ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 75. ಆಗ್ಟೆಂ
ಬರ್ನಾಡ್ ಜೆ.ಕೋಸ್ತಾ: ಕುಂದಾಪುರ್ ಫಿರ್ಗಜೆಚೊ ಬರ್ನಾಡ್ ಜೆ.ಕೋಸ್ತಾ, ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ಕಾರ್ಯಾಳ್ ಬರಯ್ಣಾರ್, ನಾಟಕಿಸ್ತ್, ವಾವ್ರಾಡಿ. ಪಾಟ್ಲ್ಯಾ ತೀಸ್-ಚಾಳಿಸ್ ವರ್ಸಾಂ ಥಾವ್ನ್ ಸಭಾರ್ ರಿತಿಚಿಂ ಬರ್ಪಾಂ ತಾಣೆಂ ಬರಯ್ಲ್ಯಾಂತ್ ತಶೆಂಚ್ ಥೊಡ್ಯಾ ಬರ್ಪಾಂಕ್ ಇನಾಮಾಂ ಸಯ್ತ್ ಆಪ್ಣಾಯ್ಲ್ಯಾಂತ್.
ಬರ್ನಾಡ್ ಜೆ.ಕೋಸ್ತಾ
"ದೋನ್ ವರ್ಸಾಂಚಿ ಕಠಿಣ್ ಸಜಾ ಹಾಂವೆಂ ಭೊಗ್ಲಿ...." ಕೇಂದ್ರ್ ಕಾರಾಗ್ರಹ ಥಾವ್ನ್ ಭಾಯ್ರ್ ಮೇಟ್ ದವರ್ತಾನಾ ಸಾಯ್ಮಾನಾಚಾ ಮನ್ಪಟಲಾಚ್ಯಾ ಬಿತರ್ಚ್ ದ್ರಶ್ಯ್ ದಾಂವೊಂಕ್ ಲಾಗ್ಲೆಂ.
"ಮೈ ಲಾರ್ಡ್ ಹೊ ಸಾಯ್ಮನ್ ಕೇವಲ್ ಚೋರ್" ನ್ಹಯ್ ಏಕ್ ಭಯಂಕರ್ ಕ್ರೂರಿ, ರಾಗ್ ಆಯ್ಲ್ಯಾರ್ ಹೊ ಮನ್ಜಾತ್ ಜಾತಾ. ಕೇವಲ್ ಆಪ್ಣಾಕ್ ಪೊಲಿಸಾಂಚ್ಯಾ ಹಾತಿಂ ಸಾಂಪ್ಡಾಯ್ತಾತ್ ಮ್ಹಳ್ಳ್ಯಾ ಕಾರಣಾಕ್ ರಂಜನಾಕ್ ಹಾಣೆಂ ಪಾಂಚ್ ಪಾವ್ಟಿಂ ಸುರಿಯೆನ್ ಕೊಚಾಯ್ಲೊ. ಹ್ಯಾ ಪಾವ್ಟಿಂ ಸಮರ್ಪಕ್ ಸಾಕ್ಶೆಂ ದ್ವಾರಿ ತುಂಮ್ಕಾಂ ಹಾಚೊ ಅಪ್ರಾಧ್ ಹಾಂವೆ ದಾಖವ್ನ್ ದಿಲಾ. ದೆಕುನ್ ಅಸಲ್ಯಾ ಘೋರ್ ಅಪ್ರಾದ್ಯಾಕ್ ನ್ಯಾಯಲಯ್ ಜೀವಾಧಿ ಶಿಕ್ಶಾ ದೀಜೆ ಮ್ಹಣನ್ ವಿನಂತಿ ಕರ್ತಾ.... ಸಾಯ್ಮಾನಾಕ್ ಸರ್ಕಾರಿ ವಕೀಲಾಚಿ ಉತ್ರಾಂ ಪರ್ತ್ಯಾ ಪರ್ತ್ಯಾ ಆಯ್ಕಾತಾಂ ತಶೆಂ ಬೊಗ್ಲೆಂ.
ಸಾಯ್ಮನಾಕ್ ಹ್ಯಾ ಸರ್ಕಾರಿ ವಕೀಲಾಕ್ ಲಗಾಡ್ಚ್ ಕಾಡ್ಚ್ಯಾ ಇತ್ಲೊ ರಾಗ್ ಆಯ್ಲೊ ಪುಣ್ ಅನ್ಯೇಕಾ ಕುಶಿನ್ ಬಾಯ್ಲ್ ಭುರ್ಗ್ಯಾಂಚೆರ್ ಏಕ್ ದೀಷ್ಟ್ ಘಾಲಿಜೆ ಮ್ಹಣನ್ ಏಕಾ ಥರಾಚಿ ವೊಡ್ಣಿಂ ಧೊಸ್ಲಿ, ಪರಿಣಾಮ್ ಆಪ್ಶೆಂಚ್ ತಾಚಿ ಕದಮಾಂ ಅಪ್ಲ್ಯಾ ಜೊಪ್ಡ್ಯಾ ಥಂಯ್ ಚಮ್ಕೊಂಕ್ ಲಾಗ್ಲಿಂ.
’ಮಾಲಾ...ಮಾಲಾ.....ಸಾಯ್ಮನಾನ್ ಜೊಪ್ಡ್ಯಾಚ್ಯಾ ದಾರಾರ್ ರಾವೊನ್ ಉಲೊ ದಿಲೊ. ಭಾಯ್ರ್ ಆಯ್ಲೆಂ ಮಾಲಾ ಸಾಯ್ಮಾನಾಕ್ ಪಳೆವ್ನ್ ಸಂತೊಸಾನ್ ಭರ್ಲೆಂ. ಅನ್ಯೇಕಾ ಘಡಿಯೆನ್ ತೆಂ ರಾಗಾನ್ ತಿರಸ್ಕಾರಾಚಾ ನದ್ರೆನ್ ಪಳೆಲಾಗ್ಲೆಂ.
’ಮಾಲಾ ಹಾಂವ್ ತುಜೊ ಘೊವ್ ಆಯ್ಲಾ....’ ಸಾಯ್ಮನಾನ್ ಹಾಸೊಂಕ್ ಪ್ರಯತ್ನ್ ಕೆಲೆಂ.
’ವ್ಹಯ್ ಮ್ಹಜೊ ಘೊವ್ ಆಯ್ಲಾ ವ್ಹಡೊ ತೀರ್ ಮಾರ್ನ್ ಆಯ್ಲಾ! ಮಿಲಿಟ್ರಿ ಸೊಜೆರಾ ಭಾಶೆನ್ ಝುಜೊನ್ ಪಾಟಿಂ ಆಯ್ಲಾ, ದೆಕುನ್ ಸಂತೊಸ್ ಪಾವಾಜೆಗಿ..? ಹಾಂವೆಂ ತುಕಾ ಕಿತ್ಲ್ಯಾ ಪಾವ್ಟಿಂ ಸಾಂಗ್ಲೆಂ ಚೊರ್ಚೆಂ ನಾಗ್ಚೆಂ ಕಾಮ್ ಸೊಡ್ನ್ ಮರ್ಯಾದೆಚೆಂ ಖಂಯ್ಚೆಂ ತರಿ ಏಕ್ ಕಾಮ್ ಕರ್ ಮ್ಹಣನ್, ಮಾಲಾಚ್ಯಾ ದೊಳ್ಯಾಂನಿ ದುಃಖಾಂ ಗಳೊಂಕ್ ಲಾಗ್ಲಿಂ.
’ಮಾಲಾ ಹೆಂ ಪೂರಾ ಆತಾಂ ಸೊಡ್...ಕಿತೆಂ ತರೀ ಜೇಂವ್ಕ್ ಆಸ್ಲ್ಯಾರ್ ದೀ..ತುಜ್ಯಾ ಹಾತಾಚೆಂ ಜೆವಿನಾಸ್ತಾಂ ದೋನ್ ವರ್ಸಾಂ ಜಾಲಿ...’ ಸಾಯ್ಮಾನಾಚೆಂ ದೊಳೆ ಗಯ್ರೆ ಗಯ್ರೆಶೆ ಜಾಲೆಂ.
’ಹಾಂ..... ಜಾಯ್ತ್ ಜಾಯ್ತ್... ಪಯ್ಲೆಂ ತುಂ ನಿತಳ್ ಜಾವ್ನ್ ಯೇ...’ ಮ್ಹಳ್ಳೆಂಚ್ ಮಾಲಾ ಗಡ್ಬಡ್ ಕುಜ್ನಾ ತಿಶಿನ್ ಪಾವ್ಲೆಂ.
********
ಸಾಧಾರಣ್ ವ್ಹಡ್ ಬೊಂಗ್ಲೊ ತೊ. ತೀನ್ ದೀಸ್ ಥಾವ್ನ್ ಸಾಯ್ಮಾನ್ ತ್ಯಾ ಬೊಂಗ್ಲ್ಯಾ ವಯ್ರ್ ದೊಳೊ ದವರ್ನ್ ಆಸಾ. ಏಕ್ ಮಾತಾರಿ ಮಾತ್ರ್ ತ್ಯಾ ಘರಾಂತ್ ಜಿಯೆತಾ ಆನಿಂ ಏಕ್ ಕಾಮಾಚೆ ಬಾಯ್ಲ್ ಮನಿಸ್ ಕಾಮಾಕ್ ಯೇವ್ನ್ ಪಾಟಿ ವೆತಾ ಪುಣ್ ರಾತ್ಚೆಂ ಮಾತ್ರ್ ತಿ ಮಾತಾರಿ ಎಕ್ಲಿಚ್ ಆಸ್ತಾಂ, ಮ್ಹಣನ್ ಜಾಣಾ ಜಾಲೊ ಸಾಯ್ಮಾನ್ ಆಪ್ಲ್ಯಾ ಮತಿ ಬಿತರ್ ಏಕ್ ಯೋಜನ್ ಮಾಂಡ್ತಾ.
ದುಸ್ರ್ಯಾ ದಿಸಾ ಸಾಂಜೆರ್ ಸಾಯ್ಮನ್ ತ್ಯಾ ಬೊಂಗ್ಲ್ಯಾಚಾ ಘರ್ ಕಾಮಾಚಿ ಬಾಯ್ಲ್ ಬೊಂಗ್ಲೊ ಸೊಡ್ಚ್ಯಾ ಪಯ್ಲೆಂ ತ್ಯಾ ಬೊಂಗ್ಲ್ಯಾಚೊ ವ್ಹಡ್ ಜಯ್ತ್ ಪಾಗೊರ್ ಉಡೊನ್ ಬೊಂಗ್ಲ್ಯಾಚಾ ಪಾಟ್ಲ್ಯಾ ದಾರಾಲಾಗಿಂ ಪಾವ್ಲೊ. ಸಾಯ್ಮನಾನ್ ಚಿಂತಲ್ಯಾ ಭಾಶೆನ್ಂಚ್ ಜಾಲೆಂ ಪಾಟ್ಲೆಂ ದಾರ್ ಉಗ್ತೆಂಚ್ ಆಸ್ಲೆಂ. ಸಾಯ್ಮನಾನ್ ತಡೊವ್ ಕೆಲೊ ನಾ ತಕ್ಶಣ್ ತೊ ಬಿತರ್ ಘುಸ್ಲೊ. ಘರ್ ಕಾಮಾಚೆಂ ಜಾಂವ್ ಮಾತಾರಿ ಕೊಣ್ಯಿ ದಿಸ್ಲಿನಾಂತ್. ತೊ ಶೀದಾ ಮಾಳಿಯೆಚಿಂ ಮೆಟಾಂ ಚಡೊನ್ ಏಕಾ ರೂಮಾಂತ್ ಲಿಪೊನ್ ಬಸ್ಲೊ. ಥೊಡ್ಯಾ ವೆಳಾ ಉಪ್ರಾಂತ್ ಘರ್ ಕಾಮಾಚಿ ಬಾಯ್ಲ್ ಪಾಟ್ಲೆಂ ದಾರ್ ಬಂದ್ ಕರ್ನ್ "ಮುಖ್ಲೆಂ ದಾರ್ ಬಂಧ್ ಕರ್ನ್ ಘೆ ಮ್ಹಾಕಾ ವೇಳ್ ಜಾಲೊ.., ಮ್ಹಣೊನ್ ಪುರ್ಪುರಾಚ್ ಚಲ್ತೆಚ್ಚ್ ರಾವ್ಲಿ. ಮಾತಾರೆನ್ ಕಷ್ಟಾನಿಂ ಮುಖ್ಲೆಂ ದಾರ್ ಬಂದ್ ಕರ್ನ್ ಆಪ್ಲ್ಯಾ ಖಾಟ್ಲ್ಯಾರ್ ಯೇವ್ನ್ ಆಡ್ ಪಡ್ಲಿ. ಉಪ್ರಾಂತ್ಲೆಂ ಏಕ್ ವೊರ್ ಉತರ್ಲ್ಯಾರಿ ಸಾಯ್ಮನ್ ಸಕ್ಲಾ ದೆಂವ್ಲೊ ನಾಂ. ರಾತ್ ಜೂನ್ ಜಾಂವ್ಚ್ಯಾ ಖಾತಿರ್ ತೊ ಲಿಪೊನ್ ರಾಕೊನ್ ರಾವ್ಲೊ...!
ರಾತಿ ಸಾಡೆ ಆಟ್ ವೊರಾ ತಶೆಂ ಮಾತಾರಿ ಜೇವ್ನ್ ಪರ್ತ್ಯಾ ಪಾಟಿಂ ಆಪ್ಲ್ಯಾ ಕುಡಾಕ್ ಪಾವ್ಲಿ. ಸಾಯ್ಮನಾಕ್ಯಿ ಜೆಂವ್ಚಿ ಆಶಾ ಆಯ್ಲಿ, ಪುಣ್ ಆವಾಜ್ ಜಾವ್ನ್ ಮಾತಾರಿ ಖಂಯ್ ಬೊಬ್ ಮಾರಿತ್ ಜಾಲ್ಯಾರ್ ಆಪ್ಣೆಂ ಚಿಂತ್ಲೆಂ ಕಾಮ್ ನಿರ್ಫಳ್ ಜಾತೆಲೆಂ ಮಾತ್ರ್ ನ್ಹಯ್ ಪರ್ತ್ಯಾ ಪೊಲಿಸಾಂಚ್ಯಾ ಹಾತಿಂ ಸಾಂಪಡ್ನ್ ಮಾಗಿರ್ ಜೈಲಾಚೆಂ ಶಿತ್ ಜೆವಿಜೆ ಪಡ್ತೆಲೆಂ ಮ್ಹಣೊನ್ ವೊಗೊ ರಾವ್ಲೊಂ. ಚೊರಿ ರಾತಿಂ ಬಾರಾ ವೊರಾಂ ಉಪ್ರಾಂತ್ಚ್ ಕರ್ಚಿ ಮ್ಹಣೊನ್ ಯೋಜಿತ್ ಕೆಲ್ಲ್ಯಾನ್ ಸಾಯ್ಮನಾನ್ ಲ್ಹಾನ್ ನೀದ್ ಕಾಡ್ಚಿ ಆಲೋಚನ್ ಕರ್ನ್ ಥಂಯ್ಚ್ ನಿದೆಕ್ ವೆಂಗ್ಲೊ.
ರಾತಿ ದೇಡ್ ವೊರಾಂ ತಶೆಂ ಜಾಗ್ಲೊ ಸಾಯ್ಮನ್ ಆಪ್ಲೆಂ ಕಾರ್ಯೆಂ ಜ್ಯಾರಿ ಕರುಂಕ್ ಆಪುಣ್ ಲಿಪ್ಲ್ಲ್ಯಾ ಕುಡಾ ಥಾವ್ನ್ ಭಾಯ್ರ್ ಯೇವ್ನ್ ಮಾಳಿಯೆಚಿ ಮೆಟಾಂ ದೆಂವೊಂಕ್ ಲಾಗ್ಲೊ. ಮಾತಾರಿ ಜಾಗ್ ಜಾವ್ನ್ ಬೊಬ್ ಮಾರಿತ್ ವ ಪ್ರತಿರೋದ್ ದಾಕಯ್ತ್ ತರ್ ಮಾತಾರೆಕ್ ಸುರಿಯೆನ್ ರೊಂಬೊನ್ ವ ತಿಚಿ ಗೊಮ್ಟಿ ಚಿಡ್ಡುನ್ ನಿರ್ದಯೆನ್ ಮಾರ್ನ್ ಉಡೊಂವ್ಚೆಂ...!! ಸಾಯ್ಮನಾನ್ ಮತಿ ಬಿತರ್ಚ್ ಘಟ್ ಕೆಲೆಂ.
ಸಾಯ್ಮನ್ ಮಾತಾರೆಚ್ಯಾ ಕುಡಾಚ್ಯಾ ಲಾಗಿಂ ಲಾಗಿಂ ಪಾವ್ತನಾ ಮಾತಾರೆಚ್ಯಾ ಕುಡಾ ಥಾವ್ನ್ ವಳ್ವಳೆಂ ತಾಕಾ ಆಯ್ಕಾಶೆಂ ಬೊಗ್ಲೆಂ. ಕುಡಾಚಾ ದಾರಾರ್ ಪಾವೊನ್ ಪಳೆತಾಂ ತರ್ ಮಾತಾರಿ ಆಪ್ಲೆಂ ಹರ್ದೆಂ ದಾಂಬುನ್ ದರ್ನ್ ಸಕ್ಲಾ ಧರ್ಣಿರ್ ಪಡೊನ್ ವಳ್ವಳ್ತಾಲಿ. ತಿಚೊ ಏಕ್ ಹಾತ್ ಆಪ್ಣಾಕ್ ಕಿತೆಂಗಿ ಜಾಯ್ ಮ್ಹಳ್ಳ್ಯಾ ಭಾಶೆನ್ ವೊಡ್ಡುನ್ ಮುಖಾರ್ ವಚೊಂಕ್ ಪೆಚಾಡ್ತಾಲಿ, ಪುಣ್ ಜಾಯ್ನಾಸ್ತಾಂ ವದ್ದಾಡ್ತಾಲಿ.
’ದೆವಾ ಮ್ಹಾಕಾ ರಾಕ್....., ಕಾಂಪ್ಚಾ ಘಾಮಾನ್ ಬುಡೊನ್ ವಳ್ವಳ್ಚ್ಯಾ ಮಾತಾರೆನ್ ಮತಿ ಬಿತರ್ಚ್ ಹಾಕ್ ಮಾರ್ತಾ ವಯ್ರ್ ಆಸ್ಲ್ಲ್ಯಾ ಜೆಜುಚ್ಯಾ ಪೊಟ್ಯಾಚೆರ್ ತಿಣೆಂ ದೀಷ್ಟ್ ಚರೊಂಕ್ ವಯ್ರ್ ಪಳೆತಾನಾ, ದಾರಾರ್ ಏಕ್ ವ್ಯಕ್ತಿ ದಿಸ್ಲೊ ತಿಕಾ
! ತೊ ಜಾವ್ನಾಸ್ಲೊ, ಚೋರ್ ಸಾಯ್ಮನ್ ಹಾತಾಂತ್ ಸುರಿ ಘೆವ್ನ್ ಆಯ್ತೊ ಜಾವ್ನಾಸ್ಲೊ ಆಪ್ಣಾಕ್ ಕೊಚಾಂವ್ಕ್...!!
ಪುಣ್ ಮಾತಾರೆಚ್ಯಾ ಮನಾಂತ್ ಏಕ್ ಆಶಾ ಕೀರ್ಣ್ ಉಬ್ಜಾಲೆಂ "ಪುತಾ......ಕಷ್ಟಾಂನಿ ತಿಣೆಂ ಕಾಂಪ್ತಾ ಕಾಂಪ್ತಾ ತೊಂಡ್ ಉಘಡ್ಲೆಂ "ಮೆಜಾರ್ ಆಸ್ಲ್ಲ್ಯೊ ತೊ ಗುಳಿಯೊ ಆನಿಂ ಉದಾಕ್ ದೀ...."
"ಮಾತಾರೆ ಹಾಂವ್ ಚೋರ್, ಹಾಂವ್ ಚೊರುಂಕ್ ಆಯ್ಲಾ, ತುಕಾ ಉದಾಕ್ ಪಿಯೆವ್ನ್ ಸತ್ಕಾರ್ ಕರುಂಕ್ ನ್ಹಯ್. ಪಯ್ಲೆಂ ಸಾಂಗ್ ಕಬಾಟಾಚ್ಯೊ ಚಾವಿಯೊ ಖಂಯ್ ಆಸಾತ್ ಬರ್ಯಾನ್ ದೀ ನಾ ತರ್ ಹಾಂವೆಂ ಜಬರ್ದಸ್ತಿ ಕರಿಜೆ ಪಡ್ತೆಲೆಂ...
"ಚಾವಿಯೊಯಿ ತ್ಯಾ ಮೆಜಾಚ್ಯಾ ಡ್ರಾವರಾಂತ್ ಆಸಾತ್ ಘೆ. ತುಂವೆಂ ಹ್ಯಾ ಘರಾಂತ್ಲೆಂ ಜಾಯ್ ಆಸ್ಲ್ಲೆ ಘೇವ್ನ್ ವಚ್ಯೆತ್, ಪುಣ್ ತ್ಯಾ ಮೆಜಾರ್ ಆಸ್ಲ್ಲ್ಯಾ ಗುಳಿಯೊ ಆನಿಂ ಉದಾಕ್ ದೀ.... ಮ್ಹಾಕಾ ಏಟೆಕ್ ಆಯ್ಲಾ...., ಮಾತಾರಿ ಉಲಂವ್ಕ್ ಕಷ್ಟಾಲಿ.
ಸಾಯ್ಮನಾನ್ ತಕ್ಶಣ್ ಮೇಜಾಚೆಂ ಡ್ರಾವರ್ ಉಗ್ತೆಂ ಕೆಲೆಂ. ಥಂಯ್ಸರ್ ಚಾವಿಯಾಂಚೊ ಘೊಸ್ ದಿಸ್ಲೊಚ್ ತೊ ತಾಣೆಂ ಘೆತ್ಲೊ, ಉಪ್ರಾಂತ್ ಇಲ್ಲೆಶ್ಯಾ ಸಮಾಧಾನೆನ್ ಮಾತಾರೆಚೆರ್ ತಾಣೆಂ ದೀಷ್ಟ್ ಪರ್ತಾಯ್ಲಿ. ತಾಕಾ ಬಿರ್ಮೊತ್ ದಿಸ್ಲಿ, ತಿಚೆಂ ವಳ್ವಳೆಂ ತಾಕಾ ಪಳೆಂವ್ಕ್ ಜಾಲೆಂ ನಾ. ಸಾಯ್ಮನಾನ್ ಮೆಜಾರ್ ಆಸ್ಲ್ಲಿ ಗುಳಿಯೆಚಿ ಬೊತ್ಲ್ ಆನಿಂ ಉದಾಕ್ ಮಾತಾರೆಕ್ ದಿಲೆಂ. ಮಾತಾರಿ ಗುಳಿಯೆ ಸೆಂವ್ಕ್ ಕಷ್ಟಾಲಿ. ಸಾಯ್ಮನಾನ್ ಗುಳಿಯೊ ಖಾವೊವ್ನ್ ಉದಾಕ್ ಪಿವಯ್ಲೆಂ..!
ಸಾಯ್ಮನ್ ಖುದ್ಧ್ ಚಿಂತುಂಕ್ ಲಾಗ್ಲೊ ’ಹಾಂವ್ ಚೋರ್ ಕ್ರೂರಿ..ಹಾಂವ್ ಕಶೆಂ ಮೊವಾಳ್ಳೊ....ಹೆಣೆಂ ಜಾಗೊನ್ ಆಡ್ಕಳ್ ಕೆಲ್ಯಾರ್ ಮಾರ್ನ್ಂಚ್ ಉಡಯ್ಜೆ ಮ್ಹಣ್ ಆಯ್ಲೊ ಕಸಾಪಿ ಹಾಂವ್....ಹಾಂವೆ ಚೊರಿ ಕೆಲ್ಲ್ಯಾಕ್ ಸಾಕ್ಸ್ ಹಿ ಜಾವ್ನಾಸಾ ಹಿಕಾ ಜೀವಂತ್ ಸೊಡ್ಚೆಂ ಸಾರ್ಕೆಂಗಿ...? ಹಿಕಾ ಗುಳಿಯೊ ದಿಲ್ಲ್ಯೊ ಚೂಕ್ ಜಾಲಿ! ಹಿಕಾ ಆತಾಂ ಗೊಮ್ಟಿ ಚಿಡ್ಡುನ್ ಮಾರ್ನ್ ಉಡವ್ಚೆಂಚ್ ಸಾರ್ಕೆಂ ಸಾಯ್ಮನಾನ್ ದಾಂತ್ ಮುಟಿ ಆರ್ನಿಲಿ,
ತೆದಾಳಾಚ್ ಮಾತಾರಿ ಕಸ್ಕಸ್ಲಿ "ಮ್ಹಜ್ಯಾ ಪುತಾ...,"
"ಮ್ಹಜ್ಯಾ ಪುತಾ...., ಮ್ಹಣೊನ್ ಮಾತಾರೆಚ್ಯಾ ತೋಂಡಾ ಥಾವ್ನ್ ಆಯ್ಕಾಲೆಂಚ್ ಸಾಯ್ಮನ್ ಪರ್ತ್ಯಾನ್ ಗಳೊನ್ ಗೆಲೊ "ಮ್ಹಾಕಾ ಅನ್ಯೇಕ್ ಉಪ್ಕಾರ್ ಕರ್, ಫೋನಾ ಲಾಗಿಂಚ್ ನಂದನ್, ಹೊಸ್ಪಿಟ್ಲಾಕ್ ಫೋನ್ ಕರ್ "ವಿಲ್ಸನ್ ವಿಲ್ಲಾಚಿ ಏಲಿಜ್ ಬಾಯೆಕ್ ಏಟೆಕ್ ಜಾಲಾಂ ಮ್ಹಣೊನ್ ಫೋನ್ ಕರ್ ತಕ್ಶಣ್ ಆಂಬುಲೆನ್ಸ್ ಯೇಂವ್ಕ್....., ಮಾತಾರೆಚ್ಯಾ ದೊಳ್ಯಾ ಥಾವ್ನ್ ದುಃಖಾಂ ದೆಂವಾಲಾಗ್ಲಿಂ.
ಸಾಯ್ಮನಾಕ್ ಕಿತೆಂ ಬೊಗ್ಲೆಗಿಂ, ತೊ ತಕ್ಶಣ್ ಮಾತಾರೆನ್ ಸಾಂಗ್ಲ್ಲ್ಯಾ ಭಾಶೆನ್ ಫೊನಾಲಾಗಿಂ ಘುವೊನ್ ಫೋನ್ ಕೆಲೊ ತಾಣೆಂ. ನಂತರ್ ತಾಣೆಂ ವೇಳ್ ಪಾಡ್ ಕೆಲೊ ನಾಂ ಕಬಾಟಾಚ್ಯಾ ಚಾವಿಯೆನಿಂಚ್ ಕಬಾಟ್ ಉಗ್ತೆಂ ಕರ್ನ್ ಹಾತಾಕ್ ಮೆಳ್ಲ್ಲೆಂ ಭಾಂಗಾರ್, ಕ್ಯಾಶ್ ಪಯ್ಶೆಂ ಘೆವ್ನ್ ತೊ ಸುಟ್ಲೊ.
"ಏಲಿಜ್ ಬಾಯೆ ಹಾಂವ್ ಚಲ್ತಾಂ ಅನ್ಯೇಕಾ ಘಡಿಯೆನ್ ಏಂಬುಲೆನ್ಸ್ ಯೆತಾ..., ಸಾಯ್ಮನಾನ್ ಮಾತಾರೆಕ್ ತಿಕ್ಕೆಶೆಂ ಮೊವಾಳಾಯೆನ್ ದೆಖ್ಲೆಂ.
"ಜಾಯ್ತ್, ಮ್ಹಳ್ಳ್ಯಾ ಭಾಶೆನ್ ಹಾಳು ಮಾತೆ ಹಾಲಯ್ಲೆಂ ಏಲಿಜ್ ಬಾಯೆನ್.
ಸಾಯ್ಮನಾನ್ ಮುಖ್ಲೆಂ ದಾರ್ ಉಗ್ತೆಂ ದವರ್ಲೆಂ. ಆಸ್ಪತ್ರೆಚ್ಯಾ ಶಿಬಂದೆನ್ ಬಿತರ್ ಯೆಂವ್ಚ್ಯಾ ಖಾತಿರ್ ಆನಿಂ ಪಾಟ್ಲ್ಯಾ ದಾರಾಂತ್ಲ್ಯಾನ್ಂಚ್ ಭಾಯ್ರ್ ಪಡ್ಲೊ. ಪುಣ್ ಕಪೌಂಡಾಚಾ ಭಾಯ್ರ್ ವಚೊನ್ ರಾಕೊನ್ ರಾವ್ಲೊ. ಥೊಡ್ಯಾ ವೇಳಾನ್ ಎಂಬುಲೆನ್ಸ್ ಆಯ್ಲೆಂ ಆನಿಂ ಎಲಿಜ್ ಬಾಯೆಕ್ ವರ್ನ್ ಗೆಲೆಂ. ತ್ಯಾ ಉಪ್ರಾಂತ್ಚ್ ಸಾಯ್ಮನಾಕ್ ಏಕಾ ಥರಾಚೆಂ ಸಮಧಾನ್ ಬೊಗ್ಲೆಂ ಆನಿಂ ತೊ ಆಪ್ಲಿ ವಾಟ್ ಧರ್ನ್ ಕಾಳೊಕಾಂತ್ ಮಾಯಾಕ್ ಜಾಲೊ. ಪುಣ್ ಏಲಿಜ್ ಬಾಯೆಚೆಂ ಘಟನ್ ತಾಚ್ಯಾ ಮಾತ್ರ್ ಮತಿ ಥಾವ್ನ್ ಮಾಯಾಕ್ ಜಾಲೆಂ ನಾಂ.
ಹೆಂ ಘಟನ್ ಮಾತ್ರ್ ಸಾಯ್ಮನಾನ್ ಆಪ್ಲೆಂ ಬಾಯ್ಲೆಕ್ ಕಳಿತ್ ಕೆಲೆಂ ನಾ. ಕಾರಾಣ್ ಪರ್ತ್ಯಾನ್ ಆಪ್ಣೆಂ ಚೊರುಂಕ್ ಆರಂಭ್ ಕೆಲ್ಲೆಂ ಮಾಲಾಕ್ ಕಳಿತ್ ನಾತ್ಲ್ಲೆಂ. ಎಲಿಜ್ಬಾಯ್ ’ನಂದನ್ ಹೊಸ್ಫಿಟ್ಲಾಂತ್ ಬರಿ ಜಾವ್ನ್ ಯೆತಾಲಿ. ಸಾಯ್ಮನಾಕ್ ಜಬ್ಬೊರ್ ಆಶಾ ದೊಸ್ತಾಲಿ, ಏಕ್ ಪಾವ್ಟಿಂ ತರೀ ಏಲಿಜ್ ಬಾಯೆಕ್ ಪಳೆಜೆ ಮ್ಹಣೊನ್. ತಿ ವಾಂಚ್ಲ್ಯಾಗಿ ವಾಂಚ್ಲ್ಯಾರ್ ತಿಣೆಂ ಪೊಲಿಸ್ ದೂರ್ ದೀವ್ನಾಂ ಕಿತ್ಯಾಕ್................? ದೂರ್ ದಿಲ್ಲೆಂ ತರ್ ಎದೊಳ್ ಬಿತರ್ ಪೊಲಿಸ್ ಸೊದುನ್ ಘರಾ ಯೆತೆ ಆಸ್ಲ್ಲೆ. ನ್ಹಯ್ ಮಾತಾರಿ ಮೆಲಿಗಿ ಕಿತೆಂ..? ಸಾಯ್ಮನ್ ಖಂತಿಷ್ಟ್ ಜಾಲೊ. ತಾಣೆಂ ನಿರ್ಧಾರ್ ಕೆಲೊ ಏಕ್ ಪಾವ್ಟಿಂ ಹೊಸ್ಪಿಟ್ಲಾಕ್ ವಚೊನ್ ಏಲಿಜ್ ಬಾಯೆಕ್ ಪಳೆಂವ್ಚೆ ಮ್ಹಣೊನ್. ತಶೆಂ ಹೊಸ್ಪಿಟ್ಲಾಚ್ಯಾ ರಿಸೆಪ್ಶನ್ ಕೌಂಟರಾರ್ ಏಲಿಜ್ ಬಾಯೆಚೆಂ ರೂಮ್ ವಿಚಾರ್ನ್ ಸಾಯ್ಮನ್ ಥಂಯ್ಸರ್ ಪಾವ್ಲೊ. ಎಲಿಜ್ಬಾಯ್ ಖಾಟ್ಲ್ಯಾರ್ ಬಸೊನ್ ಆಸ್ಲ್ಲಿ. ದಾರಾರ್ ಪಾವ್ಲ್ಲೊ ಸಾಯ್ಮನ್ ಎಲಿಜ್ಬಾಯ್ ಜೀವಂತ್ ಆಸ್ಲ್ಲೆಂ ಪಳೆವ್ನ್ ಪಾಟ್ಲ್ಯಾ ಪಾಯಾನ್ ಧಾಂವೊನ್ ವೆಚೆಂ ಮ್ಹಣೊನ್ ಚಿಂತಾನಾ, ಏಲಿಜ್ ಬಾಯೆನ್ಂಚ್ ಉಲೊ ದಿಲೊ "ಯೇ ಪುತಾ ಬಿಯೆನಾಕಾ...., ಮೊಗಾನ್ ತಿಣೆಂ ಆಪಯ್ಲೊಂ.
ಪರ್ತ್ಯಾ ಪುತಾ ಮ್ಹಳೆಂ ಆಯ್ಕಾಲೆಂಚ್ ಸಾಯ್ಮನ್ ಗಳೊನ್ ಗೆಲೊ. ಹ್ಯಾ ಪಾವ್ಟಿಂ ಸಾಯ್ಮನಾಚೆಂ ದೊಳೆ ಬಿಜೊನ್ ಆಯ್ಲೆಂ...! ಸಾಯ್ಮನ್ ಬಿಯಾನ್ಂಚ್ ಏಲಿಜ್ ಬಾಯೆ ಸರ್ಶಿಂ ಪಾವ್ಲೊಂ. "ಪುತಾ ತುಂವೆಂ ಮ್ಹಜೊ ಜೀವ್ ವಾಂಚಾಯ್ಲಾಯ್..ದೆಕುನ್ ಹಾಂವ್ ತುಜೊ ಉಪ್ಕಾರ್ ಬಾವುಡ್ತಾಂ..., ಎಲಿಜ್ ಬಾಯೆನ್ ಹಾತ್ ಜೊಡ್ಲೆಂ.
"ಮಾಂಯ್ ಹಾಂವ್ ಏಕ್ ಚೋರ್ ಜಾವ್ನಾಸಾ...ತುಂವೆಂ ಮ್ಹಾಕಾ ಹಾತ್ ಜೊಡ್ಚೆಂಗಿ? ಹಾಂವೆಂ ತುಜೆಂ ಬಾಂಗಾರ್ ಆನಿಂ ಪಯ್ಶೆ ಚೊರ್ಲಾಂ...., ಸಾಯ್ಮನಾಕ್ ಸೊಸುಂಕ್ ಜಾಲೆಂ ನಾ.
"ಪುಣ್ ಪುತಾ ತುವೆಂ ಮ್ಹಜೊ ಜೀವ್ ವಾಂಚಾಯ್ಲಾಯ್....ತುಂವೆಂ ಚೊರ್ಲೆಂ ತೆಂ ಮ್ಹಜ್ಯಾ ಜಿವಾ ಪ್ರಾಸ್ ವರ್ತೆಂ ನ್ಹಯ್. ಹಾಂವ್ ಜಾಣಾಂ ತುಜೆಂಲಾಗಿಂ ಮನ್ಶಾಪಣ್ ಆಸಾ ಮ್ಹಣೊನ್ ನಾ ತರ್ ತುಂ ಹಾಂಗಾಸರ್ ಮ್ಹಾಕಾ ಪಳೆಂವ್ಕ್ ಯೆನಾತ್ಲೊಯ್...,.
"ವ್ಹಯ್ ಹಾಂವೆಂ ಲ್ಹಾನ್ ಆಸ್ತಾನಾ ಮ್ಹಜ್ಯಾ ಮಾಂಯ್ಕ್ ಹೊಗ್ಡಾವ್ನ್ ಘೆತ್ಲೆಂ..., ಸಾಯ್ಮನಾಚೊ ಗಳೊ ಭರೊನ್ ಆಯ್ಲೊ.
"ತುಜೆಂ ನಾಂವ್ ಕಿತೆಂ, ತುಂ ಕಾಜಾರಿ..? ಏಲಿಜ್ ಬಾಯೆನ್ ವಿಚಿತ್ರ್ ಸವಾಲ್ ಕೆಲೆಂ.
"ಮ್ಹಜೆಂ ನಾಂವ್ ಸಾಯ್ಮನ್ ವ್ಹಯ್ ಹಾಂವ್ ಕಾಜಾರಿ, ತೆಂ ಮ್ಹಜ್ಯಾ ತಸಲ್ಯಾ ಚೊರಾಲಾಗಿಂ ಕಾಜಾರ್ ಜಾವ್ನ್, ಅನ್ಯೇಕ್ ಘರ್ಚೊ ಗಸ್ಟೊ ಕಾಡ್ನ್ ಆಸಾ....ಮ್ಹಜ್ಯಾ ಭುರ್ಗ್ಯಾಂಕ್ ಪೊಸ್ಚ್ಯಾ ಖಾತಿರ್, ಮ್ಹಾಕಾ ಏಕ್ ಚೆರ್ಕೊ ಏಖ್ ಚೆಡುಂ ಭುರ್ಗೆಂ ಆಸಾ...,
"ವ್ಹಯ್ಗಿ...ಭಾರಿ ಸಂತೊಸಾಚಿ ಗಜಾಲ್....ಪುಣ್ ಸಾಯ್ಮಾನ್, ತುಜಿ ನೀಜ್ ಆವಯ್ ಹೊಸ್ಪಿಟ್ಲಾಂತ್ ಆಸ್ಲಿ ತರ್ ಎಕ್ಲ್ಯಾಕ್ಚ್ ಹೊಸ್ಪಿಟ್ಲಾಂತ್ ಸೊಡ್ತಾಂ ಆಸ್ಲೊಯ್ಗಿ..?
"ನಾ ನಾ.., ಸಾಯ್ಮನಾನ್ ತಕ್ಷಣ್ ಜಾಪ್ ದಿಲಿ.
"ಪುತಾ ಸಾಯ್ಮನ್...ಆತಾಂ ಮ್ಹಾಕಾ ಪುತಾಚಿ ಆನಿಂ ಸುನೆಚಿ ಗರ್ಜ್ ಆಸಾ...ಮ್ಹಜಿ ಸೆವಾ ಕರ್ತೆಲಿ ಮಸ್ತ್ ಜಣ್ ಆಸಾತ್...ಪುಣ್ ನಿಸ್ವಾರ್ಥ್ ನ್ಹಯ್...ಮ್ಹಜಿ ಸೆವಾ ನಿಸ್ವಾರ್ಥಾನ್ ಕರ್ತೆಲ್ಯಾಂಚಿ ಗರ್ಜ್ ಆಸಾ....ತುಜ್ಯಾ ಪತಿಣೆಕ್ ಮ್ಹಜ್ಯಾ ಸೆವೆಕ್ ದಾಡ್ತಾಯ್ಗಿ..?
"ಖಂಡಿತ್ ಮಾಂಯ್.... ಮ್ಹಳ್ಳೆಂಚ್ ಸಾಯ್ಮನ್ ಪಾಟಿಂ ಘರಾ ದಾಂವ್ಲೊಚ್. "ಸಾಯ್ಮನಾನ್ ಮ್ಹಾಕಾ ಮಾಂಯ್ ಮಾಂಯ್ ಮ್ಹಳೆಂ..ಮಾಂಯ್...! ಹೊ ಸಬ್ದ್ ಆಯ್ಕೊಂಕ್ ಹಾಂವ್ ಕಿತ್ಲೆಂ ದೀಸ್ ಚಡ್ಪಡ್ಲಿ...., ಏಲಿಜ್ ಬಾಯೆಚ್ಯಾ ದೊಳ್ಯಾಂನಿ ದುಃಖಾಂ ದೆಂವ್ಲಿ.
********
ಎಲಿಜ್ಬಾಯ್ ಬರಿ ಜಾವ್ನ್ ಘರಾ ಆಯ್ಲಿ. ಎಕಾ ದಿಸಾ ಸಾಯ್ಮನ್ ಆಪ್ಲಿ ಪತಿಣ್ ಆನಿಂ ಆಪ್ಲ್ಯಾ ದೋಗ್ ಭುರ್ಗ್ಯಾಂಕ್ ಚೆಡೊ ಆನಿಂ ಚೆಡ್ವಾಕ್ ಘೆವ್ನ್ ಎಲಿಜ್ಬಾಯೆಚ್ಯಾ ಘರಾ ಆಯ್ಲೊ.
"ಯೇ ಪುತಾ ಯೇ ತುಕಾ ಪಳೆನಾಸ್ತಾನಾ ದೊಳೆ ವೊಳ್ನ್ ಗೆಲ್ಲೆಂ.... ಏಲಿಜ್ ಬಾಯೆನ್ ಕಾಳ್ಜಾಚ್ಯಾ ಗುಂಡಾಯೆ ಥಾವ್ನ್ ಆಹ್ವಾನ್ ಕೆಲೊ.
"ಮಾಂಯ್ ತುವೆಂ ಪುತಾ ಮ್ಹಣೊನ್ ಆಪಯ್ತಾನಾ ಮ್ಹಜೆಂ ಕಾಳಿಜ್ ಕಿಮ್ಚುನ್ ಯೆತಾ...ಹಾಂವೆಂ ಆನಿಂ ಮ್ಹಜೆ ಬಾಯ್ಲ್ ಮಾಲಾನ್ಯಿ ಲ್ಹಾನ್ ಆಸ್ತಾನ್ಂಚ್ ಆವಯ್ ಬಾಪಾಯ್ಕ್ ಹೊಗ್ಡಾಂವ್ಕ್ ಘೆತ್ಲೆಂ ಆಶೆಂ ಆಮಿಂ ದೊಗಾಯಿಂ ಆವಯ್ಚೊ ಮೊಗ್ ಹೊಗ್ಡಾಂವ್ಕ್ ಘೆತ್ಲಿ ನಿರ್ಭಾಗಿ ಆಮಿಂ. ಆಸಲ್ಯಾ ಅನಾಥಾಂಕ್ ಪುತಾ ದುವೆ ಮ್ಹಣೊನ್ ಮೋಗ್ ದಾಕಂವ್ಚ್ಯಾ ತುಜ್ಯಾ ತಸಲ್ಯಾ ದೇವೊತ್ ಸ್ತ್ರೀಯೆಕ್ ಆನ್ಯಾಯ್ ಕೆಲ್ಯಾರ್ ದೇವ್ ಮ್ಹಾಕಾ ಬೊಗ್ಸುಂಚೊ ನಾಂ... ಮ್ಹಳ್ಳೆಂಚ್ ಸಾಯ್ಮನಾನ್ ಏಕ್ ಪೊಟ್ಲಿ ಏಲಿಜ್ ಬಾಯೆಚ್ಯಾ ಪಾಂಯಾ ಥಳಾಂ ದವರ್ನ್ ಏಲಿಜ್ ಬಾಯೆಚೆಂ ಪಾಯ್ ದರ್ನ್ ರಡಲಾಗ್ಲೊ. "ಮಾಂಯ್ ಮ್ಹಾಕಾ ಮಾಫ್ ಕರ್. ಹಾಂವ್ ಪಾತ್ಕಿ ಮ್ಹಾಕಾ ಮಾಫ್ ಕರ್...,
"ಹೆಂ ಕಿತೆಂ ತುಮ್ಚೆಂ..! ಕಿತೆಂ ಜಾಲೆಂ ತುಂಮ್ಕಾಂ? ಎಲಿಜ್ಬಾಯ್ ಗುಸ್ಪೊಡ್ಲಿ.
"ಸಾಯ್ಮನಾನ್ ಜೆಂ ಕಿತೆಂ ಕರುಂಕ್ ನಾಕಾ ಆಸ್ಲ್ಲೆಂ ತೆಂ ಪೂರಾ ಮ್ಹಜೆಲಾಗಿಂ ಸಾಂಗ್ಲಾಂ.......ಮಾಲಾಯಿ ದೊಳೆ ಬಿಜೊನ್ ರಡ್ತಾಲೆಂ. "ಮಾಂಯ್ ಹೆಂ ತಾಣೆಂ ತುಜೆಂ ಚೊರ್ಲ್ಲೆಂ ಭಾಂಗಾರ್ ಆನಿಂ ಪಯ್ಶೆಂ ಜಾವ್ನಾಸಾತ್.. ಪಯ್ಶೆ ಮಾತ್ರ್ ಇಲ್ಲೆಶೆಂ ಹಾಣೆಂ ಖರ್ಚುನ್ ಸೊಡ್ಲ್ಯಾತ್ ಆಮ್ಕಾಮ್ ಮಾಪಿ ಆಸೊಂದಿ.... ಮಾಲಾನ್ ಹಾತ್ ಜೊಡ್ಲೆಂ.
"ಕಿತೆಂ ಹೆಂ ಮ್ಹಜ್ಯಾ ಭುರ್ಗ್ಯಾಂನೊ, ಕಿತೆಂ ಮಾಫಿ ತುಂಮ್ಕಾಂ ಹಾಂವ್ ದೀಂವ್....ಮಾಲಾ, ಸಾಯ್ಮಾನಾನ್ ದೆವಾ ಭಾಶೆನ್ ಯೇವ್ನ್ ಮ್ಹಜೊ ಜೀವ್ ವಾಂಚಾಯ್ಲಾ. ಮ್ಹಜ್ಯಾ ಜೀವಾ ಪ್ರಾಸ್ ವರ್ತೆಂಗಿ ಹೆಂ ಬಾಂಗಾರ್ ದುಡು...? ತ್ಯಾ ವೆಳಾ ಮ್ಹಜೊ ಜೀವ್ ವಾಂಚಾಯ್ಲ್ಯಾಕ್ ಜೊಕ್ತೊ ಪ್ರತಿಫಳ್ ಜಾವ್ನ್ ಆಸಾ ಹೊ. ದೆಕುನ್ ಹೆಂ ಬಾಂಗಾರ್ ದುಡು ತುಂಮ್ಚೆಚ್ ಜಾವ್ನಾಸಾ ಜಾಯ್ತೆಂ...?
"ನಾ ನಾ ಆನಿಕೀ ಮ್ಹಾಕಾ ಲಜೆಕ್ ಘಾಲಿನಾಕಾತ್ ತುಂಮ್ಚೆಂ ಧನ್ ಬಾಂಗಾರ್ ಪಾಟಿಂ ಘೆಯಾ... ಸಾಯ್ಮನಾಚೊ ತಾಳೊ ಗದ್ಗದಿತ್ ಜಾಲೊ.
"ಸಾಯ್ಮನ್ ಮ್ಹಾಕಾ ಆತಾಂ ಧನ್ ಬಾಂಗಾರಾಚಿ ಗರ್ಜ್ ನಾಂ. ಮ್ಹಾಕಾ ಆತಾಂ ಗರ್ಜ್ ಆಸಾ ಭುರ್ಗ್ಯಾಂಚೊ ಮೋಗ್, ಭುರ್ಗ್ಯಾಂಚೊ ಸಾಂಗಾಂತ್, ಹುಸ್ಕೊ ಆಪ್ಲೆಂ ಮ್ಹಳ್ಳೆಂ ಮನ್ಶಾಚೊ ಬಾಂಧವ್....
ಏಲಿಜ್ ಬಾಯೆಚೊ ತಾಳೊ ಗದ್ಗದಿತ್ ಜಾಲೊ. "ಸಾಯ್ಮನ್ ಹಾಂವ್ ಎಕ್ಸುರ್ಪಣಾಚ್ಯಾ ಅಗ್ಟ್ಯಾಂತ್ ಝಳೊನ್ ಆಸಾ....ಎಲಿಜ್ಬಾಯ್ ಮುಖಾರ್ ಉಲಂವ್ಕ್ ಸಕ್ಲಿನಾ ತಿ ಭುರ್ಗ್ಯಾ ಭಾಶೆನ್ ಹುಸ್ಕೊನ್ ಹುಸ್ಕೊನ್ ರಡ್ಲಿ.
ಸಾಯ್ಮನ್ ಆನಿಂ ಮಾಲಾ ಏಕ್ ಕ್ಷಣ್ ಭರ್ ಆರ್ ಮಾರ್ಲ್ಲ್ಯಾ ಭಾಶೆನ್ ಜಾವ್ನ್ ಫಾತೊರ್ ತಶೆಂ ಮೌನ್ ಉಭಿ ಜಾಲಿಂ ತಿಂ. ಥೊಡ್ಯಾ ವೇಳಾ ಉಪ್ರಾಂತ್ಚ್ ತಿಂ ದೊಗಾಂಯ್ ಏಲಿಜ್ ಬಾಯೆಲಾಗಿಂ ಧಾಂವೊನ್ ಆಯ್ಲಿಂ. "ಮಾಂಯ್ ರಡನಾಕಾ...ಮಾಲಾಚ್ಯಾ ದೊಳ್ಯಾ ಥಾವ್ನ್ಯಿ ದುಃಖಾಂ ಆಯ್ಲಿಂ. ಎಲಿಜ್ಬಾಯ್ ಖೂಬ್ ರಡ್ಲಿ.
"ಹಾಂವ್ ಪಯ್ಲೆಂ ಆಶೆಂ ಎಕ್ಸುರಿ ನಾತ್ಲ್ಲಿ...ರಡೊನ್ ರಡೊನ್ ಪುರೊ ಜಾಲೆಂಚ್ ಏಲಿಜ್ ಬಾಯೆಚೊ ತಾಳೊ ಮೋವ್ ವ್ಹಾಳ್ಳೊಂ. "ಮ್ಹಜೆಂ ಕಾಜಾರ್ ಜಾಲೆಂ ಭುರ್ಗಿಂ ಜಾಲಿ, ಬರೊ ಪತಿ, ಹಾಂವ್ ಭೋವ್ ಖುಶ್ ಮನಿಸ್ ಜಾವ್ನಾಸ್ಲಿ, ಪುಣ್ ಭುರ್ಗಿಂ ವ್ಹಡ್ ಜಾಲಿಂ ಶಿಕಾಪ್ ಜಾಲೆಂ ಕಾಜಾರ್ ಜಾಲಿಂ ವಿದೇಶಾಕ್ ಪಾವ್ಲಿ. ತ್ಯಾ ಉಪ್ರಾಂತ್ಚ್ ಉಣೆಂಪಣ್ ದೊಸುಂಕ್ ಲಾಗ್ಲೆಂ. ಭುರ್ಗ್ಯಾಂನಿ ವಿದೇಶಾ ಥಾವ್ನ್ ಯೆಂವ್ಚೆಂಚ್ ಉಣೆಂ ಕೆಲೆಂ. ಪಯ್ಶೆಂ ದಾಡ್ತಾಲಿಂ ಶಿವಾಯ್ ಆಮ್ಚ್ಯಾ ಘೊವ್ ಬಾಯ್ಲೆ ವಿಶಿಂ ತಾಂಕಾಂ ಕಾಂಯ್ ಖಂತ್ ಹುಸ್ಕೊಚ್ ನಾತ್ಲ್ಲೊ. ಭುರ್ಗಿಂ ವಿದೇಶಾಂತ್ ಆಪಾಪ್ಲೆಂ ಕಾರ್ಭಾರ್ ಚಲವ್ನ್ ಘೆವ್ನ್ ಬಾಯ್ಲ್ ಭುರ್ಗ್ಯಾಂ ಸವೆಂ ತಿಂ ವಿದೇಶಾಚ್ಯಾ ಜಿಣಿಯ್ಯೆಕ್ ವೆಂಗೊನ್ ವಿದೇಶಾಂತ್ಚ್ ಸ್ಥಾಪಿತ್ ಜಾಲಿಂ, ಪುಣ್ ಆವಯ್ ಬಾಪಾಯ್ಕ್ ಖಾಲಿ ಫೋನಾಚೆರ್ ಮಾತ್ರ್ ಮೋಗ್ ಸಯ್ಲಾಪ್, ಆಮ್ಕಾಂ ಪಳೆಂವ್ಕ್ ಕಾಮಾಚೆ ಮನಿಸ್ ಆಯಾ ದಾಕ್ತೆರ್ ನರ್ಸ್. ಪುಣ್ ಹಿಂ ಸಕ್ಕಡ್ ಆಮ್ಕಾಂ ಜಾಯ್ ಆಸ್ಲ್ಲೊ ಮೋಗ್ ಹುಸ್ಕೊ ಆಫ್ಲೆಂಪಣ್ ಬಾಂದವ್ಪಣ್ ದೀಂವ್ಕ್ ಸಕ್ತಾತ್ಗಿ..? ಎಲಿಜ್ಬಾಯ್ ಏಕ್ ಘಡಿ ರಾವ್ಲಿ.
"ಮ್ಹಜೊ ಪತಿ ಅಂತರ್ಲೊ, ಹಾಂವ್ ದುಃಖಾನ್ ಬುಡ್ಲಿ ತ್ಯಾ ವೆಳಾ ಯೇವ್ನ್ ಗೆಲ್ಲಿಂ ಭುರ್ಗಿಂ ಆತಾಂ ಪಾಂಚ್ ವರ್ಸಾಂ ಉತರ್ಲಿ. ಮ್ಹಾಕಾ ಆತಾಂ ದುಸ್ರ್ಯಾ ಪಾವ್ಟಿಂ ಹಾರ್ಟ್ ಏಟೆಕ್ ಜಾಲ್ಯಾರಿ ಯೇಂವ್ಕ್ ನಾಂತ್...ಸಯ್ರ್ಯಾಂಕ್ ಕಾಮಾಚ್ಯಾಂಕ್ ಕಳವ್ನ್ ಮ್ಹಜಿ ಸೇವಾ ತಾಣಿಂ ಕರಯ್ಲಿ. ದಾಕ್ತೆರಾಂಕ್ ಕಳವ್ನ್ ಚಿಕಿತ್ಸಾ ಕರುಂಕ್ ದರ್ಭಸ್ತ್ ದುಡು ದಾಡ್ಲೊ. ಪುಣ್ ಹಾಂವೆಂ ಆಶೆಂವ್ಚೊ ಖರೊ ಹುಸ್ಕೊ ಸಾಂಗಾಂತ್ ಮೋಗ್ ಮೆಳ್ಳೊ ನಾ." ಏಲಿಜ್ ಬಾಯೆಚ್ಯಾ ದೊಳ್ಯಾ ಥಾವ್ನ್ ದುಃಖಾಂ ಗಳೊಂಕ್ ಲಾಗ್ಲಿಂ.
"ಮ್ಹಾಕಾ ಜಾಯ್ ಭುರ್ಗ್ಯಾಂಚೊ ಮೋಗ್, ತಾಂಚೊ ಜಾಯ್ ಹುಸ್ಕೊ, ಘರಾಂತ್ ಮನ್ಶ್ಯಾಂಚೆಂ ಸಬ್ದ್ ಉಲೊವ್ಣೆಂ...ಲ್ಹಾನ್ ನೆಂಟ್ಯಾ ಭುರ್ಗ್ಯಾಂಚೊ ಆವಾಜ್ ಖೆಳ್, ತಶೆಂ ತುಂಮ್ಚ್ಯಾ ಭುರ್ಗ್ಯಾ ಭಾಶೆನ್, ಪುಣ್ ಮ್ಹಜಿ ಮ್ಹಳಿಂ ನಾತ್ರಾಂ ಭುರ್ಗಿಂ ಸರ್ವ್ ಆಸೊನ್ಯಿ ಹಾಂವ್ ಹಾಂತುನ್ ವಂಚಿತ್ ಜಾಲಾಂ. ಹಾಂವ್ ಎಕ್ಸುರ್ಪಣಾಚ್ಯಾ ಅಗ್ಟ್ಯಾಂತ್ ಜೀವಂತ್ ಝಳೊನ್ ಆಸಾ. ಪುಣ್ ಹೆಂ ಆಗ್ಟೆಂ ತುಂ ಪಾಲ್ವೊಂಕ್ ಸಕ್ತಾಯ್ ಸಾಯ್ಮನ್" ಏಲಿಜ್ ಬಾಯೆಚ್ಯಾ ದೊಳ್ಯಾಂನಿ ಆಶಾ ಕಿರಣ್ ದಿಸ್ಲೆಂ.
"ತೆಂ ಕಶೆಂ...? ಸಾಯ್ಮನ್ ಗಡ್ಬಡ್ಲೊ.
"ತುಮಿಂ ಆವಯ್ಚ್ಯಾ ಮೊಗಾ ಥಾವ್ನ್ ವಂಚಿತ್ ಜಾಲ್ಯಾತ್ ಜಾವ್ನಾಸಾತ್, ಹಾಂವ್ ಭುರ್ಗಿಂ ನಾತ್ರಾಂ ಆಸೊನ್ಯಿ ತಾಂಚ್ಯಾ ಮೊಗಾ ಥಾವ್ನ್ ಸಳಾವಳೆ ಥಾವ್ನ್ ವಂಚಿತ್ ಜಾಲ್ಯಾಂ, ವಂಚಿತ್ ಜಾಲ್ಲಿಂ ಆಮಿಂ ಕಿತ್ಯಾಕ್ ಎಕಾಮೆಕಾ ಮಾಂದುನ್ ಘೆವ್ನ್ ಪೂತ್ ಆನಿಂ ಆವಯ್ ಮ್ಹಳ್ಳ್ಯಾ ಸಂಬಂದಾನ್ ಜಿಯೆಂವ್ಕ್ ನಜೊ. ಹಾಂವ್ ತುಜ್ಯಾ ಬಾಯ್ಲೆಕ್ ಸುನ್ ತಶೆಂ ಧುವೆ ಭಾಶೆನ್ ಪಳೆತಾಂ, ತುಜ್ಯಾ ಭುರ್ಗ್ಯಾಂಕ್ ಮೊಗಾಚಿ ಆಜಿ ಜಾತಾ..... ಎಲಿಜ್ ಬಾಯೆಚ್ಯಾ ವಾಂಟ್ಯಾಕ್ ಎಕ್ಸುರ್ಪಣಾಚೆಂ ಆಗ್ಟೆಂ ಇತ್ಲೆಂ ಭಿರಾಂಕುಳ್ ಜಾವ್ನಾಸ್ಲೆಂಗಿ ಹೊ ನಿರ್ಣಯ್ ಘೆಂವ್ಕ್ ತಿ ಮಜ್ಬೂರ್ ಜಾಲಿಂ.
"ನಾ ಮಾಂಯ್ ನಾ ಆಮಿಂ ಹಾಕಾ ಯೋಗ್ಯ್ ನ್ಹಯ್ ಹಾಂವ್ ಏಕ್ ಚೊರ್, ಸಮಾಜೆಂತ್ ಮ್ಹಾಕಾ ಸ್ಥಾನ್ ಮಾನ್ ನಾ, ಹಾಂವ್ ದುಷ್ಟೊ ಜಾವ್ನಾಸಾ, ಆಮಿಂ ಅನಾಥ್, ಆಮ್ಕಾಂ ಚಾಲ್ ಚಮ್ಕಾಣ್ ನಾಂ ತುಜೆ ತಸಲ್ಯಾ ಮರ್ಯಾದ್ವಂತಾ ಥಂಯ್ ಜಿಯೆಂವ್ಕ್ ಆಮ್ಕಾಂ ಖಂಡಿತ್ ಯೋಗ್ಯತಾ ನಾಂ... ಸಾಯ್ಮನ್ ಹಾತ್ ಜೊಡಿಲಾಗ್ಲೊ.
"ಯೋಗ್ಯತಾ..! ಹಾಂವ್ ಜಾಣಾಂ ಜಾಲಿಂ..ಯೋಗ್ಯತಾ ನಾತ್ಲ್ಲಿ ತರ್ ತುಂ ಹೆಂ ಬಾಂಗಾರ್ ದೆಣೆಂ ಪಾಟಿಂ ಹಾಡಿನಾತ್ಲ್ಲೊಯ್, ಆನಿಂ ತುಂ ಪರಿಸ್ಥಿತೆಕ್ ಲಾಗೊನ್ ದುಷ್ಟೊ ಜಾಲೊಯ್ ಜಾಂವ್ಕ್ ಪುರೊ, ಪುಣ್ ತುಂ ಮುಳಾವಿ ದುಷ್ಟೊ ನ್ಹಯ್, ನಾಂ ತರ್ ತುಂ ಮ್ಹಾಕಾ ತ್ಯಾ ದಿಸಾ ಮರ್ಣಾ ಥಾವ್ನ್ ಬಚಾವ್ ಜಾಂವ್ಕ್ ಕುಮಕ್ ಕರಿನಾತ್ಲ್ಲೊಯ್.... ದೆಕುನ್ ಹಾಂವೆಂ ತುಕಾ ವಿಂಚ್ಲಾಂ..
"ನಾಂ ಮಾಂಯ್ ನಾಂ ಹಾಂವ್ ಹಾಕಾ ಯೋಗ್ಯ್ ನ್ಹಯ್... ಸಾಯ್ಮನಾಕ್ ದುಃಕ್ ತಡ್ವೊಂಕ್ ಜಾಲೆಂ ನಾ. ತೊ ಗಳ್ಗಳ್ಯಾಂ ರಡ್ಲೊ.
"ಸಾಯ್ಮನ್ ಆತಾಂ ತುಂ ಮ್ಹಾಕಾ ಮೊರೊಂಕ್ ಸೊಡ್ತಾಯ್ಗಿ? ಏಲಿಜ್ ಬಾಯೆಚೊ ತಾಳೊ ಪೊಂಡಾ ಥಾವ್ನ್ ಆಯ್ಕಾಶೆಂ ಬೊಗ್ಲೆಂ ಸಾಯ್ಮನಾಕ್.
"ನಾಂ ಮಾಂಯ್ ನಾಂ.... ಉದ್ವೇಗಾನ್ ಭರೊನ್ ಯೇವ್ನ್ ಸಾಯ್ಮನಾನ್ ಹಾತ್ ನಾ ನಾ ಮ್ಹಣ್ಚ್ಯಾ ಭಾಶೆನ್ ವಾರ್ಯಾರ್ ಹಾಲಾಯ್ಲೆಂ.
"ತರ್ ತುಜ್ಯಾ ಬಾಯ್ಲೆಕ್, ಭುರ್ಗ್ಯಾಂಕ್ ಮ್ಹಜೆಲಾಗಿಂ ಯೇಂವ್ಕ್ ಸೊಡ್, ಎಲಿಜ್ಬಾಯ್ ಉಸ್ಮೊಡ್ಲಿ.
"ವ್ಹಚ್ ಮಾಲಾ... ವ್ಹಚಾ ಭುರ್ಗ್ಯಾಂನೊ ತುಂಮ್ಚ್ಯಾ ವ್ಹಡ್ಲಿ ಮಾಂಯ್ಲಾಗಿಂ.....ಸಾಯ್ಮನಾನ್ ಏಕ್ ದುಃಖಿ ಮಿಶ್ರಿತ್ ಸಮಾಧಾನೆಚೊ ಶ್ವಾಸ್ ಸೊಡ್ಲೊ.
"ವ್ಹಡ್ಲಿ ಮಾಂಯ್.. ವ್ಹಡ್ಲಿ ಮಾಂಯ್... ಮ್ಹಣೊನ್ ಉಲೊ ಮಾರ್ನ್ ಸಾಯ್ಮನಾಚಿ ಭುರ್ಗಿಂ ಏಲಿಜ್ ಬಾಯೆಕ್ ಪೊಟ್ಲುನ್ ಧರ್ತಾನಾ, ಏಲಿಜ್ ಬಾಯೆಕ್ ಪಾವ್ಸ್ ವೊತಲ್ಲ್ಯಾ ಭಾಶೆನ್ ಜಾವ್ನ್ ಪಾಲ್ವೊಂಚೆಂ ಖಚಿತ್ ಲಕ್ಶಣ್ ದಿಸೊನ್ ಆಯ್ಲೆಂ ಎಕ್ಸುರ್ಪಣಾಚೆಂ ತಿಚೆಂ ’ಆಗ್ಟೆಂ’.
********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
