ಕವಿತಾಶೆತಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

ಕವಿತಾಪಾಠ್ - 19

ವಾಸ್ತವ್ - ಆನ್ಸಿ ಪಾಲಡ್ಕಾ

ಆನ್ಸಿ ಪಾಲಡ್ಕಾ

ಕೊಂಕಣಾಂತ್ಲ್ಯಾ
 ಕೃಶಿ ತೋಟಾಂತ್
  ಕವಿತೆಕ್ ಸ್ಥಾನ್
   ಮೆಳನಾ
    ಭಾವನಾಂಚಿ
     ಝರ್‌ಚ್ ಆಸಾ
       ಕೊಣಾಯ್ ಗಾದ್ಯಾಂತ್
        ವ್ಹಾಳಾನಾ
ಬ್ರಹ್ಮಾಂಡಾಂತ್ಲೊ
 ಭೃಹ್ಮಾಂಚ್ ತರ್‌ಯಿ
  ಕೊಣಾಯಿ ತೊಂಡಾರ್
   ಘೊಳಾನಾ
    ಕವಿತೆಚೆಂ
     ಮೊಗಾ ಆಗ್ಟೆಂ
      ಸಾಹಿತ್ಯ್ ಶ್ಹೆತಾಂತ್
       ಝಳನಾ
ದಿಸಾ ದೀಸ್
 ಪೇಜ್ ನೀಸ್
  ದುರ್ಬಳ್ಕಾಯ್ ತಿ
   ಪೊಳನಾ
    ಕಿತೆಂಯ್ ಜಾಂವ್
     ಅಜೂನ್ ಕವಿಕ್
      ಲಿಖ್ಣಿ ಝರವ್ನ್
       ವೊಳಾನಾ.

ಕವಿತಾಪಾಠ್‌ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ

ಕೊಂಕ್ಣಿ ಕವಿತಾಶೆತಾಂತ್ ಕವಿಂಚೆಂ ವಾಸ್ತವ್! [ - ವಲ್ಲಿ ಕ್ವಾಡ್ರಸ್]

ಕೊಂಕ್ಣಿ ಕವಿತಾಂಚಿ ಇಲ್ಲಿ ತರ್‌ಯ್ ವಳೊಕ್ ಆಸ್ಚಾಂಕ್ ಕವಿ ಆನ್ಸಿ ಪಾಲಡ್ಕಾವಿಶಿಂ ಸಾಂಗ್ಚಿ ಗರ್ಜ್ ನಾ. ಕೊಂಕ್ಣೆಂತ್ ವೆವೆಗ್ಳ್ಯಾ ಪ್ರಕಾರಾಂತ್, ವೆವೆಗ್ಳ್ಯಾ ರಿತಿರ್ ವಾವ್ರ್ ಕರ್ನ್ ಆಸ್ಚೊ ಆನ್ಸಿ ಪಾಲಡ್ಕಾ ಆಯ್ಲೆವಾರ್ ಭುರ್ಗ್ಯಾಂಚಾ ಸಾಹಿತ್ಯಾತೆವ್ಶಿನ್ ಚಡ್ ಗಮನ್ ದಿತಾ ತರ್‌ಯೀ ಹಾಣೆಂ ವಾಚ್ಪ್ಯಾಂಚಾ ಮತಿಂತ್ ಸಭಾರ್ ತೇಂಪ್ ಪರ್‍ಯಾಂತ್ ಉಗ್ಡಾಸಾಕ್ ಉರ್ಚೆತಸಲ್ಯೊ ಸಭಾರ್ ಕವಿತಾ ಲಿಖ್ಲ್ಯಾತ್. ಭೋವ್ಶಾ ’ವಾಸ್ತವ್’ ಕವಿತಾ ತಾಂತ್ಲಿ ಏಕ್.

[ಶ್ಹರೊ: ಹೆಂ ಕವಿತಾ ಅಜಿಕ್ ಇಕ್ರಾ-ಭಾರಾ ವರ್ಸಾಧಿಂ ಬರಯಿಲ್ಲೆಂ ದೆಖುನ್ ಹ್ಯಾ ಕವಿಚೆಂ ತವಳ್ಚೆಂ ಚಿಂತಾಪ್ ಆನಿ ಆತಾಂಚೆಂ ಚಿಂತಾಪ್ ಏಕ್‌ಚ್ ಆಸಾಜಯ್ ಮ್ಹಣ್ ನಾ. ತವಳ್ಚಿ ಪರಿಗತ್ (ಸಾಮಾಜಿಕ್ ವಾ ಕೊಂಕ್ಣೆಚಿ) ಹಾಂಚೆಮಧೆಂ ಜಾಯ್ತಿ ಬದ್ಲಾವಣ್ ಜಾಲ್ಯಾ. ತ್ಯಾ ವೆಳಾರ್ ನಾತ್‌ಲ್ಲೆಂ ಕೊಂಕ್ಣಿ ಅಂತರ್‌ಜಾಳ್ ಸಾಹಿತ್ಯ್ ಆಜ್ ಭರ್ಪೂರ್ ಮಾಪಾನ್ ಆಸಾ. ಕವಿತಾಂಚೆರ್ ವೆವೆಗ್ಳ್ಯಾ ರಿತಿರ್ ಅಧ್ಯಯನ್ ಚಲ್ತಾ. ಕವಿತಾಂಕ್ ಸಭಾರ್ ಸಮ್ಜೊಂಕ್ ಲಾಗ್ಲ್ಯಾತ್. ಹಾಚಿ ಫುಡಾರ್ ಫಕತ್ತ್ ವೇಳ್ ಸಾಂಗ್ತಲೊ ತರ್‌ಯೀ ಸದ್ದ್ಯಾಕ್ ಹೆಂ ಖಂಡಿತ್ ಗರ್ಜೆಚೆಂಚ್.]

ಹೆಂ ಕವಿತಾ ತಾಣೆಂ ಅಜೀಕ್ ಇಕ್ರಾ ವರ್ಸಾಧಿಂ ಬರಯಿಲ್ಲೆಂ ದೆಖುನ್ ತ್ಯಾ ಕಾಳಾಚಾ ತಶೆಂಚ್ ಆತಾಂಚಾ ’ವಾಸ್ತವಾ’ ಮಧ್ಲೊ ಫರಕ್ ಸಮ್ಜೊಂಚಿ ಗರ್ಜ್ ಮ್ಹಣ್ ಮ್ಹಾಕಾ ಭಗ್ತಾ. ಹಾಚಿ ಸುರ್‍ವಾತ್ ಜಾವ್ನ್ ಅಜೀಕ್ ಚಡುಣೆಂ ಇಕ್ರಾ ವರ್ಸಾಧಿಂಚಿ ಪರಿಗತ್ ಕವಿತೆಂತ್ ಕವಿನ್ ವರ್ಣಿಲ್ಲೆಪರಿಂ ಸಮ್ಜವ್ಯಾಂ;

’ಕೊಂಕಣಾಂತ್ಲ್ಯಾ
ಕೃಶಿ ತೋಟಾಂತ್
ಕವಿತೆಕ್ ಸ್ಥಾನ್
ಮೆಳನಾ
ಭಾವನಾಂಚಿ
ಝರ್‌ಚ್ ಆಸಾ
ಕೊಣಾಯ್ ಗಾದ್ಯಾಂತ್
ವ್ಹಾಳಾನಾ’

ಕವಿ ಪಯ್ಲ್ಯಾ ಪಂಗ್ತೆರ್‌ಚ್ ಅಪ್ಲೆಂ ನಿರಾಸಿ ಫಯ್ಸಲ್ ದಿತಾ ಆನಿ ಅಡ್ಹೂಕ್ ಸತಾಕ್ ಉಗ್ಡಾಪೆಂ ಕರ್ತಾ. ಹ್ಯಾ ಪಂಗ್ತೆರ್ ಕಾಂಯ್ ವಿಶೇಸ್ ಇಮಾಜ್ಯೊ ನಾಂತ್ ದೆಖುನ್ ಸಾದ್ಯಾ ವಾಚ್ಪ್ಯಾಂಕ್ ಹಿ ಕವಿತಾ ಸಮ್ಜೊಂಕ್ ಚಡ್ ತ್ರಾಸ್ ನಾಂತ್. ಕೊಂಕ್ಣಿ ಸಾಹಿತ್ಯಾಂತ್ ಕವಿತಾ ಜಾವ್ಯೆತ್ ಜಾಲ್ಲೆಂ ಭರ್ಪೂರ್ ಸಾಹಿತ್ಯ್ ಆಸಾ ತರ್‌ಯ್ ಹಾಂಗಾಸರ್ ತಾಕಾ ಸ್ಥಾನ್ ನಾ, ಮೋಲ್ ನಾ ಮ್ಹಳ್ಳೆಂ ಚಿಂತಾಪ್ ಕವಿ ಹಾಂಗಾಸರ್ ಉಚಾರ್ತಾ. ಹೆಂ ಸತ್‌ಯೀ ಜಾವ್ನಾಸಾ. ಹಾಚಿಂ ಕಾರಾಣಾಂ ಉಸ್ತುಂಕ್ ಚಡ್ ತ್ರಾಸ್ ನಾಂತ್. ಹಿ ಗರ್ಜ್ ಮ್ಹಣ್ ತೆದೊಳ್ ಪರ್‍ಯಾಂತ್ ಕೊಣಾಯ್ಕ್‌ಯೀ ಸಮ್ಜಾಲ್ಲೆಂ ಸಯ್ತ್ ನಾ.

ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಜೆದ್ನಾಂ ಚಾ.ಫ್ರಾ. ದೆ’ಕೋಸ್ತಾಕ್ ಮೆಳ್ಚೊ ಸುಯೋಗ್ ಮ್ಹಾಕಾ ಲಾಭ್‌ಲ್ಲೊ, ತೆದ್ನಾಂ ತಾಣೆಂ ತಾಚ್ಯಾ ಸಾಹಿತ್ಯಾಚ್ಯಾ ಸುರ್ವಾತೆವಿಶಿಂ, ಪ್ರತ್ಯೇಕ್ ಜಾವ್ನ್ ಕವಿತಾಂಚ್ಯಾ ಸುರ್ವಾತೆವಿಶಿಂ ಥೊಡೆಂ ಸಾಂಗ್‌ಲ್ಲೊ ಉಡಾಸ್ ಆಸಾ, ತಾಂತ್ಲೊಂ ಏಕ್ ವಿಶಯ್ ಜಾವ್ನಾಸಾ - ತಾಚೆಂ ಪಯ್ಲೆಂ ಕವಿತಾ, ಜೆಂ ಬೊಂಬೊಯ್ ರೇಡಿಯೊಚೆರ್ ಪ್ರಚಾರ್ ಜಾಲ್ಲೆಂ, ತೆಂ ಗೊಂಯ್ಕಾರ್ ಭಾವಾಂಕ್ ಖೂಬ್ ಆಂವಡ್ಲೆಂ ಕಂಯ್. ದೆಖುನ್ ಚಾ.ಫ್ರಾನ್ ತೆಂ ಕವಿತಾ ತ್ಯಾ ವೆಳಾರ್ ಫಾಮಾದ್ ಆಸ್ಚಾ ’ಪಯ್ಣಾರಿ’ ಪತ್ರಾಕ್ ದಿಲೆಂ ಕಂಯ್. ಪುಣ್ ವಿಪರ್‍ಯಾಸ್ ಮ್ಹಳ್ಯಾರ್ ’ಆಮ್ಚೊ ವಾಚ್ಪಿ ಕವಿತಾ ಖಾಯ್ಸ್ ಕರಿನಾ’ ಮ್ಹಳ್ಳೆಂ ಉತಾರ್ ತ್ಯಾ ವೆಳಾಚಾ ಸಂಪಾದಕಾನ್ (ತಾಚೆಂ ನಾಂವ್ ಗರ್ಜೆಚೆಂ ನ್ಹಂಯ್) ಉಚಾರ್ಲೆಂ ಕಂಯ್. ಕಾನಡಿ ಲಿಪಿಯೆಂತ್ಲ್ಯಾ ಕೊಂಕ್ಣೆಂತ್ ಆಸ್ಚಾ ಕವಿತಾಂನಿ ಚಾ.ಫ್ರಾ.ದೆ’ಕೋಸ್ತಾಕ್ ಜರ್ ಹೆಂ ಆಯ್ಕೊಂಕ್ ಮೆಳ್ಳೆಂ, ತರ್ ಬಾಕಿಚಿಂ ಸರ್ವಾಂ ಬಿಂಡಿಸೊಲಾಂಚ್ ನ್ಹಂಯ್‌ಗಿ? ಆನಿ ಅಜ್ಯಾಪ್ ಖಂಯ್ಚೆಂಗೀ ಮ್ಹಳ್ಯಾರ್ ತೆಂ ಉತಾರ್ ಸಾಂಗ್‌ಲ್ಲೊ ಸಯ್ತ್ ಏಕ್ ಫಾಮಾದ್ ಕೊಂಕ್ಣಿ ಬರವ್ಪಿ.

ಹೆಂಚ್ ಪಾರಂಪರಿಕ್ ಚಿಂತಾಪ್ ಮುಖಾರ್ ಗೆಲೆಂ, ವಾಚ್ಪ್ಯಾಂಕ್ ಕಿತೆಂ ಪಸಂದ್ ತೆಂಚ್ ಸಂಪಾದಕಾಂನಿ ದೀಂವ್ಕ್ ಸುರು ಕೆಲೆಂ - ತಿಂಚ್ ಸವಾಲಾಂ ಜಾಪಿ, ತಿಂಚ್ ದೊಡ್ಯಾ ಅರ್ಥಾಚಿಂ ವಿಡಂಬನಾಂ, ಆನಿ ತ್ಯೊಚ್ ಪೊಟ್ಟು ಕಾಣ್ಯೊ - ಶಿವಾಯ್ ಹ್ಯಾವಿಶಿಂ ವಿಚಾರ್‌ಮಂಥನ್ ಜಾಲೆಂನಾ. ಕೊಂಕ್ಣೆಚಾ ವಾಚ್ಪ್ಯಾಂಕ್ ಬಡ್ಡ್ ತಕ್ಲೆಚೆ ಮ್ಹಳ್ಳ್ಯಾ ಲೆಕಾರ್ ಕಾಡ್ಲೆಂ. ಹಾಚೊ ಪರಿಣಾಮ್ ಜಾವ್ನ್ ದಿಸಾನ್ ದೀಸ್ ಕೊಂಕ್ಣಿ ವಾಚ್ಪಿ ಉಣೆ ಜಾಯಿತ್ತ್ ಆಯ್ಲೆ ಆನಿ ಹೆರ್ ಭಾಸಾಂಚೆಂ ಸಾಹಿತ್ಯ್ ವಾಚುಂಕ್/ರಚುಂಕ್ ಲಾಗ್ಲೆ. ಹಾಂಗಾಸರ್ ಥೊಡ್ಯಾ ಸಂಪಾದಕಾಂಚಿ ಬೇಜವಾಬ್ಧಾರಿ ಸಯ್ತ್ ಕವಿತಾಶೆತಾಕ್ ಪ್ರೇರಕ್ ಜಾಯ್ನಾಸ್ತಾಂ, ಸಾಹಿತ್ಯ್ ಮ್ಹಳ್ಯಾರ್ ಫಕತ್ತ್ ಕಾಣ್ಯೊ ಆನಿ ಕಾದಂಬರಿ ಮಾತ್ರ್ ಮ್ಹಳ್ಳೆಂ ಚಿಂತಾಪ್ ಅಪ್ಶೆಂಚ್ ಉಭ್ಜಾಲೆಂ.

ಆತಾಂ ಫುಡ್ಲಿ ಪಂಗತ್ ಪಳೆಯಾಂ;

’ಬ್ರಹ್ಮಾಂಡಾಂತ್ಲೊ
ಭೃಹ್ಮಾಂಚ್ ತರ್‌ಯಿ
ಕೊಣಾಯಿ ತೊಂಡಾರ್
ಘೊಳಾನಾ
ಕವಿತೆಚೆಂ
ಮೊಗಾ ಆಗ್ಟೆಂ
ಸಾಹಿತ್ಯ್ ಶ್ಹೆತಾಂತ್
ಝಳಾನಾ’

ಕವಿತಾಂಕ್ ಸಮ್ಜತೆಲಿಂ ನಾ ಆಸ್ಚ್ಯಾ ಅಸಲ್ಯಾ ಸಂದರ್ಭಾರ್ ಕವಿತೆಚೆಂ ಮೊಗಾ ಆಗ್ಟೆಂ ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ಝಳ್ಚೆಂ ತರ್‌ಯ್ ಕಶೆಂ?

ಹಿಂದೆಂತ್ ಏಕ್ ಬರಿ ಸಾಂಗ್ಣಿ ಆಸಾ; ’ದುನಿಯಾ ಜುಕ್ತಿ ಹೆ, ಜುಕಾನೆವಾಲಾ ಚಾಹಿಯೆ’ (ಸಂಸಾರ್ ಬಾಗ್ವತಾ ಪುಣ್ ಬಾಗ್ಸಿತಲೊ ಜಾಯ್ಜಯ್) - ಆಮ್ಚಾ ವಾಚ್ಪ್ಯಾಂಕ್ ಕವಿತಾ ಸಮ್ಜತಾತ್, ಪುಣ್ ಸಮ್ಜಾಯ್ತೆಲೆ ಜಾಯ್ಜಯ್. ಪುಣ್ ಜೆದ್ನಾಂ ಅರ್ಧೆ ಕುಡ್ಡೆ ಸಂಪಾದಕ್ ಜಾತಿತ್ ತರ್ ತೆ ಕಶೆಂ ಹೆರಾಂಕ್ ದೀಶ್ಟ್ ದೀಂವ್ಕ್ ಸಕ್ತೆಲೆ? ಕಾನಡಿ ಲಿಪಿಯೆಂತ್ಲ್ಯಾ ಕೊಂಕ್ಣೆಂತ್ಲೆಂ ಪಯ್ಲೆಂ ಪತ್ರ್ ’ಕೊಂಕಣ್ ದಿರ್‍ವೆಂ’ ಹಾಚೊ ಸಂಪಾದಕ್ ಜಾವ್ನಾಸ್‌ಲ್ಲೊ ಲುವಿಸ್ ಮಸ್ಕರೇಞ್. ಹಾಚೊ ಪರಿಣಾಮ್ ಪಳೆಯಾ - ’ಅಬ್ರಾಂವ್ಚೆಂ ಯಜ್ನ್‌ದಾನ್’ ತಸಲೊ ಕಾವ್ಯ ನಾಟಕ್ ಘಡೊನ್ ಆಯ್ಲೊ, ಜೊ ಅಜೂನ್ ಪರ್‍ಯಾಂತ್ ಕೊಂಕ್ಣೆಂತ್ಲ್ಯಾ ಶ್ರೇಷ್ಟ್ ಕೃತಿಯಾಂಪಯ್ಕಿ ಏಕ್. ಪುಣ್ ಉಪ್ರಾಂತ್ ಥೊಡ್ಯಾಂನಿ ಚುಟುಕಾಂ, ಗಿತಾಂ, ಪದಾಂ ಬರಯ್ಲಿಂ ತರ್‌ಯೀ ಗಮನಾರ್ಹ್ ರಿತಿರ್ ಕಾವ್ಯಾಂಶ್ ವಾಡ್‌ಲ್ಲೆಂ ಜಾವ್ನಾಸಾ ಚಾ.ಫ್ರಾ.ಚ್ಯಾ ಕಾಳಾರ್. ತಾಣೆಂ ಪರ್ಶಿಯನ್, ಮರಾಠಿ, ಫ್ರೆಂಚ್, ಹಿಂದಿ ಭಾಸಾಂನಿ ಆಸ್ಚೆ ಜಾಯ್ತೆ ನಾಟಕ್, ಕವಿತಾ ವಾಚುನ್ ಕೊಂಕ್ಣಿ ಸಾಹಿತ್ಯಾಕ್ ಏಕ್ ನವೊ ಜಾಗೊ ಕರುನ್ ದಿಲೊ ಮ್ಹಣ್ಚ್ಯಾಕ್ ತಾಚೆ ಎಕೇಕ್ ನಾಟಕ್ ಗೊವಾಯ್ ದಿತಾತ್. ತಾಚ್ಯಾ ನಾಟಕಾಂನಿ ಸಯ್ತ್ ಸಂಭಾಶಣಾರುಪಾರ್ ಆಸ್ಚಿಂ ಕವಿತಾ - ಖರೆಂಚ್ ಜಾವ್ನ್ ಸಾಹಿತ್ಯ್ ಮೊಗಿಂಕ್ ಪಿಶ್ಯಾರ್ ಘಾಲ್ಚಿಂ ಜಾವ್ನಾಸಾತ್.

ಪುಣ್ ಚಾ.ಫ್ರಾ ಆಧ್ಲ್ಯಾ ಪಿಳ್ಗೆಚೊ, ಉಪ್ರಾಂತ್ಲಿ ಪಿಳ್ಗಿ ಕಿತ್ಲಿ ತಯಾರ್ ಆಸ್‌ಲ್ಲಿ ಹೆಂ ಮಿಸಾಂವ್ ಮುಖಾರುನ್ ವ್ಹರುಂಕ್? ಸಭಾರ್ ರಿತಿಚಿಂ ಪ್ರೇತನಾಂ, ನವೆಸಾಂವಾಂ ಸುರು ಜಾಲಿಂ - ಹಾಂತುಂ ಹೆರಾಂಸವೆಂ ಮೆಲ್ವಿನ್ ರೊಡ್ರಿಗಸಾಚಿ ದೇಣ್ಗಿ ಉಲ್ಲೇಕ್ ಕರ್‍ಯೆತಾ. ಪುಣ್ ಹಾಚ್ಯಾಧಿಂ ಕೊಂಕ್ಣಿ ಸಾಹಿತ್ಯಾಕ್ ನವಿ ದಿಶಾ, ನವಿ ಉಂಚಾಯ್, ನವಿ ಗುಂಡಾಯ್ ದಿಂವ್ಚ್ಯಾಕ್ ಮಾ|ದೊ|ವಿಲ್ಲಿ ಡಿ’ಸಿಲ್ವಾನ್ ದಿಲ್ಲಿ ದೇಣ್ಗಿ ಕೊಣೆಂಚ್ ವಿಸ್ರೊಂಕ್ ಅಸಾಧ್ಯ್ ಜಾಲ್ಲೆತಸಲಿ. ಕೊಂಕ್ಣೆಂತ್ ಕಿತ್ಲಿಂಯ್ ಪ್ರಕಾಶನಾಂ ಆಸೊಂದಿ - ಪುಣ್ ತಾಣೆಂ ಸುರು ಕೆಲ್ಲ್ಯಾ ’ಪ್ರಗತಿ ಪ್ರಕಾಶನ್’ ತಸಲ್ಯಾ ಮಟ್ಟಾಚಿಂ ಪ್ರಕಾಶನಾಂ ಆಜ್‌ಪರ್‍ಯಾಂತ್ ನಾಂತ್ ಮ್ಹಳ್ಳೆ ಮ್ಹಜೆ ಖಾಸ್ಗಿ ಪಾತ್ಯೆಣಿ.

ಜೆದ್ನಾಂ ಕವಿತಾಚಿ ಮೂರ್ ನಾಸ್ಚೆ ಸಂಪಾದಕ್ ಜಾತಿತ್ ತರ್, ತಾಂಕಾಂಚ್ ಕವಿತಾ ಸಮ್ಜಾನಾ ತರ್, ತಾಣಿಂ ಲೊಕಾಂಕ್ ಸಮ್ಜಾಂವ್ಚೆಂ ಪ್ರೇತನ್ ಕರ್ಚೆಂ ತರ್‌ಯೀ ಕಶೆಂ?

ಆತಾಂ ಮ್ಹಾಕಾ ದಾಕೊ ಖಾಂವ್ಕ್ ಉಡಿ ಮಾರ್ಚ್ಯಾ ಕೊಲ್ಯಾಚಿ ಕಾಣಿ ಉಡಾಸಾಕ್ ಯೆತಾ, ತೀನ್ ಪಾವ್ಟಿಂ ಉಡೊನ್ ದಾಕೊ ಖಾಂವ್ಕ್ ಸಲ್ವಾಲ್ಲೊ ಕೊಲೊ ಅಖ್ರೇಕ್ - ತ್ಯೊ ದಾಕೊ ಆಂಬೊಟ್ ಮ್ಹಣೊನ್ ಗೆಲೊ ಕಂಯ್. ಅಸಲಿಚ್ ಗತ್ ಸಭಾರ್ ಸಂಪಾದಕಾಂಚಿ. ಆಸೊಂದಿ! - ಕೊಲೊ ವರುಂ ತ್ಯಾ ದಾಕಾಂಕ್, ಆಮಿಂ ಪಾಟಿಂ ಕವಿತಾಪಾಠಾಕ್ ಯೆವ್ಯಾಂ;

ಆತಾಂ ಅಖ್ರೇಚ್ಯಾ ಪಂಗ್ತೆರ್ ಕವಿ ಭೋವ್ ನಿರ್ಣಾಯಕ್ ಫಯ್ಸಲ್ ದಿತಾ;

’ದಿಸಾ ದೀಸ್
ಪೇಜ್ ನೀಸ್
ದುರ್ಬಳ್ಕಾಯ್ ತಿ
ಪೊಳಾನಾ
ಕಿತೆಂಯ್ ಜಾಂವ್
ಅಜೂನ್ ಕವಿಕ್
ಲಿಖ್ಣಿ ಝರವ್ನ್
ವೊಳಾನಾ.’

ಹೆಂ ಕವಿತಾ ಎಕಾ ಅರ್ಥಾನ್ ಫಕತ್ತ್ ಸಾಂಗೊನ್ ವೆತಾ ಮ್ಹಣ್ ದಿಸೊಂಕ್ ಪುರೊ, ಪುಣ್ ಮಾತ್ಶೆಂ ಗುಂಡಾಯೆನ್ ಪಳೆಲೆಂ ತರ್, ಹ್ಯಾ ಕವಿತೆಂತ್ ಕವಿ ಸಲ್ವಾನಾ. ಇತ್ಲೆಂ ಸರ್ವ್ ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ಆಸಾ ಮ್ಹಳ್ಳೆಂ ಸಮ್ಜೊನ್‌ಯೀ, ತೊ ಅಜೂನ್ ಕವಿಂನಿ ಲಿಖ್ಣಿ ಝರಂವ್ಚಿ ರಾವಂವ್ಕ್ ನಾ ಮ್ಹಳ್ಳೆಂ ಸಾಂಗ್ತಾ. ಹಿಚ್ಚ್ ಕವಿತಾಚಿ ಸೊಭಾಯ್.

ಪುಣ್ ಹ್ಯಾ ಪಂಗ್ತೆಂತ್ ಅನ್ಯೇಕಾ ರಿತಿಚೆಂ ಚಿಂತಾಪ್‌ಯೀ ಆಸಾ - ದಿಸಾನ್ ದೀಸ್ ಪೇಜ್ ನಿಸ್, ದುರ್ಭಳ್ಕಾಯ್ ಪೊಳಾನಾ.. ಅಜೂನ್ ಕವಿಂಕ್ ಲಿಖ್ಣಿ ಝರಂವ್ಕ್ ವೊಳಾನಾ.. ಹಾಂಗಾಸರ್ ಜೆದ್ನಾಂ ಮನಿಸ್ ದುರ್ಬಳೊ ಆಸ್ತಾ, ತೆದ್ನಾಂ ಮಾತ್ರ್ ತೊ ಕಷ್ಟ್ ಸಮ್ಜೊಂಕ್ ಸಕ್ತಾ ಶಿವಾಯ್ ಗ್ರೇಸ್ತ್‌ಕಾಯೆಚಾ ಸಾಯೆಂತ್ ನ್ಹಂಯ್. ಹೆಂ ಚಿಂತಾಪ್‌ಯ್ ಹ್ಯಾ ಪಂಗ್ತೆರ್ ಕವಿನ್ ವ್ಹಾಳಂವ್ಚೆಂ ದಿಸೊನ್ ಯೆತಾ.

ಇತ್ಲೆಂ ಸರ್ವ್ ಕವಿನ್ ಸಾಂಗ್ಲಾಂ ಆತಾಂ ಆಯ್ಲೆವಾರ್ಚಿ ಕವಿತಾಚಿ ಪರಿಗತ್ ಪಳೆಯಾಂಗಿ?

ಅಜೀಕ್ ಚಡುಣೆಂ ವೀಸ್ ವರ್ಸಾಧಿಂ ಚಾ.ಫ್ರಾ.ದೆ’ಕೋಸ್ತಾ, ಮೆಲ್ವಿನ್ ರೊಡ್ರಿಗಸ್ ಹಾಣಿಂ ’ಜಾಗೆ ಕವಿ’ ಪಂಗಡ್ ಭಾಂಧುನ್, ಫಿರ್ಗಜೆವಾರ್ ಭಂವಾಡೊ ಕಾಡುಂಕ್ ಸುರು ಕೆಲೆಂ. ತ್ಯಾ ವೆಳಾರ್ ಮ್ಹಾಕಾಯ್ ಕವಿತಾಚೆರ್ ಅಲರ್ಜಿ ಆಸ್‌ಲ್ಲಿ. ತಾಚೆಂ ಕಾರಾಣ್‌ಯ್ ಭೋವ್ ಸಂಪೆಂ. ಹಾವೆಂ ಕಾಣ್ಯೊ-ಕವಿತಾ ಬರಂವ್ಚಿ ಸುರ್ವಾತ್ ಕೆಲ್ಲಿ ತ್ಯಾಚ್ ವೆಳಾರ್. ಪುಣ್ ಮ್ಹಜ್ಯೊ ಕಾಣ್ಯೊ ಪತ್ರಾಂನಿ ಖಾಯ್ಸ್ ಕರ್ನ್ ಪರ್ಗಟುಂಕ್ ಧರ್ಲ್ಯೊ ಆನಿ ಮ್ಹಜಿಂ ಕವಿತಾ ಕೊನ್ಶ್ಯಾಂತ್ ಪಡ್ಲ್ಯೊ. ತಾಂತುಂ ಶಿಕೊಂಕ್ ಮ್ಹಾಕಾ ಆವ್ಕಾಸ್‌ಯ್ ಲಾಭ್ಲೊನಾ, ಕೊಣೆಂ ಪುನೆಗೆಲ್ಲ್ಯಾನ್ ತೊ ಆವ್ಕಾಸ್‌ಯ್ ದಿಲ್ಲೊಯ್‌ನಾ - ದೆವಾಕ್ ಅರ್ಗಾಂ.

ಹ್ಯಾ ಸಂದರ್ಭಾರ್ ನವೆ ನವೆ ಕವಿ ಉದೆಲೆ ಮಾತ್ರ್ ನ್ಹಂಯ್ - ಕವಿತಾಶೆತಾಂತ್ ಥಂಯ್ ಹಾಂಗಾ ಭರ್‍ವಶ್ಯಾಚೆ ಬೊಂಗೆ ಫುಲೊಂಕ್ ಲಾಗ್ಲೆ; ಥೊಡ್ಯಾಂಚಿಂ ನಾಂವಾಂ ತರ್‌ಯ್ ಕಾಡ್ಚಿ ಗರ್ಜ್ ತರ್; ಮೆಲ್ವಿನ್ ರೊಡ್ರಿಗಸ್, ಜೊಸ್ಸಿ ಪಿಂಟೊ, ಹೆನ್ರಿ ಎಮ್ ಪೆರ್ನಾಲ್ (ಎಚ್ಚೆಮ್), ಮೌರಿಸ್ ಶಾಂತಿಪುರ್, ಫ್ರೆಡ್ ಕುಮಾರ್ ಕುಚ್ಚಿಕಾಡ್, ಕ್ಯಾಥರಿನ್ ರೊಡ್ರಿಗಸ್, ಆಂಡ್ರು ಎಲ್. ಡಿ’ಕುನ್ಹಾ, ಟೈಟಸ್ ತಾಕೊಡೆ, ವಿಲ್ಫ್ರೆಡ್ ಪಡೀಲ್ ಆನಿ ಹೆರ್ ಥೊಡೆ...

ಪುಣ್ ವೆಳಾ ಕಾಳಾತೆಕಿದ್ ಬದ್ಲಾವಣೆಂತ್ ಆಯ್ಚಾ ದಿಸಾ ಹಾಂತ್ಲ್ಯಾ ಥೊಡ್ಯಾಂನಿ ಕವಿತಾ ಬರಂವ್ಚಿಂ ಮೊಸ್ತ್ ಉಣಿಂ/ಭಂದ್ ಕೆಲ್ಯಾಂತ್. ತೆಂ ಕೊಣಾಕ್‌ಯ್ ಪಡೊನ್ ಗೆಲ್ಲೆಂಯ್ ದಿಸೊನ್ ಯೇನಾ.

ಆತಾಂಚಿ ಕವಿತಾಚಿ ಪರಿಗತ್ ಕಸಲಿಯ್ ಆಸೊಂದಿ, ಪುಣ್ ಕವಿತಾಂಕ್ ಪತ್ರಾಂನಿ ಆವ್ಕಾಸ್ ಭರ್ಪೂರ್ ಮೆಳ್ತಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಹಾಚಿಂ ಕಾರಾಣಾಂಯ್ ಭೋವ್ ಸಂಪಿಂ - ಕವಿತಾಕ್ ಸಮ್ಜಾಲ್ಲೆ, ಕವಿತಾಂಚೊ ಮೋಗ್-ಹುಸ್ಕೊ ಆಸ್ಚೆ ಸಂಪಾದಕ್ ದೆಖುನ್. ಮಟ್ವ್ಯಾನ್ ಸಾಂಗ್ಚೆಂ ತರ್;

ಮೌರಿಸ್ ಶಾಂತಿಪುರ್ - ಕಾಣಿಕ್ ಪತ್ರಾಚೊ ಸಂಪಾದಕ್ [ಕಾಣಿಕ್ ಪತ್ರಾಚೆರ್ ಸರಾಗ್ ರಿತಿನ್ ಕವಿತಾ ವ್ಹಾಳೊನ್ ಯೆತಾತ್]
ಎಲ್ಯೆರ್ ತಾಕೊಡೆ - ಮಿತ್ರ್ ಪತ್ರಾಚೊ ಸಂಪಾದಕ್ [ಮಿತ್ರಾಚೆರ್ ಕವಿತಾವೈಕುಂಠ್ ಆನಿ ಹೆರ್ ಅಂಕಣಾಂ ಪರ್ಗಟೊನ್ ಯೆತಾತ್]
ಪಂಚು ಬಂಟ್ವಾಳ್ - ಝೆಲೊ ಪತ್ರಾಚೊ ಸಂಪಾದಕ್ [ಝೆಲ್ಯಾಚೆರ್ ದೋನ್ ಪಾನಾಂ ಕವಿತಾಂಕ್ ಅಮಾನತ್ ಆಸಾತ್]
ಮೆಲ್ವಿನ್ ಪೆರ್ನಾಲ್ - ಆಮ್ಚೊ ಯುವಕ್ ಸಂಪಾದಕ್ [ಆಮ್ಚೊ ಯುವಕ್ ಪತ್ರಾಂತ್ ನವ್ಯಾಂಚಿ ತರ್‌ಯೀ ಬರಿಂ ಕವಿತಾ ಪರ್ಗಟೊನ್ ಯೆತಾತ್]

ಇತ್ಲೆಂಚ್ ನ್ಹಂಯ್ - ಅಂತರ್‌ಜಾಳಿಂನಿ ಸಯ್ತ್ ಕವಿತಾಂಕ್ ಭೋವ್ ಚಡ್ ಖಾಯ್ಸ್ ಆಸಾ, ವಾಚ್ಪಿಯ್ ದರಬಸ್ತ್ ಆಸಾತ್;

ಮೆಲ್ವಿನ್ ರೊಡ್ರಿಗಸ್ - ಕವಿತಾ.ಕೊಮ್ ಚೆರ್ ಕವಿತೆಚೆಂ ಮಿಸಾಂವ್ ಚಲವ್ನ್ ಆಸಾ. 
ಆಂಡ್ರು ಎಲ್. ಡಿ’ಕುನ್ಹಾ - ಮಾಯ್‌ಭಾಸ್.ಕೊಮ್ ಚೆರ್ ಕವಿತೆಚೆಂ ಅಂಕಣ್ ಚಲವ್ನ್ ಆಸಾ. 
ವಲ್ಲಿ ಕ್ವಾಡ್ರಸ್ - ದಾಯ್ಜ್.ಕೊಮ್‌ಧ್ವಾರಿಂ ಕವಿತಾಶೆತಾಂತ್ ವೆವೆಗ್ಳೆ ಪ್ರಯೋಗ್ ಕರುನ್ ಆಸಾ.

ಇತ್ಲೆಂಚ್ ನ್ಹಂಯ್, ಕವಿತಾಂಚೆ ಜಾಯ್ತೆ ಜಮೆ ಪರ್ಗಟೊನ್ ಯೇಂವ್ಕ್ ಲಾಗ್ಲ್ಯಾತ್. ಜಾಯ್ತ್ಯಾ ಕವಿಂನಿ ಬಂಧ್ ಕೆಲ್ಲಿ ಲಿಖ್ಣಿ ಪರತ್ ಝರಂವ್ಕ್ ಧರ್ಲ್ಯಾ. ಹೆಂ ಖರೆಂಚ್ ಸಂತೊಸಾಚೆಂ ತರ್‌ಯೀ ತೃಪ್ತೆಚೆಂ ಮ್ಹಣೊಂಕ್ ಜಾಯ್ನಾಂ. ತಶೆಂಚ್ ಸಭಾರ್ ನವೆ ನವೆ ಕವಿ ಉದೆಲ್ಯಾತ್. ಆನಿ ಖರೆಂಚ್ ಜಾವ್ನ್ ಹೆಂ ಇಕ್ರಾ ವರ್ಸಾಧ್ಲೆಂ ವಾಸ್ತವ್ ಆಯ್ಚಾ ಪರಿಗತೆಂತ್ ಆಸಾ ತಶೆಂ ಘೆಂವ್ಕ್ ತ್ರಾಸ್, ಪುಣ್ ಪುರ್ತೆಂ ನಿರಾಕರ್ಸುಂಕ್‌ಯ್ ಜಾಯ್ನಾಂ. ಇತ್ಲೆಂ ಸರ್ವ್ ಬದ್ಲಾಲಾಂ ಮ್ಹಣ್ ಹರ್ಧೆಂ ಪೆಟುನ್ ಸಾಂಗೊಂಕ್ ಆಮ್ಕಾಂ ಜಾಯ್ನಾ - ಏಕ್ ಅಪ್ವಾದ್ ಅಜೂನ್ ಆಸಾ;

ಆಯ್ಚಾ ಪರಿಗತೆಂತ್ ಕವಿತಾ ಬರಯ್ತೆಲೆ ಸಗ್ಳೆ ಕವಿತಾಚೆ ಮೋಗಿ ವಾ ಹುಸ್ಕೊ ಆಸ್ಚೆ ಮ್ಹಣೊಂಕ್ ಅಸಾಧ್ಯ್. ಆಯ್ಚಾ ಪರಿಗತೆಂತ್ ಲೇಕ್ ಕೆಲ್ಯಾರ್ ತಿನ್ಶ್ಯಾಂವಯ್ರ್ ಕವಿ ಆಸಾತ್ (ನವೆ-ಪರ್ನೆ ಧರ್ನ್). ಪುಣ್ ಕವಿತಾಂಚೆ ಬೂಕ್ ಕಾಡ್ಲ್ಯಾರ್ ಶೆಂಭೊರ್ ಬೂಕ್‌ಯೀ ವಿಖುನ್ ವಚಾನಾಂತ್. ಕವಿತಾಶೆತಾಂತ್ ಕಾಂಯ್ ನವೆ ಪ್ರಯೋಗ್ ಸುಫಳ್ ಜಾಯ್ಜಾಯ್, ಆನಿ ನವಿ ನವಿ ಕವಿತಾಪ್ರತಿಭಾ ವಾಡೊನ್ ಯೇಜಾಯ್ ತರ್ ಖಂಡಿತ್ ಜಾವ್ನ್ ಪಯ್ಲೆಂ ಕವಿಂನಿ ಹಿ ಜವಾಬ್ಧಾರಿ ಆಪ್ಲ್ಯಾ ಮಾತ್ಯಾರ್ ಘೆಂವ್ಚಿ ಭೋವ್ ಗರ್ಜ್ ಆಸಾ. ಖುದ್ದ್ ಕವಿ ಜಾವ್ನ್ ಹೆರಾಂಚಿಂ ಕವಿತಾ ಹಾಂವ್ ಕಿತ್ಲಿಂ ವಾಚ್ತಾಂ ಮ್ಹಳ್ಳೆಂ ಅಪ್ಲ್ಯಾ ಕೊಶೆಡ್ದಾಕ್ ಸವಾಲ್ ಕರಿಜಾಯ್. ಹರ್‍ಯೆಕ್ಲ್ಯಾನ್ ಹೆರಾಂಚೆ ಬೂಕ್ ಮೊಲಾಕ್ ಘೆವ್ನ್ ವಾಚುಂಕ್ ಧರ್ಲೆಂ ತರ್ - ತೆದ್ನಾಂ ಮಾತ್ರ್ ಕೊಂಕ್ಣಿ ಕವಿಂಚೆಂ ನಂದನ್ ಜಾಲೆಂ ಮ್ಹಣ್ ಅರ್ಥ್. ನಾತ್ಲ್ಯಾರ್ ಆಮಿಂ ವಾಟೆರ್ ರಾವೊನ್ ಕಿತ್ಲ್ಯೊ ತಾಳೊ ಪಿಂಜುನ್ ಬಾಬೊಟೊ ಘಾಲ್ಯೆತಾ - ಕೊಂಕ್ಣಿ ಕವಿತಾ ಶೆತಾಂತ್ ಸುಗ್ಗಿ ಮ್ಹಣ್. ವಾ ಕಸಲೆಯ್ ಸರ್ಕಸ್ ಕರ್‍ಯೆತಾ. ಪುಣ್ ತಿಂ ಸರ್ವ್ ವಾರ್‍ಯಾರ್ ರಾವ್ಳೆರಾಂ ಭಾಂದ್ಚಿಂ ಸಾಧನಾಂ ಶಿವಾಯ್ ಹಕೀಗತ್ ನ್ಹಂಯ್.

ದೇವ್ ಬರೆಂ ಕರುಂ,

ವಲ್ಲಿ ಕ್ವಾಡ್ರಸ್, ಅಜೆಕಾರ್

ಕವಿಚ್ಯಾ ಉತ್ರಾಂನಿ

ಮೊಗಾಳ್ ದಾಯ್ಜ್ ಕವಿಂಕ್ ಆನಿ ವಾಚ್ಪ್ಯಾಂಕ್,

ಆನ್ಸಿಚೆ ನಮಾನ್,

ಪಯ್ಲ್ಯಾ ಸುವಾತೆರ್ ಮ್ಹಜೆಂ ’ವಾಸ್ತವ್’ ಕವಿತೆಕ್ ತುಮಿ ಅಧ್ಯಯನಾಕ್ ಘೆತ್‌ಲ್ಲಿ ಗಜಾಲ್ ಭೋವ್ ಸಂತೊಸಾಚಿ. ತುಮಿ ದಿಲ್ಲ್ಯಾ ಹ್ಯಾ ಮಾನಾಕ್ ಹಾಂವ್ ಋಣಿ ಆಸಾಂ.

ಹೆಂ ಕವಿತಾ ಪಂದ್ರಾ ವರ್ಸಾಧಿಂ ಬರಯಿಲ್ಲೆಂ, ಆನಿ ಇಕ್ರಾ ವರ್ಸಾಧಿಂ ಥೊಡಿ ತಿದ್ವಣ್ ಕರ್ನ್ ದಿಲ್ಲೆಂ ಜಾವ್ನಾಸಾ. ಆಜ್ ಹ್ಯಾ ಕವಿತೆಕ್ ವಾಚ್ತಾನಾ ತಿ ಕವಿತಾ ಹಾಚ್ಯಾಕ್‌ಯೀ ಬರ್‍ಯಾನ್ ಬರವ್ಯೆತ್ ಮ್ಹಳ್ಳೆಂ ಚಿಂತಾಪ್ ಮ್ಹಜ್ಯಾ ಮತಿಂತ್ ಯೆತಾ. ತೆಂ ಬರೆಂಚ್ - ಕಿತ್ಯಾಕ್, ಹಿ ಜಾವ್ನಾಸಾ ಚಿಂತ್ಪಾಚಿ ವ್ಹಾಡಾವಳ್.

ತರ್‌ಯೀ ಮ್ಹಜ್ಯಾ ಕವಿತಾಂಚೆರ್ ಎಕೊಡೊ ನಿಯಾಳ್ ಕರುನ್, ಮ್ಹಜ್ಯಾ ಚಿಂತ್ಪಾಚೆರ್, ಮ್ಹಜ್ಯಾ ಕವಿತಾಂಚೆರ್ ಉಜ್ವಾಡ್ ಫಾಂಕವ್ನ್ ಮ್ಹಾಕಾ ಹುಮೆದ್ ದಿಲ್ಲ್ಯಾಕ್ ಉಪ್ಕಾರಿ ಮನಾನ್ ದೇವ್ ಬರೆಂ ಕರುಂ ಮ್ಹಣ್ತಾಂ,

ಮಾಯಾಮೊಗಾಸವೆಂ,

ಆನ್ಸಿ ಪಾಲಡ್ಕಾ

ಕವಿತಾಪಾಠ್ ಪಾನಾಕ್ 

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications