ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿಕಾಣಿ: ಸಾತ್ವ್ಯಾ ಸಾಕ್ರಾಮೆಂತಾಚೊ ಸಾಕ್ರಿಫಿಸ್
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ, ಖೊವ್ಳಾಂ, ಮರುಭುಂಯ್ಂತ್ಲೆಂ ವಾದಾಳ್, ಮರಿ ಘರಾ ಆಯ್ಲಿ, ತುಜೆಂ ಜಿಣೆಂ ಮ್ಹಜೆಂ ನ್ಹಯ್.
ಕ್ಲೆರೆನ್ಸ್, ಕೈಕಂಬ
ಬಾಬ್ ಆಚಾನಕ್ ಸರ್ಲ್ಲೊ ನ್ಹಯ್. ಖರೆಂಚ್ಚ್ ಸಾಂಗ್ಚೆಂ ತರ್ ಆಮಿಂ ತಾಚ್ಯಾ ಮೊರ್ನಾಕ್ ರಾಕೊನ್ ರಾವ್ಲ್ಲ್ಯಾಂವ್. ತಾಚ್ಯಾ ಮೊರ್ನಾಚಿ ಖಬರ್ ಆಯ್ಕೊನ್ ಆಮಿಂ ಸರ್ವಾಂನಿ ಸಮಧಾನೆನ್ ಉಸ್ವಾಸ್ ಸೊಡ್ಲ್ಲೊ ಮ್ಹಣ್ಯೆತ್. ರಡ್ಚೆಂ ಮನ್ ಕೊಣಾಯ್ಕಿ ಯೆಂವ್ಕ್ ನಾ ಮ್ಹಣ್ ಖರೆಂಪಣಿ ಹಾಂವ್ ಉಚಾರ್ತಾಂ. ಇತ್ಲೆ ಕಷ್ಟ್ ವ್ಹಳ್ವಳೆ ಸೊಸುನ್ ಆಸ್ಲ್ಲ್ಯಾಕ್ ಆಕ್ರೇಕ್ ತರ್ಯೀ ಹ್ಯಾ ಜಿವಿತಾ ಥಾವ್ನ್ ಸುಟ್ಕಾ ಮೆಳ್ಳಿ ಮ್ಹಳ್ಳೆಂ ಸಮಧಾನ್ ಆಮ್ಕಾಂ ಸರ್ವಾಂಕ್.
ಬಾಬ್ ಸರ್ಲ್ಲ್ಯಾ ದೀಸಾಚ್ಚ್ ರಾತಿಂ, ಹಾಂವ್ ಆನಿಂ ಡೊರತಿ ಭುರ್ಗ್ಯಾಂಕ್ ಘೆವ್ನ್ ಮಸ್ಕತ್ ಥಾವ್ನ್ ಬಾಯ್ರ್ ಸರ್ಲ್ಲ್ಯಾಂವ್. ಆಮಿಂ ಗಾವಾಕ್ ಪಾವ್ತಾನಾ ಬೊಂಬಯ್ಚೆಂ ಭಯ್ಣ್, ಮಯ್ಸೂರ್ ಆಸ್ಲ್ಲೊ ಪಾದ್ರಿ ಭಾವ್ ಯೇವ್ನ್ ಪಾವ್ಲ್ಲೆ. ಬಾಹ್ರೆನಾಂತ್ ಆಸ್ಲ್ಲೆಂ ಭಯ್ಣ್, ಕುವೆಯ್ಟ್ಚೊ ಭಾವ್ ಆನಿಂ ಕೆನಡಾಚೊ ಭಾವ್ ಮಾತ್ರ್ ತಾ-ತಾಂಚ್ಯಾ ಕುಟ್ಮಾಂಕ್ ಘೆವ್ನ್ ಯೆಂವ್ಕ್ ಬಾಕಿ ಆಸ್ಲ್ಲಿಂ. ತಿಂಯೀ ವಾಟೆರ್ ಆಸ್ಲ್ಲಿಂ ಮ್ಹಳ್ಳಿ ಖಬರ್ ಆಮಿಂ ಘರಾ ಪಾವ್ತಾನಾ ಆಮ್ಕಾಂ ಮೆಳ್ಳಿ.
ಘರಾ ಪಾವ್ಲ್ಯಾ ಉಪ್ರಾಂತ್, ಬಾಬ್ ಕಸೊ ಸರ್ಲೊ ಮ್ಹಣ್ ಹಾಂವೆಂ ಕೊಣಾಯ್ಲಾಗಿಂ ವಿಚಾರ್ಲೆಂ ನಾ ಆನಿಂ ಮಾಂಯ್ನ್ ಯಾ ಹೆರಾಂ ಕೋಣೆಂಯ್ ಸಾಂಗ್ಲೆಂಯ್ ನಾ. ಘರಾಂತ್ ದೂಕಾಚೆಂ ಭಗಾಪ್ಶೆಂ ಆಸ್ಲ್ಲೆಂ ಪುಣ್ ರಡ್ಣೆಂ ನಾತ್ಲ್ಲೆಂ. ಏಕಾ ರೀತಿಚೆಂ ಉಬ್ದೆಸಾಂಚೆಂ ಮೌನ್ಪಣ್. ಮಾಂಯ್ ತಿಚೆಂಚ್ಚ್ ಕಾಮ್ ಕರುನ್ ಆಸ್ಲ್ಲಿ. ತಿಚ್ಯಾ ಕಾಳ್ಜಾಂತ್ ದೂಕ್ ಆಸ್ಲ್ಲಿ ಜಾಂವ್ಕ್ ಪುರೊ ಪುಣ್ ತಿ ದಾಕಯ್ನಾತ್ಲ್ಲಿ. ರಡ್ಣೆಂ ಯಾ ತಿಚ್ಯಾ ದೊಳ್ಯಾಂನಿ ದುಖಾಂ ದೆಂವ್ಲ್ಲಿಂ ಹಾಂವೆಂ ಪಳಯ್ಲಿಂನಾಂತ್. ಬಾಬಾಚಿ ಇತ್ಲ್ಯಾ ದೀಸಾಂಚಿಂ ಚಾಕ್ರಿ ಕೆಲ್ಯಾ ಉಪ್ರಾಂತ್ ರಡ್ಣೆಂ ತರ್ಯೀ ಕಿತ್ಯಾಕ್? ಹಾಂವೆಂ ಮತಿಂತ್ ಚಿಂತ್ಲೆಂ ತೆಂ ಖರೆಂ.
ಆಮ್ಚ್ಯಾ ಕಾಮಾಚೆಂ ಚೆಡುಂ ಲತಾ ಮಾತ್ ಬಾಬ್ ಸರ್ಲ್ಲ್ಯಾ ಉಪ್ರಾಂತ್ ಸೆಜಾರ್ಚ್ಯಾ ಬೊಸ್ತ್ಯಾಂವ್ಕರ್ ವಚೊನ್ ರಾವ್ಲ್ಲೆಂ ಪಾಟಿಂ ಘರಾ ಯೆನಾಂಚ್ಚ್ ಜಾಲೆಂ. ಹಾಂವೆಂ ವಚೊನ್ ’ಘರಾ ಯೆ’ ಮ್ಹಣ್ ಪರಾತ್ಲೆಂ ತರ್ ಮ್ಹಜೆ ಪಾಯ್ ಧರುನ್ "ಹಾಂವ್ ಯೆನಾ ಬಾಬಾ.... ದಯಕರುನ್ ಮ್ಹಾಕಾ ಬೊಗ್ಸಿ..... ವ್ಹಡ್ಲೊ ಬಾಬ್ ಸರ್ಲ್ಲ್ಯಾ ಘರಾಂತ್ ಮ್ಹಾಕಾ ಯೆಂವ್ಕ್ ಬಿಲ್ಕುಲ್ ಜಾಯ್ನಾ....." ಮ್ಹಣ್ ಕಳ್ವಳೊನ್ ರಡೊಂಕ್ ಲಾಗ್ಲೆಂ.
ಬಯ್ಲಾಂತ್ಲ್ಯಾ ತಳ್ಟ್ಯಾ ಮಾಡಾಬರಿ ದಿಸ್ಚೊ ಆನಿಂ ರಾನಾಂತ್ಲ್ಯಾ ಚೊಲ್ಲೆ ವಾಗಾಬರಿ ಜಿಯೆಂವ್ಚೊ ಬಾಬ್ ಮ್ಹಾತಾರೊ ಜಾವ್ನ್, ಹುಶಾರ್ ನಾಸ್ತಾನಾ ಪಾಂಚ್ ವೊರ್ಸಾಂ ಜಾಲ್ಲಿಂ ತರ್ ಮಾಂದ್ರೆರ್ ಪಡೊನ್ ಸುಮಾರ್ ತೀನ್ ವೊರ್ಸಾಂ ಜಾಲ್ಲಿಂ. ಮಾಂಯ್ನ್ ಮಾತ್ರ್ ತಾಚಿ ಸೆವಾ ದೀಸ್ ರಾತ್ ಮ್ಹಳ್ಳ್ಯಾ ಬರಿ ಕೆಲ್ಲಿ. ತಿಚಿ ಸೊಸ್ಣಿಕಾಯ್ ತರ್ಯ್ ವಿಚಿತ್ರ್. ಹೆಂ ಹಾಂವೆಂ ಮಾತ್ ಮ್ಹಣ್ಚೆಂ ನ್ಹಯ್ ಬಗಾರ್ ಸಗ್ಳೊ ಸುರತ್ಕಲ್ಚೊ ಸೆಜಾರ್ ಮ್ಹಣ್ತಾಲೊ. ಮಾತ್ರಿಮನಿಚೊ ಸಾಕ್ರಾಮೆಂತಾಂತ್ ದೆವಾನ್ ಫಾವೊ ಕೆಲ್ಲ್ಯಾ ಮನ್ಶಾಕ್, ತೊ ಕಸಲೊಯ್ ಜಾಂವ್ದಿ, ಪಾಟ್ಲ್ಯಾ ಜಿಣಿಯೆಂತ್ ಕಿತೆಂಯ್ ತಾಣೆಂ ಕೆಲ್ಲೆಂ ಜಾಂವ್ದಿ, ಮೊರಾಸರ್ ಸಾಂಗಾತ್ ದಿಂವ್ಚಿ ತಿಚಿ ಅಶಾ ಜಾವ್ನಾಸ್ಲ್ಲಿ. ತ್ಯಾಚ್ಚ್ ಚಿಂತ್ಪಾನ್ ತಿ ಜಿಯೆಲ್ಲಿ ಆನಿಂ ಬಾಬಾಚಿ ಸೆವಾ ಕೆಲ್ಲಿ. ತಿಕಾ ಭಕ್ತಿಪಣ್ ಭಾರಿಚ್ಚ್ ಚಡ್. ಸಕಾಳಿಂಚ್ಯಾ ಮಿಸಾಕ್ ಮಿರ್ನ್ಯಾಮ್ ತರ್ಯೀ ಹಾಜರ್ ಜಾಂವ್ಕ್ ವಿಸ್ರಾತ್ ಪುಣ್ ತಿ ಜಾಂವ್ಚಿ ನಾ. ಇಗರ್ಜೆಂತ್ ಚಡಾವತ್ ಜಮತ್ಯಾಂನಿ ತಿ ಆಸಾಚ್ಚ್. ಲೀಜನಾ ಥಾವ್ನ್ ಫಿರ್ಗಜ್ ಮಂಡಳೆ ಮ್ಹಣಾಸರ್ ತಿ ಸೆವಾ ದಿತಾಲಿ ಜಾಲ್ಲ್ಯಾನ್ ಕೊಣ್ಣಾ ಮಾಂದ್ರೆರ್ ಪಡೊನ್ ಕಷ್ಟೊಂಚ್ಯಾ ಬಾಬಾಚಿ ಸೆವಾ ಕರುಂಕ್ ತಿಕಾ ತ್ರಾಣ್ ಮೆಳ್ಲ್ಲೆಂ. ಜಿಣಿಯೆಂತ್ ಜಾಲ್ಲೆಂ ಸರ್ವ್ ವಿಸ್ರೊನ್ ಯಾ ಭಗ್ಸುನ್ ಬಾಬಾಕ್ ಆಕ್ರೇಚ್ಯಾ ವೇಳಾರ್ ತಿಣೆಂ ಸಾಂಗಾತ್ ದಿಲ್ಲೊ.
ಬಾಬ್ ಮಾಂದ್ರೆರ್ ಪಡ್ಲ್ಲ್ಯಾ ಉಪ್ರಾಂತ್ ಮತಿರ್ ಸಮಾ ಆಸ್ಲ್ಲೊ ತರ್ಯೀ ಪೆಂಕ್ಡಾ ಸಕಯ್ಲ್ ಬಿಲ್ಕುಲ್ ಬಳ್ ನಾತ್ಲ್ಲೆಂ. ತೊಂಡಾಂತ್ ಉಲಂವ್ಕ್ ಜಾಯ್ನಾತ್ಲ್ಲೆಂ. ಹಾತ್ ಭಾಸ್ ಕರ್ನ್ ಜಾಯ್ ಜಾಲ್ಲೆಂ ತೊ ಸಾಂಗ್ತಾಲೊ. ಪೊಟಾಕ್ ದಿಲ್ಲೆಂ ಪೂರಾ ಖಾತಾಲೊ ತರ್ ಖೆಲ್ಲೆಂ ತೆಂ ಬಾಯ್ರ್ ವೆತಾಲೆಂ ತರ್ ತಾಕಾ ಕಳಿತ್ ಜಾಯ್ನಾತ್ಲ್ಲೆಂ. ಪಾಟ್ಲ್ಯಾ ದೋನ್ ವರ್ಸಾಂನಿಂ ದೋನ್ ಪಾವ್ಟಿಂ ಗಾಂವಾಕ್ ಗೆಲ್ಲ್ಯಾ ವೆಳಿಂ ಬಾಬಾಕ್ ದವರ್ಲ್ಲ್ಯಾ ವಿಂಗಡ್ ಕುಡಾಂತ್ ಘಾಣ್ ಭರ್ಲ್ಲ್ಯಾನ್ ಭಿತರ್ ವಚೊಂಕ್ ಜಾಯ್ನಾತ್ಲ್ಲೆಂ ತೆಂ ಮ್ಹಾಕಾಚ್ ಭಗ್ಲ್ಲೆಂ. ಎಕಾ ಮಹಿನ್ಯಾಚ್ಯಾ ರಜೆಂತ್ ಹಾಂವ್ ಬಾಬಾಚ್ಯಾ ಕುಡಾಕ್ ಗೆಲ್ಲೊಂ ಫಕತ್ತ್ ತೀನ್ ಪಾವ್ಟಿಂ. ಹಾಂವ್ ವಚೊಂಕ್ ಆಶೆಲ್ಲೊಂ ತರ್ಯ್ ಮಾಂಯ್ ಮ್ಹಾಕಾ ಆಡಾಯ್ತಾಲಿ - "ತ್ಯಾ ಘಾಣಿಂತ್ ತುಜಿ ಪೊಟಾಚಿ ಘಾಂಟ್ ಉಂಚಾಂಬಳ್ ಜಾಂವ್ಕ್ ಅಸಾ ಪುತಾ...... ತುಂ ಥಂಯ್ ವಚಾನಾಕಾ..... ಹಾಂವ್ ಜಾಲ್ಲ್ಯಾನ್ ಮಾತ್ ಥಂಯ್ ವೆತಾಂ ಮ್ಹಣ್೦ಗೀ...." ಮಾಂಯ್ಚೆಂ ಉತರ್ ಸಾರ್ಕೆಂ ದಿಸ್ಲ್ಲೆಂ ಆನಿಂ ಹಾಂವ್ ಯೆಂವ್ಚ್ಯಾ ದೀಸ್, ಮಧೆಂ ಏಕ್ ಪಾವ್ಟಿಂ ಆನಿಂ ಪಾಟಿಂ ವೆಚ್ಯಾ ದೀಸ್ ಮಾತ್ ಬಾಬಾಕ್ ಮೆಳೊಂಕ್ ಗೆಲ್ಲೊಂ.
ಎಕಾ ವರ್ಸಾಂ ಪಯ್ಲೆಂ, ರಜೆರ್ ಆಯಿಲ್ಲೊಂ ಪಾಟಿಂ ವೆತಾನಾ ಬೆಸಾಂವ್ ಮಾಗೊಂಕ್ ಗೆಲ್ಲ್ಯಾ ಮ್ಹಾಕಾ ಪಳವ್ನ್ ಬಾಬ್ ರಡ್ಲ್ಲೊ. ರಾತಿಕ್ ರಡೊನ್ ರಡೊನ್ ತಾಚೆಂ ಉಶೆಂ ಬಿಜೊನ್ ಗೆಲ್ಲೆಂ ತೆಂ ಮ್ಹಾಕಾ ಕಳ್ತಾಲೆಂ. ಬಾಬಾನ್ ರಡ್ಲ್ಲೆಂ ಹಾಂವೆಂ ಕೆದ್ನಾಂಯ್ ಪಳಂವ್ಕ್ ನಾತ್ಲ್ಲೆಂ. ತೊ ಜಿವಿತಾಂತ್ ಕೆದ್ನಾಂಯ್ ಭಿಯೆಲ್ಲೊ ಮನಿಸ್ ನ್ಹಯ್. ರಡ್ಲ್ಲೊಯ್ ನ್ಹಯ್. ಮುಖಾರ್ ಸಯ್ತಾನ್ ಮೆಳ್ಳೊ ತರ್ಯ್ ತಾಕಾ ಮಾಟ್ ಕರುನ್ ದಾಂವ್ಡಾಂವ್ಚ್ಯಾ ಖಾಸ್ತಾಚೊ. ಬರೊ ಆಸ್ತಾನಾ ತಾಕಾ ಪಳವ್ನ್ ಲೋಕ್ ಭಿಯೆತಾಲೊಚ್ಚ್ ಮ್ಹಣ್ಯೆತ್. ಆಮಿಂಯೀ ತಾಚ್ಯಾ ಲಾಗಿಂ ಸಳ್ಗೆನ್ ಕೆದ್ನಾಂಯ್ ಉಲಯಿಲ್ಲೆಂ ನಾ. ತ್ಯಾ ವೆಳಿಂ ತಾಕಾ ಮೆಳೊಂಕ್ ಗೆಲ್ಲ್ಯಾ ಮ್ಹಜ್ಯಾ ಲಾಗಿಂ, ತೊ ಕಿತೆಂಗೀ ಸಾಂಗೊಂಕ್ ಉರ್ಡಾತಾಲೊ ಪುಣ್ ಮ್ಹಾಕಾ ಅರ್ತ್ ಜಾಲ್ಲೆಂ ನಾ. ತಾಚಿ ಹಾತ್ ಭಾಸ್ ಪಳವ್ನ್ ಮಾಂಯ್ನ್ ಮ್ಹಳ್ಳೆಂ - "ಹಾಂಗಾ ರಾವೊಂಕ್ ನಾಕಾ ಕಂಯ್.... ಆಸ್ಪತ್ರೆಂತ್ ವೊರ್ನ್ ಘಾಲ್ಯಾ ಮ್ಹಣ್ತಾ ....."
ಬಾಬಾನ್ ಮ್ಹಾಕಾ ಪಳಯಿಲ್ಲೆಂ - "ವ್ಹಯ್" ಮ್ಹಣ್ಚ್ಯಾಬರಿ. ಹಾಂವ್ ತಾಚೆಂ ಉತರ್ ಆಯ್ಕಾತಾಂ ಕೊಣ್ಣಾ ಮ್ಹಳ್ಳಿ ಆಶಾ ತಾಚ್ಯಾ ದೊಳ್ಯಾಂನಿ ಆಸ್ಲ್ಲಿ. ದೂಕ್ ಭರ್ಲ್ಲ್ಯಾ ತೊಂಡಾರ್ ಭಲತ್ಕಾರಾಚೊ ಹಾಸೊ ಹಾಡುನ್ ತೊ ಮ್ಹಜ್ಯಾ ಲಾಗಿಂ ಪರಾತ್ತಾ ತಸೆಂ ಭಗ್ಲ್ಲೆಂ ಮ್ಹಾಕಾ ತರ್ಯ್ ಹಾಂವ್ ಉಲಯಿಲ್ಲೊಂನಾ ಯಾ ಅರ್ತ್ ಕರ್ಚೆಂ ಮನ್ ಹಾಂವೆಂ ಕೆಲ್ಲೆಂ ನಾ.....
"ಅಸ್ಪತ್ರೆಂತ್ ವೊರ್ನ್ ಘಾಲ್ಯಾರ್ ಗಾಂವ್ಚೊ ಲೋಕ್ ಕಿತೆಂ ಮ್ಹಣಾತ್? ಬಾಯ್ಲ್ ಆಸಾ .... ವ್ಹಡಾ ವ್ಹಡಾ ಹುದ್ದ್ಯಾಕ್ ಪಾವ್ಲ್ಲಿಂ ಭುರ್ಗಿಂ ಆಸಾತ್... ತಾಂತುಯೀ ಎಕ್ಲೊ ಪಾದ್ರಿ.... ಹಾಂಕಾ ಬಾಪಾಯ್ಕ್ ಪಳಂವ್ಕ್ ಜಾಯ್ನಾಂಗೀ ಮ್ಹಣ್ ಮ್ಹಣ್ಚೆನಾಂತ್....? ಹಾಕಾ ತೆಂ ಪೂರಾ ಸಮ್ಜಾತಾವೆ? ಹಾಂವ್ ಹಾಕಾ ಇತ್ಲೆಂ ಬರೆಂ ಕರ್ನ್ ಪಳಯ್ತಾಂ...... ಹಾಂವ್ ಜಾಲ್ಲ್ಯಾನ್ ಹಾಕಾ ಇತ್ಲೆಂ ಪಳಯ್ತಾಂ.... ಚಾಕ್ರಿ ಕರ್ತಾಂ.... ಘು ಮೂತ್ ಕಾಡ್ತಾಂ..... ಹಾಣೆಂ ಮ್ಹಾಕಾ ಕೆಲ್ಲೆಂ ಪೂರಾ ಚಿಂತ್ಲ್ಯಾರ್ ಹಾಚ್ಯಾ ಲಾಗಿಂ ಕೋಣ್೦ಚ್ಚ್ ಯೆಂವ್ಚೊ ನಾ....."
ಪುಣ್, ಮಾಂಯ್ನ್ ಮ್ಹಣ್ಚೆಂ ಸಾರ್ಕೆಂ ಮ್ಹಣ್ ಮ್ಹಾಕಾ ದಿಸ್ಲ್ಲೆಂ. ಬಾಬಾಕ್ ಮಾಂಯ್ನ್ ಪಳಯಿಲ್ಲ್ಯಾಬರಿ ಹೆರ್ ಕೋಣ್ ಪಳಂವ್ಕ್ ಆಸಾತ್? "ಬಾಬಾ.... ತುಕಾ ಮಾಂಯ್ ಇತ್ಲ್ಯಾ ಬರ್ಯಾ ಥರಾನ್ ಪಳಯ್ತಾ..... ಆನಿಂ ತುಂ ಮ್ಹಣ್ತಾಯ್, ಹಾಂಗಾ ನಾಕಾ ಮ್ಹಣ್..... ತುಂ ತಸೆಂ ಚಿಂತಿನಾಕಾ ಬಾಬಾ..... ಆಮಿಂ ಸರ್ವಾಂ ತುಕಾ ಬರೆಂ ಕರುನ್ ಪಳಯ್ತಾಂ ನ್ಹಯ್?"
ಬಾಬಾಚ್ಯಾ ತೊಂಡಾರ್ ಹುಸ್ಕಾರೆ ಭರ್ಲೆ..... ದೊಳ್ಯಾಂನಿ ದು:ಖಾಂ.... ತಾಣೆಂ ಬಲಾತ್ಕಾರಾನ್ ಮ್ಹಜೊ ಹಾತ್ ಧರ್ಲ್ಲೊ. ತೊ ಪರತ್ ಆನಿಂ ಪರತ್ ಕಿತೆಂಗೀ ಸಾಂಗೊಂಕ್ ಉರ್ದೊಂಚೆಂ ಸಮ್ಜೊಂಚ್ಯಾ ತಿತ್ಲೆಂ ಸಮಧಾನ್ ಮ್ಹಜ್ಯಾ ಥಂಯ್ ನಾತ್ಲ್ಲೆಂ. ಹಾಂವ್ ಬಲಾತ್ಕಾರಾನ್ ತಾಚೊ ಹಾತ್ ಲೊಟುನ್ ಕೂಡಾ ಬಾಯ್ರ್ ಆಯಿಲ್ಲೊಂ......
ಬಾಬಾನ್ ಆಮ್ಕಾಂ ದಿಲ್ಲೆಂ ತರ್ಯ್ ಕಿತೆಂ? ಸಾರ್ಕೆಂ ಸಾಂಗ್ಚೆಂ ತರ್ ಮಾಂಯ್ನ್ ಆಮ್ಕಾಂ ಪೊಸ್ಲ್ಲೆಂ ಆನಿಂ ವ್ಹಡ್ ಕೆಲ್ಲೆಂ... ಬಾಬಾ ಲಾಗಿಂ ಕಾಜಾರ್ ಜಾಲ್ಲ್ಯಾನ್೦ಗೀ ಯಾ ನಶಿಬಾನ್ ಕಿತೆಂ ಕಳಿತ್ ನಾ, ಮಾಂಯ್ ಸದಾಂಚ್ಚ್ ಖರ್ಗಾಲ್ಲಿ ಅನಿಂ ಕಷ್ಟಾಲ್ಲಿ....ಜಾಲ್ಲ್ಯಾ ಭುರ್ಗ್ಯಾಂಕ್ ತಾಂಕಿ ಪ್ರಮಾಣೆಂ ಶಿಕಾಪ್ ದಿಂವ್ಕ್ ಆಶೆಲ್ಲಿ ಆನಿಂ ಕಟಿಣಾಯೆನ್ ಉರ್ಡಾಲ್ಲಿ.....
ತಶೆಂ ಮ್ಹಣ್ಚೆಂ ತರ್ ಬಾಬಾಕ್ ಬರೆಂ ಕಾಮ್ ನಾತ್ಲ್ಲೆಂ ಮ್ಹಣ್ ನ್ಹಯ್.... ಪಣ್ಭೂರ್ ಪೊರ್ಟಾಂತ್ ಕಾಮ್ ಮೆಳ್ಲ್ಲೊ ಪಯ್ಲೊ ಕಿರಿಸ್ತಾಂವ್ ತೊ ಜಾವ್ಯೆತ್ ಮ್ಹಣ್ ಜಾಯ್ತ್ಯಾನಿಂ ಮ್ಹಳ್ಳೆಂ ಆಸಾ..... ಆಮ್ಚೆಂ ಘರ್ ಸುರತ್ಕಲ್ ಆಸ್ಲ್ಲೆಂ. ಥಂಯ್ ಥಾವ್ನ್ ವಚೊಂಕ್ ಆನಿಂ ಯೇಂವ್ಕ್ ಸುಲಭ್. ಮಾಂಯ್ಚ್ಯಾ ಪಾದ್ರಿ ಭಾವಾನ್ ಕೋಣಾಕ್ಗೀ ವಳ್ಕಿಚ್ಯಾಚೆ ಹಾತ್ ಪಾಯ್ ಧರ್ನ್ ಬಾಬಾಕ್ ಪೊರ್ಟಾಂತ್ ಕಾಮಾಕ್ ಲಾಗಯಿಲ್ಲೆಂ ಕಾಜಾರ್ ಜಾಲ್ಲ್ಯಾ ವೆಳಿಂಚ್ಚ್. ಕಾಜಾರ್ ಜಾತಾನಾ ಕೊಡ್ಯಾಳ್ ಖಂಚಾಗೀ ದಪ್ತರಾಂತ್ ಲೇಕ್ ದವರ್ಚೆಂ ಕಾಮ್ ಕರುನ್ ಆಸ್ಲ್ಲ್ಯಾ ತಾಕಾ ಹೆಂ ಕಾಮ್ ಬರೆಂಚ್ಚ್ ಜಾವ್ನಾಸ್ಲ್ಲೆಂ. ಬರೊ ಸಾಂಬಾಳ್ ಆನಿಂ ಘಾಮ್ ಪಿಳಿನಾಸ್ತಾನಾ ಆಂಗ್ ಪಿಟೊ ಕರಿನಾಸ್ತಾನಾ ಕರ್ಚೆಂ ಕಾಮ್ ಪಾದ್ರ್ಯಾಬಾಚ್ಯಾ ವಳ್ಕೆನ್ ಮೆಳ್ಲ್ಲೆಂ ತರ್ಯ್ ’ದೆವಾಚ್ಯಾ ದಯೆನ್ ಮೆಳ್ಳೆಂ’ ಮ್ಹಣ್ ಬಾಬಾನ್ ಮ್ಹಣ್ಚೆಂ ತರ್, ’ಮ್ಹಜೊ ಭಾವ್ ಪಾದ್ರಿ ಆಸ್ಲ್ಲ್ಯಾನ್ ಹೆಂ ಕಾಮ್ ಮೆಳ್ಳೆಂ’ ಮ್ಹಣ್ ಮಾಂಯ್ ಮ್ಹಣ್ತಾಲಿ.
ಬಾಬಾಕ್ ಪೊರ್ಟಾಂತ್ ಸಾಂಬಾಳ್ ಬರೊ ಆಸ್ಲ್ಲ್ಯಾನ್ ಆಮ್ಚ್ಯಾ ಕುಟ್ಮಾಕ್ ರಾಯಾಳ್ ರೀತಿನ್ ಜಿಯೆವ್ಯೆತೆಂ ಆಸ್ಲ್ಲೆಂ. ಪುಣ್, ತಾಚ್ಯೊ ಸವಯೊ ಬರ್ಯೊ ಖಂಚೊಯ್ ನಾತ್ಲ್ಲ್ಯೊ. ಪಾಡ್ ಕಿತ್ಲ್ಯೊ ಸವಯ್ಯೊ ಆಸ್ಲ್ಲ್ಯೊ ತಿತ್ಲೊಚ್ಚ್ ತಾಕಾ ಖರ್ಚ್ ಚಡ್ ಆಸ್ಲ್ಲೊ. ಗಲ್ಲೆಚಿಂ ಚೆಡ್ವಾಂ, ಸೊರೊ, ಜುಗಾರೆಚೊ ಖೆಳ್ ಆನಿಂ ಜಾಯ್ತೆ ಪಾವ್ಟಿಂ, ಪಾವಾನಾತ್ಲ್ಲ್ಯಾಕ್ ಕೊಂಬ್ಯಾ ಕಾಟಾ ತಸಲೊ ಬುರ್ನಾಸ್ ಖೆಳ್ ಸಯ್ತ್ ತಾಕಾ ದೀಸಾಂದೀಸ್ ಆಸ್ಲ್ಲೊ ಮ್ಹಣ್ಯೆತ್. ತ್ಯಾ ವರ್ವಿಂ, ಜೊಡ್ಲ್ಲೆ ಪಯ್ಶೆ ತಾಕಾ ಬಿಲ್ಕುಲ್ ಪಾವಾನಾತ್ಲ್ಲೆ ಮಾತ್ ನ್ಹಯ್ ಥೊಡ್ಯಾ ಪಾವ್ಟಿಂ ಮಾಂಯ್ಕ್ ತೊ ವಿರಾರ್ ಕರ್ತಾಲೊ ಪಯ್ಶೆ ದಿಂವ್ಚ್ಯಾ ಖಾತಿರ್.
ಮಾಂಯ್ ಮಾತ್ ಆಮ್ಕಾಂ ಭುರ್ಗ್ಯಾಂಕ್ ಬರೆಂ ಶಿಕಾಪ್ ದಿಂವ್ಕ್ ಆನಿಂ ಬರ್ಯಾ ವಾಟೆರ್ ಪಾವಂವ್ಚ್ಯಾ ಖಾತಿರ್ ಆಪ್ಲೊ ಜೀವ್ಚ್ಚ್ ಸಾಣೆಕ್ ದವರ್ಲ್ಲ್ಯಾ ಬರಿ ಜಿಯೆಲ್ಲಿ. ಮಾಸ್ಳಿ ವಿದೇಶಾಕ್ ದಾಡ್ಚ್ಯಾ ಸುರತ್ಕಲ್ಚ್ಯಾ ಏಕಾ ಕಂಪ್ಣೆಂತ್ ಕಾಮ್ ಕರ್ನ್ ತಿಣೆಂ ಆಮ್ಕಾಂ ಪೊಸ್ಲ್ಲೆಂ. "ಕುಟ್ಮಾಂತ್ ಏಕ್ ಯಾ ದೋಗ್ ಪಾದ್ರಿ ಆಸ್ಲ್ಯಾರ್, ಕಸೆಂ ಪುಣಿ ಇಲ್ಲಿ ಕುಮಕ್ ಜಾತಾ ಪುತಾ.... ಮ್ಹಜೆ ಭಾವ್ ದೆವಾಚೆ ಬರೆ ಮಣಿಯಾರಿ, ಪುಣ್ ಮ್ಹಾಕಾ ದೆವಾಚೆ ಬರೆ ದೂತ್ಚ್ಚ್.... ದೆವಾಕ್ ದಿಲ್ಲ್ಯಾಂತ್ಲೆಂ ಇಲ್ಲೆಂ ಉರವ್ನ್ ಮ್ಹಾಕಾ ದಿತಾತ್......" ತಿಣೆಂ ಕೆದ್ನಾಂಯ್ ಮ್ಹಣ್ಚೆಂ. ತಿಚೆ ದೋಗ್ ಭಾವ್ ಪಾದ್ರಿ ಜಾವ್ನಾಸ್ಲ್ಲೆ ಜಾಲ್ಲ್ಯಾನ್ ಭಯ್ಣಿಕ್ ತಾಣಿಂ ಸಾಂಡುನ್ ಘಾಲುಂಕ್ ನಾ. ತಾಂಕಾ ಮೊಗಾಚಿ ಭಯ್ಣ್ ಮ್ಹಜಿ ಮಾಂಯ್. ತಿಚೆ ಕಷ್ಟ್ ಪಳವ್ನ್, ತಾಣಿಂ ಕೆಲ್ಲಿ ಕುಮೊಕ್ ವರ್ತಿ.
ಪಾದ್ರಿ ಮಾಮಾ೦ಚ್ಯಾ ಕುಮ್ಕೆನ್ ಆಮಿಂ ಶಿಕ್ಲ್ಲ್ಯಾಂವ್ ಆನಿಂ ಬರ್ಯಾ ಜೊಡಿರ್ ಪಾವ್ಲ್ಲ್ಯಾಂವ್. ಸುರತ್ಕಲ್ ಆಮ್ಚ್ಯಾಚ್ಚ್ ಜಾಗ್ಯಾರ್ ಆಸ್ಲ್ಲೆಂ ಲ್ಹಾನ್ ಘರ್ ಮೊಡುನ್ ವ್ಹಡ್ ಘರ್ ಆಮಿಂ ಭಾಂದ್ಲ್ಲೆಂ.
ಬಾಬ್ ನಿವೃತ್ತ್ ಜಾಲ್ಲ್ಯಾ ವೇಳಾರ್ಯ್ ತಾಚೆಂ ಹರಾಮಿಪಣ್ ಸೊಡುಂಕ್ ನಾ ಮ್ಹಣ್ಯೆತ್. "ತುಕಾ ಭುರ್ಗ್ಯಾಂಚೆ ಪಯ್ಶೆ ಯೆತಾತ್.... ತುಂ ಮ್ಹಜಾ ಮಾರ್ತಾಯ್..... ಮ್ಹಾಕಾಯ್ ಪಯ್ಶೆ ದಿ.." ಮ್ಹಣ್ ಮಾಂಯ್ಕ್ ಸತವ್ನ್ ಆನಿಂ ಥೊಡ್ಯಾ ಪಾವ್ಟಿಂ ಧಮ್ಕುನ್ ಆನಿಂ ಮಾರ್ನ್ ಪಯ್ಶೆ ವ್ಹರುನ್ ವೆತಾಲೊ. ಥೊಡ್ಯಾ ಪಾವ್ಟಿಂ ಹಾತಾಕ್ ಮೆಳ್ಲ್ಲೆಂ ವೊರ್ನ್ ಕೊಡ್ಯಾಳ್ ವಿಕುನ್, ಮೆಳ್ಲ್ಲ್ಯಾ ಪಯ್ಶಾಂನಿ ಮಿಜಾಸ್ಕಿ ಮಾರ್ಚಿ ತಾಚಿ ಸವಯ್.
ಮ್ಹಜೆಂ ಸನದಿಚೆಂ ಶಿಕಾಪ್ ಜಾವ್ನ್, ಬೊಂಬಯ್ ಬಾಯ್ರ್ ಸರ್ತಾನಾ, ಮಾಂಯ್ ಜಾಯ್ತಿ ರಡ್ಲ್ಲಿ. "ಹ್ಯಾ ಸಯ್ತಾನಾ ಸಾಂಗಾತಾ ಕಸೆಂ ಜಿಯೆಂವ್ಚೆಂ ಪುತಾ? ತುಂ ಏಕ್ಲೊ ಆಸ್ಲ್ಲೊಯ್ ಆನಿಂ ತುಂಯ್ ಪರ್ಗಾವಾಂಕ್ ಬಾಯ್ರ್ ಸರ್ಲಾಯ್......"
ಹಾಂವೆಂ ಮಾಂಯ್ಕ್ ಪೊಟ್ಲುನ್ ಧರ್ಲ್ಲೆಂ.
"ಮ್ಹಜೆಂ ಜೀವನ್ ಬರೆಂ ಜಾಯ್ಜಯ್ ತರ್ ಹಾಂವೆಂ ಗಾವಾಂತ್ ರಾವೊಂಕ್ ಜಾಯ್ನಾ ಮಾಂಯ್.... ಬೊಂಬಯ್ ಕಾಮ್ ಕರುನ್ ಉಪ್ರಾಂತ್ ಗಲ್ಫಾಕ್ ಪಾವ್ಲೊಂ ತರ್ ಮ್ಹಜೆಂ ಜೀವನ್ ಬರೆಂ ಜಾತೆಲೆಂ.... ಹಾಂವ್ ತುಕಾ ಸಾಂಡುನ್ ಘಾಲ್ತಾಂವೆ?"
ಮಾಂಯ್ಕ್ ಹಾಂವೆಂ ಘರ್ ಸೊಡುನ್ ವೆಚೆಂ ಬಿಲ್ಕುಲ್ ಖುಶಿ ನಾತ್ಲ್ಲಿ. ಹಾಂವ್ ಆಸ್ಲ್ಲ್ಯಾ ವೆಳಿಂ ಬಾಬ್ ತಿಕಾ ಸತಯ್ತಾಲೊ ತರ್ಯ್ ಮ್ಹಜ್ಯಾ ಸಾಂಗಾತಾಂತ್ ತಿಚೊ ವೇಳ್ ಬರೊ ಪಾಶಾರ್ ಜಾತಲೊ ತಸೆಂ ತಿಕಾ ಭಗ್ತಾಲೆಂ. ಪುಣ್, ಮ್ಹಾಕಾ ತರ್ಯ್ ಗಾವಾಂತ್ ರಾವೊನ್ ಹೆಂ ಜೀವನ್ ಸುಕಿದಾಡಿಚೆಂ ಕರುಂಕ್ ಬಿಲ್ಕುಲ್ ಮನ್ ನಾತ್ಲ್ಲೆಂ. ತಸೆಂ ಹಾಂವ್ ಬೊಂಬಯ್ ಗೆಲ್ಲೊಂ ಆನಿಂ ಉಪ್ರಾಂತ್ ಮಸ್ಕತ್.
ಪಾಂಚ್ ವೊರ್ಸಾಂ ಪಯ್ಲೆಂ ಬಾಬ್ ಆಚಾನಕ್ ಹುಶಾರ್ ನಾ ಜಾಲೊ. ಕಸಲಿ ಪಿಡಾ ಮ್ಹಣ್ ದಾಕ್ತೆರಾಂಕ್ಯ್ ಕಳ್ಳೆಂ ನಾ. ತಿಚ್ಚ್ ಪಿಡಾ ತಾಚ್ಯಾ ಅಸ್ಕತ್ಕಾಯೆಚಿ ಸುರ್ವಾತ್. ಆಮಿಂ ಸರ್ವಾನಿಂ ಪಯ್ಶೆ ದಾಡ್ನ್ ಕಂಕ್ನಾಡಿ ಭರ್ತಿ ಕೆಲೊ ತರ್ ತಾಚಿ ಪಿಡಾ ವಿಚಿತ್ರ್ ಜಾಲಿ ಆನಿಂ ತಾಕಾ ಪಾಯ್ಯಾಂ ಸಕಯ್ಲ್ ಬಳ್ ನಾ ಜಾಲೆಂ. ಹುಶಾರ್ ಜಾವ್ನ್ ಘರಾ ಅಯಿಲ್ಲೊ ಬಾಬ್, ಆಂಗಾಣ್ ಸೊಡುನ್ ಬಾಯ್ರ್ ವಚೊಂಕ್ ಸಕಾನಾ ಜಾಲೊ. ತೀನ್ ವರ್ಸಾಂ ಪಯ್ಲೆಂ, ನಾಣ್ಯೆಕ್ ನಾಂವ್ಕ್ ಗೆಲ್ಲೊ ತೊ ನಿಸ್ರೊನ್ ಪಡ್ಲ್ಲೆಂ ಏಕ್ಚ್ಚ್ ನೀಬ್. ತ್ಯಾ ಪಾವ್ಟಿಂ ಆಸ್ಪತ್ರೆಕ್ ಗೆಲ್ಲೊ ಪಾಟಿಂ ಯೆತಾನಾ ತಾಣೆಂ ಮಾಂದ್ರಿಚ್ಚ್ ಧರ್ಲ್ಲಿ. ಮತ್ ಸಮಾ ಆಸ್ಲ್ಲಿ ತರ್ ಉಲವ್ಣೆಂ ಬಂಧ್ ಜಾಲ್ಲೆಂ. ಕಸೆಂ ಕಿತೆಂ ಕೊಣಾಯ್ಕಿ ಕಳಿತ್ ನಾ. ದಾಕ್ತೆರಾಂಕ್ಯ್ ಸಮ್ಜಲೆಂ ನಾ. ಹಾತ್ ಭಾಸ್ ಕರುನ್ ತೊ ಕಿತೆಂ ಜಾಯ್ ತೆಂ ಸಾಂಗ್ತಾಲೊ ತರ್ ಜಿವಾಂತ್ ಜಾಂವ್ಚಿ ಪಿಡಾ ಸೊಸುಂಕ್ ಜಾಯ್ನಾತ್ಲ್ಲ್ಯಾ ವೆಳಿಂ ಹಾಕ್ ಬೋಬ್ ಮಾರ್ತಾಲೊ.
ಬಾಬಾಕ್ ದವರ್ಲ್ಲ್ಯಾ ಕೂಡಾಂತ್ ಭರ್ಲ್ಲಿ ಘಾಣ್ ಘರಾಂತ್ಯ್ ಯೆತಾ ಮ್ಹಣ್, ಕೆನಡಾ ಆಸ್ಲ್ಲ್ಯಾ ಭಾವಾನ್ ಘರಾಕ್ ಲಾಗೊನ್, ಪಾಟ್ಲ್ಯಾನ್ ಏಕ್ ವಿಂಗಡ್ ಕೂಡ್ ಆಸಾ ಕೆಲೆಂ ಆನಿಂ ಬಾಬಾಕ್ ವೊರೆವಿಂಗಡ್ ತ್ಯಾ ಕುಡಾಂತ್ ದವರ್ಲ್ಲೊ. ತ್ಯಾ ಕೂಡಾಕ್ ವಸೊಂಕ್ ಬಾಬಾಕ್ ಬಿಲ್ಕುಕ್ ಮನ್ ನಾತ್ಲ್ಲೆಂ ಮ್ಹಣ್ ತೊ ಭಾವ್ ಮ್ಹಾಕಾ ಪೋನ್ ಕರುನ್ ಸಾಂಗಾಲಾಗ್ಲೊ.
ಜಾಯ್ತ್ಯಾನಿಂ ಆಮ್ಕಾಂ ಸಾಂಗ್ಲೆಂ ’ಬಾಬಾಕ್ ವೊರ್ನ್ ಆಸ್ಪತ್ರೆಂತ್ ದವರ್ಯಾ ಆನಿಂ ಥಂಯ್ಸರ್ ನರ್ಸಾಂ ಬರಿಂ ಕರ್ನ್ ಪಳಯ್ತಾತ್. ಘರಾಂತ್ ಕಿತ್ಯಾಕ್ ಇತ್ಲೆ ತ್ರಾಸ್...." ಪುಣ್ ಮಾಂಯ್ ಮಾತ್ ಆಯ್ಕಾನಾ ಜಾಲಿ. "ಮ್ಹಜ್ಯಾ ಘೊವಾನ್ ಮ್ಹಾಕಾ ಕಿತೆಂ ಕೆಲಾಂ ತರ್ ಕಾಂಯ್ಚ್ಚ್ ಪರ್ವಾ ನಾ... ತಾಚಿ ಚಾಕ್ರಿ ಮಾತ್ ಹಾಂವ್೦ಚ್ಚ್ ಕರ್ತಾಂ... ಮೊರಾಸರ್ ತಾಕಾ ಹಾಂವ್೦ಚ್ಚ್ ಪಳಯ್ತಾಂ..."
ಪಾದ್ರಿ ಭಾವಾನ್ ಕೆದಾಳಾಯ್ ಮ್ಹಣ್ಚೆಂ ಆಸ್ಲ್ಲೆಂ - ಸಾತ್ವ್ಯಾ ಸಾಕ್ರಾಮೆಂತಾಚೊ ಸಾಕ್ರಿಫಿಸ್ ಹೊ. ಮಾಂಯ್ ಆಮ್ಚಿ ಖಂಡಿತ್ ಜಾವ್ನ್ ಸಾಂತಿಣ್ಚ್ಚ್ ಸಯ್..
ಹಿಂ ಘಡಿತಾಂ ಚಿಂತ್ತಾನಾ, ಮ್ಹಾಕಾ ಮಾಂಯ್ಚೆರ್ ಆಸ್ಲ್ಲೊ ಗೌರವ್ ಆನಿಂ ಅಭಿಮಾನ್ ಮಾತ್ ಚಡೊನ್ ಆಯಿಲ್ಲೊ. ಏಕ್ಲಿ ಸ್ತ್ರಿ ಇತ್ಲಿಯ್ ದಯಾಳಿ ಜಾಂವ್ಕ್ ಸಾಧ್ಯ್ ಆಸಾಗಾಯ್ ಮ್ಹಳ್ಳ್ಯಾ ಮ್ಹಜ್ಯಾ ಚಿಂತ್ಪಾಕ್ ಮಾಂಯ್ ಜಿವಿ ಸಾಕ್ಸ್ ಜಾವ್ನಾಸ್ಲ್ಲಿ.
ಮಾಂಯ್ಕ್ ಸಾಂಗಾತ್ ದೀಂವ್ಕ್ ಮ್ಹಣ್ ಆಮಿಂ ಹಾಡ್ಲ್ಲೆಂ ಚೆಡುಂ ಲತಾ - ಸಕ್ಲೇಶಪುರ್ ಲಾಗ್ಸಿಲೆಂ. ಕಾಜಾರ್ ಜಾವ್ನ್ ಘೊವ್ ಸೊಡ್ನ್ ಗೆಲ್ಲ್ಯಾ ಉಪ್ರಾಂತ್, ಲತಾ ಆಪ್ಲ್ಯಾ ಬಾಪಾಯ್ ಸರ್ಶಿನ್ ಪಾಟಿಂ ಯೆತಾನಾ, ಪಾದ್ರಿ ಮಾಮಾಚ್ಯಾ ವಳ್ಕೆರ್ ಆಮ್ಗೆರ್ ಪಾವ್ಲ್ಲೆಂ. ಬಾಬಾಕ್, ಮಾಂಯ್ ಆನಿಂ ತೆಂ ದೊಗಾಂಯ್ ಬರೆಂ ಕರುನ್ ಪಳಯ್ತಾಲಿಂ.
******************************
ಬಾಬಾಚೆಂ ಮೊರ್ನ್ ಜಾವ್ನ್ ಘರಾ ಯೆತಾನಾ, ಮಾಂಯ್ ಚಿಕ್ಕೆ ಸಮಧಾನೆನ್ ಆಸ್ಲ್ಲಿ. ಅಪ್ಣಾಚೊ ಖರೊಚ್ಚ್ ದ್ವೇಷ್ ಕೆಲ್ಲ್ಯಾ ಪತಿಕ್ ಇತ್ಲೆಂ ಬರೆಂ ಕರುನ್ ಪಳವ್ನ್ ಆಖ್ರೇಕ್ ಬರ್ಯಾ ರೀತಿನ್ ಮಾತಿಯೆಕ್ ಪಾಯ್ಲೆಂ ಮ್ಹಳ್ಳೆಂ ಸಮಧಾನ್ ಜಾಂವ್ಕ್ಯ್ ಪುರೊ.
ಬಾಬ್ ಮೆಲ್ಲ್ಯಾ ದೀಸಾ ಸೆಜಾರಾ ವಚೊನ್ ರಾವ್ಲ್ಲೆಂ ಲತಾ, ಆಮಿಂ ಇಗರ್ಜೆಥಾವ್ನ್ ಪಾಟಿಂ ಯೆತಾನಾ ಘರಾ ಆಯಿಲ್ಲೆಂ. ಆಯಿಲ್ಲೆಂಚ್ಚ್ ಅಪುಣ್ ಹಾಂಗಾಸರ್ ರಾವಾನಾ ಆನಿಂ ಪಾಟಿಂ ಘರಾ ವೆತಾಂ ಮ್ಹಣ್ ರಡೊಂಕ್ಲಾಗ್ಲೆಂ.
ದುಸ್ರ್ಯಾ ದಿಸಾ ಸಕಾಳಿಂಚ್ಚ್ ಸೆಜಾರ್ಚ್ಯಾ ರಿಚ್ಚಿಚೆಂ ಕಾರ್ ಘೆವ್ನ್ ಲತಾಕ್ ಪಾಂವ್ಕ್ ಹಾಂವ್ ಭಾಯ್ರ್ ಸರ್ಲೊಂ. ಧೊನ್ಪಾರ್ ಜಾತಾನಾ, ಸಕ್ಲೇಶ್ಪುರ್ ತಾಚ್ಯಾ ಘರಾ ಪಾವ್ನ್ ಪಾಟಿಂ ಯೆತಾಂ ಮ್ಹಣ್ತಾನಾ, ಲತಾನ್ ಮ್ಹಾಕಾ ಭಲಾತ್ಕಾರಾನ್ ತಾಂಚ್ಯಾ ಘರಾ ಬಿತರ್ ವೆಲೆಂ.
ಲತಾಕ್ ಪಾಂವ್ಕ್ ಆಯಿಲ್ಲ್ಯಾ ತವಳ್ ಥಾವ್ನ್ ಆಮಿಂ ಬಾಯ್ಲ್ಯಾ ಆಂಗ್ಣಾಂತ್ ಬಸೊನ್ ಆಸ್ಲ್ಲ್ಯಾಂವ್ ಆನಿಂ ಥಂಯ್ಸರ್ಚ್ಚ್ ಆಮ್ಕಾಂ ಪೀವನ್ ದಿಲ್ಲೆಂ. ಆತಾಂ ಪಯ್ಲ್ಯಾ ಪಾವ್ಟಿಂ ಹಾಂವ್ ತಾಚ್ಯಾ ಗುಡ್ಸುಲಾಂತ್ ಗೆಲೊಂ.
ಗುಡ್ಸುಲಾಂತ್ ಸುರ್ಯಾಚೊ ಉಜ್ವಾಡ್ ಬಿಲ್ಕುಲ್ ಯೆನಾತ್ಲ್ಲೊ. ತ್ಯಾ ವೆಳಿಂ, ಕಾಳೊಕಾಂತ್ ತರ್ಯ್ ಲತಾ ರಡ್ಚೆಂ ಮ್ಹಾಕಾ ದಿಸ್ಲೆಂಚ್ಚ್...
"ಕಿತೆಂ ಜಾಲೆಂ ಲತಾ?" ಹಾಂವೆ ತಾಕಾ ಚಿಕ್ಕೆ ಜೋರ್ ಕರುನ್ ವಿಚಾರ್ತಾನಾ ತೆಂ ಮ್ಹಣಾಲೆಂ - "ಬಾಬಾ ಮ್ಹಾಕಾ ಮಾಫ್ ಕರಿಜಯ್.... ಹಾಂವೆಂ ವ್ಹಡ್ ಪಾತಕ್ ಕೆಲಾಂ... ವ್ಹಡ್ ಚೂಕ್ ಕೆಲ್ಯಾ....."
ಮ್ಹಾಕಾ ಸಮ್ಜಲೆಂನಾ..." ಕಿತೆಂ ಜಾಳೆಂ? ತುಂ ಕಿತೆಂ ಉಲಯ್ತಾಯ್ ಲತಾ.... ತೆಂ ಸಾರ್ಕೆಂ ಸಾಂಗ್...."
ಆತಾಂ ಲತಾ ಖಂಡಿತ್ ಜಾವ್ನ್ ಬಿಯೆಲ್ಲೆಂ ಆನಿಂ ತಾಚೊ ತಾಳೊ ಕಾಂಪ್ತಾಲೊ....
"ಹಾಂವೆಂ ವ್ಹಡ್ಲಿ ಚೂಕ್ ಕೆಲ್ಯಾ..... ವ್ಹಡ್ಲ್ಯಾ ಬಾಬಾಕ್ ಜಿವೆಶಿಂ ಮಾರ್ಲೆಂ .... ಬಾಬಾ......"
ತಿಂ ಉತ್ರಾಂ ಏಕ್ ಪಾವ್ಟಿಂಚ್ಯಾಕ್ ಸಮ್ಜಲಿಂನಾಂತ್ ತರ್ ದುಸ್ರ್ಯಾ ಘಡಿಯೆ ಸಮ್ಜಾತಾನಾ ಮತ್ ಪಿಸಾಂತೂರ್ ಜಾಲಿ. ಲತಾಚ್ಯಾ ಕಾನ್ಸುಲಾರ್ ಜಾತಾ ತಿತ್ಲಿಂ ಥಾಪ್ಡಾಂ ವ್ಹಾಜವ್ಯಾಂ ಮ್ಹಣ್ಂಯೀ ಮ್ಹಾಕಾ ಭಗ್ಲೆಂ.
"ಲತಾ .... ಹಾಂವ್ ತುಕಾ ಪಾತಿಯೆನಾ..... ಹೆಂ ಸತ್?"
ಲತಾ ಆತಾಂ ಕಠಿಣಾಯೆನ್ ರಡ್ತಾಲೆಂ. ತಾಚೆಂ ರಡ್ಣೆಂ ತಾಣೆಂ ಉಲಯಿಲ್ಲ್ಯಾ ಉತ್ರಾಂಚೆಂ ಸತ್ ಉಗ್ತ್ಯಾನ್ ಪಾಚಾರ್ತಾಲೆಂ ತೆಂ ಹಾಂವ್ ಜಾಣಾ ಜಾಲೊಂ.
"ತುಂವೆಂ ಅಸೆಂ ಕಿತ್ಯಾಕ್ ಕೆಲೆಂಯ್?...." ಹಾಂವ್ ಹಾಳ್ವಾಯೆನ್ ಬೊಬಾಟ್ಲೊಂ.
ಲತಾ ಉಲಯ್ಲೆಂನಾ..... ಹಾಂವೆಂಚ್ಚ್ ತಾಕಾ ಪರತ್ ಪರತ್ ವಿಚಾರ್ಲೆಂ - "ಹಾಂವ್ ತುಕಾ ಕಾಂಯಿಂಚ್ಚ್ ಕರಿನಾ ಲತಾ.... ತುಂ ಸತ್ ಸಾಂಗ್.... ಹಾಂವ್ ತುಕಾ ಕಾಂಯಿಂಚ್ಚ್ ಕರಿನಾ....."
ಆನಿಂ ತೆದ್ನಾಂ, ರಡ್ಣೆಂ ಚಿಕ್ಕೆ ಉಣೆಂ ಕರುನ್, ತಾಣೆಂ ಜವಾಬ್ ದಿಲಿ - "ವ್ಹಡ್ಲ್ಯಾ ಬಾಬಾಕ್ ತ್ಯಾ ಘರಾಂತ್ ವಾಂಚೊಂಕ್ ನಾಕಾ ಆಸ್ಲ್ಲೆಂ... ತಾಕಾ ವಾಂಚೊಂಕ್ ಜಾಯ್ ಆಸ್ಲ್ಲೆಂ ತರ್ ಆಸ್ಪತ್ರೆಂತ್ ...... ತ್ಯಾ ಖಾತಿರ್ ತುಮ್ಚ್ಯಾ ಸರ್ವಾಂ ಲಾಗಿಂ ತೊ ಪರಾತ್ತಿಲಾಗ್ಲೊ.... ಪುಣ್, ತುಮಿಂ ತಾಚೆಂ ಮಾಗ್ಣೆಂ ಆಯ್ಕಾಲೆಂ ನಾ...... ಮಾಂಯ್ ಸದಾಂನೀತ್ ರಾತಿಂ ತಾಕಾ ಅಸಿ ದಣ್ಸಿತಾಲಿಗೀ ತೊ ರಡೊನ್೦ಚ್ಚ್ ಮ್ಹಜ್ಯಾ ಲಾಗಿಂ ಮಾಗ್ತಾಲೊ.....ತಾಕಾ ಮೊರೊಂಕ್ ಜಾಯ್ ಆಸ್ಲ್ಲೆಂ.... ವ್ಹಡ್ಲ್ಯಾ ಬಾಬಾಕ್ ಮೊರೊಂಕ್ ಜಾಯ್ ಆಸ್ಲ್ಲೆಂ......"
"ಮಾಂಯ್ ತಾಕಾ ಬರಿ ಕರುನ್ ಪಳಯ್ತಾಲಿ .... ಲತಾ .... ತುಂ ಪೊಟಿ ಮಾರ್ತಾಯ್...." ತಿಂ ಉತ್ರಾಂ ಪಾತಿಯೆಂವ್ಕ್ ಜಾಯ್ನಾಸ್ತಾನಾ ಹಾಂವ್ ಖಿಳಂಚ್ಲೊ.
"ಬಾಬಾ, ಮ್ಹಾಕಾ ಫಟಿ ಮಾರಿಜಯ್ ಮ್ಹಣ್ ಗರ್ಜ್ ನಾ......ಹಾಂವ್ ಫಟಿ ಮಾರಿನಾ....... ಮ್ಹಜ್ಯಾ ಕಾಳಿ ಮಾತೆಚ್ಯಾ ನಾಂವಾನ್..... ಹರ್ ಏಕಾ ರಾತಿಂ ಮಾಂಯ್ ವ್ಹಡ್ಲ್ಯಾ ಬಾಬಾಕ್ ಮಾರ್ತಾಲಿ.... ಕಾನಾಂನಿ, ನಾಕಾಂತ್.. ಬೊಡಿಯೊ ರೊಂಬುನ್ ರಗಾತ್ ಹಾಡಯ್ತಾಲಿ..... ವ್ಹಡ್ಲೊ ಬಾಬ್ ದೂಕಿನ್ ಬೋಬ್ ಮಾರ್ತಾಲೊ.... ಮಾಂಯ್ ಮ್ಹಣ್ತಾಲಿ..’ಮ್ಹಜೆಂ ಜಿವಿತ್ ಯೆಮ್ಕೊಂಡ್ ಕೆಲ್ಲ್ಯಾ ತುಕಾ ಹಾಂಗಾಸರ್ ಶಿಕ್ಶಾ ಮೆಳೊಂಕ್ ಜಾಯ್.....’ ವ್ಹಡ್ಲ್ಯಾ ಬಾಬಾಕ್ ತಿ ಮೊರೊಂಕ್ಯ್ ದಿನಾತ್ಲ್ಲಿ ..... ಮಾಂದ್ರೆರ್ ಜಿಯೆಂವ್ಕ್ಯ್..... ರಾತಿಕ್ ಮಾಂಯ್ ತಾಚ್ಯಾ ಲಾಗಿಂ ಯೆತಾನಾ ತೊ ಭಿಯಾನ್ ಕಾಂಪ್ತಾಲೊ.... ರಡ್ತಾಲೊ.....ಹಾಕ್ ಬೋಬ್ ಮಾರ್ತಾಲೊ........ ಕಾಂಯ್ ಕರಿನಾಕಾ ಮ್ಹಣ್ ಹಾತ್ ಜೊಡುನ್ ಮಾಗ್ತಾಲೊ...... ಪುಣ್, ಮಾಂಯ್ ಮಾತ್ ಕಸಾಯ್ ಗಾರಾಂ ಬರಿ ತಾಕಾ ಕಷ್ಟಿತಾಲಿ....."
ಆತಾಂ, ಮ್ಹಾಕಾ ಲತಾಚಿಂ ಉತ್ರಾಂ ಫಟ್ ಮ್ಹಣ್ ದಿಸ್ಲಿಂ ನಾಂತ್... ತಾಂತು ಸತ್ ಆಸ್ಲ್ಲೆಂ....
ಹಾಂವ್ ಗಾವಾಕ್ ಆಯಿಲ್ಲ್ಯಾ ವೆಳಿಂ ಬಾಬಾನ್ ರಡೊನ್ ಮ್ಹಜ್ಯಾಲಾಗಿಂ ವಿಚಾರ್ಲ್ಲೆಂ ಉಡಾಸಾಂತ್ ಆಯ್ಲೆಂ...
"ಮಾಗಿರ್ ಕಿತೆಂ ಜಾಲೆಂ...?" ಹಾಂವೆಂಚ್ಚ್ ವಿಚಾರ್ಲೆಂ.
"ವ್ಹಡ್ಲೊ ಬಾಬ್ ... ಹರ್ಯೇಕ್ ದೀಸ್ ಮ್ಹಜ್ಯಾ ಲಾಗಿಂ ಪರಾತ್ತುನ್ ಹಾತ್ ಭಾಸ್ ಕರ್ತಾಲೊ........ ತಾಚೊ ಗಳೊ ಚಿರ್ಡುನ್ ಕಾಬಾರ್ ಕರುಂಕ್ ಮಾಗ್ತಾಲೊ...... ಮ್ಹಾಕಾ ತಸೆಂ ಕರುಂಕ್ ಧೈರ್ಚ್ಚ್ ಮೆಳಾನಾತ್ಲ್ಲೆಂ.... ಹಾಂವ್ ಬಾಬಾಕ್ ಸಮಧಾನ್ ಕರ್ತಾಲಿಂ... ಏಕ್ ದೀಸ್, ತಾಚೆಂ ರಡ್ಣೆಂ ಪಳಂವ್ಕ್ ಜಾಯ್ನಾಸ್ತಾನಾ, ಹಾಂವೆಂ ತಾಕಾ ಏಕ್ ಉಪಾವ್ ಸಾಂಗ್ಲೊ...... ಹಾಂವೆಂ ತಾಚೆಂ ನಾಕ್ ಆನಿಂ ತೊಂಡ್ ಹುಶೆಂ ದಾಂಬುನ್ ಬಂಧ್ ಕರ್ತಾಂ ಮ್ಹಳೆಂ...... ಖರೆಂಚ್ಚ್ ತೊ ವೊಪ್ವಾಲೊ...... ವ್ಹಡ್ಲ್ಯಾ ಬಾಬಾನ್ ಮ್ಹಾಕಾ ಬೆಸಾಂವ್ ದಿಲೆಂ ಆನಿಂ ಮಾಂಯ್ ಯೆಂವ್ಚ್ಯಾ ಪಯ್ಲೆಂ ..." ಲತಾಕ್ ಮುಖಾರ್ಸುನ್ ಉಲಂವ್ಕ್ ಜಾಲೆಂ ನಾ.... ತೆಂ ಆತಾಂ ಕಟಿಣಾಯೆನ್ ರಡ್ತಾಲೆಂ.
ಮ್ಹಜೆಂ ಕಾಳಿಜ್ ಫಾಪ್ಸಾಲ್ಲ್ಯಾ ಬರಿ ಜಾಲೆಂ. ಲತಾನ್ ಬಾಬಾಕ್ ತಸೆಂ ಕೆಲ್ಲ್ಯಾಕ್ ನ್ಹಯ್ ಬಗರ್ ಆಮಿಂ ಬಾಬಾಚೆಂ ಮಾಗ್ಣೆಂ ಸಮ್ಜೊಂಕ್ ಸಕಾನಾತ್ಲ್ಲ್ಯಾ ಖಾತಿರ್......ಹಾಂವೆಂ ಕಿತೆಂಚ್ಚ್ ಮ್ಹಳೆಂ ನಾ. ಬೊಲ್ಸಾಂತ್ ಆಸ್ಲ್ಲೆ ನೋಟ್ ಕಾಡುನ್ ಲತಾಚ್ಯಾ ಹಾತಾಂತ್ ಚೆಪ್ಲೆ...... "ತುಂವೆಂ ಬರೆಂಚ್ಚ್ ಕಾಮ್ ಕೆಲೆಂಯ್ ಲತಾ..... ಬಾಬಾಕ್ ಹ್ಯಾ ಸಂಸಾರಾಂತ್ಲ್ಯಾ ಯೆಮ್ಕೊಂಡಾಂತ್ಲಿ ಸುಟ್ಕಾ ದಿಲಿಯ್......." ಹಾಂವ್ ಗುಡ್ಸುಲಾಂತ್ಲೊಂ ಬಾಯ್ರ್ ಆಯ್ಲೊಂ.....
ಸಕ್ಲೇಶ್ಪುರ್ ಥಾವ್ನ್ ಪಾಟಿಂ ಯೆತಾನಾ ಸಾಂಜ್ ಉತ್ರೊನ್ ಗೆಲ್ಲಿ .........
ಘರಾಂತ್ ಆಮೊರಿ ತೇರ್ಸ್ ಜಾವ್ನ್, ಬಾಬಾಚ್ಯಾ ಆತ್ಮ್ಯಾಕ್ ಮಾಂಯ್ನ್ ಮಾಗ್ಣೆಂ ಸುರು ಕೆಲ್ಲೆಂ.... ಮ್ಹಜೆ ಭಾವ್, ಭಯ್ಣಿಂ ಆನಿಂ ತಾಂಚಿ ಘೊವ್ - ಭುರ್ಗಿಂ ಸಾಂಗಾತಾ ಆಸೆಲ್ಲಿಂ.......
ಕಿತ್ಯಾಕ್ಗೀ ಸರ್ವಾಂಚೊ ಕಾಂಟಾಳೊ ಮ್ಹಾಕಾ ಅಯ್ಲೊ.. ಹರ್ಯೇಕಾಂತ್ ಡೊಂಗ್ ಭರೊನ್ ಗೆಲ್ಲೊಚ್ಚ್ ದಿಸ್ಲೊ ಮ್ಹಾಕಾ.....
ಮಾಗ್ಣೆಂ ಮ್ಹಣ್ತಾನಾ ಮಾಂಯ್ ರಡ್ಚೆಂ ದಿಸ್ಲೆಂ ಮ್ಹಾಕಾ...
ತಿ ಕಿತ್ಯಾಕ್ ರಡ್ತಾ ತೆಂ ಮಾತ್ ಮ್ಹಾಕಾ ಕಳ್ಳೆಂಚ್ಚ್ ನಾ.....
ಪುಣ್, ತ್ಯಾ ವೆಳಿಂ ಬಾಬಾಕ್ ಚಿಂತುನ್ ಮ್ಹಜ್ಯಾ ದೊಳ್ಯಾಂನಿ ಪಯ್ಲ್ಯಾ ಪಾವ್ಟಿಂ ದು:ಖಾಂ ಮಾತ್ ಉದೆಲಿಂಚ್ಚ್.......
[ಹಿ ಕಾಣಿ ರಾಕ್ಣೊ ಪತ್ರಾಚೆರ್ ಪರ್ಗಟ್ಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
