ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಆವ್ರ್
ಎಚ್ಚೆಮ್: ಕೊಂಕ್ಣೆಂತ್ ಹಾಣೆಂ ಎಕ್ಲ್ಯಾ ಕವಿಚೆಂ ಸ್ಥಾನ್ ಆಪ್ಣಾಯ್ಲಾಂ ತರ್ಯೀ ಹೊ ಏಕ್ ಪ್ರಭುದ್ದ್ ಕಾಣ್ಯೆಗಾರ್ ಸಾಯ್ತ್. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಹಾಚ್ಯಾ ’ನಶಿಬಾಚಿ ರಾತ್’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ದೆವಾಕ್ ಸೊಡ್ಲಲೊ ಪಾಡೊ’ ಎದೊಳ್ಚ್ ಪರ್ಗಟ್ ಜಾಲಾ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಮಟ್ವ್ಯಾ ಕಾಣ್ಯಾಂಚಾ ವಿಭಾಗಾಂನಿ ಇನಾಮಾಂ ಆಪ್ಣಾಂವ್ಕ್ ಸಕ್ಲ್ಲೊ ಹೊ ಏಕ್ ವಿಮರ್ಶಕ್ ಆನಿ ಚಿಂತ್ಪಿ ಸಯ್ತ್.
ಎಚ್ಚೆಮಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ನಶಿಬಾಚಿ ರಾತ್
ಎಚ್ಚೆಮ್
ಸಾತ್ ದಿಸಾಂ ಥಾವ್ನ್ ಸರ್ಸರಿತ್ ಪುರ್ಸತ್ ನಾಸ್ತಾನಾ ಪಡ್ಚೊ ಶಿರಾಂಧಾರಿಚೊ ಪಾವ್ಸ್ ಇಲ್ಲೊ ಸುಟೊನ್ ಆಜ್ ಆಸೊರ್ ಪಡ್ಲ್ಲೊ. ಸದಾಂಚೆಪರಿಂ ಸೊಸಾಯ್ಟಿಚಾ ಆಂಗ್ಣಾಂತ್ ಸಕಾಳಿಂಚಾಕಿ ವೊತಾಕ್ ಆಂಗ್ ಶೆಕುನ್ ಬಸ್ಲ್ಲ್ಯಾ ದೇಶ್ಪಾಂಡೆಕ್ ಬೋರಾಡೆಚಾ ಮಾಲ್ಘಡ್ಯಾ ಪುತಾನ್ ಸಹಜ್ಪಣಿಂ ವಿಚಾರ್ಲೆಂ ’ಬಾಬಾ.. ಗಾಂಧಿಕ್ ಮಾರ್ಲ್ಲೊ ಗೋಡ್ಸೆ ಬಾಮ್ಣಾಂಚೊಮೂ?’ ತಿತ್ಲೆಂಚ್.
ತಳ್ಹಾತಾರ್ ಸತಾರಿ ತಂಬಾಕು ಘಾಲ್ನ್ ಚುನೊ ಲ್ಹಾವ್ನ್ ಘಸ್ಟುಂಚಾ ಪಿರಾಯೆಚಾ ದೇಶ್ಪಾಂಡೆಚಾ ತಳ್ಮಟ್ಯಾಕ್ ಚಡ್ಲೆಂ. ಪಾವ್ಟ್ ಮೆಳ್ಲ್ಲೆ ತೆದಾಳಾ ಲೆಕಾಚೆ, ವಿಗ್ಯಾನಾಚೆ ಪಾಠ್ ಸಾಂಗೊನ್ ದಿಂವ್ಚೊ ಭುರ್ಗ್ಯಾಕ್ ಬಾವ್ಳ್ಯಾಕ್ ಧರ್ನ್ ಹಾತಾಂತ್ಲೊ ತಂಬಾಕು ಥಂಯ್ಚ್ ಉಡವ್ನ್ ’ಯೇ.. ದಾಕಯ್ತಾಂ..’ ಮ್ಹಣ್ ಸರಾರಾಂ ಆಪ್ಲ್ಯಾ ತಳ್ಮಾಳ್ಯೆಚಾ ಫ್ಲೆಟಾ ಕುಶಿನ್ ವೋಡ್ನ್ಚ್ ವ್ಹರ್ನ್ ಗೆಲೊ ದೇಶ್ಪಾಂಡೆ ಬಾಬಾಚೆ ತಾಂಬ್ಶೆವ್ನ್ ರುಂದಾಲ್ಲೆ ದೊಳೆ, ಕಾಂಪ್ಚೆ ವೊಂಟ್. ಉಸ್ವಾಸಾಕ್ ಫುಲ್ಚೆಂ ನಾಕ್ ಪಳೆವ್ನ್ಂಚ್ ಬೋರಾಡೆಚೊ ಚವ್ತ್ಯಾ ವರ್ಗಾಂತ್ ಶಿಕ್ಚೊ ಭುರ್ಗೊ ಕಾಲುಬುಲೊ ಜಾಲ್ಲೊ.
ಬ್ರಹನ್ಮುಂಬಯ್ ಮುನಿಸಿಪಲ್ ಕೋರ್ಪೊರೇಶನ್ ನವ್ಕರೆ ಥಾವ್ನ್ ನಿವೃತ್ತ್ ಜಾಲ್ಲೊಚ್ ಸಯನ್ ಕೊಲಿವಾಡ ಚಾಳಿಂತ್ಲೆಂ ಘರ್ ವಿಕುನ್ ಬದ್ಲಾಪುನ್ ಯೇವ್ನ್ ದೋನ್ ಬೆಡ್ರುಮಾಚೆಂ ಲಗ್ಬಗ್ ನೊವ್ಶಿಂ ಚದರ್ ಫುಟಿಂಚೆಂ ಫ್ಲೇಟ್ ಕಾಣ್ಘೆಲ್ಲ್ಯಾ ಉಪ್ರಾಂತ್ಯೀ ದೇಶ್ಪಾಂಡೆನ್ ಅಪ್ಲಿ ಪರ್ನಿ ಸವಯ್ ಸೊಡುಂಕ್ ನಾತ್ಲ್ಲಿ. ಸೊಡ್ಚಿ ತರ್ಯೀ ಕಶಿ? ಸಕಾಳಿಂ ಉಟ್ಲ್ಲೊಚ್ ಚಾನ್ವೆಂ ಕಾನಾಕ್ ಖೊವವ್ನ್ ಆಂಗ್ಣಾಂತ್ ಉಕಾಟ್ಯಾ ಪಾಂಯಾಂನಿ ಮುಡ್ಲಾ ಸುರ್ಯಾಚಾ ಮೋವ್ ಕಿರ್ಣಾಂಕ್ ಪಾಟ್ ಘಾಲ್ನ್ ಬಸೊನ್ ತೞಾತಾರ್ ಸತಾರಿ ತಂಬಾಕು ಚುನ್ಯಾ ಸಾಂಗಾತಾ ಮೋಳ್ನ್ ತೊ ಹಳ್ಟ್ ಕರ್ನ್ ತಾಂತ್ಲೆಂ ಕಸ್ತಳ್ ವಿಂಚುನ್ ಧುಳ್ ಫುಂಕುನ್ ಉಭವ್ನ್ ಚಿಮ್ಣೆಂತ್ ಘೆವ್ನ್ ನಿಜ್ಜಿ ಆನಿ ವೊಂಟಾಂ ಮಧೆಂ ದವರಿನಾ ತರ್ ತಾಕಾ ಕಾಕ್ಸಾಕ್ ಜಾಯ್ನಾತ್ಲೆಂ. ತಾಣೆಂ ತಶೆಂ ಫಾಂತ್ಯಾಚಾ ಸುರ್ಯಾಕ್ ಪಾಟ್ ಕರ್ನ್ ಬಸ್ಲ್ಲೆ ವರ್ವಿಂಗೀ ವಾ ಧುಮ್ಟೆಚಾ ಮಹಿಮೆನ್ಗೀ ತಾಚಿ ಉದ್ಕಾಡೆ ಅಂರ್ಧುಂಚಿ ಪಿಡಾ ಗುಣ್ ಜಾಲ್ಲಿ.
ಬದ್ಲಾಪುನ್ ತೆದಿ ವ್ಹಡ್ ಪೇಂಟ್ ಕಾಂಯ್ ನ್ಹಂಯ್. ದೆಖುನ್ ಮುಂಬಯ್ಪರಿಂ ಮುನ್ಸಿಪಲ್ ಕೋರ್ಪೊರೇಶನ್ ನಾ. ಆಸಾ ಮ್ಹಳ್ಯಾರ್ ನಗರ್ಸಭಾ ಆನಿ ನಗರ್ ಸೇವಕ್. ಮುಂಬಯ್ಪರಿಂ ಊಂಚ್ ಮಾಳ್ಯೆಚಿಂ ಟವರಾಂ ಬಾಂಧುಂಕ್ ಹಾಂಗಾ ನಗರ್ಸಭಾ ಪರ್ವಣ್ಗಿ ದೀನಾ ದೆಖುನ್ ತೀನ್ ಯಾ ಚಾರ್ ಮಾಳಿಯಾಂಚಿಂಚ್ ಚಡಾವತ್ ಕಟ್ಟೊಣಾಂ. ಚಡ್ತಿಕ್ ಬಾಂಧ್ಲ್ಯಾರ್ ಲಿಫ್ಟ್ ಜಾಯ್. ಲಿಫ್ಟ್ ಮ್ಹಣ್ತಾನಾ ಫಯರ್ ಬ್ರಿಗೇಡಿಚಿ ಪರ್ವಣ್ಗಿ ಜಾಯ್ ಇತ್ಯಾದಿ..
ದೇಶ್ಪಾಂಡೆ ಕೋರ್ಪೊರೇಶನಾಂತ್ಚ್ ಕಾಮ್ ಕರ್ತಾಲೊ ಜಾಲ್ಲ್ಯಾನ್ ಹೆಂ ಸಗ್ಳೆಂ ತಾಕಾ ಬರ್ಯಾನ್ ಕಳಿತ್ ಆಸ್ಲ್ಲೆಂ. ತಶೆಂ ಬಿಲ್ಡರ್ ಕಶೆಂ ಬಿಲ್ಡಪ್ ಕಾರ್ಪೆಟ್ ಮ್ಹಣ್ ಲೊಕಾಕ್ ಬನಾಯ್ತಾತ್ ತೆಂ. ದೇಶ್ಪಾಂಡೆನ್ ಫ್ಲೇಟ್ ಘೆತಾನಾ ತಾಕಾ ಗುಜರಾಟಿ ಬಿಲ್ಡರ್ ದೇಡಿಯಾನ್ ಬರಿಚ್ ರಿಯಾಯ್ತಿ ದಿಲ್ಲಿ. ದೇಡಿಯಾ ಲಾಗಿಂಚ್ ದೇಶ್ಪಾಂಡೆನ್ ಫ್ಲೇಟ್ ಬುಕ್ ಕರುಂಕ್ ಅನ್ಯೇಕ್ ಕಾರಣ್ ಮ್ಹಳ್ಯಾರ್, ಬಿಲ್ಡಿಂಗಾ ಭಾಯ್ರ್ ದರಬಸ್ತ್ ಉಗ್ತೊ ಜಾಗೊ ಆಸ್ಲೊ ಆನಿ ತಾಕಾ ಸಕಾಳಿಂಚೆಂ ವೊತಾಕ್ ಆಂಗ್ ಶೆಕುಂಕ್ ಹಾಂಗಾ ಕೊಣಾಚೊ ಆಕ್ಶೇಪ್ ನಾತ್ಲೊ.
ಗೊರ್ಯಾಂಚಾ ಕಾಳಾರ್ ಮೆಟ್ರಿಕ್ ಶಿಕ್ಲ್ಲೊ ದೇಶ್ಪಾಂಡೆ ಸಂಯ್ಬಾನ್ ಮಾವ್ನಿ. ಸೊಸಾಯ್ಟಿಂತ್ ಕೊಣಾಯ್ಕಡೆ ಉಲಯಿಲ್ಲೊ ನಾ. ತೊ ಜಾಲೆಂ ತಾಚೆಂ ’ಸಕಾಳ್’ ಪೇಪರ್ ಜಾಲೆಂ. ಜಾಯ್ತೆ ಪಾವ್ಟಿಂ ಆಂಗ್ಣಾಂತ್ ಆಂಗ್ ಶೆಕುಂಕ್ ಬಸ್ಲ್ಲೆಕಡೆಚ್ಚ್ ತೊ ಪೆಪರ್ಯೀ ವಾಚೂನ್ ಕಾಡ್ಟಾಲೊ. ಪೇಪರ್ ವಾಸ್ಚೆಂ ಅರ್ಧ್ಯಾರ್ಚ್ ರಾವವ್ನ್ ಜಾಯ್ತೆ ಪಾವ್ಟಿಂ ಎಕಾ ಬಾಕ್ಕಾರಾನ್ ಕಾಕ್ಸಾಕ್ ಧಾಂವ್ತಾಲೊ. ತಶೆಂ ವೊತಾರ್ ಆಂಗ್ ಶೆಕುಂಕ್ ಕಾಕ್ಸಾಕ್ ಧಾಂವೊಂಕ್ ಸಲೀಸ್ ಜಾಯ್ಜೆ ಮ್ಹಣ್ಂಚ್ ತಾಣೆಂ ದೇಡಿಯಾಕಡೆ ತಳ್ಮಾಳ್ಯೆರ್ ಫ್ಲೇಟ್ ಘೆತ್ಲ್ಲೆಂ. ಭಾರಾವಿ ಬಾಂದಾಂತ್ಲೆಂ ಉದಕ್ ಸೊಡ್ಲ್ಯಾರ್ ಪಾವ್ಸಾಂತ್ ಉದ್ಕಾಂತ್ ಬುಡೊನ್ ವೆಚಿ ಭಿರಾಂತ್ ಆಸ್ಚ್ಯಾ ಬದ್ಲಾಪುರಾಮ್ತ್ ತಳ್ಮಾಳ್ಯೆಚಾ ಫ್ಲೆಟಾಂಕ್ ಕೊಣ್ಯೀ ವಿಚಾರಿನಾತ್ಲೆ ದೆಖುನ್ ಬಿಲ್ಡರ್ಯೀ ಮೆಳ್ಲ್ಲ್ಯಾ ಮೊಲಾಕ್ ದಿತಾಲೆ. ಪುಣ್ ದೇಶ್ಪಾಂಡೆ ಬದ್ಲಾಪುರ್ ಆಯಿಲ್ಲೆ ಥಾವ್ನ್ ಬಾಂದಾಂತ್ಲೆಂ ಉದಕ್ ಸೊಡ್ಚೆ ತಿತ್ಲೊ ಪಾವ್ಸ್ಯೀ ಪಡೊಂಕ್ ನಾತ್ಲೊ. ಗೆಲ್ಲೆ ಸಾತ್ ದೀಸ್ ಹಟಾರ್ ಪಡ್ಲ್ಲೆಪರಿಂ ಜಾಲ್ಲೊ ಪಾವ್ಸ್ ಸೊಡ್ಲ್ಯಾರ್.
ದೇಶ್ಪಾಂಡೆಕ್ ಚೆರ್ಕೆ ಭುರ್ಗೆ ನಾತ್ಲ್ಲೆ. ಆಸ್ಲ್ಲಿಂ ದೊಗಾಂಯ್ ಚೆಡ್ವಾಂಚ್ಚ್. ತಾಚಾ ನಿವೃತ್ತೆಚಾ ವೆಳಾಕ್ ದೊಗಾಂಕ್ಯೀ ಕಾಜಾರ್ ಜಾವ್ನ್ ಭುರ್ಗಿಂ ಜಾಲ್ಲಿಂ. ಫೆಸ್ತಾ ಪರ್ಬೆಕ್ ಆಪ್ಲ್ಯಾ ಕುಟ್ಮಾ ಸಾಂಗಾತಾ ಯೇವ್ನ್ ಚಾರ್ ದೀಸ್ ರಾವೊನ್ ವೆತಾನಾ ದೇಶ್ಪಾಂಡೆಚೆಂ ಘರ್ ನಾತ್ರಾಂಚಾ ಪಾಂಯಾಂತ್ಲ್ಯಾ ಕಿಣ್ಕುಳ್ಯಾಂನಿ ಫುಲೊನ್ ರಾವ್ತಾಲೆಂ. ಗಾಡಿಯೆಚಾ ಗಡ್ದೆಂತ್ ದಾದರ್ ಬಾಂಯ್ದರ್ ಥಾವ್ನ್ ಬದ್ಲಾಪುರ್ ಭುರ್ಗ್ಯಾ ಬಾಳಾಂಕ್ ವೋಡ್ನ್ ಹಾಡ್ನ್ ಯೆಂವ್ಚೆಂಯೀ ಕಶ್ಟಾಂಚೆಂಚ್.
ಒಟ್ಟುಕ್ ಚೊವೀಸ್ ಪ್ಲೇಟಾಂ ಆಸ್ಚ್ಯಾ ಕಟ್ಟೊಣಾಂತ್ಲಿಂ ವೀಸ್ ಪ್ಲೇಟಾಂ ವಿಕೊನ್ ಗೆಲ್ಲಿಂಚ್ ಬಿಲ್ಡರ್ ದೇಡಿಯಾನ್ ಕೋ ಅಪರೇಟಿವ್ ಹಾವ್ಜಿಂಗ್ ಸೊಸಾಯ್ಟಿ ಕರ್ನ್ ತಿ ಪಾರಿಜಾತ ಕೋ ಅಪರೇಟಿವ್ ಹಾವ್ಜಿಂಗ್ ಸೊಸಾಯ್ಟಿ ಲಿಮಿಟೆಡ್ ಮ್ಹಳ್ಳ್ಯಾ ನಾಂವಾನ್ ನೊಂದಾಯ್ತ್ ರಾವ್ತೆಲ್ಯಾಂ ಪಯ್ಕಿ ಮಾಲ್ಘಡೊ ಶಿಕ್ಪಿ ದೇಶ್ಪಾಂಡೆಚ್ಚ್ ದೆಖುನ್ ತಾಕಾಚ್ ಸೊಸಾಯ್ಟಿಚೊ ಪ್ರೊಮೋಟರ್ ತಸೆಂ ಪಯ್ಲೊ ಚೇರ್ಮೆನ್ ಕೆಲೊ. ಸೊಸಾಯ್ಟಿಂತ್ ತಾಕಾ ಎಕ್ಲ್ಯಾಕ್ ಸೊಡ್ಲ್ಯಾರ್ ಹೆರ್ ಪಾವ್ಟ್ ಮೆಳ್ಟಾನಾ ದೇಶ್ಪಾಂಡೆಯೀ, ತಾಚಿ ಬಾಯ್ಲ್ಯೀ ಲಿಸಾಂವ್ ಘೆತಾಲಿಂ. ದೇಶ್ಪಾಂಡೆ ಲೆಕಾಂತ್ ಆನಿ ವಿಗ್ಯಾನಾಂತ್ ಹುಶಾರ್. ತಾಚಿ ಬಾಯ್ಲ್ ಮರಾಟಿ ಆನಿ ಚರಿತ್ರೆಂತ್.
ದೇಶ್ಪಾಂಡೆಚಾ ತಳ್ಮಾಳ್ಯೆಚಾ ದೋನ್ ಬೆಡ್ರುಮಾಂಚಾ ಫ್ಲೇಟಾಂತ್ ಏಕ್ ಬೆಡ್ರೂಮ್ ಸಗ್ಳೆಂ ದೆವಾಚೆಂಚ್ ಕೂಡ್. ದೇಶ್ಪಾಂಡೆ ಸುದ್ದಾಚಾರಾಚೊ ಮನಿಸ್ ತರ್ಯೀ ತಿತ್ಲೊ ದೆವಾಸ್ಪಣಾಚೊ ನ್ಹಂಯ್. ತಾಚಿ ಬಾಯ್ಲ್ ಮಾತ್ ಫಾಂತ್ಯಾರ್ ಉಟ್ಲ್ಲಿಚ್ ಮಾತ್ಯಾರ್ ಶೆಳೆಂ ನ್ಹಾವ್ನ್ ಎಕೊಡೆಂ ವಸ್ತುರ್ ನ್ಹೆಸೊನ್ ಸೊಸಾಯ್ಟಿಚಾ ದಾಕ್ಟುಲ್ಯಾ ಬಗೀಚಾಂತ್ ತೆ ದಿಸಾ ಫುಲ್ಲ್ಲಿಂ ಲ್ಹಾನ್ ವ್ಹಡ್ ತಿಚ್ಯಾ ದೊಳ್ಯಾಂಕ್ ದಿಸ್ಚಿಂ ಸಗ್ಳಿಂ ಫುಲಾಂ ಖುಂಟುನ್ ಕಾಡ್ತಾಲಿ. ತಾಂತ್ಲಿಂ ಫುಲಾಂ ಸೊಸಾಯ್ಟಿಂತ್ಲ್ಯಾ ಹೆರ್ ಕೊಣಾಕ್ ಮೆಳಾಜೆ ತರ್ಯೀ ತಾಣಿಂ ತಿಚೆ ಪಯ್ಲೆಂ ಉಟಾಜೆ ಪಡ್ತಾಲೆಂ. ತಶೆಂ ಖುಂಟುನ್ ಹಾಡ್ಲ್ಲಿಂ ಫುಲಾಂ ದೆವಾಕ್ ಮಾಳ್ನ್ ಆಂಗ್ ಶೆಕ್ಚೆಂ, ಪೇಪರ್ ವಾಸ್ಚೆಂ, ಕಾಮ್ ಕರ್ತಾಲೊ. ನಿಜ್ಜೊ ಆನಿ ವೊಂಟಾ ಮಧ್ಲೊ ತಂಬಾಕು ಇರ್ಜೊನ್ ಉದಕ್ ಸುಟ್ತಾನಾ ದೇಶ್ಪಾಂಡೆಕ್ ಕಾಕ್ಸಾಕ್ ಯೇವ್ನ್ ತೊ ನಿತಳ್ ಜಾವ್ನ್ ಭಾಯ್ರ್ ಯೆತಾನಾ ಬಾಯ್ಲ್ ಆರತಿ ಉಕಲ್ತಾಲಿ.
ಬೋರಾಡೆಚಾ ಮಾಲ್ಘಡ್ಯಾ ಚೆರ್ಕ್ಯಾಕ್ ಬಾವ್ಳ್ಯಾಕ್ ಘಟ್ಟ್ ಧರ್ನ್ ಸರಾರಾಂ ವೋಡ್ನ್ ಹಾಡ್ನ್ ದೆವಾಚಾ ಕುಡಾಕ್ ರಿಗ್ಲ್ಲೊಚ್ಚ್ ದೇಶ್ಪಾಂಡೆ, ಥಂಯ್ ದೆವಾಂಕ್ ಫುಲಾಂ ಮಾಳ್ಚಿ ತಾಚಿ ಬಾಯ್ಲ್ ಘಡ್ಗಡೊ ಮಾರ್ಲ್ಲೆಪರಿಂ ಉಭಿಚ್ಚ್ ಉರ್ಲಿ. ಹೊ ಕಿತೆಂ ಆವ್ತಾತ್? ಮಾರಾಂಚಾ ಚೆರ್ಕ್ಯಾಕ್ ದೆವಾಚಾ ಕುಡಾಕ್ ವೋಡ್ನ್ ಹಾಡ್ನ್ ಯೇವ್ನ್ ಮಾತಾರೊ ಕಿತ್ಯಾಕ್ ಬಾರೀಕ್ ಕಾಂಪ್ತಾ? ವಾರ್ಯಾ ಸುತ್ತುರಾಕ್ ಶಿರ್ಕಾಲ್ಲ್ಯಾ ಪಿಕ್ಯಾ ಖೊಲಿಯೆಪರಿಂ...?
’ಆಯ್ಕಾಲೆಂಯೇ...’ ದೇಶ್ಪಾಂಡೆಚೊ ತಾಳೊ ರಾಗಾನ್ ಕಾಂಪ್ತಾಲೆ. ’ತಿ ಪೇಟ್ ದೀ...’ ಹ್ಯಾ ಪುರ್ತೆಂ ತಾಂತಿಯಾಂತ್ಲೆಂ ಭಾಯ್ರ್ ಪಡಾನಾತ್ಲ್ಯಾ ಪಿಲಾಕ್ ಆಜ್ ಹಾಂವ್ ಸಾಂಗ್ತಾಂ... ಗಾಂಧಿಕ್ ಮಾರ್ಲ್ಲೊ ಕೊಣೆಂ ಮ್ಹಣ್..?’ ದೇಶ್ಪಾಂಡೆಕ್ ಇತ್ಲ್ಯಾ ರಾಗಾಂತ್ ತಾಚೆ ಬಾಲೆನ್ಯೀ ಎದೊಳ್ ಪಳೆಂವ್ಕ್ ನಾತ್ಲ್ಲೆಂ. ಖರೆಂ ಸಾಂಗ್ಚೆಂ ತರ್, ತ್ಯಾ ಇತ್ಲ್ಯಾ ಪರ್ನ್ಯಾ ಲಂಕ್ಡಾ ಪೆಟೆಂತ್ ಕಿತೆಂ ಆಸ್ತ್ ಆಸಾ ಮ್ಹಣ್ ತಿಕಾಯ್ ಕಳಿತ್ ನಾತ್ಲೆಂ. ಕಿತ್ಲಿಂ ಘರಾಂ ಬದ್ಲಿಲ್ಯಾರೀ ತಿ ಪೇಟ್ ಮಾತ್ ಖುದ್ದ್ ದೇಶ್ಪಾಂಡೆ ಕಿತೆಂಗೀ ಆಸ್ತ್ ಆಸ್ಲ್ಲ್ಯಾಪರಿಂ ವ್ಹಾವವ್ನ್ ವರ್ತಾಲೊ ಆನಿ ಜೊಗಾಸಣೆನ್ ಸಾಂಭಾಳ್ನ್ ದವರ್ತಾಲೊ. ಬಾಯ್ಲ್ ಮಿಟಾಚೊ ಕುಂದೊ ಜಾಲ್ಲಿ ಪಳೆವ್ನ್ ದೇಶ್ಪಾಂಡೆ ಖುದ್ದ್ ದೆವಾಚಿಂ ಫಾಯ್ನೆಳಾಂ, ಇಮಾಜಿ ದವರಿಲ್ಲ್ಯಾ ಕೊನ್ಶ್ಯಾ ಗೆಲೊ ಆನಿ ಪರ್ನಿ ಲೊಂಕ್ಡಾಚಿ ಪೇಟ್ ವೋಡ್ನ್ ಹಾಡ್ನ್ ಬೋರಾಡೆಚಾ ಚವ್ತ್ಯಾ ವರ್ಗಾಂತ್ ಶಿಕ್ಚ್ಯಾ ಚೆರ್ಕ್ಯಾಚಾ ಪಾಂಯಾಂ ಮುಳಾ ದವರ್ಲಿ. ಆನಿ ಜಾನ್ವ್ಯಾಕ್ ಖೊವಯಿಲ್ಲೊ ಭಿಗಾತಾಂತ್ ತಾಚೆಂ ಬೀಗ್ ಉಗ್ತೆಂ ಕರ್ನ್ ತಾಂತುಂ ಭರ್ಲ್ಲಿಂ ಎಕೇಕ್ಚ್ ಪರ್ನಿಂ ಪೆಪರಾಂ ತಾಚೆ ಮುಕಾರ್ ಚತ್ರಾಯೆನ್ ಸೊಡಯ್ಲಿಂ.
’ಪಳೆ.. ತುಜೊ ಬಾಪುಯ್ ಕೊಂಗ್ರೆಸ್ಸಿ ನ್ಹಂಯ್, ರಯ್ಲ್ವೇಂತ್ ಯೂನಿಯನಾಚೊ ಮ್ಹಾನ್ ಮುಕೆಲಿ ನ್ಹಂಯ್.. ಪಳೆ ತುಂ ತರ್ಯೀ ಪಳೆ.. ಹ್ಯಾ ಕೊಂಗ್ರೆಸಿನಿ ಆಮ್ಚಿಂ ಘರಾಂ, ಕೊಮ್ಟಾಂ ಜೀವ್ ಸಗ್ಳೆಂ ಜಳವ್ನ್ ಆಮ್ಕಾಂ ಕಶೆಂ ಬೋರಾಡೆಚೊ ಚೆರ್ಕೊ ಭಿಂಯಾನ್ ಕಾಂಪ್ತಾಲೊ. ’ತೀನ್ ಹಜಾರ್ ವರ್ಸಾಂ, ತೀನ್ ಹಜಾರ್ ವರ್ಸಾಂ ಥಾವ್ನ್ ಆಮಿಂ ತುಮ್ಕಾಂ ಧಾಂಬೂನ್ ದವರ್ಲಾಂ ಮ್ಹಣ್ ತುಮಿಂ ಮ್ಹಣ್ತಾತ್ನೇ?, ವ್ಹಯ್ ಹಾಂವ್ ಬಾಮುಣ್, ನಾತೂರಾಮ್ ಗೋಡ್ಸೆಯೀ ಬಾಮುಣ್, ತಾಣೆಂ ಗಾಂಧಿಕ್ ಮಾರ್ಲೆಂ, ತುಮಿ ಸಗ್ಳೆ ಮೆಳೊನ್ ಮ್ಹಾಕಾ ಮಾರಾ.. ಮಾರಾ... ಮಾರಾ...’
ರಾವ್ಲ್ಲೆ ಕಡೆಚ್ಚ್ ಕಾಂಪ್ಚೊ ದೇಶ್ಪಾಂಡೆ ಇತ್ಲೆಂ ಮ್ಹಣೊನ್ ದೆವಾಚಾ ಕುಡಾಂತ್ಚ್ ದಡ್ಡ್ ಕರ್ನ್ ಪರ್ತಾಲೊ.
’ಬಾಬಾ...’ ಮ್ಹಣ್ ಬೋರಾಡೆಚಾ ಚೆರ್ಕ್ಯಾನ್ ಮಾರ್ಲ್ಲ್ಯಾ ಕಿಂಕ್ರಾಟೆಕ್ ಪಾರಿಜಾತ ಕೋ ಅಪರೇಟಿವ್ ಹಾವ್ಜಿಂಗ್ ಸೊಸಾಯ್ಟಿಚೆಂ ಸಗ್ಳೆಂ ಕಟ್ಟೋಣ್ ಭುಂಯ್ಕಾಪ್ಣೆಕ್ ಹಾಲ್ಚೆಪರಿಂ ಹಾಲ್ಲೆಂ.
ಭಾಯ್ರ್ ಚವ್ಕಾಂತ್ ಮುನಿಸಿಪಾಲಿಟಿಚಿ ಗಾಡಿ ’ಭಾರವೀ ಬಾಂದಾಂತ್ ಉದಕ್ ಅಪಾಯಾಚಾ ಮಟ್ಟಾಕ್ ಚಡ್ಲಾಂ, ಖಂಯ್ಚೆಯೀ ಘಡ್ಯೆ ಬಾಗ್ಲಾಂ ಉಘಡುಂಕ್ ಪುರೊ ಲೊಕಾನ್ ಜಾಗ್ರುತ್ ರಾವೊಂಕ್ ವಿನಂತಿ’ ಮ್ಹಣ್ ಚತ್ರಾಯ್ ಸಾಂಗ್ತಾಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
