ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 12
ಆಂಟನಿ ಮಿನೇಜಸ್: ಕೊಂಕ್ಣಿ ಸಾಹಿತ್ಯಾಚಿ ವೋಡ್ ಆನಿ ಆಸಕ್ತ್ ಆಸ್ಚೊ ಅಪ್ರೂಪಾಯೆನ್ ಕಾಣ್ಯೊ, ಕವಿತಾ ತಶೆಂಚ್ ಲೇಕನಾಂ ಬರಯ್ತಾ. ವಾಚಾಪ್ ಚಡವ್ನ್, ಇಲ್ಲಿ ಮಿನತ್ ಕರಿತ್ ತರ್ ಬರೆಂ ಸಾಹಿತ್ಯ್ ರಚುಂಕ್ ಸಕ್ಚಾಂತ್ ಕಾಂಯ್ ದುಭಾವ್ ನಾ. ಸಾದಿ ಸುಡಾಳ್ ಭಾಸ್ ವಾಪಾರ್ತಾ ದೆಕುನ್, ಕಾಣ್ಯೆಂತ್ ವ್ಹಾಳೊ ಬರೊ ಆಸಾ ತರ್ಯೀ ಕಥಾವಸ್ತ್ ವಿಂಚವ್ಣೆಂತ್, ವ್ಹಾಪಾರ್ಚಾ ಭಾಸೆಚೆರ್ ಇಲ್ಲೆಂ ಧ್ಯಾನ್ ದೀತ್ ತರ್ ಅನಿಕ್ಯೀ ಉಂಚ್ಲೆಂ ಸಾಹಿತ್ಯ್ ರಾಚ್ಪಿ ಜಾಂವ್ಚಾಂತ್ ದುಭಾವ್ ನಾ.
ಆಂಟನಿ ಮಿನೇಜಸ್, ಬೊಂದೆಲ್
ಕಥಾಂಕರ್ - 12. ದೋತ್.
ಮಂಗ್ಳುರ್ ಶ್ಹೆರಾಚ್ಯಾ ಎಕಾ ದುಬ್ಳ್ಯಾ ಹಳ್ಳೆಂತ್ ಜಿಯೆತಾಲೆಂ ಏಕ್ ದಾಕ್ಟೆಂ ಕುಟಾಮ್. ಘೊವ್ ಬಾಯ್ಲ್ ಆನಿ ದೊಗಾಂ ಭುರ್ಗ್ಯಾಂ ಸವೆಂ. ಘರ್ಚೊ ಯೆಜ್ಮಾನಿ ಸಂತಾನಾಮ್ ಕೂಲಿಚೆಂ ಕಾಮ್ ಕರ್ನ್ ಧನ್ಯಾಚ್ಯೊ ಗಾಳಿ ಶಿರಾಪ್ ಖಾವ್ನ್ ಕಷ್ಟಾಂನಿ ಆಪ್ಲ್ಯಾ ಕುಟ್ಮಾಕ್ ಪೊಸ್ತಾನಾ, ತಾಚಿ ಬಾಯ್ಲ್ ಎಲಿಜ್ಬಾಯ್ ಫುಲಾಂ ಗುಂತುನ್ ಭುರ್ಗ್ಯಾಂಚ್ಯಾ ಇಸ್ಕೊಲಾಚಾ ಖರ್ಚಾಚೆ ಪಯ್ಶೆ ಜಮಯ್ತಾಲಿ. ಆರ್ಥಿಕ್ ಸಂಕಷ್ಟಾಂಕ್ ಸಾಂಪಡ್ಲ್ಯಾರೀ ಕುಟ್ಮಾಚ್ಯಾ ಸಂತೊಸಾಕ್ ಕಿತೆಂಚ್ ಉಣೆಂ ನಾತ್ಲ್ಲೆಂ ತೆಂ ಪಳೆವ್ನ್ ಸೆಜಾರ್ಚೊ ಲೋಕ್ ಮನಾಂತ್ಚ್ ಝಳ್ತಾಲೊ. ಅಶೆಂಚ್ ದೀಸ್ ಮಹಿನೆ ಜಾವ್ನ್ ವರ್ಸಾಂ ವಯ್ರ್ ವರ್ಸಾಂ ಚಡ್ತಾನಾ ಭುರ್ಗಿಂ ವ್ಹಡ್ ಜಾವ್ನ್ ಆಯ್ಲಿಂ ಆನಿ ಆವಯ್-ಬಾಪಯ್ಚೆಂ ಕಾಮ್ ಕರ್ಚೆಂ ಬಳ್ ಉಣೆ ಜಾಯಿತ್ತ್ ಆಯ್ಲೆಂ. ತರಿಕ್ಯೀ ಕೆದ್ನಾಂಚ್ ಸಂತಾನಾಮಾನ್ ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂಕ್ ಉಪಾಶಿಂ ಘಾಲ್ಲೆಂ ತೊ ನೆಣಾ. ಸಂತಾನಾಮಾಚಾ ದೊಗಾಂ ಭುರ್ಗ್ಯಾಂ ಪಯ್ಕಿ ಮಾಲ್ಘಡೆಂ ಸೆಲಿನ್ ಆನಿ ದುಸ್ರೊ ಪುತ್ ರೊಬಿನ್. ದೊಗಾಂಯ್ ಇಗರ್ಜೆಚ್ಯಾ ಇಸ್ಕೊಲಾಂತ್ ಶಿಕ್ತಾಲಿಂ. ಶಿಕ್ಪಾ ಸವೆಂ ಖೆಳಾಂತ್ಯೀ ನಾಂವ್ ಹಾಡ್ಲ್ಲಿಂ ಭುರ್ಗಿಂ ತಿಂ. ಆಯ್ತಾರಾಚೆಂ ಮೀಸ್ ಜಾವ್ನ್ ಘರಾ ಪಾಟಿಂ ಯೆತಾನಾ ಮಾದ್ರಿಂನಿ ಸಂತಾನಾಮಾಚಿ ಪಾಟ್ ಥಾಪುಡ್ನ್ ತಾಚ್ಯಾ ಭುರ್ಗ್ಯಾಂ ವಿಶಿಂ ಶಾಭಾಸ್ಕಿ ಪಾಠಯ್ತಾನಾ ಸಂತಾನಾಮ್ ಆನಿ ಎಲಿಜ್ಬಾಯ್ ಆಪ್ಲ್ಯಾ ಕಾಳ್ಜಾಂತ್ ಸುರ್ ಘಾಲ್ಲ್ಯಾ ಪಿಟಾಬರಿ ಫುಗ್ತಾನಾ ದೆವಾಕ್ ಅರ್ಗಾಂ ದೀಂವ್ಕ್ ವಿಸ್ರಾನಾತ್ಲ್ಲಿಂ.
ಅಶೆಂಚ್ ದೀಸ್ ಸಾರ್ತಾನಾ ಸಂತಾನಾಮಾಚೆರ್ ಎಕ್ ವ್ಹಡ್ ಅನ್ವಾರ್ ಆಯ್ಲೆಂ. ರಾತಿಂ ಜೇವ್ನ್ ನಿದ್ಲ್ಲೊ ಸಂತಾನಾಮ್ ಸಕಾಳಿಂ ಆಮೊರಿ ಮ್ಹಣೊಂಕ್ ಉಟ್ತಾನಾ ಖಟ್ಲ್ಯಾರ್ ಥಾವ್ನ್ ಸಕ್ಲಾ ಪಡ್ಲೊ ಆನಿ ತಾಚ್ಯಾ ದಾವ್ಯಾ ಕುಶಿಕ್ ಆರ್ ಮಾರ್ಲಿ. ಹೆಂ ಪಳೆವ್ನ್ ಎಲಿಜ್ಬಾಯೆಕ್ ಆಪ್ಣಾಚೆರ್ ಮೊಳಾಬ್ ಕೊಸ್ಳೊನ್ ಪಡ್ಲೆಲೆಬರಿ ಭಗ್ಲೆಂ. ಆರ್ ಮಾರ್ಲೆಲ್ಯಾ ಸಂತಾನಾಮಾಕ್ ಆಸ್ಪತ್ರೆಕ್ ದಾಖಲ್ ಕರುಂಕ್ ಪಯ್ಶೆಂ ತಿಚೆಲಾಗಿಂ ನಾತ್ಲ್ಲೆ. ತ್ಯಾ ವೆಳಾರ್ ಸಾಂ. ವಿಶೆಂತ್ ಪಾವ್ಲಾಚ್ಯಾ ಸಾಂದ್ಯಾಂಚಾ ಮಜತಿನ್ ತಿಣೆ ತಾಕಾ ಆಸ್ಪತ್ರೆಕ್ ದಾಖಲ್ ಕೆಲೊ. ಆಸ್ಪತ್ರೆಚೆಂ ಆನಿ ವೊಕ್ತಾಂಚೆಂ ಪಯ್ಶೆಂ ಭರ್ನ್ ಎಲಿಜ್ಬಾಯೆಕ್ ಪುರೊ ಜಾಲ್ಯಾರೀ ಸಂತಾನಾಮಾ ಥಂಯ್ ಕಿತೆಂಚ್ ಬರೆಂಪಣ್ ದಿಸಾನಾತ್ಲ್ಲ್ಯಾ ವೆಳಾರ್ ಎಲಿಜ್ಬಾಯೆಕ್ ತಾಕಾ ಘರಾ ಪಾಟಿಂ ವರ್ಚಿ ಸೊಡ್ನ್ ದುಸ್ರಿ ವಾಟ್ ನಾತ್ಲ್ಲಿ. ಆತಾಂ ಕಾಮ್ ಕರ್ನ್ ಘರ್ ಚಲಂವ್ಚೊ ಸಂತಾನಾಮಾನ್ ಖಾಟ್ ಧರ್ಲ್ಯಾ ತರ್ ಹ್ಯಾ ಕುಟ್ಮಾಚಿ ಗತ್ ಕಿತೆಂ? ಸೆಜಾರ್ಚಿಂ ಕೊಣಿಂ ಕುಮ್ಕೆಕ್ ಆಯ್ಲಿಂನಾಂತ್.
ವ್ಹಡ್ಲಿ ಧುವ್ ಸೆಲಿನ್ ಧಾವೆಂತ್ ಶಿಕ್ತಾಲೆಂ ಜಾಲ್ಲ್ಯಾನ್ ಅಟ್ವೆಂತ್ ಆಸ್ಲೆಲ್ಯಾ ರೊಬಿನಾಕ್ ಇಸ್ಕೊಲಾಚೆಂ ಪೊತೆಂ ಖಾಂದ್ಯಾ ವಯ್ಲೆಂ ಉಡೊನ್ ಸಾರ್ಯಾಚೊ ಭಾಟಿ ವ್ಹಾವಂವ್ಚೆಂ ಭಾಗ್ ಫಾವೊ ಜಾಲೆಂ. ಸೆಲಿನಾಚೆಂ ಬರೆಂಪಣ್ ಆಶೆಲ್ಲೊ ರೊಬಿನ್ ಕಾಮಾಕ್ ವಚೊನ್ ಘರ್ ಸಾಂಬಾಳ್ತಾನಾ ಆಪ್ಲ್ಯಾ ಪುತಾಚೆ ಕಷ್ಟ್ ಪಳೆವ್ನ್ ಸಂತಾನಾಮ್ ಭಿತರ್ಲ್ಯಾ ಭಿತರ್ಚ್ ಕರ್ಗೊನ್ ವೆತಾಲೊ ತರ್ ಹೆಣೆಂ ಎಲಿಜ್ಬಾಯೆಚಿ ದೀಷ್ಟ್ ಉಣಿಂ ಜಾವ್ನ್ ಆಯ್ಲ್ಲಿ. ಫುಲಾಂ ವಿಖುನ್ ಚ್ಯಾರ್ ಕಾಸ್ ಕರ್ಚಿ ಎಲಿಜ್ಬಾಯ್ ಆತಾಂ ವಗೆತ್ತ್ ಬಸ್ತಾನಾ ಘರ್ಚಿ ಜವಾಬ್ದಾರಿ ಸಗ್ಳಿ ರೊಬಿನಾಚ್ಯಾ ಖಾಂದ್ಯಾರ್ ಪಡ್ಲಿ. ತೆಣೆಂ ಸೆಲಿನ್ ಧಾವ್ಯಾ ವರ್ಗಾಂತ್ಲ್ಯಾ ಅಂತಿಮ್ ಪರೀಕ್ಷೆಂತ್ ಪಯ್ಲ್ಯಾ ಶ್ರೇಣಿಂತ್ ಉತ್ತಿರ್ಣ್ ಜಾವ್ನ್ ಮುಕ್ಲ್ಯಾ ಶಿಕ್ಪಾಚಿ ಆಶಾ ಉಚಾರ್ತಾನಾ ರೊಬಿನಾಕ್ ಕಿತೆಂ ಕರ್ಚೆಂ ಮ್ಹಣ್ ಸಮ್ಜಾಲೆಂನಾ. ಎಕಾ ವಾಟೆನ್ ದುರ್ಬಳ್ಕಾಯ್ ಅನ್ಯೆಕಾ ವಾಟೆನ್ ಪಿಡೇಸ್ತ್ ಬಾಪಯ್. ಆಸ್ಲ್ಲೆ ಇಲ್ಲೆ ಪಯ್ಶೆ ವೊಕ್ತಾಂ ಘೆವ್ನ್ ಕಾಭಾರ್ ಜಾತಾನಾ ಭಯ್ಣಿಚ್ಯಾ ಮುಕ್ಲ್ಯಾ ಶಿಕ್ಪಾಕ್ ಪಯ್ಶೆ ಖಂಚೆ ಹಾಡ್ತಾಲೊ? ಅಶೆಂ ಚಿಂತುನ್ ಆಸ್ತಾನಾಂಚ್ ತಾಕಾ ಝಳ್ಕಾಲ್ಲೊ ಉಪಾಯ್ ಆಸ್ಲ್ಲೆಂ ಇಲ್ಲೆಶೆಂ ಭಾಂಗಾರ್ ಆಡೊವ್ ದವರ್ನ್ ರೀಣ್ ಘೆಂವ್ಚೆಂ. ಪುಣ್ ಆವಯ್ಲಾಗಿಂ ವಿಚಾರ್ತಾಲೊ ತರೀ ಕಶೆಂ? ಆಪ್ಲೊ ಘೊವ್ ಪಿಡೇಸ್ತ್ ಜಾವ್ನ್ ವೊಕ್ತಾಕ್ ಪಯ್ಶೆ ನಾತ್ಲ್ಲ್ಯಾ ವೆಳಾರ್ ಸಯ್ತ್ ಆಪ್ಲೆಂ ಭಾಂಗಾರ್ ಅಡವ್ ದವರ್ನ್ ರೀಣ್ ಘೆಂವ್ಚೆಂ ಪ್ರಯತ್ನ್ ತಿಣೆ ಕರುಂಕ್ ನಾತ್ಲ್ಲೆಂ. ತರ್ ಆತಾಂ? ಪುಣ್ ಕಿತೆಂಯ್ ಜಾಂವ್ ರೊಬಿನಾನ್ ಮನ್ ಘಟ್ ಕರ್ನ್ ವಿಶಯ್ ಆವಯ್ಕ್ ಕಳಯ್ತಾನಾ ತಿಣೆ ನಾಂ ಮ್ಹಳೆಂ ನಾ. ಖಂಚಿ ಆವಯ್ ಆಪ್ಲ್ಯಾ ಭುರ್ಗ್ಯಾಚೆಂ ಬರೆಂಪಣ್ ಆಶೆನಾ ಜಾಯ್ತ್? ತಿಣೆ ಆಪ್ಲಿ ಪಿಡ್ಡುಕ್ ಸೊಡ್ನ್ ಉರ್ಲ್ಲೆಂ ಸರ್ವ್ ಭಾಂಗಾರ್ ಆಡೊವ್ ದವರ್ನ್ ಸೆಲಿನಾಚೆಂ ಶಿಕಾಪ್ ಮುಖಾರ್ಸಿಲೆಂ.
ಪುಣ್ ರೊಬಿನ್ ಬಾವ್ಡೊ ಘರ್ ಸಾಂಬಾಳುಂಕ್ ರಾವ್ಲ್ಲೊ ತೊ ಘರಾಚ್ಚ್ ಉರ್ಲೊ ಆನಿ ಕುಟ್ಮಾ ಖಾತಿರ್ ಒದ್ದಾಡ್ಚೊ ಪಳೆವ್ನ್ ಆವಯ್-ಬಾಪಯ್ ದುಖೇಸ್ತ್ ಜಾತೆಲಿಂ. ಆತಾಂ ಘರ್ಚಾ ಸರ್ವಾಂಚೊ ಕಷ್ಟಾಂಚೊ ಫಳ್ ಮ್ಹಳ್ಳೆಬರಿ ಸೆಲಿನಾನ್ ಕಲಾ ವಿಭಾಗಾಂತ್ ಸನದ್ ಆಪ್ಣಾಯ್ಲಿ. ಆಪ್ಣೆಂ ಶಿಕ್ಚೆ ಖಾತಿರ್ ಭಾವಾನ್ ಕಾಡ್ಲೆಲೆ ಕಷ್ಟ್ ಪಳಯಿಲ್ಲೆಂ ಸೆಲಿನ್ ಆತಾಂ ಭಾವಾಕ್ ಆಧಾರ್ ದಿಂವ್ಚೆ ಖಾತಿರ್ ಕಾಮಾಚ್ಯಾ ಸೊಧ್ನೆರ್ ಭಾಯ್ರ್ ಸರ್ಲೆಂ.
ಕಾಮಾಚ್ಯಾ ಸೊದ್ನೆರ್ ಆಸ್ಲ್ಲೆಂ ಸೆಲಿನ್ ಆಫಿಸಾ ಆಫಿಸ್ ಥಾವ್ನ್ ಥಕ್ಲ್ಲೆಂ ತರೀಕಿ ಏಕ್ ಕಾಮ್ ತಾಕಾ ಮೆಳೊಂಕ್ ನಾತ್ಲ್ಲೆಂ. ತಾಚೆಲಾಗಿಂ ಕೊಣಾಯ್ಚೆಂ ಶಿಫಾರಾಸ್ ಪತ್ರ್ ನಾತ್ಲ್ಲೆಂ ಕಿತ್ಯಾಕ್ ತೆಂ ಗರೀಬ್ ಜಾವ್ನಾಸ್ಲೆಂ. ಅಶೆಂ ಸಭಾರ್ ಮಹಿನೆ ಬೆಕಾರ್ ಆಸೊನ್ ಪಾಶಾರ್ ಜಾತಾನಾ ಸೆಲಿನಾಚ್ಯಾ ಎಕ್ಲೆ ಇಷ್ಟಿಣೆನ್ ಆಪ್ಲ್ಯಾ ದಫ್ತಾರಾಂತ್ ಏಕ್ ಜಾಗೊ ಖಾಲಿ ಆಸಾ ಮ್ಹಣ್ತಾನಾ ತಾಕಾ ಜಾಲ್ಲೊ ಸಂತೊಸ್ ಇತ್ಲೊ ಆನಿ ತಿತ್ಲೊ ನಹಿಂ. ತೊ ದೀಸ್ ಸನ್ವಾರ್ ವರ್ತ್ಯಾ ಉಮೆದಿನ್ ಸೆಲಿನ್ ಬೊರೆಂ ಕರ್ನ್ ನೆಸೊನ್ ಸಂದರ್ಶಾನಾಕ್ ಗೆಲ್ಲೆಂ. ವ್ಹಡ್ಲೆಂ ದಫ್ತರ್ ತೆಂ. ಸುಮಾರ್ ಚಾಳೀಸ್ ಪನ್ನಾಸ್ ಜಣ್ ಕರ್ತಾಲೆ. ತೆಂ ಪಳೆವ್ನ್ ಆಪ್ಣಾಕ್ಯೀ ಹ್ಯಾ ದಫ್ತಾರಾಂತ್ ಏಕ್ ಕಾಮ್ ಮೆಳಾತ್ ಮ್ಹಣ್ ಬಸ್ಲ್ಲೆ ಕಡೆನ್ ಸ್ವಪ್ಣೆಂವ್ಕ್ ಲಾಗ್ಲ್ಯಾ ತಾಕಾ ಆಫಿಸ್ ಬೊಯಾನ್ ಬೊಸಾನ್ ಆಪಯ್ಲಾಂ ಮ್ಹಣ್ತಾನಾ ತೆಂ ಉಡೊನ್ ಪಡ್ಲೆಂ. ವಸ್ತುರ್ ಸಮಾ ಕರ್ನ್ ದೆವಾಕಡೆಂ ಮಾಗೊನ್ ತೆಂ ಭಿತರ್ ವೆತಾಚ್ಚ್ ಆಫಿಸ್ ಬೊಯಾನ್ ಬೊಸಾಚ್ಯಾ ಕುಡಾಂಚೆಂ ದಾರ್ ಬಂಧ್ ಕರ್ತಾನಾ ಸೆಲಿನಾಕ್ ಕಿತೆಂಶೆಗೀ ಭಗ್ಲೆಂ.
ಸಾಧಾರ್ಣ್ ೪೫ ವರ್ಸಾಂಚೊ ದಿಂಡ್ಯಾ ಮಾನಾಯಾನ್ ಸೆಲಿನಾಕ್ ಹಾಸೊನ್ ಯೆವ್ಕಾರ್ ಮಾಗೊನ್ ತಾಚ್ಯಾ ಮುಕ್ಲ್ಯಾ ಕದೆಲಾರ್ ಬಸೊಂವ್ಕ್ ಆದೇಶ್ ದಿಲೊ. ಹಾಸ್ತಾನಾ ತಾಚೆ ಕಿಡೆರೆ ದಾಂತ್ ಪಳೆಲ್ಲ್ಯಾ ಸೆಲಿನಾಕ್ ಕಿತ್ಯಾಗೀ ತಾಚ್ಯಾ ವಯ್ರ್ ಕಾಂಠಾಳೊ ಉಭ್ಜಾಲೊ. ತರೀಕಿ ತಾಣೆಂ ವಿಚಾರ್ಲೆಲ್ಯಾ ಸರ್ವ್ ಸವಾಲಾಂಕ್ ಸಾರ್ಕಿ ಜಾಪ್ ದಿಲ್ಲೆಂ ಸೆಲಿನ್ ತಾಚ್ಯಾ ಜಾಪಿಕ್ ರಾಕೊನ್ ರಾವ್ಲ್ಲೆಂ. ಸಾರ್ಕಿ ಜಾಪ್ ದಿಲ್ಲಿ ಖುಶಿ ಎಕಾ ಕುಶಿನ್ ತರ್ ಹೊ ಕಿತೆಂ ಮ್ಹಣ್ತಾಗಾಯ್ ಮ್ಹಣ್ ಚಿಂತುನ್ ಆಸ್ತಾನಾಂಚ್, ತೊ "ಹ್ಯಾ ಆಕ್ರೇಚ್ಯಾ ಸವಾಲಾಚಿ ಜವಾಬ್ ಸಾರ್ಕಿ ದಿಲ್ಯಾರ್ ಖಂಡಿತ್ ತುಕಾ ಕಾಮ್ ಮೆಳ್ತೆಲೆಂಚ್, ತುಂವೆ ಕಾಂಯ್ ಭಿಯೆಂವ್ಚಿ ಗರ್ಜ್ ನಾಂ, ಚಿಂತುನ್ ಸಾರ್ಕಿ ಜಾಪ್ ದೀ" ಮ್ಹಣ್ ಸಾಂಗಾಲಾಗ್ಲೊ. ಹೆಂ ಆಯ್ಕೊನ್ ಸೆಲಿನಾಚ್ಯಾ ಮತಿಂತ್ ನಾಂನಾತಿ ಚಿಂತ್ನಾಂ ಧೊಸುಂಕ್ ಲಾಗ್ಲಿಂ. ತೆಂ ಚಿಂತುನ್ ಆಸ್ತಾನಾಂಚ್ ಬೊಸಾನ್ ಉಲವ್ಣ್ಯಾಕ್ ಸುರ್ವಾತ್ ಕೆಲಿ "ಮ್ಹಜೆಂ ನಾಂವ್ ಸಲೀಮ್. ಸಕ್ಕಡ್ ಮ್ಹಾಕಾ ಮೊಗಾನ್ ಸಲೀಮ್ಬಾಯ್ ಮ್ಹಣ್ ಆಪೈತಾತ್. ಆನಿ ಹಿ ಕಂಪನಿ ಮ್ಹಜಿ. ಹ್ಯಾ ದಫ್ತಾರಾಂತ್ಲ್ಯಾ ದುಸ್ರ್ಯಾ ಚೆಡ್ವಾಂನಿ ಮ್ಹಾಕಾ ಖುಶಿ ಕೆಲ್ಲೆಬರಿ ತುಂ ಮ್ಹಕಾ ಖುಶ್ ಕರ್ಶಿ ತರ್ ಖಂಡಿತ್ ಜಾವ್ನ್ ಹೆಂ ಕಾಮ್ ತುಕಾಚ್ ಮೆಳ್ತೆಲೆಂ".
ಹಳ್ಳೆಂತ್ಲ್ಯಾ ಚೆಡ್ವಾಕ್ ಸೆಲಿನಾಕ್ ಸಮ್ಜೊಂನಾಕೀ ಖುಶ್ ಕರ್ಚೆಂ ಮ್ಹಳ್ಯಾರ್ ಕಿತೆಂ ಮ್ಹಣ್. ತಾಣೆ ಅಶಿ ಜಾಪ್ ದೀಲಿ "ಹಾಂವ್ ಬರೆಂ ಕರ್ನ್ ಕಾಮ್ ಕರ್ತೆಲಿಂ ಮ್ಹಳ್ಳೊ ಭರ್ವಸೊ ಮ್ಹಾಕಾ ಆಸಾ ಮಾತ್ರ್ ನೈಂ ಹೆಂ ಮ್ಹಜೆಂ ಪಯ್ಲೆಂ ಕಾಮ್ ಜಾಲ್ಲೆಂ ವರ್ವಿಂ ಕಿತೆಂಯ್ ಚಡ್ ಉಣೆ ಜಾಲ್ಯಾರ್ ಮ್ಹಾಕಾ ಸುಧಾರ್ಸುನ್ ವರಿಜಾಯ್". ಹೆಂ ಆಯ್ಕಾಲ್ಲೊ ಸಲೀಂ ಹ್ಯಾ ಚೆಡ್ವಾಕ್ ಕಾಂಯ್ ಸಮ್ಜೊಂಕ್ ನಾಂ ಮ್ಹಳ್ಳೆಂ ಜಾಣಾ ಜಾವ್ನ್, ತೊ ಉಟೊನ್ ಸೆಲಿನಾಚ್ಯಾ ಕುಶಿಕ್ ಯೇವ್ನ್ "ಮ್ಹಾಕಾ ಖುಶಿ ಕರ್ಚೆಂ ಮ್ಹಳ್ಯಾರ್ ದಫ್ತಾರಾಚೆಂ ಕಾಮ್ ಕರ್ಚೆಂ ಮಾತ್ರ್ ನೈಂ ಬಗಾರ್ ಹಾಂಗಾಚೆಂ ಕಾಮ್ ಜಾಲ್ಯಾ ಮಾಗೀರ್....." ಮ್ಹಣೊನ್ ಸೆಲಿನಾಚ್ಯಾ ಖಾಂದ್ಯಾರ್ ಹಾತ್ ದವರ್ತಾನಾ ಸೆಲಿನಾಚ್ಯಾ ಉಜ್ವ್ಯಾ ಹಾತಾಂಚಿಂ ಪಾಂಚ್ ಬೊಟಾಂ ಸಲೀಮ್ಬಾಯ್ಚ್ಯಾ ಕಾನ್ಸುಲಾಚೆರ್ ಪಡ್ಲ್ಲಿಂ. ಆನಿ ಹಾಂಗಾಸರ್ ರಾವ್ಲ್ಯಾರ್ ಪರಿಸ್ಥಿತಿ ಚಡ್ ಭಿಗ್ಡಾತ್ ಮ್ಹಣ್ ಚಿಂತುನ್ ತೆಂ ಖಿಣಾನ್ ತ್ಯಾ ಜಾಗ್ಯಾ ಥಾವ್ನ್ ಭಾಯ್ರ್ ವೆತಾಸ್ತಾನಾ ತಾಕ್ ಆಪ್ಲ್ಯೆ ಇಷ್ಟಿಣೆಚಿ ಗತ್ ಪಳೆವ್ನ್ ಭಿರ್ಮತ್ ದಿಸ್ಲಿ.
ಅಶೆಂ ಘರಾ ಪಾಟಿಂ ಗೆಲ್ಲೆಂ ಸೆಲಿನ್ ಕಿತೆಂಚ್ ಉಲೈನಾಸ್ತಾಂ ವೊಗೆಂ ಬಸೊನ್ ಅಸ್ಲೆಂ. ರೊಬಿನಾನ್ ಕಿತೆಂ ಜಾಲೆಂ ಬಾಯ್ ಮ್ಹಣ್ ವಿಚಾರ್ತಾನಾ ತಾಕಾ ತಡ್ವೊಂಕ್ ಜಾಲೆಂನಾ. ತೆಂ ದುಖಾಂ ಗಳವ್ನ್ ಮ್ಹಣಾಲೆಂ "ಆನಿ ಹಾಂವ್ ಆಫಿಸಾಕ್ ಕಾಮಾಕ್ ಯಾ ಸಂದರ್ಶಾನಾಕ್ ವೆಚಿಂನಾ" ಮ್ಹಣೊನ್ ಜಾಲ್ಲಿ ಗಜಾಲ್ ಸಾಂಗ್ಲಿ. ಆಯ್ಕಾಲ್ಲೊ ರೊಬಿನ್ "ಬಾಯೆ ತುಂವೆ ಕಾಮಾಕ್ ವೆಚೆಂನಾಕಾ. ಘರಾಚ್ ರಾವ್" ಮ್ಹಣ್ ಮ್ಹಣಾಲೊ. ಧುವೆಕ್ ಅಶೆಂ ಜಾಲ್ಲಿ ಖಬಾರ್ ಆಯ್ಕೊನ್ ಎಲಿಜ್ಬಾಯೆಕ್ ಮೊಸ್ತ್ ದುಕ್ಲೆಂ ಆನಿ ತೀ ಧುವೆನ್ ಕಾಮಾಕ್ ವೆಚೆಂ ನಾಕಾ ಮ್ಹಣಾಲಿ. ಅಶೆಂ ದೀಸ್ ವೆತಾನಾ ಸೆಲಿನಾಕ್ ಕಾಜಾರಾಚಿ ಪ್ರಾಯ್ ಜಾವ್ನ್ ಯೆತಾಲಿ. ಕಾಮ್ ನಾತ್ಲೆಲ್ಯಾ ದುಬ್ಳ್ಯಾ ಕುಟ್ಮಾಚೆಂ ಚೆಡುಂ ಮ್ಹಣ್ ತಾಕಾ ಸಯ್ರಿಕ್ ಯೇನಾತ್ಲಿ. ಹಾಂಚೆ ಕಷ್ಟ್ ಪಳೆವ್ನ್ ಸೆಲಿನಾಕ್ ಬರೆಂ ಕರ್ನ್ ಜಾಣಾ ಆಸ್ಲೆಲ್ಯಾ ಮಾದ್ರಿಂನಿ ಆಪವ್ನ್ ತಾಕಾ ಇಸ್ಕೊಲಾಚ್ಯಾ ದಫ್ತಾರಾಂತ್ ಕಾಮ್ ದಿಲೆಂ.
ಸೆಲಿನಾಕ್ ಕಾಮ್ ಮೆಳ್ಳ್ಯಾ ಉಪ್ರಾಂತ್ ಘರ್ಚಿ ಪರಿಸ್ಥಿತಿ ಇಲ್ಲಿಶಿ ಸುರ್ಧೊನ್ ಆಯ್ಲಿ. ಭಾವಾನ್ ಆನಿ ಭಯ್ಣಿಂನ್ ಕಾಮ್ ಕರ್ನ್ ಉರಯ್ಲೆಲ್ಯಾ ಪಯ್ಶಾಂನಿ ಪಯ್ಲೆಂ ಆವಯ್ಚೆಂ ಭಾಂಗಾರ್ ಆಡೊವ್ ದವರ್ಲೆಲೆಂ ತೆ ಸೊಡಯ್ಲೆಂ. ಕಷ್ಟ್ ಉಪ್ರಾಂತ್ ಸುಖ್ ಮೆಳ್ಳೆಬರಿಂ ಘರಾಂತ್ ಸಂತೊಸ್ ವ್ಹಾಳೊಂಕ್ ಸುರು ಜಾಲ್ಲೆಂ. ಆನಿ ಸಂತಾನಾಮಾಕ್ ಆನಿ ಎಲಿಜ್ಬಾಯೆಕ್ ಸೆಲಿನಾಚ್ಯಾ ಕಾಜಾರಾಚಿ ಖಂತ್ ಸುರು ಜಾಲ್ಲಿ. ತರ್ನಾಟೆಂ ಚೆಡುಂ ವಾಡೊನ್ ಘರಾಂತ್ ಉರ್ಲಾಂ ಮ್ಹಳ್ಯಾರ್ ಭಾರಿ ಬೆಜಾರಾಯೆಚಿ ಗಜಾಲ್ ಘರ್ಚಾ ಮನ್ಶಾಂಕ್. ತರೀ ಸೆಲಿನ್ ತ್ಯಾ ವಿಶಿಂ ಕಿತೆಂಚ್ ಚಿಂತಿನಾತ್ಲೆಂ. ತೆಂ ಆನೀಕಿ ಇಲ್ಲೊ ತೆಂಪ್ ಕಾಮ್ ಕರ್ನ್ ಘರ್ಚಾಂಕ್ ಆಧಾರ್ ಜಾಂವ್ಚೆ ವಿಶಿಂ ಚಿಂತ್ತಾಲೆಂ.
ಅಶೆಂ ಆಸ್ತಾಂ ಏಕ್ ದೀಸ್ ಎಲಿಜ್ಬಾಯೆಚೊ ಪಯ್ಶಿಲೊ ಸಯ್ರೊ ಸೈರಿಕೆಚೊ ಮಾಲೊ ಸಾಯೆರಾಮ್ ಅವ್ಚಿತ್ ಘರಾ ಯೇವ್ನ್ ಪಾವ್ಲೊ ಆನಿ ಸೆಲಿನಾಚ್ಯಾ ಸೈರಿಕೆಚೊ ಪ್ರಸ್ತಾವ್ ಕಾಡಿಲಾಗ್ಲೊ. ಮಹಿನ್ಯಾ ಭಿತರ್ ಸೆಲಿನಾಕ್ ಸೈರಿಕ್ ಸೊಧ್ಚಿ ಭಾಸ್ ದೀವ್ನ್ ಗೆಲೊ. ತೀನ್ ದಿಸಾಂ ಭಿತರ್ ಸಾಯೆರಾಮ್ ನವ್ರ್ಯಾಚೊ ಫೊಟೊ ಘೆವ್ನ್ ಆಯ್ಲೊ. ಫೊಟೊ ಪಳೆವ್ನ್ ಸೆಲಿನಾನ್ ಪಸಂದ್ ಕೆಲ್ಯಾ ಉಪ್ರಾಂತ್ ಹೊಕ್ಲೆಕ್ ಪಳೆಂವ್ಕ್ ಯೆಂವ್ಚೊ ದೀಸ್ ಠರಾಯ್ಲೊ. ತ್ಯಾಚ್ ಪರ್ಮಾಣೆ ಆಯ್ತಾರಾ ದೀಸ್ ನವ್ರೊ ಸಿರಿಲ್ ಆಪ್ಲ್ಯಾ ಆವಯ್-ಬಾಪಯ್ ಆನಿ ಭಯ್ಣ್ ಮರಿಯಾ ಸಂಗಿ ಸೆಲಿನಾಕ್ ಪಳೆಂವ್ಕ್ ಆಯ್ಲಿಂ. ಚೆಡ್ಯಾನ್ ಚೆಡ್ವಾಕ್ ಪಸಂದ್ ಕೆಲ್ಯಾ ಉಪ್ರಾಂತ್ ದೋತಿ ವಿಶ್ಯಾಂತ್ ಉಲವ್ಣೆಂ ಸುರು ಜಾಲೆಂ. ಏಕ್ ಲಾಖ್ ರುಪಯ್, ಪನ್ನಾಸ್ ಪಾಂವ್ಡಾಂ ಭಾಂಗಾರ್ ಆನಿ ಕಾಜಾರಾಚೊ ಅರ್ಧೊ ಖರ್ಚ್ ದೊತಿ ರುಪಾರ್ ಸಿರಿಲಾಚ್ಯೆ ಆವಯ್ನ್ ಕಾರ್ಮಿನ್ಬಾಯೆನ್ ವಿಚಾರ್ತಾನಾ ರೊಬಿನಾಚ್ಯಾ ತಕ್ಲೆರ್ ಮೊಳಾಬ್ ಕೊಸ್ಳಾಲ್ಲೆಬರಿ ಜಾಲೊ. ಇತ್ಲಿ ದೋತ್ ದೀಂವ್ಕ್ ತಾಂಕ್ ನಾ ಜಾಲ್ಯಾರೀ ಬರಿ ಸೈರಿಕ್ ಸೊಡುಂಕ್ ಮೊನ್ ನಾಸ್ತಾನಾ ಆಕ್ರೇಕ್ ಚರ್ಚೆ ಕರ್ನ್ ಪಾವಾಣ್ಶೆಂ ಹಜಾರ್ ರುಪಾಯ್ ಆನಿ ತೀಸ್ ಪಾಂವ್ಡಾಂ ಭಾಂಗಾರ್ ದೀಂವ್ಕ್ ರೊಬಿನ್ ಆನಿ ಎಲಿಜ್ಬಾಯ್ ಒಪ್ವಾಲಿಂ. ಕಾಜಾರಾ ಪಯ್ಲೆಂ ದೋತ್ ಪಾವಿತ್ ಕರಿಜಾಯ್ ಮ್ಹಣ್ ಕಾರ್ಮಿನ್ಬಾಯೆನ್ ಸಾಂಗ್ಲೆಂ ಆನಿ ಕಾಜಾರ್ ಫೆಬ್ರವರಿಚ್ಯಾ ೪ ತಾರ್ಕೆರ್ ಮ್ಹಣ್ ಠರಾಯ್ಲೆಂ.
ಕಾಜಾರಾಕ್ ದೀಸ್ ಲಾಗ್ಗಿಂ ಪಾವ್ಲೆ ತರೀ ರೊಬಿನ್ ೫೦ ಹಜಾರ್ ರುಪಯ್ ಆನಿ ೨೦ ಪಾಂವ್ಡಾಂ ಭಾಂಗಾರ್ ಮಾತ್ರ್ ಜಮೊ ಕರುಂಕ್ ಸಕ್ಲ್ಲೊ. ರೊಸಾಚ್ಯಾ ಆದ್ಲ್ಯಾ ದೀಸಾ ಹೆಂ ಸಗ್ಳೆಂ ಘೆವ್ನ್ ರೊಬಿನ್ ಆನಿ ಎಲಿಜ್ಬಾಯ್ ನವ್ರ್ಯಾ ಘರಾ ಗೆಲ್ಲ್ಯಾ ವೆಳಾರ್, ಕಾರ್ಮಿನ್ಬಾಯೆನ್ ಪಾವಾಣ್ಶೆಂ ಹಜಾರ್ ರುಪಾಯ್ ಆನಿ ತೀಸ್ ಪಾಂವ್ಡಾಂ ಭಾಂಗಾರ್ ದಿಲ್ಲ್ಯಾ ಖರಿತ್ ಕಾಜಾರ್ ಭಿಲ್ಕುಲ್ ಜಾಂವ್ಚೆಂ ಮ್ಹಣ್ ಸಾಂಗ್ತಾನಾ ಎಲಿಜ್ಬಾಯೆನ್ ತೊಂಡಾಂತ್ಲ್ಯಾನ್ ಉತ್ರಾಂ ಸುಟಾನಾತ್ಲಿಂ. ಪುಣ್ ರೊಬಿನಾನ್ ಉರ್ಲ್ಲೆ ಪಯ್ಶೆ ಆನಿ ಭಾಂಗಾರ್ ಕಾಜಾರಾ ಉಪ್ರಾಂತ್ ಆಪುಣ್ ದಿತಾಂ ಮ್ಹಣ್ತಾನಾ ಸೆಲಿನಾಚೆಂ ಇಸ್ಕೊಲಾಚೆಂ ಕಾಮ್ ಪಳೆವ್ನ್ ಕಾರ್ಮಿನ್ಬಾಯೆ ಕಶೀಯ್ ಒಪ್ವಾಲಿ. ಕಶೆಂಯ್ ಕಾಜಾರ್ ಜಾಲೆಂ.
ಸಂತೊಸಾಚ್ಯಾ ಉಮಾಳ್ಯಾನ್ ಆಸ್ಲ್ಯಾರೀ ಜಾಯ್ತಿ ಬೆಜಾರಾಯ್ ಭಗ್ಲಿ ಸೆಲಿನಾಕ್ ಆಪ್ಲ್ಯಾ ಆವಯ್-ಬಾಪಯ್ ಆನಿ ಭಾವಾಕ್ ಆಧೇವ್ಸ್ ಮಾಗೊನ್ ಪತಿಚ್ಯಾ ಘರಾ ವಚೊಂಕ್. ನವ್ರ್ಯಾ ಘರಾ ಪಾವ್ಲ್ಲ್ಯಾ ಸೆಲಿನಾಕ್, ಘರ್ಚಿ ಪರಿಸ್ಥಿತಿ ಸಮಾ ನಾ ತಶೆಂ ಭಗ್ಲೆಂ. ತರೀಕಿ ನವೆಂ ಘರ್ ಆನಿ ನವೆಂ ಪರಿಸರ್ ಮ್ಹಣ್ ಚಿಂತುನ್ ಆಪ್ಣಾಕ್ಚ್ ಸಮಾಧಾನ್ ಕರ್ನ್ ಸೆಲಿನ್ ಘರಾ ಭಿತರ್ ಸರ್ಲೆಂ. ಕಾಜಾರಾಕ್ ಸುಧಾರ್ಶಿಲ್ಲೆ ಸರ್ವ್ ಮಾಟ್ವಾಂತ್ ಆಸ್ಲ್ಲೆ. ಸೊರೊ ಪಿಯೆವ್ನ್, ನಾಚೊನ್ ಪದಾಂ ಮ್ಹಣೊನ್ ಪುರೊ ಜಾಲ್ಯಾ ಉಪ್ರಾಂತ್ ರಾತ್ಚೆಂ ಜೆವಾಣ್ ಜೇವ್ನ್ ಘರಾ ಗೆಲ್ಲೆ ತರೀ ಮಟ್ವಾಂತ್ ಸಿರಿಲಾಚಿ ಝಳಕ್ ನಾತ್ಲ್ಲಿ. ಗೊಮ್ಟಿ ಲಾಂಬ್ ಕಾಡುನ್ ಥಕ್ಲ್ಲೆಂ ಸೆಲಿನ್ ಕಾರ್ಮಿನ್ಬಾಯೆ ಲಾಗಿಂ ವಿಚಾರ್ತಾನಾ ಆತ್ತಾಂ ಯೆತೊಲೊ ಮ್ಹಣ್ ಸಮಾಧಾನ್ ಕರಿಲಾಗ್ಲಿ. ತರೀಕಿ ಸೆಲಿನಾಕ್ ದುಬಾವ್, ಅಶೆಂ ಕಿತ್ಯಾಕ್ ಜಾಲೆಂ ಆನಿ ಸಿರಿಲ್ ಖಂಯ್ ಗೆಲೊ? ಅಸಲಿಂ ನಾಂ ನಾಂತಿ ಸವಲಾಂ ಮತಿಂತ್ ಯೆತಾಸ್ತಾನಾ ಭಾಯ್ರ್ ಪೆಟೊ ಘೊಂಕ್ಚೊ ಆವಾಜ್ ಆಯ್ಕಾಲೊ. ಸಟ್ಟ್ ಕರ್ನ್ ಸೆಲಿನ್ ಭಾಯ್ರ್ ವಚೊನ್ ಪಳಯ್ಲೆಂ, ದೋಗ್ ಜಣ್ ಸಿರಿಲಾಚ್ಯಾ ಬಾವ್ಳ್ಯಾಂಕ್ ಧರ್ನ್ ತಾಕಾ ಆಪವ್ನ್ ಹಾಡ್ತಾಲೆ. ಸಿರಿಲ್ ಸೊರೊ ಪಿಯೆವ್ನ್ ಥಾರ್ಯಾರ್ ನಾತ್ಲ್ಲೊ. ಜೀಬ್ ಆಡ್ ಪಡ್ತಾಲಿ ಆನಿ ಉಲಂವ್ಕ್ ತಾಕಾ ಜಾಯ್ನಾತ್ಲೆಂ. ತಾಕಾ ಖಟ್ಲ್ಯಾರ್ ನಿದಾವ್ನ್ ಉದಾಕ್ ಪಿಯೆಂವ್ಕ್ ದಿತಾನಾ ತಾಣೆಂ ಉದ್ಕಾಚೊ ಗೊಬ್ಳೊ ಕಾಡ್ನ್ ಧರ್ಣಿಕ್ ಮಾರ್ಲೊ. ಕಾಜಾರಾಚ್ಯಾ ಪಯ್ಲ್ಯಾ ರಾತಿಂ ಬಾಯ್ಲೆ ಸಾಂಗಾತಾ ಆಸ್ಚೆಂ ಸೊಡ್ನ್ ಸಿರಿಲ್ ಲಾಗ್ಶಿಲ್ಯಾ ಬಾರಾಂತ್ ಸೊರೊ ಪಿಯೆವ್ನ್ ಟಾಯ್ಟ್ ಜಾವ್ನ್ ರಸ್ತ್ಯಾರ್ ಪಡ್ಲ್ಲೊ.
ಕಿತೆಂ ಆಶೆಲ್ಲೆಂ ಸೆಲಿನ್ ಆನಿ ಕಿತೆಂ ಜಾಲೆಂ? ಕಿತ್ಲ್ಯಾ ಕಷ್ಟಾನಿಂ ರೊಬಿನಾನ್ ೫೦ ಹಜಾರ್ ರುಪಯ್ ಆನಿ ೨೦ ಜಮೊ ಕೆಲ್ಲೆಂ ತೆಂ ನಿಯಾಳ್ನ್ಂಚ್ ರಾತ್ ಪಾಲಿ ಕೆಲಿ ಸೆಲಿನಾನ್. ಸಕಾಳಿಂ ಉಟೊನ್ ಸಿರಿಲ್ ಕಿತೆಂಚ್ ಕಳಿತ್ ನಾತ್ಲೆಬರಿಂ ಚಾ ಹಾಡೊಂಕ್ ಫರ್ಮಾಯ್ತಾನಾ, ಆಪ್ಣಾಕ್ ಖಾತಿರ್ ಏಕ್ ಮೊಗಾಚೆಂ ಉತಾರ್ ನಾಂ ನೈಂಗಿ ಮ್ಹಣ್ ಸೆಲಿನಾಕ್ ಮಸ್ತ್ ಬೆಜಾರಾಯ್ ಭಗ್ಲಿ. ತೆಂ ತರಿ ಕಿತೆಂ ಕರ್ತೆಲೆಂ ತೆಂ ಆತಾಂ ಬಾಂಯ್ತ್ ಪಡೊನ್ ಜಾಲಾಂ ಉಪ್ಯೆನಾಸ್ತಾಂ ನಿರ್ವೊಗ್ ನಾತ್ಲ್ಲೊ.
ಕಾಜಾರ್ ಜಾವ್ನ್ ಏಕ್ ಹಪ್ತೊ ಜಾಲ್ಯಾರೀ ಹೊಕ್ಲೆ ನವ್ರ್ಯಾ ಮಧೆಂ ಕಿತೆಂಚ್ ಮೊಗಾಚೆಂ ಉಲೊವ್ಣೆಂ ನಾತ್ಲ್ಲೆಂ. ಆಪ್ಲ್ಯಾ ಬಾಪಯ್ಚಾ ಘರಾ ಕಿತ್ಲೆಂ ಕಷ್ಟ್ ಆಸ್ಲ್ಯಾರೀ ಮಾಯಾಮೊಗಾಕ್ ಕಿತೆಂಚ್ ಉಣೆ ನಾತ್ಲ್ಲೆಂ ಮ್ಹಣ್ ಚಿಂತುನ್ ಸದಾಂ ರಾತಿಂ ದುಖಾಂ ಗಳೊವ್ನ್ಂಚ್ ನಿದ್ತಾಲೆಂ. ಸಕಾಳಿಂ ಉಟೊನ್ ದೀಸ್ ಕೂಲಿಚ್ಯಾ ಕಾಮಾಕ್ ಗೆಲ್ಯಾರ್ ಗೆಲೊ ಸಿರಿಲ್, ನಾ ಜಾಲ್ಯಾರ್ ಸೊರೊ ಪಿಯೆವ್ನ್ ಘರಾಚ್ಚ್ ನಿದ್ತಾಲೊ.
ಸೆಲಿನ್ ಕಾಜಾರಾಚಿ ರಜಾ ಕಾಬಾರ್ ಜಾವ್ನ್ ಇಸ್ಕೊಲಾಕ್ ಕಾಮಾಕ್ ಗೆಲೆಂ. ಥಂಯ್ ಮಾದ್ರಿಂನಿ ತಾಚ್ಯಾ ಜಾಗ್ಯಾರ್ ದುಸ್ರ್ಯಾಕ್ ಎಕ್ಲ್ಯಾ ಚೆಡ್ವಾಕ್ ಕಾಮಾಕ್ ದವರ್ಲ್ಲೆಂ. ದುಸ್ರಿ ವಾಟ್ ನಾಸ್ತಾಂ ಸೆಲಿನಾಕ್ ಘರ್ ಪಾಟಿಂ ಆಯ್ಲೆಂ. ಆಪ್ಲಿ ಸುನ್ ದನ್ಪಾರಾ ಆದಿಂಚ್ ಘರಾ ಪಾಟಿಂ ಆಯಿಲ್ಲಿ ಪಳೆವ್ನ್ ಕಾರ್ಮಿನ್ಬಾಯೆಕ್ ಎಕ್ ಮಿಸ್ತೆರ್ ಕಸೊ ಜಾಲೊ. ಇಸ್ಕಾಲ್ ಸಾಂಜೆರ್ ೪ ವೊರಾಂ ಮ್ಹಣಾಸರ್ ಆಸಾ ತರ್ ಹೆಂ ಪಾಟಿಂ ಆಯಿಲ್ಲೆಂ ಕಾರಾಣ್ ಕಿತೆಂಗಾಯ್ ಮ್ಹಣ್ ಚಿಂತಾಸ್ತಾನಾಂಚ್ ಸೆಲಿನ್ ಯೇವ್ನ್ ಕಾಮ್ ಗೆಲ್ಲಿ ಖಬಾರ್ ಸಾಂಗಿಲಾಗ್ಲೆಂ. ಆಯ್ಕಾಲ್ಲ್ಯಾ ಕಾರ್ಮಿನ್ ಬಾಯ್ ರಾಗಾನ್ ಪೆಟೊನ್ ತಾಂಬ್ಡೊ ಇಂಗ್ಳೊ ಜಾಲಿ. ಸೆಲಿನಾಕ್ ಬರೆಂ ಕಾಮ್ ಆಸಾ ಮ್ಹಣ್ ಕಾಜಾರಾಕ್ ಒಪ್ವಾಲ್ಲಿ ತಿ, ಆತಾಂ ಹಾಚೆಂ ಕಾಮ್ ಗೆಲೆಂ ತರ್ ಖರ್ಚಾಕ್ ಕಿತೆಂ ಗತ್? ಮ್ಹಣ್ ಚಿಂತಿಲಾಗ್ಲಿ. ಸಿರಿಲ್ ಕಾಮಾಕ್ ಗೆಲ್ಯಾರ್ ಗೆಲೊ ನಾಂ ಜಾಲ್ಯಾರ್ ಪಿಯೆವ್ನ್ ರಸ್ತ್ಯಾರ್ ಪಡ್ತಾಲೊ. ಪಾವಾನಾತ್ಲ್ಯಾಕ್ ಕಾಜಾರ್ ಜಾವ್ನ್ ಘೊವಾಕ್ ಸೊಡ್ನ್ ಆಯಿಲ್ಲೆಂ ವ್ಹಡ್ಲೆಂ ಧುವ್ ಮರಿಯಾ ಘರಾ ಆಸ್ಲ್ಲೆಂ. ಘರಾಂತ್ ಬಾಯ್ಲೆಚೆಂ ರಾಜ್ ಜಾಲ್ಲೆ ವರ್ವಿಂ ಸಿರಿಲಾಚೊ ಬಾಪಯ್ ಕೊನ್ಶಾಂತ್ ಬಸೊನ್ ಸಗ್ಳೆಂ ದೆಖ್ತಾಲೊ ಶಿವಾಯ್ ತಾಣೆ ಕಿತೆಂಯ್ ಉಲಂವ್ಚೆಂ ಪರಿಂ ನಾತ್ಲ್ಲೆಂ.
ದೀಸ್ ಸಗ್ಳೊ ಕಾಬಾರ್ ಜಾವ್ನ್ ರಾತಿಚೆಂ ಜೆವಾಣ್ ಜಾಲ್ಯಾರಿ ಕೊಣೀ ಕಿತೆಂಯ್ ಉಲೈಲಿಂನಾಂತ್. ರಾತಿಕ್ ನಿದೊಂಕ್ ಗೆಲ್ಲೆಂ ಮರಿಯಾ ವ್ಹಳೂ ಆವೈಚ್ಯಾ ಕಾನಾಂತ್ ಸೆಲಿನಾಚ್ಯಾ ಬಾಕಿ ಉರ್ಲ್ಲ್ಯಾ ದೊತಿ ವಿಶ್ಯಾಂತ್ ಪುಸ್ಪುಸೊಂಕ್ ಲಾಗ್ಲೆಂ "ಮಾಂಯ್ ಸೆಲಿನಾಕ್ ೧೦ ಪಾಂವ್ಡಾಂ ಭಾಂಗಾರ್ ಆನಿ ೨೫ ಹಜಾರ್ ರುಪಾಯ್ ವೆಗ್ಗಿಂ ಹಾಡ್ನ್ ಯೆಂವ್ಕ್ ಸಾಂಗ್. ಆತಾಂ ಕಾಮ್ ಗೆಲಾಂ ಆನಿ ರೊಬಿನ್ ಖಬ್ರೆರ್ಚ್ ನಾಂ. ಅಶೆಂ ಜಾಲ್ಯಾರ್ ಆಮ್ಕಾಂ ಉರ್ಲ್ಲಿ ದೋತ್ ಮೆಳ್ಚಿ ಸ್ಪಪಾಣ್ಂಚ್". ಇತ್ಲೆಂ ಮ್ಹಣೊನ್ ತೆಂ ನಿದೊಂಕ್ ಗೆಲೆಂ. ಹೆಂ ಆಯ್ಕಾಲ್ಲ್ಯಾ ಕಾರ್ಮಿನ್ಬಾಯೆಚಿ ನೀದ್ ಉಬ್ಲಿ, ಚಿಂತುನ್ ಚಿಂತುನ್ ಸಕಾಳ್ ಜಾಲ್ಲಿ ತಿಕಾ ಖಬಾರ್ ನಾತ್ಲ್ಲಿ. ತಿ ಎಕಾ ನಿರ್ಧಾರಾಕ್ ಆಯಿಲ್ಲಿ.
ಸೆಲಿನಾಚೆಂ ಕಾಜಾರ್ ಜಾಲ್ಯಾ ಮಾಗೀರ್ ಘರಾಂತ್ ಯೆಂವ್ಚೊ ಆದಾಯ್ ಪರತ್ ಉಣೊ ಜಾಲ್ಲೆ ವರ್ವಿಂ ರೊಬಿನಾಕ್ ಪಿಡೇಸ್ತ್ ಬಾಪಯ್ಕ್ ಪೊಸುಂಕ್ ಇಲ್ಲೆಶೆ ಕಶ್ಟ್ ಜಾತಾಲೆ. ಆತಾಂ ರೊಬಿನ್ ೨೫ ವರ್ಸಾಂಚೊ ಜಾಲ್ಲ್ಯಾನ್ ತಾಕಾ ಕಾಜಾರಾಚಿ ಆಶಾ ಉದೆಲ್ಲಿ. ಪುಣ್ ಭಯ್ಣಿಚ್ಯಾ ಕಾಜಾರಾಚೆಂ ರೀಣ್ ಫಾರಿಕ್ ಕರುಂಕ್ ಆಸ್ಲೆಲ್ಯಾನ್ ತಾಣೆ ಕಾಜಾರಾಚಿ ಆಲೊಚನ್ ಪಾಟಿಂ ಘಾಲ್ಲಿ. ಧನ್ಯಾಚಾ ಘರಾ ಆತಾಂ ಕಾಯಾಮ್ ಕಾಮ್ ನಾತ್ಲ್ಲ್ಯಾನ್ ಭಯ್ಣಿಚ್ಯಾ ಕಾಜಾರಾಚೆಂ ರೀಣ್ ಆನಿ ದೋತ್ ಕಶಿ ದಿಂವ್ಚಿ ಮ್ಹಣ್ ಚಿಂತುನ್ ತೊ ಕಂಗಾಲ್ ಜಾಲ್ಲೊ. ತರೀಕಿ ತಾಣೆಂ ಭರ್ವಸೊ ಸಾಂಡ್ಲೊನಾ. ದನ್ಪಾರ್ ಕಾಮ್ ನಾತ್ಲ್ಲ್ಯಾ ದಿಸಾಂನಿ ದುಸ್ರ್ಯಾ ಘರಾಂನಿ ವಚೊನ್ ಕಾಮ್ ಕರ್ನ್ ಮೆಳ್ಳೆ ಪಯ್ಶ್ಯಾಂನಿ ರೀಣ್ ಪಾಟಿಂ ದೀಂವ್ಕ್ ಪೆಚಾಡ್ತಾಲೊ. ಪುಣ್ ದೊತಿಚೆ ಪಯ್ಶೆ ಜಮೊ ಕರುಂಕ್ ತಾಚ್ಯಾನ್ ಜಾಲೆಂನಾ.
ಕೊಂಬ್ಯಾಚೊ ಸಾದ್ ಆಯ್ಕೊನ್ ಉಟ್ಲ್ಲಿ ಕಾರ್ಮಿನ್ಬಾಯ್ ತೋಂಡ್ ಸಯ್ತ್ ಧುಯ್ನಾಸ್ತಾಂ ಸೆಲಿನಾಚ್ಯಾ ಕುಡಾಚೆಂ ದಾರ್ ಥಾಪುಡ್ತಾನಾ ಸೆಲಿನ್ ಏಕ್ಚ್ಚ್ ಪಾವ್ಟಿಂ ಮಾಂದ್ರೆ ಥಾವ್ನ್ ಉಟೊನ್ ಬಸ್ಲ್ಲೆಂ. ಉಟೊನ್ ಬಾಗಿಲ್ ಕಾಡ್ಲೆಲ್ಯಾ ಸೆಲಿನಾಚ್ಯಾ ಕೇಸಾಂಕ್ ಧರ್ನ್ ರಾಂದ್ಪಾ ಕುಡಾಕ್ ವೊಡ್ನ್ ಹಾಡಿಲಾಗ್ಲಿ. ಕಾರ್ಮಿನ್ಬಾಯೆಕ್ ಹ್ಯೆ ಸ್ಥಿತೆಂತ್ ಪಳೈಲ್ಯಾ ಸೆಲಿನಾಕ್ ನಿಜಾಯ್ಕಿ ಭಿರಾಂತ್ ದಿಸ್ಲ್ಲಿ ಮಾತ್ರ್ ನೈಂ ಸಕಾಳಿಂಚಿ ಚಾ ಆನಿ ರಾಂದಾಪ್ ಕರುನ್ ಕುಶಿಚ್ಯಾ ಘರಾ ಕೂಲಿಚ್ಯಾ ಕಾಮಾಕ್ ವೊಚ್ ಮ್ಹಣ್ತಾನಾ ತಾಚ್ಯಾ ದೊಳ್ಯಾಂನಿ ದುಖಾಂ ಭರ್ಲಿಂ. ತರೀ ವೆಗ್ಗಿಂ ರಾಂದ್ಪಾಚೆಂ ಕಾಮ್ ಮುಗ್ದುನ್ ಸೆಲಿನ್ ಪಯ್ಲೆ ಪಾವ್ಟಿಂ ಕೂಲಿಚ್ಯಾ ಕಾಮಾಕ್ ಗೆಲೆಂ. ಕೂಲಿಚ್ಯಾ ಕಾಮಾಕ್ ವಚೊಂಕ್ ಆಪ್ಲ್ಯಾ ನಶೀಬಾಂತ್ ಆಸ್ಲೆಂ ತರ್ ಕಿತ್ಯಾಕ್ ರೊಬಿನಾನ್ ಆಪ್ಣಾ ಖಾತಿರ್ ಇತ್ಲೆ ಕಶ್ಟ್ ಕಾಡಿಜಾಯ್ ಆಸ್ಲ್ಲೆ ಮ್ಹಣ್ ಚಿಂತುನ್ ಆಪ್ಲ್ಯಾ ಖೊಟ್ಯಾ ನಶಿಬಾಕ್ ದುರ್ಸಾಲೆಂ. ಪಯ್ಲೆ ಪಾವ್ಟಿಂ ಇತ್ಲ್ಯಾ ಕಶ್ಟಾಂಚೆ ಕಾಮ್ ಕರ್ನ್ ಥಕೊನ್ ಆಯಿಲ್ಲೆಂ ಸೆಲಿನ್ ಘರ್ ಯೇವ್ನ್ ಪಳೆತೆಲೆಂ ತರಿ ಕಿತೆಂ? ವೊರಾಂ ಸಾಂಜೆಚಿಂ ಸಾಡೆ-ಸಾತ್ ಜಾಂವ್ಕ್ ನಾಂ ತರೀ ಘರ್ಚಿಂ ಸಮೆಸಾಂ ರಾತಿಚೆಂ ಜೆವಾಣ್ ಜಾವ್ನ್ ಉಶ್ಟ್ಯಾಚಿಂ ಆಯ್ದಾನಾ ಕುಜ್ನಾಂತ್ ರಾಸ್ ಘಾಲುನ್ ಹಾತ್-ಪಾಯ್ ಸೊಡ್ನ್ ಗಜಾಲಿ ಕರ್ತಾಲಿಂ. ಸೆಲಿನಾಕ್ ಮಾತ್ರ್ ಜೆವಾಣ್ ದವರುಂಕ್ ನಾತ್ಲ್ಲೆಂ. ನಾಣ್ಯೆಂತ್ ನಾಂವ್ಕ್ ಮ್ಹಣ್ ಗೆಲ್ಯಾರ್ ಭಾಣಾಂತ್ ಕಟ್ಟಿ ಉದಾಕ್ಯ್ ನಾತ್ಲೆಂ. ನಾಣ್ಯೆ ಥಾವ್ನ್ ಪಾಟಿಂ ಆಯ್ಲ್ಲೆಂ ಸೆಲಿನ್ ಉದಾಕ್ ಪಿಯೆವ್ನ್ ಆಪ್ಲ್ಯಾ ಕುಡಾಕ್ ವೆತಾನಾ ಕಾರ್ಮಿನ್ಬಾಯೆನ್ ಕುಲಿಚ್ಯಾ ಕಾಮಾಚೆ ಪಯ್ಶೆ ಘೆತ್ಲೆ ಮಾತ್ರ್ ನೈಂ ಬಾಕಿ ಉರ್ಲ್ಲಿ ದೋತ್ ದೋನ್ ಹಪ್ತ್ಯಾಂ ಭಿತರ್ ಹಾಡ್ನ್ ಯೆಂವ್ಕ್ ಫರ್ಮಾಯ್ಲೆಂ.
ತೀನ್ ದಿಸಾಂ ಮಾಗಿರ್ ಸೆಲಿನ್ ಏಕ್ಲೆಂಚ್ ಕುಳಾರಾ ಆಯಿಲ್ಲೆಂ ಪಳೆವ್ನ್ ಎಲಿಜ್ಬಾಯ್ ಅಜಾಪ್ಲಿ. ಜಾಂವಾಯ್ ಕಿತ್ಯಾಕ್ ಯೇವ್ನಾ ಮ್ಹಣ್ ವಿಚಾರ್ತಾನಾ ಸೆಲಿನಾಚ್ಯಾ ದೊಳ್ಯಾಂ ಥಾವ್ನ್ ದುಖಾಂ ವ್ಹಾಳೊಂಕ್ ಸುರು ಜಾಲಿಂ. ಇತ್ಲೆ ದೀಸ್ ದಾಂಬುನ್ ದವ್ರಿಲ್ಲಿಂ ಸರ್ವ್ ವಿಶಯ್ ತಾಣೆ ಆವಯ್ಕ್ ಸಾಂಗುನ್ ಆಪ್ಲೆಂ ಕಾಳಿಜ್ ಹಾಳು ಕೆಲೆಂ. ಇತ್ಲೆಂ ರೀಣ್ ಆಸ್ತಾನಾ ಫಕತ್ ದೋನ್ ಹಪ್ತ್ಯಾಂನಿ ದೊತಿಚ್ಯಾ ಪಯ್ಶಾಂಕ್ ಖಂಚಿ ವಿಲೆವಾರಿ ರೊಬಿನ್ ಕರ್ತಾಲೊ ಮ್ಹಳೆಂ ಚಿಂತುನ್ ಸಂತಾನಾಮ್ ಆಪ್ಲ್ಯಾ ಧುವೆಕ್ ಪೊಂಡಾಂತ್ ಲೊಟುನ್ ಘಾಲೆಂ ಮ್ಹಣ್ ಚುರ್ಚುರ್ಲೊ. ತರೀ ತಾಣೆ ಸೆಲಿನಾಕ್ ಸಮಾಧಾನ್ ಕರ್ನ್ ಕಶೆಂ ಪುಣಿ ರೊಬಿನ್ ಪಯ್ಶಾಂಚಿ ವಿಲೆವಾರಿ ಕರ್ತಾಲೊ ಮ್ಹಳ್ಳೊ ಭರ್ವಸೊ ದೀವ್ನ್ ಪಾಟಿಂ ಸಿರಿಲಾಚ್ಯಾ ಘರಾ ಧಾಡುನ್ ದಿಲೆಂ. ರೊಬಿನ್ ಬಾವ್ಡೊ ಆಪ್ಲ್ಯಾ ಇಷ್ಟಾಂಲಾಗಿಂ ಪಯ್ಶೆ ಜಮೊ ಕರ್ನ್ ಜಾತಾ ತಿತ್ಲೆಂ ವೆಗ್ಗಿಂ ಕಾರ್ಮಿನ್ಬಾಯೆಕ್ ದಿಂವ್ಚ್ಯಾ ಇರಾದ್ಯಾನ್ ದೀಸ್ ರಾತ್ ಘೊಳ್ತಾಲೊ.
ದನ್ಪಾರಾಂ ಕುಳಾರಾ ಗೆಲ್ಲೆಂ ಸೆಲಿನ್ ಕಾಳೊಕ್ ಜಾಂವ್ಚಾ ಪಯ್ಲೆಂ ಘರಾ ರಿತ್ಯಾ ಹಾತಾಂನಿ ಪಾಟಿಂ ಆಯಿಲ್ಲೆಂ ಪಳೆವ್ನ್ ಮೆಟಾರ್ ಬಸ್ಲೆಲ್ಯಾ ಕಾರ್ಮಿನ್ಬಾಯೆನ್ ತನ್ಕಿ ಸುರು ಕೆಲಿ. ಪಯ್ಶೆ ಆನಿ ಭಾಂಗಾರ್ ಖಂಯ್ ಆಸಾ? ಕಿತ್ಯಾಕ್ ಹಾಡುಂಕ್ ನಾಂಯ್? ಅಶೆಂ ಜಾಲ್ಯಾರ್ ತುವೆಂ ಹ್ಯಾ ಘರಾಂತ್ ರಿಗ್ಚಿ ಗರ್ಜ್ ನಾಂ. ಸಿರಿಲಾಕ್ ಆನಿ ಕೊಣೀ ದುಸ್ರೆಂ ಚೆಡುಂ ಪಳೆವ್ನ್ ಕಾಜಾರ್ ಕರ್ತಾಂವ್ ಮ್ಹಣ್ ಸಾಂಗೊನ್ ಮೇಟ್ ಚಡ್ಚಾ ಸೆಲಿನಾಚಿ ಗೊಮ್ಟಿ ಧರ್ನ್ ಲೊಟ್ಲೆಲ್ಯಾ ಪೊರ್ಸಾಕ್ ಸೆಲಿನ್ ಜಾಲಾಂತ್ ಉಸಾಳ್ಳೆಂ. ಆನಿ ತಾಣೆಂ ಮಾರ್ಲೆಲ್ಯಾ ಬೊಬೆಕ್ ಸೆಜಾರ್ಚಿಂ ಸರ್ವ್ ಧಾಂವೊನ್ ಆಯಿಲ್ಲ್ಯಾ ವೆಳಾರ್ ಕಾರ್ಮಿನ್ಬಾಯೆನ್ ಮೇಟ್ ನಿಸ್ರೊನ್ ಪಡ್ಲೆಂ ಮ್ಹಣ್ ಸಾಂಗ್ತೆಚ್ ತಿಂ ಸರ್ವಾಂ ಪಾಟಿಂ ಗೆಲಿಂ. ಪಡ್ಲೆಲ್ಯಾ ಸೆಲಿನಾಕ್ ಉಬೆ ರಾವೊಂಕ್ ತಾಂಕ್ಲೆ ನಾಂ ಜಾಲ್ಯಾರೀ ಕೊಣಿ ತಾಚ್ಯೆ ಕುಮ್ಕೆಕ್ ಆಯ್ಲಿನಾಂತ್. ಕುಲೆಂ ವೊಡ್ನ್ ಆಪ್ಲ್ಯಾ ಕುಡಾಕ್ ಪಾವ್ಲ್ಲೆಂ ಸೆಲಿನ್ ದುಖಿನ್ ಪಿಂರ್ಗಾಲ್ಯಾರೀ ಏಕ್ ಗೊಬ್ಳೊ ಉದಾಕ್ ದಿಂವ್ಚಿ ಪಾಪ್ ಭಿರ್ಮತ್ ತಾಂಚೆ ಥಂಯ್ ನಾತ್ಲ್ಲಿ. ಕಾರ್ಮಿನ್ಬಾಯೆನ್ ಯೆದೊಳ್ಚ್ಚ್ ಸಿರಿಲಾಕ್ ದುಸ್ರೆಂ ಕಾಜಾರ್ ಕರ್ನ್ ಪಯ್ಶೆ ಕರ್ಚಿ ಆಲೊಚನ್ ಕರ್ನ್ ಜಾಲ್ಲಿ. ತಿಂ ಸೆಲಿನಾಕ್ ಘರಾಂತ್ಲೆಂ ಭಾಯ್ರ್ ಘಾಲುಂಕ್ ಚಿಂತಿಲಾಗ್ಲಿ. ಪೆಂಕ್ಟಾಕ್ ಲಾಗ್ಲ್ಲ್ಯಾ ದುಖಿನ್ ಪಿಂರ್ಗೊನ್ ಪಿಂರ್ಗೊನ್ ದೊಳೊ ಅಡ್ ಜಾತಾನಾ ರಾತಿಂ ಭಾರಾ ವೊರಾರ್ ಸೊರೊ ಪಿಯೆವ್ನ್ ಬೊಬ್ ಮಾರ್ನ್ ಯೆಂವ್ಚಾ ಸಿರಿಲಾಚೊ ತಾಳೊ ಆಯ್ಕೊನ್ ತಾಕಾ ಜಾಗ್ ಜಾಲ್ಲಿ. ತಾಣೆ ಉಟ್ಚೆಂ ಪ್ರಯತ್ನ್ ಕೆಲ್ಯಾರಿ ತಾಚ್ಯಾ ಪೆಂಕ್ಟಾಚ್ಯಾ ದುಖಿ ವರ್ವಿಂ ತಾಕಾ ಉಟೊಂಕ್ ಜಾಲೆಂನಾ.
ಹ್ಯಾಚ್ ವೆಳಾಕ್ ರಾಕೊನ್ ರಾವ್ಲೆಲ್ಯಾ ಕಾರ್ಮಿನ್ಬಾಯೆನ್ ಧಾಂವೊನ್ ವಚೊನ್ ಆಪ್ಲ್ಯಾ ಲಕ್ಚ್ಯಾ ಪುತಾಚ್ಯಾ ಹಾತಾಕ್ ಧರ್ನ್ ಸೆಲಿನಾನ್ ಆಪ್ಣಾಕ್ ಮಾರುಂಕ್ ಹಾತ್ ಉಕೊಲ್ಲೊ ಮ್ಹಣ್ ಸಾಂಗುನ್ ಸೊಪ್ಯಾರ್ ಹಾಡ್ನ್ ಬೊಸೈತಾನಾ ಸಿರಿಲಾನ್ ಸೆಲಿನಾಕ್ ಆನಿ ತಾಚ್ಯಾ ಕುಟ್ಮಾಕ್ ಗಾಳಿ ದಿಂವ್ಕ್ ಸುರು ಕೆಲ್ಯೊ. ಇತ್ಲಿ ಬೋಬ್ ಮಾರ್ಲ್ಯಾರೀ ಸೆಲಿನ್ ಭಾಯ್ರ್ ಯೇನಾತ್ಲೆಂ ಪಳೆವ್ನ್ ಸಿರಿಲಾನ್ ಭಿತರ್ ವಚೊನ್ ನಿದ್ಲೆಲ್ಯಾ ಸೆಲಿನಾಚ್ಯಾ ಹರ್ದ್ಯಾಕ್ ಚಾರ್ ಖೊಟೊ ಘಾಲ್ಯೊ ಅನಿ ಸೊಪ್ಯಾಕ್ ವೊಡ್ನ್ ಹಾಡ್ನ್ ಆವಯ್ ಲಾಗಿಂ ಮಾಪ್ ಮಾಗುಂಕ್ ಸಾಂಗಾಲಾಗ್ಲೊ. ಸೆಲಿನಾಕ್ ಆಪ್ಲಿಚ್ ಲಜ್ ದಿಸ್ಲಿ. ಆಪ್ಲಿ ಚೂಕ್ ನಾಸ್ತಾನಾ ಮಾಫಿ ಮಾಗ್ಲೆಲ್ಯಾ ತಾಕಾ ಸಿರಿಲಾಲಾಗಿಂ ಕಾಜಾರ್ ಜಾವ್ನ್ ಆಪ್ಣೆಂ ವ್ಹಡ್ಲಿ ಚೂಕ್ ಆರ್ಧಾಲ್ಯಾ ಭಾಶೆನ್ ಭಗ್ಲೆಂ. ಕಶೆಂ ದೋನ್ ಹಾಪ್ತ್ಯಾಂನಿ ದೋತ್ ದಿಂವ್ಚಿ ಮ್ಹಣ್ ಚಿಂತಿಲಾಗ್ಲೆಂ ಆನಿ ತೆಂ ಎಕಾ ನಿರ್ಧಾರಾಕ್ ಪಾವ್ಲೆಂ. ತರೀ ತೆಂ ಅಟ್ ದೀಸ್ ರಾಕೊನ್ ರಾವ್ಲೆ ರೊಬಿನಾಕ್. ಕಸೊ ತರೀ ಆಪ್ಲೊ ಭಾವ್ ಕುಮೊಕ್ ಕರ್ತಾಲೊ ಮ್ಹಳ್ಳೊ ಭರ್ವಸೊ ತಾಕಾ ಆಸ್ಲೊ. ತೆಂ ರಾಕೊನ್ ರಾಕೊನ್ ಥಕ್ಲೆಂ.
ಆಯ್ತಾರಾ ಸಕಾಳಿಂಚೆಂ ಮೀಸ್ ಜಾವ್ನ್ ರೊಬಿನ್ ಆನಿ ಎಲಿಜ್ಬಾಯೆ ೫,೦೦೦ ಸಿರಿಲಾಚ್ಯಾ ಘರಾ ಭಾಯ್ರ್ ಸರ್ಲಿಂ. ಇಶ್ಟಾಂಲಾಗಿಂ ವಿಚಾರ್ನ್ ಆನಿ ಕಾಮ್ ಕರ್ನ್ ಮೆಳ್ಳೆಲ್ಲೆ ಪಯ್ಶೆ ಕಾರ್ಮಿನ್ಬಾಯೆಕ್ ದೀವ್ನ್ ಸದ್ದ್ಯಾಕ್ ತಿಚೆಂ ತೊಂಡ್ ಧಾಂಪವ್ಚೆಂ ಮ್ಹಣ್ ರೊಬಿನ್ ಚಿಂತುನ್ ಆಸ್ತಾನಾಂಚ್ ಬಸ್ಸ್ ಸಿರಿಲಾಚ್ಯಾ ಹಳ್ಳೆಕ್ ಪಾವ್ಲ್ಲೆಂ. ಬಸ್ಸಾರ್ ಥಾವ್ನ್ ದೆಂವೊನ್ ಸಿರಿಲಾಚ್ಯಾ ಘರ್ಚಿಂ ಧಾ ಮಿನುಟಾಂಚಿ ವಾಟ್ ಚಲ್ತಾನಾ ಏಕ್ ಆಂಬ್ಯುಲೆನ್ಸ್ ಮುಕಾರ್ ಗೆಲೆಂ. ಭಿತರ್ಲ್ಯಾ ಪಾಂಯ್ ವಾಟೆನ್ ಗಾದ್ಯಾ ಮೆರೆನ್ ಚಲೊನ್ ಧಾಕ್ಟ್ಯಾ ವ್ಹಾಳಾಚೆಂ ಪಾಂಪಾಳೆಂ ಉತ್ರಾತಾನ್ ಸಿರಿಲಾಚ್ಯಾ ಜಾಲಾಂತ್ ಜಮ್ಲ್ಲ್ಯಾ ಲೊಕಾಕ್ ಪಳೆವ್ನ್ ರೊಬಿನಾಕ್ ಕಿತೆಂಗೀ ದುಬಾವ್ ಮಾರ್ಲೊ. ತೊ ಆವಯ್ ಸಾಂಗಾತಾ ಧಾಂವೊನ್ ವಚೊನ್ ಪಳೆಯ್ತ್ ತರೀ ಕಿತೆಂ? ಸೆಲಿನಾಚಿ ಕೂಡ್ ಸಿರಿಲಾಚ್ಯಾ ಜಾಲಾಂತ್ಲ್ಯಾ ಬಾಂಯ್ಚಾ ಲಾಟ್ಯಾರ್ ಉಮ್ಕಾಳ್ತಾಲಿ. ಕಾರ್ಮಿಣ್ಬಾಯೆಚಿ ವಾಟ್ ಶಾಬಿತ್ ಜಾಲ್ಲಿ.
******
ಕಥಾಂಕರ್ ಪಾನಾಕ್: 1, 2, 3, 4, 5, 6, 7, 8, 9, 10, 11
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
