ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 1. ಚರುವೊ
ಕ್ಯಾಥರಿನ್ ರೊಡ್ರಿಗಸ್: ಕು|ಕ್ಯಾಥರಿನ್ ರೊಡ್ರಿಗಸ್, ಏಕ್ ಸಮಾಜ್ ಸೆವಕಿ, ಚಿಂತ್ಪಿಣ್, ಕವಯತ್ರಿ, ನಾಟಕ್ ಲಿಖ್ಪಿ, ಕೊಂಕ್ಣಿ ಮಾತ್ರ್ ನ್ಹಂಯ್ ತುಳುವೆಂತ್ ಸಯ್ತ್ ಫಾಮಾದ್. ಹಿಚಾ ಚಡ್ತಾವ್ ಬರ್ಪಾಂನಿ ಸಾಮಾಜಿಕ್ ಹುಸ್ಕೊ ನಿಶೆತಾ ಆನಿಂ ವಾಚ್ಪ್ಯಾಂಕ್ ಆಪ್ಲಿ ಸಾಮಾಜಿಕ್ ಜವಾಬ್ಧಾರಿ ಧಾಖಂವ್ಚಾಂತ್ ಕೆದಿಂಚ್ ಹಿಚಿಂ ಬರ್ಪಾಂ ಸಲ್ವಾನಾಂತ್.
(ಹ್ಯಾ ಕಾಣ್ಯೆಕ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಂತ್ ಪಯ್ಲೆಂ (ರು. 5000) ಇನಾಮ್ ಲಾಭ್ಲಾಂ)
ಕ್ಯಾಥರಿನ್ ರೊಡ್ರಿಗಸ್
’ಹೋ...ಹೋ...’ ಥೈ ಹಾಂಗಾ ಬೊಬಾಟ್. ಗೌಜಿ. ಕೋಣ್ ಅಂಗ್ಡಿಕ್ ಧಾಂವ್ತಾ, ಕೋಣ್ ... ಕುಂಕ್ಡಾಂಕ್ ಧರ್ತಾ, ಸುರೆ, ಸೊರ್ಯಾಕ್ ಬಾಟ್ಲಿ ಮುಟ್ಟಿಂ ಸೊಧ್ತಾ. ಸೈರಿಂ ಯೆತಾತ್ ಮ್ಹಣೊನ್ ಭುರ್ಗಿ ಉಡ್ಕಾಣಾಂ ಘಾಲ್ತಾತ್.
ಆಟಿ ಮಹಿನೊ. ದೋನ್ ದೀಸ್ ಥಾವ್ನ್ ಶಿರಾಂಧಾರಿಚೊ ಪಾವ್ಸ್. ಏಕ್ ಶೆರ್ ತಾಂದುಳ್ ಆಸ್ಲ್ಲೊ ಮಾತೆಂ ಭಾಯ್ರ್ ದವರ್ಚೊ ನಾಂ. ಬಜ್ಜೊಟ್ ಗ್ರಾಮಾಂತ್ ಪಾವ್ಸ್ ಆಜ್ ಲಾಗಾನಾ. ಗ್ರಾಮಾಚ್ಯಾ ದಿವ್ಳಾಚ್ಯಾ ಅಂಗ್ಣಾಂತ್ ಲೊಕಾಚೆಂ ಯೆಣೆಂ. ಸಾಧಾರ್ಣಾಚೆಂ ನ್ಹಯ್. ’ಮಾರಿ’ ಚೆಂ ಕಾಮ್. ಕೊಣಾಕ್ ತರೀ... ಥೊಡಿ ಆಳ್ಸಾಯ್ ಕರಿಯೇತ್ ಪುಣ್ ಮಾರಿಕ್ ನ್ಹಯ್ಯಾಬಾ. ಚಡುಣೆಂ ಜಲ್ಯಾರ್ ರಗಾತ್ ವೊಂಕೊನ್ ಮೊರಾತ್ ದೆಕುನ್ ಆಪಾಪ್ಲೆಂ ಕಾಮ್ ಹಾತಿ ಘೆವ್ನ್ ತಿಚ್ಯಾ ಖುಶೆಕ್ ಖಾಲ್ತಿಮಾನ್ ಘಾಲುಂಕ್ ಪೆಚಾಡ್ತಾಲೊ. ಏಕ್ಲೊ ರಾಂದ್ಣಿರ್ ದವರ್ಲ್ಯಾರ್ ಮೊಡ್ಕೆಕ್ ತಾಂದುಳ್ ಘಾಲ್ತಾನಾ ದುಸ್ರೊ ಉಜೊ ಪೆಟೊಂಕ್ ವೊದ್ದಾಡ್ತಾಲೊ. ರಾತ್ಚ್ಯಾ ಪಾವ್ಸಾಕ್ ಲಾಂಕುಡ್ ಭಿಜೊನ್ ಉಜೊ ಪೆಟೊಂಕ್ ಆಯ್ಕಾನಾ.
ಭರೊ ಭರ್ ಶಿಂಮ್ಟೊ ಜಳ್ಳ್ಯಾರೀ ಧುಂವೊರ್ ಮಾತ್ರ್ ಉಡ್ತಾಲೊ. ಬಜ್ಜೊಟಿಚ್ಯಾ ಕೇರಿಂತ್ ಕಾಜಾರಾಚೊ ಸಂಭ್ರಮ್. ಧೊಲಿಚೆಂ, ಪಿರ್ಲುಕಿಚೆಂ ಸಂಗೀತ್. ತೋಮಿಚ್ಯಾ ಗುಡಾಂತ್ಲೊ ಕೊಂಬೊ ಸಾದ್ ಘಾಲ್ತಾನಾ ತನಿಯಾಚ್ಯಾ ಘರ್ಚಿ ಕೊಂಬಿ ಕಾಂಕಾರ್ತಾಲಿಂ.
’ಅಪ್ಪ... ಪ್ಪಪ್ಪ... ಮಟ ಉಂಡುಗೇ...’ ನಾಚೊನ್ ನಾಚೊನ್ ಪದಾಂ ಗಾಯ್ತಾಲಿಂ. ದೋನ್ ಪೊಡಿ ಮಾಸ್ ಕೆದಾಳಾ ಮೆಳ್ತಾಗೀ ಮಣೊನ್ ಆಂಯ್ಡೆ ಗೊಟ್ತಾಲಿಂ. ರಗ್ಡೊ ದಡಬಡ ಜಾತಾಲೊ. ಕೋರಿ ರೊಟ್ಟಿ’ ತೊವ್ಯಾರ್ ಚುಂಯ್ ಕರುನ್ ಸೊಡೈತಾನಾ, ಭುರ್ಗಿಂ ಆಶೆಚ್ಯಾ ದೊಳ್ಯಾಂನಿ ಪಳೆತಾಲಿಂ. ರಾಂದ್ಣಿ ವೈರ್ ಬಾಂಧ್ಲ್ಯಾ ಮೊಡ್ಲಾರ್ ಸುಕ್ಚ್ಯಾ ಬಾಕ್ರೆಕ್ ಕಶೆಂ ಕಾಡ್ಚೆಂ ಮ್ಹಣೊನ್ ಅಂದಾಚೊ ಕರ್ತಾನಾ ವ್ಹಡಾಂ ಬೆಷ್ಟಾಯ್ತಾಲಿಂ ’ಆಪಡ್ನಾಕಾತ್ ಜೈನಗೆರ್ ಆನಿ ಮಾರಿಕ್ ದವರಿನಾಸ್ತಾನಾ ಕೆಲ್ಯಾರ್ ಪೊಟಾಂತ್ ಖಣ್ಕಣೆಂ ಪಡ್ತಾತ್. ಉತ್ಕಾಡೆ ಸುರು ಜಾತಾ.
ಭಾಯ್ರ್ ವಚಾ. ಖೆಳಾ. ಉಪ್ರಾಂತ್ ರಾತಿಂ ತುಮ್ಕಾಂಚ್. ಭುರ್ಗಿಂ ಲ್ಹಾನ್ ಥೊಂಡ್ ಕರುನ್ ವೆತಾನಾ ಮತಿಂತ್ ಗಾಲಿ ದಿತಾಲಿಂ. ಹಾಂ... ಹೆಂ ಸುಖ್ ಆಮ್ಗೇರ್ ಕಿತ್ಯಾಕ್ ನಾಂ. ಗಾಂವ್ ಹಾಸ್ತಾ ತರ್ ಹಾಂವ್ ರಡ್ತಾಂ ಕಿತ್ಯಾಕ್? ಕಿತ್ಯಾಕ್ ಹೆಂ ಶೆಣೆಂಪಣ್ ಆಮ್ಗೆರ್ ರಾಜ್ ಕರ್ತಾ? ಹಾಕಾ ಕಾರಾಣ್ ಕೋಣ್? ಹಾಂವ್...? ವ... ಮ್ಹಜಿ ಪಿಶಿ ಆಶಾ!? ಜಲ್ಮಾಲ್ಲಿ ಖೊಮ್ಟಾಂತ್... ವಾಡ್ತಾನಾ ನಾಕಾ ಜಾಲ್ಲಿ ಆಶಾ ಕಿರ್ಲಾಲಿ. ವಾಡ್ಲಿ ದೆಕುನ್ ಆತಾಂ ತಾಚಿ ಶಿಕ್ಷಾ ಹೊ ಭರೊ ಲೆಕಾಕ್ ಹಾಂವ್ ಹ್ಯಾ ಘರ್ಚಿಂ ಯಜ್ಮಾನ್ ಮ್ಹಕಾ ದೋನ್ ನಾಂವಾಂ. ಏಕ್ ಆವಯ್ ಬಾಪಾಯ್ ದವರ್ಲೆಲೆಂ - ಕಾಳಿಂ, ಕಿತ್ಯಾಕ್ ಹಾಂವ್ ಹುತೊಳ್ಯಾ ಜಾತಿಚಿಂ ದೆಕುನ್ ಸಕ್ಕಡೀ ಸಾಂಗ್ತಾಲಿಂ ಹಾಕಾ ಹೆಂ ನಾಂವ್ ಬರೆಂ ವೊಂಬ್ವಾತಾ. ದುಸ್ರೆಂ ಹಾಂವೆಂ... ದವರುನ್ ಘೆತ್ಲ್ಲೆಂ.
ಪೂಣ್ ... ಲೊಕಾಂನಿ ತಾಚೆಂ ಪಾಕಾಟೆಂ ಹಾಡಾಂ ಮೊಡುನ್ ಲ್ಹಾನ್ ಕೆಲ್ಲೆಂ. ದೆಕುನ್ ಆತಾಂ ಮ್ಹಕಾ ಕಾಳಿಂ ಮ್ಹಳ್ಯಾರ್ ವಾ ಕಾರ್ಮಿಣ್ ಮ್ಹಳ್ಯಾರ್ ಕೊಣಿ ವಳ್ಕಾನಾಂತ್. ಪೂಣ್ ಕಮ್ಮು ಮ್ಹಣ್ತಾನಾ ತ್ಯಾ ಧೋಲಾ ದೊಮುಗಾಚಿ ಬಾಯ್ಲ್ ಮ್ಹಣ್ ವಳ್ಕಾತಾಲೆಂ. ವೈಲ್ಯಾ ಮನ್ಶಾಂಚ್ಯಾ ದಯೆನ್ ಆಮ್ಕಾಂ ಪಾಂಚ್ ಪಾಂಚ್ ಸೆಂಟ್ಸ್ ಜಾಗೊ ಮೆಳ್ಲ್ಲೊ. ಆಶೆಂ ಆಮಿ ಪಂದ್ರಾ ಘರ್ಚಿಂ ಸಭಾರ್ ಪಾವ್ಸಳೆ ಥಾವ್ನ್ ಜಿಯೆತಾಂವ್. ಆಮ್ಚ್ಯಾ ಘಾರಾಂಕೀ ನೊವೆಂ ನಾಂವ್ ’ಕೇಲ್’!? ತಾಂತು ದಾ ಘರಾಂಕ್ ಪಂಚಾಂಗ್! ವೊಣ್ತಿ! ಪಕ್ಕಸ್! ರಿಪಾಂ! ಆನಿ ನಳೆ ಆಸಾತ್. ಧರ್ಣಿಕ್ ಸಿಮೆಂಟ್. ನ್ಹಾಂವ್ಕ್ ನ್ಹಾಣಿ.
ಉರ್ಲ್ಲಿ ಭುಂಯ್ಚ್ ಪಂಚಾಂಗ್. ಮೊಳಾಬ್ಚ್ಚ್ ಪಾಕೆಂ, ಮೊಡ್ಲೊ ಕೊಲು ಆನಿ ಕುಸ್ಲ್ಲಿಂ ಮೊಡ್ಲಾಂಚ್ ಸರ್ವ್ ಸಕತ್ ಮ್ಹಳ್ಳ್ಯಾಪರಿ ವದ್ದಾಡ್ತಾಲಿ. ಆಸಾತ್ ಸಬಾರ್ ಮ್ಹನ್ಶಾ ರುಪಾಚಿ ಶ್ವಾಸ್ ಘೆಂವ್ಚಿ ಜಿವಿ. ಪನ್ನಸಾಚ್ಯಾ ಪ್ರಾಯೆರ್ ಧೊಣ್ವಾಪರಿಂ ಭುಂಯ್ಚ್ ನಮಸ್ಕಾರ್ ಕರ್ಚಿಂ ಚಾಳಿಸಾಂಚ್ಯಾ ಪ್ರಾಯೆರ್ ಸತ್ತರಾಚ್ಯಾ ಭರಾರ್ ಕಾಂಪ್ಚಿ.
ಭುಂಯ್ಚ್ಯಾ ಭಾರಕ್ ಆನಿ ಶಿತಾಚ್ಯಾ ಕಾರಾಕ್ ಆಸ್ಚಿಂ. ನೆಸ್ತಾಲಿಂ . ಧಾ ವರ್ಸಾಂಚೊ ಸಿರಿಲ್ ಚೊವ್ದಾ ವರ್ಸಾಂಚೆ ಆಲಿಸ್ ಉಟೊನ್ ಉಬಿಂ ರಾವಾನಾಂತ್ ಜಾಲ್ಲೆಂ, ಗೆಲ್ಲೆಂ ಕಳಾನಾ. ಮಾಸಾಚ್ಯಾ ಮುದ್ಯಾ ಪರಿಂ ಪಡ್ತಾತ್ ರಡ್ತಾ. ಲೊಳ್ತಾತ್. ಥಂಯ್ಚ್ ಮ್ಹೆಳೆಂ ಕರ್ತಾತ್. ಅನಿ ತಾಂತುಂಚ್ಚ್ ನಿದ್ತಾತ್! ಸಂಸಾರ್ ರಿತೊ ದೆಕುನ್ ತಿಂ ತಶಿಂ. ಮ್ಹಜೆಂ ಧುವ್ ಆನ್ನಾ ಮೇರಿ ಹ್ಯಾ ಕೇರಿಂತ್ಲೆ ಮಾಣಿಕ್. ತೆಂ ಮ್ಹಜೆ ಧುವ್ ಮ್ಹಳ್ಯಾರ್ ಕೊಣಿ ಪಾತ್ಯೆನಾಂತ್.
ಕಿತ್ಯಾಕ್ ತಾಚೆಂ ರೂಪ್, ಗೂಣ್ ಮ್ಹಜ್ಯಾ ಮೆಳಿಕ್ ಮೆಳಾನಾಂತ್. ದೆವಾನ್ ದಿಲ್ಲೆಂ ಮಾಣಿಕ್. ಪೂಣ್ ಹ್ಯಾ ಥೊಡ್ಯಾ ದಿಸಾಂನಿ ತೆಂ ಮ್ಹಜೆರ್ ಚಿಡ್ತಾ. ಕೋಣ್ ಕೋಣ್ ಯೇವ್ನ್ ತಾಚ್ಯಾ ತಕ್ಲೆಂತ್ ಕಿತೆಂ ಕಿತೆಂಗಿ ಭರ್ತಾತ್! ಉತ್ರಾಂ ಉತ್ರಾಂಕ್ ತುಂವೆ ಕಿತ್ಯಾಕ್ ಅಶೆಂ ಕೆಲೆಂಯ್ ಪಳೆ. ಆತಾಂ ಮ್ಹಕಾ ಕಿತ್ಲೆಂ ಕಸ್ಟ್ ಮ್ಹಣೊನ್ ರಡ್ತಾಲೆಂ.
ಆಜ್ ಸಕಾಳಿಂ ವೆತಾನಾ ಕಿತೆಂಗೀ ನಿರ್ದಾರ್ ತಾಚ್ಯಾ ತೊಂಡಾರ್ ದಿಸ್ತಾಲೊ. ಏಕ್ ಘೊಟ್ ಉದಾಕ್ ಲೆಗುನ್ ಘೆನಾಸ್ತಾಂ ನಿರಾಳ್ ಪೊಟಾರ್ ನಾಂವ್ನ್ ಗೆಲ್ಲ್ಯಾ ಚೆಡ್ವಾಚೊ ಪಾತ್ತೊ ನಾಂ. ಹಾಂವ್ ಮ್ಹಜ್ಯಾ ಭುರ್ಗ್ಯಾಂಕ್ ಪಾಡ್ ಆಶೆಲ್ಲಿಂಗೀ ತಿಂ ಬರಿಂ ಜಾಯ್ಜೆ, ತಾಂಕಾ ಹ್ಯಾ ಸಮಾಜೆಂತ್ ಏಕ್ ಸ್ತಾನ್ ಆನಿಂ ಮಾನ್ ಮೆಳಾಜೆ ಮ್ಹಣೊನ್ ನ್ಹಯ್ಗೀ ಹಾವೆಂ ತೆದೆಂ ವಡ್ಲೆಂ ಮೇಟ್ ಕಾಡ್ಲ್ಲೆಂ ಹಾವ್ ಕಿತೆಂ ಜಾಣಾ ಪೈಶಿಲೊ ಗುಡೊ ಪಳೆವ್ನ್ ಸೊಭಿತ್ತ್ ಮ್ಹಣೊನ್. ವ್ಹಯ್ ಉದ್ಕಾಂತ್ ದೆಂವೊನ್ ಪಳೆಜೆ, ಮನ್ಶ್ಯಾಂಸಂಗಿ ರಾವೊನ್ ಭೊಗಿಜೆ ಹಾತಾಂಚ್ಯಾ ಕೊಂಪ್ರಾರ್ ಲಾಯಿಲ್ಲೆಂ ಮೊಂವ್ ಚಾಕೊಂಕ್ ಜಾಯ್ನಾ ಮಳ್ಳೆಂ ಕಳ್ತಾನಾ ಶಿತ್ ವಚೊನ್ ಅಬಿಲ್ ಜಾಲ್ಲೆಂ. ಚೆಡೆ ಬರೆ ಜಾತೆಲೆಂ ಮ್ಹಣೊನ್ ಸಪ್ಣೆಲ್ಲೆಂಚ್ ಆಯ್ಲೆಂ.
ಬೈತಾಡ್ ನೀಟ್ ಕರುಂಕ್ ಜಾಂವ್ಕ್ಚ್ ನಾಂ ಅನಿಕೀ ಪರ್ಪೊಳ್ ಜಾಲೆಂ. ನಾಕ್ಭರ್ ಪಿಯೆಲೆ. ಬಿಡಿ ಸಿಗ್ರೇಟ್ ವೊಡುನ್ ಧುಂವೊರ್ ವೊಕುಂಕ್ಲಾಗ್ಲೆ. ಏಕ್ಲೊ ರಾತಿಕ್ ಬೊಂಡೆ ಚೊರುಂಕ್ ವಚೊನ್ ಮಾಡಾವಯ್ಲೊ ಪಡೊನ್ ಪೆಂಕಾಡ್ ಮೋಡ್ನ್ ಗಳ್ಯಾಕ್ ದಾಂತ್ಯಾ ಫಾತೊರ್ ಜಾಲಾ ದುಸ್ರೊ ಮಿಶಿಯೊ ಪುಟ್ತಾನಾ ದೊರೊ ಉಡೊಂಕ್ ಲಾಗ್ಲಾ. ಆಸೆಂ ಹರಾಮಿ ಪಾಡೆ ಹಾಂಕಾಂ ನಾಕಾಕ್ ದೊರಿ ಘಾಲುಂಕ್ ಜಾಯ್ನಾಸ್ತಾನಾ ರಡ್ಚಿ ಗತ್ ಮಾತ್ ಉಬಿ.
ಮನ್ಜಾತಿ ಥಾವ್ನ್ ಮೊನ್ಶಾಂ ಜಾಂವ್ಚ್ಯಾ ವೆಳಾರ್ ಆಸ್ಲ್ಲಿಂ ದೆವಾಚಿಂ ಮನ್ಶಾಂ ನಿಜಾಕಿ ದೆವಾಚಿಂ ರುಪಾಂ ತಾಣೆಂ ದಿಲ್ಯಾ ಆಧಾರಾನ್ ಉಭಿಂ ಜಾಲ್ಯಾಂವ್. ಆನ್ನಾ ಮೇರಿ ಮ್ಹನ್ಶಾಂ ರುಪಾಚೆಂ ಮ್ಹಳ್ಳೆಂ ರುಜುಂ ಕೆಲೆಂ. ಧುವ್... ಮುಕಾರ್...ಮುಕಾರ್ ಪಾವ್ತಾನಾ ಮ್ಹಜೊ ನಿರ್ದಾರ್ ಬರ್ಯಾಕ್ ಪಡ್ಲೊ ಮ್ಹನಿಂ ಮನ್ ಸಂತೊಸ್ ಪಾವ್ಲಿಂ. ಪುಣ್ ವೇಳ್ ಕಾಳ್ ಬದ್ಲಾಲೊ. ನವೊ ಪಾದ್ರಿಗಾರ್ ನವಿಂ ಟಿಚೆ. ಥೊಡ್ಯಾ ವರ್ಸಾಚೆಂ ಉದ್ಕಾ ವೈಲ್ಯಾ ಬುಳ್ಬುಳ್ಯಾ ಪರಿಂ ಪುಟ್ಲೆ. ’ಫಿಸ್ ದಿ! ಬೂಕ್ ಘೆ. ಯುನಿಪಾರ್ಮ್ ಬರೆಂ ಘಾಲ್! ನಾ ತರ್ ಯೆನಾಕಾ. ತುಮ್ಕಾ ಆಸ್ಚ್ಯಾ ಸರ್ಕಾರಿ ಇಸ್ಕೊಲಾಕ್ ವಚ್. ಥಂಯ್ ಪಾಟಿಂಬೊ ಮೆಳ್ತಾ. ಸದಾಂಯ್ ಕರಂದಾಯ್.
ಆನಾ ಮೇರಿಕ್ ಆತಾಂ ಬೂದ್ ಆಯ್ಲ್ಯಾ. ತೆಂ ಧಾ ಬೂಕ್ ಶಿಕ್ತಾ. ದೆಕುನ್... ಆಮ್ಚ್ಯಾ ಕೇರಿಂತ್ಲ್ಯಾ ಕುಪ್ಪ, ಬಿಜಲುಚ್ಯಾ ಭುರ್ಗ್ಯಾಂಕಿ ಮೆಳ್ಚೊ ದುಡು! ಬೂಕ್! ಸತ್ರಿ... ಹೆಂ ಸರ್ವ್ ತಾಚ್ಯಾ ರಾಗಾಚ್ಯಾ ಉಜ್ಯಾಕ್ ತೇಲ್ ವೊತ್ತಾ. ಮ್ಹಕಾ ಕಿತ್ಯಾಕ್ ಮತಾಂತರ್ ಕೆಲೆಂಯ್? ಹಾಂವ್ ಅಮ್ಮಣಿ ಜಾಂವ್ಕ್ ಆಸ್ಲ್ಲಿಂ ತರ್ ಕೊಣಾಕೀ ಸಲಾಮ್ ಕರಿಜೆಂ ನಾತ್ಲೆಂ. ಹೆಂ ಅಣ್ಕಾಣೆ ಕಿತ್ಯಾಕ್?
ಮ್ಹಜೆಂ ಜೀವಿತ್ ಉಜ್ಯಾಂತ್ ಘಾಲೆಂಯ್. ಸೊರೊಪಾಕ್ ಪಳೆಯ್ಲ್ಯಾ ಮುಂಗೂಸಾಬರಿಂ ಕರ್ತಾಂ. ಮೊಜೆಂ ಆಮುಣೇ... ದೆವಾ ದೆವಾ... ಮ್ಹಜಿ ಜೀಬ್ ಕಿತ್ಯಾಕ್ ಅಶಿಂ ಮ್ಹಣ್ತಾ. ತಾಕಾ ಶಿಕ್ಪಾಚೊ ಭುತ್ ಲಾಗ್ಲಾ. ಆಮಿ ಕಾಡ್ಲೆಂ ಮೇಟ್ ಖಂಯ್ ಚುಕ್ಲೆಂ? ತವಳ್ಚ್ಯಾ ಗುರ್ಕಾರ್ ತ್ಯಾಂಪಣ್ಣಾನ್ ಸಾಂಗ್ಲ್ಲೆ - ’ ತುಮಿ ದಾದೊ ಆನಿ ಮೇರ್ ಸಾಂಗಾತಾ ಗುಡ್ಡಾಂವ್ಕ್ ಚಿಂತಾತ್. ಮೊಳ್ಬಾವೈಲ್ಯಾ ಉದೆತಾಂ ದೆವಾಕ್ ತುಟೊನ್ ಹಾಡ್ಚಿಂ ಉರ್ಭಾ ಕಿತ್ಯಾಕ್? ಗ್ರೇಸ್ತಾಂಚೊ ದೇವ್ ತೊ ಆಮ್ಕಾಂ ಮೆಳಾನಾ. ಆಮ್ಚೊ ನೀಚ ಆನಿ ಗುಳಿಗಾ ಆಮ್ಕಾ ರಾಕ್ತಾ. ತಾಣೆಂ ವಾಂಕ್ಡಿ ದೀಶ್ಟ್ ಘಾಲ್ಯಾರ್ ನಿಸ್ಸಂತಾನ್ ಜಾವ್ನ್ ವೆತಾಂವ್.
’ಆದಿ ಮೊನ್ನ್ಯಾ ಆಮಿ ದೆಕುನ್ ದೆವಾಚ್ಯಾ ಮಿರೊವ್ಣ್ಯಾ ವೆಳಾರ್ ಆಮಿ ಮುಕಾರ್ ಆನಿ ಹೆರಾಂಕ್ ವಾಟ್ ದಾಕಂವ್ಚಿ. ಆಮ್ಕಾ ದೆವಾಚಿಂ ಸಸಾಯ್ ಆಸಾ ದೆಕುನ್ಂಚ್ ಸಂಸಾರ್ಭರ್ ಬುಡ್ತ್ಗೊಲ್ ಯೇವ್ನ್ ನಾಸ್ ಜಾತಾನಾ ಅಮ್ಚಿ ಮಾಲ್ಘಡಿಂ ದೊಗಾಂ ಮಾತ್ರ್ ಉರ್ಲ್ಲಿಂ. ತಿಂಯ್ ಆಮ್ಚ್ಯಾ ಪೊಸ್ಣ್ಯಾಂಕ್ ದಿರ್ವ್ಯಾ ಥಾವ್ನ್ ಹೆಂ ದಿರ್ವೆಂ ಮ್ಹಜ್ಯಾ ಪ್ರಾಸ್ ವರ್ತೆಂ ತುಮಿ ತಾಕಾ ಧೋಲ್ ಮ್ಹಳ್ಯಾರ್ ಹಾಂವ್ ಬುರುಜ್ ಮ್ಹಣ್ತಾ. ಆಮ್ಚೊ ಮಾನ್ ಸನ್ಮಾನ್ ಕರ್ಚೊ ಆದಾರ್ ಹೊ.
ದೆಕುನ್ಂಚ್ ಆಮಿ ಮೊರ್ಚ್ಯಾ ಏಕೆಕಾ ಮಾರಾಕ್ ಏಕೆಕ್ ಆರ್ಥ್, ಏಕೆಕ್ ನಾದ್! ಅಯ್ಕಾತಾಲೊ ಮ್ಹಣ್ತಾಂ ಥಂಯ್ ಆಸಾ ಸಂತೊಸ್ ವ ದೂಕ್ ಮೈಲಾಂಪೈಸ್ ಖಭಾರ್ ಕರ್ತಾಂವ್. ಹಿಂ ಆಮ್ಚಿ ಶಾಥಿ ಜಾಣಾಂತ್ಗಿ ಹೆಂ ಕೊಣೆಂ ಫಾವೊ ಕೆಲಾಂ ಆಮ್ಚ್ಯಾ ನೀಚ ದೈವಾನ್!’ ತಾಣೆ ಆನಿಕೀ ಮುಕಾರ್ಸುನ್.... ’ವ್ಹಡಾ ಬೊಂಗ್ಲ್ಯಾನಿ ತೆಲಾಂ ತುಪಾನಿ ಖಾತೆಲ್ಯಾಂಕ್ ನಾಂವ್ ನಾತ್ಲಿ ಪಿಡಾ. ಪೂಣ್ ತಾಂಚೆ ಉಶ್ಟೆಂ ಖಾಂವ್ನ್ ಜಿಯೆಂವ್ಚ್ಯಾ ಆಮ್ಕಾ ಆಮ್ಚೊ ದೈವಾ ರಾಕನಾಂಗಿ? ಗುಡ್ಯಾ ವೈಲ್ಯಾ ದೈವಾಕ್ ದವರ್ಲ್ಲಿ ಸುರ್ ಪಿಯೆಲ್ಯಾರ್ ಪಿಡಾ ಪನಾಂದೆ ಪದ್ರಾಡ್. ತಾಚ್ಯಾ ಪ್ರಸಾದಾನ್ ಜೀವ್ ಭರ್ತಾ! ಗಂಧ, ಕುಂಕುಮಾಂತ್ ಸಕತ್ ಚಡ್ತಾ. ಕೊಣಾಚೆಂಯ್ ಆಯ್ಕೊನ್ ಪಿಶೆಂ ಪಾಂಗ್ರಿನಾಕಾತ್ .
ಆಪುಣ್ ಆಪ್ಣಾಕ್ ದೇವ್ ಸಮೆಸ್ತಾಂಕ್. ತುಮ್ಚ್ಯಾ ಮಾತ್ಯಾಕ್ ತುಮ್ಚೊ ಹಾತ್! ಗುರ್ಕಾರಾನ್ ಉತ್ರಾನ್ ಉತಾರ್ ಸಮ್ಜಯ್ಲೊ ತರೀ ಆಮಿ ಕೆಪ್ಪಿಂ ಜಾಲ್ಯಾಂವ್. ಪಾಂಚ್ ಕುಟ್ಮಾ ಕಿರಿಸ್ತಾಂವ್ , ದೆವಾಚಿ ಭುರ್ಗಿ ಜಾಲ್ಯಾಂತ್ ತವಳ್ ಹೊಡೆಂ ಪುಸ್ಲೆಂ. ಸೈರೆ ದೈರೆ, ಕುಟಾಮ್ ಸಗ್ಳೆಂ ಪೈಸ್ ಸರ್ಲೆ. ಪೈಲೆಂ ಕಳೊಂಕ್ನಾ .
ಉಪ್ರಾಂತ್...ಗಳ್ಯಾಂತ್ಲೆ ಉರ್ಕು, ಮಂತ್ರಿಲ್ಲೆ ಸುತ್ ಕಾಡ್ನ್ ಉಡೊನ್ ಗಳ್ಯಾಂತ್ ಕೋತ್, ಬೆಂತಿಣ್ ಅರ್ಲುಕ್ ಆಯ್ಲಿ ತಾಚ್ಯಾಕೀ ದುಃಕ್ ಬೊಗ್ಲೆಂ ಯೆದೊಳ್ಚಿಂ ಮ್ಹಜಿ ವ್ಹಡ್ಲಿ ಆಸ್ತ್ ಜಾವ್ನಾಸ್ಚಿಂ ಮಣಿಯಾಂಚೆ ಸರ್ ಕಾಡ್ತಾನಾ ರಡೊಂಕ್ ಆಯ್ಲೆಂ ಪೂಣ್ ಆತಾಂ ಹಾಂವ್ ಕಿರಿಸ್ತಾಂವ್ ದೆಕುನ್ ತೆಂ ಆಡ್ವರ್ಲೆಂ. ಸಕ್ಕಡ್ ವ್ಹಯ್... ತರ್ನಾಟ್ಯಾಂಕ್ ಕಾಜಾರ್ ಕರಿಜೆ. ಪೂಣ್ ಸೈರಿಕ್ಯೊ ಖಂಯ್. ಅಮಿ ನವಿಂ ಕಿರಿಸ್ತಾಂವಾಂ.
ಆಮ್ಚ್ಯಾಲಾಗಿ ಸೈರಿಕ್ ಕರುಂಕ್ ಪರ್ನಿ ಯೆತಾತ್ಗಿ? ಪೈಲ್ಯಾಂಚಿ ಆಮ್ಕಾಂ ಕಶಿಂ ದಿತಿತ್ ವ ವರ್ತಿತ್? ದೆಕುನ್ ಆಮಿ ಕಾಳ್ಯೊ ವಾತಿ ಪೆಟವ್ನ್ ಸಂಭಂದ್ ತುಟೈಲೊ. ಅಶೆಂ ಕಾಜಾರ್ ಜಾಲೆಂ. ಭುರ್ಗಿಂ ಜಾಲಿಂ. ಸಂಸಾರ್ ಭರ್ಲೊ. ಪೂಣ್ ಕಸಲಿಂ ಜಲ್ಮಾಲಿಂ. ಶಿತಾಕ್ ಖಾರ್. ಧರ್ಣಿಕ್ ಭಾರ್! ಪಾವ್ಸಾಳ್ ಧಾಂವ್ಲೆ. ಜಲ್ಮಾಲಿಂ ಮೆಲಿಂ ಥೊಡಿಂ ಆಸೊನ್ ಮೆಲೆಂ ಭೆಂಕ್ರಿಂ ಥೊಂಕ್ರಿ, ಕುಡ್ಡಿಂ, ಮೊನಿಂ ಆನಿ ಶಾಣಿ. ಅಮ್ಚೆ ಮೆಳೆಂ ಧುಂವ್ನ್ ವಚಾಜೆ. ಕೊನ್ಶಾಂತ್ಲಿಂ ಆಮಿ ಮ್ಹನ್ಶಾಂಕ್ ಯೆಜಾಯ್. ಮಾನ್ ಆನಿ ಮರ್ಯಾದ್ ಮೆಳಾಜೆ. ಆಮ್ಚ್ಯಾ ಧರ್ಮಾಂತ್ ಆಮಿ ನಿಮಾಣಿ. ಸಣ್ಸಿಲ್ಯಾ ಆಮಿ ಪರತ್ ಉಟಾಜೆ ತರ್ ತೊ ಧರ್ಮ್ ಸೊದಿಜೆ. ಮೊಜೊ ಘೊವ್ ಭದ್ರ ರೆಡ್ಯಾ ಪರಿಂ ಘೊಳ್ತಾ. ಪೂಣ್... ಸಾಂಜೆರ್ ಸಗ್ಳೆಂ ಸುರೆ, ಸೊರ್ಯಾಚ್ಯಾ ಗಡಾಂಗಾಂತ್ ಘಾಲ್ತಾ.
ಆಮಿ ಫೊಂಡಾಂತ್ ಆಸಾಂವ್, ಹಾಂಗಾಸಾರ್ ಆಮ್ಕಾ ವಾಟ್ ದಾಕೈತೆಲಿಂ ನಾಂತ್. ಸಕ್ಕಡೀ ಬೊಕ್ರೆ. ಫೊಂಡಾಂತ್ ಪಡೊಂಕ್ ಕಳಿತ್ ಆಸಾ. ಪೂಣ್ ಉಟೈತಾಲೊ ನಾಂ. ಮುಕಾರ್ ಆಮ್ಚಿ ಭುರ್ಗಿಂಯ್ ತ್ಯಾಚ್ ಚಿಕ್ಲಾಂತ್ ಲೊಳ್ತಾತ್ ಆನಿ ವಾಡ್ತಾತ್. ದೆಕುನ್ ವಾಟ್ ಸೊದಿಜೆ ಮ್ಹಣ್ತಾನಾ ತಿಂ ಉದೆಲಿಂ. ಕಿತೆಂ ಉಲೊವ್ಪ್. ಕಸಲೆಂ ವರ್ತಾನ್. ಅಮ್ಚೆಂ ಕಸ್ಟ್ ಪಳೆತಾನ ಖೂಬ್ ರಡ್ಲಿಂ ಉತ್ರ್ಯಾಂಚ್ಯಾ ಮೆಳಾಸಂಗಿಂ ಗೊಡ್ಸಾಣೆಚೆಂ ಭರ್ವಸ್ಯಾಚೆ ಲಾಡು ಖಾವೈತಾನಾ ತಳಾತಾರ್ಚ್ ಸರ್ಗ್ ದೆಂವ್ಲೊ. ಸರ್ವ್ ಮ್ಹಜಿಂ ಸ್ವಪ್ಣಾಂ ಜ್ಯಾರಿ ಜಾಲಿಂ ದೇವ್ ಸರ್ಗ್ ಮನ್ಯಾಪಣ್! ಆಮ್ಚಿ ಜಿಣಿ ಹಿಂ ಸರ್ವ್ ಪಾಂಯಾಥಳಾಚ್ ಸೊಡುಂಕ್ ನಜೊ.
ಮನ್ಶ್ಯಾಪಣ್ ದಿತಾಂ ಮ್ಹಣ್ತಾನಾ ಪಿಶೆಂ ಕಿತ್ಯಾಕ್ ಪಾಂಗ್ರಿಜೆ? ಮ್ಹಜ್ಯಾ ಭದ್ರಚ್ಯಾ ಮಾತ್ಯಾಕ್ ದವರ್ಲೆಂ. ಪೈಲೆಂ ಸರ್ವ್ ಸೈತಾನ್ ಆಂಗಾರ್ ಆಯಿಲ್ಯಾಪರಿಂ ಖುದ್ವಾಲೆಂ ಉಪ್ರಾಂತ್ ತಾಣಿಂ ಕಿತೆ ’ಮಂಗ್ ಮರ್ಲ್’ ಕಿತೆಂಗಿ ಸವ್ಕಾಸ್ ತಾಂಚೆ ಆಯ್ಕೊಕ್ ಲಾಗ್ಲೆ. ಆಮಿ ಪಾಂಚ್ ಕುಟ್ಮಾಚಿಂ ಜಲ್ಮಾಲ್ಯಾ ಕುಟ್ಮಾಕ್ ಪಾಟ್ ಕರುನ್ ಯೆತಾನಾ ತಾಣಿಂ ಆಮ್ಕಾಂ ಶಿರಾಪ್ ದಿಲೊ. ಧರ್ಣಿಕ್ ಹಾತ್ ಮಾರ್ಲೆ. ದುಮಿಂಗ್ ಜಾಲ್ಲೊ ಮ್ಹಜೊ ಘೊವ್ ಸದಾಂ ಕಾಮಾಕ್ ವೆತಾಲೊ. ವಾಲಿ ದಾಲ್ಯಾಂಚೆಂ ಕಾಮ್ ಸೊಡ್ನ್ ಖೊರೆಂ ಪಿಕ್ಕಸ್ ಧರ್ಲೆಂ. ಮ್ಹಜ್ಯಾ ಕೆಲಾಂತ್ ನ್ಹಯ್ ಮ್ಹಜ್ಯಾ ಘರಾಂತ್ ಪೆಂಟೆಂತ್ಲೊ ತಾಂದುಳ್ ಶಿಜ್ಲೊ. ಮೊಗೊರ್ಲ್ಯಾಚಿ ಮಾಸ್ಳಿ ಆಯ್ಲಿ. ಯೆದೊಳ್ ಫೆಸ್ತಾ ಪರ್ಬೆಕ್ ಗಾಂವ್ಚ್ಯಾಂಕ್ ಉಸ್ಣೆಂ ಎಕ್ಟಾಂಯ್ ಕರ್ಚೆಂ ರಾವ್ತಾನಾ ಎಕಾ ರಿತಿಚೆಂ ಸಮದಾನ್ ಭೊಗ್ಲೆಂ. ಧಾ ಜಣಾಂಚೆ ಉರ್ಲ್ಲೆಂ, ಬೆಳ್ಶೆಲ್ಲೆಂ, ಕರ್ಪಾಲ್ಲೆಂ ಖೆಲ್ಲಿ ಜೀಬ್, ನೀಸ್ ಪೆಜ್ ಜೆವ್ತಾನಾ ಮಿಟಿಯೊ ಮಾರುಂಕ್ ಲಾಗ್ಲಿ.
ಬರ್ಯಾಫಾಲ್ಯಾಂಕ್ ಪಂಗ್ತಿರ್ ಬಸ್ಚೆಂ ಭಾಗ್ ಆಮ್ಕಾಂ ನಾತ್ಲ್ಲೆಂ. ಪಯ್ಸ್ ರಾವೊನ್ ಸೊಡ್ಚ್ಯಾ ಉಶ್ಟ್ಯಾಕ್ ರಾಕಾಜೆ. ಮೆಲ್ಲ್ಯಾ ಮೊನ್ಜಾತಿಂಕ್ ಮಾತ್ಯೆಂತ್ ಘಾಲುಂಕ್ ಆಮಿ ಜಾಯ್. ವಾಸ್ರುಂ ಮೆಲ್ಯಾರ್ ಚಾಮ್ಡೆಂ ವೊಡುನ್ ಭಾತೆಣ್ ಭರೊನ್ ವಾಸ್ರಾಚೆಂ ರುಪ್ಣೆಂ ಕರುನ್ ಗಾಯ್ಕ್ ಮಂಗಾಟಾಂವ್ಕ್ ಆಮ್ಚೊ ವಾವ್ರ್ ಜಾಯ್. ಪೂಣ್ ತ್ಯಾಚ್ಚ್ ಗಾಯ್ಚೆ ದೂದ್ ಮಾತ್ ಆಮಿ ಪಿಯೆಲ್ಯಾರ್ ಆಮಿ ಪಾಪ್.
ತಾಂಚ್ಯಾ ಅಂಗಾರ್ ಪಿಂದ್ಲ್ಲೆಂ ಮಾತ್ರ್ ಆಮಿ ನೆಸಾಜೆ. ನವೆಂ ಘಾಲುಂಕ್ ಆಮ್ಕಾಂ ಹಕ್ಕ್ ನಾಂ. ಪೆಂಕ್ಟಾ ವಯ್ಲೊಮಾನ್ ಲೆಗುನ್ ಸ್ತ್ರಿಯೆನ್ ರಾಕೊಂಕ್ ಭರ್ಲ್ಲೆ ವಿಸ್ವೆ ಕಾಮುಕಿ ದೊಳ್ಯಾಂನಿ ಅಪೊಣ್ ಕಿತ್ಲೆಂ ಕಸ್ಟ್. ಆಬ್ಳಾಯೆಚಿ ತಿ ದೀಶ್ಟ್ ಜಿತ್ಲೆಂ ಜಿವೆಂ ಜಿವಿಶಿ ಮಾರ್ತಾಲಿ. ಆಮ್ಕಾಂ ಪಳೆತಾನಾ ಕಾಂಟಾಳ್ತಾತ್.
ತೆಂಚ್ಚ್ ಗರ್ಜೆಕ್ ಆನಿ ಮರ್ಜೆಕ್ ಕಶಿಂ ಯೆತಾಲಿಂ ಸುಭ್ರಾಯಾಚಿ ಭುರ್ಗಿಂ ಏಕಾ ಪಾಟ್ಲ್ಯಾನ್ ಏಕ್ ಮಾತ್ಯೆಕ್ ಸಾರೆಂ ಜಾತಾನಾ. ಮ್ಹಜ್ಯಾ ಆವಯ್ಚ್ಯಾ ಹಾತಾಂತ್ ಪುತಾಕ್ ಘಾಲುನ್ ’ಕೊರಪತಿ ಉಂದು ಎನ್ನ ಬಾಲೆ ಅತ್ತ್. ನಿನ್ನವು ಪುದರ್ ದಿಲಾ’ ಮ್ಹಣೊನ್ ರಡ್ತಾನಾ, ಭಟಾಚಿ ಶೆಂಡಿ ತಗ್ಸಾಲಿ. ಮ್ಹಜ್ಯಾ ಆವಯ್ಚ್ಯಾ ದೂದ್ ಕಾವ್ನ್ ’ಕೊಗ್ಗ್’ ಮ್ಹಣೊನ್ ಅಪಯ್ತಾನಾ, ಘೊವ್ ಆನಿ ಬಾಯ್ಲ್ ದೊಗಾಂಯ್ ರಡ್ತಾಲಿಂ. ತ್ಯಾ ದಿಸಾ ಹಾಂವೆ ಮ್ಹಜ್ಯಾ ಅವಯ್ಲಾಗಿಂ ವಿಚಾರ್ಲ್ಲೆಂ ’ಬಾಳ್ಶ್ಯಾಕ್ ಶೆಣಾ ಉದ್ಕಾಂತ್ ನಾಣಯ್ತಾತ್ಗಿ’?.
ಆಮಿ ತಾಚೆ ಖಳೆ ಉತ್ರಲ್ಯಾರ್ ಶೆಣಾನ್ ಶುದ್ದ್ ಜಾಯ್ಜೆ ಖಂಯ್. ತವಳ್ ಭುರ್ಗ್ಯಾಕ್ ನಾಣಾಯ್ಲ್ಯಾರ್ ಆಜ್ ತೊ ವ್ಹಡ್ಲೊ ಸಾವ್ಕಾರ್. ಪೋರ್ ಪೋರ್ ಮ್ಹಜ್ಯಾ ಅಪ್ಪಾಚಿ ಪೊವ್ಲಿ ಲಾಗ್ಲ್ಲ್ಯಾಕ್ ತಾಣೆಂ ದಿಲ್ಲ್ಯಾ ಖೊಟೆನ್ ಚಾರ್ ದೀಸ್ ವಳ್ವೊಳೊನ್ ತಾಂತುಂಚ್ ಮೆಲಿಂ. ಪೂಣ್ ಹೆಂ ಆಯ್ಕಾತಾಲಿಂ ಕೋಣ್? ಘಣಾರೆ ರಡ್ಲ್ಯಾರ್ ತೋಟ್ ಭಿಜ್ತಾಗಿ? ಕಿರಿಸ್ತಾಂವಾಂ ಮಧೆಂ ಊಂಚ್ ನೀಜ್ ನಾ. ಜಾತಿನ್ ಹಲ್ಕಿನಾಂತ್. ಯೆದೊಳ್ ಲ್ಹಾನ್ ಆಸ್ಲ್ಲ್ಯಾಂವ್ ಆನಿ ತರೀ ತಕ್ಲಿ ಉರ್ಲಿನೆಂ.
ಅಶೆಂ ಸಭಾರ್ ವರ್ಸಾಂಚಿ ವೊರೊಂಟ್ ನಿವ್ಲಿ. ಮ್ಹಜ್ಯಾ ನಶಿಬಾಕ್ ಅಸ್ಲ್ಲ್ಯಾ ಪಾದ್ರಿಗಾರಾನ್ ಬರೆಂಚ್ ಸುಧಾರ್ಸಿಲೆಂ. ವರ್ಸಾಚೆಂ ಸ್ವಪಾಣ್ ನವೆಂ ವಸ್ತುರ್ ನೆಸಾಜೆ. ತೆಂಯ್ ಕಾಪ್ಡಾಕ್ ಮಿರಿಯೊ ಘಾಲಿಜೆ. ತಾಂತು ಖೆಳಾಜೆ, ಹೆರಿಯಾಬಾನ್ ತೆಂ ಭಾಗಯ್ಲೆಂ.
ಪುಣ್ ಮ್ಹಜೆ ಖೊಟೆಂ ನಶಿಬ್ ಕಿತೆಂ ಮ್ಹಣಾಜೆ. ಉದ್ಕಾಂತ್ ಘಾಲ್ಲೆಂ ಕಾಪಾಡ್ ವಯ್ರ್ ಕಾಡ್ತಾನಾ ರಂಗ್ ಸಗ್ಳೊ ಬಾಲ್ದೆಂತ್. ಸುತಾಚೆಂ ವೊಳಾಪ್ ಹಾತಾಂತ್! ಕಿತೆಂಯ್ ಜಾಂವ್ ಪೆಲೆಂ ಬರೆಂ ಅಸ್ಲ್ಲೆಂ. ನವಿ ಜಾತ್! ನವೆಂ ನಾಂವ್. ಆತಾಂ ನವಿಂ ಕಿರಿಸ್ತಾಂವಾಂ! ನೀಚ, ಗುಳಿಗಾಕ್ ಸಾಂಡೆ. ಪಾಯ್ನಾಲಾಂ ಬಾಂದ್ಲಿ. ಧೋಲ್ ಕೊನ್ಶಾಕ್ ಪಡ್ಲಿ ಘರ್ ಕಾಮಾಕ್ ಗೆಲ್ಯಾಂವ್ ಪೂಣ್. ಆಮ್ಚೆಂ ಮಧೆಂ ಕಸಲೆಂಗಿ ಕಾವ್ಜೆಣಿ. ಪಯ್ಲ್ಯಾಂಚಿ ಆಮ್ಚಿಂ ಬಾಂವ್ಡಾಂ ಆಮ್ಕಾ ಕೊಡ್ಕಾರಾಂಕ್ ಪಳೆಲ್ಲ್ಯಾ ಪರಿಂ ಆಮ್ಕಾಂ ಪಳೆತಾಲಿಂ. ಆಮ್ಚಿಂ ಖೆಳ್ಕುಳಾಂ ಕರ್ತೆಲಿಂ.
ಸರ್ವ್ ಮೆಳೊನ್ ಗುಡ್ಯಾ ವಯ್ಲ್ಯಾ ದೈವಾ ಮುಕಾರ್ ’ ತುಂಚ್ ಶಿಕ್ಶಾ ದಿ’ ಮ್ಹಣ್ ದೂರ್ ದಿತಾಲಿಂ. ತಾಣೆ ಹಾಡ್ಲ್ಲೆ, ಕೆಲ್ಲೆಂ ಖಾತಾ. ಜೆವ್ತಾನಾ ತೆಂಯ್ ಮಾಸಾಚೆ ವಾಂಟೆ ಘಾಲ್ತಾನಾ ಆಮ್ಚೆ ಚೆಡೆ ಮ್ಹಜೆರ್ ರಾಗಾನ್ ಪೆಟ್ತಾಲೆ. ಭಾಯ್ರ್ ಆಯಿಲ್ಲಿಂ ಧಾಂವೊನ್ ಗೆಲ್ಲಿಂ ಮ್ಹಳ್ಳೆ ಅಪವಾದ್. ಹ್ಯಾ ಕುಶಿನ್ ಪಾವ್ಸಾಳ್ ಗೆಲ್ಯಾರಿ ’ನೊವ್ಯಾ ಕಿರಿಸ್ತಾಂವಾಂ’ ಥಾವ್ನ್ ಪರ್ನ್ಯಾಕ್ ಯೆಂವ್ಕ್ ಮೆಳೊಂಕ್ಚ್ ನಾಂ. ಪಾದ್ರಿಗಾರ್ ಬದ್ಲಾಲೆ. ಯೆದೊಳ್ ಅಸ್ಲ್ಲೊ ಬಳಿಸ್ಟ್ ಖಾಂಬೊ ಪರ್ತಾಲೊ. ಇಸ್ಕಾಲಾಚಿ ನವಿಂ ವಡಿಲ್ನ್ ಪೈಶ್ಯಾಂಚೆ ತೋಂಡ್ ಪಳೆವ್ನ್ ಭುಂಯ್ಕ್ ಪಡ್ಲ್ಲಿ. ಆಸೆಂ ಫಿಸ್, ಬೂಕ್, ಪೈಶೆ, ಪೈಶೆ... ಹೆಂ ಪೆಂಪಾರೆಂ ವಾಡ್ತಾನಾ ಕಾಯ್ಲಿರ್ ಥಾವ್ನ್ ರಾಂದ್ಣಿಕ್ ಪಡ್ಲ್ಲಿ ಗತ್. ಶಿಕ್ಪಾಚ್ಯಾ ಭುಕೆನ್ ವಳ್ವಳ್ಚ್ಯಾ ಆನ್ನಾ ಮಾರಿಕ್ ಆತಾಂ ಹಾಂವ್ ಆಪ್ರಾದಿ ಜಾಲಿಂ.
ಕೇರಿಂತ್ಲ್ಯಾ ದುಸ್ರ್ಯಾ ಭುರ್ಗ್ಯಾಂಕೀ ಹ್ಯಾ ಪಾವ್ಟಿ ಆನಿಕಿ ಚಡಿತ್ ಸಹಾಯ್ ಮೆಳ್ತಾನಾ... ’ಹ್ಯಾ ಸುಖಾಕ್ ತುಂ ಮ್ಹಜಿ ಜಾತ್ ಚೊರ್ಲ್ಲಿ. ಮ್ಹಕಾ ಇಸ್ಕಾಲಾಕ್ ವಚಾಜೆ ತುಕಾ ಜಾಯ್ನಾ ಜಾಲ್ಯಾರ್ ಮ್ಹಕಾ ಬಾಂಯ್ತ್ ಉಡಯ್. ’ರಡ್ತಾಲೆ, ಬೊಬಾಟ್ತಾಲೆಂ. ಚೂಕ್ ನಾಂ. ವಾಜ್ಬಿ ಉತಾರ್. ಕಾನ್ಪಾಟ್ಯಾಕ್ ಮಾರ್ಲ್ಯಾಪರಿಂ ಜಾತಾನಾ ಮ್ಹತಿಂತ್ಚ್ ಮಾಗ್ತೆಲಿಂ, ’ದೆವಾ... ತುಜ್ಯಾ ಮನ್ಶ್ಯಾಚ್ಯಾ ಕಾಳ್ಜಾಂತ್ ಭಿರ್ಮೊತಿಚೊ ದಿವೊ ಪೆಟಯ್. ಹಿಂ ದೆವಾಚಿ ಮ್ಹನ್ಶ್ಯಾಂ ಕಿತ್ಯಾಕ್ ಇತ್ಲಿಯೀ ದಾರುಣ್? ಡೊಲ್ಲಾ ದುಮಿಂಗ್ ಮ್ಹಜೊ ಘೊವ್ ಆತಾಂ ಕಾಮ್ ನಾಸ್ತಾನಾ ಪರತ್ ವಾಟ್ ಚುಕ್ಲ್ಲೊ.
ಕಾಳಿಂ ಜಾವ್ನಾಸ್ತಾಂ ಪಾಟಿಕ್ ಲಾಗ್ಲ್ಲೆ ಉದ್ಕಾಂತ್ ನಿಂವ್ಲ್ಲ್ಯಾ ಕೆಂಡಾಚೊ ರಂಗ್ ತರೀ ಮ್ಹಕಾ ಪಳೆವ್ನ್ ಲಾಳ್ ಗಳೈತಾಲೆ. ಆತಾಂಯೀ ಆಂಗಾಲಾಪ್ ಸೊಡ್ತಾಲೆ. ಬುಡಾಚೊ ಬೊಣ್ಕೊ, ’ಅಂದಾಯಾ ಕಾಳೆ ಆ ಬೆರ್ಮೆ ನೆನಾನ್ ಪುರ್ಸೊತುಡ್ ಕೆತ್ತ್ದೆನಾ? ಮ್ಹಣೊನ್ ರಾನಾಕ್ ವಾಲಿ, ಬೆತಾಂ ಕಾಡುಂಕ್ ಮೌನಾ ಪಾಟ್ಲ್ಯಾನ್ ಯೇವ್ನ್ - ಅವ್ಕಾಸ್ ಮೆಳ್ಳ್ಯಾರ್ ವೆಂಗ್ತಾನಾ - ’ಉಲ್ಲಯಾ ಬೊಡ್ಚಿ ಮಡಿ ಪೋಡು, ಮೈಲೆ ಆಯ್ ಪಿಲೆ ಕಲೆವೊಡು’ ಮ್ಹಣ್ತಾನಾ ಲಜ್ಮಾಂಡೊ ತುಕಾ ವೆಂಗ್ಚೆಂ ಭಾಗ್ ಮೆಳ್ಯಾರ್ ದರ್ಯಾಂತ್ ನಾಂವ್ನ್ ಶುದ್ದ್ ಜಾತಾಂ ಮ್ಹಣೊನ್ ಪೆರ್ಮಾರಿ ಪರಿಂ ತೋಂಡ್ ಸೊಡುನ್ ಕಿಡಿಯಾರೆ ದಾಂತ್ ದಾಕೈತಾಲೊ. ಗಾಂವಾರ್ ನವೆಸಾಂವ್. ಕಿರಿಸ್ತಾಂವ್ ಮೆಳಾನಾತ್.
ಗಾದೆ ಪಣ್ಗಿಣ್ ಪಡ್ಲ್ಯಾತ್. ದಾದ್ಲೆ ಗಾಂವ್ ಸೊಡುನ್ ಗೆಲ್ಯಾತ್ ಗಾಂವಾಂತ್ ಬೊಂಗ್ಲೆ ಉಬೆ ಜಾಲ್ಯಾತ್. ಆತಾತಾಂ ಹಿಂದು ಆಮ್ಕಾಂ ದೆಖ್ತಾನ ಚಿಡ್ತಾತ್. ಕಾಮ್ ದಿನಾಕಾತ್. ಬರೆಂ ಬರೆಂ ಖಾತಾ ಮ್ಹಣ್ ಗೆಲ್ಲೆಂ ನ್ಹಯ್ಗಿ? ಮೊರೊಂದಿತ್. ಆಮಿ ಕಿತ್ಯಾಕ್ ಕಾಮ್ ದಿಜಾಯ್.
ತೆ ಪೊಸಿನಾಂತ್ಗೀ ಆಸೆಂ ಕಾಮ್ ದಿನಾಸ್ತಾನಾ ತಮಾಶೆ ಕರ್ತಾನಾ, ಜಲ್ಮಾ ಥಾವ್ನ್ ಕರ್ನ್ ಆಯಿಲ್ಲೊ ಉದ್ಯೊಗ್ ಕರುಂಕೀ ಅವ್ಕಾಸ್ ನಾಸ್ತಾನಾ ಘರ್ಕಾರ್ ಪಿಸೊ ಜಾಲೊ. ಕಾಂಯ್ ತರೀ ಥೊಡೆ ಕಾಸ್ ಹಾತಿಂತ್ ಮೆಳ್ಳ್ಯಾರ್ ನಾಕ್ ಭರ್ ಪಿಯೆತಾಲೊ. ಗಾಂವಾರ್ ಮಾರಿಚೊ ಸಂಭ್ರಮ್. ಅಮ್ಗೆರ್ ರಾಂದ್ಣಿಂತ್ ಮಾಜಾರ್ ನಿದೊನ್ ಬೊಬಾಟ್ತಾ, ದುವೆಚಿ ವಾಟ್ ರಾಕೊನ್ ಗೊಮ್ಟಿ ವೊಳ್ಳಿ. ಮ್ಹತಿಂತ್ ನಾನಾಂತಿ ಚಿಂತ್ನಾ ಘುಂವ್ತಾನಾ ಮಸ್ಕ್ ಕಾಳೊಕಾಂತ್ ಚಲೊನ್ ಯೆಂವ್ಚೊ ಸಾವೊ ಝಳ್ಕಾತಾನಾ. ಮುಕಾರ್ ದಾಂವ್ಲಿ. ವ್ಹಯ್ ತಾಂಚ್ಯಾ ಮಧೆಂ ಮ್ಹಜೆಂ ಧುವ್ ಆಸ್ತಾಂ ಜೀವ್ ಭರ್ಲೊ. ಲಾಗಿಂ ಲಾಗಿಂ ಯೆತಾನಾ ಏಕಾ ರಿತಿಚೊ ಕುಲ್ಕುಲೊ ಆಯಿಲ್ಲೊ. ಹೊ ಕಸಲೊ ವೇಸ್. ಮ್ಹಜೆಂ ಆನ್ನಾಮಾರಿ ಕುಂಕುಮ್ ಆನಿಂ ಹಳ್ದಿಂತ್ ನೆಸ್ಲಾಂ. ಮಾತ್ಯಾರ್ ಭಿಂಗಾರಿ.
ತಾಚೊ ಬಾಪುಯ್, ಭಾವ್, ಸಗ್ಳೆ ದುಸ್ರೆ, ದುಸ್ರೆಚ್ ದಿಸ್ತಾತ್. ಕುಂಕುಮ್ ತಾಂಚ್ಯಾ ಮಾತ್ಯಾರ್, ಹಳ್ದಿ ಉದ್ಕಾನ್ ನಾಣಾಯಿಲ್ಲಿ ಕೂಡ್ ಲಾಗಿಂ ಲಾಗಿಂ ವೆತಾನಾ ಮ್ಹಕಾ ವೊರಾಡ್ ಯೆತಾನಾ ’ಅಪ್ಪಾ’ ಮ್ಹಳ್ಳ್ಯಾ ಉತ್ರಾನ್ ತಕ್ಲೆಕ್ ಮುಸ್ಳಾನ್ ದಾಡಯಿಲ್ಲ್ಯಾಪರಿ ಜಾತಾನ ಥಂಯ್ಚ್ ಬಸ್ಲಿಂ. ’ಅಪ್ಪಾ ... ಭಿಯೆನಾಕಾ. ಹಾಂವ್ ತುಂವೆ ದಿಲ್ಯಾ ಧರ್ಮಾ ಥಾವ್ನ್ ಭಾಯ್ರ್ ಯೇವ್ನ್ ಜಲ್ಮಾಲ್ಲ್ಯಾ ಧರ್ಮಾಕ್ ಪಾಟಿಂ ಆಯ್ಲ್ಯಾಂ. ತುಜೆಂ ಆನ್ನಾಮಾರಿ ಮೆಲಾಂ.
ಆಮುಣಿ ... ಜಿವಂತ್ ಜಾಲಾಂ. ಜೀವಾನಾಚಿ ವಾಟ್ ಧಾಂಪ್ಚೊ ಧರ್ಮ್ ಘೆಂವ್ಕ್ ಕಿತೆಂ ಕರುಂ? ಮ್ಹಕಾ ಜಿಯೆಜೆ ದೆಕುನ್... ’ ರಡ್ಲೆಂ ಉಪ್ರಾಂತ್...’ ಹಾಣಿಂ ಮ್ಹಕಾ ವಾಟ್ ದಾಕಯ್ಲಿ. ಪಾತಿಂ ಘೆತ್ಲೆಂ ಮ್ಹಜ್ಯಾ ಪಾಂಯಾನಿ ರಾವೊನ್ ಆಮ್ಕಾಂಯ್ ಜಿಯೆಂವ್ಕ್ ಹಕ್ಕ್ ಆಸಾ ಮ್ಹಳ್ಳೆಂ ದಾಕಯ್ತಾಂ’ ತೊಣ್ಕ್ಯಾನ್ ಸರ್ಸರಿತ್ ಬಡೈಲೆಬರಿಂ ದುಕ್ಲೆಂ ಮ್ಹಜ್ಯಾ ಜಿಬೆಕ್ ಆರ್ ಮಾರ್ಲಿ. ಸಾಂಗಾತಾ ಆಯಿಲ್ಲೆ ಫೆಸ್ತಾಂ ಕರುಂಕ್ ಆಯ್ತೆ ಜಾಲ್ಲೆಂ ನಾಚ್ತಾಲೆ, ಉಡ್ತಾಲೆ.
ಸಂತೊಸಾನ್ ಜೈಕಾರ್ ಘಾಲ್ತಾಲೆ. ಪಟಾಕ್ಯೊ ಪುಟ್ಲ್ಯೊ. ದೈವಾ ಮುಕಾರ್ ದಿವೆ ಜಳ್ಳೆ. ಪೂಣ್ ಹಾಂವ್ ಎಕ್ಸುರ್ಂ ಜಾಲಿಂ ಭುಂಯ್ತ್ ಕಾಳೊಕ್ ವಾಡ್ಲೊ. ಮ್ಹಜ್ಯಾ ಮ್ಹತಿಂತ್ ಆಟಿಚ್ಯಾ ಆಮಸ್ಯಾಚೊ ಕಾಳೊಕ್ ಪಡ್ಲೊ. ಸಗ್ಳೆಂ ರಿತೆಂ ಹಾಂವ್ ಎಕ್ಸುರಿಂ. ನಾಕ್ಭರ್ ಪಿಯೆವ್ನ್ ಆಯಿಲ್ಲೊ ಮ್ಹಜೊ ಘರ್ಕಾರ್ ಫೈರುಮಾಂತ್ ಬುಡುಲ್ಲಿ.
ಧೊಲ್ ಕಾಡುನ್ ನಿತಳ್ ಕರ್ತಾನಾ ಮ್ಹಜಿ ದೀಶ್ಟ್ ಘೈರಿ ಜಾಲಿ. ತೊ ತಿಂ ಘೆವುನ್ ಮುಕಾರ್ ವೆತಾನಾ ಸಗ್ಳೊ ಪಟ್ಲಾಮ್ ಗೌಜಿ ಗಮ್ಮತೆರ್ ದೆಂವುನ್ ವೆತಾನಾ ಮುಲ್ಯಾರ್ ನಿದ್ಲ್ಲೆಂ ಸುಣೆ ತಾಂಚೊ ಪಾಟ್ಲಾವ್ ಕರುಂಕ್ ಲಾಗ್ಲೆಂ. ಧುವ್ ಆಜ್ ಸುಡ್ಸುಡಿತ್. ದೆಕುನ್ ಚಿಮ್ಣಿ ಪೆಟ್ಲಿ. ಭಾಯ್ರ್ ಭಿತರ್ ವೆತಾನಾ ರಾಂದ್ಪಾಚಿ ತಯಾರಾಯ್ ಸುರು ಜಾಲಿ. ಮಾಜಾರ್ ಉಟೊನ್ ಮ್ಹಕಾ ಪಳೆತಾನಾ ಪಯ್ಶಿಲ್ಯಾನ್ ಧೊಲಿಚೊ, ವಾಚ್ಪಾಚೊ ಆನಿ ಮಾರ್ ಧಾಂವ್ಡಾಂವ್ನ್ ವ್ಹರ್ಚೊ ಆವಾಜ್ ಆಯ್ಕಾತಾನಾ ಮ್ಹಜ್ಯಾ ಜಿಣಿಯೆಚೊ ಏಕಾ ಸಂಗ್ತಿಚೊ ಸೊಲ್ಲೊ ಮುಗ್ದಾಲ್ಲೊ. ಮ್ಹತಿಂತ್ ಥಂಯ್ ಜಾಂವ್ಚೆ ಘಡಿತ್ ಜಿವೆಂ ಜಾಲೆಂ.
ಚರುವೊ ವಾವೊನ್ ಮಾರಿ ಗುಡಿಯೆಕ್ ಪಾವ್ಲೆಂ ಕೊಣ್ಣಾ? ಮೊಗ್ರಾನಿಂ ವಾವಯಿಲ್ಲ್ಯಾ ದಲ್ಯಾಂತ್ಲೆ ಮುಡ್ಯಾ ತಾಂದ್ಳಾಚೆಂ ಶಿತ್ ಭಾರ್ಣೆಕ್ ಘಾಲೆಂ ದಿಸ್ತಾ. ಕುಂಕುಮ್! ಬೊಂಡೆ! ಫುಲಾಂ ಪೊಣ್ಟಿಬದಿ ಪೆಟ್ತಾಲಿಂ ಆಸ್ತಾಂ ಮಡ್ವಾಳಾನ್ ಕುಂಕ್ಡಾಚಿ ಗೊಮ್ಟಿ ಶಿತಾರ್ ಕಾತ್ರುನ್ ರಗ್ತಾಚೊ ಹಾರ್ ದಿಲೊಗೀ? ಪಾಪ್ ಯೆದೊಳ್ ಪಾಕಾಟೆ ಫುಲೊನ್ ಸಂತೊಸಾನ್ ಬೊಬಾಟ್ಚಿಂ ಕುಂಕ್ಡಾ ಕಿತೆಂ ಜಾಣಾಂತ್ ಆಮಿ ಆಜ್ ಬಲಿ ಮ್ಹಣೊನ್? ಕೊಣಾಕ್ ಖುಶಿ ಕರುಂಕ್ ಕೋಣ್ ಬಲಿ?
ಥಂಯ್ಚ್ ದೊಳೊ ಆಡ್ ಜಾಲೊ. ಎಕಾಚ್ಪಾಣೆ ಮಾರ್ಲ್ಯಾ ಬರಿಂ ಜಾಗ್ ಜಾಲಿಂ ಪಳೆತಾನಾ ಧಾಲೆಂ ಭರ್ ಶಿತ್, ಭುರ್ಗಿಂ ತಾಂತ್ಲೆ ಕುಂಕ್ಡಾಚೊ ಮಾಂಡ್ಡೆ ಕಾಡ್ತಾಲಿಂ. ’ಅಪ್ಪಾ! ಕಿತ್ಲೆಂ ಶಿತ್ ಪಳೆ. ಅಬ್ಬಾ! ಇತ್ಲೆಂ ಶಿತ್ ಪಳೆವ್ನ್ ಕಿತ್ಲೆ ದೀಸ್ ಜಾಲೆ. ಆಜ್ ಪೋಟ್ಬರ್ ಜೆವ್ಯಾಂ ಭುರ್ಗ್ಯಾಂಕೀ ಕಸೆಂ ಸಾಂಗ್ಚೆಂ ತೆಂ ಸೈತಾನಾಚೆಂ ಖಾಂವ್ಕ್ ನ್ಹಜೊ.
ಪಾತಾಕ್ ಜಾತಾ. ಮ್ಹಜಿ ಜೀಬ್ ಕಿತೆಂಯ್ ಸಾಂಗೊಂಕ್ ತಯಾರ್ ನಾಂ ತರೀ ಕಶ್ಟಾನಿ ... ’ಪುತಾ... ತೆಂ ನಾಕಾ...’ ’ಕಿತ್ಯಾಕ್’ ಸಕ್ಡಾಂ ಏಕಾಚ್ ಪಾವ್ಟಿಂ ಉಟ್ಲಿಂ ತುಂ ಜಾಲ್ಯಾರ್ ಜೆವಿನಾಕಾ. ಭುಕೆನ್ ಮೊರ್. ಭುರ್ಗಿಂ ತೆಂಚ್ ವಯ್ಲ್ಯಾ ವರ್ ಜೆವ್ತಾನಾ ಮ್ಹಜಿ ದೀಶ್ಟ್ ವೊಣ್ತಿರ್ ಗೆಲಿ. ಥಂಯ್ಚ್ ಆಸ್ಲ್ಲೆಂ ಪಾಯ್ನಾಲ್ ದಿಸಾನ್. ಖಂಯ್ ಗೆಲೆಂ? ಕೊಣಾಲಾಗಿಂ ವಿಚಾರುಂ? ಆನ್ನಾಮಾರಿನ್ ರಾಂದ್ಲೆಲೆಂ ಸಕ್ಡಾಂ ಸಾಂಗಾತಾ ಬಸೊನ್ ಜೆವ್ತಾಲಿಂ ಕುಶಿನ್ ಸುರೆಚಿ ಮುಟ್ಟಿಂ. ಮ್ಹಜ್ಯಾ ಪೊಟಾಂತ್ ಭುಕೆಚಿಂ ಬೊಬಾಟ್ ಆಯ್ಕೊಂಕ್ ಲಾಗ್ಲಿಂ. ಮಾಸಾಚೊ ಪರ್ಮೊಳ್ ಯೆತಾನಾ ಮ್ಹಜ್ಯಾ ಬಿತರ್ಲ್ಯಾ ಆವಾಜಾನ್ ಫಳಾಫಳ್ ಘೆತ್ಲಿ. ಪಳತೆ ಬೊಸ್ಲಿಂ. ಹಾಂವ್ ನೆಣಾಂ ಕಿತೆಂ ಜಾಲೆಂ ಮ್ಹಜ್ಯಾ ಪುತಾನ್ ದವರ್ಲ್ಲಿ. ಹರ್ಯೆಕ್ ಉಂಡಿ ರುಚಿಕ್ ಆಸ್ಲಿ.
ಪೊಟಾಕ್ ಥೊಡಿ ಥಂಡಾಯ್ ಜಾತಾನಾ ’ಅಯ್ಯೊ’ ಹೆಂ ಕಿತೆಂ ಜಾಲೆಂ? ಹಾಂವ್ ಘಡ್ಬಡ್ಲಿಂ ಭುರ್ಗಿಂ ಮ್ಹಕಾ ಪಳೆವ್ನ್ ಹಾಸ್ತಾಲಿಂ. ತಾಂಚ್ಯಾ ಬಾಪಾಯ್ಕ್ ಪಿಯೆಲ್ಲೆಂ ಮಸ್ತಾಕಾಕ್ ಚಡ್ಲ್ಲೆಂ ದೊನ್ ದೊಣಿನ್ ಪಯ್ಣ್ ಕರ್ಚ್ಯಾ ಪಯ್ಣ್ಯಾರ್ಯಾ ಬರಿಂ. ಜೆಂವ್ಕ್ ತಾಕಾ ಜಾಯ್ನಾತ್ಲ್ಲೆಂ. ಉಟ್ಲೊ. ಪರತ್ ಕುಶಿನ್ ಆಸ್ಲ್ಲಿ ಧೊಲ್ ಘೆವ್ನ್ ಬಡಂವ್ಕ್ ಲಾಗ್ಲೊ. ಆವಾಜ್ ವಾಡ್ಲೊ... ವಾಡ್ಲೊ... ಕೇರಿಂತ್ಲೆ ಜಮ್ಲೆಂ. ಆಪ್ಣಾಲೆಂ ಆಯ್ಕಾನಾ. ಗುರ್ಕಾರ್ ಸಾಂಗ್ತಾಲೊ - ’ ತೊ ಸಂತೊಸಾನ್ ಪಿಸೊ ಜಾಲಾ, ನೀಚಾ ತಾಚ್ಯಾ ಅಂಗಾರ್ ಆಯ್ಲಾ’.
ಸಮಾಜ್ ಸೇವಕ್ ಸಾಂಗ್ತಾಲೆ - ’ ಫಾಲ್ಯಾಂ ಯೆತಾ ಪೆಪಾರರ್ - ಮರಳಿ ಮಾತ್ರ ದರ್ಮಕ್ಕೆ ಐದು ಸಂಸಾರ’ ಕೇರ್ ಸಗ್ಳಿಂ ಸಾಂಗ್ತಾಲಿಂ ’ ಆಮಿ ಪರತ್ ಏಕ್ ಜಾಲ್ಯಾಂವ್. ಹಾಂವ್ ಚಿಂತ್ತಾಲಿಂ - ನವಿಂ ಕಿರಿಸ್ತಾಂವಾಂ ಆಮಿ ನಾಸ್ತಾನಾ ತಾಂಕಾ ಕಿತೆಂ ಜಾಯ್ತ್? ಏ ದೆವಾ... ನಿಮಾಣೆ ತರೀಂ ಆಮ್ಕಾ ನವ್ಯಾ ಥಾವ್ನ್ ಪರ್ನ್ಯಾಕ್ ಕಿತ್ಯಾಕ್ ಕರುಂಕ್ ನಾಂಯ್? ಪರತ್ ಪತ್ರಾಕ್ ತಕ್ಲಿ ಬಾಗ್ವೊಂಕ್ ಜಾಯ್ತ್? ಪೂಣ್... ಮ್ಹಜ್ಯಾ ಪತಿಕ್ ಹೆಂ ಖಬರ್ ನಾಂ ತೊ ಬಡಯ್ತಾಲೊ ದೋಲ್. ಬಡಯ್ತಾಲೊ... ನಿಮಾಣೆಂ ದೋಲಿಚೆಂ ಚಾಮ್ ವ್ಹಡಾ ಆವಾಜಾನ್ ಪುಟ್ಲೆಂ. ಆನಿಂ ತೊ ತ್ಯಾ ಧೊಲಿಚ್ಯಾ ಚಾಮಾ ಭಿತರ್ ಧಡಿಲ್ಲ್ ಕರುನ್ ಪರ್ತಾಲೊ.
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
