ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲಿಸ್ಸಾಚ್ಯಾ ನಾಂವಾರ್ ಮೊಗಾ ಭಂಡಾರ್
ಕೊಂಕ್ಣಿ ಕವಯತ್ರಿ, ಗಾವ್ಪಿಣ್, ಬರವ್ಪಿ ಆನಿಂ ಕಾರ್ಯನಿರ್ವಾಹಕಿ ನಿರ್ಮಲಾ ಆನಿಂ ಮಾಯ್ಕಲ್ ಗೋವಿಯಸ್ ಹಾಂಚೆಂ ಮಾಲ್ಘಡೆಂ ಬಾಳ್ ಮೆಲಿಸ್ಸಾ, ದೆವಾಚ್ಯಾ ಆಚಾನಕ್ ಆಪವ್ಣ್ಯಾಚ್ಯಾ ಉಲ್ಯಾಕ್ ಪಾಳೊ ದೀವ್ನ್ ಆಕ್ಟೋಬರ್ ಮ್ಹಹಿನ್ಯಾಚ್ಯಾ ಚೊವ್ದಾ ತಾರಿಕೆರ್ ಮಸ್ಕತಾಂತ್ಲ್ಯಾ ಜಬಲ್ ಅಕ್ದಾರ್ ಪ್ರವಾಸ್ ವಾಟೆರ್ ಕಾರಾಚ್ಯಾ ಆವ್ಘಡಾಕ್ ಸಾಂಪ್ಡೊನ್ ಹೊ ಸಂಸಾರ್ ಸಾಂಡುನ್ ಗೆಲ್ಲಿ ದುಖಾಚಿ ಖಬರ್ ಆತಾಂ ಪರ್ನಿ ಜಾವ್ನ್ ಯೆತಾ ತೆಂ ಖರೆಂ. ಮೆಲಿಸ್ಸಾ ಆಮಾ ಲೊಕಾ ಸಾಂಗಾತಾ ನಾ ತರ್ಯ್ ತಾಚೊ ಉಡಾಸ್ ಮಾತ್ ಸಬಾರಾಂಚ್ಯಾ ಮತಿ ಪಾಲ್ಕ್ಯಾಂನಿಂ, ಕಾಳ್ಜಾಂ ಶಿರಾಂನಿಂ ಜಿವೊಚ್ಚ್ ಆಸಾ ಮ್ಹಳ್ಯಾರ್ ಕಾಂಯ್ಚ್ಚ್ ಚೂಕ್ ಜಾಂವ್ಚಿ ನಾ. ಆಮ್ಚ್ಯಾ ಮಧೆಂ ಆಸ್ಲ್ಲೆಂ ಹಾಸ್ತ್ಯಾ ತೊಂಡಾಚೆಂ ನೆಣ್ತೆಂ ಬಾಳ್ ಆತಾಂ ನಾ ಮ್ಹಣ್ತಾನಾ ಪರತ್ ಏಕ್ ಪಾವ್ಟಿಂ ಆಮಾ ಲೊಕಾಚ್ಯಾ ದೊಳ್ಯಾಂ ಖಾಂಚಿನಿಂ ದುಖಾಂ ಉದೆತಾತ್.
ಹ್ಯಾ ಸಂಸಾರಾಂತ್ಲೆಂ ಮೆಲಿಸ್ಸಾಚೆಂ ಜಿವಿತ್ ಮಟ್ವೆಂ ಮ್ಹಳ್ಯಾರ್ ಪಕತ್ತ್ ನೋವ್ ವರ್ಸಾಂಚೆಂ ತರ್ಯ್ ತಾಣೆಂ ಜೀವಂತ್ ಆಸ್ತಾನಾ ಕೆಲ್ಲ್ಯಾ ವೊರ್ನಿ ಚಡ್ ಕಾಮಾಂ ತಾಚ್ಯಾ ಮೊರ್ಣಾ ಉಪ್ರಾಂತ್ ಕೆಲಿಂ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿ ನಾ. ನಿರ್ಮಲಾ ಆನಿಂ ಮಾಯ್ಕಲಾನ್ ತಾಂಚ್ಯಾಚ್ಚ್ ಉತ್ರಾಂನಿ ಕಳಂವ್ಚ್ಯಾ ಬರಿ - "ತೆಂ ಏಕ್ ಆಂಜ್ ಜಾವ್ನ್ ಆಮ್ಚ್ಯಾ ಜಿವಿತಾಂತ್ ಆಮ್ಕಾಂ ಆಧಾರ್ ದೀವ್ನ್ ಆಸಾ." ನಿರ್ಮಲಾ ಆನಿಂ ಮಾಯ್ಕಲಾಕ್ ಲಾಗ್ಸಿಲ್ಯಾನ್ ವಳ್ಕಾಲ್ಲ್ಯಾನಿಂಯ್ ಹಿಂ ಉತ್ರಾಂ ಖರಿಂ ಮ್ಹಣ್ ಮಾಂದುನ್ ಘೆತ್ಲ್ಯಾಂತ್.
ಮೆಲಿಸ್ಸಾಚ್ಯಾ ಆಚಾನಕ್ ಮರ್ಣಾ ಉಪ್ರಾಂತ್ ಕೊಂಕ್ಣಿ ಸಾಹಿತ್ಯ್ ಆನಿಂ ಸಂಗೀತ್ ಶೆತಾಂನಿಂ ಏಕಾ ರೀತಿಚೆಂ ಉಮಾಳ್ಯಾಂಚೆಂ ವಾದಾಳ್ ಉಟ್ಲೆಂ ತೆಂ ಖರೆಂ. ಸಾಹಿತ್ಯ್ ಯಾ ಸಂಗೀತ್ ಜಾಯ್ತೆ ಪಾವ್ಟಿಂ ಅಪಾಪಿಂಚ್ಚ್ ಉದೆನಾ ಬಗಾರ್ ತಾಕಾ ಜಾಯ್ ತೆಂ ಪ್ರೇರಣ್ ಜಾಯ್ಜಯ್. ಮಸ್ಕತಾಂತ್ ಉದೆವ್ನ್ ಯೆಂವ್ಚಿ ತಾಲೆತ್ವಂತ್ ನಾಟಕಿಸ್ತಿಣ್ ಆನಿಂ ಕಾರ್ಯನಿರ್ವಾಹಕಿ ಬಾಯ್ ಶಾಲೆಟ್ ನೊರೊನ್ಹಾನ್ ಮೆಲಿಸ್ಸಾಚ್ಯಾ ಮ್ಹಹಿನ್ಯಾಚ್ಯಾ ಮೀಸಾ ಉಪ್ರಾಂತ್ಲೆಂ ಕಾರ್ಯೆಂ ಚಲವ್ನ್ ವರ್ತಾನಾ ಉಚಾರ್ಲ್ಲ್ಯಾ ಉತ್ರಾಂಕ್ ಉಡಾಸಾಂತ್ ಹಾಡ್ಲ್ಯಾರ್ - "ಸಂಗೀತ್ ಆನಿಂ ಸಾಹಿತ್ಯ್ ಬಂಜರ್ ಗಾವಾಂತ್ ಉದೆನಾ ಬಗಾರ್ ಪಾಚ್ವ್ಯಾ ಚರೊವಾಚೆರ್ ಮೆಳ್ಲ್ಲ್ಯಾ ಉಮಾಳ್ಯಾಂಚ್ಯಾ ಪ್ರೇರಣಾ ವರ್ವಿಂ ಉದೆತಾ. ದುಖಾಚ್ಯಾ ವೇಳಾರ್ ಥೊಡ್ಯಾ ಪಾವ್ಟಿಂ ಉದೆಲ್ಲೆಂ ಸಂಗೀತ್ ಮ್ಹಜೆಚ್ಯಾ ಕಾಳಾರ್ ಬಿಲ್ಕುಲ್ ಉದೆನಾ." ಬಾಯ್ ಶಾಲೆಟಾಚ್ಯಾ ಉತ್ರಾಂನಿಂ ಖರೋಕರ್ ಸತ್ ಆಸಾ ಆನಿಂ ತಿಂ ಉತ್ರಾಂ ಕಾಳ್ಜಾಕ್ ತೊಪ್ಚಿಂ ತಸಲಿಂಚ್ಚ್. ಪಾಚ್ವೊ ಚರವ್ ದುಖಾಚೊ ಜಾಂವ್ ಯಾ ಮೆರ್ವಾ ನಾಚಾಚೊ ಖುಶೆಚೊ; ಪ್ರೇರಣ್ ಖಂಡಿತ್ ಜಾವ್ನ್ ಜಾಯ್ ಆನಿಂ ಬಳಾಧಿಕ್ ಜಾವ್ನಾಸಾಜಯ್ಚ್ಚ್ ತೆಂ ಖರೆಂ. ಮರಣ್ ಪಾವ್ಲ್ಲೆಂ ಮೆಲಿಸ್ಸಾ ಜಾಯ್ತ್ಯಾಂಕ್ ದುಖಾಚೆಂ ತರ್ಯ್ ಉಮಾಳ್ಯಾಂಚೆಂ ಪ್ರೇರಣ್ ದೀಂವ್ಕ್ ಲಾಗ್ಲೆಂ. ಹ್ಯಾ ವೊರ್ವಿಂ ಮಸ್ಕತಾಂತ್ ಮಾತ್ ನಂಯ್ ಸಾತ್ ದರ್ಯಾಂ ಪಯ್ಸ್ ಆಸ್ಚೊ ಜೆರಿ ಡಿ’ಮೆಲ್ಲೊಚ್ಯಾ ಕಾಳ್ಜಾ ಗೊಪಾಂತ್ ಸಯ್ತ್ ಭುಂಯ್ಕಾಂಪ್ ಜಾಲಿ ಆನಿಂ ತಾಚ್ಯಾ ಥಾವ್ನ್೦ಯ್ ಕವನಾಂಚಿ ಧಾರ್ ವ್ಹಾಳೊಂಕ್ ಲಾಗ್ಲಿ. ಉಮಾಳ್ಯಾಂಚ್ಯಾ ಉಜ್ಯಾಚೆಂ ಜೆರಿಚೆಂ ಕವನ್ ಜಾಯ್ತ್ಯಾಂಚೆಂ ಮನ್ ಕಡಂವ್ಕ್ ಲಾಗ್ಲೆಂ.
[ಜೆರಿ ಡಿ’ಮೆಲ್ಲೊ, ನಿರ್ಮಲಾ ಗೋವಿಯಸ್, ಕ್ಲೆರೆನ್ಸ್ ಕೈಕಂಬ ಆನಿ ಶಾಲೆಟ್ ನೊರೊನ್ಹಾ]
ಮಸ್ಕತಾಂತ್ ಆಸ್ಚೊ ಫಾಮಾದ್ ಸಂಗೀತ್ಗಾರ್ ಆಪೊಲಿನಾರಿಸ್ ಸೋಜ್ "ಮೆಲಿಸ್ಸಾ ಆಮ್ಕಾಂ ಕೋಣ್ ಆಸಾ?" ಮ್ಹಳ್ಳೆಂ ಕವನ್ ರಚುನ್, ತಾಕಾ ಸಂಗೀತಾಚಿ ಭಾಂಗ್ರಾಳಿ ವೋಪ್ ಕಾಡುಂಕ್ ಸಕ್ಲೊ. ಹೆಂ ಮನ್ ಕಡಂವ್ಚೆಂ ರಂಗೀನ್ ಗೀತ್ ಮೆಲಿಸ್ಸಾಕ್ ಮಾತಿಯೆಕ್ ಪಾವಂವ್ಚ್ಯಾ ದೀಸ್ ಗಾಲಾ ಸ್ಪಿರಿತ್ ಸಾಂತಾಚ್ಯಾ ಇಗರ್ಜೆಂತ್ ಮೀಸಾಚ್ಯಾ ಪವಿತ್ರ್ ಬಲಿದಾನಾ ಉಪ್ರಾಂತ್ ಅಪೊಲಿನಾರಿಸ್ ಆನಿಂ ತಾಚೊ ಭಾವ್ ಕೊಂಕ್ಣಿ ಸಂಗೀತಾಚೊ ರಾಯ್ ಕುಂವರ್ ಓಜ್ವಲ್ಡ್ ಸೋಜಾನ್ ಗಾಯನ್ ಕರ್ತಾನಾ ಭರೊನ್ ಆಸ್ಲ್ಲೊ ಲೋಕ್ ರಡ್ಲೊ. ಉತ್ರಾಂಚ್ಯಾ ಉಮಾಳ್ಯಾಂನಿಂ ಕಿತ್ಲೊ ಖತ್ಕತೊ ಉಜೊ ಭರುನ್ ದವರಿಯೆತ್ ಮ್ಹಣ್ ತ್ಯಾ ದೀಸ್ ಮ್ಹಾಕಾ ಕಳಿತ್ ಜಾಲೆಂ.
[ಅಪೊಲಿನಾರಿಸ್ ಡಿ’ಸೋಜ್, ಒಸ್ವಾಲ್ಡ್ ಡಿ’ಸೋಜ್, ದಿಲೀಪ್ ಕೊರೆಯಾ, ಗ್ಲೆನ್ ಕೊರೆಯಾ, ವಿಕ್ಟೋರಿಯಾ ಸುವಾರಿಸ್ ಆನಿ ಮೊನಿಕಾ ದಾಂತಿಸ್]
"ಮೆಲಿಸ್ಸಾಚೆಂ ಮರಣ್ ಆಮಾಂ ಲೊಕಾ ಮಧೆಂ ಉಜೊ ಆನಿಂ ಉಮಾಳೊ ಹಾಡುನ್ ಆಯ್ಲೆಂ ಆನಿಂ ತ್ಯಾಚ್ಚ್ ವೊರ್ವಿಂ ಸಂಗೀತಾಚೊ ಉಜ್ಯಾ ವಾಳೊ ಉದೆಲೊ..." ಪರತ್ ಮ್ಹಣಾಲಿ ಬಾಯ್ ಶಾಲೆಟ್ ನೊರೊನ್ಹಾ, ಮೆಲಿಸ್ಸಾಚ್ಯಾ ಮ್ಹಹಿನ್ಯಾಚ್ಯಾ ಮೀಸಾ ಉಪ್ರಾಂತ್ಲೆಂ ಕಾರ್ಯೆಂ ಚಲವ್ನ್ ವರ್ತಾನಾ. ಖರೆಂಚ್ಚ್ ಸಾಂಗ್ಚೆಂ ತರ್ ಮೆಲಿಸ್ಸಾಚ್ಯಾ ಮರ್ಣಾ ಉಪ್ರಾಂತ್ಲ್ಯಾ ಸಾಹಿತಿಕ್ ಉಜ್ಯಾಕ್ ಆನಿಂ ಭಗ್ಣಾಂಚ್ಯಾ ಉಮಾಳ್ಯಾಂಕ್ ಏಕಾ ಮೊಗಾ ಭಂಡಾರಾಂತ್ ಯೆಂಕ್ಟಾಂಯ್ ಕರುನ್ ಮೊಗಾಚ್ಯಾಂಕ್ ಆರ್ಪುಂಚ್ಯಾಕ್ ಆಲೋಚನ್ ಉದೆಲ್ಲಿ ಆಸಿಚ್ಚ್ ಜಾವ್ಯೆತ್. ಜಾಯ್ತ್ಯಾ ಆನಿಂ ಜಾಯ್ತ್ಯಾಂಚ್ಯಾ ಕಟಿಣ್ ಮ್ಹಿನತೆನ್ ತಯಾರ್ ಕೆಲ್ಲಿ ಡಿವಿಡಿ ಜಾವ್ನಾಸಾ "ಮೆಲಿಸ್ಸಾ : ಆಂಜಾಕ್ ಏಕ್ ಉಡಾಸಾ ಕಾಣಿಕ್ "(ಮೆಲಿಸ್ಸಾ : ಟ್ರಿಬ್ಯೂಟ್ ಟು ಎನ್ ಎಂಜಲ್). ಹಿ ಡಿವಿಡಿ ಮೆಲಿಸ್ಸಾಚ್ಯಾ ಉಡಾಸಾಕ್ ತಾಚ್ಯಾ ಮೊಗಾಚ್ಯಾ ಮನ್ಶಾಂಚ್ಯಾ ಮತಿನಿಂ ಅಮರ್ ಕರ್ಚ್ಯಾ ಏಕಾಚ್ಚ್ ಉದ್ದೇಶಾನ್ ಆಸಾ ಕೆಲ್ಲಿ ಜಾವ್ನಾಸಾ.
ಮೆಲಿಸ್ಸಾಚ್ಯಾ ಉಡಾಸಾಕ್ ಅಮರ್ ಕರ್ಚಿ ಹಿ ಡಿವಿಡಿ ಯಾ ಮೆಲಿಸ್ಸಾಕ್ ದಿಲ್ಲೆಂ ಮೊಗಾ ಭಂಡಾರ್ "ಮೆಲಿಸ್ಸಾ : ಆಂಜಾಕ್ ಏಕ್ ಉಡಾಸಾ ಕಾಣಿಕ್ "(ಮೆಲಿಸ್ಸಾ : ಟ್ರಿಬ್ಯೂಟ್ ಟು ಎನ್ ಎಂಜಲ್) ಆಯ್ಲೆವಾರ್ ಮಸ್ಕತಾಂತ್ ಉಗ್ತಾಡಾಕ್ ಆಯ್ಲೆಂ ಆನಿಂ ಸಬಾರಾಂಚ್ಯಾ ಶಾಭಾಸ್ಕೆಕ್ ಪಾತ್ರ್ ಜಾಲೆಂ.
ಮಾಯ್ಕಲ್ ಆನಿಂ ನಿರ್ಮಲಾ ಆನಿಂ ಮೆಲಿಸ್ಸಾಚಿ ಭಯ್ಣ್ ಮೆಲಿನಾನ್ ಸಂಪಾದನ್ ಕೆಲ್ಲ್ಯಾ ಹ್ಯಾ ಮೊಗಾ ಭಂಡಾರಾಂತ್ ಮೆಲಿಸ್ಸಾ ಖಾತಿರ್ ಮ್ಹಣ್ ರಚ್ಲ್ಲಿಂ ಕವನಾಂ ಆನಿಂ ಗೀತಾಂ ಆಸಾತ್. ನಿರ್ಮಲಾ ಆನಿಂ ಮಾಯ್ಕಲಾನ್ ಉಚಾರ್ಲ್ಲೆಂ ಕಾಳ್ಜಾ ಗೊಪಾಂತ್ಲ್ಯಾ ಭಗ್ಣಾಂಚೆಂ ವಾದಾಳ್ ಆಸಾ. ಉಂಚಾಯೆನ್ ಉಲ್ಲೇಕ್ ಕರ್ಚೆಂ ತರ್ ಆಪೊಲಿನಾರಿಸ್ ಆನಿಂ ಓಜ್ವಲ್ಡ್ ಸೋಜಾನ್ ಗಾಯ್ಲೆಲೆಂ " ಮೆಲಿಸ್ಸಾ ಆಮ್ಕಾಂ ಕೋಣ್ ಆಸಾ?", ವಿಕ್ಟೊರಿಯಾ ಸುವಾರಿಸ್ ಹಿಣೆಂ ಗಾಯ್ಲೆಲೆಂ - "ಅಮರ್ ಜಾಲೆಂಯ್ ಮೆಲಿಸ್ಸಾ" (ರಚನ್ ಆನಿಂ ಸಂಗೀತ್ : ಅಪೊಲಿನಾರಿಸ್ ಸೋಜ್), ನಿರ್ಮಲಾ ಗೋವಿಯಸ್ ಹಿಣೆಂ ರಚ್ಲೆಲೆಂ ಆನಿಂ ತಿಣೆಂಚ್ಚ್ ಗಾಯ್ಲೆಲೆಂ - "ಅಮರ್ ತುಂ ಜಾ ಬಾಳ್ ಮೆಲಿಸ್ಸಾ...."(ಸಂಗೀತ್ : ಅಪೊಲಿನಾರಿಸ್ ಸೋಜ್) - ಹಿಂ ಗೀತಾಂ ನಿಜಾಯ್ಕಿ ಸಾಧಾರ್ಣ್ ಮನ್ಶಾಚ್ಯಾ ಮನಾಂನಿ ದುಖಾಚಿಂ ತುಫಾನಾಂ ಹಾಡ್ಚಿಂ ತಸಲಿಂ.
ಮುಖಾರ್ಸುನ್ ವೆಚೆಂ ತರ್, ಜೆರಿ ಡಿ’ಮೆಲ್ಲೊನ್ ಲಿಖ್ಲ್ಲೆಂ "ಆಂಜ್ ಜಾಲೆಂಯ್ ತುಂ .... ಬಾಳಾ ಮೆಲಿಸ್ಸಾ" ಕವನ್ ದಿಲಿಪ್ ಕೊರೆಯಾನ್ ವಾಚುನ್ ಪ್ರಸ್ತುತ್ ಕೆಲಾಂ ತರ್ ಹಾಂವೆಂ ಲಿಖ್ಲೆಲೆಂ ಕವನ್ "ಆದೇವ್ಸ್ ತುಕಾ ಮೆಲಿಸ್ಸಾ..." ಮೊನಿಕಾ ದಾಂತಿಸ್ ಹಿಣೆಂ ಪ್ರಸ್ತುತ್ ಕೆಲಾಂ. ನಿರ್ಮಲಾನ್ ಕಾಳಿಜ್ ಉಗ್ತೆಂ ಕರುನ್ ಲಿಖ್ಲ್ಲೆಂ ಆವಯ್ಚ್ಯಾ ರುದಾನಾಚೆಂ ಕವನ್ "ಅಮರ್ ತುಂ ಜಾ ಬಾಳಾ ಮೆಲಿಸ್ಸಾ..." ಕವನ್ ತಿಣೆಂಚ್ಚ್ ಪ್ರಸ್ತುತ್ ಕೆಲಾಂ.
ಸಂಗೀತ್ ಅನಿಂ ಸಾಹಿತ್ಯ್ ಮಾತ್ ನಾಸ್ತಾನಾ, ಹ್ಯಾ ಭಂಡಾರಾಂತ್ ಮೆಲಿಸ್ಸಾಚ್ಯಾ ಜಿವಿತಾಚಿ ಮಟ್ವಿ ವಳೊಕ್ ದಿಂವ್ಚೆಂಯ್ ಪ್ರೇತನ್ ಜಾಲಾಂ. ತಾಚ್ಯಾ ಜಿವಿತಾಂತ್ ತಾಣೆಂ ಜೊಡ್ಲ್ಲೆಂ, ತಾಚಿಂ ತಾಲೆಂತಾಂ ಆನಿಂ ಮೇಲ್ಫಂಕ್ತೆಚೆಂ ಜೀವನ್ ಮಟ್ವ್ಯಾನ್ ತರ್ಯ್ ನಾಜೂಕಾಯೆನ್ ಹಾಂತು ಪಿಂತ್ರಾಂವ್ಣಿ ಕೆಲ್ಯಾ.
ಹ್ಯಾ ಮೊಗಾ ಭಂಡಾರಾಕ್ ತಾಂತ್ರಿಕ್ಪಣ್, ದ್ವನಿ ಮುದ್ರಣ್, ಸಂಯೋಜನ್ ಆನಿಂ ಸಂಗೀತ್ ಮುದ್ರಣ್ ಹ್ಯಾ ಸರ್ವಾಂಚೆಂ ವ್ಹೊಜೆಂ ಗ್ಲೆನ್ ಕೊರೆಯಾನ್ ಘೆತ್ಲ್ಲೆಂ ತರ್ ಛಾಯಾಚಿತ್ರಣ್ ಬರ್ಟಿ ಪಿರೇರಾನ್ ಕೆಲಾಂ.
ಹ್ಯಾ ಯೋಜನಾಚೆ ಪೋಷಕ್ ಜಾವ್ನಾಸಾತ್ ಆಂತೊನಿ ಹರ್ಬರ್ಟ್ ಕ್ರಾಸ್ತಾ (ಆಸ್ಟ್ರೇಲಿಯಾ), ಹ್ಯೂಬರ್ಟ್ ಸೋಜ್, ಡೆನಿಸ್ ಮಸ್ಕರೇನಸ್.
ಮಸ್ಕತಾಂತ್ ಕೊಂಕ್ಣಿ ಸಮುದಾಯಾಂತ್ ಅಸಲೆಂ ಯೋಜನ್ ನಿಜಾಯ್ಕಿ ಪ್ರಥಮ್ ಮ್ಹಣ್ಯೆತ್ ಆನಿಂ ಹ್ಯಾ ಯೋಜನಾ ಪಾಟ್ಲ್ಯಾನ್ ಆಸ್ಲ್ಲ್ಯಾ ಹರ್ಯೆಕ್ಲ್ಯಾಕ್ ಶಾಬಾಸ್ಕಿ ಫಾವೊ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications