ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 5
ಮೊಳ್ಬಾಚಿಂ ದೆಳಿಂ
ಬೂಕ್: ಮೊಳ್ಬಾಚಿಂ ದೆಳಿಂ
ಕವಿ: ನೆಲ್ಲು, ಪೆರ್ಮನ್ನೂರ್
ಪ್ರಸ್ತಾವನ್: ಮಾವ್ರಿಸ್, ಶಾಂತಿಪುರ
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 76
ಮೋಲ್: ರು. 30
ಪ್ರಕಾಶಕ್: ಕಾವ್ಯಾಘರ್ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2001
ಸಮೀಕ್ಶಾ ಚಲಯ್ಣಾರ್: ಆಂಟನಿ ಮಿನೇಜಸ್
ತಾರಿಕ್: 10 ಜೂನ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಆಂಟನಿ ಮಿನೇಜಸ್
ನೆಲ್ಲು ಪೆರ್ಮನ್ನೂರ್
ಕವಿಚಿ ವ್ಹಳೊಕ್:
ಪೆರ್ಮನ್ನೂರ್ ಫಿರ್ಗಜೆಚೊ ಫಾಮಾದ್ ಕಲಾಕಾರ್, ಸಂಗೀತ್ಕಾರ್ ಆನಿ ಕವಿ ಐಸಾಕ್ ವೇಗಸ್ ಆನಿ ಶ್ರೀಮತಿ ಡೇಝಿ ವೇಗಸ್ ಹಾಂಚೊ ಮಾಲ್ಘಡೊ ಪೂತ್ ನೇವಿಲ್ ವೇಗಸ್. ನೆಲ್ಲು ಪೆರ್ಮನ್ನೂರ್ ಮ್ಹಳ್ಳ್ಯಾ ಲಿಖ್ಣೆನಾಂವಾನ್ ಬರಂವ್ಚೊ ತೊ ಎದೊಳ್ಚ್ಚ್ ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ವಳ್ಕಿಚೊ ಜಾಲಾ.
ನೆಲ್ಲು ಪೆರ್ಮನ್ನೂರ್ ಹಾಣೆಂ ಕೊಂಕ್ಣೆಂತ್ ಎದೊಳ್ಚ್ಚ್ 25 ಕವಿತಾಂ, 15 ಮಟ್ವ್ಯೊ ಕಾಣಿಯೊ, 3 ಕೊಂಕ್ಣಿ ನಾಟ್ಕುಳೆ ಬರಯ್ಲ್ಯಾತ್. ತಶೆಂಚ್ ಎಕ್ ತುಳು ನಾಟಕ್ಯೀ ಬರಯ್ಲಾ. ಆಕಾಶಾವಾಣಿ, ಮಂಗ್ಳುರ್ ಹಾಂತುಂ ತೀನ್ ರೇಡಿಯೊ ಕಾರ್ಯಕ್ರಮಾಂ ದೀವ್ನ್ ತೊ ಆಕಾಶಾವಾಣಿ ಕಲಾಕಾರ್ಯ್ ಜಾಲಾ. ತಾಚಿಂ ಕವಿತಾಂ ಆನಿ ಬರ್ಪಾಂ ದಿವೊ, ಕಾಣಿಕ್, ಉಮಾಳೊ, ರಾಕ್ಣೊ ಆನಿ ಆಮ್ಚೊ ಯುವಕ್ ಆನಿ ದುಸ್ರ್ಯಾ ಪತ್ರಾಂನಿ ಪರ್ಗಟ್ ಜಾಲ್ಯಾಂತ್ ಆನಿ ಆತಾಂಯ್ ಪರ್ಗಟ್ ಜಾತೆಚ್ಚ್ ಆಸಾತ್. ಮೊಳ್ಬಾಚಿಂ ದೆಳಿಂ ತಾಚೊ ಪರ್ಗಟ್ ಜಾಂವ್ಚೊ ಪಯ್ಲೊ ಕವಿತಾಜಮೊ ಜಾವ್ನಾಸಾ.
ಸಮೀಕ್ಶಾ ಲೇಖನ್
ಕವಿಚಿ ನಿಸಾಣ್ ಮೊಳ್ಬಾಕ್ ತೆಂಕ್ತಾನಾ!!
ಮೊಳ್ಬಾಚಿಂ ದೆಳಿಂ ಕವಿತಾ ಜಮ್ಯಾಂತ್ಲ್ಯಾ ಕವಿತಾಂಕ್ ದೋನ್ ಭಾಗ್ ಕರ್ಯೆತಾ. ಪಯ್ಲೊ ಕವಿಕ್ ಕೊಂಕ್ಣೆ ಥಂಯ್ ಆಸ್ಚೊ ಮೋಗ್, ದುಸ್ರೊ ಮೋಗ್ ಆನಿ ಚತ್ರಾಯ್. ’ತುಮಿಂಚ್ ರಾಕಾ ಮ್ಹಳ್ಳಿ ಕವಿತಾ ಆಮಿ ವಾಚುಂ ಜಾಲ್ಯಾರ್ ತಾಕಾ ಕೊಂಕ್ಣೆ ಥಂಯ್ ಆಸ್ಚೊ ಹುಸ್ಕೊ ಕಿತ್ಲೊ ಮ್ಹಳ್ಳೆಂ ಸ್ವಶ್ಟ್ ಥರಾನ್ ತಾಚಾಚ್ ಉತ್ರಾಂನಿ ಕಳ್ತಾ.
"ಕೊಂಕ್ಣಿ ದುದಾಂ ಗೆಲಿಂ ಸುಕೊನ್
ಕೊಂಕ್ಣಿ ಪಾನೆ ವೆಲೆ ಕಾಪುನ್
ಫಿಂರ್ಗೆಕ್ ಮುರೇ ಆಯ್ಲೆ ಫುಟೆ
ಕೊಂಕ್ಣಿಂ ಕಾಳ್ಜಾಂ ಭಾಂದ್ ತುಟ್ಲೆಂ"
ಆಜ್ಕಾಲ್ ಕೊಣೀ ಕೊಂಕ್ಣೆಕ್ ಖಾಯ್ಸ್ ಕರಿನಾಂತ್, ಕೊಣೀ ಕೊಂಕ್ಣೆಕ್ ಲಾಗಿಂ ಕರುಂಕ್ ಆಶೆನಾಂತ್ ಮ್ಹಣ್ ಮಸ್ತ್ ದುಃಖಾನ್ ಸಾಂಗ್ತಾ. ಕವಿ ಆಪ್ಲ್ಯಾ "ಮೊಗಾಳ್ ಅಭಿಮಾನಿ’ ಮ್ಹಳ್ಳ್ಯಾ ಕವಿತೆಂತ್ ಹರ್ಯೆಕಾ ಕೊಂಕ್ಣಿ ಮನ್ಶ್ಯಾಕ್ ಕವಿ ಜಾಂವ್ಕ್ ಆಪವ್ಣೆಂ ದಿತಾಸ್ತಾನಾ ಆಪ್ಲೆ ಅತ್ರೇಗ್ ತೊ ಅಶೆಂ ಉಚಾರ್ತಾ.
"ಅಭಿಮಾನಿ ಮಿತ್ರಾ ಕೊಂಕ್ಣಿ ಮಾತೆ ಸುಪುತ್ರಾ
ಕಶೆಂ ಕಳ್ನಾಂ ತುಕಾ ಎಕ್ಲ್ಯಾಕ್ ಜಿಬೆ ಗೊಡ್ಸಾಣ್ ಧಾಡುಂ"
ಹಾಂಗಾಸರ್ ಕವಿ ಆಪ್ಲ್ಯಾ ಅಭಿಮಾನಿಂಕ್ ಕೊಂಕ್ಣಿ ಮಾತೆ ಸುಪುತ್ರಾ ಮ್ಹಣ್ ಆಪವ್ನ್, ತಾಂಕಾ ಕೊಂಕ್ಣಿ ಮಾತೆಕ್ ಅಭಿಮಾನಾನ್ ಪಳೆವ್ನ್, ತಿಚಾ ಉದರ್ಗತೆಖಾತಿರ್ ವಾವ್ರುಂಕ್ ಉಲೊ ದಿತಾ. ’ತೊ ತಸೊಚ್’ ಮ್ಹಳ್ಯಾ ಕವಿತೆಂತ್ ಕವಿ ಖಂಯ್ ತರೀ ಕಷ್ಟಾಲಾ. ಫಾವೊ ತೊ ಮಾನ್ ಆನಿ ಸಹಕಾರ್ ಲೊಕಾ ಥಾವ್ನ್ ತಾಕಾ ಮೆಳೊಂಕ್ ನಾ. ಕೊಣೀಂ ಬರೆಂ ಮ್ಹಣ್ತೆಲೆ ಆತಾಂ ನಾಂ ಜಾಲ್ಯಾತ್. ಶಾಭಾಸ್ಕಿ ದಿಂವ್ಚೆಂ ಉಣೆ ಜಾಲ್ಯಾತ್ ಆನಿ ವೊಪಾರಿ ಮಾರ್ನ್ ಕವಿಂವಿಶಿಂ ಉಲ್ಟೆಂ ಉಲಂವ್ಚೆ ಚಡ್ ಜಾಲ್ಯಾತ್ ಆನಿ ಕವಿಕ್ ಪಿಸೊ ಮ್ಹಣೊಂಕ್ ಸಯ್ತ್ ಲೋಕ್ ಪಾಟಿಂ ಸರಾನಾ ಮ್ಹಣ್ ಹ್ಯಾ ಉತ್ರಾಂನಿ ಸಾಂಗ್ತಾ;
"ಖೊಟ್ಯಾ ದುಷ್ಟ್ಯಾ ಪುರಿನಾಕಾರೇ ಕವಿಕ್ ತೊ ಮೊರ್ಚೆ ಆದಿಂ ತೊ ವಾಂಚೊಕ್ ಜಾಯ್
ತುಂ ತಾಕಾ ಮಾರಿನಾಕಾ ತಾಚ್ಯಾ ಕಸ್ಟಾಂಚೊ ಫಳ್ ಮೆಳ್ಚ್ಯಾ ಆಧಿಂ" (ತೊ ತಸೊಚ್)
ಎಕಾ ಕಾಳಾರ್ ಹರ್ಯೇಕ್ಲ್ಯಾಕ್ ಕೊಂಕ್ಣಿ ಮಾತೆಚೊ ಸುಪುತ್ರ್ ಮ್ಹಳ್ಳೊ ಕವಿ ಆತಾಂ "ಖೊಟ್ಯಾ ದುಷ್ಟ್ಯಾ’ ಮ್ಹಣೊನ್ ತಾಂಚೆಂ ಥಂಯ್ ರಾಗಾರ್ ಜಾವ್ನ್ ಆಪ್ಲಿ ಶಿಣ್ ಉಚಾರ್ತಾ ಆನಿ ಕೊಂಕ್ಣೆ ಖಾತಿರ್ ಕಾಮ್ ಕರ್ತೆಲ್ಯಾ ಮನ್ಶ್ಯಾಂ ವಿರೋಧ್ ಕೊಣೆಂಯ್ ಕಿತೆಂಯ್ ಮ್ಹಳ್ಯಾರ್ ವ ತಾಂಕಾ ಕಿತೆಂಯ್ ವಾಯ್ಟ್ ಕೆಲ್ಯಾರ್ ಆಪುಣ್ ವಗೊಂ ರಾಂವ್ಚೊನಾಂ ಮ್ಹಣ್ ಸಾಂಗೊನ್ ಹಿ ಕವಿತಾ ತೊ ಅಶಿ ಆಖೇರ್ ಕರ್ತಾ.
"ಉಲ್ಟೆಂ ಉಲಯ್ಲ್ಯಾರ್ ತೊ ಲಿಖ್ಣೆನ್ಂಚ್ ಮಾರ್ತಾ ಕಾವ್ಯಾನಿಂಚ್ ಪುರುನ್ ಸೊಡ್ತಾ
ಮ್ಹಜೆಂ ತುಜೆಂ ಉಲಯ್ ತಾಚಿ ಖಭಾರ್ ಆಮ್ಕಾಂ ನಾಕಾ ತೊ ಜಲ್ಮಾನ್ ತಸೊಚ್"
ಎಕ್ ಲಿಖ್ಣಿ ದರ್ಲೆಲ್ಲ್ಯಾ ಮನ್ಶ್ಯಾನ್ ಮ್ಹಣ್ಜೆ ಎಕಾ ಕವಿಕ್ ಯಾ ಎಕಾ ಲೇಖಕಾಕ್ ಕಿತೆಂ ಸಕ್ಕಡ್ ಆಪ್ಲ್ಯೆ ಲಿಖ್ಣೆ ಥಾವ್ನ್ ಕರುಂಕ್ ಜಾತಾ ಮ್ಹಳ್ಳೆಂ ತೊ ಆಮ್ಕಾಂ ಉಗ್ತ್ಯಾನ್ ಸಾಂಗ್ತಾ. ತಿತ್ಲೆಂಚ್ ನೈಂ ಕವಿ ಚಿಂತ್ಪಾನ್ ಮಸ್ತ್ ಗ್ರೇಸ್ತ್ ಆನಿ ತೊ ಕೆದ್ನಾಂಚ್ ಕೊಣಾಯ್ಕಿ ವಾಯ್ಟ್ ಚಿಂತಿನಾ ತರ್ ತಾಚಿ ಖಭಾರ್ ಆಮ್ಕಾಂ ಕಿತ್ಯಾಕ್ ಮ್ಹಣ್ ಸಾಂಗ್ತಾ. ’ದೆಣೆಂ ದಿಲ್ಲ್ಯಾ ದೆವಾ’ ಕವಿತೆಂತ್ ಕವಿ ಆಪ್ಲ್ಯಾ ದುರ್ಬಳ್ಕಾಯೆವಿಶಿಂ ಸಾಂಗ್ತಾ ಆನಿ ಆಪ್ಣಾಕ್ ಭಿಕಾರಿ ಮ್ಹಣ್ ವೊಲಾಯ್ತಾ ಆನಿ ದೆವಾಕ್ ಸವಾಲ್ ಕರ್ನ್ ಅಶೆಂ ಮ್ಹಣ್ತಾ;
"ರಗ್ತಾಂತ್ಚ್ ದೆಣೆಂ ವೊಂಪ್ಲೆಂಯ್ ಎಕ್ ಬರೆಂ ಜಿಣೆಂಯ್ ಶಿಂಪ್ತೊಯ್
ಹಾಂವ್ ಕಾಂಯ್ ಪೊಯ್ಶಾಂವಾಲೊ ಜಾಲ್ಯಾರ್ ತುಕಾ ಕಿತೆಂ ಉಣೆಂ ಪಡ್ತೆಂ"? (ದೆಣೆಂ ದಿಲ್ಲ್ಯಾ ದೆವಾ)
ನಿಜಾಯ್ಕಿ ಆಪುಣ್ ಗ್ರೇಸ್ತ್ ನೈಂ ಮ್ಹಣ್ ಸಾಂಗ್ಚೊ ತೊ ತಾಕಾ ಹಿಂ ದೆಣಿಂ ದಿಲ್ಲ್ಯಾ ದೆವಾಕ್ ತಾಣೆಂಚ್ ದಿಲ್ಲೆಂ ದೆಣೆ ವಾಪರುನ್ ತೊ ದೆವಾಕ್ಚ್ ದುರ್ಸತಾ. ತರೀ ದೆವ್ ತಾಕಾ ಆಯ್ಕಾತಾ ಮ್ಹಣ್ಚೊ ಕವಿ ಆಪ್ಲ್ಯಾಚ್ ಭಿತರ್ಲ್ಯಾ ಆತ್ಮ್ಯಾಕ್ ಆಪ್ಲೊಚ್ ಜಲ್ಮಾ ದಿವಸ್ ಗದ್ದಾಳಾಯೆನ್ ಆಚರ್ಸುಂಕ್ಚ್ ಆಶೆಂವ್ಚ್ಯಾ ವೆಳಾರ್ ಆಪ್ಣಾಕ್ಚ್ ನಿರಾಸ್ ಜಾವ್ನ್ ಭುಜಯ್ತಾ - ಭುಜ್ವಣ್ ಮ್ಹಳ್ಳ್ಯಾ ಕವಿತೆ ದ್ವಾರಿಂ.
"ಮಾಸಾ ಪೊಡಿನಾಂತ್ ಬಿಂಬ್ಲ್ಯಾ ಕಡಿ ಮಾತ್ರ್ ಆಜ್ ತುಜೊ ಜಲ್ಮಾ ದಿವಸ್
ಮ್ಹಜ್ಯಾ ದುಬ್ಳ್ಯಾ ಅತ್ಮ್ಯಾ ಯೆಂವ್ಚ್ಯಾ ವರ್ಸಾ ಪಳೆಯಾಂ ಆಜ್ ಪೇಜ್ ಜೆವ್ಯಾಂ" (ಭುಜ್ವಣ್)
ಕವಿ ಫಿಂರ್ಗಿ ಭಾಷೆ ವಿಶ್ಯಾಂತ್ ಬೆಜಾರಾಯ್ ಉಚಾರ್ತಾ ಕಿತ್ಯಾಕ್ ಮ್ಹಳ್ಳ್ಯಾರ್ ಹರ್ಯೇಕ್ಲೊ ಆಜ್ ಕೊಂಕ್ಣಿ ಸಾಂಡುನ್ ಫಿಂರ್ಗಿ ಆಪ್ಣಾಯ್ತಾ ತೆಂ ತಾಕಾ ಪಳೆಂವ್ಕ್ ಜಾಯ್ನಾ ಆನಿ ಅರ್ಧಿ ಕೊಂಕ್ಣಿ ಆನಿ ಅರ್ಧಿ ಫಿಂರ್ಗಿ ಉಲೈತಾನಾ ಜಾಂವ್ಚೆ ತೆ ಭಾಂದ್ಪಾಸ್ ಪಳೆವ್ನ್ ’ತುಮಿಂಚ್ ರಾಕಾ’ ಮ್ಹಳ್ಳಿ ಕವಿತಾ ತೊ ಅಶಿ ಅಖೇರ್ ಕರ್ತಾ.
"ಕೊಂಕ್ಣಿ ಶೆತಾಂತ್ ಫಿಂರ್ಗಿ ವಾರೆಂ ಫಿಂರ್ಗೆಕ್ ಲಾಗುನ್
ಕೊಂಕ್ಣಿ ಸಾರೆಂ ಶಿರಾಪ್ ಜಶೆಂ ಬೆಸ್ಲ್ಯಾಂತ್ ಫಿಂರ್ಗಿ ರುವಾಂ
ಕೊಂಕ್ಣ್ಯೆಂತ್ ಕೊಣೀ ವಕಾತ್ ಸೊಂವಾ" (ತುಮಿಂಚ್ ರಾಕಾ)
ದುಸ್ರ್ಯಾ ಭಾಗಾಂತ್ ಪಳೆಂವ್ ಜಾಲ್ಯಾರ್ ಕವಿ ಮೊಗಾಚಿಂ ರುಪಾಂ ಆಮ್ಕಾಂ ದಾಕವ್ನ್ ಮೊಗಾ ಥಂಯ್ ದಿಸಾ ಉಜ್ವಾಡಾಕ್ ಸ್ವಪ್ಣಾಂ ದೆಕ್ತೆಲ್ಯಾಂಕ್ ಮೊಗಾನ್ ಮೊಳ್ಬಾಕ್ ದೆಳಿಂ ಲಾಯ್ತಾ. ನೆಲ್ಲು ತರ್ನೊ ಕವಿ ಜಾಲ್ಲ್ಯಾನ್ ಹ್ಯಾ ಕವಿಚ್ಯಾ ಮನಾಂತ್ ಮೋಗ್ ಉಬ್ಜೊಂವ್ಚೊ ಸಹಜ್ ಜಾವ್ನಾಸಾ. ಆನಿ ತೊಚ್ ಮೊಳ್ಬಾಕ್ ದೆಳೆಂ ಲಾಂವ್ಕ್ ಪ್ರಯತ್ನ್ ಕರ್ತಾಂ ಆಪ್ಲ್ಯಾ "ಮೊಗಾಚೆಂ ಪಿಶೆಂ ಮ್ಹಳ್ಳ್ಯಾ ಕವಿತೆ ದ್ವಾರಿಂ.
"ಆಮ್ಚ್ಯಾ ಮೊಗಾಚಾ ಖೆಳಾಕ್ ಹಾಂವ್ ಮೊಳಾಬ್ ಜಾತಾಂ.
ತುಂ ಚಂದ್ರ್ ಜಾ ಹಾಂವ್ ಕಾಳೊಕ್ ಪಾಂಗುರ್ತಾಂ
ತುಂ ಚಾಂದ್ನೆಂ ಜಾ ಮೊಗಾಚೊ ಖೆಳ್ ಖೆಳ್ಯಾಂ" (ಮೊಗಾಚೆಂ ಪಿಶೆಂ)
ಕವಿ ಸದಾಂಚ್ ಮೊಳ್ಬಾ ತಾರಾಂ ಮೆಜ್ತಾ. ಆನಿ ಆಪ್ಲ್ಯಾ ಮೊಗಾಚ್ಯಾ ಮ್ಹಣ್ಜೆ ಚಲಿಯೆಚ್ಯಾ ದಾಂಳ್ಬಾ ಗಾಲಾಂಚೆರ್ ಕವಿಚ್ಯಾ ಕಾಳ್ಜಾಚಿ ಉಡಿ ಚಲಿಯೆಚ್ಯಾ ಮೊರಾಚಾ ಚಾಲಿಂತ್ ಮೆಳಯ್ತಾ ಆನಿ ಮಾಣ್ಕಾ ತಸಲ್ಯಾ ಚಲಿಯೆಕ್ ತೊ ಆಶೆವ್ನ್ ಅಶೆಂ ಮ್ಹಣ್ತಾ;
"ತುಜ್ಯಾ ನಿಳ್ಶ್ಯಾ ದೊಳ್ಯಾಂನಿ ತುಜ್ಯಾ ತಾಂಬ್ಶ್ಯಾ ಆಸ್ಡ್ಯಾಂನಿ ಮೊಳ್ಬಾ ಧಾಂಕಣ್ ಆಸಾ!
ಜರ್ ತುಂ ಮ್ಹಾಕಾ ತಾಂಚೆರ್ ರಾಜ್ವಟ್ಕಿ ದಿಶಿ ಹಾಂವ್ ಖುಶಾಲ್ ಜಾತಾಂ"
ಮೊಗಾಚ್ಯಾ ಯೆಣ್ಯಾಕ್ ರಾಕೊನ್ ರಾವ್ಲ್ಲೊ ಕವಿ ತಾಚೊ ಮೋಗ್ ತಾಕಾ ಲಾಭಾನಾತ್ಲ್ಲ್ಯಾ ವೆಳಾರ್, ಆಪ್ಲ್ಯಾ ಕಾಳ್ಜಾಂತ್ಲಿ ಬೆಜಾರಾಯ್ ಕವಿ ಅಶೆಂ ಉಚಾರ್ತಾ ಸಪಾಣ್ ತುಜೆಂ ಯೆಣೆಂ ಮ್ಹಳ್ಳ್ಯಾ ಕವಿತೆಂತ್;
"ಯೆಣ್ಯಾಕ್ ತುಜ್ಯಾ ರಾಕೊನ್ ರಾಕೊನ್ ಸುಗ್ಗಿ ಲುಂವೊನ್ ಕೊಳ್ಕೆಂ ಲಾಯ್ಲೆಂ
ಶಿಮ್ಟೆಂ ಬೊಂಡೆ ತುಕಾ ಸೊಡ್ಲ್ಲೆ ಆಡೊಸಾರ್ ವಚೊನ್ ನಾರ್ಲ್ ಜಾಲೆ" (ಸಪಾಣ್ ತುಜೆಂ ಯೆಣೆಂ)
ಆಯ್ಕಾಯಾ ಹ್ಯಾ ಕವಿಚೆಂ ಆಸ್ಕಾರ್ ಹುಸ್ಕಾರ್ ಆಪ್ಣೆಂ ರಾಕೊನ್ ರಾವ್ಲ್ಲ್ಯಾ ಮೊಗಾ ಥಂಯ್ ಹ್ಯಾ ಕವಿತಾಂತ್ ಅಶೆಂ ಮುಖಾರ್ಸಿಲಾಂ.
"ಜಂದ್ಳ್ಯಾ ಝಾಡಾಂ ವಾಡೊನ್ ಯೆತಾಂ ಚಾಚಾರ್ ಬೊಂಡಾಂ ಖುಂಟುನ್ ಕಾಡ್ಲಿಂ
ಕಾಪ್ಸಾಂ ಮೊಡಾಂ ಬಿರ್ಮತ್ ಪಾವೊನ್ ಆಪ್ಣಾಕಾಚ್ ಝರೊನ್ ಭುಮಿರ್ ಪಡ್ಲಿಂ. (ಸಪಾಣ್ ತುಜೆಂ ಯೆಣೆಂ)
ಕವಿ ಎಕ್ಸುರೊ ಜಾವ್ನ್ ಮೊಳ್ಬಾಕ್ ದೆಖ್ತಾ ತರ್ ನೆಕೆತ್ರಾಂ ತಾಚಿಂ ಖೆಳ್ಕುಳಾಂ ಕರ್ಚೆಪರಿಂ ತಾಕಾ ಭಗ್ತಾ. ಕಿತ್ಯಾ ತಾಚೊ ಮೋಗ್ ತಾಕಾ ಮೆಳೊಂಕ್ ನಾಂ. ತೆದ್ನಾಂ ತೊ ಮ್ಹಣ್ತಾ;
"ಕಮ್ರಾರ್ ಬುಡ್ಕುಲೊ ಬುಡ್ಕುಲ್ಯಾಂತ್ ಮೋಗ್ ಮುಗೆಲೊ
ವ್ಹಾವೊವ್ನ್ ವೆತಾ ಪೋರಿ ಪಲ್ತಡಿಚ್ಯಾ ರೆಂವೆ ರಾಶಿರ್" (ಮೋಗ್)
ಕವಿ ಗ್ರೇಸ್ತಾಂಕ್ ಆನಿ ದುಬ್ಳ್ಯಾ ಮೊಗ್ ಕರ್ಣಾರಾಂಕ್ ಆಸ್ಚೊ ತಫಾವಾತ್ ಕಿತ್ಲೊ ತೆಂ ಆಮ್ಕಾಂ ಬರೆಂ ಕರ್ನ್ ಸಾಂಗ್ತಾ. ಗ್ರೇಸ್ತ್ ಚಲಿಯೆಚೊ ಮೋಗ್ ದುಬ್ಳ್ಯಾ ಚಲ್ಯಾಕ್ ಲಾಭಾನಾ ತೆಂ ತಾಚ್ಯಾ ’ಆಮ್ಸೊರಾಚ್ಯೊ ಘಡಿಯೊ’ ಮ್ಹಳ್ಳ್ಯಾ ಕವಿತಾಂತ್ ತೊ ಅಶೆಂ ಸಾಂಗ್ತಾ.
"ಸಾಂಡುನ್ ಮ್ಹಕಾ ಗೆಲೆಂಯ್ ತುಂ ಗರೀಬ್ ಮ್ಹಳ್ಳೆಂ ನೀಬ್ ಥಾಪುನ್
ಹಾಂವ್ಗೊ ಹಾಂಗಾ ಲಾಚಾರ್ ಜಾಲಾಂ ರಡ್ತಾಂ ತುಜ್ಯೊ ಯಾದಿ ಮೊಡುನ್" (ಅಮ್ಸೊರಾಚ್ಯೊ ಘಡಿಯೊ)
ಕವಿಕ್ ತಾಣೆ ಆಶೆಲ್ಲೊ ಮೋಗ್ ಮೆಳೊಂಕ್ ನಾ ಜಾಲ್ಯಾರೀ ತೊ ಕೆದ್ನಾಂಚ್ ರಾಗಾರ್ ಜಾಂವ್ಕ್ ನಾ ಬದ್ಲಾಕ್ ತೊ ತ್ಯಾ ಮೊಗಾಕ್ ಸರ್ವ್ ರಿತಿನ್ ಬರೆಂಚ್ ಮಾಗ್ತಾ ತೆಂಯ್ ತಿಚ್ಯಾ ಲಗ್ನಾ ದಿಸಾ. ತಾಚ್ಯಾ ಆಬೊಲ್ಯಾಚಿ ಪಾಕ್ಳಿ ಮ್ಹಳ್ಳ್ಯಾ ಕವಿತೆಂತ್ ಅಖ್ರೇಚ್ಯಾ ಪಂಕ್ತಿಂತ್ ತೊ ಅಶೆಂ ಸಾಂಗ್ತಾ.
"ಲಗ್ನಾಕ್ ಅಶೆಂ ಬೆಸಾಂವ್ ಪಡ್ಲೆಂ ಸಾವುದ್ ಮಾಗ್ತಾಂ ಸಾಂತ್ ರಡ್ಲೊ
ಜಾಂಟ್ಯಾ ತರ್ಯ್ ನಿಸ್ಕಳ್ ಮೊಗಾಕ್ ಬರೆಂ ಮಾಗೊನ್ ದುಕಾಂನಿ ಬುಡ್ಲೊ!" (ಆಬೊಲ್ಯಾಚಿ ಪಾಕ್ಳಿ)
ಕಿತ್ಯಾಕ್ಗಿ ಚೆಡ್ವಾಂಚೆಂ ಜೀವಿತ್ ಕಷ್ಟಾಂಚೆ ಪುಣ್ ತಾಂಚೆ ಪಯ್ಕಿ ಕ್ರೀಸ್ತಾಂವ್ ಚೆಡ್ವಾಂಚೆ ಜೀವಿತ್ ಚಡ್ ಕಷ್ಟಾಂಚೆ ಮ್ಹಣ್ತಾ ಕವಿ. ತಾಂಚೆ ಆಟ್ನೆಟ್, ದಾಟ್ ವೋಂಟ್, ಹರ್ದ್ಯಾ ಘುಡ್, ಮಾತ್ತಿ ಗೊಬೊರ್, ಪೆಂಕ್ಟಾಚೊ ಜೋಕ್, ಹರ್ದ್ಯಾಚಿ ತೂಕ್ ಆಪ್ಣಾಕ್ ನಾಕಾ ಮ್ಹಣ್ಚೊ ಕವಿ ದೋನ್ ನಂಬ್ರಾಚೊ ವ್ಯಾರ್ ಸೊಡ್ನ್ ನೀತಿನ್ ಘೊಳೊನ್ ಹಾಡ್ ಮ್ಹಣ್ ಸಾಂಗುಕ್ ವಿಸ್ರಾನಾ.
ಹಾತಾಕ್ ಪಾವಾನಾತ್ಲ್ಲ್ಯಾಂಕ್ ಆಸ್ಚಿ ಉಡ್ಚಿ ಸವಯ್ ಕವಿಕ್ ಭಿಲ್ಕುಲ್ ಪಸಂದ್ ಜಾಯ್ನಾ. ತುಂವೆ ಆಶೆಲ್ಲೆಂ ದೇವ್ ಖಂಡಿತ್ ದಿತಲೊ. ಪುಣ್ ಇಗರ್ಜೆಕ್ ವೆತಾನಾ ಭರ್ತಿ ನೆಸೊನ್ ವಚ್ ಮ್ಹಣ್ ತಾಕಿದ್ ದಿತಾ ಆನಿ ಕ್ರಿಸ್ತಾಂವಾಚಿ ಸಂಸ್ಕ್ರತಿ ಸಾಂಬಾಳುಂಕ್ ಉಲೊ ದೀವ್ನ್ ಕವಿ "ಜಿವಿತ್ ಕಷ್ಟಾಂಚೆಂ" ಮ್ಹಳ್ಳಿ ಕವಿತಾ ಅಶಿ ಆಕೇರ್ ಕರ್ತಾ.
"ಮ್ಹಜೊ ಧರ್ಮ್, ಮ್ಹಜಿ ಭಾಸ್ ಮ್ಹಜಿ ಸಂಸ್ಕ್ರತಿ ಮ್ಹಾಕಾ ಉರವ್ನ್ ದಿಯಾ
ಮಾಪ್ಳ್ಯಾಚ್ಯಾ ಪಿಲಾಂಕ್ ಸಾರ್ಯೆರ್ ಜಳಯಾ
ಕ್ರೀಸ್ತಾಂವ್ ಚೆಡ್ವಾಂನೊ ಜೀವಿತ್ ಕಷ್ಟಾಂಚೆ ಜಾವ್ಯೆತ್ ಸುಧಾರ್ಸುನ್ ಘೆಯಾ" (ಜಿವಿತ್ ಕಷ್ಟಾಂಚೆಂ)
ಹ್ಯಾ ಶತಮಾನಾಚ್ಯಾ ಚಲಿಯಾಂಕ್ ಕವಿ ಬೂದ್ಬಾಳ್ ಸಾಂಗುನ್ ಥಕ್ಲಾಶೆಂ ದಿಸ್ತಾ ನೆಲ್ಲುಚ್ಯಾ "ನಾಡ್" ಮ್ಹಳ್ಳ್ಯಾ ಕವಿತೆಂತ್. ಯೆದೊಳ್ ಮ್ಹಣಾಸರ್ ಮೋಗ್ ಮೋಗ್ ಮ್ಹಣ್ಚೊ ಕವಿ ಆತಾಂ ಮೋಗ್ ಮ್ಹಣ್ತಾನಾ ಕಿತ್ಯಾಕ್ಗಿ ಭಿಯೆಲ್ಲ್ಯಾಪರಿಂ ಭಾಸ್ ಜಾತಾ. ಮೋಗ್ ನಾಕಾಗೊ ಮೋಗ್ಚ್ ನಾಕಾ ಮ್ಹಣ್ ಧಾಂವ್ತಾನಾ ಸ್ತ್ರೀ ಪಾತ್ಕಾಕ್ ಮೂಳ್ ಕಾರಾಣ್ ಜಾಲ್ಲಿ ನಾಡ್ ಮ್ಹಣ್ ವೊಲಾವ್ನ್ ಅಶೆಂ ಸಾಂಗ್ತಾ.
"ಆದಾಂವ್ಕ್ ನಾಡ್ಲ್ಲ್ಯಾ ಖಾಸ್ತಾಚಿ ಧುವ್ ಪಾತ್ಕಾಕ್
ಮೂಳ್ ಕಾರಣ್ ಸ್ತ್ರೀ ತುಂ ಧೊಂಪ್ರಾ ವಯ್ರ್ ಖಂಡಿತ್
ನ್ಹೆಸಾನಾಕಾಗೊ ಕಾಲ್ಸಾಂವಾಂ ಜಿಣೆಂ ಪಾತ್ಕಾಕ್ ವೊಡಿನಾಕಾ" (ನಾಡ್)
ಅಶೆಂ ಮ್ಹಣುನ್ ಸ್ತ್ರೀಯೆಕ್ ಎಕ್ ಬರಿ ಜಿಣಿ ಜಿಯೆಂವ್ಕ್ ಉಲೊ ದಿತಾ. "ಕಾಜಾರಾಚಿ ಭಿರಾಂತ್" ಮ್ಹಳ್ಳ್ಯಾ ಕವನಾಂತ್ ಕವಿ ಕಾಜಾರ್ ಜಾಲ್ಲ್ಯಾಂಕ್ ಆನಿ ಕಾಜಾರ್ ಜಾಂವ್ಚ್ಯಾ ತರ್ನಾಟ್ಯಾಂಕ್ ಕಾಜಾರಾ ವಿಶ್ಯಾಂತ್ ಬೆಷ್ಟಾಂವ್ಚೆಂ ಪ್ರಯತ್ನ್ ಕರ್ತಾ ಮಾತ್ರ್ ನೈಂ ತೊ ಕಾಜಾರ್ ಮರ್ಣಾಕ್ ಸಮೇತ್ ಪಾವಯ್ತಾ ಮ್ಹಣ್ತಾ. ಕಾಜಾರ್ ಜಾಲ್ಲ್ಯಾ ವಿಶಿಂ ತೊ ಅಶೆಂ ಮ್ಹಣ್ತಾ.
"ಕಾಜಾರ್ ಜಾಲ್ಲೆ ರಡ್ತಾತ್ ಆತಾಂ ಬಾಯ್ಲಾಂನಿ ತಾಂಚಿಂ ಚಿಂವ್ಲ್ಯಾಂತ್
ಆಂತಾಂ ಆತಾಂ ರಡೊನ್ ಗಳವ್ನ್ ಕೊಂತಾಂ ತೇಗಾ ಮಾಗ್ತಾತ್ ಸರ್ಗಿಂ ಸಾಂತಾಂಕ್" (ಕಾಜಾರಾಚಿ ಭಿರಾಂತ್)
ಕಾಜಾರಾ ವಿಶ್ಯಾಂತ್ ಕವಿಚೊ ಅಭಿಪ್ರಾಯ್ ಸಮಾ ಮ್ಹಣ್ ದಿಸಾನಾ. ಕಾಜಾರ್ ಜಾಲ್ಲೆಂ ಕಿತ್ಲೆಶೆ ಜಣ್ ಕಿತ್ಲ್ಯಾ ಸೊಭಾಯೆನ್ ಜಿವಿತ್ ಸಾರ್ತಾತ್ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂ ಆನಿ ಕುಟ್ಮಾ ಸಾಂಗಾತಾ. ಕಿತ್ಲೆಶೆ ಜಣ್ ದಾದ್ಲೆ ಕಾಜಾರ್ ಜಾಲ್ಲ್ಯಾ ಮಾಗೀರ್ ಆಪ್ಲ್ಯೊ ವಾಯ್ಟ್ ಬುಧಿ ಸಾಂಡುನ್ ಬರೆ ಜಾಲ್ಲೆ ಆಸಾತ್ ಮಾತ್ರ್ ನೈಂ ದುಸ್ರ್ಯಾಂಕೀ ಬರ್ಯಾ ವಾಟೆಕ್ ಹಾಡುಂಕ್ ಪ್ರಯತ್ನ್ ಕರ್ತಾತ್ ತರ್ ಹಾಚೆಂ ಮೂಳ್ ಕಾರಾಣ್ ಸ್ತ್ರೀ ಮ್ಹಳ್ಳೆಂ ಕವಿ ಕಿತ್ಯಾಕ್ ಸಮ್ಜಾನಾ?
ದಾದ್ಲ್ಯಾಂನಿ ಸ್ತ್ರೀಯೆಕ್ ಬರೊ ಮಾನ್ ದೀವ್ನ್ ಬರೆಂ ಕರ್ನ್ ಭರ್ಯಾ ಪತಿ ಭಾಶೆನ್ ಮೊಗಾನ್ ಜಿಯೆಲ್ಲ್ಯಾರ್ ಖಂಡಿತ್ ಜಾವ್ನ್ ಸ್ತ್ರೀ ಕೆದ್ನಾಂಚ್ ದಾದ್ಲ್ಯಾಕ್ ಸೊಡ್ನ್ ಘಾಲಿಶಿನಾ. ನೈಂ ತರ್ "ನಾರಿ ಮುನಿದರೆ ಮಾರಿ" ಮ್ಹಳ್ಳ್ಯಾ ಬರಿಂ ಸ್ತ್ರೀ ಕುಟಾಮ್ ಬಾಂಧುನ್ ಹಾಡುಂಕೀ ಸಕ್ತಾ ಆನಿ ಮೊಡುಂಕೀ ಸಕ್ತಾ ಮ್ಹಳ್ಳೆಂ ಸತ್ ದಾದ್ಲ್ಯಾಂನಿ ಉಡಾಸ್ ದವರ್ಚೆಂ ಗರ್ಜೆಚೆಂ ಜಾವ್ನಾಸಾ. ಹ್ಯಾ ಸಂಸಾರಾಚಿ ಚಾಲ್ ಪಳೆವ್ನ್ ಕವಿ ಖಂತಿನ್ ಬುಡೊನ್ ಗೆಲ್ಲ್ಯಾ ವೆಳಾರ್ ತೊ ದೆವಾಲಾಗಿಂ ಏಕ್ ದೆಣೆಂ ವಿಚಾರ್ತಾ ಆನಿ ತೆಂ ಕಸಲೆಂ ದೆಣೆಂ ತಾಕಾ ಜಾಯ್ ಮ್ಹಣ್ "ಖಂತಿ" ಮ್ಹಳ್ಳ್ಯಾ ಕವಿತೆಂತ್ ತೊ ಅಶೆಂ ಸಾಂಗ್ತಾ.
"ಏಕ್ ದೆವಾ ದೀ ದಯೆನ್ ದೆಣೆಂ ಮ್ಹಾಕಾ ನಿಸ್ಕಳ್ಪಣಾಚೆಂ
ಮೊಗಾನ್ ಏಕ್ ಕಾಳಿಜ್ ಚೊರುನ್ ಜತ್ನೆನ್ ಸಾಂಬಾಳ್ನ್ ಫುಡಾರ್ ಪಾಂವ್ಚೆಂ" (ಖಂತಿ)
ಹರ್ಯೇಕ್ಲ್ಯಾಕ್ ನಿಸ್ಕಳ್ಪಣಾಚೆಂ ದೆಣೆಂ ಆನಿ ನಿಸ್ಕಳ್ಪಣ್ ಸಾಂಬಾಳ್ಚೆಂ ಕಿತ್ಲೆಂ ಗರ್ಜೆಚೆಂ ಮ್ಹಣ್ ಕವಿ ಹ್ಯಾ ಕವಿತಾಂತ್ ಸಾಂಗ್ತಾ.
ಕವಿನ್ ಹ್ಯಾ ತಾಚ್ಯಾ ಪುಡ್ಲೊದ್ ಕವಿತಾ ಜಮ್ಯಾಂತ್ ಮೊಗಾ ವಿಶ್ಯಾಂತ್ ಜಾಯ್ತಿಂ ಕವನಾಂ ಬರೈಲ್ಯಾಂತ್. ಜಾಯ್ತೆ ಕಡೆಂ ಮೋಗ್ ಸೊಧುನ್ ತೊ ಗೆಲೊ ಆನಿ ಥರಾಥರಾಂನಿ ತಾಣೆಂ ಮೊಗಾಚೆಂ ವರ್ಣನ್ ಕೆಲಾಂ ತರೀ ತೊ ಮೊಗಾಂತ್ ಖಂಯ್ ಜಾಲ್ಯಾರೀ ಜಿಕಲ್ಲೊ ತೆಂ ಆಮ್ಕಾಂ ದಿಸಾನಾ ಮ್ಹಳ್ಯಾರ್ ಕವಿ ಆಪ್ಲ್ಯಾ ಜಿವಿತಾಂತ್ ಮೋಗ್ ಆಪ್ಣಾಂವ್ಕ್ ಜಾಯ್ತೊ ಪೆಚಾಡ್ಲಾ ಆನಿ ತೊ ಹರ್ಯೇಕ್ ಕಡೆ ಸಲ್ವಾಲಾ. ತರೀಕಿ ತೊ ಕಾಂಯ್ ರಾಗಾರ್ ಜಾಯ್ನಾಸ್ತಾನಾ, ವಿಳಾಪಾನ್ ತಾಚೆಂ ಕಾಳಿಜ್ ಖಾಲಿ ಜಾಲ್ಯಾರೀ ಆಸ್ಡಿ ಅಜೂನ್ ವೊಲಿ ಆಸ್ಲ್ಯಾರೀ, ಮೋಗ್ ಸದಾಂ ಪೊಂವೊನ್ ಗೆಲ್ಯಾರೀ, ಆಪ್ಣಾಕ್ ಮೋಗ್ ಪಾಟಿಂ ಕೆದ್ನಾಂಯ್ ಮೆಳ್ಳೊ ನಾ ತರೀ ಕಾಂಯ್ ವ್ಹಡ್ ನೈಂ ಆಪ್ಣೆಂ ಕಶೆಂ ತೆಂ ಮಾನುನ್ ಘೆತ್ಲಾಂ ಮ್ಹಣ್ ಆಪ್ಲ್ಯಾ "ಮಾಮೂಲ್" ಮ್ಹಳ್ಳ್ಯಾ ಕವಿತಾಂತ್ ಅಶೆಂ ಸಾಂಗ್ತಾ.
"ಮ್ಹಾಕಾ ಕಾಂಯ್ ನವೆಂ ನ್ಹಯ್ ತುಜೆ ತಸ್ಲ್ಯಾಂನಿ ಹಾಚೆ ಆಧಿಂಯ್ ಕೆಲ್ಲೆಂ ಇತ್ಲೆಂಚ್,
ದೆಕುನ್ ಅಸಲಿಂ ಘಡಿತಾಂ ಮ್ಹಾಕಾ ಸದಾಂಚಿಂ" (ಮಾಮೂಲ್)
ಕವಿ ಆಪ್ಲ್ಯಾ ಚಡ್ತಾವ್ ಕವಿತೆಂನಿ ಮೋಗ್ ಸೊಧ್ತಾ ಆನಿ ಜಿವಿತ್ ದಿತಾ ಜಾಲ್ಲ್ಯಾನ್ ತೊ ವಾಚ್ತೆಲ್ಯಾಂಚ್ಯಾ ಕಾಳ್ಜಾಕ್ ಮೊಗಾಚಿ ಊಭ್ ದಿತಾ. ನೆಲ್ಲು ಪೆರ್ಮನ್ನೂರ್ ತರ್ನೊ ಕವಿ ಜಾಲ್ಲ್ಯಾನ್ ತಾಚ್ಯಾ ತರ್ನ್ಯಾ ಕಾಳ್ಜಾಚೆ ಅತ್ರೆಗ್ ಫುಲೊವ್ನ್ ಹ್ಯಾ "ಮೊಳ್ಚಾಚಿಂ ದೆಳಿಂ" ಮ್ಹಳ್ಳೊ ಕವಿತಾ ಝೆಲೊ ಗುಂತುನ್ ಕೊಂಕ್ಣಿ ಮಾಯೆಕ್ ಅರ್ಪಿಲಾ. ತಾಕಾ ತಾಚ್ಯಾ ಮುಕ್ಲ್ಯಾ ಜಿವಿತಾಕ್ ಸವ್೯ ಬೊರೆಂ ಮಾಗೊನ್ ಆನೀಕಿ ಕೊಂಕ್ಣೆಖಾತಿರ್ ಬರೊ ವಾವ್ರ್ ಕರುಂಕ್ ಪೆಚಾಡುಂದಿ ಮ್ಹಣ್ ಮಾಗ್ತಾಂ.
ತುಮಿ ಮ್ಹಾಕಾ ತುಮ್ಚೊ ತುಮ್ಚೊ ಮೊಲಾಧಿಕ್ ವೇಳ್ ದೀವ್ನ್ ಕೊಂಕ್ಣೆ ಖಾತಿರ್ ಥೊಡೊ ವೇಳ್ ಖರ್ಚಿಲ್ಲ್ಯಾಖಾತಿರ್ ದೇವ್ ಬರೆಂ ಕರುಂ ಮ್ಹಣ್ತಾನಾ ಆಖೇರ್ ಕರ್ಚ್ಯಾ ಪಯ್ಲೆಂ ನೆಲ್ಲುಚೆಂ "ಕೊಂಕ್ಣಿ ಭಾಷೆಕ್" ಮ್ಹಳ್ಳೆಂ ಕವನ್ ಆಯ್ಕೊನ್ ಕೊಂಕ್ಣಿ ಭಾಷೆಕ್ ಆಮ್ಚ್ಯಾ ಘರಾಂನಿ ಮಾನ್ ದಿಂವ್ಕ್ ಪಯ್ಲೆಂ ಶಿಕ್ಯಾಂ.
"ಯೇರೆ ಕೊಂಕ್ಣಿ ಸುಪುತ್ರಾ ನವಿ ಚರಿತ್ರಾ ಘಡುಂಯಾಂ
ಜಾಗ್ರೆ ಕೊಂಕ್ಣಿ ಮಿತ್ರಾ ಎಕ್ವಟಾನ್ ಆಮಿ ವಾಡೊಯಾಂ
ಕೊಂಕ್ಣಿ ಮಾಂಡಾರ್ ಲಗೀನ್ ಜಾತಾ ಗೊದ್ದ್ಯಾ ಭಾಷೆ ಆಮಂತ್ರಣಾ
ಸುಟಾಂತ್ ಲಿಪೊನ್ ಎಮ್.ಸಿ. ಯೆತಾ ಜಿಬೆರ್ ಕೊಂಕ್ಣಿ ವ್ಹಾಳಾನಾ.
ಘಾಂಟ್ ವಾಜ್ತಾ ಪೊರ್ಬು ಮೆಲಾ ವೊಂಕ್ಲಿಂ ಇಂಗ್ಲಿಶಾಚಿಂ ಸ್ಲೋಗನಾಂ
ಗೆಲ್ಲೊ ಮಾತ್ಯೆಕ್ ಸಾರೆಂ ಜಾಲಾ ಚಿಕನ್ ಮಟನ್ ಭೋಜನಾಂ
ಕೊಂಕ್ಣಿ ಬಾಳಾಕ್ ಪಯ್ಲೊ ಕುಮ್ಗಾರ್ ಕೊಂಕ್ಣಿ ದೊತೊರ್ನ್ ಕಳಾನಾ
ಸೊಮಿ ತರ್ಯ್ ತೊಚ್ ಸರ್ಗಾರ್ ದರ್ಬಾರ್ ಪೊವ್ಲೆಂತ್ ಗಳಾನಾ
ತುಮ್ಚೊ ಫುಡಾರ್ ಫಿಂರ್ಗೆಂತ್ ಆಸ್ತಲೊ ಕೊಂಕ್ಣೆ ಫುಡಾರ್ ವಿಭಾಡ್ನಾಕಾ
ಆಮ್ಚೊ ತುಮ್ಚೊ ಮೋಗ್ ಗಾಜ್ತಲೊ ಸರ್ಗಾರ್ ಫಿಂರ್ಗಿಂ ಉಭಾರ್ನಾಕಾ."
ದೇವ್ ಬರೆಂ ಕರುಂ.
ಆಂಟ್ಯನಿ ಮಿನೇಜಸ್, ಬೊಂದೆಲ್.
10 ಜೂನ್ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
