ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮರಿ ಘರಾ ಆಯ್ಲಿ
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ, ಖೊವ್ಳಾಂ, ಮರುಭುಂಯ್ಂತ್ಲೆಂ ವಾದಾಳ್
ಕ್ಲೆರೆನ್ಸ್, ಕೈಕಂಬ
ತ್ಯಾ ಎಕಾ ವರ್ಸಾಚಿ ಕಥಾ ಹಿ...
ತ್ಯಾ ಫಾಂತ್ಯಾರ್ ಮೇರಿ ಸೋಜ್ ಕಿತ್ಲ್ಯಾ ವೊರಾರ್ ಉಟ್ಲಿ ತೆಂ ತಿಕಾಚ್ಚ್ ಕಳಿತ್ ನಾ ಜಾಲ್ಲೆಂ. ಮದ್ಯಾನೆ ಉಪ್ರಾಂತ್ ಕಿತ್ಯಾಕ್ ಸಗ್ಳಿ ರಾತ್ಚ್ಚ್ ತಿಕಾ ನೀದ್ಚ್ಚ್ ಪಡೊಂಕ್ ನಾ. ಹರ್ಶೆಂ ಕೆದಾಳಾಯ್ ದಿಸಾಕ್ ಖಳ್ಮಿತ್ ನಾಸ್ತಾನಾ ಕಾಮ್ ಕೆಲ್ಯಾ ಉಪ್ರಾಂತ್ ರಾತಿಕ್ ಮಾಂದ್ರೆಚೊ ಪರ್ಮಳ್ ನಾಕಾಕ್ ಲಾಗ್ಲ್ಲ್ಯಾ ಫರಾಚ್ಚ್ ನೀದ್ ಪಡ್ಚ್ಯಾ ತಿಕಾ ಹ್ಯಾ ರಾತಿಂ ನೀದ್ ಲಾಗಿಂ ಆಯ್ಲಿಚ್ಚ್ ನಾ. ಕೆದಾಳಾ ಏಕ್ ಪಾವ್ಟಿಂ ಕೊಂಬ್ಯಾಚೊ ಸಾದ್ ಆಯ್ಕಾತಾ, ಕೆದಾಳಾ ಏಕ್ ಪಾವ್ಟಿಂ ಉಟೊನ್ ಸಾಂಜೆಚಿ ತಯಾರಾಯ್ ಸುರು ಕರ್ಚಿ ಮ್ಹಣ್ ಚಿಂತುನ್ಂಚ್ಚ್ ನಿದ್ಲ್ಲಿ ತಿ ಆನಿಂ ಉಟ್ಲ್ಯಾ ಸುಮಾರ್ ಎಕಾ ವೊರಾ ಉಪ್ರಾಂತ್ ಗುಡಾಂತ್ಲ್ಯಾ ಕೊಂಬ್ಯಾನ್ ಸಾದ್ ಘಾಲೊ.
ಆಜ್ ತಿಕಾ ಜಾಯ್ತೆಂ ಕಾಮ್ ಆಸ್ಲ್ಲೆಂ. ತೆಂ ಕಾಮ್ ಚಿಂತುನ್ಂಚ್ಚ್ ತಿಚಿ ತಕ್ಲಿ ವಿರಾರ್ ಜಾತಾಲಿ. ಕಿತ್ಲೊ ವೇಳ್ ಆಸ್ಲ್ಯಾರ್ ಪಾಂವ್ಚೊಂ ನಾ ಮ್ಹಣ್ ತಿಕಾ ಸುಸ್ತಾಲೆಂ. ಪುಣ್, ಹರೇಕ್ ಕಾಮ್ ಕರ್ಚೆಂ ಮರಿ ಮಾಯೆಕ್ ಮಾನ್ ಕರುಂಕ್. ತಿಚಿ ಮಜತ್ ಮಾಗೊಂಕ್. ತಿಣೆಂ ಆಪ್ಲ್ಯಾ ಘರಾ ಯೆಂವ್ಚೆಂ ತರ್ಯ್ ಪಯ್ಲ್ಯಾ ಪಾವ್ಟಿಂ. ದೆಕುನ್ಂಚ್ಚ್ ಮೇರಿ ಸೋಜಾಚ್ಯಾ ಪಾಯಾಂಕ್ ವಾಸ್ರಾಚೆಂ ಬಳ್ ಆಯಿಲ್ಲೆಂ ಜಾಯ್ಜಯ್. ಮತ್ ಚಿತ್ಳಾ ಭಾಶೆನ್ ಚುರುಕ್ ಜಾಲ್ಲಿ. ಜೀವಾಂತ್ ಉಲ್ಲಾಸ್ ಆಸ್ಲ್ಲೊ. ನಿದ್ಲ್ಲ್ಯಾ ಚೆರ್ಕ್ಯಾಂಕ್ ಉಟಯ್ನಾಸ್ತಾನಾ ತಿಣೆಂ ಆಪ್ಲೊ ವಾವ್ರ್ ಸುರು ಕೆಲೊ.
ಹೆಂ ವರಸ್ ತೆರ್ಸಾಚೆಂ ಮ್ಹಣ್ ಪಾಪಾನ್ ಪಾಚಾರ್ಲ್ಯಾ ಉಪ್ರಾಂತ್ ಕೊಡ್ಯಾಳ್ ಥಾವ್ನ್ ಇಗರ್ಜೆಂತ್ ನವಿಚ್ಚ್ ಸೊಭಿತ್ ಮರಿ ಮಾಯೆಚಿ ಇಮಾಜ್ ಹಾಡ್ಲ್ಲಿ. ನವ್ಯಾ ವರ್ಸಾ ದೀಸ್ಚ್ಚ್ ತಿ ಬೆಂಜಾರ್ ಕೆಲ್ಯಾ ಉಪ್ರಾಂತ್, ಇಗರ್ಜೆ ಮುಕಾರ್ ಸಜಯಿಲ್ಲ್ಯಾ ವೆದಿಚೆರ್ ತಿ ದವರ್ನ್, ವಿಗಾರಾನ್ ಫಿಗರ್ಜೆಚ್ಯಾ ಸರ್ವ್ ವಾಡ್ಯಾಂಚ್ಯಾ ಗುರ್ಕಾರಾಂಕ್ ಆನಿಂ ಲಿಜನಾಚ್ಯಾ ಮುಖೆಲಿಂಕ್ ಆಪವ್ನ್ ತಾಕಿದ್ ದಿಲ್ಲಿ - "ಆಮ್ಚ್ಯಾ ಫಿರ್ಗಜೆಂತ್ ಸರಿ ಸುಮಾರ್ ತಿನ್ಶ್ಯಾಂ ವಯ್ರ್ ಕುಟ್ಮಾಂ ಆಸಾತ್.. ಆನಿಂ ಹ್ಯಾ ವರ್ಸಾಂತ್ ಏಕೇಕ್ ದೀಸ್ ಎಕೇಕ್ಲ್ಯಾಚ್ಯಾ ಘರಾ ಮರಿಯೆಚಿ ಇಮಾಜ್ ವೆತೆಲಿ... ಮರಿಯೆಚಿ ಇಮಾಜ್ ಮ್ಹಣ್ ಆಮಿಂ ಚಿಂತ್ಚೆಂ ನ್ಹಂಯ್... ಮರಿ ಮಾಂಯ್ ಆಮ್ಚ್ಯಾ ಸಂಗಿಂ ಆಸಾ ಮ್ಹಣ್ ಆಮಿಂ ಚಿಂತ್ಚೆಂ. ದುಬ್ಳೊ ವ ಗ್ರೇಸ್ ಮರಿಯೆಕ್ ಫರಕ್ ನಾ... ಎಕೇಕ್ ದೀಸ್ ಎಕೇಕ್ಲ್ಯಾಚ್ಯಾ ಘರಾ.... ತಿ ಹರ್ಯೆಕ್ಲ್ಯಾಚೆರ್ ಬೆಸಾಂವಾಂ ವೊತ್ತೆಲಿಚ್ಚ್.. ಪ್ರತೇಕ್ ಜಾವ್ನ್ ಆಮ್ಚ್ಯಾ ಫಿರ್ಗಜೆಚೆರ್... ಆನಿಂ ತುಮಿಂ ಸರ್ವಾನಿಂ ಹ್ಯಾ ಇಮಾಜೆ ಸವೆಂ ವಚಾಜಯ್. ರಾತಿಚೊ ತೇರ್ಸ್ ಘರಾ ಮ್ಹಣ್ಚ್ಯಾಕೀ ಕೊಣಾಗೆರ್ ತಿ ವೆತಾ ತಾಂಚ್ಯಾ ಘರಾ ತೊ ಕರ್ಚೊ... ಹಾಂತುಂ ವ್ಹಡ್ಪಣ್ ಆನಿಂ ಲಾನ್ಪಣ್ ಕಿತೆಂಚ್ಚ್ ಚಿಂತುಂಕ್ ನಾ..."
ಪಾದ್ರ್ಯಾಬಾಚಿ ತಾಕಿದ್ ಆನಿಂ ಮರಿಯೆಚೆರ್ ಭಕ್ತಿಪಣ್.... ಗುರ್ಕಾರ್ ಆನಿಂ ಲೀಜನಾಚೆ ಮುಕೆಲಿ ಸಾಂಗಾತಾ ಮೆಳೊನ್ ಖಂಚೊ ವಾಡೊ ಕೆದಾಳಾ ಸುರು ಕರ್ಚೊ ತೆಂ ನಿರ್ಣಯ್ ಕೆಲೆಂ. ಇಗರ್ಜೆ ವಾಡೊ ಲಾಗ್ಸಿಲೊ ತರ್ಯೀ ಸಾಂ. ಪೆದ್ರು ವಾಡೊ ಭಳಾಧಿಕ್. ಸಾಮ್. ಪೆದ್ರು ವಾಡ್ಯಾಂತ್ಯಾ ಹರೆಕ್ಲ್ಯಾ ವ್ಹಡಿಲಾಚೊ ಪೂತ್ ವ ಧುವೊ ಗಲ್ಫಾಂತ್ ಆಸಾತ್ ಆನಿಂ ತಾಣಿಂ ದಿಂವ್ಚಿ ಕುಮ್ಕೆ ನಿಧಿ ಆನಿಂ ದಾನ್ ಹೆರಾಂ ವಾಡ್ಯಾಂ ವರ್ನಿಂ ಚಡ್. ತಸೆಂ ಪಯ್ಲೆಂ ಸ್ಥಾನ್ ಸಾಂ. ಪೆದ್ರುಚ್ಯಾ ವಾಡ್ಯಾಕ್ ದಿಲ್ಲೆಂಚ್ಚ್ ಉಪ್ರಾಂತ್ ಇಗರ್ಜೆ ವಾಡೊ ಮ್ಹಣ್ ತಿಳ್ಸಿಲೆಂ. ಪಾವ್ಸಿಲ್ಯಾ ದಿಸಾನಿಂ ಸಾಂ. ಪಾವ್ಲುಚ್ಯಾ ವಾಡ್ಯಾನ್ ನಾಕಾ ಮ್ಹಳೆಂ ತರ್ಯೀ ತಾಂಚೆಂ ಉತಾರ್ ಆಯ್ಕೊಂಕ್ ಕೋಣ್ಚ್ಚ್ ತಯಾರ್ ನಾತ್ಲ್ಲಿಂ. ಸಾಂ. ಪಾವ್ಲುಚೊ ವಾಡೊ ತಿರ್ಸಾಲ್ಲೊಚ್ಚ್ ಸಾಂ. ಜುವಾಂವ್ ವಾಡೊ. ಆನಿಂ ಆಕೇರಿಕ್ ಸಾಂ. ಜುಜೆ ವಾಡೊ.
ಮೇರಿ ಸೋಜ್ ಸಾಂ ಜುಜೆಚ್ಯಾ ವಾಡ್ಯಾಂತ್ ಆಖ್ರೇಚ್ಯಾ ಘರಾಂತ್ ರಾಂವ್ಚಿ ಮನಿಸ್. ಮರಿ ಮಾಯೆನ್ ವೆಚೆಂ ಆಖ್ರೆಚೆಂ ಘರ್ ತಿಚೆಂ. ಉಪ್ರಾಂತ್ ಇಮಾಜ್ ಪಾಟಿಂ ಇಗರ್ಜೆಕ್.
ಸರ್ಕಾರಾನ್ ದಿಲ್ಲ್ಯಾ ಪಾಂಚ್ ಸೆಂಟ್ಸ್ ಜಾಗ್ಯಾರ್ ನಳ್ಯಾಚೆಂ ಅರ್ಧೆಂಕುರೆಂ ಸಂಪ್ಲ್ಲೆಂ ಘರ್ ಮೇರಿ ಸೋಜಾಚೆಂ. ಘರ್ ಮ್ಹಣ್ಚ್ಯಾಕೀ ಲ್ಹಾನ್ ಕೊಡ್ಕೆಂ ಮ್ಹಳ್ಯಾರ್ ಚಡ್ ಸಂಪೆಂ ಕೊಣ್ಣಾಂ... ಸರ್ಕಾರಾನ್ ಕುಮೊಕ್ ಜಾವ್ನ್ ದಿಲ್ಲ್ಯಾ ಥೊಡ್ಯಾ ಪಯ್ಶಾಂನಿಂ ವೊಣೊದಿ ಚಡಯಿಲ್ಲ್ಯೊ ತರ್ ಉರ್ಲ್ಲೆ ಪಯ್ಶೆ ತಿಚೊ ಘೊವ್ ಮಾರ್ಕು ಸೋಜಾನ್ ಮೊರ್ಚ್ಯಾ ಪಯ್ಲೆಂ ಪಿಯೆವ್ನ್ ಮುಗ್ದಿಲ್ಲೆ. ಮಾತಿಯೆಚ್ಯಾ ವೊಣದಿಚೆರ್ ಪಾಕ್ಕಾಸ್ ಘಾಲ್ನ್ ನಳೆ ಘಾಲ್ಚೆಂ ಕಾಮ್ ಮೇರಿ ಸೋಜಾನ್ ಥೊಡ್ಯಾ ಮಾರಾಂಚ್ಯಾ ಚೆಡ್ಯಾಂಕ್ ಘೆವ್ನ್ ಕೆಲ್ಲೆಂ.
ತಿಚೆಂ ಬಿಡಾರ್ ಮಾರಾ ಕೊರ್ಗಾರಾಂಚ್ಯಾ ಬಿಡಾರಾಂ ಮಧೆಂಚ್ಚ್ ಆಸ್ಚೆಂ ಏಕ್ ಆಯ್ಬ್ ಮ್ಹಣ್ ಹ್ಯಾ ಫಿರ್ಗಜೆಂತ್ಲ್ಯಾ ಕಿರಿಸ್ತಾಂವ್ ಮನ್ಶಾಂನಿ ಚಿಂತ್ಚೆಂ. ದೆಗೆಚಿಂ, ಮುಕ್ಲಿಂ ಆನಿಂ ಪಾಟ್ಲಿಂ ಸರ್ವಾಂ ಮಾರಾಂಚಿಂ ಯಾ ಕೊರ್ಗಾರಾಂಚಿಂ. ತ್ಯಾ ಸುತ್ತುರಾಕ್ ಕೋಣ್ಂಚ್ಚ್ ಎಕ್ಲೊ ಪುಣಿ ಕಿರಿಸ್ತಾಂವ್ ಮನಿಸ್ ರಾವಾನಾತ್ಲ್ಲೊ. ಮಾರಾಂ ಕೊರ್ಗ್ಯಾಂಚ್ಯಾ ಘಾಣಿಂ ಮಧೆಂ ಮನಿಸ್ ಜಾಲ್ಲ್ಯಾಕ್ ಜಿಯೆಂವ್ಕ್ ಕಷ್ಟ್ - ಹೆಂ ಆಮ್ಚ್ಯಾ ಬರ್ಯಾ ಆನಿಂ ಖರ್ಯಾ ಕಿರಿಸ್ತಾಂವ್ ಭಾವಾಂಚೆಂ ನಿತಳ್ ಚಿಂತಾಪ್. ಮೇರಿ ಸೋಜ್ ಹ್ಯಾ ಬಿಡಾರಾಕ್ ಯೆಂವ್ಚ್ಯಾ ಪಯ್ಲೆಂ, ಕುಟ್ಮಾ ಸಮೇತ್ ನಾನು ಪುಜಾರಿಚ್ಯಾ ಭಾದ್ಯಾಚ್ಯಾ ಘರಾಂತ್ ರಾವ್ತಾಲಿ. ಕೊಣಾ ಕೊಣಾಚೆ ಪಾಯ್ ಧರುನ್ ತಿಕಾ ಪಾಂಚ್ ಸೆಂಟ್ಸ್ ಜಾಗೊ ಮೆಳ್ಲ್ಲೊ. ತ್ಯಾ ಜಾಗ್ಯಾರ್ ಘರ್ ಉಭೆಂ ಕರಿಜಾಯ್ ತರ್ ಪರತ್ ತಿಣೆಂ ಕಿತ್ಲಿ ವಾಂವ್ಟ್ ಕಾಡ್ಲ್ಲಿ ಕೊಣಾ ಕೊಣಾಕಡೆ ಭಿಕ್ ಮಾಗ್ಲ್ಲೆಂ ತೆಂ ಕೋಣ್ಂಚ್ಚ್ ನೆಣಾ. ಘರ್ ಭಾಂಧುಂಕ್ ಮ್ಹಣ್ ಮೆಳ್ಲ್ಲೆಂ ಥೊಡೆಂ ದಾನ್ ತಿಚ್ಯಾ ಘೊವಾಚ್ಯಾ ಹರ್ದ್ಯಾರ್ ಘಾಲ್ತಾನಾ ತಿ ರಡ್ಲ್ಲಿ. ತಿಚೆಂ ಕಳ್ವಳ್ಯಾಚೆಂ ರಡ್ಣೆಂ ಕಾಂಯ್ ದೆವಾನ್ ಆಯ್ಕಾಲ್ಲೆಂಗೀ ಕೋಣ್ ಜಾಣಾ, ಭಾಡ್ಯಾಚ್ಯಾ ಘರಾಂತ್ ಆಸ್ತಾನಾಂಚ್ಚ್ ಮಾರ್ಕು ಸೊಜ್ ದೆವಾಕ್ ಮೊಗಾಚೊ ಜಾಲ್ಲೊ. ತಿಚ್ಯಾ ದೊಗಾಂ ಚೆರ್ಕ್ಯಾಂಕ್ ಘೆವ್ನ್ ತಿ ಹ್ಯಾ ಬಿಡಾರಾಂತ್ ಯೇವ್ನ್ ರಾವ್ಲ್ಲಿ.
ಆಜ್ ಸಾಂಜೆರ್ ತಿಚ್ಯಾ ಘರಾ ಮರಿಯೆಚಿ ಇಮಾಜ್ ಹಾಡುಂಕ್. ಕಾಲ್ಚ್ಯಾ ದೀಸಾ ಪಲ್ತಡಿಚ್ಯಾ ಕಾಂತಿ ಶೆಟಿಗೆರ್ ಇಮಾಜೆಕ್ ಹಾಡ್ಲ್ಲಿ. ಕಾಂತಿ ಶೆಟಿಗೆರ್ ಮರಿ ಮಾಯೆಕ್ ಭಾರಿಚ್ಚ್ ದಬಾಜಾಚೊ ಯೆವ್ಕಾರ್ ಮೆಳ್ಲ್ಲೊ. ಭಾಯ್ಲ್ಯಾನ್ ತೋರ್ಣಾಂ ಬಾಂಧ್ಲ್ಲಿಂ. ಮರಿಯೆಕ್ ಹೊಗಳ್ಸುಂಚಿಂ ಉತ್ರಾಂ ತಾಚೆರ್ ಪಿಂತ್ರಾಯಿಲ್ಲಿಂ. ಕಾಂತಿಚೆ ತೇಗ್ ಪೂತ್ ದುಬಾಯ್ ಥಾವ್ನ್ ಆಯಿಲ್ಲೆ. ದೊಗಾಂ ಧುವೊ ಮಸ್ಕತ್ ಥಾವ್ನ್ ಗಾಂವಾಕ್ ದೆಂವ್ಲ್ಲಿಂ. ದುಕೊರ್ ಮಾರ್ಲ್ಲೊ. ಪಿರೇರಿ ಕೆಟರರ್ಸ್ - ಶ್ಹೆರಾಂತ್ಲೆಂ ಮಾನೆಸ್ತ್ ರಾಂದ್ಪ್ಯಾಂನಿ ಜೆವಾಣ್ ತಯಾರ್ ಕೆಲ್ಲೆಂ. ದುಕ್ರಾ ಮಾಸ್ ಮಾತ್ ಕಾಮ್ತಿಚ್ಯಾ ಗುಡಾಂತ್ಲ್ಯಾ ದುಕ್ರಾಚೆಂಚ್ಚ್. ತಾಣೆಂ ಆಜ್ ಮ್ಹಣಾಸರ್ ಶ್ಹೆರಾಂತ್ಲ್ಯಾ ದುಕ್ರಾಂಚೆಂ ಮಾಸ್ ಆಪ್ಡುಂಕ್ ನಾ ಮ್ಹಣ್ ತೊ ಕೆದಾಳಾಯ್ ಆಡಂಬರಾಯೆನ್ ಸಾಂಗ್ತಾಲೊ. ಶ್ಹೆರಾಂತ್ಲೆಂ ದುಕೊರ್ ಹಳ್ಶಿಕ್ ಖಾವ್ನ್ಂಚ್ಚ್ ವಾಡ್ಚೆ ಮ್ಹಣ್ ತಾಣೆಂ ಮ್ಹಣ್ಚೆಂ. ಗರ್ನಾಳ್ ಸಾಯ್ಭಾನ್ ಖಜ್ನೆ ತಯಾರ್ ಕೆಲ್ಲೆ. ದಾರು ಲಾಸ್ಚಿ ಸರ್ಭಾರಾಯ್ ಆಸ್ಲ್ಲಿ. ಮುಕ್ಲ್ಯಾ ಜಾಲಾಂತ್ ಆನಿಂ ದೆಗೆಚ್ಯಾ ರುಕಾ ಮುಳಿಂ ಶಾಮಿಯಾನಾ ಆಸಾ ಕೆಲ್ಲೆಂ. ಚಂದಣ್ಣಾಕ್ ಕೊಂಟ್ರೆಕ್ಟ್. ಕದೆಲಾಂ, ಮೆಜಾಂ ತಾಚಿಂಚ್ಚ್. ಮುಕ್ಲ್ಯಾ ಗೇಟಿ ಥಾವ್ನ್ ಘರಾ ಮ್ಹಣಾಸರ್ ರುಕಾ ಝಾಡಾನಿಂ ರಂಗಾಳ್ ದಿವೆ ಪೆಟೊನ್ ಆಸ್ಲ್ಲೆ. ಫುಲಾಂ ಝೆಲೆ ಭರೊನ್ ಗೆಲ್ಲೆ. ಹಾಚೆಂ ಕೊಂಟ್ರೆಕ್ಟ್ ಅಪ್ಪು ಶೆಟ್ಟಿಚ್ಯಾ ಮಾಲ್ಘಡ್ಯಾ ಜಾಂವ್ಯಾಕ್. ಶೀನ ಆಚಾರಿನ್ ನವಿಚ್ಚ್ ಆಲ್ತಾರ್ ಭಾಂದ್ಲ್ಲಿ. ನಿಳ್ಶ್ಯಾ ರಶ್ಮಾ ವಸ್ತುರಾನ್ ಆನಿಂ ಭಾಂಗ್ರಾಳ್ಯಾ ಲಿಗಿಟಾಚ್ಯಾ ನೆಕೆತ್ರಾನಿಂ ತಿ ನೆಟಯಿಲ್ಲಿ. ಧ್ವನಿ ವರ್ಧಕಾಚಿ ವಿಲೆವಾರಿ ಅಪ್ಪು ಶೆಟ್ಟಿಚ್ಯಾ ಜಾಂವ್ಯಾಚಿಚ್ಚ್. ಪುಣ್, ಕನ್ನಡ ಹಿಂದಿ ಪಿಕ್ಚರಾಂಚಿಂ ಆಂಗಾಚಿ ಲೋಂವ್ ಉಭಿ ಕರ್ಚಿ ಉಚಾಂಬಳಿ ಪದಾಂ ಬಿಲ್ಕುಲ್ ನಾಂತ್ ಆಮ್ಚಿ ಭಕ್ತ್ ಹಿಂದು ಮುಸ್ಲಿಮಾಂಕ್ ಉಗ್ತ್ಯಾನ್ ದಾಕಂವ್ಕ್ ಕಂತಾರಾಂ ಮಾತ್ ಪ್ರಸಾರ್ ಕರಿಜಾಯ್ ಮ್ಹಣ್ ಕಾಂತಿನ್ ಕಟಿಣಾಯೆನ್ ತಾಕಿದ್ ದಿಲ್ಲಿ. ತ್ಯಾ ವರ್ವಿಂಚ್ಚ್ ಸಕಾಳಿಂ ಥಾವ್ನ್ ಎಕಾ ಪಾಟ್ಲ್ಯಾನ್ ಏಕ್ ಕಂತಾರಾಂ ವ್ಹಾಳೊನ್ ಯೆತಾಲಿಂ.
ಸಾಂಜ್ ಜಾಂವ್ಚ್ಯಾ ಪಯ್ಲೆಂಚ್ಚ್ ಲೋಕ್ ಹಾರಿಂ ಹಾರಿನಿಂ ಆಯಿಲ್ಲೊ. ತೇರ್ಸಾಚ್ಯಾ ಆಶೆನ್ ನ್ಹಂಯ್ ತರ್ಯ್ ಕಾಂತಿಚ್ಯಾ ಜೆವ್ಣಾಚ್ಯಾ ಆಶೆನ್ ಮ್ಹಣ್ ಥೊಡೆ ಉಲಯ್ತಾಲೆ. ಹಾಸ್ತಾಲೆ. ಪುಣ್, ಅಸೆಂ ಹಾಸ್ಲ್ಲೆ ಪಯ್ಲೆಂ ಯೇವ್ನ್ ಬಸ್ಲ್ಲೆ. ಘರ್ ಭರೊನ್ ಮುಕ್ಲೆಂ ಶಾಮಿಯನಾಂತ್ ಬಸೊನ್ ಕಿತ್ಲೆಶೊ ಲೋಕ್ ಉಬೊ ಸಯ್ತ್ ಆಸ್ಲ್ಲೊ. ಸೆಜಾರ್ಚ್ಯಾ ಹೆನ್ರಿ ಮಸ್ಕರೇನಸ್ ಹಾಚ್ಯಾ ಘರಾ ಥಾವ್ನ್ ಇಮಾಜ್ ಪಾದ್ರ್ಯಾಬ್ಚ್ಚ್ ಖುದ್ದ್ ಹಾಡ್ನ್ ಆಯಿಲ್ಲೊ. ತಾಚ್ಯಾ ಪಾತ್ಲ್ಯಾನ್ ವಾಡ್ಯಾಚೆ ಸರ್ವ್ ಗುರ್ಕಾರ್, ತಾಂಚಿ ಕುಟ್ಮಾಂ, ಲಿಜನಾಚಿಂ ವ್ಹಡಿಲಾಂ ಆನಿಂ ತಾಂಚಿ ಕುಟ್ಮಾಂ ಮರಿಯೆಕ್ ಹೊಗೊಳ್ಸುಚಿಂ ಗಾಯಾನಾಂ ಗಾವ್ನ್ ಯೆತಾನಾ, ಗರ್ನಾಳಿ ಆನಿಂ ಖಜ್ನೆ ಪುಟೊನ್ ಸಗ್ಳ್ಯಾ ಸಂಸಾರಾಕ್ ಕಾಂತಿಕರ್ ಮರಿಯೆಚೆಂ ಯೆಣೆಂ ಪ್ರಕಟುನ್ ಘಾಜೊಂಕ್ ಲಾಗ್ಲೆಂ. ಆಸಲೊ ಸರ್ಭಾರಾಯೆಚೊ ಸ್ವಾಗತ್ ಆಖ್ಖ್ಯಾ ಫಿರ್ಗಜೆಂತ್ ಮರಿಯೆಕ್ ಮೆಳ್ಲ್ಲೊನಾ ಮ್ಹಣ್ ಪಾದ್ರ್ಯಾಬ್ಚ್ಚ್ ಖುದ್ದ್ ಜೆವ್ಣಾ ವೆಳಾರ್ ಮ್ಹಣ್ತಾಲೊ ತೆಂ ಸಭಾರಾನಿಂ ಆಯ್ಕಾಲೆಂ.
ತೇರ್ಸ್ ಸುರು ಕರ್ಚ್ಯಾ ಪಯ್ಲೆಂ ಸರ್ವಾಂಕ್ ಥಂಡ್ ಪೀವನ್ ಆಯ್ಲೆಂ. ಪೀವನಾಂ ಸಾಂಗಾತಾ ಕೇಕಿಚೆ ಕುಡ್ಕೆ ವಾಂಟ್ಲ್ಲೆ.
ತೇರ್ಸ್, ಪಾದ್ರ್ಯಾಬಾನ್ಂಚ್ಚ್ ಕಾಂತಾರ್ ಆನಿಂ ಕುಟ್ಮಾಕ್ ಮರಿ ಮಾಯೆಚಿಂ ಬೆಸಾಂವಾಂ ಆಶೆವ್ನ್ ಸುರು ಕೆಲೊ. ಪಾಂಚ್ ಖಣ್ ಗುರ್ಕಾರಾನಿಂ ಶಿಕಯ್ಲೆ ಆನಿಂ ಲದಿನ್ ಲಿಜನಾಚ್ಯಾ ಅಧ್ಯಕ್ಷಿಣಿಕ್ ಮ್ಹಣ್ಚೊ ಮಾನ್ ಮೆಳ್ಳೊ. ಗುರ್ಕಾರ್ ಆನಿಂ ಲಿಜನಾಚಿಂ ವ್ಹಡಿಲಾಂ ಸಗ್ಳ್ಯಾ ತೆರ್ಸಾ ವೆಳಿಂ ದಿಂಬಿಯಾನಿಂಚ್ಚ್ ಆಸ್ಲ್ಲಿಂ. ಹರೇಕ್ ಖಣ್ ಆಕೇರ್ ಜಾತಾನಾ ಖಜ್ನೆ ಪುಟ್ಲೆ. ತೇರ್ಸ್ ಅಖೇರ್ ಜಾಲ್ಲೊಚ್ಚ್ ದಾರು ಲಾಸ್ಚಿ ಸರ್ಭರಾಯ್ ಚಲ್ಲಿ. ಆಯಿಲ್ಲ್ಯಾ ಲೊಕಾಕ್ ಆಸಲಿ ಗದ್ದಾಳಾಯ್ ಕೆದಾಳಾ ಪಳಂವ್ಕ್ ಮೆಳ್ತಾ?
ಜೆವ್ಣಾ ಪಯ್ಲೆಂ ತಿದೊಡಿ ಬಿಯರ್ ಆನಿಂ ಸೊರೊ ಅಸಾ ಮ್ಹಣ್ ಗಾಬ್ ಜಾಲ್ಲಿ. ತ್ಯಾಚ್ಚ್ ಪ್ರಮಾಣೆಂ ಜಾಲೆಂ. ಪಿಯೆಂವ್ಚ್ಯಾಂಕ್ ಪಿಯೆತಾ ತಿತ್ಲೊ ಆನಿಂ ಖಾಂವ್ಚ್ಯಾಕ್ ಖಾಂವ್ಚ್ಯಾ ತಿತ್ಲೆಂ ದಾಧೊಶಿ ಕರುನ್ ಕಾಂತಿನ್ ಲೊಕಾಕ್ ಪಾಟಿಂ ದಾಡ್ಲೆಂ.
ಮೇರಿ ಸೋಜ್, ಕಾಂತಿಚ್ಯಾ ಘರಾ ಗೆಲ್ಲಿ ನಾ. ತಿಕಾ ಕಾಂತಿನ್ ಚುಕೊನ್ಂಯೀ ಆಪಯಿಲ್ಲೆಂ ನಾ. ತ್ಯಾ ವರ್ವಿಂ ತಿಕಾ ಕಾಂಯ್ ಶಿಣ್ ಯಾ ರಾಗ್ ಯೇಂವ್ಕ್ ನಾತ್ಲ್ಲೊ. ಕಾಂತಿ ತಸಲ್ಯಾ ಗ್ರೇಸ್ತ್ ಮನ್ಶಾಂಗೆರ್ ಆಪ್ಣೆಂ ದುಬ್ಳಿ ಸ್ತ್ರಿಯೆನ್ ಕರ್ಚೆಂ ತರೀ ಕಿತೆಂ? ಅಸೆಂ ತಿಣೆಂ ಚಿಂತ್ಲೆಂ.
ಘರ್ ತಿಣೆಂ ಎಕಾ ಹಾಪ್ತ್ಯಾ ಪಯ್ಲೆಂಚ್ಚ್ ನಿತಳ್ ಕೆಲ್ಲೆಂ. ಖಂಯ್ಸರ್ಚ್ಚ್ ಕಸಲೊಚ್ಚ್ ಕೊಯ್ರ್, ಗಯ್ರಾಮೊ ಆಸಾನಾತ್ಲ್ಲ್ಯಾ ಬರಿ ಸಾರೊಣ್, ಝಾಡು ಮಾರ್ಲೊ. ಪಾಕಾಸಾಚ್ಯಾ ಪಂದಾಕ್ ಕಾಂಯ್ ಏಕ್ ಸಾಳಿಯೊ ಯಾ ಘೊಂಟೆರ್ ದಿಸ್ತಾಗೀ ಮ್ಹಣ್ ಪರತ್ ಆನಿಂ ಪರತ್ ತಿಣೆಂ ಪಳಯ್ಲೆಂ. ಘರಾ ಭಿತರ್ ಚಿಮ್ಣೆಚಿ ಕರಿ ಘಾಲುನ್, ದಾಟ್ ಶೆಣ್ ಕಾಡ್ಲೆಂ. ಝಾಲಾಂತ್ ಉಭಾರ್ ತಗ್ವಟ್ ಆಸ್ಲ್ಲ್ಯಾ ಕಡೆ ಪೆಟ್ಣೆಂ ಮಾರುನ್ ಉತಳ್ ಕೆಲೆಂ. ಝಾಲಾಕ್ ಶೆಣ್ ಕಾಡುನ್ ನಿತಳ್ ಕರುನ್, ತಾಚ್ಯಾ ಭಿತರ್ ಕುಂಕ್ದಾಂ ಯೇವ್ನ್ ಹಳ್ಶಿಕ್ ಕರಿನಾತ್ಲ್ಲ್ಯಾ ಬರಿ ಪಳಂವ್ಚಿ ಜವಾಬ್ದಾರಿ ಪುತಾಕ್, ಜೊನಾಕ್ ದಿಲಿ. ಝಾಲಾ ಭಾಯ್ರ್ ಮಾತಿಯೆಂತ್ ಖಾಂಬೆ ಪುರುನ್ ತಾಚ್ಯಾ ಭಂವಾರಿಂ ಆಂಬ್ಯಾ ರುಕಾಚಿಂ ಪಾನಾಂ ಘುತ್ಲಾಲಿಂ. ಪಾವಾನಾತ್ಲ್ಲ್ಯಾ ಜಾಗ್ಯಾರ್ ಥೊಡಿಂ ಶೆಣೆತಾಂ ಬಾಂದ್ಲಿಂ. ತಾಚ್ಯಾ ವಯ್ರ್ ಭಿತರ್ ಆಸ್ಲ್ಲ್ಯೊ ಮರಿ ಮಾಯೆಚ್ಯೊ ದೋನ್ ಪಾಯ್ನೆಲಾಂ ಉಮ್ಕಾಳಾಯ್ಲಿಂ.
ತಿಚ್ಯಾ ಘರಾ ಮುಕಾರ್ ಆಬೊಲ್ಯಾಂಚಿ ಝಡಾಂ ತಿಣೆಂ ಪೊಸ್ಲ್ಲಿಂ. ಉಸ್ತ್ಯಾಚೆಂ ಉದಾಕ್ ಯಾ ತೊಂಡ್ ಧುಲ್ಲೆಂ ಉದಾಕ್ ಪಡ್ಲ್ಲ್ಯಾನ್ ತಾಚೆರ್ ಆಬೊಲಿಂ ಬರಿಂಚ್ಚ್ ಜಾತಾಲಿಂ. ತಿಂ ಆಬೊಲಿಂ ಕಾಡುನ್ ವಿಕ್ಲಿಂ ತರ್ ಮಾಸ್ಳೆಚೆ ಕಾಸ್ ಜಾತಾಲೆ. ಪಾಟ್ಲ್ಯಾ ಎಕಾ ಹಾಪ್ತ್ಯಾ ಥಾವ್ನ್ ತಿ ಆಬೊಲಿಂ ತಿಣೆಂ ಆಪಡ್ಲಿಂನಾಂತ್. ಕಾಲ್ಚ್ಯಾ ದೀಸಾ ತಿಂ ಪುರಾ ಕಾಡುನ್, ಧಾ ವ್ಹಡ್ ಝೆಲೆ ತಿಣೆಂ ಕೆಲೆ. ದೆಗೆಚ್ಯಾ ಘರಾಂನಿಂ ಆಸ್ಲ್ಲಿಂ ಥೊಡಿಂ ಶಿವ್ತಿಂ, ಚಿಕೊಳ್ಯೊ, ಕಾಟ್ ಗುಲೊಬ್ ಆನಿಂ ಧಸ್ಮಿಂ ಪುಲಾಂ ಮಾಗೊನ್ ಆರಾಯ್ಲಿಂ. ವೊವ್ಳೆನ್ ಘುಂತುನ್ ತಾಂಚೆಯೀ ಲಾಂಬ್ ಝೆಲೆ ವಿಣ್ಲೆ.
ಸಕಾಳಿಂ ಥಾವ್ನ್ ತಿಚೆಂ ಕಾಳಿಜ್ ದಡ್ಧಡ್ತಾಲೆಂ. ಕಾಂತಿಕರ್ ಆಯಿಲ್ಲ್ಯಾಚ್ಯಾಕೀ ಕಾಲ್ದೊ ಲೋಕ್ ಆಯ್ಲೊ ತರ್, ಆಪ್ಣೆಂ ತಯಾರ್ ಕೆಲ್ಲೆಂ ಥೊಡೆಂಚ್ಚ್ ಖಾಣ್ ತಾಂಕಾ ವಾಂಟುಂಕ್ ಪುರೊ? ಜೆವಾಣ್, ಸೊರ್ಯಾ ಪೀವನ್ ದೀಂವ್ಕ್ ತಿಕಾ ತಾಂಕ್ ನಾತ್ಲ್ಲಿ. ಪುಣ್, ತೆರ್ಸಾಕ್ ಆಯಿಲ್ಲ್ಯಾಂಕ್ ತಿಚ್ಯಾ ತಾಂಕಿ ಪ್ರಮಾಣೆಂ ದಾಧೊಶಿ ಕರುಂಕ್ ತಿಣೆಂ ತಯರಾಯ್ ಎಕಾ ಮಹಿನ್ಯಾಂ ಥಾವ್ನ್ ಕೆಲ್ಲಿ. ಮಹಿನ್ಯಾ ಥಾವ್ನ್ ಕಿತ್ಯಾಕ್ ಮರಿ ಮಾಂಯ್ ಘರಾ ಘರಾನಿಂ ವೆತೆಲಿ ಮ್ಹಣ್ ಪಾದ್ರ್ಯಾಬಾನ್ ಸಾಂಗ್ಲ್ಲ್ಯಾ ದೀಸಾ ಥಾವ್ನ್ ತಿಣೆಂ ತಯರಾಯ್ ಸುರು ಕೆಲ್ಲಿ ಮ್ಹಳ್ಯಾರ್ಯೀ ಚೂಕ್ ಜಾಂವ್ಚಿನಾ. ಹೆಣೆಂ ತೆಣೆಂ ಕೂಲಿಚೆಂ ಕಾಮ್ ಕರ್ನ್ ಆಪ್ಲ್ಯಾ ದೊಗಾಂ ಚೆರ್ಕ್ಯಾಂಕ್ ಪೊಸುಂಕ್ ಉರ್ಡೊಂಚ್ಯಾ ತಿಕಾ ಆಯಿಲ್ಲ್ಯಾ ಲೊಕಾಕ್ ಸುಧಾರ್ಸುಂಕ್ ಜಾಯ್ತ್ಯಾ ದೀಸಾಂಚಿ ತಯಾರಾಯ್ ಜಾಯ್ ಆಸ್ಲ್ಲಿಚ್ಚ್. ಹರೇಕ್ ದೀಸ್ ಖಂಚಾತ್ ಪುಣಿ ಇಲ್ಲೆ ಇಲ್ಲೆ ಪಯ್ಶೆ ಉರವ್ನ್ ಏಕಾ ಕಂರ್ಡ್ಯಾಂತ್ ಜಮಂವ್ಕ್ ತಿಣೆಂ ಸುರು ಕೆಲ್ಲೆ ತರ್ಯೀ ತಾಂತುಂ ಶೆಂಬೊರ್ ರುಪಯ್ ಜಾಲ್ಲೆ ನಾಂತ್. ಆಯಿಲ್ಲ್ಯಾ ಲೊಕಾಕ್ ಥಂಡ್ ಪೀವನಾಂ ದಿಂವ್ಚ್ಯಾ ಖಾತಿರ್ ಬಿಂಡಿ ಸೊಲಾಂ ಸುಕೊವ್ನ್, ತಿಣೆಂ ರಾಸ್ ಕೆಲ್ಲಿಂ. ಸಾಧಾರ್ನ್ ಶೆಂಬೊರಾಂ ವಯ್ರ್ ಲೋಕ್ ಆಯ್ಲೊ ತರ್ಯೀ ತಿಂ ಪುರೊ. ಘಾಟಾರ್ ಎಸ್ಟೇಟಾಂತ್ ಕಾಮ್ ಕರ್ಚ್ಯಾ ಆಪ್ಲ್ಯಾ ಮಿವ್ಣ್ಯಾಕ್ ತಿಳ್ಸುನ್ ಥೊಡಿ ಕಾಪ್ಯೆ ಭಿ ಹಾಡವ್ನ್ ಸುಕೊವ್ನ್, ತಾಚೊ ಪಿಟೊ ಕರುನ್ ಎಕಾ ಕಂರ್ಡ್ಯಾಂತ್ ಜಾಗ್ರುತ್ಕಾಯೆನ್ ದವರ್ಲ್ಲೊ. ಥಂಡ್ ನಾಕಾ ಆಸ್ಲ್ಲ್ಯಾಂಕ್ ಕಾಫಿಯೆಚಿ ಬಂದೊಬಸ್ತ್ ಜಾಲ್ಲಿ. ಕಾಪ್ಯೆಕ್ ತಸೆಂ ಪಾತೊಳ್ಯೊ ಕರುಂಕ್ ಜಾಯ್ ಜಾಲ್ಲೆಂ ಗೋಡ್, ನಾರ್ಣ ಪುಜಾರಿ ಸರ್ಸಿನ್ ವಚೊನ್, ಏಕ್ ಪೆಳೊ ಉಣ್ಯಾ ದರಿರ್ ಹಾಡ್ಲ್ಲೆಂ ಆನಿಂ ರಾಂದ್ಣಿ ವಯ್ರ್ ದುವ್ರಾಕ್ ಶೆಣೆತಾನಿಂ, ನಾರ್ಲಾ ಚುಡೆತ್ಯಾನಿಂ ವೋಳ್ನ್ ಬಾಂಧುನ್ ದವರ್ಲ್ಲೆಂ. ಪಾವ್ಶಿಲ್ಯಾ ದಿಸಾನಿಂ ಪಟೆಲಾಗೆರ್ ಕಾಮಾಕ್ ವೆತಾನಾ, ತಾಚ್ಯಾ ಲಾಗಿಂ ಮಾಗೊನ್ ಮ್ಹಳ್ಳ್ಯಾ ಬರಿ ಥೊಡೆ ಪೊಣೊಸ್ ಹಾಡ್ನ್, ತಿಣೆಂ ದೊನ್ಶಾಂ ವಯ್ರ್ ಹಾಪೊಳ್ ತಯಾರ್ ಕೆಲ್ಲೆ. "ಮರಿಯಮ್ಮ ಇಲ್ಲಡ್ ಬರ್ಪೆರ್ - ವೊಂತೆ ಎಣ್ಣೆ ಬೋಡ್ " (ಮರಿ ಮಾಂಯ್ ಘರಾ ಯೆತಾ ಇಲ್ಲೆಂ ತೇಲ್ ಜಾಯ್.) ಅಸೆಂ ಪಟೆಲಾ ಲಾಗಿನ್ ಮಾಗ್ಲ್ಲ್ಯಾ ವೆಳಿಂ, ತಾಣೆಂ ಉದಾರ್ಪಣಿ ವ್ಹಡಾ ಮೊರ್ಗುಲಾಂತ್ ಬರೆಂ ನಾರ್ಲೆಲ್ ತೇಲ್ ದಿಲ್ಲೆಂ. ಆಯಿಲ್ಲ್ಯಾ ಲೊಕಾಕ್ ಪಾಪ್ದೆ ಬಾಜುನ್ ದಿಂವ್ಕ್ ಸೆಜಾರ್ಚ್ಯಾ ರುಕ್ಕುಚಿ ಕುಮೊಕ್ ತಿಣೆಂ ಮಾಗ್ಲ್ಲಿ. ಹೆಣೆಂ ತೆಣೆಂ ಮಾಗೊನ್ ಥೊಡೊ ತಾಂದುಳ್ ರಾಸ್ ಕರ್ನ್, ಬಿಜಾತ್ ಘಾಲ್ನ್, ಆಜ್ ವಾಟುನ್ ಥೊಡಿಂ ಮುಟ್ಲಿಂ, ಹಳ್ದಿ ಕೊಲ್ಯಾಂಚ್ಯೊ ಪಾತಳ್ಯೊ, ಪೊಣ್ಸಾ ಕೊಲ್ಯಾಂಚ್ಯೊ ಗೊಡಾಚೆಂ ಸೂರ್ನ್ ಘಾಲ್ನ್ ಪಾತೆಳ್ಯೊ ಕೆಲ್ಲ್ಯೊ. ತೊಯ್ ಕಾಂಯ್ ಶೆಂಬರಾಂ ವಯ್ರ್ ಲೊಕಾಕ್ ಪುರೊ ಮ್ಹಣ್ ತಿಚೊ ಅಂದಾಜ್.
ಮರಿ ಮಾಯೆಚಿ ಇಮಾಜ್ ದವರುಂಕ್ ತಿಣೆಂ ಪರ್ನೆಂ ಮೇಜ್ ಸೊಭಿತ್ ಕರುನ್ ಮಾಂಡ್ಲ್ಲೆಂ. ಶೀನ ಆಚಾರಿಚ್ಯಾ ಘರಾ ವಚೊನ್ ದಬ್ಬ್ಯಾಂತ್ ಇಲ್ಲೊ ರಂಗ್ ಹಾಡುನ್, ನಾರ್ಲಾಚೆಂ ಸಣ್ಣ್ ಘೆವ್ನ್, ತಾಚೆಂ ಪೋಂತ್ ತಾಸುನ್, ಮೆಜಾಕ್ ನಿಳ್ಶೊ ರಂಗ್ ಸಾರಯಿಲ್ಲೊ. ಆಪ್ಲೆಂ ಸಾಡ್ಯಾ ವಯ್ಲೆಂ ಕಾಪಾಡ್ - ನಿಳ್ಶ್ಯಾ ರಂಗಾಚೆಂ ತೆಂ ಕಾಡುಂಕ್ಯ್ ತಿ ಪಾಟಿಂ ಸರ್ಲಿ ನಾ. ದುಸ್ರಿಂ ಕಾಪ್ಡಾಂಯ್ ತಿಚೆಂ ಲಾಗಿಂ ನಾತ್ಲ್ಲಿಂ. ತೆಂ ಕಾಪಾಡ್ ಮೆಜಾರ್ ಹಾಂತುಳ್ನ್, ದೆಗೆನ್ ತೀನ್ ಮುಣ್ಯೊಂ ದವರ್ನ್ ತಾಚ್ಯಾ ವಯ್ರ್ ಪಾಂಗುರ್ಲೆಂ. ಆಬೊಲಿಂ, ಸಿವ್ತಿಂ, ಗುಲೊಬ್ ಆನಿಂ ದಸ್ಮಿಂ ಫುಲಾಂ ಝೆಲೆ ಭಂವಾರಿಂ ನೆಟವ್ನ್, ಆಲ್ತಾರ್ ತಯಾರ್ ಕೆಲಿ. ಶಿನ್ವಾಸಾಚ್ಯಾ ಆಂಗ್ದಿ ಥಾವ್ನ್ ತಾಂಬ್ದ್ಯೊ ವಾತಿ ಹಾಡ್ಲ್ಲ್ಯೊ. ತ್ಯೊ ವಾತಿ ಏಕಾ ಲ್ಹಾನ್ ಪಿರಿಂತ್ ಉಬ್ಯೊ ಕೆಲ್ಯೊ. ಮರಿ ಮಾಯ್ ಏಕಾ ದೀಸಾಕ್ ರಾವೊಂಕ್ ಆಸಾ ಕೆಲ್ಲೆಂ ಬಿಡಾರ್ ಭಾರಿಚ್ಚ್ ಸೊಭಿತ್ ದಿಸ್ಲೆಂ ತಿಕಾ.
ಆಯಿಲ್ಲ್ಯಾ ಲೊಕಾಕ್ ಬಸೊಂಕ್ ಘರಾಂತ್ ಆಸ್ಲ್ಲ್ಯೊ ಮಾಂದ್ರ್ಯೊ ಪರ್ನ್ಯೊ ಜಾಲ್ಲ್ಯೊ ದೆಕುನ್ ಪಟೆಲಾ ಸರ್ಶಿನ್ ಆಡ್ದೊಸ್ ಮಾಗೊನ್, ಪನ್ನಾಸ್ ಮೊಡ್ಲಾಂ ಹಾಡ್ನ್, ತಿಂ ಉದ್ಕಾಂತ್ ಬಿಜವ್ನ್, ವೊಳುನ್, ಝಾಲಾಂತ್ ಘಾಲ್ಚ್ಯಾಕ್ ತಯಾರ್ ಕೆಲ್ಲಿಂ. ಆಯಿಲ್ಲ್ಯಾ ಶೆಂಬರ್ ದೊನ್ಶಿಂ ಲೊಕಾಕ್ ತಿಂ ಪುರೊ ಆಸ್ಲ್ಲಿಂ.
ಲೊಕಾಕ್ ಪಿಯೆಂವ್ಕ್ ಕೊಪಾಂ, ಬೊಶಿಯೊ, ಹಾತ್ ಪಾಯ್ ಧುಂವ್ಕ್ ಉದಾಕ್ ಭರ್ಚ್ಯೊ ಬಾಲ್ದ್ಯೊ, ಕಟ್ಟ್ಯೊ ಪುರಾ ತಯಾರ್ ಜಾಲ್ಲ್ಯೊ.
ಫಾಂತೆಂ ಜಾಂವ್ಚ್ಯಾ ಪಯ್ಲೆಂಚ್ಚ್ ಉಟೊನ್, ಎಕಾ ಘಡಿಯೆಚೊ ವೇಳ್ ಪಾಡ್ ಕರಿನಾಸ್ತಾನಾ ಪುರಾ ಕಾಮ್ ತಿಣೆಂ ಕಾಬಾರ್ ಕೆಲ್ಲೆಂ. ಸಾಡೆ ಪಾಂಚ್ ಉತರ್ಲಿಂ ತರ್ಯೀ ಘರಾ ಕೋಣ್ಂಚ್ಚ್ ಯೇಂವ್ಕ್ ನಾತ್ಲ್ಲೊ ಪಳವ್ನ್, ಲೋಕ್ ಕಾಂತಿಕರ್ ಯೇವ್ನ್ ಘರಾ ಯೆತಾತ್ ಮ್ಹಣ್ ತಿಚ್ಯಾ ಮತಿಂತ್ ಆಸ್ಲ್ಲೆಂ. ಸ ಜಾತಾನಾ, ಆಪ್ಲ್ಯಾ ದೊಗಾಂ ಪುತಾಂಕ್ ಘೆವ್ನ್ ತಿ ಕಾಂತಿಕರ್ ಪಾವ್ಲಿ. ಶಾಮಿಯಾನಾ ಕಾಡ್ಲ್ಲೆಂ. ಕದೆಲಾಂ ಖಾಲಿ ಜಾಲ್ಲಿಂ. ಆಲ್ತಾರಿ ಭಂವ್ತಿಂ ದಿವೆ ಜಳ್ತಾಲೆ. ಮರಿ ಮಾಯೆಚಿ ಇಮಾಜ್ ಎಕ್ಸುರಿಚ್ಚ್ ಆಸ್ಲ್ಲಿ. ಹೆಣೆಂ ತೆಣೆಂ ಕೋಣ್ಂಚ್ಚ್ ನಾತ್ಲ್ಲಿಂ. ಕಾಲ್ಚೊ ದಬಾಜೊ, ಆವಾಜ್, ಗಾಯಾನಾಂ ಬಂದ್ ಜಾಲ್ಲಿಂ. ಸಗ್ಳ್ಯಾನಿಂ ಮೌನ್ಪಣ್ಂಚ್ಚ್ ಆಸ್ಲ್ಲೆಂ.
ಮೇರಿ ಸೋಜಾನ್ ದಾವೊನ್ ವಚೊನ್ ಮರಿ ಮಾಂಯ್ಚ್ಯಾ ಪಾಯಾಂಚೊ ಉಮೊ ಘೆತ್ಲೊ ಆನಿಂ ತೀನ್ ನಮಾನ್ ಮರಿಯೆ ಬೆಟವ್ನ್, "ಕಾಂತಿ ಮಾಮಾ..." ಮ್ಹಣ್ ಉಲೊ ಕೆಲೆಂ.
ಇಲ್ಲ್ಯಾ ವೇಳಾನ್ ಕಾಂತಿಚೊ ಕಾಮಾಚೊ ಚೆಡೊ ಬಾಯ್ರ್ ಆಯ್ಲೊ. "ಬಾಬ್ ಆನಿಂ ಕೋಣಿ ಘರಾಂತ್ ನಾಂತ್... ತಿಂ ಸರ್ವಾಂ ಕೊಡ್ಯಾಳ್ ಗೆಲ್ಯಾಂತ್... ಇಮಾಜ್ ತುಕಾ ವ್ಹರುಂಕ್ ಸಾಂಗ್ಲ್ಯಾ..."
ಮೇರಿ ಸೋಜಾನ್ ಮರಿ ಮಾಂಯ್ಚಿ ಇಮಾಜ್ ಭಕ್ತಿಪಣಾನ್ ಅರಾಯ್ಲಿ ಆನಿಂ ಆಪ್ಲ್ಯಾ ಹರ್ದ್ಯಾಕ್ ದಾಂಬುನ್ ಧರ್ಲಿ. "ಗುರ್ಕಾರ್ ಯಾ... ಕೋಣೀ.." ತಿಣೆಂ ಪುಸ್ಪುಸೊನ್ ಪರತ್ ವಿಚಾರ್ಲೆಂ...
ಕಾಂತಿಚ್ಯಾ ಕಾಮಾಚ್ಯಾ ಚೆಡ್ಯಾನ್ ಜವಾಬ್ ದಿಂವ್ಕ್ ಚಿಕ್ಕೆ ತಡವ್ ಕೆಲೊ. ಕಾಂತಿಚ್ಯಾ ಪಯ್ಶಾಂಚ್ಯಾ ವಡ್ಪಣ್ ಕಾಮಾಚ್ಯಾ ಚೆಡ್ಯಾಚ್ಯಾ ತಳ್ಮಾಟ್ಯಾಕ್ಯೀ ಲಾಗ್ಲ್ಲೊ ಆಸ್ತಲೊ." ಧನ್ಯಾನ್ ಕೊಡ್ಯಾಳ್ ನವೆಂ ಜೊವ್ಳೆ ಶೊಪ್ ಕಾಣ್ಘೆಲಾಂ... ಭಾರಿ ವ್ಹಡ್... ಆನಿಂ ತಾಚೆಂ ಉದ್ಘಾಟನ್ ಕರುಂಕ್ ಬೆಂಗ್ಳುರ್ ಥಾವ್ನ್ ಮಂತ್ರಿ ಯೆತಾತ್ ಕಂಯ್.. ದೆಕುನ್ ಪಾದ್ರ್ಯಾಬ್, ಗುರ್ಕಾರ್ ಆನಿಂ ಸರ್ವ್ ಲೋಕ್ ಗೆಲಾ..."
ಮೇರಿ ಸೋಜ್ ಉಲಯ್ಲಿ ನಾ. ತಿಣೆಂ ಉಲಂವ್ಚೆಂ ತರೀ ಕಿತೆಂ? ಮರಿ ಮಾಯೆಚಿ ಇಮಾಜ್ ಆಪ್ಲ್ಯಾ ಹರ್ದ್ಯಾಕ್ ಆರಾವ್ನ್ ತಿ ಆಪ್ಲ್ಯಾ ಘರಾ ಕುಶಿನ್ ಮೆಟಾಂ ಕಾಡಿಲಾಗ್ಲಿ.
ಝಾಲಾಂತ್ ಸುಂರ್ಗಾರಾಯಿಲ್ಲ್ಯಾ ಆಲ್ತಾರಿ ವಯ್ರ್ ಇಮಾಜ್ ದವರ್ತಾನಾ ತಿಚ್ಯಾ ದೊಳ್ಯಾಂತ್ಲಿ ದುಖಾಂ ಗಳೊನ್ ಇಮಾಜಿಚೆರ್ ಪಡ್ಲಿಂ....
ಅಪ್ಲ್ಯಾ ದೊಗಾಂ ಚೆರ್ಕ್ಯಾಂ ಸವೆಂ ತೇರ್ಸ್ ಮ್ಹಣೊಂಕ್ ತಿಣೆಂ ಕೋಂತ್ ಘೆತ್ಲೆಂ....
ತ್ಯಾ ವೆಳಿಂ, ಝಾಲಾಂತ್ ಸೊಡಯಿಲ್ಲ್ಯಾ ಮೊಡ್ಲಾಂಚೆರ್ ಮಾರಾಂ ಕೊರ್ಗಾರಾಚಿಂ ವ್ಹಡಾಂ ಲ್ಹಾನಾಂ ರಾಸ್ ಪಡೊನ್ ತಿಕಾಚ್ಚ್ ದೆಖ್ತಾಲಿಂ ತೆಂ ಮಾತ್ ತಿಚ್ಯಾ ದೊಳ್ಯಾಂಕ್ ದಿಸಾನಾಸ್ತಾನಾ ರಾವ್ಲೆನಾಂ...
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
