ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 30. ಸಲ್ವಣಿ
ರಿಚಾರ್ಡ್ ಕವ್ತಾರ್: ಸಾಹಿತ್ಯ್ ಕೊಣಾಕ್ ಹವ್ಯಾಸ್ ತರ್ ಕೊಣಾಕ್ ವೇಳ್ ಪಾಶಾರ್ ಕರ್ಚೆಂ ಮಾಧ್ಯಮ್ ಆನಿ ಕೊಣಾಕ್ ಸಾಹಿತ್ಯ್ ಭಕ್ತ್, ಪುಜಾ ಆನಿ ಸರ್ವಸ್ವ್. ಹ್ಯಾ ಕಾಣ್ಯೆಗಾರಾಕ್ ಹಾಂವ್ ಪಾಟ್ಲ್ಯಾ ಪಂದ್ರಾ ವರ್ಸಾಂ ಥಾವ್ನ್ ಭೋವ್ ಲಾಗ್ಸಿಲ್ಯಾನ್ ವಳ್ಕೊನ್ ಆಯ್ಲಾಂ, ಭೋವ್ ಖಾಲ್ತೊ, ಸಾದೊ ಆನಿ ಮಾಯ್ಪಾಸಿ ಜಿನೊಸಾಚೊ ತರ್ಯ್ ಸಾಹಿತ್ಯಾಚಿ ವೋಡ್ ಆನಿ ಮೋಗ್ ಅಜೂನ್ ತಾಚಾ ಕಾಳ್ಜಾಂತ್ ತಿತ್ಲೊಚ್ಚ್ ಆಸಾ ಜಿತ್ಲೊ ಪಂದ್ರಾ-ಸೊಳಾ ವರ್ಸಾಂಧಿಂ ಅಸ್ಲ್ಲೊ. ಕೊಂಕ್ಣೆಂತ್ ಪತ್ತೇದಾರಿ ಕಾಣ್ಯಾಂನಿ ಅಪ್ಲಿ ಅಸ್ಮಿತಾಯ್ ರುತಾಂ ಕೆಲ್ಲೊ ಹೊ ಏಕ್ ಬರೊ ಕಾಣ್ಯೆಗಾರ್ ಮ್ಹಣ್ಚಾಕ್ ಹಿ ಕಾಣಿ ಗೊವಾಯ್ ದಿತಾ.
ರಿಚಾರ್ಡ್ ಕವ್ತಾರ್
"ಪಪ್ಪಾ....."
ಆವಾಜ್ ಆಯ್ಕೊನ್ ಹಾಂವೆಂ ಮ್ಹಜಿ ದೀಷ್ಟ್ ಬಾಗ್ಲಾಚೆರ್ ಖಂಚಯ್ಲಿ. ಎಕಾ ಮೊವಾಳ್ ಹಾಸೊ ಮ್ಹಜ್ಯಾ ವದನಾರ್ ಉದೆಲ್ಯೊ.
"ಬಿತರ್ ಯೇ ರಾಣಿ"
ಮ್ಹಜಿ ಪರ್ವಣ್ಗಿ ಲಾಬ್ತಚ್ಚ್, ಆಪ್ಲೆ ನಾಜೂಕ್ ಚಾಲಿನ್ ರಾಣಿ ಬಿತರ್ ಆಯ್ಲೆಂ. ಹಾಂವೆಂ ಕಿತೆಂಯಿ ಉಲಂವ್ಚೆ ಫುಡೆಂ ಏಕ್ ಸ್ವಾದೀಕ್ ಉಮೊ ತಾಣೆಂ ಮ್ಹಜ್ಯಾ ಕಪಲಾಕ್ ದಾಂಬ್ಲೊ.
"ಥ್ಯಾಂಕ್ಯೂ ರಾಣಿ!" ಘಡಿಭರ್ ತಾಚ್ಯಾ ತ್ಯಾ ಸೊಬಿತ್ ವಿಶಾಲ್ ನಯನಾಂನಿ ಕಿತೆಂಗೀ ಸೊದುನ್ ಸಾಂಗ್ಲೆಂ ಹಾಂವೆಂ.
"ಪಪ್ಪಾ...."
"ಸಾಂಗ್ ಬಾಳಾ, ಹಾಂವ್ ಜಾಣಾಂ, ಆಜ್ ತುಕಾ ಕಿತೆಂಗಿ ಗರ್ಜೆಚೆಂ ಉಲಂವ್ಕ್ ಆಸಾ ಮ್ಹಣ್!"
"ಪಪ್ಪಾ...."
"ಕಮೊನ್ ರಾಣಿ, ಮ್ಹಜೆ ತುಜೆ ಮಧೆಂ ಕಸಲಿಯಿ ದಾಕ್ಶೆಣ್,
ಭಿರಾಂತ್ ಯಾ ಲಿಪಂವ್ಚೆಂ ತಸಲೆಂ ಕಾಂಯ್ ಆಸೊಂಕ್ ನಜೊ"
"ಪಪ್ಪಾ, ಹಾಂವ್ ಎಕಾ ಲ್ಹಾನ್ ಸಮಸ್ಯಾಂತ್ ಶಿರ್ಕಲ್ಯಾಂ"
"ತಶೆಂ ಸಾಂಗನಾಕಾ. ತುಕಾ ಸಮಸ್ಸೊಚ್ ಆಸೊಂಕ್."
"ಹಾಂವ್ ಜಾಣಾಂ ಪಪ್ಪಾ, ಮ್ಹಜೊ ಏಕ್ ಕೇಸ್ ಜಡ್ಲ್ಯಾರ್ ತುಂ ಜೊಗಾಸಾಣೆನ್ ಸಾಂಬಾಳ್ನ್ ದವರ್ತಾಯ್. ಮ್ಹಾಕಾ ಖಂಚೆಚ್ ರಿತಿನ್ ದುಕ್ಚೆ ತುಕಾ ಪಸಂದ್ ನಾಂ"
"ತುಜೊ ಸಮಸ್ಸೊ ಸಾಂಗ್!"
"ಪಪ್ಪಾ, ಹಾಂವೆಂ ಎಕಾ ಚಲ್ಯಾಕ್ ಪಸಂದ್ ಕೆಲಾಂ"
ತೀನ್ ಮಿನುಟಾಂಚೆಂ ಮಾವ್ನ್ ಆಮ್ಚೆಂ ಮಧೆಂ ದೆಂವ್ಲೆಂ. ಕಳಿತ್ ನಾಸ್ತಾನಾ, ದೋನ್ ದುಖಾಂ ದೊಳ್ಯಾಂ ಖಾಂಚಿಂತ್ ಉದೆಲಿಂ.
"ಐ ಎಮ್ ಸೊರ್ರಿ ಪಪ್ಪಾ....!"
"ಕಿತ್ಯಾಕ್....?"
"ಹಾಂವ್ ಜಾಣಾಂ, ಹಾಂವೆಂ ಎದೊಳ್ ತುಜ್ಯೆಥಾವ್ನ್ ಹಿ ಗಜಾಲ್ ಲಿಪಯ್ಲಿ ದೆಕುನ್ ತುಕಾ ದುಕ್ಲೆಂ ಮ್ಹಣ್."
"ಇಟ್ಸ್ ಒ.ಕೆ. ಡಿಯರ್. ಸಾಂಗ್ ಕೋಣ್ ತೊ?"
"ಮ್ಹಜೆ ಸಾಂಗಾಂತಾ ಯುನಿವರ್ಸಿಟಿಂತ್ ಶಿಕ್ತಾಲೊ. ಮ್ಹಜ್ಯಾಕಿ ಎಕಾ ವರ್ಸಾಕ್ ಸೀನಿಯರ್. ನಾಂವ್ ರಾಜೇಶ್".
"ತುಜ್ಯಾ ಪಸಂದೆಚೆರ್ ಮ್ಹಾಕಾ ಭರ್ವಸೊ ಆಸಾ ರಾಣಿ"
ಪುಣ್ ಪಪ್ಪಾ....."
"ಪುಣ್ ಕಿತೆಂ ಪುತಾ....?"
"ಆತಾಂ ಏಕ್ ಲ್ಹಾನ್ ಸಮಸ್ಸೊ ಜಾಲಾ"
"ಕಿತ್ಯಾಕ್ ರಾಜೇಶ್ ಕಾಂಯ್...!"
"ಸಮಸ್ಸೊ ತಾಚೆಥಾವ್ನ್ ನ್ಹಂಯ್ ಪಪ್ಪಾ.."
"ಆನಿಂ ಕೊಣಾ ಥಾವ್ನ್?
"ದುಸ್ರೊ ಏಕ್ ಚಲೊ ಮ್ಹಜ್ಯಾ ಪಾಟಿಕ್ ಲಾಗ್ಲಾ..."
"ವ್ಹಾಟ್?" ಮ್ಹಜ್ಯಾ ನಿಯಂತ್ರಣಾ ಭಾಯ್ರ್ ಹಾಂವ್ ಖರ್ಶೆಲೊ. ರಾಣಿಕ್ ಏಕ್ ಪಾವ್ಟಿಂ ಕಾವ್ಜೆಣೆನ್ ಮ್ಹಾಕಾ ಪಳೆಲೆಂ. ಉಪ್ರಾಂತ್ ತಾಣೆಂ ದೀಷ್ಟ್ ಧರ್ಣಿರ್ ಗಳಯ್ಲಿ...
"ಕೋಣ್ ತೊ?"
ಪಾಂಚ್ ಮಿನುಟಾಂಚ್ಯಾ ಗಳಾಯೆನ್ ಹಾಂವ್ ಉಲಯ್ಲೊಂ.
"ತಾಚೆ ನಾಂವ್ ರಾಹುಲ್?"
"ಏಕ್ ಉದೆವ್ನ್ ಯೆಂವ್ಚೊ ಲೇಖಕ್.."
"ತುಂವೆಂ ತಾಕಾ ಸಮ್ಜೊಂಕ್ ನಾಯೆ?"
"ಸಮ್ಜಯ್ಲೆಂ ಪಪ್ಪಾ. ಪುಣ್ ತೊ ಮ್ಹಣ್ತಾ - ಹಾಂವ್ಚ್ ತಾಕಾ ನಿರ್ಮಿಲ್ಲಿ ಚಲಿ ಕಂಯ್."
"ಬಕ್ವಾಸ್........ಬಕ್ವಾಸ್ ಉಲಯ್ತಾ ತೊ. ಕೊಣಾಯ್ಕಿ ಕೊಣಾಯ್ ಖಾತಿರ್ ನಿರ್ಮುಂಕ್ ನಾ. ತುಜ್ಯಾ ಸಿಂತಿಮೆಂತಾಂ ಲಾಗಿಂ ಖೆಳೊಂಕ್ ಎಕ್ಲ್ಯಾಕ್, ಎಕಾ ನಿರ್ದಿಷ್ಟ್ ಮನ್ಶಾ ಖಾತಿರ್ಚ್ ರಚ್ಲ್ಲೆಂ ತರ್, ಹ್ಯಾ ಸಂಸಾರಾಂತ್ ಸರ್ವ್ ಸುಖಿ ಆಸ್ತಿಂ. ಬಕ್ವಾಸ್"
ಹಾಂವೆಂ ಕಿತ್ಲೆಂ ಪ್ರಯತ್ನ್ ಕೆಲ್ಯಾರೀ, ದೊಳ್ಯಾಂತ್ಲ್ಯಾನ್ ದುಕಾಂ ಉದೆವ್ನ್, ಗಾಲಾಂ ವಯ್ಲ್ಯಾನ್ ದೆಂವೊನ್ ಗೆಲಿಂ.
"ಪಪ್ಪಾ ತುಂ ರಡ್ತಾಯ್?" ರಾಣಿನ್ ಹಾಳ್ವಾಯೆನ್ ಆಪ್ಲಿಂ ಬೊಟಾಂ ಮ್ಹಜ್ಯಾ ಕೆಸಾಂನಿ ಚರಯ್ಲಿಂ.
"ಮ್ಹಾಕಾ ಥೊಡೊ ವೇಳ್ ಎಕ್ಸುರ್ಯಾಕ್ ಸೊಡ್!"
"ಪುಣ್ ಪಪ್ಪಾ..."
"ಪ್ಲೀಜ್ ರಾಣಿ...."
"ಒ.ಕೆ. ಪಪ್ಪಾ"
ಚಡ್ತಿಕ್ ಉಲಯ್ನಾಸ್ತಾನಾ, ದಾರ್ ಉಗ್ತೆಂ ಕರ್ನ್ ರಾಣಿ ಭಾಯ್ರ್ ಗೆಲೆಂ. ಹಾಳ್ವಾಯೆನ್ ದಾರ್ ಬಂದ್ ಕರ್ನ್ ಹಾಂವ್ ಮ್ಹಜ್ಯಾ ಆರಾಮ್ ಕದೆಲಾರ್ ವೊಣ್ಕೊನ್ ಬಸ್ಲೊಂ. ದೊಳೆ ಧಾಂಪ್ಲೆಂ ಹಾಂವೆಂ......
***************
"ಹಾಂವೆಂ ಬಿತರ್ ಯೆವ್ಯೆತ್ಗಿ ಅಂಕಲ್?" ಬಾಗ್ಲಾಚೆರ್ ಉಬೊ ಆಸ್ಲ್ಲ್ಯಾ ಆಕರ್ಶಿಕ್ ತರ್ನಾಟ್ಯಾಕ್ ಪಳೆವ್ನ್ ಹಾಂವೆಂ ವೋಂಟ್ ರುಂದಾಯ್ಲೆಂ .
"ಬಿತರ್ ಯೇ ರಾಹುಲ್"
"ಕ್ಯಾಬಿನಾಚೆಂ ದಾರ್ ಬಂದ್ ಕರ್ನ್ ರಾಹುಲ್ ಬಿತರ್ ಯೇವ್ನ್ ಬಸ್ಲೊ.
"ಅಂಕಲ್ ಮ್ಹಾಕಾ ಕಿತ್ಯಾಕ್ ಯೇಂವ್ಕ್ ಸಾಂಗ್ಲೆಯ್?"
ಉಲವ್ಯಾಂ ಮ್ಹಣ್ ಭೊಗ್ಲೆಂ."
"ಕಿತೆಂ ಉಲೊಂಕ್ ಆಸಾ ಅಂಕಲ್!?"
"ತುಂ ಬರೆಂ ಬರಯ್ತಾಯ್ ಮ್ಹಣ್ ರಾಣಿ ಸಾಂಗ್ತಾಲೆಂ"
"ತುಮಿಂ ವಾಚಿನಾಂತ್ಗಿ ಅಂಕಲ್"?
"ತಶೆಂ ಕಾಂಯ್ ನಾ. ಪುಣ್ ಮ್ಹಜ್ಯಾ ಆತಾಂಚ್ಯಾ ಬಿಝಿ ಲೈಫಾ ವರ್ವಿಂ ಕಸಲೆಂಚ್ ವಾಚುಂಕ್ ಪುರ್ಸತ್ ಮೆಳಾನಾ."
"ನಾ ಅಂಕಲ್, ಹೆಂ ಏಕ್ ನೀಬ್ ಮಾತ್ರ್. ಹಾಂವ್ ಚಿಂತಾಂ ತುಂಮ್ಕಾಂ ವಾಚ್ಪಾ ವಯ್ಲಿಂ ಉರ್ಬಾ ಗೆಲ್ಯಾ ಆಸ್ತೆಲಿ".
"ತಶೆಂ ಕಾಂಯ್ ನಾ."
"ಹಾಂವ್ ಜಾಣಾಂ ಅಂಕಲ್. ಪಾಟ್ಲ್ಯಾ ವೀಸ್ ವರ್ಸಾಂ ಥಾವ್ನ್ ತುಮಿಂ ವಾಚ್ಚೆಂ, ಬರಂವ್ಚೆಂ ಸೊಡ್ಲಾಂ"
"ಬರಂವ್ಚೆಂ?"
"ಲಿಪಯ್ನಾಕಾ ಅಂಕಲ್. ಮ್ಹಾಕಾ ತುಂಚೆಂ ವಿಶಿಂ ಕಳಿತ್ ಆಸಾ. ಹಾಂವ್ ಮ್ಹಾಕಾ ಗರ್ಜ್ ಆಸ್ಚ್ಯೊ ಸರ್ವ್ ಸಂಗ್ತಿಂ ಪಯ್ಲೆಂಚ್ ಸಮ್ಜೊನ್ ಘೆತಾಂ."
"ಪುಣ್ ಮ್ಹಜ್ಯೆ ಥಾವ್ನ್ ತುಕಾ ಕಸಲಿ ಗರ್ಜ್?"
"ತುಂ ರಾಣಿಚೊ ಪಪ್ಪ. ಹಿಚ್ಚ್ ಮ್ಹಜಿ ಗರ್ಜ್"
"ಗುಡ್, ಯೂ ಆರ್ ರಿಯಲ್ಲಿ ಸ್ಮಾರ್ಟ್"
"ಥ್ಯಾಂಕ್ಯೂ ಅಂಕಲ್."
"ಕಿತೆಂ ಘೆತಾಯ್ ಟೀ ಯಾ ಕೊಫಿ?" ಹಾಂವೆಂ ಉಲೊಣ್ಯಾಚಿ ದಿಶಾ ಬದ್ಲುಂಕ್ ಪ್ರಯತ್ನ್ ಕೆಲೆಂ.
"ಟೀ"
ಆಫೀಸ್ ಚೆಡ್ಯಾಕ್ ಆಪವ್ನ್, ದೋನ್ ಚ್ಹಾ ಹಾಡುಂಕ್ ಫರ್ಮಾಯ್ಲೆಂ . ಚ್ಹಾ ಪಿಯೆವ್ನ್ ಜಾತಾ ಪರ್ಯಾಂತ್ ಆಮಿಂ ಥೊಡ್ಯೊ ಜೆರಾಲ್ ಸಂಗ್ತಿಂ ಉಲಯ್ಲ್ಯಾಂವ್. ಮತಿಂತ್ ಹಾಂವ್ ಮುಖ್ಲ್ಯಾ ಉಲೊಣ್ಯಾ ಖಾತಿರ್ ಮ್ಹಾಕಾಚ್ಚ್ ತಯಾರ್ ಕರ್ನ್ ಆಸ್ಲ್ಲೊಂ.
"ರಾಹುಲ್ ತುವೆಂ ರಾಣಿಕ್ ವಿಸ್ರೊಂಕ್ ಜಾಯ್!"
ರಾಹುಲ್ ಕಾಂಯ್ಚ್ ಉಲೊಂವ್ಕ್ ನಾ. ದೋನ್ ಮಿನುಟಾಂಭರ್ ತಾಣೆಂ ಮ್ಹಜ್ಯಾ ದೊಳ್ಯಾಂನಿ ಪಳೆಂವ್ಕ್ ಪ್ರಯತ್ನ್ ಕೆಲೆ. ತಾಚಿ ತಿ ದೀಷ್ಟ್ ಫುಡ್ ಕರುಂಕ್ ಹಾಂವ್ ಸಕ್ಲೊಂ ನಾ.
"ಅಂಕಲ್, ತುಂ ಫಟಿ ಮಾರ್ನ್ ಆಸಾಯ್?"
"ತುಕಾ ತಶೆಂ ಕಿತ್ಯಾಕ್ ಬೊಗ್ತಾ ರಾಹುಲ್?"
"ಜಾಪ್ ತುಕಾಚ್ ಕಳಿತ್ ಆಸಾ ಅಂಕಲ್"
"ಕಸಲಿ ಜಾಪ್?"
"ಪಾಟ್ಲ್ಯಾ ಬಾವೀಸ್ ವರ್ಸಾಂಚಿ ಗುಪಿತ್ ಜಿಣಿ"
"ರಾಹುಲ್ ತುಂ ಕಿತೆಂ ಉಲಯ್ತಾಯ್ ಮ್ಹಣ್ ಮ್ಹಾಕಾ ಸಮ್ಜಾನಾ."
"ಅಂಕಲ್, ಹಾಂವೆಂ ಪಯ್ಲೆಂಚ್ ಸಾಂಗ್ಲಾಂ. ಮ್ಹಾಕಾ ತುಮ್ಚೆಂವಿಶಿಂ ಕಳಿತ್ ಆಸಾ"
ಸೊಡ್ ತಿ ಗಜಾಲ್ ರಾಹುಲ್. ಆತಾಂ ಹಾಂವೆಂ ಸಾಂಗ್ಚೆಂ ಆಯ್ಕ್."
"ಸೊರ್ರೀ ಅಂಕಲ್. ಮ್ಹಾಕಾ ರಾಣಿಕ್ ವಿಸ್ರೊಂಕ್ ಸಾಧ್ಯ್ಚ್ ನಾ."
"ಪ್ರಯತ್ನ್ ಕೆಲ್ಯಾರ್ ಸರ್ವ್ ಸಾದ್ಯ್ ಜಾತಾ ರಾಹುಲ್."
"ಪಾಟ್ಲ್ಯಾ ಬಾವೀಸ್ ವರ್ಸಾಂ ಥಾವ್ನ್ ತುಂಯೀ ಹೆಂಚ್ ಕರ್ನ್ ಆಯ್ಲಾಂಯ್. ಪುಣ್ ತುಂ ಕೆದ್ನಾಂಯಿ ತುಜ್ಯಾ ಮೊಗಾಕ್ ವಿಸ್ರೊಂಕ್ ಸಕ್ಲಾಯ್ಗಿ ಆಂಕಲ್...."
ರಾಹುಲಾಚೆಂ ಸವಾಲ್ಪರತ್ ಪರತ್ ಮ್ಹಾಕಾ ಆಯ್ಕೊಂಕ್ ಲಾಗ್ಲೆಂ.
"ಮ್ಹಾಕಾ ಸಮ್ಜಂವ್ಚೆಂ ಕಸಲೆಂಚ್ ನಯ್ತಿಕ್ ಹಕ್ಕ್ ತುಕಾ ನಾ ಅಂಕಲ್"
"ಪುಣ್, ರೆಂವೆಭುಂಯ್ತ್ಲ್ಯಾ ಓಯಸಿಸಾ ಪಾಟ್ಲ್ಯಾನ್ ಧಾಂವ್ಚೆಂ ಪಿಶೆಂಪಣ್ ಜಾವ್ನಾಸಾ"
"ಮೊಗಾಂತ್ ಪಿಶೆಂಪಣ್ಯಿ ಸಾರ್ಕೆಂ ಮ್ಹಣ್ ತುಂಚ್ ಪಾತ್ಯೆತಾಯ್ ಅಂಕಲ್!"
"ತುಜೆ ಮುಖಾರ್ ತುಜೆಂ ಭವಿಶ್ಯ್ ಆಸಾ. ಏಕ್ ಬರೊ ಫುಡಾರ್ ತುವೆಂ ರುತಾ ಕರುಂಕ್ ಆಸಾ. ತುಜ್ಯಾ ವ್ಹಡಿಲಾಂಕ್ ತುವೆಂ ಸಾಂಬಾಳೂಂಕ್ ಆಸಾ"
"ಕೊಣಾಯ್ಕಿ ಸಾಂಬಾಳ್ಚೆ ಖಾತಿರ್ ಹಾಂವ್ ಮ್ಹಜೊ ಮೋಗ್ ಹೊಗ್ಡಾಂವ್ಕ್ ತಯಾರ್ ನಾ ಅಂಕಲ್. ರಾಣಿ, ದೆವಾನ್ ಮ್ಹಾಕಾ ನಿರ್ಮಿಲ್ಲಿ ಚಲಿ. ಆಮಿಂ ದೊಗಾಂಯ್ ಎಕಾಮೆಕಾ ಖಾತಿರ್ ಮ್ಹಣ್ ದೆವಾನ್ ಆಮ್ಕಾಂ ರಚ್ಲಾಂ."
"ಚೂಕ್ ರಾಹುಲ್, ರಾಣಿನ್ ಆಪ್ಲೊ ಜಿಣಿಯೆ ಸಾಂಗಾಂತಿ ವಿಂಚ್ಲಾ. ತೊ ಕೋಣ್, ಕಿತೆಂ ಕರ್ತಾಂ ಯಾ ತಾಚೆವಿಶಿಂ ಹೆರ್ ಕಾಂಯ್ ಚಡ್ತಿಕ್ ವಿಚಾರುಂಕ್ ಹಾಂವ್ ವಚೊಂಕ್ ನಾ. ಮ್ಹಾಕಾ ಮ್ಹಜ್ಯಾ ರಾಣಿಚೆರ್ ಪಾತ್ಯೆಣಿ ಆಸಾ. ತೆಂ ಕೆದ್ನಾಂಯಿ ಚೂಕ್ ವಿಂಚವ್ಣ್ ಕರಿನಾ."
"ಹಾಂವ್ ಜಾಣಾಂ ಅಂಕಲ್. ಪುಣ್ ಹಾಂವೆಂ ರಾಣಿಚೊ ಮೋಗ್ ಕೆಲಾ. ತೆಂ ಮ್ಹಜೆ ಮ್ಹಣ್ ಪಾತ್ಯೆತಾಂ."
"ಪಿಶೆಂಪಣ್ ಸೊಡ್ ತರ್ನಾಟ್ಯಾ, ಹಾಂವ್ ಜಾಣಾ, ಲೇಕಕ್ ಸರ್ವ್ ಎಕಾ ರಿತಿಚೆ ಪಿಶೆ ಜಾವ್ನಾಸ್ತಾತ್. ತಾಂಕಾಂ ಸಿಂತಿಮೆಂತಾಂ ಇಲ್ಲಿಶಿ ಚಡ್. ಆಪ್ಣೆಂ ಆಶೆಲ್ಲೆಂ ಆಪ್ಣಾಕ್ ಮೆಳಾಜೆ ಮ್ಹಳ್ಳೆಂ ಹಟ್ ಚಡ್. ತಾಚೆ ಖಾತಿರ್ ಜಾಯ್ತಿ ಫಿಲೊಸೊಪಿ ತೆ ಖುದ್ಧ್ ಘಡ್ತಾತ್. ಅಕ್ರೇಕ್ ಪೊಂಡಾಂತ್ ಪಡ್ತಾತ್. ಪುಣ್ ತುಜೆ ತಸಲ್ಯಾ ಶಿಕ್ಪಿ ತರ್ನಾಟ್ಯಾಕ್ ಹೆಂ ಸೊಬ್ ದೀನಾ ರಾಹುಲ್. ತುವೆಂ ರಾಣಿಕ್ ವಿಸ್ರೊಂಕ್ಚ್ ಜಾಯ್."
"ಅಂಕಲ್, ಉಡಾಸಾಂಕ್ ಕೆದ್ನಾಂಯಿ ಮರಣ್ ನಾ ಮ್ಹಣ್ ತುಮಿಚ್ ಪಾತ್ಯೆತಾತ್"
"ರಾಹುಲ್, ಮ್ಹಾಕಾ ತುಜೆಲಾಗಿಂ ಅರ್ಗ್ಯೂ ಕರುಂಕ್ ಖುಶಿ ನಾ. ಆಯ್ಕ್. ಮ್ಹಾಕಾ ರಾಣಿಚಿ ಖುಶಿ ಗರ್ಜೆಚಿ. ತಾಣೆಂ ಪಸಂದ್ ಕೆಲ್ಲೊ ಚಲೊ ತಾಕಾ ಖಂಡಿತ್ ಖುಶಿ ದೀಂವ್ಕ್ ಅಸ್ಕ್ತಾ. ತುಂ ನ್ಹಂಯ್. ಉಡಾಸ್ ದವರ್, ಬಲತ್ಕಾರಾನ್ ಕೆದ್ನಾಂಯಿ ಮೊಗಾಫುಲಾಂ ಫುಲಾನಾಂತ್."
"ಹಾಂವ್ ಜಾಣಾಂ ಅಂಕಲ್. ಪುಣ್ ಹಾಂವ್ ರಾಣಿ ಖಾತಿರ್ ಸಗ್ಳಿ ಜಿಣಿ ರಾಕೊಂಕ್ ತಯಾರ್ ಆಸಾಂ. ತೆಂ ಮ್ಹಾಕಾ ಮೆಳನಾತ್ಲ್ಯಾರ್ ತಾಚ್ಯಾ ಉಡಾಸಾನ್ ಜಿಯೆಂವ್ಕ್ ತಾಂಕ್ಲ್ಲೆ ತಿತ್ಲೆ ದೀಸ್ ಜಿಯೆತಾಂ. ನಾಂ ತರ್...."
"ತುಕಾ ಎಕ್ಸುರೊಂ ಜಿಯೆಂವ್ಕ್ ತಿತ್ಲಿಯಿ ಆಶಾ ಆಸಾ ತರ್ ತುಜೆ ಖುಶೆ ಪರ್ಮಾಣೆಂ ಚಲ್ಯೆತ್. ತುವೆಂ ಆತಾಂ ವಚ್ಯೆತ್. ಎದೊಳ್ ಪರ್ಯಾಂತ್ ಹಾಂವೆಂ ಮ್ಹಜೊ ವೇಳ್ ಪಾಡ್ ಕೆಲ್ಲ್ಯಾಕ್ ಪಶ್ಚತ್ತಾಪ್ ಪಾವ್ತಾಂ."
ರಾಹುಲಾಕ್ ಉಪ್ರಾಂತ್ ಕಸಲ್ಯಾಚ್ ಸಂವಾದಾಕ್ ಆವ್ಕಾಸ್ ಹಾಂವೆಂ ದೀಂವ್ಕ್ ನಾ. ಜಿಣಿಯೆ ಪಯ್ಣಾಂತ್ ಪರತ್ ಏಕ್ ಪಾವ್ಟಿಂ ಸಲ್ವಾಲ್ಲೊ ಅನ್ಭೋಗ್ ಮ್ಹಾಕಾ!
************
ಸಿಗ್ರೆಟಿಚೊ ಧುಂವೊರ್ ಪೊಪ್ಸಾ ಬಿತರ್ ರಿಗ್ತಾನಾ, ಬಳಾನ್ ಖೊಂಕ್ಲಿ ಆಯ್ಲಿ. ಪಾಟ್ಲ್ಯಾ ವೀಸ್ ಬಾವೀಸ್ ವರ್ಸಾಂನಿ ಹ್ಯಾ ಸಿಗ್ರೆಟಿನ್ ಮ್ಹಾಕಾ ಆಪ್ರೂಪ್ ದಿಲ್ಲೊ. ಕೆನ್ನಾ ಕೆನ್ನಾ ಆಮಾಲಾಚೆ ಬೊತ್ಲೆಸಂಗಿಂ ರಾತ್ ಪಾಶಾರ್ ಕೆಲ್ಲಿ. ಹಿ ಸವಯ್ ಸೊಡಂವ್ಕ್ ರಾಣಿನ್ ಜಾಯ್ತೆಂ ಪ್ರಯತ್ನ್ ಕೆಲ್ಲೆಂ ತರೀ ತೆಂ ಸಲ್ವಾಲ್ಲೆಂ!
"ತುಂ ಸಲ್ವಾಲೊಯ್! ತುಂ ಸಲ್ವಾಲೊಯ್. ತುಜ್ಯಾ ಬಾವೀಸ್ ವರ್ಸಾಂಚ್ಯಾ ಪ್ರಾಚಿತಾ ಉಪ್ರಾಂತೀ, ತುಂ ಏಕ್ ಸಲ್ವಾಲ್ಲೊ ಮನಿಸ್ ಜಾವ್ನ್ಚ್ ಉರ್ಲೊಯ್!"
ಮ್ಹಜೆ ಅಂತಸ್ಕರ್ನ್ ಬೊಬಾಟ್ಲೆ. ಹಾತಾಂತ್ಲ್ಯಾ ಗ್ಲಾಸಾಂತ್ ಆಸ್ಲ್ಲಿ ವಿಸ್ಕಿ ಎಕಾಚ್ ಘೊಟಾನ್ ಖಾಲಿ ಕೆಲಿ.
"ಉಡಾಸಾಂಕ್ ಕೆನ್ನಾತಿ ಮರಣ್ ನಾ" ಮ್ಹಜಿಚ್ ಫಿಲೊಸೊಫಿ ಉಡಾಸಾಕ್ ಯೇವ್ನ್ ಹಾಸೊ ಆಯ್ಲ್ಯೊ ಮ್ಹಾಕಾ. ಹಾಂವೆಂ ಸವ್ಕಾಸ್ ದೊಳೆ ಧಾಂಪ್ಲೆ. ಮತಿ ಪಡ್ದ್ಯಾರ್ ಏಖ್ ರುಪ್ಣೆಂ ಉದೆಲೆಂ.
ರಾಣಿ! ಮ್ಹಜೊ ಮೋಗ್!
ಜಿಣೀಯೆಂತ್ ತಶೆಂ ಮೊರ್ನಾಂತ್ ಸಾಂಗಾಂತ್ ದಿತಾಂ ಮ್ಹಳ್ಳೋ ಮೋಗ್!
ಫಕತ್ ತುಜೆ ಖಾತಿರ್ ಜಿಯೆತಾಂ ಮ್ಹಳ್ಳೊ ಮೋಗ್!
ತೆಂ ದುಸ್ರ್ಯಾಚೆಂ ಆಮಾನತ್ ಮ್ಹಣ್ ಕಳಿತ್ ಆಸೊನ್ಯಿ ಕೆಲ್ಲೊ ಮೋಗ್!
ತಾಚ್ಯಾ ಹರ್ಯೇಕಾ ಸುಖಾದುಖಾಂತ್ ಸಾಂಗಾಂತ್ ದಿತಾಂ ಮ್ಹಳ್ಳೊ ಮೋಗ್!
ತಾಚೆ ಖಾತಿರ್ ಜಿಣಿಯೆಚಿಂ ಬಾವೀಸ್ ವರ್ಸಾಂ ಎಕ್ಸುರಿ ಖರ್ಚಿಲ್ಲೊ ಮೋಗ್! ಉಡಾಸಾಂಕ್ ಮರಣ್ ನಾ ಮ್ಹಣ್ ಫಿಲೊಸೊಫಿ ಘಡ್ಲ್ಲೊ ಮೋಗ್! ಮ್ಹಜ್ಯಾ ಜಿವಾಚೊ ಜೀವ್ ಮ್ಹಣ್ ಜಾಣಾಸೊನ್ಯಿ ತಾಕಾ ಚಡ್ ದುಕಯಿಲ್ಲೊ ಮೋಗ್!
ತೆಂಚ್ ಮ್ಹಜೆ ಜಿಣಿಯೆ ಸಾಂಗಾತಿಣ್ ಮ್ಹಣ್ ಸಮ್ಜೊನ್ ಸುಖಾಂತ್ ತಶೆಂ ದುಖಾಂತ್ ತಾಕಾ ಸಾಂಗಾಂತ್ ದೀವ್ನ್ ರಾಕ್ತಾಂ ಮ್ಹಣ್ ದೆವಾಕ್ ಭಾಸ್ ದೀವ್ನ್, ಮ್ಹಜ್ಯಾ ಎಕ್ಸುರ್ಯಾ ಸಂಸರಾಂತ್ ತೆಂಚ್ ಮ್ಹಜಿ ಪತಿಣ್ ಮ್ಹಣ್ ಜಿಯೆವ್ನ್ ಆಯಿಲ್ಲೊ ವಿಚಿತ್ರ್ ಮೋಗ್. ರಾಣಿಕ್ ದಿಂವ್ಚೊ ಮೋಗ್ ಕೆನ್ನಾಂಯೀ ಉಣೊ ಜಾಂವ್ಕ್ ನಜೊ ಮ್ಹಣ್ ಸಮ್ಜೊನ್, ಎಕಾ ಅನಾಥ್ ಚೆಡ್ವಾಕ್ ಬಾಪುಯ್ ಜಾವ್ನ್, ತಾಕಾ ’ರಾಣಿ’ ಮ್ಹಣ್ ನಾಂವ್ ದೀವ್ನ್ ಆಜ್ ಪರ್ಯಾಂತ್ ಸಾಂಬಾಳ್ನ್ ವೆಲ್ಲೊ ಮೋಗ್!
ಜೆಂ ಕಿತೆಂ ಬಾವೀಸ್ ವರ್ಸಾಂ ಆದಿಂ ಮ್ಹಜೆ ಜಿಣಿಯೆಂತ್ ಘಡ್ಲ್ಲೆಂ, ತೆಂಚ್ ಆಜ್ ಪರತ್ ಮ್ಹಜ್ಯಾ ಧುವೆಚೆ ಜಿಣ್ಯೆಂತ್ ಪುನಾರಾವರ್ತನ್ ಜಾಲ್ಲೆಂ.
ತ್ಯಾ ರಾಣಿ ಖಾತಿರ್ ಬಾವೀಸ್ ವರ್ಸಾ ಆದಿಂ ಏಕ್ ದೇವ್ದಾಸ್ ಜಲ್ಮಾಲ್ಲೊ! ಆಜ್ ಹ್ಯಾ ರಾಣಿ ಖಾತಿರ್ ಅನ್ಯೇಕ್ ದೇವ್ದಾಸ್ ಜಲ್ಮೊಂಕ್ ತಯಾರ್ ಜಾಲ್ಲೊ.
’ಟಕ್.....ಟಕ್......ಟಕ್..."
ದಾರಾರ್ ಬಡಂವ್ಚೊ ಆವಾಜ್ ಆಯ್ಕಾತಾನ್ , ಚಿಂತ್ನಾಂ ಸಂಸಾರಾಂತ್ಲೊ ಭಾಯ್ರ್ ಆಯ್ಲೊಂ.
"ಬಿತರ್ ಯೇ ರಾಣಿ"
ಪಾಂಚ್ ಮಿನುಟಾಂನಿ ಹಾಂವ್ ಆನಿಂ ರಾಣಿ ಎಕಾಮೆಕಾಕ್ ಫುಡ್ ಕರ್ನ್ ಬಸೊನ್ ಆಸ್ಲ್ಲ್ಯಾಂವ್.
"ಪಪ್ಪಾ, ತುವೆಂ ಕಿತ್ಯಾಕ್ ಮ್ಹಜೆ ಥಾವ್ನ್ ಸರ್ವ್ ಲಿಪಯ್ಲೆಂಯ್? ತುಜ್ಯೆ ಮತಿಂತ್ ಇತ್ಲೆಂ ದೂಕ್ ಆಸೊನಿ ತುಕಾ ಮ್ಹಜೆಲಾಗಿಂ ಸಾಂಗಾಜೆ ಮ್ಹಣ್ ಭೊಗೊಂಕ್ ನಾ?"
"........"
"ತುಕಾ ಏಕ್ ಸಂತೊಸಾಚಿ ಖಬಾರ್ ಆಸಾ"
"ಸಾಂಗ್ ರಾಣಿ"
"ಪಪ್ಪಾ, ಹಾಂವೆ ಹೈಯರ್ ಸ್ಟಡಿಸಾ ಖಾತಿರ್ ಅಮೇರಿಕನ್ ಯೂನಿವರ್ಸಿಟಿಕ್ ಎಪ್ಲಾಯ್ ಕೆಲ್ಲೆಂ. ಆಟಾಂ ತಾಂಚೆಂ ಕೊಲ್ ಆಯ್ಲಾಂ"
"ಕೊಂಗ್ರಾಜುಲೇಶನ್ಸ್"
"ಮುಖ್ಲ್ಯಾ ಹಪ್ತ್ಯಾಂತ್ ಆಮಿಂ ಆಮೆರಿಕಾ ವೆತೆಲ್ಯಾಂವ್."
"ಆಮಿಂ ಮ್ಹಳ್ಯಾರ್..."
"ಹಾಂವ್ ಆನಿಂ ತುಂ......."
"ಪುಣ್ ಹಾಂವ್ ಕಿತ್ಯಾಕ್?"
"ಪಪ್ಪಾ, ಹಾಂವ್ ಪಾಟಿಂ ಇಂಡಿಯಾಕ್ ಯೇಂವ್ಕ್ ಆಶೆನಾ"
"ಕಿತ್ಯಾಕ್?"
"ಕೊಣಾಯ್ಚಿ ಜಿಣಿ ಪಾಡ್ ಕರ್ಚೆಂ ಹಕ್ಕ್ ಮ್ಹಾಕಾ ನಾ"
ಹಾಂವ್ ರಾಣಿಚ್ಯಾ ಉತ್ರಾಂಚೊ ಮತ್ಲಬ್ ಸಮ್ಜಾಲೊಂ.
ಪುಣ್ ರಾಣಿಕ್ ಸಮ್ಜಾನಾತ್ಲ್ಲೆಂ ಏಕ್ ಸತ್ ಹಾಂವ್ ಜಾಣಾಸ್ಲೊಂ -
"ರಾಣಿ ಇಂಡಿಯಾ ಥಾವ್ನ್ ಪಯ್ಸ್ ಗೆಲ್ಯಾರೀ, ರಾಹುಲ್ ಖಂಡಿತ್ ಮ್ಹಜೆ ಸ್ಥಾನ್ ಘೆತಾಲೊ. ಕೋಣ್ ಕಿತ್ಲೆಂ ಪಯ್ಸ್ ಗೆಲ್ಯಾರಿ ಖರೊ ಮೋಗ್ ಕೆದ್ನಾಂಯಿ ಮೊರಾನಾ.
ಹಾಂವ್ ಹರ್ಯೇಕ್ ವಾಟೆನ್ ಸಲ್ವಾಲ್ಲೊ. ಮ್ಹಜಿ ಫಿಲೊಸೊಫಿ ಮ್ಹಾಕಾಚ್ಚ್ ಹೆಡಾಯ್ತಾಲಿ -
"ಉಡಾಸಾಂಕ್ ಕೆದ್ನಾಂಯಿ ಮರಣ್ ನಾ!"
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
