सिरिवंताच्या साहित्याचेर अध्ययनाचें कथापाठ शिंकळिचें उग्तावण

सिरिवंताच्या साहित्याचेर अध्ययनाचें कथापाठ शिंकळिचें उग्तावण

१ जुलाय २०२३: आशावादी प्रकासन आनी धेंपे कोलेज गोंय हांच्या जोड पालंवाखाल, नाम्नेचो कोंकणी कथाकार, वावराडी सिरिवंत (जेरोम सिरील वेगस) हाच्या साहित्याचेर अध्ययन चलंवच्या इराद्यान चलुंक आसच्या राश्ट्रीय मट्टाच्या वेबिनारांचें ’कथापाठ चोवती शिंकळेचें’ उग्तावण सन्वारा (१ जुलाय २०२३) सांजेर ४:३० वोरार जालें. धेंपे कोलेजिंत ’भारतीय भासांची मुखेसत’ जावनासचा प्रोफेसर अंजू साखर‌दांडेन ओळोक करून येवकाराचें उलवप कर्तच धेंपे कोलेजिची प्रिन्सिपाल, प्रोफेसर दो|वृंदा पी. बोर्करान अपल्या उग्तावण उलपवांत ’कोंकणी भास, कोंकणी साहित्य जें हेर लिपी-बोलिंनी आसा, ताचो अभ्यास कर्ची गर्ज आसा आनी शैक्षणीक रितिच्या ह्या कामासाळांनी भाग घेवन फायदो जोडच्या विध्यार्थिंची तशेंच असलीं उपक्रमां मांडून हाडुंक सहभागित्व घेतलेल्या समेसतांची थोकणाय केली.

कथापाठाच्या तीन शिंकळेंचो तशेंच कथापाठ अध्ययन वेबिनारांतल्या प्रबंधांच्या पुसतकांचो मोटवो विवर दिवून वल्ली क्वाड्रसान सिरिवंताची सविसतार ओळोक तशेंच ’ममशक्ती कमलनाथ’ (देव‌च म्हजी सकत) ध्येयाखाल १९६६ इस्वेंत सिरिवंतान सुरू केल्ल्या साळक प्रकाशनाच्या ८८ पुसतकांची ओळोक करून हेच मयन्यांत चलुंक आसच्या वेबिनारांचो विवर दिलो.

८ जुलाय (सांजेर ४:३० वोरांक): सिरिवंताची साहित्क ओळोक आनी साळक प्रकाशन (चलयता: वल्ली क्वाड्रस)

१५ जुलाय (सांजेर ४:३० वोरांक): सिरिवंताच्या कथेंनी असतुरिचो पात्र (चलयता: फेल्सी लोबो देरेबैल)

२२ जुलाय (सांजेर ४:३० वोरांक): सिरिवंताचीं (जेरी लुवीस) हास्य बर्पां (चलयता: फ्लाविया आल्भुकर्क)

२९ जुलाय (सांजेर ४:३० वोरांक): कथापाठ चोवत्या शिंकळेचें संपणेचें वेबिनार

प्रमूख उलवपी मानेसत स्टीफन हेरालड मसकरेन्हस (हेमाचाऱ्य) अपल्या उलवपांत सिविरंताची, ताच्या वेक्तित्वाची खोलायेन ओळोक करून दिवून "सिरिवंत एक वेक्ती न्हय, बगार एक संस्थो जावनासलो आनी कोंकणी वावर कर्तेयांक एक देक जावन अपलें जिवीत‌च कोंकणीक समर्पीत केल्लो महान साहिती/वावराडी" म्हणालो. अन्येक उलवपी मा|प्रताप नायकान सिरिवंतासवें अपणाक आस‌ल्ल्या खास इसटागतेविशीं उलवन, "सिरिवंत तसलो वावराडी कोंकणिंत उदेवन आयिल्लेवर्वीं कोंकणी भासेच्या समग्र गिरेसत‌काय जोडुंक सकल्यांव" म्हणालो. सयरीं जावन हाजर आसलेल्या दो|आसटीन प्रभू, काणीक पत्राचो संपादक मानेसत अवील रासकिन्हा आनी मानेसत जेरालड वी. कारलो हाणीं सिरिवंताविशीं अपलीं भगणां आनी विचार उचारले.

वल्ली क्वाड्रसान धिन्वास पाठयले.