ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 8
ಕಾಳೊಕಾಂತ್ಲಿಂ ಕಾಂತಾರಾಂ
ಬೂಕ್: ಕಾಳೊಕಾಂತ್ಲಿಂ ಕಾಂತಾರಾಂ.
ಕವಿ: 44 ವೆವೆಗ್ಳೆ ಕವಿ
ಪ್ರಸ್ತಾವನ್: ಮೆಲ್ವಿನ್ ರೊಡ್ರಿಗಸ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 88
ಮೋಲ್: ರು. 100
ಪ್ರಕಾಶಕ್: ಕವಿತಾ ಪಬ್ಲಿಕೇಶನ್ಸ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ವಾಸ್ ಕೆಲರಾಯ್
ತಾರಿಕ್: 14 ಅಕ್ತೋಬರ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ಮೆಲ್ವಿನ್ ರೊಡ್ರಿಗಸ್
ಕವಿಚಿ ವ್ಹಳೊಕ್:
ಮೆಲ್ವಿನ್ ರೊಡ್ರಿಗಸ್, ಕೊಂಕ್ಣೆಂತ್ಲ್ಯಾ ಮ್ಹಾಲ್ಘಡ್ಯಾ ಕವಿಂಪಯ್ಕಿ ಎಕ್ಲೊ. ಕೊಂಕ್ಣಿ ಕವಿತಾಂಕ್ ನವೆಂ ರೂಪ್ ದಿಂವ್ಚಾಂತ್ ನವ್ಯಾ ವಾವ್ರಾಚಿ ಬುನ್ಯಾದ್ ಘಾಲ್ಲೊ. ತಾಚಾ ಫುಡಾರ್ಪಣಾಖಾಲ್, ದೆ|ಚಾ.ಫ್ರಾ.ದೆ’ಕೋಸ್ತಾಚಾ ಮಾರ್ಗ್ದರ್ಶನಾಖಾಲ್ ಅಜಿಕ್ ಅಟ್ರಾ-ವೀಸ್ ವರ್ಸಾಂಧಿಂಚ್ ’ಜಾಗೆ ಕವಿ’ ಪಂಗಡ್ ಉದೆಲ್ಲೊ ಆನಿಂ ಆಯ್ಚಾ ಕಾಳಾಚೆ ಭರ್ವಶ್ಯಾಚೆ ಕವಿ ಉದೆಲ್ಲೆ ತೆಚ್ಚ್ ವೆಳಾರ್. ಕವಿತಾ ಸಾಯ್ಟಾಚೊ ಸಂಪಾದಕ್ ಜಾವ್ನ್, ದುಭಾಂಯ್ತ್ ಕೊಂಕ್ಣಿ ಕವಿತಾಚಿಂ ಕಾಮಾಸಾಳಾಂ ಚಲವ್ನ್ ವರ್ಚೆ ಮುಖಾಂತ್ರ್, ತರ್ನ್ಯಾ ಕವಿಂಕ್ ತೊ ದೇಕ್ ದಿತಾ ಆನಿಂ ವಾಟ್ ಧಾಖಯ್ತಾ. ’ಕುಪಾಂ ಪೊಂದ್ಲಿಂ ಮುಖಾಂ’, ಉಪ್ರಾಂತ್ ಹೆರ್ ಕವಿಂಚಾ ಕವಿತಾಂಚೆಂ ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೊ ಹೊ ದುಸ್ರೊ ಕವಿತಾಜಮೊ ಜಾವ್ನಾಸಾ.
ಸಮೀಕ್ಶಾ ಲೇಖನ್
ಕವಿತೆಂಚಾ ಸಮ್ದಿರಾಂತ್ ತಿಳ್ತಾನಾ..................! [-ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಕಾಳ್ಜಾ ಗೂಂಡಾಯೆಚಾ ಆಂಗ್ಣಾಂತ್, ಸುಮಧುರ್ ಸುಂಗಂಧ್ ಶಿಂಪ್ಲಲ್ಯೆಪರಿಂ ಪರ್ಮಳ್ ಪಾಸಾರ್ಚಿ ಆಮ್ಚಾ ಕೊಂಕಣಾಂತ್ಲೆ ಕಾಜುಲೆ, ಸಕಾಳಿಂಚಾ ಸುರ್ಯಾಚ್ಯಾ ಕಿರ್ಣಾಕ್ ಪಾಚ್ವ್ಯಾ ಪಾನಾ ವಯ್ಲೊ ಧೋವ್ ಕರ್ಗೊನ್ ನಪಂಯ್ಚಾ ಜಾಂವ್ಚಾ ಪರಿ ಆಪ್ಲೆಂ ಆಸ್ಥಿತ್ವ್ ಹೊಗ್ಡಾಯ್ನಾಸ್ತಾನಾ ’ಕವಿತಾ ಕುಳಾರ್ ಮಾಳಾ’ ಹಾಚ್ಯಾ ಉಜ್ವಾಡಾಂತ್ ಆಜ್ ಮ್ಹಜ್ಯಾ ದೊಳ್ಯಾಂ ಸಾಮ್ಕಾರ್ ಆಪಾಪ್ಲ್ಯಾ ಕವಿಪಣಾಚೆಂ ಆಸ್ಥಿತ್ವ್ ರಚುಂಕ್ ಕೋಣ್ ಕಾಜುಲೊ ಪುಡ್ಲದ್ ತರ್, ಕೋಣ್ ನೆಣ್ತೊ ಆನಿ ಕೋಣ್ ಜಾಣ್ತೊ ಜಾವ್ನ್, ’ಕಾಳೊಕಾಂತ್ಲಿ ಕಾಂತಾರಾಂ’ ಕವಿತಾ ಜಮ್ಯಾಂತ್, ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ಕೊಂಕಣಿ ಕವಿತೆಚ್ಯಾ ಧ್ಯಾಸಾಂತ್ ತಾಚ್ಯಾ ವಾವ್ರಾಚಾ ವಾಡಾವಳಿಂತ್ ಏಕ್ ಹಂತ್ ಜಾವ್ನ್ ಆಜ್ ಮ್ಹಜ್ಯಾ ಆನಿ ತುಜ್ಯಾ ಫುಡೆಂ ಘುಣ್ಗುಣೊನ್ ಆಸಾತ್.
ಕವಿತಾ ಮ್ಹಳ್ಯಾರ್ ಕಿತೆಂ? ಮ್ಹಳ್ಳ್ಯಾ ಸವಾಲಾಕ್ ಕವಿತೆಚಾ ಸಂಸಾರಾಂತ್ ಏಕ್ perfect definition ದಿಂವ್ಕ್ ಖಂಡಿತ್ ಕಷ್ಟ್. ಪೂಣ್ ಕವಿತೆಚಾ ವಾಚ್ಪ್ಯಾಕ್ ತಾಚ್ಯಾ ಸಂಸಾರಾಂತ್ ಕವಿತೆಚೆಂ ವ್ಯಾಖ್ಯಾ (definition) ಖಂಡಿತ್ ಆಸಾ. ಹ್ಯಾ ವ್ಯಾಕ್ಯಾಂತ್ ಜಿವಿತಾ ಅನ್ಬೋಗಾಕ್ ಜರ್ ಹಾಂವ್ ಚಡ್ ಪ್ರಾಮುಖ್ಯತಾ ದಿತಾಂ ಜಾಲ್ಯಾರ್, ಖಂಡಿತ್ ಜಾವ್ನ್ ’ಕಾಳೊಕಾಂತ್ಲಿ ಕಾಂತಾರಾಂ’ ಮ್ಹಜ್ಯಾ ಸಮಾಜೆಂತ್ ಏಕ್ ವಯ್ರ್ ಏಕ್ ದಾಡ್ ಮಾರುನ್ ಝೊಪ್ಡ್ಯಾನಿಂ ಜಿಯೆಂವ್ಚಾ ಮನ್ಶ್ಯಾಂಚೆಂ ರಗಾತ್ ಚಿಂವ್ಚಾ ತ್ಯಾ ಜಳಾರಿಂಕ್ ಮಾರ್ಚೆಂ ವಕಾತ್ ಜಾಂವ್ಚಾ ಬದ್ಲಾಕ್ ಆಪ್ಲ್ಯಾ ವೊಕ್ತಾಚಿ ಸಕತ್ ಹೊಗ್ಡಾಯಿಲ್ಲೆಂ ವಕಾತ್ ಜಾವ್ನ್ ಸಮಾಜೆಚಾ ಮನ್ಶ್ಯಾಂಚೆ ಆಕ್ಲಾಸ್, ಖಳ್ಮಿತ್ ನಾತ್ಲ್ಲಿ ವಿರಾರಾಯ್ ಪಯ್ಸ್ ಕರ್ಚಿ ’ಥೆರಾಫಿ’ ಜಾಯ್ನಾಸ್ತಾನಾ ತಾಂಚ್ಯಾ ಮಾತ್ಯಾರ್ ವೊಜ್ಯಾ ವಯ್ರ್ ವೊಜೆಂ ಖಂಡಿತ್ ಜಾತೆಲೆಂ ಮ್ಹಳ್ಳೊ ಮ್ಹಜೊ ವಾದ್.
ಹ್ಯಾಚ್ ಕಾರಾಣಾ ಖಾತಿರ್ ಆನಿಂ, ಸಾಹಿತ್ಯಾಚಾ ಎಕಾ ಜವಾಬ್ದಾರಿಯುತ್ ಹಕ್ಕಾಚಾ ವಿದ್ಯಾರ್ಥಿಚಾ ತರ್ಪೆನ್ ’ಕಾಳೊಕಾಂತ್ಲಿ ಕಾಂತಾರಾ’ ಕವಿತಾ ಜಮ್ಯಾಂತ್ಲ್ಯಾ ಸರ್ವ್ ಕವಿಂಕ್ ಆನಿಂ ಕವಿಯತ್ರಿಂಕ್ ಎಕಾಚ್ಚ್ ನದ್ರೆನ್ ಪಳಂವ್ಚೆ ಮ್ಹಜೆಂ ಧರ್ಮ್, ಹಾಂವೆ ಮ್ಹಜ್ಯಾ ಲ್ಹಾನ್ಪಣಾರ್ ಥಾವ್ನ್ ಸಾಂಬಾಳುನ್ ಆಯಿಲ್ಲೆಂ ತೆಂ ಆಜ್ ಬಲಾತ್ಕಾರಾನ್ ಮಾಕಾ ಸೊಡ್ದೊಡ್ ಕರುಂಕ್ ಲಾಯ್ತಾ. ಜಿವಿತಾಂತ್ಲ್ಯಾ ದಿಸ್ಪೊಡ್ತ್ಯಾ ಜಿವಿತಾಕ್ ಸಾರುಂಕ್ ವೆಳಾ ಕಾಳಾ ಆನಿ ಖೆಳಾ ತೆಕಿದ್ ಮ್ಹಜ್ಯಾ ವಿಚಾರಾಂಚೆರ್ ಬದ್ಲಾಪ್ ಯಾ ದಿಸ್ಪೊಡ್ತ್ಯಾ ಜಿವಿತಾ ಸಂಗಿಂ ರಾಜಿ (compromise) ಹಾಂವ್ ಭಿಲ್ಕುಲ್ ಕರಿನಾಂ. ಪೂಣ್ ಆಜ್ ’ದಾಯ್ಜ್’ ಪಂಗ್ಡಾನ್ ಮ್ಹಜ್ಯೆ ತಾಬೆನ್ ಕೆಲ್ಲ್ಯಾ ಹ್ಯಾ ವಿಮರ್ಶಾಚ್ಯಾ ವಾವ್ರಾಂತ್ ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ಬರ್ಯಾ ಮನಾಚ್ಯಾ ಕಾಮಾಂತ್ ಪಾಟಿಂಬೊ ದಿಂವ್ಚಾ ಖಾತಿರ್ ಹ್ಯಾ ಮ್ಹಜ್ಯಾ ಲೇಖನಾಂತ್ ತರ್ನ್ಯಾ ಕವಿಂಕ್ ಉತ್ತೇಜನ್ ದಿಂವ್ಚಾ ಖಾತಿರ್ ತಾಂಕಾ ಬಗ್ಲೆಕ್ ದವರುನ್ ಜಾಣ್ತ್ಯಾ ಕವಿಂಚಾ ವಿಚಾರಾಂಕ್ ವಾಚ್ಪ್ಯಾಂ ಮುಕಾರ್ ದವರ್ತಾಂ. ಅಶೆಂ ಕರ್ತಾನಾ ಖಂಡಿತ್ ಮಾಕಾ ಖಾತ್ರಿ ಆಸಾಕೀ ನವ್ಯಾ ಕವಿ ಆನಿಂ ಕವಿಯತ್ರಿಂಕ್ ಹೆ ವಿಚಾರ್ ತಾಂಚಾ ಮುಕ್ಲ್ಯಾ ಸಾಹಿತಿಕ್ ಜಿಣ್ಯೆಂತ್ ಖಂಡಿತ್ ಉಪ್ಕಾರಾಕ್ ಪಡ್ತೆಲೆಂ. ಉಪ್ಕಾರಾಕ್ ಪಡಾತ್ ಜಾಲ್ಯಾರ್ ಮ್ಹಜೊ ವಾವ್ರ್ ಸುಫಳ್ ಜಾಲ್ಲ್ಯಾ ಪರಿಂಚ್. ಆತಾಂ ’ಕಾಳೊಕಾಂತ್ಲಿಂ ಕಾಂತಾರಾಂ’ ಹ್ಯಾ ಕವಿತಾ ಜಮ್ಯಾಂತ್ಲ್ಯಾ ಕವಿತೆಂಕ್ ಹಾಂವ್ ಮ್ಹಜ್ಯಾ ಸಮಾಜೆಚಾ ಮುಕಾರ್ ದವರ್ತಾಂ.
ಜಿವಿತಾಚಾ ಅನ್ಬೋಗಾಕ್ ವೈಯುಕ್ತಿಕ್ ನದ್ರೆನ್ ಜರ್ ದೆಖ್ಲೆಂ ತರ್ ಥಂಯ್ಸರ್ ಆಳ್ಮ್ಯಾ ಭಾಶೆನ್ ಘಡ್ಗಡೊ ಉಟ್ತಾನಾ ಟೆರರಿಸ್ಟ್ ಪುಲ್ತಾತ್. ಜಿವಿತಾಚೊ ಅನ್ಭೋಗ್ ಜಾಂವ್ ತೊ ಕಸಲ್ಯಾಯ್ ಪ್ರವೃತ್ತಿಂಚೊ (tendency) ತ್ಯಾ ಪ್ರವೃತ್ತಿಚೆಂ ಪರಿವರ್ತನ್ ಟೆರರಿಸ್ಟ್ಚ್ ಜಾಂವ್ಕ್ ಜಾಯ್ ಮ್ಹಳ್ಯಾರ್ ಸಮಾಜೆಚ್ಯಾ ದ್ರಶ್ಟೆನ್ ಖಂಡಿತ್ ಚೂಕ್. ಸಮಾಜೆಚ್ಯಾ ನದ್ರೆ ಮುಕಾರ್ ಜರ್ ಖಂಯ್ಚಿಯ್ ಏಕ್ ವ್ಯಕ್ತಿಯಾ ತಾಚಿ ಸಮಾಜ್, ಕುಳಿ ಯಾ ತಾಚೊ ಗಾಂವ್ ಪರಿವರ್ತನ್ ಜಾತಾನಾ ಟೆರರಿಸ್ಟ್ ಜಾತಾತ್ ಜಾಲ್ಯಾರ್ ಖಂಡಿತ್ ಜಾವ್ನ್ ತೊ ಯಾ ತಿ ಕುಳಿ ಟೆರರಿಸ್ಟ್ ಜಾವ್ನ್ ಪರಿವರ್ತನ್ ಜಾಂವ್ಚಾ ಪಯ್ಲೆಂಯ್ ಸಮಾಜೆಚಾ ಸಾಮ್ಕಾರ್ ಪರ್ದ್ಯಾ ಪಾಟ್ಲೆ ಟೆರರಿಸ್ಟ್ಚ್ ಜಾವ್ನ್ ಆಸ್ತಾತ್.
ದ್ವೇಶ್ + ಫಾರಿಕ್ಪಣ್ = ಟೆರರಿಸ್ಟ್ ಕಶೆ?
ಸಮಾಜೆಕ್ ಏಕ್ ಮಹಾತ್ಮ ಕಿತ್ಯಾಕ್ ನಜೊ? ಜೆದ್ನಾಂ ಸಮಾಜೆಚಾ ಜಿವಿತಾಚೊ ಅನ್ಬೋಗ್ ವೈಯುಕ್ತಿಕ್ ಯಾ ಖಾಸ್ಗಿ ಜಿವಿತಾಚಾ ಆನ್ಭೋಗಾ ಮುಕಾರ್ ಲ್ಹಾನ್ ಯಾ ಉಣೊ ಜಾತಾನಾ ಮಾತ್ರ್ ಮನಿಸ್ ಆಪ್ಲೆಂಪಣ್ ಚಿಂತುನ್ ಸಮಾಜ್ಪಣ್ ಸಾಂಡ್ತಾ. ಹೊ ಉಗ್ಡಾಸ್ ದವರುಂಕ್ ಜಾಯ್ ಜಾಲ್ಲೊ ವಿಶಯ್. ಸಮಾಜ್ಪಣ್ ಸಾಂಡ್ಲ್ಲೊ ಖಂಡಿತ್ ಎಕಾ ನಹಿಂ ತರ್ ಎಕಾ ರುಪಾಂತ್ ಟೆರರಿಸ್ಟ್ಚ್ ಮ್ಹಣ್ಯೆತ್.
’ನೆಣ್ತ್ಯಾ ಕಾಳ್ಜಾನಿಂ
ದ್ವೇಶಾಚೆಂ ಫಾರಿಕ್ಪಣಾಚೆಂ ಭಿಂ
ವೊಂಪುನ್ ಸೊಡಾ
ಫಾಲ್ಯಾಂಚೆ ಟೆರರಿಸ್ಟ್ ಕರ್ಚಾಕ್’ (ಫಾಲ್ಯಾಂಚೆ ಟೆರರಿಸ್ಟ್)
ಕವಿತಾ ನಾಯಕ್ ಶೋಷಣ್-ಕರ್ತಾಂಚಾ ಹಾತಿಂ ಶೋಷಿತ್ ಜಾವ್ನ್ ತಾಚೆಂ ಪರಿಣಾಮ್ ಜಾವ್ನ್ ತೊ ಯಾ ತಾಚಾ ಕುಳಿಯೆಕ್ ಟೆರರಿಸ್ಟಾಂಚಾ ಜಲ್ಮಾಚಾ ವಿಚಾರಾಂಚೆಂ ಭಿಂ ವೊಂಪ್ತಾ ಜಾಲ್ಯಾರ್ ಮ್ಹಜ್ಯಾ ಚಿಂತ್ಪಾ ಪರ್ಮಾಣೆಂ ಮಹಾತ್ಮಾ ಗಾಂಧಿ ಆಜ್ ಮಹಾತ್ಮಾ ಜಾತೊ ನಾಂ. ಆಖ್ಖ್ಯಾ ಸಂಸಾರಾಕ್ ಎಕಾ ಮಹಾತ್ಮಾನ್ ಶಿಕಯಿಲ್ಲೆಂ ಲಿಸಾಂವ್ ಸಗ್ಳೊ ಸಂಸಾರ್ ಟೆರರಿಸ್ಟ್ ಜಾಲೊ ತರೀಯ್ ಮಹಾತ್ಮಾನ್ ಶಿಕಯಿಲ್ಲ್ಯಾ ಲಿಸಾಂವಾಕ್ ಶಿಕಂವ್ಕ್ ಸಕ್ಚೊನಾ. ಅಶೆಂ ಆಸ್ತಾನಾ ಸಮಾಜೆಂತ್ ಟೆರರಿಸ್ಟ್ ಕಶೆ ಜಲ್ಮಾತಾತ್ ಮ್ಹಣೊನ್ ದಾಖಂವ್ಚಾ ಪ್ರಾಸ್ ಜಲ್ಮಾಲ್ಲ್ಯಾ ಟೆರರಿಸ್ಟಾಂಕ್ ಮಹಾತ್ಮಾಚೆಂ ಲಿಸಾಂವ್ ದಾಖವ್ನ್ ದಿಂವ್ಚೆ ಚಡ್ ಗರ್ಜೆಚೆಂ.
ಹರ್ಯೇಕಾ ಕ್ರಿಯಾಕ್ ಏಕ್ ಪ್ರತಿಕ್ರಿಯಾ ಖಂಡಿತ್ ಆಸಾ. ಪೂಣ್ ಹ್ಯಾ ಕ್ರಿಯಾ ಆನಿ ಪ್ರತಿಕ್ರಿಯಾ ಕಶಿ ಆನಿ ಕಿತ್ಯಾ ಮ್ಹಳ್ಳೆಂ ನೆಣ್ತ್ಯಾ ಕಾಳ್ಜಾಂಕ್ ಜಾಣ್ತ್ಯಾನಿಂ ಜಾಗ್ವಣಿ ದೀಂವ್ಕ್ ಜಾಯ್. ಆಮ್ಚಿ ಜಾಗ್ವಣಿಚ್ ಆತಂಕ್ವಾದ್ ಜಾಲ್ಯಾರ್ ಥಂಯ್ ನೆಣ್ತೆಂ ಆನಿ ಜಾಣ್ತೆಂ ಮ್ಹಳ್ಳೊ ಭೇದ್ಚ್ಚ್ ಯೇನಾ ಬಗಾರ್ ಸಮಾಜೆಚಾ ವಿಚಾರಾಂಚಾ ಆನ್ಭೋಗಾಚೆಂ ಉಣೆಂಪಣ್ ದಿಸ್ತಾ.
ಹೆಂ ಉಣೆಂಪಣ್ ಭರ್ತಿ ಕರುಂಕ್ ಸಾಹಿತ್ಯಾಕ್ ಏಕ್ universal ವಿಶಯ್ ಜಾವ್ನ್ ಘೆವ್ನ್ ಮ್ಹಜ್ಯಾ ಸಮಾಜೆಂತ್ ಆಸ್ಚಾ ಶೋಷಿತಾಂಕ್ ಖಳ್ಮಿತ್ ನಾತ್ಲ್ಲ್ಯಾ ದಣ್ಸಾಣೆ ಆನಿಂ ವಿರಾರಾಯೆ ಥಾವ್ನ್ ಮುಕ್ತಿ ದಿಂವ್ಚಿ ’ಥೆರಾಪಿ’ ಕವಿತಾ ಸಾಹಿತ್ಯಾಂತ್ ವ್ಹಾಳಂವ್ಚೆ ಚಡ್ ಮಹ್ವತಾಚೆಂ.
ಹ್ಯಾ ಗರ್ಜೆಕ್ ದರ್ಯಾ ಲ್ಹಾರಾಂ ಕಿತ್ಯಾಕ್ ಮೆಜುಂಕ್ ಜಾಯ್? ಆಮ್ಕಾಂ ದುಸ್ರಿ ವಾಟ್ ನಾಂ?
"ದರ್ಯಾ ತುಕಾ ಮುಟಿಂತ್ ಧರ್ಲಾಂ
ಮೊಗಾಕ್ ಮ್ಹಜೆ ಮತಿಂತ್ ಪುರ್ಲಾಂ
ಚಿಂತುನ್ ಚಿಂತುನ್ ಮೊಗಾಕ್ ತುಜ್ಯಾ
ಸುಕೆ ರೆಂವೆರ್ ಲಿಖುಂಕ್ ಲಾಗ್ಲಾಂ
ಖಂಡಿತ್ ಆಜ್ ಸಲ್ವೊನ್ ಗೆಲಾಂ’ (ದರ್ಯಾ ಲಾರಾಂ ಮೆಜ್ತಾನಾ)
ಸಲ್ವಾಲ್ಲ್ಯಾ ಸಿಂತಿಮೆಂತಾಂಚೆಂ ರುದಾನ್, ಕವಿತಾ ಶೆತಾಂತ್ಚ್ ಏಕ್ ಮಾರೆಕಾರ್ ಪಿಡಾ. ಬಹುಶ: ಹೆಂ ವಾಚ್ಪ್ಯಾಚಾ ಬೊಗ್ಣಾಂಕ್ ಸ್ಪಂದಿಸುನ್ ತಾಚ್ಯಾ ಭುಜಾವಣೆಚಾ ಪುಕಟ್ ಉತ್ರಾಂಕ್ ಯಾ ದೆಖಿಭರಿತ್ ದುಖಾಂಕ್ ಆಪ್ಲ್ಯಾ ತಾಬೆಂತ್ ಕರುನ್ ಘೆಂವ್ಚಿ ಆದಿಂ ಮಾಗಾಂ ಥಾವ್ನ್ ಮ್ಹಜ್ಯಾ ಭೊಂವಾರಿಚಾ ಸಮಾಜೆಂತ್ ಚಲೊನ್ ಆಯಿಲ್ಲಿ ಕವಿತಾ ನಾಯಕಾನ್ ಆಪ್ಣಾಚಿ ಕರುನ್ ಘೆತ್ಲ್ಲಿ ನಿರಾಸ್ವಾದಾಚಿ ಜೀಣ್. ಹ್ಯಾಚ್ ನಿರಾಸ್ ಥಾವ್ನ್ ಸಲ್ವೊಣಿ ಥಾವ್ನ್ ಭಾಯ್ರ್ ಯೆಂವ್ಚಿ ವಾಟ್ ಕಿತ್ಯಾಕ್ ಆಯ್ಚಾ ಕವಿತಾ ನಾಯಕಾಕ್ ಝಳ್ಕಾನಾಂ....?
ಕಾರಾಣ್ ತ್ಯಾ ವಾಟೆಚೆಂ ಅಂತ್ಯ್ ಆಪ್ಲ್ಯಾಚ್ ವೈಯುಕ್ತಿಕ್ ಚಿಂತ್ಪಾ ಪರ್ಮಾಣೆಂ ದರ್ಯಾಚಾ ವೆಳೆಕ್ ವರುನ್ ಪಾವಯಿಲ್ಲೆಂ? ಯಾ ದೆವಾಚಾ ಪಾಯಾಂ ಥಳಾಕ್ ಥಾಂಬಯಿಲ್ಲೆಂ?
’ಹೆಂ ಪಳೆವ್ನ್ ರಡುನಾಕಾ
ಮ್ಹಾಕಾ ಮರಣ್ ಧಾಡುನಾಕಾ
ಬದ್ಲೆ ಏಕ್ ನವೆಂ ರೂಪ್ ಕರ್
ದೆವಾ ಮಾಕಾ ಮಾಫ್ ಕರ್
ಜಿಣೆಂ ಮ್ಹಜೆಂ ಸಾಫ್ ಕರ್’ (ದೆವಾ ಮಾಕಾ ಮಾಫ್ ಕರ್)
ಭೋವ್ಚ್ ಸರಳ್ ಉಪಾಯ್. ಭೋವ್ಚ್ ಸುಲಭ್ ರೀತ್. ದೆವಾಚಾ ವಾಟೆರ್ ತಾಚ್ಯಾ ಪಾಯಾಂಥಳಾ ಆಡ್ ಪಡೊನ್ ಉತ್ರಾನಿಂ ಮಾಗ್ಚೆಂ. ಹೆಂ ದೆವಾಕ್ ಭುಲಂವ್ಚೆಂ ಯಾ ಸಾಹಿತ್ಯಾಕ್ ಪಾತ್ಳಾಂವ್ಚೆಂ ತೆಂ ಹಾಂವ್ ಸಾಂಗೊಂಕ್ ವಚಾನಾಂ. ಕವಿತಾ ನಾಯಕ್ ಹಾಂಗಾಸರ್ ದೆವಾಚಾ ಪಾಂವ್ಯಾಂಕ್ ಧರುನ್ ಗಳ್ಗಳ್ಯಾಂ ರಡ್ಚ್ಯಾಕ್ಯ್ ಖುದ್ದ್ ಆಪ್ಣೆಂ ಚಲೊನ್ ಆಯಿಲ್ಲ್ಯಾ ವಾಟೆರ್ ಪಾರ್ಕುನ್ ಮುಕ್ಲ್ಯಾ ಪುಡಾರಾಚಾ ವಾಟೆಚಿ ದಿಶಾ ಬದ್ಲುನ್ ದೆವಾಚಾ ಕಾಮಾಚೊ ಬೊರ್ ಇಲ್ಲೊ ಉಣೊ ಕೆಲ್ಲೊ ಜಾಲ್ಯಾರ್ ಯಾ ಮ್ಹಜೆ ತಸಲ್ಯಾ ವಾಚ್ಪ್ಯಾಕ್ ಏಕ್ ವಾಟ್ ದಾಖವ್ನ್ ದಿಲ್ಲಿ ಜಾಲ್ಯಾರ್ ಸಾಹಿತ್ಯಾಚಾ ವಿಚಾರಾಂತ್ ಆನಿಂ ತ್ಯಾ ವಿಚಾರಾಂಚಾ ಪರಿಣಾಮಾಂತ್ ಕಿತ್ಲೆಂ ಬದ್ಲಾವಣ್ ಜಾತೆಂ. ಹ್ಯಾ ಪರಿಣಾಮ್ ವರ್ವಿಂ ತ್ಯಾ ಸಾಂಜೆಚಾ ವಗ್ತಾ ಆನಿಶ್ಚಿತ್ ಘಡಿಯೆಕ್ ವೆಂಗುಂಕ್ ಆಯ್ತೊ ಜಾಲ್ಲೊ ಹೊ ಕವಿತಾ ನಾಯಕ್ ಇತ್ಲೊ ನಿರಾಸ್ ಖಂಡಿತ್ ಜಾತೊ ನಾಂ.
’ಆದ್ಲಿ ಜೀಣ್ ಬದ್ಲಿ ಜಾಲ್ಯಾ
ತರ್ನೆಂಪಣ್ ಪರ್ನೆಂ ಜಾಲಾಂ
ಭಳ್ ಗಳೊನ್ ಚಿಂವಡ್ ಜಾಲಾಂ
ತರೀ ಹಾಂವ್ ಜಿವೊ ಉರ್ಲಾಂ" (ಹಿ ಸಾಂಜ್)
ಮ್ಹನ್ಶ್ಯಾ ಜಿವಿತ್ ಫಾಂತೆ, ಸಾಕಾಳ್, ದನ್ಪಾರ್ ಆನಿ ಸಾಂಜ್. ಹ್ಯಾ ವಿಚಾರಾಂ ಪಾಟ್ಲ್ಯಾ ಅಸ್ಪಷ್ಟ್ ರೂಪಾನಿಂ ಘುಂತೊನ್ ಆಸಾ. ಮನಿಸ್ಯ್ ಏಕ್ ಅಸಲೊ ಕಿರ್ಕೊಳ್ ಕಿಡೊ ಕೀ ಆಪ್ಲ್ಯಾ ವೈಯುಕ್ತಿಕಾಚ್ಯಾ ವಿಶಯಾಂತ್ ಚಡ್ಚ್ ಮೆತೆರ್ ಜಾತಾ. ಆಪ್ಣಾಕ್ಚ್ ಚಿಂತಾಲೊ ಶಿವಾಯ್ ಆಪ್ಲ್ಯಾ ಭಾಯ್ಲೆಂ ನಹಿಂ. ಹ್ಯಾಚ್ ಖಾತಿರ್ ದೆವಾಚಾ ಪಾಯಾಂಮುಳಾಂತ್ ಭಿಕಾರ್ಯಾಚೊ ವೇಸ್ ಘಾಲ್ತಾನಾಂಯ್ ಆಪ್ಣೆಂಚ್ ಚಿಂತುನ್ ವೆತಾ. ಹಾಂಚೆ ಮಧೆಂ ಅಪ್ರೂಪ್ ಥೊಡೆ ಆಶಾವಾದಿ ಬಂಧಡೆಂತ್ ಆಸ್ಲ್ಯಾರೀಯ್ ಆಪ್ಣಾಕ್ ಆನಿ ಹೆರಾಂಕ್ ಸುಟ್ಕಾ ದಿಂವ್ಚೆಂ ಆಶಾವಾದಿ ಲಿಸಾಂವ್ ಘೆವ್ನ್ ಘಣ್ಗುಣ್ತಾತ್.
’ತರೀ ಏಕ್ ದೀಸ್ ಯೆತಲೊ ವೈಕುಂಠ್ ಪರತ್ ಪುಲ್ತೆಲೆಂ
ಆಮಿಂ ಸ್ವತಂತ್ರ್ ಜಾತೆಲ್ಯಾಂವ್ ಯುಪ್ರಟಿಸ್ ಪರತ್ ವ್ಹಾಳ್ತೆಲೆಂ" (ಬಂಧಡ್)
ವಿಚಾರಾನಿಂ ಏಕ್ ಪ್ರಕಾರಾಚೆಂ ಚಿಂತಾಪ್ ಹ್ಯಾ ಕವಿತಾ ನಾಯಕಾ ಲಾಗಿಂ ನಾಂ. ತೊ ಖುದ್ದ್ ಬಂಧಿ ಜಾವ್ನ್ ಆಸ್ಲ್ಯಾರೀಯ್ ತಾಚ್ಯಾ ಪಿಳ್ಗೆಕ್ ಟೆರರಿಸ್ಟಾಂಚಿ ಝಳಕ್ ದಾಖಯ್ನಾಂ. ಬಗಾರ್ ಆದಿಂ ಮಾಗಾಂತ್ಲೆಂ ವೈಕುಂಠಾಚೆಂ ದರ್ಶನ್ ದಾಖಯ್ತಾ. ಹ್ಯಾಚ್ ದರ್ಶನಾಚಾ ವಾಟೆನ್ ಯುಪ್ರಟಿಸ್ ಪರತ್ ವಾಳ್ತೆಲೆಂ ಮ್ಹಳ್ಳೊ ಆಶಾವಾದ್. ಸಾಹಿತ್ಯಾಚಾ ಖರ್ಯಾ ಜಾಣ್ವಾಯೆಚಿಂ ಪಾವ್ಲಾಂ ಕವಿತಾ ನಾಯಕಾಚಿಂ ತಾಚ್ಯಾ ವಿಚಾರಾಂತ್ ಸ್ವಷ್ಟ್ ಝಳ್ಕಾತಾತ್.
ಹಿಂಚ್ ಜಾಣ್ವಾಯೆಚಿಂ ಪಾವ್ಲಾಂ ಪಾವ್ಸಾ ಧೊಣ್ವಾಕ್ ಧರುಂಕ್ ಮೊಳ್ಬಾ ಕುಶಿಂನ್ ಧಾಂವ್ಚೆಂ ಕವಿತಾಚಾ ಸಂಸಾರಾಂತ್ ಕವಿತೆಚಾ ವ್ಹಾಳ್ಯಾಚಿ ಸೊಭಾಯ್ ದಾಖವ್ನ್ ದಿತಾ.
’ಪಾವ್ಸಾ ಧೋಣು ಮುಡ್ಲಾ ಮೊಳ್ಬಾರ್
ಭುಂಯ್ ಮೊಳಾಬ್ ಜೊಡ್ತಾ.......
ಕಾಂಯ್ ಥೊಡೆ ಉಡಾಸ್ ಮ್ಹಜೆ
ಸಾತೀ ರಂಗಾನ್ ನ್ಹೆಸ್ತಾತ್
ಪಾವ್ಸಾ ಧೊಣ್ವಾ ಆಂಗ್ಲೆಂ ಶಿಂವೊನ್
ತುಕಾ ದಿಂವ್ಚಾಕ್ ಸಾಂಗ್ತಾತ್’ (ಪಾವ್ಸಾ ಧೊಣು)
ಪ್ರಕೃತಿಚಿ ಸೊಬಾಯ್, ಕವಿತೆಚಾ ಪ್ರಕಾರಾಂಕ್ ಘುಂತ್ಚೆ ತಿತ್ಲೆಂ ಕಾಂಯ್ ಕಷ್ಟಾಚೆಂ ನಹಿಂ ತರೀ ಹ್ಯಾ ಘುಂತ್ಚಾ ಆನಿ ಶಿಂವ್ಚಾ ವಾವ್ರಾಂತ್ ಕವಿತೆಂತ್ ಝಳ್ಕೊಂಚಿ ಕವಿತೆಚಿ ಕ್ರಾಂತಿ ಮಾತ್ರ್ ಮಾಂದ್ಚೆ ತಸಲಿ. ಹಾಂವ್ ಚಿಂತಾ ಹಾಂಗಾಸರ್ ಕವಿತಾ ನಾಯಕ್ ವಾಚ್ಪ್ಯಾಚಾ ಮತಿಚಿ ವಿರಾರಾಯ್ ಆನಿ ಖಂತ್ ಪಯ್ಸ್ ಕರ್ಚಾ ತ್ಯಾ ’ಥೆರಾಪಿ’ ಚಾ ಪಾಲ್ವಾಮ್ತ್ ಲೊಳೊನ್ ಪಾಶಾರ್ ಜಾಲಾ.
ಎಕ್ಸುರ್ಯಾ ವಾಟೆಚಿ ವಿಳಾಪ್ ಪರ್ತ್ಯಾಕ್ ತ್ಯಾಚ್ ಆದ್ಲ್ಯಾ ಸಾರ್ಲೆಲ್ಯಾ (past) ಜಿವಿತಾಕ್ ಉಡಾಸ್ ಕಾಡ್ಚೆಂ ದಿಸೊನ್ ಯೆತಾ. ಬಹುಶ: ಸಿಂತಿಮೆಂತಾ ನಾಂ ಜಾಲ್ಯಾರ್ ಕವಿತಾ ಉಬ್ಜಾನಾ ಮ್ಹಣೊನ್ ಸಬಾರ್ ಆಮ್ಚಾ ಕವಿಂನಿಂ ಮಾಂದುನ್ ಘೆತ್ಲಾಂ ಜಾಯ್ಜಾಯ್.
’ಮಧುರ್ ಉಡಾಸ್ ತೆ ಆದ್ಲೆ......
ಶ್ಹೆರಾಕ್ ಗೆಲ್ಲಿಂ ವಾರ್ಯಾಕ್ ಗೆಲ್ಲಿಂ
ಫಿಂರ್ಗಿ ಚಾಲ್ ಆಪ್ಣಾಂವ್ಕ್ ವಚೊನ್
ಆಪ್ಲೆಂಪಣ್ ಹೊಗ್ಡಾವ್ನ್ ಆಯ್ಲಿಂ (ಎಕ್ಸುರೆ ವಾಟೆಚೆ ವಿಳಾಪ್)
ಪ್ರಗತಿಚಾ ವಾಟೆರ್ ಮನಿಸ್ ಜಾಣ್ವಾಯ್ ಜೊಡ್ತಾನಾ ತ್ಯಾಚ್ ಜೊಡ್ಲ್ಲ್ಯಾ ಜಾಣ್ವಾಯೆನ್ ಪರ್ತ್ಯಾಕ್ ತ್ಯಾಚ್ (past) ಸಾರ್ಲೆಲ್ಯಾ ಜಿವಿತಾಕ್ ಸೊದ್ತಾ ಕಿತ್ಯಾಕ್ ಮ್ಹಳ್ಳೊಚ್ ಏಕ್ ಮಿಸ್ತೆರ್. ಹೊ ಮಿಸ್ತೆರ್ ಚಡಾವತ್ ಜಾವ್ನ್ ಆಮ್ಚಾ ಕೊಂಕ್ಣ್ಯಾಂಚಾ ಸಾಹಿತ್ಯಾಂತ್ ಚಡ್ಚ್ ದಿಸ್ತಾ ಶಿವಾಯ್ ಭಾಯ್ಲ್ಯಾ ಸಾಹಿತ್ಯಾಂತ್ ಅಪ್ರೂಪ್ ದಿಸೊನ್ ಯೆತಾ. ಹಾಕಾ ಕಾರಾಣ್ ಕೊಂಕ್ಣ್ಯಾಂಚಾ ಪ್ರಗತೆಕ್ ಭಾಯ್ಲ್ಯಾ ಸಮಾಜೆಚೆಂ ಅನುಕರಣ್ಯ್ ಜಾಂವ್ಕ್ ಪುರೊ. ಬಹುಶ: ಆಮ್ಚೆ ಕೊಂಕ್ಣೆಂ ಪರ್ದೆಶ್ಯಾಂಕ್ ಅನುಕರಣ್ ಕರ್ಚಾಂತ್ ಸಂಸಾರಾಚಾ ಸರ್ವ್ ಲೊಕಾ ಥಾವ್ನ್ ಮುಕಾರ್ ಆಸಾತ್ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾಂ. ಹಾಕಾ ಸ್ವಷ್ಟ್ ಉದಾಹರಣ್ ದಿಂವ್ಚೆಂ ಜಾಲ್ಯಾರ್
’ಜಿಣ್ಯೆಂತ್ಲೊ ಬದ್ಲಾವಣ್ಯೊ ಆಸಲ್ಯೊ
ವಿರೋಧಾಭಾಸ್ ಅಸಲೆ
ಥಂಯ್ಸರ್ ತಾನ್ ಆಸ್ಲ್ಲಿ
ಪೂಣ್ ಉದಾಕ್ ನಾತ್ಲ್ಲೆಂ
ಹಾಂಗಾಸರ್ ಉದಾಕ್ ಆಸಾ ಪೂಣ್ ತಾನ್ ನಾ’ (ಆಮ್ಚೆಂ ಭುರ್ಗೆಂಪಣ್)
ಜರ್ತರ್ ಹೆ ಕವಿತೆಚೆ ನಾಯಕ್ ಖುದ್ದ್ ಆಪ್ಲ್ಯಾ ಮರ್ಜೆನ್ ಪ್ರಗತಿಕ್ ಪಾಂವ್ಚಾ ದಿಶೆನ್ ಜಿಣ್ಯೆಂತ್ ಬದ್ಲಾವಣ್ ಜರ್ ಕರ್ತಾತ್ ಜಾಲ್ಯಾರ್ ನಿಮಾಣೆಂ ಶೆವೊಟಾಚಾ ವೆಳೆರ್ ಬೊಸೊನ್ ನಿರಾಸ್ಪಣಿಂ ರಡ್ತಾತ್ ಕಿತ್ಯಾಕ್? ಆಮ್ಚಾ ಸಮಾಜೆಕ್ ಸಲ್ವೊಣೆಚೊ ಕಿಡೊ ಮುಳಾಕ್ಚ್ ಕಾಂತವ್ನ್ ಬಸ್ತಾ ಕಿತ್ಯಾಕ್? ಆಪ್ಲ್ಯಾ ಜಿವಿತಾಚಾ ವಾಟೆರ್ ಸಲ್ವೊನ್ ಗೆಲ್ಲೆ ಹೆ ಕವಿತಾ ನಾಯಕ್ ಸಾಹಿತ್ಯಾಚಾ ನದ್ರೆನ್ ಮ್ಹಜ್ಯಾ ಸಮಾಜೆಕ್ ಕಸಲಿ ಜೀಕ್ ಯಾ ಜಯ್ತಾಚಿ ವಾಟ್ ಕಶಿ ದಾಖಂವ್ಕ್ ಸಕ್ತೆಲೆ? ತಾಂಕಾ ಆಜ್ ಫಕತ್ತ್
’ಸಂಪೊನ್ ಗೆಲ್ಲ್ಯಾ ವೆಳಾಚಾ ಪಾಟ್ಲ್ಯಾ
ದಾರಾಂತ್ಲ್ಯಾನ್ ಆಜ್ ತಿಳ್ತಾನಾ
ದಿಸ್ತಾ ತರ್ ಫಕತ್ತ್
ಬಂಜರ್ ಭುಂಯ್" (ಆಮ್ಚೆಂ ಭುರ್ಗ್ಯಾಪಣ್)
ಹಿ ಬಂಜರ್ ಭುಂಯ್ಚ್ ಕಿತ್ಯಾಕ್? ಬಂಜರ್ ಭುಂಯ್ತ್ ಘಾಮ್ ಪಿಳುನ್ ತ್ಯಾ ಮ್ಹಜ್ಯಾ ಸಮಾಜೆಂತ್ಲಿಂ ಬಾಯ್ಲಾಂ ಗೋಂವ್ ಕಿರ್ಲಾಯ್ತಾತ್ ಜಾಲ್ಯಾರ್ ಆಮ್ಚೆ ಸಾಹಿತಿ ಕೇವಲ್ ಹಾತ್ ಬಾಂದುನ್ ವಿಳಾಪ್ ಕರ್ತಾತ್.
ದೊಳ್ಯಾಂ ಪುಡೆಂನ್ ದಿಸ್ಚಾ ಮೊಡಾಂಕ್ ಜಿಣ್ಯೆಕ್ ಸಾಂಗಾತ್ ಜಾವ್ನ್ ಉಟೊನ್ ಯೆಂವ್ಚಾ ಲ್ಹಾರಾಂಕ್ ಜಿವಿತಾ ಸೊಭಾಣ್ ಜಾವ್ನ್, ಶಿರಾಂಧಾರಿ ವೊತ್ಚಾ ಪಾವ್ಸಾಚೊ ಜಿವಿತಾ ಆಧಾರ್ ಘೆವ್ನ್, ರಾಜ್ವಟ್ಕಾಯ್ ಚಲಂವ್ಚಾ ಬಂಜರ್ ಭುಂಯ್ಕ್ ಜಿವಿತಾ ವಾಟ್ ಜಾವ್ನ್ ಜಿವಿತ್ ಚಲಂವ್ಕ್ ಶಿಕಂವ್ಚೆ ಲಿಸಾಂವ್ ದಿಂವ್ಚೆ ಪ್ರಯತ್ನ್ ಬಹುಶ: ಆಮ್ಚಾ ಕೊಂಕಣಾಕ್ ಲಾಗು ಜಾಂವ್ಚೆ ದಿಸಾನಾಂ. ಹಾಂವ್ ಅಶೆಂ ಮ್ಹಣ್ತಾನಾ ಭಿಲ್ಕುಲ್ ಅಮಾಸ್ಯ್ ಕೊಂಕಣ್ ಸಾಹಿತ್ಯಾಚಾ ಪಾಲ್ವಾಂತ್ ನಾಂ. ಹಾಕಾ ಕಾರಾಣ್ ’ಪಾವ್ಸ್ ವೊತ್ತಾ’ ’ಪಾವ್ಸಾ ದೋಣು’ ’ಯೆಯಾ ಆಮಿಂ ಕುಪಾಂ ಧರುಂಯಾ’ ’ನಿರ್ಧಾರ್’ ಕವಿತೆನಿಂ ಕವಿತೆಚೆಂ ವಿನ್ಯಾಸ್ (design) ವಿವಿಂಗಡ್ ಆಸ್ಲ್ಯಾರ್ಯ್ ಕವಿತಾ ಶೆತಾಂತ್ ಘೊಳ್ಲ್ಲೆಂ ಆನ್ಭೋಗ್ (experience) ಕವಿತೆಚಾ ವ್ಹಾಳ್ಯಾಂತ್ ಸ್ರಜನ್ಶೀಲತಾಚಾ (creativity) ರೂಪಾರ್ ಏಕಾಂತ್ ಬರ್ಪೂರ್ ತರ್ ಏಕಾಂತ್ ಥೊಡೆಂ ಉಣೆಂ ಝಳ್ಕಾಲ್ಯಾರೀ ಕವಿತೆಂತ್ಲೆಂ ಸ್ವಶ್ಟ್ ವಾ ಅಸ್ವಶ್ಟ್ ಸಂಘರ್ಶ್ (clash) ಜಾಂವ್ ತೆ ದೋನ್ ಪ್ರವ್ರತ್ತಿ (tendency) ಮಧ್ಲೊ ವಾ ಸಮಾಜ್ ಆನಿ ಕವಿತಾ ನಾಯಕ್ ಮದ್ಲೊ ಸ್ವಶ್ಟ್ ಝಳ್ಕಾತಾತ್. ವಿಚಾರಾಂಕ್ ಉಗ್ಡಾಪೆಂ ಕೆಲ್ಲ್ಯಾ ಆಕಾರಾಂತ್ ಯಾ ಪ್ರಕಾರಾಂತ್ ಏಕಾ ಥಾವ್ನ್ ದುಸ್ರ್ಯಾಕ್ ಉಣೆಂಪಣ್ ಯಾ ಜಾಣ್ತೆಂಪಣ್ ಖಂಡಿತ್ ಆಸಾ ತರೀ ಹೊ ವಿಶಯ್ ಹಾಂಗಾಸರ್ ತಿತ್ಲೊ ಪ್ರಾಮುಖ್ಯತಾ ಖಂಡಿತ್ ದೀನಾ. ಕಾರಾಣ್ ಎಕಾಚ್ಚ್ ಕವಿತೆಚಾ ಆಧಾರಾನ್ ಸಮೆಸ್ತ್ ಸ್ರಜನ್ಶೀಲತಾ ವಯ್ರ್ ಎಕಾ ಪ್ರಾಕಾರಾಚೊ ವಾದ್ ಮಾಂಡುಂಕ್ ಮ್ಹಜ್ಯಾ universal ಚಿಂತ್ಪಾಕ್ ಸಾರ್ಕೆಂ ದಿಸಾನಾ.
ಅಶೆಂ ಮ್ಹಣ್ತಾನಾ ಹಾಂಗಾಸರ್ ಕೊಣ್ಯ್ ಉಟೊನ್ ಹಾಂವ್ ದಂದ್ವ್ ನೀತ್ ಆಪ್ಣಾಯ್ತಾಂ ಮ್ಹಣೊನ್ ಮ್ಹಜೆರ್ ಅಫ್ರಾದ್ ಮಾಂಡುಂಕ್ ಪುರೊ. ಹ್ಯಾ ಅಫ್ರಾದಾಕ್ ಹಾಂವ್ ಸವಿಸ್ತಾರ್ ರೀತಿನ್ ಸಾಂಗೊಂ ಜಾಲ್ಯಾರ್ ಸಾಹಿತ್ಯ್ ಕಸಲ್ಯಾಯ್ ಪ್ರಕಾರಾಚೆಂ ರಚನ್ (creation) ಜಾಂವ್ಕ್ ಸಕ್ತಾ. ಜಾಂವ್ ತೆಂ ಅಸ್ವಾಭಾವಿಕ್ (imaginary) ಯಾ ಸ್ವಾಭಾವಿಕ್. ಹಾಂಗಾಸರ್ ಸಾಹಿತ್ಯ್ imaginary ಪ್ರಕಾರಾರ್ ಆಸ್ಲ್ಯಾರೀ ಜರ್ತರ್ ತೆಂ ಸಾಹಿತ್ಯ್ ನಿದ್ಲೆಲ್ಯಾ ಹ್ಯಾ ಸಮಾಜೆಕ್ ಉಟಂವ್ಕ್ ಸಕ್ತಾ ಜಾಲ್ಯಾರ್ ಯಾ ಶೋಷಿತ್ ಆನಿ ಶೋಷಣ್ ಕರ್ತಾಚಾ ದಿಸ್ಪೊಡ್ತ್ಯಾ ಜೀವನಾಕ್ ಸವಾಲ್ ಜಾವ್ನ್ ಉಭೆಂ ಜಾತಾ ಜಾಲ್ಯಾರ್ ತೆಂ ಖಂಡಿತ್ ಖರೆಂ ಸಾಹಿತ್ಯ್. ಅಸಲೆಂ ಸಾಹಿತ್ಯ್ (ಹಾಂಗಾಸರ್ ಆಮಿಂ ಪ್ರಕಾರ್ ಸೊಡ್ಯಾಂ) ಜಾಂವ್ ತೆಂ ವೈಯುಕ್ತಿಕ್ ವಿಚಾರಾಂಚೆಂ (ಖಾಸ್ಗಿ ನಹಿಂ) ಯಾ ಸಮಾಜೆಚಾ ಜೆರಾಲ್ ವಿಚಾರಾಂಚೆಂ, ತ್ಯಾ ಸಾಹಿತ್ಯಾನ್ ದಾಖಂವ್ಚೆ ಜಯ್ತ್ ಆನಿಂ ಸಲ್ವಣಿ ಕಿತ್ಲಿ ಪ್ರಾಮುಖ್ಯತಾ ಘೆತಾಗೀ ತಿತ್ಲೆಂಚ್ ತ್ಯಾ ಸಾಹಿತ್ಯಾಚೆ ವಿಚಾರ್ಯ್. ಅಶೆಂ ಆಸ್ತಾನಾ ವೈಯುಕ್ತಿಕ್ ಮ್ಹಳ್ಯಾರ್ ಖಾಸ್ಗಿ ವಿಶಯಾಂಚೆಂ ಸಾಹಿತ್ಯ್ ’ಕವಿತಾ ಕುಳಾರ್ ಮಾಳಾನ್’ ಆಪವ್ಣೆಂ ದಿಂವ್ಚಾ ತ್ಯಾ ’ಥೆರಾಫಿ’ ಕ್ ಸಂಬಂಧ್ ಜೊಡ್ತಾನಾ ಖಾಸ್ಗೆನ್ ವಾಚ್ಪ್ಯಾಕ್ ಜಾಂವ್ ಯಾ ಹಾಚೆಂ ಪರಿಣಾಮ್ ಜಾವ್ನ್ ತ್ಯಾ ಸಮಾಜೆಕ್ ಜಾಂವ್ ಕಾಂಯ್ ತರೀ ಬರೆಂಪಣ್ ಹಾಡ್ತಾ ಮ್ಹಳ್ಳೊ ಭರ್ವಸೊ ಮ್ಹಾಕಾ ನಾಂ. "ವಾಚ್ಪ್ಯಾಚಾ ಸಿಂತಿಮೆಂತಾಕ್ ಜಾಗವ್ನ್ ಶಾಭಾಸ್ಕಿ ಜೊಡುನ್ ಘೆಂವ್ಚಿ ಕಲಾ ’ಕವಿತಾ’ ಮ್ಹಣೊನ್ ಹಾಂವ್ ತರೀ ಖಂಡಿತ್ ಪಾತ್ಯೆನಾಂ. ಹಾಂ.... ಪೂಣ್ ಕವಿತೆಂಚೊ ನೆಣ್ತೊ ಪ್ರಕಾರ್ ಜಾಂವ್ನ್ ಆಸ್ಚಾ ಪದಾಂನಿಂ ಹಿ ಕಲಾ ಯಶಸ್ವಿ ಥರಾನ್ ಪ್ರಗತೆಕ್ ಪಾವಯೆತ್.
ಪ್ರಸ್ತುತ್ ಕಾಳಾರ್ ಆಸಲಿಂ ಪದಾಂಯ್ ಮನ್ಶಾ ಜಿವಿತಾಚಾ ಮೆಡಿಟೇಶನಾಕ್ ವೈಯುಕ್ತಿಕ್ ಸಾಂಗಾತ್ ದೀಂವ್ಕ್ ಸಕಾನಾಂತ್. ಅಶೆಂ ಆಸ್ತಾಂ ಏಕ್ ಆರೋಗ್ಯಭರಿತ್ ಸಮಾಜ್ ರಚುಂಕ್ ಖಾಸ್ಗಿ ವೈಯುಕ್ತಿಕ್ ಚಿಂತ್ಪಾಚೆಂ ಸಲ್ವೊಣೆಕ್ ವೆಂಗುನ್ ವಿಳಾಪ್ ಕರ್ಚೆಂ ಸಾಹಿತ್ಯ್ ಕಿತ್ಲೆಂ ವಾವುರ್ತೆಲೆಂ ತೆಂ ವಾರಾವ್ನ್ ಪಳವ್ಯೆತ್.
"ಕಾಳೊಕಾಂತ್ಲಿಂ ಕಾಂತಾರಾಂ’ ಕವಿತಾ ಜಮ್ಯಾಂತ್ ಹಾಂವೆ ಆರಂಭಿಕ್ ಹಂತಾರ್ ಸಾಂಗ್ಲ್ಲ್ಯಾ ಪರಿಂ ಸಬಾರ್ ಪುಡ್ಲದ್ ಕವಿಂಚೆಂ ಜಲ್ಮ್ ಜಾಲಾಂ ಆಸ್ತಾಂ ಸಬಾರ್ ತರ್ನ್ಯಾ ಕವಿಂಚಿಂ ನೆಣ್ತಿಂ ಪಾವ್ಲಾಂ ಪಳೆವ್ನ್ ತಾಂಚಾ ಜಲ್ಮಾಕ್ ಯಾ ತಾಂಚಾ ಪಾವ್ಲಾಂಕ್ ಬಳ್ ಆನಿ ಘಟಾಯ್ ದಿಂವ್ಚಾ ಎಕಾಚ್ಚ್ ಇರಾದ್ಯಾನ್ ಹ್ಯಾ ಜಮ್ಯಾಂತ್ಲ್ಯಾ ಜಾಣ್ತ್ಯಾ ಕವಿಂಚಾ ಕವಿತಾಂಕ್ ಮಾತ್ರ್ ಹಾಂವೆ ಮ್ಹಜ್ಯಾ ವಿಮರ್ಶಾಂತ್ ವಿಂಚ್ಲಾಂ. ಅಶೆಂ ಆಸ್ತಾನಾ ನವ್ಯಾನಿಂ ತಶೆಂ ನೆಣ್ತ್ಯಾಂನಿ ಹಾಂಗಾಸರ್ ಘುಸ್ಪಡೊನ್ ಆಪ್ಣೆಂ ರಚ್ಲೆಲ್ಯಾ ಸಾಹಿತ್ಯಾಕ್ಚ್ ಸಮತೋಲನ್ ಕರುನ್ ಖುದ್ದ್ ಜಾವ್ನ್ ವಾರಾವ್ನ್ ಪಳಂವ್ಚೆ. ತಶೆಂಚ್ ಆಪ್ಲ್ಯಾ ಸಾಹಿತ್ಯಾಚೆ ವಿಚಾರ್ ಕಸಲ್ಯಾ ಪಾಂವ್ಡ್ಯಾರ್ ಆಸಾತ್ ತೆಂ ಸಮ್ಜೊನ್ ಘೆಂವ್ಚೊ.
ಹೊ ವಿಚಾರ್ ಮಾಕಾ ಹಾಂವೆಂ ಪಯ್ಲೆಂಚ್ ಸಾಂಗ್ಲ್ಲ್ಯಾ ಪರಿಂ ಮ್ಹಜ್ಯಾ ಏಕ್ ಪ್ರಕಾರಾಚಾ uಟಿiveಡಿsಚಿಟ ಧರ್ಮಾಕ್ ವಿರುದ್ಧ್ ತರೀ ಮ್ಹಜ್ಯಾ ಸಮಾಜೆಚಾ ಉದರ್ಗತೆಚಿ ಆಶಾ ದವರುನ್ ಆನಿ ಸಾಹಿತ್ಯಾಚಾ ಕ್ರಾಂತೆಚೆಂ ಆಶಾವಾದ್ ಲಾಲೆವ್ನ್ ಕೊಂಕಣಿ ಕವಿತಾ ಶೆತಾಕ್ ಎಕಾ ಅಂತರ್ ರಾಷ್ಟ್ರೀಯ್ ಮಟ್ಟಾಚಾ ರುಚಿಚೊ ಸ್ವಾದ್ ಭರ್ಚಾ ಎಕಾಚ್ಚ್ ಉದ್ದೇಶಾನ್ ಹಾಂವೆ ಹಿ ವಾಟ್ ಆಪ್ಣಾಯ್ಲಿ. ಹ್ಯಾ ಮ್ಹಜ್ಯಾ ವಿಚಾರಾಂಕ್ ವಾಚ್ಪ್ಯಾಂನಿ ಸಮ್ಜೊನ್ ಸುಧಾರ್ಸುನ್ ಘೆಂವ್ಚೆಂ.
’ಯೆಯಾ ಆಮಿಂ ಕುಪಾಂ ಧರುಂಯಾ’ ಆನಿ ’ನಿರ್ಧಾರ್’ ಕವಿತೆನಿಂ ಕವಿತೆಂಚಾ ವಿಚಾರಾಂನಿ ಸಂಘರ್ಷ್ ಆನಿ ದಿಸ್ಪೊಡ್ತ್ಯಾ ಜಿವಿತಾಂತ್ ಉಟೊನ್ ಯೆಂವ್ಚಾ ಸಮಾಜೆಚಾ ಉದರ್ಗತಿಕ್ ಪ್ರವ್ರತ್ತಿಂಕ್ (tendency) ಜಯ್ತಾಚಾ ತೆಂವ್ಶಿ ಪಾವೊಂವ್ಚೊ. ಕ್ರಾಂತಿವಾದ್ ಉಟೊನ್ ದಿಸ್ಚೆಂ ನಿಜಾಯ್ಕ್ಯ್ ಸೌಭಾಗ್ಯ್.
’ಪಾವ್ಸ್ ವೊತ್ತಾ’ ಕವಿತೆಂತ್ ಕವಿತೆಚ್ಯಾ ವಿಚಾರಾಂಚಿ ಆನಿಂ ಕವಿತೆಚ್ಯಾ ವ್ಹಾಳ್ಯಾಚಿ ಕ್ರಾಂತಿ ಕವಿತೆಕ್ ಸ್ವಶ್ಟ್ ಆನಿಂ ಅಸ್ಪಶ್ಟ್ ರಿತಿನ್ ವಾಚ್ಪ್ಯಾಚಾ ದೊಳ್ಯಾಂ ಮುಕಾರ್ ಸಬಾರ್ ರುಪಾಂಕ್ ಹಾಡವ್ನ್ ಕವಿತೆಚಾ ಸಂಸಾರಾಂತ್ಚ್ ಯಶಸ್ವಿ ಥರಾನ್ ಉಪ್ಯೆಶೆಂ ಕರ್ಚಿ, ಕವಿತಾ ಶೆತಾಂತ್ಲ್ಯಾ ಆನ್ಭೋಗಾಚಿ ಸ್ಪೂರ್ತಿ ದಾಖಯ್ತಾ.
ವಿಚಾರಾಂಕ್ ಉಗ್ಡಾಪೆಂ ಕರ್ತಾನಾ ವಿಚಾರಾಂಚಾ ಸಂಘರ್ಷಾಕ್ ವ್ಹಾಳಂವ್ಚಿ ಕ್ರಾಂತಿ ಆನಿ ಅನ್ಭೋಗಾಚಿ ಸ್ಪೂರ್ತಿ ಮೆಳ್ಳ್ಯಾರ್ ಕವಿತೆಚಾ ಶೆತಾಂತ್ಚ್ ಕ್ರಾಂತಿ ಉಟವ್ಯೆತಾ. ಹ್ಯಾ ವಾಟೆರ್ ತರ್ನ್ಯಾ ಕವಿಂನಿ ಪಾವ್ಲಾಂ ಕಾಡ್ಚಿಂ ಚಡ್ ಗರ್ಜೆಚಿಂ. ಅಶೆಂ ಜಾಲ್ಯಾರ್ ಮಾತ್ರ್ ಕೊಂಕಣಿ ಸಾಹಿತ್ಯ್ ಸಂಸಾರಾಚಾ ಖಂಯ್ಚಾಯ್ ಸಾಹಿತ್ಯಾಕ್ ಫುಡ್ ಕರ್ನ್ ರಾವೊಂಕ್ ಸಕ್ತೆಲೆಂ. ಆನಿಂ ಹ್ಯಾಚ್ ದಿಶೆನ್ ಖಳ್ಮಿತ್ ನಾಸ್ತಾನಾ ವಾವ್ರ್ ಚಲಂವ್ಚಾ ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ವಾವ್ರಾಂತ್ ಜಯ್ತ್ ಲಾಬ್ತೆಲೆಂ.
ಕವಿತಾ ಮ್ಹಳ್ಯಾರ್ ಕಾಳ್ಜಾ ಸ್ಪಂದನಾಚಿ ಭಾಸ್ ಮ್ಹಣೊನ್ ಸಬಾರ್ ಕವಿ ಆನಿ ಕವಿಯತ್ರಿಂ ಮಾಂದುನ್ ಘೆತಾನಾ ತ್ಯಾಚ್ ಸ್ಪಂದನಾ ಥಾವ್ನ್ ಉಟ್ಲ್ಲ್ಯಾ ಭಾಸೆಕ್ ದುಸ್ರ್ಯಾ ಕಾಳ್ಜಾಕ್ ಸ್ಪಂದಿಸುಂಚಾ ತಿತ್ಲಿ ಸಕತ್ ಕಿತ್ಯಾಕ್ ನಾಂ? "ಫಾಂತ್ಯಾಫಾರಾಚಿ ಸಪ್ಣಾಂ ಆನಿ ಸಕಾಳಿಂಚೊ ಧೋವ್ ಹ್ಯಾ ದೊನಾಂಯ್ಚೆ ಆಸ್ಥಿತ್ವ್ ಉಜ್ವಾಡ್ ಜಾಗೊ ಜಾತಾ ವರೇಗ್ ಮಾತ್ರ್". ಪೂಣ್ ಮನ್ಶ್ಯಾ ಜಿವಿತಾಚೆಂ ಆಸ್ಥಿತ್ವ್ ತಶೆಂ ನಹಿಂ. ಆತಾಂ ಹಾಂವ್ ಜರ್ತರ್ ಮನ್ಶಾ ಜಿವಿತಾಕ್ ಸಪ್ಣಾಂ ಆನಿ ಧೊವಾಕ್ ಸರಿ ಕರ್ತಾಂ ಜಾಲ್ಯಾರ್ ಹಾವೆಂಚ್ ರಚ್ಲ್ಲ್ಯಾಕ್ ಹಾವೆಂಚ್ ಮಾರ್ಲೆಲ್ಯಾ ಪರಿಂ. ತರ್ ಹಾಂಗಾಸರ್ ನಿರಾಸ್ವಾದ್, ಪಲಾಯನ್, ಪೊಳಾಪಳ್, ವಿಳಾಪ್, ಆಕ್ಲಾಸ್ ಕಿತ್ಯಾಕ್? ಕವಿತಾಚೊ ಪ್ರಕಾರ್ ಭಿಲ್ಕುಲ್ ಅಸೊ ನಹಿಂ.
ಕವಿತೆಚಿ ಸಕತ್ ಆಶಿ ಆಸೊಂಕ್ ಜಾಯ್ ಕೀ ಸಕಾಳಿಂಚಾ ಸುರ್ಯಾಚಾ ಕಿರ್ಣಾಂಕ್ ತೊ ಫಾಂತ್ಯಾಚೊ ದೋವ್ ವಾಸ್ತಾವಾಂತ್ ಸಕ್ತೆನ್ ಆಪ್ಲ್ಯಾ ಆಸ್ಥಿತ್ವಾಕ್ ಸಾಂಬಾಳುನ್ ವರ್ತಾ ಜಶಿ. ಅಸಲಿ ಸಕತ್ ಮಾತ್ರ್ ದುಸ್ರ್ಯಾಕ್ಯ್ ಏಕ್ ಜವಾಬ್ದಾರಿಚೆಂ ಲಿಸಾಂವ್ ಯಾ ವಾಟ್ ದಾಖಯ್ತಾ ಆನಿ ಅಪ್ಲ್ಯಾ ಮಿಸಾಂವಾಂತ್ ಯಶಸ್ವಿ ಜಾತಾ. ಜಯ್ತೆವಂತ್ ಜಾತಾ.
ಪುಡಾರಾಕ್ ಹಿಚ್ಚ್ ಆಶಾ ಆನಿ ಉಮೆದ್ ಖಾತ್ರಿ ಕರುನ್ ’ಕಾಳೊಕಾಂತ್ಲಿ ಕಾಂತಾರಾಂ’ ಹ್ಯಾ ಕವಿತಾ ಜಮ್ಯಾಂತ್ಲ್ಯಾ ಸರ್ವ್ ಕವಿಂಕ್ ಆನಿ ಕವಿಯತ್ರಿಂಕ್ ತಾಂಚಾ ವಾಟೆರ್ ಜಯ್ತ್ ಮಾಗ್ತಾಂ. ಕಾಳೊಕಾಂತ್ ಘುಣ್ಗುಣ್ಚೆ ಕಾಜುಲೆ ಸಮಾಜೆಚಾ ಅಂದ್ಕಾರಾಕ್ ಭರ್ವಸ್ಯಾಚೆಂ ಕೀರ್ಣ್ ಜಾವ್ನ್ ಗಾಯ್ತೆಲೆ ಮ್ಹಳ್ಳೊ ಮ್ಹಜೊ ಆಶಾವಾದ್.
ಆಯ್ಚಾ ಹ್ಯಾ ಸಮೀಕ್ಶೆಂತ್ ಹಾವೆಂ ಫಕತ್ತ್ ಕಾಳೊಕಾಂತ್ಲಿಂ ಕಾಂತಾರಾಂ ಹ್ಯಾ ಕವಿತಾ ಜಮ್ಯಾಂತ್ಲ್ಯಾ ಕವಿತಾಂಕ್ ಮಾತ್ರ್ ವಿಂಚ್ಲಾಂ ಶಿವಾಯ್ ಕವಿಂಕ್ ಯಾ ಕವಿಯತ್ರಿಂಕ್ ಭಿಲ್ಕುಲ್ ನಹಿಂ. ಜಮ್ಯಾಂತ್ ವ್ಹಾಳ್ಲ್ಲ್ಯಾ ಕವಿತಾಂಚಾ ವಿಚಾರಾಂಚೆರ್ ಮಾತ್ರ್ ಮ್ಹಜೊ ವಾದ್ ಆನಿ ಪ್ರತಿವಾದ್ ಮಾಂಡ್ಲಾ ಶಿವಾಯ್ ವೈಯುಕ್ತಿಕ್ ಜಾವ್ನ್ ಬರವ್ಪ್ಯಾಂಕ್ ಖಂಡಿತ್ ನಹಿಂ. ಬಹುಶ: ಹ್ಯಾಚ್ಚ್ ಬರವ್ಪ್ಯಾಂಚಾ ದುಸ್ರ್ಯಾ ಕವಿತಾಂಚೆರ್ ತ್ಯಾ ಕವಿತಾಂಚಾ ವಿಚಾರಾ ಪ್ರಮಾಣೆಂ ಹಾಂವೆ ಮಾಂಡ್ಲ್ಲೊ ವಾದ್ ವೆಗ್ಳೊಚ್ಚ್ ಆಸೊಂಕ್ ಸಕ್ತಾ. ಕಾರಾಣ್, ಹಾಂವ್ ಸಾಹಿತ್ಯಾಕ್ ಆನಿ ವ್ಯಕ್ತಿಕ್ ಕೆದ್ನಾಂಚ್ ಸರಿ ಕರಿನಾಂ. ಹ್ಯಾ ವಿಶಯಾಚೆರ್ ವಾಚ್ಪ್ಯಾಂನಿ ಹಾಂಗಾಸರ್ ಧ್ಯಾನ್ ದಿಂವ್ಚೆಂ.
ಏಕ್ ಮಹತ್ವಾಚೊ ವಿಶಯ್ ಹಾಂವ್ ಹಾಂಗಾಸರ್ ಉಲ್ಲೇಖ್ ಕರುಂಕ್ ಖುಶಿ ವರ್ತಾಂ. ಕಾಳೊಕಾಂತ್ ಘುಣ್ಗುಣ್ಚೆ ಕಾಜುಲೆ ಆಪ್ಲ್ಯಾ ಜಲ್ಮಾ ಸ್ವಭಾವಾಕ್ ಹ್ಯಾ ಕಾಳೊಕಾಂತ್ಲ್ಯಾ ಕಾಂತಾರಾಂತ್ ಕಶೆ ವಿಸ್ರಾಲೆ? ಕಾಜುಲೆ ಕಾಳೊಕಾಂತ್ಯ್ ಧಯ್ರಾಚೊ ಉಜ್ವಾಡ್ ಫಾಂಕವ್ನ್ ಆಪ್ಲಿ ವಾಟ್ ಸಾರ್ಚೆ ಆನಿ ಆಪ್ಲ್ಯಾ ಜಲ್ಮಾ ಸ್ವಭಾವಾನ್ ಹೆರಾಂಕಿ ಧಯ್ರಾಚಿ ವಾಟ್ ದಾಖಂವ್ಚೆ ಆಪ್ಲೊ ಸ್ವಭಾವ್ಚ್ ವಿಸ್ರೊನ್ ಖುದ್ದ್ ಕಾಳೊಕಾಂತ್ ಸಾಂಪ್ಡೊನ್ ಹಾಕ್ ಬೋಬ್ ಮಾರುನ್ ವಿಳಾಪ್ ಕರ್ಚೆಂ ನಿಜಾಯ್ಕೀ ಹರ್ಯೆಕಾ ಕವಿತೆಚಾ ಕಾಜುಲ್ಯಾನ್ ವಾರಾವ್ನ್ ಪಳಂವ್ಕ್ ಜಾಯ್ ಜಾಲ್ಲೊ ವಿಶಯ್. "ವಾತ್ ಝಳ್ಚಿಚ್ ಕಾಳೊಕಾಂತ್". ಅಶೆಂ ತಿ ಜಳ್ತಾನಾ ತಿಕಾ ಝಗ್ಡೊನ್ ಝಗ್ಡೊನ್ ಜಿಯೆಂವ್ಕ್ ಪಡ್ತಾ. ಆನಿ ಹೆಂ ಖಂಯ್ ವರೇಗ್ ಮ್ಹಳ್ಯಾರ್ ಆಪ್ಲೆಂ ಆಸ್ಥಿತ್ವ್ ಹೊಗ್ಡಾವ್ನ್ ಘೆತಾ ವರೇಗ್. ಜಾಲ್ಯಾರೀ ತಿ ವಾತ್ ವಿಳಾಪ್ ಕರಿನಾಂ, ನಿರಾಸ್ ದಾಖಯ್ನಾಂ ಪಲಾಯನಾಕ್ ತಯಾರ್ ನಾಂ. ತರ್ ಸಮಾಜೆಚ್ಯಾ ಕಾಳೊಕಾಕ್ ಪಯ್ಸ್ ಕರುಂಕ್ ಆಯ್ತೊ ಜಾವ್ನ್ ತ್ಯಾ ಕಾಳೊಕಾಂತ್ ಉಭೊನ್ ಯೆಂವ್ಚೆ ಸಾಹಿತ್ಯಾಚೆ ಜವಾಬ್ದಾರಿಯುತ್ ಕಾಜುಲೆ ಸಾಹಿತ್ಯಾಚಾ ಹ್ಯಾ ಮಹತ್ವಾಚಾ ವಾವ್ರಾಂತ್ ಆಪ್ಲೊ ಖಾಸ್ಗಿ ಆನ್ಭೋಗ್ ಸಾಂಡುನ್ ಸಮಾಜೆಕ್ ಜಾಗಂವ್ಕ್ ಯಾ ವಾಟ್ ದಾಖಂವ್ಕ್ ಕಿತ್ಯಾಕ್ ತಯಾರ್ ನಾಂತ್?
"ಕಾಳೊಕಾಂತ್ ಕಾಳೊಕ್ಚ್ ಕಿತ್ಯಾಕ್ ಜಳಂವ್ಕ್ ಜಾಯ್? ಕಾಳೊಕಾಂತ್ ಭರ್ವಸೊ, ಕಾಳೊಕಾಂತ್ ಮೋಗ್, ಕಾಳೊಕಾಂತ್ ಧಯ್ರ್. ಪ್ರತ್ಯೇಕ್ ಜಾವ್ನ್ ಕಾಳೊಕಾಂತ್ ಉಜ್ವಾಡ್ಯ್ ಫಾಂಕವ್ಯೆತಾ. ಉಜ್ವಾಡ್ ಫಾಂಕಂವ್ಕ್ ಕಾಳೊಕ್ಚ್ ಜಾಯ್. ಉಜ್ವಾಡಾಂತ್ ಉಜ್ವಾಡಾಚಿ ಕಾಂಯ್ ಗರ್ಜ್ ನಾಂ". ಮನ್ಶ್ಯಾ ಜಾತ್ ಕಾಳೊಕಾಂತ್ಯ್ ಖುಶ್ ಆನಿಕ್ ಸುಖಿ ರಾವೊಂಕ್ ಪ್ರಯತ್ನ್ ಕರ್ತಾ. ದೆಕುನ್ಂಚ್ ವಾತ್ ಜಳಯ್ತಾ. ಹ್ಯಾಚ್ ಪರಿಂ ಕೊಂಕಣಾಂತ್ಲೆ ಕೊಂಕ್ಣಿ ಕವಿತಾಂಚೆ ಕಾಜುಲೆ ಫುಡಾರಾಕ್ ಕಾಳೊಕಾಂತೀ ಉಜ್ವಾಡಾಚಿ ದಿವ್ಟಿ ಪೆಟಯ್ತೆಲೆ ಮ್ಹಳ್ಳೊ ಮ್ಹಜೊ ಆಶಾವಾದ್. ಜರೀ ತ್ಯಾ ಕಾಜುಲ್ಯಾಂಚಾ ವೈಯುಕ್ತಿಕ್ ವಿಚಾರಾಂಕ್ ಕಾಳೊಕಾನ್ ವೆಡೊ ಘಾಲಾ ತರೀ.
ಹೊ ಮ್ಹಜೊ ಆಶಾವಾದ್ ಕೊಂಕ್ಣಿ ಕವಿತೆಂಕ್ ಸಂಸಾರಾಚಾ ಕ್ಷಿತಿಜಾಕ್ (horizon) ಖಂಡಿತ್ ವರುನ್ ಪಾವಯ್ತಲೊ ಮ್ಹಳ್ಳೊ ಭರ್ವಸೊ ಆಜ್ ತುಮ್ಚೆ ಹುಜಿರ್ ಖಾತ್ರಿ ಕರ್ತಾಂ. ಅಶೆಂ ಕರ್ತಾನಾ ಬಹುಶ: ಖಂಡಿತ್ ’ಕಾಳೊಕಾಂತ್ಲಿ ಕಾಂತಾರಾಂ’ ಕವಿತಾ ಜಮ್ಯಾಂತ್ಲ್ಯಾ ಕವಿಂಕ್ ಆನಿ ಕವಿಯತ್ರಿಂಕ್ ಹ್ಯಾ ಜಮ್ಯಾ ಪಾಟ್ಲ್ಯಾ ಪಿಂತುರಾಂಚೊ ಉಗ್ಡಾಸ್ ಯೇವ್ನ್ ಘುಸ್ಪಡ್ ಖಂಡಿತ್ ಜಾತಲೊ. ಯೆದೊಳ್ಚ್ ಹ್ಯಾ ಘುಸ್ಪಡಾಕ್ ಮ್ಹಜ್ಯಾ ವಿಚಾರಾಂನಿ ಹಾವೆಂ ಉಗ್ಡಾಪೆಂ ಕೆಲಾಂ ತರೀ ಸ್ವಶ್ಟ್ ರಿತಿನ್ ಸಾಂಗ್ಚೆಂ ತರ್ ದೊಳ್ಯಾಂನಿ ದುಕಾಂ ಗಳಂವ್ಚಾ ಭುರ್ಗ್ಯಾಚಾ ತಸ್ವೀರೆಕ್ ಪಳೆವ್ನ್ ಹಾವೆಂಯ್ ಮ್ಹಜ್ಯಾ creative ಸಾಹಿತ್ಯಾಂತ್ ದುಕಾಂಚ್ ಗಳಂವ್ಕ್ ಜಾಯ್ ಮ್ಹಣೊನ್ ನಾಂ. ತಿಂ ದುಕಾಂ ಪುಶೆಂವ್ಕ್ ತ್ಯಾ ಭುರ್ಗ್ಯಾಕ್ ಹಾವೆಂ God father ಯ್ ಜಾವ್ಯೆತಾ. ತ್ಯಾ ದುಕಾಂಕ್ ಧಯ್ರಾಚೆಂ ಸಕತ್ ಯಾ ಭರ್ವಶ್ಯಾಚೆಂ ಕಿರಣ್ಯ್ ಜಾವ್ಯೆತಾ. ಚಡ್ ಕರುನ್ ತ್ಯಾ ನೆಣ್ತ್ಯಾ ದುಕಾಂಕ್ ಪುಡೆಂ ದವರುನ್ ಆಖ್ಖ್ಯಾ ಸಮಾಜೆಕ್ ಏಕ್ ಸಕ್ತೆವಂತ್ ಲಿಸಾಂವ್ಯ್ ದೀಂವ್ಕ್ ಸಕ್ತಾ. ಅಶೆಂ ಆಸ್ತಾನಾ ಹಾಂವ್ ಖಂಡಿತ್ ಸಾಂಗೊಕ್ ಸಕ್ತಾಂ ಕೀ ಪಿಂತುರ್ ತೆಂ ಕಸಲೆಂಯ್ ಜಾಂವ್ ತೆಂ ಕವಿತೆಚಾ ವಿನ್ಯಾಸಾಕ್ (design) ಶಿವಾಯ್ ಕವಿತೆಚಾ ವಿಚಾರಾಂಕ್ ನಹಿಂ. ಕವಿತೆಚೆಂ ವಿನ್ಯಾಸ್ ಆನಿ ವಿಚಾರ್ ಜರ್ ಏಕ್ಚ್ಚ್ ಜಾಲೊ ತರ್ ತಸಲ್ಯಾ ಕವಿತೆಚಾ ಇಮಾಜೆನಿಂ ವೈವಿಧ್ಯಾತಾ (variety) ಯಾ ಕವಿತೆಚಾ ವ್ಹಾಳ್ಯಾಂತ್ ಸ್ರಜನಾಶೀಲತಾ (creativity) ಕವಿತೆಕ್ ಗ್ರೇಸ್ತ್ ಕರುಂಕ್ ಸಕಾನಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
