ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮಾಪ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್, ಮತಾಂತರ್, ಸೊಲ್ಲೊ, ಜಿಣ್ಯೆ ಸಾಂಗಾತಿ.
"ತುಜೆಂ ಪರ್ಫೋರ್ಮೆನ್ಸ್ ಎಪ್ರೇಯ್ಸಲಾಚೆಂ ಫಾಯ್ಲ್ ಮ್ಹಾಕಾ ಪಾವ್ಲಾಂ. ಆಜ್ ಯೂಜುವಲ್ - ಯೂ ಹ್ಯಾವಂಟ್ ಎಚೀವ್ಡ್ ಯುವರ್ ಸ್ಕೋರ್ ಕಾರ್ಡ್ ಮಿಸ್ಟರ್ ಗುರ್ದಾಸ್"
ಸುಮಾರ್ ವೇಳ್ ಫಾಯ್ಲಾಚೆರ್ ಗಂಭೀರ್ ದೀಶ್ಟ್ ಘಾಲುನ್ ಆಸ್ಲ್ಲ್ಯಾ ಪ್ರಧಾನ್ ಸಂಪಾದಕ್ ಶರಣ್ ಮೋಟ್ವಾನಿನ್ ಆಪ್ಲ್ಯಾ ನಾಕಾಚೆರ್ ಆಸ್ಚ್ಯಾ ಚಸ್ಮಾ ವಯ್ಲ್ಯಾನ್ ಗುರ್ದಾಸಾಕ್ ತಿಳ್ಳೆಂ.
ಕದಲಾರ್ ಹಾತ್ ದವರ್ನ್ ಬಸೊನ್ ಆಯ್ಕತೆಲ್ಯಾ ಗುರ್ದಾಸಾಚ್ಯಾ ತೊಂಡಾಚೊ ಛಾರೊ ಬದ್ಲೊಂಕ್ ನಾತ್ಲೊ, ಹೆಂ ಕಾಂಯ್ ತಾಕಾ ನವೆಂ ನ್ಹಯ್. ಹಿಂ ಉತ್ರಾಂ ತಾಕಾ ವ್ಹಳ್ಕೆಚಿಂ. ಉತ್ರಾಂಚ್ ಕಿತ್ಯಾಕ್? ಹೆಂ ಕೂಡ್, ಕದೆಲಾಂ, ಹರ್ಯೆಕ್ ವ್ಹಳ್ಕೆಚೆಂ. ಪುಣ್ ಮೆಜಾಪಾಟ್ಲ್ಯಾ ಕದೆಲಾಚೆರ್ ಮಾತ್ರ್ ಬೊಸ್ಚೊ ವೆಕ್ತಿ ಮಾತ್ರ್ ಬದಲ್ತಾಲೊ. ತಾಚ್ಯಾ ಮತಿಂತ್ ಅವ್ಯಕ್ತ್ ಸವಾಲ್ ಉದೆವ್ನ್ ಯೆತಾಲೆಂ;
’ಕಾಂಯ್ ಹೆಂ ಮಾಪ್ ವಾ ಮಾಪ್ದಂಡ್!?’.
ಅಜೀಕ್ ಕಾಂಯ್ ಅಟ್ರಾ ವರ್ಸಾಧಿಂ ಸುರ್ವಾತ್ ಕೆಲ್ಲ್ಯಾ ಹ್ಯಾ ಮ್ಯಾಗ್ಜೀನಾಂತ್ ಚಡ್ತಾವ್ ಜಾವ್ನ್ ಹರ್ಯೆಕಾ ವರ್ಸಾಂತ್ ಸಂಪಾದಕ್ ಬದಲ್ತಾಲೆ. ಪುಣ್ ಪಾಟ್ಲ್ಯಾ ಥೊಡ್ಯಾ ಮಯ್ನ್ಯಾಧಿಂ ಸಂಪಾದಕಾನ್ ಕಾಮ್ ಸೊಡುನ್ ಗೆಲ್ಲ್ಯಾ ಉಪ್ರಾಂತ್, ಸದ್ದ್ಯಾಕ್ ಪ್ರಧಾನ್ ಸಂಪಾದಕ್ಚ್ ಪತ್ರ್ ಚಲಯ್ತಾಲೊ.
"ತುವೆಂ ಮ್ಹಜ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ನಾಂಯ್, ತುಜ್ಯಾ ಸ್ಕೋರ್ ಕಾರ್ಡಾಂತ್ ತುಕಾ ದಿಲೆಲ್ಯಾ ಹರ್ಯೆಕಾ ಶೆತಾಂತ್ ತುಜಿ ಮಾಪ್ಣಿ ನಿರಾಸ್ದಾಯಕ್ ಜಾವ್ನಾಸಾ. ತುಕಾ ಕಾಂಯ್ ಸಾಂಗೊಂಕ್ ಆಸಾ? ತುಕಾ ಪಾಟ್ಲ್ಯಾ ಎಕಾ ವರ್ಸಾಂತ್, ತುಜೆಥಂಯ್ ಜಾಲ್ಲಿ ಕಾಂಯ್ ಬದ್ಲಾವಣ್ ದಿಸ್ತಾ?"
"...................." ಗುರ್ದಾಸಾನ್ ಮೌನ್ ಪಸಂದ್ ಕೆಲೆಂ.
**********
ಅಜೀಕ್ ಕಾಂಯ್ ಸಾತ್ ವರ್ಸಾಧಿಂ ಆರೋ ಮ್ಯಾಗಜಿನಾಚೊ ವರ್ದೆಗಾರ್ ಜಾವ್ನ್ ಕಾಮಾಕ್ ಸೆರ್ವಲ್ಲ್ಯಾ ದಿಸಾಕ್ ಆನಿ ಆಜ್, ಸಾತ್ ವರ್ಸಾಂ ಉಪ್ರಾಂತ್ಲ್ಯಾ ದಿಸಾಕ್ ಅಂತರ್ ಮ್ಹಳ್ಯಾರ್ ಸಂಪೊನ್ ಗೆಲ್ಲಿಂ ವರ್ಸಾಂ ಮಾತ್ರ್ ಶಿವಾಯ್ ಹೆರ್ ಕಸ್ಲೋಯ್ ಬದ್ಲಾಪ್ ಜಾಂವ್ಕ್ ನಾತ್ಲ್ಲೊ. ತೊಚ್ಚ್ ಸುಕೊ ಸಾಡೆ ತೀನ್ ಹಜಾರಾಂಚೊ ಸಾಂಬಾಳ್, ತೆಂಚ್ ದೇಡ್ ಹಜಾರ್ ರುಪ್ಯಾಂಚೆಂ ಭಾಡ್ಯಾಚೆಂ ಲ್ಹಾನ್ ಕೂಡ್. ತಿಚ್ಚ್ ಲೋಕಲ್ ಟ್ರೇಯ್ನ್, ಬಿಎಸ್ಟಿ ಬಸ್ಸಾಂ ಆನಿ ತೆಂಚ್ ಯಾಂತ್ರೀಕೃತ್ ಜಿವಿತ್.
ತಶೆಂ ಮ್ಹಣೊನ್ ಮ್ಯಾಗಜಿನಾನ್ ವೃದ್ದಿ ಕರುಂಕ್ ನಾ ಮ್ಹಣ್ ನ್ಹಯ್. ಪಯ್ಲೆಂ ಸಾಯನ್ ಕೊಲಿವಾಡಾಂತ್ಲ್ಯಾ ಚಾರ್ಶಿಂ ಸ್ಕ್ವೇರ್ ಫುಟಾಚ್ಯಾ ದಫ್ತರಾಂತ್ ಸಾತ್ ಜಣಾಂನಿ ಸುರ್ವಾತ್ ಕೆಲ್ಲ್ಯಾ ಹ್ಯಾ ಪತ್ರಾನ್ ಆಜ್ ಭಾರತಾಚ್ಯಾ ಪ್ರಮುಖ್ ಮೆಟ್ರೊ ಶ್ಹೆರಾಂನಿ ಆಪ್ಲಿ ಅಸ್ಮಿತಾಯ್ ರುತಾಂ ಕೆಲ್ಯಾ. ಆಜ್ ಸಾಯನ್ ಕೊಲಿವಾಡಾಂತ್ ಕಾಂಯ್ ತೀನ್ ಮಾಳಯಾಂಚೆಂ ಭಾಂದಾಪ್ ಜಾಲಾಂ, ಕಾಂಯ್ ಸಾಟಾಂಚ್ಯಾಕೀ ಚಡಿತ್ ಕಾಮ್ ಕರ್ತಾತ್ ತರ್ ಕಾಂಯ್ ಶೆಂಭೊರಾಂನಿ ರಿಪೋರ್ಟರ್ ಆಸಾತ್. ಶೆಂಭೊರಾಂನಿ ವಿಖ್ರ್ಯಾಚೆ ಯೇಜಂಟ್ ಆಸಾತ್. ರಿಸರ್ಚ್ ಆನಲಿಸ್ಟ್ ಆಸಾತ್. ಮುಂಬಯ್ ಮಾತ್ರ್ ನ್ಹಯ್, ದೆಲ್ಹಿಂತ್, ಚೆನ್ನಯಾಂತ್, ಕೋಲ್ಕತ್ತಾಂತ್ ಸಯ್ತ್ ಬ್ರ್ಯಾಂಚಾಂ ಆಸಾತ್.
ಶರಣ್ ಮೋಟ್ವಾನಿ ಮಹತ್ವಾಕಾಂಕ್ಶಿ, ಜರ್ಮನಿಚ್ಯಾ ಬರ್ಲಿನಾಂತ್ ಪತ್ರಿಕೋಧ್ಯಮಾಚಿ ಉಂಚ್ಲಿ ಸನದ್ ಜೊಡುನ್ ಯೆತಾನಾ ತಾಚಿ ಹುಮೆದ್ ವಿಶೇಸ್. ತಾಣೆಂ ಸುರ್ವಾತ್ ಕೆಲ್ಲ್ಯಾ ಪತ್ರಾನ್ ವೆಗಿಂಚ್ ಮೊಳ್ಬಾಕ್ ಆಪಡ್ಚೊ ಭರ್ವಸೊ ಉಭ್ಜಾಯಿಲ್ಲೊ. ’ಆರೋ’ ತಾಚೆಂ ಸ್ವಪಾಣ್, ಹರ್ಯೆಕ್ ಸಂಗ್ತ್ಯೊ ಉಟಾಉಟಿಂ ಬದ್ಲಾಜಯ್, ಖಿಣಾನ್ ಜಾಯ್ಜಯ್, ಫಾಸ್ಟ್, ಕ್ವಿಕ್, ಆಕ್ಯುರೆಟ್ - ಹೆ ಹಾಚ್ಯಾ ದೀಸ್ಪಡ್ಚ್ಯಾ ಉಲವ್ಣ್ಯಾಂತ್ ಪರತ್ ಪರತ್ ಆಯ್ಕೊಂಕ್ ಮೆಳ್ಚೆ ಸಬ್ಧ್.
ಬರಾಪ್ ಕೊಣಾಕ್ ಹವ್ಯಾಸ್ ಮಾತ್ರ್ ಆಸೊಂಕ್ ಪುರೊ, ಕೊಣಾಕ್ ಪಿಸಾಯ್ ಜಾಂವ್ಕ್ ಪುರೊ, ಆನಿ ಕೊಣಾಕ್ ಖೊರೊಜ್ ಜಾಂವ್ಕ್ ಪುರೊ. ಪುಣ್ ಪತ್ರಿಕೋಧ್ಯಮ್ ತಶೆಂ ಜಾಯ್ನಾ. ದೆಕುನ್ ಬರಯ್ಣಾರ್ ಆನಿ ಸಾಹಿತಿ ವೆವೆಗ್ಳೆ ಪ್ರಕಾರ್. ಬರಯ್ಣರಾನ್ ಚಿಂತ್ಚಿ ರೀತ್ ವಿಂಗಡ್, ಮಾಪ್ಚೆಂ ಮಾಪ್ ವೆಗ್ಳೆಂ, ದೆಖ್ಚಿ ರೀತ್ ಅಥ್ವಿ. ಬರಯ್ಣಾರಾನ್ ಬೇಜವಬ್ದಾರ್ ಜಾವ್ಯೆತಾ, ಪುಣ್ ಸಾಹಿತಿನ್ ನ್ಹಯ್. ಬರಯ್ಣರಾನ್ ನೈತಿಕ್ ಮೊಲಾಂ ಹೊಗ್ಡಾವ್ನ್ ಜಿಯೆವ್ಯೆತಾ, ಪುಣ್ ಸಾಹಿತಿನ್ ನ್ಹಯ್. ಬರಯ್ಣಾರಾನ್ ಪೊಳ್ಕುರ್ವಾದ್ ವೆಂಗ್ಯೆತಾ ಪುಣ್ ಸಾಹಿತಿನ್ ನ್ಹಯ್. ಬರಯ್ಣಾರಾನ್ ಫಾಯ್ದೊ-ಲುಕ್ಸಾಣ್ ಚಿಂತ್ಯೆತಾ, ಪುಣ್ ಸಾಹಿತಿನ್ ನ್ಹಯ್.
ಗುರ್ದಾಸಾನ್ ಪತ್ರಿಕೋಧ್ಯಮಾಕ್ ಪಾಂಯ್ ಥೆಂಕ್ಲ್ಲೊ ಹವ್ಯಾಸಾಂತ್ಯೀ ನ್ಹಯ್ ಜವಾಭ್ದಾರೆಂತ್ಯೀ ನ್ಹಯ್. ಗುರ್ದಾಸಾಕ್ ಜಿಣ್ಯೆಂತ್ ಹವ್ಯಾಸ್ ಮ್ಹಣ್ಚೆಂ ಕಾಂಯ್ ಕರುಂಕ್ ವೇಳ್ಚ್ ಕಂಯ್ ಆಸ್ಲೊ? ಪಾಟಿಂ ಫುಡೆಂ ಪಳೆಂವ್ಕ್ ತಾಚಿಂ ಕೊಣ್ಂಚ್ ನಾತ್ಲಿಂ. ಜಶೆಂ ಜಿವಿತಾನ್ ಆವ್ಕಾಸ್ ದಿಲೊ ತಸೊ ತೊ ಚಮ್ಕೊನ್ ಗೆಲ್ಲೊ.
**********
ಬೆಳ್ಗಾಂವ್ಚ್ಯಾ ಪಿರೇನ್ವಾಡಿಂತ್ಲ್ಯಾ ಎಕಾ ಲಾಚಾರ್ ರಯ್ತಾಚೊ ಪೂತ್ ಜಾವ್ನ್ ಜಲ್ಮಲ್ಲ್ಯಾ ಗುರ್ದಾಸಾನ್ ಧಾವಿ ಪರ್ಯಾಂತ್ಲೆಂ ಶಿಕಾಪ್ ಜೊಡ್ಲ್ಲೆಂಚ್ ಭೋವ್ ಕಶ್ಟಾಂನಿ; ತೆಂಯ್ ಸರ್ಕಾರಿ ಇಸ್ಕೊಲಾಂತ್. ತಾಚಿ ಆವಯ್ ಘರಾಂತ್ ರಾಂದ್ಪಾಚಿ, ನಿತಳಾಯೆಚಿ ಜವಾಭ್ದಾರಿ ಕರ್ಚೆಸವೆಂ ಘೊವಾಸವೆಂ ಗಾದ್ಯಾಂನ್ ಘೊಳೊಂಕ್ ಸಯ್ತ್ ವೆತಾಲಿ. ಸದಾಂ ಇಸ್ಕೊಲಾಂತ್ಲೊ ಯೆತೆಚ್ಚ್ ಗುರ್ದಾಸ್ ಗುಡ್ಯಾರ್ ಆಸ್ಚೆಂ ಶೆಣ್ ವಿಂಚುಂಕ್ ವೆತಾಲೊ. ಗಿರೇಸ್ತಾಂಕ್ ಕಾಂಯ್ ಕೋನ್ವೆಂಟ್ ಇಸ್ಕೊಲಾಂ ಥೊಡಿಂ ಆಸ್ಲಿಂ ಪುಣ್ ಶಿಕ್ಪಾಚೆ ಫೀಸ್ ದೀಂವ್ಕ್ ಗತ್ ನಾತ್ಲ್ಲ್ಯಾ ಗುರ್ದಾಸಾಕ್ ಧಾವಿ ಜಾತೆಚ್ಚ್ ಫುಡ್ಲಿ ವಾಟ್ ಗಯ್ರಿ ಗಯ್ರಿ ದಿಸ್ತಾಲಿ.
ಶಾಂತ್ ಸ್ವಭಾವಾಚೊ ಗುರ್ದಾಸ್ ಗರ್ಜೆಭಾಯ್ರ್ ಕೊಣಾಯ್ಲಾಗಿಂ ಉಲಯ್ನಾತ್ಲ್ಲೊ. ತಾಚಿ ಅಭೀವ್ಯಕ್ತಿ ಜಾವ್ನಾಸ್ಲಿ ’ಬರಾಪ್’. ಸಾಹಿತಾರುಪಾರ್ ತೊ ಚಿಂತಾಲೊ, ತಾಣೆಂ ಕೊಣಾಲಾಗಿಂಗೀ ಉಲಂವ್ಕ್ ಆಸಾ, ಆಪ್ಲೆ ವಿಚಾರ್ ಸಾಂಗೊಂಕ್ ಆಸಾತ್, ಕೊಣ್ಗೀ ತಾಕಾ ವಾಚ್ತಾತ್ ಆನಿ ಸಮ್ಜತಾತ್ ಮ್ಹಳ್ಳೆಂ ತಾಚೆಂ ಚಿಂತಾಪ್. ಇಸ್ಕೊಲಾಂತ್ ತವಳ್ ತವಳ್ ಪ್ರಭಂಧ್ ಬರವ್ನ್ ಇನಾಮಾಂ ಆಪ್ಣಾಯಿಲ್ಲ್ಯಾ ಹಾಚ್ಯಾ ಬರ್ಪಾ ಪ್ರತಿಭೆಚೆರ್ ಥೊಡ್ಯಾ ಟಿಚರಾಂನಿ ಹಾಕಾ ಪತ್ರಿಕೋಧ್ಯಮಾ ತೆವ್ಶಿನ್ ಫುಡಾರ್ ಸೊಧುಂಕ್ ಸುಚಯಿಲ್ಲೆಂ. ದೆಖುನ್ ಧಾವಿ ಜಾತೆಚ್ಚ್ ತೊ ಈವ್ನಿಂಗ್ ಕೊಲೆಜಿಂತ್ ಪಿಯುಸಿ ಕರ್ನ್, ಬಿ.ಯೆ. ಶಿಕೊನ್ ಆಸ್ತಾನಾ ದಿಸಾಚೆಂ ತೊ ಗಾದ್ಯಾಚೆಂ ಕಾಮ್ ಕರ್ತಾಲೊ. ಶಿಕ್ಪಾಚ್ಯಾ ಮಧೆಂಚ್ ತಾಚೊ ಬಾಫುಯ್ ಸರ್ಲೊ. ಆತಾಂ ತಾಚೆಂ ಶಿಕಾಪ್ ಮುಖಾರುಂಚೆಗೀ ವಾ ಕುಟ್ಮಾಚೊ ಹಾರ್ಭಾರ್ ಖಾಂದಾರ್ ಘೆಂವ್ಚೊಗೀ ಸಮ್ಜಾನಾ ಜಾಲೆಂ ತಾಕಾ. ಭೋವ್ ಲ್ಹಾನ್ ಪ್ರಾಯೆರ್ಚ್ ಜಿಣ್ಯೆನ್ ಜಾಯ್ತೆಂ ಲಿಸಾಂವ್ ಶಿಕಯಿಲ್ಲೆಂ ತಾಕಾ. ಹೆಚ್ಚ್ ವೆಳಾರ್ ತಾಣೆಂ ಬರಯ್ಣಾರ್ ಜಾವ್ನ್ ಆಪ್ಲಿ ಪ್ರತಿಭಾ ಧಾಖಯ್ಲಿ. ಮರಾಠಿ, ಹಿಂದಿ, ಕಾನಡಿ ಭಾಸೆಸವೆಂ ಇಂಗ್ಲಿಶ್ ಭಾಸೆಚೆಂ ಸಾಹಿತ್ ಸಯ್ತ್ ವಾಚುಂಕ್ ಲಾಗ್ಲೊ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜಿಕ್ಲೊ ಮ್ಹಣ್ತಚ್ ಅಪ್ಸೊಚ್ ಲೊಕಾಂಕ್ ವ್ಹಳ್ಕೆಚೊ ಜಾಲೊ.
ಗಾಂವ್ಟಿ ಲೊಕಾಂಸವೆಂ ಭರ್ಸೊನ್ ಜಿಯೆತಾಲೊ ದೆಖುನ್ ತಾಕಾ ಸಾದ್ಯಾ ಲೊಕಾಂಚೆಂ ಜಿವಿತ್, ಚಿಂತಾಪ್, ಕಾಳ್ಜಾಚಿ ಉಡ್ಕಿ, ಹಾಸೊ, ದೂಕ್ ಸಮ್ಜೊಂಕ್ ಸಕ್ತಾಲೊ. ಗಾದ್ಯಾಂನಿ ಕೊಬು ಲಾಂವ್ಚಿ, ಕೊಬು ಲುವ್ಣಿ, ಬರೊ ಕೊಬು ಭಾಂಧುನ್ ಸಾಕರ್ ಫೆಕ್ಟ್ರೆಕ್ ವಿಖ್ಚೊ, ಆನಿ ಮೊಡ್ಲ್ಲೊ ಕೊಬು ಗಾಂವ್ಚಾಂನಿ ಗೋಡ್ ಕರುಂಕ್, ಸೊರೊ ಕಾಡುಂಕ್ ಆನಿ ಹೆರ್ ಗರ್ಜಾಂಕ್ ಉಪೇಗ್ ಕರ್ಚೆಂ ತೊ ಸಮ್ಜಲ್ಲೊ. ಕೊಬಾಸವೆಂ ಹೆರ್ ತರ್ಕಾರಿ ಲಾಂವ್ಣಿ, ವೊಳಿ ಖೊಂಡ್ಚೆಂ, ಮೆರೊ ಖೊಂಡ್ಚೆಂ ಕಾಮ್ ತೊ ಕರ್ನಾಸ್ಚ್ಯಾ ಸಂಧರ್ಭಿಂ, ಲೊಕಾಂಕ್ ಆಸಕ್ತ್ ನೀಲು ಫುಲೆಚ್ಯಾ ನಾಟಕಾಂನಿ, ದಾದಾ ಕೋಂಡ್ಕೆಚ್ಯಾ ಬಪ್ಪರ್ ಫಿಲ್ಮಾಂಚಿ, ಆನಿ ಕಾಂಯ್ ಆಸಕ್ತ್ ಆಸಾ ತರ್ ವರ್ಸಾನ್ ವರಸ್ ಜಾಂವ್ಚ್ಯಾ ಜಾತ್ರ್ಯಾಚೆರ್.
ಕಶ್ಟಾಂನಿ ಬಿ.ಎ.ಶಿಕೊನ್ ಕಾಂಯ್ ಕಾಮ್ ಸೊಧುಂಕ್ ಲಾಗ್ಚ್ಯಾ ದಿಸಾಂನಿ, ಪಿಡೆನ್ ತಾಚಿ ಆವಯ್ ಸರ್ಲಿ. ಆತಾಂ ಪಿರೆನ್ವಾಡಿಂತ್ ಏಕ್ ಲ್ಹಾನ್ ಘರಾಂತ್ ತೊ ಎಕ್ಸುರೊ ಜಿಯೆಂವ್ಕ್ ಸಕ್ಲೊನಾ. ಗಾಂವ್ಚ್ಯಾ ಮುಖಿಯಾಚ್ಯಾ ಶಿಫಾರಸೆನ್ ಬೊಂಬೊಯ್ ಗೆಲೊ ಆನಿ ಘಾಟ್ಕೋಪರಾಂತ್ಲ್ಯಾ ಎಕಾ ಪಯ್ಸಿಲ್ಯಾ ಸಯ್ರ್ಯಾಸವೆಂ ರಾವೊನ್ ಕಾಮ್ ಸೊಧುಂಕ್ ಲಾಗ್ಲೊ.
ಬರಯ್ಣಾರ್ ಬೇಕಾರಿ! ಪ್ರತಿಶ್ಟಿಕ್ ಬೇಕಾರಿ!! ಶಿಕ್ಪಿ ಬೇಕಾರಿ!!!.
ಕೊಣ್ ಮ್ಹಣ್ತಾ ’ಶಿಕಾಪ್ ಜೊಡ್ಚೆಂ ಕಾಮ್ ಮೆಳೊಂಕ್’, ಪುಣ್ ಹಕೀಗತೆಂತ್ ಹೆಂ ಅವ್ವಲ್ ಫಟ್. ಕಾಮಾಕ್ ಆನಿ ಶಿಕ್ಪಾಕ್ ಸಂಭಂಧ್ ಆಸಾಜಯ್ಚ್ ಮ್ಹಣ್ ತಾ. ಅಶೆಂ ಪಳೆಂವ್ಕ್ ಗೆಲ್ಯಾರ್, ಶಿಕಾಪ್ ಜೊಡ್ಚೆಂ ಸಮಾಜೆಂತ್ ಏಕ್ ಬರೊ ನಾಗರಿಕ್ ಜಾವ್ನ್ ಜಿಯೆಂವ್ಕ್. ಬರೆಂ-ವಾಯ್ಟ್ ಮಧ್ಲೊಂ ಫರಕ್ ಸಮ್ಜೊಂಕ್, ಸವಾಲಾಂ ಕರುಂಕ್. ಪುಣ್ ಜೆದ್ನಾಂ ಮತಿಂತ್ ಕೆಲ್ಲಿಂ ಹಿಂ ಸವಾಲಾಂ ಅಧುರಿಂಚ್ ಜಾವ್ನ್ ಉರ್ತಾತ್, ತೆದ್ನಾಂ ಉಭ್ಜಾತಾಲೆಂ ಎಕಾ ರಿತಿಚೆಂ ಝುಜ್.
ಬೊಂಬೊಯಾಂತ್ ಕಾಂಯ್ ಫೆಸ್ತಾಂ ಪರ್ಬೊ ಉಣ್ಯೊ ನಾಂತ್. ದಿವಾಳಿ ಜಾಂವ್, ನವ್ರಾತ್ರಿ ಜಾಂವ್, ಗಣ್ಪತಿ ಜಾಂವ್, ಕ್ರಿಸ್ಮಸ್, ಜಾಂವ್, ಈದ್ ಜಾಂವ್ - ಹರ್ಯೆಕ್ಲಿಂ ಹ್ಯಾ ಫೆಸ್ತಾಂನಿ ಮೆತೆರ್ ಜಾತಾಲಿಂ. ಕೊಣಾಕ್ ಮಹತ್ವ್ ಕಳೊಂದಿ ಆನಿ ಕೊಣಾಕ್ ಕಳಾನಾಯೆ ಜಾಂವ್ದಿ. ಕ್ರಿಸ್ಮಸಾಚ್ಯಾ ಸಾಂತಾಕ್ಲೋಜಾಕ್ ನವ್ಯಾ ವರ್ಸಾದಿಸಾ ಥೊಡೆ ಲಾಸ್ತಾಲೆ, ರಾಖಿ ದಿಸಾ ರಾಖಿ ಭಾಂದ್ಲ್ಲ್ಯಾ ಚೆಡ್ವಾಸವೆಂ ಬೀಚಾಂಕ್ ವೆತಾಲೆ, ಗಣ್ಪತಿಕ್ ಉದ್ಕಾಂತ್ ಘಾಲ್ಚ್ಯಾ ತೆಂಪಾರ್ ಘರಾನ್ಘರ್ ಪಯ್ಶೆ ವಸೂಲಿ ಕರ್ತಾಲೆ - ಆಸೊಂ.
ವರ್ಸಾನ್ ವರಸ್ ಹ್ಯಾ ಫೆಸ್ತಾಂ ಸವೆಂ ಹೆರ್ ಸಾಂಸ್ಕೃತಿಕ್ ಚಟುವಟಿಕೊ ಜಾತಾಲ್ಯೊ. ತಾಂತುಂ ಮರಾಟಿ ಕಲಾ ಮೇಳ ಸಂಸ್ಥೊ ಏಕ್. ತಾಂಚೆಂ ’ಆಮ್ಚೊ ಮಾಣುಸ್’ ಮ್ಹಳ್ಳೊ ಪುರಸ್ಕಾರ್ ಹ್ಯೇ ಪಾವ್ಟಿಂ ಗುರ್ದಾಸಾಕ್ ದೀಂವ್ಕ್ ಪ್ರಾಯೋಜಕಾಂನಿ ನಿರ್ಣಯ್ ಕೆಲ್ಲೊ. ಅಶೆಂ ನಮ್ಯಾರ್ಲೆಲ್ಯಾ ದಿಸಾ ದುರ್ದಾಸಾಕ್ ತ್ಯಾ ಸಾಂಸ್ಕೃತಿಕ್ ಸಭೆಂತ್ ವೆದಿಚೆರ್ ಆಪವ್ನ್ ಮಾನ್ ಕೆಲೊ. ಮುಖೆಲ್ ಸಯ್ರೊ ಪಾಠಕ್ ಇಂಡಸ್ಟ್ರೀಸಾಚೊ ಮ್ಹಾಲಕ್ ದೀನನಾತ್ ಪಾಠಕಾನ್ ಮರಾಠಿ ಮಾನುಸಾಂಕ್ ಕ್ರಿಯಾತ್ಮಕ್ ವಾವ್ರ್ ಕರುಂಕ್ ಉಲೊ ದಿಲೊ ತಶೆಂಚ್ ಗಂಧಾಚೊ ಹಾರ್ ಗುರ್ದಾಸಾಚ್ಯಾ ಗಳ್ಯಾರ್ ಸೊಭಯ್ಲೊ ಆನಿ ಪೊಟ್ಲುನ್ ಧರ್ನ್ ಅಭಿನಂದನ್ ಪಾಟಯ್ಲೆ. ವೆದಿಚೆಂ ಕಾರ್ಯೆಂ ಜಾಲ್ಲೆಂಚ್, ತಾಣೆಂ ಗುರ್ದಾಸಾಕ್ ಆಪ್ಲೆಂ ವಿಜಿಟಿಂಗ್ ಕಾರ್ಡ್ ದಿಲೆಂ.
ಜಿಣ್ಯೆಂತ್ಲೊ ಪಯ್ಲೊ ಅನ್ಭೋಗ್ ಗುರ್ದಾಸಾಚೊ. ವೆದಿಚೆರ್ ಚಡೊನ್ ಇತ್ಲ್ಯಾ ಲೊಕಾಂ ಮಧೆಂ ಮಾನ್-ಸಮ್ಮಾನ್ ಘೆಂವ್ಚೊ. ತಾಣೆಂ ತೆಂ ವಿಜಿಟಿಂಗ್ ಕಾರ್ಡ್ ಜೊಗಾಸಣೆನ್ ದವರ್ಲೆಂ. ಭೋವ್ ಮಹತ್ವ್ ದಿವುನ್.
ಬೊಂಬೊಯ್ ಯೇವ್ನ್ ಕಾಂಯ್ ದೇಡ್ ಮಯ್ನೊ ಜಾಲ್ಲೊ. ಹ್ಯಾ ದೇಡ್ ಮಯ್ನ್ಯಾಂನಿ ತೊ ಚರ್ಚ್ಗೇಟ್ ಖಂಯ್ ಆಸಾ, ವಿಟಿ ಖಂಯ್ ಆಸಾ? ಥಾನಾ ಖಂಯ್ ಆಸಾ? ಅಂಧೇರಿ ಖಂಯ್ ಆಸಾ? ಬಿಎಸ್ಟಿ ಬಸ್ಸಾಂ ಕಶಿಂ ಧರ್ಚಿಂ? ಖಂಚಿಂ ನಂಬ್ರಾಚಿಂ ಬಸ್ಸಾಂ ಘಾಟ್ಕೊಪರ್ ಯೆತಾತ್ ಮ್ಹಳ್ಳೆಂ ಶಿಕ್ಲ್ಲೊ ತರ್ಯೀ ಜೊಕ್ತೆಂ ಕಾಮ್ ತಾಕಾ ಮೆಳೊಂಕ್ ನಾತ್ಲ್ಲೆಂ. ಎಕಾ ವಾಟೆನ್ ಕಾಮ್ ನಾ, ದುಸ್ರೆ ವಾಟೆನ್ ರಾವೊಂಕ್ ಭಾಡೆಂ ದೀಂವ್ಕ್ ನಾಂತ್ ಮ್ಹಳ್ಳಿ ಖಂತ್. ಉಪಾವ್ ಕರುನ್ ಎಕಾ ದಿಸಾ, ದೀನನಾಥ್ ಪಾಠಕಾಕ್ ಖುದ್ದ್ ಮೆಳೊಂಕ್ ಚಿಂತ್ಲೆಂ. ಕಾಂಯ್ ತಾಚ್ಯಾ ವ್ಹಳ್ಕೆಂತ್ ಪುಣಿಂ ಆಪ್ಣಾಕ್ ಕಾಮ್ ಲಾಭ್ಲೆಂ ತರ್ ಬರೆಂಚ್!
ದೀನನಾಥ್ ಪಾಠಕಾಚಿ ದಾದರಾಂತ್ ಏಕ್ ಲ್ಹಾನ್ ಫೇಕ್ಟ್ರಿ ಆಸ್ಲಿ, ಫ್ಯಾಬ್ರಿಕೇಶನಾಚಿ ಫೇಕ್ಟರಿ. ಅಪ್ಣಾಕ್ ಅಚಾನಕ್ ಮೆಳೊಂಕ್ ಆಯಿಲ್ಲ್ಯಾ ತರ್ನಾಟ್ಯಾಚಿ ವ್ಹಳೊಕ್ ಭಾಯ್ರ್ ಆಸ್ಚ್ಯಾ ಗೇಟ್ಕಿಪರಾಕ್ ಸಾಂಗ್ತಚ್ ತಾಕಾ ಭಿತರ್ ಧಾಡುಂಕ್ ಫೊನಾರ್ ಪರ್ವಣ್ಗಿ ದಿಲಿ ಪಾಠಕಾನ್. ಗುರ್ದಾಸಾಕ್ ದಫ್ತರಾಚ್ಯಾ ಭಿತರ್ ಆಪವ್ನ್ ಕೃತಕ್ ಹಾಸೊ ಪಾಟವ್ನ್ ಬಸೊಂಕ್ ಸಾಂಗ್ಲೆಂ. ಪಯ್ಲೆಂಚ್ ಆಫಿಸಾಂತ್ ಪಾಠಕಾಚೆ ದೋಗ್ ಸಯ್ರೆ ಆಸ್ಲೆ ದೆಖುನ್ ತಾಂಚೆ ಮುಖಾರ್ ಕಶೆಂ ಉಲಂವ್ಚೆಂ ಮ್ಹಣ್ ಚಿಂತುಂಕ್ ಲಾಗ್ಲೊ ಗುರ್ದಾಸ್. ತ್ಯಾ ಶಿವಾಯ್ ಭಿತರ್ ಹಿಂವ್ ಖಾಂವ್ಚೆಪರಿಂ ಎ.ಸಿ.ಚೊ ಥಂಡ್ ಹವೊ.
"ಸರ್, ತುಮಿಂ ಮ್ಹಾಕಾ.. ಪೊ.. ಪೊಯ್ರ್.. ಸಮ್ಮಾನ್ ಕೆಲ್ಲೊ... ಘಾಟ್ಕೊಪರಾಂತ್.." ಗುರ್ದಾಸ್ ಪಾದ್ದೆವ್ನ್ ಉಲಯ್ಲೊ.
"ವ್ಹಯ್.. ಹಾಂವ್ ಕಿತೆಂ ಕರುಂ ಆತಾಂ ತುಕಾ? ಮ್ಹಜೆ ಥಾವ್ನ್ ಕಾಂಯ್..."
"ಸರ್.. ಹಾಂವ್ ಬೆಳ್ಗಾಂವ್ಚ್ಯಾ ರಾಣಿ ಪಾರ್ವತಿ ದೇವಿ ಕೊಲೆಜಿಂತ್ ಬಿ.ಎ. ಶಿಕೊನ್ ಆಯ್ಲಾಂ, ಮ್ಹಾಕಾ ಖಂಯ್ ತರೀ ಕಾಮ್ ಮೆಳ್ಳೆಂ ತರ್ ಉಪ್ಕಾರ್ ಜಾತೊ. ದೆಖುನ್ ಕಾಂಯ್ ತುಮ್ಚ್ಯಾ ವ್ಹಳ್ಕೆರ್.."
"ತುಂ ಖಂಯ್ ರಾವ್ತಾಯ್? ಕೊಣಾಸವೆಂ ರಾವ್ತಾಯ್?"
"ಸರ್, ಹಾಂವ್ ಘಾಟ್ಕೊಪರಾಂತ್ಲ್ಯಾ ಮ್ಹಜ್ಯಾ ಎಕಾ ಪಯ್ಸಿಲ್ಯಾ ಸಯ್ರ್ಯಾಸವೆಂ, ತಾಚ್ಯಾ ಕುಡಾಂತ್ ರಾವ್ತಾಂ"
"ಲುಕ್ ಆಟ್ ಟುಡೇಸ್ ಯೂತ್, ತರ್ನಾಟ್ಯಾ.. ತುಜ್ಯಾ ಪ್ರಾಯೆರ್ ಹಾಂವ್ ಬೊಂಬೊಯ್ ಯೆತಾನಾ ಮ್ಹಜ್ಯಾ ಪಾಂಯಾಂಕ್ ವ್ಹಾಣೊ ಸಯ್ತ್ ನಾತ್ಲ್ಲ್ಯೊ. ಮ್ಹಜೊ ಸಯ್ರೊ ಕೊಣ್ಂಚ್ ನಾತ್ಲ್ಲೊ. ವ್ಹಳ್ಕೆಚ್ಯಾ ಎಕಾ ವಾಚ್ಮೆನಾಚ್ಯಾ ಶಿಫಾರಸೆನ್ ತಾಣೆಂ ಪಾರೊತ್ ಕರ್ಚ್ಯಾ ಪಾಂಚ್ ಮಾಳಯೆಚ್ಯಾ ಬಿಲ್ಡಿಂಗಾಚ್ಯಾ ಟೆರೆಸಾರ್ ನಿದೊನ್ ದೀಸ್ ಕಾಡ್ಲ್ಯಾತ್... ನೋ ಇನ್ಫ್ಲೂಯೆನ್ಸ್, ನೋ ಸ್ಪೋನ್ಸರ್ಸ್. ಪಳೆ ಆಜ್ ಹಾಂವೆಂ ಹಿ ಫ್ಯಾಕ್ಟರಿ ಉಭಿ ಕೆಲ್ಯಾ ತರ್ ಮ್ಹಜ್ಯಾ ಮಿನತೆನ್ ಆನಿ ಪರಿಶ್ರಮಾನ್... ತುಂ ಬಿ.ಎ. ಶಿಕ್ಲಾಯ್, ತುಕಾ ಹ್ಯಾ ಎದ್ಯಾ ವ್ಹಡಾ ಶ್ಹೆರಾಂತ್ ಎಕಾ ಕಾಮಾಕ್ ಸೊಧ್ಚಿ ಶ್ಯಾಥಿ ನಾ?"
"ಸರ್, ತಶೆಂ ನ್ಹಯ್ ಸರ್, ಹಾಂವ್ ಹಾಂಗಾ ಇನ್ಫ್ಲೂಯೆನ್ಸಾಕ್ ಯೇಂವ್ಕ್ ನಾ.. ಮುಖೆಲ್ ಸಯ್ರೊ ಜಾವ್ನ್ ಆಯಿಲ್ಲ್ಯಾ ತುಮ್ಚಿಂ ಉತ್ರಾಂ ಆಯ್ಕೊನ್ ಪ್ರಭಾವಿತ್ ಜಾವ್ನ್ ಆಯ್ಲಾಂ. ಮ್ಹಾಕಾ ಮ್ಹಜ್ಯಾ ಶ್ಯಾಥಿಯೆರ್ ಕಾಮ್ ಮೆಳ್ಚೊ ಭರ್ವಸೊ ಆಸಾ. ಪುಣ್ ಎವ್ನ್ ಮಯ್ನೆ ಜಾಲೆ ದೆಕುನ್ ಮ್ಹಜೆಲಾಗಿಂ ವೇಳ್ ನಾ, ದೆಖುನ್ ಕಾಂಯ್ ತುಮ್ಚ್ಯಾ ವ್ಹಳ್ಕೆಚ್ಯಾಂ ಥಂಯ್ ಕಾಮ್ ಆಸಾ ತರ್ ತುಮಿಂ ಮ್ಹಾಕಾ ಫಕತ್ತ್ ಸಾಂಗಾ, ಹಾಂವ್ ಖುದ್ದ್ ಕಾಮಾಕ್ ಅರ್ಜಿ ಘಾಲ್ತಲೊಂ"
"ತುವೆಂ ಸಿ.ವಿ ಹಾಡ್ಲ್ಯಾಯ್ವೆ?"
"ನಾ ಸರ್"
"ಲುಕ್ ಆಟ್ ಇಟ್.." ಪಾಠಕ್ ಇಶ್ಟಾಂಕ್ ಪಳೆವ್ನ್ ಹಾಸ್ಲೊ.
"ಕಾಮ್ ಜಾಯ್ ಖಂಯ್, ಸಿವಿ ನಾ.. ಪಯ್ಲೆಂ ಖಂಯ್ ಕಾಮ್ ಕೆಲಾಂಯ್?" ಪಾಠಕಾನ್ ಮುಖಾರ್ ಸವಾಲ್ ಕೆಲೆಂ.
"ಸರ್, ಮ್ಹಾಕಾ ಆಫಿಸಾಂತ್ ಕಾಮ್ ಕರುನ್ ಅನ್ಭೋಗ್ ನಾ".
"ಮಾಗಿರ್ ಖಂಯ್ ಕಾಮ್ ಕೆಲಾಂಯ್?".
"ಘರಾಂತ್ ಗಾದ್ಯಾಂತ್ ಮಾತ್ರ್ ಕಾಮ್ ಕೆಲಾಂ".
"ಹಹಹ! ಗಾಂವ್ಚೆ ಗಾದೆ ಸೊಡ್ನ್ ಬೊಂಬೊಯ್ ಶ್ಹೆರಾಕ್ ಆಯ್ಲಾಯ್, ಖಂಚ್ಯಾ ಬೆಕುಫಾನ್ ತುಕಾ ಸಾಂಗ್ಲೆಂ ಹಾಂಗಾ ಗಾದೆ ಆಸಾತ್ ಮ್ಹಣ್?"
"ಸರ್.. ಹಾಂವ್ ಗಾದ್ಯಾಂತ್ ಕಾಮ್ ಕರುಂಕ್ ಯೇಂವ್ಕ್ ನಾ. ಹಾಂವ್ ಏಕ್ ಬರಯ್ಣಾರ್. ದೆಖುನ್ ಕಾಂಯ್ ಮ್ಹಜ್ಯಾ ತಾಲೆಂತಾಕ್ ಸರಿ ಜಾಲ್ಲೆಂ ಕಾಮ್ ಮೆಳ್ಳೆಂ ತರ್ ಹಾಂವ್ ಕರುಂ.."
"ಬರಯ್ಣಾರ್?..." ಪಾಠಕಾಚ್ಯಾ ಎಕಾ ಸಯ್ರ್ಯಾನ್ ಸವಾಲ್ ಕೆಲೆಂ.
"ವ್ಹಯ್.."
"ಬರೆಂ ಜಾಲೆಂ... ಮ್ಹಜೊ ಎಕ್ಲೊ ವ್ಹಳ್ಕೆಚೊ ಆಸಾ, ತೊ ಎಕಾ ಬರಯ್ಣರಾಕ್ ತಲಾಸ್ ಕರುನ್ ಆಸಾ.. ಬರೆಂ ಜಾಲೆಂ.. ಧರ್ ಮ್ಹಜೆಂ ವಿಜಿಟಿಂಗ್ ಕಾರ್ಡ್. ಫಾಲ್ಯಾಂ ಮ್ಹಾಕಾ ಫೋನ್ ಕರ್, ಹಾಂವ್ ತುಕಾ ಚಡ್ತಿಕ್ ವಿವರ್ ದಿತಾಂ".
ಗುರ್ದಾಸಾಕ್ ಸಮಧಾನ್ ಭಗ್ಲೆಂ. ತೊ ಅಧೇವ್ಸ್ ಮಾಗೊನ್, ಉಪ್ಕಾರ್ ಬಾವ್ಡುನ್ ಥಂಯ್ಚೊ ಭಾಯ್ರ್ ಸರ್ಲೊ.
**********
"ತುಂ ಬರಯ್ತಾಯ್ ಮ್ಹಣ್ ಮ್ಹಾಕಾ ಮ್ಹಜ್ಯಾ ಮಿತ್ರಾನ್ ರೆಫರೆನ್ಸ್ ದಿಲಾಂ" ಧವ್ಯಾ ಪಾಯ್ಜಾಮಾರ್ ಆಸ್ಚ್ಯಾ ಕಾರ್ಡ್ ಬೊರ್ಡಾಚ್ಯಾ ಶೊಪಾಚ್ಯಾ ಧನ್ಯಾನ್ ಸವಾಲ್ ಕೆಲೆಂ.
"ವ್ಹಯ್ ಸರ್.." ಗುರ್ದಾಸಾಚಿ ಜವಾಬ್.
"ಬರೆಂ. ಚೀತ್ ದೀವ್ನ್ ಆಯ್ಕ್. ಹಾಂಗಾ ಕಾಮ್ಂಚ್ ಕಾಮ್, ತುಂ ಜರ್ ಕಾಮ್ ಕರುಂಕ್ ಆಯ್ಲಾಯ್ ತರ್, ತುಕಾ ಪುರ್ಸತ್ ಆಸ್ಚಿ ನಾ. ತುಂ ಮಿನತೆನ್ ಕಾಮ್ ಕರುಂಕ್ ತಯಾರ್?"
"ವ್ಹಯ್ ಸರ್, ಹಾಂವ್ ಜರೂ ಮಿನತ್ ಕರ್ತಲೊಂ. ಮ್ಹಾಕಾ ಕಾಮ್ ಜಾಯ್"
"ಭೋವ್ ಬರೆಂ. ತುಕಾ ಮಯ್ನ್ಯಾಕ್ ಏಕ್ ಹಜಾರ್ ರುಪಯ್ ಸಾಂಭಾಳ್ ದಿತಲೊಂ. ಉಪ್ರಾಂತ್ ತುಜ್ಯಾ ಮಿನತೆಕ್ ಸರಿ ಜಾವ್ನ್ ತುವೆಂ ಕಮಾವ್ಯೆತಾ. ಥೊಡೆ ಮಯ್ನ್ಯಾಕ್ ಧಾ ಹಜಾರ್ ರುಪಯ್ ಕಮಾಯ್ತಾತ್, ಥೊಡೆ ಪಂದ್ರಾ ಹಜಾರ್ ರುಪಯ್ ಕಮಾಯ್ತಾತ್, ತೆಂ ತುಮ್ಚೆರ್ ಹೊಂದ್ವೊನ್ ಆಸಾ"
"ಜಾಯ್ತ್ ಸರ್, ಹಾಂವೆಂ ಕಿತೆಂ ಬರಯ್ಜೆ?"
"ತುಕಾ ಪಸಂದ್ ಜಾಲ್ಲ್ಯಾಚೆರ್ ತುವೆಂ ಬರವ್ಯೆತಾ, ಹಾಂಗಾ ಕಾರ್ಡ್ ಬೋರ್ಡ್, ಕ್ಯಾನ್ವಾಸ್, ಬ್ಯಾನರಾಂ ಹರ್ಯೆಕ್ ಆಸಾತ್. ತುಕಾ ಕಾರ್ಡ್ ಬೊರ್ಡಾಚೆರ್ ಬರಂವ್ಕ್ ಅಭಿರುಚ್ ಆಸಾ ತರ್ ಬರವ್ಯೆತಾ, ಬ್ಯಾನರಾಂತ್ ಬರಂವ್ಕ್ ಅಭಿರುಚ್ ಆಸಾ ತರ್ ಬ್ಯಾನರ್ ಥಂಯ್ ಆಸಾ, ಮ್ಯಾಟರ್ ಘೆ, ಆನಿ ಪೆನ್ನಾಂ, ಪೇಂಟ್ ಕುಶಿಚ್ಯಾ ಕುಡಾಂತ್ ತ್ರಿಪಾಠಿ ತುಕಾ ದಿತಲೊ".
ಆಯ್ಕೊನ್ ಆಂಗಾರ್ ಶೆಳೆಂ ಉದಾಕ್ ವೊತ್ಲ್ಲೊ ಅನ್ಭೋಗ್ ಜಾಲೊ ಗುರ್ದಾಸಾಕ್.
ಎಕಾ ವಾಟೆನ್ ಕಾಮ್ ಮೆಳ್ಲ್ಲೊ ಸಂತೊಸ್, ಘಡ್ಯೆನ್ ಮೆಳ್ಲ್ಲೆಂ ಕಾಮ್ ಚಿಂತುನ್ ಆಂಗಾಚಿ ಲೋಂವ್ ಉಭಿ ಜಾಲಿ.
ಜಿಣ್ಯೆಂತ್ ಕೆದಿಂಚ್ ಪೇಂಯ್ಟಿಂಗಾರ್ ಬರಂವ್ಕ್ ನಾತ್ಲ್ಲ್ಯಾ ಗುರ್ದಾಸಾಚಿ ಪರಿಕ್ಷಾ - ಪೊಟಾಚ್ಯಾ ಭುಕೆಚಿ ಪರಿಕ್ಷಾ!!. ಸದ್ದ್ಯಾಕ್ ಮೆಳ್ಲ್ಲೆಂ ಕಾಮ್ಂಚ್ ಸರಿ, ಪುಣ್ ಪ್ರೇತನ್ ಕರ್ಚೆಂ ಬರೆಂ ಮ್ಹಣ್ ಭಗ್ಲೆಂ ಗುರ್ದಾಸಾಕ್.
ಚಡ್ತಿಕ್ ವಾರ್ಜಿಕ್ ಕರಿನಾಸ್ತಾಂ ತೊ ದೆಗೆಚ್ಯಾ ಕುಡಾಕ್ ಗೆಲೊ ಆನಿ ತ್ರಿಪಾಠಿಲಾಗ್ಚೆಂ ಮ್ಯಾಟರ್ ಆನಿ ಪೆನ್ನಾಂ ಆನಿ ಪೇಂಟ್ ಘೆವ್ನ್ ತಾಚೆಸವೆಂ ಏಕ್ ಬ್ಯಾನರ್ ಘೆವ್ನ್ ಆಯ್ಲೊ.
ಬ್ಯಾನರ್ ಕಸೊ ಭಾಂಧ್ಚೊ ಮ್ಹಳ್ಳೆಂ ತಾಕಾ ಕಳಿತ್ ನಾ ದೆಕುನ್ ತೊ ತಾಣೆಂ ಧರ್ಣಿಚೆರ್ ಪಾತ್ಳಾಯ್ಲೊ ಆನಿ ಮ್ಯಾಟರ್ ಪಳೆಲೆಂ ’ವೋಟ್ ಫೋರ್ ಕಾಂಗ್ರೆಸ್’ - ಇತ್ಲೆಂಚ್ ಬರಂವ್ಕ್ ಆಸ್ಲೆಂ. ಅಕ್ಶರಾಂ ಸವೆಂ ಪಾರ್ಟೆಚೊ ಘುರ್ತ್, ಏಕ್ ಹಾತ್, ಆನಿ ತೀನ್ ರಂಗಾಚೊ ಬಾವ್ಟೊ.
ನಾ ರೂಲರ್, ನಾ ನಕ್ಶಾ, ನಾ ಮಾಪ್, ನಾ ಲೇಖ್.
ತಾಣೆಂ ಶೀದಾ ಬ್ರಶ್ಶ್ ಪೇಂಟಾಚ್ಯಾ ಡಬ್ಬ್ಯಾಂತ್ ಘಾಲೊ ಆನಿ ಬರಂವ್ಕ್ ಧರ್ತಾನಾಂಚ್ "ಯೇ.... ಕ್ಯಾ ಕರ್ ರಹಾ ಹೆ?" ಮ್ಹಣ್ ಎಕ್ಲೊ ಭಯ್ಯಾ ಧಾಂವೊನ್ ಆಯ್ಲೊ.
ಉಲವ್ಣೆಂ ಜಾತಾಸ್ತಾಂ ಗುರ್ದಾಸಾಕ್ ಸತ್ ಸಾಂಗ್ಲ್ಲೆಶಿವಾಯ್ ಉಪಾವ್ ನಾಂ.
"ಹೋ.. ತರ್ ತುಂ ತೊ ಬರವ್ಪಿ.. ಕಳ್ಳೆಂ... ತುಕಾ ಸಾಂಗ್ಲ್ಲೆಂ ಕಾಮ್ ಹೆಂ ನ್ಹಯ್. ಆಮ್ಕಾಂ ಕಾರ್ಡ್ ಬೊರ್ಡಾಂತ್ ಕಲಾತ್ಮಕ್ ರಿತಿನ್ ಬರಯ್ತೆಲಿಂ ಜಾಯ್ ಶಿವಾಯ್, ಮೆಂದು ಪೊಕೊರ್ಚೆಂ ಬರಯ್ತೆಲಿಂ ನ್ಹಯ್"
ಗುರ್ದಾಸಾಚ್ಯಾ ತೊಂಡಾಕ್ ಬೀಗ್ ಪಡ್ಲ್ಲೆಂ.
"ಹೊ ಸಂಸಾರ್ ರಂಗಾಳ್ ಬಾಜಾರ್, ಹಾಂಗಾ ರಂಗ್ ಮಾತ್ರ್ ವಿಖೊನ್ ವೆತಾತ್" ಕೊಣಾಚಿಂಗೀ ಸ್ಪಶ್ಟ್ ಉತ್ರಾಂ, ಅಸ್ಪಶ್ಟ್ ರಿತಿನ್ ತಾಚ್ಯಾ ಕಾನಾರ್ ಪಡ್ಲಿಂ.
**********
ಭಾಯ್ರ್ ಆಯಿಲ್ಲೊ ಗುರ್ದಾಸ್ ರೇಲ್ವೆ ಸ್ಟೆಶನಾಕ್ ಪಾವ್ಲೊ. ತಾಣೆ ರಿಟರ್ನ್ ಟಿಕೆಟ್ ಕಾಡ್ಲ್ಲಿ ದೆಖುನ್ ಶೀದಾ ಭಿತರ್ ರಿಗ್ಲೊ. ಪುಣ್ ಭಿತರ್ ರಿಗೊನ್ ಬೊಲ್ಸಾಕ್ ಹಾತ್ ಘಾಲ್ತಾನಾ, ತಾಕಾ ಪಾತ್ಯೆಂವ್ಕ್ ಜಾಲೆಂ ನಾ. ತಾಚೊ ಬೋಲ್ಸ್ ಖಾತರ್ಲ್ಲೊ ಆನಿ ಬೊಲ್ಸಾಂತ್ ಆಸ್ಲ್ಲಿ ಟಿಕೆಟ್, ಥೊಡೆ ಪಯ್ಶೆ ಮಾಯಾಗ್.
ಬೊಂಬೊಯ್ ಸರ್ಗಾಂತ್ ಪಯ್ಲೊ ಅನ್ಭೋಗ್ ಹೊ.
ಆತಾಂ ಕಿತೆಂ ಕರ್ಚೆಂ!? ರಿತ್ಯಾ ಹಾತಾಂನಿ, ರಿತೆಂ ಮನ್ ಘೆವ್ನ್ ಚಲ್ಚ್ಯಾ ಗುರ್ದಾಸಾಕ್ ಟ್ರೇಯ್ನಾಚಿ ಟಿಕೆಟ್ ಕಾಡುಂಕ್ ಬೊಲ್ಸಾಂತ್ ಪೊಯ್ಶೆ ನಾಂತ್. ಪುಣ್ ಬೊಂಬೊಯ್ ಶ್ಹೆರಾಚಿ ಸೊಭಾಯ್ ಹಿಚ್ಚ್ - ಪೊಟಾಚಿ ಭುಕ್ ಆನಿ ಪರಿಗತೆಚೊ ಒತ್ತಡ್, ಹರ್ಯೆಕ್ ವಿಧ್ಯಾ ಅಪ್ಶಿಚ್ ಶಿಕಯ್ತಾ.
ಗುರ್ದಾಸ್ ದಾದರ್ ಥಾವ್ನ್ ಘಾಟ್ಕೊಪರ್ ವೆಚ್ಯಾ ಟ್ರೇಯ್ನಿರ್ ಚಡ್ಲೊ; ಟಿಕೆಟ್ ನಾಸ್ತಾಂ!
’ಶಿಕ್ಪಿ ನಾಗರಿಕ್ ಟಿಕೆಟ್ ನಾಸ್ತಾಂ ಪಯ್ಣ್ ಕರ್ತಾ!’ ಮತಿಂತ್ ಗುನ್ಯಾಂವ್ಕಾರಿ ಚಿಂತಾಪ್ ಜಾಗೆಂ ಜಾಲೆಂ. ಪುಣ್ ಹಾಂಗಾಸರ್ ಜಿಣ್ಯೆನ್ ಕಸ್ಲಿಚ್ ವಿಂಚವ್ಣ್ ದೀಂವ್ಕ್ ನಾಸ್ಲ್ಲಿ, ಹೆರ್ ಉಪಾವ್ಯೀ ನಾತ್ಲ್ಲೊ. ’ಖಂಚ್ಯಾ ಧಯ್ರಾನ್ ಆಯಿಲ್ಲೊಯ್?’ ಅನ್ಯೇಕಾ ಚಿಂತ್ಪಾನ್ ಪಾಟಿಂ ಸವಾಲ್ ಕೆಲೆಂ. ದೊನೀಂ ಸವಾಲಾಂಕ್ ಜಾಪಿ ನಾತ್ಲ್ಲ್ಯೊ. ಜಾಪಿ ಸೊಧ್ಚಿ ಮತ್ ಖಂಯ್ಗೀ ಆಸ್ಲಿ.
**********
ಥೊಡೆ ದೀಸ್ ಪಾಶಾರ್ ಜಾಲೆ. ಕಶ್ಟಾಂನಿ ದೀಸ್ ವೆತಾಲೆ. ಸಯ್ರ್ಯಾನ್ ಪನ್ನಾಸ್ ರುಪ್ಯಾಂಚೊ ನೋಟ್ ದೀವ್ನ್ ಮ್ಹಳ್ಳೆಂ. ಭಿಂಯೆನಾಕಾ, ಹ್ಯೇ ಪಾವ್ಟಿಂ ತುಕಾ ಕಾಮ್ ಮೆಳ್ತೆಲೆಂ.
ದಿಸಾಚೆಂ ಚಡ್ತಾವ್ ತೊ ರೇಲ್ವೆ ಸ್ಟೆಶನಾರ್, ಬಾಜಾರಾಕ್, ಚಲೊನ್ ವೆತಾಲೊ. ವಿವಿದ್ ಕಾಲೆತಿಚ್ಯಾ ಲೊಕಾಂಕ್ ಪಳೆತಾಲೊ. ತಾಂಚಿ ಭಾಸ್ ಆಯ್ಕತಾಲೊ. ಲೆಕಾಚೆಂ ಜಿವಿತ್ ತಾಣೆಂ ಸಾರುಂಕ್ ಆಸ್ಲೆಂ. ರೇಲ್ವೆ ಸ್ಟೆಶನಾಂತ್ ಖಂಚ್ಯಾ ಫ್ಲ್ಯಾಟ್ಪೊರ್ಮಾಂತ್ ವ್ಹಡ್ಲೊ ವಡಾಪಾಂವ್ ಮೆಳ್ತಾ ತೆಂ ತೊ ಜಾಣಾ. ಏಕ್ ವಡಾಪಾಂವಾಕ್ ಏಕ್ ರುಪಯ್, ಏಕ್ ಕೆಳ್ಯಾಕ್ ಪನ್ನಾಸ್ ಪಯ್ಶೆ. ಹೆಂ ತಾಚೆಂ ಜೆವಾಣ್. ಉಪ್ರಾಂತ್ ಪೋಟ್ಭರ್ ಉದಾಕ್ ಪಿಯೆತಾಲೊ. ಪಯ್ಲೆಂ ಪಯ್ಲೆಂ ತೊ ಘಾಟ್ಕೊಪರಾಂತ್ಲ್ಯಾ ಎಕಾ ಝುಣ್ಕಾ ಭಾಕರ್ ಹೊಟೆಲಾಕ್ ವೆತಾಲೊ, ಎಕಾ ರುಪ್ಯಾಂಕ್ ದೋನ್ ಭಾಖ್ರ್ಯೊ ಆನಿ ಚಣ್ಯಾಪಿಟಾಚೊ ದಾಟ್ ಸಾರ್, ಎಕಾ ತರ್ನ್ಯಾ ಮಿರ್ಸಾಂಗೆಸವೆಂ ಖಾತಾಲೊ. ಪುಣ್ ಆಜ್ಕಾಲ್ ತೆಂ ಬಂಧ್ ಪಡ್ಲಾಂ ದೆಖುನ್ ವಡಾ-ಪಾಂವ್ ಆನಿ ಕೆಳೆಂಚ್ ತಾಚೆಂ ಜೆವಾಣ್.
ಏಕ್ ಪಾವ್ಟಿಂ ಭಂವೊನ್ ಭಂವೊನ್ ತೊ ಪಿಸಾಂತುರ್ ಜಾಲ್ಲ್ಯಾ ಮತಿಕ್ ಘೆವ್ನ್ ಪರ್ನಿಂ ರದ್ದಿ ವಿಖ್ಚ್ಯಾ ಶೆಪಾಂತ್ ಆಸ್ಚಿಂ ಪರ್ನಿಂ ಪತ್ರಾಂ ವಾಚ್ತಾಂ ವಾಚ್ತಾಂ ತಾಕಾ ಎಕಾ ಜಾಗ್ಯಾರ್ ಬರಯ್ಣಾರ್ ಜಾಯ್ ಮ್ಹಳ್ಳೆಂ ಜಾಹೀರಾತ್ ದಿಸ್ಲೆಂ. ವಿ.ಟಿ.ಚೊ ವಿಳಾಸ್ ಆಸ್ಚೆಂ ಜಾಹಿರಾತ್ ತಾಣೆಂ ಶೊಪಾಚ್ಯಾ ಭಯ್ಯಾಲಾಗಿಂ ವಿಚಾರ್ನ್ ಘೆತ್ಲೆಂ.
ಉಟಾಉಟಿಂ ಕುಡಾಕ್ ಯೇವ್ನ್ ನ್ಹೆಸೊನ್, ಹಾತಿಂ ಫಾಯ್ಲ್ ಘೆವ್ನ್ ತೊ ರೇಲ್ವೆ ಸ್ಟೆಶನಾಕ್ ಗೆಲೊ. ಧನ್ಪಾರಾಂಶೆಂ ತೊ ವಿ.ಟಿ. ಸ್ಟೆಶನಾಕ್ ಪಾವ್ಲೊ. ಸ್ಟೆಶನಾ ಭಾಯ್ಲ್ಯಾ ಪಾನ್ವಾಲ್ಯಾಂಚ್ಯಾ ದುಕಾನಾಂಕ್ ವಿಚಾರ್ನ್ ವಿಚಾರ್ನ್ ಕಸೊಯ್ ತೊ ವಿಳಾಸ್ ಸೊಧುಂಕ್ ಸಕ್ಲೊ. ಏಕ್ ಜೆರೋಕ್ಸಾಚೆಂ ಶೊಪ್, ಕುಶಿನ್ ಸುಮಾರ್ ಧಾ-ಭಾರಾ ಟೈಪಿಸ್ಟಾಂ, ಆನಿ ಗುರ್ದಾಸ್ ಆತಾಂ ಕೊಣಾಕ್ ಮೆಳ್ಚೆಂ ಮ್ಹಣ್ ಸೊಧುನ್ ಆಸ್ತಾನಾ, ಎಕ್ಲೊ ಹಳ್ತ್ ಪ್ರಾಯೆಚೊ ದಾದ್ಲೊ ಯೆವ್ನ್ ಸವಾಲ್ ಕರಿಲಾಗ್ಲೊ. ಗಜಾಲ್ ಸಮ್ಜತಚ್ಚ್;
"ಹೆಂ ಜಾಹೀರಾತ್ ಪರ್ನೆಂ, ಆಮ್ಕಾಂ ಎದೊಳ್ಚ್ ಬರಯ್ಣಾರ್ ಮೆಳ್ಳ್ಯಾತ್, ಪುಣ್ ತುಂ ಟೆಂಪರರಿ ಕಾಮ್ ಕರ್ತಾಯ್ ತರ್ ಸಾಂಗ್"
"ಹಾಂವ್ ತಯಾರ್" - ತಕ್ಶಣ್ ಗುರ್ದಾಸಾನ್ ಜಾಪ್ ದಿಲಿ.
"ಬರೆಂ - ತುಕಾ ಕಾಮ್ ಸಮ್ಜಯ್ತಾಂ, ತುವೆಂ ಅರ್ಜ್ಯೊ, ವಿನತ್ಯೊ ಎಪ್ಲಿಕೇಶನಾಂ, ವೆವೆಗ್ಳಿಂ ಫೋರ್ಮಾಂ ಭರುಂಕ್ ಶಿಕಾಜಯ್. ಹೆಂ ಪಾಸ್ಪೋರ್ಟ್ ಫೋರ್ಮ್, ಹೆಂ ಶೇರ್ಬಾಜಾರಾಚೆಂ ಫೋರ್ಮ್, ಮ್ಯೂಚುವಲ್ ಫಂಡಾಕ್ ವೆಗ್ಳಿಂ ಫೊರ್ಮಾಂ ಆಸಾತ್. ಇನ್ಶೂರೆನ್ಸಾಚಿಂ ಫೊರ್ಮಾಂ ವೆಗ್ಳಿಂ..... ತೊ ಸಾಂಗೊನ್ ವೆತಾಲೊ."
ಅನ್ಯೇಕ್ ಘಡ್ಗಡೊ ಮಾರ್ಲ್ಲೊ ಅನ್ಭೋಗ್ ಜಾಲೊ ಗುರ್ದಾಸಾಕ್.
’ಅಪುಣ್ ಕಿತ್ಲೊ ಬೇಕೂಫ್? ಬರಯ್ಣಾರ್ ಮ್ಹಣೊನ್ ತಕ್ಲೆರ್ ಶಿಂಗಾಂ ಘೆವ್ನ್ ಎದೊಳ್ ಮ್ಹಣಾಸರ್ ಅಪ್ಲೊಚ್ ಸಂಸಾರ್ ರುತಾಂ ಕರುನ್ ಮರ್ಜೆನ್ ಜಿಯೆವ್ನ್ ಆಸ್ಲ್ಲೊಂ. ಪುಣ್ ಆಪ್ಲ್ಯಾ ಸಂಸಾರಾ ಭಾಯ್ರ್ ಆಜ್ ಹಾಂವ್ ಕಿತ್ಲೊ ಲಾಚಾರ್ ಆನಿ ಕಿತ್ಲೊ ಅಸ್ಕತ್’ ಮ್ಹಳ್ಳೆಂ ಚಿಂತಾಪ್ ಗುರ್ದಾಸಾಚ್ಯಾ ಮತಿಂತ್ ಉದೆಲೆಂ.
ಬೊಂಬೊಯ್ ಸರ್ಗಾಂತ್ ಕಾಮಾಂಚೊ ಬೊರ್ಗೊಳ್ ನಾ ಮ್ಹಳ್ಳೆಂ ಉತಾರ್ ತಾಣೆಂ ಲ್ಹಾನ್ಪಣಾರ್ ಆಯ್ಕಾಲ್ಲೆಂ. ಪುಣ್ ಪಾಟ್ಲ್ಯಾ ದೋನ್-ಅಡೇಜ್ ಮಯ್ನ್ಯಾಂನಿ ಆಪ್ಣಾಕ್ ಹ್ಯಾ ಸರ್ಗಾಂತ್ ಏಕ್ ಲ್ಹಾನ್ ಕಾಮ್ ಸಯ್ತ್ ಮೆಳೊಂಕ್ ನಾ!?
ಬಿ.ಎ.ಶಿಕ್ಲೆಲ್ಯಾ ಆಪ್ಣಾಕ್ ಬರಯ್ಣಾರ್ ಮ್ಹಳ್ಯಾರ್ ಕೊಣ್ ಮ್ಹಳ್ಳೆಂ ನಖ್ಖಿ ಕಳಿತ್ ಆಸಾ ಪುಣ್ ಸಂಸಾರಾಚೊ ಸರ್ವ್ ಲೋಕ್ ಬಿ.ಎ. ಶಿಕ್ಪಿ ನ್ಹಯ್ ಪಳೆ!? ಬರಯ್ಣಾರ್ ಮ್ಹಳ್ಯಾರ್ ಕೊಣಾಕ್ ಅರ್ಜಿ ಬರಯ್ತೆಲೆ ತರ್ ಕೊಣಾಕ್ ರಸ್ತ್ಯಾಚೆರ್ ಬ್ಯಾನರ್ ಬರಯ್ತೆಲೆ ತರ್ ಅನಿ ಕೊಣಾಕ್ ಗಾಡಿಯಾಂಚಿ ನಂಬರ್ ಪ್ಲೇಟ್ ಬರಯ್ತೆಲೆ.
ಪುಣ್ ಗುರ್ದಾಸಾನ್ ಭರ್ವಸೊ ಸಾಂಡುಂಕ್ ನ್ಹಜೊ ಆಸ್ಲೆಂ. ತೊ ಶೂನ್ಯ್ ನದ್ರೆಂತ್ ರಸ್ತ್ಯಾ ದೆಗೆಲ್ಯಾ ಝೊಪ್ಡ್ಯಾಂನಿ ಜಿಯೆತೆಲ್ಯಾ ಲೊಕಾಂಕ್ ಚೊಯ್ತಾಲೊ. ಪೋಶ್ ಗಾಡಿಯಾಂನಿ ಗಿರೇಸ್ತ್ ಲೋಕ್ ಆಪ್ಲ್ಯಾ ಭುರ್ಗ್ಯಾಂಕ್ ತಿ ಝೊಪ್ಡಿಂ ಧಾಖಂವ್ಚೆಂ ಪಳೆತಾಲೊ. ತಿಂ ನಾಗ್ಡಿಂ, ಭುರ್ಶಿಂ ಭುರ್ಗಿಂ, ಹಾಸ್ತಾಲಿಂ, ಖೆಳ್ತಾಲಿಂ, ಉಡ್ಕಾಣಾಂ ಮಾರ್ತಾಲಿಂ, ನಾಕಾ ತೊಂಡಾರ್ ಕಿರ್ಮೆಂ ಗಳವ್ನ್ ತರ್ಯೀ ಧರ್ಣಿಕ್ ಪಡ್ಲ್ಲೆಂ ವಿಂಚುನ್ ಖಾತಾಲಿಂ. ಭೋವ್ಶಾ ಗಿರೇಸ್ತಾಂ ತಾಂಚ್ಯಾ ಭುರ್ಗ್ಯಾಂಕ್ ಧರ್ಣಿರ್ ಪಡ್ಲ್ಲೆಂ, ಚಿಕೊಲ್ ಲಾಗ್ಲ್ಲೆಂ ಖಾಣ್ ಖಾಯ್ನಾಯೆ ಮ್ಹಣ್ ಶಿಕಯ್ತಾತ್ ಕೊಣ್ಣಾ. ಅಶೆಂ ಪಳೆಂವ್ಕ್ ಗೆಲ್ಯಾರ್ ಝೊಪ್ಡ್ಯಾಂನಿ ಜಿಯೆತೆಲ್ಯಾಂಕ್ ಸಯ್ತ್ ಜಿಣ್ಯೆಂತ್ ವಿಕಲ್ಪ್ ನಾತ್ಲ್ಲೊ. ತಾಂಚ್ಯಾ ಜಿವಿತಾನ್ ಸಯ್ತ್ ಕಸ್ಲಿಚ್ ವಿಂಚವ್ಣ್ ದಿಲ್ಲಿನಾ. ತಾಂಕಾಂಯ್ ಧುಳಿಚೆಂ ಖಾಣ್ ಖೆಲ್ಯಾರ್ ಭಲಾಯ್ಕೆಕ್ ಭಾದಕ್ ಮ್ಹಳ್ಳಿ ಪ್ರಜ್ನಾ ಆಸೊಂಕ್ ಪುರೊ ಪುಣ್ ನಿರ್ವೋಗ್ ನಾಸ್ಲ್ಲೊ.
**********
ಇಸ್ಕೊಲಾಚ್ಯಾ ದಿಸಾಂನಿ ಟಿಚೆರಾಂನಿ ’ತುಂ ಜಿಣ್ಯೆಂತ್ ಕಿತೆಂ ಜಾಂವ್ಕ್ ಆಶೆತಾಯ್?’ ವಿಶ್ಯಾಚೆರ್ ಪ್ರಭಂಧ್ ಬರಂವ್ಕ್ ಸಾಂಗ್ಲೆಲ್ಯಾ ದಿಸಾಂನಿ, ಕೊಣ್ ದಾಕ್ಟರ್ ಜಾವ್ನ್ ದುಬ್ಳ್ಯಾ ಲೊಕಾಂಚಿ ಸೆವಾ ಕರ್ತಾಂ ಮ್ಹಣ್ ಸಾಂಗ್ತಾಲೆ. ಕೊಣ್ ಇಜ್ನೆರ್ ಜಾವ್ನ್ ದೇಶಾಚ್ಯಾ ವಿಕಾಸಾಕ್ ಪಾಟಿಂಬೊ ದಿತಾಂ ಮ್ಹಣ್ ಸಾಂಗ್ತಾಲೆ. ಕೊಣ್ ವಕೀಲ್ ಜಾವ್ನ್ ಸರ್ವ್ ಲೊಕಾಂಕ್ ನ್ಯಾಯ್ ದಿವಯ್ತಾಂ ಮ್ಹಣ್ ಸಾಂಗ್ತಾಲೆ. ತಿ ಪ್ರಾಯ್ಚ್ ತಸಲಿ. ಜಿಣ್ಯೆಚೆಂ ಮಾಪ್ ಸಮ್ಜೊಂಕ್ ತಾಂಕ್ ನಾಸ್ಲ್ಲಿ. ಪುಣ್ ಖರಿ ಜಿಣಿ ಸುರು ಜಾಂವ್ಚಿ ಶಿಕಾಪ್ ಸಂಪ್ತಚ್. ಗುರ್ದಾಸ್ ಜಿಣ್ಯೆಂತ್ ಏಕ್ ಬರಯ್ಣಾರ್ ಜಾಂವ್ಕ್ ಆಶೆಲ್ಲೊ. ಲೀಯೊ ಟಾಲ್ಸ್ಟಾಯ್, ರಬೀಂಬ್ರನಾಥ್ ಟಾಗೋರ್ ಪರಿಂ. ಪುಣ್ ಹಕೀಗತೆಂತ್ ತಾಕಾ ಜಿವಿತಾನ್ ಶೆವ್ಟಾಯಿಲ್ಲೊ. ಉದಾಕ್ ನಾಕಾವಯ್ರ್ ಯೆಂವ್ಚ್ಯಾಧಿಂ ಜಾಗೆಂ ಜಾಂವ್ಚೆಂ ಬರೆಂ ಮ್ಹಳ್ಳೆಂ ಚಿಂತಾಪ್ ಮತಿಕ್ ಯೆತೆಚ್ಚ್, ಗುರ್ದಾಸಾನ್ ಮೆಳ್ಲ್ಲೆಂ ಕಾಮ್ ಕರುಂಕ್ ನಿಚೆವ್ ಕೆಲೊ.
ಎಕಾ ಪತ್ರಾಕ್ ವಿಖ್ರ್ಯಾ ಪ್ರತಿನಿಧಿ ಜಾಯ್ ಮ್ಹಳ್ಳೆಂ ಜಾಹೀರಾತ್ ವಾಚುನ್ ಸಂಪರ್ಕ್ ಕೆಲ್ಲ್ಯಾ ಗುರ್ದಾಸಾಕ್ ’ಗ್ಯಾರಂಟಿ ಮನಿ’ ಡೆಪಾಸಿಟ್ ಕರುಂಕ್ ಮಾಗ್ತಾನಾ ಕಿತೆಂ ಜಾಪ್ ದಿಂವ್ಚಿ ಮ್ಹಳ್ಳೆಂ ಸಮ್ಜಾನಾಸ್ತಾಂ, ಅಖ್ರೇಕ್ ಪತ್ರಾಂ ಘರಾನ್ ಘರಾ ವಾಂಟ್ಚೆಂ ಕಾಮ್ ಲಾಭ್ಲೆಂ. ತೆಂಯ್ ಏಜೆನ್ಸಿಚ್ಯಾ ಕುರ್ಪೆನ್. ತಾಣಿಂ ಹಾಕಾ ಖಂಚ್ಯಾ ಖಂಚ್ಯಾ ಬಿಲ್ಡಿಂಗಾಂನಿ, ಖಂಚ್ಯಾ ಖಂಚ್ಯಾ ಫ್ಲೇಟಾಂನಿ ಪತ್ರಾಂ ವಾಂಟಿಜಾಯ್ ಮ್ಹಳ್ಳಿ ಲಿಸ್ಟ್ ದಿಲ್ಲಿ, ಸವೆಂ ಏಕ್ ಸಾಯ್ಕಲ್ಯೀ ದಿಲ್ಲೆಂ.
ಬೊಂಬೊಯ್ ಸರ್ಗಾಂತ್ ಪಯ್ಲೆಂ ಕಾಮ್, ಸಕಾಳಿಂ ಸಾಡೆ ಚ್ಯಾರಾಂಕ್ ಉಟೊನ್ ತೊ ಸ್ಟೆಶನಾಕ್ ವಚೊನ್ ಪತ್ರಾಂ ಘೆವ್ನ್ ಹಾಡ್ತಾಲೊ. ಪತ್ರಾಂಚೆಂ ವೊಜೆಂ ಸಾಯ್ಕಲಾಚೆರ್ ಭಾಂಧುನ್ ತೊ ಘರಾನ್ ಘರ್ ಪತ್ರಾಂ ವಾಂಟುಂಕ್ ಲಾಗ್ಲೊ. ಸಕಾಳಿಂ ಪತ್ರಾಂ ವಾಂಟುನ್ ಜಾತೆಚ್ಚ್ ತಾಕಾ ಆರಾಮ್ - ದಿಸಾಚೆಂ ಹೆರ್ ಕಾಮ್ ನಾಸ್ಲ್ಲೆಂ. ಅಶೆಂ ಪತ್ರಾಂ ವಿಖುನ್ ವಿಖುನ್ ಮಧೆಂ ಮಧೆಂ ತೊ ತಾಚ್ಯಾ ಹಾತಿಂ ಆಸ್ಚಿಂ ಪತ್ರಾಂ ವಾಚ್ತಾಲೊ.
ಏಕ್ ಪಾವ್ಟಿಂ ಪತ್ರಾಚೆರ್ ಆರೊ ಮ್ಯಾಗಜಿನಾಕ್ ರಿಪೋರ್ಟರಾಂಕ್ ಏಕ್ ಓಪನ್ ಇಂಟರ್ವ್ಯೂ ಆಸಾ ಮ್ಹಳ್ಳೆಂ ಜಾಹೀರಾತ್ ವಾಚುನ್ ಗುರ್ದಾಸ್ ಮನ್ ನಾಸ್ಲ್ಲ್ಯಾ ಮನಾನ್ ಫಾಯ್ಲಾಂ ಘೆವ್ನ್ ಇಂಟರ್ವ್ಯೂಕ್. ವೃತ್ತಿಪರ್ ವಾತಾವರಣಾಂತ್ ತಾಣೆಂ ಪಯ್ಲೆಂ ಪಾವ್ಟಿಂ ಮೇಟ್ ದರರ್ಚೆಂ. ಆಪ್ಲೊ ನಿಯಮಿತ್ ವೇಳ್ ಯೆತೆಚ್ಚ್ ತೊ ಇಂಟರ್ವ್ಯೂ ಕುಡಾಕ್ ಗೆಲೊ. ಅರ್ಜಿ ದಿಲಿ. ಸವಲಾಂ ಜಾಪಿ ಜಾಲ್ಯೊ. ಪಾಟ್ಲ್ಯಾ ಥೊಡ್ಯಾ ಮಯ್ನ್ಯಾಂನಿ ಪತ್ರಾಂ ವಿಖ್ಚೊ ಅನ್ಭೋಗ್ ಸೊಡ್ಲ್ಯಾರ್ ಗುರ್ದಾಸಾಕ್ ಹೆರ್ ಅನ್ಭೋಗ್ ನಾಸ್ಲ್ಲೊ. ಪುಣ್ ಫ್ರೀಲ್ಯಾನ್ಸ್ ವರ್ದೆಗಾರ್ ಜಾವ್ನ್ ತಾಕಾ ಕಾಮಾಕ್ ವಿಂಚ್ಲೊ.
ಸುರ್ವಾತೆರ್ ತಾಕಾ ಥೊಡ್ಯಾ ಸೀನಿಯರ್ ರಿಪೋರ್ಟರಾಂಸವೆಂ ವೆವೆಗ್ಳ್ಯಾ ಪ್ರಾಂತ್ಯಾಕ್ ವಚೊಂಕ್, ಖಬ್ರೊ ತಯಾರ್ ಕರುಂಕ್, ವಿಶ್ಲೇಶಣಾಂ ಕರುಂಕ್, ಸಮೀಕ್ಶಾ ಚಲಂವ್ಕ್, ಸಂದರ್ಶನಾಂ ಘೆಂವ್ಕ್. ಪಯ್ಲೆಂ ಪಯ್ಲೆಂ ಸರ್ವ್ ಕಾಮಾಂ ಎಕಾ ರಿತಿಚೆಂ ಥ್ರಿಲ್ ಜಾತಾಲೆಂ. ಶ್ಹೆರಾಂತ್ ಮಾತ್ರ್ ನ್ಹಯ್, ಗಾಂವಾಂನಿ, ಹಳ್ಳೆಂನಿ, ಕುಗ್ರಾಮಾಂನಿ ಭಂವೊನ್ ವೆವೆಗ್ಳ್ಯಾ ವರ್ಗಾಚ್ಯಾ ಲೊಕಾಂ ಮಧೆಂ ಭರ್ಸೊನ್, ತಾಂಚ್ಯಾ ಜಿಣ್ಯೆಕ್ ಸ್ಪಂಧನ್ ಕರುನ್ ಬರ್ಪಾಂ ಬರಂವ್ಚ್ಯಾಕ್ ಆನಿ ಎದೊಳ್ ಪರ್ಯಾಂತ್ ಕಾಲ್ಪನಿಕ್ ರಿತಿಚ್ಯಾ ಪೊಟ್ಟು ಕಾಣ್ಯಾಂಕ್ ಬರಂವ್ಚ್ಯಾ ಮಧೆಂ ಆಸ್ಚೊ ಅಗಾಧ್ ಫರಕ್ ಆತಾಂ ಗುರ್ದಾಸಾಚ್ಯಾ ಮತಿಕ್ ಸಮ್ಜೊಂಕ್ ಲಾಗ್ಲೆಂ. ಥಂಯ್ ಫಕತ್ತ್ ಕಾಣಿ ತರ್ ಹಾಂಗಾ ಹರ್ಯೆಕ್ ಜಿಣಿ. ಹರ್ಯೆಕ್ ವಾಸ್ತವ್, ಹರ್ಯೆಕ್ ಜಿವೆಂ ಹರ್ಯೆಕ್ ಗೋಚರ್, ಹರ್ಯೆಕ್ ಪ್ರಾಕ್ಟಿಕಲ್.
ಆರೊ ಮ್ಯಾಗಜಿನ್ ಭಾರತಾಚ್ಯಾ ಪ್ರಮುಖ್ ಮ್ಯಾಗಜಿನಾಚ್ಯಾ ಪಟ್ಟೆರ್ ನಾಂವ್ ಧಾಖಲ್ ಕೆಲ್ಲೆಂ. ಹರ್ಯೆಕಾ ವರ್ಗಾಚ್ಯಾ ಲೊಕಾಕ್ ಆಕರ್ಶಿತ್ ಕರ್ಚಿ ಶ್ಯಾಥಿ ಮ್ಯಾಗಜಿನಾಕ್ ಆಸ್ಲ್ಲಿ. ಇಂಟೆಲೆಕ್ಚುವಲ್ಸಾಂನಿ ಖಾಯ್ಸ್ ಕರ್ಚೆಂ ಹರ್ಯೆಕ್ ಸಾಹಿತ್ ಮ್ಯಾಗಜಿನಾರ್ ಪರ್ಗಟ್ತಾಲೆಂ. ದೇಶಿ/ವಿದೇಶಿ ಹೆಡ್ಲಾಯ್ನ್ ಜಾಂವ್ಚೆ ತಸಲ್ಯಾ ಕಾಣ್ಯಾಂಕ್ ಛಾಪ್ಚಿ ಶ್ಯಾಥಿ ಪತ್ರಾಚಿ. ಮ್ಯಾಗಜಿನಾಚೊ ತೀನ್ ಉತ್ರಾಂಚೊ ಧೇಯ್ ಸುಡಾಳ್ ಜಾವ್ನ್ ಆರೊ ನಾಂವಾಲಾಗಿಂಚ್ ವಯ್ರ್ ವೆಚೊ ಏಕ್ ಆರೊ, ತಶೆಂಚ್ ಆರೊ ನಾಂವಾಸಕಯ್ಲ್ ದಿಲ್ಲೊ; ಫಾಸ್ಟ್, ಆಕ್ಯುರೆಟ್ ಆಂಡ್ ಹೈ (ತುರಂತ್, ನಿಖರತಾ ಆನಿ ಊಂಚ್). ಭೋವ್ಶಾ ಪತ್ರಿಕೋಧ್ಯಮಾಂತ್ ಆಸ್ಚ್ಯಾ ಕೊಣಾಯ್ಕೀ ಆರೋ ಮ್ಯಾಗಜಿನಾಚಿ ವ್ಹಾಡಾವಳ್ ಕಳಿತ್ ನಾಸ್ತಾಂ ವಚೊಂಕ್ ನಾ. ಆಜ್ ಹೆಂ ಕೋರ್ಪೊರೇಟ್ ಸಂಸಾರಾಂತ್ ಮಾತ್ರ್ ನ್ಹಯ್, ಮಾಧ್ಯಮ್ ಲೊಕಾಂಚ್ಯಾ ಮಧೆಂ ಸಯ್ತ್ ಲೊಕಾಮೊಗಾಳ್ ಮ್ಯಾಗಜಿನ್. ಪುಣ್ ಇತ್ಲೆಂ ಸರ್ವ್ ಆಸಾ ತರ್ಯೀ ಏಕ್ ಅಪುಟ್ ಸತ್ ಹೆಂಯೀ ಜಾವ್ನಾಸಾ, ಆರೊ ಪತ್ರಾಚೊ ಪ್ರಮುಖ್ ಇರಾದೊ ಮುನಾಫೊ ಕರ್ಚೊ, ದುಡು ಕಮಾಂವ್ಚೊ.
ಗುರ್ದಾಸ್ ಏಕ್ ಹವ್ಯಾಸಿ ಬರಯ್ಣಾರ್ ಮಾತ್ರ್ ಜಾವ್ನಾಸ್ಲೊ ದೆಖುನ್ ತವಳ್ ತವಳ್ ಪತ್ರಿಕೋಧ್ಯಮಾಚ್ಯಾ ವೆವೆಗ್ಳ್ಯಾ ಸೆಮಿನಾರಾಂಕ್ ವೆತಾಲೊ. ವೆವೆಗ್ಳಿಂ ನ್ಯೂಸ್ ಏಜೆನ್ಸಿ ಕಶ್ಯೊ ಖಬ್ರೊ ವಾಂಟ್ತಾತ್, ಕಶ್ಯೊ ಖಬ್ರೊ ಕರ್ತಾತ್/ರಚ್ತಾತ್, ಆನಿ ದುಡ್ವಾನ್/ವಶೀಲಾಯೆನ್ ಹ್ಯಾ ಖಬ್ರಾಂಚೆರ್ ಕಶೆಂ ಪ್ರಭಾವ್ ಘಾಲುಂಕ್ ಸಾಧ್ಯ್ ಆಸಾ ಮ್ಹಳ್ಳ್ಯಾಚೆರ್ ಮಾಹೆತ್ ಘೆತ್ಲಿ. ದೀಸ್ಪಡ್ತ್ಯಾ ಜಿಣ್ಯೆಂತ್ ಕಾಯ್ದೆ ಕಾನೂನ್ ಕಶೆಂ ಉಪ್ಕಾರ್ತಾತ್ ತಶೆಂಚ್ ಅಡ್ಕಳ್ ಹಾಡ್ತಾತ್ ಮ್ಹಳ್ಳ್ಯಾಚೆರ್ ವಿಶ್ಲೇಶಣ್ಯೀ ತಾಣೆಂ ಸಮ್ಜೊನ್ ಘೆತ್ಲೆಂ.
ವೃತ್ತಿಪರತೆಚ್ಯಾ ಕಾಮಾಂತ್ ಹಳ್ತಾರ್ ಗುರ್ದಾಸಾಕ್ ಆಪ್ಲೆಂ ಕಾಮ್ ಸಮ್ಜೊಂಕ್ ವೇಳ್ ಲಾಗ್ಲೊನಾ. ತಾಚೆಂ ಕಾಮಾಚೆಂ ಪಯ್ಲೆಂ ವರಸ್ ಕಾಬಾರ್ ಜಾಲೆಂ, ತಾಕಾ ರಾವೊಂಕ್ ಕೂಡ್ ದಿಲ್ಲೊ ತಾಚೊ ಸಯ್ರೊ ಆತಾಂ ಕಾಜಾರ್ ಜಾಲ್ಲೊ ದೆಖುನ್ ಗುರ್ದಾಸಾಕ್ ಸಾಕಿನಾಂತ್ ಏಕ್ ಹಳ್ತಾಚೆಂ ಕೂಡ್ ಉಣ್ಯಾ ಭಾಡ್ಯಾಕ್ ಮೆಳ್ಳೆಂ. ಸಗ್ಳೊ ದೀಸ್ ತೊ ಭಾಯ್ರ್ ಆಸ್ತಾಲೊ ದೆಖುನ್, ಹೊಟೆಲಾಂತ್ಚ್ ಖಾಣ್, ಹೊಟೆಲಾಂತ್ಚ್ ಪಿಯೆವ್ಣ್. ಫಕತ್ತ್ ನಿತಳಾಯ್ ಆನಿ ಇಲ್ಲೊ ವಿಶೆವ್ ಘೆಂವ್ಚ್ಯಾಕ್ ಮಾತ್ರ್ ಗುರ್ದಾಸ್ ಕುಡಾಕ್ ಯೆತಾಲೊ.
ಅಶೆಂ ಮ್ಹಣೊನ್ ಕಾಂಯ್ ನಖ್ಖಿ ದೀಸ್ಪೊಡ್ತಿ ಗುರ್ದಾಸಾಕ್ ನಾ. ಸಕಾಳಿಂ ಉಟೊನ್ ಕಾಮಾಕ್ ಗೆಲ್ಯಾರ್ ಸಾಂಜೆರ್ ನಖ್ಖೆಂ ಜಾವ್ನ್ ಪಾಟಿಂ ಯೆತಾ ಮ್ಹಣ್ ಸಾಂಗೊಂಕ್ ಜಾಯ್ನಾ. ಕೆದ್ನಾಂ ರಾತಿಂ ಮ್ಹಣಾಸರ್ ಪಯ್ಸ್ ಪಯ್ಸ್ ಗೆಲ್ಲೊ, ಥೊಡೆ ಪಾವ್ಟಿಂ ಥಂಯ್ಚ್ ರಾತ್ಫಾಲಿ ಕರ್ತಾಲೊ. ಥೊಡೆಪಾವ್ಟಿಂ ಪಯ್ಶಿಲ್ಯಾ ಗಾಂವಾಕ್ ಗೆಲ್ಯಾರ್ ರಾತಿಂ ಟ್ರೇಯ್ನಾಚೆರ್ಚ್ಚ್ ನಿದೊನ್ ರಾತ್ ಪಾಶಾರ್ ಕೆಲ್ಲಿಯೀ ಆಸಾ. ಪತ್ರಿಕೋಧ್ಯಮಾಂತ್ ಕೊಣಾಕ್ ಶಿಸ್ತೆಚಿ ಜಿಣಿ ಆಸಾ? "ನೀದ್, ಭುಕ್, ತಾನ್ ಹ್ಯಾ ಸರ್ವಾಚೊ ಹುಸ್ಕೊ ಆಸ್ತೆಲ್ಯಾಂಕ್ ಪತ್ರಿಕೋಧ್ಯಮ್ ವೊಂಬ್ವಾನಾ" - ಸಹಯೋಗಿ ವಾಗ್ಮೋರೆನ್ ಸಾಂಗ್ಲೆಲಿಂ ಉತ್ರಾಂ ಖಡಾಕಡ್ ಸತ್.
ಪಯ್ಲೆಂ ವರಸ್ ಸಂಪಯ್ತಚ್ಚ್, ಗುರ್ದಾಸಾಕ್ ಆರೊ ಮ್ಯಾಗಜಿನಾಚೊ ಪರ್ಮನೆಂಟ್ ರಿಪೋರ್ಟರ್ ಜಾವ್ನ್ ಘೆತ್ಲ್ಲೆಂ. ತಾಕಾ ಆತಾಂ ಭಾತೆಂ ಚಡಯಿಲ್ಲೆಂ. ಕಂಪೆನಿಚೆ ಕಾಯ್ದೆ ಪಾಳುಂಕ್ ಆಸ್ಲ್ಲೆ. ಹರ್ಯೆಕಾಚೊ ರೆಕಾರ್ಡ್ ದವ್ರುಂಕ್ ಆಸ್ಲೆಂ. ಹರ್ಯೆಕ್ ಕಾಮ್ ರೆಕಾರ್ಡಾರ್ ಆಸ್ತಾಲೆಂ ತಶೆಂಚ್ ತಾಂಚೆಂ ಮೌಲ್ಯ್ ಮಾಪನ್ ಜಾತಾಲೆಂ.
ಆತಾಂ ಗುರ್ದಾಸ್ ಸ್ವತಂತ್ರ್ ರಿತಿನ್ ವೆವೆಗ್ಳ್ಯಾ ಪ್ರಾಂತ್ಯಾಕ್ ವಚೊಂಕ್ ಸಕ್ತಾಲೊ. ಹಿಂದಿ, ಮರಾಟಿ, ಇಂಗ್ಲಿಶ್, ಕಾನಡಿಸವೆಂ ತಾಕಾ ಥೊಡಿ ಗುಜ್ರಾತಿ, ಥೊಡಿ ಸಿಂಧಿ, ಥೊಡಿ ಭೋಜ್ಪುರಿ ಸಯ್ತ್ ಯೆತಾಲಿ. ವರ್ಸಾಚ್ಯಾ ಅಖ್ರೇಕ್ ತಾಚ್ಯಾ ಕಾಮಾಚೆರ್ ಮಾಪ್ ಜಾತಾಲೆಂ ’ಪರ್ಫೋಮೆನ್ಸ್ ಎಪ್ರೇಯ್ಸಲ್’ ಮ್ಹಳ್ಳ್ಯಾ ನಿಬಾನ್. ಹಾಚೆಸವೆಂ ಕಾಮಾಕ್ ಸೆರ್ವಲ್ಲೆ ಎದೊಳ್ಚ್ ಸೀನಿಯರ್ ರಿಪೋರ್ಟರ್, ಅಸಿಸ್ಟಂಟ್ ಎಡಿಟರ್ ಜಾಲ್ಲೆ. ಪುಣ್ ಗುರ್ದಾಸ್ ಜಸೊ ಆಸ್ಲೊ ತಸೊಚ್ಚ್ ಆಸಾ. ತೆಚ್ಚ್ ಖಾಡ್, ಖಾಂದಾರ್ ವಸ್ತ್ರಾಚೆಂ ಬ್ಯಾಗ್, ತಾಂತುಂ ಏಕ್ ಬೂಕ್, ಏಕ್ ಲಾಂಬ್ ಜುಬ್ಬೊ, ಜುಬ್ಬ್ಯಾಚ್ಯಾ ಬೊಲ್ಸಾಂತ್ ಏಕ್ ಪೆನ್ನ್, ದೊಳ್ಯಾಂಚೆರ್ ವೋಕ್ಲ್, ಹಾತಿಂ ಏಕ್ ಪರ್ನೆಂ ವೋಚ್, ಪಾಂಯಾಂಕ್ ಕೊಲಾಪುರಿ ಚಪ್ಪಲ್.
ತಾಚೆ ಸೀನಿಯರ್ಸ್ ಹರ್ಯೆಕಾ ಪರ್ಫೋಮೆನ್ಸ್ ಎಪ್ರೇಯ್ಸಲಾಂತ್ ತಾಕಾ ಸಭಾರ್ ಸುಚನಾಂ ದಿತಾಲೆ. ಪುಣ್ ಗುರ್ದಾಸಾಚೆಂ ಚಿಂತಾಪ್ ಪತ್ರಾಚ್ಯಾ ಮುಳಾವ್ಯಾ ಚಿಂತ್ಪಾಕ್ ತಾಳ್ ಪಡಾನಾಸ್ಲ್ಲೆಂ.
ಪುಣ್ ಗುರ್ದಾಸ್ ಕಠೀಣ್ ಮಿನತೆಚೊ ರಿಪೋರ್ಟರ್, ಕೆದ್ನಾಂ ಆವ್ರ್ ಆಯ್ಲೆಂ, ವಾ ಉಜೊ ಪೆಟ್ಲೊ, ಗಾಂವಾರ್ ಗಾಂವ್ ಲಾಸ್ಲೊ, ತೆದ್ನಾಂ ತೊ ಪಯ್ಲೊ ಹಾಜರ್ ಆಸ್ತಾಲೊ ಆನಿ ಹಿ ವರ್ದಿ ತಯಾರ್ ಕರ್ತಾಲೊ. ಅಶೆಂ ಎಕೇಕ್ ವರ್ಸಾಂ ಪಾಶಾರ್ ಜಾವ್ನ್ ಕಶೀಂಯ್ ಪಾಂಚ್-ಸ ವರ್ಸಾಂ ಕಾಡ್ಲಿಂ.
**********
"ತುಜೆ ಆಧ್ಲೆ ರೆಕೋರ್ಡ್ ಪಳೆಲೆ ಹಾಂವೆಂ, ಪುಣ್ ವಿಶೇಸ್ ರಿತಿನ್ ತುಜೊ ವಾವ್ರ್ ಮ್ಹಾಕಾ ಪಳೆಂವ್ಕ್ ಮೆಳಾನಾ." ಶರಣ್ ಮೋಟ್ವಾನಿನ್ ಆಧ್ಲಿಂ ಫಾಯ್ಲಾಂ ವಾಚುನ್ ಜಾತೆಚ್ಚ್ ಉಲಂವ್ಕ್ ಮುಖಾರಿಲೆಂ.
"..................."
"ತುಜೆಲಾಗಿಂ ಜಿವಿತಾಂತ್ ಸ್ಪಶ್ಟ್ ರಿತಿಚೊ ಮೋಟೊ ನಾ! ಮ್ಹಾಕಾ ದಿಸಾನಾ ತುಕಾ ಧ್ಯಾನ್ ದೀವ್ನ್ ಕಾಮ್ ಕರುಂಕ್ ತಾಂಕ್ತಾ ಮ್ಹಣ್. ತುಂ ಶಿಕ್ಪಿ ವರ್ಗಾಚೊ ವೆಕ್ತಿ, ಗಾಡ್ವಾಪರಿಂ ಫಕತ್ತ್ ಕಾಮ್ ಕರುಂಕ್ ಆಶೆತಾಯ್ ವಾ ತುಜ್ಯಾ ಜಿಣ್ಯೆಂತ್ ಉಂಚ್ಲ್ಯಾ ಹುದ್ದ್ಯಾಕ್ ಪಾಂವ್ಚೊ ಶೆವೊಟ್ ಆಸಾ?"
"ಸರ್, ಹಾಂವ್ ಪ್ರೇತನ್ ಕರುನ್ ಆಸಾಂ"
"ಹೆಂಗೀ ತುಜೆಂ ಪ್ರೇತನ್?.. ಪಾಟ್ಲ್ಯಾ ಪಾಂಚ್ ವರ್ಸಾಂಚೆ ರೆಕೋರ್ಡ್ ಸಾಂಗ್ಚೆಪರಿಂ, ತುಕಾ ಅಜೂನ್ ಪಾಸೊನ್ ತುಜ್ಯಾ ಪೊರ್ಫೋಮೆನ್ಸಾಚೆರ್ ಸಾಠಾಂಚ್ಯಾಕೀ ಚಡಿತ್ ಅಂಕ್ ಮೆಳೊಂಕ್ ನಾಂತ್. ತುಕಾ ಕಳಿತ್ ಆಸೊಂಕ್ ಪುರೊ, ತುಕಾ ಪ್ರೊಮೋಶನ್ ದೀಜಾಯ್ ತರ್ ಉಣ್ಯಾರ್ ಉಣೆಂ ತೀನ್ ವರ್ಸಾಂ ಮ್ಹಣಾಸರ್ ತುಕಾ ಪಾವಣ್ಶ್ಯಾಂಚ್ಯಾಕೀ ಚಡಿತ್ ಅಂಕ್ ಮೆಳ್ಚಿ ಗರ್ಜ್ ಆಸಾ.."
"ವ್ಹಯ್ ಸರ್, ಹಾಂವ್ ಜಾಣಾಂ"
"ತ್ಯಾ ಶಿವಾಯ್ ತುಕಾ ಇಂಪ್ರೂವ್ ಕರುಂಕ್ ಆಮಿ ಹರ್ಯೆಕಾ ರಿತಿನ್ ಪ್ರೇತನ್ ಕೆಲಾಂ, ಆವ್ಕಾಸ್ ದಿಲಾ. ಸೆಮಿನಾರಾಂಕ್ ತುಕಾ ಧಾಡ್ಲಾ, ಟ್ರೇಯ್ನಿಂಗಾಕ್ ತುಕಾ ಧಾಡ್ಲಾ. ತುಜೆಸವೆಂ ಕಾಮಾಕ್ ಸೆರ್ವಲ್ಲೆ ಆಜ್ ಹೆರ್ ಪತ್ರಾಂನಿ ಸಂಪಾದಕ್ ಜಾವ್ನ್ ಆಸಾತ್, ಆಮ್ಚ್ಯಾ ಕಂಪೆನಿಂತ್ಯೀ ಬರ್ಯಾ ಹುದ್ದ್ಯಾರ್ ಆಸಾತ್. ಪುಣ್ ತುಂ ಅಜೂನ್ ತೊಚ್ಚ್ ರಿಪೋರ್ಟರ್ ಜಾವ್ನಾಸಾಯ್, ತುಜ್ಯಾ ಜಿಣ್ಯೆಚೊ ಧ್ಯೇಯ್ ಕಸಲೊ ಮ್ಹಣ್ ಹಾಂವೆಂ ವಿಚಾರ್ಯೆತ್?"
"ಸರ್, ಬರಿ ಜಿಣಿ ಜಿಯೆಂವ್ಚೊಚ್ ಮ್ಹಜ್ಯಾ ಜಿಣ್ಯೆಚೊ ಧ್ಯೇಯ್"
"ಬರೆಂ ಆನಿ ಜಯ್ತೆವಂತ್ ಹಾಂಚೆಮಧೆಂ ಫರಕ್ ತುಂ ಸಮ್ಜತಾಯ್? - ಮಿಸ್ಟರ್ ಗುರ್ದಾಸ್, ಹಾಂವ್ ಪಳೆ, ಮ್ಹಜ್ಯಾ ಜಿಣ್ಯೆಚಿಂ ಹರ್ಯೆಕ್ ಕಾಮಾಂ ಏಕ್ ಶರ್ತಾಪರಿಂ ಸ್ವೀಕಾರ್ ಕರ್ತಾಂ, ಜಿಣ್ಯೆಚ್ಯಾ ಹರ್ಯೆಕಾ ಶರ್ತಾಂತ್ ರಿಸ್ಕ್ ಆಸಾ. ಆಮ್ಚ್ಯಾ ಜಿಣ್ಯೆಂತ್ ಸಯ್ತ್ ಹರ್ಯೆಕಾ ಶರ್ತಾಂನಿ ದೋನ್ ರಿತಿಚೆಂ ರಿಸ್ಕ್ ಆಸಾ. ಪಯ್ಲೆಂ ತ್ರೆಟ್ (ಭಿರಾಂತ್) ಆನಿ ದುಸ್ರೆಂ ಒಪೋರ್ಚುನಿಟಿ (ಆವ್ಕಾಸ್). ಆಮಿ ತ್ರೆಟ್ ಆಸ್ಚ್ಯಾಕ್ ಹೆರಾಂಚ್ಯಾ ಮಾತ್ಯಾರ್ ಟ್ರಾನ್ಸ್ಫರ್ ಕರಿಜಾಯ್, ಆನಿ ಒಪೋರ್ಚುನಿಟಿಂಕ್ ಆಪ್ಣಾಯ್ಜಯ್. ಹೆಂಚ್ ಜಯ್ತಾಚೆಂ ಪೋರ್ಮುಲಾ. ಆಜ್ ಮ್ಹಾಕಾ ಪಳೆಂ. ಮ್ಹಜೆಂ ಚಿಂತಾಪ್ ಆರೊ ಮ್ಯಾಗಜಿನಾಂತ್ ಆಸಾ. ಮ್ಹಜೊ ಆರೊ ಸದಾಂ ವಯ್ರ್ ವಯ್ರ್ ವಚೊಂಕ್ ಆಶೆತಾ. ಮ್ಹಾಕಾ ಹರ್ಯೆಕ್ಲ್ಯಾಂನಿ ಸ್ವಪ್ಣಾಂ ಪಳೆಜಯ್ ಮ್ಹಳ್ಳಿ ಆಶಾ, ಹರ್ಯೆಕ್ಲ್ಯಾಂನಿ ವ್ಹಾಡಾಜಯ್ ಮ್ಹಳ್ಳಿ ಆಶಾ. ಮ್ಹಾಕಾ ದುಭಾವ್ ಜಾತಾ ತುಂ ಮ್ಹಜ್ಯಾ ಮಿಸಾಂವಾತ್ ಚಡ್ ತೇಂಪ್ ಬಾಳ್ಶಿ ಮ್ಹಣೊನ್."
"ಸರ್, ಭೋವ್ಶಾ ತುಮಿಂ ಸಾರ್ಕೆಂ ಸಾಂಗ್ಲೆಂ, ಹಾಂವ್ ತುಮ್ಚ್ಯಾ ಮಿಸಾಂವಾಕ್ ಜೊಕ್ತೊ ವೆಕ್ತಿ ನ್ಹಯ್. ಹಾಂವೆಂ ಕಂಪೆನಿ ಥಾವ್ನ್ ಜಾಯ್ತೆಂ ಟ್ರೇಯ್ನಿಂಗ್ ಘೆತ್ಲೆಂ, ತರ್ಯೀ ಮ್ಹಜ್ಯಾ ಮತಿಂತ್ ಆಸ್ಚ್ಯಾ ಮುಳಾವ್ಯಾ ಸವಾಲಾಂಕ್ ಜವಾಬ್ ದಿಂವ್ಚ್ಯಾಕ್ ಎಕೀ ಟ್ರೇಯ್ನಿಂಗ್ ಸಕ್ಲಿಂ ನಾಂತ್"
"ವ್ಹಾಟ್!? ಕಸಲಿಂ ತಿಂ ಮುಳಾವಿಂ ಸವಾಲಾಂ? ತುಜ್ಯಾ ಜಾಗ್ಯಾರ್ ಹೆರ್ ಕೊಣೀಂ ಆಸ್ಲಿಂ ತರ್ ಆಜ್ ಕಿತ್ತುನ್ ಪಾವ್ತಿಂ ಮ್ಹಳ್ಳ್ಯಾಚೆಂ ಲೇಖ್ ಕೆಲಾಂಯ್ವೆ ತುವೆಂ?"
"ಸರ್, ಹಾಂವ್ ಲೆಕಾಚಿ ಜಿಣಿ ಜಿಯೆಂವ್ಕ್ ಆಶೆನಾ ಸರ್. ಹಾಂವ್ ಜಾಣಾಂ, ಜಿಣ್ಯೆಂತ್ ದೋನ್ ರಿತಿಚೆ ರಿಸ್ಕ್ ಆಸ್ತಾತ್, ಎಕಾಂತ್ ಭಿರಾಂತ್ ಆಸ್ತಾ ದುಸ್ರ್ಯಾಂತ್ ಆವ್ಕಾಸ್ ಆಸ್ತಾ. ಭಿರಾಂತ್ ಆಸ್ಚೆಂ ಹೆರಾಂಚ್ಯಾ ಮಾತ್ಯಾರ್ ಘಾಲುಂಕ್ ಕಿತ್ಯಾಕ್ಗೀ ಮ್ಹಜೆಂ ಕೊಶೆಡ್ದ್ ಮಾಂದಿನಾ, ತಶೆಂಚ್ ಆವ್ಕಾಸಾಕ್ ವೆಂಗುಂಕ್ ಸಯ್ತ್ ಮ್ಹಜೆಂ ಕಾಳಿಜ್ ಆಯ್ಕಾನಾ. ಮಾಫ್ ಕರಾ, ತುಮ್ಚೆಂ ವಯ್ರ್ ವೆಚ್ಯಾ ಆರೊ ಸಮೊರ್, ಮ್ಹಜ್ಯಾ ತಿಂತೆರಾಚೊ ಆರೊ ಸಕ್ಲಾ ಕುಶಿನ್ ಆಸಾ, ವಯ್ಲ್ಯಾ ದಿಶೆನ್ ಮ್ಹಜ್ಯಾನ್ ಬರಂವ್ಕ್ ಸಾಧ್ಯ್ ನಾ, ಕಿತ್ಯಾಕ್ - ತಾಂತುಂ ತೀಂತ್ ಗಳಾನಾ. ತೆಚ್ಚ್ಪರಿಂ ಮ್ಹಾಕಾ ಆವ್ರ್ ಆಯಿಲ್ಲ್ಯಾ ಗಾಂವಾಂನಿ ಮ್ಹಜ್ಯಾ ಕಾಮಾಚ್ಯಾಕೀ ಚಡಿತ್ ಜಾವ್ನ್ ಥಂಯ್ ವೊಳೊನ್ ವೆಚ್ಯಾ ಲೊಕಾಂಚ್ಯಾ ಕುಮ್ಕೆಕ್ ವೆಚಿ ಚಡಿತ್ ಗರ್ಜ್ ಮ್ಹಣ್ ಭಗ್ತಾ. ಖಂಯ್ಚರ್ ದೊಂಬಿ ಗಲಾಟೊ ಜಾತಾ, ಥಂಯ್ಚರ್ ಮ್ಹಾಕಾ ಮಸಾಲಾ ರಿಪೋರ್ಟಾಚ್ಯಾಕೀ, ಭಾಜ್ಲೆಲ್ಯಾಂಕ್ ವ್ಹಕಾತ್ ದಿವಯ್ಶೆಂ ಕರ್ಚಿ ಚಡಿತ್ ಗರ್ಜ್ ಮ್ಹಣ್ ಭಗ್ತಾ. ಮಾಫ್ ಕರಾ ಸರ್, ಮ್ಹಜಿಂ ಸ್ವಪ್ಣಾಂ ಹೆರಾಂಚಿಂ ಸ್ವಪ್ಣಾಂ ಪಿಡ್ಡ್ಯಾರ್ ಕರ್ಚಿಂ ನ್ಹಯ್. ಮ್ಹಾಕಾ ಉಂಚ್ಲೊ ಹುದ್ದೊ ನ್ಹಯ್, ಉಂಚ್ಲೊ ವೆಕ್ತಿ ಜಾಂವ್ಚಿ ಮಾತ್ರ್ ಆಶಾ"
ಉಪ್ರಾಂತ್ ಕಸ್ಲೆಂಚ್ ಉಲವ್ಣೆಂ ತಾಂಚೆ ಮಧೆಂ ಚಲ್ಲೆಂ ನಾ.
**********
ಸುಮಾರ್ ವರ್ಸಾಂ ಉತರ್ಲ್ಯಾಂತ್!
ಆತಾಂ ಗುರ್ದಾಸ್ ಬರಯ್ನಾ, ಪತ್ರಿಕೋಧ್ಯಮಾಂತ್ ನಾ, ಜುಬ್ಬೊ ನೆಸಾನಾ, ತಾಚೆ ಖಾಡ್ ಲಾಂಬ್ ಜಾಲ್ಯಾತ್, ಬೊಲ್ಸಾಂತ್ ತಿಂತೆರ್ ನಾ. ಫಕತ್ತ್ ಝೊಪ್ಡ್ಯಾಚ್ಯಾ ಭುರ್ಗ್ಯಾಂಕ್ ಎಕ್ಟಾಂಯ್ ಕರುನ್ ಶಿಕಯ್ತಾ, ತಾಂಕಾಂ ನ್ಹಾಣಯ್ತಾ, ತಾಂಚೆಸವೆಂ ಜೆವ್ತಾ, ತಾಂಚೆಸವೆಂ ನಿದ್ತಾ.
ಹಾಂ! ಸಾಂಗೊಂಕ್ ವಿಸರ್ಲೊಂ; ಆರೊ ಮ್ಯಾಗಜಿನಾಂತ್ ತೊ ರಿಪೋರ್ಟರ್ ಭಿಲ್ಕುಲ್ ನ್ಹಯ್! ತಾಣೆಂ ಸೊಡ್ಲಾಂ ವಾ ತಾಕಾ ಕಾಡ್ಲಾ ತೆಂ ತುಕಾ ಪುಣಿಂ ಕಳಿತ್ ಆಸ್ತೆಲೆಂಚ್.
**********
[ಹಿ ಕಾಣಿ ’ರಾಕ್ಣೊ’ ಪತ್ರಾಚೆರ್ ಪರ್ಗಟ್ ಜಾಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
