ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್
ಸರ್ವ್ ದಾಯ್ಜ್ ವಾಚ್ಪ್ಯಾಂಕ್ ಪಾಸ್ಕಾಂಚಾ ಫೆಸ್ತಾಚೆ ಉಲ್ಲಾಸ್
ಮಯ್ನೊ: ಎಪ್ರಿಲ್ 2007 ವರಸ್: 4
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006: - 40,000 ರುಪ್ಯಾಂಚಿಂ ಇನಾಮಾಂ ಜಿಕ್ಪಿಂ: ಸರ್ವ್ ಬರ್ಪಾಂ ದಾಯ್ಜ್.ಕೊಮ್ಚೆರ್ ತಶೆಂಚ್ ಮಾಯ್ ಮಯ್ನ್ಯಾಂತ್ ಪರ್ಗಟೊನ್ ಯೆಂವ್ಚ್ಯಾ ಮಿತ್ರ್-ದಾಯ್ಜ್ ವಿಶೇಷ್ ಅಂಖ್ಯಾಚೆರ್ ಪರ್ಗಟ್ ಜಾತೆಲಿಂ.
ಮಟ್ವ್ಯೊ ಕಾಣ್ಯೊ: ಕೆವಿನ್ ಡಿ’ಮೆಲ್ಲೊ (ಪಯ್ಲೆಂ ಇನಾಮ್), ಮೆಲ್ವಿನ್ ಪಿಂಟೊ (ದುಸ್ರೆಂ ಇನಾಮ್), ಕ್ಯಾಥರಿನ್ ರೊಡ್ರಿಗಸ್ (ತಿಸ್ರೆಂ ಇನಾಮ್), ಭುಜ್ವಣೆಚಿಂ ಇನಾಮಾಂ: ಡಾ|ಎಡ್ವರ್ಡ್ ನಜ್ರೆತ್, ಎಚ್ಚೆಮ್ ಆನಿ ನಂದಿನಿ.
ಕವಿತಾ: ಎಲ್ಯೆರ್ ತಾಕೊಡೆ (ಪಯ್ಲೆಂ ಇನಾಮ್), ಎಚ್ಚೆಮ್ (ದುಸ್ರೆಂ ಇನಾಮ್) ಆನಿ ಮೆಲ್ವಿನ್ ಪಿಂಟೊ ನೀರುಡೆ (ತಿಸ್ರೆಂ ಇನಾಮ್). ಭುಜ್ವಣೆಚಿಂ ಇನಾಮಾಂ: ವಿಲ್ಸನ್ ಕಟೀಲ್, ಆಂಟನಿ ಬಾರ್ಕುರ್, ರಿಚ್ಚಿ ಪಿರೇರ್ ಆನಿ ಮೆಲಿಟಾ ಪಿಂಟೊ.
ಲೇಖನಾಂ: ಭುಜ್ವಣೆಚಿಂ ಇನಾಮಾಂ: ಡಾ|ಎಡ್ವರ್ಡ್ ನಜ್ರೆತ್, ಲುವಿ ಪಿರೇರ್ ಮಂಡ್ಯ ಆನಿ ಪ್ರಸನ್ನ್ ನಿಡ್ಡೋಡಿ.
ರಗ್ತಾಳೊ ಖೆಳ್?: ಗಿಬ್ಬಾ ಕುಲ್ಶೇಕರಾಚ್ಯಾ ಕಾಣ್ಯಾಂಚೊ ಪ್ರಕಾರ್ ಚಡ್ತಾವ್ ಜಾವ್ನ್ ಮನರಂಜನ್, ಥ್ರಿಲ್ಲರ್ ಆನಿ ಸಸ್ಪೆನ್ಸಾಚ್ಯೊ ದೆಕುನ್ ಥೊಡೆ ವಾಚ್ಪಿ ಚಡ್ ಪಸಂದ್ ಕರ್ತಾತ್. ಹಾಚ್ಯಾಧಿಂ ’ಕೊಳ್ಸೊ (ಚಾ.ಫ್ರಾ. ದೆ’ಕೋಸ್ತಾ), ಮೂಗುತಿ (ವಿಲ್ಫಿ ರೆಬಿಂಬಸ್), ಹರ್ಧ್ಯಾರ್ ಖುರಿಸ್ (ಎ.ಟಿ.ಲೊಬೊ)’ ಮ್ಹಳ್ಳ್ಯೊ ತೀನ್ ಸಾಂಕಳ್ ಕಾಣ್ಯೊ ಆಮಿ ಪರ್ಗಟ್ಲ್ಯಾತ್, ಹಿ ಚೊವ್ತಿ ಸಾಂಕಳ್ ಕಾಣಿ ವೆಗ್ಳ್ಯಾಚ್ ಶೈಲೆರ್ ಆಸೊನ್ ಮೆಟಾಂ ಮೆಟಾಂಕ್ ತುಮ್ಕಾಂ ಉದ್ವೇಗ್ ಚಡಂವ್ಕ್ ಕಾರಣ್ ಜಾಂವ್ಚಾಂತ್ ದುಭಾವ್ ನಾ.
ಖೊವ್ಳಾಂ: ಹಿಂ ಕಸ್ಲಿಂ ಖೊವ್ಳಾಂ? ಜೆದ್ನಾಂ ಅಪ್ಲೊ ಮಾಂಯ್ಗಾಂವ್ ಸೊಡ್ನ್ ಪರ್ಕಿ ಗಾಂವಾಂತ್ ಜಿಯೆಂವ್ಕ್ ಲಾಗ್ಲ್ಲ್ಯಾ ಜೊಡ್ಯಾಕ್ ವೆಳಾ ಕಾಳಾನ್ ದಿಲ್ಲಿಂ ಮಿಂಜಾಸ್ಕೆಚಿಂ ಖೊವ್ಳಾಂ ತರ್ಯೀ ಕಸ್ಲಿಂ ಪಳೆಯಾ. ಅಪ್ಲ್ಯಾ ಉತರ್ ಪ್ರಾಯೆರ್ ಅಪ್ಲಿಂಚ್ ಭುರ್ಗಿಂ ಅಪ್ಣಾಕ್ ತೋಂಡ್ ಧಾಖಂವ್ಕ್ ಯೇನಾಸ್ಚೆ ವೆಳಾರ್ ಅಪ್ಲ್ಯಾ ಮನ್ಶಾಂಕ್ ಮೆಳೊಂಕ್ ಆಶೆಂವ್ಚಿಂ ಹಿಂ ಆಶೆಚಿಂ ಖೊವ್ಳಾಂ ಸಮ್ಜಾಜಯ್ ತರ್ ಕ್ಲೆರೆನ್ಸ್ ಕೈಕಂಬಾಚಿ ಹಿ ಕಾಣಿ ಜರೂರ್ ವಾಚಿಜಾಯ್.
ಅಸ್ಥಿರ್ ಮೆಟಾಂ: ಮಾಂಯ್ಗಾಂವಾಂತ್ ಜಿಯೆಂವ್ಚಾ ಅಪ್ಲ್ಯಾಂಚಿ ಸ್ವಪ್ಣಾಂ ಜಿವಿಂ ಕರುಂಕ್, ಗಾಂವ್ಚಾ ಮಾತಿಯೆಂತ್ ಗುಲೊಬ್ ಫುಲೊಂಕ್ ಕೊಣಾ ಕೊಣಾ ಯೇಜಂಟಾಂಕ್ ಹಜಾರ್-ಲಾಖಾಂನಿ ದುಡು ದೀವ್ನ್ ಗಲ್ಫಾಕ್ ಯೇವ್ನ್ ತಿಂ ಸ್ವಪ್ಣಾಂ ಜಿವಿ ದವ್ರುಂಖ್ ಕಸ್ಲಿ ಜಿಣಿ ಜಿಯೆಂವ್ಕ್ ಪಡ್ತಾ ಮ್ಹಳ್ಳಿ ಕಾಂಯ್ ತರೀ ಅಂದಾಜ್ ಆಸ್ಚಾಂಕ್ ಹಿ ಫಕತ್ತ್ ಏಕ್ ಕಾಣಿ ನ್ಹಂಯ್ ಬಗಾರ್ ಜಿಣಿ ಮ್ಹಳ್ಳೆಪರಿಂ ಭಗ್ತೆಲೆಂಚ್. ತುಮಿಂ ಗಲ್ಫಾಂತ್ ಆಸಾತ್? ತುಮ್ಚಿಂ ಕೊಣೀಂ ಗಲ್ಫಾಂತ್ ಆಸಾತ್ ವಾ ವಚೊಂಕ್ ಆಶೆತಾತ್? ಪಯ್ಲೆಂ ಸ್ಟೇನ್ ಅಗೇರಾಚಿ ಹಿ ಕಾಣಿ ಜರೂರ್ ವಾಚಾ.
ಕೊರ್ಗೊರ್ಲೆಂ: ’ಬಿಗ್ ಬ್ರದರ್’ ಶೋಚೆರ್ ಆಯ್ಲೆವಾರ್ ಯುಕೆಂತ್ ಶಿಲ್ಪಾ ಶೆಟ್ಟಿಕ್ ಹಲ್ಕ್ ಕೆಲೆಂ ಮ್ಹಣ್ ಸಗ್ಳೊ ಭಾರತ್ ದೇಸ್ ಉಡ್ಲೊ. ಕೊಣೆಂ ಕಾರಾಂ ಲಾಸ್ಲಿಂ ಕೊಣೆಂ ಬಸ್ಸಾಂ ಹುಲ್ಪಾಯ್ಲಿಂ. ಪುಣ್ ಆಮ್ಚಾ ಸಮಾಜೆಂತ್ ಆಮ್ಚೆಪರಿಂಚ್ ಜಿಯೆಂವ್ಚಾ ಲೊಕಾಕ್ ಆಮಿ ಮಾರಾಂ ಕೊರ್ಗಿಂ ಮ್ಹಣ್ ಅಜೂನ್ ವೊಲಾಂವ್ಚೆಂ ಸತ್ ಮಾತ್ರ್ ಜಿವೆಂಚ್ ಉರೊನ್ ಆಮ್ಚಾ ಹಿಪೊಕ್ರಿತ್ ಸವಯಾಂಚೆರ್ ತುಕ್ಲಾವ್ನ್ ಹಾಸ್ತಾ. ಕೊಂಕ್ಣೆಂತ್ ವಿಚಾರ್ವಂತ್ ಕಾಣ್ಯೊ ಬರಂವ್ಕ್ ನಾಂವಾಡ್ದಿಕ್ ಜಾಲ್ಲ್ಯಾ ಜೊರ್ಜಿ ಪೀಂತ್ ಆಯ್ಕೊಳಾನ್ ಬರಯಿಲ್ಲಿ ಅಖ್ರೇಚಿ ಮಟ್ವಿ ಕಾಣಿ ಹಿ.
ಸಾಹಿತಿಲಾಗಿಂ ಸಂವಾದ್: ಕೊಂಕ್ಣಿ ಸಾಹಿತಿಂಚಾ ಮೆಳಿಂತ್ ಲ್ಯಾನ್ಸಿ ಪಿಂಟೊ ನಾಯಕ್ ನಾಂವ್ಯೀ ಫಾಮಾದ್ ತಶೆಂಚ್ ವಿವಾದಾತ್ಮಕ್. ಕೆದ್ನಾಂ ನಾಟಕಾಂಕ್ ತರ್ ಕೆದ್ನಾಂ ಕಾದಂಬರಿಯಾಂಕ್. ಕೆದ್ನಾಂ ಕವಿತಾಂಕ್ ಆನಿ ಕೆದ್ನಾಂ ವಿಡಂಬನಾಂಕ್. ಪುಣ್ ಏಕ್ ಸತ್ ಮಾತ್ರ್ ಕೊಣೆಂಯ್ ನೆಗಾರ್ ಕರ್ಚೆಪರಿಂ ನಾ; ಕೊಂಕ್ಣಿ ಸಾಹಿತ್ಯಾಕ್ ಹಾಣೆಂಯ್ ದಿಲ್ಲಿ ದೇಣ್ಗಿ ಜಾಯ್ತಿ ಆಸಾ. ತೆಚ್ಚ್ ಇರಾದ್ಯಾನ್ ದಾಯ್ಜ್ ಸಹ-ಸಂಪಾದಕಿ ಪ್ರಿಯಾ ಸಿಕ್ವೇರಾನ್ ಚಲಯಿಲ್ಲೆಂ ಸಂವಾದ್ ಹೆಂ.
ಕೊಂಕ್ಣಿ ಕಾರ್ಭಾರಿ: ಹಾಕಾ ಚಡ್ತಾವ್ ’ವಿವಾದಾತ್ಮಕ್ ವೆಕ್ತಿ’ ಮ್ಹಣ್ ಲೆಕ್ತಾತ್ ತರ್ಯೀ ಆಮ್ಚಾ ಸಮಾಜೆಂತ್ ಆಮಿ ಬರೊ ಮನಿಸ್ ಮ್ಹಣ್ ಕೊಣಾಕ್ ಲೆಖ್ತಾಂವ್? ಜೆಜುಕ್ ಖುರ್ಸಾಯಿಲ್ಲ್ಯಾ ಆಮ್ಕಾಂ, ಗಾಂಧಿಕ್ ಗುಳೊ ಘಾಲ್ಲ್ಯಾ ಆಮ್ಕಾಂ, ಆಮ್ಚೆ ಶಿವಾಯ್ ಬರಿಂ ಹ್ಯಾ ಸಂಸ್ರಾಂತ್ ಆಸ್ಚೆಂ ದಿಸೊಂಕ್ ಆಮ್ಚೆ ದೊಳೆ ಉಘಡ್ಲ್ಯಾರ್ ನಿಯೆ? ಕೋಣ್ ಕಿತೆಂಯ್ ಸಾಂಗೊಂದಿತ್, ಪುಣ್ ಅಪ್ಲ್ಯಾ ತಾಂಕಿಚೊ ವಾವ್ರ್ ಹೊ ಕೆದ್ನಾಂಯ್ ಕರ್ನ್ ಆಸ್ತಾ ಆನಿ ಕೊಂಕ್ಣಿ ವಾವ್ರಾಕ್ ಖರೊ ಪಾಟಿಂಬೊ ದಿಂವ್ಚಾಂತ್ಲೊ ಎಕ್ಲೊ ಪಾಸ್ಕಲ್ ಪಿಂಟೊ. ಹಾಚೆಸವೆಂ ದಾಯ್ಜ್ ಸಹ-ಸಂಪಾದಕ್ ಮೆಲ್ವಿನ್ ಜೆ. ವಾಸಾನ್ ಘೆತ್ಲ್ಲೆಂ ಸಂದರ್ಶನ್.
ಚಿಕ್ಲೆಟಾಂ: ಫಾಸ್ಕಾಂ ಫೆಸ್ತಾಚಾ ಸಂದರ್ಭಾರ್ ದುಕ್ರಾಮಾಸ್ ಆನಿ ವಿಸ್ಕೆಚಿ ಬೋತ್ಲ್ ಘೆವ್ನ್ ಬೊಸ್ತಾನಾ - ತೆಂ ಜಿರೊಂಕ್ ಕಾಂಯ್ ತರೀ ಜಾಯ್ ಆಸ್ಚಾಂನಿ ಹೆಂ ಜರೂರ್ ವಾಚಿಚಾಯ್. ಕೊಂಕ್ಣೆಂತ್ಲೊ ದುಂಡಿರಾಜ್ ಮ್ಹಳ್ಳ್ಯಾಕ್ ಆತಾಂ ಕಸ್ಲಿ ಜಾಪ್ ದಿತಾ? ಸಿಜ್ಯೆಸ್ ತಾಕೊಡೆಚಿಂ ವಿಂಚ್ಣಾರ್ ಚಿಕ್ಲೆಟಾಂ ತುಮ್ಕಾಂ ದಾಧೊಶಿಂ ಹಸಯ್ತೆಲಿಂ. ದೆಕುನ್ ವಾಚಾ, ನಾಚಾ ಆನಿ ಹಾಸಾ..
ಜೀವಂತ್ಪಣ್: ಜಿವಂತ್ಪಣ್ ತಿತ್ಲೆಂ ಸುಲಭ್ ನ್ಹಂಯ್, ಕಿತ್ಯಾಕ್ ತಾಚ್ಯಾಧಿಂ ಮೊರೊಂಕ್ ಪಡ್ತಾ. ಆನಿ ಆಮಿಂ ಮಾರುಂಕ್ ತರೀ ತಯಾರ್ ಪುಣ್ ಮೊರೊಂಕ್ ನ್ಹಂಯ್. ದೆಕುನ್ ಜೀವಂತ್ಪಣ್ ತಿತ್ಲೊ ಸಲೀಸಾಯೆಚೊ ಸಬ್ಧ್ ನ್ಹಂಯ್. ಕ್ರಿಸ್ತಿ ಧರ್ಮಾಚೊ ಮೂಳ್ ಶೆವೊಟ್ ಹ್ಯಾ ಸಬ್ಧಾಚೆರ್ ಆಸಾ. ಹೆಂ ಜಿವಂತ್ಪಣ್ ಕುಡಿಚೆಂಚ್ ನ್ಹಂಯ್. ಆಮ್ಚಾ ಚಾಲ್ತ್ಯಾ ಜಿಣ್ಯೆಂತ್ಯ್ ಆಮಿ ಆಧಾರ್ಲ್ಲ್ಯಾ ಚುಕಿಂ ಥಾವ್ನ್ ಆಮಿ ಕೆದ್ನಾಂ ಮೊರೊನ್ ಜೀವಂತ್ ಜಾತಾಂವ್ ಮ್ಹಳ್ಳೊ ನಿಯಾಳ್ ಕರ್ನ್ ದಿಂವ್ಚಾ ಇರಾದ್ಯಾನ್ ಆಂಡ್ರು ಎಲ್. ಡಿ’ಕುನ್ಹಾನ್ ಬರಯಿಲ್ಲೆಂ ಅಪುರ್ಭಾಯೆಚೆಂ ಕವಿತಾ.
ಲೆಂವ್ಟೊ: ಹ್ಯಾ ಸಂಸಾರಾಂತ್ ಜಿಯೆತೆಲೆ ದೋಗ್. ಎಕ್ಲೊ ಕವಿ ದುಸ್ರೊ ತಿ ಕವಿತಾ ವಾಸ್ಚೊ ವಾಚ್ಪಿ - ಪುಣ್ ದೊಗೀ ಲೆಂವ್ಟೆ. ಹೆಂ ಕಸಲೆಂ ಲೆಂವ್ಟೆಂಪಣ್? ಕವಿಚಾ ಉತ್ರಾಂನಿ ಆಸ್ಚಿ ದೂಕ್ ಸ್ವತಾ ಭಗ್ಲ್ಲ್ಯಾಂಕ್ ಮಾತ್ರ್ ಕಳಿತ್ ಜಾತಾ. ಆನಿ ವಾಚ್ಲ್ಲೊ ತುಂ ಕಿತ್ಯಾಕ್ ಆನಿ ಕಸೊ ಲೆಂವ್ಟೊ? ಮ್ಹಳ್ಳೆಂ ಹಾವೆಂ ಸಾಂಗ್ಚಾ ಬದ್ಲಾಕ್ ಆನ್ಸಿ ಪಾಲಡ್ಕಾಚೆಂ ಕವಿತಾ ತುಮಿಂಚ್ ವಾಚುನ್ ಸಮ್ಜಶ್ಯಾತ್ ತರ್ ಭೋವ್ ಬರೆಂ ಜಾಯ್ತ್.
ಸಾಳಿಯೊ ಆನಿ ರಾಯ್: ಹಾವೆಂ ಪಯ್ಲೆಂಚ್ ಸಾಂಗ್ಲಾಂ - ಎಚ್ಚೆಮಾನ್ ಸಾಂಗ್ಚೆಂ ಥೊಡೆಂಚ್. ಪುಣ್ ಸಗ್ಳೆಂ ತ್ಯಾ ಥೊಡ್ಯಾಂತ್ ಆಸಾ - ಸಗ್ಳೆಂ ಮ್ಹಳ್ಯಾರ್ ಕೆದಿಂಚ್ ಮುಗ್ದನಾತ್ಲ್ಲಿ ಕಾಣಿ. ಹಾಂಗಾ ಹ್ಯಾ ಸಾಳ್ಯಾ ರಾಯಾಚಿ ಫವ್ನ್, ಜಯ್ತ್, ಮಿರವ್ಣಿ, ಆನಿ ಖೆವಾದ್ ಪಳೆವ್ನ್ ತುಮಿಂ ಸಂಸಾರ್ ವಿಸರ್ನಾಕಾತ್. ಫಕತ್ತ್ ಕವಿತೆಚಿ ಸೊಭಾಯ್ ಆನಿ ತ್ರಾಣ್ ಪಾರ್ಕಿಯಾ.
ಮೊಲಾಚಿಂ ಸೊಧ್ನಾಂ: ಕೊಣೆಂ ಕೆಲ್ಯಾಂತ್ ಮೊಲಾಚಿಂ ಸೊಧ್ನಾಂ? ಸಾಂಗಾ ಮ್ಹಾಕಾ. ಕವಿ ವಿಲ್ಸನ್ ಕಟೀಲ್ ಆತಾಂ ತಿಂ ಕರ್ತಾನಾ, ಎಕಾ ಕವಿತೆಕ್ ಧಾ ರುಪ್ಯಾಂಚೊ ಏಕ್ ನೋಟ್ಯೀ ಪಾವ್ತಾ ಸಮಾಜೆಚಾ ಎಕೆಕಾ ಮಾರೆಕಾರ್ ಪಿಡೆಂಕ್ ಉಸ್ತುಂಕ್ ಮ್ಹಳ್ಳೆಂ ಹೆಂ ಕವಿತಾ ಅಪುರ್ಭಾಯೆಚೆಂ ಗೊವಾಯ್ ದಿತಾ.
ಪಯ್ಣಾರಿ: ಮನಿಸ್ ಹ್ಯಾ ಸಂಸಾರಾಂತ್ಲೊ ಏಕ್ ಪಯ್ಣಾರಿ. ಆನಿ ಹೆಂ ಚಿಂತಾಪ್ ಸಮ್ಜೊಂಕ್ ಕಾಂಯ್ ತತ್ವ್ಗಿನ್ಯಾನಾಚಿ ಗರ್ಜ್ ನಾ. ಪುಣ್ ಹ್ಯಾ ಪಯ್ಣಾಚಿಂ ಎಕೇಕ್ ಮೆಟಾಂ ಆನಿ ಎಕೇಕ್ ಸಾಂಗಾತಿ ಆನಿ ತಾಂಚೊ ಶೆವೊಟ್ ಕಸೊ ಎಕಾಮೆಕಾಚಿಂ ಭಗ್ಣಾಂ, ಉದ್ವೇಗ್ ಜಾಗಂವ್ಕ್ ಸಕ್ತಾತ್ ಮ್ಹಳ್ಳೆಂ ಪಿಂತ್ರಾಂವ್ಚೆಂ ಕವಿತಾ ಮೆಲ್ವಿನ್ ಜೆ. ವಾಸ್ ಥಾವ್ನ್.
ದೀಷ್ಟ್: ’ಉತ್ರಾಂ-ಉತ್ರಾಂನಿಂ ಜೀವ್ ದೆಖ್ಚೊ, ಕರ್ನ್ಯಾ-ಕರ್ನ್ಯಾಂನಿಂ ದೇವ್ ದೆಖ್ತಾ, ದೇವ್ ದಿಸ್ತಾ ಉಣೊ!, ಸಯ್ತಾನ್ ನಾಚ್ತಾ......... ಶಾಣೊ!!’ ಕಸ್ಲಿಂ ಉತ್ರಾಂ ಪಳೆಯಾ ಕವಿಚಿಂ. ಭೋವ್ ಮಾರ್ಮಿಕ್ ಸತಾಚಿಂ ಉತ್ರಾಂ. ಆಮ್ಚಾ ಜಿಣ್ಯೆಂತ್ ಆಮಿಂ ಉಲವ್ನ್ ರಾಂವ್ಚಾ ಬದ್ಲಾಕ್ ಕರ್ನ್ ಧಾಖಂವ್ಕ್ ಲಾಗ್ಲ್ಯಾಂವ್ ತರ್ ಸಗ್ಳೊ ಸಂಸಾರ್ ಥೊಡೆಚ್ಚ್ ದಿಸಾಂನಿ ಬದ್ಲೊಂಕ್ ಆಸಾ ತೆಂ ಖಂಡಿತ್. ಅನಿಲ್ ಪೆರ್ನಾಲಾಚೆಂ ಹೆಂ ಕವಿತಾ ಕಾಂಯ್ ಸರ್ವ್ ಕಾಳಾರ್ ಸೊಭ್ಚೆಂ ಆನಿ ರುಸ್ಚೆತಸ್ಲೆಂ ಜಾವ್ನಾಸಾ.
ಬಸವಾ ಆನಿ ತೊ: ಕೊಂಕ್ಣೆಂತ್ ಆಯ್ಲೆವಾರ್ ಉದೆಲ್ಲ್ಯಾ ಥೊಡ್ಯಾ ಪ್ರತಿಭಾವಂತ್ ಕವಿಂ ಪಯ್ಕಿ ಆರ್ಯನ್ ತಾಕೊಡೆಕ್ ಹಾಂವ್ ಲೆಕ್ತಾಂ. ಹೆಂ ಕಾಂಯ್ ಸಾದೆಂ ಕವಿತಾ ನ್ಹಂಯ್, ಏಕ್ ಬಸ್ವಾ ಜೆದ್ನಾಂ ಅಪ್ಲ್ಯಾ ಧನ್ಯಾ ಖಾತಿರ್ ಕಸಲೊ ಕಸಲೊ ವೇಸ್ ಘಾಲ್ನ್ ಭಿಕ್ ಮಾಗ್ತಾ. ದೀಸ್ ಉತ್ರೊನ್, ಹಾಫ್ತೆ ಸರೊನ್, ಮಯ್ನೆ ಪಾಶಾರ್ ಜಾವ್ನ್ ವರ್ಸಾಂ ಉಭ್ತಾತ್ ಆನಿ ಧನಿ ಮೊರ್ತಾನಾ ತೊ ಬಸ್ವಾ ಮಾಪ್ಳ್ಯಾಚಿ ಆಸ್ತ್ ಆನಿ ವಸ್ತ್ ಜಾತಾನಾ ಸಾಂಕೇತಿಕ್ ರಿತಿನ್ ಏಕ್ ಅಪುರ್ಭಾಯೆಚೆಂ ಪಿಂತುರ್ ಉಭೆಂ ಕರ್ತಾ ಹಿ ಕವಿತಾ.
ಜೀವಂತ್ಪಣ್: ಜಿವಂತ್ಪಣಾಚ್ಯೆ ಆಧಿಂ ಹ್ಯಾ ಸಂಸಾರಾಂತ್ ಅಪ್ಣಾಕ್ ಕಸ್ಲೊಚ್ ಅಪ್ರಾಧ್ ಕರಿನಾಸ್ತಾಂ ಸಯ್ತ್ ಭಗ್ಲ್ಲ್ಯಾ ಅಟೆವಿಟ್ಯಾಂಕ್ ಸೊಸುನ್, ತೆಚ್ಚ್ ಮನ್ಶ್ಯಾಂಚಾ ಬರ್ಯಾಪಣಾ ಪಾಸತ್ ಪುನರ್ಜೀವ್ ಜಾಂವ್ಚೆಂ ಕಿತ್ಲೆಂ ವ್ಹರ್ತೆಂ ಪಳೆಯಾ. ದೆಕುನ್ ದೈವಿಕ್ ಚಿಂತ್ಪಾಚೆರ್ ಕವಿಚಿಂ ಉತ್ರಾಂ ಆರ್ಥರ್ ಪಿರೇರಾಚ್ಯಾ ಹ್ಯಾ ಕವಿತೆಕ್ ವರ್ತಿಂ ಕರುಂಕ್ ಸಕ್ತಾತ್.
ಕೊಣ್ ಸುಖಿ: ಹ್ಯಾ ಸಂಸ್ರಾಂತ್ ಜಿಯೆತೆಲ್ಯಾಂನಿ ಎಕಾಮೆಕಾ ಕರ್ಚೆಂ ಸವಾಲ್ ಹೆಂ. ಅಂಕ್ವಾರ್ ಆಸ್ಚಿಂ ಕಾಜಾರ್ಯಾಂಕ್ ವಿಚಾರ್ತಾತ್, ಆನಿ ಕಾಜಾರಿಂ ಅಂಕ್ವಾರಿಂಕ್ ವಿಚಾರ್ತಾತ್. ಭುರ್ಗಿಂ ಆಸ್ಚಿಂ ಭುರ್ಗಿಂ ನಾತ್ಲ್ಲ್ಯಾಂಕ್ ವಿಚಾರ್ತಾತ್, ಭುರ್ಗಿಂ ನಾತ್ಲ್ಲಿಂ ಭುರ್ಗಿಂ ಆಸ್ಚಾಂಕ್ ವಿಚಾರ್ತಾತ್ ’ಕೊಣ್ ಸುಖಿ?’ ತರ್ ಕವಿಚ್ಯಾ ಉತ್ರಾಂನಿ ನಿಜಾಯ್ಕೀ ಕೊಣ್ ಸುಖಿ? ನವೊ ಕವಿ ತರ್ಯೀ ಬರೆ ವಿಚಾರ್ ಘೆವ್ನ್ ಆಯಿಲ್ಲ್ಯಾ ಮೆಲ್ವಿನ್ ಡಿ’ಸೋಜಾಚೆಂ ಕವಿತಾ ಪಳೆಯಾ.
ಅಜೂನೀ ತಿಂಚ್ ದುಖಾಂ: ಕೊಣ್ ಮ್ಹಣ್ತಾ ಜೆಜುಕ್ ಖುರ್ಸಾರ್ ಖಿಳಾಯಿಲ್ಲೆಂ ಅಜೀಕ್ ದೋನ್ ಹರಾರ್ ವರ್ಸಾಧಿಂ ಮ್ಹಣ್? ಕವಿ ವಿನ್ಸಿ ಮೆಲ್ಕಾರ್ ಕಿತೆಂ ಸಾಂಗ್ತಾ ಪಳೆಯಾ, ಆಮಿಂ ವರ್ಸಾನ್ ವರ್ಸಾ ನ್ಹಂಯ್, ಹರ್ಯೆಕಾ ದಿಸಾ ಜೆಜುಕ್ ಖಿಳಯ್ತಾಂವ್ ಮ್ಹಳ್ಳೆಂ ಆಮ್ಕಾಂ ಪಾತ್ಯೆಂವ್ಕ್ ಜಾಯ್ನಾ ತರ್ಯೀ ಸತ್ ಮ್ಹಳ್ಳೆಂ ಚಿಂತಾಪ್ ಕವಿ ಅಪುರ್ಭಾಯೆನ್ ಪಿಂತ್ರಾವ್ಣಿ ಕರ್ಚಿ ಹಾಂಗಾಸರ್ ದಿಸೊನ್ ಯೆತಾ.
ಶ್ರದ್ದಾಂಜಲಿ!?: ಮೊರೊನ್ ಗೆಲ್ಲ್ಯಾ ಮನ್ಶ್ಯಾಂಕ್ ಶ್ರದ್ದಾಂಜಲಿ ದಿಂವ್ಚಿ ರಿವಾಜ್ ಆಮಿ ತುಮಿ ಆಯ್ಕಲ್ಯಾ, ಪುಣ್ ಮೊರೊನ್ ಗೆಲ್ಲ್ಯಾ ಎಕಾ ಕೊಂಕ್ಣಿ ಪತ್ರಾಕ್ ಆತಾಂ ಶ್ರದ್ದಾಂಜಲಿ ದಿತಾನಾ, ಹಿ ಶ್ರದ್ದಾಂಜಲಿ ದಿತೆಲ್ಯಾಂನಿ ಭಗ್ಲ್ಲೆ ಆಟೆವಿಟೆ ಆನಿ ದೂಕ್ ಕಿತ್ಲೆ ಮ್ಹಳ್ಳೆಂ ತುಮಿಂಚ್ ಅಂದಾಜ್ ಘಾಲಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed, hosted and maintained by Ashawadi
Publications