ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಸೊಲ್ಲೊ
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್, ಮತಾಂತರ್.
ಜಿಣ್ಯೆಂತ್ ಜೆದ್ನಾಂಯ್ ತತ್ವಾಂ ಎಕಾಮೆಕಾ ಆದ್ಳೊನ್ ಪಡ್ತಾನಾ ಸೊಲ್ಲೊ ಕರ್ನ್ ಸಮಧಾನ್ ಜೊಡ್ಚ್ಯಾಕ್ ಕೊಣ್ ಮ್ಹಣಾತ್ ಪೊಳ್ಕುರ್ವಾದ್. ಪುಣ್ ಸಾಮ್ವೆಲಾಕ್ ಮಾತ್ರ್ ಹೆಂ ಜಿಣ್ಯೆಸೂತ್ರ್. ಆನಿ ಜರ್ ಆಜ್ ಸಾಮ್ವೆಲಿನ್ ಇತ್ಲೆಂ ಆಪ್ಣಾಯ್ಲಾಂ ತರ್ ಅಸಲ್ಯಾಚ್ ಸೊಲ್ಲ್ಯಾನಿಮ್ತಿಂ ಮ್ಹಳ್ಳೆಂಯ್ ಅಪುಟ್ ಸತ್.
’ಜಿಲ್ಲು ಮೌಶೆಚ್ಯಾ ಪುತಾಕ್ ಕಶೆಂ ಪುಣೀ ಏಕ್ ವಿಜಾ ಧಾಡ್’ ಮ್ಹಣೊನ್ ಬಾಯ್ಲೆಚೆಂ ಕಾಗಾದ್ ಆಯಿಲ್ಲೆ ಥಾವ್ನ್ ಸಾಮ್ವೆಲಿಚ್ಯಾ ಮತಿಚಿಂ ಚಿಂತ್ನಾಂ ಲ್ಹಾರಾಂಪರಿಂ ಉಮಾಳೊನ್ ಯೆತಾಲಿಂ. ಕಾಗ್ದಾಸವೆಂ ಪಾಸ್ಪೋರ್ಟಾಚ್ಯೊ ಪ್ರತಿಯೊ ಆನಿ ತಸ್ವೀರೊ ಸಯ್ತ್ ಧಾಡ್ಲ್ಲ್ಯೊ. ವಿಜಾ ಧಾಡ್ಚಿ ತಿತ್ಲಿ ಸಲೀಸ್ ಜಾಲ್ಲಿ ತರ್ ಸಗ್ಳಿಂ ಗಾಂವ್ಚಿಂ ಆಜ್ ಗಲ್ಫಾಂತ್ ಆಸ್ತಿಂ ಕೊಣ್ಣಾ - ತೊ ಮತಿಂತ್ಚ್ ಆಟೊವ್ ಕರ್ತಾಲೊ.
ತೆಂಪಾಧಿಂ ಬೊಂಬೊಂಯ್ತ್ ಗಲ್ಫಾಕ್ ವಿಜಾ ವಿಖ್ಚ್ಯಾ ಯೇಜಂಟಾಚ್ಯಾ ದಫ್ತರಾಂಚ್ಯಾ ಬಾಗ್ಲಾಂನಿ ತಾನೆವ್ನ್, ವೊತಾಕ್ ತಾಪೊನ್, ಪಾವ್ಸಾಕ್ ಬಿಜೊನ್ ಪಾಶಾರ್ ಕೆಲ್ಲೆ ದೀಸ್ ಯಥೇಶ್ಟ್ ಮಾಪಾನ್ ಆಸಾತ್. ಪುಣ್ ಗಲ್ಫಾಕ್ ವೆಚ್ಯಾ ಧಾಂವ್ಣೆಂತ್ ಸಯ್ತ್ ಮಲ್ಬಾರಿಂಕ್ ಪಯ್ಲೊ ಆವ್ಕಾಸ್ ಲಾಭ್ತಾಲೊ. ಕಾಂಯ್ ಏಕ್ ದೋನ್ ಪಾವ್ಟಿಂ ತೊ ವಿಂಚೊನ್ ಆಯಿಲ್ಲೊ ತರ್ಯೀ, ಯೇಜಂಟಾಂಚ್ಯಾ ಹಿಖ್ಮತೆಂನಿ ಸಾಮ್ವೆಲಿಕ್ ಗಲ್ಫಾಚಿ ವಿಜಾ ಲಾಭ್ಲಿಚ್ ನಾ. ಪುಣ್ ಹೊಟೆಲಾಂತ್ ಕಾಮ್ ಕರ್ನ್ ಥಂಯ್ಚ್ ವಸ್ತಿ ಕರ್ಚ್ಯಾ ಸಾಮ್ವೆಲಿನ್ ಧಯ್ರ್ ಸೊಡ್ಲೆಂನಾ. ತಾಚೊ ಪ್ರತಿಫಳ್ ಜಾವ್ನ್ ಕಾಂಯ್ ಎಕಾ ಕೋಂಟ್ರಾಕ್ಟಿಂಗ್ ಕಂಪೆನಿಂತ್ ಯೇವ್ನ್ ಕಾಂಯ್ ವರ್ಸಾಂ ನೋವ್ ಪಾಶಾರ್ ಜಾಲ್ಯಾಂತ್. ಹ್ಯಾ ನೋವ್ ವರ್ಸಾಂನಿ ಸಾಮ್ವೆಲಿನ್ ಜಾಯ್ತೆಂ ಹೊಗ್ಡಾಯ್ಲಾಂ ತಶೆಂ ಪುಂಜಾಯ್ಲಾಂ ಸಯ್ತ್.
ಹಿ ಕೋಂಟ್ರಾಕ್ಟಿಂಗ್ ಕಂಪ್ಣಿ ಚಲಯ್ತಾಲೊ ಏಕ್ ಆರ್ಭಿ. ಆನಿ ತಾಚೊ ಖಾಸ್ ಮನಿಸ್ ಜಾವ್ನಾಸ್ಚೊ ಮಲ್ಬಾರಿ ಥೊಡ್ಯಾ ವರ್ಸಾಂಧಿಂ ಆರ್ಭಿಕ್ ತೊಪಿ ದೀವ್ನ್, ಹಜಾರಾಂನಿ ದಿನಾರ್ ಗುಳುಂ ಕರ್ನ್ ಧಾಂವ್ಲ್ಲೆನಿಮ್ತಿಂ ಸಾಮ್ವೆಲಿಚ್ಯಾ ಅದೃಶ್ಟಾಚೆಂ ದಾರ್ ಉಗ್ತೆಂ ಜಾಲ್ಲೆಂ. ಕೋಂಟ್ರಾಕ್ಟಿಂಗ್ ಕಂಪೆನಿಚೆಂ ಕಾಮ್ ಬರ್ಯಾನ್ ಚಲ್ತಾಲೆಂ. ಬಾಂಗ್ಲಾಚೆ, ಶ್ರೀಲಂಕಾಚೆ, ನೆಪಾಲಿ, ಮಲ್ಬಾರಿ, ಆಂಧ್ರಚೆ ಕಡಪಾ, ಪಾಕಿಸ್ತಾನಿ, ಅಫ್ಗಾನಿಸ್ತಾನ್, ಎಜಿಪ್ತಾಚೆ ಮಸ್ರಿ ಅಶೆಂ ಉಣ್ಯಾ ಸಾಂಬಾಳಾಕ್ ಆಯಿಲ್ಲ್ಯಾಂಕ್, ಹಿ ಕೋಂಟ್ರಾಕ್ಟಿಂಗ್ ಕಂಪೆನಿ ಕಂಯ್ ಕಂಯ್ ಕಾಮಾಕ್ ಲಾಯ್ತಾಲೆ. ಹಾಂಕಾಂ ರಾವೊಂಕ್ ಏಕ್ ಹಳ್ತಾಚೆಂ ಘರ್ ಬಾಡ್ಯಾಕ್ ಘೆವ್ನ್, ಎಕೆಕಾ ಕುಡಾಂತ್ ಧಾ ಧಾ ಜಣಾಂಕ್ ಘಾಲ್ತಾಲಿಂ. ತಾಂಕಾಂ ರಾಂದುಂಕ್ ಮ್ಹಣ್ ದೊಗಾಂ ಆಸ್ಲಿಂ. ಲೋಕ್ ಮಜ್ಬೂರೆಂತ್ ದೀಸ್ ಲೊಟ್ತಾಲೊ. ಥೊಡ್ಯಾಂಕ್ ಚಾರ್ ವರ್ಸಾಂಕ್ ಏಕ್ ಮಯ್ನ್ಯಾಚಿ ರಜಾ ತರ್ ಥೊಡ್ಯಾಂಕ್ ತೀಯ್ ಮೆಳಾನಾತ್ಲ್ಲಿ.
ಸಾಮ್ವೆಲ್ ಆಫಿಸಾಂತ್ ಕಾಮ್ ಕರ್ನ್ ಆಸ್ಲೊ. ಆರ್ಭ್ಯಾಚೊ ಖಾಸ್ ಮನಿಸ್. ಪುಣ್ ಆಫಿಸಾಂತ್ ಸಗ್ಳಿಂ ತಾಕಾ ಮೆನೆಜರ್ ಮ್ಹಣ್ ವೊಲಾಯ್ತಾಲಿಂ. ಆರ್ಭ್ಯಾಚಿ ಪರ್ನಿ ಗಾಡಿ ತೊಚ್ಚ್ ಚಲಯ್ತಾಲೊ. ತಾಕಾ ರಾವೊಂಕ್ ಏಕ್ ವೆಗ್ಳೆಂಚ್ ಕೂಡ್ ದಿಲ್ಲೆಂ, ಆನಿ ತಾಂತುಂ ತಾಕಾ ಸರ್ವ್ ಗರ್ಜೆಚ್ಯೊ ಸವ್ಲತಾಯೊ ದಿಲ್ಲ್ಯೊ.
ಸಾಮ್ವೆಲ್ ಮಾಯ್ಗಾಂವಾಂತ್ ಏಕ್ ಪ್ರತಿಷ್ಟಿತ್ ವೆಕ್ತಿ. ಶೆಜಾರ್ಚ್ಯಾ ಗಾಂವ್ಚ್ಯಾ ಚೆಡ್ವಾಸವೆಂ ಕಾಜಾರ್ ಜಾವ್ನ್ ಮಾಂವಾಡೆ ಸಯ್ತ್ ಭೋವ್ ನಾಂವಾಡ್ದಿಕ್ ಜಾಲಾ. ಎಕ್ಲೆಂಚ್ ಚೆಡುಂ ದೆಕುನ್ ಮಾಂವಾಡೆಚ್ ಬರೆಂ ಟೆರೆಸಾಚೆಂ ಘರ್ ಭಾಂದ್ಲಾಂ. ವರ್ಸಾನ್ ವರಸ್ ರಜೆರ್ ಗೆಲ್ಲೊ ಇಗರ್ಜೆಕ್ ಮೊಟೊ ಐವಜ್ ದಾನಾ ರುಪಾರ್ ದಿತಾ ದೆಕುನ್ ಮಾಂವಾಡೆ ಭೋವ್ ವಳ್ಕೆಚೊ ಜಾಲಾ.
ತೆಂ ಚ್ಯಾರ್ ಕುಡಾಂಚೆಂ ಲ್ಹಾನ್ ಆಫಿಸ್, ಎಕಾಂತ್ ಅರ್ಭಿ ಬಸ್ತಾಲೊ ಆನಿ ತಾಕಾ ಭೆಟೊಂಕ್ ಯೆಂವ್ಚೆ ತಾಚೆ ಮಿತ್ರ್ ಬೊಸೊನ್ ಗಪ್ಪೆ ಮಾರ್ತಾತ್. ದುಸ್ರ್ಯಾಂತ್ ಸಾಮ್ವೆಲಿ ಆನಿ ತಾಚೆ ಸವೆಂ ದೊಗ್ ಎಕೌಂಟೆಂಟ್. ಭಾಯ್ರ್ ಎಕಾ ಕುಡಾಕ್ ಹೊಲಾಪರಿಂ ಕರ್ನ್ ಸೊಫಾ ದವರ್ಲಾ - ಕಾಂಯ್ ಕೊಣೀ ಆಯ್ಲ್ಯಾರ್ ಬೊಸೊಂಕ್. ಅನ್ಯೇಕ್ ಕೂಡ್ ಕೂಜ್ನ್ ಆನಿ ದೆಗೆನ್ ಖಾಕುಸ್. ಪುಣ್ ಕ್ಲೀನಿಂಗಾಚಿಂ ಹಾತೆರಾಂ ದಾಸ್ತಾನ್ ಕರ್ನ್ ದವರ್ಲ್ಲಿಂ.
ದೋಗ್ ತರ್ನೆ ಆಫಿಸ್ಬೋಯ್, ಎಕ್ಲೊ ಪಿಲಿಪ್ಪಿನಾಚೊ ತರ್ ದುಸ್ರೊ ಬಾಂಗ್ಲಾಚೊ. ಆಫಿಸಾಚಿ ನಿತಳಾಯ್, ಚಾ-ಕಾಫಿ ಕರ್ಚಿ ಜವಾಬ್ಧಾರಿ ತೆ ಪಳೆವ್ನ್ ಘೆತಾಲೆ.
ಜಿಲ್ಲು ಮೌಶಿ ಗಾಂವಾಂತ್ ಭಾರಿ ಕಾರ್ಭಾರಾಂ ಕರ್ತಾಲಿ. ತಿಚೊ ಪತಿ ತಪ್ಪಾಲಾಚೊ ಪೆದೊ ಜಾವ್ನ್ ಕಾಮ್ ಕರ್ತಾಲೊ ತರ್ಯೀ, ಘರಾಂತ್ ತಶೆಂ ಗಾಂವಾಂತ್ ಹಿಚೆಂಚ್ ಕಾರ್ಭಾರ್ ಚಲ್ತಾಲೆಂ. ತಿಚೊ ಮಾಲ್ಘಡೊ ಪೂತ್ ಮಿಲಿಟ್ರಿಕ್ ಮ್ಹಣ್ ಗೆಲ್ಲೊ. ಥಂಯ್ ಥಾವ್ನ್ ಧಾಂವೊನ್ ಗೆಲ್ಲೊ ಆಜ್ ಪಾಸೊನ್ ಖಂಯ್ ಗೆಲಾ ಮ್ಹಣ್ ಕೊಣ್ಚ್ ನೆಣಾಂತ್. ದುಸ್ರೊ ಸೆಮಿನರಿಕ್ ವೆತಾಂ ಮ್ಹಣ್ ಗೆಲ್ಲೊ ದೊನ್ಂಚ್ ವರ್ಸಾಂನಿ ದೊರೊ ಉಡೊನ್ ಧಾಂವೊನ್ ಆಯಿಲ್ಲೊ ಸದ್ದ್ಯಾಕ್ ಬೊಂಬೊಯಾಂತ್ ಹಾಪೊಳ್ ಕರ್ನ್ ವಿಖ್ಚ್ಯಾ ಕಂಪ್ಣೆಂತ್ ಕಾಮ್ ಕರ್ತಾಲೊ. ನಿಮಾಣೊ ಚೆಡೊ ಬಾಲ್ತು ಚ್ಯಾರ್ ಪಾವ್ಟಿಂ ಧಾವೆಂತ್ ಫೇಯ್ಲ್ ಜಾವ್ನ್, ಆತಾಂ ಕಸೋಯ್ ಧಾವಿ ಕರ್ನ್ ತೀನ್ ಮಯ್ನ್ಯಾಂಚೊ ಕಂಪ್ಯೂಟರ್ ಕೋರ್ಸ್ ಕರ್ನ್ ಆತಾಂ ಕಾಂಯ್ ಬಾವೊಜಿ ಗಲ್ಫಾಚಿ ವಿಜಾ ಧಾಡ್ತಾ ಮ್ಹಣ್ ರಾಕೊನ್ ಬೊಸ್ಲಾ.
ಸಾಮ್ವೆಲಿಚ್ಯಾ ಮರ್ಯಾದೆಚೆಂ ಸವಾಲ್ ಹೆಂ. ಜಿಲ್ಲು ಮೌಶೆಚೆಂ ತೋಂಡ್ ವ್ಹಡ್ - ಮ್ಹಣ್ ಗಾಂವಾಂತ್ ಸಗ್ಳಿಂ ಜಾಣಾಂತ್. ಕಾಂಯ್ ವಿಜಾ ಧಾಡ್ಲಿನಾ ತರ್ ಪಡ್ಚಾ. ಸಾಮ್ವೆಲಿ ಆಟವ್ ಕರ್ತಾಲೊ.
ತಶೆಂ ಮ್ಹಣ್ ಸಾಮ್ವೆಲಿನ್ ವಿಚಾರ್ಲ್ಯಾರ್ ಕಾಂಯ್ ಆರ್ಭಿ ನಾ ಮ್ಹಣ್ಚೊನಾ. ಪುಣ್ ಹಾಡ್ನ್ ತಾಕಾ ಕಂಯ್ ಮ್ಹಣ್ ಕಾಮಾಕ್ ಲಾಂವ್ಚೆಂ? ಕಾಮ್ ಕರ್ನ್ ಅನ್ಭೋಗ್ ನಾ ಮ್ಹಣ್ತಚ್ ತಾಕಾ ಹಾಡ್ನ್ ಕಾಂಯ್ ಕೋಂಟ್ರಾಕ್ಟಿಂಗ್ ಕಂಪ್ಣೆಂತ್ ಕಾಮಾಕ್ ಲಾಗಯ್ಲ್ಯಾರ್ ಗತ್ ಪಾಡ್ ಜಾಂವ್ಕ್ ಆಸಾ ಚೆಡ್ಯಾಚಿ.
ಆಧ್ಲೆ ಪಾವ್ಟಿಂ ಗಾಂವಾಕ್ ಗೆಲ್ಲೆವೆಳಾರ್ ಜಿಲ್ಲು ಮೌಶೆನ್ ಏರ್ಪೋರ್ಟಾಕ್ ಪಾಂವ್ಕ್ ಯೆತಾನಾ ಮೊಗಾನ್ ’ಆಂಬಡ್ಯಾಚೆಂ ಲೊಣ್ಚೆಂ’ ಕರ್ನ್ ಹಾಡ್ಲ್ಲೆಂ. ತೆಂ ದಿತಾನಾ ತಿಣೆಂ ಖಾಸ್ ವಿನತಿ ಕೆಲ್ಲಿ; "ಪುತಾ, ಖಂಚೇಯ್ ಜಾತಾ, ಏಕ್ ವಿಜಾ ಆಮ್ಚ್ಯಾ ಬಾಲ್ತುಕ್ ಧಾಡ್ ಪುತಾ.. ನಾಂತರ್ ತೊ ಗಾಂವಾಂತ್ ಪಾರ್ಪೊಳ್ ಜಾತಾ".
ವ್ಹಯ್! ಸುರ್ವೆರ್ ಸಗ್ಳಿಂ ತೆಂಚ್ ಸಾಂಗ್ತಾತ್ - ಖಂಚೇಂಯ್ ಕಾಮ್ ಜಾತಾ ಮ್ಹಣ್. ಉಪ್ರಾಂತ್ ಕಾಮ್ ಸಾರ್ಕೆಂ ನಾ, ರಾವೊಂಕ್ ಸಮಾ ನಾ. ಸಾಂಬಾಳ್ ಸಾರ್ಕೊ ಮೆಳಾನಾ, ರಜಾ ಮೆಳಾನಾ, ಕಾಮ್ ಚಡ್, ಜೇಂವ್ಕ್ ಮೆಳಾನಾ ಮ್ಹಳ್ಳಿ ದುರ್ಸೊಣಿ ಚುಕಾನಾ. ದೆಕುನ್ ಮ್ಹಾಕಾ ಕಿತ್ಯಾಕ್ ಬೊಡಿ ದೀವ್ನ್ ಮಾರ್ ಖಾಂವ್ಚಿ? ಸಾಮ್ವೆಲಿಚ್ಯಾ ಮತಿಕ್ ಕಿತೆಂಚ್ ಸಮ್ಜಾನಾತ್ಲ್ಲೆಂ.
ಎಕಾ ವಾಟೆರ್ ಸಾಮ್ವೆಲಿಚ್ಯಾ ಮರ್ಯಾದಿಚೆಂ ಸವಾಲ್. ಸಾಮ್ವೆಲಿ ಗಾಂವಾಕ್ ಪಾವ್ತಚ್ಚ್ ಫೊನಾಂಚಿ ರಾಸ್. ಕೊಣ್ ಎಲ್ಲೈಸಿಚೆ, ಕೊಣ್ ಮ್ಯೂಚುವಲ್ ಫಂಡಾಚೆ. ಕೊಣ್ ಐ.ಸಿ.ವೈ.ಎಮ್ಮಾಚೆ ತರ್ನಾಟೆ, ಆನಿ ಕೊಣ್ ವಿಜಾ ದಿತಾಯ್ಗೀ ಮ್ಹಣ್ ವಿನತಿ ಕರುಂಕ್. ಇಗರ್ಜೆಚೊ ಪಾದ್ರಿ ಥಾವ್ನ್ ಕೋನ್ವೆಂಟಾಚಿಂ ಸಿಸ್ಟ್ರಾಂ ಸಯ್ತ್ ಸಾಮ್ವೆಲಿಕ್ ಮೆಳೊಂಕ್ ಯೆತಾತ್. ಕೆದ್ನಾಂ ಹೊಲಾಕ್ ಪೇಂಟ್ ಮಾರುಂಕ್, ಆನಿ ಕೆದ್ನಾಂ ಇಸ್ಕೊಲಾಚ್ಯಾ ಭಾಂದ್ಪಾಕ್ ದುರಸ್ತಿ ಕರುಂಕ್. ಆನಿ ಕೆದ್ನಾಂ ಘಾಂಟ್ ಉಭಾರುಂಕ್..
ಚಿಂತುನ್ ಚಿಂತುನ್ ಸಾಮ್ವೆಲಿಕ್ ಏಕ್ ಅಲೋಚನ್ ಆಯ್ಲಿ. ಕಾಂಯ್ ಆಫಿಸಾಂತ್ ಕಾಮ್ ಕರ್ನ್ ಆಸ್ಚ್ಯಾ ದೊಗಾಂ ಆಫಿಸ್ಬೋಯ್ ಪಯ್ಕಿಂತ್ ಎಕ್ಲ್ಯಾಕ್ ಕಾಡ್ನ್ ತಾಚ್ಯಾ ಜಾಗ್ಯಾರ್ ಬಾಲ್ತುಕ್ ಹಾಡ್ಲ್ಯಾರ್ ಬರೆಂ ಮ್ಹಳ್ಳಿ ಆಲೋಚನ್ ಸಾಮ್ವೆಲಿಕ್ ಬರಿ ಮ್ಹಣ್ ದಿಸ್ಲಿ. ರಾವೊಂಕ್ ಕಾಂಯ್ ಆಪ್ಲ್ಯಾ ಕುಡಾಂತ್ ರಾವವ್ಯೆತ್. ಸುರ್ವೆರ್ ಥೊಡೆ ಮಯ್ನೆ ಹಾಂಗಾ ಕಾಮ್ ಕರ್ನ್ ಹಳ್ತಾರ್ ಶಿಕ್ತಲೊ. ಉಪ್ರಾಂತ್ಲೆಂ ಮಾಗಿರ್ ಪಳೆವ್ಯಾಂ ಮ್ಹಣ್ ಚಿಂತಿಲಾಗ್ಲೊ.
ಪುಣ್ ದೊಗಾಂ ಪಯ್ಕಿ ಕೊಣಾಕ್ ಕಾಡ್ಚೆಂ? ದೊಗೀ ಚೆಡೆ ಕಾಮಾಂತ್ ಬರೆ ಆಸಾತ್. ವೆಳಾರ್ ಯೆತಾತ್, ಹಾಸ್ಕುರ್ಯಾ ತೊಂಡಾರ್ ಕಾಮ್ ಕರ್ನ್ ಆಸಾತ್ ಮ್ಹಣ್ತಾನಾ, ತಾಂಕಾಂ ಕಾಡುಂಕ್ಯಿ ಏಕ್ ಉಪಾಯ್ ಗರ್ಜೆಚೊ ಮ್ಹಳ್ಳೆಂ ಸಾಮ್ವೆಲಿಕ್ ಕಳಿತ್ ಆಸ್ಲೆಂ.
ಥೊಡೆ ದೀಸ್ ಗೆಲ್ಲೆಪರಿಂ ಸಾಮ್ವೆಲಿನ್ ನವಿ ಚಾಲ್ ಸುರು ಕೆಲಿ. ಸಕಾಳಿಂ ಸದಾಂಯ್ ತೊ ಆಟ್ ವೊರಾಶೆಂ ಆಫಿಸಾಕ್ ಯೆತಾ ಆನಿ ಸಕಾಳಿಂ ಆಟ್ ವೊರಾಕ್ ತಾಕಾ ಪಯ್ಲಿ ಚಾ ಹಾಡ್ನ್ ಯೆತಾ ಆಫಿಸ್ಬೋಯ್ ಪಿಲಿಪ್ಪೈನಾಚೊ ಚೆಡೊ. ಉಪ್ರಾಂತ್ ಇಕ್ರಾ ವೊರಾರ್ ದುಸ್ರಿ ಚಾ. ದನ್ಪಾರಾಂ ಉಪ್ರಾಂತ್ ತೀನ್ ವೊರಾಶೆಂ ತಿಸ್ರಿ ಚಾ. ಹಾಚ್ಯಾಕೀ ಚಡಿತ್ ಜೆದ್ನಾಂಯ್ ಗರ್ಜ್ ಪಡ್ಲಿ ತರ್ ಆಪಯ್ಲ್ಯಾರ್ ಚೆಡೆ ತಯಾರ್ ಆಸ್ತಾತ್.
ಎಕಾ ಸಕಾಳಿಂ ಸಾಮ್ವೆಲಿನ್ ಚಾಯೆಚೊ ಏಕ್ ಘೊಟ್ ಪಿಯೆವ್ನ್, ದುಸ್ರೊ ಘೊಟ್ ಪಿಯೆಂವ್ಚ್ಯಾಧಿಂ ಆಪ್ಲ್ಯಾ ಪ್ಯಾಂಟಾಚ್ಯಾ ಬೊಲ್ಸಾಕ್ ಹಾತ್ ಘಾಲ್ನ್ ಥೊಡಿಂ ಸುತಾಂ ಭಾಯ್ರ್ ವೊಡ್ಲಿಂ ಆನಿ ತಿಂ ಕಾಡ್ನ್ ಚಾಯೆಚ್ಯಾ ಗ್ಲಾಸಾಕ್ ಘಾಲ್ನ್ ಆಫಿಸ್ಬೋಯಾಕ್ ದೆಂಕ್ಣೊ ಘಾಲ್ಯೊ. ಬಾವ್ಡೊ ಚೆಡೊ ಕಿತೆಂ ಜಾಲೆಂ ಕಳಿತ್ ನಾಸ್ತಾಂ ದೊನೀ ಹಾತ್ ಧರುನ್ ಉಭೊ ಜಾಲೊ.
"ತುವೆಂ ಚಾಯೆಚೆಂ ಕಪ್ ಸಾರ್ಕೆಂ ಧುಲಾಂವೆ?. ಹಾಂವ್ ಪಳೆತೆ ಆಸಾಂ. ಆಜ್ಕಾಲ್ ತುಮ್ಚೆಂ ಧ್ಯಾನ್ ಕಾಮಾಚೆರ್ ಭಿಲ್ಕುಲ್ ನಾ. ಮರ್ಯಾದೆನ್ ಕಾಮ್ ಕರುಂಕ್ ಆಸ್ಲ್ಯಾರ್ ಕರಾ. ನಾಂ ತರ್ ಕೋಂಟ್ರಾಕ್ಟಿಂಗ್ ಕಾಮಾಕ್ ಲಾಯ್ತಾಂ ತುಮ್ಕಾಂ. ವ್ಹರ್ ಹಿ ಚಾ ಆನಿ ಪಳೆ ಕಿತೆಂ ಆಸಾ ಹಾಂತುಂ ಮ್ಹಣ್" ಸಾಮ್ವೆಲಿನ್ ರಾಗಾನ್ ಉಲಂವ್ಚೆಂ ಪಯ್ಲೆ ಪಾವ್ಟಿಂ ದೆಕುನ್ ಚೆಡೊ ಕಾವ್ಜೆಲೊ ಆನಿ ಹಳೂ ಚಾಯೆಚೆಂ ಕಪ್ ಘೆವ್ನ್ ವೆತಾನಾ ’ಸಾರಿ ಸರ್’ ಮ್ಹಣ್ತಾನಾ ಸಯ್ತ್ ಸಾಮ್ವೆಲಿಚ್ಯಾ ತೊಂಡಾರ್ ಕಿತೆಂಚ್ ಭಗ್ಣಾಂ ಉದೆಲಿಂ ನಾಂತ್.
ಸೊಲ್ಲೊ - ಮಾರೆಕಾರ್ ಸೊಲ್ಲೊ ಕರುಂಕ್ ಆಸ್ಲೊ ತಾಣೆ.
ಥೊಡ್ಯಾ ವೆಳಾನ್ ದುಸ್ರಿ ಚಾ ಕರುನ್ ಹಾಡ್ನ್ ಆಯ್ಲೊ ತೊ ಚೆಡೊ. ಸವೆಂ ಉದ್ಕಾಚೊ ಏಕ್ ಗ್ಲಾಸ್.
ಥೊಡೊ ವೇಳ್ ಜಾತಚ್ಚ್. ಸಾಮ್ವೆಲಿನ್ ಚಾ ಪಿಯೆವ್ನ್ ಜಾತಚ್ಚ್, ಉದ್ಕಾಚೊ ಏಕ್ ಘೊಟ್ ಪಿಯೆವ್ನ್ ಬಾಕಿಚೆಂ ಉದಾಕ್ ಹಳೂ ಮೆಜಾ ಪಂದಾಕ್ ವೊತ್ಲೆಂ. ಆನಿ ತ್ಯಾ ಉದ್ಕಾಚೆರ್ ಆಪ್ಲೆ ಮೊಚೆ ಗಶ್ಟುನ್ ಚಿಕೊಲ್ ಕೆಲೊ.
ಸುಮಾರ್ ಏಕ್ ವೋರ್ ಜಾತಾನ್ ತೊ ಚಿಕೊನ್ ಸುಕ್ಲೊ ಆನಿ ಮಾತಿ ಕದ್ವೊಳೊನ್ ಸಾರ್ಕೆಂ ದಿಸ್ತಾಲೆಂ ದೆಕುನ್ ಸಾಮ್ವೆಲಿನ್ ಪರತ್ ಧೆಂಕ್ಣೆ ಘಾಲೆ.
"ಕಾಲ್ ಆಫಿಸ್ ಕೊಣೆ ನಿತಳ್ ಕೆಲ್ಲೆಂ?"
ಬಾಂಗ್ಲಾದೇಶಿ ಚೆಡೊ ಮಿಸ್ತೆರ್ ಸಮ್ಜಾನಾಸ್ತಾಂ ಮುಕಾರ್ ಆಯ್ಲೊ ’ಅಪ್ಣಾನ್’ ಮ್ಹಳ್ಳ್ಯಾ ಅರ್ಥಾನ್.
"ತುವೆಂ ನಿತಳ್ ಕೆಲ್ಲೆಂಯ್?"
ತಾಣೆಂ ವ್ಹಯ್ ಮ್ಹಳ್ಳ್ಯಾ ಅರ್ಥಾರ್ ತಕ್ಲಿ ಹಾಲಯ್ಲಿ.
"ಹಾಂಗಾ ಪಳೆ ಸಕಯ್ಲ್... ಚಿಕೊಲ್ ತಸೊಚ್ಚ್ ಆಸಾ. ಖಂಚ್ಯಾ ಕರ್ಮಾಕ್ ತುಮಿ ಕಾಮ್ ಕರ್ನ್ ಆಸಾತ್? ತುಮ್ಕಾಂ ಕಿತೆಂ ಫುಂಕ್ಯಾಕ್ ಸಾಂಬಾಳ್ ಮೆಳ್ತಾ? ತುಮ್ಕಾಂ ಮರ್ಯಾದೆನ್ ಕಾಮ್ ಕರುಂಕ್ ತಾಂಕ್ತಾ ತರ್ ಕಾಮ್ ಕರಾ. ನಾವೇ ತುಮ್ಕಾಂಯ್ ಕೋಂಟ್ರಾಕ್ಟಿಂಗ್ ಕಾಮಾಕ್ ವಚ್ಯೆತ್"
ಬಾವ್ಡೊ ಬಾಂಗ್ಲಾದೇಶಿ ಕುಜ್ನಾ ಥಾವ್ನ್ ವಸ್ತುರ್ ಘೆವ್ನ್ ಆಯ್ಲೊ ಆನಿ ಬಾಗ್ವೊನ್ ಧರ್ನಿಚೆರ್ ಆಸ್ಚ್ಯಾ ಚಿಕೊಲಾಕ್ ಪುಸಿಲಾಗ್ಲೊ.
**********
ಎದೊಳ್ ಪರ್ಯಾಂತ್ ಸಾಮ್ವೆಲಿನ್ ಅಶೆಂ ರಾಗಾನ್ ಧೆಂಕ್ಣೊ ಘಾಲ್ಚೊ ಕೊಣೆಂಚ್ ಆಯ್ಕೊಂಕ್ ನಾ ದೆಕುನ್ ಕಾಂಯ್ ಸಾಮ್ವೆಲಿಕ್ ಬ್ಲಡ್ ಪ್ರೆಶ್ಶರ್ ಪುಣಿ ಸುರು ಜಾಲಾಂಗಾಯ್ ಮ್ಹಳ್ಳೊ ದುಭಾವ್ ಹೆರಾಂಕ್ ಧೊಸ್ಲೊ. ಪುಣ್ ಸಾಂಗೊಂಕ್ ತಾಂಕಾಂ ಕಸ್ಲಿಗೀ ಕಾವ್ಜೆಣಿ. ತ್ಯಾ ಶಿವಾಯ್ ಸಾಮ್ವೆಲ್ ಆಫಿಸಾಚೊ ಮೆನೆಜರ್ ಆನಿ ಆರ್ಭ್ಯಾಚಿ ಖಾಸ್ ಮನಿಸ್ ಮ್ಹಣ್ತಾನಾ ಹೆರಾಂಕ್ ವೊಗೆಚ್ಚ್ ರಾವೊನ್ ಸೊಸ್ಲ್ಲೆಶಿವಾಯ್ ಹೆರ್ ನಿರ್ವೋಗ್ ನಾತ್ಲೊ. ಅರ್ಭಿ ಸಯ್ತ್ ದಿಸಾಚಿಂ ಥೊಡಿಂ ವೊರಾಂ ಮಾತ್ರ್ ಆಫಿಸಾಂತ್ ಆಸ್ತಾ ದೆಕುನ್ ದಿಸಾಚೆಂ ಚಡ್ತಾವ್ ವೊರಾಂ ಬೋಸ್ ಜಾವ್ನ್ ಆಸ್ತಾ ಸಾಮ್ವೆಲಿಚ್.
ದೀಸ್ ಗೆಲ್ಲೆಪರಿಂ ಸಾಮ್ವೆಲಿ ಹ್ಯಾ ದೊಗಾಂ ಚೆಡ್ಯಾಂಚ್ಯಾ ಪಾಟಿಕ್ ಲಾಗ್ಲೊಚ್. ಕೆದ್ನಾಂ ಉದ್ಕಾಚೊ ಗ್ಲಾಸ್ ನಿತಳ್ ಕರುಂಕ್ ನಾ, ಆನಿ ಕೆದ್ನಾಂ ಆಫಿಸ್ ಸಾರ್ಕೆಂ ನಿತಳ್ ಕರುಂಕ್ ನಾ. ಕೆದ್ನಾಂ ಖಾಕುಸಾಂತ್ ಉದಾಕ್ ಬೆಶ್ಟೆಂಚ್ ಪಾಡ್ ಜಾತಾ. ಆನಿ ಕೆದ್ನಾಂ ಹೆರ್ ನಿಬಾಂ ಸೊಧುನ್ ಬಾವ್ಡ್ಯಾ ಚೆಡ್ಯಾಂಚೆಂ ಸಮಧಾನ್ ವಿಭಾಡಿಶೆಂ ಕರಿಲಾಗ್ಲೊ.
ಪುಣ್ ಹೆಂ ಕೆಲ್ಲೆ ಶಿವಾಯ್ ಹೆರ್ ನಿರ್ವೋಗ್ ನಾತ್ಲ್ಲೊ ಸಾಮ್ವೆಲಿಕ್. ಕಾಂಯ್ ಹೆರ್ ಕಂಪ್ಣೆಂನಿ ಏಕ್ ವಿಜಾ ಕಾಡಂವ್ಚಿ ಶ್ಯಾಥಿ ಸಾಮ್ವೆಲಿಕ್ ನಾತ್ಲ್ಲಿ. ದುಸ್ರೆಂ ಖಾಸ್ಗಿ ವಿಜಾ ಕಾಡುಂಕ್ ತಿತ್ಲೊ ಸಾಂಬಾಳ್ ಸಯ್ತ್ ಸಾಮ್ವೆಲಿಕ್ ನಾತ್ಲ್ಲೊ. ಅರ್ಭ್ಯಾನ್ ನವಿ ವಿಜಾ ಕಾಡುಂಕ್ ತ್ರಾಸ್ ಆಸಾತ್; ಕಾಮ್ ಮೆಳಾನಾ ಮ್ಹಳ್ಳೆಂ ದೆಕುನ್ ತಾಕಾ ಆತಾಂ ಎಕ್ಚ್ ವಾಟ್ ದಿಸ್ತಾಲಿ - ಕಶೆಂ ತರ್ಯೀ ಕರ್ನ್ ಹ್ಯಾ ದೊಗಾಂ ಚೆಡ್ಯಾಂ ಪಯ್ಕಿಂತ್ ಎಕ್ಲ್ಯಾಕ್ ತರೀ ಧಾಂವ್ಡಾಯ್ಲೊ ತರ್ ತಾಚ್ಯಾ ಜಾಗ್ಯಾಕ್ ಬಾಲ್ತುಕ್ ಹಾಡ್ಚಿ ಆಲೋಚನ್ ಸಾಮ್ವೆಲಿಚಿ.
ಧಾಂವೊಂಕ್ ಆಯ್ಕಾನಾಂತ್ ತರ್ ಎಕ್ಲ್ಯಾಕ್ ಕಾಡ್ನ್ ಕೋಂಟ್ರಾಕ್ಟಿಂಗ್ ಕಾಮಾಕ್ ಲಾಂವ್ಚೆಂ ಮ್ಹಣ್ ಸಾಮ್ವೆಲ್ ಚಿಂತಿಲಾಗ್ಲೊ.
ದೊಗಾಂ ಮಧೆಂ ಕಾಂಯ್ ಝಗ್ಡೆಂ ಸುರು ಜಾಲ್ಲೆಂ ತರ್ ಬರೆಂ ಆಸ್ತೆಂ. ಆಪ್ಣಾಕ್ ತಾಚೊ ತರ್ಯೀ ಫಾಯ್ದೊ ಜೊಡ್ಯೆತೊ. ಸಾಮ್ವೆಲಿ ಚಿಂತಾಲೊ ತರ್ಯೀ, ತೊ ಆವ್ಕಾಸ್ ತಾಕಾ ಲಾಭ್ಲೊಚ್ ನಾ.
**********
ಗಲ್ಫಾಕ್ ಯೆಂವ್ಚ್ಯಾಧಿಂ ವ್ಹಡ್ ವ್ಹಡ್ ಸ್ವಪ್ಣಾಂ ಮತಿಂತ್ ದವ್ರುನ್ ಆಸ್ಚ್ಯಾಂಕ್ ಗಲ್ಫಾಕ್ ಯೆತೆಚ್ಚ್ ಪರಿಗತ್ ಬದ್ಲತಾನಾ, ಹಾತಾಂತ್ ಚ್ಯಾರ್ ಕಾಸ್ ಜಾತಾನಾ ಸವಯೊ, ಹವ್ಯಾಸ್ ಬದಲ್ಚೆಂ ಕಾಂಯ್ ನವೆಂ ನ್ಹಯ್. ಕೊಣ್ ಗಾಡಿ ಘೆತಾ ಕೊಣ್ ಸೂಟ್ ಘೆತಾ ಆನಿ ಕೊಣ್ ಆನಿ ಕಿತೆಂ. ಕೊಣ್ ತಕ್ಲಿ ತಾಸ್ತಾ ಆನಿ ಕೊಣ್ ಮಿಶ್ಯೊ ತಾಸ್ತಾ ಆನಿ ಕೊಣ್ ನಕ್ಲಿ ಕೇಸ್ ನೆಸ್ತಾ.
ಕೊಣ್ ವಾಯ್ಟ್ ಚಾಲಿಚೆರ್ ವಚೊನ್ ದುಡು ಕಮಾಯ್ತಾ. ಕೊಣ್ ಕೊಣಾಕ್ ತೊಪಿ ದೀವ್ನ್ ವ್ಹಡ್ ಜಾತಾ. ಕೊಣ್ ಪೆಲ್ಯಾಂಕ್ ಲುಟ್ತಾ ತರ್ ಕೊಣ್ ಅಪ್ಲ್ಯಾಂಕ್ಚ್ ಲುಟುನ್ ವಯ್ರ್ ಯೆತಾ. ಮನಿಸ್ ಜೊ ಅಪ್ಲ್ಯಾ ಸುಖಾ ಖಾತಿರ್, ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಸರ್ವ್ ರಿತಿಚೆಂ ವಾಯ್ಟ್ ಕರ್ತಾ ಆನಿ ಸಮಧಾನ್/ಸಂತೊಸ್ ಸೊಧುನ್ ದಿವ್ಳಾಂ/ಇಗರ್ಜ್ಯಾಂನಿ, ಸೊಧುಂಕ್ ವೆತಾ.
ಸಾಮ್ವೆಲಿ ಸಯ್ತ್ ಅಪ್ಲೇಸ್ತಕಿಂ ಚಿಂತಿಲಾಗ್ಲೊ.
ದುಸ್ರಿ ವಾಟ್ ಸಾಮ್ವೆಲಿಕ್ ದಿಸ್ಲಿನಾ.
ಎಕಾ ದಿಸಾ ಬಾಂಗ್ಲಾದೇಶಾಚೊ ಚೆಡೊ ಆಯ್ಲೊ ಅನಿ ಮ್ಹಣಾಲೊ "ಮೆನೆಜರ್ ಸಾಯ್ಭಾ, ತುಕಾ ಕಳಿತ್ ಆಸಾ, ಮ್ಹಾಕಾ ಮೆಳ್ಚೊ ಮಯ್ನ್ಯಾಚೊ ಸಾಂಬಾಳ್ ಹಾಂವ್ ಉರವ್ನ್ ಗಾಂವಾಕ್ ಧಾಡ್ತಾಂ. ಪುಣ್ ಆತಾಂ ಗಾಂವಾಂತ್ ಗರ್ಜ್ ಚಡ್ಲ್ಯಾ ದೆಕುನ್ ಮ್ಹಾಕಾ ಎಕಾ ಮಯ್ನ್ಯಾಚೊ ಸಾಂಬಾಳ್ ಎಡ್ವಾನ್ಸ್ ಮೆಳ್ಳೊ ತರ್ ಭೋವ್ ಉಪ್ಕಾರ್ ಜಾಯ್ತ್"
ಪುಣ್ ಸಾಮ್ವೆಲಿಚ್ಯಾ ತೊಂಡಾರ್ ಜಾಪ್ ತಯಾರ್ ಆಸ್ಲಿ;
"ತುಕಾ ಕಳಿತ್ ಆಸ್ಚೆಂನಾ ಕಂಪೆನಿ ಕಿತ್ಲ್ಯಾ ಕಶ್ಟಾಂನಿ ಚಲೊನ್ ಆಸಾ ಮ್ಹಳ್ಳೆಂ. ಎಡ್ವಾನ್ಸ್ ಸೊಡ್.. ಸಾರ್ಕೆಂ ಕಾಮ್ ಜಾಯ್ನಾತ್ಲ್ಯಾರ್ ಮಯ್ನ್ಯಾಚೊ ಸಾಂಬಾಳ್ ಸಯ್ತ್ ಮೆಳೊಂಕ್ ಕಶ್ಟ್ ಆಸ್ತೆಲೆ"
ಬಾವ್ಡೊ ಬಾಂಗ್ಲಾದೇಶಿ ವೊಗೆಚ್ಚ್ ರಾವೊನ್ ಗೆಲೊ.
ಎಕಾ ಸಾಂಜೆರ್ ಸಾಮ್ವೆಲಿನ್ ಪಿಲಿಪ್ಪಿನೊ ಚೆಡ್ಯಾಕ್ ಆಪವ್ನ್ ಅಶೆಂ ಸಾಂಗ್ಲೆಂ;
"ಅಳೆ, ಆಮ್ಚ್ಯಾ ಕಂಪೆನಿಂತ್ ಕಾಮ್ ಕರ್ತೆಲಿಂ ಚಡ್ಲ್ಯಾಂತ್ ತರ್ಯೀ, ಕಾಮ್ ಚಡೊಂಕ್ ನಾ. ಮಾರ್ಗಾಯ್ ಚಡೊನ್ ಆಸಾ, ಪುಟ್ ಉತ್ಪತ್ ಚಡೊಂಕ್ ನಾ. ವಸ್ತುಂಚಿಂ ಮೊಲಾಂ ಚಡ್ಲ್ಯಾಂತ್ ಪುಣ್ ಸಾಂಬಾಳ್ ಚಡ್ಚೆಪರಿಂ ನಾ. ಆತಾಂ ಎಕ್ಚ್ ಉಪಾಯ್ ಉರ್ಲಾ, ಕಾಮಾಚ್ಯಾಂಕ್ ಉಣೆಂ ಕರ್ಚೊ. ತೇಗ್ ಆಸ್ಚೆಕಡೆ ದೊಗಾಂ, ದೊಗಾಂ ಆಸ್ಚೆಕಡೆ ಎಕ್ಲೊ. ಆನಿ ಎಕೆಕ್ಲೆ ಆಸ್ಲ್ಯಾಂನಿ ಹೆರಾಂಚಿಂ ಕಾಮಾಂ ಕರುಂಕ್ ಪಡ್ತೆಲೆಂ. ತುಂ ಸಮ್ಜತಾಯ್ಮೂ ಹಾಂವ್ ಕಿತೆಂ ಸಾಂಗೊಂಕ್ ಆಶೆತಾಂ ಮ್ಹಣ್?"
ಸಾಮ್ವೆಲಿಚಿಂ ಉತ್ರಾಂ ಆಯ್ಕೊನ್ ಚೆಡೊ ಭೋವ್ ನಿರಾಸ್ಲೊ. ಭೋವ್ಶಾ ಹಾಂತುಂ ಪುಣಿ ದೊಗಾಂಂತ್ಲೊ ಎಕ್ಲೊ ಕಾಮ್ ಸೊಡ್ನ್ ಧಾಂವ್ತಲೊ ಮ್ಹಳ್ಳೊ ಭರ್ವಸೊ ಸಾಂವೆಲಿಚೊ ಜಾವ್ನಾಸ್ಲೊ. ಥೊಡ್ಯಾ ವೆಳಾ ಉಪ್ರಾಂತ್ ದೊಗಾಂಯ್ ಚೆಡ್ಯಾಂಚ್ಯಾ ತೊಂಡಾರ್ ನಿರಾಸ್ ಪಾರ್ಕಿಲ್ಲ್ಯಾ ಸಾಮ್ವೆಲಿಕ್ ಕಳೊನ್ ಆಯ್ಲೆಂ - ನಿಶಾನಿ ಸಾರ್ಕ್ಯಾ ಜಾಗ್ಯಾರ್ ಆಸಾ ಮ್ಹಣ್.
**********
ಹೆಂ ಘಡಿತ್ ಜಾವ್ನ್ ಥೊಡೆ ದೀಸ್ ಉಭ್ಲೆ. ಎಕಾ ದಿಸಾ ಅಚಾನಕ್ ಬಾಂಗ್ಲಾದೇಶಚೊ ಚೆಡೊ ಕಾಮಾಕ್ ಆಯ್ಲೊನಾ. ಕಾಂಯ್ ಕಾಮ್ ಸೊಡ್ನ್ ಧಾಂವ್ತಾಸ್ತಲೊ - ಪುಣ್ ತಾಚೊ ಪಾಸ್ಪೋರ್ಟ್ ಕಂಪೆನಿಂತ್ ಆಸ್ಲೆನಿಮ್ತಿಂ ಸಾಂಗಾನಾಯೆ ಧಾಂವೊಂಕ್ ಸಾಧ್ಯ್ ನಾ. ದೆಕುನ್ ಭಿತರ್ಲೆ ಭಿತರ್ ಸಾಮ್ವೆಲಿಕ್ ಇಲ್ಲೊಸೊ ಭರ್ವಸೊ ದಿಸೊನ್ ಆಯ್ಲೊ. ಬಾತ್ತುಚಿ ವಿಜಾ ಕಾಡ್ಚಿ ಆಲೋಚನ್ ಮತಿಂತ್ಚ್ ಕರಿಲಾಗ್ಲೊ. ಕಸೊಯ್ ಅಪುಣ್ ಇತ್ಲೊ ತೇಂಪ್ ಸಯ್ರಣಾನ್ ರಾಕ್ಲೊಂ. ದೆಕುನ್ ಆಯಿನ್ನ್ ಘಡ್ಯೆ ತೊ ಕಾಮ್ ಸೊಡ್ತಾ ವ್ಹಯ್ ತರ್ ತೆಚ್ಚ್ ಘಡ್ಯೆ ಅರ್ಭ್ಯಾಲಾಗಿಂ ವಿನತಿ ಕರ್ಚಿ - ಅಪ್ಣಾಚೊ ಎಕ್ಲೊ ಭುರ್ಗೊ ಆಸಾ, ಜೊ ಹ್ಯಾ ಕಾಮಾಕ್ ಜೊಕ್ತೊ ಆನಿ ಕಶೆಂ ಪುಣಿಂ ತಾಕಾ ವಿಜಾ ಕಾಡ್ಚಿ ಮ್ಹಳ್ಳಿ ಆಲೋಚನ್ ತೊ ಕರ್ನ್ ಆಸ್ಲೊ.
ಪುಣ್ ಕಿತೆಂಚ್ ಜಾಂವ್ಕ್ ನಾತ್ಲ್ಲೆಪರಿಂ ಕರಿಲಾಗ್ಲೊ ಸಾಮ್ವೆಲ್. ಸಾಂಜೆಶೆಂ ತಾಣೆಂ ಬಾತ್ತುಚ್ಯಾ ನಾಂವಾರ್ ನಕ್ಲಿ ಬಯೋಡಾಟ ತಯಾರ್ ಕೆಲೊ. ಪಾಸ್ಪೋರ್ಟ್ ಕಾಪಿ ಆನಿ ಫೋಟೊ ಚಿಡ್ಕಾವ್ನ್ ಸಕ್ಕಡ್ ತಯಾರ್ ಕರುನ್ ದುಸ್ರೆ ದಿಸಾಕ್ ರಾಕೊನ್ ಬೊಸ್ಲೊ.
ದುಸ್ರೆ ದಿಸಾ ಸಾಮ್ವೆಲ್ ವಿಶೇಸ್ ಹುಮೆದಿನ್ ಆಫಿಸಾಕ್ ವೆಗ್ಗಿಂಚ್ ಆಯ್ಲೊ. ಆಜ್ ಬಾಂಗ್ಲಾಚೊ ಚೆಡೊ ಕಾಮಾಕ್ ಆಯಿಲ್ಲೊ ಪುಣ್ ಪಿಲಿಪ್ಪಿನೊ ಚೆಡೊ ನಾತ್ಲ್ಲೊ.
ಸಾಮ್ವೆಲಿಕ್ ಕರ್ಕರೆ ಜಾಲೆ. ತಾಚೆಂ ಲೇಖ್ ಚುಕ್ಲ್ಲೆಂ ದೆಕುನ್ ನಿರಾಸ್ ಜಾವ್ನ್ ಬಾಂಗ್ಲಾದೇಶಾಚ್ಯಾ ಚೆಡ್ಯಾಕ್ ಆಪವ್ನ್ ಧೆಂಕ್ಣೊ ಘಾಲೊ "ತುಮ್ಕಾಂ ಸಾರ್ಕೆಂ ಕಾಮ್ ಕರುಂಕ್ ಜಾಯ್ನಾ? ಕಾಲ್ ಕಿತ್ಯಾಕ್ ತುಂ ಕಾಮಾಕ್ ಯೇಂವ್ಕ್ ನಾಂಯ್? ತುಕಾ ಮರ್ಜಿ ಜಾತಾನಾ ಯೇಂವ್ಕ್ ಹಿ ಕಿತೆಂ ತುಜ್ಯಾ ಬಾಪಾಯ್ಚಿ ಕಂಪೆನಿಂಗಿ?"
ಚೆಡ್ಯಾಚೆಂ ತೋಂಡ್ ಬಾವ್ಲೆಂ, ಹಳೂ ಉತ್ರಾಂನಿ ಸಾಂಗಾಲಾಗ್ಲೊ;
"ಮೆನೆಜರ್ ಸಾಯ್ಬಾ, ಮ್ಹಜೊ ಗುನ್ಯಾಂವ್ ಜಾಲೊ. ಮ್ಹಜ್ಯಾ ಘರ್ಚ್ಯಾಂಕ್ ಪಯ್ಶ್ಯಾಂಚಿ ಗರ್ಜ್ ಪಡ್ಲಿ ದೆಕುನ್ ಮ್ಹಜ್ಯಾ ಎಕಾ ಇಶ್ಟಾನ್ ಮ್ಹಾಕಾ ಕಾಲ್ ಎಕಾ ಲೋನ್ ದಿಂವ್ಚ್ಯಾ ಕಂಪೆನಿಕ್ ಆಪವ್ನ್ ವೆಲ್ಲೆಂ. ಮ್ಹಾಕಾ ಚಿಂತುಂಕ್ಚ್ ಆವ್ಕಾಸ್ ಲಾಭ್ಲೊನಾ ದೆಕುನ್ ಸಾಂಗೊಂಕ್ ಜಾವ್ನಾ.. ಮ್ಹಾಕಾ ಮಾಫ್ ಕರಾ"
ಬಾಂಗ್ಲಾದೇಶಿಚಿಂ ಉತ್ರಾಂ ಆಯ್ಕೊನ್ ಸಾಮ್ವೆಲಿಚ್ಯಾ ಮತಿಂತ್ ದುಭಾವ್ ಆಯ್ಲೊ. ಹೊ ಹಡ್ಬೊ ಪೋಯ್ರ್ ಅಪ್ಣಾನ್ ಎಡ್ವಾನ್ಸ್ ಸಾಂಬಾಳ್ ದೀನಾ ಮ್ಹಳ್ಳ್ಯಾಕ್ ನಾಟಕ್ ಕರ್ತಾಸ್ತಲೊ ಮ್ಹಣ್ ಚಿಂತಿಲಾಗ್ಲೊ ಆನಿ ಮ್ಹಣಾಲೊ "ಬರೆಂ.. ಬರೆಂ.. ಆತಾಂ ಮ್ಹಜೆಂ ತೋಂಡ್ ಕಿತ್ಯಾಕ್ ಪಳೆತಾಯ್.. ವಚ್ ಆನಿ ಪರತ್ ಅಶೆಂ ಕರಿನಾಕಾ"
ಥೊಡ್ಯಾ ವೆಳಾ ಉಪ್ರಾಂತ್ ಬಾಗ್ಲಾರ್ ಪಿಲಿಪ್ಪಿನೊ ಚೆಡೊ ಉಭೊ ರಾವೊನ್ ಮ್ಹಾಕಾಚ್ಚ್ ಪಳೆತಾಲೊ. ಪಯ್ಲೆ ಪಾವ್ಟಿಂ ತೊ ಅಶೆಂ ಪಳೆತಾಲೊ ದೆಕುನ್ ಹಾವೆಂ ಜ್ಯೊರಾನ್ ಸವಾಲ್ ಕೆಲೆಂ "ಕಿತೆಂರೆ ಕಾಂಯ್ ಕಾಮ್ ನಾ ತುಕಾ? ಕಿತ್ಯಾಕ್ ಥಂಯ್ ಉಭೊ ರಾವೊನ್ ಮ್ಹಾಕಾ ಅಸೊಯ್ ಪಳೆತಾಯ್?"
ಪಿಲಿಪ್ಪಿನೊ ಚೆಡೊ ಭಿತರ್ ಆಯ್ಲೊ. ಆಪ್ಲೆ ದೊನ್ಯೀ ಹಾತ್ ಭಾಂಧುನ್ ಖಾಲ್ತೆಪಣಿಂ ಉಲಯ್ಲಾಗ್ಲೊ;
"ಸರ್, ಹಾವೆಂ ಗಾಂವಾಕ್ ವೆಚಿ ಆಲೋಚನ್ ಕೆಲ್ಯಾ"
"ತುಮ್ಕಾಂ ದುಸ್ರಿ ಕಿತೆಂಯ್ ಫಿಕಿರ್ ಆಸಾಯೆ? ಆಯ್ಲ್ಯಾರ್ ಜಾಲೆಂ, ವೆಳಾರ್ ಪಾಗ್ ಕಸೊಯ್ ಮೆಳ್ತಾ, ಕಾಮ್ ಕೆಲ್ಯಾರೀ ಚಲ್ತಾ, ನಾತ್ಲ್ಯಾರೀ ಚಲ್ತಾ.. ತುಮ್ಕಾಂ ಜವಾಭ್ದಾರಿ ಮ್ಹಳ್ಳಿ ಆಸ್ಲ್ಲಿ ತರ್ ಕಳ್ತೆಂ.. ಕಿತ್ಲೆ ದೀಸ್ ರಜೆರ್ ವೆತಾಯ್?" ಸಾಮ್ವೆಲಿನ್ ಕಡಕ್ಕ್ ತಾಳ್ಯಾನ್ ಪಾಟಿಂ ಸವಾಲ್ ಕೆಲೆಂ.
"ಸರ್.. ಹಾಂವ್ ಪಾಟಿಂ ಯೇಂವ್ಕ್ ನ್ಹಯ್.. ಹೊ ಗಾಂವ್ ಸೊಡುನ್ ವಚೊಂಕ್ ಚಿಂತುನ್ ಆಸಾಂ.."
ಅಛಾನಕ್ ಸಾಮ್ವೆಲಿಚ್ಯಾ ಮತಿಕ್ ಅವ್ಯಕ್ತ್ ಉಲ್ಲಾಸ್ ಚರ್ಲೊ. ತಕ್ಷಣ್ ತಾಚಿ ನದರ್ ಮೆಜಾಚೆರ್ ಆಸ್ಲ್ಲ್ಯಾ ಬಾತ್ತುಚ್ಯಾ ಎಪ್ಲಿಕೇಶನಾಚೆರ್ ಗೆಲಿ.
"ಸರ್.. ಮ್ಹಜ್ಯಾ ಘರಾ ಮ್ಹಜಿ ಆವಯ್ ಆನಿ ದೊಗಾಂ ಲ್ಹಾನ್ ಭಯ್ಣಿಂ ಆನಿ ಎಕ್ಲೊ ಲ್ಹಾನ್ ಭಾವ್ ಆಸಾತ್. ತಿಂ ಇಸ್ಕೊಲಾಕ್ ವೆತಾತ್ ಆನಿ ಮ್ಹಜಿ ಮಾಯ್ ಲಾಗ್ಸಿಲ್ಯಾ ಪಬ್ಬಾಂತ್ ಆಯ್ದಾನಾಂ ಧುವ್ನ್ ಕಶ್ಟಾಂನಿ ಆಮ್ಚೆಂ ಘರಾಣೆಂ ಚಲ್ತಾ. ಹಾವೆಂ ಚಿಂತ್ಲೆಂ ಹಾಂವ್ ಥೊಡೊ ತೇಂಪ್ ಗಲ್ಫಾಂತ್ ಕಾಮ್ ಕರ್ನ್ ಕಾಂಯ್ ಮಜತ್ ಕರಿನ್ ತರ್, ಮ್ಹಜ್ಯಾ ಭಾವ್-ಭಯ್ಣ್ಯಾಂಕ್ ಕಾಂಯ್ ಇಲ್ಲೆಂ ಶಿಕಾಪ್ ಮೆಳ್ತೆಲೆಂ ಮ್ಹಣ್. ಪುಣ್ ಮ್ಹಜೊ ಮಯ್ನ್ಯಾಚೊ ಸಾಂಬಾಳ್ ಗಾಂವ್ಚ್ಯಾ ಘರ್ಚ್ಯಾ ಖರ್ಚಾಕ್ಚ್ ಸಮಾ ಜಾತಾಲೊ. ಆತಾಂ ತುಮಿಂ ಸಾಂಗ್ಲಾಂ ತೆಗಾಂ ಆಸ್ಚಿಂ ದೋನ್ ಜಾಯ್ಜೆ, ದೊಗಾಂ ಆಸ್ಚಿಂ ಏಕ್ ಜಾಯ್ಜೆ ಮ್ಹಣ್. ಮ್ಹಾಕಾ ಪುಣಿಂ ವ್ಹಡ್ ನಾ. ಗಾಂವಾಕ್ ಗೆಲ್ಯಾರ್ ತ್ಯಾ ಪಬ್ಬಾಂತ್ ಕಾಮ್ ಮೆಳ್ತೆಲೆಂ. ಪುಣ್ ತ್ಯಾ ಬಾಂಗ್ಲಾದೇಶಿಕ್ ಮ್ಹಜ್ಯಾಕೀ ಚಡ್ ಕಶ್ಟ್ ಆಸಾತ್ ಸರ್. ತಾಚ್ಯಾ ಗಾಂವಾಂತ್ ಪೋಯ್ರ್ ಪಾವ್ಸಾಕ್ ತಾಂಚೆಂ ಘರ್ ಪರ್ತಾಲಾಂ ದೆಕುನ್ ತಾಚಿ ಪ್ರಾಯೆಸ್ತ್ ಆವಯ್ ಬಾಪುಯ್, ತಾಚಿ ವಿಧವ್ ಭಯ್ಣ್ ಆನಿ ತಿಚಿಂ ಭುರ್ಗಿಂ ವಾಟೆರ್ ಆಸಾತ್. ದೆಕುನ್ ಕಾಲ್ ತೊ ಕೊಣಾ ಕೊಣಾಲಾಗ್ಚೆಂ ರೀಣ್ ಮಾಗೊಂಕ್ ಗೆಲ್ಲೊ. ದೆಕುನ್ ತಾಚೆಖಾತಿರ್ ಹಾಂವ್ ಮ್ಹಜೆಂ ಕಾಮ್ ಸೊಡ್ತಾಂ ಸರ್".
ಆಯ್ಕೊನ್ ಸಾಮ್ವೆಲಿಚೆಂ ಕಾಳಿಜ್ ಎಕಾಚ್ಫರಾಂ ರಡೊಂಕ್ ಲಾಗ್ಲೆಂ. ಪಶ್ಚಾತಾಪಾನ್ ತಶೆಂಚ್ ಅಪ್ಣಾಚೆರ್ ಎಕಾ ಥರಾಚ್ಯಾ ಕಾಂಠಾಳ್ಯಾನ್. ತಾಣೆಂ ಇತ್ಲೆಂಚ್ ಮ್ಹಳೆಂ
"ತುಂ ಖಂಯ್ಚರ್ಯೀ ವಚೊನಾಂಯ್. ಜಿಲ್ಲು ಮೌಶೆಕ್ ಹಾಂವ್ ಸಮ್ಜಯ್ತಾಂ. ಪುಣ್ ತುಮಿ ದೊಗಾಯ್ನೀ ಕಾಮ್ ಸೊಡ್ಚಿ ಭಿಲ್ಕುಲ್ ಗರ್ಜ್ ನಾ"
=ಚೆಡೊ ಥಂಡ್ಗಾರ್ ಜಾವ್ನ್ ಪಾಟಿಂ ಮುಕಾರ್ ಪಳೆಂವ್ಕ್ ಲಾಗ್ಲೊ.
**********
[ಹಿ ಕಾಣಿ ’ರಾಕ್ಣೊ’ ಪತ್ರಾಚೆರ್ ಪರ್ಗಟ್ ಜಾಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
