ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್
ಬೂಕ್: ಪಾಟಿಂ ಗಾಂವಾಕ್
ಕವಿ: ವಲ್ಲಿ ಕ್ವಾಡ್ರಸ್ ಹಾಚಿ ಸವಿ ಕಾದಂಬರಿ.
ಪ್ರಸ್ತಾವನ್: ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪಾಟಿಂ ಗಾಂವಾಕ್
ಚರ್ಬೆಲ್ಲಿ ಕೊಂಬಿ?
ಪ್ರೀತಮ್, ಕಿರೆಂ
[ಏಕ್ ವಿಭಿನ್ನ್ ವಿಮರ್ಸೊ - ವಲ್ಲಿ ಕ್ವಾಡ್ರಾಸಾಚ್ಯಾ "ಪಾಟಿಂ ಗಾಂವಾಕ್" ಇ-ಕಾದಂಬರಿ ವಯ್ರ್.]
"ಹಾತಾಚಿಂ ಕಾಂಕ್ಣಾಂ ಪಳಂವ್ಕ್ ಆರ್ಸೊ ನಾಕಾ, ಆಮ್ಚೆ ನಾಗ್ಡೆ ದೊಳೆಚ್ಚ್ ಪುರೊ"
ಕಾಳೊಕ್ ಪಡ್ತಾ ಮ್ಹಣಾಸಾರ್ ದಿವ್ಟಿ ಪೆಟಂವ್ಕ್ ರಾಕ್ಚೆಂ ನ್ಹಂಯ್, ವೇಳ್ ಉತ್ರೊನ್ ವ್ಹಚಾತ್
ಪಿರಾಯ್ ಭರ್ಲೆಲ್ಯಾ ಚೆಡ್ವಾಕ್ ಘರಾಂತ್ ದವರ್ಚೆಂ ನ್ಹಂಯ್, ಕಾಜಾರ್ ಕರ್ನ್ ಘೊವಾಗೆರ್ ದಾಡ್ಚೆಂ ಜೊಕ್ತೆಂ, ಉಪ್ರಾಂತ್ ಚುರ್ಚುರ್ಚೆಂ ನ್ಹಂಯ್.
ಹಾಗೊಂಕ್ ಜಾತಾನಾಂ ಸುವಾತ್ ಸೊದ್ಚಿ ನ್ಹಂಯ್, ನಾಂ ತರ್..... ಗಳೊನ್ ವ್ಹಚಾತ್"
- ಅಶೆಂ ಸಾಂಗ್ತಾತ್ ಜಾಂಟೆ.
ಅಸಲಿಚ್ಚ್ ಏಕ್ ಜಾಗ್ವಣ್, ಆಜೆಕಾರ್ಚೊ ವಲ್ಲಿ ಕ್ವಾಡ್ರಸ್, ಲಿಸಾಂವಾಂಭರಿತ್ "ಪಾಟಿಂ ಗಾಂವಾಕ್" ಕಾದಂಬರೆಧ್ವಾರಿಂ ದಿತಾ. ಚರ್ಬೆಲ್ಲ್ಯಾ ಕೊಂಬಿಯೆಂಕ್ ಆನಿಂ ಹಾಂಡ್ಕುರ್ ಪಾಡ್ಯಾಂಕ್.
"ಪಾಟಿಂ ಗಾಂವಾಂತ್" ಹೆರ್ ಕಾಣಿಯಾಂಪರಿಂ, ನಾಯಕ್ ದಿಸ್ಲೊನಾ, ನಾಯಕ್ ನಾಸ್ತಾನಾಂಚ್ಚ್ ಖಳನಾಯಕ್ ಖಂಯ್ ಥಾವ್ನ್ ಉದೆಲೊಗಾಯ್?
ನಾಯಕಿ, ತಿ ಉಪ್ರಾಂತ್ ಖಳನಾಯಕಿ ಜಾವ್ನ್ ರೂಪಾಂತರ್ ಜಾಲ್ಲಿ, ತೆಂ ಮ್ಹಜ್ಯಾ ತಸಲ್ಯಾ ಕಝೊ ತಾಂದ್ಳಾಚೆಂ ಶಿತ್ ಜೆವ್ಲೆಲ್ಯಾಕ್ ಬಿಲ್ಕುಲ್ ಜಿರ್ಲೆಂನಾಂ.
ಜಿರ್ವಣ್ ಕರ್ನ್ ಘೆಂವ್ಚೆಂ ಪರಿಶ್ರಮ್ಯೀ ಘೆತ್ಲೆಂ ನಾಂ, ಹಾಂವೆಂ.
ಕಿತ್ಯಾಕ್, ಹಾಗೊಂಕ್ ಜಾತಾನಾಂ ಗುಡೊ ಸೊಧ್ಚಾ ಕಾಸ್ತಾಚೊ ಹಾಂವ್.
ಮ್ಹಜ್ಯಾ ಜಿವಿತಾಚೆ ಹರ್ಯೆಕ್ ಪಾಂವ್ಡೆ ನಿಧಾನ್ ಪ್ರಾರಂಬ್ ಜಾಲ್ಯಾತ್, ತಸೆಂಗೀ ಥೊಡೆ-ಥೊಡೆ ಸುರ್ವಾತೆಚಾ ಹಂತಾರ್ಚ್ಚ್ ಕುರ್ವೊನ್ ಅಧುರೆ ಉರ್ಲ್ಯಾತ್..
ತಶೆಂ ಆಸ್ತಾಂ, ಹಾವೆಂ ಹಿ ಕಾಣಿ ದೋನ್ - ತೀನ್ ಪಾವ್ಟಿಂ ವಾಚ್ತಾಂ ಮ್ಹಣಾಸಾರ್, ಹಾಂವ್ ಮ್ಹಜ್ಯಾ ಕೋಶೆಡ್ಡಾಚ್ಯಾ "ಗಾಂವಾಕ್ ಪಾಟಿಂ" ಘುಂವ್ಲೊಂ ನಾಂ. ಸುರ್ವಾತೆರ್ಚ್ಚ್ ಉರ್ಲ್ಲೊಂ ಕಾಂಯ್ ಏಕ್ ನವಾಲ್ ನ್ಹಂಯ್.
"ಪಾಟಿಂ ಗಾಂವಾಕ್" ಎಕಾಚ್ಚ್ ಕಿಸ್ತಾನ್ ವಾಚುಂಕ್ ಮ್ಹಜ್ಯಾ ಸಂಯ್ಭಾಕ್ ವರ್ಗಾಲೆಂ ನಾಂ. ಏಕ್ ಪಾವ್ಟಿಂ, ದೋನ್ ಪಾವ್ಟಿಂ, ಮಾತ್ರ್ ನ್ಹಂಯ್, ಸತ್ತ್ ಸಾಂಗ್ತಾಂ, ಪಾಂಚ್ ಪಾವ್ಟ್ ಖಟ್ಲ್ಯಾರ್ ಥಾವ್ನ್ ಭಾಯ್ರ್ ಚವ್ಕೆಂತ್ ಉಡಯ್ಲೊ ಹಾಂವೆಂ.
ಉಡಯಿಲ್ಲೊ
ಬೂಕ್ ಚಡ್ ವೇಳ್ ಚವ್ಕೆಂತ್ ಉರ್ಲೊ ನಾಂ. ತೆದ್ನಾಂ ಮ್ಹಣಾಸಾರ್ಗೀ, ತಾಂತ್ಲೆಂ ಏಕ್ - ದೋನ್ ಗಾಂಚ್ ಮ್ಹಜ್ಯಾ ಸೆಜಾರಿ ಚರ್ಬೆಲ್ಲ್ಯಾ ಕೊಂಬಿಯಾಂಕ್ ಸೊಧುನ್ ಜೊಡುಂಕ್ ಲಾಗ್ಲೆ, ತೆದ್ನಾಂ ಮ್ಹಣಾಸಾರ್.
ಕಾಣಿಯೆಚೊ ಅಂತ್ಯ್ ಪರಿಣಾಮ್ ಕಿತೆಂ ರಾವೊತ್ ಮ್ಹಣೊನ್ ಜಾಣಾಂ ಆಸೊನೀಂ, ವಾಚ್ಪ್ಯಾಕ್ ಸವ್ಕಾಸ್ ತರೀ ಕುತೂಹಲ್ ಹಾಡ್ನ್ "ರೊಮ್ಯಾನ್ಸ್ ಆನಿಂ ಟ್ರಾಜೆಡಿ" ದೊನಾಂಯ್ಚೆಂ ಮಿಶ್ರಣ್ ಏಕಾಚ್ಚ್ ಮಾಂಚಿಯೆರ್ ಸಾಧಾರ್ ಕೆಲ್ಲಿ ಕೀರ್ತ್ ಬರಯ್ಣಾರಾಚಿ.
ರೊಮ್ಯಾನ್ಸ್ ಆನಿಂ ಟ್ರಾಜೆಡಿಚ್ಯಾ ಸಾಂಖ್ಯಾರ್ ಪಯ್ಣ್ ಕರ್ತಾಸ್ತಾಂ, ಆಮ್ಚ್ಯಾ ಮಾತಿಯೆಚೊ ವಾಸ್ ಆನಿ, ಆಮ್ಚ್ಯಾ ಗಾಂವ್ಚೊ ಪರ್ಮಳ್ ಜಾಯ್ ಪುರ್ತೊ ವಾಂಟುಂಕ್ "ವಲ್ಲಿ" ಕಾಂಯ್ ಸುರಾತ್ ಕರಿನಾಂ. ಜೆಂ ತೊ ಹ್ಯಾ ಉತ್ರಾಂನಿ ಸಾಂಗ್ತಾ:
"ಆಂಗ್ಣಾ ದೆಗೆನ್ ಆಸ್ಚಿ ಸಾತ್ ಆಳಾಂಚಿ ಬಾಂಯ್, ಬಾಂಯ್ ದೆಗೆರ್ ವ್ಹಸ್ತುರಾಂ ಉಂಬ್ಳುಂಕ್ ಆಸ್ಚೊ ಫಾತೊರ್, ಆನಿಂ ತೆಂ ವ್ಹಸ್ತುರ್ ಧುಲ್ಲೆಂ ಉದಾಕ್ ವ್ಹಾಳೊನ್ ವ್ಹಚೊಂಕ್ ಏಕ್ ಬಾರೀಕ್ ತೋಡ್ ಆನಿಂ, ತೆಂ ಉದಾಕ್ ವ್ಹಾಳೊನ್ ವ್ಹಚೊನ್ ಪಡ್ಚೆಂ ವಾಳ್ಚೆಬಾಜಿಯೆಚಾ ಮುಳಾಂಕ್, ಆನಿಂ ಘಟ್ ಆಸ್ಚೊ ವಾಳ್ಚೆಬಾಜಿಯೆಚೊ ಮಾಟೊವ್, ತೆಂಡ್ಲ್ಯಾಂಚೊ ಮಾಟೊವ್, ದೆಗೆನ್ ನಾಂವ್ಕ್ ಆಸ್ಚೆಂ ಭಾಣ್, ತ್ಯಾ ಮಾಟ್ವಾಕ್ ಲಾಗೊನ್ಂಚ್ಚ್ ಪಡ್ವಳ್ಯಾಂಚೊ ಮಾಟೊವ್, ತಾಂತುಂ ಆಸ್ಚಿಂ ಪಡ್ವಳಿಂ, ಕುವಾಳೆ, ಬೊಬ್ಳಿಂ, ಕಣ್ಗಿ, ರುಕಾ ಕಣ್ಗಿ...."
"ಆಂಗ್ಣಾಚಾ ಆನ್ಯೇಕಾ ಕುಶಿನ್ ಆಸ್ಚೆ ಪೊಪಾಯೆಚೆ ರೂಕ್, ಮಿರ್ಸಾಂಗೆಚಿ ವೋಳ್, ವಾಂಯ್ಗಿಂ, ಕಾಸುಳ್, ದುದಿಂ, ಗೊಸಾಳಿಂ, ಆಲ್ಸಾಂಡೆಚ್ಯೊ ವಾಲಿ, ಕುಶಿನ್ ಎಸ್ತೆಲಾನ್ ಲಾಯಿಲ್ಲಿಂ ಪುಲಾಂಚಿ ಝಡಾಂ, ಮೊಗ್ರಿಂ, ಆಬೊಲಿಂ, ಶಿಂವ್ತಿಂ, ಸಗ್ಳಿಂ ಹ್ಯಾ ರಾತಿಂ ತಿಯೊಕ್ ಆದೇವ್ಸ್ ಕರ್ತಾಲಿಂ, ತೆಂ ಪಳೆಲ್ಲ್ಯಾ ತಿಯೊಚೆಂ ಕಾಳಿಜ್ ಭರೊನ್ ಆಯ್ಲೆಂ."
ಬರಯ್ಣಾರಾನ್ ಕಾಂಯ್ ’ಜೊಗ್ರಾಫಿಂತ್ ಪಿ.ಹೆಚ್.ಡಿ ಕಾಡ್ಲ್ಯಾಗಾಯ್’ ಮ್ಹಣ್ ಭಗ್ಚ್ಯಾಂತ್ ಕಾಂಯ್ಚ್ಚ್ ದುಭಾವ್ ನಾ.
ಅನ್ಯೇಕ್ ಪಾವ್ಟಿಂ, ಬರಯ್ಣಾರ್ ಇತ್ಲೊ ಭಾವುಕ್ ಜಾತಾಗೀ;
"ಹ್ಯಾ ರುಕಾಂಚಿ ಏಕ್ ಖೊಲಿ ಪಿಕೊನ್ ಝಡ್ತಾನಾಂಯ್ ತಿಯೊಕ್ ಪೊಟಾಕ್ ಉಜೊ ಪಡ್ತಾಲೊ. ಕಾಳ್ಜಾಕ್ ಕೋಣ್ಗೀ ಮುಸ್ಳಾಂತ್ ಕಾಂಡ್ಲ್ಲ್ಯಾ ಪರಿಂ ಭೊಗ್ತಾಲೆಂ."
ಕಾಂಯ್ ಜೊ.ಸಾ. ಆಲ್ವಾರಿಸಾನ್ ಹ್ಯಾ ಕಾಣ್ಯೆಂತ್ ಪ್ರವೇಶ್ ಘೆಂವ್ಕ್ ನಾಂಮೂಂ??
ಆಮ್ಚ್ಯಾ ಗಾಂವ್ಚಿ ಗಿರೆಸ್ತ್ಗಾಯ್ಚ್ಚ್ ತಶಿ. ತ್ಯಾಚ್ಚ್ ದೆಕುನ್ ಕೊಣ್ಣಾ ಪ್ರಸ್ತಾವನ್ ದಿಲ್ಲ್ಯಾ "ಮಾನೆಸ್ತ್ ಲ್ಯಾನ್ಸಿ ಪಿಂಟೊ ನಾಯಕ್" ನ್ (ಅ)ಸುರತಿ "ವಲ್ಲಿ" ಥಾವ್ನ್ ಗಿರೇಸ್ತ್ ಕೊಂಕ್ಣಿ ಸಾಹಿತ್ಯಾಚೊ ವ್ಹಾಳೊ ವ್ಹಾಳಂವ್ಚೆಂ ಬೊಲ್ಮೆಂ ವಾಚ್ಲಾಂ. ತೆಂ ಖರೆಂ ಜಾಂವ್.
"ಖಂಚೀಯ್ ಚೂಕ್ ಏಕ್ ಯಾ ದೋನ್ ಪಾವ್ಟಿಂ ಕರ್ತಾನಾಂ ಮಾತ್ರ್ ಮ್ಹತ್ ಇಲ್ಲಿ ಬಿಂಯೆತಾ. ಕೆನ್ನಾಂ ತಿ ಚೂಕ್ ಆಪ್ಲಿ ಸವಯ್ ಜಾತಾಗೀ ತೆನ್ನಾ ತೆಂ ಗುನ್ಯಾಂವ್ಕಾರಿ ಚಿಂತಾಪ್ ಮಾಯಾಗ್ ಜಾತಾ, ಆನಿಂ ಸದಾಂಚೆಂ ಜಾತಾ"
ಪಾತ್ಕಾಂಚಿ ದೂಃಖ್ ಧರುನ್ ಜಿಣಿಂ ಪರಿವರ್ತನ್ ಕರುಂಕ್ ಏಕ್ ಭೋವ್ ಬರಿ ದಿಶಾ ದಿತಾ "ಮೆಸ್ತ್ರಿ" ವಲ್ಲಿ. ಕಾಂಯ್ ತರೀ "ಚಾಲ್ತಿಂ ಮಾಗ್ಣಿಂ’ ಕಡ್ತಿಲೆಚೊ ನವೊ ಸಂಶೋಧ್ ತರೀ ನ್ಹಂಯ್ಮೂ??
ಗಲ್ಫಾಚಿ ಜಿಣಿ ಕೂಲಂಕುಶ್ ಥರಾನ್ ಆಸಾ ತಶಿ ಖಿರವ್ನ್, ಹ್ಯಾ ಪರ್ಗಾವಾಂತ್ ಘೊಳ್ಚಾ ದಳ್ದಿರ್ ಪಡ್ಲೆಲ್ಯಾ ಪಿಳ್ಗೆ ಥಾವ್ನ್ ತಾಂಚ್ಯಾ ಕುಟ್ಮಾ ಥಾವ್ನ್ ಆಪೇಕ್ಸುಂಚೆಂ ಖಜಾನ್ ಉಕಲ್ನ್ ದಾಖಯ್ಲೆಲಿ ಹಿಮ್ಮತ್ ಕಾಂಯ್ ಮೆಚ್ವೊಂಚಿ ಇಲ್ಲಿ ನ್ಹಂಯ್.
’ಹಾಂಗಾಚೆಂ ಜಿವಿತ್ ಕೊಣಾಕ್ ಫುಲಾಂಚಿ ಗಜ್ಡಿ ತರ್ ಕೊಣಾಕ್ ಖಾಂಟ್ಯಾಂಚೊ ಮುಕುಟ್. ಥೊಡ್ಯಾಂಕ್ ಅಂತ್ರಳಾರ್ ಉಭಯ್ತಾ ತರ್ ಕೊಣಾಕ್ ಜೆರ್ಭಾಂದ್ ಮಾರ್ತಾ ಆನಿಂ ಖಾಂದ್ಯಾರ್ ಖುರಿಸ್ ದಿತಾ. ಹಾಂಗಾಯಿ ಜುದೆವ್ ಕಾಂಯ್ ಉಣೆಂ ನಾಂತ್......" ಏಕ್ ನಿರಾಶಾವಾದ್ ಧರ್ಧರ್ ಮ್ಹಣ್ ದಾಖಯ್ತಾ ಬರಯ್ಣಾರ್.
ಕಾಣಿಯೆಚಾ ಹರ್ಯೆಕ್ ಪಂತಾರ್ ಅಸಲೆ ಏಕ್ ನ್ಹಂಯ್, ದೋನ್ ನ್ಹಂಯ್ ಸಭಾರ್ ಲಿಸಾಂವಾಂಚೆ ವಾಂಜೆಲ್ಚ್ ವಾಂಟ್ತಾನಾಂ, ಶೆರ್ಮಾಂವ್ ಆಯ್ಕೊನ್, ಆಯ್ಕೊನ್ ಕಾಂಟಾಳ್ಳೆಲ್ಯಾ ವಾಚ್ಪ್ಯಾಕ್ ಏಕಾ ಥರಾಚಿ ಉಬ್ಜೊಣ್ ಯೇಂವ್ನ್, ಪುಸ್ತಕ್ ಖಟ್ಲ್ಯಾ ವಯ್ಲೆಂ ಪರತ್ ಕಾಡ್ನ್ ಮಾಡಾಮುಳಾಕ್ ಉಡಂವ್ಚಿ ತಾಳ್ಣಿ ಯೆತಾ.
ಕಾಣಿಯೆಚೆಂ ಅಂತ್ಯ್ ತಿಕ್ಕೆ ಘುಸ್ಫೋಡಾಯ್ತಾ ತರೀ, ನಿಮಾಣ್ಯಾ ಏಕಾಚ್ಚ್ ಪ್ಯಾರಾಗ್ರಾಫಾಂತ್ ಕಾಣಿಯೆಚೆಂ ರೂಪ್ಚ್ಚ್ ಬದ್ಲುನ್ ಘುಸ್ಪೊಡಾಯ್ ಪಯ್ಸ್ ಕರ್ಚಿ ಶ್ಯಾತಿ ವಲ್ಲಿಚಿ. ಕಾಂಯ್ ಕಾಣಿಂ ಮುಂದರ್ಸುನ್ ದುಸ್ರ್ಯಾ ಭಾಗಾಕ್ ಪ್ರವೇಶ್ ಜಾಂವ್ಚೆಂ ಲಕ್ಶಣ್ ರೂಪ್ ರೂಪ್ ದಿಸೊನ್ ಯೆತಾ.
ಏಕ್ ಖಾಲ್ತಿ ವಿನಂತಿ:
ಕಾಜಾರಾಚಾ ದೊತೊರ್ನೆಂತ್, "ಪಾಟಿಂ ಗಾಂವಾಕ್" ಪುಸ್ತಕ್ ಕಡ್ದಾಯಾನ್ ವಾಚಯಿಲ್ಲೆಂ ತರ್, ಕಾಂಯ್ ಫಾಯ್ದೊ ಜಾಯ್ತ್ ಮ್ಹಣ್ತಾಂ ಹಾಂವ್ ಭಿಂಯಾನ್ ಭಿಂಯಾನ್.
ತಿತ್ಲೆಂ ನ್ಹಂಯ್ ತರ್, ಮುದಿಯೆ ದಿಸಾ, "ಪಾಟಿಂ ಗಾಂವಾಕ್" ಪುಸ್ತಕಾಚಿ ಏಕ್ ಪ್ರತಿ ನೊವ್ರ್ಯಾನ್ ಇನಾಮಾ ಸಾಂಗಾತಾ ಬುಕ್ಕ್ ಬಾಂಯ್ಡ್ ಕರ್ನ್ ದಿಲ್ಲಿ ತರೀ ಫಾಯ್ದ್ಯಾಮಾಂದ್ ಜಾಯ್ತ್, ಮ್ಹಣ್ತಾಂ ಹಾಂವ್ ಇಲ್ಲೆಂ ಧಯ್ರ್ ಘೆವ್ನ್.
ವಿಂಚವ್ಣ್ ತುಮ್ಚಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
