ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮೊಳಾಬ್ ಆನಿ ಮೊಡಾಂ
ಜೆಮ್ಮಾ ಪಡೀಲ್: ಕೊಂಕ್ಣಿ ಸಾಹಿತ್ಯಾಂತ್ ಸಿಂತಿಮೆಂತಾಳ್ ಕಾಣ್ಯಾಂಕ್ ಭೋವ್ ಫಾಮಾದ್ ಜಾಲ್ಲೊ ಕಾಣ್ಯೆಗಾರ್ ಜಾವ್ನಾಸಾ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೆ ತೀನ್ ಬೂಕ್, ಆಶಾ ಭಾಗಯ್ಲಿ (1967), ಸಿಂತಿಮೆಂತಾಂ (1991) ಆನಿ ದುಖಾಂ (2001) ಪರ್ಗಟ್ಲ್ಯಾತ್. ಹಾಚ್ಯಾ ಕಾಣ್ಯಾಂಚಿ ವಿಶೇಸ್ ಸೊಭಾಯ್ ಹಿ ಜಾವ್ನಾಸಾ - ವಾಚ್ಪ್ಯಾಕ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಅಪ್ಲ್ಯಾ ದೊಳ್ಯಾಂ ಹುಜಿರ್ ಘಡ್ಚೆಂ ಏಕ್ ಘಡಿತ್ಗಾಯ್ ಮ್ಹಳ್ಳೆಂ ಚಿಂತಾಪ್ ಉಭ್ಜಾಯ್ತಾ ಮಾತ್ರ್ ನ್ಹಂಯ್, ಸಭಾರ್ ಕಾಳ್ ಪರ್ಯಾಂತ್ ಮತಿಂತ್ ಉರಂವ್ಚಿ ಶ್ಯಾಥಿ ಹಾಚಾ ಕಾಣ್ಯಾಂಕ್ ಆಸಾ ಮ್ಹಣ್ಚಾಕ್ ಹಿ ಕಾಣಿ ಅಪುರ್ಭಾಯೆಚಿ ಗೊವಾಯ್ ದಿತಾ. ['ರಾಕ್ಣೊ' ಪತ್ರಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಜೆಮ್ಮಾ ಪಡೀಲಾಚ್ಯೊ ಹೆರ್ ಕಾಣ್ಯೊ: ಪಾಂತಿ, ಪರ್ನೆಂ ಕದೆಲ್, ಪಾತ್ಕಾಂ
ಜೆಮ್ಮಾ ಪಡೀಲ್
ಹರ್ಯೆಕಾ ಹಫ್ತ್ಯಾಂತ್ ತಪ್ಪಾಲಾಕ್ ಮ್ಹಜೆಂ ಕೊಂಕಣಿ ಹಫ್ತ್ಯಾಳೆಂ "ಸಕಾಳ್" ಘಾಲುಂಕ್ ಆಸಾ ದೆಕುನ್ ಹಾಂವ್ ಬಿಝಿ ಆಸ್ತಾಂ. ಘಳಾಯ್ ಕೆಲ್ಯಾರ್, ಪಯ್ಲೆಂಚ್ ಆರ್ಧ್ಯಾ ಕುರ್ಯಾ ಮೆಟಾಂನಿ ಪಾವ್ಲಾಂ ಕಾಡ್ಚಾ ಮ್ಹಜಾ ಪತ್ರಾನ್, ತಪ್ಪಾಲ್ ಖಾತ್ಯಾಕ್ ಸ್ಟೇಂಪಾಂಚಾ ನಾಂವಾನ್ ಚಡ್ತಿಕ್ ಪಯ್ಶೆ ಭರುಂಕ್ ಪಡ್ತಾತ್. ಉಪ್ರಾಂತ್ ಮ್ಹಜೊ ಉಸ್ವಾಸ್ ಬಂಧ್ ಜಾಲ್ಲ್ಯಾ ಬರಿಚ್! ಆಜ್ಕಾಲ್ ಪತ್ರಾಚಿ ಪರಿಗತ್ ಪಾಡ್ ನಾ. ಸಾಡೆ ತೀನ್ ಹಜಾರ್ ವರ್ಗಣಿದಾರ್ ಆಸಾತ್. ಮ್ಹಜಾ ನಶೀಬಾನ್ ಮ್ಹಣ್ಯೆತ್ ಗಲ್ಫಾಗಾರಾಂಕ್ ಮ್ಹಜಾ ಪತ್ರಾಚೆರ್ ಜಬ್ಬೊರ್ ಮೋಗ್. ಹ್ಯಾ ಮೊಗಾನ್ ’ಸಕಾಳ್’ ಪನ್ನಾಸ್ ಆನಿ ದೋನ್ ಆಂಕೆ ತಾಂಚಾ ಇಸ್ತ್ರಿಹಾರಾಂನಿ ಭರುನ್ ವೆತಾತ್-ಆಟಿಂತ್ ತೊಡಾಂತ್ ಆನಿ ವ್ಹಾಳಾಂತ್ ಉದಕ್ ಭರ್ಲ್ಲೆಬರಿ. ’ಸಕಾಳ್’ ಚೊ ಹರ್ಯೆಕ್ ಅಂಕೊ ಇಸ್ತಿಹಾರಾಂನಿ ಭರ್ತಾ.
ಹಾಂವ್ ಭಾಗಿಚ್. ಕೊಂಕಣಿ ಪತ್ರಾಂ ಕಾಡ್ನ್ ದೀಸ್ ಸಾರುಂಕ್ ಕಿತ್ಲೆ ಕಷ್ಟ್ ತೆಂ ಪತ್ರ್ ಸುರು ಕೆಲ್ಲ್ಯಾಕ್ ಮಾತ್ರ್ ಕಳಿತ್! ಪತ್ರಾಂ ಮಾಗೊನ್ ವಾಚ್ಚ್ಯಾ ಆಮ್ಚಾ ಕೊಂಕ್ಣಿ ಲೊಕಾಚಿ ರೀತ್ ಆನಿ ಅಭಿರುಚ್ ಬದ್ಲುನ್ ತಾಂಚೊ ಖರೊ ಸಹಕಾರ್ ಮೆಳ್ಲ್ಲ್ಯಾ ಶಿವಾಯ್ ಕೊಂಕಣಿ ಪತ್ರ್ ಚಲಂವ್ಚೆಂ ವ್ಹಡ್ ಕಷ್ಟಾಂಚೆಂ ಕಾಮ್! ಹೆಂ ಏಕ್ ಝುಜ್ ಮ್ಹಣ್ ಆತಾಂ ಸುಮಾರ್ ವರ್ಸಾಂನಿ ಜಾಣಾಂ ಜಾಲಾಂ. ಕಿತ್ಲಿಶಿಂ ಪತ್ರಾಂ ಪ್ರಾರಂಭ್ ಕರ್ನ್ ಉಪ್ರಾಂತ್ ಪ್ರಗಟುಂಕ್ ತಾಂಕ್ ನಾಸ್ತಾಂ ಬಂಧ್ ಜಾಂವ್ಕ್ ನಾಂತ್? ಮ್ಹಜೆಂ ನಶೀಬ್ ಬರೆಂ ಆಸಾ. ನಾ ತರ್ ಹಾಂವೆಂಯ್ ಪತ್ರಾಚೆಂ ಬಾಗಿಲ್ ಬಂಧ್ ಕರಿಜಾಯ್ ಪಡ್ತೆಂ. ಮ್ಹಜೆಂ ನಾಂವ್ ಲಿಯೊ ಫ್ರಾನ್ಸಿಸ್ ಸೆರಾವೊ. ’ಸಕಾಳ್’ ಪತ್ರಾಚೊ ಸಂಪಾದಕ್, ಪ್ರಕಾಶನ್ ಆನಿ ಮ್ಹಾಲಕ್..
ಛಾಪುನ್ ಆಯಿಲ್ಲಿ ಏಕ್ ಪ್ರತಿ ಮ್ಹಜಾ ಮೆಜಾರ್ ಆಸಾ. ವಯ್ಲ್ಯಾನ್ ಪಾಂಕೊ ಘುಂವ್ತಾ.
ಹಾಂವ್ ಬಸ್ಲಾಂ. ಮೆಜಾಚೆರ್ ದಾಟ್ ಕಾಗ್ದಾಂಚೊ ದಾಳೊ ಆಸಾ. ಆಯಿಲ್ಲಿಂ ಸರ್ವ್ ವಾಚುಂಕ್ ನಾ. ದಿಸಾಕ್ ಯೆಂವ್ಚಿಂ ಸಬಾರ್ ಕಾಗ್ದಾಂತ್ ಅರ್ಧೊ ವಾಂಟೊ ಕವಿತಾಂ, ಲೇಖನಾಂ ಆನಿ ಕಾಣ್ಯೊ.. ಥೊಡಿಂ ತಾಂಚಾ ಲಿಖಿತಾಂ ವಿಶ್ಯಾಂತ್ ವಿಚಾರ್ ಕರ್ನ್ ಆಯಿಲ್ಲಿಂ ಕಾಗ್ದಾಂ. ಉರ್ಲ್ಲಿಂ ವರ್ಗಣಿದಾರಾಂಚಿಂ ಆನಿ ಇಸ್ತಿಹಾರಾಂಚಿಂ ಪತ್ರಾಂ.
ಟಕ್... ಟಕ್... ಟಕ್...
ಮ್ಹಜಿ ಮತ್ ಜಾಗ್ ಜಾಲಿ ಬಾಗ್ಲಾರ್ ಪಡ್ಲೆಲ್ಯಾ ಠೊಕ್ಯಾಚಾ ಆವಾಜಾನ್. ಹಾಂವೆಂ ಮ್ಹಜೆ ದೊಳೆ ಬಾಗ್ಲಾ ಸರ್ಶಿಂ ವ್ಹೆಲೆ. ಅರ್ಧ್ಯಾ ಶಟ್ಟಾರಾಚಾ ಬಾಗ್ಲಾ ಸಕಯ್ಲ್ ಹವಾಯ್ ಚಪ್ಪಲಾಂ ಘಾಲ್ಲೆ ಪಾಂಯ್ ದಿಸ್ಲೆ. ಪರತ್ ಬಾಗ್ಲಾಚೆರ್ ಠೊಕೆ ಪಡ್ತಾನಾ, ಹಾಂವ್ ವಿರಾರ್ ಜಾಲೊಂ. "ಭಿತರ್ ಯೇ.." ಕದೆಲಾ ವಯ್ರ್ ಕುಲೊ ಬದ್ಲುನ್ ಮ್ಹಳೆಂ ಹಾಂವೆಂ ವಿರಾರಾಯೆನ್. ’ಕೋಣ್ ಗಾಯ್?’ ಮತಿಂತ್ಚ್ ವಿಚಾರ್ ಕರ್ನ್ ಕದೆಲಾಚೆರ್ ವೊಣ್ಕಾಲೊಂ ಹಾಂವ್.
ಏಕ್ ವ್ಯಕ್ತಿ ಭಿತರ್ ಆಯ್ಲಿ. ಸವ್ಕಾಸ್.
ತರುಣ್ ಭುರ್ಗೊ. ಪ್ರಾಯ್ ಕಾಂಯ್ ವೀಸ್ ಜಾತಿತ್. ಪರ್ನೊ ಪುಣ್ ನಿತಳ್ ಜಿಬ್ಬೊ, ಪರ್ನೆಂ ಪೇಂಟ್. ಖಾಡ್ ಮಿಶ್ಯೊ ಯೇಂವ್ಕ್ ಸುರು ಜಾಲ್ಲ್ಯೊ. ಮಟ್ವೆ ಕೇಸ್, ಬೊಟಾರ್ ವೆಲಂಕಣಿ ಸಾಯ್ಬಿಣಿಚಿ ಮುದಿ. ಹಾಂವೆಂ ತಾಚಿ ಸೂಕ್ಷ್ಮಾಯೆನ್ ಪರಿಕ್ಶಾ ಕೆಲಿ.
"ಗುಡ್ ಮೊರ್ನಿಂಗ್ ಸರ್.."
ನಮೃತೆನ್ ತೊಂಡಾರ್ ಹಾಸೊ ಹಾಡವ್ನ್ ಉಲಯ್ಲೊ ತೊ.
"ಕಿತೆಂ ಜಾಯ್?" ವಿಚಾರ್ಲೆಂ ಹಾಂವೆಂ.
"ಸರ್.. ಮ್ಹಜಿ ಕಾಣಿ..."
""ತುಜಿ ಕಾಣಿ! ಮ್ಹಜೆಲಾಗಿಂ ಸಭಾರ್ ಕಾಣಿಯೊ ಆಸಾತ್- ದೋನ್ ಫಾಯ್ಲಾಂನಿ ಭರುನ್. ತುಂವೆಂ ಕೆದಾಳಾ ಧಾಡ್ಲ್ಲಿಯ್?"
ಧಾಡ್ನ್ ತೀನ್ ಚಾರ್ ಮಹಿನೆ ಜಾಲೆ ಸರ್. ತುಂವೆಂ ವಾಚುನ್ .." ತಾಚಿಂ ಉತ್ರಾಂ ಅರ್ಧ್ಯಾರ್ ರಾವ್ಲ್ಯಾರೀ, ತಾಚಾ ಉತ್ರಾಂಚೊ ಅಂದಾಜ್ ಜಾಲೊ ಮ್ಹಾಕಾ.
"ತುಂವೆಂ ಎದೊಳ್ ಕಿತೆಂಯ್ ಬರಯ್ಲಾಂಯ್?"
"ನಾ ಸರ್. ಮ್ಹಜಿ ಪಯ್ಲಿ ಕಾಣಿ. ದೆಕುನ್ ಆತುರಾಯ್, ಹಾಂವ್ ಕೆದಾಳಾಯ್ ಚುಟುಕಾಂ ಆನಿ ಸವಾಲಾಂ ಧಾಡ್ತಾಂ."
"ಆಜ್ಕಾಲ್ ಆಮ್ಚೆ ತರ್ನಾಟೆ ಚಾರ್ ಸವಾಲಾಂ ಮೊಗಾಚಿಂ ಆನಿ ದೋನ್ ಚುಟುಕಾಂ ಧಾಡ್ಲ್ಲಿಂ ಫಾಯ್ಸ್ ಜಾಲ್ಲಿಂಚ್ ವ್ಹಡ್ಲೆ ಕವಿ, ಲೇಖಕ್ ಜಾಲೆ ಮ್ಹಣ್ ಲೆಖ್ತಾತ್. ಕಾಣಿ ಬರಂವ್ಕ್ ಏಕ್ ವಸ್ತ್ ಜಾಯ್. ಉತ್ತೀಮ್ ಶೈಲಿ ಜಾಯ್, ಬರೆಂ ಚಿಂತಾಪ್ ಜಾಯ್. ವಾಚ್ಪ್ಯಾಂಚಾ ಮತಿಂತ್ ಮತಿಂತ್ ಸವಾಲಾಂ ಉದೆಂವ್ಚಿ ಪರಿಗತ್ ಜಾಯ್. ಕಾಣಿ ಬರಂವ್ಚಿ ಮ್ಹಳ್ಯಾರ್ ಭಟಾಚಾ ಹೊಟೆಲಾಂತ್ಲೆ ಗೊಳಿಬಜೆ ಖೆಲ್ಲೆಬರಿ ನ್ಹಂಯ್!. ತಾಕಾ ತಪಸ್ಯ್, ಏಕಾಗ್ರತ್ ಜಾಯ್." ಹಾಂವೆಂ ತಾಕಾ ಲಾಂಭ್ ಸೆರ್ಮಾಂವ್ಂಚ್ ದಿಲೊ. ತಾಣೆಂ ತಕ್ಲಿ ಹಾಲಂವ್ಚಿ ದೆಖ್ಲಿ ಹಾಂವೆಂ.
"ಸರ್.. ತುವೆಂ ತಿ ವಾಚುನ್, ತಿದ್ವುನ್, ಸಲ್ಹಾ ದೀವ್ನ್ ಮ್ಹಾಕಾಯ್ ಉತ್ತೇಜನ್ ದಿವ್ಯೆತ್ ಪ್ಲೀಜ್.."
"ತುಜ್ಯಾ ಕಾಣ್ಯೆಚೆಂ ನಾಂವ್?"
"’ಸಲ್ವಣೆಂತ್ಲಿ ಜೀಕ್’. ಹೆಂ ಆಯ್ಕಾತಚ್ ಮ್ಹಜೊ ತಾಳೊ ಖೊರ್ಜುಲೊ. ಹಾಂವೆಂ ಖೊಂಕ್ಲಿ ಕಾಡ್ಲಿ. ಹಿ ಏಕ್ ಮೊಗಾಚಿ ಕಥಾ. ಆತಾಂಚಾ ತರ್ನಾಟ್ಯಾಂಕ್ ಮೊಗಾ ಶಿವಾಯ್ ದುಸ್ರೊ ವಿಷಯ್ ಮೆಳಾನಾಂಗಿ? ವಾ ಕನ್ನಡ, ಹಿಂದಿ ಪಿಂತುರಾಂ ಪಳೆವ್ನ್ ಹಾಂಕಾಂ ಮೆಳ್ಚೊ ವಿಷಯ್ ಫಕತ್ತ್ ಮೊಗಾಚೊಚ್! ಹಾಯ್ ದೆವಾ. ಆಮ್ಚೆಂ ಸಾಹಿತ್ಯ್ ಸುದ್ರೊಂಚೆಂ ಕೆದ್ನಾಂ? ಮ್ಹಜ್ಯಾ ಮನಾಂತ್ ಸವಾಲಾಂ ಉದೆಲಿಂ.
"ಅನ್ಯೇಕ್ ಪಾವ್ಟಿಂ ಯೆ. ಹಾಂವ್ ವಾಚುನ್ ಮ್ಹಜಿ ಅಭಿಪ್ರಾಯ್ ದಿತಾಂ. ಬರಿ ನಾ ಜಾಲ್ಯಾರ್ ತುಂವೆಂ ಪಾಟಿಂ ವ್ಹರಿಜಾಯ್ ಪಡ್ತೆಲಿ." ಮುಂಗಡ್ ಹಿಶಾರೊ ದಿಲೊ ಹಾಂವೆಂ. ತಾಣೆಂ ತಕ್ಲಿ ಹಾಲಯ್ಲಿ. ಪಾಟ್ ಕರ್ನ್ ವೆಚಾ ವಗ್ತಾ, ಉಲೊ ಕೆಲೆ ಹಾವೆಂ.
"ತುಜೆಂ ನಾಂವ್?"
"ಮ್ಹಜೆಂ ನಾಂವ್ ಮೆಕ್ಸಿ, ಮೆಕ್ಸಿಮ್ ಲಸ್ರಾದೊ." ತಾಚೆ ದೊಳೆ ಉಜಾಳ್ಳೆ.
ಮೆಕ್ಸಿ ಕುಡಾ ಥಾವ್ನ್ ಗೆಲೊ ಮ್ಹಣ್ ಶಟ್ಟರಾಂಚಾ ಬಾಗ್ಲಾಂನಿ ಕಳಯ್ಲೆಂ ಮ್ಹಾಕಾ, ಹಾಂವೆಂ ತ್ಯಾ ಕಾಗ್ದಾಂಚಾ ದಾಳ್ಯಾಂತ್ ಹಾತ್ ಘಾಲೊ. ಸುಮಾರ್ ಕಾಗ್ದಾಂ ಆಯಿಲ್ಲಿಂ. ಗಲ್ಫಾ ಥಾವ್ನ್ ಕಾಗ್ದಾಂ ಸಂಗಿಂ ಕವಿತಾ ಆನಿ ಕಾಣಿಯೊ ಸಯ್ತ್ ಆಯಿಲ್ಲ್ಯೊ. ವಾಚುಂಕ್ ಸುರು ಕೆಲೆಂ ಹಾಂವೆಂ, ಭಾರಿಚ್ ನೀರಸ್ ಕಥಾ. ಕನ್ನಡಾಂತ್ ಫಾಯ್ಸ್ ಜಾಂವ್ಚಾ ಭುರ್ಗ್ಯಾಂಚಾ ’ಚಂದಮಾಮ’ ಪತ್ರಾಕ್ ಫಾಯ್ಸ್ ಕರುಂಕ್ ಯೋಗ್ಯ್ ತ್ಯೊ. ಮ್ಹಾಕಾ ಬರೆಂ ಲಾಗ್ಲೆಂ ನಾ. ಬರೆಂ ಲಾಗ್ಲೆಂ ನಾ ಮ್ಹಣ್ ಫಾಯ್ಸ್ ಕರಿನಾಸ್ತಾಂ ದವ್ರುಂಕ್ ಹಾಂವ್ ಆಸಕ್ತ್ ಜಾಲ್ಲೊಂ. ಕಿತ್ಯಾಕ್ ರೊಬರ್ಟಾಚಾ ಶಿಫಾರಾಶೆನ್ ತಾಣಿಂ ಧಾಡ್ಲೆಲೆಂ.
ರೋಬರ್ಟ್..
ಎಕಾ ತೆಂಪಾರ್ ಗಾಂವಾಂತ್ ಪೋಲಿ ಆನಿ ಬಚ್ಚಾಲಿ ಜಾವ್ನ್ ಗಾಂವ್ಚೆ ಮಾರೊಗ್ ಮೆಜ್ಚೊ, ದೆವಾಚ್ಯೆ ದಯೆನ್ ಆನಿ ಸೈರ್ಯಾಂಚೆ ಕುಮ್ಕೆನ್ ಗಲ್ಫಾಕ್ ಪಾವ್ಲೊ. ಥಂಯ್ ಪಾವ್ಲ್ಯಾ ನಂತರ್ ಥಂಯ್ಚಾ ಗರ್ಮೆ ರೂಪ್ ಬದ್ಲಾಶೆಂ ಕೆಲೆಂ ಜಾವ್ಯೆತ್. ತಾಕಾ ಹಾಲಂವ್ಕ್ ಜಾಲೆಂನಾ. ಪಯ್ಲೊ ’ಸಕಾಳ್’ ಚೊ ವರ್ಗಣ್ದಾರ್ ಜಾಲೊ ದುಸ್ರ್ಯಾಂಕ್ಯೀ ವರ್ಗಣೆದಾರ್ ಕೆಲೆಂ ತಾಣೆಂ. ಇಸ್ತಿಹಾರಾಂ ಧಾಡ್ಲಿಂ. ಜಲ್ಮಾ ದಿವಸ್, ಕಾಜಾರಿ ಜೊಡ್ಯಾಂಕ್ ಉಲ್ಲಾಸ್ ಧಾಡ್ಲೆಂ. ’ಸಕಾಳ್’ಚೊ ವಿಕ್ರೊ ಚಡ್ಲೊ. ಸಾಂಗಾತಾ ಮ್ಹಜಿ ದಾಕ್ಷೆಣ್ ವಾಡೊನ್ ಆಯ್ಲಿ. ತಾಣೆಂ ಜವಾಬಿ ದಿಲ್ಯೊ. ಏಕ್ ದೀಸ್ ತಾಣೆಂ ಕಾಣಿ ಬರವ್ನ್ ಧಾಡ್ಲಿ. ಕಾಣಿ ತಿದ್ವುನ್ ’ನವಿ ಕಾಣಿ’ ಜಾವ್ನ್ ಹಾಂವೆಂ ಫಾಯ್ಸ್ ಕೆಲಿ. ಏಕ್-ದೋನ್ ಪಾವ್ಟಿಂ ಅಸೆಂಚ್ ಮುಖಾರುನ್ ಗೆಲೆಂ. ಏಕ್ ದೀಸ್ ತಾಚಾ ಕಾಗ್ದಾಚೊ ಒಕ್ಕಾಣೆ ವಾಚುನ್ ಹಾಂವೆಂ ಮ್ಹಜೆ ಹಾತ್ ತಕ್ಲೆಕ್ ಮಾರ್ಲೆ "ತುಂವೆಂ ಹ್ಯಾ ಮುಖಾರ್ ಮ್ಹಜಿ ಕಥಾ ಲಿಖಿತಾಂಚೆ ವಿಷಯ್ ಬದ್ಲಿನಾಸ್ತಾಂ ಫಾಯ್ಸ್ ಕರಿಜಾಯ್. ತುಂವೆಂ ವ್ಯಾಕರಣ್ ತಿದ್ವಿಲ್ಯಾರ್ ಪರ್ವಾನಾ. ಕಥಾವಸ್ತ್ ಬದ್ಲುಂಕ್ ನಜೊ. ತುಂ ಮ್ಹಾಕಾ ಸುಧಾರ್ಸುಂಕ್ ಸಕಾನಾಂಯ್ ತರ್ ಹಾಂವ್ಯೀ ತುಕಾ.."
ಹ್ಯಾ ಕಾಗ್ದಾನ್ ಮ್ಹಜೆ ಹಾತ್ ಭಾಂದ್ಲೆ. ಮ್ಹಜಿ ಆದ್ಲಿ ಪರಿಗತ್ ದೊಳ್ಯಾಂ ಮುಖಾರ್ ಆಯ್ಲಿ ಮ್ಹಾಕಾ. ಪಿಂಜ್ಲ್ಲ್ಯಾ ವಸ್ತುರಾನ್ ಭುರ್ಗ್ಯಾಂನಿ ಇಸ್ಕೊಲಾಕ್ ವೆಚೆಂ.. ಫಕತ್ ಕರಿಯಮಣಿರ್ ಮ್ಹಜ್ಯಾ ಬಾಯ್ಲೆನ್ ಖಂಯ್ ಕಾಜಾರಾಕ್ ವೆಚೆಂ.. ’ಸಕಾಳ್’ ಖಾತಿರ್ ಘರ್ ಆಡವ್ ಘಾಲುಂಕ್ ಬ್ಯಾಂಕಾಕ್ ವೆತಾನಾ ಮತಿಂತ್ಲಿ ದೂಖ್ ಇತ್ಯಾದಿ..
ಹಾಂವೆಂ ನಿಶಕ್ತ್ಪಣಾನ್ ದೊಳೆ ಧಾಂಪ್ಲೆ. ಪರತ್ ಆದ್ಲೆ ದೀಸ್ ನಿಯಾಳುಂಕ್ ನಾಕಾ ಆಸ್ಲ್ಲೆಂ ಮ್ಹಾಕಾ. ಇಂಜಿನಿಯರಿಂಗ್ ಕೊಲೆಜಿಂತ್ ಶಿಕ್ಚಾ ಮ್ಹಜ್ಯಾ ಪುತಾಚೆಂ ಭವಿಷ್ಯ್ ಆನಿ ಪಿ.ಯು.ಸಿ ಕರ್ಚ್ಯಾ ಮ್ಹಜ್ಯಾ ಮೊಗಾಚಾ ಧುವೆಕ್ ಆದ್ಲೆಂ ವಾತಾವರಣ್ ಪ್ರಸ್ತುತ್ ಕರುಂಕ್ ನಾಕಾ ಆಸ್ಲ್ಲೆಂ. ದೆಕುನ್ ಹಾವೆಂ ತಾಚಿಂ ಲೇಖನಾಂ ಆಸಾ ತಸಿಂ ಫಾಯ್ಸ್ ಕೆಲಿಂ. ತಾಣೆಂ ಕೆಲ್ಲ್ಯಾ ಕುಮ್ಕೆಚಾ ಫುಗಾಸಾಂವಾಂತ್ ಹಾಂವೆಂ ಉಸ್ವಾಸ್ ಸೊಡ್ಲೊ. ತಾಚಾ ಯೆಣ್ಯಾಚಾ ಸಾವ್ಳೆಂತ್, ಕರ್ತವ್ಯ್, ರಾಜಾಂವ್ ಆನಿ ಅಂತಸ್ಕರ್ನ್ ಭಾಡ್ಯಾಕ್ ದವ್ರುನ್ ಹಾಂವೆಂ ಪತ್ರ್ ಚಲಯ್ಲೆಂ - ಗೊಮ್ಟ್ಯಾಕ್ ನಾಂಗೊರ್ ಬಾಂಧುನ್ ಗಾದೊ ಕೊಸ್ಚ್ಯಾ ರೆಡ್ಯಾಬರಿ ಹಾಂವೆಂ ಮ್ಹಾಕಾಚ್ ಸಮಧಾನ್ ಕೆಲೆಂ- ಫುಡಾರಾ ವಿಷ್ಯಾಂತ್ ಚಿಂತುನ್ ಹಾಂವೆಂ ದೊಳೆ ಘಶ್ಟಿಲೆ. ವಯ್ಲೊ ಪಾಂಕ್ಕೊ ರಭಸಾನ್ ಘುಂವ್ತಾಲೊ. ಮ್ಹಜ್ಯಾ ಕಪಾಲಾರ್ ಉದೆಲ್ಲೆ ಘಾಮಾಚೆ ಥೆಂಬೆ ತುವಾಲ್ಯಾನ್ ಪುಸ್ಲ್ಯಾರೀ, ಸತ್ ಆನಿ ರುಜ್ವಾತ್ ಘಾಮಾಚ್ಯಾ ರುಪಾರ್ ಮೆಳ್ಚಾ ಮ್ಹಾಕಾ, ಹ್ಯಾ ಸಂಸಾರಾಂತ್ ಆದರ್ಶ್ ಆನಿ ಕರ್ತವ್ಯಾಂತ್ ಆಸ್ಚೊ ಫರಕ್ ಸಮ್ಜತಾನಾ ವೇಳ್ ಉತ್ರಾಲ್ಲೊ.
ಉಟೊನ್ ಜನೆಲಾ ಸರ್ಶಿಂ ಗೆಲೊಂ ಹಾಂವ್. ಮೊಳ್ಬಾರ್ ದಾಟ್ ಮೊಡಾಂ ಮಾಂಡ್ಲ್ಲಿಂ, ಆದ್ಲ್ಯಾ ಜೀವನಾಚೊ ಉಗ್ಡಾಸ್ ಮತಿಂತ್ ಯೇವ್ನ್ ದೊಳೆ ಮ್ಹಜೆ ಗಯ್ರೆ ಜಾಲೆ.
ದೋನ್ ಹಫ್ತೆ ಸಂಪ್ಲೆ. ಹಾಂವ್ ಆಯ್ತಾರಾ ಫರಂಗಿಪೇಟ್ ಮಿಸಾಕ್ ಗೆಲ್ಲೆಂ. ರೊಬರ್ಟಾನ್ ತಾಚಾ ಮಿತ್ರಾ ಮೆಲ್ಕಿ ಸಂಗಿಂ ಮ್ಹಾಕಾ ’ಪೇಂಟ್ ಆನಿ ಶರ್ಟ್ ಪೀಸ್’ ಧಾಡ್ಲ್ಲಿಂ. ’ತಾಂಗೆರ್ ವಚೊನ್ ಘೆ’ ಮ್ಹಳ್ಳೆಂ ಕಾಗದ್ ಆಯಿಲ್ಲ್ಯಾನ್, ಹಫ್ತ್ಯಾ ಮಧೆಂ ವೇಳ್ ನಾತ್ಲೆಲ್ಯಾನ್, ಹಾಂಗಾ ಆಜ್ ಪಾವ್ಲ್ಲೊಂ. ಆಯ್ತಾರಾಚೆಂ ಮೀಸ್ ಜಾವ್ನ್ ಇಗರ್ಜೆ ಥಾವ್ನ್ ಭಾಯ್ರ್ ಪಡ್ಲೊಂ. ರೊಬರ್ಟಾನ್ ಧಾಡ್ಲ್ಲೊ ವಿಳಾಸ್ ಬೊಲ್ಸಾಂತ್ ಆಸ್ಲ್ಲೊ.
"ಸರ್... ಸರ್.." ಮ್ಹಜ್ಯಾ ಪಾಟ್ಲ್ಯಾನ್ ಮ್ಹಾಕಾ ಉಲೊ ಕೆಲ್ಲ್ಯೆಬರಿ ಜಾವ್ನ್ ಹಾಂವೆಂ ಪಾಟಿಂ ಪಳೆಲೆಂ. ಪಳೆವ್ನ್ ಜಾತಚ್ ರಾಗಾನ್ ವೋಂಠ್ ಚಾಬ್ಲೆ ಹಾಂವೆಂ. ಪರತ್ ತೊಚ್ ಮೆಕ್ಸಿ, ಮೆಕ್ಸಿಮ್ ಲಸ್ರಾದೊ!
"ಗುಡ್ ಮೊರ್ನಿಂಗ್"
"ಮೆಕ್ಸಿ.." ರಾಗಾನ್ ದಾಂತ್ ಚಾಬೊನ್ ಉತ್ರಾಂ ವಿಂಚ್ಲಿಂ ಹಾಂವೆಂ.
"ತುಂ ಕೊಂಕ್ಣಿ ಲೇಖಕ್ ಜಾಂವ್ಕ್ ಖುಶಿ ವರ್ತಾಯ್ ತರ್, ತುಂ ಕೊಂಕ್ಣಿ ಭಾಸ್ ಉಲಂವ್ಕ್ ಪಳೆ! ಕೊಂಕ್ಣಿ ಭಾಸ್ ಶಿಕೊಂಕ್ ಪಳೆ!! ತುಂ ಇಂಗ್ಲಿಶಾಂತ್ಲೆಂ ಗುಡ್ ಮೊರ್ನಿಂಗ್ ಬಂಧ್ ಕರ್!!! ಪಯ್ಲೆಂ ತುಂ ಕೊಂಕ್ಣೆಂತ್ ಬರಂವ್ಕ್ ಶಿಕ್, ಉಲಂವ್ಕ್ ಶಿಕ್. ಮ್ಹಜಾ ತೊಂಡಾ ಥಾವ್ನ್ ಉತ್ರಾಂ ಉಸಾಳ್ಳಿಂ. ತಾಚೊ ಸಹವಾಸ್ ತಸೆಂ ತಾಚೆಂ ದರ್ಶನ್ ಮ್ಹಾಕಾ ನಾಕಾ ಜಾಲ್ಲೆಂ. ತೊ ಉಲಯ್ಲೊನಾ. ತಾಣೆಂ ತಕ್ಲಿ ಹಾಲಯ್ಲಿ. ತಾಚೆ ದೊಳೆ ಮಾತ್ರ್ ಕಿತೆಂಗೀ ಸಂದೇಶ್ ದಿಂವ್ಚೆಬರಿ ಭಾಸ್ ಜಾಲೆಂ ಮ್ಹಾಕಾ.
ಹಾಂವೆಂ ಮೆಟಾಂ ಕಾಡ್ಲಿಂ. ಮುಖ್ಯ ಮಾರೊಗ್ ದಿಸ್ಲೊ ಮ್ಹಾಕಾ. ಹಾಂವೆಂ ಬೊಲ್ಸಾಂತ್ಲೊ ವಿಳಾಸ್ ಭಾಯ್ರ್ ಕಾದ್ನ್ ಹೆಣೆಂ-ತೆಣೆಂ ಪಳೆಲೆಂ. "ಖಂಯ್ ವಚೊಂಕ್ ಜಾಯ್ ಆಸ್ಲ್ಲೆಂ ಸರ್?". ಮ್ಹಜ್ಯಾ ಪಾಟ್ಲ್ಯಾನ್ ಚಲೊನ್ ಯೆಂವ್ಚೊ ಮೆಕ್ಸಿ ಉಲಯ್ಲೊ. ಹ್ಯಾ ಮನ್ಶ್ಯಾಕ್ ಬೆಜಾರಾಯ್ ನಾಂಗಾಯ್? ಮ್ಹಜೆಸ್ತಕಿಂ ಉಲಯ್ಲೊಂ ಹಾಂವ್. ಕಸಲೊಯ್ ಉಪಾಯ್ ನಾಸ್ತಾಂ ಮ್ಹಜಾ ಹಾತಿಂ ಆಸ್ಚೊ ವಿಳಾಸ್ ತಾಕಾ ವೊಡ್ಡಾಯ್ಲೊ. "ಹೋ.. ಹಾಂಗೆರ್ಗಿ?" ತಾಣೆಂ ತಾಚೆ ದಾಂತ್ ಸೊಡ್ಲೆ. "ತಾಂಚೆಂ ಘರ್ ಆಮ್ಚಾ ಘರಾ ಲಾಗ್ಸಾರ್ಚ್! ಹಾಂವೆಂ ವಾಟ್ ದಾಖಯ್ತಾಂ ಸರ್."
ವಿಳಾಸ್ ಆಸ್ಲ್ಲೆಂ ಕಾಗದ್ ತಾಣೆಂ ಪಾಟಿಂ ದಿಲೆಂ.
ಆಮಿ ಚಲೊಂಕ್ ಲಾಗ್ಲ್ಯಾಂವ್. ಆಮ್ಚೆ ಮಧೆಂ ಉಲವ್ಣೆಂ ಚಲ್ಲೆಂ ನಾ. ಉಲಂವ್ಕ್ ಹಾಂವೆಂ ಉತ್ತೇಜನ್ ದಿಲೆಂ ನಾ. ಪಾಂಚ್ ಮಿನುಟಾಂ ಚಲೊನ್, ಆಮಿ ಎಕಾ ಘರಾ ಮುಖ್ಲ್ಯಾ ಗೇಟಿ ಸರ್ಶಿಂ ಪಾವ್ಲ್ಯಾಂಚ್. ಜಾಲಾಂತ್ ಸುಶೆಗಾತ್ ನಿದ್ಲ್ಲೊ ಪೆಟೊ ಘರ್ಚಿ ಗೇಟ್ ಉಗ್ತಿ ಜಾಲ್ಲ್ಯಾಚೊ ಆವಾಜ್ ಆಯ್ಕೊನ್ ಘೊಂಕಾಂತ್ತ್ ಧಾಂವೊನ್ ಮುಖಾರ್ ಯೆತಾನಾ, ಮೆಕ್ಸಿಚಾ ಒಳ್ಕಿನ್ ತಸೆಂ ತಾಚಾ ಧೆಂಕ್ಣ್ಯಾಕ್ ಭಿಂಯೆಂವ್ನ್, ಶಿಮ್ಟಿ ಹಾಲಯಿತ್ತ್ ಒಗೊ ರಾವ್ಲೊ. ಪೆಟೊ ಘೊಂಕ್ಲ್ಲ್ಯಾ ಆವಾಜಾಕ್, ಘರ್ಚಾ ಸೊಪ್ಯಾರ್ ಮನ್ಶಾಂ ಉದೆಲಿಂ. ಮೆಕ್ಸಿಚೊ ಪಾಟ್ಲಾವ್ ಕರೀತ್ತ್ ಹಾಂವ್ ತ್ಯಾ ಘರ್ಚಿಂ ಮೆಟಾಂ ಚಡ್ಲೊಂ.
"ಹೊ ’ಸಕಾಳ್’ ಪತ್ರಾಚೊ ಸಂಪಾದಕ್ ಶ್ರೀಮಾನ್ ಲಿಯೊ ಸೆರಾವೊ. ಮೆಲ್ಕ್ಯಾಬಾಕ್ ಮೆಳೊಂಕ್ ಆಯ್ಲಾ." ಮೆಕ್ಸಿನ್ ಮ್ಹಜಿ ಒಳೊಕ್ ಕರ್ನ್ ದಿಲಿ. ಆಮಿ ಕದೆಲಾರ್ ಬಸ್ಲ್ಯಾಂವ್. ಥೊಡ್ಯಾ ವೆಳಾನ್, ತೊಂಡಾರ್ ಸಿಗ್ರೆಟ್ ದವ್ರುನ್, ಬನಿಯಾನಾ ವಯ್ರ್ ಮೊಟ್ಯಾ ಭಾಂಗಾರಾಚಿ ಚೇಯ್ನ್ ಘಾಲ್ನ್ ಭಾಯ್ರ್ ಆಯಿಲ್ಲ್ಯಾ ಮಾನೆಸ್ತಾಕ್ ತೊ ಸೊಪ್ಯಾರ್ ಯೆತಾನಾ ಮೆಲ್ಕಿ ಮ್ಹಣ್ ಒಳ್ಕಾಲೊಂ.. "ಗುಡ್ ಮೊರ್ನಿಂಗ್ ಹಾಂವ್ ಲಿಯಾ, ’ಸಕಾಳ್’ ಚೊ ಸಂಪಾದಕ್" ಹಾಂವೆಂ ಮ್ಹಜಿ ವಳೊಕ್ ಕರ್ನ್ ದಿಲಿ. ಆಮಿ ಎಕಾಮೆಕಾ ಹಾತ್ ಮೆಳಯ್ಲೆ. ಉಪ್ರಾಂತ್ ಬಸೊನ್, ತಾಚ್ಯೆ ವಿಷ್ಯಾಂತ್, ತಾಚಾ ಕಾಮಾ ವಿಷ್ಯಾಂತ್, ರೊಬರ್ಟಾ ವಿಶ್ಯಾಂತ್ ಸಮ್ಜೊನ್ ಘೆತ್ಲೆಂ. ’ಸಕಾಳ್’ ವಿಷ್ಯಾಂತ್ ಗಲ್ಫಾಗಾರಾಂಚಿ ಅಭಿಪ್ರಾಯ್ ವಿಚಾರ್ಲಿ ಹಾಂವೆಂ. ಆಮ್ಚೆಂ ಉಲವ್ಣೆಂ ಜಾತಾನಾ, ಮೆಕ್ಸಿ ಸೂಕ್ಷ್ಮಾಯೆನ್ ಆಮ್ಕಾಂ ಪಳೆತಾಲೊ.
ಮಧೆಗಾತ್ ದಿಲ್ಲಿ ಕಾಫ್ಹಿ, ಫಳಾರ್ ಘೆವ್ನ್ ಹಾಂವ್ ಥಂಯ್ ಥಾವ್ನ್ ಉಟ್ಲೊಂ. ವೆಚಾ ಪಯ್ಲೆಂ ಏಕ್ ಪಾವ್ಟಿಂ ದಫ್ತರಾಕ್ಚ್ ಯೇಜಾಯ್ ಮ್ಹಳ್ಳಿ ವಿನತಿ ಕೆಲಿ ಹಾಂವೆಂ. ತಾಣೆಂ ದಿಲ್ಲಿ ವಸ್ತುರಾಂಚಿ ಪೊಟ್ಲಿ ಹಾತಿಂ ಘೆವ್ನ್ ’ದೇವ್ ಬರೆಂ ಕರುಂ’ ಸಂಗಿಂ ತಾಂಚಾ ಘರ್ಚಿ ಮೆಟಾಂ ದೆಂವ್ಲೊಂ. ಮಾರ್ಗಾರ್ ಪಾವ್ತಾನಾ. ಮೆಕ್ಸಿ ಮ್ಹಣಾಲೊ; "ಸರ್ ಆಮ್ಗೆರ್ ದಯಕರ್ನ್ ಭೆಟ್ ದೀ ಸರ್." ತಾಣೆಂ ವಿನತಿ ಕೆಲಿ. "ನಾ.. ಮೆಕ್ಸಿ ಮ್ಹಾಕಾ ಪಾಟಿಂ ವಚಾಜಯ್. ಆತಾಂಚ್ ವೊರಾಂ ಇಕ್ರಾ ಜಾಂವ್ಕ್ ಜಾಲಿಂ. ಮ್ಹಾಕಾ ವೇಳ್ ನಾ ಮೆಕ್ಸಿ."
"ಸರ್ ತುಂ ಆಮ್ಚಾ ಗಾಂವಾಕ್ ಆಯ್ಲಾಯ್. ಆಮ್ಗೆರ್ ಏಕ್ ಪಾವ್ಟಿಂ ಆಯ್ಲ್ಯಾರ್ ಜಾಲೆಂ. ಕಾಫಿ, ಚ್ಹಾ ಪಿಯೆಂವ್ಚಿ ನಾಕಾ. ಬೊಂಡೊ ದಿತಾಂ".
ತಾಣೆ ಹಾತ್ ಜೊಡ್ಲೆ. ಹಾಂವೆಂ ಜಾಯ್ನಾಂ ಮ್ಹಳ್ಳ್ಯಾ ಜಿನ್ಸಾರ್ ತಕ್ಲಿ ಹಾಲಯ್ಲಿ. ಹಾಂವ್ ವಯ್ಲ್ಯಾ ಮಾರ್ಗಾಚೆರ್ ಚಲೊಂಕ್ ಲಾಗ್ಲೊಂ. ಮೆಕ್ಸಿನ್ ಮ್ಹಾಕಾ ಪಾಟ್ಲಾವ್ ಕರ್ಚೆಂ ಕಳ್ಳೆಂ ಮ್ಹಾಕಾ. ಏಕ್ ಘಡಿ ಧಾಂವೊನ್ ತಾಚಾ ದೊಳ್ಯಾಂಕ್ ಪಳೆಲೆಂ ಹಾಂವೆಂ. ತಾಂತುಂ ವಿನತಿ ಆಸ್ಲ್ಲಿ. ಅಪೇಕ್ಶಾ ಆಸ್ಲ್ಲಿ. ಸಮ್ಜಾಲೊಂ ಹಾಂವ್ "ಮೆಕ್ಸಿ.." ತಗ್ಸೊನ್ ಮ್ಹಳೆಂ ಹಾಂವೆಂ, "ಆಜ್ ಮ್ಹಾಕಾ ವೇಳ್ ನಾ. ಅನ್ಯೇಕ್ ಪಾವ್ಟಿಂ ಖಂಡಿತ್. ಹಾಂ.. ತುಜಿ ಕಾಣಿ ಹಾಂವೆಂ ಫಾಯ್ಲ್ ಕರ್ನ್ ದವರ್ಲ್ಯಾ. ತುಂ ಯೆಂವ್ಚಾ ಹಫ್ತ್ಯಾಂತ್ ದಫ್ತರಾಕ್ ಯೆ." ತಿತ್ಲೆಂ ಸಾಂಗೊನ್ ಹಾಂವ್ ರಾವ್ಲೊನಾ. ತಾಕಾ ಪಾಟ್ ಕರ್ನ್ ಹಾಂವೆಂ ವಾಟ್ ಧರ್ಲಿ.
ಏಕ್ ಹಫ್ತೊ ಪಾಶಾರ್ ಜಾಲೊ. ಮ್ಹಜಾ ರಾಟಾವಳೆ ಮಧೆಂ ಮೆಕ್ಸಿಚೊ ಉಗ್ಡಾಸ್ ಯೇವ್ನ್, ಫಾಯ್ಲಾಂತ್ಲಿ ತಾಚಿ ಕಾಣಿ ಭಾಯ್ರ್ ಕಾಡ್ಲಿ ಹಾಂವೆಂ. ’ವೇಳ್ ಮೆಳ್ತಾನಾ ಹಾಂವೆಂ ತಿ ವಾಚ್ಚಿ ಹ್ಯಾ ಚಿಂತ್ನಾನ್, ತಿ ಹಾಂವೆಂ ಮೆಜಾರ್ ದವರ್ಲಿ. ವೇಳ್ ಮೆಳ್ತಾನಾ ಹಾಂವೆಂ ತಿ ವಾಚ್ಲಿ. ಏಕ್ ಪಾವ್ಟಿಂ.. ದೋನ್ ಪಾವ್ಟಿಂ... ತೀನ್ ಪಾವ್ಟಿಂ.. ವಾಚುನ್ ಹಾಂವ್ ಚಿಂತುಂಕ್ ಪಡ್ಲೊಂ ಶಿವಾಯ್, ವಾಚುನ್ ಪುರೊ ಜಾಲೆಂ ನಾ. ಸಬಾರ್ ವರ್ಸಾನ್ ಏಕ್ ಉತ್ತೀಮ್ ಕಾಣಿ ವಾಚ್ಲ್ಲೊ ಆನಂದ್ ಜಾಲೊ. ದೋನ್ಯೀ ಹಾತಾಂನಿ ಮ್ಹಜಿ ತಕ್ಲಿ ಘಟ್ಟ್ ಧರ್ಲಿ ಹಾಂವೆಂ. ’ಸಲ್ವಣೆಂತ್ಲಿ ಜೀಕ್’ ಏಕ್ ಫಾಮಾದ್ ಲೇಖಕಾಚಾ ಕೃತಿಯೆಕ್ ಸರಿಸಮಾನ್ ಆಸ್ಲ್ಲಿ. ’ಪ್ರಥಮ್’ ಪ್ರಯತ್ನಾನ್ ಹೊ ಹ್ಯಾ ಥರಾನ್ ಬರಂವ್ಕ್ ಸಕಾತ್?’ ಹೆಂ ಸವಾಲ್ ಸವಾಲ್ ಜಾವ್ನ್ ಉರ್ಲೆಂ ಶಿವಾಯ್ ಜವಾಬ್ ಮೆಳ್ಳಿ ನಾ. ಮ್ಹಾಕಾ ಮ್ಹಜಿಚ್ ಲಜ್ ದಿಸ್ಲಿ. ಎಕಾ ಖರ್ಯಾ ವಜ್ರಾಕ್ ಒಳ್ಕೊಂಕ್ ಹಾಂವ್ ಸಕ್ಲೊಂನಾ ಮ್ಹಳ್ಳೆಂ ಆಪ್ರಾದಿ ಕಾಳಿಜ್ ದುರ್ಸಾಲೆಂ ಮ್ಹಾಕಾ. ದಾಕ್ಶೆಣೆಚಾ ತಸೆಂ ಋಣಾಚಾ ಸಂಸಾರಾಂತ್, ಲಜೆ-ಕಾಂಟ್ಯಾಬರಿ ದೊಡೊನ್ ಮೊಡೊನ್ "ಮ್ಹಾಕಾಚ್" ವಿಸ್ರಾಲ್ಲ್ಯಾ ಹಾಂವೆಂ-ಮೆಕ್ಸಿ ಇತ್ಲ್ಯಾ ತಾಲೆಂತಾಂನಿ ಭರ್ಲಾಂ ತೆಂ ಚಿಂತುನ್ ಲಜೆನ್ ದೊಳೆ ಧಾಂಪ್ಲೆ. ’ಯೆಂವ್ಚಾ ಹಫ್ತ್ಯಾಂತ್ ಫಾಯ್ಸ್ ಕರಿಜಾಯ್’ ಮ್ಹಳ್ಳ್ಯಾ ಚಿಂತ್ನಾಂನಿ, ಮುಖ್ಲ್ಯಾ ಹಫ್ತ್ಯಾಚಾ ಛಾಪ್ಯಾಕ್ ವೆಚಾ ಲೇಖನಾಂಚಾ ಫಾಯ್ಲಾಂತ್ ಘಾಲ್ಯಾಂ ಮ್ಹಣ್ತಾನಾ; ’ಕಾಂಯ್ ದುಸ್ರ್ಯಾ ಭಾಷೆ ಥಾವ್ನ್ ವ ಹ್ಯಾ ಆದಿಂ ಪ್ರಕಟ್ ಜಾಲ್ಲ್ಯಾ ದುಸ್ರ್ಯಾ ಪತ್ರಾಂತ್ಲಿ ನಕ್ಕಲ್ ಕಾಡ್ನ್ ಮ್ಹಾಕಾ ಧಾಡ್ಲ್ಯಾಗಿ..?’ ಮ್ಹಳ್ಳೊ ದುಭಾವಿ ಕಿಡೊ ಮ್ಹಾಕಾ ಧೊಸ್ತಾನಾ, ಹಾಂವ್ ಜಾಗೊಂ ಜಾಲೊಂ. ’ಹೆಂ ಸಾರ್ಕೆಂ ವಿಚಾರ್ ಕರ್ನ್ ಪಳೆಂವ್ಕ್ ಜಾಯ್. ನಾ ತರ್ ವಾಚ್ಪ್ಯಾಂಚ್ಯೊ ಗಾಳಿ ಆನಿ ಅಪವಾದ್ ಆಯ್ಕೊಂಕ್ ಹಾಂವ್ ಸಕಾನಾ. ಪಾತಕ್ ಕರ್ನಾಸೆಂ ಪಾತ್ಕಾಚೆ ಸಮಯೆ ಚುಕಯ್ಜಾಯ್’ ಹ್ಯಾ ಚಿಂತ್ನಾಂನಿ ಮಿಸ್ಳೊನ್, ತಿ ಕಾಣಿ ಪಾಟಿಂ ಕಾಡ್ಲಿ.
ದುಸ್ರೊ ಹಫ್ತೊ ಸಂಪ್ಲೊ. ಮ್ಹಾಕಾ ಅಜ್ಯಾಪ್ ಜಾಲೆಂ. ಮೆಕ್ಸಿ ದಫ್ತರಾಕ್ ಆಯ್ಲೊನಾ. ಹಾಂವ್ ಘುಸ್ಪಡ್ಲೊಂ. ಮೆಕ್ಸಿಕಡೆ ವಿಚಾರ್ ಕೆಲ್ಯಾ ಶಿವಾಯ್ ಫಾಯ್ಸ್ ಕರುಂಕ್ ಧೈರ್ ಘೆತ್ಲೆನಾ ಹಾಂವೆಂ. ತಿಸ್ರ್ಯಾ ಹಫ್ತ್ಯಾಂತ್ ಮೆಲ್ಕಿ ದಫ್ತರಾಕ್ ಆಯ್ಲೊ. ಹಜಾಲ್ ಅದಲ್-ಬದಲ್ ಜಾತಾನಾ ’ಮೆಕ್ಸಿಕ್ ಸೈಕಲಾರ್ ಕಂಕ್ನಾಡಿ ಲಾಗ್ಸಾರ್ ಆವ್ಘಡ್ ಜಾವ್ನ್ ವೆನ್ಲೊಕ್ ಆಸ್ಪತ್ರೆಂತ್ ಆಸಾ. ಹಾತಾ ವಯ್ರ್ ಕಾರ್ ಗೆಲ್ಲ್ಯಾನ್ ಹಾತ್ ಪಿಟೊ ಜಾಲಾ. ಬಹುತೇಕ್ ತಾಚೊ ಉಜ್ವೊ ಹಾತ್ ಕಾತ್ರುಂಕ್ ಪುರೊ’ ಗಜಾಲ್ ಮೆಲ್ಕಿ ಥಾವ್ನ್ ಕಳಿತ್ ಜಾತಾನಾ ಮ್ಹಜಿ ತಕ್ಲಿ ಘುಂವ್ಲಿ. ಹಾಂವೆಂ ಮ್ಹಜೆ ಕಾನ್ ಧಾಂಪ್ಲೆ. ಹುನ್-ಹುನ್ ಸಿಸೆಂ ಮ್ಹಜಾ ಕಾನಾಂತ್ ವೊತ್ಲ್ಲೊ ಅನುಭವ್ ಜಾಲೊ ಮ್ಹಾಕಾ. ವೇಳ್ ಕಾಡಿನಾಸ್ತಾಂ ಚಾರ್ ಮೆಟಾಂನಿ ಮ್ಹಳ್ಳ್ಯಾಬರಿ ಆಸ್ಪತ್ರೆಕ್ ಹಾಂವೆಂ ಧಾಂವ್ ಮಾರ್ಲಿ. ಅಪ್ರಾಧಿ ಮೆಟಾಂನಿ ಆನಿ ಭರ್ಲ್ಲ್ಯಾ ದುಃಖಾಂನಿ ಹಾಂವೆಂ ತಾಚ್ಯಾ ಖಟ್ಲ್ಯಾ ಸರ್ಶಿಂ ಪಾವ್ಲಾಂ ಕಾಡ್ಲಿಂ. ತಾಚಾ ಉಜ್ವ್ಯಾ ಹಾತಾಕ್ ಪ್ಲಾಸ್ಟರ್ ಘಾಲ್ಲೊ. ಗೊಮ್ಟ್ಯಾಕ್ ಏಕ್ ’ಸ್ಲೀಂಗ್’ ಕರ್ನ್ ತಾಚೊ ಹಾತ್ ತಾಚೆರ್ ದವ್ರಿಲ್ಲೊ. ತೊಂಡಾ ವಯ್ಲೆ ಘಾಯ್ ಮಾಯಾಗ್ ಜಾವ್ನ್ ಯೆತಾಲೆ. ನಿಸ್ತೇಜ್ ಜಾವ್ನ್ ನಿದ್ಲ್ಲೊ ತೊ. ತಾಚಿ ಚಾಕ್ರಿ ಕರುಂಕ್ ಏಕ್ ಪ್ರಾಯ್ವಂತ್ ಮನಿಸ್ ಆಸ್ಲ್ಲೊ. ಹೆಂ ಸರ್ವ್ ಎಕಾ ಸೆಕುಂಡಾನ್ ಚೊಯ್ಲೆಂ ಹಾಂವೆಂ.
"ದೇವ್ ಬರೊ ದೀಸ್ ಸರ್.." ಮೆಕ್ಸಿನ್ ಉಚಾರ್ಲೆಲಿಂ ಕ್ಷೀಣ್ ಉತ್ರಾಂ ಮ್ಹಜೆಂ ಕಾಳಿಜ್ ಶಿಂದುಂಕ್ ಪಾವ್ಲಿಂ. ತಿಂ ಹಾಂವ್ ಜಿರಂವ್ಕ್ ಸಕ್ಲೊ ನಾ. ತಾಣೆಂ ಖಟ್ಲ್ಯಾರ್ ಥಾವ್ನ್ ಉಟೊಂಕ್ ಪಳೆಲೆಂ ತರೀ ಅಸಹಾಯಕ್ ಜಾಲೊ ತೊ. ತಾಚೆಂ ತೊಂಡ್ ನಿರ್ವಿಕಾರಾನ್ ಭರ್ಲೆಲೆಂ ದೆಖ್ಲೆಂ ಹಾಂವೆಂ.
ಹಾಂವೆಂ ದೊಳೆ ಧಾಂಪ್ಲೆ. ತೆಂ ದೃಶ್ಯ್ ಚಿಂತುಂಕ್ ವಾ ಆಟಾಪುಂಕ್ ಜಾಲೆಂನಾ ಎಕಾ ತರುಣ್ ಭುರ್ಗ್ಯಾಚೆಂ ಜೀವನ್ ಫುಲಾಬರಿ ಜಾಲ್ಲೆಂ ಚಿಂತುನ್ ಕಾಳಿಜ್ ಕಡ್ಲೆಂ ಮ್ಹಜೆಂ. ಸವ್ಕಾಸ್ ತಾಚ್ಯೆ ಸರ್ಶಿಂ ಪಾವ್ಲೊಂ ಹಾಂವ್. ತಾಚೊ ದಾವೊ ಹಾತ್ ಮ್ಹಜಾ ದೋನ್ಯೀ ಹಾತಾಂನಿ ಧಾಂಬುನ್ ಧರ್ಲೊ ಹಾಂವೆಂ. ಹುನೊನಿ ದುಃಖಾಂ ತಾಚಾ ಹಾತಾರ್ ಪಡ್ಲಿಂ ಜಾಯ್ಜಯ್, ನಿದ್ಲ್ಲೆಕಡೆ ತೊ ಹುಳ್ವುಳ್ಳೊ.
"ಸರ್.. ತುಂವೆಂ ಸಾಂಗ್ಲ್ಲ್ಯಾಬರಿ ತುಕಾ ಮೆಳೊಂಕ್ ಯೆತಾಲೊಂ ಸರ್. ಮಾರ್ಗಾರ್ ಸರ್ಕಾರಾನ್ ಘಾಲ್ಲ್ಯಾ ರೆಂವೆರ್ ಮ್ಹಜೆಂ ಸೈಕಲ್ ’ಸ್ಕಿಡ್’ ಜಾವ್ನ್ ಹಾಂವ್ ಮಾರ್ಗಾರ್ ಉಸಾಳ್ಳೊಂ. ತೆದಾಳಾ.."
"ಮೆಕ್ಸಿ.. "ಹಾಂವೆಮ್ ಕಿಂಕ್ರಾಟ್ ಮಾರ್ಲಿ. "ದಯಕರ್ನ್ ಹಾತ್ ಸೊಡ್ನ್ ಹಾಂವೆಂ ಬಳಾನ್ ಮ್ಹಜೆ ಕಾನ್ ಧಾಂಪ್ಲೆ. ಚಾರ್ ಕುಶಿಂತ್ಲ್ಯಾನ್ ಗರ್ನಾಳಿ ಸೊಡ್ಲ್ಲೊ ಅನುಭವ್, ಭೊಗ್ಲೊ ಮ್ಹಾಕಾ. ’ಕಿತೆಂ ಮೆಳುಂಕ್ ಆಯಿಲ್ಲೊ!! ಮ್ಹಜಿ ವಾಚ್ಯಾ ಸಕತ್ ಬಂದ್ ಜಾಲ್ಲ್ಯಾಬರಿ ಜಾಲೆಂ ಮ್ಹಾಕಾ. ಉಗ್ತ್ಯಾ ರಸ್ತ್ಯಾರ್ ನಾಗ್ಡೊ ಕೆಲ್ಲಿ ಲಜ್ ಭೊಗ್ಲಿ ಮ್ಹಾಕಾ. ಮ್ಹಜೆ ದೊಳೆ ದುಃಖಾಂನಿ ಭಿಜ್ಲೆ. ಕಪಾಲ್ ಧಾಡಾಯ್ಲೆಂ ಹಾಂವೆಂ ಸಿಂತಿಮೆಂತಾಂನಿ ಮ್ಹಜೆಂ ಕಾಳಿಜ್ ಭರೊನ್ ಆಯ್ಲೆಂ.
ಮ್ಹಾಕಾ ತ್ಯಾ ಉಬ್ದೇಸಾಂತ್ ರಾವೊಂಕ್ ಜಾಲೆಂನಾ. ಥಂಯ್ ಥಾವ್ನ್ ಧಫ್ತರಾಕ್ ಪಾವ್ಲೊಂ ಹಾಂವ್. ಫಾಯ್ಲಾಂತ್ ಪಾಟಿಂ ಘಾಲ್ಲಿ ತಾಚಿ ಕಾಣಿ, ಹಾಂವೆಂ ಭಾಯ್ರ್ ಕಾಡ್ಲಿ. ತ್ಯಾಚ್ ಹಫ್ತ್ಯಾಂತ್ ಫಾಯ್ಸ್ ಕರುಂಕ್ ನಿರ್ಧಾರ್ ಕೆಲ್ಲ್ಯಾ ಹಾಂವೆಂ, ತ್ಯಾ ಕಾಣ್ಯೆ ಪಂದಾ ಹೊ ಶ್ಹರೊ ಲಿಖ್ಲೊ.
’ಸಲ್ವಣೆಂತ್ಲಿ ಜೀಕ್’ ಲಿಖ್ಲೆಲ್ಯಾ ಮೆಕ್ಸಿ ಲಸ್ರಾದೊಕ್ ’ಸಕಾಳ್’ ಆಭಾರಿ. ಸಬಾರ್ ವರ್ಸಾಂ ನಂತರ್ ಏಕ್ ಉತ್ತೀಮ್ ಕಾಣಿ ಪ್ರಗಟುಂಕ್ ಅಭಿಮಾನ್ ಭಗ್ತಾ. ಇತ್ಲ್ಯಾ ತಾಲೆಂತಾಂನಿ ಭರ್ಲ್ಲ್ಯಾ ಹ್ಯಾ ತರುಣಾಕ್ ಜಾಲ್ಲ್ಯಾ ಆವ್ಘಡಾನ್ ಹ್ಯಾ ಫುಡೆಂ ಲಿಖುಂಕ್ ತಾಕಾ ಅಸಾಧ್ಯ್ ಜಾಲಾಂ. ಕೊಂಕ್ಣಿ ಸಾಹಿತ್ಯಾಕ್ ಹೊ ಏಕ್ ಆಘಾತ್ ಭರಾನಾತ್ಲ್ಲೊ ಜಾವ್ನಾಸಾ. ತಾಚಿ ’ಖರಿ’ ಒಳೊಕ್ ಧರುಂಕ್ ತಡವ್ ಕೆಲ್ಲ್ಯಾಕ್ ’ಸಕಾಳ್’ ಪಶ್ಚಾತಾಪ್ ಪಾವ್ತಾ ಆನಿ ಭಗ್ಸಾಣೆಂ ಮಾಗ್ತಾ.
- ಸಂಪಾದಕ್.
ಹಾಂವ್ ದುಃಖಾಂ ಪುಸುನ್ ಜನೆಲಾ ಸರ್ಶಿಂ ಗೆಲೊಂ. ವಯ್ರ್ ಮೊಳ್ಬಾರ್ ಮೊಡಾಂ ನಿತಳ್ಳೆಲಿಂ. ನೀಳ್ ಮೊಳಾಬ್ ದಿಸ್ಲೆಂ ಮ್ಹಾಕಾ. ದೀರ್ಘ್ ಉಸ್ವಾಸ್ ಸೊಡ್ಲೊ ಹಾಂವೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
