ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 1
ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ
ಬೂಕ್: ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ
ಕವಿ: ಆಂಡ್ರು ಎಲ್. ಡಿ’ಕುನ್ಹಾ, ಕಿನ್ನಿಕಂಬ್ಳ
ಪ್ರಸ್ತಾವನ್: ಕಿಶೂ, ಬಾರ್ಕುರ್
ಛಾಪ್ಲ್ಲಿ ಲಿಪಿ: ಕಾನಡಿ ಆನಿಂ ದೇವ್ನಾಗರಿ.
ಪಾನಾಂ: 194
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ವಲ್ಲಿ ಕ್ವಾಡ್ರಸ್
ತಾರಿಕ್: 11 ಮಾರ್ಚ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಜೊಮೆಲ್ ಬೊಂದೆಲ್
ಆಂಡ್ರು ಎಲ್. ಡಿ’ಕುನ್ಹಾ
ಕವಿಚಿ ವ್ಹಳೊಕ್:
ಆಂಡ್ರು ಎಲ್’ ಡಿ’ಕುನ್ಹಾ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಪಾಟ್ಲ್ಯಾ ದೋನ್ ದಾಕ್ಡ್ಯಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯ್ ರಸ್ಚಾ ಆಂಡ್ರುಚೊ ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ ಕವಿತಾ ಜಮೊ - ಫುಡ್ಲದ್ ಕವಿತಾಜಮೊ ಜಾವ್ನಾಸಾ. ಮಾಯ್ಭಾಸ್.ಕೊಮ್ಚೆರ್ ಹಾಚಿ ಕವಿತಾಂಕ್ ಸಂಬಂಧ್ ಜಾಲ್ಲಿ ವ್ಹೋಳ್ ’ಕವಿತಾವ್ಹಾಳೊ ’ ಪರ್ಗಟ್ ಜಾತೆಚ್ಚ್ ಆಸಾ.
ಆಂಡ್ರುಕ್ ಸಭಾರ್ ಕವಿತಾ ಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.
ಸಮೀಕ್ಶಾ ಲೇಖನ್
- ಜೊಮೇಲ್ ಬೊಂದೆಲ್, ಕುವೇಯ್ಟ್
ಸುಮಾರ್ ತೆಂಪಾ ಆದಿಂಚ್ ಕೊಂಕ್ಣಿ ಲೊಕಾ ಹುಜಿರ್ ಪಾವಜೆ ಆಸಲ್ಲೊ, ವ್ಹಳೂ
ವ್ಹಳೂ ತರೀ, ಕವಿತಾ ಲ್ಹಾರಾಂಚೊ ವ್ಹಾಳೊಚ್ ಘೆವ್ನ್ ಆಯ್ಲೊ
"ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ಕವಿತಾ ಪುಂಜೊ. ಆಂಡ್ರು ಎಲ್ ಡಿ’ಕುನ್ಹಾಚೊ ಹೊ ಕವಿತಾ ವಾಳೊ ಖಂಡಿತ್ ಜಾವ್ನ್ಯಿ ಕೊಂಕ್ಣಿ ಕವಿತಾ ಶೆತಾಂತ್ಲೆಂ ಭಾಂಗ್ರಾಳೆಂ ಪೀಕ್ ಜಾವ್ನಾಸಾ ಮ್ಹಣ್ ಸಾಂಗ್ಚ್ಯಾಕ್
ದುಬಾವ್ ನಾ. ಹೊ ಕವಿತಾ ಪುಂಜೊ ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಪ್ರಮುಕ್ ಸ್ಥಾನ್ ಘೆತಲೊ ಮ್ಹಣ್ ಮ್ಹಕಾ ಖಚಿತ್ ಜಾತಾ. ಆನಿ
ಅಸಲ್ಯಾ ‘ವ್ಹಾಳ್ಯಾ’ಚಿ ಕೊಂಕ್ಣಿ ಸಾಹಿತ್ಯಾಕ್ ಗರ್ಜ್ಯೀ ಆಸಾ. ಆಶಾವಾದಿ ಪ್ರಕಾಶನ್ ದ್ವಾರಿಂ ಸಾತ್ವೊ ಬೂಕ್ ಜಾವ್ನ್ ಲೊಕಾ ಹುಜಿರ್ ಪಾವ್ಲ್ಲೊ ಆನಿಕ್ಯೀ ಸಂತೊಸಾಚಿ ಗಜಾಲ್.
ಹೊ ಲೇಖಕಾಚೊ ಪಯ್ಲೊ ಬೂಕ್ ತರೀ ತಾಣೆ
ಬರಯಿಲ್ಲಿ ಕವಿತಾಚಿ ರೀತ್ (ಶೈಲಿ), ಕವಿತಾ ವಿಷಯ್ ವಾಚುನ್ ಪಳೆತಾನಾ, ತಾಕಾ ಕವಿತಾ ಸಾಹಿತ್ಯಾಂತ್ ಆಸ್ಚೊ
ಗೂಂಡ್ ಅನ್ಭೋಗ್ ಉಂಚ್ಲ್ಯಾ ರಿತಿನ್ ದಿಸೊನ್ ಯೆತಾ. ಕವಿತಾಚೆ ವಿಷಯ್ ಭೋವ್ ಸೊಂಪೆ ಜಾಲ್ಯಾರ್, ಚಿಂತಾಪ್ ಆನಿ ಲೇಖಕಾನ್ ದಿಂವ್ಚೆ ಲಿಸಾಂವ್ ಕಾಳ್ಜಾಕ್ ಆನಿ ಮತಿಕ್ ಈಟಾಳ್ ಜಾವ್ನಾಸಾತ್. ಸಾಂಗಾತಾಚ್ ಕೊಂಕ್ಣಿ ಕವಿತಾಂತ್ ನವೆಂಸಾಂವ್ಯೀ
ಉಗ್ತ್ಯಾನ್ ದಿಸೊನ್ ಯೆತಾ. ಕವಿತಾ ಪ್ರಾಸಾಚೆರ್ (Rhyming) ಯಾ
ಸಾಂಪ್ರಾದಾಯಿಕ್ ಶೈಲಿರ್ ಬರಯಿನಾಸ್ತಾಂ, ವಾಚ್ಪ್ಯಾಂಕ್ ಕವಿನ್ ಆಪ್ಣಾಚಿಂ
ಭೊಗ್ಣಾಂ ಬರ್ಯಾ ಥರಾನ್ ಸಮ್ಜೊಂವ್ಕ್ ಪ್ರಯತನ್ ಕೆಲಾ.
"ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ಕವಿತಾ ಪುಂಜಾಂತ್
ಕವಿನ್ ವಿವಿಧ್ ಥರಾಚೆ ವಿಷಯ್ ಆಪಡ್ಲ್ಯಾತ್. ಕೊಂಕ್ಣಿ
ಸಂಸ್ಕೃತಿಚಿ ಖಂತ್, ಹುಸ್ಕೊ, ಬಡಾಯ್ ಭೋವ್ ಆಪುರ್ಬಾಯೆನ್
ವರ್ಣಿಲಾಂ. "ಬಾಂಯ್" ಕವಿತಾ ಕೊಂಕ್ಣಿ ಸಂಸ್ಕೃತೆಚಿ ಖರಿ ವಳೊಕ್
ವ್ಯಂಗ್ಯ್ ಥರಾನ್ ದಾಕೊವ್ನ್ ದಿತಾ. ಮಲ್ಘಾಡ್ಯಾನಿಂ ಸಾಂಬಾಳುನ್
ಹಾಡ್ಲ್ಲಿ ಹಿ ಗ್ರೇಸ್ತ್ ಕೊಂಕ್ಣಿ ಸಂಸ್ಕೃತಿಚಿ ಶಿರೊಚ್ ಕಾತ್ರುನ್
ಸೊಡ್ಲ್ಯಾತ್. ಆಬಾನ್ ಬಾರಾ ಮುಂಡ್ ಖೊಂಡ್ಲ್ಯಾರ್, ಬಾಬಾನ್
ಫಕತ್ ಸ ಮುಂಡ್ ಮಾತ್ರ್ ಖೊಂಡ್ಲ್ಯಾ. ಹಿ ಕವಿತಾ ಸಂಪೂರ್ಣ್
ಥರಾನ್ ಕೊಂಕ್ಣಿ ಸಂಸ್ಕೃತೆ ಥಂಯ್ ನವ್ಯಾನ್ ಜಾಗ್ವಣ್ ದಿತಾ
ಮ್ಹಣ್ಚ್ಯಾಕ್ ದುಬಾವ್ಚ್ ನಾ.
ತಶೆಂಚ್ ಅತ್ಮಿಕ್ ಸಂಗ್ತೆಚಿ
ಲಡಾಯ್, ಕೊಶೆಡ್ದಾಚಿ ಝಡ್ತಿ, ಜಿವಿತ್ ಮ್ಹಳ್ಯಾ ಕರೆಜ್ಮಾಚೊ
ಪಾಶಾಂವ್ ಆನಿ ಥಂಯ್ ಥಾವ್ನ್ ಜಿವಂತ್ಪಣ್, ಕ್ರೀಸ್ತಿಂ ಮೂಳ್
ತತ್ವಾಂ, ವಾಚ್ಪ್ಯಾನ್ ಫಕತ್ ವಾಚುನ್ ಥಂಯ್ಚ್ ಸೊಡಿನಾಸ್ತಾಂ
ನಿಯಾಳ್ ಕರ್ಚಿ ತಸಲಿಂ ಚಿಂತ್ನಾಂ ಜಾವ್ನಾಸಾತ್. "ಜಿವಂತ್ಪಣ್", "ಹಿಂ
ವೈರಾಸಾ", "ಕಾರ್ಕೊಳಾಂತ್ ಮೊಡ್ಲೊಲೊ ಉಂಡೊ" ಆನಿ ಹೆರ್, ಮತಿಕ್
ಆನಿ ಕಾಳ್ಜಾಕ್ ಚಡ್ ಥರಾನ್ ಪ್ರಭಾವ್ ಘಾಲ್ತಾ.
ತಿತ್ಲೆಂಚ್
ನ್ಹಂಯ್ ಆಸ್ತಾಂ ಕವಿನ್ ಸಮಾಜೆ ಭಂವಾರಿಂ ಭೋವ್
ಗುಂಡಾಯೆನ್ ನದರ್ ಘಾಲ್ಯಾ. ತಾಚಾ ಕವಿತಾಂತ್ ಸಾರ್ಣಿ ಕುಂಟೆ,
ಮ್ಹೆಳೆಂ, ಕುಸಾಡಾಯ್, ದುಬ್ಳ್ಯಾ ಲೊಕಾಂಚಿ ಮಜ್ಬೂರಿ, ಅಮ್ಮಾಚಿ
ಪಿಂರ್ಗೊವ್ಣ್, (ತನಿಯ, ಲಿಂಗ, ದುಗ್ಗಚಿ) ನೀದ್, ಸಮಾಜೆಂತ್ಲೆ
ಅಸಮತೋಲನ್ ಧರ್ ಧರ್ ಮ್ಹಣ್ ದಾಕೊವ್ನ್ ದಿತಾ.
"ಫಾಂತ್ಯಾಚಿಂ..." ಕವಿತಾಂತ್ ಶಿಕ್ಪಾ ಥಾವ್ನ್ ವಂಚಿತ್ ಜಾಲ್ಲ್ಯಾ
ದುಬ್ಳ್ಯಾ ಭುರ್ಗ್ಯಾಂಕ್ ಕಾಟ್ ಫುಲಾಂಕ್ ಸರಿ ಕರ್ಚೆಂ ಏಕ್
ವ್ಯಂಗ್ಯ್ ಕವನ್ ಜಾವ್ನಾಸಾ. "ಹಾಂವ್ಯ್ ವೇಸ್ ಗಾಲ್ತಾಂ",
"WHY
ಖೊಂಕ್ಲಿ ಮಾಂಯ್", "ತುಮ್ಚಿ ಹಿ ನೀದ್ ಕಸಲಿ" ಕವಿತಾ
ದ್ವಾರಿಂ ನಿದೊನ್ ಯಾ ಕುಡ್ಡ್ಯಾಂಚೊ ನಟನ್ ಕರ್ಚ್ಯಾ ಸಮಾಜೆಚಿ
ಖರಿ ವ್ಹಳೊಕ್ ಆನಿ ಪಿತುಳ್ಚ್ ಭಾಯ್ರ್ ಘಾಲ್ತಾ.
ಇರಾಕಾಂತ್ ಜಾಂವ್ಚೆ ರಡ್ಣೆಂ, ರಗ್ತಾಚೆ ವಿಳಾಪ್ ಆನಿ ದೆಸ್ವಾಟ್
ಕಾಳ್ಜಾಕ್ ‘ಕಸ್ಕ್’ ಕರ್ನ್ ಭಾಲಿ ತೊಪ್ಲ್ಲೊ ಅನ್ಭೋಗ್ ದಿತಾತ್. ಕವಿ ಶಾರ್ಜಾಚಾ ರೆಂವೆರ್ ಜಿಯೆಲ್ಯಾರೀ, ತಾಚ್ಯಾ ಕವಿತಾ ದ್ವಾರಿಂ ತೊ
ಇರಾಕಾಚೊ ಏಕ್ ಫಾಪ್ಸೊನ್ ಗೆಲ್ಲೊ ನಾಗರಿಕ್ ತಶೆಂ ರಡ್ತಾ. ಕವಿ ಆಂಡ್ರುನ್ ಇರಾಕಾಚೆಂ ದುಃಖ್ ಪಿಂತ್ರಾಯ್ಲೆ ಬರಿಂ ಪ್ರಸ್ತುತ್
ಖಂಚಾಯ್ ಕವಿನ್ ವರ್ಣಿಲ್ಲೆಂ ಮ್ಹಜಾ ದಿಷ್ಟೆಕ್ ಯೇನಾ.
’ರಾಕನಾಕಗೊ ಚೆಡ್ವಾ ರಾಕನಾಗೊ’ ಕವಿತಾಂತ್ ಕವಿ ಮೊಗಾಚಿ ಭಾಸ್ ಬೋವ್ ನಾಜೂಕ್ ಥರಾನ್ ವರ್ಣಿಲ್ಯಾ. ’ಥೆಂಬೆ...’ಂತ್ ಉತ್ರಾಂತ್ ಥೆಂಬ್ಯಾ ಪರಿಂ ಮಟ್ವಿಂ ಜಾಲ್ಯಾರೀ ಮತಿಕ್
ಚಿಂತ್ನಾಚೊ ವ್ಹಾಳೊಚ್ ವ್ಹಾಳೊನ್ ಯೆತಾ. "ವ್ಹಳೂ ವ್ಹಳೂ ವ್ಹಾಳ್
ವ್ಹಾಳ್ಯಾ" ಕವಿತಾ, ಆಂಡ್ರುಚಿ ಕವಿತಾ ಸಂಸಾರಾಚಿ ಗ್ರೇಸ್ತ್ಕಾಯ್ ದಾಕಯ್ತಾ. ಥೊಡ್ಯಾ ಕವಿತಾಂತ್ ತೊಚ್ಚ್ ಕವಿತಾಂಚೊ ನಾಯಕ್
ಜಾವ್ನ್ ಉಲೈತಾ. "ಹಾಂವ್ ಆನಿ ತೊ", "ವೊಳಿ", "ಗುಂಡಾಯೆ ಥಾವ್ನ್", "ಸಗ್ಳೊಂಚ್ ಬದಲ್ಲೊಂ" ಕವಿತಾ ದ್ವಾರಿಂ ತೊ ತಾಚೊ ಖಾಸ್ಗಿ ಅನ್ಭೋಗ್ ಪಿಂತ್ರಾಯ್ತಾ. ಕವಿನ್ ಉಬೆ ಕರ್ಚೊ ತ್ಯೊ ಇಮಾಜ್ಯೊ/ಪ್ರತಿಮಾ,
ಸಂಕೇತ್ ಆನಿ ಅಲಂಕಾರ್ ನಿಜಾಯ್ಕಿ ವರ್ಣುಂಕ್ ಫಾವೊ.
ನಿಮಾಣೆಂ "ಖಡ್ಪಾ ಧೊಮೊಸ್" ಕವನ್ ಹ್ಯಾ ಬುಕಾಚೊ ಪ್ರಮುಕ್ ಉದ್ದೇಶ್ ದಾಕಯ್ತಾ. ಕವಿತೆಕ್ ಸಲ್ವೊಂಚೆ
ಗೂಣ್ ನಾಂತ್. ಕವಿತೆಚಿಂ ಲ್ಹಾರಾಂ ಖಡಪ್ ತಸಲ್ಯಾ ಚಿಂತ್ಪಾ ವಯ್ಲ್ಯಾನ್ ಪರತ್ ಪರತ್ ವ್ಹಾಳ್ತಾನಾ ಖಡಾಪ್ ಪಿಗಾಳ್ತಾ ಯಾ
ಮೊವಾಳ್ತಾ, ಕವಿತಾಚೊ ವ್ಹಾಳೊ ವಾಳ್ತೆಚ್ ಆಸ್ತಾ.
ವಯ್ರ್ ಸಾಂಗ್ಲ್ಲೆಬರಿ, ಹೊ ಬೂಕ್ ಕವಿ ಆಂಡ್ರುಚೊ ಪಯ್ಲೊ ಜಾಲ್ಲೆ ವರ್ವಿಂ
ತಾಚ್ಯೊ ಉಂಚ್ಲ್ಯೊ ಕವಿತಾ ಪುರಾ ಏಕಚ್ಚ್ ಪಾವ್ಟಿಂ ಫಾಯ್ಸ್
ಕರುಂಕ್ ಪ್ರಯತನ್ ಕೆಲ್ಲೆಂ ಬರಿಂ ಆಸಾ. ಭುರ್ಗ್ಯಾಂಚೊ ಕವಿತಾ ಹ್ಯಾ ಬೂಕಾಂತ್ ಸಜನಾತ್ಲೆ ಬರಿಂ ದಿಸ್ತಾತ್. ಏಕ್ ಯಾ ದೋನ್ ಕವಿತಾ ಸೊಡ್ಲ್ಯಾರ್ ಹೊ ಕವಿತಾ ಪುಂಜೊ ಪರಿಪೂರ್ಣ್ ಆಸಾ. ಬೂಕಾಚೊ ಭಾಯ್ಲೊ ವಿನ್ಯಾಸ್
ಬೊರೊ ಕರ್ನ್ ಪಿಂತ್ರಾಯ್ಲಾ. ಪ್ರಸ್ತಾವನ್ ದಿಲ್ಲೊ ಮಾನೆಸ್ತ್ ಕಿಶೂ, ಬಾರ್ಕೂರ್, ಹಾಚಿ ಉತ್ರಾ ಆನಿಂ ಕವಿತಾಚಿ
ಮಾಂಡಾವಳ್ ಸಂಕ್ಷಿಪ್ತ್ ಥರಾನ್ ಲಿಖ್ಲಾಂ. ಬೂಕಾಚೆ ಮೋಲ್ ಮ್ಹಕಾ ವಾಜ್ಬಿ ಮ್ಹಣ್ ಬೊಗ್ತಾ.
ಕವಿ ’ಆಂಡ್ರು ಎಲ್ ಡಿ’ಕುನ್ಹಾ’
ಆನಿ ’ಆಶಾವಾದಿ ಪ್ರಕಾಶನ್’ "ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ದ್ವಾರಿಂ
ಕಾಡ್ಲ್ಲೆಂ ಹೆಂ ಮೇಟ್ ಕೊಂಕ್ಣಿ ಸಾಹಿತ್ಯಾಕ್ ಗ್ರೇಸ್ತ್ ಕರುಂದಿ ಮ್ಹಣ್ ಹಾಂವ್ ಖಾಲ್ತೆಪಣಿ ಆಶೆತಾಂ.
(ಹೆಂ ಲೇಖನ್
ಕುವೇಯ್ಟಾಂತ್ ಫೆಬ್ರೆರ್ಚ್ಯಾ ಇಕ್ರಾವೆಚೆರ್ ಜಾಲ್ಲ್ಯಾ ’ಕವಿತಾ
ಪಾಠ್’ ಹಾಂತುನ್ ವಾಚುನ್ ಸಾಂಗ್ಲಾ.)
ಕವಿಚಾ ಉತ್ರಾಂನಿ:
ಮ್ಹಜಾ "ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ಪುಸ್ತಕಾಂತ್ಲ್ಯಾ ಕವಿತಾಂವಯ್ರ್ ಸಂವಾದ್ ಚಲವ್ನ್ ಮ್ಹಜಾ ಕವಿತಾಂತ್ಲೊ ಅನ್ಭೊಗ್ ಭೊಗುಂಕ್ ಜಮ್ಲ್ಲ್ಯಾ ಕುವೆಯ್ಟಾಂತ್ಲ್ಯಾ ಕಾವ್ಯಾರಸಿಕಾಂಕ್ ಮ್ಹಜೆ ಖಾಲ್ತೆ ಪ್ರಣಾಮ್. ಕಾವ್ಯಾ ಥಾವ್ನ್ ಸುಖಾಳ್ ಅನ್ಘೊಗ್ ಜೊಡ್ಚೊ ರಸಗ್ರಾಯಕ್ ಆನಿ ಸಹೃದಯಿ ಕವಿ ಭಿತರ್ ಉಮೆದಿಚಾ ಝರಿಚೆ ಉಮಾಳೆ ಚಡಂವ್ಕ್ ಸಕ್ತಾ. ತುಮ್ಚಾ ಬರ್ಯಾ ಮನಾ ವರ್ವಿಂ ಮ್ಹಜೆ ಭಿತರ್ಯ್ ಅಸಲ್ಯೊ ಉಮಾಳ್ಯಾಂಚೊ ಝರಿ ವ್ಹಾಳೊನ್ ಆಸಾತ್.
ಕಾವ್ಯಾ ಮುಖಾಂತ್ರ್ ಸುಖಾಳ್ ಅನ್ಭೊಗ್ ಜೊಡ್ಚೊ ಆನಿ ತೊ ಅನ್ಭೊಗ್ ವಾಂಟ್ಚೊ ಕಾವ್ಯಾಚೊ ಉದ್ದೇಶ್ ಮ್ಹಣ್ ಹಾಂವ್ ಮಾಂದ್ತಾಂ. ಹೊ ಅನ್ಭೊಗ್ ಜೊಡುಂಕ್ ಕವಿತಾ ವಾಚ್ಲ್ಯಾರ್ ಪಾವಾನಾ. ಕವಿತಾ ಭೊಗುಂಕ್ ಜಾಯ್. ತೆದ್ನಾಂ ರಸಗ್ರಾಯಕ್ ಕವಿಚಾ ಅನ್ಭೊಗಾ ಥಂಯ್ ಏಕ್ ಜಾವ್ನ್ ಸುಖ್ ಜೊಡ್ತಾ. ಹೊ ಸುಖಾಳ್ ಅನ್ಭೊಗ್ ಲವ್ಕಿಕ್ ಸಂತೊಸ್ ನ್ಹಯ್. ಕವಿಚೊ ಸಂಸಾರ್ ಕಲಾ ಸಂಸಾರ್. ಲವ್ಕಿಕ್ ಸಂಸಾರ್ ನ್ಹಯ್. ದುಖಾಂತ್ಯ್ ಸಂತೊಸ್ ಜೊಡ್ಚೊ ಗೂಣ್ ಕವಿಚೊ.
"ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ಪುಸ್ತಕಾಂತ್ ಪಾಟ್ಲ್ಯಾ ಅಟ್ರಾ ವರ್ಸಾಂನಿ ಬರಯಿಲ್ಲಿಂ ಮ್ಹಜ್ಯಾ ಸಂಗ್ರಹಾಂತ್ ಆಸ್ಲ್ಲಿಂ ಕವಿತಾಂ ಆಸಾತ್. ಸಭಾರ್ ಆದ್ಲಿಂ ಕವಿತಾಂ ಹಾಂವೆಂ ಹೊಗ್ಡಾಯ್ಲ್ಯಾಂತ್. ತ್ಯಾ ವೆಳಾಚಾ ಅನ್ಘೊಗಾಚಾ ಆನಿ ಸ್ಪೂರ್ಥೆಚಾ ಘಡ್ಯೆ ಉಮಾಳುನ್ ಆಯಿಲ್ಲಿಂ ಕವಿತಾಂ ಆತಾಂ ಪರತ್ ಬರಯಾಂ ಮ್ಹಳ್ಯಾರ್ ಬರಂವ್ಕ್ ಜಾಯ್ನಾ. ದೆಕುನ್ ಹಾಂಗಾ ಜಮ್ಲ್ಲ್ಯಾ ಕವಿಂಕ್ ಏಕ್ ಉಲೊ. ತುಮ್ಚಿಂ ಕವಿತಾಂ ಚತ್ರಾಯೆನ್ ಸಾಂಬಾಳುನ್ ದವರಾ.
ಅನ್ಘೊಗಾಚೊ ಈಟ್ ನಾತ್ಲ್ಯಾರ್ ಕವಿತಾ ಘಡಾನಾ. ಕವಿಚೆಂ ಕಲ್ಪನಾಚಿ ಉಂಚಾಯ್ ತಾಣೆ ಜೊಡ್ಲ್ಲ್ಯಾ ಅನ್ಭೊಗಾಚೆರ್ ಹೊಂದೊನ್ ಆಸ್ತಾ. ಮ್ಹಜ್ಯಾ ಕಾವ್ಯಾಘೊಸಾಂತ್ ವೆಯಕ್ತಿಕ್ ಕವಿತಾ ಚಡ್ ಅಸಾತ್. ಹಾಂವ್ಚ್ ಕವಿತೆಚೊ ನಾಯಕ್ ಜಾಲಾಂ. "ಗುಂಡಾಯೆ ಥಾವ್ನ್" ಆನಿ ಹಾಂವ್ "ಸಗ್ಳೊಂಚ್ ಬದಲ್ಲೊಂ" ಕವಿತಾಂತ್ಲಿಂ ಭೊಗ್ಣಾಂ ಎಕಾಚ್ ಥರಾಚಾ ಅನ್ಬೊಗಾ ವರ್ವಿಂ ವೆವೆಗ್ಳ್ಯಾ ಘಡ್ಯೆ ಉಮಾಳುನ್ ಆಯಿಲ್ಲಿಂ ಜಾವ್ನ್ ಆಸಾತ್. ಹ್ಯಾ ಸಮಾಜೆಂತ್ ಸುಶೆಗಾತ್ ಜಿಯೆಜಾಯ್ ತರ್ "ಕವಿಚಿ ನೀತ್" ಸಾಂಡಿಜಾಯ್ ಪಡ್ತಾ. ತಾರಾಂ ಲಾಗಿಂ ಪಾವೊಂಕ್ ಆಪ್ಲೆಂಪಣ್ ಸಾಂಡುನ್ ಧುಳಿಕಣ್ ಜಾಂವ್ಕ್ ಜಾಯ್ ಪಡ್ತಾ. ಹೆಂ ಭಿತರ್ಲ್ಯಾ ಕವಿಕ್ ಸೊಸಾನಾ. ತ್ಯಾ ವೆಳಾರ್ ಉದೆತಾತ್ ಅಸಲಿಂ ಕವಿತಾಂ. "ವ್ಹೊಳಿ" ಕವಿತಾ ಕವಿ ಮೆಲ್ವಿನ್ ರೊಡ್ರಿಗಸಾನ್ ಪಯ್ಲೆ ಪಾವ್ಟಿಂ ವಾಚ್ತಾನಾ ತಾಕಾ ತಾಂತುಂ ವೆವೆಗ್ಳೊ ಇಮಾಜ್ಯೊ ದಿಸ್ಲ್ಯೊ. ಪುಣ್ ಹಿ ಕವಿತಾಯ್ ಮ್ಹಜಿ ವೆಯಕ್ತಿಕ್ ಕವಿತಾ. ಮ್ಹಜ್ಯಾ ಬಾಬಾಚಾ ಉಡಾಸಾಚಿ. ಬಾಬ್ ಸರೊನ್ ಅಟ್ರಾ ವರ್ಸಾಂ ಜಾಲಿಂ ಸಿಮಿಸ್ತ್ರಿಂತ್ ಫೊಂಡಾರ್ ವಾತಿ ಝಳಾನಾಂತ್. ಫೊಂಡ್ ಸುಕ್ಲಾ. ಪುಣ್ ಬಾಬಾನ್ ಬಾಂದ್ಲ್ಲ್ಯೊ ಮಿರ್ಸಾಂಗೆಚೊ ವ್ಹೊಳಿ ವರ್ಸಾನ್ ವರ್ಸ್ ಜಿವ್ಯೊ ಜಾತಾತ್. ತ್ಯಾ ವ್ಹೊಳಿ ಭಿತ್ರ್ಲ್ಯಾ ಈಟಾ ವರ್ವಿಂ ವರ್ವಿಂ ತಣ್ ತ್ಯಾ ವ್ಹೊಳಿಂಚೆರ್ ವ್ಹಾಡ್ತಾನಾ ಹಾಂವ್ ಗಾಂವಾಕ್ ರಜೆರ್ ಗೆಲ್ಲ್ಯಾವೆಳಿಂ ಹ್ಯೊ ವ್ಹೊಳಿ ಜಿವ್ಯಾ ಫೊಂಡಾಪರಿಂ ದಿಸ್ತಾತ್. ಬಾಬಾಚಾ ಉಡಾಸಾನ್ ಮ್ಹಜ್ಯೊ ಕವಿತಾ ವ್ಹೊಳಿ ಹ್ಯಾ ವ್ಹೊಳಿಂ ಪರಿಂ ಈಟಾಳ್ ಕರುಂಕ್ ಪೆಚಾಡ್ತಾನಾ ಮ್ಹೆಳ್ಚೊ ತೊ ಅನ್ಭೊಗ್ ಹಾಂವೆಂ ವೊಳಿ ಕವಿತೆಂತ್ ವ್ಹಾಳಯ್ಲಾ.
ಥೊಡಿಂ ಕವಿತಾಂ ಸಮಾಜೆಂತ್ಲಿ ಅನೀತ್, ಅನ್ಯಾಯ್ ಆನಿ ದುಬ್ಳೆಂಪಣಾ ಥಂಯ್ ಸ್ಪಂದನ್ ಜಾವ್ನ್ ಬರಯ್ಲ್ಯಾಂತ್. "ಸಾರ್ಣಿ ಕುಂಟೆ" ಕವನ್ ಮಂಗ್ಳುರ್ ಹಂಪನ್ ಕಟ್ಟೆ ಪರ್ನ್ಯಾ ಬಸ್ಸ್ಟ್ಯಾಂಡಾ ಲಾಗಿಂ ಮುನ್ಸಿಪಾಲಿಟೆಚೆ ಕಾಮಾಗಾರ್ ಸದಾಂಯ್ ತ್ಯಾ ಘಾಣಿಂತ್ ಕಸ್ತಳ್ ಕಾಡ್ಚೆಂ ಪಳೆವ್ನ್ ಬರಯಿಲ್ಲೆಂ. "ಹಿ ತುಮ್ಚಿ ನೀದ್ ಕಸಲಿ" ಕವನ್ ಥಕೊನ್ ಬಸ್ಸ್ಟ್ಯಾಂಡಾನಿ ನಿದೊನ್ ಪಡ್ಲ್ಲ್ಯಾ ಅಸಲ್ಯಾಚ್ ದುಬ್ಳ್ಯಾ, ಸಮಾಜೆನ್ ಕೀಳ್ ಮ್ಹಣ್ ಲೆಕ್ಚಾ ಮ್ಹನ್ಶ್ಯಾಂವಿಶಿಂ ತಾಂಕಾ ಜಾಗಯಾಂ ಮ್ಹಣ್ ಮ್ಹಜಾ ಕವಿಕ್ ಮನ್ ಜಾತಾನಾ ಬರಯಿಲ್ಲೆಂ. "ಫಾಂತ್ಯಾಚಿಂ" ಕವನ್ಯ್ ಅಸಲ್ಯಾಚ್ ಬೊಂಗ್ಣಾಚೆಂ. ಶಿಕ್ಪಾ ಥಾವ್ನ್ ವಂಚಿತ್ ಜಾಲ್ಯಾ ದುಬ್ಳ್ಯಾ ಭುರ್ಗ್ಯಾಂಕ್ ಕಾಟ್ ಫುಲಾಂಕ್ ಸರಿ ಕರ್ನ್ ಸುಮಾರ್ ಪಂದ್ರಾ ವರ್ಸಾಂ ಅದಿಂ ಬರಯಿಲ್ಲೆಂ ವ್ಯಂಗ್ಯ್ ಕವನ್ ಹೆಂ.
"ಬಾಂಯ್" ಕವಿತಾ ವಿಶಿಂ ಸಬಾರ್ ಜಣಾಂನಿ ಅಭಿಪ್ರಾಯ್ ದಿಲ್ಯಾ. ಆಮ್ಚ್ಯಾ ಸಂಸ್ಕ್ರತಿಚಾ ಗತಿ ವಿಶಿಂ ಬರಯಿಲ್ಲೆಂ ವೆಂಗ್ ಕವನ್ ಹೆಂ. ಪುರ್ವಜಾಂನಿ ಸಾಂಬಾಳುನ್ ವೆಲ್ಲ್ಯಾ ಸಂಸ್ಕ್ರತೆಚೊ ಶಿರೊ ಕಾತರ್ನ್ ಆಜ್ ಆಮಿ ಫಕತ್ ಮಾಲ್ಘಡ್ಯಾಂನಿ ಸಾಂಬಾಳೂನ್ ದವರ್ಲ್ಲ್ಯಾ ದಾಯ್ಜಾಚೊ "ಉಡಾಸ್" ಮಾತ್ರ್ ಕಾಡ್ತಾಂವ್. ಬಾಬಾಕ್ ಆಸ್ಲ್ಲೆಂ ಬಳ್ ಪುತಾಕ್ ನಾ (ಬಾಬಾನ್ ಬಾರಾ ಮೂಂಡ್ ಕೊಂಡ್ಲ್ಯಾರ್, ಪುತಾಕ್ ಸ ಮೂಂಡ್ ಖೊಂಡುಕ್ ಮಾತ್ರ್ ತಾಕತ್ ಆಸಾ). ನಾತ್ವಾಂಕ್ ಕೊಂಕ್ಣಿ ಸಂಸ್ಕ್ರತಿ ಥಂಯ್ ಹಾಸೊಂಕ್, ಅಣ್ಕುಂಕ್ ಆನಿ ಶೆಶ್ಟಾಯೊ ಕರುಂಕ್ ಮಾತ್ರ್ ಕಳ್ತಾ. ಕವಿತೆಂತ್ಲೆಂ ಮುನ್ಸಿಪಾಲಿಟೆಚೆಂ ಉದಕ್ ಕೃತಕ್ಪಣಾಚೆಂ ಸಂಕೇತ್.
"why" ಖೊಂಕ್ಲಿ ಮಾಂಯ್ ಕವನ್ ವೆಂಗ್ ಕವನ್ ತರೀ ಹಾಂವೆಂ ಗಲ್ಫಾಂತ್ ಘಡ್ಚಾ ನೀಜ್ ಸಂಗ್ತಿ ಥಂಯ್ ಬೋಟ್ ಜೊಕ್ಲಾಂ. ಭುರ್ಗಿಂ ಪರ್ಗಾವಾಂತ್ ಪಾವ್ತಾನಾ ಅವಯ್ ಬಾಪಯ್ ಗಾವಾಂತ್ ಎಕ್ಸುರಿಂ ಜಾಲ್ಯಾಂತ್. ಗಲ್ಫಾಂತ್ ಬಾಳಾಂತ್ ಜಾಂವ್ಚೆ ಘಡ್ಯೆ ಧುವೆಕ್ ಆನಿ ಸುನೆಕ್ ಆವಯ್ಚೊ ಉಡಾಸ್ ಯೆತಾ ಆನಿ ತಿಕಾ ಗಲ್ಫಾಕ್ ಯೇವ್ಚೆಂ ಭಾಗ್(?) ಮೆಳ್ತಾ. ಯೆದೊಳ್ ಜಾಯ್ನಾತ್ಲ್ಲಿ ವಿಸಾ ತ್ಯಾ ವೆಳಾರ್ ಜಾತಾ. ಹಾಂಗಾ ತಿಣೆ ತೀನ್ ಮಹಿನೆ ಕಾಮಾಚಾ ಚೆಡ್ವಾಪರಿಂ ಕಾಮ್ ಕರಿಜಾಯ್ ಪಡ್ತಾ. ಆಪ್ಲ್ಯಾ ಪ್ರಾಯೆಸ್ತ್ ಪತಿಕ್ ಗಾಂವಾಂತ್ ಚೊಡ್ನ್ ಹಾಂಗಾ ಆಯಿಲ್ಲ್ಯಾ ತಿಚಾ ಭೊಗ್ಣಾಂಕ್ ಲೆಕ್ತೆಲಿಂ ಕೊಣೀ ನಾಂತ್. ನಾತ್ರಾಂ ಕೊಂಗ್ಲಿಶ್ ಉಲಯ್ತಾತ್. ತಾಂಕಾ ಉಡಾಸ್ ಆಬಾಚೊ ನಂಯ್ ತಾಚಾ ತಾಂಬ್ಡ್ಯಾ ಕಾಶ್ಟೆಚೊ ಮಾತ್ರ್.
ನಿಮಾಣೆ ಖಡ್ಪಾ ಧೊಮೊಸ್ ಕವನ್ ಮ್ಹಜ್ಯಾ ಪುಸ್ತಾಕಾಚಿ ಠರಾವಣ್ ಉಚಾರ್ತಾ (theme) ಕವಿತೆಕ್ ಚಲ್ವೊಂಚೆ ಗೂಣ್ ನಾಂತ್. ಕವಿತೆಚಿಂ ಲ್ಹಾರಾಂ ಖಡ್ಪಾ ಮನಾ ವಯ್ಲ್ಯಾನ್ ಪರತ್ ಪರತ್ ವ್ಹಾಳ್ತಾನಾ ಖಡಾಪ್ ಜಾತಾ ಖಾಲ್ತೆಂ, ಕಾವ್ಯೆಂ ಜಾತಾ ವರ್ತೆಂ.
ಮ್ಹಜಾ ಕವಿತಾಂನಿ ಹಾಂವೆಂ ಭೊಗ್ಣಾಂಕ್ ಚಡ್ ಮಹತ್ವ್ ದಿಲಾ. ಕಾವ್ಯಾ ಸ್ಪೂರ್ಥೆ ವೆಳಿಂ ಆಪಾಪಿಂಚ್ ವ್ಹಾಳೊನ್ ಆಯಿಲ್ಲೊ ಅಲಂಕಾರ್ ಕವಿತೆಂತ್ ಪಡ್ಲಾ. ಚಡಿತ್ ಅಲಂಕಾರ್, ಪ್ರಾಸ್ ದೀವ್ನ್ ಸೊಭಂವ್ಚೆಂ ಪ್ರೇತನ್ ಹಾಂವೆ ಕರುಂಕ್ ನಾ. ಹೊ ಊಣ್ ಮ್ಹಜ್ಯಾ ಮುಖ್ಲ್ಯಾ ಕವಿತೆಂನಿ ಭರ್ತಿ ಕರುಂಕ್ ಪೆಚಾಡ್ತಾಂ
ಮ್ಹಜಿಂ ಕವಿತಾಂ ಪುಸ್ತಕಾ ರುಪಾರ್ ಪ್ರಕಟ್ ಕರುಂಕ್ ಹಾಂವೆ ದಾಕಯಿಲ್ಲಿ ಆಳ್ಸಾಯ್ ಸೊಸುಂಕ್ ಜಾಯ್ನಾಸ್ತಾನಾ, ಸದಾಂಚ್ ಮ್ಹಳ್ಯಾಪರಿಂ ಮ್ಹಜ್ಯಾ ಪಾಟಿಕ್ ಪಡೊನ್ ಮ್ಹಜಿಂ ಕವಿತಾಂ ಸಂಗ್ರಹ್ ಕರ್ನ್ ಹೆಂ ಪುಸ್ತಕ್ ಪ್ರಕಟ್ ಕರ್ನ್ ಮ್ಹಜಾ ಕವಿತಾಂಕ್ ಉಜ್ವಾಡ್ ದಿಲ್ಲ್ಯಾ ಆಶಾವಾದಿ ವಲ್ಲಿ ಕ್ವಾಡ್ರಸಾಕ್ ಹಾಂವ್ ಋಣಿ.
ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ
ವ್ಹಳೂ ವ್ಹಳೂ ವ್ಹಾಳ್
ಮ್ಹಜ್ಯಾ ಕಾಳ್ಜಾಚೊ ವ್ಹಾಳೊ ವ್ಹಳೂ ವ್ಹಳೂ ತುಮ್ಚಾ ಕಾಳ್ಜಾಂತ್ ರಿಗೊನ್ ತುಮ್ಕಾಂ ಸುಖಾಳ್ ಅನ್ಭೊಗ್ ದಿತ್ ತರ್ ಹಾಂವ್ ದಾದೊಶಿ. ಕವಿತೆಚೊ ಮೋಗ್ ತುಮ್ಚೆಂ ಜಿವಿತ್ ಗೋಡ್ ಆನಿ ಸುಖಾಳ್ ಕರುಂ ಮ್ಹಣ್ ಮಾಗ್ತಾಂ.
ತುಮ್ಚೊ ಅಭಿಮಾನಿ
ಆಂಡ್ರ್ಯೂ ಎಲ್ ಡಿ’ಕುನ್ಹಾ
10.02.2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
