ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
8. ತಿಸ್ರೊ ಶಕುನಿ
ಆ೦ಬ್ಯಾಮುಳಿ೦ ಶೆತ್ ಆಶೆತಾ ಪಾವ್ಸ್ ಮೊಟೊ
ಆ೦ಬ್ಯಾಚಾ ಮಾತ್ಯಾರ್ ಕೊಗುಳ್ ಖರ್ಶೆತಾ ಪಾವ್ಸ್ ಖೊಟೊ
ಮಾಯಾಚೊ ಮಹಿನೊ ಮೊರೊನ್ ವೆತಾ ಮೊಡ್ ಮದೆತಾ
ವೃಷ್ಟಿ-ಸೃಷ್ಟಿಲೆ೦ ಲಗನ್ ಜಾತಾ ಶೆಳ್ ಉದೆತಾ
ಕೆಸ್ ಕೊವ್ಳುನ್ ರಸ್ಮಾ೦ ಆವ್ಳುನ್ ಖ೦ಯ್ಗೊ ವೆತಾ
ಬದ್ಕಾಚಿ ಚಾಲ್ ಉದ್ಕಾ೦ತ್ಲ್ಯಾನ್ ಜಾತಾ ಕೊಣಾಲಿ ಸುತಾ
ಹಾತಾ೦ತ್ಲಿ ಸತ್ರಿ ಶೆತಾ೦ತ್ ಲಕ್ತಾ ವಾರೆ೦ ವೊಳ್ತಾನಾ
ಚಾಲ್ ಜೆಮೆತಾ ಗಾಲ್ ಭಿ೦ಡೆತಾ ಧಾರ್ ಗಳ್ತಾನಾ
ಎಕ್ಲೆ೦ ದ್ರೌಪದಿ ದೋಗ್ ಶಕುನಿ ಆಸಾಗೊ ತಿಸ್ರೊ
ಲಾಗಿ೦ ಝೊ೦ಪ್ಡ್ಯಾ೦ತ್ ಶಿರಾ೦ಧಾರೆ೦ತ್ ಮ್ಹಜೊಗೊ ಆಸ್ರೊ
ಧಾ ವೋಳಿಂಚೆ ಹೆ ಲ್ಹಾನ್ ಕವಿತೆಂತ್ ಸಬಾರ್ ರುಪ್ಣಿಂ ದೊಳ್ಯಾಂ ಮುಕಾರ್ ಯೆತಾತ್. ಆಂಬ್ಯಾಚೊ ರೂಕ್, ತ್ಯಾ ರುಕಾಚೆಂ ಮೂಳ್, ಮುಳಾಂತ್ಲೆಂ ಶೆತ್, ಆಂಬ್ಯಾರುಕಾಚ್ಯಾ ಮಾತ್ಯಾರ್ ಕೊಗುಳ್, ಪಾವ್ಸ್ ನಾಕಾ ಮ್ಹಣೊನ್ ತಿಚಿ ಖರಸ್; ಪಾವ್ಸ್, ಪಾವ್ಸ್ ಆನಿ ಧರ್ತಿಚೆಂ ಲಗಿನ್ ಜಾವ್ನ್ ಉದೆಲ್ಲಿ ಶೆಳ್; ಹ್ಯಾ ಸಂಗ್ತಿಂಕ್ ತಾಳ್ ಜಾವ್ನ್ ಮ್ಹಣ್ಚೆಬರಿ ಬದ್ಕಾಚೆ ಚಾಲಿನ್ ವೆಚಿ ಚಲಿ ಆನಿ ಆಸ್ರೊ ದಿಂವ್ಚೆಂ ಝೊಂಪ್ಡೆಂ!
ಆ೦ಬ್ಯಾಮುಳಿ೦ ಶೆತ್ ಆಶೆತಾ ಪಾವ್ಸ್ ಮೊಟೊ
ಆ೦ಬ್ಯಾಚ್ಯಾ ಮಾತ್ಯಾರ್ ಕೊಗುಳ್ ಖರ್ಶೆತಾ ಪಾವ್ಸ್ ಖೊಟೊ
ಆಂಬ್ಯಾಚೊ ರೂಕ್ ಏಕ್ ಕಲಾತ್ಮಕ್ ರುಪ್ಣೆಂ. ತಾಚ್ಯಾ ಮುಳಾಂತ್ ಶೆತ್ ಪಾವ್ಸಾಕ್ ಆಶೆತಾ, ಫುಲೊಂವ್ಕ್ ಆನಿ ಫಳೆಂವ್ಕ್. ಪುಣ್ ತಾಚೆರ್ ಬಸೊನ್ ಆಸ್ಚಿ ಕೊಗುಳ್, ವಿಲಾಸಿನ್. ತಿಚ್ಯೆ ಭೊಂವ್ಡೆ ಘುಂವ್ಡೆಕ್ ಆನಿ ಗಾಯಾನಾಕ್ ಆಡ್ಕಳ್ ಹಾಡ್ಚೊ ಪಾವ್ಸ್ ನಾಕಾ ಮ್ಹಣ್ಟಾ.
ಮಾಯಾಚೊ ಮಹಿನೊ ಮೊರೊನ್ ವೆತಾ ಮೊಡ್ ಮದೆತಾ
ವೃಷ್ಟಿ-ಸೃಷ್ಟಿಲೆ೦ ಲಗನ್ ಜಾತಾ ಶೆಳ್ ಉದೆತಾ.
ತರ್ಯಿ ಸೃಷ್ಟಿಚೆಂ ಕಾಮ್ ಜಾತೇ ಆಸ್ತಾ. ಮಾಯ್ ಮ್ಹಯ್ನೊ ಆಕೆರ್ ಜಾವ್ನ್ ಯೆತಾನಾ ಅಂತ್ರಳಾರ್ ಮೊಡಾಂ ಚರ್ಬೆನ್ ಮಸ್ತೆವ್ನ್ ರಾವ್ತಾತ್. ಆನಿ ಮಾಗಿರ್ ಪಾವ್ಸ್ ಪಡ್ಟಾ ಧರ್ಣಿರ್ ಶೆಳ್ ಉದೆತಾ.
ಕೆಸ್ ಕೊವ್ಳುನ್ ರಸ್ಮಾ೦ ಆವ್ಳುನ್ ಖ೦ಯ್ಗೊ ವೆತಾ
ಬದ್ಕಾಚಿ ಚಾಲ್ ಉದ್ಕಾ೦ತ್ಲ್ಯಾನ್ ಜಾತಾ ಕೊಣಾಲಿ ಸುತಾ
ಅಸಲ್ಯಾ ವೆಳಾರ್ ಕೆಸಾಂರಾಸ್ ಕೊವ್ಳ್ಯಾ ರುಪಾರ್ ಬಾಂದುನ್ ರಸ್ಮಾ ನ್ಹೆಸ್ಣಾರ್ ಉದ್ಕಾವಯ್ರ್ ವ್ಹಾಳೊನ್ ವೆಚ್ಯಾ ಬದ್ಕಾಬರಿ ಚಲೊನ್ ವೆಚಿ ಚಲಿ ತಿ ಕೊಣಾಲಿ ಧುವ್ ಆಸ್ಯೆತ್?
ಹಾತಾ೦ತ್ಲಿ ಸತ್ರಿ ಶೆತಾ೦ತ್ ಲಕ್ತಾ ವಾರೆ೦ ವೊಳ್ತಾನಾ
ಚಾಲ್ ಜೆಮೆತಾ ಗಾಲ್ ಭಿ೦ಡೆತಾ ಧಾರ್ ಗಳ್ತಾನಾ
ವಾರೆಂ ವೊಳ್ತಾನಾ ತಿಚಾ ಹಾತಾಂತ್ಲಿ ಸತ್ರಿ ಶೆತಾಂತ್ ಲಕ್ತಾ, ತಿಚಿ ಚಾಲ್ ನಿದಾನ್ ಜಾತಾ, ಉದ್ಕಾಚಿ ಧಾರ್ ತಾಂಬ್ಡ್ಯಾ ಗಾಲಾಂ ವಯ್ಲ್ಯಾನ್ ದೆಂವೊನ್ ಯೆತಾ.
ಎಕ್ಲೆ೦ ದ್ರೌಪದಿ ದೋಗ್ ಶಕುನಿ ಆಸಾಗೊ ತಿಸ್ರೊ
ಲಾಗಿ೦ ಝೊ೦ಪ್ಡ್ಯಾ೦ತ್ ಶಿರಾ೦ಧಾರೆ೦ತ್ ಮ್ಹಜೊಗೊ ಆಸ್ರೊ
ಅಶೆಂ ಪಯ್ಲೆಂಚ್ಯೊ ಆಟ್ ವೋಳಿ ಏಕ್ ಸುಂದರ್ ಚಿತ್ರಣ್ ದೊಳ್ಯಾಂ ಮುಕಾರ್ ಹಾಡ್ಟನಾ ಆಕೆರಿಚ್ಯೊ ದೋನ್ ವೋಳಿ ಗೊಂದೊಳಾಂತ್ ಶಿರ್ಕಾಯ್ತಾತ್. ದ್ರೌಪದಿ ಪಾಂಚ್ ಜಣಾಂ ಘೊವಾಂಚಿ ಬಾಯ್ಲ್, ಶಕುನಿ ಶೆಂಬೊರ್ ಕೌರವಾಂಚೊ ಮಾವ್ಳೊ - ಪುಣ್ ಹ್ಯಾ ವೊಳಿಂನಿ ದೋಗ್ ಶಕುನಿ ಜಾವ್ನ್ ತಿಸ್ರೊ ಶಕುನಿ ಆಸಾ, ತೊ ಕೊಣ್ ಮ್ಹಳ್ಳೆಂ ಕಳನಾ. ಹೊ ತಿಸ್ರೊ ಶಕುನಿ ಲಾಗ್ಶಿಲ್ಯಾ ಝೊಂಪ್ಡ್ಯಾಂತ್ ಆಸಾ ಆನಿ ಶಿರಾಂಧಾರಿಂಚಾ ಪಾವ್ಸಾಕ್ ಸಾಂಪಡ್ಲೆಲ್ಯಾಂಕ್ ಥಂಯ್ಸರ್ ತ್ಯಾ ಝೊಂಪ್ಡ್ಯಾ ಶಿವಾಯ್ ದುಸ್ರೊ ಆಸ್ರೊ ನಾ.
ಭರ್ಲ್ಯಾ ಸೊಬಾಗೆಂತ್ ಬದ್ಕಾಚಾಲಿಚಿ ಚಲಿ ವೆತಾ ಖಂಯ್? ಆನಿ ತಿಸ್ರೊ ಶಕುನಿ ಕೊಣ್? ಮ್ಹಣ್ಚೆಂ ಸವಾಲ್ ವಾಚ್ಪ್ಯಾಥಂಯ್ ಜಿರನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications