ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 8. ಬ್ರದರ್ ರೊಕಿ
ಕೊಂಕ್ಣಿ ಸಾಹಿತ್ಯಾಂತ್ ಹೊ ಕವಿ ಜಾವ್ನ್ ಫಾಮಾದ್ ತರ್ಯ್ ತಾಣೆಂ ಕೊಂಕ್ಣೆಂತ್ ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಹಾಚಿಂ ಬರ್ಪಾಂ ವಾಚ್ತಾನಾ ಹಾಂತ್ಲಿ ಕಾಣಿ ಕಾಳ್ಜಾಕ್ ಲಾಗ್ತಾ ದೆಕುನ್ ಸದಾಂಕಾಳ್ ತಿ ಉಡಾಸಾಂತ್ ಉರ್ತಾ ಮ್ಹಣ್ಚಾಕ್ ಹಿ ಕಾಣಿ ಗೊವಾಯ್ ದಿತಾ. ಆಂಡ್ರುನ್ ಕೊಂಕ್ಣೆಂತ್ ಚಡುಣೆಂ ಪನ್ನಾಸಾಂಲಾಗಿಂ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್, ಥೊಡ್ಯಾಂಕ್ ಇನಾಮಾಂಯ್ ಲಾಭ್ಲ್ಯಾಂತ್ ಆನಿ ಆಕಾಶ್ವಾಣಿ ಮಂಗ್ಳುರಾಂತ್ ಪ್ರಸಾರ್ಯ್ ಜಾಲ್ಯಾತ್.
[ಹಿ ಕಾಣಿಂ ಬರಂವ್ಕ್ ಉತ್ತೇಜನ್ ದಿಲ್ಲ್ಯಾ ಜೆಮ್ಮಾ ಪಡೀಲ್ ಹಾಕಾ ಹಾಂವ್ ಋಣ್ಕಾರಿ - ವಲ್ಲಿ]
ಆಂಡ್ರು ಡಿ’ಕುನ್ಹಾ
[ಹಿ ಕಾಣಿಂ 1988 ಇಸ್ವೆಂತ್ ಆಂಡ್ರು ಡಿ’ಕುನ್ಹಾನ್ ಬರಯಿಲ್ಲಿ ಆನಿ ಆಮ್ಚೊ ಯುವಕ್ ಪತ್ರಾಚೆರ್ ಪರ್ಗಟ್ ಜಾಲ್ಲಿ ಹಾವೆಂ ವಾಚ್ಲ್ಲಿ ತರ್ಯೀ ಅಜೂನ್ ಮ್ಹಜಾ ಮತಿಚಾ ಪಡ್ದ್ಯಾಚೆರ್ ಖಂಚೊನ್ ಆಸ್ಲ್ಲಿ, ಹ್ಯಾ ಕಾಣ್ಯೆಚಿ ಪ್ರತಿ ಆಂಡ್ರುಲಾಗಿಂ ಜಾಂವ್, ಮ್ಹಜೆಲಾಗಿಂ ಜಾಂವ್ ನಾತ್ಲ್ಲ್ಯಾನ್ ಹಾವೆಂ ಪರತ್ ಬರಯ್ಲ್ಯಾ ಹ್ಯಾ ಕಾಣ್ಯೆಚೆರ್ ಪ್ರೇರಣ್ ಘೆವ್ನ್ ಹಾವೆಂ ಬರಯಿಲ್ಲಿ ’ಬ್ರದರ್ ರೊನಿ’ ಮ್ಹಳ್ಳಿ ಕಾಣಿ 1991 ಇಸ್ವೆಂತ್ ಆಮ್ಚೊ ಯುವಕ್ ಪತ್ರಾಚೆರ್ ಪರ್ಗಟ್ ಜಾಲ್ಲಿ.]
ತ್ಯಾ ಸಕಾಳಿಂಚಾ ಪ್ರಶಾಂತ್ ಹವ್ಯಾಮಧೆಂ, ದರ್ಯಾವೆಳೆರ್ ಬೊಸೊನ್ ಆಸ್ಲ್ಲ್ಯಾ ಮ್ಹಜಾ ನದ್ರೆಕ್ ದರ್ಯಾಂತ್ ಖೆಳೊನ್ ತಡಿಕ್ ಆಪ್ಟೊಂವ್ಚಾ ಲ್ಹಾರಾಂಚಾ ಪೊಕ್ರಿಪಣಾಚೆರ್ ಅವ್ಯಕ್ತ್ ಭೊಗ್ಣಾಂ ಉದೆವ್ನ್ ಯೆತಾಲಿಂ. ಸುರ್ಯೊ ಎದೊಳ್ಚ್ ಅಪ್ಲಿಂ ಭಾಂಗ್ರಾಳಿಂ ಕಿರ್ಣಾಂ ತ್ಯಾ ದರ್ಯಾಚೆರ್ ಹಾಂತುಳ್ಣ್ ಅಪ್ಲೊ ಪೃಥ್ವಿಚೆರ್ ಪರ್ಜಳ್ ಪರ್ಗಟೊಂಕ್ ಲಾಗ್ಲ್ಲೊ ತರ್ಯ್ ಮ್ಹಜಾ ಮತಿಂತ್ ಉಟ್ಲ್ಲೆ ವಾದಾಳ್ ಹ್ಯಾ ಖಂಚಾಕ್ಯ್ ಗುಮಾನ್ ಕರುಂಕ್ ಕಬೂಲ್ ನಾತ್ಲ್ಲೆಂ. ಕಾಳಿಜ್ ಮ್ಹಜೆಂ ಉದ್ವೇಗಾನ್ ಜ್ಯೊರಾನ್ ಉಡ್ತಾಲೆಂ, ಹಾತಾಂತ್ ಬಾಂದ್ಲ್ಲ್ಯಾ ಘಡ್ಯಾಳಾಚೆರ್ ಮ್ಹಜಿ ನದರ್ ಮ್ಹಜಾ ಪರ್ವಣ್ಗೆವಿಣೆಂ ಪಡ್ಲ್ಲಿಚ್ ಮ್ಹಜಿ ದೀಶ್ಟ್ ತಿಶಿನ್ ಹಿಶಿನ್ ಘುಂವ್ತಾಲಿ.
ಮ್ಹಜಾ ಮನಾನ್ ಎದೊಳ್ಚ್ ಮಾಂದುನ್ ಘೆತ್ಲ್ಲೆಂ - ನಾ! ಆಜ್ ಮ್ಹಜಾ ಮತಿಕ್ ಸುಶೆಗ್ ಜಾಯ್! ಮ್ಹಜಾ ಕಾಳ್ಜಾಕ್ ಸುಶೆಗ್ ಜಾಯ್! ಮ್ಹಜಾ ಶೆವೊಟಾಕ್ ಪೋಂತ್ ಜಾಯ್!
***************
ಹಾಂವ್! ಬ್ರದರ್ ರೊಕಿ
ಅಪ್ಲಿ ಜಿಣಿ ದೆವಾಕ್ ಸಮರ್ಪುನ್ ದಿಂವ್ಚಾಕ್ ಪಾಟ್ಲ್ಯಾ ಸ ವರ್ಸಾಂ ಥಾವ್ನ್ ಸೆಮಿನರಿಂತ್ ಆಸೊನ್, ಆಯ್ಲೆವಾರ್ ಮ್ಹಜೆಂ ತತ್ವ್ ಶಾಸ್ತ್ರಾಚೆಂ ಶಿಕಾಪ್ ಸಂಪವ್ನ್ ಎಕಾ ವರ್ಸಾಖಾತಿರ್ ಹ್ಯಾ ಫಿರ್ಗಜೆಕ್ ಆಯಿಲ್ಲೊಂ. ತರ್ನಾಟ್ಪಣಾಚಿ ಹುಮೆದ್ ಮ್ಹಾಕಾ ಫಿರ್ಗಜೆಂತ್ ಆಸ್ಚಾ ಯುವಜಣಾಂಸವೆಂ ಭರ್ಸೊನ್, ತಾಂಚೆಲಾಗಿಂ ಆಸ್ಚಿಂ ತಾಲೆಂತಾಂ ಭಾಯ್ರ್ ಹಾಡಂವ್ಕ್ ತ್ರಾಸ್ ಜಾಂವ್ಕ್ ನಾಂತ್. ಹಾಂವ್ ಪಳೆಂವ್ಕ್ ಸೊಭಿತ್ ದಿಸ್ತಾಂ ಮ್ಹಣ್ ಮ್ಹಾಕಾ ಆಯಿಲ್ಲ್ಯಾ ಸಭಾರ್ ಲವ್ ಲೆಟರಾಂನಿ ರುಜ್ವಾತ್ ದಿಲ್ಲಿ. ಗೊರ್ಶಿ ಕಾತ್, ಹಳ್ತಾಚೊ ಜೀವ್, ಸಾದೆಂ ವೆಕ್ತಿತ್ವ್, ಮಧುರ್ ತಾಳೊ, ತಾಕಾ ಸಾಂಗಾತ್ ದಿಂವ್ಚಾಕ್ ಮ್ಹಜೆಲಾಗಿಂ ಆಸ್ಲ್ಲ್ಯಾ ತಾಲೆಂತಾಚೊ ಪುಂಜೊ ಮ್ಹಜೆಲಾಗಿಂ ಖರೆಂಚ್ ಚಡಿತ್ ಆನಿ ಚಡಿತ್ ಚೆಡ್ವಾಂಕ್ ವೊಡ್ಚಾಂತ್ ಜಯ್ತ್ ಮೆಳ್ತಾಲೆಂ.
ಪುಣ್!
ಹಾಂವೆಂ ಚಿಂತ್ಚೆಂ ಚಿಂತಾಪ್ ವೆಗ್ಳೆಂಚ್. ಮ್ಹಾಕಾ ಸಂಸಾರಾಚಾ ಹ್ಯಾ ತಾಳ್ಣ್ಯಾಂಚೆರ್ ಜಯ್ತ್ ವರುಂಕ್ ಆಸ್ಲ್ಲೆಂ. ಮ್ಹಜಾ ಜಿಣ್ಯೆಚೆಂ ಮಿಸಾಂವ್ ಧಯ್ರಾನ್ ಆನಿ ಸಯ್ರಣ್ ಸಾಂಭಾಳ್ನ್ ಫುಡೆಂ ವರುಂಕ್ ಆಸ್ಲ್ಲೆಂ. ಹಾಂವ್ ಮಾಗ್ಣೆಂ - ನಿಹಾಳ್ ಕರ್ತಾಲೊಂ, ಮ್ಹಜಾ ದೀಸ್ಪೊಡ್ತ್ಯಾ ಜಿಣ್ಯೆಚೆರ್ ಮ್ಹಾಕಾ ರಾಕೊನ್ ವರ್ಚಾಕ್ ಸಾಯ್ಬಿಣ್ ಮಾಯೆಚೊ ಆಧಾರ್ ಮಾಗ್ತಾಲೊಂ.
ಹ್ಯಾ ಫಿರ್ಗಜೆಕ್ ಆಯಿಲ್ಲೆಥಾವ್ನ್ ಇಗರ್ಜೆಂತ್ಚ್ ಪಾದ್ರ್ಯಾಬಾಚಾ ಘರಾಂತ್ ಮ್ಹಜಾ ಕುಡಾಂತ್ ಹಾಂವ್ ರಾವ್ತಾಲೊಂ ದೆಕುನ್ ಸಕಾಳಿಂ ಫಾಂತ್ಯಾರ್ ಉಟೊನ್ ಇಗರ್ಜೆಕ್ ವಚೊನ್ ದಿಂಬ್ಯೆರ್ ಗಳೊನ್ ನಿಹಾಳ್ ಕರ್ತಾಲೊಂ. ಮಾಗ್ಣೆಂ ಕರ್ತಾಲೊಂ, ಉಪ್ರಾಂತ್ ಸಕಾಳಿಂಚಾ ಮಿಸಾಚಿ ತಯಾರಾಯ್ ಕರ್ತಾಲೊಂ, ಗಿಟಾರ್ ಖೆಳವ್ನ್ ಕಾಂತಾರಾಂ ಗಾಯ್ತಾಲೊಂ, ವಾಚಾಪ್ ವಾಚ್ತಾಲೊಂ. ಆನಿ ಖರೆಂಚ್ ಹಾವೆಂ ಜಾಯ್ತ್ಯಾ ಯುವಜಣಾಂಕ್ ಆಕರ್ಶಿತ್ ಕೆಲ್ಲೊ ಮ್ಹಳ್ಳೆಂ ಲೋಕ್ ತವಳ್ ತವಳ್ ಸಾಂಗ್ತಾಲೊ.
ತೀನ್ಂಚ್ ಮಯ್ನ್ಯಾಂನಿ ಮ್ಹಜಾ ನಡ್ತ್ಯಾನ್ ಫಿರ್ಗಜೆಂತ್ ಜಿವಾಳಾಯ್ ಹಾಡ್ಲ್ಲಿ ಮ್ಹಣ್ ಯುವಸಂಚಾಲಾಕ್ ಆಯಿಲ್ಲ್ಯಾ ಸಾಂದ್ಯಾಂಕ್ ಮೆಜ್ತಾನಾ ಕಳ್ತಾಲೆಂ. ತಾಕಾ ಪುರ್ತೆಂ ಮ್ಹಾಕಾ ತ್ಯಾ ಯುವಸಂಚಾಲನಾಚೊ ಸಹಾಯಕ್ ನಿರ್ದೇಶಕ್ ಜಾವ್ನ್ ನಮ್ಯಾರ್ಲ್ಲೊ ದೆಕುನ್ ಯುವಜಣಾಂಕ್ ಕಾಂತಾರಾಂ, ಪದಾಂ ಶಿಕಂವ್ಕ್, ಕ್ರಿಕೆಟ್, ವಾಲಿಬೋಲ್, ತ್ರೋಬೋಲ್, ಟೆನ್ನಿಸ್, ಕ್ಯಾರಮ್ ಶಿಕಂವ್ಕ್ ಮ್ಹಕಾ ಬರೊ ಆವ್ಕಾಸ್ ಮೆಳ್ಳೊ ಆನಿ ಹಾವೆಂಯ್ ತೊ ಬರೊಚ್ ಗಳ್ಸಿಲೊ.
ಸ ಮಯ್ನ್ಯಾಂ ಭಿತರ್ ಹ್ಯಾ ಫಿರ್ಗಜೆಚೆಂ ಯುವಸಂಚಾಲನ್ ವಾರಾಡ್ಯಾಚಾ ಚಡ್ತಾವ್ ಸ್ಪರ್ಧ್ಯಾನಿ ಜಿಕ್ಲೆಂ ಆನಿ ಟ್ರೋಫಿ ಹಾಡ್ನ್ ಯೆತಾನಾ ಫಿರ್ಗಜೆಂತ್ ಜಾಲ್ಲೊ ಸಂತೊಸ್ ವರ್ಣುಂಕ್ ಸಾಧ್ಯ್ ನಾತ್ಲ್ಲೊ. ಸರ್ವಾಂಚಾ ತೊಂಡಾಂತ್ ಎಕ್ಚ್ ನಾಂವ್ - ಬ್ರದರ್ ರೊಕಿ, ಬ್ರದರ್ ರೊಕಿ. ಮ್ಹಜೆಂ ಮುಖ್ಲೆಂ ಮಿಸಾಂವ್ ಜಾವ್ನ್ ಆಸ್ಲ್ಲೆಂ ’ವಾರ್ಶಿಕೋತ್ಸವ್’. ವ್ಹಯ್! ವಾರ್ಶಿಕೋತ್ಸವ್ ಆನಿ ಯುವಜಣಾಂಚೊ ದಿವಸ್.
ತ್ಯಾ ಖಾತಿರ್ ಎದೊಳ್ಚ್ ಹಾವೆಂ ತಯಾರಾಯ್ ಸುರು ಕೆಲ್ಲಿ, ಅಭಿನಯ್ ಕರ್ಚಾಂಚೊ ಪಂಗಡ್, ಗಾಯನಾಂ ಗಾಂವ್ಚಾಂಚೊ ಪಂಗಡ್ ತಶೆಂಚ್ ಕಲೆಕ್ಶನ್ ಕರ್ಚಾಂಚೊ ಪಂಗಡ್ ಮ್ಹಣೊನ್ ಸರ್ವಾಂಕ್ ಆವ್ಕಾಸ್ ಲಾಭವ್ನ್ ದಿಲೊ. ತಯಾರಾಯ್ ದರಬಸ್ತ್ ಜಾವ್ನ್ ಚಲ್ತಾಲಿ.
ಲೀನಾ ತ್ಯಾ ಫಿರ್ಗಜೆಚೆಂ ಎಕ್ಲೆಂ ಚೆಡುಂ ಪಿಯುಸಿ ದುಸ್ರೆ ವರ್ಸಾಚೆಂ ಶಿಕಾಪ್ ಜೊಡುನ್ ಆಸ್ಲ್ಲೆಂ. ಸೊಭಿತ್ ತೋಂಡ್, ಆಕರ್ಶಕ್ ವೆಕ್ತಿತ್ವ್, ಭರ್ಲ್ಲೆ ವಿಸ್ವೆ ಆನಿ ಮಾಣ್ಸುಗೆಚಿ ಚಾಲ್-ಚಮ್ಕೊಣೆನ್ ಫಿರ್ಗಜೆಚಾ ಸಭಾರ್ ತರ್ನಾಟ್ಯಾಂಚೆಂ ಗಮನ್ ತಾಚೆರ್ ಆಸ್ಲ್ಲೆಂ.
ಎಕಾ ಸಕಾಳಿಂ, ಕೆದಿಂಕ್ಚ್ ಸದಾಂಚೆಂ ಮೀಸ್ ಆಯ್ಕೊಂಕ್ ಯೇನಾತ್ಲ್ಲೆಂ ಲೀನಾ ಮಿಸಾಕ್ ಆಯಿಲ್ಲೆಂ ಆನಿಂ ಮೀಸ್ ಜಾತೆಚ್ಚ್ ಅಪ್ಣಾಕ್ ಮೆಳೊಂಕ್ ಬೊಲ್ಕಾಂವಾಂತ್ ಆಯ್ಲೆಂ. ಅಪುಣ್ ಬೊಲ್ಕಾಂವಾಂತ್ ಕಾಮಾರ್ ಪಡ್ಲ್ಲೊಂ ಪಾಟ್ಲ್ಯಾನ್ ಲೀನಾಚೊ ಮಧುರ್ ತಾಳೊ ’ಬ್ರದರ್ ರೊಕಿ - ಗುಡ್ ಮೋರ್ನಿಂಗ್’ ಹಾಂವ್ ಪಾಟಿಂ ಘುಂವೊನ್ ಪಳೆತಾನಾ ಮ್ಹಜಾ ಕಾಳ್ಜಾಂತ್ ಕಸಲೆಗೀ ಅವ್ಯಕ್ತ್ ಚಿಂತಾಪ್ ಭೊಗೊನ್ ಆಯ್ಲೆಂ, ನಾಕಾ ನಾಕಾ ಮ್ಹಳ್ಯಾರೀ ತಾಚೆ ತಾಂಬ್ಡೆ ವೋಂಟ್, ಉಭಾರ್ ಹರ್ದೆಂ ತಾಚಾ ನವ್ಯಾ ಆಂಗ್ಲ್ಯಾಪ್ರಾಸ್ ಸೊಭಿತ್ ದಿಸೊಂಕ್ ಲಾಗ್ಲೆಂ. ’ಎಸ್ಸ್ ಲೀನಾ’ ಮ್ಹಳೆಂ.
’ಬ್ರದರ್ ರೊಕಿ, ಆಜ್ ಮ್ಹಜೊ ಬರ್ತ್ಡೇ, ದೆಕುನ್ ತುಮ್ಕಾಂ ಏಕ್ ಕೇಕ್ ಹಾಡ್ನ್ ಆಯ್ಲ್ಯಾಂ’ ಮ್ಹಣೊನ್ ತಾಚಾ ಹಾತಿಂ ಆಸ್ಚಿ ಲ್ಹಾನ್ ಕೇಕ್ ಮ್ಹಜಾ ಹಾತಿಂ ದಿಲಿ.
’ವೋ.. ಹ್ಯಾಪಿ ಬರ್ತ್ಡೇ ಲೀನಾ’ ಮ್ಹಜಾ ತೊಂಡಾಂತೂನ್ ಉತ್ರಾಂ ಆಪಾಪಿಂಚ್ ಸುಟೊನ್ ಮ್ಹಜೊ ಉಜ್ವೊ ಹಾತ್ ತಾಚಾ ಹಾತಾಕ್ ಧರುನ್ ತಾಚಿಂ ಮೊವಾಳ್ ಬೊಟಾಂ ದಾಂಬ್ತಾಸ್ತಾನಾ ಮ್ಹಜಾ ಕಾಳ್ಜಾಂತ್ ಉದೆವ್ನ್ ಆಯಿಲ್ಲ್ಯಾ ತುಫಾನಾಕ್ ಹಾಂವ್ ಸಮ್ಜೊಂಕ್ ಸಕ್ಲೊಂನಾ.
’ಥ್ಯಾಂಕ್ ಯೂ ಬ್ರದರ್’ ತೆಂ ಹಾಸೊನ್ಂಚ್ ಗೆಲೆಂ.
ಹಾಂವ್ ಮ್ಹಜಾ ಉಜ್ವ್ಯಾ ತಳಾತಾಕ್ಚ್ ಪಳೆಂವ್ಚಾರ್ ಪಡ್ಲೊಂ. ಸುಮಾರ್ ವೇಳ್ ಪಾಶಾರ್ ಜಾಲೊ ತರ್ಯ್ ಮ್ಹಜಾ ಮತಿನ್ ಲೀನಾವಿಶ್ಯಾಂತ್ ಚಿಂತ್ಚೆಂ ರಾವಯ್ಲೆಂಚ್ ನಾ.
ಎಕೆಕ್ಚ್ ಘಡಿ ಸಂಪೊನ್ ಯೆತಾಲಿ, ಪುಣ್ ಸಗ್ಳೊ ದೀಸ್ ಮ್ಹಜಾನ್ ಲೀನಾಶಿವಾಯ್ ಹೆರ್ ಕಿತೆಂಚ್ ಚಿಂತುಂಕ್ ಜಾಲೆಂಚ್ ನಾ. ಪರತ್ ಪರತ್ ಲೀನಾ ಅಪ್ಣಾಖಾತಿರ್ ಇಗರ್ಜೆಕ್ ಆಯ್ಲೆಂ, ಮೊಗಾನ್ ಕೇಕ್ ಹಾಡ್ನ್ ಆಯ್ಲೆಂ ಆನಿಂ ನವೆಂ ಆಂಗ್ಲೆಂ ನೆಸೊನ್ ಆಯ್ಲೆಂ ಮ್ಹಜಾ ಕಾಳ್ಜಾಭಿತರ್ ಕಾಂಯ್ ರಿಗ್ಲೆಂ?
ಕಿತ್ಯಾಕ್ಗಿ ಅಪ್ಣಾಕ್ ಲೀನಾ ಅಪ್ಲೆಂ ಮ್ಹಳ್ಳೆಂ ಚಿಂತಾಪ್ ಆಯ್ಲೆಂ. ಜೆಂ ಎದೊಳ್ ಪರ್ಯಾಂತ್ ಕೆದಿಂಕ್ಚ್ ಕೊಣಾಚೆರ್ಚ್ ಆಯಿಲ್ಲೆಂನಾ. ಕಿತ್ಯಾಕ್? ತೆಂ ಅಪ್ಣಾಕ್ ಪಸಂದ್ ಕರ್ತಾ ದೆಕುನ್ ಅಪ್ಣಾಖಾತಿರ್ ತೆಂ ಆಯಿಲ್ಲೆಂ. ಅಪ್ಣಾಕ್ಯ್ ತೆಂ ಪಸಂದ್ ಆಸಾ?
ಛೆ! ಕಸಲಿ ತಾಳ್ಣಿ ಹಿ?
ಹಾಂವ್ ಪರತ್ ದಿಂಬಿಯೆರ್ ಪಡೊನ್ ಮಾಗಾಲಾಗ್ಲೊಂ, ದೆವಾ ಮ್ಹಜಾ ಮತಿಕ್ ತುಂ ಮ್ಹಜಾ ಜಿಣ್ಯೆಂತ್ ಹಾವೆಂ ಚಲೊಂಕ್ ಆಸ್ಚಾ ವಾಟೆಚೆರ್ ಉಜ್ವಾಡ್ ಫಾಂಕಯ್.
ಉಟೊನ್ ಜೇಂವ್ಕ್ ಗೆಲೊಂ ತರ್ಯ್ ಜೇಂವ್ಕ್ ಮ್ಹಜಾನ್ ಜಾಲೆಂನಾ. ಜಿಬೆಕ್ ರೂಚ್ ನಾತ್ಲ್ಲಿ, ಪೊಟಾಕ್ ಭುಕ್ ನಾತ್ಲ್ಲಿ.
ಅಶೆಂ ಕಿತ್ಯಾಕ್?
ಹಾಚ್ಯಾಧಿಂ ಜಾಯ್ತ್ಯಾ ಚೆಡ್ವಾಂನಿ ಮ್ಹಾಕಾ ಭೆಟೊನ್, ಲವ್ ಲೆಟರಾಂನಿ ಮ್ಹಜೊ ಮೋಗ್ ವಿಚಾರ್ಲೊ ತರ್ಯ್ ಅಪ್ಣಾಕ್ ತೆಂ ಕೆದಿಂಕ್ಚ್ ಭೊಗ್ಲ್ಲೆಂನಾ. ಥೊಡ್ಯಾಂನಿ ಅಪ್ಲ್ಯಾ ರಗ್ತಾನ್ ತಿಂ ಲವ್ ಲೆಟರಾಂ ಬರಯಿಲ್ಲಿಂ, ಅಪುಣ್ ತಾಂಚೊ ಮೊಗ್ ಕರಿನಾತ್ಲ್ಯಾರ್ ಜೀವ್ಘಾತ್ ಕರ್ನ್ ಮೊರ್ಚಿ ಧಮ್ಕೀಯ್ ತಾಣಿಂ ದಿಲ್ಲಿ. ತರ್ಯ್ ಹಾಂವ್ ಜಯ್ತೆವಂತ್ ಜಾಲ್ಲೊಂ.
ಪುಣ್ ಆತಾಂ!
ಲೀನಾಚಾಕೀ ಸೊಭಿತ್ ಸಭಾರ್ ಚೆಡ್ವಾಂ ಫಿರ್ಗಜೆಂತ್ ಆಸ್ಲ್ಲಿಂ, ಸೊಭಿತ್ ಸೊಭಿತ್ ಚೆಡ್ವಾಂ. ಪುಣ್ ಅಪ್ಣಾಕ್ ಅಸಲೆಂ ಕಿತೆಂಚ್ ಭೊಗೊಂಕ್ ನಾ. ಪುಣ್ ಲೀನಾ ಅಪ್ಣಾಚೆಂ ಮ್ಹಳ್ಳೆಂ ಭೊಗಾಪ್ ಕಿತ್ಯಾಕ್?
ಥೊಡೆ ದೀಸ್ ಪಾಶಾರ್ ಜಾಲೆ. ಅಪ್ಣಾಕ್ ಪದಾಂ ಶಿಕಯ್ತಾನಾ ಲೀನಾಚೆರ್ ಅಪ್ಲೆಂ ಗಮನ್ ಗೆಲೆಂ, ತೆಂ ಜಯ್ತೆಪಾವ್ಟಿಂ ಅಪ್ಣಾಚೆರ್ ಅಪ್ಲಿ ದೀಶ್ಟ್ ಖಂಚವ್ನ್ ಸಂಸಾರ್ ವಿಸ್ರಾಲ್ಲೆಂ ಅಪ್ಣಾಕ್ ಸಂಕಶ್ಟಾರ್ ಘಾಲ್ಲೆಂ.
ತ್ಯೇ ಉಪ್ರಾಂತ್ ದಿಸಾಕ್, ರಾತಿಕ್ ಆನಿ ಹರ್ಯೆಕಾ ವೆಳಾರ್ ಲೀನಾಚೆಂ ರುಪ್ಣೆಂ ಅಪ್ಲೆ ಮತಿಚಾ ಪಡ್ದ್ಯಾಚೆರ್ ಖಂಚ್ಲ್ಲೆಂ. ಆನಿ ಅಪ್ಣಾಕ್ ಹ್ಯಾ ಸಂದಿಗ್ಧ್ ಪರಿಗತೆ ಥಾವ್ನ್ ಸುಟ್ಕಾ ಜಾಯ್ ಆಸ್ಲ್ಲಿ.
ಹಾಂವ್ ಏಕ್ ದೀಸ್ ಸಗ್ಳೊ ಉಪಾಸ್ ಕರುನ್ ದೆವಾಲಾಗಿಂ ಮಾಗಾಲಾಗ್ಲೊಂ - ದೆವಾ ಮ್ಹಾಕಾ ಮ್ಹಜಾ ಮಿಸಾಂವಾಕ್ ಸಮ್ಜಾಯ್ ಮ್ಹಣೊನ್. ಸಕಾಳಿಂ, ದನ್ಪಾರಾಂ ಆನಿ ರಾತಿಂ ಏಕ್ ಘೊಟ್ ಉದಾಕ್ ಸಯ್ತ್ ಪಿಯೆಲೊಂ ನಾ. ಹಠಾನ್ ಪರತ್ ಪರತ್ ದೆವಾಲಾಗಿಂ ’ದೆವಾ ತುವೆಂ ಮ್ಹಜಾ ಮತಿಕ್ ಜಾಪ್ ದಿತಾ ಪರ್ಯಾಂತ್ ಹಾಂವ್ ಜೆವಿಸೊನಾ’ ಲ್ಹಾಣ್ ಭುರ್ಗ್ಯಾಪರಿಂ ಹಠಾನ್ ಮಾಗಾಲಾಗ್ಲೊಂ. ಅಖ್ರೇಕ್ ಮ್ಹಜಾ ಮತಿಂತ್ ಅವ್ಯಕ್ತ್ ಚಿಂತಾಪ್ ಉದೆಲೆಂ ’ಅಪುಣ್ ಲೀನಾಚೊ ಮೋಗ್ ಕರ್ತಾಂ’. ಹೆಂ ಚಿಂತುನ್ ಕಾಳ್ಜಾಂತ್ ಸಂತೊಸ್ ಪಾಚಾರ್ಲೊ.
ಮ್ಹಜಾ ಮತಿಕ್ ಜಾಪ್ ಮೆಳ್ಲ್ಲಿ. ನಾ ಅಪುಣ್ ಅಪ್ಲೊ ಭೆಸ್ ಸಾಂಡ್ತಲೊಂ, ಅಪುಣ್ ಲೀನಾಚೊ ಕಾಳ್ಜಾ ಥಾವ್ನ್ ಮೋಗ್ ಕರ್ತಲೊಂ, ಲೀನಾಕ್ ದೆವಾನ್ ರಚ್ಲಾಂ ಮ್ಹಜೆಖಾತಿರ್ ದೆಕುನ್ ಮ್ಹಾಕಾ ಹ್ಯಾ ಫಿರ್ಗಜೆಕ್ ಧಾಡ್ಚಿ ದೆವಾಚಿಚ್ ಮಾಂಡಾವಳ್. ದೆಕುನ್ ಆತಾಂ ಅಪುಣ್ ಲೀನಾಕ್ ಅಪ್ಲ್ಯಾ ವೆಂಗೆಂತ್ ಘೆತಲೊಂ, ತಾಚಾ ಸೊಭಿತ್ ಲ್ಹಾಂಬ್ ಕೆಸಾಂಚೆರ್ ಪೊಶೆವ್ನ್ ತಾಚಾ ಕಪಲಾಚೆರ್ ಮ್ಹಜಾ ಮೊಗಾಚೊ ಮೊರ್ ಘಾಲ್ತಲೊಂ ಆನಿಂ ಮಜಾ ಕಾಳ್ಜಾಂತ್ಲಿಂ ಭಗ್ಣಾಂ ಉಚಾರ್ತಲೊಂ ಆನಿ ಪಾಟ್ಲ್ಯಾ ಇತ್ಲ್ಯಾ ದಿಸಾಂನಿ ಅಪ್ಣಾನ್ ಖರ್ಚಿಲ್ಲ್ಯಾ ಎಕೆಕ್ ಘಡಿಯಾಂಚೆಂ ಲೇಕ್ ವಿಚಾರ್ತಲೊಂ. ಮ್ಹಜಾ ಮತಿನ್ ಎದೊಳ್ಚ್ ಲೇಕ್ ಘಾಲುಂಕ್ ಧರ್ಲ್ಲೆಂ.
ದುಸ್ರೆ ದೀಸ್ ಸಕಾಳಿಂ ಅನ್ಯೇಕ್ ಅಜ್ಯಾಪ್! ಲೀನಾ ಸದಾಂಚಾ ಮಿಸಾಕ್ ಆಯ್ಲಾಂ..
ಅಪ್ಣಾಕ್ ಮಾತ್ಸಿ ಕಾವ್ಜೆಣಿ ಭೊಗ್ಲಿ. ಕಿತ್ಯಾಕ್ ಆಯ್ಲಾಂ? ಕಾಂಯ್ ದೆವಾನ್ ತಾಕಾ ಮ್ಹಜೆಸರ್ಶಿಂ ದಾಡ್ಲಾಂ? ಜಾಂವ್ಕ್ ಪುರೊ ಮ್ಹಣ್ ಚಿಂತುನ್ ಮ್ಹಜಾ ಕಾಮಾರ್ ಪಡ್ಲೊಂ.
ಮೀಸ್ ಜಾಲೆಂ, ಆನಿಂ ತೆಂ ಮ್ಹಜೆಲಾಗಿಂ ಆಯ್ಲೆಂ ’ಬ್ರದರ್ ರೊಕಿ ಮ್ಹಾಕಾ ತುಜೆಲಾಗಿಂ ಇಲ್ಲೆಂ ಖಾಸ್ಗಿ ಉಲಂವ್ಕ್ ಆಸಾ’. ಅಪ್ಣಾನ್ ಸಾಂಗೊಂಕ್ ಚಿಂತ್ಲ್ಲೆಂ ಉತಾರ್ ತಾಣೆಂಚ್ ಉಚಾರ್ಲೆಂ ದೆಕುನ್ ಮ್ಹಜಾ ಕಾಳ್ಜಾನ್ ಸಂತೊಸಾನ್ ನಾಚೊಂಕ್ ಧರ್ಲ್ಲೆಂ. ’ಬರೆಂ ಆಮಿಂ ಖಂಯ್ ತರ್ಯೀ ವ್ಹೊರೆವಿಂಗಡ್ ಸುವಾತೆಕ್ ವಿಂಚ್ಯಾ’ ಹಾವೆಂ ಧಯ್ರ್ ಎಕ್ಟಾಂವ್ನ್ ಸಾಂಗ್ಲೆಂ. ತೆಂ ಕಬೂಲ್ ಜಾಲೆಂ ಆನಿಂ ತಾಣೆಂ ಫಾಲ್ಯಾಂ ಸಕಾಳಿಂ ದರ್ಯಾವೆಳೆರ್ ಮೆಳ್ಚಿ ಭಾಸ್ ದಿಲಿ.
************
ವೊರಾಂ ಸಾಡೆ ನೋವ್ ಜಾಂವ್ಚಾರ್ ಆಸ್ತಾನಾ ಲೀನಾ ಹಾತಿಂ ಕೊಲೆಜಿಚೆ ಬೂಕ್ ಅಪ್ಲ್ಯಾ ಹರ್ಧ್ಯಾಕ್ ಧಾಂಪುನ್ ಆಯ್ಲೆಂ. ಆಮ್ಚಿ ದೊಗಾಂಯ್ಚಿಂ ನದರ್ ಎಕಾಮೆಕಾ ಮೆಳ್ತಾನಾ ಮ್ಹಜಾ ಕಾಳ್ಜಾಂತ್ ನವೆ ಉಮಾಳೆ ಉಟೊನ್ ಆಯ್ಲೆ. ಭೋವ್ಶಾ ಲೀನಾಚಿ ಪರಿಗತ್ಯ್ ತಿಚ್ಚ್. ಆಮ್ಚಿ ದೊಗಾಂಯ್ಚಿಂ ಕಾಳ್ಜಾಂ ಎಕಾಮೆಕಾಖಾತಿರ್ ಭರೊನ್ ಆಯಿಲ್ಲ್ಯಾಕ್ ದರ್ಯಾಚಿಂ ಲ್ಹಾರಾಂಚ್ ರುಜ್ವಾತ್ ದಿತಾಲಿಂ. ಆತಾಂ ಉಲಂವ್ಕ್ ಕೊಣೆಂ ಸುರ್ವಾತ್ ಕರ್ಚಿ?
ಹಾಂವೆಂ ಧಯ್ರ್ ಎಕ್ಟಾವ್ನ್ ಲೀನಾಕ್ ಉಲಂವ್ಕ್ ಸಾಂಗ್ಲೆಂ ’ಲೇಡಿಸ್ ಫಸ್ಟ್’
"ಥ್ಯಾಂಕ್ ಯೂ ಬ್ರದರ್ ತುಮಿಂ ಮ್ಹಜೆಖಾತಿರ್ ವೇಳ್ ಖರ್ಚುನ್ ಆಯಿಲ್ಲ್ಯಾಕ್... ಬ್ರದರ್ ತುಮಿಂ ಆಮ್ಚಾ ಫಿರ್ಗಜೆಕ್ ಆಯಿಲ್ಲ್ಯಾ ದಿಸಾಥಾವ್ನ್ ಹಾಂವ್ ತುಮ್ಚೆರ್ ಪಿಸ್ವಾಲ್ಲಿಂ, ತುಮ್ಚಾ ತಾಲೆಂತಾಂಚೆರ್, ತುಮ್ಚಾ ಸ್ವಭಾವಾಚೆರ್ ಹಾಂವ್ ಪಿಸ್ವಾಲ್ಲಿಂ, ಆನಿ ತುಮ್ಚೆಲಾಗಿಂ ಹಾಂವ್ ಆಜ್ ಮ್ಹಜೆಂ ಕಾಳಿಜ್ ಉಘಡ್ತಾಂ"
"ಹಾಂವ್ಯ್ ತಶೆಂಚ್ ಕರ್ತಲೊಂ ಲೀನಾ.. ಹಾಂವ್ ಭಾಸ್ ದಿತಾಂ.." ಮ್ಹಜಾ ಪರ್ವಣ್ಗೆಭಾಯ್ರ್ ಮ್ಹಜಾ ತೊಂಡಾಂತೂನ್ ಉತ್ರಾಂ ಸುಟ್ಲಿಂಚ್.
’ಬ್ರದರ್.. ತುಮಿ ಮ್ಹಜಾ ಜಿಣ್ಯೆಂತ್ ಬರೊ ಪ್ರಭಾವ್ ಘಾಲಾ, ತುಮಿಂ ಹೆರಾಂಕ್ ದೆಖ್ಚಿ ರೀತ್, ಹೆರಾಂಕ್ ಸಮ್ಜೊಂವ್ಚಿ ರೀತ್, ಮನ್ಶಾಪಣಾಕ್ ಸಾಕ್ಸ್ ದಿತಾಸ್ತಾನಾ ಹಾಂವ್ ತುಮ್ಚೆಥಾವ್ನ್ ಜಾಯ್ತಿಂ ಶಿಕ್ಲ್ಯಾಂ ಆನಿ ಶಿಕೊನ್ ಆಸಾಂ. ತುಮಿ ತುಮ್ಚಿ ಜಿಣಿ ದೆವಾಕ್ ಸಮರ್ಪುನ್ ದಿಲ್ಯಾ ಆನಿ ಹಾಂವ್ ಎಕ್ಲಿಂ ಸಾದಿ ವೆಕ್ತಿ ಆನಿಂ ಲ್ಹಾನ್.. ಪ್ರಾಯೆನ್, ಸಮ್ಜೊಣೆನ್, ಜಿಣ್ಯೆ ಅನ್ಭೋಗಾನ್. ತರ್ಯ್ ಹಾಂವ್ ಪಾಟ್ಲ್ಯಾ ಸಭಾರ್ ತೆಂಪಾಥಾವ್ನ್ ತುಮ್ಕಾಂ ಮೆಳೊನ್ ತುಮ್ಚೆಲಾಗಿಂ ಮ್ಹಜಾ ಕಾಳ್ಜಾಚಿ ಆಶಾ-ಅತ್ರೆಗ್ ಉಗ್ಡಾಪೆಂ ಕರುಂಕ್ ಚಿಂತುನ್ ಆಸ್ಲ್ಲಿಂ, ಬ್ರದರ್.. ಹಾಂವೆಂ ನಿರ್ಧಾರ್ ಕೆಲಾ.. ಹಾವೆಂ ನಿರ್ಧಾರ್ ಕೆಲಾ.. ತುಮ್ಚಿ ದೇಖ್ ಘೆವ್ನ್ ಏಕ್ ಧಾರ್ಮಿಕ್ ಭಯ್ಣ್ ಜಾಂವ್ಕ್!’
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
