ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸೊಮಿಯಾಂ ತುಜೆಲಾಗಿಂ ಆಡ್ದೊಸ್ ಮಾಗ್ತಾಂ - ಕಿತೆಂಯ್ ಕರ್ ಪುಣ್ ಮನ್ಶಾಕುಳಾಚೆರ್ ಜಾಂವ್ಚೊ ಅನ್ನ್ಯಾಯ್ ಕರ್ಚ್ಯ ಅನ್ಯೇಕಾ ಜನಾಂಗಾಕ್ ಬೂದ್ ಶಿಕಯ್. ದುಸ್ರ್ಯಾಂಕ್ ಮಾರ್ನ್ ಅನಂದ್ ಭಗ್ಚಾಂಕ್, ತಸಲೆಂ ಏಕ್ ಥಾಪಾಡ್ ಯಾ ಮಾರ್ ದಿಲ್ಯಾರ್ ಮಾರಾಚಿ ದೂಕ್ ಕಳ್ತಾ.
ಸತಾಂತ್ಲಿಂ ವಿಚಿತ್ರಾಂ - 5. ಘರ್ಕಾಮೆಲಿಂ
ಜೆಮ್ಮಾ ಪಡೀಲ್
ದೆವಾ ತುವೆಂ ಹೊ ಸಂಸಾರ್ ರಚ್ಲೊಯ್. ತುವೆಂ ಪಯಿಲ್ಲೆಂ ಕುಟಾಮ್ ಯಾ ಜೊಡೆಂ ಜಾವ್ನ್ ಆದಾಂವ್ಕ್ ಆನಿ ಎವೆಕ್ ರಚ್ಲೆಂಯ್. ತಾಂಕಾಂ ಕಾಯ್ನ್
ಆನಿ ಆಬೆಲ್ ನಾಂವಾಚೆ ಚೆರ್ಕೆ ಭುರ್ಗೆ ದಿಲೆಂಯ್. ತಾಂಚ್ಯೆ ಥಾವ್ನ್ ಹೊ ಸಂಸಾರ್ ವ್ಹಾಡಂವ್ಕ್ ತುವೆಂ ಯೋಜನ್ ಕೆಲೆಂಯ್.
ದೆವಾ ತುಂ ನಿಜಾಯ್ಕಿ ಏಕ್ಧಮ್ ಬುಧ್ವಂತ್ ಆನಿ ಶಾತಿವಂತ್. ತುವೆಂ ಚಿಂತ್ಲೆಲ್ಯಾಬರಿ ಜಾಲೆಂ. ಸಂಸಾರ್ ವ್ಹಾಡ್ಲೊ,
ವಿಸ್ತರ್ಲೊ. ಹ್ಯಾ ಖೆಸ್ತಾವಾಂತ್ ಮನಿಸ್ ಮನ್ಶಾಕ್ ಖಾಂವ್ಕ್ ಆನಿ ಗಿಳುಂಕ್ ತಯಾರ್ ಜಾಲೆ ಆನಿ ತಯಾರಾಯ್ ಜಾಯಿತ್ತ್ ಆಸಾ. ಕಿತೆಂ ಸಾಂಗೊಂ ದೆವಾ ಚಿಂತಾನಾ ತಕ್ಲಿ ಗರಮ್ ಜಾತಾ. ತುವೆಂ ಇತ್ಲ್ಯಾ ವಿಶಾಲ್ ಜಾಣ್ವಾಯೆಚ್ಯಾ ಸರ್ವೆಸ್ಪರಾನ್ ಕಿತ್ಯಾಕ್ ಖಾತಿರ್ ಹ್ಯಾ ತುಜ್ಯಾ ಸಂಸಾರಾಂತ್ ವೀದ್ವಾವ್ಳಿ ಕರುಂಕ್ ಹ್ಯಾ ತುಜ್ಯಾ ಮನ್ಶಾಕುಳಾಕ್
ಸೊಡ್ಲೆಂಯ್? ತೆಂ ತಿಂತುಂಕ್ ಹಿ ಮ್ಹಜಿ ಅಸ್ಕತ್ ಮತ್ ಭಿವ್ಕುರೆಂ ಕಾಳಿಜ್, ಪಾತ್ಕಿ ಕೊಶೆಡ್ದ್ ಆನಿ ಜಿವಾಚ್ಯಾ
ಹರ್ಯೆಕಾ ಕಣಾಂತ್ ಆಬ್ಲೇಸ್ ಆನಿ ಮೊಸೊರ್. ತುವೆಂ ದಿಲ್ಲ್ಯಾ ಹ್ಯಾ ’ದೆಣ್ಯಾಂ’ ವರ್ವಿಂ, ಹ್ಯಾ ತುಜ್ಯಾ ಮನ್ಶಾಕುಳಾನ್ ಅಸ್ಕತ್ ಮನ್ಶಾಕುಳಾಕ್ ನಿಸಂತಾನ್ ಕರ್ನ್ ಸೊಡ್ಲಾಂ. ತುಕಾ ಹಾವೆಂ ವಾಚ್ಲ್ಲೆಂ ಸಾಂಗೊಂ?
ಗೊರೆ ಆಫ್ರಿಕಾಚ್ಯಾ ಖಂಡಾಕ್ ವಚೊನ್, ಕಾಳ್ಯಾ ಲೊಕಾಕ್ ಧರ್ನ್ ಹಾಡ್ನ್ ಪಯ್ಶಿಲ್ಯಾ ಅಮೆರಿಕಾಂತ್ ವಿಕೊನ್ ತಾಂಕಾಂ ಗುಲಾಮ್ ಕೆಲ್ಲೆಂ ತುಕಾ ಕಳಿತ್ ಆಸಾ. ತುವೆಂ ಪಳೆಲ್ಯಾರೀ ತ್ಯಾ ಕಾಳ್ಯಾ ಲೊಕಾಕ್ ದಿಲ್ಲೆ ಕಷ್ಟ್ ಕೆಲ್ಲೊ ಅತ್ತ್ಯಾಚಾರ್, ಮನಿಸ್ ಮ್ಹಳ್ಳೊ ವಿಷಯ್ ಮತಿಂತ್ ದವರಿನಾಸ್ತಾಂ, ತಾಂಕಾಂ ಕಷ್ಟಿಲ್ಲೆಂ ವಾಚ್ತಾನಾ, ಕಾಳಿಜ್ ಮುದೊ ಜಾತಾ; ಗಾರ್ ಜಾತಾ. ತುವೆಂ ತುಜ್ಯಾ ಹರ್ಯೆಕಾ ಮನ್ಶಾಕ್ ಗೊರ್ಯಾಬರಿ ಕಾಳಿಜ್ ದಿಲಾಂಯ್, ತಾಂಬ್ಡೆಂ ರಗಾತ್ ದಿಲಾಂಯ್. ಗೊರ್ಯಾಚೆಂ ಧೊವೆಂ ಆನಿ ಕಾಳ್ಯಾಚೆಂ ಕಾಳೆಂ ರಗಾತ್ ನ್ಹಯ್ ತರ್ ಹ್ಯಾ ಥರಾನ್ ಅತ್ತ್ಯಾಚಾರ್ ಕರ್ತಾನಾ ತುಂ ಕಿತ್ಯಾಕ್ ವೊಗೆಚ್ಚ್ ಬೊಸ್ಲೊಯ್?.
ತುವೆಂ ಸೊದೊಮ್ ಆನಿ
ಗೊಮೊರ್ ನಾಸ್ ಕೆಲೊಯ್, ಮೊಯ್ಜೆಕ್ ಭಾಸಾಯಿಲ್ಲ್ಯಾ ಗಾಂವಾಕ್ ತಾಕಾ ಪಾಂಯ್ ದವರುಂಕ್ ತುವೆಂ ಸೊಡುಂಕ್ ನಾಂಯ್. ತುಜ್ಯಾ ಮೊಗಾನ್ ಜಿಯೆತೆಲ್ಯಾ ಲೊಕಾಕ್ ಪಾವ್ಸ್, ವಾರೆಂ ವಾದಾಳ್ ಭುಂಯ್ಕಾಪ್ ಆನಿ ಜ್ವಾಲಾಮುಖಿ ದೀವ್ನ್ ಗಾಂವ್, ಸಂಸಾರ್ ಆನಿ ಲೊಕಾಕ್ ನಾಸ್ ಕೆಲ್ಲ್ಯಾ ತುಕಾ ಗೊರ್ಯಾಂನಿ ಹ್ಯಾ ಥರಾಚಿಂ ಕಾಳಿಜ್ ರಾಂವ್ಚೆ ತಸಲೊ ಅನ್ನ್ಯಾಯ್ ಕರ್ತಾನಾ ಕಸೊ ವೊಗೊಚ್ಚ್ ರಾವ್ಲೊಯ್ ತೆಂ ಚಿಂತುನ್ ಹೆಂ ಹಾವೆಂ ತುಜೆಲಾಗಿಂ ಸವಾಲ್ ಕರ್ಚೆಂ. ಹಾವೆಂ ಹ್ಯಾ ಆದಿಂ ತುಕಾ ಖರೆಂ ಸಾಂಗ್ಲಾಂ - ಮ್ಹಜ್ಯಾ ಬಡ್ಡ್ ತಕ್ಲೆಕ್ ತುವೆಂ ಮಾತ್ರ್ ಉಚಿತ್ ಜವಾಬ್ ದೀವ್ನ್ ಮ್ಹಾಕಾ ಕಷ್ಟೊಂಚ್ಯಾ ಹ್ಯಾ ’ವಾದಾಳಾ’ ಥಾವ್ನ್ ಸುಟ್ಕಾ ದಿವ್ಯೆತ್. ತೊ ಆದ್ಲೊ ಕಾಳ್. ಆತಾಂ ಕಿತೆಂ ಚಲ್ತಾ ಸೊಮಿಯಾಂ?
ಮನಿಸ್ ಚಂದ್ರಾಕ್ ಪಾವ್ಲೊ; ವಾರ್ಯಾರ್ ಉಭೊಂಕ್ ಶಿಕ್ಲೊ,
ಉದ್ಕಾಪಂದಾ ತಿಳುಂಕ್ ಪಾವ್ಲೊ. ಚಿಂತುಂಕ್ ಜಾಯ್ನಾತ್ಲ್ಲಿಂ ನವಾಲಾಂ ಖರೆಂ ಜಾವ್ನ್ ಊರ್ಜಿತ್ ಜಾಲ್ಲ್ಯಾ ಹ್ಯಾ ಆಧುನಿಕ್ ಸಂಸಾರಾಂತ್ ಆಸಾ ಆಮ್ಚೊ ಗಾಂವ್ ಮಂಗ್ಳುರ್. ಹಾಂವ್ ಲ್ಹಾನ್ ವ್ಹಡ್ ಜಾಲ್ಲೊ ಗಾಂವ್. ಹ್ಯಾ ಗಾಂವಾಂತ್ ಚಾರ್ ಕಾಸ್ ಆಸ್ಲ್ಲ್ಯೊ ಬಾಯೊ ಆನಿ ತಾಂಚೆಂ ಕುಟಾಮ್ ತಾಂಚ್ಯಾ ಘರಾಕಾಮ್ ಕರ್ತೆಲ್ಯಾ ಘರ್ಚಾಕ್ರೆಚ್ಯಾ ಬುರ್ಗ್ಯಾಂಕ್ ಯಾ ವ್ಹಡಾಂಕ್ ಕಸಲ್ಯಾ ಕಷ್ಟಾಂಕ್ ಒಳಗ್ ಕರ್ತಾತ್ ತೆಂ ಚಿಂತುಂಕ್ ಜಾಯ್ನಾ. ತಿಂ ಮನ್ಶಾಂ ನ್ಹಯ್ಗೀ? ತ್ಯಾ ದುಬ್ಳ್ಯಾ ದಾಕ್ಟ್ಯಾಂಕ್ ಹ್ಯಾ ಥರಾನ್ ಕಷ್ಟಿತಾತ್, ಹೆಂ ಸವಾಲ್ ತುಕಾ ಬರಂವ್ಚ್ಯಾ ಮ್ಹಾಕಾ ಬರಂವ್ಕ್ ಕಷ್ಟ್ ಮಾರ್ತಾತ್, ತುಕಾ ಸದಾಂ ಉಲೊ ಮಾರ್ಚ್ಯಾ ಘರಾ ಮನ್ಶಾ ಜಾತಿಚೆರ್ ಅತರ್ವಣಾಂ ಘಡ್ತಾತ್.
ಮಂಗ್ಳೂರ್ ಸೊಡ್ ಭಾರತಾಂತ್; ಉತ್ತರ್ ಭಾರತಾಂತ್ - ಜಮೀನ್ದಾರಾಂ ದುಬ್ಳ್ಯಾ ದಾಕ್ಟ್ಯಾಂಕ್ ಜಿಣಿಭರ್ ಗುಲಾಮ್ಗಿರಿ ಕರಯ್ತಾತ್. ಎಕಾ ಸಂತಾನಾ ಥಾವ್ನ್ ಅನ್ಯೇಕ್ ಸಂತಾನ್ ಫಕತ್ತ್ ದುಖಾಂ ಗಳವ್ನ್ ಜಿಯೆಂವ್ಚ್ಯಾ ತಸಲ್ಯಾ ತುಜ್ಯಾ ಜೀವಿಂಕ್ ಏಕ್ ಹಾಸೊ ಹಾಡ್ಚೆಂ ವಿಧಾಣ್ ತರೀ ತುವೆಂ ಕಳಿತ್ ಕೆಲ್ಯಾರ್ ಬರೆಂ. ನಾಂ ತರ್ ಹೊ ಸಂಸಾರ್ ಮುಕಾರ್ ಕಿತೆಂ ಜಾಯ್ತ್ ತೆಂ ಚಿಂತುಂಕ್ ಜಾಯ್ನಾಂ. ಅಮೆರಿಕಾಂತ್ಲೆ ಗುಲಾಮ್ಗಿರಿ ಝುಜ್ ಕರ್ನ್ ಕಸೇಂಯ್ ರಾವಯ್ಲೆಂಯ್. ಪುಣ್, ಹ್ಯಾ ಭಾರತಾಂತ್ ಖಂಯ್ಚೆಂ ಝುಜ್ ಕರ್ಚೆಂ. ಸರ್ಕಾರ್ ತಾಂಚೆ ’ಮನಿಸ್’ ಚಲಯ್ತಾತ್.
ಸೊಮಿಯಾಂ ತುಜೆಲಾಗಿಂ ಆಡ್ದೊಸ್ ಮಾಗ್ತಾಂ - ಕಿತೆಂಯ್ ಕರ್ ಪುಣ್ ಮನ್ಶಾಕುಳಾಚೆರ್ ಜಾಂವ್ಚೊ ಅನ್ನ್ಯಾಯ್ ಕರ್ಚ್ಯ ಅನ್ಯೇಕಾ ಜನಾಂಗಾಕ್ ಬೂದ್ ಶಿಕಯ್. ದುಸ್ರ್ಯಾಂಕ್ ಮಾರ್ನ್ ಅನಂದ್ ಭಗ್ಚಾಂಕ್, ತಸಲೆಂ ಏಕ್ ಥಾಪಾಡ್ ಯಾ ಮಾರ್ ದಿಲ್ಯಾರ್ ಮಾರಾಚಿ ದೂಕ್ ಕಳ್ತಾ. ತಶೆಂ ಕಸಲೇಂಯ್ ನವೆಂ ವಿಧಾನ್ ತುವೆಂ ದೀವ್ನ್ ಹ್ಯಾ ತುಜ್ಯಾ ಜನಂಗಾಂತ್ ಎಕಾಮೆಕಾ ಮಾಯಾಮೊಗ್, ಮಾಯ್ಪಾಸ್, ಹುಸ್ಕೊ ವಾಂಟುನ್ ದಿಂವ್ಚೆಬರಿ ಜಾಂವ್ದಿ. ತುವೆಂ ಹೆಂ ಕರುಂಕ್ ಜಾಯ್. ಮ್ಹಾಕಾ ತುಕಾ ಸದಾಂನೀತ್ ತಪ್ಪಾಲಾಂತ್ ಸವಾಲಾಂ ಧಾಡ್ನ್ ತುಕಾ ಮ್ಹಜೆರ್ ಉಬ್ದೇಸ್ ಆಯಿಲ್ಲ್ಯಾ ವಗ್ತಾಂ, ಸರ್ವ್ ಜಾತೆಲೆಂ ಮ್ಹಣ್ ಚಿಂತಾಂ ಆನಿ ಆಶೆತಾಂ. ಅತ್ತ್ಯಾಚಾರ್ ರಾವೊಂದಿ ಹಿ ಏಕ್ ವಿನತಿ, ಉಲೊ ಆನಿ ಮಾಗ್ಣೆಂ.
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
