ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 62. ಹೆರಿ ಬಾಪ್ಪುಚೆಂ ಮೋರ್ನ್
ವಿತೊರಿ ಕಾರ್ಕಳ್: ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ವೆವೆಗ್ಳ್ಯಾ ರಿತಿಚೊ ಕೊಂಕ್ಣಿ ವಾವ್ರ್ ಕರ್ಚಾಂತ್ ವಿತೊರಿ ಎದೊಳ್ಚ್ಚ್ ನಾಂವಾಡ್ಲಾ. ಕೊಂಕ್ಣಿ ವಾವ್ರಾಸವೆಂ ಅಪ್ರೂಪ್ ತರ್ಯೀ ಸಾಹಿತಿಕ್ ವಾವ್ರ್ ಕರುನ್ ಆಸಾ. ಜಾಂವ್ ಕಾಣ್ಯೊ, ಜಾಂವ್ ಕವಿತಾ ವಾ ವಿಡಂಬನಾಂ.
ವಿತೊರಿ ಕಾರ್ಕಳ್
ಹೆರಿ ಬಾಪ್ಪುಚ್ಯಾ ಮೊರ್ನಾಸಂಗಿಂ ಆಮ್ಗೆರ್ ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ಚಲೊನ್ ಆಸ್ಲ್ಲೆಂ ಝಜ್ ಆಕೇರ್ ಜಾಲ್ಲೆಂ. ಹೆರಿ ಬಾಪ್ಪುಚಿ ಮೊರ್ಚಿ ಪ್ರಾಯ್ ನ್ಹಂಯ್ ತರೀ ಹಾಂವೆಂ ಸಯ್ತ್ ತಾಚೆ ವೊಳ್ವಳೆ ಪಳೆಂವ್ಕ್ ತಾಂಕಾನಾಸ್ತಾಂ, ತಾಕಾ ಮೋರ್ನ್ ಧಾಡ್ ಮ್ಹಣ್ ದೆವಾಲಾಗಿಂ ಮಾಗ್ಲ್ಲೆಂ ಕಿತ್ಲೆಂ ಜಾಯ್ತ್? ಹೆರಿ ಬಾಪ್ಪುಚಿ ನಿರ್ಜಿವ್ ಕೂಡ್, ಚವ್ಕೆಂತ್ ದೋನ್ ಬಾಂಕ್ ಸಾಂಗಾತಾ ದವರ್ನ್, ತಾಚೆರ್ ಧವೆಂ ಲುಗಾಟ್ ಹಾಂತುಳ್ನ್ ದವರ್ಲ್ಲಿ. ಮಾತ್ಯಾಕಡೆ ಆಲ್ತಾರಿ ಮುಳಾಂತ್ ದೋನ್ ವಾತಿ ಝಳ್ತಾಲ್ಯೊ.
ಹಾಂವೆಂ ಪರತ್ ಹೆರಿ ಬಾಪ್ಪುಚೆಂ ಮುಸ್ಕಾರ್ ಪಳೆಲೆಂ. ತಾಣೆ ಭಗ್ಲ್ಲ್ಯಾ ವೊಳ್ವಳ್ಯಾಂಚೆಂ ಪಡ್ರೂಪ್ ಆನಿಕ್ಯಿ ಮುಸ್ಕಾರಾರ್ ಉರ್ಲ್ಲೆಂ. ಥೊಡ್ಯಾ ದಿಸಾಂ ಥಾವ್ನ್ ಕಿತ್ಲೊ ಕಶ್ಟಾಲ್ಲೊ. ಮ್ಹಾಕಾ ದೂಕ್ ಉಮಾಳೊನ್ ಆಯ್ಲೆಂ ತರ್ಯಿ, ರಡ್ಲಿಂನಾ, ವ್ಹಡ್ಲಿಮಾಂಯ್ ಎಕಾ ಕೊನ್ಶಾರ್ ಹಾಕ್-ಬೊಬ್ ಮಾರ್ನ್ ರಡ್ತಾಲಿ. ಆನಿ ಘಡ್ಯೆ ಘಡ್ಯೆ ಮತ್ ಚುಕೊನ್ ಪಡ್ತಾಲಿ. ಘರ್ಚಿಂ ಸೆಜಾರ್ಚಿಂ ಸಬಾರ್ ಜಣಾಂ, ಜಮೊನ್ ಮಾಗ್ಣೆಂ ಮ್ಹಣೊನ್ ಸರ್ಲ್ಲ್ಯಾಚ್ಯಾ ಆತ್ಮ್ಯಾಕ್ ಶಾಂತಿ ಮಾಗ್ತಾಲಿಂ. ಮಾಮ್ಮಿ, ಟ್ಯಾನಿಯಾ ಮಾವ್ಶಿ, ಟೆರಿ ಬಾಪ್ಪು ಎಕಾ ಕೊನ್ಶ್ಯಾರ್ ರಾವ್ಲ್ಲಿಂ. ತಾಂಚ್ಯಾಚ್ ದೊಳ್ಯಾಂನಿ ದುಕಾಂ ಆಸ್ಲ್ಲಿಂ.
ಪುಣ್ ಹಾಂವ್ ಖಂಡಿ ತ್ ಜಾಣಾಂ. ಹಿಂ ದುಕಿನ್ ಫುಮಾರ್ ಜಾವ್ನ್ ಉಭ್ಜಾಲ್ಲಿಂ ದುಕಾಂ ನ್ಹಂಯ್. ಹ್ಯಾ ದೋನ್ ವರ್ಸಾಂ ಥಾವ್ನ್ ತಿಂ ಕಿತ್ಲಿಂ ಆಶೆಲ್ಲಿಂ ಕೊಣ್ಣಾ ಹೆರಿ ಬಾಪ್ಪು ಮೊರೊಂಕ್. ಜರ್ ಪಪ್ಪಾ ನಾತ್ಲ್ಲೊ ತರ್, ಹೆರಿ ಬಾಪ್ಪು, ಕೆದ್ನಾಂಚ್ ಮೋರ್ನ್ ಪಾವ್ತೊ.
"ವಿಸ್ಮಿತಾ ವಾತ್ ಪೆಟಯ್ ಮಾಂ" ಸೆಜಾರ್ಚಿ ಲಿಲ್ಲಿ ಬಾಯ್ ಸುಸ್ಕಾರ್ಲಿ. ಹಾಂವೆಂ ಪೆಕೆಟಿಂತ್ಲಿಂ ಆನ್ಯೆಕ್ ವಾತ್ ಕಾಡ್ನ್, ಪೆಟಯ್ಲಿ. ಮಾಗ್ಣೆಂ ತೇರ್ಸ್ ಚಾಲುಚ್ ಆಸ್ಲ್ಲೊ. ಮ್ಹಾಕಾ ಕಿತ್ಯಾಕ್ಗೀ ಹಾಂಗಾಸರ್ ರಾವೊಂಕ್ ಜಾಲೆಂನಾ. ಸರ್ವಾಂಚ್ಯಾ ವೆಕ್ತಿತ್ವಾಚಿ ವಳೊಕ್ ಮ್ಹಾಕಾ ಎದೊಳ್ಚ್ ಜಾಲ್ಲಿ. ಸರ್ವಾಂ ಆತಾಂ ದುಕೇಸ್ತ್ ಮ್ಹಣ್ ದಾಕಯ್ತಾತ್. ಹೆರಿ ಬಾಪ್ಪುಚ್ಯಾ ಮೊರ್ನಾ ಥಂಯ್ ದೂಕ್ ಪಾವ್ಲ್ಲಿಂ ಮ್ಹಳ್ಯಾರ್ ವ್ಹಡ್ಲಿಮಾಂಯ್, ಹಾಂವ್ ಆನಿ ಪಪ್ಪಾ ಮಾತ್.
ಪಪ್ಪಾ ಖಂಯ್ ಆಸಾ? ಹಾಂವೆಂ ಪರತ್ ಭೊಂವ್ತಿಂ ದೀಶ್ಟ್ ಭಂವ್ಡಾಯ್ಲಿ. ಪಪ್ಪಾ ಜಮ್ಯಾ ಮದೆಂ ದಿಸ್ಲೊನಾ. ಪಪ್ಪಾಕ್ ಸೊದುನ್ ಭಾಯ್ರ್ ಆಯ್ಲಿಂ. ಪಪ್ಪಾ ನ್ಹಾಣ್ಯೆಕಡೆ ಬಸೊನ್, ರಾಂದ್ಣಿಕ್ ಆಡಾರಾಂ ಚೆಪ್ತಾಲೊ. ತಾಚ್ಯಾ ತೊಂಡಾರ್ಯಿ ದೂಕ್ ಖಿಳಾಯಿಲ್ಲೆ ಪರಿಂ ಆಸ್ಲ್ಲೆಂ ತರ್ಯಿ ತೊ ರಡನಾತ್ಲ್ಲೊ. ತಶೆಂ ರಡ್ಚೊ ಗ್ರಾಯ್ಕ್ಯಿ ನ್ಹಂಯ್ ತೊ. ತಾಚೆ ದೊಳೆ ತಾಂಬ್ಡೆ ಜಾಲ್ಲೆ.
"ಪಪ್ಪಾ ತುಂ ಆಜ್ಯಿ ಪಿಯೆಲಾಯ್?"
"ನಾಂಗೊ, ಇಲ್ಲೊ...." ತಾಣೆ ತಕ್ಲಿ ಬಾಗಾಯ್ಲಿ. "ಉಜೊ ಪಳೆ, ಹಾಂವ್ ರೋಸ್ ಕಾಡುಂಕ್ ಸಾಂಗೊನ್ ಯೆತಾಂ." ಪಪ್ಪಾ ಥಂಯ್ ಥಾವ್ನ್ ಚಲ್ಲೊ.
ವ್ಹಡ್ಲಿಮಾಂಯ್ಚ್ಯಾ ಪಾಂಚ್ ಜಣಾಂ ಭುರ್ಗ್ಯಾಂಪಯ್ಕಿ, ಪಪ್ಪಾ ಮಾಲ್ಗಡೊ ತರ್ ಹೆರಿ ಬಾಪ್ಪು ನಿಮಾಣೊ. ಪಪ್ಪಾ ಪಾಟ್ಲಿಂ ದೊಗಾಂ ಚೆಡ್ವಾಂ ನೆಲ್ಲಿ ಆಕಯ್ ಆನಿ ಶಾಂತಿ ಆಕಯ್. ಚವ್ತೊ ಟೆರಿ ಬಾಪ್ಪು. ಹೆರಿ ಬಾಪ್ಪು ಲ್ಹಾನ್ ಥಾವ್ನ್ಯಿ ಭಾರಿ ಪೊಕ್ರಿ ಖಂಯ್. ಆಬಾಕ್ ಜಾಂವ್, ವ್ಹಡ್ಲಿಮಾಂಯ್ಕ್ ಜಾಂವ್ ಆಯ್ಕಾನಾತ್ಲ್ಲೊ ಖಂಯ್. ಪುಣ್ ಪಪ್ಪಾಚ್ಯಾ ಎಕಾ ದೆಂಕ್ಣ್ಯಾಕ್ ವಗೊ ಜಾತಾಲೊ. ಪುಣ್ ಪಾಪ್ಪಾ ತಾಚೊ ತಿತ್ಲೊಚ್ ಮೋಗ್ಯಿ ಕರ್ತಾಲೊ. ನಿಮಾಣೊ ಭಾವ್ ಮ್ಹಳ್ಳೊ ಕೊಂಡಾಟೊ ಜಾಂವ್ಕ್ ಪುರೊ.
ಆಬಾ ಉಪ್ರಾಂತ್ ಪಪ್ಪಾಚ್ ಘರ್ಚೊ ಯೆಜ್ಮಾನ್ ಜಾಲೊ. ಆಬಾನ್ ಕೆಲ್ಲ್ಯಾ ಚಾರ್ ಮುಡೆ ಭಾತಾ ಸುವಾತೆರ್ ಆನಿ ದೋನ್ ಎಕ್ರೆ ಮಾಡ್-ಮಾಡಿಯಾಂಚ್ಯಾ ತೊಟಾಂತ್ ಘೊಳ್ತಾಲೊ. ಟೆರಿ ಬಾಪ್ಪು ಶಿಕ್ಪಾಂತ್ ಹುಶಾರ್ ಆಸ್ಲ್ಲ್ಯಾನ್, ಕೊಲೆಜ್ ಕರ್ನ್ ಬೊಂಬಯ್ ಉಪ್ರಾಂತ್ ಗಲ್ಫಾಕ್ ಪಾವ್ಲ್ಲ್ಲೊ. ವರ್ಸಾ ಭಿತರ್ ಟ್ಯಾನಿಯಾಕ್ ಮ್ಹಜಿ ಮಾವ್ಶಿ ಜಾವ್ನ್ ಹಾಡ್ನ್ ಆಯಿಲ್ಲೊ. ಪಯ್ಲ್ಯಾ ದಿಸಾ ವ್ಹಡ್ಲಿಮಾಂಯ್ನ್ ತಿಕಾ ತನಿಯಾ ಮ್ಹಣ್ ಆಪಯಿಲ್ಲೆಂ. ಉಪ್ರಾಂತ್ ಕೆದ್ನಾಂಯ್ ಮಾವ್ಶೆಕ್ ಚಿಡಾಂವ್ಕ್ ಹಾಂವೆಂಯ್ ತನಿಯಾ ಮಾವ್ಶಿ ಮ್ಹಣ್ಚೆಂ ಆಸ್ಲ್ಲೆಂ. ಶ್ಹೆರಾಂತ್ಲಿ ಜಾಲ್ಲ್ಯಾನ್ ಫೆಶನಾಂ ಕರ್ತಾಲಿ. ಆನಿ ಹೆಂ ವ್ಹಡ್ಲಿಮಾಂಯ್ಕ್ ಪಸಂದ್ ಜಾಯ್ನಾತ್ಲೆಂ.
ಆನಿ ನಿಮಾಣೊ ಹೆರಿ ಬಾಪ್ಪು ಇಸ್ಕೊಲ್ ಪುರಾ ಶಿಕ್ಲೊನಾ. ಗಾದ್ಯಾ ತೊಟಾಂತ್ ಘೊಳೊಂಕ್ಯಿ ದೆಂವ್ಲೊನಾ. ತಾಕಾ ಬೊಂಬಯ್ಚೆಂ ಪಿಶೆಂ ಲಾಗ್ಲ್ಲೆಂ. ವ್ಹಡ್ಲಿಮಾಂಯ್ನ್ ಆನಿ ಪಪ್ಪಾನ್ ಕಿತ್ಲೆಂ ನೆಗಾರ್ಲ್ಯ್ಯಿ, ಪರಾತ್ಲ್ಯಾರ್ಯಿ, ಹಟ್ ಧರ್ನ್ ಮ್ಹಳ್ಳೆಪರಿ ಗೆಲ್ಲೊ. ಥಂಯ್ ಥಾವ್ನ್ ಗಲ್ಫಾಕ್ ವೆಚೆಂ ತಾಚೆಂ ಸಪಾಣ್ ಜ್ಯಾರಿ ಜಾಲೆಂನಾ. ಟೆರಿ ಬಾಪ್ಪುನ್ ತಾಕಾ ಕುಮೊಕ್ ಕೆಲಿನಾ ಮ್ಹಣ್ ಸಬಾರ್ ಪಾವ್ಟಿಂ ದುರ್ಸತಾಲೊ.
ಆನಿ ಜರ್ತರ್ ತ್ಯಾ ದೀಸ್ ಪಪ್ಪಾಚೆಂ ಆನಿ ವ್ಹಡ್ಲಿಮಾಂಯ್ಚೆಂ ಆಯ್ಕಾಲ್ಲೊ ಜಾಲ್ಯಾರ್, ಆಜ್ ಹೆರಿ ಬಾಪ್ಪುಕ್ ಹಿ ಗತ್ ಯೆತಿನಾ. ಅಸಲೆಂ ವ್ಹಳ್ವಳ್ಯಾಚೆಂ ಮೋರ್ನ್ ಫಾವೊ ಜಾತೆಂನಾ....
ಏಕ್ ಕಿಟಾಳ್ ಪಾಂಯಾರ್ ಪಡೊನ್ ’ಚುರ್ಕ್’ ಜಾತಾನಾ ಹಾಂವ್ ವಾಸ್ತವೆಕ್ ಪರ್ತಾಲಿಂ. ಉಬೆಂ ರಾವೊನ್ ಉದಾಕ್ ಪಳೆಲೆಂ. ಖತ್ಕತ್ತಾಲೆಂ. ವೆಗಿಂ ವೆಗಿಂ ರಾಂದ್ಣಿಂತ್ಲಿಂ ಲಾಂಕ್ಡಾಂ, ಆಡಾರಾಂ ಭಾಯ್ರ್ ವೋಡ್ನ್ ಶೆಳೆಂ ಉದಾಕ್ ಘಾಲ್ನ್ ಉಜೊ ಪಾಲ್ವಯ್ಲೊ ಆನಿ ಕುಜ್ನಾಕ್ ಆಯ್ಲಿಂ.
ದೊಗಾಂ ಬಾಯ್ಲಾಂ ರೊಸಾಖಾತಿರ್ ವಾನಾಂತ್ ನಾರ್ಲ್ ವ್ಹಾಟ್ತಾಲಿಂ. ಕುಜ್ನಾ ಥಾವ್ನ್ ಕೊಡ್ಕ್ಯಾಕ್ ಯೆತಾನಾ ಪಪ್ಪಾ ಕೊನ್ಶಾರ್ ರಾವೊನ್ ಕಾಲ್ದಿ ಖಾಲಿ ಕರ್ತಾಲೊ. ಹಾಂವೆಂ ಪಳೆಲೆಂ ತರ್ಯಿ ಉಲಯ್ಲಿಂನಾ. ಪಪ್ಪಾಚಿ ಸವಯ್ ಕಳಿತ್ ಆಸಾ ಮ್ಹಾಕಾ. ತಾಚೆಂ ದೂಕ್ ಉಣೆಂ ಕರುಂಕ್ ದುಸ್ರಿ ವಾಟ್ ತಾಕಾ ನಾತ್ಲ್ಲಿ. ಮೊಗಾಚ್ಯಾ ಭಾವಾಚ್ಯಾ ಮೊರ್ನಾನ್ ತಾಕಾ ಅರ್ಧೊ ಕೆಲ್ಲೊ.
ತಿತ್ಲ್ಯಾರ್ ಗುರ್ಕಾರಾಮ್ ಥೊಡ್ಯಾಂಸಂಗಿಂ ಆಯ್ಲೊ. ಬಾಪ್ಪು ಅಂತಿಮ್ ನಮಾನ್ ಭೆಟಯ್ತಾಚ್ ಪಪ್ಪಾಕ್ ಉಲೊ ಮಾರಿತ್ ಆಯ್ಲೊ. ಪಪ್ಪಾ ವೆವೆಗಿಂ ಲುಂಗೆಚ್ಯಾ ಪೊಂತಾಂತ್ ತೋಂಡ್ ಪುಸಿತ್ ಭಾಯ್ರ್ ಆಯ್ಲೊ.
"ಪಾದ್ರ್ಯಾಬಾಕ್ ಖಬಾರ್ ದಿಲ್ಯಾಯೆ ಜೊನಾ?"
"ವ್ಹಯ್" ಸಾಂಜೆರ್ ಚಾರಾಂಕ್ ಮೋರ್ನ್ ದವರ್ಲಾಂ. ತಿನಾಂಕ್ ಹಾಂಗಾ ಯೆತಲೊ"
"ಬರೆಂ. ಪೊಂಡ್ ಕಾಡುಂಕ್ ಆಮ್ಚ್ಯಾ ಥೊಡ್ಯಾ ತರ್ನಾಟ್ಯಾಂಕ್ ಧಾಡ್ನ್ ಹಾಂವ್ ಹೆವ್ಶಿನ್ ಆಯ್ಲೊಂ. ಸರ್ವ್ ತಯಾರ್ ಆಸಾ ತರ್, ಮೋರ್ನ್ ನ್ಹಾಣವ್ಯಾಂ" ಗುರ್ಕಾರಾನ್ ಜವಾಬ್ದಾರಿ ವಯ್ಸಿಲಿ.
ಭಾಯ್ರ್ ಆಂಗ್ಣಾಂತ್ ಎಕಾ ಕೊನ್ಶಾರ್ ಬಾಂಕ್ ದವರ್ಲೆ ಆನಿ ತರ್ನಾಟ್ಯಾಂನಿ ಮೆಳೊನ್ ಹೆರಿ ಬಾಪ್ಪುಚಿ ಕೂಡ್ ಭಾಯ್ರ್ ಹಾಡ್ಲಿ. ಖಾಡ್ ತಾಸುನ್ ಜಾತಚ್, ಕುಟ್ಮಾಚ್ಯಾ ಸಾಂದ್ಯಾಂನಿ ರೋಸ್ ಪುಸೊಂಕ್ ಗುರ್ಕಾರಾಮಾನ್ ಸಾಂಗ್ಲೆಂ. ಪಯ್ಲೆಂ ತಾಣೆಂಚ್ ಇಲ್ಲೊ ರೋಸ್ ವಯ್ಲ್ಯಾವಾರ್ ಶೆಣಾಯ್ಲೊ. ಕೂಡ್ ಆಪ್ಡುಂಕ್ ಭಿಯೆತಾ ಆಸ್ತಲೊ. ಉಪ್ರಾಂತ್ ವ್ಹಡ್ಲಿಮಾಂಯ್ನ್, ಪಪ್ಪಾನ್ ಬರೊ ಕರ್ನ್ ರೋಸ್ ಪುಸ್ಲೊ. ಉಪ್ರಾಂತ್ ಹರ್ಯೆಕ್ಲ್ಯಾನ್ ರೋಸ್ ಪುಸ್ಚೊ ’ನಾಟಕ್’ ಕರ್ಚೊ ಮ್ಹಾಕಾ ಕಳ್ಳೆಂ. ಸರ್ವಾಂಕ್ ಭೆಂ ಆಸ್ಲ್ಲೆಂ. ಕಿತ್ಯಾಕ್ ಬಾಪ್ಪುಚಿ ಪಿಡಾ ತಸಲಿ. ನಿಮಾಣೆಂ ಹಾಂವೆಂಯ್ ರೋಸ್ ಪುಸ್ತಾನಾ ಮಾಮ್ಮಿನ್ ದೊಳೆ ಉರ್ಕುಟಾವ್ನ್ ಪಳೆಂವ್ಚೆಂ ಕಳ್ಳೆಂ ತರ್ಯಿ ಗುಮಾನ್ ದಿಲೆಂನಾ. ಎಕ್ಲಿ ಆನ್ಯೆಕ್ಲೆಲಾಗಿಂ ಮೆಚ್ವಂವ್ಚೆಂ ಮ್ಹಜ್ಯಾ ಕಾನಾಕ್ ಪಡ್ಲೆಂ. "ತಾಚೆ ಕುಡಿಕ್ ಹಾತ್ ಲಾಯ್ನಾಕಾ. ಮೆಲ್ಯಾ ಉಪ್ರಾಂತ್ ಕ್ರಿಮಿ ಭಾಯ್ರ್ ಯೆತಾತ್ ಖಂಯ್".
ನ್ಹಾಣವ್ನ್ ಬಾಪ್ಪುಕ್ ತಾಚ್ಯಾ ಅಂತಿಮ್ ಪಯ್ಣಾಚೆಂ ವಸ್ತುರ್ ನ್ಹೆಸವ್ನ್ ಪರತ್ ಚೊವ್ಕೆಂತ್ ನಿದಾಯ್ಲೊ. ಪೇಟ್ ಎದೊಳ್ ಯೇಂವ್ಕ್ ನಾತ್ಲ್ಲಿ. ತಿತ್ಲ್ಯಾರ್ ದೊಗಿ ಆಕಯೊ, ಮಾಮ್ ಆನಿ ತಾಂಚಿಂ ಭುರ್ಗಿಂ ರಿಕ್ಶಾರ್ ಯೇವ್ನ್ ಪಾವ್ಲಿಂ. ಪರತ್ ಇಲ್ಲೊ ವೇಳ್ ರಡ್ಣೆಂ ಬೊಬಾಟ್ ಜಾಲಿ ಆನಿ ಉಪ್ರಾಂತ್ ಮಾಗ್ಣೆಂ ಸುರು ಜಾಲೆಂ.
ಆತಾಂ ಹಾಂಣಿ ಮಾಗ್ಚೆಂ ಖಂಚ್ಯಾ ಕರ್ಮಾಕ್? ಕೊಣಾಚ್ಯಾ ದೊಳ್ಯಾಂಕ್ ಮಾತಿ ಘಾಲುಂಕ್? ಬಾಪ್ಪು ಜಿವಂತ್ ಆಸ್ತಾನಾ ಸರ್ವಾಂ ತಾಚ್ಯಾ ಮೊರ್ನಾಕ್ ಆಶೆಲ್ಲಿಂ. ಬಾಪ್ಪುಕ್ ಹಾಂಣಿ ಸರ್ವಾಂನಿ ಪ್ರತ್ಯೇಕ್ ಜಾವ್ನ್ ಮಾಮ್ಮಿ, ಟ್ಯಾನಿಯಾ ಮಾವ್ಶಿ ಆನಿ ಟೆರಿ ಬಾಪ್ಪುನ್ ಮಾನಸಿಕ್ ವಿರಾರಾಯ್ ಸೊಡ್ನ್ ದುಸ್ರೆಂ ಕಿತೆಂ ದಿಲ್ಲೆಂ? ಬಾಪ್ಪುಚಿ ಪಿಡಾ ತಸಲಿ. ತಾಕಾ ಒಕತ್ ನಾ. ತಾಚೆಂ ಅಂತ್ಯ್ ಮೋರ್ನ್ ಮ್ಹಣ್ ಕಳಿತ್ ಆಸೊನ್ಯಿ, ತಾಕಾ ಧಯ್ರ್ ದಿಂವ್ಚ್ಯಾ ಬದ್ಲಾಕ್, ಕರ್ಕರೆ ದಿಲ್ಲೆ. ಪಿಡಾ ನ್ಹಂಯ್, ಪಿಡೆ ಪಾಟ್ಲಿ ನಾಲಿಸಾಯ್ ತಾಂಕಾಂ ವ್ಹಡ್ ದಿಸ್ಲ್ಲಿ.
ಹಾಂವೆಂ ಪರತ್ ಹೆರಿ ಬಾಪ್ಪುಕ್ ಪಳೆಲೆಂ. ಪಿಡೆವರ್ವಿಂ ತಾಚಿ ಕೂಡ್ ಭಾಗೆಟಿ ಜಾಲ್ಲಿ. ತೊಂಡ್ಯಿ ಚಿವ್ಳೊನ್ ಗೆಲ್ಲೆಂ. ಪಯ್ಲೆಂ ಕಿತ್ಲೊ ಸೊಭಿತ್ ದಿಸ್ತಾಲೊ ತೊ. ರೂಂದ್ ಫುಗ್ರೆ ಗಾಲ್, ವಿಶಾಲ್ ದೊಳೆ, ದಾಟ್ ಮಿಶ್ಯೊ, ಘಟ್ಮೂಟ್ ತರ್ನಾಟೊ ಆನಿ ಬಾಪ್ಪುಚ್ಯಾ ತೊಂಡಾರ್ ಕೊಣಾಯ್ಕಿ ಪಿಶ್ಯಾರ್ ಘಾಲ್ಚ್ಯೊ ಹಾಸೊ ಆಸ್ತಾಲ್ಯೊ. ಪುಣ್ ತೀನ್ ವರ್ಸಾಂ ಪಯ್ಲೆಂ ಹೆರಿ ಬಾಪ್ಪು ಬೊಂಬಯ್ ಥಾವ್ನ್ ಪಾಟಿಂ ಆಯ್ಲೊ. ತೆದಾಳಾ ಥಾವ್ನ್ ತಾಚ್ಯಾ ತೊಂಡಾರ್ ಹಾಸೊ ಆಪ್ರೂಪ್ ಜಾಲ್ಲ್ಯೊ. ತೊಂಡಾರ್ ಕಳಾ ನಾತ್ಲ್ಲಿ. ಖಂತೀಶ್ಟ್ ಆಸ್ತಾಲೊ. ಆಮ್ಗೆರ್ ಹಾಂವ್ ಎಕ್ಲೆಂಚ್ ಭುರ್ಗೆಂ ಜಾಲ್ಲ್ಯಾನ್, ಪಯ್ಲೆಂ ಥಾವ್ನ್ಯಿ ಬಾಪ್ಪುಕ್ ಮ್ಹಜೊ ವಿಶೇಸ್ ಮೋಗ್. ಕೊಂಡಾಟೊ ಕರ್ಚೊ, ಭೊಂವ್ಡಾಂವ್ಚೆಂ, ಖಾಂವ್ಕ್, ಇಸ್ಕೊಲಾಕ್ ಗರ್ಜ್ ಆಸ್ಚ್ಯೊ ವಸ್ತು ಸರ್ವ್ ಹಾಡ್ನ್ ದಿತಾಲೊ.
ಬೊಂಬಯ್ ಗೆಲ್ಯಾ ಉಪ್ರಾಂತ್ಯಿ, ಹರ್ ಎಕಾ ಕಾಗ್ದಾರ್ ಚುಕನಾಸ್ತಾಂ, ಮ್ಹಾಕಾ ವಿಚಾರ್ತಾಲೊ. ಫೊನ್ ಕೆಲ್ಯಾರ್ ಮ್ಹಜೆಲಾಗಿಂ ಉಲಯಿಲ್ಲ್ಯಾ ಶಿವಾಯ್ ಫೊನ್ ಬಂದ್ ಕರಿನಾತ್ಲೊ. ಆನಿ ಬೊಂಬಯ್ ಥಾವ್ನ್ ವರ್ಸಾಕ್ ಏಕ್ಪಾವ್ಟಿಂ ಯೆತಾನಾ ಮ್ಹಜೆ ಖಾತಿರ್ ಮಸ್ತು ವಸ್ತು ಹಾಡ್ನ್ ಯೆತಾಲೊ. ಆನಿ ತವಳ್ ಮಾಮ್ಮಿ ತಾಕಾ ಮೊಗಾನ್ ಜ್ಯೋರ್ ಕರ್ತಾಲಿ.
ಆನಿ ಬಾಪ್ಪು ಘರಾಂತ್ ಆಸತ್ ತರ್, ಭೊಂವ್ತಿಚ್ಯಾ ಚ್ಯಾರ್ ಘರಾಂಕ್ ಕಳ್ತಾಲೆಂ. ಕಸಲೊ ಗಲಾಟೊ, ಕಸಲ್ಯೊ ಹಾಸೊ, ಟೇಪ್ ಘಾಲ್ನ್ ನಾಚ್ಚೆಂ ಕಿತೆಂ? ತೆದ್ನಾಂ ಘರಾಂತ್ ಸಂತೊಸ್ ವ್ಹಾಳ್ತಾಲೊ. ಬಾಪ್ಪು ಥಂಯ್ ತೆದ್ನಾಂ ಟ್ಯಾನಿಯಾ ಮಾವ್ಶಿ ಆನಿ ಮಾಮ್ಮಿಯ್ ಖುಶ್ ಆಸ್ಲ್ಲಿಂ.
ಪುಣ್ ಆತಾಂ ಬಾಪ್ಪು ಮ್ಹಜೆಸಂಗಿಂ ಆದ್ಲೆಪರಿಂ ವಾಗನಾತ್ಲ್ಲೊ. ಹಾಂವ್ಯಿ ಲ್ಹಾನ್ ನ್ಹಂಯ್. ಪರಿಪಿಕಾಯೆಕ್ ಪಾವ್ಲ್ಲಿ ಚಲಿ. ಆಟ್ವೆಂತ್ ಶಿಕ್ತಾಲಿಂ. ಎಕಾ ಥರಾಚಿ ಲಜ್ ಭೊಗ್ತಾಲಿ. ಪುಣ್ ಬಾಪ್ಪುಚೆಂ ಹೆಂ ವರ್ತನ್ ಸರ್ವಾಂಕ್ ಮಿಸ್ತೆರ್ ಜಾಲ್ಲೆಂ. ಬಾಪ್ಪು ಆತಾಂ ಪಪ್ಪಾಸಂಗಿಂ ಗಾದ್ಯಾಂನಿ ಘೊಳ್ತಾಲೊ, ತೊಟಾಂತ್ ಭೊಂವ್ತಾಲೊ. ತಾಕಾ ಥೊಡೆ ಪಾವ್ಟಿಂ ತಾಪ್, ಶೆಳ್ ಸುರು ಜಾತಾಲಿ ಆನಿ ಪಪ್ಪಾ ತಕ್ಷಣ್ ವಕತ್ ಹಾಡ್ನ್ ದಿತಾಲೊ ಆನಿ ಪಿಡಾ ಗೂಣ್ ಜಾತಾಲಿ.
ಏಕ್ ದೀಸ್ ಹಾಂವೆಂ ಬಾಪ್ಪುಕ್ ವಿಚಾರ್ಲೆಂ "ಬಾಪ್ಪು, ತುಜಿ ಪ್ರಾಯ್ ಕಿತ್ಲಿ?"
"ಸತ್ತಾವೀಸ್ ವರ್ಸಾಂ, ಕಿತ್ಯಾಕ್ಗೊ?"
"ಆತಾಂ ಜಾಲ್ಯಾರ್ ತುಜಿ ಕಾಜಾರಾಚಿ ಪ್ರಾಯ್. ತುಂ ಕಾಜಾರ್ ಜಾವ್ನ್, ಮ್ಹಾಕಾ ಏಕ್ ಮಾವ್ಶಿ ಹಾಡ್ನೆ, ಪುಣ್ ಟ್ಯಾನಿಯಾ ಮಾವ್ಶೆ ತಸಲಿ ನಾಕಾ". ಕಿತ್ಯಾಕ್ಗಿ ಹಾಂವ್ ತಿಕಾ ಪಸಂದ್ ಕರಿನಾತ್ಲ್ಲಿಂ.
"ಕಾಲೆಂಗೊ ಬೊಗೊಳ್ತಾಯ್, ಚೆಡ್ವಾಚಿ ಕೊಕಾಯ್ ಬರಿ ಲಾಂಬ್ ಜಾಲ್ಯಾ. ತೋಂಡ್ ಧಾಂಪುನ್ ಚಲ್ಗೊ ಹಾಂಗಾಚೆಂ" ಬಾಪ್ಪುನ್ ವಿರಾರಾಯೆನ್ ಜಾಪ್ ದಿತಾನಾ, ಹಾಂವ್ ಆವಾಕ್ಕ್ ಜಾಲಿಂ. ದೊಳ್ಯಾಂನಿಂ ದುಕಾಂ ಘೆವ್ನ್ ಗೆಲ್ಲ್ಯಾ ಮ್ಹಾಕಾ ಇಲ್ಲ್ಯಾ ವೆಳಾನ್ ಬಾಪ್ಪುನ್ ಯೇವ್ನ್ ಸಮಾಧಾನ್ ಕೆಲ್ಲೆಂ. "ಮ್ಹಾಕಾ ಮಾಫ್ ಕರ್ ಪುತಾ. ಪುಣ್ ಹಾಂವ್ ತುಜಿ ಆಶಾ ಪೂರ್ಣ್ ಕರುಂಕ್ ಸಕನಾ" ಬಾಪ್ಪು ಪುಸ್ಪುಸ್ಲ್ಲೊ. ಪುಣ್ ತೆದ್ನಾಂ ಮ್ಹಾಕಾ ಕಿತೆಂಚ್ ಸಮ್ಜೊಂಕ್ ನಾ.
"ಪಾದ್ರ್ಯಾಬ್ ಆಯ್ಲೊ" ಕೋಣ್ಗಿ ಮ್ಹಣಾಲಿಂ. ಮೊರ್ನಾಚಿ ಗಾಡಿಯಿ ಆಯಿಲ್ಲಿ. ಪಾದ್ರ್ಯಾಬಾನ್ ಮೋರ್ನ್ ಬೆಂಜಾರ್ ಕರ್ತಾಚ್, ಥೊಡೆ ಫೊಟೊ ಕಾಡ್ಲೆ ಆನಿ ಮೋರ್ನ್ ಗಾಡ್ಯೆರ್ ದವರ್ನ್ ತೀನ್ ಮಯ್ಲಾಂ ಪಯ್ಸ್ ಆಸ್ಲ್ಲೆ ಇಗರ್ಜೆತೆವ್ಶಿಂ ಚಮ್ಕಲಾಗ್ಲ್ಯಾಂವ್. ಕಾಂತಾರಾಂ, ಮಾಗ್ಣೆಂ, ಸಾಸ್ಣಾಚೊ ವಿಶೆವ್, ತೇರ್ಸ್ ಸರಾಗ್ ಚಾಲು ಆಸ್ಲ್ಲೊ. ಪುಣ್ ಹಾಂವ್ ಚಿಂತೇಸ್ತ್ ಜಾವ್ನ್ ಚಲ್ತಾಲಿಂ. ಮ್ಹಾಕಾ ಹ್ಯಾ ಲೊಕಾಚ್ಯಾ ದೊಡ್ಯಾಪಣಾ ವಯ್ರ್ ಕಾಂಟಾಳೊ ಯೆತಾಲೊ. ಜೀವ್ ಆಸ್ತಾನಾ ಮೋರ್ನ್ ಆಶೆವ್ನ್, ಮೆಲ್ಯಾ ಉಪ್ರಾಂತ್ ಶಾಂತಿ ಮಾಗ್ತಾಲಿಂ. ಹಾಂಚಿಂ ಶಾಂತಿ ಬಾಪ್ಪುಚೊ ಅತ್ಮೊ ಸ್ವೀಕಾರ್ ಕರಿತ್? ಹೊ ನಾಟಕ್ ಬಂಧ್ ಕರಾ ಮ್ಹಣ್ ಬೊಬಾಟುನ್ ಸಾಂಗ್ಯಾಂ ಮ್ಹಳ್ಳಿ ತಾಳ್ಣಿ ಯೆತಾಲಿ ತರ್ಯಿ ಮಾಮ್ನ್ಪಣಿ ಚಮ್ಕಾತಾಲಿಂ.
ಸರ್ವ್ ಸಾರ್ಕೆಂ ಚಲೊನ್ ಆಸ್ಲ್ಲ್ಯಾ ಆಮ್ಗೆರ್, ಅಸಮಾಧಾನ್ ರಾಜ್ ಕರುಂಕ್ ಲಾಗ್ಲ್ಲೆಂ ದೋನ್ ವರ್ಸಾಂ ಆದಿಂ ಮ್ಹಣ್ಜೆ ಬಾಪ್ಪು ಗಾಂವಾಕ್ ಯೇವ್ನ್ ವರ್ಸಾ ಉಪ್ರಾಂತ್. ಬಾಪ್ಪುಕ್ ಆಯಿಲ್ಲೊ ತಾಪ್ ಸುಟನಾತ್ಲ್ಲ್ಯಾ ವಗ್ತಾ ಶೆಹರಾಂತ್ಲ್ಯಾ ವ್ಹಡ್ ಆಸ್ಪತ್ರೆಕ್ ದಾಕಲ್ ಕೆಲ್ಲೆಂ. ಥಂಯ್ಸರ್ ಕೆಲ್ಲ್ಯಾ ರಗತ್ ಪರಿಕ್ಷೆವರ್ವಿಂ ಆಮ್ಗೆರ್ ವಾದಾಳ್ ಉಟ್ಲ್ಲೆಂ. ಬಾಪ್ಪುಕ್ ಏಡ್ಸ್ ಜಾಲ್ಲೆಂ ಖಂಯ್.
ಚಡ್ ಉಚಾಂಬಳ್ ಜಾಲ್ಲಿ ಮ್ಹಳ್ಯಾರ್ ಟ್ಯಾನಿಯಾ ಮಾವ್ಶಿ. "ಅಸಲೊ ಪಿಡೆಸ್ತ್ ಆಸ್ಚ್ಯಾ ಘರಾಂತ್ ಹಾಂವ್ ರಾವನಾ. ಸರ್ವ್ ಘುಟ್, ಘಟ್ಚ್ ಕೆಲೊ. ಮ್ಹಾಕಾ ಪಯ್ಲೆಂ ಸಾಂಗೊಂಕೀ ನಾ ಕಿತ್ಯಾಕ್? ಅಸಲಿ ಪಿಡಾ ಆಸಾ ಮ್ಹಣ್ ಕಳ್ಲ್ಲಿ ತರ್, ಹಾಂವ್ ಹ್ಯಾ ಘರ್ಚಿ ಸುನ್ ಜಾತಿಂನಾ... ಶಿಕ್ಪಿ ಟ್ಯಾನಿಯಾ ಮಾವ್ಶಿ ಅಶಿಕ್ಪ್ಯಾಪರಿಂ ಉಲಯಿಲ್ಲಿ.
ಮಾಮ್ಮಿಯ್ ಮುಸ್ಮುಸ್ಲ್ಲಿ. "ಚೆಡುಂ ವಾಡೊನ್ ಯೆತಾ. ಆಜ್-ಫಾಲ್ಯಾಂ ಮ್ಹಣ್ತಾನಾ ತಾಕಾ ಕಾಜಾರ್ ಕರಿಜೆ. ಹಿ ಪಿಡಾ ಆಸಾ ಮ್ಹಣ್ ಕಳಾತ್ ತರ್ ಮಾಗಿರ್ ಸಯ್ರಿಕೊ ಲಾಗೊಂಕ್ ಕಶ್ಟ್ ಆಸಾತ್. ಹೆರಿಕ್ ಖಂಯ್ ವೆಗ್ಳೆಂ ದವರ್ಯಾಂ".
"ಖಂಯ್ ತುಜ್ಯಾ ಬಾಪಾಯ್ಗೆರ್ಗೀ?" ಪಪ್ಪಾ ತಿತ್ಲೊ ಉಚಾಂಬಳ್ ಜಾಲ್ಲೊ ಹಾಂವೆಂ ಪಯ್ಲೆಪಾವ್ಟಿಂ ಪಳೆಂವ್ಚೆಂ. ತುಕಾ ಕಶ್ಟ್ ಜಾತಾತ್ ತರ್, ತುಂ ಆನಿ ತುಜಿ ಧುವ್ ವಚಾ. ತೊ ಮ್ಹಜೊ ಭಾವ್. ತೊ ಹಾಂಗಾಚ್ ಆಸ್ತಲೊ. ತಾಕಾ ಹಿ ನ್ಹಂಯ್ ಹಾಚ್ಯಾಪ್ರಾಸ್ ಹಜಾರ್ ವಾಂಟೆ ವ್ಹಡ್ ಪಿಡಾ ಆಯ್ಲ್ಯಾರ್ಯೀ ಹಾಂವ್ ಪಳೆತಾಂ".
ವ್ಹಡ್ಲಿಮಾಂಯ್ಕ್ ಹೆಂ ಸರ್ವ್ ಸಮ್ಜನಾತ್ಲ್ಲೆಂ. ತರ್ಯಿ ಆಪ್ಲ್ಯಾ ಪುತಾಕ್ ಗೂಣ್ ಜಾಯ್ನಾತ್ಲ್ಲಿ ಪಿಡಾ ಆಯ್ಲ್ಯಾ ಮ್ಹಣ್ ಕಳ್ತಾನಾ ತಿ ಕಂಗಾಲ್ ಜಾವ್ನ್, ಹಪ್ತೊಭರ್ ರಡೊನ್ ಬಸ್ಲ್ಲಿ. ಪಪ್ಪಾಚಾ ಉತ್ರಾಂಕ್ ತಿಣೆಂಯ್ ಪಾಟಿಂಬೊ ದಿಲ್ಲೊ.
ಹಪ್ತ್ಯಾ ಉಪ್ರಾಂತ್ ಹೆರಿ ಬಾಪ್ಪು ಘರಾ ಯೆತಾನಾ ಟ್ಯಾನಿಯಾ ಮಾವ್ಶಿ ಕುಳಾರಾ ಗೆಲ್ಲಿ. ಬಾಪ್ಪುಚೆ ಪಿಡೆ ವಿಶ್ಯಾಂತ್ ಗಾಂವಾಂತ್ ಖಬರ್ ಜಾಲ್ಲಿ. ಎಕೆಲ್ಲ್ಯಾಂಚಿ ಎಕೆಕ್ ಅಭಿಪ್ರಾಯ್, ಎಕೆಕ್ ಉಲೊಣೆಂ.
"ಕಿತ್ಲೊ ತರ್ನಾಟೊ! ಛೆ ಕಸಲೆಂ ನಶಿಬ್?"
"ತರ್ನಾಟ್ಯಾಂಕ್ಚ್ ಹಿ ಪಿಡಾ ಯೆಂವ್ಚಿ. ನಶಿಬ್ ನ್ಹಂಯ್ ಉಚಾಂಬಳಾಯ್ ಮ್ಹಣ್".
"ಪಯ್ಲೆಂಚ್ ಉಚಾಂಬಳಿ ಪಾಡೊ. ತೆಂಯ್ ಬೊಂಬಯ್ ಮ್ಹಳ್ಯಾ ಉಪ್ರಾಂತ್ ಸಾಂಗ್ಚೆಂ ಕಿತೆಂ? ಥಂಯ್ಸರ್ ಸರ್ವ್ ದಾಕವ್ನ್ ಯೆಮ್ಕೊಂಡಾಕ್ ಪಾವಂವ್ಚಿಂ ದಾರಾಂ ಚೊವಿಸ್ ವೊರಾಂಯಿ ಉಗ್ತಿಂಚ್ ಆಸ್ತಾತ್. ಆತಾಂ ಭೊಗುಂದಿ ಪೆಲ್ಯಾನ್".
ಹೆಂ ಸರ್ವ್ ಆಯ್ಕೊನ್ ಆನಿ ಮಾಮ್ಮಿಚೆಂ ಆನಿ ಮಾವ್ಶೆಚೆಂ ವರ್ತನ್ ಪಳೆವ್ನ್ ಬಾಪ್ಪು ಗಳೊನ್ ಗೆಲ್ಲೊ. ಆತಾಂ ಘರಾ ಬಾಪ್ಪುಚಿಂ ಸರ್ವ್ ಕಾಮಾಂ ತೊ ಖುದ್ ಕರ್ತಾಲೊ ವಾ ಪಪ್ಪಾ ನಾ ತರ್ ವ್ಹಡ್ಲಿಮಾಂಯ್ ಕುಮೊಕ್ ಕರ್ತಾಲಿಂ. ಶಿವಾಯ್ ಮಾಮ್ಮಿ ಚುಕೊನ್ಯಿ ಬಾಪ್ಪು ಸರ್ಶಿನ್ ಯೇನಾತ್ಲ್ಲಿ ಆನಿ ಮ್ಹಾಕಾ ಆಡಾಯ್ತಾಲಿ. ಪುಣ್ ಮ್ಹಾಕಾ ಪಿಡೆವಿಶಿಂ ಮಾಹೆತ್ ಆಸ್ಲ್ಲಿ.
ಇಸ್ಕೊಲಾಂತ್ ಆಮ್ಕಾಂ ಏಡ್ಸ್ ಪಿಡೆವಿಶಿಂ ಶಿಕೊಂಕ್ ಆಸ್ಲ್ಲೆಂ. ಆನಿ ಹಾಂವೆ ದೊತೊರ್ ಎಡ್ವರ್ಡ್ ನಜ್ರೆತಾಚೊ ’ಯುವಜಣಾಂಕ್ ಲಂಯ್ಗಿಕ್ ಶಿಕ್ಷಣ್’ ಬೂಕ್ ವಾಚ್ಲ್ಲೊ. ದೆಕುನ್ ಹಾಂವ್ ಮಾಮ್ಮಿಕ್ ಕೇರ್ ಕರಿನಾತ್ಲ್ಲಿಂ. ಬಾಪ್ಪುಕ್ ಆತಾಂ ವೊಕಾತ್ ನ್ಹಂಯ್, ಧಯ್ರ್ ಆನಿ ಮತಿಕ್ ಸಮಾಧಾನ್ ಗರ್ಜ್ ಆಸ್ಲ್ಲೆಂ. ಪುಣ್ ಹೆ ಪಿಡೆಚ್ಯಾ ಭಿಂಯಾನ್ ತಾಕಾ ತೆಂ ಫಾವೊತ್ಯಾ ಮಾಪಾನ್ ಮೆಳಾನಾತ್ಲ್ಲೆಂ.
ಗಲ್ಫಾ ಥಾವ್ನ್ ಟೆರಿ ಬಾಪ್ಪು ಯೆತೆಚ್ ಪರತ್ ಏಕ್ಪಾವ್ಟಿಂ ಆಮ್ಗೆರ್ ಉಚಾಂಬಳಾಯ್ ಜಾಲ್ಲಿ. ಟ್ಯಾನಿಯಾ ಮಾವ್ಶಿ ಟೆರಿ ಬಾಪ್ಪುಚೆರ್ ಸಗ್ಳಿಚ್ ರಾಗಾರ್ ಜಾಲ್ಲಿ. "ತುಜ್ಯಾ ಭಾವಾಕ್ ಏಡ್ಸ್ ಆಸಾ ಮ್ಹಣ್ ತುವೆಂ ಸಾಂಗೊಂಕ್ನಾಂಯ್? ಸಾಂಗ್ಲ್ಲೆಂ ತರ್, ತುಜೆಕಡೆ ಕಾಜಾರ್ಚ್ ಜಾತಿಂನಾ. ಮ್ಹಾಕಾ ಮೋಸ್ ಕೆಲೊಯ್ ತುವೆಂ".
"ಟ್ಯಾನಿಯಾ...." ಬಾಪ್ಪುನ್ ಕಿತೆಂಯ್ ಸಾಂಗ್ಚ್ಯಾಪಯ್ಲೆಂ ಪಪ್ಪಾ ಉಲಯಿಲ್ಲೊ. "ತುಮ್ಚ್ಯಾ ಕಾಜಾರಾ ತೆದಾಳಾ ತಾಕಾ ಪಿಡಾ ಆಸಾ ಮ್ಹಣ್ ಕೊಣಾಯ್ಕಿ ಕಳಿತ್ ನಾತ್ಲ್ಲೆಂ. ತುವೆಂ ಆತಾಂ ಗಲಾಟೊ ಕರ್ನ್ ಕಾಂಯ್ ಪ್ರೇಜನ್ ನಾ. ತಾಚಿ ಪಿಡಾ ತೊ ಸೊಸ್ತಾಲೊ".
ಪುಣ್ ತಿ ಗಜಾಲ್ ಥಂಡ್ ಪಡ್ಲಿನಾ ರಾತಿಂ ಮಾವ್ಶೆನ್ ಬಾಪ್ಪುಕ್ ಧುಲ್ಲೆಂ ಜಾಯ್ಜೆ. ಸಕಾಳಿಂ ನಶ್ಟೊ ಕರ್ತಾನಾ, ಪರತ್ ಬಾಪ್ಪುನ್ ವಿಶಯ್ ಉಸ್ತಿಲೊ. "ದಾಟ್ಟೊ, ಹೆರಿಚೆ ಪಿಡೆವರ್ವಿಂ ಆಮ್ಕಾಂ ಸಗ್ಳ್ಯಾಂಕ್ ಬಾಂದ್ಪಾಸ್ ಜಾಲ್ಯಾತ್. ಭಾಯ್ರ್ ತೋಂಡ್ ದಾಕಂವ್ಕ್ ಲಜ್ ದಿಸ್ತಾ. ತಾಕಾ ಖಂಯ್ ಪುಣ್ಯಿ ದವರ್ಯಾಂ".
"ಧಾಂಪ್ರೆ ತೋಂಡ್...." ಪಪ್ಪಾ ಗರ್ಜಾಲೊ. ಹಾಂಗಾಸರ್ ಹೆರಿ ನಿಮ್ತಿಂ ಕೊಣಾಕ್ ಬಾಂದ್ಪಾಸ್ ಆಸಾತ್ ತಾಂಣಿಚ್ ವೆಗ್ಳೆಂ ವಚ್ಯೆತ್. ಹೆರಿ ಖಂಯ್ ವೆಚೊನಾ, ಹಾಂಗಾಚ್ ಆಸ್ತೊಲೊ. ಹೆಂ ನಿಮಾಣೆಂ ಉತರ್".
ವ್ಹಡ್ಲಿಮಾಂಯ್ಚಾ ದೊಳ್ಯಾಂನಿ ದುಕಾಂ ದೆಂವ್ತಾಲಿಂ. "ಪುತಾ ತೊ ಮ್ಹಜೊ ಪೂತ್. ಜರ್ ಹಿಚ್ ಪಿಡಾ ತುಕಾ ಆಯಿಲ್ಲಿ ತರ್, ತುಜೆಥಂಯ್ ಅಶೆಂ ವಾಗ್ಲ್ಲ್ಯಾಂವ್ ತರ್, ತುಕಾ ಕಿತೆಂ ಭೊಗ್ತೆಂ?"
ಹ್ಯಾ ಸವಾಲಾಂಸಂಗಿಂ ಥಂಯ್ಸರ್ ಮಾವ್ನ್ ದೆಂವ್ಲ್ಲೆಂ. ಪುಣ್ ಅಸಮಾಧಾನ್ ಉರ್ಲ್ಲೆಂ. ಹಾಂವ್ ಹ್ಯಾ ಸರ್ವಾಕ್ ಮಾವ್ನ್ ಪ್ರೇಕ್ಷಕ್ ಜಾಲ್ಲಿಂ.
ಹೆರಿ ಬಾಪ್ಪು ಭಿತರ್ಲೆ ಭಿತರ್ ಕರ್ಗಾತಾಲೊ. ಪಿಡೆಪ್ರಾಸ್ ಪಿಡೆ ಪಾಟ್ಲಿ ನಾಲಿಸಾಯ್, ತಾಕಾ ಧಣ್ಸಿತಾಲಿ. ಹಾಂವ್ಯಿ ಚಿಂತ್ತಾಲಿಂ. ಮನಿಸ್ ಚೂಕ್ ಕರ್ತಾ. ಪುಣ್ ತಾಚೆ ಚುಕಿಕ್ ಎದಿ ವ್ಹಡ್ ಶಿಕ್ಷಾ - ಭೊಗ್ಸಾಣೆ ನಾತ್ಲ್ಲಿ. ಲಂಯ್ಗಿಕತಾ ಮನಿಸ್ ನಿಯಂತ್ರಣಾರ್ ದವರುಂಕ್ ಸಕ್ತಾ ತರ್ಯಿ, ಕಿತ್ಲೆಶೆ ಪಾವ್ಟಿಂ ಕ್ಷಣಿಕ್ ಸುಕಾಕ್ ಲಬ್ದಾತಾ ಆನಿ ತಾಚೊ ಫಟ್ ಅಸಲಿ ಭಿರಾಂಕುಳ್ ಪಿಡಾ...?
ಪುಣ್ ಹೆ ಪಿಡೆನ್ ಮ್ಹಾಕಾ ಲ್ಹಾನ್ ಪ್ರಾಯೆರ್ಚ್ ಮನ್ಶ್ಯಾಂಚಿ ವಳೊಕ್ ದಿಲ್ಲಿ. ಭಾಯ್ಲ್ಯಾ ಸೊಬಿತ್ ರುಪಾ ಪಾಟ್ಲ್ಯಾನ್, ಭಿತರ್ ಆನ್ಯೆಕ್ ಕುರೂಪಿ ತೊಂಡ್ ಆಸಾ ಮ್ಹಣ್ ಕಳ್ಲ್ಲೆಂ. ಬಾಪ್ಪುಚೆ ಪಿಡೆಕ್ ಕೆದ್ನಾಂ ಪುಣ್ಯಿ ವೊಕಾತ್ ಮೆಳಾತ್. ಪುಣ್ ಹ್ಯಾ ದೊಡ್ಯಾಪಣಾಚೆ ಪಿಡೆಕ್?
ಬಾಪ್ಪುಚಿ ಪಿಡಾ ಚಡ್ ಜಾತಾನಾ, ಹಾಂವೆಂ ಲೆಕ್ಲೆಂ ತಾಚಿ ಆಕೆರ್ ಲಾಗಿಂ ಪಾವ್ಲ್ಯಾ. ಕಟೀಣ್ ವೋಂಕ್, ಪೊಟಾಂತ್ ದೂಕ್, ತಾಪ್, ಶೆಳ್, ಬಾಪ್ಪು ನಿತ್ರಾಣ್ ಜಾಯಿತ್ತ್ ಆಯ್ಲೊ. ಸೊಸುಂಕ್ ಜಾಯ್ನಾತ್ಲ್ಲೆ ದುಕಿಕ್ ವೊಕ್ತಾ ಥೊಡೊ ವೇಳ್ ಥಂಡ್ ಕರ್ತಾಲಿಂ. ಬಾಪ್ಪುಕ್ ಆತಾಂ ಏಕ್ ವೆಗ್ಳೆಂಚ್ ಕೂಡ್ ದಿಲ್ಲೆಂ. ವ್ಹಡ್ಲಿಮಾಂಯ್ಕ್ ಬಾಪ್ಪುಚಿ ಸೆವಾ ಕರುಂಕ್ ಹಾಂವೆಂಚ್ ಆಡಾಯಿಲ್ಲೆಂ. ಕಿತ್ಯಾಕ್ ತಿ ಚತ್ರಾಯ್ ಸಾಂಬಾಳಿನಾತ್ಲ್ಲಿ. ಆವಯ್ಚೆ ಕಾಳಿಜ್ ವ್ಹಯ್. ಪುಣ್ ಪಿಡೆಕ್ ಸಂಬಂದ್ ಖಂಯ್ ಆಸಾ? ಚತ್ರಾಯೆವಿಣೆಂ ಸೆವಾ ಕೆಲ್ಯಾರ್ ಹಿ ಪಿಡಾ ತಿಕಾಯಿ ಯೆಂವ್ಚಿ ಸಾದ್ಯತಾಯ್ ಆಸ್ಲ್ಲಿ.
ಪಪ್ಪಾಕ್, ಹಾತಾಕ್ ಲುಂವಾಂ ಘಾಲ್ನ್, ಬಾಪ್ಪುಚಿ ನಿತಳಾಯ್ ಕರುಂಕ್ ಹಾಂವೆಂ ಸಾಂಗ್ಲ್ಲೆಂ. ಪಪ್ಪಾ ತಶೆಂಚ್ ಕರ್ತಾಲೊ. ಹಾಂವ್ ಕುಮೊಕ್ ಕರ್ತಾಲಿಂ. ಪುಣ್ ಮಾಮ್ಮಿ ಜಾಂವ್ ಟ್ಯಾನಿಯಾ ಮಾವ್ಶಿ ಜಾಂವ್ ಚುಕೊನ್ಯಿ ಯೇನಾತ್ಲ್ಲಿಂ. ಬಾಪ್ಪುಚಿ ಆಕೆರ್ ಆಯ್ಲ್ಯಾ ಮ್ಹಣ್ ಕಳೊನ್, ಲೊಕಾ-ಜಿಬೆಂಕ್ ಭಿಯೆವ್ನ್, ಮಾವ್ಶಿ ಕುಳಾರ್ ಥಾವ್ನ್ ಆಯಿಲ್ಲಿ ಜಾವ್ಯೆತ್.
ಬಾಪ್ಪುಚಿ ಪಿಡಾ ಚಡ್ಲಿ. ಕುಡಿಚ್ಯಾ ಪ್ರತಿರೋದಕ್ ಸಕ್ತೆಕ್ ಯೆಂವ್ಚಿ ಪಿಡಾ ಜಾಲ್ಲ್ಯಾನ್ ಹೆರ್ ಸಬಾರ್ ಪಿಡೆಂನಿ ಧಾಡ್ ಘಾಲ್ನ್ ತಾಕಾ ವೊಳ್ವಾಳಾಯ್ಲೆಂ. ತಾಚೆ ವೊಳ್ವಳೆ ಪಳೆಂವ್ಕ್ ತಾಂಕನಾಸ್ತಾಂ, ಹಾಂವೆಂಚ್ ಕಿತ್ಲೆಪಾವ್ಟಿಂ ದೆವಾಲಾಗಿಂ ಮಾಗ್ಲ್ಲೆಂ ’ತಾಕಾ ಮರಣ್ ಧಾಡ್’.
ಆನಿ ದೆವಾನ್ ಆಕೆರಿಕ್ ತರ್ಯಿ ಮ್ಹಜೆ ಮಾಗ್ಣೆಂ ಆಯ್ಕಾಲೆಂ. ಹೆರಿ ಬಾಪ್ಪುನ್ ಆಪ್ಲೆ ಪಿಡೆ ಥಾವ್ನ್ ಸುಟ್ಕಾ ಜೊಡ್ಲಿ. ಆನಿ ಮಾಮ್ಮಿನ್, ಟ್ಯಾನಿಯಾ ಮಾವ್ಶೆನ್ ಸಮಾದಾನೆಚೆ ಸುಸ್ಕಾರ್ ಸೊಡ್ಲೆ ಜಾಯ್ಜೆ. ತೆದ್ನಾಂಚ್ ವರ್ಸಾಚೆ ರಜೆರ್ ಯೆಂವ್ಚೊ ಟೆರಿ ಬಾಪ್ಪುಯಿ ತುರಂತ್ ಯೇವ್ನ್ ಪಾವ್ಲೊ. ಭಾವಾಚ್ಯಾ ಮೊರ್ನಾನಿಮ್ತಿಂ ತಾಕಾ ಕಾಂಯ್ ವಿಶೇಸ್ ದೂಕ್ ಭೊಗುಂಕ್ ನಾಂ......
ಮೋರ್ನ್ ಇಗರ್ಜೆಕ್ ಪಾವ್ಲೆಂ. ಮೀಸ್ ಜಾವ್ನ್, ಮೋರ್ನ್ ಸೆಮಿತರಿಂತ್ ಫೊಂಡಾ ಭಿತರ್ ದೆಂವಯ್ತಾನಾ ಮ್ಹಾಕಾ ತಡ್ವುಂಕ್ ಜಾಲೆಂನಾ. ಸಾಸ್ಣಾಕ್ ಆನಿ ಬಾಪ್ಪು ನಾ ಮ್ಹಳ್ಳಿಂ ಚಿಂತ್ನಾಂ ಉದೆತಾನಾ ತೀನ್ ಮುಟಿ ಮಾತಿ ಘಾಲ್ತಾನಾ, ಹಾಂವ್ ಕಸ್ಕಸೊನ್ ರಡಾಲಾಗ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
