ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಕೋಮಲ್
ಡಾ|ಎಡ್ವರ್ಡ್ ನಜ್ರೆತ್: ನೀಜ್ ಜಿಣ್ಯೆಂತ್ ಏಕ್ ವಯ್ಜ್ ಜಾವ್ನ್ ಜಿತ್ಲೊ ಫಾಮಾದ್ಗೀ, ಕೊಂಕ್ಣಿ ಸಾಹಿತ್ಯಾಂತ್ ತಿತ್ಲೊಚ್ಚ್ ಫಾಮಾದ್ ಕಾಣ್ಯೆಗಾರ್, ಲೇಖಕ್ ಜಾಲ್ಲೊ ಹೊ ಕೊಂಕ್ಣಿ ಕಾಣ್ಯಾಂನಿ ಅಪ್ಲೆಂಚ್ ಮ್ಹಳ್ಳೆಂ ಸ್ಥಾನ್ ಎದೊಳ್ಚ್ ರುತಾಂ ಕರ್ಚಾಂತ್ ಜಿಕ್ಲಾ ಮ್ಹಣ್ಯೆತ್. ’ಭುಮಿ ವೈಕುಂಟಾಂತ್’, ’ಆಡ್ವಾರ್ಲ್ಲೆಂ ಫಳ್’, ’ ಸಂಯ್ಬಾಚೆಂ ಪಾತಕ್’ ಆನಿ ’ಚಾಮಾದೊರಾಚೊ ಪೂತ್’ ಮ್ಹಳ್ಳೆ ಚ್ಯಾರ್ ಕಾಣ್ಯಾಂಚೆ ಬೂಕ್ ಎದೊಳ್ ಪರ್ಗಟ್ ಕೆಲ್ಯಾತ್. ಅಪ್ಲೆಂಚ್ ’ನಜ್ರೆತ್ ಪ್ರಕಾಶನ್’ ಚಲವ್ನ್ ಆಸ್ಚೊ ಹೊ ಕಾಣ್ಯಾಂ ಶಿವಾಯ್ ಲೇಕನಾಂ ಸಯ್ತ್ ಬರಯ್ತಾ. [ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಚೆರ್ ಹ್ಯಾ ಕಾಣ್ಯೆಕ್ ಭುಜ್ವಣೆಚೆಂ ಇನಾಮ್ ಲಾಭ್ಲಾಂ]
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಚೆರ್ ದುಸ್ರೆಂ ಇನಾಮ್ ಜೊಡ್ಲೆಲಿ ಕಾಣಿ: ಜುಬ್ಲೆವ್
ಡಾ|ಎಡ್ವರ್ಡ್ ನಜ್ರೆತ್
ಕಾಮಿಲ್ ಬಾಪ್ಪುಕ್ ಸಾಸ್ಣಾಕ್ ನಾ ಕರಿಜೆ ಮ್ಹಳ್ಳೊ ನಿರ್ಧಾರ್ ಹಾಂವೆಂ ಘಟ್ ಕರ್ತಾನಾ, ಮ್ಹಜಿ ಸಾತ್ವ್ಯಾ ಕ್ಲಾಸಿಚಿ ಪರೀಕ್ಶಾ ಜಾಂವ್ಕ್ ನಾತ್ಲ್ಲಿ. ಕಾಮಿಲ್ ಬಾಪ್ಪುಕ್ ಕಶೆಂ ಆನಿಂ ಕೆದ್ನಾಂ ಜಿವೆಶಿ ಮಾರ್ಚೆಂ ಮ್ಹಳ್ಳೆಂ ಮಾತ್ರ್ ಮ್ಹಾಕಾ ತವಳ್ ಸ್ವಷ್ಟ್ ನಾತ್ಲ್ಲೆಂ.
ತ್ಯಾ ಲ್ಹಾನ್ ಪ್ರಾಯೆರ್ ಆಸಲಿ ಮಾರೆಕಾರ್ ಕರ್ನಿ ಮ್ಹಜೆ ತಸಲ್ಯಾ ಭುರ್ಗ್ಯಾನ್ ಕರುಂಕ್ ಸಾಧ್ಯ್ ನಾಂ ಮ್ಹಣ್ ಲೆಕ್ತೆಲಿಂಚ್ ಚಡ್. ಹಿ ಯೆವ್ಜಣ್ ಕರುಂಕ್ ಮ್ಹಾಕಾ ಪ್ರೇರಣ್ ಜಾಲ್ಲೆಂಚ್ ತವಳ್ ’ಸಂಕ್ರಾತಿ’ ಕೇಬಲ್ (ಟಿ.ವಿ.) ಚಾನೆಲಾಚೆರ್ ಪ್ರಸಾರ್ ಜಾವ್ನ್ ಆಸ್ಲ್ಲಿ. ’ಕೋಮಲ್’ ಮ್ಹಳ್ಳಿ ಸೀರಿಯಲ್. ತಶೆಂ ಮ್ಹಣ್ ಮ್ಹಾಕಾ ಟಿ.ವಿ.ಚೆರ್ ಪ್ರಸಾರ್ ಜಾಂವ್ಚಿಂ ಸೀರಿಯಲಾಂ ಪಳೆಂವ್ಚಿ ಪಿಸಾಯ್ ಆಸ್ಲ್ಲಿ ಮ್ಹಣ್ಯಿ ನ್ಹಂಯ್. ಸೀರಿಯಲಾಂ ಪ್ರಾಸ್ ಮ್ಹಾಕಾ ಪಿಕ್ಚರಾಂ, ಕಾರ್ಟೂನ್ ಆನಿಂ ಎಮ್. ಟಿ.ವಿ., ವಿ.ಟಿ.ವಿ ತಸಲಿಂ ಸಂಗೀತ್ ಚಾನೆಲಾಂ ಚಡ್ ಪಸಂದೆಚಿಂ. ಪುಣ್ ತೀಂಯ್ ಹಾಂವ್ ಹಟ್ ಧರ್ನ್ ಪಳೆವ್ನ್ ನಾತ್ಲ್ಲೊಂ. ಸದಾಂಯ್ ಸೀರಿಯಲಾಂ ಪಳೆಂವ್ಚೆಂ ಸೊಡ್ಯಾಂ ಮ್ಹಜ್ಯಾ ಪಸಂದೆಚೆಂ ಕಿತೆಂಯ್ ಪಳೆಂವ್ಕ್ಯಿ ಮಾಮ್ಮಿ ಆಡ್ಕಳ್ ಕರ್ತೆಲಿ. ಟೆಲಿವಿಶನ್ ಪಳೆಲ್ಯಾರ್ ಆನಿಂ ಕಂಪ್ಯೂಟರಾಚೆರ್ ಬಸ್ಲ್ಯಾರ್ ಭುರ್ಗಿಂ ಶಿಕನಾಂತ್ ಮ್ಹಣ್ ಮಾಮ್ಮಿಚಿ ಘಟ್ ಪಾತ್ಯೆಣಿ. ಪುಣ್ ಟಿವಿಚೆರ್ ಯೆಂವ್ಚೆಂ ತಿಕಾ ಜಾಯ್ ಜಾಲ್ಲೆಂ ಖಂಚೆಂಯ್ ಪ್ರೊಗ್ರ್ಯಾಮ್ ಮಾತ್ರ್ ಮಾಮ್ಮಿ ಚುಕಯ್ನಾತ್ಲ್ಲಿ.
ಮಾಮ್ಮಿ ತಿಕಾ ಜಾಯ್ ಜಾಲ್ಲೆಂ ಸೀರಿಯಲ್ ಪಳೆಂವ್ಚೆಂ ಖಾತಿರ್ ಟಿ.ವಿ. ಸಾಮ್ಕಾರ್ ಬಸ್ತಾನಾ ಮ್ಹಾಕಾ ಮ್ಹಜ್ಯಾ ಕುಡಾಂತ್ ಬಸೊನ್ ಲಿಸಾಂವ್ ಕರುಂಕ್ ಒತ್ತಾಯ್ ಕರ್ನ್, ಭಾಯ್ಲ್ಯಾನ್ ದಾರಾಚಿ ಖಿಳ್ ಘಾಲ್ತೆಲಿ. ತಿಣೆಂ ತಶೆಂ ಸೀರಿಯಲ್ ಪಳೆಂವ್ಕ್ ಆಡ್ಕಳ್ ಘಾಲ್ಚೆಂ ಮ್ಹಾಕಾ ಬೆಜಾರ್ ಕರಿನಾತ್ಲ್ಲೆಂ. ಮಾಮ್ಮಿನ್ ಸೀರಿಯಲ್ ಪಳೆತಾನಾ ಹಾಂವ್ ಮ್ಹಜೆಂ ಹೋಮ್ವರ್ಕ್ ಕರ್ತಾಲೊಂ. ಎಕೇಕ್ ಪಾವ್ಟಿಂ ಮ್ಹಾಕಾ ಚಡಿತ್ ಲಿಸಾಂವ್ ಕರುಂಕ್ ನಾತ್ಲ್ಯಾರ್ ವ ರಜಾ ಆಸ್ಲ್ಯಾರ್ ಮಾಮ್ಮಿಚ್ ಪರ್ವಣ್ಗಿ ಘೆವ್ನ್ ತಿಚೆಂ ಸಾಂಗಾಂತಾ ಸೀರಿಯಲಾಂ ಪಳೆಂವ್ಕ್ ಹಾಂವ್ಯಿ ಬಸ್ತಾಲೊಂ. ಆಪ್ರೂಪ್ ಪಳೆಂವಿಂ ಕಾರ್ಟೂನ್ ನಾ ತರ್ ಎಮ್.ಟಿ.ವಿ. ಚ್ಯಾನೆಲ್ ಘಾಲ್ನ್ ಬಸ್ತಾಲೊಂ.
ಪುಣ್ ಮ್ಹಾಕಾ ಕೋಮಲ್ ಸೀರಿಯಲಾಚೆರ್ ಆಸಕ್ತ್ ಉಬ್ಜಾಲ್ಲಿಂ ಕಾರಣಾಂಚ್ ವಿಂಗಡ್. ಶಿಕೊಂಕ್ ಕಿತೆಂಯ್ ನಾತ್ಲ್ಯಾರ್ಯಿ ವಾ ರಜೆಚ್ಯಾ ದೀಸಾಂನಿಯ್ ಮಾಮ್ಮಿ ಸಾಂಗಾಂತಾ ಬಸೊನ್ ’ಕೋಮಲ್’ ಸೀರಿಯಲ್ ಪಳೆಂವ್ಕ್ ಮಾತ್ರ್ ಮಾಮ್ಮಿ ಸೊಡಿನಾತ್ಲ್ಲಿ. ಹೆರ್ ಸೀರಿಯಲಾಂ ಪಳೆಂವ್ಕ್ ಆಡ್ಕಳ್ ಕರಿನಾತ್ಲ್ಲೆ ಮಾಮ್ಮಿನ್ ’ಕೋಮಲ್’ ಪಳೆಂವ್ಕ್ ನಜೊಚ್ ಮ್ಹಣ್ ಹಟ್ ಧರ್ಲ್ಲೆಂ ಮ್ಹಾಕಾ ತೆಂ ಸೀರಿಯಲಾಚೆರ್ ಆಸಕ್ತ್ ಉಬ್ಜೊಂಕ್ ಪಯ್ಲೆಂ ಪ್ರೇರಣ್ ತರ್, ಮಾಮ್ಮಿ ಆಪುಣ್ ತೆಂ ಸೀರಿಯಲ್ ಪಳೆಂವ್ಚೆಂ ಖಂಡಿತ್ ಚುಕಯ್ನಾತ್ಲ್ಲೆಂ ದುಸ್ರೆಂ ಕಾರಣ್. ಆಯ್ತಾರಾ ಸಾತ್ ವೊರಾಂಚಾ ಮಿಸಾಕ್ ವೆಳಾರ್ ವೆಚೆ ಪ್ರಾಸ್, ಹರ್ ದಿಸಾ ಮ್ಹಳ್ಳೆಪರಿಂ ಸಾಂಜೆರ್ ಸಾಡೆ-ಸಾತ್ ವೊರಾಂಚೆರ್ ’ಕೋಮಲ್’ ಸೀರಿಯಲ್ ಪಳೆಂವ್ಚೆಂ ಮಾಮ್ಮಿಕ್ ಚಡ್ ಗರ್ಜೆಚೆಂ ಜಾಲ್ಲೆಂ. ಖಂಯ್ ಭಾಯ್ರ್ ಗೆಲ್ಯಾರ್ಯಿ ಸಾಡೆ ಸಾತ್ ವೊರಾಂಚೆರ್ ಮಾಮ್ಮಿ ಘರಾ ಆಸ್ತೆಲಿಚ್. ಮ್ಹಜೆಂ ಹೋಮ್ವರ್ಕ್ ಕರುಂಕ್ ಮಾಮ್ಮಿನ್ ಕಿತೆಂಯ್ ಕುಮಕ್ ಕರ್ಚಿ ಆಸ್ಲ್ಯಾರ್ಯಿ ಸಾಡೆ ಸಾತ್ ವೊರಾಂಚ್ಯಾ ಪಯ್ಲೆಂ ನಾಂ ತರ್ ತೆಂ ಸೀರಿಯಲ್ ಪುರ್ತೆಂ ಸಂಪ್ಲ್ಲ್ಯಾ ಉಪ್ರಾಂತ್. ಆಮ್ಚ್ಯಾ ಗರಾ ತೆಣೆಂ ತವಳ್ ತವಳ್ ಕರೆಂಟ್ ವೆತಾಲೆಂ ಜಾಲ್ಲ್ಯಾನ್, ’ಕೋಮಲ್’ ಸೀರಿಯಲ್ ಪಳೆಂವ್ಚೆಂ ಚುಕ್ತಾ ಮ್ಹಳ್ಳೆಂ ಖಾತಿರ್ಚ್ ಮಾಮ್ಮಿನ್ ಜನರೇಟರ್ ಹಾಡಾಯಿಲ್ಲೊ. ಈ (ಆಮ್ಚ್ಯಾ ಸೆಜಾರಾ ಕೊಣಾಯ್ಚ್ಯಾ ಘರಾ ಜನರೇಟರ್ ನಾತ್ಲ್ಲೊ). ಆಪ್ರೂಪ್ ಖಂಯ್ ಘರಾ ಭಾಯ್ರ್ ವಚೊನ್ ಸೀರಿಯಲ್ ಚುಕ್ಚೆಪರಿಂ ಆಸ್ಲ್ಯಾರ್ ಲೆತ್ತಿ ಆಂಟಿಕಡೆ ಸೀರಿಯಲ್ ರೆಕೋರ್ಡ್ ಕರುಂಕ್ ಸಾಂಗೊನ್, ಸಿ.ಡಿ. ಹಾಡೋವ್ನ್ ಹಾಂವ್ ಘರಾ ನಾತ್ಲ್ಲೆ ವೆಳಾರ್ ಮಾಮ್ಮಿ ಪಳೆತಾಲಿ. ’ಮಾಮ್ಮಿನ್ ಇತ್ಲ್ಯಾ ಉರ್ಬೆನ್ ಆಣಿಂ ಮ್ಹಜೆಂ ಥಾವ್ನ್ ಲಿಪೊವ್ನ್ ತೆಂ ಸೀರಿಯಲ್ ಪಳೆಜೆ ತರ್ ತ್ಯಾ ಸೀರಿಯಲಾಂತ್ ಕಿತೆಂ ತರ್ಯಿ ವಿಶೇಶ್ ಆಸಾಜೆಚ್ಚ್’ ಲೆಕ್ಲ್ಲೆ ಹಾಂವೆಂ. ’ಕೋಮಲ್’ ಧಾರಾವಾಹಿಂತ್ ಹಾಂವೆಂ ಪಳೆಂವ್ಕ್ ನಜೊ ಜಾಲ್ಲೆಂ ಕಿತೆಂ ತರ್ಯೀ ಆಸಾ ಮ್ಹಳ್ಳಿ ಆಸಕ್ತ್ಚ್ಚ್ ಮ್ಹಾಕಾ ನಂದುಕಡೆ ತ್ಯಾ ಸೀರಿಯಲಾಚಿ ಕಥಾ ವಿಚಾರುಂಕ್ ಪ್ರೇರಣ್ ಜಾಲ್ಲೆಂ. ನಂದು ಮ್ಹಜೊ ಕ್ಲಾಸ್ಮೇಟ್, ಶಿಕ್ಚ್ಯಾಂತ್ ಪಾಟಿಂ ಆಸ್ಲ್ಯಾರ್ಯಿ ತಾಚಿ ಮಾಮ್ಮಿ ತಾಕಾ ಧಾರಾವಾಹಿ ಪಳೆಂವ್ಕ್ ಆಡ್ಕಳ್ ಕರಿನಾತ್ಲ್ಲಿ ಜಾಲ್ಲ್ಯಾನ್ ನಂದು ಸಭಾರ್ ಧಾರಾವಾಹಿ ಪಳೆತಾಲೊ. ನಂದುನ್ ಸಾಂಗ್ಲ್ಲೆ ಕಾಣಿಯೆಂತ್, ’ಕೋಮಲ್’ ಸೀರಿಯಲಾಂತ್ ಹಾಂವೆಂ ಪಳೆಂವ್ಚೆಂ ಆಡ್ವಾರ್ಚೆಂ ತಸಲೆಂ ಕಿತೆಂಯ್ ಆಸಾ ಮ್ಹಣ್ ಮ್ಹಾಕಾ ಬೊಗ್ಲೆಂಚ್ ನಾಂ. ತರ್ ಮಾಮ್ಮಿ ಕಿತ್ಯಾಕ್ ಮ್ಹಾಕಾ ಸೀರಿಯಲ್ ಪಳೆಂವ್ಕ್ ಸೊಡಿನಾ ಮ್ಹಳ್ಳಿ ಗಜಾಲ್ ಮ್ಹಾಕಾ ನವಾಲ್ ಜಾಲಿ. ಹೆಂಚ್ ’ಕೋಮಲ್’ ಸೀರಿಯಲ್ ಪಳೆಜೆ ಮ್ಹಳ್ಳ್ಯಾ ಒತ್ತಾಯೆಕ್ ಕಾರಾಣ್ಯಿ ಜಾಲೆಂ.
ಮಾಮ್ಮಿಚೆ ದೊಳೆ ಚುಕೊವ್ನ್ ತೆಂ ಸೀರಿಯಲ್ ಪಳೆಂವ್ಚಿ ವಾಟ್ ಲಾಬ್ಲಿಚ್. ಆಮ್ಗೆರ್ ಟಿ.ವಿ. ದವರ್ಲ್ಲ್ಯಾ ಮಧ್ಲ್ಯಾ ಕುಡಾಕ್ ಆನಿಂ ಹಾಂವೆಂ ಲಿಸಾಂವ್ ಕರುಂಕ್ ಬಸ್ಚ್ಯಾ ತಶೆಂ ರಾತಿಂ ನಿದ್ಚ್ಯಾ ಕುಡಾ ಥಾವ್ನ್ ಬಂಧ್ ಕರ್ಚೆಪರಿಂ ಆಸ್ಲ್ಲಿ. ಜನೆಲಾಕ್ ಭಾಯ್ಲ್ಯಾನ್ - ಮ್ಹಳ್ಯಾರ್ ಟಿ.ವಿ. ಆಸ್ಲ್ಲ್ಯಾ ಕುಡಾಂತ್ ಪಡ್ದೊ ಘಾಲ್ಲೊ. ಮಾಮ್ಮಿನ್ ಜನೆಲಾಕ್ ಪಾಟ್ ಕರ್ನ್ ಬಸೊನ್ ಟಿ.ವಿ. ಪಳೆಂವ್ಚಿ ಆಸ್ಲ್ಲಿ.
ಟಿ.ವಿ. ಪಳೆಂವ್ಕ್ ಬಸ್ಚ್ಯಾ ಪಯ್ಲೆಂ ಮ್ಹಜ್ಯಾ ಕುಡಾಚೆಂ ದಾರ್ ಮಾಮ್ಮಿನ್ ಭಾಯ್ಲ್ಯಾನ್ ಘಾಲ್ಚೆಂ ಆಸ್ಲ್ಲೆಂ. ಹೆರ್ ಸೀರಿಯಲಾಂ ಪಳೆತಾನಾ ಮಾಮ್ಮಿ ತಿತ್ಲಿ ಚತ್ರಾಯ್ ಘೆನಾತ್ಲ್ಲಿ ಪುಣ್ ಕೋಮಲ್ ಸೀರಿಯಲಾಚ್ಯಾ ವೆಳಾರ್ ಮ್ಹಾಕಾ ಕುಡಾ ಥಾವ್ನ್ ಭಾಯ್ರ್ ಯೇಂವ್ಕ್ ಆವ್ಕಾಸ್ಚ್ ನಾತ್ಲ್ಲೆಪರಿಂ ಮಾಮ್ಮಿ ದಾರಾಚಿ ಖಿಳ್ ಶಿರ್ಕಾಯ್ತಾಲಿ. ಹಾಂವೆಂ ಮಾಮ್ಮಿನ್ ಖಿಳ್ ಘಾಲ್ಚೆ ಪಯ್ಲೆಂಚ್ ದಾರ್ ಬಂಧ್ ಕರ್ನ್ ಬಿತರ್ಲ್ಯಾನ್ ಖಿಳ್ ಘಾಲುಂಕ್ ಧರ್ಲಿ. ಮಾಮ್ಮಿನ್ ಚುಕೊನ್ಯಿ ಮ್ಹಜ್ಯಾ ಕುಡಾಕ್ ಯೆಂವ್ಚೆಂ ಸಾಧ್ಯ್ ನಾತ್ಲ್ಲೆಂ. ತ್ಯಾ ಉಪ್ರಾಂತ್ ಜನೆಲಾಚೆಂ ದಾರ್ ಬಿತರ್ಲ್ಯಾನ್ ಥೊಡೆಂಚ್ ಉಗ್ತೆಂ ಕರ್ನ್ ಟಿ.ವಿ. ಮ್ಹಾಕಾ ದಿಸ್ಚೆ ಪರಿಂ ಹಾಂವೆಂ ಬಸೊಂಕ್ ಧರ್ಲೆಂ. ಪಡ್ದೊ ಆಡ್ ಆಸ್ಲ್ಲ್ಯಾನ್ ಜನೆಲಾಚೆ ದಾರ್ ಥೊಡೆಂಚ್ ಉಗ್ತೆಂ ಕೆಲ್ಲೆಂ ಮಾಮ್ಮಿಕ್ ಕಳನಾತ್ಲ್ಲೆಂ. ಪಡ್ದೊ ಚಡ್ ದಾಟ್ ನಾತ್ಲ್ಲೊ ಜಾಲ್ಲ್ಯಾನ್ ಟಿ.ವಿ. ಮ್ಹಾಕಾ ಬಿತರ್ ಥಾವ್ನ್ ಸಾರ್ಕಿ ದಿಸ್ತಾಲಿ. ಸೀರಿಯಲ್ ಸಂಪಲ್ಲೆಂಚ್ ಜನೆಲಾಚೆಂ ದಾರ್ ಪಯ್ಲೆಂಚೆಪರಿ ಆಡ್ ಕರ್ನ್, ದಾರಾಕ್ ಬಿತರ್ಲ್ಯಾನ್ ಘಾಲ್ಲಿ ಖಿಳ್ ಕಾಡ್ಚಿ ಹಾಂವೆಂ ಸವಯ್ ಕೆಲಿ. ಮಾಮ್ಮಿಕ್ ಹಾಂವೆಂ ಚೊರಿಯಾಂ ’ಕೋಮಲ್’ ಸೀರಿಯಲ್ ಪಳೆಂವ್ಚೆಂ ಕಳ್ಳೆಂಚ್ ನಾಂ.
ಪುಣ್ ’ಕೋಮಲ್’ ಸೀರಿಯಲಾಂತ್ ವಿಶೇಸ್ ಕಿತೆಂಯ್ ಆಸಾ ಮ್ಹಣ್ ಮ್ಹಾಕಾ ಬೊಗ್ಲೆಂಚ್ ನಾಂ. ನಂದುನ್ ಮ್ಹಾಕಾ ಸಾಂಗ್ಲ್ಲ್ ಉಪ್ರಾಂತ್ ಕೋಮಲ್ ಧಾರಾವಾಹಿ ಚಡ್ ಮುಖಾರ್ ವಚೊಂಕ್ ನಾತ್ಲ್ಲಿ. ಸೀರಿಯಲ್ ಬೆಷ್ಟೆಂಚ್ ಲಾಂಬಾಯ್ತಾಲೆ. ಘಡ್ಲ್ಲೆಂಚ್ ಪರತ್ ಪರತ್ ದಾಕಾಯ್ತಾಲೆ. ಧಾರಾವಾಹಿ ಮುಖಾರ್ ವಚನಾತ್ಲ್ಲಿ ಮ್ಹಾಕಾ ವಿರಾರಾಯೆಕ್ ಕಾರಾಣ್ ಜಾಲೆಂ. ಕೋಮಲ್ ಧಾರಾವಾಹಿಂತ್ ’ರಾಘು’ ಮ್ಹಳ್ಳೊ ಶಾಳೆಂತ್ ಶಿಕಂವ್ಚೊ ಮೆಸ್ತ್ರಿ. ತಾಚಿ ಪತಿಣ್ ಕೋಮಲ್. ರಾಘು ಮೆಸ್ತ್ರಿ ಘರಾ ನಾತ್ಲ್ಲೆ ವೆಳಾರ್ ಶ್ಯಾಮ್ ನಾಂವಾಚೊ ಕೋಮಲಾಕ್ ಮೆಳೊಂಕ್ ಯೆತಾಲೊ. ತೊ ಕಾಜಾರಾ ಪಯ್ಲೆಂ ಥಾವ್ನ್ ಕೋಮಲಾಕ್ ಒಳ್ಕಿಚೊ ಆಣಿಂ ತಿಂ ಮೊಗಾರ್ ಆಸ್ಲ್ಲಿಂ. ತಾಣೆಂ ಕಾಜಾರಾ ಪಯ್ಲೆಂಚ್ ಕೋಮಲಾಕಡೆಂ ’ತೆಂ’ ಕೆಲ್ಲೆಂ ಆನಿಂ ಆತಾಂಯ್ ತಶೆಂ ಕರ್ತಾಲಿಂ. ರಾಘು ಮೆಸ್ತ್ರಿಕ್ ಕೋಮಲ್ - ಶ್ಯಾಮಚ್ಯಾ ಸಂಬಂಧಾಚೊ ಜೋಪ್ ಜಾಲ್ಲೊ. ಶ್ಯಾಮ್ ರಾಘು ಮೆಸ್ತ್ರಿಕ್ ಒಳ್ಕಿಚೊ. ಶ್ಯಾಮಾಚ್ಯಾ ಬಾಪಾಯ್ನ್ ರಾಘು ಮೆಸ್ತ್ರಿಕ್ ಹಪ್ತ್ಯಾಚೆ ಪಾಂಚ್ ದೀಸ್ ದೋನ್ ಹಪ್ತೆ ಚುಕನಾಸ್ತಾಂ ಕೋಮಲ್ ಧಾರಾವಾಹಿ ಚೋರ್ ಪಳೆಲ್ಲ್ಯಾ ಉಪ್ರಾಂತ್ ಮ್ಹಾಕಾ ತ್ಯಾ ಸೀರಿಯಲಾಂತ್ ಆಸಕ್ತ್ ಉಣಿಂ ಜಾಲಿ. ಮಾಮ್ಮಿ ಕಿತ್ಯಾಕ್ ತೆಂ ಸೀರಿಯಲ್ ತಿತ್ಲ್ಯಾ ಒತ್ತಾಯೆನ್ ಪಳೆತಾ ಮ್ಹಣ್ ಮ್ಹಾಕಾ ಸುಸ್ತಾಲೆಂಚ್ ನಾಂ. ನಿಮಾಣೆಂ ಸೀರಿಯಲ್ ಪಳೆಂವ್ಚೆಂಚ್ ನಾಕಾ ಮ್ಹಣ್ ಲೆಕ್ಲೆಂ.
ಚಡ್ ದೀಸ್ ಗೆಲೆನಾಂತ್.
ಮಾಮ್ಮಿಕ್ ತ್ಯಾ ಸಿರಿಯಾಲಾಚೆರ್ ತಿತ್ಲಿಯ್ ಆಸಕ್ತ್ ಕಿತ್ಯಾಕ್ ಮ್ಹಣ್ ಕಳ್ಚೆಂ ಘಡಿತ್ ಘಡ್ಲೆಂಚ್.
ಆಶೆಂ ಜಾಂವ್ಕ್ ಆಸ್ಚೆಂ ನಿರ್ಮಿಲ್ಲೆಂ ಆಡಂವ್ಕ್ ಜಾತಾ?
ಕಾಮಿಲ್ ಬಾಪ್ಪು ಮ್ಹಜ್ಯಾ ಡ್ಯಾಡಿಚೊ (ಪಯ್ಶಿಲ್ಯಾನ್) ಮಾವ್ಶೆ ಭಾವ್. ಡ್ಯಾಡಿ ಪ್ರಾಸ್ ಜಾಯಿತ್ತ್ಯಾ ವರ್ಸಾಂ ಲ್ಹಾನ್ ಪ್ರಾಯೆಚೊ. ಆಮ್ಚೆಚ್ ಪೆಂಟೆಂತ್ ತಾಕಾ ರಿಯಲ್ ಎಸ್ಟೇಟ್ ಬಿಜ್ನೆಸ್ ಆಸ್ಲ್ಲೆಂ. ತೊ ಸದಾಂಯ್ ಮ್ಹಳ್ಳೆಂಪರಿಂ ದಿಸಾಚೆಂ ಆಮ್ಗೆರ್ ಯೆತಾಲೊ. ’ಹೊ ಆಮ್ಚೊ ಫೆಮಿಲಿ ಫ್ರೆಂಡ್’ ಮ್ಹಣ್ಂಚ್ ಡ್ಯಾಡಿನ್ - ಮಾಮ್ಮಿನ್ ಹೆರಾಂಕ್ ಕಾಮಿಲ್ ಬಾಪ್ಪುಚಿ ವಳೊಕ್ ಕರ್ಚಿ ಆಸ್ಲ್ಲಿ. ಆಮ್ಚ್ಯಾ ಘರ್ಚ್ಯಾ ವಿಜೆಚಿಂ ವಾ ಫೋನಾಚಿಂ ಬಿಲ್ಲಾಂ ಬಾಂದ್ಚಿಂ, ಮಾಮ್ಮಿಚೆಂ ಬೆಂಕಾಚೆಂ ವಾ ಇನ್ಸೂರ್ ದಫ್ತರಾಚೆಂ ಕಾಮ್ ಆಸ್ಲ್ಯಾರ್ ಕರ್ಚೆಂ, ದುಬಾಯ್ ಆಸ್ಚ್ಯಾ ಡ್ಯಾಡಿಚಾ ಆನಿಂ ಮಾಮ್ಮಿಚ್ಯಾ ನಾಂವಾರ್ ಆಸ್ಲ್ಲ್ಯಾ ಶೆರಾಂಚಿಂ ಕಾಮಾಂ ಆನಿಂ ಕಿತೆಂಯ್ ಆಸ್ಲ್ಯಾರ್ ಕಾಮಿಲ್ ಬಾಪ್ಪುಕ್ ಮಾಮ್ಮಿ ಫೋನ್ ಕರ್ತೆಲಿ ಆನಿಂ ತೊ ಲಗ್ತಿ ದಸ್ತವೇಜಾಂ ವ್ಹರುಂಕ್ ಘರಾ ಯೆತಾಲೊ. ಆಯ್ಲ್ಯಾರ್ ಜಾಯಿತ್ತೊ ವೇಳ್ ಮಾಮ್ಮಿಕಡೆ ಉಲೊವ್ನ್ ಬಸ್ತಾಲೊ, ಜೆವ್ಣಾಚ್ಯಾ ವೆಳಾರ್ ಆಯ್ಲ್ಯಾರ್ ಜೆವ್ತಾಲೊ. ಮಾಮ್ಮಿನ್ ಬರೆಂ ವಾ ವಿಶೇಶ್ ಕಿತೆಂಯ್ ರಾಂದ್ಲ್ಯಾರ್ ತಾಕಾ ಫೋನ್ ಕರ್ತೆಲಿ ಆಣಿಂ ತೊ ರಾತಿಂ ಜೆವ್ಣಾಕ್ಯಿ ಯೆತಾಲೊ. ತಶೆಂ ರಾತಿಂ ಆಯಿಲ್ಲೊ ಜೆವಾಣ್ ಜಾಲ್ಲೆಂಚ್ ಆಮ್ಚ್ಯಾ ಸಯ್ರ್ಯಾಂಚ್ಯಾ ಕುಡಾಂತ್ ನಿದ್ತಾಲೊ, ಸಕಾಳಿಂ ಹಾಂವೆಂ ಉಟ್ಚೆಂ ಪಯ್ಲೆಂಚ್ ವೆತಾಲೊ. ಕಾಮಿಲ್ ಬಾಪ್ಪುನ್ ಮಾಕಾಯ್ ಜಾಯಿತ್ತಿ ಕುಮಕ್ ಕೆಲ್ಲಿ ಆಸಾ. ಪುಣ್ ಕಾಮಿಲ್ ಬಾಪ್ಪುಚಿ ನೀಜ್ ಗಜಾಲ್ ಮ್ಹಾಕಾ ತವಳ್ ಪರ್ಯಾಂತ್ಯಿ ಕಳಿತ್ ನಾತ್ಲ್ಲಿ.
ಮ್ಹಜ್ಯಾ ಸಾತ್ವ್ಯಾ ಕ್ಲಾಸಿಚಿ ವರ್ಸಾ ಮಧ್ಲಿ ಪರೀಕ್ಶಾ ಜಾಲ್ಲ್ಯಾ ಉಪ್ರಾಂತ್ಲ್ಯಾ ರಜೆಚ್ಯಾ ಏಕೆ ರಾತಿಂ ನಿದ್ಲ್ಲ್ಯಾ ಮ್ಹಾಕಾ ಆಚಾನಕ್ ಜಾಗ್ ಜಾಲಿ. ಟಿ.ವಿ. ದವರ್ಲ್ಲ್ಯಾ ಕುಡಾಂತ್ ಹುಂಕಾರ್ಚೊ, ಖರ್ಶೆಂವ್ಚೊ ವಿಚಿತ್ರ್ ಆವಾಜ್ ಆಯ್ಕಾತಾಲೊ. ಆವಾಜ್ ಆಯ್ಕೊನ್ ಪಯ್ಲೆಂ ಬಿರಾಂತ್ ದಿಸ್ಲಿ, ವ್ಹರಾಂ ರಾತಿಚಿಂ ಸಾಡೆ-ಬಾರಾ ಜಾಲ್ಲಿಂ. ಪಯ್ಲೆಂ ಮ್ಹಾಕಾ ಕಾವ್ಜೆಣಿ ಜಾಲಿ. ಥೊಡೊ ವೇಳ್ ನಿದ್ಲ್ಲೊ ಹಾಲ್ಲೊಂ ನಾಂ. ಆವಾಜ್ ತಸೊಚ್ ಆಸ್ಲ್ಲೊ. ಘಡ್ಯೆಕ್ ಪಾವ್ಟಿಂ ಚಡ್ತಾಲೊ. ಥೊಡೊ ವೇಳ್ ರಾವ್ತಾಲೊ, ಉಲಯಿಲ್ಲೆಪರಿಂ ಜಾತಾಲೆಂ...ಪರತ್ ತೊ ವಿಚಿತ್ರ್ ಆವಾಜ್.....ಥೊಡ್ಯಾ ವೆಳಾ ಉಪ್ರಾಂತ್, ಹಳೂ ಉಟೊನ್ ಹಾಂವೆಂ ಜನೆಲಾಚೆಂ ದಾರ್ ಆವಾಜ್ ಕರಿನಾಸ್ತಾಂ ಉಗ್ತೆಂ ಕೆಲೆಂ.
ಪಡ್ದ್ಯಾ ಪಾಟ್ಲೆಂ ದ್ರಶ್ಯ್ ಹಾಂವ್ ಉತ್ರಾಂವ್ಕ್ಚ್ ಸಕಾನಾ..ತೆಂ ದ್ರಶ್ಯ್ ಅಜೂನ್ ಮ್ಹಜ್ಯಾ ಮತಿ ಪಡ್ದ್ಯಾರ್ ಆಸಾ. ಪಡ್ದ್ಯಾ ಪಾಟ್ಲೆಂ ದ್ರಶ್ಯ್ ಹಾಂವ್ ಪಾತ್ಯೆಲೊಂ ನಾಂ. ಹಾಂವ್ ಸ್ವಪ್ಣೆತಾಲೊಂ? ನಾಂ.... ಮ್ಹಜಿ ನೀದ್ ಖಂಯ್ ಪಯ್ಸ್ ಗೆಲ್ಲಿ..ಹಾಂವ್ ಸಗ್ಳೊಚ್ ಶೆರ್ಮೆಲೊಂ. ಟಿ.ವಿ.ಚೆರ್ ವಿಣ್ಗೊ ದಾದ್ಲೊ ಆನಿಂ ವಿಣ್ಗೆ ಬಾಯ್ಲೆಚೆಂ ಫಿಲ್ಮ್ ಚಲೊನ್ ಆಸ್ಲ್ಲೆಂ. ತಿಂ ’ತೆಂ’ ಕರ್ಚೆಂ ಪಿಕ್ಚರಾಂತ್ ಆಸ್ಲ್ಲೆಂ. ಆಸಲಿಂ ಪಿಕ್ಚರಾಂ ಆಸ್ತಾತ್ ಮ್ಹಣ್ ತೆ ದೀಸ್ ಪರ್ಯಾಂತ್ ಕಳಿತ್ ನಾತ್ಲ್ಲೆಂ. ಆವಾಜ್ ತ್ಯಾ ಪಿಂತುರಾಚೊ. ಆನಿಂ ಸಕ್ಲಾ ಕಾರ್ಪೆಟಿಚೆರ್ ಕಾಮಿಲ್ ಬಾಪ್ಪು ಆನಿಂ ಮಾಮ್ಮಿ ಎಕಾಮೆಕಾಚ್ಯಾ ವೆಂಗೆಂತ್ ಪುರ್ತಿಂ ವಿಣ್ಗಿ ಆಸ್ಲ್ಲಿ..ಆನಿಂ ತಿಂಯ್ ಫಿಲ್ಮಾಂತ್ ಆಸ್ಚೆಪರಿಚ್ ಕರ್ನ್ ಆಸ್ಲ್ಲಿ.....!
ಮ್ಹಜೆ ಹಾತ್- ಪಾಯ್ ಥಂಡ್ ಜಾಲೆ.
ಥೊಡೊ ವೇಳ್ ಹಾಲನಾಸ್ತಾಂ ರಾವೊನ್ ತೆಂ ಪಳೆಲ್ಲ್ಯಾ ಉಪ್ರಾಂತ್ ಹಾಂವೆಂ ಹಳೂ ಜನೆಲ್ ದಾಂಪ್ಲೆಂ. ಪಾಟಿಂ ವಚೊನ್ ಹಾಂವ್ ಮ್ಹಜ್ಯಾ ಖಾಟಿಚೆರ್ ವೊಗೆಚ್ಚ್ ಸುಮಾರ್ ವೇಳ್ ಬಸ್ಲೊಂ, ಉಪ್ರಾಂತ್ ನಿದ್ಲೊಂ, ಪುಣ್ ಮ್ಹಾಕಾ ನೀದ್ ಆಯ್ಲಿ ನಾಂ...
ಕಾಮಿಲ್ ಬಾಪ್ಪು ಆನಿಂ ಮಾಮ್ಮಿ ಕರುಂಕ್ ನಜೊ ಆಸ್ಲ್ಲೆಂ ಕರ್ತಾತ್ ಮ್ಹಣ್ ಹಾಂವ್ ಜಾಣಾಂ ಆಸ್ಲ್ಲೊಂ.
ದಾದ್ಲೊ ಆನಿಂ ಬಾಯ್ಲ್ ’ತೆಂ’ ಕರ್ತಾತ್, ಕಿತ್ಯಾಕ್ ಕರ್ತಾತ್, ಕರ್ತಾನಾ ಕಿತೆಂ ಜಾತಾ ಮ್ಹಳ್ಳೆಂ ಮ್ಹಾಕಾ ಕಳಯಿಲ್ಲೆಂಚ್ ನಂದೂನ್. ತವಳ್ ಹಾಂವ್ ಸವೆ ಕ್ಲಾಸಿಂತ್ ಆಸ್ಲ್ಲೊಂ. ಆಯ್ಕಾಲ್ಲೆಂ ಸುರ್ವಾತೆರ್ ಮ್ಹಾಕಾ ತಿ ಏಕ್ ವಿಶೇಶ್ ಆಸಕ್ತೆಚಿ ಗಜಾಲ್ ಜಾಲ್ಲಿ. ಪರತ್ ಪರತ್ ಆಯ್ಕಾಯಾಂ ಮ್ಹಣ್ ಬೊಗ್ತಾಲೆಂ. ಏಕ್ ದೀಸ್ ಹಿ ಗಜಾಲ್ ಮ್ಹಜೊ ಅನ್ಯೇಕ್ ಸಾಂಗಾಂತಿ ವಿಲ್ಫಿ ಕಡೆ ಸಾಂಗ್ಲಿಂ. ತಾಕಾ ತ್ಯೆ ವಿಶಿಂ ಬರಿ ಸಮ್ಜಣಿ ಆಸ್ಲ್ಲಿ ’ಕಾಜಾರ್ ಜಾಲ್ಲೆ ಉಪ್ರಾಂತ್ ಮಾತ್ರ್ ’ತೆಂ’ ಕರ್ಚೆಂ ....ಕಾಜಾರ್ ಜಾಯ್ನಾತ್ಲ್ಲ್ಯಾಂನಿ ತಶೆಂ ಕರ್ಚೆಂ ಮ್ಹಾ - ಪಾತಕ್. ತಶೆಂ ಕೆಲ್ಲ್ಯಾನ್ಂಚ್ ಭುರ್ಗಿಂ ಜಾಂವ್ಚಿ’ ವಿಲ್ಫಿನ್ ವಿವರಾವ್ನ್ ಸಾಂಗ್ಲ್ಲೆ. ಉಪ್ರಾಂತ್ ತಾಂತ್ಲಿ ವಿಶೇಶಾತಾಯ್ ಭೊಚಿ ಮ್ಹಜೆ ಥಂಯ್ ಉಣಿ ಜಾಲಿ. ಕಾಜಾರ್ ಜಾಲ್ಲೆ ಉಪ್ರಾಂತ್ ಕಾಜಾರಿ ದಾದ್ಲ್ಯಾನ್ ಆನಿಂ ತಾಚೆ ಬಾಯ್ಲೆನ್ ಮಾತ್ರ್ ಕರ್ಚಿ ಸಾಮಾನ್ಯ್ ಗಜಾಲ್ ಮ್ಹಣ್ ಹಾಂವೆಂ ಲೆಕ್ಲಿ. ಪಾಟ್ಲ್ಯಾ ದಿಸಾಂನಿ ತೆ ಗಜಾಲಿವಿಶಿಂ ಚಿಂತಾನಾ ಮ್ಹಾಕಾ ಕಿತೆಶೆಂ ಭೊಗ್ತಾಲೆಂ. ತಶೆಂ ಭೊಗ್ಚೆಂಯ್ ಪಾತಕ್ ಕೊಣ್ಣಾ ಮ್ಹಳ್ಳಿ ಕಾವ್ಜೆಣಿ ದೊಸ್ತಾಲಿ.
ಮಾಮ್ಮಿ ಆನಿಂ ಕಾಮಿಲ್ ಬಾಪ್ಪು ’ತೆಂ’ ಕರ್ನ್ ಆಸ್ಚೆಂ ಪಳೆತಾನಾ ಹಾಂವ್ ಬಿಯೆಲ್ಲೊಂ. ಪುರ್ತೊ ಕಂಗಾಲ್ ಜಾಲ್ಲೊಂ. ಮ್ಹಾಕಾ ಮಾಮ್ಮಿಚೆರ್ ಕಾಂಠಾಳೊ ಭೊಗ್ಲೊ, ದುಸ್ರೆ ದೀಸ್ ಸಕಾಳಿಂ ಶಾಳೆಕ್ ವೆತಾ ಪರ್ಯಾಂತ್ಯಿ ಹಾಂವ್ ತಿಚೆಕಡೆ ಸಾರ್ಕ್ಯಾನ್ ಉಲಯ್ಲೊ ನಾ. ಶಾಳೆಂತ್ಯಿ ಮ್ಹಾಕಾ ಲಿಸಾಂವಾಂಚೆರ್ ಧ್ಯಾನ್ ದೀಂವ್ಕ್ ಜಾಲೆಂ ನಾಂ. ಲೆಕಾಂಚ್ಯಾ ಮೆಸ್ತ್ರಿನ್ ವಿಚಾರ್ ಕೆಲ್ಲ್ಯಾಕ್ ಭಲಾಯ್ಕಿ ಬರಿ ನಾಂ ಮ್ಹಣ್ ಸಾಂಗ್ಲೆಂ ಹಾಂವೆಂ.
’ಮ್ಹಜಿ ತಕ್ಲಿ ಪಡ್ತಾ’ ಮ್ಹಳೆಂ ಹಾಂವೆಂ ಸಾಂಜೆರ್ ಮಾಮ್ಮಿನ್ ವಿಚಾರ್ ಕೆಲ್ಲ್ಯಾಕ್. ’ ತಕ್ಲಿ ಪಡ್ತಾ ತರ್ ಮ್ಹಜೆಂ ಕಿತ್ಯಾಕ್ ಸಾಂಗೊಂಕ್ ನಜೊ.. ಉಲೊಂವ್ಕ್ ನಜೊ?’ ಮ್ಹಣ್ ಮಾಮ್ಮಿನ್ ವಿಚಾರ್ಲೆಂ, ಹಾಂವೆಂ ಜಾಪ್ ದಿಲಿ ನಾಂ. ಮಾಮ್ಮಿಕ್ ಮ್ಹಜ್ಯಾ ಬದ್ಲಲ್ಯಾ ನಡ್ತ್ಯಾನ್ ಕಿತೆಂಯ್ ದುಬಾವ್ ಯೇತ್ ಮ್ಹಣ್ ಹಾಂವೆ ಚಿಂತ್ಲೆಂ ನಾಂ. ಮಾಮ್ಮಿನ್ ಪರತ್ ಪರತ್ ಉಲೊಂವ್ಕ್ ಲಾಯ್ಲ್ಯಾರ್ಯಿ ಹಾಂವ್ ಉಲಯ್ಲೊಂಚ್ ನಾಂ.
ಹೆಂ ಘಡ್ಲ್ಲ್ಯಾ ದುಸ್ರ್ಯಾ ಸಾಂಜೆರ್ ಥಾವ್ನ್ ಹಾಂವೆಂ ಕೋಮಲ್ ಸೀರಿಯಲ್ ಲಿಪೊನ್ ಪಳೆಂವ್ಚೆಂ ಪರತ್ ಸುರು ಕೆಲೆಂ. ಮಾಮ್ಮಿ ಕಿತ್ಯಾಕ್ ತಿತ್ಲ್ಯಾ ಆಸಕ್ತೆನ್ ಆನಿಂ ಮ್ಹಜೆ ಥಾವ್ನ್ ಲಿಪೊವ್ನ್ ಕೋಮಲ್ ಧಾರಾವಾಹಿ ಪಳೆತಾ ಮ್ಹಾಕಾ ಆತಾಂ ಹಳ್ತಾನ್ ಸುಸ್ತೊಂಕ್ ಲಾಗ್ಲ್ಲೆಂ.
ಸೀರಿಯಲಾಂತ್ಲ್ಯಾ ರಾಘು ಮೆಸ್ತ್ರಿಚ್ಯಾ ಜಾಗ್ಯಾರ್ ಮ್ಹಜೊ ಡ್ಯಾಡಿ, ಕೋಮಲ್ ಜಾವ್ನ್ ಮಾಮ್ಮಿ ಆನಿಂ ಶ್ಯಾಮ್ ಜಾವ್ನ್ ಕಾಮಿಲ್ ಬಾಪ್ಪು ಆಸಾತ್ ತಶೆಂ ಬೊಗ್ಲೆಂ ಮ್ಹಾಕಾ.... ತ್ಯಾ ಉಪ್ರಾಂತ್ ಹಾಂವೆಂ ಕೋಮಲ್ ಧಾರಾವಾಹಿಚೆರ್ ಚಡ್ ಗುಮಾನ್ ದಿಲೆಂ. ರಾಘು ಮೆಸ್ತ್ರಿಕ್ ಆಪ್ಲೆಂ ಬಾಯ್ಲ್ ಕೋಮಲ್ ಆನಿಂ ಶ್ಯಾಮ್ ಮಧ್ಲ್ಯಾ ಸಂಬಂದಾಚೊ ಜೋಪ್ ಜಾಲ್ಲೊ ಆನಿಂ ಹ್ಯಾ ಸಮಸ್ಯಾಕ್ ಪರಿಹಾರ್ ಜೊಡುಂಕ್ ಪ್ರೇತನ್ ಕರ್ನ್ ಆಸ್ಲ್ಲೊ. ಪುಣ್ ರಾಘು ಮೆಸ್ತ್ರಿ ದಯಾಳ್ ಮನಿಸ್. ಹೆರಾಂಚೆರ್ ರಾಗ್ ಕರುಂಕ್ಚ್ ಜಾಯ್ನಾ ತಸಲೊ...ಮ್ಹಜ್ಯಾ ಡ್ಯಾಡಿ ಪರಿಂಚ್....
ಮ್ಹಜೊ ಡ್ಯಾಡಿಯ್ ತಸೊಚ್ ಬೊಳೊ. ಕೋಮಲ್ ಧಾರಾವಾಹಿಂತ್ಲ್ಯಾ ರಾಘು ಮೆಸ್ತ್ರಿಕ್ ಭುರ್ಗಿಂ ನಾತ್ಲ್ಲಿಂ ಪುಣ್ ತೊ ಆಪ್ಲ್ಯಾ ಬಾಯ್ಲೆಚೊ ಆಜೂನ್ ಮೋಗ್ ಕರ್ನ್ ಆಸ್ಲ್ಲೊಂ. ಮ್ಹಜೊ ಡ್ಯಾಡಿ ತರ್ಯಿ ತಸೊಚ್, ಮ್ಹಜೊ ಆನಿಂ ಮಾಮ್ಮಿಚೊ ಆಪ್ಲ್ಯಾ ಜಿವಾ ಪ್ರಾಸ್ ಡ್ಯಾಡಿ ಚಡ್ ಮೋಗ್ ಕರ್ತಾಲೊ. ಹರ್ ಹಪ್ತ್ಯಾಂತ್ ಘರಾ ಫೋನ್ ಕರ್ನ್ ಮಾಮ್ಮಿ ಕಡೆ ಆನಿಂ ಉಪ್ರಾಂತ್ ಮ್ಹಜೆಕಡೆ ಉಲಯ್ತಾಲೊ. ಬರೆಂ ಕರ್ನ್ ಶಿಕೊನ್ ತುವೆಂ ವ್ಹಡ್ಲೊ ಇಜ್ನೆರ್ ಜಾಯ್ಜಾಯ್ ಮ್ಹಣ್ತಾಲೊ ಡ್ಯಾಡಿ ಹರ್ ಪಾವ್ಟಿಂ. ’ಆತಾಂ ಶಿಕ್ಲ್ಯಾರ್ ಮಾತ್ರ್ ಜಾತಾ’ ತೊ ಮ್ಹಾಕಾ ಉಡಾಸ್ ಕರ್ತಾಲೊ. ಡ್ಯಾಡಿ ಹರ್ಯೇಕಾ ಮಯ್ನ್ಯಾಂತ್ ಮಾಮ್ಮಿಕ್ ಹಜಾರಾಂನಿ ಡ್ರಾಪ್ಟ್ ದಾಡ್ತಾಲೊ.. ಹರ್ಯೇಕಾ ವರ್ಸಾ ನತಲಾಂ ಫೆಸ್ತಾಚ್ಯಾ ವೆಳಾರ್ ರಜೆರ್ ಡ್ಯಾಡಿ ಘರಾ ಯೆತಾಲೊ ಆನಿಂ ಆಮ್ಕಾಂ ದೊಗಾಂಯ್ಕ್ ಕಿತ್ಲ್ಯೊ ವಸ್ತು ಜಾಯ್ತ್ ಹಾಡ್ನ್ ಯೆತಾಲೊ.
ಡ್ಯಾಡಿನ್ ಕಿತ್ಯಾಕ್ ಉಣೆಂ ಕೆಲಾಂ ಮ್ಹಣ್ ಮಾಮ್ಮಿ ಆಶೆಂ ಕರ್ತಾ? ಡ್ಯಾಡಿ ಸಾಂಗಾತಾ ಮಾತ್ರ್ ಕರುಂಕ್ ಜಾಯ್ ಆಸ್ಚೆಂ ಕಾಮಿಲ್ ಬಾಪ್ಪು ಸಾಂಗಾತಾ ಕರ್ನ್ ಮಾಮ್ಮಿ ಪಾತಕ್ ಕರ್ತಾ ಮಾತ್ರ್ ನ್ಹಯ್ ಡ್ಯಾಡಿಕ್ ಘಾತ್ ಕರ್ತಾ ಮ್ಹಣ್ ಹಾಂವ್ ಸಮ್ಜಲ್ಲೊಂ.
ಏಕ್ ಹಪ್ತೊ ಪಾಶಾರ್ ಜಾಲೊ. ಮ್ಹಜೆ ಮತಿಂತ್ ಫಕತ್ತ್ ಮಾಮ್ಮಿ, ಕಾಮಿಲ್ ಬಾಪ್ಪು ಆನಿಂ ಕೋಮಲ್ ಧಾರಾವಾಹಿ ಮಾತ್ರ್ ಘುಂವ್ತೆಲೆ.
ಮಾಮ್ಮಿನ್ ಕಾಮಿಲ್ ಬಾಪ್ಪು ಸಾಂಗಾಂತಾ ಆಶೆಂ ಕರ್ಚೆಂ ಕಶೆಂ ಆಡ್ವಾಯೆತ್? ಕಾಮಿಲ್ ಬಾಪ್ಪುನ್ ಆಮ್ಗೆರ್ ಯೆಂವ್ಚೆಂ ಆಡಾಯ್ಲ್ಯಾರ್ ಜಾಯ್? ಕಾಮಿಲ್ ಬಾಪ್ಪುನ್ ಆಮ್ಗೆರ್ ಯೇನಾತ್ಲ್ಯಾರ್...
ಕೋಮಲ್ ಸೀರಿಯಲಾಂತ್ ರಾಘು ಮೆಸ್ತ್ರಿನ್ ತಶೆಂಚ್ ಕೆಲ್ಲೆಂ. ಶ್ಯಾಮಾನ್ ಆಪ್ಲ್ಯಾ ಘರಾ ಯೇನಾಶೆಂ ರಾಘು ಮೆಸ್ತ್ರಿನ್ ವ್ಯವಸ್ಥಾ ಕೆಲ್ಲಿ. ಪುಣ್ ಶ್ಯಾಮಾಕ್ ಮೆಳ್ಚೆ ಖಾತಿರ್ ಕೋಮಲ್ ಲೊಡ್ಜಾಂಕ್, ಪಾರ್ಕಾಂಕ್ ವೆತಾಲೆಂ. ಕಾಮಿಲ್ ಬಾಪ್ಪು ಆಮ್ಗೆರ್ ಯೇನಾ ತರ್ ಮಾಮ್ಮಿಯ್ ತಶೆಂ ಕರಿತ್?
ಹಾಂವ್ ಹೆಂಚ್ ಚಿಂತುನ್ ಆಸ್ತಾಲೊ. ಶಾಳೆಂತ್ ಮ್ಹಾಕಾ ಲಿಸಾಂವಾಕ್ ಗುಮಾನ್ ದೀಂವ್ಕ್ಚ್ ತ್ರಾಸ್ ಜಾತಾಲೆ. ಗರಾ ಹೋಮ್ ವರ್ಕ್ ಕರುಂಕ್ ಜಾಯ್ನಾತ್ಲ್ಲೆಂ, ಮಾಮ್ಮಿಕಡೆ ಗರ್ಜೆ ತಿತ್ಲೆ ಮಾತ್ರ್ ಉಲಯ್ತಾಲೊಂ. ಮ್ಹಾಕಾ ಪಯ್ಲೆಚೆಂ ಪರಿಂ ಭುಕ್ ಸಯ್ತ್ ಲಾಗನಾತ್ಲ್ಲಿ.
’ಸುನಿಲ್ ಆತಾಂ ಪಯ್ಲೆಂಚೆಪರಿಂ ನಾಂಯ್ ಖಂಯ್’ ಆಯ್ತಾರಾ ಎಕೆ ಸಾಂಜೆರ್ ಘರಾ ಭೆಟೆಕ್ ಆಯಿಲ್ಲ್ಯಾ ವಿಗಾರಾನ್ ಮ್ಹಾಕಾ ಭಾಯ್ರ್ ಜಾಲಾಕ್ ಆಪವ್ನ್ ವ್ಹರ್ನ್ ವಿಚಾರ್ಲೆಂ. ವಿಗಾರಾನ್ ಮಸ್ತು ಸವಾಲಾಂ ಕೆಲಿಂ. ಥೊಡೆ ಮ್ಹಜೆವಿಶಿಂ ಲಿಪ್ತೆ ಗಜಾಲಿಯ್ ವಿಚಾರ್ಲೆ. ವಿಗಾರಾನ್ ವಿಚಾರ್ಲ್ಲ್ಯಾ ಹರ್ ಸವಾಲಾಂಕ್ ಹಾಂವೆಂ ನಿಸ್ರೊಂಚೆ ಜಾಪಿ ದಿಲೆ ಶಿವಾಯ್ ನೀಜ್ ಗಜಾಲ್ ಸಾಂಗ್ಲಿಚ್ ನಾ.
’ಚೆರ್ಕೆ ವಾಡೊನ್ ಯೆತಾನಾ ತಶೆಂಚ್ ವಿಲ್ಮಾ’ ವಿಗಾರಾ ಉಪ್ರಾಂತ್ ಮಾಮ್ಮಿಕಡೆ ಸಾಂಗ್ಲ್ಲೆಂ ಆಯ್ಕಾಲೆಂ ಹಾಂವೆಂ ’ತೆ ಚಡ್ ಅಂತರ್ಮುಖಿ ಜಾತಾತ್, ಥೊಡ್ಯಾ ದಿಸಾಂನಿ ಸಾರ್ಕೊ ಜಾತಾಲೊ...” ವಿಗಾರಾಂಕಡೆ ಸಮ್ಜೊಂವ್ಕ್ ಡ್ಯಾಡಿನ್ಂಚ್ ಸಾಂಗ್ಲ್ಲೆಂ ಮ್ಹಣ್ ಮುಖ್ಲ್ಯಾ ಹಪ್ತ್ಯಾಂತ್ ಫೋನಾರ್ ಮಾಮ್ಮಿನ್ ಡ್ಯಾಡಿ ಕಡೆ ಸಾಂಗ್ತಾನಾ ಕಳ್ಳೆಂ ಮ್ಹಾಕಾ,.
’ಮಾಮ್ಮಿ ವ್ಹಡ್ ಸಾಂತಿಣೆಪರಿಂ ಕರ್ತಾ’ ಮತಿಂತ್ಚ್ ದುರ್ಸಾಲೊಂ ಹಾಂವ್. ಮ್ಹಾಕಾ ಮಾಮ್ಮಿಚೆರ್ ಕಿತೆಂಚ್ ಮೋಗ್ ಉರ್ಲೊ ನಾ....ಹಾಂವ್ ತಿಕಾ ಕಾಂಟಾಳೊಂಕ್ ಲಾಗ್ಲೊಂ.
ಕಾಮಿಲ್ ಬಾಪ್ಪು ಪಯ್ಲೆಂಚೆಪರಿಂ ಘರಾ ಯೇವ್ನ್ ಆಸ್ಲ್ಲೊ. ರಾತಿಂ ರಾವೊಂಕ್ ಯೆತಾಲೊ. ಪುಣ್ ರಾತಿಂ ಗಲೀಜ್ ಪಿಕ್ಚರಾಂ ಪಳೆತಾತ್ ಆನಿಂ ತ್ಯಾ ಪಿಕ್ಚರಾಂತ್ ಆಸ್ಲ್ಲೆಪರಿಂಚ್ ಕರ್ತಾತ್ ವಾ ನಾ ತೆಂ ಮಾತ್ರ್ ಹಾಂವೆಂ ರಾಕೊನ್ ಪಳೆಲೆಂ ನಾಂ. ತಿಂ ತಶೆಂ ಕರ್ತಾತ್ ಮ್ಹಣ್ ಹಾಂವೆಂ ಲೆಕ್ಲ್ಲೆಂ ಆನಿಂ ರಾಕೊನ್ ಪಳೆಂವ್ಚಿ ಕಸಲಿಯ್ ಉರ್ಭಾ ಮ್ಹಜೆಥಂಯ್ ನಾತ್ಲ್ಲಿ.
ಕಾಮಿಲ್ ಬಾಪ್ಪುನ್ ಮಾಮ್ಮಿಕ್ ಮೆಳ್ಳ್ಚೆಂ ಖಂದಿತ್ ಆಡಾಯಿಲ್ಲೆಂ ಶಿವಾಯ್ ಹಿ ನಾಲೀಸಾಯ್ ರಾಂವ್ಚೆಪರಿ ನಾಂ ಮ್ಹಣ್ ಕೋಮಲ್ ಧಾರಾವಾಹಿ ಪಳೆವ್ನ್ಂಚ್ ಹಾಂವ್ ಸಮ್ಜಾಲ್ಲೊಂ. ’ಅಸಲಿ ರೂಚ್ ಲಾಗ್ಲ್ಲಿಂ ಕಶೆಂ ತರ್ಯಿ ಮೆಳ್ಚೆಂ ಆಡಯ್ನಾಂತ್’ ಕೋಮಲ್ ಸೀರಿಯಲಾಂತ್ ರಾಘು ಮೆಸ್ತ್ರಿ ಸಾಂಗ್ತಾಲೊ.
ಮಾಮ್ಮಿ ಆನಿಂ ಕಾಮಿಲ್ ಮೆಸ್ತ್ರಿನ್ ಭೆಟ್ಚೆಂ ಹಾಂವ್ ಆಡಾಂವ್ಕ್ ಚಿಂತುನ್ ಆಸ್ಚೆಪರಿಂಚ್, ಕೋಮಲ್ ಧಾರಾವಾಹಿಂತ್ ರಾಘು ಮೆಸ್ತ್ರಿ ಆಪ್ಲೆ ಬಾಯ್ಲೆ ಆನಿಂ ಶ್ಯಾಮಾ ಮದ್ಲೊ ಸಂಬಂದ್ ಚುಕೊಂವ್ಕ್ ಪ್ರೇತನ್ ಕರ್ನ್ ಆಸ್ಲ್ಲೊ. ವಿವಿಧ್ ಜಣಾಂಕ್ ಮೆಳೊನ್ ಪರಿಹಾರ್ ಸೊದುಂಕ್ ವಚೊನ್ಂಚ್ ಮೆಸ್ತ್ರಿನ್ ಆಪ್ಲಿ ಮರ್ಯಾದ್ ಹೊಗ್ಡಾಯಿಲ್ಲಿ, ಕೋಮಲ್ ಆನಿಂ ಶ್ಯಾಮಾಚಿ ಖಬಾರ್ ಮೆಸ್ತ್ರಿಚ್ಯಾ ಶಾಳೆಂತ್ಲ್ಯಾ ಭುರ್ಗ್ಯಾಂಕ್ ಸಯ್ತ್ ಕಳಿತ್ ಆಸ್ಲ್ಲಿ. ಪುಣ್ ಹಾಂವ್ ಚತ್ರಾಯೆನ್ ಆಸ್ಲ್ಲೊಂ. ಕೊಣಾಯ್ಕಡೆ ಹಿ ಖಬಾರ್ ಕಾಡುಂಕ್ ನಜೊ ಮ್ಹಣ್ ಹಾಂವೆಂ ನಿರ್ಧಾರ್ ಕೆಲ್ಲೊ. ’ತುಜೊ ಮೂಡ್ ಸಮಾ ನಾಂ...’ ಮ್ಹಣ್ ನಂದೂನ್ ಸಾಂಗ್ಲ್ಯಾರ್ಯಿ ನಂದೂಕಡೆ ನೀಜ್ ಗಜಾಲ್ ಸಾಂಗ್ಲಿ ನಾಂ.
ಸೀರಿಯಲಾಂತ್ ಪುರ್ತೊ ಹರ್ವೊನ್ ಗೆಲ್ಲೊ ರಾಘು ಮ್ಸ್ತ್ರಿ - ಕೋನ್ ಏಕ್ ಸೊಮ್ಗೊಳಾ ಸರ್ಶಿಂ ಪರಿಹಾರ್ ಸೊಧುನ್ ಗೆಲ್ಲೊ. ಸೊಮ್ಗೊಳಾನ್ ವಿವಿಧ್ ವಾಟೊ ವಿಶ್ಲೇಶಿತ್ ಕೆಲ್ಲೆ ಉಪ್ರಾಂತ್ ಶ್ಯಾಮಾಚಿ ಖುನ್ ಕರುಂಕ್ ರಾಘು ಮೆಸ್ತ್ರಿಕ್ ಸೂಚನ್ ದಿಲ್ಲೆಂ.
’ಅನ್ಯಾಯ್ ಕರ್ತೆಲ್ಯಾಂಕ್ ಲಗಾಡ್ ಕಾಡುಂಕ್ ಪುರಾಣಾಂತ್ಯಿ ಸಾಂಗ್ಲಾಂ’ ಸೊಮ್ಗೊಳಾನ್ ರಾಘು ಮೆಸ್ತ್ರಿಕ್ ಸಮ್ಜಯಿಲ್ಲೆಂ ಮ್ಹಾಕಾ ಅವಡ್ಲೆಂ. ’ಮಹಾಭಾರತಾಂತ್ ದುಶ್ಟ್ ಮನ್ಶ್ಯಾಂಕ್ ಲಗಾಡ್ ಕಾಡ್ಚ್ಯಾ ಝುಜಾಂತ್ ದೇವ್ಚ್ ಜಾವ್ನಾಸ್ಚೊ ಕ್ರಷ್ಣ ಅರ್ಜುನಾಚ್ಯಾ ರಥಾಚೊ ವಾಹಕ್ ಜಾಲ್ಲೊ...ಅನ್ಯಾಯ್ ಕರ್ತೆಲ್ಯಾಂಕ್ ಸಾರ್ಕೆಂ ಕರುಂಕ್ ಸಾಧ್ಯ್ ನಾಂ ತರ್ ಜಿವೆಶಿಂ ಮಾರ್ಚೆಂಯ್ ಸಾರ್ಕೆಂಚ್’ ಮ್ಹಣ್ ತ್ಯಾ ಸೊಮ್ಗೊಳಾನ್ ಸಾಂಗ್ಲ್ಲೆಂ ಮ್ಹಾಕಾ ವಯ್ ಮ್ಹಣ್ ಬೊಗ್ಲೆಂ. ಧಾರಾವಾಹಿಚೊ ತೊ ಅಂಕ್ಡೊ ಪಳೆಲ್ಲ್ಯಾ ರಾತಿಂ ಮ್ಹಾಕಾ ನಿಡ್ ಪಡ್ಲಿ ನಾಂ...ಕಾಮಿಲ್ ಬಾಪ್ಪುನ್ ಮೆಲ್ಲೆ ಶಿವಾಯ್ ಮಾಮ್ಮಿ ಆನಿಂ ತಾಚೆ ಮದ್ಲೊ ಸಂಬಂಧ್ ಚುಕೊಂವ್ಕ್ ಸಾಧ್ಯ್ ನಾತ್ಲ್ಲೊ - ಹಾಂವೆಂ ಮ್ಹಾಕಾಚ್ ಸಮ್ಜಯ್ಲೆಂ.
ಕಾಮಿಲ್ ಬಾಪ್ಪುಕ್ ಜಿವೆಶಿಂ ಮಾರ್ಚೆಂ ಕಶೆಂ ಮ್ಹಣ್ ಹಾಂವ್ ಚಿಂತುಂಕ್ ಲಾಗ್ಲೊಂ.
ದೋನ್ ಮಹಿನೆ ಉತ್ರೊನ್ ದಸೆಂಬರ್ ಮಹಿನೊ ಆಯ್ಲೊ. ಹ್ಯಾ ವರ್ಸಾಯ್ ಡ್ಯಾಡಿ ನತಲಾಂ ಫೆಸ್ತಾ ವೆಳಾರ್ ರಜೆರ್ ಯೆಂವ್ಚ್ಯಾರ್ ಆಸ್ಲ್ಲೊ.
ಡ್ಯಾಡಿ ನತಲಾಂ ಫೆಸ್ತಾಕ್ ಗಾವಾಕ್ ಆಯಿಲ್ಲೆ ವೆಳಾರ್ ಮಾಮ್ಮಿ ಆನಿಂ ಕಾಮಿಲ್ ಬಾಪ್ಪುಚ್ಯಾ ಸಂಬಂದಾಚಿ ಖಬರ್ ಸಾಂಗ್ಯೆತ್ ಮ್ಹಣ್ ಹಾಂವೆಂ ಪಯ್ಲೆಂ ಲೆಕ್ಲೆಂ, ಪೂಣ್ ಡ್ಯಾಡಿ ಕಿತೆಂಯ್ ಕರಿತ್ ಮ್ಹಳ್ಳೊ ಭರ್ವಸೊ ಮ್ಹಾಕಾ ನಾತ್ಲ್ಲೊ. ಡ್ಯಾಡಿ ಪಿಸಾಂತುರ್ ಜಾಯ್....ರಾಘು ಮೆಸ್ತ್ರಿನ್ ಸುರ್ವಾತೆರ್ ಯೆವ್ಜಿಲ್ಲೆಪರಿಂ ಆಪುಣ್ಂಚ್ ಗಳ್ಪಾಸ್ ಘೆವ್ನ್ ಜೀವ್ಘಾತ್ ಕರುಂಕ್ ವಚಾತ್ ಶಿವಾಯ್ ಕಾಮಿಲ್ ಬಾಪ್ಪುಕ್ ಲಗಾಡ್ ಕಾಡ್ಚೊ ನಾಂ.
ಪಯ್ಲೆಂ ಥಾವ್ನ್ ಡ್ಯಾಡಿ ಘರಾ ಆಯಿಲ್ಲೆ ವೆಳಾರ್ ಕಾಮಿಲ್ ಬಾಪ್ಪು ಸದಾಂಯ್ ಆಮ್ಗೆರ್ ಯೆತಾಲೊ... ಡ್ಯಾಡಿಕ್ ಖಂಯ್ ವಚೊಂಕ್ ಆಸಾ ತರ್ ಕಾರ್ ಚಲೊಂವ್ಕ್ ಕಾಮಿಲ್ ಬಾಪ್ಪುಚ್ ಯೆತಾಲೊ. ಆಮ್ಚ್ಯಾ ಸಯ್ರ್ಯಾಂಚ್ಯಾ ಘರಾ ವೆತಾನಾ, ಕಾರ್ಕೊಳ್ ಫೆಸ್ತಾಕ್ ವೆತಾನಾ ಆಶೆಂ ಡ್ಯಾಡಿ ಖಂಯ್ ವೆಚೊ ಆಸ್ಲ್ಯಾರ್ಯಿ ಕಾಮಿಲ್ ಬಾಪ್ಪು ಸಾಂಗಾಂತ್ ಚುಕಯ್ನಾತ್ಲ್ಲೊ. ಡ್ಯಾಡಿ ಆಸ್ತಾನಾಂಯ್ ತೊ ಆಮ್ಗೆರ್ ರಾವ್ತಾಲೊ. ಹ್ಯಾ ವರ್ಸಾಯ್ ಕಾಮಿಲ್ ಬಾಪ್ಪುಚ್ಯಾ ಚಾಲಿಂತ್ ದುಬಾವೊಂಕ್ ಸಾಧ್ಯ್ ಜಾಂವ್ಚೆಂ ಕಿತೆಂಚ್ ನಾತ್ಲ್ಲೆಂ. ತೊ ಮುಖ್ಲ್ಯಾನ್ ಬರ್ಯಾ ವಿಶ್ವಾಸಿ ಇಶ್ಟಾಪರಿಂ ನಟನ್ ಕರ್ತಾಲೊ. ಕೋಮಲ್ ಸೀರಿಯಲಾಂತ್ಲ್ಯಾ ಶ್ಯಾಮಾಕ್ ಆನಿಂ ಕಾಮಿಲ್ ಬಾಪ್ಪುಕ್ ಹೊ ಮಾತ್ರ್ ಫರಕ್ ಆಸ್ಲ್ಲೊ.
ಹೆ ಪಾವ್ಟಿಂ ರಜೆರ್ ಆಯಿಲ್ಲ್ಯಾ ಡ್ಯಾಡಿನ್ ಮ್ಹಜೆರ್ಯಿ ಬೆಜಾರಾಯ್ ಉಚಾರ್ಲ್ಲಿ. ’ತುಂ ಪಯ್ಲೆಂಚೆಪರಿಂ ಚೀತ್ ದೀವ್ನ್ ಶಿಕನಾಂಯ್ ಖಂಯ್, ಕ್ಲಾಸಿಂತ್ಯಿ ಧ್ಯಾನ್ ದೀನಾಂಯ್...ಮಾಮ್ಮಿಕಡೆ ಬರ್ಯಾನ್ ಉಲಯ್ನಾಂಯ್’ ಡ್ಯಾಡಿನ್ ತಶೆಂ ಸಾಂಗ್ಲ್ಲೆಂ ಮ್ಹಾಕಾ ವಿರಾರ್ ಕರುಂಕ್ ಲಾಗ್ಲೆಂ. ಹಾಂವ್ ಡ್ಯಾಡಿಚೊ ಇತ್ಲೊ ಮೋಗ್ ಕರ್ತಾಲೊಂ, ಡ್ಯಾಡಿಕ್ ಮ್ಹಜೆರ್ ಬೆಜಾರಾಯ್ ಆಯಿಲ್ಲಿ ಮ್ಹಾಕಾ ವಿಶೇಸ್ ಬೊಗ್ಲೆಂ.
ಕಾಮಿಲ್ ಬಾಪ್ಪು ಸಾಂಗಾಂತಾ ಆಸ್ತಾನಾ ಮಾಮ್ಮಿಕಡೆ ಮಾತ್ರ್ ನ್ಹಂಯ್ ಮ್ಹಾಕಾ ಡ್ಯಾಡಿಕಡೆ ಸಯ್ತ್ ಬರ್ಯಾನ್ ಉಲೊಂವ್ಕ್ ಜಾಯ್ನಾತ್ಲ್ಲೆಂ.. ಪುಣ್ ಹಾಂವ್ ಡ್ಯಾಡಿಕ್ ಕಶಿ ನೀಜ್ ಗಜಾಲ್ ಸಾಂಗೊಂ? ಹ್ಯಾ ಮ್ಹಜ್ಯಾ ಬದ್ಲಾಲ್ಲ್ಯಾ ನಡ್ತ್ಯಾಚೆ ಕಾರಣ್ ಡ್ಯಾಡಿಕ್ ಕಳಂವ್ಕ್ ಮ್ಹಜ್ಯಾನ್ ಸಾಧ್ಯ್ ನಾತ್ಲ್ಲೆಂ. ಮಾಮ್ಮಿನ್ ಆನಿಂ ಕಾಮಿಲ್ ಬಾಪ್ಪುನ್ ಡ್ಯಾಡೀಕ್ ಕರ್ಚೊ ಘಾತ್ ಹಾಮ್ವೆಂ ಸಾಂಗ್ಲ್ಯಾರ್ಯಿ ಸತ್ತಿ ಸ್ವಭಾವಾಚೊ ಮ್ಹಜೊ ಡ್ಯಾಡಿ ಪಾತ್ಯೆಂವ್ಚೊ ನಾಂ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ. ಡ್ಯಾಡಿಚೆಂ ಬೊಳೆಂಪಣ್, ತಾಚೊ ತೊ ಸಾದೊ ಜಿನೊಸ್, ಹೆರಾಂಕ್ ತಾಂಚ್ಯಾ ಉತ್ರಾಂಚೆರ್ಚ್ ಪಾತ್ಯೆಂವ್ಚೆಂ, ಘಾತ್ ಲಿಪೊನ್ ಆಸಾ ಮ್ಹಳ್ಳೊ ಕುಸ್ಕುಟಾ ತಿತ್ಲೊ ದುಬಾವ್ ನಾಸ್ಚೊ...ಡ್ಯಾಡಿಕ್ ಜಾಂವ್ಚೊ ಅನ್ಯಾಯ್ ಚಿಂತುನ್ ಹಾಂವ್ ಮ್ಹಜೆಯಿತ್ಲ್ಯಾಕ್ ಕಳ್ವಳೊನ್ ಉರ್ಲೊಂ.
ಡ್ಯಾಡಿ ಪಾಟಿಂ ಭಾಯ್ರ್ ಸರ್ತಾನಾ ಹಾಂವೆಂ ಏಕ್ ನಿಚೆವ್ ಕೆಲ್ಲೊ. ಡ್ಯಾಡಿನ್ ಮುಖ್ಲ್ಯಾ ನತಲಾಂ ಫೆಸ್ತಾಚೆ ರಜೆರ್ ಗರಾ ಯೆಂವ್ಚೆಂ ಬಿತರ್ ಕಾಮಿಲ್ ಬಾಪ್ಪುಚೆಂ ನಿರ್ಣಾಮ್ ಕರ್ತಲೊಂ. ಅನ್ಯಾಯಾ ಖಾತಿರ್ ಖುನ್ ಕರ್ಚೆಂಯ್ ಚೂಕ್ ನ್ಹಂಯ್ ಮ್ಹಣ್ ಕೋಮಲ್ ಸೀರಿಯಲಾಂತ್ ಸೊಮ್ಗೊಳಾನ್ ರಾಘು ಮೆಸ್ತ್ರಿಕ್ ಸಾಂಗ್ಲ್ಲೆಂ, ತೆಂ ಪರತ್ ಪರತ್ ದಾಕಾಯ್ತಾಲೆ - ಹಾಂವೆಂ ಜಿಕುನ್ ಧರ್ಲ್ಲೆಂ, ಹಾಂವೆಂಯ್ ತೆಂ ಮಾನುನ್ ಘೆತ್ಲ್ಲೆಂ. ಖುನ್ ಕರ್ತೆಲ್ಯಾಂಕ್ ಪಯ್ಶೆ ದೀವ್ನ್ ರಾಘು ಮೆಸ್ತ್ರಿನ್ಯಿ ಶ್ಯಾಮಾಚಿ ಖುನ್ ಕರಂವ್ಕ್ ತಯಾರಾಯ್ ಕೆಲ್ಲಿ.... ಮ್ಹಾಕಾ ತೆಂ ಸಾಧ್ಯ್ ನಾತ್ಲ್ಲೆಂ...ಆಮ್ಚ್ಯಾ ಗಾಂವಾಂತ್ ದುಕ್ರಾಚೆಂ ಮಾಸ್ ವಿಕ್ಚೊ ದುಜ್ಯಾಮ್ ಸೊಡ್ಳ್ಯಾರ್, ಮನ್ಶ್ಯಾಂಕ್ ಸೊಡ್ಯಾಂ ಮನ್ಜಾತಿಂಕ್ ಮಾರ್ತೆಲ್ಯಾಂಚಿ ಸಯ್ತ್ ಮ್ಹಾಕಾ ಖಬಾರ್ ನಾತ್ಲ್ಲಿ.
ಪೂನ್ ಕೋಮಲ್ ಸೀರಿಯಲ್ ಆತಾಂ ದುಸ್ರೆಚ್ ದಿಶಾರ್ ಚಲೊನ್ ಆಸ್ಲ್ಲೆಂ. ರಾಘು ಮೆಸ್ತ್ರಿನ್ ಶ್ಯಾಮಾಚಿ ಖುನ್ ಕರಯ್ಲಿ ನಾ. ಶ್ಯಾಮಾಚೆ ಬಾಯ್ಲೆಕ್ ಭಲಾಯ್ಕಿ ಬರಿ ನಾತ್ಲ್ಲಿ, ತಿಕಾ ರಗ್ತಾ - ಕೆನ್ಸರ್ ಜಾಲ್ಲೆಂ. ತಾಂಚ್ಯಾ ಏಕಾ ಭುರ್ಗ್ಯಾಚೆರ್ ರಾಘು ಮೆಸ್ತ್ರಿಕ್ ವಿಶೇಸ್ ಜತನ್ ಘೆಂವ್ಚಿ ಆಸಕ್ತ್ ಜಾಲ್ಲಿ. ತೆಂ ಭುರ್ಗೆಂ ಆಪ್ಣಾಚೆಂ ತಶೆಂ ಚಿಂತುಂಕ್ ಲಾಗ್ಲೊ ರಾಘು ಮೆಸ್ತ್ರಿ....ಹಾಂವೆಂ ಸೀರಿಯಲ್ ಸದಾಂಯ್ ಪಳೆಂವ್ಚೆಂ ರಾವಾಯ್ಲೆಂ. ಆಪ್ರೂಪ್ ಪಳೆತಾಲೊ...ಪೂಣ್ ತಾಂತು ಮ್ಹಾಕಾ ಆಸಕ್ತೆಚೆಂ ನಾತ್ಲ್ಲೆಂ.
ಡ್ಯಾಡಿ ಪಾಟಿಂ ಗೆಲ್ಲೆ ಉಪ್ರಾಂತ್ ಜಾಯಿತ್ತೆ ರಾತಿಂ ಕಾಮಿಲ್ ಬಾಪ್ಪು ಘರಾ ರಾವೊಂಕ್ ಆಯಿಲ್ಲೊ. ಎಕೇಕ್ ರಾತಿಂ ಭಾಯ್ರ್ ತಾಣಿಂ ಪಿಕ್ಚರಾಂ ಪಳೆವ್ನ್ ಆಸ್ಚೆಂ ಮ್ಹಾಕಾ ಕಳಿತ್ ಜಾತಾಲೆಂ. ಪುಣ್ ಹಾಂವೆಂ ಜನೆಲ್ ಉಗ್ತೆಂ ಕರ್ನ್ ಪಳೆಲೆಂ ನಾಂ. ಮ್ಹಾಕಾ ತಾಂಚೆರ್ ಪುರ್ತೊ ಕಾಂಠಾಳೊ ಆಯಿಲ್ಲೊ.
ಕಾಮಿಲ್ ಬಾಪ್ಪುಕ್ ಕಶೆಂ ತರ್ಯಿ ವಾಟೆ ವಯ್ಲೊ ಕಾಡಿಜೆ ಮ್ಹಳ್ಳಿಂ ಚಿಂತ್ನಾಂ ಮ್ಹಜೆಥಂಯ್ ವಾಡಾತ್ತ್ ಗೆಲಿಂ. ನಿದ್ಲ್ಲೆಕಡೆ ಸುರಿ ತೊಪ್ಚಿ, ಗೊಮ್ಟ್ಯಾಕ್ ವಾಯರ್ ವೊಡ್ಚೆಂ, ಪಿಸ್ತುಲ್ ಮೆಳ್ಳ್ಯಾರ್ ಗುಳೊ ಘಾಲ್ಚೊ...ನಾ ಖಂಚಿಯ್ ವಾಟ್ ಸುರಕ್ಶಿತ್ ನಾತ್ಲ್ಲಿ. ಕಾಮಿಲ್ ಬಾಪ್ಪು ಮೊರ್ಚೊ ನಾಂ ಆನಿಂ ಮೆಲ್ಯಾರ್ಯಿ ಹಾಂವ್ ಸಾಂಪ್ಡೊನ್ ಪಡೊಂಕ್ ಆಸಾ.
ತೆ ಏಕ್ ದೀಸ್ ನಂದುನ್ ಮ್ಹಾಕಾ ಅತುರಾಯೆಚಿ ಏಖ್ ಗಜಾಲ್ ಸಾಂಗ್ಲಿಂ. ತಾಚ್ಯಾ ಸಯ್ರ್ಯಾಂ ಬಿತರ್ ಎಕಾ ಕುಟ್ಮಾಚ್ಯಾ ಸರ್ವಾಂನಿ ಸಯನಾಯ್ಡ್ ಪಿಯೆವ್ನ್ ಜೀವ್ಗಾತ್ ಕೆಲ್ಲೊ. ಸಯನಾಯ್ಡ್ ಕಿತ್ಲೆಂ ಬಿರಾಂಕುಳ್ ವೀಕ್, ಕಿತೆಂಚ್ ರೂಚ್ ಆನಿಂ ಫರ್ಮಳ್ ನಾತ್ಲ್ಲೆಂ..ಖಂಯ್ಚ್ಯಾತ್ ಭರ್ಸುನ್ ದಿಲ್ಯಾರ್ಯಿ ಕಳನಾ....ನಂದುನ್ ಮ್ಹಾಕಾ ಸಾಂಗ್ಲ್ಲೆಂ. ಭಾಂಗಾರಾಚೆಂ ಕಾಮ್ ಕರ್ಚಾ ನಂದುಕ್ ಸಯನಾಯ್ಡ್ ಸಲೀಸಾಯೆನ್ ಮೆಳ್ತಾಲೆಂ.
ಮ್ಹಜ್ಯಾ ಮತಿಂತ್ ಏಕ್ ವಾಟ್ ದಿಸ್ಲಿಚ್.
ಪೂಣ್ ತಕ್ಶಣ್ ಹಾಂವೆಂ ನಂದೂಕ್ ಗಜಾಲ್ ಸಾಂಗ್ಲಿ ನಾಂ.
ದೋನ್ ದಿಸಾಂ ಉಪ್ರಾಂತ್ ಸಯನಾಯ್ಡ್ ಕಶೆಂ ವಾಪಾರ್ಯೆತ್ ಮ್ಹಣ್ ನಕ್ಕಿ ಕೆಲ್ಲೆ ಉಪ್ರಾಂತ್, ಸೆಜಾರ್ಚೊ ಏಕ್ ಪೆಟೊ ದೊಶಿ ದಿತಾ. ಕೊಣಾಯ್ಕ್ ಕಳಿತ್ ಜಾಯ್ನಾಶೆಂ ತಾಕಾ ಜಿವೆಶಿಂ ಮಾರುಂಕ್ ಮ್ಹಳ್ಳೆಂ ಕಾರಣ್ ಸಾಂಗೊನ್ ಮ್ಹಾಕಾ ಥೊಡೆಂಚ್ ಸಯಾನಾಯ್ಡ್ ಹಾಡ್ನ್ ದೀಶೆ ಹಾಂವೆಂ ನಂದುಕ್ ಒತ್ತಾಯ್ ಕೆಲಿ.
ಸುರ್ವಾತೆರ್ ನಂದು ಸಯನಾಯ್ಡ್ ಹಾಡ್ನ್ ದೀಮ್ವ್ಕ್ ಒಪ್ವಾಲೊಚ್ ನಾಂ. ಹಾಂವೆಂ ಹಪ್ತೊ ಪರ್ಯಾಂತ್ ಹರ್ ದೀಸ್ ಒತ್ತಾಯ್ ಕೆಲಿ. ನಿಮಾಣೆಂ ತಾಂಚ್ಯಾ ಆಂಗ್ಡಿಂತ್ ಕಾಮಾಚ್ಯಾ ಚೆಡ್ಯಾಕ್ ಘುಟಾನ್ ದೀವ್ನ್, ಲ್ಹಾನ್ ಸಿಸ್ಲೆಂತ್ ಸಯನಾಯ್ಡ್ ಹಾಡ್ನ್ ದಿಂವ್ಚೆಂ ಖಾತಿರ್ ನಂದುಕ್ ದೊನ್ಶಿಂ ರುಪಯ್ ದಿಲೆ. ತೆ ಉಪ್ರಾಂತ್ ಲಗ್ಬಗ್ ಹಪ್ತೊ ಗೆಲೊ. ನಂದುನ್ ಸಯನಾಯ್ಡ್ ಹಾಡ್ನ್ ದಿಲೆಂ. ಕೊಣಾಯ್ಕ್ ಕಳೊಂವ್ಕ್ ನಜೊ ಮ್ಹಣ್ ನಂದೂನ್ ಮ್ಹಜೆಕಡೆ ಭಾಸ್ ಘೆತ್ಲಿ.
ಎಕೇಕ್ ರಾತಿಂ ಕಾಮಿಲ್ ಬಾಪ್ಪು ತಡವ್ ಕರ್ನ್ ಯೆತಾ ಆನಿಂ ತಸೊ ಆಯಿಲ್ಲೊ ಮಾಮ್ಮಿಚ್ಯಾ ಕಬಟಾಂತ್ ಆಸ್ಚಿ ವಿಸ್ಕಿ ಪಿಯೆತಾ ಮ್ಹಣ್ ಮ್ಹಾಕಾ ಜೋಪ್ ಆಸ್ಲ್ಲೊ. ಆಮ್ಗೆರ್ ಡ್ಯಾಡಿಕ್ ವಾ ಮಾಮ್ಮಿಕ್ ಅಮಾಲ್ ಪಿಯೆಂವ್ಚಿ ಸವಯ್ ನಾತ್ಲ್ಲಿ. ಖಂಯ್ ಸಂಭ್ರಮಾಂಕ್ ಗೆಲ್ಲೆ ವೆಳಾರ್ ವಾ ಆಮ್ಗೆರ್ಚ್ ಹೆರಾಂ ಬಿಯೆರ್ - ವಿಸ್ಕಿ ಪಿಯೆತಾನಾಂಯ್ ಡ್ಯಾಡಿ ಆನಿಂ ಮಾಮ್ಮಿ ಫಕತ್ತ್ ಥಂಡ್ ಪೀವನ್ ಪಿಯೆತಾಲಿಂ.
ಮಾಮ್ಮಿಚ್ಯಾ ಕಬಟಾಂತ್ ಆಸ್ಚೆ ವಿಸ್ಕೆಕ್ ಸಯನಾಯ್ಡ್ ಭರ್ಸಿಲ್ಯಾರ್ ಜಾಲೆಂ. ಕಾಮಿಲ್ ಬಾಪ್ಪುಚಿ ಕಥಾ ಆಕೇರ್ ಕರುಂಕ್ ಹಾಚೆ ಪ್ರಾಸ್ ಬರಿ ವಾಟ್ ದುಸ್ರಿ ನಾತ್ಲ್ಲಿ. ಸಯನಾಯ್ಡ್ ಮೆಳ್ಚೆಂ ಪಯ್ಲೆಂಚ್ ಹಾಂವೆಂ ಯೆವ್ಜಣ್ ಕೆಲ್ಲೆಂ.
ನಂದುನ್ ದಿಲ್ಲೆಂ ಸಯನಾಯ್ಡ್ ಮ್ಹಜ್ಯಾ ಬುಕಾಂಚ್ಯಾ ಕಬಟಾಂತ್ ಥೊಡೆ ದೀಸ್ ಚತ್ರಾಯೆನ್ ದವರ್ಲೆಂ. ಸಯನಾಯ್ಡ್ ಮೆಳ್ಲ್ಲೆ ಉಪ್ರಾಂತ್ ಮ್ಹಾಕಾ ರಾತಿಚಿ ಸಾರ್ಕಿ ನೀದ್ಚ್ ಪಡ್ಲಿ ನಾಂ. ಮ್ಹಜಿ ನಿಮಾಣಿ ಪರೀಕ್ಶಾ ವೆಗಿಂ ಯೆಂವ್ಚ್ಯಾರ್ ಆಸ್ಲ್ಲಿ. ಆಶೆಂಚ್ ಟೆನ್ಶನ್ ಕರ್ನ್ ರಾವೊಂಕ್ ಸಾಧ್ಯ್ ನಾತ್ಲ್ಲೆಂ. ಪರೀಕ್ಶೆಚೆ ತಯಾರೆಕ್ ಅಡ್ಕಳ್ ಜಾತಾಲಿ. ಕಾಮಿಲ್ ಬಾಪ್ಪುಕ್ ತುರಂತ್ ಲಗಾಡ್ ಕಾಡ್ಚಿ ಗರ್ಜ್ ಆಸ್ಲ್ಲಿ. ತೊ ಸಮಸ್ಸೊ ನಿವಾರ್ಲ್ಯಾರ್ ಸರ್ವ್ ಸಾರ್ಕೆಂ ಜಾಯ್ತ್ ಮ್ಹಣ್ ಹಾಂವೆಂ ಚಿಂತ್ಲ್ಲೆಂ.
ಅನ್ಯಾಯ್ ಚುಕೊಂವ್ಕ್ ಜಿವೆಶಿಂ ಮಾರ್ಚಿಯ್ ಚೂಕ್ ನ್ಹಂಯ್. ಹಾಂವೆಂ ಕಿತ್ಲೆಪಾವ್ಟಿಂ ಜಾಯ್ತ್ ತೆಂ ನಿಯಾಳ್ಲ್ಲೆಂ!
ತೆ ಎಕಾ ದಿಸಾ ಪಯ್ಲೆಂಚ್ ಯೆವ್ಜಿಲ್ಲೆಪರಿಂ, ಮಾಮ್ಮಿ ನಾಂವ್ಕ್ ಗೆಲ್ಲೆ ವೆಳಾರ್ ಹಾಂವೆಂ ಹಳೂ ಹಳೂ ತಿಚೊ ಕಬಾಟ್ ಉಗ್ತೊ ಕರ್ನ್ ವಿಸ್ಕೆಚಿ ಬೋತ್ಲ್ ಕಾಡ್ಲಿ. ಇತ್ಲ್ಯಾರ್ಚ್ ಆರ್ದಿ ಮುಗ್ದಾಲ್ಲೆ ವಿಸ್ಕೆಕ್ ಹಾಂವೆಂ ಹಾಡ್ಲ್ಲೆಂ ಸಯನಾಯ್ಡ್ ಪುರ್ತೆಂ ಭರ್ಶಿಲೆಂ. ಸಯನಾಯ್ಡ್ ಹಾಡ್ಲ್ಲಿ ಸಿಸ್ಲಿ ಜನೆಲಾಂತ್ಲ್ಯಾನ್ ಪಯ್ಸ್ ಉಡಯ್ಲಿ.
ತೆ ರಾತಿಂ ಮಧ್ಯಾನ್ ಪರ್ಯಾಂತ್ ಹಾಂವ್ ನಿದ್ಲೊಂ ನಾ.....ಪೂಣ್ ಕಾಮಿಲ್ ಬಾಪ್ಪು ತೆ ರಾತಿಂ ಆಯ್ಲೊ ನಾಂ. ನಾ ತ್ಯಾ ಉಪ್ರಾಂತ್ಲೆ ಚಾರ್ ರಾತಿಂಯ್ ತೊ ಆಯ್ಲೊ ನಾಂ. ಮ್ಹಜೆ ಉಬ್ದೇಸ್ ಚಡೊನ್ಂಚ್ ಗೆಲೆ. ಕಾಮಿಲ್ ಬಾಪ್ಪು ಯೇನಾ ಜಾಯ್ತ್ ಆನಿಂ ಮಾಮ್ಮಿ ಹೆರ್ ಕೊಣಾಯ್ ಆಚಾನಕ್ ಆಯಿಲ್ಲ್ಯಾ ಸಯ್ರ್ಯಾಂಕ್ ವಿಸ್ಕಿ ದೀಸ್ ತರ್?
ಮ್ಹಜೆ ಚಡ್ಬಡೆ ಸಾಂಗ್ಚೆಂ ನ್ಹಂಯ್.
ತಸಲೆಂ ಅನಾಹುತ್ ಜಾಯ್ನಾಶೆಂ ಹಾಂವೆಂ ದೀಸ್ ರಾತ್ ಮಿನಿನ್ ಜೆಜುಕಡೆ ಮಾಗ್ಲೆಂ.
ಪಾಂಚ್ವ್ಯಾ ದಿಸಾ ಸಕಾಳಿಂ ಜಾಗ್ ಜಾತಾನಾ ಭಾಯ್ಲ್ಯಾ ಕುಡಾಂತ್ ಟೆಲಿವಿಶನ್ ಚಾಲು ಆಸ್ಚೆಂ ಆಯ್ಕಾಲೆಂ ಮ್ಹಾಕಾ. ಮಾಮ್ಮಿ ತಿತ್ಲೆ ಸಕಾಳಿಂ ಟಿ.ವಿ. ಘಾಲಿನಾತ್ಲ್ಲಿ.
ಕಿತೆಂ ತರ್ಯ್ ಚಡ್ ಉಣೆಂ ಜಾಲಾಂ. ಹಾಂವ್ ಘಾಬ್ರೆಲೊಂ. ಆದ್ಲೆ ರಾತಿಂ ಕಾಮಿಲ್ ಬಾಪ್ಪು ಆಯಿಲ್ಲೊ???
ಭಾಯ್ರ್ ವೆಚ್ಯಾಕ್ ಹಾಂವೆಂ ಮ್ಹಜ್ಯಾ ಕುಡಾಚೆಂ ದಾರ್ ಉಗ್ತೆಂ ಕರ್ನ್ ಲೊಟುಂಕ್ ಪಳೆಲೆಂ. ಮ್ಹಜ್ಯಾ ಕುಡಾಚ್ಯಾ ದಾರಾಕ್ ಭಾಯ್ಲ್ಯಾನ್ ಖಿಳ್ ಘಾಲ್ಲಿ.
ಘಳಾಯ್ ಕರಿನಾಸ್ತಾಂ ಹಾಂವೆಂ ಜನೆಲಾಚೆಂ ದಾರ್ ಪುರ್ತೆಂ ಕಾಡ್ಲೆಂ ಆನಿಂ ಭಾಯ್ಲೊ ಪಡ್ದೊ ಕುಶಿಕ್ ಕೆಲೊ.
ಭಾಯ್ಲ್ಯಾ ಕುಡಾಚ್ಯಾ ಸೊಫಾಚೆರ್ ಕಾಮಿಲ್ ಬಾಪ್ಪು ಆನಿಂ ಮಾಮ್ಮಿ ದೊಗಾಂಯ್ ಅವ್ಯವಸ್ಥ್ ಪಡ್ಲ್ಲಿಂ. ದೊಗಾಂಯ್ ರಾತಿಚ್ಯಾ ನೆಸ್ಣಾಚೆರ್ ಆಸ್ಲ್ಲಿಂ. ವಿಸಿಡಿ ಚಾಲು ಆಸ್ಲ್ಲಿ, ಪುಣ್ ಟಿ.ವಿ.ಚೆರ್ ಬೊಲ್ತೆಂಚ್ ಚಾನೆಲ್ ಚಲೊನ್ ಆಸ್ಲ್ಲೆಂ. ಟೀಪೊಯ್ಚೆರ್ ವಿಸ್ಕೆಚೆ ದೋನ್ ಗ್ಲಾಸ್ ಆಸ್ಲ್ಲೆ!!
ಹಾಂವೆಂ ಜನೆಲಾಥಾವ್ನ್ಂಚ್ ಮಾಮ್ಮಿಕ್ ತೀನ್ ಚಾರ್ ಪಾವ್ಟಿಂ ಜ್ಯೋರಾನ್ ಆಪಯ್ಲೆಂ..ಮಾಮ್ಮಿಚಿ ಕಿತೆಂಚ್ ಜಾಪ್ ನಾತ್ಲ್ಲಿ.
ಮಾಮ್ಮಿನ್ಯಿ ವಿಸ್ಕಿ ಪಿಯೆಂವ್ಕ್ ಧರ್ಲ್ಲಿ ಮ್ಹಾಕಾ ಕಳಿತ್ಚ್ ನಾತ್ಲ್ಲೆಂ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
