ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 14. ಚ್ಯಾರ್ ಕುಡ್ಡೆ
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ಕುಡ್ಡ್ಯಾಂಚಾ ಆಶ್ರಮಾಂತ್ ಆಸ್ಲ್ಲ್ಯಾ ಥೊಡ್ಯಾ ಕುಡ್ಡ್ಯಾಂಕ್ ಹಸ್ತಿಕ್ ಪಳೆಂವ್ಚಿ ಆಶಾ ಉದೆಲಿ ಆನಿ ಚಾರ್ ಜಣ್ ಕುಡ್ಡೆ ಮೆಳೊನ್ ಎಕಾ ಹಸ್ತಿಲಾಗಿಂ ವಚೊನ್ ತ್ಯಾ ಹಸ್ತೆಕ್ ಆಪಡ್ನ್ ಆಪ್ಲ್ಯಾ ಆಂತರಿಕ್ ದಿಶ್ಟಿಂತ್ ಪಳೆಂವ್ಕ್ ನಿಚೆವ್ ಕೆಲೊ.
ಅಶೆಂ ಆಯಿಲ್ಲೆ ಹೆ ಕುಡ್ಡೆ ಬಾಂಧುನ್ ಘಾಲ್ಲ್ಯಾ ಹಸ್ತಿಲಾಗಿಂ ಯೇವ್ನ್ ರಾವ್ಲೆ ಆನಿ ತ್ಯಾ ಹಸ್ತಿಕ್ ಪಳಂವ್ಚಾಕ್ ಏಕ್ ಕುಡ್ಡೊ ಮುಖಾರ್ ಗೆಲೊ ಆನಿ ತಾಚಾ ಹಾತಾಕ್ ಹಸ್ತಿಚಿ ಶಿಮ್ಟಿ ಮೆಳ್ಳಿ ಆನಿ ಬರಿ ಕರ್ನ್ ತಿ ಆಪ್ಡುನ್ ತೊ ಪಾಟಿಂ ಆಯ್ಲೊ ಆನಿ ತವಳ್ ಹೆರಾಂನಿ ತಾಕಾ ಸವಾಲ್ ಕೆಲೆಂ ’ಹಸ್ತ್ ಮ್ಹಳ್ಯಾರ್ ಕಿತೆಂ?’ ತವಳ್ ತೊ ಸಾಂಗಾಲಾಗ್ಲೊ ’ಹಸ್ತ್ ಮ್ಹಳ್ಯಾರ್ ದೊರಿ ಯಾ ರಾಜು, ಭಾರೀಕ್ ಆನಿ ಲಾಂಬ್ ಆಸ್ತಾ’
ತಿತ್ಲ್ಯಾರ್ ದುಸ್ರೊ ಕುಡ್ಡೊ ಹಸ್ತೆಕ್ ಪಳೆಂವ್ಕ್ ಗೆಲೊ ಆನಿ ತಾಕಾ ಹಸ್ತಿಚೆಂ ನಾಕ್ (ಸೊಂಡಿಲ್) ಆಪ್ಡುಂಕ್ ಮೆಳ್ಳೆಂ ಆನಿ ತೊ ಪಾಟಿಂ ಯೇವ್ನ್ ಸಾಂಗಾಲಾಗ್ಲೊ ’ಹಸ್ತ್ ದೊರಿ ಯೆ ಪರಿಂ ನಾ, ಬಗಾರ್ ಪೆರ್ಮಾರೆಪರಿಂ ಆಸಾ’
ಆತಾಂ ತಿಸ್ರೊ ಕುಡ್ಡೊ ಉಟ್ಲೊ ಆನಿ ಹಸ್ತೆಕ್ ಪಳೆಂವ್ಕ್ ಗೆಲೊ ಆನಿ ತಾಕಾ ಹಸ್ತೆಚೆ ಪಾಂಯ್ ಆಪ್ಡುಂಕ್ ಮೆಳ್ಳೆ ಆನಿ ಪಾಟಿಂ ಯೇವ್ನ್ ಸಾಂಗಾಲಾಗ್ಲೊ ’ಹಸ್ತ್ ದೊರಿಯ್ ನ್ಹಯ್, ಪೆರ್ಮಾರಿಯ್ ನ್ಹಯ್ ಬಗಾರ್ ಖಾಂಬ್ಯಾಪರಿಂ ಆಸಾ’
ಚೊವ್ತೊ ಕುಡ್ಡೊ ಆತಾಂ ಹಸ್ತ್ ಪಳೆಂವ್ಕ್ ಗೆಲೊ ಆನಿ ತಾಕಾ ಆಪ್ಡುಂಕ್ ಮೆಳ್ಳೆಂ ಹಸ್ತಿಚೆಂ ಆಂಗ್ ಆನಿ ತೊ ಪಾಟಿಂ ಯೆವುನ್ ಮ್ಹಣೊಂಕ್ ಲಾಗ್ಲೊ ’ಹಸ್ತ್ ನಾ ದೊರಿ, ನಾ ಪೆರ್ಮಾರಿ, ನಾ ಖಾಂಬೊ, ಬಗಾರ್ ಹಸ್ತ್ ಎಕಾ ವೊಣೊದಿಪರಿಂ ವಿಶಾಲ್ ಆಸಾ’
ಸಂದೇಶ್: ಆಮ್ಚಾ ಜಿಣ್ಯೆಂತ್ ಸಭಾರ್ ಪಾವ್ಟಿಂ ಸಭಾರ್ ಸವಾಲಾಂ ಉದೆತಾತ್. ’ದೇವ್ ಮ್ಹಳ್ಯಾರ್ ಕಿತೆಂ?’ ’ಭಾವಾರ್ಥ್ ಮ್ಹಳ್ಯಾರ್ ಕಿತೆಂ?’ ’ಮನ್ಶಾ ಜಿವಿತ್ ಮ್ಹಳ್ಯಾರ್ ಕಿತೆಂ?’... ಪುಣ್ ಹ್ಯಾ ಸವಾಲಾಂಕ್ ಆಮಿಂ ಜರ್ ಜಾಪಿ ಸೊಧುಂಕ್ ಗೆಲ್ಯಾಂವ್ ತರ್ ಹ್ಯಾ ಕುಡ್ಡ್ಯಾಂಪರಿಂಚ್ ಎಕೆಕ್ಲೆ ಎಕೆಕ್ ಜಾಪಿ ದಿತಿತ್. ಹಾಂಗಾಸರ್ ಕೋಣ್ ಸಾರ್ಕೊ ಆನಿ ಕೋಣ್ ನ್ಹಯ್ ಮ್ಹಳ್ಳೆಂ ಸವಾಲ್ ನ್ಹಯ್, ಬಗಾರ್ ಮನ್ಶಾಚಾ ಜಿಣ್ಯೆಂತ್ ಅಸಲ್ಯಾ ಸವಾಲಾಂಕ್ ಕಶ್ಯೊ ಜಾಪಿ ಸೊಧ್ಚ್ಯೊ ಮ್ಹಳ್ಳೆಂ. ಜೊಡ್ಲಲೊ ಆನ್ಬೋಗ್, ಮಾಹೆತ್ ಆನಿ ತಾಣೆ ಸಮ್ಜೊನ್ ಘೆತ್ಲ್ಲಿ ರೀತ್ ತಾಕಾ ತಾಚಾ ಸವಾಲಾಂಕ್ ಜಾಪಿ ದೀಂವ್ಕ್ ಸಕ್ತಾತ್ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
