ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಅಭಿಯಾನ್ ಸಮಿತಿಚ್ಯಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ.
ಜೊನಿ ವಿಶ್ಯಾಂತ್ ಉಲಂವ್ಕ್ ಗೆಲ್ಯಾರ್ ಉತ್ರಾಂ ಜಾತಾತ್ ಮೊನಿಂ.
ಸದಾಂಚ್ ಹೆರಾಂಚಾ ಗರ್ಜೆಕ್ ಆಯ್ಕೊಂಚೆ ತಸ್ಲಿ ಜಾವ್ನಾಸ್ಲಿ ಜೊನಿಚಿ ಜಿಣಿ.
ಅಪ್ಲ್ಯಾ ದುಖಾಂಕ್ ಧಾಂಬುನ್ ಧರ್ನ್ ಹೆರಾಂಕ್ ಆಯ್ಕೊಂಚಿ ಜೊನಿಚಿ ಕಾಣಿ.
ಆಜ್ ಕುವೆಯ್ಟಾಂತ್ಲ್ಯಾ ಮೆಟಾಂ ಮೆಟಾಂನಿ ನಿಯಾಳ್ ಜೊನಿಚೊ ಮನಿಂ.
ಮೆಳಾತ್ಗಾಯ್ ಕೊಂಕ್ಣಿ ಮಾಯೆಕ್ ಜೊನಿ ತಸ್ಲೊ ಅನಿ ಕೊಣಿ?
[ಜನನ್: 22 ಫೆಬ್ರೆರ್ 1960 ಮರಣ್: 16 ಅಗೋಸ್ತ್ 2006]
ಜೊನಿ ಸುರತ್ಕಲ್
ಏಕ್ ಉಡಾಸ್ - ಜೊನಿ ಸುರತ್ಕಲ್ಚೊ
ಹ್ಯಾ ಸಂಸಾರಾಂತ್ ಜಲ್ಮೊನ್, ಜಿಯೆಂವ್ಚ್ಯಾ ಹರ್ಯೆಕಾ ಮನ್ಶ್ಯಾಕ್ ಅಪ್ಲೆಂಚ್ ಮ್ಹಳ್ಳೆಂ ಏಕ್ ಮಿಸಾಂವ್ ಆಸ್ತಾ ತಶೆಂಚ್ ಅಪ್ಲೆಂ ಬರೆಂ ಅಪ್ಲ್ಯಾ ಫಾಲ್ಯಾವಿಶಿಂ ಖಂತ್ ಕರ್ಚೆಂ ಹಕ್ಕ್ ಆಸ್ತಾ. ಚಡ್ತಾವ್ ಮನಿಸ್ ಅಸಲಿ ಜಿಣಿ ಜಿಯೆತಾನಾ ಆಯ್ಚಾ ದಿಸಾಪರಿಂ ಫಾಲ್ಯಾಂಚೆ ಖಾತಿರ್ಯೀ ಕಾಂಯ್ ಥೊಡೆಂ ಪುಂಜಾಂವ್ಕ್ ಪೆಚಾಡ್ತಾ, ದೆಖುನ್ ಮನ್ಶ್ಯಾಲಾಗಿಂ ಅಪುಣ್, ಅಪ್ಲಿಂ ಮ್ಹಣೊನ್ ಸುಶೆಗ್ ಮೆಳಾನಾ. ಹ್ಯಾ ಮನ್ಶ್ಯಾ ಜಿಣ್ಯೆಕ್ ಕೋಣ್ ಬರೆಂ ಯಾ ವಾಯ್ಟ್ ಮ್ಹಣ್ ವೊಲಾಯ್ತಾತ್ ಪುಣ್ ಹಕೀಗತೆಂತ್ ಮನಿಸ್ ಯೆತಾನಾ ರಿತೊ ತಶೆಂಚ್ ವೆತಾನಾ ರಿತೊ. ವೆತಾನಾ ಕಿತೆಂಯ್ ವರುನ್ ವೆತಾ ತರ್ ಅಪ್ಲೆಂ ಬರೆಂ-ವಾಯ್ಟ್, ತೆಚ್ಚ್ಪರಿಂ ಕಿತೇಂಯ್ ಹ್ಯಾ ಸಂಸಾರಾಂತ್ ಸೊಡ್ನ್ ವೆತಾ ತರ್ ತಾಣೆಂ ಕೆಲ್ಲ್ಯಾ ಬರ್ಯಾ ವಾಯ್ಟಾಚೊ ಉಡಾಸ್. ದೆಖುನ್ ಜಿವಂತ್ ಆಸ್ತಾನಾ ವಳ್ಕೊನ್ ಆಸ್ಚಾಂನಿ ಮೊರ್ತಚ್ ದುಃಖಾಂ ಗಳಂವ್ಚೆಂ ವಾಜ್ಬಿ. ಮನ್ಶ್ಯಾ ಜಿಣ್ಯೆಚೊ ಘುಟ್ಯೀ ಹೊಚ್ಚ್; ಜೆದ್ನಾಂ ಆಸ್ಚೆಂ ಸಸಾರ್, ಕೆದ್ನಾಂ ಆಸ್ಚೆಂ ಹೊಗ್ಡಾಯ್ತಚ್ ತಾಚೆಂ ಮೋಲ್ ಕಳ್ತಾ.
ಹ್ಯಾ ಪರಿಗತೆಂತ್ ಭೋವ್ ಥೊಡೆ ಮನಿಸ್ ’ಹೆರಾಂ ಖಾತಿರ್ ಜಿಯೆಂವ್ಚಿಚ್ ಅಪ್ಲಿ ಜಿಣಿ’ ಮ್ಹಣ್ ಜಿಯೆತಾತ್. ತಾಂತ್ಲೊ ಎಕ್ಲೊ ಎಕಾ ವರ್ಸಾಧಿಂ ದೆವಾಧೀನ್ ಜಾಲ್ಲೊ ’ಜೊನಿ ಮಿಸ್ಕಿತ್’ ಮ್ಹಣ್ಚ್ಯಾಕ್ ತಾಚಿ ಸಳಾವಳ್ ಆಸ್ಲ್ಲ್ಯಾ ಲೊಕಾಂಚಿಂ ಉತ್ರಾಂ ರುಜ್ವಾತ್. ಆಜ್ ತೊ ಆಮ್ಚೆ ಮಧೆಂ ನಾಂ ಮ್ಹಣ್ತಚ್ಚ್ ತಾಚೆವಿಶಿಂ ಕಿತೇಂಯ್ ಬರೆಂ ವಾಯ್ಟ್ ಬರವ್ಯೆತ್, ತಾಂತುಂ ತಾಕಾ ಕಸಲೊಚ್ಚ್ ಫರಕ್ ನಾ. ತರ್ಯೀ ತಾಚಾ ಬರ್ಯಾಪಣಾಚೊ ಇಲ್ಲೊ ತರ್ಯೀ ಉಡಾಸ್ ಕಾಡ್ಲೊ ತರ್, ತಾಚ್ಯಾ ವಾಟೆನ್ ಚಮ್ಕೊನ್ ಆಸ್ಚಾ ಥೊಡ್ಯಾಂಕ್ ತರ್ಯೀ ಏಕ್ ದಿಶ್ಟಾವೊ ಲಾಭ್ತಲೊ ಮ್ಹಳ್ಳ್ಯಾ ಇರಾದ್ಯಾನ್ ಹೆಂ ಬರಯ್ತಾಂ.
ಮ್ಹಜಿ ಆನಿ ಜೊನಿಚಿ ಪಯ್ಲಿ ವಳೊಕ್ ಜಾಲ್ಲಿ 1987 ಇಸ್ವೆಂತ್ ಜೆದ್ನಾಂ ಎಕಾ ’ಮಿತ್ರ್ ಸಾಹಿತಿಕ್ ಶಿಭಿರ್’ ಹಾಕಾ ಹಾಂವ್ ಆನಿ ಮಿತ್ರ್ ಕೆವಿನ್ ಡಿ’ಮೆಲ್ಲೊ ಹಾಜರ್ ಜಾಂವ್ಕ್ ಗೆಲ್ಲ್ಯಾ ವೆಳಾರ್. ಮುಖಾಮುಖಿ ಉಲಂವ್ಕ್ ನಾಂವ್, ತೆದ್ನಾಂ ಕೊಣೆಂಗೀ ತಾಚಿ ವಳೊಕ್ ಕರ್ನ್ ದಿಲ್ಲಿ ’ಬೇಬಿಪ್ರಿಯಾ’ ಲಿಖ್ಣೆಂ ನಾಂವಾರ್ ಬರಂವ್ಚೊ ಲೇಖಕ್ ಹೊಚ್ಚ್, ಕುವೆಯ್ಟಾಂತ್ ’ಕೇಟರಿಂಗ್ ಬಿಜ್ನೆಸ್’ ಕರುನ್ ಆಸಾ ಮ್ಹಣ್; ಇತ್ಲೆಂಚ್. ತಾಚ್ಯಾಕೀ ಚಡ್ತಿಕ್ ಕಿತೆಂಚ್ ತಾಚೆವಿಶಿಂ ಹಾಂವ್ ನೆಣಾಸ್ಲೊಂ.
ಸುಮಾರ್ ಪಂದ್ರಾ ವರ್ಸಾಂ ಉಪ್ರಾಂತ್ (2001 ಇಸ್ವೆಂತ್) ಜೆದ್ನಾಂ ಹಾಂವ್ ಕುವೆಯ್ಟಾಕ್ ಪಾವ್ಲೊಂ, ತೆದ್ನಾಂ ಜೊನಿಚಿ ಸಳಾವಳ್ ಜಾಲಿ. ತಾಚಿ ವಳೊಕ್ ಕೊಂಕ್ಣಿ, ತಾಚೊ ವಾವ್ರ್ ಪರ್ಧ್ಯಾಪಾಟ್ಲೊ. ಹೆಂ ತಾಚೆಸಂಗಿಂ ವಾವ್ರ್ ಕೆಲ್ಲ್ಯಾ ಹಾವೆಂ ಸಮ್ಜಾಲ್ಲೆಂ ಸತ್; 2002 ಇಸ್ವೆಂತ್ ’ಕುಳ್ವಾರ್ಚೆಂ ದಾಯ್ಜ್’ ಬೂಕ್ ಪರ್ಗಟ್ ಕರ್ತಾನಾ, ಬುಕಾಚೆಂ ಸಂಪಾದಕ್ಪಣ್ ಮ್ಹಜ್ಯಾ ಖಾಂದ್ಯಾರ್ ಆಸ್ಲೆಂ ತರ್ ಬುಕಾಚಾ ಆರ್ಥಿಕ್ ಸಹಾಯೆಚಿ ಜವಾಬ್ಧಾರಿ ಜೊನಿಚ್ಯಾ ಖಾಂದ್ಯಾರ್ ಆಸ್ಲಿ. ಆನಿ ಹಾಂವ್ ತೆದ್ನಾಂ ಕುವೆಯ್ಟಾಕ್ ನವೊಂ ತರ್ಯೀ, ತೊ ಬೂಕ್ ಪರ್ಗಟ್ ಜಾಂವ್ಕ್ ಮೂಳ್ ಕಾರಣ್ ಜೊನಿ. ಫುಡೆಂ ವೆವೆಗ್ಳ್ಯಾ ರಿತಿರ್ ತಾಚೊ ಕೊಂಕ್ಣಿ ವಾವ್ರ್ ಪಳೆವ್ನ್ ಹಾಂವ್ ತಾಚೆಥಾವ್ನ್ ಜಾಯ್ತೆಂ ಶಿಕ್ಲೊಂ. ಹ್ಯಾ ತಾಚ್ಯಾ ಕೊಂಕ್ಣಿ ಮೊಗಾಕ್, ತಶೆಂಚ್ ಪರ್ದ್ಯಾ ಪಾಟ್ಲ್ಯಾನ್ ತಾಣೆಂ ಕರ್ಚ್ಯಾ ವಾವ್ರಾಕ್ ಸಮ್ಜೊನ್ ಹಾವೆಂ ಏಕ್ ಲೇಖನ್ ಬರಯಿಲ್ಲೆಂ ’ಕೊಂಕ್ಣೆಂತ್ಲೊ ಖರೊ ಆಶಾವಾದಿ’ - ಆನಿ ದಿವೊ ಪತ್ರಾನ್ ತೆಂ ಪರ್ಗಟ್ ಕೆಲ್ಲೆಂ.
ಜೊನಿ ’ಝೆಲೊ’ ಪತ್ರಾಚೊ ವ್ಹಡ್ಲೊ ಅಭಿಮಾನಿ ಆನಿ ಕುವೆಯ್ಟಾಂತ್ ಜರ್ ಝೆಲೊ ವಿಶೇಸ್ ಅಂಖೆ ಪರ್ಗಟ್ ಜಾಲ್ಯಾತ್, ತಾಚೊ ಭಳಿಷ್ಟ್ ಖಾಂಬೊ ಜೊನಿ ಮ್ಹಳ್ಳೆಂ ಕೊಣೆಂಚ್ ಇನ್ಕಾರ್ ಕರ್ಚೆಪರಿಂ ನಾ. ಪುಣ್ ತಾಚೆಮಧೆಂ ಆನಿ ಮ್ಹಜೆ ಮಧೆಂ ಉಭ್ಜಾಲ್ಲೊ ವಾದ್ ಹೊಚ್ಚ್; ’ಜರೀ ತರೀ ಆಮಿ ಝೆಲೊ ಪತ್ರಾಕ್ ಮಾತ್ರ್ ಕುಮೊಕ್ ಕರ್ಚಿ ತರ್ ಆಮಿ ಝೆಲೊ ಅಭಿಮಾನಿ ಸಂಘ್ ಮ್ಹಣ್ ಆಮ್ಕಾಂ ವೊಲಾವ್ಯಾಂ, ಕೊಂಕ್ಣಿ ಅಭಿಮಾನಿ ಮ್ಹಣ್ಚೆಂ ನಾಕಾ’ - ತಶೆಂ ಮ್ಹಣ್ ಮ್ಹಾಕಾ ಝೆಲ್ಯಾಚೆರ್ ಕಸಲೊಚ್ಚ್ ವೆಕ್ತಿಗತ್ ರಾಗ್-ಧ್ವೇಶ್ ನಾತ್ಲ್ಲೊ. ಆಮ್ಚಾ ಹ್ಯಾ ವಾದಾ ಮಧೆಂ ಹೆರ್ ಪತ್ರಾಚೊ ವಿಶೇಸ್ ಅಂಖೊ ಕಾಡ್ಚೆಂ ಸ್ವಪಾಣ್ ಅಧುರೆಂಚ್ ಉರ್ಲೆಂ.
ಫುಡ್ಲ್ಯಾ ವರ್ಸಾ ಆಮ್ಚೊ ಅನ್ಯೇಕ್ಲೊ ಸಾಂಗಾತಿ ’ಜೊರ್ಜಿ ಪೀಂತ್ ಆಯ್ಕೊಳ್’ ಆಮ್ಕಾಂ ಸಾಸ್ಣಾಚೊ ಆಧೇವ್ಸ್ ಮಾಗೊನ್ ಗೆಲೊ. ತಾಚ್ಯಾ ಕುಟ್ಮಾಕ್ ಮಜತ್ ಕರ್ಚ್ಯಾ ಇರಾದ್ಯಾನ್ ಆಮಿ ವಿಶೇಸ್ ಅಂಖೊ ಕಾಡುಂಕ್ ಮುಖಾರ್ ಸರ್ಲ್ಯಾಂವ್. ಹೆರ್ ಪತ್ರಾಂ ಥಾವ್ನ್ ಆಮ್ಕಾಂ ಕಿತ್ಲಿ ಕುಮೊಕ್/ಸಹಕಾರ್ ಮೆಳಾತ್ ಮ್ಹಳ್ಳೆಂ ಆಮ್ಕಾಂ ನಖ್ಖೆಂ ಕಳಿತ್ ನಾತ್ಲ್ಲ್ಯಾನ್, ಆಮ್ಕಾಂ ಪರತ್ ಝೆಲೊ ವಿಶೇಸ್ ಅಂಖೊ ಕಾಡ್ಚೆಂಚ್ ಬರೆಂ ಮ್ಹಣ್ ಭಗ್ಲೆಂ ಆನಿ 2003 ಇಸ್ವೆಂತ್ ಆಮಿ ಝೆಲೊ ವಿಶೇಸ್ ಅಂಖೊ ಕಾಡ್ಲೊ - ಜೊ ಅಜೂನ್ ಏಕ್ ಝೆಲ್ಯಾಚೊ ಧಾಖ್ಲೊ (232 ಪಾನಾಂಚೊ) ಜಾವ್ನಾಸಾ.
ಆಜ್ ತೊ ಆಮ್ಚೆ ಮಧೆಂ ನಾ ಮ್ಹಣ್ತಚ್ಚ್ ಆಮ್ಚೆ ಮಧ್ಲೊ ವಾದ್-ವಿವಾದಾಚೊ ಉಲ್ಲೇಕ್ ಹಾಂಗಾಸರ್ ಗರ್ಜೆ ಭಾಯ್ಲೊ. ಪುಣ್ ಮ್ಹಜ್ಯಾ ಕಾಳ್ಜಾಂತ್ ಮಾಂದುನ್ ಘೆತ್ಲ್ಲೆಂ ಸತ್ ಜಾವ್ನಾಸಾ; ಕೊಂಕ್ಣೆ ಖಾತಿರ್ ವೋತ್-ಸಾವ್ಳಿ ಮ್ಹಳ್ಳೆಂ ಪಳೆನಾಸ್ತಾಂ, ಕೆದಿಂಚ್ ಕಸ್ಲೇಂಯ್ ನಾಂವ್, ಮಾನ್, ಸನ್ಮಾನ್, ಶಾಲಾಂ, ಕದೆಲಾಂ ಆಶೆನಾಸ್ತಾಂ ಕೆದಿಂಚ್ ಅಪ್ಲೆಂ ಸಂದರ್ಶನ್ ದೀನಾಸ್ತಾಂ ವಾವ್ರ್ ಕೆಲ್ಲೊ ಜೊನಿ ಸುರತ್ಕಲ್ ಖರೆಂಚ್ ಜಾವ್ನ್ ಅಪ್ಲ್ಯಾಚ್ ಜಾಗ್ಯಾರ್ ಏಕ್ ಸಂಸ್ಥೊ. ಹಾಂತುಂ ಸಮಾಜ್ ಸೆವಾ, ಕೊಂಕ್ಣಿ ಸೆವಾ, ವಾವ್ರ್, ಗರ್ಜೆವಂತಾಂಕ್ ಕುಮ್ಕೆಚೊ ಆಧಾರ್ ತಶೆಂಚ್ ರಂಗ್ಮಾಂಚಿಯೆರ್ ಲೊಕಾಂಕ್ ಹಾಸಂವ್ಚಿ ಶ್ಯಾಥಿ ಆಟಾಪ್ಲ್ಯಾ.
ಜೊನಿಕ್ ಪರ್ಧ್ಯಾ ಪಾಟ್ಲ್ಯಾನ್ ಲಿಪವ್ನ್ ವೆದಿಚೆ ಮಾನ್-ಸನ್ಮಾನ್ ಜೊಡ್ಲ್ಲೆಂ ಧಾರಾಳ್ ಮಾಪಾನ್ ಆಸ್ಚಾಂನಿ ಆಜ್ ಜೊನಿವಿಶಿಂ ಕಿತ್ಲಿಂ ಸಿಸ್ರಿಚಿಂ ದುಖಾಂ ಗಳಯ್ಲ್ಯಾರೀ, ಜೊನಿ ಜಿವಂತ್ ಆಸ್ತಾನಾ ತಾಕಾ ಮಾನ್-ಸಮ್ಮಾನ್ ದಿಲ್ಲೊಚ್ಚ್ ನಾ ಮ್ಹಳ್ಳೆಂ ವಿಪರ್ಯಾಸ್. ಜೊನಿಚ್ಯಾ ಶಿರಾಂನಿ ಆಸ್ಲ್ಲಿ ’ಕೊಂಕ್ಣಿ’, ಆನಿ ತಾಚ್ಯಾ ಕಾಳ್ಜಾಂತ್ ಆಸ್ಲ್ಲೊ ’ಝೆಲೊ’, ಆನಿ ಹ್ಯಾ ಖಾತಿರ್ ಝೆಲೊ ಪತ್ರಾನ್ ತಾಚ್ಯಾ ಮೊರ್ನಾಚ್ಯಾ ವರ್ಸಾಚೊ ಉಡಾಸ್ ಕಾಡ್ಚಾ ಸಂದರ್ಭಾರ್, ಜೊನಿ ಸುರತ್ಕಲಾಕ್ ಲಾಗ್ಸಿಲ್ಯಾನ್ ವಳ್ಕಲ್ಲ್ಯಾ ಥೊಡ್ಯಾಂಕ್ ವಿಂಚುನ್ ತಾಂಚೆ ವಿಚಾರ್ ಹಾಂಗಾಸರ್ ದಿಲ್ಯಾತ್.
- ವಲ್ಲಿ ಕ್ವಾಡ್ರಸ್
[ಜೋನಿ ಸುರತ್ಕಲಾಚಿ ಮಟ್ವಿ ಕಾಣಿ ’ಕರಿಯಮಣಿ’]
[ಜೋನಿ ಸುರತ್ಕಲಾಚೆಂ ಏಕ್ ಕವಿತಾ ’ಕೊಂಕ್ಣೆಕ್ ಯೆತಿತ್ ಬರೆ ದೀಸ್?’]
ಹೆರಾಂಕ್ ಮಾನ್ ದೀವ್ನ್ ಗೆಲೊ
ಆಮ್ಚಾ ಸಮಾಜೆಂತ್ಲ್ಯಾ ಚಡ್ತಾವ್ ಸಂಘ್-ಸಂಸ್ಥ್ಯಾಂನಿ ಕಾಮಾಂ ಕರ್ಚೆ ಭೋವ್ ಥೊಡೆ ಆನಿ ನಾಂವ್-ಹುದ್ದೆ ಆಶೆಂವ್ಚೆಂ ಯಥೇಶ್ಟ್. ಕೊಂಕ್ಣೆಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್, ಕೊಂಕ್ಣೆಚ್ಯಾ ಮೊಗಾನ್ ಕೆದ್ನಾಂಯ್ ಕಿತೆಂಚ್ ಆಶೆನಾಸ್ತಾಂ ಕೊಂಕ್ಣಿ ವಾವ್ರ್ ಕೆಲ್ಲ್ಯಾ ಜೊನಿ ಸುರತ್ಕಲಾನ್ ಕೆದಿಂಚ್ ವೆದಿಚೆರ್ ಮಾನ್ ಜೊಡುಂಕ್ ನಾ ಬಗಾರ್ ಸದಾಂಚ್ ಹೆರಾಂಕ್ ಮಾನ್ ದಿಲಾ. ಮ್ಹಜ್ಯಾ ಜಿಣ್ಯೆ ಆವ್ದೆಂತ್ ಹಾಂವ್ ಜೊನಿ ತಸಲೊ ವೆಕ್ತಿ, ಜಿತ್ಲೊ ಖಾಲ್ತೊ, ಶೆಗುಣಿ ಆನಿ ಮೊಗಾಳ್ ದುಸ್ರೊ ಪಳೆಂವ್ಕ್ ನಾ. ಖರೆಂಚ್ ಜೊನಿಚೊ ಉಡಾಸ್ ಸದಾಂಚ್ ಮ್ಹಜ್ಯಾ ಕಾಳ್ಜಾ ಮನಾಂತ್ ಉರ್ತಲೊ
- ಲಾರೆನ್ಸ್ ಪಿಂಟೊ, ಆಗ್ರಾರ್
[ಜೊನಿಚೊ ಖಾಸ್ ಮಿತ್ರ್, ಆಧ್ಲೊ ಅಧ್ಯಕ್ಶ್, ಕೆ.ಸಿ.ಡಬ್ಲ್ಯೂ.ಎ]
ಕೊಂಕ್ಣೆಕ್ ಜಾಲ್ಲೆಂ ಲುಕ್ಸಾಣ್
ಮನಿಸ್ ಜಿವಂತ್ ಆಸ್ತಾನಾ ತಾಚೆಂ ಬರೆಂಪಣ್ ಸಂಸಾರಾಕ್ ದಿಸಾನಾ ಜಾವ್ಯೆತ್, ಪುಣ್ ತಾಣೆಂ ಮೊರ್ತಚ್ಚ್ ತಾಚೆಂ ಬರೆಂಪಣ್ ಗಾಂವ್ಚೆ ಧಾರಾಳ್ ಮಾಪಾನ್ ಆಸ್ತಾತ್ - ಹೆಂ ಆಮ್ಚಾ ಸಮಾಜೆಚೆಂ ಪೊಕೊಳ್ಪಣ್. ಹಾಂವ್ ಜೊನಿಚ್ಯಾ ಖಾಸ್ ಮಿತ್ರಾಂ ಪಯ್ಕಿಂತ್ಲೊ ಜಾಲ್ಲ್ಯಾನ್ ಜೊನಿಕ್ ಲಾಗ್ಶಿಲ್ಯಾನ್ ಪಳೆಂವ್ಕ್, ಸಮ್ಜೊಂಕ್ ಸಕ್ಲ್ಲೊಂ. ಜೊನಿ ಏಕ್ ಭರ್ಲ್ಲೊ ಕೊಳ್ಸೊ, ಜೊನಿಚೊ ವಾವ್ರ್ ಪರ್ದ್ಯಾ ಪಾಟ್ಲೊ, ಜೊನಿನ್ ಕೆದಿಂಚ್ ಅಪ್ಲೊ ಫಾಯ್ದೊ ಕೊಂಕ್ಣೆಚ್ಯಾಕೀ ಚಡ್ ಜಾವ್ನ್ ಚಿಂತ್ಲ್ಲೊ ನಾ. ತಾಚೆಂ ಮರಣ್ ಖರೆಂಚ್ ಜಾವ್ನ್ ಆಮ್ಕಾಂ ವೆಕ್ತಿಗತ್ ಜಾವ್ನ್ ಭೋವ್ ವ್ಹಡ್ ಲುಕ್ಸಾಣ್. ತಶೆಂಚ್ ಕೊಂಕ್ಣೆಕ್ಯೀ. ಹಾಚ್ಯಾಕೀ ಚಡ್ ಕಿತೆಂ ಸಾಂಗೊಂ?
- ಲುವಿಸ್ ರೊಡ್ರಿಗಸ್
[ಜೊನಿಚೊ ಖಾಸ್ ಮಿತ್ರ್, ಫಾಮಾದ್ ಸಂಘಟಕ್]
ಭರ್ಲ್ಲೊ ಕೊಳ್ಸೊ
ಎಕಾ ಸಬ್ಧಾನ್ ಸಾಂಗ್ಚೆಂ ತರ್ ಜೊನಿ ಸುರತ್ಕಲ್ ಏಕ್ ಭರ್ಲ್ಲೊ ಕೊಳ್ಸೊ ಜಾವ್ನಾಸ್ಲೊ. ಕೊಂಕ್ಣೆಕ್ ಲಗ್ತಿ ಜಾಲ್ಲ್ಯಾ ಚಡ್ತಾವ್ ಹರ್ಯೆಕಾಂತ್ ತಾಚಿ ಜಾಣ್ವಾಯ್ ಆನಿ ಗಿನ್ಯಾಯ್ ವಿಶೇಸ್. ಕಿತ್ಯಾಕ್ ಮ್ಹಳ್ಯಾರ್ ತೊ ತಿತ್ಲೊ ಹೆಳ್ಲ್ಲೊ, ವಾಚ್ಪಾಂತ್ ತಶೆಂಚ್ ವಾವ್ರಾಂತ್. ತರ್ಯೀ ತೊ ಸಾದೆಂಪಣ್ ಪಸಂದ್ ಕರ್ತಾಲೊ, ಕೆದಿಂಚ್ ವೆದಿಚೆರ್ ಮಾನ್ ತೊ ಆಶೆಲ್ಲೊನಾ, ಕಿತ್ಲೊ ವಾವ್ರ್ ಕೆಲ್ಯಾರೀ, ತಾಣೆಂ ಹೆರಾಂಕ್ ಮಾನ್ ದಿಲಾ ವಾ ದಿವಯ್ಲಾ ಶಿವಾಯ್ ಕೆದಿಂಚ್ ಶಾಲಾಂ, ಫಳಾಂ ಘೆಂವ್ಕ್ ನಾಂತ್. ಆಜ್ ಖರೆಂಚ್ ಜಾವ್ನ್ ಜೊನಿಚಾ ಗೈರ್ ಹಾಜ್ರೆಂತ್ ಕುವೆಯ್ಟಾಂತ್ ಕೊಂಕ್ಣೆಚೊ ಜಾಗೊ ರಿತೊ ಆಸ್ಚೊ ಸ್ವಶ್ಟ್ ದಿಸ್ತಾ.
- ಗ್ರೇಶಿಯನ್ ಡಿ’ಸೋಜ್, ಇಜಯ್/ಕುವೇಯ್ಟ್
[ಜೊನಿಚೊ ಖಾಸ್ ಮಿತ್ರ್, ಫಾಮಾದ್ ಕೊಂಕ್ಣಿ ಗಾವ್ಪಿ]
ಖಾಲ್ತ್ಯಾಪಣಾಚೊ ಕುರುಃ ದಿಲ್ಲೊ ಕೊಂಕ್ಣೆಚೊ ಮಹಾನ್ ಸುಪುತ್ರ್.
ಖಾಲ್ತ್ಯಾಪಣಾನ್, ಸಾದ್ಯಾಪಣಾನ್ ಆನಿ ನಿಸ್ವಾರ್ಥಿ ಮನೋಭಾವಾನ್ ಜಿಯೆಲ್ಲೊ ವ್ಯಕ್ತಿ ಜಾವ್ನಾಸ್ಲ್ಲೊ ಜೊನಿ ಸುರತ್ಕಲ್. ಆಜ್ ತೊ ಆಮ್ಚೆಮಧೆಂ ನಾ ತರ್ಯೀ, ತಾಚೆಂ ತೆಂ ಸಾದೆಂ ವ್ಯಕ್ತಿತ್ವ್ ಮ್ಹಜ್ಯಾ ಜಿವಿತಾಚ್ಯಾ ನಿಮಾಣ್ಯಾ ಘಡ್ಯೆ ಪರ್ಯಾಂತ್ ಮ್ಹಜ್ಯಾ ಮನಾಂತ್ ಜಿವಂತ್ ಉರ್ತಲೆಂ.
ಏಕ್ ಕವಿ ಜಾವ್ನ್, ಏಕ್ ಬರವ್ಪಿ ಜಾವ್ನ್, ಏಕ್ ಉತ್ತೀಮ್ ನಟ್ ಜಾವ್ನ್, ಕೊಂಕ್ಣಿ ಮಾಯೆಚಿ ಸೆವಾ ಕೆಲ್ಲ್ಯಾ ಕೊಂಕ್ಣಿ ಸುಪುತ್ರಾಕ್ ಮ್ಹಜ್ಯಾ ಮೊಗಾಳ್ ಇಶ್ಟಾಕ್ ಹೊಗ್ಡಾಯಿಲ್ಲ್ಯೊ ಹಾಂವ್ ನಿರ್ಭಾಗಿ ನ್ಹಂಯ್ ತರ್ ಆನಿ ಕೊಣ್?
- ಗಿಬ್ಬಾ ಕುಲ್ಶೇಕರ್,
[ಕುವೆಯ್ಟಾಂತ್ಲೊ ಕೊಂಕ್ಣೆಚೊ ಭೋವ್ ಮಾಲ್ಘಡೊ ಕಾಣ್ಯೆಗಾರ್]
ಉಡಾಸ್ ಯೆತಾನಾ
ಜೋನಿ ಸುರತ್ಕಲಾಚ್ಯಾ ವೆಗ್ಳಾಚಾರಾಚೊ ಉಡಾಸ್ ಮತಿಂತ್ ಯೆತಾನಾ ಎಕಾ ರಿತಿಚೆಂ ದುಃಖಾಳ್ ಸಂಗೀತ್ ಆಯ್ಕಾಲ್ಲೊ ಅನ್ಭೋಗ್ ಜಾತಾ. ಕುವೆಯ್ಟಾಂತ್ ಹಾವೆಂ ಕೊಂಕ್ಣೆಂತ್ಲ್ಯಾ ಫಾಮಾದ್ ಗಾವ್ಪ್ಯಾಂಕ್ ಸಂಗೀತ್ ದಿಲಾಂ ತರ್ಯೀ ಹಾಂತ್ಲ್ಯಾ ಚಡ್ತಾವ್ ಕಾರ್ಯಾಂನಿ ಮ್ಹಾಕಾ ಜೋನಿಸವೆಂ ಲಾಗ್ಸಿಲ್ಯಾನ್ ವಾವ್ರ್ ಕರುಂಕ್ ಆವ್ಕಾಸ್ ಲಾಭ್ಲೊ. ಆಜ್ ತೆ ಎಕೇಕ್ ವೀಡಿಯೊ ಪಳೆತಾನಾ, ಪರ್ಧ್ಯಾ ಪಾಟ್ಲ್ಯಾನ್ ವಾವ್ರ್ ಕೆಲ್ಲ್ಯಾ ಜೊನಿಚೊ ಉಡಾಸ್ ಖರೊಚ್ ಮತಿಂತ್ ಉದೆವ್ನ್ ಯೆತಾನಾ ಪಾತ್ಯೆಂವ್ಕ್ ಕಶ್ಟ್ ಜಾತಾತ್, ಜೊನಿ ತಸ್ಲೊ ಖರೊ ಕಲಾಕಾರ್ ಹ್ಯಾ ಸಂಸಾರಾಕ್ ಆಧೇವ್ಸ್ ಮಾಗೊನ್ ಇತ್ಲೆವೆಗಿಂ ಗೆಲೊ ನ್ಹಂಯ್ಗೀ ಮ್ಹಣೊನ್.
- ಎಡ್ರಿಯನ್ ಗೋಮ್ಸ್, ಶಿರ್ವಾಂ
[ಫಾಮಾದ್ ಸಂಗೀತ್ಗಾರ್, ಕುವೇಯ್ಟ್]
ಕೊಂಕ್ಣಿ ವಾವ್ರಾಂತ್ ಜೊನಿಚೊ ಜಾಗೊ ಖಾಲಿ
ಕಾಳ್ಜಾಂತ್ಲ್ಯಾ ಭಗ್ಣಾಂತ್ ಉತ್ರಾಂಚೆಂ ರೂಪ್ ದೀಂವ್ಕ್ ಮ್ಹಜ್ಯಾನ್ ಜಾಯ್ನಾ ತರ್ಯೀ, ಮಟ್ವ್ಯಾನ್ ಸಾಂಗ್ಚೆಂ ತರ್ ಜೊನಿ ಕುವೆಯ್ಟಾಂತ್ ನಾಸ್ತಾಂ ತಾಣೆಂ ಪರ್ದ್ಯಾ ಪಾತ್ಲ್ಯಾನ್ ಕರ್ನ್ ಆಸ್ಚೆಂ ಕಾಮ್ ಆಧುರೆಂ ಉರ್ಲಾಂ, ತಾಚೊ ಜಾಗೊ ಖಾಲಿಚ್ ಪಡ್ಲಾ. ಜೊನಿ ಆಸ್ತಾನಾ ತಾಣೆಂ ಎಕ್ವಟಿತ್ ವಾವ್ರಾಕ್, ಕೊಂಕ್ಣಿ ವಾವ್ರಾವ್ ಘೆತ್ಲ್ಲೆಂ ಮುಖೇಲ್ಪಣ್, ಜಾಂವ್ಕ್ ಪುರೊ ತೊ ಕೆದಿಂಚ್ ಪರ್ದ್ಯಾ ಮುಖಾರ್ ನಾತ್ಲ್ಲೊ, ಪುಣ್ ತಾಣೆಂ ಕೊಂಕ್ಣೆಕ್ ದಿಲ್ಲಿ ದೇಣ್ಗಿ ಖರಿಚ್ ಜಾವ್ನ್ ಅಮೊಲಿಕ್ ತಶೆಂಚ್ ಕೆದಿಂಚ್ ಕೊಣೆಂಯೀ ವಿಸ್ರೊಂಕ್ ಸಕಾನಾಸ್ಚೆತಸಲಿ ಜಾವ್ನಾಸಾ.
- ಎಲಿಯಾಸ್ ಸಾಂಕ್ತಿಸ್, ಕಿರೆಂ
[ಫಾಮಾದ್ ಮುಖೆಲಿ, ಸಮಾಜ್ ಸೆವಕ್]
ಶ್ರದ್ದಾಂಜಲಿ ತುಕಾ ಮೊಗಾಳ್ ಜೊನಿ
ವರಸ್ ತೆಂ ಏಕ್ ಯೆತಾ ಸಂಪೊನ್, ಮೊಗಾಚ್ಯಾ ಜೊನಿ ಕೂಡ್ ತಿ ತುಜಿ ಮಾತ್ಯೆಂತ್ ಧಾಂಪುನ್
ದೆಂವ್ತಾತ್ ದುಃಖಾಂ ದೊಳ್ಯಾಂನಿ ವ್ಹಾಳೊನ್, ಖಂಯ್ ಪಾವ್ಲಾಯ್ ಜೊನಿ ತುಂ ಸರ್ವಾಂಕ್ ಸಾಂಡುನ್
ಯೆತಾನಾ ಮಯ್ನೊ ಅಗೋಸ್ತಾಚೊ, ನಿಯಾಳ್ತಾಂ ತೊ ದೀಸ್ ತುಜಿ ಅಂತಿಮ್ ವಿಧಾಯಾಚೊ
ಚಿಂತುಂಕ್ ನಾತ್ಲ್ಲೆಂ ದೀಸ್ ಸೊಳಾವೊ ತುಜ್ಯಾ ಜಿಣ್ಯೆಚೊ ಅಖ್ರೇಚೊ,
ಪುಣ್ ನಿರ್ಧಾರ್ ತೊ ಜಾವ್ನಾಸ್ಲೊ ಆಮ್ಚಾ ರಚ್ಣಾರಾಚೊ
ಪಾವ್ಲಾಯ್ ತುಂ ರಾಜ್ಯಾಂತ್ ದೆವಾಚ್ಯಾ ಜೊನಿ, ಸಂಪವ್ನ್ ಉಪ್ಕಾರಿ, ಕಶ್ಟಿ ತಸಿ ಸಾಕ್ರಿಫಿಸಾಚಿ ಜಿಣಿ
ಜಾಂವ್ಕ್ ಪುರೊ ಆತಾಂ ತಿ ಏಕ್ ಆದ್ಲಿ ಕಾಣಿ, ಪುಣ್ ಹಾಂವ್ ಮಾತ್ರ್ ಸದಾಂಚ್ ತುಕಾ ಋಣಿ
ಕುಟ್ಮಾ ಸವೆಂ ಮಾಗ್ತಾಂ ಇಶ್ಟಾ ಶಾಂತಿ ಸಮಧಾನ್, ಫಾವೊ ಕರುಂಕ್ ದೆವಾನ್ ತುಕಾ ತಾಚೆಂ ಸನ್ನಿಧಾನ್
ಭೆಟಯ್ತಾಂ ಶೃದಾಂಜಲಿ ದುಃಖೇಸ್ತ್ ಕಾಳ್ಜಾಂತುನ್, ಉರ್ತಲೊಯ್ ತುಂ ಮ್ಹಜೆ ಜಿಣ್ಯೆಂತ್ ಅಮರ್ ಜಾವ್ನ್
- ಪಾಸ್ಕಲ್ ಪಿಂಟೊ, ಪೆರ್ಮುದೆ
[ಆಧ್ಲೊ ಅಧ್ಯಕ್ಶ್, ಕೆ.ಸಿ.ಡಬ್ಲ್ಯೂ.ಎ]
ಉತ್ರಾಂನಿ ಆಟಾಪುಂಕ್ ಸಕಾನಾಸ್ಚಿ ಜೊನಿಚಿ ಜಿಣಿ
ಜೊನಿ ಸುರತ್ಕಲಾವಿಶಿಂ ಉಲಂವ್ಕ್, ಬರಂವ್ಕ್ ಉತ್ರಾಂ ಉಣಿಂ ಪಡೊಂಕ್ ಆಸಾತ್, ತಾಚ್ಯಾ ಲ್ಹಾನ್ವಿಕಾಯೆ ಥಾವ್ನ್, ತಾಚೊ ಕೊಂಕ್ಣಿ ಮೊಗ್ ಮ್ಹಣಾಸರ್ ಖಂಡಿತ್ ಜಾವ್ನ್ ಜೊನಿತಸ್ಲೊ ದುಸ್ರೊ ಕೊಣ್ಂಚ್ ನಾ. ಝೆಲೊ ಪತ್ರ್ ಆಜ್ ತಾಚ್ಯಾ ಉಡಾಸಾಚೊ ಅಂಖೊ ಕಾಡ್ಚೆಂ ನಿಜಾಯ್ಕೀ ತಾಕಾ ದಿಂವ್ಚಿ ಖರಿ ಶ್ರದ್ದಾಂಜಲಿ ಮ್ಹಣ್ ಮ್ಹಾಕಾ ಭಗ್ತಾ.
- ಡಾಯ್ನಿ ಕುತಿನ್ಹೊ ಬೆಳ್ಮಣ್, ಕುವೇಯ್ಟ್
[ಸಮಾಜ್ ಸೆವಕಿ]
ಕೊಂಕ್ಣಿ ರಂಗ್ಮಂಚ್ ರಿತೊ?
ಜೊನಿ ಸುರತ್ಕಲ್ ಜಸೊ ಏಕ್ ಫಾಮಾದ್ ಸಮಾಜ್ ಸೆವಕ್ ಜಾವ್ನಾಸ್ಲೊ ತಿತ್ಲೊಚ್ ಲೊಕಾಮೊಗಾಳ್ ನಟ್ಯೀ ಜಾವ್ನಾಸ್ಲೊ. ತಾಚೆಸವೆಂ ನಟನ್ ಕೆಲ್ಲ್ಯಾಂಕ್ ಕಳಿತ್ ತೊ ಕಿತ್ಲೊ ಸಾದೊ ಆನಿ ಬೊಳೊ ವೆಕ್ತಿ ಮ್ಹಣ್. ಖಂಡಿತ್ ಜಾವ್ನ್ ಜೊನಿ ನಾಸ್ತಾಂ ಕೊಂಕ್ಣಿ ರಂಗ್ಮಂಚ್ ರಿತೊಚೊ ಭಗ್ತಾ. ಖರೆಂಚ್ ಜಾವ್ನ್ ಕೊಂಕ್ಣೆಂತ್ ಜೊನಿಚೆಂ ಸ್ಥಾನ್ ಅಜೂನ್ ರಿತೆಂಚ್ ಆಸಾ.
- ಅನಿಲ್ ಮಿನೇಜಸ್, ಶಿರ್ವಾಂ
[ಫಾಮಾದ್ ಕೊಂಕ್ಣಿ ನಟ್, ಮುಖೆಲಿ]
ಗೊಂಯ್ಕಾರ್ ಆನಿ ಮಂಗ್ಳುರ್ಕಾರಾಂ ಮಧ್ಲೊ ಸಾಂಖೊವ್ ಮೊಡ್ಲೊ
ದೆ| ಬಾಬ್ ಜೋನಿ ಸುರತ್ಕಲ್ ಖರೊಚ್ ಮಂಗ್ಳುರ್ಗಾರ್ ಆನಿ ಮಂಗ್ಳುರ್ಗಾರಾಂ ಮಧ್ಲೊ ಏಕ್ ಸಾಂಖೊವ್ ಜಾವ್ನ್ ಆಸ್ಲೊ ಆನಿ ಆಪ್ಲ್ಯಾ ತಾಂಕಿಚಿಂ ಸರ್ವ್ ಪ್ರೇತನಾಂ ಕರ್ನ್ ಆಸ್ಲೊ, ಸರ್ವ್ ಕೊಂಕ್ಣಿ ಲೊಕಾಂನಿ ಎಕ್ವಟಿತ್ ವಾವ್ರ್ ಕರ್ಚಾಕ್. ತೊ ಕಸೊ ಏಕ್ ಬರೊ ನಟ್, ಬರಯ್ಣಾರ್, ಪತ್ರ್ಕರ್ತ್, ಕವಿ ಜಾವ್ನಾಸ್ಲೊಕೀ, ತಶೆಂಚ್ ಏಕ್ ಬರೊ ಮನಿಸ್ ಜಾವ್ನ್ ಆಸ್ಲೊ. ಆಮ್ಕಾಂ ಪರತ್ ಜೊನಿ ತಸ್ಲೊ ನಿಸ್ವಾರ್ಥಿ ಕೊಂಕ್ಣಿ ಮೋಗಿ ಪರತ್ ಮೆಳಾತ್?
- ಎ. ವೆರೋನಿಕಾ ಫೆರ್ನಾಂಡಿಸ್, ಕುವೇಯ್ಟ್
[ಫಾಮಾದ್ ಕೊಂಕ್ಣಿ ವಾವ್ರಾಡಿ, ಪತ್ರ್ಕರ್ತ್]
ಖಾಲ್ತೆಪಣಾಚೊ ಧಾಖ್ಲೊ ನಪಂಯ್ಚ್?
ಮ್ಹಜ್ಯಾ ಜಿಣ್ಯೆಂತ್ ಹಾಂವೆಂ ಭೋವ್ ಥೊಡ್ಯಾ ಮಹಾನ್ ವೆಕ್ತಿಂಕ್ ಸಾದ್ಯಾ ಮನ್ಶ್ಯಾಚ್ಯಾ ರುಪಾರ್ ಪಳೆಮಾಂ, ತಾಂತ್ಲೊ ಎಕ್ಲೊ ಜೊನಿ ಸುರತ್ಕಲ್. ಸದಾಂಚ್ ಹಾಸ್ತ್ಯಾ ತೊಂಡಾಚೊ, ಹೆರಾಂಕ್ ಉಪ್ಕಾರ್ ಕರ್ಚೆಂ ಕಾಳಿಜ್ ಆಸ್ಚೊ, ಹೆರಾಂಚೆಂ ಬರೆಂ ಮಾಗ್ಚೊ, ಸಾದೊ ಬೊಳೊ ಆನಿ ಇತ್ಲೊ ಮೊಗಾಳ್ ವೆಕ್ತಿಕೀ, ದೆವಾಕ್ಚ್ ತಾಚಿ ಗರ್ಜ್ ದಿಸ್ಲಿ ಜಾಯ್ಜಯ್, ದೆಕುನ್ ಇತ್ಲೆವಿಗಿಂ ದೆವಾನ್ ತಾಕಾ ವಯ್ರ್ ಆಪಯ್ಲೊ. ಪುಣ್ ಆಮ್ಚಾ ಕಾಳ್ಜಾಂತ್ ಜೊನಿಚೊ ಉಡಾಸ್ ಜಿವೊಚ್ ಆಸ್ತಲೊ.
- ಹೆಲೆನ್ ಪಿಂಟೊ, ಪಡೀಲ್
[ಫಾಮಾದ್ ಸಮಾಜ್ ಸೆವಕಿ, ಕೊಂಕ್ಣಿ ನಟಿ]
ಜೋನಿ ಸುರತ್ಕಲಾಚಿ ಮಟ್ವಿ ಕಾಣಿ ’ಕರಿಯಮಣಿ’
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications