ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಪಾಂಚ್: ಮಿಶೇಲ್
ಮಿಶೇಲ್ ಆನಿ ಜೆರೊಮಾಕ್ ಆಪ್ಲ್ಯಾ ವೆಂಗೆಂತ್ ಘೆತ್ಲೆಲೆಂ ಟಾಟಾ ಸಫಾರಿ ಜೀಪ್, ಸವ್ಕಾಸ್ ಲೋವರ್ ಬೆಂದೂರ್ಚಾ ತಿಸ್ರ್ಯಾ ಕ್ರಾಸಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ತೆಂ, ಮುಕಾರ್ ಧಾಂವೊನ್, ಬೆಂದೂರ್ ವೆಲ್ ಸರ್ಕಲಾರ್ ಘುಂವೊನ್, ಕಂಕ್ನಾಡಿ ರಸ್ತ್ಯಾ ವಯ್ಲ್ಯಾನ್ ಜಾವ್ನ್ ನ್ಯಾಶನಲ್ ಹೈವೇ
48 ಕ್ ದೆಂವ್ಲೆಂ. ಸದಾಂಚಾ ಪರಿಂಚ್ ಆಜ್ ಸನ್ವಾರ್ ಜಾಲ್ಲ್ಯಾನ್, ಜೆರೊಮ್, ಒಮ್ಜೂರ್ ಆಪ್ಲ್ಯಾ ತೋಟಾ ತೆವ್ಶಿಂ ವಚೊಂಕ್ ಭಾಯ್ರ್ ಸರ್ಲಲೊ. ಹ್ಯಾ ದಿಸಾಂನಿಂ ತೊಟಾಚೆಂ ಕಾಮ್ ಚಲ್ತಾಲೆಂ ಜಾಲ್ಲ್ಯಾನ್ ಕಾಮಾಗಾರಾಂಕ್ ಪಾಗ್ ದಿಂವ್ಚಿ ಗರ್ಜ್ ಆಸ್ಲ್ಲಿ. ತೊಟಾಂತ್ಲೆಂ ಕಾಯಮ್ ಕಾಮ್ ಕರ್ಚಾ ಸೆಲ್ಲಿಚಾ ಆವಯ್ಚಾ ಕುಟ್ಚಾಕ್, ದೇವಕಿಕ್ ಆನಿ ಜಾನಕಿಚಾ ಕುಟ್ಮಾಕ್ ಆಯ್ತಾರಾ ಪಾಗ್ ದಿಲ್ಯಾರ್ ಚಲ್ತಾಲೆಂ. ಪುಣ್, ಆತಾಂಚಾ ಹ್ಯಾ ಆಳಾಂಕ್ ಸನ್ವಾರಾ ಪಾಗ್ ಮೆಜುಂಕ್ ಜಾಯ್ ಆಸ್ಲ್ಲ್ಯಾನ್, ಜೆರೊಮ್, ಮಿಶೇಲಾಕ್ ಘೆವ್ನ್ ಒಮ್ಜೂರ್ ವಚೊಂಕ್ ಆಯ್ತೊ ಜಾಲ್ಲೊ.
ಕಾಲೇಜಿ ಥಾವ್ನ್ ಧನ್ಫಾರಾಂ ಘರಾ ಆಯಿಲ್ಲೆಂ ಮಿಶೇಲ್, ಧನ್ಫಾರಾಂಚಾ ಜೆವ್ಣಾರ್ ಆಜ್ಯಾನ್ ನಾತಿ ಸಾಂಗಾತಾ ತೊಟಾಕ್ ಭಾಯ್ರ್ ಸರ್ಚಾ ವಿಶಿಂ ಇಚ್ಚಾ ವ್ಯಕ್ತ್ ಕರ್ತಾನಾ ಮಿಶೇಲಾನ್ ಇನ್ಕಾರ್ ಕೆಲೆಂ ನಾ.
ಮಿಶೇಲಾಕ್, ಹಾಂಗಾ ಶ್ಹೆರಾಚಾ ಗಡ್ದೆ ಪ್ರಾಸ್, ಪಯ್ಸಿಲ್ಯಾ ತ್ಯಾ ಒಮ್ಜೂರ್ಚಾ ಪೃಥ್ವೆಚಿ ಸೊಭಾಯ್ ಚಡ್ ಪಸಂದ್ ಜಾತಾಲಿ. ಬೆಂದೂರ್ಚಾ ಭಾಗಿಂತ್ ಫುಲ್ಚಾ ಫುಲಾಕ್, ತ್ಯಾ ಗಡ್ದೆಚಾ ಮಾತಿಯೆ ಧುಳಿನ್ ನ್ಹಾಣಯ್ತಾನಾ, ಒಮ್ಜೂರಾಂತ್ ಫುಲ್ಚಾ ತ್ಯಾ ಸೊಭಿತ್ ಕಳ್ಯಾಂ ವಯ್ರ್, ಧೊವಾಚ್ಯೊ ಶೆಣೊ ತ್ಯಾ ಕಳ್ಯಾಂಕ್ ಹಾನಿಕ್ಯ್ ಚಡ್ಚ್ ಮೊವಾಳ್ ಕರ್ತಾಲ್ಯೊ.
ಸಗ್ಳ್ಯಾ ಶಾಂತ್ ಪರಿಸರಾಂತ್, ತೊಟಾ ಮಧೆಂ ಥಂಡ್ ಥಂಡ್ ಹವ್ಯಾಂತ್, ಥಂಯ್ ಹಾಂಗಾ ಉಬ್ಚಾ ತ್ಯಾ ಡೊಂಕಾಂಚಾ ಸೊಭಾಯೆಂತ್ ಆನಿ ಸಾಂಜೆಚಾ ವಗ್ತಾ, ತ್ಯಾ ವಾರ್ಯಾ ವೆಂಗೆಂತ್ ಉಭೊನ್ ಯೆಂವ್ಚಾ, ಹ್ಯಾ ಮತಿಕ್ ಪ್ರಫುಲ್ಲ್ ಕರ್ಚಾ ಫುಲಾಂಚಾ ಸುವಾಧಾಕ್ ಮಿಶೇಲ್ ಭೋವ್ ಪಸಂದ್ ಕರ್ತಾಲೆಂ. ಆಜ್ಯಾ ಸಂಗಿಂ ಒಮ್ಜೂರ್ ವೆಚೆಂ ಮ್ಹಳ್ಯಾರ್ ಹಪ್ತ್ಯಾಂತ್ ಏಕ್ ಪಾವ್ಟಿಂ ಪಿಕ್ನಿಕಾಕ್ ವೆಚಾ ಪರಿಂ ತಾಕಾ ಜಾತಾಲೆಂ.
ತೊಟಾಂತ್ ಕಾಮ್ ಕರ್ಚಿ ತಿ ಸೆಲ್ಲಿಚಿ ಆವಯ್ ಮಗ್ಗಿ ಜಾಂವ್ದಿ ಯಾ ಮೆರೆ ದೆಗೆಚೆಂ ತಣ್ ಲುಂವೊಂಕ್ ಯೆಂವ್ಚಿ ಪಾತು ಬ್ಯಾರ್ದಿ ಜಾಂವ್, ಜಲ್ಮಾ ಥಾವ್ನ್ ತಿಕ್ಕೆ ಕಾನ್ ಪಯ್ಸ್ ಆಸ್ಚೆಂ ದೇವಕಿ ಜಾಂವ್ ಯಾ ಬೆಬ್ದ್ಯಾ ಘೊವಾಕ್ ಅಜೂನ್ ಪೊಸುನ್ ಸುದಾರ್ಸುಂಚೆಂ ಜಾನಕಿ ಜಾಂವ್, ಸಗ್ಳ್ಯಾಂಕ್ ಮಿಶೇಲ್ ಮ್ಹಳ್ಯಾರ್ ಪಯ್ಲೆಂ ಥಾವ್ನ್ ಭಾರಿಚ್ಚ್ ಮೋಗ್. ತಾಚೆ ಲಾಗಿಂ ಉಲಂವ್ಚಾಂತ್, ತಾಕಾ ಹಾಸಂವ್ಚಾಂತ್, ತಾಕಾ ಖಬ್ರೊ ಸಾಂಗ್ಚಾಂತ್ ತಿಂ ಕಾಂಯ್ ಉಣಿಂ ನಾತ್ಲ್ಲಿಂ. ಮಿಶೇಲ್, ಆವಯ್ ಬಾಪಯ್ ನಾತ್ಲೆಲೆಂ ಭುರ್ಗೆಂ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ಸರ್ವಾನಿಂ ಮಿಶೇಲಾಕ್ ಲ್ಹಾನ್ ಥಾವ್ನ್ ಮೋಗ್ ದಿಲ್ಲೊಚ್ಚ್ ಚಡ್. ಸಗ್ಳ್ಯಾಂಕ್ ತಾಚಿ ಭಿರ್ಮತ್. ಸಗ್ಳ್ಯಾಂಕ್ ತಾಚಿ ಆಪುರ್ಭಾಯ್.
ತೊಟಾಂತ್ಲ್ಯಾ ಕಾಮಾಗಾರಾಂಚಿಂ ಭುರ್ಗಿಂ ತರ್ಯ್ ಮಿಶೇಲಾಚಾ ಪಿಂರ್ಗಿ ರುಪಾಕ್ ಲಾಗೊನ್ ತಾಚೆಲಾಗಿಂ ಸಳಾವಳ್ ಕರುಂಕ್ ತಿತ್ಲೆಂ ಕಾಂಯ್ ಗರ್ಜ್ ಮ್ಹಳ್ಳ್ಯಾ ಪರಿಂ ದಿಸಾನಾತ್ಲೆಲ್ಯಾ ಖಾತಿರ್ ಯಾ ಮಿಶೇಲಾಚೆಂ ನ್ಹೆಸಾಣ್, ತಾಚಿ ಚಾಲ್ ಚಮ್ಕಾಣ್, ತಾಚ್ಯಾ ತ್ಯಾ ಗೊರ್ಯಾ ಗೊರ್ಶ್ಯಾ ಕಾತಿಕ್ ಎಕಾ ಥರಾಚಿ ವಿಚಿತ್ರ್ ಸೊಭಾಯ್ ದೀವ್ನ್, ಮಿಶೇಲ್ ಆನಿ ತಾಂಚ್ಯಾ ಮಧೆಂ ಫರಕ್ ಆಸಾ ಮ್ಹಣೊನ್ ಉಗ್ತ್ಯಾನ್ ದಿಸಯ್ತಾಲಿ ಜಾಲ್ಲ್ಯಾನ್ ಖಂಯ್ಚಾಯ್ ಭುರ್ಗ್ಯಾಚಾ ಲಾಗ್ಶಿಲ್ಯಾ ಸಳಾವಳಿಂತ್ ತೆಂ ಪಡೊಂಕ್ ಸಕ್ಲೆಂ ನಾ.
ಗಾಂವ್ಚ್ಯಾ ಭುರ್ಗ್ಯಾಂಚೊ ತಾಂಚೊಚ್ ಮ್ಹಳ್ಳೊ ಏಕ್ ಸಂಸಾರ್ ಆಸ್ಲ್ಲೊ. ತ್ಯಾ ಸಂಸಾರಾಂತ್ ತಿಂ ಫಕತ್ತ್ ಎಕಾಮೆಕಾ ಸಂಗಿಂ ಹಾಸೊನ್ ಖೆಳೊನ್ ಸಂತೊಸಾನ್ ಆಸ್ತಾಲಿಂ ಶಿವಾಯ್ ಕಶೆಂ ನ್ಹೆಸ್ಚೆಂ, ಕಶೆಂ ಖಾಂವ್ಚೆಂ, ಕಶೆಂ ರಾಂವ್ಚೆಂ, ಹ್ಯಾ ವಿಶಿಂ ತಾಂಕಾ ಕಾಂಯ್ ಪಡೊನ್ ಗೆಲ್ಲ್ಯಾ ಪರಿಂ ದಿಸಾನಾತ್ಲ್ಲೆಂ. ಎಖೇಕ್ ಪಾವ್ಟಿಂ, ಎಕ್ಸುರೆಂ ಬಸೊನ್, ಮಿಶೇಲ್ ಅತೀ ಉತ್ಸುಕಾಯೆನ್ ತ್ಯಾ ಜಾನಕಿಚಾ ಭುರ್ಗ್ಯಾನಿಂ ಖೆಳ್ಚೊ ಖೆಳ್ ಪಳೆತಾಲೆಂ. ತಾಂಚೆ ಖೆಳ್ ಜಾಲ್ಯಾರ್ಯ್ ತಸಲೆಚ್ಚ್. ತೆ ಖೆಳ್ ಮಿಶೇಲಾಕ್, ತಾಚ್ಯಾ ಬೆಂದೂರಾಂತ್ ಕೆದ್ನಾಂಚ್ ದೊಳ್ಯಾಂ ನದ್ರೆಕ್ ಜಳ್ಕಾಲ್ಲೆ ನಾಂತ್. ತ್ಯಾ ಭುರ್ಗ್ಯಾಂಲಾಗಿಂ ಉಲಂವ್ಕ್ ಗೆಲ್ಯಾರ್ ಯಾ ತಾಂಚೆ ಮಧೆಂ ಆಪುಣ್ ಪ್ರವೇಶ್ ಜಾಂವ್ಕ್ ಪ್ರಯತ್ನ್ ಕೆಲ್ಯಾರ್, ತ್ಯಾ ಉತ್ಸಾಹಿಕ್ ಭುರ್ಗ್ಯಾಂಚೊ ಉತ್ಸಾಹ್ ಜಿರೊನ್ ವೆತಾಲೊ ಆನಿ ತಿಂ ಎಕೇಕ್ಲಿಂ ಎಕೇಕಾ ಕುಶಿಂನ್ ರಾವೊನ್ ಮಿಶೆಲಾಕ್ ಎಕಾ ವಿಚಿತ್ರ್ ನದ್ರೆನ್ ದೆಖ್ತಾಲಿಂ. ತ್ಯಾ ಭುರ್ಗ್ಯಾಂಚಾ ನೆಣ್ತ್ಯಾಪಣಾಕ್ ಲಾಗೊನ್, ಮಿಶೇಲ್, ತಾಂಕಾ ತಾಂಚೆ ತಿತ್ಲ್ಯಾಕ್ ಸೊಡುನ್, ಹ್ಯಾ ತಾಂಚಾ ಆವಯಾಂ ಲಾಗಿಂ ಉಲವ್ಣ್ಯಾಕ್ ದೆಂವ್ತಾಲೆಂ.
ಒಮ್ಜೂರ್ಚಾ ಪರಿಸರಾಂತ್ ಮಿಶೇಲ್ ಸಗ್ಳೆಂಚ್ ವಿಸ್ರಾತಾಲೆಂ. ಸೊಭಿತ್ ಪಾಚ್ವ್ಯಾ ಸ್ರಷ್ಟೆಂತ್, ತಾಚ್ಯಾ ಮತಿಂತ್ಲ್ಯಾ ಬಣಾಂಕ್ ತೆಂ ಸಜಯ್ತಾಲೆಂ ಆನಿ ತ್ಯಾ ಮಧೆಂಚ್ ತೆಂ ಸಪ್ಣಾಂ ಘುಂತಾಲೆಂ.
ಆಯ್ಚಾ ದಿಸಾ ಜಾಲ್ಯಾರ್ಯ್, ಆಜ್ಯಾನ್ ನಾತಿಕ್ ಒಮ್ಜೂರಾಕ್ ವಚೊಂಕ್ ಆಪ್ಣಾಕ್ ಸಾಂಗಾತ್ ದೀಂವ್ಕ್ ಆಪವ್ಣೆ ದಿತಾನಾ,
"ಆಜ್ ಜಿಮ್ಮಿ ಕಾಮಾಕ್ ಯೇಂವ್ಕ್ನಾ. ಜೀಪ್ ತುಂಚ್ ಚಲಯ್ತಾಯ್.......?" ಮಿಶೇಲಾನ್ ಆಜ್ಯಾಕ್ ಜಿಮ್ಮಿಚೊ ಉಡಾಸ್ ಕೆಲೊ.
ಜಿಮ್ಮಿ, ಜೆರೊಮಾಚಾ ಘರ್ಚೊ ಡ್ರೈವರ್. ಜೆರೊಮಾನ್ ಆತಾಂ ಜೀಪ್ ಚಲಂವ್ಚೆಂ ಉಣೆಂ ಕೆಲ್ಲೆಂ.
"ಡ್ರೈವರ್ ನಾ ಮ್ಹಣೊನ್ ಹಾವೆಂ ಘರಾ ಬಸೊಂಕ್ ಜಾತಾ? ಹಪ್ತೊಭರ್ ಗೊಳ್ಲ್ಲ್ಯಾಂಚಾ ಬಾಯ್ಲೆ ಭುರ್ಗ್ಯಾಂಚಾ ತೊಂಡಾರ್, ಕಾಂಯ್ ಹಾಸೊ ಉದೆಂವ್ಕ್ ಜಾಯ್ ಜಾಲ್ಯಾರ್ ತ್ಯೊ ಆಯ್ಚಾ ದಿಸಾ! ತ್ಯಾ ವಯ್ಲ್ಯಾನ್ ಫಾಲ್ಯಾಂ ಆಯ್ತಾರ್! ಜಿಮ್ಮಿಕ್ ಸೊಡ್....! ತಾಕಾ ಹಾವೆಂ ಸಾಂಗ್ಲೆಲೆಂ ಧನ್ಫಾರಾಂ ಉಪ್ರಾಂತ್ ಜಾಲ್ಯಾರ್ಯ್ ವ್ಹಡ್ ನಾ, ಯೇಂವ್ಕ್ ಜಾತಾ ಜಾಲ್ಯಾರ್ ಯೇಂವ್ಕ್ ಪಳೆರೆ ಮ್ಹಣೊನ್. ಪಳೆಯಾಂ..... ಆಯ್ಲ್ಯಾರ್ ಆಯ್ಲೊ ತೊ.....!"
"ತುವೆಂ ಜೀಪ್ ಚಲಂವ್ಕ್ ಶಿಕೊಂಕ್ ಜಾಯ್ ಮಿಶೇಲ್!" ಎದೊಳ್ ವೊಗಿ ಬಸೊನ್ ಆಸ್ಲೆಲಿ ಎಸ್ತೆಲ್ ಮಧೆಂಚ್ ಉಲಯ್ಲಿ.
"ಹಾವೆಂ?" ಆಜಿಯೆಚಾ ಕುಶಿಂನ್ ಘುಂವೊನ್ ಪಳೆಲ್ಲ್ಯಾ ಮಿಶೆಲಾಚಾ ಮತಿಚಾ ಪರ್ದ್ಯಾರ್, ಅಚಾನಕ್, ಏಕ್ ಭಯಂಕರ್ ಆಕ್ಸಿಡೆಂಟ್ ಘಡೊನ್ ಗೆಲ್ಲ್ಯಾ ಪರಿಂ ಜಾಲೆಂ. ತಾಚೆ ಪಾಟ್ಲ್ಯಾನ್ ಆಪ್ಲ್ಯಾ ಆವಯ್ ಬಾಪಾಯ್ಚಿ ಕಿಂಕ್ರಾಟ್ ತಾಚ್ಯಾ ಕಾನಾಂತ್ ಬೋಬ್ ಮಾರ್ತಾ ತಶಿ ಜಾಲಿ. ಎಕಾಚ್ ಘಡಿಯೆ ಭಿತರ್ ಮಿಶೇಲ್ ಭಿಯಾನ್ ಆಂಕುಡ್ಲೆಂ. ತಾಚೊ ಸಗ್ಳೊ ಸಂಸಾರ್ಚ್ ಬದ್ಲುನ್ ಸೊಡ್ಲೆಲ್ಯಾ ತ್ಯಾ ಆಕಿಡೆಂಟಾಚೊ ಆವಾಜ್ ತಾಚ್ಯಾ ಶಿರಾಂ ಶಿರಾಂನಿ ಜಗ್ಲಾಣ್ಯಾ ಪರಿಂ ವ್ಹಾಳೊನ್ ಗೆಲೊ.
ಎಕಾಚ್ಚ್ ಫರಾ ಬದ್ಲಾಲ್ಲ್ಯಾ ಆಪ್ಲ್ಯಾ ನಾತಿಕ್ ಪಳವ್ನ್ ಎಸ್ತೆಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಿ ನಾತಿಕ್ಚ್ ಪಳಂವ್ಚಾರ್ ಪಡ್ಲಿ.
"ನಾ ಮಾಂಯ್..... ಮ್ಹಾಕಾ ಡ್ರೈವಿಂಗ್ ನಾಕಾ!"
ಥೊಡೊ ವೇಳ್ ಮೌನ್ ಬಸ್ಲೆಲೆಂ ಮಿಶೇಲ್ ಆಪ್ಣಾಕ್ಚ್ ಸಾಂಬಾಳುಂಕ್ ಸಕ್ಲೆಂ.
"ಕಿತ್ಯಾಕ್? ......ಕಿತ್ಯಾಕ್ ನಾಕಾ?" ಜೆರೊಮಾನ್ ವಿಚಾರ್ಲೆಂ.
"ತುಮಿಂ ಜಾಣಾಂತ್...... ಮ್ಹಾಕಾ ಜಾಂವ್ಚೆಂ ನಾ ತೆಂ!"
"ಕಿತ್ಯಾಕ್ ಮಿಶೇಲ್? ..........ತುಕಾ ಭಿರಾಂತ್ ದಿಸ್ತಾ?" ನಾತಿಕ್ ಪಾರ್ಕಿಲೆಂ ಆಜ್ಯಾನ್. "ಭಿಂಯೆವ್ನ್ ಬಸ್ಲ್ಯಾರ್ ಕಾಂಯ್ ಜಾಯ್ನಾ ಪುತಾ.....! ತುಂ ಚಲೊಂಕ್ ಶಿಕ್ತಾನಾ ಕಿತ್ಲೆ ಪಾವ್ಟಿಂ ಪಡ್ಲಾಂಯ್ ತೆಂ ತುಂ ಜಾಣಾಂಯ್? ತ್ಯಾ ದೀಸ್ ತುಂ ಭಿಯೆಲ್ಲೆಂಯ್ ಜಾಲ್ಯಾರ್ ಆಜ್ ಚಲೊಂಕ್ ಪಾವ್ತೆನಾಂಯ್!" ಜೆರೊಮಾನ್ ನಾತಿಕ್ ಸಮ್ಜಾಯ್ಲೆಂ.
"ತಶೆಂ ನ್ಹಯ್ ಆಬಾ....!" ಮಿಶೇಲಾಚಾ ನಿರಾಕರಣಾಂತ್ ಕಸಲೊಗೀ ನಿರ್ಧಾರ್ ಆಸ್ಲ್ಲೊ. "......ಫಾಲ್ಯಾಂ ಕೊಣ್ಯ್ ಮ್ಹಜೆ ವರ್ವಿಂ ಹಾಂವ್ ಜಾಲ್ಲ್ಯಾ ಪರಿಂ ಆನಾಥ್ ಜಾಂವ್ಕ್ ನುಜೊ!"
"ಮ್ಹಳ್ಯಾರ್......., ತುಂ ಆತಾಂ ಆನಾಥ್?"
"ತಶೆಂ ನ್ಹಯ್ ಮಾಂಯ್!"
"ಮಾಗಿರ್ ಕಶೆಂ ಮಿಶೇಲ್?" ಎಸ್ತೆಲಾಚಾ ತೊಂಡಾರ್ ಆತಾಂ ರಾಗ್ ಉದೆಲೊ. "..... ತುಕಾ ಹಾಚ್ಯಾ ಪಯ್ಲೆಂ ಮಸ್ತ್ ಪಾವ್ಟಿಂ ಹಾವೆಂ ಸಮ್ಜಾಯ್ಲಾಂ. ಜಿವಿತಾಂತ್ ಸಂಪೊನ್ ಗೆಲ್ಲ್ಯಾ ದಿಸಾಂಕ್, ಜಿವಿತಾಚಾ ಯೆಂವ್ಚಾ ದಿಸಾಂ ಸಾಂಗಾತಾ ಸಂಭಂಧ್ ಜೊಡ್ಚೆಂ ನಿಜಾಯ್ಕ್ ಪಿಶೆಂಪಣ್. ಫಾಲ್ಯಾಂಚೆಂ ಕಿತೆಂ ಜಾತೆಲೆಂ ತೆಂ ಕೊಣ್ಚ್ ನೆಣಾಂ. ಆಶೆಂ ಆಸ್ತಾನಾ....."
"ತಿಂ ಮ್ಹಜಿಂ ಆವಯ್ ಬಾಪಯ್ ಜಾವ್ನ್ ಆಸ್ಲ್ಲಿಂ!"
"ತುಕಾ ಆವಯ್ ಬಾಪಯ್ ಜಾಂವ್ಚಾ ಪಯ್ಲೆಂ ತಿಂ ಆಮ್ಚಿಂ ಭುರ್ಗಿಂ ಜಾವ್ನಾಸ್ಲ್ಲಿಂ!"
"ತೆದ್ನಾ ಹಾಂವ್ ನೆಣ್ತೆಂ ಆಸ್ಲ್ಲೆಂ ಆನಿ ಮ್ಹಾಕಾ ತಾಂಚಿ ಗರ್ಜ್ ಆಸ್ಲ್ಲಿ!"
"ಆಮ್ಕಾಂಯ್ ಆಮ್ಚಾ ಭುರ್ಗ್ಯಾಂಚಿ ಗರ್ಜ್ ಆಸ್ಲೆಲಿ ಮಿಶೇಲ್!"
ಆಜಿಯೆಚಾ ಜವಾಬೆ ಮುಕಾರ್ ಆತಾಂ ಮಿಶೇಲ್ ಥಂಡ್ ಜಾಲೆಂ. ತೆಂ ಮೌನ್ ಜಾಲೆಂ.
"ಪಳೆ ಪುತಾ....!" ತಿಚ್ಚ್ ಉಲಯ್ಲಿ. "......ಜಿವಿತಾಕ್ ಭಿಯೆವ್ನ್ ರಾಂವ್ಚೆಂ ಆನಿ ಜಿವಾಕ್ ಪೊಸ್ಚೆಂ ನಿಜಾಯ್ಕ್ಯ್ ವ್ಯರ್ಥ್. ದೊನ್ಯ್ ಕೆದ್ನಾಂ ಮನ್ಶ್ಯಾಚೊ ಸಾಂಗಾತ್ ಸೊಡ್ತಾತ್ ತೆಂ ಸಾಂಗೊಂಕ್ ಸಾದ್ಯ್ ನಾ. ಆಶೆಂ ಆಸ್ತಾನಾ......, ಜಿವಿತ್ ಆಸ್ತಾ ವರೇಗ್ ಧಯ್ರಾನ್ ಜಿವಿತ್ ಸಾರುಂಕ್ ಶಿಕೊಂಕ್ ಜಾಯ್!"
ಆತಾಂಯ್ ಮಿಶೇಲ್ ಆಪ್ಲ್ಯಾ ಆಜಿಯೆಕ್ ಆಯ್ಕಾಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
"ಉಡಾಸ್ ಮನ್ಶ್ಯಾ ಜಿವಿತಾಕ್ ಸೊಭಿತ್ ರಿತಿನ್ ಜಿಯೆಂವ್ಕ್ ಕುಮಕ್ ಕರ್ತಾ. ದೆಕುನ್ ಉಡಾಸ್ ಮನ್ಶ್ಯಾಕ್ ಖಂಡಿತ್ ಜಾಯ್. ಪುಣ್ ಹ್ಯಾ ಉಡಾಸಾ ಥಾವ್ನ್ ಮನ್ಶ್ಯಾನ್ ಭಿವ್ಕುರೊ ಯಾ ಲಾಚಾರ್ ಜಾಂವ್ಕ್ ನುಜೊ. ಆಶೆಂ ಜಾಲ್ಯಾರ್ ಮನ್ಶ್ಯಾ ಜಿವಿತ್ ಫಕತ್ತ್ ಚಿಂತ್ನಾಂಚಾ ಗೊಂದೊಳಾಂತ್ ಶಿರ್ಕೊನ್ ದುಖಾ ಭರಿತ್ ಜಾತಾ. ದೆಕುನ್ ಉಡಾಸ್ ದವರ್ ಮಿಶೇಲ್......! ಆಜ್ ತುಂ ಕಿತೆಂ ಕರ್ತಾಯ್ ತೆಂ ಸಗ್ಳೆಂ ತುಜ್ಯಾ ಕಾಲ್ಚಾ ಜಿವಿತಾಚಾ ಪ್ರಭಾವಾನ್. ಆನಿ ಫಾಲ್ಯಾಂ ತುಜೆಂ ಕಿತೆಂ ಜಾತೆಲೆಂ ತೆಂ ತುಜೆಂ ಆಯ್ಚೆಂ ವ್ಯಕ್ತಿತ್ವ್ ವ್ಯಕ್ತ್ ಕರ್ತಾ!"
ಎಸ್ತೆಲಾನ್ ಆಪ್ಲ್ಯಾ ನಾತಿಕ್ ಸಮ್ಜೊಣೆಚೆಂ ಲಿಸಾಂವ್ ದಿಲೆಂ.
"ಆತಾಂ ಹಾವೆಂ ಜೀಪ್ ಚಲಂವ್ಕ್ ಶಿಕೊಂಕ್ ಜಾಯ್! ತಿತ್ಲೆಂಚ್........?" ಜೆರೊಮಾಚಾ ತೊಂಡಾಕ್ ಪಳೆಲ್ಲೆಂ ಮಿಶೇಲ್, ಆತಾಂ ಆಜಿಯೆಕ್ ಪಳೆವ್ನ್, "ಥೊಡೆ ದೀಸ್ ವಚೊಂದಿತ್.......!, ಹಾಂವ್ ಖಂಡಿತ್ ಶಿಕ್ತಾಂ....!" ಮಿಶೇಲಾನ್ ಸಾಂಗ್ತಾನಾ ಸಮಧಾನ್ ಜಾಲ್ಲ್ಯಾ ಜೆರೊಮಾನ್ ಆನಿ ಎಸ್ತೆಲಾನ್ ಜೆವ್ಣಾಚೆರ್ ಧ್ಯಾನ್ ದಿಲೆಂ. ತಾಂಚೆ ಸವೆಂ ಮಿಶೇಲ್ ಜೇಂವ್ಕ್ ಲಾಗ್ಲೆಂ.
ಜೆವಾಣ್ ಜಾವ್ನ್ ಅರ್ಧೆಂ ವೋರ್ ಥೊಡೊ ವಿಶೆವ್ ಘೆತ್ಲ್ಲೊ ಜೆರೊಮ್, ಒಮ್ಜೂರ್ ವೆಚ್ಯಾಕ್ ನ್ಹೆಸೊಂಕ್ ಲಾಗ್ಲೊ.
ಜಿಮ್ಮಿ ಯೆಂವ್ಚೊ ಆಸ್ಲ್ಲೊ ಜಾಲ್ಯಾರ್ ಯೆದೊಳ್ ತೊ ಯೆತೊ......, ಹ್ಯಾ ಉಪ್ರಾಂತ್ ತಾಚೆಂ ಧಯ್ರ್ ನಾ. ತಾಕಾ ರಾಕೊನ್ ರಾವೊನ್ ಕಾಂಯ್ ಫಾಯ್ದೊ ನಾ. ಮತಿಂತ್ಚ್ ಚಿಂತ್ಲಲೊ ಜೆರೊಮ್, ವಸ್ತುರ್ ನ್ಹೆಸೊನ್ ಭಾಯ್ರ್ ಸೊಪ್ಯಾರ್ ಪಾವ್ತಾನಾ, ಅಜೂನ್ ಮಿಶೇಲ್, ಭಾಯ್ಲ್ಯಾ ಸೊಪ್ಯಾ ವಯ್ಲ್ಯಾ ಸೊಫಾಚೆರ್ ಬಸೊನ್, ಆಪ್ಣೆ ಹಾಡ್ಲೆಲ್ಯಾ ನವ್ಯಾಚ್ ಸೆಲ್ಫೋನಾ ವಯ್ರ್ ಬೊಟಾಂ ಚರಯ್ತಾ ತೆಂ ಪಳವ್ನ್,
"ಮಿಶೇಲ್.....? ಚಲ್ ಪುತಾ ನ್ಹೆಸ್. ವೆಗ್ಗಿಂ.....!, ವೇಳ್ ಜಾತಾ ಮ್ಹಾಕಾ. ಕಾಳೊಕ್ ಜಾಂವ್ಚಾ ಪಯ್ಲೆಂ ಆಮ್ಕಾಂ ಪಾಟಿಂ ಪಾವೊಂಕ್ ಜಾಯ್!"
ಆಜ್ಯಾಚೆಂ ಫರ್ಮಾಣ್ ಆಯ್ಕೊನ್, ಉಟೊನ್ ಭಿತರ್ ಗೆಲ್ಲ್ಯಾ ಮಿಶೇಲಾಕ್ ನ್ಹೆಸೊನ್ ಭಾಯ್ರ್ ಯೇಂವ್ಕ್ ಚಡ್ ಕಾಂಯ್ ವೇಳ್ ಲಾಗ್ಲೊ ನಾ. ತಾಚೆಂ ಸಾದೆಂ ನ್ಹೆಸಾಪ್. ಕುಡಿಕ್ ಚಡ್ ಶ್ರಂಗಾರಾಂವ್ಕ್ ತೆಂ ಖುಶಿ ವರಿನಾತ್ಲ್ಲೆಂ.
ಭಿತರ್ಲ್ಯಾ ನಿದ್ಚಾ ಕುಡಾಂತ್ ಆಡ್ ಪಡ್ಲೆಲ್ಯಾ ಆಜಿಯೆಕ್ ಸಾಂಗೊನ್ ತೆಂ ಜಿಪಾರ್ ಬಸ್ತಾನಾ ಯೆದೊಳ್ಚ್ ಜೆರೊಮಾನ್ ಜೀಪ್ ಚಾಲು ಕೆಲ್ಲೆಂ.
ಜೆರೊಮಾಕ್ ಪಯ್ಲೆಂಚಾ ತಿತ್ಲಿ ದೀಷ್ಟ್ ಆನಿ ಸಕತ್ ನಾತ್ಲೆಲಿ ಜಾಲ್ಯಾರ್ಯ್ ಡ್ರೈವಿಂಗಾಂತ್ ತೊ ಹುಶಾರ್ ಆಸ್ಲ್ಲೊ. ಮಿಶೇಲ್ ತಾಚ್ಯಾ ಜಿವಿತಾಂತ್, ತಾಚೆಂ ಜಿವಿತ್ ಜಿಯೆಂವ್ಕ್ ಏಕ್ ಭರ್ವಸೊ ಜಾವ್ನ್ ಆಯ್ಲ್ಯಾ ಉಪ್ರಾಂತ್, ಮತಿಚಾ ಸಮಧಾನೆ ವರ್ವಿಂ ಜೆರೊಮಾನ್ ಆಪ್ಲ್ಯಾ ಪಿಡೆ ವಯ್ರ್ ಥೊಡೆಂ ಜಯ್ತ್ ಜೊಡ್ಲೆಲೆಂ.
ಮುಕ್ಕಾಲ್ ವೊರಾಂಚಾ ವಾಟೆಕ್ ಸಾರುನ್, ಜೆರೊಮಾಚೆಂ ಜೀಪ್, ಆತಾಂ ಒಮ್ಜೂರ್ಚಾ ತಾಚ್ಯಾ ತೊಟಾಕ್ ಪಾವ್ಲೆಂ. ಹರ್ಶೆಂಚಾ ಪರಿಂಚ್ ಜೀಪ್ ಆಪ್ಲ್ಯಾ ತೊಟಾಂತ್ಲ್ಯಾ ಘರಾಚಾ ಜಾಲಾಂತ್ ರಾವವ್ನ್, ಜೀಪಾರ್ ಥಾವ್ನ್ ಸಕಯ್ಲ್ ದೆಂವ್ಲ್ಲಿಂ ದೊಗಾಂಯ್ ಜಾಲಾ ಮುಕ್ಲ್ಯಾ ಕೊಡ್ಶ್ಯಾರ್ ಥಾವ್ನ್ ಸಕಯ್ಲ್ ದೆಂವೊಂಕ್ ಕೆಲ್ಲ್ಯಾ ಮೆಟಾಂಕ್ ದೆಂವೊನ್ ಮಾಡಿಯೆ ತೊಟಾಕ್ ಪಾವ್ಲಿಂ.
ತೊಟಾಂತ್ ಚಲ್ತಾಂ ಚಲ್ತಾಂ, ಜೆರೊಮಾನ್ ತಶೆಂಚ್ ಆಪ್ಲಿ ತಕ್ಲಿ ಉಭಾರುನ್ ತೊಟಾಂತ್ಲ್ಯಾ ಸಗ್ಳ್ಯಾ ಮಾಡಿಯಾಂ ವಯ್ರ್ ದೀಷ್ಟ್ ವೆಲಿ. ಥೋಡ್ಯಾ ಮಾಡಿಯಾಂಚಿಂ ಪೊಪ್ಳಾಂ ಪಿಕೊನ್ ತಾಂಬ್ಡಿಂ ಜಾಲ್ಲಿಂ. ಥೊಡ್ಯಾಂನಿಂ ಮಧೆಂ ಮಧೆಂ ತರ್ನಿಂ ದಿಸೊನ್ ಯೆತಾಲಿಂ.
"ಹೊ ಶೀನ ಕಾಮಾಕ್ ಯೇಂವ್ಕ್ ನಾಂ ಕಿತೆಂ......? ಪೊಪ್ಳಾಂ ತಶಿಂಚ್ ಆಸಾತ್....!"
ಆಪ್ಣಾ ತಿತ್ಲ್ಯಾಕ್ ಸಾಂಗೊನ್ ಮಿಶೇಲಾಕ್ ಪಳೆಲ್ಲ್ಯಾ ಜೆರೊಮಾಕ್, ಮಿಶೇಲ್, ಏಕಾ ಮಾಡಿಯೆಚಾ ಪೊಪ್ಳಾಂಕ್ ಪಳವ್ನ್ ಸ್ತಬ್ದ್ ಜಾಲ್ಲೆಂ ದಿಸ್ತಾನಾ, ಆಪ್ಲೆಂ ನಾತ್ ಫುಡಾರಾಚೆಂ ಹ್ಯಾ ತೊಟಾಚೆಂ ಯೆಜ್ಮಾಣ್! ತೊಟಾಚಾ ವಿಶಯಾಂತ್ ತಾಣೆಂ ಘೆಂವ್ಚಾ ಆಸಕ್ತೆಂತ್ ತಾಚ್ಯಾ ಫುಡಾರಾಚೊ ಭರ್ವಸೊ ಜೆರೊಮಾನ್ ಪಳೆಲ್ಲೊ.
"ಅಬಾ.....?"
".........?" ಕಿತೆಂ ಮ್ಹಳ್ಳ್ಯಾ ನದ್ರೆನ್ ಜೆರೊಮಾನ್ ಮಿಶೇಲಾಕ್ ಪಳೆಲೆಂ.
"ಹಾಚಿಂ ಪೊಪ್ಳಾಂ ಕಿತ್ಯಾಕ್ ಪುಟೊನ್ ಜಡ್ಲ್ಯಾಂತ್?" ಆಪ್ಣೆ ದೀಷ್ಟ್ ಉಭಾರುನ್ ಪಳಂವ್ಚಾ ಮಾಡಿಯೆ ವಯ್ಲಿ ದೀಷ್ಟ್ ಪಾಟಿಂ ಕಾಡಿನಾಸ್ತಾನಾ ಮಿಶೇಲಾನ್ ವಿಚಾರ್ಲೆಂ.
"ತಾಕಾ ರೋಗ್ ಲಾಗ್ಲಾ ಪುತಾ! ಶೀನಾ ಲಾಗಿಂ ಸಾಂಗೊಕ್ ಮ್ಹಾಕಾ ಉಡಾಸ್ ಕರ್ ಹಾಂ....! ಚಲ್ ಯೇ...!"
ಜೆರೊಮ್ ಸಾಂಗೊನ್ ಮುಕಾರ್ ಚಲ್ಲೊ. ಮಿಶೇಲ್ ಆತಾಂ ಆಜ್ಯಾ ಸಂಗಿಂ ತೊಟಾಚೆಂ ವೀಕ್ಷಣ್ ಕರಿತ್ತ್, ತೆಂ ಮಾಡಿಯೆಚೆಂ ತೋಟ್ ಉತ್ರೊನ್ ಮುಕ್ಲ್ಯಾ ಶೆತಾಂಚಾ ಮದ್ಲ್ಯಾ ಮೆರೆರ್ ತಿಂ ಚಲೊಂಕ್ ಲಾಗ್ಲಿಂ.
ಜೆರೊಮ್ ಆನಿ ಮಿಶೇಲ್ ಶೆತಾಚಾ ಮೆರೆರ್ ಚಲ್ತಾನಾ, ಆಜೊ ಆನಿ ನಾತ್ ಕರುನ್ ತೊಟಾಕ್ ದೆಂವ್ಲ್ಯಾಂತ್ ಮ್ಹಳ್ಳೆಂ ತೆಂ ಚ್ಯಾರ್ ಕುಶಿಂನ್ ಆಸ್ಚಾ ಗಾಂವ್ಚಾಂಕ್ ದಿಸೊನ್ ಯೆತಾಲೆಂ. ಹೆಂ ಜೆರೊಮಚಾ ಸಗ್ಳ್ಯಾ ಕಾಮಾಗಾರಾಂಕ್ ಜಾಗ್ರುತ್ ಕರ್ತಾಲೆಂ.
ತಶೆಂಚ್ ಆಜ್!
ತೆನ್ಕಾಚಾ ಬೆಟಾ ವಯ್ಲ್ಯಾ ಮಗ್ಗಿಚಾ ಘರಾಚಾ ಜಾಲಾಂತ್ ಖೆಳೊನ್ ಆಸ್ಲೆಲ್ಯಾ ಮಗ್ಗಿಚಾ ವ್ಹಡ್ಲ್ಯಾ ಪುತಾಚಾ, ವಿಲ್ಫಿಚಾ ಭುರ್ಗ್ಯಾಂಕ್, ಮಿಶೇಲ್ ಆನಿ ಜೆರೊಮ್ ಶೆತಾ ಮೆರೆ ವಯ್ಲ್ಯಾನ್ ಚಲೊನ್ ಯೆಂವ್ಚಿಂ ತಿಂ ದಿಸ್ತಾನಾ, ಕಿತೆಂಗೀ ತಾಂಕಾ ಜಾಯ್ ಜಾಲ್ಲೆಂ ಮೆಳ್ಳೆಂ ಮ್ಹಳ್ಳ್ಯಾ ಪರಿಂ ತಾಂಚೊ ಖೆಳ್ ಸೊಡುನ್ ತಿಂ ಘರಾ ಭಿತರ್ ದಾಂವ್ಲಿಂ. ಥೊಡ್ಯಾ ವೆಳಾನ್ ತಿಂ ಭಾಯ್ರ್ ಯೆತಾನಾ ತಾಂಚೆಂ ಸಂಗಿಂ ವಿಲ್ಫಿಚೊ ನಿಮಾಣೊ ಭಾವ್ ಆಲ್ವಿನ್ ಭಾಯ್ರ್ ಆಯ್ಲೊ. ಘರ್ಚಾ ದಾರ್ವಾಟ್ಯಾರ್ಚ್ ರಾವೊನ್, ಪಯ್ಸ್ ಥಾವ್ನ್ ಚಲೊನ್ ಯೆಂವ್ಚಾ ಮಿಶೇಲ್ ಆನಿ ಜೆರೊಮಾಕ್ ಪಳವ್ನ್, ತೊ ಪರ್ತ್ಯಾಕ್ ಘರಾ ಭಿತರ್ ಗೆಲೊ. ಪುಣ್ ಭುರ್ಗಿಂ ಮಾತ್ರ್ ಹ್ಯಾ ದೊಗಾಂಯ್ಕ್ಯ್ ಪಳಂವ್ಚಾರ್ ಪಡ್ಲೆಲಿಂ.
ಮುಕ್ಲ್ಯಾ ಶೆತಾಂತ್ ಕೊಳ್ಕ್ಯಾಕ್ ವೊಂಪ್ಲ್ಲೆಂ ಮಾತ್ರ್. ಪಾತಳ್ ಕಿರ್ಲೊನ್ ಯೆಂವ್ಚೆಂ ಬಾತ್ ಭರ್ಲೆಲ್ಯಾ ಉದ್ಕಾ ಮದ್ಲ್ಯಾನ್ ಜೀವ್ ಘೆತಾಲೆಂ. ದೆಗೆಚಾ ಭಾರೀಕ್ ವ್ಹಳಾಂತ್ಲ್ಯಾನ್ ವಯ್ಲ್ಯಾ ಭೊಟಾಂಚಾ ಭಣಾ ಕಡ್ಚಾ ತಳ್ಯಾಂತ್ಲೆಂ ಉದಾಕ್ ಪಂಪಾ ಮುಕಾಂತ್ರ್ವಯ್ರ್ ಉಡಯಿಲ್ಲೆಂ ತೆಂ, ಸವ್ಕಾಸ್ ವ್ಹಾಳೊನ್ ಶೆತಾಕ್ ದೆಂವ್ತಾಲೆಂ. ವಯ್ಲ್ಯಾ ಶೆತಾನಿಂ ಪಿಕ್ಲೆಲೆಂ ಬಾತ್ ಥಂಯ್ ಹಾಂಗಾ ವಾರ್ಯಾಕ್ ಲಾಗೊನ್ ಆಡ್ ಪಡ್ಲೆಲೆಂ. ತೆಂ ಲುವ್ಣೆಕ್ ಲಾಗಿಂ ಪಾವ್ಲ್ಲೆಂ.
ಕೊಳ್ಕ್ಯಾಚಾ ಶೆತಾಂ ವಯ್ಲ್ಯಾ ಬೆಟಾಕ್ ಉತ್ರಾಲ್ಯಾರ್, ಉಪ್ರಾಂತ್ ದಿಸ್ಚೆಂ ಸಗ್ಳೆಂ ಮಾಡಿಯಾಂಚೆಂ ತೋಟ್. ಹ್ಯಾಚ್ ತೊಟಾಚಾ ಮುಳಾಕ್ ಈಟ್ ಘಾಲ್ಚೆಂ ಕಾಮ್ ಚಲ್ತಾಲೆಂ. ತೊಟಾಚಾ ದೆಗೆಂತ್ಲ್ಯಾನ್ ಆಸ್ಲಲೊ ಪಾವ್ಸಾಚೆಂ ಉದಾಕ್ ವ್ಹಾಳೊನ್ ವೆಚೊ ರೂಂದ್ ವ್ಹಳ್. ಪಾವ್ಸಾಂತ್ ಸಗ್ಳಾ ಗಾಂವ್ಚೆಂ ಉದಾಕ್ ಹ್ಯಾ ವ್ಹಳಾ ಮುಕಾಂತ್ರ್ ವ್ಹಾಳೊನ್ ವೆತಾ ಜಾಲ್ಲ್ಯಾನ್, ಪಾವ್ಸಾಂತ್ ತೊ ವ್ಹಾಳ್ ತೋಂಡ್ ಭರ್ ಭರೊನ್ ವ್ಹಾಳ್ತಾ. ಕೆದ್ನಾಂ ಕೆದ್ನಾಂ ಅಲ್ತೊಡಿ ಆನಿ ಪಲ್ತೊಡಿಚಾ ಶೆತಾಂಕ್ ಆನಿ ತೊಟಾಕ್ ಸಮಾಸಮ್ ಕರ್ತಾ. ವಯ್ಲ್ಯಾ ತ್ಯಾ ದಿವ್ರಾಂಚಾ ಘರಾ ಸಮ್ಕಾರ್ ಘುಂವೊನ್ ಯೆಂವ್ಚಾ ವ್ಹಳಾಕ್ ಹಾಂಗಾಸರ್ ಜೆರೊಮಾಚಾ ತೊಟಾಕ್ ಪಾಂವ್ಚಾ ವೆಳಾರ್, ತಾಚ್ಯಾಪಾಟ್ಲ್ಯಾನ್ ಉದ್ಕಾಚೊ ಲೋಟ್ ಚಡ್ ಮಾರ್ತಾಲೊ ಜಾಲ್ಲ್ಯಾನ್, ತ್ಯಾ ತಾಚ್ಯಾ ಲೊಟಾಕ್ ಲಾಗೊನ್ ಹ್ಯಾ ಕೊಡ್ಶ್ಯಾಕ್ ಮಾರ್ಚೆಂ ಉದಾಕ್, ಸವ್ಕಾಸ್ ಹ್ಯಾ ಕೊಡ್ಶ್ಯಾಕ್ ಖಾವ್ನ್ವೆತಾಲೆಂ. ವ್ಹಳಾಕ್ ಬಾಂದ್ಲೆಲೆ ಕಾಳೆ ಫಾತೊರ್ ಕೊಸ್ಳೊನ್ ಪಡ್ತಾಲೆ. ಆದ್ಲ್ಯಾ ಪಾವ್ಸಾಕ್ ಹ್ಯಾ ವ್ಹಳ್ಯಾಚೊ ಏಕ್ ಕೊನ್ಸೊ ಕೊಸ್ಳೊನ್ ಪಡ್ಲಲೊ. ಹ್ಯಾ ಪಾವ್ಟಿಂ ಪಾವ್ಸ್ ಪಡ್ಚ್ಯಾ ಪಯ್ಲೆಂ ಹ್ಯಾ ಕೊನ್ಶ್ಯಾಕ್ ಫಾತರ್ ಬಾಂದಂವ್ಕ್ ಜಾಯ್. ನಾ ತರ್?
"ಪಾವ್ಸ್ ಪಡ್ಚಾ ಪಯ್ಲೆಂ ಹೆಂ ಕಾಮ್ ಜಾಂವ್ಕ್ ಜಾಯ್ ಆಸ್ಲ್ಲೆಂ! ಕೊಣಾಕ್ ತಾಂಕ್ತಾ ಪುತಾ.....?"
ಉದಾಕ್ ನಾಸ್ತಾನಾ ಸೊಭ್ಚಾ ಗೊಡ್ಡು ವ್ಹಳಾಂತ್ ಜೆರೊಮಾನ್ ಆಪ್ಲಿ ದೀಷ್ಟ್ ಭೊಂವ್ಡಾಯ್ಲಿ. ವ್ಹಳ್ ಸುಕೊನ್ ಘೆಲ್ಲೊ. ವ್ಹಳಾಕ್ ಜೀವ್ ಭರುಂಕ್ ಜಾಯ್ ಜಾಲ್ಯಾರ್ ಪಾವ್ಚ್ ಯೇಂವ್ಕ್ ಜಾಯ್. ತ್ಯಾ ಪರ್ಯಾಂತ್ ಹೊ ವ್ಹಳ್ ಮೊರೊನ್ ಗೆಲ್ಲ್ಯಾ ದಿವ್ಡಾ ಪರಿಂ.
ಆಜ್ಯಾ ಸವೆಂ ಆಪುಣ್ ತೊಟಾಚೆಂ ವೀಕ್ಷಣ್ ಕರುನ್ ಮುಕಾರ್ ಚಲ್ತಾನಾ, ಆಚಾನಕ್ ಆಯ್ಕೊನ್ ಆಯ್ಲೆಲ್ಯಾ ಭುರ್ಗ್ಯಾಂಚಾ ಹಾಸ್ಯಾಂಕ್ ಆಯ್ಕೊನ್ ಮುಕಾರ್ ಚಲ್ಚೆಂ ಮಿಶೇಲ್ ಎಕಾ ಖಿಣಾಕ್ ಥಾಂಬೊನ್ ಪಾಟಿಂ ಘುಂವ್ಲೆಂ.
ಪಾಟ್ಲ್ಯಾನ್ ಮಸ್ತ್ ಪಾಟಿಂ ಆಪ್ಣಾಚೊ ಪಾಟ್ಲಾವ್ ಕರುನ್ ಯೆಂವ್ಚಾ ದೊಗಾಂ ಭುರ್ಗ್ಯಾಂಕ್ ವಳ್ಕಾನಾಸ್ತಾನಾ ಗೆಲೆಂ ನಾ ತೆಂ.
ಲಾಯ್ಡ್ ಆನಿ ಲವೀನಾ! ವಿಲ್ಫಿಚಿಂ ಭುರ್ಗಿಂ ತಿಂ. ಲವೀನಾ ಮಾಲ್ಗಡೆಂ ಚೆಡುಂ ಭುರ್ಗೆಂ ಜಾಲ್ಯಾರ್ ಲಾಯ್ಡ್ ದುಸ್ರೊ ಚೆರ್ಕೊ ಭುರ್ಗೊ.
ಆಪ್ಲ್ಯಾ ಘರಾ ಥಾವ್ನ್ ಇತ್ಲ್ಯಾ ಪಯ್ಸ್ ಚಲೊನ್ ಆಯಿಲ್ಲಿಂ ಭುರ್ಗಿಂ ಆಪ್ಣಾಚೊಚ್ ಪಾಟ್ಲಾವ್ ಕರ್ತಾತ್ ಮ್ಹಳ್ಳೆಂ ಮಿಶೇಲ್ ಜಾಣಾಂ ಜಾಲೆಂ.
"ಅಬಾ....., ತುಂ ವಚ್. ತಿಂ ವಿಲ್ಫಿಚಿಂ ಭುರ್ಗಿಂ ಯೆತಾತ್ ದಿಸ್ತಾ. ಹಾಂವ್ ತಾಂಚೆ ಸಾಂಗಾತಾ ಯೆತಾಂ....!"
ನಾತಿನ್ ಸಾಂಗ್ಲೆಂಲೆಂ ಆಯ್ಕೊನ್ ಜೆರೊಮ್ ಮುಕಾರ್ ಚಲ್ಲೊ.
ಚಲೊನ್ ಆಸ್ಲೆಲೆಂ ಮಿಶೇಲ್ ರಾವ್ಲೆಲೆಂ ಪಳವ್ನ್ ವಿಲ್ಫಿಚಿಂ ಭುರ್ಗಿಂಯ್ ರಾವ್ಲಿಂ. ರಾವ್ಲೆಲ್ಯಾ ಕಡೆನ್ ಥಾವ್ನ್ಚ್ ತಿಂ ಮಿಶೇಲಾಕ್ ಪಳೆತಾನಾ ಮಿಶೇಲಾನ್ ತಾಂಕಾಂ ಹಾತ್ ಭಾಸ್ ಕರುನ್ ಹೆವ್ಶಿಂ ಯೆಂವ್ಕ್ ಆಪಯ್ಲೆಂ. ಚಡಾವತ್ ಖಂಯ್ಚಿಂಯ್ ಗಾಂವ್ಚಿಂ ಭುರ್ಗಿಂ ಮಿಶೇಲಾಕ್ ಪಳವ್ನ್, ತಾಚ್ಯಾ ರುಪಾಕ್ ಪಳವ್ನ್, ಮಿಶೇಲಾಚಾ ಲಾಗಿಂ ಯೇನಾತ್ಲ್ಲಿಂ. ತಾಚ್ಯಾ ರುಪಾಕ್ ಆನಿ ಸುರ್ಪಾಯೆಕ್ ಪಳವ್ನ್, ಪರ್ಕ್ಯಾಕ್ ಪಳೆಲ್ಲ್ಯಾ ಪರಿಂ ಕರ್ಚಿಂ ತಿಂ ಮಿಶೇಲ್ ಖುದ್ದ್ ಜಾವ್ನ್ ಲಾಗಿಂ ಗೆಲ್ಯಾರ್ಯ್ ತಾಚ್ಯೆ ಸಾಂಗಾತಾ ಬರ್ಸಾನಾತ್ಲ್ಲಿಂ.
ಮಗ್ಗಿಚಾ ನಾತ್ರಾಂಕ್ ಜಾಲ್ಯಾರ್ಯ್ ಮಿಶೇಲಾಚಾ ಭಂವ್ತಿಂ ಭಂವೊನ್ ತಾಚಿ ವಳಕ್ ಆಸ್ಲ್ಲಿ. ತಶೆಂ ಥೊಡೆ ಪಾವ್ಟಿಂ ಆಪ್ಲ್ಯಾ ಆಜ್ಯಾ ಸಾಂಗಾತಾ ಗರ್ಜೆಕ್ ಮಗ್ಗಿಚಾ ಘರಾ ತೆಂ ವಚೊನ್ ಆಯಿಲ್ಲೆಂಯ್ ಆಸಾ. ಮ್ಯಾಂಚೆಸ್ಟರಾ ಥಾವ್ನ್ ಆವಯ್ ಬಾಪಾಯ್ಕ್ ಹೊಗ್ಡಾವ್ನ್ ಆನಾಥ್ ಮಿಶೇಲ್ ಆಪ್ಲ್ಯಾ ಆಜ್ಯಾಚಾ ಘರಾ ಪಾವ್ತಾನಾ ಮಗ್ಗಿಚಾ ಧುವೆನ್ ಸೆಲ್ಲಿನ್ಚ್ ತಾಚೊ ಪೋಸ್ ಕೆಲ್ಲೊ. ಸೆಲ್ಲಿಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಮಾತ್ರ್ ತೆಂ ಮಿಶೇಲಾಕ್ ಪಯ್ಸ್ ಜಾಲ್ಲೆಂ. ಮಗ್ಗಿಚೊ ಪೂತ್ ವಿಲ್ಫಿ ಆಪ್ಲ್ಯಾ ಕಾಮಾ ಉಪ್ರಾಂತ್ ತಾಚ್ಯಾ ಧನಿಯಾಚೆಂ ಕಾಮ್ ಪಳೆತಾಲೊ. ತಾಣೆಂ ಉಲಂವ್ಚೆಂ ಅಪ್ರೂಪ್ ತರ್ಯ್ ಗರ್ಜ್ ಪುರ್ತೆಂ ತೊ ಉಲಯ್ತಾಲೊ ಶಿವಾಯ್ ತಾಚ್ಯಾಚ್ ಕಾಮಾರ್ ಮೆತೆರ್ ಆಸ್ತಾಲೊ. ಮಗ್ಗಿಚಾ ಸರ್ವ್ ಚೆಡ್ವಾಂಕ್ ಕಾಜಾರ್ ಜಾಲ್ಲೆಂ. ವಿಲ್ಫಿಚಾ ಪಾಟ್ಲೊ ಹೆರಿ ಬೆಂಗ್ಳುರ್ ಕಾಮಾರ್ ಆಸ್ಲ್ಲೊ. ನಿಮಾಣೊ ಆಲ್ವಿನ್ ಶಿಕ್ತಾಲೊ.
ಆಪ್ಣಾಕ್ ಪಳವ್ನ್ ಥಂಯ್ಚ್ ಸ್ತಬ್ದ್ ಜಾಲ್ಲ್ಯಾ ಭುರ್ಗ್ಯಾಂಕ್, ಮಿಶೇಲಾನ್ ಹಾತ್ ಬಾಶೆನ್ ಆಪಯ್ಲೆಂ ತರ್ಯ್ ತಿಂ ಮುಕಾರ್ ಯೆಂವ್ಚಿಂ ದಿಸೊನ್ ಯೇನಾಸ್ತಾನಾ ವೆತಾನಾ ಪರ್ತ್ಯಾಕ್ ಮಿಶೇಲಾನ್ ತಾಂಕಾಂ ಆಪಯ್ಲೆಂ. ಲವೀನಾ ಆನಿ ಲಾಯ್ಡ್ ಎಕಾಮೆಕಾ ತೊಂಡಾಕ್ ತೋಂಡ್ ಪಳವ್ನ್ ಲಜೆವ್ಚೆಂ ದಿಸ್ತಾನಾ, ಮಿಶೇಲ್ ಪಾಂಯಾಂಚಿ ವಳ್ ಕಾಡುಂಕ್ ತ್ಯಾ ವಾಟೆ ವಯ್ಲ್ಯಾ ಕಟ್ಟಪುಣಿಕ್ ತೆಂಕುನ್ ಬಸ್ಲೆಂ. ಥೊಡೊ ವೇಳ್ ಬಸೊನ್ ಪಳೆಲ್ಯಾರ್ಯ್ ಭುರ್ಗಿಂ ಆಪ್ಣಾಚಾ ಲಾಗಿಂ ಯೇನಾಂತ್ ತೆಂ ಕಳ್ಲ್ಲೆಂ ಮಿಶೇಲ್ "ಹಾವೆಂ ಹಾಂಗಾ ಆನಿ ಬಸೊನ್ ಫಾಯ್ದೊ ನಾ. ಹಾಚ್ಯೆ ಬದ್ಲಾಕ್ ಆಬಾಕ್ ಸಾಂಗಾತ್ ದಿಲ್ಯಾರ್ಚ್ ಬರೆಂ!" ಚಿಂತ್ಲೆಲೆಂ ತೆಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ತೊಟಾಂತ್ ಕಾಮ್ ಚಲ್ಚಾ ತೆಂವ್ಶಿಂ ಚಲೊಂಕ್ ಲಾಗ್ಲೆಂ.
ಥೊಡೆಂ ಮುಕಾರ್ ಚಲ್ಲ್ಲೆಂ ಮಿಶೇಲ್ ಪಾಟಿಂ ಘುಂವೊನ್ ಪಳೆತಾನ್ ಭುರ್ಗಿಂ ದೊಗಾಂಯ್ ಮಾಯಾಗ್ ಜಾಲ್ಲಿಂ.
"ಕಾಂಯ್ಪುಣಿಂ ಘರಾ ಗೆಲಿಂ?"
ಮತಿಂತ್ ಚಿಂತ್ನಾ ಯೇವ್ನ್ ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ತಾಕಾ ಖಂಯ್ಚರ್ಯ್ ತಿಂ ದಿಸೊಂಕ್ ಆಯ್ಲಿಂ ನಾಂತ್ ಜಾಲ್ಲ್ಯಾನ್ ದುಸ್ರಿ ವಾಟ್ ನಾಸ್ತಾಂ ಮಿಶೇಲ್ ಮುಕಾರ್ ಚಲ್ಲೆಂ.
ತೊಟಾಂತ್ ಭಂವ್ಲೆಲ್ಯಾ ತಾಣೆಂ ತೊಟಾಂತ್ ಜಾಂವ್ಚೆಂ ಕಾಮ್ ಪಳೆಲೆಂ. ಆಜ್ಯಾನ್ ಕಾಮಾಗಾರಾಂಲಾಗಿಂ ಉಲಂವ್ಚಿ ರೀತ್, ತಾಂಚೆಲಾಗಿಂ ತಾಣೆಂ ದವರ್ಚೊ ಸಂಭಂಧ್ ಪಳೆಲ್ಲೆಂ ಮಿಶೇಲ್, ಹೆಂ ಕಾಂಯ್ ತಾಕಾ ನವೆಂ ನ್ಹಯ್ ಜಾಲ್ಯಾರ್ಯ್ ಆಜ್ಯಾ ಥಾವ್ನ್ ಸಭಾರ್ ವಿಶಯ್ ತೆಂ ಶಿಕೊಂಕ್ ಪಾವ್ಲೆಂ. ತೊಟಾಂತ್ ಜಡ್ಲೆಲಿಂ ಪೊಪ್ಳಾಂ ವಿಂಚುನ್ ಆಸ್ಲ್ಲ್ಯಾ ಮಗ್ಗಿಕ್ ಮೆಳ್ಳೆಂ. ತಿಚೆಲಾಗಿಂ ಉಲಯ್ಲೆಂ, ತಿಚ್ಯಾ ನಾತ್ರಾಂಚೊ ವಿಶಯ್ ವಿವರ್ಸಿಲೊ. ಮಿಶೇಲಾಕ್ ಪಳವ್ನ್ ಆನಿ ತಾಣೆಂ ಉಲಯಿಲ್ಲೆಂ ಆಯ್ಕೊನ್ ತಿ ಫಕತ್ತ್ ಹಾಸ್ಲಿ ಮಾತ್ರ್ ಶಿವಾಯ್ ಕಾಂಯ್ ಉಲಯ್ಲಿ ನಾ. ದೇವಕಿ ಆನಿ ಜಾನಕಿಕ್ ಪಳಯ್ಲೆಂ. ತಾಣಿಂ ಫಕತ್ತ್ ಮಿಶೇಲಾಚಾ ಬಲಾಯ್ಕೆಚೊ ವಿಚಾರ್ ಕೆಲೊ. ತಾಣಿಂ ದುಸ್ರೆಂ ಕಾಂಯ್ ಉಲಂವ್ಕ್ ಸಾದ್ಯ್ ನಾತ್ಲ್ಲೆಂ. ಮಿಶೇಲ್, ತಾಂಚಿ ತುಳು ಬಾಸ್ ನೆಣಾಂ ಆಸ್ಲೆಲೆಂ.
’ಎಂಚ ಉಲ್ಲ ಮಗಾ?’ ಮ್ಹಣೊನ್ ವಿಚಾರ್ಲ್ಯಾರ್ ’ಹುಶಾರ್ ಉಂಡು!’ಮ್ಹಣ್ಚಾ ಮಿಶೇಲಾಚಾ ಮೊಟ್ಕುರ್ ಜವಾಬೆಕ್ ಆಯ್ಕೊನ್ ಮಾತಾರೆಂ ದೇವಕಿ ತರ್ಯ್ ಚೆಡ್ವಾಚಾ ಗೂಣಾಂಕ್ ಪಳವ್ನ್ ಸಂತೊಸ್ತಾಲೆಂ ಜಾಲ್ಯಾರ್ ಜಾನಕಿ ಮಾತ್ರ್ ವೊಂಟಾಂ ಭಿತರ್ಚ್ ಹಾಸ್ತಾಲೆಂ. ಮಿಶೇಲಾಕ್ ತಾಂಚಿ ತುಳು ಭಾಸ್ ಉಲಂವ್ಚಿ ಸಾದ್ಯತಾ ನಾತ್ಲೆಲಿ. ತಿ ಭಾಸ್ ಶಿಕ್ಚೊ ಸಂಭವ್ಯ್ ನಾತ್ಲಲೊ. ತರ್ಯ್ ಮಿಶೇಲ್ ತೊಟಾಂತ್ಲಿಂ ಕಾಮಾಚಿಂ ಮನ್ಶ್ಯಾಂ ಉಲಯ್ತಾನಾ ಆಯ್ಕಾಲ್ಲೆಂ ತೆಂ ಸಮ್ಜೊನ್ ಉಲಂವ್ಚೆಂ ಪ್ರಯತ್ನ್ ಕರ್ತಾಲೆಂ.
ತೊಟಾಚ್ಯಾ ಕಾಮಾಚೊ ವಿವರ್ ಪಳವ್ನ್ ಆನಿ ದೀಂವ್ಕ್ ಜಾಯ್ ಜಾಲ್ಲಿ ಸಲಹಾ ತ್ಯಾ ಕಾಮಾಗಾರಾಂಕ್ ದಿತಚ್, ಜೆರೊಮ್, ಹೆವ್ಶಿಂ ಆಪ್ಲ್ಯಾ ನಾತಿ ತೆವ್ಶಿಂ ಆಯ್ಲೊಲೊ ತೊ ಜಾನಕಿಲಾಗಿಂ ಚಮ್ಕಾಲೊ. ಭಾಟ್ಕಾರ್ ಆಪ್ಣಾ ತೆವ್ಶಿಂ ಯೆತಾ ತೆಂ ಪಳೆಲ್ಲೆಂ ಜಾನಕಿ ಆಪ್ಲೆ ಹಾತ್ ವೆಗ್ಗಿಂ ಧಾಂವ್ಡಾಂವ್ಕ್ ಲಾಗ್ಲೆಂ.
"ಕಿತೆಂಗೋ ಜಾನಕಿ......? ಶೀನ ಖಂಯ್ ಆಸಾಗೋ?" ಜೆರೊಮಾಚಾ ಆಯ್ಚ್ಯಾ ಉಂಚ್ಲ್ಯಾ ಆವಾಜಾಂತ್ ಥೊಡೊ ಅಧಿಕಾರ್ ಆಸ್ಲ್ಲೊ.
ಭಟ್ಕಾರಾಕ್ ಜಾಣಾಂ ಆಸ್ಲೆಲೆಂ ಜಾನಕಿ, ಸವ್ಕಾಸ್ ಆಪ್ಲೆಂ ಕಾಮ್ ಸೊಡುನ್ ಉಭೆಂ ಜಾಲ್ಲೆಂ ತೆಂ, ನಿಸ್ರೊನ್ ಗೆಲ್ಲ್ಯಾ ಆಪ್ಲ್ಯಾ ಪಾಲ್ವಾಕ್ ಪೆಂಕ್ಡಾಕ್ ಖೊವಯಿತ್ತ್,
"ತೊ ಅಬ್ಬೆಟ್ಟು ಲಕ್ಷ್ಮಿಗೆರ್ ಗೆಲಾ ಧನಿಯಾಂ.....!" ಜಾನಕಿನ್ ಆಪ್ಲ್ಯಾ ತಾಳ್ಯಾಂತ್ ತಗ್ಸಾವ್ಣಿ ಹಾಡ್ಲಿ.
"ಲಕ್ಷಿಗೆರ್.....? ಲಕ್ಷ್ಮಿಗೆರ್ ಕಿತ್ಯಾಕ್?"
"ತಾಂಗೆರ್ ಕಾಲ್ ಆನಿ ಆಜ್ ಭುತಾಕ್....., ಧನಿಯಾಂ! ತಶೆಂ......, ಫಾಲ್ಯಾಂ ಯೆತಲೊ!"
"ಭುತಾಕ್?"
"........." ಜಾನಕಿನ್ ಕಾಂಯ್ಚ್ ಉಲಯ್ನಾಸ್ತಾನಾ, ಏಕ್ ಪಾವ್ಟಿಂ ಮಿಶೇಲಾಕ್ ಪಳವ್ನ್, ಉಪ್ರಾಂತ್ ಸವ್ಕಾಸ್ ಆಪ್ಲಿ ದೀಷ್ಟ್ ಆಪ್ಲ್ಯಾ ಹಾತಾಂ ವಯ್ರ್ ಖಂಚಯ್ಲಿ.
"ಹೆಂ......, ತೊಟಾಕ್ ಹಾಡ್ಲೆಲೆಂ ವಕಾತ್ ಆಸಾ?" ಜೆರೊಮಾಕ್ ತ್ಯಾ ಪೊಪ್ಳಾಂ ಫುಟ್ಲೆಲ್ಯಾ ಮಾಡಿಯೆಚೊ ಉಡಾಸ್ ಆಯ್ಲೊ.
"ವಕಾತ್ ಥೊಡೆಂ ಆಸಾ ಮ್ಹಣೊನ್ ದಿಸ್ತಾ. ಸಾರ್ಕೆಂ ಉಡಾಸ್ ನಾ ಧನಿಯಾಂ...., ಪಳವ್ನ್ ಯೇಂವ್?"
"ಶೆಡ್ಡಾಚಿ ಚಾವಿ ಆಸಾ? ವಚ್ ಚಲ್ ಪಳವ್ನ್ ಯೇ! ತುಕಾ ಕಾಂಯ್ ಉಡಾಸ್ ಉರಾನಾ. ತ್ಯಾ ಶೀನಾಕ್ ಕಾಂಯ್ ಪಡೊನ್ ವಚೊಂಕ್ ನಾ! ಚಾವಿ ಖಂಯ್ ಆಸಾ? ಮಗ್ಗಿಲಾಗಿಂ ವಿಚಾರ್.....!"
ಜಾನಕಿ ವೆವೆಗ್ಗಿಂ ಮಗ್ಗಿ ತೆವ್ಶಿಂ ಚಮ್ಕಾಲೆಂ.
"ಚಲ್ ಮಿಶೇಲ್....!ಶೆಡ್ಡಾಲಾಗಿಂ ವಚೊನ್ ಯೆಯಾಂ!"
ಜೆರೊಮ್ ಆನಿ ಮಿಶೇಲ್ ದೊಗಾಂಯ್ ಶೆಡ್ಡಾ ತೆವ್ಶಿಂ ಚಮ್ಕಾಲಿಂ. ತಿತ್ಲ್ಯಾರ್ ತಾಂಚೆ ಬರಾಬರ್ ಜಾನಕಿ ಶೆಡ್ಡಾಚಿ ಚಾವಿ ಘೆವ್ನ್ ಶೆಡ್ಡಾಲಾಗಿಂ ಪಾವ್ಲೆಂ. ಶೆಡ್ಡಾಚೆಂ ದಾರ್ ಉಗ್ತೆಂ ಕರುನ್ ಭಿತರ್ ಗೆಲ್ಲೆಂ ಜಾನಕಿ, ಭಿತರ್ ದವರ್ಲೆಲ್ಯಾ ವಕ್ತಾಂಚಾ ದೊಬ್ಯಾಂಕ್ ಹಾಲೊವ್ನ್, ಖಂಯ್ಚಾಂತ್ ಕಿತ್ಲೆಂ ವಕಾತ್ ಆಸಾ ತೆಂ ಪಳಂವ್ಕ್ ಲಾಗ್ಲೆಂ.
"ಆಸಾಯೆಗೋ?"
"ದೋನ್ ದೊಬೆ ಆಸಾತ್ ಧನಿಯಾ. ತಿಸ್ರ್ಯಾಂತ್ ಥೊಡೆಂಚ್ ಆಸಾ.....!"
"ಬರೆಂ....! ಹಾಂವ್ ಮಗ್ಗಿಲಾಗಿಂ ಪಯ್ಶೆ ದಿತಾಂ. ವಿಲ್ಫಿ ವಕಾತ್ ಹಾಡುನ್ ದಿತಲೊ. ಆಬ್ಬೆಟ್ಟು ಥಾವ್ನ್ ಶೀನಾ ಪಾಟಿಂ ಯೆತಲೊಗೊ....? ಯಾ ಆನಿ ಖಂಯ್......!, ತುಜ್ಯೆ ತಸಲಿಂ ಬಾಯ್ಲಾಂಶೀನಾ ತಸಲ್ಯಾಂಕ್ ಮೆಳ್ಳ್ಯಾರ್, ತಾಂಕಾ ಆನಿ ಕಾಮ್ ಕರ್ಚಿ ಗರ್ಜ್ ಕಿತೆಂ ಆಸಾ?" ಉಲವ್ನ್ ಉಲವ್ನ್ ಜೆರೊಮಾನ್ಶೆಡ್ಡಾ ಭಿತರ್ ಪಾಂಯ್ ದವರ್ಲೆ.
"ವ್ಹಯ್ಗೋ? ತುಜೆಂ ದಾಕ್ಟೆಂ ಧುವ್ ಕಶೆಂ ಆಸಾಗೊ ಆತಾಂ......?"
"ಆತಾಂ ಬರೆಂ ಆಸಾ ಧನಿಯಾಂ. ತುಮ್ಚೊ ಮಸ್ತ್ ಉಪ್ಕಾರ್ ಜಾಲೊ. ಹಾತಾಂ ಪಾಂಯಾಂಕ್ ತಿತ್ಲೆಂ ಭಳ್ ನಾ ಜಾಲ್ಯಾರ್ಯ್ ಚೆಡುಂ ಹುಶಾರ್ ಆಸಾ ಆತಾಂ!"
"ಪಳೆಗೋ ಜಾನಕಿ......, ಭುರ್ಗ್ಯಾಂಚಿ ಚತ್ರಾಯ್ ಕರ್. ಕಾಂಯ್ ಥೊಡೆಂಚ್ ಶುರು ಜಾತಾನಾ ವಕಾತ್ ಹಾಡ್. ತಾಂಕಾಂ ಭುರ್ಗ್ಯಾಂಕ್ ಸಾಂಗೊಂಕ್ ಕಳ್ತಾವೇ? ಶೀನಾಚೆಂ ಸೊಡ್! ಏಕ್ ತೊಟೊ ಮಾರ್ಲ್ಯಾರ್ ತಾಕಾ ವಾಟ್ ಸಾರ್ಕಿ ದಿಸಾನಾ. ತುಂ ತಿಕ್ಕೆ ಜಾಗ್ರುತ್ ಕರ್!"
ಉಲಯ್ತಾಂ ಉಲಯ್ತಾಂ, ಜೆರೊಮಾನ್ ಆಪ್ಲ್ಯಾ ಬೊಲ್ಸಾಕ್ ಹಾತ್ ಘಾಲುನ್, ಪಾಕೆಟಿಂತ್ಲೆ ಥೊಡೆ ಪಯ್ಶೆ ಕಾಡುನ್ "ಹೆ ಧರ್. ಭುರ್ಗ್ಯಾಂಕ್ ಕಾಂಯ್ ಬರೆಂ ಹಾಡುನ್ ದೀ. ಆನಿ ತುಂ ಪಳೆಗೋ..... ತುಜೊ ವೇಸ್ ಜಾಲಾ ಪಳೆಗೋ...... ತ್ಯಾ ಮಾರ್ಣಮಿಚಾ ಅನಾರ್ಕಲಿ ಭಾಶೆನ್! ಹ್ಯಾ ಸೊರ್ಯಾ ವರ್ವಿಂ ಸಗ್ಳೆಂ ಸತ್ತ್ಯಾನಾಸ್ ಜಾಲೆಂ!"
ಹಾತಾಂತ್ ಕಾಡ್ಲೆಲೆ ಪಯ್ಶೆ ಜಾನಕಿಕ್ ವಡ್ಡಾವ್ನ್, "ಧರ್.... ಹೆ ಘೆ!" ಜೆರೊಮಾನ್ ಸಾಂಗ್ತಾನಾ ಜಾನಕಿನ್ ತೆ ಘೆತ್ಲೆ.
"ದೇವ್ ಬರೆಂ ಕರುಂ ಧನಿಯಾಂ!" ಜಾನಕಿ ಭಾವುಕಾಯೆತಾಯೆನ್ ಉಲಯ್ಲೆಂ.
"ಬರೆಂ! ಶೀನಾ ಆಯ್ಲ್ಯಾ ಉಪ್ರಾಂತ್ ವಕ್ತಾಚೊ ಉಡಾಸ್ ದವರ್ ಹಾಂ.....!"
ಜೆರೊಮ್ ಶೆಡ್ಡಾ ಥಾವ್ನ್ ಭಾಯ್ರ್ ಆಯ್ಲೊ. ಆಜ್ಯಾಕ್ಚ್ ಪಳವ್ನ್ ಆಸ್ಲೆಲೆಂ ಮಿಶೇಲ್, ಕಾಂಯ್ಚ್ ಉಲಯ್ನಾಸ್ತಾನಾ ಮೌನ್ ಪಣಿಂ ಜಾನಕಿಕ್ ಪಳವ್ನ್ ತಾಕಾ ಹಾಸೊ ದಿಲ್ಲೆಂ ತೆಂ, ಶೆಡ್ಡಾ ಥಾವ್ನ್ ಭಾಯ್ರ್ ಆಯಿಲ್ಲೊ ಆಜೊ ಭಾಯ್ಲ್ಯಾ ಬಾಂಯ್ಚಾ ಭೊಂವಾರಿ ಭೊಂವಾಡೊ ಮಾರ್ತಾ ತೆಂ ಪಳವ್ನ್, ತೆಂಯ್ ಆಜ್ಯಾ ಸಾಂಗಾತಾ ಸೆರ್ವಾಲೆಂ.
"ಶೆಡ್ಡಾಕ್ ಬೀಗ್ ಘಾಲುಂ ಧನಿಯಾಂ?"
"ಹಾಂ..... ಬೀಗ್ ಘಾಲ್ ಆನಿ ಚಾವಿ ಮಗ್ಗಿಕ್ ದೀ!"
ಮುಕ್ಲ್ಯಾ ಬಾಂಯ್ತ್ ತಿಳುನ್ ಆಸ್ಲೆಲ್ಯಾ ಪರಿಂಚ್ ಜೆರೊಮಾನ್ ಜವಾಬ್ ದಿಲಿ. ಶೆಡ್ಡಾಕ್ ಬೀಗ್ ಘಾಲುನ್ ಜಾನಕಿ ಥಂಯ್ ಥಾವ್ನ್ ಚಲ್ಲೆಂ.
"ಹ್ಯಾ ವರ್ಸಾ ಹ್ಯಾ ಬಾಂಯ್ತ್ಲೊ ಉಭಿರ್ ಕಾಡುಂಕ್ ಜಾಯ್......!" ಜೆರೊಮಾಕ್ ಉದ್ಕಾಚಿ ಖಂತ್ ಆಸ್ಲ್ಲಿ.
"ಅಬಾ....., ಬಾಂಯ್ತ್ ನಾರ್ಲ್ ಪಡ್ಲಾ!" ಬಾಂಯ್ತ್ ತಿಳ್ಲ್ಲ್ಯಾ ಮಿಶೇಲಾಕ್, ಲಾಗ್ಶಿಲ್ಯಾ ಮಾಡಾಚೊ ಜಡ್ಲಲೊ ನಾರ್ಲ್ ಬಾಂಯ್ತ್ ಪಡ್ಲಲೊ ದಿಸ್ಲೊ.
"ಸಾಂಗ್ಲೆಲ್ಯಾ ಪರಿಂ ಘರಾ ವೆಚಾ ಪಯ್ಲೆಂ ನಾರ್ಲ್ ಜಿಪಾರ್ ಘಾಲುಂಕ್ ಉಡಾಸ್ ಕರ್! ನಾ ಜಾಲ್ಯಾರ್......? ತುಜ್ಯಾ ಆಜಿಯೆನ್ ಪಯ್ಲೆಂಚ್ ಸಾಂಗ್ಲಾಂ!"
ಜೆರೊಮಾಚಿ ದೀಷ್ಟ್ ಬಾಂಯ್ಚಾ ಕಾಟ್ಯಾ ವಯ್ಲ್ಯಾ ನಾರ್ಲಾಚಾ ಮಾಡಾರ್ ಖಂಚ್ಲಿ.
"ಹ್ಯಾ ಶೀನಾಕ್ ಸಗ್ಳೆಂ ಸಾಂಗೊಂಕ್ ಪಡ್ತಾ! ತ್ಯಾ ಜಾನಕಿ ಆನಿ ತಾಚ್ಯಾ ಭುರ್ಗ್ಯಾಂಚೆಂ ತೋಂಡ್ ಪಳವ್ನ್ ಮಾತ್ರ್ವೊಗೊ ರಾವೊಂಕ್ ಜಾಯ್ ಶಿವಾಯ್....." ಕಿತೆಂಗೀ ಉಲಂವ್ಕ್ ಚಿಂತ್ಲೆಲ್ಯಾ ಜೆರೊಮಾನ್, ಆಪ್ಲ್ಯಾ ಉತ್ರಾಂಕ್ ಖಾಡುಂ ಮಾರುನ್ "ಚಲ್ ಯಾ!" ಆಜ್ಯಾನ್ ಸಾಂಗ್ತಾನಾ, ಮಿಶೇಲಾನ್ ಆಜ್ಯಾ ಸಾಂಗಾತಾ ಮೆಟಾಂ ಕಾಡ್ಲಿಂ.
ದೊಗಾಂಯ್ ಶೆಡ್ಡಾಲಾಗಿಂ ಥಾವ್ನ್ ಪಾಟಿಂ ಯೆತಾನಾ, ಪಯ್ಸ್ ಕಾಮ್ ಕರ್ಚಾ ಮಗ್ಗಿಚಾ ಲಾಗ್ಸಾರ್, ತಿಚಿಂ ನಾತ್ರಾಂ ಲವೀನಾ ಆನಿ ಲಾಯ್ಡ್ ಉಭಿಂ ಆಸ್ಲೆಲಿಂ ತೆಂ ಮಿಶೇಲಾನ್ ಪಯ್ಸ್ ಥಾವ್ನ್ಚ್ ಪಳೆಲೆಂ.
ಮಿಶೇಲ್ ಆನಿ ಜೆರೊಮ್ ದೊಗಾಂಯ್ ಲಾಗಿಂ ಜಾತಾನಾ, ಲಾಯ್ಡ್ ಆಜಿಯೆಚಾ ಪಾಲ್ವಾಕ್ ಧರುನ್ ಹೆವ್ಶಿಂ ಪಳವ್ನ್ ಹಾಸ್ತಾಲೊ ಆಸ್ತಾಂ ಲವೀನಾ ಆಪ್ಲ್ಯಾ ಹಾತಾಂತ್ ದಾಕ್ಟುಲೆಂ ಏಕ್ ಕಾಗಾತ್ ಘೆವ್ನ್ ಆಜಿಯೆಚಾ ಪಾಟ್ಲ್ಯಾನ್ ರಾವೊನ್ ಲಿಪೊಂಕ್ ಪ್ರಯತ್ನ್ ಕರ್ತಾಲೆಂ.
ಪಯ್ಲೆ ಪಾವ್ಟಿಂ ಹ್ಯಾ ಭುರ್ಗ್ಯಾಂಚೆಂ ವರ್ತನ್ ಪಳವ್ನ್ ಮಿಶೇಲಾಕ್ ವಿಚಿತ್ರ್ ದಿಸ್ಲೆಂ. ಹ್ಯಾ ಭುರ್ಗ್ಯಾಂಚೆಂ ತಾಂಚ್ಯಾ ಆಯ್ಚೆ ತಸಲೆಂ ವರ್ತನ್ ತಾಣೆಂ, ತಾಚ್ಯಾ ವಸ್ತಿ ಕರ್ಚಾ ಶ್ಹೆರಾಂತ್ ಪಳಂವ್ಕ್ ನಾತ್ಲೆಲೆಂ.
"ಹೊ ಸಂಸಾರ್ಚ್ ಆಪ್ಲೊ ಆನಿ ಹೆಂ ತೋಟ್ಚ್ ಆಪ್ಲೊ ತಾಳುವೆ ಹಾತ್..... ಜ್ಯಾ ತಾಳುವೆ ಹಾತಾರ್ ಎಕಾ ಖಿಣಾ ಥಾವ್ನ್ ದುಸ್ರ್ಯಾ ಖಿಣಾಕ್ ಪಾವ್ತಾ ವರೇಗ್ ಕಸಲೆಂಯ್ ಸಪಾಣ್ ಖೆಳ್ಚೆಂ ಪಳವ್ಯೆತ್! ಕಸಲ್ಯಾಯ್ ಸಪ್ಣಾಕ್ ಖೆಳವ್ಯೆತ್! ಕಸಲ್ಯಾಯ್ ಸಪ್ಣಾಕ್ ಆಪ್ಣಾಚೆಂ ಕರುನ್ ಘೆವ್ಯೆತ್! ಆಶೆಂ ಆಸ್ತಾನಾ ತ್ಯಾ ಮುಖಾಮಳಾ ವಯ್ಲ್ಯಾ ದೊಳ್ಯಾಂ ದಿಷ್ಟಿಂತ್ ಕಿತ್ಲೆಂ ಮುಗ್ದ್ಪಣ್! ತ್ಯಾ ವೊಂಟಾನಿಂ ಕಿತ್ಲ್ಯೊ ನಿಷ್ಕಳಂಕ್ ಹಾಸೊ! ತ್ಯಾ ಕುಡಿಂತ್ ಕಿತ್ಲೊ ಉಲ್ಲಾಸಾಚೊ ಉತ್ಕರ್ಷ್! ಭುರ್ಗ್ಯಾಂಚೊ ಸಂಸಾರ್ ಹೊ!" ದಾಕ್ಟ್ಯಾ ಭುರ್ಗ್ಯಾಂಚಾ ವರ್ತನಾಕ್ ಪಳವ್ನ್, ಏಕ್ ಕ್ಷಣ್ ರಾವ್ಲೆಲ್ಯಾ ಕಡೆಚ್ ರಾವ್ಲ್ಲೆಂ ಮಿಶೇಲ್, ಆಪ್ಲ್ಯಾ ಮತಿಂತ್ಚ್ ಲಾಯ್ಡ್ ಆನಿ ಲವೀನಾಚಾ ನೆಣ್ತ್ಯಾ ಸಂಸಾರಾಂತ್ ಆಪ್ಣಾಕ್ ವಿಸ್ರಾಲೆಂ. ತಾಚ್ಯಾ ವೊಂಟಾನಿಂ ಮಂದ್ ಹಾಸೊ ಉದೆಲ್ಲ್ಯೊ.
ಶ್ಹೆರಾ ಭಾಯ್ಲ್ಯಾ ಗಾಂವ್ಚಿ ದೊಳ್ಯಾಂಕ್ ದಿಸ್ಚಿ ಸೊಭಾಯ್ ಕಿತ್ಲಿ ನೈಸರ್ಗಿಕ್, ತಿತ್ಲೆಂಚ್, ಥಂಯ್ಚರ್ ಜಿಯೆಂವ್ಚಾ ಲೊಕಾಚೆಂ ಜಿವಿತ್! ಹೆಂ ಜಿವಿತ್ ಘರಾ ಥಾವ್ನ್ ಘರಾಕ್ ಯಾ ಗಾಂವಾ ಥಾವ್ನ್ ಗಾಂವಾಕ್ ಆಪ್ಲ್ಯಾ ಸೊಭಾಯೆಂತ್ ಬದ್ಲಾವಣ್ ಹಾಡುಂಕ್ ಸಕ್ತಾ. ಪುಣ್, ಹ್ಯಾ ಬದ್ಲಾವಣಾಂತ್ ಕೃತಕ್ಪಣ್ ಖಂಯ್ಚರ್ಯ್ ಹಾಡುಂಕ್ ಸಕಾನಾ. ತಿ ಸೊಭಾಯ್ ನಾಸ್ ಜಾತಾ ಜಾಂವ್ಕ್ ಪುರೊ. ಪುಣ್ ಅಪ್ಲ್ಯಾ ನಾಸಾಕ್ ಚುಣ್ಯಾ ಬಣಾಂತ್ ಲಿಪಯ್ನಾ. ತಶೆಂಚ್ ಹಿಂ ಮಗ್ಗಿಚಿಂ ನಾತ್ರಾಂ!
ರಾವ್ಲೆಲ್ಯಾ ಕಡೆಚ್ ರಾವೊನ್, ಭುರ್ಗ್ಯಾಂಕ್ ಪಳಂವ್ಚಾ ಮಿಶೇಲಾಚಾ ದಿಷ್ಟೆಂತ್, ತೊಟಾಂತ್ ವ್ಹಾಳೊನ್ ವೆಚೆಂ ಸಾಂಜೆಚೆಂ ವಾರೆಂ ತೊಟಾ ಮಧೆಂ ವ್ಹಾಳೊನ್ ಯೆತಾನಾ,ಮೊಳಾಬಾಕ್ ತೆಂಕ್ಲೆಲ್ಯಾ ಮಾಡಿಯೆರ್ ನವಿಚ್ ಪುಟ್ಲೆಲ್ಯಾ ಪಿಂಗಾರಿಚ್ಯಾ ಪರ್ಮಳಾಕ್ ಆಪ್ಲ್ಯಾ ಪಾಲ್ವಾಂತ್ ಘೆವ್ನ್ ಮಾಡಿಯಾಂ ಮಧೆಂ ಆಪಾಲಿಪಾ ಖೆಳ್ಚಾ ವಾರ್ಯಾ ಪರಿಂ ಆಪುಣ್ಯ್ ಹ್ಯಾ ಭುರ್ಗ್ಯಾಂ ಸಾಂಗಾತಾ ಖೆಳ್ ಖೆಳ್ತಾಂ ತಶೆಂ ತಾಕಾ ದಿಸ್ಲೆಂ. ತಾಚ್ಯಾ ಪಾಟ್ಲ್ಯಾನ್ ಆಪ್ಣೆಂ ಪಳಂವ್ಚೆ ತೆ ರಂಗ್ ರಂಗೀನ್ ಬಣ್ ದೊಳ್ಯಾಂ ಮುಕಾರ್ ಉಭೊನ್ ಆಯಿಲ್ಲ್ಯಾ ಪರಿಂ ಜಾತಾನಾ, ಪಯ್ಲೆ ಪಾವ್ಟಿಂ ಹೊ ಸಂಸಾರ್ ಮಿಶೇಲಾಕ್ ಚಡ್ ಆನಿ ಚಡ್ ಸೊಭಿತ್ ದಿಸ್ಲೊ.
ಮಿಶೇಲ್ ಆಪ್ಣಾ ಸಾಂಗಾತಾ ನಾತ್ಲೆಲೆಂ ಪಳವ್ನ್, ಪಾಟಿಂ ಘುಂವೊನ್ ಪಳೆಲ್ಲ್ಯಾ ಜೆರೊಮಾಕ್, ಆಪ್ಲೆಂ ನಾತ್ ಕಿತೆಂಗೀ ವಿಚಿತ್ರ್ ಪಳೆಲ್ಲ್ಯಾ ಪರಿಂ ರಾವ್ಲೆಲ್ಯಾ ಕಡೆಚ್ ರಾವೊನ್ ಪಳಂವ್ಚೆಂ ದಿಸ್ತಾನಾ,
"ಮಿಶೇಲ್.....?" ಜೆರೊಮಾನ್ ಆಪ್ಲೊ ತಾಳೊ ಉಭಾರ್ಲೊ.
ಆಜ್ಯಾಚೊ ತಾಳೊ ಕಾನಾಂಕ್ ಪಡ್ತಾಚ್ ಭುರ್ಗ್ಯಾಂಚಾ ಸಂಸಾರಾ ಥಾವ್ನ್ ಭಾಯ್ರ್ ಆಯ್ಲೆಲೆಂ ಮಿಶೇಲ್,
"ನಿಜಾಯ್ಕ್ಯ್ ಹೊ ಸಂಸಾರ್ ಕಿತ್ಲೊ ಸೊಭಿತ್ ಆಸಾ ಆಬಾ.....!" ತಾಣೆಂ ಏಕ್ ಲಾಂಬ್ ಸುಸ್ಕಾರ್ ಸೊಡ್ಲೊ. ತ್ಯಾ ಸುಸ್ಕಾರಾಂತ್ ಕಸಲ್ಯಾಗೀ ಎಕಾ ಥರಾಚ್ಯಾ ಭಾವನಾಂಚೆಂ ಉಗ್ಡಾಪಣ್ ಆಸ್ಲ್ಲೆಂ.
"ಕಾಂಯ್ ಉಡಾಸ್ ಆಯ್ಲೊ ಪುತಾ?"
ಆಜ್ಯಾಚಾ ಸವಾಲಾಕ್ ’ನಾ’ ಮಳ್ಳ್ಯಾ ಭಾಶೆನ್ ಫಕತ್ತ್ ತಕ್ಲಿ ಹಾಲವ್ನ್ ಜವಾಬ್ ದಿಲ್ಲೆಂ ಮಿಶೇಲ್, ಆತಾಂ ಮೆಟಾಂ ಕಾಡುನ್ ಮುಕಾರ್ ಆಯ್ಲೆಂ.
"ಹಾಂ ಪುತಾ! ಹೊ ಸಂಸಾರ್ ಮಸ್ತ್ ಸೊಭಿತ್! ಹ್ಯಾ ಸೊಭಾಯೆಕ್ ಪಳಂವ್ಚಾ ದೊಳ್ಯಾಂಕ್ ದೀಷ್ಟ್ ಮಾತ್ರ್ ಆಸೊಂಕ್ ಜಾಯ್.....! ಆಮಿಂ ಕಸಲ್ಯಾ ದಿಷ್ಟೆನ್ ಸಂಸಾರಾಕ್ ಪಳೆತಾಂವ್ ಆಮ್ಕಾಂ ತಿಚ್ ಸೊಭಾಯ್ ದಿಸ್ತಾ!" ಜೆರೊಮಾಚಿಂ ಜಾಣ್ವಾಯೆಚಿಂ ಉತ್ರಾಂ.
"ಹ್ಯಾ ಭುರ್ಗ್ಯಾಂಚೊ ಸಂಸಾರ್ ಹ್ಯಾ ಗಾವಾಂತ್ ಆನಿ ತ್ಯಾ ಶ್ಹೆರಾಂತ್ ಇತ್ಲ್ಯಾ ಅಂತರಾಕ್ ಕಿತ್ಯಾಕ್ ದವರ್ತಾ....?"
"ಫಕತ್ತ್ ಭುರ್ಗ್ಯಾಂಚೊ ಸಂಸಾರ್ ಮಾತ್ರ್ ನ್ಹಯ್ ಮಿಶೇಲ್. ಜಾಣ್ತ್ಯಾಂಚೊ ಸಂಸಾರ್ಯ್ ತ್ಯಾ ಶ್ಹೆರಾಂತ್ ಆನಿ ಹ್ಯಾ ಗಾವಾಂತ್ ಮಸ್ತ್ ಅಂತರಾರ್ ಆಸಾ!"
"ಆಶೆಂ ಕಿತ್ಯಾಕ್ ಆಬಾ?"
"ಹಾಂ ಪುತಾ! ಆಜ್ ತುವೆಂ ಬರೆಂ ಸವಾಲ್ ಕೆಲೆಂಯ್. ತುಜಿ ಆಜಿ ತಿಚ್ಯಾ ಭುರ್ಗ್ಯಾಂಕ್ ನಿಯಾಳ್ತಾನಾ ಮ್ಹಾಕಾ ಹೆಂಚ್ ಸವಾಲ್ ಕರ್ತಾ.......! ಆಮ್ಚಾ ಭುರ್ಗ್ಯಾಂಕ್ ಆಮ್ಚಾ ಘರಾಂತ್ ಕಿತೆಂ ಉಣೆಂಪಣ್ ಆಸ್ಲ್ಲೆಂ? ಕಸಲ್ಯಾ ಉಣ್ಯಾಪಣಾಕ್ ಭರುಂಕ್ ತಾಂಕಾ ಆಮಿಂ ಪರ್ಗಾಂವಾಕ್ ದಾಡ್ಲೆಂ?" ಸಿಂತಿಮೆಂತಾಳ್ ಜಾಲ್ಲೊ ಜೆರೊಮ್ ಥೊಡೊ ವೇಳ್ ಮೌನ್ ಜಾಲ್ಲೊ ತೊ, "ತುಂ ಎಕ್ಲೆಂ ಆಮ್ಚಾ ಜಿವಿತಾಂತ್ ಭರ್ವಸೊ ಜಾವ್ನ್ ಆಯ್ಲೆಲ್ಯಾನ್, ಆಮ್ಚೆಂ ಜೀವನ್ ತುಜೆ ಸಾಂಗಾತಾ ಸಗ್ಳೆಂ ದೂಖ್ ವಿಸ್ರೊನ್ ಸಾರೊನ್ ಗೆಲೆಂ. ತುಂ ನಾತ್ಲೆಲೆಂಯ್ ಜಾಲ್ಯಾರ್ ಆಮ್ಚೆಂ ಕಿತೆಂ ಜಾತೆಂ ತೆಂ ಕೋಣ್ ಜಾಣಾಂ?" ಆಪ್ಲ್ಯಾ ಜಿವಿತಾಚಾ ಕೊಡು ಸತಾಕ್ ನಿಯಾಳುನ್ ಜೆರೊಮ್ ಬಾವುಕ್ ಜಾಲೊ. ಹೆಂ ಪಳೆಲ್ಲ್ಯಾ ಮಿಶೇಲಾನ್ ಸವ್ಕಾಸ್ ಆಪ್ಲ್ಯಾ ಆಜ್ಯಾಚೊ ಹಾತ್ ಆಪ್ಲ್ಯಾ ಹಾತಾಂತ್ ಘೆತ್ಲೊ.
"ತುಮ್ಚೆ ಸಾಂಗಾತಾ ಹಾಂವ್ ಆಸಾಂ ಆಬಾ........ ಭೋವ್ಶ್ಯಾ ತುಮ್ಚ್ಯಾ ಬರ್ಯಾ ಮನಾಕ್ ತುಮ್ಚ್ಯಾ ಭುರ್ಗ್ಯಾಂಚೊ ಸಾಂಗಾತ್ ತುಮ್ಚೆ ಸಂಗಿ ನಾ ಜಾಂವ್ಕ್ ಪಾವ್ಲೊ ಜಾಲ್ಯಾರ್ಯ್ ಮ್ಹಜೊ ಸಾಂಗಾತ್ ತುಮ್ಕಾಂ ಫಾವೊ ಜಾಲಾ!"
ಜೆರೊಮಾಕ್ ಪಳವ್ನ್ ಉಲಯಿಲ್ಲ್ಯಾ ಮಿಶೇಲಾಚಾ ಉತ್ರಾಂಚಿ ಜಾಣ್ವಾಯ್ ಪಳೆಲ್ಲೊ ಜೆರೊಮ್, "ಖರೆಂಚ್ ತುಂ ಜಾಣ್ವಾಯೆಚಿಂ ಉತ್ರಾಂ ಉಲಯ್ಲೆಂಯ್. ತುಂ ನಾತ್ಲೆಲೆಂಯ್ ಜಾಲ್ಯಾರ್ ಭೋವ್ಶ್ಯಾ ಹಿಂ ಉತ್ರಾಂ ಆಮ್ಕಾಂ ತ್ಯಾ ಆಸ್ರ್ಯಾಂತ್ಯ್ ಆಯ್ಕೊಂಕ್ ಮೆಳ್ತಿಂ ನಾಂತ್ ಕೊಣ್ಣಾ....!"
"ಆಸ್ರ್ಯಾಂತ್.....? ಆಸ್ರ್ಯಾಂತ್ ಕಿತ್ಯಾಕ್?"
"ಹಾತ್ ಪಾಂಯ್ ಪಡ್ಲ್ಯಾ ಉಪ್ರಾಂತ್ ಆಸ್ರೊಚ್ ಗತ್ ನ್ಹಯ್ ಆಸ್ತಾಂ ದುಸ್ರೆಂ ಕಿತೆಂ ಆಸಾ?"
"ಮ್ಹಳ್ಯಾರ್......?" ಮಿಶೇಲಾಕ್ ಸಮ್ಜಾಲೆಂ ನಾ.
"ಮಾತಾರ್ಯಾಂಕ್..... ಪ್ರಾಯ್ವತಾಂಕ್ ಪಳಂವ್ಚಿಂ ಘರಾಂ!"
"ಪ್ರಾಯ್ವಂತಾಕ್ ಪಳಂವ್ಚಿಂ ಘರಾಂ....!? ಕೋಣ್ ಪಳೆತಾ?"
"ಗತ್ ನಾತ್ಲೆಲ್ಯಾಂಕ್ ನಶೀಬಾಂತ್ ಫಾವೊ ಜಾಲ್ಯಾರ್ ಮಾತ್ರ್! ಗತ್ ಆಸ್ಲ್ಲ್ಯಾಂಚಾನಿಂ ಪಯ್ಶೆ ದಿಲ್ಯಾರ್ ಪೊಸ್ಚಿಂ ಪೊಸ್ತಾತ್. ಮ್ಹಜ್ಯೆಲಾಗಿಂ ತರ್ಯ್ ಆಸ್ತ್ಬದಿಕ್ ಆಸ್ಲ್ಲೆಂ. ಮ್ಹಾಕಾ ಖಂಯ್ಚಾಯ್ ಆಸ್ರ್ಯಾಂತ್ ಪಾವ್ಯೆತೆಂ. ಪುಣ್.....!"
"ಪುಣ್ ಕಿತೆಂ......?"
"ಕಾಂಯ್ ನಾ...... ಸೊಡ್ ತೆಂ!"
ಜೆರೊಮಾನ್ ಆಪ್ಲ್ಯಾ ತೊಂಡಾರ್ ಭಲತ್ಕಾರೆನ್ ಹಾಸೊ ಹಾಡ್ಚೆಂ ಪ್ರಯತ್ನ್ ಕೆಲೆಂ.
ಆಜಾಚಾ ಸಿಂತಿಮೆಂತಾಳ್ ಉತ್ರಾಂಕ್ ಆಯ್ಕಾಲ್ಲ್ಯಾ ಮಿಶೇಲಾಕ್ ಪಯ್ಲ್ಯಾ ಪಾವ್ಟಿಂ ಆಪ್ಣೆಂ ಸೊಭಿತ್ ಮ್ಹಣೊನ್ ಚಿಂತ್ಲೆಲ್ಯಾ ಹ್ಯಾ ನೈಸರ್ಗಿಕ್ ಸಂಸಾರಾಕ್ ಖಂಯ್ಚರ್ ತರ್ಯ್ ದೂಖಿನ್ ದಾಡ್ ಮಾರ್ಲ್ಯಾ ಮ್ಹಳ್ಳ್ಯಾ ಪರಿಂ ದಿಸ್ಲೆಂ.
ಆಪುಣ್ ಆಜ್ ಹಾಂಗಾ ನಾತ್ಲೆಲಿಂ ಜಾಲ್ಯಾರ್ ಆಪ್ಲ್ಯಾ ಆಜ್ಯಾಕ್ ಆನಿ ಆಜಿಯೆಕ್ ಕೊಣ್ಚ್ ನಾತ್ಲ್ಲೆಂ! ಮಗ್ಗಿಕ್ ತಿಚಿಂ ಭುರ್ಗಿಂ, ತಿಚಿಂ ನಾತ್ರಾಂ ಲಾಗಿಂ ಆಸ್ಲ್ಲಿಂ!
ಮ್ಹಳ್ಯಾರ್.....!
ಕಾಂಯ್ಚ್ ನಾತ್ಲೆಲ್ಯಾ ಕಡೆನ್ ಸಗ್ಳೆಂಚ್ ಆಸ್ಲ್ಲೆಂ. ಸಗ್ಳೆಂ ಆಸ್ಲೆಲ್ಯಾ ಕಡೆನ್ ಕಾಂಯ್ಚ್ ನಾತ್ಲ್ಲೆಂ!
ಚಿಂತ್ನಾಂ ಧಾಂವ್ಲ್ಲ್ಯಾ ಮಿಶೇಲಾಚಾ ಮತಿಕ್ ಆಪ್ಣೆಂ ನೆಣಾಂ ಜಾಲ್ಲ್ಯಾ ಸಂಸಾರಾಚಿ ವ್ಹಳಕ್ ಜಾಲಿ.
ತರ್ ಸಂಸಾರ್ ಮ್ಹಳ್ಯಾರ್ ಆಪ್ಣೆಂ ದೆಖ್ಚೆಂ ಏಕ್ ಸಪಾಣ್ ನ್ಹಯ್! ಹ್ಯಾ ಸಪ್ಣಾಕ್ಯ್ ವಿವಿದ್ ರಂಗ್ ಆಸಾತ್! ತ್ಯಾ ಎಕೇಕಾ ರಂಗಾಕ್ ಆಪ್ಲೆಂಚ್ ಮ್ಹಳ್ಳೆಂ ಎಕೇಕ್ ಆಸ್ಥಿತ್ವ್ ಆಸಾ! ತ್ಯಾ ಆಸ್ಥಿತ್ವಾಕ್ ಪಾಕ್ಳ್ಯೊ ಆಸಾತ್! ಎಕೇಕಾ ಪಾಕ್ಳ್ಯಾಂಚಿ ಎಕೇಕ್ ಸೊಭಾಯ್ ಆಸಾ! ಹ್ಯಾ ಸೊಭಾಯೆ ಮಧೆಂ ಎಕಾ ಕುಶಿಂನ್ ಹಾಂವ್ ತರ್ ಎಕಾ ಕುಶಿಂನ್ ತೆಂ ಲವೀನಾ ಆನಿ ಲಾಯ್ಡ್! ಎಕಾ ಕುಶಿಂನ್ ಆಪ್ಣಾಚೊ ಆಜೊ ಆನಿ ಆಜಿ ತರ್ ಎಕಾ ಕುಶಿಂನ್ ಮಗ್ಗಿ!
"ಮಿಶೇಲ್..... ಪುತಾ!?"
ಚಿಂತ್ನಾಂಚಾ ಸಾಗೊರಾಂತ್ ಬುಡ್ಲೆಲ್ಯಾ ಮಿಶೇಲಾಕ್ ಮಗ್ಗಿನ್ ಆಪಯ್ಲೆಲೆಂ ಆಯ್ಕಾತಾನಾ ಚಿಂತ್ನಾ ಥಾವ್ನ್ ಸುಟ್ಕಾ ಲಾಭ್ಲ್ಲೆಂ ಮಿಶೇಲ್ ತಕ್ಲಿ ಉಭಾರುನ್ ಮಗ್ಗಿ ತೆವ್ಶಿಂ ಪಳಂವ್ಕ್ ಲಾಗ್ಲೆಂ.
"ದೀಗೋ......! ದಾಕಯ್ತಾಂ....."
ಮಗ್ಗಿನ್ ಆಪ್ಲ್ಯಾ ನಾತಿಚಾ ಲವೀನಾಚಾ ಹಾತಾಂತ್ ಆಸ್ಲೆಲೆಂ ತೆಂ ಮಿಶೇಲಾನ್ ಪಯ್ಲೆಂ ಪಳೆಲ್ಲೆಂ ಕಾಗಾತ್ ವೊಡುನ್, ತಿ ಹೆವ್ಶಿಂ ಮಿಶೇಲಾಚಾ ಲಾಗಿಂ ಯೇವ್ನ್ ತೆಂ ಕಾಗಾತ್ ಮಿಶೇಲಾಚಾ ಮುಕಾರ್ ತೆಂ ವೊಡ್ಡಾಯ್ತಾನಾ, ತ್ಯಾ ಕಾಗ್ದಾ ವಯ್ರ್ ದೀಷ್ಟ್ ವೆಲ್ಲೆಂ ಮಿಶೇಲ್, ತ್ಯಾ ಕಾಗ್ದಾರ್ ಪಿಂತ್ರಾಯಿಲ್ಲೆಂ ಪಿಂತುರ್ ಪಳವ್ನ್ ಆಜಾಪ್ ಜಾಲೆಂ.
"ಆಲ್ವಿನಾನ್ ಪಿಂತ್ರಾಯಿಲ್ಲೆಂ ಹೆಂ......!, ಹಿಂ ದೊಗಾಂಯ್ ಘೆವ್ನ್ ಆಯ್ಲ್ಯಾಂತ್!"
ಮಗ್ಗಿನ್ ಸಾಂಗ್ತಾನಾ, ಏಕ್ ಪಾವ್ಟಿಂ ಮಗ್ಗಿಕ್ ಪಳೆಲ್ಲ್ಯಾ ಮಿಶೇಲಾನ್, ಪರ್ತ್ಯಾಕ್ ತ್ಯಾ ಪಿಂತುರಾ ವಯ್ರ್ ದೀಷ್ಟ್ ವೆಲಿ. ತ್ಯಾ ಪಿಂತುರಾರ್ ಜೆರೊಮಾಚೆಂ ಜೀಪ್ ಪಿಂತ್ರಾಯಿಲ್ಲೆಂ ಆಸ್ತಾಂ ಜೆರೊಮ್ ಜಿಪಾಚಾ ದಾರಾ ಕುಶಿಕ್ ಉಭೊ ಅಸ್ಲಲೊ.
ಆಪ್ಲ್ಯಾ ಆಜ್ಯಾಕ್ ಪಿಂತುರಾರ್ ಪಳವ್ನ್ ಮಿಶೇಲಾಚಾ ತೊಂಡಾರ್ ಹಾಸೊ ಉಟೊನ್ ರಾವ್ಲ್ಯೊ.
"ಅಬಾ......, ಹಾಂಗಾ ಯೇ!" ಮ್ಹಳ್ಳೆಂ ಮಿಶೇಲ್ ಹಾಸೊನ್ ಹಾಸೊನ್ ತೆಂ ಪಿಂತುರ್ ಆಪ್ಲ್ಯಾ ಆಜ್ಯಾಕ್ ದಾಖಯ್ತಾನಾ, ಜೆರೊಮ್, ಆಪ್ಣಾಚೆಂ ಪಿಂತುರ್ ಪಳವ್ನ್ ಆಮ್ರುಕೊ ಹಾಸ್ಲೊ.
"ಹ್ಯಾಚ್ ಪಿಂತುರಾಕ್ ಲಾಗೊನ್ ತುಮಿಂ ಇತ್ಲ್ಯಾ ವೆಳಾ ಥಾವ್ನ್ ಮ್ಹಜ್ಯಾ ಪಾಟಿಕ್ ಲಾಗ್ಲ್ಲ್ಯಾತ್?" ಮಿಶೇಲ್ ಆತಾಂ ಭುರ್ಗ್ಯಾಂ ತೆವ್ಶಿಂ ಘುಂವ್ಲೆಂ.
"ಆಲ್ವಿನಾಕ್ ಆಸಾ ಪಳೆ ಕಾಂಯ್ ಕಾಮ್ ನಾ.....!, ಆನಿ ಹಾಂಕಾಂ.....?" ಆಪ್ಲ್ಯಾ ನಾತ್ರಾಂ ತೆವ್ಶಿಂ ಪಳೆಲ್ಲಿ ಮಗ್ಗಿ, "ತುಕಾ ಹೆಂ ದಾಖಂವ್ಕ್ ಹಾಂಕಾಂ ಲಜ್ ದಿಸ್ತಾ.....! ದೆಕುನ್ ಮ್ಹಜ್ಯಾ ಲಾಗಿಂ ಯೇವ್ನ್ ಗುಸು ಗುಸು ಕರ್ತಾತ್.....!"
"ಆಲ್ವಿನ್ ಕಿತೆಂ.....? ತೊ ಪಿಂತುರಾಂ ಸೊಡಯ್ತಾ?" ಮಿಶೇಲಾಕ್ ಆಜ್ಯಾಪ್ ಜಾಲೆಂ. ಆಲ್ವಿನ್ ಪಿಂತುರಾಂ ಪಿಂತ್ರಾಯ್ತಾ ಮ್ಹಳ್ಳ್ಯಾವಿಶಿಂ ಮಿಶೇಲ್ ಎದೊಳ್ ನೆಣಾ ಆಸ್ಲ್ಲೆಂ.
"ತಾಕಾ ಲ್ಹಾನ್ಪಣಾರ್ ಥಾವ್ನ್ ತೆಂ ಪಿಶೆಂ ಆಸ್ಲ್ಲೆಂ. ಕಾಲೇಜಿಕ್ ವೆತಾನಾ ಥೊಡೆಂ ಥೊಡೆಂ ಶಿಕೊಂಕ್ ವೆತಾಲೊ. ಪಯ್ಲಿ ಮ್ಹಜಿ ತಸ್ವೀರ್ ಕರುನ್ ಘರಾ ಉಮ್ಕಾಳಾಯ್ಲ್ಯಾ ತಾಣೆಂ! ತುಜಿಯ್ ತಸ್ವೀರ್ ಕರ್ತಾಲೊ....!"
"ಮ್ಹಜಿ.....?" ಅಚಾನಕ್ ಆಯ್ಕಾಲ್ಲ್ಯಾ ಮಗ್ಗಿಚ್ಯಾ ಉತ್ರಾಂಚೆರ್ ಮಿಶೇಲಾಕ್ ಪಾತ್ಯೆಣಿ ಆಯ್ಲಿ ನಾ.
"ತಿ ಸಮಾ ಜಾಂವ್ಕ್ ನಾ......ಬಪ್ಪುನ್ ತಿ ಪಿಂದ್ಲಿ!" ಭುರ್ಗ್ಯಾಂಚ್ಯಾ ಹ್ಯಾ ಹುರುಪಾಯೆಚ್ಯಾ ವರ್ತನಾಂತ್ ಆನಿ ತಾಂಚಾ ಹ್ಯಾ ಹಾಸ್ಯಾಂನಿ ಎಕಾ ಮುಗ್ದ್ ಜೀವನಾಚೆಂ ಪಿಂತುರ್ ಝಳ್ಕಾತಾಲೆಂ.
"ಬಪ್ಪುಕ್ ಸಾಂಗ್ಯಾ ತುಮ್ಚಿ ದೊಗಾಂಯ್ಚಿ ತಸ್ವೀರ್ ಪಿಂತ್ರಾಂವ್ಕ್.....!"
"ಬಪ್ಪುನ್ ಪೋರ್ ಲಾಯ್ಡಾಚಿ ಕೆಲ್ಲಿ. ತಾಂತುಂ..... ತಾಂತುಂ ಆಸಾ ಪಳೆ, ಲಾಯ್ಡಾಚೆ ಕಾನ್ ಇತ್ಲೆ ವ್ಹಡ್ಲೆ ಜಾಲ್ಲೆ....!" ಲವೀನಾ ಆಪ್ಲ್ಯಾ ಹಾತಾನ್ ವ್ಹಡ್ಲ್ಯಾ ಕಾನಾಂಚೊ ಆಕಾರ್ ಕರುನ್ ದಾಖಯ್ತಾನಾ, ಲಾಯ್ಡ್, ಲಜೆನ್ ಆಜಿಯೆಚಾ ಕಾಪ್ಡಾಕ್ ಆಪ್ಣಾ ಭೊಂವಾರಿಂ ರೆವೊಡ್ ಘಾಲುನ್ ತ್ಯಾ ತಿಚಾ ಕಾಪ್ಡಾ ಭಿತರ್ ಲಿಪೊಂಕ್ ಲಾಗ್ಲೊ.
"ಚೆಡೊ ಕಿತೆಂ ಖಂಯ್....! ಅರೇ ಲಾಯ್ಡ್?....." ಲಾಯ್ಡಾಕ್ ಆಪ್ಲ್ಯಾ ಹಾತಾನ್ ವೊಡುನ್, "ಪುರೊಗೋ..... ಪುರೊ! ಚಲಾ ಘರಾ ವಚಾ...." ಮಗ್ಗಿನ್ ತಿಕ್ಕೆ ವ್ಹಡ್ ತಾಳ್ಯಾನ್ ಸಾಂಗ್ತಾನಾ ಭುರ್ಗಿಂ ತೆವ್ಶಿಂ ಉಡ್ಕಾಣಾಂ ಮಾರೀತ್ತ್ ಧಾಂವ್ಲಿಂ.
ಭುರ್ಗ್ಯಾಂಚಾ ಆಯ್ಚ್ಯಾ ವರ್ತನಾಕ್ ತನ್ ಮನಾನ್ ಖುಶ್ ಜಾಲ್ಲೆಂ ಮಿಶೇಲ್, ಲಾಯ್ಡ್ ಆನಿ ಲವೀನಾನ್ ಆಪ್ಣಾಚಾ ಹಾತಿಂ ಸಾಂಡುನ್ ಗೆಲ್ಲ್ಯಾ ಪಿಂತುರಾಕ್ ಏಕ್ ಪಾವ್ಟಿಂ ಪಳವ್ನ್, ಉಪ್ರಾಂತ್ ಆಪ್ಲಿ ತಕ್ಲಿ ಉಭಾರುನ್, ತೆವ್ಶಿಂ ಆಪ್ಲ್ಯಾ ಘರಾಚಾ ಕುಶಿಕ್ ಧಾಂವ್ಚಾ ಭುರ್ಗ್ಯಾಂಕ್ಚ್ ಪಳವ್ನ್ ರಾವ್ಲೆಂ. ತಾಕಾ ನಿಜಾಯ್ಕ್ಯ್ ಹ್ಯಾ ಭುರ್ಗ್ಯಾಂಚೊ ಸಂಸಾರ್ ಭೋವ್ ಸೊಭಿತ್ ದಿಸ್ಲೊ.
ತಿತ್ಲ್ಯಾರ್!
"ಮಗ್ಗಿ.....?"
ಆಪ್ಣಾಕ್ ಧನಿಯಾನ್ ಆಪಯಿಲ್ಲೆಂ ಅಯ್ಕಾಲ್ಲಿ ಮಗ್ಗಿ ಹೆವ್ಶಿಂ ಘುಂವ್ಲಿ.
"ಹಾವೆಂ ಚೆನ್ನಪ್ಪಾಕ್ ಸಾಂಗ್ಲಾಂ. ಕಾಮ್ ಸಗ್ಳೆಂ ಜಾವ್ನ್ ತೆ ಘರಾ ತೆವ್ಶಿಂ ಯೇಂವ್ದಿತ್. ತುಮಿಂಯ್ ಯೆಯಾ.....!"
ಧನಿಯಾನ್ ಸಾಂಗ್ಲೆಲೆಂ ಆಯ್ಕೊನ್ ’ಜಾಯ್ತ್’ ಮ್ಹಳ್ಳ್ಯಾ ಭಾಶೆನ್ ಮಗ್ಗಿನ್ ತಕ್ಲಿ ಹಾಲಯ್ಲಿ.
"ಚಲ್...... ಯಾ ಮಿಶೇಲ್!" ಚ್ಯಾರ್ ಮೆಟಾಂ ಚಲೊನ್ ಗೆಲ್ಲೊ ಜೆರೊಮ್ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್ "ಸಾಂಗ್ಲೆಲ್ಯಾ ಪರಿಂ ಸೆಲ್ಲಿಚಿ ಕಾಂಯ್ ಖಬಾರ್ ಆಸಾ? ಹಾಂಗಾ ಆಯ್ಲ್ಯಾರ್ ಘರಾಲಾಗಿಂಯ್ ಯೇವ್ನ್ ವಚೊಂಕ್ ಸಾಂಗ್!"
ಮಗ್ಗಿ ಆಯ್ಕಾತಾಲಿ ಮಾತ್ರ್. ತಿಕಾ ಸೆಲ್ಲಿಚಾ ವಿಶಯಾಂತ್ ಕಾಂಯ್ಚ್ ಉಲಂವ್ಚೆಂ ಹಕ್ಕ್ ನಾತ್ಲ್ಲೆಂ. ಸೆಲ್ಲಿ ತಿಚೆಂ ಧುವ್ ಜಾವ್ನ್ ತಿಚ್ಯಾ ಘರಾಂತ್ ಆಸ್ಲ್ಲ್ಯಾ ಪ್ರಾಸ್ ಚಡ್ ಜೆರೊಮಾನ್ ತಾಕಾ ಪೊಸ್ಲಾಂ, ತಾಚೆಂ ಬರೆಂ ವಾಯ್ಟ್ ಕೆಲಾಂ, ತಾಚ್ಯೆ ಥಾವ್ನ್ ಆಪ್ಲ್ಯಾ ಉರ್ಲೆಲ್ಯಾ ಭುರ್ಗ್ಯಾಂಕ್ ಬರೆಂ ಮೆಳ್ಳಾಂ ತೆಂ ತಿ ಜಾಣಾಂ.
ಆಜೊ ಆನಿ ನಾತ್, ದೊಗಾಂಯ್ ಚಲೊನ್ ವೆಚೆಂ ಆಪ್ಲ್ಯಾ ದೊಳ್ಯಾಂನಿಂ ಪಳಯಿತ್ತ್ ರಾವ್ಲೆಲಿ ಮಗ್ಗಿ ಸವ್ಕಾಸ್ ಆಪ್ಲ್ಯಾ ಕಾಮಾಕ್ ಲಾಗ್ಲಿ.
ತೊಟಾಚಾ ಆಳಾಂಚೊ, ತಾಂಚಾ ದಿಸ್ಪಡ್ತ್ಯಾ ವಾವ್ರಾಚೊ ವೇಳ್ ಜಾತಚ್, ತಾಂಚಿ ಹಪ್ತ್ಯಾಚಿ ಮಜೂರಿ ಮೆಜುನ್ ಜಿಪಾರ್ ನಾರ್ಲ್ ಚಡಯಿಲ್ಲೊ ಜೆರೊಮ್, ಆಪ್ಲ್ಯಾ ಘರಾಕ್ ಭಾಯ್ರ್ ಸರ್ಲೊ.
ಆಜ್ ಒಮ್ಜೂರಾಕ್ ಆಯಿಲ್ಲ್ಯಾ ಮಿಶೇಲಾಕ್, ಒಮ್ಜೂರ್ಚೆಂ ಆಯ್ಚೆಂ ತಾಚೆಂ ಪಯ್ಣ್, ಪಯ್ಲೆಂಚಾ ತಾಚ್ಯಾ ಪಯ್ಣಾ ಪ್ರಾಸ್ ವಿಂಗಡ್ಚ್ ಜಾಂವ್ಕ್ ಪಾವ್ಲ್ಲೆಂ. ಜಿವಿತಾಂತ್ ಉದೆವ್ನ್ ಯೆಂವ್ಚಾ ಎಕಾ ಲ್ಹಾರಾ ವಿಶಿಂ ತೆಂ ಸಮ್ಜಾಲ್ಲೆಂ. ಎಕಾ ಕುಶಿಂನ್ ತ್ಯಾ ಗಾಂವ್ಚಿಂ ಹಾಸ್ತಿಂ ಮುಖಮಳಾಂ........ ಸಂಪೂರ್ಣ್ ನೆಣ್ತ್ಯಾ ಭಾವನಾಂಕ್ ಪಾಂಗ್ರುನ್ ವಾಗೊನ್ ಯೆಂವ್ಚಿಂ ಲವೀನಾ ಆನಿ ಲಾಯ್ಡ್! ಎಕಾ ಕುಶಿನ್ ಕುಟ್ಮಾಕ್ ಸಾಂಬಾಳುಂಕ್ ಕಷ್ಟ್ ವಾಂವ್ಟ್ ಕಾಡುನ್ ಆಪ್ಲ್ಯಾ ಜಿವಿತಾಚಿ ಆಶಾ ಸಾಂಡುನ್ ಜಿಯೆಂವ್ಚೆಂ ಜಾನಕಿ! ಎಕಾ ಕುಶಿಂನ್ ಸಗ್ಳೆಂ ಆಸೊನ್ಯ್ ಕಾಂಯ್ಚ್ ನಾತ್ಲೆಲ್ಯಾ ಪರಿಂ ಜಾವ್ನ್, ನಿಮಾಣೆ, ಆಪ್ಲ್ಯಾ ನಾತಿಚಾ ಭರ್ವಸ್ಯಾಚೆರ್ ಜಿವಿತ್ ಸಾರ್ಚಿಂ ಜೆರೊಮ್ ಆನಿ ಎಸ್ತೆಲ್! ಎಕಾ ಕುಶಿಂನ್ ಜಿಯೆಂವ್ಕ್ ಕಷ್ಟೊನ್ಯ್ ಜಿವಿತಾಂತ್ ಸದಾಂ ಆಪ್ಲ್ಯಾಂಚಾ ಸಾಂಗಾತಾ ಖುಶ್ ಆಸ್ಚಿ ಮಗ್ಗಿ!
ಜಿಪಾರ್ ಬಸ್ಲೆಲೆಂ ಮಿಶೇಲ್, ಜೀಪ್ ಆತಾಂ ಒಮ್ಜೂರ್ ಇಗರ್ಜೆಚೊ ರಸ್ತೊ ಸೊಡುನ್ ರಾಜ್ ರಸ್ತ್ಯಾಕ್ ಪಾವ್ತಾನಾ, ಆಪ್ಲೊ ವೇಗ್ ಚಡ್ ಆರಾವ್ನ್ ಧಾಂವೊಂಕ್ ಲಾಗ್ಲೆಲ್ಯಾ ಪರಿಂ, ಮಿಶೇಲಾಚಿಂ ಚಿಂತ್ನಾಯ್ ತಾಚ್ಯಾ ಮತಿಂತ್ ವೇಗ್ ಆರಾವ್ನ್ ಉದೆವ್ನ್ ಯೇಂವ್ಕ್ ಲಾಗ್ಲಿಂ.
ಆಪ್ಣೆ ಸಾಡೆ ತೀನ್ ವೊರಾಂ ಪಯ್ಲೆಂ ಪಯ್ಣ್ ಕರುನ್ ಆಯ್ಲೆಲ್ಯಾ ವಾಟೆನ್, ಆತಾಂ ಪಾಟಿಂ ಪರ್ತೊಂಚಾ ವೆಳಾರ್, ಮಿಶೇಲ್ ಆಪ್ಣಾಕ್ಚ್ ಸೊಧುಂಕ್ ಲಾಗ್ಲೆಂ.
ತಿ ವಾಟ್ ಕಾಂಯ್ ನವಿ ನ್ಹಯ್. ತಿ ಸದಾಂಚಿ!
ತೆಂ ಪಯ್ಣ್ ಕಾಂಯ್ ನವೆಂ ನ್ಹಯ್. ತೆಂ ಸದಾಂಚೆಂ!
ಆಪುಣ್ ಆನಿ ಆಪ್ಣಾಚೊ ಆಜೊ ಕಾಂಯ್ ನವಿಂ ನ್ಹಯ್. ಆಮಿಂಯ್ ಸದಾಂಚಿಂ!
ತರ್.....!
ಜೆರೊಮಾನ್ ಡ್ರೈವಿಂಗ್ ಕರ್ಚೆಂ ಟಾಟಾ ಸಫಾರಿ ಜೀಪ್ ಆತಾಂ ತ್ಯಾ ಅಡ್ಯಾರ್ಚಾ ಪರಿಸರಾಕ್ ಲಾಗಿ ಪಾವ್ಲೆಲೆಂ. ರಾಜ್ ರಸ್ತ್ಯಾಚಾ ಹೆವ್ಶಿಂ ತೆವ್ಶಿಂ ದೊನ್ಯ್ ಕುಶಿಂನಿಂ ಶೆತಾಂ ದಿಸ್ತಾಲಿಂ. ಮಿಶೇಲಾನ್ ಜಿಪಾ ಭಿತರ್ ಥಾವ್ನ್ ಆಪ್ಲಿ ದೀಶ್ಟ್ ಭಾಯ್ರ್ ಭೊಂವ್ಡಾಯ್ಲಿ.
ಕಾಂಯ್ಚ್ ವೊಂಪುಕ್ ನಾತ್ಲೆಲಿಂ ಬಂಜರ್ ಶೆತಾಂ!
ಮಿಶೇಲಾಚಿ ದೀಷ್ಟ್ ಹೆವ್ಶಿಂ ಬೊಂವ್ತಾನಾ, ಹ್ಯಾ ಕುಶಿಚಾ ಶೆತಾಂ ಪಯ್ಕಿ ಎಕಾ ಶೆತಾಂತ್ ರಾಂದ್ವಯ್ ಕೆಲ್ಲಿ ತಾಕಾ ದಿಸ್ಲಿ. ತ್ಯಾ ಶೆತಾಕ್ ಲಾಗೊನ್ ಏಕ್ ತಳೆಂ. ತಳ್ಯಾಂತ್ ಫಕತ್ತ್ ಪಾಮಾಜಿ ಆನಿ ಉದ್ಕಾ ಝಡಾಂ ಸೊಡ್ಲ್ಯಾರ್ ತಾಂತುಂ ಉದಾಕ್ ದಿಸಾನಾತ್ಲೆಲೆಂ. ತಳ್ಯಾ ವಯ್ಲಿ ದೀಷ್ಟ್ ಮುಕಾರ್ ಧಾಂವ್ತಾನಾ ರಾಂದ್ವಯ್ ಕೆಲ್ಲ್ಯಾ ಶೆತಾಂತ್ ಗಾಯ್ ಏಕ್ ರಾಂದ್ವಯೆಚಾ ಝಡಾಂಕ್ಚರವ್ ಮ್ಹಣೊನ್ ಚಿಂತುನ್ ಚರ್ತಾಲಿ.
ಮತಿಚ್ಯಾ ಕೊನ್ಶ್ಯಾಂತ್ ಕೊಣೆಂಗೀ ಸುವಿಯೆನ್ ತೊಪ್ಲ್ಲ್ಯಾಪರಿಂ ಜಾವ್ನ್ ಮಿಶೇಲಾನ್ ತ್ಯಾ ಗಾಯ್ಕ್ಚ್ ಪಳೆಲೆಂ. ಗಾಯ್ಚಾ ಗೊಮ್ಟ್ಯಾಕ್ ಬಾಂದ್ಲೆಲಿ ದೊರಿ ಆನಿ ತ್ಯಾ ದೊರಿಯೆಕ್ ಪೊಂತಾರ್ ಗಾಂಟಾಯಿಲ್ಲೊ ಖುಂಟ್ಯ್ ಆಸ್ಲ್ಲೊ.
ತಿಚ್ಚ್ ಗಾಯ್!
ವ್ಹಯ್! ಆಪುಣ್ ಒಮ್ಜೂರಾಕ್ ವೆಚಾ ವಗ್ತಾರ್ ತ್ಯಾ ಗಾಯ್ಕ್ ತಳ್ಯಾ ದೆಗೆನ್ ಖುಂಟ್ ಮಾರುನ್ ತ್ಯಾ ಖುಂಟಾಕ್ ಬಾಂದ್ಲೆಲಿ ಮಿಶೇಲಾನ್ ಪಳೆಲ್ಲೆಂ.
ಪುಣ್ ಆತಾಂ......?
ಜೀಪ್ ಧಾಂವ್ತಾಂ ಧಾಂವ್ತಾ ಮಿಶೇಲಾಚಾ ದೊಳ್ಯಾಂ ಮುಕ್ಲೆಂ ಹೆಂ ದ್ರಶ್ಯ್ ಪಾಟಿಂ ಧಾಂವ್ಲೆಂ.
ತಾಚಿ ಮತ್ ಕಿತ್ಯಾಕ್ಗಿ ತೆಂ ದ್ರಶ್ಯ್ ಪರ್ತ್ಯಾಕ್ ಪಳಂವ್ಕ್ ಆಶೆಲಿ. ತೆಂ ಪಾಟಿಂ ಘುಂವ್ಲೆಂ. ಜಿಪಾಕ್ ತೆಂಕೊನ್ ಮ್ಹಳ್ಳ್ಯಾ ಪರಿಂ ಜಿಪಾಚಾ ಪಾಟ್ಲ್ಯಾನ್ ಥಾವ್ನ್ ಯೆಂವ್ಚಾ ಗವರ್ನ್ಮೆಂಟಾಚಾ ಬಸ್ಸಾನ್ ಮಿಶೇಲಾಚಾ ದೊಳ್ಯಾಂಕ್ ತಾಣೆಂ ಆಶೆಲ್ಲೆಂ ದ್ರಶ್ಯ್ ಪಳಂವ್ಕ್ ಆವ್ಕಾಸ್ ದಿಲೊ ನಾ.
ಆಪ್ಲ್ಯಾ ಬಸ್ಕೆರ್ ಥಾವ್ನ್ ಪಾಟಿಂ ಘುಂವೊನ್ ಪಳಂವ್ಚ್ಯಾ ನಾತಿಕ್ ಪಳೆಲ್ಲ್ಯಾ ಜೆರೊಮಾಕ್, ಆಪ್ಲೆಂ ನಾತ್ ಪಾಟಿಂ ಪಳವ್ನ್, ಪಾಟ್ಲ್ಯಾನ್ ಕಿತೆಂ ತರ್ಯ್ ಸೊಧ್ತಾ ಮ್ಹಳ್ಳ್ಯಾ ಪರಿಂ ದಿಸ್ಲೆಂ.
"ಕಿತೆಂ ಜಾಲೆಂ ಮಿಶೇಲ್?" ಅಪ್ರಯತ್ನಾನ್ ಮ್ಹಳ್ಳ್ಯಾಪರಿಂ ಜೆರೊಮಾನ್ ಆಪ್ಲಿ ನದರ್, ಜಿಪಾ ಭಿತರ್ಲ್ಯಾ ಸೆಂಟರ್ ಮಿರರಾರ್ ಖಂಚಯ್ಲಿ. ತಾಕಾ ತ್ಯಾ ಮಿರರಾಂತ್ ಕಾಂಯ್ಚ್ ದಿಸ್ಲೆಂ ನಾ.
"ಕಾಂಯ್ ನಾ ಅಬಾ!" ಥೊಡಿಂ ಕ್ಷಣಾಂ ಮೌನ್ ಸಾಂಬಾಳ್ಲ್ಲೆಂ ಮಿಶೇಲ್, ".......ತಿ ಗಾಯ್.....!"
"ಗಾಯ್.......? ಖಂಯ್ಚಿ ಗಾಯ್?"
"ತಿ......, ಪಾಟ್ಲ್ಯಾನ್ ಶೆತಾಂತ್ಲ್ಯಾ ರಾಂದ್ವಯೆಂತ್ ಚರ್ತಾಲಿ.....!"
ನಾತಿಚಿಂ ಉತ್ರಾಂ ಆಯ್ಕೊನ್ ಜೆರೊಮಾಚಾ ತೊಂಡಾರ್ ಹಾಸೊ ಉದೆಲ್ಯೊ.
"ತಾಂತುಂ ಕಿತೆಂ ಆಸಾ....?"
"ಪಯ್ಲೆಂ ತಿ ಗಾಯ್ ರಸ್ತ್ಯಾ ದೆಗೆಚಾ ತಳ್ಯಾ ಲಾಗಿಂ ಬಾಂದ್ಲೆಲಿ ಆಸ್ಲ್ಲಿ!"
"ಗಾಯ್ಕ್ ಬೂದ್ ಆಸ್ಲ್ಲಿ ಜಾಲ್ಯಾರ್ ತಿ ತ್ಯಾ ರಾಂದ್ವಯೆಂತ್ ಚರ್ತಿವೇ ಪುತಾ? ತಿಕಾ ಜಾಣ್ವಾಯ್ ನಾ ದೆಕುನ್ ಚರ್ತಾ!" ಜೆರೊಮಾಚಾ ವೊಂಟಾರ್ ಪರ್ತ್ಯಾಕ್ ಹಾಸೊ ಉದೆಲ್ಯೊ. ನಾತಿ ಲಾಗಿಂ ಉಲಯ್ತಾಂ ಉಲಯ್ತಾಂ ಸೈಡ್ ಮಿರರಾಚೆರ್ ನದರ್ ಮಾರ್ಲೆಲ್ಯಾ ತಾಕಾ ತೆಂ ಬಸ್ಸ್ ಆಪ್ಣಾ ಪಾಟ್ಲ್ಯಾನ್ ಚಡ್ಚ್ಚ್ ತೆಂಕೊನ್ ಯೆತಾ ತೆಂ ಕಳೊನ್ ಜಿಪಾಕ್ ಥೊಡೆಂ ದೆಗೆನ್ ರಸ್ತ್ಯಾ ವಯ್ಲೆಂ ಸಕಯ್ಲ್ ದೆಂವಯಿಲ್ಲ್ಯಾ ತಾಣೆಂ ತ್ಯಾ ಬಸ್ಸಾಕ್ ಫುಡೆಂ ವಚೊಂಕ್ ದಿಲೆಂ.
"ತುಂ ತ್ಯಾ ಗಾಯ್ ವಿಶಿಂ ಚಿಂತಾಯ್?" ಆಪ್ಲಿ ನಾತ್ ಅಜೂನ್ ತ್ಯಾಚ್ ಕಸಲ್ಯಾಗೀ ಸಿಂತಿಮೆಂತಾನಿ ಬುಡ್ಲೆಲ್ಯಾ ಪರಿಂ ಜೆರೊಮಾಕ್ ದಿಸ್ಲೆಂ.
"ನ್ಹಯ್!" ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲ್ಲ್ಯಾ ಮಿಶೇಲಾನ್ ಆಪ್ಲ್ಯಾ ಪಾಂಯಾಕ್ ಲಾಂಭ್ ಸೊಡ್ಲೆಂ.
"ನ್ಹಯ್....!? ಮಾಗಿರ್ ಖಂಯ್ಚಾ ವಿಶಿಂ......?"
"ಆಮ್ಚೆ ವಿಶಿಂ!"
"ಆಮ್ಚೆ ವಿಶಿಂ?" ಅಚಾನಕ್ ಜೆರೊಮಾಕ್ ಆಶ್ಚರ್ಯಾಚೊ ಧಖೊ ಮಾರ್ಲೊ. "....ಆಮ್ಚೆ ವಿಶಿಂ ಕಿತೆಂ?"
"ಪ್ರಾಯ್ವತಾಂಕ್ ಪೊಸ್ಚಿಂ ಘರಾಂ ಖಂಯ್ ಆಸಾತ್?"
ನಾತಿಚೆಂ ಸವಾಲ್ ಆಯ್ಕೊನ್ ಜೆರೊಮ್ ಪಯ್ಲೆಂಚಾ ಪ್ರಾಸ್ ದೊಡ್ಯಾನ್ ಆಶ್ಚರ್ಯ್ಚಕಿತ್ ಜಾಲೊ. ಮಿಶೇಲಾಚಾ ತೊಂಡಾ ಥಾವ್ನ್ ಹೆಂ ಸವಾಲ್ ಆಯ್ಕೊಂಕ್ ಮೆಳಾತ್ ಮ್ಹಣೊನ್ ತಾಣೆಂ ಚಿಂತುಂಕ್ ಸಯ್ತ್ ನಾ.
"ಪ್ರಾಯ್ವತಾಂಕ್ ಪೊಸ್ಚಿಂ ಘರಾಂ.....? ಆಸಾತ್......! ಕಿತ್ಯಾಕ್?"
"ಆಮ್ಕಾಂ ಥಂಯ್ ವಚೊಂಕ್ ಜಾತಾ?"
"ವೆಚ್ಯಾಂತ್ ಕಿತೆಂ ಆಸಾ? ಕೊಣಾಯ್ಕ್ಯ್ ವಚ್ಯೆತ್.....! ಆಮ್ಚಿಂ ಕೊಣ್ಯ್ ಆಸ್ಲ್ಯಾರ್ ಆಮ್ಕಾಂಯ್ ವಚ್ಯೆತ್!"
"ಆಮ್ಚಿಂ ನಾಂತ್ ಜಾಲ್ಯಾರ್ ವಚೊಂಕ್ ಜಾಯ್ನಾ?"
"ವಚ್ಯೆತ್. ಭೆಟ್ ದೀವ್ನ್ ಯೆವ್ಯೆತ್!"
ಆಪ್ಣಾಚೆಂ ನಾತ್ ಆಪ್ಣಾಕ್ ಹಿಂ ಸಗ್ಳಿಂ ಸವಾಲಾಂ ಕಿತ್ಯಾಕ್ ವಿಚಾರ್ತಾ ತೆಂ ಜೆರೊಮಾಕ್ ಸಮ್ಜಾಲೆಂ ನಾ.
"ವ್ಹಯ್...! ...... ಆತಾಂ ತುಂ ಮ್ಹಾಕಾ ಹೆಂ ಸಗ್ಳೆಂ ಕಿತ್ಯಾಕ್ ವಿಚಾರ್ತಾಯ್?"
"ಆಶೆಂಚ್!" ಥೊಡೊ ವೇಳ್ ಮೌನ್ ಜಾಲ್ಲೆಂ ಮಿಶೇಲ್, "......ಮ್ಹಾಕಾ ಆಪವ್ನ್ ವರ್ತಾಯ್?"
"ಖಂಯ್? ಆಸ್ರ್ಯಾಕ್!?"
"ಆಸ್ರೊ....!?" ಮಿಶೇಲಾಕ್ ಹೊ ನವೊ ಸಬ್ದ್ ಸಮ್ಜಾಲೊ ನಾ.
"ಪ್ರಾಯ್ವಂತಾಚಾ ಘರಾಂಕ್ ಆಸ್ರೊ ಮ್ಹಣ್ಯೆತ್. ಕೊಣ್ಯ್ ಗತ್ ಆಧಾರ್ ನಾತ್ಲೆಲ್ಯಾಂಕ್ ಥಂಯ್ ಪೊಸ್ತಾತ್ ಜಾಲ್ಲ್ಯಾನ್ತ್ಯಾ ಘರಾಂಕ್ ಆಸ್ರೊ ಮ್ಹಣ್ತಾತ್. ತುಕಾ ಥಂಯ್ ವಚೊಂಕ್ ಜಾಯ್?"
"ವ್ಹಯ್!"
ಮಿಶೇಲಾಚಾ ತೊಂಡಾಕ್ ಪಳೆಲ್ಲ್ಯಾ ಜೆರೊಮಾಕ್ ಆಜ್ ಆಪ್ಲ್ಯಾ ನಾತಿಚಾ ತೊಂಡಾರ್ ದುಸ್ರೊಚ್ ಛಾರೊ ಜಳ್ಕಾಲೊ. ಹ್ಯಾ ಬದ್ಲಾಲ್ಲ್ಯಾ ಛಾರ್ಯಾಚೆಂ ಕಾರಾಣ್ ಕಿತೆಂ ತೆಂ ತಾಕಾ ಸಮ್ಜಾಲೆಂ ನಾ.
"ತುಕಾ ಹಾವೆಂ ಕೆದ್ನಾಂಯ್ ಖಂಯ್ಚೇಂಯ್ ನಾ ಮ್ಹಣೊನ್ ಸಾಂಗ್ಲಾಂ ಪುತಾ? ತುಕಾ ಖಂಯ್ ವಚೊಂಕ್ ಜಾಯ್ ತೆಂ ಸಾಂಗ್. ತುಕಾ ಹಾಂವ್ ಆಪವ್ನ್ ವರ್ತಾಂ!"
"ಮ್ಹಾಕಾ ಮ್ಯಾಂಚೆಸ್ಟರಾಕ್ ಆಪವ್ನ್ ವರ್ತಾಯ್?" ಮಿಶೇಲಾನ್ ಆಪ್ಲ್ಯಾ ದೀಷ್ಟೆಕ್ ನಿಟ್ಟ್ ತ್ಯಾ ಮುಕ್ಲ್ಯಾ ಆರ್ಶ್ಯಾ ಭಾಯ್ಲ್ಯಾ ರಸ್ತ್ಯಾರ್ಚ್ ಕೇಂದ್ರೀಕ್ರತ್ ಕೆಲ್ಲಿ.
ತಿತ್ಲೆಂಚ್!
"ಮ್ಯಾಂಚೆಸ್ಟರ್!" ಸಬ್ದ್ ಕಾನಾಂಕ್ ಪಡ್ಲ್ಲೆಂಚ್ ಆಪಾಪಿಂಚ್ ಜೆರೊಮಾಚೊ ಪಾಂಯ್ ಎಕ್ಸಿಲೇಟರಾ ವಯ್ಲೊ ಉಟೊನ್ ಜಿಪಾಚಾ ಬ್ರೇಕಿಚೆರ್ ಬಸ್ಲೊ. ತಾಚೆ ಪಾಟ್ಲ್ಯಾನ್,
"ಕಿರ್ರ್...ರ್ರ್...ರ್ರ್..!" ಆವಾಜ್ ಕರುನ್ ಜೀಪ್ ’ಗಕ್ಕ್’ ಕರುನ್ ರಾವ್ತಾನಾ, ಏಕ್ ಪಾವ್ಟಿಂ ಆಪ್ಣೆಂ ಬಸ್ಲೆಲ್ಯಾ ಬಸ್ಕೆರ್ ಮುಕಾರ್ ಪಾಟಿಂ ಜಾಲ್ಲ್ಯಾ ಮಿಶೇಲಾನ್ ಆಪ್ಲ್ಯಾ ಹಾತಾಂಕ್ ಫುಡೆಂ ಕರುನ್ ಡ್ಯಾಶ್ ಬೋರ್ಡಾಕ್ ಧರುನ್, ಆಪ್ಣಾಕ್ಚ್ ಸಾಂಬಾಳ್ಳೆಂ.
ತಿತ್ಲ್ಯಾರ್......!,
ಹೈವೇ ವಯ್ಲ್ಯಾನ್ ವೇಗಾನ್ ಯೆಂವ್ಚೆಂ ಏಕ್ ಟ್ರಕ್ ’ಪೇಂ’ ಕರುನ್ ಕಾನ್ ಪುಟ್ತಾ ವರೇಗ್ ಹಾರನ್ ಮಾರ್ಲೆಲೆಂ ತೆಂ ಜಿಪಾಕ್ ಓವರ್ಟೇಕ್ ಕರುನ್ ಮುಕಾರ್ ಧಾಂವ್ ಮಾರ್ತಾನಾ, ತ್ಯಾ ಟ್ರಕ್ಕಾಕ್ಚ್ ಪಳವ್ನ್, ತೆಂ ಆಪ್ಲ್ಯಾ ದೊಳ್ಯಾಂ ಮುಕ್ಲೆಂ ಮಾಯಾಗ್ ಜಾತಾನಾ, ಮಿಶೇಲಾನ್ ಸವ್ಕಾಸ್ ಆಪ್ಲ್ಯಾ ಮುಖಮಳಾಕ್ ಆಜ್ಯಾ ತೆವ್ಶಿಂ ಘುಂವ್ಡಾಯ್ಲೆಂ.
’ಮ್ಯಾಂಚೆಸ್ಟರ್!’ ನಾಂವ್ ಆಯ್ಕೊನ್ ಏಕ್ ಪಾವ್ಟಿಂ ಝಿಂಟ್ ಉಡ್ಲ್ಲ್ಯಾ ಪರಿಂ ಜಾಲ್ಲ್ಯಾ ಜೆರೊಮಾನ್ ದುಸ್ರ್ಯಾ ಕ್ಷಣಾರ್ ಮತಿಚಾ ಸಂತುಲನಾರ್ ಯೇವ್ನ್ ಥಾಂಬೊಂಕ್ ತಯಾರ್ ಜಾಲ್ಲ್ಯಾ ಜಿಪಾಚಿ ಗೇರ್ ಬದ್ಲುನ್ ಜೀಪಾಚೆಂ ಎಕ್ಸಿಲೇಟರ್ ದಾಂಬ್ಲೆಂ.
ಜೆರೊಮಾನ್ ಆಪ್ಲ್ಯಾ ನಾತಿಚಾ ಕುಶಿಂನ್ ಘುಂವೊನ್ ತಾಚೆರ್ ಏಕ್ ನದರ್ ಜೊಕ್ಲಿ ಮಾತ್ರ್ ಶಿವಾಯ್ ತೊ ಕಾಂಯ್ಚ್ ಉಲಂವ್ಕ್ ನಾ. ತಾಚೆಂ ಗಿನ್ಯಾನ್ ಆತಾಂ ಫಕತ್ತ್ ರಸ್ತ್ಯಾರ್ ಆಸ್ಲ್ಲೆಂ.
ಮ್ಯಾಂಚೆಸ್ಟರಾಚೆಂ ನಾಂವ್ ಆಯ್ಕೊನ್ ಆಪ್ಲ್ಯಾ ಆಜ್ಯಾಚಾ ಕುಡಿ ಮನಾಂತ್ ಜಾಲ್ಲ್ಯಾ ಬದ್ಲಾವಣೆಕ್ ಆಪ್ಲ್ಯಾ ದೊಳ್ಯಾಂ ಸಾಮ್ಕಾರ್ಚ್ ಮಿಶೇಲ್ ಪಳಂವ್ಕ್ ಸಕ್ಲೆಂ. ಆಪ್ಣಾ ಶಿವಾಯ್ ಆಪ್ಲ್ಯಾ ಆಜ್ಯಾಕ್ ಆನಿ ಆಜಿಯೆಕ್ ದುಸ್ರಿ ಕಾಂಯ್ ಗತ್ ಆಧಾರ್ ನಾ ಮ್ಹಳ್ಳೆಂ ತೆಂ ತಾಚ್ಯಾ ಆಜ್ಯಾಚಾ ಆತ್ತಾಂಚಾ ಅಚಾನಕ್ ಬದ್ಲಾಲ್ಲ್ಯಾ ವರ್ತಾನಾಕ್ ಪಳವ್ನ್ ತೆಂ ಜಾಣಾಂ ಜಾಲೆಂ.
ಆತಾಂ ಮಿಶೇಲಾಚಾ ದೊಳ್ಯಾಂ ಮುಕಾರ್ ಸವ್ಕಾಸ್ ಲವೀನಾ ಆನಿ ಲಾಯ್ಡಾಚಿಂ ರುಪಾಂ ಉದೆವ್ನ್ ಅಯ್ಲಿಂ.
ತಾಚ್ಯಾ ಪಾಟ್ಲ್ಯಾನ್ ತಿಚ್ಚ್ ತ್ಯಾ ಶೆತಾಕ್ ಚರ್ಚಿ ಗಾಯ್.....!
************
ಮಿಶೇಲ್....!
ಜೆವ್ಣಾಚಾ ಮೆಜಾರ್ ಬಸ್ಲೆಲಿ ಎಸ್ತೆಲ್ ಮಿಶೇಲಾಕ್ಚ್ ಪಳೆತಾಲಿ.
ರಾತಿಚಾ ಜೆವ್ಣಾಕ್ ಮೆಜಾರ್ ಬಸ್ಲೆಲೆಂ ಮಿಶೇಲ್ ಆಪ್ಲೆಂ ಜೆವಾಣ್ ಜೆಂವ್ಚಿ ಉಮೆದ್ ನಾಸ್ತಾನಾ, ಆಪ್ಲ್ಯಾ ಭಾರೀಕ್ ಮೊವಾಳ್ ಬೊಟಾಂನಿಂ ಬೊಶಿಯೆಂತ್ಲ್ಯಾ ಶಿತಾ ಸಾಂಗಾತಾ ಖೆಳ್ತಾ ತಶೆಂ ತಿಕಾ ದಿಸ್ಲೆಂ. ಆಪ್ಲೆಂ ನಾತ್ ಆಸಲ್ಯಾ ವರ್ತನಾಂತ್ ಎದೊಳ್ ಆಸ್ಲೆಲೆಂ ತೆಂ ತಿಣೆಂ, ಹ್ಯಾ ಆದಿಂ ಪಳಂವ್ಕ್ ನಾತ್ಲೆಲೆಂ. ಜೆರೊಮಾನ್ ಎದೊಳ್ಚ್ಚ್ ಆಪ್ಲೆಂ ಜೆವಾಣ್ ಆರಂಭ್ ಕೆಲ್ಲೆಂ.
ಆಪ್ಣಾ ಮುಕಾರ್, ಜೆವ್ಣಾ ಮೆಜಾರ್ ಹಾಜರ್ ಆಸ್ಲ್ಲ್ಯಾ ಹ್ಯಾ ಬೊಶಿಯೆಂತ್ಲ್ಯಾ ಶಿತಾ ಮಧೆಂ, ಖಂಯ್ಚರ್ ತರ್ಯ್ ಆನಿ ಕಸಲೆಂ ತರ್ಯ್ ಸಮ್ಜಣೆಚೆಂ ದಿರ್ವೆಂ ಲಿಪೊನ್ ಆಸಾ ತಶೆಂ ಭೊಗ್ಲ್ಲೆಂ ಮಿಶೇಲ್, ಆಪ್ಲ್ಯಾ ಹಾತಾ ಬೊಟಾಂನಿ ತ್ಯಾ ದಿರ್ವ್ಯಾಕ್ ಸೊಧುಂಕ್ ಲಾಗ್ಲೆಂ.
"ಶಿತ್....!"
ಪಳಂವ್ಕ್ ಚಿಲ್ಲಾರಾಯೆಚೆಂ ಖಾಣ್. ಹ್ಯಾಚ್ ಶಿತಾಕ್ ದೀಸ್ ಆನಿ ರಾತ್ ಖಾವ್ನ್ ಜೇವ್ನ್ ವ್ಹಾಡ್ಲಲೊ ಆಪ್ಲೊ ಬಾಪಯ್ ಹ್ಯಾಚ್ ಶಿತಾಕ್ ಸೊಡುನ್ ಇಂಗ್ಲೆಂಡಾಕ್ ಪಾವ್ಲೊ. ತ್ಯಾ ಮ್ಯಾಂಚೆಸ್ಟರಾಂತ್ ಹಾಂವ್ ಹೆಂ ಶಿತ್ ಜೆವ್ಲ್ಯಾಂ? ಆಪ್ಲ್ಯಾ ಚಿಂತ್ಚ್ಯಾ ಮತಿಕ್, ಮಿಶೇಲಾನ್ ಏಕ್ ಪಾವ್ಟಿಂ ಮಸ್ತ್ ಪಾಟಿಂ ಆಪ್ಲ್ಯಾ ನೆಣ್ತ್ಯಾಪಣಾಕ್ ಪಾಟಿಂ ಧಾಂವ್ಡಾಯ್ಲೆಂ.
ಮ್ಯಾಂಚೆಸ್ಟರಾ ಥಾವ್ನ್ ಆಪ್ಣೆಂ ಮಂಗ್ಳುರಾಕ್ ಆಯ್ಲೆಲ್ಯಾ ವಗ್ತಾರ್ ಕ್ಯಾಥರೀನಾನ್ ಆಪ್ಣಾಚಾ ವಸ್ತುಂಚಾ ಸಾಂಗಾತಾ ದಾಡುನ್ ದಿಲ್ಲೊ ಆಲ್ಬಮ್ ಉಡಾಸ್ ಯೇವ್ನ್ ಮಿಶೇಲಾಚಿ ಮತ್ ತ್ಯಾ ಫೋಟೊ ಆಲ್ಬಮಾಕ್ ಆಪ್ಲ್ಯಾ ಮತಿಂತ್ಚ್ ಸೊಧುಂಕ್ ಲಾಗ್ಲಿ.
ಆಬ್ಳೆ...!
ಭೋವ್ ಸೊಭಿತ್ತ್ ನಿತಳ್ ತಸ್ವೀರೆಂಚೊ ತೊ ಆಲ್ಬಮ್ ಮಿಶೇಲಾಚಾ ದೊಳ್ಯಾ ಮುಕಾರ್ ಉಭೊ ಜಾಲೊ. ಜಶೆಂ ಬೊಶಿಯೆಂತ್ಲ್ಯಾ ಶಿತಾಕ್ ತಾಚಿಂ ಬೊಟಾಂ ವಯ್ರ್ ಪಂದಾ ಪರ್ತಿತಾಲಿಂ, ತಶೆಂ, ತಾಚ್ಯಾ ಮತಿಂತ್ ಆಪ್ಣೆ ಹಾಡ್ಲೆಲ್ಯಾ ಆಲ್ಬಮಾಂತ್ಲಿ ಎಕೇಕ್ಚ್ ತಸ್ವೀರ್ ಆಪ್ಲಿಂ ಪಾನಾಂ ಪರ್ತುಂಕ್ ಲಾಗ್ಲಿ.
ಲ್ಹಾನ್ ನೆಣ್ತೆಂ ಮಿಶೇಲ್! ತಾಚ್ಯೆ ಸಾಂಗಾತಾ ತಾಚೊ ಬಾಪಯ್ ಆನಿ ತಾಚಿ ಆವಯ್! ತಸ್ವೀರೆಂತ್ಲಿಂ ರುಪಾಂ ಮಿಶೇಲಾಚಾ ದೊಳ್ಯಾ ಮುಕಾರ್ ಉಭಿಂ ಜಾಲಿಂ. ತಾಚ್ಯ್ ಪಾಟ್ಲ್ಯಾನ್ ಕ್ಯಾಥರೀನ್, ಸೈಮನ್, ಕ್ರಿಸ್ಟಿನಾ, ಅಲೆಕ್ಸ್ ಆನಿ....... ಆನಿ ಕಾಂಯ್ ನಾ. ತ್ಯಾ ಫೋಟೋ ಆಲ್ಬಮಾಕ್ ಸೊಡ್ಲ್ಯಾರ್ ಆಪ್ಣಾಚಾ ಆಸ್ಥಿತ್ವಾಚೊ ವಾದ್ ಮಾಂಡುಂಕ್ ಕಾಂಯ್ಚ್ ರುಜ್ವಾತಿ ನಾಂತ್.
ನಾ.... ಏಕ್ ರುಜ್ವಾತ್ ಆಸಾ! ಪಾಸ್ಪೋರ್ಟ್.......! ಮ್ಹಜೊ ಬ್ರಿಟಿಶ್ ಪಾಸ್ಪೋರ್ಟ್!
"ಮಿಶೇಲ್.....? ಕಿತೆಂ ಚಿಂತಾಯ್ ಪುತಾ?"
ಆಪ್ಲೆಂ ನಾತ್ ಅಜೂನ್ ಜೆವ್ಣಾಚೆರ್ ಧ್ಯಾನ್ ದೀಂವ್ಕ್ ಸಕೊಂಕ್ ನಾ ತೆಂ ಪಳೆಲ್ಲ್ಯಾ ಎಸ್ತೆಲಾನ್ ಮಿಶೆಲಾಕ್ ಜಾಗಯ್ಲೆಂ.
ಆಜಿಯೆನ್ ಆಪಯಿಲ್ಲೆಂ ಕಾನಾರ್ ಪಡ್ಲೆಂ ತರ್ಯ್ ತ್ಯಾ ಉತ್ರಾಂಚೊ ಪ್ರಭಾವ್ ತಾಚ್ಯಾ ಕಾರ್ಯಾಂತ್ ದಿಸೊನ್ ಆಯ್ಲೊ ನಾ.
"ಮಿಶೇಲ್.....?" ಆಜಿಯೆನ್ ಪರ್ತ್ಯಾಕ್ ನಾತಿಕ್ ಜಾಗಂವ್ಚೆಂ ಪ್ರಯತ್ನ್ ಕರ್ತಾನಾ, ಜೆರೊಮ್, ಏಕ್ ಪಾವ್ಟಿಂ ಆಪ್ಲ್ಯಾ ಬಾಯ್ಲೆಕ್ ಪಳೆಲ್ಲೊ ತೊ ಆತಾಂ ನಾತಿಚಾ ಕುಶಿಂನ್ ಪಳಂವ್ಕ್ ಲಾಗ್ಲೊ.
ದುಸ್ರೆ ಪಾವ್ಟಿಂ ಆಜಿಯೆನ್ ಆಪಯಿಲ್ಲೆಂ ಆಯ್ಕಾಲ್ಲ್ಯಾ ಮಿಶೇಲಾನ್, ಸವ್ಕಾಸ್ ಆಪ್ಲಿ ತಕ್ಲಿ ವಯ್ರ್ ಉಕೊಲ್ಲಿ. ಎದೊಳ್ ಪಾಸೊನ್ ತಾಚಿ ದೀಷ್ಟ್ ತ್ಯಾ ಬೊಶಿಯೆಂತ್ಲ್ಯಾ ಶಿತಾಂತ್ ಸೊಧುನ್ ಆಸ್ಲ್ಲಿ.
"ಹಾಂ....?" ಮಿಶೇಲಾನ್ ಆಜಿಯೆಕ್ ಪಳೆಲೆಂ.
"ಕಿತೆಂ ಜಾಲೆಂ......? ಕಿತೆಂ ಚಿಂತಾಯ್ ತುಂ?"
".........."
ಆಜಿಯೆಚಾ ಸವಾಲಾಕ್ ಮಿಶೇಲಾ ಲಾಗಿಂ ಕಾಂಯ್ ಜವಾಬ್ ನಾತ್ಲೆಲಿ.
"ಬೊಶಿಯೆಂತ್ ಶಿತ್ ದವರುನ್ ಶಿತಾಕ್ ಆಮಿ ರಾಕಯ್ನಾಯೆ ಪುತಾ.....! ಶಿತಾಕ್ ಆಮಿಂ ರಾಕೊಂಕ್ ಜಾಯ್! ಕಿತೆಂ ಜಾಲೆಂ? ಕಾಂಯ್......?"
"ಕಾಂಯ್ ನಾ ಮಾಂಯ್! ಆಶೆಂಚ್.....!"
ಆಪ್ಲ್ಯಾ ಮನಾಂತ್ಲೆಂ ಆಜಿಯೆಕ್ ಸಾಂಗ್ಚಾ ಪರಿಂ ನಾತ್ಲ್ಲೆಂ.
"ಆಶೆಂಚ್....? ಹಾಂವ್ ಎದೊಳ್ ಥಾವ್ನ್ ಪಳೆತಾಂ. ತುಂ ಕಿತೆಂ ತರ್ಯ್ ಚಿಂತುನ್ ಆಸ್ಲೆಲ್ಯಾ ಪರಿಂ.....!"
ಆಜಿಯೆಚಾ ಸವಾಲಾಕ್ ಕಿತೆಂ ಜವಾಬ್ ದೀಂವ್ಚಿ ಮ್ಹಳ್ಳಿ ಮಿಶೇಲಾಕ್ ಸಮ್ಜಾಲೆಂ ನಾ. ತೆಂ ಜವಾಬ್ ದಿತೆಲೆಂ ಜಾಲ್ಯಾರ್ಯ್ ಕಿತೆಂ? ಒಮ್ಜೂರ್ ಥಾವ್ನ್ ಪಾಟಿಂ ಯೆಂವ್ಚಾ ವಗ್ತಾರ್ ತಾಚ್ಯಾ ಮತಿಂತ್ ಅಚಾನಕ್ ತೂಫಾನ್ ಉಟ್ಲ್ಲೆಂ. ಹೆಂ ತೂಫಾನ್ ಅಚಾನಕ್ ಜಾವ್ಯೆತ್. ಪುಣ್, ಏಕ್ ನಾ ತರ್ ಏಕ್ ದೀಸ್, ಹೆಂ ಯೆಂವ್ಕ್ ಆಸ್ಲ್ಲೆಂಚ್! ಆಜ್ ತೆಂ ಯೆತಾನಾ, ಮಿಶೇಲ್ ತ್ಯಾ ತೂಫಾನಾಕ್ ಫುಡ್ ಕರುನ್ ರಾವೊಂಕ್ ಭಿಲ್ಕುಲ್ ತಯಾರ್ ನಾತ್ಲೆಲೆಂ. ಜಿವಿತಾಚ್ಯಾ ಸತಾಕ್ ತಾಣೆಂ ಇತ್ಲ್ಯಾ ಗೂಂಡಾಯೆಂತ್ ದೆಂವೊನ್ ಪಳೆಲ್ಲೆಂ ನಾ. ಫಕತ್ತ್ ಭಾಯ್ಲ್ಯಾನ್ ದಿಸೊನ್ ಯೆಂವ್ಚಾ ಸೊಭಾಯೆಕ್ ಮಾತ್ರ್ ತಾಣೆಂ ಪಳೆಲ್ಲೆಂ.
ಮಿಶೇಲ್ ಆಜ್ ಆಶೆಂ ಕಿತ್ಯಾಕ್ ಆಸಾ ತೆಂ ಜೆರೊಮಾಕ್ ಸಮ್ಜಾಲೆಂ. ಆತಾಂ ತಾಣೆಂಚ್ ತಾಚ್ಯಾ ನಾತಿಕ್ ಪಯ್ಲೆಂಚಾ ವಾಟೆಕ್ ಹಾಡುಂಕ್ ಜಾಯ್ ಮ್ಹಣೊನ್ ಸಮ್ಜಾಲ್ಲೊ ತೊ,
"ಕಿತೆಂ ಪುತಾ ಮಿಶೇಲ್? ಪರ್ತ್ಯಾಕ್ ತೆಂಚ್ ಉಡಾಸ್ ಕಾಡುನ್ ಬಸ್ಲಾಂಯ್....?" ಜೆರೊಮಾಚೊ ತಾಳ್ಯಾಂತ್ ಆಪ್ಲ್ಯಾ ನಾತಿ ವಯ್ರ್ ಆಸ್ಲ್ಲಿ ಖಂತ್ ಸ್ಪಶ್ಟ್ ದಿಸ್ತಾಲಿ.
"ಕಿತೆಂ ಉಡಾಸ್ ಕಾಡುನ್ ಬಸ್ಲಾಂ? ಕಿತೆಂ ಜಾಲೆಂ....?" ಮಧೆಂಚ್ ಉಲಯಿಲ್ಲಿ ಎಸ್ತೆಲ್, ".......ಮಿಶೇಲ್? ತೊಟಾಲಾಗಿಂ ಕಾಂಯ್ ಆಬಾನ್ ಜ್ಯೋರ್ ಕೆಲೆಂ ತುಕಾ?" ಎಸ್ತೆಲಾಕ್ ಆಪ್ಲ್ಯಾ ಘೊವಾಚೆರ್ ದುಬಾವ್ ಜಾಲೊ.
"ಹ್ಯಾ ಶಿತಾಂತ್ಯ್ ಕಿತ್ಲೊ ಮಾಯಾಮೋಗ್ ಆಸಾ ಆಬಾ!?"
ಆಜಿಯೆನ್ ಉಲಯಿಲ್ಲೆಂ ಅಯ್ಕಾಲ್ಯಾರ್ಯ್ ತ್ಯಾ ಕುಶಿಂನ್ ಮಿಶೇಲಾನ್ ಆಪ್ಲೆಂ ಧ್ಯಾನ್ ದೀನಾಸ್ತಾನಾ ಆಜ್ಯಾ ತೆವ್ಶಿಂ ಪಳೆಲೆಂ.
ಆಜ್ಯಾ ಆನಿ ನಾತಿ ಮಧೆಂ ಕಿತೆಂ ಚಲ್ತಾ ತೆಂ ಎಸ್ತೆಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಿ ಏಕ್ ಪಾವ್ಟಿಂ ಆಪ್ಲ್ಯಾ ನಾತಿಕ್ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್ ಪಳಂವ್ಚಾರ್ ಪಡ್ಲಿ.
"ಕಿತೆಂ ಜಾಲೆಂ ಪುತಾ? ಆಮ್ಚೆ ಥಾವ್ನ್ ತುಕಾ ಕಾಂಯ್.....? ಯಾ ಕಾಂಯ್ ತುಂ.....?" ಜೆರೊಮಾಕ್ ಆಪ್ಣಾ ವಯ್ರ್ ದುಬಾವ್ ಜಾಲೊ. ಆಮ್ಚ್ಯಾ ನಾತಿಕ್ ಆಮ್ಚ್ಯೆ ಥಾವ್ನ್ ಕಾಂಯ್.....? ತೊ ಚಿಂತಾಲೊ.
"ಹಾಂವ್ ಜಾಣಾಂ ಆಬಾ ಮ್ಹಜ್ಯಾ ವಿಶಿಂ ತುಮಿಂ ಕಿತ್ಲೆಂ ಖಂತ್ ಕರ್ತಾತ್ ಮ್ಹಣೊನ್. ಮ್ಹಜ್ಯೆ ಶಿವಾಯ್ ತುಮ್ಕಾಂ ದುಸ್ರೆಂ ಕೊಣ್ಯ್ ನಾ ಮ್ಹಣೊನ್ಯ್ ಹಾಂವ್ ಜಾಣಾಂ"
"ನಾ ಮಿಶೇಲ್! ನಾ......! ತುಂ ಕಾಂಯ್ಚ್ ನೆಣಾಂಯ್! ಜೆದ್ನಾಂ ಆಮ್ಚೆ ಸಾಂಗಾತಾ ಕೊಣ್ಯ್ ನಾತ್ಲೆಲೆಂ ತೆದ್ನಾಂ ಸೆಲ್ಲಿ ಆಮ್ಚೆ ಸಂಗಿಂ ಆಸ್ಲ್ಲೆಂ. ತೆಂ ಆಮ್ಚೆಂ ಧುವ್ ನ್ಹಯ್ ಜಾಲ್ಲೆಂ ಜಾಂವ್ಕ್ ಪುರೊ. ತೆಂ ಆಮ್ಚೆಂ ರಾಗಾತ್ ನ್ಹಯ್ ಜಾಲ್ಲೆಂ ಜಾಂವ್ಕ್ ಪುರೊ. ಪುಣ್ ಸಂಭಂಧ್ ಫಕತ್ತ್ ರಗ್ತಾ ಥಾವ್ನ್ ಮಾತ್ರ್ ಉಬ್ಜಾನಾ! ತುವೆಂಯ್ ಪಳೆಲಾಂಯ್...... ಸೆಲ್ಲಿಕ್ ತಾಚ್ಯಾ ನೊವ್ರ್ಯಾಗೆರ್ ಒಪ್ಸುನ್ ದಿತಾನಾ ತೆಂ ತಾಚ್ಯಾ ಆವಯ್ಕ್ ನ್ಹಯ್ ತುಜ್ಯಾ ಆಜಿಯೆಕ್ ವೆಂಗುನ್ ರಡ್ಲ್ಲೆಂ. ತಿತ್ಲೆಂ ರಡ್ಣೆಂ ಹಾವೆಂ ಮ್ಹಜ್ಯಾ ಭುರ್ಗ್ಯಾಂಚಾ ದೊಳ್ಯಾಂತ್ ಪಳಂವ್ಕ್ ನಾ. ಕೋಣ್ ಜಾಣಾಂ ಕೊಣಾಚಾ ಮೊಗಾಂತ್ ಖಂಯ್ ಉಣೆಂಪಣ್ ಆಸ್ಲ್ಲೆಂ ತೆಂ!" ಉಲಂವ್ಚೊ ಜೆರೊಮ್ ಎಕಾ ಘಡಿಯೆಕ್ ಮೌನ್ ಜಾಲೊ.
"ತುಂ ಜೇವ್ ಪುತಾ! ಕಿತೆಂಯ್ ಉಲಂವ್ಕ್ ಆಸ್ಲ್ಯಾರ್ ಆಮಿಂ ಉಪ್ರಾಂತ್ ಉಲವ್ಯಾಂ!" ಎಸ್ತೆಲ್ ನಾತಿಕ್ ಜೆವ್ಣಾಕ್ ವತ್ತಾಯ್ ಕರ್ತಾಲಿ.
ಒಮ್ಜೂರ್ ವಚೊನ್ ಆಯಿಲ್ಲ್ಯಾ ತಿಚ್ಯಾ ನಾತಿಚಾ ವರ್ತನಾಂತ್ ಬದ್ಲಾವಣ್ ಜಾಲ್ಲಿ ತಿ ತಿಣೆ ಪಳೆಲ್ಲಿ. ಹ್ಯಾ ಬದ್ಲಾವಣಾಚೆಂ ಕಾರಾಣ್ ತಿಕಾ ಕಳಿತ್ ನಾತ್ಲೆಲೆಂ.
"ಜರ್ತರ್ ತುಮ್ಚೆಂ ಕೊಣ್ಯ್ ತುಮ್ಚೆ ಸಾಂಗಾತಾ ಆಸ್ಲ್ಲೆಂ ಜಾಲ್ಯಾರ್ ಸೆಲ್ಲಿಬಾಯೆ ಸಾಂಗಾತಾ ತುಮ್ಚೊ ಸಂಭಂಧ್ ಇತ್ಲೊ ಘಟ್ ಜಾತೊ?"
ಹಾತಿಂತ್ ಉಂಡಿ ಶಿತ್ ಧರ್ಲೆಲ್ಯಾ ಮಿಶೇಲಾನ್ ಉಲಯ್ತಾನಾ, ನಾತಿಚೆಂ ಉಲವ್ಣೆಂ ಆಯ್ಕಾಲ್ಲ್ಯಾ ಜೆರೊಮಾಕ್ ಕೊಣೆಗೀ ಆಪ್ಲ್ಯಾ ಮತಿಕ್ ಇರ್ನ್ಯಾನ್ ಕೊಚಾಯಿಲ್ಲ್ಯಾ ಪರಿಂ ಜಾಲೆಂ.
ಮಿಶೇಲಾನ್ ಸಾಂಗ್ಲೆಲೆಂ ಖಂಡಿತ್ ಸತ್ . "ಆಪ್ಣಾ ಸಾಂಗಾತಾ ಕೊಣ್ಯ್ ನಾ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ಸೆಲ್ಲಿ ಆಪ್ಣಾಕ್ ಭುರ್ಗೆಂ ಜಾಲ್ಲೆಂ. ಸೆಲ್ಲಿಕ್ ಕಾಂಯ್ ಗತ್ ನಾತ್ಲೆಲಿ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ಆಪುಣ್ ತಾಕಾ ಬಾಪಯ್ ಜಾಲ್ಲೊಂ. ನಾ ಜಾಲ್ಯಾರ್ ಸೆಲ್ಲಿಕ್ ತಾಚಿಂ ಆವಯ್ ಬಾಪಯ್ ಆಸ್ಲ್ಲಿಂ. ತಾಚ್ಯಾ ಗರ್ಜೆಕ್ ಆಮಿಂ ಪಾವ್ಲೆಲ್ಯಾನ್ ಆಮಿಂ ತಾಕಾ ತಾಚ್ಯಾ ಆವಯ್ ಬಾಪಯ್ ಪ್ರಾಸ್ ಚಡ್ ಲಾಗಿಂ ಜಾಲ್ಯಾಂವ್. ಆಶೆಂ ಜಾಂವ್ಕ್ ನಾತ್ಲೆಲೆಂ ಜಾಲ್ಯಾರ್?
ಜೆರೊಮಾಚಾ ಮತಿಂತ್ ಆಪುಣ್ ಖಂಯ್ಚರ್ ತರ್ಯ್ ಘುಸ್ಪಡ್ಲಾಂ ತಶೆಂ ಜಾಲೆಂ. ತಶೆಂಚ್ ಏಕ್ ಪಾವ್ಟಿಂ ಆಪ್ಲ್ಯಾ ಬಾಯ್ಲೆಕ್ ಆನಿ ಉಪ್ರಾಂತ್ ಹೆವ್ಶಿಂ ಘುಂವೊನ್ ಆಪ್ಲ್ಯಾ ನಾತಿಕ್ ಪಳೆಲ್ಲೊ ತೊ ದುಸ್ರೆಂ ಕಾಂಯ್ ಉಲಯ್ಲೊ ನಾ. ಸವ್ಕಾಸ್ ಆಪ್ಲ್ಯಾ ಜೆವ್ಣಾ ವಯ್ರ್ ತಾಚೆಂ ಗುಮಾನ್ ಗೆಲೆಂ ಜಾಲ್ಯಾರ್ಯ್ ಕಿತ್ಯಾಕ್ಗೀ ತಾಕಾ ಹ್ಯಾ ಜೆವ್ಣಾಂತ್ ದಾಧೊಸ್ಕಾಯ್ ಭೊಗ್ಲಿ ನಾ. ಆಪ್ಲೆಂ ನಾತ್ ಆತಾಂ ಜೇಂವ್ಕ್ ಲಾಗ್ಲಾಂ ತೆಂ ಪಳೆಲ್ಲಿ ಎಸ್ತೆಲ್ ಆಪ್ಲೆಂ ಜೆವಾಣ್ ಜೇಂವ್ಕ್ ಲಾಗ್ಲಿ.
"ಹ್ಯಾಚ್ ಬೊಶಿಯೆಂತ್ಲ್ಯಾ ಶಿತಾಕ್ ಆಸೊಚ್ ಮ್ಹಜೊ ಬಾಪಯ್ ಜೆವ್ಲಾ ಆಸ್ತಲೊ. ಶಿತಾನ್ ಮನ್ಶ್ಯಾಕ್ ಘಾತ್ ಕರುಂಕ್ ನಾ.....! ತರ್, ಕಿತೆಂ ಮನ್ಶ್ಯಾನ್ ಶಿತಾಕ್ ಘಾತ್ ಕೆಲೊ?"
ಜೆವ್ತಾಂ ಜೆವ್ತಾಂ ಮತಿಂತ್ ಉದೆಲ್ಲ್ಯಾ ಸವಾಲಾ ಥಾವ್ನ್ ಮತ್ ದಂಡಳ್ತಾನಾ, ಆಪ್ಲಿ ತಕ್ಲಿ ಉಭಾರುನ್ ಮಿಶೇಲಾನ್ ಆಜಿಯೆ ತೆವ್ಶಿಂ ದೀಷ್ಟ್ ವೆಲಿ. ತ್ಯಾಚ್ ವೆಳಾರ್ ತಕ್ಲಿ ಉಕ್ಲುನ್ ಮಿಶೇಲಾಕ್ ಪಳೆಲ್ಲ್ಯಾ ಎಸ್ತೆಲಾಚೆ ದೊಳೆ ಮಿಶೇಲಾಚಾ ದಿಷ್ಟೆಕ್ ಭೆಟ್ತಾನಾ, ದೋನ್ ದಿಷ್ಟಿ ಮಧೆಂ ಕಿತೆಂ ಚಲ್ಲೆಂ ತೆಂ ಉತ್ರಾಂನಿಂ ಸಾಂಗೊಂಕ್ ಜಾಂವ್ಚೆಂ ನ್ಹಯ್ ತಸಲೆಂ.
ಎಕಾಚ್ ಖಿಣಾ ಭಿತರ್ ಮಿಶೆಲಾಚಾ ಮತಿಂತ್, ಆಪ್ಲೆಂಚ್ ಶೆತ್ ಚರ್ಚಿ ತಿ ಗಾಯ್, ದುಸ್ರ್ಯಾಚಾ ತೊಟಾಂತ್ ಆಪ್ಲ್ಯಾಪಣಾನ್ ಭೊಂವ್ಡಿ ಮಾರ್ಚಿಂ ಲವೀನಾ ಆನಿ ಲಾಯ್ಡ್, ಭುತಾಚಾ ಕೋಲಾಕ್ ಗೆಲ್ಲ್ಯಾ ಬೇಜವಾಬ್ದಾರಿ ಘೊವಾಚೆಂ ಬಾಯ್ಲ್ ಜಾನಕಿನ್ ಕುಟ್ಮಾಕ್ ಪೊಸುಂಕ್ ಕಾಡ್ಚೆ ಕಷ್ಟ್, ಕಾಂಯ್ಚ್ ಸಂಭಂಧ್ ನಾತ್ಲೆಲ್ಯಾ ಸೆಲ್ಲಿನ್ ಆಪ್ಲ್ಯಾ ಬಾಟ್ಕಾರಾಕ್ ಆನಿ ಬಾಟ್ಕಾರ್ನಿಕ್ ಸಾಂಬಾಳ್ಲ್ಲಿ ರೀತ್, ಸಗ್ಳೆಂ ಎಕಾ ಪಾಟ್ಲ್ಯಾನ್ ಏಕ್ ತ್ಯಾ ಟಿ.ವಿ. ಪರ್ದ್ಯಾರ್ ಚಲ್ಚಾ ಪಿಂತುರಾ ಪರಿಂ ಉದೆವ್ನ್ ವೆತಾನಾ ಮಿಶೇಲ್ ಸಗ್ಳೆಂಚ್ ದೆದಸ್ಪರ್ ಜಾಲೆಂ.
ಆಪ್ಲ್ಯಾ ಮತಿಂತ್ಲ್ಯಾ ವಾದಾಳಾಕ್ ಆಪ್ಲ್ಯಾ ತೊಂಡಾರ್ ಹಾಡಿನಾಸ್ತಾನಾ, ಆಪ್ಲ್ಯಾ ಆಜಿಯೆಚಾ ದಿಷ್ಟಿಕ್ ಜೊಕ್ಲೆಲಿ ದೀಷ್ಟ್ ಪಾಟಿಂ ಕಾಡುನ್ ಜೆವ್ಣಾಚೆರ್ ತಾಣೆಂ ಆತಾಂ ಧ್ಯಾನ್ ದಿಲೆಂ.
ಜೆವಾಣ್ ಸಂಪಯಿಲ್ಲೆಂ ಮಿಶೇಲ್, ಸದಾಂಚಾ ಪರಿಂ ಆಜಿಯೆಕ್ ಕುಜ್ನಾಂತ್ ಆಯ್ದಾನಾಂ ನಿತಳ್ ಕರ್ಚಾ ತಿಚ್ಯಾ ವಾವ್ರಾಂತ್ ಕುಮಕ್ ಕರುಂಕ್ ಲಾಗ್ಲೆಂ.
"ಆಪ್ಲಿಂ ಕಾಮಾ ಆಪ್ಣೆಂಚ್ ಕರುಂಕ್ ಜಾಯ್ ಪುತಾ. ಕರುಂಕ್ ಜಾಯ್ನಾತ್ಲೆಲ್ಯಾ ಕಾಮಾಂಚೊ ದುಸ್ರೊ ವಿಶಯ್! ಕಾಮ್ ಕೆಲ್ಲ್ಯಾ ತಿತ್ಲೆಂ ಜಿವಾಕ್ ಸುಶೆಗ್ ಆನಿ ದೊಳ್ಯಾಂಕ್ ರಾತಿಕ್ ಬರಿ ಜೆಮ್ ಪಡ್ತಾ. ಭಲಾಯ್ಕಿ ಬರಿ ಉರ್ತಾ. ಹೊ ಎಸ್ತೆಲಾಚೊ ವಾದ್. ಆಶೆಂ ಮ್ಹಣೊನ್ ಆಪ್ಲ್ಯಾ ಆಜಿಯೆಚಾ ವಾದಾಕ್ ಲಾಗೊನ್ ಯಾ ತಿಣೆಂ ದಿಂವ್ಚಾ ಭಲಾಯ್ಕೆಚಾ ಸಲಹಾಂಕ್ ಲಾಗೊನ್ ಮಿಶೇಲ್ ಬಲಾತ್ಕಾರೆನ್ ಆಪ್ಣಾಕ್ಚ್ ಕಾಮಾಕ್ ಲಾಯ್ತಾಲೆಂ ಮ್ಹಣೊನ್ ಭಿಲ್ಕುಲ್ ನ್ಹಯ್.
ಆಪುಣ್ ಮಂಗ್ಳುರಾಕ್ ಆಯಿಲ್ಲ್ಯಾ ದಿಸಾ ಆಪ್ಣಾಕ್ ವೆಂಗೆಂತ್ ಘೆವ್ನ್ ರಡ್ಲೆಲ್ಯಾ ಎಸ್ತೆಲಾಕ್ ಸಮ್ಜೊನ್ ಘೆಂವ್ಕ್ ಮಿಶೇಲಾಕ್ ವರ್ಸಾಂ ಗೆಲ್ಲಿಂ. ದೀಸ್ ಆನಿ ರಾತ್ ಮ್ಹಳ್ಳ್ಯಾ ಪರಿಂ ಜಾಗೊನ್ ಎಸ್ತೆಲಾನ್ ಮಿಶೇಲಾಚಿ ಸೆವಾ ಕೆಲ್ಯಾ. ತಾಕಾ ಸಾಂಬಾಳ್ಳಾಂ. ತಾಕಾ ಮೋಗ್ ದಿಲಾ. ತೊ ಮೋಗ್ ಆಪ್ಲ್ಯಾ ಆಜಿಯೆಚೊ ಮೋಗ್ ಮ್ಹಣೊನ್ ಮಿಶೇಲಾಕ್ ಸಮ್ಜಣಿ ಯೆತಾನಾ ಕಳ್ಲ್ಲೆಂ ಜಾಲ್ಯಾರ್ಯ್ ಆಜಿಯೆ ಸಾಂಗಾತಾ ಉಟ್ಚೆಂ ಬಸ್ಚೆಂ ಸವಯೆಚೆಂ ಜಾಲ್ಲ್ಯಾನ್, ತೆಂ ಸದಾಂ ಎಸ್ತೆಲಾ ಸಾಂಗಾತಾಚ್ ಆಸ್ತಾಲೆಂ. ಆಪ್ಲ್ಯಾ ಆಜಿಯೆನ್ ಕರ್ಚಾ ಹರ್ಯೇಕಾ ಕಾಮಾಂತ್ ತೆಂ ಹಾತ್ ಗಾಲ್ತಾಲೆಂ ಜಾಲ್ಲ್ಯಾನ್, ಆಜಿಯೆಕ್ ಹಾತ್ ಮೆಳಂವ್ಚೆಂ ಮಿಶೇಲಾಕ್ ಸವಯೆಚೆಂ ಜಾಲ್ಲೆಂ. ಹಿಚ್ಚ್ ಸವಯ್ ಲ್ಹಾನ್ಪಣಾರ್ ಥಾವ್ನ್ ವಾಡೊನ್ ಆಯಿಲ್ಲಿ ತಿ, ಮಿಶೇಲ್ ಆತಾಂ ತರ್ನಾಟೆಂ ಚಲಿ ಜಾಲಾಂ ಜಾಲ್ಯಾರ್ಯ್ ತಿ ಸವಯ್ ಮಾತ್ರ್ ತಶಿಚ್ ಚಾಲು ಆಸ್ಲ್ಲಿ.
"ತೊಟಾಂತ್ ಸಗ್ಳೆಂ ಕಸೆಂ ಆಸಾ ಪುತಾ?" ಉದಾಕ್ ಪಿಯೆಂವ್ಚಾ ಗ್ಲಾಸಾಂಕ್ ಸಾಬು ಲಾಂವ್ಚಾ ಮಿಶೆಲಾಕ್ ಪಳೆಲ್ಲ್ಯಾ ಎಸ್ತೆಲಾನ್ ಕುಜ್ನಾಂತ್ಲೆಂ ಮೌನ್ ಮೊಡುನ್ ಉಲೊಣ್ಯಾಕ್ ಬುನ್ಯಾದ್ ಘಾಲಿ.
ಸಾಬು ಲಾಯಿಲ್ಲೊ ಗ್ಲಾಸ್ ಕಾಡುನ್ ತೆವ್ಶಿಂ ಆಜಿಯೆಚಾ ಹಾತಾಕ್ ದಿಲ್ಲೆಂ ಮಿಶೇಲ್, ಕಪಾಲಾರ್ ಗಳ್ಚಾ ಆಪ್ಲ್ಯಾ ಕೆಸಾಂಕ್ ತಾಳುವೆ ಹಾತಾಚಾ ಪಾಟ್ಲ್ಯಾ ಕುಶಿನ್ ಥಾವ್ನ್ ಪಾಟಿಂ ಕರುನ್ ದುಸ್ರೊ ಗ್ಲಾಸ್ ಹಾತಿಂ ಘೆತಾನಾ....
"ತೆ ಕೇಸ್ ಮುಕ್ಲ್ಯಾನ್ ತಿತ್ಲೆ ಮಟ್ವೆ ಕಿತ್ಯಾಕ್ ಕೆಲ್ಯಾಯ್? ಕೆದಾಳಾ ಪಳಯ್ಲ್ಯಾರ್ಯ್ ತೆ ದೊಳ್ಯಾಂಕ್ ಆಡ್ ಯೆತಾತ್. ತೆಂ ಏಕ್ ಚೂಡ್ಕೊತ್ರು.... ಕೇಸ್ ಕಾತ್ರುಂಕ್ಯ್ ತ್ಯಾ ಎಪ್ಪಿಕ್ ಆನಿಕ್ಯ್ ಕಳಾನಾ!" ನಾತಿಕ್ ಕಷ್ಟ್ ಜಾಂವ್ಚೆ ಪಳಂವ್ಕ್ ಜಾಯ್ನಾಸ್ತಾನಾ ಮಿಶೇಲಾನ್ ವೆಚ್ಯಾ ಸೆಲೂನಾಂತ್ಲ್ಯಾ ಎಪ್ಪಿಚೆರ್ ಎಸ್ತೆಲ್ ಬಡ್ಬಡ್ಲಿ.
"ಎಪ್ಪಿ ಆಂಟಿ ಖಂಯ್ ಕೇಸ್ ಕಾತರ್ತಾ ಮಾಂಯ್? ಹೆ ತಾಚ್ಯಾ ಸೆಲೂನಾಂತ್ಲ್ಯಾನ್ ಕಾತರ್ಲೆಲೆ!" ಆಜಿಯೆಚಾ ತೊಂಡಾ ವಯ್ಲಾ ರಾಗಾಕ್ ನಿತ್ಳಾಂವ್ಕ್ ಮಿಶೇಲಾನ್ಸಮಾಧಾನೆಚಿ ಜವಾಬ್ ದಿಲಿ.
"ಸೆಲೂನಾಂತ್ಲ್ಯಾನ್ ಜಾಲ್ಯಾರ್ ಕಿತೆಂ ಜಾಲೆಂ? ಕೋಣ್ ತೆಂ....? ತಾಕಾ ದೊಳೆ ದಿಸಾನಾಂತ್ ಕಿತೆಂ? ಒಟ್ಟಾರೆ ಸೆಲೂನಾಂ....! ಸಗ್ಳ್ಯಾಂಕ್ ಪ್ಯಾಶನಾಂ ಜಾಯ್. ತ್ಯಾ ಎಪ್ಪಿಕ್ ಪಳೆಲ್ಯಾರ್ ಆನಿ ಸಾಂಗ್ಚೆಂ ನಾಕಾ. ಹ್ಯಾ ಪ್ರಾಯೆರ್ ಕೊಣಾಕ್ ಮ್ಹಣೊನ್ ತೆಂ ಸೊಭಯ್ತಾ ಆನಿಂ ರಂಗಯ್ತಾ ತೆಂ ದೇವ್ ಜಾಣಾಂ!" ಎಸ್ತೆಲಾನ್ ಆಪ್ಲ್ಯಾ ಹಾತಾಂತ್ಲೊ ದುವ್ನ್ ಜಾಲ್ಲೊ ಗ್ಲಾಸ್ ತ್ಯಾ ಕುಶಿಂನ್ ವೊಮ್ತೊ ಗಾಲುನ್ ಹೆವ್ಶಿಂ ನಾತಿಚಾ ಹಾತಿಂತ್ಲೊ ಸಾಬು ಲಾಯ್ಲಲೊ ದುಸ್ರೊ ಗ್ಲಾಸ್ ಹಾತಿಂ ಘೆತ್ಲೊ.
"ಪಳೆ ಪುತಾ......" ತಿಚ್ಚ್ ಉಲಯ್ಲಿ. "ದೆವಾಚಾ ದಯೆನ್ ಹರ್ಯೇಕ್ ಜೀವ್, ಜೀವ್ ಘೆವ್ನ್ ಹ್ಯಾ ಸಂಸಾರಾಕ್ ಯೆತಾನಾ ತಿ ಜೀವಿ ದೆವಾಚಾ ಸೃಷ್ಟೆಚಿ ಆಪುಟ್ ಸೊಭಾಯ್ ಘೆವ್ನ್ ಸಂಸಾರಾಕ್ ಯೆತಾ. ತಿಚ್ಚ್ ಸೊಭಾಯ್ ಸಗ್ಳ್ಯಾಂ ಪ್ರಾಸ್ ವರ್ತಿ. ಹೆರಾಂ ಸಾಮ್ಕಾರ್ ಆಪ್ಣಾಚಾ ಕುಡಿಚೆಂ ಪ್ರದರ್ಶನ್ ಕರುನ್ ದಾಕಂವ್ಚೆಂ ದೆವಾಕ್ ರಾಗಾರ್ ಘಾಲ್ತಾ. ಹೆರಾಂಕ್ ಆಮಿಂ ಪ್ರದರ್ಶನ್ ಕರುನ್ ದಾಕಯ್ತಾಂವ್ ಜಾಲ್ಯಾರ್ಯ್ ಕಿತೆಂ? ಆನಿಂ ತೆಂ ಕಿತ್ಯಾಕ್ ಮ್ಹಣೊನ್ ಹ್ಯಾ ದಡ್ಡ್ ತಕ್ಲೆಚಾ ಮನ್ಶ್ಯಾಂಕ್ ಸಮ್ಜಾನಾಂ. ಆಸೊಂದಿ..... ಸೊಡ್ ತೆಂ. ತೊಟಾಚೆಂ ಕಾಮ್ ಕಿತ್ಲೆಂ ಜಾಲಾಂ?"
"ತೊಟಾಚೆಂ ಕಾಮ್ ಹಾನಿಕ್ಯ್ ಮಸ್ತ್ ಬಾಕಿ ಆಸಾ ಮಾಂಯ್. ತ್ಯಾ ಇತ್ಲ್ಯಾ ವ್ಹಡ್ಲ್ಯಾ ತೊಟಾಕ್ ಈಟ್ ಘಾಲುಂಕ್ ಜಾಯ್ ದೀಸ್ ಕಿತ್ಲೆ? ತ್ಯಾ ವಯ್ಲ್ಯಾ ಸಾಣಾಚಾ ಕುಶಿಂನ್ ಈಟ್ ಘಾಲುನ್ ಜಾಲಾಂ. ಯೆಂವ್ಚಾ ಹಪ್ತ್ಯಾಂತ್ಯ್ ಪೂರಾ ಕಾಮ್ ಕರುಂಕ್ ಪಡ್ತೆಲೆಂ."
"ಆನಿ ತೆಂ ತೊಟಾಕ್ ವಕಾತ್ ಮಾರುಂಕ್ ಜಾಯ್ ಮ್ಹಣ್ತಾಲೊ ಆಬ್.....?"
"ವಕ್ತಾಚಾ ವಿಶಿಂ ಆಬ್ ಜಾನಕಿ ಲಾಗಿಂ ಉಲಯ್ಲಾ. ತೊ ಶೀನಾ ತಾಚ್ಯಾ ಭಯ್ಣಿಕರ್ ಭುತಾಚಾ ಕೋಲಾಕ್ ಗೆಲಾ ಖಂಯ್....!"
"ತೊ ಏಕ್ ಶೀನಾ....! ತಾಕಾ ಭುತ್, ಕೋಲ, ಆನಿ ನೇಮ ಜಾಲ್ಯಾರ್ ಜಾಲೆಂ. ಹೆಂ ಜಾನಕಿ ಬಾವ್ಡೆಂ ಹಾಂಗಾ ಮರ್ತಾ. ತ್ಯಾ ಘರಾಕ್ ಮ್ಹಣೊನ್ ತೆಂ ಪಳೆತೆಲೆಂ ವಾ ತ್ಯಾ ಭುರ್ಗ್ಯಾಂಕ್ ಮ್ಹಣೊನ್ ತೆಂ ಪಳೆತಲೆಂ? ಕಿತೆಂ ಕರ್ತೆಲೆಂ ಬಾವ್ಡೆಂ? ಭಿರ್ಮತ್ ಚೆಡ್ವಾಚಿ!" ಏಕ್ ಲಾಂಭ್ ಸುಸ್ಕಾರ್ ಸೊಡ್ಲೆಲಿ ಎಸ್ತೆಲ್
"ಸಾಂಗ್ಲೆಲ್ಯಾ ಪರಿಂ ತಾಚೆಂ ಚೆಡುಂ ತೆಂ ಮಲೇರಿಯಾ ಜಾಲ್ಲೆಂ ತೆಂ ಅತಾಂ ಕಶೆಂ ಆಸಾ ಖಂಯ್? ಕಾಂಯ್ ಪುಣಿಂ ಸಾಂಗ್ತಾಲೆಂ?"
"ತ್ಯಾ ವಿಶಿಂ ಆಬ್ ವಿಚಾರ್ತಾಲೊ ತಾಚ್ಯೆಲಾಗಿಂ. ಮ್ಹಾಕಾ ಸಾರ್ಕೆಂ ಸಮ್ಜೊಂಕ್ ನಾ ತಾಣೆಂ ಕಿತೆಂ ಸಾಂಗ್ಲೆಂ ತೆಂ. ಪುಣ್ ಆತಾಂ ತೆಂ ಭಲಾಯ್ಕೆಂತ್ ಆಸಾ ದಿಸ್ತಾ!"
"ಮಗ್ಗಿನ್ ಕಾಂಯ್ ಸಾಂಗ್ಲೆಂ?"
"ನಾ!"
"ಕಿತೆಂ ತುಜ್ಯೆಲಾಗಿಂ ತಿ ಉಲಂವ್ಕ್ ನಾ.....?"
"ಉಲಯ್ಲಿ....! ಆಶೆಂಚ್ ಸದಾಂಚೆ ಪರಿಂ....!"
"ಮಾಗಿರ್ ತೆಂ ಆಬಾಚೆಂ ಪಿಂತುರ್.....? ತುಂ ಘೆವ್ನ್ ಆಯ್ಲಾಂಯ್ ತೆಂ.....?"
"ತ್ಯಾ ಪಿಂತುರಾಕ್ ಲಾಗೊನ್......"
ಲವೀನಾಚೊ ಆನಿ ಲಾಯ್ಡಾಚೊ ಆತಾಂ ಮಿಶೇಲಾಕ್ ಉಡಾಸ್ ಯೆತಾನಾ ತಾಚ್ಯಾ ತೊಂಡಾರ್ ತಾಕಾಚ್ಚ್ ಕಳಿತ್ ನಾತ್ಲೆಲ್ಯಾ ಪರಿಂ ಹಾಸೊ ಉದೆಲ್ಯೊ.
"ವಾಟೆರ್ ಆಬಾನ್ ಕಾಂಯ್ ಸಾಂಗ್ಲೆಂ? ಯಾ..... ಜ್ಯೋರ್ ಪುಣಿಂ ಕೆಲೆಂ?"
"ನಾ! ಕಾಂಯ್ ನಾ! ಕಿತ್ಯಾಕ್?"
"ಕಾಂಯ್ ನಾ.....!? ತರ್ ಜೆವ್ಣಾಚಾ ಮೆಜಾರ್ ಕಿತೆಂ ಜಾಲೆಂ?"
ಎದೊಳ್ ಘುಂವ್ಡಾವ್ನ್ ಘುಂವ್ಡಾವ್ನ್ ಸವಾಲಾಂ ಕೆಲ್ಲ್ಯಾ ಎಸ್ತೆಲಾನ್ ಆತಾಂ ಆಪ್ಲ್ಯಾ ಮತಿಂತ್ಲ್ಯಾ ಖರ್ಯಾ ಸವಾಲಾಕ್ ಮುಕಾರ್ ದವರ್ಲೆಂ. ಆಪ್ಲ್ಯಾ ನಾತಿಚಾ ತೊಂಡಾಕ್ಚ್ ಪಳಂವ್ಚಾ ತಿಣೆಂ ಮಿಶೇಲಾಚಾ ತೊಂಡಾಚೊ ಛಾರೊ ಕಾಂಯ್ ಬದ್ಲಾತಾ ಕೊಣ್ಣಾ ಮ್ಹಣೊನ್ ಚಿಂತ್ಲ್ಯಾರ್ಯ್ ತ್ಯಾ ಸೊಭಿತ್ ಮುಖಾಮಳಾರ್ ಕಾಂಯ್ ಬದ್ಲಾವಣ್ ದಿಸೊನ್ ಆಯ್ಲಿ ನಾ.
"ಕಾಂಯ್ ನಾ ಮಾಂಯ್ ಆಶೆಂಚ್.....!"
"ಆಶೆಂಚ್?ತುಕಾ ಹಾವೆಂ ಜೆವ್ಣಾಚಾ ಮೆಜಾರ್ ಆಶೆಂ ಹಾಚ್ಯಾ ಪಯ್ಲೆಂ ಪಳಂವ್ಕ್ ನಾ!"
ತರ್ ಆಪ್ಣಾಚಿ ಆಜಿ ಆಪ್ಲ್ಯಾ ಜೆವ್ಣಾ ಮೆಜಾ ವಯ್ಲ್ಯಾ ವರ್ತನಾಕ್ ಕಾರಾಣ್ ಸೊಧ್ತಾಲಿ? ಎದೊಳ್ ಪಾಸೊನ್ ಆಪ್ಣಾಕ್ ತಿಣೆಂ ವಿಚಾರುನ್ ಆಸ್ಲೆಲ್ಯಾ ಸವಾಲಾಂಚೊ ಮತ್ಲಬ್ ಮಿಶೇಲಾಕ್ ಆತಾಂ ಸಮ್ಜಾಲೊ. ಎಕಾ ಕುಶಿಂನ್ ಆಪ್ಲ್ಯಾ ಆಜಿಯೆಕ್ ಆಪ್ಣಾ ವಯ್ರ್ ಆಸ್ಚೊ ತೊ ಹುಸ್ಕೊ ಚಿಂತುನ್ ಮತಿಂತ್ಚ್ ಆಜಿಯೆಚಿ ಭಿರ್ಮತ್ ಉದೆಲಿ ತಾಕಾ.
"ತೆಂ ಕಾಂಯ್ ನಾ ಮಾಂಯ್! ಸಾಂಜೆರ್ ಆಮಿ ಒಮ್ಜೂರ್ ವೆತಾನಾ ಪ್ರಾಯ್ವಂತಾಚಾ ಆಸ್ರ್ಯಾ ವಿಶಿಂ ಆಬ್ ಉಲಯಿಲ್ಲೊ. ತಶೆಂ ಮ್ಹಾಕಾ ಕಿತ್ಯಾಕ್ಗೀ ಮ್ಹಜ್ಯಾ ಬಾಪಾಯ್ನ್ ಕೆಲ್ಲಿ ಚೂಕ್ ಮ್ಹಣೊನ್ ದಿಸ್ಲಿ. ಆನಿ ಹಾಂವ್....."
"ತುಜ್ಯಾ ಆಬಾಕ್ ಕಾಂಯ್ ಕಾಮ್ ನಾ. ಕೊಣಾಲಾಗಿಂ ಕಿತೆಂ ಉಲಂವ್ಕ್ ಜಾಯ್ ಮ್ಹಳ್ಳೆಂ ತೆಂ ತಾಕಾ ಅಜೂನ್ ಕಳಿತ್ ನಾ!" ಆಪ್ಲ್ಯಾ ಘೊವಾ ವಯ್ರ್ಚ್ ಎಸ್ತೆಲ್ ರಾಗಾರ್ ಜಾಲಿ.
"ಆಬಾನ್ ಉಲಂವ್ಚೆಂಯ್ ಸಾರ್ಕೆಂ ಮಾಂಯ್. ಆಜ್ ಜರ್ತರ್ ಹಾಂವ್ ಹಾಂಗಾ ಆಸ್ಚಾ ಬದ್ಲಾಕ್ ಮ್ಯಾಂಚೆಸ್ಟರಾಂತ್ ಆಸ್ಲ್ಲಿ ಜಾಲ್ಯಾರ್........!?
"ಪುಣ್ ತುಂ ಹಾಂಗಾ ಆಸಾಯ್. ಮ್ಯಾಂಚೆಸ್ಟರಾಂತ್ ನಾಂಯ್.....!"
"ತೆಂ ಆತಾಂ ಮಾಂಯ್! ಹೆಂ ತುಂ ಆಜ್ ಧಯ್ರಾನ್ ಸಾಂಗ್ತಾಯ್ ಕಿತ್ಯಾಕ್ ಮ್ಹಳ್ಯಾರ್ ತುಂ ಜಾಣಾಂಯ್ ಮ್ಹಾಕಾ ಆತಾಂ ತುಮಿಂ ಸೊಡ್ಲ್ಯಾರ್ ದುಸ್ರೆಂ ಕೊಣ್ಯ್ ನಾ. ಆನಿ ಹಾಂವ್ ತುಮ್ಕಾಂ ಸೊಡುನ್ ಖಂಯ್ ವಚೊಂಕ್ಯ್ ಸಕಾನಾ. ಪುಣ್ ಹಾಚ್ಯಾ ಪಯ್ಲೆಂ.......!?"
"ಹಾಚ್ಯಾ ಪಯ್ಲೆಂ......!?"
ಆತಾಂ ಸವ್ಕಾಸ್ ಎಸ್ತೆಲಾಚಿಂ ಚಿಂತ್ನಾಂ ಜಾಗಿಂ ಜಾಲಿಂ. ತಿಚಿಂ ಸಿಂತಿಮೆಂತಾಂ ಜಿವಾಳ್ ಜಾಲಿಂ. ಎಕಾ ಖಿಣಾಕ್ ತಿಚಿ ಮತ್ ಪಾಟಿಂ ಧಾಂವ್ಲಿ.
ತ್ಯಾ ಆದ್ಲ್ಯಾ ದಿಸಾಂಕ್! ತ್ಯಾ ಆದ್ಲ್ಯಾ ದಿಸಾಂಕ್ ಸೊಧುನ್ ತಿಚ್ಯಾ ದೊಳ್ಯಾಂತ್ಲಿ ದೀಷ್ಟ್ ಧಾವೊಂಕ್ ಲಾಗ್ಲಿ.
ವ್ಹಯ್! ಮಿಶೇಲಾನ್ ಸಾಂಗ್ಚೆಂ ಖಂಡಿತ್ ಸಾರ್ಕೆಂ. ಆಜ್ ಆಪುಣ್ ಖುಶ್ ಆಸಾಂ. ಪುಣ್ ಜ್ಯಾ ದಿಸಾಂನಿಂ ಹ್ಯಾ ಎದ್ಯಾ ವ್ಹಡ್ಲ್ಯಾ ಘರಾಂತ್ ಆಪುಣ್ ಆನಿ ಆಪ್ಣಾಚೊ ಘೊವ್ ಎಕ್ಸುರ್ಪಣಾಕ್ ತೆಂಕ್ತಾನಾ ಆಮ್ಚಾ ದೊಳ್ಯಾಂ ಮುಕಾರ್ ಕಿತೆಂ ಕಿತೆಂ ಚಿಂತ್ನಾಂ ಆಯಿಲ್ಲಿಂ ನಾಂತ್? ಕಿತ್ಲೆ ಪಾವ್ಟಿಂ ತೊ ಪ್ರಾಯ್ವತಾಂಚೊ ಆಸ್ರೊ ಆಮ್ಚಾ ಮೆಟಾಂಕ್ ಸ್ವಾಗತ್ ಭಾಸಯ್ತಾ ತಶೆಂ ಆಮ್ಕಾಂ ಜಾಂವ್ಕ್ ನಾ. ಕಿತ್ಲೆ ಪಾವ್ಟಿಂ ಆಮ್ಕಾಂ ಆಮ್ಚ್ಯಾ ಭುರ್ಗ್ಯಾನಿಂ ಸಾಂಡ್ಲೆಲ್ಯಾಚೆಂ ದೂಖ್ ಎಕಾಮೆಕಾ ಆಮಿಂ ಬಸೊನ್ ಉಲಯಿಲ್ಲೆಂ ನಾ? ತ್ಯಾ ವೆಳಾರ್ ಆಮ್ಕಾಂ ಆಮಿಂಚ್ ಸಮಾಧಾನ್ ದಿಲಾ ಶಿವಾಯ್ ಸಮಾಧಾನೆಚೆಂ ನೆಕೆತ್ರ್ ಜಾವ್ನ್ ಯಾ ಭರ್ವಶ್ಯಾಚೆಂ ಕಿರಣ್ ಜಾವ್ನ್ ಆಮ್ಚಾ ಘರಾಂತ್ ಉಜ್ವಾಡ್ ಫಾಂಕಯಿಲ್ಲೆಂ ಆಮ್ಚೆಂ ಸಂತಾನ್ ಕೊಣ್ಯ್ ಆಸಾ? ಚಿಂತ್ಚಾ ಎಸ್ತೆಲಾಚಾ ಮತಿಕ್ ಸುಮಾರ್ ಥೆಂಪಾ ಉಪ್ರಾಂತ್ ಆದ್ಲ್ಯಾ ಉಡಾಸಾನ್ ಕಾಂತಯ್ತಾನಾ ತಿಕಾ ಸತ್ನೆಗಾರ್ ಕರುಂಕ್ ಸಾದ್ಯ್ ಜಾಲೆಂ ನಾ.
"ಆಮ್ಚೆ ಖಾತಿರ್ ತುಜೆಂ ಜೀವನ್ ಆಮಿಂ ಬಲಿ ಭೆಟಂವ್ಕ್ ತಯಾರ್ ನಾ ಪುತಾ! ಆಮ್ಕಾಂ ಆನಿ ಕಿತೆಂ ಜಾಂವ್ಕ್ ಜಾಯ್?" ಸಿಂತಿಮೆಂತಾಳ್ ಜಾಲ್ಲಿ ಎಸ್ತೆಲ್ ಉಲಯ್ಲಿ.
"ತಶೆಂ ನ್ಹಯ್ ಮಾಂಯ್! ಇತ್ಲೆ ದೀಸ್ ತುಮ್ಚೆ ಮತಿಕ್ ಹಾವೆಂ ಸಮಾಧಾನ್ ದಿಲೆಂ ತೆಂಚ್ ಮ್ಹಾಕಾ ವರ್ತೆಂ. ಪುಣ್ ಆಶೆಂಚ್ ಹಾನಿಕ್ಯ್ ಕಿತ್ಲೊ ಲೋಕ್ ಆಸಾ ಆಸ್ತಲೊ ಜ್ಯಾ ಲೊಕಾಕ್ ತಾಂಚಿಂ ಮ್ಹಳ್ಳಿಂ ಆಸೊನ್ಯ್ ಆಪ್ಲೆಂ ಘರ್ದಾರ್ ಸಾಂಡುನ್ ತ್ಯಾ ಆಸ್ರ್ಯಾನಿಂ ವೊರಾಂ ಮೆಜ್ಚಿಂ.....!"
ನಾತಿಚಾ ಉತ್ರಾಂಕ್ ಆಯ್ಕೊನ್ ಏಕ್ ಕ್ಷಣ್ ಆಪ್ಲ್ಯಾ ಕಾನಾಂ ವಯ್ರ್ ಆಪ್ಣಾಕ್ಚ್ ಭರ್ವಸೊ ನಾತ್ಲೆಲ್ಯಾ ಪರಿಂ ಎಸ್ತೆಲಾಕ್ ಜಾಲೆಂ. ಮಿಶೇಲಾನ್ ತಾಚ್ಯಾ ಪ್ರಾಯೆಚಾ ಜಾಣ್ವಾಯೆ ಪ್ರಾಸ್ ಉಂಚಾಯೆಚಿಂ ಉತ್ರಾಂ ಉಚಾರ್ಲೆಲಿಂ. ನಾತಿಚಿಂ ಉತ್ರಾಂ ಆಯ್ಕಾಲ್ಲ್ಯಾ ಎಸ್ತೆಲಾಕ್ ಆತಾಂ ರಾವೊಂಕ್ ಜಾಲೆಂ ನಾ.
"ಮ್ಹಜ್ಯಾ ಪುತಾ!" ಮ್ಹಳ್ಳ್ಯಾ ತಿಣೆಂ ಆಪ್ಲ್ಯಾ ನಾತಿಕ್ ಆಪ್ಲ್ಯಾ ದೊನ್ಯ್ ಹಾತಾನಿಂ ವೊಡುನ್ ಭಳಾನ್ ವೆಂಗುನ್ ಧರ್ಲೆಂ.
ಆಜಿಯೆಚಾ ವೆಂಗೆಂತ್ ಆಯಿಲ್ಲೆಂ ಮಿಶೇಲ್ ಕಾಂಯ್ಚ್ ಉಲಯ್ಲೆಂ ನಾ. ಪುಣ್ ಖಂಯ್ಚರ್ಗೀ ಪಯ್ಸ್ ಸೊಭಿತ್ ಸೊಭಿತ್ ರಂಗಾಳ್ ಬಣಾಂಚಾ ಶಿಂವೊರಾ ಮಧೆಂ ಆಪುಣ್ ರಾಣಿಯೆಚಾ ನ್ಹೆಸ್ಣಾಚೆರ್ ಚಲೊನ್ ವೆತಾಂ ತಶೆಂ ಮಿಶೇಲಾಕ್ ದಿಸ್ಲೆಂ.
ಮನ್ಶ್ಯಾಚೆಂ ಖರೆಂ ರಾಜ್ ಕಸಲೆಂ? ಹ್ಯಾ ರಾಜಾಕ್ ಚಲಂವ್ಕ್ ಆನಿಂ ಜಿಕೊಂಕ್ ಕಶೆಂ ಸಾದ್ಯ್ ಮ್ಹಳ್ಳೆಂ ತೆಂ ಸವ್ಕಾಸ್ ಮಿಶೇಲಾಚಾ ಮತಿಕ್ ಸಮ್ಜಾಲ್ಲೆಂ. ಮನ್ಶ್ಯಾಚಾ ಕಾಳ್ಜಾಕ್ ಜಿಕ್ಚೆಂ, ತೆಂಯ್ ವಜನ್ ಭೊಗ್ಚಾ ಕಾಳ್ಜಾಂಕ್ ಸಂತೊಸ್ ದಿಂವ್ಚೆಂ ಸಗ್ಳ್ಯಾಂ ಪ್ರಾಸ್ ವರ್ತೆಂ ಮ್ಹಣೊನ್ ಮಿಶೇಲ್ ಸಮ್ಜಾತಾನಾ ತಾಚ್ಯಾ ತ್ಯಾ ಸೊಭಿತ್ ವೊಂಟಾಚೆರ್ ಮಂದ್ ಹಾಸೊ ವ್ಹಾಳೊನ್ ಆಯ್ಲ್ಯೊ. ತ್ಯಾ ಹಾಸ್ಯಾಂ ಸಾಂಗಾತಾ ಆಪ್ಲ್ಯಾ ಆಜಿಯೆಕ್ ಮಿಶೇಲಾನ್ ಘಟ್ ವೆಂಗುನ್ ಧರ್ಲೆಂ.
*****************
ಆಜ್ ಮಿಶೆಲ್ ಕಾಲೇಜಿಕ್ ಆಯಿಲ್ಲೆಂ ತೆಂ ಹರ್ಶೆಂಚಾ ಪರಿಂ ತಾಚ್ಯಾ ಹಾಸ್ತ್ಯಾ ಮುಖಮಳಾಚಾ ಹುರುಪಾರ್ ನಾತ್ಲೆಲೆಂ. ಆಪ್ಣಾಚಾ ಮುಖಮಳಾನ್ ಹೊಗ್ಡಾಯಿಲ್ಲ್ಯಾ ಹುರುಪಾಕ್ ತಾಚ್ಯಾ ಮತಿಚೊ ಭಾರ್, ಯಾ ಕಾಳ್ಜಾಚಾ ಸಿಂತಿಮೆಂತಾಂಚೆಂ ವ್ಹಜನ್, ತಾಕಾಚ್ ಕಳಿತ್ ನಾತ್ಲೆಲೆಂ ತಾಚ್ಯಾ ಆಯ್ಚಾ ಹ್ಯಾ ಬದ್ಲಾಲ್ಲ್ಯಾ ಜಿನೊಸಾಕ್ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ. ಪುಣ್ ಏಕ್ ವಿಶಯ್ ಮಾತ್ರ್ ಮಿಶೇಲ್ ಸಾರ್ಕೆಂ ಜಾಣಾಂ ಜಾಲ್ಲೆಂ.
ಜಿವಿತ್ ಮ್ಹಳ್ಯಾರ್ ಉದ್ಕಾ ವಯ್ಲ್ಯಾ ಬುಳ್ಬುಳ್ಯಾ ಪರಿಂ. ತೊ ಬುಳ್ಬುಳೊ ಉಟೊಂಕ್ ಉಟ್ತಾ. ಪುಣ್ ತಾಚೊ ಫುಡಾರ್ ಕಿತೆಂ ತೆಂ ಖುದ್ದ್ ತೊಚ್ ನೆಣಾಂ. ಮನಿಸ್ಯ್ ಆಸೊಚ್ಚ್. ಏಕ್ ಬುಳ್ಬುಳೊ ಮಂಗ್ಳುರಾಂತ್ ಉಟ್ಲಲೊ ತೊ, ತ್ಯಾ ಪಯ್ಶಿಲ್ಯಾ ಮ್ಯಾಂಚೆಸ್ಟರಾಂತ್ ವಚೊನ್ ಪುಟ್ಲೊ ಆಸ್ತಾಂ ದುಸ್ರೊ, ಆಸ್ರ್ಯಾಚಾ ದಾರಾಕ್ ಪಾವೊಂಕ್ ಲಾಗಿಂ ಜಾವ್ನ್ ಪಾಟಿಂ ಪರ್ತಾಲ್ಲೊ.
ಆಪ್ಲ್ಯಾಚ್ ಆಶೆ ಆನಿ ಖುಶೆ ಪರ್ಮಾಣೆಂ, ಜಿವಿತಾಂತ್ ಪಯ್ಲೆ ಪಾವ್ಟಿಂ ಆಪ್ಲ್ಯಾ ಆಜ್ಯಾ ಸಾಂಗಾತಾ ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಪಾಂಯ್ ದವರ್ಲೆಲ್ಯಾ ಮಿಶೇಲಾಕ್, ಆಸ್ರ್ಯಾಂತ್ ಆಸ್ಲೆಲ್ಯಾಂಕ್ ಪಳಯ್ತಾನಾ ಖುಶಿ ಜಾಲಿ ಜಾಲ್ಯಾರ್ಯ್ ಎಕೇಕ್ಲ್ಯಾಂಚಿ ಜಿವಿತಾಚಿ ಕಥಾ ಆಯ್ಕಾತಾನಾ ತಾಚೆಂ ನೆಣ್ತೆಂ ಕಾಳಿಜ್ ಶಿಂದೊನ್ ಆಯ್ಲೆಂ.
ಕೊಣ್ಚ್ ಗತ್ ಆಧಾರ್ ನಾತ್ಲೆಲ್ಯಾಂಕ್ ಪೊಸ್ಚಿಂ ಆಶ್ರಮಾ ಆಸಾತ್ ಮ್ಹಣೊನ್ ತಾಣೆಂ ಆಜ್ಯಾ ಥಾವ್ನ್ ಆಯ್ಕಾಲ್ಲೆಂ. ಪುಣ್ ಆಪ್ಲಿಂ ಆಸ್ಲೆಲಿಂ ತಿಂ ಆಪ್ಲ್ಯಾ ಪಯ್ಶ್ಯಾಂಚಾ ಭಳಾನ್ ಆಪ್ಲ್ಯಾಂಕ್ಚ್ ಆಶ್ರಮಾಂತ್ ದವರುನ್ ಪೊಸ್ತಾತ್ ಮ್ಹಳ್ಳೆಂ ತೆಂ ಮಿಶೇಲ್ ನೆಣಾಂ ಆಸ್ಲ್ಲೆಂ.
ಆಸ್ರ್ಯಾಂತ್ ಕೊಣ್ಯ್ ನಾತ್ಲೆಲ್ಯಾಂಚಾಕ್ಯ್ ಸಗ್ಳಿಂ ಆಸ್ಲ್ಲೆ ಮನಿಸ್ಚ್ ಚಡ್ ಆಸ್ಲ್ಲೆ. ಕೊಣಾಚೊ ಪುತ್ ಅಮೇರಿಕಾ ಅಸ್ಲ್ಯಾರ್, ಕೊಣಾಚೊ ಪುತ್ ಗಾವಾಂತ್ ಆಸ್ಲ್ಲೊ. ಕೋಣ್ ಬಾಟ್ಕಾರ್ ತರ್ ಕೋಣ್ ಘಟಾಗಾರ್. ಪುಣ್ ಸಗ್ಳೆ ಪಯ್ಶಾಂಗಾರ್! ಹಾಂಗಾ ಕೋಣ್ ಆಪ್ಲ್ಯಾ ಭುರ್ಗ್ಯಾಂಕ್ಚ್ ಕಾಂಠಾಳ್ತಾ ತರ್ ಕೋಣ್ ಆಪ್ಣೆಂ ಜಲ್ಮ್ ದಿಲ್ಲ್ಯಾ ಚೂಕಿಕ್ ಆಪ್ಲ್ಯಾ ಭುರ್ಗ್ಯಾಂಕ್ ರಡೊನ್ ರಡೊನ್ ಬೆಸಾಂವ್ ದಿತಾಲೊ. ಕೊಣಾಕ್ ಸುನೆನ್ ಭಾಯ್ರ್ ಘಾಲಾಂ ಜಾಲ್ಯಾರ್ ಕೊಣಾಚಿ ಆಸ್ತ್ ಜಾಂವ್ಯಾನ್ ಭಿತರ್ ಘಾಲ್ಯಾ.
"ಥುಕ್ ಹಾಂಚಾ ಜಲ್ಮಾಕ್!"
ಆಸ್ರ್ಯಾ ಥಾವ್ನ್ ಭಾಯ್ರ್ ಆಯಿಲ್ಲೊ ಜೆರೊಮ್ ರಾಗಾನ್ ಥುಕ್ಲ್ಲೊ. ಭೋವ್ಶ್ಯಾ ತಾಕಾಯ್ ಆಪುಣ್ ಆಜ್ ತಾಂಚೆ ಸಂಗಿಂ ಆಸ್ತೊಂ ಆಸ್ಲ್ಲೊಂ ಮ್ಹಳ್ಳೆಂ ಸತ್ ಕಳ್ಲ್ಲೆಂ ಆಸ್ತೆಲೆಂ.
"ಸಗ್ಳೆಂ ಬೆಷ್ಟೆಂ ಪುತಾ! ಸಂಸಾರಾಂತ್ ಪಳಂವ್ಕ್ ಗೆಲ್ಯಾರ್ ಕಾಂಯ್ಚ್ ನಾ!"
ಆಜಿಯೆಚಿಂ ಉತ್ರಾಂ ಖರೆಂಚ್ ಸತ್ ಮ್ಹಳ್ಳ್ಯಾಪರಿಂ ಮಿಶೇಲಾಕ್ ದಿಸ್ಲಿಂ. ತಾಚ್ಯಾಚ್ ಹಟಾಕ್ ಲಾಗೊನ್ ತಾಕಾ ತಾಚೊ ಆಜೊ ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಆಪವ್ನ್ ಹಾಡ್ನ್ ಆಯಿಲ್ಲೊ. ಆಸ್ರ್ಯಾಂತ್ ಆಸ್ಲ್ಲ್ಯಾ ಥೊಡ್ಯಾಂಕ್, ನವ್ಯಾ ಮನ್ಶಾಂಲಾಗಿಂ ಉಲಯ್ತಾನಾ ಸಂತೊಸ್ಯ್ ಜಾಲ್ಲೊ. ತಾಂಚೆಂ ಉಮಾಳೆ ದೆಖ್ತಾನಾ ಮಿಶೇಲಾಕ್ ಆಶೆಂ ದಿಸ್ಲೆಂ ಕೀ, ಹ್ಯಾ ಪ್ರಾಯ್ವಂತಾಕ್ ತಾಂಚಾ ಆಸ್ರ್ಯಾ ಭಾಯ್ಲ್ಯಾ ಲೊಕಾಂ ಸವೆಂ ಭರ್ಸೊಂಚಿ ಕಿತ್ಲಿ ಉಮೆದ್ ಆಸಾ! ಜಶೆಂ ಹ್ಯಾ ಪ್ರಾಯ್ವಂತಾಕ್ ತಾಣಿಂ ಜಿಯೆಲ್ಲ್ಯಾ ಸಂಸಾರಾ ಥಾವ್ನ್ ವಿಂಗಡ್ ದವರ್ಲಾಂ ಆನಿ ತಿಂ ಪರ್ತ್ಯಾಕ್ ತ್ಯಾ ತಾಣಿಂ ಜಿಯೆಲ್ಲ್ಯಾ ಸಂಸಾರಾಕ್ ವಚೊಂಕ್ ಆಶೆತಾತ್ ಮ್ಹಳ್ಳ್ಯಾ ಪರಿಂ! ತಾಂಚಾ ಉಲೊಣ್ಯಾಂತ್ ಕಿತ್ಲಿ ಮೊವಾಳಾಯ್? ಕಿತ್ಲೆ ಸಿಂತಿಮೆಂತಾಂಚೆ ಉಮಾಳೆ? ತಾಂಚಾ ದೊಳ್ಯಾಂನಿ ಉಪ್ಯೆವ್ನ್ ಆಯಿಲ್ಲಿ ಖುಶಿ.... ದಿಷ್ಟಿಂತ್ ದಿಸೊನ್ ಆಯಿಲ್ಲೊ ಸಂತೊಸ್..... ಉತ್ರಾಂನಿಂ ಭರೊನ್ ವೊಮ್ತೊಂಚೊ ಉಲ್ಲಾಸ್.... ತಾಣಿಂ ಬಾವುಡ್ಲಲೊ ಉಪ್ಕಾರ್, ದಿಲ್ಲಿಂ ಬೆಸಾಂವಾಂ, ಪೊಲ್ಯಾರ್ ಚರಯಿಲ್ಲೆ ಹಾತ್, ಆನಿ ನಿಮಾಣೆಂ..... ದೊಳ್ಯಾಂ ಆಸ್ಡ್ಯಾಂ ಪೊಂತಾರ್ ಥಾವ್ನ್ ಗಳಯಿಲ್ಲಿಂ ದುಖಾಂ!
ಕಾಲ್ಚಾ ಹ್ಯಾ ಭೆಟೆ ವರ್ವಿಂ ಮಿಶೇಲಾಚಾ ನೆಣ್ತ್ಯಾ ಕಾಳ್ಜಾಂತ್ ವಾದಾಳ್ಚ್ ಉಟೊನ್ ರಾವ್ಲ್ಲೆಂ. ಸಭಾರ್ ಸವಾಲಾಂ ತಾಚ್ಯಾ ಮತಿಂತ್ ಉಭಿಂ ಜಾಲ್ಲಿಂ. ಸಭಾರಾಂಕ್ ತಾಣೆಂ ಜವಾಬ್ ಸೊಧ್ಲಿ ತರ್ಯ್ ಸಬಾರ್ ಸವಾಲಾಂ ಅಜೂನ್ ಆಂಕ್ವಾರ್ ಜಾವ್ನ್ ತಾಚ್ಯಾ ಮತಿಂತ್ ಉರ್ಲೆಲಿಂ.
"ಕಿತೆಂ ಜಾಲೆಂ ಮಿಶೇಲ್ ? ವಾಟ್ಸ್ ರಾಂಗ್....?" ಆಯ್ಚಾ ದಿಸಾಚೆಂ ಮಿಶೇಲಾಚೆಂ ವರ್ತನ್ ಪಳವ್ನ್ ಶೀತಲಾಕ್ ದುಬಾವ್ ಮಾರ್ಲೊ.
ಶೀತಲ್, ಮಿಶೇಲಾಚೆಂ ಕಾಲೇಜ್ ಸಾಂಗಾತಿಣ್, ತೆಂ ಫಕತ್ತ್ ತಾಚೆಂ ಕಾಲೇಜಿಚೆಂ ಸಾಂಗಾತಿಣ್ ಮಾತ್ರ್ ನ್ಹಯ್, ತಾಚೆಂ ಚಡ್ ಲಾಗ್ಶಿಲೆಂ ಜಿಣಿಯೆ ಇಷ್ಟಿಣ್. ದೊಗಾಂಯ್ ಎಕಾಚ್ ಪ್ರಾಯೆಚಿಂ ಜಾವ್ನ್, ಚಡಾವತ್ ಜಾವ್ನ್ ತಾಂಚ್ಯಾ ಲ್ಹಾನ್ ಥಾವ್ನ್ ಸಗ್ಳ್ಯಾ ತಾಂಚಾ ಇಸ್ಕೊಲಾಚಾ ದಿಸಾನಿಂ ಸಾಂಗಾತಾ ಆಸ್ಲ್ಲಿಂ. ತ್ಯಾ ಭಾಯ್ರ್ ದೊಗಾಂಯ್ ಸೆಜಾರಿ. ಎಕಾಚ್ ಲೇನಾಂತ್ ತಾಂಚಿಂ ಘರಾಂ.
ಶೀತಲಾಚೊ ಬಾಪಯ್ ಮಾಧವ ಶೆಟ್ಟಿ. ಮಂಗ್ಳುರಾಂತ್ ತಾಕಾ ಸೊರ್ಯಾಚೆಂ ಬಿಜ್ನೆಸ್. ಜೆರೊಮಾಕ್ ತೊ ಪಯ್ಲೆಂ ಥಾವ್ನ್ ವಳ್ಕಾತಾಲೊ. ಬಿಜ್ನೆಸಾಚಾ ನದ್ರೆನ್ ತಾಂಚಾ ಮಧೆಂ ಸಂಭಂಧ್ ಆಸ್ಲ್ಲೊ. ತಶೆಂ ಶೀತಲ್ ಆನಿ ಮಿಶೇಲ್ ದೊಗಾಂಯ್ ಮಧೆಂ ಇಷ್ಟಾಗತೆಚೊ ಸಂಭಂಧ್ ಪಯ್ಲೊಚ್ ಉಬ್ಜಾಲ್ಲೊ.
"ನಥಿಂಗ್! ಕಾಂಯ್ ನಾ.....!" ಶೀತಲಾಚಾ ಸವಾಲಾಕ್ ಮಿಶೇಲಾನ್ ಸಾದಿ ಜವಾಬ್ ದಿಲಿ. ಪುಣ್, ತೆಂ ತಾಚ್ಯಾ ತೊಂಡಾರ್ ರೂಪ್ ರೂಪ್ ಜಳ್ಕೊಂಚಾ ತ್ಯಾ ಖಂತ್ಭರಿತ್ ಬಾವ್ಲೆಲ್ಯಾ ಲಕ್ಷಣಾಕ್ ಜಾಂವ್ ಯಾ ತಾಚ್ಯಾ ಮತಿಂತ್, ಚಿಂತ್ನಾನಿಂ ಉಟಯಿಲ್ಲ್ಯಾ ವಾದಾಳಾಕ್ ಜಾಂವ್ ಲಿಪಂವ್ಕ್ ಸಕ್ಲೆಂ ನಾ.
"ಕಾಂಯ್ ನಾ.....!? ತುಜ್ಯಾ ತೊಂಡಾಕ್ ಪಳೆಲ್ಯಾರ್ ಕಿತೆಂ ತರ್ಯ್ ಆಸ್ಲೆಲ್ಯಾ ಪರಿಂ ದಿಸ್ತಾ....!"
"ತುಕಾ ಏಕ್ ಸವಾಲ್ ವಿಚಾರ್ತಾಂ.... ಜವಾಬ್ ದಿತಾಯ್?" ಮಿಶೇಲಾನ್ ಆಪ್ಲ್ಯಾ ನದ್ರೆಕ್ ಮುಕ್ಲ್ಯಾ ರಸ್ತ್ಯಾ ವಯ್ರ್ ಕೇಂದ್ರೀಕ್ರತ್ ಕೆಲಿ.
"ಸವಾಲ್.....?" ಮಿಶೇಲಾಚೆಂ ಆಯ್ಚೆಂ ವರ್ತನ್ ಶೀತಲಾಚಾ ಸಮ್ಜಾಣೆ ಭಾಯ್ರ್ ಆಸ್ಲ್ಲೆಂ. ತಾಣೆಂ ತಶೆಂಚ್ ತಿಂ ಚಲೊನ್ ಆಸ್ಲೆಲ್ಯಾಪರಿಂ ಹೆವ್ಶಿಂ ಮಿಶೇಲಾಕ್ ಪಳೆಲೆಂ. ತಾಚ್ಯಾ ಮುಖಮಳಾರ್ ತೆಂಚ್ ಪಯ್ಲೆಂಚೆಂ ಲಕ್ಷಣ್ ರಾಜ್ ಕರ್ತಾಲೆಂ.
ಆತಾಂ ತಿಂ ಕಾಲೇಜಿಚಿ ಗೇಟ್ ಉತ್ರೊನ್ ಮುಕ್ಲ್ಯಾ ವಿಶಾಲ್ ಕಾಲೇಜಿಚಾ ಕ್ಯಾಂಪಸಾ ಭಿತರ್ ಪಾವ್ಲಿಂ.
ಕ್ಯಾಂಪಸಾ ಭಿತರ್ ಚಲ್ತಾಂ ಚಲ್ತಾಂ ಎಕ್ಚ್ಚ್ ಪಾವ್ಟಿಂ ರಾವ್ಲ್ಲ್ಯಾ ಮಿಶೇಲಾನ್ ಆಪ್ಲಿ ತಕ್ಲಿ ಉಭಾರುನ್ ವಯ್ಲ್ಯಾ ಮೊಳಾಬಾರ್ ನದರ್ ವೆಲಿ. ಸಕಾಳಿಂಚೊ ಸುರ್ಯೊ ಕಾಲೇಜಿಚಾ ದಾವ್ಯಾ ಕುಶಿಂತ್ಲ್ಯಾಂನ್ ಆಪ್ಲೊ ವೈಭವ್ ದಾಖಯ್ತಾಲೊ. ಥೊಡ್ಯಾ ವೆಳಾಕ್ ತ್ಯಾ ಸುರ್ಯಾಕ್ಚ್ ಪಳೆಲ್ಲ್ಯಾ ಮಿಶೇಲಾನ್, ಸವ್ಕಾಸ್ ಆಪ್ಲಿ ನದರ್ ಸಕಯ್ಲ್ ಕಾಡುನ್ಶೀತಲಾ ಸಂಗಿಂ ಮೆಟಾಂ ಕಾಡ್ಲಿಂ.
"ಸುರ್ಯೊ ಜಳ್ತಾ ಮ್ಹಣೊನ್ ತುಂ ತುಕಾಚ್ ತಾಚ್ಯಾ ಆಗ್ಟ್ಯಾ ಥಾವ್ನ್ ಲಿಪವ್ನ್ ದವರುನ್ ಭಿತರ್ ಬಸ್ತಾಯ್?" ಥೊಡೊ ವೇಳ್ ಮೌನ್ ಜಾಲ್ಲ್ಯಾ ಮಿಶೇಲಾನ್ ವ್ಹಳೂ ಸವಾಲ್ ಕೆಲೆಂ.
ಮಿಶೇಲಾಚಾ ಸವಾಲಾಕ್ ಸಮ್ಜೊಂಕ್ ಸಕಾನಾಸ್ತಾನಾ ಶೀತಲ್ ಥೊಡೆಂ ಚಿಂತುಂಕ್ ಪಡ್ಲೆಂ.
"ಸುರ್ಯಾಕ್ ಭಿಯೆವ್ನ್......? .......ನಾ!" ತಾಣೆಂ ಜವಾಬ್ ದಿಲಿ.
"ಚಾನ್ನ್ಯಾಚೊ ಉಜ್ವಾಡ್ ಬರೊ ಥಂಡ್ ಮ್ಹಣೊನ್ ತುಂ ತುಜ್ಯಾ ಘರಾಚೆಂ ಪಾಕೆಂ ಉಗ್ತೆಂ ಘಾಲ್ತಾಯ್?" ಮಿಶೇಲಾಚೆಂ ದುಸ್ರೆಂ ಸವಾಲ್.
"ನಾ!" ಮಿಶೇಲಾಚಾ ಸವಾಲಾಕ್ ಶೀತಲಾನ್ ತಿತ್ಲ್ಯಾಚ್ ಥಂಡ್ಪಣಾನ್ ಜವಾಬ್ ದಿಲಿ.
"ತುಂ ಸುರ್ಯಾಕ್ ಭಿಯೆನಾಯ್..... ಚಾನ್ನ್ಯಾಕ್ ಆಶೆನಾಯ್.....! ತರ್ಯ್ ತುಂ ಸುರ್ಯಾ ಥಾವ್ನ್ ಲಿಪ್ತಾಯ್ ಆನಿ ಚಾನ್ನ್ಯಾಕ್ ಸೊಧ್ತಾಯ್!" ಏಕ್ ಪಾವ್ಟಿಂ ಮಿಶೇಲಾನ್ ಶೀತಲಾಕ್ ಪಳೆವ್ನ್ ಪರ್ತ್ಯಾಕ್ ತಶಿಚ್ಚ್ ಆಪ್ಲಿ ನದರ್ ಸಕಯ್ಲ್ಯಾ ಧರ್ಣಿಚೆರ್ ಚರಯ್ಲಿ.
ಮಿಶೇಲ್ ಆತಾಂ ಮೌನ್ ಜಾಲ್ಲೆಂ ಪಳೆಲ್ಲೆಂ ಶೀತಲ್ ಆಪ್ಲೆಂ ತೋಂಡ್ ಹೆವ್ಶಿಂ ಘುಂವ್ಡಾವ್ನ್ ಮಿಶೇಲಾಕ್ ಪಳಂವ್ಕ್ ಲಾಗ್ಲೆಂ. ಮಿಶೇಲಾಕ್ ಪಳೆಲ್ಲ್ಯಾ ಶೀತಲಾಕ್, ತೆಂ ಕಿತೆಂ ತರ್ಯ್ ಚಿಂತುನ್ ಆಸಾ ತಶೆಂ ದಿಸ್ಲೆಂ. ಪುಣ್, ತೆಂ ಕಿತೆಂ ಚಿಂತಾ ಮ್ಹಳ್ಳೆಂ ತೆಂ ಮಿಶೇಲಾನ್ ತಾಕಾ ವಿಚಾರ್ಲೆಲ್ಯಾ ಸವಾಲಾಂ ಥಾವ್ನ್ ತಾಕಾ ಸಮ್ಜಾಲೆಂ ನಾ. ಮಿಶೇಲಾಚಾ ಸವಾಲಾಂಕ್ಮಿಶೇಲಾನ್ಚ್ ದಿಲ್ಲಿಜವಾಬ್ ಪಳವ್ನ್, ತ್ಯಾ ಸಮ್ಜಾನಾತ್ಲೆಲ್ಯಾ ಜವಾಬೆ ಥಾವ್ನ್ ಮಿಶೇಲಾಕ್ ಕಸಲಿ ಖಂತ್ ಲಾಗ್ಲ್ಯಾ ತೆಂ ಪಾರ್ಕುಂಕ್ ಶೀತಲಾಕ್ ಸಾದ್ಯ್ ಜಾಲೆಂ ನಾ.
ತಿತ್ಲ್ಯಾರ್!
ಶೀತಲಾಚಾ ಬ್ಯಾಗಾಂತ್ಲೆಂ ತಾಚೆಂ ಸೆಲ್ಫೋನ್ ವ್ಹಾಜೊಂಕ್ ಲಾಗ್ಲೆಂ.
ಶೀತಲಾಚಾ ಫೊನಾಚೊ ಮಧುರ್ ರಿಂಗ್ ಟೋನ್ ಆಯ್ಕಾಲ್ಲೆಂ ಮಿಶೇಲ್ ಎಕಾ ಕ್ಷಣಾಕ್ ಆಪ್ಲ್ಯಾ ಚಿಂತ್ನಾಂ ಸಾಗೊರಾ ಥಾವ್ನ್ ಭಾಯ್ರ್ ಆಯ್ಲೆಂ ಜಾಲ್ಯಾರ್ಯ್ ತೆಂ ತಾಕಾಚ್ ಗ್ರಾಸಿಲ್ಲ್ಯಾ ತ್ಯಾ ಸಂಸಾರಾ ಥಾವ್ನ್ ಭಾಯ್ರ್ ಯೇಂವ್ಕ್ ಸಕ್ಲೆಂ ನಾ.
ಆಪ್ಲ್ಯಾ ಬ್ಯಾಗಾಂತ್ಲೆಂ ಫೋನ್ ಭಾಯ್ರ್ ಕಾಡ್ಲೆಲೆಂ ಶೀತಲ್ ತೆಂ ಆನ್ ಕರುನ್ ಉಲಂವ್ಕ್ ಲಾಗ್ಲೆಂ.
ಪಾಂಚ್ ಮಿನುಟಾಂ ಫೊನಾರ್ ಉಲಯಿಲ್ಲೆಂ ಶೀತಲ್ ಫೋನ್ ಭಂಧ್ ಕರುನ್,
"ಹಾಂ ಮಿಶೇಲ್! ಮ್ಹಜ್ಯಾ ಕಸಿನಾಚೆಂ ಫೋನ್.....!" ಭಂಧ್ ಕೆಲ್ಲ್ಯಾ ಫೊನಾಕ್ ಬ್ಯಾಗಾಂತ್ ಗಳವ್ನ್, "ಯೆಂವ್ಚಾ ಹಪ್ತ್ಯಾಂತ್ ತಾಚೊ ಬರ್ತ್ಡೇ ಆಸಾ. ದೆಕುನ್ ಪಾರ್ಟಿ ದವರ್ಲ್ಯಾ ಖಂಯ್. ತಶೆಂ ಮ್ಹಾಕಾ ಆಪಯ್ತಾಲೆಂ!"
"ಕೋಣ್.....? ಸಪ್ನಾ.....?"
"ನ್ಹಯ್! ಅಂಜಲಿ.....!"
"ಹಾಂ.....! ತೆಂ ಮೂಡಬಿದ್ರೆಚೆಂ....?"
"ವ್ಹಯ್!"
ಹಾಸೊನ್ ಜವಾಬ್ ದಿಲ್ಲೆಂ ಶೀತಲ್ "ಓ.ಕೆ. ಆತಾಂ ಸಾಂಗ್, ಕಿತೆಂ ಜಾಲಾಂ........? ವಾಟ್ಸ್ ರಾಂಗ್ ವಿದ್ ಯು?" ಶೀತಲಾನ್ ಪಯ್ಲೆಂಚಾ ವಿಶಯಾಕ್ ಉಡಾಸ್ ಕೆಲೊ.
"ಮನ್ಶ್ಯಾನ್ ಹಿ ಸಮಾಜ್ ಮ್ಹಣೊನ್ ಕಿತ್ಯಾಕ್ ರಚ್ಲ್ಯಾ?" ಉಲಯ್ಲೆಂ ಮಿಶೇಲ್ "ಎಕಾಮೆಕಾ ಸಗ್ಳಿಂ ಮೆಳೊನ್ ಬರ್ಯಾ ಭಾಶೆನ್ ಜೆಯೆಂವ್ಕ್.....! ವ್ಹಯ್?" ಮಿಶೇಲಾಚಾ ಸವಾಲಾಕ್ ಮಿಶೇಲಾನ್ಚ್ ಜವಾಬ್ ದಿತಾನಾ ಶೀತಲಾನ್ ಫಕತ್ತ್ ’ವ್ಹಯ್’ ಮ್ಹಳ್ಳ್ಯಾ ಭಾಶೆನ್ ತಕ್ಲಿ ಹಾಲಯ್ಲಿ.
"ತರ್ ಹ್ಯಾಚ್ ಸಮಾಜೆಂತ್ ಜಿಯೆಂವ್ಚೊ ಮನಿಸ್ ಆಪ್ಣೆಂ ಜಿಯೆಂವ್ಚಾ ಖಾತಿರ್ ದುಸ್ರ್ಯಾಕ್ ಕಿತ್ಯಾಕ್ ಕೊನ್ಶ್ಯಾಕ್ ಲೊಟ್ತಾ? ಆಪ್ಣೆಂ ಶಿತ್ ಜೆಂವ್ಚಾ ಖಾತಿರ್ ದುಸ್ರ್ಯಾಚೆಂ ಶೆತ್ ಕಿತ್ಯಾಕ್ ಚರ್ತಾ? ಆಪ್ಣಾಚಾ ಪಿಡೆಕ್ ದುಸ್ರ್ಯಾಕ್ ಕಿತ್ಯಾಕ್ ವಕಾತ್ ವಾಟ್ತಾ? ಕಿತ್ಯಾಕ್? ವೈ......?"
ಮಿಶೇಲಾಚಾ ತೊಂಡಾ ಥಾವ್ನ್ ಆಯ್ಲೆಲ್ಯಾ ಸವಾಲಾಂಕ್ ಪಳವ್ನ್ ಶೀತಲ್ ಸಗ್ಳೆಂಚ್ ಘುಸ್ಪಡ್ಲೆಂ. ಮಿಶೇಲ್ ಕಸಲ್ಯಾ ವಿಶಯಾ ವಿಶಿ ಉಲಯ್ತಾ ತೆಂ ತಾಕಾ ಕಾಂಯ್ ಸಮ್ಜಾಲೆಂ ನಾ. ಥೊಡ್ಯಾಚ್ ವೆಳಾ ಪಯ್ಲೆಂ ಸುರ್ಯಾ ಆನಿ ಚಾನ್ನ್ಯಾ ವಿಶಿಂ ಉಲಯಿಲ್ಲೆಂ ಮಿಶೇಲ್ ಆತಾಂ ಎಕಾಚ್ಚ್ ಫರಾ ಆಪ್ಲ್ಯಾ ಸಮಾಜೆ ವಯ್ರ್ ಘುಂವ್ಲೆಲೆಂ.
"ಚಲ್ಯಾಂ ಆತಾಂ ಕ್ಲಾಸಿಕ್ ವೇಳ್ ಜಾತಾ. ಕ್ಲಾಸಿಂತ್ ಕಾಂಯ್ ಮತಿಕ್ ರಿಗ್ಲೆಂ ಜಾಲ್ಯಾರ್, ಉಪ್ರಾಂತ್ ತುಕಾ ಸಾಂಗ್ತಾಂ!" ದೊಗಾಂಯ್ ಉಲವ್ನ್ ಉಲವ್ನ್ ಕಾಲೇಜಿಚಿಂ ಮೆಟಾಂ ಚಡ್ಲಿಂ.
ತುವೆಂ ಸಮ್ಜೊಂಕ್ ಸಾದ್ಯ್ ನಾ ಶೀತಲ್! ಜೆದ್ನಾಂ ತುಂ ಸಮ್ಜಾತೆಲೆಂಯ್ ತೆದ್ನಾಂ ತುಂ ತುಕಾಚ್ ಕಾಂಟಾಳ್ತೆಲೆಂಯ್. ತುಜ್ಯಾ ಆಂಗಾಚಾ ಶಿರಾಂ ಶಿರಾಂನಿಂ, ತಾತ್ಲ್ಯಾ ಥೆಂಬ್ಯಾ ಥೆಂಬ್ಯಾನಿಂ ಜಾನಕಿ ತಸಲ್ಯಾ ಗರೀಬ್ ಬಾಯ್ಲೆಚೆಂ ದೂಖ್ ಭರ್ಲಾಂ! ತ್ಯಾ ದುಖಾಕ್ ನಾ ತುಂ ಪಿಳುನ್ ಕಾಡುಂಕ್ ಸಕ್ತಾಯ್. ನಾ ತುಂ ತಾಕಾ ಚಿಂವೊನ್ ತ್ಯಾ ನಾಣಿಯೆಂತ್ ಥುಕೊಂಕ್ ಸಕ್ತಾಯ್! ಮತಿಂತ್ಚ್ ಸಾಂಗ್ಲೆಲೆಂ ಮಿಶೇಲ್ ಕ್ಲಾಸ್ರೂಮಾ ಭಿತರ್ ರಿಗ್ಲೆಂ.
ಕ್ಲಾಸಿಂತ್ ಪ್ರೊಫೆಸ್ಸರಾಂಚಾ ಲೆಕ್ಚರಾಕ್ ಆಯ್ಕೊನ್ ಆನಿ ವಿಗ್ಯಾನಾಚಾ ಸಂಶೋಧನಾಂಕ್ ಮತಿಂತ್ ಆಟಯ್ತಾನಾ ಮಿಶೇಲಾಚಿ ಮತ್ ಅಪ್ಲೆಸ್ತಕಿಂ ತಾಚ್ಯಾ ಮತಿಕ್ ವೆಡೊ ಮಾರ್ಲೆಲ್ಯಾ ಚಿಂತ್ನಾಂ ಥಾವ್ನ್ ಸುಟ್ಕಾ ಘೆವ್ನ್ ಲಿಸಾಂವಾಂ ತೆವ್ಶಿಂ ತಾಚೆಂ ಧ್ಯಾನ್ ವೆತಾನಾ, ಥೊಡ್ಯಾ ವೆಳಾಕ್ ತೆಂ ಸಂಸಾರಾಕ್ ವಿಸ್ರಾಲೆಂ.
ಕಾಲೇಜಿಚೊ ವೇಳ್ ಆಕೇರ್ ಜಾತಾನಾ ದನ್ಪರಾಂಚಾ ಫ್ರೀ ಟಾಯ್ಮಾರ್ ಆಪ್ಲ್ಯಾ ಲಿಸಾಂವಾ ಖಾತಿರ್ ಲೈಬ್ರೆರಿ ಥಾವ್ನ್ ಘೆತ್ಲೆಲ್ಯಾ ಬೂಕಾಂಕ್ ಹಾತಿಂ ಘೆತ್ಲೆಲೆಂ ಮಿಶೇಲ್, ಆಪ್ಲ್ಯಾ ಕ್ಲಾಸಿ ಥಾವ್ನ್ ಭಾಯ್ರ್ ಪಡ್ಲೆಂ.
"ಆತಾಂ ಜಾಲ್ಯಾರ್ ತುಕಾ ತಿಕ್ಕೆ ಪಳವ್ಯಾಂ ಮ್ಹಣೊನ್ ಜಾತಾ. ಐ ಡೋಂಟ್ ನೋ..... ಮತಿಂತ್ ಕಸಲಿಂ ಕಸಲಿಂ ಚಿಂತ್ನಾ, ತ್ಯಾ ಸಾಕಾಳಿಂ ಫುಡೆಂ ಘೆವ್ನ್ ತುಂ ಭೊಂವ್ತಾಯ್ ತೆಂ.......!" ಕ್ಲಾಸ್ರೂಮಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಶೀತಲ್, ಮಿಶೇಲಾಚಾ ತೊಂಡಾರ್ ಆತಾಂ ತಿಕ್ಕೆ ನಿಳಾ ಆಯಿಲ್ಲಿ ಪಳವ್ನ್ ಸಂತೊಸ್ಲೆಂ.
ತಾಚ್ಯಾ ಉಲವ್ಣ್ಯಾಕ್ ಫಕತ್ತ್ ಮಿಶೇಲ್ ಹಾಸ್ಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ. ಕ್ಲಾಸ್ರೂಮಾ ಭಾಯ್ಲ್ಯಾ ಲಾಂಭ್ ಕಾರಿಡಾರಾಚೆರ್ ಚಲೊನ್, ಸಕಯ್ಲ್ ದೆಂವೊಂಕ್ ಆಸ್ಚಿಂ ಮೆಟಾಂ ದೆಂವೊನ್, ತಿಂ ದೊಗಾಂಯ್ ಗ್ರೌಂಡ್ ಫ್ಲೋರಾಕ್ ಪಾವ್ಲ್ಲಿಂ ತಿಂ, ಭಾಯ್ರ್ ಯೇವ್ನ್ ತ್ಯಾ ಮುಕ್ಲ್ಯಾ ಗ್ರೌಂಡಾಕ್ ಉತ್ರೊನ್, ಭಾಯ್ಲ್ಯಾ ರಸ್ತ್ಯಾಕ್ ಪಾವ್ಲಿಂ.
ರಸ್ತ್ಯಾರ್ ಹೆವ್ಶಿಂ ತೆವ್ಶಿಂ ಲಾಂಬಾಯೆಕ್ ದೀಷ್ಟ್ ವೆಲ್ಲ್ಯಾ ಮಿಶೇಲಾಕ್ ಖಂಯ್ಚರ್ಯ್ ಆಪ್ಣಾಚೆಂ ಜೀಪ್ ದಿಸೊನ್ ಆಯ್ಲೆಂ ನಾ.
"ಜಿಮ್ಮಿ, ಸದಾಂಚ್ ವೆಳಾರ್ ಹಾಜರ್ ಆಸ್ತಾಲೊ.....! ಆಜ್ ಕಿತೆಂ....? ಕಾಂಯ್ ದುಸ್ರೆಂ ಕಾಮ್ ಪಡ್ಲೆಂ?"
ಮಿಶೇಲಾನ್ ಮತಿಂತ್ಚ್ ಚಿಂತ್ಲೆಂ. ಹೆವ್ಶಿಂ ತೆವ್ಶಿಂ ಜೀಪ್ ಖಂಯ್ಸರ್ಯ್ ದಿಸ್ತಾಗಾಯ್ ಮ್ಹಣೊನ್ ತೆಂ ಪಳಂವ್ಕ್ ಲಾಗ್ಲೆಂ.
"ಖಂಯ್ ಮಿಶೇಲ್.....? ಜಿಮ್ಮಿ ದಿಸಾನಾ....!"
"ತೆಂಚ್ ಶೀತಲ್! .......ಹಾಂವ್ಯ್ ಪಳೆತಾಂ!"
ಮಿಶೇಲಾಕ್ ಕಿತೆಂ ಕರ್ಚೆಂ ತೆಂ ಕಳೊಂಕ್ ನಾ. ಫೋನ್ ಕರುನ್ ವಿಚಾರ್ಯಾಂ ಮ್ಹಣೊನ್ ಚಿಂತ್ಲ್ಲ್ಯಾ ತಾಣೆಂ ಆಪ್ಲ್ಯಾ ಬ್ಯಾಗಾಕ್ ಹಾತ್ ಘಾಲೊ.
"ಚಲ್ ಮಿಶೇಲ್....., ಥಂಯ್ಚರ್ ಸಾವ್ಳೆಕ್ ಯಾ!"
ಶೀತಲ್ ರಸ್ತ್ಯಾಕ್ ದೆಂವೊನ್, ರಸ್ತ್ಯಾಚಾ ದುಸ್ರ್ಯಾ ಕುಶಿಕ್ ಅಸ್ಚಾ ರೂಕಾಚಾ ಸಾವ್ಳೆ ತೆವ್ಶಿಂ ಚಲೊಂಕ್ ಲಾಗ್ತಾನಾ, ಬ್ಯಾಗಾಂತ್ಲೆಂ ಸೆಲ್ಫೋನ್ ಪುಸ್ತಕಾಂ ಮಧೆಂ ಸೊಧ್ಚೆಂ ಮಿಶೇಲ್, ಯಾಂತ್ರೀಕ್ರತ್ ರಿತಿನ್ ಶೀತಲಾಚಾ ಪಾಟ್ಲ್ಯಾನ್ ರಸ್ತೊ ಉತ್ರೊಂಕ್ ಲಾಗ್ಲೆಂ.
ತಿತ್ಲ್ಯಾರ್!
ಹ್ಯಾ ಕುಶಿಂನ್ ಥಾವ್ನ್ ಆಯ್ಲೆಲೆಂ ಏಕ್ ತಾಂಬ್ಡ್ಯಾ ರಂಗಾಚೆಂ ಸ್ಪೋರ್ಟ್ಸ್ ಬೈಕ್, ಶೀತಲ್ ಆನಿ ಮಿಶೇಲಾಚಾ ಚಡ್ ಲಾಗ್ಶಿಲ್ಯಾನ್ ಥಾವ್ನ್ ’ಝೂಂ’ ಆವಾಜ್ ಕರುನ್ ವೆತಾನಾ, ತಾಚ್ಯೆ ಸವೆಂ ತ್ಯಾ ಬೈಕಾಕ್ ಲಾಯಿಲ್ಲೆಂ ತೆಂ ರೆಡ್ಯಾಚಾ ತಾಳ್ಯಾಚೆಂ ಹಾರನ್ ’ಹೋಂ.... ಹೋಂ’ ಕರುನ್ ವ್ಹಾಜ್ತಾನಾ, ರಸ್ತೊ ಉತ್ರೊಂಚೆಂ ಮಿಶೇಲ್, ಎಕಾಚ್ಚ್ ಫರಾ ಆಪ್ಣಾಕ್ ಕಿತೆಂಗೀ ಜಾಲ್ಲ್ಯಾ ಪರಿಂ ಭಿಯಾನ್ ಆಂಗ್ ಕಾಡುನ್ ನೀಟ್ ಜಾಲೆಂ. ತಾಚ್ಯಾ ಹಾತಾಕ್ ಆಯಿಲ್ಲೆಂ ಸೆಲ್ಫೋನ್ ಆನಿ ಹಾತಿಂತ್ ಧರ್ಲೆಲೆ ಲೈಬ್ರರಿಚೆ ಬೂಕ್ ತಾಚ್ಯಾ ಹಾತಾ ಥಾವ್ನ್ ರಸ್ತ್ಯಾಕ್ ಗಳ್ಳೆ. ಶೀತಲಾನ್ ತರ್ಯ್ ನಿಮಾಣ್ಯಾ ಘಡಿಯೆ ತ್ಯಾ ಬೈಕಾಕ್ ಪಳೆಲ್ಲೆಂ.
ಪುಣ್ ಮಿಶೇಲ್......?
ಸೆಲ್ಫೊನಾಚಾ ಧ್ಯಾನಾರ್ಚ್ ಆಸ್ಲ್ಲೆಂ ತೆಂ, ಶೀತಲಾಚಾ ಧಯ್ರಾರ್ ಫುಡೆಂ ಸರ್ಲೆಲೆಂ, ಅಚಾನಕ್ ಆಘಾತಾಕ್ ವಳಗ್ ಜಾಲ್ಲ್ಯಾಪರಿಂ ಜಾವ್ನ್ ಥೊಡ್ಯಾ ಘಡಿಯಾಂಕ್ ತಾಚೆಂ ಕಾಳಿಜ್ ರಾವ್ಲೆಲ್ಯಾ ಪರಿಂ ಜಾಲೆಂ.
ತಿತ್ಲೆಂಚ್!
ಮಿಶೇಲ್ ಆಪ್ಣಾಕ್ಚ್ ವಿಸ್ರಾಲೆಂ. ತಾಚ್ಯಾ ಕಾಳ್ಜಾಚಿ ಉಡಿ ರಾವೊನ್ ತೆಂ ಸ್ವಾಸ್ ಘೆಂವ್ಕ್ ವಿಸ್ರಾಲೆಂ. ತಾಚ್ಯಾ ಜಿವಾ ಭಿತರ್ಲೊ ಜೀವ್ ಆಪ್ಲೊ ಜೀವ್ ವಾಂಚವ್ಚ್ಯಾ ಖಾತಿರ್ ಉಡ್ಡೊಂಕ್ ಲಾಗ್ಲೊ.
ತಿತ್ಲ್ಯಾರ್!
ಬೈಕ್ ಧಾಂವ್ಲೆಲ್ಯಾ ತೆವ್ಶಿಂ ಪಳೆಲ್ಲ್ಯಾ ಶೀತಲಾಕ್, ತೆಂ ಬೈಕ್ ಬ್ರೇಕ್ ಮಾರುನ್ ಮುಕ್ಲ್ಯಾ ಜ್ಯೂಸಾಚಾ ಪಾರ್ಲರಾ ಮುಕಾರ್ ರಾವ್ಲೆಲೆಂ ತೆಂ ದಿಸ್ಲೆಂ.
"ಮಿಶೇಲ್....!"
ಉದ್ಗಾರ್ಲೆಲೆಂ ಶೀತಲ್, ಸಕಯ್ಲ್ ಧರ್ಣಿರ್ ಪಡೊನ್, ತೆವ್ಶಿಂ ಉಸ್ಳಾಲ್ಲ್ಯಾ ಮಿಶೇಲಾಚಾ ಸೆಲ್ಫೋನಾಕ್ ವಿಂಚುಂಕ್ ವೆತಾನಾ, ’ಪೇಂ’ ಕರುನ್ ವ್ಹಾಜ್ಲೆಲೆಂ ಹಾರನ್ ಅಯ್ಕೊನ್ ಪಾಟಿಂ ಸರ್ಲೆಂ. ತಿತ್ಲ್ಯಾರ್ ಹಾರನ್ ವ್ಹಾಜಯಿಲ್ಲೆಂ ತೆಂ ಕಾರ್ ಬ್ರೇಕ್ ಮಾರುನ್ ಮಿಶೇಲಾಚಾ ಮುಕಾರ್ಚ್ ಥಾಂಬ್ಲೆಂ.
"ಮಿಶೇಲ್.....! ಪಿಕ್ ಅಪ್ ದೋಸ್ ಬುಕ್ಸ್!"
ರಸ್ತ್ಯಾ ವಯ್ಲೆಂ ಸೆಲ್ಫೋನ್ ವಿಂಚ್ಲೆಲೆಂ ಶೀತಲ್, ಮಿಶೇಲ್ ವೊಗೆಂಚ್ ರಸ್ತ್ಯಾರ್ ರಾವ್ಲಾಂ ತೆಂ ಪಳವ್ನ್ ಬೊಬಾಟ್ಲೆಂ.
ರಸ್ತ್ಯಾ ಮಧೆಂ ಉಭೆಂ ಜಾಲ್ಲೆಂ ಮಿಶೇಲ್ ಹಾತಾ ಪಾಂಯಾನ್ ಕಾಂಪ್ತಾಲೆಂ. ತೆಂ ಸಂಸಾರಾಕ್ ವಿಸ್ರಾಲ್ಲೆಂ. ಆಪ್ಣಾಕ್ ಕಿತೆಂಗೀ ಜಾಲ್ಲ್ಯಾ ಪರಿಂ ತಾಕಾ ಭೊಗ್ಲೆಂ. ತ್ಯಾ ಥೊಡ್ಯಾಚ್ ವೆಳಾಂತ್ ಮಿಶೇಲಾಕ್ ತ್ಯಾ ಮ್ಯಾಂಚೆಸ್ಟರಾಂತ್ ಆಪ್ಲ್ಯಾ ಆವಯ್ ಬಾಪಾಯ್ಕ್ ಗ್ರಾಸಿಲ್ಲ್ಯಾ ಆಕ್ಸಿಡೆಂಟಾಚೊ ಆವಾಜ್ ತಾಚ್ಯಾ ಭಂವ್ತಿಂ ಘಾಜ್ತಾ ತಸೆಂ ಜಾಲೊ.
ಮಿಶೇಲಾಚೆಂ ವರ್ತನ್ ಪಳವ್ನ್, ಸಕಯ್ಲ್ ರಸ್ತ್ಯಾರ್ ಶಿಂಪಡ್ಲೆಲೆ ಬೂಕ್ ವಿಂಚ್ಲೆಲೆಂ ಶೀತಲ್, ಮಿಶೇಲಾಕ್, ತಾಚ್ಯಾ ಹಾತಾಕ್ ಧರುನ್ ಮಧೆಂ ರಸ್ತ್ಯಾ ಥಾವ್ನ್ ರಸ್ತ್ಯಾಚಾ ತ್ಯಾ ಕುಶಿಂನ್ ಪಾವ್ಲೆಂ.
ಮಿಶೇಲ್ ಆತಾಂ ರಡೊಂಕ್ ಲಾಗ್ಲೆಂ.
ಅಚಾನಕ್ ಜಾಲ್ಲ್ಯಾ ಘಡಿತಾ ಥಾವ್ನ್ ಕಾಲೇಜಿಚಾ ಸಭಾರ್ ಚಲಿಯಾಂಚಿ ನದರ್ ಹೆವ್ಶಿಂ ಮಿಶೇಲ್ ಆನಿ ಶೀತಲಾ ವಯ್ರ್ ಖಂಚ್ಲಿ.
"ಕಮಾನ್ ಮಿಶೇಲ್.....! ಕಾಂಯ್ ಜಾಂವ್ಕ್ ನಾ!" ಶೀತಲಾನ್ ಮಿಶೇಲಾಚಾ ಭುಜಾಂಕ್ ಧರುನ್ ಹಾಲಯ್ಲೆಂ. ಮಿಶೇಲ್ ಸಂಪೂರ್ಣ್ ಭಿಯಾನ್ ಕಾಂಪ್ತಾಲೆಂ.
ತಿತ್ಲ್ಯಾರ್!
ಜಿಮ್ಮಿನ್ ಡ್ರೈವ್ ಕರ್ಚೆಂ ಟಾಟಾ ಸಫಾರಿ, ಕಾಲೇಜಿಚ್ಯಾ ಮುಕ್ಲ್ಯಾ ರಸ್ತ್ಯಾರ್ ಸವ್ಕಾಸ್ ಆಯಿಲ್ಲೆಂ ತೆಂ ಕಾಲೇಜಿಚಾ ಗೇಟಿ ಮುಕಾರ್ ಯೇವ್ನ್ ರಾವ್ಲೆಂ.
ಕಾಲೇಜಿಚಾ ಗೇಟಿ ಮುಕಾರ್ ಜಿಮ್ಮಿಕ್ ಮಿಶೇಲ್ ಜಾಂವ್ ಶೀತಲ್ ಜಾಂವ್ ಜಳ್ಕಾಲಿಂ ನಾಂತ್.
ಜಿಮ್ಮಿ ಜಾಣಾಂ, ತೊ ಯೇಂವ್ಕ್ ವೇಳ್ ಜಾಲ್ಯಾರ್ ಮಿಶೇಲ್ ಖಂಯ್ ರಾವ್ತಾ ತೆಂ. ತಾಣೆಂ ಆಪ್ಲಿ ದೀಷ್ಟ್ ಮುಕ್ಲ್ಯಾ ತ್ಯಾ ರಸ್ತ್ಯಾಚಾ ತ್ಯಾ ಕುಶಿನ್ ಆಸ್ಚಾ ರಸ್ತ್ಯಾ ದೆಗೆಚಾ ರೂಕಾಂ ತೆವ್ಶಿಂ ಧಾಂವ್ಡಾಯ್ಲಿ.
ವ್ಹಯ್! ಮಿಶೇಲ್ ಆನಿ ಶೀತಲ್ ದೊಗಾಂಯ್ ತಾಚ್ಯಾ ದೊಳ್ಯಾಂಕ್ದಿಸ್ತಾನಾ, ವ್ಹಳೂ ಜೀಪ್ ಘುಂವ್ಡಾಯಿಲ್ಲ್ಯಾ ಜಿಮ್ಮಿನ್ ಜಿಪಾಕ್ ಹಾಡುನ್ ಮಿಶೆಲಾಚಾ ಮುಕಾರ್ ಥಾಂಬಯ್ಲೆಂ.
"ಮಿಶೇಲ್...? ಜೀಪ್ ಆಯ್ಲೆಂ!"
ಶೀತಲಾನ್ ಸಾಂಗ್ಲೆಲೆಂ ಆಯ್ಕೊನ್ ಮುಕಾರ್ ಪಳೆಲ್ಲ್ಯಾ ಮಿಶೇಲಾನ್, ಆಪ್ಲೆ ದೊಳೆ ಘೆಷ್ಟುನ್, ಖಾಂದ್ಯಾಚೆಂ ನಿಸ್ರಾಲ್ಲೆಂ ಬ್ಯಾಗ್ ವಯ್ರ್ ಖಾಂದ್ಯಾರ್ ವೊಡುನ್ ಜಿಪಾ ಲಾಗಿಂ ಯೇವ್ನ್ ಜಿಪಾಚೆಂ ದಾರ್ ಉಗ್ತೆಂ ಕರುಂಕ್ ಹಾತ್ ಮುಕಾರ್ ಹಾಡ್ಲಾ ಮಾತ್ರ್!
ತಿತ್ಲ್ಯಾರ್!
ಹೆವ್ಶಿಂ ಘುಂವೊನ್ ಮಿಶೆಲಾಕ್ ಪಳೆಲ್ಲ್ಯಾ ಜಿಮ್ಮಿಕ್, ಮಿಶೇಲಾಕ್ ಪಳಯ್ತಾನಾ ದುಬಾವ್ ಮಾರ್ಲೊ.
ದೊಗಾಂಯ್ ಜಿಪಾ ಭಿತರ್ ಬಸೊನ್ ದಾರ್ ಭಂಧ್ ಕರ್ತಾನಾ, "ದರ್.... ಪೋನ್ ಘೆ...! ಹೆಂ ಭಂಧ್ ಜಾಲಾಂ ದಿಸ್ತಾ!" ಸೆಲ್ಫೋನಾಚಾ ಡಿಸ್ಪ್ಲೇ ವಯ್ರ್ ಕಾಂಯ್ಚ್ ದಿಸೊನ್ ಯೆನಾತ್ಲೆಲೆಂ ಪಳವ್ನ್ ಆನಿ ಸೆಲ್ಫೋನ್ ರಸ್ತ್ಯಾಕ್ ಪಡ್ಲೆಲ್ಯಾ ಪಡ್ಣೆಕ್ ಲಾಗೊನ್ ಭಂಧ್ ಜಾಲಾಂ ತೆಂ ಕಳ್ಲ್ಲ್ಯಾ ಶೀತಲಾನ್ ಸಾಂಗ್ಲೆಂ.
ಹ್ಯಾಚ್ ವೆಳಾರ್ ಜಿಮ್ಮಿಚಿ ನದರ್ ಮುಕ್ಲ್ಯಾ ಸೆಂಟರ್ ಮಿರರಾರ್ ಪಡ್ಲಿ.
ಜಿಪಾ ಪಾಟ್ಲ್ಯಾನ್ ಕಾಲೇಜಿಚಿಂ ಚೆಡ್ವಾಂ ಆಪ್ಲ್ಯಾ ಜಿಪಾಕ್ಚ್ ಪಳವ್ನ್ ರಾವ್ಲ್ಯಾಂತ್ ತೆಂ ಪಳೆಲ್ಲ್ಯಾ ತಾಕಾ ಕಿತ್ಯಾಕ್ಗೀ ಮಿಶೇಲಾ ವಯ್ರ್ ದುಬಾವ್ ಮಾರ್ಲೊ.
"ಕಿತೆಂ ಜಾಲೆಂ...?"
ಜಿಮ್ಮಿಚಾ ತಾಳ್ಯಾಂತ್ ತೊಚ್ಚ್ ಸದಾಂಚೊ ತಿರಸ್ಕಾರ್ ಭರೊನ್ ವೊಮ್ತೊಂಚೊ ಸ್ವಭಾವ್.
ತಾಚ್ಯಾ ಉಲವ್ಣ್ಯಾಂತ್ ಮೊವಾಳಾಯ್ ಮ್ಹಳ್ಳಿ ತಿ ನಾತ್ಲೆಲಿ. ದೊಳ್ಯಾಂ ದಿಷ್ಟೆಂತ್ ಶಾಂತ್ಪಣ್ ಜಾಂವ್ ಯಾ ವೊಂಟಾರ್ ಆಪ್ರೂಪ್ ತರ್ಯ್ ಹಾಸೊ ಜಾಂವ್ ಮಿಶೇಲಾನ್ ಯಾ ಶೀತಲಾನ್ ಪಳೆಲ್ಲೆಂ ನಾ. ಮತಿಂತ್ ದ್ರಡ್ ಆನಿ ಕರ್ನ್ಯಾನಿಂ ಏಕ್ಧಂ ಖಡಕ್ ಸ್ವಭಾವ್.
"ಹ್ಯಾ ಡ್ರೈವರಾಕ್ ತುಜೊ ಆಬ್ ಕಿತೆಂ ಮ್ಹಣೊನ್ ಪಸಂದ್ ಕರ್ತಾ?"
ಜಿಮ್ಮಿಚಾ ವರ್ತನಾಕ್ ಸಮ್ಜಾನಾಸ್ತಾನಾ ಶೀತಲಾನ್ ಸಭಾರ್ ಪಾವ್ಟಿಂ ಮಿಶೇಲಾಕ್ ಸವಾಲ್ ಕೆಲ್ಲೆಂ.
"ಐ ಡೋಂಟ್ ನೋ....! ಬಟ್ ಹಿ ಇಸ್ ವೆರ್ರಿ ಸಿನ್ಸಿಯರ್!"
ಶೀತಲಾನ್ ಜಿತ್ಲೆ ಪಾವ್ಟಿಂ ಜಿಮ್ಮಿ ವಿಶ್ಯಾಂತ್ ಸವಾಲಾಂ ಕೆಲ್ಲಿಂ ತಿತ್ಲೆ ಪಾವ್ಟಿಂ ಮಿಶೇಲಾನ್ ತಾಕಾ ಹಿಚ್ಚ್ ಜವಾಬ್ ದಿಲ್ಲಿ. ಜಿಮ್ಮಿ ಫಕತ್ತ್ ಮಿಶೇಲಾಚಾ ಘರ್ಚೊ ಡ್ರೈವರ್ ಮ್ಹಳ್ಳೊ ವಿಶಯ್ ಸೊಡ್ಲ್ಯಾರ್, ದೊಗಾಂಯ್ ಜಿಮ್ಮಿ ವಿಶ್ಯಾಂತ್ ಕಾಂಯ್ಚ್ ನೆಣಾಂ ಆಸ್ಲ್ಲಿಂ. ತಿಂಚ್ಚ್ ಕಿತ್ಯಾಕ್ ಜಿಮ್ಮಿ ವಿಶ್ಯಾಂತ್ ಜೆರೊಮ್ ಜಾಂವ್ ಯಾ ಎಸ್ತೆಲ್ ಜಾಂವ್ ಕಾಂಯ್ ನೆಣಾಂತ್. ಜಿಮ್ಮಿಚಾ ವಿಶ್ಯಾಂತ್ ಜೆದ್ನಾಂ ಜೆದ್ನಾಂ ಜೆರೊಮಾನ್ ಕಿತೆಂಯ್ ಜಾಣಾಂ ಜಾಂವ್ಚೆಂ ಪ್ರಯತ್ನ್ ಕೆಲ್ಲ್ಯಾ ತೆದ್ನಾಂ ತೆದ್ನಾಂ ಜಿಮ್ಮಿನ್ ತ್ಯಾ ವಿಶಿಂ ಉಲಂವ್ಕ್ ಇನ್ಕಾರ್ ಕೆಲಾಂ ಶಿವಾಯ್ ತಾಚ್ಯಾ ಖಾಸ್ಗಿ ವಿಶಯಾಂಕ್ ತಾಣೆಂ ಕೆದ್ನಾಂಚ್ ಜೆರೊಮಾ ಮುಕಾರ್ ದವರ್ಲೆಲೆಂ ನಾ.
ಆತಾಂ ಹ್ಯಾ ವಗ್ತಾರ್ ಜಾಲ್ಯಾರ್ಯ್ ತಶೆಂಚ್!
ಜಿಮ್ಮಿಚಾ ತಾಳ್ಯಾಂತ್ ಮೊವಾಳಾಯ್ ಮ್ಹಳ್ಳಿ ನಾತ್ಲೆಲಿ. ತಿಚ್ ಧಾರುಣಾಯ್!
ಆಪ್ಣೆ ವಿಚಾರ್ಲೆಲ್ಯಾ ಸವಾಲಾಕ್ ದೊಗಾಂಯ್ ಥಾವ್ನ್ ಕಾಂಯ್ ಜವಾಬ್ ಯೇನಾಸ್ತಾನಾ ವೆತಾನಾ ಜಿಮ್ಮಿನ್ಚ್ ಪಾಟಿಂ ಘುಂವೊನ್ ಪಳೆಲೆಂ.
ಪಾಟಿಂ ಘುಂವೊನ್ ಮಿಶೇಲಾಕ್ ಪಳಯಿಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಮಿಶೇಲಾಚಾ ದೊಳ್ಯಾಂ ಥಾವ್ನ್ ಭಾರೀಕ್ ರೂಪಾನ್ ತಾಚ್ಯಾ ಪೊಲ್ಯಾಂ ವಯ್ರ್ ಥಾವ್ನ್ ಗಳೊನ್ ವೊಂಟಾಕ್ ಪಾವ್ಲೆಲಿಂ ದುಖಾಂ ದಿಸ್ತಾನಾ, ಮಿಶೇಲಾಕ್ ಸೊಡುನ್ ತಾಣೆಂ ತಶೆಂಚ್ ಶೀತಲಾಕ್ ಪಳೆಲೆಂ.
ಶೀತಲಾಚಿ ದೀಷ್ಟ್ ಫಕತ್ತ್ ಎಕಾ ಕ್ಷಣಾಕ್ ಜಿಮ್ಮಿಚಾ ದೊಳ್ಯಾಂಕ್ ಮುಖಾಮುಖಿ ರಾವೊಂಕ್ ಸಕ್ಲಿ. ದುಸ್ರ್ಯಾ ಕ್ಷಣಾರ್ ಶೀತಲಾನ್ ಆಪ್ಲಿ ನದರ್ ಮಿಶೇಲಾ ತೆವ್ಶಿಂ ಘುಂವ್ಡಾಯ್ಲಿ.
ಕಾಂಯ್ ತರ್ಯ್ ಜಾಲಾಂ..... ಆನಿ ಹಿ ಮ್ಹಾಕಾ ಸಾಂಗಾನಾಂತ್! ಕಿತೆಂ ಜಾಲಾಂ ಜಾವ್ಯೆತ್? ಮನಾಂತ್ಚ್ ಚಿಂತ್ಲೆಲ್ಯಾ ಜಿಮ್ಮಿನ್,
"ಶೀತಲ್....., ತುಂ ತರ್ಯ್ ಸಾಂಗ್ ಕಿತೆಂ ಜಾಲೆಂ? ಬಾಬಾಕ್ ಫೋನ್ ಕರುಂ....?"
"ನಾಕಾ ನಾಕಾ....! ಕಾಂಯ್ ಜಾಂವ್ಕ್ ನಾ!" ಶೀತಲಾನ್ ಜಿಮ್ಮಿಕ್ ಪಳೆಲೆಂ. "........ ಎಕ್ಚುವಲ್ಲಿ ಆಮಿ ರಸ್ತೊ ಕ್ರಾಸ್ ಕರ್ತಾನಾ ಮಿಶೇಲ್ ಭಿಯೆಲೆಂ.....!"
"ಭಿಯೆಲೆಂ....? ಕಿತ್ಯಾಕ್?"
"ಎಕ್ಚುವಲ್ಲಿ....." ಶೀತಲ್ ಥೊಡೆಂ ಗಾಗೆಲೆಂ. ಹ್ಯಾ ಘಡಿತಾ ವಿಶಿಂ ಜಿಮ್ಮಿಕ್ ಆಪುಣ್ ಸಾಂಗೊ ವಾ ನಾ ಸಾಂಗೊಂ ಮ್ಹಳ್ಳ್ಯಾ ಭಾಶೆನ್. ಏಕ್ ಪಾವ್ಟಿಂ ಮಿಶೇಲಾಕ್ ಪಳೆಲ್ಲೆಂ ತೆಂ, "........ಆಮ್ಕಾಂ ತೆಂ ಬೈಕ್ ಕಶೆಂ ಆಯ್ಲೆಂ ತೆಂ ಕಳೊಂಕ್ಚ್ ನಾ. ಮಿಶೆಲಾನ್ ತರ್ಯ್ ತ್ಯಾ ಬೈಕಾಕ್ ಪಳಂವ್ಕ್ಚ್ ನಾ. ತಾಚ್ಯಾ ವಯ್ಲ್ಯಾನ್ ತೆಂ ತಾಚೆಂ ಹಾರನ್! ಮೈ ಗಾಡ್...! ಇತ್ಲ್ಯಾ ಲಾಗಿಂ ಪಾವೊನ್ ತಾಣೆಂ ಇತ್ಲ್ಯಾ ವ್ಹಡ್ಲ್ಯಾ ಆವಾಜಾನ್ ತೆಂ ವ್ಹಾಜಯ್ತಾನಾ..... ತೆಂಯ್ ತ್ಯಾ ರೆಡ್ಯಾನ್ ಆಂಬೆಲ್ಲ್ಯಾ ಪರಿಂ! ಜಾಯ್ ಜಾಯ್ ಮ್ಹಣೊನ್ ಕರ್ತಾತ್ ಹೆ.....!"
"ಆನಿ ತೆಂ ಬೈಕ್.....?" ಶೀತಲಾಚಾ ತೊಂಡಾ ಥಾವ್ನ್ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ತಾಣೆಂವಿಚಾರ್ಲೆಂ.
ಜಿಮ್ಮಿಚಾ ಸವಾಲಾಕ್ ಪಾಟಿಂ ಘುಂವ್ಲ್ಲ್ಯಾ ಶೀತಲಾನ್ ಪಯ್ಸ್ ಜ್ಯೂಸ್ ಪಾರ್ಲರಾಚಾ ಮುಕಾರ್ ರಾವ್ಲೆಲೆಂ ತಾಂಬ್ಡ್ಯಾ ರಂಗಾಚೆಂ ಬೈಕ್ ಪಳವ್ನ್,
"ಥಂಯ್ ಜ್ಯೂಸ್ ಪಾರ್ಲರಾಚಾ ಮುಕಾರ್ ರಾವ್ಲಾಂ ಪಳೆ ತೆಂ....!" ಶೀತಲಾನ್ ಸಾಂಗ್ತಾನಾ ಪಾಟಿಂ ದಿಸ್ಚಾ ಜ್ಯೂಸ್ ಪಾರ್ಲಾರಾ ತೆವ್ಶಿಂ ಜಿಮ್ಮಿನ್ ಆಪ್ಲಿ ದೀಶ್ಟ್ ಜೊಕುನ್ ಪಳೆಲೆಂ. ಥಂಯ್ಚರ್ ತಾಚ್ಯಾ ದಿಷ್ಟೆಕ್ ದೊನ್ ಚಾರ್ ಬೈಕಾಂ, ಥೊಡಿಂ ಸೈಕಲಾಂ ಆನಿ ಏಕ್ ಅಟೋ ರಿಕ್ಶಾ ರಾವೊನ್ ಆಸ್ಲೆಲಿ ದಿಸ್ಲಿ.
"ಖಂಯ್ಚೆಂ ಮ್ಹಳೆಂಯ್....?"
"ತಾಂಬ್ಡ್ಯಾ ರಂಗಾಚೆಂ....!"
ಶೀತಲಾನ್ ಸಾಂಗ್ತಾನಾ, ತಾಂಬ್ಡೆಂ ಬೈಕ್ ಪಳೆಲ್ಲೊ ಜಿಮ್ಮಿ, ಮುಕಾರ್ ಘುಂವೊನ್ ಜಿಪಾಚಿ ಗೇರ್ ವೊಡುನ್ ಥೊಡೆಂ ಮುಕಾರ್ ಗೆಲ್ಲೊ ತೊ ವ್ಹಳೂ ಜಿಪ್ ಪಾಟಿಂ ಘುಂವ್ಡಾಯ್ತಾನಾ ಶೀತಲಾಕ್ ಆಶ್ಚರ್ಯ್ ಜಾಲೆಂ.
"ತುಕಾ ಖಂಯ್ ವಚೊಂಕ್ ಆಸಾ?"
ಶೀತಲಾಚಾ ಸವಾಲಾಕ್ ತಾಣೆಂ ಜವಾಚ್ ದಿಲಿ ನಾ. ತಶೆಂಚ್ ಜೀಪ್ ಡ್ರೈವ್ ಕರುನ್ ಆಯಿಲ್ಲೊ ತೊ ತ್ಯಾ ಜ್ಯೂಸ್ ಪಾರ್ಲರಾ ಮುಕಾರ್ ರಾವೊನ್ ಆಸ್ಲೆಲ್ಯಾ ತ್ಯಾ ತಾಂಬ್ಡ್ಯಾ ಬೈಕಾಚಾ ಮುಕಾರ್ ಆಪ್ಲ್ಯಾ ಜಿಪಾಕ್ ರಾವವ್ನ್, ಜಿಮ್ಮಿನ್ ತ್ಯಾ ಬೈಕಾಕ್ಚ್ ಪಳೆಲೆಂ.
ತಾಂಬ್ಡ್ಯಾ ಬೈಕಾಚೆಂ ಸ್ಟಾಂಡ್ ಮಾರುಂಕ್ ನಾತ್ಲೆಲೆಂ. ತಾಚ್ಯೆರ್ ಏಕ್ ತರ್ನಾಟೊ ಬಸೊನ್ ಆಸ್ಲ್ಲೊ. ತಾಚ್ಯಾ ಉಜ್ವ್ಯಾ ಕುಶಿಕ್ ಏಕ್ ಚಲಿ ಉಭೆಂ ಜಾವ್ನ್ ತ್ಯಾ ತಾಂಬ್ಡ್ಯಾ ಬೈಕ್ವಾಲ್ಯಾ ಲಾಗಿಂ ಉಲಯ್ತಾಲೆಂ.
"ಹಲೋ......?" ಜಿಮ್ಮಿನ್ ತ್ಯಾ ಬೈಕಾರ್ ಬಸ್ಲೆಲ್ಯಾ ತರ್ನಾಟ್ಯಾಕ್ ಆಪಯ್ಲೆಂ.
ಜಿಮ್ಮಿಚೊ ಉದ್ದೇಶ್ ಕಳ್ಳೆಲೆಂ ಶೀತಲ್, "ಚಲ್ ಸೊಡ್ ತೆಂ....! ಬೆಷ್ಟೆಂ ಉಪದ್ರ್ ನಾಕಾತ್....!"ಶೀತಲಾನ್ ಪಾಟ್ಲ್ಯಾನ್ ಥಾವ್ನ್ ಸಾಂಗ್ಲೆಲೆಂ ಕಾನಾಂಕ್ ಪಡ್ಲ್ಯಾರ್ಯ್ ಆಪ್ಣಾಕ್ ಕಾಂಯ್ ಆಯ್ಕೊಂಕ್ ನಾ ಮ್ಹಳ್ಳ್ಯಾ ಪರಿಂ ತಾಣೆಂ ಆತಾಂ ಆಪ್ಲ್ಯಾ ಜಿಪಾಚೆಂ ಹಾರನ್ ಮಾರುನ್ ತ್ಯಾ ತರ್ನಾಟ್ಯಾಕ್ ಹೆವ್ಶಿಂ ಆಪಯ್ಲೆಂ.
ತಾಂಬ್ಡ್ಯಾ ಬೈಕಾ ವಯ್ಲೊ ತರ್ನಾಟೊ, ಬಗ್ಲೆಕ್ ರಾವ್ಲೆಲ್ಯಾ ಚಲಿಯೆಲಾಗಿಂ ಉಲವ್ನ್ ಆಸ್ಚಾ ಪರಿಂಚ್ ತೊ ಆತಾಂ ಜಿಮ್ಮಿಚಾ ಕುಶಿಂನ್ ಘುಂವ್ಲೊ.
"ಹಾಂಗಾಸರ್ ರಸ್ತೊ ಕ್ರಾಸ್ ಕರ್ತಾತ್ ತೆಂ ದಿಸಾನಾ? ಗಾಡಿ ಸ್ಲೋ ದವರುಂಕ್ ಜಾಯ್ನಾ.....?"
ಜಿಮ್ಮಿನ್ ವಿಚಾರ್ತಾನಾ ತ್ಯಾ ತರ್ನಾಟ್ಯಾಚಿ ನದರ್ ಜಿಪಾ ಭಿತರ್ ಬಸ್ಲೆಲ್ಯಾ ಮಿಶೇಲ್ ಆನಿ ಶೀತಲಾ ವಯ್ರ್ ಗೆಲಿ.
"ಕಿತೆಂ ಜಾಲೆಂ? ಕಾಂಯ್ ಜಾಂವ್ಕ್ ನಾ....! ಚಲ್ ಚಲ್! ಚೆಡ್ವಾಂ ಮುಕಾರ್ ಹೀರೊ ಜಾಯ್ನಾಕಾ.....!" ಆಪ್ಲ್ಯಾ ದೊಳ್ಯಾಂಕ್ ದವರ್ಲೆಲೆಂ ವೋಕ್ಲ್ ಕಾಡುನ್ ತ್ಯಾ ತರ್ನಾಟ್ಯಾನ್ ಸಾಂಗ್ತಾನಾ, ಎಕ್ಚ್ಚ್ ಪಾವ್ಟಿಂ ಜೀಪ್ ಭಂಧ್ ಕೆಲ್ಲೊ ಜಿಮ್ಮಿ ಜಿಪಾಚೆಂ ದಾರ್ ಉಗ್ತೆಂ ಕರುನ್ ಭಾಯ್ರ್ ದೆಂವ್ಲೊ.
"ಜಿಮ್ಮಿ?" ಮಿಶೇಲಾನ್ ಆಪಯಿಲ್ಲೆಂ ತಾಣೆಂ ಗುಮಾನ್ ಕೆಲೆಂ ನಾ.
ತಿತ್ಲ್ಯಾರ್ ಜ್ಯೂಸ್ ಪಾರ್ಲರಾ ಭಿತರ್ ಥಾವ್ನ್ ತೀನ್ ಚ್ಯಾರ್ ತರ್ನಾಟೆ ಉಟ್ಲೆಲೆ ತೆ,ಭಾಯ್ರ್ ಕಿತೆಂ ತರ್ಯ್ ಚಲ್ತಾ ತೆಂ ಕಳೊನ್ ಭಾಯ್ರ್ ಅಯ್ಲೆ.
"ತುಕಾ ದಾಖಂವ್.... ಕೋಣ್ ಚೆಡ್ವಾಂ ಮುಕಾರ್ ಹೀರೊ ಜಾವ್ನ್ ಭೊಂವ್ತಾ ತೊ..... ತುಕಾದಾಖಂವ್...?"
ಗಲಾಟೊ ಚಡ್ ಜಾತಾ ತೆಂ ಕಳ್ಲ್ಲ್ಯಾ ಲಾಗ್ಶಿಲ್ಯಾ ರಿಕ್ಶಾಗಾರಾನಿ ಆನಿಂ ಪಾರ್ಲರಾ ಥಾವ್ನ್ ಆಯ್ಲೆಲ್ಯಾ ತ್ಯಾ ತರ್ನಾಟ್ಯಾಚಾ ಇಷ್ಟಾಂನಿಂ ಮೆಳೊನ್ ಜಿಮ್ಮಿಕ್ ಪಾಟಿಂ ಲೊಟುನ್ ಹಾಡ್ಲೊ.
"ಯೇ....! ಸೊಡ್ಯಾ ತ್ಯಾ ಬ್ರಿಟಿಶಾಂಚಾ ಗುಲಾಮಾಕ್! ಮ್ಹಜೊ ಪೂತ್ ಮ್ಹಾಕಾ ವಿಚಾರ್ ಕರುಂಕ್ ಆಯ್ಲಾ....!"
ತ್ಯಾ ತರ್ನಾಟ್ಯಾಚಿಂ ಉತ್ರಾಂ ಕಾನಾಂಕ್ ಮಾರ್ತಾನಾ ಜಿಮ್ಮಿ ಮುಕಾರ್ ವಚೊಂಕ್ ಉಡ್ಡಾಲೊ ತರ್ಯ್ ತಾಕಾ ಜಾಲೆಂ ನಾ. ಸಗ್ಳ್ಯಾಂನಿಂ ಮೆಳೊನ್ ತಾಕಾ ಲೊಟುನ್ ಜಿಪಾ ಭಿತರ್ ಘಾಲೊ.
ಥೊಡಿಂಚ್ ಕ್ಷಣಾಂ...!
ಸಗ್ಳ್ಯಾ ಕಾಲೇಜಿಚ್ಯಾ ಚಲಿಯಾಂಚಿ ನದರ್ ಆತಾಂ ಹ್ಯಾ ವಾಟೆನ್ ಆಸ್ಲ್ಲಿ.
ತಿತ್ಲೆಂಚ್!
ಕೊಣೆಚ್ ಚಿಂತಿನಾತ್ಲೆಲ್ಯಾ ಪರಿಂ ಜಿಪಾಚೆಂ ದಾರುಗ್ತೆಂ ಕೆಲ್ಲೊ ಜಿಮ್ಮಿ ಪರ್ತ್ಯಾಕ್ ಭಾಯ್ರ್ ಉಡ್ಲೊ.
"ಬಾಪಾಯ್ನ್ ಲುಟುನ್ ಕಮಾಯ್ಲೆಲ್ಯಾ ಪಯ್ಶಾಂಚೊ ಹಂಕಾರ್ ಹಾಂಗಾ ಯೇವ್ನ್ ದಾಖಾಯ್ತಾಯ್.....?" ತಾಣೆಂ ಮುಕಾರ್ ವಚೊಂಕ್ ಪ್ರಯತ್ನ್ ಕೆಲೆಂ.
ಜಿಮ್ಮಿಕ್ ಪರ್ತ್ಯಾಕ್ ಘಟ್ ದರುನ್ ಪರ್ತ್ಯಾಕ್ ತಾಕಾ ಜಿಪಾ ಭಿತರ್ ಲೊಟುನ್ ಘಾಲುನ್ ಜಿಪಾಚೆಂ ದಾರ್ ಭಂಧ್ ಕೆಲೆಂ ಭಾಯ್ಲ್ಯಾನಿಂ.
"ಚಲ್ ಜಿಮ್ಮಿ ಘರಾ ಯಾ! ನಾ ಜಾಲ್ಯಾರ್ ಹಾಂವ್ ಫೋನ್ ಕರುನ್ ಆಬಾಕ್ ಆಪಯ್ತಾಂ...!"
ಮಿಶೇಲ್ ಸಂಪೂರ್ಣ್ ಭಿಯೆಲ್ಲೆಂ.
"ಹಾಂವ್ ಬ್ರಿಟಿಶಾಂಚೊ ಗುಲಾಮ್....? ಹಾಂವ್....?" ಆಪ್ಲ್ಯಾ ದೊನ್ಯ್ ಹಾತಾನಿಂ ಸ್ಟೇರಿಂಗಾಕ್ ಘಟ್ ಧರುನ್ ಘುಣ್ಗುಣ್ಚಾ ಜಿಮ್ಮಿಕ್ ಪಳೆಲ್ಲೆಂ ಶೀತಲ್,
"ಜಿಮ್ಮಿ...! ಸೊಡ್ ತೆಂ ಪ್ಲೀಸ್....! ಸಗ್ಳಿಂ ಹಾಂಗಾಚ್ ಪಳೆತಾತ್....!"
ಶೀತಲಾಚಿಂ ಉತ್ರಾಂ ಆಯ್ಕೊನ್ ಜೀಪ್ ಸ್ಟಾರ್ಟ್ ಕೆಲ್ಲ್ಯಾ ಜಿಮ್ಮಿನ್ ಜಿಪಾಚಿ ಗೇರ್ ರಾಗಾನ್ ಮ್ಹಳ್ಳ್ಯಾ ಪರಿಂ ವೊಡುನ್ "ಬರ್ರ್..ರ್ರ್..ರ್ರ್..." ಆವಾಜಾನ್ ಜಿಪಾಕ್ ಮುಕಾರ್ ಧಾಂವ್ಡಾಯ್ಲೆಂ.
ಭಾಯ್ರ್ ಥಾವ್ನ್ ಸಗ್ಳಿಂ ಮಿಶೆಲಾಚಾ ಜಿಪಾಕ್ಚ್ ಪಳೆತಾಲಿಂ. ಮಿಶೇಲಾಕ್ ಆತಾಂ ಎಕಾ ಥರಾಚಿ ಕಾವ್ಜೆಣಿ ಭೊಗ್ಲಿ. ತಾಚ್ಯಾ ದೊಳ್ಯಾಂ ಮುಕಾರ್ ಕಿತೆಂ ಕಿತೆಂ ಪಿಂತುರಾ ಉದೆವ್ನ್ ಯೇಂವ್ಕ್ ಲಾಗ್ಲಿಂ. ತಾಚ್ಯೆ ಸವೆಂ ತೊಚ್ಚ್, ಥೊಡ್ಯಾಚ್ ವೆಳಾ ಪಯ್ಲೆಂ ತಾಕಾ ಬೆಷ್ಟಾಯಿಲ್ಲೊ ಆವಾಜ್ ಆನಿ ತ್ಯಾ ರೆಡ್ಯಾಚಿ ಆಂಬೆವ್ಣಿ ತಾಚ್ಯಾ ಕಾನಾಂಕ್ ಘಡ್ಗಡ್ಯಾ ಪರಿಂ ಮಾರ್ತಾ ತಶೆಂ ಜಾಲಿ. ತಾಚ್ಯೆ ಪಾಟ್ಲ್ಯಾನ್, ತ್ಯಾ ಮ್ಯಾಂಚೆಸ್ಟರಾಂತ್ಲಿ ತಿ ರಾತ್.......! ಆಪ್ಲ್ಯಾ ಆವಯ್ ಬಾಪಾಯ್ಕ್ ಹೊಗ್ಡಾಯಿಲ್ಲಿ ರಾತ್! ತ್ಯಾ ರಾತಿಂ ಆಯ್ಕೊನ್ ಗೆಲ್ಲೊ ತೊ ಆವಾಜ್ ಕ್ಷೀಣ್ಪಣಿಂ ತಾಚ್ಯಾ ಕಾನಾಂತ್ ಗುಂಗುರ್ಲ್ಯಾಚಾ ಆವಾಜಾ ಪರಿಂ ಘುಂಯ್ ಗುಟ್ತಾನಾ......,
"ಮಮ್ಮೀ.....!" ಮಿಶೇಲಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ತಾಚ್ಯಾ ತೊಂಡಾ ಥಾವ್ನ್ ಉದ್ಗಾರ್ ಭಾಯ್ರ್ ಸರ್ಲೊ. ತಾಚ್ಯಾ ಪಾಟ್ಲ್ಯಾನ್ ತಾಚ್ಯಾ ಆವಯ್ಚೆಂ ವಿವಿಯಾನಾಚೆಂ, ತ್ಯಾ ಫೋಟೋ ಆಲ್ಬಮಾಂತ್ಲೆಂ ಹಾಸ್ತೆಂ ಮುಖಮಳ್ ತಾಚ್ಯಾ ದೊಳ್ಯಾಂ ಮುಕಾರ್ ಯೇವ್ನ್ ರಾವ್ಲೆಂ.
ತಿತ್ಲೆಂಚ್!
ಮುಕ್ಲ್ಯಾ ಸೆಂಟರ್ ಮಿರಾರಾಂತ್ ದೀಶ್ಟ್ ವರುನ್, ಪಾಟ್ಲ್ಯಾ ಮಿಶೇಲಾಚ್ಯಾ ಕಳ್ವಳ್ಯಾಂಕ್ ಪಳಯಿಲ್ಲ್ಯಾ ಜಿಮ್ಮಿಚೆಂ ಕಾಳಿಜ್ ಭರೊನ್ ಯೇವ್ನ್, ತಾಣೆಂ ಆಪ್ಲ್ಯಾ ಪಯ್ಣಾಚಿ ದಿಶಾ ಬದ್ಲಿಲಿ. ಹೆಂ ಕಳ್ಲ್ಲೆಂ ಶೀತಲ್,
"ಖಂಯ್ ವೆತಾಯ್ ಜಿಮ್ಮಿ?" ಆಜ್ ಜಿಮ್ಮಿನ್ ಡ್ರೈವ್ ಕರ್ಚ್ಯಾ ಜಿಪಾಚಿ ವಾಟ್ ಬದ್ಲಾಲ್ಲಿ ಶೀತಲಾಕ್ ಕಳಾನಾಸ್ತಾನಾ ಘೆಲಿ ನಾ.
"ಹ್ಯಾಚ್ ಕಾರಾಣಾಕ್ ಲಾಗೊನ್ ಹ್ಯಾ ದೇಶಾಕ್ ಬರಾಗಾಲ್ ಪಡ್ಲಾ! ಮೇರಾ ಭಾರತ್ ಮಹಾನ್! ಸುಕಿಧಾಡ್ ಪಡ್ಲಲೊ..... ಹೊ ಮೇರಾ ಭಾರತ್ ಮಹಾನ್! ಹ್ಯಾ ಶಿತಾಚೆಂ ಹಣೆಬರಪ್ಗೀ ವಾ ಹ್ಯಾ ದೂದಾಕ್ ಸಕತ್ ನಾಂಗೀ ಕೋಣ್ ಜಾಣಾಂ? ಹ್ಯಾ ದೇಶಾಂತ್ಲೆಂ ಚಲಿ ಲಾಚಾರ್ ಜಾವ್ನ್ಚ್ ಉರ್ತಾ! ಹ್ಯಾ ದೇಶಾಂತ್ ಚಲಿಯಾಂಕ್ ಬರ್ಕಾತ್ ನಾ.....! ತರ್ಯ್ ಇಂಡಿಯಾ ಇಸ್ ಶಾಯ್ನಿಂಗ್....!"
ಶೀತಲಾನ್ ತಾಚ್ಯಾ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಜಿಮ್ಮಿಚಾ ತಾಳ್ಯಾಂತ್ ಇತ್ಲೊ ತಾತ್ಸಾರ್ ಪಳೆಲ್ಲೊ. ಜಿಮ್ಮಿನ್ ಉಚಾರ್ಲೆಲ್ಯಾ ಉತ್ರಾಂನಿಂ ಸತ್ ಆಸ್ಲ್ಲೆಂ. ತ್ಯಾ ಸತಾಚ್ಯಾಕ್ಯ್ ದೊಡ್ಯಾ ಮಾಫಾನ್ ತಾಚ್ಯಾ ತಾಳ್ಯಾಂತ್ ಎಕಾ ಥರಾಚೊ ಆಕ್ರೋಶ್ ಭರಿತ್ ಉತ್ಕರ್ಷ್ ಆಸ್ಲ್ಲೊ.
ಮುಕ್ಲ್ಯಾ ಸರ್ಕಲಾರ್, ಜಿಪಾಕ್ ಸರ್ಕಲ್ ಮಾರುನ್, ಭಿತರ್ ವೆಚ್ಯಾ ಭಾರೀಕ್ ರಸ್ತ್ಯಾರ್ ಘುಸ್ಲಲೊ ಜಿಮ್ಮಿ, ಸಕಯ್ಲ್ಯಾ ಮೇಯ್ನ್ ರೊಡಾಕ್ ಪಾವೊನ್, ತ್ಯಾ ಆಸ್ಪತ್ರ್ರೆಚಾ ದೆಗೆನ್ ವೆಚ್ಯಾ ಗಲ್ಲೆಂತ್ ಪ್ರವೇಶ್ ಜಾವ್ನ್, ಪರ್ತ್ಯಾಕ್ ತೊ ಕಾಲೇಜಿಚಾ ಮುಕಾರ್ ಯೇವ್ನ್ ಪಾವ್ಲೊ.
"ತುಂ ಪರ್ತ್ಯಾಕ್ ಹಾಂಗಾ ಆಯ್ಲೊಯ್?"
ಮುಕ್ಲ್ಯಾ ವಿಂಡ್ ಸ್ಕ್ರೀನಾ ಮುಕಾಂತ್ರ್ ತ್ಯಾ ಜ್ಯೂಸ್ ಪಾರ್ಲರಾಕ್ ಪಳಂವ್ಚಾ ಜಿಮ್ಮಿಕ್ ಪಳವ್ನ್ ಶೀತಲಾನ್ ವಿಚಾರ್ಲೆಂ.
ಹ್ಯಾಚ್ ಆಯಿನ್ನ್ ವೆಳಾರ್ ಪಾರ್ಲರಾ ಥಾವ್ನ್ ಭಾಯ್ರ್ ಆಯಿಲ್ಲಿಂ ತೊಚ್ಚ್ ಚಲೊ ಆನಿ ತೆಂಚ್ ಚಲಿ ಯೇವ್ನ್ ತ್ಯಾ ತಾಂಬ್ಡ್ಯಾ ಬೈಕಾರ್ ಬಸ್ತಾನಾ ಸವ್ಕಾಸ್ ಜಿಪಾಚೆಂ ಕ್ಲಚ್ ದಾಂಬುನ್ ಜಿಮ್ಮಿನ್ ಜಿಪಾಚಿ ಗೇರ್ ವೊಡ್ಲಿ. ತಾಚ್ಯಾ ಪಾಟ್ಲ್ಯಾನ್ ತೆಂ ಬೈಕ್ ಸ್ಟಾರ್ಟ್ ಜಾವ್ನ್ ಮುಕಾರ್ ಧಾಂವ್ತಾನಾ ಆಪ್ಣೆಂಯ್ ಜಿಪಾಕ್ ತ್ಯಾ ಬೈಕಾ ಪಾಟ್ಲ್ಯಾನ್ ದಾಂವ್ಡಾಯ್ಲೆಂ. ಏಕ್ ವ್ಹಡ್ಲೊ ಭೊಂವಾಡೊ ಮಾರ್ಲೆಲೆಂ ಬೈಕ್ ಜಿಮ್ಮಿಚಾ ಜಿಪಾ ಮುಕ್ಲ್ಯಾನ್ ಧಾಂವೊನ್ ಧಾಂವೊನ್ ಜ್ಯೋತಿ ಸರ್ಕಲಾ ಮುಕಾರ್ ಪಾವ್ತಾನಾ ಜಿಪಾಚಾ ಡ್ಯಾಷ್ ಬೊರ್ಡಾ ವಯ್ಲೆಂ ಜಿಪಾಚೆಂ ಸೆಲ್ಫೋನ್ ವ್ಹಾಜ್ಲೆಂ.
"ಹಲೋ....!"
ಜೆರೊಮಾಚೆಂ ಫೋನ್ ತೆಂ.
"ನಾ! ತೆಂ ಜಿಪಾಚೆರ್ ಆಸಾ.....!"
".........."
"ವ್ಹಯ್.... ದೊಗಾಂಯ್ ಆಸಾತ್. ಕಂಕ್ನಾಡಿ ಮ್ಹಾಕಾ ತಿಂ ಟ್ಯಾಬ್ಲೆಟ್ಸಾಂ ಮೆಳೊಂಕ್ ನಾಂತ್. ಹಾಂವ್ ಆತಾಂ ಮಿಲಾಗ್ರಿಸ್ ವೆತಾಂ....!"
".........."
"ಬರೆಂ....!"
ಜಿಮ್ಮಿನ್ ಸೆಲ್ಫೋನ್ ಭಂಧ್ ಕೆಲೆಂ. ತಾಚಿ ದೀಷ್ಟ್ ಮುಕ್ಲ್ಯಾ ತ್ಯಾ ತಾಂಬ್ಡ್ಯಾ ಬೈಕಾಚೆರ್ಚ್ ಆಸ್ಲ್ಲಿ. ಹಂಪನ್ಕಟ್ಟಾಚೊ ರಸ್ತೊ ದರ್ಲೆಲೆಂ ಬೈಕ್ ಆತಾಂ ಲೈಟ್ ಹೌಸಾ ತೆವ್ಶಿಂ ಘುಂವ್ಲೆಂ. ತಶೆಂಚ್ ತಾಚ್ಯಾ ಪಾಟ್ಲ್ಯಾನ್ ಆಯಿಲ್ಲೊ ಜಿಮ್ಮಿ, ಲೈಟ್ ಹೌಸಾಚಾ ಠಾಗೋರ್ ಪಾರ್ಕಾಮುಕ್ಲ್ಯಾ ಬೇಲ್ಪುರಿ ಆಂಗ್ಡಿಚಾ ಮುಕಾರ್ ಬೈಕ್ ರಾವ್ತಾನಾ, ತಾಚ್ಯಾ ಪಾಟ್ಲ್ಯಾನ್ಚ್ ಜೀಪ್ ಥಾಂಬವ್ನ್, ಜಿಪಾ ಥಾವ್ನ್ ಭಾಯ್ರ್ ಯೇವ್ನ್ ಹಾನಿಕ್ಯ್ ಬೈಕಾರ್ ಥಾವ್ನ್ ದೆಂವೊಂಕ್ ನಾತ್ಲೆಲ್ಯಾ ತ್ಯಾ ತರ್ನಾಟ್ಯಾಕ್ ತಾಚ್ಯಾ ಶರ್ಟಾಕ್ ಧರುನ್ ವೊಡುನ್ ಬೈಕಾಕ್ ಖೊಟ್ ಮಾರುನ್ ಸಕಯ್ಲ್ ಉಡಯ್ತಾನಾ, ಜಿಮ್ಮಿ ಹಾಂಗಾ ವರೇಗ್ ಕಿತ್ಯಾಕ್ ಆಯ್ಲಾ ತೆಂ ಮಿಶೇಲಾಕ್ ಆನಿ ಶೀತಲಾಕ್ ಸಮ್ಜಾಲೆಂ.
ಬೈಕಾರ್ ಬಸೊನ್ ಆಯ್ಲೆಲ್ಯಾ ಚಲಿಯೆನ್ ಬೋಬ್ ಮಾರ್ಲ್ಯಾರ್ಯ್ ತ್ಯಾ ತರ್ನಾಟ್ಯಾಕ್ ಜಿಮ್ಮಿನ್ ಸೊಡ್ಲೆಂ ನಾ. ಖಂಯ್ ಕಿತೆಂ ಮ್ಹಣೊನ್ ತ್ಯಾ ತರ್ನಾಟ್ಯಾಕ್ ಕಳ್ಚ್ಯಾ ಪಯ್ಲೆಂಚ್ ಸಾದಾರ್ನ್ ಆಪ್ಲ್ಯಾ ಹಾತಾನಿಂ ಆನಿ ಪಾಂಯಾನಿಂ ತ್ಯಾ ತರ್ನಾಟ್ಯಾ ವಯ್ರ್ ತಾಣೆಂ ಆಪ್ಲೆಂ ಹಕ್ಕ್ ಚಲಯ್ಲೆಂ. ಭಂವ್ತಣಿಚಾ ಲೊಕಾಕ್ ಕಿತೆಂ ಚಲ್ತಾ ತೆಂ ಕಳ್ಚೊ ಸಂಭವ್ಚ್ಚ್ ನಾತ್ಲ್ಲೊ.
"ಹಾಂವ್ ಬ್ರಿಟಿಶಾಂಚೊ ಗುಲಾಮ್.....?"
ಆಡ್ ಪಡ್ಲೆಲ್ಯಾ ಬೈಕಾಚಾ ಹ್ಯಾಂಡಲಾಕ್ ಶಿರ್ಕೊನ್ ಆಸ್ಲೆಲೆಂ ಹೆಲ್ಮೆಟ್ ವೊಡುನ್ ಕಾಡುನ್, ತೆಂ ಬೈಕಾಚಾ ಪೆಟ್ರೊಲ್ ಟಾಂಕಿಚೆರ್ ’ದಡ್ಡ್’ ಕರುನ್ ತಾಣೆಂ ಮಾರ್ಲೆಂ.
"ಮ್ಹಾಕಾ ಪೂತ್ ಕರ್ತಾಯ್....! ತುಕಾ ಬಾಪಯ್ ನಾತ್ಲೆಲ್ಯಾಕ್ ಪೂತ್ ಜಾಂವ್ಚಿ ಸಕತ್ ಆಸಾ?"
ಧರ್ಣಿರ್ ಪಡ್ಲೆಲ್ಯಾ ತ್ಯಾ ತರ್ಚಾಟ್ಯಾಕ್ ಜಿಮ್ಮಿನ್ ಆಪ್ಲ್ಯಾ ಪಾಂಯಾನಿಂ ಭಳಾನ್ ಖೊಟಾಯ್ಲೆಂ. ತಾಚೊ ರಾಗ್ ತಕ್ಲೆಕ್ ಚಡ್ಲ್ಲೊ.
ಆಪ್ಣೆ ಚಿಂತಿನಾಸ್ತಾನಾಚ್ ಆಚಾನಕ್ ಆಪ್ಣಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾ ಥಾವ್ನ್ ತೊ ತರ್ನಾಟೊ ಸಂಪೂರ್ಣ್ ಧರ್ಣಿಕ್ ಗಳ್ಳೊ. ತಾಚ್ಯಾ ಕುಮ್ಕೆಕ್ ಕೊಣ್ಯ್ ಆಯ್ಲೊ ನಾ.
"ಆನಿ ತುಂ....!" ಜಿಮ್ಮಿ ಆತಾಂ ತ್ಯಾ ಚಲಿಯೆ ತೆವ್ಶಿಂ ಘುಂವ್ಲೊ. ".....ಹ್ಯಾ ಮವಾಲ್ಯಾ ಸಂಗಿಂ ಭೊಂವ್ತಾಯ್. ಮರ್ಯಾದೆಕ್ ಖಂಯ್ಚಾ ಬ್ಯೂಟಿ ಪಾರ್ಲರಾಂತ್ ಸಾಂಡುನ್ ಆಯ್ಲಾಂಯ್? ಥುಕ್ ತುಜ್ಯಾ ಜಲ್ಮಾಕ್....!" ತ್ಯಾ ಚಲಿಯೆಕ್ ಪಳವ್ನ್ ಧರ್ಣಿಕ್ ಥುಕ್ಲಲೊ ತೊ, ಉಟೊನ್ ಉಭೊ ಜಾಲ್ಲ್ಯಾ ತ್ಯಾ ತರ್ನಾಟ್ಯಾ ವಯ್ರ್ ಪರ್ತ್ಯಾಕ್ ’ದಡ್ ದಡ್’ ಕರುನ್ ಹಾತ್ ಚಲಯ್ತಾನಾ ಲೋಕ್ ಕುಡ್ಸಾತಾ ತೆಂ ಪಳವ್ನ್ ’ಸಟ್ಟ್’ ಕರುನ್ ಆಯಿಲ್ಲ್ಯಾ ತಾಣೆಂ, ಜಿಪಾರ್ ಬಸ್ಲ್ಲೊಚ್ ಜೀಪ್ ಸ್ಟಾರ್ಟ್ ಕರುನ್ ಜಿಪಾಕ್ ಮುಕಾರ್ ಧಾಂವ್ಡಾಯ್ಲೆಂ.
ಜಿಮ್ಮಿ ಜಿವಾಂತ್ ಭಾರೀಕ್ ತರ್ಯ್, ತಾಚ್ಯಾ ಜಿವಾಂತ್ಲ್ಯಾ ಭಳಾಕ್ ಪಯ್ಲ್ಯಾ ಪಾವ್ಟಿಂ ದೊಳ್ಯಾಂ ಮುಕಾರ್ ರೂಪ್ ರೂಪ್ ಪಳೆಲ್ಲ್ಯಾ ಮಿಶೇಲ್ ಆನಿ ಶೀತಲಾಕ್ ತಾಂಚಾ ಜಿಬೆರ್ ಉತಾರ್ಚ್ ಸುಟಾನಾ ಜಾಲೆಂ.
"ಹೆ ಸಗ್ಳೆ ಬಾಪಯ್ಚಾ ಪಯ್ಶಾಂಚಾ ಭಳಾರ್ ಉಡ್ಚೆ. ಬಾಪಯ್ ಥಂಯ್ ಖಂಯ್ಚಾಗೀ ಗರೀಬಾಂಕ್ ಲುಟ್ತಾ ಆನಿ ಪೂತ್ ಹಾಂಗಾ ಕೊಣಾ ಕೊಣಾಕ್ ಘೆವ್ನ್ಮಿರಯ್ತಾ! ಶಿರಾಪ್ ಪಡ್ಲೆಲೆ....! ಆನಿ ತುಂ....?" ರಾಗಾಚೆಂ ವೀಕ್ ಪೊಟಾ ಥಾವ್ನ್ ಭಾಯ್ರ್ ವೊಂಕ್ಲ್ಲೊ ಜಿಮ್ಮಿ, ಶೀತಲಾ ತೆವ್ಶಿಂ ಘುಂವೊನ್, "....ಪೋರ್ ತುಂ ತೆಂ ನವೆಂ ಕ್ಯಾಮರಾ ಆಸ್ಲೆಲೆಂ ಮೊಬಾಯ್ಲ್ ಫೋನ್ ಜಿಪಾರ್ ಹಾಡುನ್, ಘುಂವ್ಡಾವ್ನ್ ಘುಂವ್ಡಾವ್ನ್ ಮಿಶೇಲಾಕ್ ದಾಖಯ್ತಾಲೆಂಯ್ ಪಳೆ....., ತ್ಯಾ ಫೊನಾಕ್ ತುಜ್ಯಾ ಬಾಪಾಯ್ನ್ ಘೆಂವ್ಚಾ ಖಾತಿರ್ ಕಿತ್ಲ್ಯಾಗೀ ಬಾಯ್ಲಾಂನಿಂ ಮಧ್ಯಾನ್ ರಾತಿಂ ದುಖಾಂ ಗಳಯ್ಲ್ಯಾಂತ್! ಕಿತ್ಲ್ಯಾಗೀ ಭುರ್ಗ್ಯಾಂನಿಂ ಪೊಟಾಕ್ ನಾಸ್ತಾಂ ಉಪಾಸ್ ಕಾಡ್ಲಾ! ಕಿತ್ಲ್ಯಾಗೀ ಆವಯಾಂನಿಂ ತಾಂಚಾ ಜಾಣ್ತ್ಯಾಪಣಾರ್ ಪಾಲಂವ್ ಖೊವಯ್ಲಾ! ಕಿತ್ಲ್ಯಾಗೀ ಭಯ್ಣ್ಯಾಂನಿಂ ತಾಂಚಾ ಸಪ್ಣಾಂಕ್ ಚಿಮ್ಣೆಚಾ ಧುಂವರಾಂತ್ ಉಭಯ್ಲಾಂ!" ಜಿಮ್ಮಿ ಖರ್ಶೆತಾಲೊ. "....ಫಕತ್ತ್ ತುಜ್ಯಾ ಬಾಪಾಯ್ನ್ ತುಕಾ ಮೊಬಾಯ್ಲ್ ಫೋನ್ ಘೆವ್ನ್ ದಿಂವ್ಚಾ ಖಾತಿರ್! ತಾಣೆಂ ಎ.ಸಿ. ರೂಮಾಂತ್ ಸುಖಾಳ್ ನೀದ್ ಕಾಡ್ಚೆ ಖಾತಿರ್! ತುಜ್ಯಾ ಘರಾಚ್ಯಾ ಸುಣ್ಯಾನ್ ಹಾಡಾಂ ಚಾಬ್ಚಾ ಖಾತಿರ್! ......ಆನಿ ಹೆಂ ಕಶೆಂ ಜಾಣಾಂಯ್? "
ಶೀತಲಾಚಾ ತೊಂಡಾ ಥಾವ್ನ್ ಕಾಂಯ್ ಆವಾಜ್ ಸುಟ್ಲೊ ನಾ. ತಾಕಾ ಜಿಪಾರ್ ಬಸ್ಲೆಲ್ಯಾ ಕಡೆಚ್ ಜಿಮ್ಮಿಚಾ ಉತ್ರಾಂ ಥಾವ್ನ್ ತಾಚ್ಯಾ ಕುಡಿಕ್ ಆರ್ ಮಾರ್ಲೆಲ್ಯಾ ಪರಿಂ ಜಾಲೆಂ. ತೆಂ ಜಿಮ್ಮಿಕ್ಚ್ ಪಳಂವ್ಕ್ ಲಾಗ್ಲೆಂ.
"ತುಜ್ಯಾ ಬಾಪಾಯ್ನ್ ಮುನಿಸಿಪಾಲಿಟಿಚಾ ನಳಾಕ್ಚ್ ಸೊರ್ಯಾಚಿ ಟ್ಯಾಂಕ್ ಲಾಯಿಲ್ಲ್ಯಾನ್....!"
ಶೀತಲಾಚಾ ತಕ್ಲೆರ್ ಘಡ್ಗಡೊ ಪಡ್ಲೆಲ್ಯಾ ಪರಿಂ ಜಾಲೆಂ. ತೆಂ ತಾಕಾಚ್ ವಿಸ್ರಾಲೆಂ. ದೊಳ್ಯಾಂ ಮುಕಾರ್ ಜಗ್ಲಾಣೆಂ ಮಾರ್ಲೆಲ್ಯಾ ಪರಿಂ ಜಾವ್ನ್ ತಾಚ್ಯಾ ದೊಳ್ಯಾಂಕ್ ಕಾಂಯ್ಚ್ ದಿಸಾನಾಸ್ತಾನಾ ಭೊಂವ್ತಣಿ ಕಾಳೊಕ್ ಮಾಂಡ್ಲೆಲ್ಯಾಪರಿಂ ಜಾಲೆಂ. ತೆಂ ತಶೆಂಚ್ ಜಿಪಾಚಾ ಬಸ್ಕೆಕ್ ಪಾಟಿಂ ಪರ್ತಾಲೆಂ
"ಘರಾಕ್ ಉಜ್ವಾಡ್ ದಿಂವ್ಚೊಯ್ ತೊಚ್ಚ್ ದಿವೊ. ಘರಾಕ್ ಜಳಂವ್ಚೊಯ್ ತೊಚ್ಚ್ ದಿವೊ! ದಿವ್ಯಾಕ್ ಜಳಯ್ತೆಲ್ಯಾಕ್, ದಿವೊ ಜಳಂವ್ಚಾ ಪಯ್ಲೆಂ ಹೆಂ ಕಳಿತ್ ಆಸೊಂಕ್ ಜಾಯ್ ಕೀ ಆಪ್ಣೆಂ ಜಳಂವ್ಚೊ ದಿವೊ ಆಪುಣ್ ಖಂಯ್ಚಾ ಜಾಗ್ಯಾರ್ ದವರ್ತಾಂ ತೆಂ! ಹೆಂ ತುಕಾ ಆಜ್ ಸಮ್ಜೊಂಚೆಂ ನಾ. ಫಾಲ್ಯಾಂ ಸಮ್ಜಾತೆಲೆಂ. ಭೋವ್ಶ್ಯಾ ತ್ಯಾ ವೆಳಿಂ ತುಂ ಉಡಾಸ್ ಕಾಡ್ತಾನಾ ಹಾಂವ್ ಖಂಯ್ ಆಸ್ತಲೊಂ ಕೋಣ್ ಜಾಣಾಂ?"
ಜಿಮ್ಮಿ ಆತಾಂ ಮೌನ್ ಜಾಲೊ. ತಾಣೆಂ ಡ್ರೈವ್ ಕರ್ಚೆಂ ಟಾಟಾ ಸಫಾರಿ ಜೀಪ್, ಆಪ್ಣೆಂ ಆಪ್ಲ್ಯಾ ವೆಂಗೆಂತ್ ಘೆವ್ನ್ ಭೊಂವ್ಚಾ, ತೀನ್ ಜಿವಾಂಚಿ ಪರ್ವಾ ನಾಸ್ತಾನಾ ರಸ್ತ್ಯಾರ್ ಧಾಂವೊಂಕ್ ಲಾಗ್ಲೆಂ.
***************
ಆಂಗಾರ್ ತಾಂಬ್ಡಿ ವೋಲ್ ವೊಡ್ಲೆಲೊ ಸುರ್ಯೊ, ಮತಿಚಾ ಸಮಾಧಾನೆಂತ್, ದರ್ಯಾಚಾ ಉಸ್ಕ್ಯಾರ್ ಆಪ್ಲ್ಯಾ ಸಿಂತಿಮೆಂತಾಂಕ್ ಹಳೂ ಕರುಂಕ್ ಸಕ್ಲೊ ತರ್ಯ್ ತ್ಯಾ ಕುಶಿಂನ್ ಶೀತಲ್, ಆಪ್ಲ್ಯಾ ಮತಿಂತ್ ಉಟ್ಲೆಲ್ಯಾ ತೂಫಾನಾಕ್ ಥಾಂಬಂವ್ಕ್ ಸಕ್ಲೆಂ ನಾ.
ಜಿವಿತಾಂತ್, ಆಜ್ ಪಯ್ಲ್ಯಾ ಪಾವ್ಟಿಂ ಎಕ್ಲ್ಯಾನ್ ತಾಚ್ಯಾ ಕಾಳ್ಜಾಚಾ ದಾರಾಕ್ ಖಿಳೊ ಮಾರ್ಲ್ಲೊ.
ಆಪ್ಲ್ಯಾ ಕುಡಾಚ್ಯಾ ಆಟಾಚ್ಡ್ ಬಾತ್ರುಮಾಂತ್ ಕುಡಿಕ್ ಮಧುರ್ ಉದ್ಕಾಚಿ ಧಾರ್ ದರುನ್ ರಾವ್ಲೆಲೆಂ ಶೀತಲ್, ಜಿಮ್ಮಿನ್ ಅಚಾನಕ್ ಆಪ್ಲ್ಯಾ ಕಾಳ್ಜಾಕ್ ಮಾರ್ಲೆಲ್ಯಾ ತ್ಯಾ ಖಿಳ್ಯಾಚಾ ದುಖಿಕ್, ಆಪ್ಲ್ಯಾ ಮಾತ್ಯಾರ್ ಥಾವ್ನ್ ದೆಂವೊನ್ ಪಾಂಯಾಂಕ್ ಜಾಂವ್ನ್ ವ್ಹಾಳೊನ್ ವೆಚ್ಯಾ ಉದ್ಕಾ ಸಾಂಗಾತಾ ವ್ಹಾಳಾಂವ್ಕ್ ಪ್ರಯತ್ನ್ ಕರ್ತಾಲೆಂ.
ಪುಣ್ ತಾಚೆ ಥಾವ್ನ್ ತೆಂ ಸಾದ್ಯ್ ಜಾಲೆಂ ನಾ.
ತಿತ್ಲ್ಯಾರ್!
".......ಹೆಂ ಕಶೆಂ ಜಣಾಂಯ್? ತುಜ್ಯಾ ಬಾಪಾಯ್ನ್ ಮುನಿಸಿಪಾಲಿಟಿಚಾ ನಳಾಕ್ಚ್ ಸೊರ್ಯಾಚಿ ಟ್ಯಾಂಕ್ ಲಾಯಿಲ್ಲ್ಯಾನ್....!"
ಜಿಮ್ಮಿಚಿಂ ಧಾರುಣ್ ಉತ್ರಾಂ ಶೀತಲಾಚಾ ಕಾನಾಂತ್ ಪರ್ತ್ಯಾಕ್ ಆಯ್ಕೊನ್ ಆಯ್ಲಿಂ.
ತಾಚ್ಯೆ ಸವೆಂ......,
ಉಗ್ತೆಂ ಆಸ್ಲೆಲ್ಯಾ ಶಾವರಾ ಥಾವ್ನ್ ಸೊರೊ ವ್ಹಾಳೊನ್ ಯೆವ್ನ್, ತೊ ಸೊರೊ ಆಪ್ಣಾಕ್ ನ್ಹಾಣಯ್ತಾ ತಶೆಂ ದಿಸ್ತಾನಾ ಶೀತಲಾನ್ ವೆವೆಗ್ಗಿಂ ಶಾವರಾಚೊ ಟ್ಯಾಪ್ ಭಂಧ್ ಕೆಲೊ.
ವ್ಹಯ್! ಜಿಮ್ಮಿಚಾ ಉತ್ರಾಂ ಥಾವ್ನ್ ಶೀತಲಾಕ್ ಆತಾಂ ಹರ್ಯೆಕಾ ವಾಟೆನ್ ಸೊರೊಚ್ ದಿಸ್ಲೊ.
ತಾಚ್ಯಾ ಬಾಪಾಯ್ಚೆಂ ಬಿಜ್ನೆಸ್ ತೆಂ....! ಹ್ಯಾಚ್ ಬಿಜ್ನೆಸಾ ಥಾವ್ನ್.....,
ಜಿವಿತಾಂತ್, ಆಪ್ಣಾಕ್ ಜಾಯ್ ತೆಂ, ಆಪ್ಣಾಚಾ ಖುಶಿಯೆಚೆಂ, ಆಪ್ಣಾಚಾ ಪಸಂದೆಚೆಂ, ಆಪ್ಣಾಚೆಂ ಕರುನ್ ಘೆಂವ್ಕ್ ಶೀತಲಾಕ್ ಕಾಂಯ್ ಕಷ್ಟ್ ನಾತ್ಲ್ಲೆ. ತೆಂ ಜಲ್ಮಾಲ್ಲೆಂಚ್ ಮಂತನಾಚಾ ಕುಟ್ಮಾಂತ್. ಆಪ್ಣೆಂ ಕಿತೆಂ ಮಾಗ್ಲಾಂ ತೆಂ ತಾಕಾ ಲಾಬ್ಲಾಂ. ಎಕೇಕ್ ಪಾವ್ಟಿಂ ಮಾಗಾನಾಸ್ತಾನಾಂಯ್ ತಾಕಾ ಫಾವೊ ಜಾಲಾಂ. ಆಶೆಂ ಮಾಗಾನಾಸ್ತಾನಾ ಫಾವೊ ಜಾಲ್ಲ್ಯಾಂತ್ ತಾಕಾ ಚಡ್ಚ್ ಖುಶಿ ಲಾಬ್ಲ್ಯಾ ಶಿವಾಯ್ ತೆಂ ನಾ ಖುಶ್ ಜಾಂವ್ಕ್ ನಾತ್ಲ್ಲೆಂ. ಪುಣ್....
ಆಯ್ಚಾ ಸಾಂಜೆರ್ ಆಪ್ಣೆಂ ಮಾಗಾನಾಸ್ತಾನಾಚ್, ಆಪ್ಲ್ಯಾ ಕಾಳ್ಜಾಚಾ ದಾರಾಕ್ ಖಿಳೊ ಥಾಪಡ್ಲೆಲ್ಯಾ ಎಕಾ ಪರ್ಕ್ಯಾ ಥಾವ್ನ್, ಆಪ್ಣಾಕ್ ವ್ಯಕ್ತ್ ಕರುಂಕ್ ಸಾದ್ಯ್ ನಾತ್ಲೆಲಿ ಅವ್ಯಕ್ತ್ ರೂಪಾಚಿ ದೂಖ್ ಉಬ್ಜಾಲ್ಲಿ. ಹಿ ದೂಖ್, ಆಪ್ಲ್ಯಾ ತೊಂಡಾಚಾ ಉತ್ರಾಂನಿಂ, ಶೀತಲಾಕ್ ಕೊಣಾಯ್ ಮುಕಾರ್ ಅಭಿವ್ಯಕ್ತ್ ಕರುಂಕ್ ಸಾದ್ಯ್ ನಾತ್ಲೆಲಿ ತಸಲಿ.
ಆಪ್ಣಾಚಾ ದೊಳ್ಯಾಂ ಮುಕಾರ್ ಆಪ್ಲ್ಯಾ ಜಿವಿತಾಚಾ ಸತಾಕ್ ಉಗ್ಡಾಪೆಂ ಕೆಲ್ಲಿ ದೂಖ್....!
ಜಿವಿತಾ ಪಾಟ್ಲ್ಯಾನ್ ಲಿಪ್ಲೆಲ್ಯಾ ಭಯಾನಕ್ ಸತಾಕ್ ದಾಖಯ್ತಾನಾ ಉಬ್ಜಾಲ್ಲಿ ದೂಕ್...!!
ಆಪ್ಣೆಂ ಮರ್ಜೆನ್ ಸಾರ್ಲೆಲ್ಯಾ ದಿಸಾಂ ಪಾಟ್ಲ್ಯಾನ್ ಉಟೊನ್ ರಾವ್ಲೆಲ್ಯಾ ತ್ಯಾ ದಾಟ್ ಸಾವ್ಳೆಕ್ ದಾಖಯ್ತಾನಾ ಶಿರಾಂ ಶಿರಾಂನಿಂ ಉಬ್ಜಾಲ್ಲಿ ದೂಖ್....!!!
ಶೀತಲಾಚಿ ಸಗ್ಳಿ ಕೂಡ್ ದೂಖಿನ್ ಮಿರ್ಮಿರೊಂಕ್ ಲಾಗ್ಲಿ. ತಾಚೆಂ ಕಾಳಿಜ್ ಪುಟೊನ್ ಬೆಸಾಂ ಜಾವ್ನ್ ವೆತಾ ತಶೆಂ ತಾಕಾ ಜಾಲೆಂ. ಆಂಗಾಚಾ ಲೊಂವೆ ಲೊಂವೆ ಥಾವ್ನ್ ಉಜೊ ದಾಂವ್ಲೆಲ್ಯಾ ಪರಿಂ ತಾಕಾ ಜಾತಾನಾ, ಸವ್ಕಾಸ್ ಶೀತಲಾಚಾ ಗೊರ್ಯಾ ಖಾತಿ ಥಾವ್ನ್ ಪಾತಳ್ ಘಾಮ್ ಸುಟೊಂಕ್ ಲಾಗ್ಲೊ.
ಧಾವ್....! ವಿಪರೀತ್ ಉಜ್ಯಾಚಿ ಧಾವ್....!
ತಿತ್ಲೆಂಚ್!
ಶೀತಲಾನ್ ಪರ್ತ್ಯಾಕ್ ಮುಕ್ಲ್ಯಾ ಶಾವರಾಚಾ ಟ್ಯಾಪಾಕ್ ಹಾತ್ ಘಾಲೊ. ತೊ ಟ್ಯಾಪ್ ಸಗ್ಳೊಚ್ ಉಗ್ತೊ ಕರುನ್, ತ್ಯಾ ಶಾವಾರಾ ಥಾವ್ನ್ ಪಡ್ಚಾ ಉದ್ಕಾಕ್ ತೆಂ ರಾವ್ಲೆಂ.
ಶಾವಾರಾ ಥಾವ್ನ್ ತಾಚ್ಯಾ ಮಾತ್ಯಾರ್....., ಮಾತ್ಯಾ ಥಾವ್ನ್ ಆಂಗಾರ್...., ಆಂಗಾ ಥಾವ್ನ್ ಪಾಂಯಾಂಕ್, ದೆಂವೊನ್ ವೆಚಾ ಉದ್ಕಾಂತ್ ಆಪ್ಲ್ಯಾ ಆಂಗಾಕ್ ಧರ್ಲಲೊ ಉಜೊ ಆನಿ ತ್ಯಾ ಉಜ್ಯಾ ಪಾಟ್ಲಿ ದೂಖ್ ವ್ಹಳೂ ವ್ಹಳೂ ದೆಂವೊನ್ ವೆತಾ ತಶೆಂ ಶೀತಲಾಕ್ ಭೊಗ್ಲೆಂ.
ತಿತ್ಲ್ಯಾರ್!
ಭಂಧ್ ಬಾತ್ರೂಮಾಂತ್, ಶಾವರಾ ಥಾವ್ನ್ ಪಡ್ಚಾ ಉದ್ಕಾಚಾ ಶಿಂವೊರಾಚಾ ಆವಾಜಾಚೊ ಫಾಯ್ದೊ ಉಟವ್ನ್, ಕೋಣ್ಗೀ ಆಪ್ಲ್ಯಾ ಬಾತ್ರೂಮಾಚೆಂ ದಾರ್ ಲೊಟುನ್ ಭಿತರ್ ಆಯಿಲ್ಲ್ಯಾ ಪರಿಂ ಶೀತಲಾಕ್ ಜಾತಾನಾ, ’ಸಕ್ಕ್’ ಕರುನ್ ಹೆವ್ಶಿಂ ದಾರಾ ತೆವ್ಶಿಂ ಘುಂವೊನ್ ಪಳೆಲ್ಲೆಂ ತೆಂ ಬಾತ್ರೂಮಾ ಭಿತರ್ ಆಪ್ಣಾ ಶಿವಾಯ್ ದುಸ್ರೆಂ ಕೋಣ್ಯ್ ನಾ ತೆಂ ಕಳೊನ್, ತಾಣೆಂ ಸವ್ಕಾಸ್ ಶಾವರಾಕ್ ಭಂಧ್ ಕರ್ತಾನಾ, ತಾಚಿ ದೀಷ್ಟ್ ಮುಕ್ಲ್ಯಾ ವಾಶ್ ಬೇಸಿನಾ ವಯ್ಲ್ಯಾ ಆರ್ಶ್ಯಾಚೆರ್ ಘೆಲಿ.
ಜಲ್ಮಾ ಸುಟಾ ವಯ್ರ್, ಆಜ್ ಆಪುಣ್ ಆಸಾಂ ತಶೆಂ ತಾಕಾ ತ್ಯಾ ಆರ್ಶ್ಯಾಂತ್ ದಿಸ್ಲೆಂ. ಗೊರ್ಶ್ಯಾ ಆಂಗಾರ್ ಉದ್ಕಾನ್ ಭಿಜ್ಲ್ಲೆ ಕೇಸ್ ಮಾತ್ಯಾಚಾ ತ್ಯಾ ದೊನ್ಯ್ ಕುಶಿಂನ್ ಥಾವ್ನ್ ದೆಂವ್ಲ್ಲೆ. ಆಂಗಾರ್ ಕಾಂಯ್ಚ್ ಆಭರಣ್ ನಾಸ್ತಾನಾ, ಆಪುಣ್ ಆಪ್ಣಾಕ್ಚ್ ಅಪುಟ್ ಆಂಕ್ವಾರ್ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ. ತಶೆಂಚ್ ಆಪ್ಣಾಕ್ಚ್ ತ್ಯಾ ಆರ್ಶ್ಯಾಂತ್ ಪಳವ್ನ್ ರಾವ್ಲೆಲೆಂ ಶೀತಲ್ ಆಪ್ಲ್ಯಾ ಭಂವ್ತಣಿಚಾ ಸಂಸಾರಾಕ್ ವಿಸ್ರಾಲೆಂ ಜಾಲ್ಯಾರ್ಯ್ ಸಾಂಜೆರ್ ಜಿಮ್ಮಿನ್ ಉಲಯಿಲ್ಲ್ಯಾ ಉತ್ರಾಂಕ್ ವಿಸ್ರೊಂಕ್ ಸಕ್ಲೆಂ ನಾ.
"ಜಿಮ್ಮಿ....!"
ಆಪ್ಣಾಕ್ ಆನಿ ತಾಕಾ ಕಾಂಯ್ಚ್ ಸಂಭಂಧ್ ನಾತ್ಲ್ಲೊ. ಪುಣ್ ಜಿವಿತಾಚಾ ವಾಟೆರ್ ಖಂಯ್ಚರ್ಗೀ ಆಪ್ಣಾಚಿ ಸಾವ್ಳಿ ತಾಚ್ಯಾ ಜಿವಿತಾ ಸಾಂಗಾತಾ ಖೆಳೊನ್ ತಾಚ್ಯೆ ವಯ್ರ್ ಪ್ರಭಾವ್ ಘಾಲುಂಕ್ ಪಾವ್ಲ್ಯಾ ಮ್ಹಣೊನ್ ಮಾತ್ರ್, ತೆಂ, ಜಿಮ್ಮಿಚ್ಯಾ ತಾಣೆಂ ಉಚಾರ್ಲೆಲ್ಯಾ ಉತ್ರಾಂ ಥಾವ್ನ್ ಜಾಣಾಂ ಜಾಲ್ಲೆಂ. ಹ್ಯಾಚ್ ಪ್ರಭಾವಾನ್ ಭರೊನ್ ಎಕಾಚ್ಚ್ ಖಿಣಾ ಭಿತರ್ ಜಿಮ್ಮಿನ್ ಶೀತಲಾಕ್ ತಾಚೆಂ ಜಿವಿತ್ ದಾಕವ್ನ್ ದಿಲ್ಲೆಂ.
ತೆಂಚ್ ಜಿವಿತ್!
ಆಂಕ್ವಾರ್ ಕುಡಿ ವಯ್ರ್ ರಸ್ಮಾಚೊ ಶಾಲ್ ಪಾಂಗುರ್ಲೆಲೆಂ ಜಿವಿತ್!!
ಸಮಾಜೆಂತ್ ಮರ್ಯಾದೆಚೆಂ ಮ್ಹಣೊನ್ ಚಿಂತ್ಲಲೆಂ ನಾಗ್ಡೆಂ ಜಿವಿತ್!!!
ಜಿಮ್ಮಿನ್ ದಾಕಯಿಲ್ಲ್ಯಾ ಸತಾ ಮುಕಾರ್ ಶೀತಲಾಕ್ ಲಜ್ ಭೊಗ್ಲ್ಲಿ. ಪುಣ್, ಹ್ಯಾ ಭಂಧ್ ಬಾತ್ರೂಮಾ ಭಿತರ್ ಆಪ್ಲ್ಯಾ ಸಂಪೂರ್ಣ್ ವಿಣ್ಗ್ಯಾ ಕುಡಿಕ್ ದೀಷ್ಟ್ ಜೊಕ್ತಾನಾ ತಾಕಾ ಲಜ್ ಭೊಗ್ಲಿ ನಾ. ಆಪ್ಣಾಚಾ ಭೊಂವಾರಿಂ ದೋನ್ ದೊಳೆ ಆಪ್ಣಾಕ್ ಪಳೆತಾತ್ ತಶೆಂ ದಿಸ್ಲ್ಯಾರ್ಯ್ ತೆಂ ಕಾವ್ಜೆಲೆಂ ಶಿವಾಯ್ ತಾಚ್ಯಾ ಲಜೆಕ್ ತಾಣೆಂ ದಾಂಪ್ಲೆಂ ನಾ. ಕಾರಾಣ್, ಲಜ್ ಆನಿ ಜಿವಿತಾ ಮಧ್ಲೊ ಅಂತರ್ ಜಾಣಾಂ ಜಾಂವ್ಕ್ ತೆಂ ವದ್ದಾಡ್ತಾಲೆಂ.
ಮುಕ್ಲ್ಯಾ ಆರ್ಶ್ಯಾಂತ್ ರೂಪ್ ರೂಪ್ ದಿಸ್ಚಾ ಆಪ್ಣಾಚಾ ಲಜೆ ಮುಕಾರ್, ತ್ಯಾ ಆರ್ಶ್ಯಾ ಭಾಯ್ರ್ ಹ್ಯಾಚ್ ಲಜೆಕ್ ದಾಂಪುಂಕ್ ಆಪ್ಣೆಂ ವಾಪಾರ್ಚಿ ಮಾನ್ ಮರ್ಯಾದೆಚಿ ಲಜ್, ಚಡ್ ಕೀಳ್ ಮ್ಹಳ್ಳ್ಯಾ ಭಾಶೆನ್ ಶೀತಲಾಕ್ ದಿಸ್ತಾನಾ, ತಾಕಾ ಆಪ್ಣಾ ವಯ್ರ್ಚ್ ಕಾಂಟಾಳೊ ಆಯ್ಲೊ ಆನಿ ತೆಂ ಪರ್ತ್ಯಾಕ್ ಶಾವರಾ ಪಂದಾ ಆಯಿಲ್ಲೆಂಚ್ ಶಾವರಾಚೊ ಟ್ಯಾಪ್ ಉಗ್ತೊ ಕರುನ್ ತಾಚಿ ಧಾರ್ ಘೆಂವ್ಕ್ ಲಾಗ್ಲೆಂ. ಮಾತ್ಯಾರ್ ಥಾವ್ನ್ ಪಾಂಯಾಂಚಾ ತಾಳುವೆ ಪರ್ಯಾಂತ್ ದೆಂವೊನ್ ವೆಚಾ ಉದ್ಕಾಂತ್ ಕಸಲೆಂಗೀ ಆಪ್ಣಾಚಾ ಕುಡಿ ಥಾವ್ನ್ ದೆಂವೊನ್ ವಚೊನ್ ಆಪ್ಣಾಚಿ ಮತ್ ಶಾಂತ್ ಜಾತಾ ತಶೆಂ ತಾಕಾ ಭೊಗ್ಲೆಂ. ತೆಂ ಶಾವರಾ ಪಂದಾ ಥಾವ್ನ್ ಹಾಲ್ಲೆಂ ನಾ.
ಮತ್ ಶಾಂತ್ ಜಾತಾ ವರೇಗ್ ತ್ಯಾ ಶಾವರಾಚ್ಯಾ ಉದ್ಕಾ ಪಂದಾ ಆಪ್ಣಾಕ್ಚ್ ಬಲಿ ಭೆಟವ್ನ್, ನಿಮಾಣೆಂ ಕಾಳ್ಜಾಚಿ ಜಡಾಯ್ ದೆಂವೊನ್ ಗೆಲ್ಲ್ಯಾ ಪರಿಂ ಜಾತಾನಾ, ತೆಂ ಬಾತ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಂ. ಮಾತ್ಯಾಕ್ ದಾಟ್ ಟವಲ್ ರೆವ್ಡಾವ್ನ್, ಆಂಗಾರ್ ನೈಟಿ ವೊಡುನ್, ಆಪ್ಲ್ಯಾ ಕುಡಾಚೆಂ ಜನೆಲ್ ಉಗ್ತೆಂ ಕೆಲ್ಲೆಂ ಶೀತಲ್, ತ್ಯಾ ಜನೆಲಾ ಥಾವ್ನ್ ’ಜುಮ್ಮ್’ ಕರುನ್ ಭಿತರ್ ಆಯಿಲ್ಲ್ಯಾ ಥಂಡ್ ಸಾಂಜೆಚಾ ವಾರ್ಯಾಕ್ ಪುಳಕಿತ್ ಜಾವ್ನ್, ತಶೆಂಚ್ ಜನೆಲಾಂತ್ಲ್ಯಾನ್ ಭಾಯ್ರ್ ಪಳವ್ನ್ ರಾವ್ಲೆಂ.
ಭಾಯ್ಲ್ಯಾನ್ ದಾಟ್ ನ್ಹಯ್ ತರ್ಯ್ ಕಾಳೊಕ್ ಮಾಂಡ್ಲ್ಲೊ. ಶೀತಲಾಚಾ ಘರಾಚಾ ಲೇನಾಂತ್ಲೆ ವೀಜ಼್ ದಿವೆ ಥಂಯ್ ಹಾಂಗಾ ಪೆಟ್ತಾಲೆ. ತ್ಯಾ ವೀಜ಼್ ದಿವ್ಯಾಂಚಾ ಉಜ್ವಾಡಾಂತ್ ಭಾಯ್ರ್ ಪಳಂವ್ಚಾ ಶೀತಲಾಚಾ ದೊಳ್ಯಾಂಕ್ ಚಡ್ ಕಾಂಯ್ ದಿಸ್ಲೆಂ ನಾ. ಮುಕ್ಲೆಂ ಏಕ್ ಘರ್ ಆನಿ ತಾಚ್ಯಾ ಭಂವ್ತಣಿಚೆ ಚ್ಯಾರ್ ಮಾಡ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ತೆಂ ಪಳಂವ್ಕ್ ಸಕ್ಲೆಂ ನಾ.
ಭಾಯ್ರ್ ಪಳಂವ್ಚಾ ಶೀತಲಾಚಾ ದಿಷ್ಟೆಕ್ ಕಾಂಯ್ಚ್ ನವೆಂಪಣ್ ದೆಖ್ತಾಂ ಮ್ಹಳ್ಳ್ಯಾಪರಿಂ ಜಾಯ್ನಾಸ್ತಾನಾ ವೆತಾನಾ, ಸವ್ಕಾಸ್ ತಾಚ್ಯಾ ಮತಿಂತ್ ಪರ್ತ್ಯಾಕ್ ತೊ ಸಾಂಜೆಚೊ ಉಡಾಸ್ ಉಭೊನ್ ಆಯ್ಲೊ. ತಾಚ್ಯಾ ಸವೆಂ ಜಿಮ್ಮಿಚಿಂ ತಿಂ ನಿಮಾಣಿಂ ಉತ್ರಾ.....! ಆಪ್ಣಾಕ್ ಆಪ್ರಾಧಿ ಮ್ಹಣೊನ್ ಪೈಸಲ್ ದಿಲ್ಲಿ ತಿಂ ಉತ್ರಾಂ ಪರ್ತ್ಯಾಕ್ ಕಾನಾಂತ್ ಆಯ್ಕಾಲ್ಲ್ಯಾ ಪರಿಂ ಜಾತಾನಾ ಎಕಾಚ್ಚ್ಫರಾ ಶೀತಲಾನ್ ’ದಡ್ಡ್’ ಕರುನ್ ಭಳಾನ್ ಜನೆಲ್ ಭಂಧ್ ಕೆಲೆಂ.
ತಾಚ್ಯಾ ಮತಿಂತ್ ನವ್ಯಾನ್ ಝುಜ್ ಆರಂಭ್ ಜಾಲೆಂ.
ಜಿವಿತಾಚೆಂ ಝುಜ್....!
ಆಪ್ಣೆಂ ವಿಸ್ರಾಲ್ಲ್ಯಾ ಜಿವಿತಾಚೆಂ ಝುಜ್....!!
ಎದೊಳ್ ಪಾಸೊನ್ ಆಪ್ಣೆ ಚಿಂತುಂಕ್ ನಾತ್ಲೆಲೆಂ ಆಪ್ಲ್ಯಾಚ್ ಜಿವಿತಾಚೆಂ ಕುರ್ಡೆಂ ಝುಜ್.....!!!
*************
ರಾತಿಚೆಂ ಜೆವಾಣ್ ಜಾವ್ನ್ ನಿದೊಂಕ್ ಗೆಲ್ಲ್ಯಾಮಿಶೆಲಾಚಾ ದೊಳ್ಯಾಂ ಮುಕಾರ್ ನಿದೆಚಿ ಸಾವ್ಳಿ ಪಾಸೊನ್ ವಾಟ್ ಚುಕೊನ್ ಪಾಶಾರ್ ಜಾಲಿ ನಾ. ಆಪ್ಲ್ಯಾ ಆವಯ್ ಬಾಪಾಯ್ಕ್ ಆಪ್ಣಾ ಥಾವ್ನ್ ವೊಡುನ್ ವೆಲ್ಲೆಂ ತೆಂ ಮರಣ್ ತ್ಯಾಚ್ ರೂಪಾನ್ ಆಪ್ಣಾ ಭೊಂವಾರಿ ಆಜ್ ಭೊಂವೊಂಕ್ ಲಾಗ್ಲಾಂ ತಶೆಂ ತಾಕಾ ದಿಸ್ತಾಲೆಂ. ಜೆರೊಮಾನ್ ಆನಿ ಎಸ್ತೆಲಾನ್ ದೊಗಾಂಯ್ನಿ ಮಿಶೇಲಾಕ್ ಸಮ್ಜಣಿ ದಿಲಿ ಜಾಲ್ಯಾರ್ಯ್ ಪಯ್ಸ್ ಖಂಯ್ಚರ್ಗೀ ಆಪ್ಣಾಕ್ ಸಾಂಡುನ್ ಗೆಲ್ಲಿಂ ಆಪ್ಲಿಂ ಆವಯ್ ಬಾಪಯ್ ಆಪ್ಣಾಕ್ ಚಿಂತುನ್ ರಡ್ತಾತ್ ತಶೆಂ ತಾಕಾ ಜಾಲೆಂ. ಕೋಣ್ಗೀ, ಖಂಯ್ಚರ್ಗೀ ಆಪ್ಣಾಕ್ ಪಾರೊ ಕರುನ್ ರಾವ್ಲಾ ತಶೆಂ ತಾಕಾ ಭೊಗ್ತಾನಾ, ಆಂಗಾರ್ ವೊಡ್ಲೆಲಿ ವೋಲ್ ಹೆವ್ಶಿಂ ಲೊಟುನ್ ಆಪ್ಣೆ ನಿದ್ಲೆಲ್ಯಾ ಖಾಟಿಯೆರ್ ಥಾವ್ನ್ ತೆಂ ಉಟೊನ್ ಬಸ್ಲೆಂ. ನಿದ್ಚಾ ಕುಡಾಂತ್ಲೊ ಕಾಳೊಕ್ ಪಾಸೊನ್ ಆಪ್ಣಾಕ್ ಬೆಷ್ಟಾಯ್ತಾ ತಶೆಂ ಜಾತಾನಾ, ಖಾಟಿಯೆ ವಯ್ಲೆಂ ಉಟೊನ್ ವಚೊನ್ ಮಿಶೇಲಾನ್ ಆಪ್ಲ್ಯಾ ಕುಡಾಚೊ ಲೈಟ್ ಜಳಯ್ಲೊ.
ಲೈಟಾಚಾ ಉಜ್ವಾಡಾಂತ್ ಸಗ್ಳೆಂ ಕೂಡ್ ತಾಚ್ಯಾ ದೊಳ್ಯಾಂಚಾ ದಿಷ್ಟೆಕ್ ಯೆತಾನಾ, ಪರ್ತ್ಯಾಕ್ ತಶೆಂಚ್ ಪಾಟಿಂ ಯೇವ್ನ್ ಖಾಟಿಯೆರ್ ತೆಂ ಆಡ್ ಪಡ್ಲೆಂ. ಖಾಟಿಯೆ ವಯ್ಲ್ಯಾ ಸೀಲಿಂಗಾರ್ ಉಮ್ಕಾಳ್ಚೆಂ ಪ್ಯಾನ್ ಆಪ್ಣಾ ಇತ್ಲ್ಯಾಕ್ ಘುಂವೊನ್ ವಾರೆಂ ಶಿಂವ್ರಾಯ್ತಾಲೆಂ.
"ಆಪುಣ್ ಕಿತ್ಯಾಕ್ ಮ್ಹಣೊನ್ ಇತ್ಲಿಂಯ್ ಭಿಯೆಲ್ಯಾಂ?" ಆಪ್ಣಾ ಇತ್ಲ್ಯಾಕ್ ಮಿಶೇಲಾಚಾ ಮತಿಂತ್ ಸವಾಲ್ ಉದೆಲೆಂ. "ಮರ್ಣಾಕ್?" ಮತಿಂತ್ಚ್ ಉಟ್ಲೆಲ್ಯಾ ಸವಾಲಾಕ್ ’ನ್ಹಯ್’ ಮ್ಹಳ್ಳ್ಯಾ ಭಾಶೆನ್ ಮಿಶೇಲಾನ್ ತಕ್ಲಿ ಹಾಲಯ್ಲಿ.
"ಮರ್ಣಾಕ್ ಭಿಯೆಂವ್ಚೊ ಮನಿಸ್ ಭಿವ್ಕುರೊ ಪುತಾ. ಆಜ್ ನಾ ಜಾಲ್ಯಾರ್ ಫಾಲ್ಯಾಂ ಮೊರೊಂಕ್ ಸಗ್ಳ್ಯಾಂಕ್ ಆಸಾ. ಮರ್ತಾಂ ಪಾಸೊನ್ ಧಯ್ರಾನ್ ಜಿಯೆಂವ್ಕ್ ಜಾಯ್!" ಆಪ್ಲ್ಯಾ ಆಜಿಯೆನ್ ಸಾಂಜೆರ್ ದಿಲ್ಲ್ಯಾ ಶೆರ್ಮಾಂವಾತ್ಲೆಂ ಲಿಸಾಂವ್ ಮಿಶೇಲಾಚಾ ಕಾನಾಂ ಪಡ್ದ್ಯಾರ್ ಪರ್ತ್ಯಾನ್ ಆಯ್ಕೊನ್ ಗೆಲೆಂ.
ಜಿವಿತಾಚಾ ಝುಜಾಂತ್ ಹರ್ಯೇಕ್ ಜಲ್ಮಾಲ್ಲಿ ಜೀವಿ ಝುಜ್ತಾ. ಹಾಂತುಂ ಮರಣ್ಯ್ ಏಕ್ ಝುಜ್ಚ್! ಆಶೆಂ ಆಸ್ತಾನಾ ಆಪುಣ್ ಖಂಯ್ಚೆಂ ಝುಜ್ ಝುಜ್ತಾಂ? ಆಯ್ಚೆಂ ಘಡಿತ್ ಘಡ್ಲೆಲ್ಯಾ ಘಡಿಯೆ ಥಾವ್ನ್ ಆಪುಣ್ ಚಿಂತ್ನಾಂಚಾ ಕಸಲ್ಯಾ ಕೊಡ್ಶ್ಯಾರ್ ಉಭಿಂ ಜಾಲ್ಯಾಂ? ಜ್ಯಾ ಕೊಡ್ಶ್ಯಾರ್ ಮ್ಹಾಕಾ ಪರ್ತ್ಯಾಕ್ ಪರ್ತ್ಯಾಕ್ ಆಪ್ಲ್ಯಾ ಆವಯ್ ಬಾಪಾಯ್ಚೊ ಉಡಾಸ್ ಸತಾಂವ್ಕ್ ಲಾಗ್ಲಾ?
"ನೆಣಾರ್ಪಣಾಂತ್ ಆಸಲಿಂ ಘಡಿತಾಂ ಘಡ್ತಾತ್ ಮಿಶೇಲ್. ಹಾಂಗಾಚರ್ ತುಜೆಂ ಆವ್ಕ್ ಮಾತ್ರ್ ತುಕಾ ಸಾಂಗಾತ್ ದೀಂವ್ಕ್ ಸಕ್ತಾ. ಆವ್ಕಾನ್ ಜರ್ ತುಜೊ ಹಾತ್ ಸೊಡ್ಲೊ ಜಾಲ್ಯಾರ್ ಮನ್ಶ್ಯಾಕ್ ಮೊರೊಂಕ್ ವಾಟೆ ವಯ್ಲೊ ಪಾಂಯಾಂಕ್ ದಾಂಟೊಂಚೊ ಲ್ಹಾನ್ಸೊ ಫಾತರ್ಚ್ ಪುರೊ. ತುಜ್ಯಾ ಮಾಮ್ಮಿ ಡ್ಯಾಡಿಚೆಂ ಆವ್ಕ್ಚ್ ತಿತ್ಲೆಂ ಆಸ್ಲ್ಲೆಂ ಜಾಲ್ಯಾರ್ ಕೊಣೆಂ ಕಿತೆಂ ಕರುಂಕ್ ಜಾತಾ? ಆಕ್ಸಿಡೆಂಟ್ ಫಕತ್ತ್ ಏಕ್ ನೀಬ್ ಮಾತ್ರ್! ತಿಂ ಚಿಂತ್ನಾ ಮತಿಂತ್ಲಿಂ ಕಾಡುನ್ ಉಡಯ್. ಪುರೊ.....! ಮಸ್ತ್ ಜಾಲೊ ತೊ ಆಲ್ಬಮ್ ಪಳೆಲ್ಲೊ ತುವೆಂ....!" ಆಪ್ಣೆಂ ಆಪ್ಲ್ಯಾ ಆವಯ್ ಬಾಪಾಯ್ಕ್ ಆಲ್ಬಮಾಂತ್ ಪಳವ್ನ್ ದುಖಾಂ ಗಳಯ್ತಾನಾ ಆಪ್ಲ್ಯಾ ಆಜ್ಯಾನ್ ಸಾಂಗ್ಲೆಲಿಂ ಉತ್ರಾಂ ಮಿಶೇಲಾಕ್ ಉಡಾಸ್ ಆಯ್ಲಿಂ.
ಮನಿಸ್ ಘಡಿತಾಕ್ ಕಾರಾಣ್ ಮಾತ್ರ್ ದೀಂವ್ಕ್ ಸಕ್ತಾ ಶಿವಾಯ್ ಜಾಂವ್ಚಾ ಘಡಿತಾಕ್ ರಾವೊಂಕ್ ಯಾ ದಾಕಂವ್ಕ್ ಸಕಾನಾ. ಯಾ ಖುದ್ದ್ ಜಾವ್ನ್ ಪಳಂವ್ಕ್ ಸಕಾನಾ. ಕಿತ್ಯಾಕ್? ಮನಿಸ್ ಇತ್ಲೊ ಲಾಚಾರ್ ಜಾವ್ನ್ಯ್ ಆಪ್ಣಾಕ್ಚ್ ಆಪುಣ್ ವ್ಹಡ್ಲೊ ಮ್ಹಣೊನ್ ಕಿತ್ಯಾಕ್ ಚಿಂತಾ?
"ಪಳೆಲೆಂಯ್ ಮಿಶೆಲ್? ಹೆ ಸಗ್ಳೆ ಮನಿಸ್ ಚಡಾವತ್ ಜಾವ್ನ್ ತಾಂಚೆ ಹಾತ್ ಪಾಂಯ್ ಚಲ್ತಾನಾ ಸಮಾಜೆಂತ್ಲೆ ನಾಂವಾಡ್ಲಲೆ ಮನಿಸ್. ಪಯ್ಶಾನಿಂ ಖೆಳ್ಲ್ಲೆ ಮನಿಸ್. ಸ್ಮಾರಕ್ ಮಾರ್ಬಲಾಂ ವಯ್ರ್ ತಾಂಚೆಂ ನಾಂವ್ ಕಾಂತಯ್ಲಾಂ. ಅಸಲ್ಯಾಂಕ್ ಆಜ್ ಹಾಂಚಾಚ್ ಭುರ್ಗ್ಯಾಂನಿಂ ಸಾಂಡ್ಲಾಂ. ಹಾಕಾ ಕಾರಾಣ್ ಕಿತೆಂ? ಪಯ್ಶೆ ಜಮವ್ನ್ ಭುರ್ಗ್ಯಾಂಕ್ ಶಿಕಾಪ್ ದಿಲ್ಲಿ ಹಾಂಚಿ ಚೂಕ್? ವಾ ಶಿಕಾಪ್ ಘೆತ್ಲೆಲಿಂ ಭುರ್ಗಿಂ ಹಾಂಗಾ ಫುಡಾರ್ ನಾಸ್ತಾಂ, ದೇಶಾಂತರ್ ಫುಡಾರ್ ಸೊಧುನ್ ಗೆಲ್ಲಿ ತಾಂಚಿ ಚೂಕ್? ಸಮಾಜೆಂತ್ ಜೀವನ್ ಕಾಡುಂಕ್ ಗರ್ಜ್ ಆಸ್ಚೆಂ ಸಗ್ಳೆಂ ಶಿಕಾಪ್ ಜೊಡುನ್ ದಿತಾನಾ ಕುಟ್ಮಾ ಜಿವಿತಾಚೆ ವಿಚಾರ್ ಭುರ್ಗ್ಯಾಂಚಾ ಕಾನಾಂತ್ ವೊಂಪಿನಾತ್ಲೆಲಿ ಹಾಂಚಿ ಚೂಕ್? ವಾ ಕುಟ್ಮಾಚೊ ಮೋಗ್ ಪಾರ್ಕುಂಕ್ ಸಕಾನಾಸ್ತಾನಾ ಆಪ್ಣಾಕ್ಚ್ ಕುರ್ಡೆಂ ಕರುನ್ ಘೆತ್ಲೆಲ್ಯಾ ತ್ಯಾ ಕುರ್ಡ್ಯಾ ಭುರ್ಗ್ಯಾಂಚಿ ಚೂಕ್?" ಪ್ರಾಯ್ವತಾಂಚಾ ಆಸ್ರ್ಯಾಂತ್ ಪ್ರಾಯ್ವಂತಾಚಿ ಭೆಟ್ ಕರುನ್ ನಿಮಾಣೆಂ ತ್ಯಾ ಆಸ್ರ್ಯಾಚಾ ವ್ಹಡಿಲಾಕ್ ಮೆಳೊಂಕ್ ಗೆಲ್ಲ್ಯಾ ವೆಳಿಂ ತ್ಯಾ ಆಸ್ರ್ಯಾಚಾ ವ್ಹಡಿಲಾನ್ ಉಲಯಿಲ್ಲಿಂ ಉತ್ರಾಂ ಆತಾಂ ಮಿಶೇಲಾಕ್ ಉಡಾಸ್ ಆಯ್ಲಿ.
"ತುಂ ಪ್ರಾಯೆನ್ ಭರ್ಲಾಂಯ್ ವ್ಹಯ್. ಪುಣ್ ಜಾಣ್ವಾಯ್ ತುಕಾ ಅಜೂನ್ ಭರೊಂಕ್ ನಾ. ಮನಿಸ್ ಪ್ರಾಯೆನ್ ಪಯ್ಲೊ ಭರ್ತಾ ಆನಿ ಜಾಣ್ವಾಯೆನ್ ಉಪ್ರಾಂತ್! ಹ್ಯಾಚ್ ಖಾತಿರ್ ಮನಿಸ್ ಪಯ್ಲೊ ಹಾಸ್ತಾ ಆನಿ ಉಪ್ರಾಂತ್ ರಡ್ತಾ! ಜಾಣ್ವಾಯ್ ಸಂತೊಸ್ ದೀನಾ....! ಜಾಣ್ವಾಯ್ ಸಂತೊಸಾಕ್ ಅರ್ಥ್ ದಾಕಯ್ತಾ ಆನಿ ಹೊ ಅರ್ಥ್ ಸಂತೊಸಾಕ್ ಆಡಂಬರ್ ಜಾವ್ನ್ ದಿಸಯ್ನಾ. ಬಗಾರ್ ಮತಿಂತ್ ಸಮಾಧಾನ್ ಜಾವ್ನ್ ರಾಜ್ ಕರ್ತಾ! ಆಸಲೊ ಮನಿಸ್ ರಡಾನಾ....!"
"ತುಮಿಂ ಪಳೆಲಾಂ ಆಸ್ತೆಲೆಂ.....! ಹಾಂಗಾಚಾ ಸಭಾರಾಂಕ್ ಕೊಣೆ, ಕಿತ್ಯಾಕ್, ಖಂಯ್, ಕಶೆಂ ಚೂಕ್ ಕೆಲ್ಯಾ ಆನಿ ಆಪ್ಣಾ ಥಾವ್ನ್ ಕಶಿ ಚೂಕ್ ಜಾಲ್ಯಾ ಮ್ಹಳ್ಳ್ಯಾಚಿ ಜಾಣ್ವಾಯ್ ಆಯ್ಲ್ಯಾ. ದೆಕುನ್ ತೆ ಸಮಾಧಾನೆಂತ್ ಆಸಾತ್ ಆನಿ ಆಪ್ಲ್ಯಾ ಚೂಕಿಚೆಂ ಪ್ರಾಯಶ್ಚಿತ್ ಕರ್ತಾತ್. ಹಾಚಿ ಸಮ್ಜಣಿ ಜಾಂವ್ಕ್ ನಾತ್ಲೆಲೆ ಅಜೂನ್ ರಡ್ತಾತ್. ಆಪ್ಲ್ಯಾಚ್ ಭುರ್ಗ್ಯಾಂಕ್ ಅಜೂನ್ ಶಿರಾಪ್ ಘಾಲ್ತಾತ್. ಅಸಲ್ಯಾಂಕ್ ತಾಣಿಂ ಹೊಗ್ಡಾಯಿಲ್ಲಿ ಖರಿ ಜಾಣ್ವಾಯ್ ತಾಂಕಾಂ ದೀಂವ್ನ್ ತಾಂಕಾಂ ಸಮ್ಜೊಂಚೆಂ ಪ್ರಯತ್ನ್ ಹಾಂವ್ ಕರುನ್ ಆಸಾಂ...!"
"ತುಂ ಆತಾಂ ತರ್ನಾಟ್ಪಣಾಚಾ ದಿಸಾಂ ಸಾಂಗಾತಾ ಮೆಟಾಂ ಕಾಡ್ಚೆಂ ಚಲಿ. ತುಕಾ ಹ್ಯಾ ಪ್ರಾಯ್ವಂತಾಂಕ್ ಪಳಂವ್ಕ್ ಜಾಯ್ ಮ್ಹಣೊನ್ ಭೊಗ್ಲ್ಲೆಂ ತೆಂ ತುಜ್ಯಾ ಆಬಾನ್ ಮ್ಹಾಕಾ ಸಾಂಗ್ತಾನಾ, ತುಜ್ಯಾ ಆಬಾಚೆಂ ಆಯ್ಕೊನ್ ಮ್ಹಾಕಾ ಭೋವ್ ಸಂತೊಸ್ ಜಾಲೊ. ತುಜಿ ಆಯ್ಚಿ ಹಿ ಕ್ರಿಯಾ ಏಕ್ ಬರಿ ಕ್ರಿಯಾ!"
"ತುಂ ಜಾಣಾಂಯ್......?, ಹರ್ಯೇಕಾ ಕ್ರಿಯಾಕ್ ಏಕ್ ಪ್ರತಿಕ್ರಿಯಾ ಖಂಡಿತ್ ಆಸಾ. ತುಜ್ಯಾ ಜಿವಿತಾಂತ್ಯ್ ಭೋವ್ಶ್ಯಾ ಏಕ್ ಕ್ರಿಯಾ ಪಾಶಾರ್ ಜಾವ್ನ್ ಗೆಲ್ಯಾ ಆನಿ ತ್ಯಾ ಕ್ರಿಯಾಚಿ ಪ್ರತಿಕ್ರಿಯಾ ಜಾವ್ನ್ ತುಂ ಆಜ್ ಹ್ಯಾ ಪ್ರಾಯ್ವಂತಾಂಕ್ ಸೊಧುನ್ ಹಾಂಗಾ ಪಾವ್ಲಾಂಯ್. ತಿ ಕಸಲಿ ಕ್ರಿಯಾ ಮ್ಹಣೊನ್ ಹಾಂವ್ ವಿಚಾರುಂಕ್ ವಚಾನಾ. ಪುಣ್, ತುಕಾ ಇತ್ಲೆಂ ಮಾತ್ರ್ ಸಾಂಗ್ತಾಂ ಕೀ ತ್ಯಾ ಕ್ರಿಯಾ ಥಾವ್ನ್ ತುಕಾ ಸಮ್ಜಣಿ ಆಯ್ಲ್ಯಾ. ಹ್ಯಾ ಸಂಸಾರಾಂತ್ ಸಭಾರಾನಿಂ ವಿಸ್ರಾಲ್ಲೆಂ ತೆಂ ತುಕಾ ಉಡಾಸಾಕ್ ಆಯ್ಲಾಂ. ಹೆಂಚ್ ಸಗ್ಳ್ಯಾಂ ಪ್ರಾಸ್ ವರ್ತೆಂ!"
"ತುವೆಂ ಹಾಂಗಾಚಾ ಪ್ರಾಯ್ವಂತಾ ಲಾಗಿಂ ಉಲಯ್ತಾನಾ ಹಾವೆಂ ತುಕಾ ಪಳೆಲೆಂ. ತುಜ್ಯಾ ಮತಿಂತ್ ಕಸಲೆಂಗೀ ಏಕ್ ಝುಜ್ ಆಸಾ. ತುಂ ತ್ಯಾ ಝುಜಾಕ್ ಆಪ್ಲ್ಯಾ ಮತಿಂತ್ಚ್ ಝುಜೊನ್ ಆಸಾಯ್. ಹೆಂ ಭಿವ್ಕುರ್ಯಾಂಚೆಂ ಲಕ್ಷಣ್. ಭೋವ್ಶ್ಯಾ ತುಜ್ಯಾ ಜಿವಿತಾಂತ್ ಘಡ್ಲೆಲ್ಯಾ ಘಡಿತಾ ಥಾವ್ನ್ ತುಂ ಪ್ರಭಾವಿತ್ ಜಾಲಾಂಯ್ ಆಸ್ತೆಲೆಂ. ತಾಚೊ ಪ್ರಭಾವ್ ತುಜೆರ್ ಪಡ್ಲಾ ವ್ಹಯ್! ಪುಣ್ ತೆಂ ತುಜೆಂ ಜಿವಿತ್ ನ್ಹಯ್. ತ್ಯಾ ತುಜ್ಯಾ ಜೀವನಾಚೆರ್ ಪಡ್ಲೆಲ್ಯಾ ಪ್ರಭಾವಾಕ್ ಬರ್ಯಾ ಕಾಮಾಂತ್ ಗಳ್ಸುಂಚಿ ಸಮ್ಜಣಿಂ ಜೊಡ್ಚೆಂ ಖರ್ಯಾ ಧಯ್ರಾಚೆಂ ಲಕ್ಷಣ್! ಹಾಂವ್ ಹಾಂಗಾ ಮನಾಂ ಸೊಧ್ತಾಂ. ತ್ಯಾ ಪಾಸೊನ್ ಹಾವೆಂ ತುಜ್ಯಾ ಮನಾಕ್ ಸೊಧ್ಲೆಂ. ಹಾಂವ್ ನೆಣಾಂ ಹಾಂವ್ ಕಿತ್ಲೊಂ ಸಾರ್ಕೊಂ ಆಸಾಂ ಮ್ಹಣೊನ್....!"
"ತುಕಾ ಹಾವೆಂ ಸಾಂಗ್ಲೆಂ ಹರ್ಯೇಕಾ ಕ್ರಿಯಾಕ್ ಏಕ್ ಪ್ರತಿಕ್ರಿಯಾ ಖಂಡಿತ್ ಆಸಾ ಮ್ಹಣೊನ್. ತುವೆಂ ಉಲಂವ್ಚೆಂ ಏಕ್ ಉತಾರ್ ಪಾಸೊನ್ ಏಕ್ ಕ್ರಿಯಾ ಆನಿ ಹ್ಯಾ ಕ್ರಿಯಾಚಿ ಪ್ರತಿಕ್ರಿಯಾ ತ್ಯಾಚ್ ವಗ್ತಾರ್ ಸಗ್ಳ್ಯಾ ತುಜ್ಯಾಕುಡಿರ್ ಪ್ರಭಾವ್ ಘಾಲ್ತಾ. ಸ್ಪೆಶಲೀ ತುಜ್ಯಾ ನರ್ವಸ್ ಸಿಸ್ಟಮಾಚೆರ್! ಹೊ ಪ್ರಭಾವ್ ತುಕಾ ಆಜ್ ದಿಸೊಂಕ್ಯ್ ಪುರೊ. ಫಾಲ್ಯಾ ದಿಸೊಂಕ್ಯ್ ಪುರೊ. ಪೊಟಾಂತ್ ಆಸ್ಲೆಲ್ಯಾ ಭುರ್ಗ್ಯಾಚೆರ್ ಪಡೊಂಕ್ಯ್ ಪುರೊ. ಯಾ ತುಜ್ಯಾ ಜಾಣ್ತ್ಯಾಪಣಾರ್ ಪಡೊಂಕ್ಯ್ ಪುರೊ. ಎಕಾ ವಾಟೆನ್ ಹಾಕಾ ನಶೀಬ್ ಯಾ ಡೆಸ್ಟಿನಿ ಮ್ಹಣೊನ್ಯ್ ಮ್ಹಣ್ಯೆತ್.....! ......ಮ್ಹಳ್ಯಾರ್ ಜೆಂ ಕಿತೆಂ ತುಂ ಆಜ್ ಜಾವ್ನ್ ಆಸಾಯ್ ತೆಂ ತುಜ್ಯಾ ಜಿವಿತಾಚ್ಯಾ ಕಾಲ್ಚಾ ಪ್ರಭಾವಾನ್.....! ಆನಿ ಫಾಲ್ಯಾಂ ತುಜೆಂ ಜಿವಿತ್ ಕಿತೆಂ ಜಾತೆಲೆಂ ತೆಂ ತುಜ್ಯಾ ಆಯ್ಚಾ ಮನೋ ವಿಚಾರಾಂಚೆರ್ ಹೊಂದೊನ್ ಆಸಾ! ದೆಕುನ್ ಜಿವಿತಾಂತ್ ಹರ್ಯೇಕ್ ಕ್ರಿಯಾ ಚಡ್ ಮಹತ್ವಾಚೊ ಪಾತ್ರ್ ಘೆತಾ!"
"ಮ್ಹಳ್ಯಾರ್.....?" ಮಿಶೇಲಾಕ್ ಆಪ್ಲ್ಯಾ ಮತಿಕ್ ಕಿತೆಂಗೀ ಝಳ್ಕಾಲ್ಲ್ಯಾ ಪರಿಂ ಜಾಲೆಂ.
ತೆಂ ಎದೊಳ್ ಪಾಸೊನ್ ತ್ಯಾ ಪ್ರಾಯ್ವಂತಾಂಚಾ ಆಸ್ರ್ಯಾಚಾ ವ್ಹಡಿಲಾಚೆಂ ಆಯ್ಕಾತಾಲೆಂ.
ತಾಣೆಂ ಮಿಶೇಲಾಕ್ ಸಮ್ಜಣೆಚಿಂ ಉತ್ರಾಂ ಸುಡಾಳ್ ವಿವರ್ಸಿಲ್ಲಿಂ. ಕಿತ್ಯಾಕ್, ಮಿಶೇಲ್ ಏಕ್ ತರ್ನಾಟೆಂ ಚಲಿ ಜಾವ್ನ್, ತೆಂ ಮಂತನಾಂತ್ಲ್ಯಾ ಕುಟ್ಮಾಂತ್ ವಾಡ್ಲೆಲೆಂ ಜಾವ್ನ್ಯ್ ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಆಪ್ಣಾಚಿಂ ನ್ಹಯ್ ಆಸ್ಲೆಲ್ಯಾಂಕ್ ಸೊಧುನ್ ತೆಂ ಆಯ್ಲಾಂ ಮ್ಹಳ್ಯಾರ್.....?
ವ್ಹಯ್! ತಾಕಾ ಮಿಶೇಲಾಚೆರ್ ಗೌರವ್ ಉದೆಲ್ಲೊ.
"ತರ್.....!? ಆಪ್ಣಾಚೆಂ ಸಗ್ಳೆಂ ಆಸೊನ್ಯ್ ಆಜ್ ಕಾಂಯ್ಚ್ ನಾಸ್ತಾನಾ ಜೀವನ್ ಸಾರ್ಚಾ ಹ್ಯಾ ಪ್ರಾಯ್ವಂತಾಂಕ್ ತಾಂಚಾಚ್ ಆದ್ಲ್ಯಾ ಚಾಲ್ ಚಮ್ಕಾಣೆಚಿ ಶಿಕ್ಶಾ ಲಾಬ್ಲ್ಯಾ...?" ಮಿಶೇಲಾಕ್ ಆಜ್ ಏಕ್ ಭಯಾನಕ್ ಸತ್ ಝಳ್ಕಾಲ್ಲೆಂ.
"ಯು ಆರ್ ರೈಟ್ ಮಿಶೇಲ್....!"
ತ್ಯಾ ಆಸ್ರ್ಯಾಚಾ ವ್ಹಡಿಲಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ಪಳೆ ಮಿ. ಜೆರೊಮ್..... ತುಜೆಂ ನಾತ್ ಬರೆಂ ಸಮ್ಜಣೆಚೆಂ!"
ಜೆರೊಮಾಕ್ ತಾಚಿಂ ಉತ್ರಾಂ ಆಯ್ಕೊನ್ ಆಪ್ಣಾ ವಯ್ರ್ಚ್ ಆಭಿಮಾನ್ ಭೊಗ್ಲೊ.
".....ಆನಿ ಹಾಂಚಾ ಭುರ್ಗ್ಯಾಂಚೆಂ?" ಸಾಂಗೊನ್ ಥೊಡೆಂ ಚಿಂತುಂಕ್ ಪಡ್ಲೆಲೆಂ ಮಿಶೇಲ್ "ಮೈ ಗಾಡ್! ತಾಂಚೆಂ ಭವಿಶ್ಯ್ ತರ್ ಹಾಚ್ಯಾಕ್ಯ್ ಭಯಾನಕ್....!"
"ಎಸ್ ಮಿಶೇಲ್! ಹ್ಯಾ ಪ್ರಾಯ್ವಂತಾಂಚಾ ಭುರ್ಗ್ಯಾಂಚೆಂ ಭವಿಶ್ಯ್ ನಿಜಾಯ್ಕ್ಯ್ ಭಯಾನಕ್ ಆಸಾ...! ಆಯ್ಚಾ ತಾಂಚಾ ಕ್ರಿಯೆಚಿ ಪ್ರತಿಕ್ರಿಯಾ ಫಾಲ್ಯಾಂ ತಾಂಕಾ ಖಂಯ್ಚರ್ ರಾಕೊನ್ ಆಸಾ ತೆಂ..... ನೊ ಬಡಿ ನೋಜ಼್! ತಿ ಪ್ರತಿಕ್ರಿಯಾ ಕಿತ್ಲ್ಯಾ ಭಯಾನಕ್ ಜಾಯ್ತ್ ತೆಂ ಕೊಣಾಯ್ ವರ್ವಿಂ ಸಾಂಗೊಂಕ್ ಸಾದ್ಯ್ ನಾ!"
ಖಾಟಿಯೆರ್ ನಿದೊನ್ ಸೀಲಿಂಗಾಕ್ ಪಳಂವ್ಚಾ ಮಿಶೇಲಾಕ್ ಎಕಾ ಪಾಟ್ಲ್ಯಾನ್ ಏಕ್ ಸಗ್ಳೆಂ ಉಡಾಸ್ ಆಯ್ಲೆಂ.
"ಆಪುಣ್ ಆಪ್ಲ್ಯಾ ಆವಯ್ ಬಾಪಾಯ್ಚೊ ಮೋಗ್ ಕರ್ತಾಂ ದೆಕುನ್ ತಾಂಕಾ ಹೊಗ್ಡಾಯಿಲ್ಲ್ಯಾ ತ್ಯಾ ಆಕ್ಸಿಡೆಂಟಾಕ್ ಚಿಂತಾನಾ ಭಿಯೆತಾಂ. ಆಜ್ ಹಾಂವ್ ಭಿಯೆತಾಂ ಜಾಲ್ಲ್ಯಾನ್ ಫುಡಾರಾಕ್ಯ್ ಮ್ಹಜ್ಯಾ ಭಂವ್ತಿಂ ಹಾಂವ್ ಭಿರಾಂತೆಚಿ ವೊಣೊದ್ಚ್ ಉಭಾರ್ತಾಂ. ಹಿ ವೊಣೊದ್ ಏಕ್ ದೀಸ್ ಇತ್ಲಿ ಉಭಾರ್ ಜಾತೆಲಿ ಕೀ ಮ್ಹಾಕಾ ಮ್ಹಜ್ಯಾ ಭಂವ್ತಣಿ ಆಕ್ಸಿಡೆಂಟ್ಚ್ ದಿಸೊನ್ ಯೆತೆಲೆಂ. ಆನಿ ಹಾಂವ್......!?"
ಮಿಶೇಲಾಕ್ ಮುಕಾರ್ ಚಿಂತುಂಕ್ ಜಾಲೆಂ ನಾ.
"ಮನ್ಶ್ಯಾಚಾ ಜಿವಿತಾಚಾ ಹರ್ಯೆಕಾ ಸವಾಲಾಕ್ ಜವಾಬ್ ತಾಚ್ಯಾ ಭಂವ್ತಣಿಚ್ ಆಸಾ. ಹೆಂ ಪೃಕೃತೆಚೆಂ ನಿಯಮ್. ಹೆಂ ನಿಯಮ್ ಪಾಳುಂಕ್ ಮಾತ್ರ್ ಮನಿಸ್ ನೆಣಾಂ ಜಾಲಾ. ಕಿತ್ಯಾಕ್ ಮ್ಹಳ್ಯಾರ್, ತಾಣೆಂ ಪೃಕೃತೆಕ್ ಸೊಡುನ್ ದಿಲಾಂ ಆನಿ ತೊ ಸ್ವಾರ್ಥಿ ಜಾಲಾ!"
ಆಪ್ಲ್ಯಾ ಮತಿಚಾ ಜಾಣ್ವಾಯೆನ್ ಉತ್ರಾಂ ಜಾಗಯ್ತಾನಾ ಮಿಶೇಲ್ ಖಾಟಿಯೆರ್ ಥಾವ್ನ್ ಉಟ್ಲೆಂ. ಭೋವ್ಶ್ಯಾ ತಾಚ್ಯಾ ಮತಿಕ್ ಆತಾಂ ಸಮಾಧಾನ್ ಜಾಲ್ಲೆಂ ಜಾಯ್ಜಯ್. ಕೂಡಾಂತ್ ಜಳ್ಚಾ ವೀಜ಼್ ದಿವ್ಯಾಕ್ ಪಾಲ್ವಯಿಲ್ಲ್ಯಾ ತಾಣೆಂ ಖಾಟಿಯೆಕ್ ವೆಂಗ್ತಾಚ್ ದೆಗೆನ್ ಪಡ್ಲೆಲ್ಯಾ ವೊಲಿಕ್ ಆಂಗಾರ್ ವೊಡ್ಲೆಂ.
**************
"ಮಿಶೇಲ್!? .....ಮಿಶೇಲ್ ಪುತಾ!"
ಆಪ್ಲ್ಯಾ ಆಜಿಯೆಚೊ ತಾಳೊ ಕಾನಾಂಕ್ ಆಯ್ಕಾತಾನಾ, ನಿದೆಚಾ ಆಮಾಲಾರ್ ಆಸ್ಲೆಲೆಂ ಮಿಶೇಲ್, ಹೆವ್ಶಿಂ ಲೊಳ್ಲ್ಲೆಂ ತೆಂ ಆಪ್ಲ್ಯಾ ಆಂಗಾ ವಯ್ಲ್ಯಾ ವೋಲಿಕ್ ತೆವ್ಶಿಂ ಲೊಟುನ್ ಖಾಟಿಯೆರ್ ಉಟೊನ್ ಬಸ್ಲೆಂ ಜಾಲ್ಯಾರ್ಯ್ ದೊಳ್ಯಾಂಚಾ ನಿದೆಕ್ ತ್ಯಾ ವೋಲಿ ಸಾಂಗಾತಾ ಬಗ್ಲೆಕ್ ಲೊಟುಂಕ್ ಸಕ್ಲೆಂ ನಾಂ. ದೊಳ್ಯಾಂತ್ಲ್ಯಾ ತಾಚ್ಯಾ ನಿದೆನ್ ತ್ಯಾ ಆಸ್ಡ್ಯಾಂ ಪಂದಾ ಲಿಪ್ಚೆಂ ಪ್ರಯತ್ನ್ ಕರ್ತಾನಾ ಪರ್ತ್ಯಾಕ್ ಮಿಶೇಲ್ ಖಾಟಿಯೆರ್ ಆಡ್ ಪಡ್ಲೆಂ.
"ಮಿಶೇಲ್, ಊಟ್ಗೊ ಪುತಾ.... ವೊರಾಂ ಪಳೆ....!" ಆಜಿಯೆನ್ ಪರ್ತ್ಯಾಕ್ ಜಾಗಯ್ತಾನಾ ನಿರ್ವೊಗ್ ನಾಸ್ತಾಂ ಖಾಟಿಯೆರ್ ಥಾವ್ನ್ ಉಟ್ಲೆಲೆಂ ಮಿಶೇಲ್, ಆಪ್ಣೆಂ ಪಾಂಗ್ರುನ್ ನಿದ್ಲೆಲ್ಯಾ ವೋಲಿಕ್ ಸೊಭಿತ್ ಗಡಿ ಕರುನ್, ಹೆವ್ಶಿಂ ತೆಂವ್ಶಿಂ ಮಿರಿಯೊ ಘೆವ್ನ್ ವೊಂದಾಲ್ಲ್ಯಾ ಬೆಡ್ ಶೀಟಾಕ್ ಸಾರ್ಕೆಂ ಜಾಗ್ಯಾರ್ ವೊಡುನ್ ಬಾತ್ರೂಮಾಕ್ ರಿಗ್ಲೆಂ.
ಕಾಲ್ಚಾ ರಾತಿಂ ಚಿಂತ್ನಾನಿಂ ರೆವೊಡ್ ಘಾಲ್ಲ್ಯಾ ಮಿಶೇಲಾಚಾ ಮತಿಕ್ ಸುಟ್ಕಾ ತಿತ್ಲ್ಯಾ ಸುಲಾಭಾಯೆನ್ ಮೆಳಾನಾಸ್ತಾನಾ ವೆತಾನಾ, ಎಕ್ಸುರ್ಪಣಾಂತ್ ಆದ್ಲ್ಯಾ ಜಿವಿತಾಂತ್ ಉದೆವ್ನ್ ಗೆಲ್ಲ್ಯಾ ಘಡಿತಾನ್, ಸಾಂಡುನ್ ಗೆಲ್ಲ್ಯಾ ತಾಚ್ಯಾ ಪ್ರಭಾವಾಕ್, ಆಪ್ಲ್ಯಾ ಮತಿಚಾ ಸಂತುಲನಾಕ್ ಸರಿ ಸಮಾನ್ ಕರುನ್, ಮತಿಕ್ ವಿಶೆವ್ ದಿಂವ್ಚಾ ಶಾಂತಿಕ್ ತೆಂ ವೆಂಗ್ತಾನಾ, ರಾತಿಚೊ ಸುಮಾರ್ ವೇಳ್ ಪಾಶಾರ್ ಜಾಲ್ಲೊ. ಭೋವ್ಶ್ಯಾ ವೇಳ್ ಕರುನ್ ನಿದ್ಲೆಲ್ಯಾನ್ ಯಾ ಮತಿಚಾ ಜಡಾಯೆಕ್ ಹಳೂ ಕರುನ್ ನಿದ್ಲೆಲ್ಯಾನ್, ಮಿಶೆಲಾಕ್ ಮಾತ್ರ್ ಬರೆಂಚ್ ನಿದೆನ್ ಆಪ್ಲ್ಯಾ ವೆಂಗೆಂತ್ ಘೆತ್ಲ್ಲೆಂ.
ಮಿಶೇಲಾಚಿ ಆಜಿ ಜಾಲ್ಯಾರ್ಯ್ ನಾತಿಕ್ ಗರ್ಜೆ ಶಿವಾಯ್ ವೆಗ್ಗಿಂ ನಿದೆಂತ್ಲೆಂ ಉಟಂವ್ಚೆಂ ಪ್ರಯತ್ನ್ ಕರಿನಾತ್ಲ್ಲಿ. ಸಕಾಳಿಂಚಾ ಕಾಮಾಕ್ ಕುಮಕ್ ಕರುಂಕ್ ಕಾಮಾಚಿ ಬಾಯ್ಲ್ ಆಸ್ತಾಲಿ. ತಶೆಂ ತಿಕಾ ಕಾಂಯ್ ಭಿರಾಂತ್ ನಾತ್ಲ್ಲಿ. ಪುಣ್, ಆಜ್ ಆಪ್ಲ್ಯಾ ನಾತಿನ್ ಸದಾಂ ನಿದೆಂತ್ಲೆಂ ಉಟ್ಚೊ ವೇಳ್ ಪಾಶಾರ್ ಜಾವ್ನ್ ವಚೊನ್, ತಾಣೆಂ ಆಪ್ಲ್ಯಾ ಕಾಲೇಜಿಕ್ ವೆಸೊ ವೇಳ್ ಲಾಗಿಂ ಜಾವ್ನ್ ಯೆತಾನಾ ತಿಣೆಂ ನಾತಿಕ್ ಉಟಂವ್ಚೆಂ ಪ್ರಯತ್ನ್ ಕೆಲೆಂ.
ವೆವೆಗ್ಗಿಂ ಸಾಕಾಳಿಂಚಾ ಆಪ್ಲ್ಯಾ ಗರ್ಜಾಂಕ್ ತಿರ್ಸುನ್ ಬಾತ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಲೆಂ ಮಿಶೇಲ್, ಆಜಿಯೆನ್ ತಯಾರ್ ಕೆಲ್ಲೊ ನಾಸ್ಟೊ ಸಂಪವ್ನ್ ಕಾಲೇಜಿಕ್ ವಚೊಂಕ್ ನ್ಹೆಸೊಂಕ್ ಲಾಗ್ಲೆಂ.
ಕಾಲ್ಚಾ ರಾತಿಚೆಂ ಕಾಂಯ್ಚ್ ಮಿಶೇಲಾಕ್ ಆಜ್ ಉಡಾಸಾಕ್ ಆಯ್ಲೆಂ ನಾ. ತೆಂ ಶಾಂತ್ ಆಸ್ಲ್ಲೆಂ. ಪುಣ್ ತಾಚೊ ಆಜೊ ಶಾಂತ್ ನಾತ್ಲ್ಲೊ.
"ಹ್ಯಾ ಪಾಡಾರ್ಯಾಂಕ್ ಪಾತ್ಯೆಂವ್ಕ್ ಜಾಯ್ನಾ.....!" ಜೆರೊಮ್ ರಾಗಾನ್ ಉಸ್ಮೊಡ್ತಾಲೊ. ತಾಕಾ ಮಿಶೇಲಾನ್ ಕಾಲ್ ಕಾಲೇಜಿಚಾ ಮುಕಾರ್ ಘಡ್ಲೆಲೆಂ ಸಗ್ಳೆಂ ಆಸಾ ತಶೆಂ ಸಾಂಗ್ಲ್ಲೆಂ. ಮಿಶೇಲಾನ್ ಸಾಂಗ್ಲೆಲೆಂ ಆಯ್ಕೊನ್ ಜೆರೊಮ್ ಜಿಮ್ಮಿಚೆರ್ಚ್ ಉಪ್ರಾಟ್ಲೊ. ಹ್ಯಾಚ್ ಖಾತಿರ್ ಆಜ್ ಸಾಕಾಳಿಂ ಉಟ್ಲಲೊ ಜೆರೊಮ್, ಆಪುಣ್ಚ್ ಮಿಶೇಲಾಕ್ ಕಾಲೇಜಿಕ್ ಸೊಡುಂಕ್ ಭಾಯ್ರ್ ಸರ್ಲೊ. ಆಂಗಾರ್ ವಸ್ತುರ್ ನ್ಹೆಸ್ತಾಂ ನ್ಹೆಸ್ತಾಂ ತೊ ವೊಗೊ ರಾವ್ಲೊ ನಾ. "....ತಾಂಚೆಂ ಕಶೆಂಯ್ ಜಾಲೆಂ! ಹಾಕಾ ತರ್ಯ್ ಇಲ್ಲಿ ಪುಣಿಂ ಬೂದ್ ಆಸೊಂಕ್ ಜಾಯ್. ಹಾಕಾ ತಾಂಚೆಲಾಗಿಂ ಝಗ್ಡೊಂಕ್ ವಚೊಂಕ್ ಜಾಯ್ ಮ್ಹಳ್ಳಿ ಗರ್ಜ್ ಕಸಲಿ? ಆಪ್ಣಾಚೆಂ ಕಾಮ್ ಕಿತೆಂ ಆಸಾ ತೆಂ ಪಳವ್ಚೆಂ ಸೊಡುನ್....."
ಭಾಯ್ಲ್ಯಾ ಜಾಲಾಂತ್ ಜೀಪಾಕ್ ವಸ್ತುರ್ ವೊಡುನ್ ಆಸ್ಲೆಲ್ಯಾ ಜಿಮ್ಮಿಕ್ ಉದ್ದೇಶುನ್ ಜೆರೊಮ್ ಉಲಯ್ಲೊ.
"ತುಂ ಏಕ್ ಕಿತ್ಲೊ ಶೆರ್ಮಾಂವ್ ದಿತಾಯ್ ತ್ಯಾ ಚೆಡ್ಯಾಕ್....? ಕಾಲ್ ದಿಲ್ಲೊ ಪಾವಾನಾತ್ಲೆಲ್ಯಾಕ್.......!" ಜೆರೊಮಾಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಎಸ್ತೆಲ್ ಆಪ್ಲ್ಯಾ ಘೊವಾ ವಯ್ರ್ ರಾಗಾರ್ ಜಾಲಿ.
"ಆನಿ ಕಿತೆಂ ತರ್.....? ಹ್ಯಾ ಹಾಕಾ ನಾಕಾ ಜಾಲ್ಲಿಂ ಕಾಮಾ ನ್ಹಯ್.....?"
ಜಿಪಾಚ್ಯಾ ವಿಂಡ್ ಸ್ಕ್ರೀನಾಕ್ ಬಾನೆಟಾಚಾ ವಸ್ತುರಾನ್ ಸಾಫ್ ಕರ್ಚಾ ಜಿಮ್ಮಿಕ್ ಆಪ್ಲ್ಯಾ ಧನಿಯಾಚಿಂ ರಾಗಾಚಿಂ ಉತ್ರಾಂ ಆಯ್ಕಾತಾಲಿಂ ಜಾಲ್ಯಾರ್ಯ್ ತೊ ಕಾಂಯ್ ಉಲಯ್ಲೊ ನಾ. ಎಕಾ ವಾಟೆನ್ ತಾಚ್ಯಾ ಧನಿಯಾನ್ ಸಾಂಗ್ಚೆಂಯ್ ಸಾರ್ಕೆಂಚ್. ಕಾಲ್ ಆಪ್ಣೆಂ ಮಿಶೆಲಾನ್ ಭಿಯೆಂವ್ಕ್ ಕಾರಾಣ್ ಜಾಲ್ಲ್ಯಾ ತ್ಯಾ ತರ್ನಾಟ್ಯಾಕ್ ಮಾರ್ಲೆಲೆಂ ಪರಿಣಾಮ್ ಕಿತೆಂ ಜಾಯ್ತ್ ಮ್ಹಳ್ಳಿ ಖಂತ್ ತಾಕಾಯ್ ರಾತಿಕ್ ಥಾವ್ನ್ ದೊಸ್ತಾಲಿ. ಆಶೆಂ ಮ್ಹಣೊನ್ ಜಿಮ್ಮಿ ಕೆದ್ನಾಂಚ್ ಜಿವಾಕ್ ಭಿಯೆಲ್ಲೊ ಚೆಡೊ ನ್ಹಯ್. ಆಪ್ಣೆಂ ಭಿಯೆವ್ನ್ ತರ್ಯ್ ಜಿಯೆಂವ್ಕ್ ಜಾಯ್ ಮ್ಹಳ್ಳ್ಯಾ ಕಾಯ್ದ್ಯಾಕ್ ಮಾಂದುನ್ ಚಲ್ಚೊ ನ್ಹಯ್. ತಶೆಂ ಜಾಲ್ಲ್ಯಾನ್ ತಾಣೆಂ ರಾತಿಂ ನಿದೊಂಕ್ ವೆಚಾ ಪಯ್ಲೆಂಚ್ ಆಯ್ಚಿ ಆಪ್ಣಾಚಿ ಭದ್ರತಿ ಕರುನ್ ಜಾಲ್ಲಿ. ತ್ಯಾಚ್ಚ್ ಭದ್ರತೆಕ್, ಆತ್ತಾಂ ಥೊಡ್ಯಾ ವೆಳಾ ಪಯ್ಲೆಂ, ಆಪುಣ್ ಪಾಂಯಾಂಕ್ ಮೊಚೆ ಶಿರ್ಕಾಂವ್ಚಾ ವಗ್ತಾರ್, ತ್ಯಾ ಪಾಂಯಾಂಚಾ ಸಾಕ್ಸಾಚಾ ಭಿತರ್ ತ್ಯಾ ಭದ್ರತೆಕ್ ತಾಣೆಂ ಚೆಪ್ಲೆಲಿ.
"ಹಾವೆಂ ಸಾಂಗ್ಚೆಂ ಜಾಲ್ಯಾರ್ ತುಂ ಘರಾಚ್ ರಾವ್ರೇ ಜಿಮ್ಮಿ......, ಹಾಂವ್ ಚೆಡ್ವಾಕ್ ಪಾವೊನ್ ಯೆತಾಂ!" ಜೆರೊಮ್ ಸೊಪ್ಯಾಚಿಂ ಮೆಟಾಂ ದೆಂವ್ಲೊ.
ಆಪ್ಲ್ಯಾ ಹಾತಾಂತ್ಲ್ಯಾ ಬಾನೆಟಾಚಾ ವಸ್ತುರಾಕ್ ಜೊರಾನ್ ಪಾಪ್ಡಿಲ್ಲೊ ಜಿಮ್ಮಿ, ಆಪ್ಣೆಂ ಪಯ್ಲಿಂ ಉಭಿಂ ಕರುನ್ ದವರ್ಲೆಲಿಂ ವೈಪರಾಂ ಆರ್ಶ್ಯಾರ್ ನಿದಾವ್ನ್ಜಿಪಾಚಾ ಡ್ರೈವಿಂಗ್ ಸಿಟಾರ್ ಬಸ್ಲೊ. ಜೆರೊಮಾನ್ ತಾಕಾ ಸಾಂಗ್ಲೆಲೆಂ ಆಯ್ಕಾಲ್ಲೆಂ ಜಾಲ್ಯಾರ್ಯ್ ಜೆರೊಮಾಚಾ ಉತ್ರಾಂಕ್ ತಾಣೆಂ ಕಾಂಯ್ಚ್ ಪ್ರತಿಕ್ರಿಯಾ ದಾಖಯ್ಲಿ ನಾ.
"ತುಂ ರಾವ್ರೇ ಜಿಮ್ಮಿ..... ಹಾಂವ್ ವೆಗ್ಗಿಂ ವಚೊನ್ ಯೆತಾಂ! ಮ್ಹಾಕಾ ಆಜ್ ಕಾಲ್ಚಾ ಹ್ಯಾ ಪಾಡಾರ್ಯಾಂಚೆಂ ಧಯ್ರ್ ಮೆಳಾನಾ...!" ಡ್ರೈವಿಂಗ್ ಸಿಟಾಚಾ ಕುಶಿಕ್ ಆಯಿಲ್ಲ್ಯಾ ಜೆರೊಮಾನ್ ತ್ಯಾ ಕುಶಿಚೆಂ ದಾರ್ ಉಗ್ತೆಂ ಕೆಲೆಂ.
"ತುಮಿಂ ಇತ್ಲೆಂ ಭಿಯೆತಾತ್ ಕಿತ್ಯಾಕ್?" ಜಿಮ್ಮಿಕ್ ಆತಾಂ ಉಲಯ್ನಾಸ್ತಾನಾ ದುಸ್ರೊ ಉಪಾಯ್ ನಾತ್ಲ್ಲೊ. ".....ಕಾಂಯ್ ಜಾಯ್ನಾಂ! ತಶೆಂಯ್ ಕಾಂಯ್ ಜಾಲ್ಯಾರ್ಯ್ ಮ್ಹಾಕಾ, ಮ್ಹಜ್ಯಾ ಪಾಟ್ಲ್ಯಾನ್ ರಡ್ಚಿಂ ಆಸಾತ್ ಮ್ಹಳ್ಳಿ ಖಂತ್ ನಾ. ಹ್ಯಾ ಮವಾಲ್ಯಾಂಕ್ ಭಿಯೆವ್ನ್ ಹಾವೆಂ ಹಾಂಗಾ ಘರಾ ಬಸೊಂಕ್ ಜಾಯ್.....?"
ಜಿಮ್ಮಿನ್ ಸಾಂಗ್ತಾನಾ ಮಿಶೇಲ್ ಆಪ್ಲೆಂ ಕಾಲೇಜಿಚೆಂ ಬ್ಯಾಗ್ ಖಾಂದ್ಯಾಕ್ ಶಿರ್ಕಾವ್ನ್ ಭಾಯ್ರ್ ಆಯಿಲ್ಲೆಂ ತೆಂ ಯೇವ್ನ್ ಜಿಪಾರ್ ಬಸ್ಲೆಂ.
"ಕಾಂಯ್ ಜಾಯ್ನಾಂ... ತುಮಿ ಭಿಯೆನಾಕಾತ್. ಹಾಂವ್ ತಾಂಕಾಂ ಕಾಲೇಜಿಕ್ ಪಾವೊನ್ ಯೆತಾಂ. ತುಮಿಂ ರಾವ್ತಾತ್ ಜಾಲ್ಯಾರ್ ರಾವಾ. ಯೆತಾತ್ ಜಾಲ್ಯಾರ್ ತುಮ್ಚಿ ಖುಶಿ.....!"
ಜಿಮ್ಮಿನ್ ಸಾಂಗ್ಲೆಲೆಂ ಆಯ್ಕೊನ್ ಜಿಪಾಚಾ ಹ್ಯಾ ಕುಶಿಕ್ ಆಯಿಲ್ಲೊ ಜೆರೊಮ್, ಜಿಪಾಚೆಂ, ಮುಕ್ಲ್ಯಾ ಕುಶಿಚೆಂ ದುಸ್ರೆಂ ದಾರ್ ಉಗ್ತೆಂ ಕರುನ್, ಜಿಮ್ಮಿಚಾ ಬಗ್ಲೆನ್ ಬಸ್ಲೊ. ಜಿಮ್ಮಿನ್ ಆತಾಂ ಜೀಪ್ ಚಾಲು ಕೆಲೆಂ.
ಆಪ್ಲ್ಯಾ ಘರ್ಚಾ ಕಂಪೌಂಡಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಜಿಮ್ಮಿನ್ ದೋನ್ ಘರಾಂಕ್ ಉತ್ರೊನ್ ತಿಸ್ರ್ಯಾ ಘರಾಚಾ ಗೇಟಿ ಮುಕಾರ್ ಜಿಪಾಕ್ ಥಾಂಬಯ್ಲೆಂ.
ಶೀತಲಾಚೆಂ ಘರ್ ತೆಂ!
ಘರ್ಚಾ ಆಂಗ್ಣಾಂತ್ ಶೀತಲ್ ದಿಸೊನ್ ಆಯಿಲ್ನಾ ಜಾಲ್ಲ್ಯಾನ್ ಜಿಮ್ಮಿನ್ ಜಿಪಾಚೆಂ ಹಾರನ್ ಮಾರ್ಲೆಂ.
ಘರಾ ಭಿತರ್ ಥಾವ್ನ್ ಶೀತಲಾನ್ ಯೆಂವ್ಚೆಂ ದಿಸ್ಲೆಂ ನಾ. ಮಿಶೆಲಾಚಿ ದೀಷ್ಟ್ ಶೀತಲಾಚಾ ಘರ್ಚಾ ಮುಕ್ಲ್ಯಾ ದಾರಾಕ್ಚ್ ಪಳೆತಾಲಿ.
ತಿತ್ಲ್ಯಾರ್!
ಜಿಪಾಚೆಂ ಹಾರನ್ ಆಯ್ಕೊನ್ ಶೀತಲಾಚಿ ಆವಯ್ ಭಾಯ್ರ್ ಆಯ್ಲಿ. ಭಾಯ್ಲ್ಯಾ ಗೇಟಿಲಾಗಿಂ ಜೆರೊಮಾಚಾ ಜಿಪಾಕ್ ಪಳವ್ನ್ ತಿ ಗೇಟಿಲಾಗಿಂ ಆಯಿಲ್ಲಿ,
"ಶೀತಲ್ ಆಜ್ ವೆಗ್ಗಿಂ ಗೆಲಾಂ! ತುಕಾ ಫೋನ್ ಕರುಂಕ್ ನಾ ತಾಣೆಂ......?" ತಿಣೆಂ ಮಿಶೇಲಾಕ್ಚ್ ಪಳೆಲೆಂ.
"ನಾ!" ಮಿಶೇಲಾಕ್ ಆಶ್ಚರ್ಯ್ ಜಾಲೆಂ.
"ಶೀತಲ್ ವಚೊನ್ ಪಂದ್ರಾ ಮಿನುಟಾಂ ಜಾಲಿಂ! ತೆಂ ಎದೊಳ್ ಕಾಲೇಜಿಕ್ ಪಾವ್ಲಾಂ ಆಸ್ತೆಲೆಂ!"
ಶೀತಲಾಚಾ ಆವಯ್ಚಾ ಉತ್ರಾಂಕ್ ಕಿತೆಂ ಜವಾಬ್ ದಿಂವ್ಚಿಂ ತಿ ಕೊಣಾಯ್ಕ್ಯ್ ಕಾಂಯ್ ಸಮ್ಜಾಲೆಂ ನಾ.
"ಬರೆಂ ತರ್....!"
ಜಿಮ್ಮಿನ್ ಜೀಪ್ ಮುಕಾರ್ ಧಾಂವ್ಡಾಯ್ಲೆಂ.
"ಅಚಾನಕ್ ಆಜ್ ಶೀತಲ್ ಕಾಲೇಜಿಕ್ ಚಲೊನ್ ಕಶೆಂ ಗೆಲೆಂ?" ಮಿಶೇಲಾಚಾ ಮತಿಂತ್ ಅವ್ಚಿತ್ತ್ ಚಿಂತಾಪ್ ಉದೆಲೆಂ. "ತಶೆಂ ಕಸಲೊಯ್ ವಿಶಯ್ ಆಸ್ಲ್ಯಾರ್ ತೆಂ ಖುದ್ದ್ ಜಾವ್ನ್ ಆಪ್ಣಾ ಲಾಗಿಂ ಸಾಂಗ್ತಾ. ಪುಣ್....." ಮಿಶೇಲಾಕ್ ಕಾಂಯ್ ಸಮ್ಜಾಲೆಂ ನಾ.
"ಕಾಂಯ್ ಪುಣಿಂ ಕಾಲ್ಚಾ ರಾಗಾನ್.....!?" ಮಿಶೇಲಾಚಾ ಮತಿಂತ್ ಸವಾಲ್ ಉದೆಲೆಂ.
ಜೀಪ್ ಡ್ರೈವ್ ಕರ್ಚಾ ಜಿಮ್ಮಿಕ್ ಮಾತ್ರ್ ಹೆಂ ಖಚಿತ್ ಜಾಲ್ಲೆಂ ಕೀ ಶೀತಲ್ ಆಪ್ಣಾ ವಯ್ಲ್ಯಾ ರಾಗಾನ್ ಆಜ್ ಕಾಲೇಜಿಕ್ ಚಲೊನ್ ಗೆಲಾಂ. ಕಾಲೇಜಿಕ್ ಚಲೊನ್ ವೆಚೆಂ ಕಾಂಯ್ ವ್ಹಡ್ಲೆಂ ನ್ಹಯ್. ಕಾಲೇಜ್ ಲಾಗ್ಸಾರ್ಚ್ ಆಸಾ. ಆಸ್ಪಾಸ್ಚಿಂ ಸಗ್ಳಿಂ ಚೆಡ್ವಾಂಚಲೊನ್ಚ್ ಕಾಲೇಜಿಕ್ ವೆತಾತ್. ಆಸ್ಪಾಸ್ಚಾ ಚೆಡ್ವಾಂಕ್ ಆನಿ ಶೀತಲಾಕ್ ಸರಿ ಕರುಂಕ್ ಸಾದ್ಯ್ ನಾತ್ಲ್ಲೆಂ. ಶೀತಲ್ ಮಿಶೇಲಾಚೆಂ ಕಾಳ್ಜಾ ಲಾಗ್ಶಿಲೆಂ ಇಷ್ಟಿಣ್! ಛೆ.....! ಆಪ್ಣೆ ಕಾಲ್ ತಶೆಂ ಶೀತಲಾಕ್ ಉಲಂವ್ಕ್ ನುಜೊ ಆಸ್ಲ್ಲೆಂ......!
ಜಿಮ್ಮಿಚಾ ಮತಿನ್ ಚುರ್ಚುರ್ತಾನಾತಾಣೆಂ ಡ್ರೈವ್ ಕರ್ಚೆಂ ಜೀಪ್ ಮಿಶೇಲಾನ್ ವೆಚಾ ಕಾಲೇಜಿಚಾ ಮುಕಾರ್ ಯೇವ್ನ್ ಪಾವ್ಲೆಂ.
"ಬಾಯ್ ಆಬಾ....!" ಮಿಶೇಲಾನ್ ಜಿಪಾಚೆಂ ದಾರ್ ಉಗ್ತೆಂ ಕರುಂಕ್ ಹಾತ್ ಘಾಲಾ ಮಾತ್ರ್.......!
ತಿತ್ಲ್ಯಾರ್!
ಎಕಾಚ್ಚ್ಫರಾ ಜಿಪಾಚಾ ತ್ಯಾ ಕುಶಿಂನ್ ಥಾವ್ನ್ ತೇಗ್ ಯುವಕ್ ಆನಿ ಜಿಪಾಚಾ ಹ್ಯಾ ಕುಶಿಂನ್ ಥಾವ್ನ್ ದೋಗ್ ಯುವಕ್ ಆಯಿಲ್ಲೆ ತೆ ಜಿಪಾಚಾ ಮುಕಾರ್ ಯೇವ್ನ್ ರಾವ್ಲೆ.
ಜಿಪಾಚೆಂ ದಾರ್ ಉಗ್ತೆಂ ಕರುಂಕ್ ಗೆಲ್ಲ್ಯಾ ಮಿಶೇಲಾಕ್ ಆಚಾನಕ್ ತ್ಯಾ ತರ್ನಾಟ್ಯಾಂಕ್ ಪಳವ್ನ್ಜಿಪಾಚೆಂ ದಾರ್ ಉಗ್ತೆಂ ಕರ್ಚೆಂ ಧಯ್ರ್ ಆಯ್ಲೆಂ ನಾ.
"ದೇಂವ್...... ಸಕಯ್ಲ್ ದೇಂವ್!" ಜಿಮ್ಮಿಕ್ ಬೋಟ್ ಜೊಕುನ್ ಎಕ್ಲ್ಯಾ ಯುವಕಾನ್ ಕರ್ಕಶ್ಯಾ ತಾಳ್ಯಾನ್ ಸಾಂಗ್ತಾನಾ ತಾಂಕಾಂಚ್ ಪಳೆಲ್ಲ್ಯಾ ಜಿಮ್ಮಿನ್ ಆಪ್ಲ್ಯಾ ದೊನ್ಯ್ ಹಾತಾನಿಂ ಜಿಪಾಚಾ ಸ್ಟೇರಿಂಗಾಕ್ ಘಟ್ ಧರ್ಲೆಂ.
"ಮಿಶೇಲ್ ತುಂ ಕಾಲೇಜಿಕ್ ವಚ್....!" ಜಿಮ್ಮಿನ್ ಸಾಂಗ್ಲೆಂ.
"ರಾವ್ ಮಿಶೇಲ್..... ತುಂ ಸಕಯ್ಲ್ ದೆಂವಾನಾಕಾ! ಹ್ಯಾ ಪಾಡಾರ್ಯಾಂಕ್ ಹಾಂವ್ ಪಳೆತಾಂ....!"
ಜಿಪಾಚೆಂ ದಾರ್ ಉಗ್ತೆಂ ಕರುನ್ ಭಾಯ್ರ್ ಆಯಿಲ್ಲೊ ಜೆರೊಮ್, ಮುಕಾರ್ ತ್ಯಾ ತರ್ನಾಟ್ಯಾ ಸಾಮ್ಕಾರ್ ವೆತಾನಾ, ಬಸ್ಲೆಲ್ಯಾ ಕಡೆನ್ ಥಾವ್ನ್ಚ್ ಜಿಮ್ಮಿನ್ ಏಕ್ ಪಾವ್ಟಿಂ ಭಂವ್ತಣಿಂ ಆಪ್ಲಿ ನದರ್ ಘುಂವ್ಡಾಯ್ಲಿ. ತಾಕಾ ತೊ ಕಾಲ್ಚೊ ಆಪ್ಣೆ ಮಾರ್ಲಲೊ ತರ್ನಾಟೊ ಹಾಂಚಾ ಮಧೆಗಾತ್ ದಿಸ್ಲೊ ನಾ. ಪುಣ್, ತ್ಯಾಚ್ಚ್ ಕಾಲ್ಚಾ, ಮಿಶೇಲ್ ಆನಿ ಶೀತಲ್ ರಾವೊನ್ ಆಸ್ಲೆಲ್ಯಾ ಜಾಗ್ಯಾರ್ ಶೀತಲ್ ಆನಿಂ ದುಸ್ರೆಂ ಎಕ್ಲೆಂ ಚೆಡುಂ ರಾವೊನ್ ಉಲಯ್ತಾತ್ ತೆಂ ದಿಸ್ಲೆಂ.
"ಕಿತೆಂ ಜಾಲಾಂ? ಕೋಣ್ ತುಮಿಂ.....? ತುಮಿಂ ಜಾಣಾಂತ್......?"
"ತಾಕಾ ಜಿಪಾ ಥಾವ್ನ್ ಸಕಯ್ಲ್ ದೆಂವಯ್! ಚಲ್....!" ಜೆರೊಮಾಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಎಕ್ಲ್ಯಾನ್ ಸಾಂಗ್ಲೆಂ.
"ಏ ಹಿರೋ.... ಸಕಯ್ಲ್ ದೇಂವ್!" ದುಸ್ರ್ಯಾನ್ ಜಿಮ್ಮಿಕ್ ಚಿರ್ಪುಟ್ ಮಾರುನ್ ದಾಖಯ್ಲೆಂ.
ಕಾಲೇಜಿಚಾ ಮುಕಾರ್ ಕಿತೆಂ ತರ್ಯ್ ಜಾತಾ ಮ್ಹಣೊನ್ ಜಾಣಾಂ ಜಾಲ್ಲಿಂ ಕಾಲೇಜಿಚಿಂ ಚೆಡ್ವಾಂ ವೆವೆಗ್ಗಿಂ ಕಾಲೇಜಿಚಾ ಕಂಪೌಂಡಾ ಭಿತರ್ ಘುಸೊಂಕ್ ಲಾಗ್ಲಿಂ ತರ್, ಥೊಡಿಂ ಹೆವ್ಶಿಂ ತೆವ್ಶಿಂ ಪಾಸಾಯೊ ಮಾರ್ಚಿಂ ತಶೆಂಚ್ ಉಭಿಂ ರಾವೊನ್ ಪಳಂವ್ಕ್ ಲಾಗ್ಲಿಂ.
"ಪಳೆಯಾ... ಹಾಂಗಾ ಕಾಲೇಜಿ ಮುಕಾರ್ ಗಲಾಟೊ ಕರುನ್......"
ಜೆರೊಮಾಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಎಕ್ಲ್ಯಾನ್ ಜೆರೊಮಾಕ್ ಧರುನ್ ಪಾಟಿಂ ಲೊಟ್ಲೊ. ತರ್ನ್ಯಾ ಭಳಾ ಮುಕಾರ್ ಪಾಟಿಂ ಮಾಲ್ವಾಲ್ಲೊ ಜೆರೊಮ್ ಜಿಪಾಚೊ ಆಧಾರ್ ಘೆವ್ನ್ ಆಪ್ಣಾಕ್ಚ್ ಸಾಂಬಾಳುನ್ ರಾವ್ಲೊ.
ಹೆಂ ಪಳೆಲ್ಲೆಂ ಮಿಶೇಲ್,
"ಅಬಾ.....!"
ಜಿಪಾ ಭಿತರ್ಚ್ ತಾಚ್ಯಾ ತಾಳ್ಯಾ ಥಾವ್ನ್ ಬೋಬ್ ಉಟ್ಲಿ. ಆಪ್ಲ್ಯಾ ದಾರಾಕ್ ಉಗ್ತೆಂ ಕರುನ್ ತೆಂ ಸಕಯ್ಲ್ ದೆಂವ್ಲೆಂ.
ತಿತ್ಲೆಂಚ್!
ಏಕ್ ಭಳಾಧೀಕ್ ಶ್ವಾಸ್ ವೊಡ್ಲಲೊ ಜಿಮ್ಮಿ ತಡವ್ ಕರಿನಾಸ್ತಾನಾ ಆಪ್ಲೆಂ ದಾರ್ ಉಗ್ತೆಂ ಕರುನ್ ಭಾಯ್ರ್ ಉಡ್ಲೊ. ತಾಚ್ಯೆ ಸವೆಂ ಜಿಮ್ಮಿಚಾ ಹ್ಯಾಚ್ ವರ್ತನಾಕ್ ರಾಕೊನ್ ರಾವ್ಲೆಲೊ ಎಕ್ಲೊ ಯುವಕ್, ಜಿಪಾಚಾ ಪಾಟ್ಲ್ಯಾನ್ ಥಾವ್ನ್ ದಾಂವೊನ್ ಅಯಿಲ್ಲೊ ತೊ, ಭಳಾನ್ ಜಿಮ್ಮಿಕ್ ಮುಕಾರ್ ಲೊಟ್ತಾನಾ, ಹ್ಯಾ ವಿಶಿಂ ಕಾಂಯ್ಚ್ ಕಳಿತ್ ನಾತ್ಲಲೊ ಜಿಮ್ಮಿ ವೊಮ್ತೊಚ್ ಧರ್ಣಿಕ್ ಶೆವ್ಟಾಲೊ. ತಾಕಾ ಆಪ್ಣಾ ಪಾಟ್ಲ್ಯಾನ್ ಕಿತೆಂ ಜಾಲೆಂ ತೆಂ ಕಳೊಂಕ್ಚ್ ನಾ. ತಿತ್ಲ್ಯಾರ್, ಉರ್ಲೆಲ್ಯಾ ತರ್ನಾಟ್ಯಾನಿಂ ಜಿಮ್ಮಿಕ್ ಪಡ್ಲೆಲ್ಯಾ ಕಡೆಚ್ಚ್ ದಾಂಬುನ್ ಧರುನ್ ತಾಚ್ಯೆ ವಯ್ರ್ ತಾಂಚೆ ಹಾತ್ ಪಾಂಯ್ ಚಲಯ್ತಾನಾ, ರಸ್ತ್ಯಾಚಾ ತ್ಯಾ ಕುಶಿಂನ್ ಉಭೆಂ ಆಸ್ಲೆಲೆಂ ಶೀತಲ್ ಹ್ಯಾ ಕುಶಿಂನ್ ಧಾಂವೊನ್ ಆಯ್ಲೆಂ. ರಸ್ತ್ಯಾರ್ ವೆಚಿಂ ವಾಹನಾಂ ರಸ್ತ್ಯಾರ್ ಜಾಂವ್ಚೊ ಗಲಾಟೊ ಪಳವ್ನ್ ಎಕಾ ಪಾಟ್ಲ್ಯಾನ್ ಏಕ್ ಥಾಂಬ್ಲಿಂ. ಪುಣ್ ಕೊಣೆಚ್ ಮುಕಾರ್ ವೆಚೆಂ ಧಯ್ರ್ ಕೆಲೆಂ ನಾ. ಸ ಜಣ್ ತರ್ನಾಟೆ ಮೆಳೊನ್ ಜಿಮ್ಮಿಚಾ ಆಂಗಾರ್ ಪಡ್ಲ್ಲೆ.
"ಕಿತೆಂ ಜಾಲೆಂ ಮಿಶೇಲ್?"
ಶೀತಲ್ ಹೆವ್ಶಿಂ ಆಯಿಲ್ಲೆಂ ತೆಂ ಭಿಯಾಂನ್ ಕಾಂಪ್ಚಾ ಮಿಶೇಲಾಕ್ ಪಳವ್ನ್ ತಾಚ್ಯಾ ಮತಿಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ವೆತಾನಾ ತಾಣೆಂ ಮುಕಾರ್ ಪಳೆಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ಸ ಜಣ್ ತರ್ನಾಟೆ ಎಕ್ಲ್ಯಾ ಜಿಮ್ಮಿ ವಯ್ರ್ ಬರೆಚ್ಚ್ ಹಾತ್ ಚಲಯ್ತಾಲೆ.
"ಅಂಕಲ್... ತಾಂಕಾ ರಾವಯಾ ಅಂಕಲ್....!" ಜೆರೊಮಾಕ್ ಪಳವ್ನ್ ಶೀತಲಾನ್ ಬೋಬ್ ಮಾರ್ಲಿ.
ಜೆರೊಮ್ ತರ್ಯ್ ಕಿತೆಂ ಕರ್ತಲೊ. ತಾಕಾ ಕಾಂಯ್ಚ್ ಸಮ್ಜಾನಾತ್ಲ್ಲೆಂ.
ಪಡ್ಲೆಲ್ಯಾ ಕಡೆನ್ ಥಾವ್ನ್ ಜಿಮ್ಮಿನ್ ಉಟೊಂಕ್ ಪ್ರಯತ್ನ್ ಕೆಲೆಂ ತರ್ಯ್ ತಾಕಾ ಸಾದ್ಯ್ ಜಾಂವ್ಕ್ ನಾ. ಆಪ್ಲ್ಯಾ ಹಾತಾನಿಂ ತಾಣೆಂ ಆಪ್ಲ್ಯಾ ತೊಂಡಾಕ್ ದಾಂಪುನ್ ದರುಂಕ್ ಪ್ರಯತ್ನ್ ಕೆಲೆಂ ಜಾಲ್ಯಾರ್ಯ್ ತಾಕಾ ಸಾದ್ಯ್ ಜಾಲೆಂ ನಾ. ಎಕ್ಲ್ಯಾಚಾ ಪಾಂಯಾಚೊ ಮೊಚೊ ನಿಟ್ಟ್ ಯೇವ್ನ್ ತಾಚ್ಯಾ ಪೊಟಾಕ್ ಉಮೊ ದಿತಾನಾ ಆಪ್ಲೊ ಉಸ್ವಾಸ್ ರಾವ್ಲೆಲ್ಯಾ ಪರಿಂ ತಾಕಾ ಜಾಲೆಂ.
ತಿತ್ಲೆಂಚ್!
ತಾಕಾ ಕಳಿತ್ ನಾತ್ಲೆಲ್ಯಾ ಪರಿಂಚ್ ತಾಚೊ ಹಾತ್ ತಾಚ್ಯಾ ಪೊಟಾ ತೆಂವ್ಶಿ ಗೆಲೊ. ತಿತ್ಲ್ಯಾರ್ ಎಕ್ಲ್ಯಾಚಿ ಖೊಟ್ ಯೇವ್ನ್ ವಿಣ್ಗೊ ಜಾಲ್ಲ್ಯಾ ತಾಚ್ಯಾ ತೊಂಡಾಕ್ ವೆಂಗ್ತಾನಾ ತಾಚ್ಯಾ ತೊಂಡಾ ಥಾವ್ನ್ ರಾಗಾತ್ ಉಸಾಳ್ಳೆಂ.
ಜಿಮ್ಮಿಕ್ ಮಾರುನ್ ಆಸ್ಲೆಲ್ಯಾ ತರ್ನಾಟ್ಯಾಂ ಪಯ್ಕಿ ಎಕ್ಲ್ಯಾಕ್ ಜೆರೊಮಾನ್ ಆಪ್ಲ್ಯಾ ಹಾತಾನಿ ಧರುನ್ ವೊಡ್ತಾನಾ ತಾಣೆಂ ಪಾಟಿಂ ಘುಂವೊನ್ ಜೆರೊಮಾಕ್ ಪಾಟಿಂ ಲೊಟ್ಲೆಂ. ತಾಣೆಂ ಲೊಟ್ಲೆಲ್ಯಾ ಫೊರ್ಸಾಕ್ ಜೆರೊಮ್ ’ದಡ್ಡ್’ ಕರುನ್ ಪಾಟಿಂ ಪರ್ತಾಲೊ.
ಮಿಶೇಲ್ ಆತಾಂ ರಡೊಂಕ್ ಲಾಗ್ಲೆಂ. ಸಕಯ್ಲ್ ಪಡ್ಲೆಲ್ಯಾ ಆಪ್ಲ್ಯಾ ಆಜ್ಯಾಕ್ ತೆಂ ಆಧಾರ್ ದೀಂವ್ಕ್ ಲಾಗ್ತಾನಾ,
ವೆವೆಗ್ಗಿಂ ಆಪ್ಲ್ಯಾ ಬ್ಯಾಗಾ ಥಾವ್ನ್ ಆಪ್ಲೆಂ ಸೆಲ್ಫೋನ್ ಭಾಯ್ರ್ ಕಾಡ್ಲೆಲ್ಯಾ ಶೀತಲಾನ್ ಆಪ್ಲ್ಯಾ ಬಾಪಾಯ್ಚೆಂ ನಂಬರ್ ಡಯಲ್ ಕೆಲೆಂ.
"ಡ್ಯಾಡಿ.... ಹಾಂಗಾ ಕಾಲೇಜಿ ಮುಕಾರ್ ಜಿಮ್ಮಿಕ್ ಕೋಣ್ಗೀ ಮಾರ್ತಾತ್ ಡ್ಯಾಡಿ. ಹಾಂಗಾ ಯೇ ಡ್ಯಾಡಿ ಪ್ಲೀಸ್.....!" ತಾಚ್ಯಾ ತಾಳ್ಯಾಂತ್ ಭಿರಾಂತ್ ಉಟೊನ್ ರಾವ್ಲ್ಲಿ.
"ಸೊಡ್ಯಾ...... ಸೊಡ್ಯಾ ತಾಕಾ!" ರಸ್ತ್ಯಾರ್ ಉಭೆಂ ಜಾಲ್ಲ್ಯಾ ಬಸ್ಸಾಚಾ ಎಕಾ ಕಂಡಕ್ಟರಾನ್ ತ್ಯಾ ತರ್ನಾಟ್ಯಾಂಕ್ ಆಡಾಂವ್ಚೆಂ ಪ್ರಯತ್ನ್ ಕೆಲೆಂ ತರ್ಯ್ ತಾಕಾ ಲೊಟುನ್ ತೆವ್ಶಿಂ ಘಾಲೊ.
ಆತಾಂ ಉಟೊನ್ ಉಭೊ ಜಾಲ್ಲ್ಯಾ ಜೆರೊಮಾಕ್ ಆಪ್ಲ್ಯಾ ಜಿಪಾ ವಯ್ಲೊ ಲೊಂಕ್ಡಾಚೊ ರೋಡ್ ಉಡಾಸಾಕ್ ಯೇವ್ನ್, ಜಿಪಾಚಾ ಪಾಟ್ಲ್ಯಾ ಕುಶಿಕ್ ಆಯಿಲ್ಲ್ಯಾ ತಾಣೆಂ ಜಿಪಾಚೆಂ ಪಾಟ್ಲೆಂ ದಾರ್ ಉಗ್ತೆಂ ಕರುನ್ ತೊ ಲೊಂಕ್ಡಾಚೊ ರೋಡ್ ಹಾತಿಂ ಘೆತ್ಲೊ.
ತ್ಯಾ ತರ್ನಾಟ್ಯಾಂ ಮುಕಾರ್ ಆಪ್ಣಾಕ್ ಆನಿ ಉಟೊನ್ ಉಭೊ ಜಾಂವ್ಕ್ ಸಾದ್ಯ್ ನಾ. ಆಪುಣ್ ಆಸೊಚ್ ಆಪ್ಣಾಕ್ ಬಚಾವ್ ಕರುಂಕ್ ಲಾಗ್ಲೊಂ ಜಾಲ್ಯಾರ್ ಆಪ್ಣೆ ಜಿವಂತ್ ಉರೊಂಕ್ ಸಾದ್ಯ್ ನಾ ಮ್ಹಣೊನ್ ಕಳಿತ್ ಜಾಲ್ಲೊ ಜಿಮ್ಮಿ, ಆಪ್ಲೆಂ ನಿಮಾಣೆಂ ಪ್ರಯತ್ನ್ ಮ್ಹಳ್ಳ್ಯಾ ಪರಿಂ ಉಜ್ವ್ಯಾ ಹಾತಾಕ್ ಆಪ್ಲ್ಯಾ ಉಜ್ವ್ಯಾ ಪಾಂಯಾಚಾ ಸಾಕ್ಸಾ ಭಿತರ್ ಸಾಸ್ಪುಂಕ್ ಲಾಗ್ಲೊ.
ತಿತ್ಲೆಂಚ್!
ಏಕ್ ಪಾಂವ್ಟಿಚ್ಯಾಕ್ ತಾಕಾ ಹಜಾರ್ ಹಸ್ತಿಂಚೆಂ ತ್ರಾಣ್ ಆಯಿಲ್ಲ್ಯಾ ಪರಿಂ ಜಾಲೆಂ.
ಎದೊಳ್ ಪಾಸೊನ್ ತಾಚ್ಯಾ ಉಜ್ವ್ಯಾ ಪಾಂಯಾಚಾ ಸಾಕ್ಸಾ ಭಿತರ್ ವಿಶೆವ್ ಘೆವ್ನ್ ಆಸ್ಲೆಲಿ ಸುರಿ ಜಿಮ್ಮಿಚಾ ಹಾತಿಕ್ ಆಯ್ಲಿ.
ತಿತ್ಲೆಂಚ್!
ಸಾಕ್ಸಾ ಭಿತರ್ಲ್ಯಾ ಸುರಿಯೆಕ್ ಭಾಯ್ರ್ ವೊಡ್ಲೆಲ್ಯಾ ಪರಿಂಚ್ ಮುಕಾರ್ ಆಸ್ಲೆಲ್ಯಾ ಎಕ್ಲ್ಯಾಚಾ ಪಾಂಯಾಂಕ್ ಭಳಾನ್ ವೊಡ್ಲಿ ತಾಣೆಂ. ತಶಿಚ್ಚ್ ದುಸ್ರ್ಯಾಚಾ ಪಾಯಾಕ್ ’ಸಕ್ಕ್’ ಕರುನ್ ತೊಪ್ಲಿ. ಹ್ಯಾ ದೊಗಾಂನಿಂ ಬೊಬೊ ಮಾರ್ತಾನಾ ತಿಸ್ರ್ಯಾಚ್ಯಾ ಪೊಟಾಕ್ ತ್ಯಾ ಸುರಿಯೆನ್ ತೊಪುಂಕ್ ಕೆಲ್ಲೆಂ ತಾಚೆಂ ಪ್ರಯತ್ನ್ ವಿಫಲ್ ಜಾಲೆಂ. ಚವ್ತ್ಯಾಚಾ ಪಾಟಿಕ್ ಜೆರೊಮಾಚಾ ಹಾತಿಂತ್ ಆಸ್ಲಲೊ ರೋಡ್ ಬಸ್ಲೊ. ಪಾಂಚ್ವ್ಯಾಕ್ ಕಿತೆಂ ಜಾತಾ ತೆಂ ಕಳ್ಚಾ ಪಯ್ಲೆಂಚ್ ತಾಚಾ ಪೊಟಾಕ್ ಮ್ಹಣೊನ್ ತೊಪ್ಲೆಲಿ ಸುರಿ ತಾಚ್ಯಾ ಜಾಂಗೆಂತ್ ರಿಗ್ಲಿ. ತಾಚ್ಯಾ ಪಾಟ್ಲ್ಯಾನ್ ತೊ ವ್ಹಡ್ಲ್ಯಾನ್ ಬೋಬ್ ಮಾರುನ್ ಧಾಂವ್ಲೊ. ಅಚಾನಕ್ ಜಾಲ್ಲ್ಯಾ ಗಡ್ಬಡೆಂತ್ ತೆ ಪಾಟಿಂ ಸರ್ಲೆ. ಜಿಮ್ಮಿ ಆತಾಂ ಉಟೊನ್ ಉಭೊ ಜಾಲೊ. ಹೆವ್ಶಿಂ ಆಯಿಲ್ಲ್ಯಾ ಆನ್ಯೇಕ್ಲ್ಯಾಕ್ ಜೆರೊಮಾನ್ ತ್ಯಾ ತಾಚಾ ಹಾತಾಂತ್ಲ್ಯಾ ರೊಡಾನ್ ದಾಡಾಯ್ಲೊ. ಸುರಿಯೆಚೊ ಮಾರ್ ಖಾವ್ನ್ ದೋಗ್ ರಾಗಾತ್ ವ್ಹಾಳಾವ್ನ್ ಧಾಂವೊಂಕ್ ಲಾಗ್ತಾನಾ ತಾಂಚಾ ಮಧ್ಲ್ಯಾ ಎಕ್ಲ್ಯಾನ್ ಪಾಟಿಂ ಸರ್ಚೆಂ ಪ್ರಯತ್ನ್ ಕೆಲೆಂ. ಪುಣ್ ಜಿಮ್ಮಿ ತಾಚ್ಯಾ ಪಾಟ್ಲ್ಯಾನ್ ಧಾಂವ್ಲೊ. ಧಾಂವ್ಲ್ಲೊ ತೊ ಮುಕ್ಲ್ಯಾ ರಿಕ್ಶಾಕ್ ಆದ್ಳೊನ್ ಪಡ್ತಾನಾ ಜಿಮ್ಮಿನ್ ಭಳಾನ್ ಆಪ್ಲಿ ಸುರಿ ಉಭಾರುನ್ ತಾಚಾ ಪೊಟಾಕ್ ತೊಪ್ಲಿ. ಪಡ್ಲೆಲ್ಯಾ ಕಡೆಚ್ಚ್ ತೊ ತೆವ್ಶಿಂ ಮಾಲ್ವಾಲ್ಲ್ಯಾನ್ ತಿ ಸುರಿ ತಾಚಾ ಆಂಗಾಕ್ ಘೆಷ್ಟುನ್ ಮಾತ್ರ್ ಗೆಲಿ. ದುಸ್ರೆ ಪಾವ್ಟಿಂ ತಾಣೆಂ ತಿ ಸುರಿ ಉಭಾರ್ತಾನಾ ಭಯಂಕರ್ ಕಿಂಕ್ರಾಟ್ ಮಾರ್ಲಲೊ ತೊ ಚಲೊ ಜಿಮ್ಮಿಕ್ ಲೊಟುನ್ ಧಾಂವೊಂಕ್ ಲಾಗ್ಲೊ. ಖರ್ಶೆಂವ್ಚಾ ಜಿಮ್ಮಿಕ್ ತಾಚಾ ಪಾಟ್ಲ್ಯಾನ್ ಧಾಂವೊಂಕ್ ಜಾಲೆಂ ನಾ. ತಾಚೆಂ ಶರ್ಟ್ ಪಿಂಜುನ್ ತೊಂಡಾ ಥಾವ್ನ್ ರಾಗಾತ್ ದೆಂವ್ಲ್ಲೆಂ. ತೊ ನಿತ್ರಾಣ್ ಜಾಲ್ಲೊ. ಹೆವ್ಶಿಂ ಪಾಟಿಂ ಘುಂವೊನ್ ಪಳೆಲ್ಲ್ಯಾ ತಾಕಾ ಆತಾಂ ಥಂಯ್ಚರ್ ಕೊಣ್ಯ್ ದಿಸ್ಲೆ ನಾಂತ್. ತಶಿಚ್ಚ್ ತಿ ಸುರಿ ಆಪ್ಲ್ಯಾ ಹಾತಾಂತ್ ಘಟ್ ಧರುನ್ ತೊ ಜಿಪಾ ಲಾಗಿಂ ಆಯಿಲ್ಲೊ ಜಿಪಾಚೆಂ ದಾರ್ ಉಗ್ತೆಂ ಕರುನ್ ಪಾಟ್ಲ್ಯಾ ಸಿಟಾರ್ ’ದಡ್ಡ್’ ಕರುನ್ ಪಡ್ಲೊ.
ಕೊಣೆ ಎಕ್ಲ್ಯಾನ್ ಜಿಮ್ಮಿಕ್ ಹಾಸ್ಪಿಟಲಾಕ್ ವರುಂಕ್ ಸಲಹಾ ದಿಲಿ.
ತಿತ್ಲ್ಯಾ ಭಿತರ್ ಶೀತಲಾಚೊ ಬಾಪಯ್ ಯೇವ್ನ್ ಪಾವ್ಲೊ ಥಂಯ್ಚರ್.
"ಕಿತೆಂ ಜಾಲೆಂ? ಕೋಣ್ ತೆ....?" ಶೀತಲಾಚಾ ಬಾಪಾಯ್ನ್ ಜಿಮ್ಮಿಚೆರ್ ನದರ್ ಮಾರ್ಲಿ.
"ತಾಕಾ ಆಸ್ಪತ್ರೆಕ್ ವರುಂಕ್ ಜಾಯ್. ವೆಗ್ಗಿಂ...! ಚಡ್ ಕಾಂಯ್ ಮಾರ್ ಪುಣಿಂ....?"
ಶೀತಲಾಚಾ ಬಾಪಾಯ್ನ್ ಪೊಲಿಸಾಂಕ್ ಫೋನ್ ಕೆಲೆಂ. ಪೊಲಿಸಾಂಕ್ ಖಬಾರ್ ದೀವ್ನ್ ಜಾವ್ನ್ ತೊ ಜೆರೊಮಾ ಕುಶಿಂನ್ ಘುಂವ್ಲೊ.
"ತುಮಿ ತಾಕಾ ಹಾಸ್ಪಿಟಲಾಕ್ ವರಿಯಾ! ಹಾಂವ್ ಯೆತಾಂ....!" ಶೀತಲಾಚಾ ಬಾಪಾಯ್ನ್ ಸಾಂಗ್ತಾನಾ ಜೆರೊಮ್ ಜಿಪಾಚಾ ಡ್ರೈವಿಂಗ್ ಸಿಟಾರ್ ಬಸ್ಲೊ.
"ತುಮಿಂ ಕಾಲೇಜಿಕ್ ವಚಾ ಪುತಾ....!"
"ಹಾಂವ್ಯ್ ಯೆತಾಂ ಆಬಾ ಮ್ಹಾಕಾ ಬ್ಯೆಂ ದಿಸ್ತಾ...!" ಮಿಶೇಲ್ ಜಿಪಾರ್ ಬಸ್ಲೆಂ.
"ಹಾಂವ್ ಯೇಂವ್....?" ಮ್ಹಳ್ಳೆಂ ಶೀತಲ್ "ಚಲ್ ಹಾಂವ್ಯ್ ಯೆತಾಂ....!" ತೆಂಯ್ ಮಿಶೆಲಾಚಾ ಲಾಗಿಂ ಬಸ್ಲೆಂ.
ತಿತ್ಲೆಂಚ್!
ಜೆರೊಮಾನ್ ಆಪ್ಲೆಂ ಜೀಪ್ ಮುಕಾರ್ ಧಾಂವ್ಡಾಯ್ಲೆಂ.
ಸವ್ಕಾಸ್ ಲೊಕಾಚೊ ಜಮೊ ನಿತ್ಳೊಂಕ್ ಲಾಗ್ಲೊ.
ಜೆರೊಮ್ ಹಾಸ್ಪಿಟಲಾಕ್ ಪಾಂವ್ಚಾ ಪಯ್ಲೆಂಚ್ ಶೀತಲಾಚೊ ಬಾಪಯ್ ಹಾಸ್ಪಿಟಲಾಕ್ ಪಾವ್ಲ್ಲೊ.
ಮಾಧವ ಶೆಟ್ಟಿ! ಶೀತಲಾಚೊ ಬಾಪಯ್!
ಪ್ರಾಯೆನ್ ಜೆರೊಮಾಕ್ ತೊ ಮಸ್ತ್ ಲ್ಹಾನ್ ತರ್ಯ್ ಸಮಾಜೆಂತ್ ತಾಚೆಂ ನಾಂವ್ ಉಂಚ್ಲೆಂ. ಸಮಾಜೆಚಾ ವ್ಹಡ್ಲ್ಯಾ ವ್ಹಡ್ಲ್ಯಾ ಮನ್ಶ್ಯಾಂ ಸಂಗಿಂ ತೊ ಉಟ್ತಾಲೊ ಬಸ್ತಾಲೊ. ಸೊರ್ಯಾಚಾ ವ್ಯಾರಾನ್ ಮಾಧವ ಶೆಟ್ಟಿಚೆಂ ನಾಂವ್ ಅತೀ ಊಂಚ್ ಪಾವಯಿಲ್ಲೆಂ.
ಸಮಾಜೆಚಾ ಲೀಗಲ್ ವ್ಯವಸ್ಥಾ ವಯ್ರ್ ಮಾಧವಾಕ್ ಬರಿ ಜಾಣ್ವಾಯ್ ಆಸ್ಲ್ಲಿ. ತ್ಯಾ ಶಿವಾಯ್ ತ್ಯಾ ತಾಚ್ಯಾ ಬಿಜ್ನೆಸಾಕ್ ಲಾಗೊನ್ ಜಾಯ್ ಪುರ್ತಿ ವಳಕ್. ಆಶೆಂ ಜಾಲ್ಲ್ಯಾನ್ ಆಯ್ಚಾ ಜಿಮ್ಮಿಚಾ ಹ್ಯಾ ಸಮಸ್ಯಾಕ್ ಪರಿಹಾರ್ ಆಪ್ಣಾಚಾ ಕುಶಿಂನ್ ಕರುನ್ ಘೆಂವ್ಕ್ ಮಾಧವಾಕ್ ಚಡ್ ವೇಳ್ ಲಾಗ್ಲೊ ನಾ. ದೊನ್ಚ್ ವೊರಾಂ ಭಿತರ್ ಮಿಶೇಲಾನ್ ವೆಚಾ ಕಾಲೇಜಿಚಾ ಮುಕ್ಲ್ಯಾ ಜ್ಯೂಸ್ ಪಾರ್ಲರಾ ಭಿತರ್ ರಿಗ್ಲೆಲ್ಯಾ ಪೊಲಿಸಾಂನಿ ಇನ್ಕ್ವಾಯರಿ ಕರುನ್ ಎದೊಳ್ಚ್ ದೊಗಾಂಕ್ ಭಿತರ್ ಕುಡಾವ್ನ್ ಜಾಲ್ಲೆಂ.
ಪೊಲಿಸ್, ಆಸ್ಪತ್ರ್, ಕಂಪ್ಲೇಂಟ್, ವಿಚಾರಣ್, ಮಾರಾಫಾರ್, ಹೆಂ ಸಗ್ಳೆಂ ಜೆರೊಮಾಚಾ ಕುಟ್ಮಾಕ್ ನವೆಂ ಪುಣ್ ಮಾಧವಾಕ್ ಹೆಂ ನವೆಂ ನ್ಹಯ್!
ಮಾಧವಾನ್ ಸಗ್ಳೆಂ ಆಪ್ಣಾಚಾ ಕುಶಿಂನ್ ಕರುನ್ ಘೆತ್ಲೆಂ.
ಏಕ್ ದೀಸ್ ಎಮರ್ಜೆನ್ಸಿ ವಾರ್ಡಾಂತ್ ದವರ್ಲೆಲ್ಯಾ ಜಿಮ್ಮಿಕ್ ದುಸ್ರೆ ದಿಸಾ ಭಾಯ್ರ್ ಹಾಡ್ಲೊ.
ಹ್ಯಾ ದೋನ್ ದಿಸಾಂನಿ ತಾಕಾ ಪಳಂವ್ಕ್ ಆಯಿಲ್ಲೊ ಮ್ಹಳ್ಯಾರ್ ಫಕತ್ತ್ ಜೆರೊಮ್ ಮಾತ್ರ್.
ಪೊಲಿಸಾಂ ಮುಕಾರ್ ಮಾಧವಾನ್ ಜಿಮ್ಮಿಕ್ ಕೆಲ್ಲೊ ಉಪ್ಕಾರ್ ಜೆರೊಮಾಕ್ ಜಿಮ್ಮಿಕ್ ಸಾಂಗ್ಲೊ.
ಆದ್ಲ್ಯಾ ದಿಸಾ ಆಪ್ಣೆಂ, ಹಜಾರ್ ಲೊಕಾಂಚೊ ಗುನ್ಯಾಂವ್ಕಾರ್ ಕೆಲ್ಲ್ಯಾ ಮಾಧವ ಶೆಟ್ಟಿನ್, ಶೀತಲಾಚಾ ಬಾಪಾಯ್ನ್, ಆಪ್ಣಾಕ್ ತ್ಯಾಚ್ ತಾಚಾ ಬಿಜ್ನೆಸಾಚಾ ಸಕತೆ ವರ್ವಿಂ, ಆಜ್ ಪೊಲಿಸಾಂಚಾ ಹಾತಾ ಥಾವ್ನ್ ಬಾಚಾವ್ ಕೆಲೊ ಮ್ಹಳ್ಳೆಂ ತೆಂ ತಾಕಾ ಕಳ್ತಚ್, ಆಪ್ಣೆ ಶೀತಲಾಕ್ ಉಲಯಿಲ್ಲಿಂ ಉತ್ರಾಂ ಸವ್ಕಾಸ್ ಜಿಮ್ಮಿಚಾ ಕಾನಾಂತ್ ಪ್ರತಿದ್ವನಿತ್ ಜಾಲಿಂ.
ತಾಣೆ ತಶೆಚ್ ದೊಳೆ ದಾಂಪ್ಲೆ.
ಆಜ್ ತಾಕಾಚ್ ಕಳಿತ್ ನಾತ್ಲೆಲ್ಯಾ ಪರಿಂ, ತಾಣೆಂಚ್ ಕಾಂಟಾಳ್ಚಾ ಹ್ಯಾ ಸಂಸಾರಾಚಾ ಅವ್ಯವಸ್ಥಾಂತ್, ತೊ ಮಾಧವ ಶೆಟ್ಟಿಚಾ ಗುನ್ಯಾಂವಾಚೊ ಹಕ್ಕ್ದಾರ್ ಜಾಲ್ಲೊ!
***************
ತೀನ್ ದೀಸ್ ಆಸ್ಪತ್ರೆಂತ್ ಪಾಶಾರ್ ಕೆಲ್ಲೊ ಜಿಮ್ಮಿ ಚವ್ತ್ಯಾ ದಿಸಾ ಘರಾ ಆಯ್ಲೊ. ಹ್ಯಾ ಆವ್ಚಿತ್ತ್ ಘಡ್ಲೆಲ್ಯಾ ಘಟನಾಂತ್ ತಾಕಾ ಜೆರೊಮಾಚೊ ಆನಿ ಮಾಧವಾಚೊ ಮಾತ್ರ್ ಸಾಂಗಾತ್ ಆಸ್ಲ್ಲೊ ಶಿವಾಯ್ ತಾಚೆಂ ಮ್ಹಳ್ಳೆಂ ಕೊಣ್ಯ್ ನಾತ್ಲ್ಲೆಂ. ಜಿಮ್ಮಿಕ್ ಹ್ಯಾ ಸಂಸಾರಾಂತ್ ತಾಚಿಂ ಮ್ಹಳ್ಳಿಂ ತಿಂ ಹ್ಯಾ ಸಂಸಾರಾಂತ್ ಕೋಣ್ಯ್ ಆಸಾತ್ ವಾ ನಾಂ ತೆಂ ಖುದ್ದ್ ಜಿಮ್ಮಿ ಶಿವಾಯ್ ದುಸ್ರೆಂ ಕೊಣ್ಯ್ ನೆಣಾಂ. ಜೆರೊಮಾಕ್ ಪಾಸೊನ್ ತಾಣೆಂ ಆಪ್ಣಾ ವಿಶಿಂ ಕಾಂಯ್ ಕಳಯಿಲ್ಲೆಂ ನಾ.
ಆಸ್ಪತ್ರೆ ಥಾವ್ನ್ ಘರಾ ಆಯಿಲ್ಲ್ಯಾ ಜಿಮ್ಮಿಕ್ ಏಕ್ ಹಪ್ತೊ ಆರಾಮ್ ಕರುಂಕ್ ಜೆರೊಮಾನ್ ಸಲಹಾ ದಿಲಿ. ಜೆರೊಮಾಚಾ ಸಲಹಾಕ್ ಖಾಲ್ತಿಮಾನ್ ಘಾಲ್ಲ್ಯಾ ತಾಣೆ, ಎಕಾ ಹಪ್ತ್ಯಾ ಖಾತಿರ್ ತಾಚ್ಯಾ ಕಾಮಾ ಥಾವ್ನ್ ಸುಟ್ಕಾ ಘೆತ್ಲಿ. ಹ್ಯಾ ಎಕಾ ಹಪ್ತ್ಯಾಂತ್ ತೊ ಕೆದ್ನಾಂಚ್ ಜೆರೊಮಾಕ್ ಜಾಂವ್ ಯಾ ಕೊಣಾಯ್ಕ್ ಜಾಂವ್ ಮೆಳೊಂಕ್ ಯೇಂವ್ಕ್ ನಾತ್ಲ್ಲೊ. ತೊ ಖಂಯ್ ಗೆಲಾ ಮ್ಹಳ್ಳೆಂ ಕೊಣ್ಯ್ ನೆಣಾಂ ಆಸ್ಲ್ಲಿಂ ಜಾಲ್ಯಾರ್ಯ್ ತಾಣೆಂ ರಾಂವ್ಚೆಂ ಮಾತ್ರ್ ಹ್ಯಾ ಕುಶಿಚಾ ಬೊಂದೆಲಾಂತ್ ಮ್ಹಣೊನ್ ಜೆರೊಮ್ ಜಾಣಾಂ. ತ್ಯಾ ವಿಶಿಂ ಚಡಿತ್ ತಕ್ಲಿ ಆಟಂವ್ಕ್ಯ್ ಜೆರೊಮಾಕ್ ನಾಕಾ ಆಸ್ಲ್ಲೆಂ.
ದೀಸ್ ದಾಂವ್ತಾನಾ....., ಆದ್ಲ್ಯಾ ಹಪ್ತ್ಯಾಂತ್ ಘಡ್ಲೆಲ್ಯಾ ಘಡಿತಾಕ್ ಪಳೆಲ್ಲ್ಯಾಂಚಾ ಮತಿ ಪಡ್ದ್ಯಾರ್ ಥಾವ್ನ್ ತೆಂ ಘಡಿತ್ ಸವ್ಕಾಸ್ ಮಾಜ್ವೊನ್ ಯೇಂವ್ಕ್ ಲಾಗ್ಲೆಂ. ಪುಣ್ ಮಿಶೇಲ್ ಆನಿ ಶೀತಲ್.....?
ತ್ಯಾ ದಿಸಾಚಾ ಘಡಿತಾ ಉಪ್ರಾಂತ್ ಮಿಶೇಲ್ ಆನಿ ಶೀತಲ್ ಸಾಕಾಳಿಂ ಕಾಲೇಜಿಕ್ ವೆತಾನಾ ಆನಿಂ ಸಾಂಜೆರ್ ಕಾಲೇಜಿ ಥಾವ್ನ್ ಪಾಟಿಂ ಯೆತಾನಾ ಚಲೊನ್ ಯೇಂವ್ಕ್ ಲಾಗ್ಲಿಂ. ಆತಾಂ ಘರಾ ಡ್ರೈವರ್ ಜಾವ್ನ್ ಜಿಮ್ಮಿ ನಾತ್ಲಲೊ. ಜೆರೊಮಾನ್ ಜಾಂವ್ ಮಾಧವಾನ್ ಜಾಂವ್ ದೊಗಾಂಯ್ಕ್ಯ್ ಸಾಕಾಳಿಂ ಕಾಲೇಜಿಕ್ ಪಾವಯ್ತಾಂ ಮ್ಹಣೊನ್ ಕಿತ್ಲೆಂ ವತ್ತಾಯ್ ಕೆಲ್ಯಾರ್ಯ್ ತಿಂ ವೊಪ್ಲಿಂ ನಾಂತ್. ತಾಣಿಂ ದೊಗಾಂಯ್ನಿಂಯ್ ಸಾಕಾಳಿಂ ಸಾಂಜೆರ್ ಕಾಲೇಜಿಕ್ ಚಲೊನ್ ವಚೊನ್ ಚಲೊನ್ ಪಾಟಿಂ ಯೆಂವ್ಚಿಚ್ ತಾಂಚಿ ಖುಶಿ ದಾಖಯ್ಲಿ. ತಶೆಂಯ್ ತಾಂಚಾ ಘರಾ ಥಾವ್ನ್ ಕಾಲೇಜ್ ಕಾಂಯ್ ಚಡ್ ಪಯ್ಸ್ ನಾತ್ಲೆಲಿ.
ಶೀತಲಾಚಾ ಬಾಪಾಯ್ಚಾ ವಳ್ಕೆಚಾ ಭಳಾ ವರ್ವಿಂ ಪೊಲಿಸಾಂನಿ ತಾಂಚೆಂ ಕಾಮ್ ಚಡ್ಚ್ ಉಮೆದಿನ್ ಸಂಪಯಿಲ್ಲೆಂ. ಹ್ಯಾ ಹಪ್ತ್ಯಾಂತ್ ಕಾಲೇಜಿಚಾ ಗೇಟಿ ಸಾಮ್ಕಾರ್ ಏಕ್ ಪೊಲಿಸ್ ಜೀಪ್ ಉಭೆಂ ಜಾತಾಲೆಂ.
ಭಾಯ್ಲ್ಯಾನ್ ಪ್ರಸ್ತುತ್ ಪರಿಸ್ಥಿತಿ ಸಗ್ಳಿ ಸಾರ್ಕಿ ಜಾಲ್ಲಿ.
ತಿಚ್ಚ್ ಕಾಲೇಜ್...!
ತಿಚ್ಚ್ ವಾಟ್.....!!
ತೊಚ್ಚ್ ಸಾಂಗಾತ್.....!!!
ಫಕತ್ತ್ ಜಿಮ್ಮಿ ಮಾತ್ರ್ ನಾತ್ಲ್ಲೊ. ಪುಣ್ ತಾಣೆ ಉಟಯಿಲ್ಲೆಂ ವಾದಾಳ್ ಅಜೂನ್ ಥಂಡ್ ಜಾಂವ್ಕ್ ನಾತ್ಲ್ಲೆಂ.
ಹ್ಯಾ ವಾದಾಳಾಂತ್ ದೋನ್ ಮತಿ ಶಿರ್ಕಾಲ್ಲ್ಯೊ.....!
ತಾಂಕಾಂ ವಿಶೆವ್ ನಾತ್ಲ್ಲೊ....!!
ತಾಂಚಾ ಚಿಂತ್ನಾಂಕ್ ಸುಶೆಗ್ ನಾತ್ಲ್ಲೊ.....!!!
ಮನಿಸ್ ತೊ ಕೋಣ್ಯ್ ಜಾಂವ್. ಜೆದ್ನಾಂ ಪಾಸೊನ್ ತೊ ಆಪ್ಲ್ಯಾ ಮತಿಕ್ ಚಿಂತುಂಕ್ ಲಾಯ್ನಾ, ತೆದ್ನಾಂ ಪಾಸೊನ್ ತಾಕಾ ಜಿಣಿಯೆಚಿಂ ನವಾಲಾಂ, ಸವಾಲಾಂ ಜಾವ್ನ್ ಉಭಿಂ ಜಾಯ್ನಾಂತ್. ತಶೆಂಚ್ ಮಿಶೇಲ್ ಆನಿ ಶೀತಲ್......!
ಮಿಶೇಲ್ ತರ್ಯ್ ಆಪ್ಲ್ಯಾ ಜಲ್ಮಾ ಥಾವ್ನ್ ಆಪ್ಲ್ಯಾ ಬಗ್ಲೆಕ್ ಝುಜ್ ಘೆವ್ನ್ಚ್ ಜಲ್ಮಾಲ್ಲೆಂ. ತ್ಯಾ ತಾಚ್ಯಾ ನೆಂಟುಲ್ಯಾ ದಿಸಾ, ಆಪ್ಲ್ಯಾ ಆವಯ್ ಬಾಪಾಯ್ಕ್ ಹೊಗ್ಡಾಯಿಲ್ಲ್ಯಾ ದಿಸಾ ಥಾವ್ನ್ ಆರಂಭ್ ಜಾಲ್ಲೆಂ ಹೆಂ ಝುಜ್, ತ್ಯಾ ತಾಚ್ಯಾ ನೆಂಟುಲ್ಯಾ ದಿಸಾಂನಿ ತಾಕಾ ಮಯ್ಪಾಸಾನ್ ಸಾಂಗಾತ್ ದಿಲ್ಲ್ಯಾ ಕ್ಯಾಥರೀನಾ ವರ್ವಿಂ, ತ್ಯಾ ಉಪ್ರಾಂತ್ ಜೆರೊಮ್ ಎಸ್ತೆಲಾ ವರ್ವಿಂ, ಸಾಂಗಾತಾ ಮೊಗಾನ್ ಪೋಸ್ ಕೆಲ್ಲ್ಯಾ ಸೆಲ್ಲಿ ವರ್ವಿಂ ಕಾಂಯ್ಚ್ ಸಂಘರ್ಷಾ ವಿಣೆಂ ಪಾಶಾರ್ ಜಾಲ್ಲೆಂ ಜಾಲ್ಯಾರ್ಯ್ ಮಿಶೇಲಾಚಿ ಮತ್ ಬಸ್ತಾನಾ, ತೆಂಚ್ ಝುಜ್ ಪರ್ತ್ಯಾಕ್ ಮಿಶೇಲಾಚಾ ಮತಿ ಪಡ್ದ್ಯಾರ್ ಹಾಜರ್ ಜಾಲ್ಲೆಂ. ಮಿಶೆಲ್ ಆತಾಂ ಆಪ್ಲ್ಯಾ ಜಿವಿತಾಚಾ ಹರ್ಯೆಕಾ ದಿಸಾ ಆಪ್ಲ್ಯಾ ಚಿಂತ್ನಾಂ ಸಾಂಗಾತಾ ಝುಜ್ತಾಲೆಂ.
ಮಿಶೆಲಾಚಾ ಜಿವಿತಾ ಭಾಯ್ಲ್ಯಾ ಸಂಘರ್ಷಾಂತ್ ತಾಕಾ ತಾಚ್ಯಾ ಆಜ್ಯಾ ಆಜಿಯೆಚೊ ಬರ್ಪೂರ್ ಸಾಂಗಾತ್ ಆಸ್ಲ್ಲೊ ತರ್ಯ್ ದಿಸಾ ಥಾವ್ನ್ ದಿಸಾಕ್ ಉಟೊನ್ ಯೆಂವ್ಚಾ ಮತಿ ಭಿತರ್ಲ್ಯಾ ಝುಜಾಂತ್ ಮಿಶೇಲಾಕ್ ಸಾಂಗಾತ್ ದಿಂವ್ಚಿಂ ಹ್ಯಾ ಸಂಸಾರಾಂತ್ ಕೊಣ್ಯ್ ನಾತ್ಲ್ಲಿಂ.
ಶೀತಲ್, ಮಿಶೇಲಾಕ್ ಆಪ್ಲ್ಯಾ ಇಷ್ಟಾಗತೆಚೊ ಬರೊ ಸಾಂಗಾತ್ ದಿತಾಲೆಂ ತರ್ಯ್ ದೊಗಾಂಯ್ಚಾ ಜಲ್ಮಾಂತ್ ಆನಿ ವಾಡಾವಳಿಂತ್ ಮಸ್ತ್ ಅಂತರ್ ಆಸ್ಲ್ಲೊ. ದೊಗಾಂಯ್ ಜಲ್ಮಾ ಥಾವ್ನ್ಚ್ ಮಂತನಾಂತ್ಲಿಂ ಜಾವ್ನ್ಯ್ ಮಿಶೇಲ್ ಮಾತ್ರ್ ತಾಚ್ಯಾ ಜಿವಿತಾಂತ್ ಘಡೊನ್ ಗೆಲ್ಲ್ಯಾ ಘಡಿತಾಂ ಥಾವ್ನ್ ಜಿವಿತಾ ವಿಶಿಂ ಚಿಂತುಂಕ್ ಲಾಗ್ಲ್ಲೆಂ. ಹೆಂ ಚಿಂತಾಪ್ ಶೀತಲಾಚಾ ಮತಿಕ್ ಆಜ್ ಉದೆಲ್ಲೆಂ! ಹೆಂ ಚಿಂತಾಪ್ ಉದೆಂವ್ಕ್ ಕಾರಾಣ್ ಜಾಲ್ಲೊಚ್ ಜಿಮ್ಮಿ....!
ಜಿಮ್ಮಿಚಾ ಖಾಸ್ಗಿ ಜಿವಿತಾಕ್ ಜಾಂವ್ ಯಾ ತಾಚ್ಯಾ ವಿಚಾರಾಂಕ್ ಜಾಂವ್ ಕಾಂಯ್ಚ್ ನೆಣಾಂ ಆಸ್ಲ್ಲ್ಯಾ ಶೀತಲಾಕ್ ಆನಿ ಮಿಶೇಲಾಕ್ ಜಿಮ್ಮಿ ವಿಶಿಂ ಏಕ್ ವಿಶಯ್ ಮಾತ್ರ್ ಆಜ್ ಸಾರ್ಕೊ ಕಳಿತ್ ಜಾಲ್ಲೊ. ಎಕ್ಚ್ ಜಿಮ್ಮಿ ಶೀತಲಾಚಾ ಬಾಪಾಯ್ಕ್ ವಿರೋಧ್ ಯಾ ತಾಣೆಂ ಚಲಂವ್ಚ್ಯಾ ತ್ಯಾ ತಾಚ್ಯಾ ಸೊರ್ಯಾಚಾ ಬಿಜ್ನೆಸಾಕ್ ವಿರೋಧ್! ಹೆಂ ನ್ಹಯ್ ತರ್ ತೊ ಮಾಧವ ಶೆಟ್ಟಿಚಾ ಜಿವಿತಾಕ್ಚ್ ವಿರೋಧ್! ಕಿತ್ಯಾಕ್ ಮ್ಹಳ್ಯಾರ್ ಜಿತ್ಲಿ ಗ್ರೇಸ್ತ್ಕಾಯ್ ಮಾಧವ ಶೆಟ್ಟಿ ಲಾಗಿಂ ಆಸಾ ತಿತ್ಲಿಚ್ ಗ್ರೇಸ್ತ್ಕಾಯ್ ಜೆರೊಮಾಕ್ಯ್ ಆಸಾ. ಪುಣ್ ಜಿಮ್ಮಿನ್ ಕೆದ್ನಾಂಚ್ ಜೆರೊಮಾಚಾ ವಿರೋಧ್ ಉಲಂವ್ಚೆಂ ಪ್ರಯತ್ನ್ ಕರುಂಕ್ ನಾ.
ಮಾಧವ ಶೆಟ್ಟಿಚಾ ವಿರೋಧ್ ಜಿಮ್ಮಿನ್ ಉಲಯಿಲ್ಲ್ಯಾ ವಿಚಾರ್ಭರಿತ್ ಉತ್ರಾಂನಿ ವಜನ್ ಜರೂರ್ ಆಸ್ಲ್ಲೆಂ. ಹ್ಯಾಚ್ ವಜನಾಕ್, ಶೀತಲ್, ಹ್ಯಾ ದಿಸಾಂನಿ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೆಂ.
"ತುಕಾ ಏಕ್ ವಿಶಯ್ ಸಾಂಗೊಂ ಶೀತಲ್....?" ಕಾಲೇಜಿಚಾ ವಾಟೆರ್ ಆಜ್ ಮಿಶೇಲಾನ್ ಸವಾಲ್ ಕೆಲೆಂ.
ಎದೊಳ್ ಮೌನತಾ ಸಾಂಬಾಳುನ್ ಆಸ್ಲ್ಲ್ಯಾ ಶೀತಲಾನ್, ಆತಾಂ ಮಿಶೇಲಾಚೆಂ ಸವಾಲ್ ಆಯ್ಕೊನ್ ತಾಚೆ ಕುಶಿಕ್ ಆಪ್ಲಿ ತಕ್ಲಿ ಘುಂವ್ಡಾಯ್ಲಿ. ತಾಚ್ಯಾ ಜಿಬೆರ್ ಥಾವ್ನ್ ಕಾಂಯ್ಚ್ ಉತ್ರಾಂ ಸುಟ್ಲಿಂ ನಾಂತ್. ಫಕತ್ತ್ ತಾಣೆಂ ಮಿಶೇಲಾಕ್ ಪಳೆಲೆಂ ಮಾತ್ರ್.
"ಹ್ಯಾ ದಿಸಾಂನಿ ತುಂ ಮಸ್ತ್ ಬದ್ಲಾಲ್ಲ್ಯಾ ಪರಿಂ ದಿಸ್ತಾಯ್....!"
ಮಿಶೇಲಾನ್ ಸಾಂಗ್ಲೆಲೆಂ ಆಯ್ಕೊನ್ ಶೀತಲ್ ಕಾಂಯ್ ಉಲಯ್ಲೆಂ ನಾ ತರ್ಯ್, ಎಕಾ ಖಿಣಾಕ್, ತಾಚಿ ಮತ್, ತಾಕಾಚ್ ಸೊಡುನ್ ಸಂಸಾರ್ಭರ್ ಭೊಂವೊನ್ ಆಯ್ಲಿ. ಹ್ಯಾ ಭೊಂವ್ಡೆಂತ್ ಸಭಾರ್ ಆಸ್ಪಶ್ಟ್ ಸವಾಲಾಂ ತಾಚ್ಯಾ ಕಾನಾಂತ್ ಪಾತಾಳಾ ಥಾವ್ನ್ ಬೋಬ್ ಮಾರ್ತಾತ್ ಮ್ಹಳ್ಳ್ಯಾ ಪರಿಂ ತಾಕಾ ಜಾಲಿಂ.
ಆಪ್ಲಿ ದೀಷ್ಟ್ ಮಿಶೇಲಾ ವಯ್ಲಿ ಪಾಟಿಂ ಕಾಡುನ್, ತ್ಯಾ ಶೂನ್ಯತಾಯೆನ್ ಭರ್ಲೆಲ್ಯಾ ದಿಶ್ಟೆಕ್, ಶೀತಲಾನ್, ಥೊಡ್ಯಾ ಘಡಿಯಾಂಕ್ ತ್ಯಾ ವಯ್ಲ್ಯಾ ನಿಳ್ಶ್ಯಾ ಮೊಳಾಬಾರ್ ಖಂಚಯ್ಲಿ.
ಥೊಡೊಚ್ ವೇಳ್!
ಮೊಳಾಬಾ ವಯ್ಲ್ಯಾ ಆಪ್ಲ್ಯಾ ದಿಶ್ಟೆಕ್ ಪಾಟಿಂ ಕಾಡ್ಲೆಲ್ಯಾ ಶೀತಲಾನ್ ಆತಾಂ ಆಪ್ಲೆಂ ಮೌನ್ ವ್ರತ್ ಮೊಡ್ಲೆಂ.
"ಎಕೇಕ್ ಪಾವ್ಟಿಂ ಚಲಿ ಇತ್ಲೆಂಯ್ ಲಾಚಾರ್ ಕಶೆಂ ಜಾತಾ?" ಶೀತಲಾಚೆಂ ಸವಾಲ್.
"ಕಿತೆಂ ಜಾಲೆಂ....?" ಮಿಶೇಲಾನ್ ಶೀತಲಾಕ್ಚ್ ಪಳೆಲೆಂ.
"ಥೊಡ್ಯಾ ದಿಸಾಂ ಪಯ್ಲೆಂ ಜಿವಿತ್ ಮಸ್ತ್ ಸೊಭಿತ್ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ. ಪುಣ್ ಆತಾಂ....!"
"ಆತಾಂ.....? ಆತಾಂ ಕಿತೆಂ?"
ಮಿಶೇಲಾಚಾ ಸವಾಲಾಕ್ ಶೀತಲಾಚಾ ವೊಂಟಾಂನಿ ಕಾಂಯ್ ಜವಾಬ್ ನಾತ್ಲ್ಲಿ. ಬೋವ್ಶಾ ತೆಂ ಜವಾಬ್ ದಿಂವ್ಚಾ ಸ್ಥಿತೆರ್ ನಾತ್ಲ್ಲೆಂ. ಕಾರಾಣ್ ತಾಚ್ಯಾ ಭೊಂವಾರಿ ಜಿಮ್ಮಿನ್ ಉಟಯಿಲ್ಲ್ಯಾ ವಾದಾಳಾ ವರ್ವಿಂ, ತಾಚ್ಯಾ ಮತಿಚ್ಯಾ ದೊಳ್ಯಾಂಕ್ ಕಾಂಯ್ಚ್ ಸಾರ್ಕೆಂ ದಿಸಾನಾತ್ಲ್ಲೆಂ. ಸಗ್ಳೆಂ ಗಯ್ರೆಂ ಗಯ್ರೆಂ ತಶೆಂ ಜಾಲ್ಲೆಂ. ತಾಚ್ಯಾ ಮತಿಂತ್ ಸವಾಲಾಂ ಸಭಾರ್ ಉಟ್ತಾಲಿಂ ಆನಿ ತಶಿಂಚ್ ತಿಂ, ತ್ಯಾ ಧರ್ಣಿ ಪಂದ್ಲೊ ಲಾವಾ ಧರ್ಣಿ ಪಂದಾಚ್ ಖತ್ಕತೊನ್ ಉರ್ಚಾ ಪರಿಂ ಉರ್ತಾಲಿಂ.
ಮಿಶೇಲಾನ್ ಕಾಲೇಜಿಕ್ ವೆಚೊ ಸದಾಂಚೊ ರಸ್ತೊ ತೊ. ಹ್ಯಾ ರಸ್ತ್ಯಾರ್ ಆಜ್ ರಸ್ತ್ಯಾಚೆ ಫೊಂಡ್ ಭರ್ಚೆಂ ಕಾಮ್ಚಲ್ತಾಲೆಂ. ಹ್ಯಾ ಕಾಮಾಂತ್ ಮೆತೆರ್ ಜಾಲ್ಯಾ ದಾದ್ಲ್ಯಾಂಕ್, ಬಾಯ್ಲಾಂಕ್, ಭುರ್ಗ್ಯಾಂಕ್ ಪಳೆತಾನಾ ಮಿಶೇಲಾಚಾ ಮತಿಕ್ ಕಿತೆಂಗೀ ಜಳ್ಕಾಲ್ಲ್ಯಾ ಪರಿಂ ಜಾಲೆಂ.
"ತುಂ ಜಿವಿತ್ ಜಿಯೆಂವ್ಚಾ ಸೊಭಾಯೆಕ್ ಜಾಣಾಂ ಜಾಂವ್ಕ್ ಪ್ರಯತ್ನ್ ಕರ್ತಾಯ್.....?" ಸವಾಲ್ ಕೆಲ್ಲ್ಯಾ ಮಿಶೇಲಾನ್ ಆಪ್ಲ್ಯಾ ಪಾಂಯಾಂಕ್ ತಾಂಚ್ಯಾ ಚಲನಾ ಸಕ್ತೆ ವಯ್ರ್ ಖಾಡುಂ ಘಾಲೆಂ. ತಾಣಿಂ ಚಲೊನ್ ಆಸ್ಚ್ಯಾ ತ್ಯಾ ಫುಟ್ಪಾತಿಚೆರ್ ಮಿಶೇಲ್ ಸ್ತಬ್ದ್ ಜಾವ್ನ್, ಆತಾಂ ತಾಣೆಂ ಶೀತಲಾಚಾ ಹಾತಾಕ್ ವೊಡುನ್ ಧರುನ್ ಶೀತಲಾಕ್ ರಾವಯ್ಲೆಂ.
"ಥಂಯ್ಚರ್ ಪಳೆ....!"
ಮಿಶೇಲಾ ಸಾಂಗಾತಾ ತ್ಯಾ ಫುಟ್ಪಾತಿರ್ ಉಭೆಂ ಜಾಲ್ಲ್ಯಾ ಶೀತಲಾನ್, ಮಿಶೇಲಾನ್ ಆಪ್ಣಾಕ್ ದಾಕಯಿಲ್ಲ್ಯಾ ಕುಶಿಕ್ ಪಳಯ್ಲೆಂ. ಮಿಶೇಲಾನ್ ದಾಕಯಿಲ್ಲ್ಯಾ ಕುಶಿಕ್ ಪಳೆಲ್ಲ್ಯಾ ಶೀತಲಾಕ್, ತಾಚ್ಯಾ ಫುಡ್ಯಾನ್ ಥಂಯ್ಚರ್, ರಸ್ತ್ಯಾ ಮಧ್ಲೆ, ಪಾವ್ಸಾ ಉದ್ಕಾನ್ ವೀದ್ ವಾವ್ಳಿ ಕರ್ತಾನಾ ಜಲ್ಮಾಲ್ಲೆ ಫೊಂಡ್ ಭರುನ್ ರಸ್ತೊ ಸಾರ್ಕೊ ಕರ್ಚೆ ಮನಿಸ್ ತಾಚ್ಯಾ ದೊಳ್ಯಾಂಕ್ ದಿಸ್ಲೆ.
"ತುಂ ಚಿಂತಾಯ್ ಶೀತಲ್, ಹಿಂ ಮನ್ಶ್ಯಾಂ ಹ್ಯಾ ರಸ್ತ್ಯಾಚೆ ಪೊಂಡ್ ಭರ್ಚೆಂ ನಶೀಬ್ ಘೆವ್ನ್ ಜಲ್ಮಾಲ್ಲಿಂ?"
ಮಿಶೇಲಾಚಾ ಸವಾಲಾ ಥಾವ್ನ್ ಥೊಡಿಂ ಕ್ಷಣಾಂ ದೊಗಾಂಯ್ ಮಧೆಂ ಕಾಂಯ್ ಉಲೊಣೆ ಜಾಲೆಂ ನಾ. ದೊಗಾಂಯ್ಚಾ ಮತಿಂತ್ ವಿಚಾರಾಂಚಿ ಸಾಂಕಳ್ ’ದರ್’ ’ದರ್’ ಕರುನ್ ಜರ್ಕಟೊನ್ ವೊಚೊಂಕ್ ಲಾಗ್ಲಿ. ಥಂಯ್ ಹಾಂಗಾ ತಿ ಜರ್ಕಟ್ತಾನಾ ಉಜ್ಯಾಚಿಂ ಕಿಟಾಂಳಾಂ ಪೆಟೊನ್ ಗೆಲ್ಲ್ಯಾ ಪರಿಂ ತಾಂಕಾ ಜಾಲೆಂ.
ಮಿಶೇಲಾಚಾ ಸವಾಲಾಕ್ ಆನಿ ಆಪ್ಣಾಕ್ ಕಾಂಯ್ಚ್ ಸಂಭಂಧ್ ನಾತ್ಲೆಲೆಂ, ಏಕ್ ಸುಮಾರ್ ಧಾ ವರ್ಸಾಂಚೆಂ ಚೆಡುಂ ಭುರ್ಗೆಂ, ಆಪ್ಲ್ಯಾ ಹಾಂಡಿಯೆರ್ ಎಕಾ ವಿಣ್ಗ್ಯಾ ಭುರ್ಗ್ಯಾಕ್ ಘೆವ್ನ್ ಉಭೆಂ ಆಸ್ಲ್ಲೆಂ ತೆಂ, ರಸ್ತ್ಯಾ ದೆಗೆಚಾ ಫುಟ್ಪಾತಿರ್ ರಾವೊನ್, ರಸ್ತ್ಯಾ ಮಧ್ಲ್ಯಾ ಚಲ್ಚ್ಯಾ ಕಾಮಾಕ್ ಪಳವ್ನ್ ರಾವ್ಲ್ಲ್ಯಾ ಮಿಶೇಲಾಕ್ಚ್ ಪಳಂವ್ಕ್ ಪಡ್ಲೆಂ. ಮಿಶೇಲಾಕ್ ಪಳವ್ನ್ ತೆಂ ವಿಜ್ಮಿತ್ ಜಾಲ್ಲೆಂ. ಮಿಶೇಲಾಚೆಂ ಗೊರೆಂ ರೂಪ್, ಮಾತಿಯೆ ಸಾರ್ಕ್ಯಾ ಭಾಂಗ್ರಾಳ್ಯಾ ರಂಗಾಚೆ ತಾಚೆ ಕೇಸ್ ಆನಿ ತಿ ತಾಚಿ ಭಾರೀಕ್ ಕೂಡ್ ಪಳೆತಾನಾ ಮಿಶೇಲ್ ಆಪ್ಣಾ ಥಾವ್ನ್ ಸಂಪೂರ್ಣ್ ವೆಗ್ಳೆಂ ಮ್ಹಳ್ಳ್ಯಾ ಭಾಶೆನ್ ತ್ಯಾ ಚೆಡ್ವಾಕ್ ದಿಸ್ಲೆಂ ಜಾಯ್ಜಯ್..... ಹ್ಯಾಚ್ ಕಾರಾಣಾನ್ ತೆಂ ಮಿಶೇಲಾ ತೆವ್ಶಿಂ ಆಕರ್ಶಿತ್ ಜಾವ್ನ್, ಆಪ್ಣಾಕ್ಚ್ ವಿಸ್ರೊನ್, ತೆಂ ತಶೆಂಚ್ ರಾವೊನ್ ಮಿಶೇಲಾಕ್ಚ್ ಪಳಂವ್ಚಾರ್ ಪಡ್ಲೆಂ.
"ಹಾಂಚಾ ನಶೀಬಾಂತ್ ಹ್ಯಾ ರಸ್ತ್ಯಾಚೆ ಫೊಂಡ್ ಶಿವಾಯ್ ತಿಜೊರಿಚೆಂ ದಾರ್ ಉಗ್ತೆಂ ನಾ?" ಆತಾಂ ಮಿಶೇಲಾನ್ ಸವಾಲ್ ಕೆಲೆಂ.
ಶೀತಲ್ ತ್ಯಾ ಕಾಮಾಗಾರಾಂ ತೆವ್ಶಿಂ ಪಳೆಂವ್ಕ್ ಲಾಗ್ಲೆಂ ಶಿವಾಯ್ ತಾಣೆಂ ಮಿಶೇಲಾಚಾ ಸವಾಲಾಕ್ ಕಾಂಯ್ ಜವಾಬ್ ದಿಲಿ ನಾ.
"ಆಶೆಂ ಆಸ್ಲ್ಯಾರ್ಯ್ ...., ಕಿತೆಂ ತುಂ ಚಿಂತಾಯ್ ಹಾಂಚೆಂ ಜಿವಿತ್ ಸೊಭಿತ್ ನಾ.....?" ಮಿಶೇಲಾಚೆಂ ದುಸ್ರೆಂ ಸವಾಲ್.
ಶೀತಲ್ ಅಜೂನ್ ಮೌನ್ ಸಾಂಬಾಳ್ತಾಲೆಂ. ತಾಚಿ ಜೀಬ್ ಕಾಂಯ್ ಉಲಯ್ನಾತ್ಲ್ಲಿ. ಪುಣ್ ತಾಚ್ಯಾ ಮತಿಂತ್.....!?
ವಯ್ಲ್ಯಾ ಹ್ಯಾ ಶುಬ್ರ್, ನಿತಳ್, ಮೊಳಾಬಾ ಪಂದಾ ಕಾಳಿಂ ಕಾಳಿಂ ಮೊಡಾಂ ಆವ್ಚಿತ್ತ್ ಉಟೊನ್ ಯೇವ್ನ್ ಘಡ್ಗಡ್ಯಾ ಜಗ್ಲಾಣ್ಯಾ ಸವೆಂ ಶಿರಾಂಧಾರಿಚ್ಯಾ ಪಾವ್ಸಾನ್ ಪ್ರಥ್ವೆಕ್ ದಾಡ್ ಮಾರುನ್, ಥೊಡ್ಯಾಚ್ ಖಿಣಾಂ ಭಿತರ್ ಸಗ್ಳೆಂಚ್ ಬದ್ಲುನ್ ಸೊಡ್ಲೆಲ್ಯಾ ಪರಿಂ, ತಾಚ್ಯಾ ಮತಿಂತ್ಯ್ ಕಾಳಿಂ ಮೊಡಾಂ ಉಟೊನ್ ಯೇವ್ನ್, ಘಡ್ಗಡೊ ಜಗ್ಲಾಣೆ ಮಾರುನ್ ಶಿರಾಂಧಾರಿಚೊ ಪಾವ್ಸ್ ವೊತುಂಕ್ ಲಾಗ್ಲೊ.
"ಹಾಂಚೆಂ ಜಿವಿತ್ ಭಾಯ್ಲ್ಯಾನ್ ಮ್ಹೆಳೆಂ ಆಸಾ. ದೆಕುನ್ ಆಮ್ಕಾಂ ತಿಂ ಮೆಳಿಂ ದಿಸ್ತಾತ್! ಆಮ್ಚಿ ದೀಷ್ಟ್ ಆಶಿ ಜಾಂವ್ಕ್ ಕೋಣ್ ಕಾರಾಣ್ ತೆಂ ತುಂ ಜಾಣಾಂಯ್....?" ಮಿಶೇಲ್ ತ್ಯಾ ರಸ್ತ್ಯಾ ವಯ್ಲ್ಯಾ ಕಾಮಾಗಾರಾಂಕ್ ಪಳೆತಾಲೆಂ. "ಹಾಕಾ ಕಾರಾಣ್ ಆಮಿಂಚ್! ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೆಂ ಜಿವಿತ್ ಭಾಯ್ಲ್ಯಾನ್ ನಿತಳ್ ದವರ್ಚ್ಯಾ ಖಾತಿರ್ ಆಮಿ ಹಾಂಕಾ ಭಾಯ್ಲ್ಯಾನ್ ಮ್ಹೆಳೆಂ ಕೆಲಾಂ. ಹಾಕಾ ಕಾರಾಣಾಂ ಸಭಾರ್ ಆಸೊಂಕ್ ಪುರೊ!" ಆತಾಂ ಮಿಶೇಲ್ ತ್ಯಾ ಆಪ್ಣಾಕ್ಚ್ ಪಳಂವ್ಚಾ ಚೆಡ್ವಾಕ್ ಪಳಂವ್ಕ್ ಲಾಗ್ಲೆಂ.
"ತ್ಯಾ ಚೆಡ್ವಾಚಾ ಹಾತಾಂತ್ಲ್ಯಾ ಭುರ್ಗ್ಯಾಕ್ ಪಳೆ! ತಾಚಿಂ ಆವಯ್ ಬಾಪಯ್ ಬೋವ್ಶ್ಯಾ ಥಂಯ್ ಕಾಮ್ ಕರ್ತಾತ್. ದೆಕುನ್ ಹ್ಯಾ ಲ್ಹಾನ್ ಪಿಂಪ್ರ್ಯಾಚಿ ಜವಾಬ್ದಾರಿ ಹಾಕಾ ಪಡ್ಲ್ಯಾ! ಹ್ಯಾ, ಹಾಚಾ ಪ್ರಾಯೆರ್ ತುಕಾ ಆನಿ ಮ್ಹಾಕಾ ಆಮ್ಚಾ ವ್ಹಡಿಲಾಂನಿ ಕಿತ್ಲ್ಯಾ ಜಾಗ್ರುತ್ಕಾಯೆನ್ ವಾಗಯ್ಲಾಂ ಆಸ್ತೆಲೆಂ! ದೆಕುನ್ ಜಿವಿತ್ ಕಿತೆಂ ತೆಂ ಆಮಿ ಸಮ್ಜೊಂಕ್ ಸಕೊಂಕ್ ನಾಂವ್. ಬೋವ್ಶ್ಯಾ ಸಮ್ಜೊಂಕ್ಯ್ ಸಕ್ಚೆ ನಾಂವ್....!"
"ವಿಶಯ್ ತೊ ನ್ಹಯ್ ಮಿಶೇಲ್!" ಸಭಾರ್ ವೆಳಾ ಉಪ್ರಾಂತ್ ಶೀತಲಾನ್ ತೋಂಡ್ ಉಘಡ್ಲೆಂ.
"ಆನಿ ಕಿತೆಂ?" ಮಿಶೇಲಾಚೆಂ ಸವಾಲ್.
"ಜಿಮ್ಮಿನ್ ತ್ಯಾ ದೀಸ್ ಜಿಪಾರ್ ಸಾಂಗ್ಲೆಲ್ಯಾ ಉತ್ರಾಂ ಥಾವ್ನ್....."
"ಹಾಂವ್ ಜಾಣಾಂ ಶೀತಲ್! ಜಿಮ್ಮಿನ್ ತ್ಯಾ ದೀಸ್, ರಾಗಾನ್ ತುಜ್ಯೆರ್ ಆಪ್ರಾದ್ ಮಾಂಡ್ಲೆಲ್ಯಾ ಉಪ್ರಾಂತ್ ಥಾವ್ನ್, ತುಂ ತುಜ್ಯಾ ಸಾರ್ಕ್ಯಾ ಮತಿಚಾ ಸಂತುಲಾನಾರ್ ನಾಂಯ್!"
"ಹಾಂವ್ ನೆಣಾಂ ತಾಣೆಂ ತಶೆಂ ಕಶೆಂ ಸಾಂಗ್ಲೆಂ ತೆಂ....?"
"ತುಂ ತಾಚೊ ವಿಶಯ್ ಸೊಡ್! ಎಕ್ಚುವಲ್ಲಿ ಪಳಂವ್ಕ್ ಗೆಲ್ಯಾರ್ ತಾಣೆಂ ಸಾಂಗ್ಲ್ಲ್ಯಾಂತ್ ಕಾಂಯ್ ಚೂಕ್ ನಾ. ಪುಣ್, ತುಜ್ಯಾ ಜಾಗ್ಯಾರ್ ರಾವೊನ್ ಪಳೆಲ್ಯಾರ್ ತುಜಿಯ್ ಕಾಂಯ್ ಚೂಕ್ ನಾ!"
"ತರ್....."
"ಓ.ಕೆ. ತುಂ ಮ್ಹಾಕಾ ಆತಾಂ ಹೆಂ ಸಾಂಗ್.... ಮನಿಸ್ ಆಪ್ಲ್ಯಾ ಜಿವಿತಾಂತ್ ಕಿತೆಂಯ್ ಕರ್ತಾ ಜಾಲ್ಯಾರ್ ತೆಂ ತೊ ಕಿತ್ಯಾಕ್ ಕರ್ತಾ?"
"ಹಾಂವ್ ಚಿಂತಾಂ ತಾಚ್ಯಾ ಸಂತೊಸಾ ಖಾತಿರ್!"
"ಎಕ್ಸಾಕ್ಟ್ಲಿ!" ಉಲಯ್ಲೆಂ ಮಿಶೇಲ್ "ಮನಿಸ್ ಜರ್ ಆಪ್ಲ್ಯಾ ಸಂತೊಸಾ ಖಾತಿರ್ ಕಿತೆಂಯ್ ಕರುಂಕ್ ಸಕ್ತಾ ತರ್, ಜಿವಿತ್ ಜಿಯೆಂವ್ಚೆಂ ಡೆಫಿನಿಶನ್ ಚಡ್ ಸುಲಭ್ ಜಾಲೆಂ! ತುಕಾ ಜರ್ ಸಂತೊಸ್ ಜಾಯ್ ತರ್ ಹೆರಾಂಕ್ ಖುಶಿ ಕರ್. ವೆರ್ರಿ ಸಿಂಪಲ್! ಹೆರಾಂಚಿ ಖುಶಿ ಪಳವ್ನ್ ತುಂ ಆಪ್ಲೆಸ್ತಕಿಂ ಖುಶಿ ಜಾತೆಲೆಂಯ್! ತುಂಯ್ ಖುಶ್ ಹಾಂವ್ಯ್ ಖುಶ್ ಮ್ಹಣ್ತಾನಾ ಸಂಸಾರ್ಚ್ ಖುಶ್!"
ಮಿಶೇಲ್ ಸಾಂಗೊನ್ ಮೌನ್ ಜಾಲೆಂ. ಆತಾಂ ಥೊಡೊ ವೇಳ್ ತ್ಯಾ ಹಾಂಡಿಯೆರ್ ಭುರ್ಗ್ಯಾಕ್ ಘೆತ್ಲೆಲ್ಯಾ ಚೆಡ್ವಾಕ್ಚ್ ಪಳೆಲ್ಲೆಂ ಮಿಶೇಲ್, ಪರ್ತ್ಯಾಕ್ ಆಪ್ಲಿ ದೀಷ್ಟ್ ಪಾಟಿಂ ಕಾಡುನ್,
"ಪುಣ್, ಮನಿಸ್ ಆಸಾ ಪಳೆ ಶೀತಲ್.... ಹೆರಾಂಚಿ ಖುಶಿ ಪಳಂವ್ಚಾ ಪ್ರಾಸ್ ಆಪ್ಲಿ ಖುಶಿ ಪಳಂವ್ಕ್ ಚಡ್ ಆತ್ರೆಗ್ತಾ ಆನಿ ತೊ ಸ್ವಾರ್ಥಿ ಜಾತಾ. ಆಪ್ಲ್ಯಾ ಖುಶೆಕ್ ವೆಂಗ್ಲಲೊ ಹರ್ಯೆಕ್ಲೊ ದುಖಿಃ ಶಿವಾಯ್ ಸುಖಿಃ ಜಾಂವ್ಕ್ ಸಾದ್ಯ್ಚ್ ನಾ!"
"ಹೆಂ ಕಶೆಂ?" ಶೀತಲ್ ಮಿಶೇಲಾ ಕುಶಿಕ್ ಘುಂವ್ಲೆಂ.
"ಓ.ಕೆ.... ತುಕಾ ಏಕ್ ಎಕ್ಸಾಂಪಲ್ ದಿತಾಂ" ಮ್ಹಳ್ಳೆಂ ಮಿಶೇಲ್ ಆಪ್ಲ್ಯಾ ಕಪಾಲಾರ್ ಗಳ್ಲ್ಲ್ಯಾ ಕೆಸಾಂಕ್ ಪಾಟಿಂ ಲೊಟುನ್ "ಆಮ್ಚ್ಯಾ ಜಿಪಾಚೆರ್ ಬಸೊನ್ ಆಮಿ ಆರಾಮಾಯೆರ್ ಕಾಲೇಜಿಕ್ ಯೆಂವ್ಚೆಂ ಆಮ್ಕಾಂ ಖುಶಿ ದಿತಾ. ಹಿ ಖುಶಿ ಆಮ್ಕಾಂ ಸುಖ್ ದಿತಾ! ಮ್ಹಳ್ಯಾರ್ ಆಮ್ಚಾ ಸುಖಾ ಖಾತಿರ್ ಏಕ್ ಕುಟಾಮ್ ಹಾಂಗಾ ರಸ್ತ್ಯಾಚೆ ಫೊಂಡ್ ಭರುನ್ ಭರುನ್ ಬಲಿ ಜಾತಾ! ಆಮ್ಚಾ ಸುಖಾನ್ ತ್ಯಾ ಚೆಡ್ವಾಚೆಂ ಜಿವಿತ್ ಲುಟ್ಲಾಂ! ಪಳೆ ಥಂಯ್... ತಾಕಾ ಪಳೆ! ಕಶೆಂ ದಿಸ್ತಾ ತೆಂ ತುಕಾ?" ಮಿಶೇಲಾನ್ ಆಪ್ಲೆಂ ಬೋಟ್ ಜೊಕುನ್ ನೆಣ್ತ್ಯಾ ಭುರ್ಗ್ಯಾಕ್ ಹಾಂಡಿಯೆರ್ ಘೆವ್ನ್ ಆಸ್ಲೆಲ್ಯಾ ತ್ಯಾ ಚೆಡ್ವಾಕ್ ದಾಕಯ್ಲೆಂ.
"ಆಜ್ ತೆಂ ಆಮ್ಚಾ ಪರಿಂಚ್ ಇಸ್ಕೊಲಾಕ್ ವಚೊಂಕ್ ಸಕ್ತೆಂ.... ಬರೆಂ ಶಿಕಾಪ್ ಜೊಡುಂಕ್ ಸಕ್ತೆಂ..... ಆಶೆಂ ಜಾಂವ್ಕ್ ನಾ. ಆಮ್ಚಾ ಸುಖಾ ಖಾತಿರ್ ಆಮಿ ಎಕಾ ಅಮಾಯಕ್ ಜಿವಿತಾಕ್ ಗಳ್ಸಿಲಾಂ. ಆಮ್ಚ್ಯಾ ಜಿಪಾಕ್ ಹ್ಯಾ ರಸ್ತ್ಯಾರ್ ಧಾಂವ್ಡಾಂವ್ಕ್ ತ್ಯಾ ಅಮಾಯಕ್ ಕುಟ್ಮಾಚಿ ಆಮಿ ಬಲಿ ಘೆತ್ಲ್ಯಾ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸಮಾಜೆಂತ್ ಆಮ್ಚೆ ಲಾಗಿಂ ಸಕತ್ ಆಸಾ. ಪಯ್ಶೆ ಮ್ಹಳ್ಳಿ ಸಕತ್ ಆಸಾ. ಜಶೆಂ ಪೊರ್ಚಾ ದಿಸಾ ಜಿಮ್ಮಿಚಾ ಹಾತಾಂತ್ ಸುರಿ ಮ್ಹಳ್ಳಿ ಸಕತ್ ಆಸ್ಲ್ಲ್ಯಾ ಪರಿಂ!ಜಾಂವ್ಕ್ ಪುರೊ ತ್ಯಾ ದಿಸಾ ತಾಣೆಂ ತಿ ಸುರಿ ಉಪಯೋಗ್ಸಿಲ್ಲೆಂ ಕಾರಾಣ್ ದುಸ್ರೆಂ. ಪುಣ್ ಸುರಿ ತಿ ಹರ್ಯೆಕಾ ವಾಟೆನ್ ಸುರಿಚ್. ತಾಚಿ ಸಕತ್ ಎಕ್ಚ್. ತಾಚಿ ಧಾರ್ ಎಕ್ಚ್. ತಾಚೆಂ ಕಾಮ್ ಎಕ್ಚ್.... ಬಲಿ ಘೆಂವ್ಚೆಂ! ಹಾಂಗಾಸರ್ಯ್ ಆಮ್ಚೆಂ ಸುಖ್ ಮ್ಹಳ್ಳ್ಯಾ ಸುರಿಯೆಕ್ ಹಿಂ ಅಮಾಯಕ್ ಕುಟ್ಮಾ ಬಲಿ ಜಾತಾತ್. ಹೊ ಆಮ್ಚೊ ಸ್ವಾರ್ಥ್! ತುಂ ಜಾಣಾಂಯ್ ಹ್ಯಾ ವರ್ವಿಂ ಹಿಂ ಕುಟ್ಮಾ ಸುಖ್ ಜೊಡುಂಕ್ ಪಾವ್ತಾತ್? ಭಾಯ್ಲ್ಯಾನ್ ತಿಂ ಹ್ಯಾ ರಸ್ತ್ಯಾ ದೆಗೆನ್ ಭೊಂವೊನ್ ಖೆಳೊನ್ ಆಸಾತ್ ತಶೆ ದಿಸ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ತಿಂ ನೆಣ್ತಿಂ. ತೆಂಚ್ ತಾಂಚಿಂ ಆವಯ್ ಬಾಪಯ್.....?"
ಲಾಂಬ್ ಉಲಯಿಲ್ಲೆಂ ಮಿಶೇಲ್ ಮೌನ್ ಜಾಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ತ್ಯಾ ತಾಚ್ಯಾ ಒಮ್ಜೂರ್ಚಾ ಮಾಡಿಯೆ ತೊಟಾಂತ್ ಧಾಂವ್ ಮಾರ್ಚಿಂ ತಿಂ ನೆಣ್ತಿಂ ಭುರ್ಗಿಂ ಲಾಯ್ಡ್ ಆನಿ ಲವೀನಾ, ತ್ಯಾ ಶೀನಾಚೆಂ ಬಾಯ್ಲ್ ಜಾನಕಿ ಆನಿ ತಿ ರಸ್ತ್ಯಾ ದೆಗೆಚಾ ಶೆತಾಂತ್ ರಾಂದ್ವಯೆಂತ್ ಚರವ್ ಮ್ಹಣೊನ್ ಚರ್ಚಿ ಗಾಯ್, ಎಕಾ ಪಾಟ್ಲ್ಯಾನ್ ಏಕ್ ಪಿಂತುರಾ ಭಾಶೆನ್ ದಿಸಾಲಾಗ್ಲಿಂ.
"ತರ್ ಜಿಮ್ಮಿನ್ ಉಲಯಿಲ್ಲ್ಯಾಂತ್......?"
ಮಿಶೆಲಾಚಾ ಮೌನತಾ ಮಧೆಂ ಉಲಯಿಲ್ಲ್ಯಾ ಶೀತಲಾನ್, ಆಪ್ಲ್ಯಾ ಉತ್ರಾಂಕ್ ಸಂಪೂರ್ಣ್ ಕೆಲೆಂ ನಾ. ತಾಚಿ ಮತ್ ಆತಾಂ ಜಿಮ್ಮಿಕ್ ನಿಯಾಳುಂಕ್ ಲಾಗ್ಲಿ. ತಾಣೆಂ ಉಲಯಿಲ್ಲ್ಯಾ ಉತ್ರಾಂತ್ ಆಸ್ಲ್ಲೆಂ ಸತ್, ಸವ್ಕಾಸ್ ತಾಚ್ಯಾ ದೊಳ್ಯಾಂ ಮುಕಾರ್ ಉಗ್ಡಾಪೆಂ ಜಾಂವ್ಕ್ ಲಾಗ್ಲೆಂ.
"ಆತಾಂ ತುಕಾ ಜಿಮ್ಮಿಚಾ ಉತ್ರಾಂಚೊ ಮತ್ಲಾಬ್ ಸಮ್ಜಾಲೊ ಆಸ್ತಲೊ...! ಹ್ಯಾ ಖಾತಿರ್ ತುಕಾ ಸತ್ ಸಾಂಗ್ತಾಂ ಶೀತಲ್....!" ಮಿಶೆಲ್ ಪರ್ತ್ಯಾಕ್ ಉಲಯ್ಲೆಂ.
"...... ತ್ಯಾ ದೀಸ್ ರಾಗಾನ್ ತರ್ಯ್ ಜಿಮ್ಮಿನ್ ಉಲಯಿಲ್ಲ್ಯಾಂತ್ ಸತ್ ಆಸಾ. ಹ್ಯಾ ಸತಾ ಥಾವ್ನ್ ತುಕಾ ದುಖ್ಲಾಂ ತೆಂ ಹಾಂವ್ ಜಾಣಾಂ ಆಸ್ಲ್ಲಿಂ. ಪುಣ್ ಸತಾಕ್ ನೆಗಾರ್ ಕರುಂಕ್ ಜಾಯ್ನಾ! ಬೋವ್ಶಾ ಜಿಮ್ಮಿನ್ ತ್ಯಾ ಸೊರ್ಯಾಚೊ ಪರಿಣಾಮ್ ಆಪ್ಲ್ಯಾ ಸಮಾಜೆಂತ್ ಪಳೆಲಾ ಆಸ್ತಲೊ. ದೆಕುನ್ ತೊ ತಸೊ ಉಲಯ್ಲೊ. ತ್ಯಾ ಸೊರ್ಯಾಚೊ ಪರಿಣಾಮ್ ತುವೆಂ ತುಜ್ಯಾ ಸಮಾಜೆಂತ್ ಪಳಂವ್ಕ್ ನಾಂಯ್ ದೆಕುನ್ ತುಕಾ ಆನಿ ಮ್ಹಾಕಾ ತ್ಯಾ ವಿಶಿಂ ಕಾಂಯ್ ಖಬಾರ್ ನಾ!"
ಮಿಶೇಲಾನ್ ಸಾಂಗ್ತಾನಾ ಅಪ್ರಯತ್ನಾನ್ ಮ್ಹಳ್ಳ್ಯಾ ಪರಿಂ ಆಪ್ಲ್ಯಾ ಪಾಂಯಾಂಕ್, ತಾಂಚಾ ಚಲನಾ ಸಕ್ತೆ ವಯ್ರ್ ಖಾಡುಂ ಮಾರುನ್ ರಾವ್ಲೆಲೆಂ ಶೀತಲ್ ಸವ್ಕಾಸ್ ಪಾಟಿಂ ಘುಂವ್ಲೆಂ.
ಪಾಟಿಂ ಘುಂವ್ಲ್ಲ್ಯಾ ತಾಕಾ ಆಪ್ಣಾ ಸಾರ್ಕಿಂ ಸಭಾರ್ ಚಲಿಯೊ ಕಾಲೇಜಿಕ್ ಚಲೊನ್ ಯೆಂವ್ಚಿಂ ದಿಸ್ಲಿಂ ಜಾಲ್ಯಾರ್ಯ್ ತಾಂಚಾ ಮಧೆಂ ತಾಚ್ಯಾ ದೊಳ್ಯಾಂಚಿ ನದರ್ ತ್ಯಾ ಭುರ್ಗ್ಯಾಕ್ ಹಾಂಡಿಯೆರ್ ಘೆತ್ಲೆಲ್ಯಾ ಚೆಡ್ವಾ ವಯ್ರ್ ಗೆಲಿ. ತೆಂ ಚೆಡುಂ ತಾಚ್ಯಾಚ್ ಸಂಸಾರಾಂತ್ ಆಸ್ಲ್ಲೆಂ. ಎಕ್ ಕ್ಷಣ್ ತಾಚ್ಯೆರ್ ನದರ್ ಬೊಂವ್ಡಾವ್ನ್ ಪರ್ತ್ಯಾಕ್ ಶೀತಲ್ ಆಪ್ಲ್ಯಾ ಕಾಲೇಜಿ ತೆವ್ಶಿಂ ಚಲೊಂಕ್ ಲಾಗ್ಲೆಂ.
"ಹ್ಯಾ ಸಂಸಾರಾಂತ್ ಹೊ ಮನಿಸ್ ಸಗ್ಳ್ಯಾಂ ಸವೆಂ ಸಂಭಂಧ್ ಆಸೊನ್ಯೆಕಾಮೆಕಾ ಥಂಯ್ ಕಿತ್ಲೊ ಅಪರಿಚಿತ್!" ಶೀತಲ್ ಆಜ್ ಸತಾಕ್ ಜಾಣಾಂ ಜಾಲ್ಲೆಂ.
ಮಿಶೆಲಾಚಾ ಸಾದ್ಯಾಪಣಾಚೆಂ ಕಾರಾಣ್ ರುಜ್ವಾತಿ ಸವೆಂ ಆಜ್ ಶೀತಲಾಚಾ ದೊಳ್ಯಾಂ ಮುಕಾರ್ ಆಯಿಲ್ಲೆಂ.
ಹ್ಯಾ ಎಕಾ ಹಪ್ತ್ಯಾಚಾ ಆವ್ದೆಂತ್ ಜಿಮ್ಮಿ ನಾತ್ಲ್ಲೊ. ಕಾಲೇಜಿಕ್ ವೆತಾನಾ ಆನಿ ಕಾಲೇಜಿ ಥಾವ್ನ್ ಪಾಟಿಂ ಘರಾ ಯೆತಾನಾ ಮಿಶೇಲಾಕ್ ಆನಿ ಶೀತಲಾಕ್ ಮೆಳ್ಚಾ ವೆಳಾಂತ್ ಸಭಾರ್ ವೇಳ್ ತಾಣಿಂ ಸಂಸಾರಾಕ್ ಸಮ್ಜೊಂಚಾ ದಿಶೆನ್ ವಿಚಾರ್ ವಿಮರ್ಶಾ ಕರುನ್ ಪಾಶಾರ್ ಕೆಲೊ. ತಾಂಚಾ ಮಧೆಂ ಕಸಲ್ಯಾಯ್ ಉಲವ್ಣ್ಯಾಕ್ ಭಂಧಡ್ ನಾತ್ಲ್ಲಿ. ತಾಂಚಾ ಸಂಸಾರಾಂತ್ ಫಕತ್ತ್ ತಿಂ ದೊಗಾಂಚ್ ಜಾಲ್ಲಿಂ.
ಹಪ್ತ್ಯಾ ಉಪ್ರಾಂತ್ ಜಿಮ್ಮಿನ್ ಪರ್ತ್ಯಾಕ್ ಆಪ್ಲ್ಯಾ ಪಯ್ಲೆಂಚಾ ಡ್ಯೂಟೆಕ್ ಹಾತಿಂ ಘೆತ್ಲ್ಯಾ ಉಪ್ರಾಂತ್ಯ್ ತಾಂಚೆಂ ಜೀವನ್ ತಶೆಂಚ್ ಚಲೊಂಕ್ ಲಾಗ್ಲೆಂ. ಫಕತ್ತ್ ತಿಂ ಜಿಮ್ಮಿಚಾ ಮುಕಾರ್ ಮಾತ್ರ್ ಕಾಂಯ್ ಉಲಯ್ನಾತ್ಲ್ಲಿಂ. ಶೀತಲಾಚಾ ಚಿಂತ್ಪಾಂತ್ ಆನಿ ಆಚಾರ್ ವಿಚಾರಾಂತ್ ಮಸ್ತ್ ಬದ್ಲಾವಣ್ ಜಾಲಿ ಜಾಲ್ಯಾರ್ಯ್ ಸಮಾಜೆಕ್ ಸವಾಲ್ ವಿಚಾರುಂಕ್ ವಾ ಆಪ್ಲ್ಯಾ ಬಾಪಾಯ್ಚಾ ಮುಕಾರ್ ತರ್ಕ್ ಮಾಂಡುಂಕ್ ಶೀತಲಾಕ್ ಧಯ್ರ್ ನಾತ್ಲ್ಲೆಂ.
ಮಿಶೇಲ್ ಜಾಲ್ಯಾರ್ಯ್ ತಶೆಂಚ್! ಜಿವಿತಾಚಾ ವಾಟೆರ್ ಪಾಶಾರ್ ಜಾಂವ್ಚಾ ಹರ್ಯೆಕಾ ದಿಸಾಂನಿ ದಾಖವ್ನ್ ದಿಂವ್ಚಾ ಲಿಸಾಂವಾಕ್ ತೆಂ ಬರೆಂಚ್ ಶಿಕ್ಲೆಂ. ಹ್ಯಾ ಶ್ಹೆರಾಂತ್ ತಾಣೆಂ ರಾಂವ್ಚೆಂ ಪರಿಸರ್ ಆನಿ ಹಪ್ತ್ಯಾಕ್ ಏಕ್ ಪಾವ್ಟಿಂ ಆಪ್ಲ್ಯಾ ಆಜ್ಯಾ ಸವೆಂ ತಾಣೆಂ ಭೆಟ್ ದಿಂವ್ಚಾ ತ್ಯಾ ಒಮ್ಜೂರ್ಚಾ ಪರಿಸರಾಚೆಂ ಪೃಕೃತಿ ರೂಪ್ ದೊನ್ಯ್ ತಾತಾಂಚಾ ವಿಭಿನ್ನ್ ರೂಪಾಂಕ್ ಮಿಶೇಲಾಚಾ ದೊಳ್ಯಾಂ ಮುಕಾರ್ ಹಾಡಾಯ್ತಾಲಿಂ.
ದಿಸ್ ಧಾಂವೊನ್ ವರಸ್ ಉಬ್ತಾನಾ, ಮಿಶೇಲಾಚೆಂ ಕಾಲೇಜಿಚೆಂ ಶಿಕಾಪ್ ಸಂಪ್ಲೆಂ. ತಾಕಾ ಆತಾಂ ಜಿವಿತಾಂತ್ ಆಪ್ಣೆ ಕಿತೆಂ ತರ್ಯ್ ಸಾಧನ್ ಕೆಲ್ಲಿ ಖುಶಿ ಲಾಬ್ಲ್ಲಿ ಜಾಲ್ಯಾರ್, ದುಸ್ರ್ಯಾ ಕುಶಿನ್ ತಾಚ್ಯಾ ಕ್ಯಾಥರೀನಾನ್ ಮ್ಯಾಂಚೆಸ್ಟರಾ ಥಾವ್ನ್ ಫೋನ್ ಕರ್ತಾನಾ, ಹರ್ಯೆಕ್ ಪಾವ್ಟಿಂ ವಿಚಾರ್ಚಾ "ಮ್ಹಕಾ ತುಂ ಕೆದ್ನಾಂ ಪಳಂವ್ಕ್ ಯೆತಾಯ್ ಮಿಶೇಲ್?" ವಾ "ಮಿಶೇಲ್.... ತುಕಾ ಪಳಂವ್ಕ್ ಮ್ಹಾಕಾ ಮಸ್ತ್ ಮನ್ ಕರ್ತಾ! ಮ್ಯಾಂಚೆಸ್ಟರಾಕ್ ತುಂ ಕೆದಾಳಾ ಯೆತಾಯ್ ಪುತಾ?" ಮ್ಹಳ್ಳ್ಯಾ ತಿಚ್ಯಾ ಆಶೆಚ್ಯಾ ಸವಾಲಾಂನಿ ಮಿಶೇಲಾಚಾ ಮತಿಂತ್ ಭಗ್ಣಾಂಚಾ ಚಿಂತ್ನಾಂಕ್ ಕದ್ವಳಾಯಿಲ್ಲೆಂ. ತಿಕಾ ಪಳೆಲ್ಲೊ ಉಡಾಸ್ ಪಾಸೊನ್ ಮಿಶೇಲಾಚಾ ಮತಿಂತ್ ಮಾಜ್ವೊನ್ ಗೆಲಾ ಜಾಲ್ಯಾರ್ಯ್ ಬಾಳ್ಶ್ಯಾಪಣಾರ್ ಥಾವ್ನ್ ಆಪ್ಣಾಕ್ ವಿಸ್ರಾನಾಸ್ತಾನಾ ಆಪ್ಣಾಚಿ ಖಬಾರ್ ಘೆಂವ್ಚಿ ಆಪ್ಣಾಚಿ ಆಜಿಯೆ ಸಾರ್ಕಿ ಆಜಿ ಪಯ್ಶಿಲ್ಯಾ ತ್ಯಾ ಮ್ಯಾಂಚೆಸ್ಟರಾಂತ್ ಆಪ್ಣಾಕ್ ಪಳಂವ್ಕ್ ರಾಕೊಣ್ ಅಸಾ ಮ್ಹಣೊನ್ ತೆಂ ಜಾಣಾಂ ಆಸ್ಲ್ಲೆಂ.
"ಆತಾಂ ಆಪ್ಣಾಚೆಂ ಶಿಕಾಪ್ ಜಾಲೆಂ ಆನಿ ಹಾವೆಂ ತಿಕಾ ಮೆಳ್ಯೆತ್! ಯೆದೊಳ್ ಪಾಸೊನ್ ಹಾವೆಂ ತಿಕಾ ದಿಲ್ಲೆಂ ನೀಬ್ಯ್ ಹೆಂಚ್!" ಚಿಂತ್ಚ್ಯಾ ಮಿಶೆಲಾಚಿ ಮತ್ ದುಸ್ರ್ಯಾ ಕುಶಿನ್ "ಹ್ಯಾ ಇತ್ಲ್ಯಾ ವರ್ಸಾಂಚಾ ವೆಗ್ಳಾಚಾರಾ ಥಾವ್ನ್ ತಿಕಾ ಆತಾಂ ಆಪುಣ್ ಮೆಳಾನ್ ಜಾಲ್ಯಾರ್ ಕಿತೆಂ ಆಪುಣ್ ಹಾಂಗಾ ಪಾಟಿಂ ಯೇಂವ್ಕ್ ಪಾವ್ತೆಲಿಂ?" ಹೆಂ ಸವಾಲ್ಯ್ ಮಿಶೇಲಾಚಾ ಮತಿಂತ್ ಭಳಾನ್ ಉಟೊನ್ ರಾವ್ಲ್ಲೆಂ.
ಆಪ್ಣಾಚಾ ಅಧೀನ್ ಅಸ್ಲಲೊ ಫೋಟೋ ಆಲ್ಬಮ್ ಆನಿ ತಾಂತುಂ ಆಸ್ಲೆಲಿ ಕ್ಯಾಥರೀನ್ ತ್ಯಾಚ್ ರುಪಾನ್ ಆಜ್ ಖಂಡಿತ್ ಆಸ್ಚಿ ನಾ. ಹ್ಯಾ ಮ್ಹಜ್ಯಾ ಆಜ್ಯಾ ಆಜಿಯೆ ಪರಿಂ ತಿಚ್ಯಾಯ್ ಹಾತಾ ಪಾಂಯಾಂಚೆಂ ಭಳ್ ಉಣೆಂ ಜಾಲಾಂ ಜಾಂವ್ಕ್ ಪುರೊ. ತಿಚ್ಯಾಯ್ ಕುಡಿಚೆರ್ ಮಾತಾರ್ಪಣಾಚೊ ಘುರ್ತ್ ಜಾವ್ನ್ ಮಿರಿಯೊ ವಾಡ್ಲ್ಯಾತ್ ಜಾಂವ್ಕ್ ಪುರೊ. ತಿಕಾಯ್ ಆಜ್ ಮ್ಹಜೊ ಆಧಾರ್ ಜಾಯ್ ಮ್ಹಣೊನ್ ಭಗ್ತಾ ಜಾಂವ್ಕ್ ಪುರೊ! ಚಿಂತ್ನಾ ಮಿಶೇಲಾಚಾ ಮತಿಂತ್ ಧಾಂವ್ತಾಲಿಂ. ಹ್ಯಾ ಚಿಂತ್ನಾಂಕ್ ಭಳ್ ಕರ್ಚೊ ದೀಸ್ಯ್ ಮಿಶೇಲಾಚಾ ಜಿವಿತಾಂತ್ ವೆಗಿಂಚ್ ಯೆಂವ್ಚಾರ್ ಆಸ್ಲ್ಲೊ. ತಾಚ್ಯಾ ಶಿಕ್ಪಾಚ್ಯಾ ರಿಸಲ್ಟಾಚೊ ದೀಸ್....!
ತ್ಯಾ ಕುಶಿನ್ ಕೆನಡಾಂತ್ ಆಸ್ಚಾ ಜೆರೊಮಾಚಾ ಧುವಾನಿಂ ಆನಿ ಆಸ್ಟ್ರೇಲಿಯಾಂತ್ಲ್ಯಾ ಪುತಾನ್ ಮಿಶೇಲಾಚಾ ಫುಡಾರಾ ವಿಶಿಂ ಖಂತ್ ಉಚಾರುನ್, ತಾಚೆಂ ಶಿಕಾಪ್ ಜಾತಚ್ ತಾಕಾ ತಾಂಚೆ ಸಾಂಗಾತಾ ಆಪವ್ನ್ ವರ್ಚಿ ಇಚ್ಛಾ ದಾಖಯಿಲ್ಲಿ ಜಾಲ್ಯಾರ್ಯ್ ಜೆರೊಮ್ ಆನಿ ಎಸ್ತೆಲ್ ಮಾತ್ರ್ ಖಂಯ್ಚಾಯ್ಕ್ಯ್ ಆನಿ ಕೊಣಾಯ್ಕ್ಯ್ ಆಯ್ಕಾಲಿಂ ನಾಂತ್.
"ಮಿಶೇಲಾಕ್ ತಾಚೆಂ ಜೀವನ್ ಕಾಡುಂಕ್ ಜಾಯ್ ಆಸ್ಚಾ ಪ್ರಾಸ್ ಚಡ್ ಮಾಫಾನ್ ಹಾವೆಂ ಜಮಯ್ಲಾಂ. ಆಮ್ಚೊ ಜೀವ್ ಆಸ್ತಾ ಪಾಸೊನ್ ತಾಣೆಂ ಖಂಯ್ಚರ್ಯ್ ವೆಚಿ ಗರ್ಜ್ ಖಂಡಿತ್ ನಾ. ತ್ಯಾ ಉಪ್ರಾಂತ್....? ತ್ಯಾ ಉಪ್ರಾಂತ್ ತಾಚಿ ಖುಶಿ!" ಜೆರೊಮಾಚಾ ನಿರ್ಧಾರಾಂತ್ ಕಾಂಯ್ ಬದ್ಲಾವಣ್ ನಾತ್ಲ್ಲಿ. ತಾಕಾಯ್ ಆತಾಂ ಮಿಶೆಲಾಚಿ ಖಂತ್ ದೊಸ್ತಾಲಿ. ಪುಣ್ ತಿತ್ಲ್ಯಾ ಸುಲಾಭಾಯೆನ್ ಜೆರೊಮ್ ಆಪ್ಲ್ಯಾ ಫುಡಾರಾಚಾ ಆಧಾರಾಕ್ ಆಪ್ಲ್ಯಾಚ್ ಹಾತಾಂನಿ ಪರ್ಗಾಂವಾಕ್ ಒಪ್ಸುನ್ ದೀಂವ್ಕ್ ತಯಾರ್ ನಾತ್ಲ್ಲೊ.
"ತುಮ್ಕಾಂ.... ತುಮ್ಚಾ ಖಂಯ್ಚಾಯ್ ನಿರ್ಧಾರಾಂತ್ ಹಾಂವೆಂ ಆಡಾಂವ್ಕ್ ನಾ. ತೆದ್ನಾಂ ಮ್ಹಾಕಾ ತಾಂಕ್ತಾಲೆಂ. ಆತಾಂ ಮ್ಹಾಕಾ ತಾಂಕ್ ನಾ ಮ್ಹಣೊನ್ ನ್ಹಯ್. ಪುಣ್ ಸತಾಕ್ ಮಾಂದುನ್ ಘೆಂವ್ಚೆಂ ಮನ್ಶ್ಯಾ ಧರ್ಮ್. ದೆಕುನ್ ಹಾಂವ್ ಮಾಂದುನ್ ಘೆತಾಂ. ತುಮ್ಕಾಂ ಹಾಂವೆಂ ಸಗ್ಳೆಂ ದೀವ್ನ್ ಕುಟ್ಮಾ ಜಿವಿತಾಚಿಂ ಮೊಲಾಂ ಶಿಕಂವ್ಚಾಂತ್ ಉಣೆಂಪಣ್ ಆಧಾರ್ಲಾಂ. ಪುಣ್ ತೆಂ ಉಣೆಂಪಣ್ ಹಾವೆಂ ಮಿಶೇಲಾ ಥಂಯ್ ಭರ್ತಿ ಕೆಲಾಂ. ಹಾಂತುಂ ತೆಂ ಕಿತ್ಲೆಂ ಶಿಕ್ಲಾಂ ಆನಿ ತೆಂ ಕಿತ್ಲೆಂ ಸಮ್ಜಾಲಾಂ ತೆಂ ಹಾಂವ್ ತಾಚ್ಯಾ ವಯ್ರ್ಚ್ ಸೊಡ್ತಾಂ!" ಹ್ಯಾ ಪಾವ್ಟಿಂ ಕ್ರಿಸ್ಮಸಾಚಾ ದಿಸಾಂನಿ ಗಾಂವಾಕ್ ಆಯಿಲ್ಲ್ಯಾ ಪುತಾ ಆನಿ ಸುನೆಕ್ ಖಡಾಖಂಡಿತ್ ಜೆರೊಮಾನ್ ಜವಾಬ್ ದಿಲ್ಲಿ.
ಕೊಣೆಯ್ ಕೊಣಾಯ್ಕ್ಯ್ ದಬಾವ್ ಘಾಲ್ಚಾ ಪರಿಂಚ್ ನಾತ್ಲ್ಲೆಂ. ಜೆರೊಮ್ಯ್ ತಿತ್ಲೊ ಸ್ವಾರ್ಥಿ ನ್ಹಯ್ ಆಸ್ಲ್ಲೊ. ಆಪ್ಣಾಚಾ ಆಜ್ ಯಾ ಫಾಲ್ಯಾಂ ಪಾಲ್ವೊಂಚಾ ಜಿವಾ ಖಾತಿರ್ ಪುಡಾರಾಚಿ ಲಾಂಭ್ ಜಿಣಿ ಜಿಯೆಂವ್ಕ್ ಆಸ್ಚ್ಯಾ ಮಿಶೇಲಾಚೆಂ ಜಿವಿತ್ ಬಲಿಯೆಕ್ ಚಡಂವ್ಚೊ.
ಆತಾಂ ನಿರ್ಧಾರ್ ಮಿಶೇಲಾನ್ ಘೆಂವ್ಕ್ ಆಸ್ಲ್ಲೊ!
***********
ವಿಧ್ಯಾರ್ಥಿ ಜೀವನಾಕ್ ವಿರಾಮ್ ಘಾಲುನ್, ತ್ಯಾ ಮುಕ್ಲ್ಯಾ ಆಪ್ಲ್ಯಾ ಯೆಂವ್ಕ್ ಆಸ್ಚ್ಯಾ ನವ್ಯಾ ಜಿವಿತಾ ವಿಶಿಂ ಚಿಂತ್ಚಾ ಹರ್ಯೆಕಾ ತರ್ನಾಟ್ಯಾಂಕ್, ತಾಂಚ್ಯಾ ಮುಕ್ಲ್ಯಾ ಜಿವಿತಾಚಿ ವಾಟ್ ವಿಂಚ್ಚಿ ಆತುರಾಯ್ ಆನಿ ಉಮೆದ್ ಆಸ್ತಾ. ತಾಂಚ್ಯಾ ಮತಿಂತ್ಲ್ಯಾ ಸಪ್ಣಾಂಕ್ ಸಾಕಾರ್ ಕರುಂಕ್ ತಾಣಿಂ ಕಾಡ್ಲೆಲ್ಯಾ ಕಷ್ಟಾಂಚಾ ಫಳಾಕ್ ಘೆವ್ನ್, ಫುಡಾರ್ ಬಾಂದ್ಚೊ ತಾಂಚೊ ಉದ್ದೇಶ್, ತಾಂಕಾ ತಾಂಚ್ಯಾ ಜಿವಿತಾಕ್ ಏಕ್ ವಾಟ್ ವಿಂಚುಂಕ್ ಲಾಯ್ತಾ ತರ್, ವಿಧ್ಯಾರ್ಥಿ ಜೀವನಾಕ್ ಪಾಟಿಂ ಸಾಂಡ್ಲೆಲೆಂ ಮಿಶೇಲ್ ಆಪ್ಣಾ ಮುಕಾರ್ ವಾಟೊ ಸೊಧ್ತಾಲೆಂ.
ಆಜ್ ತಾಚ್ಯಾ ದೊಳ್ಯಾಂ ಮುಕಾರ್ ಫಕತ್ತ್ ಎಕ್ಚ್ಚ್ ವಾಟ್ ನಾತ್ಲ್ಲಿ.
ತಾಚಿ ಏಕ್ ವಾಟ್ ತಾಕಾ ಮ್ಯಾಂಚೆಟರಾಕ್ ಆಪಯ್ತಾಲಿ ಜಾಲ್ಯಾರ್ ದುಸ್ರಿ ವಾಟ್ ತಾಕಾ ಕೆನಡಾ ಆನಿ ಆಸ್ಟ್ರೇಲಿಯಾ ಆಪಯ್ತಾಲಿ. ಏಕ್ ವಾಟ್ ತಾಕಾ ಒಮ್ಜೂರಾಕ್ ಸ್ವಾಗತ್ ಕರ್ತಾಲಿ ತರ್ ದುಸ್ರಿ ವಾಟ್ ತಾಕಾ ತಾಚ್ಯಾಚ್ ಭಂವ್ತಣಿ ಭೊಂವ್ಡಾಯ್ತಾಲಿ.
ಹ್ಯಾ ವಾಟೆನಿಂ ಮಿಶೇಲಾನ್ ಆಪ್ಲೊ ಫುಡಾರ್ ಸೊಧುಂಕ್ ಆಸ್ಲ್ಲೊ. ಪುಣ್.....
ಪುಣ್, ತಾಚ್ಯೆ ಮುಕಾರ್ ವಿಂಚವ್ಣ್ ನಾತ್ಲ್ಲಿ.
ತಾಚೆ ಕಾಲೇಜಿಚೆ ದೀಸ್ ಕಾಬಾರ್ ಜಾಲ್ಲೆ.
ಜೆರೊಮಾನ್ ಆಪ್ಲ್ಯಾ ನಾತಿಕ್ ತಾಚ್ಯಾ ಫುಡಾರಾಚೊ ನಿರ್ಧಾರ್ ಘೆಂವ್ಚೆಂ ಸಂಪೂರ್ಣ್ ಹಕ್ಕ್ ದಿಲ್ಲೆಂ. ತಾಣೆಂ ಆಪ್ಲ್ಯಾ ನಾತಿಕ್ ಖಂಯ್ಚಾಯ್ ವಿಶಯಾಂತ್ ಆಪ್ಲ್ಯಾಸ್ವಾರ್ಥಾ ಖಾತಿರ್ ಗಳ್ಸುಂಕ್ ನಾತ್ಲ್ಲೆಂ. ಪುಣ್ ಮಿಶೇಲ್.....? ಮಿಶೇಲ್ ಆಪ್ಲ್ಯಾ ಫುಡಾರಾಚ್ಯಾ ಚಿಂತ್ನಾಂನಿ ಗೊಂದೊಳೊನ್ ಜಿವಿತ್ ಸಾರುಂಕ್ ಕಶ್ಟೊನ್ ಆಸ್ತಾಂ,
"ಮಿಶೇಲ್....!?" ಆಪ್ಲ್ಯಾ ಆಜಿಯೆನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕಾಲ್ಯಾರ್ಯ್ ತಿಚ್ಯಾ ತೆವ್ಶಿ ಮಿಶೇಲ್ ಘುಂವ್ಲೆಂ ನಾ. ತಾಚ್ಯಾ ಮತಿಂತ್ ಏಕ್ ವಾದಾಳ್ ಉಟ್ಲ್ಲೆಂ.
"ಮಿಶೇಲ್....? ಪುತಾ ಕಿತೆಂ ಚಿಂತಾಯ್?" ಎಸ್ತೆಲ್ ನಾತಿಚ್ಯಾ ಲಾಗಿಂ ಯೇವ್ನ್ ಬಸ್ಲಿ. ಸವ್ಕಾಸ್ ಆಪ್ಲ್ಯಾ ಹಾತಾಂಕ್ ಮಿಶೇಲಾಚಾ ಮಾತ್ಯಾರ್ ತಿಣೆಂ ಚರಯ್ಲೆ. ಪುಣ್ ಮಿಶೇಲ್ ಮಾತ್ರ್ ಕಾಂಯ್ಚ್ ಪರ್ವಾ ನಾತ್ಲೆಲ್ಯಾ ಪರಿಂ ಆಪ್ಲ್ಯಾ ನಿದ್ಚ್ಯಾ ಕೂಡಾಚಾ ಉಗ್ತೆಂ ಆಸ್ಲ್ಲ್ಯಾ ಜನೆಲಾ ಥಾವ್ನ್ ಭಾಯ್ರ್ ಪಳವ್ನ್ ರಾವ್ಲ್ಲೆಂ ತೆಂ ಹಾಲ್ಲೆಂ ನಾ.
"ಪಳೆ ಮಿಶೇಲ್....!, ತುಂ ಜರ್ ಆಶೆಂ ಕರ್ಶಿ ತರ್ ಮ್ಹಾಕಾಚ್ ಹ್ಯಾ ಸಮಸ್ಯಾಕ್ ಕಾಂಯ್ ತರ್ಯ್ ವಾಟ್ ಸೊಧುಂಕ್ ಪಡ್ತೆಲಿ!"
"ಶೀತಲ್ ಕೆದಾಳಾಯ್ ಸಾರ್ಕೆಂಚ್ ಸಾಂಗ್ತಾಲೆಂ ಮಾಂಯ್.....!" ಆಜಿಯೆಚಾ ಚಿಂತಾಪ್ ಆನಿ ಮಿಶೇಲಾಚೆಂ ಚಿಂತಾಪ್ ಸಂಪೂರ್ಣ್ ವೆಗ್ಳೆಂ. ಮಿಶೇಲ್ ಆಪ್ಲ್ಯಾಚ್ ಸಂಸಾರಾಂತ್ ಘುಂವೊನ್ ಆಸ್ಲ್ಲೆಂ.
"ಶೀತಲ್.....?" ಎಸ್ತೆಲಾಕ್ ಆಶ್ಚರ್ಯ್ ಜಾಲೆಂ. ತಿಚ್ಯೆ ದೊಳೆ ರುಂದಾಲೆ. "......ಕಿತೆಂ ಸಾಂಗ್ತಾಲೆಂ ಶೀತಲ್?" ದುಬಾವಾನ್ ಮ್ಹಳ್ಳ್ಯಾ ಪರಿಂ ತಿಣೆಂ ವಿಚಾರ್ಲೆಂ.
"ಚಲಿ ಆಪ್ಲ್ಯಾ ಜಿವಿತಾ ಮೆಟಾಂನಿ ಇತ್ಲೆಂಯ್ ಲಾಚಾರ್ ಕಿತ್ಯಾಕ್ ಜಾತಾ?" ಮಿಶೇಲಾನ್ ಆಪ್ಲ್ಯಾ ಆಜಿಯೆಕ್ ಸವಾಲ್ ಉಡಯ್ಲೆಂ.
"ಆತಾಂ ಜಾಲಾಂ ಕಿತೆಂ?" ಎಸ್ತೆಲಾನ್ ಪಾಟಿಂ ಸವಾಲ್ ಕೆಲೆಂ. ತಿಕಾ ತಿಚ್ಯಾ ನಾತಿಚಾ ಆಯ್ಚ್ಯಾ ಹ್ಯಾ ಭರ್ತಾವಾಚೆಂ ಕಾರಾಣ್ ಸಮ್ಜಾಲೆಂ ನಾ.
ಮಿಶೇಲ್ ಕಾಂಯ್ಚ್ ಉಲಯ್ಲೆಂ ನಾ.
"ಪಳೆ ಮಿಶೇಲ್!" ಎಸ್ತೆಲ್ ಉಲಯ್ಲಿ. "ತುಂ ಜರ್ ತುಜ್ಯಾ ಫುಡಾರಾ ವಿಶಿಂ ಚಿಂತಾಯ್ ತರ್ ಹಾಂವ್ ತುಕಾ ಕಾಂಯ್ ಸಾಂಗಾನಾ. ಕಿತ್ಯಾಕ್ ಮ್ಹಳ್ಯಾರ್ ಹೊ ನಿರ್ಧಾರ್ ಘೆಂವ್ಚೆಂ ಹಕ್ಕ್ ಫಕತ್ತ್ ತುಜೆಂ. ಜರ್ ತುಂ ಆಯ್ಚಾ ಹ್ಯಾ ದಿಸಾಚ್ಯಾ ವಿಶಿಂ ಉಲಯ್ತಾಯ್ ತರ್, ಆಜ್ ತುವೆಂ ಖುಶಿ ಪಾವೊಂಕ್ ಜಾಯ್. ಇತ್ಲ್ಯಾ ವರ್ಸಾಂನಿ ತುವೆಂ ಕಾಡ್ಲೆಲ್ಯಾ ತುಜ್ಯಾ ಮ್ಹಿನತೆಚೊ ಫಳ್ ತುಕಾ ಲಾಬ್ಲಾ. ತುಂ ಇತ್ಲ್ಯಾ ಬರೆಂ..... ತೆಂಯ್ ಉಂಚ್ಲ್ಯಾ ವರ್ಗಾಂತ್ ತುಂ ಉತ್ತೀರ್ಣ್ ಜಾಲಾಂಯ್ ಮ್ಹಣ್ತಾನಾ, ತುವೆಂ ಆಜ್ ಖುಶಿ ಪಾಂವ್ಚೆಂ ಸೊಡುನ್ ಹೆಂ ಕಿತೆಂ ಮಾತ್ಯಾರ್ ಜಡಾಯ್ ಘೆವ್ನ್ ಬಸ್ಲಾಂಯ್? ಮ್ಯಾಂಚೆಸ್ಟರ್ ಫೋನ್ ಕೆಲಾಂಯ್ ತುವೆಂ? ಚಲ್....! ತುಕಾ ಹಾಂವ್ ಕಶಿ ಆಜಿ ತಶಿಚ್ಚ್ ತ್ಯಾ ಮ್ಯಾಂಚೆಸ್ಟರಾಂತ್ಯ್ ತುಜಿ ಏಕ್ ಆಜಿ ಆಸಾ. ತಿ ತುಜ್ಯಾ ಬರ್ಯಾಪಣಾಕ್ ಕಿತ್ಲೆಂ ಆಶೆತಾ....! ವಚ್ ವಚ್! ತಿಕಾ ಫೋನ್ ಕರ್....!"
ಎಸ್ತೆಲಾನ್ ಉಲವ್ನ್ ಆಖೇರ್ ಕರ್ತಾನಾ, ಎದೊಳ್ ವರೇಗ್ ಆಪ್ಲಿ ದೀಷ್ಟ್ ಆಪ್ಲ್ಯಾ ಕೂಡಾಚಾ ಜನೆಲಾ ಭಾಯ್ರ್ ಕೇಂದ್ರೀಕ್ರತ್ ಕೆಲ್ಲೆಂ ಮಿಶೇಲ್ ಆತಾಂ ಸವ್ಕಾಸ್ ಆಪ್ಲಿ ತಕ್ಲಿ ಆಜಿಯೆ ತೆವ್ಶಿಂ ಘುಂವ್ಡಾವ್ನ್ ಏಕ್ ಕ್ಷಣ್ ತಾಣೆಂ ದೀನ್ಪಣಿ ಆಪ್ಲ್ಯಾ ಆಜಿಯೆಚಾ ದೊಳ್ಯಾಂಕ್ಚ್ ಪಳೆಲೆಂ ತರ್ಯ್ ವೆಗಿಂಚ್ ತಾಚಿ ನದರ್ ಸಕಯ್ಲ್ ಗಳೊನ್ ಆಪ್ಲ್ಯಾ ಹಾತಾಂಕ್ ಪಳೆಲಾಗ್ಲಿ. ತ್ಯಾ ನದ್ರೆಂತ್ ತಿತ್ಲೆಂ ಧಯ್ರ್ ನಾತ್ಲ್ಲೆಂ.
ತಕ್ಲಿ ಬಾಗಾವ್ನ್ಚ್ ಆಪ್ಲ್ಯಾ ಹಾತಾಚಾ ಬೊಟಾಂಕ್ ವೊಳಾಂವ್ಚಾ ಮಿಶೇಲಾನ್ ಉತ್ರಾಂ ವಿಂಚ್ಲಿಂ.
"ಮಾಂಯ್......? ಏಕ್ ಪಾವ್ಟಿಂ ಆಮ್ಕಾಂ ಮ್ಯಾಂಚೆಸ್ಟರಾಕ್ ವಚೊನ್ ಯೇಂವ್ಕ್ ಸಾದ್ಯ್ ಜಾಂವ್ಚೆಂ ನಾ?"
ಮಿಶೇಲಾಚಾ ಮತಿಂತ್ ಕಿತೆಂ ಘುಂವ್ತಾ ತೆಂ ಎಸ್ತೆಲಾಕ್ ಸಮ್ಜೊಂಕ್ ಕಷ್ಟ್ ಮಾರ್ತಾಲೆ. ಪುಣ್ ಮಿಶೇಲ್ ಆಪ್ಲ್ಯಾ ಮತಿಂತ್ ಭಿತರ್ಲ್ಯಾ ಭಿತರ್ ಕಸಲ್ಯಾಗೀ ಸಿಂತಿಮೆಂತಾನಿ ಬುಡೊನ್ ತಾಚಿಂ ಭಗ್ಣಾಂ ಸಾಂಗೊಂಕ್ ಜಾಯ್ನಾಸ್ತಾನಾ ವದ್ದಡ್ತಾ ತಶೆಂ ಎಸ್ತೆಲಾಕ್ ದಿಸ್ತಾಲೆಂ. ಆಪ್ಲ್ಯಾ ಬಾಪಾಯ್ಚಾ ಕುಟ್ಮಾಂತ್ ತೆಂ ಆಜ್ ಆಸ್ತಾನಾ ತಾಣೆಂ ಪಳಯ್ನಾತ್ಲೆಲ್ಯಾ ತ್ಯಾ ತಾಚ್ಯಾ ಆವಯ್ಚಾ ಕುಟ್ಮಾ ವಿಶಿಂ ತೆಂ ಚಿಂತಾಲೆಂ. ತಾಚೊ ಆನಿ ತಾಚ್ಯಾ ಆವಯ್ಚಾ ಕುಟ್ಮಾಚೊ ಸಂಭಂಧ್ ಕೆದಾಳಾಗೀ ತುಟೊನ್ ಗೆಲ್ಲೊ. ಆತಾಂ ಆಸಾ ಮ್ಹಳ್ಯಾರ್ ಕ್ಯಾಥರೀನ್ ಮಾತ್ರ್. ತಿಚ್ಯಾ ಮೊವಾಳ್ ಉತ್ರಾಂನಿ ತಿಣೆಂಯ್ ಮಿಶೆಲಾ ವಯ್ರ್ ಮೋಗ್ ವ್ಹಾಳಯ್ಲಾ. ಆಶೆಂ ಆಸ್ತಾನಾ ಆಜ್ ಮಿಶೇಲ್ ಕ್ಯಾಥರೀನಾ ವಿಶಿಂ ಚಿಂತಾ ಜಾಲ್ಯಾರ್ ತಾಂತುಂ ಕಾಂಯ್ ನವಾಲ್ ನಾ.
"ಬರೆಂ!" ಮ್ಹಳ್ಳ್ಯಾ ಎಸ್ತೆಲಾನ್ ".......ಹಾಂಗಾ ಮ್ಹಾಕಾ ಪಳೆ!" ಮಿಶೇಲಾಚಾ ಖಾಡ್ಕೆಕ್ ಆಪ್ಲ್ಯಾ ಹಾತಾಂನಿ ಧರುನ್ ವಯ್ರ್ ಉಕೊಲ್ಲೆಂ.
"ತುಕಾ ಮ್ಯಾಂಚೆಸ್ಟರಾಕ್ ಕಿತ್ಯಾಕ್ ವಚೊಂಕ್ ಜಾಯ್.....?" ಎಸ್ತೆಲಾನ್ ಮಿಶೇಲಾಚಾ ದೊಳ್ಯಾಂಕ್ಚ್ ಪಳೆಲೆಂ.
ಮಿಶೇಲಾಚಾ ತೊಂಡಾ ಥಾವ್ನ್ ಕಾಂಯ್ ಉತ್ರಾಂ ಸುಟ್ಲಿಂ ನಾಂತ್.
"ಸಾಂಗ್ ಮಿಶೇಲ್...... ಉಲಯ್!"
ಮಿಶೇಲಾಚಿ ತಕ್ಲಿ ಬಾಗ್ವೊನ್ ತಾಚಿ ನದರ್ ಧರ್ಣಿಕ್ ಪಳೆತಾಲಿ ಶಿವಾಯ್ ಮಿಶೇಲಾನ್ ಕಾಂಯ್ ಜವಾಬ್ ದಿಲಿ ನಾ.
"ತುಂ ತುಜ್ಯಾ ಫುಡಾರಾ ವಿಶಿಂ ಚಿಂತಾಯ್ ಜಾಲ್ಯಾರ್.... ಆನಿ ಹಾಂಗಾಸರ್ ತುಕಾ ತುಜ್ಯಾ ಫುಡಾರಾಚೆಂ ಕಾಂಯ್ ಜಾಂವ್ಚೆಂ ನಾ ಮ್ಹಣೊನ್ ತುಕಾ ಭೊಗ್ತಾ ಜಾಲ್ಯಾರ್ ತುಜೊ ಕಸಲೊಯ್ ನಿರ್ಧಾರ್ ಆಸಾ ಜಾಲ್ಯಾರ್ ಸಾಂಗ್. ತುಜ್ಯೆ ವರ್ನಿಂ ವರ್ತೆಂ ಆಮ್ಕಾಂ ದುಸ್ರೆಂ ಕಾಂಯ್ ನಾ ಪುತಾ.....!" ಎಸ್ತೆಲಾಚೊ ತಾಳೊ ಬದ್ಲುನ್ ಯೆತಾ ತಶೆಂ ಮಿಶೇಲಾಕ್ ಭೊಗ್ಲೆಂ.
"ತಶೆಂ ನ್ಹಯ್ ಮಾಂಯ್!" ಆಜಿಯೆಚಿಂ ಉತ್ರಾಂ ಆಯ್ಕೊನ್ ಮಿಶೆಲಾಚೆಂ ಕಾಳಿಜ್ ಭರೊನ್ ಆಯ್ಲೆಂ.
"ಮಾಗಿರ್ ಕಿತೆಂ? ತುಜ್ಯಾ ಮತಿಂತ್ ಕಿತೆಂಯ್ ಆಸ್ಲ್ಯಾರ್ ತುಕಾ ಸಾಂಗೊಂಕ್ ಜಾಯ್ನಾ.....!"
"ಕಾಂಯ್ ನಾ ತೆಂ ಸೊಡ್ಯಾಂ...!" ಮಿಶೇಲಾನ್ ಹಾಸ್ಚೆಂ ಪ್ರಯತ್ನ್ ಕೆಲೆಂ.
ಹ್ಯೊ ತಾಚ್ಯೊ ಕೃತಕ್ ಹಾಸೊ ಮ್ಹಣೊನ್ ಎಸ್ತೆಲಾಕ್ ಕಳಾನಾಸ್ತಾನಾ ಗೆಲೆಂ ನಾ. ಆಪ್ಲ್ಯಾ ನಾತಿಕ್ ಕಶೆಂ ತರ್ಯ್ ತಿ ಖುಶಿ ದವರುಂಕ್ ಆಶೆತಾಲಿ. ತಾಣೆಂ ಆಶೆಂ ಖಂತೀಶ್ಟ್ ಜಾಂವ್ಚೆಂ ತಿಕಾ ಪಸಂದ್ ನಾತ್ಲ್ಲೆಂ. ಹ್ಯಾ ಖಾತಿರ್ ತಿ ಮೌನ್ ಜಾಲಿ.
"ತರ್ ಹಾಂಗಾ ಕಿತ್ಯಾಕ್ ಬಸ್ಲಾಂಯ್? ಊಟ್ ಊಟ್! ಚೆಡ್ವಾಂನಿ ಕೆದಾಳಾಯ್ ಸುಡ್ಸುಡೀತ್ ಆಸೊಂಕ್ ಜಾಯ್!"
"ಹಾಂವ್ ಮ್ಯಾಂಚೆಸ್ಟರ್ ಏಕ್ ಫೋನ್ ಕರ್ತಾಂ!" ಬೆಡ್ಡಾರ್ ಆಸ್ಲ್ಲ್ಯಾ ಸೆಲ್ಫೋನಾಕ್ ಸೊಧುನ್ ಹಾತಿಂ ಘೆತ್ಲೆಲೆಂ ಮಿಶೇಲ್ ಉಲಯ್ಲೆಂ.
"ಬರೆಂ! ಹಾಂವೆಯ್ ತಾಂಕಾ ಸಗ್ಳ್ಯಾಂಕ್ ವಿಚಾರ್ಲಾಂ ಮ್ಹಣೊನ್ ಸಾಂಗ್!" ಎಸ್ತೆಲಾನ್ ಹಾಸೊನ್ ಸಾಂಗ್ತಾನಾ, ಮಿಶೇಲಾನ್, ಆಪ್ಲ್ಯಾ ಸೆಲ್ಫೋನಾರ್ ಆಸ್ಲೆಲೆಂ ಕ್ಯಾಥರೀನಾಚೆಂ ನಂಬರ್ ಡಯಲ್ ಕೆಲೆಂ.
ಫೋನ್ ತ್ಯಾ ಕುಶಿನ್ ರಿಂಗ್ ಜಾತಾಲೆಂ.
ಸುಮಾರ್ ವೇಳ್ ರಿಂಗ್ ಜಾಲ್ಲೆಂ ಫೋನ್ ನಿಮಾಣೆಂ ಬಂದ್ ಜಾಲೆಂ. ತ್ಯಾ ಕುಶಿನ್ ಕೊಣೆಂಯ್ ಫೋನ್ ಕಾಡುಂಕ್ ನಾ.
"ಬೋವ್ಶಾ ಕಾಂಯ್ ಕಾಮಾರ್ ಆಸಾತ್ ಆಸ್ತೆಲಿಂ" ಚಿಂತ್ಲೆಲ್ಯಾ ಮಿಶೇಲಾನ್ ಪರ್ತ್ಯಾಕ್ ನಂಬರ್ ಡಯಲ್ ಕೆಲೆಂ.
"ಕಿತೆಂ ಜಾಲೆಂ? ನಂಬರ್ ಲಾಗಾನಾ?" ನಾತಿಚ್ಯಾ ಬದ್ಲಾಲ್ಲ್ಯಾ ತೊಂಡಾಚ್ಯಾ ಛಾರ್ಯಾಕ್ ಪಳೆಲ್ಲ್ಯಾ ಎಸ್ತೆಲಾಕ್ ದುಬಾವ್ ಜಾಲೊ.
"ನಂಬರ್ ರಿಂಗ್ ಜಾತಾ! ಕೊಣ್ಯ್ ಕಾಡಿನಾಂತ್....!" ಮಿಶೇಲಾನ್ ಎಸ್ತೆಲಾಕ್ ಸಾಂಗ್ತಾನಾ.....
ತ್ಯಾ ಕುಶಿನ್ ಫೋನ್ ಕಾಡ್ಲಲೊ ಆವಾಜ್...!
"ಹಲೋ....!"
ತ್ಯಾ ಕುಶಿನ್ ಚಲ್ಯಾಚೊ ತಾಳೊ ಆಯ್ಕೊನ್ ಆಯ್ಲೊ.
"ಹಲೋ... ಅಲೆಕ್ಸ್...!" ಮಿಶೇಲಾನ್ ತ್ಯಾ ತಾಳ್ಯಾಚಿ ವಳಕ್ ಧರ್ಲಿ.
"ಹಾಂ ಮಿಶೇಲ್ ತುಂ ಕಶೆಂ ಆಸಾಯ್?"
"ಆಸಾಂ... ಬರಿಂ ಆಸಾಂ! ತುಂ ಕಸೊ ಆಸಾಯ್?"
"ಬರೊಂ ಆಸಾಂ.... ಕಿತೆಂ ಖಬಾರ್?"
"ಕಾಂಯ್ ನಾ ಆಶೆಂಚ್! ಮಾಮ್ಮಿ ನಾ? ತಿಚೊ ಉಡಾಸ್ ಆಯ್ಲೊ.... ತಶೆಂ ಫೋನ್ ಕೆಲೆಂ!"
"ಥ್ಯಾಂಕ್ಸ್ ಮಿಶೇಲ್! ಪುಣ್.... ಮಾಮ್ಮಿ...."
ಅಲೆಕ್ಸಾಚಿಂ ಮುಕ್ಲಿಂ ಉತ್ರಾಂ ಮಿಶೇಲಾಚ್ಯಾ ಕಾನಾಂತ್ ಘಡ್ಗಡ್ಯಾ ಪರಿಂ ಘಾಜ್ಲಿಂ.
"ಕೆದಾಳಾ..?"
"ಆದ್ಲ್ಯಾ ಮಹಿನ್ಯಾಂತ್.... ಬಾರಾ ತಾರಿಕೆರ್...."
"ಮೈ ಗಾಡ್! ಮ್ಹಾಕಾ ಕೊಣೆಯ್ ಏಕ್ ಸಬ್ದ್ ಸಾಂಗೊಂಕ್ ನಾ?"
"ಮಾಮ್ಮಿಕ್......"
ತ್ಯಾ ಕುಶಿಂನ್ ಆಲೆಕ್ಸ್ ಉಲಯ್ತಾಲೊ. ತಾಚಿಂ ಉತ್ರಾಂ ಮಿಶೇಲಾಚಾ ಕಾನಾಕ್ ಪಡ್ತಾಲಿಂ. ತಾಕಾ ಆತಾಂ ಕಾಂಯ್ಚ್ ಸಮ್ಜಾನಾ ಜಾಲೆಂ. ಕಾಳ್ಜಾಂತ್ಲೆ ಉಮಾಳೆ ಭರೊನ್ ವೊಮ್ತೊಂಕ್ ಲಾಗ್ತಾನಾ ಮಿಶೇಲಾಚಾ ದೊಳ್ಯಾಂನಿ ದುಖಾಂಚ್ಯೊ ಝರಿ ಪುಟ್ಲ್ಯೊ. ತಾಕಾ ಮುಕಾರ್ ಕಾಂಯ್ಚ್ ಉಲಂವ್ಕ್ ಸಾದ್ಯ್ ಜಾಲೆಂ ನಾ.
"ಹಾಂವ್.... ತುಕಾ.... ಅ... ಅ... ಅನ್ಯೇಕ್ ಪಾವ್ಟಿಂ ಪೋನ್ ಕರ್ತಾಂ!"
ಫೋನ್ ಡಿಸ್ಕನೆಕ್ಟ್ ಕೆಲ್ಲೆಂ ಮಿಶೇಲ್ ಬೆಡ್ಡಾಚೆರ್ ವೊಮ್ತೆಂ ಪಡ್ಲೆಂ. ತಾಚ್ಯಾ ಕಾಳ್ಜಾಂತ್ ಆಸ್ಲೆಲ್ಯಾ ಸಂಭಂಧಾಚಾ ಭಾಂದಾಚೊ ಕಾಟ್ ತುಟೊನ್, ತ್ಯಾ ಕಾಟಾ ಭಿತರ್ಲಿಂ ಸಿಂತಿಮೆಂತಾಂ ದುಖಾಂ ಜಾವ್ನ್, ತಾಚ್ಯಾ ದೊಳ್ಯಾಂ ಥಾವ್ನ್ ಗಳೊನ್ ಖಾಟಿಯೆರ್ ಪಡೊಂಕ್ ಲಾಗ್ಲಿಂ.
"ಮಿಶೇಲ್! ಕಿತೆಂ ಜಾಲೆಂ ಪುತಾ?"
ನಾತಿಚೆಂ ವರ್ತನ್ ಎಸ್ತೆಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ ಜಾಲ್ಯಾರ್ಯ್ ತಿಕಾ ಮಾತ್ರ್ ನಾತಿಚ್ಯಾ ಅಚಾನಕ್ ಬದ್ಲಾಲ್ಲ್ಯಾ ಜಿನೊಸಾಚೆರ್ ಆನಿ ತಾಚ್ಯಾ ರಡ್ಣ್ಯಾಚೆರ್ ದುಬಾವ್ ಮಾರ್ಲೊ.
"ಪುತಾ ಮಿಶೇಲ್ ಕಿತೆಂ ಜಾಲೆಂ?" ಮಿಶೇಲಾಕ್ ಆಪ್ಲ್ಯಾ ಹಾತಾಂನಿ ಪರ್ತೊಂಚೆಂ ನಿರ್ಫಳ್ ಪ್ರಯತ್ನ್ ತಿಣೆಂ ಕೆಲೆಂ.
ಸುಮಾರ್ ವೇಳ್ ತಶೆಂಚ್ ಆಪ್ಲ್ಯಾ ತೊಂಡಾಕ್ ಹಾತ್ ದರುನ್ ರಡ್ಲೆಲೆಂ ಮಿಶೇಲ್ ಥೊಡ್ಯಾ ವೆಳಾನ್,
"ಮಾಂಯ್....?" ತಶೆಂಚ್ ತೆಂ ದೊಳೆ ದಾಂಪುನ್ ಖಾಟಿಯೆರ್ ಹುಸ್ಕಾರ್ಲೆಂ.
"ಹಾಂ ಸಾಂಗ್ ಪುತಾ.... ಕಿತೆಂ ಜಾಲೆಂ? ಕಾಂಯ್ .....?"
"ಕ್ಯಾಥರೀನ್......." ಮುಕಾರ್ ಮಿಶೇಲ್ ಉಲಯ್ಲೆಂ ನಾ.
"ಹಾಂ! ಕಿತೆಂ ಜಾಲೆಂ ಕ್ಯಾಥರೀನಾಕ್?"
"ತಿ ಸರ್ಲ್ಯಾ ಮಾಂಯ್!"
"ಕ್ಯಾಥರೀನ್ ಸರ್ಲೆಂ.....?" ಎಕಾಚ್ಚ್ ಫರಾ ಎಸ್ತೆಲಾನ್ ಆಪ್ಲ್ಯಾ ನಾತಿಕ್ ಧರ್ಲೆಲೆ ಹಾತ್ ಸೊಡ್ಲೆ.
"ಕೆದಾಳಾ.....?" ತಿ ನೀಟ್ ಜಾಲಿ.
"ಆದ್ಲ್ಯಾ ಮಹಿನ್ಯಾಚಾ ಬಾರಾ ತಾರಿಕೆರ್!"
"ಆದ್ಲ್ಯಾ ಮಹಿನ್ಯಾಂತ್....! ಆನಿ ಆಮ್ಕಾಂ ಕಾಂಯ್ ಖಬಾರ್ ಪಾಸೊನ್ ನಾ?"
"ಕಿತೆಂ ಜಾಲ್ಲೆಂ ಖಂಯ್ ತಿಕಾ?" ಸವ್ಕಾಸ್ ಎಸ್ತೆಲ್ ಆತಾಂ ನಾತಿಚಾ ಬಗ್ಲೆಕ್ ಬಸ್ಲಿ.
"ಹಾರ್ಟ್ ಅಟ್ಯಾಕ್!"
ಬೆಡ್ಡಾರ್ ವೊಮ್ತೆಂ ಪಡೊನ್ ಸುಸ್ಕಾರ್ ಸೊಡ್ಚಾ ಮಿಶೇಲಾಕ್ ಪಳವ್ನ್ ಎಸ್ತೆಲಾಕ್ ಭಿರ್ಮತ್ ದಿಸ್ಲಿ.
"ಮಿಶೇಲ್!" ರಡಾನಾಕಾ ಪುತಾ..... ಮೆಲ್ಲಿಂಚ್ ಸುಭಾಗಿ! ತಿಚ್ಯೆ ಖಾತಿರ್ ಮಾಗ್ಚೆ ಶಿವಾಯ್ ರಡೊನ್ ಕಾಂಯ್ ಫಾಯ್ದೊ ನಾ. ಆಯ್ಕ್....! ಪುತಾ ಮಿಶೇಲ್....!" ತಿ ನಾತಿಕ್ ಸಮಾಧಾನ್ ಕರುಂಕ್ ಲಾಗ್ಲಿ.
ಕಿತ್ಲೊ ವೇಳ್ ಮಿಶೇಲ್ ತಶೆಂಚ್ ರಡೊನ್ ರಾವ್ಲ್ಲೆಂ ತೆಂ ತೆಂಚ್ ನೆಣಾಂ. ದೊಳ್ಯಾಂ ಥಾವ್ನ್ ದೆಂವೊನ್ ಗೆಲ್ಲಿಂ ದುಖಾಂ ಮತಿಕ್ ಆನಿ ಕಾಳ್ಜಾಕ್ ಹಳು ಕರ್ತಾನಾ ಆಪ್ಲೆಸ್ತಕಿಂ ಮಿಶೇಲಾಚೆಂ ರಡ್ಣೆಂ ಥಾಂಬ್ಲೆಂ.
ಮಿಶೇಲಾಕ್, ಆಜ್ ಪರ್ತ್ಯಾಕ್ ಆಪ್ಣಾಚಾ ಎಕಾ ಲಾಗ್ಶಿಲ್ಯಾಕ್ ಹೊಗ್ಡಾಯಿಲ್ಲೊ ಅನುಭವ್ ಜಾಲೊ. ದೊಳ್ಯಾಂ ಭಾಯ್ರ್ ಆಸೊನ್ಯ್ ಸಾಂಬಾಳುನ್ ವೆಲ್ಲೊ ಸಂಭಂಧ್ ತುಟೊನ್ ವಚೊನ್ ಕೆದಾಳಾಗೀ ಅನಂತಾ ಸವೆಂ ವಿಲೀನ್ ಜಾಲ್ಲೊ. ಮನ್ಶ್ಯಾಚೆಂ ಜಿವಿತ್ಯ್ ವಿಚಿತ್ರ್! ಜಿಣಿ ಭರ್ ಕಿತೆಂ ಜೊಡುಂಕ್ ಹೊ ಮನಿಸ್ ವೊದ್ದಾಡ್ತಾ ತ್ಯಾಚ್ ವಾಟೆರ್ ಏಕ್ ದೀಸ್ ಆಪ್ಲೆಂ ಅಸ್ಥಿತ್ವ್ ಸಾಂಡುನ್ ನಪಂಯ್ಚ್ ಜಾತಾ. ಜಶೆಂ ಜಯ್ತ್ ಜಿವ್ದಾಳ್ ಆಪ್ಲ್ಯಾ ಆಂಗಾಚೆಂ ಕರ್ಲ್ ನಿಸ್ರಾಯ್ತಾ ತಶೆಂ. ಕರ್ಲಾ ಭಿತರ್ಲೂ ಜೀವ್ ಉಭೊನ್ ಗೆಲ್ಯಾ ಉಪ್ರಾಂತ್ ತ್ಯಾ ಕರ್ಲಾಕ್ಯ್ ಕಿತೆಂ ಮೋಲ್ ಆಸಾ?
ಕ್ಯಾಥರೀನಾಚಾ ಮರ್ಣಾಕ್ ಆನಿ ಆಪ್ಲ್ಯಾ ಕಾಳ್ಜಾ ಭಿತರ್ಲ್ಯಾ ದುಖಾಕ್ ವಿಸ್ರೊಂಚೆಂ ಮಿಶೇಲಾಕ್ ತಿತ್ಲೆಂ ಸುಲಭ್ ನಾತ್ಲ್ಲೆಂ. ಹ್ಯಾ ಆದಿಂ ಹರ್ಯೆಕ್ ಪಾವ್ಟಿಂ ತಿಚೆಂ ಫೋನ್ ಯೆತಾನಾ ಮಿಶೇಲ್ ಮಸ್ತ್ ಖುಶಿ ಜಾತಾಲೆಂ. ತ್ಯಾ ಫೋನಾ ವಯ್ಲ್ಯಾ ತಿಚ್ಯಾ ಭರ್ವಶ್ಯಾಚಾ ಉತ್ರಾಂಕ್ ತೆಂ ಆಪ್ಲ್ಯಾ ಮತಿಂತ್ ಆಟಯ್ತಾಲೆಂ. ಪುಣ್ ಹ್ಯಾ ಉಪ್ರಾಂತ್.....?
ಹ್ಯಾ ಉಪ್ರಾಂತ್ ಆಪ್ಣಾಕ್ ಕ್ಯಾಥರೀನಾಚೆಂ ಫೋನ್ ಯೆಂವ್ಚೊ ಸಂಭವ್ಚ್ಚ್ ನಾ ತೆಂ ಕಳ್ತಾನಾ ಮಿಶೇಲ್ ಭಿತರ್ಲ್ಯಾ ಭಿತರ್ಚ್ಚ್ ಮುರ್ಗೊಟೊನ್ ರಡಾಲಾಗ್ಲೆಂ. ತಿಚ್ಯಾ ಉಸ್ಕ್ಯಾರ್ ಥಾವ್ನ್ ಮಂಗ್ಳುರಾಕ್ ತಿಣೆಂ ಮಿಶೆಲಾಕ್ ದಾಡುನ್ ದಿತಾನಾ ತಾಚ್ಯೆ ಸಾಂಗಾತಾ ದಾಡ್ಲೆಲ್ಯಾ ವಸ್ತುಂಕ್ ಮಿಶೇಲಾನ್ ಸಾಂಬಾಳುನ್ ದವರ್ಲೆಲೆಂ. ಆತಾಂ ಹ್ಯೊ ವಸ್ತುಚ್ ತಾಚ್ಯಾ ಆನಿ ಕ್ಯಾಥರೀನಾಚ್ಯಾ ಸಾಸ್ಣಾಚಾ ಆದೇವ್ಸಾಕ್ ವಿಸ್ರೊಂಕ್ ಸಾಂಗಾತ್ ದೀಂವ್ಕ್ ಲಾಗ್ಲ್ಯೊ.
ದಿಸಾ ವಯ್ರ್ ದೀಸ್ ಧಾಂವ್ತಾನಾ ಮಿಶೇಲ್ ಸವ್ಕಾಸ್ ಕ್ಯಾಥರೀನಾಚ್ಯಾ ಮರ್ಣಾಚಾ ದುಖಾ ಥಾವ್ನ್ ಭಾಯ್ರ್ ಆಯ್ಲೆಂ ಜಾಲ್ಯಾರ್ಯ್ ಕ್ಯಾಥರೀನಾಕ್ ತಾಣೆಂ ವಿಸ್ರೊಂಚಾ ಪರಿಂಚ್ ನಾತ್ಲ್ಲೆಂ.
ಹ್ಯಾ ಉಪ್ರಾಂತ್, ಮುಕಾರ್ ಉಂಚ್ಲೆಂ ಶಿಕಾಪ್ ಶಿಕೊಂಕ್ ಮಿಶೇಲಾಕ್ ಉರ್ಬಾ ನಾತ್ಲೆಲಿ. ತೆಂ ಘರಾಚ್ ಆಜ್ಯಾಕ್ ಆನಿ ಆಜಿಯೆಕ್ ಸಾಂಬಾಳುನ್ ಜಿಯೆಂವ್ಕ್ ಲಾಗ್ತಾನಾ, ಶೀತಲ್ ಮಾತ್ರ್ ಆಪ್ಲ್ಯಾ ಶಿಕ್ಪಾ ಉಪ್ರಾಂತ್ ಆಪ್ಲ್ಯಾಚ್ ಪಾಂಯಾರ್ ಆಪುಣ್ ಉಭೆಂ ಜಾಂವ್ಚಾ ಇರಾದ್ಯಾನ್ ಬಾಪಾಯ್ಚೆಂ ಬಿಜ್ನೆಸ್ ಸೊಡುನ್ ಇಂಡಿಯನ್ ಏರ್ಲೈನ್ಸಾಂತ್ ಏರ್ ಹೊಸ್ಟೆಸ್ ಜಾವ್ನ್ ಕಾಮಾಕ್ ಲಾಗ್ಲೆಂ.
ಜಿಮ್ಮಿನ್ ಜಾಗಯಿಲ್ಲ್ಯಾ ವಿಚಾರಾಂ ಥಾವ್ನ್, ಶೀತಲಾನ್ ಜಿಯೆಂವ್ಕ್ ಆಶೆಂವ್ಚ್ಯಾ ಆನಿ ಶೀತಲಾಚಾ ಬಾಪಾಯ್ನ್ ಜಿಯೆಂವ್ಚ್ಯಾ ಜಿವಿತಾ ಮಧೆಂ ವಿಚಾರಾಂಚೊ ತುರೊ ಉಭೊ ಜಾಲ್ಲೊ. ತೆಂ ಆತಾಂ ಚಿಂತುಂಕ್ ಸಕ್ತಾಲೆಂ. ಸಮಾಜೆಂತ್ ಖಂಯ್ಚೆಂ ಬರೆಂ ಆನಿ ಖಂಯ್ಚೆಂ ವಾಯ್ಟ್ ತೆಂ ಸಮ್ಜೊಂಕ್ ಸಕ್ತಾಲೆಂ. ತಾಚ್ಯಾ ಆನಿ ಜಿಮ್ಮಿ ಮಧೆಂ ಕಾಂಯ್ ಸಂಭಂಧ್ ನಾತ್ಲಲೊ ಜಾವ್ಯೆತ್ ಪುಣ್, ಜಿಮ್ಮಿಚಾ ವಿಚಾರಾಂನಿ ಮಾತ್ರ್ ಶೀತಲಾಚಾ ಮತಿಕ್ ಆನಿ ಕಾಳ್ಜಾಕ್ ಏಕ್ ನವಿ ದಿಶಾ ದಾಖಯಿಲ್ಲಿ.
ಮಿಶೇಲಾಕ್ ಶೀತಲಾನ್ ಆಪ್ಣಾ ಸವೆಂ ಕಾಮಾಕ್ ಲಾಗೊಂಕ್ ವತ್ತಾಯ್ ಕೆಲಿ ತರ್ಯ್ ಮಿಶೇಲ್ ತಾಕಾ ಕಬೂಲ್ ಜಾಲೆಂ ನಾ.
**************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2, ಅವಸ್ವರ್ 3, ಅವಸ್ವರ್ 4
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
