ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಆಯ್ಚಾ ಸಮಾಜೆಂತ್ ವ್ಹಡ್ಲಿ ಭುಕ್, ಖಾಣಾಚಿ ನ್ಹಂಯ್, ಆಮಿಂ ಕೊಣಾಕ್ಚ್ ನಾಕಾ ಜಾಲ್ಲಿಂ ಮ್ಹಳ್ಳೆಂ ಚಿಂತಾಪ್’ - ಮದರ್ ತೆರೆಜಾ
ಆಮಿ ಮೊಡ್ತೆಲ್ಯಾಂ ಪಯ್ಕಿಂತ್ಲೆ ವಾ ಜೊಡ್ತೆಲ್ಯಾಂ ಪಯ್ಕಿಂತ್ಲೆ?
ವರಸ್ : 2007
ಅಂಕೊ : 36
ಮಯ್ನೊ : ಜೂನ್
ಸಂಪಾದಕೀಯ್ - 36.
ವಲ್ಲಿ ಕ್ವಾಡ್ರಸ್
ಭುರ್ಗ್ಯಾಪಣಾರ್ ಆಯ್ಕಾಲ್ಲಿ ಅಕ್ಬರ್-ಬೀರ್ಬಲಾಚಿ ಏಕ್ ಕಾಣಿ ಉಡಾಸಾಕ್ ಯೆತಾ, ಏಕ್ ಪಾವ್ಟಿಂ ಹರ್ಶೆಂಚ್ಯಾಕೀ ತಡವ್ ಕರ್ನ್ ಆಸ್ತಾನಾಕ್ ಆಯಿಲ್ಲ್ಯಾ ಬೀರ್ಬಲಾಕ್ ಪಳೆವ್ನ್ ಅಕ್ಭರ್ ರಾಗಾರ್ ಜಾವ್ನ್ ಸವಾಲ್ ಕರ್ತಾ;
"ಕಿತ್ಯಾಕ್ ಬೀರ್ಬಲ್ ತುಂ ಇತ್ಲೊ ತಡವ್ ಕರ್ನ್ ಆಯ್ಲೊಯ್?"
ಬೀರ್ಬಲ್ ಜಾಪ್ ದೀವ್ನ್ ಮ್ಹಣಾಲೊ "ವಾಟೆರ್ ಏಕ್ ಭುರ್ಗೊ ಕೊಬು ಜಾಯ್ ಮ್ಹಣೊನ್ ರಡ್ತಾಲೊ, ತಾಕಾ ಕೊಬು ದೀವ್ನ್ ಆಯ್ಲೊಂ ದೆಕುನ್ ತಡವ್ ಜಾಲೊ"
"ಕಿತೆಂ? ಕೊಬು ದೀಂವ್ಕ್ ಇತ್ಲೊ ತಡವ್? ಕಿತೆಂ ಕೊಬು ಹಾಡುಂಕ್ ತುಂ ಸರ್ಗಾಕ್ ವಚೊನ್ ಆಯ್ಲೊಯ್?"
"ನಾ.. ಕೊಬು ತ್ಯಾ ಭುರ್ಗ್ಯಾಲಾಗಿಂಚ್ ಆಸ್ಲೊ"
"ಕಿತೆಂ?.. ಭುರ್ಗ್ಯಾ ಲಾಗಿಂ ಕೊಬು ಆಸೊನ್ ಭುರ್ಗೊ ಕಿತ್ಯಾಕ್ ತುಜೆಲಾಗಿಂ ಕೊಬು ವಿಚಾರಿಲಾಗ್ಲೊ?"
"ತಶೆಂ ನ್ಹಂಯ್... ಭುರ್ಗ್ಯಾಕ್ ತೊ ಕೊಬು ದೋನ್ ಕುಡ್ಕೆ ಕರ್ನ್ ದೀ ಮ್ಹಣಾಲೊ, ಹಾವೆಂ ತಶೆಂಚ್ ಕೆಲೊ, ಉಪ್ರಾಂತ್ ಭುರ್ಗೊ ದೋನ್ ಆಸ್ಚೆ ಚ್ಯಾರ್ ಕುಡ್ಕೆ ಕರ್ನ್ ದೀ ಮ್ಹಣಾಲಾಗ್ಲೊ. ಹಾವೆಂ ತಶೆಂಚ್ ಚಾರ್ ಕುಡ್ಕೆ ಕರ್ನ್ ದಿಲೊ, ಭುರ್ಗೊ ಚ್ಯಾರ್ ಕುಡ್ಕೆ ಆಸ್ಚೆ ಆಟ್ ಕುಡ್ಕೆ ಕರ್ನ್ ದೀಂವ್ಕ್ ಸಳ್ ಕರಿಲಾಗ್ಲೊ, ಹಾವೆಂ ತಶೆಂಚ್ ಆಟ್ ಕುಡ್ಕೆ ಕರ್ನ್ ದಿತಾನಾ, ಭುರ್ಗೊ ಪರತ್ ರಡ್ಲೊ - ಅಪ್ಣಾಕ್ ಆಟ್ ಕುಡ್ಕೆ ಆಸ್ಚೆ ಸೊಳಾ ಕುಡ್ಕೆ ಕರ್ನ್ ದೀ ಮ್ಹಣೊನ್..." ಬೀರ್ಬಲ್ ಅಕ್ಭರಾಕ್ ಸಮ್ಜಾಯ್ಲಾಗ್ಲೊ.
"ಹುಂ.. ತುವೆಂ ಸಾಂಗ್ಚೆಂ ಸತ್ಚ್ ಮ್ಹಣ್ ಚಿಂತ್ಯಾಂ.. ಪುಣ್ ಇತ್ಲೆ ಕುಡ್ಕೆ ಕರುಂಕ್ ತುಕಾ ಕಿತ್ಲೊ ವೇಳ್ ಜಾಯ್?"
"ಉಪ್ರಾಂತ್ ಆಯ್ಕ್.. ಸೊಳಾ ಕುಡ್ಕೆ ಕರ್ತಚ್ ಭುರ್ಗೊ ಪರತ್ ರಡಾಲಾಗ್ಲೊ.. ಮ್ಹಾಕಾ ಇತ್ಲೆ ಕುಡ್ಕೆ ನಾಕಾತ್ - ಮ್ಹಾಕಾ ಪಯ್ಲೆಂಚೆಪರಿಂಚ್ ಏಕ್ ಕೊಬು ಕರ್ನ್ ದೀ ಮ್ಹಣ್.."
ಹ್ಯಾ ಕಾಣ್ಯೆಕ್ ಆನಿ ಆಮ್ಚಾ ಪ್ರಸ್ತುತ್ ಕೊಂಕ್ಣಿ ಸಮಾಜೆಕ್ ಲಾಗ್ಸಿಲೊ ಸಂಬಂಧ್ ಆಸಾ. ವ್ಹಯ್!. ನ್ಹಂಯ್ ಹಾಂಗಾ ಕೊಣ್ ಬೀರ್ಬಲ್ ಆನಿ ಕೊಣ್ ಅಕ್ಭರ್ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ.
ಆಮ್ಚಾ ದೀಸ್ಪಡ್ತ್ಯಾ ಜಿಣ್ಯೆಂತ್ ಆಮಿ ಸಭಾರ್ ಪಾವ್ಟಿಂ ಸಂತೊಸ್ ಪವ್ತಾಂವ್ ತಶೆಂಚ್ ನಿರಾಸ್ ಪಾವ್ತಾಂವ್. ಸಂತೊಸ್ ಪಾವ್ತಾನಾ ಹಾಸ್ತಾಂವ್ ಆನಿ ನಿರಾಶಿ ಜಾತಾನಾ ದುರ್ಸತಾಂವ್. ಹೆಂ ಮನ್ಶ್ಯಾ ಸಂಯ್ಬ್. ಪುಣ್ ಜೆದ್ನಾಂ ನಿರಾಶಿ ಜಾಲ್ಲೆವೆಳಾರ್ ಆಮಿಂ ಆಮ್ಚಾ ನಿರಾಸೆಕ್ ಕಿತೆಂ ಕಾರಾಣ್ ಮ್ಹಣ್ ಚಿಂತ್ಲಾಂ ವಾ ಚಿಂತಾಂವ್?
ವ್ಹಯ್! ಜಾಣಾ - ಹ್ಯಾ ಸಂಸಾರಾಂತ್ ಆಮಿ ಚಂದ್ರಾಕ್ ಕಶೆಂ ಉಡ್ಚೆಂ, ಸಾಗೊರಾಚೆಂ ಉದಾಕ್ ಕಶೆಂ ಅಂಬೊಟ್ ಕರ್ಚೆಂ? ಸುರ್ಯಾಚ್ಯಾ ವೊತಾಕ್ ಕಶೆಂ ಕಾಳೆಂ ಕರ್ಚೆಂ ಹ್ಯಾ ಸಂಗ್ತ್ಯಾಂಚೆರ್ ಕಿತ್ಲೆಂಯ್ ಚಿಂತುಂಕ್ ಸಕ್ತಾಂವ್, ಪುಣ್ ಆಮ್ಚಾ ಮತಿಚೆಂ ಚಿಂತಾಪ್ ಕಿತ್ಲೆಂ ಉಂಚಾಯೆರ್ ಆಸಾ, ಕಿತ್ಲೆಂ ಗುಂಡಾಯೆರ್ ಆಸಾ ಮ್ಹಳ್ಳೆಂ ಚಿಂತುಂಕ್ ಸಕಾನಾಂವ್. ಆಮಿಂ ಕೊಣಾಯ್ಕ್ಯೀ ಜಾಂವ್ ಪುಣ್ ಹೆರಾಂಕ್ ಮೆಜುಂಕ್ ಸಕ್ತಾಂವ್, ಸಕಾನಾಂವ್ ತರ್ ಆಮ್ಕಾಂ ಮಾಪುಂಕ್. ಅಶೆಂ ಕಿತ್ಯಾಕ್?
ಆಮಿಂ ಜಲ್ಮಾಲ್ಲೊ, ಜಿಯೆಂವ್ಚೊ ದೇಶ್ ಪ್ರಜಾಪ್ರಭುತ್ವಾಚೊ, ಹಾಂಗಾ ಆಮ್ಕಾಂ ಸ್ವತಂತ್ರ್ಪಣಿಂ ಚಿಂತುಂಕ್, ಅಭಿವ್ಯಕ್ತ್ ಕರುಂಕ್ ಸ್ವತಂತ್ರ್ ಆಸಾ ಶಿವಾಯ್ ಕಶೇಂಯ್ ಚಿಂತುಂಕ್ ವಾ ಅಭಿವ್ಯಕ್ತ್ ಕರುಂಕ್ ನ್ಹಂಯ್. ಹ್ಯಾ ಗೊಂದೊಳಾ ಮಧೆಂ ಶಿರ್ಕಾಲ್ಲಿಂ ಆಮಿಂ ಆಜ್ ಎಕಾ ಅಸಲ್ಯಾ ಪರಿಗತೆಂತ್ ಜಿಯೆತಾಂವ್ ಮ್ಹಳ್ಯಾರ್ - ಆಮ್ಚಾ ದೀಸ್ಪಡ್ತ್ಯಾ ಜಿಣ್ಯೆಕ್ ಆಮ್ಚೆಲಾಗಿಂ ಏಕ್ ದೋನ್ ನ್ಹಂಯ್, ಸಭಾರ್ ಮುಖಾಂ ಗರ್ಜ್ ಪಡ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಸಂಸಾರ್ ವಳ್ಕತಾ, ಮಾನ್ ದಿತಾ ಮುಖಾಂಕ್ ಮಾತ್ರ್ ಶಿವಾಯ್ ಭಿತರ್ ಆಸ್ಚೆಂ ಬರೆಂ ಯಾ ಸಾರೆಂ ಕೊಣಾಕ್ ಪಡೊನ್ ಗೆಲಾಂ?
ಆಮ್ಚಾ ಸಮಾಜೆಂತ್ ಇತ್ಲಿಂ ಸರ್ವ್ ಸಂಘಟನಾಂ ಆಸಾತ್, ಸಂಘ್ಸಂಸ್ಥೆ ಆಸಾತ್, ಎಕ್ತಾರ್ ಆಸಾತ್. ಆಮ್ಚೆಪಯ್ಕಿ ಕಿತ್ಲೆ ಅಧ್ಯಕ್ಶ್, ಮಾಜಿ ಅಧ್ಯಕ್ಶ್, ಕಾರ್ಯದರ್ಶಿ, ಖಜಾಂಚಿ, ಸಂಚಾಲಕ್, ನಿರ್ದೇಶಕ್, ಸಲ್ಹಾದಾರ್, ಮಾರ್ಗ್ದರ್ಶಕ್, ವಾವ್ರಾಡಿ ಆಸಾತ್? ಥೊಡೆ ಎಕಾಚ್ಯಾಕೀ ಚಡ್ ಸಂಘ್ಸಂಸ್ಥ್ಯಾಂನಿ ಹುದ್ದೆದಾರ್. ಇತ್ಲೆ ಸರ್ವ್ ಆಮ್ಚೆಮಧೆಂ, ಆಮ್ಚೆ ಭಂವ್ತೊಣಿಂ ಆಸೊನ್ಯೀ. ಆಮಿಂ ಕೆಲ್ಲ್ಯಾ ವಾ ಕರ್ಚ್ಯಾ ಕಾಮಾಂನಿ ಆಮ್ಕಾಂ ಕಿತ್ಲೆಂ ಸಮಧಾನ್ ಆಸಾ?
ಆಮಿಂ ಹಿಪೊಕ್ರೆತ್ ಸಂಸ್ರಾಂತ್ ಹಿಪೊಕ್ರೆತ್ ಜಿಣಿ ಜಿಯೆವ್ನ್ ಆಸಾಂವ್ ದೆಕುನ್ ಆಮಿ ಸಮಾಜ್ ಸೆವಾ ಕರ್ಚಿ ಮ್ಹಣ್ತಾಂವ್ ತರ್ಯೀ ಆಮ್ಕಾಂ ಸಮಾಜ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಕಳಿತ್ ನಾ. ಆಮಿ ಕೊಂಕ್ಣಿ ಸೆವಾ/ವಾವ್ರ್ ಕರ್ತಾಂವ್ ಮ್ಹಣ್ತಾಂವ್ ಪುಣ್ ಆಮ್ಚಾ ಕೊಂಕ್ಣಿ ಮೊಗಾಂತ್ ಭರ್ಲ್ಯಾ ಮೊಸೊರ್ ಆನಿ ಕುಸಡಾಯ್ ಮಾತ್ರ್.
ಜಾಂವ್ಕ್ ಪುರೊ ಆಮಿಂ ಪಾಂಚ್, ಧಾ, ಪಂದ್ರಾ, ವೀಸ್, ಪನ್ನಾಸ್ ವರ್ಸಾಂನಿ ಸಮಾಜ್ ಸೆವಾ ಕೆಲ್ಯಾ, ಕೊಣಾ ಕೊಣಾಕ್ ಆಪವ್ನ್ ಹಾಡ್ನ್ ಮಾನ್ ಸಮ್ಮಾನ್ ಕರಯ್ಲಾ, ಫುಲಾಂ ಫಳಾಂ ದಿಲ್ಯಾಂತ್, ಗುಡೆ ಪರ್ತಿಲ್ಯಾತ್, ಫೊಂಡ್ ಪುರ್ಲ್ಯಾತ್ - ಪುಣ್ ಮುಳಾವೆಂ ಏಕ್ ಸವಾಲ್ ಹಾಂಗಾ ಉಭ್ಜತಾ;
"ಹ್ಯಾ ಧಾ,ವೀಸ್, ತೀಸ್, ವಾ ಪನ್ನಾಸ್ ವರ್ಸಾಂನಿ, ಆಮಿಂ ಕಿತ್ಲೆಶ್ಯಾ ಗರಿಬಾಂಚೆಂ ರುದಾನ್ ಆಯ್ಕಲಾಂ? ಕಿತ್ಲೆಶಿಂ ಪಾಕಿಂ ಉಭಾರ್ಲ್ಯಾಂತ್? ಕಿತ್ಲೆಶ್ಯಾ ಬೆಕಾರಿಂಕ್ ಕಾಮ್ ಮೆಳಾಶೆಂ ಕೆಲಾಂ? ಕಿತ್ಲ್ಯಾ ಪಿಡೆಸ್ತಾಂಕ್ ಕುಮೊಕ್ ದಿಲ್ಯಾ?"
ಮಾಫ್ ಕರಾ, ಹಾವೆಂ ಸಾಂಗ್ಚೊ ಇರಾದೊ, ಆಮಿಂ ಹುದ್ದೇದಾರ್ ಜಾಂವ್ಚೆಂ ಪಾದ್ರಿಂ ಮಾದ್ರಿಂಚಿಂ ಕಾಮಾಂ ಕರುಂಕ್ ನ್ಹಂಯ್ ಮ್ಹಣ್ ಚಿಂತೆಲ್ಯಾಂನಿ ’ಹಿಂ ಕಾಮಾಂ ಪಾದ್ರಿಂ ಮಾದ್ರಿಂಚಿ ಮಾತ್ರ್?’ ಮ್ಹಳ್ಳೆಂ ಸವಾಲ್. ಆಮಿಂ ಆಮ್ಚಾ ಫಿರ್ಗಜೆಂನಿ ಜಾಯ್ತಿಂ ಭಾಂದ್ಪಾಂ ಭಾಂದ್ಲ್ಯಾಂತ್ ವಾ ಆಸ್ಚಿಂ ಭಾಂದ್ಪಾಂ ಪರ್ತುನ್ ಅನಿಕ್ಯೀ ವ್ಹಡ್ ಭಾಂದ್ಪಾಂ ಭಾಂದಯ್ಲ್ಯಾಂತ್ ಆಸೊಂಕ್ ಪುರೊ. ಪತ್ರಾಂ-ಸಾಯ್ಟಾಂನಿ ಆಮ್ಚಿ ರಂಗಾಳ್ ತಸ್ವೀರ್ ಸದಾಂಯ್ ಯೆತಾ ಜಾಂವ್ಕ್ ಪುರೊ. ಪುಣ್ ಆಮಿಂ ಕಿತ್ಲಿಂ ಸಾಧನಾಂ ಕೆಲ್ಯಾರ್ಯೀ, ಜೆದ್ನಾಂ ಪಾಸೊನ್ ಆಮ್ಚಾ ಕಾನಾಂಕ್ ಆಮ್ಚಾ ಸಮಾಜೆಂತ್ಲ್ಯಾ ಲ್ಹಾನಾಂಚಿ ಅಸ್ಕತ್ ಬೋಬ್ ಆಯ್ಕನಾಂಗೀ, ಜೆದ್ನಾಂ ಆಮ್ಚಾ ದೊಳ್ಯಾಂಕ್ ಆಮ್ಚಾ ಸಮಾಜೆಂತ್ಲಿಂ ವಿಣ್ಗಿಂ ದಿಸಾನಾಂತ್ಗೀ, ತಿತ್ತುನ್ ಪರ್ಯಾಂತ್ ಆಮಿಂ ಖಂಚ್ಯಾಯ್ ಸಂಘ್ಸಂಸ್ಥ್ಯಾಕ್ ಫಾವೊ ಜಾಲ್ಲಿಂ ನ್ಹಂಯ್.
ಮದರ್ ತೆರೆಜಾಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ "ಆಯ್ಚಾ ಸಮಾಜೆಂತ್ ವ್ಹಡ್ಲಿ ಭುಕ್, ಖಾಣಾಚಿ ನ್ಹಂಯ್, ಆಮಿಂ ಕೊಣಾಕ್ಚ್ ನಾಕಾ ಜಾಲ್ಲಿಂ ಮ್ಹಳ್ಳೆಂ ಚಿಂತಾಪ್". "ಆಜ್ಕಾಲ್ ಮನಿಸ್ ಮೊಗಾಕ್ ಭುಕೆಲಾ, ಸಮಾಜೆಂತ್ ಸೆಜ್ಸಾಂಬಾರ್ ಮ್ಹಳ್ಳೆಂ ಚಿಂತಾಪ್ ಉಣೆಂ ಜಾಲಾಂ, ಸೆಜಾರಿಂ ಎಕಾಮೆಕಾ ಆಧಾರ್ ಜಾಂವ್ಚ್ಯಾಕೀ ಮೊಸ್ರಾನ್ ಪೆಟ್ಲ್ಯಾಂತ್, ಕುಟ್ಮಾಂತ್ ದುಡು ಕರ್ಚ್ಯಾ ಧಾಂವ್ಣೆಂತ್ ಎಕಾಮೆಕಾ ಖಾತಿರ್ ವೇಳ್ ನಾ". ಹಿ ಭುಕ್ ನ್ಹಂಯ್?
ಹ್ಯಾ ಪರಿಗತೆಕ್ ಸುಧ್ರಾಂವ್ಕ್ ಆಮಿ ಕಿತ್ಲೆ ’ಆಮ್ಚಾ ಬಾಪಾ, ನಮಾನ್ ಮರಿಯೆ, ಆನಂದ್ ಬಾಪಾ’ ಭೆಟಯ್ಜಾಯ್? ಕಿತ್ಲಿಂ ಭಾಗೆವಂತ್ ವೊರಾಂ ಕರಿಜಾಯ್? ಕಿತ್ಲಿಂ ಪಾನಾಂ ವಾಂಜೆಲ್ ವಾಚಿಜಾಯ್? ಹ್ಯಾ ಸವಾಲಾಂಕ್ ಖಂಯ್ ಆಸಾ ಜವಾಬ್?
ಆಮ್ಚಾ ಕೊಂಕ್ಣಿ ಸಮಾಜೆಂತ್ ಇತ್ಲೆಂ ಸರ್ವ್ ಆಸೊನ್ಯೀ ಆಮ್ಚೆ ಮುಳಾವೆ ಶೆವೊಟ್ ಹಾಲ್ತಾತ್, ಆಮ್ಚೆಂ ದಾಕ್ಡ್ಯಾಂಚೆಂ ಸಂಚಾಲನ್ ಸಯ್ತ್ ಎಕಾ ಮಾರಾಕ್ ಥರ್ಥರೊನ್ ಕಾಂಪ್ತಾ. ಸರ್ವ್ ಜಾಗ್ಯಾಂನಿ ಬಂಡ್ವಾಳ್ಶಾಹಿ ಚಿಂತಾಪ್ ರಾಜ್ ಕರ್ತಾ. ಜೆದೊಳ್ ಪರ್ಯಾಂತ್ ಅಪ್ಲೆಂ ಚಲ್ತಾ ತೆದೊಳ್ ಪರ್ಯಾಂತ್ ಆಮ್ಚಿ ಸೆವಾ, ಜೆದ್ನಾಂ ಆಮ್ಚಿ ದಾಳ್ ಶಿಜಾನಾ, ತವಳ್ ಆಮಿಂ ತೆಂ ಸಂಚಾಲನ್ ಫುಟಂವ್ಕ್ ಪಾಟಿಂ ಸರಾನಾಂವ್. ಆಮ್ಚೊ ಇರಾದೊ ಹುದ್ದೊ, ಅಧಿಕಾರ್, ನಾಂವ್ ಶಿವಾಯ್ ಕಾಮಾಂ ನ್ಹಂಯ್. ದೆಕುನ್ ಏಕ್ ಸಂಚಾಲನ್ ಆಸ್ಚೆಂ ದೋನ್ ಕುಡ್ಕೆ ಕರ್ತಾಂವ್, ದೋನ್ ಆಸ್ಚಿಂ ಚ್ಯಾರ್, ಚ್ಯಾರ್ ಆಸ್ಚಿಂ ಆಟ್, ಆಟ್ ಆಸ್ಚಿಂ ಸೊಳಾ.. ಭಿಲ್ಕುಲ್ ವಯ್ಲ್ಯಾ ಅಕ್ಭರ್ ಬೀರ್ಬಲಾಚ್ಯಾ ಕಾಣ್ಯೆಂತ್ ಆಸ್ಚೆಪರಿಂ. ದೆಕುನ್ ಆಮ್ಚಾ ಸಮಾಜೆಂತ್ಲೆಂ ನಾಗ್ಡೆಂ ಸತ್ ಭೋವ್ ವಿದ್ರೂಪ್ ಜಾವ್ನ್ ಆಮ್ಕಾಂ ದಿಸ್ತಾ;
"ಆಮ್ಚಾ ಸಮಾಜೆಂತ್ ಎಕಾಕ್ ದೋನ್, ದೊನಾಕ್ ಚ್ಯಾರ್ ಆನಿ ಚ್ಯಾರಾಂಕ್ ಹಜಾರಾಂಚೆ ಹಜಾರ್ ಕುಡ್ಕೆ ತರ್ನ್, ಹ್ಯಾ ಚುರಾಂಚೆಂ ತಿರ್ಕುಟ್ ಕರ್ಚಿ ಕಲಾ ಆಮ್ಕಾಂ ಹರ್ಯೆಕ್ಲ್ಯಾಂಚ್ಯಾ ರಗ್ತಾಂತ್ ಭರೊನ್ ಗೆಲ್ಯಾ, ಕಿತೆಂಯ್ ನಾ ತರ್ ಹ್ಯಾ ತಿರ್ಕುಟ್ಯಾಂಕ್ ಲಾಗಿಂ ಜೊಡುಂಕ್ ಸಕ್ತೆಲೆ"
ಅಶೆಂ ಮ್ಹಣೊನ್ ಅಪ್ಲ್ಯಾ ಸ್ವ-ಫಾಯ್ದ್ಯಾಕ್ ಅಸಲ್ಯಾ ತಿರ್ಕುಟ್ಯಾಂಕ್ ಲಾಗಿಂ ಹಾಡ್ನ್ ಎಕಾ ಸತ್ರೆಪಂದಾ ಹಾಡ್ಲೆಂ ಮ್ಹಣ್ ಸಂಸ್ರಾಕಾ ಹರ್ಧೆಂ ಪೆಟ್ಚಿಂ ಕಾಂಯ್ ಉಣಿಂ ನಾಂತ್. ಜೆದ್ನಾಂ ಪರ್ಯಾಂತ್, ಆಮ್ಕಾಂ, ಆಮ್ಚಾಂಕ್, ಆಮ್ಕಾಂ ಹರ್ಸಿತೆಲ್ಯಾಂಚೆಂ ಬೊಳ್ಕೆಂ ಭರ್ತಾ, ಮಾನ್ ಸಮ್ಮಾನ್ ಮೆಳ್ತಾ, ಪ್ರಶಸ್ತ್ಯೊ ಭಿರುದೊ ಮೆಳ್ತಾತ್, ತೆದೊಳ್ ಪರ್ಯಾಂತ್ ಆಮಿ ಹ್ಯಾ ತಿರ್ಕುಟ್ಯಾಂಕ್ ಕೊಬಾಪರಿಂ ಕಿತ್ಲೆ ಪಾವ್ಟಿಂ ಗಾಣ್ಯಾಕ್ ದೀಂವ್ಕ್ಯೀ ತಯಾರ್.
ಆತಾಂ ಸಂಸಾರಾಕ್ ಬೋಟ್ ಜೊಕ್ಚ್ಯಾಧಿಂ ಆಮಿಂ (ಹಾಂವ್ ಆನಿ ತುಂ) ಏಕ್ ಸವಾಲ್ ಆಮ್ಕಾಂಚ್ ವಿಚಾರ್ಯಾಂಗಿ?
"ಆಮಿಂ ಹ್ಯಾ ಪರಿಗತೆಂತ್ ಮೊಡ್ತೆಲ್ಯಾಂಚಾ (Break) ಪಂಗ್ತೆರ್ ಆಸಾಂವ್ ವಾ ಜೊಡ್ತೆಲ್ಯಾಂಚ್ಯಾ (Unite) ಪಂಗ್ತೆರ್ ಆಸಾಂವ್?"
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
