ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಏಕ್ ಕುಡ್ಕೊ ಪಿಜ್ಜಾ
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಹಾಚ್ಯೊ ಥೊಡ್ಯೊ ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್
ಕ್ಲೆರೆನ್ಸ್, ಕೈಕಂಬ
ಕಪಾಲಾರ್ ಜಮ್ಲ್ಲೊ ಘಾಮ್ ತೀನ್ ಪಾವ್ಟಿಂ ಪುಸ್ಲೊ ತರೀ ಪರತ್ ಜಮ್ಲೊ ಮ್ಹಣ್ ರಾಮಲುಕ್ ಕಳ್ಳೆಂ. ಪುಣ್ ತಾಣೆ ಪರತ್ ಪುಸ್ಲೊ ನಾ. ಮಾತ್ಯಾ ವಯ್ರ್ ಆಕಾಸಾರ್ ಝಳೊನ್ ಆಸ್ಲ್ಲೊ ಸುರ್ಯೊ ಬುಡೊಂಕ್ ತಯಾರ್ ಜಾಲ್ಲೊ ತರೀ ವೊತಾಚಿ ಧಾವ್ ಉಣಿ ಜಾಂವ್ಕ್ ನಾತ್ಲ್ಲಿ. ಮಸ್ಕತಾಂತ್ ಮಧ್ಯಾನ್ ರಾತ್ ವರೇಗ್ ಗರ್ಮೆಚಿ ಧಾವ್ ಆಸ್ತಾ. ರಸ್ತ್ಯಾರ್ ಝಾಡು ಮಾರ್ಚ್ಯಾ ಹರ್ಯೆಕ್ಲ್ಯಾಚ್ಯಾ ಮಾತ್ಯಾ ಥಾವ್ನ್ ಪಾಂಯಾಂ ಮ್ಹಣಾಸರ್ ಹರ್ಯೆಕಾ ಲೊಂವೆಂತ್ಲ್ಯಾನ್ ಘಾಮಾಚಿ ಝರಿ ಉದೆತಾತ್ ತೆಂ ಖರೆಂಚ್ಚ್ ಆನಿಂ ರಾಮಲುಚೆಂ ಸರ್ಕಾರಿ ಆಂಗ್ ವಸ್ತುರ್ ಹ್ಯಾ ಉಜ್ಯಾ ಸಾರ್ಕ್ಯಾ ಧಾವೆಕ್ ಬಿಜೊನ್ ಥಂಡ್ ಜಾಲ್ಲೆಂ. ಮಾತ್ಯಾರ್ ಆಸ್ಚೆಂ ಚೆಪೆಂ ಥಂಡ್ ಜಾವ್ನ್, ತಾಂತ್ಲ್ಯಾನ್ ಘಾಮಾಚಿ ವೊರಾಸಣ್ ಯೆತಾಲಿ. ಪಾಯಾಂಚ್ಯಾ ಮೊಚ್ಯಾಂನಿ ಘಾಮ್ ಭರೊನ್ ತಳ್ಯಾಂತ್ ಚಲ್ಲ್ಲ್ಯಾ ಬರಿ ತಾಕಾ ಜಾತಾಲೆಂ.
ಹಾತಿಂ ನಾರಾಚಿ ಲಾಂಬ್ ಗೊಣಿ ಆನಿ ಬುರುಸ್ ಆಸ್ಲ್ಲೆಂ. ಗೊಣಿಯೆಂತ್ ಕೋಯ್ರ್ ಭರ್ಲ್ಲೊ. ರಸ್ತ್ಯಾ ವಯ್ರ್, ಚಡಾವತ್ ದೆಗೆನ್ ಹೆಣೆ ತೆಣೆ ಪಡ್ಲ್ಲೊ ಕೋಯ್ರ್ ವಿಂಚುನ್ ತೊ ಮುಕಾರ್ ಮುಕಾರ್ ಯೆತಾಲೊ.
ಮಸ್ಕತ್ ಮುನಿಸಿಪಾಲಿಟಿಂತ್ ಕಾಮ್ ಕರ್ಚೊ ರಾಮಲು, ಗಾವಾಂತ್ ಆಂಧ್ರಚೊ. ಕರೀಮ್ನಗರಾ ಥಾವ್ನ್ ಸುಮಾರ್ ತಿನ್ಶಿಂ ಮಯ್ಲಾಂ ಪಯ್ಸಿಲಿ ಹಳ್ಳಿ - ಕಾಕನಕುಡ ತಾಚೆಂ ಬಿಡಾರ್. ಸಾತ್ ವರ್ಸಾಂ ಪಯ್ಲೆಂ ಮಸ್ಕತ್ ಯೆಂವ್ಚೆಂ ನಶೀಬ್ ಉದೆತಾನಾ ತಾಣೆ ಪಾಟಿಂ ಮುಕಾರ್ ಪಳಯಿಲ್ಲೆಂ ನಾ. ಬಾಯ್ಲೆಚೆಂ ಭಾಂಗಾರ್ ವಿಕುನ್, ಆಸ್ಲ್ಲೊ ಥೊಡೊ ಜಾಗೊ ಆಡವ್ ದವರ್ನ್ ತೊ ಮಸ್ಕತ್ ಆಯಿಲ್ಲೊ. ಏಜಂಟಾಕ್ ದಿಲ್ಲೆ ಚಾಳಿಸ್ ಹಜಾರ್ ರುಪಯ್ ಕಸೆಯ್ ಚಾರ್ ವರ್ಸಾನಿಂ ದೀಸ್ ರಾತ್ ಘೊಳೊನ್ ಪಾಟಿಂ ಆಯಿಲ್ಲ್ಯಾ ಬರಿ ಭಗ್ಲ್ಲೆಂ.
ಮಸ್ಕತಾಕ್ ಆಯಿಲ್ಲ್ಯಾ ತವಳ್ ಥಾವ್ನ್ ರಾಮಲುಕ್ ದೋನ್ ಆದೇಸಾಂಕ್ ಕಾಮ್. ಸಕಾಳಿಂಚ್ಯಾ ಆದೇಸಾಕ್, ಫಾಂತ್ಯಾರ್ ಸ ವೊರಾಂ ಥಾವ್ನ್ ನೋವ್ ವರೇಗ್, ಶಾರಟನ್ ಹೊಟೆಲಾಚ್ಯಾ ರಸ್ತ್ಯಾ ದಿವ್ಯಾಂ ಥಾವ್ನ್ ವಾಡಿ ಕಭೀರ್ ಮ್ಹಣಾಸರ್ ರಸ್ತೊ ಜಾಡುಂಕ್. ಸಾಂಜೆರ್ ಚಾರ್ ವೊರಾಂ ಥಾವ್ನ್ ನೋವ್ ಮ್ಹಣಾಸರ್ ಶಾರಟನಾಚ್ಯಾ ಆಡ್ವ್ಯಾ ರಸ್ತ್ಯಾರ್ ಆಸ್ಲ್ಲೆ ಸರ್ವ್ ಲ್ಹಾನ್ ವ್ಹಡ್ ರಸ್ತೆ ತಾಚ್ಯಾ ವರ್ಗಾಕ್. ರಸ್ತ್ಯಾರ್ ಖಚ್ರ್ಯಾಚೊ ಏಕ್ ಕುಡ್ಕೊ ದಿಸ್ಲೊ ತರೀ ಸತ್ತ್ ಕರುನ್ ವಿಂಚಿನಾ ತರ್ ಕೆದಾಳಾಯ್ ಆರ್ಭಿ ಸುಪರ್ವೈಸರ್ ಯೇವ್ನ್ ಸಾದಾರ್ನ್ ರೀತಿಚ್ಯೊ ಗಾಳಿ ಶಿರಾಪ್ ದಿತಾಚ್ಚ್. ತಾಚ್ಯಾ ತೊಂಡಾ ಥಾವ್ನ್ ಕಾಂಯ್ ಆಯ್ಕೊಂಕ್ ನಜೊ ತರ್ ಸರಾಗ್ ಬುರುಸ್ ಘುಂವ್ದಾವ್ನ್ಂಚ್ಚ್ ರಾವಾಜಾಯ್.
ಹ್ಯಾ ಜಾಗ್ಯಾರ್ ಹಾಪ್ತ್ಯಾಂತ್ ಏಕ್ - ದೋನ್ ಥೊಡ್ಯಾ ಪಾವ್ಟಿಂ ಚಡ್ ಆವ್ಘಡಾಂ ಘಡ್ತಾತ್. ತ್ಯಾ ವೆಳಿಂ ಜಾಂವ್ಚಿ ಆವಸ್ತಾ ಸಾಂಗೊಂಕ್ ಜಾಯ್ನಾ. ರಸ್ತ್ಯಾರ್ ಪಡ್ಲ್ಲ್ಯಾ ಆರ್ಶ್ಯಾಚೆ ಕುಡ್ಕೆ ಕಾಡ್ಚೆಂಚ್ಚ್ ವ್ಹಡ್ ತ್ರಾಸಾಚೆಂ ಕಾಮ್. ತರೀ ಕಿತೆಂ ಕರುಂಕ್ ಜಾತಾ ಮಹಿನ್ಯಾಕ್ ಮೆಳ್ಚ್ಯಾ ಪನ್ನಾಸ್ ರಿಯಾಲಾಂಕ್ ಹೆಂ ಕಾಮ್ ಕರಿಜಾಯ್ ನಾ ತರ್ ಪಾಟಿಂ ಆಪ್ಲ್ಯಾ ದೇಶಾಕ್ ವಚೊಂಕ್ ಜಾಯ್. ಥೈಂ ವಚೊನ್ ಕಾಲೆಂ ಕರ್ಚೆಂ. ಪರತ್ ಮಾತಿ ಮುರ್ಡಿಜಾಯ್ ಯಾ ಗಾಡ್ಯಾನಿಂ ಘೊಳಾಜಯ್ ????!
ಶಾರಟನಾ ಥಾವ್ನ್ ಮುಕಾರ್ ಯೇವ್ನ್ ದಾವ್ಯಾಕ್ ಆಯ್ಲ್ಯಾರ್ ಮೆಳ್ಚ್ಯಾ ಸುವಾಧಿಕ್ ಪರ್ಮಳಾಚ್ಯಾ ಆಂಗ್ದಿ ಮುಕಾರ್ ಉಬ್ಯಾ ರಾವೊನ್, ತ್ಯಾಚ್ಚ್ ಆಂಗ್ದಿಕ್ ದೆಖೊನ್ ಹರ್ಯೇಕ್ ದೀಸಾ ಥೊಡೊ ವೇಳ್ ಖರ್ಚುಂಚಿ ಸವಯ್ ತಾಚಿ. ಪಾಟ್ಲ್ಯಾ ಸಾತ್ ವರ್ಸಾಂ ಥಾವ್ನ್ ಹರ್ಯೆಕ್ ದೀಸ್ ತೊ ತಸೆಂಚ್ಚ್ ಕರ್ತಾಲೊ.
ತಾಂಬ್ದೊ, ಹಳ್ಧುವೊ ಆನಿ ಕಾಳ್ಯಾ ರಂಗಾಚೊ ಬೋರ್ಡ್. ತಾಚೆರ್ ಏಕ್ ಚೆಪೆಂ. ಚೆಪ್ಯಾ ಪಂದಾಕ್ ಕಾಳಿಂಚ್ಚ್ ಅಕ್ಶರಾಂ. ರುಚಿಕ್ ಖಾಣಾಚೆಂ ದುಕಾನ್ ಮ್ಹಣ್ ತಾಕಾ ಕಳಿತ್ ಜಾಲ್ಲೆಂ. ಕಾರಾಂಚೆರ್ ಯೇಂವ್ಚಿ ಗ್ರೇಸ್ತಾಂ ಮಾತ್ರ್ ತಾಚೆ ಗಿರಾಯ್ಕ್. ಥೊಡಿಂ ಭಿತರ್ ಬಸೊನ್ ಖಾತಾಲಿಂ ತರ್ ಥೊಡಿಂ ಕಾಗ್ದಾಚ್ಯಾ ಕಂರ್ಡ್ಯಾನಿ ಬಾಂಧುನ್ ವರ್ತಾಲಿಂ.
ತ್ಯಾ ಆಂಗ್ದಿ ಮುಕಾರ್ ಚಡಾವತ್ ಕೋಯ್ರ್ ಪಡಾನಾತ್ಲ್ಲೊ. ಪದ್ಲೊ ತರೀ ವಿಂಚ್ತಾನಾ ಯೆಂವ್ಚ್ಯಾ ಪರ್ಮಳಾಕ್ ತಾಚ್ಯಾ ಪೊತಾಂತ್ಲೆ ದಾಂತ್ ಅಬ್ಲೆಸಾಕ್ ಹುಳ್ವುಳ್ತಾಲೆ. ತ್ಯಾ ಹುಳ್ವುಳ್ಯಾನಿಂ ತೊಂಡಾಂತ್ ಪಾಜಾರ್ಚ್ಯಾ ಥಿಂಪಿಯೆಕ್ ತಾಣೆ ಉಡಯಿಲ್ಲಿ ನಾ. ತಿ ಥಿಂಪಿಚ್ಚ್ ಇತ್ಲಿ ರುಚಿಕ್ ತರ್ ತೆಂ ಖಾಣ್ ಕಿತ್ಲೆಂ ಬರೆಂ ಆನಿಂ ರುಚಿಕ್ ಮ್ಹಣ್ ಚಿಂತುಂಕ್ ತಾಕಾ ಸಾಧ್ಯ್ ಜಾಯ್ನಾತ್ಲ್ಲೆಂ.
ಸಾತ್ ವರ್ಸಾಂನಿ ತಾಣೆ ಕೆಲ್ಲೆಂಯ್ ತಿತ್ಲೆಂಚ್ಚ್. ಭಿತರ್ ವಚೊನ್, ಖಾಣಾಚಿ ರೂಚ್ ಚಾಕ್ಚಿ ತಿತ್ಲೆಂ ಧಯ್ರ್ ತಾಚ್ಯಾ ಥೈಂ ಯೆದೊಳ್ ಯೆಂವ್ಕ್ ನಾತ್ಲ್ಲೆಂ. ಏಕ್ ದೀಸ್ ಮುಕಾರ್ ಮೆಳ್ಲ್ಲ್ಯಾ ಏಕ್ಲ್ಯಾ ಭಾರತೀಯಾಲಾಗಿಂ ತಾಣೆ ತ್ಯಾ ಆಂಗ್ದಿಚೆಂ ನಾಂವ್ ವಿಚಾರ್ಲ್ಲೆಂ. ಜವಾಬ್ ದಿಂವ್ಚೊ ಮನಿಸ್ ಚಿಕ್ಕೆ ಆಕ್ಡು ತಸೆಂ, ರಾಮಲುಚ್ಯಾ ಮೆಳ್ಕೊಟ್ ಅನಿ ಸರ್ಕಾರಿ ವಸ್ತುರಾಕ್ ದೆಖೊನ್ ವಿದ್ರೂಪಾಯೆನ್ ಹಾಸೊನ್ ಮ್ಹಣಾಲೊ - "ಫಿಮಾ ಹಟ್ ..."
ರಾಮಲುಕ್ ಪಯ್ಲೆಂ ತೆಂ ನಾಂವ್ ಜಿಕುನ್ ಧರುಂಕ್ ಜಾಂವ್ಕ್ ನಾ. ತಾಣೆ ಪರತ್ ವಿಚಾರ್ಲ್ಲೆಂ.
"ಪಿಜ್ಜಾ ಹಟ್.. ಪಿಜ್ಜಾ ಹಟ್... ಹಾಂತು ಪಿಮಾ ಮೆಳ್ತಾತ್.... ತೆಂ ಏಕ್ ವಿಶೇಸ್ ರೀತಿಚೆಂ ಗ್ರೇಸ್ತಾಚೆಂ ಖಾಣ್ .. ಪುಣ್ ತುಕಾ ಸಾಂಗ್ಲ್ಲೆಂ ನ್ಹಂಯ್... ತುಜ್ಯಾ ಏಕಾ ಮಹಿನ್ಯಾಚೆ ಜೆವ್ಣಾಚೆ ಪಯ್ಶೆ ದಿಲ್ಯಾರ್ ಕಾಂಯ್ ಏಕ್ ಕುಡ್ಕೊ ಪಿಜ್ಜಾ ಮೆಳ್ತಾ ಕೊಣ್ಣಾ....."
ರಾಮಲುಕ್ ಆಜಾಪ್ ಜಾಲ್ಲೆಂ ಆನಿ ತಸೆಂ ತ್ಯಾ ತೀನ್ ಕಾಸಾಂಚ್ಯಾ ಭಾರತೀಯಾಚೆರ್ ರಾಗ್ಯ್ ಆಯಿಲ್ಲೊ. ತಾಕಾ ಹೆಂ ಮಾತ್ರ್ ಸಮ್ಜಲೆಂನಾ - ಆಪ್ಣಾಚ್ಯಾ ಮಹಿನ್ಯಾಚ್ಯಾ ಜೆವ್ಣಾಕ್ ಲಾಗ್ಚೆ ಪಂದ್ರಾ ರಿಯಾಲ್... ತರ್ ಏಕಾ ಕುಡ್ಕ್ಯಾ ಪಿಜ್ಜಾಕ್ ಪಂದ್ರಾ ರಿಯಾಲ್... ???!. ಏಕ್ಚ್ಚ್ ಹೆಂ ಪಿಮಾಚೆಂ ಖಾಣ್ ಭಾಂಗ್ರಾಳ್ಯಾ ಕಾಯ್ಲಿಚೆರ್ ದಿತಾತ್ ಯಾ ಆಪುಣ್ ಖಾಂವ್ಚೆಂ ಖಾಣ್ ಪೆಟ್ಯಾ ಮಾಜ್ರಾಕ್ ಸಹಜ್ಲ್ಲೆಂ ಮ್ಹಣ್ ಹೊ ಭಿಕ್ಣೆಶಿ ಮನಿಸ್ ಚಿಂತ್ತಾ ಆಸ್ತಲೊ...
ರಾಮಲು ಪರತ್ ತ್ಯಾ ಮನ್ಶಾಲಾಗಿಂ ಉಲಯಿಲ್ಲೊ ನಾ. ತ್ಯಾ ವೆಳಿಂ ತಾಚ್ಯಾ ಮತಿಂತ್ ಉದೆಲ್ಲೆಂ ಏಕ್ಚ್ಚ್ ಚಿಂತಾಪ್... ಹೆಂ ಗ್ರೇಸ್ತಾಂಚೆಂ ಖಾಣ್ ಏಕ್ ಪಾವ್ಟಿಂ ಖಾಯ್ಜಯ್ಚ್ಚ್....
ದೀಸ್ ಧಾಂವ್ತಾನಾ ರಾಮಲುಚ್ಯಾ ಮತಿಂತ್ ಜೀವ್ ಜಾಲ್ಲೆಂ ಚಿಂತಾಪ್ ಸ್ವಪಾಣ್ ಜಾಂವ್ಕ್ ಪಾವ್ಲೆಂ... ತೆಂ ಸ್ವಪಾಣ್ ಏಕ್ ನಾ ದೀಸ್ ಖರೆಂ ಜಾಯ್ಜಯ್ಚ್ಚ್...
ದನ್ಪಾರಾಂ ಉಪ್ರಾಂತ್ ಕಾಮ್ ತರ್ ಸಾಂಜೆರ್ ಪಾಂಚ್ ವೊರಾಂ ಜಾತಾನಾ ಶಾರಟನಾಚೊ ಮುಕ್ಲೊ ರಸ್ತೊ ಜಾವ್ನ್ ತೊ ಪಿಜ್ಜಾಚ್ಯಾ ದುಕಾನಾ ಲಾಗಿಂ ತೊ ಪಾವ್ತಾಲೊ. ಥಂಯ್ಸರ್ ಪಾವ್ತಾನಾ ಮತಿಂತ್ ಪರತ್ ಏಕ್ ಪಾವ್ಟಿಂ ತಿಂಚ್ಚ್ ಚಿಂತ್ನಾಂ... ಪೊತಾಂತ್ ಆಶೆಚಿಂ ಉಡ್ಕಾ ಝರಿ...ಪಿಜ್ಜಾಚೊ ಕುಡ್ಕೊ ಖಾಂವ್ಚಿ ಬಳ್ವಂತ್ ಆಶಾ....
ನವೆಂಬ್ರ್ ಮಹಿನೊ ಚಡಾವತ್ ಮಸ್ಕತ್ ಮುನಿಸಿಪಾಲಿಟಿ ಕಾಮೆಲ್ಯಾಂಕ್ ಬರೊ ಮಹಿನೊ. ರಾಷ್ತ್ರೀಯ್ ದೀಸಾಚಿ ತಯರಾಯೆಂತ್ ಇಲ್ಲೆಂ ಚಡ್ ಕಾಮ್. ರಸ್ತೊ ಝಾಡ್ಚೆಂ ಕಾಮ್ ಜಾಲ್ಯಾ ಉಪ್ರಾಂತ್ ರಸ್ತ್ಯಾ ಬಗ್ಲೆನ್ ರಂಗ್ ಸಾರಂವ್ಚೆಂ ಕಾಮ್. ಹ್ಯಾ ಪಾವ್ಟಿಂ ರಾಮಲುಕ್ ಸುಪರ್ವೈಸರಾನ್ ಚಡ್ತಿಕ್ ಕಾಮಾಕ್ ಘೆತ್ಲೊ.
ಪಂದ್ರಾ ದಿಸಾನಿಂ ಚಾರ್ ವರಾಂ ಚಡ್ತಿಕ್ ಕಾಮ್ ಕೆಲ್ಯಾ ಉಪ್ರಾಂತ್ ರಾಮಲುಕ್ ವೀಸ್ ರಿಯಾಲ್ ಚಡ್ತಿಕ್ ಮೆಳ್ಳೆ. ತೆ ರಿಯಾಲ್ ಜೊಗಾಸಣೆನ್ ತಾಣೆಂ ದೆಗೆನ್ ಉಶ್ಯಾ ಪಂದಾಕ್ ದವರ್ಲೆ. ಉಪ್ರಾಂತ್ಲೆ ಪಂದ್ರಾ ದೀಸ್ ತಾಣೆಂ ಪಿಮಾ ವಿಶ್ಯಾಂತ್ ಚಿಂತ್ಲೆಂ. ಆಪ್ಲೆಂ ಸದಾಂಚೆ ಜೆವಾಣ್ ಉಣೆಂ ಕರುನ್ ತಾಣೆಂ ಪಯ್ಶೆಯ್ ಥೊಡೆ ಉರಯ್ಲೆ.
ರಾಮಲುಕ್ ಹಫ್ತ್ಯಾಚಿ ರಜಾ ಮೆಳ್ಚಿ ಬುಧ್ವಾರಾ. ತ್ಯಾ ದೀಸಾಚ್ಚ್ ಪಿಜ್ಜಾ ಘೆಂವ್ಚೆಂ ಬರೆಂ.
ವೆಚೆಂ ತರ್ ಕಸೆಂ. ಪರ್ನೆಂ ವಸ್ತುರ್ ಘಾಲ್ನ್ ಗ್ರೇಸ್ತಾಂಚ್ಯಾ ದುಕಾನಾಕ್? ಛೆ ! ನಾ ಹಾಬಾ !! ರೂವಿ ಮಾರ್ಕೆಟಿಕ್ ವಚೊನ್ ತಾಣೆ ಪೆಂಟ್ ಶರ್ಟ್ ಘೆತ್ಲೆಂ. ಪೊರುಂ ಆಂದ್ರಾಕ್ ರಜೆರ್ ಗೆಲ್ಲ್ಯಾ ವೆಳಿಂ ಘೆತ್ಲ್ಲೆಂ ವಸ್ತುರ್ ಆಸ್ಲ್ಲೆಂ ತರೀ ತೆಂ ಪರ್ನೆಂ ತಸೆಂ ಭಗ್ಲೆಂ ತಾಕಾ. ಚಪ್ಪಾಲಾಂ ಘಾಲಿಂ ತರ್ ಬರೆಂ ನ್ಹಂಯ್. ಉಣ್ಯಾ ಮೊಲಾಚೆ ತರಿ ಮೊಚೆ ಜಾಯ್. ದೆಕುನ್ ಏಕ್ ಜೊಡಿ ಮೊಚೆಯ್ ಘೆತ್ಲೆ.
ಮಸ್ಕತ್ ಮುನಿಸಿಪಾಲಿಟಿಚ್ಯಾ ವಾಡಿ ಕಭೀರ್ ರಾವ್ಪಾ ಟಾಣ್ಯಾಂತ್ ಏಕಾ ಕುಡಾಂತ್ ಆಟ್ ಜಣಾಂಕ್ ಸಾಂಗಾತಾ ರಾವೊಂಕ್. ಆಮ್ಚ್ಯಾ ದೇಶಾಂತ್ ಜಯ್ಲಾಂನಿ ತರಿ ಇತ್ಲಿ ಅಡ್ಚಣಿ ಆಸ್ಚಿ ನಾ. ಹ್ಯಾ ಜಾಗ್ಯಾರ್ ಪುಣಿ ಪಿಜ್ಜಾ ಹಾಡ್ನ್ ಖಾಂವ್ಚೆ ಬರಿ ನಾ. ತೆಂಯ್ ಇತ್ಲ್ಯಾ ಮೊಲಾಚೆ ಖಾಣ್ ವಾಂಟುನ್ ಕೆಲ್ಯಾರ್ ಆಪ್ಣಾಚಿ ಆಶಾ ಬಾಗ್ಚಿ ಕೆದ್ನಾಂ??
ಪಿಜ್ಜಾ ಘೆವ್ನ್ ಶೀದಾ ವಾಡಿ ಕಭೀರ್ ಪಾರ್ಕಾಂತ್ ಕೊನ್ಶಾಂತ್ ಆಸ್ಚ್ಯಾ ಬಾಂಕಾಚೆರ್ ಏಕ್ಲ್ಯಾನ್೦ಚ್ಚ್ ಬಸೊನ್ ಖಾಯ್ಜಯ್ ಮ್ಹಣ್ ತಾಣೆ ಲೇಕ್ ಘಾಲೆಂ. ಏಕಾ ಸಾಂಜೆರ್ ವಾಡಿ ಕಭೀರ್ ಪಾರ್ಕಾಂತ್ ವಚೊನ್ ಖಂಯ್ಸರ್ ಬಸೊನ್ ಖಾಯ್ಜಯ್ ಮ್ಹಳ್ಳ್ಯಾ ವಿಶ್ಯಾಂತ್ ಸಾರ್ಕೆಂ ಪಳವ್ನ್ ತೊ ಆಯ್ಲೊ.
ದುಸ್ರೊ ದೀಸ್ ಬುಧ್ವಾರ್...
ಮಂಗ್ಳಾರಾ ದೀಸ್ ಪಿಜ್ಜಾ ಘೆಂವ್ಕ್ ಆನಿ ಖಾಂವ್ಕ್ ಜಾಯ್ ತಯಾರಾಯ್ ತಾಣೆ ಕೆಲಿ......
ಪಿಜ್ಜಾಚ್ಯಾ ದುಕಾನಾ ಲಾಗಿಂ ವಸೊನ್ ಥೊಡಿ ಚಡ್ಚ್ಚ್ ಆಶೆಚಿ ಥಿಂಪಿ ಗಿಳ್ಳಿ. ಭಿತರ್ ತೀಳುನ್ ಪಳವ್ನ್, ಖಂಚಾನ್ ವೆಚೆಂ, ಕೊಣಾ ಲಾಗಿಂ ವಿಚಾರ್ಚೆಂ ಪುರಾ ಬರೆಂ ಕರ್ನ್ ಪಳಯ್ಲೆಂ. ಪಿಮಾಚೊ ಕಂರ್ಡೊ ಘೆವ್ನ್ ಖಂಚಾನ್ ಭಾಯ್ರ್ ಯೆಂವ್ಚೆಂ, ಉಪ್ರಾಂತ್ ಖಂಯ್ ಟೆಕ್ಸಿ ಧರ್ಚಿ ಪೂರಾ ತಜ್ವೀಸ್ ಕೆಲೆಂ.
ಬುಧ್ವಾರಾ ದೀಸಾ ದನ್ಪಾರಾಂ ತೊ ಜೆವ್ಲೊಚ್ಚ್ ನಾ. ಜೆವಾಣ್ ತಾಕಾ ರುಚ್ಲೆಂ ನಾ. ಸಾಂಜೆರ್ ತೊ ಬರೆಂ ಕರುನ್ ನೆಸ್ಲೊ. ಮೊಚೆ ಘಾಲೆ. ವೀಸ್ ರಿಯಾಲಾಂಚೊ ನೋಟ್ ಪೆಂಟಾಚ್ಯಾ ಬೊಲ್ಸಾಂತ್ ಚೆಪ್ಲೊ. ದೋನ್ ರಿಯಾಲ್ ಶರ್ಟಾಚ್ಯಾ ಬೊಲ್ಸಾಂತ್ ಘಾಲೆ. ಏಕ್ ರಿಯಾಲ್ ಟೆಕ್ಸೆರ್ ವಚೊಂಕ್ ಆನಿ ಏಕ್ ಪಾಟಿಂ ವಾಡಿ ಕಭೀರ್ ಪಾರ್ಕಾಕ್ ಯೇಂವ್ಕ್.
ಹಾಚ್ಯಾ ಆದಿಂ ಕೆದಾಳಾಯ್ ರೂವಿ ವೆಚೆಂ ತರ್ ಸರ್ಕಾರಿ ಬಸ್ಸಾರ್ ವೆಚೊ ರಾಮಲು ಆಜ್ ತೆಕ್ಸೆರ್ ಬಸ್ಲೊ. ಪಿಜ್ಜಾಚ್ಯಾ ದುಕಾನಾಲಾಗಿಂ ದೆವೊನ್ ರಿಯಾಲ್ ಟೆಕ್ಸೆಗಾರಾಕ್ ದಿಲೊ.
ಸಾತ್ ವೊರ್ಸಾಂ ಥಾವ್ನ್ ಮತಿಂತ್ ಆಸ್ಲ್ಲೆಂ ಆಶೆಲ್ಲೆಂ ಸ್ವಪಾಣ್ ಆಜ್ ಖರೆಂ ಜಾಂವ್ಚ್ಯಾರ್ ಆಸ್ಲ್ಲೆಂ.
ವೀಸ್ ರಿಯಾಲ್ ಹಾತಾಂತ್ ಧರುನ್ ತೊ ದುಕಾನಾ ಭಿತರ್ ರಿಗ್ಲೊ. ಹೆರಾಂ ದಿಸಾಂನಿಂ, ಬಾಯ್ಲ್ಯಾನ್ ಖಚ್ರೊ ಕಾಡ್ತಾನಾ ಆಯಿಲ್ಲ್ಯಾ ಪರ್ಮಳಾಚ್ಯಾಕಿ ಚಡ್ ಪರ್ಮಳ್ ಆಜ್ ಯೆತಾಲೊ. ದುಕಾನಾ ಭಿತರ್ ಮಾಂಡುನ್ ದವರ್ಲ್ಲ್ಯಾ ಮೆಜಾಂಚೆರ್ ಸಭಾರ್ ಜಣಾಂ ಬಸೊನ್ ಖಾತಾಲಿಂ. ಥೊಡಿಂ ಪಿಜ್ಜಾಚೆ ಕಂರ್ಡೆ ಘೆವ್ನ್ ಚಲ್ತಾಲಿಂ.
"ಪಿಜ್ಜಾ ಮಾಂಗ್ತಾ ಹೈ.." (ಪಿಜ್ಜಾ ಜಾಯ್ ಮ್ಹಾಕಾ) ಮುಕಾರ್ ಆಸ್ಲ್ಲ್ಯಾ ತರ್ನಾಟ್ಯಾಲಾಗಿಂ ರಾಮಲುನ್ ವೀಸ್ ರಿಯಾಲ್ ವೊಡ್ಡಾವ್ನ್ ಮ್ಹಳೆಂ.
"ಛೊಟಾ... ಮೀಡಿಯಂ.. ಬಡಾ... ಚಿಕನ್... ವೆಜ್... ಬೀಪ್.."
(ಲ್ಹಾನ್ .. ಹಳ್ತಾಚೊ... ವ್ಹಡ್... ಕುಂಕ್ದಾ ಮಾಸಾಚೊ.... ರಾಂದ್ವಾಯೆಚೊ... ಬೀಫಾಚೊ...)
ವಿಕ್ತ್ಯಾ ಮನ್ಶಾನ್ ಖಿಣಾ ಭಿತರ್ ನಾಂವಾಂ ಉಚಾರ್ಲಿಂ.
ರಾಮಲುಚಿ ತಕ್ಲಿ ಮಿರ್ಮಿರ್ಲಿ. ತಾಂತು ದೋನ್ - ತೀನ್ ಸಬ್ಧ್ ಜಿಕುನ್ ಧರ್ಲೆ.
ಲ್ಹಾನ್ ಖಾವ್ನ್ ಉಪ್ಕಾರ್ ನಾ. ಖೆಲ್ಯಾ ಉಪ್ರಾಂತ್ ಪೋಟ್ ಭರ್ನ್ ಖಾಯ್ಜಯ್...
"ಬಡಾ.... ಚಿಕನ್.....ಕಿತ್ನಾ..." (ವ್ಹಡ್ಲೊ ... ಕುಂಕ್ದಾ ಮಾಸಾಚೊ .. ಕಿತ್ಲೆ???) ರಾಮಲುಚಿಂ ಉತ್ರಾಂ ತುಟ್ತಾಲಿಂ.
"ಸಲಾದ್ ಮಾಂಗ್ತಾ ಹೈ...???" (ಸಲಾದ್ ಜಾಯ್???)
ರಾಮಲುಕ್ ಪರತ್ ಸಮ್ಜಲೆಂನಾ. ತಾಣೆ ತಕ್ಲಿ ಧಲಯ್ಲಿ. ನಾಕಾ ಮ್ಹಳ್ಳ್ಯಾ ಬರಿ. ಮುಕ್ಲ್ಯಾ ಮನ್ಶಾನ್ ಕಿತೆಂ ಚಿಂತ್ಲೆಂ ದೇವ್ ಮಾತ್ ಜಾಣಾ...
"ಚಾರ್ ರಿಯಾಲ್ ಆಟ್ ಸೌ.."
ರಾಮಲುನ್ ವೀಸ್ ರಿಯಾಲಾಚೊ ನೋಟ್ ದಿಲೊ.
"ಪಂದ್ರಾ ಮಿನಟ್ ಕೆ ಬಾದ್ ಆವೊ.." (ಪಂದ್ರಾಂ ಮಿನುಟಾಂ ಉಪ್ರಾಂತ್ ಯೆ) ಬಾಕಿಚೆ ಪಯ್ಶೆ ಹಾತಾಂತ್ ಘಾಲುನ್ ತೊ ತರ್ನಾಟೊ ಮ್ಹಣಾಲೊ. ಕಸಲಿ ಶನಿ... ಪಯ್ಶೆ ದಿಲ್ಯಾ ಉಪ್ರಾಂತ್ ಪಂದ್ರಾ ಮಿನುಟಾಂ ರಾಕೊಂಕ್.. ತಾಚ್ಯಾ ಪೊತಾಂತ್ ಹುಳ್ವಳ್ಚೆ ದಾಂತ್ ಆತಾಂ ಬೊಬಾಟುಂಕ್ ಲಾಗ್ಲೆ. ಪಂದ್ರಾ ಮಿನುಟಾಂ ಪಂದ್ರಾ ದೀಸಾಂ ಬರಿ ಲಾಗ್ಲಿಂ ರಾಮಲುಕ್.
ಪಂದ್ರಾ ಮಿನುಟಾಂನಿ ಪಿಜ್ಜಾಚೊ ಡಬ್ಬೊ ಹಾತಿಂ ಮೆಳ್ತಾನಾ, ತಾಚ್ಯಾ ಜೀವಾಂತ್ ಜಾಲ್ಲೊ ಸಂತೊಸ್ ಸಾಂಗ್ಚೊ ನ್ಹಂಯ್. ಆಮ್ಸರಾನ್ ತೊ ಭಾಯ್ರ್ ಆಯ್ಲೊ ಆನಿ ಟೆಕ್ಸಿ ಧರುನ್ ವಾಡಿ ಕಭೀರ್ ಪಾರ್ಕಾಕ್ ಆಯ್ಲೊ.
ವ್ಹಡ್ ವಾಡಿ ಕಭೀರ್ ಪಾರ್ಕಾಂತ್ ಥೊಡೊ ಲೋಕ್ ಆಸ್ಲ್ಲೊ. ಬ್ರೇಸ್ತಾರ್ ಜಾಲ್ಲೊ ತರ್ ಆನಿಕ್ಯ್ ಚಡ್ ಆಸ್ತೊ ಆನಿ ತ್ಯಾ ವೆಳಿಂ ಆಪ್ಣಾಕ್ ಸುಡಾಳ್ ರಿತಿನ್ ಖಾಂವ್ಕ್ ಜಾತೆಂ ನಾ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂ.
ಪಾರ್ಕಾಕ್ ರಿಗ್ಚ್ಯಾ ಪಯ್ಲೆಂ, ದೆಗೆಚ್ಯಾ ಆಂಗ್ಡಿ ಥಾವ್ನ್ ವ್ಹಡ್ಲಿ ಬೊತ್ಲ್ ಪೆಪ್ಸಿ ತಾಣೆ ಘೆತ್ಲಿ.
ಪೊಂತಾರ್ ತಣಾಚ್ಯಾ ಸುವಾತೆರ್ ತೊ ಬಸ್ಲೊ. ಕಂರ್ಡೊ ಉಗ್ತೊ ಕೆಲೊ.
ಉರುಟ್ ಆಕಾರಾಚೊ ಸೊಭಿತ್ ಪಿಜ್ಜಾ. ತಾಚಿ ಸೊಬಾಯ್ ಪಳವ್ನ್೦ಚ್ಚ್ ತಾಚೆಂ ಮನ್ ಪಿಸ್ವಾಲೆಂ. ಪಂದಾ ಕಾಂಯ್ ವಿಶೇಸ್ ರಿತಿಚಿ ಭಾಕ್ರಿ ಆಸ್ಲ್ಲಿ. ತಾಚ್ಯಾ ವಯ್ರ್ ರುಚಿಚೆ ಕುಡ್ಕೆ ಮಾಸ್... ಆನಿ ಹೆರ್ ರಾಂದಯೆಚ್ಯೊ ಶಿರೊ... ಹೆರ್ ಕಿತೆಂ ಪೂರಾ..... ಆತ್ ಕುಡ್ಕೆ ಆಸ್ಲ್ಲೆ. ಇತ್ಲೆಚ್ಚ್ ಕುಡ್ಕೆ ಆಪ್ಣಾಕ್ ಪುರೊಗಿ? ಮತಿಂತ್ ಚಿಂತ್ಲೆಂ ತಾಣೆಂ...
ಪಯ್ಲೊ ಕುಡ್ಕೊ ಭಾರಿ ಜಾಗ್ರುತ್ಕಾಯೆನ್ ಕಾಡ್ಲೊ. ಸವ್ಕಾಸ್ ಘಾಸ್ ಘಾಲೊ...
ಹಾ... ಕಸಲೊ ಸ್ವಾದ್... ಹಾಚ್ಯಾ ಆದಿಂ ಕೆದ್ನಾಂಯ್ ತಾಣೆಂ ಆಸಲೆಂ ಖಾಣ್ ಖಾಂವ್ಕ್ ನಾ... ಹ್ಯಾಚ್ಚ್ ಖಾಣಾಕ್ ಹೆ ಗ್ರೇಸ್ತ್ ಉರ್ಡಾತಾತ್...
ಹೆಂಚ್ಚ್ ಸ್ವಾದಾಚೆಂ ಖಾಣ್ ಖಾಂವ್ಕ್ ಕಿತ್ಲಿ ವರ್ಸಾಂ ಆಶೆಲ್ಲೊಂ. ದುಸ್ರೊ ಕುಡ್ಕೊ ಖಾಂವ್ಚ್ಯಾ ಪಯ್ಲೆಂ ತೊ ಪೆಪ್ಸಿ ಪಿಯೆಲೊ.
ದುಸ್ರೊ.. ತಿಸ್ರೊ... ಪಾಂಚ್ವೊ ಕುಡ್ಕೊ ಆಕೇರ್ ಜಾತಾನಾ ರಾಮಲುಚೆಂ ಪೋಟ್ ಭರ್ಲ್ಲೆಂ. ತರೀ ಕಶ್ಟಾಂನಿ ಆನಿ ಏಕ್ ಕುಡ್ಕೊ ಮುಗ್ದಿಲೊ.
ಸಾತ್ವೊ ಕುಡ್ಕೊ ಖಾಂವ್ಕ್ ತಯಾರ್ ಜಾತಾನಾ ತಾಚ್ಯಾ ಪೊಟಾಂತ್ ಇಡೆಂ ನಾತ್ಲ್ಲೆಂಚ್ಚ್. ಪುಣ್ ಕಿತೆಂ ಕರ್ಚೆಂ .. ಇತ್ಲ್ಯಾ ಮೊಲಾಚೊ ಪಿಜ್ಜಾ ತಾಣೆಂ... ಸಾತ್ವೊ ಕುಡ್ಕೊ ಹಾತಿಂ ಧರುನ್ ಘಾಸ್ ಮಾರುಂಕ್ ಚಿಂತ್ಲೆಂ ತರೀ ಜಾಲೆಂನಾ... ಪಿಜ್ಜಾಚ್ಯಾ ಕುಡ್ಕ್ಯಾಕ್ ಪಳಯ್ಲೆಂ... ತಿಯ್ ಏಕ್ ಬಾಕ್ರಿ... ಮತ್ ತಾಚಿ ಉಚಾರ್ತಾಲಿ... ಆಪ್ಣೆಂ ಘರಾ ಕರ್ಚ್ಯಾ ಭಾಕ್ರೆಚ್ಯಾಕಿ ಚಿಕ್ಕೆ ದಾಟ್....ಚಿಕ್ಕೆ ಮೋವ್... ತಾಚೆರ್ ಘಾಲ್ಲೆಂ ಮಾಸ್ ಕುಂಕ್ದಾಂಚೆಂಚ್ಚ್...ರಾಂದಯೆಚೆ ಥೊಡೆ ಕುಡ್ಕೆ....
ಸಾತ್ವೊ ಕುಡ್ಕೊ ತಾಣೆ ಕಾಭಾರ್ ಕೆಲೊ ತರೀ ಆಕ್ರೇಚೊ ಕುಡ್ಕೊ ತಾಕಾ ಖಾಂವ್ಕ್ ಜಾಲೊಚ್ಚ್ ನಾ. ಕಂರ್ಡ್ಯಾಂತ್ ಆಸ್ಲ್ಲ್ಯಾ ಪಿಜ್ಜಾ ಕುಡ್ಕ್ಯಾಕ್ ಪಳೆವ್ನ್ ರಾಮಲು ಹಾಸ್ಲೊ. ಪೊಟ್ ಭರೊನ್ ವೊಮ್ತಾತಾಲೆಂ...
ಭರ್ಲ್ಲ್ಯಾ ಪೊಟಾ ವರ್ವಿಂ ಆತಾಂ ಉರ್ಲ್ಲ್ಯಾ ಕುಡ್ಕ್ಯಾ ಪಿಜ್ಜಾಚೆರ್ ಕಾಂಟಾಳೊಚ್ಚ್ ಆಯ್ಲೊ. ತ್ಯಾಚ್ಚ್ ವೆಳಿಂ, ವಾಡಿ ಕಭೀರ್ ಉದ್ಕಾ ವಾಟೆಂತ್ಲ್ಯಾನ್ ದಾಂವೊನ್ ಯೆಂವ್ಚೊ ಪಾಡಾರಿ ಪೆಟೊ ತಾಕಾ ದಿಸ್ಲೊ.
ಮಸ್ಕತಾಂತ್ ಪಾಡಾರಿ ಸುಣಿಂಚ್ಚ್ ದಿಸ್ಚಿಂ ಉಣಿಂ.. ತರ್ ಆಜ್ ದಿಸ್ಚ್ಯಾ ಹ್ಯಾ ಪೆಟ್ಯಾಕ್ ಪಿಜ್ಜಾ ಖಾಂವ್ಚೆಂ ನಶೀಬ್ ಆಸಾ ಆಸ್ತೆಲೆಂ..
ಸಾತ್ ವೊರ್ಸಾಂಚಿ ಆಪ್ಣಾಚಿ ಆಶಾ ಬಾಗ್ಲ್ಲಿ .... ಹ್ಯಾ ಪಿಜ್ಜಾಂತ್ ಚಿಂತ್ಲ್ಲೆಂ... ಆಶೆಲ್ಲೆಂ ಕಿತೆಂಚ್ಚ್ ನಾತ್ಲ್ಲೆಂ.... ಆಕ್ರೇಕ್ ತೀಯ್ ಏಕ್ ಬಾಕ್ರಿ... ಆನಿ ಮಾಸಾ ಕುಡ್ಕೆ....ರಾಂದಯೆಚ್ಯೊ ಪೊಡಿ....
ಪುಣ್ ಗ್ರೇಸ್ತಾಚಿಂ ಬಾಕ್ರಿ...
ರಾಮಲುಚ್ಯಾ ಮತಿಂತ್ ಕಸಲೆಂಗಿ ತುಫಾನ್ ಉದೆಲ್ಲೆಂ... ತೊ ಕಿತೆಂಗೀ ಚಿಂತಿಲಾಗ್ಲೊ...
ಪಿಜ್ಜಾಚೊ ಆಕ್ರೇಚೊ ಕುಡ್ಕೊ ಆಸ್ಲ್ಲೊ ಕಂರ್ಡೊ ಪೆಟ್ಯಾ ಮುಕಾರ್ ಉಡವ್ನ್ ತೊ ಆಪ್ಲ್ಯಾ ಬಿಡಾರಾ ಕುಸಿನ್ ಮೆಟಾಂ ಕಾಡಿಲಾಗ್ಲೊ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
