ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 11. ಕಿಸ್ಣ ಕಾಣಿ ಜಾಲ್ಲೊ
ಅವಿನಾ ಮೆಂಡೊನ್ಸಾ, ಮಿಯಾರ್ - ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚಾ ಸಾಹಿತಿಂಚಾ ಮೆಳಿಂತ್ ಎಕ್ಲೆಂ. ಚಿಂತ್ಪಾನ್ ಪ್ರಭುದ್ದತಾ, ವಿಚಾರಾನಿ ಪರಿಪಕ್ವತಾ ಆಸೊನ್ ಬರ್ಪಾಂನಿ ವಿಚಾರ್ಧಾರಾ ಆಟಾಪ್ಚೆಂ ಸಾಹಿತ್ಯ್ ರಸ್ಚಾ ಅವಿನಾಚಿ ಹಿ ಕಾಣಿ ’ದಾಯ್ಜ್ ಸಾಹಿತಿ ಸ್ಪರ್ಧೊ - 2004’ ಹಾಂತುಂ ಚೊವ್ತೆಂ ಸ್ಥಾನ್ ಘೆಂವ್ಕ್ ಸಕ್ಲಿ. ಕೊಂಕ್ಣೆಂತ್ ಮಟ್ವ್ಯಾ ಕಾಣ್ಯಾಂ ಶಿವಾಯ್ ಲೇಖನಾಂ, ಕವಿತಾ ಬರಂವ್ಚೆಂ ಹೆಂ ’ಅವಿನಾ ಮಿಯಾರ್’ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ಚ್ ಫಾಮಾದ್ ಜಾಲಾಂ. ಕೊಂಕ್ಣೆಂತ್ ಪ್ರಭುದ್ದ್ ಸ್ತ್ರೀ ಲೇಖಕಿ ಜಾವ್ನ್ ಹೆಂ ಏಕ್ ದೀಸ್ ಲೊಕಾಮೊಗಾಳ್ ಜಾಂವ್ ಮ್ಹಣ್ ಹಾಂವ್ ಆಶೆತಾಂ.
ಅವಿನಾ, ಮಿಯಾರ್
ಘಾಟಾಚ್ಯಾ ರಾನಾ ದೆಗೆರ್ ಶಾಂತ್ ರಿತಿನ್ ಆಪ್ಲ್ಯಾಚ್ಚ್ ಏಕಾ ಸಂಸಾರಾ ಭಿತರ್ ಕೊವಳ್ನ್ ನಿದ್ಲ್ಲೊ ಗಾಂವ್ ವಿಳ್ಯ. ’ಶಾಂತ್’ ಮ್ಹಣ್ಚ್ಯಾಕ್ ಕಾರಾಣ್ ಆಸಾ. ಭಾಯ್ರ್ ಥಾವ್ನ್ ವಾ ಶ್ಹೆರಾ ಥಾವ್ನ್ ಯೆತೆಲ್ಯಾಂಕ್ ಹೊ ಗಾಂವ್ ಶಾಂತ್ ಮ್ಹಣ್ ದಿಸ್ಲ್ಯಾರೀ, ಗಾಂವಾಂತ್ ಭಿತರ್ಲ್ಯಾ ಭಿತರ್ ಲೊಕಾಚ್ಯಾ ಮನಾಂತ್, ಘರಾಂತ್ಲ್ಯಾ ಕಾಳ್ಕ್ಯಾ ಕುಡಾಂನಿ, ನ್ಹಾಣ್ಯೆಚ್ಯಾ ಉಜ್ಯಾ ಮುಖಾರ್, - ಖಬ್ರೊ, ದೂಃಖ್, ಬೆಜಾರಾಯ್, ನಿರಾಸ್ಪಣ್, ಜಿಣ್ಯೆಂತ್ಲೆಂ ಅಂತರ್ಝುಜ್ ಬಾಣಾಂತ್ ಖತ್ಕತ್ಯಾ ಉದ್ಕಾಪರಿಂ ಹುನ್ ಜಾವ್ನ್ ಖತ್ಕತೊನ್ ಆಸ್ತಾಲೆಂ.
ಕಿತ್ಲೆಶೆ ಪಾವ್ಟಿಂ ಹ್ಯಾ ಗಾಂವ್ಚೊ ಲೋಕ್ ಮೊಸ್ರಿ, ಸದಾಂ ಝಗಡ್ಚೊ, ಮನ್ಶಾಪಣ್ ನಾತ್ಲ್ಲೊ ಮ್ಹಣ್ ಬೊಗುನ್, ತಾಚಿ ಹುನ್ ಸಗ್ಳ್ಯಾಂನಿ ಪಾಶಾರ್ಲ್ಯಾರಿ, ಆಖ್ರೇಚೆ ಘಡ್ಯೆ ಕಿತೆಂಚ್ ಘಡನಾತ್ಲ್ಲ್ಯಾಪರಿಂ ಸರ್ವ್ ಶಾಂತ್ ಜಾತಾಲೆ. ಹ್ಯಾ ಸರ್ವಾಚೊ ಅನ್ಭೋಗ್ ಜಾಯ್ಜೆ ಜಾಲ್ಯಾರ್ ತ್ಯಾ ಗಾಂವಾಂತ್, ತ್ಯಾಚ್ ಗಾಂವ್ಚ್ಯಾ ಮನ್ಶ್ಯಾಪರಿಂ ಜಿಯೆಂವ್ಕ್ ಜಾಯ್. ಪುಣ್ ಗಾಂವಾಂ ಭಿತರ್ಲ್ಯಾ ಝಗ್ಡ್ಯಾಂನಿ ಭಾಗ್ ಘೆನಾಸ್ತಾನಾ ರಾಂವ್ಚೆಂ ಬೋವ್ ಸಂಪೆಂ. ಕಿತ್ಯಾಕ್ ಖಂಚಾಯಿ ಸಂಗ್ತಿಂನಿ ಎಕ್ಲ್ಯಾನ್ ಆಪ್ಲೆಂ ನಾಕ್ ರಿಗಯ್ಲೆಂಚ್ ಜಾಲ್ಯಾರ್, ಆಖ್ರೇಕ್ ತೊ ಖಂಚಾ ಪಾಡ್ತಿಕ್ ಆಸಾ ಮ್ಹಣ್ ಸಾಂಗ್ಚೆಂ ಭೋವ್ ಕಷ್ಟಾಂಚೆಂ ಜಾಯ್ತ್.
ಕೃಷ್ಣಾಸ್ವಾಮಿಚ್ಯಾ ದಿಸಾ ಜಲ್ಮಲ್ಲ್ಯಾ ಕೃಷ್ಣಾಕ್ ’ಬಾಲಕೃಷ್ಣ’ ಮ್ಹಳ್ಳೆಂ ಲಾಂಬ್ ಶಿಮ್ಟಿ ಆಸ್ಚೆಂ ನಾಂವ್ ಆಸ್ಲ್ಲೆ. ಪುಣ್ ಸಕ್ಡಾಂಚ್ಯಾ ಜಿಬೆರ್, ಪ್ರತ್ಯೇಕ್ ಜಾವ್ನ್ ಮುಖ್ಲೆಂ ದಾಂತ್ ಭಾಯ್ರ್ ಆಯ್ಲ್ಯಾ ತಾಚ್ಯಾ ದಾಟ್ಟುಚ್ಯಾ ತೊಂಡಾಂತ್ ತೊ ’ಕಿಸ್ಣ’ ಜಾವ್ನ್ ಖೆಳ್ತಾಲೊ.
ಲ್ಹಾನ್ ಆಸ್ತಾನಾ ಕಿಸ್ಣಾಕ್ ಗಾಂವ್ಚ್ಯಾ ಭಿತರ್ಲಿ ಹುನ್ಪಾಣ್ ತಿತ್ಲಿ ಲಾಗಾನಾತ್ಲ್ಲಿ. ಖಾಲಿ ತಾಚ್ಯಾ ಬಾಳ್ಪಣಾಚ್ಯಾ ಅನ್ನಾಡ್ಪಣಾಂಚೆಂ ವರ್ಣನ್ ತಾಚ್ಯಾ ಕಾನಾರ್ ಪಡ್ತಾಲೆಂ. ಪುಣ್ ತಿ ತಾಚಿ ಹೊಗ್ಳಿಕ್ಗಿ ವಾ ದುರಾಂಗಿ ಮ್ಹಣ್ ತಾಕಾ ಸಮ್ಜಾನಾತ್ಲ್ಲೆಂ. ಸಮ್ಜೊಂಚಿ ಪ್ರಾಯ್ ನ್ಹಯ್ ತಿ. ಪುಣ್ ತಾಚಿ ಅನ್ನಾಡ್ಪಣಾ ದುಸ್ರ್ಯಾಂಚ್ಯಾ ತೊಂಡಾ ಥಾವ್ನ್ ಆಯ್ಕೊಚೆಂಚ್ ತಾಕಾ ಭೋವ್ ಸಂತೊಸ್ ದಿತಾಲೆಂ.
ಕೃಷ್ಣಾಚ್ಯಾ ಆಜಿಯೆನ್ ಸಾಂಗ್ಚ್ಯೊ, ಭೂತಾ ಸಾಂಗಾತಾ ತಿಚ್ಯೊ ಮುಖಾಮುಖಿಚ್ಯೊ ಕಾಣಿಯೊ ಕೃಷ್ಣಾಕ್ (ಕಿಸ್ಣಾಕ್) ಭೋವ್ ಮೊಗಾಚ್ಯೊ. ತಾಚ್ಯಾ ಆಜಿಯೆನ್ ಭುತಾಚಿ ಕಾಣಿ ಸುರು ಕೆಲ್ಯಾರ್ ತಾಚ್ಯಾ ಆಂಗಾಚಿ ಲೋಂವ್ ನೀಟ್ ರಾವ್ತಾಲಿ.
"ಏಕ್ ದೀಸ್ ರಾತಿಂ ಜಾಲೆಂ ಗೊತ್ತುಸಾಯೆ ಕಿಸ್ಣ? ಆಮ್ಚಿ ತಿ ನ್ಹಂಯ್ ಆಸಾನೆ, ತಾಚ್ಯಾ ಪಲ್ತಡಿ ಶಾಂತಕ್ಕಾಚೆಂ ಘರ್ ನಾವೆ"
"ತಿಚ್ ಪಾಂಯ್ ವಯ್ರ್ ಸಕಯ್ಲ್ ಕರ್ನ್ ಚಲ್ಚಿ ಮ್ಹಾತಾರಿ ಶಾಂತಕ್ಕ" ಮ್ಹಣ್ ಮಧೆಂ ತೋಂಡ್ ಘಾಲೆಂ ಕೃಷ್ಣಾನ್.
"ಮಾತಾರಿ ಜಾಲ್ಯಾರ್ ಕಿತೆಂ, ತುಂ ಏಕ್ ದೀಸ್ ಮ್ಹಾತಾರೊ ಜಾಯ್ನಾಂಯ್ ದಿಸ್ತಾ, ಸುಕಿ ಖೊಲಿ ಪಡ್ತಾನಾ ತರ್ನಿ ಖೊಲಿ ಹಾಸ್ತಾಲಿ ಖಂಯ್.. ಆಸೊಂ ಆಯ್ಕ್ ಹಾಂಗಾ, ಮ್ಹಾಕಾ ತೆದಾಳಾ ಕಾಜಾರ್ ಜಾಲ್ಲೆಂ ಮಾತ್ರ್."
ಎತ್ಲೆಂ ಮ್ಹಣ್ತಾನಾ ಸದಾಂ ಗಾಂಟಿ ದೂಕ್ ಮ್ಹಣ್ ಮ್ಹಣ್ಚೆಂ ತಾಚೆ ಆಜ್ಯೆನ್, ಅಟ್ಟೆಮುಟ್ಟೆ ಘಾಲ್ನ್ ಬಸೊನ್, ಕಿಸ್ಣಾಚ್ಯಾ ಆನಿಕೀ ಇಲ್ಲೆಂ ಲಾಗಿಂ ಯೇವ್ನ್, ದೊಳೆ ವ್ಹಡ್ ಕರ್ನ್ ಸಾಂಗ್ಚಿ ರೀತ್ ಪಳೆವ್ನ್, ಅರೆ! ಅಜ್ಯೆಕ್ ಕಿತೆಂ ಜಾಲೆಂ ಮ್ಹಣ್ ಚಿಂತ್ಚಿ ತಾಂಕ್ನಾಸ್ತಾನಾ, ಕಿಸ್ಣ ಆಜ್ಯೆಚ್ಯಾ ಆನಿಕೀ ಇಲ್ಲೆಂ ಲಾಗ್ಗಿ ಯೇವ್ನ್ ತಿಚ್ಯಾ ಪಾಯಾಂ ವಯ್ರ್ ಆಪ್ಲಿ ಮುಂಗಾಯ್ ತೆಂಕುನ್ ಬಸ್ಲೊ.
"ಮ್ಹಜೆಂ ಕಾಜಾರ್ ಜಾವ್ನ್ ಏಕಾ ಮ್ಹಯ್ನ್ಯಾ ಉಪ್ರಾಂತ್ ಶಾಂತಕ್ಕಚೆಂ ಕಾಜಾರ್. ’ತಮ್ಮಣಾ’ಕ್ ಕುಂಕಾಡ್, ಮಾಸ್ಳಿ ಸಕ್ಕಡ್ ರಾಂದ್ಲ್ಲೆಂ. ಘರಾಂತ್ ಮ್ಹಜೊ ಮ್ಹೊಂವ್ ಮಾಂವ್ ಮ್ಹಳ್ಯಾರ್ ತುಚೊ ಪಿಜ್ಜ ಎಕ್ಲೊಚ್ ಬಾವ್ಡೊ. ತುಜೊ ಆಜೊ ಖಂಯ್ ಪಿಯೆವ್ನ್ ಮೆಲ್ಲೊ ಕೋಣ್ ಜಾಣಾಂ".
"ತುಜೊ ಪಿಜ್ಜ ಘರಾಂತ್ ಎಕ್ಲೊಚ್ಚ್ ಬಾವ್ಡೊ ಮ್ಹಣೊನ್ ಶ್ಯಾಮಣ್ಣಾನ್ ಎಲ್ಲಿ ಕುಂಕ್ಡಾ ಕಡಿ ಆನಿ ಮಾಸ್ಳಿ ಭಾಂದುನ್ ದಿಲಿ ಪಳೆ, ಫಾಂತ್ಯಾರ್ ಪಾಂಚ್ ವೊರಾರ್ ಘರಾ ಯೆತಾಸ್ತಾನಾ, ತ್ಯಾ ನ್ಹಂಯ್ ದೆಗೆರ್ ಏಕ್ ವಾಟ್ ಆಸಾನ್, ತಿಚ್ ವಾಟ್ ತಾಂತುಂ ತುಜಿ ಆವಯ್ ಕೆದಾಳಾರೀ ವಸ್ತುರ್ ಉಂಬ್ಳುಂಕ್ ವೆತಾ. ತ್ಯಾಚ್ ವಾಟೆನ್ ಪಡ್ಲೊ.
ಆಜಿ ಮುಖಾರುನ್ ಮ್ಹಣಾಲಿ. "ತಶೆಂಚ್ಚ್ ಯೆತಾನಾ ನ್ಹಂಯ್ತ್ ಕಿತೆಂಗಿ ದಿಸ್ತಾ. ಧವೊ ಬೋಳ್ ಮಂಡೊ ಆನಿ ತಾಚೆ ಮಧ್ಗಾತ್ ಕಾಳ್ಯಾ ಶಿಮ್ಟಿ, ಉದ್ಕಾಂತ್ ವಯ್ರ್ ಸಕಯ್ಲ್ ವೆತೆ ಆಸಾ. ಕಾಲೆಂ ಮ್ಹಣ್ ಪಳೆತಾಂ. ಶಂಕ್ರಭಟಾಚೊ ಪೂತ್ ತಾಣಿಂ ಮರೊನ್ ಎದೊಳೊಚ್ಚ್ ದೋನ್ ವರ್ಸಾಂ ಜಾಲ್ಲಿಂ ಮ್ಹಣ್ತಾ. ತೊ ಮ್ಹಜೆ ಲಾಗಿಂಚ್ ಯೆತೆ ಆಸಾ. ಜೀವ್ ಆಸಾಂಗಿ ಹಾಂವ್."
"ಹಾತಾಂತ್ ಮಾಸ್ಮಾಸ್ಳಿ ಆಸ್ಲ್ಯಾರ್ ಭೂತ್ ಪಾಟ್ಲ್ಯಾನ್ ಯೆತಾತ್ ಮ್ಹಣ್ ತುಜೊ ಪಿಜ್ಜಾ ಸಾಂಗ್ತಾಲೊ. ಪುಣ್ ಹ್ಯಾ ಬಾಮುಣ್ಯಾಂಚ್ಯಾಕ್ ಕಿತ್ಯಾಕ್ ಮಾಸ್ಮಾಸ್ಳಿ ಹಾಬಾ ಮ್ಹಣ್ ಧಯ್ರ್ ಕೆಲೆಂ ಪಳೆಂ ಹಾಂವೆಂ."
ಏಕ್ ಲಾಂಬ್ ಶ್ವಾಸ್ ಘೆವ್ನ್ ಆಜ್ಯೆನ್ ಮುಖಾರ್ಸಿಲೆಂ" ಮೆಲ್ಲಿಂ ದಿಸ್ಲ್ಯಾರ್ ಪಾಟಿಂ ಘುಂವೊನ್ ಪಳೆಂವ್ಕ್ ನಜೊ ಖಂಯ್. ಜೋರಾನ್ ಉಲವ್ನಂಚ್ಚ್ ಆಯ್ಲಿಂ. ಕಶಿಂ ಘರಾ ಪಾವ್ಲಿಂ ದೆವಾ. ಮ್ಹಾಕಾ ಗೊತ್ತುನಾ. ಮಾಗಿರ್ ತುಜ್ಯಾ ಪಿಜ್ಜಾನ್ ಮಾಸ್ಮಾಸ್ಳಿ ಸಮಾ ಆಂಬುಡ್ಲಿ".
ಆಜ್ಯೆನ್ ಇತ್ಲೆಂ ಮ್ಹಣ್ತಾನಾ ಕಿಸ್ಣಾಚ್ಯಾ ತೊಂಡಾಂತ್ ಉದಾಕ್ ಯೇವ್ನ್ ಹೆವ್ಶಿಲ್ಯಾನ್ ಮುತೊಂಕ್ಯಿ ಜಾವ್ನ್ "ಹಾಂವ್ ಮುತೊನ್ ಯೆತಾಂ ಅಜ್ಜಿ" ಮ್ಹಣ್ ಧಾಂವೊನ್ ಭಾಯ್ರ್ ಗೆಲೊ.
ಮುತೊಂಕ್ ಗೆಲ್ಲ್ಯಾಕಡೆ ಪಾಟ್ಲ್ಯಾನ್ ಕೋಣ್ ತರಿ ಅಸಲ್ಲ್ಯಾಪರಿಂ ಬೊಗುನ್ ಭಿಂಯಾನ್ ಎಕಾಚ್ ಬಕ್ಕಾರಾನ್ ಘರಾ ಪಾವ್ಲ್ಲೊ. ಘರಾ ಯೆತಾನಾ ಅಜಿ ನಿದೊನ್ ಘೊರೆತಾಲಿ. ಕೃಷ್ಣಾಚ್ ಆವಯ್ ರಾಂದ್ಚ್ಯಾ ಕುಡಾಂತ್ "ಸಕಾಳಿಂ, ಸಾಂಜ್, ರಾತ್ ಮ್ಹಣ್ ಕಾಂಯ್ನಾ. ಸಗ್ಳೊ ದೀಸ್ ಖಾಂವ್ಚೆ, ನಿದ್ಚೆಂ" ಮ್ಹಣ್ ಪುರ್ಪುರ್ತಾಲಿ. ತೆವ್ಶಿನ್ ಮನ್ ದೀನಾಸ್ತಾನಾ, ತೆಂ ಪೂರಾ ಆಪ್ಣಾಕ್ ಲಗ್ತಿ ಜಾಲ್ಲೆಂ ನ್ಹಯ್ ಮ್ಹಣೊನ್ ಇಷ್ಟಾ ಪ್ರಸಾದಾಚ್ಯಾ ಘರಾ ಕೃಷ್ಣಾ ಭಾಯ್ರ್ ಸರೊನ್ ಗೆಲೊ.
ವರ್ಸಾಂ ಧಾಂವ್ತಾನಾ ಕೃಷ್ಣಾಕ್ ಘರ್ಚ್ಯಾ ಹುನ್ಸಾಣೆಂ ಸವೆಂ ಗಾಂವಾಂತ್ ಶಾಂತ್ ರಿತಿನ್ ಝಳ್ಚ್ಯಾ ಲೊಕಾಚ್ಯಾ ಚಿಂತ್ನಾಂಚಿ ಹುನ್ಯಿ ಲಾಗೊಂಕ್ ಸುರು ಜಾಲ್ಲಿ. ಪುಣ್ ಹ್ಯಾ ಸರ್ವಾಂತ್ ಹಾಂವ್ಯೀ ಏಕ್ ವಾಂಟೊ ಜಾಂವ್ಚ್ಯಾರ್ ಆಸಾಂ ಮ್ಹಣ್ ತಾಣೆಂ ಸ್ವಪ್ಣಾಂತ್ಯೀ ಚಿಂತುಂಕ್ ನಾ. ತ್ಯಾ ಗಾಂವ್ಚ್ಯಾ ಲೊಕಾಂನಿ ತ್ಯಾ ಗಾಂವ್ಚ್ಯಾ ಪ್ರಸಣಾಥಾವ್ನ್ ಭಾಯ್ರ್ ಆಸೊಂಕ್ ಸಾಧ್ಯ್ ಆಸಾವೆ?
ಗಾಂವಾಕ್ ಕರೆಂಟ್ ಯೇವ್ನ್ ದೋನ್ ತೀನ್ ವರ್ಸಾಂ ಜಾಲ್ಲಿಂ ಮಾತ್ರ್. "ಆನಿಂ ಖಂಯ್ ಮೆಲ್ಲಿಂ, ಹ್ಯಾ ಉಜ್ವಾಡಾಕ್" ಮ್ಹಣ್ ಕೃಷ್ಣಾಚ್ಯಾ ಆಜ್ಯೆನ್ ಪಯ್ಲೆ ಪಾವ್ಟಿಂ ಘರಾಂತ್ ತಶೆಂ ಭಾಯ್ರ್ ರಸ್ತ್ಯಾರ್ ತಿತ್ಲೊ ಉಜ್ವಾಡ್ ಪಳೆವ್ನ್ ಸಾಂಗ್ಲ್ಲೆಂ.
ಪಯ್ಲೆಂ ಪಾವ್ಟಿಂ ಕೃಷ್ಣಾಚಾ ಘರಾ ಟಿ.ವಿ. ಯೆತಾನಾ ಸಕ್ಡಾವರ್ನಿಂ ಚಡ್ ಸಂತೊಸ್ ಪಾವ್ಲ್ಲೊ ಕೃಷ್ಣಾ. ಪರ್ಬುಚ್ಯಾ ಘರಾ ಗೊಮ್ಟಿ ಲಾಂಬ್ ಕಾಡ್ನ್ ಜನೆಲಾಥಾವ್ನ್ ತೀಳ್ನ್ ತೀಳ್ನ್ ಟಿ.ವಿ. ಪಳೆವ್ನ್ ತಾಚೆಂ ಸತ್ತ್ಯಾನಾಸ್ ಜಾವ್ನ್ ವೆತಾಲೆಂ. ಟಿ.ವಿ. ಪಳೆಂವ್ನ್ಗಿ, ಗೊಮ್ಟಿ ದುಕ್ಚ್ಯಾವಿಶಿಂ ಚಿಂತ್ಚೆಂಗಿ. ಕಶೆಂಯಿ ಕಿಸ್ಣಾಕ್ ಹ್ಯಾ ಕಷ್ಟಾ ಥಾವ್ನ್ ಸುಟ್ಕಾ ಮೆಳ್ಲ್ಲಿ.
ಟಿ.ವಿ. ಹಾಡ್ಲ್ಲೊ ಬಾಪುಯ್ ಕಿತ್ಲೊ ಬರೊ ಮ್ಹಣ್ ಭೊಗ್ಲ್ಲೆಂ ತಾಕಾ. ತಾಚಿ ಪಿಯೆಂವ್ಚಿ ಸವಯ್ ಏಕ್ ಸೊಡ್ಲ್ಯಾರ್.
ಆಜ್ಯೆಕ್, ನಾತ್ವಾಕ್ಯಿ ಟಿ.ವಿ. ಂತ್ ಯೆಂವ್ಚ್ಯಾ ಭೂತಾಚ್ಯಾ ಕಾಣ್ಯೆವರ್ವಿಂ ಭಾಜ್ಲ್ಲೆಂ ಮೆಳ್ಲ್ಲೆಂ. ಟಿ.ವಿ.ಂತ್ ಮೆಲ್ಲಿಂ ಆಯಿಲ್ಲ್ಯಾ ತೆದ್ನಾಂ "ತುಂವೆಂ ಪಳೆಯಿಲ್ಲೆ ಭೂತ್ ಆಸೆಚ್ಚ್ ಆಸಲ್ಲೆಗಿ ಅಜ್ಜಿ" ಮ್ಹಣ್ ನಾತ್ವಾನ್ ವಿಚಾರ್ತಾನಾ "ತಾಂಚೆ ಸುರೊಪ್ ಆಶೆಂ ಆಸ್ತಾಗೀ ನಾಂಗೀ. ಇತ್ಲಿ ಸೊಬಿತ್ ಚೆಡ್ವಾಂ ಪುಣಿ ಅಸಾನಾಂತ್ರೆ". ಮ್ಹಣ್ ದೊಳೆ ಲ್ಹಾನ್ ಕರ್ನ್ ಸಾಂಗ್ತಾಲಿ. ಹಾಂಚೆ ದೊಗಾಚೆ ರಾಮಾಯಣ್ ಆಯ್ಕೊನ್ ಉರ್ಲ್ಲ್ಯಾಂಕ್ ಖಂಯ್ ನಾತ್ಲ್ಲೊ ರಾಗ್ ಯೆತಾಲೊ.
ಪುಣ್ ಕೃಷ್ಣಾಚೊ ಬಾಪುಯ್ ’ಟೈಟ್’ ಜಾಲ್ಲ್ಯಾ ದೀಸ್ ಟಿ.ವಿ.ಯಿ ನಾ, ಜೆವಾಣ್ಯೀ ನಾ.
ಕೃಷ್ಣಾಚ್ಯಾ ಸೊಬಿತ್ ಬಾಳ್ಪಣಾಂತ್, ಸೊಬಿತ್ ಅನ್ನಾಡ್ಪಣಾಂನಿ, ಬಾಪಾಯ್ನ್ ಸೊರೊ ಪಿಯೆಂವ್ಚ್ ಏಕ್ ಸೊಡ್ಲ್ಯಾರ್, ಉರ್ಲ್ಲೆಂ ಪೂರಾ ಬರೆಂ ಆಸ್ಲ್ಲೆಂ. ಪುಣ್ ಬಾಪಾಯ್ಚ್ಯಾ ಪಿಯೆವ್ಣ್ಯಾ ವರ್ವಿಂ ತಾಕಾ ಮಸ್ತ್ ಭೊಗುಂಕ್ ಮೆಳೊಂಕ್ ನಾತ್ಲ್ಲೆ. ಪುಣ್ ತಾಚೆಧ್ವಾರಿಂ ಮಾಜ್ವೊಂಕ್ ಜಾಯ್ನಾಸ್ಲ್ಲೊ ಘಾಯ್ ಜಾಲ್ಲೊ ಹ್ಯಾ ಘಡಿತಾ ಉಪ್ರಾಂತ್.
ಸದಾಂಚ್ ಪುರ್ಪುರ್ಯಾನಿಂಚ್ ಸಮಧಾನ್ ಬೊಗ್ತೆಲ್ಯಾ ಕೃಷ್ಣಾಚಿ ಆವಯ್, ಏಕ್ ದೀಸ್ ಕೃಷ್ಣಾ ನ್ಹಂಯ್ತ್ ಮಾಸ್ಳಿ ಧರುನ್, ಶಿರ್ಲ್ಯಾ ಮಾಂಡ್ಯಾಕ್ ಫಾತರ್ ಉಡವ್ನ್, ಪೆರಿ ರೂಕ್ ಚಡ್ನ್ ವಯ್ರ್ ಪಂದಾ ಕರ್ನ್ ಪಾಟಿಂ ಯೆತಾನಾ ಉಜೊ ಜಾಲ್ಲಿ. ಕೃಷ್ಣಾಕ್ ತಾಚ್ಯಾ ಆವಯ್ಚೊ ಅವ್ತಾರ್ ಪಳೆವ್ನ್ ಬ್ಯೆಂ ದಿಸ್ಲೆಂ. ಅಜಿ ಸದಾಂಚೆಪರಿಂ ಘೊರೆತಾಲಿ.
ಕೃಷ್ಣಾ ಪೇಜ್ ಜೆಂವ್ಚೆಂ ಕಾಮ್ ತಿರ್ಸುನ್, ಪರ್ತುನ್ ಇಷ್ಟ್ ಪ್ರಸಾದಾಕ್ ದಿಲ್ಲ್ಯಾ ಭಾಸಾವ್ಣ್ಯಾಂ ಪರ್ಮಾಣೆಂ ನ್ಹಂಯ್ತ್ ಕುರ್ಲ್ಯೊ ಧರುಂಕ್ ಭಾಯ್ರ್ ಸರ್ನ್ ಗೆಲೊ.
ಸಾಂಜೆರ್ ಪೊವ್ಲೆಂತ್ ಹಾಡ್ಲ್ಲ್ಯೊ ಕುರ್ಲ್ಯೊ, ಕೃಷ್ಣಾನ್ ಆಪ್ಣಾ ಮುಖ್ಲೆಂ ದೃಶ್ಯ್ ಪಳೆತಾನಾ, ಸಕಯ್ಲ್ ಪಡ್ಲ್ಲ್ಯ್, ಹೆವ್ಶಿನ್ ತೆವ್ಶಿನ್ ಧಾವ್ಲ್ಲ್ಯೊ. ದುಸ್ರೊ ಖಂಚ್ಯೊಯಿ ವೇಳ್ ಜಾಲ್ಲೊ ಜಾಲ್ಯಾರ್ ತೊಯಿ ತಾಂಚ್ಯಾ ಪಾಟ್ಲ್ಯಾನ್ ಧಾಂವ್ತೊ.
ಪುಣ್ ದೊಳ್ಯಾಂ ಮುಖ್ಲೆಂ ದೃಶ್ಯ್ ಪಳೆವ್ನ್ ಆಪುಣ್ ಖಂಯ್ ಆಸಾ ಮ್ಹಣ್ ಭೊಗ್ಲ್ಲೆಂ ತಾಕಾ. ಹುಲ್ಪೊನ್ ಕರ್ಪೊನ್ ಗೆಲ್ಲ್ಯಾ ತಾಚ್ಯಾ ಬಾಪಾಯ್ನ್ ಗೊಣಿಯೆಂತ್ ಭಾಂದುನ್ ರಿಕ್ಷಾರ್ ದವರ್ತಾಲೆ. ತಾಚಿ ಆವಯ್ ಮಾತ್ಯಾಕ್ ಹಾತ್ ಧರ್ನ್ ಬಸ್ಲ್ಲಿ. ಅಜಿ ಹರ್ದೆಂ ಬಡವ್ನ್ ಉರ್ಡಾಲಿ. "ಖಾವ್ನ್ ಸೊಡ್ಲೆಂ ಹ್ಯಾ ರಾಕ್ಶಿಣೆನ್, ಆಯ್ಯೋ ಮ್ಹಜೊ ಪೂತ್" ಮ್ಹಣ್ ಬೊಬಾಟ್ತಾಲಿ. ತಾಚ್ಯಾ ಬಾಪಾಯ್ಚ್ಯೊ ಆಂಗಾಚಿ ಕಾತ್ ಉಕಲ್ನ್ ಯೆಂವ್ಚಿ ಪಳೆವ್ನ್ ಕೃಷ್ಣಾಕ್ ವೊಕೊಂಕ್ ಆಯ್ಲೆಂ. ತ್ಯಾ ಸ್ಥಿತೆಂತ್ ಕಿತೆಂ ಕರ್ಚೆಂ ಮ್ಹಣ್ ಕಳಾನಾಸ್ತಾನಾ ಹೆವ್ಶಿನ್ ತೆವ್ಶಿನ್ ಘುವೊಂಕ್ ಲಾಗ್ಲೊ. ತಾಚೆ ಪಾಯ್ ಕಾಂಪ್ತಾಲೆ.
ತಾಚೊ ಬಾಪುಯ್ ಪಿಯೆವ್ನ್ ಘರಾ ಯೇವ್ನ್ ಹಿಣ್ಸುಂಚೆ ತಾಂಕಾನಾಸ್ತಾನಾ ತಾಚೆ ಆವಯ್ನ್ ತ್ಯಾ ದೀಸ್ ಇಲ್ಲೆಶೊ ಚಡ್ಚ್ ರಾಗ್ ದಾಕಯಿಲ್ಲೊ. ಉತ್ರಾಕ್ ಉತರ್ ಮೆಳೊನ್ ಝಗ್ಡೆಂ ಜಾವ್ನ್, ತಾಚ್ಯಾ ಬಾಪಾಯ್ನ್ ಆಮಾಲ್ಪಣಾಚ್ಯಾ ಪಿಶೆಂಪಣಾರ್ ’ಹಾಂವ್ ಹಾಂಗಾ ಆಸೊಂಕ್ ನಜೊ, ತುಜಿ ಗತ್ ಕರ್ತಾ ಪಳೆಂ’ ಮ್ಹಣೊನ್ ಆಂಗಾರ್ ಚಿಮ್ಣೆ ತೇಲ್ ವೊತುನ್ ಉಜೊ ಪಾಲ್ವಯಿಲ್ಲೊ ಕೃಷ್ಣಾಚ್ಯಾ ಆವಯ್ನ್. ಪುಣ್ ಉರ್ಲ್ಲ್ಯಾಂನಿ ಕೊಣೆಂಯಿ ತಾಚ್ಯಾ ಆವಯ್ಚ್ಯೊ ರಡ್ಣ್ಯಾಕ್ ಆವ್ಕಾಸ್ ದೀಂವ್ಕ್ ನಾ.
ತ್ಯಾ ರಾತಿಂ ಜೆವಾಣ್ಯಿನಾ ಕಾಂಯ್ ನಾ. ಆಜ್ಯೆಚೆಂ ರಡ್ಣೆಂ, ಪುರ್ಪುರೆ ಆಯ್ಕೊತಾಲೆ. ತಾಚಿ ಭಯ್ಣ್ ಕಿತೆಂ ಕರ್ಚೆಂ ಮ್ಹಣ್ ಕಳನಾಸ್ತಾನಾ ಹುಸ್ಕಾರ್ತಾಲಿ. ತಾಚಿ ಆವಯ್ ಮಾತ್ರ್ ಖಂಯ್ಗಿ ದೀಷ್ಟ್ ಜೊಕುನ್ ಮೌನ್ ಜಾವ್ನ್ ಬಸಲ್ಲಿ, ತಾಚೆ ಭಾವ್ ಆನಿಕೀ ಘರಾ ಯೇಂವ್ಕ್ ನಾತ್ಲ್ಲೆ.
ತ್ಯಾ ರಾತಿಂ, ತಾಚ್ಯಾ ಬಾಪಾಯ್ಚೊ ಹುಲ್ಪಾಲ್ಲೊ ಜೀವ್ ಚಲೊನ್ ಆಯಿಲ್ಲ್ಯಾಪರಿಂ, ಟಿ.ವಿ. ರ್ ಯೆಂವ್ಚ್ಯಾ ಭೂತಾಪರಿಂ ಆವಯ್ ದಿಸೊಂಕ್ ಲಾಗ್ಲ್ಲ್ಯಾ ತೆದ್ನಾಂ, ಸ್ವಪ್ಣಾಂತ್ಲೊ ಉಟೊನ್ ತೊ ಬೊಮಾರ್ಲ್ಲೊ. ಆಜ್ಯೆಕ್ ಪುಟ್ಲುನ್ ಧರ್ನ್ ನಿದ್ಲ್ಲೊ.
ದುಸ್ರ್ಯಾ ದಿಸಾ ಸರ್ವಾಂ ಸಾಂಗಾಂತಾ ತೊಯಿ ಆಸ್ಪತ್ರೆಕ್ ಭಾಯ್ರ್ ಸರೊನ್ ಗೆಲೊ. ತಾಚೊ ಬಾಪುಯ್ ಆಸ್ಚ್ಯಾ ಕುಡಾ ಥಾವ್ನ್ ಕುಸ್ಲ್ಲಿ ಘಾಣ್ ಮಾರ್ತಾಲಿ. ಕಿಸ್ಣಾಕ್ ಸೊಸುಂಕ್ ತಾಂಕ್ಲೆನಾ. ಪಯ್ಸ್ ಥಾವ್ನ್ ದಿಸ್ಚ್ಯಾ ಬಾಪಾಯ್ಕ್ ಪಳೆವ್ನ್, ಪಳೆಂವ್ಕ್ ಜಾಯ್ನಾಸ್ತಾಂ, ಥಂಯ್ಚೊ ತೊ ಧಾಂವೊನ್ ಆಯ್ಲೊ. ತ್ಯಾಚ್ ದೀಸ್ ತಾಚೊ ಬಾಪುಯ್ ಒಕ್ತಾಂನಿ ಕಾಂಯ್ ಬರೆಂಪಣ್ ಜಾಯ್ನಾಸ್ತಾನಾ ಮೋರ್ನ್ ಪಾವ್ಲ್ಲೊ.
ಸಕ್ಡಾಂ ಸಾಂಗಾತಾ ಕಿಸ್ಣ ಆಪ್ಣಾ ಮುಖಾರ್ ಚಲ್ಚ್ಯಾ ನಾಟ್ಕುಳ್ಯಾಕ್ ಪ್ರೇಕ್ಶಕ್ ಜಾವ್ನಾಸ್ಲ್ಲೊ.
ಹ್ಯಾ ಘಡಿತಾ ಉಪ್ರಾಂತ್ ತಾಚ್ಯಾ ಆವಯ್ಚೆ ಸದಾಂಚೆ ಪುರ್ಪುರೆಚ್ ರಾವ್ಲ್ಲೆ. ಏಕ್ ಥೆಂಬೊ ದೂಃಖ್ ತಿಚ್ಯಾ ಪೊಲ್ಯಾ ಥಾವ್ನ್ ದೆವೊಂಕ್ನಾತ್ಲ್ಲೆಂ. ದೀಸ್ ತಶೆಚ್ ಧಾಂವ್ತಾಲೆ. ಆಚಿ ಆಜಿ ಆರ್ದಿ ಪಿಶಿ ತಶಿ ಜಾಲ್ಲಿ. ಕೃಷ್ಣಾ ಘರಾಚ್ ಆಸಾನಾತ್ಲ್ಲೊ.
"ಕೃಷ್ಣಾಚಿ ಆವಯ್ ಪಳೆ, ಘೊವ್ ಮೆಲ್ಲೊಚ್ ಮೆಲೊ. ಕಶಿ ಜಿವಾಂತ್ ಬರಿ ಜಾಲ್ಯಾ ಪಳೆ.
ಏಕ್ ದೀಸ್ ವಾಟೆರ್ ವೆತಾನಾ ಹೆಂ ಆಯ್ಕಲ್ಲ್ಯಾ ಕೃಷ್ಣಾಕ್ ಮೆಲ್ಲ್ಯಾಪರಿಂ ಜಾವ್ನ್ ಘರಾ ಯೇವ್ನ್ ತಾಣೆಂ ಆವಯ್ಕ್ಚ್ ಸೂಕ್ಷ್ಮ್ ಥರಾನ್ ಪಳೆಂವ್ಕ್ ಧರ್ಲ್ಲೆಂ. ನೋವ್-ಧಾ ವರ್ಸಾಂಚ್ಯಾ ಭುರ್ಗ್ಯಾನ್ ಆಪ್ಣಾಕ್ಚ್ ಪಳೆಂವ್ಚೆ ಪಳೆವ್ನ್ ಆವಯ್ಕ್ ಕಿತೆಂ ಭೊಗ್ಲೆಂ ಕೊಣ್ಣಾ. ಆಮಾಸೆ ಪುನಾವಾಕ್ ಏಕ್ ಪಾವ್ಟಿಂ ಇಸ್ಕಾಲಾಕ್ ವೆಚ್ಯಾ ಕೃಷ್ಣಾಕ್ ದುಸ್ರ್ಯಾ ದಿಸಾ ನವಿ ಸ್ಲೇಟ್ ಆನಿ ಪೊತೆಂ ಆಯಿಲ್ಲೆಂ.
ತಾಚೆ ಆವಯ್ನ್ ತಾಕಾ ಲಾಗಿಂ ಆಪವ್ನ್ "ಮ್ಹಜೆಂ ಜೀವನ್ ಆಶೆಂ ಜಾಲೆಂ ಪುತಾ, ತುವೆಂ ಪುಣಿ ಬರೊ ಭುರ್ಗೊ ಜಾಯ್ಜೆ. ಬರೆಂ ಶಿಕೊನ್ ಇಸ್ಕಾಲಾಕ್ ವಚಾಜೆ ಕಳ್ಳೆಂಮೂ". ಇತ್ಲೆಂ ಸಾಂಗ್ತಾನಾ ತಿಚ್ಯಾ ದೊಳ್ಯಾಂತ್ ದುಃಖಾಂ ಭರ್ಲ್ಲಿಂ.
ಏಕಾ ಹಾಪ್ತ್ಯಾ ಥಾವ್ನ್ ಕೊನ್ಶಾರ್ ಆಸ್ಚ್ಯಾ ಆಜ್ಯೆನ್ ಹೆಂ ಆಯ್ಕೊನ್ "ಘೊವಾಕ್ ಗೀಳ್ನ್ ಸೊಡ್ಲೆಂಯ್. ಆಸ್ಚ್ಯಾ ಮ್ಹಜ್ಯಾ ನಾತ್ವಾಕ್ ಕಿತೆಂ ಕರುಂಕ್ ಭಾಯ್ರ್ ಸರ್ಲ್ಯಾಂಯ್" ಮ್ಹಣೊನ್ ಜ್ಯೋರಾನ್ ರಡೊಂಕ್ ಲಾಗ್ಲಿ.
ಕೃಷ್ಣಾಕ್ ಕಿತೆಂ ಕರ್ಚೆಂ ಮ್ಹಣ್ ಕಳನಾಸ್ತಾನಾ, ಇಸ್ಕಲಾಚ್ಯಾ ವಾಟೆ ಬದ್ಲಾಕ್, ಸ್ಲೇಟ್, ಪೊತೆಂ ಘೆವ್ನ್ ಶೀದಾ ನ್ಹಂಯ್ಚಿ ವಾಟ್ ಧರ್ನ್ ಗೆಲೊ. ಆಶೆಂ ಕೃಷ್ಣಾಚೆಂ ಇಸ್ಕಾಲ್ ರಾವೊನ್ ರಾವೊನ್ ಮುಖಾರ್ ಚಲ್ತಾಲೆಂ.
ಪಾಂಚ್ವ್ಯಾ ಕ್ಲಾಸಿಕ್ ಯೆತಾನಾ ಕೃಷ್ಣಾಕ್ ಅಕ್ಶರಾಂಚಿ ವಳೊಕ್ ಏಕ್ ಆಸ್ಲ್ಲಿ. ಉರ್ಲ್ಲೆಂ ಕಾಂಯ್ ತಾಚ್ಯಾ ತಕ್ಲೆ ಬಿತರ್ ರಿಗ್ಲೆನಾ.
ಕೊಣೆಂಗಿ ತುಜ್ಯಾ ಬಾಪಾಯ್ಚೊ ಭೂತ್, ತ್ಯಾ ಗಡಂಗಾಚ್ಯಾ ಮುಖಾರ್ ಆಸ್ಚ್ಯಾ ಫಾತ್ರಾವಯ್ರ್ ಸದಾಂ ದಿಸ್ತಾ ಮ್ಹಣ್ ಸಾಂಗ್ಲ್ಲ್ಯಾ ತೆದಾಳಾ ಭಿಂಯೆವ್ನ್ ಕಂಗಾಲ್ ಜಾಲ್ಲೊ. ಚ್ಯಾರ್ ದೀಸ್ ಹೆಂಚ್ ನೀಬ್ ಘೆವ್ನ್ ಇಸ್ಕಲಾಕ್ ವೊಚೊಂಕ್ಯ್ ನಾತ್ಲ್ಲೊ.
ಆಜ್ಯೆಚ್ಯಾ ಕಾಣಿಯೆಂತ್ಲೊ ಭೂತ್, ಬಾಪಾಯ್ಚೊ ಭೂತ್, ಆಖ್ರೇಕ್ ಗಾಂವಾಂತ್ ಜೀವ್ ಆಸ್ಚ್ಯಾ ಮನ್ಶ್ಯಾಂಚೆ ಭೂತ್ ಪೂರಾ ತಾಚೆರ್ ಝುಜ್ ಮಾಂಡ್ತಾ ತಶೆಂ ತಾಕಾ ಭೊಗ್ತಾಲೆಂ. ತಾಣೆಂ ಸಮಾಧಾನ್ ಜೊಡ್ಚೆಂ, ನ್ಹಂಯ್ತ್ಗೀ, ತೊಟಾಂತ್ಗೀ ವಾ ಟಿ.ವಿ. ಪಳೆವ್ನ್ಗಿ.
ಟಿ.ವಿ.ರ್ ಯೆಂವ್ಚ್ಯಾ ತ್ಯಾ ರಂಗಾಳ್ ಜೀವನಾಕ್ ಆಪ್ಲ್ಯಾ ಜಿಣ್ಯೆಚ್ಯಾ ತ್ಯಾ ಪರಿಗತೆಕ್ ಖಂಯ್ ತಾಳ್ ಪಡಾನಾಸ್ತಾನಾ, ತೆಂ ತಾಕಾ ಸಮ್ಜಲ್ಲ್ಯಾ ತೆದ್ನಾಂ ತಾಕಾ ಭಾರಾ-ತೆರಾ ವರ್ಸಾಂ.
ತಿತ್ಲ್ಯಾರ್ಚ್ ತಾಚಿ ಭಯ್ಣ್ ಘರ್ ಲಾಗ್ಶಿಲ್ಯಾ ಚೆಡ್ಯಾಲಾಗಿಂ ಕೊಣಾಕಡೆಯಿ ಸಾಂಗಾನಾಸ್ತಾನಾ ಕಾಜಾರ್ ಜಾಲ್ಲೆಂ. ಆನಿ ಲಾಗ್ಶಿಲ್ಯಾ ಶೆರಾಂತ್ ರಾವ್ತಾಲೆಂ.
"ಆವಯ್ನ್ ಸಮಾ ಆಸ್ಲ್ಯಾರ್ನೆ, ಧುವೆನ್ ಸಮಾ ಆಸ್ಚೆ" ಮ್ಹಳ್ಳಿಂ ಉತ್ರಾಂ ಸುಮಾರ್ ದೀಸ್ ಹೆವ್ಶಿನ್ ತೆವ್ಶಿನ್ ಘುಂವ್ಲಿ.
ಹ್ಯಾ ಸರ್ವ್ ಸಂಗ್ತಿ ಧ್ವಾರಿಂ ಆಮ್ಚ್ಯಾ ಕಥಾನಾಯಕಾಚ್ಯಾ ಜೀವನಾಂತ್ ಜಾಲ್ಲಿ ಮಹತ್ತರ್ ಬದ್ಲಾವಣ್ ಮ್ಹಳ್ಯಾರ್, ಕೃಷ್ಣಾ ಆತಾಂ ಕೊಣಾಯಿಕಡೆ ಉಲಯ್ನಾತ್ಲ್ಲೊ. ತಾಣೆಂ ಮಾಸ್-ಮಾಸ್ಳಿ ಖಾಂವ್ಚಿ ಸೊಡ್ಲ್ಲಿ. ಮಾಸ್ ಮಾಸ್ಳಿ ಖಾತಾನಾ ತಾಕಾ ಬಾಪಾಯ್ಚ್ಯೊ ಆಂಗಾಥಾವ್ನ್ ಉಕಲ್ನ್ ಯೆಂವ್ಚಿ ಕಾತ್ಚ್ ಉಡಾಸಾಕ್ ಯೆತಾಲಿಂ.
ತಾಚ್ಯಾ ಬಾವಾಂಪರಿಂ ಆಟ್ವೆ ಕ್ಲಾಸಿಚ್ಯಾ ಮುಖಾರ್ ವಚೊಂಕ್ ತಾಚ್ಯಾನ್ ಜಾಲ್ನಾ. ತಾಚಿ ಆವಯ್ ಧುವೆಕರ್ ವಚೊಂಕ್ ರಾಂವ್ಚೊ ಪ್ರಸ್ತಾಪ್ ಸದಾಂಚ್ ಕರ್ತಾಲಿ. ಅಜಿ ಸರ್ಲ್ಲ್ಯಾ ಉಪ್ರಾಂತ್ ತಾಚೆ ಭಾವ್ ಎಕ್ಲೆಯಿ ಘರಾ ರಾವಾನಾಸ್ತಾನಾ ಆಪ್ಲಿ ವಾಟ್ ಧರ್ನ್ ಚಲ್ಲ್ಲೆ.
ಮೆಲ್ಯಾರಿ ಬಾಯೆಚ್ಯಾ ಘರಾ ಯೆಂವ್ಚೊನಾ ಮ್ಹಣ್ ಕೃಷ್ಣಾಕ್ ಸಾಂಗ್ಲ್ಲೆಂ. ಚೊವ್ದಾಂ ವರ್ಸಾಂಚೊ ಚೆಡೊ ಭುರ್ಗೊ ಪಾಡಾರಿ ಜಾಲಾ ಮ್ಹಣ್ ಗಾಂವಾಂತ್ ಖಬಾರ್ ಜಾಲ್ಲಿ. ಗಾಂವ್ಚೆಂ ಎಕ್ಲೆಂ ಚೆಡುಂಯಿ ತಾಚ್ಯಾ ಕಡೆ ಉಲಯ್ನಾತ್ಲ್ಲೆಂ.
ಆಜಿ ಎಕ್ಲೆಕ್ ಸೊಡ್ನ್, ಜಿಣ್ಯೆಚ್ಯಾ ಸರ್ವ್ ಸಂಗ್ತಿಂ, ಮನ್ಶಾವಯ್ರ್ ತಾಕಾ ಖಂಯ್ ನಾತ್ಲ್ಲೊ ದ್ವೇಷ್ ಉಬ್ಜಾಲ್ಲೊ. ಹಾಂವ್ಯಿ ಘರ್ ಸೊಡ್ನ್ ವೆತಾ ಮ್ಹಣ್ ತಾಣೆಂ ಕಿತ್ಲೆಂ ಪಾವ್ಟಿಂ ಚಿಂತ್ಲ್ಯಾರ್ಯಿ ರಾತಿಚ್ಯಾ ಭೂತಾಚ್ಯಾ ಭ್ಯೆಂ ಇತ್ಲೆಂ ನಾಡ್ತಾಲೆಂಕೀ, ಆಖ್ರೇಕ್ ಪಾಂಯ್ ಘರಾ ಕುಶಿನ್ಂಚ್ಚ್ ಚಮ್ಕಾತೆಲೆ. ಹಾಂವ್ ಕಿತ್ಯಾಕ್ ಪಾಡಾರಿ? ಹಾಂವ್ ಕಿತ್ಯಾಕ್ ಅಸೊಂ. ಹ್ಯಾ ಸವಾಲಾಂನಿಚ್ ತಾಚಿ ಮತ್ ಪಿಸಾಂತುರ್ ಜಾವ್ನ್ ಸಗ್ಳ್ಯಾವಯ್ರ್ ಉಜೊ ವೊಂಕ್ತಾಲೊ.
ತ್ಯಾ ಗಾಂವಾಂ ಥಾವ್ನ್ ತಾಚೆಂ ವಿದ್ಯುಕ್ತ್ ನಿರ್ಗಮನ್ ಜಾಲ್ಲೆಂ ಹ್ಯಾ ಕಾರಣಾ ಥಾವ್ನ್.
ತ್ಯಾ ಗಾಂವಾಂತ್ ಪೋಸ್ಟ್ಮೆನ್ ಶ್ರೀಧರಾಚೆಂ ಏಕ್ ಕುಟಮ್. ತಾಕಾ ಚ್ಯಾರ್ ಜಣಾಂ ಚೆಡ್ವಾಂ ಭುರ್ಗಿಂ. ಆವಯ್ ಅಂಗನವಾಡಿ ಶಿಕ್ಶಕಿ. ಘೊವ್ ಬಾಯ್ಲ್ ಘರ್ ಸೊಡ್ನ್ ಕಾಮಾಕ್ ಗೆಲ್ಲ್ಯಾ ತೆದ್ನಾಂ ಭುರ್ಗಿಂಚ್ ಘರಾ ಆಸ್ತಾಲಿಂ.
ತಾಂತ್ಲೆಂ ಎಕ್ಲೆಂ ಚೆಡುಂ ಏಕ್ ದೀಸ್ ನ್ಹಾಣಿಯೆಂತ್ ವಸ್ತುರ್ ಧುವ್ನ್ ಆಸ್ತಾನಾ, ಕೃಷ್ಣಾನ್ ಜನೆಲಾ ಥಾವ್ನ್ ತಿಳ್ಳೆಂ, ಚೆಡ್ವಾನ್ ಸಾರೊಣ್ ಧರ್ನ್ ತಾಕಾ ಧಾಂವ್ಡಾಯ್ಲೆಂ ಮ್ಹಣ್ ಗಾಂವಾರ್ ಸಗ್ಳಿ ಖಬಾರ್ ಜಾಲ್ಲಿ.
ದುಸ್ರ್ಯಾ ದಿಸಾ ಕೃಷ್ಣಾ ಗಾಂವಾಂತ್ ನಾತ್ಲ್ಲೊ. ಆಖ್ರೇಕ್ ಕೃಷ್ಣಾಚಿ ವಾಟ್ ಪಳೆವ್ನ್ ಥಕೊನ್ ತಾಚಿ ಆವಯ್ ಧುವೆಕರ್ ಗೆಲ್ಲಿ.
ಪೋರ್ ಕೊಣೆಂಗಿ ಕೃಷ್ಣಾ ಬೊಂಬಯ್ ಆಸಾ ಮ್ಹಣ್ ಕೃಷ್ಣಾಚ್ಯಾ ಆವಯ್ಕ್ ಖಬಾರ್ ದಿಲ್ಲಿ.
ಬೊಂಬಯ್ಚ್ಯಾ ರಂಗೀನ್ ಉಜ್ವಾಡಾಂ ಮಧೆಂ ಭೂತಾಚೆ ಉಪದ್ರ್ ನಾಂತ್ ಕೊಣ್ಣಾ. ಕೃಷ್ಣಾಚ್ಯಾ ಬಾಪಾಯ್ಚ್ಯೊ ಭೂತಾಚಿ ಆನಿ ಕೃಷ್ಣಾಚಿ ಕಾಣಿ ಗಾಂವಾಂತ್
ಹರ್ಯೇಕ್ ರೂಕ್, ಫಾತರ್, ನಂಯ್ ಸಾಂಗ್ತಾ ತಶೆಂ
ಭೊಗ್ತಾಲೆಂ.
ಪುಣ್ ನಪಂಯ್ಚ್ ಜಾವ್ನ್ ಕಾಣಿ ಜಾಲ್ಯಾ ಕೃಷ್ಣಾಕ್ ವಿಸ್ರಾಲ್ಲೊ(?) ಗಾಂವ್ ಶಾಂತ್ ಆಸ್ಲ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
