ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 11
ಎ.ಟಿ.ಲೋಬೊ
ಹರ್ಧ್ಯಾರ್ ಖುರಿಸ್
ನಾಂವ್ : ಅಪೊಲೊ ತೋಮಸ್ ಲೋಬೊ
ಲಿಖ್ಣೆ ನಾಂವಾಂ : ಎ.ಟಿ.ಲೋಬೊ, ಎಟ್ಯೆಲ್, ಜೆನ್ನ, ಫಿಫ್ಟಿ ಫಿಫ್ಟಿ, ಜ್ನಾನ್ ಪ್ರಕಾಶ್.
ಜನನ್ : 02 ಮಾರ್ಚ್ 1920.
ಜಲ್ಮಾಲ್ಲೊ ಗಾಂವ್ :ಫೆರಾರ್ ಫಿರ್ಗಜೆಚಾ ನೆಲ್ತಿರ್ ವಾಡ್ಯಾಂತ್ .
ಆವಯ್-ಬಾಪಾಯ್ಚೆಂ ನಾಂವ್: ದೆ| ಮೆರಿ ಡಿ’ಕುನ್ಹಾ, ಆನಿಂ ದೆ|ಬೆಂಜಮಿನ್ ಸಾಲ್ವಾದೊರ್ ಲೊಬೊ.
ಪತಿಣ್: ಮಾರ್ಸಿಲಿನ್ ರೊಡ್ರಿಗಸ್ (05 ಮಾಯ್ 1962) .
ಮರಣ್: 29 ಅಗೋಸ್ತ್ 1998.
ವಳೊಕ್:
ಕಾದಂಬರ್ಯೊ:
ರೀದ್,
ರಗ್ತಾಕ್ ಖತ್ ಲಾಯ್ನಾಕಾ,
ದಾದಾ ವ ಕೇಡಿ,
ವೇಳ್-ಘಡಿ, (1265 ಪಾನಾಂಚಿ)
ತುಂ ಬರೊ ಜಾ
ದೆವಾಚಾ ಘರಾ ಆಸಾ
ದೆವಾಚಿ ಖುಶಿಮಟ್ವ್ಯೊ
ಕಾದಂಬರ್ಯೊ:
ಶಿಂವ್ತೆಂ,
ಹರ್ಧ್ಯಾರ್ ಖುರಿಸ್,
ಜೆರಾಲ್ ಮೊದೊರ್ನ್,
ತುಕಾ ದುಸ್ರೊ ಮೆಳ್ತಲೊ,
ಪೊಂಡಾರ್ ಫ಼ುಲಾಂ,
ಭಿಯಾಚಿ ಕೂಲ್,
ಪಶ್ಚಾತಾಪ್,
ಸಿಂತಿಯಾ,
ನಾಟಕ್ ಆನಿ
ನಾಟ್ಕುಳೆ:
ದುಸ್ಮಾನ್ ದೊತಿಚೊ,
ಮ್ಹಜೊ ಬಾವ್ ತಾಚೊ ದುಬಾವ್,
ಆಮ್ಚಿಂ ಭುರ್ಗಿಂ,
ಆಮ್ಚೆಂ ನಶೀಬ್,
ಈಶ್ಟ್,
ನೊವ್ರೊ,
ಘರ್ ಕುಟಾಮ್,
ಜಾಂವೊಂಯ್,
ಆಂಕ್ವಾರ್ ಆವಯ್,
ಜೊವ್ಳೆ ನಾತು,
ದಿಲಾಂ ತೆಂ ಗೆಲಾಂ,
ಪಹಿಲ್ವಾನ್ ಪಂಡಿತ್,
ಫೆಸ್ತಾಕ್ ಪಾವ್ಲ್ಲೊ ಸಯ್ರೊ,
ಆಶೆಚಿ ದಿಶಾ,
ಲಾಂಬ್ ಮಟ್ವ್ಯೊ
ಕಥಾ ಪತ್ರಾಂನಿ ಸಾಂಕ್ಳೆ ಕ್ರಮಾರ್:
ಕೆದೊಳ್ ಝಾಡ್ಶಿ ಕೆದ್ನಾ ಪಡ್ಶಿ,
ಚಿಂತ್ಲ್ಯಾರ್ ಆಸಾ ಉಪಾಯ್,
ಮಸ್ತುನ್ ಅಪಾಯ್ ಉಸ್ತಿಯಾಂ ಉಪಾಯ್,
ಆಶಾ,
ಗುಪಿತ್ ಮೋಗ್,
ನಳ್ಯಾಂಚೆಂ ಘರ್,
ಫೆಸ್ತಾಕ್ ಆಯಿಲ್ಲೊ ಸಯ್ರೊ,
ದೆವಾಗೆಲಿ ಸಯ್ರಿಕ್,
ಆಳ್ಶಿ ಆಲ್ವಿ,
ಬೆಸಾಂವ್ ಆನಿ ಆಶಾ,
ಲೇಖನಾಂ:
ಘರ್ಕಾರ್ ಘರ್ಕಾರ್ನ್,
ಕಿತ್ಯಾಕ್ ಆಮಿ ಪಾಟಿಂ,
ಇಕ್ರಾವೊ ಉಪದೆಸ್,
ಆಟ್ವೊ ಸಾಕ್ರಾಮೆಂತ್,
ಕುಂಪಾದ್ರ್ ಆನಿ ಕುಮಾದ್ರ್,
ಆಮ್ಚಿ ಭಾಸ್ ಕಶಿಯ್ ಘಾಸ್ ,
ಉಟೊನ್ ಉಬೆ ರಾವಾ,
ದೊತಿಕ್ ಫೊಂಡಾಕ್ ಪಾವಯಾ.
ಆಪ್ಣಾಯಿಲ್ಲ್ಯೊ
ಪ್ರಶಸ್ತ್ಯೊ:
1.’ತುಂ ಬರೊ ಜಾ’ ಕಾದಂಬರೆಕ್ ಟಿ.ಎಮ್.ಎ.ಪೈ
ಫ಼ೌಂಡೇಶನಾಚಿ ಪ್ರಶಸ್ಥಿ.
2.1995-96
ಇಸ್ವೆಚಿ ಕರ್ನಾಟಕ್ ಕೊಂಕ್ಣಿ
ಸಾಹಿತಿಕ್ ಪ್ರಶಸ್ತಿ.
ಚಿಂತಾಪ್ :
ಎ.ಟಿ.ಲೊಬೊಚೆಂ ಚಿಂತಾಪ್ ತಾಚಾ ಕಾಳಾಚಾ ಹೆರ್ ಸಾಹಿತಿಂ ಥಾವ್ನ್ ಇಲ್ಲೆಂ ಅಥ್ವೆಂ. ಜಶೆಂ ವಿ.ಜೆ.ಪಿ ಸಲ್ಡಾನ್ (ಖಡಾಪ್) ಐತಿಹಾಸಿಕ್ ಕಾದಂಬರಿ ಲಿಖ್ತಾಲೊಕೀ, ಕಶೆಂ ಜೊ.ಸಾ.ಅಲ್ವಾರಿಸ್ ಸಾಮಾಜಿಕ್ ಕಾದಂಬರಿ ಲಿಖ್ತಾಲೊಕೀ, ತಶೆಂಚ್ ಎ.ಟಿ.ಲೊಬೊ ಜಿಣ್ಯೆಚಾ ಮೌಲ್ಯಾಂಚೆರ್ ಉಜ್ವಾಡ್ ಫ಼ಾಂಕಂವ್ಚಿಂ ಬರ್ಪಾಂ ಖಾಯ್ಸ್ ಕರ್ತಾಲೊ. ಸಾದಿ ತಾಚಿ ಚಾಲ್ ತರ್ಯ್ ತಾಚಾ ಉತ್ರಾಂನಿ ವಜಾನ್ ಆಸ್ಲ್ಲೆಂ. ಫ಼ುಡಾರಿ ಜೋರ್ಜ್ ಫ಼ೆರ್ನಾಂಡಿಸಾಕ್ ತೊ ಬರೊ ಮಾಂದ್ತಾಲೊ. ಆನಿಂ ಬೊಂಬೊಂಯ್ತ್ ತಾಕಾ ಜೋರ್ಜ್ ಫ಼ೆರ್ನಾಂಡಿಸಾಥಾವ್ನ್ ಸನ್ಮಾನ್ಯ್ ಲಾಭ್ಲಾ.
ಶರೊ: ಮ್ಹಾಕಾ ಕೊಂಕ್ಣಿ ಸಾಹಿತ್ಯಾಚಿ ವಾಚ್ಪಾಚಿ ವೋಡ್ ಲ್ಹಾನ್ಪಣಾರ್ ಆಸ್ಲ್ಲಿ ದೆಖುನ್ ಕಾನಡಿ ತಶೆಂ ಕೊಂಕ್ಣಿ ಸಾಹಿತ್ಯಾಚೆ ಸಭಾರ್ ಬೂಕ್/ಪತ್ರಾಂ ವಾಚುನ್ ಆಸ್ತಾನಾ, ಎ.ಟಿ.ಲೊಬೊಚಿ ’ತುಂ ಬರೊ ಜಾ’ ಕಾದಂಬರಿ ಮ್ಹಜ್ಯಾ ಮತಿಕ್ ಇತ್ಲಿ ಪ್ರಭಾವ್ ಘಾಲುಂಕ್ ಲಾಗ್ಲಿ ಮ್ಹಳ್ಯಾರ್ ತೆಚ್ಚ್ ವೆಳಾರ್ ಹಾಂವೆಂಯೀ ಸಾಹಿತ್ಯ್ ರಚಿಜಾಯ್ ಮ್ಹಳ್ಳಿ ಖತ್ಕತಿ ಉರ್ಭಾ ಉದೆಲ್ಲಿ. ಹೆಂ ಜೆದ್ನಾಂ ಹಾಂವ್ ಪಯ್ಲೆ ಪಾವ್ಟಿಂ ಎ.ಟಿ.ಲೋಬೊಕ್ ಮೆಳ್ಲ್ಲೆವೆಳಾರ್ ತಾಕಾ ಸಾಂಗ್ಲ್ಲೆಂಚ್ ತೊ ಪಾತ್ಯೆಲೊನಾ. ತೆಚ್ಚ್ ವೆಳಾರ್ ಚಾ.ಫ್ರಾ, ವಿ.ಜೆ.ಪಿ, ಸಿಜ್ಯೆಸ್, ಎ.ಟಿ.ಲೋಬೊ ಹಾಂಚೆಸವೆಂ ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ಘಡೊಂಕ್ ಜಾಯ್ತೊ ವಾವ್ರ್ ಚಲ್ತಾನಾ ತಾಂಚೆಸವೆಂ ಹಾಂವ್ ಲ್ಹಾನ್ ಭುರ್ಗೊ ತರ್ಯೀ ಆಸ್ಲ್ಲೊಂ ದೆಖುನ್ ಹ್ಯಾ ಮಹಾನ್ ಸಾಹಿತಿಂಸವೆಂ ಭರ್ಸೊಂಚೊ ಅಪೂರ್ವ್ ಆವ್ಕಾಸ್ ಮ್ಹಾಕಾ ಲಾಭ್ಲೊ.
ಎಟ್ಯೆಲ್ ದೀಸ್ ವೆತಾಂ ವೆತಾಂ ತಾಚೆರ್ ಆಸ್ಚಾ ಮ್ಹಜಾ ಅಭಿಮಾನಾಕ್ ಪಾತ್ಯೆಂವ್ಕ್ ಲಾಗ್ಲೊ ಜಾಯ್ಜಯ್ - ದೆಕುನ್ ತೊ ತಾಕಾ ಸಾರ್ಕೆಂ ಚಲೊಂಕ್ ಜಾಯ್ನಾತ್ಲ್ಲೆಂ ತರ್ಯೀ, ಮ್ಹಾಕಾ ಮೆಳೊಂಕ್ ತವಳ್ ತವಳ್ ಯೆತಾಲೊ. ಅಶೆಂ ಎಕಾ ದಿಸಾ ಹಾವೆಂ ಕಾಣಿಕ್ ಪತ್ರಾಖಾತಿರ್ ಏಕ್ ಕಾದಂಬರಿ ದಿಶಿಗೀ ಮ್ಹಣ್ ವಿನತಿ ಕರ್ತಾನಾ ತಾಣೆಂ ಸಯ್ ಮ್ಹಳೆಂ ಪುಣ್ ಎಕಾ ಶರ್ತಾಖಾಲ್ - ’ಮ್ಹಾಕಾ ಬರಂವ್ಕ್ ಸಾಧ್ಯ್ ನಾ, ಪುಣ್ ಮ್ಹಜ್ಯಾ ಮತಿಂತ್ ಆಸ್ಚಾ ಕಾಣ್ಯೆಕ್ ಎಕಾ ಕಾದ್ಂಬರಿ ರುಪಾರ್ ಬರವ್ನ್ ತುಕಾ ದಿತಾಂ, ಪುಣ್ ಬರಂವ್ಕ್ ಕುಮೊಕ್ ಕರ್ಚೊ/ಕರ್ಚೆಂ ಎಕ್ಲ್ಯಾಕ್ ತಲಾಸ್ ಕರ್ನ್ ದಿಂವ್ಚಿ ಜವಾಬ್ಧಾರಿ ತುಜಿ, ಪುಣ್ ತಾಕಾ ಸಾಂಬಾಳ್ ಹಾಂವ್ ದಿತಲೊಂ’. ತೆಚ್ಚ್ವೆಳಾರ್ ಎಕ್ಲೆಂ ಚೆಡುಂ ಕಾಮ್ ಸೊಧುನ್ ಆಯಿಲ್ಲೆಂ ಮ್ಹಜ್ಯಾ ಮತಿಕ್ ಗೆಲೆಂ ದೆಖುನ್ ಹಾವೆಂ ತ್ಯಾ ಚೆಡ್ವಾಕ್ ಎ.ಟಿ.ಲೋಬೊಚಿ ವಳೊಕ್ ಕರುನ್ ದಿಲಿ ತರ್ಯೀ ಉಪ್ರಾಂತ್ ಆಮಿ ಕೆದಿಂಚ್ ಭೆಟ್ಲೆನಾಂವ್. ಪುಣ್ ಆಜ್ ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಮೊಗಾಚೊ ಎಡ್ವಿನ್ ಜೆ.ಎಫ್ ಪುಣ್, ಆಜ್ಯೀ ಕೊಂಕ್ಣಿ ಸಾಹಿತ್ಯಾಂತ್ ಹಾವೆಂ ಸರ್ವಾಂಚ್ಯಾಕೀ ಚಡ್ ಮೋಗ್ ಕೆಲ್ಲೊ ಸಾಹಿತಿ ಎ.ಟಿ.ಲೋಬೊ ಮ್ಹಣೊಂಕ್ ಮ್ಹಾಕಾ ಅಭಿಮಾನ್ ಭಗ್ತಾ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 11 . ಹರ್ಧ್ಯಾರ್ ಖುರಿಸ್
ದಕ್ಷಿಣ್ ಕನ್ನಡ ಜಿಲ್ಲ್ಯಾಚಾ ಉದೆಂತಿಕ್, ಆಮಿಂ ಏಕ್ ಬಾರಿಕ್ ನದರ್ ಮಾರ್ಲ್ಯಾರ್, ಥಂಯ್ ದಿಶ್ಟಿಕ್ ಪಡ್ತಾತ್ ಊಂಚ್ ದೊಂಗೊರ್ ಆನಿಂ ಗುಡೆ. ತಾಂಚೆ ವಯ್ಲ್ಯಾನ್ ಮೊಡಾಂ ಉಬ್ತಾನಾ - ದಿಸ್ತಾ ಅಂತ್ರಳ್ ತ್ಯಾ ಗುಡ್ಯಾಂಚೆರ್ ತೆಂಕ್ಲಾಂ! ಪುಣ್ ಲಾಗಿಂ ವಚೊನ್ ಪಳೆಂವ್ ಜಾಲ್ಯಾರ್ ಭೊಗ್ತಾ-ಅಂತ್ರಳ್ ಆನಿಕಿ ಮುಖಾರ್ ಪಾವ್ಲಾಂ!
ನಿಜಾಯ್ಕಿ ದೀಷ್ಟ್ ಆಮ್ಕಾಂ ಫಟಯ್ತಾ ಆನಿಂ ಆಮಿಂ ಚಿಂತಾಂವ್, ಖರೆಂಚ್, ಮನ್ ಆಂಕಾಂ ಭುಲಯ್ತಾ ಆನಿಂ ಆಮಿಂ ಸೊಧ್ತಾಂವ್. ಜಾಲ್ಯಾರಿ, ತ್ಯಾ ಗುಡಾಂಚೆರ್ ರಾವ್ಲ್ಯಾರ್ ಜರೂರ್ ಆಮಿಂ ದೆಕ್ತೆಲ್ಯಾಂವ್-ಭೊಂವಾರಿ ಆಸ್ಚಿಂ ತಿಂ ರಾನಾಂ ಆನಿಂ ಫಾಲ್ಕಿಂ-ಝಿರ್ಯೊ ಆನಿಂ ಝರಿ-ಬೊಲಿಂ ಆನಿಂ ಮೊಲಿಂ. ಖಂಯ್ ಫಾತ್ರಾಚೆರ್ ಫಾತೊರ್ ಆಜಾಪಾಂನಿಂ ರಾವ್ಲಾಸೊ ದಿಸ್ತಾ ಖಂಯ್. ಉದ್ಕಾಚೊ ಜ್ಯೋಗ್ ಆಚರ್ಯಾಂನಿ ವ್ಹಾಳ್ತಾಸೊ ಭೊಗ್ತಾ - ತಸಲ್ಯಾ ತ್ಯಾ ದೃಶ್ಯಾಂತ್ ರಿಗೊಂಕ್ ಆಮಿಂ ಮನ್ ಕರುಂ, ಖಂಡಿತ್ ಆಮ್ಕಾಂ ವಾಟೆರ್ ಕ್ರೂರ್ ಮನ್ಜಾತಿ ಆನಿಂ ವಿಕಾಳ್ ಜಿವ್ದಾಳಿ ಭೆಟ್ತೆಲ್ಯೊಚ್. ಕಿತ್ಯಾಕ್ ತೆಚ್ ತೆ ಜಾವ್ನಾಸಾತ್ ಘಾಟ್!
ಘಾಟ್! ಗಾಂವ್ ಹಿಂವಾಚೊ ಆನಿಂ ಶೆಳಿಚೊ. ಥಂಯ್ ವರ್ಸಾಚೆ ಬಾರಾಯೀ ಮಹಿನೆ ಪಿಡೆಚಿ ಆನಿಂ ವಿಕಾಳ್ ಜಿವ್ದಾಳಿಂಚಿ ಭಿರಾಂತ್ ಕಾಂಯ್ ಚುಕ್ಲ್ಲಿ ನಾಂ! ಜಾಲ್ಯಾರಿ, ಮನಿಸ್ ಗೇಣ್ಭರ್ ಪೊಟಾ ಖಾತಿರ್ ಥಂಯ್ ಪಾವ್ಲಾ ಮ್ಹಣ್ಚಾಕ್, ಆಜ್ ರುಜ್ವಾತ್ ದಿತಾತ್ ತಿಂ ಜಿನ್ಸಾವಾರ್ ಬೆಳ್ಯಾಂಚಿ ಭಾಟಾಂ ಆನಿಂ ತೊಟಾಂ. ತ್ಯಾ ಪಯ್ಕಿ ಥೊಡ್ಯಾ ತೊಟಾಂಚಿ ಮ್ಹಾಲಕಿ ಕ್ರಿಸ್ತಾಂವ್ ಮಾನಾಯಾಂಚಿ ಜಾವ್ನಾಸಾ. ದೆಕುನ್ ತಾಂಕಾಂ ’ಸಾವ್ಕಾರ್’ ಮ್ಹಣೊನ್ ಬಿರುದ್ ಮೆಳ್ಳಾಂ. ತ್ಯಾ ಬಿರುದ್ ತೆಕಿತ್, ಸಬಾರಾಂನಿ ತಾಂಚಿ ಘರಾಣಿಂ ಉದ್ಧಾರ್ ಕೆಲ್ಯಾಂತ್- ತಾಂಚಾ ಭುರ್ಗ್ಯಾಂ-ಬಾಳಾಂಕ್ ತಾಣಿಂ ಶಿಕ್ಷಣ್ ದಿಲಾಂ. ಥೊಡ್ಯಾಂನಿ ಧರ್ಭಾರ್ ಆನಿಂ ಕಾರ್ಭಾರ್ ಚಲವ್ನ್ ಸದಾಂ ಫೆಸ್ತಾಂ ಆಚರ್ಸಿತಾನಾ, ತೊಟಾಚಿ ಮ್ಹಾಲಕಿಯ್ ಹೊಗ್ಡೊಯ್ಲ್ಯಾ! ಜಾಲ್ಯಾರಿ, ರುತಾ ಕೆಲ್ಲ್ಯಾಂಚಿ ಘರಾಂ ದೆಕ್ತಾನಾ - ತಾಂಚಿ ಮೋಟರ್ಕಾರಾಂ ಧಾಂವ್ತಾನಾ - ಕೊಣೆಂಯಿ ಜಾಲ್ಯಾರಿ "ಘಾಟ್ ಬರೊ’ ಮ್ಹಣ್ಚಾಂತ್ ಕಸಲೆಂಚ್ ನವಾಲ್ ನಾಂ!
ವ್ಹಯ್, ಆಜ್ "ಘಾಟ್ ಬರೊ" ಕಿತ್ಯಾಕ್ ಆಜ್ ತ್ಯಾ ಘಾಟಾಂಚಾ ವಿವಿಧ್ ತೊಟಾಂನಿ ಹಜಾರಾಂನಿ ಲೋಕ್ ತ್ಯಾ ಘಾಟಾಂಚಾ ವಿವಿಧ್ ತೊಟಾಂನಿ ಲೋಕ್ ತಾಂಚೊ ಗ್ರಾಸ್ ಜೊಡ್ತಾ. ತಾಂಚಾ ಕುಡಿ-ಅತ್ಮ್ಯಾಚಾ ಗರ್ಜಾಂಕ್ ಸರ್ವ್ ಥರಾಂಚಿ ಸೌಲಭ್ಯಾ ಆಜ್ ಘಾಟಾಂನಿ ಆಸಾತ್. ನಿತಿಚ್ಯೆ ಕುಲಿಕ್ ಝಗ್ಡೊಂಕ್ ಸಂಸ್ಥೆ ಆನಿಂ ಫುಡಾರಿ ಆಸ್ತಾನಾ, ನಿತಿನ್ ಜೊಡ್ಲ್ಲೆಂ ಹೊಗ್ಡಾಂವ್ಕ್ ಸಂದರ್ಭ್ ಆನಿಂ ಸಮಯೆ ಥಂಯ್ ಕಾಂಯ್ ಉಣೆಂನಾಂತ್. ಆದಿಂ ಹಳ್ಳ್ಯೊ ಆಸ್ಲ್ಲ್ಯೊ ಆಜ್ ಪೆಂಟೊ ಜಾಲ್ಯಾತ್. ಕೊಪೆಲಾಂ ಆಸ್ಲ್ಲೆಕಡೆ ದೆವ್ಹಾಳಾಂ ಬಾಂದ್ಲ್ಯಾಂತ್. ಜೊವ್ಳೆ ವ್ಯಾಪಾರಿ ಆನಿಂ ಬಂಗ್ಸಾಳಿಂಯಿ ಪುಶ್ಕಳ್ ಆಸಾತ್. ತೊಟಾಚ್ಯೆ ಬಗ್ಲೆಕ್ ಖಂಯ್ ಪುಣಿ ಏಕ್ ಮೀಟ್-ಮಿರ್ಸಾಂಗೆಚಿ ಅಂಗಡ್ ಆಸ್ತಾಚ್. ಕಾಂಯ್ ನಾಂ ಮ್ಹಣ್ಚೆಕಡೆ ಏಖ್ ಲ್ಹಾನ್ ಕಾಫ್ಯೆಚೆಂ ಹೊಟೆಲ್ ಆನಿಂ ಏಕ್ ಬಿಡಾಂಚಿ ಅಂಗಡ್ ಪುಣಿ ಆಸಾಜಾಯಿಚ್. ಕಿತ್ಯಾಕ್, ಘಾಟಾಚಾ ಹಿಂವಾಕ್ ಚಾ-ಕಾಫಿ, ಬಿಡಿ ಆನಿಂ ಕಾಂಬೊಳ್ ಚಡ್ ಗರ್ಜೆಚಿ ಮ್ಹಣ್ ಹರ್ಯೆಕ್ಲೊ ಜಾಣಾಂ. ದೆಕುನ್ ವ್ಯಾರಾಕ್ ಅತ್ರೆಗ್ಚೊ ಗುಡ್ಯಾಚ್ಯೆ ತಕ್ಲೆರ್ ಜಾಲ್ಯಾರಿ, ಲ್ಹಾನ್ ಏಕ್ ಕೊಡ್ಕೆಂ ಬಾಂಧುನ್ ಅಂಗಡ್ ಘಾಲುಂಕ್ ಪಾಟಿಂ ಸರಾನಾ!
ಆಜ್ ಮನಿಸ್ ಶಾಣೊ ಜಾಲಾ ಆನಿಂ ಜೊಡುಂಕ್ ಶಿಕ್ಲಾ. ದೆಕುನ್ ಕೊಡ್ಯಾಳ್ಚಿ ಸಕಾಳಿಂಚಿ ಜಿವಿ ಮಾಸ್ಳಿ ಲೆಗುನ್ ದೊನ್ಪರಾಂ ಘಾಟಾರ್ ಕಡ್ಯೆಂತ್ ಪಡ್ತಾ. ಕಾರಣ್, ವಾಹನಾಂ ಜಾಲ್ಯಾಂತ್. ರಾತ್ - ದೀಸ್ ಘಾಟಾಚಾ ವಾಟಾಂನಿ ಲೊರಿಯೊ ಆನಿಂ ಕಾರಾಂ ಧಾಂವ್ತಾತ್. ತಶೆಂ ಜಾಲ್ಯಾನ್, ರಾತಿಂ ಯೆಣೊ ಆಯಿಲ್ಲ್ಯೆ ಗರ್ಭೆಸ್ತ್ ಸ್ತ್ರೀಯೆಕ್ ಸಕಾಳಿಂ ಕೊಡಾಳ್ ಯೇವ್ನ್ ಬಾಳಂತ್ ಜಾಂವ್ಕ್ ಕಸಲಿಚ್ ಹರ್ಕತ್ ನಾಂ!
ವ್ಹಯ್, ಆಜ್ ಘಾಟ್ ಸುಧಾರ್ಲಾ. ಘಾಟಾರ್ ಆಜ್ ಚಡಾವತ್ ಕಸಲೆಂಚ್ ಮೆಳಾನಾ ಮ್ಹಳ್ಳೆಂ ನಾ. ಮನ್ಶಾಚಿ ಭಲಾಯ್ಕಿಯಿ ಆತಾಂ ಥಂಯ್ ಬರಿ ಉರ್ತಾ. ಕಾರಣ್, ಆಧ್ಲೆಬರಿ ಥಂಯ್ ಆತಾಂ ಮಲೇರಿಯಾ ತಾಪ್ ಜಾಂವ್, ಪೊಟಾಂತ್ ಗೆಡ್ಡೊ ವಾಡ್ಚಿ ಪಿಡಾ ಜಾಂವ್, ವಿಶೇಶ್ ನಾ. ಚಡಾವತ್ ಲೋಕ್ ಸುಖಿ ಆಸಾ ಮ್ಹಣ್ಯೆತ್. ಪುಣ್ ಎಕಾ ತೆಂಪಾರ್?
ತೊ ಏಕ್ ತೇಂಪ್. ತ್ಯಾ ತೆಂಪಾರ್, ತ್ಯಾ ಘಾಟಾಂನಿ, ತ್ಯಾ ಮನ್ಶಾಂಚಿ, ತಿ ಪರಿಸ್ಠಿತಿ ಚಿಂತ್ಲ್ಯಾರ್, ಆತಾಂಯಿ ಮೊವಾಳ್ ಕಾಳಿಜ್ ರಡ್ತೆಲೆಂ. ಕಿತ್ಯಾಕ್ ತ್ಯಾ ಘಾಟಾಂನಿ ದಕ್ಶಿಣ್ ಕನ್ನಡ ಜಿಲ್ಲ್ಯಾಚಾ ಸಬಾರ್ ಮಾಲ್ಘಡ್ಯಾಂನಿ ಜೀವ್ ದಿಲಾ. ತಾಂಚಿ ಮೊಡಿಂ ತ್ಯಾ ಘಾಟಾಂಚಾ ಗುಡ್ಯಾಂನಿ ಆನಿಂ ಮಯ್ದಾನಾಂನಿ ನಿಕೆಪಿಲ್ಯಾಂತ್. ಸಬಾರಾಂಕ್ ತೊಟಾಂನಿ ಆನಿಂ ಭಾಟಾಂನಿ ಲೆಗುನ್ ಪುರ್ಲ್ಯಾತ್. ಆಜ್ ಘಾಟ್ ಸಧಾರ್ಲಾ ವ್ಹಯ್ ಜಾಲ್ಯಾರ್, ತೊ ಜಾವ್ನಾಸಾ ಸಾಕ್ರಿಫಿಸ್ ಆಮ್ಚಾ ಮಾಲ್ಘಡ್ಯಾಂಚೊ. ಆಜ್ ಕೊಣಿ ತೊಟಾ ಸಾವ್ಕಾರ್ ಜಾಲಾ ವ್ಹಯ್ ಜಾಲ್ಯಾರ್, ತಾಚಾ ತೊಟಾಚಾ ಬುನ್ಯಾದಿಕ್ ಪಡ್ಳಾ ಘಾಮ್ ದುರ್ಭಳ್ಯಾ ಗರೀಬಾಂಚೊ. ಹೆಂ ಸತ್ ಕೊಣಾಚಾನ್ಂಚ್ ನೆಗಾರ್ ಕರುಂಕ್ ಸಾಧ್ಯ್ ಜಾಂವ್ಚೆನಾ!
ತ್ಯಾ ತೇಂಪಾರ್ - ಚಡುಣೆಂ ಸಾಟ್ ವರ್ಸಾಂ ಆದಿಂ ದಕ್ಷಿಣ್ ಕನ್ನಡ ಜಿಲ್ಲ್ಯಾಂತ್ ಯಂತ್ರಾಚಿಂ ವಾಹನಾಂ ನಾತ್ಲ್ಲಿಂ. ದೊಡ್ಯಾ ಆನಿಂ ಎಕೊಡಾ ಬೊಯ್ಲಾಚ್ಯೊ ಗಾಡಿಯೊ ತೊಡ್ಯೊ ಆಸ್ಲ್ಲ್ಯೊ. ಪಯ್ಶಿಲ್ಯಾ ಗಾಂವಾಕ್ ಕಾಜಾರಾಕ್ ಆನಿಂ ಫೆಸ್ತಾಕ್ ವೆಚೆಂ ಆಸ್ಲ್ಯಾರ್, ಗಾಡಿ ಆಸ್ಲ್ಲಿಂ ಘರಾನಿಂ ಕುಟ್ಮಾ ಸಾಂಗಾತಾ ಗಾಡ್ಯೆರ್ ಭಾಯ್ರ್ ಸರ್ತಾಲಿಂ. ಚಡಾವತ್ ಲೋಕ್ ಪಾಯ್ ವಾಟೆನ್ ಮಯ್ಲಾನ್ ಆನಿಂ ಕೋಸ್ ಮೆಜ್ತಾಲೊ. ಆತಾಂಚೆಬರಿ ಏಕ್ ಕಾಟ್ ಕಳೊ ವ ಏಕ್ ಬೊಬ್ಳೆಂ ಕಾಣ್ಘೆವ್ನ್ ಪೆಂಟೆಕ್ ವಚೊಂಕ್ ಏಕ್ ವೊರ್ ಸಿಟಿ ಬಸ್ಸಾಕ್ ಕೊಣ್ಂಚ್ ರಾಕಾನಾತ್ಲ್ಲಿಂ. ಬಗಾರ್ ದೊಗಾಂನಿ ಉಕಲ್ಚೆಂ ತಸಲೆಂ ವೊಜೆಂ ಕಾಣ್ಘೆವ್ನ್ ಸ್ತ್ರೀಯೊ ಸೊಳಾ ಆನಿಂ ಆಟ್ರಾ ಮಯ್ಲಾಂ ಪಯ್ಶಿಲ್ಯೆ ಪೆಂಟೆಕ್ ವ ಸಾಂತೆಕ್ ಲೆಗುನ್ ಪಾವ್ತಾಲ್ಯೊ. ಥೊಡ್ಯಾಂಚಾ ಮಾತ್ಯಾರ್ ವೊಜೆಂ ಆನಿಂ ಪಾಸ್ಳೆಕ್ ಭುರ್ಗೆಂ- ಖಾಂದಾಕ್ ಜೊಳಿ ಬಾಂಧುನ್ ಆಸ್ತಾಲೆಂ. ಪುರಾಸಾಣೆಕ್ ಚಿಕ್ಕೆ ವಿಶೆವ್ ಘೆಂವ್ಕ್ ವಾಟೆರ್ ಥೊಡೆಕಡೆ ವೊಜ್ಯಾ ಫಾತೊರ್ ಮ್ಹಣ್ ಆಸ್ಲ್ಲೆ. ತ್ಯಾ ಫಾತ್ರಾರ್ ತಕ್ಲೆ ವಯ್ಲೆಂ ವೊಜೆಂ ನಿಸ್ರಾವ್ನ್ ತಿಂ ಘಾಮ್ ಪುಸ್ತಾಲಿಂ. ಥೊಡೆಕಡೆ ಪಿಂಪ್ಳಾಚಾ ರುಕಾಕ್ ಕಾಟಿಂ ಬಾಂಧ್ಲ್ಲಿಂ ಆಸ್ಲ್ಲಿಂ. ಥಂಯ್ಸರ್ ಥೊಡ್ಯಾ ಧರ್ಮಿಶ್ಟಾಂಚೆ ಉದಾಕ್ ಆನಿಂ ಗೊಡ್ ಲೆಗುನ್ ಫುಂಕ್ಯಾಕ್ ಮೆಳ್ತಾಲೆಂ. ತಸಲ್ಯಾ ಕಾಟ್ಯಾಂನಿ ವೊಜಿಂ ದೆಂವೊವ್ನ್ ಮಾಲ್ಘಡಿಂ ಆಮ್ಚಿಂ ಕುಲೊ ತೆಂಕುನ್ ಪಾಂಯಾಚಿ ವೋಳ್ ಕಾಡ್ತಾಲಿಂ. ಕಷ್ಟಿ ಕಾಳ್ ತೊ. ರುವೆ-ತಾರೆಚೊ ತೇಂಪ್ ತೊ. ಚಕ್ರಾಂನಿ ಮೊಲಾಂ ಆನಿಂ ವಱಾಂನಿ ದೊತಿ ತ್ಯಾ ತೆಂಪಾಚ್ಯೊ. ಗುಮ್ಟಾಂಚಾ ಸಾದಾನ್ ಅನಿಂ ವ್ಹೊವ್ಯೊ ವೆರ್ಸಾಂಚಾ ಗಾಜಾನ್ ತ್ಯಾ ಕಾಳಾರ್ ಜಾತಲೊ ದಬಾಜೊ ಕಾಜರಾಂ - ಫೆಸ್ತಾಂಚೊ. ಸತ್ತಿ ತೇಂಪ್ ಆನಿಂ ಭಾವಾಱಿಂ ಮನಿಸ್ ತ್ಯಾ ಕಾಳಾಚೊ. ದೆಕುನ್ ಸಾಂ ಬಸ್ತ್ಯಾಂವ್ಂಚ್ ಪಂಡಿತ್ ಜಾವ್ನಾಸ್ಲ್ಲೊ ಸರ್ವಾಂಚ್ಯೆ ಪಿಡೆಶಿಡೆಂತ್.
ತ್ಯಾ ತೆಂಪಾರ್ ಮಂಗ್ಳುರ್ಚಾ ಭರ್ಮಾಕ್ ಆನಿಂ ಕೊಡ್ಯಾಳ್ಚಾ ಘನಾಕ್ ಮ್ಹಳ್ಳ್ಯಾಬರಿ ನಾ ಮ್ಹಣ್ಚಾಕ್ ದೊಡ್ಯಾ ಘೊಡ್ಯಾಂಚಿ ಆನಿಂ ಚಾರ್ ರೊದಾಂಚಿ ಏಕ್ ಗಾಡಿ ಆಸ್ಲ್ಲಿ. ತ್ಯೆ ಗಾಡ್ಯೆಕ್ ಸಾರೊಟ್ ಮ್ಹಣ್ ನಾಂವ್ ಪಡ್ಲ್ಲೆಂ. ತೆಂ ಸಾರೊಟ್ ಬಂದ್ರಾರ್ ಆಸ್ಚಾ ಪೊಲಿಸ್ ಠಾಣ್ಯಾ ಥಾವ್ನ್ ಫರಂಗಿಪೇಂಟ್ ಪರ್ಯಾಂತ್ ವೆತಾ-ಯೆತಾಲೆಂ ಮ್ಹಣ್ತಾತ್. ತ್ಯಾ ಸಾರೊಟಾರ್ ಚಡಾವತ್ ಸರ್ಕಾರಿ ಹುದ್ದೆದಾರಾಂನಿ, ಭೋವ್ ಥೊಡಾ ಗ್ರೇಸ್ತಾಂನಿ ಮಾತ್ರ್ ಬಸ್ಚೆಂ ಆಸ್ಲ್ಲೆಂ. ಸಾಧಾರ್ಣಾಚಾ ದುರ್ಭಳ್ಯಾಕ್ ತ್ಯಾ ಸಾರೊಟಾಲಾಗಿಂ ವಚೊಂಕ್ ಧೈರ್ ಪಾವನಾತ್ಲ್ಲೆಂ, ಆನಿಂ ಮಧ್ಯಮ್ ವರ್ಗಾಚಾಕ್ ಮನ್ ಜಾಯ್ನಾತ್ಲ್ಲೆಂ. ಕಾರಣ್ ತ್ಯಾ ಕಾಳಾರ್ ಪಯ್ಶೆ ಚಡ್ ಮ್ಹಾರಗ್ ಆಸ್ಲ್ಲೆ. ದೆಕುನ್ ಏಕ್ ರುವಿ ಮ್ಹಣ್ಚಿ ಥೊಡ್ಪ್ಯಾ ತೆದಿ ದಿಸ್ತಾಲಿ. ತ್ಯಾ ಸಾರೊಟಾಚೆ ನಕ್ಕಲ್ ಥೊಡ್ಯಾಚ್ ತೇಂಪಾ ಬಿತರ್ ಇತರ್ ತಾಲುಕಾಂನಿ ಪಾವ್ಲೆಂ. ಕುಂದಾಪುರಾಂತ್ ಸುಬ್ಬಯ್ಯ ಶೆಟ್ಟಿ ನಾಂವಾಚಾನ್ ಸಾರೊಟ್ ಚಾಲು ಕೆಲ್ಲೆಂ. ತೆಂ ಸಾರೊಟ್ ಕುಂದಾಪುಅರ್ ಥಾವ್ನ್ ಮಾಬುಕಳ್ ಪರ್ಯಾಂತ್ ವೆತಾಲೆಂ.
ತಸಲ್ಯಾ ತ್ಯಾ ಕಾಳಾರ್ ಉದೆಂತಿಚ್ಯಾ ಘಾಟಾಂನಿ, ಫಿಂರ್ಗ್ಯಾಂಚಿಂ ಥೊಡಿಂ ಚಾಯೆಚಿಂ ಆನಿಂ ಕಾಫ್ಯೆಚಿಂ ತೊಟಾಂ ಆಸ್ಲ್ಲಿಂ. ತಾಣಿಂ ಸಬಾರ್ ತೆಂಪಾ ಆದಿ ಥಂಯ್ ವಚೊನ್ ತಿಂ ತೊಟಾಂ ರುತಾ ಕೆಲ್ಲಿ. ತಶೆಂ ರುತಾ ಕರುಂಕ್ ತಾಂಕಾಂ ಬರೊ ಸಂದರ್ಭ್ಯಿ ಲಾಭ್ಲ್ಲೊ. ಬ್ರಿಟಿಶಾಂಚೆಂ ರಾಜ್ ಚಲ್ತಾಲೆಂ ದೆಕುನ್ ಜಬರ್ದಸ್ತೆನ್ ಆನಿಂ ಪುಸ್ಲಾವ್ನ್ ಗರೀಬಾಂಕ್ ತ್ಯಾ ಮೊಲ್ಯಾಕ್ ವ್ಹರ್ನ್ ಘೊಳಂವ್ಕ್ ತಾಂಕಾಂ ಸುಲಭ್ ಜಾಲ್ಲೆಂ ಕೊಣಿ ಖುಶೆನ್ ಘಾಟಾರ್ ವಚೊಂಕ್ ಕಬೂಲ್ ನಾತ್ಲ್ಲೊ. ಕಾರಣ್ ತ್ಯಾ ಮೊಲ್ಯಾಂನಿ ಪಿಡಾ ಆನಿಂ ಶಿಡಾ ಆನಿಂ ವಿಕಾಳ್ ಜಿವ್ದಾಳಿಂಚಿ ಬಿರಾಂತ್ ಚುಕ್ಲ್ಲಿ ನಾತ್ಲ್ಲಿ. ತರಿ, ದುರ್ಭಳ್ಕಾಯೆಕ್ ಆನಿಂ ಭುಕೆಕ್ ಲಾಗೊನ್ ತೆ ವೆತಾಲೆ.
ತ್ಯಾ ಫಿಂರ್ಗ್ಯಾಂನಿ ಘಾಟಾಂನಿ ವಚೊನ್, ಥಂಯ್ಚ್ಯೆ ಮಾತ್ಯೆಚೊ ಗೂಣ್ ಪಳೆವ್ನ್, ತೆಂ ಅರೇಬಿಯಾ ಕಾಫ್ಯೆಚೆಂ ಬಿಂ ಲಾಯ್ತಾನಾ, ಪಯ್ಲೆಂ ಥಂಯ್ಚ್ಯಾ ಲೊಕಾಕ್ ಗೌಡಾಂಕ್ ಆನಿಂ ದಕ್ಶಿಣ್ ಕನ್ನಡ ಜಿಲ್ಲ್ಯಾಂತ್ಲ್ಯಾ ಥೊಡ್ಯಾ ಗ್ರೇಸ್ತಾಂಕ್ - ಮುಟಿ ಭಿತರ್ ಕಾಣ್ಘೆಲ್ಲೆ. ಥೊಡ್ಯಾಂಕ್ ತೊಟಾಚೆ ವಾಂಟೆಲಿ ಲೆಗುನ್ ಕೆಲ್ಲೆ. ಪುಣ್ ತಾಂಚಾ ತೊಟಾಂನಿ ಘೊಳೊಂಕ್ ಆಳಾಂಚೊ ಬರ್ಗಾಲ್ ಸದಾಂಚೊ ಜಾಲ್ಲೊ. ತರಿ, ಮೆಳ್ಲ್ಯಾಂಲ್ ಆಳಾಂ ಕರ್ನ್ ಘೊಳವ್ನ್ ತೊಟಾಂ ರುತಾ ಕರ್ತಾನಾ ಕಾಫ್ಯೆಚಾ ಬಿಯೆಚೆಂಯಿ ಸುಧಾರಣ್ ಜಾಲೆಂ. ರೊಬರ್ಟ್, ಮ್ಹಳ್ಳ್ಯಾನ್ ಝಾಡಾರ್ ಚಡ್ ಫಳ್ ಜಾಂವ್ಚೆಂ ಪ್ರಯತ್ನ್ ಸುಫಳ್ ಕೆಲೆಂ ದೆಕುನ್, ತ್ಯೆ ಕಾಫ್ಯೆಕ್ ತಾಚೆಂಚ್ ನಾಂವ್ ಪಡ್ಲೆಂ. ಜಾಲ್ಯಾರಿ, ಘಾಟಾಂಚಾ ತೊಟಾಂನಿ ಘೊಳೊಂಕ್ ಆಳಾಮ್ಚೆಂ ಉಣೆಪಣ್ ಸದಾಂಚೆಂಚ್ ಜಾವ್ನ್ ಉರ್ಲೆಂ!
ತಸಲ್ಯಾ ತ್ಯಾ ಕಾಳಾರ್ ತೊಟಾಂಚೆಂ ಮ್ಹಾಲಕ್ ತಾಂಚಾ ಪಾತ್ಯೆಣೆಚಾ ಮನ್ಶಾಕ್ ಥೊಡೆ ಪಯ್ಶೆ ದೀವ್ನ್ ಆಳಾಂ ಹಾಡುಂಕ್ ಧಾಡ್ತಾಲೆ. ತ್ಯಾ ಮನ್ಶಾಕ್ ಮ್ಹಣ್ತಾಲೆ ರೈಟರ್. ತೊ ರೈಟರ್ ಗಾಂವಾಂನಿ ಆನಿಂ ಹಳ್ಳ್ಯಾಂನಿ ಭೊಂವೊನ್, ಗರೀಬ್ ಲೊಕಾಕ್ ಮುಂಗಡ್ ಪಯ್ಶೆ ದಾಕವ್ನ್ ಭುಲಯ್ತಾಲೊ. ಜೇಂವ್ಕ್ ಆನಿಂ ನ್ಹೆಸೊಂಕ್ ವ್ಹಳ್ವಳ್ಚೊ ಲೋಕ್, ತೆ ಥೊಡೆ ಪಯ್ಶೆ ಪಳೆವ್ನ್ ಘಾಟ್ ಚಡೊಂಕ್ ತಯಾರ್ ಜಾತಲೊ. ಹೆರ್ ಥೊಡೆ ಭುರ್ಗೆ ಆನಿಂ ತರ್ನಾಟೆ ಬೊಟ್ಲೆರಾಚಾ ಕಾಮಾಕ್ ಮ್ಹಣ್ ಭಾಯ್ರ್ ಸರ್ತಾಲೆ. ಥೊಡೆ ಧುರ್ಭಳೆ ನೆಂಟೆ ಗೊರ್ವಾಂಕ್ ಚರಂವ್ಕ್ ವ ಸಾಯ್ಬಾಚಾ ಭುರ್ಗ್ಯಾಂಕ್ ಖೆಳಂವ್ಕ್ ಮ್ಹಣ್ ಘಾಟಾಕ್ ವೆತಾಲೆ. ತಶೆ ಗೆಲ್ಲೆ ಸಬಾರ್ ಜಣ್ ಆಖೇರಿಕ್ ತೊಟಾ ಸಾವ್ಕಾರ್ ಲೆಗುನ್ ಜಾಂವ್ಕ್ ಪಾವ್ಲ್ಯಾತ್. ಕಾರಣ್ ಸರ್ಕಾರಿ ಜಾಗೊ ವಾಂಟ್ತಾನಾ ತಾಂಚಾ ಧನ್ಯಾಂಚಾ ಬರ್ಯಾ ಮನಾನ್ ಆನಿಂ ಮ್ಹಿನತೆನ್ ತೆ ತಾಂತ್ಲ್ಯಾ ಥೊಡಾ ಜಾಗ್ಯಾಚೆ ಹಕ್ಕ್ದಾರ್ ಜಾಲ್ಯಾತ್. ಥೊಡೆ ಜಣ್ ಫಕತ್ತ್ ತೊಂಡ್ ಲಿಪಂವ್ಚಾ ಖಾತಿರ್ ಘಾಟಾರ್ ಪಾವ್ತಾಲೆ. ಅರ್ಥಾಥ್ ಚೊರಾಂಕ್, ರೀಣ್ ಬುಡಯ್ತೆಲ್ಯಾಂಕ್ ಆನಿಂ ಲಜೆಕ್ ಸಾಂಪಡ್ಲ್ಲ್ಯಾಂಕ್ ಆಖೇರ್ಚಿ ವಾಟ್ ಘಾಟಾಚಿ ಮ್ಹಣ್ ಸುಸ್ತಾತಾಲಿ.
ತ್ಯಾ ತೆಂಪಾರ್ ಘಾಟಾಂಚಿ ಪೀಕ್-ಚಾ, ಕಾಫಿ, ಎಳೊ, ಮಿರಿಂ ಬೆಡೊ ಇತ್ಯಾದಿ - ದೊಡ್ಯಾ ಬೊಯ್ಲಾಂಚಾ ಗಾಡಿಯಾಂನಿ ಘಾಟ್ ದೆಂವ್ತಾಲಿ. ತ್ಯಾ ತಿತ್ಲ್ಯಾಚ್ ಕಾಮಾ ಖಾತಿರ್ ದಕ್ಶಿಣ್ ಕನ್ನಡ ಜಿಲ್ಲ್ಯಾಚಾ ಥೊಡ್ಯಾ ಮ್ಹಾತ್ಭಾರ್ಯಾಂಲಾಗಿಂ ಚಾರ್ ಥಾವ್ನ್ ಚಾಳೀಸ್ ಗಾಡಿಯೋ ಪರ್ಯಾಂತ್ ಆಸ್ಲ್ಲ್ಯೊ. ಘಾಟಾಚೆಂ ಬೆಳೆಂ ಗಾಂವಾಂನಿ ಸಾಗ್ಸಿತಾನಾ, ಗಾಂವ್ಚಿ, ವೊರ್ವಿ ತೆ ಘಾಟಾಕ್ ವ್ಹರ್ತಾಲೆ. ತಾಂಚ್ಯೊ ಗಾಡಿಯೋ ಘಾಟ್ ದೆಂವ್ತಾನಾ ಆನಿಂ ಚಡ್ತಾನಾ ದೋಗ್ ಚಡಿತ್ ಬೋಯ್ಲ್ ಆಖೆರಿಚ್ಯೆ ಗಾಡಿಯೆ ಪಾಟ್ಲ್ಯಾನ್ ಆಸ್ತಾಲೆ. ಗಾಡಿಯೆಕ್ ಬಾಂದ್ಲ್ಲ್ಯಾ ಬೊಯ್ಲಾಕ್ ಪಯ್ಣಾರ್ ಜರ್ ಕಸಲೆಂಯಿ ಅವ್ಘಡ್ ಘಡ್ಲ್ಯಾರ್, ತಕ್ಶಣ್ ಚಡಿತ್ ವೆಲ್ಲ್ಯಾ ಬೊಯ್ಲಾಕ್ ತಾಚೆ ಸುವಾತೆರ್ ಬದ್ಲಿತಾಲೆ. ವಾಟೆರ್ ಚೊರಾಂಚಿ ಕಠಿಣ್ ಬಿರಾಂತ್ ಆಸ್ತಾಲಿ. ದೆಕುನ್ ಏಕ್ ಸುರಿ ವ ಭಾಲೊ ಅಥ್ವಾ ಏಕ್ ತೊಣ್ಕೊ ಪುಣಿ ತಾಂಚಾ ಗಾಡಿಯಾಂನಿ ಆಸ್ತಾಲೊಚ್. ಥೊಡ್ಯಾ ಗಾಡಿಯೆಗಾರಾಂಲಾಗಿಂ ತಾಂಚಿಂ ಮೊಗಾಚಿಂ ಸುಣಿಂ ಆಸ್ತಾಲಿಂ. ಪಯ್ಣಾರ್ ತಾಂಚಿ ರಾಕೊಣ್ ತಿಂ ಕರ್ತಾಲಿ. ಗಾಡಿಯೋ ಚಡಾವತ್ ದೀಸ್ ಬುಡ್ಲ್ಯಾ ಉಪ್ರಾಂತ್ ಪಯ್ಣಾಕ್ ಲಾಗ್ತಾಲ್ಯೊ. ರಾತ್ಚೆಂ ಪಯ್ಣ್ ಜಾತನಾ, ಮುಖ್ಲಿ ಆನಿಂ ನಿಮಾಣೆಂ ಗಾಡಿ ಅಂಬುಡ್ಚೆಂ, ದೋಗ್ ಜಣ್ ಧೈರಾಧಿಕ್ ಮಾನಾಯ್ ಮಾತ್ರ್ ಜಾಗ್ರುತ್ ಆಸ್ತಾಲೆ. ಮಧ್ಲ್ಯಾ ಗಾಡಿಯಾಂಚೆ ಜಣ್ ಥೊಡೆ ಪಾವ್ಟಿಂ ಜೆಮ್ಯಿ ಕಾಡ್ತಾಲೆ. ಕಾರಣ್, ಮುಖ್ಲಿ ಗಾಡಿ ಗೆಲ್ಲ್ಯಾ ಪ್ರಮಾಣೆ ಪಾಟ್ಲ್ಯಾ ಗಾಡಿಯೆಚೆ ಬೊಯ್ಲ್ ಪಾಯ್ ಉಕಲ್ತಾಲೆ. ತಸ್ಯೊ ಪಯ್ಣಾಕ್ ಲಾಗ್ಲ್ಲೊ ಗಾಡಿಯೋ ಸಕಾಳಿಂಚೊ ರವಿ ತಾಪೊನ್ ಯೆತಾನಾ, ಖಂಯ್ಸರ್ಯಿ ಸಾವ್ಳೆಕ್ ವಿಶೆವ್ ಘೆತಾಲ್ಯೊ. ತಶೆಂ ವಿಶೆವ್ ಕಾಣ್ಘೆಂವ್ಕ್ ತಾಂಕಾಂ ವೆಳಾಚೊ ಅಂದಾಜ್ ಆನಿಂ ಠಿಕಾಣಿಂ ಆಸ್ಲ್ಲಿಂ. ತ್ಯಾ ಪ್ರಮಾಣೆ ತ್ಯಾ - ತ್ಯಾ ಠಿಕಾಣ್ಯಾಂನಿ ತಾಣಿಂ ಗಾಡಿಯೋ ರಾವವ್ನ್ - ಬೊಯ್ಲಾಕ್ ಸೊಡ್ನ್ ರಾಂದ್ಚೆಂ - ಜೆಂವ್ಚೆಂ ವ ಪುರಾಸಣ್ ಕಾಡ್ಚಿ ಆಸ್ಲ್ಲಿ. ತಸಲ್ಯಾ ವೆಳಾರ್ ಥೊಡೆ ಅವಿಶ್ವಾಸಿ ಗಾಡ್ಯೆಗಾರ್, ಎಕೆಕಾ ಗೊಣ್ಯೆಂತ್ಲಿ ಎಕೇಕ್ ಸೇರ್ ಕಾಫಿ ವ ಹೆರ್, ಆಸ್ಲ್ಲ್ಯಾಂತ್ಲೆಂ ಕಾಡ್ನ್ ಖರ್ಚ್ ಸುಧಾರ್ಸಿತಾಲೆ. ತ್ಯಾಚ್ ಪ್ರಂಆಣೆ ಥೊಡೆ ರೈಟರ್ ತೊಟಾಂಚಾ ಸಾವ್ಕರಾಂಕ್ ಠಕಯ್ತಾಲೆ. ತಶೆಂಚ್ ಥೊಡೆ ಪಾವ್ಟಿಂ ಮುಂಗಡ್ ಪಯ್ಶೆ ಕಾಣ್ಘೆಲ್ಲೆ ಆಳ್ ರೈಟರಾಕ್ ಫಟಯ್ತಾಲೆ. ಆಶೆಂ ಠಕಂವ್ಚಾ ಆನಿಂ ಫಟಂವ್ಚಾ ವಹಿವಟಾಂತ್ ಥೊಡೆ ಪಾವ್ಟಿಂ ಥೊಡ್ಯಾಂನಿ ಲಜೆಕ್ ಸಾಂಪಡ್ತಾನಾ, ಜೀವ್ಘಾತ್ ಕರ್ನ್ ಕಾಣ್ಘೆಲ್ಲೆಂಯಿ ಆಸಾ! ಪುಣ್ ತ್ಯಾ ಗರೀಬ್ ಆಳಾಮ್ಚೆಂ ಜಿವಿತ್ ತೆಂ ವಿಂಗಡ್ಚ್.
ತ್ಯಾ ಆಳಾಂಕ್ ರೈಟರಾನ್ ಭಾಸಾಯಿಲ್ಲಿ ಕೂಲ್ ಸ್ತ್ರೀಯಾಂಕ್ ದಿಸಾಕ್ ಸ ಆಣೆ. ದಾದ್ಲ್ಯಾಂಕ್ ಆಟ್ ಆಣೆ ಆನಿಮ್ ಸಾಧಾರ್ಣಾಚಾ ಭುರ್ಗ್ಯಾಂಕ್ ಚಾರ್ ಆಣೆ. ತ್ಯೆ ಕುಲಿಚೆಂ, ಚಾರ್ ವ ಸ ಮಹಿನ್ಯಾಂಚೆಂ ಐವಜ್ ತಾಂಕಾಂ ಘಾಟಾಕ್ ಭಾಯ್ರ್ ಸರ್ಚಾ ಆದಿಂ ಮುಂಗಡ್ ಮೆಳ್ತಾಲೆಂ ಜಾಲ್ಲ್ಯಾನ್, ಘರ್ ಭಾಯ್ರ್ ಸರ್ಚಾ ಆದಿಂಚ್ ಚಾರ್ಚ್ ದಿಸಾಂನಿ ಖರ್ಚುನ್ ಕಾಬಾರ್ ಜಾತಾಲೆಂ. ಉಪ್ರಾಂತ್ ಪಯ್ಶೆ ಪಳೆಜಾಯ್ ಜಾಲ್ಯಾರ್, ಖರಾರ್ ಕೆಲ್ಲ್ಯಾ ಪ್ರಮಾಣೆಂ ವಾಯ್ದೊ ಕಾಬಾರ್ ಜಾಯ್ಜಾಯ್. ತ್ಯಾ ವೆಳಾರ್ ಮಾತ್ರ್ ಜಾಲ್ಲೊ ಜಮೊ ಐವಜ್ ತಾಂಕಾಂ ಲಾಭ್ತಾಲೊ ಆನಿಂ ತಿಂ ತಾಂಚಾ ಮಾಂಯ್ ಗಾಂವಾಕ್ ಪಾಟಿಂ ಪರ್ತತಾಲಿಂ. ತೆದೊಳ್ ಪರ್ಯಾಂತ್ ತಾಣಿಂ ತ್ಯಾ ಮೊಲ್ಯಾಂನಿ ಘೊಳಾಜಾಯ್ ಆನಿಂ ಜಿಯೆಜಾಯ್. ದಿಸ್ಫಡ್ತ್ಯಾ ಖರ್ಚಾಕ್ ಘರಾಂತ್ ಜಾಯ್ ಪಡ್ಚ್ಯೊ ವಸ್ತು ತೊಟಾಚಾ ಅಥ್ವ್ಯಾ ಭಾಯ್ಲ್ಯಾ ಆಂಗ್ಡಿನಿ ತಾಂಕಾಂ ರೀಣ್ ಮೆಳ್ತಾಲ್ಯೊ. ಆಳಾಂಚೊ ವಾಯ್ದೊ ಸರ್ತಾನಾ, ಅಂಗಡ್ಗಾರ್ ಪಯ್ಲೆಂ ತಾಂಕಾಂ ಭೆಟ್ತಾಲೆ ಆನಿಂ ವಾಡಿ ಸಮೇತ್ ರೀಣ್ ವಸೂಲ್ ಕರ್ತಾಲೆ. ಪುಣ್ ಪಿಡೆ ಶಿಡೆಂತ್, ಕಶ್ಟಾ-ಅನ್ವಾರಾಂತ್ ತಾಣಿಂಚ್ ತಾಂಕಾಂ ಪಾವಜಾಯ್ ಆನಿಂ ಭುಜಯ್ಜಾಯ್. ಪೆಲ್ಯಾಚೊ ತಾಂಕಾಂ ಆಧಾರ್ ನಾ! ತಸಲ್ಯೆ ಗತಿಂತ್ ಥೊಡ್ಯಾಂಚೊ ಪ್ರಾಣ್ ಆವ್ಜಿತ್ತ್ ಉಬ್ತಾಲೊ. ತಾಂಚ್ಯೆ ನಿರ್ಜೀವ್ ಕುಡಿಕ್ ಗುಡೊ ವ ಮಯ್ದಾನ್ ಶಿವಾಯ್ ದುಸ್ರಿ ಸೆಮಿತ್ರ್ ನಾ! ಮೀಸ್, ಕುಮ್ಸಾರ್ ಆನಿಂ ಕುಮ್ಗಾರ್ ತೊಟಾಂನಿ ಪಾದ್ರಿ ಯೇತ್ ಜಾಲ್ಯಾರ್ ಮಾತ್ರ್; ನಾಂ ತರ್ ಪಾಟಿಂ ಗಾಂವಾಕ್ ಆಯಿಲ್ಲ್ಯಾ ವೆಳಾರ್! ಪಾಟಿಂ ಯೆತಾನಾ ಧಾ ಜಣಾಂ ಗೆಲ್ಲ್ಯಾಂತ್ ಸ ಜಣಾಂ ಮಾತ್ರ್ ಆಸ್ತಾಲಿಂ!. ಹೆರಾಂ ಚೊವ್ಗಾಂ ಜಣಾಂ ಮಲೇರಿಯಾ ತಾಪಾನ್ ಆನಿಂ ವಿಕಾಳ್ ಜಿವ್ದಾಳಿಂಚಾ ಘಾತಾನ್ ಘಾಟಾಂಚಾ ತೊಟಾಂ ಸಾರೆಂ ಜಾತಾಲಿಂ. ಗಾಂವಾಕ್ ಪಟಿಂ ಆಯಿಲ್ಲ್ಯಾಂಕ್ಯಿ ಸುಖ್ ನಾತ್ಲ್ಲೆ. ಸ ಜಣಾಂ ಪಯ್ಕಿಂ ತೆಗಾಂಚಾ ಪೊಟಾಂತ್ ಪುಣಿ ಪಿಡೆಚೆ ಗೆಡ್ಡೆ ವಾಡ್ತಾಲೆ. ಪಿಡೆಕ್ ವಕ್ತಾಂ ಕರ್ತಾನಾ ಜೊಡಿಂತ್ ಉರ್ಲ್ಲೆಂಯಿ ಸಂಪ್ತಾಲೆಂ. ತಸಲ್ಯಾ ತ್ಯಾ ತೆಂಪಾರ್ ತಸಲಿ ತಿ ಪರಿಸ್ಥಿತಿ ತ್ಯಾ ಘಾಟಾಂಚಿ ಆನಿಂ ತ್ಯಾ ಮನ್ಶಾಂಚಿ, ತ್ಯಾ ಕಾಳಾರ್, ತ್ಯಾ ಘಾಟಾರ್, ತ್ಯಾ ತೊಟಾಂತ್, ಜನ್ಮಾಲೊ ಏಕ್ ಭುರ್ಗೊ. ತಾಚೆಂ ಜಿವಿತ್ ಹ್ಯೆ ಕಾಣಿಯೆಂತ್ ಆಟಾಪುನ್ ಆಸಾ.
ತ್ಯಾ ವರ್ಸಾಂ ಘಾಟಾಂನಿ ಕಠಿಣ್ ಪಿಡಾ ಪಡ್ಲ್ಲಿ. ಮಲೇರಿಯಾ ತಾಪ್ ಆನಿಂ ಸಿರ್ಸಿರೆಚಿ ಪಿಡಾ ಹರ್ಯೇಕಾ ತೊಟಾಂತ್ ವಿಸ್ತಾರೊನ್ ಗೆಲ್ಲಿ. ಚಿಕಿತ್ಸೆಚಿ ಸೌಲಭ್ಯಾಂ ಉಣಿಂ ಆಸ್ಲ್ಲಿಂ. ದೆಕ್ತೆಲ್ಯಾಚಿ ಆನಿಂ ಪಾವ್ತೆಲ್ಯಾಚಿ ಸಾವ್ಳಿ ಅಪ್ರೂಪ್ ಜಾಲ್ಲಿ. ಹರ್ಯೇಕಾ ತೊಟಾಂತ್ ದಿಸಾಕ್ ದೊಗಾಂ ಆಳಾಂ ಪುಣಿ ಮೊರ್ತಾಲಿಂಚ್. ತೆಂ ಪಳೆವ್ನ್ ತೊಟಾಂತ್ಲು ಆಳಾಂ ಥರ್ಥರ್ಲ್ಲಿಂ. ಕಾರಾಣ್ ಸಕಾಳಿಂ ಆಸ್ಲ್ಲೊ ತೊ ಸಾಂಜೆರ್ ಆಸಾತ್ ಆನಿಂ ರಾತಿ ನಿದ್ಲ್ಲೊ ತೊ ಸಕಾಳಿಂ ಉಠಾತ್ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾತ್ಲ್ಲೆಂ. ಮೆಲ್ಲ್ಯಾಂಚಿಂ ಮೊಡಿಂ ಮಾತ್ಯೆಕ್ ಪಾಂವ್ಕ್ ಲೆಗುನ್ ಜೀವ್ ಆಸ್ಲ್ಲ್ಯಾಂಕ್ ಧೈರ್ ಪಾವನಾತ್ಲ್ಲೆಂ. ಕಿತ್ಯಾಕ್, ಪಿಡಾ ಬದ್ಲಾತ್ ಮ್ಹಳ್ಳಿ ಭಿರಾಂತ್! ಆನಿಂ ಖರೆಂಚ್ - ತ್ಯಾ ವರ್ಸಾ ವೊಸ್ಯಾಚ್ಯೆ ಪಿಡೆ ವರ್ವಿಂ ಪರಿಸ್ಥಿತಿ ವಿಕಟ್ ಜಾಲ್ಲಿ. ವಾಂಚೊನ್ ಉರ್ಲ್ಲೊ ಲೋಕ್ ಘಾಟ್ ದೆಂವೊಂಕ್ ಲೆಗುನ್ ತಯಾರ್ ಜಾಲ್ಲೊ. ಪುಣ್ ಸಾವ್ಕಾರ್ ತಾಂಕಾಂ ಧೈರ್ ದಿತಾಲೆಂ. ದಯಾಳ್ ಮನಾಚೆ ತಾಂಕಾಂ ಕುಮಕ್ ಕರ್ತಾಲೆ. ಶಾಥಿವಂತ್ ಆನಿಂ ಧೈರಾಧಿಕ್ ಸೊರ್ಯಾ ಬಳಾರ್ ಮೆಲ್ಲ್ಯಾಂಚಿ ಮೊಡಿಂ ಪುರ್ತಾಲೆ. ಎಕೇಕ್ ಪಾವ್ಟಿಂ ಎಕಾಚ್ ಫೊಂಡಾಂತ್ ದೋನ್ ಮೊಡಿಂ ನಿಕೆಪಿಲ್ಲಿಂಯಿ ಆಸಾತ್. ಥೊಡೆಕಡೆ ಮೆಲ್ಲಿ ಖಬರ್ ನಾಸ್ತಾನಾ, ಮೊಡ್ಯಾಕ್ ಘಾಣ್ ಪಡ್ಲ್ಲಿಯಿ ಆಸಾ. ತಸಲ್ಯೆ ತ್ಯೆ ಗತಿಂತ್, ಆಖೇರಿಕ್ ಸಾವ್ಕಾರಾಂಚೆಂಯಿ ಧೈರ್ ಚುಕ್ಲೆಂ. ದಯಾಳ್ಕಿಯಿ ಬಿಯೆಲೆ. ಶಾಥಿವಂತಾಂಕ್ ಆನಿಂ ಧೈರಾಧಿಕಾಂಕ್ಯಿ ಸೊರ್ಯಾಚೆಂ ಆಮಾಲ್ ತಕ್ಲೆಕ್ ಚಡಾನಾ ಜಾಲೆಂ. ಸರ್ವ್ ಲೋಕ್ ನಿರಾಸಿ ಜಾಲೊ. ಎಕೆಕ್ಲ್ಯಾನ್ಂಚ್ ಕುಟ್ಮಾಕ್ ಕಣ್ಘೆವ್ನ್ ಘಾಟ್ ದೆಂವೊಂಕ್ ಆರಂಭ್ ಕೆಲೆಂ. ತ್ಯಾ ವೆಳಾರ್................ತ್ಯಾ ದಿಸಾಂನಿ..............
ವ್ಹಯ್, ತ್ಯಾ ದಿಸಾಂನಿ ಎಕಾ ಲ್ಹಾನ್ ಘರಾಂತ್ ದೆಲ್ಫಿನ್ ತಿಚಾ ಸ ವರ್ಸಾಂಚಾ ಎಕ್ಲ್ಯಾಚ್ ಪುತಾಕ್ ಪೊಟ್ಲುನ್ ಧರ್ನ್ ಧುಳ್ದುಳ್ಯಾಂ ರಡ್ಟಾಲಿಂ. ತಿಚಿ ಆವಯ್, ತಿ ಲ್ಹಾನ್ ಆಸ್ತಾನಾ ಅಂತರ್ಲ್ಲಿ. ಉಪ್ರಾಂತ್ ತಿಚಾ ಬಾಪಾಯ್ನ್ ತಿಕಾ ಘಾಟಾರ್ ಹಾಡ್ನ್ ತಿಚೆಂ ಕಾಜಾರ್ ಕೆಲ್ಲೆಂ. ತಿಚೊ ಮೊಗಾಚೊ ಬಾಪುಯ್ - ತೊಯೀ ತ್ಯೆ ಪಿಡೆಕ್ ಬಲಿ ಜಾವ್ನ್ ವೀಸ್ ದೀಸ್ ಸರ್ಲ್ಲೆ. ತ್ಯಾ ಉಪ್ರಾಂತ್ ತಿಚೊ ಘರ್ಕಾರ್ ತಿಚೊ ತೊ ಆಧಾರ್ ಆನಿಂ ಫುಡಾರ್- ತೊಯಿ ತ್ಯಾ ಖರ್ಗಾಂತ್ ಅಂತರೊನ್ ಆಟ್ಚ್ ದೀಸ್ ಜಾಲ್ಲೆ.
ಚೆರ್ಕ್ಯಾಚೆಂ ನಂವ್ ಬೆಜ್ಮಿ. ತೊ ಜನ್ಮಾ ಥಾವ್ನ್ ಫುಡ್ಪುಡಿತ್ ಆಸ್ಲ್ಲೊ. ದೆವಾಧೀನ್ ಜಾಲ್ಲ್ಯಾ ತಾಚಾ ಆಜ್ಯಾಚಾ ಆನಿಂ ಬಾಪಾಯ್ಚಾ ಅಪುರ್ಬಾಯೆನ್ ಗುಳ್ಯಾಬರಿ ತೊ ವಾಡ್ಲ್ಲೊ. ಪುಣ್ ಏಕ್ ತಾಚೆಂ ನಿರ್ಭಾಗ್ಪಣ್ ತಾಕಾ ಉಲಂವ್ಕ್ ಯೇನಾತ್ಲ್ಲೆಂ. ತಾಕಾ ಆಯ್ಕಾನಾತ್ಲ್ಲೆಂ. ತೊ ಮೊನೊ ಆನಿಂ ಕೆಪ್ಪೊ. ಫಕತ್ತ್ "ಮಾ (ಮಾಂಯ್, ಬಾ(ಬಾಬಾ), ಆ(ಆಬಾ), ಕೊ(ಕೊಕೊ), ಖಾ (ಖಾಂವ್ಕ್ ) ದೊ..." ಆಶೆಂ ಎಕೇಕ್ ಉತಾರ್ ಮಾತ್ರ್ ತೊ ಉಲಯ್ತಾಲೊ ಶಿವಾಯ್, ಸ್ವಷ್ಟ್ ಉಚ್ಃಆರ್ ಕರುಂಕ್ ತಾಕಾ ಕಳಾನಾತ್ಲೆಂ. ತೆಚ್ಪರಿಂ ತಾಕಾ ಕಸಲಿಯಿ ಬುದ್ವಂತ್ಕಾಯ್ ವ ಸಮ್ಜಣಿ ನಾತ್ಲ್ಲಿ. ತಸಲೊ ತೊ ಭುರ್ಗೊ, ಆವಯ್ಚೆಂ ದುಃಖ್ ಕಿತೆಂ ಕಾಣಾಂ?
ಪಿಡೆಚಾ ಭಿಯಾಕ್ ಘಾಟ್ ಸೊಡ್ಚಿಂ ದೆಲ್ಫಿನಾಚಿಂ ಶೆಜಾರ್ಯಾಂ ಆನಿಂ ವೊಳ್ಕಿಚಿಂ, ತಿಕಾಯಿ "ಘಾಟ್ ಸೊಡ್ ಚಲ್ಯಾಂ" ಮ್ಹಣ್ ವತ್ತಾಯ್ ಕರ್ತಾಲಿಂ. ಪುಣ್ ದೆಲ್ಪಿನ್ ವೆತೆಲೆ ಖಂಯ್! ಗಾಂವಾಂತ್ ತಿಕಾ ಕೋಣ್ ನಾ. ಹಾತಾಂತ್ ತಿಚಾ ದೆಡ್ಕಿ ನಾ. ಅಂಗಾರ್ ಪಿಂಜ್ಕರ್ ಏಕ್ ಕಾಪಾಡ್ ಆನಿಂ ಬಾಜು ಶಿವಾಯ್ ದುಸ್ರ್ಯಾ ವಸ್ತ್ರಾಂಚಿ ಗತ್ ನಾಂ. ದೆಕುನ್ ಮನ್ ತಿಚೆಂ ಸಂಸರಾಕ್ ಕಾಂಠಾಳ್ಲ್ಲೆಂ. ತಿಚಾ ಮೊಗಚಾಂಕ್ ಘಾಟಾಚ್ಯೆ ಮಾತ್ಯೆಂತ್ ಸಾಂಡುನ್ ವಚೊಂಕ್ ತಿಕಾ ನಾಕಾ ಆಸ್ಲ್ಲೆಂ. ತ್ಯಾ ದೆಕುನ್, ತಿ ಆಸ್ಲ್ಲ್ಯಾ ತೊಟಾಂತ್ ಘೊಳ್ತಾಲಿ. ಪುಣ್ ಚಡ್ ದೀಸ್ ಘೊಳೊಂಕ್ ತಿ ಸಕ್ಲಿನಾ!
ಏಕ್ ದೀಸ್ ಸಾಂಜೆರ್, ಸದಾಂಚೆ ಬರಿ ತೊಟಾಂತ್ಲೆ ಕಾಮ್ ತಿರ್ಸುನ್, ದೆಲ್ಪಿನ್ ತಿಚಾ ಬಿಡಾರಾಕ್ ಆಯ್ಲಿ. ಯೆತಾನಾ ತಿಣೆಂ ಸದಾಂಚ್ಯೆ ಅಂಗ್ಡಿಚೊ ದೋನ್ ಸೆರ್ ತಾಂದುಳ್ ರೀಣ್ ಹಾಡ್ಲ್ಲೊ. ಸಾಂಜೆಚೆಂ ರಾಂದಾಂಪ್ ಜಾವ್ನ್ ತಿಣೆಂ ಚೆರ್ಕ್ಯಾಕ್ ನ್ಹಾಣಯ್ಲೊ ಆನಿಂ ತಿಯೀ ನ್ಹಾಲಿ. ಉಪ್ರಾಂತ್ ದೊಗಾಂಯಿ ಜೆವ್ಲಿಂ. ಥೊಡಾ ವೆಳಾನ್ ರಜಾರ್ ತಿರ್ಸುನ್ ತಿಂ ನಿದ್ಲಿಂ.
ಪುಣ್ ನಿದೊನ್ ಎಕಾ ವೊರಾನ್, ಚೆರ್ಕ್ಯಾಕ್ ನೀದ್ ಪಡ್ಲ್ಲಿ ಆಸ್ತಾನಾ, ದೆಲ್ಫಿನಾಕ್ ವೋಂಕ್ ಸುರು ಜಾಲಿ. ದೆಲ್ಫಿನ್ ಬಿಯೆಲಿ. ವೆಗಿಂ ವೆಗಿಂ ಜಾಣಾಂ ಆಸ್ಲ್ಲ್ಯಾ ಪ್ರಮಾಣೆಂ ವಕ್ತಾಚೊ ಕಸಾಯ್ ಶಿಜಯ್ಲೊ. ಪುಣ್, ಕಸಾಯ್ ಪಿಯೆವ್ನ್ಯಿ ಪರತ್ ತಿಕಾ ತೀನ್ ಪಾವ್ಟಿಂ ವೋಂಕ್ ಆನಿಂ ಉದ್ಕಾಡೆ ಜಾಲೆಂ. ತಿ ಕಾಂಪ್ಲಿ ಆನಿಂ ಥರ್ಥರ್ಲಿ. ಮೊಗಾಚಾಂಚೊ ಉಗ್ಡಾಸ್ ತಿಕಾ ಆಯ್ಲೊ. ದೊಳ್ಯಾಂ ಥಾವ್ನ್ ದುಃಖಾಂ ದೆಂವ್ಲಿಂ. ರಾತ್ಚಿಂ ವೊರಾಂ ದೋನ್ ಜಾತಾನಾ ತಿಚೆ ಹಾತ್-ಪಾಯ್ ಶೆಳೆವ್ನ್ ಆಯ್ಲೆ. ನಿದ್ಲ್ಲೆಕಡೆ ಪುತಾಕ್ ಪೊಶೆತ್ತ್ ಸಬಾರ್ ವೇಳ್ ತಿಣೆಂ ಪಾಶಾರ್ ಕೆಲೊ. ಆಖೇರಿಕ್ ಫಾಂತ್ಯಾಚಾ ಪಾಂಚ್ ವೊರಾರ್ "ಬಾಳಾ ಮ್ಹಜ್ಯಾ, ರಾಯಾ!" ಮ್ಹಣತ್ತ್ ತಿಣೆಂ ಪುತಾಚ್ಯೆ ತಕ್ಲೆರ್ ಹಾತ್ ದವರ್ಲ್ಲೊ ಆಶ್ತಾನಾ ಪ್ರಾಣ್ ಸೊಡ್ಲೊ.
ಸಕಾಳಿಂಚಾ ಸಾತ್ ವೊರಾರ್ ಬೆಜ್ಮಿಕ್ ಜಾಗ್ ಜಾಲಿ. ಪುಣ್ ಮಾ ಉಠೊಂಕ್ ನಾ! ಬೆಜ್ಮಿನ್ ಆವಯ್ಕ್ ಧೊಂಕುಳ್ಳೆಂ ಆನಿಂ ಜಾಗಯ್ಲೆಂ ಜಾಲ್ಯಾರಿ ಮಾ ಉಠಾನಾ! ಬೆಜ್ಮಿನ್ ತಿತ್ಲೆಂ ವಿಶೇಶ್ ಗುಮಾನ್ ಕೆಲೆಂ ನಾ..... ತೊ ಗುಮಾನ್ ದೀಂವ್ಕ್ಯಿ ನೆಣಾ ಆಸ್ಲ್ಲೊ.
ರಾಂದ್ಣಿಲಾಗಿಂ ತೊ ಗೆಲೊ ಆನಿಂ ಕುಂಡ್ಲ್ಯಾ-ಬುಡ್ಕುಲ್ಯಾಂತ್ ಸೊಧಿಲಾಗ್ಲೊ. ಬುಡ್ಕುಲ್ಯಾಂತ್ ಬೋವ್ ಥೊಡೆಂ ರಾತ್ಚೆಂ ಶಿತ್ ಆಸ್ಲ್ಲೆಂ. ಕುಂಡ್ಲ್ಯಾತ್ ಸಾರಾಚೆಂ ಇಲ್ಲೆಂ ಉದಾಕ್ ಆಸ್ಲ್ಲೆಂ. ಬೆಜ್ಮಿನ್ ಬುಡ್ಕುಲ್ಯಾಂತ್ ಶಿತ್ ಹಾತಾನ್ ಕಾಡ್ನ್ ಕುಂಡ್ಲ್ಯಾಂತ್ ಘಾಲೆಂ ಆನಿಂ ಅಮ್ರತ್ ಕೆಲೆಂ. ಕುಂಡ್ಲ್ಯಾಂತ್ಲೆಂ ಶಿತ್ ಸಂಪ್ತಚ್ ತೊಂಡಾಚೆಂ ಉಸ್ಟೆಂ ಹಾತಾಚಾ ತಟ್ಟ್ಯಾಂಕ್ ಪುಸಿತ್ತ್, ತೊ ಭಾಯ್ರ್ ಖೆಳೊಂಕ್ ಗೆಲೊ. ತಾಚೆ ವರ್ತೆಂ ತೊ ಣೆಣಾಂ. ಆವಯ್ ಮೆಲ್ಯಾ ಮ್ಹಣ್ ತೊ ಕಿತೆಂ ಜಾಣಾಂ. ತಿ ಉಠೊಂಕ್ ನಾ ಜಾಲ್ಯಾರ್ ಉಠ್ತೆಲಿ. ತಾಕಾ ಆನಿಂ ದೊನ್ಪರಾಂ ಜೇಂವ್ಕ್ ಮೆಳ್ಳ್ಯಾರ್ ಜಾಲೆಂ.
ಬೆಜ್ಮಿ ಖೆಳಾತ್ತ್ ಇತರ್ ಭುರ್ಗ್ಯಾಂ ಸಾಂಗಾಂತಾ ಭರ್ಸಾಲೊ. ತಾಕಾ ಘರ್ಚೊ ಜಾಂವ್ ಆವಯ್ಚೊ ಉಗ್ಡಾಸ್ ಬಿಲ್ಕುಲ್ ಉರ್ಲೊನಾ. ಕಾರಣ್ ಸದಾಂ ಆವಯ್ ತಾಕಾ ಸೊಧುನ್ ಕಾಡ್ನ್ ಘರಾ ವ್ಹರ್ನ್ ವಾಡ್ತಾಲಿ. ತರ್ ಬೆಜ್ಮಿನ್ ಚಿಂತಿಜಾಯ್ ಕಿತ್ಯಾಕ್! ಚಿಂತ್ಚಿ ಸಕತ್ಯಿ ತಾಕಾ ನಾ.
ವೊರಾಂ ದೊನ್ಪರಾಂಚಿಂ ಬಾರಾ ಜಾಲಿಂ ಆನಿಂ ಬೆಜ್ಮಿ ಭುಕೆಲೊ. ಪುಣ್ ಮಾ ಯೆತಲಿ! ಬೆಜ್ಮಿಚೆಂ ಗಿನ್ಯಾನ್ ವಿಂಗಡ್ಚ್ !! ಪಾಟಿಂ ಘಡ್ಲಾಂ ಕಿತೆಂ ಆನಿಂ ಮುಖಾರ್ ಜಾತೆಲೆಂ ಕಿತೆಂ ಮ್ಹಳ್ಳೆಂ ತೊ ಬಿಲ್ಕುಲ್ ನೆಣಾ. ತಾಚಾ ಸಾಂಗಾತಾಚಿಂ ಭುರ್ಗಿಂ ಭುಕ್ ಲಾಗ್ತಾನಾ ಎಕೆಕ್ಲಿಂಚ್ ನಿಸರ್ಲಿ. ಬೆಜ್ಮಿ ಎಕ್ಲೊಚ್ ಉರ್ಲೊ. ಮಾ ಯೆತಾಲಿ! ಬೆಜ್ಮಿನ್ ಸದಾಂ ಆವಯ್ನ್ ಯೆಂವ್ಚ್ಯೆ ವಾಟೆಕ್ ದೀಷ್ಟ್ ಘುಂವ್ಡಾಯ್ಲಿ. ಮಾ ನಾ! ಮಾ ನಾ ಮ್ಹಣ್ ತಾಕಾ ತಿತ್ಲೆಂ ವಿಶೇಶ್ ದಿಸ್ಲೆಂನಾ. ಪುಣ್ ತಾಚಿ ಭುಕ್ ವಿಶೇಶ್ ಜಾಲಿ. ತಾಣೆಂ ಘರ್ಚೆ ವಾಟೆಕ್ ಪಾತ್ ಧಾಂವ್ಡಾಯ್ಲೆ.
ಘರಾಂತ್ ಆವಯ್ಚಿ ತಿ ನಿರ್ಜೀವ್ ಕೂಡ್ ತಶಿಚ್ ಮಾಂದ್ರೆರ್ ನಿದೊನ್ ಆಸ್ಲ್ಲಿ. ಬೆಜ್ಮಿನ್ ವಚೊನ್ ತ್ಯೆ ಕುಡಿಕ್ ಜಾಗಯ್ಲೆಂ, ಉಠಯ್ಲೆಂ ಆನಿಂ ಧೊಂಕುಳ್ಳೆಂ. ಪುಣ್ ಮಾ ಉಠಾನಾ. ಬೆಜ್ಮಿನ್ ರಾಂದ್ಣಿಲಾಗಿಂ ವಚೊನ್ ಕುಂಡ್ಲ್ಯಾಂತ್ ಆನಿಂ ಬುಡ್ಕುಲ್ಯಾಂತ್ ತಿಳ್ಳೆಂ. ದಿಸ್ಲ್ಲೆಂ ಹಾತಾನ್ ಪುಸುನ್ ಖೆಲೆಂ. ಪುಣ್ ಪೊಟ್ ತಾಚೆಂ ಭರ್ಲೆಂನಾ. ದೆಕುನ್ ಪರತ್ ತಾಣೆಂ ಆವಯ್ಕ್ ಜಾಗಯ್ಲೆಂ. ತರ್, ಮಾ ಉಠಾನಾ! ಬೆಜ್ಮಿ ಭಾಯ್ರ್ ಆಯ್ಲೊ ಆನಿಂ ಬಿತರ್ ಗೆಲೊ. ಆಖೇರಿಕ್ ಆವಯ್ಚ್ಯೆ ಬಗ್ಲೆಕ್ ನಿದ್ಲೊ. ಪುಣ್ ಭುಕ್ ತಾಕಾ ದೊಸ್ತಾಲಿ. ದೆಕುನ್ ತಾಣೆಂ ನಿದ್ಲ್ಲೆಕಡೆ ಥಾವ್ನ್ ಆವಯ್ಚೊ ಹಾತ್ ಧರ್ಲೊ, ಕೇಸ್ ವೊಡ್ಲೆ, ನಾಕಾಕ್ ಧರ್ಲೆಂ, ಗಾಲ್ ಪೊಶೆಲೆ. ಇತ್ಲೆಂ ಕರ್ತಾನಾ ತಾಕಾ ಥಂಯ್ಚ್ ಜೆಮ್ ಪಡ್ಲಿ ಆನಿಂ ತೊ ನಿದ್ಲೊ.
ದೊನ್ಪಾರ್ ಉತ್ರೊನ್ ವೊರಾಂ ತೀನ್ ಜಾತಾನಾ ಬೆಜ್ಮಿಕ್ ಎಕಾಚ್ಛಾರಾ ಜಾಗ್ ಜಾಲಿ ಆನಿಂ ತೊ ಉಠ್ಲೊ. ದೊಳೆ ಪುಸಿತ್ತ್ ಪರತ್ ತಾಣೆಂ ಆವಯ್ಕ್ ಉಠಂವ್ಚೆಂ ಸಾಧನ್ ಕೆಲೆಂ. ಪುಣ್ ಪ್ಯರ್ಥ್. ಬೆಜ್ಮಿಚಿ ಭುಕ್ ವಿಶೇಸ್ ಜಾಲಿ. ದೆಕುನ್ ವಚೊನ್ ತಾಣೆಂ ಕುಂಡ್ಳ್ಯಾಂತ್ ಆನಿಂ ಬುಡ್ಕುಲ್ಯಾಂತ್ ನಿಮಾಣಿ ದೀಷ್ಟ್ ಘಾಲಿ. ಬೆಜ್ಮಿಕ್ ಕಿತೆಂ ಕರ್ಚೆಂ ಮ್ಹಳ್ಳೆಂ ಸಮ್ಜಾಲೆಂನಾ. ತೊ ಘರಾ ಭಾಯ್ರ್ ಆಯ್ಲೊ. ಪಯ್ಸ್ ತಾಚಾ ಥೊಡಾ ಸಾಂಗಾಂತಿ ಭುರ್ಗ್ಯಾಂನಿ ಖೆಳ್ಚೆಂ ತಾಣೆಂ ಪಳೆಲೆಂ ದೆಕುನ್ ಥಂಯ್ ವಚೊಂಕ್ ತಾಣೆಂ ಬಾರಿಕ್ ಮೆಟಾಂ ಕಾಡ್ಲಿಂ. ಪುಣ್ ಪೊಟ್ ತಾಚೆಂ ಖಾಣಾಕ್ ಆಶೆಲ್ಲ್ಯಾನ್, ಮನ್ ತಾಚೆಂ ಖೆಳಾಕ್ ಉತ್ತೇಜನ್ ದಿನಾತ್ಲ್ಲೆಂ, ಬಗಾರ್ ಖಾಂವ್ಕ್ ಆನಿಂ ಜೇಂವ್ಕ್! ಖಂಯ್ ತೆಂ ಮೆಳಾತ್? ತಶೆಂ ತೊ ಚಿಂತಾನಾ ಏಕ್ ಉಗ್ಡಾಸ್ ತಾಕಾ ಆಯ್ಲೊ. ಅಂಗಡ್ಗಾರ್ ಖಾಂವ್ಕ್ ದಿತಾ. ಆವಯ್ ಕೆದಾಳಾಯಿ ತಾಕಾ ತಿಚಾ ಸಾಂಗಾಂತಾ ಅಂಗ್ಡಿ ಆಪವ್ನ್ ವ್ಹರಾತ್ ಜಾಲ್ಯಾರ್ ಎಕ್ಯೆ ದೆಡ್ಕೆಚೆಂ ಪುಣಿ ಖಾಂವ್ಚೆಂ ಕಾಣ್ಘೆವ್ನ್ ದಿತಾಲಿ. ದೆಕುನ್ ತಾಚೆಂ ಮನ್ ಖೆಳ್ಚ್ಯೆ ವಾಟೆ ಥಾವ್ನ್ ಅಂಗ್ಡಿ ವಾಟೆಕ್ ವೊಳ್ಳೆಂ.
ತೊಟಾ ಥಾವ್ನ್ ಆಂಗಡ್ ಆರ್ದ್ಯಾಂ ಫರ್ಲಾಂಗಾ ಪಯ್ಸ್ ಆಸ್ಲ್ಲಿ. ತ್ಯೆ ಅಂಗ್ಡೀಕ್ ವೆಚಾ ಆದಿಂ ದೋನ್ ಲ್ಹಾನ್ ಮಾರೊಗ್ ಕುಡ್ಸಾಲ್ಲೆ ಮೆಳ್ತಾಲೆ. ಅಂಗ್ಡಿ ಮುಖಾರ್ ತೀನ್ ಮಾರೊಗ್ ಘಡ್ಸಾಲ್ಲೆ ದಿಸ್ತಾಲೆ. ಬೆಜ್ಮಿ ಚಲ್ಲೊ, ಚಲ್ಲೊ, ಮುಖಾರ್ ಚಲ್ಲೊ. ತೆ ದೋನ್ ಮಾರ್ಗಾಂ ಪಯ್ಕಿಂ ಎಕಾ ಮಾರ್ಗಾಂತ್ಲ್ಯಾನ್ ಮುಖಾರ್ ಚಲ್ಲೊ.
ಬೆಜ್ಮಿ ಚಲ್ತಾ, ಪುಣ್ ಆಂಗಡ್ ಮೆಳಾನಾ. ಬೆಜ್ಮಿಕ್ ಭುಕ್ ಲಾಗ್ಲ್ಯಾ ಜಾಲ್ಯಾರಿ, ಖಾಂವ್ಚೆಂ ದಿಸಾನಾ. ಬೆಜ್ಮಿ ಚಲ್ಲೊ- ಅರ್ಧ್ಯಾ ಮಯ್ಲಾ ಪಯ್ಸ್ ಪಾವ್ಲೊ. ಜಾಲ್ಯಾರಿ ವಾಟ್ ಚುಕ್ಲ್ಯಾ ಮ್ಹಣ್ ತೊ ನೆಣಾಂ. ಪಾಟಿಂ ವಚೊಂಕ್ ತಾಕಾ ಮನ್ ನಾ. ಅಂಗಡ್ ಮೆಳ್ತೆಲಿಚ್ ಆನಿಂ ಖಾಂವ್ಚೆ ಜಾಯಿಚ್. ಬೆಜ್ಮಿಚಾ ಭುಕೆಲ್ಲ್ಯಾ ಪೊಟಾಚಿ ಆಶೆಲ್ಲಿ ಚಿಂತ್ನಾಂ ಆನಿಂ ನಿತ್ರಾಣಿ ಮೆಟಾಂ ತಾಕಾ ಮುಖಾರ್ ಮುಖಾರ್ ವ್ಹರ್ನ್ ಗೆಲಿ. ತ್ಯಾ ವೆಳರ್.........! ತ್ಯಾಚ್ ಮಾರ್ಗಾಂತ್ಲ್ಯಾನ್ ಥೊಡ್ಯೊ ದೊಡ್ಯಾ ಬೊಯ್ಲಾಂಚ್ಯೊ ಗಾಡಿಯೊ ಮುಖ್ಲ್ಯಾನ್ ವೆತಾಲ್ಯೊ.ಘಾಟಾಚಿ ಕಾಫಿ ಭರುನ್ ಮಂಗ್ಳುರಾಕ್ ತ್ಯೊ ಭಾಯ್ರ್ ಸರ್ಲ್ಲ್ಯೊ.
ಬೆಜ್ಮಿಕ್ ಅಂಗಡ್ ಚಡ್ ಪಾಟಿಂ ಪಡ್ಲ್ಲಿ ಆನಿಂ ತೊ ದುಸ್ರ್ಯೆ ವಾಟೆನ್ ಚಡ್ ಪಯ್ಸ್ ಪಾವ್ಲ್ಲೊ. ಜಾಲ್ಯಾರಿ ತಿತ್ಲೆಂ ಸಮ್ಜೊಂಚೆಂ ಗುನ್ಯಾನ್ ತಾಕಾ ನಾತ್ಲ್ಲೆಂ. ತೊ ಅಂಗ್ಡಿ ವೆಚಿ ವಾಟ್ ಸಾಂಗ್ತಾಲೊ. ಗಳ್ಯಾಂತ್ ತಾಚಾ ಏಕ್ ನಾಡೊ ಆಸ್ಲ್ಲೊ..........ಪುಣ್ ಅರ್ಲುಕ್ ನಾತ್ಲ್ಲಿ. ಪೆಂಕ್ಡಾಂತ್ ಮೂಂಜ್ ಆಸ್ಲ್ಲಿ. ಪುಣ್ ಕಾಸ್ಟಿ ನಾತ್ಲ್ಲಿ. ಆದಿಂ ಬಾರಾ ವರ್ಸಾಂ ಪ್ರಾಯ್ ಪರ್ಯಾಂತ್ ಭುರ್ಗಿಂ ಲಜ್ ನೆಣಾ ಆಸ್ಲ್ಲಿಂ ಮ್ಹಣ್ತಾತ್ ಆಮ್ಚೆ ಮಾಲ್ಘಡೆ. ತರ್ ಸ ವರ್ಸಾಂಚಾ ಬೆಜ್ಮಿನ್ ಉಗ್ತೊ ಆಸ್ಲ್ಲ್ಯಾಂತ್ ನವಾಲ್ ಕಸಲೆಂ? ಬೆಜ್ಮಿ ಚಲ್ತಾಲೊ. ತ್ಯಾ ವೆಳಾರ್ ಮುಖ್ಲ್ಯಾನ್ ವೆಚಾ ಗಾಡಿಯಾಂ ಪಯ್ಕಿಂ ಅಖೇರಿಚ್ಯೆ ಗಾಡಿಯೆರ್ ಬಸ್ಲ್ಲ್ಯಾ ಪಿಂತಾಚಾಚಿ ದೀಷ್ಟ್ ಬೆಜ್ಮಿಚೆರ್ ಪಡ್ಲಿ. ತೊ ಪಿಂತಾಮ್ ತ್ಯಾ ತೀನ್ ಗಾಡಿಯಾಂಚೊ ಧನಿ. ದೆಕುನ್ ತೊ ತ್ಯೆ ಗಾಡಿಯೆಂತ್ ದಾಳ್ಲ್ಲ್ಯಾ ಗೊಣಿಯಾಂಚೆರ್ ಬಸೊನ್ ಬದ್ಕಾಚಿ ಆನಿಂ ಗಾಡಿಯೆಕ್ ಪಾಟ್ಲ್ಯಾನ್ ಬಾಂದ್ಲ್ಲ್ಯಾ ದೊಗಾಂ ಬೊಯ್ಲಾಂಚಿ ಜಾಗ್ರುತ್ಕಾಯ್ ಕಾಣ್ಘೆತಾಲೊ. ತಸಲ್ಯಾ ವೆಳಾರ್ ಬೆಜ್ಮಿ ತಚ್ಯೆ ನದ್ರೆಕ್ ಪಡ್ಲೊ. ಸಬಾರ್ ವೇಳ್ ಪುಶ್ಕಳ್ ವಾಟ್ ಸಂಪ್ಲಿ ತರೀ ಬೆಜ್ಮಿ ಚಲ್ತಾಲೊ. ತಾಚೆರ್ ನದರ್ ದವರ್ನ್ ಆಸ್ಲ್ಲೊ ಪಿಂತಾಮ್ ಚಿಂತುಂಕ್ ಪಡ್ಲೊ. "ಕೊಣಾಚೊ ಜಾವ್ಯೆತ್ ಹೊ ಭರ್ಗೊ? ಪುಶ್ಕಳ್ ವೇಳ್ ಥಾವ್ನ್ ಚಲ್ತಾ. ಖಂಯ್ ಯೆತಾಗಾಯ್?" ತಿತ್ಲೆಂ ತೊ ಚಿಂತಾನಾ ಆನಿಂ ಆಟಯ್ತಾನಾ, ವಾಟೆಚಿ ದೆಂವ್ಣಿ ಆಯ್ಲಿ. ರೊದಾಂಕ್ ತಿರು ಗಾಲ್ಚಾ ಖಾತಿರ್ ಸರ್ವ್ ಗಾಡಿಯೋ ರಾವ್ಲ್ಯೊ.
ತಿರು ಅರ್ನುನ್ ಆಖೇರ್ ಜಾತಾನಾ ಬೆಜ್ಮಿ ಗಾಡಿಯಾಂಕ್ ಲಾಗಿಂ ಜಾಲೊ. "ಖಂಯ್ ವೆತಾಯ್ ಪುತಾ?" ವಿಚಾರ್ಲೆಂ ತಾಕಾ ಪಿಂತಾಮಾನ್. ಬೆಜ್ಮಿಚಿ ಜವಾಬ್ ನಾ. ಪರತ್ ಸವಾಲ್ ಘಾಲೆಂ ಪಿಂತಾಮಾನ್. ತ್ಯಾ ವೆಳಾರ್ ಬೆಜ್ಮಿನ್ ಮೊನ್ಯಾ ಭಾಶೆನ್ ಗಾಗ್ಯಾ ಉತ್ರಾಂನಿ "ಖಾ........ಖಾ(ಖಾಂವ್ಕ್) ದಾ............ದಾ(ಜಾಯ್)" ಮ್ಹಳೆಂ
ತೆಂ ಆಯ್ಕೊನ್ "ಭುರ್ಗೊ ಮೊನೊಗಾ" ಮ್ಹಣಾಲೊ ಎಕ್ಲೊ ಗಾಡಿಯೆಗಾರ್.
"ಕೊಣಾಚೊ ಜಾವ್ಯೆತ್?" ದುಸ್ರ್ಯಾನ್ ಕಪಾಲಾರ್ ಮಿರಿಯೊ ಘಾಲ್ಯೊ.
"ಮ್ಹಾರಾಂಚೊ ವ ಗಾವ್ಡಾಂಚೊ?"
"ಗಳ್ಯಾಂತ್ ನಾಡೊ ಆಸಾಗಾ - ಕ್ರಿಸ್ತಾಂವ್ ಜಾಯ್ಜಾಯ್" ತಿಸ್ರ್ಯಾಚಾ ಸವಾಲಾಕ್ ಚೊವ್ತ್ಯಾನ್ ಜವಾಬ್ ದಿಲಿ.
"ನಾಡ್ಯಾಕ್ ಆರ್ಲುಂಕ್ ನಾಂಗಾ. ಮಾರಾಂಚೊಚ್ ಜಾಯ್ಜಾಯ್" ಪಾಂಚ್ವ್ಯಾನ್ ಅಂದಾಜ್ ಸಾಂಗ್ಲೊ.
"ವೆತಾ ಖಂಯ್ಗಾಯ್? ಕಾಂಯ್ ಪಿಡೆಚಾ ಭಿಯಾಕ್ ಘಾಟ್ ಸೊಡ್ನ್ ವೆತಾನಾ ಕೊಣಾಚೊಯ್ ಪುಣಿ ಚುಕೊಂಕ್ ನಾಮೂ?
"ತಸೆಂಚ್ ಜಾಯ್ಜಾಯ್. ನಾ ಜಾಲ್ಯಾರ್ ಇತ್ಲೊ ಲ್ಹಾನ್ ಭುರ್ಗೊ ಆಸೊ ಹಾಂಗಾ ಪಾಂವ್ಚೊ ಕಸೊ?"
ತಾಸೊ ಅಂದಾಜ್ ಸವ್ಯಾಸೊ ಆನಿಂ ಸಾತ್ವ್ಯಾಚೊ ಜಾತಾನಾ ಆಟ್ವ್ಯಾನ್ ಹಾಂಕ್ರೆತ್ತ್ ಮ್ಹಳೆಂ; "ಚೆರ್ಕೊ ಚೆಂಡಾಬರಿ ಆಸಾ!"
"ವ್ಹಯ್, ಘರಾ ಕಾಮಾಕ್ ಉಪ್ಕಾರಾತ್, ಕೊಣಾಯ್ಚೊಯ್ ಜಾಲ್ಯಾರ್ ವಾಟೆರ್ ದಿಂವ್ಚೊ"
ತಿತ್ಲೆಂ ತಾಂಚೆ ಮಧ್ಲ್ಯಾ ಎಕ್ಲ್ಯಾನ್ ಮ್ಹಣ್ತಾನಾ, ಪಿಂತಾಮಾನ್ ಬೆಜ್ಮಿಕ್ ಉಕಲ್ನ್ ಗಾಡಿಯೆರ್ ದವರ್ಲೊಚ್. ತಿತ್ಲ್ಯಾರ್ ಸರ್ವಾಂನಿ ತಾಂತಾಂಚಾ ಗಾಡಿಯೆರ್ ಚಡೊನ್ ಬೊಯ್ಲಾಂಚಿ ದೊರಿ ವೊಡ್ಲಿ - ಗಾಡಿಯಾಂಚಿ ರೊದಾಂ ಘುಂವ್ಲಿಂ.
ಬೆಜ್ಮಿನ್ ತಾಚ್ಯೆ ಜಿಣ್ಯೆಂತ್ ಪಯ್ಲ್ಯಾ ಪಾವ್ಟಿಂ ಗಾಡಿಯೆರ್ ಬಸ್ಚೆಂ. ತಶೆಂ ಜಾಲ್ಲ್ಯಾನ್ ಬೆಜ್ಮಿಕ್ ಸಂತೊಸಾ ಸಾಂಗಾತಾ ಕಾವ್ಜೆಣಿಯೀ ಜಾಲಿ. ಬಿರಾಂತೆ ಸಾಂಗಾತಾ ಆನಂದ್ಯಿ ಭಗ್ಲೊ. ಪುಣ್ ಗಾಡಿ ಲಕ್ತಾನಾ ಆನಿಂ ಆಂಗ್ ಧಲ್ತಾನಾ ಬೆಜ್ಮಿಚೆಂ ದೈರ್ ಘಡ್ಬಡ್ಲೆಂ! ತೊ ಕಾಲುಬುಲೊ ಜಾವ್ನ್ ಶೆರ್ಮೆಲೊ. ತೆಂ ಪಳೆವ್ನ್ ಪಿಂತಾಮಾನ್ ತಾಚಿ ಏಕ್ ಪೊಟ್ಲಿ ಸೊಡವ್ನ್, ತ್ಯೆ ಪೊಟ್ಲೆಂತ್ಲೊ ಥೊಡೊ ಪೊವ್ ಆನಿಂ ಏಕ್ ಗೊಡಾಚೊ ಕುಡ್ಕೊ ಕಾಡ್ನ್ ಬೆಜ್ಮಿಚಾ ಹಾತಾರ್ ಘಾಲೊ. ತಿತ್ಲೆಂ ದೆಕ್ಲ್ಲೆಂಚ್ ಬೆಜ್ಮಿಚಿ ಕಾವ್ಜೆಣಿ ಸುಟ್ಲಿ. ತೊ ಸರ್ವ್ ವಿಸರ್ಲೊ. ಪಿಂತಾಮಾನ್ ತಾಚೆಲಾಗಿಂ ಉಲಯ್ತಾನಾ, ತಾಣೆಂಯಿ ತಾಚಾ ಮೊನ್ಯಾ ಭಾಶೆನ್ ಗಾಗ್ಯಾ ಉತ್ರಾಂನಿ ಜವಾಬ್ ದಿಲಿ ಆನಿಂ ಸಬ್ದಾ ಸಾಂಗಾಂತಾ ಹಾತ್ ಭಾಶೆನ್ ಸವಲಾಂಯಿ ಘಾಲಿಂ. ಥೊಡಾಚ್ ವೆಳಾ ಬಿತರ್ ತಾಂಚೆ ಮಧೆಂ ಸಳಾವಳ್ ವಾಡ್ಲಿ. ತಸಲ್ಯಾ ವೆಳಾರ್ ಪಿಂತಾಮಾನ್ "ಸುಕ್ಣೆಂ ಲಿಪಯ್ಜಾಯ್ರೆ ಪುತಾ" ಮ್ಹಣ್ತ್ತ್, ಬೊಲ್ಸಾಂತ್ಲೊ ಲ್ಹಾನ್ ಲೇಸ್ ಕಾಡ್ನ್ ಬೆಜ್ಮಿಚಾ ಮುಂಜಿರ್ ಖೊವಯ್ಲೊ. ತಿತ್ಲ್ಯಾರ್ ದೆಂವ್ಣಿ ದೆಂವೊನ್ ಗಾಡಿಯೋ ಚಡ್ಣೆಚ್ಯೆ ವಾಟೆಕ್ ಪಾವ್ಲ್ಯೊ ದೆಕುನ್, ಗಾಡಿಯೋ ರಾವವ್ನ್ ಗಾಡಿಯೆಗಾರ್ ತಿರು ಸದಿಳ್ ಕರುಂಕ್ ಲಾಗ್ಲೆ. ಥೊಡ್ಯಾ ವೆಳಾನ್ ಬೊಯ್ಲಾಂನಿ ಪಾಯ್ ಉಕಲ್ತಾನಾ ಗಾಡಿಯಾಂಚಿಂ ರೊದಾಂ ಪರತ್ ಲೊಳ್ಳಿಂ. ತ್ಯಾ ತೆಕಿತ್ ಮಯ್ಲಾಂಚೆ ಫಾತೊರ್ ಪಾಟಿಂ ಪಡ್ತಾನಾ ಸುರ್ಯಾಚಿಂ ಕೀರ್ಣಾಂ ಪೊಳ್ಳಿಂ. ರವಿನ್ ಸಂಸಾರಾಕ್ ಆದೇವ್ಸ್ ಮಾಗ್ಲೊ. ಪ್ರಥ್ವಿನ್ ಆಂಧ್ಕಾರಾಕ್ ಸ್ವಾಗತ್ ಕೆಲೊ. ವಾರ್ಆಚೊ ಪಾಲಂವ್ ಸ್ರಷ್ಟೆಚೆರ್ ಉಬ್ಲೊ ಆನಿಂ ಹಿಂವಾನ್ ಜಿವಿಂಕ್ ಉಮೊ ದಿಲೊ. ತೆಂ ಪಳೆವ್ನ್ ಪಿಂತಾಮಾನ್ ತಾಚೆಲಾಗಿಂ ಚಡಿತ್ ಆಸ್ಲ್ಲಿ ಏಕ್ ಪಿಂಜ್ಕರ್ ವೋಲ್ ಕಾಡ್ಣ್ ಬೆಜ್ಮಿಚಾ ಆಂಗಾಕ್ ರೆವ್ಡಾಯ್ಲಿ.
ವಾರ್ಯಾ ಹಿಂವಾಕ್ ಆಂಗ್ ದೀವ್ನ್ ರಾನಾ ಮೊಲ್ಯಾಂತ್ಲಿ ವಾಟ್ ಉತ್ರೊನ್ ಗಾಡಿಯೋ ಘಾಟ್ ಸಕಯ್ಲ್ ದೆಂವ್ತಾಲ್ಯೊ. ದಿಸಾಕ್ ವೊತಾಚ್ಯೆ ದಾವೆಕ್ ಬೊಯ್ಲಾಂಕ್ ಸುಶೆಗ್ ದೆಂವ್ಚಾ ಖಾತಿರ್ ಗಾಡಿಯೋ ಖಂಯ್ಸರ್ಯೀ ಸಾವ್ಳೆಕ್ ರಾವ್ತಾಲ್ಯೊ. ತಶೆಂ ರಾಂವ್ಚಾ ಖಾತಿರ್ ತಾಂಚಿಂ ನಿರ್ಣಾಯಿಲ್ಲಿಂ ಠಿಕಾಣಿಂ ಆಸ್ಲ್ಲಿಂ. ಥಂಯ್ಸರ್ ಗಾಡಿಯೆ ಥಾವ್ನ್ ಬೊಯ್ಲಾಂಕ್ ಸೊಡ್ನ್, ತಾಂಕಾಂ ಧುವ್ನ್ ವ ಪುಸುನ್, ಕುಳಿತ್ ಉಕಡ್ಚೊ, ಭಾತಣ್ ಘಾಲ್ಚೆಂ ಆನಿಂ ಜಣಾಂ ಖಾತಿರ್ ತಾಣಿಂಚ್ ರಾಂದಾಪ್ ಕರ್ಚೆಂ ತಾಂಚೆಂ ಭಾಗ್ ಜಾವ್ನಾಸ್ಲ್ಲೆಂ. ತ್ಯಾ ಭಾಗಾಂತ್ ಬೆಜ್ಮಿ ತಾಂಚೊ ನವೊ ಸಯ್ರೊ. ಥೊಡ್ಯಾಚ್ ದಿಸಾಂಚಾ ಪಯ್ಣಾಂತ್ ಬೆಜ್ಮಿ ಸರ್ವಾಂಚೊ ಮಿತ್ರ್ ಜಾಲೊ. ಸರ್ವಾಂಕ್ ಮೊಗಾಚೊ ಜಾಲೊ. ಪುಣ್ ನಾಂವ್ ತಾಚೆಂ ಕೋಣ್ಚ್ ನೆಣಾ. ಸಾಂಗೊಂಕ್ ಬೆಜ್ಮಿಕ್ ಕಳಾನಾ. ತೊ ಮೊನೊ ಆನಿಂ ಕೆಪ್ಪೊ. ಗಾಗ್ಯೊ ಆನಿಂ ಗಿನ್ಯಾನ್ ನಾತ್ಲ್ಲೊ ಭುರ್ಗೊ. ಏಕ್ ಸಾಂಗ್ಲ್ಯಾರ್ ಆನ್ಯೇಕ್ ಕರ್ತಾಲೊ. ಬಸ್ ಮ್ಹಳ್ಯಾರ್ ನಿದ್ತಾಲೊ ಆನಿಂ ನಿದೆ ಮ್ಹಳ್ಯಾರ್ ಹಾಸ್ತಾಲೊ. ತೆಂ ಪಳೆವ್ನ್ ಗಾಡಿಯೆಗಾರ್ ತಾಕಾ ಸೊವ್ತಾಲೆ ಆನಿಂ ಧಮ್ಕಿತಾಲೆ ತರಿ, ಬೆಜ್ಮಿಕ್ ರಾಗ್ ನಾ ಬೆಜಾರ್ ನಾ. ಮಾರ್ಲ್ಯಾರ್ ಲೆಗುನ್ ತೊ ರಡನಾತ್ಲ್ಲೊ ಬಗಾರ್ ಹಾಸ್ತಾಲೊ. ತೆಂ ಪಳೆವ್ನ್ ಕಸಲ್ಯಾಂಚೆಯಿ ಮನ್ ಮೊವಾಳ್ತಾಲೆಂ. ದೆಕುನ್ ಥೊಡ್ಯಾ ಗಾಡಿಯೆಗಾರಾಂನಿ ತಾಕಾ ಬೆಪ್ಪಾ ಮ್ಹಣ್ ನಾಂವ್ ದಿಲೆಂ, ಆನಿಂ ಥೊಡ್ಯಾಂನಿ ತಾಕಾ ಬೊಮ್ಮಾ ಮ್ಹಣ್ ಉಲೊ ಕೆಲೆಂ.
ಸಬಾರ್ ದಿಸಾಂಚೆಂ ಪಯ್ಣ್ ಸಂಪ್ಲ್ಯಾ ಉಪ್ರಾಂತ್, ಗಾಡಿಯೊ ಕೊಡಾಳಾಕ್ ಯೇವ್ನ್ ಪಾವ್ಲ್ಯೊ. ಪಿಂತಾಮಾನ್ ತಾಚಾ ಸಾವ್ಕಾರಾಚ್ಯೆ ಹುಕ್ಮೆ ಪ್ರಮಾಣೆ, ಗಾಡಿಯಾಂನಿ ಹಾಡ್ಲ್ಲಿ ಸರ್ವ್ ಕಾಫ್ಯೆಚಿ ಬಿ ವ್ಯಾಪರಾಂಚಾ ಸ್ವಾಧೀನ್ ದಿಲಿ. ಗಾಡಿಯೋ ಖಾಲಿ ಕರವ್ನ್, ತಾಚಾ ಜಣಾಂಕ್ ಸುಟ್ಕಾ ದಿಲಿ. ಜಣಾಂನಿ ತಾಂಚಾ ಸದಾಂಚಾ ಠಿಕಾಣ್ಯಾರ್ ಗಾಡಿ-ಬೊಯ್ಲಾಂಕ್ ವಿಶೆವ್ ದೀವ್ನ್ ತಾಂಚಿಂ ಖಾಸ್ಗಿ ಕಾಮಾಂ ಕರುಂಕ್ ಮೆಟಾಂ ಕಾಡ್ಲಿಂ. ಪಿಂತಾಮ್ ತಾಚ್ಯೆ ಮ್ಹಿನತೆಚೆಂ ಲೇಕ್ ಕರ್ನ್ ಥೊಡೆ ಪಯ್ಶೆ ಕಾಣ್ಘೆಂವ್ಚಾ ಖಾತಿರ್, ಬೆಜ್ಮಿಕ್ ಸಾಂಗಾತಾ ಕಾಣ್ಘೆವ್ನ್ ಸಾವ್ಕಾರಾಚಾ ಘರಾ ಫಳ್ನೀರಾಕ್ ಆಯ್ಲೊ. ತ್ಯಾ ವೆಳಾರ್ ಸಾವ್ಕಾರ್ ಘರಾಂತ್ ನಾತ್ಲ್ಲೊ. ತೊ ಘಾಟಾ ಥಾವ್ನ್ ಯೆಂವ್ಚೊ ಆಸ್ಲ್ಲೊ. ಪುಣ್, ತ್ಯಾ ದೀಸ್ ಗಾಂವಾಕ್ ತೊ ಪಾವೊಂಕ್ ನಾತ್ಲ್ಲೊ. ತಶೆಂ ಜಾಲ್ಲ್ಯಾನ್ ಪಿಂತಾಮಾನ್ ತತ್ಕಾಲಾಕ್ ಸಾವ್ಕಾರ್ನಿ ಲಾಗ್ಚೆ ಪಯ್ಶೆ ಕಾಣೆಂವ್ಚಾ ಇರಾದ್ಯಾನ್ ಕುಲೊ ತೆಂಕಿತ್ತ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ. ತ್ಯಾ ವೆಳಾರ್ ಸಾವ್ಕಾರ್ನಿಚಿ ಬೆಜ್ಮಿಚೆರ್ ಪಡ್ಲಿ ಆನಿಂ ತಿಣೆಂ ತಾಚೊ ವಿಚಾರ್ ಕೆಲೊ. ಪಿಂತಾಮಾನ್ ಸತ್ ಗಜಾಲ್ ವಿವರ್ಸಿಲಿ. ತೆಂ ಆಯ್ಕೊನ್ "ತರ್ ತೊ ಭುರ್ಗೊ ಆಮ್ಕಾಂ ಆಸೊಂದಿ. ಘರಾಂತ್ಲ್ಯಾ ಬಾರಿಕ್ ಕಾಮಾಕ್ ಉಪ್ಕಾರ್ತಾಲೊ..........ಕಾಂಯ್ ನ್ಹಂಯ್ ಜಾಲ್ಯಾರ್ ಭುರ್ಗ್ಯಾಕ್ ಖೆಳಂವ್ಕ್ ಪುಣಿ ಜಾವ್ಯೆತ್" ಮ್ಹಣಾಲಿ ಸಾವ್ಕಾರ್ನ್.
ಪಿಂತಾಮ್ ಚಿಂತುಂಕ್ ಪಡ್ಲೊ. ಭುರ್ಗೊ ತಾಕಾಯಿ ಜಾಯ್ ಆಸ್ಲ್ಲೊ. ಪುಣ್ ಸಾವ್ಕಾರ್ನ್ ವಿಚಾರ್ತಾನಾ.........ತ್ಯಾ ಶಿವಾಯ್ ಪಯ್ಶೆಯಿ ಕಾಣ್ಘೆಂವ್ಕ್ ಆಸಾತ್. ತ್ಯಾ ದೆಕುನ್.....................ಸಾವ್ಕಾರ್ನಿಚೆಂ ಮನ್ ಸಮಾಧಾನ್ ಕರ್ಚಾ ಖಾತಿರ್ "ಹಾಂ................ಆಸೊಂದಿ" ಮ್ಹಣಾಲೊ ಪಿಂತಾಮ್ ಕಶ್ಟಾಂನಿ ಸುಸ್ಕಾರಿತ್ತ್. ತ್ಯಾ ಉಪ್ರಾಂತ್ ತಾಣೆಂ ಪಯ್ಶಾಂಚೊ ಪ್ರಸ್ತಾಪ್ ಕಾಡ್ಲೊ. ಸಾವ್ಕಾರ್ನಿನ್ ತಾಚಾ ಮಾಗ್ಣ್ಯಾ ಪ್ರಾಸ್ ಚಡಿತ್ ಪಯ್ಶೆ ದೀವ್ನ್ ಸಂತೊಸಾನ್ ತಾಕಾ ಧಾಡ್ಲೊ. ಬೆಜ್ಮಿ ಸಾವ್ಕಾರ್ನಿಚೆ ಸ್ವಾಧೀನ್ ಜಾಲೊ. ತಿಚಾಚ್ ಘರ್ಕಾರಾಚಾ ತೊಟಾಂತ್ ಬೆಜ್ಮಿಚಿ ಆವಯ್ ಘೊಳ್ತಾಲಿ ಮ್ಹಣ್ ಸಾವ್ಕಾರಿಕ್ ಕಳಿತ್ ನಾತ್ಲ್ಲೆಂ.
ಚಾರ್ ದೀಸ್ ಸಾವ್ಕಾರಿಕ್ ಬೆಜ್ಮಿಚೆಂ ಮೊನೆಪಣ್ ಬರೆಂ ಸೊಬ್ಲೆಂ ಪುಣ್ ಪಾಂಚ್ವ್ಯಾ ದಿಸಾ ತಾಚೊ ತಿಕಾ ಕಾಂಠಾಳೊ ಆಯ್ಲೊ. ಕಾರಣ್ ತೊ ಕೆಪ್ಪೊ. ಏಕ್ ಸಾಂಗ್ಲ್ಯಾರ್ ಆನ್ಯೇಕ್ ಕರ್ತಾ. ಜೆವ್ಣಾಕ್ ತಾಚಾ ಮೀತ್ಚ್ ನಾ. ಕಿತ್ಲೆಂ ವಾಡ್ಲ್ಯಾರ್ಯಿ ಜೆವ್ತಾ. ಬುಧ್ವಂತ್ಕಾಯ್ ಬಿಲ್ಕುಲ್ ನಾ. ರೀತ್ - ರಿವಾಜ್ ಕಸಲೆಂಚ್ ನೆಣಾಂ. ’ಹಿ ವಾಟೆನ್ ವೆಚಿ ಪಿಡಾ ಕಿತ್ಯಾಕ್ ಮಾಗೊನ್ ಕಾಣ್ಘೆಲಿ?’ ಮ್ಹಣ್ ಸಾವ್ಕಾರ್ನ್ ಚಿಂತುಂಕ್ ಪಡ್ಲಿ. ’ತ್ಯಾ ಶಿವಾಯ್ ತೊ ಜಾತಿನ್ ಕೋಣ್ ಆನಿಂ ತಾಚೆಂ ನಾಂವ್ ಕಿತೆಂ ಮ್ಹಳ್ಳೆಂ ದೇವ್ಚ್ ಜಾಣಾ. ನಿಜಾಯ್ಕಿ ಬೆಪ್ಪಾ ಆನಿಂ ಬೊಮ್ಮಾ’
ಬೆಜ್ಮಿ ತಿಕಾ ಬಿಲ್ಕುಲ್ ನಾಕಾ ಜಾಲೊ. ತಾಕಾ ಪಾಟಿ ದೀಂವ್ಕ್ ಪಿಂತಾಮಾಚಿ ತಿಣೆಂ ವಾಟ್ ರಾಕ್ಲಿ. ಪುಣ್ ಪಿಂತಾಮ್ ಸಬಾರ್ ದೀಸ್ ಪರ್ಯಾಂತ್ ಆಯ್ಲೊನಾ. ಬದ್ಲಾಕ್ ತಿಚೊ ಘರ್ಕಾರ್ ಘಾಟಾರ್ ಥಾವ್ನ್ ಆಯ್ಲೊ.
ತಿಚೊ ಘರ್ಕಾರ್, ಘಾಟಾ ಸಾವ್ಕಾರ್ ತೆಲಿಸಾಬ್, ದಯಾಳ್ ಆನಿಂ ಮೊಗಾಳ್. ಘರ್ ಬಿತರ್ ಸರ್ತಾನಾಂಚ್ ತಾಣೆಂ ವಿಚಾರ್ಲೆಂ. "ಭುರ್ಗೊ ಕೊಣಾಚೊ ಹೊ?"
ಲೆತ್ತಿಬಾಯೆನ್ ಘಡ್ಲ್ಲಿ ಗಜಾಲ್ ಸಾಂಗ್ಲಿಂ ಆನಿಂ ಮ್ಹಳೆಂ: "ಚೆರ್ಕೊ ಮಾತ್ರ್ ಬೆಪ್ಪಾ ಆನಿಂ ಬೊಮ್ಮಾ.......... ಕಾಸಾಕ್ ಪ್ರಯೋಜನಾಕ್ ಪಡ್ಚೊ ಭುರ್ಗೊ ನ್ಹಂಯ್".
ತಶೆಂ ಲೆತ್ತಿಬಾಯೆನ್ ಸಾಂಗ್ತಾನಾ, ತೆಲಿಸಾಬ್ ಕಪಾಲಾಕ್ ಮಿರಿಯೊ ಘಾಲಿತ್ತ್ ಆಕ್ಲಾಸಿತ್ತ್ ಮ್ಹಣಾಲೊ: "ಕಾಂಯ್ ತೊಚ್ ಹೊ ಭುರ್ಗೊ ನ್ಹಂಯ್ಮೂ. ಆಮ್ಚೊ ರೈಟರ್ ಸಾಂಗ್ತಾಲೊ. ಆಮ್ಚಾ ತೊಟಾಂತ್ ದೆಲ್ಪಿನ್ ನಾಂವಾಚಿ ಎಕ್ಲಿ ಸ್ತ್ರೀ ಆಳ್ ಆಸ್ಲ್ಲಿ ಖಂಯ್.....ತಿಚಾ ಮೊಡ್ಯಾಕ್ ಘಾಣ್ ಪಡ್ಲ್ಯಾ ಉಪ್ರಾಂತ್ ತಾಣೆಂ ಜಣಾಂಕ್ ಧರ್ನ್ ಮಾತ್ಯೆಕ್ ಪಾಯ್ಲೆಂ ಖಂಯ್.........ತಿಕಾ ಏಕ್ ಲ್ಹಾನ್ ಪೂತ್ ಆಸ್ಲ್ಲೊ ಖಂಯ್. ತಾಚೊ ಪಾತ್ತೊಚ್ ನಾ ಮ್ಹಣ್ ಟೋ ಸಾಂಗ್ತಾಲೊ. ಕಾಂಯ್ ಹೊಚ್ ತೊ ನಹಿಮೂ?"
"ಪುಣ್ ಹೊ ಭುರ್ಗೊ ಪಿಂತಾಮಾಕ್ ವಾಟೆರ್ ಮೆಳ್ಲ್ಲೊ ಖಂಯ್" ಲೆತ್ತಿಬಾಯ್ ಮ್ಹಣಾಲಿ.
"ತರ್ ಹೊ ಕಾಂಯ್ ದುಸ್ರೊ ಭುರ್ಗೊ ಜಾವ್ಯೆತ್" ತೆಲಿಸಾಬಾನ್ ತಾಚ್ಯೆ ಮತಿಕ್ ಸಮಾಧಾನ್ ಕೆಲೆಂ ಆನಿಂ ಮುಖಾರ್ಸುನ್ ಮ್ಹಳೆಂ "ಲೆತ್ತಿ ತಾಕಾ ಖುಶೆನ್ ತುಂವೆಂ ಕಾಣ್ಘೆಲಾಯ್ ದೆಕುನ್ ಸಂತೊಸಾನ್ ತೊ ಆಸೊಂದಿ.........ಮ್ಹಾರ್ ಜಾಂವ್ ಕೊರ್ಗೊ ಜಾಂವ್, ಆಖೇರಿಕ್ ದೆವಾನ್ ರಚ್ಲ್ಲೊ ತೊಯಿ ಏಕ್ ಮನಿಸ್. ದೆಕುನ್ ಕಾಂಠಾಳ್ನಾಕಾ. ಸಂಸಾರಾಂತ್ ಏಕ್ ದೀಸ್ ತಾಚಿಯಿ ಗರ್ಜ್ ಪಡಾತ್"
"ಪುಣ್ ತಾಕಾ ರೀತ್ ನಾ; ಖಾಂವ್ಚಾ-ಜೆಂವ್ಚಾಂತ್ ಮೀತ್ ನಾ. ತಾಕಾ ಕೊಣೆಂ ಸಾಂಬಾಳ್ಚೊ" ಲೆತ್ತಿಬಾಯ್ ಗುಣ್ಗುಣ್ಲಿ.
ತೆಂ ಆಯ್ಕೊನ್ ತೆಲಿಸಾಬ್ ಘನಾನ್ ಹಾಸ್ಲೊ ಆನಿಂ ದೊಳೆ ರುಂದಾಯಿತ್ತ್ ಮ್ಹಣಾಲೊ. "ಲೆತ್ತಿ, ಆಮ್ಚಾ ಸುಣ್ಯಾಂನಿ ಖಾಂವ್ಚಾ ಪ್ರಾಸ್ ಚಡಿತ್ ತೊ ಖಾಂವ್ಚೊನಾ; ಆಮ್ಗೆರ್ ಶಿಂಪೊನ್ ವೆಚಾ ಪ್ರಾಸ್ ಚಡ್ ತೊ ಜೆಂವ್ಚೊನಾ. ದೆಕುನ್ ಆಸೊದಿ..........ಸಾಂಬಾಳ್ಚೆಂ ದೆವಾನ್" ಮ್ಹಣಾತ್ತ್ ತಾಣೆಂ ಬೆಜ್ಮಿಕ್ ಲಾಗಿಂ ಆಪವ್ನ್ ತಾಚಿ ತಕ್ಲಿ ಪೊಶೆಲಿ ಆನಿಂ ಲೆತ್ತಿ ಬಾಯೆಕ್ ಸಾಂಗ್ಲೆಂ; " ಆಜ್ಚ್ ತಾಕಾ ದೊ- ದೋನ್ ಜೊಡಿ ಮುಸ್ತಾಯ್ಕಿ ಕರಯ್".
ತಿತ್ಲೆಂ ತೆಲಿಸಾಬಾಚಾ ಗರಾಂತ್ ತಾಚಾ ಭುರ್ಗ್ಯಾಂ ಸಾಂಗಾಂತಾ ಖೆಳೊನ್ ದೀಸ್ ಪಾಶಾರ್ ಕರ್ತಾಲೊ. ತೆಲಿಸಾಬ್ ಘರಾಂತ್ ಆಸ್ಲ್ಯಾರ್ ಮಾತ್ರ್ ಬೆಜ್ಮಿಕ್ ಸುಖ್ ಆನಿಂ ಸಮಾಧಾನ್. ತೊ ಘರಾಂತ್ ನಾ ಜಾಲ್ಯಾರ್ ಬೆಜ್ಮಿಕ್ ಲೆತ್ತಿಬಾಯೆಚ್ಯೊ ಧಮ್ಕ್ಯೊ ಆನಿಂ ಥಾಪ್ಡಾಂ. ತರೀ, ಬೆಜ್ಮಿಕ್ ದುಃಖ್ ಆನಿಂ ಬೆಜಾರಾಯ್ ಮ್ಹಣ್ ನಾ. ತೊ ರಡೊಂಕ್ ನೆಣಾ. ತಾಚಾ ದೊಳ್ಯಾಂತ್ಲ್ಯಾನ್ ಧುಃಖ್ ಬಿಲ್ಕುಲ್ ದೆವಾನಾತ್ಲ್ಲೆಂ. ತಿಚ್ ಏಕ್ ವಿಚಿತ್ರ್ ಗಜಾಲ್ ಲೆತ್ತಿಬಾಯ್ ತಕ್ಲೆಂತ್ ಆಟವ್ನ್, ತಾಕಾ ಮಾರ್ತಾನಾ ತಿ ಮ್ಹಣ್ತಾಲಿ "ಹ್ಯಾ ಚೆಡ್ಯಾಚಾ ಅಂಗಾಂತ್ ರಗತ್ ಆಸಾ ಯಾ ನಾ. ಮಾರ್ಲ್ಯಾರ್ ಆನಿಂ ಚಾಚಾಯ್ಲ್ಯಾರ್ ಲೆಗುನ್ ತೊ ರಡಾನಾ ಮ್ಹಳ್ಯಾರ್ ಕಿತೆಂ?" ಲೆತ್ತಿಬಾಯೆಕ್ ತಾಚೊ ತೊ ಏಕ್ ಗೂಣ್ ಮಿಸ್ತೆರ್ ಜಾಲ್ಲೊ.. ಜಾಲ್ಯಾರಿ, ಬೆಜ್ಮಿ ತಿಕಾ ’ಶಿತಾಕ್ ಖಾರ್ ಆನಿಂ ಥರ್ಣಿಕ್ ಭಾರ್’ ಮ್ಹಳ್ಳ್ಯಾಬರಿ ಘರಾಂತ್ ಕೊಯ್ರ್ಸೊ ದಿಸ್ತಾಲೊ. ತಾಕಾ ದೆಕ್ತಾನಾ ತಿಕಾ ರಾಗ್ ಆನಿಂ ಕ್ರೋಧ್ ಭರ್ತಾಲೊ. ಕಂಯ್ ಏಕ್ ಪಾವ್ಟಿಂ ತಾಕಾ ಘರಾ ಭಾಯ್ರ್ ಕರಿನ್ಶೆಂ ತಿಕಾ ಭೊಗ್ತಾಲೆಂ. ತಾಕಾ ಧಾಂವ್ಡಾಂವ್ಕ್ ತಿ ರಾತ್ ದೀಸ್ ಚಿಂತಾಲಿ. ಪುಣ್ ಘರ್ಕಾರಾಚಾ ಬಿಂಯಾಕ್ ತಿ ಪಾಟಿಂ ಸರ್ತಾಲಿ. ಜಾಲ್ಯಾರಿ ಏಕ್ ದೀಸ್ ತಿಣೆಂ ಆಲೋಚನ್ ಕೆಲಿಚ್ . ಧೈರ್ ಕಾಣ್ಘೆಲೆಂಚ್. ತೆಲಿಸಾಬ್ ಘಾಟಾರ್ ಗೆಲ್ಲ್ಯಾ ವೆಳಾರ್ ತಿಕಾ ಸಯ್ರೊ ಲೆಕ್ಚಾ ಎಕಾ ಮನ್ಶಾ ಮುಖಾಂತ್ರ್ ತಿಣೆಂ ಬೆಜ್ಮಿಕ್ ಕುದ್ರೊಳಿ ವ್ಹರ್ನ್ ಸೊಡುಂಕ್ ಸಾಂಗ್ಲೆಂ.
ಗಿನ್ಯಾನ್ ಆನಿಂ ಸಮ್ಜೊಣಿ ನಾತ್ಲ್ಲೊ ಭುರ್ಗೊ, ಬೆಜ್ಮಿ, ವಾಟೆಚಿ ವಳಕ್ ನಾಸ್ತಾನಾ ತ್ಯಾ ದೀಸ್ ಕುದ್ರೋಳಿ ಮಾಪ್ಳ್ಯಾಂಚ್ಯೆ ಕೇರಿಂತ್ ಘುಸ್ಪುಡೊನ್ ಉರ್ಲೊ. ವಾಟೆನ್ ವೆಚಾ ಸಬಾರ್ ಲೊಕಾನ್ ತಾಕಾ ಪಳೆಲೆಂ. ಪುಣ್ ಕೋಣ್ಂಚ್ ತಾಚೆಲಾಗಿಂ ಉಲಯ್ಲೆನಾಂತ್. ಬೆಜ್ಮಿ ದಿಸ್ಲ್ಲ್ಯೆ ವಾಟೆನ್ ಚಲ್ತಾಲೊ. ಮೆಳ್ಲ್ಲ್ಯಾ ಮಾರ್ಗಾಕ್ ಘುಂವ್ತಾಲೊ. ಸಾಂಜ್ ಜಾವ್ನ್ ಆನಿಂ ರಾತ್ ಜಾಲಿ. ಜಾಲ್ಯಾರಿ, ಬೆಜ್ಮಿ ಗೆಲ್ಲೆ ವಾಟೆನ್ ಪರತ್ ಪರತ್ ಭಂವ್ತಾಲೊ. ತಾಕಾ ಭುಕ್ ಲಾಗ್ತಾಲಿ. ಸಾಂಗಾತಾಚ್ಚ್ ನೀದ್ಯಿ ಯೆತಾಲಿ. ಜಾಲ್ಯಾರಿ ಸದಾಂಚಿಂ ಮನ್ಶಾಂ ದಿಸಾನಾಂತ್ ಕಿತ್ಯಾಕ್? ತಿಂ ಖಂಯ್ ಗೆಲಿಂ? ಬೆಜ್ಮಿಚೆಂ ಚಿಂತಾಪ್ ವಿಂಗಡ್ಚ್. ತೊ ಲೆತ್ತಿಬಾಯೆಕ್ ಆನಿಂ ತಿಚಾ ಭುರ್ಗ್ಯಾಂಕ್ ಸೊಧ್ತಾಲೊ. ರಾತಿಚಿ ವೊರಾಂ ಧಾ ಜಾಲಿಂ. ಬೆಜ್ಮಿ ನಿದೆನ್ ಪಿಕ್ಲೊ. ದೆಕುನ್ ಎಕಾ ಅಂಗ್ಡಿಚಾ ಬಾಗ್ಲಾರ್ ನಿದ್ಲೊ.
ಭುಕೆಚಾ ಜಾಳಾಂನಿ ಬೆಜ್ಮಿಕ್ ಘಡ್ಯೆ ಘಡ್ಯೆ ಜಾಗ್ ಜಾತಾಲಿ. ಜಾಲ್ಯಾರಿ ಕಾಳೊಕ್ ಆಸಾ ಮ್ಹಣ್ ತೊ ನಿದ್ತಾಲೊ. ಪುಣ್ ಸಕಾಳಿಂ ಉಟ್ತಾನಾ ತಿ ಅಂಗಡ್ ಬಿಡೆ-ಬಿಡಿಯೋ ಫಳಾಂ ಇತ್ಯಾದಿ ವಿಕ್ಚಿ ಜಾವ್ನಾಸ್ಲ್ಲಿ. ದಿಸಾಕ್ ವಿಕ್ಲ್ಲಿ ಆಡ್ಸಾರಾಂ ಪಿಯೆವ್ನ್ ಲೊಕಾನ್ ಉಡಯಿಲ್ಲಿಂ ತ್ಯಾ ಅಂಗ್ಡಿ ಬಾಗ್ಲಾರ್ ಚರಂಡಿತ್ ಬೆಜ್ಮಿನ್ ದೆಕ್ಲಿಂ. ಬೆಜ್ಮಿನ್ ಉಟೊನ್ ತ್ಯಾ ಬೊಂಬಾಟ್ಯಾನಿ ಹಾತ್ ಘಾಲೊ. ತ್ಯಾ ಬೊಂಬಾಟ್ಯಾಂನಿ ಮೆಳ್ಲ್ಲಿ ನಾರ್ಲಾಚಿ ಸಾಯಿ ಆನಿಂ ಕಾಂತ್ಳಿ ಖಾವ್ನ್ ಬೆಜ್ಮಿಚಿ ಭುಕ್ ಚಿಕ್ಕೆ ಥಾಂಬ್ಲಿ. ತಿತ್ಲ್ಯಾರ್ ಅಂಗಡ್ಗಾರ್ ಮಾಪ್ಳಿ ಅಂಗ್ಡಿಚೆಂ ದಾರ್ ಉಗ್ತೆಂ ಕರುಂಕ್ ಆಯ್ಲೊ. ತಾಣೆಂ ಬೆಜ್ಮಿಕ್ ಚರಂಡಿತ್ ಪಳೆವ್ನ್ ಗೊವ್ಜಿ ಕೆಲಿ. ಜಾಲ್ಯಾರಿ ಬೆಜ್ಮಿಚಾ ಹಾತಾಂತ್ಲೆ ಸುಟ್ಲೆಂನಾ. ಮಾಪ್ಳ್ಯಾನ್ ಧಮ್ಕೆ ಬರಾಬರ್ ಬೆಜ್ಮಿಚಾ ಕಾನಾಕ್ ಧರ್ನ್ "ಊಟ್" ಮ್ಹಳೆಂ. "ತೆಂ ಉಸ್ಟೆಂ ಖಾಯ್ನಾಕಾ"
ಬೆಜ್ಮಿನ್ "ಥ...ಥ..........ಥಾ...ಬ ಬ ಬಾಅ" ಕರ್ನ್ ತಾಚ್ಯಾ ಮೊನ್ಯಾ ಭಾಶೆನ್ ಜವಾಬ್ ದಿಲಿ.
ಮಾಪ್ಳ್ಯಾಕ್ ಬೆಜ್ಮಿಚೆರ್ ದಯಾ ಆಯ್ಲಿ. ತಾಣೆಂ ಅಂಗಡ್ ಉಗ್ತಿ ಕರ್ನ್ - ಅಂಗ್ಡಿಚೆಂ ಬಾಗಿಲ್ ಝಾಡುಂಕ್ ಬೆಜ್ಮಿಕ್ ಸಾರೊಣ್ ದಿಲಿ.
ಬೆಜ್ಮಿ ಝಾಡ್ತಾನಾ ಆನಿಂ ಅಂಗ್ಡಿ ಗಿರಾಯ್ಕ್ ಯೆತಾನಾ "ಕೋಣ್ ಭುರ್ಗೊ..? ಖಂಯ್ಚೊ?" ಇತ್ಯಾದಿ ಉತ್ರಾಂನಿಂ ಅಂಗಡ್ಗಾರಾ ಆನಿಂ ತಾಚಾ ಗಿರಾಯ್ಕಾಂ ಮಧೆಂ ಸಂಭಾಶಣ್ ಚಲ್ಲೆಂ - ಹೆರಾಂನಿಯಿ ಆಯ್ಕಾಲೆಂ - ಆಯ್ಕಾಲ್ಲ್ಯಾಂನಿ ಬೆಜ್ಮಿಕ್ ವಿಚಾರ್ಲೆಂ. ಪುಣ್ ಬೆಜಿಮ್ ಮೊನೊ. ತಾಚಿ ಜವಾಬ್ ಕೋಣಾಕ್ಚ್ ಸಮ್ಜಾನಾತ್ಲ್ಲಿ. ತಾಚಿ ಜಾತ್ ಲೆಗುನ್ ಕೊಣಾಕ್ಚ್ ಕಳಾನಾತ್ಲ್ಲಿ. ಕಾರಣ್ ಬೆಜ್ಮಿಕ್ ಪಯ್ಸ್ ವರ್ನ್ ಸೊಡುಂಕ್ ಆಲೋಚನ್ ಕರ್ತಾನಾ - ಲೆತ್ತಿಬಾಯೆನ್ ತಾಚಾ ಗಳ್ಯಾಂತ್ ಆಸ್ಲ್ಲಿ ರುಪ್ಯಾಚಿ ಸರ್ಪಳಿ ಆನಿಂ ಖುರಿಸ್ ಕಾಡ್ಲ್ಲೊ. ತಿ ಸರ್ಪಳಿ ತೆಲಿಸಾಬಾನ್ ಕರವ್ನ್ ಬೆಜ್ಮಿಚಾ ಗಳ್ಯಾಂತ್ ಘಾಲ್ಲಿ. ಪುಣ್ ಲೆತ್ತಿಬಾಯೆನ್ ರುಪ್ಯಾಚ್ಯೆ ಆಶೆನ್ ನಿಕ್ಳಾವ್ನ್ ದವರ್ಲ್ಲಿ. ತಶೆಂ ಜಾಲ್ಲ್ಯಾನ್ ಬೆಜ್ಮಿ ಖಂಚಾ ಧರ್ಮಾಚೊ ಮ್ಹಳ್ಳೆಂ ಲೆಗುನ್ ಕೊಣಾಕ್ಚ್ ಕಳ್ಳೆಂನಾ.
ಥೊಡ್ಯಾ ವೆಳಾನ್ ಅಂಗಡ್ಗಾರ್ ಮಾಪ್ಳ್ಯಾನ್ ಬೆಜ್ಮಿಕ್ ಕಾಫಿ ಆನಿಂ ಪೊಳೊ ಹಾಡವ್ನ್ ದಿಲೊ. ಪಾಡ್ ಜಾಲ್ಲಿಂ ಥೊಡಿಂ ಕೆಳಿಂ ತಾಚಾ ಹಾತಾರ್ ಉಡಯ್ಲಿಂ. ದಿಲ್ಲೆಂ ತಿತ್ಲೆಂಯಿ ಖಾವ್ನ್ ಬೆಜ್ಮಿ ತ್ಯಾಚ್ ಅಂಗ್ಡಿಚಾ ಬಾಗ್ಲಾರ್ ರಾವ್ಲೊ. ತೆಂ ಪಳೆವ್ನ್ ಅಂಗಡ್ಗಾರಾನ್ ತಾಚಿ ಬಾರಿಕ್ ಬಾರಿಕ್ ಕಾಮಾಂ ಬೆಜ್ಮಿ ಕರ್ನಾ ಕರಯ್ಲಿಂ. ಪುಣ್ ಸಾಂಜ್ ಜಾಯ್ಜಾಯ್ ಜಾಲ್ಯಾರ್ ಅಂಗಡ್ಗಾರಾಕ್ ಬೆಜ್ಮಿ ಗಿನ್ಯಾನ್ ನಾತ್ಲ್ಲೊ ಭುರ್ಗೊ, ಬೊಮ್ಮಾ ಆನಿಂ ಬೆಪ್ಪಾ ಮ್ಹಳ್ಳೆಂ ಸ್ವಷ್ಟ್ ಕಳ್ಳೆಂ. ಅಂಗ್ಡಿ ಆಯಿಲ್ಲ್ಯಾ ಗಿರಾಯ್ಕಾಂನಿ ಆನಿಂ ತಾಚೆಲಾಗಿಂ ಉಲಯಿಲ್ಲ್ಯಾ ಸರ್ವಾಂನಿಯಿ ತಾಕಾ ಬೆಪ್ಪಾ ಆನಿಂ ಬೊಮ್ಮಾ ಮ್ಹಣ್ ನಾಂವ್ ಘಾಲೆಂ. ತೆಂ ನಾಂವ್ ಕ್ಷಣಾ ಭಿತರ್ ತೆಣೆಂ ಮಾರ್ಗಾರ್ ಖೆಳೊನ್ ಆಸ್ಲ್ಲ್ಯಾ ಭುರ್ಗ್ಯಾಂನಿ ಬೆಜ್ಮಿಕ್ ಧೊಸುಂಕ್ ಆರಂಭ್ ಕೆಲೆ. ಪುಣ್ ಅಂಗಡ್ಗಾರಾನ್ ಬೆಜ್ಮಿಕ್ ರಾಕ್ಲೊ.
ಬೆಜ್ಮಿ ವಚೊನ್ ಎಕಾ ಹಾಫ್ತ್ಯಾನ್, ಘಾಟಾಕ್ ಗೆಲ್ಲೊ ತೆಲಿಸಾಬ್ ಪಾಟಿಂ ಗಾಂವಾಕ್ ಆಯ್ಲೊ. ಘರಾಂತ್ ಬೆಜ್ಮಿ ನಾತ್ಲ್ಲೊ ಪಳೆವ್ನ್ ಘರ್ಗಾರ್ನಿಕ್ ತಾಣೆಂ ವಿಚಾರ್ಲೆಂ. "ಬೆಜ್ಮಿ ಖಂಯ್ ಗೆಲಾ?"
"ತೊವೇ ಹಾಫ್ತೊ ಜಾಲೊ, ದಿಸಾನಾ. ಭಾಯ್ರ್ ಖೆಳೊನ್ ಆಸ್ಲ್ಲೊ. ಖಂಯ್ ಗೆಲೊ ಮ್ಹಣ್ ಕೋಣ್ ಜಾಣಾ. ಸದಾಂಚ್ ಹಾಂವ್ ಸಾಂಗ್ತಾಲಿಂ ಭಾಯ್ರ್ ಮಾರ್ಗಾಕ್ ವಚಾನಾಕಾ. ಪುಣ್ ತ್ಯಾ ದೀಸ್.......... ತಾಚೊ ಪಾತ್ತೊಚ್ ನಾ" ಲೆತ್ತಿಬಾಯೆನ್ ಬಾರಿಕ್ ನೆರಾಯ್ಲೆಂ ಖಂತಿಷ್ಟ್ ತಾಳ್ಯಾನ್.
"ತ್ಯಾ ಬಾಬ್ತಿನ್, ತುವೆಂ ಕಸಲಿಯೀ ಮ್ಹಿನತ್ ಕಾಣ್ಘೆಲ್ಯಾಯ್ವೆ?" ತೆಲಿಸಾಬಾನ್ ತಾಳೊ ಖರ್ಕಸ್ ಕೆಲೊ.
ಲೆತ್ತಿಬಾಯ್ ಉಸ್ಮಡ್ಲಿ.
"ವ್ಹಯ್.....ತುಂ ತಾಚಿ ಆವಯ್ ನ್ಹಂಯ್....." ತೆಲಿಸಾಬಾನ್ ಕದೆಲಾರ್ ಬಸೊನ್ ದೀರ್ಘ್ ಶ್ವಾಸ್ ಸೊಡಿತ್ತ್ ಮ್ಹಳೆಂ, " ಪತಿ ಪಾಟ್ಲ್ಯಾನ್ ಪತಿಣ್ ವೆತಾ - ತೊ ಯೋಗ್ಯ್ ಆಸಾತ್ ಜಾಲ್ಯಾರ್..... ಭಾವಾ ಪಾಟ್ಲ್ಯಾನ್ ಭಯ್ಣ್ ವೆತಾ- ತೊ ಕಾಂಯ್ ದಿತಾ ಜಾಲ್ಯಾರ್ ...........ಆನಿಂ ಪುತಾ ಪಾಟ್ಲ್ಯಾನ್ ಆವಯ್ ವೆತಾ--- ಆವಯ್ಪಣ್ ರಡ್ತಾ ಜಾಲ್ಯಾರ್.....ನೋವ್ ಮಹಿನ್ಯಾಂಚೆಂ ವೊಜೆಂ ದೆಕುನ್ ಭುರ್ಗ್ಯಾಂಚೆಂ ಕಜೆಂ ಆವಯ್ ಪುಸ್ತಾ.....ಬಾಂಳ್ತೆರಾಚಿ ದೂಃಖ್ ತಿಕಾ ಜಿಣಿಯೆಂತ್ ಉಗ್ಡಾಸ್ ಹಾಡ್ತಾ.....ತರ್ ತುಂ ತಾಚೆ ಖಾತಿರ್ ಕೋಣ್...?"
ತಶೆಂ ತೊ ಉಲಯ್ತಾನಾ - ತಾಚೊ ಎಕ್ಲೊ ಈಷ್ಟ್ ಗರ್ಜೆಚಾ ಕಾಮಾನ್ ಯೇವ್ನ್ ಪಾವ್ಲೊ. ತ್ಯಾ ಇಷ್ಟಾ ಸಾಂಗಾಂತಾ ತೆಲಿಸಾಬ್ ಮಲ್ಪೆ ವಚೊಂಕ್ ಭಾಯ್ರ್ ಸರ್ಲೊ. ತಶೆಂ ಜಾಲ್ಲ್ಯಾನ್ ಉಪ್ರಾಂತ್ ತಾಕಾ ಬೆಜ್ಮಿಚೊ ಉಗ್ಡಾಸ್ ಉರ್ಲೊನಾ. ಪಯ್ಣಾರ್ ಮಂಜೆಂತ್ ಬಸ್ಲ್ಲೆಕಡೆ ಇಷ್ಟಾಚಾ ಗಜಾಲಿಂನಿ ತೊ ಸರ್ವ್ ವಿಸರ್ಲೊ. ಆಟ್ ದಿಸಾಂನಿ ಪಾಟಿಂ ಯೆತಾನಾ, ತಾಕಾ ಬೆಜ್ಮಿಚಾ ಗಜಾಲಿಚಿ ಚತ್ರಾಯಿಚ್ ಉರ್ಲಿನಾ. ಹಜಾರ್ ರಾಟಾವಳಿಂಚೊ ಮನಿಸ್ ತೊ - ಏಕ್ ಕಾಮ್ ತಿರ್ಸಾತಾನಾ ತಾಕಾ ದುಸ್ರೆಂ ಕಾಮ್ ತೆಂಕ್ತಾಲೆಂ. ತಶೆಂ ಜಾಲ್ಲ್ಯಾನ್, ತ್ಯಾ ಉಪ್ರಾಂತ್ ತಾಣೆಂ ಬೆಜ್ಮಿ ವಿಶ್ಯಾಂತ್ ಗುಮಾನ್ ಕೆಲೆಂನಾ.
ಬೆಜ್ಮಿ ತ್ಯಾ ಅಂಗ್ಡಿ ಬಾಗ್ಲಾರ್ ತಾಚಾ ಜಿವಿತಾಚೆ ದೀಸ್ ಪಾಶಾರ್ ಕರ್ತಾನಾ, ತಾಚಾ ಆಂಗಾರ್ ಆಸ್ಲ್ಲಿ ಮುಸ್ತಾಯ್ಕಿ ಮ್ಹೆಳಿ ಜಾಲಿ ಆನಿಂ ಕುಡಿಚಿ ಕಾತ್ ಚಿಕ್ಲಾನ್ ಭರ್ಲಿ. ಪಾರ್ಪೊಳ್ ಭುರ್ಗ್ಯಾಂನಿ ತಾಕಾ ಚಿಡಾವ್ನ್ ಹೆಡಾವ್ನ್ ದೊಸ್ತಾನಾ, ತರ್ನಾಟ್ಯಾ ಯುವಕಾಂನಿ ತಮಾಶ್ಯಾಂ ಖಾತಿರ್ ಚಿಮ್ಟೆಂ ಆನಿಂ ಥಾಪ್ಡಾಂ ದಿಲಿಂ. ಥೊಡ್ಯಾಂನಿ ತಾಕಾ ಭೆಷ್ಟಾವ್ನ್ ಆನಿಂ ಧಮ್ಕುನ್ ಬಿಡಿಯಾಂಚಾ ಉಜ್ಯಾನ್ ದಾಗ್ತಾನಾ, ಥೊಡ್ಯಾಂನಿ ತಾಕಾ ಧಾಂವ್ಡಾವ್ನ್ ಲೊಟುನ್ ಆನಿಂ ವೊಡ್ನ್ ತಾಚಿ ಮುಸ್ತಾಯ್ಕಿ ಸಯ್ತ್ ಪಿಂಜ್ಲಿ. ಜಾಲ್ಯಾರಿ ಬೆಜ್ಮಿಕ್ ರಾಗ್ ನಾ, ಬೆಜಾರ್ ನಾ. ಕುಲೆ ಉಗ್ತೆ ಪಡ್ಲೆ ತರೀ, ತಾಕಾ ಲಜ್ ನಾ, ತಾಕಾ ಫಕತ್ತ್ ಖಾಂವ್ಕ್ ಆನಿಂ ಜೇಂವ್ಕ್ ಮೆಳ್ಳ್ಯಾರ್ ಜಾಲೆಂ.
ಥೊಡ್ಯಾಚ್ ತೆಂಪಾ ಬಿತರ್ ತೆಣೆಚ್ಯಾಂಕ್ ತೊ ವೊಳ್ಕಿಚೊ ಜಾಲೊ. ಥೊಡ್ಯಾಂನಿ ತಾಕಾ ಉರ್ಲ್ಲೆಂ-ಸಾಂಡ್ಲ್ಲೆಂ - ಉಸ್ಟ್ಯಾಚೆಂ ಜೇಂವ್ಕ್ ದಿಲೆಂ. ಥೊಡ್ಯಾಂನಿ ತಾಂಚಾ ಭುರ್ಗ್ಯಾಂಚೆಂ ಪಿಂಜ್ಲ್ಲೆಂ ವಸ್ತುರ್ ದೀವ್ನ್ ತಾಚಿ ಕೂಡ್ ಧಾಂಪ್ಲಿ. ಥೊಡ್ಯಾಂನಿ ದಾನ್ ದಿಲ್ಲೊ ಫಳ್ ಕಾಮ್ ಕರವ್ನ್ ಕಾಣ್ಘೆಲೊ. ತಾಂಚಾ ಘರಾಂನಿ ಆನಿಂ ಹಿತ್ಲಾಂನಿ ಮೆಲ್ಲಿ ಂ ಮಾಜ್ರಾಂ, ಉಂದಿರ್, ಕೊಳೆಂದ್ರ್ ವ ಮಾಜ್ರಾಂ, ಉಂದಿರ್ ವ ಸುಣಿ ತಾಚೆ ಕರ್ನಾ ಕಾಡಯ್ಲಿಂ. ಬೆಜ್ಮಿಕ್ ಘಾಣ್ ನಾ, ವೊಂಕಾರೊ ನಾ ಆನಿಂ ಕಾಂಠಾಳೊ ನಾ. ಕುಸೊನ್ ಕಿಡೆ ಪಡ್ಲ್ಲೆ ಉಂದಿರ್, ಕೊಳೆಂದ್ರ್ ವ ಮಾಜ್ರಾಂ ಸಹಿತ್ ತೊ ಹಾತಾನ್ ಪುಸುನ್ ಕಾಡ್ಟಾಲೊ. ಕಸಲ್ಯಾಯಿ ಘಾಣಿಂತ್ ಜಾಲ್ಯಾರಿ, ತೊ ಪಾಂಯ್ ಘಾಲ್ತಾಲೊ. ತ್ಯಾ ತಾಚಾ ಚಿಲ್ಲರ್ ವಾವ್ರಾಕ್ ಬೆಳ್ಶೆಲ್ಲೆಂ, ಫುಂರ್ಗೆಲ್ಲೆಂ ಖಾಂವ್ಕ್ ಮೆಳ್ಳ್ಯಾರಿ, ತಾಕಾ ಸಂತೊಸ್, ನಾಣೆಂ ಘೆಂವ್ಕ್ ತೊ ನೆಣಾಂಚ್. ಆನಿಂ ದಿಂವ್ಚೊಯಿ ಕೊಣಿ ನಾತ್ಲ್ಲೊ. ಕಾರಾಣ್ ಬೆಜ್ಮಿ ವಾಟೆಚೊ ಭುರ್ಗೊ. ಲೋಕ್ ತಾಚೊ ಮಾಯ್ - ಬಾಪ್. ಆಂಗ್ಡಿಚೆಂ ಬಾಗಿಲ್ ತಾಚೆಂ ಠಿಕಾಣಿ.
ತಸಲ್ಯೆ ತಾಚ್ಯೆ ಗತಿಂತ್, ಎಕ್ಲಿ ಬಿಕಾರಿಣ್ ಹಿಂದು ಸ್ತ್ರೀ ತಾಕಾ ವೊಳ್ಕಿಚಿ ಜಾಲಿ. ತಿ ಭಿತಾರಿಣ್ ಪ್ರಾಯೆನ್ ಮ್ಹಾತಾರಿ - ಭುರ್ಗ್ಯಾಂಚಾ ಮೊಗಾಚಿ. ತಿಕಾ ಬೆಜ್ಮಿಚೆ ಚುರ್ಚುರೆ ದಿಸ್ಲೆ. ತಿಕಾ ಬಿಕೆಕ್ ಮೆಳ್ಲ್ಲೆಂ ಖಾಂವ್ಚೆಂ ಇತ್ಯಾದಿ ಹಾಡ್ನ್ ತಿಣೆ ಸದಾಂಚ್ ಬೆಜ್ಮಿಕ್ ದಿಂವ್ಚೆಂ ಆಸ್ಲ್ಲೆಂ. ತ್ಯಾ ಉಗ್ಡಾಸಾನ್ ಬೆಜ್ಮಿ ತಿಚಿ ವಾಟ್ ರಾಕ್ತಾಲೊ. ತಿಕಾ ದೆಕ್ತಚ್ ಬೆಜ್ಮಿ ನಾಚೊನ್ - ಉಡೊನ್ ತಿಚ್ಯೆ ಬಗ್ಲೆಕ್ ಧಾಂವ್ತಾಲೊ. ಜಾವ್ಯೆತ್ ದೆವಾನ್ ಆವಯ್ ನಾತ್ಲ್ಲ್ಯಾಕ್ ಆವಯ್ ದಿಲಿ.
ತಶೆಂ ದಿಸಾಂ ಪಾಟ್ಲ್ಯಾನ್ ದೀಸ್ ಧಾಂವ್ಲೆಂ, ಹಫ್ತೆ ಸರ್ಲೆ, ಮಹಿನೆ ಗೆಲೆ ಆನಿಂ ವರ್ಸಾಂ ಉಬ್ಲಿ. ತ್ಯಾ ತೆಕಿತ್ ಕೆಂಳ್ಬ್ಯಾಬರಿ ವಾಡೊನ್ ಬೆಜ್ಮಿ ತಳ್ಟ್ಯಾ ಮಾಡಾಬರಿ ಫುಲ್ಲೊ. ಆಟ್ರಾ ವರ್ಸಾಂ ಪ್ರಾಯೆರ್ ತೊ ದಿಂಡೊ ಮಾನಾಯ್ ಜಾಲೊ. ಆನಿಂ ಹ್ಯೆ ಪ್ರಾಯೆರ್ ತಾಕಾ ಇಲ್ಲಿ ಇಲ್ಲಿ ಸಮ್ಜೊಣಿ ಯೇಂವ್ಕ್ ಆರಂಭ್ ಜಾಲಿ. ಎಕೇಕ್ ಉತಾರ್ ತೊ ಗೊದ್ದೆಂ ಉಲಯ್ತಾಲೊ. ತಾಚಿ ವೊಳಕ್ ಕುದ್ರೋಳಿಂತ್ಚ್ ನ್ಹಂಯ್ ಆಸ್ತಾಂ ಶೆಜಾರಿ ವಾಡ್ಯಾಂನಿ ಲೆಗುನ್ ವಿಸ್ತಾರ್ಲ್ಲಿ. ಲೋಕ್ ತಾಂಚಾ ಗರ್ಜಾಂನಿ ತಾಕಾ ಖಂಯ್ಸರ್ಯಿ ಆಪವ್ನ್ ವ್ಹರ್ತಾಲೊ. ತಶೆಂ ಜಾಲ್ಲ್ಯಾನ್ ತೊ ಆಯ್ಣಾಕ್, ಜಾತ್ರ್ಯಾಕ್ ಆನಿಂ ಫೆಸ್ತಾಕ್, ಸಾಂತೆಂತ್ಲ್ಯಾ ಆಂಗಡ್ಗಾರಾಂಚೆಂ ಕಾಮ್ ಕರ್ನ್ ಆಸ್ತಾಲೊ.
ಥೊಡೆ ಪಾವ್ಟಿಂ ಕಸಲಿಂಯಿ ಲ್ಹಾನ್ ವೊಜಿಂ ವಾವೊವ್ನ್ ತೊ ಕೊಡಿಯಾಳಾಚಾ ಕೊನ್ಶಾ-ಕೊನ್ಶಾಂನಿ ಪಾವ್ತಾಲೊ. ಪುಣ್ ತಾಕಾ ವೊಳ್ಕೊಂಚೊ ಲೋಕ್ ತಾಚೆ ತಮಾಶೆ ಕರ್ನ್ ತಾಕಾ ಧೊಸ್ಲ್ಯಾ ಬಗಾರ್ ರಾವನಾತ್ಲ್ಲೊ. ತೆಂ ಪಳೆವ್ನ್ ಇಸ್ಕೊಲಾಚಾ ಭುರ್ಗ್ಯಾಂಕ್ ಸಹಿತ್ ಸಳ್ಗಿ ಮೆಳ್ಳಿ. ಚಲಿಯಾಂನಿ ಲೆಗುನ್ ಧಯ್ರ್ ಕಾಣ್ಘೆಲೆಂ. ಭುರ್ಗೆ ತಾಕಾ ಪಾಟ್ಲ್ಯಾನ್ ಯೇವ್ನ್ ಮುಟಿ ಮಾರ್ನ್ ಧಾಂವ್ತಾನಾ, ಥೊಡ್ಯೊ ಚಲಿಯೋ ಪಯ್ಸ್ ಥಾವ್ನ್ ತಾಚೆರ್ ಬಾರಿಕ್ ಫಾತೊರ್ ಮಾರ್ನ್ ಕಿಡ್ಕಿಡ್ತಾಲಿಂ. ಜಾಲ್ಯಾರಿ ಬೆಜ್ಮಿಕ್ ರಾಗ್ ನಾ. ಬೆಜಾರ್ ನಾ. ಸರ್ವ್ ತಾಕಾ ಏಕ್ಚ್. ಧರ್ಮಿಶ್ಟಾಂಚೆಂ ಜೆವಾಣ್ ಆಸಾ ಮ್ಹಣ್ ಆಯ್ಕಾಲ್ಯಾರ್ ತೊ ಮ್ಹಾರಾಂಚಾ ಕೊಮ್ಟಾಂತ್ ಲೆಗುನ್ ಪಾವ್ತಾಲೊ. ದೀವ್ಳ್, ಮಸೀದ್ ಆನಿಂ ಇಗರ್ಜ್ ಕಿತೆಂ ಮ್ಹಣ್ ತೊ ನೆಣಾಸ್ಲ್ಲೊ. ಗಾಂವ್ಚೊ ಸರ್ವ್ ಭಾಸೊ ತಾಕಾ ಸಮ್ಜಾತಾಲ್ಯೊ. ಪುಣ್ ತಾಚೆಂ ಉಲವ್ನ್ ಗೊದ್ದೆ. ತೆಂ ಉಲಂವ್ಚೆಂ ಆಯ್ಕೊಂವ್ಚಿ ಲೊಕಾಚಿ ಪಿಸಾಯ್. ತಾಕಾ ತಮಾಶೆ ಕರ್ಚಿ ಲೊಕಾಚಿ ಧಾಧೊಸ್ಕಾಯ್. ಸರ್ವಾಂಕ್ ತೊ ಜಾಯ್, ಸರ್ವಾಂಕ್ ತಾಚಿ ಆಪುರ್ಭಾಯ್.
ತಶೆಂ ದೀಸ್ ಪಾಶಾರ್ ಜಾತಾನಾ, ತಾಚಾ ಜಿವಿತಾಕ್ ಆವಯ್ಚಿ ಸಾವ್ಳಿ ಘಾಲ್ಲಿ ಭಿಕಾರಿಣ್ ಪಿಡೆಸ್ತ್ ಜಾವ್ನ್ ದೆವಾಧೀನ್ ಜಾಲಿ. ತ್ಯಾ ಉಪ್ರಾಂತ್ ತ್ಯಾ ವರ್ಸಾಚಾ ಪಾವ್ಸಾಂತ್ ಆಂಗಡ್ ಆಸ್ಲ್ಲೆಂ ಕಟ್ವೊಣ್ ಕೊಸ್ಳೊನ್ ಪಡ್ಲೆಂ. ಬೆಜ್ಮಿ ರಾತ್ ಪಾಶಾರ್ ಕರುಂಕ್ ಠಿಕಾಣಿ ಸೊಧಿತ್ತ್, ಕುದ್ರೋಳಿ ಸೊಡ್ನ್ ತೊ ಕೊಡಿಯಾಳ್ಚ್ಯೆ ವ್ಹಡ್ಲ್ಯೆ ಮಾರ್ಕೆಟಿಲಾಗಿಂ ಪಾವ್ಲೊ. ಮಾರ್ಕೆಟಿಚ್ಯೆ ಗೇಟಿ ಮುಖಾರ್ ಚಾರ್ ಮಾರೊಗ್ ಕುಡ್ಸೊನ್, ಪುಲ್ಕಾರ್ ಪೆಂಟೆಂಕ್ ವೆಚಾ ಮಾರ್ಗಾಚಾ ಕೊನ್ಶ್ಯಾಕ್ ಎಕಾ ಕೊಂಕ್ಣ್ಯಾಚಿ ಬಂಗ್ಸಾಳ್ ಆಸ್ಲ್ಲಿ. ತ್ಯಾ ಆಂಗ್ಡಿ ಬಾಗ್ಲಾರ್ ಬೆಜ್ಮಿ ರಾತ್ ಪಾಶಾರ್ ಕರ್ತಾಲೊ. ದಿಸಾಚೆಂ ತಾಣೆಂ ತೆಣೆಂಚಾ ಅಂಗಡ್ಗಾರಾಚೆಂ ಬಾರಿಕ್ ಚಿಲ್ಲರ್ ಕಾಮ್ ಕರ್ಚೆಂ ಆಸ್ಲ್ಲೆಂ. ತಾಣಿಂ ದಿಲ್ಲೆಂ ಖಾಂವ್ಚೆಂ ಆಸ್ಲ್ಲೆಂ. ಪುಣ್ ತಾಕಾ ತಮಾಶೆ ಕರ್ನ್ ಧೊಸ್ಲ್ಯಾ ಶಿವಾಯ್ ಕೊಣ್ಚ್ ಕಾಂಯ್ ದೀನಾತ್ಲ್ಲೊ. ತ್ಯಾ ಪಯ್ಕಿ ಬಂಗ್ಸಾಳೆಗಾರ್ ಕೊಂಕ್ಣೊ ನರಸಿಂಹ ಪೈ, ಎಕ್ಲೊ ಮಾತ್ ತಾಚಿ ಬಿರ್ಮೊತ್ ಚಿಂತಾಲೊ. ತಾಚಾಚ್ ಆಂಗ್ಡಿಚಾ ಬಾಗ್ಲಾರ್ ಬೆಜ್ಮಿ ನಿದ್ತಾಲೊ ಜಾಲ್ಲ್ಯಾನ್, ಸಕಾಳಿಚಿ ತಿಂ ಆಂಗಡ್ ಝಾಡ್ಚೆಂ ಕಾಮ್ ಬೆಜ್ಮಿಚೆಂ ಜಾವ್ನಾಸ್ಲ್ಲೆಂ. ತ್ಯಾ ಉಪ್ರಾಂತ್ ಮುಡೆ ಸೊಡಂವ್ಕ್ ಆಸ್ಲ್ಯಾರ್, ತಾಂದು ವ್ಹರುಂಕ್ ಆಶ್ಲ್ಯಾರ್, ಬೆಜ್ಮಿ ತಿಂ ಕಾಮಾಂ ಕರ್ತಾಲೊ. ತ್ಯೆ ಆಂಗ್ಡಿ ಕಾಮ್ ನಾತ್ಲ್ಲ್ಯಾ ವೆಳಾರ್ ಮಾತ್ರ್ ಬೆಜ್ಮಿ ಹೆರಾಂಚಾ ಗರ್ಜಾಂಕ್ ಪಾವ್ತಾಲೊ.
ಬೆಜ್ಮಿಚೆಂ ಜಿವಿತ್ ತಶೆಂ ಪಾಶಾರ್ ಜಾತಾನಾ ತಾರಿಕೆಚೆಂ ಆಂಕ್ಡೆ ಬದ್ಲೊನ್ ಮಹಿನೆ ಉಬ್ಲೆ ಆನಿಂ ವರ್ಸಾಂ ಧಾಂವ್ಲಿಂ. ತ್ಯಾ ತೆಕಿತ್ ಗೀಮ್, ಪಾವ್ಸ್ ಆನಿಂ ಹಿಂವ್ ಭೊಗುನ್ ಬೆಜ್ಮಿಕ್ ಪಂಚ್ವೀಸ್ ವರ್ಸಾಂ ಪ್ರಾಯ್ ಜಾಲಿ. ತ್ಯೆ ತಾಚ್ಯೆ ಪ್ರಾಯೆರ್ ಬೆಜ್ಮಿಚಿ ಕೂಡ್ ವಿಶೇಸ್ ವಾಡ್ಲಿ ಆನಿಂ ಪುಲ್ಲಿ. ತಾಚೆಂ ಹರ್ಧೆಂ ರುಂದಾಲೆಂ, ಗಳೊ ಭರ್ಲೊ, ಹಾತ್-ಪಾಯ್ ಪುಗ್ಲೆ. ಆನಿಂ ಜಿವಾಚೊ ಕಟ್ ಮೊಟೊ ಜಾವ್ನ್ ತೊ ದಿಂಡೊ ಜಾಲೊ. ತಾಚೆ ತಸಲೊ ದಿಂಡೊ ಮನಿಸ್ ತ್ಯಾ ತೆಂಪಾರ್ ಸಗ್ಳ್ಯಾ ಮಂಗ್ಳುರಾಂತ್ ದುಸ್ರೊ ನಾತ್ಲ್ಲೊ ಮ್ಹಣ್ಯೆತ್.
ತ್ಯಾ ತೆಕಿತ್ ತಾಚಿ ಸಕತ್ ವಾಡ್ಲ್ಲಿ. ಪಾವ್ಟಿಕ್ ತೊ ತಾಂದ್ಳಾಚೆ ತೀನ್ ಮುಡೆ ವಾವಯ್ತಾಲೊ. ಮಾಸ್ಳೆಚಿಂ ದೋನ್ ವೊಜಿಂ ತಾಚ್ಯೆ ತಕ್ಲೆರ್ ಸರಾಗ್ ಬಸ್ತಾಲಿಂ. ನಾರ್ಲಾಂಚ್ಯೊ ದೋನ್ ಗೊಣಿಯೊ ತೊ ದೋನ್ ಖಾಂದಾಂಚೆರ್ ಕಾಣ್ಘೆತಾಲೊ. ತಿತ್ಲೊ ತೊ ಬಳಿಷ್ಟ್ ಆನಿಂ ಸಕ್ತಿವಂತ್. ವೊಳಕ್ ನಾತ್ಲ್ಲೆ ತಾಚಾ ಜಿವಾಕ್ ಪಳೆವ್ನ್ ಬಿಯೆತಾಲೆ. ಪುಣ್ ತಾಚಿ ವೊಳಕ್ ಆಸ್ಲ್ಲೊ ಭುರ್ಗೊ ಲೆಗುನ್ ತಾಕಾ ಚಿಡಾವ್ನ್ ಹೆಡಾವ್ನ್, ಮುಟಿ ಮಾರ್ನ್ ಧಾಂವ್ತಾಲೊ. ತಾಚ್ಯೊ ಮಿಸ್ಯೊ ಧರ್ನ್ ವೊಡ್ತಾಲೆ. ತಾಚೆಂ ವಸ್ತುರ್ ಪಿಂಜುನ್ ಘಾಲ್ತಾಲೆ. ಕಾರಾಣ್ ತೊ ಬೆಪ್ಪಾ ಆನಿಂ ಬೊಮ್ಮಾ. ತಾಕಾ ರಾಗ್ ನಾ. ದೆಕುನ್ ತಾಕಾ ಪಳೆತಾನಾ ಮಾಪ್ಳ್ಯಾಕ್ ಏಕ್ ಮೊವ್ಳಿ ಸುಂಭ್ ಜಾಲ್ಯಾರಿ ಜಡ್ ಜಾತಾಲೆಂ ಆನಿಂ ಮೊಗಾರ್ಲಾಂಕ್ ಪೊವ್ಲಿ ಬಾರಾಧಿಕ್ ದಿಸ್ತಾಲಿ. ಬೆಜ್ಮಿ ವಾವಯ್ತಾ. ತಾಕಾ ಕೂಲ್ ದೀಂವ್ಕ್ ನಾ. ಥೊಡೆ ಜಣ್ ತಾಕಾ ಕಾಜಾರಾಕ್ ಉದಾಕ್ ಭರುಂಕ್ ವ್ಹರ್ತಾಲೆ ಆನಿಂ ಪೊಟ್ಭರ್ ವಾಡ್ನ್ ದಾಡ್ತಾಲೆ. ಥೊಡೆ ಜಣ್ ತಾಚೆ ಕರ್ನಾ ದೀಸ್ಭರ್ ಖೊಂಡ್ಚೆಂ, ಕಾತರ್ಚೆಂ, ಕಾಮ್ ಕರವ್ನ್ ಆಖೇರಿಕ್ ಏಕ್ ಥಾಪಾಡ್ ದಿತಾಲೆ ತರಿ, ಬೆಜ್ಮಿಕ್ ಸಂತೊಸ್. ಎಕ್ಲ್ಯಾನ್ ತಾಕಾ ಘಾತ್ ಕೆಲ್ಯಾರಿ, ದುಸ್ರೊ ತಾಕಾ ಪಾವ್ತಾಲೊ. ವಾಟೆನ್ ವೆಚೊ ಕೊಣಿ ಜಾಲ್ಯಾರಿ, ತಾಕಾ ಆಪವ್ನ್ ಕಾಫಿ ಫಳಾರ್ ದಿತಾಲೊ.
ತ್ಯಾ ತೆಂಪಾರ್ ಮಂಗ್ಳುರಾಂತ್ ಆತಾಂ ’ಸೆಂಟ್ರಲ್ ಟೋಕಿಸ್’ ಮ್ಹಣ್ ಆಸ್ಲ್ಲೆ ಕಡೆ ’ಹಿಂದುಸ್ಥಾನ್ ಸಿನೆಮಾ’ ಮ್ಹಣ್ ಆಸ್ಲ್ಲೆಂ. ತಾಂತುಮ್ ’ಮೌನ್ ಪಿಂತುರಾಂ’ ಆಸ್ತಾಲಿಂ. ತ್ಯಾ ಪಿಂತುರಾಂಚೆಂ ಜಾಹಿರಾತ್ ಥೊಡೆ ಪಾವ್ಟಿಂ ಬೆಜ್ಮಿನ್ ಕರ್ಚೆಂ ಆಸ್ಲ್ಲೆಂ. ತಾಕಾ ವೇಸ್ ರಂಗವ್ನ್, ಲಾಂಬ್ ’ಜೋಕರಾ’ ಚಿ ತೊಪಿ ದವರ್ನ್ ತಾಚೆಂಲಾಗಿಂ ಹಾತ್ - ಪತ್ರಾಂ ದಿಂವ್ಚೆಂ ಆಸ್ಲ್ಲೆಂ. ತಾಚೆ ಪಾಟ್ಲ್ಯಾನ್ ಧೊಲ್ ಬಡವ್ನ್ ಎಕ್ಲೊ ಚಲ್ತಾಲೊ. ಪುಣ್ ವಾಟೆರ್ ಪೊಕ್ರಿ ಭುರ್ಗೆ ತಾಚೆಲಾಗ್ಚಿಂ ಹಾತ್ ಪತ್ರಾಂ ವೊಡ್ನ್ ಕಾಣ್ಘೆವ್ನ್ ಧಾಂವ್ತಾಲೆಂ. ತ್ಯಾ ವೆಳಾರ್ ದೊಲಿಗಾರಾನ್ ರಗ್ಳೆ ತಿರ್ಸಿಜಾಯ್ ಆಸ್ಲ್ಲೆ. ತಶೆಂ ಬೆಜ್ಮಿ ಸಗ್ಳ್ಯಾ ಮಂಗ್ಳುರಾಂತ್ ಪ್ರಖ್ಯಾತ್ ಜಾಲೊ. ಸಗ್ಳ್ಯಾಂಚೊ ತೊ ಆಳ್. ಸರ್ವಾಂಕ್ ತೊ ಮೊಗಾಚೊ. ಸಮೇಸ್ತಾಂಕ್ ತೊ ಜಾಯ್. ತೊ ಖೆಳ್ ಲ್ಹಾನಾ-ವ್ಹಡಾಂಚೊ. ಪುಣ್ ತೊ ಕೋಣ್? ಖಂಚಾ ಗಾಂವ್ಚೊ? ಕಸಲ್ಯಾ ಧರ್ಮಾಚೊ? ಕೊಣಾಚೊ ಪೂತ್? ಹ್ಯಾ ಸವಲಾಂಕ್ ಕೊಣಾಯ್ ಲಾಗಿಂ ನೀಜ್ ಜವಾಬ್ ನಾತ್ಲ್ಲಿ. ಕೊಣ್ಚ್ಚ್ ತ್ಯಾ ವಿಶ್ಯಾಂತ್ ನೆಣಾಸ್ಲ್ಲೊ. ತರಿ ಹಿಂದು ಮ್ಹಣ್ತಾಲೆ "ಆಮ್ಚೊ’, ಮಾಪ್ಳಿ ಸಾಂಗ್ತಾಲೆಂ ’ ತಾಂಚೊ’......ಕ್ರಿಸ್ತಾಂವ್ ಉಲಯ್ತಾಲೆ "ಕೊಣ್ಚೊ ಮ್ಹಣ್ ಕೊಣ್ ಜಾಣಾ’ ಜಾಲ್ಯಾರಿ ಬೆಜ್ಮಿ ಸಮೆಸ್ತಾಂಚೊ. ಜಾತ್ ಆನಿಂ ಧರ್ಮ್ ತೊ ನೆಣಾ. ದೆವಾಚಿ ವ ದೆಂವ್ಚಾರಾಚಿ ಪರಿಚಯ್ ತಾಕಾ ನಾ. ತೊ ವೊಳ್ಕತಾ ಫಕತ್ತ್ ಮನ್ಶಾಂಕ್. ಪುಣ್ ತ್ಯಾ ಮನ್ಶಾಂನಿ ಕಿತ್ಲೆಂ ತಾಕಾ ಜೆವಯ್ಲೆಂ ಆನಿಂ ಖಾವಯ್ಲೆಂ, ತಿತ್ಲೆಂಚ್ ತಾಕಾ ಧೊಸ್ಲೆಂ ಆನಿಂ ಮಾರ್ಲೆಂ ಜಾಲ್ಯಾರಿ, ತಾಣೆಂ ಕಸಲ್ಯಾಯಿ ಕಶ್ಟಾಂತ್ ಏಕ್ಚ್ ಏಕ್ ದುಃಖ್ ಗಳಯ್ಲೆಂನಾ.
ಪುಣ್ ಏಕ್ ದೀಸ್ ಸಗ್ಳೆಂ ಮಂಗ್ಳುರ್ ರಡ್ಲೆಂ. ತಿತ್ಲಿಂ ದುಃಖಾಂ ಕೊಣ್ಂಚ್ ಮನಿಸ್ ತಾಚ್ಯೆ ಸಗ್ಳ್ಯೆ ಜಿಣ್ಯೆಂತ್ ರಡ್ಚೊನಾ. ತಸಲಿ ತಿ ತಾಚ್ಯೆ ಜಿಣ್ಯೆಚಿ ಕರುಣಾಭರಿತ್ ಕಾಣಿ ಆಯ್ಕೊಂಕ್, ಹ್ಯಾ ಮುಖಾರ್ ಅಮಿಂ ತಾಕಾ ’ ಬೊಮ್ಮಾ’ ನಾಂವಾನ್ ವೊಳ್ಕಯಾಂ. ಕಿತ್ಯಾಕ್ ಸಗ್ಳೆಂ ಮಂಗ್ಳುರ್ ತಾಕಾ ’ ಬೊಮಾ’ ಮ್ಹಳ್ಳ್ಯಾ ಶಿವಾಯ್ ವೊಳ್ಕಾನಾತ್ಲ್ಲೆಂ.
"ಸರ್ವ್ ಸುಣ್ಯಾಂಕ್ ಏಕ್ ದೀಸ್ ಆಸಾ" ಮ್ಹಳ್ಳ್ಯೆ ಗಾದಿಬರಿ, "ಹರ್ಯೇಕಾ ಮನ್ಶಾಕ್ ಏಕ್ ವೇಳ್ ಅಸಾ" ಮ್ಹಣ್ಚೆ, ಮನ್ಶಾಚಾ ಜಿವಿತಾಂತ್ ಧನಾನ್, ಘನಾನ್, ಮಾನಾನ್ ವ ಕರ್ನೆನ್ ನಾಂವ್ ಆಡ್ಚೊ ಏಕ್ ತೇಂಪ್ ಆಸ್ತಾಂ.
ತ್ಯಾ ತೆಂಪಾರ್ ಸೆಂಟ್ರಲ್ ಮಾಯ್ದಾನಾರ್ ಥೊಡ್ಯೊ ನಾಟಕ್ ಮಂಡಳ್ಯೊ ತಾತ್ಕಾಲಿಕ್ ಸಾಲಾಂ ಬಾಂಧುನ್ ನಾಟಕಾಂ ಖೆಳವ್ನ್ ದಾಕಯ್ತಾಲೆಂ. ತಾಂಚಿಂ ನಾಟಕಾಂ ಸಂಪ್ಲ್ಯಾ ಉಪ್ರಾಂತ್ ತ್ಯಾಚ್ ಸಾಲಾಂನಿ ಕುಸ್ತ್ಯೊ ಜಾತಲ್ಯೊ. ನಾಂವಾಡ್ದಿಕ್ ಪಹಿಲ್ವಾನ್ ಶ್ಹೆರಾಕ್ ಪಾವ್ತಾಲೆ ಆನಿಂಮ್ ಜಿಕ್ಲ್ಲೆ ಇನಾಮ್ ಜೊಡ್ತಾಲೆ. ತಸಲ್ಯಾ ತ್ಯಾ ದಿಸಾಂನಿ ಮಲಬಾರ್ ಥಾವ್ನ್ ಎಕ್ಲೊ ಪಹಿಲ್ವಾನ್ ಆಯ್ಲೊ. ಮಂಗ್ಳುರಾಂತ್ಲೆ ಸರ್ವ್ ಪಹಿಲ್ವಾನ್ ತಾಚೆಲಾಗಿಂ ಸಲ್ವಾಲೆ. ಜಾಲ್ಯಾರಿ ತ್ಯಾ ಮಲಬಾರ್ಚಾ ಪಹಿಲ್ವಾನ್ "ಆನಿಂ ಕೋಣ್ ಆಸಾತ್ ಜಾಲ್ಯಾರ್ ಯೆಯಾ" ಮ್ಹಣ್ ಹಂಕರಾನ್ ಶರ್ಥ್ ಉಡಾಯ್ಲೆಂ. ಹೆಂ ಆಯ್ಕೊನ್ ಸಗ್ಳೆಂ ಮಂಗ್ಳುರ್ ಚಾಪ್ಪೆ ಜಾಲೆಂ.
ತ್ಯಾ ವೆಳಾರ್ ಬಂಗ್ಸಾಳೆಗಾರ್ ನರಸಿಂಹ ಪೈಕ್ ಆಲೋಚನ್ ಆಯ್ಲಿ. ತಾಚಾಚ್ ಆಂಗ್ಡಿ ಬೊಮ್ಮಾನ್ ರಾತ್ ಪಾಶಾನ್ ಕರ್ಚಿ ಆಸ್ಲ್ಲಿ. ಬೊಮ್ಮಾ ತ್ಯಾ ಕೊಂಕ್ಣ್ಯಾಕ್ ಚಡ್ ಮೊಗಾಚೊ ಜಾಲ್ಲೊ. ದೆಕುನ್ ಕೊಂಕ್ಣ್ಯಾನ್ "ಬೊಮ್ಮಾಕ್ ಕುಸ್ತೆಕ್ ಉಬೊ ಕೆಲ್ಯಾರ್ ಕಶೆಂ ?" ಮ್ಹಣ್ ಚಿಂತ್ಲೆಂ. ತಿ ಆಲೋಚನ್ ತಾಣೆಂ ಶೆಜಾರಿ ಆಂಗಡ್ಗಾರ್, ಕೆಲ್ಸಿ ಕಾಂತಪ್ಪಾಕ್ ಸಾಂಗ್ಲಿ. ಕಾಂತಪ್ಪಾಯಿ ಖುಶಾಲಿ ಮನಾಚೊ ತಾಣೆಂಯಿ ’ಜಾವ್ಯೆತ್’ ಮ್ಹಳೆಂ. ದೊಗಾಂಯ್ನಿ ಬೊಮ್ಮಾಕ್ ವಿಚಾರ್ಲೆಂ. ಬೊಮ್ಮಾನ್ "ಹುಂ.....ಹೊಯ್ಸ್" ಮ್ಹಣ್ ಜವಾಬ್ ದಿಲಿ. ಬೊಮ್ಮಾಚಿ ತಿ ಸದಾಂಚಿ ಜವಾಬ್. ಖಂಚಾಯಿ ಕಾಮಾಕ್ ತೊ "ಹುಂ ಹೊಯ್ಸ್" ಮ್ಹಣ್ತಾಲೊ ಶಿವಾಯ್ "ನಾ" ಮ್ಹಣೊಂಕ್ ತೊ ನೆಣಾಂಚ್. ಪುಣ್ ಬೊಮ್ಮಾಕ್ ’ಕುಸ್ತಿ’ ಮ್ಹಳ್ಯಾರ್ ಕಿತೆಂ ಕಳಿತ್ . ತರಿ ಬೊಮ್ಮಾನ್ ತಕ್ಲಿ ಹಾಲಯ್ಲಿ. ಕಾಂತಪ್ಪಾನ್ ಮೊಗ್ರಾಮ್ಚಾ ಎಕಾ ಪಹಿಲ್ವಾನಾಕ್ ಹಾಡ್ನ್ ಬೊಮ್ಮಾಕ್ ಥೊಡಿ ತರ್ಭೆತಿ ದಿಲಿ. ತೆಣೆಂ ನರಸಿಂಹ ಪೈನ್ ಮಲಬಾರ್ಚಾ ಪಹಿಲ್ವಾನಾಚೆಂ ಶರ್ಥ್ ಸ್ವೀಕರ್ಸಿಲೆಂ. ನಗ್ದಿ ಶೆಂಬೊರ್ ರುಪಯ್ ಇನಾಮ್ ಠರಾಯ್ಲೆಂ. ತ್ಯಾ ಪ್ರಮಾಣೆಂ ಜಾಹಿರಾತ್ಯಿ ಜಾಲೆಂ. ಬೊಮ್ಮಾಚ್ಯೆ ಪಾಡ್ತಿನ್ ಮಾರ್ಕೆಟಿ ವಟಾರಾಚಾ ಸರ್ವ್ ಆಂಗಡ್ಗಾರಾಂನಿ ವಂತಿಗಿ ಕಾಡ್ಲಿ. ಮೊಗೊರ್ಲ್ಯಾಂನಿ ಸಹಿತ್ ದೆಡ್ಕಿ- ತೀನ್ ತಾರೋ ದಿಲ್ಯೊ.
ಕುಸ್ತೆಕ್ ನಮಿಯಾರ್ಲಾಲೊ ದೀಸ್ ಆಯ್ಲೊ. ಜಾಲ್ಯಾರಿ ಬೊಮ್ಮಾ ತರ್ಭೆತಿಕ್ ಖಂಯ್ ಲೆಕ್ತಾ. ತೊ ತಾಚೆಂಚ್ ಏಕ್ ಸಾಂಗ್ಲ್ಯಾರ್ ಆನ್ಯೇಕ್ ಕರ್ತಾ. ಕಾಂತಪ್ಪಾ ನಿರಾಶಿ ಜಾಲೊ. ತ್ಯಾ ವೆಳಾರ್ ಕೊಂಕ್ಣ್ಯಾನ್ ಮ್ಹಳೆಂ " ಬೊಮ್ಮಾ, ತುಂ ಚಡಿತ್ ಕಸಲೆಂಚ್ ಕರಿನಾಕಾ......ಬಗಾರ್, ತುಂ ಪಹಿಲ್ವಾನ್ ಮ್ಹಣ್ ಕಳ್ಚಾ ಖಾತಿರ್, ಪಯ್ಲೆಂ ಏಕ್ ಥಾಪ್ ತುಜ್ಯಾ ಜಾಂಗೆಕ್ ಮಾರ್. ದುಸ್ರಿ ಥಾಪ್ ಬಾವ್ಳ್ಯಾಕ್ ಮಾರ್. ತ್ಯಾಚ್ ಬರಾಬರ್ ತ್ಯಾ ಪಹಿಲ್ವಾನಾಕ್ ವೆಡ್ಕೊಳ್ ಮಾರ್ನ್ ಧರ್. ತಶಿ ವೆಡ್ಕೊಳ್ ಮಾರ್ಲ್ಲಿ ಮಾತ್ರ್ ಹಾಂವೆಂ ಸಾಂಗ್ಲ್ಯಾ ಶಿವಾಯ್ ಸೊಡಿನಾಕಾ"
"ಹುಂ........ಹೊಯ್ಸ್..." ಬೊಮ್ಮಾನ್ ಜಾಯ್ತ್ ಮ್ಹಣ್ ತಕ್ಲಿ ಹಾಲಯ್ಲಿ.
ದೊನ್ಪಾರ್ ಜಾತನಾ, ತೆಣೆಂ ಇಸ್ಕೊಲಾಂಚಾ ಭುರ್ಗ್ಯಾಂಚಿ ಚುಕಾರಿ. ಹೆಣೆಂ ಕಾಮಾಕ್ ಗೆಲ್ಲೆ ಘರಾ ಪಾಟಿಂ. ಕಾರಣ್ - ಬೊಮ್ಮಾ ಕುಸ್ತೆಕ್ ರಾವ್ಲಾ. ತೊ ಸರ್ವಾಂಚೊ ದೆಜುನ್ ಸಮೇಸ್ತಾಂಕ್ ಬೊಮ್ಮಾಚಿ ಕುಸ್ತಿ ಪಳೆಂವ್ಚಿ ಉರ್ಬಾ. ಥೊಡ್ಯಾ ಆಂಗಡ್ಗಾರಾಂನಿ ಅಂಗ್ಡಿ ಧಾಂಪ್ಲ್ಯೊ. ಮೊಗೊರ್ಲ್ಯಾಂನಿ ಕಾಂಟಿ ಮಾರ್ಕೆಟಿಂತ್ ಸೊಡ್ಲ್ಯೊ. ಕುಸ್ತೆಚೊ ವೇಳ್ ಜಾತಾನಾ - ಸಾಲ್ ಭರೊನ್, ವಟಾರಾಂತ್ ಲೆಗುನ್ ಲೊಕಾಚೊ ಜಮೊ ವಿಶೇಸ್ ಜಾಲೊ. ಕಾರಣ್ ಬೊಮ್ಮಾ ಕುಸ್ತೆಕ್ ರಾವ್ಲಾ.
ಕುಸ್ತಿ ಆರಂಭ್ ಜಾಲಿ. ಪ್ರೇಕ್ಶಕ್ ಚತುರ್ ಜಾಲೆ. ಭುರ್ಗ್ಯಾಂಚಿ ಚುಕಾರಿ. ಹೆಣೆಂ ಕಾಮಾಕ್ ಗೆಲ್ಲೆ ಘರಾ ಪಾಟಿಂ. ಕಾರಣ್ ಬೊಮ್ಮಾ ಕುಸ್ತೆಕ್ ರಾವ್ಲಾ. ತೊ ಸರ್ವಾಂಚೊ ದೆಕುನ್ ಸಮೇಸ್ತಾಂಕ್ ಬೊಮ್ಮಾಚಿ ಕುಸ್ತಿ ಪಳೆಂವ್ಚಿ ಉರ್ಬಾ. ಥೊಡ್ಯಾ ಆಂಗಡ್ಗಾರಾಂನಿ ಆಂಗ್ಡಿ ಧಾಂಪ್ಲ್ಯೊ. ಮೊಗೊರ್ಲ್ಯಾಂನಿ ಕಾಂಟಿ ಮಾರ್ಕೆಟಿಂತ್ ಸೊಡ್ಲ್ಯೊ. ಕುಸ್ತೆಚೊ ವೇಳ್ ಜಾತಾನಾ ಸಾಲ್ ಭರೊನ್, ವಟಾರಾಂತ್ ಲೆಗುನ್ ಲೊಕಾಚೊ ಜಮೊ ವಿಶೇಸ್ ಜಾಲೊ. ಕಾರಾಣ್ ಬೊಮ್ಮಾ ಕುಸ್ತೆಕ್ ರಾವ್ಲಾ.
ಕುಸ್ತಿ ಆರಂಭ್ ಜಾಲಿ. ಪ್ರೇಕ್ಶನ್ ಚತುರ್ ಜಾಲೆಂ. ಭುರ್ಗ್ಯಾಂಚೊ ಶಿಲೊಣ್ಯೊ ಕಿಂಕ್ರಾಟ್ಯೊ ಆನಿಂ ಬೊಬ್ ಉಟ್ಲಿ. ತಿತ್ಲ್ಯಾ ಬಿತರ್ ಕೊಂಕ್ಣ್ಯಾನ್ ಸಾಂಗ್ಲ್ಲ್ಯಾ ಪ್ರಮಾಣೆಂ ಬೊಮ್ಮಾನ್ ತ್ಯಾ ಪಹಿಲ್ವಾನಾಕ್ ವೆಡ್ಕೊಳ್ ಮಾರ್ನ್ ಧರ್ಲೆಂಚ್.
ಧಾ ಮಿನುಟಾಂ ಪಾಶಾರ್ ಜಾಲಿಂ ಜಾಲ್ಯಾರಿ, ಬೊಮ್ಮಾಚಿ ವೆಡ್ಕೊಳ್ ಸುಟಾನಾ. ತೆಣೆಂ ಸಂತೊಸಾನ್ ಲೊಕಾಚಿ ಬೊಬ್. ಹೆಣೆಂ ಮಲಬಾರ್ಚಾ ಪಹಿಲ್ವಾನಾಚೆ ಬೊಮ್ಮಾಚ್ಯೆ ವೆಂಗೆಂತ್ ಧಡ್ಬಡೆ ಆನಿಂ ಉಳ್ವುಳೆ. ಜಾಲ್ಯಾರಿ ಬೊಮ್ಮಾಚೊ ವೆಡ್ಕೊಳ್ ಅಂರ್ದಾತಾ ಶಿವಾಯ್ ಸಡಿಳ್ ಜಾಯ್ನಾ.
ವೀಸ್ ಮಿನುಟಾಂ ಗೆಲಿಂ ತರೀಂ, ಬೊಮ್ಮಾಚೆಂ ವೆಂಗೆಂತ್ಲೊ ಪಹಿಲ್ವಾನ್ ಸುಟಾನಾ. ಪಹಿಲ್ವಾನಾಚೆ ದೊಳೆ ಭಾಯ್ರ್ ಆಯ್ಲೆ. ಹಾತ್ ಪಾಂಯ್ ಕಂಗಾಲ್ ಜಾಲೆ. ತ್ಯಾ ಬರಾಬರ್ ಪೊಟಾಂತ್ಲೆಂ ಜಿರ್ಲ್ಲೆಂ ಖಾಣ್ ನ್ಹೆಸ್ಲ್ಲ್ಯಾ ಕಾಚಾಚಾ ಇಡ್ಯಾಂತ್ಲ್ಯಾನ್ ಸೆವ್ಯಾಂಬರಿ ಭಾಯ್ರ್ ಸರ್ಲೆ. ತೆಂ ಪಳೆವ್ನ್ ವೆಡ್ಕೊಳ್ ಸೊಡುಂಕ್ ಬೊಮ್ಮಾಕ್ ಲೊಕಾನ್ ಬೊಬ್ ಮಾರ್ಲಿ. ಪುಣ್ ಬೊಮ್ಮಾ ಬೊಬೆಕ್ ಖಂಯ್ ಲೆಕ್ತಾ.
ಪಂಚ್ವೀಸ್ ಮಿನುಟಾಂ ಜಾತಾನಾ ಪಹಿಲ್ವಾನ್ ಪ್ರಾಣ್ ಸೊಡ್ತಾ ಮ್ಹಳ್ಳ್ಯಾಬರಿ ಕೊಂಕ್ಣ್ಯಾಕ್ ದಿಸ್ಲೆಂ. ದೆಕುನ್ ಕೊಂಕ್ಣ್ಯಾನ್ ಉಟೊನ್ ಬೊಮ್ಮಾಕ್ ಮ್ಹಳೆಂ: "ಬೊಮ್ಮಾ, ಆತಾಂ ಸೊಡ್"
ತಕ್ಶಣ್ ಬೊಮ್ಮಾನ್ ಮಾರ್ಲ್ಲೊ ವೆಡ್ಕೊಳ್ ಸೊಡ್ಲೊ. ಪಹಿಲ್ವಾನ್ ರೂಕ್ ಪರ್ತಾಲ್ಲ್ಯಾಬರಿ ಪಾಟಿಂ ಪರ್ತಾಲೊ. ತಕ್ಷಣ್ ತಾಚಾ ಜಾತಿಚಾ ಥೊಡ್ಯಾಂನಿ ತಾಕಾ ವಾರೆಂ ಘಾಲ್ನ್ ಗೆಲೊ. ತಶೆಂ ಗೆಲ್ಲ್ಯಾ ತ್ಯಾ ಮಲಬಾರ್ಚಾ ಪಹಿಲ್ವಾನಾನ್ ಬಿಲ್ಕುಕ್ ಪಾಟಿಂ ಪಳೆಲೆಂನಾ. ಬೊಮ್ಮಾಕ್ ಉಕಲ್ನ್ ಲೊಕಾನ್ ಮಾರ್ಕೆಟ್ಯೆ ವಾಟೆಕ್ ಪುರ್ಶಾಂವ್ ಕಾಡ್ಲೊ.
ಬೊಮ್ಮಾಚಿ ಕೀರ್ತ್ ಮಂಗ್ಳುರಾಂತ್ ಗಾಜ್ಲಿ ಜಾಲ್ಯಾರಿ, ಬೊಮ್ಮಾಚಿ ಗತ್ ಸದಾಂಚಿ. ಲೊಕಾಂಚಿ ಥಾಪ್ಡಾಂ, ಮಾರ್ ಆನಿಂ ಧೊಸ್ ತಾಕಾ ಚುಕ್ಲ್ಲಿ ನಾ. ತರಿ ಬೊಮ್ಮಾ ದಾದೊಶಿ ಲೊಕಾಚಾ ಗುಸ್ತಾರ್ ತಾಕಾ ಉಪಾಸ್ ನಾ.
ಕುಸ್ತೆಂತ್ ಜುಕ್ಲ್ಲೆ ಬೊಮ್ಮಾಚೆ ದೊನ್ಶಿಂ ರುಪಯ್ ತ್ಯಾ ಕೊಂಕ್ಣ್ಯಾ ಲಾಗಿಂ ಆಸ್ಲ್ಲೆ. ದೆಕುನ್ ಕೊಂಕ್ಣ್ಯಾಕ್ ಏಕ್ ಆಲೋಚನ್ ಸುಸ್ತಾಲಿ. "ಬೊಮ್ಮಾಕ್ ಕಾಜಾರ್ ಕೆಲ್ಯಾರ್ ಕಶೆಂ "ಕೊಂಕ್ಣ್ಯಾನ್ ತಾಚಿ ಆಲೋಚನ್ ಕಾಂತಪ್ಪಾಕ್ ಸಾಂಗ್ಲಿ. ಕಾಂತಪ್ಪಾ ಥಾವ್ನ್ ಖಬಾರ್ ಹೆರಾಂಕ್ ವಿಸ್ತಾರ್ಲಿ. ಪುಣ್ ಬೊಮ್ಮಾಚಿ ಜಾತ್ ಕಸಲಿ? ತಾಕಾ ಚೆಡುಂ ಖಂಚೆಂ ಸೊದ್ಚೆಂ? ಸವಾಲ್ ಕೊಂಕ್ಣೊ ಆಟಯ್ತನಾ ಕಾಂತಪ್ಪಾನ್ ಆಲೋಚನ್ ಸಾಂಗ್ಲಿ. "ಬೊಮ್ಮಾಕ್ ಕ್ರಿಸ್ತಾಂವ್ ಕರ್ಚೊ, ಕ್ರಿಸ್ತಾಮ್ವಾ ಮಧೆಂ ಚೆಡ್ವಾ ಮೆಳ್ತಾತ್..."
ತ್ಯಾ ತೆಂಪಾರ್ ಬಿಫಾಚ್ಯೆ ಮಾರ್ಕೆಟಿ ಮುಖಾರ್, ಲಾಲ್ಭಾಗ್ ಜುವಾಂವ್ ಫೆರ್ನಾಂದಾಚಾ ಜಾಗ್ಯಾರ್ ಏಕ್ ಲಾಂಕ್ಡಾಚೊ ಡಿಪೊ ಆಸ್ಲ್ಲೊ. ತ್ಯಾ ಡಿಪ್ಯಾಂತ್ ಎಕ್ಲೊ ಗರೀಬ್ ಲಾಂಕ್ಡಾಂ ಫೊಡ್ತಾಲೊ. ತಾಣೆಂ ತಾಚ್ಯೆ ಮಾಲ್ಘಡ್ಯೆ ಧುವೆಕ್ ಕಾಜಾರ್ ಕೆಲ್ಲೆಂ. ತಿಕಾ ಏಕ್ ಚೆಡುಂ ಭುರ್ಗೆ ಜಲ್ಮಾಲ್ಯಾ ಉಪ್ರಾಂತ್ ತಿ ಕುಳಾರಾಚ್ ಆಸ್ಲ್ಲಿ. ತಿಚ್ಯೆ ಪಾಟ್ಲೆಂ ಭಯ್ಣ್ ಕಾತ್ರಿನ್ ಶಿಂಬ್ರೆ ಜಾಲ್ಲ್ಯಾನ್ ಅಂಕ್ವಾರ್ ಉರ್ಲ್ಲೆಂ. ತ್ಯಾ ಕಾತ್ರಿನಾಲಾಗಿಂ ಬೊಮ್ಮಾಕ್ ಸಯ್ರಿಕ್ ಸೊದ್ಲಿ.
ನಮಿಯಾರ್ಲೆಲ್ಯಾ ದಿಸಾ, ಕಾಂತಪ್ಪಾ ಆನಿಂ ಕೊಂಕ್ಣೊ ಬೊಮ್ಮಾಕ್ ಸಾಂಗಾತಾ ಕಾಣ್ಘೆವ್ನ್ ಹೊಕ್ಲೆಕ್ ಪಳೆಂವ್ಕ್ ಗೆಲೆ. ಹೊಕ್ಲೆಚಾ ಬಾಪಾಯ್ನ್ ಸಯ್ರ್ಯಾಂಕ್ ಸ್ವಾಗತ್ ಕೆಲೊ. ಬಸೊಂಕ್ ಬಾಂಕ್ ದಿಲೊ. ತ್ಯಾ ವೆಳಾರ್ ಹೊಕ್ಲೆಚಾ ಭಯ್ಣಿಚೆಂ ಭುರ್ಗೆಂ ಸೊಪ್ಯಾರ್ ಖೆಳೊನ್ ಆಸ್ಲ್ಲೆಂ. ಸಯ್ರೆ ಬಸ್ಲ್ಯಾ ಉಪ್ರಾಂತ್ ಥೊಡ್ಯಾ ವೆಳಾನ್, ರಿವಾಜಿ ಪ್ರಮಾಣೆಂ ಹೊಕಾಲ್ ಉದ್ಕಾಚೊ ಚೆಂಬು ಹಾಡ್ನ್ ಬೊಮ್ಮಾಚಾ ಪಾಯಾಂಲಾಗಿಂ ದವರ್ನ್ ಬಿತರ್ ಧಾಂವ್ಲಿ. ತ್ಯಾ ಚೆಂಬಾಕ್ ಪಳೆವ್ನ್ ಖೆಳೊನ್ ಆಸ್ಲ್ಲೆಂ ಭುರ್ಗೆಂ ದಿಮ್ಕುರ್ಯಾಂನಿ ಬೊಮ್ಮಾಚಾ ಪಾಯಾಂ
ಸರ್ಶಿನ್ ಆಯ್ಲೆಂ. ಬೊಮ್ಮಾನ್ ತ್ಯಾ ಭುರ್ಗ್ಯಾಕ್ ಉಕಲ್ನ್ ಉಸ್ಕ್ಯಾರ್ ಕಾಣ್ಘೆಲೆಂ. ತ್ಯಾ ವೆಳರ್ ಕೊಂಕ್ಣ್ಯಾನ್ ಬೊಮ್ಮಾಚಾ ಕಾನಾಂತ್ ವಿಚಾರ್ಲೆಂ "ಚೆಡುಂ ತುಕಾ ಜಾಯ್ತ್ ಮೂ?"
"ಹುಂ .....ಹೊಯ್ಸ್...ಬೊದೆಂ ಆತಾ, ಬೊದೆಂ ಆತಾ" ಬೊಮ್ಮಾನ್ ಉಸ್ಕ್ಯಾರ್ ಕಾಣ್ಘೆಲ್ಲ್ಯಾ ಭುರ್ಗ್ಯಾಕ್ ಪೊಶೆತ್ತ್ ಜವಾಬ್ ದಿಲಿ. ಬೊಮ್ಮಾ ತ್ಯಾ ಭುರ್ಗ್ಯಾ ವಿಶ್ಯಾಂತ್ ಉಲಯ್ತಾ ಮ್ಹಣ್ ಕಾಂತಪ್ಪಾಕ್ ಕಿತೆಂ ಕಳಿತ್. ಬೊಮ್ಮಾ "ಹೊಕಾಲ್ ಬರಿ ಆಸಾ" ಮ್ಹಣ್ತಾ ಮ್ಹಣ್ ತಾಣಿಂ ಲೆಕ್ಲೆಂ. ದೆಕುನ್ ಕಾಂತಪ್ಪಾನ್ ಕಾಜಾರಾಚೊ ವಿಶಯ್ ಮುಖಾರ್ಸಿಲೊ. ತ್ಯಾ ವೆಳಾರ್ ಹೊಕ್ಲೆಚಾ ಬಾಪಾಯ್ನ್ ಖರಾರ್ ನಿಸ್ಚಿತ್ ಕರುಂಕ್ ದೋನ್ ದಿಸಾಂಚಿ ರಜಾ ಮಾಗ್ಲಿ. ತಿತ್ಲೆಂ ಆಯ್ಕೊನ್ ಸಯ್ರೆ ಘರ್
ಭಾಯ್ರ್ ಸರ್ಲೆ.
ವಾಟೆರ್ ಬೊಮ್ಮಾಕ್ ಕಾಂತಪ್ಪಾನ್ ಆನಿಂ ಕೊಂಕ್ಣ್ಯಾನ್ ಪರತ್ ಪರತ್ ವಿಚಾರ್ಲೆಂ: "ಚೆಡುಂ ತುಕಾ ಜಾಯ್ತ್ಮೂ ಬೊಮ್ಮಾ?" ತುಂ ತಾಕಾ ಪೊಸ್ತಲೊಯ್ಮೂ? ತಾಕಾ ಬಾಜು ಆನಿಂ ಕಾಪಾಡ್ ದಿತಲೊಮೂ?"
"ಕಾಪಾಡ್.........!ಇ, ಇಇ, ತ್ಯಾ?" ಬೊಮ್ಮಾನ್ ಆಕಾಂತೊನ್ ಮ್ಹಳೆಂ. "ತೆಂ ಬುದ್ದೆಂ......ನಾನ್..ಬೊದೆಂ ಆತಾ.....ತಾತಾ ಚಾಚ್ಚಿ, ಬಿಚ್ಚಿತ್,...... ಹುಂ ಹುಂ ಹೊಯ್ಸ್"
ತೆಂ ಆಯ್ಕೊನ್ ಘಡ್ಬಡೊನ್ ಮ್ಹಣಾಲೊ ಕೊಂಕ್ಣೊ
"ತರ್ ತುವೆಂ ಭುರ್ಗ್ಯಾಕ್ ಪಸಂದ್ ಕೆಲಾಂಯ್ರೆ ಕಿತೆಂ ಬೊಮ್ಮಾ?"
"ಹಾಂ ಹಾಂ ಹಾಂ......ಮಾತಾ ಬುದ್ದೆಂ ಜಾಯ್" ಬೊಮ್ಮಾಚಿ ಜವಾಬ್.
"ಥು ಪಿಶ್ಯಾ....ಆಮಿಂ ಪಳೆಂವ್ಕ್ ಗೆಲ್ಲ್ಯಾಂವ್ ಹೊಕ್ಲೆಕ್ ಆನಿಂ ತುವೆಂ ಪಳೆಲಾಂಯ್ ಭುರ್ಗೆಂ. ನಾ ತುಕಾ ಕಾಜಾರ್ಯಿ ನಾ ಬೊಜೊಯಿ ನಾ, ತುಂ ಬೆಪ್ಪಾ, ಬೊಮ್ಮಾ" ಕಾಂತಪ್ಪಾನ್ ರಾಗಾನ್ ಉಲವ್ನ್ ಬಳಾನ್ ಮೆಟಾಂ ಕಾಡ್ಲಿಂ. ತ್ಯಾ ದೀಸ್ ಥಾವ್ನ್ ಬೊಮ್ಮಾಚಿ ಕಾಜಾರಾಚಿ ಖಬರ್ ಆಖೇರ್ ಜಾಲಿ. ಲೋಕ್ ಮಾತ್ರ್ ತೆಂ ಕರ್ತುಬ್ ಆಯ್ಕೊನ್ ಸದಾಂಚ್ ಹಾಸ್ತಾಲೊ.
"ಹರ್ಯೇಕ್ ಪಾಳ್ ವಕ್ತಾಚೆಂ - ಹರ್ಯೇಕ್ ಖೊಳೊ ಗರ್ಜೆಚೊ ಖಂಯ್, ದೇವ್ ಆಸಾ, ಥಂಯ್ ಶ್ವಾಸ್ ಪರ್ಜೆಚೊ" ಹ್ಯೆ ಸಾಂಗ್ಣೆಂ ಪ್ರಕಾರ್ ಏಕ್ ದೀಸ್ ಉದೆಲೊ.
ತ್ಯಾ ದೀಸ್ ಬೊಮ್ಮಾ ಸಿನೆಮಾಚೆಂ ಜಾಹಿರಾತ್ ಕರುಂಕ್ ಭಾಯ್ರ್ ಸರ್ಲ್ಲೊ. ಮುಖ್ಲ್ಯಾನ್ ಹಾತ್-ಪತ್ರಾಂ ಲೊಕಾಕ್ ವಾಂಟ್ತಾನಾ, ತಾಚಾ ಪಾಟ್ಲ್ಯಾನ್ ಧೊಲಿಗಾರ್ ಧೊಲ್ ಬಡಯ್ತಾಲೊ. ತೆ ದೊಗ್ಯಿ ಫಳ್ನಿರ್ಚಾ ಮಾರ್ಗಾಕ್ ಪಾವ್ಲ್ಲೆ. ತ್ಯಾ ವೆಳಾರ್ ತೆಣೆಂಚಾ ಎಕಾ ಘರಾಕ್ ಉಜೊ ಲಾಗ್ಲ್ಲೊ. ಘರಾಚೊ ಉಜೊ ಬಿರಾಂಕುಳ್ ಜಾಲ್ಲೊ. ತೆಂ ಪಳೆಂವ್ಕ್ ಲೋಕ್ ಪುಶ್ಕಳ್ ಲೋಕ್ ಘರಾಚಾ ವಟಾರಾಂತ್ ಕುಡ್ಸಾಲ್ಲೊ. ಘರಾಂತ್ಲಿ ಮನ್ಶಾಂ ಭಾಯ್ರ್ ರಾವೊನ್ ಹಾಕ್-ಬೊಬ್ ಮಾರ್ತಾಲಿಂ. ಥೊಡೊ ಲೋಕ್ ಉಜೊ ಪಾಲ್ವಂವ್ಕ್ ಸಾಧನ್ ಕರ್ತಾಲೊ. ಜಾಲ್ಯಾರಿ ಉಜೊ ಬಳಾನ್ ಪೆಟ್ತಾಲೊ. ತೆಂ ಪಳೆವ್ನ್ ಘರ್ಚಾ ಮನ್ಶಾಂ ಪಯ್ಕಿ ಎಕ್ಲಿ ತರ್ನಾಟಿಂ ಸ್ತ್ರೀ ಆಕ್ಲಾಸ್ ಆನಿಂ ವಿಳಾಪ್ ಕರ್ತಾಲಿ. ಕುಡ್ಸಾಲ್ಲ್ಯಾ ಲೊಕಾಲಾಗಿಂ ಉಪ್ಕಾರ್ ಮಾಗ್ತಾಲಿ ಜಾಲ್ಯಾರಿ ತಿಚೆಂ ಮಾಗ್ಣೆಂ ಕೊಣ್ಂಚ್ ಲೆಕಿನಾತ್ಲ್ಲೊ. ಕಾರಾಣ್ ಉಜೊ ಕಠಿಣ್ ಜಾಲ್ಲೊ. ತರಿ ತಿ ಸ್ತ್ರೀ ರಡ್ತಾಲಿ, ಆಕ್ಲಾಸ್ತಾಲಿ ಆನಿಂ ರುದಾನ್ ಕರ್ತಾಲಿ. ಕಾರಾಣ್ ತಿಚೆಂ ಮಾಲ್ಘಡೆಂ ಫಳ್ - ಧಾ ಮಹಿನ್ಯಾಂಚೊ ಚೆರ್ಕೊ ಭುರ್ಗೊ ತ್ಯಾ ಪೆಟ್ಚಾ ಘರಾಂತ್ ಪಾಳ್ಣ್ಯಾಂತ್ ಉರ್ಲ್ಲೊ. ತರ್ ತೊ ಚೆರ್ಕೊ ಕೋಣ್.....?
ವ್ಹಯ್, ತೊ ನಾತು ಘಾಟಾ - ಸಾವ್ಕಾರ್ ತೆಲಿಸಾಬಾಚೊ . ತಿ ಸ್ತ್ರೀ ತಾಚಿ ಸುನ್. ತೆಂ ಘರ್ ತೆಲಿಸಾಬಾಚೊ. ಲೆತ್ತಿಬಾಯ್ ಆನಿಂ ತೆಲಿಸಾಬ್ ತೆದಾಳಾ ಮ್ಹಾತಾರಿಂ ಜಾವ್ನ್ ಆಯಿಲ್ಲಿಂ. ತಾಣಿಂ ತಾಂಚಾ ಮಾಲ್ಘಡ್ಯಾ ಪುತಾಕ್ ಕಾಜಾರ್ ಕರ್ನ್ ತೊ ಚೆರ್ಕೊ ತ್ಯಾ ಘರಾಚೊ ದಿವೊ ಜಾವ್ನ್ ಜನ್ಮಾಲ್ಲೊ. ಪುಣ್ ತೊ ದಿವೊ ಲಾಸ್ಚಾ ಘರಾ ಬಿತರ್ ಪಾಳ್ಣ್ಯಾಂತ್ ಆಸ್ಲ್ಲೊ. ಆಕ್ಲಾಸಾಕ್ ಭಾಯ್ರ್ ಧಾಂವೊನ್ ಯೆತಾನಾ ಸುನೆನ್ ಲೆಕ್ಲ್ಲೆಂ ಚೆರ್ಕ್ಯಾಕ್ ಮಾಂಯ್ನ್ ಹಾಡ್ಲಾ ಮ್ಹಣ್ ಆನಿಂ ಮಾಂಯ್ನ್ ಚಿಂತ್ಲ್ಲೆಂ ಸುನೆನ್ ಹಾಡ್ಲಾ ಮ್ಹಣ್. ದೊಗಾಂಯಿ ಭಾಯ್ರ್ ಯೇವ್ನ್ ಚಿಂತಾನಾ ತಾಣಿಂ ಲೆಕ್ಲೆಂ ಚೆರ್ಕ್ಯಾಕ್ ಘರ್ - ಚಾಕರ್ನಿನ್ ಪಾಳ್ಣ್ಯಾಂತ್ಲೊ ಕಾಡ್ಲಾ ಜಾವ್ಯೆತ್ ಮ್ಹಣ್. ಪುಣ್ ಆಖೇರಿಕ್, ಘರಾಚೊ ಉಜೊ ಬಳ್ ಜಾತಾನಾ ಆನಿಂ ತೆಗಾಂಯೀ ಸಾಂಗಾಂತಾ ಮೆಳ್ತಾನಾ, ತಾಂಕಾಂ ಕಳ್ಳೆಂ ಚೆರ್ಕೊ ಬಿತರ್ ಪಾಳ್ಣ್ಯಾಂತ್ ಆಸಾ. ತಾಕಾ ಪಾಳ್ಣ್ಯಾಂತ್ಲೊ ಹಾಡ್ಚೊ ಕೊಣೆಂ? ಘರಾಕ್ ಚಾರಾಂಯಿ ವಾಟಾಂನಿ ಉಜೊ ವಿಸ್ತಾರ್ಲಾ. ಭಿತರ್ ಸರೊಂಕ್ ಕೊಣಾಕ್ಚ್ ಧೈರ್ ಮೆಳಾನಾ. ತೆಣೆಂ ಚೆರ್ಕ್ಯಾಚ್ಯೆ ಆವಯ್ಚೆ ಆಕ್ಲಾಸ್ ಆನಿಂ ರಡ್ಣೆಂ. ಹೆಣೆಂ ಆಜಿಯೆಚೆ ವಿಳಾಪ್ ಆನಿಂ ರುದಾನ್. ತೆಲಿಸಾಬ್ ಹಜಾರಾಂನಿ ಇನಾಮ್ ಭಾಸಯ್ತಾ. ಜಾಲ್ಯಾರಿ ಕುಡ್ಸಾಲ್ಯಾ ಲೊಕಾ ಮಧ್ಲೊ ಕೊಣ್ಂಚ್ ಮನಿಸ್ ಚೆರ್ಕ್ಯಾಕ್ ವಾಂಚಂವ್ಕ್ ಮುಖಾರ್ ಸರಾನಾ. ತಸಲ್ಯಾ ಆಶಾ ಖಂಡ್ಲ್ಲ್ಯಾ ವೆಳಾರ್.......!!
ವ್ಹಯ್, ತ್ಯಾಚ್ ವೆಳಾರ್ ಬೊಮ್ಮಾ ತ್ಯಾ ಮಾರ್ಗಾಂತ್ಲ್ಯಾನ್ ವೆತಾನಾ, ಧೊಲಿಚೊ ಆವಾಜ್ ಆಯ್ಕಾಲೊ. ತಕ್ಶಣ್, ಕುಡ್ಸಾಲ್ಲ್ಯಾ ಲೊಕಾ ಮಧ್ಲ್ಯಾ ಎಕ್ಲ್ಯಾನ್ ಸಟ್ಟ್ ಕರ್ನ್ ಮ್ಹಳೆಂ: ತೊ ಪಳೆಯಾ ಬೊಮ್ಮಾ ವೆತಾ - ಚೆರ್ಕ್ಯಾಕ್ ವಾಂಚಯ್ಲ್ಯಾರ್ ತಾಣೆಂ ಮಾತ್."
ತೆಂ ಆಯ್ಕೊನ್ "ವ್ಹಯ್" ಮ್ಹಣಾಲೆಂ ಥೊಡೆ ಜಣ್, "ತಾಕಾ ಆಪವ್ನ್
ಹಾಡಾ".
ತಿತ್ಲೆಂ ಉಲಂವ್ಚಾ ಬಿತರ್ ಧಾಂವೊನ್
ವಚೊನ್ ದೊಗಾಂನಿ ಬೊಮ್ಮಾಕ್ ವೊಡ್ನ್ ಹಾಡ್ಲೊಚ್.
ತೆಲಿಸಾಬಾನ್ ಬೊಮ್ಮಾಕ್ ಹಾತ್-ಭಾಶೆನ್ ಆನಿಂ ಉತ್ರಾಂನಿ ಗಜಾಲ್
ಸಾಂಗ್ಲಿ. ಲೆತ್ತಿಬಾಯೆನ್ ಪಾಳ್ಣೆಂ ಆಸ್ಲ್ಲ್ಯಾ ಕುಡಾಕ್
ವೆಚಿ ವಾಟ್ ವಿವರ್ಸಿಲಿ. ತಾಂಚಿ ಸುನ್ ಬೊಮ್ಮಾಚಾ ಪಾಯಾಕ್
ಪಡ್ಲಿ. ತಿತ್ಲೆಂ ಆಯ್ಕೊನ್ "ಹುಂ, ಹೊಯ್ಸ್" ಮ್ಹಣಾಲೊ
ಬೊಮ್ಮಾ ಆನಿಂ ಪೆಟ್ಚಾ ಉಜ್ಯಾಕ್ ಆಂಗ್ ದೀವ್ನ್ ಘರಾ ಬಿತರ್
ಸರ್ಲೊ.
ಬೊಮ್ಮಾನ್ ಎಕಾ ತೆಂಪಾರ್ ಜಿಯೆಲ್ಲೆಂ ಘರ್ ತೆಂ. ಪುಣ್ ತಾಕಾ ಕಿಂಚಿತ್ ಉಗ್ಡಾಸ್
ನಾ. ಕುಡಾಂ ಕುಡಾಂನಿ ವಚೊನ್ ತಾಣೆಂ ಪಾಳ್ಣೆಂ ಸೊಧ್ಲೆಂ. ಉಜೊ ಚಡಾತ್ತ್
ವೆತಾಲೊ. ಭಾಯ್ಲ್ಯಾನ್ ಲೋಕ್ ಆಕ್ಲಾಸ್ ಸೊಡ್ತಾಲೊ. ತಿತ್ಲ್ಯಾ ಬಿತರ್
ಬೊಮ್ಮಾನ್ ಚೆರ್ಕ್ಯಾಕ್ ಹರ್ಧ್ಯಾರ್ ದಾಂಬುನ್ ಕಾಣ್ಘೆವ್ನ್
ಬಾಗ್ವೊನ್ ಭಾಯ್ರ್ ಹಾಡ್ಲೊ. ಆವಯ್ಚೊ ಸಂತೊಸ್ ತೊ
ಸಾಂಗ್ಚೊ ನ್ಹಂಯ್. ಲೊಕಾಚೊ ಆನಂದ್ ತೊ ವಿಂಗಡ್ಚ್. ತಿತ್ಲ್ಯಾರ್ "ಬೊಮ್ಮಾ"
ಮ್ಹಣಾಲೊ ತೆಲಿಸಾಬ್, "ಅನ್ಯೇಕ್ ಉಪ್ಕಾರ್ ಕರ್ - ಸಾಲಾಂತ್
ಮುಖಾರ್ಚ್ ಬಿರ್ಯಾಂತ್ ಏಕ್ ಪೆಟುಲ್ ಆಸಾ. ತ್ಯಾ ಪೆಟುಲಾಂತ್
ಮ್ಹಜೆಂ ಧನ್ ಆನಿಂ ದಸ್ತಾವೆಜಾಂ ಆಸಾತ್. ದೆಕುನ್ ಹಾಡ್".
ತೆಲಿಸಾಬಾನ್ ಉಲಂವ್ಚ್ಯಾ ಬರಾಬರ್ ಹಾತ್-ಬಾಶೆನ್ ವಿವರ್ಸಿಲೆಂ. ಆಯ್ಕೊನ್
ಬೊಮ್ಮಾ "ಹುಂ ಹೊಯ್ಸ್" ಮ್ಹಣಾತ್ತ್ ಘರಾ ಬಿತರ್ ಧಾಂವ್ಲೊ.
ಘರಾಚಿ ಆಡಿಂ, ಪಾಕಾಸೆ, ರಿಪಾಂ ಆನಿಂ ಪೊಳಿಂ ಲಾಸೊನ್, ಉಜ್ಯಾಚಾ ಖೆಂಡಾಬರಿ ಘರಾಂತ್ ಗಳ್ತಾಲಿಂ ಆನಿಂ
ಬೊಮ್ಮಾಚಾ ಆಂಗಾರ್ ಲೆಗುನ್ ಪಡ್ತಾಲೆಂ ಜಾಲ್ಯಾರಿ, ಬೊಮ್ಮಾನ್ ಬಿರೊ
ಸೊಧುನ್ ಕಾಡ್ನ್ ಪೆಟುಲ್ ಭಾಯ್ರ್ ಹಾಡ್ಲೆಂ.
ಬೊಮ್ಮಾಚ್ಯೆ ಬಹೂದೂರೆಕ್ ತೆಲಿಸಾಬಾಚೊ ಸಂತೊಸ್ ದೊಡ್ತೊ ಜಾತಾನಾ
ಲೊಕಾನ್ ತಾಕಾ ಶಾಭಾಸ್ಕಿ ದಿಲಿ. ತ್ಯಾಚ್ ವೆಳಾರ್ ಆಕ್ಲಾಸಿತ್ತ್
ಮ್ಹಣಾಲಿ ಲೆತ್ತಿಬಾಯ್: "ಬೊಮ್ಮಾ, ತಾಂಕ್ಲ್ಯಾರ್ ಏಕ್ ಉಪ್ಕಾರ್ ಕರ್.......ಆಲ್ತಾರಿಂತ್
ಮ್ಹಜೊ ಏಕ್ ವ್ಹಡ್ಲೊ ಖುರಿಸ್ ಆಸಾ. ರುಪ್ಯಾಚೊ ಖುರಿಸ್ ತೊ ಭಾಂಗಾರಾಚಿ ಇಮಾಜ್ ತಾಚಿ....ತೊ ಖುರಿಸ್
ಮ್ಹಜ್ಯೆ ಆವಯ್ನ್ ಮ್ಹಾಕಾ ಆಯೆರ್ ಕೆಲ್ಲೊ......ತಿಚೊ ತೊ ಉಗ್ಡಾಸ್
ಲಾಸುಂಕ್ ಸೊಡ್ಚೊ ನ್ಹಂಯ್. ದೆಕುನ್ ತೊ ಖುರಿಸ್
ಹಾಡ್ ಮ್ಹಜಾ ರಾಯಾ" ಮ್ಹಣಾತ್ತ್ ತಿಣೆಂ ಬೊಮ್ಮಾಲಾಗಿಂ ಆಡ್ದೊಸ್
ಮಾಗ್ಲೊ....
ಘರಾಂತ್ಲ್ಯಾ ರುಕಾಡಾಚಾ ಸರ್ವ್ ವಸ್ತುಂಕ್ ಉಜೊ ಕಠಿಣ್ ಥರಾನ್
ಪೆಟ್ತಾಲೊ. ಎಕೇಕ್ ಬಾಗಿಲ್ ಹುಲ್ಪೊನ್ ಕೊಸಾಳ್ತಾಲೆಂ.
ಪಾಕೆಂ ಲಾಸೊನ್ ಪಡೊಂಕ್ ತಯಾರ್ ಜಾಲ್ಲೆಂ. ಜಾಲ್ಯಾರಿ
ಬೊಮ್ಮಾನ್ ಖುರಿಸ್ ಹಾಡುಂಕ್ ಮೆಟ್ ಕಾಡ್ಲೆಂ. ಸಾಧನ್ ಕರ್ನ್ ತೊ
ಭಿತರ್ ಗೆಲೊ. ಪ್ರಯತ್ನ್ ಕರ್ನ್ ತಾಣೆಂ ಆಲ್ತಾರ್ ಪೊಡ್ಲಿ. ಆಕೇರಿಕ್ ಖುರಿಸ್
ಹಾತಾಂತ್ ಕಾಣ್ಘೆವ್ನ್ ಭಾಯ್ರ್ ಯೆಂವ್ಕ್ ಚಿಂತಾನಾ! ಚಿಂತಿನಾತ್ಲ್ಲೆಂ ಘಡ್ಲೆಂ. ಎಕಾಚ್ಫರಾ ಘರಾಚೆಂ
ಪಾಕೆಂ ನಿಕ್ಳೊನ್ ಪಡ್ಲೆಂ. ದಾರ್ವಾಟೆ ಲಕ್ಲೆ. ದೋನ್ ವೊಣದಿ ಕೊಸ್ಳೊನ್
ಪಡ್ಲ್ಯೊ. ಬೊಮ್ಮಾ ತ್ಯಾ ಉಜ್ಯಾಂತ್ ವೊಮ್ತೊಚ್ ಧರ್ಣಿಕ್
ಶೆವ್ಟಾಲೊ.
ಭಾಯ್ಲ್ಯಾನ್ ಲೊಕಾಚಿ ಬೊಬ್ ಜಾತಾಲಿ. ಸರ್ವ್ ತಾಚಿ ವಾಟ್ ಪಳೆತಾಲಿ.
ಪುಣ್ ಬೊಮ್ಮಾ ನಾ. ಬೊಮ್ಮಾ ತ್ಯಾ ಉಜ್ಯಾಂತ್ ಲಾಸ್ತಾಲೊ. ತಾಚಾ ಆಂಗಾರ್
ಪಾಕೆಂ ಆನಿಂ ವೊಣದ್ ಪಡ್ಲ್ಲಿ. ತಾಚಾನ್ ಉಟೊಂಕ್ ಸಕಾನಾತ್ಲ್ಲೆಂ ತರಿ, ತೊ ದೋನ್ಯಿ
ಹಾತಾಂನಿ ಖುರಿಸ್ ಹರ್ಧ್ಯಾಕ್ ದಾಂಬುನ್ ಧರ್ನ್ ಸಾಂಭಾಳ್ತಾಲೊ.
ಪಂದ್ರಾ ಮಿನುಟಾಂ
ಪಾಶಾರ್ ಜಾಲಿಂ ಜಾಲ್ಯಾರಿ, ಬೊಮ್ಮಾ ನಾ. ತೆಂ ಪಳೆವ್ನ್
ಲೊಕಾಚೆ ಆಕ್ಲಾಸ್ ಚಡ್ಲೆ. ತೆಲಿಸಾಬಾಚೆಂ ಕುಟಾಮ್ ಚಡ್ಬಡ್ಲೆಂ. ತಿತ್ಲ್ಯಾರ್ ಥಂಯ್ ಕುಡ್ಸಾಲ್ಲ್ಯಾ
ಸರ್ವ್ ಲೊಕಾನ್ ಉಜ್ಯಾಂತ್ ಪಾಯ್ ಘಾಲ್ನ್ ಬೊಮ್ಮಾಕ್
ಸೊಧುಂಕ್ ಧೈರ್ ಕಾಣ್ಘೆಲೆಂ. ಪುಣ್ ಕಸಲೊ ಫಾಯ್ದೊ? ವೇಳ್ ಉತರ್ಲ್ಲೊ.
ಬೊಮ್ಮಾನ್ ಭಾಜೊನ್, ಲಾಸೊನ್, ಕಶ್ಟೊನ್ ಆನಿಂ
ವೊಳ್ವಳೊನ್ ಪ್ರಾಣ್ ಸೊಡ್ಲ್ಲೊ. ಬೊಮ್ಮಾ ಹ್ಯಾ
ಸಂಸಾರಾಕ್ ಅಂತರ್ಲ್ಲೊ. ನಾ.......ಆನಿಂ ........ಬೊಮ್ಮಾ
ನಾ..... ತ್ಯಾ ಉಜ್ಯಾ ಮಾರಿಫಾತ್ ದೆವಾನ್ ತಾಕಾ ಮಂಗ್ಳುರ್ಚೆ
ವೊಂಟೈಂತ್ಲೊ ವ್ಹೆಲ್ಲೊ. ಜಾಲ್ಯಾರಿ ತಾಣೆಂ ತೊ ಖುರಿಸ್......
ಲೊಕಾಚಾ ಸಾಧನಾನ್ ಬೊಮ್ಮಾಚಿ ನಿರ್ಜೀವ್ ಕೂಡ್ ಭಾಯ್ರ್
ಹಾಡ್ಲಿ. ತಾಚೆಂ ಆಂಘ್ ಭಾಜ್ಲ್ಲೆಂ. ಪಾಯ್ ಲಾಸ್ಲ್ಲೆ ರೂಪ್ ವಿದ್ರೂಪ್
ದಿಸ್ತಾಲೆಂ. ಪುಣ್ ಖುರಿಸ್ ಜಸೊ ಹರ್ಧ್ಯಾಕ್ ದಾಂಬುನ್ ಧರ್ಲ್ಲೊ - ತೊ ತಸೊಚ್ ದೋನ್ಯಿ
ಹಾತಾಂನಿ ಘಟ್ ಧರ್ನ್ ಆಸ್ಲ್ಲೊ. ಖುರಿಸ್ ವೊಮ್ತೊ ತಾಣೆಂ ಧರ್ಲ್ಲೊ. ತಶೆಂ ಜಾಲ್ಲ್ಯಾನ್ ಜೆಜು ತಾಚಾ ಕಾಳ್ಜಾಲಾಗಿಂ ಉಲಯ್ತಾ ಮ್ಹಳ್ಳ್ಯಾಬರಿ ತಿ ಇಮಾಜ್ ತಾಚಾ
ಹರ್ದ್ಯಾಕ್ ತೆಂಕ್ಲ್ಲಿ. ಎಕ್ಲ್ಯಾನ್ ತೊ ಖುರಿಸ್ ಕಾಡುಂಕ್ ಹಾತ್ ಘಾಲೊ.
ಪುಣ್ ಆಜಾಪ್! ಬೊಮ್ಮಾಚಾ ಹಾತಾಂತ್ಲೊ ಖುರಿಸ್ ಸುಟಾನಾ. ತಿತ್ಲ್ಯಾ ತೆಲಿಸಾಬಾನ್
ಹಾತ್ ಘಾಲೊ ಆನಿಂ ಖುರಿಸ್ ವೊಡ್ಲೊ. ಜಾಲ್ಯಾರಿ ಬೊಮ್ಮಾ ಖುರಿಸ್
ಸೊಡಿನಾ. ಸಬಾರ್, ಲೊಕ್ ಆಜಾಪ್ಲೊ ಆನಿಂ ಥಟಾಕ್ಲೊ. ಹಿ ವಿಚಿತ್ರ್ ಗಜಾಲ್ ಕ್ಷಣಾ ಬಿತರ್ ಆಖ್ಯಾ
ಮಂಗ್ಳುರಾಕ್ ವಿಸ್ತಾರ್ಲಿ ಮಂಗ್ಳುರ್ಚಾ ಕೊನ್ಶ್ಯಾ - ಕೊನ್ಶ್ಯಾ ಥಾವ್ನ್ ಥೊಡೆ
"ಆಜಾಪ್" ಪಳೆಂವ್ಕ್ ಧಾಂವ್ಲೆ. ತಿತ್ಲ್ಯಾರ್ ಪೊಲಿಸ್ ಆಯ್ಲೆ ಆನಿಂ ತನ್ಖಿ ಚಲ್ಲಿ.
ತೆಲಿಸಾಬ್ ಗ್ರೇಸ್ತ್ ಆನಿಂ ಮಾತ್ಭಾರಿ ಮನಿಸ್ ಜಾಲ್ಲ್ಯಾನ್ ತನ್ಖಿ
ವಿಶೇಶ್ ಜಾಲಿನಾ. ತೆಲಿಸಾಬಾನ್ "ಬೊಮ್ಮಾಕ್ ಆಪುಣ್
ಮಾತಿ ದಿಸಾಂ" ಮ್ಹಳ್ಳ್ಯಾಕ್, ಘಳಾಯ್ ನಾಸ್ತಾನಾ
ಪೊಲಿಸಾಂನಿ ಬೊಮ್ಮಾಚಿ ನಿರ್ಜೀವ್ ಕೂಡ್ ಥಂಯ್ಚ್, ಸೊಡ್ನ್ ದಿಲಿ.
ಪುಣ್ ಬೊಮ್ಮಾಕ್ ಖಂಚಾ ಧರ್ಮಾಚ್ಯೆ ರಿತಿ ಪ್ರಕಾರ್ ಮಾತಿ ದಿಂವ್ಚಿ? ತೊ ಹಿಂದು,
ಮಾಪ್ಳಿ, ವ ಕ್ರಿಸ್ತಾಂವ್? ಕೋಣ್ ತಾಚಿಂ ವಾರೆಸ್ದಾರಾಂ ಆನಿಂ ತಿಂ ಖಂಯ್ ಆಸಾತ್?
ಸವಾಲಾಂ ವಯ್ರ್ ಸವಲಾಂ ಉಟ್ಲಿಂ. ಪುಣ್ ಜವಾಬ್ ಕೊಣಾಚಿಚ್
ನಾ. ಆಖೇರಿಕ್ ತೆಲಿಸಾಬಾನ್ ಪೇಟ್ ಹಾಡಯ್ಲಿ. ಬೊಮ್ಮಾಚಿ ನಿರ್ಜೀವ್ ಕೂಡ್
ಪೆಟೆಂತ್ ನಿದಾಯ್ಲಿ. ತೆದೊಳ್ ಪರ್ಯಾಂತ್ ಜಾಲ್ಯಾರಿ, ಬೊಮ್ಮಾಚಾ
ಹಾತಾಂತ್ಲೊ ತೊ ಖುರಿಸ್ ಸುಟ್ಲೊನಾ. ಲೆತ್ತಿಬಾಯ್ ತಿಚೆಯಿತ್ಲ್ಯಾಕ್
"ರುಪ್ಯಾಚೊ ಖುರಿಸ್, ಭಾಂಗಾರಾಚಿ ಇಮಾಜ್" ಮ್ಹಣಾತ್ತ್
ಸುಸ್ಕಾರ್ತಾಲಿ. ತಿಚೊ "ಉಗ್ಡಾಸ್" ಗೆಲೊ ಮ್ಹಣ್ ತಿ ಚಡ್ಬಡ್ತಾಲಿ ಜಾಲ್ಯಾರಿ,
ಬೊಮ್ಮಾಚ್ಯೆ ಪೆಟೆ ಸರ್ಶಿನ್ ವಚೊಂಕ್ ತಿ ಬಿಂಯೆತಾಲಿ.
ತಸೊ ಥೊಡೊ ವೇಳ್ ಪಾಶಾರ್ ಜಾತನಾ ಬೊಮ್ಮಾಕ್ ವೊಳ್ಕೊಂಚೊ
ಸರ್ವ್ ಜಾತಿ - ಕಾತಿಂಚೊ ಲೋಕ್ ಹಜಾರಾಂನಿ ಫಳ್ನಿರಾಂತ್ ಜಮೊ ಜಾಲೊ. ನರಸಿಂಹ
ಪೈನ್ ಆನಿಂ ಕಾಂತಪ್ಪಾನ್ ದೋನ್ ಬೆಂಡಾಂ ತಯಾರ್ ಕೆಲಿಂ. ಕುದ್ರೊಳಿಚಾ
ಮಾಪ್ಳ್ಯಾಂನಿ ಫುಲಾಂ ಹಾಡ್ಲಿಂ.
ಮೊರ್ನ್ ಉಕಲ್ಚಿ ತಯಾರಾಯ್ ಕರ್ತಾನಾ ಖುರಿಸ್ ವೆತಾ ಮ್ಹಳ್ಳ್ಯಾ
ಪೊಟಾಚಾ ಜಾಳಾಂನಿ ಲೆತ್ತಿಬಾಯ್ ಬೊಮ್ಮಾಚ್ಯೆ ಪೆಟೆ
ಸರ್ಶಿನ್ ವಚೊನ್ ಮ್ಹಣಾಲಿ : " ಖುರಿಸ್ ತುಂ ವ್ಹರ್ತಾಯಿಚ್ಚ್ವೆ?......ದಿಲ್ಲೊಯ್ ಜಾಲ್ಯಾರ್ ತುಜೆಂ
ನಾಂವ್ ಹಾಂವ್ ಸಾಂಗ್ತಿಂ....... ದುಸ್ರೊ ಖುರಿಸ್ ದಿತಿಂ?"
ತಿತ್ಲೆಂ ಮ್ಹಣೊನ್ ತಿಣೆಂ ಖುರ್ಸಾಕ್ ಹಾತ್ ಘಾಲೊ. ಆಬ್ಳೆ ಆಜಾಪ್. ತಕ್ಶಣ್
ಬೊಮ್ಮಾಚಾ ಹಾತಾಂತ್ಲೊ ಖುರಿಸ್ ಸುಟ್ಲೊ. ಉತ್ರಾಂ ಪ್ರಮಾಣೆಂ
ಲೆತ್ತಿಬಾಯೆನ್ ದುಸ್ರೊ ರುಕಾಡಾಚೊ ನವೊ ಖುರಿಸ್
ಹಾಡವ್ನ್ ಬೊಮ್ಮಾಚಾ ಹಾತಾಂತ್ ದಿಲೊ. ತಿತ್ಲ್ಯಾರ್ ಮೊರ್ನ್ ಉಕ್ಲ್ಲೆಂ.
ಬೊಮ್ಮಾಚಾ ಮೊರ್ನಾಕ್ ಸರ್ವ್ ಜಾತಿಂಚೊ ಲೋಕ್ ತಾಂತಾಂಚೆಂ
ಮಾಗ್ಣೆಂ ಮ್ಹಣೊನ್ ವಾಟ್ ಚಮ್ಕತಾಲೊ. ತಾಚ್ಯೆ ಪೆಟೆಕ್ ಘಡ್ಯೆಕ್ ಏಕ್
ಪಾವ್ಟಿಂ ಖಾಂದ್ ಬದ್ಲುಂಕ್ ಮಾಪ್ಳಿ. ಹಿಂದು ಆನಿಂ ಕ್ರಿಸ್ತಾಂವ್ ಆಸ್ಲ್ಲೆ.
ಮಂಗ್ಳುರಾಂತ್ ಜಾತಿಂಚಾ ಎಕ್ವಟಾನ್ ಮೊರ್ನ್ ಜಾಲಾಂ ವ್ಹಯ್ ಜಾಲ್ಯಾರ್, ತೆಂಚ್
ಪಯ್ಲೆಂ ಮೊರ್ನ್ ಬೊಮ್ಮಾಚೆಂ.
ಬೊಮ್ಮಾಕ್ ಮಾತಿಯೆಂತ್ ನಿಕೆಪಿತಾನಾ ತಾಕಾ ಧೊಸ್ಲ್ಲ್ಯಾ,
ಮಾರ್ಲ್ಲ್ಯಾ ಆನಿಂ ತಾಚೆಲಾಗಿಂ ಖೆಳ್ಲ್ಲ್ಯಾ ಸರ್ವ್ ಲೊಕಾಚಾ ದೊಳ್ಯಾಂ ಥಾವ್ನ್ ದುಃಖಾಂಚ್ಯೊ ಝರಿ ದೆಂವ್ತಾಲ್ಯೊ.
ಮೊಗರ್ಲಿಂ ಆನಿಂ ಮಾಪ್ಳಿ ತಾಂಚೊಚ್ ಕೊಣ್ ಮೆಲ್ಲ್ಯಾಬರಿ
ಸುಸ್ಕಾರ್ನ್ ರಡ್ತಾಲಿಂ.
ವ್ಹಯ್, ಬೊಮ್ಮಾ ಸಮೆಸ್ತಾಂಚೊ ದೆಕುನ್ ಸಮೆಸ್ತ್ ತಾಕಾ ರಡ್ಲೊ.........ಸಮೆಸ್ತಾಂಚಾ ತೀನ್ ಚಿಮ್ಟ್ಯಾ
ಮಾತಿಯೆನ್ಂಚ್ ಪೊಂಡ್ ತಾಚೊ ಭರ್ಲೊ. ಬೊಮ್ಮಾ ಗೆಲೊ.
ಬೊಮ್ಮಾಚೊ ಸಂಸಾರ್ ಕಾಬಾರ್ ಜಾಲೊ. ಪುಣ್ ತಾಚೆಂ
ಪೊರ್ನ್ ಜಾವ್ನ್ ಲೋಕ್ ಘರಾ ವೆತಾನಾ ಮ್ಹಣ್ತಾಲೊ: " ಆವಯ್ಕ್ ಭುರ್ಗೆಂ ಮೆಳ್ಳೆಂ.......ಗ್ರೇಸ್ತಾಂಕ್ ಧನ್ ಮೆಳ್ಳೆಂ ಆನಿಂ ಗರೀಬ್
ಬೊಮ್ಮಾಕ್ ಮೆಳ್ಳೊ ಹರ್ಧ್ಯಾರ್ ಖುರಿಸ್."
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
