ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 3
ಕಯ್ದ್ಯಾಚ್ಯೊ ಕವಿತಾ
ಬೂಕ್: ಕಯ್ದ್ಯಾಚ್ಯೊ ಕವಿತಾ
ಕವಿ: ಎಚ್ಚೆಮ್, ಮುಂಬಯ್
ಪ್ರಸ್ತಾವನ್: ಆಂಡ್ರು ಎಲ್. ಡಿ’ಕುನ್ಹಾ
ಛಾಪ್ಲ್ಲಿ ಲಿಪಿ: ಕಾನಡಿ ಆನಿ ದೇವ್ನಾಗರಿ.
ಪಾನಾಂ: 94
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್, ಕೆಲರಾಯ್
ತಾರಿಕ್: 15 ಎಪ್ರಿಲ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ಎಚ್ಚೆಮ್
ಕವಿಚಿ ವ್ಹಳೊಕ್:
ಹೆನ್ರಿ ಎಮ್. ಪೆರ್ನಾಲ್ (ಎಚ್ಚೆಮ್) ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಎಚ್ಚೆಮ್ ಹಾಚಾ ಕವಿತಾಂನಿ ದಿಸ್ಚೊ ಇಮಾಜ್ಯೊಚ್ ಏಕ್ ಸೊಭ್. ಹಾಚಾ ಕವಿತಾಂನಿ, ವಾಚ್ಪ್ಯಾಂಚಾ ಮತಿಂತ್ ವಿಚಾರ್ ಉಟಾಶೆಂ ಕರ್ಚಿ ಶ್ಯಾಥಿ ಆಸಾ. ಪುಣ್ ಹಾಚಿಂ ಚಡ್ತಾವ್ ಕವಿತಾ ಗೂಂಡ್ ಚಿಂತ್ಪಾಚಿಂ ಕವಿತಾ. ಹಾಚಾಧಿಂ ಹಾಚೊ ’ಚಲಿಯಾಂಕ್ ಚತ್ರಾಯ್’ ಕವಿತಾಜಮೊ ಪರ್ಗಟ್ ಜಾಲಾಸ್ತಾಂ, ’ಕಯ್ದ್ಯಾಚ್ಯೊ ಕವಿತಾ’ ಹಾಚೊ ದುಸ್ರೊ ಕವಿತಾಜಮೊ ಜಾವ್ನಾಸಾ. ಏಕ್ ಕವಿ ಮಾತ್ರ್ ನ್ಹಯ್ ಆಸ್ತಾಂ, ಏಕ್ ವಿಮರ್ಶಕ್, ವಿಚಾರ್ವಂತ್ ಬರವ್ಪಿ, ಕಾಣ್ಯೆಗಾರ್ ಆನಿಂ ಅಂಕಣ್ಕಾರ್ಯ್ ಜಾವ್ನಾಸಾ.
ಎಚ್ಚೆಮಾಕ್ ಸಭಾರ್ ಕವಿತಾಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.
ಸಮೀಕ್ಶಾ ಲೇಖನ್
ಕಯ್ದ್ಯಾಚೊ ಮೊಗಾ ಪೆಳೊ ಚಾಕ್ತಾನಾ.....!
ಜಿವಿತಾಂತ್ ಎಕೇಕ್ ಪಾವ್ಟಿಂ ಏಕ್ ವ್ಯಕ್ತಿ ಯಾ ಏಕ್ ವಿಚಾರ್ ಸಗ್ಳ್ಯಾ ಜಿವಿತಾಕ್ಚ್ ಬದ್ಲುಂಕ್ ಕಾರಾಣ್ ಜಾತಾತ್. ಹ್ಯಾ ಏಕ್ ವ್ಯಕ್ತಿ ಆನಿಂ ಎಕಾ ವಿಚಾರಾಂತ್ ಎಚ್ಚೆಮ್ಯ್ ಏಕ್ ಮ್ಹಣ್ಯೆತ್. ವ್ಯಕ್ತಿ ಏಕ್ ಆನಿ ವಿಚಾರ್ ಏಕ್. ಎಚ್ಚೆಮ್ ಆನಿ ಮೋಗ್.
ಹೊ ಮೋಗ್ ಕಸಲೊ? ತ್ಯಾ ಮೊಗಾಚೆ ವಿಚಾರ್ ಕಸಲೆ? ಮೊಗಾಚಾ ಬಲಿದಾನಾಕ್ ಕಾಂಟ್ಯಾಂಕ್ ಆಪ್ಲ್ಯಾ ಕಾಳ್ಜಾಕ್ ತೊಪುನ್ ಫುಲಾಕ್ ರಂಗಯಿಲ್ಲೆಂ ತೆಂ ಸುಕ್ಣೆಂ ಬಹುಶಃ ಆಜ್ ಬುಕಾಂಚ್ಯಾ ಪಾನಾಂ ಮಧೆಂ ಮೊಗಾಕ್ ಸೊಭಯ್ತಾ ಆಸ್ತೆಲೆಂ. ಪುಣ್ ಕವಿನ್ ಹಾಂಗಾ ಆಪ್ಲ್ಯಾ ಲ್ಹಾನಾಂ ದುಬ್ಳ್ಯಾಂಚಾ ಮೊಗಾಂತ್ ಬುಡೊನ್ ಆಪ್ಲ್ಯಾ ಕಾಳ್ಜಾರುಪಾಂತ್ ಮಾಖುನ್ ಉಟಯಿಲ್ಲಿ ಕಯ್ದ್ಯಾಂಚಿ ಕ್ರಾಂತಿ ನಿಜಾಯ್ಕ್ಯೀ ಮಾಂದ್ಚೆ ತಸಲಿ.
’ಕಯ್ದ್ಯಾಚ್ಯೊ ಕವಿತಾ’ ಕವಿತಾ ಜಮೊ ನವ್ಯಾ ವಿಚಾರಾಂಕ್ ನವಿ ಕ್ರಾಂತಿ ದಿಂವ್ಚೊ ನವ್ಯಾ ಶೈಲಿಚೊ ಕವಿತಾ ಜಮೊ. ಹ್ಯಾ ಜಮ್ಯಾಚೆಂ ನಾಂವ್ಚ್ ಸಾಂಗ್ಚೆಪರಿಂ ಹ್ಯಾ ಸಂಸಾರಾಂತ್ ಕಯ್ದಿ ಜಾಲ್ಲ್ಯಾಂಚೆ ಜೀವನ್ ಭೋವ್ಚ್ ಸೊಭಿತ್ ರಿತಿರ್ ಕಾಳ್ಜಾಕ್ ದೋನ್ ಧಾರಿಚಿ ತಾಲ್ವಾರ್ ಪಾಪ್ಸುಂಚೆ ಪರಿಂ ವರ್ಣಿಲಾಂ.
ಜಮ್ಯಾಂತ್ಲಿ ಪಯ್ಲಿ ಕವಿತಾ ’ಆಟೆವಿಟೆ’ ಹಾಂವೆಂ ಮ್ಹಜ್ಯಾ ದೊಳ್ಯಾಂನಿ ಸೊಭಯ್ತಾನಾ ಪಯ್ಲೆ ಪಾವ್ಟಿಂ ಹೊ ಕವಿತಾನಾಯಕ್ ಖಂಡಿತ್ ಎಕಾ ಮೊಗಾಚಾ ಪಿಂಜ್ರ್ಯಾಂತ್ ಶಿರ್ಕಾಲಾ ಮ್ಹಣೊನ್ ಹಾಂವೆಂ ಆಮ್ಸೊರಾನ್ ಫೈಸಲ್ ದಿಲ್ಲೆಂ ತರ್ಯೀ ಉತ್ರಾಂಚ್ಯಾ ಸೊಭಾಯೆಕ್ ಹಾಂವೆ ದುಸ್ರ್ಯಾ ಪಾವ್ಟಿಂ ತಿಚ್ಚ್ ಕವಿತಾ ವಾಚ್ತಾನಾ ಮ್ಹಜ್ಯಾ ದೊಳ್ಯಾ ಮುಖಾರ್, ಮ್ಹಜ್ಯಾ ಕಾಳ್ಜಾಂತ್, ಮ್ಹಜ್ಯಾ ಉಸ್ವಾಸಾಂತ್, ಮ್ಹಜ್ಯಾ ಪಾಟ್ಲ್ಯಾನ್, ಚಾರ್ಯೀ ಕುಶಿಂನಿ ಚಾಚಾರ್ ಇಮಾಜ್ಯೊ ಉಭ್ಯೊ ಜಾತಾನಾ ಪಯ್ಲೆ ಪಾವ್ಟಿಂ ಕವಿಚಾ ಶೈಲೆಕ್ ಮಾನ್ ಭಾಗಾಯ್ಲಾ ಹಾಂವೆಂ. ಜರ್ತರ್ ಏಕ್ ಕವಿತಾ ಹರ್ಯೇಕ್ ಪಾವ್ಟಿಂ ವಾಚ್ತಾನಾ ನವಿ ನವಿ ರೂಚ್ ದೀಂವ್ಕ್ ಸಕ್ತಾ, ತೆಂಚ್ ಕವಿತೆಚಿ ಗ್ರೇಸ್ತ್ಕಾಯ್ ಆನಿ ಹಿಚ್ಚ್ ಗ್ರೇಸ್ತ್ಕಾಯ್ ’ಕಯ್ದ್ಯಾಚೊ ಕವಿತಾ" ಕವಿತಾ ಜಮೊ ವಾಚ್ತಾನಾ ಉಮಾಳೊನ್ ಯೆತಾ.
ಹ್ಯಾಚ್ ಕವಿಚಾ ದುಖಿ ಉಚಾರ್ಚಾ ಉತ್ರಾಂನಿ ಸಾಂಗ್ಚೆಂ ತರ್ ಕವಿತಾಕ್ ಅರ್ಥ್ ಕರ್ಚ್ಯಾ ಪಯ್ಲೆಂ ವಾಚ್ಪ್ಯಾನ್ ಕವಿತಾಚಾ ಮಟ್ಟಾಕ್ ಪಾಂವ್ಚೆಂ ಗರ್ಜೆಚೆಂ. ಹ್ಯಾ ಮಟ್ಟಾಕ್ ಪಾವಾನಾತ್ಲ್ಲ್ಯಾಕ್ ಕೊಂಕ್ಣೆಚೊ ಮಹಾನ್ ಕವಿಂ ಪಯ್ಕಿ ಎಕ್ಲೊ ಚಾ.ಫ್ರಾ. ನ್ ಸಾಂಗ್ಚಾಪರಿಂ ಉಣ್ಯಾ ಸವಯೆಚಿಂ ಉತ್ರಾಂಚಾ ಸೊಭಾಯೆನ್ ವೊಳ್ಲ್ಲಿಂ, ಪ್ರಾಸಾಂತ್ ವಿಣ್ಲ್ಲಿಂ, ಪಿಸೊಳ್ಯಾ ಫುಲಾಂನಿಂ ಭಾಗಿಂತ್ ಸುಂರ್ಗಾರಾಯಿಲ್ಲಿಂ ಪದಾಂ ಕೊಂಕ್ಣೆಚಾ ಪಾಲ್ವಾಂತ್ ಭರ್ಫೂರ್ ಆಸಾತ್. ತರ್ ಹ್ಯಾ ಕವಿಂಚೆಂ ದುಖ್ ಕಿತೆಂ? ಹ್ಯಾ ದುಖಿಕ್ ಕವಿತಾಂಚಿ ಗರ್ಜ್ ಕಿತೆಂ? ಕವಿತಾಂಚೆಂ ಮಟ್ಟ್ ಕಿತೆಂ? ಕವಿಂಚಾ ವಯ್ಲ್ಯಾ ದುಖಿಕ್ ಉಂಚ್ಲ್ಯಾ ಮಟ್ಟಾಚಿಂ ಕವಿತಾಂ ಗರ್ಜ್ ತರ್ ಹೆಂ ಮಟ್ಟ್ ಕಿತೆಂ? ಕವಿತಾಂಚೆಂ ಮಟ್ಟ್ ಪಳಂವ್ಕ್ ಗೆಲ್ಯಾರ್ ಎಚ್ಚೆಮಾಚಾ ಕವಿತಾಂನಿ ತೆಂ ಆಪ್ಲ್ಯಾ ಆಂಗಾರ್ ರಸ್ಮಾಚೊ ಸಾಡೊ ವೊಡ್ಲೆಲ್ಲ್ಯಾ ಪರಿಂ ದಿಸ್ತಾ.
ಆಬೊಲ್ಯಾಂನಿ ಸೊಬ್ಚಾ ಹೊಕ್ಲೆಚಾ ಮಾತ್ಯಾರ್ ಆನ್ಯೇಕ್ ಕಳೊ ತೊಪ್ಲೆಲ್ಲ್ಯಾಪರಿಂ ದಿಸ್ತಾ. ಕವಿತಾಂ ಅಧ್ಯಯನ್ ಕರ್ಚೊ ಹಾಂವ್ ಎಕ್ಚ್ ಪಾವ್ಟಿಂ ರುಕಾರ್ ಥಾವ್ನ್ ತಳ್ಯಾಂತ್ ಉಡ್ಕಿ ಮಾರುನ್ ಥಳಾಚೊ ಉಭಿರ್ ಪಾಯಾಂನಿಂ ಕದ್ವಳಾಂವ್ಚೊ ನೆಣ್ತೊ ಭುರ್ಗೊ ನ್ಹಯ್. ಹೊ ಭುರ್ಗ್ಯಾಪಣಾ ವಯ್ಲೊ ಖೆಳ್. ಕವಿತಾಚಾ ತಳ್ಯಾಂತ್ ಉಪ್ಯೆತಾನಾ ಎಕೇಕ್ಚ್ ಥೆಂಬ್ಯಾ ಉದ್ಕಾಕ್ ವೆಂಗೆಂತ್ ಜಿರವ್ನ್ ತಾಚೊ ಸ್ವಾದ್ ಸೆವುನ್ ಥಳಾರ್ ಲಿಪೊನ್ ಆಸ್ಲ್ಲ್ಯಾ ಮೊತಿಯಾಂಕ್ ಮೊಗಾನ್ ವೇಂಗ್ ಮಾರ್ಚೊ ಹಾಂವ್.
ಆತಾಂ ಕವಿಚಾ ಹ್ಯಾ ಜಮ್ಯಾಂತ್ಲ್ಯಾ ಮೊತಿಯಾಂ ತಸಲ್ಯಾ ಸಬ್ದಾಂಚಿ ರೂಚ್ ಪಳಂವ್ಯಾ.
"ಗೋ...." ದೆಡಾ ಅಕ್ಷರಾಚಾ ಹ್ಯಾ ಸಬ್ದಾಕ್ ಕವಿನ್ ತಾಚ್ಯಾ ಕವಿತಾ ನಾಯಕಾಚಾ ಮೊಗಾಂತ್ ಬರೆಂಚ್ ಸೊಭಯ್ಲಾಂ. ಹ್ಯಾ ಸಬ್ದಾಚೊ ಅರ್ಥ್ ಪಳಂವ್ಚೆಂ ಭೋವ್ ಗರ್ಜೆಚೆಂ. ಕವಿನ್ ತಾಚ್ಯಾ ಎಕ್ಸುರ್ಪಣಾಂತ್ ಆಪ್ಲ್ಯಾ ಭಂವ್ತಿಂ ರಚ್ಲ್ಲ್ಯಾ ಸಂಭಂದಾ ಪಯ್ಕಿ ಹೊ ಏಕ್ ಉಂಚ್ಲೊ ಸಂಭಂದ್ ಮ್ಹಣ್ಯೆತ್.
ಕಾರಾಣ್, ಹ್ಯಾ ಸಂಭಂದಾಕ್ ತಾಣೆಂ ಆಪ್ಲ್ಯಾ ಚಿಂತ್ಪಾಚಾ, ಆಪ್ಲ್ಯಾ ಕಾಳ್ಜಾಚ್ಯಾ, ಆಪ್ಲ್ಯಾ ಆತ್ಮ್ಯಾಚಾ, ಆಪ್ಲ್ಯಾ ಉಗ್ಡಾಸಾಚಾ, ಆಪ್ಲ್ಯಾ ಕುಡಿಚಾ, ಆಪ್ಲ್ಯಾ ಸಮಾಜೆಚಾ ಚಡ್ ಜಾವ್ನ್ ಆಪ್ಲ್ಯಾ ಸ್ವತಂತ್ರಾಚಾ ಚಡ್ ಲಾಗಿಂ ದವರ್ಲಾಂ. ದುಸ್ರೊ ಕಸಲೊಯ್ ಸಂಭಂದ್ ಹಾಂಗಾ ಕವಿಕ್ ತಾಚ್ಯಾ ವಿಂಚ್ಣಾರ್ ಭಗ್ಣಾಂಕ್ ಇತ್ಲೆಂ ಸೊಭಿತ್ ರೂಪ್ ದಿಂವ್ಕ್ ಸಕ್ತೊ ಮ್ಹಣೊನ್ ಹಾಂವ್ ಪಾತ್ಯೆನಾಂ. ರೇ... ಮ್ಹಳ್ಳೊ ಸಬ್ದ್ ಸಗ್ಳ್ಯಾ ಜಮ್ಯಾಂತ್ ಕೇವಲ್ ಚಲಿಯೆ ಲಾಗಿಂಚ್ ಸಂಭಂದ್ ನಿಯಾಳ್ತಾ. ಕ್ರಾಂತಿಕ್ ಉಗ್ತ್ಯಾ ಪಾಚಾರ್ಚೊ ಸಬ್ದ್ ಹ್ಯಾ ಜಮ್ಯಾಂತ್ "ರೇ..." ’ಕಯ್ದ್ಯಾಚೊ ಕವಿತಾ’ ಕವಿತಾ ಜಮ್ಯಾಂತ್ ಗೋ ಸಬ್ದಾಕ್ ದೋನ್ ರುಪಾಂನಿ ಆಮಿ ಪಳವ್ಯೆತ್.
ಪಯ್ಲೆಂ: ಮ್ಹಜ್ಯಾ ಚಿಂತ್ಪಾ ಪ್ರಾಕಾರ್ ನೆಣ್ತ್ಯಾ ಬಾಳಾಕ್ ಪಯ್ಲಿ ವೇಂಗ್ ತಾಚ್ಯಾ ಆವಯ್ಚಿ. ಹ್ಯಾಚ್ ಕಾರಾಣಾ ಖಾತಿರ್ ಭುರ್ಗೆಂ ಆವಯ್ಚಾ ಉಸ್ಕ್ಯಾರ್ ಪಯ್ಲ್ಯಾ ಶಾಂತಿಕ್ ವೆಂಗ್ತಾ. ಮುಕ್ಲ್ಯಾ ತಾಚ್ಯಾ ಜಿವಿತಾಂತ್ಯ್ ಆವಯ್ಚ್ಯಾ ಉಸ್ಕ್ಯಾರ್ ಮೆಳ್ಚಿ ಶಾಂತಿ ದುಸ್ರ್ಯಾ ಕೊಣಾಚಾಚ್ ಉಸ್ಕ್ಯಾರ್ ತಾಕಾ ಲಾಭಾನಾ. ನೆಣ್ತೆಂ ಭುರ್ಗೆಂ ಜಾಣ್ತೆಂ ಜಾತಾನಾಂಯ್ ಜಿವಿತಾಚಿ ಶಾಂತಿ ಚಲಿಯೆಚಾ ಉಸ್ಕ್ಯಾರ್ಚ್ ಆಶೆತಾ. ಹಾಂಗಾಸರ್ ಹಾಚೆಂ ರೂಪ್ ಬದ್ಲಾತಾ ಜಾಂವ್ಕ್ ಪುರೊ. ಕವಿನ್ಯ್ ತಾಚ್ಯಾ ಕವಿತಾ ನಾಯಕಾಕ್ ಎಕಾ ಚಲಿಯೆಚಾ ಸಾಂಗಾತಾಚೆಂ ಮೊಗಾಚೆಂ ರೂಪ್ ದೀವ್ನ್ ತಾಚ್ಯಾ ಉಸ್ಕ್ಯಾರ್ ಶಾಂತಿ ಸೊದ್ಚೆಂ ಪ್ರಯತ್ನ್ ಕೆಲಾಂ.
ದುಸ್ರೆಂ: ಕವಿತಾ ನಾಯಕಾಚಾ ಚಿಂತ್ಪಾಕ್ ಆನಿ ವಿಚಾರಾಂಕ್ ಸಾಂಗಾತ್ ಜಾವ್ನ್ ಚಲಿಯೆಚಾ ಮೊಗಾಚೆಂ ರೂಪ್ ತಾಕಾ ದೀವ್ನ್ ಸಂಸಾರಾಂತ್ಲಿ ದೂಖ್ ಆನಿ ಖಂತ್ ರುದಾನ್ ಕರ್ಚೆಂ ಪ್ರಯತ್ನ್. ಹ್ಯಾ ಪ್ರಯತ್ನಾಕ್ ಹಿ ಏಕ್ ನವಿ ಶೈಲಿ ಆನಿ ಹ್ಯಾ ನವ್ಯಾ ಶೈಲೆಂತ್ ಕೊಂಕ್ಣಿ ಕವಿತೆಂಕ್ ನವಿ ದಿಶಾ ಮ್ಹಣೊನ್ ಚಿಂತಾಂ ಹಾಂವ್.
ಸಂಸಾರಾರ್ ದೂಖ್: ಕಾಂಯ್ ಉಣೆಂ ನ್ಹಂಯ್. ಹ್ಯಾ ದುಃಕಾ:ಕ್ ಕಾರಾಣ್ಯ್ ಸಂಸಾರಾಚಾ ಸುರ್ವೆರ್ ಥಾವ್ನ್ಂಚ್ ಚಲಿ. ಜಶೆಂ ಸುಖಾಚಾ ಸಂಸಾರಾಂತ್ ಎವೆನ್ ಆದಾಂವ್ಕ್ ಖಾವಯಿಲ್ಲ್ಯಾ ಪಯ್ಲ್ಯಾ ಆಡ್ವಾರ್ಲೆಲ್ಯಾ ಫಳಾ ಥಾವ್ನ್ ದೂಕ್ ಉಬ್ಜಾಲ್ಲಿ ತಿ ತ್ಯಾ ಉಪ್ರಾಂತ್ ವಾಂಟ್ಯಾ ವಾಂಟ್ಯಾಂನಿ ರುಪಾ ರುಪಾಂನಿ ವಾಡಾತ್ತ್ ಗೆಲಿ ಜಶೆಂ ವಾಂಟ್ಯಾಂತ್ ಎಕಾ ರೂಪಾಂತ್ ಎಕಾ.....!
"ತುಜ್ಯಾ ಮೊಗಾ ಪಾಸ್ಳೆಂತ್ ಹಾವೆಂ ಘುಂತ್ಲ್ಲಿ ಸಪ್ಣಾಂ ಸರ್ಗಾಚಿಂ ಸಂಯ್ಚಾಚೆಂ
ಕಾಳ್ಕಾಯೆಂತ್ ಆಜ್ ಉರ್ಲ್ಯಾಂತ್ ಖತಾಂ ಮಾತ್ರ್ ಹಳ್ದುವಿಂ"
"ಚಾನ್ನ್ಯಾ ರಾತಿಂ ಮೊರಾ ಪಾಕಾಂ ಮಾಳುನ್ ಆಯಿಲ್ಲ್ಯಾ ಚೆಡ್ವಾ
ಸಾಂಗ್ಗೊ ಮ್ಹಾಕಾ ನೆಕೆತ್ರಾಂ ಖಂಯ್ ಶಿಂಪುನ್ ಆಯ್ಲೆಂಯ್?"
"ಆಬೊಲ್ಯಾಚಾ ಉಜ್ಯಾರ್ ಆಂಗ್ ಶೆಕುನ್ ಆಯಿಲ್ಲ್ಯಾ ಚೆಡ್ವಾ
ಸಾಂಗ್ಗೊ ನ್ಹಾಲ್ಲ್ಯಾ ಗುಲೊಬಾ ರೊಸಾಕ್ ಖಂಯ್ ವ್ಹಾಳಯ್ಲೆಂಯ್?" (ಆಟೆವಿಟೆ)
ಹಿ ಮೊಗಾಚಿ ಫಾಸ್ಳಿ ಕಸಲಿ? ಹಾಚೆಂ ರೂಪ್ ಕಸಲೆಂ? ಹಿ ಮೊಗಾ ಫಾಸ್ಳಿ ಚಾನ್ನ್ಯಾಚಿ ರಾತ್ ಆನಿ ಆಬೊಲ್ಯಾಂಚೊ ಉಜೊ...! ಚಾನ್ನ್ಯಾಚಾ ರಾತಿಚೊ ಥಂಡ್ ಉಜ್ವಾಡ್. ಆಬೊಲ್ಯಾಂಚಿ ಮೊವಾಳಾಯ್ ಕೇವಲ್ ತ್ಯಾ ಭುರ್ಗ್ಯಾಪಣಾ ವಯ್ಲ್ಯಾ ಪಾಳ್ಣ್ಯಾ ಭಿತರ್ ಮಾತ್ರ್. ತ್ಯಾ ಪಾಳ್ಣ್ಯಾ ಭಿತರ್ಲ್ಯಾ ಜಿವಿತಾಂತ್ ಮೊರಾ ಪಾಕಾಂ ಮಾಳುನ್ ಆಯಿಲ್ಲೆಂ ಜಿವಿತ್, ಕಾಜುಲೆ ದಿವೆ ಪೆಟಯಿಲ್ಲೆ ಜಿವಿತ್, ಉಬಾಳ್ ವೆಂಗೆಂತ್ ಆಂಗ್ ಶೆಕ್ಲ್ಲೆಂ ಜಿವಿತ್, ಮೊಗ್ರಾಚಾ ಭಿಚಾಣ್ಯಾ ಥಾವ್ನ್ ಮೊಳ್ಬಾಕ್ ನಿಸಣ್ ತೆಂಕಯಿಲ್ಲೆಂ ಜಿವಿತ್ ಖಂಡಿತ್ ಭುರ್ಗ್ಯಾಪಣಾ ವಯ್ಲೆಂ ನೆಣ್ತೆಂ ಜಿವಿತ್. ಹ್ಯಾ ಜಿವಿತಾಂತ್ಲಿ ಸ್ವಪ್ಣಾಂ ಸರ್ಗಾಚಿಂ.
ಆತಾಂಚಾ ಜಾಣ್ತ್ಯಾ ಜಿವಿತಾಂತ್ ಪಯ್ಲೆಂ ಸ್ವಪ್ಣೆಲ್ಲಿಂ ತಿಂ ನೆಕೆತ್ರಾಂ, ತೊ ಚಂದ್ರ್, ತೊ ಗುಲೊಬಾ ರೋಸ್, ಮನ್ಶ್ಯಾ ಸೈಂಭಾಚಾ ವೆಂಗೆಂತ್ ಕೆಲ್ಲಿ ಆಶಾ ಆತಾಂ ಜಾಣ್ತ್ಯಾಪಣಾರ್ ಜಾಂವ್ಕ್ ಪಾವ್ಲ್ಯಾ ಕಾಳ್ಕಾಯೆಂತ್ ಖತಾಂ. ಭುರ್ಗ್ಯಾಪಣಾ ವಯ್ಲ್ಯಾ ಸ್ವಪ್ಣಾಂಕ್ ಕವಿತಾ ನಾಯಕಾಚೆಂ ಪಯ್ಲೆಂ ಕಯ್ದ್.......! ಮೊಗಾಚಾ ಪಾಸ್ಳೆಕ್ ಮೊಗಾಚೆಂ ರೂಪ್....! ಭೋವ್ ಸುಂದರ್ ತಾಳ್. ಹ್ಯಾ ಭುರ್ಗ್ಯಾಪಣಾ ವಯ್ಲ್ಯಾ ಸುಖಾಕ್ ಆಶೆಂವ್ಚ್ಯಾ ನೆಣ್ತ್ಯಾ ಸ್ವಪ್ಣಾಂಕ್, ಕವಿತೆಚೊ ನಾಯಕ್ ಗಡ್ದೆಂತ್ಲ್ಯಾ ಶ್ಹೆರಾಂನಿ, ಚ್ಯಾರ್ ವೊಣೊದಿ ಭಿತರ್, ಭಾಂಗ್ರಾಳ್ಯಾ ಪಿಂಜ್ರ್ಯಾಂತ್, ರಾವ್ಳೆರಾಂತ್, ಘಟಾರಾಂತ್ ಆನಿ ತ್ಯಾ ಕಾಂಕ್ಣಾಚಾ ಗಲ್ಲೆಂನಿ ಸಯ್ತ್ ಸೊಧುನ್ ಭಂವ್ತಾ.
"ಕಾಂಕ್ಣಾ ಗಲ್ಲೆಂತ್ ಶಿಂಪ್ಲ್ಯಾತ್ರೆ ಸಪ್ಣಾಂ
ವಿಂಚುಕ್ ಪಡ್ಲ್ಯಾಂತ್ ಆಶಿಂ ಪಿಶಿಂ ಮನಾಂ ಆಪುರ್ಭಾಯೆಚಿಂ" (ಕಾಂಕ್ಣಾ ಗಲ್ಲೆಂತ್)
ವಾಳಾಂತ್ ಪಳೆಲ್ಲ್ಯ್ ನೆಣ್ತ್ಯಾ ಸಪ್ಣಾಂಕ್ ಸಾಕಾರ್ ಕರ್ಚಾ ದಿಸಾಂನಿಂ ಹ್ಯಾ ನೆಣ್ತ್ಯಾ ಚೆಡ್ವಾಂಚೆಂ ಜೀವನ್ ತ್ಯಾ ಗಲ್ಲೆನಿಂ ಪಿರಾಯೆಚಾ ಬಾಯ್ಲಾಂನಿಂ ನೆಸಂವ್ಚಾ ಜಬ್ಬೊರ್ ಕಾಂಕ್ಣಾನಿಂ ಶಿರ್ಕೊನ್ ಕಶೆಂ ಉಡ್ಡಾತಾ ತೆಂ ಕವಿತಾ ನಾಯಕ್ ಬೊಬಾಟುನ್ ಸಾಂಗ್ತಾ. ಹಾಂಗಾಸರ್ ಉಬ್ಯೊ ಕೆಲ್ಲ್ಯೊ ಇಮಾಜಿ ಪಳೆಯಾ, ಕಾಂಕ್ಣಾಂ, ಗಲ್ಲಿ, ಸಪ್ಣಾಂ, ಸೊಧ್ನಾಂ, ಮನಾಂ. ಸಪ್ಣಾಂ ತುಟ್ತಾನಾ ದುಖಾಂ ಫ್ಹುಟ್ತಾತ್ ದೊಳ್ಯಾಂನಿಂ. ದೊಳ್ಯಾಂನಿಂ ಉದೆಲ್ಲಿಂ ದುಖಾಂ ಸಪ್ಣಾಂಚಾ ರೂಪಾರ್ ಗಲ್ಲೆಂತ್ ಕಯ್ದ್ ಜಾಲ್ಲ್ಯಾಂತ್. ಅಶೆಂ ಕಯ್ದ್ ಜಾಲ್ಲಿಂ ಸಪ್ಣಾಂ........
"ಫಾಂತ್ಯಾಚಾ ಸಪ್ಣಾಂ ಕರ್ಲಾಂತ್ ಫುಟ್ಚಾ ಆದಿಂ ಚೀಂತ್
ತರ್ನ್ಯಾ ಕಾಳ್ಜಾಂಚೆ ಕುಡ್ಕೆ ಗಾಲಾಂ ಫೊಂಡ್ಕುಲಾನಿಂ
ಸಾಂಡುನ್ ಸಾಕಾಳಿಂಚಾ ದೊವಾಕ್ ನಾಂವ್ಕ್ ವೆಚಾ ಪಯ್ಲೆಂ
ಕಾಳ್ಜಾಂತ್ ಉರ್ಲೆಲ್ಯಾ ಪಿಂತುರಾಂಚೆಂ ಕಿತೆಂ ಕರ್ಚೆಂ ಸಾಂಗ್" (ಫಿಂರ್ಗೊಣ್)
ಸಪಾಣ್ ತೆಂ ಪೊಟಾಂತ್ ಕಿರ್ಲೊನ್ ಫ್ಹುಟೊನ್ ವೆಚಾ ಪಯ್ಲೆಂಚ್ ಸಪ್ಣಾಕ್ ಸವಾಲ್ ಉಡಯ್ತಾ ಕವಿತಾ ನಾಯಕ್. ಗಲ್ಲೆಂತ್ಲ್ಯಾ ಖರ್ಯಾ ಜಿವಿತಾಂತ್ ಪೊಟಾಂತ್ ಕಿರ್ಲಾಲ್ಲ್ಯಾ ರಗ್ತಾಚೆಂ ಜಿವಿತ್ ಕಿತ್ಲ್ಯಾ ಫಿಂರ್ಗೊಣೆಚೆಂ ಜಾಂವ್ಕ್ ಪಾವ್ತಾ ತೆಂ ಪಿಂತ್ರಾಯ್ತಾ ಆನಿ ವಿನತಿ ಕರ್ತಾ......
"ಕೆನ್ನಾಂಯ್ ಅಸೊ ಉಜೊ ಪೆಟಯ್ನಾಕಾತ್
ಮಾಸಾಂ ಭಾಜ್ತಾತ್, ರಾಗ್ತಾಂ ಪೆಟ್ಟಾತ್ - ಬೊಬೆಕ್
ಶ್ಹೆರ್ ಉಟ್ತಾನಾ, ಪಿರಾಣ್-ಲಜ್ ಸಾಂಗಾತಾ ಲುಟ್ತಾತ್" (ವಿನತಿ)
ಸಮಾಜೆಂತ್ಲ್ಯಾ ಸ್ವಾರ್ಥಿ ಮತ್ಲಾಬಿ ಮನ್ಶ್ಯಾಂ ಥಾವ್ನ್ ತಾಂಚಾ ಅಧಿಕಾರಾಚಾ, ಹಕ್ಕಾಚಾ, ಪಯ್ಶ್ಯಾಂಚಾ ಬೊಳಾಚಾ ಹಾತೆರಾಂನಿ ಆಪ್ಲಿ ಸ್ವಾರ್ಥಿ ಭುಕ್ ಥಾಂಬಂವ್ಚೆ ಮನಿಸ್ ಹ್ಯಾ ಸಮಾಜೆಂತ್ ಕಶೆಂ ರಾಗಾತ್ ಝಳವ್ನ್ ಮಾಸಾಂ ಭಾಜ್ತಾತ್. ಹ್ಯಾ ಝಳ್ಚಾ ಭಾಜ್ಣೆಂತ್ ನಿರ್ದೊಶ್ಯಾಂಚೆ ಪ್ರಾಣ್, ಅಬಲ್ ಚಲಿಯಾಂಚೊ ಮಾನ್ ಕಸೊ ಲುಟ್ತಾ ತೆಂ ಪಳೆವ್ನ್ ಫಿರ್ಯಾದ್ ಮಾಂಡ್ತಾ ಕವಿತಾ ನಾಯಕ್. ಹಾಂಗಾ ಮನ್ಶ್ಯಾಪಣ್ಯ್ ಪರ್ಕಿ ಗಾಂವಾಂತ್ ಕಯ್ದಿ ಜಾಲಾಂ.
"ಕಸೊ ಮೆಲೊ ಕವಿ? ಉಜ್ಯಾಂತ್ ಲಾಸೊನ್, ಮಾಸಾಂ ಝಳೊಂಕ್ ನಾಂತ್ ಪೆಟೊಂಕ್ ನಾಂತ್ ಖಾತಿ ಕಸೊ ಮೆಲೊರೆ ಕವಿ ಹ್ಯಾ ಪರ್ಕಿ ಶ್ಹೆರಾಂತ್ ಪುರ್ಶ್ಯಾಂವ್ ಕಸಲೆ ದಿಸ್ತಾತ್ ರಿಕಾಮ್ಯಾ ರಸ್ತ್ಯಾರ್" (ಫಿರ್ಯಾದ್)
ಕವಿಪಣಾಕ್ ಜಾಗಂವ್ಚೆಂ ಪ್ರಯತ್ನ್ ಹೆಂ. ಕವಿತಾ ನಾಯಕಾಕ್ ಸಂಸಾರಿ ದೊಳ್ಯಾಂಕ್ ಕೊಣ್ಯ್ ಮೆಲ್ಲಿಂ ಖುಣಾಂ ದಿಸಾನಾಂತ್ ತರೀಯ್ ಕವಿಚಾ ದೊಳ್ಯಾಂಕ್ ಕವಿಪಣ್ ಮೊರೊನ್ ಸಿಮೆಸ್ತ್ರಿಕ್ ವೆತಾ ತಶೆಂ ದಿಸ್ತಾ. ಕವಿತಾಂಚಾ ಕ್ರಾಂತಿಕ್ ಹಾಂಗಾ ಕವಿತಾ ನಾಯಕಾನ್ ಖಾಂದಾರ್ ಉಕೊಲ್ನ್ ಧರ್ಲಾಂ. ಸಮಾಜೆಂತ್ ಜಾಂವ್ಚಾ ಆನಿ ಘಡ್ಚಾ ಆತ್ಯಾಚಾರಾ ವಯ್ರ್ ತಾಣೆಂ ಬಂಡಾಯ್ ಉಬೊ ಕೆಲಾ. ತೊ ಕ್ರಾಂತಿಕ್ ದೆಂವ್ಲಾ. ತಾಚ್ಯೆ ಲಾಗಿಂ ಆಶಾವಾದ್ ನಾ. ಫಾಲ್ಯಾಂ ಜಾತೆಲೆಂ ಮ್ಹಣ್ ತೊ ರಾಕೊನ್ ರಾವಾನಾ. ಆಯ್ಚಾ ಕಾಳೊಕಾಕ್ ಆಜ್ಚ್ ಉಜ್ವಾಡ್ ದಿಂವ್ಕ್ ಸಾಧನ್ ಕರ್ತಾ.
"ಸಪ್ಣಾಂ ರಂಗಂವ್ಚಾ ದೊಳ್ಯಾಂನಿ ರಗ್ತಾ ತಾನ್
ಮೋಗ್ ಪಾಲೆಂವ್ಚಾ ಕಾಳ್ಜಾಂತ್ ಪಾರ್ತೇನಿಯಮ್ ರಾನ್
ಜಿಬೆ ರುಚಿಚ್ಯೊ ಸ್ವರ್ಗಾ ಸುಖಾಚ್ಯೊ ಕಾಳ್ಜಾಂ ಸಂತೊಸಾಚ್ಯೊ
ಶಿರೊ ಸುಕ್ಲ್ಯಾತ್ಗೊ, ಕುಡಿ ಆತ್ಲ್ಯಾಂತ್" (ಅನಸ್ತೇಶಿಯಾ)
ಮನಿಸ್ ಆನಿ ಮನ್ಶ್ಯಾಪಣ್ ಆಜ್ ರಾನಾಕ್ ಧಾಂವ್ಲಾಂ ಆನಿ ಹ್ಯಾ ಸ್ವತಂತ್ರಾಚಾ ಗಾಂವಾಂತ್ ದುಕೊಳ್ ಪಡ್ಲಾ. ಕಾರಾಣ್ ಹಾಂಗಾ ಉಜ್ವಾಡಾಕ್ ಆನಿ ಉದ್ಕಾಕ್ಯ್ ಕಯ್ದ್ ಕೆಲಾಂ.
"ಕೊಂಬ್ಯಾಕ್ ಸುರ್ಯೊ ಮೊರಾಕ್ ಪಾವ್ಸ್ ಖಾಲ್
ದೆಕುನ್ ಹ್ಯಾ ಗಾಂವಾಂತ್ ಕಾಳೊಕ್ ದುಕೊಳ್ ಸಗ್ಳ್ಯಾನಿತ್ಲ್ಯಾನ್" (ಹ್ಯಾ ಗಾಂವಾಂತ್)
ಆಮ್ಚಾ ದೇಶಾ ವಯ್ರ್ ಶಿಣ್ಚೊ ಕವಿತಾ ನಾಯಕ್ ಹ್ಯಾ ದೆಶಾಚಾ ಕಾಳೊಕಾಕ್ ಆನಿ ದುಕೊಳಾಕ್ ಕಾರಾಣ್ ಜಾಲ್ಲ್ಯಾ ಕೊಂಬ್ಯಾಕ್ ಆನಿ ಮೊರಾಕ್ ಬೋಟ್ ಜೊಕ್ತಾ. ಪ್ರಿತುಮೆಚಾ ನಿಯಾಮಾ ವಯ್ರ್ ಸಯ್ತ್ ಹೆ ಕೊಂಬ್ಯಾ ತಸಲೆ ಆಪ್ಣಾ ಥಾವ್ನ್ಂಚ್ ಫಾಂತೆ ಜಾತಾ ಮ್ಹಣ್ ಚಿಂತ್ಚೆಂ, ತ್ಯಾ ಮೊರಾ ತಸಲೆ ಮ್ಹಜ್ಯೆ ಥಾವ್ನ್ಂಚ್ ಹ್ಯಾ ದೆಶಾಂತ್ ಪಾವ್ಸ್ ಪಡ್ತಾ ಮ್ಹಣ್ಚ್ಯೆ ತಸಲೆ ಆಜ್ ಯೇವ್ನ್ ಸುರ್ಯಾಕ್ ಆನಿ ಪಾವ್ಸಾಕ್ ಲಿಪವ್ನ್ ಸಮಾಜೆಂತ್ಲ್ಯಾ ಲೋಕಾ ಸಂಗಿಂ ಖೆಳ್ ಖೆಳ್ತಾತ್. ಅಸಲ್ಯಾ ಕೊಂಬ್ಯಾ ಆನಿ ಮೊರಾಚೊ ಮೋಗ್ ಕವಿ ತಾಚ್ಯಾ ಸೊಬಿತ್ ಉತ್ರಾಂನಿ ಅಶೆಂ ಪಿಂತ್ರಾಯ್ತಾ.
"ತುಂಗೊ ಫುಲ್ ಹಾಂವ್ಗೊ ಭಂವರ್ ಮೊಗಾರ್ ಪಡ್ಲ್ಯಾಂವ್
ಪಯ್ಲ್ಯಾ ದಿಷ್ಟಿಂತ್ ಹಾಂವ್ಗೊ ಮೇಣ್
ತುಂಗೊ ವಾತ್ ಜಳ್ತಾಂವ್ ದೊಗಾಂಯ್ ಆತಾಂ - ಮೊಗಾ ಉಜ್ಯಾಂತ್" (ಹಾಂವ್ ಆನಿ ತುಂ)
ಹೊ ಮೊಗಾ ಉಜೊ ಕಸಲೊ? ಆಶೆಚ್ಯಾ ಆನಿ ಕುಡಿಚ್ಯಾ ಮದ್ಲೊ. ಕಾಳೊಕ್ ಆನಿ ಆತ್ಮ್ಯಾ ಮದ್ಲೊ. ಮೋಗ್ ತೊ ಕೆಲಾ. ಜಾಂವ್ ತಾಚೊ ರೂಪ್ ಕಸಲೆಂಯ್. ಪುಣ್ ಜಳೊಂಕ್ ಖಂಡಿತ್ ಆಸಾ. ಉಜ್ಯಾಂತ್.... ಹ್ಯಾ ಉಜ್ಯಾಂಚೆ ಅಂತ್ಯ್ ಕೊಣ್ಂಚ್ ನೆಣಾಂ. ಕವಿತೆಚೊ ನಾಯಕ್ ವಾಯ್ಟಾಕ್ ಆನಿ ಜಿವಿತಾಕ್ ಸಂಭಂದ್ ಕರ್ತೆಲ್ಯಾಂಚೊ ಮೋಗ್ ಪಯ್ಲ್ಯಾ ದಿಷ್ಟಿನ್ ಉಬ್ಜಾತಾ ಮ್ಹಣ್ತಾ. ಪಯ್ಶಾಂಚಾ ಆಶೆಕ್ ಅಧಿಕಾರಾಚಾ ಭುಲವ್ಣೆಕ್, ಚಲಿಯೆಚಾ ವೊಡ್ನ್ಯಾಕ್ ಕಾರಾಣ್ ಕಿತೆಂಯ್ ಆಸೊಂ ಕಾಳೊಕ್ ಮ್ಹಳ್ಯಾರ್ ಪಾತ್ಕಾಕ್ ವೇಂಗ್ ಮಾರುಂಕ್ ಎಕ್ಚ್ ದೀಷ್ಟ್ ಪಾವ್ತಾ. ಥೊಡೆ ಪಾವ್ಟಿಂ ತಿ ದೀಷ್ಟ್ಯ್ ದೊಳ್ಯಾಂ ಥಾವ್ನ್ ಆತ್ಮ್ಯಾ ದಾರಾರ್ ಪಾಂವ್ಚ್ ಪಯ್ಲೆಂಚ್ ಕಾಳೊಕ್ ಜಾವ್ನ್ ಬದ್ಲಾತಾ.
ಹ್ಯಾ ಮೊಗಾಕ್ ಪಿಂತ್ರಾಯಿಲ್ಲೊ ಇಮಾಜ್ಯೊ ತುಂಗೊ ಫುಲ್ ಹಾಂವ್ಗೊ ಭಂವರ್, ತುಂಗೊ ದರ್ಯೊ ಹಾಂವ್ಗೊ ಸುರ್ಯೊ, ತುಂಗೊ ಚಂದ್ರೆಮ್ ಹಾಂವ್ಗೊ ಚಾನ್ನೆಂ. ಹ್ಯಾ ಇಮಾಜೆಂಚೆ ಮಿಲನ್ ಖಂಡಿತ್ ಜಾಯ್ನಾಂ ಆನಿ ಸರ್ವ್ ಇಮಾಜ್ಯೊ ಸುಖಾಚ್ಯಾ ಅಮಾಲಾಚಾ ಸಂಸಾರಾಂತ್ಲ್ಯೊ ಮ್ಹಳ್ಳ್ಯಾರ್ ಕಾಳೊಕಾಚೊ. ಜಾಯ್ನಾತ್ಲೆಂ ಮಿಲನ್ ಹಾಂಗಾಸರ್ ಕವಿ ಕರ್ತಾ. ತೆಂಚ್ ಕವಿತೆಚಿ ಸೊಬಾಯ್ ವಾಡಾಯ್ತಾ. ಅಶೆಂ ಜಾಲ್ಲೊ ಮೋಗ್ ನಿಮಾಣೊ ಮೇಣ್ ಆನಿ ವಾತ್. ಹಾಂಗಾಸರ್ ವೆಗ್ಳಾಚಾರ್ ನಾಂ ಪಾತಕ್ ಆನಿ ಆತ್ಮೊ ಉಜ್ಯಾಂತ್ ಜಳ್ಣಿ. ಹೊ ಸಂಸಾರ್ಚ್ ಏಕ್ ಬಂಧಿಖಾನೊ ಆನಿ ಆಮಿ ಸಗ್ಳೆ ತಾಂತುಂ ಕಯ್ದಿ ಜಾವ್ನಾಸಾಂವ್. ಹೆ ಕಯ್ದಿಯ್ ಕಸಲೆ? ಥೊಡೆ ವ್ಯವಸ್ತೆಕ್ ಲಾಗೊನ್ ಕಯ್ದ್ ಜಾಲ್ಲೆ ಥೊಡೆ ಆಪ್ಲ್ಯಾಚ್ ಖುಶೆನ್ ಕಯ್ದ್ ಜಾಲ್ಲೆ ತರ್ ಥೊಡ್ಯಾಂಕ್ ಕೊಣೆಂ ಕಯ್ದ್ ಕರುನ್ ದವರ್ಲೆಲೆ.
"ಚ್ಯಾರ್ ವೊಣೊದಿ ಭಿತರ್ ಹಾಂವ್ಗೊ ಆತಾಂ ಕಯ್ದ್ ಸುಕ್ಣ್ಯಾಪರಿಂ
ಜಾಳಿಚಾ ಪಿಂಜ್ರ್ಯಾಂತ್ ಸಂಸಾರ್ ದಿಸ್ತಾ ಸೊಬಿತ್
ಭಾಯ್ಲೊ ಮಾಕಾ ಉಬೊಂಕ್ ಮಾತ್ರ್ ಪಾಕಾಟೆಂ ನಾಂತ್" (ಕಯ್ದ್ಯಾಚಿ ಕವಿತಾ: ಉಪ್ರಾಂತ್ಲಿ)
ಕವಿತೆಚೊ ನಾಯಕ್ ಹಾಂಗಾ ಕಯ್ದ್ ಜಾಲಾ ಚ್ಯಾರ್ ವೊಣೊದಿ ಭಿತರ್. ತಾಕಾ ಆತಾಂ ಭಾಯ್ಲೊ ಸಂಸಾರ್ ಸೊಭಿತ್ ದಿಸ್ತಾ. ಪುಣ್ ಉಬೊನ್ ವಚೊಂಕ್ ಪಾಕಾಟೆ ನಾಂತ್. ಕಯ್ದ್ ಜಾಲ್ಲ್ಯಾಕ್ ಭಾಯ್ಲೊ ಸಂಸಾರ್ ಕಿತ್ಯಾಕ್ ಸೊಭಿತ್ ದಿಸ್ತಾ? ಕಯ್ದೆ ಭಿತರ್ಲ್ಯಾ ಸಂಸಾರಾಚಿ ಸೊಬಾಯ್ ಖಂಯ್ ಗೆಲ್ಯಾ? ತಾಚೊ ತೊ ಬಾಯ್ಲೊ ಸಂಸಾರ್......
"ಗುಡೆ ದೊಂಗೊರ್ ನಂಯೊ ದರ್ಯೊ ಭಂವೊನ್ ಖಾವ್ನ್ ಜಿಯೆಲ್ಲೊ ಜೀವ್ಗೊ ಮ್ಹಜೊ" (ಕಯ್ಚ್ಯಾಚಿ ಕವಿತಾ: ಉಪ್ರಾಂತ್ಲಿ)
ಕಯ್ದಿ ಜಾಂವ್ಚ್ ಪಯ್ಲೆಂ ಗುಡೆ ದೊಂಗೊರ್ ತಾಣೆಂ ಮಸ್ತಿಲ್ಯಾತ್. ಕಾಂಟೆ ಖುಂಟೆ ಗುಡ್ಡಾಯ್ಲ್ಯಾತ್. ನಂಯೊ ದರ್ಯೊ ಉತರ್ಲ್ಯಾತ್. ವಾರ್ಯಾ ವಾದಾಳಾಕ್ ಮುಖಾರ್ ರಾವ್ಲಾ ಮ್ಹಳ್ಳ್ಯಾರ್ ಭೋವ್ ಕಷ್ಟಿ ಜಿವಿತ್. ಕಷ್ಟಾಂಚಾ ಜಿವಿತಾಕ್ ಕವಿತಾ ನಾಯಕ್ ಪಿಂಜ್ರ್ಯಾ ಭಿತರ್ ಉಗ್ಡಾಸ್ ಕಾಡ್ತಾ. ತೊ ಆತಾಂ ಕಯ್ದ್ ಜಾಲ್ಲೊ ಪಿಂಜ್ರ್ಯಾಂತ್ಲೊ ಸಂಸಾರ್.....
"ತುಜ್ಯಾ ರಾವ್ಳೆರಾಚೊ ಪಾಗೊರ್ ಇತ್ಲೊಗೋ ಉಬಾರ್ ........."
ಕೆಲ್ಶ್ಯಾಚಾ ಕಾತ್ರಿಕ್ ಖುಶೇನ್ ಪಾಕಾಂ ದಿಲ್ಲೊ ಜೀವಯ್ ಆಜ್
ರಾವ್ಳೆರಾ ಸುಖಾಂತ್ ಕಿತ್ಯಾಕ್ ಪಿಂರ್ಗಾತಾ?" (ಕಯ್ದ್ಯಾಚಿ ಕವಿತಾ: ಉಪ್ರಾಂತ್ಲಿ)
ಕಷ್ಟ್ ದಗ್ದೊಣೆಚಾ ಜೀವನಾ ಥಾವ್ನ್ ಪೊಳಾಫಳ್ ಘೆಂವ್ಚಾಕ್ ರಾವ್ಳೆರಾಚೊ ರಸ್ತೊ ಆಪ್ಣಾಯಿಲ್ಲೊ ಕವಿತಾ ನಾಯಕಾನ್. ರಾವ್ಳೆರ್ ಮ್ಹಳ್ಳ್ಯಾರ್ ಸುಖ್. ಪಿಂಜ್ರ್ಯಾಂತ್ಲೆಂ ರಾವ್ಳೆರ್ ಮ್ಹಳ್ಳ್ಯಾರ್ ಹಾಂಗಾಸರ್ ಸುಲಾಬಾಯೆನ್ ಪಯ್ಶೆ ಜೊಡ್ಚೊ ಕಾಳೊ ಸಂಸಾರ್. ಹ್ಯಾ ಖಾತಿರ್ ಆಪ್ಲ್ಯಾಚ್ ಖುಶೆನ್ ತಾಣೆಂ ಆಪ್ಲ್ಯಾ ಸ್ವತಂತ್ರ್ಪಣಾಚೆಂ ಪಾಕಾಟೆಂ ಕೆಲ್ಶ್ಯಾಚಾ ಕಾತ್ರಿಕ್ ಬಲಿ ದಿಲ್ಲೆಂ. ಕೆಲ್ಶಿ ಮ್ಹಳ್ಳ್ಯಾರ್ ಪಾತಕ್, ತಾಚಿ ಕಾತರ್ ವಾಂಕ್ಡಿ ವಾಟ್. ಮ್ಹಳ್ಳ್ಯಾರ್ ಕೆಲ್ಶ್ಯಾಚೊ ಗುಲಾಮ್ ತೊ ಜಾಲೊ.
ಆತಾಂ ಹ್ಯಾ ಪಾತ್ಕಿ ಸಂಸಾರಾಚೊ ಪಾಗೊರ್ ತಾಚ್ಯಾ ಭಂವ್ತಿ ಇತ್ಲೊ ಉಬಾರ್ ಜಾಲಾಕೀ ಕವಿತಾ ನಾಯಕ್ ಹ್ಯಾ ಪಾತ್ಕಾಚಾ ಮೊಗಾಂತ್ ಫುಲ್ ಆನಿ ಭಂವರಾ ಥಾವ್ನ್ ಮೇಣ್ ಆನಿ ವಾತ್ ಜಾಲಾ. ರಾವ್ಳೆರಾ ಭಿತರ್ ಆತಾಂ ಪಾತ್ಕಾಂತ್ ಝಳ್ತಾನಾ ಭಾಯ್ಲೊ ಆದಿಂ ಸಾರ್ಲೆಲೊ ತೊ ಕಷ್ಟಾಂ ದುಃಕಾಂಚೊ ಪುಣ್ ಶಾಂತಿ ಸಮಾಧಾನೆಚೊ ಸಂಸಾರ್ಚ್ ಸೊಭಿತ್ ದಿಸ್ತಾ ತಾಕಾ ಪುಣ್ ಹ್ಯಾ ಪಿಂಜ್ರ್ಯಾ ಥಾವ್ನ್ ಸುಟ್ಕಾ ಕಶಿ? ಧಾವೊಂಕ್ ಪಿಂಜ್ರೊ ಆಸಾ. ಉಬೊಂಕ್ ಪಾಕಾಟೆ ಕಾತರ್ಲ್ಯಾತ್. ಕೆಲ್ಶ್ಯಾಚೊ ಪಾರೊ ಆಸಾ. ಆತಾಂ ತೊ ಆಪ್ಣೆಂಚ್ ಕೆಲ್ಲ್ಯಾ ಪಾತ್ಕಿ ಮೊಗಾಕ್ ಸವಾಲ್ ಕರ್ತಾ.
"ಸಾಂಗ್ ಗೊ ನಿಶ್ಚಿಂತ್ ಉಬ್ತಾನಾ ಬಂದೆಂತ್ ಬಸ್ಚಿ ಆಶಾ
ಪಿಂಜ್ರ್ಯಾಂತ್ ಪಡ್ಲ್ಲ್ಯಾ ಉಪ್ರಾಂತ್ ಉಭೊನ್ ವೆಚಿ ಖಂತ್
ಕಾಳ್ಜಾಕ್ ಆಶಿ ಕಿತ್ಯಾಕ್ ಧೊಸ್ತಾ?" (ಕಯ್ದ್ಯಾಚಿ ಕವಿತಾ: ಉಪ್ರಾಂತ್ಲಿ)
ನಿಶ್ಚಿಂತ್ ಉಬ್ತಾನಾ ತಾಕಾ ಕಷ್ಟ್ ಆಸ್ಲ್ಲೆ ತರೀಯ್ ಕಾಳ್ಜಾಂತ್ ಉಜೊ ನಾತ್ಲ್ಲೊ. ಪಾತ್ಕಾ ಸಾಂಗಾತಾ ಸಂಭಂದ್ ನಾತ್ಲ್ಲೊ. ಅಶೆಂ ತೊ ನೆಣಾಂ ಆಸ್ಲ್ಲೊ ಜಳ್ಣಿ ಕಿತೆಂ ತೆಂ. ತೆದಾಳಾ ಭಿತರ್ಲೆಂ ರಾವ್ಳೆರ್ ಸೊಭಿತ್ ದಿಸ್ಲೆಂ ಭಾಯ್ಲೆಂ ನಾಕಾ ಜಾಲೆಂ. ದೆಕುನ್ ರಾವ್ಳೆರಾಂತ್ ಕಯ್ದಿ ಜಾಲೊ. ಆತಾಂ ಆತ್ಮೊ ಆಶೆತಾ ಏಕ್ ಪಾವ್ಟಿಂ ಭಾಯ್ಲ್ಯಾ ಉಜ್ವಾಡಾಕ್ ಉಬೊನ್ ವಚೊಂಕ್. ಕವಿತಾ ನಾಯಕಾಚೆಂ ಭುಲವ್ಣೆಂ ಸಂಸಾರಾಂತ್ ರಾವ್ಳೆರಾಂತ್ಲೆಂ ಕಯ್ದ್ ತಾಚ್ಯಾಚ್ ಖುಶೇಚೆಂ. ಪಾತ್ಕಾಂತ್ ಕಯ್ದ್ ಜಾಲ್ಲ್ಯಾ ಸುಕ್ಣ್ಯಾಕ್ ಆತಾಂ ನಿಮಾಣೆಂ ಆಯೆರ್ ಘಂವ್ಚೊ ವೇಳ್ ಲಾಗಿಂ ಪಾವ್ಲಾ.
"ವರ್ಸಾಂ ಚಡ್ತೆಲಿಂ ಮಿರಿಯೊ ವಾಡ್ತೆಲ್ಯೊ
ಫುಲಾಂ ಬಾವ್ತೆಲಿಂ ವಸ್ತು ಕಾಬಾರ್ ಜಾತೆಲ್ಯೊ
ದಾವ್ಯಾ ಪೊಲ್ಯಾಚಾ ಚಾಮ್ಕೊಳಾ ಮುಳಾರ್ ಘೆಗೊ
ಏಕ್ ಚೊರಿಯಾಂ ಉಮೊ ಶೆವೊಟ್ ಪರ್ಯಾಂತ್ ತುಕಾ ಧೊಸ್ತೊಲೊ" (ಆಯೆರ್)
ಚೊರಿಯಾಂ ಉಮೊ ಸಾಸ್ಣಾಚಾ ಸಾಸ್ಣಾಕ್ ಉರ್ಚೊ ತರ್ ಹೊ ಉಮೊ ಕಸಲೊ? ತೊ ಉಮೊ ದಾವ್ಯಾ ಪೊಲ್ಯಾಚಾ ಚಾಮ್ಕೊಳಾ ಮುಳಾರ್....! ಫುಲಾಂ ಬಾವ್ತಾತ್ ವಸ್ತು ಕಾಬಾರ್ ಜಾತಾತ್ ಪುಣ್ ಉಮೊ ಸಾಸ್ಣಾಚೊ......! ನಿಜಾಯ್ಕ್ಯ್ ಜಿವೆಂ ಉದಾಕ್ ದಿಂವ್ಚೊ ಆಯೆರ್ ಹೊ. ಚೊರಿಯಾಂ ಉಮೊ..... ಚೊರಿಯಾಂ ಕುಮ್ಸಾರ್.....! ದಾವ್ಯಾ ಪೊಲ್ಯಾಚಾ ಚಾಮ್ಕೊಳಾ ಮುಳಾರ್...., ಕುಡಿಚಾ ದಾವ್ಯಾ ಕುಶೆಚಾ ಕಾಳ್ಜಾ ಮುಳಾಂ ಥಾವ್ನ್ ಕುಮ್ಸಾರ್. ಕಿತ್ಲೊ ಸೊಭಿತ್ ವಾಳೊ. ಕಿತ್ಲ್ಯಾ ಮೊಗಾಚಾ ಉತ್ರಾಂನಿ......! ಹೊ ಆಯೆರ್ ಕುಳಾರಾಚಾ ವಾಟೆರ್ ವೆಚ್ಯಾ ಆಪ್ಲ್ಯಾ ಧುವೆಕ್ ದಿಂವ್ಚಾ ಪಯ್ಲೆಂ ಕವಿತೆಚೊ ನಾಯಕ್ ಆಪ್ಲ್ಯಾ ಭುಜವ್ಣೆಚಾ ಉತ್ರಾಂನಿ ಕಾಳ್ಜಾಕ್......
"ರಡಾನಾಕಾ ಕಾಳ್ಜ್ ಚಿಂತುನ್- ಬಂಧಡೆಂತ್ ತುವೆಂ ಕಾಡ್ಲ್ಲೆ ದೀಸ್
ಸುಟ್ಕಾ ಮ್ಹಳ್ಳ್ಯಾ ತ್ಯಾ ಗಾಂವಾಕ್ ಆತಾಂ ತುಜ್ಯಾ ವಾಂಟ್ಯಾಕ್ ಉರ್ಲಾಂ - ಆಳುಂ ದೆಂಟೊ" (ಭುಜಾವಣ್)
ಆಪ್ಲೊ ರಾವ್ಳೆರಾಂತ್ಲೊ ಪಿಂಜ್ರೊ ಸೊಡ್ಲ್ಲೊ ಕಯ್ದಿ ನಿಮಾಣ್ಯಾ ಆಯೆರಾಕ್ ಯೆತಾನಾ ಕಾಳಿಜ್ ರಡ್ಚೆಂ ಸಹಜ್. ಭುಜಯ್ತಾ ತೊ ಕಾಳ್ಜಾಕ್. ತೆ ದೀಸ್ ಚಿಂತಿನಾಕಾ. ಥಂಯ್ ಆತಾಂ ಉಜ್ಯಾಚೊ ಪಾವ್ಸ್ ಪಡ್ಲಾ ದುಕೊಳ್ ಆಯ್ಲಾ ಸಗ್ಳೆಂಚ್ ನಾಸ್ ಜಾಲಾಂ ಜಶೆಂ ಸೊದೊಮ್ ಆನಿ ಗೊಮೊರಾ. ಹ್ಯಾ ಇಮಾಜೆಂನಿ ಪಾತ್ಕಿ ಸಂಸಾರಾಚೆಂ ಅಂತ್ಯ್ ಕಶೆಂ ಜಾತೆಲೆಂ ತೆಂ ಕವಿ ವರ್ಣಿತಾ. ತ್ಯಾ ಪಾತ್ಕಿ ರಾವ್ಳೆರಾಂತ್ ಕಾಡ್ಲ್ಲ್ಯಾ ದಿಸಾಂಕ್ ಸುಟ್ಕಾ ಲಾಬ್ಲ್ಯಾ ತುಜ್ಯಾ ವಾಂಟ್ಯಾಕ್ ತೊಚೊ ಗುಡೆ ದೊಂಗೊರ್ ಮಸ್ತುನ್ ವಾಗಯಿಲ್ಲೊ ಆಳುಂ ದೆಂಟೊ ಉರ್ಲಾ.
ಪಿಂಜ್ರ್ಯಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಸುಕ್ಣ್ಯಾಕ್ ಪಿಂಜ್ರ್ಯಾಂತ್ಲ್ಯಾ ದಿಸಾಂಚಿಂ ಯಾದ್ ಉಗ್ಡಾಸ್ ಯೆಂವ್ಚೊ ಸಹಜ್. ಪಿಂಜ್ರ್ಯಾಂತ್ ಭಾಂಗಾರ್ ಮೆಳ್ತಾಲೆಂ ಭಾಯ್ರ್ ಆಳುಂ ದೆಂಟೊ. ಆತಾಂ ತೊ ಆಪುಣ್ ಕಯ್ದಿ ಜಾಲ್ಲಿಂ ಘಡಿತಾಂ ನಿಯಾಳ್ತಾ.
"ಸದಾಂ ದನ್ಪಾರಾಂ ಬಾರಾಂತ್ ಜೆವ್ತಾಲೊಂ ನಾಕಾ ಮ್ಹಜ್ಯಾ ಹಾತಾಚೆಂ ಖಾ ಮ್ಹಳೆಂಯ್ ಜೇವ್ನ್ ಮೆಜಾರ್ ಕುಂಕ್ಡಾ ನೀದ್ ಮಾರ್ತಾಲೊಂ ನಾಕಾ ಮ್ಹಜ್ಯೆ ಸಾಂಗಾತಾ ಚೆಸ್ ಖೆಳ್ ಮ್ಹಳೆಂಯ್ ತುಜಿ ಕಸಲಿಚ್ ಚೂಕ್ ನಾಂ ಮ್ಹಣ್ ರುಜು ಕರ್ತಾಯ್ ಕಶೆಂ ಸಾಂಗ್ ತುಂ" (ಕಯ್ದ್ಯಾಚಿ ಕವಿತಾ: ಪಯ್ಲಿ)
"ಆಜ್ ತುವೆಂ ರಾಂದಿನಾತ್ಲ್ಯಾರ್ ಮಾಕಾ ಜೇಂವ್ಕ್ ರುಚಾನಾ
ತುವೆಂ ಹಾಂತುಳ್ನ್ ದೀನಾತ್ಲ್ಯಾರ್ ಮಾಕಾ ನೀದ್ ಲಾಗಾನಾ
ತುಕಾ ಸೊಬಾನಾತ್ಲ್ಲೆಂ ಹಾಂವ್ ನ್ಹೆಸಾನಾ
ಟಿವಿರ್ ಸಯ್ತ್ ಐಶ್ವರ್ಯಾಕ್ ದೊಳೊ ಉಕೊಲ್ನ್ ಪಳೆನಾಂ" (ಕಯ್ದ್ಯಾಚಿ ಕವಿತಾ: ಪಯ್ಲಿ)
ಕಯ್ದಿ ಪಾತ್ಕಾಲಾಗಿಂ ಸವಾಲ್ ಕರ್ತಾ ತುಜಿ ಚೂಕ್ ಕಶಿ ನಾಂ ಮ್ಹಣ್ತಾಯ್? ಆಪ್ಲ್ಯಾ ಸ್ವತಂತ್ರಾನ್ ಖಾವ್ನ್ ಜೇವ್ನ್ ನಿದೊನ್ ಆಸ್ತಾನಾ ತುಜಾ ಪಸಂದೆ ಪರಿಂ ಬದ್ಲಾಲೊಂ ಮ್ಹಳ್ಯಾರ್ ಪಾತ್ಕಾಕ್ ಜಾಯ್ ಜಾಲ್ಲೆ ಪರಿಂ. ಆತಾಂ ಮ್ಹಜ್ಯೆ ಹೆ ಹಾಲ್ ಜಾಲ್ಯಾತ್ ಜಿವಿತ್ಚ್ ನಾಂ ಜಾಲಾಂ. ಮ್ಹಳ್ಯಾರ್ ಕಯ್ದಿ ಜಾವ್ನ್ ಆಸ್ತಾನಾ ತೊ ಪಾತ್ಕಾಚಾ ಥಳಾರ್ ಪಾವ್ಲ್ಲೊ. ಪಾತ್ಕಿ ರಾಂದಾಪ್, ಪಾತ್ಕಿ ಹಾಂತುಳ್ನ್, ಪಾತ್ಕಿ ನೀದ್, ಪಾತ್ಕಿ ಸೊಬಾಯ್, ಪಾತ್ಕಿ ಚಲಿ, ಸವಯೆರ್ ಪಡ್ಲ್ಲೆಂ ಸಗ್ಳೆಂ ಸಾಂಡುನ್ ಆದ್ಲೆಂ ವಿಸ್ರೊಂಕ್ ಆಪ್ಣೆ ಘೆತ್ಲ್ಲ್ಯಾ ಆಯೆರಾ ಸಂಗಿಂ ತೊ ಆತಾಂ ಸಾಂಜೆಕ್ ರಾಕೊನ್ ರಾವ್ಲಾ.
"ಘರಾಂತ್ ಸಾಂಜ್ ರಿಗ್ತಾನಾ ಕಸ್ಲಿಗೊ ಹಿ ಪಿಸಾಯ್?
ಬುಡೊಂಕ್ ವೆಚ್ಯಾ ಸುರ್ಯಾಕ್ ಸಯ್ತ್ ಲಾರಾಂಚಿ ಖರಾಯ್
ಮಿಟಾಂತ್ ಧುಲ್ಲ್ಯಾ ತೊರಾಬರಿಂ ಚಿರ್ಮುಟೊನ್ ವೆತಾ ಪಿರಾಯ್
ಪಿಶ್ಯೆ ಮತಿಕ್ ಸಮ್ಜಂವ್ಕ್ ಕಶೆಂ ಸಾಂಗ್ಗೊ ಕಾಂಯ್ ಉಪಾಯ್" (ಸಾಂಜೆಗೀತ್)
ಹಿ ಸಾಂಜ್ ಕಸಲಿ? ಸಾಂಜ್ ಯೆತಾನಾ ಪಿಸಾಯ್ ಕಸಲಿ? ಘರಾಂತ್ ಸಾಂಜ್ ಯೆತಾನಾ..... ಕುಡಿಕ್ ಮಾತಾರ್ಪಣ್ ಯೆತಾನಾ ಮತಿಕ್ ಆದ್ಲ್ಯಾ ಸಾರ್ಲ್ಲ್ಯಾ ಜಿವಿತಾಚೊ ಉಗ್ಡಾಸ್. ಜಿವಿತ್ ಬುಡೊಂಕ್ ವೆತಾ ತರೀಯ್ ತರ್ನಾಟ್ಪಣಾಚಿ ಖರಾಯ್. ಮಿಟಾ ಉದ್ಕಾಂತ್ ಘಾಲ್ಲ್ಯಾ ತೊರಾಬರಿಂ ಕೂಡ್ ಚಿರ್ಮೊಟೊನ್ ವೆತಾನಾ ತರ್ನೆಪಣ್ ಆಶೆಂವ್ಚಾ ಪಿಶ್ಯಾ ಮತಿಕ್ ಉಪಾಯ್ ಕಸಲೊ?
"ಉಪಾಯ್ ಎಕ್ಚ್ಚ್ ಪಾವ್ಸಾಕ್ ರಾಕ್ವೊಣ್.......! "
ಕುಳಾರ್ಚೆ ವಾಟೆರ್ ಫುಲಾಂ ಮಾಳುನ್ ತುವೆಂ
ಪಾಶಾರ್ ಜಾಲೆ ದೀಸ್ ಕಿತ್ಲೆ?
ಯೆತೆಲೆಂಯ್ ಕೆನ್ನಾಂ?
ಹಾಡ್ತೆಲೆಂಯ್ ಪಾವ್ಸ್ ಸುಕ್ಲಾ ಹಾಂವ್ ರಾಕ್ತಾಂ ಹಾಂವ್" (ವಾಟ್ ರಾಕ್ತಾಂ)
ರಾಕ್ವೊಣ್ ಕೊಣಾಚಿ? ಕುಳಾರ್ಚ್ ವಾಟೆರ್ ಫುಲಾಂ ಮಾಳುನ್ ಗೆಲ್ಲೆಂ ಕೋಣ್? ಮೊಗಾನ್ ತೀನ್ ಮಹಿನೆಭರ್ ಕುಡಿರ್ ಮೊಗಾಚಾ ಉದ್ಕಾನ್ ನಾಣವ್ನ್ ಭುಜವ್ನ್ ವಾಳವ್ನ್ ಕಿರ್ಲಾವ್ನ್ ಆಜ್ ಪಾವ್ಸ್ ಗೆಲಾ ಕುಳಾರಾಕ್. ಭುಂಯ್ ಸುಕ್ಲ್ಯಾ ಸಗ್ಳೆಂ ಕರ್ಪಾಲಾಂ. ಪಾವ್ಸ್ ವಚೊನ್ ದೀಸ್ ಕಿತ್ಲೆ ಜಾಲೆ? ಉದ್ಕಾಕ್ ತಾನೆಲ್ಲಿ ಭುಂಯ್ ಆತಾಂ ಸುಕೊನ್ ರಾಕೊನ್ ರಾವ್ಲ್ಯಾ ಹಿ ರಾಕ್ವೊಣ್ ಕಸಲಿ? ಹ್ಯಾ ರಾಕ್ವೊಣೆಚೊ ಮೋಗ್ ಪಳೆಯಾ.
"ಕಾಳ್ಜಾ ಉಡಿಯೆಂತ್ ಶಿತಾ ಉಂಡಿಯೆಂತ್, ವಾಳ್ಚ್ ವಾರ್ಯಾಂತ್ ಸಯ್ತ್ ತುಜಿಚ್ಗೊ ಫಕತ್ತ್ ತುಜಿ ಸತಯ್ತಾ ಯಾದ್ ತುಟೊಂಕ್ ತಯಾರ್ ನಾಂಗೊ ಸಗ್ಳೆ ಬಾಕ್ರೆ ಹಟಾಕ್ ಪಡ್ಲ್ಲೆಂ ಭುರ್ಗ್ಯಾ ಸಂಯ್ಬ್ ಉರೊಂಕ್ ನಾಂ ಬಾಕ್ರಿ ಆತಾಂ - ಆಪ್ಲ್ಯಾಚ್ ಜಾಳಾಂತ್ ಶಿರ್ಕಾಲ್ಲ್ಯಾ ಸಾಳ್ಕ್ಯಾಚಿಗೊ ಗತ್ ಮ್ಹಜಿ" (ತುಜೆ ವಿಣ್)
"ಹ್ಯಾ ಕಯ್ದ್ಯಾಚೊ ಮೋಗ್ ಶಿತಾ ಉಂಡಿಯೆಂತ್ಲೊ...! ಕಾಳ್ಜಾಚಿ ಉಂಡಿ, ಶಿತಾಚಿ ಉಂಡಿ, ವಾಳ್ಚೆಂ ವಾರೆಂ, ಸತಾಂವ್ಚೊ ಉಗ್ಡಾಸ್. ಇಮಾಜೆ ಪಾಟ್ಲೊ ಮೋಗ್ ಸಾಂಡುನ್ ಆಯಿಲ್ಲೊ....! ಕಾಳ್ಜಾಚಾ ಉಡಿಯೆಂತ್ ಮೊಗಾಚಿ ವಾಲ್ ಕಿರ್ಲಾಲ್ಲಿ.
ಹಿ ವಾಲ್ ಮಯ್ಪಾಸಾಚಿ, ಸುಖಾ ದುಃಕಾಂತ್ ಸಾಂಗಾತಾಚಿ, ಕುಟ್ಮಾ ಸುಖಾಚಿ, ಕುಟ್ಮಾ ಸುಖ್ ಕೊಣೆಂ ಲುಟ್ಲಾಂ? ಹ್ಯಾ ಗಡ್ದೆಚಾ ಗಾಂವಾಂತ್, ಪರ್ಕಿ ಶ್ಹೆರಾಂತ್, ಆಪ್ಲೆಂ ಆದ್ಲೆಂ ಜಿವಿತ್ ಉಗ್ಡಾಸ್ ಜಾಂವ್ಕ್ ಪಾವ್ಲಾಂ. ಶಿತಾಚಿ ಉಂಡಿ.... ಶಿತಾಚಾ ಹರ್ಯೇಕಾ ಘಾಸಾಂತ್ ತ್ಯಾ ಶಿತಾಚಾ ಮಾತಿಯೆಚೊ ಜಿವೊ ಪರ್ಮಳ್. ಅಪುಟ್ ಸ್ವಾದಿಷ್ಟ್ ಶಿತ್ ತೆಂ ಆಪ್ಲ್ಯಾ ಶಿತಾಂತ್ ವಾಗಯಿಲ್ಲ್ಯಾ ಕಣ್ಶ್ಯಾಂ ಥಾವ್ನ್ ಉದೆಲ್ಲೆಂ. ಹ್ಯಾ ಶೆತಾಂತ್ಲ್ಯಾ ಕನ್ಶ್ಯೆಚೊ ವಾರ್ಯಾರ್ ಧಲ್ತಾನಾ ಯೆಂವ್ಚೊ ಮಧುರ್ ನಾದ್ ದಿಸ್ಚಿ ತಿ ಪಾಚ್ವಿ ಸೊಬಾಯ್ ಕೊಣೆಂ ಫಾರ್ಲ್ಯಾ? ಹ್ಯಾ ಗಡ್ದೆಚಾ ಗಾಂವಾನ್ ಲುಟ್ಲ್ಯಾ.
ಮೆಜಾ ವಯ್ಲ್ಯಾ ಕೊನ್ಶ್ಯಾರ್ ತ್ಯಾ ಶೆತಾಚೊ ಬಾಜ್ವೆ ಬುತಾಂವ್ ತುಟೊನ್ ಪಡ್ಲಾ. ಕಾರಾಣ್ ನಾಂ ಕೋಣ್ ತೊ ಶಿಂವ್ತಲೊ. ಬುತಾಂವಾ ವಿಣೆಂ ತೆಂ ಶಿತಾಯ್ ಉಗ್ಡಾಸಾನ್ ದುಃಕಾಂ ಗಳಂವ್ಚಾ ತಸಲೆಂ. ಗಾಂವ್ಚಾ ಶೆತಾಂತ್ ಅರ್ಧಿ ಭಾಕ್ರಿ ತರೀಯ್ ಭಾಜ್ತಾಲಿ. ಸಗ್ಳ್ಯಾ ಭಾಕ್ರೆಕ್ ಆಶೆವ್ನ್ ಹ್ಯಾ ಪರ್ಕಿ ಗಾಂವಾಂತ್ ಆಯಿಲ್ಲ್ಯಾ ಕವಿತಾ ನಾಯಕಾಕ್ ಆತಾಂ ತಿ ಭಾಕ್ರಿ ಉರೊಂಕ್ ನಾಂ. ಆಪ್ಲ್ಯಾಚ್ ಜಾಳಾಂತ್ ಶಿರ್ಕಾಲ್ಲ್ಯಾ ಸಾಳ್ವ್ಯಾಚಿ ಗತ್ ತಾಚಿ ಜಾಲ್ಯಾ. ಆನಿ ಹೆಂ ಜಾಳ್........
"ಉಸ್ಕ್ಯಾರ್ ತುಜ್ಯಾ ಹಾಂವ್ಗೊ ಭುರ್ಗೊ
ಇಕ್ರಾ ಮಹಿನ್ಯಾಂಚೊ ಪೆಂಕ್ಟಾಕ್ ಮ್ಹಜ್ಯಾ ಬಾರಾಯ್
ವರಾಂ ನಾಡೊ ತುಜ್ಯಾ ಪಾಲ್ವಾಚೊ ಪೊಳೊನ್
ತರೀ ಸುಟೊಂ ಕಶೆಂ ಸಾಂಗ್ ಖಂಯ್ ಲಿಪೊಂ ವಾಜ್ತಾ ಪಾಯಾಂತ್ಲೊ ಖಿಣ್ಕೊಳೊ" (ಕಾಳ್ಜಾ ಜಯ್ಲಾಂತ್)
ಕವಿತಾ ನಾಯಕ್ ಹಾಂಗಾಸರ್ ಪಾಯಾಂಕ್ ಖಿಣ್ಕುಳೊ ಬಾಂದುನ್ ಪಾಲ್ವಾಚಾ ನಾಡ್ಯಾಂತ್ ರೆವ್ಡೊನ್ ಕೊಣಾಚಾ ಉಸ್ಕ್ಯಾರ್ ಪಡ್ಲಾ? ತೊ ಪಡ್ಲಾ ವೆಳಾಚಾ. ಇಕ್ರಾ ಮಹಿನ್ಯಾಚೊ ಭುರ್ಗೊ ತೊ, ದೋನ್ ಕಾಂಟೆ ಜಾವ್ನ್ ಗಡಿಯಾಳಾ ಭಿತರ್ ಗಡಿಯಾಳಾಚಾ ನಾಡ್ಯಾಕ್ ಶಿರ್ಕೊನ್ ಕಯ್ದ್ ಜಾಲಾ. ಭಾಯ್ರ್ ಧಾಂವ್ಲೊ ತರ್ ಗಡಿಯಾಳಾಚೆ ಖಿಣ್ಕುಳೆ ವಾಜ್ತಾತ್. ಕಸಲೆಂ ಕಯ್ದ್...! ಹ್ಯಾ ಪರ್ಕಿ ಗಾಂವಾಂತ್ ಹ್ಯಾ ವೆಳಾಂತ್ ಕಯ್ದ್ ಜಾಲ್ಲ್ಯಾಂಕ್ ಆತಾಂ ತರೀಯ್ ಗಡಿಯಾಳಾಚೆಂ ದಾರ್ ಉಗ್ತೆಂ ಕರುನ್ ವಾರೆಂ ವಾಳಂವ್ಕ್ ಆನಿ ಸುಟ್ಕೆಚಿಂ ಮೊಗ್ರ್ಯಾ ಫುಲಾಂ ಫುಲೊಂಕ್ ಉಲೊ ದಿತಾ ಹೊ ಕಯ್ದಿ. ಹ್ಯಾಚ್ ಕಯ್ದ್ಯಾಚೆಂ ಏಕ್ ನವೆಂ ರೂಪ್ ಪಳಂವ್ಚೆಂ ಜಾಲ್ಲ್ಯಾರ್.....
"ಆಯ್ಕಾಗೊ ಹೆಂ ಮಾಕಾ ನವೆಂ ನವೆಂ ಆಂಕ್ವಾರ್ ಮರಿಯೆ ಮಾಗ್ಣೆಂ
ಮ್ಹಳ್ಳೆಂ ಹಾಂವೆಂ ತರೀ ಸಾಂಗ್ಗೊ ಕಿತ್ಯಾಕ್ ಅಶೆಂ ಘಡ್ಲೆಂ
ಪಯ್ಲ್ಯಾ ಉಮ್ಯಾಕ್ಚ್ ಕಾಳ್ಜಾ ದಾರ್ ತುಟೊನ್ ಪಡ್ಲೆಂ" (ಚಲಿಯಾಂಕ್ ಚತ್ರಾಯ್)
ಆಂಕ್ವಾರ್ ಮರಿಯೆಚೆಂ ಮಾಗ್ಣೆಂ ಮ್ಹಳ್ಳೊ ಹೊ ಕಯ್ದಿ ನವ್ಯಾಸಾಂವಾಕ್ ವೆಂಗ್ಲಾ. ನವೆಂಸಾಂವಾಕ್ ಆಂಕ್ವಾರ್ ಮರಿಯೆಚೆಂ ಮಾಗ್ಣೆಂ, ನಿತಳ್ ಕಾಳ್ಜಾಚೆಂ, ಪವಿತ್ರ್ ಇರಾದ್ಯಾಚೆಂ ಮಾಗ್ಣೆಂ.... ಪಾದ್ರಿಪಣಾಚೆಂ.......! ಹ್ಯಾ ಕವಿತೆಚೊ ಕಯ್ದಿ ಪಾದ್ರಿಪಣಾಚಾ ಭೆಸಾಂತ್ ಕಯ್ದ್ ಜಾಲಾ. ಪಯ್ಲ್ಯಾ ಉಮ್ಯಾಕ್ಚ್ ಕಾಳ್ಜಾದಾರ್ ಕೊಸ್ಳೊನ್ ಪಡ್ಲೆಂ..... ಪಯ್ಲೊ ಉಮೊ..... ಹಾಂಗಾಸರ್ ಇಮಾಜ್ಯೊ ಉಭಿ ಕೆಲ್ಲ್ಯೊ ಭಾರಿಚ್ಚ್ ಗರ್ಜೆಚೊ.
ಪಯ್ಲೊ ಉಮೊ.... ಪಯ್ಲೆಂ ಕುಮ್ಸಾರ್ ಪಾದ್ರಿಪಣಾಚಾ ಭೆಸಾಚೆಂ. ಪಯ್ಲ್ಯಾ ಕುಮ್ಸಾರಾಂತ್ಚ್ ತ್ಯಾ ಪಾದ್ರಿಪಣಾಚಾ ಪಿಂಜ್ರ್ಯಾಂತ್ ಕಯ್ದ್ ಜಾಲ್ಲ್ಯಾಚೆಂ ಕಾಳಿಜ್ ತುಟೊನ್ ಪಡ್ಲೆಂ. ಥಂಯ್ಸರ್ ಆತಾಂ ದಾರ್ ನಾ. ಕೇವಲ್ ಚಾರ್ ವೊಣೊದಿ ಮಾತ್ರ್. ತ್ಯಾ ವೊಣೊದಿ ಥಾವ್ನ್ ಭಾಯ್ರ್ ಯೆಂವ್ಕ್ ಖಂಡಿತ್ ಸಾದ್ಯ್ ನಾಂ.
(ಹೆಂ ಕವಿತೆಕ್ ಸಮ್ಜೊಂಕ್ ಮಾತ್ರ್ ನಾಂತರ್ ಅಸಾದ್ಯ್ ಮ್ಹಳ್ಳೆಂ ಸಂಸಾರಾಂತ್ ಕಾಂಯ್ ನಾ ತೆಂ ವಾಚ್ಪ್ಯಾನ್ ಉಗ್ಡಾಸ್ ದವರ್ಚೆಂ)
ಕಾರಾಣ್ ತ್ಯಾ ಕೆಲ್ಶ್ಯಾಚಿ ಕಾತರ್ ಕಾಜಾರಿ ಜಿಣ್ಯೆಚಿಂ ಪಾಕಾಂ ಕಾತರ್ಲ್ಲಿ ಆನಿಂ ತಾಚೊ ತೊ ಪಾರೊ ಆಸಾ. ಹ್ಯೊ ಹಾಂವೆ ಉಭಿ ಕೆಲ್ಲ್ಯೊ ಇಮಾಜ್ಯೊ ಪರ್ದ್ಯಾ ಪಾಟ್ಲ್ಯೊ. ಪುಣ್ ಗರ್ಚೆಚೊ. ಕೆಲ್ಶಿ ಆನಿ ಕಾತರ್ ನಾಸ್ತಾನಾ ಕಯ್ದ್ ನಾಂ ತೆಂ ಆಮಿ ಜಣಾಂ ಜಾಂವ್ಕ್ ಜಾಯ್. ಹ್ಯಾ ಇಮಾಜೆಂಚೊ ಹ್ಯಾ ಕವಿತಾಂತ್ ಸಂಭಂದ್ ಬದ್ಲಾತಾ. ಹ್ಯಾಚ್ ಕಾರಾಣಾ ಖಾತಿರ್ ಹಾಂಗಾಸರ್ ಕೆಲ್ಶಿ ನಾಂ. ಯಾ ತಾಚಿ ಕಾತರ್ ನಾಂ. ಭೋವ್ಚ್ ಜಾಣ್ತ್ಯಾ ರಿತಿರ್ ಕವಿನ್ ಹಾಂಗಾಸರ್ ವಾಳೊ ವಾಳಯ್ಲಾ.
ಬಂಡಾಯಂತ್ ಯಾ ಗಡ್ದೆಚಾ ಶ್ಹೆರಾಂತ್ಲ್ಯಾ ಜಿವಿತಾಂತ್ ಪಾತ್ಕಾಕ್ ಕೆಲ್ಶಿ ಆನಿ ತಾಚಿ ಕಾತರ್ ಸೊಬಾಯ್ ದಿತಾ ತರ್ ಹ್ಯಾ ಕವಿತೆಂತ್ ಪರ್ದ್ಯಾ ಪಾಟ್ಲ್ಯೊ ಇಮಾಜಿ ಕಯ್ದ್ಯಾಕ್ ಹಾಂಗಾಸರ್ ತಾಚೊ ಭೆಸ್ ಪಾಳೊಂಕ್ ಬಳ್ ಆನಿ ಘಟಾಯ್ ದಿತಾತ್. ಹ್ಯಾ ಘಟಾಯೆಕ್ ಕವಿತಾ ನಾಯಕ್ ಹಾಂಗಾಸರ್ ಸವಾಲ್ ವಿಚಾರಿನಾ ಬಗಾರ್ ವಿನತಿ ಕರ್ತಾ. ಹ್ಯಾ ವಿನತೆಕ್ ತಾಣೆಂ ತಕ್ಲಿ ಭಾಗಯ್ಲ್ಯಾ. ಕಯ್ದ್ಯಾಚಾ ಹ್ಯಾ ದುಸ್ರ್ಯಾ ರುಪಾಂತ್ ಸರ್ಗ್ ಪಿಂತ್ರಾಯ್ಲಾ ಕವಿನ್. ಆನಿ ಚಲಿಯಾಂಕ್ ತೊ ಆಮ್ಚೊ ಸರ್ಗ್ ಚುಕಯ್ನಾಕಾತ್ ಮ್ಹಣೊನ್ ಚತ್ರಾಯ್ ದಿತಾ. ಕಯ್ದ್ಯಾಚೆಂ ತಿಸ್ರೆಂ ರೂಪ್ ಪಳಂವ್ಚೆ ತರ್;
"ತುಮಿಂ ಭಿರ್ಮತ್ ಹಾಂ ಹಾಂ ಮ್ಹಣ್ತೇ ವೆತಾತ್ ತೊ- ಗೊಮ್ಟ್ಯಾಚೆಂ ಬೈರಾಸ್ ಸುಟವ್ನ್ ನಿರ್ದಾಯೆನ್ ಕಾಪ್ಲ್ಲೆ ತುಮಿ ಜೊಗಾಸಣೆನ್ ಸಾಂಬಾಳ್ಲ್ಲೆ ಕೇಸ್ ದುಕಾನಾಚ್ಯಾ ಕೊನ್ಶ್ಯಾರ್ ಪಾಪುಡ್ನ್ ದುಸ್ರೆ ಕಸ್ರಿಕ್ ಚುನೊ ಲಾಯ್ತಾ ಪರ್ಯಾಂತ್ ವಾಕೊರಾಚೆಂ ತೊರುಂ ಆನಿ ತುಮ್ಚಿ ಮೊಲಾಧಿಕ್ ತಕ್ಲಿ ತಾಚ್ಯಾ ಹಾತಾಂತ್ ಆಸ್ತಾ ಜಾಲ್ಲ್ಯಾನ್" (ಕೆಲ್ಶಿ)
ಪರ್ದ್ಯಾ ವಯ್ಲ್ಯಾ ಕೆಲ್ಶಿಚೆಂ ನೀಜ್ ರೂಪ್ ಹೆಂ. ನಿರ್ದಾಯೆನ್ ಕೇಸ್ ಕಾಪ್ಚೊ ಹೊ ಕೆಲ್ಶಿ ಕೋಣ್? ಮೊಲಾಧಿಕ್ ತಕ್ಲಿ ಕೊಣಾಚಿ? ಭಿರ್ಮತ್ ಹಾಂ ಹಾಂ ಮ್ಹಣ್ತೆ ವೆಚೆ ಕೋಣ್? ಹಾಂಗಾಸರ್ ಕೆಲ್ಶಿ ಮ್ಹಳ್ಯಾರ್ ಸಮಾಜೆಂತ್ ಏಕ್ ಪ್ರಬಲ್ ಮನಿಸ್ ಯಾ ಶೋಷಣ್ ಕರ್ತಾ ತೊ ಮ್ಹಣ್ಯೆತ್. ಗೊಮ್ಟ್ಯಾಕ್ ಬೈರಾಸ್ ಗುಟ್ಲಾಯಿಲ್ಲೊ ಗರೀಬ್ ಯಾ ಶೋಷಿತ್ ಮ್ಹಣ್ಯೆತ್. ಕವಿನ್ ಉಭಿ ಕೆಲ್ಲ್ಯೊ ಇಮಾಜಿ ಕೆಲ್ಶಿ, ವಾಕೊರ್, ಬೈರಾಸ್, ಕಸರ್, ಚುನೊ. ಎಕಾ ವಯ್ರ್ ಎಕ್ ಗೂಂಡ್ ಅರ್ಥ್ ದಿಂವ್ಚ್ಯೊ ತಸಲ್ಯೊ. ಶೋಷಣ್ ತೆಂ ರೂಪಾನ್ ಲಾನ್ ಜಾಂವ್ ಯಾ ದೇಶ್ ಪರಿಂ ವಡ್ಲ್ಯಾ ರೂಪಾನ್.
ಶೋಷಣ್ ತೆಂ ಶೋಷಣ್ಂಚ್. ಸಂಸಾರಾಂತ್ ಪ್ರಬಲ್ ಮ್ಹಣೊನ್ ಸಾಂಗ್ಚೊ ದೇಶ್ ಗರೀಬ್ ದೆಶಾಕ್ ತ್ಯಾಚ್ ಗರೀವಾಯೆ ಮದೆಂ ಆಪ್ಲ್ಯಾ ಫಾಯ್ದ್ಯಾಕ್ ಕಶೆಂ ಗಳ್ಸುಂಕ್ ಸಕ್ತಾ ಆನಿ ತ್ಯಾ ಗರೀಬ್ ದೇಶಾಕ್ ಹಾಂ ಹಾಂ ಮ್ಹಣ್ಚೆ ಶಿವಾಯ್ ದುಸ್ರಿ ವಾಟ್ ಆಸಾನಾ. ಹ್ಯಾ ಸಂಸಾರಾಂತ್ ಬಂಧಿವಾನ್ ಜಾಲ್ಲ್ಯಾಂಚೆಂ ಕಯ್ದಿ ರೂಪ್ ಸಾಂಗೊಂಕ್ ಗೆಲ್ಯಾರ್ ತಾಕಾ ಅಂತ್ಯ್ ಆಸ್ಚೆಂ ನಾ. ಕಯ್ದ್ ಶೋಷಣ್ ತೆಂ ಖಂಡಿತ್.
ಪುಣ್ ಹರ್ಯೆಕಾ ವಾಟೆನ್ ಶೋಷಣ್ಚ್ ಮ್ಹಣೊಂಕ್ ಸಾದ್ಯ್ ನಾಂ. ಜಶೆಂ ಆವಯ್ಚಾ ಗರ್ಬಾಂತ್ಲೆಂ ಕಯ್ದ್ಪಣ್ ಆಮ್ಚಾ ಖುಶೇಚೆಂ ನ್ಹಂಯ್ ತಶೆಂ ಸಂಸಾರಾಂತ್ಲೆಂ ಥೊಡೆಂ ಕಯ್ದ್ಯ್ ಆಮ್ಚಾ ಖುಶೆಚೆಂ ನ್ಹಂಯ್. ಥೊಡೆ ಪಾವ್ಟಿಂ ವೆಳಾ ಕಾಳಾಕ್ ಲಾಗೊನ್, ಪರಿಸ್ಥಿತಿಕ್ ಲಾಗೊನ್, ದುಸ್ರ್ಯಾಂಕ್ ಲಾಗೊನ್ ಕಯ್ದ್ ಜಾಂವ್ಕ್ ಪಡ್ತಾ. ಹೆಂ ಸ್ವಾಭಾವಿಕ್ ತರ್ಯ್ ಆಪ್ಲಿಂಚ್ ಪಾಕಾಂ ಕಾತ್ರಾವ್ನ್ ಕಯ್ದ್ ಜಾಂವ್ಚಾಂತ್ ಆನಿ ದುಸ್ರ್ಯಾಂಚಿ ಪಾಕಾಂ ಕಾತ್ರುನ್ ಕಯ್ದ್ ಜಾಂವ್ಚಾಂತ್ ಖಂಡಿತ್ ರಾತ್ ದಿಸಾಚೊ ವ್ಯತ್ಯಾಸ್ ಆಸಾ. ಹೆಂಚ್ ವ್ಯತ್ಯಾಸ್ ದಾಕಂವ್ಚೆಂ ಪ್ರಯತ್ನ್ ಕೆಲಾಂ ಕವಿನ್.
ಪುಣ್ ಆಂಕ್ವಾರ್ ಮರಿಯೆ ಮಾಗ್ಣೆಂ ಮ್ಹಣೊನ್ ಕಯ್ದ್ ಜಾಲ್ಲ್ಯಾಂತ್ ಆನಿ ಕಾಂಕ್ಣಾಂಚಾ ಗಲ್ಲೆಂತ್ ಕಯ್ದ್ ಜಾಲ್ಲ್ಯಾಂತ್ ಆಸ್ಚೆಂ ವ್ಯತ್ಯಾಸ್ ಆಪ್ಲ್ಯಾ ಸೊಭಿತ್ ಶೈಲೆಂತ್ ವಾಪರ್ಲ್ಲ್ಯಾ ಉತ್ರಾಂನಿ ಆನಿ ದಿಲ್ಲ್ಯಾ ಮೊಗಾಚಾ ರೂಪಾಂನಿ ಕವಿತೆಕ್ ಚಡ್ ವರ್ತೆಂ ಕೆಲಾಂ. ಕಯ್ದ್ಯಾಚೆಂ ಜೀವನ್ ದೊಳ್ಯಾಂ ಮುಖಾರ್ ದವರ್ತಾನಾ ಕವಿನ್ ಕಾಳ್ಜಾದಾರಾಂಕ್ ಹಾಲಯ್ಲಾಂ.
"ಕಾಂಕ್ಣಾ ಜಬ್ಬೋರ್ ವ ರಾತ್ ನಿಬೊರ್
ಕಾತಿಂಕ್ ಚೀರ್ನ್ ತುಟ್ತಾನಾ ಫುಟ್ತಾತ್ ದುಃಕಾಂ ದೊಳ್ಯಾಂ ಖಾಂಚಿನಿಂ" (ಕಾಂಕ್ಣಾ ಗಲ್ಲೆಂತ್)
ಹ್ಯಾ ಕವಿತೆಚಾ ಹರ್ಯೆಕಾ ಉತ್ರಾಂನಿ ದುದಾ ಸಾರ್ಕೆಂ ಸತ್, ಕೊಳ್ಸೊಬರ್ ದುಃಕಾಂ, ಬುಕಾ ದಾಟಾಯೆಚಿಂ ಭಾವನಾಂ, ಸಪ್ಣಾಂ, ಜಿವಿತ್ ಲಿಪೊನ್ ಆಸಾ. ಹಾಂಗಾಸರ್ ಕವಿ ಕಯ್ದ್ಯಾಚಾ ಜಿವಿತಾಚಾ ಥಳಾಕ್ ಪಾವ್ಲಾ. ತೊ ಉಭಿರ್ ಹಾಲಂವ್ಕ್ ನ್ಹಂಯ್ ಬಗಾರ್ ಉಭಿರ್ ಕಾಡುನ್ ಉಡಂವ್ಕ್. ಕವಿ ನೀಜ್ ಜಾವ್ನ್ ಸಮಾಜೆಚಾ ವಯ್ರ್ ಆಜ್ ಝಜಾಕ್ ದೆಂವ್ಲಾ. ಹ್ಯಾ ತಾಚ್ಯಾ ಕವಿತಾ ಜಮ್ಯಾಕ್ ಏಕ್ ಬಂಡಾಯ್ ಯಾ ಕ್ರಾಂತಿಕಾರಿವಾದಾ ಜಮೊ ಮ್ಹಳ್ಯಾರ್ಯ್ ತಾಚ್ಯಾ ಕವಿತೆಂತ್ಲ್ಯಾ ಉತ್ರಾಂನಿ ದಿಸೊನ್ ಯೆಂವ್ಚಿ ಕ್ರಾಂತಿ ಬಹುಶಃ ಕ್ರಾಂತಿ ಮ್ಹಳ್ಳ್ಯಾ ಸಬ್ದಾಂತ್ ತಿತ್ಲಿ ಝಳ್ಕಾಶಿ ನಾ.
ಕಯ್ದ್ಯಾಚಾ ಜಿವಿತಾಕ್ ಭೋವ್ ಲಾಗ್ಶಿಲ್ಯಾನ್ ಪಳಂವ್ಚೆಂ ಪ್ರಯತ್ನ್ ಕವಿನ್ ಕೆಲಾಂ. ಜಿವಿತಾಂತ್ ನಿರಾಶೆಂತ್ ಆರಂಭ್ ಕೆಲ್ಲೆಂ ಜಿವಿತ್ ಖಂಡಿತ್ ವಾಳ್ತಾ ಮ್ಹಳ್ಳೊ ಭರ್ವಸೊ ಮ್ಹಾಕಾ ನಾಂ. ಹೊಚ್ ಎಚ್ಚೆಮಾಚಾ ಕವಿತಾಂಚೊ ಸಾರ್. ತಾಚ್ಯಾ ಕವಿತೆಂಚೊ ನಾಯಕ್ ಖಂಯ್ಸರ್ಯ್ ಜೆಮೆನಾಂ. ಖಂಯ್ಸರ್ಯ್ ಭಿಂಯೆನಾಂ. ಯಾ ಪೊಳಾಫಳ್ ಘೆಂವ್ಚೆಂ ದಿಸಾನಾ ಬಗಾರ್ ಚತ್ರಾಯ್ ದಿತಾ. ಕಾರಾಣ್ ತೊ ಆಶೆಂತ್ ಜಲ್ಮಾಲಾ. ಆಶೆಂತ್ಲೆಂ ದೂಖ್: ಸ್ವಾಭಾವಿಕ್ ತರ್ ದೂಖಾ ಪಾಟ್ಲಿ ಉಮಾಳೊನ್ ಯೆಂವ್ಚಿ ಕ್ರಾಂತಿ ಮಾಂದ್ಚಿ ತಸಲಿ.
"ವಿಚಾರ್ತಾಯ್ ಕೊಣಾಕ್ ದಾಕವ್ನ್ ಮ್ಹಜೆ ಘುರ್ತ್
ಕುಡ್ಡ್ಯಾಂಚಾ ಶ್ಹೆರಾಂತ್ ವೊಕ್ಲಾಂ ಲಾಯ್ಲ್ಯಾಂತ್
ರಾತಿಕ್ ಘುಗಿಂನಿಂ ಸಯ್ತ್ ದೊಳ್ಯಾಂಕ್" (ಸೊದ್ನಾಂ)
ಹ್ಯಾ ಶ್ಹೆರ್ ಮ್ಹಳ್ಳ್ಯಾ ಬಂಧಿಖಾನ್ಯಾಂತ್ ಜಿಯೆತೆಲೆ ಸಗ್ಳೆ ಕುಡ್ಡೆ ಜಾಲ್ಯಾತ್. ರಾತಿಚಾ ಕಾಳ್ಯಾ ಕಾಮಾಕ್ ಯೆಂವ್ಚಾ ಅಂದ್ಕಾರಾಂತ್ಲ್ಯಾ ಘುಗಿಂನಿಂ ಸಯ್ತ್ ದೊಳ್ಯಾಂಕ್ ವೊಕ್ಲಾಂ ಲಾಯ್ಲ್ಯಾಂತ್. ಕ್ರಾಂತಿಕಾರಿ ಉತ್ರಾಂಕ್ ಪಳಯಾ ಭ್ಯೆಂ ಭಿರಾಂತ್ ನಾತ್ಲೆಲಿಂ.
"ಸೊಡ್ಗಾ ಮ್ಹಜ್ಯೆಯಿತ್ಲ್ಯಾಕ್ ಮಾಕಾ,
ಬರ್ಫಾ ಕುಡ್ಕೊ ಜಾತಾಂ, ಎಕ್ಸುರ್ಪಣಾಂತ್ ಖಿರ್ತಾಂ ಪಾವ್ಸಾ ಥೆಂಬೊ ಜಾತಾಂ
ಮೊಗಾ ಥಂಡಿಯೆಂತ್ ರೂಕ್ ಜಾತಾಂ ಆರ್ಬಿ ದರ್ಯಾಂತ್
ಮೆಳ್ತಾಂ ಉಚಾಂಬಳ್ ತುಫಾನ್ ಜಾತಾಂ" (ಸೊದ್ನಾಂ)
ಎಕಾ ಕವಿಚೆಂ ನೀಜ್ ರೂಪ್ ಹೆಂ. ಉಚಾಂಬಳ್ ತುಫಾನ್.....! ಸಗ್ಳ್ಯಾ ಶ್ಹೆರಾಂತ್ಲ್ಯಾ ಸಮಾಜಿಕ್ ಧಾರ್ಮಿಕ್ ಶೋಷಣಾಕ್ ಆಟವ್ನ್ ತೊ ಬರ್ಫಾ ಕುಡ್ಕೊ ಜಾವ್ನ್ ಎಕ್ಸುರ್ಪಣಾಚಾ ಉಜ್ಯಾಂತ್ ಸವ್ಕಾಸ್ ಖಿರ್ತಾನಾ ತಿಂ ತಾಚಾ ಎಕಾ ಎಕಾ ಥೆಂಬ್ಯಾ ಥಾವ್ನ್ ತ್ಯಾ ರಿತ್ಯಾ ಪಾನಾಂನಿಂ ರೂಕ್ ಜಾವ್ನ್ ಕವಿತೆಚಾ ಸಂಸಾರಾಕ್ ಪಾವೊನ್ ಸಗ್ಳ್ಯಾಂಚಾ ಕಾಳ್ಜಾಂತ್ ಏಕ್ ಉಚಾಂಬಳ್ ತುಫಾನ್ ಜಾತಾಂ ಮ್ಹಣ್ತಾ.
ಕವಿತಾ ನಾಯಕಾಚೆಂ ಆಶಾವಾದ್ ಹಾಂಗಾ ಕೊತ್ಕೊತೊನ್ ಉಮಾಳ್ತಾ. ಜಲ್ಮಾಂತ್ ಆಶಾ, ಆಶೆಂತ್ ನಿರಾಶಾ, ನಿರಾಶೆಂತ್ ಸೊದ್ನಾಂ, ಸೊದ್ನಾಂನಿ ಮೆಟಾಂ, ಮೆಟಾಂನಿ ಪೊಳಾಫಳ್ ನಾಂ ಬಗಾರ್ ಕ್ರಾಂತಿ ಉಚಾಂಬಳ್ ತೂಫಾನಾಚಿ ಕ್ರಾಂತಿ. ಹಿ ಕ್ರಾಂತಿ ಕವಿತಾಂಚಾ ಸಂಸಾರಾಕ್ಯ್ ಲಾಗು ಜಾಲ್ಲಿ ದಿಸೊನ್ ಯೆತಾ. ಕವಿತಾಂಕ್ ಭಾರಿಚ್ಚ್ ಮೋಗ್ ಕರ್ಚೊ ಹೊ ಕವಿ ಕೊಂಕ್ಣೆಂತ್ಲ್ಯಾ ಕವಿತಾಂಚಿ ಪರಿಗತ್ ಪಳವ್ನ್ ಕವಿತಾಂಚಾ ಕ್ರಾಂತಿಕ್ ದೆಂವ್ಲಾ ತೊ. ಧಯ್ರಾಧಿಕ್ ಮೇಟ್ ಹೆಂ ಎಕಾ ಉಂಚ್ಲ್ಯಾ ಚಿಂತ್ಪಾಚಾ ಕವಿಚೆಂ ಲಕ್ಷಣ್. ಹ್ಯಾ ಲಕ್ಷಣಾಕ್ ತಾಚ್ಯಾಚ್ ಕವಿತೆಚಾ ಉತ್ರಾಂನಿ ಪಳಂವ್ಚೆ ತರ್,
"ಪಿಯೆವ್ನ್ ಉರ್ಲೆಲ್ಯಾ ರಗ್ತಾಚೆಂ ಮ್ಹಜ್ಯಾ ಕಿತೆಂ ಕರ್ತಾಯ್ ಆತಾಂ ತುಂ
ರಾಗ್ತಾಭಿಯೆಚಾ ರಾಕ್ಸಾ ಕುಳ್ಲೆಂತ್ಲೊ ಹಾಂವ್ ಧರ್ಣಿರ್ ಶಿಂಪ್ಲ್ಯಾರ್ ಥೆಂಬ್ಯಾ ಥೆಂಬ್ಯಾಂತ್ ಕಿರ್ಲಾತಾಂ
ಖಾವ್ನ್ ಸಾಂಡ್ಲ್ಲ್ಯಾ ಮಾಸಾಚೆಂ ಮ್ಹಜ್ಯಾ ಕಿತೆಂ ಕರ್ತಾಯ್ ಸಾಂಗ್ ಆತಾಂ ತುಂ
ಮಾಕಾ ಪಾರ್ತೇನಿಯಂ ಸಂತತಿಚೆಂ ಭಿಂ ರೆ ಹಾಂವ್ ವಾರ್ಯಾಂತ್ ಉಭೊನ್ ಎಚ್ಚೆಮ್ ಗಾಂವ್ಭರ್ ಜಾತಾಂ" (ಸಾಕ್ಶಿ)
ಮನಿಸ್ ಜಾವ್ನ್ ಕವಿ ಜಾಲ್ಲೊ ತೊ ಹರ್ಯೆಕ್ಲೊ ಆಪಾಪ್ಲ್ಯಾ ಜಾಗ್ಯಾರ್ ಏಕ್ ಶಿಕ್ಷಣ್ ಕೇಂದ್ರ್ ಜಾವ್ನ್ ಆಸಾತ್. ಹ್ಯಾ ಕೇಂದ್ರಾ ಪಯ್ಕಿಂ ಎಚ್ಚೆಮ್ಯ್ ಎಕ್ಲೊ. ಥೆಂಬ್ಯಾ ಥೆಂಬ್ಯಾಂತ್ ಕಿರ್ಲೊಂಚೊ ಆಶಾವಾದ್. ಪಾರ್ತೆನಿಯಂ ಸಂತತಿಚಾ ಭಿಂಯಾ ವಯ್ರ್ ತಾಚೆಂ ಧಯ್ರ್ ಆನಿಂ ಫುಡಾರಾಂತ್ಲೆ ತಾಚೆಂ ಜಯ್ತ್ ತಾಚ್ಯಾ ಆಶಾವಾದಾಕ್ ಕ್ರಾಂತಿ ಥಾವ್ನ್ ಜಯ್ತ್ ಆಶೆತಾ. ಫಕತ್ತ್ ಜಯ್ತ್.
ಕಯ್ದಿ ತೊ ರೂಪಾನ್ ಕಸಲೊಯ್ ತರೀಯ್ ತ್ಯಾ ಕಯ್ದ್ಯಾಕ್ ಮೋಗ್ ಜಿವಿತಾಚೆಂ ಉದಾಕ್. ಜಿವಿತಾಂತ್ಲ್ಯಾ ಕಯ್ದ್ಯಾಂಕ್ ಮೋಗ್ ವಾಂಟ್ಚೆ ಪ್ರಯತ್ನ್ ಕವಿಚೆಂ. ಸಂಕ್ಷಿಪ್ತ್ ರಿತಿರ್ ಹೊ ಮೋಗ್ ಸಾಂಗ್ಚೊ ತರ್, ಹೊ ಮೋಗ್ ನೆಂಟ್ಯಾ ಸಪ್ಣಾಂಚೊ, ಮನ್ಶ್ಯಾಪಣಾಚೊ, ಕರ್ಲಾಂತ್ ವಾಡ್ಚಾ ಪಯ್ಲೆಂಚ್ ಫುಟೊನ್ ಗಟಾರಾಂನಿ ವಾಳೊನ್ ವೆಚಾ ಜಿವಾಂಚೊ. ಹೊ ಮೋಗ್ ಕಾಂಕ್ಣಾಚಾ ಗಲ್ಲೆಂತ್ ಶಿಂಪ್ಲ್ಲ್ಯಾ ಸಪ್ಣಾಂಚೊ, ಸಾಂಡುನ್ ಗೆಲ್ಲ್ಯಾ ತ್ಯಾ ಗಾಂವ್ಚಾ ಶೆತಾಚೊ, ಭುರ್ಗ್ಯಾಪಣಾಚೊ. ಹೊ ಮೋಗ್ ಕಷ್ಟಿ ತರೀ ಸಮಾಧಾನೆಚಾ ಅರ್ಥ್ ಭಾಕ್ರೆಚಾ ಜಿವಿತಾಚೊ, ಪಾದ್ರಿಂಚಾ ನಿಸ್ಕಳ್ಪಣಾಚೊ, ತರ್ನಾಟ್ಯಾ ಜಿವಿತಾಚೊ, ಶೋಷಿತಾಂಚೊ, ಖರ್ಯಾ ಕವಿಪಣಾಚೊ, ಪಾತ್ಕ್ಯಾಂಕ್ ಆಯೆರ್ ದೀವ್ನ್ ಬರ್ಯಾ ವಾಟೆಕ್ ಹಾಡ್ಚೊ, ಕವಿಂಕ್ ಜಾಗಂವ್ಚೊ. ಹೊ ಮೋಗ್ ಸಮಾಜೆಚೊ, ವೆಳಾಚೊ, ಕಾಳಾಚೊ, ಉಣೆಂಪಣ್ ಆಸ್ಲ್ಲ್ಯಾಂಚೊ, ಕಾಳೊಕಾಂವ್ ಆಸ್ಲ್ಲ್ಯಾಂಚೊ ಆನಿ ಸಮೆಸ್ತಾಂಚಾ ಸ್ವಾತಂತ್ರ್ಯಾಚೊ. ಖರೆಂಚ್ ಕವಿನ್ ತಾಚ್ಯಾ ಕಾಳ್ಜಾ ಥಾವ್ನ್ ಮೋಗ್ ಕೆಲಾ. ವಯ್ಲ್ಯಾಂಚಾ ಮೋಗಾಂತ್ ತೊ ಕಯ್ದಿ ಜಾಲಾ. ಬಹುಶ: ಹ್ಯಾ ಕವಿಕ್ ಕವಿ ಭಿತರ್ಲೊ ಕಯ್ದಿ ಉಲಯ್ತಾ ಮ್ಹಣೊನ್ ಕೊಣೆಂಯ್ ಸಾಂಗ್ಲ್ಯಾರ್ಯ್ ಹಾಂವ್ ಮಾತ್ರ್ ಖಂಡಿತ್ ಸಾಂಗ್ತಾಂ ಮೊಗಾಂತ್ ಕಯ್ದಿ ಜಾಲ್ಲ್ಯಾ ಹ್ಯಾ ಕಯ್ದಿ ಭಿತರ್ಲೊ ಕವಿ ಉಲಯ್ತಾ.
’ಕಯ್ದ್ಯಾಚೊ ಕವಿತಾ’ ಕವಿತಾ ಜಮೊ ಚಡ್ ಗೂಂಡಾಯೆಂತ್ ಅಧ್ಯಾಯನ್ ಕೆಲ್ಯಾರ್ ದೊಳ್ಯಾಂಕ್ ಝಳ್ಕಾನಾತ್ಲೆಲೆ ಥೊಡೆ ವಿಚಾರ್ ಮತಿಕ್ ಝಳ್ಕಾತಾತ್. ಹಾಂವೆಂ ಪಯ್ಲೆಂಚ್ ಸಾಂಗ್ಲ್ಲ್ಯಾ ಪರಿಂ ಕವಿತಾಚಾ ಥಳಾಂತ್ ರಿಗೊನ್ ಮೊತಿಯಾಂಕ್ ಸೊದುನ್ ಹಾಡ್ಚೊ ಹಾಂವ್. ಕವಿನ್ಯ್ ಹಿಚ್ ಕ್ರಾಂತಿ ಆಪ್ಲ್ಯಾ ಕವಿತೆನಿಂ ಆಪ್ಣಾಯಿಲ್ಲಿ ಝಳ್ಕಾತಾ. ಕವಿತೆಚಾ ಕ್ರಾಂತಿಂತ್ ಕವಿಚೊ ಆವಾಜ್ ನಿಜಾಯ್ಕ್ಯ್ ಮಾಂದುನ್ ಘೆಂವ್ಚಾ ತಸಲೊ. ಕೊಂಕ್ಣಿ ಮಾಯೆಚಾ ಪಾಲ್ವಾಂತ್ ಹಿ ಕ್ರಾಂತಿ ಉಟೊಂಕ್ ಇತ್ಲೊ ವೇಳ್ ಲಾಗ್ಲ್ಲೊ ನಿಜಾಯ್ಕ್ಯ್ ಬೆಜಾರಾಯೆಚಿ ಗಜಾಲ್. ಪುಣ್ ಕಯ್ದ್ಯಾಚಾ ಜಿವಿತಾಂತ್ ಉಟಯಿಲ್ಲಿ ಕ್ರಾಂತಿ ಕವಿತಾ ನಾಯಕಾಕ್ ಜಯ್ತಾಕ್ಚ್ ಪಾವಯ್ತಾ ತೆಂ ಸಾಂಗೊಂಕ್ ಜಾಯ್ನಾ.
ಸಮಾಜ್ ಮ್ಹಳ್ಯಾರ್ ವಾಸ್ತವ್. ಆನಿ ವಾಸ್ತವ್ ಮ್ಹಳ್ಯಾರ್ ಜಿವಿತ್. ವಾಸ್ತಾವಾಚಾ ಕ್ರಾಂತಿಂತ್ ಜಯ್ತ್ ಕವಿತೆನಿಂಯ್ ದಿಸೊನ್ ಯೇನಾ ಸಮಾಜೆಂತ್ಯ್ ದಿಸೊನ್ ಯೆನಾಂ. ಬದ್ಲಾವಣ್ ಜರೂರ್ ದಿಸೊನ್ ಯೆತಾ ಜಾಂವ್ಕ್ ಪುರೊ. ಮನ್ಶಾ ಸೈಂಭಾಚಿ ವಾಸ್ತಾವಿಕ್ ವೊಡ್ನಿ ತ್ಯಾ ಭುಮಿವೈಕುಂಟಾ ಥಾವ್ನ್ಂಚ್ ಆರಂಭ್ ಜಾಲ್ಲಿ. ವಾಸ್ತವಿಕಾಂತ್ಯ್ ಕವಿನ್ ಥೊಡೆಂ ಪೊಳ್ಕುರ್ಪಣ್ ದಾಖಯ್ಲಾಂ ತರೀ ಪೊಳಾಫಳ್ ಖಂಯ್ಸ್ರ್ಯ್ ದಾಖಂವ್ಕ್ ನಾ ತೊ ಮಾಂದುನ್ ಘೆಂವ್ಕ್ ಜಾಯ್ ಜಾಲ್ಲೊ ವಿಶಯ್.
ಹಾಂವ್ ಚಿಂತಾಂ ಸಮಾಜೆಚಿ ಕ್ರಾಂತಿ ಆನಿ ಕವಿತಾಚಿ ಕ್ರಾಂತಿ ದೊನ್ಯ್ ಕ್ರಾಂತಿಂಕ್ ಎಕಾಚ್ ಹಾತಾನ್ ಸಾಂಗಾತ್ ದಿಲ್ಲ್ಯಾನ್ ಹಾಂಗಾಸರ್ ಕವಿತೆಚಿ ಕ್ರಾಂತಿ ಜಿಕೊನ್ ಸಮಾಜೆಚಿ ಕ್ರಾಂತಿ ಥೊಡಿ ಪೊಳ್ಕುರ್ಪಣಾ ತೆವ್ಶಿಂ ಮಾಲ್ವಾಲ್ಯಾ ಜಾಂವ್ಕ್ ಪುರೊ. ಹಾಕಾ ಕಾರಾಣ್ ದಿಂವ್ಚೆಂ ತರ್ ಮೊಗಾಚೊ ಉಜೊ ಆನಿ ಝಳಯಿಲ್ಲೊ ಶೋಷಿತ್ ಉಜೊ ಕವಿಚಾ ಚಿಂತ್ಪಾ ಫರ್ಮಾಣೆಂ ವಿವಿಧ್ ಅರ್ಥಂಚೊ ಎಕಾಚ್ ರುಪಾಚೊ ಉಜೊ. ಉಜ್ಯಾಚೆಂ ರೂಪ್ ಏಕ್ ಜಾಂವ್ಕ್ ಸಕ್ತಾ ಪೂಣ್ ಉಜ್ಯಾಚಿ ಝಳ್ಣಿ ಏಕ್ ಜಾಯ್ನಾ. ಪಾರ್ತೇನಿಯಮ್ ರಾನ್ ದೋನ್ ಅರ್ಥಾಂನಿ ಕವಿನ್ ಸೊಭಯ್ಲಾಂ.
ಹಾಚೊ ಅರ್ಥ್ಯ್ ವಿವಿಧ್ ಇಮಾಜ್ಯೊ ಮುಖಾರ್ ದವರ್ತಾನಾ ಕವಿ ನಿಜಾಯ್ಕ್ಯ್ ಖಂಯ್ಚಾ ಇಮಾಜೆ ಪಾಟ್ಲ್ಯಾನ್ ಉಬೊ ಆಸಾ ತೆಂ ಪಾರ್ಕುಂಕ್ ಹಾಂವೆ ಸಾಂಗ್ಲ್ಲ್ಯಾ ಪರಿಂ ಪರ್ತ್ಯಾಕ್ ಕ್ರಾಂತಿಚಾ ಕುಶಿಂನ್ ಮಾಲ್ವೊಂಕ್ ಪಡ್ತಾ. ಕವಿತಾ ವಾಚ್ಚ್ಯಾ ಪಯ್ಲೆಂ ವಾಚ್ಪ್ಯಾನ್ ಕವಿತಾಚಾ ಮಟ್ಟಾಕ್ ಪಾಂವ್ಚೆಂ ಗರ್ಜೆಚೆಂ.
ಪುಣ್ ಹ್ಯಾ ಕ್ರಾಂತಿಕ್ ಉಮಾಳುಂಕ್ ಕವಿತಾಚಾ ಮಟ್ಟಾಚೆಂ ಗರ್ಜ್ ಆಸಾ? ಕವಿತೆಚೆಂ ಮಟ್ಟ್ ಉರಂವ್ಕ್ ಅಸಲಿಂ ಕವಿತಾಂ ಖಂಡಿತ್ ಗರ್ಜೆಚಿಂ ಚಡಾವತ್ ಬಂಡಾಯ್ ಕವಿತೆಂನಿ ದಿಸೊನ್ ಯೆಂವ್ಚೊ ನಿರಾಸ್ವಾದ್ ಯಾ ಪೊಳಾಫಳ್ ಎಚ್ಚೆಮಾಚಾ ಕವಿತೆಂನಿ ದಿಸೊನ್ ಯೇನಾ. ಕಾರಾಣ್ ಹಾಂಗಾ ಕವಿತಾ ನಾಯಕ್ ಆಶೆಕ್ ವೊಳ್ಸಾಯಿಲ್ಲೊ ಜಾಲಾ. ತೊ ಆಶೆಂತ್ ಜಲ್ಮಾಲಾ. ಹ್ಯಾಚ್ ಖಾತಿರ್ ತಾಣೆಂ ಪೊಳಾಫಳ್ ಘೆಂವ್ಚೆಂ ಯಾ ನಿರಾಸಾಂತ್ ರುದಾನ್ ಕರ್ಚೆಂ ದಿಸೊನ್ ಯೇನಾ. ಬಗಾರ್ ವಾಸ್ತಾವಾಚಾ ಆಶೆ ಥಾವ್ನ್ ಕ್ರಾಂತಿಕ್ ಚಡ್ ದೆಂವ್ತಾ. ವಾಸ್ತವಾಚಾ ಕ್ರಾಂತಿ ವಿಶಿಂ ಮಾತ್ರ್ ಕವಿನ್ ಚಿಂತುಂಕ್ ಜಾಯ್.
ವಾಸ್ತಾವಾಚಿ ಕ್ರಾಂತಿ ವಾಸ್ತಾವಾಚೆಂ ನಿರ್ಮೂಲನ್ ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಸಾದ್ಯ್ ನಾಂ. ಸಮಾಜೆಚಾ ವಾಸ್ತವಾಚೆಂ ನಿರ್ಮೂಲನ್ ಜಾಲೆಂ ತರ್ ಭೋವ್ಶಾ ಮನ್ಶ್ಯಾ ಜಾತಿಚೆಂಯ್ ನಿರ್ಮೂಲನ್ ಜಾಲ್ಲ್ಯಾಪರಿಂಚ್. ವಾಸ್ತವ್ ಮನ್ಶ್ಯಾಚಾ ರಗ್ತಾಂತ್ ಭರ್ಲಾಂ. ರಗ್ತಾಚಾ ಥೆಂಬ್ಯಾಕ್ ಪಾರ್ಕುಂಕ್ ರಗಾತ್ ವಾಳಂವ್ಕ್ ಪಡ್ತಾ. ವಾಳಯಿಲ್ಲೆಂ ರಗಾತ್ ಪರ್ತ್ಯಾನ್ ನವ್ಯಾ ರಗ್ತಾನ್ ಭರುಂಕ್ ಜಾಯ್ ತರ್ ಥಂಯ್ಸರ್ಯ್ ತ್ಯಾ ನವ್ಯಾ ರಗ್ತಾಕ್ಯ್ ಏಕ್ ರಂಗ್ ದಿಂವ್ಚೊ ಪಡ್ತಾ ಆನಿ ಹೊ ರಂಗ್ ವಾಸ್ತಾವಾಚಾ ಸಂಸಾರಾ ಥಾವ್ನ್ ಮೆಕ್ಳೊಚ್ ಉದೆವ್ನ್ ಖಂಡಿತ್ ಯೆನಾ. ಬಗಾರ್ ದುಸ್ರ್ಯಾ ರೂಪಾಕ್ ಜಲ್ಮ್ ದಿತಾ.
ವಾಸ್ತಾವಾಚೆಂ ದುಸ್ರೆಂ ರೂಪ್ ಆತಾಂಚ್ಯಾಕ್ಯ್ ಬರೆಂ ಯಾ ವಾಯ್ಟ್ ಕಶೆಂ ಆಸಾತ್ ತೆಂ ಸಾಂಗೊಂಕ್ ಜಾಯ್ನಾ. ಆಶೆಂ ಮ್ಹಣೊನ್ ಕ್ರಾಂತಿಕ್ ಕಯ್ದ್ ಕರುಂಕ್ಯ್ ಜಾಯ್ನಾಂ. ಹ್ಯಾಚ್ ಕಾರಾಣಾ ಖಾತಿರ್ ಹಾಂಗಾ ಕವಿನ್ ಕ್ರಾಂತಿಕ್ ಆನಿ ಕವಿತೆಕ್ ಸಾಂಗಾತಾ ವ್ಹಾಳಯ್ಲಾಂ ಮ್ಹಣೊನ್ ಮ್ಹಜಿ ಅಭಿಪ್ರಾಯ್. ಅಶೆಂ ಹೊ ಕವಿತಾ ಜಮೊ ಜಿಕೊಂಕ್ ಪಾವ್ಲಾ ತೆಂ ಸತ್.
ನಿಮಾಣೊ ಶರೊ: ಚಾನ್ನ್ಯಾಚಾ ರಾತಿಂ ಮೊರಾ ಪಾಕಾಂ ಮಾಳುನ್ ನೆಕೆತ್ರಾಂ ಶಿಂಪ್ಡಾಯ್ತಾನಾ ಆಮಾಸ್ ವಾಟೆರ್ ಕಾಜುಲೆ ದಿವೊ ಪೆಟವ್ನ್ ಚಂದ್ರೆಮಾಕ್ ಲಿಪವ್ನ್ ದವರುನ್ ಕವಿತಾ ನಾಯಕಾಕ್ ತಾಚ್ಯಾ ಮೊಗಾಚಾ ಪಾಸ್ಳೆಂತ್ ಸರ್ಗಾಚಿ ಸಪ್ಣಾಂ ದಾಖವ್ನ್ ಹೊ ಕವಿತಾ ಜಮೊ ಸೊಬಯಿಲ್ಲ್ಯಾ ಕವಿತಾಂತ್ಲ್ಯಾ ಸರ್ವ್ ಕಯ್ದ್ಯಾಂಕ್ ತಾಂಚಾ ಪಿಂಜ್ರ್ಯಾ ಥಾವ್ನ್ ಸುಟ್ಕಾ ಲಾಭಾಶೆಂ ಮ್ಹಜ್ಯಾ ಆಶಾವಾದಾಚೆಂ ಎಕ್ ಕಿರಣ್ ತ್ಯಾ ಕಾಂಕ್ಣಾ ಗಲ್ಲೆಂತ್ಲ್ಯಾ ಚಲಿಯೆಚಾ ಜಿವಿತಾಂತ್ ಫಾಂಕವ್ನ್ ದಿಸಾಂದೀಸ್ ತ್ಯಾ ಗಲ್ಲೆನಿಂ ವಾಳೊನ್ ವೆಚಾ ನೆಂಟ್ಯಾ ಸಪ್ಣಾಂಕ್ ಉಜ್ವಾಡಾಚೊ ಫುಡಾರ್ ಜಾವ್ನ್ ಕ್ರಾಂತಿ ಉಟಯಿಲ್ಲ್ಯಾ ’ಕಯ್ದ್ಯಾಚೊ ಕವಿತಾ’ ಹ್ಯಾ ಕವಿತಾ ಜಮ್ಯಾಚೊ ಕವಿ ಎಚ್ಚೆಮ್ ಪೆರ್ನಾಳ್ ಹಾಕಾ ಆನಿ ಹಾಚ್ಯಾ ಕವಿತಾಂಕ್ ಆನಿಂ ಫುಡಾರಾಕ್ ಸರ್ವ್ ಜಯ್ತ್ ಮಾಗೊನ್ ಮುಖಾರ್ಯ್ ಹ್ಯಾ ಕವಿಚಾ ಲಿಖ್ಣೆಂತ್ ಹಾಚ್ಯಾಕ್ಯ್ ಉಂಚ್ಲಿಂ ಕವಿತಾಂ ಕೊಂಕ್ಣಿ ಮಾಯೆಚಾ ಪಾಲ್ವಾಂತ್ ವಾಳೊಂದಿತ್ ಮ್ಹಳ್ಳ್ಯಾ ಆಶೆನ್ ಕವಿತಾ ನಾಯಕಾಚಾ ಸಮಾಜೆಂತ್ಲ್ಯಾ ಕ್ರಾಂತಿಕ್ ಸರ್ವ್ ಜಯ್ತಾ ಮಾಗ್ತಾಂ.
ತಶೆಂಚ್ ಹೊ ಜಮೊ ಫಾಯ್ಸ್ ಕೆಲ್ಲ್ಯಾ ಆಶಾವಾದಿ ಪ್ರಕಾಶಾನಾಚಾ ಪಾಲ್ವಾಂತ್ ಖಂಡಿತ್ ಜಾವ್ನ್ ಹೊ ಜಮೊ ಏಕ್ ಸದಾಂ ಕೊಂಬ್ಯಾಕ್ ಖಾಲ್ ಜಾಯ್ನಾತ್ಲೊ ಸುರ್ಯೊ ಜಾವ್ನ್ ಪರ್ಜಳ್ತಲೊ ಮ್ಹಳ್ಳೊ ಮ್ಹಜೊ ಭರ್ವಸೊ. ದೇವ್ ಬರೆಂ ಕರುಂ.
ಮೆಲ್ವಿನ್ ಜೆ. ವಾಸ್, ಕೆಲರಾಯ್
15 ಎಪ್ರಿಲ್ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
