ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ಎಕ್ ನದರ್ಚೆರ್ ಪ್ರತಿಕ್ರಿಯಾ: ಮುಂಗೊ!..... ನಾಂವ್ ಲಿಪಯಿಲ್ಲೊ ‘ಗೊಂಗೊ’!? - ನೆಲ್ಲು ಪೆರ್ಮನ್ನೂರ್.
‘ಬೊಂಗೊಗೀ ತುಳು ಭಾಷೆಚೊ ಮುಂಗೊ? ಫಟ್ಕಿರೊ ವಿಮರ್ಸೊ ಆನಿ ಚಿದಾನಂದ್ ಮಂಗ್ಳುರ್ ಎಕ್ಲೊ ಫಟ್ಕಿರೊ ವಿಮರ್ಶಕ್ ಮ್ಹಳ್ಳೊ ಮ್ಹಜೊ ವಾದ್. ನೀಜ್ ನಾಂವ್ ಫಾಯ್ಸ್ ಕರ್ಚೆಂ ಧಯ್ರ್ ನಾಸ್ತಾನಾ ಅನಾಮಿಕ್ ನಾಂವಾನ್ ಎಕಾ ವಾಡೊನ್ ಯೆಂವ್ಚ್ಯಾ ನಾಟಕ್ ಪಂಗ್ಡಾಚೆಂ ನಾಂವ್ ಪಾಡ್ ಕರ್ಚೆಂ ಪ್ರೇತನ್ ಕೆಲಾಂ. ಚಿದಾನಂದ್ ಮಂಗ್ಳುರಾನ್.
ಕೊಂಕ್ಣಿ ಕಲೆಚಿ ಪರಿಗತ್ ಪಳೆತಾನಾ ಗಳ್ಯಾಂತ್ ಆಡಾಂಚೊ ಶಿರ್ಕಾಲ್ಲ್ಯಾ ಬರಿಂ ಜಾಲೆಂ ಖಂಯ್ ಮಾನೆಸ್ತಾಕ್. ಪುಣ್ ಇತ್ಲ್ಯಾ ವರ್ಸಾಂ ಥಾವ್ನ್ ನಾಟಕ್ ಶೆತಾಂತ್ ವಾವ್ರ್ ದೀವ್ನ್ ಆಸ್ಲ್ಲ್ಯಾ ಮಾನೆಸ್ತಾನ್ ಕೊಂಕ್ಣಿ ನಾಟಕ್ ಶೆತಾಂತ್ ಕರ್ನ್ ದಾಕಯಿಲ್ಲಿಂ ಬಿಕ್ಣಾಂಯ್ ನಾಂತ್. ವೃತ್ತಿಪರ್ ಪಂಗಡ್ ಬಾಂದ್ಲ್ಲೊನಾ. ಪಾಟ್ ಲಾಗೊನ್ ಪ್ರದರ್ಶನಾ ಕೆಲ್ಲಿಂ ನಾಂತ್. ತೊ ಅನುವಾದಿತ್ ಆನಿ ಆಧಾರಿತ್ ನಾಟಕಾಂ ವಿಶ್ಯಾಂತ್ ಹೊಗ್ಳಿಕ್ ಉಚಾರ್ತಾ. ತರ್ ಕೊಂಕ್ಣಿ ನಾಟಕ್ ಶೆತಾಂತ್ ಸ್ವಂತ್ ಕೃತಿಯೊ ಬರೊವ್ನ್ ಉಬ್ಯೊ ಜಾಂವ್ಚ್ಯೊ ಕೆದಾಳಾ? ಹಾಚೆ ಖಾತಿರ್ ಆನಿ ಕಿತ್ಲಿಂ ವರ್ಸಾಂ ರಾಕಾಜೆ? ಹೊಚ್ಚ್ ಉದ್ದೇಶ್ ಮತಿಂತ್ ಘೆವ್ನ್ ಕೊಂಕ್ಣೆಂತ್ ಸ್ವಂತ್ ನಾಟಕ್ ಕೃತಿ ಬರವ್ನ್, ವೃತ್ತಿಪರ್ ಪಂಗಡ್ ಬಾಂದುನ್ ಆಮಿಂ ಪ್ರದರ್ಶನಾ ಕೆಲ್ಯಾಂತ್. ಯಶಸ್ವೀ ಜಾಲ್ಯಾಂವ್ ಆನಿ ಕೊಂಕ್ಣಿ ಲೋಕ್ ಹಾಕಾ ಒಪ್ಲಾ.
‘ಫಟ್ಕಿರೊ ವಿಮರ್ಶಕ್’’ಬೊಂಗೊ ವಿಸಿಡಿ ಪಳೆವ್ನ್ ಶಿರಿಂ ಚುಕ್ಲೊಂ’ ಮ್ಹಣ್ತಾ. ಆನಿ ’ಪಡೀಲ್, ಕಾಪಿಕಾಡ್ ಆನಿ ಕೊಡಿಯಾಲ್ ಬೈಲ್ ಹಾಂಚೆ ಲಾಗಿಂ ಉಲೊನ್ ಮೆಳೊನ್ ಜಾಣಾಂ’ ಮ್ಹಣ್ತಾ. ಹಾಂವ್ ತಸಲ್ಯಾ ಮ್ಹಾನ್ ತುಳು ರಂಗ್ ಮಾಂಚಿಯೆಚ್ಯಾ ತಾರಾಂ ಸಂಗಿಂ ಘಳೊನ್ ಹೆಳೊನ್ ಆಯಿಲ್ಲೊ ಭುರ್ಗೊ. ತುಳು ನಾಟಕ್ ಊಂಚ್ ರಿತಿನ್ ಲೊಕಾಚ್ಯಾ ಜಿಬೆರ್ ಆಸ್ಲ್ಯಾರೀ ರಾಜ್ಯ್ ಮಟ್ಟಾಕ್ ಕಿತ್ಯಾಕ್ ಪಾವೊನಾಂತ್?, ಮ್ಹಳ್ಳೆಂ ಸವಾಲ್ ವಿಮರ್ಶಕ್ ಉಡಯ್ತಾ. ಮ್ಹಜೆ ಬರಿಂ ಕಮರ್ಷಿಯಲ್ ದೃಷ್ಟನ್ ನಾಟಕ್ ಶೆತಾಚೆ ಫುಡ್ಲೆ ದೀಸ್ ರಾಕ್ಚ್ಯಾ ನಾಟಕಿಸ್ತಾಕ್ ಲೊಕಾನ್ ಅಪೇಕ್ಷುಂಚೆ ನಾಟಕ್ ಜಾಯ್ ಶಿವಾಯ್, ಪಂಚ್ವೀಸ್ ಪ್ರೇಕ್ಷಕಾಂಕ್ ಘೆವ್ನ್ ಪ್ರದರ್ಶನ್ ಕರ್ಚೆ ನ್ಹಯ್.
ವಿಮರ್ಶಕಾನ್ ಬೊಂಗೊ ನಾಟಕಾಂತ್ ತುಳು ನಾಟಕಾಚೆಂ ಆಧಾರಿತ್ ’ಅಸಲ್’ ಮ್ಹಳ್ಳಿ ಖ್ಯಾತಿ ಘೆವ್ನ್ ಆಕ್ರ್ಸುಂಕ್ ಪ್ರಯತ್ನ್ ಕೆಲಾಂ ಮ್ಹಣೊನ್ ಆಪ್ಲೆಂ ಹೆಡ್ಡೆಪಣ್ ಉಗ್ತ್ಯಾನ್ ದಾಕಯ್ಲಾಂ. ’ಅಸಲ್ ಕಲಾಕಾರ್’ ಮ್ಹಣೊನ್ ತುಳುಂತ್ ಖಂಯ್ಸರ್ಯ್ ನಾ. ಅಸಾ ತರ್ ’ಒರಿಯೊರ್ದೊರಿ ಅಸಲ್ ತಂಡದ ಸಂಗಮ ಕಲಾವಿದೆರ್ ಕುಡ್ಲ’ ವಿಮರ್ಸೊ ಕರ್ತಾನಾ ಪೊಕ್ಳೆ ಮಾತ್ರ್ ನ್ಹಯ್ ಜಾಣ್ವಾಯ್ ಗರ್ಜೆಚಿ ಮಿಸ್ಟರ್ ಚಿದಾನಂದ್.
ಬೊಂಗೊ ನಾಟಕಾಂತ್ ಉಲವ್ಣ್ಯಾಚಿ ರೀತ್, ಕುಡಿಚಿ ಭಾಸ್, ಜಿವಾಚಿ ಭಾಸ್, ಪ್ಲೇಸ್ಮೆಂಟ್, ಎಕಾಮೆಕಾ ಸಂಬಂಧ್, ಪೋಝ್ (ವಿರಾಮ್) ಪರಿಣಾಮ್ಕಾರಿ ನಾಂತ್ ಮ್ಹಳ್ಳಾಂ. ಖಂಯ್ಸರ್ ಕಿತೆಂ ಚೂಕ್ ಘಡ್ಲ್ಯಾ ಮ್ಹಳ್ಳೆಂ ಉಗ್ತ್ಯಾನ್ ಕಿತ್ಯಾಕ್ ಸಾಂಗೊನಾಂ? ಸಾಂಗಾತಾಚ್ಚ್ ಉಲವ್ಣ್ಯಾಚಿ ರೀತ್ ಎಕಾ ಪರಿಸರಾಚಿ ಆಮಿ ಉರಯ್ಲ್ಯಾ, ತಿಯ್ ಕೊಂಕ್ಣಿ ಕಾರ್ಬಾರ್ಯಾಂ ಲಾಗಿಂ ಚರ್ಚಾ ಚಲವ್ನ್ ಖಂಯ್ಚ್ಯಾಯ್ ಬೊಲಿ ವಿಶಿಂ ವಿಮರ್ಶಕಾಚಿ ವಾಂಕ್ಡಿ ದೀಷ್ಟ್ ಪಡ್ಲ್ಯಾ ತಿ ವಿಮರ್ಶ್ಯಾಕ್ ಜಾಂವ್ದಿ ವಿಮರ್ಶಕಾಕ್ ಜಾಂವ್ ಭಲಾಯ್ಕೆಭರಿತ್ ನ್ಹಯ್.
’ಹಾಸಂವ್ಚೆ ಖಾತಿರಚ್ಚ್ ಸನ್ನಿವೇಶ್ ಅಸೊನ್ ಪ್ರೇಕ್ಷಕಾಂಕ್ ಮಾಂಕೊಡ್ ಕರ್ಚೆಂ ಪ್ರೇತನ್ ಕೆಲಾಂ’ ಮ್ಹಣ್ತಾ ವಿಮರ್ಶಕ್. ತರ್ ಆಮ್ಚೊ ನಾಟಕ್ ಪಳೆಲ್ಲ್ಯಾ ಕಿತ್ಲೆಶ್ಯಾ ಸಬಾರ್ ಜಣಾನಿಂ ಆಮ್ಕಾಂ ಶಾಭಾಸ್ಕಿ ಪಾಟಯ್ಲ್ಯಾ. ತರ್ ತೆ ಆಮ್ಚೆ ಮೊಗಾಳ್ ಪ್ರೇಕ್ಷಕ್ ಮಾಂಕೊಡ್ ಗೀ? ಚಿದಾನಂದಾನ್ ದಿಲ್ಲೊ ವಿಮರ್ಸೊ ಸಾರ್ವತ್ರಿಕ್ ವಿಮರ್ಸೊ ಮ್ಹಣ್ ಲೆಕುಂಕ್ ಹಾಂವ್ ಬಿಲ್ಕುಲ್ ತಯಾರ್ ನಾ. ನಾಟಕ್ ಪಳೆಲ್ಲ್ಯಾ 99.99 ಠಕ್ಕೆ ಲೊಕಾನಿಂ ’ಬೊಂಗೊ’, ನಾಟಕಾವಿಶಿಂ ಹೊಗ್ಳಿಕ್ ಉಚಾರ್ಲ್ಯಾ. ಹೊ ವಿಮರ್ಶಕ್ ತ್ಯಾ ಭಾಯ್ರ್ ಉರಲ್ಲೊ 0.01 ಠಕ್ಕೆ ಮಾತ್ರ್.
ಎಕ್ಟಿಂಗ್ ಕರ್ಚೆಂ ಪ್ರೇತನ್ ಕೆಲಾಂ ಶಿವಾಯ್ ಪರ್ಫೊಮೆನ್ಸ್ ದಿಸಾನಾ, ಸಾದ್ಯಾ ಪ್ರೇಕ್ಷಕಾಕ್ ಟಾಯ್ಮ್ ಪಾಸ್ ಶಿವಾಯ್ ಕೊಂಕ್ಣೆಚೆಂ ಭವಿಶ್ಯ್ ನ್ಹಯ್ ಮ್ಹಣ್ತಾ ನೇ? ಇತ್ಲ್ಯಾ ವರ್ಸಾನಿಂ ಹ್ಯಾ ನಾಟಕಿಸ್ತಾನ್ ಕೆಲ್ಲೆಂ ಕಿತೆಂ? ತಿತ್ಲೆಂಚ್ಚ್! ಅಪ್ಲ್ಯಾ ರಾಂದ್ಣಿರ್ ಶಿಜ್ಲೆಂನಾ ಮ್ಹಣೊನ್, ಅತಾಂ ಹೆರಾಂಚ್ಯಾ ರಾಂದ್ಣಿಚೊ ಉಜೊ ಪಾಲ್ವಂವ್ಚೆಂ ಪ್ರೇತನ್ ಕರ್ತಾ.
ಪರ್ತ್ಯಾನ್ ಕೊಂಕ್ಣೆ ಭಾಯ್ಲಿಂ ಸಬಾರ್ ನಾಂವಾಂ ದೀವ್ನ್ ತಸ್ಲೆ ನಾಟಕ್ ಪಳೆಯ್ಜೆ ಮ್ಹಣ್ತಾ. ತುಳು, ಕನ್ನಡ, ಮರಾಠಿ ಆನಿ ಮಳಯಾಳಿಂತ್ ಹಾಂವೆಂ ಪಳೆಲ್ಲ್ಯಾ ತಿತ್ಲೆ ನಾಟಕ್ ವಿಮರ್ಶಕಾನ್ ಬಿಲ್ಕುಲ್ ಪಳೆವ್ನಾಂತ್. ಕನ್ನಡಾಂತ್ಲೆ ಮೋಡರ್ನ್ ಡ್ರಾಮಾ ಹಾಡ್ನ್ ಪಂಚ್ವೀಸ್ ಪ್ರೇಕ್ಷಕಾಂಕ್ ಘೆವ್ನ್ ಪ್ರದರ್ಶನ್ ಕರುಂಕ್ ಆಮ್ಚೆ ಥಾವ್ನ್ ಸಾಧ್ಯ್ ನಾ ದೆಕುನ್ ಆಮಿಂ ಪ್ರಸ್ತುತ್ ’ಕೊಂಕ್ಣಿ ಪ್ರೇಕ್ಷಕಾಂಕ್ ಮೆಚ್ವೊಂಚೆ’ ನಾಟಕ್ ಸಾದರ್ ಕರ್ನ್ ಅಸಾಂವ್. ಹಾಂತುಂ ಆಮಿ ತೃಪ್ತಿ ಜೊಡ್ಲ್ಯಾ.
ತುಳು ನಾಟಕಾಚ್ಯಾ ಮೆರೆರ್ ಆಮಿ ಆಸೊಂಕ್ ಪುರೊ. ಪುಣ್ ತ್ಯಾಚ್ಚ್ ಮೆರೆರ್ ಎಕಾ ಬರ್ಯಾ ಶೆತಾಕ್ ಪಾಂವ್ಚೆಂ ಪ್ರೇತನ್ ಆಮಿ ಕರುನ್ ಅಸಾಂವ್ ಶಿವಾಯ್, ಆಮಿಂ ಕೊಣಾಂಯ್ಚಿಯ್ ನಕಲ್ ಕೆಲ್ಲಿ ನಾ. ತುಳು ನಾಟಕಾ ಭಾಯ್ರ್ ಬರಯ್ಣಾರಾನ್ ನದರ್ ಘಾಲುನಾ, ಬರೊ ನಟ್ ಬರೊ ಬರವ್ಪಿ ಜಾಯ್ನಾ’ಜಾಂವ್ಕ್ ಪುರೊ, ಪುಣ್ ಹಾಂವ್ ಬರೊ ನಟ್ಯ್ ನ್ಹಯ್ ಬರೊ ಬರವ್ಪಿಯ್ ನ್ಹಯ್. ಹ್ಯಾ ದೊನಾಂಯ್ತಿ ಹಾಂವ್ ಉದೆವ್ನ್ ಯೆಂವ್ಚೊ ಬೊಂಗೊ’ಹಾಂವ್ ಫುಲ್ತಾಂ ಮ್ಹಳ್ಳೊ ಭರ್ವಚೊ ಖುದ್ಧ್ ಮ್ಹಾಕಾ ಆಸಾ. ಇತ್ಲ್ಯಾರ್ ಚ್ಚ್ ಹಾಂವೆಂ ಆನಿ ಮ್ಹಜ್ಯಾ ಪಂಗ್ಡಾನ್ ಯಶಸ್ವೀ ಜೊಡ್ಲ್ಯಾ. ಹಿ ಸುರ್ವಾತ್ ಮಾತ್ರ್. ಫುಡೆಂ ಉಬೊ ಜಾಂವ್ಕ್ ಆಸ್ಚೊ ವಾವ್ರ್ ಜಾಯ್ತೊ ಆಸಾ. ತೊ ಫುಡೆಂ ದಾಕಯ್ತೆಲ್ಯಾಂವ್.
ಸಗ್ಳ್ಯಾ ನಾಟಕಾಂತ್ ಖಂಯ್ಚ್ಯಾಯ್ ತುಳು ನಾಟಕಾಚೆಂ ಖಂಯ್ಚೆಂಯ್ ದೃಶ್ಯ್ ಗಡ್ಪಿಲಾಂ ತರ್ ವಿಮರ್ಶಕ್ ಉಗ್ತ್ಯಾನ್ ಸಾಂಗೊಂದಿ. ಆಮಿಂ ಕೊಂಕ್ಣಿ ನಾಟಕ್ ಶೆತಾಂತ್ ಪ್ರಗತಿಚ್ಚ್ ಕರ್ನ್ ಅಸಾಂವ್. ಆಸಲ್ಲ್ಯಾ ಮಟ್ಟಾಚ್ಯಾಕೀ ಸಕ್ಲಾ ದೆವೊನಾಂವ್. ಪುಣ್ ಎದೊಳ್ ಆಸ್ಲ್ಲೆಂ ಮಟ್ಟ್ ಖುದ್ಧ್ ವಿಮರ್ಶಕಾಕ್ಚ್ಚ್ ಕಳಿತ್ ನಾಂ ಆಶೆಂ ದಿಸ್ತಾ. ಹಾಂವೆಂ ಎಕ್ಲೊ ನಾಟಕಿಸ್ತ್ ಜಾವ್ನ್ ಬರವ್ಪಿ ಜಾವ್ನ್ ಶೆಂಭೊರಾಂ ವಯ್ರ್ ನಾಟಕ್ ಪಳೆಲ್ಯಾತ್. ತಿತ್ಲೆ ನಾಟಕ್ ಎಕ್ಲೊ ನಾಟಕಿಸ್ತ್ ಆನಿ ವಿಮರ್ಶಕ್ ಜಾವ್ನ್ ತುವೆಂ ಪಳೆಲ್ಯಾತ್ಗೀ?
ತುಳು ನಾಟಕ್ ಹೆರ್ ಭಾಷೆಚ್ಯಾ ನಾಟಕಾಂ ಬರಿಂ ರಾಜ್ಯ್, ರಾಷ್ಟ್ರ್ ಆನಿ ಅಂತಾರಾಷ್ಟ್ರೀಯ್ ಮಟ್ಟಾಕ್ ಪಾವೊನಾಂತ್ ಮ್ಹಳ್ಳಿ ಖಂತ್ ವಿಮರ್ಶಕ್ ಉಚಾರ್ತಾ. ತುಳು ಭಾಸ್ ಖಂಯ್ಚ್ಯಾಯ್ ರಾಜ್ಯಾಚಿ ಭಾಸ್ ನ್ಹಯ್ ಬಗಾರ್ ಎಕಾ ಪ್ರದೇಶಾಚಿ ಭಾಸ್ ಮಳ್ಳೆಂ ವಿಮರ್ಶಕಾಚ್ಯಾ ಗುಮಾನಾಂತ್ ನಾಂ ಅಶೆಂ ಭೊಗ್ತಾ. ತರೀ ಮುಂಬಯ್ ತಸ್ಲ್ಯಾ ಶಹರಾಂತ್ ಆಮಿ ’ಲಕುಮಿ’ ಪಂಗಡ್ ಘೆವ್ನ್ ಪಾಟ್ಲ್ಯಾ ಚಾರ್ ವರ್ಸಾಂ ಥಾವ್ನ್ ಎಕಾ ಮ್ಹಯ್ನ್ಯಾ ಭಿತರ್ ಪನ್ನಾಸ್ ಥಾವ್ನ್ ಸಾಟ್ ಪ್ರದರ್ಶನಾಂ ದೀವ್ನ್ ಯೆತಾಂವ್. ತ್ಯಾ ಭಾಯ್ರ್ ಬೆಂಗ್ಳುರ್, ಡೆಲ್ಲಿ ಆನಿ ಗಲ್ಫ್ ರಾಷ್ಟ್ರಾಂನಿಂ ಸಯ್ತ್ ತುಳು ನಾಟಾಕಾಂಚಿಂ ಪ್ರದರ್ಶನಾ ಚಲ್ತೇ ಅಸಾತ್. ತುಳು ನಾಟಕ್ ಶೆತಾನ್ ಎದೊಳ್ ಕೆಲ್ಲೆಂ ಸಾಧನ್ ಶ್ರೇಷ್ಟ್. ಹಾಚೆ ಮುಕಾರ್ ಕೊಂಕ್ಣಿ ಎಕಾ ರಾಜ್ಯಾಂತ್ ರಾಜಾಂವ್ ಚಲೊನ್ ಅಸ್ಲ್ಯಾರೀ ಕೊಂಕ್ಣೆಂತ್ ಕೆಲ್ಲೆಂ ಕಾಂಯ್ ನಾ. ಹ್ಯಾ ಆಟೆವಿಟ್ಯಾಂ ಮಧೆಂ ಅಮ್ಚೊ ದುಸ್ರೊ ನಾಟಕ್ ’ಬೊಂಗ್ಲೊ’ 2008 ಇಸ್ವೆಚ್ಯಾ ಮದ್ಗಾತ್ ಗಲ್ಫಾಂತ್ ದೋನ್ ಜಾಗ್ಯಾನಿಂ ಪ್ರದರ್ಶನ್ ಉಬೆಂ ಕರ್ತಾ. ಹಿ ಕೊಂಕ್ಣೆಚಿ ವಾಡಾವಳ್ ನ್ಹಯ್ಗೀ? ಜಾಣ್ವಾಯ್ ಅಸ್ಲ್ಲ್ಯಾ ಮಾಲ್ಘಡ್ಯಾಂನಿಚ್ಚ್ ಕುರ್ಲ್ಯಾಂಚೊ ಮನೋಭಾವ್ ದಾಕಯ್ಲಾ ತರ್ ಕೊಂಕ್ಣೆಂತ್ ಕಿತ್ಲೆಂ ನವಾಲ್ ಕರ್ಯೆತ್?
ಹಾಸ್ಯ್ ನಾಟಕ್ ಫಕತ್ ಲೊಕಾಕ್ ಭರೆ ಕರ್ನ್ ಹಾಸಯ್ತಾತ್, ಭಾಷೆಚ್ಯಾ ಗ್ರೇಸ್ತ್ಕಾಯೆಕ್ ಉಪ್ಕಾರಾಕ್ ಪಡಾನಾಂತ್, ಸ್ಪರ್ಧ್ಯಾಕ್ ಅರ್ಹತಾ ಅಸ್ಚೆಯ್ ನ್ಹಯ್ ಮ್ಹಣ್ತಾ ಮಾನೆಸ್ತ್. ತಸ್ಲೊ ನಾಟಕ್ಯ್ ಮ್ಹಜೆಲಾಗಿಂ ತಯಾರ್ ಅಸಾ. ಜರ್ ಕೊಂಕ್ಣಿ ನಾಟಕಾಂಚೊ ’ಗಂಭೀರ್ ಸ್ಪರ್ಧೊ’ ಚಲ್ಲೊ, ’ನಿರ್ಧಾರ್’ ಮ್ಹಳ್ಳೊ ನಾಟಕ್ ಮ್ಹಜೆಲಾಗಿಂ ತಯಾರ್ ಆಸಾ. ಹ್ಯಾ ನಾಟಕಾಂತ್ ಹಾಂವ್ ಪ್ರಶಸ್ತಿ ಜೊಡ್ತಾಂ ಮ್ಹಳ್ಳೆಂಯ್ ಮ್ಹಾಕಾ ಧಯ್ರ್ ಅಸಾ. (ಮ್ಹಜಿ ಸ್ವಪ್ಣಾಂ ಹಾಚೆ ಆದಿಂಯ್ ಫಟ್ ಜಾವ್ನಾಂತ್). ತುಕಾ ಕಿತ್ಲೊಯ್ ಅನ್ಭೊಗ್ ಜಾವ್ನ್ ಅಸೊಂಕ್ ಪುರೊ, ಪುಣ್ ತುವೆಂ ನಾಟಕ್ ಶೆತಾಂತ್ ಶಿಕೊಂಕ್ ಅನಿಕೀ ಜಾಯ್ತೆಂ ಆಸಾ.
’ತುವೆಂ ದಾಂಟಾಲ್ಯಾ ಫಾತ್ರಾಕ್ ಆಮಿಂ ದಾಂಟಾನಾಯೆ’ ಮ್ಹಳ್ಳಿ ಚತ್ರಾಯ್ ದಿಲ್ಯಾಯ್. ಪುಣ್ ತುವೆಂ ದಾಂಟಾಲ್ಲೊ ಫಾತೊರ್ ಆಮಿಂ ಪಯ್ಲೆಂಚ್ಚ್ ಉಕಲ್ನ್ ದೆಗೆನ್ ದವರ್ಲಾ. ಸಾಂಗಾತಾ ತುಕಾಯ್. ಫಕತ್ ಖೊಡಿ ಕಾಡ್ಚ್ಯೊ ಸೊಡ್ಲ್ಯಾರ್ ’ಬೊಂಗೊ’ ನಾಟಕಾಂತ್ಲ್ಯೊ ಬರ್ಯೊ ಸಂಗ್ತಿ ಕಿತ್ಯಾಕ್ ಖಂಯ್ಸರ್ಯ್ ತುಜ್ಯಾ ನಿಷ್ಟುರ್ ದೊಳ್ಯಾಂಕ್ ಗೆಲ್ಯೊನಾಂತ್? ತುಂ ಲೊಕಾಕ್ ಮಾಂಕೊಡ್ ಕರ್ಚೆಂ ಪ್ರೇತನ್ ಕೆಲಾಂ ಮ್ಹಣ್ತಾಯ್ ನ್ಹೆಂ? ಇತ್ಲ್ಯಾ ಲೊಕಾನ್ ಆಮ್ಚಿ ಪ್ರಶಂಸಾ ಉಚಾರ್ಲ್ಯಾ ತರ್... ಕೊಂಕ್ಣಿ ಲೋಕ್ ಮಾಂಕೊಡ್ಗೀ? ಯಾ ತುವೆಂ ಅತಾಂ ಮಾಂಕೊಡ್ ಕರ್ಚೆಂ ಪ್ರೇತನ್ ಕೆಲಾಂಯ್?
ನಾಟಕಾ ವಿಶ್ಯಾಂತ್ ಇತ್ಲೆ ಪೊಕ್ಳೆ ಸೊಡ್ಚ್ಯಾ ಹ್ಯಾ ಮಾನೇಸ್ತಾನ್ ಇತ್ಲ್ಯಾ ವರ್ಸಾಂ ಥಾವ್ನ್ ಕೊಂಕ್ಣಿ ನಾಟಕ್ ಶೆತಾಂತ್ ಪಿಕಯಿಲ್ಲೆಂ ಕಿತೆಂ? ಭಲಾಯ್ಕೆಭರಿತ್ ವಿಮರ್ಸೊ ಕರಿಜೆ, ಕೊಂಕ್ಣಿ ನಾಟಕ್ ಶೆತಾಕ್ ಅಧಾರ್ ದೀಜೆ ಮ್ಹಣ್ ಮತಿಂತ್ ಅಸಲ್ಲೆಂ ತರ್ ನೀಜ್ ನಾಂವ್ ಲಿಪಂವ್ಚೆಂ ಚೊರಾಂಚೆಂ ಕಾಮ್ ಕಿತ್ಯಾಕ್ ಕೆಲೆಂ? ಹಿ ಆಮ್ಚಿ ವಾಡಾವಳ್ ಮೊಡೊಂಕ್ ಕೆಲ್ಲಿ ಫಿತೂರಿ ಮಾತ್ರ್?
ಕುವೈಟ್ ವೆಚ್ಯಾ ದೋನ್ ದಿಸಾಂ ಪಯ್ಲೆಂ ಪೋರ್, ಪೋರ್, ಮ್ಹಜೆ ಲಾಗಿಂಚ್ಚ್ ಫೊನಾರ್ ಸ್ಕ್ರಿಪ್ಟ್ ವಿಚಾರ್ಲ್ಯಾತ್ ವಿಮರ್ಶಕಾನ್, ಹಾಕಾ ಆಮ್ಚೊ ನಾಟಕ್ ಬರೊ ಲಾಗ್ಲೊ ನಾ ತರ್ ವಯ್ಲ್ಯಾನ್ ಮ್ಹಜೆ ಸ್ಕ್ರಿಪ್ಟ್ ಕಿತ್ಯಾಕ್ ಗರ್ಜ್?
ಹೊಚ್ಚ್ ವಿಮರ್ಶಕ್ ಎಕ್ಲೊ ಕೃತಿ ಚೋರ್ ಸಾಹಿತಿ ಮ್ಹಳ್ಳೆ ದಾಕ್ಲೆಯ್ ಅಸಾತ್. ಹ್ಯಾಚ್ಚ್ ವಿಮರ್ಶಕಾಚ್ಯಾ ಪ್ರಕಾಶನಾ (ಕುಲ್ಶೇಕರ್ ಮಂಗ್ಳುರ್) ಥಾವ್ನ್ ಪ್ರಗಟ್ ಜಾಲ್ಲ್ಯಾ ’ಜೋಪ್’ ಮ್ಹಳ್ಳ್ಯಾ ಬುಕಾಂತ್, ಶ್ರೇಷ್ಠ್ ತೆಲುಗು ಸಾಹಿತಿ ’ಯಂಡಮೂರಿ’ಚಿ ಏಕ್ ಕಾಣಿ ಅಸಾ ತಶಿ ’ಧುರಿ’ ಮ್ಹಳ್ಳ್ಯಾ ನಾಂವಾರ್ ಫಾಯ್ಸ್ ಕೆಲ್ಯಾ. ಮಾತ್ರ್ ನ್ಹಯ್ ಮೊಬಾಯ್ಲ್ ಎಸ್. ಎಮ್. ಎಸ್ ಯೇವ್ನ್ ಆಸಲ್ಲೊ ಏಕ್ ಕೊಂಕ್ಣಿ ಜೋಕ್ ಚೋರ್ನ್ ವಿಮರ್ಶಕಾನ್ನ್ ಕವಿತಾ ಮ್ಹಣ್ ಫಾಯ್ಸ್ ಕೆಲ್ಯಾ. ಸಭಾರ್ ಹೆರ್ ಧಾಖ್ಲೆ ಆಸಾತ್ - ಗರ್ಜ್ ಪಡ್ಲ್ಯಾರ್ ದಿತಾಂ. ಸಾಹಿತಿಕ್ ಶೆತಾಂತ್ ಭಳ್ ನಾತ್ಲ್ಲ್ಯಾ ಹಾಣೆಂ ಪಯ್ಶ್ಯಾಂಚ್ಯಾ ಭಳಾನ್ ಆಪ್ಣಾಕ್ಚ್ ಸಾಹಿತಿ, ನಾಟಕಿಸ್ತ್ ಮ್ಹಣ್ ವೊಲಾಯ್ಲಾಂ.
ಪ್ರಸ್ತುತ್ ಹಾಂವ್ ಅತಾಂ ಕಲಾಕುಲ್ ಪಂಗ್ಡಾಂತ್ ನಾಟಕ್ ಕೃತಿ (ಸ್ಕ್ರಿಪ್ಟ್) ನಾಸ್ತಾನಾಂಚ್ಚ್ ಏಕ್ ’ಕೊಂಕ್ಣಿ ಸಾಮಾಜಿಕ್ ಹಾಸ್ಯ್ ನಾಟಕ್’ ಉಬೊ ಕರ್ನ್ ಅಸಾಂ. ಅಸ್ಲ್ಯಾ ರಿಸ್ಕೆಚೆಂ ಕಾಮ್ ಇತ್ಲ್ಯಾ ವರ್ಸಾಂಚ್ಯಾ ನಾಟಕ್ ಅನುಭವಾಂತ್ ಹ್ಯಾ ಮ್ಹನ್ಶ್ಯಾನ್ ಕರ್ನ್ ದಾಕಯ್ಲಾಂಗೀ? ಆನಿ ಮುಕಾರ್ ಕರುಂಕ್ ಅಸಾಗೀ? ಸಗ್ಳ್ಯಾ ಪರಿಸ್ಥಿತೆಂತ್ ವೀಸ್ ವರ್ಸಾನಿಂ ಹ್ಯಾ ಮ್ಹನ್ಶ್ಯಾನ್ ಕರುಂಕ್ ಸಕಾನಾತ್ಲ್ಲಿಂ ಕಾಮಾ ಆಮಿಂ ಫಕತ್ ದೋನ್ ವರ್ಸಾಂನಿಂ ಕೆಲಿಂ ದೆಕುನ್ ಹಾಚ್ಯಾ ಪೊಟಾಂತ್ ಜಳ್ತಾ. ದೆಕುನ್ ಅತಾಂ ಮೆಂದು ಕಾಕೆ ಪಂದಾಕ್ ದವರ್ನ್ ಶೆಳ್ಯಾ ಶಿತಾಕ್ ವಾರೆಂ ಘಾಲ್ಚಿ ಬುದ್ವಂತ್ಕಾಯ್ ದಾಕಯ್ತಾ. ಹೆಂ ಕೊಣಾಕ್ ಮಾಂಕೊಡ್ ಕರ್ಚೆಂ ಪ್ರೇತನ್?. ಕೊಂಕ್ಣೆಂತ್ ತೊ ಕಾಂಯ್ ಥೊಡ್ಯಾಂಕ್ ಮಾಂಕೊಡ್ ಕರಿತ್, ಪುಣ್ ಸರ್ವಾಂಕ್ ನ್ಹಯ್.
’ಕಲಾಕುಲ್’ ನಾಟಕ್ ಪಂಗ್ಡಾ ವಿಶ್ಯಾಂತ್ ವ್ಹಡ್ವಿಕ್ ಉಲಂವ್ಚೊ ಹೊ ಮಾನೇಸ್ತ್ ತ್ಯಾ ಪಂಗ್ಡಾಕ್ ವಚೊನ್ ಮೆಳ್ಳಾಂ ಮ್ಹಣ್ತಾ ನ್ಹೇಂ? ತೊ ಕೆದಾಳಾ ತ್ಯಾ ಪಂಗ್ಡಾಕ್ ಮೆಳ್ಳಾ ಮ್ಹಣಾತ್ಗೀ? ತೊ ತ್ಯಾ ಪಂಗ್ಡಾಕ್ ಬಿಲ್ಕುಲ್ ಮೆಳೊನಾಂ. ಬಗಾರ್ ’ಕಲಾಕುಲ್’ ಪಂಗ್ಡಾ ವಿಶ್ಯಾಂತ್ ಖಂಯ್ ಸಗ್ಳ್ಯಾನ್ ಫೊನಾಂ ಕರ್ನ್ ವಿಮರ್ಶಕಾನ್ ಮಾಹೆತ್ ಘೆತ್ಲ್ಯಾ ಮ್ಹಳ್ಲೊ ದಾಕ್ಲೊಯ್ ಮ್ಹಜೆಲಾಗಿಂ ಅಸಾ. ಮಾತ್ರ್ ನ್ಹಯ್ ಅನಿಕೀ ಚಡಿತ್ಬುದ್ವಾಂತ್ಕಾಯ್ ಖರ್ಸುನ್ ‘ದಾಯ್ಜ್ ಡೊಟ್ ಕೊಮ್’ಚೆರ್ ಫಾಯ್ಸ್ ಜಾಲ್ಲೊ ಹೊಚ್ಚ್ ’ಸವಾಯ್ (Cheap) ಬುದ್ವಂತ್ ವಿಮರ್ಸೊ’’ಮಾನೆಸ್ತ್ ಲ್ಯಾನ್ಸಿ ಪಿಂಟೊ ನಾಯಕಾಚ್ಯಾ’ ಇ-ಮೇಯ್ಲ್ ಐಡಿ ಥಾವ್ನ್ ಸಭಾರ್ ಜಣಾಂಚ್ಯಾ ಆನಿ ಸಂಸ್ಥ್ಯಾಂಚ್ಯಾ ಇ-ಮೇಯ್ಲ್ ಐಡಿಕ್ ಧಾಡ್ಲಾ (ದಾಕ್ಲೊ ಅಸಾ). ವಿಮರ್ಶಕಾನ್ ನಾಂವ್ ಪಾಡ್ ಕರುಂಕ್ಚ್ಚ್ ಇತ್ಲಿಂ ಕಾಮಾಂ ಕೆಲ್ಯಾಂತ್ ಮ್ಹಳ್ಳೆಂ ಕೊಂಕ್ಣಿ ಲೊಕಾನ್ ಇತ್ಲ್ಯಾರ್ಚ್ಚ್ ಸiಲ್ಯಾರ್ ಬರೆಂ. ಅಸ್ಲೊ ಫಟ್ಕಿರೊ ವಿಮರ್ಶಕ್ ಕೊಂಕ್ಣೆಕ್ ಗರ್ಜ್ಗೀ!?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
