ಕವಿತಾकविताPoem
ಘಾಲ್ತೆಲ್ಯಾಂಕ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚಿ ಕವಯತ್ರಿ - 12
ಸೂತ್ರ್ 12: ಶೆಣ್ ಘಾಲ್ತೆಲ್ಯಾಂಕ್
ವಾಯ್ಲೆಟ್ ಜೆ. ಪಿರೇರಾ, ಕುಲ್ಶೇಕರ್
ಶೆಣ್, ಘಾಣ್, ಕವಿ ಆನಿ ಕವಿತ್ವಾ
ದೆವಾನ್ ರಚ್ಲ್ಲಿ ಉಂಚ್ಲಿ(?) ರಚ್ನಾಂ ’ಮನಿಸ್’. ಆನಿ ಮನ್ಶಾನ್ ಮನ್ಶಾಂ ಮಧೆಂ ಉಭೆ ಕೆಲ್ಲೆ ದೊರೆ, ಎಕಾಮೆಕಾ ವಿಂಗಡ್ ಕರುನ್ ರಚನ್ ಕೆಲ್ಲೆ ವೆವೆಗ್ಳೆ ಭೇದ್, ಎಕಾಮೆಕಾ ಉಂಚ್, ನೀಚ್ ಮ್ಹಣ್ ಧಾಖಂವ್ಕ್ ಕೆಲ್ಲೆ, ಕರ್ಚೆ, ಕರುನ್ ಆಸ್ಚೆ ವೆವೆಗ್ಳೆ ಖೆಳ್ ಖರೆಚ್ಚ್ ಜಾವ್ನ್ ಅಧ್ಭುತ್ಚ್ ಸಯ್. ದೆಕುನ್ ಆಜ್ ಮನಿಸ್ ಅಪ್ಣಾಕ್ ಹೆರಾಂಚ್ಯಾಕೀ ಉಂಚ್ಲೊ ಮ್ಹಣ್ ರುಜು ಕರುಂಕ್ ಜಾಯ್ತೆ ರಿತಿನ್ ವದ್ದಾಟ್ತಾ. ಕೆದ್ನಾಂ ಜಾತ್-ಧರ್ಮಾಚಿಂ ನಿಬಾಂ, ಕೆದ್ನಾಂ ಸಂಯ್ಬ್-ಕುಳಿಯೆಚಿಂ ನಿಬಾಂ, ಆನಿ ಕೆದ್ನಾಂ ಗಾಂವ್-ಪ್ರಾಂತ್ಯಾಚಿಂ ನಿಬಾಂ. ದೆಕುನ್ ಅಜೂನ್ ಸಯ್ತ್ ಕಾತಿ ಕಾತಿ ಮಧೆಂ, ಜಾತಿ ಜಾತಿ ಮಧೆಂ ದುಸ್ಮಾನ್ಕಾಯ್ ಆಸಾ, ವಾಡೊನ್ಂಚ್ ಆಸಾ.
ಹ್ಯಾ ಸಂದರ್ಭಾರ್ ಆಮಿ, ದೆವಾನ್ ವಿಂಚುನ್ ಕಾಡ್ಲೆಲಿ ಭಾಗೆವಂತ್ ಕ್ರಿಸ್ತಾಂವ್ ಪರ್ಜಾ, ಜಿ ಏಕ್ ಕುರ್ಲ್ಯಾಂಚಿ ಸಮಾಜ್ ಜಾವ್ನ್ ಜಿಯೆತೆಲಿಂ ’ಅಥ್ವಿಂ?’ ಕಶಿಂ ಅಥ್ವಿಂ? ತೆಂಪಾಧಿಂ ತ್ಯಾ ಮಲ್ಬಾರಿಂಕ್ ಹಲ್ಕ್ ಕರ್ನ್ ಜಿಯೆಲ್ಲಿಂ ಆಜ್ ತಾಂಚೆಮುಖಾರ್ ಆಮಿ ಖಂಯ್ ಆಸಾಂವ್? ಕಿತ್ಯಾಕ್? ಹೆಂ ಚಿಂತುಂಕ್ ಕೊಣಾಕ್ ಪುರ್ಸತ್ ಆಸಾ?
ಆಯ್ಲೆವಾರ್ ಸ್ಟಾರ್ ಟಿವಿಚ್ಯಾ ’ವೋಯ್ಸ್ ಆಫ್ ಇಂಡಿಯಾ’ ಪ್ರೋಗ್ರಾಮಾಂತ್ ಜಿಕ್ಲೆಲ್ಯಾಂಕ್ ಇನಾಮ್ ದಿಂವ್ಚ್ಯಾಕ್, ಭಾರತಾಚಿ ಕೊಗುಳ್ ಗಾವ್ಪಿಣ್ ಲತಾ ಮಂಗೇಶ್ಕರಾಕ್ ವೆದಿಕ್ ಆಪವ್ನ್ ಅಸೊ ಮಾನ್ ಕೆಲೊ ಮ್ಹಳ್ಯಾರ್, ದೆಖ್ತೆಲ್ಯಾ ಸರ್ವಾಂಕ್ ಎಕಾ ರಿತಿಚಿ ಹುಮೆದ್ ತಾಂಚ್ಯಾ ಶಿರಾಂ ಶಿರಾಂನಿ ಭರ್ಚಿ ದಿಸ್ತಾಲಿ. ಜರ್ ಕೊಂಕ್ಣೆಂತ್ ಹಿ ಘಡಿ ಉದೆಲ್ಲಿ ತರ್ ಕಶೆಂ ಜಾತೆಂ ಮ್ಹಳ್ಳೆಂ ಘಡ್ಯೆಚೆಂ ಕಲ್ಪನ್ ಹಾವೆಂ ಕೆಲೆಂ, ತೆದ್ನಾಂ ತ್ಯಾ ಕಲ್ಪನಾಂತ್ ಕೊಣ್ ಥೊಡೆ ವೆದಿಕ್ ಯೇವ್ನ್ ಲತಾಕ್ ಸವಾಲ್ ಕರ್ತಾಲೆ ’ತುಕಾ ಶಾಕಿರಾಪರಿಂ ಪೆಂಕಾಡ್ ಹಾಲವ್ನ್ ಗಾಂವ್ಚಿ ಶ್ಯಾಥಿ ನಾ, ಆವ್ರಿಲ್ ಲ್ಯಾವಿಗ್ನೆಪರಿಂ ತಾಳೊ ಕಾಂಪಂವ್ಕ್ ಕಳಿತ್ ನಾ, ಸೆಲಿನ್ ಡಿಯೋನಾಪರಿಂ ಲಾಂಬಾಯೆಕ್ ಊಂಚ್ ತಾಳ್ಯಾನ್ ಗಾಂವ್ಚಿ ಶ್ಯಾಥಿ ನಾ, ಮುರಾಯಾ ಕ್ಯಾರಿಪರಿಂ ವೇರಿಯೇಶನ್ ನಾ, ಬ್ರಿಟ್ನಿ ಸ್ಪಿಯರ್ಸಾನ್ ಗಾಯ್ತಾನಾ ಭಗ್ಚೆಂ ಆಕರ್ಶಣ್ ತುವೆಂ ಗಾಯ್ತಾನಾ ಭಗಾನಾ, ಜೆನಿಫರ್ ಲೋಪೆಜಾಪರಿಂ ವೀಕ್ಶಕಾಂಕ್ ನಾಚಂವ್ಚಿ ಕಲಾ ತುಕಾ ನಾ, ತುವೆಂ ಬ್ರಾಯನ್ ಆಡಮ್ಸಾಚಿಂ ಪದಾಂ ಆಯ್ಕಲ್ಯಾಂತ್ವೆ? ತುವೆಂ ಲಾಯ್ನಲ್ ರಿಚಿಚಿಂ ಪದಾಂ ಆಯ್ಕಲ್ಯಾಂತ್ವೆ? (ಹೆ ಪರ್ನೆ ಜಾಲೆ ತರ್); ತುವೆಂ ಎನ್ರಿಕ್ ಇಗ್ಲೇಶಿಯಸಾಚಿಂ ಪದಾಂ ಆಯ್ಕಲ್ಯಾಂತ್ವೆ? ತುವೆಂ ರಿಕಿ ಮಾರ್ಟಿನಾಚಿಂ ಪದಾಂ ಆಯ್ಕಲ್ಯಾಂತ್ವೆ? - ಕೊಣಾಲಾಗಿಂ ಆಮಿ ವಾದ್ ಕರ್ಚೊ? ಕೆದಾಲಾಗಿಂ?’ ಅಶೆಂ ಸವಾಲಾಂ ಕರುನ್ ಲತಾ ಮಂಗೇಶ್ಕರಾಕ್ ತಿಚ್ಯಾ ಗಾಯ್ಲೆಲ್ಯಾ ಜಿಣ್ಯೆಕ್ ’ಕೇದ್’ ಮ್ಹಣ್ ಹಲ್ಕ್ ಕೆಲ್ಲೆಂ ತರ್ ಕಶೆಂ ಭಗ್ತೆಂ?
ಪಾಡ್ಕ್ಯಾಚ್ಯಾ ಕಾನಾಂಕ್ ವ್ಹಾರೆಂ ರಿಗ್ಲ್ಯಾರ್ ಕಿತೆಂ ಜಾತಾ ಮ್ಹಳ್ಳೆಂ ಸರ್ವ್ ಜಾಣಾಂತ್, ಪಿಶ್ಯಾಂಪರಿಂ ಉಡ್ಕಾಣಾಂ ಘಾಲುನ್ ಮೆಳ್ಲ್ಲ್ಯಾಂಕ್ ಹಾಂಡುಂಕ್ ವೆತಾ ತೊ ಪಾಡ್ಕೊ. ತೆಚ್ಚ್ಪರಿಂ ಎದೊಳ್ ಖಂಯ್ಗೀ ಆಸ್ಚಾಂಕ್ ಎಕ್ಚ್ಚ್ ಪಾವ್ಟಿಂ ಆಂಗಾರ್ ಖಂಯ್ಚಿಗೀ ಪಿಶಿ ನಾಡ್ ಯೇತ್ ಜಾಲ್ಯಾರ್ ಜಾಂವ್ಚಿ ಗತ್ಯೀ ಹಿಚ್ಚ್. ಅಶೆಂ ಪಳೆಂವ್ಕ್ ಗೆಲ್ಯಾರ್ ಆಮ್ಚಾ ದೇಶಾಂತ್ ಸರ್ವಾಂಕ್ ಉಲವ್ಪಾಚೆಂ ಸ್ವಾತಂತ್ರ್ ಆಸಾ, ದೆಕುನ್ ಕಿತೆಂಯ್ ಉಲವ್ಯೆತ್, ಪೊಟ್ಟು ಫಾತ್ರಾಕ್ ಸಯ್ತ್ ಲಂಕಡ್ ಮ್ಹಣ್ಯೆತ್, ಭಾಂಗಾರ್ ರುಪೆಂ ಸಯ್ತ್ ಖಚ್ರೊ ಮ್ಹಣ್ಯೆತ್. ಪುಣ್ ಹಾಂಣಿ ಸಾಂಗ್ಲೆಂ ಮ್ಹಣೊನ್ ಗೊಡೊ ಗಾಡಾಂವ್ ಜಾತಾ? ಹಸ್ತ್ ಉಂದಿರ್ ಜಾತಾ? - ದೇವ್ ಜಾಣಾ! ಹಾಂವ್ ನೊಕೊ!!
ಹಿಚ್ ಪರಿಗತ್ ಸದ್ದ್ಯಾಕ್ ಕೊಂಕ್ಣೆಚಿ. ಸಗ್ಳ್ಯಾನ್ ಕೇದ್ ಆನಿ ಕದ್ವಳ್. ಎಕಾ ಸುವಾತೆರ್ ಬರೆಂಗೀ ವಾಯ್ಟ್ಗೀ ಕಳಿತ್ ನಾಸ್ತಾಂ ’ಆಯ್ಲೆಂ ಜಶೆಂ ಗಾಯ್ಲೆಂ’ ಪುಣ್ ಕಿತ್ಲೆಂ ಬರೆಂ, ವಾ ಕಿತ್ಲೆಂ ವಾಯ್ಟ್ ಮ್ಹಳ್ಳೆಂ ಚಿಂತುಂಕ್ ನಾ - ಅಸಲೊ ವಾದ್ ಕರ್ಚೆ ಸಾಹಿತಿ. ಅನ್ಯೇಕಾ ಸುವಾತೆರ್ ಕೊಂಕ್ಣೆಂತ್ ಆಸ್ಚೆಂ ಸಕ್ಕಡ್ ಸಾರೆಂ ಆನಿ ಶೆಣ್ ಮ್ಹಣ್ಚೆ ಪಂಡಿತ್, ಹ್ಯಾ ಮಧೆಂ ಥೊಡ್ಯಾಂಕ್ ಕಿತೆಂಚ್ ಪಡೊಂಕ್ ನಾ, ತಾಂಚಿ ಸಾಹಿತಿಕ್ ಚೊರಿ ಭರಾನ್ ಚಾಲುಚ್ ಆಸಾ, ಆನಿ ಹೆಂ ಕೊಣಾಕ್ಯ್ ಕಳ್ಚೆಪರಿಂಯ್ ನಾ - ಕಿತ್ಯಾಕ್ ಆಮ್ಕಾಂ ಆಮ್ಚ್ಯಾ ಕೊಂಕ್ಣೆಂತ್ಲೆಂಚ್ ವಾಚುಂಕ್ ಜೆದ್ನಾಂ ಪುರ್ಸತ್ ನಾ ತರ್ ಹೆರ್ ಭಾಸಾಂಚೆಂ ವಾಚುಂಕ್ ಖಂಯ್ ಮನ್/ವೇಳ್ ಆಸಾ? ಆನಿ ಕೊಣ್ಯೀ ಎಕ್ಲ್ಯಾ ದೊಗಾಂಕ್ ಹಿ ಚೊರಿ ಕಳಿತ್ ಜಾಯ್ತ್ ತರ್, ತಾಚೆರ್, ತಾಚ್ಯಾ ಸಂತಾನ್ ಕುಟ್ಮಾಚೆರ್ ಝಡ್ತಿ ಸುರು. ತಿ ಝಡ್ತಿ ತಿತ್ಲ್ಯಾರ್ಚ್ ಸಂಪಾನಾ, ಬಗಾರ್ ಪರ್ಗಟ್ ಕೆಲ್ಲ್ಯಾ ಸಂಪಾದಕಾಕ್, ಪತ್ರಾಕ್ ವೆವೆಗ್ಳೆ ಆಣ್ಕಾಣೆ, ದುರ್ಸೊಣೆ, ನಾಂವಾಂ ಬದ್ಲುನ್ ಇಮೇಯ್ಲಾಂ. ಆನಿ ಬಾಂಯ್ತ್ ದರಬಸ್ತ್ ಮಾಣ್ಕೆ ಕಶೆಯ್ ಆಸಾತ್ - ತಾಂಚೆಂ ಕಾಮ್ ಫಕತ್ತ್ ಉಡಿ ಮಾರ್ಚೆಂ.
ದೆಕುನ್ ಜೊ ಕೊಣ್ ಆಮ್ಕಾಂ ರುಸ್ಚೆಂ, ಆಮ್ಕಾಂ ಧುಂಪಂವ್ಚೆಂ ಕರ್ತಾ ತೊ ಬರೊ, ತಶೆಂಚ್ ಜೊ ಕೊಣ್ ಆಮ್ಕಾಂ ಪಸಂದ್ ನಾಸ್ಚಾಂಕ್ ಯೆಟ್ತಾ, ವಾ ತಾಂಚ್ಯೊ ಖೊಡಿ ಕಾಡ್ತಾ, ತೊ ಉಂಚ್ಲೊ ವಿಮರ್ಶಕ್. ಪುಣ್ ಜೆದ್ನಾಂ ತೊಚ್ ವಿಮರ್ಶಕ್ ಆಮ್ಚಾ ಬರ್ಪಾಂಚೆರ್ ವಿಮರ್ಸೊ ಕರ್ತಾ, ತೆದ್ನಾಂ ತೊ ಖೊಡ್ಯಾರೊ, ತೊ ವ್ಯಂಗ್ಯ್, ನಂಜಾಳೊ. ಆನಿ ತೆದ್ನಾಂ ತ್ಯಾ ವಿಮರ್ಶಕಚೆಂ ಅಸ್ತಿತ್ವಾಚಿಂ ಸೊಧ್ನಾಂ ಜಾತಾತ್, ತಾಣೆಂ ಕೊಂಕ್ಣೆಂತ್ ಎದೊಳ್ ಕಿತೆಂ ಕೆಲಾಂ ಮ್ಹಳೆಂ ಲೇಖ್ ಯೆತಾ. ವ್ಹಾ! ಕಿತ್ಲೆಂ ಬರೆಂ ಚಿಂತಾಪ್ ನ್ಹಯ್? ಆಮ್ಚಾ ನಾಲಾಯಕ್ ಚಿಂತ್ಪಾಚಾ ಲೇಖಕಾಂಚೆ?.
ಹಾಂಗಾಸರ್ ಖಂಚೆಂ ಶೆಣ್ ಮ್ಹಣೊಂ? ಖಂಚೆಂ ನ್ಹಯ್ ಮ್ಹಣೊಂ? - ಆಮ್ಚೆ ಪಯ್ಕಿ ಹೆರಾಂಚೆಂ ಸಾಹಿತ್ಯ್ ವಾಚ್ತೆಲೆ ಕಿತ್ಲೆ ಆಸಾತ್? ಅಯ್ಯೋ - ಹೆರಾಂಚೆಂ ವಾಸ್ಚಾಕೀ, ದೋನ್ ಪೆಗ್ ಚಡ್ ಘೆವ್ನ್ ಬಾಜಾರಿ ಬಾಯ್ಲಾಂಪರಿಂ ಕೊಣಾ ಕೊಣಾಚ್ಯೊ ಖಬ್ರೊ ಕರುಂಕ್ ತರೀ ಹೆ ತಯಾರ್ ಪುಣ್ ಹೆರಾಂಚೆಂ ಸಾಹಿತ್ಯ್ ವಾಚುಂಕ್ ನ್ಹಯ್. ಹೆರಾಂಚಿ ಝಡ್ತಿ ಕರುಂಕ್ ಆಮಿ ಭೋವ್ ಅಪ್ವಂತ್, ಪುಣ್ ಆಮ್ಚ್ಯಾ ದೊಳ್ಯಾಂತ್ ಆಡೆಂ ಸೊಡ್, ದೊಂಗೊರ್ ಆಸ್ಲ್ಯಾರೀ ಕಿತ್ಯಾಕ್ ಆಮ್ಕಾಂ ದಿಸಾನಾ? ಹೆಂ ಶೆಣ್ ನಾಸ್ತಾಂ ಆನಿ ಕಿತೆಂ? ಪಯ್ಲೆಂ ಹೆಂ ಮತಿಂತ್ಲೆಂ ಶೆಣ್ ಪಯ್ಸ್ ಗೆಲ್ಲೆ ಖರಿತ್ ಆಮ್ಕಾಂ ಆಮ್ಚೆ ಭಾಯ್ಲೆಂ ಸರ್ವ್ ಶೆಣ್ಚ್ ದಿಸ್ತೆಲೆಂ ನ್ಹಯ್ಗೀ?.
ಪುಣ್ ಹ್ಯಾ ಪರಿಗತೆಂತ್ ಶೆಣಾಕ್ ರಸ್ಚಾ ಫ್ಯಾಕ್ಟೆರಿಂಕ್ ರಸ್ಚೆ ಕಾಂಯ್ ಉಣೆಂ? ಆನಿ ಅಶೆಂ ಶೆಣಾಕ್ ಪಾಟಿಂಬೊ ದಿಲ್ಲೆನಿಮ್ತಿಂಚ್ ನ್ಹಯ್ಗಿ ತಾಂಚೆಂ ಬೊಳ್ಕೆಂ ಭರ್ಚೆಂ? ಕೊಂಕ್ಣಿ ಕೊಣಾಕ್ ಪಡೊನ್ ಗೆಲಾಂ? ಆಮಿಂಚ್ ಕೊಂಕ್ಣಿ, ಆಮಿ ಕೆಲ್ಲೆಂ ಕೊಂಕ್ಣಿ, ’ಆಮಿ ಘಾಲ್ಲೆಂ ಅಮೃತ್ - ಹೆರಾಂಚೆಂ ಶೆಣ್’; ಹ್ಯಾ ಪರಿಗತೆಂತ್ ಕೊಂಕ್ಣೆಚೊ ನಿಜಾಯ್ಕೀ ಹುಸ್ಕೊ ಆಸ್ಚ್ಯಾಂನಿ ಶೆಣ್ ಖಂಯ್ಚೆಂ? ಆನಿ ಶೆಣ್ ಛಾಪ್ಚಿ ಭಾಟಿ, ಕುರ್ವೆಂ, ಕುರ್ಪೊಣ್, ಕಾಂಟ್... ಅಶೆಂ ಮೆಜುನ್ ವೇಳ್ ವಿಭಾಡ್ಚ್ಯಾಕೀ, ಕೊಂಕ್ಣೆಂತ್ ನಾಸ್ಚೆಂ (?) ಅಮೃತ್ ರಚುಂಕ್ ಗೆಲ್ಯಾರ್ ಬರೆಂ ನ್ಹಯ್ಗಿ? ಪಯ್ಲೆಂ ರಚುಂದಿತ್, ಉಪ್ರಾಂತ್ ವಾಂಟುಂದಿತ್, ಮ್ಹಾಕಾಯ್ ಏಕ್ ಚಿಮ್ಟಿ ಮೆಳತ್ ತರ್ ಹಾಂವ್ಯೀ ತೆಂ ಅಮೃತ್ ಭಕ್ತೆನ್ ಸೆವ್ತಲೊಂ.
ಆಯ್ಲೆವಾರ್ ಕೊಂಕ್ಣೆಂತ್ ದರಬಸ್ತ್ ಕವಿ/ಬರಯ್ಣಾರ್ ಉದೆಲ್ಯಾತ್ ಮ್ಹಣ್ ಕೊಣೆಂಗೀ ಆಯ್ಲೆವಾರ್ ವಾದ್ ಮಾಂಡ್ಲೊ. ದುಸ್ರೊ ತಾಕಾ ಜವಾಬ್ ದೀವ್ನ್ ಮ್ಹಣಾಲೊ; ’ಭೋವ್ಶಾ ಆಜ್ ಕೊಂಕ್ಣೆಂತ್ ವಾಚ್ಪ್ಯಾಂಕೀ ಚಡ್ ಬರಯ್ಣಾರ್ ಆಸಾತ್’. ತಿಸ್ರೊ ವ್ಹಳೂ ಅಶೆಂ ಮ್ಹಣಾಲೊ; ’ಕೊಂಕ್ಣೆಂತ್ ಕವಿ ಚಡ್ಲ್ಯಾತ್ ಜಾವ್ಯೆತಾ, ಪುಣ್ ಕವಿತ್ವ್ ದಿಸಾನ್ದೀಸ್ ಸಂಕೀರ್ಣ್ ಜಾತೇಚ್ ಯೆತಾ’ ಖರೆಂಚ್! ಆನಿ ಹೆಂ ಕವಿತ್ವಾ ಮಾಪುಂಕ್ ಕಸಲೆಚ್ಚ್ ಪುರಸ್ಕಾರ್/ಇನಾಮ್/ಪ್ರಶಸ್ಥಿ ಸಕಾನಾಂತ್ ಮ್ಹಳ್ಳೆಂ ಅಪುಟ್ ಸತ್.
ಹ್ಯಾ ಮಯ್ನ್ಯಾಚೆಂ ಸೂತ್ರ್ ಎಕೆಕಾ ಕವಿನ್ ಎಕೆಕಾ ರಿತಿಚೆರ್ ಚಿಂತಾಪ್/ಆಟೊವ್ ಘಾಲ್ಲೊ, ತಾಂಚಿಂ ಕವಿತಾ ವಾಚ್ತಾಂ ಸುಸ್ತಾತಾ. ಹೆಂ ಎಕಾ ಕವಿಚ್ಯಾನ್ ಮಾತ್ರ್ ಸಾಧ್ಯ್.
ಕವಿಚಿ ತಾಂಕ್ ಅಧ್ಭುತ್, ತಿ ತಾಂಕ್ ಮೆಜ್ಚಿ ತಾಕ್ಡಿ ಬೊಲ್ತಿಚ್ಚ್, ತಿ ಸಕತ್ ಮಾಪ್ಚೆಂ ಮಾಪ್ ಅಥ್ವೆಂಚ್, ಆನಿ ತಿ ನದರ್ ಪಾರ್ಕುಂಚಿ ಶ್ಯಾಥಿ ಕವಿಂಕ್ ಮಾತ್ರ್ ಆಸ್ಯೆತಾ ಶಿವಾಯ್ ಕವಿಚೊ ’ಡೋಂಗ್’ ಕರ್ತೆಲ್ಯಾಂಕ್ ನ್ಹಯ್.
ಆತಾಂ ಹ್ಯಾ ಎಕಾ ಕವಯತ್ರಿಚಿ ಜರೂರ್ ಇಲ್ಲಿ ತರ್ಯೀ ವಾಖಣ್ಣಿ ಕರುಂಕ್ ಫಾವೊ, ಆಪ್ಲ್ಯಾ ದೊಗಾಂ ಬುರ್ಗ್ಯಾಂಚಿ ಶಿಕ್ಪಾಚಿ ಜತನ್ ಎಕಾ ಕುಶಿನ್ ತರ್, ದುಸ್ರೆ ಕುಶಿನ್ ಆಪ್ಲ್ಯಾ ಘರ್ಚೆಂ ಕಾಮ್, ಹಾಚೆ ಮಧೆಂ ಮೆಳ್ಲ್ಲೊ ವೇಳ್ ಕೊಂಕ್ಣೆಕ್ ಖರ್ಚುನ್, ತವಳ್ ತವಳ್ ಆಪ್ಲ್ಯಾ ಭಲಾಯ್ಕೆನ್ ಸಾಂಗಾತ್ ಸೊಡ್ಲ್ಯಾರೀ, ಎಕಾ ಅಪೂರ್ವ್ ರಿತಿಚ್ಯಾ ಸ್ಪೂರ್ತೆನ್ ಪಾಟ್ಲ್ಯಾ ಕಾಂಯ್ ಥೊಡ್ಯಾ ತೆಂಪಾ ಥಾವ್ನ್ ಹಿಣೆ ಕೆಲ್ಲೊ ವಾ ಕರುನ್ ಆಸ್ಚೊ ಕೊಂಕ್ಣಿ ವಾವ್ರ್ ಖರೊಚ್ ಜಾವ್ನ್ ಅಪುರ್ಭಾಯೆಚೊ. ಆಮ್ಚಿ ಕೊಂಕ್ಣಿ ಸಮಾಜ್ ಕುರ್ಲ್ಯಾಂಚಿ ಸಮಾಜ್ ಮ್ಹಳ್ಳೆಂ ಸತ್ ನಾಗ್ಡೆಂ ಸತ್. ದೆಕುನ್ ಕರ್ತೆಲೆ ಕೊಣ್ ನಾ ತರ್ಯೀ ವ್ಹಡ್ ನಾ, ಪುಣ್ ಕರ್ತೆಲ್ಯಾಂಕ್ ಹಾತ್ ಖೊಡಿ ಕಾಡ್ಚೆ, ತಾಂಚೆರ್ ಕೇದ್ ಉಡಯ್ತೆಲೆ, ತಾಂಚಿಂ ಖೆಳ್ಕುಳಾಂ ಕರ್ತೆಲೆ ಅಪಾರ್. ಆನಿ ಅಶೆಂ ಕರುನ್ ಆಪ್ಲಿ ಭಾದುರಿ ಪರ್ಗಟ್ ರಿತಿನ್ ಧಾಖವ್ನ್ ಹರ್ದೆಂ ಪೆಟ್ಚಾಂಚ್ಯಾ ಹಾತಾಂಕ್ ಕಾಂಕ್ಣಾಶಿವಾಯ್ ಹೆರ್ ಕಿತೆಂ ಸೊಭತ್? ಪುಣ್ ಹೊ ವಾವ್ರ್ ಜೆದ್ನಾಂ ಏಕ್ ಬಾಯ್ಲ್ ಕರಿತ್ ತರ್ ತಿಣೆಂ ಭಗುಂಕ್ ಜಾಯ್ ಜಾಲ್ಲೆ ಮಾನಸಿಕ್ ಆಟೆವಿಟೆ ನಿಜಾಯ್ಕೀ ಆಮ್ಕಾಂಚ್ ಲಜೆಕ್ ಘಾಲ್ಚೆ ತಸಲೆ. ಅಸಲ್ಯಾ ಬಾಯ್ಲಾಂಕ್ ಕಸಲಿಚ್ಚ್ ಮುಲಾಜ್ ನಾಸ್ತಾಂ ಖೊಡಿ ಕಾಡ್ಚ್ಯಾಂನಿ ಏಕ್ ಘಡಿ ತರ್ಯೀ ತ್ಯಾ ಬಾಯ್ಲೆಚ್ಯಾ ಜಾಗ್ಯಾರ್ ಆಪ್ಲ್ಯಾಚ್ಚ್ ಆವಯ್ಕ್, ಆಪ್ಲೆಚ್ಚ್ ಭಯ್ಣಿಕ್ ದವರ್ನ್ ಎಕಾ ಖಿಣಾಚೊ ತರ್ಯೀ ನಿಯಾಳ್ ಕೆಲ್ಲೊ ತರ್?ದೆಕುನ್
ಆಮ್ಚ್ಯಾ ಕೊಂಕ್ಣೆಂತ್ ಸ್ತ್ರೀ ಲೇಖಿಕಾಂ ನಾಂತ್, ಕಿತ್ಯಾಕ್ ಹ್ಯಾ ಮೊಸ್ರಾಚ್ಯಾ ತಳ್ಯಾಂತ್ ಪರತ್ ಪರತ್ ಕದ್ವಳ್ ಕರ್ತೆಲ್ಯಾ ದೆಂಕ್ಳ್ಯಾಂ ಮಧೆಂ ಜಿಯೆಂವ್ಚೆಂ ಮ್ಹಳ್ಳೊ ಕಾಂಠಾಳೊ ಭಗುನ್ ಭೋವ್ಶಾ ತಿಂ ಕೊಂಕ್ಣೆಪಯ್ಸ್ ರಾವೊನ್ ಮರ್ಯಾದಿಚಿ ಜಿಣಿ ಜಿಯೆತಾತ್ ಆಸ್ಯೆತ್, ಪುಣ್ ಥೊಡಿಂ ಮಾತ್ರ್ ವಿಶೇಸ್ ಸಕ್ತೆಚಿಂ. ತಾಂಚಿ ಸಕತ್ ಅಧ್ಭುತ್, ಜಶೆಂ ಬಾಯ್ ಗ್ಲೇಡಿಸ್ ರೇಗೊ ಆಜ್ ಕೊಂಕ್ಣೆಂಕ್ ಇತ್ಲೊ ವಾವ್ರ್ ಕರುನ್ ಆಸಾ, ತಿಚ್ಯಾಚ್ಚ್ ಪಾವ್ಲಾಂನಿ ಮ್ಹಜ್ಯಾ ನದ್ರೆಕ್ ಪಡ್ತಾ ಬಾಯ್ ವಾಯ್ಲೆಟ್ ಪಿರೇರ್.
ಪುಣ್ ಬಾಯ್ ವಾಯ್ಲೆಟಾಕ್ ಮಯ್ನ್ಯಾಚಿ ಕವಯತ್ರಿ ಕರುಂಕ್ ಆಮಿ ಖಂಡಿತ್ ಜಾವ್ನ್ ಕಸಲಿಂಚ್ ಸಿಂತಿಮೆಂತಾಂ ಘೆಂವ್ಕ್ ನಾಂತ್, ಬಗಾರ್ ತಿಚೆಂ ಅಪುರ್ಭಾಯೆಚೆಂ ಕವಿತಾ ವಾಚ್ತಾಂ ತುಮ್ಕಾಂಚ್ ಸುಸ್ತಾತೆಲೆಂ. ಮಯ್ನ್ಯಾಚಿ ಕವಯತ್ರಿ ಜಾಲ್ಲ್ಯಾ ಬಾಯ್ ವಾಯ್ಲೆಟಾಕ್ ರಾಸ್ ರಾಸ್ ಉಲ್ಲಾಸ್.
ವಿಶೇಷ್ ಇನಾಮ್
[ಡಾ|ಆಸ್ಟಿನ್ ಡಿ’ಸೋಜಾ ಪ್ರಭು ನಂತೂರ್/ಚಿಕಾಗೊ]
ಹಾಕಾ ಕೊಣ್ ಕವಿ ಮ್ಹಣ್ತಾ, ಆನಿ ಕೊಣ್ ಮುಖೆಲಿ ಮ್ಹಣ್ತಾ, ಕೊಣ್ ಲೇಖಕ್ ಮ್ಹಣ್ತಾ ತರ್ ಕೊಣ್ ಏಕ್ ಗೂಂಡ್ ಚಿಂತ್ಪಿ ಮ್ಹಣ್ತಾ. ದಾಯ್ಜಾಚೆರ್ ಹಾಚಿಂ ಸಭಾರ್ ಬರ್ಪಾಂ ಪರ್ಗಟ್ಲ್ಯಾಂತ್, ಜಾವ್ಯೆತಾ ಕವಿತಾ, ಲೇಖನಾಂ, ಜಾವ್ಯೆತಾ ಕಾಣಿ, ಜಾವ್ಯೆತಾ ವಿಶ್ಲೇಶಣಾಂ. ಪುಣ್ ಮ್ಹಾಕಾ ಹೊ ಅಜೂನ್ ಮುಖಾಮುಖಿ ಮೆಳೊಂಕ್ ನಾ ತರ್ಯೀ, ಏಕ್ ಆದರ್ಶ್, ಖಾಲ್ತೊ, ಸರ್ವಾಂಕ್ ಸರ್ವ್ ಕಾಳಾರ್ ಬರೆಂಚ್ ಚಿಂತ್ಚೊ ಆನಿ ಬರೆಂಚ್ ಕರ್ಚೊ. ಹಾಂವ್ ಕಾಂಯ್ ಹಾಂಗಾಸರ್ ಸಾಂತ್ ಆಂತೊನಿವಿಶಿಂ ಉಲಯ್ನಾಂ, ಬಗಾರ್ ಎಕಾ ಅಸಲ್ಯಾ ಕವಿವಿಶಿಂ, ಜೊ ಎಕ್ಲೊ ಮಾತ್ರ್ ಆಜ್ ಪರ್ಯಾಂತ್ ಸರಾಗ್ ಹರ್ಯೆಕಾ ಅವಸ್ವರಾಕ್ ಚುಕಾನಾಸ್ತಾಂ ಆಪ್ಲೆಂ ಕವಿತಾ (ವಾ ಕಿತೆಂಯ್ ಆಸೊಂ) ಧಾಡ್ತಾ.
ಸಂಸಾರಾಕ್ ಸಮಧಾನ್ ಕರುಂಕ್ ಆಸಾಧ್ಯ್ ಜೆದೊಳ್ ಪರ್ಯಾಂತ್ ಅಪ್ಣಾಕ್ ಸಮಧಾನ್ ನಾ - ಹೆಂಚ್ ಜಾವ್ನಾಸಾ ಹಾಚೆಂ ತತ್ವ್. ಹಾಚ್ಯಾ ಬರ್ಯಾ ಮನಾಕ್ ವರ್ಣುಂಕ್ ಮ್ಹಜೆಲಾಗಿಂ ಉತ್ರಾಂ ಉಣಿಂ ಆಸಾತ್. ಪುಣ್ ಕಾಳ್ಜಾಚ್ಯಾ ಗುಂಡಾಯೆ ಥಾವ್ನ್ ಇತ್ಲೆಂಚ್ ಸಾಂಗ್ತಾಂ - ದೇವ್ ಬರೆಂ ಕರುಂ ತಶೆಂಚ್ ಉಲ್ಲಾಸ್ ತುಕಾ ಬಾಬ್ ಆಸ್ಟಿನ್ ಡಿ’ಸೋಜಾ ಪ್ರಭು.
ಉತ್ರಾಂತ್ ಸೂತ್ರಾಂ - 12: ಶೆಣ್ ಘಾಲ್ತೆಲ್ಯಾಂತ್
[ವಾಂಟೆಲಿ ಜಾಲ್ಲಿಂ]
9. ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.
ಶೆಣ್, ಘಾಣ್, ಕವಿ ಆನಿ ಕವಿತ್ವಾ [ಮಯ್ನಾಚೆಂ ಕವಿತಾ]-
ವಾಯ್ಲೆಟ್ ಜೆ. ಪಿರೇರಾ
ಸಂಸಾರಾಚ್ಯಾ ಚ್ಯಾರಾಂಯೀ ಕೊನ್ಶ್ಯಾನಿ ಆನ್ನ್ಯಾಯ್ ಚಲ್ತಾ
ಋತು ಮನ್ಶ್ಯಾಂಸಂಗಿ ಆಜ್ಕಾಲ್ ಖೆಳ್ ಖೆಳ್ತಾ
ಭಂವ್ತಣ್ ಮೊಸೊರ್, ಹಗ್ಯಾಚೆ ಶೆಣ್ ಘಾಣ್ತಾ
ಹಾಂಗಾಸರ್ ಫಾರಿಕ್ಪಣಾಚೊ ಉಜೊ ಝಳ್ತಾ
ಹ್ಯಾ ಧರ್ತಿರ್ ಆಮಿಂ ಸರ್ವ್ ಆಸಾಂವ್ ಪಯ್ಣಾರ್
ನಾ ಮನ್ಶ್ಯಾಂ ಮತಿಂತ್ ಹ್ಯಾ ವಿಶಿಂ ಖಬಾರ್
ಆಪುಣ್ ಆಪ್ಣಾಕ್ ದೇವ್ ಸಮೇಸ್ತಾಂಕ್, ಹೆಂಚ್ಚ್ ರಜಾರ್
ಹಗ್ಯಾನ್ ವ್ಹಾಳ್ತಾ ದಿಸಾನ್ ದೀಸ್ ರಗ್ತಾ ಝರ್
ದಿಸಾನ್ ದೀಸ್ ಕೊಚಾವ್ನ್ ಧರ್ತಿ ಗರ್ಭಾಕ್
ಭಾಂದ್ಲ್ಯಾತ್ ರಾವ್ಳೆರಾಂ ಜಿಯೆಂವ್ಕ್ ಆಮ್ಚಾ ಸುಖಾಕ್
ಭಿರ್ಮತ್ ದುಬ್ಳ್ಯಾಂಚಿ ನಾ ಕಿತೆಂಚ್ ತಾಂಚ್ಯಾ ಪೊಟಾಕ್
ವೊರ್ವಿ ಚಡ್ತಾನಾ ನಾ ಪಾಯಾಕ್ ವೊಡ್ತಾನಾ ಮಾತ್ಯಾಕ್
ಮನ್ಶ್ಯಾ ಸಂಯ್ಭ್ ನ್ಹಂಯ್ಗೀ ಆಮ್ಚೆಂ ಮೊಸ್ರಿ
ನಾ ಮಾಯಾಮೋಗ್, ವಿಸ್ರಾಲ್ಯಾಂವ್ ದೇವ್ ಮ್ಹಣ್ ಮಯ್ಪಾಸಿ
ನಾ ಮ್ಹಜೊ, ನಾ ಪೆಲೊ ಫಕತ್ತ್ ಮತ್ಲಾಬಾಚೆ ಕುಶಿ
ಮೆಳ್ತೊಲೊ ಮಾನ್ ಜರ್ ತುಂ ಕೊಣಾಯ್ಚೊಯ್ ಪೊದೊರ್ನ್ ಜಾಶಿ
ಎಕ್ಲೊ ಬರೊ ಜಾತಾನಾ ಆನ್ಯೆಕ್ಲ್ಯಾಕ್ ಸೊಸಾನಾ
ಜಾಣಾ ತೊ, ಪೆಲೊ ತಾಚ್ಯಾ ಖಬ್ರೆಕ್ ಯೆನಾ
ತರೀ ಕುಲ್ಫಾ ಕರ್ನ್ ಶೆಣ್ ಘಾಲ್ಚೆಂ ಸೊಡಿನಾ
ಚುರ್ಚುರ್ತಲೊ ಜೆದ್ನಾಂ ಘಾಣ್ ತಾಚಾಚ್ಚ್ ಆಂಗ್ಣಾಂತ್ ಯೆತಾನಾ
ಶೆಣಾಚಿ ಮಹಿಮಾ [ - ಮೆಲ್ವಿನ್ ಪಿಂಟೊ ನೀರುಡೆ]
ಶೆಣಾಂತ್ ಏಕ್ ಕಿಡೊ ಉಟ್ಲೊ
ಶೆಣ್ ಘಾಸಾನ್ ಖಾತಾಂ ಖಾತಾಂ
ಚರಬ್ ಕಾತಿ ಇಡ್ಯಾಂತ್ ಭರೊನ್
ಘಡ್ಯೆನ್ ದಾಟೊ ಮೊಟೊ ಜಾಲೊ
ಪಾಶಾರ್ ಜಾಂವ್ಚ್ಯಾ ಭಾಗೆಟ್ಯಾ ಕೊಂಬ್ಲ್ಯಾನ್
ಶೆಣಾ ಗರ್ಬಾಂತ್ ಹುಳ್ವುಳೆ ದೆಕ್ಲೆ
ಕಿಡೊ ರೊಕ್ಡೊಚ್ ಉಡ್ಕಾಣಾಂ ಘಾಲ್ತಾಂ
ಎಕಾಚ್ ಬೊಂಚಿನ್ ಗಿಳುನ್ ಸೊಡ್ಲೆಂ
ಶೆಣ್ ಘಾಲ್ತೆಲ್ಯಾಂಕ್ ನೀತ್ ಹಿ:
ಪುಡ್ಪುಡಿತ್ ದಿಸ್ಚೆಂ ಬಳ್ವಂತ್ ನ್ಹಯ್
ಅಸ್ಕತ್ ದಿಸ್ಚೆಂ ಪೊಕೊಳ್ ನ್ಹಯ್
ಶೆಣ್ ಘಾಲ್ತೆಲ್ಯಾಂಕ್ [ - ಮಾ|ಜೋರ್ಜ್ ಒಲಿವೆರಾ]
ಶೆಣ್ ಘಾಲ್ತೆಲ್ಯಾ೦ಕ್ ಮ್ಹಜೆ ಪ್ರಣಾಮ್!
ಕಿತೆ೦ ಚಿ೦ತ್ಲ್ಲೆ೦, ಲೆಕ್ಲ್ಲೆ೦, ವಿಮರ್ಸೊ ಕರುನ್-
ಸಾಹಿತ್ ಶೆತಾ೦ತ್ ಸಾರೆ೦ ಜಾವ್ನ್ ಘಾಲ್ಲೆ೦,
ತೆ೦ ನಿಜಾಯ್ಕಿ ಫಾಯ್ದ್ಯಾಚೆ೦, ಗರ್ಜೆಚೆ೦,
ಸರ್ವಾ೦ಕ್ ಮರ್ಜೆಚೆ೦-ಸಾಹಿತ್ಯ್ ವಿಕಾಸ್ ಕರ್ಚೆ೦.
ಸತ್ ಪ್ರಸಾರ್ ಕರುನ್, ನೀತ್ ಸಾ೦ಭಾಳುನ್,
ಪೆಲ್ಯಾಕ್ ದುಕಯ್ನಾಸ್ತಾನಾ ಲಿಖ್ಣೆ೦ ಧ್ವಾರಿ೦-
ಶೆಣ್ ಘಾಲ್ಚ್ಯಾ ಸರ್ವ್ ಸಾಹಿತಿಕ್ ನಮಾನ್!
ಶೆಣ್ ಸಾಹಿತ್ಯ್ ಶೆತಾ೦ತ್ ಪಡ್ಲ್ಲ್ಯಾ ನ೦ತರ್
ತೆ೦ ಅಮೃತ್ ಚಾಕ್ಚ್ಯಾ ವಾಚ್ಪ್ಯಾ೦ಕ್ ಅಭಿನ೦ಧನ್!
ಉಗ್ತ್ಯಾಮನಾನ್, ಕ್ರಿಯಾತ್ಮಕ್ ಸಕ್ತೆನ್, ಸಾಹಿತ್ಯ್
ಶೆತಾ೦ತ್ ಉತ್ಪತ್ತ್ ಜಾಲ್ಲ್ಯಾ ಪುಲಾ೦-ಫಳಾ೦ಕ್
ಯೆವ್ಕಾರ್ ಮಾಗ್ಚ್ಯಾ ವಾಚ್ಪ್ಯಾಕ್ ಉಲ್ಲಾಸ್.
ತುಂ ನಾತ್ಲ್ಯಾರ್ ಸಾಹಿತಿ ನಾ, ನೆಗಾರ್ ಕೆಲ್ಯಾರ್,
ಸಾಹಿತಿಚ್ಯಾ ಅಸ್ತಿತ್ವಾಕ್ ಕುರಾಡ್ ಮಾರುಲ್ಲ್ಯಾ ಪರಿ೦.
ತುವೆ೦ ವಾಚುನ್, ಲೇಖಕಾಕ್ ಉತ್ತೇಜಿತ್ ಕರ್.
ಶೆಣ್ ಘಾಲ್ತೆಲ್ಯಾ ಸಾಹಿತಿಕ್ ಠೀಕಾ ಕೆಲ್ಲ್ಯಾ –
ಮಾನೆಸ್ತಾ೦ಕ್ ದೇವ್ ಬರೆ೦ ಕರು೦.
ಶೆಣ್ ಘಾಲ್ತೆಲ್ಯಾಂಕ್ [- ಆಸ್ಟಿನ್ ಪ್ರಭು ನಂತೂರ್]
ಹ್ಯಾ ಸೊಭಿತ್ ಸಂಸಾರಾಂತ್
ಶೆಣ್ ಘಾಲ್ತೆಲೆ ಸಭಾರ್ ಆಸಾತ್
ಥೊಡೆ ಕುಡಿಚಿ ಗರ್ಜ್ ತಿರ್ಸುಂಕ್
ಪುಣ್ ಸಭಾರ್ ತಾಂಚಿ ಮಸ್ತಿ ದಾಖಂವ್ಕ್
ದೆವಾನ್ ರಚ್ಲೊ ಸಂಸಾರ್ ಹೊ
ತರ್ ಶೆಣ್ ಘಾಲ್ತೆಲ್ಯಾಂಕ್ ಕರ್ಯಾಂ ಕಿತೆಂ
ಹೆರ್ ಕಿತೇಂಯೀ ಕರುಂಕ್ ನ್ಹಜೊ
ಭೆಷ್ಟೊ ಕಿತ್ಯಾಕ್ ಹೊ ಮೊಸ್ರಾಚೊ ಉಜೊ?
ಜರ್ ತುಕಾ ಶೆಣ್ ಘಾಲುಂಕ್ಚ್ ಜಾಯ್
ಪಳೆ ಖಂಯ್ ಜಾಗೊ ವೊರೆವಿಂಗಡ್
ಸಗ್ಳ್ಯಾ ಮುಖಾರ್ ಘಾಲಿನಾಕಾ ಶೆಣ್
ದೆಖ್ತಲೊ ತುಕಾ ಸಗ್ಳೊ ಪಂಗಡ್
ಬರೆಂ ಕರುಂಕ್ ವ ಬರೆಂ ಪಳೆಂವ್ಕ್
ದೊಳ್ಯಾಂನಿ ಜಾಯ್ನಾಸ್ಲ್ಲೆ ಸಭಾರ್
ಹೆರಾಂ ಮುಖಾರ್ ಕಾರ್ಬಾರ್ ದಾಖಂವ್ಕ್
ಫಕತ್ ತಾಂಚೆಂ ಶೆಣ್ ಘಾಲ್ತಾತ್
ಉಪ್ರಾಂತ್ ಮಾತ್ರ್ ಧಯ್ರ್ ನಾಸ್ತಾಂ
ಶಿಮ್ಟಿ ಉಕ್ಲುನ್ ಭಾಯ್ರ್ ಪೊಳ್ತಾತ್
ಅಸಲ್ಯಾಂಕ್ ಆಮಿಂ ಗುಮಾನ್ ಕರ್ಚೆಂ
ಆನಿ ಘೊಂಕ್ಚ್ಯಾ ಸುಣ್ಯಾಂಕ್ ಫಾತೊರ್ ಮಾರ್ಚೆಂ
ಎಕ್ಚ್ಚ್ ಜಾವ್ನಾಸಾ ಹ್ಯಾ ಸಂಸಾರಾಂತ್!
ಶೆಣ್ ಘಾಲ್ತೆಲ್ಯಾಂಕ್ [- ಪ್ರಸನ್ನ್, ನಿಡ್ಡೋಡಿ]
ಕೊಂಕ್ಣಿ ಸುಪುತ್ರ್ ಶಿಕೊನ್ ಫಿಂರ್ಗಿ
ಆರಾವ್ನ್ ನೆರಾವ್ನ್, ಜಾಂಟೊ ಬರ್ಪಿ ಆತಾಂ
ತುಮಿ ಶಿಕಯ್ಲೆಲಿ ಬರ್ಪಿ ಭಾಸ್ ಶೆಣ್ ಆನಾ
ಹಾಂವ್ ಜಾಣಾ ಶೆಣ್ ಕರುಂಕ್ ಮೇಣ್
ಶಿಕಾಪ್ ಮ್ಹಜೆಂ ಮೊಳಾಬ್, ತುಮ್ಚೆಂ ಅಜೂನ್ ತೊಡ್ಪೆಂ
ತೊಡ್ಪೆಂ ಉಡಯಾ ಮೊಳಾಬ್ ಉಸಾಯಾ
ನಕ್ತಿರಾಂ ವಿಂಚುನ್ ಉಜ್ವಾಡ್ ಥಂಯ್ ಚಡಯಾ
ಶೆಣ್ ಮಾತ್ರ್ ಆಂಗ್ಣಾಕ್ ಝರಯಾ..!
ತೊಡ್ಪ್ಯಾಂತ್ ಪುತಾ ಪೊಟಾ ಭುಕ್ ದಿಸ್ತಾ
ಮೊಳ್ಬಾರ್ ಮೂರೆ ಆಶಾ ಆನಿ ಅಕ್ಲಾಸ್ ಸೊಭ್ತಾ
ತಾಂಕ್ ತುಜಿ ಆಕಾಸಾರ್ ನಿಸಾಣ್ ತೆಂಕ್ಚಿ
ಆಮ್ಚಿ ಅಜೂನ್ ಆಂಗ್ಣಾಕ್ ಮೇಟ್ ದವರ್ಚಿ
ಹುನ್ ರಗಾತ್ ಪುತಾ ತುಜೆಂ ಶೆಳೆಂ ಮುರೆ ಆಮ್ಚೆಂ
ತುಂ ಉಚಾಂಬಳಿ ದರ್ಯೊ ಪಡ್ಲ್ಯಾತ್ ಹಾಂಗಾ ಶಾಂತ್ ಲ್ಹಾರಾಂ ಮಿರ್ಯೊ
ತಾಕತ್ ನಾಸ್ಲಿ ಕಾಂಪ್ಣಿ ಪಿರಾಯ್ ಆಮ್ಚಿ
ತೀಂತ್ ಶಿಂಪಡ್ನ್ ಕಾಗ್ದಾರ್ ಜಾಯ್ತ್ ಶೆಣ್..!
ಕೊಂಕ್ಣಿ ಮಾತೆಕ್ ಹಟ್ಟಾನ್ ಭಾಂದುನ್ ಪಾಂಯ್ಜಣಾಂ
ಕಿತ್ಯಾಕ್ ನಾಚಯ್ತಾತ್ ಫುಟ್ ಪಡ್ಲ್ಲ್ಯಾ ಆಂಗ್ಣಾ?
ನಾಚ್ ತೊ ದಿಸಾತ್ ಪಾಂಯ್ಜಣಾ ಆವಾಜ್ ಆಯ್ಕಾತ್
ಕೊಣ್ ದರ್ಶಕ್ ತಾಳಿಯೊ ಪೆಟಿತ್..?
ಉಚಾರಿನಾಕಾ ಪುತಾ ಶಿಣ್, ತಾಂಕ್ತಾ ತರ್ ಫಾರಿಕ್ ಕರ್ ಋಣ್
ದವರ್ನ್ ಶೆಣಾರ್ ಪಾಂಯ್ ವಾಡ್ಲೊಲೊಯ್ ಹಾಯ್
ಆತಾಂ ಪಾಂಯಾಂಕ್ ಘಾಲುನ್ ಬಾಟಾ - ಕರ್ತಾಯ್ ಶೆಣಾಕ್ ಟಾಟಾ..?
ಶೆಣ್ ಘಾಲ್ತೆಲ್ಯಾಂಕ್ [- ಆರ್ಯನ್ ತಾಕೊಡೆ]
ಸುರ್ಯಾ ಉಜ್ವಾಡ್ ಗೊಬೊರ್ ಜಾಲಾ
ಚಿಮ್ಣೆ ದಿವ್ಯಾಚೆಂ ತ್ರಾಣ್ ಸಂಪ್ಲಾಂ
ಯೆಯಾ ಪಾಲ್ವೊಂಚ್ಯಾಧಿಂ ದಿವ್ಯಾಕ್ ಥೆಂಕೊ ಜಾವುಯಾಂ
ಕೊಂಕ್ಣಿ ಮ್ಹಳ್ಯಾರ್ ದಾಕ್ಶೆಣೆಚಿ ಖೊಂಕ್ಲಿ ಕಾಡ್ಚ್ಯಾ
ಫಿಂರ್ಗಿ ಸಾಕ್ರಿ ಮೇಲಾಂತ್ ಕುರ್ಕುರೆ ಬುಡೊನ್ ಖಾಂವ್ಚ್ಯಾ
ಅಪುಣ್ ಕೊಂಕ್ಣಿ ಬಾಳಾಂಕ್ ಸಮ್ಜಣಿ ದಿವುನ್ ಚುರ್ಚುರೆ ಪಾವುಯಾಂ
ಉಗ್ತ್ಯಾ ಗೊಂಯ್ಡ್ಯಾಂಕ್ ವೋಂಯ್ ಘಾಲ್ಯಾರ್ ಕಿತೆಂ?
ಶೆಣ್ ಘಾಲ್ತೆಲ್ಯಾಂಕ್ ಗುಡ್ದಿ ಮಾರ್ಯೆತ್ಗಾಯ್?
ಯೆಯಾ ಭಾಟಿ ಘೆವುನ್, ಎಕ್ವಟಾನ್ ಶೆಣ್ ವಿಂಚುಯಾಂ..!
ಕೋಣ್ ಶೆಣ್ ಘಾಲ್ತೆಲೆ? [- ಕ್ಲೋಡ್ ಪಾಯ್ಸ್]
ರಾಜಕೀಯ್ ಫುಡಾರಿ, ಸಮಾಜೆಂತ್ಲೆ ಮಣಿಯಾರಿ,
ಸಾಹಿತ್ಯಾಚೆ ಪುಜಾರಿ;
ಚೆಪೆಂ, ಕಾಲ್ಸಾಂವ್, ಖುತಾಂವ್, ಕಾಸ್ಟೆನ್ ಬುರಾಕ್,
ಉತಾರ್ ಸಾಕರ್, ಮುಯೆ ಪಾಟ್ಲ್ಯಾನ್ ಮೂಯ್ - ಮಿಸ್ತೆರ್.
ಬೊಕ್ಡೆ ಪಾಟ್ಲ್ಯಾನ್ ಬೊಕ್ರೆ, ವಾಸ್, ಗಳ್ಯಾಕ್ ಪಾಸ್
ದಾನ್ ದಿಂವ್ಚಿ, ಮುಡ್ದೊಮಾಕ್ ವೇದಿಚೆರ್ ಮಾನಾಚಿ ವಾತ್
ಘಾಣ್ ಕರ್ಚಿ ಘೊಣ್
ಕುರ್ಡ್ಯಾಂಕ್ ದೀಶ್ಟ್ ದಿಂವ್ಚೆ ನಕ್ಲಿ ದೊತೊರ್,
ಹಸ್ತೆಕ್ ಕುಚುಲ್ಯೊ ಕರುನ್ ಹಾಸಾಂವ್ಚೆ ಮಾನೆಸ್ತ್
ಪೊಟ್ಟು ಬಾಂಯ್ತ್ ದೆಂವಯ್ತಾತ್ ಕೊಳ್ಸೊ
ಸುತಾಂಚ್ಯಾ ಸುತಾನ್ ಭಾಂದ್ತಾತ್ ಸಾಂಖೊವ್
ಸತಾಚ್ಯಾ ಪಾಳಾಂಕ್ ಬುಡ್ಡೊನ್,
ಖತಾವೀಣ್ ಸಮಾಜೆಚೊ ಭಲತ್ಕಾರ್
ಶೆಣ್ ಘಾಲ್ತೆಲ್ಯಾಂಕ್, ಲಗಾಮ್ ಧರುನ್, ಗೊಟ್ಯಾಂತ್ ಭಾಂದುನ್,
ಮಾರಾ ಚಾಬುಕೆಂತ್, ವ್ಹಾಳಾ ಉದ್ಕಾಂತ್ ಬುಡವ್ನ್ ಕಾಡಾ ಚಿಕೊಲ್
ಬೊಡಾಚೊ ಬೊಂಡು ಸೊಲುನ್ ಕರಾ ಶಿಂದಾಪ್
ಪಾಟಿಚೆಂ ಚಾಮ್ಡೆಂ ವೊಡುನ್ ವಾಜಯಾ ಗುಮಾಟ್
ಕಾಸ್ಟಿ ನೆಸವ್ನ್, ಇಜಾರ್ ಘಾಲುನ್ ಧುಂಪಯಾ
ಶೆಣ್ ಘಾಲ್ತೆಲ್ಯಾಂಕ್ [- ಪ್ರಿಯಾ ಸಿಕ್ವೇರಾ, ಫೆರಾರ್]
ಹುನ್ ಜಾಲ್ಲ್ಯಾ ರೆಂವೆರ್ ಚಲೊಂಕ್
ದರ್ಬೆ ಪಾಂಯ್ ಅಸಾತ್
ವೊತಾಂತ್ ಕರ್ಪೊಂಕ್
ಟೊಪಿ ಘಾಲ್ಲೊ ತಕ್ಲೊ ಆಸಾ
ವಾರೆಂ ವ್ಹಾಳ್ತಾನಾ ತಡ್ವೊಂಕ್
ರೂಂದ್ ಕಾನ್ ಆಸಾತ್
ರೆಂವೆಚಿ ಖಣಾಂ ಚುಕೊಂವ್ಕ್
ಕೂಲಿಂಗ್ ಗ್ಲಾಸ್ ದಾಂಪ್ಲ್ಲೆ ದೊಳೆ ಆಸಾತ್
ಶೆಣ್ ಘಾಲ್ಚೆಂ ಪಳೆಂವ್ಕ್
ವಿಶೇಷ್ ಜಾಣ್ವಾಯ್ ಆಸಾ
ನಾಂ ಮ್ಹಳ್ಯಾರ್ ಫಕತ್ತ್
ದರ್ಬ್ಯಾ ಪಾಯಾಂಕ್ ವ್ಹಾಣೊಂ
ಖಡ್ಡ್ಯಾ ತಕ್ಲ್ಯಾರ್ ಕೇಸ್
ಆಯ್ಕಾನಾತ್ಲ್ಲೆಂ ಕಾನ್
ಶೆಣಾಂತ್ಲ್ಯಾನ್ ಭಾಯ್ರ್ ಯೆಂವ್ಚ್ಯಾ
ಕಿಡ್ಯಾಂಕ್ ಪಳೆಂವ್ಕ್ ಸಕಾನಾತ್ಲ್ಲೆಂ ದೊಳೆ
ಕಿಡೆ ಭಾಯ್ರ್ ಸರೊನ್
ಆಂಗಾರ್ ಚರೊನ್
ಕುಸಯ್ತಾ ಮ್ಹಣಾಸರ್
ಆಡಾಂವ್ಚಿ ಸಕತ್!!
ಶಿರ್ಕಾಯ್ ತುಜ್ಯಾ ಪಾಂಯಾಂಕ್ ವ್ಹಾಣೊಂ
ಟೊಪಿ ನಿಕ್ಳಾವ್ನ್ ಖಡ್ದ್ಯಾಕ್ ಉಗ್ತೆಂ ಸೊಡ್
ರೂಂದ್ ಕಾನ್ ನಿತಳ್ ಕರ್ನ್ ಆಯ್ಕಾ ಸಾರ್ಕೆಂ ಕರ್
ಕೂಲಿಂಗ್ ಗ್ಲಾಸ್ ಕಾಡ್ನ್ ಉಗ್ತ್ಯಾ ದೊಳ್ಯಾಂನಿ ಭಂವ್ತಿಂ ಪಳೆ
ಶೆಣಾಕ್ ತ್ಯಾ ಉದ್ಕಾಂತ್ ವ್ಹಾಳೊಂಕ್ ಸೊಡ್
ನಾಂ ತರ್ ವೊತಾಕ್ ತರೀ ಸುಕೊಂಕ್ ಸೊಡ್
ಕಿಡೆ ತುಕಾ ನಾಚ್ ಕರ್ಚ್ಯಾ ಪಯ್ಲೆಂ
ತುಂಚ್ ತಾಂಕಾ ನಾಚ್ ಕರ್
ಜಾಗ್ರುತ್ ಜಾವ್ನ್ ಪಾಚ್ವಿ ಜಿಣಿಂ ತುಂ ಜಿಯೆ
ಸುಕಿದಾಡ್ ಪಡ್ಲ್ಲ್ಯಾ ಹ್ಯಾ ಸುವಾತೆರ್
ಶೆಣ್ ಘಾಲ್ತೆಲ್ಯಾಂಕ್ [- ಸ್ಟ್ಯಾನ್ಲಿ ಮೆಂಡೊನ್ಸಾ, ಯು.ಕೆ.]
ಕೋಣ್ ಘಾಲಿನಾಂತ್ ಶೆಣ್?
ಪೂಣ್ ಥೊಡ್ಯಾಂಚಾಕ್ ಇಲ್ಲಿಶಿ ಚಡ್ ಘಾಣ್
ವಜ್ರಾಂ ಮೊತಿಯಾಂ ಕೊಣೀ ಘಾಲ್ತೆಲೆ ನಾಂತ್ ಹಾಂಗಾ
ಬರ್ಯಾ ಕಾಮಾಂಚೆರ್ ಆಸೊಂ ತುಜೆಂ ಧ್ಯಾನ್
ಘಾಣ್ ಕರ್ತೆಲ್ಯಾಂಕ್ ತಾಂಚೆ ಇತ್ಲ್ಯಾಕ್ ಸೊಡ್
ತಾಂಕಾಂ ರಾವಂವ್ಕ್ ಜಾಯ್ನಾ
ತಾಂಕ್ತಾ ತರ್ ತಾಂಚ್ಯೊ ಶೆಣ್ಯೊ ಥಾಪುಣ್ ಹುಲ್ಫಾವ್ನ್ ಸೊಡ್
ತಾಂಚ್ಯಾನ್ ಜಾಂವ್ಚೆಂ ದುಸ್ರೆಂ ಕಾಂಯ್ ನಾ
ಶೆಣ್ ಘಾಲ್ಯಾರ್ ವ್ಹಡ್ ನಾ ರೆ ಬಾಬಾ
ತಾಂತುನ್ ಕರ್ಯೆತ್ ಸಾರೆಂ
ಲಾಭ್ ತಾಚೊ ಘೆಂವ್ಕ್ ಶಿಕ್ರೆ ಅಪಾ
ಕುಸೊವ್ನ್ ಈಟ್ ಜಾತಾ ಖರೆಂ
ಪೆಟ್ಯಾಚಿ ಶಿಮ್ಟಿ ನೀಟ್ ಜಾಯ್ತ್?
ತಶಿಚ್ಚ್ ಗಜಾಲ್ ಘಾಣ್ ಕರ್ತೆಲ್ಯಾಂಚಿ
ತಾಂಚ್ಯಾ ಮೆಂದ್ವಾಂತ್ಯೀ ಕುಸಾಡಾಯಿಚ್ಚ್ ಭರ್ಲ್ಯಾ
ಆಸಾನಾ ಗತ್ ತಾಂಕಾಂ ಹುಂಕ್ತೆಲ್ಯಾಂಚಿ
ಶೆಣ್ ಘಾಲ್ತೆಲ್ಯಾಂಕ್ ಪಳೆವ್ನ್ ರಾವಾನಾಕಾ
ತುಜೆಂ ಕಾಮ್ ಕರುನ್ ಮುಕಾರ್ ಸರ್
ತುಜೊ ವೇಳ್ ತುಂ ವಿಭಾಡ್ನಾಕಾ
ಘಾಣ್ ಉಟಯ್ತೆಲ್ಯಾಂಕ್ ದೆಗೆಕ್ ಧರ್
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.