ಕವಿತಾकविताPoem
ಕವಿತಾಪಾಠ್ - 15: ಗಝಲ್ - (ಏಕ್ ಅಧ್ಯಯನ್)
ಗಝಲ್ - ಏಕ್ ಅಧ್ಯಯನ್
ಕವಿತಾಪಾಠ್ - 15
ಸಾಂಜ್ ಜಾಲಿ
ತುವೆಂ ಯೆತಾಂ ಮ್ಹಳೆಂಯ್, ರಾಕೊನ್ ರಾಕೊನ್ ಸಾಂಜ್ ಜಾಲಿ
ಮೋಗ್ ನಾಸ್ತಾಂ ವರ್ಸಾಂ ಗಳ್ಳಿಂ, ಆತಾಂ ಜಿಣ್ಯೆಚಿ ಸಾಂಜ್ ಜಾಲಿ
ಗೆಲೊ ಎಕಾ ಸಕಾಳಿಂ, ಸೊಧುನ್ ಮೋಗ್ ಸಂಸಾರಿಂ
ಜಿಣಿಂಚ್ ಕಾಬಾರ್ ಜಾಲಿ, ತವಳ್ ಮೊಗಾಚಿ ಸಾಂಜ್ ಜಾಲಿ
ಮೊಳ್ಬಾರ್ ಏಕ್ ನೆಕೆತ್ರ್ ಉದೆಲೆಂ, ತಾರಾಂ ಮೆಜ್ತಾಂ ಮೆಜ್ತಾಂ
ಮಧೆಂಚ್ ಲೇಕ್ ಚುಕ್ಲೆಂ, ಆನಿ ಚಾನ್ನ್ಯಾಚಿ ಸಾಂಜ್ ಜಾಲಿ
ಸತಾಚಾ ಘರಾಂತ್ ನಿತಿಚೆಂ ಪಾಕೆಂ ಭಾಂದುಂಕ್ ಲಾಗ್ಲೊಂ
ಫಟಿನ್ ಅಶೀಯ್ ಧಾಡ್ ಘಾಲಿ, ಆಬ್ಳೆ ಸತಾಚಿ ಸಾಂಜ್ ಜಾಲಿ
ಕಾಳ್ಜಾಂತ್ ಕಿತೆಂ ಲಾಸ್ಲೆಂ, ಸಾಂಗ್ ಮ್ಹಾಕಾ ತುಂ ’ಕ್ವಾಡ್ರಸ್’
ಗಾಂವಾರ್ ಗಾಂವ್ ಧುಂವರ್ ಉಟ್ಲೊ, ಅಶಿ ಕವಿಚಿ ಸಾಂಜ್ ಜಾಲಿ.
ಗಝಲಾಂ - ಏಕ್ ಅಧ್ಯಯನ್ [- ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಗಝಲಾಂಚಿ ಚರಿತ್ರಾ:
ಗಝಲಾಂಚಿ ಚರಿತ್ರಾ ಜಾಯ್ತ್ಯಾ ಬುಕಾಂನಿ ವಾಚುಂಕ್ ಮೆಳ್ತಾ ತರ್ಯ್ ಗಝಲಾಂಚೊ ಚಡ್ ಪ್ರಯೋಗ್ ಜಾಲಾ ಭಾರತ್ ಆನಿ ಪಾಕಿಸ್ತಾನಾಂತ್ ತರ್ಯ್ ಗಝಲಾಂ ಎಕಾ ರಿತಿಚಿಂ ಅಪುರ್ಭಾಯೆಚಿಂ ಕವಿತಾ. ಗಝಲಾಂಚಿಂ ಮುಳಾಂ ಪ್ರಾಚೀನ್ಯ್ ಅರೆಬಿಕ್ ಸಂಸ್ಕೃತೆಥಾವ್ನ್ ಯೆತಾತ್ ಮ್ಹಣ್ಚಾಕ್ ಜಾಯ್ತೆ ದಾಖ್ಲೆ ಆಸಾತ್. ಅರೇಬಿಕ್ ಭಾಸೆಂತ್ ಗಝಲ್ ಮ್ಹಳ್ಯಾರ್ ಸ್ತ್ರೀಯೆಲಾಗಿಂ/ಚೆಡ್ವಾಲಾಗಿಂ ಉಲಂವ್ಚೆಂ. ಪುಣ್ ಗಝಲಾಂಚಿ ಸುರ್ವಾತ್ ಜಾಲ್ಲಿ ಅರೆಬಿಕ್ ಭಾಸೆಂತ್ ನ್ಹಂಯ್ ಬಗಾರ್ ಪರ್ಶಿಯನ್ ಭಾಶೆಂತ್ಲಿಂ ’ಖಸಿಡಾ’. ಆನಿ ’ಖಸಿಡಾ’ ಪರ್ಶಿಯಾ ಥಾವ್ನ್ ಇರಾನಾಕ್ ಆಯಿಲ್ಲೆಂ ಚಡುಣೆಂ ಧಾವ್ಯಾ ಶೆಕ್ಡ್ಯಾಂತ್ ಮ್ಹಣ್ ಧಾಖ್ಲೆ ಸಾಂಗ್ತಾತ್.
’ಖಸಿಡಾ’ ಮ್ಹಳ್ಯಾರ್ ವಾಖಣ್ಣುಂಚೆಂ. ಚಡಾವತ್ ಜಾವ್ನ್ ರಾಂಯಾಚಿ, ದೆವಾಚಿ ವ ಮಾನ್-ಮನ್ಶಾಂಚಿ ವಾಖಣ್ಣಿ ಕರ್ಚಾಕ್ ಕವಿಂನಿ ಗಳ್ಸಿಲ್ಲೆಂ ಕವಿತಾಚೆಂ ಮಧ್ಯಮ್. ಖಸಿಡಾಂತ್ ಚಡ್ ಜಾವ್ನ್ ವಾಚುಂಕ್ ಮೆಳ್ಚೊ ಕವಿತಾಚೊ ರಸ್ ಜಾವ್ನಾಸಾ ’ಭಕ್ತಿರಸ್’ (ಭಕ್ತ್ ಉಚಾರ್ಣಿ) ತರ್ಯ್ ಖಸಿಡಾಂತ್ ಥೊಡೆ ಪ್ರಕಾರ್ ಆಸಾತ್, ತಾಂತ್ಲೊ ಏಕ್ ಪ್ರಕಾರ್ ’ತಶ್ಬಿಬ್’ - ಆನಿ ಹೊ ವಿಭಾಗ್ ವೆಳಾಕಾತೆಕಿದ್ ಬದ್ಲೊನ್ ಗಝಲಾಚಾ ರುಪಾಕ್ ಪಾವ್ಲೊ. ಬರ್ಪಾರಿತಿರ್ ’ಖಸಿಡ’ ಆನಿ ’ಗಝಲ್’ ಮಧೆಂ ಚಡ್ ತಫಾವತ್ ನಾ, ’ಖಸಿಡ’ ಂತ್ ದೋನ್ ವೊಳಿಂಚ್ಯೊ ಶೆಂಬೊರ್ ವಾ ಚಡ್ ಸಾಲ್/ವೊಳಿ ಆಸ್ಯೆತಾ ಪುಣ್ ಗಝಲಾಂತ್ ಚಡಾವತ್ ಜಾವ್ನ್ ಧಾ-ಭಾರಾಂಕ್ ಮಿಕ್ವೊನ್ ಆಸಾನಾಯೆ. ಜೆರಾಲ್ ರಿತಿನ್ ಚಾರ್ ಥಾವ್ನ್ ಸಾತ್ ಶೇರ್ ಆಸ್ತಾತ್. (ಶೇರ್ ಮ್ಹಳ್ಯಾರ್ ದೋನ್ ಸಾಲಾಂಚಿ ಏಕ್ ಕವಿತಾ).
ಭಾರತಾಂತ್ ಗಝಲಾಂ:
ಗಝಲಾಂಚೊ ಭಾಂದ್ ಸಂಗೀತಾಸವೆಂ ಭೋವ್ ಲಾಗ್ಶಿಲೊ, ಕಿತ್ಯಾಕ್ ಮ್ಹಳ್ಯಾರ್ ಗಝಲಾಂನಿ ಚಡಾವತ್ ಬೆಹೆರ್ (ಮಿಟರ್) ಆಸ್ತಾ ಆನಿ ಅಸೊಂಕ್ ಜಾಯ್, ಆನಿ ಅಸಲ್ಯಾ ಪಂಕ್ತ್ಯಾಂಕ್ ತಾಳೊ ಬಸವ್ನ್ ಗಾಂವ್ಕ್ ಸಲೀಸ್. ಹಿಂದಿ ಪಿಂತುರಾಂನಿ ಹ್ಯಾ ಗಝಲಾಂಕ್ ನವೊ ಜೀವ್ ಭರ್ಲೊ ದೆಖುನ್ ಭಾರತಾಂತ್ ಹ್ಯೊ ಗಝಲ್ ಚಡ್ ಆನಿ ಚಡ್ ಲೊಕಾಮೊಗಾಳ್ ಜಾಂವ್ಕ್ ಪಾವ್ಲ್ಯೊ ಆನಿ ಅರೆಬಿಯಾಂತ್ ದಿಸಾನ್ ದೀಸ್ ಉಣ್ಯೊ ಜಾವ್ನ್ ಆಯ್ಲ್ಯೊ.
ಹಿಂದಿ ಪದಾಂನಿ ಸಯ್ತ್ ವೆಳಾಕಾಳಾತೆಕಿದ್ ಹ್ಯಾ ಗಝಲಾಂನಿ ವೈವಿಧ್ಯತಾ ದಿಸೊನ್ ಆಯ್ಲಿ. ಗಝಲಾಂಚಾ ರುಪಾಂಕ್, ತಶೆಂಚ್ ಸಿಂತಿಮೆಂತಾಂನಿ ಸಯ್ತ್ ಜಾಯ್ತಿ ಬದ್ಲಾವಣ್ ಆಯ್ಲಿ. ಚಡ್ ಜಾವ್ನ್ ಗಝಲಾಂ ಉರ್ದು/ಹಿಂದಿ ಸಂಸ್ಕೃತೆಕ್ ತಾಳ್ ಪಡ್ತಾ ದೆಖುನ್ ಹೆರ್ ಭಾಸಾಂನಿ, ಮ್ಹಣ್ಜೆ ಸಂಸ್ಕೃತ್, ಇಂಗ್ಲಿಶ್, ಕೊಂಕ್ಣಿ ಭಾಸಾಂನಿ ತಿತ್ಲ್ಯೊ ಫಾಮಾದ್ ಜಾಲ್ಯೊ ನಾಂತ್.
ಗಝಲ್:
ಗಝಲ್ ಮ್ಹಳ್ಯಾರ್ ಕಿತೆಂ?
ಗಝಲ್ ಮ್ಹಳ್ಳ್ಯಾ ಸಬ್ಧಾಚೊ ಅರೆಬಿಕ್ ಅರ್ಥ್ ಅಸೊ ಆಸಾ; "ಚಲಿಯೆಲಾಗಿಂ ವಾ ಚಲಿಯಾಂವಿಶ್ಯಾಂತ್ ಉಲಂವ್ಚಿ ವ ವಾಖಣ್ಣುಂಚಿ ರೀತ್". ಅಶೆಂ ಮೊಗಾಚಿ ಉಚಾರ್ಣಿ ಕರ್ಚಿ ರೀತ್. ಪುಣ್ ಗಝಲಾಂನಿ ಹ್ಯಾ ಬದಲ್ಚಾ ಸಂಸಾರಾಂತ್ ಅಪ್ಲಿಂ ರುಪಾಂ ಬದ್ಲುನ್ ಬದ್ಲುನ್ ಮನ್ಶಾ ಜಿಣ್ಯೆಚಾ ಹರ್ಯೆಕಾ ಪ್ರಕಾರಾಂನಿ ಹಿ ಗಝಲ್ ವ್ಹಾಳ್ಳ್ಯಾ.
ಗಝಲಾಂ ಚಡಾವತ್ ಜಾವ್ನ್ ಆಮ್ಚಾ ದೇಶಾಂತ್ ವಾಚುಂಕ್/ಆಯ್ಕೊಂಕ್ ಮೆಳ್ಚಿಂ ಉರ್ದು ಭಾಸೆಂತ್. ಕೊಂಕ್ಣೆಂತ್ ಹಾಂಚೊ ಭೋವ್ ಉಣೊ ಪ್ರಭಾವ್ ಪಡ್ಲಾ ದೆಖುನ್ ಕೊಂಕ್ಣೆಂತ್ ವಾಚುಂಕ್ ಮೆಳ್ಚಿಂ ಸಗ್ಳಿಂ ಗಝಲಾಂ ಖರಿಂ ಗಝಲಾಂ ಮ್ಹಣ್ ಸಾಂಗೊಂಕ್ ಕಸ್ಟ್.
ಗಝಲಾಂಚೆ ವೆವೆಗ್ಳೆ ಪ್ರಕಾರ್;
ಮಟ್ವ್ಯಾನ್ ಗಝಲ್ ವಿಶಿಂ ಸಮ್ಜೊಂಚೆಂ ತರ್; ಗಝಲ್ ಮ್ಹಳ್ಯಾರ್ ದೋನ್ ಸಾಲಾಂಚಾ/ವೊಳಿಂಚಾ ಕವಿತಾಂಚೊ ಜಮೊ. (ಉರ್ದುಂತ್ ಹ್ಯಾ ದೋನ್ ವೊಳಿಂಕ್ ’ಶೇರ್’ ಮ್ಹಣ್ತಾತ್). ಪುಣ್ ದೋನ್ ವೊಳಿಂಚ್ಯೊ ಹರ್ಯೆಕ್ ಜಮೊ ಗಝಲ್ ಜಾಯ್ನಾಂ. ಹೆಂ ಆತಾಂ ಆಮಿ ಹೆರ್ ಥೊಡ್ಯೊ ರೆಗ್ರೊ ಪಳೆತಾನಾ ಸಮ್ಜಾತೆಲೆಂ. ಹ್ಯೊ ದೋನ್ ವೊಳಿಂನಿ ಹ್ಯೊ ಸಕಯ್ಲ್ಯೊ ರೆಗ್ರ್ಯೊ ಪಾಳ್ನ್ ಆಸಾಜಯ್;
ಮೀಟರ್ (ಬೆಹೆರ್)
ರಾದಿಫ್
ಕಾಫಿಯಾ
ಮತ್ಲ
ಮಖ್ತ
ಹ್ಯಾ ಸರ್ವಾಂಚೊ ದಾಖ್ಲೊ ದೀಂವ್ಕ್ ಹಿ ಗಝಲ್ ಘೆವ್ಯಾಂ;
ತುವೆಂ ಯೆತಾಂ ಮ್ಹಳೆಂಯ್, ರಾಕೊನ್ ರಾಕೊನ್ ಸಾಂಜ್ ಜಾಲಿ
ಮೋಗ್ ನಾಸ್ತಾಂ ವರ್ಸಾಂ ಗಳ್ಳಿಂ, ಆತಾಂ ಜಿಣ್ಯೆಚಿ ಸಾಂಜ್ ಜಾಲಿ
ಗೆಲೊ ಎಕಾ ಸಕಾಳಿಂ, ಸೊಧುನ್ ಮೋಗ್ ಸಂಸಾರಿಂ
ಜಿಣಿಂಚ್ ಕಾಬಾರ್ ಜಾಲಿ, ತವಳ್ ಮೊಗಾಚಿ ಸಾಂಜ್ ಜಾಲಿ
ಮೊಳ್ಬಾರ್ ಏಕ್ ನೆಕೆತ್ರ್ ಉದೆಲೆಂ, ತಾರಾಂ ಮೆಜ್ತಾಂ ಮೆಜ್ತಾಂ
ಮಧೆಂಚ್ ಲೇಕ್ ಚುಕ್ಲೆಂ, ಆನಿ ಚಾನ್ನ್ಯಾಚಿ ಸಾಂಜ್ ಜಾಲಿ
ಸತಾಚಾ ಘರಾಂತ್ ನಿತಿಚೆಂ ಪಾಕೆಂ ಭಾಂದುಂಕ್ ಲಾಗ್ಲೊಂ
ಫಟಿನ್ ಅಶೀಯ್ ಧಾಡ್ ಘಾಲಿ, ಆಬ್ಳೆ ಸತಾಚಿ ಸಾಂಜ್ ಜಾಲಿ
ಕಾಳ್ಜಾಂತ್ ಕಿತೆಂ ಲಾಸ್ಲೆಂ, ಸಾಂಗ್ ಮ್ಹಾಕಾ ತುಂ ’ಕ್ವಾಡ್ರಸ್’
ಗಾಂವಾರ್ ಗಾಂವ್ ಧುಂವರ್ ಉಟ್ಲೊ, ಅಶಿ ಕವಿಚಿ ಸಾಂಜ್ ಜಾಲಿ.
’ಶೇರ್’ ಮ್ಹಳ್ಯಾರ್ ಕಿತೆಂ?
ದೋನ್ ಸಾಲಾಂಚೆಂ/ವೊಳಿಂಚೆಂ ಏಕ್ ಕವಿತಾ. ಹರ್ಯೆಕ್ ಶೇರ್ ಏಕ್ ಸ್ವತಂತ್ರ್ ಕವಿತಾ ಜಾವ್ನಾಸಾ. ಎಕಾ ಗಝಲಾಂತ್ ಎಕಾ ಶೇರ್ ಹಾಕಾ ವರ್ಣುಂಕ್ ವಾ ಸಮ್ಜಾಂವ್ಕ್ ಅನ್ಯೇಕಾ ಶೇರ್ಚಿ ಗರ್ಜ್ ನಾ, ವಯ್ಲ್ಯಾ ಗಝಲಾಂತ್ ಆಸ್ಚ್ಯೊ ಚ್ಯಾರ್ ಶೇರ್, ಚ್ಯಾರ್ ಸ್ವತಂತ್ರ್ ಕವಿತಾಂ.
ಶೇರ್ಚ್ಯೊ ಹೆರ್ ರೆಗ್ರೊ:
ಕಸ್ಲ್ಯಾಯ್ ದೋನ್ ವೊಳಿಂಚ್ಯೊ ಕವಿತಾ ಗಝಲ್ ನ್ಹಂಯ್. ಕಿತ್ಯಾಕ್ ಮ್ಹಳ್ಳೆಂ ಫುಡ್ಲ್ಯೊ ಥೊಡ್ಯೊ ರೆಗ್ರೊ ಸಮ್ಜಾಯ್ತಾತ್.
ಬೆಹೆರ್:
ಬೆಹೆರ್ ಮ್ಹಳ್ಯಾರ್ ಹ್ಯಾ ದೋನ್ ವೊಳಿಂನಿ ಆಸ್ಚೆಂ ಮೀಟರ್. ಹಾಕಾ ಶೆರ್ಚಿಂ ಲಾಂಭಾಯ್ ಮ್ಹಣ್ಯೆತ್. ಹ್ಯಾ ಶೇರ್ಂತ್ ಆಸ್ಚ್ಯೊ ದೊನ್ಯ್ ಸಾಲ್ ಎಕಾಚ್ ಮಿಟರಾಚ್ಯೊ ಆಸೊಂಕ್ ಜಾಯ್. ಏಕ್ ಲಾಂಬ್ ಆನಿ ಏಕ್ ಮಟ್ವಿ ಆಸಾನಾಯೆ. ಉರ್ದುಚ್ಯಾ ವೆವೆಗ್ಳ್ಯಾ ಬುಕಾಂನಿ ಹ್ಯಾವಿಶಿಂ ಅಧ್ಯಯನ್ ಚಲಯ್ಲ್ಯಾರ್ ಚಡುಣೆಂ ಎಕುಣೀಸ್ ವೆವೆಗ್ಳ್ಯಾ ಪ್ರಕಾರಾಚಿಂ ಮಿಟರಾಂ ಮೆಳ್ತಾತ್. ತಿಂ ಹಾಂಗಾಸರ್ ವರ್ಣುಂಕ್ ಕಶ್ಟ್ ತಶೆಂಚ್ ಗರ್ಜೆಭಾಯ್ಲೆಂ ಸಯ್ತ್. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಂತ್ ಹಾಂಚೊ ದಾಖ್ಲೊ ಆಸ್ಚೊ ಭೋವ್ ಉಣೊ ವ ನಾಂಚ್ ಮ್ಹಣ್ಯೆತ್.
ಮಟ್ವ್ಯಾನ್ ಹ್ಯಾ ಪ್ರಕಾರಾಂಕ್ ತೀನ್ ರಿತಿಂನಿ ವಿಂಗಡ್ ಕರ್ಯೆತಾ;
* ಮಟ್ವೆಂ ಮಿಟರ್ (ಮಟ್ವ್ಯಾ ಮಿಟರಾಂಚ್ಯೊ):
* ಮೀಡಿಯಮ್ ಮಿಟರ್ (ಮೀಡಿಯಮ್ ಮಿಟರಾಂಚ್ಯೊ):
* ಲಾಂಬ್ ಮಿಟರ್ (ಲಾಂಬ್ ಮಿಟರಾಂಚ್ಯೊ):
ಮ್ಹಳ್ಯಾರ್ ಗಝಲ್ ಮ್ಹಳ್ಯಾರ್ ಎಕಾಚ್ ಮಿಟರಾಂಚ್ಯೊ ದೋನ್ ವೊಳಿಂಚೆಂ ಕವಿತಾ.
ರಾದಿಫ್:
ಹೆಂ ಘಝಲಾಂನಿ ಆಸ್ಚೆಂ ಭೋವ್ ಗರ್ಜೆಚೆಂ. ರಾದಿಫ್ ಮ್ಹಳ್ಯಾರ್ ಹರ್ಯೆಕಾ ದುಸ್ರ್ಯಾ ವೊಳಿಂಚೊ ಅಖ್ರೇಚೊ ಸಬ್ಧ್ ಏಕ್ಚ್ ಆಸೊಂಕ್ ಜಾಯ್. ವಯ್ಲ್ಯಾ ದಾಖ್ಲ್ಯಾಕ್ ಘೆತ್ಲ್ಯಾರ್ ’ಸಾಂಜ್ ಜಾಲಿ’ ಹ್ಯಾ ಕವಿತಾಚೆಂ ರಾದಿಫ್. ರಾದಿಫ್ ಇತ್ಲೆಂ ಅರ್ಥಾಭರಿತ್ ಆಸ್ಯೆತ್ ಮ್ಹಳ್ಯಾರ್ ಗಝಲಾಚೆಂ ನಾಂವ್ ಥೊಡೆ ಪಾವ್ಟಿಂ ರಾದಿಫಾಚೆರ್ ಆಸೊಂಕ್ ಸಾಧ್ಯ್ ಆಸಾ.
ಕಾಫಿಯಾ:
ಕಾಫಿಯಾ ಏಕ್ ಪ್ರಾಸ್ಭರಿತ್ ಸಬ್ಧ್ ಜೊ ಹರ್ಯೆಕಾ ರಾದಿಫಾ ಫುಡೆಂ ಆಸೊಂಕ್ಚ್ ಜಾಯ್. ಹ್ಯಾ ದಾಖ್ಲ್ಯಾಂತ್ ’ಜಿಣ್ಯೆಚಿ’, ’ಮೊಗಾಚಿ’, ’ಸತಾಚಿ’, ’ಕವಿಚಿ’ ಸಬ್ಧ್ ಕಾಫಿಯಾಕ್ ದಾಖ್ಲೊ. ಆನಿ ಹೊ ಸಬ್ಧ್ ರಾದಿಫಾಸವೆಂ ’ಜಿಣಿಯೆಚಿ ಸಾಂಜ್ ಜಾಲಿ’ ವ ’ಸತಾಚಿ ಸಾಂಜ್ ಜಾಲಿ’... ಜಾತಾ.
ಮತ್ಲ:
ಪಯ್ಲ್ಯಾ ದೋನ್ ವೊಳಿಂಚಾ ಶೇರ್ಂತ್ ಅಖ್ರೇಚೆ ಸಬ್ದ್ ಏಕ್ಚ್ ಆಸೊಂಕ್ ಜಾಯ್, ಮ್ಹಣ್ಜೆ ಪಯ್ಲ್ಯಾ ಸಾಲಾಚೊ ಅಖ್ರೇಚೊ ಸಬ್ಧ್ ಆನಿ ದುಸ್ರ್ಯಾ ಸಾಲಾಚೊ ಅಖ್ರೇಚೊ ಸಬ್ಧ್ ಏಕ್ಚ್ ಆಸೊಂಕ್ ಜಾಯ್. ’ಸಾಂಜ್ ಜಾಲಿ’.
ಎಕಾಚ್ಚ್ ಗಝಲಾಂತ್ ಎಕಾವರ್ನಿಂ ಚಡ್ ಮತ್ಲ ಆಸ್ಯೆತಾ ಪುಣ್ ತ್ಯಾ ಸರ್ವ್ ವೊಳಿಂಕ್ ’ಮತ್ಲ’ ಮ್ಹಣಾನಾಂತ್ ಬಗಾರ್ ಪಯ್ಲ್ಯಾ ದೋನ್ ಸಾಲಾಂಕ್ ಮಾತ್ರ್ ’ಮತ್ಲ’ ಮ್ಹಣ್ತಾತ್ ಆನಿ ಹೆರ್ ಸಾಲಾಂಕ್/ವೊಳಿಂಕ್ ’ಮತ್ಲ-ಇ-ಸಾನಿ’ ವಾ ’ಹುಸ್ನ್-ಇ-ಮತ್ಲ’ ಮ್ಹಣ್ತಾತ್.
ಮಖ್ತ:
ಹರ್ಯೆಕಾ ಗಝಲಾಂತ್ ಕವಿಚೆಂ ಸಂಭಾಶಣ್ ಆಸ್ತಾ, ಜಾಂವ್ ತೆಂ ಎಕಾ ಚಲಿಯೆಲಾಗಿಂ ವ ಅಪ್ಲೇಸ್ತಕಿಂ. ಹ್ಯಾ ಗಝಲಾಂತ್ ಕವಿ ’ಕ್ವಾಡ್ರಸ್’ ಸವೆಂ ಸಂವಾದ್ ಚಲಯ್ತಾ. ಆನಿ ಅಖ್ರೇಚಾ ಶೇರ್ಂತ್ ಹೆಂ ಆಸ್ಚೆಂ ಭೋವ್ ಗರ್ಜೆಚೆಂ. ಹೆಂ ಕವಿಚೆಂ ಕಾವ್ಯನಾಮ್ ಆಸ್ಯೆತ್.
ಮಟ್ವ್ಯಾನ್ ಎಕಾ ಗಝಲಾಚೆಂ ವರ್ಣನ್ ವ್ಯಾಖ್ಯಾನ್ ದಿಂವ್ಚೆಂ ತರ್; ಗಝಲ್ ಮ್ಹಳ್ಯಾರ್ ಎಕಾಚ್ ಮಿಟರಾಂಚಾ ದೋನ್ ವೊಳಿಂಚಾ ಕವಿತಾಂಚೊ ಜಮೊ. ಜ್ಯಾ ಕವಿತಾಂನಿ ’ಮತ್ಲ’, ’ಮಖ್ತ’ ಆಸೊನ್, ’ಕಾಫಿಯಾ’ ಆನಿ ’ರಾದಿಫ್’ ಆಸ್ತಾ.
ಗಝಲಾಂಚೆ ಥೊಡೆ ದಾಖ್ಲೆ;
ಗಝಲ್
ಮರ್ಣಾನ್ ಮಾಂಡ್ಲೊ ಪಾಸ್ ತಾಚೆರ್, ಸ್ವಾಸ್ ತುಟೊನ್ ಗೆಲೊ,
ಜಿಣ್ಯೆ ಆಂಬ್ರಾರ್ ಖರ್ ದೊನ್ಪಾರಾಂ, ಸುರ್ಯೊ ಫುಟೊನ್ ಗೆಲೊ.
ರಾಕ್ತಾತ್ ಪಾರೆ ಘರಾ ಭಂವ್ತಿಂ, ಆಯ್ಲ್ಯಾರ್ ತಾಕಾ ಮಾರುಂಕ್,
ರಾಯ್ ಮ್ಹಜೊ ದಿಸಾಕ್ ಆತ್ತಾಂ, ಸಪ್ಣಾಂತ್ ಭೆಟೊನ್ ಗೆಲೊ.
ವರ್ಸಾಂ ಥಾವ್ನ್ ವೊಕ್ತಾಕ್ ವೆತಾ, ವಯ್ಜಾಕ್ ನಾಡ್ ಮೆಳ್ಳಿನಾ,
ಬಾಯ್ಲ್ ಘರಾಂತ್ ರಿಗೊನ್ ಮ್ಹಯ್ನ್ಯಾನ್, ತಾಪ್ ಸುಟೊನ್ ಗೆಲೊ.
ಪುಂಜಾಯ್ಲೆಂ ಧನ್ ದಿರ್ವೆಂ ಚಿಂತುನ್ ಮೊರಾಕಾಳಾ ಖಾಯಾಂ,
ಖಾಂವ್ಚೆ ಆದಿಂ ಮೆಲೊ ಆತಾಂ ಚೋರ್ ಲುಟೊನ್ ಗೆಲೊ.
ಘರ್ ಬದಿಕ್ ದುಡು ಭಾಂಗಾರ್ ಸೊಡ್ತೆಂತ್ ಸಗ್ಳೆಂ ಗೆಲೆಂ,
ಆತಾಂ ಉರ್ಲ್ಯಾ ಬಾಯ್ಲ್ ಫಕತ್, ತಿಕಾಯ್ ಲಾಟೊನ್ ಗೆಲೊ.
"ಕವಿ ಮೆಲ್ವಿನ್ ಉಲಂವ್ಕ್ ಯೆತಾ" ಮಾಂಚಿಯೆರ್ ಕೊಣೆ ಸಾಂಗ್ಲೆಂ?’
ನಾಟಕ್ ದೆಖೊಂಕ್ ಜಮ್ಲ್ಲೊ ಲೋಕ್, ಪುರಾಯ್ ಉಟೊನ್ ಗೆಲೊ.
- ಮೆಲ್ವಿನ್ ರೊಡ್ರಿಗಸ್
ಗಝಲ್
ಪರ್ಮಳ್ ವಿಳಾಸ್ ನಾಕಾಂತ್ ಚೆಪುನ್ ಮೂಸ್ ಗೆಲೊ
ಮೊಗಾಕ್ ಸಲ್ವಲ್ಲ್ಯಾ ಗಳ್ಯಾಂತ್ ಗುಂತುನ್ ಪಾಸ್ ಗೆಲೊ
ಮೊಗಾಚಿ ಕವಿತಾ ಬರಂವ್ಚ್ಯಾ ಆಶೆನ್ ಉತ್ರಾಂ ವಿಂಚ್ಲಿಂ
ಉತ್ರಾಂಕ್ ಸಯ್ರಿಕ್ ಘಡ್ಲಿನಾ ದೆಕುನ್ ಪ್ರಾಸ್ ಗೆಲೊ
ಪಾವ್ಲಾಂ ತುಜಿಂಗೊ ಫುಲ್ತಿತ್ ಮ್ಹಣೊನ್ ಆಂಗಣ್ ಝಾಡ್ಲೆಂ
ನಾಚೊನ್ ಆಂಗಣ್ ಮಸ್ತುನ್ ಮಾರ್ನೆಮಿ ವೇಸ್ ಗೆಲೊ
ರೊಸಾಳ್ ನಶೆಚ್ಯಾ ಉತ್ರಾಂಕ್ ಪುಂಜಾವ್ನ್ ಉಮೊ ಕೆಲೊ
ವೊಂಟಾಂಕ್ ತುಗೆಲ್ಯಾ ಪರ್ನ್ಯಾ ವಾಯ್ನಾಚೊ ಗ್ಲಾಸ್ ಕೆಲೊ
ಮೊಗಾಕ್ ಮರ್ಣಾಕ್ ಕೊಣೆಂಗಿ ಭಾವ್ಡ್ಯಾನ್ ಗುಂತ್ಲೆಂ ನಾತೆಂ
ಪಾಂತಿಯೆ ಸರ್ಗಾಕ್ ಆಶೆಲ್ಲ್ಯಾ ಕಳ್ಯಾಂಚೊ ಸ್ವಾಸ್ ಗೆಲೊ.
- ವಿಲ್ಸನ್ ಕಟೀಲ್
© 2006 ವಲ್ಲಿ ಕ್ವಾಡ್ರಸ್ · ದಾಯ್ಜ್ · ಆಶಾವಾದಿ ಪ್ರಕಾಶನ್ ಸರ್ವ್ ಹಕ್ಕಾಂ ರಾಕೊನ್ ದವರ್ಲ್ಯಾಂತ್.
ಸಂಪಾದಕೀಯ್संपादकीयEditorial Aug 2026
ಸಂಪಾದಕೀಯ್ - 1: ಯದಾಹಾಂ ಜೀವಮಿ, ಅಹಮಾಶಂಸೆ (ಜೀವ್ ಆಸ್ತಾಸರ್ ಭರ್ವಸ್ತಾಂ)
ವಿಮರ್ಸೊविमर्सोCriticism Aug 2008
ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?
ಸಂಪಾದಕೀಯ್संपादकीयEditorial Aug 2026
ಕಾಳೊಕಾಂತ್ ಜಿಯೆವ್ನ್ ಸವಯ್ ಜಾಲೆಲ್ಯಾಂಕ್ ಉಜ್ವಾಡ್ ದೊಳ್ಯಾಂಕ್ ಖೊಂಕ್ತಾ
More in Daaiz
ಖಬರ್खबरNews May 2006
ಕಾರ್ಕಳಾಂತ್ ದಾಯ್ಜ್-ಮಿತ್ರ್ ಸಾಹಿತಿಕ್ ಶಿಭಿರ್
ಖಬರ್खबरNews 16 Sep 2007
ದಾಯ್ಜ್ ಮಿತ್ರ್ ಸಾಹಿತಿಕ್ ಶಿಭಿರ್ 2007
ಕವಿತಾकविताPoem 21 Apr 2006
ಕವಿತಾಪಾಠ್ - 14: ಸೊಧ್ನಾಂ (ಮೆಲ್ವಿನ್ ಜೆ. ವಾಸ್)
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.