ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 44. ಮ್ಹಜ್ಯಾ ಬಾಯ್ಲೆಚೆಂ ಕಾಜಾರ್!
ರಿಚ್ಚಿ ಪಿರೇರ್: ಕೊಂಕ್ಣಿ ವರ್ತುಲಾಂತ್ ಏಕ್ ಆಲ್ ರೌಂಡರ್ ಹೊ; ಕಾಣ್ಯೆಗಾರ್, ಕವಿ, ವಿಡಂಬನಾಂ, ಅಂಕಣಾಂ ಬರವ್ಪಿ, ಪತ್ರಿಕೋಧ್ಯಮಿ, ವಾವ್ರಾಡಿ, ಚಿಂತ್ಪಿ. ’ಕಲಾಕಿರಣ್’ ಪತ್ರ್ ಸ್ಥಾಪನ್ ಕರ್ನ್ ಸಭಾರ್ ವರ್ಸಾಂ ಚಲಯಿಲ್ಲೊ ಹೊ ’ಉಮಾಳೊ’, ’ಕಾಣಿಕ್’, ’ಆಮ್ಚೊ ಯುವಕ್’ ಪತ್ರಾಚೆಂ ಸಂಪಾದಕ್ಪಣ್ಯಿ ಕೆಲ್ಲೊ. ಕೊಂಕ್ಣೆಂತ್ ಆಸ್ಚಾ ಭೋವ್ ಥೊಡ್ಯಾ ಹಾಸ್ಯ್ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ.
ರಿಚ್ಚಿ ಪಿರೇರ್
ಕಾಜಾರ್ ಜಾಂವ್ಚ್ಯಾ ಆದಿಂ ಹಾಂವ್ ಕಾಜಾರಾ ಖಾತಿರ್ ಕಿತ್ಲೊ ಆಶೆತಾಲೊಂಗೀ, ಆತಾಂ ಕಾಜಾರ್ ಜಾಲ್ಯಾ ನಂತರ್ ತಿತ್ಲೊಚ್ ಕಾಂಟಾಳ್ತಾಂ. ಕಾಜಾರಾ ಆದ್ಲಿ ಆಶಾ, ಆತ್ರೆಗ್ ಆನಿ ಕುತೂಹಲ್ ಪೂರಾ ಪೊರ್ಚ್ಯಾ ಶಿರಾಂಧಾರಿಚಾ ಪಾವ್ಸಾಕ್ ಕೊಸ್ಳೊನ್ ಪಡ್ಲ್ಯಾಂತ್.
ಪೂಣ್ ಹಾಂತು ಮ್ಹಜ್ಯೆ ಬಾಯ್ಲೆಚಿ ಕಸಲಿಚ್ಚ್ ಚೂಕ್ ನಾ. ಚೂಕ್ ಮ್ಹಜಿಚ್. ಆಪ್ಲ್ಯಾ ಆವಯ್-ಬಾಪಯ್ಚ್ಯಾ ಘರಾ ಜೇವ್ನ್ ಖಾವ್ನ್, ಸುಖಾ-ಸಂತೊಸಾನ್ ಮಾಣ್ಕುಲೆಂ ಆಸ್ಲ್ಲ್ಯಾ ತಾಕಾ ಗಳ್ಯಾಕ್ ಪಿಡ್ಡುಕ್ ಬಾಂದುನ್ ವೋಡ್ನ್ ಹಾಡ್ಲ್ಲಿ ಮ್ಹಜಿ ವ್ಹಡ್ಲಿ ಚೂಕ್.
ಮ್ಹಜಿ ಚೂಕ್ ಮ್ಹಣೊನ್ ಹೆಂ ಬಾವ್ಡೆಂ ಮ್ಹಜೆಂ ಅರ್ದೆಂ ಆಂಗ್ಲೆಂ - ಗಾಂವಾರ್ ಗಾಜಯ್ನಾ. ಹಾವೆಂ ಊಟ್ ಮ್ಹಳ್ಯಾರ್ ಉಟ್ತಾ, ಬಸ್ ಮ್ಹಳ್ಯಾರ್ ಬಸ್ತಾ. ಪುಣ್ ಕೆದೊಳ್ ಮ್ಹಣಾಸರ್ ತಿಣೆಂ ಆಶೆಂ ’ಬಸ್ಕಿ’ ಕಾಡ್ನ್ ದೀಸ್ ಕಾಡ್ಚೆ? ತಿಚೆ ಥಾವ್ನ್ ಏಕ್_ದೋನ್ ಸೊಡ್ನ್ ದುಸ್ರೊ ಕಸಲೊಚ್ ಮ್ಹಾಕಾ ಫಾಯ್ದೊ ನಾ. ಆಶೆ ಮ್ಹಣೊನ್, ಮ್ಹಜೆ ಥಾವ್ನ್ ತಿಕಾ ಕಸಲೊ ಫಾಯ್ದೊ ಆಸಾ ತೆಂಯ್ ತೊಂಡ್ ಸೊಡ್ನ್ ಸಾಂಗಾನಾ. ಅಸಲ್ಯಾ ಬಾಯ್ಲೆ ಲಾಗಿಂ ಹಾಂವೆ ದೀಸ್ ಕಾಡ್ಚೆ ತರ್ಯ್ ಕಶೆಂ?
ಆತಾಂ ಮ್ಹಾಕಾ ಖಂತ್ ಮ್ಹಜ್ಯಾ ಜಿವಾಚಿ ವ ಕುಡಿಚ್ಯಾ ಖುಶಾಲಾಯೆಚಿ ನ್ಹಯ್. ಮ್ಹಾಕಾ ಖಂತ್ ಮ್ಹಜ್ಯಾ ಬಾಯ್ಲೆಚ್ಯಾ ಬರ್ಯಾಪಣಾಚಿ. ಹಾಂವ್ ಆಸ್ತಾಂ ಮ್ಹಣಾಸರ್ ಗಾಡಿ ಕಶಿಯ್ ಮುಖಾರ್ ವೊಡಿತ್. ಹಾಂವ್ ಮೆಲ್ಯಾ ಉಪ್ರಾಂತ್ ತಿಚಿ ಗತ್?
ಹಾಂವ್ ಮೆಲ್ಯಾ ಉಪ್ರಾಂತ್ಲಿ ಖಂತ್ ಮ್ಹಾಕಾ ಆತಾಂ ಜೀವ್ ಆಸ್ತಾನಾಂಚ್ ಕಿತ್ಯಾ ಆಯ್ಲಿ ಜಾಣಾಂತ್? ಹಾಂವೆ ಮ್ಹಜ್ಯಾ ಬಾಯ್ಲೆಕ್ ಫಕತ್ ಮ್ಹಜ್ಯಾ ಭೋಗಾಚಿ ವಸ್ತ್ ಜಾವ್ನ್ ವ ಮನೋರಂಜನಾಚೊ ಖೆಳ್ ಜಾವ್ನ್ ವ ಹಾವೆಂ ಜಲ್ಮಾಂವ್ಚ್ಯಾ ಬುರ್ಗ್ಯಾಂಚಿ ಆವಯ್ ಜಾವ್ನ್ ಹಾಡುಂಕ್ ನಾ. ಮ್ಹಜ್ಯಾ ಕುಶಿಚಿ ಬೋರ್ ಜಾವ್ನ್, ಮ್ಹಜ್ಯಾ ಉರ್ಬೆಚೊ ಸ್ಪಿರಿತ್ ಜಾವ್ನ್ ಮ್ಹಜೊ ಮೋಗ್ ತಿಚೆರ್ ಸಮಪ್ರಮಾಣಾಚೆರ್ ವೊತ್ಚ್ಯಾ ಖಾತಿರ್ ಕಾಜಾರಿ ಭೆಸ್ ಫಳಾದೀಕ್ಪಣಿ ಜೊಡ್ಚ್ಯಾ ಖಾತಿರ್ ಹಾಡ್ಲಾಂ.
ಮ್ಹಜೊ ಎಕ್ಲೊ ಈಷ್ಟ್ ಆಸಾ. ನಿಜಾಯ್ಕಿ ಮ್ಹಾಕಾ ತಾಚೊ ರಾಗ್ ಯೆತಾ. ಘರ್ಚ್ಯಾ ಕಾಮಾಕ್ ಬರೆಂ ಚೆಡುಂ ಮೆಳಾನಾ ಮ್ಹಣೊನ್ ತೊ ಕಾಜಾರ್ ಜಾಲ್ಲೊ ಖಂಯ್. ಕಾಜಾರಿ ಬಾಯ್ಲ್ ಘೊವಾಚ್ಯಾ ಸೆವೆಕ್ಯ್ ಜಾತಾ, ಘರ್ಚ್ಯಾ ಕಾಮಾಕ್ಯ್ ಜಾತಾ, ಜಲ್ಮೊಂಚ್ಯಾ ಭುರ್ಗ್ಯಾಂಚಿ ಚಾಕ್ರಿ ಕರುಂಕ್ಯ್ ಜಾತಾ. ಹ್ಯಾ ಸರ್ವ್ ಕಾಮಾಕ್ ದೊಗಾಂ-ತೆಗಾಂ ಆಯಾ ಜಾಯ್ ಪಡ್ತಿತ್. ತಾಂಕಾ ಸಾಂಬಾಳ್ ದೀಂವ್ಕ್ ಆನಿ ಆಟಾಪುಂಕ್ ಕಿತ್ಲೊ ದುಡು ಜಾಯ್ ಪಡಾತ್? ಆನಿ ಆಜ್ಕಾಲ್ ಕಿತ್ಲೊ ಸಾಂಬಾಳ್ ದಿತಾಂ ಮ್ಹಳ್ಯಾರ್ಯ್ ಘರ್ಕಾಮಾಕ್ ಚೆಡುಂ ಮೆಳ್ತಾ ಖಂಯ್?
ಥೊಡಿಂ ಚೆಡ್ವಾಂ ಆತಾಂ ಖೂಬ್ ಶಿಕ್ತಾತ್. ಫಾಲ್ಯಾಂ ಸಕಾಳಿಂ ತಾಂಕಾಂ ಘೊವಾಚಾ ಘರಾ ಧಾಂವ್ಡಾಂವ್ಕ್ ಆಸಾ. ಸೈರಿಕ್ ಯೆತಾನಾ ಪಯ್ಲೊ ಪ್ರಸ್ತಾಪ್ - "ಚೆಡುಂ ಕಿತ್ಲೆಂ ಶಿಕ್ಲಾಂ? ಕಿತ್ಲೆಂ ಜೊಡ್ತಾ?" ಅಶೆಂ ವಿಚಾರ್ತಾತ್. ಆಜ್ ಕಾಲ್ಚೆ ಪೆಂಕ್ಟಾಂತ್ ಬಳ್ ನಾತ್ಲ್ಲೆ, ಪಾಟ್ ಬಾಗಾನಾತ್ಲ್ಲೆ ಥೊಡೆ ನೊವ್ರೆ. ಆದಿಂ ಚೆಡ್ವಾಚಿ ಪ್ರಾಯ್ ಆನಿ ಚೆಡ್ಯಾಚೊ ಸಾಂಬಾಳ್ ಕಿತ್ಲೊ ಮ್ಹಣೊನ್ ಕೊಣ್ಯ್ ವಿಚಾರಿನಾತ್ಲ್ಲೆ. ಆತಾಂ ಚೆಡ್ವಾಚೊ ಸಾಂಬಾಳ್ ಆನಿ ಚೆಡ್ಯಾಚಿ ಪ್ರಾಯ್ ಕೊಣ್ಯ್ ಸಾಂಗಾನಾಂತ್. ಕಿತ್ಯಾ ಮ್ಹಳ್ಯಾರ್, ಚೆಡ್ವಾನ್ ಜೊಡ್ಲ್ಲೆ ತಿತ್ಲೆಂ ಚೆಡ್ಯಾನ್ ಜೊಡ್ತಾನಾ - ಚೆಡೊ ಆರ್ದೊ ಮಾತಾರೊ ಜಾತಾ. ಹ್ಯಾ ವೆಳಾರ್ ತಾಚಿ ಪ್ರಾಯ್ ಸಾಂಗ್ಲ್ಯಾರ್ ಮಾಗಿರ್ ತಾಕಾ ಕಾಜಾರ್ಯ್ ನಾ, ಭೊಜೊಯ್ ನಾ. ಆದ್ಲೆ ನೊವ್ರೆ ಕಾಜಾರ್ ಜಾವ್ನ್ ಘರ್ ನಂದನ್ ಕರ್ಚೆ ಖಾತಿರ್ ವೊಕ್ಲೆಕ್ ಹಾಡ್ತಾಲೆ. ಆತಾಂಚೆ ನೊವ್ರೆ ಕಾಜಾರ್ ಜಾವ್ನ್ ದೋನ್ಚ್ ದಿಸಾಂ ಭಿತಾರ್ ಹೊಕ್ಲೆಕ್ ಭಾಯ್ರ್ ಕಾಮಾಕ್ ಜೋಡ್ನ್ ಹಾಡುಂಕ್ ಧಾಡ್ತಾತ್, ವಚಾನಾ ತರ್ ಲೊಟ್ತಾತ್. ಮಾಗಿರ್ ಹೆ ಸೊರೊ ಪಿಯೆವ್ನ್ ಪಡ್ತಾತ್.
’ಜೊಡ್ಚೆಂ ಚೆಡುಂ ಜಾಯ್’ ಮ್ಹಣೊನ್ ಲಾಳ್ ಗಳಂವ್ಚ್ಯಾ ಅಸಲ್ಯಾ ಪರ್ದೆಶಿ ಚೆಡ್ಯಾಂ ಖಾತಿರ್, ಪಾಪ್-ಚೆಡ್ವಾಂಚಿಂ ವ್ಹಡಿಲಾಂ ತಾಂಕಾಂ ಇಸ್ಕೊಲ್ ಶಿಕಯ್ತಾತ್ ಆನಿ ಖಂಯ್ಚ್ಯಾಯ್ ಕಾಮಾಚಿ ಲಾಯ್ನ್ ಶಿಕಾಯ್ತಾತ್. ಆಪ್ಲ್ಯಾ ದುವೆಕ್ ’ಬರಿ ಸೈರಿಕ್ ಯೇಂವ್ದಿ’ ಮ್ಹಳ್ಳ್ಯಾ ಅಂಗಾಲಾಪಾನ್, ತಾಚ್ಯಾ ಬಾಂಗಾರಾ ಖಾತಿರ್ ಆನಿ ಫುಡಾರಾ ಖಾತಿರ್ ದೀಸ್ರಾತ್ ಘೊಳೊನ್, ಆಪ್ಲಿ ಕೂಡ್ ಮ್ಹಳ್ಳಿ ತಿ ಘಾಣ್ಯಾಕ್ ದಿಲ್ಲ್ಯಾ ಕೊಬಾ ಪರಿ ಚಿವಂಡ್ ಕರ್ತಾತ್.
ಆನಿ ಥೊಡ್ಯಾ ಚೆಡ್ವಾಂಚಿಂ ವ್ಹಡಿಲಾಂ ತಾಂಕಾಂ ಘರ್-ಖಾತ್ಯಾಕ್ ಧಾಡುಂಕ್ ಭಿಯೆತಾತ್. ಹ್ಯಾ ಕಾರಾಣಾ ಖಾತಿರ್: ಥೊಡೆ ಘರ್ವಾಲೆ ತಾಂಚೆ ಕರ್ನಾ ಘರ್ಚೆಂ ಕಾಮ್ ಕರಾಯ್ತಾತ್ ಆನಿ ಮಾಗಿರ್ ಆಪ್ಲೆಂ ಖಾಸ್ಗಿ ಕಾಮ್ಯ್ ಕರಯ್ತಾತ್. ಪಯ್ಲೆಂ-"ಮ್ಹಾಕಾ ಚಿಕ್ಕೆ ಪುರೊ ಜಾಲಾಂ, ಪಾಂಯ್ ದಾಂಬ್" ಮ್ಹಣೊನ್ ಫರ್ಮಾಯ್ತಾತ್. ಮಾಗಿರ್ಚೆ ಮಾಗಿರ್ ಭಿರ್ಮತ್ ಚೆಡ್ವಾಂ (ಸಾದಿಂ ಬೊಳಿಂ ಗೊರ್ವಾಂ) ಆಪ್ಲೊ ಧನಿ ಮ್ಹಳ್ಳ್ಯಾ ಮೊಗಾನ್ ಆನಿ ಗೌರವಾನ್ ಖಂಚ್ಯಾ ಕಾಮಾಕ್ಯ್ ತಯಾರ್ ಜಾತಾತ್.
ಹ್ಯಾಚ್ ಕಾರಾಣ್ ಖಾತಿರ್, ಆತಾತಾಂ ಥೊಡಿಂ ವ್ಹಡಿಲಾಂ ಚೆಡ್ವಾಂಕ್ ಪೊಸುಂಕ್ ತಾಂಕಾನಾ ಜಾಲ್ಯಾರ್ ಶೀದಾ ಗಲ್ಫಾಕ್ ಧಾಡ್ತಾತ್. ಹಾಂಗಾ ಗಾಂವಾತ್ ಪಾಡ್ ಜಾಂವ್ಚ್ಯಾ ಬದ್ಲಾಕ್ ಸಾತ್ ದರ್ಯೊ ಉತ್ರೊನ್ ಲೊಕಾಚಾ ದೊಳ್ಯಾಂ ಭಾಯ್ರ್ ಪಾಡ್ ಜಾಂವ್ದಿತ್. ದೋನ್ ವರ್ಸಾಂ ಭಿತರ್-ತಿಂ ಜಿವಾಂತ್ ಭರೊನ್, ಭಾಂಗಾರಾನ್ ನೆಟೊನ್, ಪರ್ಮಳಾನ್ ವೊಮ್ತೊನ್ ಗಾಂವಾಕ್ ದೆಂವ್ತಾನಾ-ತಾಂಕಾಂ ಮೋಲ್ ಬಾಂಧುಂಕ್ ಆನಿ ತಾಂಚ್ಯೊ ಖಬ್ರೊ ಕರುಂಕ್ ಹಾಂಗಾಚಾ ಬಾಯ್ಲಾಂಕ್ ಖಂಯ್ ಬೆಟ್ರಿ ಆಸಾ?
ಆಂಬ್ಯಾರ್ ಥವ್ನ್ ಕುಂಬ್ಯಾರ್ ಉಡ್ಚೆಂ ಮ್ಹಣ್ಚೆಂ ಹಾಕಾಚ್. ಹಾಂವ್ ತುಮ್ಕಾಂ ಮ್ಹಜ್ಯಾ ಇಷ್ಟಾಚೆಂ ಹಣೆಬರಾಪ್ ಸಾಂಗ್ತಾಲೊಂ. ಥೂ! ತೊ ಮ್ಹಜೊ ಈಷ್ಟ್ ಮ್ಹಣೊಂಕ್ಯ್ ಮ್ಹಾಕಾ ಕಾಂಟಾಳೊ ಯೆತಾ. ನಾ ಜಾಲ್ಯಾರ್, ತಾಚಿ ಗಲೀಜ್ ಬಯಾಗ್ರಫಿ ಲಜ್ ನಾಸ್ತಾಂ ಮ್ಹಜೆ ಮುಖಾರ್ ಪಾತ್ಳಾಯ್ತಾ ತೊ. ಪಂದ್ರಾ ವರ್ಸಾಂ ಭರ್ಲ್ಯಾ ನಂತರ್ ತೊ ಕಿತ್ಲಿಂ ಕಾಜಾರಾಂ ಜಾಲಾಂ ಮ್ಹಳ್ಳೆಂ ತಾಕಾಚ್ ಲೇಖ್ ನಾ ಖಂಯ್. ಪೂಣ್ ರೆಸ್ಪೆರ್ ಮಾತ್ರ್ ಏಕ್ಚ್ ಜಾಲೊ ಖಂಯ್. ತೆಂಯಿ ಘರ್ಚ್ಯಾ ಕಾಮಾಕ್ ಏಕ್ ಚೆಡುಂ ಜಾಯ್ ಮ್ಹಳ್ಳ್ಯಾ ಮತ್ಲಾಬಾ ಖಾತಿರ್, ಆತಾಂ ತಾಕಾ ಘರ್ಚಿ ಖಂತ್ ನಾ ಖಂಯ್. ಸಕಾಳಿಂ ಉಟೊನ್ ಭಾಯ್ರ್ ಚಲ್ಚೆಂ, ಪೋಟ್ ಭರ್ಚೆ ಖಾತಿರ್ ಇಲ್ಲೆಂ ಜೊಡ್ಚೆಂ, ಪೋಟ್ ಭರ್ಲ್ಯಾ ನಂತರ್ ಸಾಂಜೆರ್ ’ಕಾಜಾರ್’ ಜಾಂವ್ಚೆಂ, ಮಾಗಿರ್ ಸಮಾ ಆಸ್ಲ್ಯಾರ್ ರಾತಿಂ ಘರಾ ಯೇವ್ನ್ ನಿದ್ಚೆಂ. ಟಾಯ್ಟ್ ಜಾಲ್ಯಾರ್ ನಿದೊಂಕ್ ಮಾರ್ಗಾ ದೆಗೆಲಿ ಚರಂಡಿಯ್ ಜಾತಾ, ಆಂಗ್ಡಿ-ಬಾಗಿಲ್ಯ್ ಜಾತಾ. ತಾಚಿ ಬಾಯ್ಲ್ ಭಿರ್ಮತ್ ರಾತಿಂ ಬಾರಾ ವರಾಂ ಪರ್ಯಾಂತ್ ಜೆವಿನಾಸ್ತಾಂ ರಾಕೊನ್ ಬಸ್ತಾ-ನೊವ್ರ್ಯಾ ಸಾಂಗಾತಾ ಜೇಂವ್ಕ್ ಬಸ್ಲ್ಯಾರ್ ದೋನ್ ಉಂಡಿಯೊ ಶಿತ್ ಚಡ್ ಪೊಟಾಕ್ ವಚಾತ್ ಮ್ಹಳ್ಳ್ಯಾ ಅಂಗಾಲಾಪಾನ್.
ಪುಣ್ ಹಾಂವ್ ಕಾಜಾರಿ ಭೆಸಾಚೊ ನಿತಳ್ ಉದ್ದೇಶ್ ದವರ್ನ್ ಕಾಜಾರ್ ಜಾಲ್ಲೊಂ ಜಾಲ್ಲ್ಯಾನ್ಚ್ ಮ್ಹಾಕಾ ಮ್ಹಜ್ಯೆ ಬಾಯ್ಲೆಚಿ ಭಿರ್ಮತ್. ಎಕಾ ವೆಳಾ ಹಾಂವ್ ಮೆಲೊಂ ತರ್ ಮ್ಹಜ್ಯೆ ಬಾಯ್ಲೆಚಿ ಗತ್ ಕಿತೆಂ ಮ್ಹಳ್ಳಿಚ್ ಕಳ್ವಳ್ಯಾಂಚಿ ಖಂತ್. ವಿಧವ್ ಮ್ಹಣೊನ್ ತಿಕಾ ಕೊಣ್ಯ್ ಮಾತಾರ್ಯಾಚ್ಯಾ ವ ಬೆಬ್ದ್ಯಾಚ್ಯಾ ಗಳ್ಯಾಕ್ ಬಾಂದ್ತಿತ್ ತರ್ ತಿಣೆಂ ಮಾಗಿರ್ ರಡೊನ್ ರಡೊನ್ ಅರ್ಧಿ ಪುಲ್ಗೋತ್ರ್ ಸಂಸಾರಾಂತ್ಚ್ ಭೊಗಾಜೆ ಪಡಾತ್. ಹಾಂವ್ ಜೀವ್ ಆಸ್ತಾನಾ ತಿ ಕಶಿ ಸುಖಾ-ಸಂತೊಸಾನ್ ಆಸಾ, ತಶಿ ಹಾಂವ್ ಮೆಲ್ಯಾ ಉಪ್ರಾಂತ್ ತಿಚೆಂ ಆವ್ಕ್ ಸಂಪ್ತಾವರೇಗ್ ಸಂತೊಸಾನ್ ತಿಣೆಂ ಆಸಾಜೆ. ತೆದ್ನಾಂ ಮಾತ್ರ್ ಮ್ಹಾಕಾ ಮೆಲ್ಯಾರ್ಯ್ ಮಾತಿ ಲಾಗಾತ್.
ಹಾಂವ್ ಖಂಡಿತ್ ಜಾಣಾಂಕೀ ಮ್ಹಜ್ಯಾ ಮೊರ್ನಾ ಉಪ್ರಾಂತ್ ತಿ ವಿಧವ್ ಜಾವ್ನ್ ಉರಾತ್ ತರ್ ಸುಖ್-ಸಂತೊಸ್ ಮ್ಹಳ್ಳೊ ತೊ ತಿಕಾ ’ಮೊಳ್ಬಾ ವಯ್ಲಿ ಭುತಿ’ ಜಾಯ್ತ್. ತಿಚೊ ಸತ್ತಿ ಸ್ವಭಾವ್, ಸಾದೆಂಪಣ್ ಹ್ಯಾ ಸಂಸಾರಾಂತ್ ತಿಕಾ ಮಾರಗ್ ಪಡಾತ್. ಹ್ಯಾ ಖಾತಿರ್ ಚಿಂತುನ್ ಚಿಂತುನ್ ಹಾಂವ್ ಎಕಾ ನಿಮಾಣ್ಯಾ ನಿರ್ಧಾರಾಕ್ ಪಾವ್ಲಾಂ ಮಾತ್ರ್.
ತೊ ನಿರ್ಧಾರ್ ಆಯ್ಕೊನ್ ತುಮ್ಕಾಂ ನಿಜಾಯ್ಕ್ಯ್ ಉಸ್ತುರೆಂ ವೆತೆಲೆಂ. ಹಾಂವ್ ಮೊರ್ಚಾ ಆದಿಂಚ್ ತಿಕಾ ಏಕ್ ಸೈರಿಕ್ ಪಳವ್ನ್ ದವರ್ಚಿ-ಆಶೆಂ ಖಂಡಿತ್ ಕೆಲೆಂ. ಹಾಂವ್ ಮೆಲ್ಯಾ ಉಪ್ರಾಂತ್ ಮ್ಹಜೆ ಬಾಯ್ಲೆಲಾಗಿಂ ಲಗ್ನಾಂತ್ ಎಕ್ವಟ್ಚೊ ದಾದ್ಲೊ ಅಪುಟ್ ಆಂಕ್ವಾರ್ ಆಸಾಜೆ ಮ್ಹಳ್ಳೆಂ ಹಟ್ಟ್ ಬಿಲ್ಕುಲ್ ನಾ. ಪುಣ್ ತೊ ಮ್ಹಜ್ಯೆಪರಿಚ್ ದಯಾಳ್, ಮೊಗಾಳ್, ಖಾಲ್ತ್ಯಾ ಕಾಳ್ಜಾಚೊ ಜಾವ್ನ್ ಆಸೊಂಕ್ ಜಾಯ್. ಹಾವೆಂ ಮ್ಹಜ್ಯೆ ಬಾಯ್ಲೆಕ್ ಎದೊಳ್ ಪಳೆಲ್ಲೆ ಪರಿ ತಾಣೆಂಯಿ ಮೊಗಾ-ಮಾಯ್ಪಾಸಾನ್ ತಿಕಾ ಚಲಂವ್ಕ್ ಜಾಯ್.
ಏಕ್ ಕಾಜಾರಿ ವಿಶ್ವಾಸಿ ಘೊವ್ ಜಾವ್ನ್ ಮ್ಹಜ್ಯಾ ಮೊಗಾಳ್ ಬಾಯ್ಲೆ ಖಾತಿರ್ ಹಾಂವೆಂ ಕರ್ಯೆತ್ ಜಾಲ್ಲೆಂ ಮಹಾನ್ ಕಾಮ್ ಹಾಂವ್ ಆತಾಂ ಕರುನ್ ಆಸಾಂ. ಸಂಸಾರಾಂತ್ಲೆ ಸರ್ವ್ ದಾದ್ಲೆ ಆಪ್ಲ್ಯಾ ಮರ್ಣಾ ನಂತರ್-ಬಾಯ್ಲೆನ್ ಸುಖಿ ಆಸಾಜೆ ಮ್ಹಣ್ ಪಯ್ಶೆ ಜಮಾಯ್ತಾತ್ ಆನಿ ಇನ್ಸೂರ್ ಕರ್ತಾತ್. ಪುಣ್ ಫಕತ್ ಪಯ್ಶಾ ವರ್ವಿಂ ಸಂಸಾರಾರ್ ಕೊಣೆಯ್ ಸುಖಿ ಜಾಲ್ಲೆ ಪರಿ ನಾ ಮ್ಹಣೊನ್ ತಾಂಚ್ಯಾ ತಕ್ಲೆಕ್ ಕಿತ್ಯಾಕ್ ವಚಾನಾ-ತೆಂ ಮ್ಹಾಕಾ ಕಳಾನಾ.
ಮ್ಹಜ್ಯಾ ಬಾಯ್ಲೆಕ್ ದುಸ್ರ್ಯಾಪಣಾಕ್ ದಾದ್ಲೊ ಸೊದ್ಚ್ಯಾ ಪ್ರಾಸ್ ಚಡ್ ಕಷ್ಟ್ ಮ್ಹಾಕಾ ದಿಸ್ತಾತ್-ತಿಚ್ಯಾ ದುಸ್ರ್ಯಾ ಕಾಜಾರಾಕ್ ತಿಕಾ ಕಶೆಂ ತಯಾರ್ ಕರ್ಚೆಂಗಿ ಮ್ಹಣ್. ತಿ ಹಾಂವ್ ಮ್ಹಳ್ಯಾರ್ ಜೀವ್ ಸೊಡ್ತಾ. ಹಾಂವ್ ಚಿಕ್ಕೆ ಹುಶಾರ್ ನಾ ತರ್ ತಿಚ್ ಹುಶಾರ್ ನಾತ್ಲೆ ಪರಿ ಕರ್ತಾ. ಹಾಂವ್ ತಿಕ್ಕೆ ಭುಖೆಲ್ಯಾರ್ ತಿಚ್ ಭುಖೆಲ್ಲ್ಯಾ ಪರಿ ಚಡ್ಪಡ್ತಾ. ಹಾವೆಂ ಕಿತೆಂಯ್ ಖಂತ್ ಉಚಾರ್ಲ್ಯಾರ್ ’ತುಂ ಭಿಯೆನಾಕಾ, ಹಾಂವ್ ಆಸಾಂ’ ಮ್ಹಣ್ತಾ. ಅಸಲ್ಯಾ ಬಾಯ್ಲೆ ಖಾತಿರ್ ಜೀವ್ ದಿವ್ಯಾಂ ಮ್ಹಣ್ ಮ್ಹಾಕಾ ಭೊಗ್ತಾ. ಪುಣ್ ’ಹಾಂವ್ ಮೆಲ್ಯಾ ಉಪ್ರಾಂತ್ ತುಂ ಆನ್ಯೇಕ್ ಕಾಜಾರ್ ಜಾ. ತುಕಾ ಮ್ಹಜ್ಯೆ ಪರಿಚ್ ಬರೊ ಚೆಡೊ ಸೊದ್ಲಾ’ ಮ್ಹಣೊನ್ ತಿಕಾ ಸಾಂಗಾನ್ ತರ್ ತಿಕಾ ಕಶೆಂ ಭೊಗಾತ್ - ತಿಚ್ಚ್ ಮ್ಹಾಕಾ ಭಿರಾಂತ್ ದಿಸ್ತಾ.
ಎಕೆ ರಾತಿಂ ಬಾಯ್ಲೆಚೊ ಬರೊ ಮೂಡ್ ಪಳೆವ್ನ್ ತಿಕಾ ಸಾಂಗೊನ್ ಸೊಡ್ಲೆಂ. ತಿ ’ಆಂ’ ಕರ್ನ್ ಮ್ಹಾಕಾಚ್ ಪಳಂವ್ಕ್ ಪಡ್ಲಿ. ಉಪ್ರಾಂತ್ ಉಮಾಳ್ಯಾನಿಂ ಉಶ್ಯಾಂತ್ ತೋಂಡ್ ಚೆಪುನ್ ಸುಸ್ಕಾರೊಂಕ್ ಲಾಗ್ಲಿ. ರಡ್ಲ್ಯಾರ್ ತಕ್ಲಿ ಹಾಳು ಜಾತಾ ಖಂಯ್. ಹಾಂವೆಂ ತಿಕಾ ಜಾಯ್ ತಿತ್ಲೆಂ ರಡೊಂಕ್ ಸೊಡ್ಲೆಂ. ಆನಿ ಹಾಂವ್ ಖಾಟಿಯೆಚಾ ಖುಂಟ್ಯಾಕ್ ವಣ್ಕೊನ್ ಬೊಸ್ಲೊಂ.
ಥೊಡ್ಯಾ ವೆಳಾನ್ ಸಟ್ಟ್ ಕರ್ನ್ ಉಟೊನ್, ಮ್ಹಾಕಾ ವೆಂಗೊನ್ ಕುಡ್ಕ್ಯಾ ಕುಡ್ಕ್ಯಾ ಉತ್ರಾಂನಿ ಉಚಾರಿಲಾಗ್ಲಿ. ಮ್ಹಜೊ ಉಸ್ವಾಸ್ ಆಸ್ತಾ ಮ್ಹಣಾಸರ್ ಮಾತ್ರ್ ತಿಣೆಂ ವಾಂಚ್ಚೆಂ ಖಂಯ್. ಹಾಂವ್ ಮೆಲ್ಯಾ ನಂತರ್ ತಿಕಾ ದುಸ್ರ್ಯಾ ಕಾಜಾರಾಚೆಂ ಸುಖ್ ಸೊಡ್. ಹ್ಯಾ ಅಣ್ವ್ಯಾ ಸಂಸಾರಾಂತ್ ಏಕ್ ಘಡಿ ವಾಂಚೊಂಕ್ಯ್ ದೂಖ್ ದಿಸ್ತಾ ಖಂಯ್. ಮ್ಹಜ್ಯಾ ಮೊರ್ನಾಚಿ ಖಬಾರ್ ಆಯಿಲ್ಲಿಚ್ ತಿ ತಿಚೊ ಜೀವ್ ಹೊಗ್ಡಾಯ್ತಾ ಖಂಯ್.
ಆಯ್ಕೊನ್ ಹಾಂವ್ ಶಿರಿಂ ಚುಕ್ಲೊಂ. ಹಾಂವ್ ತಿಚೆ ಖಾತಿರ್ ಉಪ್ರಾಂತ್ಯ್ ಸುಖಾಚಿಂ ಯೋಜನಾಂ ಮಾಂಡುನ್ ಆಸಾಂ ಆನಿ ತಿ ಜೀವ್ಘಾತಾಚೆಂ ಚಿಂತುನ್ ಆಸಾ. ಪುಣ್ ಹ್ಯಾ ವಿಶಿಂ ಮ್ಹಾಕಾ ಕಾಂಯ್ ಕರುಂಕ್ ಜಾಯ್ನಾ. ತ್ಯಾ ವೆಳಾರ್ ಹಾಂವ್ ಜೀವ್ ಆಸ್ಲ್ಯಾರ್ ನ್ಹಯ್ವೇ ಕಿತೆಂಯ್ ಕರ್ಚೆಂ?
ತಿತ್ಲ್ಯಾರ್ ಹಾವೆಂ ಮೊರ್ಚಿಂ ಚಿಂತ್ನಾಂ ಸೊಡ್ನ್ ಸೊಡ್ಲಿಂ. ಕಿತ್ಯಾಕ್ ಮ್ಹಳ್ಯಾರ್, ಹಾಂವ್ ಆವ್ಕ್ ಸಂಪೊನ್ ಮೊರ್ತಾನಾ-ಮ್ಹಜ್ಯಾ ಬಾಯ್ಲೆನ್ ಜೀವ್ಘಾತ್ ಕರ್ನ್, ತಿಚೆಂ ಆಸ್ಲ್ಲೆಂ ಆವ್ಕಾಚೆಂ ವಯರ್ ಕಟ್ಟ್ ಕರ್ಚೆಂ ಮ್ಹಾಕಾ ಸೊಸಾನಾ. ವಯ್ಲ್ಯಾನ್, ದೆವಾನ್ ದಿಲ್ಲೆಂ ಆವ್ಕ್ ದೆವಾನ್ಚ್ ವಿಚಾರ್ನ್ ವರಾಜೆ ಸೊಡ್ನ್ ಅತ್ಮೊ ಹೊಗ್ಡಾವ್ಕ್ ಮನ್ಶ್ಯಾಂಕ್ ಆಡ್ವಾರ್ಲಾಂ. ನಿಮಾಣೆಂ ಲಾಯ್ಟ್ ಪಾಲ್ವೊಂಚಾ ಆದಿಂ ತಿ ಮ್ಹಾಕಾ ಆನಿಕ್ಯ್ ತೆಂಕೊನ್ ಬಸೊನ್ ಮ್ಹಣಾಲಿ
"ಹಾಂವ್ ತುಕಾ ಬಿಲ್ಕುಲ್ ಮೊರೊಂಕ್ ಸೊಡಿನಾಂ"
ಹಾವೆಂ ಆಲ್ತಾರಿಕ್ ಪಳೆವ್ನ್ ಹಾತ್ ಜೊಡ್ಲೆ ಆನಿ ಮನಾಂತ್ಚ್ ಮ್ಹಳೆಂ-"ಮ್ಹಜ್ಯೆ ಬಾಯ್ಲೆ ಪ್ರಾಸ್ ಏಕ್ ದೀಸ್ ಚಡ್ ಆವ್ಕ್ ಮ್ಹಾಕಾ ದೀ ದೆವಾ......" ಮಾಗಿರ್ ಲಾಯ್ಟ್ ಪಾಲ್ವವ್ನ್ ಸೊಡ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
