ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿ ಕಥಾ: ನಕ್ಕುರ ಮಹಾತ್ಮೆ
ಕೆವಿನ್ ಡಿ’ಮೆಲ್ಲೊ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಪ್ರಕಾರಾಂತ್ ಕೆವಿನ್ ಡಿ’ಮೆಲ್ಲೊಚ್ಯೊ ಕಾಣ್ಯೊ ವೆಗ್ಳ್ಯಾಚ್ ರಿತಿಚ್ಯೊ. ಗ್ರಾಮೀಣ್ ಲೊಕಾಂಚೆಂ ಜಿವಿತ್, ತಾಂಚೆಂ ಚಿಂತಾಪ್, ತಾಂಚಿ ಭಾಸ್, ತಾಂಚಿ ಸಂಸ್ಕೃತಿ ಅಪ್ಲ್ಯಾ ಕಾಣ್ಯಾಂನಿ ಅಪುರ್ಭಾಯೆನ್ ಪಿಂತ್ರಾಂವ್ಚಿ ಕಲಾ ಜಾಣಾ ಆಸ್ಚಾ ಹಾಚ್ಯಾ ಮಟ್ವ್ಯಾ ಕಾಣ್ಯಾಂಕ್ ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂನಿ ತಶೆಂಚ್ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಂತ್ ಹಾಚ್ಯಾ ಅನ್ವೇಷಣ್ ಕಾಣ್ಯೆಕ್ ತಿಸ್ರೆಂ (ರು. 2000) ಇನಾಮ್ ತಶೆಂಚ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ’ಚಂಡ ಆನಿ ಗರ್ಭ್’ ಹಾಣ್ಯೆಕ್ ಪಯ್ಲೆಂ ಇನಾಮ್ (ರು. 5000) ಲಾಭ್ಲಾಂ.
ಕೆವಿನ್ ಡಿ’ಮೆಲ್ಲೊಚ್ಯೊ ಹೆರ್ ಕಾಣ್ಯೊ: ಅನ್ವೇಷಣ್, ಚಂಡ ಆನಿ ಗರ್ಭ್, ಕೂಕುರ ಆನಿ ದುವಾಳೆ
ಕೆವಿನ್ ಡಿ’ಮೆಲ್ಲೊ
ಮಟ್ವಿ ಟಿಪ್ಪಣಿ:
"ಟರಠಕ್ಕ ಟರಠಕ್ಕ ಢರ್ಢಕ್ಕ ಢರ್ಢಕ್ಕ
ಚಂಡ ಮುಂಡ, ರುಂಡ ಮುಂಡ ಢಂಯ್
ಮುಂಡ ರುಂಡ, ಚಂಡ ಮುಂಡ ಧಂಯ್
ಆದಿ ಶಕ್ತಿಯೆ, ಮಹಿಷ ಮರ್ದಿನಿಯೇ
ಶ್ರೀ ದೇವಿಯೆ ನಮೋನಮಃ:"
ದುಶ್ಟ್ ರಾಕ್ಕೊಸ್ ಚಂಡ-ಮುಂಡ, ಮಹಿಶಾಸುರಾಚಿ ತಕ್ಲಿ ಕಾಪುನ್ ’ದುಷ್ಟ ಸಂಹಾರ - ಶಿಷ್ಟ ಸಂರಕ್ಷೆ ’ಕೆಲ್ಲೆ ಅಂಗೊಣ್ಯಾಚ್ಯಾ ಯಕ್ಶಗಾನ್ ಬಯಲಾಟ ’ಶ್ರೀದೇವಿ ಮಹಾತ್ಮೆ’ಕ್ಯಿ ಕಥನಕಾಚ್ಯಾ ’ನಕ್ಕುರ ಮಾಹಾತ್ಮೆ’ ಕ್ಯಿ ಕಸಲೊಚ್ ಸಂಬಂಧ್ ವಾ ಗಾಂಚ್ ನಾ ಮ್ಹಣ್ ವಾಚಕ್ ಮಹಾಶಯಾಂಕ್ ಸ್ವಷ್ಟೀಕರಣ್ ದಿಂವ್ಚೆಂ ಸೂಕ್ತ್ ಮ್ಹಣ್ ಭೊಗ್ತಾ. ಬ್ರಹ್ಮ ಮಹಾತ್ಮೆ, ಈಶ್ವರ ಮಾಹಾತ್ಮೆ ವಾ ವಿಷ್ಣು ಮಹಾತ್ಮೆಯಿ ಹ್ಯಾ ನಕ್ಕುರ ಮಹಾತ್ಮೆ ಸವೆಂ ಘಡ್ಸುಂಚೆಂ ಪ್ರೇತನ್ ಕರ್ಚೆಂ ಆದಮ್ಯ್ ಚೂಕ್ ಜಾಯ್ತ್. ತರೀ ’ಇಸ್ಣು ಮಹಾತ್ಮೆ’ ಚ್ಯಾ ದಶಾವತಾರಾಂನಿ ಹೊ ಇಕ್ರಾವೊ ನಕ್ಕುರಾವತಾರ್ ಕಸೊ ಘುಸ್ಲೊಗಾಯ್? ಮ್ಹಣ್ ಯಕ್ಶಗಾನ ತಾಳ-ಮದ್ದಳೆಚೆಂ ಖಂಡಾಬಟ್ಟೆ ಪಿಶೆಂ ಆಸ್ಲ್ಲ್ಯಾಂನಿ ವಿಚಾರ್ಲ್ಲ್ಯಾಂಕ್ ಮಾತ್ರ್ ಕಾಂಯ್ ಅತಿಶಯ್ ನಾ. ಆಸೊಂ.....ಹಾಂಗಾಸರ್ ನಕ್ಕುರ ಮ್ಹಳ್ಯಾರ್ ನಕ್ಕುರ ವಾ ಗಾಂಯ್ದೊಳಾಚೆಂ ಚಿತ್ರಣ್ ತುಮ್ಚ್ಯಾ ಸ್ಮ್ರತಿಪಟಲಾರ್ ಉದೆಂವ್ಚೆಂ ತೆಂ ಸಹಜ್ಚ್. ವಾಚಕ್ ಮಹಾಶಯಾಂಕ್ ದಿಂವ್ಚೆಂ ಆನ್ಯೇಕ್ ಸ್ವಷ್ಟೀಕರಣ್ - ಹೆಂ ಕಥಾನಕ್ ನಕ್ಕುರ್ ವಾ ಗಾಂಯ್ದೊಳಾಚೆಂ ನ್ಹಯ್. ಬಗಾರ್ ’ನಕ್ಕುರ’ ನಾಂವಾಂಚ್ಯಾ ನರಪ್ರಾಣಿಚೆಂ ಮ್ಹಣ್ ಸಮ್ಜೊಂಚೆಂ. ಮನ್ಶಾಂಕ್ಯಿ ಅಸಲೆಂ ವಿಚಿತ್ರ್ ನಾಂವ್ ದವರ್ತಾತ್ಗಿ? ಮ್ಹಣ್ ತುಮಿಂ ವಿಚಾರುಂಕ್ ಪುರೊ. ವ್ಹಯ್, ಜರೂರ್ ದವರ್ತಾತ್. ಸಂಪ್ರದಯಾ ಪರ್ಮಾಣೆಂ ಹಾಚೊ ಬಾಪುಯ್ ಬೊಗ್ಗುರ ಹಾಕಾ ಪಾಳ್ಣ್ಯಾಂತ್ ಘಾಲ್ಚ್ಯಾ ಪಯ್ಲ್ಯಾ ದಿಸಾ, ಧನಿ ಗುತ್ತಾಚ್ಯಾ ದೇಜಣ್ಣ ಶೆಟ್ಟಿಚ್ಯಾ ಆಂಗ್ಣಾಂತ್ ಪೆಂಕಡ್ ಬಾಗಾವ್ನ್ ನಮ್ರ್ ಜಾವ್ನ್ ಉಬೊ ಜಾಲ್ಲೊ. ಪಯ್ಲ್ಯಾ ಪಾವ್ಸಾಕ್ ಆಂಗ್ಣಾಂತ್ ವಯ್ರ್ ಪಡ್ಲ್ಲ್ಯಾ ಗಾಂಯ್ದೊಳಾಕ್ ಗಿಳುಂಕ್ ಝಗ್ಡೆಂ ಕರ್ನ್ ಆಸ್ಲ್ಲ್ಯಾ ಕುಂಕ್ಡಾ ಪಿಲಾಂಚಿ ಸೊಬಾಯ್ ಪಳೆವ್ನ್ ಆಸ್ಲ್ಲ್ಯಾ ಧನಿ ದೇಜಣ್ಣ ಶೆಟ್ಟಿನ್ ಹಾಸೊನ್ಶೆಂ ಮ್ಹಳ್ಳೆಂ, ’ನಾಂವಾಂತ್ ಕಸಲಿ ಂ ಕರ್ಮಾಂ ಆಸಾತ್? ನ....ನ...... ನಕ್ಕುರ್ ಮ್ಹಣ್ ದವರ್" ಪಾಟಿಂ ಮುಖಾರ್ ಚಿಂತಿನಾಸ್ತಾಂ ಧನ್ಯಾಚಿ ಆಜ್ಞಾ ವಿದೇಯ್ ಜಾವ್ನ್ ಬೊಗ್ಗುರಾನ್ ಪಾಳ್ಲ್ಲಿ...ತೆಂ ಸೊಡ್ಯಾಂ ...ಹಾಂ......ಟಿಪ್ಪಣಿ ಸಂಪಂವ್ಚ್ಯಾ ಫುಡೆಂ ಹ್ಯಾ ನಕ್ಕುರ ನರಪ್ರಾಣಿಕ್ಯಿ ನಕ್ಕುರ ವಾ ಗಾಂಯ್ದೊಳಾಕ್ಯಿ ವಿಶೇಷ್ ಸಳಾವಳ್ ಆಸಾ ಮ್ಹಣ್ ಗ್ಯಾರಂಟಿ ಜಾವ್ನ್ ಸಾಂಗ್ಯೆತ್. ಅಂತೆಯೇ ವಾಚಕ್ ಮಹಾಶಯನೇ, ನಕ್ಕುರ ಮಹಾತ್ಮೆಯನು ಆಲಿಸುವಂತವನಾಗು....
ಮಹಾತ್ಮೆಚೆ ಆರಂಭ್:
ಕಾರ್ತಿ ಮಯ್ಣ್ಯಾಚೊ ಅಕೆರ್, ಬೊಂತೆಲ್ ಮಯ್ನ್ಯಾಂಚೊ ಆರಂಭ್. ಕಾರ್ತಿ ಬೆಳೆಂ ’ಏಣೆಲ್ದಾಕೆಯ್’ ಚೆಂ ಲುಂವಪ್ ಎದೊಳ್ಚ್ ಮುಗ್ದಾಲ್ಲೆಂ ಬಯ್ಲಾಂನಿ ಸುಗ್ಗಿ ಬೆಳ್ಯಾಕ್ ಕೊಸಪ್ ಸುರು ಕರ್ಚೊ ಕಾಳ್. ಹೊ ಕಾಳ್ ನಕ್ಕುರಾಚಿ ಜಿಣಿಯೆಂತ್ ಇಸೇಸ್ ’ಸಿಜನಾ’ ಚೊ ಕಾಳ್. ಗಾದ್ಯಾ ಮೆರಾಂಚ್ಯಾ ತಣಾಂತ್ ಹಾಬ್ಬೊನ್ ರಾಂವ್ಚೆಂ ಗೊಂಕುರು ಮಾಣ್ಕೆ(ಬೆಬೆ) ತಶೆಂಚ್ ಬಯ್ಲಾ ದೆಗೆಚ್ಯಾ ಫಾತ್ರಾ ಮಾಟ್ಯಾಂನಿ ಲಿಪ್ಲ್ಲ್ಯಾ ದೆಂಕ್ಳ್ಯಾಂಕ್ ಗರಿಯೆಕ್ ನಕ್ಕುರ್ ಗುಂತುನ್ ಧರ್ಚ್ಯಾಂತ್ ತೊ ವೆಸ್ತ್ ಆಸ್ತಾ. ಗೊಂಕುರು ಮಾಣ್ಕೆ - ದೆಂಕ್ಳೆ ಕಾಂಯ್ ತಾಕಾ ನಿಸ್ತ್ಯಾಕ್ ನ್ಹಯ್. ಬಗಾರ್ ತಾಚ್ಯಾ ಪ್ರಾಸ್ ಮಹತ್ತರ್ ಕಾಮಾಕ್ ತೆ ಉಪ್ಕಾರ್ತಾತ್ ತೆಂ ’ಓಪನ್ ಸೀಕ್ರೇಟ್’ ಚ್ ಸಯ್. ಮಾಸ್ಳಿ ಧರಿಜೆ ಜಾಲ್ಯಾರ್ ’ಮೇವು’(ಖಾಣ್) ಗರ್ಜೆಚೆಂ. ದೆಕುನ್ ಶಾಂಭವಿ ನ್ಹಯ್ಚೆ ಉದ್ಕಾ ದೆಗೆಚ್ಯಾ ಮುಂಡೇಮ್(ಬೊಣೊಂಗ್) ಬೊಲ್ಯಾಂನಿ ಪಾವ್ಸ್ ಸುರು ಆರಂಭ್ ಜಾಲ್ಲೊಚ್ ರಿಗೊನ್ ಬಸ್ಲ್ಲೆ ಮಾಡೊಂಜಿ, ಪಿಲಿಕುಟ್ಟಿ, ಪಟ್ಟೆಕುಚ್ಚಿ ಆಪಾಪ್ಲ್ಯಾ ಪಿಲಾಂ ಜಮ್ಯಾಕ್ ಘೆವ್ನ್ ಭಾಯ್ರ್ ಯೇವ್ನ್ ಭುಕೆ ಸವೆಂ ರಾಜಾರೋಶಾಂತ್ ಭೊಂವ್ಡಿ ಮಾರ್ತಾನಾ ’ಮೇವು’ ಉದವ್ನ್ ವ್ಹಡ್ ವ್ಹಡ್ ಮಾಸ್ಳ್ಯೊ ಧರ್ಚೊ ಆಯಿನ್ನ್ ಕಾಳ್.......
....ತಶೆಂ ಪಳೆಂವ್ಕ್ ಗೆಲ್ಯಾರ್ ಥೊಡ್ಯಾ ವರ್ಸಾಂ ಆದಿಂ ಮಾಸ್ಳಿ ಧರ್ಚಿ ಕಾಂಯ್ ನಕ್ಕುರಾಚಿ ವ್ರತ್ತಿ ನ್ಹಯ್ ಆಸ್ಲ್ಲಿ. ಫಕತ್ತ್ ಪ್ರವ್ರತ್ತಿ ಜಾವ್ನಾಸ್ಲ್ಲಿ ಮ್ಹಣ್ಯೆತ್. ಪುಣ್ ಗ್ರಾಚಾರ್ ತಾಚೆಂ. ’ಕಾಫಿನಾ ತೋಟಾ’ ಗೀಗಾ ಪರ್ಬುಗೆರ್ ನಾರ್ಲ್ ಕಾಡುಂಕ್ ಗೆಲ್ಲೊ ತೊ ಪಾಂಯ್ ಚುಕೊನ್ ಸಕ್ಲಾ ಪಡ್ಲ್ಲೊ. ಪರಿಣಾಮ್ ಜಾವ್ನ್ ದಾವ್ಯಾ ಪಾಂಯಾಂಚೆಂ ಹಾಡ್ ಮೊಡ್ಲ್ಲೆಂ. ಸರ್ಕಾರಿ ಆಸ್ಪತ್ರೆಕ್ ದಾಕಲ್ ಜಾಲ್ಯಾರೀ ಸೂಕ್ತ್ ಚಿಕಿತ್ಸಾ ನಾಸ್ತಾಂ ಪಾಂಯ್ ವಾಂಕ್ಡೊಚ್ ಜಾವ್ನ್ ಉರ್ಲೊ. ಥೊಂಟೊ ನ್ಹಯ್ ತರೀ ಚೊಂಟೊ ಜಾಲ್ಲೊ. ಥೊಡ್ಯಾಚ್ ತೆಂಪಾನ್ ಹಳ್ಳೆಚ್ಯಾ ಚಡ್ತಾವ್ ಲೊಕಾನ್ ತಾಕಾ ನವ್ಯಾ ನಾಂವಾನ್ ’ಚೊಂಟೆ ನಕ್ಕುರೆ’ ಮ್ಹಣ್ ವೊಲಾಂವ್ಕ್ ದಾಕ್ಶೆಣ್ ಕೆಲಿ ನಾ.....
...ಆಜ್ಯೀ ನಕ್ಕುರಾಕ್ ಫಾಂತ್ಯಾಫರಾಚ್ ಜಾಗ್ ಜಾಲ್ಲಿ. ಹಳ್ಳೆಕ್ ಆಜ್ ವಿಶೇಶ್ ದೀಸ್. ಅಜ್ ವರ್ಸಾವಾರ್ಚೊ ಜಾತ್ರೊ. ಪಾಟ್ಲ್ಯಾ ದೋನ್ ದಿಸಾಂ ಥಾವ್ನ್ ಎಕ್ಚ್ ಏಕ್ ಮಾಡೊಂಜಿ ಮೆಳೊಂಕ್ ನಾ. ಆಜ್ ಕಶೆಂ ಪುಣಿ ಕರ್ನ್ ಏಕ್-ದೋನ್ ಮಾಸ್ಳ್ಯೊ ಧರ್ನ್, ವಿಕುನ್ ಖರ್ಚಾಕ್ ಪಯ್ಶೆ ಕರಿಜೆ. ಚುಮುಚುಮು ಉಜ್ವಾಡ್ತಾನಾಂಚ್ ಗುಡ್ಸುಲಾ ಥಾವ್ನ್ ಭಾಯ್ರ್ ಅಯಿಲ್ಲೆಂಚ್ ಖೊರೆಂ ಘೆವ್ನ್ ಸಾರ್ಯಾ ಮುಟ್ಯಾ ದೆಗೆನ್ ಉಸ್ತಿಲಾಗ್ಲೊ. ಜೀವ್ ಜೀವ್ ಹುಳ್ವುಳ್ಚೆ ಗಾಂಯ್ದೊಳ್ ಕಟ್ಟೆಂತ್ ಘಾಲ್ನ್ ವೊಡ್ಪಾಕ್ - ಶಿರ್ಕಾಯಿಲ್ಲೆಂ ಶಿಲೆಂ (ಇಂದಾ ತಾಳ್ಯೆಚೆ ಬೊಡಿ) ಆನಿಂ ತಾಕಾ ಬಾಂದ್ಲ್ಲಿ ಗರಿ, ಪರ್ನ್ಯಾ ಪೊತ್ಯಾಂತ್ ದರ್ವಿಲ್ಲ್ಯೊ ತಂಗಿಸಾಚ್ಯೊ ವ್ಹಡ್ಲ್ಯೊ ಗರಿಯೊ ತಶೆಂಚ್ ಮಾತಿಯೆ ಮೊಡ್ಕಿ ಘೆವ್ನ್ ಆಂಗ್ಣಾಕ್ ಆಯ್ಲೊ. ಬಾಯ್ಲ್ ಕೂಸು, ಧುವ್ ಯಮುನಾ ಅಜೂನ್ ಮಾಂದ್ರೆರ್ ಲೊಳ್ತಾಲಿಂ. ಜಾತ್ರ್ಯಾಚೊ ದೀಸ್ ಜಾಲ್ಲ್ಯಾನ್ ಕಾಮಾಕ್ ರಜಾ. ಆಜ್ ವೆಗಿಂಚ್ಯಾಕ್ ಚಾ ಮೆಳ್ಚಿನಾ ಮ್ಹಣ್ ಸುಸ್ತಾಲ್ಲೆಂಚ್ ಸರಾರಾಂ ದೇಜಣ್ಣ ಶೆಟ್ಟಿಚ್ಯಾ ಬಯ್ಲಾ ಗಾದ್ಯಾ ತೆವ್ಶಿನ್ ಪಾಂಯ್ ವೊಡಿತ್ ಚಮ್ಕಲಾಗ್ಲೊ.
....ಗರಿಯೆಕ್ ನಕ್ಕುರ್ ಗುಂತುನ್ ಕಿತ್ಲಿಂಯ್ ಬಿಳಾಂ, ಮಾಟಿಂ ಸೊದ್ಲ್ಯಾರ್ಯಿ ಏಕ್ಚ್ ಏಕ್ ದೆಂಕ್ಳೊ ದಿಷ್ಟಿಕ್ ನಾ!. ಗರಿಯೆಕ್ ಹುಂಗೊನ್ ಸಮೇತ್ ಪಳೆನಾತ್ಲ್ಲ್ಯಾ ದೆಂಕ್ಳ್ಯಾಂಚ್ಯಾ ಸಂತಾನಾಕ್ ಯೆಟಿತ್ ಆಸ್ತಾನಾ ಸುರ್ಯ್ ದೇವ್ ವಯ್ರ್ ವಯ್ರ್ ಚಡ್ತಾಲೊ.
"ಮಾಲ್ದಿಸಾಂವ್ ಪಡ್ಲ್ಲೆ ಖಂಚಿ. ಕಂಯ್ ಬೊಂಗ್ಲ್ಯಾತ್ಗಾಯ್?" ನಕ್ಕುರಾಚೆಂ ಸಯ್ರಾಣ್ ಚುಕೊನ್ ಯೆತಾಲೆಂ. ಆನಿಂ ಹಾಂಗಾಸರ್ ರಾವ್ಲ್ಯಾರ್ ಫಾಯ್ದೊ ನಾ, ಹಾಚ್ಯಾ ಪ್ರಾಸ್ ಸಂಕರಭಟ್ರುಚ್ಯಾ ತೊಟಾ ಬಗ್ಲೆಚ್ಯಾ ’ಪಲ್ಲ’ಂತ್ (ಉದ್ಕಾ ಗುಂಡಿ) ಮಾಣ್ಕೆ ಧರ್ಚೆಂಚ್ ಬರೆ ಮ್ಹಣ್ ಚಿಂತುನ್ ಪಾಟಿಂ ಘುಂವ್ತಾನಾ ಮೆರೆ ಕೊನ್ಶ್ಯಾ ಥಾವ್ನ್ ಮಾಯಿಲಾಚಿ ತಕ್ಲಿ ದಿಸಾಲಾಗ್ಲಿ. ಹಾತಾಂತ್ ಜಯ್ತ್ ಕಡಲ ಕೊಂಬೊ ಘೆವ್ನ್ ಲಾಗಿಂ ಆಯಿಲ್ಲ್ಯಾ ಮಾಯಿಲಾನ್ ಹಾಸೊನ್ಶೆಂ ವಿಚಾರ್ಲೆಂ,
"ಕೊಣಾಕ್ ಯೆಟುನ್ ಆಸಾಯ್ ನಕ್ಕುರಣ್ಣ? ಸೊಡ್ತೆಚ್ಯಾ ಕಾಟಾಕ್ ಯೇಂವ್ಕ್ನಾಂಗಿ?"
"ಆನಿಂ ಕೋನಾಕ್ ಯೆಟಿನ್" ನ್ಹಯ್, ತರ್ ಹ್ಯಾ ದೆಂಕ್ಳ್ಯಾಂಚೆಂ ಸಂತಾನ್ಚ್ ಮುತ್ವೊನ್ ಗೆಲಾಂಗಿ ಮ್ಹಣ್. ಹಾಂ, ಸೊಡ್ತೆಕ್ ಪುಣಿ ಯೇಜೆ ಮಾರಾಯಾ. ದೂದ್(ಜುಗಾರ್) ಬಾಂದುಂಕ್ ಮುಕ್ಕಾಲ್ ನಾ. ಏಕ್ ಮಾಡೊಂಜಿ ಪುಣಿ ಬಾಗಾಯ್ಲ್ಯಾರ್ ದೋನ್ ಕಾಸ್ ಜಾತಿತ್. ಕೆಂಪು ಉರಿಯಾಕ್ ಬಾಲ್ ಬಾಂದಿನಾಸ್ತಾಂ ಮಯ್ನೆ ತೀನ್ ಜಾಲೆ"
"ತುಂ ಎಕ್ಲೊಚ್ ಪಳೆ ಮಸ್ಳೆಕ್ ಗರಿ ಘಾಲ್ಚೊ. ಹೆ ಹಳ್ಳೆಂತ್ ಮಾಸಾಕ್ ಗರಿ ಘಾಲ್ಚೆ ಕಿತ್ಲೆಶೆಗ್ ಮನಿಸ್ ಆಸಾತ್. ಮಾಸಾಕ್ ಮಾಸ್. ಪಯ್ಶಾಂಕ್ ಪಯ್ಶೆ......ಸೊಡ್....ತೆಂ ಪೂರಾ ತುಕಾ ಖಂಯ್ ಕಳ್ತಾ? ಚಲ್ ಎಕೇಕ್ ಮುಟ್ಟಿ ಸುರ್ ಮಾರ್ಯಾ.....ಮ್ಹಜ್ಯಾ ಲೆಕಾರ್" ಮಾಯಿಲಾ ಮುಸುಮುಸು ಕರ್ನ್ ಕಿಸ್ಕ್ ಕರ್ನ್ ಹಾಸ್ಲೊ.
ಆತಾಂ ದೊಗೀ ಚಂದಯ್ಯ ಪುಜಾರಿಚೆ ಸುರೆ ಗಡಂಗಾ ತೆವ್ಶಿನ್ ಚಮ್ಕಾಲಾಗ್ಲೆ,
ಗಡಂಗಾಂತ್ ಗಿಜಿಗಿಜಿ ಆವಾಜಾ ಸವೆಂ ಸಾಟ್ ಸತ್ತರ್ ಥಂಯ್ ಥಂಯ್ಸರ್ ಬಾಂದುನ್ ಘಾಲ್ಲ್ಯಾ ಕಾಟಾಚ್ಯಾ ಕೊಂಬ್ಯಾಚೊ ಸಾದ್. ಚಡ್ತಾವ್ ಸಂಭಾಷಣ್ ಆಯ್ಚ್ಯಾ ದಿಸಾ ಚಲ್ಚ್ಯಾ ಸೊಡ್ತಿಚ್ಯಾ ಕೊಂಬ್ಯಾ ಕಾಟಾ ವಿಶಿಂ, ಉಪ್ರಾಂತ್ ರಾತಿಂ ಚಲ್ಚ್ಯಾ ಗುತ್ತುಚ್ಯಾ ದೇಜಣ್ಣ ಶೆಟ್ಟಿಚೊ ಆಂಗೊಣೆಚೊ ಯಕ್ಶಗಾನ ಬಯಲಾಟ ’ಶ್ರೀ ದೇವಿ ಮಹಾತ್ಮೆ = ’ಇಸ್ಣು’ ಮಾಹಾತ್ಮೆ’ ವಿಶಿಂ ಚಲ್ತಾಲೆಂ. ಮಾಯಿಲಾನ್ ಧರ್ಮಾರ್ಥ್ ದಿವಯಿಲ್ಲಿ ಸುರೆಚಿ ಮುಟ್ಟಿ ಖಾಲೊ ಕರ್ನ್ ಗರಿ ಆನಿಂ ಮಾತಿಯೆ ಮೊಡ್ಕಿ ಘೇವ್ನ್ ಪಾಟಿಂ ವೆಚೆಂ ಆಟ್ಟಾಣೆಂ ಕರ್ತಾ ಕರ್ತಾನಾ ’ಪರ್ಕಟ್ ಬಾಯಿ’ ಕಿಟ್ಟಪ್ಪ ಮುಖಾರ್ ಉದೆಲೊ.
"ಹೋಯ್...ನಕ್ಕುರ...ಗರಿ ಘಾಲಿವೇ?" ಕಾಂಯ್ ಶಿರ್ಕಾಲೆಂಗಿ?"
ನಕ್ಕುರಾನ್ ಜಾಪ್ ದಿಲಿ ನಾ. ಫಕತ್ತ್ ತಕ್ಲಿ ಹಾಲಯ್ಲಿ ಮಾತ್ರ್. ತಾಕಾ ಕಾರಣ್ಯಿ ಆಸಾ. ಹ್ಯಾ ಕಿಟ್ಟಫ್ಫಾಚ್ಯಾ ತೊಂಡಾಕ್ ಶಿರ್ಕಾಲ್ಯಾರ್ ಉಪ್ರಾಂತ್ ಭಾರಿ ಕಷ್ಟ್ಚ್ ಸಯ್. ಖಂಯ್ ಥಾವ್ನ್ ಖಂಯ್ ಉತ್ರಾಂಚೊ ಫಾರ್ ಮಾರ್ತಾ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾ.
"ಇಶ್ಶೀ......ತುಂ ಬೂಸ್ ಮಾರಾಯ. ತುಂ ಫಕತ್ತ್ ಮಾಸ್ಳಿ ಧರುಂಕ್ ಲಾಯೆಕ್.
ಶೆಂಡಿಯೆಕ್ ಧರ್ನ್ ಚಾರ್ ವ್ಹಾಜಂವ್ಕ್ ತುಕಾ ಧಯ್ರ್ ಖಂಯ್ ಆಸಾ?" ಕಿಟ್ಟಪ್ಪ್ ಕಿಸ್ಕ್ ಕರ್ನ್ ಹಾಸ್ತಾನಾ ತಾಚ್ಯಾ ಸವೆಂ ಆಸ್ಲ್ಲೆ ಆನಿಂ ಥೊಡೆಯ್ ಹಾಸಾಲಾಗ್ಲೆ,
ನಕ್ಕುರಾಕ್ ಕಿತೆಂ ಉಲಂವ್ಚೆಂ ಮ್ಹಣ್ ಕಳನಾಸ್ತಾಂ, ದೊಳೆ ಪಿಳಿ ಪಿಳಿ ಕರ್ನ್ ಹೆವ್ಶಿನ್ ತೆವ್ಶಿನ್ ಪಳೆಲಾಗ್ಲೊ.
"ಜೂನ್ ಮಾಸ್ಳೆ ಸವೆಂ ತರ್ನೆ ಮಾಸ್ಳೆಕ್ಯಿ ಗರಿ ಪಡ್ಲ್ಯಾ. ’ಮೇವು’ ಉಡಯ್ಲ್ಯಾರ್ ಗರಿ ಚಾಬಾಜೆಚ್ ಪಳೆ. ಆಸೊಂ...ಆಸೊಂ...ತೆಂ ಪೂರಾ ತುಕಾ ಖಂಯ್ ಕಳ್ತಾ? ತಿಕ್ಕೆ ಜಾಗ್ರೂತ್ ರಾವ್ ಆನಿಂ ಬಂದೊಬಸ್ತ್ ಕರ್’ ತಿತ್ಲೆಂ ಸಾಂಗೊನ್ ಕಿಟ್ಟಪ್ಪ ಗಡಂಗಾ ಬಿತರ್ ರಿಗೊನ್ ನಪಂಯ್ಚ್ ಜಾಲೊ. ಗಿರಾಯ್ಕಾಂಚ್ಯಾ ಜಮ್ಯಾಂತ್ಲೆ ಥೊಡೆ ಪರತ್ ’ಪುಸ್ಕ್’ ಕರ್ನ್ ಹಾಸ್ಲೆ.
ಆತಾಂಚ್ ಕಿಟ್ಟಪ್ಪಾಕ್ ಧಾಂವ್ಡಾವ್ನ್ ವ್ಹರ್ನ್ ಮುಸ್ಕಾರ್ ಚೆಂಚುನ್ ಘಾಲ್ಯಾಂ ಮ್ಹಳ್ಳೆಂ ತಿತ್ಲೊ ರಾಗ್ ಆಯ್ಲೊ ತರೀ ಆಪ್ಲೊ ಚೊಂಟೊ ಪಾಂಯ್ ಕಾಣ್ಘೆವ್ನ್ ಕಿಟ್ಟಪ್ಪ ಕಡೆನ್ ಆಪುಣ್ ಝುಜೊಂಕ್ ಸಕನಾ ಮ್ಹಳ್ಳೆಂ ಪರಿಜ್ಞಾನ್ ನಕ್ಕುರಾಕ್ ಜರೂರ್ ಆಸ್ಲ್ಲೆಂ. ಉಮಾಳೊನ್ ಯೆಂವ್ಚೆಂ ದೂಖ್ ಆನಿಂ ರಾಗ್ ಗಿಳಿತ್ ತಕ್ಲಿ ಪಂದಾ ಘಲ್ನ್ ಪಾಂಯ್ ವೊಡಿತ್ ಸಂಕರಭಟ್ರುಚ್ಯಾ ತೊಟಾ ದೆಗೆಚ್ಯಾ ’ಪಲ್ಲ’ ತೆವ್ಶಿನ್ ಚಮ್ಕಾಲಾಗ್ಲೊ
"ವ್ಹಯ್, ಆಜ್ ಪರತ್ ಸಕಾಳಿಂ ಫುಡೆಂಚ್ ನಕ್ಕುರಾಚಿ ಮತ್ ವಿರಾರ್ ಜಾಲ್ಲಿ. ಆಜ್ ಮಾತ್ರ್ ನ್ಹಯ್, ಪಾಟ್ಲ್ಯಾ ಥೊಡೆಶ್ಯಾ ದಿಸಾಂನಿ ಹೆಂ ಘಡೊನ್ ಆಸಾ. ಖೊಮ್ಟಾಚಿ ಮ್ಹಾಲ್ಘಡಿ ಕೊರಪುಲ್ ಆಜ್ಜಿ, ಮ್ಹಾಲ್ಗಡೊ ಕೊರಗಜ್ಜ, ಆಂಗ್ಡ್ಚೊ ಕೊಂಕ್ಣೊ ನರಸಿಂಹ್ ಪೈಕುಲ್, ಘುಡಾ ಆಂಗ್ಡಿಚೊ ನಾಗಣ್ಣ....ಆಶೆಂ ಹೆರ್ ಥೊಡೆಯ್ ಹುಮಿಣ್ಯಾಂ ರುಪಾರ್ ನಮುನ್ಯಾವಾರ್ ಉಲಯಿತ್ ಅಸಾತ್. ಪುಣ್ ನಕ್ಕುರಾಚೆ ಮತಿಂತ್ ಕಾಂಯ್ ಝಳ್ಕಲ್ಲೆಂ ನಾ ವಾ ದುಬಾವ್ ಉದೆಲ್ಲೊ ನಾ. ತಶೆಂ ಉಲಯಿಲ್ಲ್ಯಾಂ ಕಡೆನ್ ಸ್ವಷ್ಟೀಕರಣ್ ವಿಚಾರ್ಚೆಂ ಖಬ್ರೆಕ್ಯಿ ತೊ ಗೆಲ್ಲೊ ನಾ.
ಸದಾಂಯ್ ತಿಳುಂಕ್ ಯೆಂವ್ಚ್ಯಾ ಪಲ್ಲಂತ್ ಆಜ್ ದೋನ್ ತೀನ್ ಬೆಬೆ ಮಾಣ್ಕೆ ಉಪ್ಯೆವ್ನ್ ಆಸ್ಚೆ ಪಳಯಿಲ್ಲೆಂಚ್ ನಕ್ಕುರಾಚಿ ಮನೋಪರಿಗತ್ ಖಿಣಾನ್ ಬದ್ಲಾಲಿ. ಪಲ್ಲಂತ್ ದೆಂವೊನ್ ಆವಾಜ್ ಕರಿನಾಸ್ತಾಂ ’ಗಬಕ್ಕ್’ ಕರ್ನ್ ದೋನ್ ಮಾಣ್ಕ್ಯಾಂಕ್ ಧರ್ಲೆಂ ತರೀ ಏಕ್ ಮಾಣ್ಕೊ ಉಡೊನ್ ಧಾಂವ್ಲೊ. ಪುಡ್ಲ್ಯಾ ಪಾಂಚ್ ಮಿನುಟಾಂನಿ ಶಾಂಭವಿ ನ್ಹಯ್ಚೆ ತಡಿಕ್ ಯೇವ್ನ್ ಪಾವೊನ್ ಜಾಲ್ಲೆಂ ತಾಣೆಂ. ಪೊತ್ಯಾಂತ್ ರೆವ್ಡಾವ್ನ್ ದವರ್ಲ್ಲೆಂ ತಂಗಿಸ್ (ಪ್ಲಾಸ್ಟಿಕಾಚೆಂ ಸುತ್) ಆನಿಂ ತಾಕಾ ಬಾಂದ್ಲ್ಲಿ ಗರಿ ಭಾಯ್ರ್ ಕಡ್ನ್ ಮಾಣ್ಕ್ಯಾಂಚ್ಯಾ ದಾವ್ಯಾ ಪಾಂಯಾಂಕ್ ಗುಂತ್ಲಿ. ಆತಾಂ ತೊ ಉದ್ಕಾ ದೆಗೆರ್ಚ್ ಆಡ್ ವಾಡ್ಲ್ಲ್ಯಾ ರುಮ್ಡಿ ರುಕಾರ್ ಚಡ್ಲೊ. ಸದಾಂಚೆ ಪರಿಂ ಉದ್ಕಾ ಕುಶಿಂ ಬಾಗ್ವೊನ್ ರಾವ್ಲ್ಲ್ಯಾ ಫಾಂಟ್ಯಾರ್ ಬಸ್ತೆಚ್ ಉದ್ಕಾಂ ಕುಶಿಂ ತದೇಕತೆನ್ ಪಳೆಯ್ಲಾಗ್ಲೊ. ಉಣ್ಯಾರ್ ಉಣೆಂ ದೋನ್ - ತೀನ್ ಜೊಡಿ ಮಾಡೊಂಜ್ಯೊ ಪಿಲಾಂ ಹಿಂಡಾಕ್ ಘೆವ್ನ್ ರಾಜಾರೋಶಾಂತ್ ಖೆಳ್ತಾಲ್ಯೊ. ಮುಂಡೇವು ಬೊಲ್ಯಾಂ ದೆಗೆನ್ ಏಕ್ ದೋನ್ ಒಂಟಿ ( ಎಕ್ಸುರೆಂ) ಪಿಲಿಕುಚ್ಚೆಚಿ ಶಿಮ್ಟಿಯಿ ಹಾಚೆ ತೀಕ್ಷ್ಣ್ ದಿಷ್ಟಿಕ್ ಸಾಂಪ್ಡಾನಾಸ್ತಾಂ ಗೆಲಿ ನಾ. ಫುಡ್ಲೆಂ ಆವ್ದೆಂತ್ ಆಯಿನ್ನ್ ಜಾಗ್ಯಾರ್ ಮಾಣ್ಕ್ಯಾ ಸವೆಂ ತಂಗಿಸ್ ಬಿಜಾವ್ನ್ ಉದ್ಕಾಂ ಕುಶಿಂ ಉಡವ್ನ್ ಸುತಾಚೆಂ ಏಕ್ ಪೊಂತ್ ಹಾತಾಂತ್ ಘಟ್ಟ್ ಧರ್ನ್ ರಾಕಾಲಾಗ್ಲೊ.....ಆನಿಂ ರಾಕ್ಚೆಂ ಮಾತ್ರ್ ನಕ್ಕುರಾಚೆಂ ಕಾಮ್. ಹಾತ್ - ಪಾಂಯ್ ಬಡಯಿತ್ ಉಪ್ಯೆಂವ್ಚ್ಯಾ ಮಾಣ್ಕ್ಯಾಕ್ ರಾಗಾನ್, ಭುಕೆನ್, ಮಸ್ತೆನ್ ಗಿಳ್ಚೆ ಮಾಸ್ಳೆಕ್ ವಯ್ರ್ ವೊಡ್ಲ್ಯಾರ್ ಜಾಲೆಂ.
ಸೊಸ್ಣಿಕಾಯೆನ್ ರಾಕೊನ್ ಆಸ್ಲ್ಲ್ಯಾ ನಕ್ಕುರಾಚೆ ಮತಿಂತ್ ಆಲೋಚೆನ್ಯೊ ರೆವೊಡ್ ಘಾಲಿಲಾಗ್ಲ್ಯೊ....... ಆರೇ ಹಾಂ.....ಆಜ್ ಮಾಸ್ಳಿ ಮೆಳ್ಳ್ಯಾರ್ ರೋಜಿ ಬಾಯಕ್ಕಕ್ ವಿಕಿಜೆ. ತಿಚೊ ಘೊವ್ ರೊಬಟ ಪರ್ಬುಲ್ ಫೊರಿನ್ ಥಾವ್ನ್ ಆಯ್ಲಾ,. ಶೆಂಬೊರ್ ರುಪ್ಯಾಂಚ್ಯಾ ಎಕೆ ಮಾಸ್ಳೆಕ್ ದೊನ್ಶ್ಂ ರುಪಯ್ ಫೊರಿನ್ ಪೊರ್ಬುಲ್ ದಿತಾ ತೆಂ ಗ್ಯಾರಂಟಿ. ಉರಿಯ ಕೊಂಬ್ಯಾಕ್ ದೊನ್ಪರಾಂ ಉಪ್ರಾಂತ್ ಕಳಾಕ್ ವ್ಹರಿಜೆ. ಶೆಂಬೊರ್ ರುಪಯ್ ಪುಣೀ ’ದೂದ್’ ಬಾಂದಿಜೆ. ಹಾಚೆ ಆದಿಂಯ್ ಸಾತ್ ಪಾವ್ಟಿಂ ಪಾಡ್ಯ ದಿಸಾಚ್ ಉರಿಯಾಕ್ ಬಾಂದ್ಲ್ಲೆಂ. ’ಬಂಟ’ (ಜಿಕ್ಲ್ಲೊ ಕೊಂಬೊ) ಜಾವ್ನ್ಚ್ ತೊ ಪಾಟಿಂ ಆಯಿಲ್ಲೊ. ಆಜ್ಯಿ ಪಾಡ್ಯಚ್. ಆಜ್ಯಿ ಜಿಕ್ಚೆಂ ಗ್ಯಾರಂಟಿ. ’ವೊಟ್ಟೆ’ (ಮೆಲ್ಲೊ ವಾ ಸಲ್ವಾಲ್ಲೊ) ಕೋರಿಚೆ ದೋನ್ ಕುಡ್ಕೆ ಮಾಸ್ ಚಾಬಾಜೆ........ ಉಪ್ರಾಂತ್ ರಾತಿಚೆಂ ಶ್ರೀದೇವಿ ಇಸ್ಣು ಮಹಾತ್ಮೆ ದೊಳೆಭರ್ ಪಳಯ್ಜೆ...
......ಆತಾಂ ಸುರ್ಯೊ ದೇವ್ ವಯ್ರ್ ವಯ್ರ್ ಚಡೊನ್ ಯೆತಾನಾ ನಕ್ಕುರಾಚೆಂ ಸಯ್ರಾಣ್ ಚುಕೊನ್ ಯೆತಾಲೆಂ. ಆಜ್ ಹ್ಯಾ ಮಾಸ್ಳ್ಯಾಂಕ್ ಜಾಲಾಂ ತರೀ ಕಿತೆಂ? ಹಲ್ಕಟ್ ಖಂಚೆ.......... ಆರ್ ಪುಣಿ ಮಾರುಂಕ್ ನಾಮೂ?....ನ್ಹಯ್ ತರ್ ಮಾಣ್ಕ್ಯಾಚ್ಯಾ ಸುತ್ತುರಾಕ್ ಯೆತಾತ್ ಶಿವಾಯ್ ಹುಂಗೊನ್ ಸಮೇತ್ ಪಳೆನಾಂತ್ಮೂ...? ಪಳೆತಾ ಪಳೆತಾನಾ ಹಾತ್ ಪಾಂಯ್ ಮಾರ್ನ್ ಸಲ್ವಾಲ್ಲೊ ಗೊಂಕುರು ಮಾಣ್ಕೊ ಪಿರಾಣ್ ಸೊಡ್ನ್ ಉದಾರೊಚ್ ಪಡ್ತಾನಾ ನಿರಾಶೆಚೊ ದೀರ್ಘ್ ಉಸ್ವಾಸ್ ಸೊಡ್ಲೊ. ನಕ್ಕುರಾನ್, ಭೇಸ್ ಜಾಲೆಂ...ಮೆಲ್ಲ್ಯಾ ’ಮೇವು’ಕ್ ಆನಿಂ ಮಾಸ್ಳಿ ಲಾಗನಾ. ರುಕಾರ್ ಥಾವ್ನ್ ಸಕ್ಲಾ ದೆಂವೊನ್ ಫುಡೆಂ ಕಿತೆಂ ಕರ್ಚೆಂ ಮ್ಹಣ್ ಝಳ್ಕನಾಸ್ತಾಂ ಥೊಡೊ ವೇಳ್ ಸ್ತಬ್ದ್ ರಾವ್ಲ್ಲ್ಯಾ ತಾಕಾ ಕಸಲಿಗಿ ಆಲೋಚನ್ ಮತಿಂತ್ ರಿಗ್ಲ್ಲಿಚ್ ತುರ್ತಾನ್ ರೋಜಿ ಬಾಯಕ್ಕಾಚ್ಯಾ ಘರ್ಚಿ ವಾಟ್ ಧರಿಲಾಗ್ಲೊ.....
ಟೆರೆಸಾಚ್ಯಾ ಘರ್ಚ್ಯಾ ಸಿಟ್ ಆವ್ಟಾಂತ್ ಬಸೊನ್ ಫೊರಿನ್ ಸಿಗ್ರೆಟ್ ವೋಡ್ನ್ ಆಸ್ಲ್ಲ್ಯಾ ರೊಬಟ ಪರ್ಬುನ್ ಪಾಂಯ್ ವೊಡಿತ್ ಯೆಂವ್ಚ್ಯಾ ನಕ್ಕುರಾಚಿ ಒಳೊಕ್ ಧರ್ಲಿ.
"ರೊಬಟ ನಾಗೆರೆಕ್ ನಮಸ್ಕಾರ್ ಉಂಡು" ಲಾಗಿಂ ಆಂಗ್ಣಾಂಕ್ ಪಾವ್ಲ್ಲೆಂಚ್ ನಕ್ಕುರಾನ್ ದಾಂತ್ ಕಿರ್ಲಿಲೆ.
"ಕಾಂಯ್ ಮಾಸ್ಳಿ ಪುಣಿ ಹಾಡ್ಲ್ಯಾಯ್ಗಿ ನಾ? ಮಡೊಂಜೆಚೆ ಕುಡ್ಕೆ ಖಾಯ್ನಾಸ್ತಾಂ ತೊಂಡ್ ಚಾಪ್ಪೆ ಜಾಲಾಂ" ರೊಬಟ ಪರ್ಬುನ್ ನಕ್ಕುರಾಚ್ಯಾ ಪೊತ್ಯಾ ಕುಶಿಂ ದೀಷ್ಟ್ ವೆಲಿ.
ನಕ್ಕುರಾನ್ ಹಕೀಗತ್ ವಿವರಿಲಿ. ಫುಡ್ಲ್ಯಾ ದೋನ್ - ತೀನ್ ದಿಸಾಂನಿ ಮಾಸ್ಳಿ ಧರ್ನ್ ದಿತಾಂ ಮ್ಹಣ್ ಭರ್ವಸೊ ದೀವ್ನ್ ಹಾತ್ ಪಾಟಿಂ ಬಾಂದುನ್ ಧರ್ಣ್ ಪಳೆಲಾಗ್ಲೊ. ತೆದ್ನಾಚ್ ರೋಜಿ ಬಾಯಕ್ಕ ಭಾಯ್ರ್ ಅಯ್ಲಿ. ರೊಬಟ ಪರ್ಬುನ್ ಬಾಯ್ಲೆಕ್ ಹಿಶಾರೊ ಕೆಲೊ.
"ಕೆಲ್ಲಿಚ್ ಇಲ್ಲಿ ಚ್ಹಾ ಆಸಾ. ಪಿಯೆವ್ನ್ ವಚ್ರೆ ನಕ್ಕುರಾ" ತಿತ್ಲೆಂ ಸಾಂಗೊನ್ ರೋಜಿ ಬಾಯಕ್ಕ ಬಿತರ್ ಗೆಲಿ. ಆತಾಂ ನಕ್ಕುರ ಪಾಟ್ಲ್ಯಾ ಬಾಗ್ಲಾ ಮುಖಾರ್ ಉಬೊ ಜಾಲೊ. ಸ್ಟೀಲಾಚ್ಯಾ ಗೊಬ್ಳ್ಯಾಂತ್ ಚಾ ದೀವ್ನ್, ಪಯ್ಶೆ ತಾಚ್ಯಾ ಹಾತಾಂತ್ ಘಾಲ್ನ್ ಬಾಯಕ್ಕ ಲೋವ್ ಮ್ಹಣಾಲಿ.
ಘೆ ಹೆ ಪನ್ನಾಸ್ ರುಪಯ್ ಪೊರ್ಬುಲೆಚ್ಯಾ ಲೆಕಾರ್. ಆನಿಂ ಹೆ ಶೆಂಬೊರ್ ಮ್ಹಜ್ಯಾ ಲೆಕಾರ್. ಆಜ್ ತುಜ್ಯಾ ಜಾತ್ರ್ಯಾಚ್ಯಾ ಖರ್ಚಾಕ್... ಹಾಂ... ಪರ್ಬುಂ ಕಡೆನ್ ಉಲವ್ನ್ ರಾಂವ್ಚೆಂ ನಾಕಾ. ಶೀದಾ ಚಲ್"
ಕಿತೆಂಗಿ ವಿಚಾರಿಜೆ ಮ್ಹಣ್ ಚಿಂತ್ಲ್ಲ್ಯಾ ನಕ್ಕುರಾಕ್ ಬಾಯಕ್ಕಾಚ್ಯಾ ಮುಖಮಳಾರ್ ನಿಶೆಂವ್ಚೆ ಆವ್ಯಕ್ತ್ ಭ್ಯೆಂ ಪಳೆವ್ನ್ ಮಿಸ್ತೆರ್ಚ್ ದಿಸಾಲಾಗ್ಲೊ. ಪರ್ಬುಲ್ ಗಾಂವಾಕ್ ಆಯಿಲ್ಲ್ಯಾ ಪಾಟ್ಲ್ಯಾ ವರ್ಸಾಂನಿಯಿ ಅಸಲೆಂಚ್ ಭ್ಯೆಂ ತಿಚ್ಯಾ ದೊಳ್ಯಾಂನಿ ಹಾಣೆಂ ದೆಕ್ಲಾಂ! ಪರ್ಬುಲ್ ಫೊರಿನ್ ಗೆಲ್ಲೆಂಚ್ ತೆಂ ಭ್ಯೆಂ ತಿಚೆ ಥಾವ್ನ್ ಆಪಾಪಿಂ ಮಾಯಾಗ್ ಜಾತಾ! ಕಾಂಯ್ ತರ್ ಚಿಲ್ಲರ್ ಪಲ್ಲರ್ ಕಾಮ್ ಆಸ್ಲ್ಯಾರ್ ವಾ ಕಾಂಯ್ ಪಯ್ಶಾಂಚಿ ಗರ್ಜ್ ಪಡ್ಲ್ಯಾರ್ ರೀಣ್ ವಿಚಾರ್ಚ್ಯಾಂಕ್ ಹಾಂಗಾ ಆಯಿಲ್ಲ್ಯಾ ತೆದ್ನಾ ಚಡ್ತಾವ್ ಜಾವ್ನ್ ಬೊಣ್ಕೊ ಮಹಾಬಲ ಶೆಟ್ಟಿ ಹಿಚೆ ಕಡೆನ್ ಚೊವ್ಕೆಂತ್ ಬಸೊನ್ ಉಲವ್ನ್ ಆಸ್ತಾ. ಹೆಂ ಕಿತ್ಲೆಶೆಗಿ ಪಾವ್ಟಿಂ ನಕ್ಕುರಾನ್ ಪಳೆಯ್ಲಾಂ. ಏಕ್ ದೋನ್ ಶೆಂಬೊರಾಂಚೆ ನೋಟ್ ಹಾತಾರ್ ಘಾಲ್ನ್ ಬಾಯಕ್ಕಾನ್ ಹಾಕಾ ಘಡಿಯೆನ್ ಪಾಟಿಂ ಧಾಡ್ಲ್ಲೆಂ ಆಸಾ. ತೆ ಪಯ್ಶೆ ಪರತ್ ತಿಣೆಂ ಪಾಟಿಂ ವಿಚಾರ್ಲ್ಲೆಂನಾಂತ್! ರೋಜಿ ಬಾಯಕ್ಕ ಅನಿಂ ಮಹಾಬಲ್ ಶೆಟ್ಟಿ ವಿಶಿಂ ಎಕ್ ದೋನ್ ಖಬ್ರೊ ಹಾಚ್ಯಾ ಕಾನಾಂತ್ ಪಡ್ಲ್ಲ್ಯೊಯ್ ಆಸಾತ್. ಪುಣ್ ಹ್ಯಾ ವಿಶಿಂ ನಕ್ಕುರ ಸಂಪೂರ್ಣ್ ನಿರ್ಲಿಪ್ತ್. ಆಯ್ಕಾಲ್ಲಿ ಖಬಾರ್ ಇತ್ಲಿಚ್ -
"ಬೊಣ್ಕ್ಯಾಚಿ ಗರಿಯೆಕ್ ಚರ್ಬೆಲ್ಲಿ ವ್ಹಡ್ಲಿ ಮಾಸ್ಳಿಚ್ ಶಿರ್ಕಾಲ್ಯಾ!"
....ದೆಜಣ್ಣ ಶೆಟ್ಟಿಚೆಂ ಬಯ್ಲ್ ಉತ್ರೊನ್ ಗುಡ್ಸುಲಾ ತೆವ್ಶಿನ್ ಪಾಟಿಂ ಪರ್ತಾತಾನಾ ಬೊಲ್ಸಾಂತ್ ವಿಶೆವ್ ಘೆಂವ್ಚ್ಯಾ ದೋನ್ ನವ್ಯಾಚ್ ನೊಟಾಂಕ್ ಪರತ್ ಆಪಡ್ನ್ ಪಳಯ್ಲೆಂ ನಕ್ಕುರಾನ್. ಸಮಾಧಾನ್ ಜಾತೆಚ್ ಮುಖಾರ್ ಚಲ್ತಾನಾ ಫಟಕ್ ಕರ್ನ್ ಕಸಲೊಗಿ ಉಡಾಸ್ ಆಯಿಲ್ಲೊಚ್ ಏಕ್ ಖಿಣಾ ಥಂಯ್ಚ್ ಉಬೊ ಜಾಲೊ.
"ಖರ್ಚಾಕ್ ನಾತ್ಲ್ಯಾರ್ ಹೆವ್ಶಿನ್ ಯೆ.
ದಾಕ್ಶೆನಾಕಾ ಕಳೆಂಮೂ?" ತ್ಯಾ ದೀಸ್ ಮ್ಹಣ್ಚೆ ಚಾರ್ ಪಾಂಚ್ ಮಯ್ನ್ಯಾಂ ಆದಿಂ ಶೆಂಬೊರಾಚೊ ನೋಟ್ ಹಾಚ್ಯಾ ಬೊಲ್ಸಾಂತ್ ಚೆಪುನ್ ಎಲ್ಮೆಂಟ್ರಿ ಇಸ್ಕೊಲಾಚ್ಯಾ ಮಂಜಯ್ಯ ಮಾಸ್ತೆರಾನ್ ಸಾಂಗ್ಲ್ಲೆಂ. ಚಾರ್ - ಪಾಂಚ್ ಮಯ್ನ್ಯಾಂ ಆದ್ಲಿ ಗಜಾಲ್. ಪಾವ್ಸಾಳ್ ಸುರು ಜಾವ್ನ್ ಹಪ್ತೊ ಮಾತ್ರ್. ಖಂಯ್ಸ್ರ್ಗಿ ಪಾವ್ಲ್ಲೊ ನಕ್ಕುರ ಇಸ್ಕೊಲಾ ತೆವ್ಶಿಲ್ಯಾನ್ ಪಾಶಾರ್ ಜಾತಾನಾ ಪಾವ್ಸ್ ಧೋ ಕರ್ನ್ ವೊತಿಲಾಗ್ಲೊ. ನಿರ್ವೊಗ್ ನಾಸ್ತಾಂ ಇಸ್ಕೊಲಾ ತೆವ್ಶಿನ್ ತಾಣೆಂ ಧಾಂವ್ ಮಾರ್ಲ್ಲಿ. ಸನ್ವಾರಾ ದೊನ್ಪರಾಂ ಉಪ್ರಾಂತ್ಲೊ ವೇಳ್ ಜಾಲ್ಲ್ಯಾನ್ ದಾರಾಂ ಬಂದ್ ಆಸ್ಲ್ಲಿಂ. ಘಡ್ಘಡೊ, ಝಗ್ಲಣ್ಯಾ ಸವೆಂ ಭಿರಾಂಕುಳ್ ಆವಾಜ್ ಕರಿತ್ ವೊತುನ್ ಅಸ್ಲ್ಲ್ಯಾ ಪಾವ್ಸಾ ಮದೆಗಾತ್ಯಿ ಹಾಣೆಂ ಉಬೆಂ ರಾವ್ಲ್ಲ್ಯಾ ಕುಡಾ ಬಗ್ಲೆಕ್ ಪಿಂರ್ಗಾಲ್ಲೊ ಆವಾಜ್! ಜನೆಲ್ ಅರ್ಧೆಂಕುರೆಂ ಉಗ್ತೆಂ ಆಸ್ಲ್ಲೆಂ. ಕುತೂಹಲಾನ್ ನಕ್ಕುರ ಗೊಮ್ಟಿ ಲಾಂಬ್ ಕಾಡ್ನ್ ತಿಳ್ತಾ ತರ್, ತೀನ್ ಭುರ್ಗ್ಯಾಂಚೊ ಬಾಪುಯ್ ಮಂಜಯ್ಯ ಮಾಸ್ತೆರ್ ಆನಿಂ ಆಯ್ಲೆಂವಾರ್ ಶ್ಹೆರಾ ಥಾವ್ನ್ ವರ್ಗ್ ಜಾವ್ನ್ ಆಯಿಲ್ಲಿ ಸಾವಿತ್ರಿ ಟೀಚೆರಮ್ಮ ವಿವಸ್ತ್ರ್ ಜಾವ್ನ್ ಎಕಾಮೆಕಾಚ್ಯಾ ಅಂಗಾರ್ ಲೊಳ್ತಾಲಿಂ! ಸಾವಿತ್ರಿ ಟಿಚೆರ್ಯಿ ದೊಗಾಂ ಭುರ್ಗ್ಯಾಂಚಿ ಆವಯ್. ತಿಚೊ ಘೊವ್ ಬೆಂಗ್ಳೂರಾಂತ್ ವ್ಹಡ್ಲ್ಯಾ ಸರ್ಕಾರಿ ಹುದ್ದ್ಯಾಂತ್ ಆಸಾ ಮ್ಹಣ್ ಹಾಣೆಂ ಆಯ್ಕಾಲ್ಲೆಂ.......ಛಿ.......ಛಿ...... ತೀಳ್ನ್ ಆಸ್ಲ್ಲಿ ಗೊಮ್ಟಿ ಪಾಟಿಂ ಕಾಡ್ನ್ ಹಾಂಗಾ ಥಾವ್ನ್ ದಾಂವ್ಯಾಂ ಮ್ಹಣ್ ಭೊಗ್ಲ್ಲೆಂ ನಕ್ಕುರಾಕ್. ಪುಣ್ ಶನಿ ಲಾಗ್ಲ್ಲೊ ಪಾವ್ಸ್ ಸುಟೊಂಕ್ ಆಯ್ಕಾನಾ. ಭೋವ್ಶ್ಯಾ ಮಾಸ್ತೆರಾನ್ ವಾ ಟಿಚೆರಿನ್ ಹಾಕಾ ಪಳಯಿಲ್ಲೆಂ ಜಾಯ್ಜೆ. ಥೊಡ್ಯಾ ವೆಳಾನ್ ಪುಡ್ವೆಂ ಸಮಾ ಕರಿತ್ತ್ ಬಾಗಿಲ್ ಕಾಡ್ನ್ ಭಾಯ್ರ್ ಆಯಿಲ್ಲ್ಯಾ ಮಾಸ್ತೆರಾನ್ ಹಾಚ್ಯಾ ಬೊಲ್ಸಾಂತ್ ಥೊಡೆ ನೋಟ್ ಚೆಪ್ಲ್ಲೆ.
"ನಕ್ಕುರಾ, ತುಂ ಸತೆವಂತ್ ಮನಿಸ್. ಆಮ್ಚಿ ಮರ್ಯಾದ್ ವಾಟೆರ್ ಘಾಲಿಸೊನಾಂಯ್ ಮ್ಹಣ್ ಮ್ಹಜೊ ’ಭರ್ವಸೊ.....ಹಾಂ...ತುಜೆ ಗರ್ಜೆ ವೆಳಾರ್ ಹೆವ್ಶಿನ್ ಯೆತೇ ರಾವ್. ದಾಕ್ಶೆನಾಕಾ. ಖಂಚ್ಯಾಕ್ಯಿ ಹಾಂವ್ ಆಸಾಂ"
ಕಸಲಿಚ್ ಜಾಪ್ ದೀನಾಸ್ತಾಂ ತಕ್ಲಿ ಹಾಲವ್ನ್ ತ್ಯಾ ಪಾವ್ಸಾಂತ್ ಬಿಜಾತ್ ಮಾಸ್ತೆರಾಚ್ಯಾ ದೊಳ್ಯಾಂ ನದ್ರೆ ಥಾವ್ನ್ ಮಾಯಾಗ್ ಜಾಲ್ಲ್ಯಾ ನಕ್ಕುರಾನ್ ಅಜೂನ್ ತಾಕಾ ಮುಖಾಮುಖಿ ಭೆಟೊನ್ ಕಾಂಯ್ ಗರ್ಜ್ ಉಚಾರ್ಲ್ಲಿ ನಾ, ತಶೆಂಚ್ ಘುಟ್ ಫೊಡ್ಲೊಯ್ ನಾ!
...ಚೊವ್ಕೆಂತ್ ಇಜಿಚೆರಾಚೆರ್ ಬಸ್ಲ್ಲೊ ಮಂಜಯ್ಯ ಮಾಸ್ತೆರ್ ನಕ್ಕುರಾಚಿ ತಕ್ಲಿ ದಿಸ್ಲ್ಲಿಚ್ ಎಕಾ ಬಾಕ್ಕಾರಾನ್ ಭಾಯ್ರ್ ಧಾಂವೊನ್ ಆಯ್ಲೊ.
"ಓಹೋ ..ಹೋ...ಕಿತೆಂ ಖಂಯ್ ನಕ್ಕುರಾ?" ....ಭಾರೀ ಆಪ್ರೂಪ್ ಜಾಲಾಯ್!....
ಯೆ..ಯೆ ಬಸ್....ಘರಾ ಕೊಣೀ ನಾಂತ್. ಪೂರಾ ದಿವ್ಳಾಕ್ ಗೆಲ್ಯಾಂತ್. ಸಾಂಗ್ ಮ್ಹಜೆ ಥಾವ್ನ್ ಕಾಂಯ್ ಇಲ್ಲಿ ಕುಮೊಕ್?" ಮಾಸ್ತೆರಾನ್ ಲೆಕಾವರ್ತಿ ನಮ್ರತಾಯ್ ದಾಕಯ್ಲಿ.
"ಕಾಂಯ್ ನಾ....ಮಾಸ್ಟ್ರೇ, ಹಳ್ಳೆಚೊ ಜಾತ್ರೊ ಪಳೆಯಾ. ಬಾಯ್ಲ್ - ಭುರ್ಗ್ಯಾಂಕ್ ಎಕೇಕ್ ಜೊಡಿ ವಸ್ತುರ್ ಘೆಯಾಂ ಮ್ಹಣ್. ಏಕ್ ತಿನ್ಶಿಂ ರುಪಯ್ ರೀಣ್ ಮೆಳ್ಳ್ಯಾರ್ ಬರೆ ಆಸ್ಲ್ಲೆ. ಮಯ್ನ್ಯಾ ಬಿತರ್ ಪಾಟಿಂ ದಿತಾಂ" ನಕ್ಕುರಾನ್ ಗರ್ಜ್ ಉಚಾರ್ಲಿ.
"ರೀಣ್? ಆನಿಂ ತುವೆಂ ಪಾಟಿಂ ದಿಂವ್ಚೆಂ?..... ..ಛೆ......ಖಂಯ್ ತರೀ ಆಸಾವೆ? ರಾವ್ ಆಯ್ಲೊಂ ಅತ್ತಾಂ" ಮಾಸ್ತೆರ್ ಘರಾ ಬಿತರ್ ಧಾಂವ್ಲೊ. ಥೊಡ್ಯಾ ವೆಳಾನ್ ಪಾಟಿಂ ಯೆತಚ್ ನಕ್ಕುರಾಚ್ಯಾ ಬೊಲ್ಸಾಂತ್ ನೋಟ್ ಚೆಪ್ಲೆ ತಾಣೆಂ.
"ಹಾಂತುಂ ಪಾಂಯ್ಶಿಂ ರುಪಯ್ ಆಸಾತ್. ಬಾಯ್ಲ್- ಭುರ್ಗ್ಯಾಂಕ್ ವಸ್ತುರ್ ಘೆ ಆನಿಂ.....ಹಾಂ ಹೆ ಕಾಂಯ್ ರೀಣ್ ನ್ಹಯ್....... ಪಾಟಿಂ ಕಾಂಯ್ ದಿಂವ್ಚೆಂ ನಾಕಾತ್. ಕಳ್ಳೆಂಮೂ?" ಮಾಸ್ತೆರಾನ್ ನಕ್ಕುರಾಚಿ ಪಾಟ್ ಥಾಪುಡ್ಲಿ.
ದಿವ್ಳಾಕ್ ಗೆಲ್ಲೊ ಮಾಸ್ತೆರಾಚ್ಯಾ ಗರ್ಚೊ ವ್ಹೊರ್ ಪಯ್ಶಿಲ್ಯಾನ್ ಯೆಂವ್ಚೊ ಪಳೆವ್ನ್, ಮಾಸ್ತೆರಾಕ್ ಧನ್ಯವಾದ್ ದೀವ್ನ್ ನಕ್ಕುರಾನ್ ಮಹಮ್ಮದ್ ಬ್ಯಾರಿಚ್ಯಾ ವಸ್ತುರಾಂಚಿ ಅಂಗ್ಡಿ ಕುಶಿಂ ಮೆಟಾಂ ಕಾಡ್ಲಿಂ.
ಬ್ಯಾರಿಚೆ ಆಂಗ್ಡಿ ವ್ಯಾರ್ ಜ್ಯೋರಾನ್ ಚಲ್ತಾಲೊ. ಹೊ ಸಾಯ್ಬ್ ವ್ಹಡ್ಲೊ ಕಾಣ್ಣೊಜಿಚ್ ಸಯ್. ದೊಗೀ ಬಾಯ್ಲೊ ಆಸೊನ್ಯಿ ಹೆರ್ ಬಾಯ್ಲಾಂ ಜಾತಿಕ್ ಗರಿ ಘಾಲ್ಚ್ಯಾಂತ್ ಅವ್ವಲ್.
ಬಿಡ್ಯೊ ಬಾಂದ್ಚ್ಯಾ ಆನಿಂ ಬಿಯೆಕಾರ್ಖಾನಾಚ್ಯಾ ಚೆಡ್ವಾಂಕ್ ಹಾಣೆಂ ಫಟಯ್ಲಾಂ. ತಾಂಕಾಂ ಧರ್ಮಾರ್ಥ್ ವಸ್ತುರಾಂಯ್ ದಿಲ್ಯಾಂತ್. ತಾಕಾ ತರ್ನಿಂ, ಪರ್ನಿಂ ಕುಸ್ಲ್ಲಿ ಖಂಚಿಯ್ ಮಾಸ್ಳಿ ಚಲ್ತಾ ಮ್ಹಣ್ ಪರ್ಕಟ್ ನಾಲಾಯ್ ಕಿಟ್ಟಪ್ಪನ್ ಗಡಂತಾಂತ್ ಕಿತೆಶೆಗಿ ಪಾವ್ಟಿಂ ಸಾಂಗ್ಲ್ಲೆಂ ನಕ್ಕುರಾನ್ ಆಯ್ಕಾಲಾಂ. ನೇಜಿ ಗಾದ್ಯಾಂತ್ಯಿ ಚಡ್ತಾವ್ ಬಾಯ್ಲಾಂ ಬ್ಯಾರಿ ವಿಶಿಂಚ್ ಉಲವ್ನ್ ಆಸ್ಚೆಂ ಹಾಚ್ಯಾ ಕಾನಾಕ್ ಪಡ್ಲಾಂ.
ಬಾಯ್ಲ್ ಕೂಸುಕ್ ಏಕ್ ದೆಡ್ಶೆಂ ರುಪ್ಯಾಚೆಂ ತಾಂಬ್ಡೆಂ ಕಾಪಡ್, ಧುವ್ ಯಮುನಾಕ್ ಏಕ್ ಸೂಡಿದಾರ (ಚೂಡಿದಾರ್) ಆಂಗ್ಲೆಂ ಮೊಲಾವ್ನ್ ಪಾಟಿಂ ಗುಡ್ಸುಲಾಂ ಕುಶಿಂ ಮೆಟಾಂ ಕಾಡಿಲಾಗ್ಲೊ.....ಆಜ್ ಖಂಡಿತ್ ಬಾಯ್ಲ್ - ಭುರ್ಗ್ಯಾಂಕ್ ಖುಶಿ ಜಾಯ್ತ್. ಹಳ್ಳೆಚ್ಯಾ ಜಾತ್ರ್ಯಾ ದಿಸಾಕ್ ಆಪ್ಣೆಂ ನವೆಂ ವಸ್ತುರ್ ಹಾಡಿನಾಸ್ತಾಂ ವರ್ಸಾಂ ಕಿತ್ಲಿಂ ಜಾಲಿಂಗಾಯ್? ಲಗ್ಬಗ್ ಸಾತ್ ಆಟ್ ವರ್ಸಾಂ ಜಾಲಿಂ ಜಾಯ್ಜೆ. ಆಪುಣ್ ಮಾಡಾರ್ ಥಾವ್ನ್ ಪಡ್ಲ್ಲ್ಯಾ ವರ್ಸಾಂ ಥಾವ್ನ್ ನವೆಂ ವಸ್ತುರ್ ಹಾಡ್ಚೆಂ ಬಂದ್ ಜಾಲ್ಲೆಂ. ಪಯ್ಶೆ ಅಸ್ಲ್ಯಾರ್ ಹಾಡ್ಯೆತೆಂ. ಪಯ್ಶೆಂಚ್ ನಾಂತ್ ತರ್ ಘೊಳಾಜೆ. ಫೊಳ್ಯಾಂ ಮ್ಹಳ್ಯಾರ್ ಪಾಂಯ್ ಸಮಾ ನಾ......ಕ್ರಮೇಣ್ ಬಾಯ್ಲ್ ಕೂಸುನ್ಂಚ್ ಕುಟ್ಮಾಕ್ ಪೊಸ್ಚಿ ಜವಬ್ದಾರಿ ಘೆತ್ಲ್ಲಿ. ಕೂಸು ವರ್ಸಾಚ್ಯಾ ಬಾರಾಯ್ ಮಹಿನೆ ಸಂಕರಭಟ್ರುಚ್ಯಾ ತೊಟಾಂತ್ ಘೊಳ್ತಾಲೆಂ. ಭಟ್ರುಕಡೆನ್ ಹಾಚ್ಯಾ ಪಾಂಯಾಂಚೆ ಚಿಕಿತ್ಸೆ ಖಾತಿರ್ ಘೆತ್ಲ್ಲೆ ರೀಣ್ ಆಜೂನ್ ಫಾರಿಕ್ ಜಾಂವ್ಕ್ನಾಂತ್. ಖರ್ಚಾಕ್ ಪಾವನಾ ಮ್ಹಣ್ ಆಯ್ಲೆವಾರ್ ವಾಡೊನ್ ರಾವ್ಲ್ಲ್ಯಾ ಯಮುನಾ ಕಾಮಾಕ್ ಧಾಡ್ಚಿ ಆಲೋಚನ್ ಕರ್ತಾ ಕರ್ತಾನಾ ಗುತ್ತಾಚೊ ಧಾಕ್ಟೊ ಧನಿ ಜಯಂತ ಶೆಟ್ಟಿನ್ ಆಚಾನಕ್, ಕೂಸು ಆಸ್ತಾನಾಂಚ್ ಹಾಚೆ ಕಡೆನ್ ವಿಚಾರ್ಲ್ಲೆಂ.
"ಯಮುನಾಕ್ ಕಿತೆಂ ಘರಾಚ್ ಬಸಯ್ತಾತ್ಗಿ ಕಿತೆಂ? ಕಾಮಾಕ್ ಧಾಡ್. ತಾಚ್ಯಾ ಬರ್ಯಾ ಫಾಲ್ಯಾಕ್ ದೋನ್ ಕಾಸ್ ಒಟ್ಟುಕ್ ಕರುಂದಿ"
ವ್ಹಯ್ ಆತಾಂ ಯಮುನಾಯ್ ಗುತ್ತಾಚ್ಯಾ ಘರಾ ಕಾಯಾಮ್ ಜಾವ್ನ್ ಕಾಮಾಕ್ ವಚೊನ್ ಅಸಾ. ದೊಗಾಂಯ್ ಘೊಳ್ತಾಲಿಂ ತರೀ ದಿಸ್ ಕಷ್ಟಾಂನಿ ಚಲೊನ್ ಅಸಾತ್. ಪಾಟ್ಲ್ಯಾ ವರ್ಸಾಂ ಥಾವ್ನ್ ಕೂಸುನ್ ಘೊವಾಕ್ ಗಾಳಿ ದಿಂವ್ಚ್ಯೊ, ಪುರ್ಪುರ್ಚೆಂ, ಹಿಣ್ಸುಂಚೆಂ ಸದಾಂಚೆಂ ಜಾಲ್ಲೆಂ. ತ್ಯಾ ಸವೆಂ ಬಾಯ್ಲೆಚಿ ಪುರ್ಪುರೆ, ಹಿಣ್ಸೊಚೆಂ ವಿಶಿಂ ಬೆಫಿಕಿರಾಯೆನ್ ಆಸ್ಚೆಂಯ್ ನಕ್ಕುರಾಕ್ ಸವಯೆರ್ ಪಡ್ಲ್ಲೆಂ.
....ಪೂಣ್ ಪಾಟ್ಲ್ಯಾ ಥೊಡ್ಯಾಂ ಮಯ್ನ್ಯಾಂ ಥಾವ್ನ್ ವಾತಾವರಣ್ ಬದ್ಲಿ ಜಾಲ್ಲೆಂ ಮ್ಹಣ್ಯೆತ್. ಕೂಸುಚ್ಯೊ ಗಾಳಿ, ಪುರ್ಪುರೆ ಬಂದ್ ಜಾಲ್ಲೆ! ಮೊಗಾನ್ ಉಲಯ್ನಾ ತರೀ ರಾಗ್, ಶಿಣ್, ಹಿಣ್ಸೊಣ್ಯಾಕ್ ಪೂರ್ಣ್ ವಿರಾಮ್ ಪಡ್ಲ್ಲೊ! ಸಂಕರಭಟ್ರುಚಿ ಬಾಯ್ಲ್ ರುಕ್ಕುಬಾಯ್ ಜಬ್ಬೊರ್ ಮನಿಸ್.
ಕಾಮಾಂಚ್ಯಾಕ್ ಖಂಡಾಬಟ್ಟೆ ಕಷ್ಟೊಂಚಿ ತಿ ಸ ಮಯ್ನ್ಯಾಂ ಆದಿಂ ಕಾಳಿಜ್ ರಾವೊನ್ ಗೊಟಕ್ ಜಾಲ್ಲಿ. ತಿ ಅಸ್ತಾನಾ ಫಾಂತ್ಯಾಫರಾರ್ಚ್ ಉಟೊನ್ ಕಾಮಾಕ್ ಧಾಂವ್ಚೆಂ ಕೂಸು ಆಯ್ಲೆವಾರ್ ನೋವ್ ವೊರಾಂ ಉಪ್ರಾಂತ್ಚ್ ಹಾಲಾಂ-ಹುಲಾಂ ಕರ್ನ್ ಭಟ್ರುಗೆರ್ ವೆತಾಲೆಂ. ಭಟ್ರುನ್ ರೀಣ್ ಮಾಫಿ ಕೆಲಾಂ, ಸಾಂಬಾಳ್ ಚಡ್ ಕೆಲಾ, ತೊಟಾ ಬದ್ಲೆಕ್ ಘರ್ಚ್ಯಾ ಕಾಮಾಕ್ ನಮಿಯರ್ಲಾಂ ಮ್ಹಳ್ಳಿ ಖಬರ್ ಆವಯ್ ಧುವೆನ್ ಉಲಯ್ತಾನಾ ನಕ್ಕುರಾನ್ ಆಯ್ಕಾಲ್ಲಿ......
....ಪಾಂಯ್ ವೊಡಿತ್ತ್ ಎಕಾ ಹಾತಾಂತ್ ಗರಿ, ಪೊತೆಂ ಆನಿಂ ಮೊಡ್ಕಿ, ದುಸ್ರ್ಯಾ ಹಾತಾಂತ್ ವಸ್ತುರಾಚಿ ಪೊಟ್ಲಿ ಘೆವ್ನ್ ನಕ್ಕುರಾನ್ ಗುಡ್ಸುಲಾಚೆಂ ಮೇಟ್ ಚಡ್ತಾನಾ ವೊರಾಂ ದೊನ್ಪರಾಚಿಂ ಬಾರಾ ವ್ಹಾಜ್ಲ್ಲಿ. ಅಂಗ್ಣಾಚ್ಯಾ ಕೊನ್ಶಾರ್ ಗುಂಟ್ಯಾಕ್ ಬಾಂದ್ಲ್ಲೊ ಕೆಂಪು ಉರಿಯ ಹಾಕಾ ಪಳೆವ್ನ್ "ರೈಟ್ ಪೋಯಿರಣ ರಂಗೋಕ್" ಮ್ಹಳ್ಳೆಂ ಭಾಶೆನ್ ಪಾಕಾಟೆ ಫಾಪ್ಡಿತ್ತ್ ಸಾದ್ ಘಾಲಿಲಾಗ್ಲೊ.
ಬಿತರ್ಲೆಂ ದ್ರಶ್ಯ್ ಪಳೆವ್ನ್ ನಕ್ಕುರಾಚಿ ಆತುರಯ್, ಉಮಾಳೆ ಎಕಾಚ್ಫರಾ ನಿಂವೊನ್ ಗೆಲೆ. ಕೂಸು ಜಯ್ತ್ ತಾಂಬ್ಡೆಂ ತಾಂಬ್ಡೆಂ ಪಟ್ಟೆಸೀರೆ ನ್ಹೆಸೊನ್ ಆಯ್ತೆಂ ಜಾತಾಲೆಂ ತರ್ ಧುವ್ ಯಮುನಾ ನವೆಂ ನವೆಂಚ್ ಸೂಡಿದಾರ ಆಂಗ್ಲೆಂ ನ್ಹೆಸೊನ್ ತೊಂಡಾಕ್ ಪಾವ್ಡರ್ ಪಾತ್ಳಾಯ್ತಾಲೆಂ. ಆತಾಂ ನಕ್ಕುರಾನ್ ಹಾತ್ಭಾಶೆನ್ ಧುವೆಕ್ಲಾಗಿಂ ಆಪವ್ನ್ ವಸ್ತುರಾಚಿ ಪೊಟ್ಲಿ ದಿಲಿ. ದೊಗಾಂಯ್ಚ್ಯಾ ಕಾನಾಂ - ಗೊಮ್ಟ್ಯಾಂತ್ ಆಜ್ ಭಾಂಗರಾ ರಂಗಾಚಿ ನಗಾಂ! ಬಹುಶಃ ಭಾಂಗಾರ್ಚ್ ಜಾಯ್ಜೆ!
ಪೊಟ್ಲೆಂತ್ ಕಿತೆಂ ಅಸಾ ಮ್ಹಣ್ ಪಳೆಂವ್ಚೆಂ ಖಬ್ರೆಕ್ ವಚಾನಾಸ್ತಾಂ ಆವಯ್ ಧುವ್ ಆಮ್ಸೊರಾನ್ ಗುಡ್ಸುಲಾ ಥಾವ್ನ್ ಭಾಯ್ರ್ ಪಡ್ಲಿಂ. ತಿಂ ಖಂಯ್ಸರ್ ವೆತಾತ್ ತೆಂ ಹೊ ಖೂಬ್ ಜಾಣಾ. ಉತ್ಸವಾ ಲೆಕಾರ್ ದುರ್ಗಾಪರಮೇಶ್ವರಿ ದಿವ್ಳಾಂತ್ ಮಹಾಪೂಜೆ. ದರ್ಶನ್. ಉಪ್ರಾಂತ್ ಸಬಾಸಾಲಾಂತ್ ಸಾಮೂಹಿಕ್ ಜೆವಾಣ್ ಆಸ್ಲ್ಲೆಂ. ಹಿಂ ಜಾತ್ರ್ಯಾಂಕ್ ಭೊಂವ್ಡಿ ಮಾರುಂಕ್ ವೆತಾತ್ ತರ್ ನಕ್ಕುರ ಸೊಡ್ತೆಚ್ಯಾ ಕಾಟಾಕ್ ವೆತಾ. ಹಿ ವರ್ಸಾಂ ಥಾವ್ನ್ ಚಲೊನ್ ಆಯಿಲ್ಲಿ ರಿವಾಜ್.
ಬಸ್ಲ್ಲ್ಯಾ ಕಡೆನ್ಂಚ್ ಕಿಟ್ಟಪ್ಪ, ಕೊರಪೊಲಜ್ಜಿ, ಕೊರಗಜ್ಜ, ಪೈಕುಲ್, ಮಾಮಿಲಾ, ನಾಗಣ್ಣಾಚಿಂ ಹುಮಿಣ್ಯಾಚಿಂ ಉತ್ರಾಂ ನಕ್ಕುರಾಚ್ಯಾ ಕಾನಾಂನಿ ಪ್ರತಿನಿಧ್ವಿತ್ ಜಾಂವ್ಕ್ ಸುರು ಜಾಲಿಂ. ತ್ಯಾ ಸವೆಂ ಕೆಂಪು ಉರಿಯಾಯಿ ಪರತ್ ಪರತ್ ಸಾದ್ ಘಾಲಿಲಾಗ್ಲೊ. ಖಂತ್ ಬೆಜಾರಾಯ್, ನಾಲಿಸಾಯ್, ಅಸಹಾಯಕತಾ ಮತಿಂತ್ ಆವ್ರತ್ತ್ ಜಾಲ್ಲಿ. ಪೊಟ್ಯಿ ಚುರುಚುರು ಮ್ಹಣ್ತಾಲೆಂ. ಥೊಡ್ಯಾ ವೆಳಾನ್ ಮೊಡ್ಕೆಂತ್ಲಿ ಪೇಜ್ ಬೊಶ್ಯೆಕ್ ಘಾಲ್ನ್ ಇಲ್ಲಿಶಿ ಜೇವ್ನ್ ಧರ್ಣಿರ್ ಆಡ್ ಪಡ್ಲೊ.....
......ಪರತ್, ನಾಕಾ, ಜಾಲ್ಲಿಂ ಚಿಂತ್ನಾಂ! ವಿರಾರಾಯೆನ್ ಭರ್ಲ್ಲಿ ತಕ್ಲಿ ಪಿಸಾಂತುರ್ ಜಾಂವ್ಚೆಂ ಸ್ಥಿತೆಕ್ ಪಾವ್ತನಾ ’ದಿಡ್’ ಕರ್ನ್ ಉಟೊನ್ ಆಂಗ್ಣಾಕ್ ಆಯ್ಲೊ. ನಿರಂತರ್ ಸಾದ್ ಘಾಲ್ನ್ ಆಸ್ಲ್ಲ್ಯಾ ಉರಿಯಾಕ್ ಗುಂಟ್ಯಾಂತ್ಲೊ ಸುಟಯ್ಲೊ. ಹರ್ಶೆಂ ಗುಂಟ್ಯಾಂತ್ಲೊ ಸುಟಯ್ಲೊ. ಹರ್ಶೆಂ ಗುಂಟ್ಯಾಂತ್ಲೆಂ ಸುಟಯಿಲ್ಲೆಂಚ್ ’ಕೊಟೊ ಕೊಟೊ’ ಕರ್ನ್ ಭಾಸ್ ಘಾಲ್ಚೊ ಉರಿಯಾ ಆತಾಂ ಖಂಡಾಬಟ್ಟೆ ಆರಾಬಾಯೊ ದೀಲಾಗ್ಲೊ. ಹೆಂ ಅಪಶಕುನ್ ಮ್ಹಣ್ ಕಳಿತ್ ಅಸ್ಲ್ಯಾರೀ ಗಣ್ಣೆಂ ಕರಿನಾಸ್ತಾಂ ಮ್ಹಣಾಲೊ,
"ಭಾರೀ ಹಂಕಾರಾನ್, ಚರ್ಬೆನ್ ಭರ್ಲಾಯ್ ತುಕಾ ಆಜ್ ಬಾಂದುನ್ಚ್ ಶುದ್ದ್" ನಕ್ಕುರಾನ್ ಕೊಂಬ್ಯಾಕಳಾಚಿ ವಾಟ್ ಧರ್ಲಿ.
ಆಂತ್ಯಾಚಿ ಸುರ್ವಾತ್:
ದೀಸ್ ಬುಡೊನ್ ಯೆತಾ - ಯೆತಾನಾ ನಕ್ಕುರ ಖಾಲಿ ಹಾತಾಂನಿ ಪಾಟಿಂ ಆಯಿಲ್ಲೊ. ಹಾತಾಂತ್ ಕೊಂಬೊ ನಾ! ಬೊಲ್ಸಾಂತ್ ರುವೀ ನಾ! ಪಾಟ್ಲ್ಯಾ ಸಾತ್ ಕಾಟಾಂನಿ ವಿರೋಚಿತ್ ಜಾವ್ನ್ ಝುಜ್ ಮಾಂಡುನ್ ಜಯ್ತ್ ಜೊಡ್ಲ್ಲೊ ಉರಿಯ ಆಜ್ ಕಸಲೊಚ್ ವಿರೋಧ್ ನಾಸ್ತಾಂ ಮುಖ್ಲ್ಯಾ ಕಡಲ ಕೊಂಬ್ಯಾಚ್ಯಾ ಎಕಾಚ್ ಮಾರಾಕ್ ಮರಣ್ ಪಾವ್ಲ್ಲೊ! ಕೊಂಬೊಯಿ ಗೆಲೊ, ಪಯ್ಶೆಯ್ ಗೆಲೆ. ಪುಣ್ ಸಾಂತ್ವನಾ ರುಪಾರ್ ಮಾಯಿಲಾ ಹಾಕಾ ದೋನ್ ತೊಟ್ಟೆ ಸೊರೊ ಕಾಣ್ಘೆವ್ನ್ ದೀಂವ್ಕ್ ವಿಸ್ರಾಲೊ ನಾ.
ಪಾಂಯ್ ವೊಡಿತ್ತ್ ಹಳ್ತಾರ್ ಲಕೊನ್ ಲಕೊನ್ ಗುಡ್ಸುಲಾ ಬಿತರ್ ಇಗ್ತಾನಾ ಕುಜ್ನಾಂತ್ ರಾಂದಪ್ ತಯಾರ್ ಜಾತಾಲೆಂ. ಮಾಸ್ ರಾಂದ್ಲ್ಲೊ ಪರ್ಮಳ್, ಬಹುಶಃ ಬೊಕ್ರ್ಯಾ ಮಾಸ್ ಜಾಯ್ಜೆ. ಹರ್ಶೆಂ ಕೊಂಬೊ ಕಿತೆಂ ಜಾಲೊ ಮ್ಹಣ್ ವಿಚಾರುಂಕ್ ಭಾಯ್ರ್ ಧಾಂವೊನ್ ಯೆಂವ್ಚೆಂ ಕೂಸು ಅಜ್ ರಾಂದ್ಪಾಂತ್ ಮಗ್ನ್ ಜಾಲ್ಲೆಂ! ಧುವ್ ಆವಯ್ಕ್ ಕುಮೊಕ್ ಕರ್ತಾಲೆಂ!
ಆತಾಂ ನಕ್ಕುರ ಆಂಗ್ಣಾಕ್ ಯೇವ್ನ್ ಎಕಾ ಕೊನ್ಶ್ಯಾರ್ ಉಕುಟೆಂ ಬಸೊನ್ ಚಿಂತಾಮಗ್ನ್ ಜಾಲೊ. ಉರಿಯಾಕ್ ಹೊಗ್ಡಾವ್ನ್ ಘೆತ್ಲ್ಲಿ ಖಂತ್ ದೊಸ್ಚ್ಯಾಕೀ ಕಳಾ ಕಡೆನ್ ಆಸ್ಲ್ಲ್ಯಾ ಎಕಾ ದೊಗಾಂಚಿಂ ಉತ್ರಾಂಚ್ ಚಡ್ ಆನಿಂ ಚಡ್ ಧೊಸುಂಕ್ ಲಾಗ್ಲಿಂ!
"ಹೋಯ್, ನಕ್ಕುರಣ್ಣ ಆನಿಂ ಮುಖಾರ್ ತುಂ ಅನ್ಕೂಲ್ವಂತ್ಚ್ ಸಯ್"
"ನಕ್ಕುರಾನ್ ಆನಿಂ ಕಾಂಯ್ ಗರಿ ಘಾಲ್ನ್ ದೀಸ್ ಕಾಡಿಜೆ ಮ್ಹಣ್ ನಾ. ಮಾಸಾಕ್ ಮಾಸ್, ಪಯ್ಶ್ಯಾಂಕ್ ಪಯ್ಶೆ!"
"ಯೆಂವ್ಚ್ಯಾ ಜಾತ್ಯ್ರಾ ಪಯ್ಲೆಂ ಗುಡ್ಸುಲ್ ವಚೊನ್ ನಕ್ಕುರಾಚ್ಯಾ ಪಾಕ್ಯಾಕ್ ನಳೆ ಪಡ್ತಾತ್ಗಿ ನಾ ಪಳೆಯಾ. ಹೆಂ ಹಂವ್ ಕವಡೆ ಘಾಲ್ನಾಸ್ತಾನ್ಂಚ್ ಸಾಂಗೊಂಕ್ ಸಕ್ತಾಂ...!
....ಛೆಕ್ಕ್.....ಬೊಡ್ಕಿಚೆ ಪೂತ್...ಹಾಂಕಾಂ ಜಾಲಾಂ ತರೀ ಕಿತೆಂ? ಹರ್ಶೆಂ ಆಶೆಂ ಪೂರಾ ಉಲಯ್ನಾತ್ಲ್ಲೆಂ, ಆಜ್ಕಾಲ್ ವೊಪಾರಿಂನಿ ಕಿತೆಂ ಕಿತೆಂ ಬೊಗೊಳ್ತಾತ್......ನಕ್ಕುರಾಚಿ ಮತ್ ಪಿಸಾಂತುರ್ ಜಾವ್ನ್ ಯೆತಾಲಿ. ಪ್ರಸ್ತುತ್ ಪರಿಗತ್ ತಾಚ್ಯಾ ಹೆಡ್ಡ ಮತಿಕ್ ಸ್ವಷ್ಟ್ ಜಾಯಿತ್ತ್, ತ್ಯಾ ಸವೆಂ ಆಪ್ಲೆ ಅಸಹಾಕತೆ ವಿಶಿಂ ಚಿಂತುನ್ ಬಸ್ಲ್ಲ್ಯಾಕಡೆನ್ಚ್ ಚಡ್ಪಡ್ಲಾಗ್ಲೊ.
ಭುಮ್ಯೆರ್ ಕಾಳೊಕ್ ಸಂಪೂರ್ಣ್ ದಾಟೆಲ್ಲೊ. ತ್ಯಾ ಕಾಳೊಕಾಂತ್ಚ್ ಅಂತರ್ಮುಖಿ ಜಾಲ್ಲ್ಯಾ ನಕ್ಕುರಾಚ್ಯಾ ಕಾನಾಂಕ್ ಆವಾಜ್ ಎಕಾಚ್ಚಾಣೆಂ ಧಲೊನ್ ಧಲೊನ್ ಆಪ್ಟಾಲ್ಲೊ.
"ಟರಠಕ್ಕ, ಟರಠಕ್ಕ, ಟರಠಕ್ಕ, ಟರ್ರ್ಟರ್ರ್ ಟಕ್" ಚೆಂಡೆಚೊ ಆವಾಜ್!
ಅತಾಂ ಘಡ್ಬೊಡೊನ್ ಉಟೊನ್ ನಕ್ಕುರ ಗುಡ್ಸುಲಾ ಬಿತರ್ ಆಯ್ಲೊ.
....ಧುವ್ ಯಮುನಾನ್ ಶಿರೊತೆರ್ ವಾಡ್ನ್ ದಿಲ್ಲೆಂ ಮಾಸ್-ಪೊಳಿಯೆಚೆಂ ಜೆವಾಣ್ ಮೌನ್ ಜಾವ್ನ್ ಜೆವ್ಲೊ.
"ಆಮಿಂ ಆಟಾಕ್ ವೆತಾಂವ್. ತುಮ್ ಯೇನಾಂಯ್ಗಿ ಆಪ್ಪ?" ಆಪ್ಲೆಂ ಮೊಲಾಯಿಲ್ಲೆಂ ತಾಂಬ್ಡೆಂ ಸೊಬಿತ್ ಸೂಡಿದಾರ ಆಂಗ್ಲೆಂ ಘಾಲ್ನ್ ಯಮುನಾನ್ ಮೊಗಾನ್ ವಿಚಾರ್ಲೆಂ. ಕಿತ್ಲೆಂ ಸೊಬಿತ್ತ್ ದಿಸ್ತಾ ಆಪ್ಲೆಂ ಧುವ್! ನಕ್ಕುರಾನ್ ಆಪ್ಲೆ ಧುವೆಚೆರ್ ಪ್ರಾಣ್ಚ್ ದವರ್ಲ್ಲೊ. ತಶೆಂಚ್ ಯಮುನಾಕ್ಯಿ ಬಾಪಾಯ್ಚೆರ್ ವಿಶೇಷ್ ಮೋಗ್ ಆಸ್ಲ್ಲೊ.
"ತುಮಿಂ ಮುಖಾರ್ ವಚಾ, ಹಾಂವ್ ಪಾಟ್ಲ್ಯಾನ್ ಯೆತಾಂ" ನಕ್ಕುರಾನ್ ಜಾಪ್ ದಿಲಿ.
......ಚೆಂಡೆಚೊ ಆವಾಜ್ ಅತಾಂ ಚಡ್ ಅನಿಂ ಚಡ್ ಜಾಯಿತ್ತ್ ಆಯ್ಲೊ. ತ್ಯಾ ಸವೆಂ ಆವಯ್-ಧುವಾಂಚ್ಯಾ ಪಾಟಪಾಟ್ ನಕ್ಕುರಾಯೀ ಆಟ ಪಳೆಂವ್ಕ್ ಭಾಯ್ರ್ ಸರ್ಲೊ.
ದಿವ್ಳಾ ದೆಗೆಚ್ಯಾ ವಿಶಾಲ್ ಮಯ್ದಾನಾಂತ್ ವೀಜ್ ದಿವ್ಯಾಂ ಸವೆಂ ಆಲಂಕ್ರತ್ ಕೆಲ್ಲ್ಯಾ ರಂಗ್ಮಂಚಾಂತ್ ಎದೊಳ್ಚ್ ಸಬಾಕಾರ್ಯಕ್ರಮ್ ಚಲ್ತಾಲೆಂ. ವೆದಿರ್ ಗುತ್ತಾಚೊ ಯೆಜ್ಮಾನ್ ದೇಜಣ್ಣ ಶೆಟ್ಟಿ, ಪತಿಣ್ ಲಕ್ಷ್ಮೀ ಶೆಡ್ತಿ, ಧಾಕ್ಟೊ ಯೆಜ್ಮನ್ ಜಯಂತ ಶೆಟ್ಟಿ, ಸಂಕರಭಟ್ರು, ಮಹಾಬಲ ಪೂಜಾರಿ, ದಿವ್ಳಾಚೊ ಮುಖ್ಯ್ ಅರ್ಚಕ ಕ್ರಷ್ಣ ಭಟ್ರು.. ಹೆ ತೆ ಮ್ಹಣ್ ವೆದಿರ್ ಜಾಗೊ ನಾತ್ಲ್ಲೊ. ವೆದಿ ದೆಗೆರ್ ದೋಗ್ ತೇಗ್ ಶಹರಾಚೆ ತರ್ನಾಟೆ ಸಿನೆಮಾ ನಾಯಕಾಪರಿಂ ನ್ಹೆಸೊನ್ ಪೋಜ್ ದಿತಾಲೆ!
ಫುಡ್ಲ್ಯಾ ಅರ್ಧ್ಯಾ ವೊರಾನ್ ವೆದಿ ಕಾರ್ಯೆಂ ಮುಗ್ದೊನ್ ಆಟಾಕ್ ಕ್ಷಣ್ಗಣನ್ ಸುರ್ವಾತ್ ಜಾಲ್ಲೆಂ. ಮಧ್ಯಾನ್ ರಾತ್ ಮ್ಹಣಾಸರ್ ದೇವಿ ಮಹಾತ್ಮೆ ಆಟ. ತಾಚ್ಯಾ ಉಪ್ರಾಂತ್ ಸಕಾಳ್ ಪರ್ಯಾಂತ್ ವಿಷ್ಣು ಮಹಾತ್ಮೆ. ಮಯ್ದಾನ್ಭರ್ ಲೊಕಾ ಜಮೊ. ಖಂಯ್ ತರೀ ಎಕಾ ಮುಲ್ಯಾರ್ ಜಾಗೊ ಧರ್ನ್ ಬಸ್ಚೆಂ ಆಟ್ಟಾಣೆಂ ಕರ್ನ್ ಆಸ್ಲ್ಲ್ಯಾ ನಕ್ಕುರಾನ್ ಎದೊಳ್ಚ್ ಲೊಕಾ ಜಮ್ಯಾಮ್ ಭಂವ್ತಿಂ ಚಾರ್ ಪಾಂಚ್ ಭೊಂವಾಡೆ ಕಾಡ್ಲ್ಲೆ! ಪುಣ್ ತಾಚೆ ತೀಕ್ಷ್ಣ್ ದಿಷ್ಟಿಕ್ ಬಾಯ್ಲ್ ಕೂಸು ಜಾಂವ್ದಿ, ಧುವ್ ಯಮುನಾ ಜಾಂವ್ದಿ ಝಳ್ಕಲಿಂನಾಂತ್! ಎಕೇಕ್ ಜಾವ್ನ್ ಹರ್ಯೆಕ್ಲ್ಯಾಂಚಿ ತಕ್ಲಿ ದಿಸ್ತಾಲಿ ತರೀ ಆವಯ್-ಧುವೆಚಿ ತಕ್ಲಿ ದಿಸಾನಾತ್ಲ್ಲಿ! ಅಖ್ರೇಕ್ ಪುರಾಸಾಣೆನ್ ದೊಳೆ ವೊಳಾಯಿತ್ತ್ ಮುಖ್ಲೆ ಸುವಾತೆಚ್ಯಾ ಕೊನ್ಶ್ಯಾರ್ ಬಸ್ಲೊ ತೊ. ರಂಗ್ಮಂಚಾಚ್ಯಾ ಮುಖ್ಲ್ಯಾ ಕದೆಲಾಂಚೆ ಬಸ್ಕೆಂತ್ ಬಸ್ಲ್ಲ್ಯಾ ಗಣ್ಯ್ ವ್ಯಕ್ತಿಂ ಪಯ್ಕಿಂ ಸಂಕರಭಟ್ರು, ಧಾಕ್ಟೊ ಯೆಜ್ಮಾನ್ ಜಯಂತ ಶೆಟ್ಟಿ ಆನಿಂ ತಾಚೆ ಶಹರಾಚೆ ಈಷ್ಟ್ ಮಾತ್ರ್ ನಪಂಯ್ಚ್ ಜಾಲ್ಲೆ ಮಾತ್ರ್ ಕೊಣಾಯ್ಚ್ಯಾಯ್ ಗಮನಾಕ್ ಗೆಲೆಂನಾ... ಹಾಂ... ನಕ್ಕುರಾಕ್ ಸಮೇತ್!
"ಟರಠಕ್ಕ ಟರಠಕ್ಕ.....ಚೆಂಡೆಚೊ ಆವಾಜ್ ಜ್ಯೋರಾನ್ ವ್ಹಾಜಾಲಾಗ್ಲೊ.
"ಚಂಡ ಮುಂಡ, ರುಂಡ ಮುಂಡ ಢಂಯ್!
ಮುಂಡ ರುಂಡ, ಚಂಡ ಮುಂಡ ಢಂಯ್!
ಆಹ್-ಹಾಹ್ ! ಹ್ಹ! ಹ್ಹ! ಹ್ಹ!!!!"
ಭಿರಾಂಕುಳ್ ಜೊವ್ಳೆ ರಾಕ್ಕೊಸ್ ಚಂಡ - ಮುಂಡಾಚೊ, ಆಟ್ಟ ಹಾಸಾ ಸವೆಂ ಪ್ರವೇಶ್ ಜಾಲೊ!
ಮಹಾತ್ಮೆಚೆಂ ಅಂತ್ಯ್:
ಚಂಡ - ಮುಂಡ - ಮಹಿಷಾಸುರಾಂಚೊ ಆಟ್ಟಹಾಸ್; ಶ್ರೀದೇವಿ ದೈವಿಕ್ ಮಹಿಮೆಭರಿತ್ ಅಪೂರ್ವ್ ಸಕತ್! ದುಷ್ಟ್ ದುರ್ಯೋಧನ್ - ಕಂಸ-ರಾವಣಾಂಚೊ ಹಂಕಾರ್, ರಾಮ-ಕ್ರಷ್ಣ-ಉಗ್ರ ನರಸಿಂಹ ಥಾವ್ನ್ ತಾಂಚೊ ಸಂಹಾರ್. ದುಷ್ಟ ಸಂಹಾರ - ಶಿಷ್ಟ ಸಂರಕ್ಷಣೆ .....ಅಶೆಂ ಬಯಲಾಟ ಆಖೇರ್ ಜಾವ್ನ್ ಯೆತನಾ ಉಜ್ವಾಡೊನ್ ಯೆತಾಲೆಂ. ಆನಿಕೀ ಅರ್ಧ್ಯಾ ವೊರಾಂಚೊ ಖೆಳ್ ಬಾಕಿ ಆಸ್ತಾನಾಂಚ್ ನಕ್ಕುರ ಪಾಟಿಂ ಗುಡ್ಸುಲಾಕ್ ಆಯಿಲ್ಲೊ. ಸದಾಂಚ್ಯಾಪರಿಂ ನಕ್ಕುರ್ ಉಸ್ತುನ್ ಗರಿಯೊ ಆನಿಂ ಶಿಲ್ಯಾ ಸವೆಂ ಬೈಲಾದೆಗೆಚ್ಯಾ ತೊಂಡಾಂತ್ ಗರಿ ಘಾಲ್ತಾ ಘಾಲ್ತಾನಾ ಸ್ವಷ್ಟ್ ಉಜ್ವಾಡ್ಲ್ಲೆಂ. ಆಜ್ ಅಜ್ಯಾಪ್ಚ್ ಸಯ್! ಪಾಂಚ್ ಮಿನುಟಾಂನಿ ತೀನ್ ದೆಂಕ್ಳೆ ಮಾತ್ಯೆ ಮೊಡ್ಕೆಂತ್ ಪಡ್ಲ್ಲೆ! ತೆ ಘೆವ್ನ್ ಶಾಂಭವಿ ನ್ಹಯ್ಚೆ ತಡಿಕ್ ಯೇವ್ನ್ ಪಾವ್ಲೊ ತೊ. ವ್ಹಡ್ಲಿ ಗರಿ ದೆಂಕ್ಳ್ಯಾಚೆ ಪಾಟಿಕ್ ಗುಂತುನ್ ರುಮ್ಡಿ ರುಕಾರ್ ಚಡ್ಲೊ. ಆಡ್ ಉದ್ಕಾ ಕುಶಿಂ ವಾಡ್ಲ್ಲ್ಯಾ ಫಾಂಟ್ಯಾರ್ ಬಸೊನ್ ಪಯ್ಶಿಲ್ಯಾ ಉದ್ಕಾಕ್ ಎಕೊಡಿ ದೀಷ್ಟ್ ಭೊಂವ್ಡಯ್ಲಿ. ದೆಕ್ತಾ ತರೀ ಕಿತೆಂ!? ಏಕ್ ನ್ಹಯ್, ದೋನ್ ನ್ಹಯ್ ಬಗಾರ್ ಧಾ - ಬಾರಾ ಜೊಡಿ ಮಾಡೊಂಜ್ಯೊ ಪಿಲಾಂ ಜಮ್ಯಾ ಸವೆಂ ಭಂವೊನ್ ಅಸಾತ್! ಮುಂಡೆವು ಬೊಲ್ಯಾ ತೆಣೆಂಯ್ ಸಾತ್ ಆಟ್ ಪಿಲಿಕುಚ್ಚ್ಯೊಯಿ ಉಡ್ಕಣಾಂ ಘಾಲ್ನ್ ಆಸಾತ್! ತರ್ ಆಜ್ ಮಾಸ್ಳಿ ಮೆಳ್ಚೆಂ ನಿಘಂಟ್!
....ಗರಿ ಬಿಜಾವ್ನ್ ಬಿಜಾವ್ನ್ ಜಾತಾ ತಿತ್ಲೆ ಗುಂಡ್ಯೆಕ್ ಉಡವ್ನ್ ಆತಾಂ ರಾಕಾಲಾಗ್ಲೊ ನಕ್ಕುರ್....ಥೊಡೆಂಚ್ ಕ್ಷಣಾಂ....
"ಫಟ್! ಫಟಾಲ್ಲ್!’ ವ್ಹಡ್ಲ್ಯಾ ಮಾಡೊಂಜಿನ್ ’ಮೇವು’ಕ್ ಮಾರ್ನ್ ಗೀಳ್ನ್ ಸೊಡ್ಲ್ಲೆಂ!
.......ಆತಾಂ ತಂಗಿಸ್ ನೀಟ್ ಜಾಂವ್ಕ್ ಸುರು ಜಾಲೆಂ.
’ರಪರಪ’ ಕರ್ನ್ ತಂಗಿಸ್ ವೊಡುಂಕ್ ಸುರ್ವಾತ್ ಕರ್ತಾನಾ ನಕ್ಕುರಾಚಿ ದೀಷ್ಟ್ಯ್ ಎಕಾಚ್ಚಾಣೆಂ ತಾಣೆಂ ಚಡೊನ್ ಬಸ್ಲ್ಲ್ಯ ರುಮ್ಡಿ ರುಕಾ ಮುಳಾಚ್ಯಾ ಉದ್ಕಾಚೆರ್ ಗೆಲಿ. ಥಂಯ್ಸರ್ ಕಿತೆಂಗಿ ಉಪ್ಯೆವ್ನ್ ಆಸ್ಲ್ಲೆಂ ದಿಸಾಲಾಗ್ಲೆಂ. ವ್ಹಯ್! ಮನ್ಶಾ ಆಕ್ರತಿ! ನಿರ್ಜೀವ್ ಕೂಡ್! ಉದಾರೆಂಚ್ ಉಪ್ಯೆವ್ನ್ ಆಸ್ಲ್ಲೆ ಕುಡಿಚೆಂ ಮುಖಮಳ್ ಸ್ವಷ್ಟ್ ಥರಾನ್ ದಿಸ್ತಾಲೆಂ, ವ್ಹಯ್! ತೆಂಚ್ ತೆಂ! ಘಾಯೆಲ್ಲೆಂ ಆಂಗ್, ಮಖಮಳ್, ಪಿಂಜೊನ್ ಗೆಲ್ಲೆಂ ತಾಂಬ್ಡೆಂ ಸೂಡಿದಾರಾ! ಅಪ್ಲೆಂ ಧುವ್ ಯಮುನಾ!
ಟರಠಕ್ಕ ಟರಠಕ್ಕಾ..ಢರ್ಢಕ್ಕ ..ಢರ್ಢಕ್ಕ......ಥೊಡೊ ವೇಳ್ ಆರ್ ಮಾರ್ಲ್ಲ್ಯಾ ಪರಿಂ ಸ್ತಬ್ದ್ ಜಾಲ್ಲ್ಯಾ ನಕ್ಕುರಾಚೆ ತಕ್ಲೆ ಬಿತರ್ ಆತಾಂ ಚೆಂಡೆಚೊ ಆವಾಜ್ ಪ್ರಾರಂಭ್ ಜಾಲ್ಲೊ. ಹಳ್ತಾರ್ ಉದ್ಬವ್ ಜಾಲ್ಲೊ ಆವಾಜ್ ಜ್ಯೋರ್ ಜಾಯಿತ್ತ್, ತಾರಕ್ಸ್ತರಾಕ್ ಪಾವ್ತಾ ಪಾವ್ತಾನಾ ಕುಡಿಂತ್ ಆವೇಶ್ ಭರಾಲಾಗ್ಲೊ. ಆಂಗಾಚಿ ಲೋಂವ್ ಉಬಿ ಜಾವ್ನ್ ಸರ್ವಾಂಗ್ ಕಾಂಪಾಲಾಗ್ಲೊ. ತಾಂಬ್ಡ್ಯಾ ವರ್ಣಾಕ್ ಬದ್ಲೊನ್ ಭಾಯ್ರ್ ಆಯಿಲ್ಲ್ಯಾ ದೊಳ್ಯಾಂ ಮುಖಾರ್ ದುಶ್ಟ್ ಆಕ್ರತ್ಯೊ ಉದೆಲಾಗ್ಲೆ! ರೋಜಿ ಬಾಯಕ್ಕ, ಮಂಜಯ್ಯ ಮಾಸ್ತೆರ್, ಸಾವಿತ್ರಿ ಟೀಚರ್, ಮಹಮ್ಮದ್ ಬ್ಯಾರಿ, ಸಂಕರಭಟ್ರು, ಶಹರಾಚೆ ತರ್ನಾಟೆ, ಜಯಂತ ಶೆಟ್ಟಿ!!
.......ನಕ್ಕುರಾಚೊ ಆವೇಶ್ ಆತಾಂ ದೊಡ್ತೊ ಜಾಲೊ. "ಹ್ಹಾ! ಹ್ಹ! ಹ್ಹ್! ಹೋಯ್!" ಚಂಡ - ಮುಂಡಾಪರಿಂ ಆಟ್ಟಹಾಸಾರ್ ಹಾಸಾಲಾಗ್ಲೊ. ತ್ರಿಶೂಲ್ ಧರ್ಲ್ಲೆಂ ಕಾಳಿ ದೇವಿನ್ ಜೀಬ್ ಭಾಯ್ರ್ ಘಾಲ್ಲ್ಯಾಪರಿಂ ಘಾಲ್ನ್, ಉಗ್ರನರಸಿಂಹಾನ್ ಗೊರೊಜ್ ಘಾಲ್ಲ್ಯಾಪರಿಂ ಗೊರೊಜ್ ಘಾಲಿತ್ತ್ ವಿಪ್ರೀತ್ ಆವೇಶಾನ್ ರುಕಾಚೊ ಫಾಂಟೊ ಧರ್ನ್ ಹಾಲಯ್ಲಾಗ್ಲೊ.
ಥೊಡಿಂಚ್ ಕ್ಷಣಾಂ.......
ಹರ್ದ್ಯಾಂತ್ ತಾಚ್ಯಾ ಹೆಳ್ಕೆವಿಣೆಂಚ್ ’ಕಸ್ಕ್’ ಜಾಲೆಂ! ಫುಡ್ಲೆ ಘಡ್ಯೆ ನಕ್ಕುರಾಚಿ ನಿರ್ಜೀವ್ ಕೂಡ್ ಉದ್ಕಾಕ್ ಪಡ್ಲಿ! ತೆವ್ಶಿಲ್ಯಾನ್ ಗರಿಯೆಕ್ ಸಾಂಪ್ಡಾಲ್ಲೆ ಮಾಸ್ಳೆನ್ ಉಡ್ಡೊನ್ ಉಡ್ಡೊನ್ ಪ್ರಾಣ್ ಸೊಡ್ಲೊ!
[ಹಿ ಕಾಣಿ ರಾಕ್ಣೊ ಪತ್ರಾಚೆರ್ ಪರ್ಗಟ್ಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
