ಇಂದೀವರ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾದಾಯ್ಜ್ -9

ಇಂದೀವರ್

ನೀಜ್ ನಾಂವ್ : ಶ್ಯಾಮ್‌ಲಾಲ್ ಬಹುರಾಯ್.

ಜನನ್ : 1924.

ಮರಣ್ : 27 ಫೆಬ್ರೆರ್ 1999.

ಜಲ್ಮಾಲ್ಲೊ ಗಾಂವ್ : ಝಾನ್ಸಿ (ಮಧ್ಯಪ್ರದೇಶ್).

ವಳೊಕ್:

ಅಪ್ಣಾಯಿಲ್ಲ್ಯೊ ಪ್ರಶಸ್ತ್ಯೊ :

1975 ಇಸ್ವೆಂತ್ಲ್ಯಾ ’ಅಮಾನುಷ್’ ಫಿಲ್ಮಾಕ್ ತಾಣೆ ಲಿಖ್‌ಲ್ಲ್ಯಾ ’ದಿಲ್ ಐಸಾ ಕಿಸೀನೆ ಮೆರಾ ತೋಡಾ’ ಪದಾಂಕ್ ಫಿಲ್ಮ್‌ಫೇರ್ ಪ್ರಶಸ್ತಿ. ಹಾಣೆಂ ಪದಾಂ ಬರಯಿಲ್ಲಿಂ ಫಿಲ್ಮಾಂ: 200 ವಯ್ರ್.

ಪದಾಂ/ಕವಿತಾ/ಗಝಲಾಂ : 1000 ವಯ್ರ್.

ಫಿಲ್ಮಾಂಕ್ ಪದಾಂಚಿ ಸುರ್‍ವಾತ್ :

ಏಕ್ ಪದಾಂ ಲಿಖ್ಪಿ ಜಾವ್ನ್ ಫಿಲ್ಮಾಂತ್ ಅಪ್ಲೆಂ ಅಸ್ತಿತ್ವ್ ಸೊಧುಂಕ್ ಇಂದೀವರಾಕ್ ಜಾಯಿತ್ತಿ ಮಿನತ್ ಕರುಂಕ್ ಪಡ್ಲಿ. 1946 ಇಸ್ವೆಂತ್ ’ಡಬಲ್ ಫೇಸ್’ (ದೊಡೆಂ ಮುಖ್) ಮ್ಹಳ್ಳ್ಯಾ ಫಿಲ್ಮಾಂತ್ ತಾಣೆಂ ಅಪ್ಲೆಂ ಪಯ್ಲೆಂ ಪದ್ ಲಿಖ್ಲೆಂ. ಹಾಚೆಸವೆಂ ಜಾಯ್ತ್ಯಾ ’B’ ತಶೆಂಚ್ ’C’ ಗ್ರೇಡಿಚಾ ಫಿಲ್ಮಾಂನಿ ಪದಾಂ ಬರಯ್ಲಿಂ ತರ್‌ಯೀ ತಾಚೆಂ ನಾಂವ್ ಲೊಕಾಂಕ್ ವಳ್ಕಿಚೆಂ ಜಾಲೆಂಚ್ ನಾ.

ತಿತ್ಲ್ಯಾರ್ 1951 ಇಸ್ವೆಂತ್ ’ಮಲ್ಹಾರ್’ ಮ್ಹಳ್ಳ್ಯಾ ಫಿಲ್ಮಾಂತ್ ’ಬಡೆ ಅರ್‌ಮಾನ್ ಸೆ ರಕ್ಕಾ ಹೆ ಬಲಮ್ ತೇರಿ ಕಸಮ್’ ಮ್ಹಳ್ಳೆಂ ಪದ್ ಲಿಖ್ಲೆಂ ಆನಿಂ ತೆಂ ಭಾರಿಚ್ ಲೊಕಾಮೊಗಾಳ್ ಜಾಲೆಂ ತರ್‌ಯೀ ತೊ ಲೊಕಾಮೊಗಾಳ್ ಜಾಲೊನಾ. 1963 ಇಸ್ವೆಂತ್ ತಾಕಾ ’ಪಾರಸ್‌ಮಣಿ’ ಮ್ಹಳ್ಳ್ಯಾ ಫಿಲ್ಮಾಕ್ ಪದಾಂ ಲಿಖ್ಚೊ ಆವ್ಕಾಸ್ ಮೆಳ್ಳೊ. ಆನಿಂ ತ್ಯಾಚ್ ಫಿಲ್ಮಾಂತ್ ಅಪ್ಲ್ಯಾ ಸಂಗೀತ್ ಲೊಕಾಚಿ ಸುರ್ವಾತ್ ಕೆಲ್ಲಿ ಸಂಗೀತ್ ನಿರ್ದೇಶಕ್ ’ಲಕ್ಷ್ಮೀಕಾಂತ್ - ಪ್ಯಾರೆಲಾಲ್’ ಹಾಣಿಂ.

ಹ್ಯಾ ಫಿಲ್ಮಾ ಉಪ್ರಾಂತ್ ತಾಚೆಂ ನಾಂವ್ ಉಂಚ್ಲ್ಯಾ ಕವಿಂಚಾ ಪಂಗ್ತೆರ್ ವಳ್ಕಿಚೆಂ ಜಾಲೆಂ.

ಫಿಲ್ಮಾಂ ಆನಿಂ ಪದಾಂ :

ಹಾಚಾ ಜಿಣ್ಯೆಂತ್ ಘಡ್‌ಲ್ಲೆಂ ಅನ್ಯೇಕ್ ಮಹತ್ವಾಚೆಂ ಘಡಿತ್ ಜಾವ್ನಾಸಾ ತಾಚಿ ಆನಿಂ ಮನೋಜ್ ಕುಮಾರ್ ಹಾಚಿ ಇಸ್ಟಾಗಾತ್. 1967 ಇಸ್ವೆಂತ್ಲೆಂ ತಾಚೆಂ ’ಉಪ್ಕಾರ್’ ಫಿಲ್ಮಾಂತ್ ಲಿಖ್ಲೆಲಿಂ ಪದಾಂ ಜಾಯ್ತಿಂ ಲೊಕಾಮೊಗಾಳ್ ಜಾಲಿಂ ಮಾತ್ರ್ ನ್ಹಯ್, ಭಾರತಾಚಾ ದೇಶ್‌ಭಕ್ತ್ ಗಿತಾಂಚಾ ಇತಿಹಾಸಾಂತ್ ನವೆ ಅಧ್ಯಾಯ್ ಜಾಲ್ಲ್ಯಾ ಪದಾಂ ಪಯ್ಕಿ ಏಕ್ ಜಾಲಿಂ. ಹೆಚ್ಚ್ ವೆಳಾರ್ ತಾಣೆಂ ಲಿಖ್ಲೆಲಿಂ ಥೊಡಿಂ ಪದಾಂ ’ಕಸ್ಮೆವಾದೆ ಪ್ಯಾರ್ ವಫಾ’, ಯಾ ’ಕೊಯಿ ಜಬ್ ತುಮಾರ ಹೃದಯ್ ತೋಡ್ ದೆ’ ಪದಾಂಕ್ ಹಿಂದಿ ಫಿಲ್ಮಿ ಸಂಸಾರಾಂತ್ಲ್ಯಾ ಶ್ರೇಷ್ಟ್ ಪದಾಂ ಪಯ್ಕಿ ಏಕ್ ಮ್ಹಣ್ ಲೆಖ್ತಾತ್. ತಾಚೆಂ ಅನ್ಯೇಕ್ ಪದ್ ’ಮೆರಿ ಪ್ಯಾರಿ ಬೆಹೆನಿಯಾ ಬನೇಗಿ ದುಲ್ಹನಿಯಾ’ ಪದ್ ಆಜ್ ಸಯ್ತ್ ಸಭಾರಾಂ ಕಾಜಾರಾಂ ಕಾರ್ಯಾಂನಿ ಆಯ್ಕತಾತ್.

ಖೊಡ್ :

ಇಂದೀವರಾಕ್ ಲಾಭ್‌ಲ್ಲಿ ಖೊಡ್‌ಯೀ ತಾಕಾ ಮೆಳ್‌ಲ್ಲ್ಯಾ ನಾಂವಾತಿತ್ಲಿಚ್ ಫಾಮಾದ್. ಏಕ್ ಪಾವ್ಟಿಂ ಹಾಣೆಂ ಜಿಯೆಂವ್ಚಾ ಬಿಲ್ಡಿಂಗಾಕ್ (ಬೆಂಡ್ರಾ) ಎಕಾ ದಿಸಾ ಹಾಂವ್ ಗೆಲ್ಲೆವೆಳಾರ್, ತಾಚಾ ಬಿಲ್ಡಿಂಗಾಚಾ ವಾಚ್‌ಮೆನಾ ಥಾವ್ನ್, ಲಿಫ್ಟ್‌ಮೇನ್ ಪರ್‍ಯಾಂತ್ ತಾಚಾ ಪಿಸಾಯೆ ವಿಶ್ಯಾಂತ್ ಉಲ್ಲೇಕ್ ಕರ್ತಾಲೆ. ಸಾಹಿತ್ಯಾಚೆಂ ತಶೆಂಚ್ ತರ್ನ್ಯಾ ಬೊಂಬ್ಯಾಂಚೆಂ ಜಬರ್‌ದಸ್ತ್ ಪಿಶೆಂ ತಾಚಾ ಮ್ಹಾತಾರ್‍ಯಾ ಪ್ರಾಯೆರ್‌ಯೀ ತಾಕಾ ಆಸ್‌ಲ್ಲೆಂ. ತಾಣೆಂ ಜಾಯಿತ್ತ್ಯಾ ಅರ್ಥ್ ನಾತ್‌ಲ್ಲ್ಯಾ ಫಿಲ್ಮಾಂಕ್ ಸಯ್ತ್ ಪದಾಂ ಲಿಖ್ಲ್ಯಾಂತ್, ದೊಡ್ಯಾ ಅರ್ಥಾಚಿಂ, ಅಶ್ಲೀಲ್ ಸಬ್ಧಾಂಚಿಂ ಪದಾಂ ಸಯ್ತ್ ತಾಣೆಂ ಲಿಖ್ಲ್ಯಾಂತ್ - ಫಕತ್ ಅಸಲ್ಯಾಚ್ ವರ್ಗಾಚಾ ವಾಚ್ಪ್ಯಾಂಕ್ ಧಾಧೊಸ್ ಕರ್ಚಾಕ್.

ಕವಿತಾ/ಪದಾಂ :

"ಜಿವಿತಾಕ್ ಜಾಯ್ತೊ ಮೋಗ್ ಅಪ್ಣಾನ್ ದಿಲಾ 

ಮರಣಾಸವೆಂಯೀ ಮೊಗ್‌ಚ್ ಪಾಳ್ತಲೊಂ ಹಾಂವ್ 

ರಡೊನ್ ರಡೊನ್ ಸಂಸಾರಾಕ್ ಆಯಿಲ್ಲೊಂ ತರ್‌ಯೀ 

ಹಾಸೊನ್ ಹಾಸೊನ್ಂಚ್ ಸಂಸಾರಾ ಥಾವ್ನ್ ವೆತಲೊಂ"

ಅಸಲಿಂ ಉತ್ರಾಂ ಅಪ್ಲ್ಯಾ ಪದಾಂನಿ ಲಿಖ್‌ಲ್ಲ್ಯಾ ಕೊಣಾಯ್ಚಾಯ್ ಕವಿತಾ-ಪದಾಂವಿಶ್ಯಾಂತ್ ಇಲ್ಲೆಂ ಸಾಂಗ್ಚೆಂ ಅಸಾಧ್ಯ್. ಪುಣ್ ತಾಣೆ ಅಪ್ಲ್ಯಾ ಜಿಯೆಲ್ಲ್ಯಾ ಕವಿತಾ ಸಂಸಾರಾಂತ್ ಸಭಾರ್ ಪಾವ್ಟಿಂ ಸಾದ್ಯಾ ಲೊಕಾಂಕ್ ಸಮ್ಜಾಂವ್ಚೆಖಾತಿರ್ ಅಪ್ಲ್ಯಾ ಕವಿತಾಂಕ್ ಕೊನ್ಶಾಕ್ ಲೊಟುನ್ ಅರ್ಥ್ ನಾತ್‌ಲ್ಲಿಂ ಪುಣ್ ಪ್ರಾಸ್-ಛಂದಸ್ಸಾಂನಿ ಭರ್‌ಲ್ಲಿಂ ಪದಾಂ ಲಿಖ್ಲ್ಯಾಂತ್.

ಪುಣ್ ಏಕ್ ಸತ್ ಜೆಂ ಕೊಣೆಂಚ್ ನೆಗಾರ್ ಕರ್ಚೆಪರಿಂ ನಾತ್‌ಲ್ಲೆಂ ಆನಿಂ ತೆಂ ಜಾವ್ನಾಸಾ ಪದಾಂ ತಾಣೆಂ ಬರಯಿಲ್ಲಿಂ ಥೊಡಿಂ ಫಿಲ್ಮಾಂ, ಬಾಲಿವುಡ್ ಫಿಲ್ಮಾಚಾ ಇತಿಹಾಸಾಂತ್ ಅಮರ್ ಜಾಲ್ಯಾಂತ್.

ಕವಿತಾದಾಯ್ಜ್ - 9 . ಇಂದೀವರ್

ಹಾಂತ್ಲೆಂ ಏಕ್ ಫಿಲ್ಮ್ ಉಲ್ಲೇಕ್ ಕರ್ಚಿಂ ತರ್ ’ಸಫರ್’, ಆನಿಂ ಹಾಂತ್ಲೆಂ ಏಕ್ ಪದ್ ’ಜಿಂದಗೀ ಕಾ ಸಫರ್.. ಹಾ ಯೆ ಕೈಸಾ ಸಫರ್..’ ಪದ್ - ಜೆಂ ಆಜ್ ಪರ್‍ಯಾಂತ್ ವಿರಕ್ತ್-ಭಾವುಕ್ ಮನಿಸ್ ತವಳ್‌ತವಳ್ ಗಾಯ್ತಾ-ಆಯ್ಕತಾ.

"ಜಿಣ್ಯೆಚೆಂ ಪಯ್ಣ್ ತೆಂ ಕಸಲೆಂ ಪಯ್ಣ್ 

ಜೆಂ ಕೊಣ್ಂಚ್ ಸಮ್ಜೊಂಕ್ ನಾಂತ್ 

ಕೊಣಾಕ್‌ಚ್ ಕಳೊಂಕ್‌ನಾ 

      ಜಿವಿತಾಕ್ ಜಾಯ್ತೊ ಮೋಗ್ ಅಪ್ಣಾನ್ ದಿಲಾ 

      ಮರಣಾಸವೆಂಯೀ ಮೊಗ್‌ಚ್ ಪಾಳ್ತಲೊಂ ಹಾಂವ್ 

      ರಡೊನ್ ರಡೊನ್ ಸಂಸಾರಾಕ್ ಆಯಿಲ್ಲೊಂ ತರ್‌ಯೀ 

      ಹಾಸೊನ್ ಹಾಸೊನ್ಂಚ್ ಸಂಸಾರಾ ಥಾವ್ನ್ ವೆತಲೊಂ 

ಅಸಲೆಂ ಜಿವಿತ್‌ಯೀ ಆಸಾ, ಜೆಂ ಜಿಯೆಲ್ಲೆಂಚ್ ನಾ 

ಜಾಕಾ ಜಿಯೆಂವ್ಚಾಧಿಂಚ್ ಮರಣ್ ಆಯ್ಲೆಂ 

ಅಸಲೀಂಯ್ ಫುಲಾಂ ಆಸಾತ್, ಜಿಂ ಫುಲ್ಲಿಂಚ್ ನಾಂತ್ 

ಜಾಂಕಾಂ ಫುಲ್ಚಾಧಿಂಚ್ ಭ್ರಮರಾಂನಿ ಖೆಲೆಂ"

ಕವಿತಾದಾಯ್ಜ್: 1, 2, 3, 4, 5, 6, 7, 8

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2004 DAAIZ.COM All rights reserved. Page concept, designed and maintained by Ashawadi Publications