ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 2
ಕಟ್ಪುತ್ಳಿ
ಬೂಕ್: ಕಟ್ಪುತ್ಳಿ
ಕವಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಪ್ರಸ್ತಾವನ್: ಎಚ್ಚೆಮ್, ಮುಂಬಯ್
ಛಾಪ್ಲ್ಲಿ ಲಿಪಿ: ಕಾನಡಿ ಆನಿಂ ದೇವ್ನಾಗರಿ.
ಪಾನಾಂ: 134
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್, ಕೆಲರಾಯ್
ತಾರಿಕ್: 11 ಮಾರ್ಚ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ವಲ್ಲಿ ಕ್ವಾಡ್ರಸ್
ಕವಿಚಿ ವ್ಹಳೊಕ್:
ವಲ್ಲಿ ಕ್ವಾಡ್ರಸ್, ಅಜೆಕಾರ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕವಿಂ ಪಯ್ಕಿ ಎಕ್ಲೊ. ಪಾಟ್ಲ್ಯಾ ದೋನ್ ದಾಕ್ಡ್ಯಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯ್ ರಸ್ಚಾ ವಲ್ಲಿಚೊ ’ಕಟ್ಪುತ್ಳಿ’ ಕವಿತಾ ಜಮೊ - ದುಸ್ರೊ ಕವಿತಾಜಮೊ ಜಾವ್ನಾಸಾ. ಪಯ್ಲೊ ಕವಿತಾಜಮೊ ’ಚ್ಯಾರ್ ಮುಖಾಂ’ ದೋನ್ ವರ್ಸಾಂಧಿಂ ಪರ್ಗಟ್ ಜಾಲಾ. ದಾಯ್ಜ್ಚೆರ್ ಹಾಚಿ ಕವಿತಾಂಕ್ ಸಂಬಂಧ್ ಜಾಲ್ಲಿ ವ್ಹೋಳ್ ’ಕವಿತಾದಾಯ್ಜ್’ ಪರ್ಗಟ್ ಜಾತೆಚ್ಚ್ ಆಸಾ, ತಶೆಂಚ್ ’ಆಂಕರ್’ ವ್ಹೊಳಿ ಮುಖಾಂತ್ರ್, ಉದೆವ್ನ್ ಯೆಂವ್ಚಾ ಕಂವಿಂಚಾ ಕವಿತಾಂಕ್ ತೊ ಆವ್ಕಾಸ್ ಕರುನ್ ದಿತಾ.
ವಲ್ಲಿಕ್ ಕೊಂಕಣಿ ತಶೆಂಚ್ ಇಂಗ್ಲಿಶ್ ಕವಿತಾ ಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.
ಸಮೀಕ್ಶಾ ಲೇಖನ್
ಆಶಾವಾದಿ ಕ್ರಾಂತೆಚಾ ವಾಟೆರ್ ಚಮ್ಕಾತಾನಾ.. [ಮೆಲ್ವಿನ್ ಜೆ. ವಾಸ್, ಕೆಲರಾಯ್ 11-ಮಾರ್ಚ್-2005]
ಕಟ್ಪುತ್ಳಿ ಕವಿತಾಜಮೊ ಸಾಮಾಜಿಕ್ ವೆವಸ್ತಾ ವಯ್ರ್ ದವರ್ಚಿ ಏಕ್ ಪಯ್ಲಿ ನದರ್.
ಸಮಾಜ್ ತಿ ಕಸಲಿಯ್ ಜಾಂವ್ದಿ. ಜಾಂವ್ದಿ ತಿ ಶೆಕ್ಡ್ಯಾಧ್ಲಿ ವಾ ಆತಾಂಚಿ. ಆಧಿಂ ಚಲ್ತಾಲೆಂ ತೆಂ ಆತಾಂಯ್ ಚಲೊನ್ಂಚ್ ಆಸಾ. ಚಡಾವತ್ ಕವಿತೆಂನಿ ವಾಸ್ತವಿಕತಾ ಉಕ್ಲುನ್ ಧರ್ತಾ ಕವಿತೆಚೊ ನಾಯಕ್. ವಾಸ್ತವಿಕತಾಂತ್ ನಿರಾಶಾ ಖಂಡಿತ್ ಆಸಾ. ಭೋವ್ಶಾ ಹ್ಯಾಚ್ ಕಾರಾಣಾಂಕ್ ಲಾಗೊನ್ ಕವಿನ್ ಆಪ್ಲ್ಯಾ ಕವಿತಾ ನಾಯಕಾಕ್ ಸಂಸಾರಾಚಾ ರಂಗೀನ್ ಸಂಸಾರಾ ಥಾವ್ನ್ ವೆಗ್ಳ್ಯಾಚ್ ಸಂಸಾರಾಕ್ ಪಯ್ಣ್ ಕರಯ್ಲಾಂ. ಅನಿಂ ಚಡಾವತ್ ಕವಿಂನಿ ಆಪ್ಲ್ಯಾ ಕವಿತೆಕ್ ವಿಂಸ್ಚಾ ಮೋಗ್, ಫುಲ್, ರಂಗ್, ಸೊಭಾಯ್, ಅಸಲ್ಯಾ ವಿಶಯಾಂಚೆರ್ ಧ್ಯಾನ್ ದೀನಾಸ್ತಾನಾ ಆಪ್ಲಿ ನದರ್ ಸಮಾಜೆ ವಯ್ರ್ ಖಂಚಯ್ಲ್ಯಾ.
ಹ್ಯಾ ಕವಿತಾಜಮ್ಯಾಚೆಂ ಅಧ್ಯಯನ್ ಕರ್ತಾನಾ ಹಾವೆಂ ಏಕ್ ಯಾ ದೋನ್ ಕವಿತಾವಯ್ರ್ ನದರ್ ದವರಿನಾಸ್ತಾನಾ ಸಗ್ಳ್ಯಾ ಜಮ್ಯಾಕ್ಚ್ ಮ್ಹಜಾ ನದ್ರೆನ್ ಪಳೆಲಾಂ. ಹಾಕಾ ಕಾರಾಣ್ ಕವಿತಾ ಕಾಂಯ್ ವಾರ್ಯಾನ್ ಉಭೊನ್ ಯೆಂವ್ಚೆಂ ಸುಕ್ಣೆಂ ನ್ಹಯ್. ಕಾಳ್ಜಾಚೆಂ ತಳ್ ಹಾಲ್ತಾನಾ ಮಾತ್ರ್ ಕವಿತಾ ಉಭ್ಜತಾ, ಆನಿಂ ಅಶೆಂ ಉಭ್ಜಾಲ್ಲೆಂ ಕವಿತಾ ತಿ ವಾಚ್ಪ್ಯಾಚಾ ಕಾಳ್ಜಾಕ್ ಖಂಡಿತ್ ಧರುನ್ ಹಾಲಯ್ತಾ .
ಕಟ್ಪುತ್ಳಿ ಜಮ್ಯಾಕ್ ಹಾವೆಂ ನಿರಾಸ್ವಾದಾಚೊ, ತೆಂಯ್ ಕ್ರಾಂತಿಕಾರಿ ನಿರಾಸ್ವಾದೆಚೊ ಜಮೊ ಮ್ಹಳ್ಯಾರ್ ಕವಿತೆಚಾ ನಾಯಕಾಕ್ ಚೂಕ್ ದಿಸ್ಚೆಂನಾ. ಚಡಾವತ್ ಕವಿತೆಂನಿ ತೊ ಅಪ್ಲೆಂ ಜಿವಿತ್ ನಿರಾಶೆಥಾವ್ನ್ಂಚ್ ಆರಂಭ್ ಕರುನ್ ನಿಮಾಣೆಂ ನಿರಾಸೆಚೆಂತ್ಚ್ ದೆವಾಕ್ ಸವಾಲ್ ಉಡಂವ್ಚೆಂ ಚಡ್ ದಿಸೊನ್ ಯೆತಾ. ತೊ ಜೆಜುಕ್ ಪರತ್ ಹ್ಯಾ ಸಂಸಾರಾಂತ್ ದುಬ್ಳ್ಯಾಂಚೊ ಸಾಂಗಾತಿ ಜಾವ್ನ್ ಆಪಂವ್ಕ್ ಸೊಧ್ತಾ.
ಕಾರಾಣ್ ವಾಸ್ತವಿಕತಾ. ಹೆಂ ವಾಸ್ತವಿಕ್ ಸಮಾಜ್ ಶೋಷಣ್ ಆಧಿಂ ಮಾಗಾಂತ್ ಚಲ್ತಾಲೆಂ ತೆಂಚ್ ಆತಾಂಯ್ ಚಲ್ತಾ. ಭೋವ್ಶಾ ತಾಚೆಂ ರೂಪ್ ಬದಲ್ಲಾಂ. ಹ್ಯಾಚ್ಚ್ ಕಾರಾಣಾ ಖಾತಿರ್ ಕವಿತಾ ನಾಯಕ್ ವಾಸ್ತವಿಕತಾ ನಿರಾಶಾ ಥಾವ್ನ್ ಭಾಯ್ರ್ ಯೇಂವ್ಕ್ ಉರ್ಡಾತಾ.
’ಹಾಂಗಾ ಪಾವ್ಸ್ ಉಜ್ಯಾಚೊ,
ನ್ಹಾತಾತ್ ರಗ್ತಾನ್ ಎಕಾಮೆಕಾಚ್ಯಾ
ರಾನ್ ಗಾಂವ್ ಜಾತಾನಾ
ಗಾಂವ್ ರಾನ್ ಜಾತಾನಾ’ (ಹಾಂವ್ ಹಾಂವ್ ನ್ಹಯ್)
ಮ್ಹಳ್ಯಾರ್ ಮನ್ಜಾತ್ಯೊ ಸಯ್ತ್ ಮನಿಸ್ ಜಾತಾನಾ ಮನಿಸ್ ಜಾನ್ವಾರ್ ಜಾತಾನಾ ಮ್ಹಳ್ಳೊ ಸಾಂಕೇತಿಕ್ ಅರ್ಥ್. ವಾಸ್ತವಿಕಾಕ್ ಅನಿಂ ಆಶಾವಾದಾಕ್ ಖಂಡಿತ್ ಸಂಭಂಧ್ ಕರುಂಕ್ ಜಾಯ್ನಾಂ. ಸಂಬಂಧ್ ಕೆಲೊ ತರ್ಯೀ ತೊ ಸಂಬಂಧ್ ನಿರಾಸೆಂತ್ ಬದ್ಲತಾ. ಹಾಕಾ ಕಾರಾಣ್ ವಾಸ್ತವಾಕ್ ಅಂತ್ಯ್ ನಾ. ಅಂತ್ಯ್ ನಾತ್ಲೆಲೆಂ ವಾಸ್ತವ್ ಫಾವೊ ಜಾಲ್ಲೆಂ ಆದಾಂವ್ ಆನಿ ಯೆವೆಕ್ ತ್ಯಾ ಭುಮಿ ವೈಕುಂಟಾಂತ್ಲ್ಯಾ ಪಯ್ಲ್ಯಾ ದಿಸಾಂನಿ. ಉಪ್ರಾಂತ್ಲ್ಯಾ ದಿಸಾಂನಿ ತಾಂಕಾಂಯಿ ವಾಸ್ತವಿಕಾಂತ್ ಜಿಯೆಂವ್ಕ್ ಪಡ್ಲೆಂ. ಹಾಂಗಾಯ್ ತೆಂಚ್ ದಿಸೊನ್ ಯೆತಾ. ಸದಾಂ ಜಿಯೆಂವ್ಚಾ ಸಮಾಜೆಂತ್ ಮನಿಸ್ ಎಕಾಮೆಕಾ ವಯ್ರ್ ರಾಗ್, ಹಗೆಂ, ಮೊಸೊರ್ ಕಶೆಂ ದವರ್ತಾ ಆನಿಕ್ ಆಪ್ಲ್ಯಾ ಜಿಯೆಂವ್ಚಾ ಗಾಂವಾಕ್ಚ್ ರಾನ್ ಕರ್ತಾ ತೆಂ ಸ್ವಷ್ಟ್ ಕಳೊನ್ ಯೆತಾ.
’ಚಿಂತಾಂ ಚಿಂತಾಂ.. ಖೊಳ್ ವೋಡ್ನ್ ನಿದ್ತಾಂ’ (ಜೆಮ್)
ವಾಸ್ತವಿಕತೆಚೆಂ ಸತ್ ಪಳೆಲ್ಲೊ ಕವಿತಾ ನಾಯಕ್ ಹಾಂಗಾಸರ್ ಆಶಾವಾದಾಕ್ ಇಡೆಂ ದೀನಾಸ್ತಾನಾ ಖೊಳ್ ವೋಡ್ನ್ ನಿದೊಂಕ್ ಗೆಲಾ? ಪ್ರಿತುಮೆವಯ್ಲ್ಯಾ ಹರ್ಯೆಕಾ ವಿಶಯಾಚಾ ಸಂಗ್ತಿಂಕ್ಯೀ ಜಲ್ಮ್ ಮ್ಹಳ್ಳೊ ತೊ ಬಿಲ್ಕುಲ್ ಆಸಾ. ಜಲ್ಮಾವಿಣೆಂ ಕಾಂಯ್ ಉದೆನಾ ಹೊ ಜಲ್ಮ್ ಸುಃಖಾಕ್ ಅನಿಂ ದುಃಖಾಕ್ ಪಯ್ಲೆಂ ಮೇಟ್. ಜಲ್ಮ್ ನಾಸ್ತಾನಾ ಸುಃಖ್ ಅಸೊಂಕ್ ಸಕ್ತಾ. ಪುಣ್ ಜಲ್ಮಾವಿಣೆಂ ದೂಃಖ್ ಖಂಡಿತ್ ನಾ.
’ಯೆಯಾ ತುಮಿ ಪಿಲಾತ್ ಜಾವುನ್
ಜೆರ್ಭಾಂದ್ ಮ್ಹಾಕಾ ತಯಾರ್ ಕರಾ
ಬಾರಾಬ್ಬಾಸಾಂ ಮಧ್ಲೊ ವಿಂಚುನ್
ಜಿವೊ ಜಿವೊಚ್ಚ್ ಖರ್ಸಾರ್ ಮ್ಹಾರಾ’ (ಯೆಯಾ ಮ್ಹಜಿ ನೀತ್ ಕರಾ)
ಜಿವೊ ಜಿವೊ ಮ್ಹಣ್ಚೆಂ ಜಿವ್ಯಾಂಕ್ ಮಾತ್ರ್. ಜಿವ್ಯಾಕ್ ಮಾತ್ರ್ ದೂಃಕ್ ಕಿತೆಂ ತೆಂ ಕಳ್ತಾ. ಮೆಲ್ಲ್ಯಾ ಜಿವ್ಯಾಕ್ ದೂಃಕ್ ಕಿತೆಂ ತೆಂ ಕಳಾನಾ. ಹಾಂಗಾ ಕವಿತೆಚೊ ನಾಯಕ್ ಇತ್ಲೊ ದುಖ್ಲಾಗೀ ಅನಿ ಚಡ್ತಿಕ್ ದುಃಕಾಚಿ ತಾಕಾ ಪರ್ವಾ ನಾ. ತ್ಯಾ ಖಾತಿರ್ ತೊ ಪಿಲಾತಾಂಕ್ ಸಗ್ಳ್ಯಾಂಕ್ ಆಪಯ್ತಾ ’ಯೆಯಾ ಮ್ಹಜಿ ನೀತ್ ಕರಾ’.
ಆಶಾಚ್ ಮನ್ಶಾಜಿವಿತಾಚಾ ದುಃಖಾಕ್ ಮೂಲ್ ಕಾರಾಣ್. ಹೆಂ ಏಕ್ ಅಪುಟ್ ಸತ್. ಹ್ಯಾ ಸತಾಕ್ ಸಕ್ರಿಯ್ ಸಾಕ್ಶೆಕ್ ಸೊಧುನ್ ವೆಚಿ ಗರ್ಜ್ ಆಸಾ ಮ್ಹಣೊನ್ ಮ್ಹಾಕಾ ಖಂಡಿತ್ ಭೊಗಾನಾ. ಆಶೆಂತ್ ದೂಃಖ್, ದುಃಖಾಂತ್ ನಿರಾಸ್, ನಿರಾಸೆಂತ್ ನಿಮಾಣೆಂ ದೇವ್, ಹೆಂ ವಿಚಾರ್ಪಣ್ ಆಧಿಂ ಥಾವ್ನ್ ಚಲೊನ್ಂಚ್ ಆಯ್ಲಾಂ. ತರ್ಯೀ ಹಾಂಚೆಮಧೆಂ ಥೊಡೆ ಆಶಾವಾದಿಯ್ ಆಸಾತ್. ಎಕಾ ದಿಸಾ ಭೋವ್ಶಾ, ಕೆದ್ನಾಂಯ್, ಫಾಲ್ಯಾಂ, ಅಸಲಿಂ ಉತ್ರಾಂ ಹ್ಯಾ ಆಶಾವಾದಾಕ್ ಸಾಕ್ಸ್ ದಿತಾತ್.
ಮ್ಹಜಾ ಚಿಂತ್ಪಾ ಪ್ರಕಾರ್ ಹ್ಯಾ ಕವಿತಾಜಮ್ಯಾಂಚೊ ಕವಿ ಹ್ಯಾ ಆಶಾವಾದಾಚಾ ವಾದಾಳಾಂತ್ ಶಿರ್ಕೊನ್ ಖಂಯ್ಸರ್ಗೀ ಕೊಣಾಯ್ಕ್ಯ್ ಆಯ್ಕಾನಾತ್ಲ್ಲ್ಯಾ ಜಾಗ್ಯಾಥಾವ್ನ್ ಅಪ್ಲ್ಯಾ ಆಶಾವಾದಾಕ್ ತಾಳೊ ಪಿಂಜ್ತಾವರೇಗ್ ಬೊಭಾಟುನ್ ನಿರಾಸ್ ಜಾವ್ನ್ ಘೆತಾ ಮ್ಹಳ್ಳೆಂ ತೆಂ ಕಳೊನ್ ಯೆತಾ.
’ಸಕ್ಕಡ್ ತಶೆಂಚ್ ಆಸಾ ಪೊರ್ಚೆ ಕಾಲ್ಚೆ ಆಯ್ಚೆಪರಿಂ’ (ಆಜ್)
ಸಗ್ಳ್ಯಾ ಕವಿತಾ ಜಮ್ಯಾಚೊ ನಿರಾಸ್ ಹ್ಯಾ ಸಾತ್ ಉತ್ರಾಂನಿ ಕವಿತೆಚೊ ನಾಯಕ್ ಉಚಾರ್ತಾ. ಸಮಾಜಿಕ್ ಅತ್ಯಾಚಾರ್ ಖಂಯ್ಚಾಯ್ ಶೆಕ್ಡ್ಯಾಂನಿ ಕಾಂಯ್ ಉಣೊ ನಾ. ಮಧೆಂ ಮಧೆಂ ಕಾಂಯ್ ಚಡ್ಲಾ ತರ್ ಮಧೆಂ ಮಧೆಂ ವಾಡ್ಲಾ. ಹಾಂತುಂ ಖಂಯ್ಸರ್ಯೀ ನವೆಸಾಂವ್ ನಾ ಆನಿಂ ತೆಚ್ಚ್ ಪಾಸೊನ್ ಕವಿತಾನಾಯಕ್ ಸಾಂಗ್ತಾ ’ಸಕ್ಕಡ್ ತಶೆಂಚ್ ಆಸಾ’.
ಹಾಂಗಾ ಕವಿತಾನಾಯಕ್ ವಾಸ್ತವಿಕತಾಚಾ ಥಳಾರ್ ಪಾವ್ಲಾ. ಹ್ಯಾ ಥಳಾಥಾವ್ನ್ ತೊ ಕ್ರಾಂತಿಕ್ ದೆಂವಾನಾ ಬಗಾರ್ ಆಪ್ಲ್ಯಾ ನಿಮಾಣ್ಯಾ ಆಶೆಕ್, ನಿಮಾಣ್ಯಾ ಭರ್ವಶ್ಯಾಚಾ ಕಿರ್ಣಾಕ್ ದೇವ್ ಆಧಾರ್ ಮ್ಹಳ್ಳೆಪರಿಂ ತೊ ದೆವಾಕ್ ಉಲೊ ಮಾರ್ತಾ. ವಾಸ್ತವಿಕತೆಕ್ ಅನಿಂ ದೆವಾಕ್ ಭೋವ್ಶಾ ಸಂಬಂಧ್ ಜೊಡುನ್ ದಿಂವ್ಚೆಂ ಪ್ರೇತನ್ ಹೆಂ.
’ತುಜಾ ಪದ್ವೆನ್ ಜಾತಾ ತರ್ ಮೊಮ್ ಆಸ್ಲ್ಲೆಂ ಬದ್ಲುನ್ ಮಾಯ್ ಕರ್’ (ಏಕ್ ಪರ್ಗಟ್ ರುದಾನ್)
ಹಾಂಗಾಸರ್ ಕವಿತಾನಾಯಕ್ ಸಾರ್ಕೊ ಜಾಣಾ ತಾಚಿ ಆಶಾ ಫಳಾಧಿಕ್ ಜಾಯ್ನಾ. ತ್ಯಾ ಪಾಸತ್ ತೊ ’ಜಾತಾ ತರ್’ ಮ್ಹಣ್ ಸಾಂಗ್ತಾ. ಹೆಂ ನಿರಾಸ್ವಾದಾಂತ್ಯೀ ಏಕ್ ಆಶಾವಾದ್. ಕವಿತಾನಾಯಕ್ ಆಪ್ಲ್ಯಾ ನಿರಾಶೆಕ್ ಏಕ್ ಆಶೆಚೆಂ ಕಿರಣ್ ದೀಂವ್ಕ್ ಪೆಚಾಡ್ತಾ. ತರ್ಯೀ ತಾಚೊ ಭರ್ವಸೊ ಹಾಂಗಾಸರ್ ಆಪ್ಲ್ಯಾ ಅಶೆ ವಯ್ರ್ ದವರ್ನ್ ವಚೊನ್ ದೆವಾ ವಯ್ರ್ ದವರ್ತಾ. ಕೊಂಕ್ಣಿ ಭಾಷೆಚೊ ಮೊಗ್ ಭರ್ಪೂರ್ ಹಾಂಗಾಸರ್ ಆಯ್ಕೊಂಕ್ ಮೆಳ್ತಾ. ಕೊಂಕ್ಣಿ ಭಾಷೆಚೆರ್ ಜಾಂವ್ಚೊ ಅತ್ಯಾಚಾರ್ ತಿಕಾ ವಿಸ್ರಾಲ್ಲ್ಯಾಂಚೆರ್ ಅನಿಂ ಕೆಲ್ಲ್ಯಾಂಚೆರ್ ತೊ ಶಿಣ್ತಾ.
’ಆಜ್ ಪಳೆ ಬಾಳಾಂಕ್ ಹಿಚಾ ಪಡ್ಲ್ಯಾ ವಿಸರ್
ಪಯ್ಲ್ಯಾ ವರ್ಗಾಚ್ಯೆ ಜಿಣ್ಯೆಂತ್ ತಾಂಚಾ ಹಿಚ್ ಸಸಾರ್’ (ಏಕ್ ಪರ್ಗಟ್ ರುದಾನ್)
’ಮೊರ್ಚಾ ಕೊಂಕ್ಣಿ ಭಾವಾಕ್ ಏಕ್ ಥೆಂಬೊ ನೀಸ್ ಸೊಡುಂಕ್’ (ಕೊಂಕ್ಣಿ ಬರವ್ಪಿ)
ಹಾಂಗಾಸರ್ ಕೊಂಕ್ಣಿ ಭಾಸೆಚಿ ಪರಿಗತ್ ಹ್ಯಾ ಉಂಚ್ಲ್ಯಾ ವರ್ಗಾಚೆ ಮ್ಹಣ್ಜೆ ಶಿಕಾಪ್ ಶಿಕೊನ್ ಅಪುಣ್ ಉಂಚ್ಲೊ ಮ್ಹಣ್ ಚಿಂತ್ಚಾ ಮನ್ಶಾಂ ಮಧೆಂ ಕಶಿ ಉರ್ಡೊನ್ ಆಸಾ ಮ್ಹಣೊನ್ ಸಾಂಗೊಂಕ್ ಪೆಚಾಡ್ತಾ. ಕೊಂಕ್ಣಿ ದುಸ್ರ್ಯಾ ಭಾಷೆ ಮುಕಾರ್ ಆಜ್ ಕೊಂಕ್ಣ್ಯಾಂಕ್ಚ್ ಮಹತ್ವಾಚಿ ಮ್ಹಣ್ ದಿಸಾನಾ. ತಾಂಚಾ ಭುರ್ಗ್ಯಾಂಕ್ ’ಮಾಂಯ್’ ಮ್ಹಣ್ ಶಿಕಂವ್ಚಾ ಬದ್ಲಾಕ್ ’ಮೊಮ್’ ಮ್ಹಣ್ ಶಿಕಯ್ತಾತ್.
ಎಕಾ ಥರಾಚಿ ಲಜ್. ಕೊಂಕ್ಣಿ ಉಲಂವ್ಕ್ ಎಕಾ ಥರಾಚಿ ಅವ್ಮರ್ಯಾದ್ ಭೊಗ್ಚಾ ಹ್ಯಾ ಕೊಂಕ್ಣ್ಯಾಂಕ್ ಪಳೆವ್ನ್ ಆಪ್ಲಿ ನೀತ್ ಕರುಂಕ್ ಆಪಯ್ತಾ ಕವಿತಾನಾಯಕ್. ಹೊ ಸಂಸಾರ್ ಏಕ್ ಬಾಜಾರ್ ಅನಿಂ ಹ್ಯಾ ಬಾಜಾರಾಂತ್ ಕೊಣ್ ಕೊಣಾಕ್ ಮೊಲಾಯ್ತಾ ಕೊಣ್ ಕೊಣಾಕ್ ವಿಖ್ತೆಂ ಘೆತಾ. ವಿಖ್ತೆಂ ಘೆತೆಲೆ ಹಾಂಗಾಸರ್ ಸಭಾರ್ ಆಸಾತ್. ದುಬ್ಳಿಕಾಯೆಚೆಂ ದುಖಾಚೆಂ ಪಯ್ಶ್ಯಾಂಚೆಂ ಪದ್ವೆಚೆಂ ಹಾತೆರ್ ಘೆವ್ನ್ ಪಾಪಾಚ್ಯಾಂಕ್ ಅಪ್ಲ್ಯಾ ಸುಖಾಖಾತಿರ್ ಗಳ್ಸುಂಚೆಂ ಹಾಂಗಾಸರ್ ಕಾಂಯ್ ಉಣೆಂ ನಾಂತ್. ಚಾಕೊರ್ಪಣಾಚೆಂ ಪಿಂತುರ್ ಹ್ಯಾ ಕವಿತೆಚಾ ಉತ್ರಾಂನಿ ಅಮಿಂಚ್ ಆತಾಂ ಪಳೆಯಾಂ;
’ವಿಕುಂಕ್ ನಾ ಬಾಕಿ ಕಿತೆಂಚ್ ಹೊ ಹಾಂಗಾಚೊ ಸದಾಂಚೊ ಬಾಜಾರ್’ (ಬಾಜಾರ್)
ಹಾಂಗಾಸರ್ ವಿಕುಂಕ್ ಕಾಂಯ್ಚ್ ಬಾಕಿ ನಾ. ಅನಿಂ ಹೆಂ ಸದಾಂಚೆಂ. ವಿಕ್ತೆಲ್ಯಾಂಚಾ ಆನಿಂ ಘೆತೆಲ್ಯಾಂಚಾ ಮಧೆಂ ಹೊ ಏಕ್ ಖೆಳ್ ಜಾವ್ನಾಸಾ. ಹ್ಯಾ ಖೆಳಾ ಮಧೆಂ ತೆಂ ಜಿವಿತ್ಯೀ.
’ಹ್ಯಾ ವಯ್ಲ್ಯಾ ವರ್ಗಾಚೆ ಜಿಣಿಯೆಂತ್’ (ಏಕ್ ಪರ್ಗಟ್ ರುದಾನ್)
ಆಯ್ಚಾ ಕಾಳಾರ್ ಹೆಂ ಜಿವಿತ್ಯೀ ಉಂಚ್ಲೆಂ ಜಿವಿತ್, ಉಂಚ್ಲ್ಯಾ ವರ್ಗಾಚ್ಯಾ ಮನ್ಶಾಂನಿ ಸಾರ್ಚೆಂ ಜೀವನ್ ಮ್ಹಣೊನ್ ಕವಿತಾನಾಯಕ್ ಸಾಂಗ್ತಾ. ಆನಿಂ ಹೆಂ ಜಿವಿತ್ ಜಿಯೆಂವ್ಚೆಂ ತೆ ಮನಿಸ್ಯೀ ಕಸಲೆ? ಹಾಂಕಾಂ ತೊ ಮಾಸ್ಳೆಕ್ ಸರಿ ಕರ್ತಾ.
’ಮಾಸ್ಳ್ಯೊ ಹಾಂಗಾ ಮೆಟಾಂಕ್ ಏಕ್ ಲ್ಹಾನಾಂಕ್ ಗಿಳ್ಚೊ, ವ್ಹಡಾಂಕ್ ದೆಕೊನ್ ಲಿಪ್ಚ್ಯೊ’ (ಮಾಸ್ಳಿ ಧರ್ತೆಲಿಂ)
ಆಪ್ಲ್ಯಾವರ್ನಿಂ ಲ್ಹಾನಾಂಕ್ ಗಿಳುನ್ ಹೆ ವ್ಹಡ್ ಮನಿಸ್ ಕಶೆಂ ಆಪ್ಲೆಂ ಜೀವನ್ ಸಾರ್ತಾತ್ ಆನಿ ಹಾಚೆಖಾತಿರ್ ತೆ ಕಿತೆಂಯ್ ಕರುಂಕ್ ತಯಾರ್ ಆಸಾತ್.
’ಕಾಪ್ಚೆಯ್ ಆಸಾತ್ ಲುಂವ್ಚೆಯ್ ಆಸಾತ್ ಕಾತರ್ಚೆಯ್ ಆಸಾತ್
ಸೊವುರ್ಚೆಯ್ ಆಸಾತ್ ಗರಿಯ್ ಆಸಾ ಜಾಳ್ಯ್ ಆಸಾತ್’ (ಬಾಜಾರ್)
ಉಂಚ್ಲ್ಯಾ ವರ್ಗಾಚೆಂ ಜಿವಿತ್ ಜಿಯೆಂವ್ಕ್ ಸಮಾಜೆಂತ್ ಅತ್ತ್ಯಾಚಾರ್ ಕರುನ್ ದುಬ್ಳಿಕಾಯೆಕ್ ಕಾಪುನ್ ಲುಂವೊನ್ ಕಾತ್ರುನ್ ಸೊವುರ್ನ್ ತರ್ಯೀ ಜಾಯ್ನಾಂ ತರ್ ಗರಿ ಘಾಲುನ್ ಯಾ ಜಾಳಾಂತ್ ಸಾಂಪ್ಡಾವ್ನ್ ಆಪ್ಲೆಂ ಕಾಮ್ ಕರ್ಚಾ ಹ್ಯಾ ಮನ್ಶಾಂನಿ ಸಂಸಾರಾಚೆರ್ ವೊತ್ಲೆಲ್ಯಾ ದುಕೊಳಾಕ್ ಕಾಡುಂಕ್ ತೊ ಬೊಬಾಟ್ತಾ.
’ದೆವಾ ಹಾಂಗಾ ದುಕೊಳ್ ಪಡ್ಲಾ ನ್ಹಯ್ ಉದ್ಕಾಚೊ
ನ್ಹಯ್ ವಾರ್ಯಾಚೊ ಬಗಾರ್ ಮನ್ಶಾಪಣಾಚೊ’ (ದುಕೊಳ್)
ಮನ್ಶಾಲಾಗಿಂ ನಾತ್ಲ್ಲೆಂ ಮನ್ಶಾಪಣ್ ಹ್ಯಾ ನವ್ಯಾ ವರ್ಸಾಕ್ ನವಿ ದಿಶಾ ಜಾವ್ನ್ ಬದ್ಲುಂದಿ ಮ್ಹಣೊನ್ ದೆವಾಲಾಗಿಂ ತೊ ಮಾಗ್ತಾ.
’ಆಯ್ಲೆಂ ಪರತ್ ನವೆಂ ವರಸ್ ನವಿ ದಿಶಾ ಘೆವುನ್
ನವ್ಯಾ ದಿಶೆಕ್ ಪಾವಂವ್ಕ್ ಬಂದೆಂತ್ ಆಸ್ಚಾ ಆಮ್ಕಾಂ ಸುಟ್ಕಾಚಿ ದಿಶಾ ಧಾಖಂವ್ಕ್’ (ನವೆಂ ವರಸ್)
ನವ್ಯಾ ವರ್ಸಾಕ್ ತೀನ್ ಇಮಾಜ್ಯೊ ಕವಿತಾನಾಯಕ್ ಹಾಂಗಾ ಮುಕಾರ್ ದವರ್ತಾ. ಬಂದಿಖಾನೊ, ಸುಟ್ಕಾ, ದಿಶಾ ಸಮಾಜೆಂತ್ ನವೆಸಾಂವ್ ಮ್ಹಳ್ಯಾರ್ ಸಾಮಾಜಿಕ್ ಶೋಷಣ್ ಜಾಂವ್ಚೆಂ ರಾವಂವ್ಕ್ ತೊ ಸಕ್ಕಡ್ ಪ್ರೇತನ್ ಕರ್ತಾ. ಮನ್ಶಾಕ್ ಮನ್ಶಾಪಣ್ ಆಜ್ ನಾ ಜಾಲಾಂ. ತೆಂಚ್ ಮನ್ಶಾಪಣ್ ನವಿ ದಿಶಾ ಜಾವ್ನ್ ಕೆದಾಳಾ ಯೆತೆಲೆಂ ಹ್ಯಾ ಸಂಸಾರಾಂತ್? ಹ್ಯಾ ಸಂಸಾರ್ ಮ್ಹಳ್ಳ್ಯಾ ಬಾಜಾರಾಂತ್ ಕಿರ್ಕೊಳ್ ಮನಿಸ್ ಜಾವ್ಕ್ ಪಾವ್ಲ್ಯಾತ್ ಕೊಣಾಯ್ಕ್ಯ್ ನಾಕಾ ಜಾಲ್ಲೆ. ತಾಂಚೆ ವಯ್ರ್ ಕಸಲೆಯ್ ಅತ್ತ್ಯಾಚಾರ್ ಚಲವ್ಯೆತ್ ಮ್ಹಣ್ಚೆ ತಸಲೆ.
’ಕೊನ್ಶಾಂತ್ ಗಾಂಯ್ದೊಳ್ಯ್ ಆಸಾತ್ ಕೊಣಾಕ್ ಆನಿಂ ಕಿತೆಂ ಜಾಯ್’ (ಬಾಜಾರ್)
ಹಾಂಗಾಸರ್ ದುಬ್ಳಿಕಾಯೆಚಿ ಇಮಾಜ್ ಗಾಂಯ್ದೊಳ್ ರುಪಾರ್ ಉಭಿ ರಾವ್ತಾ ಕವಿತಾನಾಯಕ್. ಶೋಷಣಾಕ್ ಕೊಣ್ಯೀ ನಾಂತ್ ತರ್ಯೀ ಕೊನ್ಶಾಂತ್ ಪಡ್ಲ್ಯಾತ್ ಮ್ಹಣೊನ್ ಸೊಡ್ಲೆಲೆ ತೆ. ಗಾಂಯ್ದೊಳಾ ರುಪಾಚೆ, ಮಾತಿ ಖಾವ್ನ್ ಜಿಯೆಂವ್ಚೆ ಭಿಕಾರಿಯ್ ಆಸಾತ್. ಹಾಚೆವಯ್ರ್ ಅನಿಂ ಕೊಣಾಕ್ ಕಿತೆಂ ಜಾಯ್? ಸಮಾಜೆಕ್ ಉಟಂವ್ಚೆಂ ಸವಾಲ್ ಹೆಂ. ಹೊ ಸಂಸಾರ್ಚ್ ಏಕ್ ಸರ್ಕಸ್. ಹ್ಯಾ ಸಂಸಾರಾಂತ್ ಹೆ ಜಿಯೆಂವ್ಚೆ ಮನಿಸ್ ಸಗ್ಳೆ ಎಕೆಕ್ಲ್ಯಾಚಾ ಹಾತಿಂ ಕಟ್ಪುತ್ಳಿ ಜಾವ್ನಾಸಾತ್. ಹ್ಯಾ ಸರ್ಕಸಾಂತ್ ದೆವಾಕ್ಯೀ ಮನಿಸ್ ಖೆಳಂವ್ಕ್ ಪಡ್ಲಾ ದೆವಾಚಾ ನಾಂವಿ ದೆವಾಚಾ ವೆಸಾಚೆರ್, ಆನಿಂ ದೆವಾಚಾ ಜಾಗ್ಯಾರ್ ಥಾವ್ನ್.
’ಕಟ್ಟಿ ದಾಂಡೊ ಕಿತ್ಯಾಕ್ ಬೊಲ್ಸಾಕ್ ಮ್ಹಜಾ ಖೊವಯ್ಲಾ ಏಕ್ ಲ್ಹಾನ್ ಖುರಿಸ್’ (ಆಂದ್ಳೆ)
ಹೆ ಥರಾ ಥರಾಚೊ ವೇಸ್ ಆಪ್ಣಾಯಿಲ್ಲೆ ಮನಿಸ್ ಆಪ್ಲ್ಯಾ ಸಕಯ್ಲ್ಯಾಂಕ್...
’ವಯ್ಲೆ ದಾಗೆ ಸಡಿಲ್ ಜಾತಾಂ ಧರ್ಣಿರ್ ಪಡ್ತಾಂ
ಉಸ್ವಾಸ್ ಸೊಡ್ತಾ ಬೊಂಬ್ಯಾ ನಾಚ್ ಚಾಲುಚ್ ಆಸ್ತಾ,
ಏಕ್ ಪಡ್ತಚ್ ಅನ್ಯೇಕ್ ಯೆತಾ’ (ಕಟ್ಪುತ್ಳಿ)
ಗರ್ಜ್ ಜಾಲಿ ವಯ್ಜ್ ಮೆಲೊ ಮ್ಹಳ್ಳೆಪರಿಂ ಆಪ್ಲ್ಯಾ ಖಾತಿರ್ ಖೆಳಾವ್ನ್ ಕಾಮ್ ಜಾಲ್ಲೆಂಚ್ ದಾಗೊ ಸಡಿಲ್ ಕೆಲೊ. ಪುಣ್ ಏಕ್ ಪಡ್ಲ್ಯಾರ್ ಅನ್ಯೇಕ್ ಥಂಯ್ಸರ್ ಉಭೊ ಜಾತಾ. ಅಶೆಂ ಸಮಾಜೆಂತ್ ಶೋಷಣಾಕ್ ಅಂತ್ಯ್ ನಾ ಮ್ಹಣ್ ಸಾಂಗ್ತಾ. ಕವಿ ಆಪ್ಲ್ಯಾ ಕವಿತಾನಾಯಕ್ ನಿರಾಶಾಕ್ ನಿರಾಶಾಕ್ ಚಡ್ ವರುನ್ ಪಾವ್ತಾ. ನಿರಾಸೆಚಾ ಗುಂಡಾಯೆಥಾವ್ನ್ ತೊ ಅಪ್ಲ್ಯಾ ರಚ್ಣಾರಾಕ್ ಸಯ್ತ್ ಬೋಬ್ ಮಾರುನ್ ವಾಸ್ತವಿಕತೆ ಥಾವ್ನ್ ಎಕಾಚ್ಫರಾಂ ನಿರಾಶೆಕ್ ಕವಿತಾನಾಯಕಾಚೆಂ ಪಯ್ಣ್ ಆಶಾವಾದಾಕ್ ಇಡೆಂ ದಿತಾ ತೆಂ ದಿಸೊನ್ ಯೇನಾ. ಪುಣ್ ಅಪರೋಕ್ ರಿತಿರ್ ಆಶಾವಾದ್ ಹರ್ಯೆಕಾ ಕವಿತೆಂತ್ ಝಳ್ಕತಾ - ಪುಣ್ ಸಾರ್ಕೆ ರಿತಿನ್ ಪಳೆಲ್ಯಾರ್ ಮಾತ್ರ್. ಕವಿ ಹಾಂಗಾ ಅಪ್ಲ್ಯಾ ಅಪರೋಕ್ಶ್ ಆಶಾವಾದಾಕ್ ನಿರಾಶಾ ಕಿತ್ಯಾಕ್ ಧಾಖಯ್ತಾ?
’ಸಕ್ಕಡ್ ತಶೆಂಚ್ ಆಸಾ ಪೊರ್ಚೆ ಕಾಲ್ಚೆ ಆಯ್ಚೆಪರಿಂ ಆಜ್!’ (ಆಜ್)
ಸಾಮಾಜಿಕ್ ಶೋಷಣ್ ತೆಂ ಶೆಕ್ಡ್ಯಾ ಪಯ್ಲೆಂಚೆಂ. ತೆಂ ಕಸಲೆಂಯ್ ಜಾಂವ್ ತಾಂತುಂ ಕಾಂಯ್ ನವೆಸಾಂವ್ ನಾ. ಕವಿತಾನಾಯಕ್ ಹಾಂಗಾ ವಾಸ್ತವಿಕತಾ ಕಾಳಾಥಾವ್ನ್ ಕಾಳಾಕ್ ಸರಿ ಕರ್ತಾ ಆನಿ ಆಜ್ ಮ್ಹಳ್ಳ್ಯಾ ಎಕಾಚ್ ಉತ್ರಾವಯ್ರ್ ತೊ ನಿರಾಶಿ ಜಾತಾ.
ಆಜ್ ತರ್ಯೀ ಬದ್ಲತಾ ಮ್ಹಳ್ಳಿ ಆಶಾ ತಾಕಾ ಆಸ್ಲ್ಲಿ ಪುಣ್ ಬದ್ಲುಂಕ್ ನಾ. ನಿರಾಶೆಚಾ ಸಾಗೊರಾಂತ್ ನಾಯಕಾಚೆಂ ಅಂತ್ಯ್. ಭೋವ್ಶಾ ಚಿಂತ್ಪಾ ಪ್ರಕಾರ್ ಆಜ್(?) ಹಾಂಗಾಸರ್ ಕವಿತಾನಾಯಕಾನ್ ಮ್ಹಾಕಾ ಸವಾಲ್ ವಿಚಾರ್ಲ್ಲೆಂ ತರ್ ಭೋವ್ಶಾ ಆಜ್ ಕಿತೆಂ ಆಸಾ ತೆಂ ಚಿಂತುನ್ ಹಾಂವ್ ನಿರಾಶಿ ಜಾತೊಂ, ತ್ಯಾ ಖಾತಿರ್ ಕವಿತಾ ನಾಯಕಾನ್ ತಾಕಾಚ್ಚ್ ಆಶೆ ಥಾವ್ನ್ ನಿರಾಶೆಕ್ ಲೊಟ್ಲೆಂ ಜಾಂವ್ಕ್ ಪುರೊ.
ಕವಿತಾ ಖಂಡಿತ್ ಏಕ್ ಮಾಗ್ಣೆಂ. ಜಾಂವ್ ತೆಂ ಮೊಗಾಚೆಂ ಯಾ ರಾಗಾಚೆಂ, ಜಾಂವ್ ತೆಂ ಸಮಾಜೆಚೆಂ ಯಾ ಧರ್ಮಾಚೆಂ. ಜಾಂವ್ ತೆಂ ದೇಶಾಚೆಂ ಯಾ ಸಂಸಾರಾಚೆಂ. ಮಾಗ್ಣ್ಯಾಂತ್ ಆಶಾ, ಆಶೆಂತ್ ರಾಕ್ವಣ್, ರಾಕ್ವಣೆಂತ್ ಜೀಕ್ ಯಾ ಸಲ್ವಣ್ ಸ್ವಾಭಾವಿಕ್. ಫಲಿತಾಂಶ್ ಕಿತೇಂಯ್ ಜಾಂವ್ ಮಾಗ್ಣೆಂ ತೆಂ ಅಖೇರ್ ಜಾಯ್ನಾ. ತಶೆಂಚ್ ಕವಿತಾಯ್ ಅಖೇರ್ ಜಾಂವ್ಚಿ ನ್ಹಯ್. ತಿ ಸದಾಂ ವಾಳೊನ್ ವೆಚಿ ಝರ್. ಜಾಂವ್ಕ್ ಪುರೊ ಮಧೆಂ ಗುಡೆ ದೊಂಗೊರ್. ಫಾತೊರ್ ಮಾತಿ. ಖಡ್ಪಾಂ ಧೊಮೊಸ್, ಹ್ಯಾ ಸಗ್ಳ್ಯಾ ವಯ್ರ್ ಜಯ್ತ್ ವರುನ್ ತಿ ಕವಿತಾ ನಿಮಾಣೆಂ ಆಪ್ಲ್ಯಾ ಗೊಂಟೆರಾಕ್ ಪಾವ್ತಾಚ್.
ಪಾಳ್ಣ್ಯಾ ಥಾವ್ನ್ ಘೊಂಟೆರಾಕ್ ಆಶಾ ಥಾವ್ನ್ ನಿರಾಶಾ, ನಿರಾಶಾ ಥಾವ್ನ್ ಆಶಾ ಜರೂರ್ ಆಸಾ. ಪುಣ್ ವಾಸ್ತವಿಕತಾಕ್ ಆಶಾವಾದ್ ಚಡ್ ಸೊಭಯ್ತಾ ಮ್ಹಣೊನ್ ಮ್ಹಜಿ ಅಭಿಪ್ರಾಯ್. ಕಿತ್ಯಾಕ್ ಮ್ಹಳ್ಯಾರ್ ವಾಸ್ತವಿಕತೆಂತ್ ನಿರಾಶಾ ಹರ್ಯೆಕಾ ಮೆಟಾಚಿ ಸಾವ್ಳಿ. ಆನಿಂ ಹ್ಯಾ ಸಾವ್ಳೆಂತ್ ರಾವೊನ್ಯೀ ಆಶಾ ಕರ್ಚೆಂ ಖಂಡಿತ್ ಸ್ವಾಭಾವಿಕ್. ಭೋವ್ಶಾ ಕವಿನ್ ಕವಿತಾನಾಯಕಾಕ್ ಹ್ಯಾ ಸ್ವಾಭಾವಿಕತೆಕ್ ವೊಳ್ಸಾಯಿಲ್ಲೆಂ ತರ್ ಚಡ್ ಬರೆಂ ಆಸ್ತೆಂ ಮ್ಹಣ್ ಹಾಮ್ವ್ ಚಿಂತಾಂ.
ಆಶಾ ಆನಿಂ ನಿರಾಶಾ ಮ್ಹಧ್ಲೊ ಸಂಬಂಧ್ ಆತಾಂ ಕವಿತೆಚಾ ಉತ್ರಾಂನಿಚ್ ಆಮಿ ಪಳೆವ್ಯಾಂ
’ಕರಾ ಮ್ಹಾಕಾ ಕಾಂಟೊ ಯಾ ಮೊಡಾ ಮ್ಹಜೊ ಫಾಂಟೊ
ಫಾತ್ರಾಯಾ ಯಾ ಧರುನ್ ಹುಲ್ಪಾಯಾ
ಪರತ್ ಉದೆವ್ನ್ ಯೆತಲೊಂ ಹಾಂವ್ ಪಾವ್ಸಾಂತ್ಲೊ ತಾಯ್ಕುಳೊ ಜಾವುನ್’ (ಹಾಂವ್ ಮೊರಾನಾ)
ಹಾಂಗಾಸರ್ ಇಮಾಜ್ಯೊ ಪಳೆಯಾ. ಕಾಂಟೊ, ಫಾಂಟೊ, ಫಾತೊರ್, ಉಜೊ, ಉದೆವ್, ತಾಯ್ಕುಳೊ. ಹಿಂ ಅತ್ಯಂತ್ ಗುಂಡಾಯೆಂತ್ಲಿ ಆಶಾವಾದಾಚಿ ಕವಿತಾ ಮ್ಹಣ್ಯೆತಾ. ಹಾಂಗಾಸರ್ ಕವಿತಾನಾಯಕ್ ಆಶಾ ಘೆವ್ನ್ ಆಯ್ಲಾ ಪುಣ್ ನಿರಾಶೆಂತ್ ತೊ ಯೇಂವ್ಕ್ ನಾ. ಜಲ್ಮಾ ಥಾವ್ನ್ಂಚ್ ಆಶಾವಾದಾಕ್ ವೊಳ್ಸಾವ್ನ್ ಆಯ್ಲಾ. ಆನಿಂ ಆಪ್ಲ್ಯಾ ಝುಜಾಕ್ ತೊ ತಯಾರ್ ಜಾಲಾ. ಮೆಲೊಂ ತರ್ಯೀ ಪಾವ್ಸಾಂತ್ಲೊ ತಾಯ್ಕುಳೊ ಜಾವ್ನ್ ಪರತ್ ಜಲ್ಮೊನ್ ಯೆತಲೊಂ ಮ್ಹಣ್ತಾ. ಹಾಂಗಾಸರ್ ವಾಸ್ತವಾಂತ್ ನಿರಾಶಾ ಬಿಲ್ಕುಲ್ ನಾ.
ವಾಸ್ತವಾಕ್ ಕವಿತಾನಾಯಕಾನ್ ಮಾಂಧುನ್ ಘೆತ್ಲಾಂ ಆನಿಂ ಸ್ವಾಭಾವಿಕ್ ಥರಾನ್ ತೊ ಕ್ರಾಂತಿಕ್ ದೆಂವ್ಲಾ. ಅಖ್ರೇಚೊ ಶರೊ: ಕವಿಚ್ಯಾ ಆಪ್ಲ್ಯಾ ಉತ್ರಾಂನಿ ತಾಂತ್ಲ್ಯಾ ಇಮಾಜೆಂನಿ ಅನಿಂ ಚಿಂತ್ಪಾಂನಿ ಆಶಾ ಸಗ್ಳ್ಯಾಂನಿ ದಿಸೊನ್ ಯೆತಾ ಪುಣ್ ಅಪರೋಕ್ಷ್ ರಿತಿರ್. ಹ್ಯಾ ಆಶೆಕ್ ಪರೋಕ್ಷ್ ರಿತಿರ್ ನಿರಾಶೆಂತ್ ಬದ್ಲುಂಚೆಂ ಪ್ರೇತನ್ ಕವಿನ್ ಕೆಲಾಂ. ಆಶಾವಾದಾಚಾ ಚಿಂತ್ನಾಂನಿ ಕವಿನ್ ಕವಿತಾನಾಯಕಾಕ್ ನಿರಾಸೆಕ್ ಕಿತ್ಯಾಕ್ ಲೊಟ್ಲಾಂಣ್ ತೆಂ ಭೋವ್ಶಾ ಕವಿಚ್ ಜಾಣಾ. ಹಾಂವ್ ಚಿಂತಾಂ ಕವಿನ್ ಆಪ್ಲ್ಯಾ ಚಿಂತ್ಪಾಕ್ ಆನಿ ಕವಿತಾನಾಯಕಾಕ್ ವಿವಿಂಗಡ್ ನದ್ರೆನ್ ಪಳೆಲ್ಲೆಂಯ್ ಜಾಂವ್ಕ್ ಪುರೊ. ಜಲ್ಮಾಥಾವ್ನ್ ವಾಸ್ತವ್, ವಾಸ್ತವಾ ಥಾವ್ನ್ ದೂಃಕ್, ದುಃಕಾ ಥಾವ್ನ್ ಆಶಾ, ಆಶೆ ಥಾವ್ನ್ ನಿರಾಶಾ, ನಿರಾಶಾ ಥಾವ್ನ್ ಎಕ್ಚ್ ಪಲಾಯನ್ ಯಾ ಕ್ರಾಂತಿ. ಹಿ ಏಕ್ ಜಿವಿತಾಚಿ ಸಾಂಕಳ್.
ಕಟ್ಪುತ್ಳಿ ಕವಿತಾಜಮೊಯ್ ಅಸೊಚ್ - ಏಕ್ ಕ್ರಾಂತಿಕ್ ಉಲೊ ದಿಂವ್ಚೆತಸಲೊ ಜಮೊ. ಪುಣ್ ಚಡಾವತ್ ಕವಿತೆಂನಿ ಕವಿತಾನಾಯಕ್ ಕ್ರಾಂತಿಕ್ ಉಲೊ ದಿಂವ್ಚೊ ಯಾ ಕ್ರಾಂತಿಕ್ ದೆಂಲ್ಲೊ ದಿಸಾನಾ. ತರ್ಯೀ ತೊ ಕ್ರಾಂತಿಚಾ ಚಿಂತ್ನಾಕ್ ಖಂಡಿತ್ ಉಮಾಳಾಯ್ತಾ. ಚಡಾವತ್ ಕವಿತೆಂನಿ ತೊ ನಿರಾಶಾಕ್ ವಚೊನ್ ತಾಚೆಂ ಪಯ್ಣ್ ಅಖೇರ್ ಕರ್ತಾ. ಹಾಂತುಂ ಪಲಾಯನ್ಯೀ ನಾ. ಹಾಕಾ ಕಾರಾಣ್ ಭೋವ್ಶಾ ಹಾಂತ್ಲೊ ಕವಿತಾನಾಯಕ್ ನಿರಾಶೆಂತ್ಚ್ ಜಲ್ಮ್ ಘೆತ್ಲ್ಲೆಂ ಜಾವ್ಯೆತ್. ನಿರಾಶೆಂತ್ ಜಲ್ಮಾಲ್ಲೆ ಪಲಾಯನಾಕ್ ವಾಟ್ ಧಾಖಯ್ತಾತ್ ಶಿವಾಯ್ ಕ್ರಾಂತಿಕ್ ವಾಟ್ ಧಾಕಯ್ನಾಂತ್.
ಕಾರಾಣ್ ತೊ ವಾಸ್ತವಿಕತೆಕ್ ವೊಳ್ಸಾಯಿಲ್ಲೊ ಆಸ್ತಾ. ಪುಣ್ ಕ್ರಾಂತಿಚೆಂ ಚಿಂತಾಪ್ ಜರೂರ್ ದಿತಾ. ಪುಣ್ ಹಾಂತುಂ ತೊ ಚಡಾವತ್ ಅಪ್ಣಾಚಾಕ್ಯೀ ದುಸ್ರ್ಯಾಂ ವಯ್ರ್ ಚಡ್ ಭರ್ವಸೊ ದವರ್ತಾ. ಹ್ಯಾಚ್ ಕಾರಾಣಾಂಕ್ ಲಾಗೊನ್ ಹಾಂತ್ಲೊ ಕವಿತಾನಾಯಕ್ ದೆವಾಕ್ ಉಲೊ ಮಾರ್ಚೆಣ್ ದಿಸೊನ್ ಯೆತಾ. ಹಾಂಗಾ ದೆವಾ ಥಾವ್ನ್ ಲಾಗೊನ್ ಹಾಂತ್ಲೊ ಕವಿತಾನಾಯಕ್ ದೆವಾಕ್ ಉಲೊ ಮಾರ್ಚೆಂ ದಿಸೊನ್ ಯೆತಾ. ಹಾಂಗಾ ದೆವಾ ಥಾವ್ನ್ ಕ್ರಾಂತಿ ಜಲ್ಮಾನಾ ತೆಂ ಆಮಿಂ ಜಾಣಾಂ ಜಾಂವ್ಕ್ ಜಾಯ್. ಹಾಂವ್ ಚಿಂತಾಂ ಸಮಾಜೆಚಾ ವಾಸ್ತವಾಚಾ ಜಲ್ಮಾಂತ್ ದುಃಖಾ ಆನಿ ಆಶೆಂತ್ ಉಪ್ಯೆವ್ನ್ ಜರ್ತರ್ ಹೊ ಕವಿತಾನಾಯಕ್ ಕ್ರಾಂತಿಕ್ ದೆಂವ್ಲ್ಲೊ ತರ್ ಭೋವ್ಶಾ ಚಡ್ ಬರೆಂ ಜಾತೆಂ.
ಅಶೆಂ ಜಾಂವ್ಕ್ ನಾತ್ಲ್ಲೆಂ ಕಾರಾಣ್ಯ್ ಖಂಡಿತ್ ಹ್ಯಾ ಜಮ್ಯಾಚಾ ಅಧ್ಯನಾಂತ್ ಮ್ಹಾಕಾ ದಿಸೊನ್ ಯೆತಾ. ತೆಂ ಹಾವೆಂ ಪಯ್ಲೆಂಚ್ ಸಾಂಗ್ಲ್ಲೆಪರಿಂ ಕವಿನ್ ಅಪ್ಲ್ಯಾ ಚಿಂತ್ಪಾಕ್ ಅನಿ ಕವಿತೆಚಾ ನಾಯಕಾಚಾ ಜಲ್ಮಾಕ್ ವಿವಿಂಗಡ್ ನದ್ರೆನ್ ಪಳೆಯಿಲ್ಲೆಂ ಜಾಂವ್ಕ್ ಪುರೊ. ಹ್ಯಾಚ್ ಕಾರಾಣಾ ಖಾತಿರ್ ಕವಿಚಾ ಲಿಪ್ಲ್ಲ್ಯಾ ಆಶಾವಾದಾಚಾ ಚಿಂತ್ಪಾ ಮುಖಾರ್ ಕವಿತಾ ನಾಯಕಾಚೆಂ ನಿರಾಸ್ಪಣ್ ಜಯ್ತ್ ವರುನ್ ಆಶಾವಾದಾ ಥಾವ್ನ್ ಕ್ರಾಂತಿಕಾರಿ ನಿರಾಸ್ವಾದಾಕ್ ಹೊ ಜಮೊ ಪಾವ್ಲಾ ಮ್ಹಣೊನ್ ಮ್ಹಜಿ ಅಭಿಪ್ರಾಯ್.
ಆಪ್ಲ್ಯಾ ಸಮಾಜೆಕ್ ಸುಧಾರಾಂವ್ಚಾ ಕವಿಚಾ ಹ್ಯಾ ಧಯ್ರಾಧಿಕ್ ವಾವ್ರಾಂತ್ ತಾಕಾ ತಾಚಾ ಹರ್ಯೆಕಾ ಮೆಟಾಂತ್ ಜಯ್ತ್ ಮಾಗ್ತಾಂ. ಆನಿಂ ಅಸಲೆ ಉರ್ಭೇಸ್ತ್ ಕವಿ ಮ್ಹಜಾ ಕೊಂಕ್ಣಿ ಮಾಯೆಚಾ ಪಾಲ್ವಾಂತ್ ಚಡ್ ಆನಿ ಚಡ್ ಜಲ್ಮೊನ್ ಯೇಂವ್.
ಕವಿ ಉಜೊ ಪೆಟಯ್ತಾನಾ... [ಆಂಡ್ರು ಎಲ್. ಡಿ’ಕುನ್ಹಾ, ಶಾರ್ಜಾ]
ಕಟ್ಪುತ್ಳಿಚೊ ಕವಿ ವಲ್ಲಿಚೊ ಶೆವಟ್ ಹ್ಯಾ ಸಂಸಾರಾಂತ್ ಕಳೆ ಫುಲಂವ್ಚೊ. ಸುವಾದ್ ವಾಂಟ್ಚೊ. ಉಗ್ತ್ಯಾ ಬಜಾರಾಂತ್ ಏಕ್ ವಿಕ್ರೊ ಕವಿತೆಚಾ ಸುರ್ವೆರ್ ಕವಿ ಹೊಚೊ ಶೆವೊಟ್ ಉಚಾರ್ನ್ ಸಾಂಗ್ತಾ. ಹ್ಯಾ ಭುಮಿ ವೈಕುಂಟಾಂತ್ ಏಕ್ ಮೂಟ್ ಮಾತಿ ಚಾರ್ ಥೆಂಬೆ ಉದಾಕ್ ಇತ್ಲೆಂಚ್ ಆಶೆಲ್ಲೊಂ ಸಪ್ಣಾಚೆಂ ಏಕ್ ಭಿಂ ಲಾಂವ್ಕ್ ದೋನ್ ಸೊಭಿತ್ ಕಳೆ ಫುಲಂವ್ಕ್ ಚ್ಯಾರ್ ಜಣಾಂಕ್ ಸುವಾದ್ ದೀಂವ್ಕ್ ಖರೊ ಆಶಾವಾದ್ ಹೊ.
ಪುಣ್ ಕವಿನ್ ಭುಮಿ ವೈಕುಂಟ್ ಮ್ಹಣ್ ಮರ್ಯಾದ್ ದೀಂವ್ಚಾ ಹ್ಯಾ ಕನಿಶ್ಟ್ ಆನಿ ಆನಿಶ್ಟ್ ಸಂಸಾರಾಂತ್ ಮ್ಹನ್ಶ್ಯಾಪಣಾಚೊ ದುಕೊಳ್ ಪಡ್ತಾನಾ ... "ದುಕೊಳ್" ಕವಿತೆಂತ್ ಕವಿ ಅಕ್ಲಾಸ್ ಸೊಡ್ತಾ.
ಖರ್ಕಟ್ಯಾ ವೊತಾಂತ್ ಫುಲ್ಚೆ ಬೊಂಗೆ ಅಬ್ಲೆಸ್ಪಣಾಚೆ ಭೃಮರ್ ಚಿಂವ್ತಾತ್ ಝಡಾಂನಿ ಕಳೆ ಫುಲ್ತಾನಾಂಚ್ ಯೆವುನ್ ಫಾಂಟ್ಯಾಸವೆಂ ತಾಕಾ ಲುಂವ್ತಾತ್ ಮ್ಹನ್ಶ್ಯಾಪಣಾಚೊ ಸುವಾದ್ ಪ್ರಸಾರ್ಚೊ ನಿತಿಚೊ ಸಂಸಾರ್ ರಸ್ಚಾ ಖಾತಿರ್ ಕವಿನ್ ಮಾಂಡ್ಲ್ಲ್ಯಾ ಝುಜಾಚೊ ತಾಳೊ ಜಾವ್ನ್ ಕಟ್ಪುತ್ಳಿಂತ್ಲಿಂ ಕವಿತಾಂ ಸಹೃದಯಿಂಚಾ ಕಾಳ್ಜಾ ಮನಾಕ್ ಆಪ್ಟಾತಾತ್.
ಕವಿತಾಂ ಹ್ಯಾ ಝುಜಾಚಿಂ ಅಸ್ತಾಂ ಜಾವ್ನ್ ಝುಜ್ತಾತ್. ಥೊಡಿಂ ಕವಿತಾಂ ವ್ಯಂಗ್ಯ್ ಉತ್ರಾಂಚ್ಯೊ ಚಾಟಿಯೊ ಜಾವ್ನ್ ಸರ್ಸರೀತ್ ವಾಜಯ್ತಾತ್ ತರ್,ಥೊ॒ಡಿಂ ಕವಿತಾಂ ಧಾರಿಂಚಿಂ ಉತ್ರಾಂ ಘೆವ್ನ್ ತಲ್ವಾರ್ ಜಾವ್ನ್ ಮಾರ್ತಾತ್. ಕವಿಚೆಂ ಹೆಂ ಝುಜ್ ಉಲ್ಟೆಂ ಮ್ಹಣ್ ತಾಚೆರ್ ಉಪ್ರಾಟ್ಲೆಲ್ಯಾಂಕ್
"ಯೆಯಾ ಮ್ಹಜಿ ನೀತ್ ಕರಾ...ಕಾಳಿಜ್ ಮ್ಹಜೆಂ ಚಿರುನ್ ಸೊಡಾ"
ಮ್ಹಣ್ ಉಗ್ತ್ಯಾನ್ ಉಲೊ ದಿಂವ್ಚೆಂ ಧೈರ್ ತೊ ಘೆತಾ. ಸಮಾಜಿಕ್ ನೀತ್ಚ್ ವಲ್ಲಿಚಾ ಕವಿತೆಂಚೊ ವರ್ತೊ ಗೂಣ್ ಮ್ಹಣ್ಯೆತ್. ಹ್ಯಾ ಗುಣಾನ್ ಆಪ್ಲೊ ಭಾವ್ ಅಭಿವ್ಯಕ್ತ್ ಕರ್ತಾನಾ ಥೊಡ್ಯಾ ಕವಿತೆಂನಿ ಕಾವ್ಯಾಳ್ ತಾಳ್ ಚುಕೊನ್ ಗೆಲ್ಲ್ಯಾಪರಿಂ ಭೊಗ್ತಾ ತರಿ ನೀತ್ ಜೊಡ್ಚಾ ಆನಿ ವಾಂಟ್ಚಾ ಆಪ್ಲ್ಯಾ ಮುಖ್ಯ್ ಶೆವಟಾ ಮುಖಾರ್ ಕಾವ್ಯಾಚಾ ಅಲಂಕಾರಾ ವಿಶಿಂ ಚಡ್ ಗಣ್ಣೆಂ ಕವಿನ್ ಕೆಲಾಂ ಮ್ಹಣ್ ಮಾಕಾ ಭೊಗಾನಾ. ಕವಿ ಹ್ಯಾ ವಿಶಿಂ ಜರ್ ಇಲ್ಲೆಂ ಚಡ್ ಗರ್ಜೆಚೆಂ ಧ್ಯಾನ್ ದೀತ್ ತರ್ ಕವಿತೆಂತ್ಲ್ಯಾ ಖತ್ಕತ್ಯಾಂತ್ಯ್ ಗೀತ್ ವ್ಹಾಳಂವ್ಚಿ ಊಂಚ್ ಸಕತ್ ಆನಿ ಶಾಣೆಪಣ್ ಹ್ಯಾ ಕವಿಲಾಗಿಂ ಆಸಾ.
"ಆಜ್" ಕವಿತಾ ಹಾಕಾ ಏಕ್ ರುಜ್ವಾತ್. ಏಕ್ ದೊನ್ ಪಾವ್ಟಿ ಹಿ ಕವಿತಾ ವಾಚ್ತಾನಾ ಘರಾಂ, ಮನಾಂ, ಕಾಳ್ಜಾಂ ದೆವಾಚೊ ಧರ್ಮಾಚೊ ದಂದೊ ಪೊರ್ಚೆ, ಕಾಲ್ಚೆ ಆಯ್ಚೆಪರಿಂ ಆಜ್ಯ್ ಚಲ್ತಾ ಮ್ಹಣ್ ಕವಿ ನಿರಾಶಾವಾದ್ ಪಾತ್ಳಾಯ್ತಾ ಮ್ಹಣ್ ಮ್ಹಾಕಾ ಭೊಗ್ಲೆಂ ತರ್ಯ್ ಮಾಗಿರ್ ಪರತ್ ಪರತ್ ವಾಚ್ತಾನಾ ಕವಿತೆಚ್ಯಾ ಗುಂಡಾಯೆ ಥಾವ್ನ್ ಉಮಾಳೊನ್ ಯೇಂವ್ಚೊ "ಫಾಲ್ಯಾಂ ಅಶೆಂ ಘಡುಂಕ್ ನಜೊ" ಮ್ಹಣ್ಚೊ ಅಶಾವಾದ್ ಭರೊನ್ ವೊಮ್ತೊಂಕ್ ಲಾಗ್ಲೊ.
ಚರಿತ್ರೆಚಾ ಸುರ್ವೆ ಥಾವ್ನ್ ಆಸ್ಲ್ಲೆಂ ಪೊಕ್ಳೆಂಪಣ್ ಆಜೂನ್ಯ್ ಪೊಕೊಳ್ಚ್ ಜಾವ್ನಾ ಉರ್ಲಾಂ ತರ್ ಪ್ರಗತೆಚಿ ಗತ್ ಕಸಲಿ? ಪ್ರಗತೆಚಿ ಗರ್ಜ್ ಕಸಲಿ? ಮ್ಹಳ್ಳಿಂ ತೀಕ್ಶ್ಣ್ ಸವಲಾಂ ಹ್ಯಾ ಕವಿತೆಚಿಂ ಕುಸಾಂ ಚೊಡಾಯ್ತಾನಾ ಹುಳ್ವುಳೊನ್ ಭಾಯ್ರ್ ಯೆತಾತ್. ಬರ್ಯಾ ಕವಿತೆಂಚೊ ಘುಟ್ ಹೊಚ್. ಚೊಡಯ್ಲ್ಯಾ ತಿತ್ಲೊಚ್ ಜೊಡ್ಚೊ! ಕವಿಚೊ ಆದರ್ಶ್ವಾದ್ಯ್ ಕವಿತೆಂನಿ ಉಟೊನ್ ದಿಸ್ತಾ.
ಕವಿತಾಂ ಕವಿಚಾ ವ್ಯಕ್ತಿತ್ವಾಚಿ ವಳಕ್ ಕರ್ನ್ ದಿತಾತ್. ಖುರ್ಸಾರ್ ಮೆಲ್ಲೊ ಜೆಜುಚ್ ಕವಿಚೊ ಆದರ್ಶ್ ಜಾಲಾ ಮ್ಹಣ್ ಕವಿತಾಂನಿ ಸ್ವಶ್ಟ್ ಕಳ್ತಾ. ತ್ಯಾಚ್ ವರ್ವಿಂ ಕೊಣ್ಣಾ ಜೆಜುಕ್ ಖುರ್ಸಾವಾಟ್ ದಾಕಯಿಲ್ಲ್ಯಾ ಪಿಲಾತ್, ಜುದಾಸ್, ಬಾರಬ್ಬಾಸ್ ಅಸಲ್ಯಾ ಕಪಟ್ಯಾಂಕ್ ಕವಿ ಘಡ್ಯೆ ಘಡ್ಯೆ ನೀತ್ ಕರ್ನ್ ಹಿಪೊಕ್ರೆಸಿ ವಿರೊಧ್ ಆಪ್ಲೊ ಕ್ರೋಧ್ ಆನಿ ಕಾಂಟಾಳೊ ದಾಕಯ್ತಾ. ಕುಡ್ಡೆ, ಆಂದ್ಳೆ, ಬಜಾರ್, ಉಗ್ತ್ಯಾ ಬಜಾರಾಂತ್ ಏಕ್ ವಿಕ್ರೊ, ಸರ್ಕಸ್, ಕಟ್ಪುತ್ಳಿ ಅಸಲ್ಯಾ ಕವಿತಾಂಚಿ ನಾಂವಾಚ್ ಕವಿತಾಚೊ ಘುಟ್ ಭಾಯ್ರ್ ಘಾಲ್ತಾತ್.
ಆಪ್ಲ್ಯಾ ಸಾಮಾಜಿಕ್ ಝುಜಾಂತ್ ಕವಿ "ಯೆಯಾ ಮ್ಹಜಿ ನೀತ್ ಕರಾ" ಕವಿತೆ ಮುಖಾಂತ್ರ್ ಖುರ್ಸಾರ್ ಮರೊಂಕ್ ತಯಾರ್. ಪುಣ್ ನೀತ್ ಚೊಡುಂಕ್ ತಯಾರ್ ನಾ. ಪುಣ್ ಜಶೆಂ ಜೆಜು ಕ್ರೀಸ್ತಾನ್ "ಬಾಪಾ ತುಜಿ ಖುಶಿ ತರ್ ಮ್ಹಜೆ ವಯ್ಲಿ ಹಿ ಖಾಲ್ಸ್ ನಿವಾರ್" ಮ್ಹಳ್ಳೆಪರಿಂ, ಹ್ಯಾ ಝುಜಾತ್ ಕವಿಕ್ಯ್ ಎಕ್ಸುರ್ಪಣ್ ಭೊಗುನ್, ಥಕೊನ್ ಮ್ಹಳ್ಳೆಪರಿಂ "ಮನಿಸ್ ಹಾಂಗಾ ಮ್ಹನ್ಶಾಂಕ್ ಖಾತಾ ಮ್ಹನ್ಶಾಂಕ್ ಮನಿಸ್ ಕರುಂಕ್ ತುಂ ಯೇ" ಮ್ಹಣ್ ಜೆಜುಕ್ ಉಲೊ ಮಾರ್ನ್ ರುದಾನ್ ಕರ್ಚೆಂ ದಿಸ್ತಾ.
ಥೊಡ್ಯಾಚ್ ಉತ್ರಾಂನಿ ವಲ್ಲಿಚಾ ಕವಿತಾ ವಿಶಿಂ ಸಾಂಗ್ಚೆಂ ತರ್:
ವಲ್ಲಿಚಾ ಕವಿತೆಂನಿ ಉಜೊ ದಿಸ್ತಾ...
ಕಿಟಾಳಾಂ ಉಸಳ್ತಾತ್.
"ಆಜ್" ಕಾಳೊಕಾಂತ್ ಕವಿನ್ ಪೆಟಯಿಲ್ಲೊ ಉಜೊ ಹೊ.
ಉಜೊ ಆಪ್ಲ್ಯಾ ಹಾತಿಂ ಘೆವ್ನ್ ಕವಿ ಮುಖಾರ್ ಧಾಂವ್ತಾ..
ಫಟೊನ್ ಪಡ್ಚಾ ಪಯ್ಲೆಂ
ಫೊಂಡಾಂತ್ ಪಡ್ಚಾ ಪಯ್ಲೆಂ
ಉಜ್ವಾಡ್ ದಿಂವ್ಚಾಕ್.
ಕೊಂಕ್ಣೆಂತ್ಲ್ಯಾ ಅಸಲ್ಯಾ ಅಪ್ರೂಪ್ ಕವಿನ್ ಫುಲಯಿಲ್ಲ್ಯಾ ಕಳ್ಯಾಂಚೊ ಸುವಾದ್ ಸಗ್ಳ್ಯಾ ಸಂಸಾರಾಚೆರ್ ಪ್ರಸಾರುಂದಿ ಮ್ಹಣ್ ಕಾಳ್ಜಾಚಾ ಗುಂಡಾಯೆಥಾವ್ನ್ ಆಶೆತಾಂ.
ಜೊಮೆಲ್ ಬೊಂದೆಲ್, ಕುವೇಯ್ಟ್
ಆಶಾವಾದಿ ದ್ವಾರಿಂ ಪ್ರಕಾಶಾನಾಕ್ ಆಯಿಲ್ಲೊ "ಕಟ್ಪುತ್ಳಿ" ಕವಿತಾಪುಂಜೊ ಕೊಂಕ್ಣಿ ಸಾಹಿತ್ಯೆಂತ್ ಅನ್ಯೇಕ್ ಬಾಂಗ್ರಾಳೆಂ ಪಾನ್ ಮ್ಹಣ್ ಸಾಂಗ್ಚ್ಯಾಕ್ ಮ್ಹಕಾ ದಾಧೊಸ್ಕಾಯ್ ಬೊಗ್ತಾ.
ಬಾಬ್ ವಲ್ಲಿ ಕ್ವಾಡ್ರಸ್ ಕೊಂಕ್ಣೆಂತ್ ಮಟ್ವಿ ಕಾಣ್ಯೊ ಲಿಖ್ಚಾಂತ್ ಫಾಮಾದ್ ಜಾವ್ನಾಸಾ ತೆಂ ಸರ್ವಾಂಕ್ ಕಳಿತ್ ಜಾಲ್ಲೆ ಆಪುಟ್ಟ್ ಸತ್ ತರೀ, ಕೊಂಕ್ಣಿ ಕವಿತಾಂತ್ ತಾಚೊ ಹೆಳ್ಲ್ಲೊ ಹಾತ್ ಸಾಂಗೊಂಕ್ ತಾಚೊ "ಕಟ್ಪುತ್ಲಿ" ಕವಿತಾ ಪುಂಜೊಚ್ ಸಾಕ್ಸ್. ಹ್ಯಾ ಬುಕಾಂತ್ಲಿ ಸಭಾರ್ ಕವಿತಾ ಹ್ಯಾ ಸಂಸಾರಾಂತ್ ನಾಚ್ ನಾಚ್ಚ್ಯಾಂಕ್, ನಾಚಂವ್ಚ್ಯಾ ತಶೆಂಚ್ ಫಕತ್ ನಾಚ್ ಪಳೆಂವ್ಚ್ಯಾ ವರ್ಗಾಚಾ ಲೊಕಾಂಚಿಂ ಅಬಿವ್ಯಕ್ತಿ ಧಾಕಯ್ತಾ.
ಮ್ಹಣ್ಜೆ ಹ್ಯಾ ಕವಿ ಪ್ರಕಾರ್ ಸಂಸಾರ್ ಏಕ್ ರಂಗ್ಮಂಚ್, ಆನಿಂ ಹ್ಯಾ ರಂಗ್ಮಂಚಾಂತ್ ಥರಥರಾಂಚೆ ಖೆಳ್ ಜಾತಾತ್, ಖೆಳ್ಚ್ ಖೆಳ್ಚೆ ತಸಲೆ ಲೊಕ್ ಆಸಾತ್, ಖೆಳ್ಚ್ ದೆಖ್ಚೆ ತಸಲೆ ಲೊಕ್ ಆಸಾತ್, ಆನಿಂ ತಾಂಚಾ ಸಂಗಾತಾ ಕೊಣಿಂ ಗತ್ ಆಧಾರ್ ನಾತ್ಲ್ಲ್ಯಾ ಲೊಕಾಂಕ್ ಬೊಂಬ್ಯಾಪರಿಂ ವಾಪಾರ್ಚೊ ಲೊಕ್ ಆಸಾ. ಮ್ಹಣ್ಜೆ ಸಮಾಜೆಚೆರ್ ಜಾಂವ್ಚಾ ಶೊಷಣಾಕ್ ಧಾಕೊಂವ್ಚೆಂ ಪ್ರೇತನ್ ಕೆಲಾಂ.
"ಆಜ್" ಕವಿತಾ ವಾಚ್ತಾನಾ, ಏಕೀಸಾವ್ಯಾ ಶೆಕ್ಡ್ಯಾಕ್ ಪಾವಲ್ಲೊ ಹೊ ಆಧುನಿಕ್ ಸಂಸಾರ್, ಆಧುನಿಕ್ ಸೌಲ್ಯತ್ಯಾಂಕ್ ಘೆವುನ್ ಮುಕಾರ್ ಪಾವ್ಲಾ ತರೀ, ಕವಿ ಚರಿತ್ರೆಂಚಿ ಪಾನಾಂ ಉಸ್ತುನ್ ಪಳೆತಾನಾ, ದೆವಾಚಾ ನಾಂವಾರ್ ಜಾಂವ್ಚೊ ಧರ್ಮಾಚೊ ದಂಧೊ, ಹಾತಾಕ್ ಆಸ್ಲ್ಲಿ ಶಿತಾ ಉಂಡಿ ಚೊರುನ್ ಕಾಡ್ಚೊ ದಂಧೊ, ಭುರ್ಗ್ಯಾಂ ಬಾಳಾಂಕ್ ವಿಣ್ಗೆಂ ಕರುನ್ ರಗತ್ ಘೊಟ್ಚೊ ದಂಧೊ ಆಸಾ, ತಶೆಂಚ್ ಆದಿಂ ಮಾಗಾ ಥಾವ್ನ್ ಘಡ್ತೆಚ್ ಆಸಾ!!. ಕಿತೆಂಚ್ ಬದ್ಲುಂಕ್ ನಾ ಮಳ್ಳಿ ಬೆಜಾರಾಯ್ ತೊ ಕಾಡ್ತಾ.
"...ಸದಾಂಯ್ ಖುರ್ಸಾರ್ ಮಾರ್ಚಾ ತುಮ್ಕಾಂ, ಆನ್ಯೇಕ್ ಖುರ್ಸಾಕ್ ಘಳಾಯ್ ಕಿತ್ಯಾಕ್" - ಯೆಯಾ ಮ್ಹಜಿ ಮ್ಹಜಿ ನೀತ್ ಕರಾ, ಕವಿತೆಂತ್ಲಿ ಉತ್ರಾಂ "ಆಜ್" ಕವಿತೆಂತ್ ಮುಕಾರುನ್ ವೆಲ್ಲೆಪರಿಂ ದಿಸ್ತಾ. "ಆಜ್" ಕವಿತಾ ವಾಚ್ತಾನಾ ಅನಿಂ ಸಮ್ಜಾತಾನಾ ಮ್ಹಜೆ ಥಂಯ್ಚ್ ಏಕ್ ನಿರಾಸ್ಪಣ್ ಉದೆವ್ನ್ ಆಯ್ಲೆಂ.
ಹಾಂವೆ ಆಜ್ ತರೀ ಕಿತೆಂಯ್ ಕರಿಜೆ ಮಳ್ಳೆಂ ಚಿಂತಾಪ್ ಮ್ಹತಿಂತ್ ಉದೆಲೆಂ ಆನಿಂ ಹ್ಯಾ ಚಿಂತ್ನಾಚೊ ಫಳ್ ಜಾವ್ನ್, ಮ್ಹಜ್ಯಾ ಬಿತರ್ ಆಸ್ಲ್ಲ್ಯಾ ಕವಿನ್ "ಫಾಲ್ಯಾಂ" ಮ್ಹಳ್ಳಿ ಕವಿತಾ ಪಿಂತಾಯ್ಲಿ; ಫಾಲ್ಯಾಂ (ಹಿ ಕವಿತಾ ವಲ್ಲಿ ಕಾಡ್ರಸಾಚಾ "ಆಜ್" ಕವಿತೆಚಾ ಪ್ರೆರಣಾರ್ ಬರಯಿಲ್ಲಿ ಜಾವ್ನಾಸಾ) ಚರಿತ್ರೆಚಿ ಗುದಾವಾಂತ್ ಕಿತೆಂ ಉಸ್ತಿತಾಯ್ ಶೆಕ್ಡ್ಯಾಚಾ ದಾಕ್ಡ್ಯಚಾ ಬಂಧ್ ಕುಡಾಂತ್ ಕಿತ್ಯಾಕ್ ಸಾಸ್ಪತಾಯ್ ಜೆಂ ಕಿತೆಂ ಜಾಲಾಂ ತೆಂ ಘಡುನ್ ಗೆಲಾಂ ನಶಿಬಾಚಿ ಬೊಶಿ ಫುಟೊನ್ ಗೆಲ್ಯಾ. ತಾಣೆಂ ಕಿತೆಂ ಕರುಂಕ್ ನಾ ತೆಂ ವಿಚಾರ್ನ್ ಫಾಯ್ದೊ ನಾ ಹಾಂವ್ ಕಿತೆಂ ಕರ್ತೊಲೊಂ ತೆಂ ಸಾಂಗೊಂಕ್ ವಿಸ್ರುಂಚೊ ನಾ ಲಿಖ್ಣೆ ತಾಲ್ವಾರ್ ಭಂವಾರಿಂ ಚಲಯ್ತೆಲೊಂ ನೀತ್, ಸತ್ ಉದಾರೆಂಚ್ ದವರ್ತಲೊಂ ಕಾಳಿಜ್, ಕೊಶೆಡ್ದ್ ಚೀರ್ನ್ ಸೊಡ್ತಲೊಂ ನಾಲಿಯೊ, ಪೆಳಿಯೊ ಸೊವ್ರುನ್ ಕಾಡ್ತಲೊಂ.
‘ಆಜ್’ ತುಂ ಆನಿ ಹಾಂವ್ ಬಾಂದ್ಯಾಂ ನವೊ ಸಂಸಾರ್ ನಾಕಾ ಥಂಯ್ ಕಸೊಲೊಚ್ ದೆಂವ್ಚಾರ್ ಪೊಣ್ತುರಾನಿಂ ಪರತ್ ಉಸ್ತುಚೆಂ ನಾಕಾ ಶೆಕ್ಡ್ಯಾ ನಂತರ್ "ಪಾಲ್ಯಾಂ" ಆಮ್ಚಾ ಚೂಕೆಕ್ ತಾಣಿಂಯೀ ರಡ್ಚೆಂ ನಾಕಾ ತಶೆಂಚ್ "ಆಮಿ ನಿದ್ಲ್ಲ್ಯಾಂವ್", "ಬಾಜಾರ್" ಕವಿತಾ, ಮ್ಹನ್ಶ್ಯಾಚೆಂ ಕೊಶೆಡ್ದ್ಚ್ ಚಿರುನ್, ಲೊಕಾಂಚೊ ಬಿತರ್ಲ್ಯಾ ಬಿತರ್ಲೊ ಗುಪಿತ್ ಖೆಳ್ ದಾಕಯ್ತಾ. "ಕೊಂಕ್ಣಿ ಬರವ್ಪಿ" ಕವಿತಾ ಕೊಂಕ್ಣಿ ಸಾಹಿತ್ಯಾಚಾ ನಾಂವಾರ್ ಜಾಂವ್ಚೊ ಬೊಂಬ್ಯಾಂಚೊ ಖೆಳ್ ಪಿಂತ್ರಾಯ್ತಾ.
"ಉಗ್ತ್ಯಾ ಬಾಜಾರಾಂತ್ ಜಾಂವ್ಚೊ ವಿಖ್ರೊ", "ಸರ್ಕಸ್", "ಜೆಮ್", "ದುಕೊಳ್" ಇತ್ಯಾದಿ... ಸಮಾಜೆಂತ್ ಜಾಂವ್ಚೆ ಶೋಷಣ್, ದೊರಿ ವೊಡ್ಚೊ ಖೆಳ್ ಉಂಚ್ಲ್ಯಾ ರಿತಿಂನಿ ದಾಖಯ್ತಾ. ಸಾಂಗಾತಾಚ್ ಕವಿಚೆಂ ನಿರಾಸ್ಪಣ್, ಬೆಜಾರಾಯ್ ದಾಕಯ್ತಾ. ಇತ್ಲ್ಯಾ ನಿರಾಸ್ಪಣಾಂತೀ ತೊ ವೊಗೊಚ್ ರಾವಾನಾ.
"ಹಾಂವ್ ಮೊರಾನಾ" ಕವಿತಾ ಹ್ಯಾಚ್ ಆಶಾವಾದಿ ಚಿಂತ್ನಾಂಚಿ ಸಾಕ್ಸ್ ಜಾವ್ನಾಸಾ. ಹ್ಯಾಚ್ ಕಟ್ಪುತ್ಳಿಚಾ ಸಂಸಾರಾಂತ್ ತೊ ಕಸೊ ಜಿಯೆತೆಲೊಗೀ ಯಾ ವಾವ್ರ್ ಕರ್ತೊಲೊಗೀ ಮ್ಹಣ್ ಹಿ ಕವಿತಾ ರುಜ್ವಾತ್ ದಿತಾ.
"...ಪರತ್ ಉದೆವ್ನ್ ಯೆತೆಲೊಂ ಹಾಂವ್ ಪಾವ್ಸಾಂತ್ಲೊ ತಾಯ್ಕುಳೊ ಜಾವ್ನ್."
"ಉಜ್ಯಾಂತ್ ಲಾಸಾ ಯಾ ಹುನ್ ಇಂಗ್ಳ್ಯಾಂತ್ ಪೊಸಾ ...
ತರ್ಯ್ ಹಾಂವ್ ಆಸ್ತಲೊಂ ಕೊಂಕ್ಣಿ ವೊಡ್ತಾಂತ್ಲಿ ಬೆಂದರ್ ವೆತಾಸರ್".
ಕವಿಚಿಂ ಉತ್ರಾಂ;
ಕವಿತಾ ಆನಿಂ ಮ್ಹಜಿ ಅಭಿವ್ಯಕ್ತಿ ’ಹಾಂವ್ ಕಿತ್ಯಾಕ್ ಬರಯ್ತಾಂ?’ ಸವಾಲ್ ’ಹಾಂವ್ ಕಿತ್ಯಾಕ್ ಜಿಯೆತಾಂ?’ ಮ್ಹಳ್ಳ್ಯಾ ಸವಾಲಾ ತಿತ್ಲೆಂಚ್ ಸಂಪೆಂ. ಆನಿಂ ತೆಂ ಸವಿಸ್ತಾರ್ ರಿತಿನ್ ಅಭಿವ್ಯಕ್ತ್ ಕರ್ಚೆಂ ತರ್ ಅಶೆಂ ಆಸಾ;
ಮ್ಹಜೆಂ ವಾಚಾಪ್ :
ಹಾಂವ್ ಜೆದ್ನಾಂ ಕೊಂಕ್ಣಿ ವಾಚಾಪ್ ಸುರು ಕೆಲೆಂಗೀ ತೆಚ್ಚ್ ವೆಳಾರ್ ಜಾಯಿತ್ತೆಂ ಕನ್ನಡ ವಾಚಾಪ್ಯೀ ವಾಚ್ತಾಲೊಂ. ಜೆದ್ನಾಂ ಹಾಂವ್ ವಾಚುಂಕ್ ಶಿಕ್ಲೊಂಗೀ ತೆದ್ನಾಂ ಹಾವೆಂ ಸುರ್ವಾತ್ ಕೆಲೆಂ ಸವಾಲಾಂ ವಿಚಾರುಂಕ್. ಅಜೀಕ್ ತೆವೀಸ್ ವರ್ಸಾಧಿಂ ಮ್ಹಣ್ಜೆ 1982 ಇಸ್ವೆಥಾವುನ್.
ತವಳ್ ಹಾಂವ್ ಚೊವ್ದಾ ವರ್ಸಾಂಚೊ ಪೊಕ್ರಿ ಬುರ್ಗೊ. ಪುಣ್ ತಾಕಾ ಮ್ಹಜಿ ಸಾಹಿತಿಕ್ ಸುರ್ವಾತ್ ಮ್ಹಣ್ ಒಪುನ್ ಘೆನಾ. ಪುಣ್ ಮ್ಹಜೆಂ ವಾಚಾಪ್ ಬರೆಂ ಆಸ್ಲ್ಲೆಂ. ಮ್ಹಜಾ ಆವಯ್ಬಾಪಾಯ್ಕ್ ಹಾಂವ್ ಮಧ್ಲೊ ಬುರ್ಗೊ ಜಾವ್ನ್ (ಮ್ಹಾಕಾ ಏಕ್ ವ್ಹಡ್ ಭಾವ್, ಏಕ್ ಲ್ಹಾನ್ ಭಾವ್, ಏಕ್ ಲ್ಹಾನ್ ಭಯ್ಣ್, ಏಕ್ ವ್ಹಡ್ ಭಯ್ಣ್ (ಆತಾಂ ಸರ್ಲ್ಯಾ). ಹಾಂವೆ ಜಲ್ಮಾತಾನಾಂಚ್ ಮ್ಹಜಾ ಬಾಬಾನ್ ನಿರ್ಧಾರ್ ಕೆಲ್ಲೊ ಹಾಂವೆಂ ಏಕ್ ಪಾದ್ರಿ ಜಾಯ್ಜಯ್ ಮ್ಹಣ್. ತವಳ್ಚೊ ಲೊಕಾಮೊಗಾಳ್ ಆರ್ಚ್ಬಿಸ್ಪಾಚೆಂ ನಾಂವ್ (ವಲೇರಿಯನ್ ಗ್ರೇಶಿಯಸ್) ಮ್ಹಾಕಾಯ್ ದಿಲೆಂ.
ಆನಿಂ ಲ್ಹಾನ್ಪಣಾ ಥಾವ್ನ್ಂಚ್ ಮಾಗ್ಣಿಂ, ಕಂತಾರಾಂ, ಸದಾಂಚೆಂ ಮೀಸ್, ಮಾಗ್ಣಿಂ, ದಿಂಬಿ ಘಾಲ್ನ್ ತೇರ್ಸ್ ಮ್ಹಣ್ಚೆಂ ಆಮ್ಚಾ ಜಿಣ್ಯೆಚೊ ಏಕ್ ವಾಂಟೊಚ್ ಜಾಲೊ. ಶೆಂಬೊರ್ ಕಂತಿಗೊ ಯಾ ಹೆರ್ ಕಂತಾರಾಂ ಹಾಂವ್ ತೋಂಡ್ಪಾಠ್ ಶಿಕ್ಲ್ಲೊಂ. ಅಜಿಯೆಚಾ ಹಾತಾಖಾಲ್ ವ್ಹಡ್ ಜಾಲ್ಲೊಂ ದೆಕುನ್ ತಿಚೆಂ ಪಾರಂಪರಿಕ್ ಚಿಂತಾಪ್ ಮ್ಹಜಾ ಮತಿಂತ್ ಇಲ್ಲೆಂ ತರ್ಯೀ ಅಜೂನ್ ದೀಸ್ ಕಾಡ್ತಾ. ಪುಣ್ ಲ್ಹಾನ್ಪಣಾಥಾವ್ನ್ಂಚ್ ಮ್ಹಜೆಂ ಚಿಂತಾಪ್ ವೆಗ್ಳೆಂ. ಹಾಕಾ ಜಾವ್ಯೆತ್ ಸಭಾರ್ ಕಾರಾಣಾಂ - ತಾಂತ್ಲೆಂ ಏಕ್ ಕಾರಣ್ ಹೆಂಯ್ ಜಾವ್ಯೆತಾ - ಆಮಿಂ ಚಾರ್ ಬುರ್ಗ್ಯಾಂ ಪಯ್ಕಿ ಕೊಣಾಯ್ಕೀ ನಾಕಾ ಜಾಲ್ಲೊ ಮ್ಹಳ್ಯಾರ್ ಹಾಂವ್ಂಚ್. ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಲ್ಘಡೊ ಭಾವ್ ಸಗ್ಳ್ಯಾಂಕ್ ಕೊಂಡಾಟ್ಯಾಚೊ, ಭಯ್ಣ್ ಎಕ್ಲೆಂಚ್ ಚೆಡುಂ ಮ್ಹಳ್ಳ್ಯಾ ಚಿಂತ್ಪಾನ್ ಸಗ್ಳ್ಯಾಂಕ್ ಮೊಗಾಚೆಂ. ನಿಮಾಣೊ ಭಾವ್ ಲ್ಹಾನ್ ದೆಕುನ್ ಸರ್ವಾಂಕ್ ಮೊಗಾಚೊ. ಹೆಂ ಚಿಂತಾಪ್ ಭೋವ್ಶಾ ಮ್ಹಾಕಾ ಅಥ್ವೆಂಚ್ ಚಿಂತುಂಕ್ ಕಾರಾಣ್ ಜಾಲೆಂ. ತಿತ್ಲೆಂಚ್ ಪಾವಾನಾತ್ಲ್ಲ್ಯಾಕ್ ಹಾಂವ್ ಕಠೀಣ್ ಪೊಕ್ರಿ ದೆಕುನ್ ಅಜೂನ್ ಪರ್ಯಾಂತ್ ಆಮ್ಚಾ ಗಾಂವಾಂತ್ ಆತಾಂಯ್ ಮ್ಹಜೆಂ ನಾಂವ್ ಆಯ್ಕತಾನಾಂಚ್ ಥೊಡ್ಯಾಂಚೆ ಕಾನ್ ಉಭೆ ಜಾತಾತ್.
ಮ್ಹಜೆಂ ಚಿಂತಾಪ್, ಉತಾರ್ ಶೀದಾ ಆನಿಂ ಕಡಕ್. ತೊಂಡಾಪುರ್ತೆಂ ಉಲಂವ್ಚಿ ವಿಧ್ಯಾ ಹಾಂವ್ ಶಿಕ್ಲ್ಲೊಂ ತರ್ ಭೋವ್ಶಾ ಹಾಂವ್ ಆಜ್ ಕಿತೆಂಗೀ ಜಾತೊಂ. ಹಿ ಮ್ಹಜಿ ಅಸ್ಕತ್ಕಾಯ್ ಜಾವ್ಯೆತಾ ಯಾ ಸಕತ್ ಮ್ಹಳ್ಳೆಂ ಅಜೂನ್ ಪರ್ಯಾಂತ್ ಹಾಂವ್ ನೆಣಾಂ. ಪುಣ್ ದೆವಾಚಿ ವಿಂಚವ್ಣ್ ವಿಂಗಡ್ಚ್ ಆಸ್ಲ್ಲಿ ಜಾಯ್ಜಾಯ್ ದೆಕುನ್ ಹಾಂವ್ ಸೆಮಿನರಿಕ್ ಗೆಲೊಂ ತರ್ಯೀ ಪಾದ್ರಿ ಜಾಲೊಂನಾ - ದೆವಾಕ್ ಅರ್ಗಾಂ. ಪುಣ್ ಹಾಚೆಸವೆಂ ಮ್ಹಜಾ ಜಿಣ್ಯೆಂತ್ ಎಕಾ ಪಾಟ್ಲ್ಯಾನ್ ಏಕ್ ಸಲ್ವಣ್ಯೊ ಆಯ್ಲ್ಯೊ. ತರ್ಯೀ ಹಾಂವ್ ಕಂಗಾಲ್ ಜಾಲ್ಲೊಂನಾ.
ಹಾಂವೆಂ ಸಾಹಿತಿಕ್ ಸುರ್ವಾತ್ ಕರುಂಕ್ ಧರ್ಲ್ಲೆಂ ಪಯ್ಲೆಂ ಮೇಟ್ ಜಾವ್ನಾಸಾ ಕನ್ನಡಾಂತ್ ಏಕ್ ಮಟ್ವಿ ಕಾಣಿ ಬರಯ್ಲಿ ಆನಿಂ ಹಾಂವೆಂ ವಾಸ್ಚಾ ’ಸುಧಾ’ ಪತ್ರಾಕ್ ಧಾಡ್ನ್ ದಿಲಿ. ವೀಸ್ ದಿಸಾಂನಿ ಮ್ಹಾಕಾ ಜಾಪ್ ಆಯ್ಲಿ ’ವಿಷಾದಪತ್ರ’ ಸವೆಂ. ಮ್ಹಜೆಂ ಹಠ್ ಚಡ್ಲೆಂ ಅನ್ಯೇಕ್ ಮಟ್ವಿ ಕಾಣಿ ಬರಯ್ಲಿ ಆನಿಂ ’ತರಂಗ’ ಪತ್ರಾಕ್ ಧಾಡ್ಲಿ.
ಎಕಾ ಮಯ್ನ್ಯಾ ಭಿತರ್ ತಾಂಚಿ ಜಾಪ್ ಆಯ್ಲಿ - ಜಾಪ್ ತಿಚ್ಚ್ ’ ವಿಷಾದಪತ್ರ’. ತಿಸ್ರಿ ಕಾಣಿ ಹಾವೆಂ ’ಮಯೂರ’ ಪತ್ರಾಕ್ ಧಾಡ್ಲಿ ಆನಿಂ ಪರಿಣಾಮ್ ತೆಂಚ್. ಅಶೆಂ ಮ್ಹಣ್ ಹಾವೆಂ ಸಾಧನ್ ಕರ್ಚೆಂ ರಾವಯ್ಲೆಂ ನಾಸ್ತಾಂ ವಾಚಾಪ್/ವಿಚಾರ್ ಕರ್ಚೆಂ ಕಾಮ್ ಚಡಯ್ಲೆಂ. ತ್ಯಾ ವೆಳಾರ್ ಹಾಂವ್ ಸರಾಗ್ ಕಾಣ್ಯೊ/ಕಾದಂಬರಿ ವಾಚ್ತಾಲೊಂ. ಮ್ಹಾಕಾ ಮಿಠಾಕಣ್ ಕೆಲ್ಲಿ ಕಾದಂಬರಿ ಎ.ಟಿ.ಲೊಬೊಚಿ ’ತುಂ ಬರೊ ಜಾ’.
1987 ಇಸ್ವೆಂತ್ ಹಿ ಕಾದಂಬರಿ ವಾಚುನ್ ಹಾಂವ್ ಕೊಂಕ್ಣೆಚೆರ್ ಇತ್ಲೊಂ ಮೊಗಾರ್ ಪಡ್ಲೊ ಮ್ಹಳ್ಯಾರ್ ಕೊಂಕ್ಣೆಂತ್ ಏಕ್ ಮಟ್ವಿ ಕಾಣಿ ’ಸಲ್ವಣಿ’ ಬರಯ್ಲಿ ಆನಿಂ ’ಕಾಣಿಕ್’ ಪತ್ರಾಕ್ ಧಾಡ್ಲಿ. ಆನಿಂ ಪಂಚು ಬಂಟ್ವಾಳ್ ತ್ಯಾ ವೆಳಾರ್ ಕಾಣಿಕ್ ಪತ್ರಾಚೊ ಸಹ-ಸಂಪಾದಕ್ ಜಾವ್ನಾಸ್ಲ್ಲೊ. ಮ್ಹಜಾ ಪಯ್ಲ್ಯಾ ಕಾಣ್ಯೆಥಾವ್ನ್ ಆಜ್ ಪರ್ಯಾಂತ್ ಹಾಂವ್ ಮ್ಹಜೊ ಸ್ವ-ವಿಳಾಸ್ ಲಿಖ್ಲ್ಲೆಂ ಪೋಸ್ಟ್ ಕಾರ್ಡ್ ಧಾಡುನ್ ದಿತಾಲೊಂ. ಪುಣ್ ಪಂಚುನ್ ಜಾಪ್ ದಿಲಿನಾ ಜಾಪಿಚಾ ಬದ್ಲಾಕ್ ಕಾಣಿಕ್ ಪತ್ರಾಚಿ ಏಕ್ ಪ್ರತಿ ದೀವ್ನ್ ಧಾಡ್ಲಿ, ಆನಿಂ ತಾಂತುಂ ಮ್ಹಜಿ ಕಾಣಿ ಫಾಯ್ಸ್ ಜಾಲ್ಲಿ. ಹಾಚೆ ಉಪ್ರಾಂತ್ ಮ್ಹಜಿ ಲಿಖ್ಣಿ ರಾವ್ಲ್ಲಿ ನಾ.
ಹಾಂವ್ ಕಿತ್ಯಾಕ್ ಬರಯ್ತಾಂ?
ಲಿಖಾಪ್ ಮ್ಹಜಿ ಅಭಿವ್ಯಕ್ತಿ. ಮ್ಹಜಾ ವಿಚಾರಾಂಕ್ ಹೆರಾಂಸವೆಂ ವಾಂಟುನ್ ಘೆಂವ್ಚೆಂ ಏಕ್ ಮಾಧ್ಯಮ್. ಪುಣ್ ಜಶೆಂ ಮ್ಹಜೆಂ ಸಂಯ್ಬ್, ತಶೆಂ ಮ್ಹಜೊ ಕರ್ನ್ಯೊ.
ಸಂಯ್ಬಾನ್ ಹಾಂವ್ ಆಂವ್ಸರಿ - ಚಡ್ತಾವ್ ಹರ್ಯೆಕ್ ಸಂಗ್ತ್ಯೊ ಮ್ಹಾಕಾ ವೆಗಿಂ ಜಾಯ್. ಮ್ಹಜೆಂ ಉಲವ್ಣೆಂ, ಮ್ಹಜೆಂ ಚಿಂತಾಪ್, ಹಾಂವೆಂ ಖಾಂವ್ಚೆಂ ಜೆಂವ್ಚೆಂ ಹರ್ಯೆಕ್ ಆಂವ್ಸರಾನ್ ಆನಿಂ ಬರಂವ್ಚೇಂಯ್. ಆತಾಂ ಪ್ರಾಯೆಚಾ ಅನ್ಭೋಗಾನ್ ಬರಯಿಲ್ಲೆಂ ಇಲ್ಲೊ ತೇಂಪ್ ಮ್ಹಜೆಸವೆಂ ದವರ್ನ್ ತೆಂ ವ್ಹೊರಾವ್ನ್ ಪಳೆತಾಂ ತರ್ಯೀ ಸಭಾರ್ ಪಾವ್ಟಿಂ ಮ್ಹಜಾ ಬರ್ಪಾಂ ಥಾವ್ನ್ ಉದೆತಾತ್ ಅಸ್ವಶ್ಟ್ ಇಮಾಜ್ಯೊ, ಜಿವಿಂ ಜಿವಿಂ ರುಪ್ಣಿಂ ಆನಿಂ ರೂಪ್ ನಾಸ್ಚಿಂ ಪಿಂತುರಾಂ. ಹಾಂಕಾಂ ಸೊಭಂವ್ಕ್ ಯಾ ನೆಟಂವ್ಕ್ ಮ್ಹಜೆಲಾಗಿಂ ತಿತ್ಲಿ ಸೊಸ್ಣಿಕಾಯ್ ಸಯ್ತ್ ಥೊಡೆಪಾವ್ಟಿಂ ನಾಂ ತರ್ ಥೊಡೆಪಾವ್ಟಿಂ ತಿ ಗರ್ಜ್ ಮ್ಹಣ್ಯೀ ಭೊಗಾನಾ.
ಹಿ ಮ್ಹಜಿ ಅಸ್ಕತ್ಕಾಯ್ ಮ್ಹಣ್ ಹಾಂವೆ ಒಪುನ್ ಘೆತ್ಲ್ಯಾ ಆನಿಂ ತಿ ಸುಧ್ರಾಪಾಚಾ ವಾಟೆರ್ ಹಾಂವ್ ಮ್ಹಜಿಂ ಪಾವ್ಲಾಂ ಕಾಡ್ನ್ ಆಸಾಂ. ಮ್ಹಾಕಾ ಕಿತೆಂ ಬರಂವ್ಕ್ ಪ್ರೇರಣ್ ದಿತಾ? ಬರಂವ್ಕ್ ಕಾಂಯ್ ಹಾಂವ್ ಹಿಮಾಲಯಾಕ್ ಚಡಾನಾ ಯಾ ಪಾತಾಳಾಕ್ ತಿಳಿನಾ. ಕಸಲೇಂಯ್ ಏಕ್ ಘಡಿತ್, ವಾಚಾಪ್, ಘಟನ್ ಮ್ಹಜಾ ಕಾಳ್ಜಾಕ್ ಜೆದ್ನಾಂ ಲಾಗ್ತಾ, ತೆದ್ನಾಂ ಮ್ಹಜೆಂ ಕಾಳಿಜ್ ಜಾಗೆಂ ಜಾತಾ ಆನಿಂ ತ್ಯಾ ಘಡ್ಯೆ ವ್ಹಾಳೊನ್ ಯೆಂವ್ಚಾ ಉಮಾಳ್ಯಾಂಚೊ ಲೋಟ್ ಮ್ಹಾಕಾ ಬರಂವ್ಕ್ ತಾಳ್ತಾ. ಆನಿಂ ತೆಚ್ ವೆಳಾರ್ ಮ್ಹಜೆಥಾವ್ನ್ ಬರಾಪ್ ಉದೆತಾ. ಏಕ್ ಕಾಣಿ ಜಾವ್ನ್, ಏಕ್ ಕವಿತಾ ಜಾವ್ನ್ ಯಾ ಏಕ್ ಚಿಂತಾಪ್ ಜಾವ್ನ್.
ಮ್ಹಾಕಾ ಮ್ಹಜಾ ಜಿಣ್ಯೆಂತ್ ಚಡ್ ಮೊಗಾಚೊ ತಿತ್ಲೊಚ್ ರಾಗಾಚೊ ಮ್ಹಜೆ ಭಿತರ್ಲೊ ಹಾಂವ್. ಜೊ ಮ್ಹಜೊ ಇತ್ಲೊ ಮೋಗ್ ಕರ್ತಾ ಆನಿಂ ತವಳ್ತವಳ್ ಮ್ಹಾಕಾ ಖಾಂಬ್ಯಾಂನಿ ಭಾಂದುನ್ ಜೆರ್ಭಾಂಧಾಚೆ ಮಾರ್ ಘಾಲ್ತಾ, ಮ್ಹಾಕಾ ಫಾತ್ರಾಯ್ತಾ ಆನಿಂ ಮ್ಹಾಕಾ ಬರಂವ್ಕ್ ಘಟಾಯ್ ದಿತಾ ತೊಚ್ ಮ್ಹಜಾ ಭಿತರ್ಲೊ ಹಾಂವ್. ಹ್ಯಾ ಬುಕಾಂತ್ಲಿಂ ಚಡ್ತಾವ್ ಕವಿತಾ ಜೆದ್ನಾಂ ಮ್ಹಜಾ ಜಿಣ್ಯೆಂತ್ ಮ್ಹಜೆ ಭಿತರ್ಲೊ ಹಾಂವ್ ಕಠೀಣ್ ಅಸ್ಕತ್ ಜಾವ್ನ್ ರುದಾನ್ ಕರ್ಚಾ ವೆಳಾರ್ ಹಾವೆಂ ಬರಯಿಲ್ಲಿಂ ಕವಿತಾ ಜಾವ್ನಾಸಾತ್. ಕಾಂಯ್ ಥೊಡ್ಯಾ ಕವಿತಾಂನಿ ಮ್ಹಜಾ ಜಿವಿತಾಚೊ ಅನ್ಭೋಗ್ ಧರ್ ಧರ್ ಮ್ಹಣ್ ಜಿವಿಂ ರಗ್ತಾಳಿಂ ದುಖಾಂ ಗಳಯ್ತಾ.
’ಯೆಯಾ ಮ್ಹಜಿ ನೀತ್ ಕರಾ’ ಕವಿತಾ - ಹಾವೆಂ ಜ್ಯಾ ಪರಿಗತೆಂತ್ ಬರಯಿಲ್ಲೆಂ ಮ್ಹಳ್ಯಾರ್ ಜೆದ್ನಾಂ ಹಾವೆಂ ಮ್ಹಜೆವಿಶಿಂ ಕಿತೆಂಚ್ ಚಿಂತಿನಾಸ್ತಾಂ, ಮ್ಹಜೊ ವೇಳ್, ಮಿನತ್, ಪೊಯ್ಶೆ ಘಾಲ್ನ್ ಕೊಂಕ್ಣಿ ಚಟುವಟಿಕೊ ಕರ್ನ್, ಹೆಂ ಕಿತೆಂಚ್ ಸಮ್ಜೊಣಿ ನಾತ್ಲ್ಲ್ಯಾಂನಿ ಮ್ಹಜಾ ವೆಕ್ತಿತ್ವಾಕ್ ಬೋಟ್ ಜೊಕ್ಲ್ಲೆವೆಳಾರ್.
ಹೆರಾಂಚಾ ಗುಸ್ತ್ಯಾರ್ಚ್ ಜಿಯೆತೆಲ್ಯಾಂಕ್, ಮೆಜಾವಯ್ಲೆಂ ಕೆಳೆಂ ಕಾಡ್ನ್ ಪಿಲ್ಯಾದ್ ಜೊಡ್ತೆಲ್ಯಾಂಕ್ ಕಶೆಂ ಕಳ್ಚೆಂ ಮಿನತ್ ಮ್ಹಳ್ಯಾರ್ ಕಿತೆಂ ಮ್ಹಣ್. ಪುಣ್ ಏಕ್ ಸತ್ ಹೆಂ ಜಾವ್ನಾಸಾ ಜೆದ್ನಾಂ ಮನ್ಶಾಕ್ ಸ್ವಾಭಿಮಾನ್ಂಚ್ ನಾತ್ಲೆಲ್ಯಾ ವೆಳಾರ್ ಕಶೆಂ ಸಮ್ಜತಾ ಹೆರಾಂಕ್ ಸಮ್ಜೊಂವ್ಚೆಂ?.
ಹಾಂವೆಂ ಮ್ಹಜಾ ಜಿಣ್ಯೆಂತ್ ಪೊಯ್ಶ್ಯಾಂಕ್ ಪ್ರಮುಕ್ ಸ್ಥಾನ್ ದಿಲ್ಲೆಂಚ್ ತರ್ ಆಜ್ ಖಂಯ್ಗೀ, ಕಸೊಗೀ ಆಸ್ತೊಂ. ಹಾಂವ್ ಖರೆಂಚ್ ಸಮ್ಜಾತಾಂ ಪೊಯ್ಶ್ಯಾಂನಿ ಬೂಕ್ ಘೆವ್ಯೆತಾ ಪುಣ್ ಜಾಣ್ವಾಯ್ ನ್ಹಯ್, ಪೊಯ್ಶ್ಯಾಂನಿ ವಖ್ತಾಂ ಘೆವ್ಯೆತಾ ಪುಣ್ ಭಲಾಯ್ಕಿ ನ್ಹಯ್. ಪೊಯ್ಶ್ಯಾಂನಿ ಇಸ್ಟಾಂಕ್ ಘೆವ್ಯೆತಾ ಪುಣ್ ಇಸ್ಟಾಗಾತ್ ನ್ಹಯ್. ಹೆಂ ಆತಾಂ ನ್ಹಯ್ - ಅಜಿಕ್ ಚಡುಣೆಂ ಎಕಾ ದಾಕ್ಡ್ಯಾಧಿಂ ಬೊಂಬೊಂಯ್ತ್ ಉಗ್ತ್ಯಾ ಟೆರೆಸಾರ್ ಪೊಟಾಕ್ ನಾಸ್ತಾಂ ಜಿಯೆಲ್ಲ್ಯಾ ದಿಸಾಂನಿ ಸಯ್ತ್. ಪೊಯ್ಶೆ ನಾಸ್ತಾಂ ಸವಾಯೆಚೊ ಪಿಯಾವ್ ಖಾವ್ನ್ ದೀಸ್ ಕಾಡ್ಲೆಲ್ಯಾ ದಿಸ್ ಜಿಯೆಲಾಂ ತರ್ಯೀ ಅಜೂನ್ ಪೊಯ್ಶ್ಯಾಂಕ್ ಮ್ಹಜಾ ಜಿಣ್ಯೆಂತ್ ಮಹತ್ವ್ ದಿಲ್ಲೊನಾ. ಮ್ಹಜಿ ಗ್ರೇಸ್ತ್ ಮಂತನಾಂತ್ಲಿಂ ಸಯ್ರಿಂ ಮ್ಹಾಕಾ ಆಸ್ಲ್ಲಿಂ, ಆಸಾತ್ ತರ್ಯೀ ಮ್ಹಾಕಾ ಕಿತ್ಯಾಕ್ಗೀ ಮ್ಹಜಿ ಜಿಣಿಂ ಮ್ಹಜೆಪ್ರಕಾರ್ ಕೊಣಾಯ್ಕೀ ಕಸಲೆಂಚ್ ಸ್ವಷ್ಟೀಕರಣ್ ದೀನಾಸ್ತಾಂ ಜಿಯೆಜಾಯ್ ಮ್ಹಳ್ಳ್ಯಾ ಹಠಾನ್ ಜಿಯೆಂವ್ಕ್ ಆಸ್ಲ್ಲಿ.
’ಸರ್ಕಸ್’ ಕವಿತಾ ಆತಾಂಚಿ ಪರಿಗತೆಕ್ ಸಾರ್ಕೆಂ ಮ್ಹಜೆಂ ಚಿತ್ರಣ್. ಪತ್ರಿಕೋಧ್ಯಮ್ ಏಕ್ ರಾಂಡ್ಭಾಜ್ ಜಾಲ್ಲ್ಯಾ ಹ್ಯಾ ದಿಸಾಂನಿ, ಕೊಲೆ ಸಯ್ತ್ ’ಕೊಂಕ್ಣಿ ಮುಕುಟ್’ ಘೆವ್ನ್ ರಾನಾಕ್ ಗೆಲ್ಯಾತ್ ಆನಿಂ ವಾಗ್ ಜಾಲ್ಯಾತ್.
’ಬಾಜಾರ್’ ಮ್ಹಜೆಪ್ರಕಾರ್ ಆಯ್ಚಾ ಕಾಳಾರ್ ಚಿಂತ್ಪಾಚಾ ಆಳ್ಸಾಯೆನ್ ಅಪುಣ್ ಫಕತ್ ಪಾಟ್ಲಾವ್ದಾರಿ ಜಾಂವ್ಕ್ಚ್ ಫಾವೊ ಜಾಲ್ಲ್ಯಾಂಕ್ ಪಳೆವ್ನ್ ಲಿಖ್ಲಾಂ. ತಾಂಕಾಂ ಚಿಂತ್ಪಾಚಿ ಇತ್ಲಿ ಆಳ್ಸಾಯ್ಕೀ ’ಹೆಂ ಶಿತ್’ ಮ್ಹಣ್ ’ಮ್ಹೆಳೆಂ’ ದಿಲ್ಯಾರ್ ಸಯ್ತ್ ಖಾಂವ್ಚಿ ಭಕ್ತ್.
ಹಾಂವ್ ನೆಣಾಂ ಹಿ ಭಕ್ತ್ ಯಾ ಕಿತೆಂ ಮ್ಹಳ್ಳೆಂ. ಆನಿಂ ಹಿ ಪರಿಗತ್ ’ಆಜ್’ ಕವಿತಾ ವೆಕ್ತ್ ಕರ್ತಾ. ’ಮಾಸ್ಳಿ ಧರ್ತೆಲಿಂ’ ಆಮ್ಚಾ ಸಮಾಜೆಂತ್ ಆಸ್ಚಿಂ ವೆಕ್ತಿತ್ವಾಂಕ್ ಪಿಂತ್ರಾಯ್ತಾ, ’ಉಗ್ತ್ಯಾ ಭಾಜಾರಾಂತ್ ಏಕ್ ವಿಖ್ರೊ’ ಆಯ್ಚಾ ಕಾಳಾಕ್ ಸಂಬಂಧ್ ಜಾಲ್ಲೆಂ ಕವಿತಾ.
ಖೊಡ್ :
ಮ್ಹಜಾ ಕವಿತಾಂನಿ ಪ್ರಾಸ್ ಉಣಿಂ, ಪ್ರಾಸ್-ಅಲಂಕಾರಾಚೊ ಉಪ್ಯೋಗ್ ಕರುನ್ ಕವಿತಾ ಬರಂವ್ಕ್ ಮ್ಹಾಕಾ ಜಾಯ್ನಾಂಗೀ ಯಾ ಗರ್ಜ್ ಮ್ಹಣ್ ಭೊಗಾನಾಂಗೀ ತೆಂ ನೆಣಾಂ. ಮ್ಹಜಾ ಕವಿತೆಚೊ ಇಮಾಜ್ಯೊ ವೆವೆಗ್ಳಿಂ ರುಪಾಂ ಘೆವ್ನ್ ಮ್ಹಜಾ ಭಿತರ್ಲ್ಯಾ ಮ್ಹಾಕಾಚ್ ಸಭಾರ್ ಪಾವ್ಟಿಂ ಗುಸ್ಪಡಾಯ್ತಾತ್. ಸಂಸಾರಾಕ್ ಮನರಂಜರ್ ಕರುಂಕ್ ಹಾವೆಂ ಎದೊಳ್ ಬರಂವ್ಕ್ ನಾ. ಮನರಂಜನಾ ಖಾತಿರ್ ಫುಡೆಂ ಬರಂವ್ಕ್ ಸಕ್ತಾಂಗೀ ನೆಣಾಂ. ಮ್ಹಜೆಂ ಚಿಂತಾಪ್ ಕಸಲೆಂ?
ಭೋವ್ ಸಂಪೆಂ - ಹಾಂವ್ ಕಾಳೊಕಾಕ್ ದುರ್ಸತೆಲ್ಯಾಂಚಾ ಪಯ್ಕಿ ರಾವೊಂಕ್ ಆಶೆನಾ. ವಾತ್ ಪೆಟಂವ್ಕ್ ವೆಚೊಚ್ ಮ್ಹಜೊ ಇರಾದೊ. ಸಾಹಿತ್ಯ್ ಮ್ಹಜಿ ಪಯ್ಲಿ ವಿಂಚವ್ಣ್ ಆನಿಂ ಸಾಹಿತ್ಯಾಕ್ ಸಂಬಂಧ್ ಜಾಲ್ಲ್ಯೊ ಚಟುವಟಿಕೊ ಮ್ಹಜಾ ಮೊಗಾಚೊ. ತರ್ಯೀ ಸಾಹಿತಿ ಜಾವ್ನ್ಂಯೀ ದೊರೆ ಉಭಾರ್ಚಾ, ಆಪ್ಲ್ಯಾ ಸ್ವಾರ್ಥಾಚಾ ಆಬ್ಲೇಸ್ಪಣಾನ್ ಸಮಾಜ್ ಮೊಡ್ಚಾಂಚೆರ್ ಮ್ಹಾಕಾ ತಾತ್ಸಾರ್ ಆಸಾ. ಪುಣ್ ತಾಂಚಾಕೀ ಚಡ್ ಜಾವ್ನ್ ಕಾಂಠಾಳೊ ಆಸಾ ದೈವಿಕ್ ಜೆಮ್ ಕಾಡ್ಚಾ ಆಮ್ಚಾ ಪರ್ಜಾಚೆರ್. ಫಕತ್ ಆಮಿಂ, ಆಮ್ಚಿ ಜೋಡ್, ಆಮ್ಚಿಂ ಕುಟ್ಮಾಂ, ಆಮ್ಚೊ ಸಂಸಾರ್ ಮ್ಹಳ್ಳ್ಯಾ ವರ್ತುಲಾಂನಿ ಅಪಾಪ್ಲ್ಯಾಂಕ್ ಹೊಗ್ಡಾವ್ನ್ ಘೆತ್ಲ್ಲ್ಯಾಂಚೆರ್.
ಎಕ್ಲೆಂ ರಶ್ಶಿಯನ್ ಕವಯತ್ರಿ ಮಾರ್ಕೆಟಾ ಕ್ಯುಬಿಕೋವಾನ್ ಮ್ಹಜಿಂ ಪೋಯೆಟ್ರಿ ಡಾಟ್ ಕಾಮಾಚೆರ್ ಪರ್ಗಟ್ ಜಾಲ್ಲಿಂ ಇಂಗ್ಲಿಶ್ ಕವಿತಾ ವಾಚುನ್ ಮ್ಹಾಕಾ ಅಶೆಂ ಬರಯ್ಲೆಂ;
’ಕವಿ ಜೊ ನ್ಹಯ್ ಜೊ ಅಪ್ಲೆಂ ದೂಖ್ ಹೆರಾಂಚೆರ್ ಥಾಪುನ್ ಸಂತೊಸ್ ಭೊಗ್ಚೊ, ಬಗಾರ್ ಅಪ್ಲ್ಯಾ ದುಖಾಸವೆಂ ಹೆರಾಂಚೆಂ ದೂಕ್ ಕಶೆಂ ಉಣೆಂ ಕರ್ಯೆತಾ ಮ್ಹಳ್ಳೆಂ ಸೊಧುನ್ ದಿಂವ್ಚೊ’
ಹೆಂ ಇಮೇಯ್ಲ್ ಮ್ಹಜಾ ಚಿಂತ್ಪಾಚಾ ದಿಶಾಕ್ಚ್ ಹಾಲಯ್ಲಾಗ್ಲೆಂ ಆನಿಂ ಹಾಂತ್ಲೆಂ ಕೊಡು ಸತ್ ಮ್ಹಾಕಾ ಜಿರಯ್ನಾಸ್ತಾಂ ವಾಟ್ಚ್ ನಾಂ ಜಾಲಿ. ತೆದೊಳ್ ಪರ್ಯಾಂತ್ ಹಾಂವ್ ಮ್ಹಜಾ ಬರ್ಪಾಂನಿ ಫಕತ್ ಖೊಂಕ್ತಾಲೊಂ ಮಾತ್ರ್ ಶಿವಾಯ್ ಪರಿಹಾರಾ ತೆವ್ಶಿಲೆಂ ಚಿಂತಾಪ್ ವಾಳಂವ್ಚಾಂತ್ ಚಡ್ ಮತ್ ದಿಲ್ಲಿ ನಾ.
ಯುರೋಪಿಯನ್ ಲೇಖಕಿ ’ಆಲಿಸ್ ಮೋಂಟ್ರೊಸ್’ ಮ್ಹಜಾ ಬರ್ಪಾಂಕ್ ವಾಚುನ್ ಮ್ಹಾಕಾ ಅಶೆಂ ಬರಯ್ಲಾಗ್ಲಿ;
’ಕವಿತಾ ಏಕ್ ಅಭಿವ್ಯಕ್ತಿ ಜಾಕಾ ಭಾಸ್ ಏಕ್ ಮಾಧ್ಯಮ್ ಮಾತ್ರ್. ಕವಿತಾಚ್ ಏಕ್ ಭಾಸ್ ಜಿ ಕವಿಚಿಂತ್ಪಾಚಾ ಮನ್ಶಾಂಕ್ ಮಾತ್ರ್ ಸಮ್ಜೊಂವ್ಚೆ ತಸಲಿ’
ಮ್ಹಜಾ ಎದೊಳ್ಚಾ ಚಡುಣೆಂ ವೀಸ್ ವರ್ಸಾಂಚಾ ಸಾಹಿತಿಕ್ ಅನ್ಭೋಗಾಂತ್ ಹಾಂವ್ ಚಡುಣೆಂ ಆತಾಂಚಾ ಸರ್ವ್ ಕಾರ್ಯಾಳ್ ಸಾಹಿತಿಂಲಾಗಿಂ ಸಂಪರ್ಕಾರ್ ಆಸಾಂ, ತಾಂಚಾ ಬರ್ಪಾಂಚೆಂ ಅಧ್ಯಯನ್ ಕರ್ತಾಂ.
ಮ್ಹಜೆಂ ಬರಾಪ್ ಮೆಳ್ಲ್ಲ್ಯಾ ಮೆಳ್ಲ್ಲ್ಯಾ ಬಾವ್ಡ್ಯಾಂಚಾ ಮಾತ್ಯಾರ್ ಥಾಪುನ್ ’ಹಾಂವ್ ಮಹಾನ್’ ಮ್ಹಣ್ ಲೇಕ್ ಘಾಲ್ಚಾ ಪಯ್ಲೆಂ ತಾಂಚೆವಿಶಿಂ ಆಯ್ಕತಾಂ ಆನಿಂ ಸಮ್ಜೊಂಕ್ ಪ್ರೇತನ್ ಕರ್ತಾಂ. ಮ್ಹಜಾ ಬರ್ಪಾಂಚೆಂ ಮಾರ್ಕೆಟಿಂಗ್ ಎದೊಳ್ ಕರುಂಕ್ ನಾ ಅನಿಂ ಕರ್ಚೊಂನಾ ಮ್ಹಳ್ಳೊ ಭರ್ವಸೊ. ಮ್ಹಾಕಾ ಮ್ಹಜಾಕೀ ಮ್ಹಾಲ್ಘಡ್ಯಾ ಲೇಖಕಾಂಚೊ ಕಿತ್ಲೊ ಹುಸ್ಕೊ ಆಸಾಗೀ ತಿತ್ಲೊಚ್ ಮಾಯ್ಪಾಸ್ ಮ್ಹಜಾಕೀ ಲ್ಹಾನಾಂಚೊ ಆಸಾ.
ಮ್ಹಜಾ ಚಿಂತ್ನಾಂಕ್ ಈಟ್ ದಿಲ್ಲೆ:
ಸಭಾರ್ ಆಸಾತ್, ತೇಂಯ್ ಕೊಂಕ್ಣಿ ಕವಿತಾ ಮ್ಹಣ್ತಾನಾ ಕಶೆಂ ವಿಸ್ರೊಂ ಮೌರಿಸ್ ಶಾಂತಿಪುರಾಕ್? ಜೊ ಮ್ಹಜಾ ಕುಡಾಚೊ ಸಾಂಗಾತಿ ಜಾವ್ನ್ ದೋನ್ ಅಡೇಜ್ ವರ್ಸಾಂ ಮ್ಹಜೆಸವೆಂ ಜಿಯೆಲಾ. ತಶೆಂಚ್ ಆಂಡ್ರು ಎಲ್ ಡಿ’ಕುನ್ಹಾ - ಜೊ ಮ್ಹಜಾ ಕಾಳ್ಜಾಕ್ ಭೋವ್ ಲಾಗ್ಸಿಲೊ, ಕಶೆಂ ವಿಸ್ರೊಂ ಮೆಲ್ವಿನ್ ರೊಡ್ರಿಗಸಾಕ್. ಭೋವ್ಶಾ ತೊ ಜರ್ ಮ್ಹಕಾ ಮೆಳೊಂಕ್ ನಾತ್ಲ್ಲೊ ತರ್ ಮ್ಹಜಾನ್ ಕವಿತಾ ಉದೆತಿಂತ್ ನಾಂತ್. ಉದೆಲಿಂ ತರ್ಯೀ
’ನಾಂವ್ ತಾಚೆಂ ಜಿಲ್ಲಿ,
ಭಾವ್ ತಾಚೊ ವಲ್ಲಿ,
ಜಿಲ್ಲಿ ಆನಿಂ ವಲ್ಲಿ ಮೆಳೊನ್
ವಿಂಚುಂಕ್ ಲಾಗ್ಲಿಂ ಜಲ್ಲಿ’
ಅಸಲಿಂ ಕವಿತಾಚ್ ಬರಯ್ತೊಂ ಭೋವ್ಶಾ. ತಿಂ ಸಗ್ಳ್ಯಾಂಕ್ ಸಮ್ಜಾತಾತ್. ತಾಣೆಂಚ್ ಮ್ಹಾಕಾ ಕವಿತಾವಾಟೆಚಿ ನೀಜ್ ಝಳಕ್ ದಿಲ್ಲಿ ತಶೆಂಚ್ ಜವಾಬ್ಧಾರೆಚೆಂ ವ್ಹೊಜೆಂಯ್. ಪುಣ್ ತೆಂ ವ್ಹೊಜೆಂ ಅಜೂನ್ ಪರ್ಯಾಂತ್ ಮಾಯಾಮೊಗಾನ್ ವ್ಹಾವವ್ನ್ ಆಯ್ಲಾಂ. ಹಾಂವ್ ಜಾಣಾಂ ಜೆದ್ನಾಂ ತೆಂ ವ್ಹೊಜೆಂ ಮ್ಹಜಾ ಖಾಂದ್ಯಾಚೆಂ ದೆಂವಯ್ಲೆಂ ತೆದ್ನಾಂ ಮ್ಹಜಾ ಕವಿತಾಚಿ ಝರ್ ಸುಕ್ತೆಲಿ ಮ್ಹಳ್ಳೆಂ.
ಕಶೆಂ ವಿಸ್ರೊಂ ಎಚ್ಚೆಮಾಕ್ ಜೊ ಕಿತೆಂಚ್ ಉಲಯ್ನಾಸ್ತಾಂಚ್ ಸಗ್ಳೆಂ ಸಾಂಗ್ತಾ.
ತಶೆಂಚ್ ಆನ್ಸಿ ಪಾಲಡ್ಕಾ - ಜಾಣೆಂ ಮ್ಹಾಕಾ ಕವಿತಾ ಬರಂವ್ಚಾಕ್ ಎಕಾ ದಾಕ್ಡ್ಯಾಧಿಂ ಮ್ಹಾಕಾ ಪಯ್ಲೆಂ ಶರ್ತ್ ದಿಲ್ಲ್ಯಾಕ್, ಆನಿಂ ಆಯ್ಲೆವಾರ್ಚಾ ದಿಸಾಂನಿ ಉದೆಲ್ಲೆ ಕಾವ್ಯಾಳ್ ಕೊಂಬ್ಲೆ ರೋಬರ್ಟ್ ಫೆರ್ನಾಂಡಿಸ್, ಆರ್ಥರ್ ಪಿರೇರ್, ದಿನೇಶ್ ಕೊರೆಯಾ, ವಿನ್ಸಿ ಪಿಂಟೊ, ಸುನಿಲ್ ಫೆರ್ನಾಂಡಿಸ್, ಮೆಲ್ವಿನ್ ಜೆ. ವಾಸ್, ಜೋನ್ ಕೊರೆಯಾ ಆನಿಂ ಹೆರಾಂಕ್.
ಮ್ಹಜಿಂ ಮುಖ್ಲಿಂ ಯೋಜನಾಂ:
ಜಾಯ್ತಿಂ ಆಸಾತ್, ತಿಂ ಹಾಂವ್ ಎಕಾ ಮಿಸ್ತೆರಾ ಪರಿಂ ದವ್ರುಂಕ್ ಆಶೆತಾಂ, ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಪರ್ದೆಸಿ ಗಾಂವಾಂತ್ ಮ್ಹಜೆಂ ಫಾಲೆಂ ಕಸಲೆಂ ತೆಂ ಹಾಂವ್ ನೆಣಾಂ. ತ್ಯಾ ಶಿವಾಯ್ ಏಕ್ ಪಾವ್ಟಿಂ ಹೊ ಗಾಂವ್ ಸೊಡ್ಲೊ ತರ್ ಆಜ್ ಮ್ಹಜಿ ವ್ಹಡ್ವಿಕ್ ಗಾಂವ್ಚಾಂಕ್ ಸೊಡ್, ಮ್ಹಜಾ ಘರ್ಚಾ ಸುಣ್ಯಾನ್ ಸಯ್ತ್ ಶಿಮ್ಟಿ ಹಾಲಂವ್ಕ್ ಹಾಂವ್ ಆಶೆನಾ ದೆಕುನ್ ಹಾಂವ್ ಹ್ಯಾ ಗಾಂವಾಂತ್ ಆಸ್ತಾಂ ಪರ್ಯಾಂತ್ ಮ್ಹಜಾ ಚಿಂತ್ಪಾನ್ ಕಿತೆಂ ಹೆರಾಂಕ್ ಉಪ್ಕಾರ್ಚೆಂ ಕರುಂಕ್ ಸಾಧ್ಯ್ ಆಸಾಗೀ ತೆಂ ಜರೂರ್ ಕರ್ತಾಂ.
ಹಾಂವ್ ಪಾರಂಪರಿಕ್ ಚಿಂತ್ಪಾಕ್ ಮಾತ್ರ್ ನ್ಹಯ್ - ನವೆಸಾಂವ್ಯ್ ಆಶೆತಾಂ. ಆಮಿಂ ಬರವ್ಪ್ಯಾಂನಿ ಕೆದಿಂಕ್ಚ್ ರಾವ್ಲ್ಲ್ಯಾ ಉದ್ಕಾಪರಿಂ ಅಸಾನಾಯೆ, ಪಾರಂಪರಿಕ್ ಚಿಂತ್ಪಾನ್ ಜರ್ ಆಮಿಂ ’ಮಾಂಡ್ ಕುರ್ಪೊಣ್’ ಮ್ಹಣ್ ಬೊಸ್ಲ್ಯಾಂವ್, ಆನಿಂ ಕವಿ ಮ್ಹಳ್ಯಾರ್ ದೆ|ಚಾ.ಫ್ರಾ.ದೆ’ಕೋಸ್ತಾ ಮಾತ್ರ್ ಯಾ ದೆ|ಲುವಿಸ್ ಮಸ್ಕರೇನ್ಹಸ್ ಮಾತ್ರ್ ಮ್ಹಳ್ಳೆಂ ಪಿಶೆಂ ಚಿಂತಾಪ್ ಸೊಡ್ನ್ - ಆಯ್ಚಾ ಕಾಳಾರ್ ಕವಿತಾಶೆತಾಂತ್ ಜಾಲ್ಲಿ/ಜಾವ್ನಾಸ್ಚಿ ಬದ್ಲಾವಣ್ ಪಳೆಂವ್ಚೆ ತಸಲೊಂ. ಕವಿತಾ ಬರಯಿಲ್ಲೆ ಸರ್ವ್ ಕವಿ ಜಾಯ್ನಾಂತ್ - ಮ್ಹಜಾ ಚಿಂತ್ಪಾಪ್ರಕಾರ್ ದೋನ್ ಪ್ರಕಾರಾಚೆ ಕವಿ ಆಸೊಂಕ್ ಸಾಧ್ಯ್ ಆಸಾ; ಏಕ್ ಉಂಚ್ಲೊ ಕವಿ - ಜೊ ಅಪ್ಲ್ಯಾ ಕವಿತಾಚಾ ಥೊಡ್ಯಾಚ್ ಸಬ್ಧಾಂನಿ ಜಾಯ್ತೆ ವಿಚಾರ್ ಉಭ್ಜಾಶೆಂ ಕರ್ತಾ, ಆನಿ ದುಸ್ರೊ ಲೊಕಾಮೊಗಾಳ್ - ಜೊ ಫಕತ್ತ್ ಸಂಸಾರಾಕ್ ಸಮ್ಜೊಂವ್ಚೆಪರಿಂ ಬರಯ್ತಾ - ಲಾಂಬಾಯೆಕ್.
ಉಂಚ್ಲ್ಯಾ ವರ್ಗಾಚೆ ಕವಿ ಲೊಕಾಮೊಗಾಳ್ ಆಸಾಜಯ್ಚ್ ಮ್ಹಣ್ ನಾ. ಆನಿಂ ಲೊಕಾಮೊಗಾಳ್ ಕವಿ ಉಂಚ್ಲೆ ಆಸಾಜಯ್ಚ್ ಮ್ಹಣ್ಯೀ ನಾ. ಕೊಂಕ್ಣೆಂತ್ ಭೋವ್ ಥೋಡೆ ಕವಿ ಉಂಚ್ಲೆ ಕವಿಯ್ ಆನಿಂ ಲೊಕಾಮೊಗಾಳ್ ಕವಿಯ್ ಜಾವ್ನಾಸಾತ್ - ದಾಖ್ಲೊ ದೆ|ಚಾ.ಫ್ರಾ ದೆ’ಕೋಸ್ತಾ, ದೆ|ಲುವಿಸ್ ಮಸ್ಕರೇನ್ಹಸ್, ಸಿಜ್ಯೆಸ್ ತಾಕೊಡೆ ತಸಲೆ..
ಕವಿತಾಂಕ್ ಅಮ್ಕೆಂಚ್ ಮ್ಹಳ್ಳೆಂ ರೂಪ್ ನಾ, ಆಸಾಜಯ್ ಮ್ಹಣ್ಯೀ ನಾ. ಕವಿ ಏಕ್ ಅಸಲೊ ವೆಕ್ತಿ, ಜೊ ಪಯ್ಲೆಂ ಏಕ್ ಚಿಂತ್ಪಿ ಜರೂರ್ ಆನಿಂ ವಾಚ್ಪಿ; ಉಪ್ರಾಂತ್ ಕವಿ ಜಾವ್ನಾಸ್ತಾ. ದೆಕುನ್ ಕಸಲೀಯ್ ನವಿ ವಾಟ್ ತುಮಿಂ ವಿಂಚ್ತಾತ್ ತರ್ ಸುಲಭಾಯೆಚಿ ವಾಟ್ ವಿಂಚಿನಾಕಾತ್. ಮಿನತ್ ಕರಾ ಆನಿಂ ತುಮ್ಚಾ ಮಿನತೆಚೆರ್ ಮಾತ್ರ್ ಭರ್ವಸೊ ದವರಾ ಶಿವಾಯ್ ಹೆರಾಂಚಾ ಮಿನತೆಚೊ ಫಳ್ ಆಶೆನಾಕಾತ್. ಸುಲಭಾಯೆಚಾ ವಾಟೆರ್ ಮೆಳ್ಚಿಂ ಫುಲಾಂ ಕಾಟ್ ಫುಲಾಂ ಮಾತ್ರ್ - ಜಿಂ ಪಳೆಂವ್ಕ್ ಮಾತ್ರ್ ಸೊಭಿತ್ ದಿಸ್ಚಿಂ. ಪುಣ್ ಖರೊ ಸುವಾದ್ ಆಸ್ಚಿಂ ಫುಲಾಂ ತುಮ್ಕಾಂ ಕಾಂಟ್ಯಾಂನಿ ಭರ್ಲೆಲ್ಯಾ ಝಡಾಚೆರ್ ಮಾತ್ರ್ ಮೆಳ್ತೆಲಿಂ.
ಇತ್ಲೆಂ ಸಯ್ರಣ್ ದೀವ್ನ್ ಮ್ಹಾಕಾ ಆಯ್ಕಾಲ್ಲ್ಯಾ ತುಮ್ಕಾಂ ಸರ್ವಾಂಕ್ ಮ್ಹಜಾ ಕಾಳ್ಜಾಥಾವ್ನ್ ಉಪ್ಕಾರ್ ಆಟಯ್ತಾಂ ಆನಿಂ ಮ್ಹಜಾ ಭಿತರ್ಲ್ಯಾ ಮ್ಹಜಾಚೊ ಉಲೊ ಚೀತ್ ದೀವ್ನ್ ಆಯ್ಕೊನ್ ಮ್ಹಾಕಾ ಮ್ಹಜಾ ಚುಕ್ಲ್ಲ್ಯಾ ಪಾವ್ಲಾಂಕ್ ಧಾಖವ್ನ್ ದೀಂವ್ಕ್ ಉಪ್ಕಾರ್ ಮಾಗ್ತಾಂ.
ಮಾಯಾಮೊಗಾಸವೆಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
[11 ಮಾರ್ಚ್ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
