ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಹಣೆಂ ಬರಾಪ್
ವಿಲ್ಸನ್ ಕಟೀಲ್: ಕೊಂಕ್ಣಿ ಸಾಹಿತ್ಯಾಂತ್ ಉದೆವ್ನ್ ಆಯಿಲ್ಲೊ ಆಯ್ಲೆವಾರ್ ತರ್ಯ್ ಎದೊಳ್ಚ್ ಆಪ್ಲ್ಯಾ ಪರಿಪಕ್ವ್ ಬರ್ಪಾಂನಿ ಕೊಂಕ್ಣಿ ಸಾಹಿತ್ಯಾಂತ್ ಅಪ್ಲಿ ಅಸ್ಮಿತಾಯ್ ರುತಾಂ ಕರ್ಚಾಂತ್ ಜಿಕ್ಲಾ. ಕವಿತಾ ಜಾಂವ್ ಕಾಣ್ಯೊ ಜಾಂವ್, ಅಪ್ಲಿಚ್ ಶೈಲಿ ಆಸಾ ಕರುನ್ ಲಿಖ್ಚೊ ಹೊ ಕೊಂಕ್ಣಿ ಸಾಹಿತ್ಯಾಂತ್ ಅಪ್ಲಿ ಮಿನತ್ ಮುಖಾರುನ್ ವರಿತ್ ತರ್ ಭರ್ವಶ್ಯಾಚೊ ಸಾಹಿತಿ ಜಾಂವ್ಚಾಂತ್ ಕಾಂಯ್ ದುಭಾವ್ ನಾ. ತಶೆಂಚ್ ಜಾಂವ್ ಮ್ಹಣ್ ಹಾಂವ್ ಅಪೇಕ್ಷಿತಾಂ.
[ಕಥಾಝರ್ಚೆರ್ ಪರ್ಗಟ್ ಜಾಲ್ಲಿ ಹಾಚಿ ’ಏಕ್ ಆಸ್ಪಶ್ಟ್ ವಾಟ್’ ಮಟ್ವಿ ಕಾಣಿ]
ವಿಲ್ಸನ್ ಕಟೀಲ್
ಹ್ಯಾ ಬರವ್ಪ್ಯಾಕ್ ಬೂಕ್ ಮ್ಹಳ್ಯಾರ್ ಅಲರ್ಜಿ.
********
ಥಾಪ್ಲ್ಲಿ ಧುಳ್ ನ್ಹಂಯ್, ಬೂಕ್ ಪೊಶೆಲ್ಲೆಂ ವ್ಹಾರೆಂ ಹುಂಗ್ಲ್ಯಾರೀ ಶಿಂಕೊ ಯೆತಾತ್. ಆಪ್ಣೆ ವಾಚ್ಚೆಂ ಸೊಡ್ಯಾಂ.... ಕೊಣೆಂ ತರೀ ಭುರ್ಗ್ಯಾನ್ ವ್ಹಡಾ ತಾಳ್ಯಾನ್ ಇಸ್ಕೊಲಾಚೆಂ ಲಿಸಾಂವ್ ವಾಚ್ಲ್ಯಾರೀ ಕರ್ಕರ್ ಜಾತಾತ್ ಹಾಕಾ. ಸ್ಪರ್ಶ್ ಗಿನ್ಯಾನ್ಯೀ ಮಾತ್ಶೆಂ ಉಣೆಂಚ್. ಆಜೂನ್ ತಾಣೆ ಆಪ್ಲಿ ಜೀಣ್ಚ್ ಆಪ್ಡುಂಕ್ ನಾ ವಾ ಆಪುಡ್ಲೆಲ್ಯಾಬರಿ ಭೊಗುಂಕ್ ನಾ ತಾಕಾ. ಕಾತ್ಕುತ್ಲಿ ಲಾಗ್ಲ್ಯಾರೀ ಖೊರ್ಪಿನಾ ತೊ. ತಾಚ್ಯಾ ಬೊಡಾಂತ್ ಮೆಂದು ಆಸಾ ಮ್ಹಳ್ಳೆಂಚ್ ದುಭಾವಾಚಿ ಗಜಾಲ್.
********
ಪುಣ್ ತೊ ಬರಯ್ತಾ. ತಶೆಂ ಪಳೆಂವ್ಕ್ ಗೆಲ್ಯಾರ್ ತಾಣೆಂ ಆಪ್ಲೆಂ ಸಾಹಿತ್ಯ್ ಸುರ್ವಾತ್ ಕೆಲ್ಲೆಂಚ್ ಎಕ್ಯೆ ವಿಲಕ್ಶಣ್ ಬರ್ಪಾ ಶಯ್ಲೆಂತ್. ಪಾನಾಚ್ಯಾ ವಯ್ರ್ ’ಕವಿತಾ’ ಮ್ಹಳ್ಳೊ ಬಿಲ್ಲೊ ಲಾಗವ್ನ್ ಪತ್ರಾಚ್ಯಾ ಸಂಪಾದಕಾಕ್ ಧಾಡುನ್ ದಿಲ್ಲ್ಯೊ. ಸುರ್ವೆರ್ ಏಕ್ ದೋನ್ ಫಾಯ್ಸ್ ಜಾಂವ್ಕ್ ನಾಂತ್. ಬೋವ್ಶಾ ಸಂಪಾದಕಾಕ್ ಪಾಂವೊಂಕ್ನಾಂತ್ ಕೊಣ್ಣಾ ಮ್ಹಣ್ ಆಪ್ಣಾಕ್ಚ್ ಭುಜಯ್ಲೆಂ. ಪುಣ್ ಪಂಚ್ವೀಸ್-ತೀಸ್ ಧಾಡ್ಲ್ಯಾರೀ ಫಾಯ್ಸ್ ಜಾಂವ್ಕ್ ನಾತ್ಲ್ಲ್ಯಾನ್ ಅಖ್ಖ್ಯಾ ಪತ್ರಿಕೋಧ್ಯಮಾ ವಯ್ರ್ಚ್ ಕಾಂಠಾಳೊ ಆಯ್ಲೊ ಬಾವ್ಡ್ಯಾಕ್.
********
ಉಪ್ರಾಂತ್ ತಾಣೆಂ ವಾಚ್ಪ್ಯಾಂಚಿಂ ಪತ್ರಾಂ ಬರಂವ್ಕ್ ಸುರ್ವಾತ್ಲಿಂ. ಫಕತ್ ಪತ್ರಾಂಚಿ ಹೊಗ್ಳಿಕ್ ಉಚಾರ್ತಾಲೊ. ಹ್ಯಾ ಖಾತಿರ್ಚ್ ತಾಣೆ ಜಿಣಿಯೆಂತ್ ಪಯ್ಲೆ ಪಾವ್ಟಿಂ ಏಕ್ ಬೂಕ್ ಘೆತ್ಲೊ. ತ್ಯಾ ಬುಕಾಚೆಂ ನಾಂವ್- ’ಡಿಕ್ಶಿನರಿ’. ಹಾಂತ್ಲೆ ಬರೆ ಬರೆ ಸಭ್ದ್ ವಿಂಚ್ತಾಲೊ ತೊ ವಾಚ್ಪ್ಯಾಂಚೆಂ ಪತ್ರ್ ಲಿಕ್ಚ್ಯಾಕ್. ಉಚಾರ್ಚಿ ಹೊಗ್ಳಿಕ್ ಅತಿರೇಕಾಕ್ ಪಾವ್ಲಿ. ಪತ್ರಾಂತ್ಲ್ಯಾ ಜಾಹಿರಾತಾಂಕ್ಯೀ ಹೊಗ್ಳಿಕ್ ಉಚಾರ್ತಾಲೊ. ಎಕಾ ಪತ್ರಾಂತ್ ’ಹ್ಯಾ ಪಾವ್ಟಿಂ ತುಮ್ಚ್ಯಾ ಶ್ರದ್ದಾಂಜಲಿಂತ್ ಘಾಲ್ಲಿ ತಸ್ವೀರ್ ಬರಿ ಆಸ್ಲ್ಲಿ’ ಮ್ಹಣ್ಯೀ ಲಿಕ್ಲ್ಲೆಂ ತಾಣೆಂ. ಹಾಚಿಂ ವಾಚ್ಪ್ಯಾಂಚಿಂ ಪತ್ರಾಂ ವಾಚುನ್ ಸಂಪಾದಕಾಕ್ ಆಪ್ಲ್ಯಾ ಪತ್ರಾಚೆರ್ಚ್ ಲಜ್ ದಿಸ್ಲಿ. ದೆಕುನ್ ಲಾಚಾರ್ ಸಂಪಾದಕಾನ್ ಹಾಚಿಂ ಪತ್ರಾಂ ವಾಚಿಂಚ್ ರಾವಯ್ಲಿಂ. ಹಾಸನಾಕಾತ್ ಗಂಭೀರ್ ಗಜಾಲ್ ಹಿ.
*********
ಹ್ಯಾ ಮಧೆಂ ಏಕ್ ಘಡಿತ್ ಘಡ್ಲೆಂ. ಹಾಚೆ ಜಿಣಿಯೆಚೆರ್ ಖೂಬ್ ಪ್ರಭಾವ್ ಘಾಲ್ಲೆಂ ಘಡಿತ್ ಹೆಂ. ತ್ಯಾ ಪತ್ರಾಂತ್ ಕೊಣೆಂಗಿ ಲಿಕ್ಲ್ಲ್ಯಾ ಕವಿತೆಚೊ ಏಕ್ ಸಬ್ದ್ ಚೂಕ್ ರಿತಿನ್ ಛಾಪೊನ್ ಆಯ್ಲೊ. ಕಿತ್ಯಾಕ್ಗೀ ಹಾಕಾ ಮಾತ್ರ್ ತೊಚ್ ಸಬ್ಧ್ ಭಾರಿಚ್ ಆಂವಡ್ಲೊ. ಅರ್ಥ್ ಸೊಧುಂಕ್ ಡಿಕ್ಶಿನರಿ ಘೆವ್ನ್ ಕಿತ್ಲೆಂ ಉಸ್ತಿಲ್ಯಾರೀ ತೊ ಸಬ್ದ್ಚ್ ಮೆಳ್ಳೊ ನಾ. ಹ್ಯಾ ಖಾತಿರ್ ತಾಕಾ ಕಠೀಣ್ ರಾಗ್ ಯೇವ್ನ್ ಡಿಕ್ಶಿನರಿಚ್ ಲ್ಹಾಸುನ್ ಸೊಡ್ಲಿ.
ಹ್ಯಾ ಬರ್ಪ್ಯಾಕ್ ಬೂಕ್ ಮ್ಹಳ್ಯಾರ್ ಅಲರ್ಜಿ.
*********
ಉಪ್ರಾಂತ್ ತಾಚ್ಯೆ ಜಿಣಿಯೆಂತ್ ಥೊಡಿ ಬದ್ಲಾವಣ್ ಆಯ್ಲಿ. ಕೊಣೆಂಗಿ ತಾಕಾ ಗಲ್ಫಾಕ್ ಪಾವಯ್ಲೆಂ. ಥೊಡೆ ಪಯ್ಶೆಯೀ ಕೆಲೆ. ಹ್ಯಾ ಮಧೆಂಯ್ ತಾಣೆ ಬರಂವ್ಚೆಂ ರಾವಯ್ಲೆಂ ನಾ. ಸುಮಾರ್ ಪನ್ನಾಸ್ ಬರ್ಪಾಂ ಜಮ್ತಾನಾ ಕವಿತೆಂಚೊ ಬೂಕ್ ಕಾಡ್ಚಿ ತಾಳ್ಣಿಂ ಉದೆಲಿ. ಪಯ್ಶೆ ಖರ್ಚಿಲೆ. ಬರ್ಪಾಂ ಟೈಪ್ ಕರಯ್ಲಿಂ. ಪಾಟ್ಲ್ಯಾ ಪಾನಾರ್ ಸೊಬ್ಚ್ಯಾಕ್ ಲಿಖ್ಣಿಂ ಗಾಲಾಕ್ ಚಿಡ್ಕಾವ್ನ್ ಧರುನ್ ಕಿತೆಂಗೀ ಗುಂಡಾಯೆನ್ ಚಿಂತ್ಚೆ ಬರಿ ನಟನ್ ಕೆಲ್ಲಿ ಏಕ್ ಕ್ಲೋಸ್-ಅಪ್ ತಸ್ವೀರ್ ಕಾಡಯ್ಲಿ. ಪ್ರಸ್ತಾವನ್ಯೀ ತಾಣೆಂಚ್ ಲಿಖ್ಲೆಂ. ಸುರ್ವೆರ್ ಬುಕಾಕ್ ನಾಂವ್ ’ಖಚ್ರ್ಯಾಂತ್ಲ್ಯೊ ಕವಿತಾ’ ಮ್ಹಣ್ ದವರ್ಲ್ಲೆಂ. ಪುಣ್ ಮುಖ್ಪಾನ್ ಪಿಂತ್ರಾಂವ್ಚ್ಯಾ ಕಲಾವಿದಾನ್ ಥಂಯ್ಸರ್ ಖಚ್ರೊ ಡಬ್ಬೊ ಪಿಂತ್ರಾಯಿಲ್ಲ್ಯಾನ್ ರಾಗ್ ಯೇವ್ನ್ ನಾಂವ್ ಬದ್ಲಿಲೆಂ. ಮುಖ್ಪಾನಾರ್ ವ್ಹಡ್ ಗ್ರಂಥಾಂಚಿ ರಾಸ್ ದಾಖಯ್ಲಿ ಆನಿ ನಾಂವ್ ದಿಲೆಂ - ’ಫಾಯ್ಸ್ ಜಾಯ್ನಾತ್ಲ್ಯೊ ಕವಿತಾ’. ಶೆಂಭೊರ್ ಪಾನಾಂ. ಹಜಾರ್ ಪ್ರತಿಯೊ. ಹಕ್ಕಾಂ ಲೇಖಕಾಚಿಂ. ಬೂಕ್ ಸದ್ದ್ಯಾಕ್ ಪ್ರಿಂಟಿಂಗಾರ್ ಆಸಾ.
*********
ಮ್ಹಜೆಲಾಗಿಂ ಏಕ್ ಬೂಕ್ ಆಸಾ. ಬೋವ್ ವಿಶೇಸ್ ಬೂಕ್. ಕಾಂಯ್ ಥೊಡ್ಯಾ ಪಾನಾಂಚೊ. ಕೋಣ್ ಪುನೆವಂತ್ ವಿಮರ್ಶಕಾನ್ ರಚ್ಲ್ಲೊಗಿ. ಹ್ಯಾ ಬುಕಾಕ್ ತಾಚೆಂಚ್ ಮ್ಹಳ್ಳೆಂ ವ್ಯಕ್ತಿತ್ವ್ ಆಸಾ; ಜಾಣ್ವಾಯ್ ಆಸಾ. ಪ್ರಬುದ್ದ್ಪಣಾಚಿ ನಿಶ್ಟುರಾಯ್ ಆಸಾ. ಸ್ಪರ್ಶ್ ಗಿನ್ಯಾನ್ ಆಸಾ. ದಿಸಾನಾತ್ಲೆಂ ವ್ಹಾರೆಂ ವ್ಹಾಳ್ತಾನಾ ಪಾನಾಂ ಪರ್ತುನ್ ಕಿತೆಂಗೀ ಪುರ್ಪುರ್ತಾ ತೊ.
ಹ್ಯಾ ಬುಕಾಚ್ಯಾ ಅಂತರ್ಮಳಾಂತ್ ಥೊಡೆಪಾವ್ಟಿಂ ಖೂಬ್ ಭೊಗಾಪ್ ಉಮಾಳೊನ್ ಯೆತಾ. ಪುಣ್ ಉತ್ರಾಂಕ್ ಕಾಂಟಾಳೊನ್ ಇರೊನ್ ವೆತಾ. ಕೊಣಾ ಕೊಣಾಚೆ ಲಾಕ್ ಸಬ್ದ್ ಹ್ಯಾ ಬುಕಾಚೆಂ ಏಕ್ ಪಾನ್ ಲೆಗೂನ್ ಜಿಕೊಂಕ್ ಸಕೊಂಕ್ ನಾಂತ್ ಯೆದೊಳ್.
ಹ್ಯಾ ಬುಕಾಚೆರ್ ಕೊಣಾಚೆಂಯೀ ನಾಂವ್ ನಾ. ಹ್ಯಾ ಬುಕಾಕ್ಚ್ ನಾಂವ್ ನಾ. ಸುರ್ವೆರ್ ಥಾವ್ನ್ ಆಖೇರ್ ಪರ್ಯಾಂತ್ ಏಕ್ ಸಬ್ದ್ ಸಯ್ತ್ ನಾ! ಹ್ಯಾ ಬುಕಾಂತ್ ಫಕತ್ತ್ ಪಾನಾಂ ರಿತಿಂ... ರಿತಿಂ... ರಿತಿಂ...
ಕಿತೆಂ ವಾಚ್ತೆಲ್ಯಾತ್?
ಹ್ಯಾ ಬುಕಾಕ್ ಬರವ್ಪಿ ಮ್ಹಳ್ಯಾರ್ ಅಲರ್ಜಿ!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
