ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಧಾಂವ್... ಧಾಂವ್...
ನಂದಿನಿ: ನಂದಿನಿಚ್ಯೊ ಮಟ್ವ್ಯೊ ಕಾಣ್ಯೊ ವೆಗ್ಳ್ಯಾಚ್ ವರ್ಗಾಚ್ಯೊ ಆನಿ ಪ್ರಕಾರಾಚ್ಯೊ, ಚಡ್ತಾವ್ ಸಾಮಾಜಿಕ್ ಚಿಂತ್ಪಾಚ್ಯೊ ತರ್ಯೀ, ಕೊಂಕ್ಣೆಂತ್ಲ್ಯಾ ಸ್ತ್ರೀ ಲೇಖಿಕಾಂ ಪಯ್ಕಿ ಉಂಚ್ಲ್ಯಾ ಮಟ್ಟಾರ್ ದವರ್ಯೆತಾ ಜಾಲ್ಲ್ಯೊ. ಪಾಟ್ಲ್ಯಾ ಸಭಾರ್ ತೆಂಪಾ ಥಾವ್ನ್ ಕೊಂಕ್ಣಿ ವಾವ್ರ್ ಕರ್ನ್ ಆಸ್ಚ್ಯಾ ಹಿಣೆಂ ವಿಮರ್ಸೊ, ಕವಿತಾಂ, ಲೇಖನಾಂ, ಕಾಣ್ಯೊ - ಅಶೆಂ ಸಭಾರ್ ಪ್ರಕಾರಾಚೆಂ ಸಾಹಿತ್ಯ್ ಹಿಣೆಂ ರಚ್ಲಾಂ ತರ್ಯೀ ಮ್ಹಾಕಾ ಹಿ ಏಕ್ ಕಾಣ್ಯೆಗಾರ್ನ್ ಮ್ಹಳ್ಳೆಪರಿಂ ಭಗ್ತಾ. ಹಿಚ್ಯಾ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಆಕಾಂತ್ ಆನಿ ಹೆರ್ ಕಥಾ’ ಪ್ರಗತಿ ಪ್ರಕಾಶನಾಧ್ವಾರಿಂ ಪರ್ಗಟ್ಲಾ.
ನಂದಿನಿಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ವಾರೆಸ್ದಾರ್, ದೊರಿ, ಭಾಲೊ
ನಂದಿನಿ
ತೊ ಧಾಂವ್ಲೊ .. ... ಧಾಂವತ್ ರಾವ್ಲೊ. ಘರ್ಚಿಂ ರಾತಿಚಾ ಜೆವ್ಣಾರ್ ಆಸ್ತಾನಾ ತೊ ಆಂಗಾರ್ ಘಾಲ್ಲ್ಯಾ ಮುಸ್ತಾಯ್ಕೆಚೆರ್ಚ್ ಘರ್ ಸೊಡ್ನ್ ಧಾಂವ್ಲೊ. ಧಾಂವ್ಲ್ಯಾರ್ ಘರಾ ಥಾವ್ನ್ ರಯ್ಲ್ವೆ ಸ್ಟೇಶನಾಕ್ ಪಂದ್ರಾಂ ಮಿನುಟಾಂ. ಖಂಯ್ಚೆಂ ರಯ್ಲ್ ಜಾಯ್? ತೆಂ ಸವಾಲ್ಚ್ ನಾ. ಖಂಯ್ಚೇಯ್ ಜಾತಾ. ಘರಾ ಥಾವ್ನ್ ಪಯ್ಸ್ ಪಾವ್ಲ್ಯಾರ್ ಪುರೊ. ತೊ ಪಂದ್ರಾ ಮಿನುಟಾಂಚೆ ಧಾಂವ್ಣೆನ್ ರಯ್ಲ್ವೆ ಸ್ಟೇಶನಾಕ್ ಪಾವ್ಲೊ. ತಾಣೆಂ ಚಿಂತ್ ಲ್ಲೆಬರಿಚ್ ರಯ್ಲ್ ತಯಾರ್ ಆಸ್ಲ್ಲೆಂ. ಜಣ್ ಆಮ್ಸರ್ ಕರ್ತಾ ತೆಂ ಪಳಯ್ತಾನಾ ರಯ್ಲ್ ಆತ್ತಾಂ ಸುಟ್ತಾಶೆಂ ದಿಸ್ತಾ. ತೊ ಲೊಕಾಚಾ ಪಾಯಾಂ ಮಧ್ಲ್ಯಾನ್ ಮ್ಹಳ್ಳೆಬರಿ ವಚೊನ್ ರಯ್ಲಾರ್ ಚಡ್ಲೊ. ಹೆಂ ತಾಕಾ ಅನ್ಭೋಗಾಚೆಂ. ಹೆಂ ತಾಣೆಂ ಚವ್ತೆಂ ಪಾವ್ಟಿ ಘರ್ ಸೊಡ್ನ್ ಧಾಂವ್ಚೆಂ. ಕಿತ್ಯಾಕ್? ಕಿತ್ಯಾಕ್ ಮ್ಹಳ್ಯಾರ್ ಘರಾಂತ್ ಕೊಣೀ ಬರೆಂ ಮನಿಸ್ ನಾಸ್ಲ್ಲೆಂ. ಸಕ್ಕಡ್ ತಾಚೆಂ ತೊಂಡ್ ಪಳಯ್ಲ್ಯಾ ತಕ್ಷಣ್ ಕಿತೆಂ ನಾ ಕಿತೆಂ ಮ್ಹಣ್ಚಿಂಚ್. ಮೊರೊಂದಿ ಮಾಮ್ಮಿ ಪುಣಿ ಬರಿ ಆಸ್ತಿ, ತಿ ಮ್ಹಜಿ ಮಾಮ್ಮಿ ನಯೆ? ತಿಣೆಂಯ್ ಕಿತ್ಯಾಕ್ ಉರ್ಲ್ಲ್ಯಾಂ ಬರಿಚ್ ಉಲಂವ್ಚೆಂ? ಇಸ್ಕೊಲಾಕ್ ವಚ್ರೆ, ಶಿಕ್ರೆ, ಶಿಕ್ರೆ, ಶಿಕ್ರೆ. ಫೈಲ್ ಜಾಲ್ಯಾರ್ ಪಾಸ್ ಜಾ, ಪಾಸ್ ಜಾಲ್ಯಾರ್ ಮಾರ್ಕ್ ಉಣೆಂ, ಮಾರ್ಕ್ ಚಡ್ ಕಾಡ್ಲ್ಯಾರ್ ಶೆಂಬೊರಾಂಕ್ ಪಾಂಚ್ ಕಿತ್ಯಾಕ್ ಉಣೆ ರೆ? ಶೆಂಬೊರಾಂತ್ ಶೆಂಬೊರ್ ಕಾಡಿಜೆ. ಥೂ, ಹಾಂಕಾಂ ಬಾರಿ ಮಾರ್ಕ್ ಮ್ಹೆಳ್ಳ್ಯಾತ್ ಇಸ್ಕೊಲಾಂತ್!
ಏಕ್ ಹಾತ್ ತಾಕಾ ಕುಶಿಕ್ ಲೊಟಿಲಾಗ್ಲೊ. ತೊ ತಿಕೆಶೆ ಸೆರ್ವೊನ್ ಬಸ್ಲೊ. ವಾಡ್ಲ್ಲ್ಯಾ ಮನ್ಶಾಚೆಂ ಮಾಸಾಚೆಂ ವೊಜೆಂ ತಾಚಾ ಕುಡಿಕ್ ಬರೆಂ ಲಾಗ್ಲೆಂ ನಾ. ತೊ ಉಟೊನ್ ಸಕಯ್ಲ್ ಬಸ್ಲೊ. ಮಾಸಾಳ್ ಮನಿಸ್ ಖುಶ್ ಪಾವೊನ್ ಸುಶೆಗಾತ್ ಬಸ್ಲಿ. ಎಕ್ಲೆನ್ ಲಾಂಬ್ ಜಯ್ತ್ ನಂದರ್ಕಾಯ್ ಕೆಳೆಂ ಕಾಡ್ನ್ ಚೆರ್ಕ್ಯಾಕ್ ದಿಲೆಂ. ತಾಣೆಂ ತೆಂ ಘೆತ್ಲೆಂ.
ಹೆಂ ಏಕ್ ಬರೆಪಣ್ ತಾಚೆ ಥಂಯ್ ಕೆದಾಳಾಯ್ ಘಡ್ತಾಲೆಂ. ಕೊಣ್ ನಾ ಕೊಣ್ ತಾಕಾ ಖಾಂವ್ಕ್ ದಿತಾಲೆಂ. ಪಾಪ್ ಚೆರ್ಕ್ಯಾಚೆ ಪಯ್ಶೆ ಭಾಯ್ರ್ ಪಡ್ಲ್ಯಾತ್ ಅಶೆಂ ಚಿಂತುನ್ ಥೊಡಿಂ ಪಯ್ಶೆ ದಿತಾಲಿಂ. ಟಿಕೆಟ್ ತಪಾಸ್ಣಾರ್ ಯೆತಾನಾ ಕಸೊಯ್ ನಪಯಿಂಚ್ ಜಾತಾಲೊ. ಪಯ್ಲೆ ಪಾವ್ಟಿ ಧಾಂವ್ತಾನಾ ಎಕಾ ಜಾಂಟ್ಯಾನ್ ತಾಚಿ ಟಿಕೆಟ್ ಕಾಡ್ಲ್ಲಿ ಆನಿ ತಾಕಾ ಕಷ್ಟಾಂತ್ಲೊ ವಾಂಚಯಿಲ್ಲೊ.
ರಯ್ಲಾರ್ ತಾಕಾ ಕೊಣಾಚಿಯ್ ಚಡ್ ವಳಕ್ ನಾಕಾ. ವಳಕ್ ಜಾಲ್ಲಿಚ್ ಮನಿಸ್ ಇಸ್ಕೊಲಾಂತ್ ಪರಿಕ್ಷೆಚಾ ವೆಳಾರ್ ದಿಂವ್ಚೆಂ ಜಯ್ತ್ ಸವಾಲಾಂ ಪತ್ರ್ಚ್ ಜಾತಾ. ಖಂಯ್? ಕಿತೆಂ? ಕೊಣ್? ಕಿತ್ಯಾಕ್? ಕಶೆಂ? ಖಂಯ್ಚೆ? ಕೊಣಾಕ್? ಕೊಣಾಚೆಂ? ಇತ್ಯಾದಿ ‘ಕ’ಸವಾಲಾಂ ಸುರು ಜಾತಾತ್ ಆನಿ ತ್ಯಾ ಸವಾಲಾಂಕ್ ಜಾಪಿ ದಿತಾನಾ ತಾಕಾ ಇಸ್ಕೊಲಾಂತ್ ಟೀಚರಿ ಮುಕಾರ್ ರಾವ್ಲ್ಲೆಬರಿ ಜಾತಾ. ಆಂಗಾರ್ ಹಜಾರ್ ಕೊಟಾರ್ಲ್ಯೊ, ನಕ್ಕುರ್ ಆನಿ ಪಾಲಿ ಒಟ್ಟುಕ್ ಚರ್ಲ್ಲೆಬರಿ ಜಾತಾ.
ತೊ ಮನ್ಶಾಂಕ್ ಜಾತಾ ತಿತ್ಲೊ ಚುಕಯ್ತಾ. ತರಿ ಹಿಂ ಮನ್ಶಾಂ ಪ್ರತ್ಯೇಕ್ ಜಾವ್ನ್ ಹಿಂ ವ್ಹಡ್ ಜಾಲ್ಲಿಂ ಮನ್ಶಾಂ ಕೊಣ್ ನಾ ಕೊಣ್ ತಾಚಾ ಪಾಟಿಕ್ ಪಡ್ತಾತ್. ಹಾಂಕಾ ಹೆ ಪಾವ್ಟಿ ಚುಕಯ್ಜೆ, ಖಂಡಿತ್ ಚುಕಯ್ಜೆ ನಾ ತರ್ಪರ್ತುನ್ ಕೊಣ್ ತರಿ ಮಾಕಾ ಧರ್ತೆಲೆಂ ಆನಿ ಪಾಟಿಂ ಘರಾ ಪಾಯ್ತೆಲೆಂ. ತೆಂಯೀ ಪೊಲಿಸಾಂ ಮುಕಾಂತ್ರ್ - ಪೊಲಿಸ್ ಮ್ಹಣ್ತಾನಾ ತಾಕಾ ಏಕ್ ಥರ್ ಶೆಂ ಜಾತಾ. ಎಕಾ ಪೊಲಿಸಾನ್ ಗೊರೊಜ್ ಮಾರ್ನ್ ವಿಚಾರ್ಲ್ಲೆಂ,
“ಘರಾ ಥಾವ್ನ್ ಧಾಂವ್ತಾಯ್ ಕಿತ್ಯಾಕ್ ರೆ?"’ತಾಣೆಂ
ಸತ್ತ್ ಸಾಂಗ್ಲ್ಲೆಂ. “ಘರಾ ಮಾಕಾ ಇಸ್ಕೊಲಾಕ್ ಧಾಡ್ತಾತ್.
ಮಾಕಾ ಇಸ್ಕೊಲ್ ನಾಕಾ" ತೆಂ ಆಯ್ಕೊನ್ ತೊ ಹಾಸ್ಲ್ಲೊ ಭುಂಯ್ಕಾಂಪ್ ಜಾಲ್ಲೆಬರಿ.
ಹಾಕಾಯೀ ಇಸ್ಕೊಲಾಕ್ ವಚೊಂಕ್ ಬರೆಂ ಜಾಯ್ನಾಸ್ಲ್ಲೆಂ ಆಸ್ತೆಲೆಂ, ಚೆರ್ಕ್ಯಾನ್ ಚಿಂತ್ಲ್ಲೆಂ. ದೊಳ್ಯಾಂ
ಮುಕಾರ್ ಆಸ್ಲ್ಲೊ ಪೊಲಿಸ್ ತಾಚಾ ಮತಿಕ್ ಲ್ಹಾನ್ ಭುರ್ಗೊ ಜಾವ್ನ್ ಇಸ್ಕೊಲ್
ಸೊಡ್ನ್ ಘರ್ ಸೊಡ್ನ್ ಧಾಂವ್ಚೆಂ ಪಿಂತುರ್ ಆಯ್ಲೆಂ ಆನಿ ತೊಯೀ
ವ್ಹಡ್ಲ್ಯಾನ್ ಹಾಸ್ಲೊ. ಇತ್ಲ್ಯಾರ್ ಪೊಲಿಸಾನ್ ಮ್ಹಳೆಂ,
“ಧಾಂಪ್ರೆ ತೊಂಡ್! ಇಸ್ಕೊಲಾಕ್ ಗೆಲೊಯ್ ಬಚಾವ್ ಜಾಲೊಯ್.
ನಾ ತರ್ ಅಳೆ ವೋ ತ್ಯಾ ರುಕಾಕ್ ತಕ್ಲಿ ಸಕಯ್ಲ್ ಕರ್ನ್ ಉಮ್ಕಾಳಾಯ್ತಾಂ ತುಕಾ!’’
ಹೆ ಪಾವ್ಟಿ ಪೊಲಿಸಾಂಚಾ ಹಾತಾಕ್ ಪಡಾನಾಯೆ. ರುಕಾಕ್ ಉಮ್ಕಾಳಾಯ್ತಾತ್ ತರ್ ಕೊಣ್ ಉಮ್ಕಾಳ್ತೊಲೊ ರಾತ್
ದೀಸ್?"ರಯ್ಲ್
ರಾವ್ಲೆಂ. ಸ್ಟೇಶನ್ ಖಂಯ್ಚೆಂ? ತೊ ನೆಣಾಂ, ತಾಕಾ ತಾಚಿ ಗರ್ಜ್ ನಾ. ತೊ ಮುಕ್ಲ್ಯಾ ಕಂಪಾರ್ಟ್ ಮೆಂಟಾಕ್ ರಿಗ್ಲೊ. ಥಂಯ್ ಜಣಾಂ ಉಣಿಂ ಆಸ್ಲ್ಲಿಂ. ಹಾಂಗಾಸರ್ ಬಸ್ಚೆಂ ಬರೆಂ ತಾಣೆಂ ಚಿಂತ್ಲೆಂ. ತೊ ಬಸ್ಲೊ. ತ್ಯಾ ಕಂಪಾರ್ಟ್ಮೆಂಟಾಂತ್ ದೊಗ್ಚ್ ಆಸ್ಲ್ಲೆ. ಎಕ್ಲೊ ಪಿಕ್ಯಾ ಕೆಸಾಂಚೊ ಸಿಟಿರ್ ಲಾಂಬಾಯೆಕ್ ನಿದ್ಲ್ಲೊ. ದುಸ್ರೊ ಕಾಳ್ಯಾ ಕೆಸಾಂಚೊ. ನೀಟ್ ಬಸೊನ್ ದಾಟ್ ಬೂಕ್ ವಾಚ್ತಾಲೊ. ತಾಕಾ ಚೆರ್ಕೊ ಯೇವ್ನ್ ಬಸ್ಲ್ಲೊ ಕಳಿತ್ಚ್ ಜಾಲೆಂ ನಾ. ರಯ್ಲ್ ಸುಟ್ಲೆಂ. .. .. ..
ಚೆರ್ಕೊ ತ್ಯಾ ಬುಕಕ್ ಪಳಯ್ಲಾಗ್ಲೊ. ತಾಕಾ ಬೂಕ್ ಜಾಯ್. ವಾಚಿಜೆ ಅಶೆಂ ಭಗ್ತಾಲೆಂ. ಪುಣ್ ಇಸ್ಕೊಲಾಚೆ ಬೂಕ್ ನ್ಹಯ್, ಹೊ ಕಾಳ್ಯಾ ಕೆಸಾಂಚೊ ವಾಚ್ತಾ ಪಳೆ ತೊ ಬೂಕ್ ವಾಚಿಜೆ. ತಾಕಾ ತಾಚಾ ಇಸ್ಕೊಲಾಚಾ ಬೆಗಾಚೊ ಉಡಾಸ್ ಜಾಲೊ. ತಾಣೆಂ ತೆಂ ಸ್ಟೋರ್ ರುಮಾಚಾ ಮಾಳ್ಯಾರ್ ಉಡಯ್ಲಾಂ. ಮೊರೊಂದಿತ್ ಥಂಯ್! ಉಂದಿರ್ ಖಾಂವ್ದಿತ್! ವಾಳಯ್ ಲಾಗೊಂದಿ!! ತೆ ಬೂಕ್ ತ್ಯಾ ಟಿಚರಿನ್ ಸಾಂಗ್ಲ್ಲೆಬರಿ ವಾಚಿಜೆ, ತಿಣೆಂ ಸಾಂಗ್ಚೆಬರಿ ಅರ್ತ್ ಕರ್ನ್ ಕಾಣ್ಘೆಜೆ , ಮಾಗಿರ್ ತೊಂಡ್ಪಾಟ್ ಕರ್ನ್ ಪರಿಕ್ಷೆಕ್ ಪಳಯ್ನಾಸ್ತಾನಾ ತ್ಯಾ ಟಿಚರಿಕ್ ಜಾಯ್ ಜಾಲ್ಲೆಬರಿ ಬರಯಿಜೆ. “ವ್ಯಾಕ್ಕ್!!" ತಾಣೆಂ ವೊಂಕಾರೆ ಕಾಡ್ಲೆ.
“ಆಹ್! ಕಿತೆಂ ಜಾತಾ ತುಕಾ? ಖಂಯ್ ಥಾವ್ನ್ ಯೆತಾಯ್?" ಕಾಳ್ಯಾ ಕೆಸಾಂಚೊ ಕ ಸವಾಲಾಂ ವಿಚಾರುಂಕ್ ಲಾಗ್ಲೊ. ಚೆರ್ಕೊ ತ್ಯಾ ಮನ್ಶಾಕ್ ಪಳಂವ್ಕ್ ಪಡ್ಲೊ. ತೊ ತಾಕಾ ಬರೊ ಲಾಗ್ಲೊ. ಕಿತೆಂ ತೊಂಡ್!? ಏಕ್ ಥರ್ ಪರ್ಜಳ್ತಾ ಮ್ಹಣ್ಚೆಬರಿ ಭಗ್ಲೆಂ ಚೆರ್ಕ್ಯಾಕ್. ತಾಕಾ ತಾಚಾ ಅನ್ಭೋಗಾನ್ ಸವಾಲಾಂಕ್ ಜವಾಬಿ ತಕ್ಷಣ್ ದಿನಾಯೆ ಮ್ಹಣ್ ಶಿಕಯಿಲ್ಲೆಂ. ತಾಣೆಂ ತಾಕಾ ಏಕ್ ಅಸಂಬದ್ದ್ ಜಾಪ್ ದಿಲಿ.
“ಕಾಂಯ್ ನಾ"
“ಮಾಮ್ಮಿ ಖಂಯ್ ಆಸಾ?"
“ನಾಂ"
“ಘರ್ ಖಂಯ್?"
“ನಾಂ"
ಇತ್ಲ್ಯಾರ್ ತ್ಯಾ ಮನ್ಶಾನ್ ಹಾತಾಂತ್ಲೊ ಬೂಕ್ ಸಕಯ್ಲ್ ದವರ್ಲೊ. ಚೆರ್ಕ್ಯಾನ್ ತಾಚಾ ಆಂಗಾಚಾ ನಿತಳ್ ಮುಸ್ತಾಯ್ಕೆಕ್ ಪಳಯ್ಲೆಂ. ತಾಚಾ ಶರ್ಟಾಚಾ ಬೊಲ್ಸಾರ್ ಲ್ಹಾನ್ ಖುರಿಸ್ ಥಳ್ ಥಳ್ತಾಲೊ. “ಜೆಜು ಮಾಕಾ ಪಾವ್." ಅಶೆಂ ಚೆರನ್ ಮತಿಂತ್ಚ್ ಮಾಗೊನ್ ಹಾತ್ ಮುಕಾರ್ ಕರ್ನ್ ತಾಣೆಂ ತ್ಯಾ ಖುರ್ಸಾಚೊ ಉಮೊ ಘೆತ್ಲೊ.
ತೊ ಮನಿಸ್ ಖುಸ್ ಪಾವ್ಲೊ. ಕ್ರಿಸ್ತಾಂವ್ ಭುರ್ಗೊ, ಅನಾಥ್ ಆಸ್ತೊಲೊ, ಚಿಂತ್ಲೆಂ ತಾಣೆಂ. “ತುಂ ಮ್ಹಜೆ ಸಾಂಗಾತಾ ಯೆತಾಯ್?" ತಾಣೆಂ ಭುರ್ಗ್ಯಾಕ್ ವಿಚಾರ್ಲೆಂ.
“ಖಂಯ್?"
“ಇಗರ್ಜೆಕ್. ಹಾಂವ್ ಥಂಯಿಂಚ್ ರಾವ್ತಾಂ."
“ಓಹ್! ಜಾಯ್ತ್!" ಚೆರ್ಕೊ ಸಂತೊಸಾನ್ ಒಪ್ಲೊ. ‘ದೆವಾ ಮ್ಹಜಾ , ಇಗರ್ಜ್ ವ್ಹಡ್ ನ್ಹಯ್, ಇಸ್ಕೊಲಾಕ್ ವ್ಹರ್ನಾಂ ಜಾಲ್ಯಾರ್ ಪುರೊ.’ ತಾಣೆಂ ಚಿಂತ್ಲೆಂ.
“ಯೇ ಹಾಂಗಾ ಬಸ್. ಪಳೆ, ಹಾಂವ್ ಪಾದ್ರ್ಯಾಬ್. ತುಕಾ ಕಿತೆಂ ಕರುಂಕ್ ಜಾಯ್? ತುಜಾ ಸಯ್ರ್ಯಾಂಗೆರ್ ವ್ಹರ್ನ್ ಪಾಯ್ಜೆ ತರ್ ಪಾಯ್ತಾಂ ಘರ್ ಖಂಯ್ ಸಾಂಗ್".
ಚೆರ್ಕೊ ಕಾವ್ಜೆಣೆನ್ ಮ್ಹಣಾಲೊ, “ನಾಕಾ, ನಾಕಾ"’
“ತರ್ ತುಂ ಕಿತೆಂ ಕರ್ತಾಯ್?"
“ಕಾಮ್ ಕರ್ತಾಂ"
“ಕಾಮ್ ಕರ್ತಾಯ್? ಇಸ್ಕೊಲಾಕ್ ವಚಾನಾಸ್ಲ್ಲೊಯ್? ಕಿತೆಂ ಕಾಮ್ ಕರ್ತಾಯ್ ತುಂ?"
“ಕಿತೆಂಯ್ ಕರ್ತಾಂ." ಚೆರ್ಕ್ಯಾನ್ ಜಾಪ್ ದಿಲಿ. ಪಾದ್ರ್ಯಾಬ್ ಆಕಾಚ್ ಪಳವ್ನ್ ಬಸ್ಲೊ. ಚೆರ್ಕ್ಯಾನ್ ಇಲ್ಲೊ ವೇಳ್ ತಾಕಾ ದೀಷ್ಟ್ ಪಾಟಿಂ ಮೆಳಯ್ಲಿ, ಮಾಗಿರ್ ಭಾಯ್ರ್ ಕಾಳೊಕಾಕ್ ಪಳಯ್ ಲಾಗ್ಲೊ.
ದುಸ್ರ್ಯಾ ಫಾಂತ್ಯಾರ್ ಗಾಡಿ ಸ್ಟೇಶನಾಂತ್ ರಾವ್ತಾನಾ ಚೆರ್ಕೊ ಪಾದ್ರ್ಯಾಬಾ ಪಾಟ್ಲ್ಯಾನ್ ಆಪ್ಣಾಕ್ ಉಕ್ಲುಂಕ್ ತಾಂಕ್ಚೆಂ ಬೆಗ್ ಕಾಣ್ಘೆವ್ನ್ ದೆಂವ್ಲೊ. ರಿಕ್ಷಾ ಧರ್ನ್ ದೊಗೀ ಇಗರ್ಜೆಕ್ ಪಾವ್ಲೆ.
ಬಟ್ಲೆರ್ ಬಾರಿಚ್ ಕುತೂಹಲಾನ್ ಚೆರ್ಕ್ಯಾಕ್ ಪಳಂವ್ಕ್ ಪಡ್ಲೊ. ಪಾದ್ರ್ಯಾನ್ ತಾಕಾ ಮಟ್ವ್ಯಾನ್ ಖಬರ್ ಕಳಯ್ಲಿ. ಆನಿ ಸಾಂಗ್ಲೆಂ, “ತಾಕಾ ನಾಂವ್ಚಿ ವೆವಸ್ತಾ ಕರ್ ಆನಿ ಉಪ್ರಾಂತ್ ಫಳಾರ್ ದಿ."
ಚೆರ್ಕೊ ನ್ಹಾವ್ನ್ ಫಳಾರ್ ಕರ್ನ್ ಬಟ್ಲೆರಾಚಾ ಪಾಟ್ಲ್ಯಾನ್ ಮುಕ್ಲ್ಯಾನ್ ಘುಂವೊನ್ ತಾಣೆಂ ಸಾಂಗ್ಲ್ಲೆಂ ಕಾಮ್ ಕರಿಲಾಗ್ಲೊ. ‘ಅಸೊಚ್ ರಾಂದ್ಪಾ ಕುಡಾಂತ್ ರಾವ್ಲ್ಲೊ ತರ್ ಬರೆಂ ಆಸ್ಲ್ಲೆಂ." ಚಿಂತ್ಲೆಂ ಬಟ್ಲೆರಾನ್. ಪುಣ್ ತಶೆಂ ಜಾಲೆಂ ನಾ.
ಇಕ್ರಾ ವೊರಾರ್ಶೆಂ ಪಾದ್ರ್ಯಾಬ್ ಚೆರ್ಕ್ಯಾಕ್ ವ್ಹರ್ನ್ ಕುಶಿಚಾ ಕೊವೆಂತಾಕ್ ಗೆಲೊ. “ ರೊನಿ, ಹಾಂಗಾಸರ್ ಥೊಡಿಂ ಭುರ್ಗಿಂ ಆಸಾತ್. ತಾಂಚೆ ಸಂಗಿಂ ರಾವ್. ಸಿಸ್ಟರ್ ತುಕಾ ಇಲ್ಲೆಶೆಂ ಕಾಮ್ ದಿತೆಲಿ. ಕರ್. ಜುನಾಂತ್ ದುಸ್ರಿ ವೆವಸ್ತಾ ಕರ್ತಾಂ."
ಪಾದ್ರ್ಯಾಬ್ ಆನಿ ಸಿಸ್ಟರ್ ಕಿತೆಂ ಉಲಯ್ಲಿಂ ತಾಕಾ ಕಳಿತ್ ಜಾಲೆಂ ನಾ. “ಹಾಂಗಾ ರಾವ್ ರೊನಿ ಮ್ಹಜೆ ಕಡೆ ಉಲಂವ್ಕ್ ಜಾಯ್ ಜಾಲ್ಯಾರ್ ಇಗರ್ಜೆಕ್ ಯೆ, ಮೆಳ್ತಾಂ" ಮ್ಹಣೊನ್ ಪಾದ್ರ್ಯಾಬ್ ಗೆಲೊ.
ಸಿಸ್ಟರಿನ್ ತಾಕಾ “ಯೇ ಬಾ" ಮ್ಹಣ್ ಆಪವ್ನ್ ವೆಲೆಂ. ಬೋರ್ಡಿಂಗಾಂತ್ ರಾವ್, ಆತಾಂ ಭುರ್ಗಿಂ ಪುರಾ ಘರಾ ಗೆಲ್ಯಾಂತ್. ರಜಾ ನ್ಹಯ್ವೆ? ಘರ್ ನಾಸ್ಲ್ಲಿಂ ಚಾರ್ ಪಾಂಚ್ ಜಣಾಂ ಆಸಾತ್. ತಾಂಚಾ ಸಾಂಗಾತಾ ರಾವ್. ಸಿಸ್ಟರ್ ಅನ್ನಾಮಾರಿಯಾ ತುಕಾ ಮುಸ್ತಾಯ್ಕಿ ದಾಕಯ್ತೆಲಿ. ತುಕಾ ಸಮ ಜಾಂವ್ಚಿ ವೀಂಚ್."
ರೊನಿಚೊ ಇಸ್ಕೊಲ್ ನಾಸ್ಲ್ಲೊ ನವೊ ಅಧ್ಯಾಯ್ ಅಧ್ಯಾಯ್ ಸುರು ಜಾಲೊ. ಮೀಸ್ ಮಾಗ್ಣೆಂ, ವೊರೆಸಾಂವ್, ಜೆವಣ್ ನೀದ್ ಇತ್ಯಾದಿ ಜಾವ್ನ್ ಉರ್ಲ್ಲ್ಯಾ ವೆಳಾಂತ್ ಕಿತೆಂ ನಾ ಕಿತೆಂ ಕಾಮ್ ಭುರ್ಗ್ಯಾಂಚಾ ಹಾತಾಕ್ ಪಡ್ತಾಲೆಂ. ರೊನಿ ಬಾರಿ ಸಂತೊಸಾನ್ ಹಿಂ ಕಾಮಾಂ ಕರ್ತಾಲೊ. ಹಾತಾಕ್ ಮೆಳ್ಲ್ಲ್ಯಾ ಖಾಲಿ ಕಾಗ್ದಾಂಚೆರ್ ತಾಕಾ ಬರೆಂ ಲಾಗ್ಚೆಂ ಗಿಚ್ಚಿತಾಲೊ. ಪಿಂತುರಾಂ ಸೊಡಯ್ತಾಲೊ. ಬೋರ್ಡಿಗಾಂತ್ ಪಡ್ಲ್ಲೆ ಇಸ್ಕೊಲಾಚೆ ಪರ್ನೆ ಬೂಕ್ ಆತುರಾಯೆನ್ ವಾಚ್ತಾಲೊ. ಕೊಣಾಚೆ ರಗ್ಳೆ ನಾಸ್ತಾನಾ ಆಪ್ಣಾಕ್ ಜಾಯ್ ತ್ಯಾ ರಿತಿನ್ ಜಾಯ್ ತೆಂ ಸಮ್ಜೊನ್ ಘೆತಾಲೊ.
ಥೊಡ್ಯಾಚ್ ದಿಸಾಂನಿ ಚೆರ್ಕೊ ಅಸಾಧಾರಣ್ ಬುಧ್ವಂತ್ಕಾಯೆಚೊ ಮ್ಹಳ್ಳೆಂ ಸತ್ ಸಿಸ್ಟರಿಕ್ ಆನಿ ಸಿಸ್ಟರಿ ಥಾವ್ನ್ ಪಾದ್ರ್ಯಾಬಾಕ್ ಕಳ್ಳೆಂ. ಪಾದ್ರ್ಯಾಬ್ ಚೆರ್ಕ್ಯಾಕ್ ಆಪವ್ನ್ ಗಜಾಲಿಂಕ್ ಬಸ್ತಾಲೊ. ತೊ ಏಕ್ ಸ್ವತಂತ್ರ್ ಜೀವಿ. ಆಪ್ಣಾಕ್ ಜಾಯ್ ತಶೆಂ ಜಿಯೆಂವ್ಕ್ ಆಶೆಂವ್ಚೊ. ಆಪ್ಣಾಕ್ ಜಾಯ್ ಜಾಲ್ಲ್ಯಾರಿತಿನ್ ಆಪ್ಣಾಕ್ ಜಾಯ್ ಜಾಲ್ಲೆಂಚ್ ಕರ್ಚೊ. ಹಾಕಾ ನಾಜುಕಾಯೆನ್ ತಿದ್ವಿನಾಂ ತರ್ ಹಾಚಿ ಬುಧ್ವಂತ್ ಕಾಯ್ ವಾಂಕ್ಡೆ ವಾಟೆಕ್ ಘುಂವೊಂಕೀ ಪುರೊ. ಅಸಲ್ಯಾಂಕ್ ಪಾದ್ರ್ಯಾಬ್ ವಳ್ಕಾತಾಲೊ ಪುಣ್ ಹಾಕಾ ತಿದ್ವುಂಚೆ ಕಶೆಂ? ಹೊ ಕಾಂಯ್ ಲ್ಹಾನ್ ಮಾರಾಕ್ ತಿದ್ವಣಿಂ ಕಾಣ್ಘೆಂವ್ಚೊ ನ್ಹಯ್. ಹಾಕಾ ಅಶೆಂ ತಿದ್ವಿಜೆ ಕಿ ಆಪ್ಣಾಕ್ ಕೊಣ್ ತರಿ ತಿದ್ವಿತಾ ತೆಂ ಹಾಕಾ ಕಳಾಂಚ್ ಜಾಯೆ. ಹೆಂ ಕಶೆಂ ಕರ್ಚೆಂ? ಪಾದ್ರ್ಯಾಬಾಕ್ ಹೆಂ ಏಕ್ ಸವಾಲ್ ಜಾಲೆಂ.
ರೊನಿ ಚವ್ತೆಂತ್ ಶಿಕ್ತಾಲೊ ಆನಿ ತಾಚಿ ಟೀಚರ್ ತಾಕಾ ತಿದ್ವುನ್ಂಚ್ ಆಸ್ತಾಲಿ. ತಿಣೆಂ ಏಕ್ ಪಾವ್ಟಿ ಚೀಜ್ ಮ್ಹಳ್ಯಾರ್ ತೂಪ್ ಮ್ಹಣ್ ಸಾಂಗ್ಲ್ಲೆಂ. ರೊನಿನ್ ‘ಗೀ’ ಮ್ಹಳ್ಯಾರ್ ಕಿತೆಂ ಮ್ಹಣ್ ಟಿಚರಿಕ್ ವಿಚಾರ್ಲ್ಲೆಂ. ಗೀ ಆನಿ ಚೀಜ್ ಮ್ಹಳ್ಯಾರ್ ಎಕ್ಚ್ ಮ್ಹಣ್ ತಿಣೆಂ ಸಾಂಗ್ಲ್ಲೆಂ. ಪಾದ್ರ್ಯಾಬಾನ್ ತಾಕಾ ಚೀಜ್ ಮ್ಹಳ್ಯಾರ್ ಕಿತೆಂ ತೆಂ ವಿವರ್ಸುನ್ ಸಾಂಗ್ಲೆಂ. ರೊನಿ ಮ್ಹಣಾಲೊ, “ವ್ಹಯ್, ಹಾಂವೆ ಚೀಜ್ ಖೆಲಾಂ ಆನಿ ತೂಪ್ ರಾಂದ್ಚಾ ಕುಡಾಂತ್ ಪಳಯ್ಲಾಂ" ಹಾಂಗಾಸರ್ ಪಾದ್ರ್ಯಾಬಾಕ್ ತೊ ತೂಪ್ ಆನಿ ಚೀಜ್ ವಾಪರ್ಚಾ ಘರಾ ಥಾವ್ನ್ ಆಯ್ಲಾ ಮ್ಹಳ್ಳೆಂ ಕಳ್ಳೆಂ. “ಆಹಾ ಪುತಾ, ತುಂ ಏಕ್ ದೀಸ್ ಖಂಡಿತ್ ಮಾಕಾ ತುಜಾ ಬಾಪಯ್ಚೆಂ ನಾಂವ್ ಆನಿ ವಿಳಾಸ್ ಸಾಂಗ್ತಾಯ್. ತೊ ಮತಿಂತ್ಚ್ ಸಂತೊಸ್ ಪಾವ್ಲೊ.
ಬೋರ್ಡಿಂಗಾಚಾ ಭುರ್ಗ್ಯಾಂ ಥಾವ್ನ್ ದುಸ್ರೊಚ್ ಮ್ಹಳ್ಳೆಬರಿ ಆಸ್ಲ್ಲೊ ರೊನಿ. ಭುರ್ಗ್ಯಾಂ ಸಾಂಗಾತಾ ಭುರ್ಗೊ ಜಾವ್ನ್ ಆಸ್ತಾಲೊ ತರಿ ತೊ ದುಸ್ರೊಚ್. ಸಕ್ಡಾಂ ಸಾಂಗಾತಾ ಮೆಳೊನ್ ಕಾಮ್ ಕರ್ತಾಲೊ ತರಿ ತಾಚೆಂ ಕಾಮ್ ವಿಂಗಡ್ಚ್ ರಿತಿನ್ ಉಟೊನ್ ದಿಸ್ತಾಲೆಂ. “ಕೊಣ್ ಪುತಾ ತುಜಾ ಮಾಮ್ಮಿ?" ಸಿಸ್ಟರ್ ಅನ್ನ್ ಮಾರಿಯಾನ್ ಏಕ್ ಪಾವ್ಟಿ ವಿಚಾರ್ಲೆಂ.
“ಮಾಮ್ಮಿ! ಕೊಣ್ ಮಾಮ್ಮಿ?" ಚೆರ್ಕ್ಯಾಚೊ ಚಾರೊಚ್ ಬದಲ್ಲೊ. ತೊಂಡ್ ಎಕಾಚ್ಛಾಣೆಂ ಸಯ್ರ್ ಭಯ್ರ್ ತಶೆಂ ದಿಸಾಲಾಗ್ಲೆಂ. ಸಿಸ್ಟರ್ ಭಿಯೆಲಿ. “ಮಾಮ್ಮಿ ನಾಂಗಿ ಪುತಾ? ವ್ಹಡ್ ನ್ಹಯ್ ಆಮಿಂ ಆಸಾ ಭಿಯೆನಾಕಾ." ಮ್ಹಣಾಲಿ ತಾಚಿ ಪಾಟ್ ಥಾಪ್ಡುನ್.
ಮಾಮ್ಮಿಚೊ ಉಡಾಸ್ ರೊನಿಕ್ ಯೆತಾಲೊ. ತಿಣೆಂ ವಾಡ್ಲ್ಲೆಂ ಜೆವಿನಾಸ್ತಾನಾ, ತಾಚೆಂ ಪೊಟ್ ತಳ್ ಮಳ್ತಾಲೆಂ. ಪುಣ್ ತಾಚಾ ಮಾಮ್ಮಿಕ್ ತಾಚಾಕಿ ಚಡ್ ತಾಚಾ ಇಸ್ಕೊಲಾಚೊ ಆನಿ ತಾಣೆಂ ಕಾಡ್ಚಾ ಮಾರ್ಕ್ಸಾಂಚೊ ಚಡ್ ಮೋಗ್ ಮ್ಹಣ್ ತಾಕಾ ಖಂಡಿತ್ ಭಗ್ತಾಲೆಂ. ಆನಿ ರೊನಿಕ್ ತಾಚಾ ಮಾಮ್ಮಿಚಾ ಮೊಗಾಚಾಕೀ ತಾಚಾ ಇಸ್ಕೊಲಾಚೊ ಚಡ್ ಕರ್ನ್ ತಾಚಾ ಟಿಚರಾಂಚೊ ಕಾಂಟಾಳೊ ಕುಡಿ ಅತ್ಮ್ಯಾಂತ್ ಭರ್ಲ್ಲೊ. ಹ್ಯಾ ಫೈನಲ್ ಪರಿಕ್ಷೆಚಾ ವೆಳಾರ್ ಇಸ್ಕೊಲ್ ಸೊಡ್ನ್ ಮಾಮ್ಮಿ ಕಿತೆಂ ದುಸ್ರೆಂ ಉಲಯ್ಲ್ಯಾ? ಘರ್ಯೀ ಇಸ್ಕೊಲ್ಚ್ ಕೆಲ್ಲೆಂ ನ್ಹಯ್ ತಿಣೆಂ? ಮಾಕಾ ಖೆಳೊಂಕೀ ಸೊಡುಂಕ್ ನಾ. ಮಾಮ್ಮಿ ಥಂಯ್ಚ್ ಆಸೊಂದಿ. ತಿಕಾ ಸಗ್ಳೊ ದೀಸ್ ಬೂಕ್ ಕಾಣ್ಘೆವ್ನ್ ಬಸ್ಚೆಂ ಮ್ಹಜೆಂ ಭಯ್ಣ್ ಲೊಲಿಟಾ ಆಸಾ ನ್ಹಯ್?
ಹ್ಯಾ ಸಿಸ್ಟರಾಂಕ್ ಕಿತ್ಯಾಕ್ ಮ್ಹಜಾ ಮಾಮ್ಮಿಚಿ ಖಂತ್? ಹಾಣಿಂ ಸಾಂಗ್ಲ್ಲೆಂ ಕಾಮ್ ಸಾಂಗ್ಲ್ಲ್ಯಾ ಚಾಕೀ ಇಲ್ಲೆಂ ಚಡ್ಚ್ ಕರ್ತಾಂ ನ್ಹಯ್? ಛೆ! ಹಾಂಚೆಕಡೆ ಆನಿ ಚಡ್ಡ್ ಉಲಯ್ ನಾಯೆ.
ರೊನಿ ಆತಾಂ ಬಾರಿಚ್ ಚತ್ರಾಯೆನ್ ಮ್ಹಳ್ಳ್ಯಾಬರಿ ಸಿಸ್ಟರಾಂಕಡೆ ಆನಿ ಪಾದ್ರ್ಯಾಬಾಕಡೆ ಉಲಯ್ತಾಲೊ. ಸತ್ ಸಾಂಗಾಜೆ ತರ್ ಉಲಂವ್ಚೆಂಚ್ ಉಣೆಂ ಕೆಲ್ಲೆಂ ಮ್ಹಣ್ಯೆತ್. ಸಿಸ್ಟರಾಂಕ್ ಹೆಂ ಕಾಂಯ್ ಸಮ್ಜಾಲೆಂ ನಾ. ಪಾಪ್ ಚೆರ್ಕ್ಯಾಕ್ ಪ್ರೊಬ್ಲೆಮ್ ಮ್ಹಣ್ ತಾಣಿಂ ಸ್ವತಾಃಕ್ ಸಾಂಗೊನ್ ಕಾಣ್ಘೆಲೆಂ ಆನಿ ಪಾದ್ರ್ಯಾಬಾಕೀ ತಿಚ್ ಖಬರ್ ದಿಲಿ. “ಚೆರ್ಕೊ ಪಾಪ್ ಆವಯ್ ಬಾಪಯ್ ನಾಸ್ಲ್ಲೆಂ ವರ್ವಿಂ ಏಕ್ ಥರ್ ಆಸಾ. ತಾಕಾ ಜಾತಾ ತಿತ್ಲೊ ಕಾಮಾಂನಿಂ ಲಾಗಯ್ಜೆ.. ದುಸ್ರ್ಯಾ ಭುರ್ಗ್ಯಾಂ ಸಾಂಗಾತಾ ತಾಣೆಂ ಚಡ್ ಆನಿ ಚಡ್ ಮೆಳೊನ್ ಆಸಾಜೆ, ಕಿತ್ಲೊ ಮ್ಹಳ್ಯಾರಿ ಪ್ರೊಬ್ಲೆಮ್ ಚೈಲ್ಡ್ ಪಳೆ!"
ಹೊ ಪ್ರೊಬ್ಲೆಮ್ ಚೈಲ್ಡ್ ಆಪ್ಲೆಸ್ಥಕಿಂ ಬಾರಿಚ್ ಸಂತೊಸಾನ್ ಆಸ್ತಾಲೊ. ಸಿಸ್ಟರಾಂ, ಪಾದ್ರ್ಯಾಬ್ ಆನಿ ಇತರ್ ವ್ಹಡಾಂ ಲಾಗಿಂ ಆಸ್ತಾನಾ ತಾಚಿ ಜೀಬ್ ಸುಡಾಳ್ ಹಾಲಾನಾಸ್ಲ್ಲಿ. ಕಸಲ್ಯಾಗಿ ಸವಾಲಾಕ್ ಕಸಲಿಗಿ ಜಾಪ್ ದಿತಾಲೊ. ತಾಚೊ ಘುಟ್ ತೊ ಮಾತ್ರ್ ಜಾಣಾಂ ಆಸ್ಲ್ಲೊ. ತಾಚೊ ಜಾಪಿ ಆಯ್ಕಾಲ್ಲಿಂ ಮಾತ್ರ್ ತೊ ಪಾಟ್ ಕರ್ನ್ ಗೆಲ್ಲ್ಯಾ ತಕ್ಷಣ್ ತಾಚಿ ಬಿರ್ಮತ್ ಪಾವ್ತಾಲಿಂ.
ಅಶೆ ಮಹಿನೆ ದೋನ್ ಪಾಶಾರ್ ಜಾಲೆ. ವಿಶೇಷ್ ಘಡಿತ್ ಕಿತೆಂ ಘಡ್ಲೆಂ ನಾ. ಮೆಯಾಚಾ ಆಕೇರಿಕ್ ಭುರ್ಗಿಂ ಬೋರ್ಡಿಂಗಾಕ್ ಪಾಟಿಂ ಯೇಂವ್ಕ್ ಲಾಗ್ಲಿಂ. ಪನ್ನಾಸ್ - ಸಾಟ್ ಭುರ್ಘ್ಯಾಂ ಮಧೆಂ ರೊನಿಯೀ ಎಕ್ಲೊ ಜಾಲೊ.
ಹ್ಯಾ ಮಧೆಂ ತಾಕಾ ಮತಿಕ್ ಕರ್ಕರೆ ದಿಂವ್ಚಿ ಏಕ್ ಗಜಾಲ್ ಘಡ್ಲಿ. ತಿ ಕಸಲಿಗಿ ಮ್ಹಳ್ಯಾರ್ ಪಾದ್ರ್ಯಾಬಾನ್ ತಾಕಾ ಇಸ್ಕೊಲಾಕ್ ಆಪವ್ನ್ ವ್ಹರ್ನ್ ದಾಖಲ್ ಕೆಲ್ಲಿ. “ಫಾದರ್, ಫಾದರ್ ಮಾಕಾ ಇಸೊಲ್ ನಾಕಾ ಫಾದರ್, ಹಾಂವ್ ಕಾಮ್ ಕರ್ತಾಂ. ಬೂಕ್ ಜಾಯ್ ಜಾಲ್ಯಾರ್ ವಾಚ್ತಾಂ, ಬರಂವ್ಕ್ ಜಾಯ್ ಜಾಲ್ಯಾರ್ ಬರಯ್ತಾಂ. ಪುಣ್ ಇಸ್ಕೊಲ್ ನಾಕಾ ಫಾದರ್!" ತೊ ರಡೊನ್ಂಚ್ ಮ್ಹಣಾಲೊ. ಪಾದ್ರ್ಯಾಬಾನ್ ತಾಕಾ ಮೊಗಾನ್ ಲಾಗಿಂ ವೊಡ್ಲೊ ತಾಚಾ ತಕ್ಲೆರ್ ಹಾತ್ ದವರ್ಲೊ. ಮೊಗಾನ್ ತಾಚಿ ಪಾಟ್ ಪುಶಿತ್ ಮ್ಹಳೆಂ,“ಪಳೆ ಪುತಾ, ಶಿಕಪ್ ಗರ್ಜೆಚೆಂ. ಕಿತ್ಲಿಶಿಂ ಭುರ್ಗಿಂ ಇಸ್ಕೊಲಾಕ್ ವಚೊಂಕ್ ಆಶೆತಾತ್ ತರೀ ತಾಂಕಾಂ ತೆಂ ಭಾಗ್ ನಾ. ತುಕಾ ದೆವಾನ್ ಶಿಕಪ್ ಫಾವೊ ಕೆಲಾಂ.
ಶಿಕ್, ಏಕ್ ಮನಿಸ್ ಜಾ. ಹಾಚೆ ವರ್ವಿಂ ತುಕಾಚ್ ನ್ಹಯ್, ತುಂ ಜಿಯೆಂವ್ಚ್ಯಾ ಸಮಾಜೆಕ್ ಯೀ ಬರೆಪಣ್ ಲಾಭ್ತಾ.
“ಫಾದರ್ ಇಸ್ಕೊಲಾಕ್ ವಚಾನಾಸ್ತಾನಾ ಮ್ಹಜೆ ಇತ್ಲ್ಯಾಕ್ಚ್ ಶಿಕ್ತಾಂ... .. .. ಫಾದರ್ ಫಾದರ್ ಇಸ್ಕೊಲ್ ನಾಕಾ ಫಾದರ್ ಜಾಯ್ ಜಾಲ್ಲೆಬರಿ ಬುಕಾಂಕ್ ಗೀಟ್ ಘಾಲುಂಕಿ ಸೊಡಿನಾಂತ್ ಫಾದರ್. .. .. .. ಫಾದರ್ ಹಾಂವ್ ಮ್ಹಜೆ ಇತ್ಲ್ಯಾಕ್ಚ್ ಶಿಕ್ತಾಂ......." ರೊನಿ ರಡ್ಲೊ.
ಪಾಪ್ ಚೆರ್ಕೊ! ಭೆಷ್ಟೊಚ್ ಭಿಯೆತಾ. ಪಾದ್ರ್ಯಾಬ್ ಬಸ್ಲೊ. ತಾಣೆಂ ರೊನಿಚಿ ತಕ್ಲಿ ಆಪ್ಲ್ಯಾ ಹರ್ಧ್ಯಾಕ್ ದಾಂಬುನ್ ಧರ್ಲಿ ಆನಿ ಮ್ಹಳೆಂ; “ರೊನಿ ಮಾಕಾ ತುಂ ಮ್ಹಳ್ಯಾರ್ ಬಾರಿ ಮೋಗ್. ತುಂವೆ ಇಸ್ಕೊಲಾಕ್ ವಚೊನ್ ವ್ಹಡ್ ಮನಿಸ್ ಜಾಯ್ಜೆ ಮ್ಹಣ್ ಮ್ಹಜಿ ಆಶಾ ......" ರೊನಿಕ್ ಹೆಂ ಬರೆಂ ಲಾಗ್ಲೆಂ. ತಾಚೆಲಾಗಿಂ ಅಶೆಂ ಕೊಣೀ ಉಲಂವ್ಕ್ಂಚ್ ನಾ. ತೊಯೀ ಏಕ್ ಪಾದ್ರ್ಯಾಬ್! ತೊ ಕಷ್ಟಾಂನಿ ಮ್ಹಣಾಲೊ,
“ಜಾಯ್ತ್ ಫಾದರ್."
ಜುನಾಚೆ ಪಯ್ಲೆರ್ ಪೊತೆಂ ಪಾಟಿರ್ ಘಾಲ್ನ್ ಚೆರ್ಕೊ ಇಸ್ಕೊಲಾಕ್ ಗೆಲೊ. ತ್ಯಾ ದಿಸಾ ತಾಕಾ ಕಾಂಯ್ ವಿರಾರಾಯ್ ಭಗ್ಲಿ ನಾ, ಪುಣ್ ಅಶೆ ಪಾಠ ಸುರು ಜಾಲೆ ಮ್ಹಣ್ತಾನಾ ರೊನಿಚೆ ಕಷ್ಟ್ಯೀ ಸುರು ಜಾಲೆ. ಲೆಕ್ಕ ಕರ್ತಾನಾ ಜಾಪಿ ಸಾರ್ಕ್ಯೊ ಆಯ್ಲ್ಯಾರ್ ಪಾವಾನಾಂತ್ಗಿ? ತೆಂ ಕಿತ್ಯಾಕ್ ತ್ಯಾ ಟಿಚರಿನ್ ಬೋರ್ಡಾರ್ ಕೆಲ್ಲೆಬರಿ ಕರಿಜೆ? ಹಾಂವೆ ಕೆಲ್ಲೆಂ ಚೂಕ್ ಕಶೆಂ? ಬುಕಾಂತ್ ಆಸ್ಚೆಂಚ್ ವಾಕ್ಯೆಂ ಕಶೆಂ ಸಮಾ? ತ್ಯಾಚ್ ಅರ್ತಾರ್ ವಾಕ್ಯೆಂ ಬದಲ್ಲೆಂ ತರ್ ಕಿತೆಂ ಜಾತಾ? ನೋಟ್ಸ್ ಬುಕಾಂಚೆರ್ ಇತ್ಲಿಂ ಸೊಬಿತ್ ಪಿಂತುರಾಂ ಆಸಾತ್ ತಾಂಕಾಂ ಕಿತ್ಯಾಕ್ ತೆಂ ಬ್ರಾವ್ನ್ ಪೇಪರ್ ಕವರ್? ಟೆಕ್ಸ್ಟ್ ಬುಕಾಂಚೆರ್ ಆಸ್ಲ್ಲೆಂ ಪಾವಾನಾಂಗಿ? ತೆಂ ಕಿತ್ಯಾಕ್ ಪರ್ತುನ್ ನೋಟ್ಸ್ ಬುಕಾಚೆರ್ ಬರಯ್ಜೆ? ಡ್ರೋಯಿಂಗ್ ಪಿರಿಯಡಿಕ್ ಹಿಣೆಂ ಬೋರ್ಡಾರ್ ಸೊಡಯಿಲ್ಲೆಂ ಪರ್ಕಟ್ ಪಿಂತುರ್ಚ್ ಕಿತ್ಯಾಕ್ ಸೊಡಯ್ಜೆ? ತಾಚಾಕಿ ಬರಿಂ ಮಾಕಾ ಸೊಡಂವ್ಕ್ ಯೆತಾತ್ ನ್ಹಯ್?
ರೊನಿ ಧಾ ದಿಸಾಂನಿ ಸಂಪೂರ್ಣ್ ವಿರಾರ್ ಜಾಲೊ. ತಾಕಾ ಪಾದ್ರ್ಯಾಬಾನ್ ತಕ್ಲೆರ್ ಹಾತ್ ದವರ್ಲ್ಲೊ ಮಾಗಿರ್ ಪಾಟ್ ಪುಸ್ಲ್ಲೊ ಉಪ್ರಾಂತ್ ತುಂ ಮ್ಹಳ್ಯಾರ್ ಬಾರಿ ಮೋಗ್ ಮ್ಹಳ್ಳೆಂ ಪುರಾ ವಿಸರ್ಲೆಂ. ತಾಚಾ ಬದ್ಲಾಕ್ ತಾಚಿ ಮಟ್ವಿ ಕಾಳಿ ಟಿಚರ್ ತಕ್ಲೆರ್ ಜಯ್ತ್ ಶಿಂಗಾಂ ಆನಿ ಪಾಟ್ಲ್ಯಾನ್ ಲಾಂಬ್ದೀಗ್ ಶಿಮ್ಟಿ ಕಾಣ್ಘೆವ್ನ್ ಕೆಕ್ಕರ್ಯಾ ತಾಳ್ಯಾನ್ ಫರ್ಮಾಂವ್ಚಿಚ್ ದಿಸಾಲಾಗ್ಲಿ.
ಸಾಂಜೆರ್ ಬೆಲ್ ಜಾತಾನಾ ತೊ ಸದಾಂಚೆಬರಿ ಇಸ್ಕೊಲಾಂತ್ಲೊ ಭಾಯ್ರ್ ಧಂವ್ಲೊ ನಾ. ಸವ್ಕಾಸ್ ಕ್ಲಾಸಿಂತ್ಲೊ ಭಾಯ್ರ್ ಯೇವ್ನ್ ಪಾಸಾಯೆಂತ್ ರಾವ್ಲೊ. ಭುರ್ಗಿಂ ಉಣಿಂ ಜಾವ್ನ್ ಯೆತಾನಾ ತಾಣೆಂ ಪೊತೆಂ ಪಾಸಾಯೆಚಾ ಕೊನ್ಶಾಕ್ ಉಡಯ್ಲೆಂ. ಉಪ್ರಾಂತ್ ಮಾರ್ಗಾದೆಗ್ಕ್ ಯೇವ್ನ್ ರಾವ್ಲೊ. ಏಕ್ ಬಸ್ಸ್ ಅಮ್ಸರಾನ್ ಮ್ಹಳ್ಳೆಬರಿ ಆಯ್ಲೆಂ. ಕಂಡಕ್ಟರ್ ಮುಕ್ಲ್ಯಾ ಬಾಗ್ಲಾರ್ ಬೇಗ, ಬೇಗ ಮ್ಹಣೊನ್ ಆಸ್ತಾನಾ ತೊ ಪಾಟ್ಲ್ಯಾಲಾಂಬ್ ಸಿಟಿಚಾ ಕೊನ್ಶಾರ್ ಆಸ್ಲ್ಲ್ಯಾ ಟಯರಾಚೆರ್ ಬಸೊನ್ ಭಾಯ್ರ್ ಪಳೆಲಾಗ್ಲೊ. ಬಸ್ಸ್ ಸುಟ್ಲೆಂ.
“ಧಾಂವ್. .. .. .. ಧಾಂವ್ ಪುತಾ. .. .. .. ಧಾಂವ್"’ತಾಣೆಂ ಸ್ವತಾಃಕ್ ಸಾಂಗ್ಲೆಂ. ಪುಣ್ ಬಸ್ಸಾಂನಿ ಧಾಂವಾನಾಕಾ, ಪಯ್ಲೆ ಪಾವ್ಟಿ ಬಸ್ಸಾರ್ ಧಾಂವ್ಲ್ಲೊಯ್ ವೆಗಿಂ ಶಿರ್ಕೊನ್ ಪಡ್ಲ್ಲೊಯ್. ಧಾಂವ್. .. .. .. ರಯ್ಲಾರ್ ಧಾಂವ್ ತೆಂಯೀ ಹೆ ಪಾವ್ಟಿ ಎಕ್ಸ್ಪ್ರೆಸ್ಸ್ ರಯ್ಲಾರ್ ಧಾಂವ್.
****************
ಆಕೇರ್ಚಾ ರಾವ್ಣೆರ್ ತೊ ದೆಂವ್ಲೊ ರಯ್ಲ್ ವೆ ಸ್ಟೇಶನಾಕ್ ವಾಟ್ ವಿಚಾರಿತ್, ಚಲೊನ್ ಗೆಲೊ. ಹೊ ಹೆಣೆಂ ವಚ್, ಓ ತೆಣೆಂ ವಚ್, ಮ್ಹಳ್ಳೆಂ ಕಳಾನಾಸ್ತಾನಾ ಪಾಂಚ್ ಮಿನುಟಾಂಚಿ ವಾಟ್ ವೀಸ್ ಮಿನುಟಾಂನಿ ಚಲೊನ್ ರಯ್ಲ್ವೆ ಸ್ಟೇಶನಾಕ್ ಪಾವ್ಲೊ. ಸ್ಟೇಶನ್ ಖಾಲಿ. .. .. .. ಖಾಲಿ. .. .. .. ಏಕ್ ನಾ ಏಕ್ ರಯ್ಲ್ ಯೆತೆಲೆಂ ಯೆಜಾಯ್ಚ್ ನ್ಹಯ್ವೆ? ತೊ ವೇಟಿಂಗ್ ರುಮಾಂತ್ ಬಸ್ಲೊ. ಬಸ್ಲ್ಲೆಕಡೆನ್ ನಿದೊನ್ ಪಡ್ಲೊ. ತಾಕಾ ಜಾಗ್ ಜಾತಾನಾ ರಾತ್ ಜಾಲ್ಲಿ. ಸ್ಟೇಶನಾಂತ್ ಲೋಕ್. ಗುಜ್ಗುಜೊ ಆವಾಜ್. ತೊ ಭಾಯ್ರ್ ಆಯ್ಲೊ, ವ್ಹಯ್, ರಯ್ಲ್ ಆಯಿಲ್ಲೆಂ.
ತೊ ರಯ್ಲಾರ್ ಚಡ್ಲೊ. ರಯ್ಲ್ ಸುಟ್ತಾ ವರೇಗ್ ತಾಚೊ ಜೀವ್ ತಾಚೆಕಡೆನ್ ನಾಸ್ಲ್ಲೊ. ಥೊಡ್ಯಾ ವೆಳಾನ್ ರಯ್ಲ್ ಸುಟ್ಲೆಂ. ರೊನಿನ್ ಸುಶೆಗಾಯೆಚೊ ಸ್ವಾಸ್ ಸೊಡ್ಲೊ. ಸವ್ಕಾಸಾಯೆನ್ ಸುರು ಜಾಲ್ಲೆಂ ರಯ್ಲ್ ಥೊಡ್ಯಾಚ್ ವೆಳಾನ್ ವೇಗ್ ಆರಾವ್ನ್ ಧಾಂವಾಲಾಗ್ಲೆಂ. ತೊ ಬಸ್ಲ್ಲೆಕಡೆ ಧಲಾಲಾಗ್ಲೊ. ರಯ್ಲಾಚಾ ಆವಾಜಾಕ್ ಸರಿ ಜಾವ್ನ್ ತೊ ತಾಕಾಚ್ ಸಾಂಗಾಲಾಗ್ಲೊ, “ಧಾಂವ್. .. .. .. ಧಾಂವ್... .. .. ಧಾಂವ್. .. .. .. ಧಾಂವ್. .. .. .. ಧಾಂವ್......... ಧಾಂವ್. .. .. .."
ಇಸ್ಕೊಲಾಚಾ ನಿತಿ ನೇಮಾಂಕ್ ಆನಿ ಘರ್ಚಾಂಚಾ ಒತ್ತಡಾಂಕ್ ಬಲಿ ಜಾವ್ನ್ ಆಪ್ಲ್ಯಾ ಸ್ವಂತಿಕಾಯೆಚೆಂ ಆನಿ ಬುದ್ವಂತ್ಕಾಯೆಚೆಂ ಮೊಲ್ ಕಳಾನಾಸ್ತಾನಾ ಮಾನಸಿಕ್ ಥರಾನ್ ಕಷ್ಟೊನ್ ಕರ್ಗೊನ್ ವೆಚಾ ರೊನಿ ತಸಲ್ಯಾ ಭುರ್ಗ್ಯಾಂಕ್ ಹಿ ಕಾಣಿ ಸಮರ್ಪಣ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
