ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
6. ಪಾವ್ಶಿಲಿ ವೊರ್ವಿ
ಗಿಮ್ಶಿಲ್ಯಾ ಮಧ್ಯಾನೆರಿ ನಿಚೆವ್ ಜಾಲೊ ಮ್ಹಜ್ಯಾ
ಪಾವ್ಶಿಲ್ಯಾ ಮೊಡಸ್ತಾನಾಂಕ್ ಮಾನ್ ಬಾಗಂವ್ಕ್ ನಜೊ
ಘೆರೆ, ಭಾವಾ, ಖೊರೆಂ ಕುದೊಳ್ ಕಾಡ್ಯಾಂ ಚಾಂಗ್ ಚೊಂಪೊ
ನಿರಾಶೆಚಾ ಮೆರೆರ್ ಲಾಂವ್ಯಾ ಭರ್ವಾಶ್ಯಾಚೊ ರೊಂಪೊ
ಗೊಟ್ಯಾಂತ್ ಸಾರೆಂ ಕುಡ್ಯಾಂತ್ ಬರೆಂ ತಾಂದು-ಭಾತ್ ಭರಾ
ಆಟಿಂತುಲ್ಯಾ ಮುಸ್ಕ್ಯಾ ಮಾಟಾಂತ್ ತಾಂಬ್ಡಿ ವಾತ್ ಧರಾ
ಸಾಂಬಾಡ್ಡ್ಯಾಚ್ಯಾ ಖಣಾಖಣಾಂತ್ ಲೊಸುಣ್ ಮಿರಿಂ ಜಿರೆಂ
ದಾಂಬುನ್ ಚೆಪುನ್ ಭರಾ ಬಾಬಾ, ಪಾವ್ಸಾಳ್ಯಾಕ್ ಬರೆಂ
ಆಂಬೆ-ಲಿಂಬೆ ಜಮೊ ಕೆಲೆ, ವೊನಿಯೆ ಲೊಣ್ಚೆಂ ಘಾಲ್
ಕೊಂಬೆ-ಕೊಂಬಿಯೊ ಧಾಂಪುನ್ ಘಾಲಾ ಭಿಜೊನ್ ಜಾತಿತ್ ಹಾಲ್
ಕಸರ್ ಫ಼ೊಡ್ ವಿಸರ್ನಾಕಾ ಆಬಾಕ್ ಜಾತಿತ್ ತ್ರಾಸ್
ಕಾಫಿ ಗೊಡ್ ಸಾಂಡಿನಾಕಾ ವ್ಹಡ್ಲಿಮಾಂಯ್ಚೊ ಗ್ರಾಸ್
ದಿವ್ಯಾಂತ್ ತೆಲಾಂ ತುಪಾಂ ಮೆಲಾಂ ಶಿಂತಿದ್ ಜಾಲೆಂ ಥಿರ್
ಪರ್ಮಳಿಲೊ ಮೀರ್, ಭಾವಾ, ಕಾಳ್ಜಾಂತ್ ಭರ್ಲೊ ಧೀರ್
ಹಾಸತ್ ಆಸಾಯ್ ಬಾಳೆ, ಮ್ಹಜೆಂ ಸವಾಲ್ ಮೊಟೆಂ ಥೊರ್
ಪಿಸಾಯ್ ಕಸ್ಲಿ ಯೆತಾನಾಂಗೊ ವಾದಾಳ್ ಘನ್ಘೋರ್
ತುಪಿಂ ಮಾಳೆ ಕಂಳ್ಬೆ ಗಳೆ ತುವೆಂಚ್ ಮುಂಗಾ ಭರ್ಲೆ
ತೊಂಡಾ ವಯ್ಲೆ ದಿವೆ ಮಾತ್ರ್ ಹಾಂವೆಂ ಪೆಟೊವ್ನ್ ಧರ್ಲೆ
ತೊಂಡಾವಯ್ಲ್ಯಾ ದಿವ್ಯಾನ್ ಬಾಳೆ ಪಾವ್ಸ್ ಜಾಯ್ನಾ ಖಾಲ್
ಕಾಮಾಕ್ ಯೆತಿತ್ ವೊಂಟಿ ಸೊಲಾಂ ದಾಲ್ಚಿನಿಚಿ ಸಾಲ್
ಯೆರೆ ಪಾವ್ಸಾ ಪಸರ್ ತುಜೆಂ ವಾದಳಾಚೆಂ ಜಾಳ್
ಗಾಜಯ್ ಬರಿ ಗಾಂವಾಕ್ ತರಿ ಘಡ್ಗಡ್ಯಾಚಿ ನಾಳ್
ಮ್ಹಜ್ಯಾ ಘರಿಂ ಯೆಂವ್ಚಿ ನಾರೆ ಆಂವ್ದು ತುಜಿ ನಾಡ್
ಗಾಂವ್ ಗುಡೊ ವೇಳ್ ವಾಡೊ ಕೆಲೊಯ್ ತರಿ ಪಾಡ್
ಮದ್ಯಾನ್ ಗೆಲಿ ಫ಼ಾಂತೆಂ ಜಾಲೆಂ ಪಾವ್ಸಾನ್ ಧಾಡ್ ಘಾಲಿ
ಶೆತ್ಭಾಟ್ ಕುಮೆರ್ವಸ್ತಿ ಶಿರಾಂಧಾರಿಂ ನ್ಹಾಲಿ
ಭಿಜ್ಲೆ ಥಳ್ ನದಿ ವ್ಹಾಳ್ ಜಾಲೆ ಧಾಟೆಮೊಟೆ
ವಾಜ್ಲೆ ತೆಣೆ ಲಜೆವಿಣೆ೦ ಘಡ್ಗಡ್ಯಾಚೆ ಥೊಟೆ
ನದಿ ವ್ಹಾಳ್ಯಾಂತ್ ಭರ್ತಿ ಜಾಲಿ ಉಬಿರ್ ಮಾತಿ ನಾಸ್
ಶೆತಾ ಗಳ್ಯಾಂತ್ ಉಟಾಉಟಿಂ ಆವ್ರಾಚೊ ಪಾಸ್
ಝಡ್ಲಿ ಝಡಾಂ ಪಡ್ಲಿಂ ಘರಾಂ ಆತಾಂ ಕಿತೆಂ ವಾಟ್?
ಬುಡ್ಲೆ ದೊಂಗರ್ ಕುಮೆರ್ ಕುಟಾಂ ಬುಡ್ಲೆಂ ಶೆತ್ಭಾಟ್
ಮ್ಹಜ್ಯಾ ಘರಾಂತ್ ಉಜ್ಯಾಪರಿಂ ಆವ್ರಾ ಲ್ಹಾರಾಂ ಭರ್ಲಿಂ
ಜಿರೆಂ ಸೊಲಾಂ ಮಿರಿಂ ಗೊಡಾಂ ವಾರ್ಯಾವೆಲ್ಯಾನ್ ಚರ್ಲಿಂ
ಚೊಂಪೊ ಗೆಲೊ ರೊಂಪೊ ಮೆಲೊ ಗೆಲೆಂ ತಾಂದುಳ್ ಭಾತ್
ಪುರ್ಲೆ ಮಾಳೆ ಉರ್ಲಿ ಗಳೊನ್ ಆಂಗಾ ವಯ್ಲಿ ಕಾತ್
ಘರಾಂತ್ ಮ್ಹಜ್ಯಾ ಕಾಳೊಕ್ ಆತಾಂ ಕಿತ್ಯಾಕ್ ಬಾಳೆ ಹಾಸ್ತಾ
ಭಿರಾಂತ್ ಮ್ಹಾಕಾ ಕಾಳೊಕಾಂತ್ ವಾತ್ ಕಸ್ಲಿ ದಿಸ್ತಾ
ಘರಾಂತ್ ಮ್ಹಜ್ಯಾ ಕಾಳೊಕ್ ಮೊಗಾ ಉಜ್ವಾಡ್ ಬಾಳೆ ಕಸೊ
ತೊ೦ಡಾವಯ್ಲೊ ದಿವೊ ಜಳೆ ಹಾಂವೆಂ ಪೆಟಂವ್ಕ್ ನಾಸ್ಲೊ
ಪಾವ್ಶಿಲ್ಯಾ ದಿಸಾಂಕ್ ಜಾಯ್ ತ್ಯೊ ಗರ್ಜೆಚ್ಯೊ ವಸ್ತು ಎಕ್ಟಾವ್ನ್ ದವರ್ಚಿ ಏಕ್ ರಿವಾಜ್. ಘರ್ಚ್ಯಾ ಕೊಣಾ ಎಕಾ ಮನ್ಶಾನ್ ಕಶ್ಟಾಂಕ್ ಪಡಾನಾಯೆ ಮ್ಹಣ್ಚ್ಯಾ ಇರಾದ್ಯಾನ್ ಘರ್ಚೊ ಯೆಜ್ಮಾನ್ ವರ್ತ್ಯಾ ಉಮೆದಿನ್ ರಾಂದ್ಪಾಚ್ಯಾ ಕುಡಾಂತ್ ಗರ್ಜೆಚ್ಯೊ ವಸ್ತು ಜಮಯ್ತಾ. ಗೊಟ್ಯಾಂತ್ಲ್ಯಾ ಗೊರ್ವಾಂಕ್ ಕಾಂಯ್ ಧೊಶಿ ಜಾಯ್ನಾತ್ಲ್ಲೆಬರಿ ಪಳೆತಾ. ಲೊಣ್ಚೆಂಚ್ ನ್ಹಯ್, ತಾಂತ್ಯಾಂಕ್ ಆನಿ ಮಾಸಾಕ್ ಮ್ಹಣೊನ್ ಕುಂಕ್ಡಾಂಚಿಯಿ ಚತ್ರಾಯ್ ಘೆತಾ.
ಕಸರ್ ಫ಼ೊಡ್ ವಿಸರ್ನಾಕಾ ಆಬಾಕ್ ಜಾತಿತ್ ತ್ರಾಸ್
ಕಾಫ಼ಿ ಗೊಡ್ ಸಾ೦ಡಿನಾಕಾ ವ್ಹಡ್ಲಿ ಮಾ೦ಯ್ಚೊ ಗ್ರಾಸ್
ಆಬಾಕ್ ಆನಿ ವ್ಹಡ್ಲಿಮಾಂಯ್ಕ್ ಪಾವ್ಶಿಲ್ಯಾ ದಿಸಾಂನಿ ಕಸಲೇಯಿ ಕಶ್ಟ್ ಜಾಯ್ನಾತ್ಲ್ಲೆಬರಿ ಸಾಂಬಾಳ್ಚಿ ತಯಾರಾಯ್ ಚಲ್ತಾ.
ಘರ್ಚ್ಯಾ ಯೆಜ್ಮಾನ್ಯಾನ್ ಪಾವ್ಶಿಲ್ಯಾ ದಿಸಾಂಖಾತಿರ್ ದಿವೆ, ತೇಲ್ ಇತ್ಯಾದಿ ತಯಾರ್ ಕರ್ನ್ ದವರ್ಲಿಂ. ಪಾವ್ಸಾಂತ್ ಘರಾಂತ್ ಉಜ್ವಾಡ್ ಜಾಯ್. ಇತ್ಲೆಂಯಿ ಪುರಾ ಕಾಮ್ ಜಾತಾನಾ ಧಾಕ್ಟುಲೊ ಬಾಳ್ ಕಾಯಿಂಚ್ ಖಂತ್ ನಾಸ್ತಾಂ ಹಾಸೊನ್ ಖೆಳೊನ್ ನಾಚ್ತಾಲೊ. ‘ಹಾಸ್ಯಾನ್ ಕಾಂಯ್ ಪಾವ್ಸಾವೆಳಾಚೆ ಕಶ್ಟ್ ಹಳು ಜಾಯ್ನಾಂತ್’ ಮ್ಹಣ್ ತೊ ಬಾಳಾಕ್ ಗಿನ್ಯಾನ್ ಸಾಂಗ್ತಾ.
ಸಗ್ಳಿ ತಯಾರಾಯ್ ಜಾತಚ್ ಪಾವ್ಸಾವರ್ವಿಂ ಆಪ್ಣಾಕ್ ಕಾಂಯ್ ಕಶ್ಟ್-ನಶ್ಟ್ ಜಾಂವ್ಚೆನಾಂತ್ ಮ್ಹಣ್ ಯೆಜ್ಮಾನ್ ಖಂಡಿತ್ ಚಿಂತಾ ಆನಿ ಸುಶೆಗಾನ್ ಪಾವ್ಸಾಕ್ ಯೇವ್ಕಾರ್ ಮಾಗ್ತಾ, “ಯೇ, ತುಜ್ಯಾ ವಾದಳಾಚೆಂ ಜಾಳ್ ಆತಾಂ ಪಸರ್, ಗಾಂವಾರ್ ಘಡ್ಗಡ್ಯಾಚೊ ಆವಾಜ್ ಕರ್, ತುಜಿ ನಾಡ್ ಆಂವ್ದು ಮ್ಹಜಾ ಘರಾಕ್ ಧೊಸ್ಚಿನಾ.”
ಯೆರೆ ಪಾವ್ಸಾ ಪಸರ್ ತುಜೆ೦ ವಾದಳಾಚೆ೦ ಜಾಳ್
ಗಾಜಯ್ ಬರಿ ಗಾ೦ವಾಕ್ ತರಿ ಗಡ್ಗಡ್ಯಾಚಿ ನಾಳ್
ಮೊಜ್ಯಾ ಘರಿ೦ ಯೆ೦ವ್ಚಿ ನಾರೆ ಆ೦ವ್ದು ತುಜಿ ನಾಡ್
ಗಾ೦ವ್ ಗುಡೊ ವೇಳ್ ವಾಡೊ ಕಲೊಯ್ ತರಿ ಪಾಡ್
ಮಧ್ಯಾನ್ ಉತ್ರೊನ್ ಫಾಂತೆಂ ಜಾತಾನಾ ಪಾವ್ಸ್ ಆಯ್ಲೊ, ಶಿರಾಂಧಾರಿಂನಿ ಘಡ್ಘಡೊನ್ ಜಗ್ಲಾವ್ನ್. ಗಾಂವ್ ಭಿಜ್ಲೊ ಅನಿ ಭಿಜೊನ್ ಮೋವ್ ಜಾಲೊ ತರ್ಯಿ ಪಾವ್ಸಾಚಿ ಧಾರ್ ರಾವ್ಲಿ ನಾ.
ಮದ್ಯಾನ್ ಗೆಲಿ ಫ಼ಾ೦ತೆ೦ ಜಾಲೆ೦ ಪಾವ್ಸಾನ್ ಧಾಡ್ ಘಾಲಿ
ಶೆತ್ಭಾಟ್ ಕುಮೆರ್ ವಸ್ತಿ ಶಿರಿ೦ಧಾರಿ೦ ನ್ಹಾಲಿ
ಭಿಜ್ಲೆ ಥಳ್ ನದಿ ವ್ಹಾಳ್ ಜಾಲೆ ಧಾಟೆ ಮೊಟೆ
ವಾಜ್ಲೆ ತೆಣೆಂ ಲಜೆವಿಣೆ೦ ಗಡ್ಗಡ್ಯಾಚೆ ಥೊಟೆ
ನ್ಹಂಯ್ ವ್ಹಾಳ್ ಭರೊನ್ ವೊಮ್ತಲೆ. ಆವ್ರ್ ಉಸ್ಳೊನ್ ಆಯ್ಲೆಂ. ರೂಕ್ಝಾಡಾಂ ಹುಂಬ್ಳೊನ್ ಪಡ್ಲಿಂ. ಕುಮೆರ್, ಗುಡೆ ದೊಂಗರ್ ಬುಡ್ಲೆ.
ನದಿ ವ್ಹಾಳ್ಯಾಂತ್ ಭರ್ತಿ ಜಾಲಿ ಉಬಿರ್ ಮಾತಿ ನಾಸ್
ಶೆತಾ ಗಳ್ಯಾಂತ್ ಉಟಾಉಟಿಂ ಆವ್ರಾಚೊ ಪಾಸ್
ಝಡ್ಲಿ ಝಡಾಂ ಪಡ್ಲಿಂ ಘರಾಂ ಆತಾಂ ಕಿತೆಂ ವಾಟ್?
ಬುಡ್ಲೆ ದೊಂಗರ್ ಕುಮೆರ್ ಕುಟಾಂ ಬುಡ್ಲೆಂ ಶೆತ್ಭಾಟ್
ಉಜ್ಯಾಚ್ಯೊ ಜಿಬೊ ತಶೆಂ ಆವ್ರಾಚಿ ಲ್ಹಾರಾಂ ಘರಾಂತ್ ಭರ್ಲಿಂ. ಜಿ ವರ್ವಿ ಪಾವ್ಶಿಲ್ಯಾ ದಿಸಾಂಕ್ ಮ್ಹಣೊನ್ ದವರ್ಲ್ಲಿ ತಿ ಆವ್ರಾಚಾ ಲೊಟಾಕ್ ವ್ಹಾಳೊನ್ ಗೆಲಿ. ಆಂಗಾವಯ್ಲಿ ಕಾತ್ ಮಾತ್ರ್ ಉರ್ಲಿ. ಮನ್ಶ್ಯಾನ್ ಚಿಂತ್ಲೆಂ ಏಕ್, ದೆವಾನ್ ಕೆಲೆಂ ಅನ್ಏಕ್.
ಮ್ಹಜ್ಯಾ ಘರಾಂತ್ ಉಜ್ಯಾಪರಿಂ ಆವ್ರಾ ಲ್ಹಾರಾಂ ಭರ್ಲಿಂ
ಜಿರೆಂ ಸೊಲಾಂ ಮಿರಿಂ ಗೊಡಾಂ ವಾರ್ಯಾವೆಲ್ಯಾನ್ ಚರ್ಲಿಂ
ಚೊಂಪೊ ಗೆಲೊ ರೊಂಪೊ ಮೆಲೊ ಗೆಲೆಂ ತಾಂದುಳ್ ಭಾತ್
ಪುರ್ಲೆ ಮಾಳೆ ಉರ್ಲಿ ಗಳೊನ್ ಆಂಗಾ ವಯ್ಲಿ ಕಾತ್
ಘರ್ ಸಗ್ಳೆ ಧುವೊನ್ ಗೆಲೆಂ, ಕುಡೆಂ ಸಗ್ಳೆಂಚ್ ನಾ ಜಾಲೆಂ, ದಿವೆಯಿ ಗೆಲೆ, ತೆಲಾಂಯಿ ಗೆಲಿಂ. ಪುಣ್ ಭರ್ಲ್ಲ್ಯಾ ಕಾಳೊಕಾಂತ್ ಉಜ್ವಾಡ್ ದಿಸ್ತಾಲೊ. ತೊ ಉಜ್ವಾಡ್ ಬಾಳಾಚ್ಯಾ ತೊಂಡಾರ್ ಆಸ್ಚ್ಯಾ ನೆಣ್ಟೆಪಣಾಚ್ಯಾ ಹಾಸ್ಯಾಂಚೊ.
ಘರಾ೦ತ್ ಮೊಜಾ ಕಾಳೊಕ್ ಆತಾ೦ ಕಿತ್ಯಾಕ್ ಬಾಳೆ ಹಾಸ್ತಾ
ಭಿರಾ೦ತ್ ಮಾಕಾ ಕಾಳೊಕಾ೦ತ್ ವಾತ್ ಕಸ್ಲಿ ದಿಸ್ತಾ
ಘರಾ೦ತ್ ಮೊಜಾ ಕಾಳೊಕ್ ಮೊಗಾ ಉಜ್ವಾಡ್ ಬಾಳೆ ಕಸೊ
ತೊ೦ಡಾ ವಯ್ಲೊ ದಿವೊ ಜಳೆ ಹಾ೦ವೆ೦ ಪೆಟೊ೦ವ್ಕ್ ನಾಸ್ಲೊ
ಆತಾಂ ಘರ್ಚೊ ಯೆಜ್ಮಾನ್ ಅಜಾಪ್ ಪಾವ್ತಾ. ಅಶೆಂ ಕಶೆಂ ಜಾಲೆಂ, ಬಾಳಾಚ್ಯಾ ತೊಂಡಾರ್ ಜಳ್ಚೊ ದಿವೊ, ಮ್ಹಳ್ಯಾರ್ ಕಾಳೊಕ್ ಧಾಂವ್ಡಾಂವ್ಚೊ ಮೊಗಾಳ್ ಹಾಸೊ ತಾಣೆಂ ದವರುಂಕ್ ನಾತ್ಲ್ಲ್ಯೊ. ತರ್ ತೊ ಕೊಣೆಂ ದವರ್ಲ್ಲೊ? “ಹಾಸ್ಯಾನ್ ಪಾವ್ಸಾವೆಳಾಚೆಂ ಕಶ್ಟ್ ಉಣೆಂ ಜಾಯ್ನಾಂತ್.” ಮ್ಹಣ್ ತಾಣೆಂ ಮ್ಹಳ್ಳೆಂ.
ಆಪ್ಣೆಂ ಸಗ್ಳೆಂ ಘರ್ ಭರ್ಲ್ಲೆಂ, ಕುಡೆಂ ಭರ್ಲ್ಲೆಂ, ಗೊಟೊ ಭರ್ಲ್ಲೊ, ಕುಂಕ್ಡಾಂಚೊ ಘುಡ್ ಭರ್ಲ್ಲೊ ಪುಣ್ ಬಾಳಾಚ್ಯಾ ತೊಂಡಾರ್ ಹಾಸ್ಯಾಚೊ ದಿವೊ ಆಪ್ಣೆಂ ಪೆಟಂವ್ಕ್ಚ್ ನಾಸ್ಲ್ಲೊ, ತೊ ಖಂಯ್ ಥಾವ್ನ್ ಆಯ್ಲೊ ಮ್ಹಣ್ಚ್ಯಾ ಸವಾಲಾ ಬರಾಬರ್ ಕವಿತಾ ಸಂಪ್ತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications