ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 65. ಹಾಂವ್ ಎಕ್ಸುರೊಂ
ಜೋಕರ್ ಕಾಸ್ಸಿಯಾ: ಕೊಂಕ್ಣೆಂತ್ ಮಾಲ್ಘಡ್ಯಾ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಜಾವ್ನಾಸ್ಚೊ ಮಾನೆಸ್ತ್ ಜೋಕಿಮ್, ಜೋಕರ್ ಕಾಸ್ಸಿಯಾ ಲಿಖ್ಣೆ ನಾಂವಾಖಾಲ್ ಫಾಮಾದ್. ಕಾಣ್ಯೊ, ಲೇಖನಾಂ, ಕವಿತಾ ಅಶೆಂ ಸಭಾರ್ ರಿತಿಚೆಂ ಸಾಹಿತ್ಯ್ ರಚುಂಕ್ ಹೊ ಸಕ್ತಾ ಮ್ಹಳ್ಳೆಂ ಹಾಣೆಂ ಎದೊಳ್ಚ್ ರುಜು ಕೆಲಾಂ.
ಜೋಕರ್ ಕಾಸ್ಸಿಯಾ
ವೇಳ್ ರಾತಿಚ್ಯಾ ಮಧ್ಯಾನೆಕ್ ಉತ್ರೊನ್ ಗೆಲ್ಲೊ. ಭಂವ್ತಣಿ ಕಿಡಿ ಕಿಟಾರ್ಯಾಂಚೊ ಕಿರ್ಕಿರಿ ಆವಾಜ್ ಮ್ಹಜ್ಯಾ ಕೆಪ್ಪ್ಯಾ ಕಾನಾಂಕ್ಯ್ ಪೊಕೊರ್ತಾಲೊ. ಕಾಳೊಕಾನ್ ಭಂವ್ತಿಂಚೆಂ ಪರಿಸರ್ ಆಪ್ಲ್ಯಾ ಪಾಲ್ವಾಂತ್ ಲಿಪಯಿಲ್ಲೆಂ. ಚಿಕ್ಕೆಶೆ ಪಯ್ಸ್ ಆಸ್ಲ್ಲ್ಯಾ ರಾಜ್ ರಸ್ತ್ಯಾರ್ ವಾಹನಾಂ ತವಳ್ ತವಳ್ ದಾಂವ್ತಾತ್ ಮ್ಹಳ್ಳೆಂ ತಾಂಚಾ ಆವಾಜಾನ್ ಕಳ್ತಾಲೆಂ. ತೊ ಮಂದ್ ಆವಾಜ್ಯ್ ಮ್ಹಜ್ಯಾ ಮ್ಹಾತಾರ್ಯಾ ಕಾನಾಂಕ್ ಧೊಡೊ ಥೊಡೊ ಆದಾಳ್ತಾಲೊ. ಅರ್ಧ್ಯಾ ಚಂದ್ರಾಚೊ ಮಂದ್ ಉಜ್ವಾಡ್ ತ್ಯಾ ದಾಟ್ ಕಾಳೊಕಾಕ್ ಧಾಂವ್ಡಾಂವ್ಕ್ ಅಸಫಲ್ ಜಾಲ್ಲೊ. ಕೆವಲ್ ಶಿತಳ್ ವಾರೆಂ ಮಾತ್ರ್ ಆಪುಣ್ ಭಲಾಯ್ಕೆವಂತ್ ಆಸಾಂ ಮ್ಹಣೊನ್ ಪಾಚಾರ್ತಾಲೆಂ. ಜಳಾರಿಂಚೊ ರಾಪಟ ಎದೊಳ್ಚ್ ಮ್ಹಜ್ಯಾ ದಾಟ್ಸಾಲ್ಲ್ಯಾ ರಗ್ತಾಕ್ ಚಿಂವೊನ್ ಆರಂಭ್ ಜಾಲ್ಲೊ. ತೆಂ ಸುಕೊನ್ ಯೆಂವ್ಚೆಂ ರಗಾತ್ ಮ್ಹಜ್ಯಾ ಆಂಗಾಚ್ಯಾ ದಾಟ್ ಚಾಮ್ಡ್ಯಾ ಥಾವ್ನ್ ವೊಡುಂಕ್ಯ್ ತಾಂಕಾ ಪುರಾಸಣ್ ಭಗ್ತಾಲಿ ಆಸ್ಯೆತ್, ತ್ಯಾಚ್ ವರ್ವಿಂ ತಾಣಿ ಮ್ಹಜ್ಯಾ ಕಾತಿಕ್ ಸುವಿ ಮಾರ್ಲ್ಲಿ ತಿ ಮ್ಹಜ್ಯಾ ಶಿಂತಿದಾಕ್ ಕಳೊಂಕ್ ಸುಮಾರ್ ವೇಳ್ ಲಾಗ್ತಾಲೊ ಜಾಲ್ಲ್ಯಾನ್ ಹಾಂವ್ ಹಾಳ್ವಾಯೆನ್ ಝಳಾರಿಂಕ್ ಧಾಂವ್ಡಾಯ್ತಾಲೊಂ.
ಸಾರ್ಕೆಂ ಉಡಾಸಾಂತ್ ನಾಂ ತರ್ಯೀ ಕಾಂಯ್ ಅಂದಾಜಾ ಪರ್ಮಾಣೆ ಮ್ಹಜಿ ಪ್ರಾಯ್ ಪಾವನ್ಶಾಂಕ್ ಲಾಗಿಂ ಜಾಲ್ಯಾ ಆಸ್ಯೆತ್. ಜಿವಾಂತ್ ಎದೊಳ್ ಪರ್ಯಾಂತ್ ಇಲ್ಲೆಶೆಂ ರಗಾತ್ ಉರ್ಲಾಂ ಜಾಲ್ಲ್ಯಾನ್ ತ್ಯಾ ರಗ್ತಾಚ್ಯಾ ಸಸಾಯೆನ್ ಹಾಂವ್ ಜಿಯೆತಾಂ. ಸವಯೆಚಾ ಭಳಾನ್ ಉಸ್ವಾಸ್ ವೊಡ್ತಾಂ ಆನಿ ಸೊಡ್ತಾಂ. ತಶೆಂ ಉಸ್ವಾಸಾಚಿ ಕ್ರಿಯಾ, ಪ್ರಾಯೆಚಾ ಉಂಚಾಯೆನ್, ಉಣೆಂಚ್ ಜಾಲ್ಯಾ ಮ್ಹಣ್ಯೆತ್. ದೊಳ್ಯಾಂಕ್ ದೀಶ್ಟ್ ಸಾರ್ಕಿ ನಾ ತರ್ಯೀ ದೊಳೆ ಉಘಡೊನ್ ಪಳಂವ್ಚೆಂಚ್ ಪಡ್ತಾ. ಸಾರ್ಕೆಂ ದಿಸಾನಾ ಜಾಲ್ಲ್ಯಾನ್ ತಕ್ಲೆಕ್ ಜ್ಯೊರ್ ದೀವ್ನ್, ಕಪಾಲಾರ್ ಮಿರಿಯೊ ಹಾಡವ್ನ್, ಮೆಂದ್ವಾಕ್ ಭೊರ್ ದೀವ್ನ್ ಮುಕ್ಲಿ ವಸ್ತ್ ಯಾ ವ್ಯಕ್ತಿಚಿ ವಳ್ಕೊಂಚೆಂ ಪ್ರಯತ್ನ್ ಕರ್ತಾಂ. ದಿಸಾ ಉಜ್ವಾಡಾಕ್ ಜಾಲ್ಯಾರ್ ಶೆಂಭರಾಂತ್ ಧಾ ಠಕ್ಕೆ ದಿಸ್ತಾ ಜಾಲ್ಯಾರ್ ರಾತಿಚೆಂ ತಾಂತ್ಲೆಯ್ ಆಟ್ ಠಕ್ಕೆ ಕಳ್ವೊನ್ ವೆತಾತ್ ಜಾಲ್ಲ್ಯಾನ್ ರಾತಿಚೆಂ ಕೊಣಾಯ್ಕ್ಯ್ ವಳ್ಕೊಂಚೆಂ ಪ್ರಯತ್ನ್ ಹಾಂವ್ ಕರಿನಾ. ಕೇವಲ್ ದಾಟ್ಸಾಲ್ಲ್ಯಾ ಕಾನಾಂಕ್ ಆಪ್ಟಾಲ್ಲ್ಯಾ ಆವಾಜಾನ್ ವಳ್ಕೊಂಚೆಂ ಆನಿ ಸಮ್ಜೊಂಚೆಂ ಕಾಮ್ ದಿತಾಂ. ದೊಳ್ಯಾಂಕ್ ಗಾಲ್ಚೆಂ ವೋಕ್ಲ್ ಥೊಡ್ಯಾ ದಿಸಾಂ ಪಯ್ಲೆಂ ಹಾಂವ್ ದಾಂತೊನ್ ಪಡ್ತಾನಾ ಪಯ್ಸ್ ಎಕಾ ಫಾತ್ರಾಕ್ ಆಪ್ಟಿಒನ್ ತಾಚ್ಯಾ ಎಕಾ ದೊಳ್ಯಾಚಾ ಆರ್ಸ್ಯಾನ್ ಆದೇವ್ಚ್ ಮಾಗ್ತಾನಾ ದುಸ್ರ್ಯಾಚಾ ಆಂಗಾರ್ ಏರ್ ಆಯಿಲ್ಲ್ಯಾನ್ ತೊಯ್ ಮ್ಹಾಕಾ ಕುಮಕ್ ಕರಿನಾ. ಹಾವೆಂ ತೊ ಸಾಂಬಾಳುನ್ ದವರ್ಲಾ. ಕಿತ್ಯಾಕ್ ಮ್ಹಳ್ಯಾರ್ ತ್ಯಾ ವೊಕ್ಲಾ ಪಾಟ್ಲ್ಯಾನ್ ಏಕ್ ಉಡಾಸ್ ಲಿಪೊನ್ ಆಸಾ. ತ್ಯಾ ವೊಕ್ಲಾಕ್ ರಚುಂಕ್ ಮ್ಹಜ್ಯಾ ಪತಿಣೆನ್ ರಾತ್ ಆನಿ ದೀಸ್ ಶಿಂವಣ್ ಶಿಂವ್ಚೆಂ ಮಿಶಿನ್ ಗುಡ್ಡಾಯ್ಲಾಂ. ತಾಚ್ಯಾ ಜಿವಿತಾಚಿ ಪುರಾಸಣ್, ತಾಚಿ ನೀದ್, ತಾಚೆಂ ತ್ರಾಣ್, ತಿಚಿ ಮ್ಹಿನತ್ ತಿಚೊ ಮೋಗ್ ಆನಿ ಮಯ್ಪಾಸ್ ಹ್ಯಾ ವೊಕ್ಲಾಚಾ ರಚನಾಂತ್ ವೊಳ್ಳಾಂ. ಆತಾಂ ತೆಂ ಮ್ಹಾಕಾ ಸೊಡುನ್ ಗೆಲಾಂ. ಸಾಸ್ಣಾಚಾ ಸುಶೆಗಾತ್ ನಿದೆಂತ್ ವಿಲೀನ್ ಜಾಲಾಂ. ಪೂಣ್ ತಾಚೆಂ ರುಪ್ಣೆಂ ಮ್ಹಜ್ಯಾ ಆಂದ್ಳ್ಯಾ ದೊಳ್ಯಾಂಚಾ ಆಸ್ಡ್ಯಾಂ ಭಿತರ್ ಅಜೂನ್ ಜಿವಂತ್ ಉರ್ಲಾಂ. ಎಕಾ ಉತ್ರಾನ್ ಸಾಂಗ್ಚೆಂ ತರ್ ತೆಂ ಮೊರೊಂಕ್ ನಾ ಬಗಾರ್ ಮ್ಹಜ್ಯಾ ಸಂಗಿಂ ಆತ್ಮಿಕ್ ರಿತಿನ್ ಮಿಸ್ಳಾಲಾಂ.
ತಾಚೊ ಉಡಾಸ್ ಯೇನಾತ್ಲ್ಲೊ ಎಕ್ಯ್ ದೀಸ್ ನಾ. ಜ್ಯಾ ದೀಸ್ ತಾಚೊ ಉಡಾಸ್ ಕಾಡಿನಾ ತ್ಯಾ ದೀಸ್ ಮ್ಹಾಕಾ ಕಿತೆಂಗೀ ಚುಕ್ಲ್ಲೆ ಪರಿಂ ಭಗ್ತಾ. ಉಡಾಸಾಚಿ ಶಿರ್ ದಡ್ಬಡ್ತಾ ಆನಿ ಆಂತರೀಕ್ ಕಾಂಪ್ಣಿ ಚಡ್ತಾ. ಮ್ಹಾಕಾ ತಾಣೆ ಆಪಯಿಲ್ಲೊ ಆವಾಜ್ ಆಯ್ಕಾತಾ. ತೆಂ ಮ್ಹಜೆ ಥಂಯ್ ವಿಲೀನ್ ಜಾಲಾಂ ಮ್ಹಳ್ಳೆಂ ಚಿಂತಾಪ್ ಸಟ್ಟ್ ಕರುನ್ ಮ್ಹಜ್ಯಾ ಮೆಂದ್ವಾಕ್ ಕೂಟ್ ಘಾಲುನ್ ಜಾಗಯ್ತಾ ಆನಿ ಹಾಂವ್ ಎಕಾಚ್ ಪಾವ್ಟಿಂ ಉಡೊನ್ ಪಡ್ತಾಂ. ತಾಚೊ ಉಡಾಸ್ ಕಾಡಿನಾತ್ಲ್ಲ್ಯಾಕ್ ಚುರ್ಚುರ್ತಾಂ. ತಾಚೊ ಉದಾಸ್ ಕಾಡುಂಕ್ ಮ್ಹಾಕಾ ಕುಮಕ್ ಕರಿನಾತ್ಲ್ಲ್ಯಾ ಮ್ಹಜ್ಯಾ ಮೆಂದ್ವಾಕ್ ಪುರ್ಪುರ್ತಾಂ ಆನಿ ತಾಚ್ಯಾ ಚಿಂತ್ನಾಂನಿ ವಿಲೀನ್ ಜಾತಾಂ ತಶೆಂ ಹಾಂವ್ ಕಿತ್ಲೊ ವೇಳ್ ಉರ್ತಾಂ ತೆಂ ಹಾಂವ್ಚ್ ನೆಣಾಂ. ತವಳ್ ಮ್ಹಕಾ ಭುಕ್ ಲಾಗ್ತಾ ಆನಿ "ತುಜ್ಯಾ ಜೆವ್ಣಾಚೊ ವೇಳ್ ಜಾಲೊ" ಮ್ಹಣೊನ್ ತಾಣೆ ಮ್ಹಾಕಾ ಜಾಗಯಿಲ್ಲ್ಯಾಚೊ ಜೋಪ್ ಯೆತಾ. ತೆದಾಳಾ ಚಾರ್ ಉಂಡಿಯೊ ಜೆಂವ್ತಾಂ.
ಹೆಂ ಸಗ್ಳೆಂ ಮ್ಹಾಕಾ ಸವಯೆರ್ ಪಡ್ಲಾಂ.
ಚಿಂತಾಂ ಚಿಂತಾಂ ಹಾವೆಂ ಮೊಳ್ಬಾಕ್ ಪಳೆಲೆಂ. ಮ್ಹಜ್ಯಾ ಅರ್ಧ್ಯಾ ಆಂದ್ಳ್ಯಾ ದೊಳ್ಯಾಂಕ್ ಮೊಳ್ಬಾ ವಯ್ಲೊ ಅರ್ಧೊ ಚಂದ್ರೆಮ್ ಮಸ್ಕ್ ಮಸ್ಕ್ ದಿಸ್ಲೊ. ಆನಿ ತಾಂತುಂಯ್ ತಾಚೆಂ ರುಪ್ಣೆಂ!
ಪಾಟ್ಲ್ಯಾ ಆಟ್ ವರ್ಸಾಂ ಥಾವ್ನ್ ಹಾಂವ್ ಹಾಂಗಾ ಆಸಾಂ. ಮ್ಹಜಿ ಕರ್ಮಭೂಮಿ ಮುಂಬಯಿ ಆನಿ ಜನ್ಮ-ಭುಮಿ ಮಂಗ್ಳುರ್. ಪುಣ್ ಹೆಂ ಶಹರ್ ಮುಂಬಯಿ ಆನಿ ಮಂಗ್ಳುರ್ಚ್ಯಾ ಮಧೆಂ ಆಸಾ. ಹೆಂ ಪುಣ್ ಶಹರ್. ಹಾಂವ್ ಪಾಟ್ಲ್ಯಾ ಆಟ್ ವರ್ಸಾಂ ಥಾವ್ನ್ ಹ್ಯಾ ಶಹರಾಚ್ಯಾ ಗರ್ಭಾಂತ್ ಆಸ್ರೊ ಗೆವ್ನ್ ಆಸಾಂ. ಥೊಡೆ ಪಾವ್ಟಿಂ ಹಾಂವ್ ಮ್ಹಜ್ಯಾ ಬಾಳ್ಪಣಾಚಿಂ ಯಾ ಭುರ್ಗ್ಯಾಪಣಾಚಿ ಆವ್ದಿ ಮ್ಹಜ್ಯಾ ಉಡಾಸಾ ಥಾವ್ನ್ ಸವ್ಕಾಸ್ ಮಾಜ್ವೊನ್ ಗೆಲ್ಯಾ. ಮ್ಹಜ್ಯಾ ತರ್ನಾಟ್ಪಣಾಚೆ ದೀಸ್ ಉಡಾಸಾಂತ್ ಉರ್ಲ್ಯಾತ್. ತೆದ್ನಾಂಚೊ ತೊ ಅನಿಭವಿಲ್ಲೊಚೊ ಗೊಡ್ಸೊ ಆನಿ ಇಲ್ಲೊಚೊ ಕೊಡು, ತರ್ಯೀ ತೊ ನಿಯಾಳ್ತಾನಾ ಏಕ್ ವಿಚಿತ್ರ್ ಸಮಾಧಾನ್ ಭಗ್ತಾ.
ಸಾಧಾರಣ್ ಬಾವೀಸ್ ವರ್ಸಾಂಚಾ ಪ್ರಾಯೆರ್ ಹಾವೆಂ ಮುಂಬಯ್ ಶ್ಹೆರಾಂತ್ ಪಾಂಯ್ ತೆಂಕ್ಲ್ಲೊ. ಮ್ಹಜ್ಯಾ ವ್ಹಡಿಲಾಂಕ್ ಮ್ಹಾಕಾ ಚಡಿತ್ ಶಿಕಾಪ್ ದಿಂವ್ಚಿ ತಾಂಕಾ ನಾತ್ಲೆಲ್ಯಾನ್ ಕೇವಲ್ ಮೆಟ್ರಿಕ್ ಶಿಕ್ಲ್ಲೊಂ ಹಾಂವ್ ಮುಂಬಯಿಂತ್ ಫುಡಾರ್ ಸೊಧುನ್ ಆಯಿಲ್ಲೊಂ. ಮ್ಹಜೊ ಬಾಪಯ್ ವೃತ್ತೆನ್ ಸುತಾರ್ ಆನಿ ಆವಯ್ ಅಶಿಕ್ಪಿ ಆನಿ ಪಿಡೆಸ್ತ್. ತಾಂಕಾಂ ಹಾಂವ್ ಮಧ್ಯಮ್ ಪ್ರಾಯೆರ್ ಮ್ಹಣ್ಚೆ ಕಾಜಾರ್ ಜಾವ್ನ್ ಚೊವ್ದಾ ವರ್ಸಾಂನಿ ಜಲ್ಮಾಲ್ಲೊಂ ಖಂಯ್. ಬಾಪಾಯ್ಚಿ ಜೋದ್ ಘರ್ ಖರ್ಚಾಕ್ ಆನಿ ಆವಯ್ಚಾ ಪಿಡೆಚಾ ವಕ್ತಾನಿಂಚ್ ಗ್ರಾಸಿಲ್ಲಿ ಜಾಲ್ಲ್ಯಾನ್ ಚಡಿತ್ ಜೋಡ್ ಕರುಂಕ್ ಆಸಫಲ್ ಜಾಲ್ಲ್ಯಾ ಮ್ಹಜ್ಯಾ ಬಾಪಾಯ್ನ್ ಕಶ್ಟಾಂನಿ ಮ್ಹಾಕಾ ಮೆಟ್ರಿಕೆಚೆಂ ಶಿಕಾಪ್ ದಿಲ್ಲೆಂ. ತ್ಯಾ ಉಪ್ರಾಂತ್ಯ್ ಶಿಕ್ಚಿ ಮ್ಹಜಿ ಅಭಿರುಚಿ ಆನಿ ಆಶಾ ತರ್ಯೀ ತಿ ಲಿಪವ್ನ್ ಬಾಪಾಯ್ಕ್ ಆಧಾರ್ ಜಾತಲೊಂ ಆನಿ ನಶಿಬಾಂತ್ ಆಸ್ಲ್ಯಾರ್ ಮುಂಬಯಿಂತ್ ಮುಕಾರ್ ಶಿಕ್ತಲೊಂ ಮ್ಹಣೊನ್ ಚಿಂತುನ್ ಹಾವೆಂ ಮುಂಬಯಿಕ್ ಪಾಂಯ್ ತೆಂಕ್ಲೊ.
ಹಾಂಗಾ ಆಯಿಲ್ಲ್ಯಾ ಮ್ಹಾಕಾ ರಾವೊಂಕ್ ಠಿಕಾಣೊ ನಾತ್ಲ್ಲೊ. ಕಶ್ಟಾಂನಿ ಎಕಾ ಇಶ್ಟಾಚ್ಯಾ ಘರ್ಚ್ಯಾ ಭಾಯ್ರ್ ಆಸ್ಲೆಲ್ಯಾ ಸಿಮೆಟಿಚ್ಯಾ ಧರ್ಣಿಚೆರ್ ಏಕ್ ಹಾಪ್ತೊ ಕಾಡ್ಲೊ. ಚಡ್ ದೀಸ್ ತಾಕಾ ಭಾರ್ ದಿಂವ್ಚೊ ಸಾರ್ಕೊ ನ್ಹಂಯ್ ಮ್ಹಣೊನ್ ತೆಣೆ ಹೆಣೆ ಕಸಲೆಂಯ್ ಕಾಮ್ ಮೆಳ್ತಾಗೀ ಮ್ಹಣೊನ್ ಸಾಸ್ಪಾಲೊಂ. ಎಕಾ ದಿಸಾ ಎಕಾ ಹೊಟೆಲಾಂತ್ ಮ್ಹೊರಿಯೆಂತ್ ಆಯ್ದಾನಾಂ ಧುಂವ್ಚೆಂ ಕಾಮ್ ಮೆಳ್ಳೆಂ. ದೋನ್ ಜೆವ್ಣಾಂ, ಏಕ್ ನಾಸ್ಟೊ ಆನಿ ನಿದೊಂಕ್ ಸುವಾತೆ ಸಂಗಿಂ ದೆಡ್ಶೆಂ ರುಪಯ್ ಪಾಗ್. ಖುಶೆನ್ ವೊಪ್ಲೊಂ. ಸಗ್ಳೆಂ ದೆವಾಚೆರ್ ಸೊಡ್ನ್ ಕಾಮಾಚಿ ಸುರ್ವಾತ್ ಜ್ಕೆಲಿ. ಕಾಮ್ ಕಶ್ಟಾಂಚಿ. ರಾತಿಚೆಂ ಬಾರಾ-ಏಕ್ ವೊರಾ ಪರ್ಯಾಂತ್ ಕಾಮ್ ಕರುಂಕ್ ಆಸ್ಲ್ಲೆಂ. ಸೊಸ್ಲೆಂ ಆನಿ ಕೆಲೆಂ. ತೀನ್ ಮಹಿನೆ ಆಯ್ದಾನಾಂ ಧುಂವ್ಚೆಂ ಕರ್ತಚ್ ತ್ಯಾಚ್ ಹೊಟೆಲಾಂತ್ ವೇಯ್ಟರಾಚೊ ಏಕ್ ಜಾಗೊ ಖಾಲಿ ಜಾತಾನಾ ಶೆಟಿಚಾ ಪರ್ವಣ್ಗೆನ್ ತಾಕಾ ಜೊಂಪಯ್ ಮಾರ್ಲಿ. ಆತಾಂ ಜೋಡ್ ವ್ಹಾಡ್ಲಿ ಆನಿ ಘರಾ ದಾಡ್ಚ್ಯಾ ಪಯ್ಶ್ಯಾಂಚೊ ವಾಂಟೊಯ್ ವಾಡ್ಲೊ. ಮೆಜೂನ್ ಸ ಮಹಿನ್ಯಾಂನಿ ವೇಯ್ಟರಾಚೆಂ ಕಾಮ್ ಸಾರ್ಕೆಂ ಶಿಕ್ಲೊಂ ಆನಿ ಎಕಾ ಸೊರ್ಯಾಚಾ ಬಾರಾಂತ್ ಉಡ್ಕಿ ಮಾರ್ಲಿ. ಸಯ್ಶಿಂ ರುಪಯ್ ಪಾಗ್ ಆನಿ ಟಿಪ್ಸ್ ಆಶೆ ಮ್ಹಣ್ತಾನಾ ಜೋಡ್ ಬರಿ ಜಾಲಿ. ಗಾಂವಾಂತ್ ಆವಯ್ಕ್ ಟಿ.ಬಿ. ಲಾಗ್ಲ್ಯಾ ಮ್ಹಳ್ಳಿ ವಾರ್ತಾ ಯೆತಾನಾ ಜೊಡ್ಲ್ಲ್ಯಾ ಪಯ್ಶಾಂಚೊ ಮೆರೊ ವಾಂಟೊ ಗಾಂವಾಂಕ್ ಸಾಗ್ಸಾಲೊ. ಹೆಣೆ ಜೊಡ್ಚೆಂ ಆನಿ ಗಾಂವಾಕ್ ದಾಡ್ಚೆಂ ಹೆಂಚ್ ಜಾಲೆಂ. ರಾತಿಚಾ ಇಸ್ಕೊಲಾಕ್ ಯಾ ಕೊಲೆಜಿಕ್ ವೆಚೆಂ ಸಪಾಣ್ ಅಧುರೆಂ ಜಾಲೆಂ. ಆಶೆಂ ಚಾರ್ ವರ್ಸಾಂ ಪಾಶಾರ್ ಜಾತಾನಾ ದೋನ್ ಪಾವ್ಟಿಂ ಗಾಂವಾಕ್ ವಚೊನ್ ಆಯಿಲ್ಲೊಂ. ಘರ್ಚಿ ಪರಿಸ್ಥಿತಿ ತಶಿಚ್ ಆಸ್ಲ್ಲಿ. ತ್ಯಾ ಶಿವಾಯ್ ಬಾಪಯ್ ಪಿಡೆಸ್ತ್ ಜಾಲ್ಲೊ. ಆವಯ್ ಬಿಚಾಣ್ಯಾಕ್ ತೆಂಕ್ಲ್ಲಿ. ತಾಂಕಾಂ ಆಸ್ಚೊ ಆಸ್ರೊ ಕೇವಲ್ ಮ್ಹಜೊಚ್. ತಾಂಚೆ ಖಾತಿರ್ ಪರತ್ ಮುಂಬಯ್ ಆಯ್ಲೊಂ. ಘೊಳ್ಳೊಂ ಆನಿ ಗಾಂವಾಕ್ ದಾಡ್ಲೆಂ. ಕೇವಲ್ ಸ ಮಹಿನ್ಯಾಂನಿ ಆವಯ್ ದೆವಾಧೀನ್ ಜಾಲಿ. ಮರ್ಣಾಕ್ ಗೆಲ್ಲೊಂ ಭರಾಧೀಕ್ ಕಾಳಿಜ್ ಘೆವ್ನ್ ಪಾಟಿಂ ಆಯ್ಲೊಂ. ಮೆಜೂನ್ ತೀನ್ ಮಹಿನ್ಯಾಂನಿ ಬಾಪಯ್ ಅಂತರ್ಲೊ ಮ್ಹಳ್ಳೆಂ ಆಯ್ಕೊನ್ ಪರತ್ ಪಾಟಿಂ ಗಾಂವಾಕ್ ದೆಂವ್ಲೊಂ.
ಪರತ್ ಮುಂಬಯ್ ಯೆತಾನಾ "ಅನಾಥ್" ಜಾವ್ನ್ ಆಯ್ಲೊಂ. ಆತಾಂ ಕೇವಲ್ ಹಾವೆಂ ಮ್ಹಜೆ ಖಾತಿರ್ ಜಿಯೆಂವ್ಕ್ ಆಸ್ಲ್ಲೆಂ. ತೆಂಚ್ ಕಾಮ್ ಮುಕಾರ್ಸಿಲೆಂ. ಹೊಟೆಲಾಂ ಬದ್ಲಿಲಿಂ. ಪಾಗ್ ವಾಡ್ಲೊ. ಟಿಪ್ಸ್ ಜಮೊ ಜಾಲೆಂ. ಮುಂಬಯಿಂತ್ ಏಕ್ ರಾವೊಂಕ್ ಥಾರೊ ಕರುಂಕ್ ಜಾಯ್ ಮ್ಹಳ್ಳ್ಯಾ ಆಶೆಕ್ ಹಾವೆಂ ಚಡಿತ್ ವ್ಹಜನ್ ದಿಲೆಂ. ಎದೊಳ್ ಹೊಟೆಲಾಂತ್ಚ್ ರಾವೊನ್ ಖಾಣ್ ಜೆವಾಣ್ ಜೆವ್ತಾಲೊಂ. ಆತಾಂ ಮ್ಹಜೆಂಚ್ ಏಕ್ ಘರ್(ಕೊಟ್ರಿ) ಕರಿಜಾಯ್ ಮ್ಹಳ್ಳಿ ಇಚ್ಚಾ ಉದೆಲಿ. ಜಮೊ ಆಸ್ಲ್ಲೆ ಪಯ್ಶೆ ಮೆಜ್ಲೆ. ಡಿಪೊಜಿಟಾರ್ ಏಕ್ ಕೂಡ್ ಬಾಡ್ಯಾಕ್ ಘೆತ್ಲೆಂ. ಹೊಟೆಲಾಂತ್ ಜೀವ್ನ್ ಆಪ್ಲ್ಯಾಚ್ ಘರಾಚಾ ಧರ್ಣಿಚೆರ್ ಪಾಟ್ ತೆಂಕ್ತಾನಾ ಏಕ್ ಅವ್ಯಕ್ತ್ ಆನಂದ್ ಭಗ್ಲೊ.
ಪ್ರಾಯ್ ಆಟ್ಟಾವೀಸಾಂಕ್ ಪಾವ್ತಾಲಿ. ತರ್ನಾಟ್ಪಣಾಚಿಂ ಭಗ್ಣಾಂ ಮ್ಹಜೆ ಥಂಯ್ ಸ್ವಾಭಾವೀಕ್ ರಿತಿನ್ ವಾಡ್ಲಿಂ. ಎಕ್ಸುರ್ಪಣ್ ಧೊಸುಂಕ್ ಲಾಗ್ಲೆಂ. ಕಾಜಾರ್ ಜಾಯ್ಜಯ್ ಮ್ಹಳ್ಳ್ಯಾ ಇರಾದ್ಯಾನ್ ವಳ್ಕಿಂಚಾಂ ಲಾಗಿಂ ಸಾಂಗ್ಲೆಂ. ಥೊಡ್ಯಾ ಚೆಡ್ವಾಂಕ್ ಪಳೆಲೆಂ. ಮ್ಹಜ್ಯಾ ತಾಂಕಿ ಭಿತರ್ ಬಾಳ್ವೊಂಚೆಂ ಚೆಡುಂ ದೀ ದೆವಾ ಮ್ಹಣೊನ್ ಮಾಗ್ಲೆಂ.. ಕಸಲ್ಯಾಯ್ ವಾಯ್ಟ್ ಚಾಲಿಕ್ ಲಬ್ದಾನಾಸ್ತಾನಾ ದೇವ್ ಭಿರಾಂತೆನ್ ವಾಗ್ಲ್ಲ್ಯಾ ಮ್ಹಾಕಾ ದೆವಾನ್ ಸೊಡ್ನ್ ಘಾಲೆಂ ನಾ. ನೊವೆನಾಂಚೊ ಫಳ್ ಜಾವ್ನ್ ನೊವೆನಾಕ್ ಗೆಲ್ಲ್ಯಾ ವೆಳಿಂಚ್ ಸಾಯ್ಬಿಣ್ ಮಾಯೆನ್ ಮ್ಹಜಿದೀಶ್ಟ್ ಎಕಾ ಚಲಿಯೆರ್ ಖಂಚಯ್ಲಿ. ತಿ ಕೋಣ್ ಆನಿ ಖಂಯ್ಚರ್ ರಾವ್ತಾ ಮ್ಹಳ್ಳ್ಯಾ ಮ್ಹಜ್ಯಾ ಸೊಧ್ನೆಕ್ ಪ್ರತಿಫಳ್ ಮೆಳ್ಳೊ. ತ್ಯಾ ಚಲಿಯೆಚೆಂ ನಾಂವ್ ಲಿಲ್ಲಿ. ಎಕಾ ಬೊಂಗ್ಲ್ಯಾಂತ್ ಘರ್ ಕಾಮಾಕ್ ಆಸಾ ಆನಿ ತಿಕಾ ಆಶ್ರಮಾ ಥಾವ್ನ್ ಹಾಡ್ಲಾಂ ಮ್ಹಳ್ಳಿ ಖಬಾರ್ ಮೆಳ್ತಾನಾ ಇಗರ್ಜೆಚ್ಯಾ ಎಕಾ ಮಾನೆಸ್ತಾ ಮುಕಾಂತ್ರ್ ಕಾಜಾರಾಚೊ ಪ್ರಸ್ತಾವ್ ಮುಕಾರ್ ದವರ್ಲೊ. ತ್ಯಾ ಚಲಿಯೆಚಾ ಧನಿಯಾಂನಿ ಮ್ಹಾಕಾ ತುಕುನ್ ತಾಂಚಿ ಪರ್ವಣ್ಗಿ ದಿತಾನಾ ಭೋವ್ ಸಾದ್ಯಾ ಮಟ್ಟಾರ್ ತ್ಯಾ ಎಕಾ ಭಾಗಿ ದಿಸಾ ಮ್ಹಜೆಂ ಆನಿ ಲಿಲ್ಲಿಚೆಂ ಲಗ್ನ್ ಜಾಲೆಂ.
ಮ್ಹಜ್ಯಾ ಜಿವಿತಾಚೆಂ ಏಕ್ ಪಾನ್ ಪರ್ತೊನ್ ದುಸ್ರೆಂ ಪಾನ್ ಉಗ್ತೆಂ ಜಾಲ್ಲೆಂ. ಲಿಲ್ಲಿ ಮ್ಹಜಿ ಪತಿಣ್ ಜಾವ್ನ್ ಆಯ್ಲಿ. ಸುಂದರಿ ನ್ಹಂಯ್ ತರ್ಯೀ ಸಾದಿ ಬೊಳಿ ಆನಿ ಸಾದ್ಯಾ ಸೊಭಾಯೆಚಿ ಮ್ಹಾಕಾ ದೆವಾನ್ ಫಾವೊ ಕೆಲ್ಲಿ. ಘರ್-ದಾರ್ ಬರ್ಯಾ ರಿತಿನ್ ಸಾಂಬಾಳುಂಕ್ ಸಕ್ಚಿ ಜೊಕ್ತಿ ಪತಿಣ್ ಮ್ಹಾಕಾ ಫಾವೊ ಜಾಲ್ಲಿ. ಜಿವಿತಾಚೊ ಸಂತೊಸ್ ದೊಡ್ತೊ ಜಾಲ್ಲೊ. ಆನಿ ಜಿಯೆಂವ್ಚಿ ದಿಶಾ ಬದಲ್ಲಿ.
ಆಶೆಂ ಮ್ಹಜ್ಯಾ ಗ್ರಹಸ್ಥಾಶ್ರಮಾಚಿ ಸುರ್ವಾತ್ ಜಾಲಿ. ಎಕ್ಸುರೊ ಅಸ್ಲ್ಲೊಂ ಆತಾಂ ದೊಡ್ತೊ ಜಲ್ಲೊಂ. ಖರ್ಚ್ ವಾಡ್ಲೊ. ಪತಿಣೆಕ್ ಸಂತೊಸ್ಬರಿತ್ ಆನಿ ಸುಖಾನ್ ದರ್ತಲೊಂ ಮ್ಹಣ್ ಸಪ್ಣೆಲೊಂ. ತಾಕಾ ಮಧ್ಯಮ್ ವರ್ಗಾಚೆಂ ಬರೆಂ ಜೀವನ್ ಜಿಯೆಂವ್ಚೊ ಹರ್ಯೆಕ್ ಆವ್ಕಾಸ್ ಹಾವೆಂ ದಿಂವ್ಚೆಂ ಪ್ರಯ್ತ್ ಕೆಲೆಂ. ತಿಣೆಂಯ್ ಮ್ಹಜ್ಯಾ ಮೊಗಾಕ್ ಆನಿ ಮಯ್ಪಾಸಾಕ್ ತಿಚೊ ಸಾಂಗಾತ್ ದಿಲೊ ಆನಿ ಏಕ್ ಸುಂದರ್ ಜಿವನಾಚಿ ಸುರ್ವಾತ್ ಜಾಲಿ. ಜೋಡ್ ತಿತ್ಲಿಚ್ ಜಾಲ್ಯಾರ್ಯ್ ಲಿಲ್ಲಿನ್ ತಾಂತುಂಚ್ ತೃಪ್ತಿ ದಾಕಯ್ಲಿ. ದನ್ಪರಾಂಚೆಂ ಕಾಮಾಕ್ ಗೆಲ್ಯಾರ್ ರಾತಿಚ್ಯಾ ಏಕ್ ಯಾ ದೋನ್ ವರಾರ್ ಮ್ಹಜೆಂ ಪಾಟಿಂ ಯೆಣೆಂ ಜಾತಾಲೆಂ. ಲಿಲ್ಲಿ, ನಿದಾನಾಸ್ತಾಂ ಆನಿ ಜೆವಿನಾಸ್ತಾನಾ ಮ್ಹಕಾ ರಾಕೊನ್ ರಾವ್ತಾಲೆಂ. ತಾಚ್ಯಾ ತ್ಯಾ ಅಪ್ರತಿಮ್ ಮೊಗಾಕ್ ಹಾಂವ್ ಮೆಚ್ವಾಲೊಂ.
ದೀಸ್ ಹಪ್ತೆ ಆನಿ ಮಹಿನೆ ಪಾಶಾರ್ ಜಾತಾನಾ ವರಸ್ ಕಶೆಂ ಧಾಂವೊನ್ ಗೆಲೆಂ ತೆಂ ಕಳ್ಳೆಂಚ್ ನಾ. ಹ್ಯಾ ಮಧೆಂ ಏಕ್ ವಿಶಯ್ ಆಮ್ಚಾ ದೊಗಾಂಯ್ಚಾ ಮತಿಂತ್ ಕಾಂತಂವ್ಕ್ ಲಾಗ್ಲ್ಲೊ. ಏಕ್ ವರಸ್ ಜಾತಾ ಪರ್ಯಾಂತ್ ಲಿಲ್ಲಿ ಥಂಯ್ ಆವಯ್ಪಣಾಚಿಂ ಖುಣಾಂಚ್ ದಿಶ್ಟಿಕ್ ಪಡ್ಲಿಂ ನಾಂತ್. ಶೆಜಾರ್ಚಾ ಮಾಲ್ಗಡ್ಯಾಂ ಲಾಗಿಂ ವಿಚಾರ್ತಾನಾ ತಾಣಿಂ ಭಿಯೆಂವ್ಚೆಂ ನಾಕಾ ಆಶೆಂ ಥೊಡ್ಯಾಂ ಥಂಯ್ ಘಡ್ತಾ ಮ್ಹಳ್ಳಿ ಜಾಪ್ ಮೆಳ್ಳಿ. ತಶೆ ಜಾಲ್ಲ್ಯಾನ್ ಆಮಿ ಚಡಿತ್ ತಕ್ಲಿ ಆಟಂವ್ಕ್ ಗೆಲಿನಾಂವ್. ದೀಸ್ ವೆತಾಲೆ ಆನಿ ವೆತಾಲೆ. ಆಮ್ಚೊ ಸಂಸಾರ್ ಸಂತೊಸಾನ್ ಚಲ್ತಾಲೊ. ಪೂಣ್ ವರ್ಸಾಂ ದೋನ್ ಜಾವ್ನ್ ತಿಸ್ರ್ಯಾಕ್ ಲಾಗಿಂ ಪಾವ್ತಾನಾ ಆಮಿ ಖಂಡಿತ್ ಭಿಯೆಲ್ಯಾಂವ್ ಆನಿ ದಾಕ್ತೆರಾಂಚಿ ಭೆಟ್ ಘೆತ್ಲಿ. ಆನಿ ಸಲಹಾ ವಿಚಾರ್ಲಿ. ತಾಣಿ ಆಮ್ಚಿ ದೊಗಾಂಯ್ಚಿ ಪರಿಕ್ಶೆ ನಂತರ್ ಲಿಲ್ಲಿ ಥಂಯ್ ಏಕ್ ಊಣ್ ಸೊಧುನ್ ಕಾಡ್ಲೊ. ತಾಚಾ ಪೊಟಾಂತ್ ಏಕ್ ಗೆಡ್ಡೊ ವಾಡ್ಲ್ಲೊ ತಾಂಕಾ ದಿಸ್ತಾನಾ ತೊ ಆಪರೇಶನ್ ಕರುನ್ ಕಾಡಿಜಾಯ್ ಆನಿ ತಾಕಾ ಬರ್ಪೂರ್ ಖರ್ಚ್ ಆಸ್ತಲೊ ಮ್ಹಣೊನ್ ಕಳಯ್ತಾನಾ ಮೊಳಾಬ್ಚ್ ಕೊಸ್ಳಾಲೆಂ. ಧಯ್ರ್ ಸಾಂಡಿನಾಸ್ತಾನಾ ದೆವಾಲಾಗಿಂ ಮಾಗ್ಲೆಂ. ಧೆಟಿಲಾಗಿಂ ಥೊಡೆಂ ರೀಣ್ ಘೆತ್ಲೆಂ. ಕಶ್ಟಾಂನಿ ಉರಯಿಲ್ಲೆಂ ಬ್ಯಾಂಕ್ ಬ್ಯಾಲೆನ್ಸ್ ಖಾಲಿ ಕೆಲೆಂ ಆನಿ ಆಪರೇಶನ್ ಸಂಪಯ್ಲೆಂ.
ಥೊಡೆ ಮಹಿನೆ ಸಂಪ್ಲೆ ಆನಿ ಎಕಾ ದಿಸಾ ಲಿಲ್ಲಿನ್ ಮ್ಹಾಕಾ ಸಂತೊಸಾಚಿ ಖಬಾರ್ ದಿತಾನಾ ಮ್ಹಾಕಾ ಮೊಳಾಬ್ ಎಕ್ಚ್ ಗೇಣ್ ಲಾಗಿಂ ದಿಸ್ಲೆಂ. ಲಿಲ್ಲಿ ಆವಯ್ ಆನಿ ಹಾಂವ್ ಬಾಪಯ್ ಜಾಂವ್ಚೊ ದೀಸ್ ಲಾಗಿಂ ಜಾವ್ನ್ ಯೆತಾಲೊ. ಕಾಜಾರಾಚಾ ಸಾಡೆ ತೀನ್ ವರ್ಸಾ ಉಪ್ರಾಂತ್ ಪರತ್ ಜೀವನ್ ಫುಲೊಂಕ್ ಸುರು ಜಾಲ್ಲೆಂ. ಹ್ಯಾ ವೆಳಾರ್ ಹಾವೆಂ ಲಿಲ್ಲಿಕ್ ವರ್ತ್ಯಾ ಚತ್ರಾಯೆನ್ ಸಾಂಬಾಳ್ಳೆಂ. ಸಂಸಾರಾಂತ್ ಯೆಂವ್ಚೊ ಆಸ್ಚಾ ಜಿವಾಚೊ ಸ್ವಾಗತ್ ಕರುಂಕ್ ಆಮಿ ಆರಂಭ್ ಕೆಲ್ಲೆಂ. ಆತಾಂ ಜೋಡ್ ವಾಡೊಂಕ್ ಜಾಯ್ ಆಸ್ಲ್ಲಿ. ಕಸಲಿಯ್ ವಾಟ್ ನಾತ್ಲ್ಲಿ. ಜೋಡ್ನ್ ಪುಂಜಾಯಿಲ್ಲೆಂ ಆಪರೇಶನಾನ್ ಗಿಳ್ಲ್ಲೆಂ. ತೆಂ ಸೊಡ್ನ್ ಪಾಟ್ಲ್ಯಾ ಮಹಿನ್ಯಾಂನಿ ಜೊಡ್ಲೆಲೆಂ ರಿಣಾಂತ್ ಕಾತ್ರುನ್ ಗೆಲ್ಲೆಂ. ಸಗ್ಳೆಂ ದೆವಾಚಾ ಹಾತಿಂ ಒಪ್ಸುನ್ ಹಾವೆಂ ಕಾಮ್ ತಶೆಂಚ್ ಲಿಲ್ಲಿಚಿ ಚತ್ರಾಯ್ ಘೆಂವ್ಚಾ ಕಾಮಾಕ್ ಖಾಂದ್ ಮಾರ್ಲೊ.
ನೋವ್ ಮಹಿನೆ ಸಂಪ್ತಾನಾ ಏಕಾ ಭಾಗಿ ದಿಸಾ ಲಿಲ್ಲಿನ್ ಎಕಾ ಚೆರ್ಕ್ಯಾ ಭುರ್ಗ್ಯಾಕ್ ಜನಮ್ ದಿತಾನಾ ಸಂಸಾರಾಂತ್ಲೆಂ ಸಗ್ಳೆಂ ಸುಖ್ ದೆವಾನ್ ಹ್ಯಾ ಚೆರ್ಕ್ಯಾಚಾ ಯೆಣ್ಯಾನ್ ಮ್ಹಾಕಾ ಫಾವೊ ಕೆಲಾಂಗಾಯ್ ಮ್ಹಳ್ಳೆಪರಿಂ ಭಗ್ಲೆಂ.
ಅನ್ಯೇಕಾ ಜೀವನಾಚಿ ಸುರ್ವಾತ್ ಜಾಲಿ. ದೊಗಾಂ ಆಸ್ಲ್ಲಿಂ ಆಮಿಂ ತೆಗಾಂ ಜಾಲ್ಯಾಂವ್. ಖರ್ಚ್ ವಾಡ್ಲೊ. ಎಕಾ ಭುರ್ಗ್ಯಾ ಪಾಟ್ಲ್ಯಾನ್ ಚ್ಯಾರ್ ಜಣಾಂ ವ್ಹಡಾಂಚೊ ಖರ್ಚ್ ಆಸ್ತಾ ಮ್ಹಣ್ತಾತ್ ತೆಂ ಉತಾರ್ ಸತ್ ಜಾಲೆಂ. ಭುರ್ಗೊ ಲಿಯೊನ್ ಮೊಗಾನ್ ಆನಿ ಕೊಂಡಾಟ್ಯಾನ್ ವಾಡೊನ್ ಯೆತಾಲೊ. ಘರಾಂತ್ಲೊ ಖರ್ಚ್ ವಾಡ್ತಾನಾ ಏಕ್ ದೀಸ್ ಲಿಲ್ಲಿನ್ ಮ್ಹಾಕಾ ಏಕ್ ಶಿಂವ್ಣೆಚೆ ಮಿಶಿನ್ ಹಾಡುನ್ ದಿಂವ್ಚಿ ವಿನತಿ ಕೆಲಿ. ತೆಂ ಶಿಂವಣ್ ಜಣಾ ಮ್ಹಳ್ಳೆಂ ಮ್ಹಾಕಾ ತೆದಾಳಾ ಕಳ್ಳೆಂ. ಆಪುಣ್ಯ್ ಥೊಡೆಂ ಶಿಂವೊನ್ ಘರ್ಚ್ಯಾ ಖರ್ಚಾಕ್ ಥೊಡೊ ಆಧಾರ್ ದಿತಾಂ ಮ್ಹಣ್ ತಾಣೆ ಮ್ಹಾಕಾ ಸಾಂಗ್ತಾನಾ ಆಮ್ಚಾ ಭುರ್ಗ್ಯಾ ಲಿಯೊನಾಕ್ ಬರೊ ಫುಡಾರ್ ದೀಂವ್ಕ್ ಜಾಯ್ ತೆಂ ಗೊಮ್ತಾನಾ ಏಕ್ ಶಿಂವ್ಣೆಚೆ ಮಿಶಿನ್ ಘರಾಂತ್ ಪ್ರವೇಶ್ ಜಾಲೆಂ.
ಭುರ್ಗೊ ಲಿಯೊನ್ ಘರಾಂತ್ ವಾಡೊನ್ ಯೆತಾಲೊ. ತಾಕಾ ಏಕ್ ಬರೊ ಫುಡಾರ್ ದೀಂವ್ಕ್ ಜಾಯ್ ಮ್ಹಣೊಣ್ ಆಮಿ ವದ್ದಾಡ್ತಾಲ್ಯಾಂವ್. ಲಿಲ್ಲಿಕ್ ತಾಚ್ಯಾ ಲ್ಹಾನ್ಪಣಾರ್ ಆವಯ್ ಬಾಪಾಯ್ಚೊ ಮೋಗ್ ಮೆಳಾನಾತ್ಲ್ಲ್ಯಾನ್ ಆಪ್ಲ್ಯಾ ಭುರ್ಗ್ಯಾಕ್ ತಾಣೆ ಬರ್ಪೂರ್ ಮೋಗ್ ಆನಿ ಕೊಂದಾಟ್ಯಾಚೊ ಭೊರೊ ದಿಲೊ. ಹಾಂವ್ ಚಡಿತ್ ಶಿಕ್ಲೊಂ ನಾ ಜಾಲ್ಲ್ಯಾನ್ ಮ್ಹಜೆಂ ಅಧುರೆಂ ಸಪಾಣ್ ಲಿಯೊನಾನ್ ಪುರ್ತೆಂ ಕರುಂಕ್ ಜಾಯ್ ಆನಿ ತೊ ಕಿತ್ಲೆಂ ಶಿಕ್ತಾ ತಿತ್ಲೆಂ ತಾಕಾ ಶಿಕಯ್ತಲೊಂ ಮ್ಹಳ್ಳ್ಯಾ ಎಕಾ ಹಟಾಕ್ ಪಡ್ಲೊಂ. ಹೊಟೆಲಾಂತ್ಲೆಂ ಕಾಮ್ ಕರುನ್, ಸಾಕಾಳಿಂಚೆಂ ದುಸ್ರ್ಯಾ ಬಾರಾನಿ ವಚೊನ್ ಥಂಯ್ಚೆಂ ಲೇಖ್ ಬರಂವ್ಚೆಂ ಚಡ್ತಿಕ್ ಕಾಮ್ ಕರುಂಕ್ ಸುರು ಕೆಲೆಂ. ಲಿಲ್ಲಿನ್ ಶೆಜಾರ್ಯಾಂಚಿಂ ವಸ್ತುರಾಂ ಶಿಂವೊನ್ ಜೋಡ್ ವಾಡಾಯ್ಲಿ. ತ್ಯಾ ತೆಕಿದ್ ಲಿಯೊನ್ಯ್ ಬರೊ ಶಿಕೊನ್ ಹರ್ಯೆಕಾ ವರ್ಸಾ ಉತ್ತೀರ್ಣ್ ಜಾವ್ನ್ ಯೆತಾಲೊ.
ವರ್ಸಾಂ ಕಶಿಂ ಧಾಂವ್ಲಿಂ ಕಶಿಂ ಉತ್ರಾಲಿಂ ಆನಿ ಕಸೊ ಲಿಯೊನ್ ವಾಡೊನ್ ಕೆಂಳ್ಬ್ಯಾ ತೆದೊ ಜಾಲೊ ತೆಂ ಆತಾಂ ಉಡಾಸಾಕ್ ಯೇನಾ. ದೀಸ್ ರಾತ್ ಲಿಯೊನಾಚಾ ಫುಡಾರಾಚಿ ಬುನ್ಯಾದ್ ಘಟ್ ಕರುಂಕ್ ವೊದ್ದಾಡ್ಲ್ಲ್ಯಾ ಮ್ಹಜ್ಯಾ ಕಾತಿಕ್ ಮಿರಿಯೊ ಪಡ್ಲ್ಯೊ ಆನಿ ದೊಳ್ಯಾಂನಿ ಕಾಳ್ಬಾಣ್ ವಾಡ್ಲ್ಲಿ ಎಕಾ ದಿಸಾ ಕಳ್ತಾನಾ ಹಾಂವ್ ಮ್ಹಾತಾರೊ ಜಾವ್ನ್ ಯೆತಾಂ ಮ್ಹಳ್ಳೆಂ ಸತ್ ಮ್ಹಜ್ಯಾ ಶಿಂತಿದಾಕ್ ಆಪ್ಟಾಲೆಂ. ಲಿಲ್ಲಿಯ್ ತಾಚ್ಯಾ ಪ್ರಾಯೆಚ್ಯಾಕ್ಯ್ ಚಡ್ ಪ್ರಾಯೆಚೆಂ ಜಾವ್ನ್ ದಿಸೊಂಕ್ ಲಾಗ್ಲ್ಲೆಂ. ಮ್ಹಜಿ ದೀಶ್ಟ್ ಗಯ್ರಿ ಗಯ್ರಿ ಜಾವ್ನ್ ಆಯಿಲ್ಲಿ.
ಲಿಯೊನಾನ್ ಬಾರಾವಿ ಸಂಪಯಿಲ್ಲಿ. ಬರ್ಯಾ ಅಂಕ್ಡ್ಯಾಂನಿ ಉತ್ತಿರ್ಣ್ ಜಾಲ್ಲ್ಯಾ ತಾಣೆ ಏಕ್ ದೀಸ್ ಆಪ್ಣಾಕ್ ಪಾಯ್ಲೆಟ್ ಜಾಂವ್ಚಿ ಇಚ್ಚಾ ವ್ಯಕ್ತ್ ಕರ್ತಾನಾ ಮ್ಹಾಕಾ ಏಕ್ ವಿಶಿಶ್ಟ್ ಸಂತೊಸ್ ಜಾಲೊ ತರ್ಯೀ ತ್ಯಾ ಪಾಟ್ಲೊ ಖರ್ಚಾಚೊ ಭಾರ್ ಚಿಂತುನ್ ಹಾಂವ್ ಕಾಂಪ್ಲೊಂ. ಲಿಯೊನಾಚಿ ಇಚ್ಚಾ ಜ್ಯಾರಿ ಕರುಂಕ್ ಜಾಯ್ತ್ ಯಾ ನಾ ತೆಂ ಮ್ಹಜ್ಯಾ ಮತಿಕ್ ಗೆಲೆಂ ನಾ. ಕೇವಲ್ ರೀಣ್ ಕಾಣ್ಘೆವ್ನ್ ತಾಚಿ ಇಚ್ಚಾ ಪೂರ್ಣ್ ಕರ್ಯೆತ್ ಆಸ್ಲ್ಲಿ. ರೀಣ್ ಕೊಣಾಲಾಗಿಂ ಘೆಂವ್ಚೆಂ ತೆಂ ಸುಸ್ತಾಲೆಂ ನಾ. ನಿಮಾಣೆಂ ಆಸ್ಲ್ಲೆಂ ಲಿಲ್ಲಿಚೆಂ ಭಾಂಗಾರ್ ವಿಕ್ಲೆಂ ಆನಿ ಶೆಟಿಲಾಗಿಂ ಏಕ್ ಮೊಟೊ ಐವಜ್ ಮಾಗ್ಲೊ. ವಾಡಿ ಸಮೇತ್ತ್ ಫಾರಿಕ್ ಕರ್ತಾಂ ಮ್ಹಣ್ ತಾಕಾ ಭಾಸಾಯ್ಲೆಂ. ತಾಚೆಲಾಗಿಂ ಪ್ರಾಮಾಣಿಕ್ಪಣಿ ಕಾಮ್ ಕೆಲ್ಲ್ಯಾ ವರ್ವಿಂ ತೊ ಒಪ್ವಾಲೊ ಆನಿ ಆಶೆ ಲಿಯೊನಾನ್ ಆಪ್ಲೆಂ ಸಪಾಣ್ ಸಾಕಾರ್ ಕರುಂಕ್ ಸಾಧ್ಯ್ ಜಾಲೆಂ.
ಪರತ್ ಆರಂಭ್ ಜಾಲೆಂ ತೆಂಚ್ ಜೀವನ್. ಹೊತೆಲಾಂತ್ಲಿ ಗುಲಾಮ್ಗಿರಿ ಮುಕಾರ್ಸುನ್ ಗೆಲಿ. ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಸಾಂಬಾಳ್ ವಾಡ್ಲ್ಲೊ ತೊ ರಿಣಾ ರುಪಾರ್ ಶೆಟಿಚಾ ತಾಬೆಂತ್ ವೆತಾಲೊ. ಕೇವಲ್ ಟಿಪ್ಸ್ ಮೆಳ್ಲ್ಲೆಂ ತೆಂ ಲಿಯೋನಾಚ್ಯಾ ಖರ್ಚಾಕ್ ದೀಂವ್ಕ್ ಪಡ್ತಾಲೆಂ. ಇತ್ಲೆಂ ವಡ್ಲೆಂ ಶಿಕಾಪ್ ತೊ ಶಿಕ್ತಾನಾ ತಾಚ್ಯಾ ಬೊಲ್ಸಾಂತ್ ಪಯ್ಶೆ ನ್ಹಂಯ್ ನೋಟ್ ಭರುಂಕ್ ಜಾಯ್ ಆಸ್ಲ್ಲೆ. ಹೆರಾಂ ಹೊಟೆಲಾಂನಿ ಲೇಖ್ ಬರವ್ನ್ ಜೊಡ್ಲ್ಲೆಂಯ್ ತಾಚ್ಯಾಚ್ ವಸ್ತುರಾಂಕ್ ಆನಿ ಹೆರ್ ಖರ್ಚಾಕ್ ಬಲಿ ಜಾತಾಲೆಂ ಜಾಲ್ಲ್ಯಾನ್ ಲಿಲ್ಲಿನ್ ಶಿಂವೊನ್ ಜೋಡ್ಲ್ಲ್ಯಾ ಜೊಡಿನ್ ಘರಾಂತ್ಲೊ ಖರ್ಚ್ ಚಲ್ತಾಲೊ. ಲಿಯೊನ್ ಹೊಸ್ಟೆಲಾಂತ್ ರಾವ್ತಾಲೊ ಜಾಲ್ಲ್ಯಾನ್ ಆಮ್ಕಾಂ ಸುಕಿ ಬಾಕ್ರಿ ಪಾವ್ತಾಲಿ. ತವಳ್ ತವಳ್ ಹೊತೆಲಾಂತ್ ಮ್ಹಾಕಾ ಮೆಳ್ಚೆಂ ಜೆವಾಣ್ ಆಮಿ ದೊಗಾಂಯ್ಚಿಂ ವಾಂಟೆ ಕರುನ್ ಜೆವ್ಲೆಲೆಂಯ್ ಆಸಾ.
ಪರತ್ ವರ್ಸಾಂ ಧಾಂವ್ಲಿಂ ಲಿಯೊನ್ ಪಾಯ್ಲೆಟ್ ಜಾಲ್ಲೊ. ಬ್ರಿಟಿಶ್ ಏರ್ವೇಸಾಂತ್ ತಾಕಾ ಬರೆಂ ಕಾಮ್ ಮೆಳ್ಳೆಂ. ಹಾತ್ ಭರ್ನ್ ಸಾಂಬಾಳ್ ಆನಿ ಭಾತೆಂ ಮೆಳ್ತಾಲೆಂ. ಆಮ್ಚೆ ಕಶ್ಟಾಂಚೆ ದೀಸ್ ಉತಾರ್ಲೆ ಮ್ಹಣೊನ್ ಆಮಿ ಚಿಂತ್ಲೆಂ ಪೂಣ್ ಜಾಲ್ಲೆಂ ದುಸ್ರೆಂಚ್.
ಲಿಯೊನಾಕ್ ಆಮ್ಚೆಸಂಗಿಂ ಜಿಯೆಂವ್ಚಿ ಅವ್ಮರ್ಯಾದ್ ತಶೆಂ ಭೊಗ್ಲ್ಲೆಂ. ಎದೊ ವಡ್ಲೊ ಪಾಯ್ಲೆಟ್ ಎಕಾ ಚಾಲಿಂತ್ ಕಸೊ ರಾವ್ತಲೊ? ತಾಕಾ ತೆಂ ಇನ್ಸಲ್ಟ್..... ತಾಕಾ ತೆಂ ಲ್ಹಾನ್ಪಣ್ ಭಗ್ತಾಲೆಂ. ಎಕಾ ದಿಸಾ ತಾಣೆಂ ತೋಂಡ್ ಸೊಡ್ನ್ ಸಾಂಗೊನ್ ಸೊಡ್ಲೆಂ.
"ಡ್ಯಾಡಿ.... ಹಾಂವ್ ಆತಾಂ ಪಾಯ್ಲೆಟ್ ಜಾಲಾಂ. ಮ್ಹಾಕಾ ಕಂಪೆನಿನ್ ಫ್ಲ್ಯಾಟ್ ದಿಲಾಂ ಹಾಂವ್ ಥಂಯ್ಚರ್ ರಾವ್ತಾಂ. ತುಮಿ ಹಾಂಗಾಚ್ ರಾವಾ. ತುಮ್ಚ್ಯಾ ಖರ್ಚಾಕ್ ದಿತಾಂ ಮ್ಹಜ್ಯಾ ಸಾಂಗಾತ್ಯಾಂಚಿಂ ಆವಯ್ ಬಾಪಯ್ ಬರಿಂ ಶಿಕ್ಲೆಲಿಂ ಆನಿ ಮೋಡರ್ನ್ ಜಾವ್ನಾಸಾತ್. ತಿಂ ಶಿಕ್ಲೆಲಿಂ ಮನ್ಶ್ಯಾಂ ಜಾವ್ನಾಸಾತ್. ತುಮಿ ಅಶಿಕ್ಪಿ ಆನಿ ತುಮ್ಕಾಂ ಮೊಡರ್ನ್ ಲಿವಿಂಗ್ ಕಳಿತ್ ನಾ. ತುಮ್ಕಾಂ ಮ್ಹಜೆ ಸಂಗಿಂ ಹಾವೆಂ ರಾವೊಂಕ್ ವೆಲ್ಯಾರ್ ತುಮ್ಚ್ಯಾ ವೆಸಾಕ್ ಪಳವ್ನ್ ಸಗ್ಳಿಂ ಮ್ಹಾಕಾ ಹಾಸೊಂಕ್ ಆಸಾತ್. ಮ್ಹಜ್ಯಾ ಸ್ಟ್ಯಾಂಡರ್ಡಾಕ್ ತುಕ್ಲಾಂವ್ಕ್ ಆಸಾತ್. ದೆಕುನ್ ಹಾಂವ್ ಫ್ಲ್ಯಾಟಾಂತ್ ತುಮ್ಕಾಂ ವರುಂಕ್ ಸಕಾನಾ,. ತುಮ್ಚ್ಯಾ ಖರ್ಚಾಚೆ ಪಯ್ಶೆ ತುಮ್ಕಾಂ ಪಾವಿತ್ ಜಾತೆಲೆ....." ಇತ್ಲೆಂ ಸಾಂಗೊನ್ ತೊ ಪಾಟಿಂ ಪಳಯ್ನಾಸ್ತಾನಾ ನಪಂಯ್ಚ್ ಜಾಲ್ಲೊ.
ಮ್ಹಕಾ ಆನಿ ಲಿಲ್ಲಿಕ್ ಘಡ್ಗಡೊ ಮಾರ್ಲ್ಲೊ. ತ್ಯಾ ದೀಸ್ ಆಮಿ ಮಸ್ತ್ ರಡ್ಲ್ಲ್ಯಾಂವ್. ಆವಯ್ಚೆಂ ಕಾಳಿಜ್ ಶಿಂದೊನ್ ಗೆಲ್ಲೆಂ. ಬಾಪಾಯ್ಚಿಂ ಸಪ್ಣಾಂ ಚುರಾನ್ ಚೂರ್ ಜಾಲ್ಲಿಂ. ಲಿಲ್ಲಿ ಖಂತಿನ್ ಮಾಂದ್ರಿ ದೊದವ್ನ್ ನಿದ್ಲೆಂ. ತಾಪ್ ಆಯ್ಲೊ. ಇಲ್ಲೆಶೆಂ ಮತಿಭೃಶ್ಟ್ ಜಾಲ್ಲೆಂ. ಹಾವೆಂ ತಾಂಕ್ತಾ ತಿತ್ಲಿ ಚಾಕ್ರಿ ಕೆಲಿ. ಕಾಮಾಕ್ ವಚೊನ್ ಯೇವ್ನ್ ಲಿಲ್ಲಿಚಿ ಚಾಕ್ರಿ ಕರ್ತಾನಾ ಮ್ಹಜ್ಯಾಯ್ ಅಸ್ಕತ್ ಕುಡಿಕ್ ಪುರಾಸಣ್ ಭಗ್ತಾಲಿ. ಲಿಲ್ಲಿಕ್ ಖಂತಿಚಿ ಪಿಡಾ ಲಾಗ್ಲ್ಲಿ. ತಿ ಪಿಡಾ ವಕ್ತಾಂ ವರ್ವಿಂ ಗೂಣ್ ಜಾಂವ್ಚಿ ನ್ಹಂಯ್ ಮ್ಹಣೊನ್ ದಾಕ್ತೆರಾನ್ ಸಾಂಗ್ಲ್ಲೆಂ. ಪುತಾಅಚಾ ವರ್ತನಾಚೊ ಆಘಾತ್ ತಾಕಾ ಜಾಲ್ಲೊ. ತಾಚ್ಯಾ ವೆಗ್ಳಾಚಾರಾಚೊ ಪರಿಣಾಮ್ ತಾಚೆ ಥಂಯ್ ವಾಡೊನ್ ಯೆತಾಲೊ. ಲಿಯೊನಾನ್ ದೋನ್ ಪಾವ್ಟಿಂ ಪಯ್ಶಾಂಚೊ ಲೊಕಾಟೊ ಕೊಣಾ ಲಗಿಂಗೀ ದಾಡುನ್ ದಿಲ್ಲೊ. ಹಾವೆಂ ತಸೊಚ್ ಪಾಟಿಂ ದಾಡ್ಲ್ಲೊ. ಆವಯ್ಚಿ ಭಲಾಯ್ಕಿ ಎಕ್ದಮ್ ಪಾಡ್ ಜಾಲ್ಯಾ ಮ್ಹಳ್ಳೊ ನಿರೊಪ್ಯ್ ದಾಡ್ಲ್ಲೊ. ಪುಣ್ ತೊ ಆಯ್ಲೊ ನಾ. ತಾಚೆಂ ಪ್ಲ್ಯಾಟ್ ಖಂಯ್ಚರ್ ಆಸಾ ಮ್ಹಳ್ಳೆಂ ಸೊದ್ಚೆಂ ಪ್ರಯತ್ನ್ಯ್ ಹಾವೆಂ ಕೆಲೆಂ ನಾ. ಮ್ಹಜೆಂ ಕಾಳಿಜ್ ಫಾತರ್ ಜಾಲ್ಲೆಂ.
ಆಮ್ಚೆಂ ಸಪಾಣ್ ಫಟ್ಕಿರೆಂ ಜಾಲ್ಲೆಂ. ತಾಕಾ ವಾಡಯಿಲ್ಲ್ಯಾ ಖಂಯ್ಚಾ ರಿತಿಂತ್ ತಾಕಾ ಉಣೆಪಣ್ ಜಾಲಾಂ ತೆಂ ಮ್ಹಾಕಾ ಕಳ್ಳೆಂ ನಾ. ಆವಯ್ನ್ ಜೀವನ್ ಭರ್ ದಿಲ್ಲೊ ಮೋಗ್ ಆನಿ ಕೊಂಡಾಟೊ ತಾಕಾ ಹ್ಯಾ ರಿತಿಚಾ ವರ್ತನಾಚೆಂ ಕಾರಾಣ್ ಜಾಲೆಂ? ತಾಚ್ಯೆ ಖಾತಿರ್ ಕೆಲ್ಲೊ ತ್ಯಾಗ್ ಆನಿ ಬಲಿದಾನ್ ಆಮ್ಕಾಂ ಮ್ಹಾರಗ್ ಪಡ್ಲೆಂ? ತಾಕಾ ಕಸಲೆಂ ಉಣೆಪಣ್ ಆಮಿ ಕೆಲೆಂ ತೆಂ ಮಾತ್ರ್ ಆಮ್ಕಾಂ ಸುಸ್ತಾಲೆಂ ನಾ. ಬೋವ್ಶಾ ದೆವಾಚಿ ಮಾಂಡ್ಣಿ ವಿಚಿತ್ರ್.... ತಾಚಿ ವಾಟ್ ತಾಚಿ ಖುಶಿ ತೊಚ್ ಜಾಣಾ.
ಥೊಡ್ಯಾಚ್ ಮಹಿನ್ಯಾಂನಿ ಲಿಲ್ಲಿನ್ ಖಂತಿಚ್ಯಾ ಪಿಡೆನ್ಚ್ ಉಸ್ವಾಸ್ ಸೊಡ್ಲೊ. ಹಾಂವ್ ಶೂನ್ಯ್ ದಿಶ್ಟೆನ್ ಫಾತರ್ ಜಾವ್ನ್ ಪಳವ್ನ್ಚ್ ಉರ್ಲೊಂ. ಯಾಂತ್ರಿಕ್ ರಿತಿನ್ ತಾಚೆಂ ನಿಕೆಪಣ್ ಜಾಲೆಂ. ಹಾಂವ್ ಆತಾಂ ಎಕ್ಸುರೊಂ ಜಾಲೊಂ.
**********
ಪಾಟ್ಲ್ಯಾ ಆಟ್ ವರ್ಸಾಂ ಥಾವ್ನ್ ಹಾಂವ್ ಹ್ಯಾ ಪುಣೆ ಶ್ಹೆರಾಂತ್ಲ್ಯಾ ಎಕಾ ಹೊಟೆಲಾಂತ್ ಜಾಡು ಮಾರ್ಚೆಂ ಕಾಮ್ ಕರ್ತಾಂ. ಮ್ಹಾಕಾ ಕೊಣ್ಯ್ ಕಾಮ್ ದಿಂವ್ಕ್ ಆಯ್ಕಾನಾಂತ್ ತರ್ಯೀ ಹ್ಯಾ ಮಯ್ಪಾಸಿ ಹೊಟೆಲಾಚಾ ಧನಿಯಾನ್ ಮ್ಹಾಕಾ ಹೊಟೆಲಾಚೆಂ ಮುಕ್ಲೆಂ ಪರಿಸರ್ ನಿತಳ್ ಕರ್ಚೆಂ ಕಾಮ್ ದಿಲಾಂ. ಕೇವಲ್ ದಿಸಾ ಉಜ್ವಾಡಾಕ್ ಹಾಂವ್ ತ್ಯಾ ಪರಿಸರಾಂತ್ ದೊಳ್ಯಾಂಕ್ ದಿಸ್ಚೊ ಕೋಯ್ರ್ ಕಾಡ್ತಾಂ. ಹೆಂ ಕಾಮ್ ಕೇವಲ್ ಏಕ್ ನಿಬಾಕ್ ಮಾತ್ರ್, ಬೋವ್ಶಾ ತ್ಯಾ ಹೊಟೆಲಾಚಾ ಧನಿಯಾಕ್ ಮ್ಹಜೆರ್ ದಯಾ ಯೆತಾ. ತೊ ಕಾಂಯ್ ಖಜೆ ಥಂಯ್ ತಾಚ್ಯಾ ಪುರ್ವಾಜಾಂಚೆಂ ರುಪ್ಣೆ ಪಳಯ್ತಾ ಜಾಂವ್ಕ್ಯ್ ಪುರೊ. ಯಾ ತಾಚ್ಯೆ ಥಂಯ್ ಮ್ಹಾಕಾ ನಾ ತರ್ ಮ್ಹಜೆ ಥಂಯ್ ಕಸಲೆಂಗೀ ೠಣ್ ಬಾಕಿ ಆಸೊಂಕ್ ಪುರೊ.
ತೊ ಮ್ಹಜ್ಯಾ ಜಾತಿಚೊ ನ್ಹಂಯ್. ಮ್ಹಜ್ಯಾ ಸಂತಾನ್ ಕುಟ್ಮಾಂತ್ಲೊ ನ್ಹಂಯ್. ತರ್ಯೀ ತೊ ಮ್ಹಾಕಾ ದೋನ್ ಜೆವ್ಣಾಂ, ಸಾಕಾಳಿಂಚೊ ನಾಸ್ಟೊ ದಿತಾ. ರಾತಿಕ್ ಪಾಟ್ ತೆಂಕುಂಕ್ ಹೊಟೆಲಾ ಪಾಟ್ಲ್ಯಾನ್ ಆಸ್ಚೊ ಸಿಮೆಟಿಚೊ ಬಾಂಕ್ ತಾಣೆ ದಿಲಾ. ಪಾಂಗ್ರುಂಕ್ ಏಕ್ ಪರ್ನಿ ಕಾಂಬೊಳ್ ದಿಲ್ಯಾ. ತವಳ್ ತವಳ್ ಮ್ಹಾಕಾ ಪರ್ನೆಂ ವಸ್ತುರ್ಯ್ ಹಾಡುನ್ ದಿತಾ ತೊ.
ಹೆಂ ಸಗ್ಳೆಂ ತೊ ಕಿತ್ಯಾಕ್ ಕರ್ತಾ ಮ್ಹಳ್ಳೆಂ ಹಾಂವ್ ನೆಣಾ, ಬೋವ್ಶಾ ದೆವಾಚಿ ತಿಚ್ ಖುಶಿ ಮ್ಹಣೊನ್ ದಿಸ್ತಾ!
ಹಾವೆಂ ದೊಳೆ ಘೆಶ್ಟಿಲೆ. ಮೊಳ್ಬಾವಯ್ಲೊ ಅರ್ದೊ ಚಂದ್ರ್ ಮೊಡಾಂತ್ ಲಿಪೊಗೀ ಕೋಣ್ ಜಣಾ? ಮ್ಹಜ್ಯಾ ಗಯ್ರ್ಯಾ ದಿಶ್ಟಿಕ್ ತೊ ದಿಸಾನಾ. ತ್ಯಾ ಚಂದ್ರಾ ಭಿತರ್ ಲಿಪೊನ್ ರಾವೊನ್ ಲಿಲ್ಲಿ ಮ್ಹಾಕಾ ಪಳಯ್ತಾ ಮ್ಹಳ್ಳೆಂ ಮಾತ್ರ್ ಖಂಡಿತ್. ತೊ ಚಂದ್ರೆಮ್ ಪರತ್ ದಿಸ್ತಾಗೀ ಮ್ಹಣೊನ್ ಹಾಂವ್ ಆಕಾಸಾಕ್ ದೀಶ್ಟ್ ಖಂಚಯ್ತ್ ಆಸಾಂ.... ತೊ ಮೊಡಾಂತ್ಲೊ ಖಂಡಿತ್ ಭಾಯ್ರ್ ಯೆತಲೊ. ಪೂಣ್ ತಾಕಾ ಪಳಂವ್ಕ್ ಮ್ಹಾಕಾ ತಾಂಕ್ತಾಗೀ? ಮ್ಹಜಿ ದೀಶ್ಟ್ ತಾಕಾ ಪಳಂವ್ಕ್ ಸಕಾತ್ಗೀ ಹಾಂವ್ ನೆಣಾ.
ಪಳಯ್ತಾಂ ಪಳಯ್ತಾಂ ಮ್ಹಾಕಾ ಜೆಮ್ ಯೆತಾ. ಆನಿ ಹಾಂವ್ ದೊಳೆ ದಾಂಪ್ತಾಂ ಬೋವ್ಶಾ ಫಾಲ್ಯಾಂಚೊ ಸುರ್ಯೊ ಪಳಯ್ತಲೊಂ ಮ್ಹಳ್ಳ್ಯಾ ಭರ್ವಸ್ಯಾನ್! ದೆವಾಚಿ ಖುಶಿ ಜಾಲ್ಯಾರ್ ಹಾಂವ್ ಫಾಲ್ಯಾಂ ಉಟ್ತಲೊಂ ಪುಣ್ ’ಎಕ್ಸುರೊ’ ಜಾವ್ನ್ಚ್ ಉರ್ತಲೊಂ.
*************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
