ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಬಾಂಯ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ.
ವಲ್ಲಿ ಕ್ವಾಡ್ರಸ್
ಬಾಲ್ತಾಜಾರ್ ಸೊಜಾಕ್ ಬಾಪಾಯ್ನ್ ಕರ್ನ್ ದವರ್ಲೆಲೊ ಸಾತ್ ಎಕ್ರೊ ಜಾಗೊ ಆಸ್ಲ್ಲೊ ತರ್ಯ್ ಕುಮೆರಿಚಾ ಪೊಕ ಪಿಂತಾಚಾ ವಿಧ್ವಿ ಧುವೆಚಾ ಮೊಗಾರ್ ಪಡೊನ್ ಗಾಂವಾರ್ ನಾಲಿಸಾಯ್ ಜಾಲ್ಲ್ಯಾ ಕರ್ಮಾಕ್ ಬಾಪಾಯ್ನ್ ಗಾಬ್ರುನ್ ತಾಕಾ ಘರಾಂತ್ಲೊ ಭಾಯ್ರ್ ನಿಕ್ಳಾಯಿಲ್ಲೊ. ಅಶೆಂ ವೊಂಟಾರ್ ಹಳ್ತ್ ಮಿಶಿಯೊ ಫ಼ುಟೊನ್ ಯೆತಾನಾಂಚ್ ತೊ ಘಾಟಾಕ್ ಧಾಂವ್ಲೊ ಆನಿಂ ಎಕಾ ಕಾಪ್ಯೆ ತೊಟಾಂತ್ ಕಾಮ್ ಕರುಂಕ್ ಲಾಗ್ಲೊ. ಅಶೆಂ ತರ್ನಾಟೊ ಜಾತಾನಾ ಫ಼ುಲೊನ್ ಧಡಂಗ್ ಜಿವಾಚೊ ಆಸ್ಲ್ಲೊ ತೊ ಅಪ್ಲೊ ಬಾಪುಯ್ ಸರ್ತಚ್ ತೊ ಗಾಂವಾಕ್ ಪಾಟಿಂ ಆಯ್ಲೊ.
ಕಾಪ್ಯೆ ತೊಟಾಚೆಂ ಕಾಮ್ ಕರುನ್ ಆಸ್ಲ್ಲೊ ತರ್ಯ್ ಪಳೆತೆಲ್ಯಾಂಕ್ ತಾಚೊ ಭರ್ತಿ ಜೀವ್ ಪಳೆತಾನಾ ಕಾಂಯ್ ತೊ ಮಿಲಿಟ್ರಿಚೊ ಸಿಪಾಯ್ಕೀ ಮ್ಹಳ್ಳೊ ದುಭಾವ್ ಯೆತಾಲೊ. ಅಶೆಂ ತಾಕಾ ಗಾಂವಾಂತ್ಚ್ ಸರ್ಕಾರಿ ಆಸ್ಪತ್ರೆಂತ್ ನಿತಳ್ ಕರ್ಚೆಂ ಕಾಮ್ ಕರ್ಚಾ ಗಾಸ್ಪೆರಾಚಿ ಧುವ್ ಮಾಗ್ಗಿಲಾಗಿಂ ಕಾಜಾರ್ ಜಾಲೆಂ ಆನಿಂ ಎಕಾ ಪಾಟ್ಲ್ಯಾ ಏಕ್ ಮ್ಹಣೊನ್ ಪಾಂಚ್ ಬುರ್ಗಿಂ ಜಾಲಿಂ.
ಮಾಲ್ಘಡೆಂ ಚೆಡುಂ ಪುಲ್ಲು ತರ್ ಪಾಟ್ಲೆ ಮರ್ಯಾಣ್, ದುಮ್ಗಾ, ಮಿಂಗೆಲ್, ಬೊಸ್ತ್ಯಾಂವ್ ಹೆ ಚೊವ್ಗೀ ಪೂತ್. ಬಾಲ್ತಾಜಾರಾಕ್ ಆತಾಂ ಗಾಂವಾಂತ್ ಆಸ್ಚಿ ಉತ್ಪತ್ತಿ ಮ್ಹಳ್ಯಾರ್ ತಾಚಾ ಬಾಪಾಯ್ಚೊ ಸಾತ್ ಎಕ್ರೊ ಜಾಗೊ, ತಾಂತುಂ ಆಸ್ಚೆ ಮಾಡ್, ಮಾಡಿಯೊ ಆನಿ ಗಾದೆ. ತರ್ಯ್ ಘರಾಂತ್ ಪ್ರಾಯೆಸ್ತ್ ಆವಯ್, ಆನಿಂ ಪಾಂಚ್ ಬುರ್ಗಿಂ ಮ್ಹಣ್ತಾನಾ ಆಟ್ ಮನ್ಶಾಂಚೊ ದೀಸ್ಪಡ್ತೊ ಗ್ರಾಸ್ ಕಸೊ ವಚೊ? ತ್ಯಾ ಭಾಯ್ರ್ ತೆಗಾಂ ಬುರ್ಗಿಂ ಸರ್ಕಾರಿ ಇಸ್ಕೊಲಾಕ್ ವೆತಾಲಿಂ ಜಾಲ್ಲ್ಯಾನ್ ಖರ್ಚ್ ರಾವ್ತಾಯೆ?
ಅಶೆಂ ದೀಸ್ ಗೆಲ್ಲೆಪರಿಂಚ್ ತೊಟಾಚಿ ವ್ರದ್ಧಿ ಕರುಂಕ್ ಲಾಗ್ಲೊ. ಕೆಂಳ್ಬ್ಯಾಚೆಂ ತೊಟ್ ಆಸ್ಲ್ಲೆಂ ದೆಕುನ್ ಸದಾಂಯ್ ಪೆಂಟೆಂತ್ಲ್ಯಾ ಕೊಂಗ್ಣ್ಯಾಚಾ ಹೊಟ್ಲಾಕ್ ಗಡಾಯ್, ಶಿರತ್ಯೊ ವಿಕುನ್ ತಾಚೊ ದೀಸ್ಪಡ್ತೊ ಗ್ರಾಸ್ ವೆತಾಲೊ. ತರ್ಕಾರಿ, ಫ಼ುಲಾಂ ಸಯ್ತ್ ವಿಕುನ್ ತಾಚಾ ಕೂಟಾಚೊ ದೀಸ್ಪಡ್ತೊ ಗ್ರಾಸ್ ವೆತಾಲೊ. ಘರಾಂತ್ ಆಟ್ ಮನ್ಶಾಂ ಮಾತ್ರ್ ನ್ಹಯ್, ದೊಗಾಂ ಮಾಜ್ರಾಂ, ದೋಗ್ ಪೆಟೆ, ಇಲ್ಲಿಂ ಕುಂಕ್ಡಾಂ, ಗೊಟ್ಯಾರ್ ತೀನ್ ಗಾಯೊ, ಏಕ್ ಜೋಡ್ ಪಾಡೆ ಮ್ಹಣ್ತಾನಾ ಘರಾಂತ್ ದೀಸ್ಭರ್ ಕಾಮಾಕ್ ಕಾಂಯ್ ಉಣೆಂ ಆಸಾ?
ಎಕಾ ಸಕಾಳಿಂ ಉಟೊನ್ ಕಾಮಾಂ ಸುರು ಜಾಲಿಂ ತರ್ ಸಾಂಜ್ ಜಾತಾಂ ಮ್ಹಣಾಸರ್, ಕಾಮಾಕ್ ಕಾಂಯ್ ಪುರ್ಸತ್ ನಾತ್ಲ್ಲಿ. ಕಶ್ಟಾಂತ್ ತರ್ಯ್ ಮಾಯಾಮೊಗಾನ್ ಘರಾಣೆಂ ಚಲ್ತಾಲೆಂ. ಪುಣ್ ಎಕಾಚ್ ಸಂಗ್ತೆಚೆಂ ಉಣೆಂಪಣ್ ಬಾಲ್ತಾಜರಾಕ್ ಭೊಗ್ತಾಲೆಂ ಸಾತ್ ಎಕ್ರೊ ಸುವಾತೆಚಾ ಜಾಗ್ಯಾರ್ ಏಕ್ ಬಾಂಯ್ ಆಸ್ಲ್ಲಿ ತರ್ ಕಿತ್ಲೆಂ ಬರೆಂ ಮ್ಹಣೊನ್.
ಆಬಾಚಾ ಕಾಳಾಚಿ ಬಾಂಯ್ ಆಸ್ಲ್ಲಿ, ತಿ ಕೊಣೆ ಖೊಂಡ್ಲ್ಲಿ ಮ್ಹಳ್ಳೆಂ ಭೋವ್ಶಾ ತಾಚೊ ಸರ್ಲ್ಲೊ ಬಾಪುಯ್ ಗಾಬ್ರುಕ್ಯ್ ಕಳಿತ್ ಆಸ್ಚೆಂನಾ. ತಿಚ್ ಸಾಡೆ ತೀನ್ ಆಳಾಂಚಿ ಬಾಂಯ್. ಪುಣ್ ಮಾಯ್ ಮಯ್ನೊ ಸುರು ಜಾಲ್ಲೆಪರಿಂಚ್ ತಿ ಬಾಂಯ್ ಸುಕ್ತಾಲಿ ಆನಿಂ ಉದ್ಕಾಚಿ ಕಠೀಣ್ ಅಡ್ಚಣ್ ತಾಂಕಾಂ ಜಾತಾಲಿ. ಗಾಂವ್ಚಿ ನ್ಹಂಯ್ ಚಡುಣೆಂ ಅರ್ಧ್ಯಾ ಮೈಲಾಂತ್ ಆಸ್ಲ್ಲಿ ದೆಕುನ್ ಹಾಪ್ತ್ಯಾಕ್ ಏಕ್ ಪಾವ್ಟಿಂ ವಚೊನ್ ವಸ್ತ್ರಾಂ ಧುಂವ್ನ್ ಯೆತಾಲಿಂ. ಅಶೆಂ ಆಸ್ತಾಂ ಏಕ್ ಬರಿ ಗೂಂಡ್ ಬಾಂಯ್ ಆಪ್ಲ್ಯಾಯ್ ಜಾಗ್ಯಾರ್ ಆಸ್ಲ್ಲಿ ತರ್ ಕಿತ್ಲೆಂ ಬರೆಂ ಮ್ಹಣೊನ್ ಬಾಲ್ತಾಜಾರ್ ಆಟೊವ್ ಘಾಲುನ್ ಆಸ್ಲ್ಲೊ.
ಪುಣ್ ಏಕ್ ಬಾಂಯ್ ಖೊಂದ್ಚಿ ಕಾಂಯ್ ಚಿಲ್ಲರ್ ಗಜಾಲ್ ನ್ಹಯ್. ದಿಸಾನ್ ದೀಸ್ ಮಾರ್ಗಾಯ್ ಚಡೊನ್ ವೆಚಾ ಕಾಳಾರ್ ಬುರ್ಗ್ಯಾಂಚೆಂ ಶಿಕಾಪ್, ದೀಸ್ಪಡ್ತೊ ಗ್ರಾಸ್, ಸಯ್ರಿಂ ಧಯ್ರಿಂ, ಆನಿಂ ಕಾರ್ಯಿಂ, ಪಿಡಾ ಶಿಡಾ ಅಶೆಂ ಮ್ಹಣ್ತಾನಾ ಜೊಡ್ಲ್ಲೆ ತಿತ್ಲೆಂ ಮೊಡುಂಕ್ ಪಡ್ತಾಲೆಂ. ಪುಣ್ ವೆಳಾಚಿಂ ರೊದಾಂ ಹ್ಯಾ ಕಸ್ಲ್ಯಾಯ್ ಸಂಗ್ತ್ಯಾಂಚಿ ಪರ್ವಾ ನಾಸ್ತಾಂ ಘುಂವೊನ್ ಆಸ್ಲ್ಲಿಂ.
ದೀಸ್ ಗೆಲ್ಲೆಪರಿಂ ತಾಚಿ ಆವಯ್ ಸೆವ್ರಿ ಅಂತರ್ಲಿ ಆನಿಂ ತಿಚಾ ಮರ್ಣಾಂತ್ ಬಾಲ್ತಾಜಾರ್ ಚಡ್ ಆಕಾಂತ್ಲೊನಾ. ಕಿತ್ಯಾಕ್ ಮ್ಹಳ್ಯಾರ್ ತಿಕಾ ಎದೊಳ್ಚ್ ಪ್ರಾಯ್ ಸತ್ತರ್ ಉತರ್ಲ್ಲಿ. ಆತಾಂ ಸಗ್ಳಿಂ ಬುರ್ಗಿಂ ಇಸ್ಕೊಲಾಕ್ ವೆತಾಲಿಂ. ಪುಲ್ಲುನ್ ಸಾತ್ವಿಚಿ ಕ್ಲಾಸ್ ಶಿಕೊನ್ ಆವಯ್ಕ್ ಕುಮೊಕ್ ಕರುಂಕ್ ಘರಾಂತ್ಚ್ ಆಸ್ಲ್ಲೆಂ. ಪುಣ್ ಕಿತ್ಲಿಂ ವರ್ಸಾಂ ಪಾಶಾರ್ ಜಾಲಿಂ ತರ್ಯ್ ಆಪ್ಲಿ ಆಶಾ ಮಾತ್ರ್ ಬಾಲ್ತಾಜರಾಕ್ ಜ್ಯಾರಿ ಕರುಂಕ್ ಜಾಲಿಚ್ಚ್ ನಾ. ಮರ್ಯಾಣ್ ಶಿಕ್ಪಾಂತ್ ಇಲ್ಲೊ ಬಡ್ಡ ದೆಕುನ್ ತಿಸ್ರಿ ಕ್ಲಾಸ್ ಶಿಕೊನ್ ಎದೊಳ್ಚ್ ಬಾಲ್ತಾಜಾರಾನ್ ತಾಕಾ ಗಾದೆ ಕೊಸುಂಕ್ ಆನಿಂ ಪಾಡ್ಯಾಂಚಿ ಜತನ್ ಘೆಂವ್ಚಿ ಜವಾಬ್ದಾರಿ ದಿಲ್ಲಿ. ದುಮ್ಗಾ ನೊವೆಚಾ ಕ್ಲಾಶೆಂತ್ ತಿಸ್ರೆ ಪಾವ್ಟಿಂ ಬೊಸ್ಲ್ಲೊಚ್ ತಾಚೆಂ ಶಿಕಾಪ್ಯ್ ಸಂಪ್ಲೆಂ ಆನಿಂ ತೊಟಾಚಿ ಜವಾಬ್ದಾರಿ ತಾಣೆ ವಹ್ಸುನ್ ಘೆತ್ಲಿ. ಮಿಂಗೆಲ್ ಆತಾಂ ಆಟ್ವೆ ಕ್ಲಾಶೆಂತ್ ಶಿಕೊನ್ ಆಸ್ಲ್ಲೊ. ಬೊಸ್ತ್ಯಾಂವ್ ಬಾಪಾಯ್ಚಾ ಕೊಂಡಾಟ್ಯಾನ್ ವಡ್ ಜಾಲ್ಲೊ ಆನಿಂ ಸಾತ್ವೆಚಾ ಕ್ಲಾಶೆಂತ್ ಶಿಕ್ತಾಲೊ. ದೀಸ್ ಅಶೆಚ್ ಪಾಶಾರ್ ಜಾಲೆ ಆನಿಂ ಬೊಸ್ತ್ಯಾಂವ್ಚಿ ಬಾಂಯ್ಚಿ ಆಶಾ ಜ್ಯಾರಿ ಜಾಲಿಚ್ಚ್ ನಾ.
ಕಾಜಾರ್ ಜಾವ್ನ್ ಎದೊಳ್ಚ್ ತಾಚಿಂ ವೀಸ್ ವರ್ಸಾ ಉತ್ರಾಲ್ಲಿಂ. ಫ಼ೆಸ್ತಾ ಪರ್ಬೆಕ್ ಯೆಂವ್ಚಿಂ ತಾಚಿಂ ಸಯ್ರಿಂ ತವಳ್ ತವಳ್ ಬುರ್ಗ್ಯಾಂಕ್ ತಾಂಗೆರ್ ಆಪವ್ನ್ ವರ್ತಾಲಿಂ. ಅಶೆಂ ತಾಂಕಾಂ ನೆಸೊಂಕ್ ವಸ್ತ್ರಾಂ ದಿತಾಲಿಂ. ಬಾಲ್ತಾಜಾರ್ ತರ್ಯ್ ಪೆಂಟೆಂತ್ ಆಸ್ಚಾ ಆಪ್ಲ್ಯಾ ಸಯ್ರ್ಯಾಂಕ್ ನಾರ್ಲ್, ಮೊಗಿಂ, ದುದಿಂ, ಗೊಸಾಳಿಂ, ವಾಂಯ್ಗಿಂ ಭರುನ್ ಭರುನ್ ದಿತಾಲೊ. ಅಶೆಚ್ ದೀಸ್ ಪಾಶಾರ್ ಜಾಲೆ ಆನಿಂ ಬುರ್ಗಿಂ ತರ್ನಾಟಿಂ ಜಾವ್ನ್ ಆಯ್ಲಿಂ.
ಆತಾಂ ಪುಲ್ಲುಕ್ ಕಸೊಯ್ ತಾಚಾ ಚಿಂತ್ಪಾಚೊ ನವ್ರೊ ಸೊಧುನ್ ಸೊಧುನ್ ಬೊಂಬೊಂಯ್ತ್ ಕಾಮ್ ಕರ್ಚೊ ಪೆದ್ರು ಘರ್ಚೊ ಮಾಲ್ಘಡೊ ಜಾಂವಯ್ ಜಾವ್ನ್ ಪುಲ್ಲುಕ್ ಘರಾಂ ಥಾವ್ನ್ ಆಪವ್ನ್ ವರ್ನ್ ಗೆಲೊ.
ಬುರ್ಗ್ಯಾಂಗ್ ಘರಾಥಾವ್ನ್ ಭಾಯ್ರ್ ಧಾಡುಂಕ್ ಮಾಗ್ಗು ಭಿಯೆತಾಲೆಂ. ತಾಚಾ ಭಯ್ಣಿಚಾ ಪಾಗುರ್ ಮಾಂವಾಚಿಂ ಭುರ್ಗಿಂ ಅಶೆಂಚ್ ಶಿಕಾಪ್ ಜಾವ್ನ್ ಭಾಯ್ರ್ ಗೆಲ್ಲಿಂ ಖೈಂ ಆಸಾತ್ ಮ್ಹಣ್ ಕೊಣಾಕ್ಯ್ ಕಳಿತ್ ನಾ. ಕೋಣ್ ಮ್ಹಣ್ತಾ ಎಕ್ಲೆಂ ಪಾರ್ಸ್ಯಾಲಾಗಿಂ ಲಗಿನ್ ಜಾಲಾಂ ಮ್ಹಣೊನ್, ಕೋಣ್ ಸಾಂಗ್ತಾತ್ ಎಕ್ಲೆಂ ತಮ್ಳಾಂಚಾ ಪಾಟ್ಲ್ಯಾನ್ ಧಾಂವ್ಲಾಂ. ಆನಿ ಎಕ್ಲೊ ಪಾರ್ಪೊಳ್ ಜಾವ್ನ್ ಬೊಂಬೊಯ್ಚಾ ಜೈಲಾಚಿಂ ಸರಳಾಂ ಮೆಜ್ತಾ ಮ್ಹಣ್. ಹೆಂ ಆಯ್ಕೊನ್ ಭ್ಯೆಂ ಮತಿಕ್ ರಿಗವ್ನ್ ಗೆಲ್ಲೆಂ ಮಾಗ್ಗಿ ಕಶ್ಟ್ ಜಾಂವ್ ಸುಖ್ ಜಾಂವ್, ಆಮಿಂ ಸಗ್ಳಿಂ ಎಕಾಚ್ ಘರಾಂತ್ ರಾವ್ಯಾಂ ಮ್ಹಳ್ಳೆಂ ಚಿಂತಾಪ್ ದವ್ರುನ್ ಆಸ್ಲ್ಲೆಂ.
ವಡ್ ಜಾಲ್ಲಿಂ ಬುರ್ಗಿಂ ಆಜ್ ನ್ಹಯ್ ತರ್ ಫ಼ಾಲ್ಯಾಂ ಆಪ್ಣಾಕ್ ಖಾಂದ್ಯಾಕ್ ಖಾಂದ್ ದೀವ್ನ್ ಕಾಮ್ ಕರ್ತೆಲಿಂ ಮ್ಹಳ್ಳೊ ಭರ್ವಸೊ ಬಾಲ್ತಾಜಾರಾಕ್ ಆಸ್ಲ್ಲೊ ಪುಣ್ ಫ಼ುಡೆಂ ಆಸ್ಚಿ ವಾಟ್ ತಾಕಾ ಕಿತಾಕ್ಗೀ ಅಶೀರ್ ದಿಸೊಂಕ್ ಲಾಗ್ಲಿ. ತೊಟಾಚಿ ವ್ರದ್ದಿ ಕರ್ಚಿ ಕಶಿ? ದರಬಸ್ತ್ ಉದಾಕ್ ಆಸ್ಲ್ಲೆಂ ತರ್ ಗಜಾಲ್ ವೆಗ್ಳಿ. ಪುಣ್ ಆತಾಂ ಆಸ್ಚಾ ತ್ಯಾ ಬಾಂಯ್ಕ್ ಕಶೆಂ ಗೂಂಡ್ ಕರ್ಚೆಂ? ಆಡೊವ್ ಘಾಲ್ಯಾಂ ಮ್ಹಳ್ಯಾರ್ ಭಾಂಗಾರ್ ನಾ. ವಿಕ್ಯಾಂ ಮ್ಹಳ್ಯಾರ್ ಕಾಂಯ್ ಆಸ್ತ್ ನಾ. ರೀಣ್ ವಿಚಾರ್ಯಾಂ ಮ್ಹಳ್ಯಾರ್ ತೆಂ ಫ಼ಾರಿಕ್ ಕರ್ಚಿ ವಾಟ್ ಮೆಳಾನಾ. ಅಶೆಂ ಆಸ್ತಾಂ ಆಸೊಂ ಬುರ್ಗಿಂ ವಡ್ ಜಾಲ್ಲೆಪರಿಂ ತಿಂ ಕಾಂಯ್ ವಾತ್ ಸೊದ್ತಿತ್. ಜಿ ಮ್ಹಜಾ ಕಟ್ಟ್ಯಾಂತ್ ರಿಗಾನಾ ಮ್ಹಳ್ಳೆಂ ಚಿಂತಾಪ್ ಚಿಂತುನ್ ತೊ ಆಸ್ಲ್ಲೊ ತರ್ಯ್ ತಾಚಾ ಮತಿಂತ್ ಏಕ್ಚ್ ಖಾತಾಲೆಂ ಕೀ ಮೊರ್ಚಾಧಿಂ ಆಪ್ಣಾಕ್ ಅಪ್ಲ್ಯಾ ಜಾಗ್ಯಾಂತ್ ಏಕ್ ಬಾಂಯ್ ಜಾಯ್. ತಿ ಗೂಂಡ್ ಆಸಾಜಯ್, ತಾಕಾ ಸಿಮೆಂಟಿಚೆ ದೊರೆ ಆಸಾಜಯ್ ಕುಶಿನ್ ಏಕ್ ಲ್ಹಾನ್ ಉದ್ಕಾಚಿ ಟೇಂಕ್ ಆಸಾಜಯ್ ಇತ್ಯಾದಿ ಚಿಂತುನ್ ಆಸ್ಲ್ಲೊ.
ದೀಸ್ ಮಾತ್ರ್ ಕಸಲಿಚ್ ಪರ್ವಾ ನಾಸ್ತಾಂ ಮುಖಾರ್ ವೆತಾಲೆ ಆನಿಂ ಆತಾಂ ಪುಲ್ಲುಕ್ ದೊಗಾಂ ಬುರ್ಗಿಂ ಜಾಲಿಂ, ಮರ್ಯಾಣ್ ಕಾಜಾರ್ ಜಾಲೊ, ಘರಾಂತ್ ಸುನ್ ಆಯ್ಲಿ.
ಅಚಾನಕ್ ಬಾಲ್ತಾಜಾರಾಕ್ ಏಕ್ ಪಾವ್ಟಿಂ ದೆಳ್ಯಾರ್ ಚಡೊನ್ ಮಿರಿಂ ಕಾಡ್ತಾನಾ ದೆಳ್ಯಾಚೊ ಪಾಂಯ್ ಚುಕೊನ್ ಪಡೊನ್ ಪೆಂಕಾಡ್ ಮೊಡ್ಲೆಂ. ಹಾಪ್ತೆಭರ್ ಆಸ್ಪತ್ರೆಚಾ ಖಟ್ಲ್ಯಾರ್ ವಳ್ವಳ್ಳೊ. ಮಯ್ನೆ ಜಾಲೆ ಆನಿಂ ಘರಾ ಪಾಟಿಂ ಆಯಿಲ್ಲೊ ತರ್ಯ್ ವಕ್ತಾಂ ಚಾಲು ಆಸ್ಲ್ಲಿಂ. ದೊತೊರಾನ್ ಕಸಲೆಂಚ್ ಕಾಮ್ ಕರಿನಾಯೆ ಮ್ಹಳ್ಳಿ ತಾಕಿದ್ ದಿಲ್ಲೆವರ್ವಿಂ ಮಾಂದ್ರೆರ್ಚ್ ಲೊಳೊನ್ ಆಪ್ಲೆ ದೀಸ್ ಪಾಶಾರ್ ಕರುಂಕ್ ಲಾಗ್ಲೊ.
ಆಜ್ ನ್ಹಯ್ ತರ್ ಫ಼ಾಲ್ಯಾಂ ಆಪುಣ್ ಬರೊಂ ಜಾತಲೊಂ ಮ್ಹಳ್ಳೊ ತಾಚೊ ಭರ್ವಸೊ ದಿಸಾನ್ ದೀಸ್ ಸತ್ ಜಾಂವ್ಕ್ ಧರ್ತಾನಾ ತೊ ಆತಾತಾಂ ಉಟೊನ್ ಭಾಯ್ರ್ ಭಿತರ್ ವಚೊನ್ ಆಪ್ಲಿ ಕುಡಿಚಿ ನಿತಳಾಯ್ ಅಪುಣ್ಂಚ್ ಕರುಂಕ್ ಲಾಗ್ಲೊ. ಭೋವ್ಶಾ ತಾಕಾ ದೆವಾನ್ ಅಪ್ಲ್ಯಾ ಮತಿಂತ್ ಆಸ್ಚಿ ಆಶಾ ಜ್ಯಾರಿ ಕರ್ಚೆ ಪಾಸತ್ ಜಿವೊ ದವರ್ಲ್ಲೊ ಜಾಯ್ಜಯ್.
ಅಶೆ ದೀಸ್ ಪಾಶಾರ್ ಜಾಲೆ, ಮಯ್ನೆ, ವರ್ಸಾಂ ಪಾಶಾರ್ ಜಾಲಿಂ. ಬಾಲ್ತಾಜಾರ್ ಆತಾಂ ಕೊಣಾಯ್ಚಾಯ್ ಘರಾ ಜಾಂವ್, ಸಯ್ರ್ಯಾಂಗೆರ್ ಜಾಂವ್, ಪೆಂಟೆಕ್ ಜಾಂವ್ ವೆಚೆಂ ಕಯ್ದ್ ಜಾವ್ನ್ ವರ್ಸಾಂ ಜಾಲ್ಲಿಂ. ಬುರ್ಗಿಂ ವಡ್ ಜಾಲ್ಲಿಂ ಆನಿಂ ಆತಾಂ ಘರಾಂತ್ ತೆಗಾಂ ಸುನೊ ಆನಿಂ ಪಾಂಚ್ ನಾತ್ರಾಂ ಜಾಲ್ಲಿಂ. ಸುಖ್ ದೂಕ್ ಅಶೆಂ ದೀಸ್ಪಡ್ತೊ ಗ್ರಾಸ್ ಚಲ್ತಾಲೊ.
ಅಚಾನಕ್ ಎಕಾ ದಿಸಾ ಮಾಗ್ಗುಚಾ ಹರ್ಧ್ಯಾಂತ್ ಕಸ್ಲಿಗೀ ದೂಕ್ ಆಯ್ಲಿ. ದೊತೊರಾಕ್ ಆಪಯ್ಲೊ, ಪುಣ್ ತೊ ಯೆಂವ್ಚಾಧಿಂಚ್ ತಿಣೆಂ ಪ್ರಾಣ್ ಸೊಡ್ಲೊ. ಬಾಲ್ತಾಜಾರ್ ಆತಾಂ ಕಂಗಾಲ್ ಜಾಲೊ. ಎದೊಳ್ ಪರ್ಯಾಂತ್ ಜಿಣ್ಯೆಂತ್ ತಾಚೊ ಸಾಂಗಾತ್ ದೀವ್ನ್ ಆಯಿಲ್ಲಿ ಪತಿಣ್ ಎಕಾಚ್ ಘಡ್ಯೆ ಸಾಸ್ಣಾಚೊ ಅಧೇವ್ಸ್ ಮಾಗೊನ್ ವೆತಾನಾ ತೊ ಶಿರಿಂ ಚುಕ್ಲೊ. ಪುಣ್ ಕಿತೆಂ ಕರ್ಯೆತ್? ಹೆಂ ಸಂಸಾರಾಚೆಂ ನಿಯಮ್ ಪಳೆ. ಆಯಿಲ್ಲ್ಯಾಂಕ್ ಸಗ್ಳ್ಯಾಂಕ್ ವಚೊಂಕ್ ಆಸ್ತಾ. ದೀಸ್ ಪಾಟಿಂ ಫ಼ುಡೆಂ ಆಸ್ತಿತ್ ತರ್ಯ್ ವೆಚೆಂ ಮಾತ್ರ್ ಕಡ್ಡಾಯ್. ಕೊಣಾಯ್ಚಾನೀ ಹೆಂ ರಾವಂವ್ಕ್ ಸಾಧ್ಯಾ ನಾ.
ಆತಾಂ ಮಾಗ್ಗು ಸರೊನ್ ವರ್ಸಾಂ ಜಾಲ್ಲಿಂ. ಬಾಲ್ತಾಜಾರಾಚೆ ಕೇಸ್ ಸಗ್ಳೆ ಧೊವೆ ಜಾವ್ನ್ ಆಯಿಲ್ಲೆ. ಘರ್ಭರ್ ನಾತ್ರಾಂ ಆನಿಂ ಗಲಾಟೊ, ಅಶೆಂ ಆಸ್ತಾಂ ಎಕಾ ದಿಸಾ ಮರ್ಯಾಣಾಕ್ ಲಾಗಿಂ ಆಪವ್ನ್ ಬಾಲ್ತಾಜಾರಾನ್ ಆಪ್ಲಿ ಆಶಾ ತಾಕಾ ಸಾಂಗ್ತಚ್ ತೊ ಹುಂ ಕುಟ್ಟುನ್ ಜಾಯ್ತ್ ಪಳೆಯಾಂ ಮ್ಹಣಾಲೊ. ತೊ ತಸೊಚ್ ಉಲಂವ್ಚೆಂ ಉಣೆಂ. ದುಸ್ರ್ಯಾ ಹಾಪ್ತ್ಯಾಂತ್ ಸೆಜಾರ್ಚಿಂ ಥೊಡಿಂ ಖೊರಿಂ ಪಿಕ್ಕಾಸಾಂ ಘೆವ್ನ್ ಆಯ್ಲಿಂ, ಮರಿಯಣಾನ್ ಪೆಂಟೆಕ್ ವಚೊನ್ ಭಾಟಿಯೊ, ಕಂಡ್ಯೊ ಹಾಡ್ಲ್ಯೊ. ಆನಿಂ ಸಗ್ಳ್ಯಾಂನಿ ಮೆಳೊನ್ ಬಾಂಯ್ ಖೊಂಡುಕ್ ಧರ್ಲೆಂ. ಬಾಲ್ತಾಜಾರಾಚೆ ದೊಳೆ ಬಿಜೊನ್ ಆಯ್ಲೆ. ಆಸ್ಲ್ಲಿ ತಾಂಕ್ ಎಕ್ಟಾಂಯ್ ಕರ್ನ್ ತೊ ತಿ ಬಾಂಯ್ ಖೊಂಡ್ಚಾ ಸುವಾತೆರ್ ಬೊಸೊಂಕ್ ಲಾಗ್ಲೊ.
ದಿಸಾನ್ದೀಸ್ ಬಾಂಯ್ಚಿ ಗುಂಡಾಯ್ ಪಾರ್ಕಿಲಾಗ್ಲೊ. ದೀಸ್ ಗೆಲ್ಲೆಪರಿಂಚ್ ಬಾಂಯ್ ಗೂಂದ್ ಜಾವ್ನ್ ಯೆತಾಲಿ. ಥೋಡಿಂ ಖೊಂದ್ತಾಲಿಂ ಥೊಡಿಂ ವಾವಯ್ತಾಲಿಂ. ಥೊಡಿಂ ತಾಂಕಾ ಖಾಂಕ್ ಪಿಯೆಂವ್ಕ್ ದಿತಾಲಿಂ. ಕೊನ್ಶಾರ್ ಬಾಲ್ತಾಜಾರ್ ದೆವಾ ಬರೆಂ ಉದಾಕ್ ಆಸ್ಚೊ ಚಾರ್ ಝರಿ ಫ಼ುಟಯ್ ಮ್ಹಣೊನ್ ಅಪ್ಲೇಸ್ತಕಿಂ ದೆವಾಲಾಗಿಂ ಮಾಗ್ತಾಲೊ. ಅಶೆಂ ಚಡುಣೆಂ ತೀನ್ ಹಾಪ್ತ್ಯಾಚೆಂ ಕಾಮ್ ಜಾಲ್ಲೆಂಚ್ ಆತಾಂ ಬಾಂಯ್ ಕಾಂಯ್ ಸಾಡೆ ತೀನ್ ಆಳ್ ಗೂಂದ್ ಜಾತಾನಾ ಬಾಂಯ್ಚಾ ಗುಂಡಾಯೆರ್ ಕೊಣೆಂಗೀ ಬೋಬ್ ಗಾಲಿ. ಉದಾಕ್ ಮೆಳ್ಳೆಂ ಮ್ಹಣೊನ್. ಸರ್ವಾಂಕ್ ಖುಶಿ. ಕೊಣೆ ನಾರ್ಲ್ ಫ಼ೊಡ್ಲೊ, ಕೊಣೆ ಪೊವ್ ಕಾಲಯ್ಲೊ. ಪುಣ್ ಕಾಮ್ ಮುಖಾರ್ಸಿಲೆಂ. ಕೊಣೆಂ ಕದ್ವಳ್ ಉದಾಕ್ ಒಡ್ಲೆಂ ಆನಿಂ ಕೊಣೆಂ ತಿ ಬಾಂಯ್ ಅನಿಕೀ ಗೂಂಡ್ ಕರುಂಕ್ ಧರ್ಲೆಂ.
ಆತಾಂ ಬಾಂಯ್ತ್ ದರಬಸ್ತ್ ಉದಾಕ್ ಆಸ್ಲ್ಲೆಂ. ಕಾಂಯ್ ದೋನ್ ಆಳ್ ಬುಡ್ಚೆತಿತ್ಲೆಂ ಗೂಂಡ್ ಉದಕ್ ಆಸ್ಲ್ಲೆಂ. ಅಶೆಂಚ್ ಪರತ್ ಏಕ್ ಹಾಪ್ತೊ ಉತರ್ಲೊ. ಮರಿಯಣಾನ್ ಸಿಮೆಂತ್ ಹಾಡವ್ನ್ ಬಾಂಯ್ಕ್ ದೊರೊ ಬಾಂದಯ್ಲೊ, ಆಡೆಂ, ಲಾಟೊ, ದೊರಿ ಸಕ್ಕಡ್ ಹಾಡುನ್ ಘಾಲಿ ಆನಿಂ ಬಾಂಯ್ತ್ ಆಸ್ಚೆಂ ಉದಾಕ್ ಬೊಂಡ್ಯಾ ಉದ್ಕಾಪರಿಂ ನಿತಳ್ ದಿಸ್ತಾಲೆಂ. ಆತಾಂ ಉದಾಕ್ಚ್ ಉದಾಕ್. ಬಾಲ್ತಾಜಾರ್ ತ್ಯೇ ಎಕಾ ಸಾಂಜೆರ್ ಎಕ್ಸುರೊ ಬಾಂಯ್ಚಾ ಖಾತ್ಯಾರ್ ರಾವೊನ್ ಬಾಂಯ್ಕಡೆ ಉಲಂವ್ಕ್ ಲಾಗ್ಲೊ. ಕಿತ್ಲಿಂ ಸ್ವಪ್ಣಾಂ ಅಪ್ಣಾನ್ ಪಳೆಂವ್ಕ್ ನಾಂತ್ ಎದೊಳ್ ಪರ್ಯಾಂತ್? ಕಿತ್ಲಿಂ ವರ್ಸಾಂ ರಾಕೊಂಕ್ನಾ ಹ್ಯಾ ದಿಸಾಖಾತಿರ್ ಅಪುಣ್? ಬಾಗ್ವೊನ್ ತ್ಯಾ ಉದ್ಕಾಂತ್ ಅಪ್ಲೆಂ ರುಪ್ಣೆಂ ಪಳೆಲ್ಲ್ಯಾ ಬಾಲ್ತಾಜಾರಾಕ್ ಅಪ್ಲಿ ಆಶಾ ಜಾರಿ ಜಾಲ್ಲೊ ವಡ್ ಸಂತೊಸ್ ಜಾಲ್ಲೊ.
ತ್ಯೇ ಸಾಂಜೆರ್ ಆಂಗ್ಣಾಂತ್ ಆಸ್ಚಾ ಮಾತ್ಯೆಚಾ ಸೊಪ್ಯಾಚೆರ್ ಬೊಸೊನ್ ಆಸ್ತಾನಾ ಭಿತರ್ ಬುರ್ಗ್ಯಾಂಚೆಂ ಉಲವ್ಣೆಂ ಜಾತಾಲೆಂ. ಕಿತೆಂ ಗಜಾಲ್ ಮ್ಹಣೊನ್ ಭಿತರ್ ಕಾನ್ ದಿಲ್ಲೊ ಬಾಲ್ತಾಜಾರ್ ಏಕ್ ಘಡಿ ಶೆರ್ಮೆಲೊ. ತಿಂ ಸಾತ್ ಎಕ್ರ್ಯಾಕ್ ವಾಂಟೊ ಕರ್ಚೆವಿಶ್ಯಾಮ್ತ್ ಉಲಯ್ತಾಲಿಂ.
ಏಕ್ ಘಡಿ ಬಾಲ್ತಾಜಾರಾಚೊ ಜೀವ್ ಆಪ್ಣಾಲಾಗಿಂ ಆಸಾಗೀ ಮ್ಹಣ್ ಕಾಳ್ಜಾಕ್ ಹಾತ್ ದವರ್ನ್ ಪಾರ್ಕಿಲೆಂ. ಆಪ್ಲ್ಯಾ ಕಾನಾಂಕ್ ಪಾತ್ಯೆಂವ್ಕ್ ತಾಚಾನ್ ಜಾಲೆಂನಾ. ತಾಣೆ ಆಶೆಲ್ಲೊ ದೀಸ್ ಉದೆಲ್ಲೊ. ಏಕ್ ಬಾಂಯ್ ಅಪ್ಲ್ಯಾ ಜಾಗ್ಯಾರ್ ಆಸ್ಲ್ಲಿ. ಆತಾಂ ಬುರ್ಗಿಂ ಹ್ಯಾ ಬಾಂಯ್ ಖಾತಿರ್ ಎಕಾಮೆಕಾ ಮಾಸಾಂ ಖಾತಾನಾ ತಾಕಾ ಅಸ್ಕತ್ ಜಾಲ್ಲ್ಯಾ ಕುಡಿಕ್ ಸಾಂಬಾಳುಂಕ್ ಜಾಲೆಂನಾ. ಭಾಯ್ರ್ ಆಸೊರ್ ಆಸ್ಲ್ಲ್ಯಾನ್ ತೊ ಮಾಂದ್ರಿ ಭಾಯ್ರ್ ಆಂಗಾಂತ್ಚ್ ಸೊಡವ್ನ್ ನಿದ್ಲೊ ತರ್ಯ್ ತಾಕಾ ನೀದ್ ಪಡ್ಲಿನಾ. ಅಪ್ಲಿಂಚ್ ಬುರ್ಗಿಂ ಮ್ಹಣ್ ಎದೊಳ್ ಪರ್ಯಾಂತ್ ಅಪ್ಲಿ ಆಶಾ ಬುರ್ಗ್ಯಾಂಚಾ ಫ಼ುಡಾರಾಕ್ ಬಾಂದ್ಚೆಪಾಸತ್ ದಾಂಬುನ್ ದವರುನ್ ಜಾಲ್ಲೊ ಫ಼ಾಯ್ದೊ ತರ್ಯ್ ಕಸಲೊ? ಹೊ ನಿಹಾಳ್ ತಾಕಾ ವಿಶೇಷ್ ಕರ್ಕರೆ ಕರುಂಕ್ ಲಾಗ್ತಾನಾ ದೊಳ್ಯಾಂ ಹುಜಿರ್ ತಾಚಿ ಸರ್ಲ್ಲಿ ಆವಯ್ ಸೆವ್ರಿ ಏಕ್ ಪಾವ್ಟಿಂ, ಸರ್ಲ್ಲಿ ಬಾಯ್ಲ್ ಸೆವ್ರಿ ಏಕ್ ಪಾವ್ಟಿಂ ಏಕ್ ಪಾಶಾರ್ ಜಾಲಿಂ. ತೊ ಅಶೆಂಚ್ ಚಿಂತುನ್ ಎಕಾ ಶೆವೊಟಾಕ್ ಪಾವ್ಲೊ.
ಸಕಾಳಿಂ ಉಟೊನ್ ಗೊಟ್ಯಾಕ್ ವಚೊನ್ ದೂದ್ ಕಾಡ್ನ್ ಯೇವ್ನ್ ಏಕ್ ಘೊಟ್ ಚಾ ದೀಂವ್ಕ್ ಮ್ಹಣೊನ್ ಸೊದ್ಚಾ ಸುನೆಕ್ ಆಪ್ಲೊ ಮಾಂವ್ ಮಾಂದ್ರೆರ್ ನಾತ್ಲ್ಲೊ ಪಳೆವ್ನ್ ಕಾಂಯ್ ಗುಡ್ಯಾಕ್ ಗೆಲಾಸ್ತಲೊ ಮ್ಹಳ್ಳೊ ದುಭಾವ್ ಆಯ್ಲೊ. ಪುಣ್ ಚಾ ಪಿಯೆಲ್ಲ್ಯಾಖರಿತ್ ಉಟಾನಾಸ್ಚೊ ತೊ ಆಜ್ ಕಿತ್ಯಾಕ್ ಆನಿ ಕಸೊ ಗೆಲೊ ಮ್ಹಳ್ಳೊ ದುಭಾವ್ಯ್ ಆಯ್ಲೊ. ತಾ ಭಾಯ್ರ್ ತಾಣೆ ಗುಡ್ಯಾಕ್ ವರ್ಚೊ ವಡ್ಲೊ ಚೆಂಬು ಘರಾಭಿತರ್ಚ್ ಆಸ್ಲ್ಲೆವರ್ವಿಂ ತೆಂ ದುಭಾವೊನ್ ಭಾಯ್ರ್ ಭಿತರ್ ಸೊದ್ಚಾರ್ ಪಡ್ಲೆಂ. ಥೊಡ್ಯಾಚ್ ವೆಳಾರ್ ಸಗ್ಳಿಂ ಬುರ್ಗಿಂ ಅಪ್ಲೆಂ ಕಾಲ್ಚಾ ರಾತಿಚೆಂ ಝಗ್ಡೆಂ ವಿಸ್ರೊನ್ ಅಪ್ಲ್ಯಾ ಬಾಪಾಯ್ಕ್ ಉಲೊ ಕರೀತ್ ಸೊಧುಂಕ್ ಲಾಗ್ಲಿಂ. ವಚೊನ್ ಎಕ್ಲ್ಯಾನ್ ಬಾಂಯ್ಕ್ ತಿಳ್ತಾನಾ ಕಿತೆಂ ಪಳೆತಾ? ಉಗ್ತ್ಯಾ ದೊಳ್ಯಾಂತ್ ವಯ್ರ್ ದೀಶ್ಟ್ ಲಾವ್ನ್ ಜೀಬ್ ಭಾಯ್ರ್ ಘಾಲ್ಲಿ ಬಾಲ್ತಾಜರಾಚಿ ವಿದ್ರೂಪ್ ಕೂಡ್ ತ್ಯೇ ಬಾಂಯ್ತ್ ಉಪ್ಯೆತಾಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
