ಕುಟ್ಮಾಚಿಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ತುಂ ಬರೊ ವಕೀಲ್, ಬರೊ ದೊತೊರ್, ವ ಬರೊ ಇಜ್ನೆರ್ ಜಾ ಪುಣ್ ಪಯ್ಲೆಂ ಬರೊ ಮನಿಸ್ ಖಂಡಿತ್ ಜಾ’

ಕುಟಾಮ್ ಆನಿಂ ಕುಟ್ಮಾಚಿಂ ಮೌಲ್ಯಾಂ

ವರಸ್ : 2005

ಅಂಕೊ : 15

ಮಯ್ನೊ : ಸಪ್ತೆಂಬರ್

ಸಂಪಾದಕೀಯ್ - 15.

ವಲ್ಲಿ ಕ್ವಾಡ್ರಸ್

ಅಜೀಕ್ ಸುಮಾರ್ ಚೊವ್ದಾ ವರ್ಸಾಂಧಿಂ ಘಡ್ಲೆಲೆಂ ಏಕ್ ಘಡಿತ್ ಮ್ಹಜಾ ಮತಿಚಾ ಪಡ್ದ್ಯಾರ್ ಅಜೂನ್ ಖಂಚೊನ್ ಆಸ್ಚೆಂ ಜಾವ್ನಾಸಾ;

ಆಮ್ಚಾ ಅಜೆಕಾರ್ ಫಿರ್ಜಜೆಂತ್ ಏಕ್ ಪಾವ್ಟಿಂ ಕಾರ್ಕಳ್ ವಾರಾಡ್ಯಾ ಹಂತಾಚೊ ಖೆಳಾ ಸ್ಪರ್ಧೊ ಆಸಾ ಕೆಲ್ಲೊ ಆನಿಂ ತ್ಯಾ ಸ್ಪರ್ಧ್ಯಾಚೊ ಎಕ್ಲೊ ಪ್ರೇಕ್ಶಕ್ ಜಾವ್ನ್ ಹಾಂವ್‌ಯ್ ಆಸ್‌ಲ್ಲೊಂ. ಸ್ಪರ್ಧೊ ಆಸ್ಚೊ ಕಿತ್ಯಾಕ್? ಎಕಾಮೆಕಾಚಿಂ ತಾಲೆಂತಾ, ಎಕಾಮೆಕಾಚಿಂ ಮಿನತ್, ಎಕಾಮೆಕಾಚೆಂ ಪರಿಶ್ರಮ್ ಹೆಂ ಸರ್ವ್ ಮೆಜ್ಚೊ ದೀಸ್, ಕೊಣ್ ಹೆಂ ಸರ್ವ್ ಚಡ್ ಮಾಪಾನ್ ಕೆಲ್ಲೊಗೀ ತೊಚ್ ಜಿಕ್ತಾ.

ಹ್ಯಾ ಸ್ಪರ್ಧ್ಯಾಂತ್ ನಕ್ರೆ ಫಿರ್ಗಜೆಚಿಂ ದೊಗಾಂ ಚೆಡ್ವಾಂ (ಭಭಯ್ಣ್ಯೊ) ಎಕಾ ಧಾಂವ್ಣೆಚಾ ಸ್ಪರ್ಧ್ಯಾಂತ್ ಆಸ್‌ಲ್ಲಿಂ. ಎಕ್ಲಿ ವ್ಹಡ್ ಭಯ್ಣ್ ದುಸ್ರಿ ದಾಕ್ಟಿ ಭಯ್ಣ್. ಸ್ಪರ್ಧೊ ಸುರು ಜಾಲೊ ಆನಿಂ ಥೊಡ್ಯಾ ಮಿನುಟಾಂನಿ ಅಖೇರ್ ಜಾಂವ್ನ್ ಯೆಂವ್ಚಾ ವೆಳಾರ್ ದಾಕ್ಟಿ ಭಯ್ಣ್ ಅಪ್ಲ್ಯಾ ವ್ಹಡ್ ಭಯ್ಣಿಚಾಕೀ ಥೊಡ್ಯಾ ಅಂತರಾರ್ ಮುಖಾರ್ ಆಸೊನ್ ಜಿಕ್ಚಾರ್ ಆಸ್‌ಲ್ಲಿ. ಪುಣ್ ತಶೆಂ ಜಾಲೆಂನಾ, ತಿ ರಾವ್ಲಿ ಆನಿಂ ಆಪ್ಲ್ಯಾ ವ್ಹಡ್ ಭಯ್ಣಿನ್ ಧಾಂವೊನ್ ಮುಖಾರ್ ಯೆಂವ್ಚಾಕ್ ರಾಕೊನ್ ರಾವ್ಲಿ ಆನಿಂ ಅಪ್ಲಿ ಭಯ್ಣಿನ್ ಹಿ ಧಾಂವ್ಣಿ ಜಿಕ್ಚೆಪರಿಂ ಕರಿಲಾಗ್ಲಿ ಆನಿ ಅಪುಣ್ ದುಸ್ರೆಂ ಸ್ಥಾನ್ ಘೆವ್ನ್ ಧಾದೊಸ್ ಜಾಲಿ.

ಹೆಂ ಘಡಿತ್ ಉಡಾಸಾಕ್ ಹಾಡ್ತಾನಾ ಮ್ಹಜಾ ಮತಿಂತ್ ತ್ಯಾ ದಾಕ್ಟ್ಯಾ ಭಯ್ಣಿನ್ ಕೆಲ್ಲ್ಯಾ ಸಾಕ್ರಿಫಿಸಾಚೊ ಉಡಾಸ್ ಯೆತಾ ಆನಿ ಅಪಾಪೆಂಚ್ ತಿಕಾ ಫಾವೊ ಜಾಲ್ಲೊ ಮಾನ್ ಮ್ಹಜಾ ಕಾಳ್ಜಾಂತ್ ಉದೆವ್ನ್ ಯೆತಾ.

ಸವಾಲ್ ಹಾಂಗಾ ಕೊಣೆಂ ಕೆಲ್ಲೆಂ ಸಾರ್ಕೆಂ ಕೊಣೆಂ ಕೆಲ್ಲೆಂ ನ್ಹಯ್ ಮ್ಹಳ್ಳೆಂ ನ್ಹಯ್, ಸವಾಲ್ ಹೆಂಯ್ ನ್ಹಯ್ ಕೀ ಎಕಾ ಸ್ಪರ್ಧ್ಯಾಂತ್ ಭಾವುಕ್ಪಣಾನ್/ಸಿಂತಿಮೆಂತಾಳ್ ಜಾಂವ್ಚೆಂ ಸಾರ್ಕೆಂಗೀ ವ ನ್ಹಯ್ ಮ್ಹಳ್ಳೆಂ. ಬಗಾರ್ ಕಶೆಂ ಏಕ್ ಭಯ್ಣ್ ಅಪ್ಲ್ಯಾ ಭಯ್ಣಿಚಾ ಭಗ್ಣಾಂಕ್ ಸಮ್ಜೊಂಕ್ ಸಕೊಂಕ್ ಸಕ್ತಾ ಮ್ಹಳ್ಳೆಂ.

ಮನ್ಶಾಕ್ ಅಪ್ಲೆಂ ಘರ್‌ಚ್ ಪಯ್ಲೆಂ ಇಸ್ಕೊಲ್ ಜಾವ್ನಾಸ್ತಾಂ, ಅಪ್ಲ್ಯಾ ಘರಾಂನಿ ಜೆ ವಿಚಾರ್, ಜಿಂ ಚಿಂತ್ನಾಂ ಚಿಂತುನ್ ವ್ಹಡ್ ಜಾತಾನಾ, ಮನಿಸ್ ಬರೆಂ ಆಸ್ಚೆಂಚ್ ವಿಂಚ್ತಾ.

ಹಿ ಏಕ್ ಲ್ಹಾನ್ ಕಾಣಿ ಆಯ್ಚಾ ಸಂಸಾರಾಂತ್ ಘಡ್ಚಾ/ಘಡೊನಾಸ್ಚಾ ಘಡಿತಾಂಕ್ ಉಲ್ಟಿಚ್ ಆಸಾ ನ್ಹಯ್‌ಗಿ?

ಅನ್ಯೇಕ್ ಕಾಣಿ; ಅಪ್ಲ್ಯಾ ದೊಗಾಂಯ್ ಕುಡ್ಡ್ಯಾ ಆವಯ್ ಬಾಪಾಂಯ್ಕ್ ಅಪ್ಲ್ಯಾ ಖಾಂದ್ಯಾರ್ ಬಸವ್ನ್ ವ್ಹಾವವ್ನ್ ವೆಲ್ಲ್ಯಾ ಶ್ರವಣ್ ಕುಮಾರಾಚಿ ಕಾಣಿಂ ಲ್ಹಾನ್‌ಪಣಾರ್ ವಾಚ್‌ಲ್ಲೊ ಉಡಾಸ್ ತುಮ್ಕಾಂಯ್ ಆಸ್ತಲೊ ಮ್ಹಣ್ ಮ್ಹಜೆಂ ಚಿಂತಾಪ್.

ಪುಣ್ ಆಜ್!

ಆಜ್ ವೇಳ್ ಬದಲ್ಲಾ, ಮನಿಸ್ ಬದಲ್ಲಾ, ವಿಚಾರ್ ಬದಲ್ಲ್ಯಾತ್, ಮನ್ಶಾಚಿಂ ಚಿಂತ್ನಾಂ ಬದಲ್ಲ್ಯಾಂತ್ ಮನ್ಶಾಚಿ ಕಾಲೆತ್ ಬದಲ್ಲ್ಯಾ ಆನಿಂ ಸಹಜ್ ಜಾವ್ನ್ ಮನ್ಶಾಚೆ ಹಾವ್-ಭಾವ್, ಜಿನೊಸ್, ತತ್ವಾಂ, ತರ್ಕಾಂ, ಜಿಣಿ ಸಯ್ತ್ ಬದಲ್ಲ್ಯಾ. ಪುಣ್ ವಿಚಾರ್ ಕರ್ಚೊ ತರ್ ಮನಿಸ್ ಕಿತ್ಲೊ ಬದಲ್ಲ್ಯಾರ್‌ಯ್ ಮತಿನ್ ಚಿಂತ್ಚೆಂ ಸೊಡುಂಕ್‌ನಾ, ಕಾಳ್ಜಾನ್ ಭೊಗ್ಚೆಂ ಸೊಡುಂಕ್ ನಾ, ದೊಳ್ಯಾಂನಿ ದೆಖ್ಚೆಂ ಸೊಡುಂಕ್‌ನಾ.

ಮೊಂತಿ ಸಾಯ್ಭಿಣಿಚಾ ಫೆಸ್ತಾಕ್ ಆಮಿಂ ಕುಟ್ಮಾಚೆಂ ಫೆಸ್ತ್ ಮ್ಹಣ್ತಾಂವ್ ಆನಿಂ ಕುಟ್ಮಾಚಾ ಸಾಂದ್ಯಾಂಚೊ ಉಡಾಸ್ ಜರೂರ್ ಕಾಡ್ತಾಂವ್. ಆಯ್ಚಾ ಕಾಳಾರ್ ಎಕಾ ಕುಟ್ಮಾಚೆ ಸಾಂದೆಚ್ ಎಕಾಮೆಚಾಚಿಂ ಮಾಸಾಂ ಖಾತಾತ್ ಅಪಾಪ್ಲ್ಯಾ ಸ್ವಾರ್ಥಿ ಇರಾದ್ಯಾಂಖಾತಿರ್ ತಶೆಂಚ್ ಆಪಾಪ್ಲಿಂ ಬೊಳ್ಕಿಂ ಶಿಜಂವ್ಚಾಕ್. ಆನಿಂ ಹ್ಯಾ ಮಧೆಂ ಶ್ರವಣ್‌ಕುಮಾರ್ ತಸಲೆ ಪೂತ್ ವ ವಯ್ರ್ ಉಲ್ಲೇಕ್ ಕೆಲ್ಲಿ ದಾಕ್ಟಿ ಭಯ್ಣ್ ಆಯ್ಚಾ ಸಂಸಾರಾಂತ್ ಹರ್‍ಯೆಕಾ ಗಾಂವಾಂನಿ ಉದೆನಾಂತ್.

ತರ್ ಕುಟ್ಮಾಚಿಂ ಮೊಲಾಂವಿಶಿಂ ಹರ್‍ಯೆಕಾ ಕುಟ್ಮಾನ್ ಚಿಂತ್ಚೆಂ ಅವಶ್ಯ್, ಜೆದ್ನಾಂ ಏಕ್ ನಾತು, ಉತರ್‌ಪ್ರಾಯೆಚಾ ಆಜ್ಯಾ-ಅಜಿಯೆಚಿ ಚಾಕ್ರಿ ಕರ್ಚಾ ಅಪ್ಲ್ಯಾ ಆವಯ್‌ಬಾಪಾಂಯ್ಕ್ ಪಳೆತಾ ತೆದ್ನಾಂ ತೊ ನಾತು ಕುಟ್ಮಾಚಿಂ ಮೊಲಾಂ ಶಿಕ್ತಾ. ಆನಿಂ ಹಿಂ ಮೊಲಾಂ ಕಾಂಯ್ ಖಂಚಾಯ್ ಬುಕಾಂನಿ, ಇಸ್ಕೊಲಾಂನಿ ವ ಕೊಲೆಜಿಂನಿ ಶಿಕೊಂಕ್ ಜಾಯ್ನಾಂತ್. ಘರಾಂ ಭಾಂದ್ಚಾಂನಿ ’ಘರಾಣೆಂ’ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜಾಜಯ್, ಕುಟಾಮ್ ಭಾಂದ್ಚಾಧಿಂ ’ಕುಟ್ಮಾಚಿಂ ಮೊಲಾಂ’ ಕಸಲಿಂ ಮ್ಹಳ್ಳೆಂ ಸಮ್ಜಾಜಯ್ ಆನಿಂ ತೆದ್ನಾಂ ಮಾತ್ರ್ ಹ್ಯಾ ಕುಟ್ಮಾಚಾ ಫೆಸ್ತಾಕ್ ಖರೊ ಮಹತ್ವ್ ಯೆತಲೊ.

- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

मुक्त उलवप वा सवायेचें (चीप) उलवप?

बिजी आसाय‌गी?

ಕಸ್ಟ್