ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತ್ಯಾ ಯುರೋಪಾಂತ್ ತುಜಿ ಶಿಕವ್ಣ್ ಶೆಳೆಲ್ಯಾ. ಥಂಯ್ ಮಣಿಯಾರಿ ನಾಂತ್. ತಾಂಕಾಂ ಭಾರತಾ ಥಾವ್ನ್ ಧಾಡ್ತಾತ್. ಥಂಯ್ ದಿಸಾಚೆಂ ಸೊಡ್, ಆಯ್ತಾರಾಚ್ಯಾ ಬಲಿದಾನಾಕ್ ಪನ್ನಾಸಾ ವಯ್ರ್ ಲೋಕ್ ನಾಂತ್. ರೊಮಾಂತ್ ಹಾಂವೆಂ ಖುದ್ದ್ ಪಳೆಲಾಂ. ತುಕಾ ಕಳಿತ್ ಆಸಾ, ಆಮ್ಚ್ಯಾ ಭಾರತಾಂತ್ ತುಜ್ಯಾ ಮಣಿಯಾರ್ಯಾಂಕ್ ಏಕ್ಚ್ಚ್ ಕಾಮ್ - ದೆವಾಳಾಂ ಭಾಂದ್ಚಿಂ - ಕಿತ್ಯಾಕ್ ತುಜೊ ಲೋಕ್ ಚಡ್ಲಾ - ಯುರೋಪಾಂತ್ ಆಧ್ಲಿಂ ದೆವಾಳಾಂ ಆಸಾತ್, ಥಂಯ್ ಲೋಕ್ ನಾಂತ್ ತುಕಾ ಉಲ್ಲಾಸುಂಕ್.
ಸತಾಂತ್ಲಿಂ ವಿಚಿತ್ರಾಂ - 15. ಸಾಂತ್ ನಾಂತ್?!
ಜೆಮ್ಮಾ ಪಡೀಲ್
ತುಂವೆಂ ಸಂಸಾರ್ ರಚ್ಲೊಯ್ ಸೊಮಿಯಾಂ. ತುಂವೆಂ ಸುರ್ವೆರ್ ಏಕ್ ಸಂಸಾರ್ ರಚ್ಲೊಯ್. ವಿಗ್ಯಾನ್ ಆಮ್ಕಾಂ ಸಾಂಗ್ತಾ ಜೆದ್ನಾಂ ಮೊಳ್ಬಾ ಥಾವ್ನ್ ಪ್ರಕಾಸ್ ಹೊಗ್ಡಾಯಿಲ್ಲ್ಯಾ ನೆಕೆತ್ರಾಂಚೊ ಭಾಗ್ ಹ್ಯಾ ತುಜ್ಯಾ ಸಂಸರಾಂತ್ ಪಡ್ಲ್ಲ್ಯಾ ವೆಳಾರ್, ಹೊ ಸಂಸಾರ್ ವಿಭಾಗ್ ಜಾಲೊ. ದರ್ಯೊ ವಿಂಗಡ್ ಜಾಲೊ. ಹಿಮಾಲಯ್ ಪರ್ವತ್ ಉದೆಲೆಂ. ಏಕ್ ಸಂಸಾರ್ ಆಸ್ಲ್ಲೊ ತೊ ಪಾಂಚ್ ಖಂಡ್ ತಯಾರ್ ಜಾಲೆ. ಹೆಂ ಸತ್ ನ್ಹಂಯ್ಗೀ ಸೊಮಿಯಾಂ?
ಆಸ್ಸಿಯಾ, ಆಫ್ರಿಕಾ, ಆಸ್ಟ್ರೇಲಿಯಾ, ಯುರೋಪ್ ಆನಿ ಅಮೇರಿಕಾ ಎಕೇಕ್ ಖಂಡ್ ಜಾಲ್ಲೆ ತುಕಾ ಕಳಿತ್ ಆಸಾತ್ ತರೀ ತುಕಾ ಕಳಿತ್ ಕರ್ಯಾಂ ಮ್ಹಳ್ಳಿ ತಾಳ್ಣಿ ಯೆತಾನಾ ಹಾಂವ್ ಬರಯ್ತಾಂ.
ಆಸ್ಸಿಯಾ ಖಂಡಾಂತ್ ಆಸಾ ಮ್ಹಜೆಂ ಭಾರತ್ - ಮಹಾ ಭಾರತ್. ಕಿತ್ಲ್ಯೊ ಭಾಸೊ? ಕಿತ್ಲೊ ಲೋಕ್? ಕಿತ್ಲ್ಯೊ ಜಾತಿ? ಸರ್ವ್ ಕಾಳೆತಿಚಾ ಲೊಕಾಕ್ ತುಂವೆಂ ತ್ಯಾ ಭಾರತಾಂತ್ ಭರ್ತಿ ಕೆಲಾಂಯ್. ಕಿತೆಂ ತಾಚಿ ಮಹತ್ವತಾ?! 17 ವ್ಯಾ ಶೆಕ್ಡ್ಯಾ ಪರ್ಯಾಂತ್ ಭಾರತ್ ಸಗ್ಳ್ಯಾ ಸಂಸರಾಂತ್ ಗ್ರೇಸ್ತ್ ದೇಸ್ ಜಾವ್ನಾಸ್ಲ್ಲೊ ತೆಂ ತುಕಾ ಕಳಿತ್ ಕರ್ಚಿ ಗರ್ಜ್ ನಾ. ಪುಣ್, ಖುದ್ದ್ ಭಾರತೀಯಾಂಕ್ ಹೆಂ ಕಳಿತ್ ನಾ. ಭಾಂಗಾರ್, ಖನಿಜಾಂ, ಮಿರಿಂ ಆನಿ ಹೆರ್ ಗರ್ಜೆಚ್ಯೊ ವಸ್ತು ತುಂವೆಂ ಹ್ಯಾ ಭರತಾಂತ್ ದಿಲಾಂಯ್. ಎಕಾ ತೆಂಪಾರ್ ಭಿಕ್ ಮಾಗೊಂಕ್ ಆಯಿಲ್ಲೆ ಗೊರೆ ಉಪ್ರಾಂತ್ ಭಾರತೀಯಾಂಕ್ ಭಿಕ್ ದೀಂವ್ಕ್ ಸುರು ಕೆಲ್ಲಿ ಕಥಾ - ನೀಜ್ ಕಥಾ ಚರಿತ್ರಾ ಜಾಣಾ. ಸಂಸಾರಾಂತ್ಲೆ ಮೊಲಾಧಿಕ್ ವಜ್ರ್ ಭಾರತಾಂಚೆಂ. ಸಂಸಾರಾಂತ್ ಎಕಾ ತೆಂಪಾರ್ ಹೈದರಾಬಾದಾಚೊ ನಿಜಾಮ್ ಗ್ರೇಸ್ತ್ ಮನಿಸ್ ಜಾವ್ನಾಸ್ಲ್ಲೊ. ಆರ್ಯಭಟ ತಸಲೆ ಮಹಾನ್ ಲೇಖ್ಗಾರ್ ಭಾರತಾಂತ್ಚ್ ಜಿಯೆಲ್ಲೆ. ಶೂನ್ಯ್ (೦) ಸೊಧುನ್ ಕಾಡ್ಲೆಂ ಭಾರತಾ ಥಾವ್ನ್.
ಹೆಂ ಸರ್ವ್ ದೀವ್ನ್, ಸೊಮಿಯಾಂ ತುಂವೆಂ ಆಮ್ಕಾಂ ಏಕ್ ಮಾತ್ರ್ ದೀಂವ್ಕ್ ನಾಂಯ್. ಹ್ಯಾ ಮಹಾನ್ ಭಾರತಾಕ್ ಸರ್ವ್ ದೀವ್ನ್ ತುಂವೆಂ ಎಕಾ ವಿಷಯಾಂತ್ ಉಣೆಂಪಣ್ ಧಾಖಯ್ಲಾಂಯ್ - ತೆಂ ಜಾವ್ನಾಸಾ - ಏಕ್ ಸಾಂತ್ ಯಾ ಸಾಂತಿಣ್!!
ಕಿತೆಂ ಸೊಮಿಯಾಂ ಭಾರತೀಯಾಂಚೆಂ ಮಾಗ್ಣೆಂ ಮಾಗ್ಣೆಂ ನ್ಹಂಯ್ಗಿ? ತುಜೊ ಅಪೋಸ್ತೊಲ್ ಹ್ಯಾ ಭಾರತಾಂತ್ ದೆಂವೊನ್ ಆಯಿಲ್ಲೊ ತಾಕಾ ತುಂವೆಂ ಸಾಂತ್ ಕೆಲೊಯ್ ತರೀ, ತಾಚೆ ಥಾವ್ನ್ ಉದೆಲ್ಲ್ಯಾ ತುಜ್ಯಾ ಕ್ರೀಸ್ತಿ ಸಮುದಾಯೆಂತ್ ಎಕ್ಚ್ ಏಕ್ ಸಾಂತ್ ಜಾಂವ್ಕ್ ತುಂವೆಂ ಮನ್ ಕರುಂಕ್ ನಾಂಯ್? ಭಾರತೀಯಾಂಚೆಂ ಮಾಗ್ಣೆಂ - ಮಾಗ್ಣೆಂ ನ್ಹಂಯ್? ತೆ ತುಜ್ಯಾ ಮಾನಾಖಾತಿರ್, ಗಲಾಟೊ ಕರ್ನ್ ತಾಂಚ್ಯಾ ಪ್ರಾಂತೀಯ್ ಭಾಸೆನ್ ಮಾಗೊಂಕ್ ಆವಾಜ್ ಕರ್ಚೆಂ ತುಕಾ ದುಸ್ರ್ಯಾ ಸಂಸಾರಾಂತ್ ಮೆಳ್ತಾ? ದೊನ್ಶ್ಯಾಂ ವಯ್ರ್ ಭಾಸೊ ಆಸ್ಚ್ಯಾ ಭಾರತಾಂತ್ ತುಕಾ ಉಲ್ಲಾಸುಂಚ್ಯಾಬರಿ ಉರ್ಲ್ಲ್ಯಾ ಖಂಯ್ಚ್ಯಾಯ್ ಸಂಸಾರಾಂತ್ ಚಲ್ತಾ? ತಸೆಂ ಆಸ್ತಾನಾ ತುಂವೆಂ ಹ್ಯಾ ತುಜ್ಯಾ ಭಾರತಾಂಕ್ ಏಕ್ ಸಾಂತಾಕ್ ಯಾ ಸಾಂತಿಣೆಕ್ ಕಿತ್ಯಾಕ್ ಫಾವೊ ಕರುಂಕ್ ನಾಂಯ್?
ಆಮ್ಚ್ಯಾ ಭಾರತಾಂತ್ ಮಾಗ್ಣೆಂ, ರೆತಿರ್ಯೊ ಆನಿ ಜಮಾತ್ಯೊ ಮ್ಹಣೊನ್ ಆಪ್ಲೆಂ ಘರ್, ಅಪ್ಲೆಂ ಕರ್ತವ್ಯ್, ಸಂಸಾರಿಕ್ ಜವಾಭ್ದಾರಿ, ಮನೋಭಾವ್ ಸರ್ವ್ ವಿಸ್ರೊನ್ ತುಕಾ ಉಲ್ಲಾಸುಂಚ್ಯಾ ಹ್ಯಾ ತುಜ್ಯಾ ಭಾರತಾಂತ್ ತುಂವೆಂ ಎಕಾ ಸಾಂತಾಕ್ ಫಾವೊ ಕರುಂಕ್ ನಾ ಮ್ಹಣ್ತಾನಾ ತುಂವೆಂ ಕಾಂಯ್ ಆಮ್ಕಾಂ ಉಣೆಂಪಣ್ ಧಾಖಯ್ಲಾಂಯ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ತುಜ್ಯೆ ವಿಶಿಷ್ಟ್ ಸಾಂದೆ, ಸದಾಂನೀತ್ "ದೆವಾಕ್ ಜಾಂವ್ ಅರ್ಗಾಂ" ಮ್ಹಳ್ಳೆಂ ಉತಾರ್ ತಾಂಚ್ಯಾ ಜಿಬೆರ್ ಆಸ್ತಾ ತ್ಯಾ ಲೊಕಾಂನಿ ಪ್ರಚಾರ್ ಕೆಲ್ಲೆ ತೆ ಉಪಾದೇಸ್, ಶಿಕವ್ಣ್ ಆನಿ ನಿಮಾಣೆಂ ತಾಣಿಂ ಕರ್ಚಿಂ "ಅಚರ್ಯಿಂ" ತುಕಾ ಕಲಿತ್ ನಾ? ತಾಣಿಂ ಬೋಬ್ ಘಾಲ್ನ್ ಉಚಾರ್ಚೆಂ "ಅಚರ್ಯೆಂ" ಕಿತೆಂ ಜಾಲೆಂ?
ತುಂ ನಿದೆರ್ ಆಸಾಯ್ ಸೊಮಿಯಾಂ. ಆಮ್ಚ್ಯಾ ಕುಶಿಚ್ಯಾ ಆಫ್ರಿಕಾಕ್ ಸಾಂತ್ ದಿಲೊಯ್ - ಪುಣ್, ಮ್ಹಜ್ಯಾ ಭಾರತಾಕ್ ತುಂವೆಂ "ಹ್ಯಾ" ಸಂಗ್ತಿಂತ್ ಅತೃಪ್ತ್ ಕೆಲಾಂಯ್ ಹೆಂ ಹಾಂವ್ ಸಾಂಗ್ತಾಂ. ತುಜೆಲಾಗಿಂ ಕಾಂಯ್ ಹ್ಯಾ ಸವಾಲಾಕ್ ಜವಾಬ್ ಆಸಾ?
ತ್ಯಾ ಯುರೋಪಾಂತ್ ತುಜಿ ಶಿಕವ್ಣ್ ಶೆಳೆಲ್ಯಾ. ಥಂಯ್ ಮಣಿಯಾರಿ ನಾಂತ್. ತಾಂಕಾಂ ಭಾರತಾ ಥಾವ್ನ್ ಧಾಡ್ತಾತ್. ಥಂಯ್ ದಿಸಾಚೆಂ ಸೊಡ್, ಆಯ್ತಾರಾಚ್ಯಾ ಬಲಿದಾನಾಕ್ ಪನ್ನಾಸಾ ವಯ್ರ್ ಲೋಕ್ ನಾಂತ್. ಪ್ರವಾಸಿ ಜಾವ್ನ್ ಯುರೋಪ್ ಪಳೆಂವ್ಕ್ ಗೆಲ್ಲ್ಯಾ ಹಾಂವೆಂ ರೊಮಾಂತ್ ಖುದ್ದ್ ಪಳೆಲಾಂ. ತುಕಾ ಕಳಿತ್ ಆಸಾ, ಆಮ್ಚ್ಯಾ ಭಾರತಾಂತ್ ತುಜ್ಯಾ ಮಣಿಯಾರ್ಯಾಂಕ್ ಏಕ್ಚ್ಚ್ ಕಾಮ್ - ದೆವಾಳಾಂ ಭಾಂದ್ಚಿಂ - ಕಿತ್ಯಾಕ್ ತುಜೊ ಲೋಕ್ ಚಡ್ಲಾ - ಯುರೋಪಾಂತ್ ಆಧ್ಲಿಂ ದೆವಾಳಾಂ ಆಸಾತ್, ಥಂಯ್ ಲೋಕ್ ನಾಂತ್ ತುಕಾ ಉಲ್ಲಾಸುಂಕ್.
ಜೆಂ ಹಾಂವೆಂ ಹಾಂಗಾ ಬರಯ್ಲ್ಯಾಂತ್ ಕಸಲೀಯ್ ಚುಕ್ ಆಸ್ಲ್ಯಾರ್ ತುಂ ಕಳಿತ್ ಕರ್. ತುಜೆ ವಿಶಿಷ್ಟ್ ಸಾಂದೆ ಸಂತೊಸಾನ್ ಸಾಂಗ್ಚೆಪರಿಂ ಮ್ಹಾಕಾ ಏಕ್ ತಂತಿ ಧಾಡ್ (Message). ಹಾಂವೆ ಖಂಯ್ ಗಡ್ಬಡ್ ಕೆಲ್ಯಾ ತೆಂ ತ್ಯಾ ತಂತಿಂತ್ ಕಳಯ್. ಹಾಚಿ ಗರ್ಜ್ ಆಸಾ. ಆಯ್ಚಾ ಸಂಸಾರಾಂತ್ ಸರ್ವ್ ರುಜ್ವಾತೆಂತ್ ಮಿಸ್ಳೊನ್ ಆಸಾ.
ಚರಿತ್ರಾ ಆಸ್ಲ್ಲಿ ಬದ್ಲುಂಕ್ ಜಾಯ್ನಾ. ಪುಣ್, ತುಂವೆಂ ಮುಖ್ಲಿ ಚರಿತ್ರಾ ಬದ್ಲಿಯೆತ್. ಹ್ಯಾ ಮುಖಾರ್ ಸರ್ವ್ ಸಾಂತ್, ಸಾಂತಿಣ್ಯೊ ಭಾರತಾ ಥಾವ್ನ್ ಜಾಂವ್ದಿತ್. ತುಜ್ಯಾ ವಿಶಿಷ್ಟ್ ಸಾಂದ್ಯಾಂನಿ ಆವಾಜ್ ಕರ್ಚ್ಯಾ "ಅಚರ್ಯೆಂ" ಸಾಂತಿಪಣಾಕ್ ವಾಟ್ ಕರಯ್. ನಾಂ ತರ್ ಕೊಣ್ ಜಾಣಾಂ? ಆತಾಂಚೆಂ ಯುರೋಪ್ ಭಾರತಾಚೆರ್ ದೆಂವೊಂಕ್ ಸಾಧ್ಯ್ ಆಸಾ. ತಸೆಂ ಜಾಂವ್ಚೆಂ ನಾಕಾ ಸೊಮಿಯಾಂ. ಎಕಾ ದೊಗಾಂಕ್ ಸಾಂತ್ ಕರ್. ಉಪ್ರಾಂತ್ ಭಾರತ್ ಪಳೆ. ಪಾಪ್ ಸಾಯ್ಭ್ ಭಾರತೀಯ್ ಜಾಂವ್ಕ್ ಆಸಾ.
ತುಜ್ಯಾ ಹಾತಾಂತ್ ಆಸಾ, ತುಜ್ಯಾ ಹಾತಾಚಿ ಮೂಟ್ ಸೊಡಯ್.. ಉಪ್ರಾಂತ್ಲೆಂ ಅಜ್ಯಾಪ್ ಪಳೆ ಧನಿಯಾಂ.
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12, 13, 14
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
