ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಎಕ್ವೀಸ್: ಮಿಶೇಲ್ ರಾಯನ್ ಆಲಿಯಾ
ರಾಯನ್ ಆಪ್ಲ್ಯಾ ಆಫೀಸಾಕ್ ಭಾಯ್ರ್ ಸರ್ತಾನಾ ತಾಕಾ ಭಾಯ್ಲ್ಯಾ ದಾರಾ ಪಾಸೊನ್ ಸಾಂಗಾತ್ ದೀವ್ನ್ ತೊ ಆಪ್ಲ್ಯಾ ದೊಳ್ಯಾಂ ಮುಕ್ಲೊ ಪಯ್ಸ್ ಜಾತಾ ಪಾಸೊನ್ ತ್ಯಾ ದಾರ್ವಾಟ್ಯಾರ್ ಉಭೆಂ ರಾವ್ಲ್ಲೆಂ ಮಿಶೇಲ್ ಆತಾಂ ಸವ್ಕಾಸ್ ಪಾಟಿಂ ಘುಂವೊನ್ ಘರಾ ಭಿತರ್ ಆಯಿಲ್ಲ್ಯಾ ತಾಣೆಂ ತ್ಯಾ ಮುಕ್ಲ್ಯಾ ದಾರಾಕ್ ದಾಂಪ್ಲೆಂ.
ಮಿಶೇಲಾನ್ ಆಜ್ ಹಾಸೊನ್ ಹಾಸೊನ್ ರಾಯನಾಕ್ ತಾಚ್ಯಾ ಆಫೀಸಾಕ್ ದಾಡುನ್ ದಿಲ್ಲೆಂ ಜಾಲ್ಯಾರ್ಯ್ ಹ್ಯಾ ಥೊಡ್ಯಾ ದಿಸಾಂ ಥಾವ್ನ್ ಮಿಶೇಲಾಚಾ ಮತಿಕ್ ಸುಶೆಗ್ ನಾತ್ಲ್ಲೊ. ತೆಂ ವಿಪರೀತ್ ಚಿಂತಾಲೆಂ. ಆಪ್ಣಾ ಭೊಂವಾರಿ ಆಪ್ಣಾಕ್ಚ್ ಕಳಿತ್ ನಾತ್ಲ್ಲ್ಯಾ ಪರಿಂ ಕಿತೆಂಗೀ ಚಲೊನ್ ಆಸಾ ಮ್ಹಳ್ಳ್ಯಾಚಿ ತಾಕಾ ಖಾತ್ರಿ ಜಾಲ್ಲಿ. ಪುಣ್ ಆಪ್ಲ್ಯಾ ಖಂತಿಕ್ ತೆಂ ರಾಯನಾ ಮುಕಾರ್ ಪ್ರದರ್ಶಿತ್ ಕರಿನಾಸ್ತಾನಾ ಮತಿಚಾ ನಾ ಸಮಾಧಾನೆಕ್ ರಾಯನಾ ಥಾವ್ನ್ ಲಿಪೊನ್ ದವರ್ತಾಲೆಂ. ರಾಯನಾಚಾ ಜಿವಿತಾಚೆಂ ಸತ್ ಮಿಶೇಲಾಕ್ ಕಳಿತ್ ಜಾಲ್ಲ್ಯಾ ದಿಸಾ ರಾಯನಾಚಾ ತಳ್ಮಳ್ಯಾಂಕ್ ಪಳೆಲ್ಲ್ಯಾ ಮಿಶೇಲಾನ್ ರಾಯನಾಕ್ ಸದಾಂಚ್ ಸಮಾಧಾನೆನ್ ದವರುಂಕ್ ಪ್ರಯತ್ನ್ ಕೆಲ್ಲೆಂ. ಪುಣ್ ಮಿಶೇಲಾಕ್ ಹೆಂ ತಾಣೆಂ ಚಿಂತ್ಚ್ಯಾ ತಿತ್ಲ್ಯಾ ಸುಲಭಾಯೆಚೆಂ ನ್ಹಯ್ ಆಸ್ಲ್ಲೆಂ.
ಎಕಾ ವಾಟೆನ್ ಮಿಶೇಲಾಚೆಂ ಹೆಂ ನವೆಂ ಕಾಜಾರಿ ಜಿವಿತ್!
ದುಸ್ರ್ಯಾ ವಾಟೆನ್ ಹ್ಯಾ ಜಿವಿತಾಕ್ ಸಾಗ್ಸುಂಚಿ ನವಿ ವಾಟ್!
ಹಾಂಗಾಸರ್ ಸಗ್ಳೆಂಚ್ ನವೆಂ ಆಸ್ತಾನಾ, ಆಪುಣ್ ಹ್ಯಾ ಜಿವಿತಾಕ್ ಹೊಂದೊನ್ ಜಿಯೆಂವ್ಕ್ ಕಶ್ಟಾತಾಂ ವಾ ಆಪ್ಣಾಚಾ ವಾಟೆರ್ ನಿಜಾಯ್ಕ್ಯ್ ಕಷ್ಟಾಂನಿ ವೆಡೊ ಮಾರ್ಲಾ? ಮಿಶೇಲಾಕ್ ಹೆಂ ಸಮ್ಜಾನಾತ್ಲ್ಲೆಂ.
ಎಕಾ ಕುಶಿನ್ ಶೀತಲ್! ಎಕಾ ಕುಶಿನ್ ಹಾಂವ್!
ಶೀತಲಾಚೆಂ ತಾಣೆಂ ಆಶೆಲ್ಲೆಂ ತಾಚ್ಯಾ ಸಪ್ಣಾಂಚೆಂ ತೆಂ ಜಿವಿತ್ ಫುಲ್ಚ್ಯಾ ಪಯ್ಲೆಂಚ್ ಬಾವೊನ್ ಜಡೊನ್ ಗೆಲ್ಲೆಂ ಆಸ್ತಾಂ ಆಪ್ಣಾಚ್ಯಾ ಜಿವಿತಾಕ್ ಖಂಯ್ಚರ್ಗೀ ಉಜೊ ಧರ್ಲಾ ಮ್ಹಳ್ಳ್ಯಾ ಪರಿಂ ಭೊಗ್ತಾ. ಆಶೆಂ ಕಿತ್ಯಾಕ್? ಹ್ಯಾ ಮುಂಬಯಿಚ್ಯಾ ಹ್ಯಾ ಜಿವಿತಾ ಪ್ರಾಸ್ ತೆಂ ಆಪ್ಣಾಚೆಂ ಮಂಗ್ಳುರ್ಚೆಂ ಜಿವಿತ್ ಕಿತ್ಲ್ಯಾ ಸೊಭಿತ್ ಆಸ್ಲ್ಲೆಂ? ಮಿಶೇಲಾಚಾ ಮತಿಂತ್ ಚಿಂತ್ನಾಂ ಧಾಂವ್ತಾಲಿಂ.
ದಾರ್ ಧಾಂಪುನ್ ಭಿತರ್ ಆಯಿಲ್ಲೆಂ ಮಿಶೇಲ್ ಟಿ.ವಿ. ಮುಕ್ಲ್ಯಾ ಸೊಫಾರ್ ಬಸ್ಲೆಂ. ಲಾಗಿಂಚ್ ಸೊಫಾರ್ ಪಡೊನ್ ಆಸ್ಲ್ಲ್ಯಾ ರಿಮೋಟ್ ಕಂಟ್ರೋಲಾಕ್ ಹಾತಿಂ ಘೆವ್ನ್ ತ್ಯಾ ಟಿ.ವಿ. ಕ್ ತಾಣೆಂ ಆನ್ ಕೆಲಿ. ಪುಣ್ ಚಡ್ ವೇಳ್ ಬಸ್ಲೆಲ್ಯಾ ಕಡೆಚ್ಚ್ ಬಸೊಂಕ್ ತಾಕಾ ಜಾಲೆಂ ನಾ. ತ್ಯಾ ಟಿ.ವಿ. ವಯ್ಲಿಂ ದ್ರಶ್ಯಾಂ ಮಿಶೇಲಾಚಾ ಮತಿಂಂತ್ ಗೆಲಿಂ ನಾಂತ್. ತಾಚ್ಯಾ ದೊಳ್ಯಾಂ ಮುಕಾರ್ ಆಪ್ಲ್ಯಾ ಜಿವಿತಾಚಿಂಚ್ ದ್ರಶ್ಯಾಂ ದಿಸೊಂಕ್ ಲಾಗ್ಲಿಂ.
ಮಿಶೇಲಾನ್ ಚಿಂತುಂಕ್ಚ್ ನಾತ್ಲ್ಲೆಂ ರಾಯನಾಚಾ ಜಿವಿತಾಚೆಂ ಸತ್ ತಾಚ್ಯಾ ದೊಳ್ಯಾಂ ಮುಕಾರ್ ಆಯಿಲ್ಲೆಂ. ಹ್ಯಾ ಸತಾಕ್ ಘುಟಾನ್ ದವರುಂಕ್ ರಾಯನಾನ್ ಕೆಲ್ಲ್ಯಾ ಪ್ರಯತ್ನಾಕ್ ತೊ ತಾಚೊ ಮತ್ಲಾಬ್ ಮ್ಹಣೊನ್ ವೊಲಾಂವ್ಕ್ ಮಿಶೆಲಾಕ್ ಸಾದ್ಯ್ ಜಾಲೆಂ ನಾ. ಕಾರಾಣ್, ರಾಯನಾನ್ ಹ್ಯಾ ತಾಚ್ಯಾ ಜಿವಿತಾಚಾ ಸತಾಕ್ ಲಿಪವ್ನ್ ದವರುನ್ ಮಿಶೇಲಾಕ್ ಕಾಂಯ್ ಧಖೊ ದೀಂವ್ಕ್ ನಾತ್ಲ್ಲೊ. ತ್ಯಾ ತಾಚ್ಯಾ ಜಿವಿತಾಚಾ ಸತಾಕ್ ಜಾಣಾಂ ಜಾಲ್ಲ್ಯಾ ರಾಯನಾನ್ ತ್ಯಾ ಸತಾ ಥಾವ್ನ್ ಆಪ್ಲೆಂ ಜಿವಿತ್ ಬರೆಂ ಕರುಂಕ್ ಪ್ರಯತ್ನ್ ಕೆಲ್ಲೆಂ. ತಾಣೆಂ ಆಪ್ಣಾಚೊ ಖರೊ ಮೋಗ್ ಕೆಲಾ. ಆಪ್ಣಾಕ್ ಖಂಯ್ಚಾಂಯ್ತ್ಯ್ ಉಣೆಂಪಣ್ ಜಾಯ್ನಾತ್ಲ್ಲ್ಯಾ ಪರಿಂ ಸಾಂಬಾಳ್ಳಾಂ. ತೊ ಫಕತ್ತ್ ತಾಚ್ಯಾ ಬಿಜ್ನೆಸಾಂತ್ ಮಾತ್ರ್ ಮೆತೆರ್ ಜಾಂವ್ಕ್ ನಾ. ಕೆದ್ನಾಂ ಮ್ಹಾಕಾ ತಾಚಿ ಗರ್ಜ್ ಆಸ್ಲ್ಲಿ ತೆದ್ನಾಂ ತಾಣೆಂ ಮ್ಹಾಕಾ ತಾಚೊ ಸಾಂಗಾತ್ ದಿಲಾ. ಹ್ಯಾ ಘರಾಂತ್ ಮ್ಹಾಕಾ ಕಾಂಯ್ಚ್ ಉಣೆಂಪಣ್ ಜಾಯ್ನಾತ್ಲ್ಲ್ಯಾ ಪರಿಂ ರಾಯನಾನ್ ಪಳೆಲಾಂ.
ರಾಯನ್ ಆಪ್ಲ್ಯಾ ಆವಯ್ಚೆಂ ಚಿಂತುನ್ ತೊ ಮ್ಹಜ್ಯೆ ಥಂಯ್ ಭಿಯೆಲ್ಲೊ ಜಾವ್ಯೆತ್. ಪುಣ್ ತಾಣೆಂ ಕೆದ್ನಾಂಚ್ ಆಪ್ಣಾ ವಯ್ರ್ ಹಕ್ಕ್ ಚಲಂವ್ಚೆಂ ಪ್ರಯತ್ನ್ ಕೆಲ್ಲೆಂ ನಾ. ಸದಾಂಚ್ ಆಪ್ಣಾಕ್ ಆಪ್ಲ್ಯಾ ಜಿವಾ ಪರಿಂಚ್ ತಾಣೆಂ ಪಳೆಲಾಂ.
ತರ್ ರಾಯನ್ ನಿಜಾಯ್ಕ್ಯ್ ಮ್ಹಜೊ ಮೋಗ್ ಕರ್ತಾ?
ರಾಯನ್ ಮ್ಹಜೊ ಮೋಗ್ ಕರ್ತಾ ಜಾಲ್ಯಾರ್ ತೆಂ ಆಲಿಯಾ.....?
ಮಿಶೇಲಾಚಾ ಮತಿಂತ್ ಹೆಂ ಸವಾಲ್ ಭಳಾಧೀಕ್ ಜಾವ್ನ್ ಯೆತಾಲೆಂ. ಎಕಾ ಕುಶಿನ್ ತಾಕಾ ದುಬಾವ್ ಹಾಡಂವ್ಚೆಂ ಆಲಿಯಾ! ದುಸ್ರ್ಯಾ ಕುಶಿನ್ ತಾಚ್ಯಾ ಭೊಂವಾರಿ ಘಡೊನ್ ಯೆಂವ್ಚೊ ಖೆಳ್!
ಆಲಿಯಾಕ್ ಆನಿ ವಿಶುಕ್ ಸಂಭಂಧ್ ಆಸ್ಲ್ಲೊ ಮ್ಹಣೊನ್ ಶೀತಲಾನ್ ಸಾಂಗ್ಲ್ಯಾ ಉಪ್ರಾಂತ್ಚ್ ಮಿಶೇಲಾಕ್ ಆಲಿಯಾ ವಯ್ರ್ ದುಬಾವ್ ಉದೆಲ್ಲೊ. ಪುಣ್ ದೋನ್ ದಿಸಾಂ ಪಯ್ಲೆಂ.....!
ದೋನ್ ದಿಸಾಂ ಪಯ್ಲೆಂ ಇಕ್ಬಾಲಾನ್ ಆಪ್ಣಾಕ್ ಪೋನಾರ್ ಸಾಂಗ್ಲ್ಲೆಂ ಸಗ್ಳೆಂ ಉಡಾಸ್ ಆಸಾ ಮಿಶೇಲಾಕ್. ರಾಯನಾಚಾ ಜಿವಿತಾಚಾ ಸತಾ ಶಿವಾಯ್ ವಿಶುಕ್ ಆನಿ ಆಲಿಯಾಕ್ ಸಂಭಂಧ್ ಆಸ್ಲ್ಲ್ಯಾ ವಿಶಿಂ ಮಾತ್ರ್ ಇಕ್ಬಾಲಾನ್ ಮಿಶೆಲಾಕ್ ಸಾಂಗ್ಲ್ಲೆಂ ನ್ಹಯ್ ಆಸ್ತಾನಾ ಮಿಶೇಲಾಚಾ ಮತಿಂತ್ ಆಪ್ಲ್ಯಾಚ್ ಘೊವಾ ವಿರೋಧ್ ದುಬಾವ್ ಫುಂಕ್ಲ್ಲೊ. ರಾಯನಾಕ್ ಆನಿ ಆಲಿಯಾಕ್ ಸಂಭಂಧ್ ಆಸಾತ್ ಮ್ಹಳ್ಳ್ಯಾ ವಿಶಿಂ ಇಕ್ಬಾಲಾನ್ ಮಿಶೆಲಾಕ್ ತಿಳ್ಸಿಲ್ಲೆಂ.
ಮಿಶೇಲ್ ಜರೀ ಆಪ್ಲ್ಯಾ ಘೊವಾಕ್ ಪಾತ್ಯೆತಾಲೆಂ. ಪುಣ್ ಮತಿಂತ್ಲೊ ದುಬಾವ್ ಕೆದ್ನಾಂ ಕೆದ್ನಾಂ ರಾಯನಾಚಾ ವರ್ತನಾಕ್ ತ್ಯಾ ಇಕ್ಬಾಲಾಚಾ ಉತ್ರಾಂ ಸಾಂಗಾತಾ ತಾಳ್ ಕರ್ತಾಲೊ.
ಎಕಾ ಕುಶಿಂನ್ ಹ್ಯಾ ಇಕ್ಬಾಲಾನ್ಚ್ ಆಪ್ಣಾಚೆರ್ ಹಲ್ಲೊ ಕೆಲ್ಲೊ ಮ್ಹಣೊನ್ ಆಲಿಯಾ ಉಗ್ತ್ಯಾನ್ ಸಾಂಗ್ತಾ ಜಾಲ್ಯಾರ್ ತ್ಯಾಚ್ ಆಲಿಯಾ ವಿರೋಧ್ ಹೊ ಇಕ್ಬಾಲ್ ಆಪ್ಣಾಕ್ ಪೋನ್ ಕರುನ್ ಜಾಗಯ್ತಾ! ಹ್ಯಾ ಜಿವಿತಂತ್ ಇತ್ಲೊ ಘುಸ್ಪಡ್ ಗೊಂದೊಳ್? ಖಂಯ್ ಕೋಣ್ ಸತ್?
ಟಿ.ವಿ. ಮುಕಾರ್ ಬಸ್ಲೆಲ್ಯಾ ಮಿಶೇಲಾಚಿ ಮತ್ ಆಪ್ಲ್ಯಾ ಖಾಸ್ಗಿ ಚಿಂತ್ಪಾನ್ ರೆವ್ಡೊನ್ ವಿರಾರ್ ಜಾಲಿ. ತಾಚ್ಯಾ ಮುಕ್ಲ್ಯಾ ತ್ಯಾ ಟಿ.ವಿ. ಂತ್ ಕಿತೆಂ ಚಲ್ತಾ ತೆಂ ತಾಚ್ಯಾ ಮತಿಕ್ ವಚಾನಾತ್ಲ್ಲೆಂ. ತರ್ ಆಪುಣ್ ಹ್ಯಾ ಟಿ.ವಿ. ಮುಕಾರ್ ಕಿತೆಂ ಕರ್ತಾಂ?
ತಿತ್ಲೆಂಚ್!
ಮಿಶೇಲಾನ್ ಆಪ್ಲ್ಯಾ ಹಾತಾಂತ್ ಆಸ್ಲ್ಲ್ಯಾ ರಿಮೋಟ್ ಕಂಟ್ರೋಲಾನ್ ಟಿ.ವಿ. ಭಂಧ್ ಕೆಲಿ. ತೆಂ ಸೊಫಾ ವಯ್ಲೆಂ ಉಟ್ಲೆಂ. ಟಿ.ವಿ. ಚ್ಯಾ ರಿಮೋಟ್ ಕಂಟ್ರೋಲಾಕ್ ಥಂಯ್ಚ್ ಸೊಫಾರ್ ಉಡವ್ನ್ ಮಿಶೆಲ್ ಆಪ್ಲ್ಯಾ ಬೆಡ್ರೂಮಾ ತೆವ್ಶಿಂ ಚಮ್ಕಾಲೆಂ.
ಮತಿಚಾ ಗೊಂದೊಳಾಂತ್ ಜಿವಿತ್ ಸಾರುಂಕ್ ಮಿಶೇಲಾಕ್ ಸಾದ್ಯ್ ನಾತ್ಲ್ಲೆಂ. ಆಪ್ಲ್ಯಾ ಆಜ್ಯಾಕ್ ಪೋನ್ ಕರುಂಕ್ ತಾಕಾ ಮನ್ ಜಾಲೆಂ.
ಬೆಡ್ರೂಮಾಕ್ ಆಯಿಲ್ಲ್ಯಾ ಮಿಶೇಲಾನ್ ಟೆಲಿಪೋನಾಚೆಂ ರಿಸೀವರ್ ಹಾತಿಂ ಧರುನ್ ಆಪ್ಲ್ಯಾ ಆಜ್ಯಾಚೆಂ ನಂಬರ್ ಡಯಲ್ ಕೆಲೆಂ.
ಪೊನಾರ್ ನಂಬರ್ ಡಯಲ್ ಕೆಲ್ಲ್ಯಾ ಮಿಶೆಲಾಕ್ ತ್ಯಾ ಕುಶಿನ್ ಪೋನ್ ರಿಂಗ್ ಜಾತಾ ತೆಂ ಆಯ್ಕಾತಾಲೆಂ. ಟೆಲಿಪೋನಾಚೆಂ ರಿಸೀವರ್ ತಶೆಂಚ್ ಆಪ್ಲ್ಯಾ ಕಾನಾಕ್ ಲಾವ್ನ್ ಹೆವ್ಶಿಂ ಪಳಂವ್ಚ್ಯಾ ಮಿಶೇಲಾಚೆ ದೊಳೆ ತ್ಯಾ ಡ್ರೆಸ್ಸಿಂಗ್ ಟೇಬಲಾರ್ ತಾಣೆಂಚ್ ಮಾಂಡುನ್ ದವರ್ಲೆಲ್ಯಾ ತ್ಯಾ ತಾಚ್ಯಾ ಆಲ್ಬಮಾಂಕ್ ಆನಿ ತ್ಯಾ ಪಿಂತುರಾಂಕ್ ಪಳೆತಾಲೆ.
ತ್ಯಾ ಕುಶಿನ್ ಟೆಲಿಪೋನ್ ರಿಂಗ್ ಜಾತಾಲೆಂ ಜಾಲ್ಯಾರ್ಯ್ ಕೊಣ್ಯ್ ಪೋನ್ ಕಾಡಿನಾತ್ಲ್ಲೆಂ.
ತಶೆಂಚ್ ರಿಂಗ್ ಜಾವ್ನ್ ಜಾವ್ನ್ ತೆಂ ಪೋನ್ ಭಂಧ್ ಜಾಲೆಂ.
ಬೋವ್ಶ್ಯಾ ಕಾಂಯ್ ಘರಾ ನಾಂತ್ ಆಸ್ತೆಲಿಂ. ಮಿಶೇಲಾಚಾ ಮತಿಂತ್ ಚಿಂತ್ನಾಂ ಧಾಂವ್ಲಿಂ.
ಜಿಮ್ಮಿಚಾ ಸೆಲ್ಪೋನಾರ್ ಪೋನ್ ಕರುಂಕ್ ಮಿಶೇಲಾಕ್ ಮನ್ ಜಾಲೆಂ. ಪುಣ್ ಹ್ಯಾ ಮನಾಕ್ ತಾಣೆಂ ಕಾರ್ಯಗತ್ ಕೆಲೆಂ ನಾ. ಉಪ್ರಾಂತ್ ಥೊಡ್ಯಾ ವೆಳಾನ್ ಕೆಲ್ಯಾರ್ ಜಾಲೆಂ! ಆಪ್ಲ್ಯಾ ಮತಿಕ್ ಸಮ್ಜಾವ್ನ್ ಟೆಲಿಪೋನ್ ರಿಸೀವರ್ ತಾಚ್ಯಾ ಕ್ರೆಡಲಾ ವಯ್ರ್ ದವರುನ್ ತೆಂ ಆಪ್ಲ್ಯಾ ತ್ಯಾ ಭುರ್ಗ್ಯಾಪಣಾಚಾ ದಾಯ್ಜಾಂತ್ ಮೆತೆರ್ ಜಾಲೆಂ.
ಮಿಶೇಲಾಚೆಂ ದಾಯ್ಜ್!
ತಾಚ್ಯಾ ಜಿವಿತಾಚೊ ಉಡಾಸ್ಚ್ ತಾಚ್ಯಾ ಜಿವಿತಾಚೆಂ ದಾಯ್ಜ್!
ಹ್ಯಾ ಉಡಾಸಾಕ್ ಜಿವೊ ಕರ್ಚೆ ತೆ ಅಲ್ಬಮ್ ಆನಿ ತಿಂ ಪಿಂತುರಾಂ!
ತ್ಯಾ ಆಲ್ಬಮಾಂತ್ಲ್ಯಾ ತಸ್ವೀರೆಂನಿ ಲಿಪ್ಲ್ಲೆಂ ತಾಚೆಂ ಜಿವಿತ್ ಆನಿ ತ್ಯಾ ಪಿಂತುರಾಂನಿ ಪರ್ಗಟ್ ಕರ್ಚೆಂ ಅಪುಟ್ ಸತ್!
ಮಿಶೆಲಾಕ್ ತ್ಯಾ ತಸ್ವೀರೆಂಕ್ ಆನಿ ತ್ಯಾ ಪಿಂತುರಾಂಕ್ ಪಳೆಲ್ಲ್ಯಾ ತಿತ್ಲೆಂ ಪಾವಾನಾತ್ಲ್ಲೆಂ. ಜಿತ್ಲೆಂ ತೆಂ ಹ್ಯಾ ತಸ್ವೀರೆಂ ಸಾಂಗಾತಾ ವೇಳ್ ಪಾಶಾರ್ ಕರ್ತಾ ತಿತ್ಲೆಂ ತೆಂ ತಾಚ್ಯಾ ಜಿವಿತಾಕ್ ಚಡ್ ಆನಿ ಚಡ್ ಸಮ್ಜಾತಾಲೆಂ. ಆಪುಣ್ ಕೋಣ್ ಮ್ಹಳ್ಳೆಂ ತೆಂ ಸೊಧ್ತಾಲೆಂ.
"ಹಾಂವ್ ಕೋಣ್?" ಆಜ್ ಪರ್ತ್ಯಾಕ್ ಆಪ್ಣಾಕ್ಚ್ ಮಿಶೆಲಾನ್ ತ್ಯಾ ಡ್ರೆಸ್ಸಿಂಗ್ ಟೇಬಲಾ ಮುಕ್ಲ್ಯಾ ಆರ್ಶ್ಯಾಂತ್ ಪಳವ್ನ್ ಸವಾಲ್ ಕೆಲೆಂ ಕೆಲೆಂ.
ಮನಿಸ್ ಜಿತ್ಲೊ ಆಪ್ಣಾಕ್ ಸಮ್ಜಾತಾ ತಿತ್ಲೊ ತೊ ಹೆರಾಂಕ್ ಲಾಗಿಂ ಜಾತಾ. ಹ್ಯಾ ಖಾತಿರ್ ಆಪ್ಣಾಕ್ಚ್ ಸಮ್ಜೊಂಚಿ ಚಡ್ ಗರ್ಜ್! ಹೆಂ ಮಿಶೇಲ್ ಪಾತ್ಯೆತಾಲೆಂ.
"ಹಾಂವ್ ಕೋಣ್....?"
ಮ್ಯಾಂಚೆಸ್ಟರಾಚಾ ರಂಗ್ ರಂಗೀನ್ ಸಂಸಾರಾಂತ್ ಜಲ್ಮಾಲ್ಲೆಂ ಬಾಳ್?
ಭುರ್ಗ್ಯಾಪಣಾರ್ಚ್ ಆವಯ್ ಬಾಪಾಯ್ಚಾ ಮೊಗಾ ಥಾವ್ನ್ ವಂಚಿತ್ ಜಾಲ್ಲೆಂ ನೆಣ್ತೆಂ ಭುರ್ಗೆಂ?
ಅಚಾನಕ್ ಸಗ್ಳೆಂಚ್ ಹೊಗ್ಡಾವ್ನ್ ಮಂಗ್ಳುರಾಕ್ ಯೇವ್ನ್ ಪಾವ್ಲೆಲೆಂ ದುರದ್ರಶ್ಟ್ ಚೆಡುಂ?
ಪೃಕೃತಿಚ್ಯಾ ಸೊಭಾಯೆಂತ್ ಶಾಂತಿ ಸೊಧ್ಚೆಂ ಚಲಿ?
ತ್ಯಾ ಮೊಳಾಬಾರ್ ರಂಗ್ ರಂಗೀನ್ ವರ್ಣಾಳ್ ಬಣಾಂಕ್ ಪಳಂವ್ಕ್ ಆಶೆಂವ್ಚೆಂ, ಚಾರ್ಲ್ಸ್ ದೆ’ಕೋಸ್ತಾಕ್ ಜಲ್ಮಾಲ್ಲೆಂ ತಾಚೆಂ ರಾಯ್ ಕುಂವರಿ?
ಧುವೆಚ್ಯಾ ದೊಳ್ಯಾಂನಿ ಆಪ್ಣೆ ಸಾಂಡ್ಲ್ಲ್ಯಾ ಆಪ್ಲ್ಯಾ ಆವಯ್ ಲಾರಾಕ್ ಆನಿ ಆಪ್ಲ್ಯಾ ಭಯ್ಣಿಕ್ ಆಂಜೆಲೀನಾಕ್ ಪಳವ್ನ್ ಖುಶಿ ಪಾವ್ಚೆಂ ವಿವಿಯಾನಾಚೆಂ ಸೊಭಿತ್ ಸಪಾಣ್?
ಫುಡಾರಾಚಾ ಜಿವಿತಾಂತ್ಲೆಂ, ಮಾತಾರ್ಪಣಾಚಾ ಜಿವಿತಾಕ್ ಸಮಾಧಾನೆನ್ ಜಿಯೆಂವ್ಕ್ ಭರ್ವಸ್ಯಾಚೆಂ ಕೀರ್ಣ್ ಜಾವ್ನ್ ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚಾ ಜಿವಿತಾಂತ್ ಆಯಿಲ್ಲೊ ಭಳಾಧೀಕ್ ಆಧಾರ್?
ಕೋಣ್? ಆಪುಣ್ ಕೋಣ್?
ಮಿಶೆಲಾಚಾ ಮತಿಂತ್ ಸವಾಲಾ ವಯ್ರ್ ಸವಾಲ್ ಉದೆವ್ನ್ ಯೆತಾನಾ ತ್ಯಾ ಡ್ರೆಸ್ಸಿಂಗ್ ಟೇಬಲಾ ಮುಕಾರ್ ರಾವೊನ್ ತ್ಯಾ ಡ್ರೆಸ್ಸಿಂಗ್ ಟೇಬಲಾಚಾ ಆರ್ಶ್ಯಾಂತ್ ದಿಸ್ಚ್ಯಾ ಆಪ್ಣಾಚಾ ಪ್ರತಿರೂಪಾಕ್ಚ್ ಮಿಶೆಲಾನ್ ಪಳೆಲೆಂ.
ಹಳ್ತಾರ್ ಮಿಶೇಲಾಚಿ ಮತ್ ಆಪ್ಲ್ಯಾಚ್ ಬಿಡಾರಾಚಾ ಕೊನ್ಶ್ಯಾ ಕೊನ್ಶ್ಯಾಂತ್ ಆಪ್ಣಾಚಾಚ್ ಜಿವಾಕ್ ಸೊಧುಂಕ್ ಲಾಗ್ಲಿ.
ಥಂಯ್ಚ್ ಮಿಶೇಲಾನ್ ಪರ್ತ್ಯಾಕ್ ತೆ ಆಲ್ಬಮ್ ಉಗ್ತೆ ಕೆಲೆ. ತಾಂತ್ಲ್ಯಾ ಭಿತರ್ಲ್ಯಾ ತಸ್ವೀರೆಂನಿ ತಾಣೆಂ ಆಪ್ಣಾಕ್ಚ್ ಸೊಧ್ಲೆಂ.
ತ್ಯೊ ತಸ್ವೀರ್ಯೊ ಆಪ್ಣಾಚೆಂ ಜಿವಿತ್ ಆಪ್ಣಾಕ್ ದಾಕಯ್ತಾತ್ ಮ್ಹಳ್ಳ್ಯಾಪರಿಂ ಮಿಶೇಲಾಕ್ ದಿಸ್ಲೆಂ.
ಆತಾಂ ತಾಣೆಂ ತಿಂ ಪಿಂತುರಾಂ ಹಾತಿಂ ಘೆತ್ಲಿಂ.
ತಿಂ ಪಿಂತುರಾಂ ಆಪ್ಣಾಚ್ಯಾಚ್ ಜಿವಿತಾಂತ್ಲಿಂ ಘಡಿತಾಂ! ಪುಣ್ ಚಡ್ ಕಾಂಯ್ ಗರ್ಜೆಚಿಂ ನ್ಹಯ್!
ಹ್ಯಾ ಪಿಂತುರಾಂಕ್ ಆನಿ ಆಪ್ಣಾಕ್ ಸಂಭಂಧ್ ಆಸ್ಲ್ಲೊ ತರ್ಯ್ ತಿತ್ಲೊ ಕಾಂಯ್ ಗರ್ಜೆಚೊ ನ್ಹಯ್!
ಪುಣ್! ಕಿತ್ಯಾಕ್ಗೀ ಹಿಂ ಪಿಂತುರಾಂ ಮಿಶೇಲಾಕ್ ಕಿತೆಂಗೀ ಸಾಂಗೊಂಕ್ ಆಶೆತಾತ್ ತಶೆಂ ತಾಕಾ ಭೊಗ್ಲೆಂ.
ತ್ಯಾ ಪಿಂತುರಾಂನಿ ಕಸಲೆಂಗೀ ಲಿಸಾಂವ್ ಆಸಾ ತಶೆಂ ತಾಕಾ ದಿಸ್ಲೆಂ.
ತಾಣೆಂ ಪರ್ತ್ಯಾಕ್ ತಿಂ ಪಿಂತುರಾಂ ಪಳೆಲಿಂ.
ಹಾತಾಂತ್ ತಾಂಬ್ಡ್ಯಾ ಪಿಕ್ಲ್ಲ್ಯಾ ಪೊಪ್ಳಾಂಚಾ ಶಿಮ್ಟ್ಯಾಕ್ ಧರುನ್ ವಯ್ರ್ ತ್ಯಾ ಮಾಡಿಯೆಚಾ ಉಭಾರಾಯೆಕ್ ಪಳಂವ್ಚಾ ಮಿಶೇಲಾಚೆಂ ಪಿಂತುರ್!
ಶೆತಾ ಮೆರೆರ್ ಬಸೊನ್ ತಳ್ಯಾಂತ್ ಫುಲ್ಲ್ಲ್ಯಾ ಧವ್ಯಾ ಸಾಳಾಕಾಕ್ ಆಪ್ಲ್ಯಾ ಹಾತಾಂನಿ ಧರುನ್ ಹಾಸ್ಚಾ ಮಿಶೇಲಾಚೆಂ ಪಿಂತುರ್!
ಲಾಯ್ಡ್ ಆನಿ ಲವೀನಾ ಸವೆಂ ತ್ಯಾ ತೊಟಾಂತ್ ಖೆಳ್ಚಾ ಮಿಶೇಲಾಚೆಂ ಪಿಂತುರ್!
ತೊಟಾಚಾ ಮಧೆಗಾತ್ ಆಪ್ಲ್ಯಾ ಆಜ್ಯಾ ಸವೆಂ ಚಲೊನ್ ಯೆಂವ್ಚಾ ಮಿಶೆಲಾಚೆಂ ಪಿಂತುರ್!
ಏಕಾ ವಯ್ರ್ ಏಕ್ ಪಿಂತುರ್ ಮಿಶೇಲಾಕ್ ಪಾಟಿಂ ಆಪ್ಲ್ಯಾ ಗಾಂವಾಕ್ ಆಪಯ್ತಾ ತಶೆಂ ಜಾಲೆಂ.
ಆನಿ ನಿಮಾಣೆ!
ಜಿಮ್ಮಿನ್ ಆಪ್ಣಾಚಾ ಕಾಜಾರಾ ಬಾಬ್ತಿನ್ ದಿಲ್ಲೆಂ ಪಿಂತುರ್! ಹ್ಯಾ ಪಿಂತುರಾ ವಯ್ರ್ ಮಿಶೆಲಾನ್ ಆಪ್ಲಿ ನದರ್ ಮಾರ್ಲಿ.
ಉದಾಕ್ ವ್ಹಾಳೊನ್ ವೆಚ್ಯಾ ವ್ಹಾಳಾ ವಯ್ಲ್ಯಾ ಪಾಂಪಾಳ್ಯಾರ್ ರಾವೊನ್ ಪಾಂಪಾಳ್ಯಾ ಪಂದ್ಲ್ಯಾ ವ್ಹಾಳ್ಚ್ಯಾ ಉದ್ಕಾಂತ್ ಸತ್ರಿ ಏಕ್ ಉದಾರಿಚ್ ವ್ಹಾಳೊನ್ ವೆಚೆಂ ಪಳವ್ನ್ ರಾವ್ಲ್ಲ್ಯಾ ಮಿಶೆಲಾಚೆಂ ಪಿಂತುರ್!
ಜಿಮ್ಮಿನ್ ಮಿಶೇಲಾ ಖಾತಿರ್ ಆಲ್ವಿನಾ ಥಾವ್ನ್ ಪಿಂತ್ರಾವ್ನ್ ಘೆತ್ಲೆಲೆಂ ಪಿಂತುರ್!
ಹ್ಯಾ ಪಿಂತುರಾಚೊ ಕಲಾಕಾರ್ ಆಲ್ವಿನ್ ಜಾಲ್ಯಾರ್ಯ್ ಹ್ಯಾ ಪಿಂತುರಾ ಭಿತರ್ಲೊ ಚಿಂತ್ಪಿ ಮಾತ್ರ್ ಜಿಮ್ಮಿ ಮ್ಹಣೊನ್ ಮಿಶೆಲ್ ಜಾಣಾಂ!
ಚಲಿಯೆಕ್ ಇತ್ಲ್ಯಾ ಲಾಗಿಂ ಥಾವ್ನ್ ವಳ್ಕೊಂಚೆಂ ಫಕತ್ತ್ ಜಿಮ್ಮಿಕ್ ಮಾತ್ರ್ ಸಾದ್ಯ್ ಶಿವಾಯ್ ದುಸ್ರ್ಯಾ ಕೊಣಾಯ್ಕ್ಯ್ ಸಾದ್ಯ್ ನಾ ಮ್ಹಳ್ಳೆಂ ಮಿಶೇಲ್ ಒಪ್ವಾತಾ.
ಮಿಶೆಲಾನ್ ತ್ಯಾ ಪಿಂತುರಾಕ್ಚ್ ಪಳೆಲೆಂ!
ಎಕಾ ಖಿಣಾಕ್ ಹ್ಯಾ ಪಿಂತುರಾಕ್ ಪಳೆತಾನಾ ಆಪ್ಣೆ ಪಳಯಿಲ್ಲೆ ತೆ ರಂಗ್, ರಾಯ್ ಕುಂವರಿಚೊ ತೊ ಪಾಟೊ, ಆವಯ್ಚೆಂ ಸಪಾಣ್, ಸಗ್ಳೆಂ ತ್ಯಾ ವ್ಹಾಳ್ಚ್ಯಾ ಉದ್ಕಾಂತ್ ಉದಾರಿ ಪಡ್ಲೆಲ್ಯಾ ಸತ್ರೆಂತ್ ಬಸೊನ್ ಆಪ್ಣಾ ಥಾವ್ನ್ ಪಯ್ಸ್ ಧಾಂವ್ತಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲೆಂ.
ತಿತ್ಲೆಂಚ್!
ಎಕಾಚ್ಚ್ ಫರಾ ಮಿಶೆಲಾಚಾ ಮತಿಕ್ ಕಿತೆಂಗೀ ಝಳ್ಕಾಲ್ಲ್ಯಾ ಪರಿಂ ಜಾಲೆಂ.
ತಿ ಪಿಂತುರಾಂತ್ಲಿ ಸತ್ರಿ ಆಪ್ಣಾ ಥಾವ್ನ್ ಪಯ್ಸ್ ವೆತಾ? ವಾ ತಿ ಸತ್ರಿ ಆಪ್ಣಾಕ್ ಸೊಧುನ್ ಯೆತಾ.....? ಮಿಶೇಲಾಚಾ ಮತಿಂತ್ ಸವಾಲ್ ಉದೆಲೆಂ.
ಹ್ಯಾ ವ್ಹಾಳ್ಯಾಂತ್ಲೆಂ ಉದಾಕ್ ವ್ಹಾಳೊನ್ ವೆತಾ ವಾ ವ್ಹಾಳೊನ್ ಯೆತಾ?
ಮಿಶೆಲಾನ್ ತ್ಯಾ ಪಿಂತುರಾರ್ ಆಪ್ಲಿ ದೀಶ್ಟ್ ಜೊಕ್ಲಿ!
ತಿತ್ಲ್ಯಾರ್!
’ಸಟ್ಟ್’ ಕರುನ್ ಮಿಶೇಲಾಚಾ ಮತಿಕ್ ಜಿಮ್ಮಿನ್ ಶೀತಲಾಕ್ ದಿಲ್ಲ್ಯಾ ತ್ಯಾ ಪಿಂತುರಾಚೊ ಉಡಾಸ್ ಆಯ್ಲೊ.
ಹಾಂಗಾ ಸತ್ರಿ! ಥಂಯ್ ಆರ್ಸೊ!
ಹಾಂಗಾ ಸತ್ರಿ ಉದಾರಿ! ಥಂಯ್ ಆರ್ಸೊ ಖಾಲಿ!
ವೊಮ್ತ್ಯಾ ಸತ್ರೆಚೊ ಆನಿ ಪ್ರತಿರೂಪ್ ದಿಸ್ಚ್ಯಾ ಆರ್ಶ್ಯಾಚೊ ಮಾತ್ರ್ ಮನ್ಶ್ಯಾಕ್ ಫಾಯ್ದೊ! ವೊಮ್ತಿ ಸತ್ರಿ ಆನಿ ಪ್ರತಿರೂಪ್ ದಾಖಯ್ನಾತ್ಲ್ಲೊ ಆರ್ಸೊ ಕಿತ್ಯಾಕ್ ಉಪ್ಕಾರ್ತಾ? ತಾಂಕಾ ಆಶೆಂಚ್ ವ್ಹಾಳೊನ್ ವಚೊಂಕ್ ದೀಂವ್ಕ್ ಜಾಯ್!
ಮ್ಹಳ್ಯಾರ್.....?
ಹಿ ಸತ್ರಿ ಆನಿ ತೊ ಆರ್ಸೊ ಮ್ಹಾಕಾ ಆನಿ ಶೀತಲಾಕ್ ಫಾವೊ ನ್ಹಯ್ ಆಸ್ಲ್ಲೊ....?
ಮಿಶೇಲಾಚಾ ಕಾನಾಂಕ್ ಘಡ್ಗಡೊ ಮಾರ್ಲೆಲ್ಯಾ ಪರಿಂ ಜಾತಾನಾ ತಾಚ್ಯಾ ದೊಳ್ಯಾಂ ಮುಕಾರ್ ಜಗ್ಲಾಣೆಂ ಉಟೊನ್ ಧಾಂವ್ಲೆಂ.
’ಮೈ ಗಾಡ್!’
ಹೆಂ ಕಶೆಂ ಸಾದ್ಯ್? ಜಿಮ್ಮಿಕ್ ಹೆಂ ಕಶೆಂ ಕಳಿತ್ ಜಾಲ್ಲೆಂ? ಹೆಂ ಸಾದ್ಯ್ಚ್ ನಾ!
ಮ್ಹಾಕಾ ಆನಿ ಶೀತಲಾಕ್ ಜಿಮ್ಮಿನ್ ಆಶೆಂ ಇತ್ಲ್ಯಾ ಲಾಗಿಂ ಥಾವ್ನ್ ಕಶೆಂ ವಳ್ಕೊನ್ ಘೆತ್ಲೆಂ? ಮ್ಹಜ್ಯಾ ಆನಿ ಶೀತಲಾಚಾ ಕಾಳ್ಜಾಂತ್ಲ್ಯಾ ಭಗ್ಣಾಂಕ್ ಜಿಮ್ಮಿನ್ ಕಶೆಂ ವಾಚ್ಲೆಂ? ಆಮ್ಚ್ಯಾ ಚಲಿಯೆಪಣಾಕ್ ತೊ ಕಶೆಂ ವಳ್ಕಾಲೊ?
ಸವಾಲಾಂಚಾ ಬೊರ್ಯಾಕ್ ಮಾತ್ಯಾರ್ ಘೆವ್ನ್ ಥಕ್ಲೆಲೆಂ ಮಿಶೇಲ್ ಆಪ್ಲ್ಯಾ ಖಾಟಿಯೆರ್ ಬಸ್ಲೆಂ.
ಕೋಣ್ ತರ್ಯ್ ಆಸಾ! ಜಿಮ್ಮಿಚಾ ಪಾಟ್ಲ್ಯಾನ್ ಕೋಣ್ ತರ್ಯ್ ಆಸಾ! ಮಿಶೆಲಾಚಿ ಮತ್ ತಾಕಾ ಬೊಬಾಟುನ್ ಸಾಂಗೊಂಕ್ ಲಾಗ್ಲಿ.
ತಿತ್ಲ್ಯಾರ್!
’ಸಟ್ಟ್’ ಕರುನ್ ಮಿಶೆಲಾಕ್ ಉಡಾಸ್ ಆಯ್ಲೊ.
ವ್ಹಯ್! ಮಿಶೆಲಾಚೊ ದುಬಾವ್ ಭಳ್ ಜಾಲೊ.
ತಾಣೆಂ ಆತಾಂ ವೇಳ್ ಕಾಡ್ಲೊ ನಾ. ಖಾಟಿಯೆ ವಯ್ಲೆಂ ಉಟ್ಲ್ಲೆಂ ತೆಂ ಟೆಲಿಪೋನಾ ತೆವ್ಶಿಂ ಆಯ್ಲೆಂ.
ಆಪ್ಲ್ಯಾ ಆಜ್ಯಾಚಾ ಜಿಪಾಚ್ಯಾ ಸೆಲ್ಪೋನಾಚೆಂ ನಂಬರ್ ಡಯಲ್ ಕೆಲೆಂ ತಾಣೆಂ.
ತ್ಯಾ ಕುಶಿನ್ ಪೋನ್ ರಿಂಗ್ ಜಾತಾಲೆಂ.
"ಹಲೋ.....?" ಜಿಮ್ಮಿಚೊ ತಾಳೊ. ತ್ಯಾ ತಾಳ್ಯಾಂತ್ ಕಾಂಯ್ಚ್ ಬದ್ಲಾವಣ್ ನಾತ್ಲ್ಲಿ. ತೆಂಚ್ ದ್ರಡತ್ವ್ ಆನಿ ತೆಂಚ್ ಶಾಂತ್ಪಣ್!
"ಹಲೊ......!" ಮಿಶೇಲ್ ಉಲಯ್ಲೆಂ.
"ಹಾಂ ಮಿಶೆಲ್! ಕಶೆಂ ಆಸಾಯ್? ಬಾಬ್ ಘರಾ ಆಸಾ! ಹಾಂವ್ ತಾಕಾ ಆಸ್ಪತ್ರೆಕ್ ಆಪವ್ನ್ ವರುನ್ ಗೆಲ್ಲೊಂ. ಆತ್ತಾಂ ತಾಂಕಾಂ ಘರಾ ಪಾವೊನ್ ಹಾಂವ್ ಆತಾಂ ಒಮ್ಜೂರ್ ಭಾಯ್ರ್ ಸರ್ಲಾಂ! ವಾಟೆರ್ ಆಸಾಂ. ತುಂ ಘರಾ ಪೋನ್ ಕರ್. ತುಕಾ ಬಾಬ್ ಘರಾ ಮೆಳ್ತಲೊ!" ಜಿಮ್ಮಿ ತ್ಯಾಚ್ ಶಾಂತತಾಯೆಚ್ಯಾ ತಾಳ್ಯಾನ್ ಉಲವ್ಣ್ಚ್ ಗೆಲೊ. ಮಿಶೇಲಾಕ್ ತಾಣೆಂ ಉಲಂವ್ಕ್ಯ್ ಆವ್ಕಾಸ್ ದಿಲೊ ನಾ.
"ಹಾಸ್ಪಿಟಲಾಚಾ ಚವ್ತ್ಯಾ ವಾರ್ಡಾಂತ್ ತುಜೆಂ ಕೋಣ್ ಆಸಾ?" ಮಿಶೆಲಾನ್ ಶೀದಾ ಸವಾಲ್ ಕೆಲೆಂ. ಜಿಮ್ಮಿನ್ ಪಯ್ಲೆಂ ಉಚಾರ್ಲ್ಲಿಂ ಉತ್ರಾಂ ಮಿಶೆಲಾಚಾ ಕಾನಾಂಕ್ ಕಿತ್ಲಿಂ ಆಯ್ಕಾಲ್ಲಿಂ ತೆಂ ಮಿಶೆಲ್ ನೆಣಾಂ. ತಾಚಿ ಮತ್ ಹ್ಯಾ ವಿಶಯಾಕ್ ನಿಯಾಳಿನಾತ್ಲ್ಲಿ.
ಮಿಶೇಲಾಚಾ ಸವಾಲಾಕ್ ತ್ಯಾ ಕುಶಿನ್ ಥಾವ್ನ್ ಜಿಮ್ಮಿಚಿ ಕಾಂಯ್ ಜವಾಬ್ ಆಯ್ಲಿ ನಾ. ತ್ಯಾ ಕುಶಿನ್ ಥೊಡೊ ವೇಳ್ ಮೌನ್ ಆಸ್ಲ್ಲೆಂ.
"ಕೋಣ್ ಆಸಾ ಜಿಮ್ಮಿ? ಕೆ.ಎಮ್.ಸಿ ಹಾಸ್ಪಿಟಲಾಚಾ ಚವ್ತ್ಯಾ ವಾರ್ಡಾಂತ್ ತುಜೆಂ ಕೋಣ್ ಆಸಾ?" ಮಿಶೇಲಾಕ್ ಜಾಣಾಂ ಜಾಂವ್ಚೊ ಆತುರ್!
ಮಿಶೇಲಾಚಾ ದುಸ್ರ್ಯಾ ಸವಾಲಾಕ್ಯ್ ಜಿಮ್ಮಿ ಥಾವ್ನ್ ಕಾಂಯ್ ಜವಾಬ್ ಆಯ್ಲಿ ನಾ. ತ್ಯಾ ಕುಶಿಚಾ ಜಿಮ್ಮಿಚಾ ಮೌನ್ಪಣಾನ್ ಮಿಶೇಲಾಚಾ ದುಬಾವಾಕ್ ತಾಚ್ಯಾ ಕಾಳ್ಜಾಂತ್ ಥಿರ್ ಕೆಲ್ಲೊ.
"ಜಿಮ್ಮಿ....? ತುಂ ಆಯ್ಕಾತಾಯ್.....?" ಮಿಶೇಲ್ ಉಲಯ್ತಾಲೆಂ.
"ತುಂ ಘರಾ ಬಾಬಾಕ್ ಪೋನ್ ಕರ್ ಮಿಶೆಲ್! ತೊ ತುಕಾ ಉಡಾಸ್ ಕಾಡ್ತಾಲೊ!" ತ್ಯಾಚ್ ದ್ರಡತ್ವಾಚಾ ಉತ್ರಾಂ ಸವೆಂ ಜಿಮ್ಮಿನ್ ತ್ಯಾ ಕುಶಿನ್ ಪೋನ್ ಭಂಧ್ ಕೆಲ್ಲೊ ಆವಾಜ್!
ಆಪ್ಲೆಂ ಟೆಲಿಪೋನ್ ಡಿಸ್ಕನೆಕ್ಟ್ ಜಾತಾನಾ ತ್ಯಾ ಪೋನಾಕ್ಚ್ ಪಳೆಲ್ಲ್ಯಾ ಮಿಶೆಲಾನ್ ಏಕ್ ಲಾಂಬ್ ಶ್ವಾಸ್ ಸೊಡ್ಲೊ.
ತಶೆಂಚ್ ಟೆಲಿಪೋನಾಚೆಂ ರಿಸೀವರ್ ಆಪ್ಲ್ಯಾ ಹಾತಿಂ ಘೆವ್ನ್ ರಾವ್ಲ್ಲ್ಯಾ ಮಿಶೇಲಾನ್ ಆತಾಂ ದುಸ್ರೆಂ ನಂಬರ್ ಡಯಲ್ ಕೆಲೆಂ.
"ಹಲೋ......?" ತ್ಯಾ ಕುಶಿನ್ ಶೀತಲಾಚೊ ತಾಳೊ.
"ತುಜೊ ದುಬಾವ್ ಖರೊ ಜಾಲೊ ಶೀತಲ್!" ಮಿಶೇಲ್ ಉಲಯ್ಲೆಂ.
"ದುಬಾವ್.....? ಕಸಲೊ ದುಬಾವ್?" ಶೀತಲಾಚ್ಯಾ ತಾಳ್ಯಾಂತ್ ಆಶ್ಚರ್ಯ್ ಆಸ್ಲ್ಲೆಂ.
"ತುಂ ಸಾಂಗ್ತಾಲೆಂಯ್ ಪಳೆ ಜಿಮ್ಮಿ ಇತ್ಲ್ಯಾ ಲಾಗ್ಶಿಲ್ಯಾನ್ ಥಾವ್ನ್ ಚಲಿಯೆಕ್ ಕಸೊ ವಳ್ಕಾತಾ ಮ್ಹಣೊನ್....?"
"ಜಿಮ್ಮಿ......?"
"ವ್ಹಯ್!"
"ಕಿತೆಂ ಜಾಲೆಂ.....?"
"ತುಂ ಜಾಣಾಂಯ್.... ಆಮಿ ಆಬಾಕ್ ಪಳಂವ್ಕ್ ಹಾಸ್ಪಿಟಲಾಕ್ ಗೆಲ್ಲ್ಯಾ ವೆಳಾರ್... ಜಿಮ್ಮಿ... ಚವ್ತ್ಯಾ ವಾರ್ಡಾಂತ್......!"
"ಹಾಂ!" ಶೀತಲಾಕ್ ಮಿಶೇಲಾನ್ ಉಡಾಸ್ ಹಾಡಯ್ಲೆಂ.
"ಥಂಯ್ಚ್ ತಾಚೆಂ ಕೋಣ್ ತರ್ಯ್ ಆಸಾ! ತ್ಯಾ ಹಾಸ್ಪಿಟಲಾಚಾ ಚವ್ತ್ಯಾ ವಾರ್ಡಾಂತ್ ತಾಚೆಂ ಕೋಣ್ ತರ್ಯ್ ಆಸಾ!"
"ಪುಣ್..... ತುಕಾ ಆತಾಂ.... ಹೆಂ.....!" ಶೀತಲಾಕ್ ಸಮ್ಜಾಲೆಂ ನಾ.
"ಬರೆಂ ಶೀತಲ್! ತುಕಾ ಹಾಂವ್ ಉಪ್ರಾಂತ್ ಪೋನ್ ಕರ್ತಾಂ!" ಮಿಶೇಲಾನ್ ಪೋನ್ ದವರ್ಲೆಂ.
ಮಿಶೆಲಾಕ್ ಆತಾಂ ಕಿತೆಂ ಕರ್ಚೆಂ ತೆಂ ಕಾಂಯ್ ಸಮ್ಜಾಲೆಂ ನಾಂ.
ತೆಂ ಆತಾಂ ಚಿಂತುಂಕ್ ಪಡ್ಲೆಂ.
ಆಪ್ಣಾಚೆಂ ಕಾಜಾರ್ ಜಾವ್ನ್ ಸ ಮಹಿನೆ ಜಾಲ್ಯಾತ್. ಹ್ಯಾ ಸ ಮಹಿನ್ಯಾಂನಿ ತೆಂ ಜಿಮ್ಮಿಚೆಂ ತಾಕಾ ಜಾಯ್ ಜಾಲ್ಲೆಂ ಅಜೂನ್ ತ್ಯಾ ಹಾಸ್ಪಿಟಲಾಂತ್ ಆಸ್ತೆಲೆಂ? ಇತ್ಲೊ ಥೇಂಪ್? ಇತ್ಲೊ ಥೇಂಪ್ ತೆಂ ತ್ಯಾ ಹಾಸ್ಪಿಟಲಾಂತ್ ಆಸಾ ಮ್ಹಳ್ಯಾರ್......? ತಾಕಾ ಕಿತೆಂ ಜಾಲಾಂ ಜಾವ್ಯೆತ್? ಕಾಂಯ್ ತಾಕಾ ಗೂಣ್ ಜಾಯ್ನಾ ತಸಲಿ ಪಿಡಾ ಆಯ್ಲ್ಯಾ? ತಾಕಾ ಕಾಂಯ್ ಮ್ಹಜಿ ಗರ್ಜ್ ಆಸಾ? ಜಿಮ್ಮಿ ಕಾಂಯ್ ತೋಂಡ್ ಉಗ್ತೆಂ ಕರುನ್ ವಿಚಾರ್ಚೊ ಚಲೊ ನ್ಹಯ್! ಜಿಮ್ಮಿಕ್ ಕಾಂಯ್ ಪಯ್ಶ್ಯಾಂಚಿ ಗರ್ಜ್ ಆಸಾ? ಆಬಾಲಾಗಿಂ ಉಲಂವ್....?
ಮಿಶೇಲಾನ್ ಚಿಂತ್ಲಾಂ ಮಾತ್ರ್!
ತಿತ್ಲ್ಯಾರ್!
ಘರ್ಚ್ಯಾ ದಾರಾಚಿ ಕಾಂಪಿಣ್ ವ್ಹಾಜ್ಲಿ.
ಎಕಾಚ್ಚ್ ಫರಾ ಅಚಾನಾಕ್ ವ್ಹಾಜ್ಲ್ಲ್ಯಾ ಕಾಂಪಿಣೆ ಥಾವ್ನ್ ಮಿಶೇಲ್ ಹ್ಯಾ ಜಿಮ್ಮಿಚ್ಯಾ ಚಿಂತ್ನಾಂ ಥಾವ್ನ್ ಭಾಯ್ರ್ ಯೆವ್ನ್ ಆಪ್ಲ್ಯಾ ಸಂಸಾರಾಕ್ ಆಯ್ಲೆಂ.
"ಡ್ರೈವರ್ ಆಯ್ಲಾ ಆಸ್ತಲೊ!" ಚಿಂತ್ಲೆಂ ತಾಣೆಂ.
ಆಪ್ಲ್ಯಾ ಚಿಂತ್ನಾಂನಿ ತಾಕಾ ಜಾಗಯ್ತಾನಾ ತೆಂ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಂ.
"ಮ್ಯಾಡಮ್ ಡ್ರೈವರ್ ಆಯ್ಲಾ!" ಬೆಡ್ರೂಮಾ ಥಾವ್ನ್ ಭಾಯ್ರ್ ಯೆಂವ್ಚ್ಯಾ ಮಿಶೇಲಾಕ್ ಶಮ್ಮಿಚೊ ತಾಳೊ ಆಯ್ಕಾಲೊ.
ಸಾಕಾಳಿಂ ರಾಯನ್ ಆಫೀಸಾಕ್ ವೆತಾನಾ ಮಿಶೇಲಾನ್ ಘರಾಲಾಗಿಂ ಡ್ರೈವರಾಕ್ ದಾಡುನ್ ದೀಂವ್ಕ್ ಸಾಂಗ್ಲ್ಲೆಂ. ಮಿಶೆಲಾಕ್ ಆಜ್ ಮಾರ್ಕೆಟಿಕ್ ವಚೊಂಕ್ ಆಸ್ಲ್ಲೆಂ.
ಮಾರ್ಕೆಟಿಕ್ ವಚೊನ್ ಆಯ್ಲ್ಯಾ ಉಪ್ರಾಂತ್ ಆಬಾಕ್ ಪೋನ್ ಕರ್ಯೆತ್! ಚಿಂತ್ಲ್ಲ್ಯಾ ಮಿಶೆಲಾನ್ ನ್ಹೆಸೊಂಕ್ ಶುರು ಕೆಲೆಂ.
ಟೊಯೊಟಾ ಲ್ಯಾಂಡ್ಕ್ರೂಸರ್ ರಾಯನ್ ಘೆವ್ನ್ ಗೆಲ್ಲೊ ಜಾಲ್ಲ್ಯಾನ್ ರಾಯನಾನ್ ಡ್ರೈವರಾನ್ ಚವರ್ಲೆಟ್ ಜೀಪ್ ವರುಂಕ್ ಫರ್ಮಾಯಿಲ್ಲೆಂ.
ರಾಯನಾನ್ ಸಾಂಗ್ಲ್ಲ್ಯಾ ಪರಿಂಚ್ ಡ್ರೈವರಾನ್ ಕಾಳೆಂ ಚವರ್ಲೆಟ್ ಜೀಪ್ ಭಾಯ್ರ್ ಕಾಡ್ಲೆಂ.
"ಮ್ಯಾಡಮ್ ಹಾಂವ್ ಯೇಂವ್.....?" ಶಮ್ಮಿನ್ ವಿಚಾರ್ಲೆಂ.
"ನಾಕಾ ಶಮ್ಮಿ! ಆಜ್ ತಿತ್ಲೊ ಕಾಂಯ್ ಸಾಮಾನ್ ನಾ! ಮ್ಹಾಕಾ ಸುಪರ್ ಮಾರ್ಕೆಟಿಕ್ ವಚೊಂಕ್ ಜಾಯ್. ತುಂ ಘರಾಚೆಮ್ ಕಾಮ್ ಪಳೆ. ಡ್ರೈವರ್ ಆಸಾ!" ಮಿಶೇಲಾನ್ ಶಮ್ಮಿಕ್ ಜವಾಬ್ ದಿಲಿ.
ಆಪ್ಣಾಚೆಂ ನ್ಹೆಸೊನ್ ಜಾವ್ನ್ ಭಾಯ್ರ್ ಆಯಿಲ್ಲೆಂ ಮಿಶೇಲ್ ಡ್ರೈವರಾನ್ ತಯಾರ್ ಕೆಲ್ಲ್ಯಾ ಜಿಪಾರ್ ಬಸ್ಲೆಂ.
"ವಚೊಂ ಮ್ಯಾಡಮ್.....?" ಡ್ರೈವರಾಚೆಂ ಖಾಲ್ತೆಂ ಉಲೊಣೆಂ.
"ಚಲ್ಯಾಂ!" ಮಿಶೇಲಾನ್ ಡ್ರೈವರಾಕ್ ಫರ್ಮಾಯ್ಲೆಂ.
ಚವರ್ಲೆಟ್ ಯೂಕೊನ್ ಜೀಪ್ ಆತಾಂ ಮಿಶೇಲಾಚಾ ಬೊಂಗ್ಲ್ಯಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಮುಕ್ಲ್ಯಾ ರಸ್ತ್ಯಾಕ್ ದೆಂವ್ಲೆಂ.
ಹಾಕಾಚ್ಚ್ ರಾಕೊಣ್ ಆಸ್ಲ್ಲೆಂ, ರಸ್ತ್ಯಾ ಪೊಂತಾರ್ ಉಭೆಂ ಜಾವ್ನ್ ಘಡಿಯೊ ಮೆಜ್ಚೆಂ ಮೆರೂನ್ ರಂಗಾಚೆಂ ಮಹೀಂದ್ರ ಸ್ಕೋರ್ಪಿಯೊ ಜೀಪ್ ವ್ಹಳೂ ಮುಕಾರ್ ಆಯಿಲ್ಲೆಂ ತೆಂ ಮಿಶೇಲಾಚಾ ಚವರ್ಲೆಟಾಚೊ ಪಾಟ್ಲಾವ್ ಕರುಂಕ್ ಲಾಗ್ಲೆಂ.
*************
ರಾಯನಾಚೆಂ ಆಫೀಸ್!
ಆಪ್ಲ್ಯಾ ಕ್ಯಾಬಿನಾ ಭಿತರ್ ಬಸೊನ್ ರಾಯನ್ ಆಪ್ಲ್ಯಾ ಮೆಜಾ ವಯ್ಲ್ಯಾ ಕಂಪ್ಯೂಟರಾ ವಯ್ರ್ ನದರ್ ಮಾರ್ತಾಲೊ. ತಾಚ್ಯಾ ಮೆಜಾಚಾ ಮುಕ್ಲ್ಯಾ ಬಸ್ಕೆರ್ ಬಸ್ಲ್ಲೊ ರಾಮ್ ಪ್ರಸಾದ್ ಥೊಡ್ಯಾ ಖಂತಿನ್ ಆಸಾ ಮ್ಹಳ್ಳ್ಯಾ ಪರಿಂ ದಿಸ್ತಾಲೊ. ಆಯ್ಚ್ಯಾ ಸಾಕಾಳಿಂ ರಾಯನಾನ್ಚ್ ತಾಕಾ ಆಪ್ಲ್ಯಾ ಆಫೀಸಾಕ್ ಆಪಯಿಲ್ಲೆಂ. ರಾಯನಾನ್ ರಾಮ್ ಪ್ರಸಾದಾಕ್ ಆಪ್ಲ್ಯಾ ಆಫೀಸಾಕ್ ಆಪಯಿಲ್ಲ್ಯಾ ತ್ಯಾ ತಾಚ್ಯಾ ತಾಳ್ಯಾಂತ್ಚ್ ರಾಯನಾ ವಯ್ರ್ ರಾಮ್ ಪ್ರಸಾದಾಕ್ ದುಬಾವ್ ಮಾರ್ಲ್ಲೊ. ಕಾಂಯ್ ತರ್ಯ್ ಗರ್ಜ್ ನಾಸ್ತಾನಾ ಆಶೆಂ ಎಕಾನ್ಏಕ್ ರಾಯನ್ ಕೊಣಾಯ್ಕ್ಯ್ ಮೆಳೊಂಕ್ ಪಸಂದ್ ಕರಿನಾ ಮ್ಹಳ್ಳೆಂ ರಾಮ್ ಪ್ರಸಾದ್ ಬರ್ಯಾನ್ ಜಾಣಾಂ.
ರಾಯನಾಚಾ ಆಫೀಸಾಕ್ ಆಯಿಲ್ಲ್ಯಾ ರಾಮ್ ಪ್ರಸಾದಾಚೊ ದುಬಾವ್ ಸತ್ ಜಾಲ್ಲೊ.
ರಾಮ್ ಪ್ರಸಾದ್ ಜಾಲ್ಯಾರ್ಯ್ ಹೆಳ್ಲ್ಲೊ ಲಾಯರ್! ತ್ಯಾ ಕೊರ್ಟಾಂತ್ ಜಡ್ಜಾ ಮುಕಾರ್ ಆಪ್ಲ್ಯಾ ಕ್ಲಾಯಂಟಾ ಖಾತಿರ್ ಝುಜ್ತಾನಾ ಮುಕ್ಲ್ಯಾ ವಿರೋಧ್ ಪಾಡ್ತಿಚ್ಯಾ ಸಾಕ್ಶೆಚಾ ದೊಳ್ಯಾಂ ದಿಶ್ಟೆಕ್ ಆನಿ ತಾಚ್ಯಾ ತಾಳ್ಯಾಂತ್ ಉಟ್ಚ್ಯಾ ತರಂಗಾಂಕ್ ಪಾರ್ಕುನ್ಚ್ ಖಂಯ್ ಕೆದಾಳಾ ಆಪ್ಣಾಚೊ ತೀರ್ ಮಾರುಂಕ್ ಜಾಯ್ ಮ್ಹಳ್ಳೆಂ ರಾಮ್ ಪ್ರಸಾದ್ ಜಾಣಾಂ ಜಾತಲೊ.
"ಪಳೆ ಪ್ರಸಾದ್!" ರಾಯನಾನ್ ಕಂಪ್ಯೂಟರಾಚಾ ಮೊನಿಟರಾ ವಯ್ಲಿ ಆಪ್ಣಾಚಿ ದೀಶ್ಟ್ ಕಾಡುನ್ ಪ್ರಸಾದಾ ವಯ್ರ್ ಖಂಚಯ್ಲಿ.
ಎದೊಳ್ ಆಪ್ಲೆಸ್ತಕಿಂ ಚಿಂತುನ್ ಆಸ್ಲ್ಲೊ ಪ್ರಸಾದ್ ಆತಾಂ ರಾಯನಾನ್ ಉಲಯಿಲ್ಲೆಂ ಆಯ್ಕೊನ್ ತೊ ರಾಯನಾಕ್ ಆಯ್ಕೊಂಕ್ ಮುಕಾರ್ ಬಾಗಾಲೊ.
"ಫಾಲ್ಯಾಂ ಫಿಲ್ಮಾಚೆಂ ಪ್ರೀಮಿಯರ್ ಆಸಾ! ಪೊರ್ವಾಂ ಕೊರ್ಟಾಂತ್ ಆಲಿಯಾಚಿ ಕೇಸ್ ಆಪಯ್ಲ್ಯಾ. ತೊ ಇಕ್ಬಾಲ್ ಬರೊ ಚಾಲಾಕ್ ಮನಿಸ್ ಉಡಾಸ್ ದವರ್!" ರಾಯನ್ ಪ್ರಸಾದಾಕ್ಚ್ ದೀಶ್ಟ್ ಜೊಕುನ್ ಪಳೆತಾಲೊ.
ರಾಯನಾಕ್ಚ್ ಪಳೆಲ್ಲ್ಯಾ ಪ್ರಸಾದಾಕ್ ಇತ್ಲ್ಯಾ ದಿಸಾಂ ಉಪ್ರಾಂತ್ ರಾಯನ್ ಆಜ್ ಕಿತ್ಯಾಕ್ಗೀ ಆಪ್ಣಾ ವಯ್ರ್ಚ್ ಭರ್ವಸೊ ಸಾಂಡ್ಲೆಲ್ಯಾ ವ್ಯಕ್ತಿ ಪರಿಂ ದಿಸ್ಲೊ. ಹಾಚೆಂ ಕಾರಾಣ್ ಪ್ರಸಾದಾಕ್ ಸಮ್ಜಾಲೆಂ ನಾ. ಪುಣ್ ಪ್ರಸಾದಾಕ್ ರಾಯನಾಚಾ ಭರ್ತವಾ ವಯ್ರ್ ದುಬಾವ್ ಉದೆಲೊ.
"ಕೇಸ್ ಆಮ್ಚ್ಯಾ ಕುಶಿನ್ಚ್ ಭಳ್ ಆಸಾ ರಾಯನ್!" ಪ್ರಸಾದಾನ್ ಆಪ್ಲ್ಯಾ ದುಬಾವಾಕ್ ಭರ್ವಸೊ ದಿಂವ್ಚೆಂ ಪ್ರಯತ್ನ್ ಕೆಲೆಂ.
"ತುಂ ಇಕ್ಬಾಲಾಕ್ ನೆಣಾಂಯ್ ಪ್ರಸಾದ್!" ರಾಯನ್ ಆಪ್ಲ್ಯಾ ಬಸ್ಕೆರ್ ವೊಣ್ಕಾಲೊ. "ತೊ ತಾಚೆಂ ಪ್ರಯತ್ನ್ ಸಂಪೂರ್ಣ್ ಥರಾನ್ ಕರ್ತಲೊ. ತಾಕಾ ಕಸಲೆಂಗೀ ಏಕ್ ಧಯ್ರ್ ಆಸಾ! ಹ್ಯಾಚ್ ಧಯ್ರಾನ್ ತೊ ಆಪ್ಣಾಕ್ ಆನಿ ಆಲಿಯಾಚಾ ಹಲ್ಲ್ಯಾಕ್ ಸಂಭಂಧ್ ನಾ ಮ್ಹಣೊನ್ ಉಗ್ತ್ಯಾನ್ ಪಾಚಾರ್ತಾ!" ಬಸ್ಕೆಕ್ ವೊಣ್ಕಾಲ್ಲೊ ರಾಯನ್ ಮೌನ್ ಜಾಲೊ. ತೊ ಥೊಡೆಂ ಚಿಂತ್ಚ್ಯಾ ಪರಿಂ ದಿಸ್ಲೊ. ರಾಮ್ ಪ್ರಸಾದಾ ವಯ್ಲಿ ದೀಶ್ಟ್ ಕಾಡುನ್ ತಾಣೆಂ ಪರ್ತ್ಯಾಕ್ ಆಪ್ಲ್ಯಾ ಕಂಪ್ಯೂಟರಾಚಾ ಮೊನಿಟರಾ ವಯ್ರ್ ಖಂಚಯ್ಲಿ. "ಹಿ ಕೇಸ್ ತುವೆಂ ಚಿಂತ್ಚ್ಯಾ ತಿತ್ಲ್ಯಾ ಸುಲಾಭಾಯೆನ್ ತಿರ್ಸಾತೆಲಿ ಮ್ಹಣೊನ್ ಮ್ಹಾಕಾ ದಿಸಾನಾ ಪ್ರಸಾದ್!" ತಸೊಚ್ಚ್ ಮೊನಿಟರಾ ವಯ್ರ್ ದೀಷ್ಟ್ ವರೀತ್ತ್ ರಾಯನ್ ಉಲಯ್ಲೊ.
"ತುಂ ಕಾಂಯ್ ವರ್ರಿ ಕರಿನಾಕಾ ರಾಯನ್! ಇಕ್ಬಾಲಾಚಿ ಚಾಲ್ ಕಿತೆಂ ಆಸಾ ತಿ ಪೊರ್ವಾಂ ಹ್ಯಾ ಕೇಸಿಚಾ ಪಯ್ಲ್ಯಾ ದಿಸಾಚಾ ಆಯ್ಕೊವ್ಣ್ಯಾಂತ್ಚ್ ಕಳ್ತೆಲಿ. ತಶೆಂಯ್ ಎಕಾಚ್ಚ್ ದಿಸಾ ಭಿತರ್ ಕೇಸ್ ಕಾಂಯ್ ಸಂಪಾನಾ!" ರಾಮ್ ಪ್ರಸಾದಾಕ್ ಆಪ್ಣಾ ವಯ್ರ್ ವಿಶ್ವಾಸ್ ಆಸ್ಲ್ಲೊ.
ಪುಣ್, ರಾಯನಾಚೊ ವಿಶ್ವಾಸ್ ಖಂಯ್ಚರ್ಗೀ ದಂಡಳ್ಲ್ಲ್ಯಾ ಪರಿಂ ಜಾತಾಲೊ.
ತುಂ ಕಾಂಯ್ ವರ್ರಿ ಕರಿನಾಕಾ ಮ್ಹಣೊನ್ ಪ್ರಸಾದಾಕ್ ತೊಂಡಾನ್ ಉಚಾರುಂಕ್ ಮಸ್ತ್ ಸುಲಭ್. ಪುಣ್ ರಾಯನಾಕ್.....?
ಎಕಾಕುಶಿನ್ ಆಲಿಯಾ ವಯ್ರ್ ಹಲ್ಲೊ. ತೊಯ್ ಮರಣಾಂತಿಕ್! ದುಸ್ರ್ಯಾ ಕುಶಿನ್ ಇಕ್ಬಾಲಾನ್ ಆಪ್ಣಾಕ್ ಕೆಲ್ಲೆಂ ಕರೋಡ್ ರುಪ್ಯಾಂಚೆಂ ಲುಕ್ಸಾಣ್!
ಹ್ಯಾ ಭಾಯ್ರ್ ಇಕ್ಬಾಲಾನ್ ಮಿಶೇಲಾಕ್ ಪೋನ್ ಕೆಲ್ಲೊ ವಿಶಯ್!
ಆಲಿಯಾ ಮ್ಹಣ್ತಾ ಇಕ್ಬಾಲಾನ್ ಆನಿ ತಾಚ್ಯಾ ಭಾವಾನ್ ತಾಚ್ಯಾ ವಯ್ರ್ ಹಲ್ಲೊ ಕೆಲಾ. ಇಕ್ಬಾಲ್ ಪಬ್ಲಿಕ್ಪಣಿಂ ಉಗ್ತ್ಯಾನ್ ಆಪ್ಣೆಂ ಆಲಿಯಾ ವಯ್ರ್ ಹಲ್ಲೊ ಕರುಂಕ್ ನಾ ಮ್ಹಣ್ ಒಪ್ತಾ! ತ್ಯಾ ಭಾಯ್ರ್ ಹೊಚ್ಚ್ ಇಕ್ಬಾಲ್ ಶೀತಲಾಕ್ ಪೋನ್ ಕರುನ್ ಆಲಿಯಾಚಾ ಆನಿ ವಿಶು ಕುಮಾರಾಚಾ ಸಂಭಂಧಾ ವಿಶಿಂ ಸಾಂಗ್ತಾ. ಮಿಶೇಲಾಕ್ ಪೋನ್ ಕರುನ್ ಆಪ್ಣಾಚಾ ಆದ್ಲ್ಯಾ ಜಿವಿತಾ ವಿಶಿಂ ಖಬಾರ್ ದಿತಾ. ಮಿಶೆಲಾಕ್ ದುಬಾವಾಕ್ ಇಡೆಂ ದಿತಾ. ತೊ ಆಶೆಂ ಕಿತ್ಯಾಕ್ ಕರ್ತಾ? ಇಕ್ಬಾಲ್ ರಾಯನಾಚಾ ಸಮ್ಜಣೆ ಭಾಯ್ರ್ ಆಸ್ಲ್ಲೊ.
ಆಲಿಯಾಚಾ ವಯ್ರ್ ಹಲ್ಲೊ ಕೆಲ್ಲ್ಯಾಚಾ ಆಪ್ಲ್ಯಾ ಆಪ್ರಾಧಾ ಥಾವ್ನ್ ಬಚಾವ್ ಜಾಂವ್ಕ್ ಇಕ್ಬಾಲ್ ವಾಟೊ ಸೊಧ್ತಾ?
ಆಪ್ಣೆ ಬಚಾವ್ ಜಾಂವ್ಕ್ ತೊ ಖಂಡಿತ್ ವಾಟೊ ಸೊಧ್ತಲೊ. ಪುಣ್ ಹಾಚ್ಯೆ ಮಧೆಂ ತೊ ಮಿಶೇಲಾಕ್ ಕಿತ್ಯಾಕ್ ಮಧೆಂ ಹಾಡ್ತಾ?
ಆಪುಣ್ ಜಾಲ್ಯಾರ್ ಬಿಜ್ನೆಸಾಕ್ ಲಾಗೊನ್ ತಾಚೊ ದುಸ್ಮಾನ್ ಜಾವ್ಯೆತ್. ಪುಣ್ ಮಿಶೆಲ್.....? ಮ್ಹಜ್ಯಾ ಬಿಜ್ನೆಸಾಚಾ ಸಂಸಾರಾಕ್ ವಳ್ಕೊನ್ ಪಾಸೊನ್ ನೆಣಾಂ ಆಸ್ಚ್ಯಾ ಮಿಶೇಲಾಕ್ ಹ್ಯಾ ಝುಜಾಂತ್ ಕಿತ್ಯಾಕ್ ತೊ ಮಧೆಂ ವೊಡುನ್ ಹಾಡ್ತಾ? ರಾಯನಾಕ್ ಕಾಂಯ್ ಸಮ್ಜಾನಾತ್ಲ್ಲೆಂ.
ಹ್ಯಾ ಥೊಡ್ಯಾಚ್ ಆವ್ದೆ ಭಿತರ್ ರಾಯನಾಚಾ ಜಿವಿತಾಂತ್ ಮಸ್ತ್ ಬದ್ಲಾವಣ್ ಜಾಲ್ಯಾ ಮ್ಹಳ್ಳ್ಯಾ ಪರಿಂ ತಾಕಾ ದಿಸ್ಲೆಂ.
ಆಪ್ಣಾಚ್ಯಾ ಬಿಜ್ನೆಸಾಂತ್ ಹೊ ಸದಾಂ ಚಲೊನ್ ಆಸ್ಚೊ ವಿಶಯ್! ಪುಣ್, ವಿಶು ಕುಮಾರಾಚೆಂ ಮರಣ್ ಆನಿ ಆಲಿಯಾ ವಯ್ರ್ ಹಲ್ಲೊ? ಹೆಂ ಸದಾಂಚೆಂ ನ್ಹಯ್! ಮಿಶೇಲಾನ್ ಸಾಂಗ್ಲ್ಲ್ಯಾ ಪರಿಂ ವಿಶು ಕುಮಾರಾಚಿ ನಿಜಾಯ್ಕ್ಯ್ ಖುನ್ ಜಾಲ್ಯಾ? ಪುಣ್ ಮಿಶೇಲ್ ಆನಿ ಶೀತಲ್ ಹೊ ದುಬಾವ್ ಆಲಿಯಾ ವಯ್ರ್ ಉಚಾರ್ತಾತ್! ಆಲಿಯಾ ಆಶೆಂ ಕರುಂಕ್ ಸಕ್ತಾ? ಆಪ್ಲ್ಯಾ ದೊಳ್ಯಾಂ ಫುಡೆಂ ಆಲಿಯಾ ಆನಿ ವಿಶುಚ್ಯಾ ಮಧೆಂ ಕಸೊಲೊಯ್ ಸಂಭಂಧ್ ಆಸಾ ಮ್ಹಳ್ಳ್ಯಾ ಪರಿಂ ಆಪ್ಣಾಕ್ ಕೆದ್ನಾಂಯ್ ಭೊಗುಂಕ್ ನಾ. ಫಿಲ್ಮಾಚಾ ಚಿತ್ರೀಕರಣಾ ವೆಳಾರ್ ಆಶೆಂ ಕಾಂಯ್ ಜಾಲಾಂ ಜಾಲ್ಯಾರ್ ಸಾವಂತಾಕ್ ಖಂಡಿತ್ ಹಿ ಖಬಾರ್ ಆಸ್ತಿ. ಆಶೆಂ ಕಾಂಯ್ ಜಾಂಯ್ಕ್ ನಾ ಜಾಲ್ಯಾರ್ ಸತ್ ಕಿತೆಂ.....? ರಾಯನ್ ಚಿಂತಾಲೊ. ತಾಚ್ಯಾ ಮತಿಕ್ ಕಾಂಯ್ ಸಮ್ಜಾಲೆಂ ನಾ.
"ಬರೆಂ ರಾಯನ್!" ಆಪ್ಣೆಂ ಆನಿ ಹಾಂಗಾ ಬಸೊನ್ ವೇಳ್ ಪಾಡ್ ಕರುನ್ ಕಾಂಯ್ ಫಾಯ್ದೊ ನಾ ಮ್ಹಳ್ಳೆಂ ಕಳಿತ್ ಜಾಲ್ಲೊ ಪ್ರಸಾದ್ ಉಟೊನ್ ಉಭೊ ಜಾಲೊ. "ತುಂ ಹ್ಯಾ ಕೇಸಿಚಾ ವಿಶಯಾಂತ್ ಕಾಂಯ್ ಚಿಂತಿನಾಕಾ. ಏಕ್ ಪಾವ್ಟಿಂ ಹಿ ಕೇಸ್ ಕೊರ್ಟಾಂತ್ ಉಗ್ತಿ ಜಾಂವ್ದಿ. ಸಗ್ಳೆಂ ಅಪ್ಲೆಸ್ತಕಿಂ ತುಜ್ಯಾ ಮುಕಾರ್ ಯೆತೆಲೆಂ!" ರಾಮ್ ಪ್ರಸಾದ್ ವಚೊಂಕ್ ತಯಾರ್ ಜಾಲೊ.
ರಾಯನಾನ್ ಆಪ್ಲ್ಯಾ ಚಿಂತ್ನಾಂಕ್ ತಾತ್ಕಾಲಾಕ್ ಬಗ್ಲೆಕ್ ಲೊಟ್ಲಿಂ. ಪ್ರಸಾದಾಚಾ ಉತ್ರಾಂಕ್ ತಾಣೆಂ ತಕ್ಲಿ ಹಾಲಯ್ಲಿ. ತಾಚ್ಯಾ ವಿಶಿಂ ತೊ ಜಾಣಾಂ.
"ಹ್ಯಾ ಕೇಸಿಂತ್ ಮ್ಹಾಕಾ ಪೊರ್ವಾಂ ಏಕ್ ಸಾಕ್ಸ್ ಜಾಯ್ ರಾಯನ್! ಆತಾಂ ಹಾಂವ್ ತಾಕಾಚ್ ತಯಾರ್ ಕರುಂಕ್ ವೆತಾಂ! ತ್ಯಾ ಉಪ್ರಾಂತ್ ಮ್ಹಾಕಾ ಆಲಿಯಾಕ್ ಮೆಳೊಂಕ್ ಆಸಾ!" ಪ್ರಸಾದಾನ್ ಸಾಂಗ್ಲೆಂ.
"ಬರೆಂ!" ರಾಯನಾನ್ ತಕ್ಲಿ ಹಾಲಯ್ಲಿ.
ರಾಮ್ ಪ್ರಸಾದ್ ಆತಾಂ ಭಾಯ್ರ್ ಚಲ್ಲೊ.
"ಪ್ರಸಾದ್.....?" ಭಾಯ್ರ್ ಮೆಟಾಂ ಕಾಡ್ಚ್ಯಾ ಪ್ರಸಾದಾನ್ ರಾಯನಾಚಾ ಉಲ್ಯಾಕ್ ಆಯ್ಕೊನ್ ಪಾಟಿಂ ಘುಂವೊನ್ ಪಳೆಲೆಂ.
"ಐ ಡೋಂಟ್ ವಾಂಟ್ ಟು ಲೂಸ್ ದಿಸ್ ಕೇಸ್ ಫಾರ್ ಎನಿ ಮ್ಯಾಟರ್!"
"ಯ್ಯಾ...!" ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಲೊ ರಾಮ್ ಪ್ರಸಾದ್ ಭಾಯ್ರ್ ಚಲ್ಲೊ.
ರಾಯನ್ ಆತಾಂ ಪರ್ತ್ಯಾಕ್ ಚಿಂತುಂಕ್ ಪಡ್ಲೊ.
ಹ್ಯಾ ಕೇಸಿಂತ್ ಇಕ್ಬಾಲ್ ಫಸ್ಲೊ ಮ್ಹಣೊನ್ ರಾಯನ್ ಪಾತ್ಯೆಲ್ಲೊ. ಪುಣ್ ಆತಾಂ ಆಪ್ಲ್ಯಾ ಪಾತ್ಯೆಣಿಚೆರ್ ತಾಕಾಚ್ಚ್ ದುಬಾವ್ ಮಾರ್ಲೊ. ಹ್ಯಾ ದುಬಾವಾಚಾ ಕಾರಾಣಾಂಕ್ ಸೊಧುನ್ ರಾಯನ್ ಭೊಂವ್ಲೊ. ತೊ ತಸೊಚ್ಚ್ ಆಪ್ಲ್ಯಾ ಬಸ್ಕೆಕ್ ವೊಣ್ಕೊನ್ ತ್ಯಾ ದುಬಾವಾಕ್ ಕಾರಾಣಾಂ ಸೊಧ್ಚ್ಯಾ ಕಾಮಾಂತ್ ಮೆತೆರ್ ಜಾಲೊ. ತಶೆಂಚ್ ತೊ ಕಿತ್ಲೊ ವೇಳ್ ಚಿಂತುನ್ ಬಸ್ಲ್ಲೊ ತೆಂ ತಾಕಾಚ್ ಕಳ್ಳೆಂ ನಾ. ತಾಚ್ಯಾ ಮೆಜಾ ವಯ್ಲೆಂ ಇಂಟರ್ಕೋಮ್ ವ್ಹಾಜ್ತಾನಾಚ್ ತೊ ಚಿಂತ್ನಾಂಚಾ ಸಂಸಾರಾ ಥಾವ್ನ್ ಭಾಯ್ರ್ ಆಯ್ಲೊ.
"ಹಲೋ....!" ರಾಯನಾನ್ ರಿಸೀವರ್ ಉಕೊಲ್ಲೆಂ.
"ಸರ್! ತುಕಾ ಕಿಶೋರ್ ವಿಚಾರ್ತಾ!" ಸ್ಮಿತಾಚೊ ತಾಳೊ.
"ಕಿತೆಂ ಖಂಯ್......?" ಕಿಶೋರ್, ಆಪ್ಲೊ ಡ್ರೈವರ್, ಸಾಕಾಳಿಂ ಮಿಶೇಲಾಕ್ ಮಾರ್ಕೆಟಿಕ್ ಆಪವ್ನ್ ವರುನ್ ಗೆಲ್ಲೊ. ರಾಯನಾಕ್ ಉಡಾಸ್ ಆಯ್ಲೊ.
"ನೆಣಾಂ ಸರ್! ತೊ ಮಾರ್ಕೆಟಿಂತ್ ಆಸಾ ಖಂಯ್. ತುಜ್ಯಾ ಲಾಗಿಂ ಉಲಂವ್ಕ್ ಜಾಯ್ ಮ್ಹಣ್ತಾ!"
"ಓ.ಕೆ. ದೀ ತಾಕಾ!" ರಾಯನಾಕ್ ಆರ್ಡರ್ ಕೆಲೆಂ.
"ಸರ್!" ಕಿಶೋರಾಚೊ ತಾಳೊ.
"ಹಾಂ.....?" ರಾಯನ್ ಉಲಯ್ಲೊ.
"ಸರ್.... ಮ್ಯಾಡಮ್ ದಿಸಾನಾ ಸರ್!" ಕಿಶೋರಾಚೊ ತಾಳೊ ಕಾಂಪ್ತಾಲೊ.
"ವಾಟ್.....?" ರಾಯನ್ ಆಪ್ಲ್ಯಾ ಬಸ್ಕೆ ವಯ್ಲೊ ಉಟೊನ್ ಉಭೊ ಜಾಲೊ.
"ಪಳೆ! ತೆಣೆಂಚ್ ಖಂಯ್ ಆಸ್ತೆಲಿ ಮ್ಯಾಡಮ್!" ರಾಯನ್ ಘಾಬರ್ಲೊ.
"ಎದೊಳ್ ಹಾವೆಂ ಮಸ್ತ್ ಸೊಧ್ಲೆಂ ಸರ್! ಖಂಯ್ಚರ್ಯ್ ದಿಸಾನಾ!" ಕಿಶೋರಾಚಾ ತಾಳ್ಯಾಂತ್ ಭಿರಾಂತ್ ಸ್ಪಶ್ಟ್ ಆಸ್ಲ್ಲಿ.
"ಮ್ಯಾಡಮಿಚಾ ಲಾಗಿಂಚ್ ರಾವೊಂಕ್ ತುಕಾ ಹಾವೆಂ ಸಾಂಗ್ಲ್ಲೆಂ!"
"ಹಾಂವ್ ಹೊ ಸಾಮಾನ್ ಜಿಪಾರ್ ದವರುಂಕ್ ಆಯಿಲ್ಲೊಂ ಸರ್! ಪಾಟಿಂ ವೆತಾನಾ.....!" ಕಿಶೋರ್ ಮುಕಾರ್ ಉಲಯ್ಲೊ ನಾ.
"ಡ್ಯಾಮಿಟ್!" ರಾಯನ್ ರಾಗಾನ್ ಘರ್ಜಾಲೊ. "ತುಂ ಥಂಯ್ಚ್ ಸೊಧ್! ತೆಣೆಂಚ್ ಮ್ಯಾಡಮ್ ಆಸ್ತೆಲಿ! ಹಾಂವ್ ಯೆತಾಂ!" ರಾಯನಾನ್ ಪೋನ್ ಭಂಧ್ ಕೆಲೆಂ.
ರಿಸಿವರ್ ಪೊನಾರ್ ದವರುನ್ ತಾಣೆಂ ಮೆಜಾ ವಯ್ಲೆಂ ಆಪ್ಲೆಂ ಸೆಲ್ಪೋನ್ ಹಾತಿಂ ಘೆವ್ನ್ ಮಿಶೇಲಾಚಾ ಸೆಲ್ಪೋನಾಕ್ ಪೋನ್ ಘುಂವ್ಡಾಯ್ಲೆಂ.
"ಮೊಬಾಯ್ಲ್ ಹ್ಯಾಸ್ ಬೀನ್ ಸ್ವಿಚ್ಡ್ ಆಫ್!" ರಾಯನ್ ಸಂಪೂರ್ಣ್ ಭಿಯೆಲೊ.
"ಡಾರ್ಲಿಂಗ್ ವೇರ್ ಆರ್ ಯು..?" ತಶೆಂಚ್ ಆಪ್ಣಾ ತಿತ್ಲ್ಯಾಕ್ ಉದ್ಗಾರ್ಲ್ಲೊ ರಾಯನ್ ಪೋನಾಕ್ಚ್ ಪಳೆಂವ್ಚ್ಯಾರ್ ಪಡ್ಲೊ.
ತಾಣೆಂ ಪರ್ತ್ಯಾಕ್ ಪೋನ್ ಡಯಲ್ ಕೆಲೆಂ.
ಫಾಯ್ದೊ ನಾ!
ಮಿಶೇಲಾಚೆಂ ಪೋನ್ ಕಶೆಂ ಭಂಧ್ ಜಾಲಾಂ? ರಾಯನಾನ್ ಆಪ್ಲ್ಯಾ ಘರಾ ಪೋನ್ ಕೆಲೆಂ.
"ಶಮ್ಮಿ? ಮ್ಯಾಡಮ್ ಆಯ್ಲ್ಯಾ.....?"
"ನಾ ಸರ್!"
"ಮ್ಯಾಡಮಿನ್ ಪೋನ್ ವೆಲಾಂ.....?"
"ಕಳಿತ್ ನಾ ಸರ್! ಪುಣ್ ಮ್ಯಾಡಮಿನ್ ಆಪ್ಲೆಂ ಬ್ಯಾಗ್ ವೆಲಾಂ!"
"ವಯ್ರ್ ಬೆಡ್ರೂಮಾಂತ್ ವಚೊನ್ ಪಳವ್ನ್ ಯೇ! ವೆಗ್ಗಿಂ... !"
ಶಮ್ಮಿನ್ ಪೋನ್ ತಶೆಂಚ್ ದವರುನ್ ವಯ್ಲ್ಯಾ ಬೆಡ್ರೂಮಾ ತೆವ್ಶಿಂ ಧಾಂವ್ ಮಾರ್ಲಿ.
ಡ್ರೆಸ್ಸಿಂಗ್ ಟೇಬಲಾರ್ ಪೋನ್ ನಾತ್ಲ್ಲೆಂ. ತಾಣೆಂ ಖಾಟಿಯೆರ್ ಪಳೆಲೆಂ. ಹೆವ್ಶಿಂ ಪೊನಾಚೆಂ ಚಾರ್ಜಿಂಗ್ ಕೋರ್ಡ್ ವಿಣ್ಗೊ ಆಸ್ಲ್ಲೊ.
ತೆಂ ಸಾಲಾಕ್ ಧಾಂವೊನ್ ಆಯ್ಲೆಂ. ಸೊಫಾರ್ ಪಳೆಲೆಂ. ಕಿಚನಾಕ್ ಗೆಲೆಂ.
"ನಾ ಸರ್! ಹಾಂಗಾ ಖಂಯ್ಚರ್ಯ್ ಮ್ಯಾಡಮಿಚೆಂ ಪೋನ್ ದಿಸಾನಾ!" ಶಮ್ಮಿ ಖರ್ಶೆತಾಲೆಂ.
ರಾಯನಾನ್ ಆತಾಂ ವೇಳ್ ಕಾಡ್ಲೊ ನಾ. ವೆವೆಗ್ಗಿಂ ತೊ ಆಪ್ಲ್ಯಾ ಆಫೀಸಾ ಥಾವ್ನ್ ಭಾಯ್ರ್ ಪಡ್ಲೊ. ಜಿಪಾರ್ ಬಸೊನ್ ತಾಣೆಂ ಪರ್ತ್ಯಾಕ್ ಕಿಶೋರಾಕ್ ಪೋನ್ ಕೆಲೆಂ.
ನಾ! ಮಿಶೇಲಾಚಿ ಕಾಂಯ್ ಖಬಾರ್ ನಾ!
ಸಗ್ಳ್ಯಾ ಮಾರ್ಕೆಟಿಂತ್ ರಾಯನಾನ್ ಮಿಶೇಲಾಕ್ ಸೊಧ್ಲೆಂ. ಮಿಶೇಲ್ ಮೆಳ್ಳೆಂ ನಾ.
ಶೀತಲಾಕ್ ತಾಣೆಂ ಪೋನ್ ಕೆಲೆಂ. ಆಲಿಯಾಕ್ ವಿಚಾರ್ಲೆಂ. ಕಾಂಯ್ಚ್ ಫಾಯ್ದೊ ಜಾಲೊ ನಾ.
ಮಿಶೇಲ್ ಖಂಯ್ ಆಸಾ ಮ್ಹಳ್ಳೆಂ ಕೊಣಾಕ್ಚ್ ಕಳಿತ್ ನಾ.
ಅಚಾನಕ್ ಮಿಶೆಲ್ ಗೆಲೆಂ ಜಾಲ್ಯಾರ್ಯ್ ಖಂಯ್? ವಾಟ್ ಚುಕ್ಲಿ....? ವಾಟ್ ಚುಕ್ಲ್ಯಾರ್ ಮಿಶೇಲ್ ಕಾಂಯ್ ಲ್ಹಾನ್ ಭುರ್ಗೆಂ ನ್ಹಯ್! ತಾಚ್ಯೆ ಲಾಗಿಂ ಪೋನ್ ಆಸಾ. ತಾಕಾ ಪೋನ್ ಕರುನ್ ರಾಯನಾಕ್ ಆಪವ್ಯೆತೆಂ. ಆಶೆಂ ಕಾಂಯ್ ಜಾಲೆಂ ನಾ. ಎಕಾನ್ ಏಕ್ ಮಿಶೇಲ್ ಕೊಣಾಕ್ಚ್ ಖಬಾರ್ ನಾಸ್ತಾನಾ ಅಶೆಂ.....? ಹೆಂ ಕಶೆಂ ಸಾದ್ಯ್?
ರಾಯನ್ ಮಿಶೇಲಾಕ್ ಸೊಧುನ್ ಸೊಧುನ್ ದೆದೆಸ್ಪರ್ ಜಾಲೊ. ಘಡಿಯೆ ಘಡಿಯೆ ತಾಣೆಂ ಮಿಶೇಲಾಚಾ ಸೆಲ್ಪೋನಾಕ್ ಪೋನ್ ಕರುನ್ ಪಳೆಲೆಂ.
"ಮೊಬಾಯ್ಲ್ ಹ್ಯಾಸ್ ಬೀನ್ ಸ್ವಿಚ್ಡ್ ಆಫ್!" ತೆಂ ಪೋನ್ ಭಂಧ್ಚ್ ಆಸ್ಲ್ಲೆಂ.
ಸಾಂಜ್ ಜಾತಾನಾ ದುಸ್ರೊ ಕಾಂಯ್ ಉಪಾಯ್ ನಾತ್ಲ್ಲ್ಯಾ ರಾಯನಾನ್ ಪೊಲಿಸ್ ಕಂಪ್ಲೇಂಟ್ ದಿಲೆಂ.
ರಾಯನಾಚಾ ಭಳಾ ಮುಕಾರ್ ಪೊಲಿಸ್ ತುರ್ತಾನ್ ಕಾರ್ಯಾಕ್ ದೆಂವ್ಲೆ. ತಾಂಕಾ ಡ್ರೈವರಾ ವಯ್ರ್ ದುಬಾವ್ ಜಾಲೊ. ಕಿಶೋರಾಕ್ ಧರುನ್ ತಾಕಾ ಭಿತರ್ ಕುಡಾಯ್ಲೊ. ತಾಕಾ ಭೆಶ್ಟಾಯ್ಲೊ. ತಾಚ್ಯಾ ಪಾಂಯಾಂಕ್ ದೊರಿಯೆನ್ ಭಾಂದುನ್ ವಯ್ರ್ ಉಮ್ಕಾಳಾಯ್ಲೊ. ಡ್ರೈವರ್ ಸತ್ಚ್ ಸಾಂಗ್ತಾ ಮ್ಹಣೊನ್ ಪೊಲಿಸಾಂಕ್ ಕಳ್ಳೆಂ.
ಡ್ರೈವರಾನ್ ಸಾಂಗ್ಚ್ಯಾ ಪರ್ಮಾಣೆಂ ಸೂಪರ್ ಮಾರ್ಕೆಟಿಚಾ ಭಾಯ್ರ್ ಮಿಶೇಲ್ ಅಚಾನಕ್ ಮಾಯಾಗ್ ಜಾಲ್ಲೆಂ.
ರಾತ್ ಜಾತಾನಾ ಶೀತಲ್ ರಾಯನಾಚಾ ಘರಾ ಆಯ್ಲೆಂ. ರಾಯನ್ ಸಗ್ಳೊಚ್ ಭಿಯೆವ್ನ್ ಪಿಸಾಂತುರ್ ಜಾಲ್ಲೊ. ತಾಕಾ ತಾಚ್ಯಾ ದೊಳ್ಯಾಂ ಮುಕಾರ್ ತಾಚಿ ಆವಯ್ಚ್ ತ್ಯಾ ದೊರಿಯೆರ್ ಉಮ್ಕಾಳ್ಚಿ ದಿಸ್ಲಿ.
"ಮಿಶೆಲ್...?" ಕಾಳಿಜ್ ಮುಡ್ಡೊನ್ ತೊ ರಡ್ಲೊ.
ಸಭಾರ್ ಥೆಂಪಾ ಉಪ್ರಾಂತ್ ಆಜ್ ರಾಯನಾಚೆಂ ಘರ್ ಮರ್ಣಾಚಾ ಘರಾ ಪರಿಂ ಜಾಲ್ಲೆಂ. ಹ್ಯಾ ಘರಾಂತ್ ದೋನ್ ಮರ್ಣಾಂ ರಾಯನಾನ್ ಎದೊಳ್ಚ್ ಪಳೆಲ್ಲಿಂ. ತ್ಯಾ ಉಪ್ರಾಂತ್ ಆಜ್ ಪಯ್ಲ್ಯಾ ಪಾವ್ಟಿಂ ಹಿ ಭಯಾನಕ್ ರಾತ್ ರಾಯನಾಚಾ ಜಿವಿತಾಂತ್ ಉದೆಲ್ಲಿ.
ರಾತ್ ಖಾಬಾರ್ ಜಾವ್ನ್ ದೀಸ್ ಉದೆಲೊ! ಮಿಶೆಲಾಚಿ ಕಾಂಯ್ ಖಬಾರ್ ನಾ.
ರಾಯನಾನ್ ಜಾತಾ ತಿತ್ಲೆಂ ಆಪ್ಲ್ಯಾ ಪಯ್ಶ್ಯಾಂಚಾ ಭಳಾಕ್ ಪ್ರಸ್ತುತ್ ಕೆಲೆಂ. ಕ್ಯಾಬಿನೆಟ್ ಮಂತ್ರಿಂಕ್ ಪಾಸೊನ್ ತಾಚೆಂ ಪೋನ್ ಪಾವ್ಲೆಂ. ಪುಣ್ ಕಾಂಯ್ ಫಾಯ್ದೊ ಜಾಲೊ ನಾ.
ಸಗ್ಳ್ಯಾ ಮುಂಬಯಿ ಶ್ಹೆರಾಚಾ ಪೊಲಿಸಾಂಕ್ ಜಾಗ್ರುತ್ ಕೆಲೆಂ. ಟಿ.ವಿ. ಚೆರ್ ಮಿಶೇಲಾಚಿ ವರ್ಧಿ ವಾಚ್ಲಿ.
ಉದೆಲ್ಲೊ ದೀಸ್ ಬುಡೊನ್ ಆಯ್ಲೊ.
ಪಯ್ಲೆಂಚ್ ಠರಾಯಿಲ್ಲ್ಯಾ ಪರ್ಮಾಣೆಂ ತಾಚ್ಯಾ ಫಿಲ್ಮಾಚೆಂ ಪ್ರೀಮಿಯರ್ ಚಲ್ಲೆಂ. ಪ್ರೀಮಿಯರಾಕ್ ರಾಯನ್ ಗೆಲೊ ನಾ.
ಪ್ರೀಮಿಯರಾ ಉಪ್ರಾಂತ್ ಬಾಲಿವುಡಾಚಾ ಚಡಾವತ್ ಸಗ್ಳ್ಯಾ ಕಲಾಕಾರಾಂ ಥಾವ್ನ್ ರಾಯನಕ್ ಪೊನಾ ವಯ್ರ್ ಪೊನಾಂ ಆಯ್ಲಿಂ. ಹರ್ಯೆಕ್ಲೊ ರಾಯನಾಕ್ ಭುಜಾವಣೆಚಿಂ ಉತ್ರಾಂ ದಿತಾಲೊ ಶಿವಾಯ್ ಮಿಶೇಲಾಚಾ ಖಬ್ರೆಕ್ ಘೆವ್ನ್ ತಾಚೆಂ ಪೋನ್ ವಾಜ್ಲೆಂ ನಾ.
"ಕಾಂಯ್ ಮಿಶೇಲ್ ಗಾಂವಾಕ್ ಪುಣಿಂ ಗೆಲೆಂ.....?" ರಾಯನಾಚೊ ನಿಮಾಣೊ ದುಬಾವ್ ಉಟೊನ್ ರಾವ್ಲೊ. ಪುಣ್ ಆಪ್ಣಾಕ್ ಸಾಂಗಾನಾಸ್ತಾನಾ....?
ಹೊ ಚಿಂತುನ್ ಬಸ್ಚೊ ವೇಳ್ ನ್ಹಯ್! ರಾಯನಾನ್ ಮಂಗ್ಳುರಾಕ್ ಪೋನ್ ಘುಂವ್ಡಾಯ್ಲೆಂ.
ರಾಯನಾಚಾ ಪೋನಾ ಥಾವ್ನ್ ಆನಿ ತ್ಯಾ ತಾಚ್ಯಾ ಭಿಯೆಲ್ಲ್ಯಾ ತಾಳ್ಯಾಕ್ ಆಯ್ಕೊನ್ ಜೆರೊಮಾಕ್ ಆನಿ ಎಸ್ತೆಲಾಕ್ ಕಾಳ್ಜಾಕ್ ಧಖೊ ಬಸ್ಲೊ ಶಿವಾಯ್ ಮಿಶೆಲಾಚಿ ಖಬಾರ್ ಕೊಣಾಯ್ಕ್ಯ್ ಲಾಬ್ಲಿ ನಾ.
ದುಸ್ರ್ಯಾ ದಿಸಾಚಿ ರಾತ್ಯ್ ಭರಾನ್ ಪಾಶಾರ್ ಜಾಂವ್ಕ್ ಲಾಗ್ಲಿ.
ರಾಯನಾಚಾ ಘರಾ ಆಯಿಲ್ಲೆಂ ಶೀತಲ್ ಪಾಟಿಂ ಆಪ್ಲ್ಯಾ ಘರಾ ವಚೊಂಕ್ ನಾ. ತೆಂ ಮಿಶೇಲಾಚಾ ಘರಾಚ್ ರಾವ್ಲೆಂ. ಹ್ಯಾ ದೆದೆಸ್ಪರ್ ಜಾಲ್ಲ್ಯಾ ರಾಯನಾಕ್ ಸೊಡುನ್ ವಚೊಂಕ್ ತಾಕಾ ಮನ್ ಜಾಲೆಂ ನಾ.
ರಾಯನ್ ಆಪ್ಲ್ಯಾ ಬಾಯ್ಲೆಚೊ ಕಿತ್ಲೊ ಮೋಗ್ ಕರ್ತಾ ತೆಂ ಶೀತಲಾನ್ ಕಾಲ್ ಥಾವ್ನ್ ಖುದ್ದ್ ಆಪ್ಲ್ಯಾ ದೊಳ್ಯಾಂನಿ ಪಳೆಲ್ಲೆಂ. ಹರ್ಯೆಕಾ ಘಡಿಯೆಕ್ ರಾಯನ್ ಮಿಶೇಲಾಕ್ ಉದ್ಗಾರೊನ್ ಹುಸ್ಕಾರ್ತಾಲೊ. ಶೀತಲಾನ್ ತಾಕಾ ಆಪ್ಣಾ ಥಾವ್ನ್ ಜಾತಾ ತಿತ್ಲೆಂ ಸಮಾಧಾನ್ ಕರುಂಕ್ ಪಳೆಲೆಂ. ಪುಣ್ ಆಪ್ಣಾಚಾ ಸಮಾಧಾನೆಚ್ಯಾ ಉತ್ರಾಂನಿ ರಾಯನಾ ಥಂಯ್ ಕಾಂಯ್ ತರ್ಯ್ ಫರಕ್ ಪಡ್ತಾ ಮಳ್ಳ್ಯಾಚಿ ರುಜ್ವಾತ್ ಶೀತಲಾಕ್ ಝಳ್ಕಾಲಿ ನಾ.
ಕಾಲ್ ಸಾಕಾಳಿಂ ಮಿಶೆಲಾನ್ ಶೀತಲಾಕ್ ಪೋನ್ ಕರುನ್ ಜಿಮ್ಮಿಚಾ ವಿಶಿಂ ಉಲಯಿಲ್ಲೆಂ ಶೀತಲ್ ಜಾಣಾಂ. ತ್ಯಾ ವಗ್ತಾರ್ ಮಿಶೇಲ್ ಸಾರ್ಕೆಂ ಆಸ್ಲ್ಲೆಂ. ತಾಚ್ಯಾ ತಾಳ್ಯಾಂತ್ ಕಾಂಯ್ ಭಿರಾಂತೆಚಿ ನಿಶಾನಿ ನಾತ್ಲ್ಲಿ. ತ್ಯಾ ಉಪ್ರಾಂತ್ ಥೊಡ್ಯಾಚ್ ವೆಳಾನ್ ಹೆಂ ಘಡಿತ್ ಘಡೊನ್ ಗೆಲಾಂ. ತರ್ ಮಿಶೇಲ್ ಗೆಲೆಂ ಖಂಯ್?
ಕಾಂಯ್ ಆಲಿಯಾ.....? ಶೀತಲಾಚೊ ದುಬಾವ್ ಪಯ್ಲೊಚ್ ಆಲಿಯಾಚೆರ್ ಖಂಚ್ಲೊ.
ಆಪ್ಣಾಕ್ ಘೊವಾ ಥಾವ್ನ್ ವಿಂಗಡ್ ಕೆಲ್ಲ್ಯಾ ಪರಿಂ ಕಾಂಯ್ ರಾಯನಾಕ್ ತಾಚ್ಯಾ ಬಾಯ್ಲೆ ಥಾವ್ನ್ ವಿಂಗಡ್ ಕರ್ಚೆಂ ಹೆಂ ಪ್ರಯತ್ನ್ ಪುಣಿಂ ನ್ಹಯ್? ಶೀತಲಾಚಾ ಮತಿಂತ್ ದುಬಾವ್ ಉಟೊನ್ ಭಳ್ ಜಾತಾನಾ ತೆಂ ಕುಡಿ ಆತ್ಮ್ಯಾ ಸಮೇತ್ ಘಾಮೆಲೆಂ. ತಾಕಾ ಕಿತೆಂ ಕರ್ಚೆಂ ತೆಂ ಕಾಂಯ್ ಕಳ್ಳೆಂ ನಾ. ರಾಯನ್ ಹ್ಯಾ ವಗ್ತಾರ್ ಮಿಶೇಲಾಚಾ ಚಿಂತ್ನಾಂನಿ ಬೊಡೊನ್ ಕರ್ಗಾತಾಲೊ ಶಿವಾಯ್ ತೊ ಕಾಂಯ್ಚ್ ಚಿಂತ್ಚ್ಯಾ ಸ್ಥಿತೆರ್ ನಾತ್ಲ್ಲೊ.
ಕಿತೆಂ ಕೆಲ್ಯಾರ್ ಜಾಯ್ತ್....? ಶೀತಲ್ ಚಿಂತುಂಕ್ ಲಾಗ್ಲೆಂ.
ತಿತ್ಲ್ಯಾರ್! ಎಕಾಚ್ಚ್ ಫರಾ ತಾಚ್ಯಾ ಮತಿಕ್ ಉಜ್ವಾಡ್ ಫಾಂಕ್ಲ್ಲ್ಯಾ ಪರಿಂ ಜಾಲೆಂ.
ತಾಣೆಂ ರಾಯನಾಕ್ ಪಳೆಲೆಂ. ರಾಯನ್ ಸಾಲಾಂತ್ ಸೊಫಾರ್ ಬಸೊನ್ ಶೂನ್ಯ್ ದ್ರಶ್ಟೆನ್ ಮುಕ್ಲ್ಯಾ ದಾರಾಕ್ಚ್ ಪಳೆತಾಲೊ. ತ್ಯಾ ದಾರಾರ್ ತಾಕಾ ಮಿಶೆಲಾಚಿ ರಾಕೊಣ್ ಆಸ್ಲ್ಲಿ.
ಶಮ್ಮಿ ಭಿತರ್ ಕುಜ್ನಾಂತ್ ಆಸ್ಲ್ಲೆಂ.
ತಿತ್ಲೆಂಚ್!
ಶೀತಲಾನ್ ಆಪ್ಲೆಂ ಸೆಲ್ಪೋನ್ ಹಾತಿಂ ಘೆತ್ಲೆಂ. ವ್ಹಳೂ ತೆಂ ಭಿತರ್ಲ್ಯಾ ಬಾತ್ ರುಮಾ ತೆವ್ಶಿಂ ಚಮ್ಕಾಲೆಂ.
ಬಾತ್ರುಮಾಕ್ ಆಯಿಲ್ಲ್ಯಾ ಶೀತಲಾನ್ ಥೊಡೊ ವೇಳ್ ಪಾಶಾರ್ ಕರುನ್ ವಾಶ್ಬೇಸಿನಾಚೊ ಟ್ಯಾಪ್ ಉಗ್ತೊ ಕೆಲೊ. ತಾಚ್ಯಾ ಸವೆಂ,
ವೆವೆಗ್ಗಿಂ ತಾಣೆಂ ಆಪ್ಲ್ಯಾ ಪೊನಾರ್ ಏಕ್ ನಂಬರ್ ಡಯಲ್ ಕೆಲೆಂ.
"ಹಲೋ.....?" ತ್ಯಾ ಕುಶಿನ್ ಪೋನ್ ಉಕೊಲ್ಲೆಂ.
"ಹಾವೆಂ ಸಾಂಗ್ಲ್ಲೆಂ ಸಾರ್ಕೆಂ ಆಯ್ಕ್!" ಶೀತಲ್ ವ್ಹಳೂ ತಾಳ್ಯಾನ್ ಫುಡೆಂ ಉಲಂವ್ಕ್ ಲಾಗ್ಲೆಂ.
************
ಆಲಿಯಾ!
ಮಿಶೇಲ್ ಅಚಾನಕ್ ಮಾಯಾಗ್ ಜಾವ್ನ್ ತಾಚಿ ಕಾಂಯ್ ಖಬಾರ್ ನಾಸ್ತಾನಾ ಪಿಸಾಂತುರ್ ಜಾಲ್ಲ್ಯಾ ರಾಯನಾ ಬರಾಬರ್ ರಾವೊಂಕ್ ಖುಶಿ ವೆಲ್ಲ್ಯಾ ಆಲಿಯಾಕ್ ರಾಯನಾನ್ ಭಲಾತ್ಕಾರೆನ್ ಮ್ಹಳ್ಳ್ಯಾ ಪರಿಂ ತಾಚ್ಯಾ ಪ್ಲ್ಯಾಟಾಕ್ ಪಾಟಿಂ ದಾಡ್ಲೆಂ. ಶೀತಲಾಕ್ಯ್ ಹೆಂಚ್ ಜಾಯ್ ಆಸ್ಲ್ಲೆಂ. ಆಲಿಯಾ ರಾಯನಾಚಾ ಸಾಂಗಾತಾ ರಾಂವ್ಚೆಂ ಶೀತಲಾಕ್ ಪಸಂದ್ ನಾತ್ಲ್ಲೆಂ. ಆಲಿಯಾಕ್ ಪಳೆತಾನಾ ತೆಂ ಮಿಶೆಲಾಚಾ ಹ್ಯಾ ಘಡಿತಾ ಥಾವ್ನ್ ಸಂಪೂರ್ಣ್ ಪಯ್ಸ್ ಆಸಾ ಮ್ಹಣೊನ್ ಶೀತಲಾಕ್ ಭೊಗ್ತಾಲೆಂ ಜಾಲ್ಯಾರ್ಯ್ ತಾಚ್ಯಾ ಮತಿಚ್ಯಾ ಕೊನ್ಶ್ಯಾಂತ್ ಕಿತ್ಯಾಕ್ಗೀ ಆಲಿಯಾಚ್ ಹ್ಯಾ ಘಡಿತಾಕ್ ಕಾರಾಣ್ ಮ್ಹಳ್ಳೊ ದುಬಾವ್ ಯೆತಾಲೊ.
ಫಾಲ್ಯಾಂ ಕೋರ್ಟಾಂತ್ ಆಲಿಯಾಚ್ಯಾ ಹಲ್ಲ್ಯಾಚಾ ಕೇಸಿಚೆಂ ಪಯ್ಲೆಂ ಆಯ್ಕೊವ್ಣೆಂ!
ಆಲಿಯಾನ್ ಫಾಲ್ಯಾಂ ಮುಂಬಯಿ ಹೈ ಕೋರ್ಟಾಕ್ ಹಾಜರ್ ಜಾಂವ್ಕ್ ಆಸ್ಲ್ಲೆಂ.
ರಾಯನಾನ್ ಹ್ಯಾ ವಿಶಯಾಂತ್ ಕಾಂಯ್ಚ್ ಉರ್ಭಾ ದಾಖಯ್ಲಿ ನಾ. ತಾಣೆಂ ಸಗ್ಳೆಂ ರಾಮ್ ಪ್ರಸಾದಾಚಾ ಭರ್ವಸ್ಯಾರ್ ಸೊಡುನ್ ದಿಲೆಂ. ತಾಕಾ ಆತಾಂ ಫಕತ್ತ್ ತಾಚೆಂ ಮಿಶೇಲ್ ತಾಕಾ ಪಾಟಿಂ ಜಾಯ್ ಆಸ್ಲ್ಲೆ.
ಆಲಿಯಾಕ್ ರಾಮ್ ಪ್ರಸಾದ್ ಮೆಳೊಂಕ್ ಆಯ್ಲೊ. ಫಾಲ್ಯಾಂ ಕೊರ್ಟಾಂತ್ ಕಶೆಂ ಚಲ್ತೆಲೆಂ ಮ್ಹಳ್ಳ್ಯಾವಿಶಿಂ ತಾಣೆಂ ಆಲಿಯಾಕ್ ವಿವರುನ್ ಜಾಗ್ರುತ್ಕಾಯ್ ದಿಲಿ. ಕಸಲ್ಯಾ ವಿಶಯಾಂತ್ ಚಡ್ ಧ್ಯಾನ್ ದಿಂವ್ಕ್ ಜಾಯ್, ಕಸಲ್ಯಾ ವಿಶಯಾಂಕ್ ಕೊರ್ಟಾಂತ್ ಉಗ್ಡಾಪೆಂ ಕರುಂಕ್ ಜಾಯ್, ಕಸಲ್ಯಾ ವಿಶಯಾಂಕ್ ಧಾಂಪುನ್ ದವರುಂಕ್ ಜಾಯ್, ಪ್ರಸಾದಾನ್ ಆಲಿಯಾಕ್ ಸಗ್ಳಿ ಜಾಣ್ವಾಯ್ ದಿಲಿ.
ಆಲಿಯಾಚಾ ಹಾಲ್ಲ್ಯಾಚಿ ಮುಖ್ಯ್ ಸಾಕ್ಸ್ ಜಾಲ್ಲೊ ರಾಯನ್ ಫಾಲ್ಯಾಂ ಕೊರ್ಟಾಂತ್ ಪ್ರಸ್ತುತ್ ಜಾಂವ್ಚೊ ನಾ. ಚಿಂತ್ಲ್ಲ್ಯಾ ಪ್ರಸಾದಾನ್ ಸಾಂವಂತಾಚಾ ಸಾಕ್ಶೆಕ್ ತಯಾರ್ ಕೆಲೆಂ.
ಆಲಿಯಾಚಿ ನಿಮಾಣಿ ಜೀಕ್!
ಫಾಲ್ಯಾಂ ಆಲಿಯಾನ್ ತಾಚ್ಯಾ ನಿಮಾಣ್ಯಾ ಜಯ್ತಾಚ್ಯಾ ಪಯ್ಲ್ಯಾ ಪಾಂವ್ಡ್ಯಾರ್ ಚಡೊಂಕ್ ಆಸ್ಲ್ಲೆಂ. ಹ್ಯಾ ತಾಚ್ಯಾ ಝುಜಾಂತ್ ಹ್ಯಾ ವಗ್ತಾರ್ ತಾಕಾ ಆಪ್ಲ್ಯಾ ಜಯ್ತಾ ಶಿವಾಯ್ ದುಸ್ರೆಂ ಕಾಂಯ್ಚ್ ದಿಸ್ಲೆಂ ನಾ. ನಾ ರಾಯನ್ ನಾ ಮಿಶೇಲ್! ಆಲಿಯಾ ಫಕತ್ತ್ ಆಪ್ಲ್ಯಾ ಜಯ್ತಾಕ್ ಮಾತ್ರ್ ಆಶೆಲೆಂ!
ಫಾಲ್ಯಾಂ ಆಪ್ಣೆ ಝುಜೊಂಕ್ ವೆಚ್ಯಾ ಝುಜಾಕ್ ಚಿಂತಾ ಚಿಂತಾನಾ ಆಲಿಯಾಕ್ ಆಯ್ಚೊ ವೇಳ್ ಕಿತ್ಯಾಕ್ಗೀ ಭರಾನ್ ಧಾಂವ್ತಾ ಮ್ಹಳ್ಳ್ಯಾ ಪರಿಂ ದಿಸ್ಲೆಂ. ಹೊ ವೇಳ್ಯ್ ವಿಚಿತ್ರ್! ಜೆದ್ನಾಂ ಮನಿಸ್ ವೆಳಾಕ್ ಆಪ್ಣಾ ಸಾಂಗಾತಾ ಆಶೆತಾ ತೆದ್ನಾಂ ತೊ ವೇಳ್ ಮನ್ಶ್ಯಾಕ್ ಸಾಂಗಾತ್ ದೀನಾಸ್ತಾನಾ ವೆಗ್ಗಿಂ ಧಾಂವ್ತಾ! ಜೆದ್ನಾಂ ಮನಿಸ್ ವೆಳಾಕ್ ಆಪ್ಣಾ ಸಾಂಗಾತಾ ಆಶೆನಾ ತೆದ್ನಾಂ ತೊ ವೇಳ್ ಮನ್ಶ್ಯಾಕ್ ಚಡ್ ಆನಿ ಚಡ್ ಸಾಂಗಾತ್ ದೀವ್ನ್ ತಾಕಾ ತೊ ಚಿಡ್ಕೊನ್ ರಾವ್ತಾ!
ಆಜ್ಯ್ ಆಶೆಂಚ್!
ಫಾಲ್ಯಾಂಚಾ ವೆಳಾಕ್ ವೆಗ್ಗಿಂ ಆಶೆಂವ್ಚ್ಯಾ ಆಲಿಯಾಕ್ ಹೊ ಆಯ್ಚೊ ವೇಳ್ ತಾಕಾ ಸೊಡುನ್ ವಚೊಂಕ್ ಕಬೂಲ್ ನಾ ಮ್ಹಳ್ಳ್ಯಾ ಪರಿಂ ಚಿಡ್ಕೊನ್ ರಾವ್ಲ್ಲೊ.
ಪ್ಲ್ಯಾಟಾ ಭಿತರ್ ಮತಿಕ್ ಸಮಾಧಾನ್ ನಾ ಜಾತಾನಾ ಆಲಿಯಾ ಆಪ್ಣೆಂ ಬಸ್ಲೆಲ್ಯಾ ಸೊಫಾರ್ ಥಾವ್ನ್ ಉಟೊನ್ ತಾಚ್ಯಾ ಬಾಲ್ಕನಿಕ್ ಆಯ್ಲೆಂ.
ತಶೆಂಚ್ ಬಾಲ್ಕನಿಂತ್ ಉಭೆಂ ರಾವೊನ್ ತಾಣೆಂ ಭಾಯ್ಲ್ಯಾ ಕಾಳೊಕಾಂತ್ ವಯ್ಲ್ಯಾ ಮೊಳಾಬಾಕ್ ಪಳೆಲೆಂ.
ತ್ಯಾ ಮೊಳಾಬಾರ್, ತ್ಯಾ ಸ್ವತಂತ್ರ್ ಸುಕ್ಣ್ಯಾ ಪರಿಂ ಸ್ವತಂತ್ರ್ ಜಾವ್ನ್ ಆಲಿಯಾ ಉಭೊಂಕ್ ಆಶೆಲ್ಲೆಂ. ತಾಚ್ಯಾ ಆಶೆ ಪರಿಂಚ್ ಆಲಿಯಾ ಆಜ್ ತ್ಯಾ ಮೊಳಾಬಾರ್ ಪಾವ್ಲ್ಲೆಂ ಜಾಲ್ಯಾರ್ಯ್ ತಿ ತಾಣೆಂ ಹ್ಯಾ ಮೊಳಾಬಾರ್ ಪಾವ್ಲ್ಲಿ ರೀತ್ ಮಾತ್ರ್ ತಾಣೆಂ ಆಶೆಲ್ಲಿ ರೀತ್ ನ್ಹಯ್!
ಹ್ಯಾ ರಾತಿಚ್ಯಾ ಗಂಭೀರ್ ಮೌನ್ಪಣಾಂತ್ ಆಲಿಯಾಕ್ ಸಗ್ಳೆಂ ತಾಚೆಂ ಜಿವಿತ್ ಉಡಾಸ್ ಆಯ್ಲೆಂ. ತಾಚ್ಯಾ ಭುರ್ಗ್ಯಾ ಪಣಾರ್ ಥಾವ್ನ್ ಆತಾಂಚಾ ಹ್ಯಾ ತಾಚ್ಯಾ ತರ್ನಾಟ್ಪಣಾ ಪಾಸೊನ್ ತಾಕಾ ತಾಚೆಂ ತಾಣೆಂ ಸಾರ್ಲೆಲೆಂ ಜಿವಿತ್ ಉಡಾಸ್ ಆಯ್ಲೆಂ. ತಾಣೆಂ ಪಳೆಲ್ಲಿಂ ತಿಂ ದ್ರಶ್ಯಾಂ, ತಾಚಿಂ ತಿ ಸಪ್ಣಾಂ, ತಿಂ ಘಡ್ಲ್ಲಿಂ ಘಡಿತಾಂ, ಜಿವಿತಾಂತ್ಲಿಂ ಖರ್ಗಾಂ, ಸಗ್ಳೆಂ ತಾಚೆಂ ಜಿವಿತ್ ಎಕಾ ಪಾಟ್ಲ್ಯಾನ್ ಏಕ್ ತಾಚ್ಯಾ ಉಡಾಸಾಕ್ ಆಯ್ಲೆಂ.
ತಾಚಿ ಆಜಿ, ತಾಚೊ ಬಾಪಯ್, ತಾಚಿ ಆವಯ್, ತಾಚಿಂ ಭಾಂವ್ಡಾಂ, ನಾಸಿರ್, ಅಮೀನಾ, ಸಮೀರ್, ಜಾವೇದ್, ಸಗ್ಳಿಂ ತಾಚ್ಯಾ ಉಡಾಸಾಂತ್ ಉದೆವ್ನ್ ಆಯ್ಲಿಂ. ಹ್ಯಾ ಸಂಭಂಧಂತ್ಲ್ಯಾ ಉಡಾಸಾ ಭಾಯ್ರ್ಯ್ ನಮಿತಾ, ಅಭಿಲಾಶ, ನವನೀತ, ವಿಶು ಕುಮಾರ್, ಕ್ಯಾಪ್ಟನ್ ರಾಣಾ, ಮನೋಜ್ ಕುಮಾರ್, ಸಗ್ಳಿಂ ಎಕಾ ಪಾಟ್ಲ್ಯಾನ್ ಎಕ್ಲಿಂ ತಾಚ್ಯಾ ದೊಳ್ಯಾಂ ಮುಕಾರ್ ಉದೆವ್ನ್ ಮಾಯಾಗ್ ಜಾಲಿಂ.
ಆಲಿಯಾಕ್ ತ್ಯಾ ಮೊಳಾಬಾರ್ ಪಾವಯಿಲ್ಲ್ಯಾ ತ್ಯಾಚ್ಯಾ ಪಯ್ಲ್ಯಾ ಫಿಲ್ಮಾಚೆಂ ಪ್ರೀಮಿಯರ್ ಬರೆಂಚ್ ಚಲ್ಲ್ಲೆಂ. ಫಿಲ್ಮ್ ಖಂಡಿತ್ ಚಲ್ತೆಲೆಂ! ಸಭಾರಾಂಚೊ ಭರ್ವಸೊ ಆಸ್ಲ್ಲೊ. ಆಲಿಯಾ ತಾಣೆಂಚ್ ಚಿಂತಿನಾಸ್ತಾನಾ ಆಜ್ ಬಾಲಿವುಡಾಂತ್ಲೆಂ ನೆಕೆತ್ರ್ ಜಾಲ್ಲೆಂ!
ಪ್ರಿಮಿಯರಾ ಥಾವ್ನ್ ಪ್ಲ್ಯಾಟಾಕ್ ಆಯಿಲ್ಲ್ಯಾ ಆಲಿಯಾಕ್ ನೀದ್ ಮ್ಹಳ್ಳಿ ತಿ ತಾಚ್ಯಾ ದೊಳ್ಯಾಂ ಲಾಗ್ಶಿಲ್ಯಾನ್ ಪಾಸೊನ್ ಧಾಂವ್ಲಿ ನಾ. ತೆಂ ಫಾಲ್ಯಾಂಚೆಂ ಚಿಂತಾಲೆಂ.
ಆಲಿಯಾಚಾ ಹಲ್ಲ್ಯಾಚಿ ಕೇಸ್ ಕೊರ್ಟಾಂತ್ ಉಗ್ತಿ ಜಾಂವ್ಚ್ಯಾ ಪಯ್ಲೆಂ ರಾಯನಾಕ್ ತಚ್ಯಾ ಫಿಲ್ಮಾಕ್ ಪರ್ದ್ಯಾರ್ ದೆಂವೊಂಕ್ ಜಾಯ್ ಆಸ್ಲ್ಲೆಂ. ಹ್ಯಾಚ್ ಖಾತಿರ್ ತಾಣೆಂ ತಾಚ್ಯಾ ಫಿಲ್ಮಾಚೆಂ ಪ್ರೀಮಿಯರ್ ನೆಮಿಯಾರ್ಲ್ಲೆಂ. ಪುಣ್ ಹ್ಯಾ ಮಧೆಂ ಮಿಶೇಲಾಚಾ ಅವ್ಚಿತ್ತ್ ಮಾಯಾಗ್ಪಣಾನ್ ರಾಯನಾಚಾ ಪ್ಲ್ಯಾನಾಕ್ ಕಾತರ್ ಪಡ್ಲ್ಲಿ. ಪುಣ್ ಆಲಿಯಾ....?
ಫಾಲ್ಯಾಂಚಾ ಪತ್ರಾಂನಿ, ಆಲಿಯಾ ಆಪ್ಣಾಚಿ ತಸ್ವೀರ್ ಪಳೆಂವ್ಕ್ ಆಶೆಲೆಂ. ಎಕಾಚ್ಚ್ ವಾಟೆನ್ ಆಪುಣ್ ಚಲ್ತಾಂ ಚಲ್ತಾಂ ಆಪ್ಣಾಚೆಂ ತ್ಯಾ ಮೊಳಾಬಾರ್ ಉಭ್ಚೆಂ ಸಪಾಣ್ ಆನಿ ತೆಂ ಜಿವಿತಾಚೆಂ ಝುಜೊನ್ ಆಯಿಲ್ಲೆಂ ಝುಜ್ ಆಪ್ಣಾಕ್ ಸಾಂಗಾತ್ ದೀವ್ನ್ ಚಲೊಂಕ್ ಲಾಗ್ಲ್ಲೆಂ. ಹ್ಯಾ ಉಪ್ರಾಂತ್ಯ್ ಹಿ ವಾಟ್ ಆಪ್ಣಾಕ್ಚ್ ಸಾಂಗಾತ್ ದಿತೆಲಿ. ಆಪುಣ್ ಆಪ್ಲ್ಯಾ ಜಯ್ತಾ ತೆವ್ಶಿಂ ಪಾವೊನ್ ಆಸಾಂ. ಆಲಿಯಾ ಚಿಂತಾಲೆಂ.
ತಿತ್ಲ್ಯಾರ್!
ಆಲಿಯಾಚೆಂ ಪೋನ್ ವಾಜ್ಲ್ಲೊ ಆವಾಜ್ ಆಯ್ಕಾಲೊ ತಾಕಾ.
ವ್ಹಯ್! ಆಲಿಯಾಚೆಂ ಸದಾಂ ವಾಜ್ಚೆಂ ಪೋನ್ ನ್ಹಯ್! ಥೊಡ್ಯಾಚ್ ದಿಸಾಂ ಪಯ್ಲೆಂ ತಾಣೆಂ ಘೆತ್ಲಲೆಂ ನವೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ಲ್ಲೆಂ.
ಪ್ಲ್ಯಾಟಾಚಾ ಬಾಲ್ಕನಿರ್ ಆಸ್ಲ್ಲೆಂ ಆಲಿಯಾ ಭಿತರ್ ಚಮ್ಕಾಲೆಂ.
ಆಲಿಯಾಕ್ ಹ್ಯಾ ಪೋನಾಚಿ ಕಾಲ್ ಥಾವ್ನ್ ರಾಕೊಣ್ ಆಸ್ಲ್ಲಿ.
ಭಿತರ್ ಆಯಿಲ್ಲ್ಯಾ ಆಲಿಯಾನ್ ತೆಂ ಪೋನ್ ಹಾತಿಂ ಘೆತ್ಲೆಂ.
"ಹಲೋ....." ಆಲಿಯಾ ಉಲಯ್ಲೆಂ. ತೆಂ ಜಾಣಾಂ ತ್ಯಾ ಕುಶಿನ್ ಕೋಣ್ ಆಸಾ ತೆಂ.
"ಫಾಲ್ಯಾಂ ಕಿತೆಂ ಕರ್ತಾಯ್ ಆಲಿಯಾ.....?" ಆಲಿಯಾನ್ ಚಿಂತ್ಲ್ಲೆಂಚ್ ಸವಾಲ್.
"ಫಾಲ್ಯಾಂಚೆಂ ಸೊಡ್ ಇಕ್ಬಾಲ್! ತುಂ ಆತಾಂಚೆಂ ಉಲಯ್! ಮಿಶೇಲ್ ಖಂಯ್ ಆಸಾ.....?" ಆಲಿಯಾ ಮುಖ್ಯ್ ವಿಶಯಾರ್ ಆಯ್ಲೆಂ.
"ಮಿಶೇಲ್.....?" ತ್ಯಾ ಕುಶಿನ್ ಇಕ್ಬಾಲಾಚೊ ಹಾಸೊ.
"ತುಂ ಕಿತೆಂ ಹಾಂವ್ ಬೇಕೂಫ್ ಮ್ಹಣೊನ್ ಸಮ್ಜಾತಾಯ್...?" ಇಕ್ಬಾಲಾಚಾ ತಾಳ್ಯಾಂತ್ ಎಕಾಚ್ಚ್ ಫರಾ ಬದ್ಲಾವಣ್ ಜಾಲಿ.
"ಮ್ಹಳ್ಯಾರ್....?" ಆಲಿಯಾಕ್ ಇಕ್ಬಾಲಾ ವಯ್ರ್ ದುಬಾವ್ ಜಾಲೊ.
"ಫಾಲ್ಯಾಂ ಕೊರ್ಟಾಂತ್ ತುವೆಂ ತುಜೊ ಮ್ಹಜ್ಯಾ ವಯ್ಲ್ಯಾ ಆಫ್ರಾಧಾಚೊ ಉಚಾರ್ ಫಟ್ಕಿರೊ ಮ್ಹಣೊನ್ ಸಾಂಗೊನ್ ಹಾಂವ್ ನಿರಫ್ರಾಧಿ ಜಾವ್ನ್ ಮ್ಹಜ್ಯಾ ಮಾನ್ ಆನಿ ಮರ್ಯಾದೆ ಸವೆಂ ಹಾಂವ್ ಭಾಯ್ರ್ ಆಯ್ಲ್ಯಾ ಉಪ್ರಾಂತ್ ಮಾತ್ರ್ ತುಕಾ ತುಜೆಂ ಮಿಶೇಲ್ ಮೆಳ್ತೆಲೆಂ. ಹಾಂ.....! ತುವೆಂ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ. ಮಿಶೇಲ್ ಹ್ಯಾ ಸಂಸಾರಾ ಮುಕಾರ್ ತುಕಾ ಜಿವಂತ್ ಮೆಳ್ಚೆಂ ನಾ!" ಇಕ್ಬಾಲ್ ಉಲಯ್ಲೊ.
"ಇಕ್ಬಾಲ್.....?" ಆಲಿಯಾ ಘರ್ಜಾಲೆಂ.
"ಸವ್ಕಾಸ್.....! ಸವ್ಕಾಸ್! ತುವೆಂ ಆತಾಂ ಬೋಬ್ ಮಾರುನ್ ಕಾಂಯ್ ಫಾಯ್ದೊ ನಾ! ತುವೆಂ ಸಾಂಗ್ಲೆಲ್ಯಾ ಪರಿಂಚ್ ಮಿಶೇಲಾಕ್ ಹಾವೆಂ ಕಿಡ್ನಾಪ್ ಕೆಲಾಂ!" ಇಕ್ಬಾಲ್ ತ್ಯಾ ಕುಶಿನ್ ವಿಲಕ್ಶಣ್ ತಾಳ್ಯಾನ್ ಉಲಯ್ತಾಲೊ.
"ಮಿಶೇಲಾಕ್ ಕಾಂಯ್ ವಾಯ್ಟ್ ಜಾಂವ್ಕ್ ನುಜೊ ಇಕ್ಬಾಲ್. ತೆಂ ಮ್ಹಾಕಾ ಆಸಾ ತಶೆಂ ಜಿವಂತ್ ಜಾಯ್! ತಾಕಾ ಜರ್ ತುವೆಂ ಕಿತೆಂಯ್ ಕೆಲೆಂಯ್ ಜಾಲ್ಯಾರ್...?" ಆಲಿಯಾಚಾ ಉತ್ರಾಂನಿ ರಾಗ್ ಉಮಾಳ್ತಾಲೊ.
"ಎಕಾ ಹಾತಾನ್ ತುಂ ಮಿಶೇಲಾಚ್ಯಾ ಮೊಡ್ಯಾಕ್ ಘೆ. ದುಸ್ರ್ಯಾ ಹಾತಾನ್ ಮ್ಹಜ್ಯಾ ಹಾತಾಚಾ ಖೊಡ್ಯಾಕ್ ನಿಕ್ಳಾಯ್!" ತ್ಯಾ ಕುಶಿನ್ ಇಕ್ಬಾಲ್ ಚಡ್ಚ್ ಚುರುಕ್ ಆಸ್ಲ್ಲೊ.
"ತುಂ ಆತಾಂ ಮ್ಹಾಕಾಚ್ ಬ್ಲ್ಯಾಕ್ಮೇಯ್ಲ್ ಕರ್ತಾಯ್......?" ಆಲಿಯಾಚೊ ದುಬಾವ್ ಖರೊ ಜಾಲೊ.
"ಹೆಂ ಮ್ಹಾಕಾ ತುವೆಂಚ್ ಶಿಕಯ್ಲಾಂಯ್ ಆಲಿಯಾ!" ಇಕ್ಬಾಲ್ ಪರ್ತ್ಯಾಕ್ ಹಾಸ್ಲೊ.
"ತುಂ ಜಾಣಾಂಯ್ ಇಕ್ಬಾಲ್.....? ಗುರು ತಾಚ್ಯಾ ಶಿಷ್ಯಾಕ್ ಕಿತ್ಲೆಂ ಶಿಕಯ್ಲ್ಯಾರ್ಯೀ ಥೊಡ್ಯೊ ಸಂಗ್ತ್ಯೊ ಶಿಕಂವ್ಕ್ ವಿಸ್ರಾತಾ!" ಆಲಿಯಾಚಾ ತಾಳ್ಯಾಂತ್ ದ್ರಡ್ ಜಾಗ್ವಣ್ ಆಸ್ಲ್ಲಿ.
"ಮಿಶೇಲ್ ಆತಾಂ ಮ್ಹಜ್ಯಾ ಹಾತಾಂತ್ ಆಸಾ ಆಲಿಯಾ! ತುಂ ಜರ್ ಫಾಲ್ಯಾಂ ಕೊರ್ಟಾಂತ್ ತುಜ್ಯಾ ವಯ್ಲೊ ಮಜ್ಯಾ ಆಪ್ರಾಧಾಚೊ ಉಚಾರ್ ತುವೆಂ ಬದ್ಲಿಲೊಯ್ ಜಾಲ್ಯಾರ್ ಮುಕ್ಲೆಂ ಸಗ್ಳೆಂ ತುವೆಂ ಚಿಂತ್ಲೆಲ್ಯಾ ಪರಿಂಚ್ ಜಾತೆಲೆಂ. ತುಂ ಆಶೆಂ ಕರಿನಾಂಯ್ ಜಾಲ್ಯಾರ್ ಮಿಶೆಲಾಕ್ ಹಾಂವ್ ಕೊರ್ಟಾಂತ್ ಹಾಜರ್ ಕರುಂಕ್ಯ್ ಸಕ್ತಾಂ!" ಇಕ್ಬಾಲಾಚಾ ತಾಳ್ಯಾಂತ್ ಆತಾಂ ಜಾಗ್ವಣೆ ಸವೆಂ ಧಮ್ಕಿ ಆನಿ ತಾಕಿದ್ ಆಸ್ಲ್ಲಿ.
"ತುಂ ಜಾಣಾಂಯ್......, ಹಾಂವೆಂ ಕಿತೆಂ ಚಿಂತ್ಲಾಂ ತೆಂ......?" ಆಲಿಯಾನ್ ಧಯ್ರಾನ್ ಇಕ್ಬಾಲಾಕ್ ವಿಚಾರ್ಲೆಂ.
"ತುವೆಂ ಆತಾಂ ಕಿತೆಂಯ್ ಚಿಂತ್ಚ್ಯಾ ಪಯ್ಲೆಂ ಮಿಶೆಲ್ ಮ್ಹಜ್ಯಾ ಹಾತಿಂತ್ ಆಸಾ ಮ್ಹಳ್ಳೆಂ ಪಯ್ಲೆಂ ಉಡಾಸ್ ದವರುನ್ ಚಿಂತುಂಕ್ ಜಾಯ್ ಆಲಿಯಾ!" ಇಕ್ಬಾಲಾಕ್ ಆಪ್ಲ್ಯಾ ಜಯ್ತಾಚೊ ಆನ್ಭೋಗ್ ಜಾಲ್ಲೊ.
ಇಕ್ಬಾಲಾಚಾ ಉತ್ರಾಂಕ್ ಆಯ್ಕೊನ್ ಆಲಿಯಾ ಕಾಂಯ್ಚ್ ಉಲಯ್ಲೆಂ ನಾ. ಸವ್ಕಾಸ್ ತಾಣೆಂ ಕಾನಾಕ್ ಲಾಯ್ಲೆಲ್ಯಾ ಪೊನಾಕ್ ಸಕಯ್ಲ್ ಗಳವ್ನ್ ತೆಂ ಪೋನ್ ಭಂಧ್ ಕೆಲೆಂ.
"ಮಿಶೇಲ್......! ಸ್ವೀಟ್ ಹಾರ್ಟ್! ಐ ಯಾಮ್ ಸಾರ್ರಿ ಡಾರ್ಲಿಂಗ್!"
ಮತಿಂತ್ಚ್ ಉಲಯಿಲ್ಲೆಂ ಆಲಿಯಾ ಸವ್ಕಾಸ್ ಹಾಸ್ಲೆಂ. ಹ್ಯೊ ತಾಚ್ಯಾ ಜಯ್ತಾಚೊ ಹಾಸೊ.
***********
ಮಂಗ್ಳುರ್!
ಜೆರೊಮ್ ದೆ’ಕೋಸ್ತಾಚೆಂ ಘರ್!
ಸಾಲಾಂತ್ಲ್ಯಾ ಸೊಫಾಚೆರ್ ಬಸ್ಲೆಲ್ಯಾ ಜೆರೊಮಾಕ್ ಸುಶೆಗ್ ನಾತ್ಲ್ಲೊ. ಬಸ್ಲೆಲ್ಯಾ ಕಡೆನ್ ಬಸೊಂಕ್ ಜಾಯ್ನಾಸ್ತಾನಾ ತೊ ಹುಳ್ವುಳ್ತಾಲೊ.
ಮುಂಬಯಿ ಥಾವ್ನ್ ರಾಯನಾಚೆಂ ಪೋನ್ ಆಯ್ಲ್ಯಾ ಉಪ್ರಾಂತ್ ಜೆರೊಮ್ ಸಂಸಾರಾಕ್ಚ್ ವಿಸ್ರಾಲ್ಲೊ. ತಾಕಾ ಫಕತ್ತ್ ತಾಚೆಂ ಮಿಶೇಲ್ ಮಾತ್ರ್ ತಾಚ್ಯಾ ದೊಳ್ಯಾಂ ಮುಕಾರ್ ದಿಸೊನ್ ಯೆತಾಲೆಂ.
ಮಿಶೇಲಾಚಿ ಖಂತ್ ಭಳ್ ಜಾವ್ನ್ ಸೊಫಾ ವಯ್ರ್ ಬಸೊಂಕ್ ಜಾಯ್ನಾಸ್ತಾನಾ ಜೆರೊಮ್ ಉಟೊನ್ ಉಭೊ ಜಾಲೊ.
"ಮಿಶೇಲ್ ಖಂಯ್ ಗೆಲಾಂ ಜಾವ್ಯೆತ್....? ಆಶೆಂ ಅಚಾನಕ್ ಚೆಡುಂ ಮಾಯಾಗ್ ಜಾಲಾಂ ಮ್ಹಳ್ಯಾರ್.....! ತಾಕಾ ಕಿತೆಂ ಜಾಲಾಂ ಆಸ್ತೆಲೆಂ?" ಜೆರೊಮಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ. ತಾಚ್ಯಾ ಮತಿಂತ್ಲ್ಯಾ ಸವಾಲಾಕ್ ಜಾಪ್ ದೀಂವ್ಕ್ ತೊ ಸಲ್ವಾಲೊ.
ರಾಯನಾಚೆಂ ಪೋನ್ ಆಯ್ಲ್ಯಾ ಉಪ್ರಾಂತ್ ಆಪ್ಲ್ಯಾ ಘೊವಾಚೆ ಜಾಂವ್ಚೆಂ ಆಟೆವಿಟೆ ಎಸ್ತೆಲಾಕ್ ಪಳಂವ್ಕ್ ಜಾಯ್ನಾತ್ಲ್ಲೆ. ಮಿಶೇಲ್ ಮ್ಹಳ್ಯಾರ್ ಜೆರೊಮಾಚೊ ಜೀವ್. ತೊ ಆಪ್ಲ್ಯಾ ಭುರ್ಗ್ಯಾಂಕ್ ಪಾಸೊನ್ ವಿಸ್ರಾತಾಲೊ ಪುಣ್ ಆಪ್ಲ್ಯಾ ನಾತಿಕ್ ವಿಸ್ರಾನಾತ್ಲ್ಲೊ. ಜೆರೊಮಾನ್ ಆಪ್ಲ್ಯಾ ಜಿವಿತಾಚಿಂ ಇತ್ಲಿಂ ವರ್ಸಾಂ ಕಾಡ್ಲ್ಯಾಂತ್ ಜಾಲ್ಯಾರ್ ತಾಕಾ ಮಿಶೇಲ್ಚ್ ಕಾರಾಣ್. ಮಿಶೇಲ್ ಜೆರೊಮಾಚಾ ಜಿವಿತಾಕ್ ಜಿಯೆಂವ್ಚೆಂ ಕಾರಾಣ್ ಜಾವ್ನ್ ಆಯಿಲ್ಲೆಂ. ಜಿತ್ಲೊ ವೇಳ್ ಜೆರೊಮಾನ್ ಆಪ್ಲ್ಯಾ ಭುರ್ಗ್ಯಾಂ ಸವೆಂ ಖರ್ಚುಂಕ್ ನಾತ್ಲ್ಲೊ ತಿತ್ಲೊ ವೇಳ್ ತಾಣೆಂ ಆಪ್ಲ್ಯಾ ನಾತಿ ಸವೆಂ ಖರ್ಚಿಲ್ಲೊ.
ಎಸ್ತೆಲ್ ಜಾಲ್ಯಾರ್ಯ್ ಪಯ್ಶಿಲ್ಯಾ ಕದೆಲಾರ್ ಬಸೊನ್ ಆಪ್ಲ್ಯಾ ಘೊವಾಕ್ ಪಳಂವ್ಚಿ ತಿ ಕುಡಿ ಮನಾಂತ್ ಅಸಹಾಯಕ್ ಜಾಲ್ಲಿ. ತಿ ಖುದ್ದ್ ಜಾವ್ನ್ ಮಿಶೆಲಾಚಾ ಹ್ಯಾ ಘಡಿತಾ ಥಾವ್ನ್ ಖಂತಿಶ್ಟ್ ಜಾಲ್ಲಿ ಆಸ್ತಾಂ ತಿಚ್ಯಾ ಘೊವಾಕ್ ತಿ ಕಶಿ ಭುಜಯ್ತೆಲಿ. ಜಾಲ್ಯಾರ್ಯ್ ತಿಣೆಂ ಆಪ್ಣಾ ಥಾವ್ನ್ ಜಾತಾ ತಿತ್ಲೆಂ ಪ್ರಯತ್ನ್ ಕೆಲ್ಲೆಂ. ಆಪ್ಲ್ಯಾ ಘೊವಾಚ್ಯಾ ಕಾಳ್ಜಾಕ್ ಧಖೊ ದಿಂವ್ಚೆ ತಸಲೆಂ ಕಸಲೆಂಯ್ ಸೊಸೊನ್ ವರ್ಚೆ ತಿತ್ಲಿ ಸಕತ್ ಆತಾಂ ಜೆರೊಮಾಚಾ ಕಾಳ್ಜಾಕ್ ನಾ ಮ್ಹಣೊನ್ ತಿ ಜಾಣಾಂ.
ಮಿಶೇಲಾನ್ ಹಾಂಗಾ ಆಮ್ಕಾಂ ಪೋನ್ ಕರುಂಕ್ ನಾ! ಥಂಯ್ ರಾಯನಾಕ್ಯ್ ಕಾಂಯ್ ಖಬಾರ್ ನಾ. ಕಾಲ್ಚಾ ದಿಸಾ ಥಾವ್ನ್ ಮಿಶೇಲ್ ಪಾವ್ಲಾಂ ಖಂಯ್ಚರ್? ಆಪ್ಲ್ಯಾ ಪಾಂಯಾಂಚಾ ದೊಂಪ್ರಾ ಗಾಂಟಿ ದುಖಿಕ್ ಲಾಗೊನ್ ಸೊಫಾರ್ ಬಸೊಂಕ್ ಜಾಯ್ನಾಸ್ತಾನಾ ತ್ಯಾ ಕದೆಲಾರ್ ಬಸೊನ್ ಆಸ್ಲ್ಲಿ ಎಸ್ತೆಲ್ ಆಪ್ಲ್ಯಾ ಘೊವಾಕ್ ಪಳಯಿತ್ತ್ ಆಪ್ಲ್ಯಾ ಮತಿಂತ್ ಚಿಂತಾಲಿ.
"ಘೊವಾ ಬಾಯ್ಲೆ ಮಧೆಂ ಕಾಂಯ್ ಝಗ್ಡೆಂ ಜಾಲೆಂ?" ತ್ಯಾ ಸಾಲಾಂತ್ ಹೆವ್ಶಿಂ ತೆವ್ಶಿಂ ಅಸಹಾಯಕ್ ಜಾವ್ನ್ ಚಲ್ಚೊ ಜೆರೊಮ್ ಆಪ್ಲ್ಯಾ ಬಾಯ್ಲೆ ಮುಕಾರ್ ರಾವೊನ್ ಉಲಯ್ಲೊ.
ಜೆರೊಮಾಚಾ ಸವಾಲಾಕ್ ಎಸ್ತೆಲ್ ಕಿತೆಂ ಜವಾಬ್ ದಿತೆಲಿ? ತಿಚ್ಯಾ ವೊಂಟಾಂನಿ ಕಾಂಯ್ ಜವಾಬ್ ನಾತ್ಲ್ಲಿ. ತಿ ತಶಿಚ್ಚ್ ಜೆರೊಮಾಕ್ ಪಳವ್ನ್ ರಾವ್ಲಿ.
"ರಾಯನಾಕ್ ಪೋನ್ ಕರುನ್ ವಿಚಾರ್ಯಾಂ...?" ಜೆರೊಮ್ ಎಸ್ತೆಲಾಚಾ ಲಾಗಿಂ ಆಯ್ಲೊ.
"ಹೆಂ ಚೆಡುಂ ಆಸಾ ಪಳೆ.....! ಕಾಂಯ್ ತರ್ಯ್ ಗರ್ಜ್ ಆಸ್ಲ್ಯಾರ್, ಆಮ್ಕಾಂ ತರ್ಯ್ ಏಕ್ ಸಬ್ದ್ ಪೋನ್ ಕರುನ್ ಸಾಂಗೊಂಕ್ ನಜೊ ಆಸ್ಲ್ಲೆಂ....?" ಎಸ್ತೆಲ್ ಘುಣ್ಗುಣ್ಲಿ.
"ತುಂ ಕಿತೆಂ ನವೆಂಚ್ ಮ್ಹಳ್ಳ್ಯಾ ಪರಿಂ?" ಜೆರೊಮಾನ್ ಆಪ್ಲ್ಯಾ ಕಪಾಲಾರ್ ಬೊಟಾಂ ಚರಯ್ಲಿಂ. ತಾಕಾ ಆಪ್ಲ್ಯಾ ಕಪಾಲಾರ್ ಘಾಮ್ ಫುಟ್ತಾ ತಸೊ ಜಾಲೊ.
"ಮಿಶೇಲ್ ಕಾಂಯ್ ತೋಂಡ್ ಉಗಡ್ನ್ ಉಲಂವ್ಚೆಂ ಚೆಡುಂ ನ್ಹಯ್! ಹಾವೆಂ ಸಾಂಗೊಂಕ್ ನಾ ತುಕಾ? ಹ್ಯಾ ಚೆಡ್ವಾನ್ ತ್ಯಾ ಮುಂಬಯಿಂತ್ ದೀಸ್ ಕಾಡ್ಲ್ಲ್ಯಾ ಪರಿಂ ನಾಂತ್ ಮ್ಹಣೊನ್.....? ಹಾಂವ್ ಪಯ್ಲೆಂಚ್ ಜಾಣಾಂ ಆಸ್ಲ್ಲೊಂ!" ಜೆರೊಮ್ ಆಪ್ಲ್ಯಾ ನಾತಿ ವಿಶ್ಯಾಂತ್ ಸಗ್ಳೆಂ ಜಾಣಾಂ ಆಸ್ಲ್ಲೊ.
ಜೆರೊಮಾನ್ ಸಾಂಗ್ಲ್ಲೆಂ ಆಯ್ಕೊನ್ ಎಸ್ತೆಲ್ ಮೌನ್ ಜಾಲಿ.
ಶೀತಲಾಚಾ ಘೊವಾಚ್ಯಾ ಮರ್ಣಾಚೊ ಧಖೊ ಎದೊಳ್ಚ್ ಜೆರೊಮಾಕ್ ಆನಿ ಎಸ್ತೆಲಾಕ್ ಲಾಗ್ಲ್ಲೊ. ಆಪ್ಲ್ಯಾ ನಾತಿ ಸಾರ್ಕೆಂ ನಾತ್ ಶೀತಲ್ ಕಾಜಾರ್ ಜಾವ್ನ್ ವರಸ್ ಸಂಪ್ಚಾ ಆದಿಂಚ್ ವಿಧವ್ ಜಾಲ್ಲೆಂ. ಮಿಶೆಲಾ ಸವೆಂ ಜಿತ್ಲೊ ಜೆರೊಮಾಚೊ ಸಂಭಂಧ್ ಆಸ್ಲ್ಲೊ ತಿತ್ಲೊಚ್ ಶೀತಲಾ ಸವೆಂಯ್ ತಾಚೊ ಸಂಭಂಧ್ ಆಸ್ಲ್ಲೊ. ಹ್ಯಾ ಸಂಭಂಧಾಂತ್ ರಗ್ತಾ ಸಂಭಂಧ್ ನಾತ್ಲ್ಲೊ ಜಾವ್ಯೆತ್! ಪುಣ್ ಮೊಗಾ ಮಾಯ್ಪಾಸಾಚೊ ತೊ ಸಂಭಂಧ್ ಆಸ್ಲ್ಲೊ. ಶೀತಲಾಚಾ ಘೊವಾಚಿ ಖಬಾರ್ ಆಯ್ಕಾತಾನಾ ಜೆರೊಮ್ ಆನಿ ಎಸ್ತೆಲ್ ತ್ಯಾ ದೀಸ್ ಆಶಿಂಚ್ ಕಳ್ವಳ್ಳಿಂ. ಆನಿ ಆತಾಂ....?
"ರಾಯನಾಕ್ ಏಕ್ ಪೋನ್ ಕೆಲ್ಯಾರ್ ಬರೆಂ. ಮಿಶೇಲಾಚಿ ಕಾಂಯ್ ತರ್ಯ್ ಖಬಾರ್ ಮೆಳ್ತೆಲಿ!" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ಚ್ ಪಳೆಲೆಂ.
ಎಸ್ತೆಲಾನ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಏಕ್ ಪಾವ್ಟಿಂ ವೊಣೊದಿ ವಯ್ಲ್ಯಾ ಗಡಿಯಾಳಾ ವಯ್ರ್ ದೀಶ್ಟ್ ವೆಲಿ.
ವೊರಾಂ ನೋವ್ ಜಾವ್ನ್ ಚಾಳೀಸ್ ಮಿನುಟಾಂ!
ಮುಂಬಯಿ ಹ್ಯಾ ವಗ್ತಾರ್ ಚಡ್ಚ್ ಪಯ್ಸ್ ಮ್ಹಳ್ಳ್ಯಾ ಪರಿಂ ಜೆರೊಮಾಕ್ ಭೊಗ್ಲೆಂ.
ರಾಯನಾನ್ ಮಿಶೇಲಾಚ್ಯಾ ವಿಶ್ಯಾಂತ್ ವಿಚಾರುನ್ ಪೋನ್ ಕೆಲ್ಲೆಂಚ್ ಸಾಂಜೆರ್! ಹ್ಯಾ ಉಪ್ರಾಂತ್ ಎಕಾನ್ ಏಕ್ ಮುಂಬಯಿ ವಚೊಂಕ್ ಸಾದ್ಯ್ ನಾತ್ಲ್ಲೆಂ.
ಮತಿಕ್ ಸಮಾಧಾನ್ ಮೆಳಾನಾಸ್ತಾನಾ ವೆತಾನಾ ಜೆರೊಮ್ ಸಾಲಾ ಥಾವ್ನ್ ಭಾಯ್ರ್ ಆಯ್ಲೊ. ಕಿತ್ಯಾಕ್ಗೀ ತಾಕಾ ಭಿತರ್ ಸಾಲಾಂತ್ ಧಗ್ ಜಾತಾ ಮ್ಹಳ್ಳ್ಯಾ ಪರಿಂ ಜಾಲೆಂ. ಸೊಪ್ಯಾಚೆಂ ದಾರ್ ಉಗ್ತೆಂ ಕರುನ್ ಭಾಯ್ರ್ ಆಯಿಲ್ಲ್ಯಾ ತಾಕಾ ತ್ಯಾ ದಾರಾ ಭಾಯ್ರ್ ಥಾವ್ನ್ ವ್ಹಾಳೊನ್ ಆಯಿಲ್ಲೆಂ ರಾತಿಚೆಂ ಥಂಡ್ ವಾರೆಂ ತಾಚ್ಯಾ ಕುಡಿಕ್ ವೆಂಗ್ಲೆಂ ಜಾಲ್ಯಾರ್ಯ್ ಭಿತರ್ಲ್ಯಾ ಭಿತರ್ಚ್ ತಾಚಿ ಕೂಡ್ ಉಭೆತಾ ಮ್ಹಳ್ಳ್ಯಾ ಪರಿಂ ಜಾಲಿ.
ಸೊಪ್ಯಾರ್ ಯೇವ್ನ್ ರಾವ್ಲೆಲ್ಯಾ ಜೆರೊಮಾಕ್ ತಾಚ್ಯಾ ಘರಾಚಿ ಮುಕ್ಲಿ ಗೇಟ್ ಸ್ಪಶ್ಟ್ ದಿಸ್ತಾಲಿ. ತೊ ತಸೊಚ್ ತ್ಯಾ ಗೇಟಿಕ್ ಪಳವ್ನ್ ರಾವ್ಲೊ. ತಾಚ್ಯಾ ನದ್ರೆಂತ್ ಮಿಶೇಲಾಕ್ ಹ್ಯಾ ವಗ್ತಾರ್ ತ್ಯಾ ಗೇಟಿ ಮುಕಾರ್ ಪಳಂವ್ಚಿ ಆಶಾ ಆಸ್ಲ್ಲಿ.
ತ್ಯಾ ದಾಟ್ ದಾಟ್ ಕಾಳೊಕಾಂತ್, ಘರಾಚಾ ವೀಜ್ ದಿವ್ಯಾಂಚಾ ಉಜ್ವಾಡಾಂತ್, ಜೆರೊಮಾಕ್ ತಾಚ್ಯಾ ಘರ್ಚೆಂ ಜಾಲ್ ಆನಿ ತಿ ಗೇಟ್ ಮಾತ್ರ್ ದಿಸ್ಲಿ ಶಿವಾಯ್ ದುಸ್ರೆಂ ಕಾಂಯ್ ದಿಸ್ಲೆಂ ನಾ. ತಾಚಿ ನದರ್ ತಶಿಚ್ ಧಾಂವೊನ್ ತ್ಯಾ ಗೆಟಿ ಭಾಯ್ಲ್ಯಾ ರಸ್ತ್ಯಾರ್ ಪಾಸೊನ್ ಪಾವ್ಲಿ.
ರಸ್ತ್ಯಾರ್ ಕೊಣೆಗೀ ಚಲೊನ್ ಯೆಂವ್ಚೆಂ ಅಸ್ಪಶ್ಟ್ ಥರಾನ್ ಜೆರೊಮಾಕ್ ದಿಸ್ಲೆಂ. ತೆಂ ಮಿಶೇಲ್ಚ್ ಜಾಂವ್ದಿ ಮ್ಹಣೊನ್ ತೊ ಆಶೆಲೊ. ಥೊಡ್ಯಾ ಘಡಿಯಾಂಕ್ ಜೆರೊಮಾಚಾ ಜಿವಾಂತ್ ಖುಶಿ ಉಮಾಳ್ಳಿ ಜಾಲ್ಯಾರ್ಯ್ ತಿ ಅಸ್ಪಶ್ಟ್ ಆಕ್ರತಿ ತ್ಯಾ ಗೆಟಿಚಾ ಉಜ್ವಾಡಾಂತ್ ತಾಚ್ಯಾ ದೊಳ್ಯಾಂ ಮುಕಾರ್ ಯೆತಾನಾ ತೆಂ ಮಿಶೇಲ್ ನ್ಹಯ್ ಮ್ಹಳ್ಳೆಂ ಕಳೊನ್ ತಾಚೆಂ ಕಾಳಿಜ್ ದಿಂಬಿಯೆರ್ ಗಳೊನ್ ರಡ್ಲೆಂ.
ತಿತ್ಲೆಂಚ್!
ಕಸಲಿಗೀ ಏಕ್ ಅವ್ಯಕ್ತ್ ಸಕತ್ ಆಪ್ಲ್ಯಾ ಕಾಳ್ಜಾಕ್ ಧರುನ್ ಮುಡ್ಡಿತಾ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
"ಮಿಶೇಲ್ ಪುತಾ....!" ಉದ್ಗಾರ್ಲ್ಲ್ಯಾ ಜೆರೊಮಾಚೊ ತಾಳೊ ಗದ್ಗದೀತ್ ಜಾವ್ನ್ ತೊ ಪರತ್ ಭಾಯ್ಲ್ಯಾ ಸೊಪ್ಯಾರ್ ಥಾವ್ನ್ ಭಿತರ್ ಆಯ್ಲೊ.
"ತುಂ ಕಿತ್ಯಾಕ್ ಮ್ಹಣೊನ್ ಇತ್ಲೆಂಯ್ ತಕ್ಲೆಕ್ ಘೆತಾಯ್....?" ಘೊವಾಚೆ ಹಾಲ್ ಪಳವ್ನ್ ಎಸ್ತೆಲಾಕ್ ತಡ್ವುಂಕ್ ಜಾಲೆಂ ನಾ. ತಿ ಆತಾಂ ಆಪ್ಣೆಂ ಬಸ್ಲೆಲ್ಯಾ ಕದೆಲಾರ್ ಥಾವ್ನ್ ಉಟ್ಲಿ.
"ತುಂ ಬಸ್ ಹಾಂಗಾ!" ಜೆರೊಮಾಚೊ ಹಾತ್ ಥರುನ್ ತಾಕಾ ತ್ಯಾ ಸೊಫಾರ್ ತಿಣೆಂ ಬಸಯ್ಲೊ. "ತಕ್ಲೆಕ್ ಘೆತ್ಲ್ಲ್ಯಾಫರಾ ಸಗ್ಳೆಂ ಸಾರ್ಕೆಂ ಜಾತಾ....?" ತಿಣೆಂ ಜೆರೊಮಾಕ್ಚ್ ಪಳೆಲೆಂ.
"ಮಿಶೇಲ್ ಆಯ್ಲಾಂ ವಾ ನಾ ತೆಂ ತುಂ ರಾಯನಾಕ್ ಪೊನ್ ಕರುನ್ ವಿಚಾರ್!" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ ಫರ್ಮಾಯ್ಲೆಂ.
"ಹಾಂವ್ ವಿಚಾರ್ತಾಂ! ತುಂ ತಿಕ್ಕೆ ಸಮಾಧಾನ್ ಘೆ! ಪಯ್ಲೆಂಚ್ ತುಜಿ ಭಲಾಯ್ಕಿ ಬರಿ ನಾ!" ಎಸ್ತೆಲ್ ಪೊನಾ ತೆವ್ಶಿಂ ಘುಂವ್ಲಿ.
ಪೊನಾ ತೆವ್ಶಿಂ ಆಯಿಲ್ಲ್ಯಾ ಎಸ್ತೆಲಾನ್ ರಾಯನಾಕ್ ಪೋನ್ ಡಯಲ್ ಕೆಲೆಂ.
ಜೆರೊಮ್ ಪೋನ್ ಡಯಲ್ ಕರ್ಚ್ಯಾ ಆಪ್ಲ್ಯಾ ಬಾಯ್ಲೆಕ್ಚ್ ಪಳವ್ನ್ ರಾವ್ಲೊ. ಭಿತರ್ ಆಯಿಲ್ಲ್ಯಾ ತಾಕಾ ಪರ್ತ್ಯಾಕ್ ಧಗ್ ಚಡ್ ಜಾಲ್ಲ್ಯಾ ಪರಿಂ ಜಾತಾನಾ ಆಪ್ಣೆಂ ನ್ಹೆಸ್ಲ್ಲ್ಯಾ ಶರ್ಟಾಚೆ ತಾಣೆಂ ಬುತಾಂವ್ ಕಾಡ್ಲೆ.
ರಿಸೀವರಾಕ್ ಹಾತಿಂ ಧರುನ್ ರಾವ್ಲೆಲ್ಯಾ ಎಸ್ತೆಲಾಕ್ ಪಳಂವ್ಚ್ಯಾ ಜೆರೊಮಾಚಾ ದೊಳ್ಯಾಂ ಮುಕಾರ್ ಮಿಶೇಲಾಚೆಂ ರೂಪ್ ಉದೆವ್ನ್ ಆಯ್ಲೆಂ. ಆಪ್ಲ್ಯಾ ದೊಳ್ಯಾಂ ಮುಕಾರ್ ತೆಂ ನೆಂಟುಲೆಂ ಮಿಶೇಲ್ ಹಾಸೊನ್ ಹಾಸೊನ್ ಧಾಂವೊನ್ ಯೆಂವ್ಚ್ಯಾ ಪರಿಂ ಜಾಲೆಂ. ಕಾಜರ್ ಜಾಲ್ಲೆಂ ನವೆಂ ಹೊಕಾಲ್ ಆಪ್ಣಾಕ್ ಆರಾವ್ನ್ ಧರುನ್ ಗಳ್ಗಳ್ಯಾಂ ರಡ್ಚೆಂ ದಿಸೊನ್ ಯೆತಾನಾ ಜೆರೊಮಾಕ್ ತಡ್ವುಂಕ್ ಜಾಲ್ನಾಂ.
ತಾಚ್ಯಾ ದೊಳ್ಯಾಂನಿಂ ದುಖಾಂಚೊ ಝರಿ ಉಮಾಳ್ಳ್ಯೊ.
ತಿತ್ಲ್ಯಾರ್!
"ಹಲೋ...?" ಎಸ್ತೆಲ್ ಪೊನಾರ್ ಉಲಯ್ಲಿ. "ರಾಯನ್.....? ಹಾಂವ್ ಮಿಶೆಲಾಚಿ ಮಾಂಯ್ ಉಲಯ್ತಾಂ. ಮಿಶೇಲಾಚಿ ಕಾಂಯ್ ಖಬಾರ್ ಆಸಾಯೆ ಪುತಾ?" ತ್ಯಾ ಕುಶಿನ್ ರಾಯನಾಚೊ ತಾಳೊ ಆಯ್ಕಾಲ್ಲ್ಯಾ ಎಸ್ತೆಲಾನ್ ವಿಚಾರ್ಲೆಂ
"ಕಾಂಯ್ ನಾ ಮಾಂಯ್ ಸಗ್ಳೆಂ ಮುಂಬಯಿ ಸೊಧ್ಲೆಂ!" ರಾಯನ್ ಉಲಯ್ಲೊ.
ಜೆರೊಮಾಕ್ ಆಪ್ಲ್ಯಾ ಬಾಯ್ಲೆನ್ ಉಲಯಿಲ್ಲೆಂ ಮಾತ್ರ್ ಆಯ್ಕಾತಾಲೆಂ ಶಿವಾಯ್ ತ್ಯಾ ಕುಶಿನ್ ಥಾವ್ನ್ ರಾಯನ್ ಕಿತೆಂ ಉಲಯ್ತಾ ತೆಂ ತಾಕಾ ಆಯ್ಕಾನಾತ್ಲ್ಲೆಂ.
"ಕಿತೆಂ ಖಂಯ್.....?" ಉದ್ವೇಗ್ ತಡ್ವುಂಕ್ ತಾಂಕಾನಾಸ್ತಾನಾ ಜೆರೊಮಾನ್ ವಿಚಾರ್ಲೆಂ.
"ಕಿತೆಂಯ್ ಆಸ್ಲ್ಯಾರ್ ಆಮ್ಕಾಂ ಏಕ್ ಖಬಾರ್ ದೀ ಪುತಾ!" ಎಸ್ತೆಲ್ ರಾಯನಾಕ್ ಜಾಗಯ್ತಾಲಿ.
"ಹಾಂವ್ ತುಮ್ಕಾಂ ಪೋನ್ ಕರ್ತಾಂ ಮಾಂಯ್!"
"ಜಾಗ್ರುತ್ ಕರ್ ಪುತಾ! ಆಮ್ಕಾಂ ತುಮ್ಚಿ ಮಸ್ತ್ ಖಂತ್ ಜಾತಾ!"
"ತುಮಿಂ ಕಾಂಯ್ ಖಂತ್ ಕರಿನಾಕಾತ್ ಮಾಂಯ್! ಮಿಶೇಲಾಕ್ ಕಾಂಯ್ ಜಾಂವ್ಚೆಂ ನಾ!"
"ತಿತ್ಲೆಂಚ್ ಪುತಾ! ಹ್ಯಾ ಚೆಡ್ವಾಕ್ ದೆವಾನ್ ರಾಕ್ಲ್ಯಾರ್ ಪುರೊ!"
"ಬರೆಂ ಮಾಂಯ್!"
"ಜಾಯ್ತ್ ಪುತಾ!"
ಪೋನ್ ದವರ್ಲ್ಲ್ಯಾ ಎಸ್ತೆಲಾಚಾ ತೊಂಡಾರ್ ನಿರಾಶಾ ಆಸ್ಲ್ಲಿ. ತ್ಯಾ ನಿರಾಶೆಕ್ ಪಳವ್ನ್ ಜೆರೊಮ್ ಎದೊಳ್ಚ್ ಸಮ್ಜಾಲ್ಲೊ.
"ಎದೊಳ್ಯ್ ಮಿಶೇಲಾಚಿ ಕಾಂಯ್ ಖಬಾರ್ ನಾ?" ಸೊಫಾರ್ ಥಾವ್ನ್ ಉಟೊಂಕ್ ಪ್ರಯತ್ನ್ ಕೆಲ್ಲ್ಯಾ ಜೆರೊಮಾಕ್ ಹರ್ಧ್ಯಾಂತ್ ಕಿತೆಂಗೀ ವೊಡುನ್ ಧರ್ಲ್ಲ್ಯಾ ಪರಿಂ ಜಾಲೆಂ. ತಾಣೆಂ ಆಪ್ಲ್ಯಾ ಆಂಗಾ ವಯ್ಲೆಂ ಶರ್ಟ್ ನಿಕ್ಳಾಂವ್ಕ್ ಪಳೆಲೆಂ. ತಾಚ್ಯಾ ಆಂಗಾ ಥಾವ್ನ್ ಘಾಮ್ ವಿಪರೀಕ್ ದೆಂವೊಂಕ್ ಲಾಗ್ಲೊ.
"ಕಿತೆಂ ಜಾತಾ ತುಕಾ....?" ಆಪ್ಣಾಚೆಂ ಶರ್ಟ್ ನಿಕ್ಳಾಯಿಲ್ಲ್ಯಾ ಘೊವಾಕ್ ಪಳೆವ್ನ್ ಎಸ್ತೆಲಾಕ್ ದುಬಾವ್ ಜಾಲೊ.
"ತ್ಯೊ ಗುಳ್ಯೊ ಹಾಡ್ ಪಳೆಯಾಂ!" ಜೆರೊಮಾನ್ ಆಪ್ಲ್ಯಾ ಹರ್ಧ್ಯಾಕ್ ಪಳೆಲೆಂ.
"ತುಜೆಂಯ್ ಆಸಾ ಪಳೆ..... ಹೆಂ ಲೆಖಾ ವರ್ತೆಂ ಟೆನ್ಶನ್! ತುಕಾ ಸಾಂಗ್ಲ್ಯಾರ್ ಖಂಯ್ ಆಯ್ಕಾತಾ?" ಎಸ್ತೆಲ್ ಪುರ್ಪುರೊನ್ ಭಿತರ್ ಗೆಲಿ.
ಜೆರೊಮಾಚ್ಯಾ ವಕ್ತಾಂ ವಿಶಿಂ ತಿ ಜಾಣಾಂ ಆಸ್ಲ್ಲಿ.
ಥೊಡ್ಯಾ ವೆಳಾನ್ ಜೆರೊಮಾಚಿಂ ವಕ್ತಾಂ ಹಾಡುನ್ ಭಾಯ್ರ್ ಆಯಿಲ್ಲಿ ಎಸ್ತೆಲ್,
"ಧರ್....! ಹ್ಯೊ ಗುಳ್ಯೊ ಘೆ!" ವಕ್ತಾಂ ಜೆರೊಮಾಚಾ ಹಾತಿಂ ದೀವ್ನ್ ಆಪ್ಲ್ಯಾ ಹಾತಾಂತ್ಲೆಂ ಉದಾಕ್ ಮುಕಾರ್ ವೊಡ್ಡಾಯ್ಲೆಂ ತಿಣೆಂ.
"ಆಸ್ಪತ್ರೆಕ್ ಯಾ......?" ವಿಚಾರ್ಲೆಂ ತಿಣೆಂ
"ಗೆಲ್ಯಾರ್ ಬರೆಂ ದಿಸ್ತಾ!" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ ಪಳಯ್ಲೆಂ.
ಜೆರೊಮಾಕ್ ಪಳೆಲ್ಲ್ಯಾ ಎಸ್ತೆಲಾಕ್ ತಿಚ್ಯಾ ಘೊವಾಚ್ಯಾ ಕಪಾಲಾರ್ ಥಾವ್ನ್ ದೆಂವ್ಚೊ ಘಾಮ್ ಸ್ಪಶ್ಟ್ ದಿಸ್ಲೊ.
"ಊಟ್ ತರ್....! ಹಾಂವ್ ಜಿಮ್ಮಿ ಆಪಂವ್.....?"
"ಆತಾಂ ಹ್ಯಾ ಚೆಡ್ಯಾಕ್ ಖಂಯ್ ಆಪಂವ್ಚೆಂ.......? ಪಳೆಯಾಂ ಮ್ಹಜೆಂ ವಸ್ತುರ್ ಹಾಡ್!" ಜೆರೊಮಾನ್ ಸಾಂಗ್ಲ್ಲೆಂ ಆಯ್ಕೊನ್ ಎಸ್ತೆಲ್ ಭಿತರ್ ಗೆಲಿ.
ಎಸ್ತೆಲಾನ್ ಹಾಡುನ್ ದಿಲ್ಲೆಂ ವಸ್ತುರ್ ಜೆರೊಮ್ ನ್ಹೆಸ್ಲೊ. ವೇಳ್ ಚಲ್ತಾ ತಿತ್ಲಿ ತಾಚಿ ಪರಿಸ್ಥಿತಿ ಭಿಗಡ್ಲೆಲ್ಯಾ ಪರಿಂ ಜಾತಾಲಿ. ವಕ್ತಾಂ ಘೆತ್ಲ್ಲ್ಯಾನ್ ಥೊಡೊ ಸುಶೆಗ್ ದಿಸ್ಲೊ ಜಾಲ್ಯಾರ್ಯ್ ಬರೆಂಪಣ್ ಮ್ಹಣೊನ್ ತಾಕಾ ಭೊಗ್ಲೆಂ ನಾ.
"ಹ್ಯಾ ಚೆಡ್ಯಾಕ್ಯ್ ಆಜ್ಚ್ ಭಾಯ್ರ್ ವಚೊಂಕ್ ಜಾಯ್ ಆಸ್ಲ್ಲೆಂ....? ಹೊ ಖಂಯ್ ವೆತಾ ಮ್ಹಳ್ಳೆಂಚ್ ಮ್ಹಾಕಾ ಸಮ್ಜಾನಾ!" ಪಾಂಯಾಂಕ್ ವ್ಹಾಣೊ ಶಿರ್ಕಾಯ್ತಾನಾ ಎಸ್ತೆಲ್ ಉಲಯ್ಲಿ.
"ಜಿಮ್ಮಿಕ್ ದೋನ್ ಚಾರ್ ಪಾವ್ಟಿಂ ತ್ಯಾ ಆಸ್ಪತ್ರೆಂತ್ ಮಾಧವಾನ್ ಪಳೆಲ್ಲೆಂ ಖಂಯ್. ತೊ ವಿಚಾರ್ತಾಲೊ ಆಸ್ಪತ್ರೆಂತ್ ಕೋಣ್ ಆಸಾ ಮ್ಹಣೋನ್......?"
ಜಿಪಾಚಿ ಚಾವಿ ಘೆವ್ನ್ ಭಾಯ್ರ್ ಆಯಿಲ್ಲ್ಯಾ ಜೆರೊಮಾನ್ ಆಪ್ಲೆಂ ಜೀಪ್ ಸ್ಟಾರ್ಟ್ ಕೆಲೆಂ. ತಿತ್ಲ್ಯಾರ್ ಎಸ್ತೆಲ್ ಯೇವ್ನ್ ಜಿಪಾರ್ ಬಸ್ಲಿ.
"ಆತಾಂ ಕಶೆಂ ಆಸಾ? ತುಕಾ ಡ್ರೈವಿಂಗ್ ಕರುಂಕ್ ಜಾತಾ..? ಜಾಯ್ನಾಂ ಜಾಲ್ಯಾರ್ ತಿಕ್ಕೆ ಮಾಧವಾಕ್ ಆಪವ್ಯಾ!" ಆಪ್ಲ್ಯಾ ಘರಾ ಥಾವ್ನ್ ಜೀಪ್ ಭಾಯ್ರ್ ಹಾಡ್ಲ್ಲ್ಯಾ ಜೆರೊಮಾಕ್ ಪಳವ್ನ್ ಎಸ್ತೆಲಾನ್ ವಿಚಾರ್ಲೆಂ.
"ಜಾತೆಲೆಂ! ತುಂ ಕಾಂಯ್ ಭಿಯೆನಾಕಾ!" ಜೆರೊಮಾನ್ ಜೀಪ್ ಹಳ್ಟಾರ್ ಮುಕಾರ್ ಧಾಂವ್ಡಾಯ್ಲೆಂ.
ಜೀಪ್ ಆತಾಂ ಭಿತರ್ಲೊ ರಸ್ತೊ ಸೊಡುನ್ ಮುಖ್ಯ್ ರಸ್ತ್ಯಾಕ್ ಯೇವ್ನ್ ಪಾವ್ಲೆಂ.
ಮುಖ್ಯ್ ರಸ್ತ್ಯಾರ್ ಮುಖ್ಲ್ಯಾನ್ ಥಾವ್ನ್ ಯೆಂವ್ಚ್ಯಾ ವಾಹನಾಂಚಾ ಹೆಡ್ಲೈಟಾಂಚಾ ಉಜ್ವಾಡಾಕ್ ಆನಿ ಜಿವಾ ಭಿತರ್ ಜಾಂವ್ಚ್ಯಾ ಆಟಾವಿಟ್ಯಾಂಕ್ ಲಾಗೊನ್ ಜೆರೊಮಾಚ್ಯಾ ದೊಳ್ಯಾಂಕ್ ಸಾಯ್ ಮಾಂಡ್ತಾ ತಶೆಂ ಜಾಲೆಂ. ಆಪ್ಲೆ ದೊಳೆ ರುಂದಾವ್ನ್ ತಾಣೆಂ ರಸ್ತ್ಯಾಕ್ ಪಳೆಲೆಂ.
"ಮಿಶೆಲಾಚಿ ಕಿತೆಂ ಗತ್ ಕೋಣ್ ಜಾಣಾಂ!" ಹ್ಯಾ ವಗ್ತಾರ್ಯ್ ಜೆರೊಮಾಕ್ ಮಿಶೇಲಾಚೊ ಉಡಾಸ್ ಆಯ್ಲೊ.
ತಿತ್ಲೆಂಚ್!
ಥಂಯ್ ಹಾಂಗಾ, ಹೆವ್ಶಿಂ ತೆವ್ಶಿಂ, ಸಗ್ಳ್ಯಾನ್ ಮಿಶೆಲ್ಚ್ ಜೆರೊಮಾಕ್ ದಿಸ್ಲ್ಲ್ಯಾ ಪರಿಂ ಜಾವ್ನ್, ತಾಚ್ಯೆ ಪಾಟ್ಲ್ಯಾನ್ ’ಸಕ್ಕ್’ ಕರುನ್ ಕೊಣೆಂಗೀ ಆಪ್ಲ್ಯಾ ಕಾಳ್ಜಾಕ್ ಘಟ್ ದಾಂಬುನ್ ಧರ್ಲ್ಲ್ಯಾ ಪರಿಂ ಜಾತಾನಾ ಉಸ್ವಾಸ್ ಬಾಂದ್ಲ್ಲ್ಯಾ ಪರಿಂ ಜಾಲ್ಲೊ ಜೆರೊಮ್ ಎಸ್ತೆಲಾಚಾ ಕುಶಿಕ್ ಮಾಲ್ವಾಲೊ.
"ಎಸ್ತೆಲಾ.....!" ಎಕ್ಚ್ಚ್ ಸಬ್ದ್ ತಾಚ್ಯಾ ತೊಂಡಾ ಥಾವ್ನ್ ಭಾಯ್ರ್ ಆಯ್ಲೊ. ಹಾಚ್ಯೆ ಸವೆಂ ಜೆರೊಮ್ ಎಸ್ತೆಲಾಚಾ ತೆವ್ಶಿಂ ಮಾಲ್ವಾತಾನಾ ತಾಚೆ ಸವೆಂ ತಾಣೆಂ ಧರ್ಲೆಲೆಂ ಜಿಪಾಚೆಂ ಸ್ಟೇರಿಂಗ್ಯ್ ಘುಂವ್ಲೆಂ.
ತಿತ್ಲೆಂಚ್!
ಎಸ್ತೆಲಾಕ್ ಆಪ್ಲೊ ಘೊವ್ ಆಪ್ಣಾ ತೆವ್ಶಿಂ ಗಳ್ಚೊ ದಿಸ್ತಾನಾ ತಿಣೆಂ ಏಕ್ ವ್ಹಡ್ಲಿ ಕಿಂಕ್ರಾಟ್ ಮಾರ್ಲಿ.
ತಿತ್ಲ್ಯಾರ್!
ಜೆರೊಮಾನ್ ಎಸ್ತೆಲಾ ತೆವ್ಶಿಂ ಗಳ್ತಾನಾ ಆಪ್ಲ್ಯಾ ಜಿಪಾಚೆಂ ಸ್ಟೇರಿಂಗ್ ಸೊಡುಂಕ್ ನಾತ್ಲೆಲ್ಯಾನ್ ತಾಚ್ಯಾ ಜಡಾಯೆಕ್ ಸ್ಟೇರಿಂಗ್ ಘುಂವ್ತಾನಾ ತೆಂ ಸ್ಟೇರಿಂಗ್ ಘುಂವ್ಲ್ಲ್ಯಾ ಕುಶಿಕ್ಚ್ ಜೀಪ್ ಘುಂವ್ಲೆಂ.
ತಿತ್ಲೆಂಚ್!
"ದಡ್ಡ್" ಕರುನ್ ಎಕ್ಚ್ ಆವಾಜ್ ಆಯ್ಕಾಲ್ಲೊ.
ತ್ಯಾ ಕುಶಿನ್ ಥಾವ್ನ್ ಯೆಂವ್ಚ್ಯಾ ಸಿಟಿ ಬಸ್ಸಾಚಾ ಮುಖಾ ಮುಖಿಂ ಆಯಿಲ್ಲೆಂ ಜೀಪ್ ಬಸ್ಸ್ ಆದ್ಳಾಲ್ಲ್ಯಾ ಸಕ್ತೆನ್ ರಸ್ತ್ಯಾರ್ ಆಡ್ ಪಡೊನ್ ತ್ಯಾ ಬಸ್ಸಾ ಸಾಂಗಾತಾಚ್ ಝರ್ಕಟೊನ್ ಸುಮಾರ್ ಮುಕಾರ್ ವಚೊನ್ ಥಾಂಬ್ಲೆಂ. ಬಸ್ಸ್ ಜಿಪಾಕ್ ಮುಖಾಮುಖಿಂ ಆದ್ಳಾಲ್ಲ್ಯಾನ್ ಜಿಪಾಚಿ ಮುಕ್ಲಿ ಕೂಸ್ ಸಂಪೂರ್ಣ್ ಚೆಂಚ್ಲಿ. ಸಗ್ಳೆಂಚ್
ಖಿಣಾ ಭಿತರ್ ಘಡ್ಲೆಂ.
ಥಾಂಬ್ಲೆಲ್ಯಾ ಬಸ್ಸಾಚೆ ಪಯ್ಣಾರಿ ಬೊಬೊ ಮಾರುಂಕ್ ಲಾಗ್ಲೆ.
ಅಚಾನಕ್ ಬಸ್ಸಾಚಾ ವಾಟೆರ್ ಮಧೆಂ ಆಯಿಲ್ಲ್ಯಾ ಜಿಪಾಕ್ ಬಾಚಾವ್ ಜಾಂವ್ಕ್ ಸಾದ್ಯ್ಚ್ ನಾತ್ಲ್ಲೆಂ.
*****************
ಅಂಧೇರಿ! ಮುಂಬಯಿ!
ವೊರಾಂ ರಾತಿಚಿಂ ಆಟ್ ಜಾವ್ನ್ ಚಾಳೀಸ್ ಮಿನುಟಾಂ!
ಇಕ್ಬಾಲಾಚಾ ಬೊಂಗ್ಲ್ಯಾ ಥಾವ್ನ್ ಭಾಯ್ರ್ ಸರ್ಲೆಲೆಂ ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂಚೆಂ ಮಹೀಂದ್ರ ಸ್ಕೋರ್ಪಿಯೊ ಜೀಪ್ ಸವ್ಕಾಸ್ ಮುಕ್ಲ್ಯಾ ರಸ್ತ್ಯಾಕ್ ದೆಂವ್ಲೆಂ. ರಸ್ತ್ಯಾಕ್ ದೆಂವ್ಲ್ಲೆಂ ಜೀಪ್ ಥೊಡೆಂ ಮುಕಾರ್ ಯೇವ್ನ್ ತೆ ತೀನ್ ರಸ್ತೆ ಎಕ್ವಟ್ಚ್ಯಾಲಾಗಿಂ ಪಾವ್ಲೆಂ. ಥೊಡೊ ವೇಳ್ ಥಂಯ್ಚ್ ದೆಗೆನ್ ರಾವ್ಲ್ಲೆಂ ಜೀಪ್ ಆಪ್ಣಾಕ್ ಸಮಾಧಾನ್ ಜಾಲ್ಯಾ ಉಪ್ರಾಂತ್ ಸವ್ಕಾಸ್ ದಾವ್ಯಾ ಕುಶಿಚೊ ರಸ್ತೊ ಧರುನ್ ಮುಕಾರ್ ಧಾಂವ್ಲೆಂ.
ತಿತ್ಲ್ಯಾರ್!
ಏಕ್ ಧವೆಂ ಮಾರುತಿ ಕಾರ್ ಯೇವ್ನ್ ತ್ಯಾ ತೀನ್ ರಸ್ತೆ ಎಕ್ವಟ್ಚಾ ಕಡೆನ್ ರಾವ್ಲೆಂ. ಲೈಟ್ ಸಿಲ್ವರ್ ರಂಗಾಚೆ ತಾಚೆ ಆರ್ಶೆ ಭಾಯ್ಲ್ಯಾ ಉಜ್ವಾಡಾಕ್ ಪರ್ಜಾಳ್ತಾಲೆ. ತ್ಯಾ ಕಾರಾ ಭಿತರ್ ಕೋಣ್ ಆಸಾ ತೆಂ ದಿಸಾನಾತ್ಲ್ಲೆಂ.
ಎಕಾಚ್ಚ್ ಎಕಾ ಘಡಿಯೆಕ್ ಥಾಂಬ್ಲೆಲ್ಯಾ ಹ್ಯಾ ಮಾರುತಿ ಕಾರಾನ್ ಥೊಡ್ಯಾಚ್ ಖಿಣಾಂ ಪಯ್ಲೆಂ ಮುಕಾರ್ ಧಾಂವ್ಲ್ಲ್ಯಾ ಮಹೀಂದ್ರ ಜಿಪಾಚೊ ಪಾಟ್ಲಾವ್ ಕರುಂಕ್ ಆರಂಭ್ ಕೆಲೊ.
ಅಂದೇರಿ ಥಾವ್ನ್ ಭಾಯ್ರ್ ಆಯಿಲ್ಲೆಂ ಮಹೀಂದ್ರ ಜೀಪ್ ಆತಾಂ ಹೈವೇಚೆರ್ ಚಡ್ಲೆಂ. ತೆಂ ಜೀಪ್ ಖಂಯ್ಚರ್ಯ್ ಥಾಂಬ್ಲೆಂ ನಾ.
ರಾತ್ ಭರಾನ್ ಪಾಶಾರ್ ಜಾತಾಲಿ.
ವೆಳಾನ್ ರಾತಿಕ್ ಧಾಂವ್ಡಾಂವ್ಚ್ಯಾ ಪರಿಂ ಹೊ ರಸ್ತೊ ತ್ಯಾ ಜಿಪಾಕ್ ಧಾಂವ್ಡಾಯ್ತಾಲೊ. ಹಾಚೆ ಸವೆಂ ತ್ಯಾ ಜಿಪಾಚಿ ವಾಟ್ ತ್ಯಾ ತಾಚ್ಯಾ ಪಾಟ್ಲ್ಯಾ ಮಾರುತಿ ಕಾರಾಕ್ ವೊಡುನ್ ಹಾಡ್ತಾಲಿ.
ಭಯಾಂದರ್ ಪಾವ್ಲೆಲೆಂ ಮಹೀಂದ್ರ ಜೀಪ್ ಆತಾಂ ಥಾಣಾ-ಭಯಾಂಧರ್ ಹೈವೇಚೆರ್ ಚಡ್ಲೆಂ.
ಮಾರುತಿ ಕಾರ್ಯೀ ತಿತ್ಲ್ಯಾಚ್ ಮೊಗಾನ್ ತ್ಯಾ ಜಿಪಾಚಿ ವಾಟ್ ಧರೀತ್ತ್ ತಾಚೊ ಪಾಟ್ಲಾವ್ ಕರುಂಕ್ ಲಾಗ್ಲೆಂ.
*****************
[ಹಾಂಗಾಸರ್ ದುಸ್ರೊ ಭಾಗ್ ಸಂಪ್ತಾ. ಪುಣ್ ತಿಸ್ರ್ಯಾ (ಅಖ್ರೇಚ್ಯಾ) ಭಾಗಾಂತ್ ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
