ಕವಿತಾकविताPoem
ನ್ಹಯ್!
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 3
ಸೂತ್ರ್ 3: ಹಾಂವ್ ಕವಿ ನ್ಹಯ್!
ಎಡ್ಡಿ ಸಿಕೇರ್, ಖತಾರ್
ಸಂಸಾರಾಂತ್ ಎಕಾ ಕವಿಚಿ ಜವಾಭ್ದಾರಿ ಕಸಲಿ?
ರವಿನ್ ದೆಖಾನಾತ್ಲ್ಲೆಂ ಜರ್ ಕವಿ ದೆಖೊಂಕ್ ಸಕ್ತಾ ಮ್ಹಣ್ ಜಾಣಾರಿ ಸಾಂಗ್ತಾತ್ - ತರ್ ಕವಿಚಿ ಮೂಳ್ ಜವಾಬ್ಧಾರಿ ದೆಖ್ಚಿ ಮ್ಹಣ್ ಜಾಲೆಂ. ಆಯ್ಚಾ ಸಂಸಾರಾಂತ್ ಜಿಯೆಂವ್ನ್ ಆಸ್ಚೊ ಮನಿಸ್ ಕಿತೆಂ ಸರ್ವ್ ದೆಖೊಂಕ್ ಸಕ್ತಾ? ಆಯ್ಚಿ ರಾಜಕೀಯ್ ಪರಿಗತ್ ಪಳೆಯಾ, ಆಯ್ಚಿ ಸಾಮಾಜಿಕ್ ಪರಿಗತ್ ಪಳೆಯಾ, ಆಯ್ಚಿ ಧಾರ್ಮಿಕ್ ಪರಿಗತ್ ಪಳೆಯಾ - ಹ್ಯಾ ಪರಿಗತೆಂತ್ ದಿಸಾನ್ ದೀಸ್ ಮನಿಸ್ ಲ್ಹಾನ್ ಲ್ಹಾನ್ ಜಾವ್ನ್ ಯೆತಾ ಆನಿ ಲ್ಹಾನ್ ಲ್ಹಾನ್ ಚಿಂತಾಪ್ ಚಿಂತುಂಕ್ ಲಾಗ್ತಾನಾ ಎಕಾ ಕವಿನ್ ಹ್ಯಾ ಚಿಂತ್ಪಾಚೆರ್ ಕಶೆಂ ಅಪ್ಲಿ ನದರ್ ಘಾಲ್ಚಿ? ಗಂಭೀರ್
ಸವಾಲ್ ನ್ಹಯ್ಗಿ?
ಕವಿತಾ ಕಾಳ್ಜಾಚೆ ಉಮಾಳೆ ತರ್ - ಕವಿಕ್ ಪ್ರೇರಣ್ ದಿಂವ್ಚೆಂ ಜಾವ್ನಾಸಾ ಕಾಳಿಜ್. ಆನಿ ಹ್ಯಾ ಸಂಸಾರಾಂತ್ ಜಿಯೆತೆಲೆ ಸಗ್ಳೆ ಎಕಾಮೆಕಾಚೆರ್ ರಾಗ್-ಕ್ರೋಧಾನ್ ಭರ್ಲಾ ತರ್ ಬರೆಂ ಚಿಂತಾಪ್ ಯೆಂವ್ಚೆಂ ಖಂಯ್ ಥಾವ್ನ್?
ದೆವಾನ್ ಬುಡ್ತ್ಗೋಳ್ ಧಾಡ್ಚ್ಯಾಧಿಂ ಶೆಂಭೊರ್ ಬರೆ ಮನಿಸ್ ಸೊಧುನ್ ದೀಂವ್ಕ್ ಪ್ರವಾದಿಲಾಗಿಂ ವಿಚಾರ್ಲೆಂ ತರ್ಯ್ ಪ್ರವಾದಿನ್ ತೆ ಶೆಂಭೊರ್ ಆಸ್ಚೆ ನೊವೊದಾಂಕ್, ನೊವೊದ್ ಆಯ್ಶ್ಯಾಂಕ್, ಆಯ್ಶಿಂ ಸತ್ತರಾಂಕ್, ಸತ್ತರ್ ಸಾಠಾಂಕ್, ಸಾಠ್ ಪನ್ನಾಸಾಂಕ್, ಪನ್ನಾಸ್ ಚಾಳಿಸಾಂಕ್, ಚಾಳಿಸ್ ತಿಸಾಂಕ್, ತೀಸ್ ವಿಸಾಂಕ್, ವೀಸ್ ಧಾಂಕ್ ದೆಂವಯ್ಲೆಂ ತರ್ಯೀ ಬರೆ ಮನಿಸ್ ತ್ಯಾ ಕಾಳಾರ್ಯೀ ಸೊಧುಂಕ್ ಪ್ರವಾದಿ ಸಕ್ಲೊನಾ. ಆಯ್ಚಿ ಪರಿಗತ್ ತ್ಯಾ ಕಾಳಾಥಾವ್ನ್ ಪುರ್ತಿ ವೆಗ್ಳಿ ಮ್ಹಣ್ ದಿಸಾನಾ - ದೀಸ್ಭರ್ ಘೊಳೊನ್ ಜೊಡ್ಲ್ಲ್ಯಾಂಕ್ ತೆಂ ಖಾಂವ್ಕ್ ಮೆಳ್ತಾ ಮ್ಹಳ್ಳಿ ನಖ್ಖಿ ನಾ. ಸಕಾಳಿಂಚೆಂ ಘರ್ ಸೊಡ್ನ್ ಗೆಲ್ಲಿಂ ರಾತಿಕ್ ಪಾಟಿಂ ಪರ್ತಾತಿತ್ ಮ್ಹಳ್ಳೊ ಭರ್ವಸೊ ನಾ. ಕೊಣ್ ಕಸೊ ಕೊಣಾಕ್ ಗ್ರಾಸಿತ್ ಮ್ಹಳ್ಳೆಂ ನೆಣಾಸ್ತಾಂ ಬಾವ್ಡೊ ಪಯ್ಲೊಚ್ ಕಂಗಾಲ್ ಆಸ್ಚೊ ಅನಿಕ್ಯ್ ಕಂಗಾಲ್ ಜಾಲಾ. ದೇವ್ ಧರ್ಮ್ ಸಯ್ತ್ ಮನ್ಶ್ಯಾಂಕ್ ಪರತ್ ಪರತ್ ಮೊಡ್ತಾನಾ ಹಾಂಕಾಂ ಎಕ್ಟಾಂವ್ಚಿಂ ಕಸಲಿಂಚ್ ಅಜ್ಯಾಪಾಂ ಹ್ಯಾ ಸಂಸಾರಾಂತ್ ಘಡಾನಾಂತ್.
ಹ್ಯಾ ಪರಿಗತೆಂತ್ ಏಕ್ ಕವಿ ಬರಂವ್ಕ್ ವಚಾತ್ ತರ್ಯ್ ಖಂಚೆ ವಿಶ್ಯಾಂತ್ ಬರಂವ್ಕ್ ಸಕಾತ್?
ಹಾಂವ್ ಕವಿ ನ್ಹಯ್! ಸೂತ್ರ್ ಹ್ಯಾ ಪಾವ್ಟಿಂ ಸಭಾರ್ ಕವಿಂಕ್ ಪ್ರೇರಣ್ ದೀಂವ್ಕ್ ಪಾವ್ಲಾಂ ಮ್ಹಣ್ಚ್ಯಾಕ್ ಹಾಂತ್ಲಿಂ ಎಕೇಕ್ ಕವಿತಾ ಆರ್ಸೊ ಧರ್ತಾತ್.
ಕವಿ ಬಾಬ್ ರೋಶನ್ ರೊಡ್ರಿಗಸ್ ಆಯ್ಲೆವಾರ್ ಕವಿ ಜಾವ್ನ್ ಉದೆಲ್ಲೊ ತರ್ಯೀ ಹ್ಯಾ ಸೂತ್ರಾಂಕ್ ವೆಗಿಂಚ್ ಸಮ್ಜೊಂಕ್ ಸಕ್ಲಾ ಮ್ಹಣ್ಚ್ಯಾಕ್ ತಾಚೆಂ ಕವಿತಾ ಸಾಕ್ಸ್ ದಿತಾ; ಸಮಾಜೆಂತ್
ಆರ್ಥಿಕ್ ರಿತಿನ್, ಸಾಮಾಜಿಕ್ ರಿತಿನ್, ರಾಜಕೀಯ್ ರಿತಿನ್ ಮಾತ್ರ್
ನ್ಹಯ್, ಆಂತರಿಕ್ ವಾ ಬಾಹೀರ್ಯ್ ರಿತಿನ್ ಕವಿ ಜಾಂವ್ಚಿಂ ಸರ್ವ್ ಖುಣಾಂ ಅಪ್ಣಾಲಾಗಿಂ ಆಸ್ಲ್ಯಾರ್ಯೀ ಅಪುಣ್ ಆಮ್ಚಾ ಗಾಂವ್ಚೊ ಕವಿಚ್
ನ್ಹಯ್ ಮ್ಹಳ್ಳೆಂ ಚಿಂತಾಪ್ ಕವಿತೆಂತ್ ದಿಸೊನ್ ಯೆತಾ. ಅನಿಕ್ಯೀ ಇಲ್ಲಿ ಮಿನತ್ ಕೆಲ್ಲಿ ತರ್ ಹೆಂ ಖರೆಂಚ್ ಏಕ್ ಅಪುರ್ಭಾಯೆಚೆಂ ಕವಿತಾ ಜಾತೆಂ ಕೊಣ್ಣಾ.
ಕವಿ ಬಾಬ್ ಫ್ರಾನ್ಸಿಸ್ ಫುಡ್ತಾದೊಕ್ ಸಮ್ಜಾಲ್ಲೆಂ ಸೂತ್ರ್ ಅಪುರ್ಭಾಯೆಚೆಂ -
ಅಪುಣ್ ಕವಿ ನ್ಹಯ್ ಜಾವ್ಯೆತ್ ಪುಣ್ ಕವಿನ್ ಕರ್ಚೆಂ ಹಾಂವೆ ಕರ್ಚ್ಯಾಕ್ ಕೊಣೆಂಚ್ ಆಡಾಂವ್ಕ್ ಅಸಾಧ್ಯ್ ಮ್ಹಳ್ಳೆಂ ಸವಾಲ್ ಘಾಲುನ್ ಕವಿ ಎಕೆಕ್ಚ್ ಜಾವ್ನ್ ಸಗ್ಳೆಂ ಕರುಂಕ್ ವೆಚೆಂ ಚಿಂತಾಪ್ ಕವಿತೆಂತ್ ದಿಸೊನ್ ಯೆತಾ.
ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾಚೆಂ ಕವಿತಾ ಏಕ್ ಲಿಸಾಂವ್ ಸಾಂಗೊನ್ ವೆತಾ - ಹ್ಯಾ ಸಂಸಾರಾಂತ್ ಹಾಂವ್ ಕವಿ ಮ್ಹಣೊಂದಿ ವಾ ಮ್ಹಣಾನಾ ಜಾಂವ್ದಿ - ಪುಣ್ ಅಪುಣ್ ಸುರ್ಯೊ ಜಾವ್ನ್ ಪ್ರಕಾಸ್ ಜರೂರ್ ಫಾಂಕಯ್ತೆಲಿಂ; ಜಿತ್ಲೆಂ ಬರ್ಯಾಂಚೆರ್ಗೀ ತಿತ್ಲೆಂಚ್ ಭೆರ್ಯಾಂಚೆರ್ ಮ್ಹಳ್ಳೆಂ ಲಿಸಾಂವ್ ದಿತಾ.
ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿ ಅಪ್ಲ್ಯಾ ಕವಿತೆಂತ್ ಕವಿನ್ ವಾಚ್ಪ್ಯಾಲಾಗಿಂ ಸಂವಾದ್ ಕರ್ಚೆಂ ದಿಸೊನ್ ಯೆತಾ - ಹಾಂತ್ಲೊ ಕವಿ ಅಪ್ಲ್ಯಾ ಶ್ಯಾಥಿಯೆವಿಶಿಂ ಸಾಂಗೊನ್ ಅಖ್ರೇಕ್ ವಾಚ್ಪ್ಯಾಲಾಗಿಂ ’ತುಂಚ್ ಸಾಂಗ್’ ಮ್ಹಳ್ಳೆಂ ಸವಾಲ್ ಕರ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ಸ್ಟ್ಯಾನಿ ಮೆಂಡೊನ್ಸಾ ಅಪ್ಲ್ಯಾ ಕವಿತೆಂತ್ ದೆವಾನ್ ರಚ್ಲ್ಲ್ಯಾ ಎಕೆಕಾ ರಚ್ನೆಚಿ ಸೊಭಾಯ್ ವರ್ಣಿತಾ ದೆಖುನ್ ಕವಿ ಜಾಂವ್ಚಿ ನದರ್ ಅಪ್ಣಾಕ್ ಆಸಾಗೀ ಮ್ಹಳ್ಳೆಂ ಸವಾಲ್ ಕರ್ಚೆಂ ದಿಸೊನ್ ಯೆತಾ. ದೆವಾಚಿ ಸಕತ್ ಸಮ್ಜೊಂಕ್ ಹ್ಯಾ ರಚ್ನೆಚಿ ಸೊಭಾಯ್ ಚಾಕೊನ್ ಚಾಕೊನ್ ಗಿನ್ಯಾನ್ ಜೊಡ್ತಾಂ ಮ್ಹಳ್ಳೆಂ ಕವಿ-ಮನ್ ಉಟೊನ್ ದಿಸ್ಚೆಂ ಹ್ಯಾ ಕವಿತೆಚಿ ಸೊಭಾಯ್.
ಕವಿ ಬಾಬ್ (ಮಾನಾಧಿಕ್ ಬಾಪ್) ಜೋರ್ಜ್ ಒಲಿವೆರಾಚ್ಯಾ ಕವಿತೆಂತ್ ಕವಿಕ್ ಹ್ಯಾ ಸಂಸಾರಾಂತ್ ಆಯ್ಕೊಂಕ್ ಮೆಳ್ಚಿಂ ಸರ್ವ್ ನಾಂವಾಂ ಆಸಾತ್ - ಪ್ರೇಮಿ, ಪಿಸೊ... ತರ್ಯೀ ಕವಿಚೊ ಮೋಗ್
ದೆವಾಚೆರ್.
ಕವಯತ್ರಿ ಬಾಯ್
ಪ್ರಿಯಾ ಸಿಕ್ವೇರಾಚ್ಯಾ ಕವಿತೆಂತ್ಲೊ ನಾಯಕ್,
ಕವಿತಾ ಸಮ್ಜೊಂಚಿ ಶ್ಯಾಥಿ ನಾಸ್ತಾಂ ಫಕತ್ತ್ ಖೊಡಿ
ಕಾಡ್ಚ್ಯಾ ಥೊಡ್ಯಾಂಕ್ ರಾಗಾಚೊ ದಾಗ್ ದಿಂವ್ಚೆಂ ದಿಸೊನ್
ಯೆತಾ.
ಕವಿ ಬಾಬ್ ಆಸ್ಟಿನ್ ಪ್ರಭುಚ್ಯಾ ಕವಿತೆಂತ್ ಕವಿ ಸಬ್ಧ್ ವಿಂಚುನ್ ಎಕೆಕಾ ಸಬ್ಧಾಂನಿ ಜೀವ್ ಭರ್ಚೆಂ ಪ್ರೇತನ್ ಕರ್ತಾಂ ಮ್ಹಳ್ಳೆಂ ಚಿಂತಾಪ್ ಉಟಂವ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ಆರ್ಯನ್ ತಾಕೊಡೆಚ್ಯಾ ಕವಿತೆಂತ್ಲೊ ಕವಿ ಅಪ್ಲೆಂ ಸ್ವಾಭಿಮಾನ್, ನೈತಿಕ್ ಜವಾಬ್ಧಾರಿ ಸಾಂಡುನ್ ಜಿಯೆವ್ನ್ ಆಸೊನ್ ಫಕತ್ತ್ ಗಿಚ್ಚುಂಚಾಂಕ್ ಕವಿ ಜಾಂವ್ಚಿ ಅರ್ಹತಾ ಭಿಲ್ಕುಲ್ ಆಸಾನಾಯೆ ಮ್ಹಳ್ಳೆಂ ಗುಂಡಾಯೆಚೆಂ ಚಿಂತಾಪ್ ದಿಂವ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ಲ್ಯಾನ್ಸಿ ಪಿಂಟೊ ನಾಯಕ್ ಹರ್ಶೆಂಚೆಪರಿಂ ಅಪ್ಲೆಂ ಕಡ್ವಳ್ ಉಗ್ತೆಂ ಕರ್ನ್ ಉಲಯ್ತಾ;
’ಕೊಣೆಂ ಮ್ಹಾಕಾ ವೊಲಾಯ್ಲಾಂ
ಕವಿ ಮ್ಹಣೊನ್!
ಮ್ಹಜೆಂ ಪಿಂದ್ಲ್ಲೆಂ ಕಾಳಿಜ್
ಶಿಂವೊಂಕ್ ಬರಯ್ಲಾಂ!’
ಜೆದ್ನಾಂ ಏಕ್ ಕವಿತಾ ಕಾಳ್ಜಾಂತ್ಲಿಂ ಭಾಸ್ ಉಲಯ್ತಾ - ತೆಂ ಕವಿತಾ ಖರೆಂಚ್ ಜಾವ್ನ್ ವಾಚ್ಪ್ಯಾಚ್ಯಾ ಕಾಳ್ಜಾಂತ್ ರಾಜ್ ಕರ್ತಾ ಮ್ಹಣ್ಚ್ಯಾಕ್ ಹೆಂ ಕವಿತಾ ಗೊವಾಯ್ ದಿತಾ.
ಕವಿ ಬಾಬ್ ಮೆಲ್ವಿನ್ ಜೆ. ವಾಸ್ ಹರ್ಶೆಂಚೆಪರಿಂ ಅಪ್ಲೆಂ ಸಂಕೀರ್ಣ್ ಕವಿತಾ ಉಭೆಂ ಕರ್ತಾ ತರ್ಯೀ ಹೆಂ ಕವಿತಾ ಅಪುರ್ಭಾಯೆಚಿ ಕಾಣಿಂಚ್ ಸಾಂಗೊನ್ ವೆತಾ;
’ಮ್ಹಜ್ಯಾ ಗಾಂವಾಂತ್ ಝುಜೊಂಕ್ ಕವಿ ನಾಂತ್
ದೆಕುನ್ ಕೊನ್ಶ್ಯಾ ಕೊನ್ಶ್ಯಾಂನಿ ತಿಂತೆರಾಂ ಝಳ್ತಾತ್
ರಾಯಾಂಚಾ ದರ್ಭಾರಾಕ್ ಪಾವೊಂಕ್
ಬೊಲ್ಸಾಂತ್ ಗುಳೆ ನಾಂತ್
ದೆಕುನ್ ಝಳ್ಚ್ಯಾ ತಿಂತೆರಾಂಕ್ ವ್ಹಾರೆಂ ಫುಂಕ್ತಾಂ
ಕಿತ್ಯಾಕ್, ಹಾಂವ್ ಕವಿ ನ್ಹಯ್!’
ಕವಿ ಬಾಬ್ ವಲ್ಲಿ ಕ್ವಾಡ್ರಸ್ ಹರ್ಶೆಂಚೆಪರಿಂ ವಿಚಾರಾಚೆಂ ತುಪೆಂ ಘೆವ್ನ್ ರಿಗ್ಲಾ ಆನಿ ಕಿತ್ಯಾಕ್ ಅಪುಣ್ ಕವಿ ನ್ಹಯ್ ಮ್ಹಣ್ತಾ ಪಳೆಯಾ;
’ಹಾಂವ್ ಕವಿ ಜಾಲ್ಲೊಂ ತರ್
ಮನಿಸ್ ಮನ್ಶಾಕ್ ಸೊಲ್ತೊನಾ
ಕಾವ್ಳೊ ಕೊಗುಳ್ ಜಾತೊನಾ
ಕೊಲೊ ರಾಜ್ವಟ್ಕಿ ಚಲಯ್ತೊನಾ
ಹಾಂವ್ ಬರಯ್ನಾಂಯ್ ರಾವ್ತೊಂ ನಾ
ತುಮಿಂ ಕಿತೆಂಯ್ ಮ್ಹಣಾ
ಹಾಂವ್ ಕವಿ ನ್ಹಯ್ಚ್ ನ್ಹಯ್’
ಮ್ಹಳ್ಯಾರ್ ಸತ್ ಸಾಂಗೊಂಕ್ ಹ್ಯಾ ಸಂಸಾರಾಂತ್ ಭಿಂಯೆವ್ನ್, ಕಾವ್ಜೆವ್ನ್, ದಾಕ್ಶೆವ್ನ್ ಜಿಯೆಜಾಯ್ ತರ್ - ಅಸಲ್ಯಾ ಭಿಂಯಾನ್, ದಾಕ್ಶೆಣೆನ್ ಖರೊ ಕವಿ ಜಾಂವ್ಚೆಂ ತರ್ಯೀ ಕಶೆಂ ಸಾಧ್ಯ್ ಮ್ಹಳ್ಳೆಂ ಚಿಂತಾಪ್ ಉಟಂವ್ಚೆಂ ದಿಸೊನ್ ಯೆತಾ.
ಕವಿ ಬಾಬ್ ಮೆಲ್ವಿನ್ ಪಿಂಟೊಕ್ ಮಹಾತ್ಮಾ ಗಾಂಧಿ ’ಬಂಡಾಯ್ ಕವಿ’, ಮದರ್ ತೆರೆಜಾ ’ನವೋದಯ ಕವಯತ್ರಿ’, ಸೊಮಿ ಜೆಜು ’ದಲಿತ್ ಕವಿ’ ಜಾಲ್ಲಿಂ ದಿಸ್ತಾ ತರ್ಯೀ ಕವಿತೆಂತ್ಲೊ ಕವಿ ಫಕತ್ತ್ ಮಾನ್-ಸಮ್ಮಾನಾಚೆ ಆಂಯ್ಡೆ ಘೊಟುನ್, ಫುಲಾಂ-ಫಳಾಂಚಾ ಪಾಟಿಕ್ ಲಾಗೊನ್, ’ಆಧುನಿಕ್ ಕವಿ’ ಜಾಂವ್ಚೆಂ ದಿಸೊನ್
ಯೆತಾ.
ಕವಿ ಬಾಬ್ ಮಾರಿಯಾನೊ ಲೂಕಸ್ ದಿನಿಜ್ ಹಾಂವ್ ಕವಿ ನ್ಹಯ್ ಮ್ಹಣ್ ಸುಟಾವೆಂ ಸಾಂಗಾನಾ ತರ್ಯೀ ಅಪ್ಲ್ಯಾ ಕವಿತೆಂತ್ ’ಜಾಂವ್ಚೆಂ ಜಾಂವ್ದಿ ಪುಣ್ ಹಾಂವ್ ಉಭೊಂ ಆಸಾಂ’ ಮ್ಹಣ್ಜೆ ಫುಡ್ ಕರ್ತಾಂ ಮ್ಹಳ್ಳೆಂ ಧಯ್ರಾಧಿಕ್ ಚಿಂತಾಪ್ ಉಟಯ್ತಾ.
ಕವಿ ಮ್ಹಳ್ಳಿ ಏಕ್ ಜವಾಭ್ದಾರಿ, ಕವಿ ಉಲಯ್ನಾ ಬಗಾರ್ ಕರ್ತಾ, ಕವಿ ಸಾಂಗಾನಾ ಬಗಾರ್ ಜಿಯೆತಾ. ಕವಿ ಬಾಬ್ ಕಾವ್ಯಾದಾಸ್ ಅಪ್ಣಾಕ್ ಕವಿ ಮ್ಹಣ್ ವೊಲಾಯ್ತೆಲ್ಯಾಂಚೆರ್ ಶಿಣ್ ಉಚಾರ್ತಾ - ಹ್ಯಾ ಸಂಸಾರಾಂತ್ ನಾಂವಾಖಾತಿರ್ ದೋನ್-ತೀನ್ ಪಂಗ್ತೆಂನಿ ಬರವ್ನ್, ಉಪ್ರಾಂತ್ ಮಾನ್-ಸನ್ಮಾನಾಚಾ ಪಾಟಿಕ್ ಲಾಗೊನ್ ಅಪ್ಣಾಕ್ಚ್ ಅಪುಣ್ ಮಹಾನ್ ಕವಿ ಮ್ಹಣ್ ಚಿಂತ್ತೆಲ್ಯಾಂ ಮಧೆಂ ಅಪ್ಣಾಕ್ ಕವಿ ಮ್ಹಣ್ಚೆಂಚ್ ನಾಕಾ ಮ್ಹಣ್ಚೆಂ ಚಿಂತಾಪ್ ಅಪುರ್ಭಾಯೆನ್ ಉಟಯ್ತಾ.
ಹ್ಯೇ ಪಾವ್ಟಿಂ ಕವಯತ್ರಿಂಯಾ ಸಯ್ತ್ ಭಳಿಷ್ಟ್ ಕವಿತಾ ಘೆವ್ನ್ ಆಯ್ಲ್ಯಾಂತ್, ಎಕಾಪ್ರಾಸ್ ಏಕ್ ಉತ್ತೀಮ್ ರಿತಿಚಿಂ ಕವಿತಾ;
ಬಾಯ್ ಗ್ಲೇಡಿಸ್ ರೇಗೊಚ್ಯಾ ಸ್ತ್ರೀ ಸಂವೇದನಾಚ್ಯಾ ಚಿಂತ್ಪಾವಿಶಿಂ ಪಯ್ಲೆಂಚ್ ಹಾವೆಂ ಜಾಯ್ತೆಂ ಬರಯ್ಲಾಂ - ಹಾಂಗಾಸರ್ ಹಿಣೆಂ ತೆಂ ಸತ್ ಮ್ಹಳ್ಳೆಂ ರುಜು ಕೆಲಾಂ;
’ಉತ್ರಾಂ ಉತ್ರಾಂಚೆರ್
ತಿಂತೆರಾಚಿಂ ಖತಾಂ
ಪೊಂತಾಂನಿ ಬಾಂಗ್ರಾ ಥಿಕಾಂ
ಮೊತಿಯಾಂ ಜಾಲ್ಲಿಂ ಕಳ್ಳೆಂಚ್ ನಾ’
ಮ್ಹಳ್ಯಾರ್ ಕವಿತೆಂತ್ಲಿ ಕವಯತ್ರಿ ಅಪ್ಲ್ಯಾ ಸ್ವ-ಖುಶೆನ್ ಕವಯತ್ರಿ
ಜಾಲ್ಲಿ ನ್ಹಯ್, ಬಗಾರ್ ಜಿಣ್ಯೆನ್ ತಿಕಾ ಕವಿ ಜಾವ್ನ್ ಬದ್ಲಿಲ್ಲೆಂ ಮ್ಹಣ್ ಪಿಂತ್ರಾಯ್ತಾ.
ಕವಯತ್ರಿ ಬಾಯ್ ಅವಿನಾ ಮಿಯಾರ್ ಪ್ರಸ್ತುತ್ ಪರಿಗತೆಂತ್ ಸ್ತ್ರೀ ಸಂವೇದನಾಚೆರ್ ಸಾಹಿತ್ಯ್ ಬರಂವ್ಚಿ ಕವಯತ್ರಿ ಮ್ಹಣ್ಚ್ಯಾಕ್ ತಿಚೆಂ ಕವಿತಾಚ್ ಗೊವಾಯ್ ದಿತಾ;
’ಖಂಚ್ಯಾಕ್ ಕವಿತಾ ಮ್ಹಣುಂ
ಮಿಟಾ ದುಃಖಾಂನಿ ಫುಟ್ಚ್ಯಾ ದುದಾಕ್
ಉತ್ರಾಂ ವ್ಹಾಳೊನ್ ಫುಟ್ಚ್ಯಾ ಕಾಳ್ಜಾಕ್
ರಗತ್ ವ್ಹಾಳೊನ್ ಆಟಂವ್ಚ್ಯಾ ಕುಡಿಂಕ್
ನೀದ್ ಚಿಂವೊನ್ ತುಟ್ಚ್ಯಾ ಸ್ವಪ್ಣಾಂಕ್
ಸೊಭಾಯ್ ದಿವುನ್ ತೊಪ್ಚ್ಯಾ ಕಾಂಟ್ಯಾಕ್
ನಾ ಜಿಣ್ಯೆಂತ್ ಪಾಟ್ಲಾವ್ ಕರ್ಚ್ಯಾ ಮರ್ಣಾ ಸಾವ್ಳೆಕ್’
ಕಶಿ ಎಕೆಕಾ ವೊಳಿಂಚೆರ್ ಎಕೇಕ್ ಅಪೂರ್ಣ್ ಕಾಣಿ ಉಭಿ ಕರ್ತಾ ಪಳೆಯಾ, ಎಕಾ ಪಾಟ್ಲ್ಯಾನ್ ಏಕ್ ಇಮಾಜ್ ಉಭಿ ಕರ್ನ್ ಹ್ಯಾ ಕವಿತೆಕ್ ಸೊಭಯ್ತಾ..
ಕವಯತ್ರಿ ಬಾಯ್ ನಂದಿನಿ ಎಕಾ ಅದೃಶ್ಯ್ ಸಕ್ತೆಚೆರ್ ಸವಾಲ್ ಕರ್ಚೆಂ ದಿಸೊನ್ ಯೆತಾ. ತಿ ಸಕತ್ ಅದೃಶ್ಯ್ ಆಸಾ ದೆಖುನ್ ಚಡ್ ಸೊಭ್ತಾ.
’ಕಿತೆಂ ಆಸಾ ತುಜೆ ಥಂಯ್?
ಚಿಂತ್ಪಾಕ್ ಲಾಗಾನಾ
ಬರ್ಪಾಕ್ ಮೆಳಾನಾ
ರೂಪ್ ತುಕಾ ದಿಂವ್ಚಾಕ್
ಹಾಂವ್ ಕವಿ ನ್ಹಯ್’
ಆನಿ ಅಖ್ರೇಕ್ ಜೆದ್ನಾಂ ಉತ್ರಾಂಕ್, ಚಿಂತ್ನಾಂಕ್ ರೂಪ್ ದಿಂವ್ಚೊ ಕಲಾಕಾರ್ ಜರ್ ಕವಿ ಜಾಯ್ತ್ ತೆದ್ನಾಂ ಕಿತೆಂ ಜಾತೆಲೆಂ ಮ್ಹಣ್ಚ್ಯಾಕ್ ಅಪ್ರೂಪ್ ಕವಿ ಬಾಬ್ ಎಡ್ಡಿ ಸಿಕೇರ್ ಆಯ್ಲಾ ’ಕಿತ್ಯಾಕ್ ಮ್ಹಣ್ತಾಯ್ರೆ ಮ್ಹಾಕಾ ಕವಿ’ ಮ್ಹಳ್ಳೆ ಕವಿತೆಂತ್ ಹೊ ಹರ್ಶೆಂಚೆಪರಿಂ ಶೀದಾ ವಾಚ್ಪ್ಯಾಚಾ ಕಾಳ್ಜಾಂತ್ ರಿಗ್ತಾ. ಅಶೆಂ ರಿಗೊನ್ ಕಾಳ್ಜಾಂತ್ ರಾಜ್ ಕರ್ಚ್ಯಾ ತಾಕಾ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚುಂಕ್ ಕಸಲೆಚ್ ತ್ರಾಸ್ ನಾಂತ್. ಎಡ್ಡಿಯಾಬಾಕ್ ಉಲ್ಲಾಸ್!
ಉತ್ರಾಂತ್ ಸೂತ್ರಾಂ - 3: ಹಾಂವ್ ಕವಿ ನ್ಹಯ್!
[ವಾಂಟೆಲಿ ಜಾಲ್ಲಿಂ]
4. ಮೆಲ್ವಿನ್ ಜೆ. ವಾಸ್, ಕೆಲರಾಯ್.
6. ಲ್ಯಾನ್ಸಿ ಪಿಂಟೊ ನಾಯಕ್ ಕುಲ್ಶೇಕರ್/ಕುವೇಯ್ಟ್.
7. ಮಾರಿಯಾನೊ ಲೂಕಸ್ ದಿನಿಜ್, ಕುವೇಯ್ಟ್.
10. ಫ್ರಾನ್ಸಿಸ್ ಫುರ್ಟಾಡೊ ಕಲೀನಾ, ಮುಂಬಯ್.
12. ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್/ಚಿಕಾಗೊ.
14. ವಾಯ್ಲೆಟ್ ಪಿರೇರಾ, ಮಂಗ್ಳುರ್.
16. ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.
18. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್.
ಕಿತ್ಯಾಕ್ ಮ್ಹಣ್ತಾಯ್ರೆ ಮ್ಹಾಕಾ ಕವಿ? [ಮಯ್ನಾಚೆಂ ಕವಿತಾ]-
ಎಡ್ಡಿ ಸಿಕೇರ್, ಖತಾರ್
ಕಿತ್ಯಾಕ್
ಮ್ಹಣ್ತಾಯ್ರೆ
ಮಾಕಾ ಕವಿ?
ಕವಿ ಹಾಂವ್ ಆಸ್ತೊಂ ತರ್
ಕವಿ ಹಾಂವ್ ಆಸ್ತೊಂ ತರ್ ಹಾಂವ್ಯೀ
ದೊಳ್ಯಾಂಕ್ ದಿಸಾನಾ ತೆಂ
ಹಜಾರ್ ಉತ್ರಾಂನಿ ವಿಣುನ್
ಕವಿತೆಂಚಿ ಧಾರ್ ವೊತ್ತೊಂ
ಮತಿಂತ್ಲ್ಯಾ ಭಗ್ಣಾಂಕ್
ಉತ್ರಾಂ ಘೊಸಾಂಚೊ ಹಾರ್ ಗುಂತುನ್
ಮೊಗಾಚಿಂ ಗಾಣಾ ಗಾಯ್ತೊಂ
ಬದ್ಲಾಕ್.....
ಚಿಲಿ ಪಿಲಿ ಸುಕ್ಣ್ಯಾ ಗಾಯನಾಂ, ಫಾಂತ್ಯಾಫರಾರ್
ಮ್ಹಾಕಾ ಹಳೂ ಹಳೂ ಜಾಗಯ್ತಾನಾ
ಧೊವಾಚ್ಯಾ ಉಮ್ಯಾನಿಂ ಭಿಜ್ಲೆಲ್ಯಾ
ತರ್ನ್ಯಾ ಪಾಚ್ವ್ಯಾ ರುಕಾ ಪಾನಾಂ ಇಡ್ಯಾಂ ಥಾವ್ನ್
ಸುರ್ಯಾಚಿಂ ಶಿತಳ್ ಕಿರ್ಣಾಂ ಕುಕುಲಿಪಾ ಖೆಳ್ತಾನಾಂ
ತೊ ಭಾಂಗ್ರಾಳೊ ಸಾಕಾಳ್ ಭಗುಂಕ್
ಬಗ್ಲೆಕ್ ಕೊಣಿಂ ನಾತ್ಲೆಲ್ಯಾ ವೆಳಾ
ಹಾತಿಂ ಹಾತ್ ಧರುನ್ ದರ್ಯಾ ವೆಳೆರ್
ರೆಂವೆರ್ ಬಸ್ಲೆಲೆಂ ತರ್ನೆಂ ಜೊಡೆಂ
ಗೊದ್ದಿಂ ಗೊದ್ದಿಂ ಉತ್ರಾಂ ಉಲವ್ನ್
ಕುಲ್ಕುಲೊ ನೆಣ್ತೊ ಹಾಸೊ ಹಾಸೊನ್
ಉಸ್ಕ್ಯಾರ್ ತಾಂಚ್ಯಾ ಖೆಳ್ಚೆಂ ಬಾಳ್ ಮಾಣ್ಕುಲೆಂ
ಪಳೆವ್ನ್ ಮ್ಹಜ್ಯಾ ಕಾಳ್ಜಾಂತ್ ಪಾಲೆಲ್ಲಿ ಆಶಾ
ಸಾಗೊಂಕ್ ಕೊಣಿಂ ಮೆಳಾನಾತ್ಲೆಲ್ಯಾ ವೆಳಾ
ಅರ್ಥ್ ನಾತ್ಲೆಲ್ಯಾ ಉತ್ರಾಂನಿ
ಮೀತ್ ನಾತ್ಲೆಲ್ಯಾ ಸೊಭಾಯೆನ್
ತರ್ನ್ಯಾಂ ಕಾಳ್ಜಾಂತ್ ಮ್ಹಜ್ಯಾ
ಮೊಗ್ ಕಿರ್ಲಾಯ್ಲೆಲ್ಯಾ ತಿಕಾ
ತ್ಯಾ ದುಸ್ರ್ಯಾಚಾ ವೆಗೆಂತ್
ಪುಸ್ಪುಸ್ಚೆಂ ದೆಕ್ತಾನಾ ಹಾಯ್
ಮ್ಹಾಕಾ ಭಗ್ಲೆಲಿ ನಿರಾಶಾ
ಆಯ್ಕೊಂಚಿಂ ಕೊಣಿಂ ನಾತ್ಲೆಲ್ಯಾ ವೆಳಾ
ಹಾವೆಂ ತೆಂ ಸರ್ವ್ಯೀ
ಕಾಗ್ದಾಂ ಕುಡ್ಕ್ಯಾನಿಂ ಲಿಕ್ಲೆಂ ಜಿರಯ್ಲೆಂ
ನಾ, ನಾ, ಹಾಂವ್ ಕೆದಿಂಚ್ ಕವಿ ನಾತ್ಲ್ಲೊಂ
ಹಾಂವ್ ಮ್ಹನಿಸ್ ಎಕ್ಲೊಂ ಎಕ್ಸುರೊಂ
ಹಾಂವ್ ಕವಿ ನ್ಹಯ್ [- ಅವಿನಾ, ಮಿಯಾರ್]
ಖಂಚ್ಯಾಕ್ ಕವಿತಾ ಮ್ಹಣುಂ?
ಮೊಡಾಂ ಝಡ್ಲ್ಯಾರ್ ದಿಸ್ಚ್ಯಾ ನಿಳ್ಶ್ಯಾ ರಂಗಾಕ್
ಸುರ್ಯೊ ಬುಡೊನ್ ಉರ್ಚ್ಯಾ ಧಗಿಕ್
ಚಂದ್ರ್ ಲಿಪೊನ್ ಉರ್ಚ್ಯಾ ಚಾನ್ನ್ಯಾಕ್
ಉದಕ್ ಜಿರವ್ನ್ ಉರ್ಚ್ಯಾ ಶೆಳಿಕ್
ಕೋಯ್ರ್ ಜಾಡುನ್ ಉರ್ಚ್ಯಾ ಧುಳಿಕ್
ವಾ ದೊಳ್ಯಾಂಕ್ ದಿಸಾನಾತ್ಲ್ಯಾರೀ ಉರ್ಚ್ಯಾ ಅನ್ಭೋಗಾಂಕ್
ಖಂಚ್ಯಾಕ್ ಕವಿತಾ ಮ್ಹಣುಂ
ಮಿಟಾ ದುಃಖಾಂನಿ ಫುಟ್ಚ್ಯಾ ದುದಾಕ್
ಉತ್ರಾಂ ವ್ಹಾಳೊನ್ ಫುಟ್ಚ್ಯಾ ಕಾಳ್ಜಾಕ್
ರಗತ್ ವ್ಹಾಳೊನ್ ಆಟಂವ್ಚ್ಯಾ ಕುಡಿಂಕ್
ನೀದ್ ಚಿಂವೊನ್ ತುಟ್ಚ್ಯಾ ಸ್ವಪ್ಣಾಂಕ್
ಸೊಭಾಯ್ ದಿವುನ್ ತೊಪ್ಚ್ಯಾ ಕಾಂಟ್ಯಾಕ್
ನಾ ಜಿಣ್ಯೆಂತ್ ಪಾಟ್ಲಾವ್ ಕರ್ಚ್ಯಾ ಮರ್ಣಾ ಸಾವ್ಳೆಕ್
ಖಂಚ್ಯಾಕ್ ಕವಿತಾ ಮ್ಹಣುಂ
ದುಃಖಾಂ ಗಳವ್ನ್ ಪರ್ಜಳ್ಚ್ಯಾ ದೊಳ್ಯಾಂಕ್
ವೊಂಟ್ ಶಿಂದುನ್ ಉಸ್ಟ್ಯಾ ಹಾಸ್ಯಾಂಕ್
ಕರ್ಪಲ್ಲ್ಯಾ ಇಟ್ಯಾವಯ್ರ್ ಜಲ್ಮಾಲ್ಲ್ಯಾ ತಣಾಕ್
ಗಡಿ ಆಸ್ಲ್ಯಾರೀ ಮೆಳ್ಚ್ಯಾ ಕಾಳ್ಜಾಂಕ್
ಕಾಳಿಜ್ ನಾತ್ಲ್ಯಾರೀ ಉರ್ಚ್ಯಾ ಮೊಗಾಕ್
ಮಾತ್ಯೆಂತ್ ಪುರ್ಲ್ಯಾರೀ ಕಿರ್ಲೊಂಚ್ಯಾ ಬಿಯೆಕ್
ಕವಿತಾ ಸೊಧುನ್ ಕವಿ ಜಾಲೊಂ
ಪುಣ್ ಮ್ಹಜಿ ಕವಿತಾ ಖಂಯ್ ಪಾವ್ಲಿ
ಓ ಥಂಯ್ ರಸ್ತ್ಯಾ ಘುಂವ್ಡೆರ್, ಗುಜರಿ ಆಂಗ್ಡೆಂತ್
ಕುಸೊನ್ ಘಾಣ್ಚ್ಯಾ ಮುನ್ಸಿಪಾಲ್ಟಿ ಪರ್ಜಳಾಂತ್
ಶಿತಾ ಉಂಡಿ ಮಾಗ್ಚ್ಯಾ ಹಜಾರೊ ಹಾತಾಂ ಮಧೆಂ
ಕವಿತಾ ಮ್ಹಜಿ ನಪಂಯ್ಚ್ ಜಾಲಿ
ಹಾಂವ್ ಕವಿ ನ್ಹಯ್
ಆತಾಂ ಖಂಚ್ಯಾಕ್ ಹಾಂವ್ ಮ್ಹಜಿ ಕವಿತಾ ಮ್ಹಣುಂ
ಚ್ಯಾರ್ ಕವಿ [- ಮೆಲ್ವಿನ್ ಪಿಂಟೊ, ನೀರುಡೆ]
ಕುಡ್ಕ್ಯಾ ಆಂಗೊಟೆರ್ಚ್
ಬ್ರಿಟಿಷ್ ರಾಜಾಕ್ ಹಾಲವ್ನ್
ಅಹಿಂಸಾ, ಸತ್ಯಾಗ್ರಹ್ ಹಾತೆರಾಂ ವ್ಹಾಪಾರ್ನ್
ದೇಶಾಕ್ ಸುಟ್ಕಾ ಲಾಭವ್ನ್
ಗಾಂಧಿ ’ಬಂಡಾಯ್’ ಕವಿ ಜಾಲೊ
ಕಚ್ರ್ಯಾಂತುನ್ ಬಾಳ್ಕಾಂಕ್ ಆರಾವ್ನ್
ಕೊಡ್ಕಾರಾಂಚ್ಯಾ ಘಾಯಾಂನಿ ಕ್ರಿಸ್ತಾಕ್ ಚೊವುನ್
ನಿರ್ಗತಿಕಾಂಚ್ಯಾ ಚಾಕ್ರೆಂತ್ಚ್
ಆರ್ಥ್ ಸೊಧ್ಲ್ಲಿ ಅಸ್ಕತ್ ನಾರಿ
ಮದರ್ ತೆರೆಜಾ ’ನವೋದಯ್’ ಕವಯತ್ರಿ ಜಾಲಿ
ಜಾತಿ ಭಾಯ್ಲ್ಯಾಂ ಸವೆಂ ಭರ್ಸುನ್
ವೇಶ್ಯಾಂಚೆರ್ ದಯಾ ದಾಕವ್ನ್
ಪಾತ್ಕ್ಯಾಂಗೆರ್ ಪೋಟ್ಭರ್ ಜೇವ್ನ್
ಜೀವ್ ತುಟ್ತಾನಾಂಯೀ ಚೊರಾಕ್ ಭಗ್ಸಿಲ್ಲೊ
ಸೊಮಿ ’ದಲಿತ್’ ಕವಿ ಜಾಲೊ
ಹಜಾರ್ ಹಜಾರ್ ರಂಗೀನ್ ಉತ್ರಾಂ
ಸಹೃದಯಿಂಕ್ ಜಿಣ್ಯೆ ಸೂತ್ರಾಂ
ಕವಿಗೋಷ್ಟಿಂನಿ ಝೆಲೆ, ಮಾನ್
ಪುರಸ್ಕಾರ್, ಇನಾಮಾಂನಿ ಫುಮಾರೊನ್
ಚರ್ಬೆಚಿಂ ಶಿಂಗಾಂ ಫುಟ್ಲ್ಲೊ ’ಆಧುನಿಕ್ ಕವಿ’
ಹಾಂವ್ ನಿಜಾಕೀ ಕವಿ ಜಾಲೊಂಚ್ ನಾ ನ್ಹಂಯ್?
ಮ್ಹಜ್ಯಾ ಗಾಂವಾಂತ್ [ - ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಮ್ಹಜ್ಯಾ ಗಾಂವಾಂತ್ ಮೊಗಾಕ್ ಮೋಲ್ ನಾ
ದೆಕುನ್ ದಿಸಾ ಉಜ್ವಾಡಾಕ್ ಕಾಳ್ಜಾಂ ಭಾಜ್ತಾತ್
ದಿಶ್ಟಿ ಮುಳಾ ಥಾವ್ನ್ ಗಳ್ಚ್ಯಾ ಥೆಂಬ್ಯಾಂಕ್
ಪಿಯೆಂವ್ಚ್ಯಾ ಮನ್ಶ್ಯಾಕ್
ಹಿಂ ಫಕತ್ತ್ ಉದ್ಕಾ ಥೆಂಬ್ಯಾಪರಿಂ ದಿಸ್ತಾತ್
ಮ್ಹಜ್ಯಾ ಗಾಂವಾಂತ್ ಭುಕೆಕ್ ಶಿತ್ ನಾ
ದೆಕುನ್ ಹಾಂಗಾ ಮಾಸಾಂ ಖಾತಾತ್
ಮಾತ್ಯಾ ಆಂಗ್ಣಾಂತ್ ಖೆಳ್ಚ್ಯಾ ತಿಳ್ಯಾಕ್
ಗಿಳ್ಚ್ಯಾ ಗಳ್ಯಾಕ್
ಹಿಂ ಫಕತ್ತ್ ಆಟ್ ಆಣ್ಯಾಂಚಿಂ ಚೊಕ್ಲೆಟಾಂ ದಿಸ್ತಾತ್
ಮ್ಹಜ್ಯಾ ಗಾಂವಾಂತ್ ತಾನೆಕ್ ಉದಾಕ್ ನಾ
ದೆಕುನ್ ವಾಟೆ ವಾಟೆಂನಿ ರಗ್ತಾಂ ವ್ಹಾಳ್ತಾತ್
ಮಾಣ್ಸುಗೆಚ್ಯಾ ಪಾಲ್ವಾ ಫಿಂತಾಕ್
ಕಾತರ್ಚ್ಯಾ ದಿಶ್ಟಿಂಕ್
ಹಿಂ ಫಕತ್ತ್ ವರ್ಣಾಳ್ ಬಣಾಪರಿಂ ದಿಸ್ತಾತ್
ಮ್ಹಜ್ಯಾ ಗಾಂವಾಂತ್ ಝುಜೊಂಕ್ ಕವಿ ನಾಂತ್
ದೆಕುನ್ ಕೊನ್ಶ್ಯಾ ಕೊನ್ಶ್ಯಾಂನಿ ತಿಂತೆರಾಂ ಝಳ್ತಾತ್
ರಾಯಾಂಚಾ ದರ್ಭಾರಾಕ್ ಪಾವೊಂಕ್
ಬೊಲ್ಸಾಂತ್ ಗುಳೆ ನಾಂತ್
ದೆಕುನ್ ಝಳ್ಚ್ಯಾ ತಿಂತೆರಾಂಕ್ ವ್ಹಾರೆಂ ಫುಂಕ್ತಾಂ
ಕಿತ್ಯಾಕ್, ಹಾಂವ್ ಕವಿ ನ್ಹಯ್!
ಹಾಂವ್ ಕವಿ ನ್ಹಯ್ [ - ವಲ್ಲಿ ಕ್ವಾಡ್ರಸ್]
ತುಮಿಂ ಕಿತೆಂಯ್ ಮ್ಹಣಾ
ಪುಣ್ ಹಾಂವ್ ಕವಿ ನ್ಹಯ್
ಹಾಂವ್ ಬರಯ್ತಾಂ ಜರೂರ್
ದುದಾ ಮೊಂವಾಚಿ ಭಾಸ್ ನ್ಹಯ್
ರಗ್ತಾ ವ್ಹಾಳಾಚೊ ಗಾಜ್ ಮಾತ್ರ್
ಕೊಗುಳೆ ಮೊರಾಚಿ ಚಾಲ್ ನ್ಹಯ್
ಫಕತ್ತ್ ಹಾಸ್ಚಾಂಕ್ ರಡಂವ್ಚೆಂ ಸೂತ್ರ್
ತುಮಿಂ ಕಿತೆಂಯ್ ಸಾಂಗಾ
ಹಾಂವ್ ಕವಿ ಭಿಲ್ಕುಲ್ ನ್ಹಯ್
ಹಾಂವ್ ಬರಯ್ತಾಂ ಖರೆಂಚ್
ಗ್ರಾಸ್ ನಾ ದೀಂವ್ಕ್ ಮ್ಹಜೆಲಾಗಿಂ
ಪ್ರಾಸ್ ಕಸೊ ಆಸ್ಚೊ ಕವಿತೆಂತ್
ರೀತ್ ನಾ ಮ್ಹಜ್ಯಾ ಕವಿತೆಂತ್
ಗೀತ್ ಕಶೆಂ ಕೊಣೆಂಯ್ ಗಾವ್ಯೆತ್
ತುಮಿಂ ಕಿತೆಂಯ್ ಕರಾ
ಹಾಂವ್ ಕವಿ ಖಂಡಿತ್ ನ್ಹಯ್
ಹಾಂವ್ ಕವಿ ಜಾಲ್ಲೊಂ ತರ್
ಮನಿಸ್ ಮನ್ಶಾಕ್ ಸೊಲ್ತೊನಾ
ಕಾವ್ಳೊ ಕೊಗುಳ್ ಜಾತೊನಾ
ಕೊಲೊ ರಾಜ್ವಟ್ಕಿ ಚಲಯ್ತೊನಾ
ಹಾಂವ್ ಬರಯ್ನಾಂಯ್ ರಾವ್ತೊಂ ನಾ
ತುಮಿಂ ಕಿತೆಂಯ್ ಮ್ಹಣಾ
ಹಾಂವ್ ಕವಿ ನ್ಹಯ್ಚ್ ನ್ಹಯ್
ಹಾಂವ್ ಕವಿ ನ್ಹಯ್! [- ಲ್ಯಾನ್ಸಿ ಪಿಂಟೊ ನಾಯಕ್]
ಹಾಂವ್ ಕವಿ ನ್ಹಯ್ಗಾ,
ವ್ಹಾಳ್ಚಿ ನಂಯ್!
ತುಮಿಂ ಸೊಧ್ತಾತ್ಗಾಯ್?
ಪೊಟ್ಟು ಬಾಂಯ್!?
ಕೊಣೆಂ ಮ್ಹಾಕಾ ವೊಲಾಯ್ಲಾಂ
ಕವಿ ಮ್ಹಣೊನ್?
ಮ್ಹಜೆಂ ಪಿಂದ್ಲ್ಲೆಂ ಕಾಳಿಜ್
ಶಿಂವೊಂಕ್ ಬರಯ್ಲಾಂ!
ಹಾಂವ್ ಕವಿ ನ್ಹಯ್ಗಾ,
ಆಳ್ಶಿ ನಂಯ್!
ತುಮಿಂ ಸೊಧ್ತಾತ್ಗಾಯ್?
ಘೊಳ್ಚಿ ಮೂಯ್?
ಕೊಣೆಂ ಮ್ಹಾಕಾ ತೆಲಾಯ್ಲಾಂ
ಕವಿ ಮ್ಹಣೊನ್?
ತುಮ್ಚ್ಯಾ ಕುಡ್ಡ್ಯಾ ದೊಳ್ಯಾಂಕ್
ದೃಶ್ಟೆನ್ ಖಿರಯ್ಲಾಂ!
ಹಾಂವ್ ಕವಿ ನ್ಹಯ್ಗಾ,
ವೊಡ್ಚಿ ಲಯ್!
ತುಮ್ಚ್ಯಾ ಶಿಂತಿದಾಂತ್ ಆಶೆಕ್
ಗೊಡ್ಶಿ ವ್ಹೋಂಯ್ !!
ಕೊಣೆಂ ಮ್ಹಾಕಾ ವೊರಯ್ಲಾಂ
ಕವಿ ಮ್ಹಣೊನ್?
ವ್ಹಾಳ್ಚಿಂ ಉತ್ರಾಂ ಜಾಲ್ಯಾಂತ್
ಕವಿತಾ ಜಾವುನ್!!
ಹಾಂವ್ ಕವಿ ನ್ಹಯ್ಗಾ,
’ಕವಿ ಮ್ಹಾ-ಶಯ್’
ತುಮ್ಕಾಂ ಆಟಂವ್ಕ್ ಆಸಾಧ್ಯ್,
ಜಾಲ್ಲೊ ವಿಷಯ್!?
Ubem Asam? [- Mariano Lucas Diniz]
Xant mhojeam kallzant
Khoinchean torui dovoll* ghalun
Xitol monat hubol eun
Koslem-i torim modd upraslam.
Xant asloleam ghorant
Okosmat pados* tacho moddon
Xantikaicheam molleant
Zhuzachem modd chollam.
Vonti moddon sogleo
Mhojeam paddosacheo zaun vadreo*
Kitlem pavtt mhunn
Ghorant mhojeam hunna munna?
Sogllim dukham gillun potant
Thir vontir, ghott bhunhadir
Mon mhojem hansot halot
Moddank tondd diunk ubem asam.
* dovoll =
ಆಲ್ಕಂದ್ಚೆಂ
* pados = ಪಾಕೆಂ
* vadryo - ಧೆಸ್ವಾಟ್
ಮ್ಹಾಕಾ ಕವಿ ಕೆಲೊ ಕೊಣೆ [- ಗ್ಲೇಡಿಸ್ ರೇಗೊ]
ಮ್ಹಜ್ಯಾ ಧವ್ಯಾ ಪಾಂಯಾಂಕ್
ಗೊರ್ಯಾ ಹಾತಾಂಚಿ ಕಾಳಿ ಸಾವ್ಳಿ
ಕಶಿ ಅಶಿ ಪಾಂಗುರ್ಲಿ ಕಳ್ಳಿಚ್ಚ್ ನಾ
ಕಶಿ ಅಶಿ ಪಾಂಗುರ್ಲಿ ಕಳ್ಳಿಚ್ಚ್ ನಾ
ದರ್ಯಾ ಲ್ಹಾರಾಂಚಿ
ತುಫಾನಾಂ ಗೊರೊಜ್
ವಿಣ್ಯಾ ಸರಿಯಾಂನಿ
ಕಶಿ ಜಿರಯ್ಲಿ ಕಳ್ಳಿಚ್ಚ್ ನಾ
ಕಶಿ ಜಿರಯ್ಲಿ ಕಳ್ಳಿಚ್ಚ್ ನಾ
ಉತ್ರಾಂ ಉತ್ರಾಂಚೆರ್
ತಿಂತೆರಾಚಿಂ ಖತಾಂ
ಪೊಂತಾಂನಿ ಬಾಂಗ್ರಾ ಥಿಕಾಂ
ಮೊತಿಯಾಂ ಜಾಲ್ಲಿಂ ಕಳ್ಳೆಂಚ್ ನಾ (2)
ಕಾಳ್ಜಾ ಉದ್ಗಾರಾಂಚೆ ಕಿಸ್ಫೊರ್
ಖರ್ಕಶ್ಯಾ ಸಾಣ್ಯಾರ್
ಕಿಟಾಳಾಂನಿ ಉಸ್ಪೊನ್
ಸಬ್ಧ್ ಕಶೆ ಬಸ್ಲೆ ಕಳ್ಳೆಚ್ಚ್ ನಾ (2)
ಆಕ್ಲಾಸಾ ಉದ್ಗಾರಾಂ ಖೆಳ್ಣ್ಯೊಂ
ದೊಳ್ಯಾಂ ದುಕಾಂ ಪಾವ್ಳೆ
ಉಸ್ವಾಸಾಂತ್ಲೆ ಪುಸ್ಫುಸೆ
ಉತ್ರಾ- ಮೊತಿಯಾಂ ಜಾಲೆ
ತುಮಿಂಚ್ಚ್ ತಾಂಕಾ ವೊಲಾಯ್ಲೆಂ
ಪದಾಂ - ಕವಿತಾಂ ಕೆಲೆ
ತಾಚೆ ಬರಾಬರ್ ಮ್ಹಾಕಾ
ತುಮಿಂಚ್ಚ್ ಕವಿ ಕೆಲೊ (2)
ಹಾಂವ್ ಕವಿ ನ್ಹಯ್
ತುಮಿಂಚ್ಚ್ ಮ್ಹಾಕಾ ಕವಿ ಕೆಲೊ
ಹಾಂವ್ ಕವಿ ನ್ಹಯ್ [- ನಂದಿನಿ]
ತುಂ ಗೆಲೆಂಯ್
ತುಜಾ ಪಾಟ್ಲ್ಯಾನ್
ವಿಜೆಚಿ ಶಿರ್ ತುಟ್ಲಿ
ನಳಾಂತ್ಲಿ ಝರ್ ಮೆಲಿ
ಕಾಳೊಕಾಚೆಂ ಜಾಲೆಂ ರಾಜ್
ವಾತ್ ಮೆಳ್ತಾನಾ
ಫಸ್ಕ್ ನಾ
ಫಸ್ಕ್ ಮೆಳ್ತಾನಾ
ಜಳಾನಾ ಕಾಡಿ
ವೆತಾಂ ಥಂಯ್ ಕಪ್ಲಾಕ್ ಮ್ಹಜಾ
ಆಪ್ಟಾತಾತ್ ವಣದಿ
ದುಬಾವ್ ಯೆತಾ
ಸವಾಲ್ ಕರ್ತಾಂ
ಘರ್ ಮ್ಹಜೆಂ?
ಯಾ ಪೆಲ್ಯಾಚೆಂ?
ತುಂ ಗೆಲೆಂಯ್
ಹಾಂಗಾ ಆತಾಂ
ಕಾಳೊಕಾ- ಉಜ್ವಾಡಾಚೆ
ಮೇಳಿಂತ್
ಭಿಯಾನ್ ಜಾತಾಂ ಗುಟ್ಲಿ !
ತುಂ ಗೊ ಆಸ್ತಾನಾ
ಅಶೆಂ ಜಾಯ್ನಾಸ್ಲ್ಲೆಂ
ಕಾಳೊಕಾಂತ್ ಜಳ್ತಾಲ್ಯೊ ವಾತಿ
ಜಮುಲ್ಲೆಂ ಉದಕ್
ಥಂಡಯ್ತಾಲೆಂ ಕುಡಿ
ವಣದಿಂಚೆಂ ನಾಂವ್ ನಾಸ್ಲ್ಲೆಂ
ಕಾಳೊಕ್ ಸರ್ತಾಲೊ ಕುಶಿನ್
ಮಿಣ್ಮಿಣ್ಚೆ ವಾತಿಂತ್
ಗಯ್ರ್ ಮಸ್ಕ್ ಉಜ್ವಾಡಾಂತ್
ರೂಪ್ ತುಜೆಂ
ದೆಕ್ತಾನಾ
ಕುಡಿ ಆತ್ಮ್ಯಾಕ್
ಮೆಳ್ತಾಲಿ ಶಾಂತಿ.
ಕಿತೆಂ ಆಸಾ ತುಜೆ ಥಂಯ್?
ಚಿಂತ್ಪಾಕ್ ಲಾಗಾನಾ
ಬರ್ಪಾಕ್ ಮೆಳಾನಾ
ರೂಪ್ ತುಕಾ ದಿಂವ್ಚಾಕ್
ಹಾಂವ್ ಕವಿ ನ್ಹಂಯ್
ವಿಣ್ಗ್ಯಾ ಹ್ಯಾ ಸತಾ ಮುಕಾರ್
ಜಳ್ತಾಂ ಭಾಯ್ರ್ ಭಿತರ್
ಕರ್ಗತಾಂ, ನಿರಾಶೆನ್ ದೊಡ್ತಾಂ
ಚಿಂತ್ತಾಂ; ಕಿತ್ಯಾಕ್ ಹಾಂವ್ ಕವಿ ನ್ಹಂಯ್?
ಹಾಂವ್ ಕವಿ ನ್ಹಯ್ [- ಫ್ರಾನ್ಸಿಸ್ ಫುರ್ಟಾಡೊ, ಕಲೀನಾ]
ಹಾಂವ್ ಕವಿ ನ್ಹಯ್, ಪುನ್ ತುಂ
ನ್ಹಯ್ ಮ್ಹಾಕಾ ಆಡಾಂವ್ಚೊ,
ಗಾಯನ್ ಕರುಂಕ್ ದಿ ಮ್ಹಾಕಾ, ತ್ಯಾ ವಯ್ಲ್ಯಾ ಜಮೀನ್ದಾರಾಚೊ,
ತೊ ಧನಿ ಅಂತ್ರಳಾಚಾ ಸುರ್ಯಾ, ಚಂದ್ರಾ ಅನಿಂ ಸಗ್ಳ್ಯಾ ನಕೆತ್ರಾಂಚೊ,
ಸಂಸಾರಾರ್ ಕೊಣ್ಂಚ್ ನಾಂ ತಾಚಿ ಭುಂಯ್ ಮೆಜುನ್ ಸಾಂಗ್ಚೊ.
ಹಾಂವ್ ಕವಿ ನ್ಹಯ್, ಪುಣ್ ತುಂ ನ್ಹಯ್ ಮ್ಹಾಕಾ
ಆಡಾಂವ್ಚೊ,
ನಮಾನ್ ಕರುಂಕ್ ದಿ ಮ್ಹಾಕಾ, ತ್ಯಾ ವ್ಹಡ್ಲ್ಯಾ ರಚ್ನಾರಾಚೊ,
ಮ್ಹಾಕಾ ರಚ್ಲೊ ಎಕಾ ಕಣಾಂತ್ಲೊ, ಹಾಂವ್ ಅಸಾಂ ವಿಚಾರ್ಚೊ,
ಕಣಾಂತ್ಲೊ ಕಸೊ ಜಾಲೊ ಬದ್ಲಾಪ್ ಹಾಡ್, ಮಾಸ್ ಅನಿಂ ಕೆಸಾಂಚೊ.
ಮನ್ಶಾಚೆಂ ರಚನ್ ಏಕ್ ನವಾಲ್, ಜಾಪ್ ನಾತಲ್ಲೆಂ ಏಕ್ ಸವಾಲ್,
ದೇವ್ ಮನ್ಶಾಕ್ ನಾಂವಾನ್ ವಳ್ಕನಾ, ಸಗ್ಳ್ಯಾಂಚೆಂ ವಿಂಗಡ್ ಮೊಡೆಲ್,
ಬೊಟಾಂಚ್ಯಾ ಟಸ್ಯಾರ್ ಅಸಾ ಐಡಿ, ಜಾಯ್ನಾ ಕರುಂಕ್ ಅದಲ್ ಬದಲ್,
ಕೊರೊಡಾಂನಿ ಮನಿಸ್ ಸಂಸಾರಾಂತ್ ಜಿಯೆತಾ, ಎಕ್ಲೊಚ್ ಕರ್ತಾ ಸಾಂಬಾಳ್.
ಹಾಂವ್ ಕವಿ ನ್ಹಯ್, ಪುಣ್ ತುಂ ನ್ಹಯ್ ಮ್ಹಾಕಾ
ಆಡಾಂವ್ಚೊ,
ವಂದನ್ ಕರುಂಕ್ ದಿ ಮ್ಹಾಕಾ, ತ್ಯಾ ಅದ್ರಶ್ ವಿಚಿತ್ರ್ ಮಾಲಿಚೊ,
ಮಿಸ್ತೆರ್ ಮ್ಹಾಕಾ ಸಮ್ಜಾನಾ ರಂಗಾಳ್ ಪರ್ಮಳಿಕ್ ಫುಲಾಂಚೊ,
ಕಸೊ ಆಯ್ಲೊ ಹೊ ರಂಗ್ ಅನಿಂ ಪರ್ಮಳ್, ಝಡಾಚೊ ಯಾ ಮಾತಿಯೆಚೊ.
ಹಾಂವ್ ಕವಿ ನ್ಹಯ್, ಪುಣ್ ತುಂ ನ್ಹಯ್ ಮ್ಹಾಕಾ
ಆಡಾಂವ್ಚೊ,
ಹೊಗ್ಳಾಪ್ ಕರುಂಕ್ ದಿ ಮ್ಹಾಕಾ, ತ್ಯಾ ಆದ್ಲ್ಯಾ ಇಂಜಿನಿಯರಾಚೊ,
ಕೊಣೆಂ ಖೆಲಾ ಆಮ್ಚೊ ಮೆಂದು - ಹಾರ್ಡ್ ಡಿಸ್ಕಾಕ್ ಲಜೆಕ್ ಘಾಲ್ಚೊ,
ಕಿತ್ಲಿ ಬೈಟ್, ಕಿತ್ಲಿ ಮೆಮೊರಿ, ಗರ್ಜ್ ನಾಂ ಕೊಪಿ-ಪೇಸ್ಟ್
ಕರ್ಚೊ.
ಹಾಂವ್ ಕವಿ ನ್ಹಯ್ [- ಮಾ|ಜೋರ್ಜ್ ಒಲಿವೆರಾ]
ಅಶೀಯ್ ಏಕ್ ಸಾಂಗ್ಣಿ ಆಸಾ, ಎಕಾ ಸಾಹಿತಿಚಿ:
ಕವಿ, ಪ್ರೇಮಿ ಆನಿ ಪಿಸೊ ಎಕಾ ಲೆಕಾನ್,
ಎಕಾಚ್ ಸಂಸಾರಾಂತ್ ಜಿಯೆತಾತ್..
ಹಾಂವ್ ಕವಿ ನ್ಹಯ್-
ತಾಣೆಂ ದೆಖ್ಲ್ಲೆಂ, ಹಾಂವ್ ದೆಖೊಂಕ್ ಸಕ್ಚೊನಾ;
ತಾಣೆಂ ಚಿಂತ್ಲ್ಲೆಂ, ಹಾಂವ್ ಚಿಂತುಂಕ್ ಸಕ್ಚೊನಾ;
ತಾಣೆಂ ಚಾಕ್ಲ್ಲೆಂ ಅಮೃತ್ ಮ್ಹಾಕಾ ಲಾಭ್ಚೆಂನಾ;
ತಾಣೆಂ ವರ್ಣಿಲ್ಲಿ ಸೊಭಾಯ್ ಮ್ಹಾಕಾ ಅರ್ಥ್ ಜಾಂವ್ಚಿನಾ!
ಹಾಂವ್ ಪ್ರೇಮಿ ನ್ಹಯ್ -
ತಾಣೆಂ ಸಪ್ಣೆಂವ್ಚೊ ಸಂಸಾರ್ ಕೆದಿಂಚ್ ಮ್ಹಜೊ ಜಾಂವ್ಚೊನಾ;
ತಾಣೆಂ ಆಶೆಂವ್ಚೆಂ ಮಾಣಿಕ್ ಮ್ಹಜೆಂ ಕೆದಿಂಚ್ ಜಾಂವ್ಚೆಂ ನಾ!
ತಾಣೆಂ ಜಿಯೆಂವ್ಚ್ಯಾ ಸಂಸಾರಾಂತ್ ಮ್ಹಾಕಾ ಜಾಗೊ ಆಸ್ಚೊನಾ;
ತಾಣೆಂ ಲಾಲೆಂವ್ಚ್ಯಾ ವೆಂಗೆಂತ್ ಹಾಂವ್ ಏಕ್ ಜಾಂವ್ಚೊನಾ!
ಹಾಂವ್ ಪಿಸೊ ನ್ಹಯ್ -
ತಾಚಿ ಚಿಂತ್ಪಾ ಲಹರ್ ಮ್ಹಾಕಾ ಪಾರ್ಕುಂಕ್ ಜಾಂವ್ಚೆಂನಾಂ;
ತಾಚಿಂ ಉತ್ರಾಂ ಸೂತ್ರಾಂ ಮ್ಹಾಕಾ ಆಟೊವ್ ಕರುಂಕ್ ಕಳ್ಚೆಂನಾ;
ತಾಚೊ ಎಕೀನ್ ಸಂಸಾರ್ ಮ್ಹಾಕಾ ಮಿಸ್ತೆರ್ ಜಾವ್ನ್ ಉರಾತ್;
ತಾಚೊ ಸಾಂಗಾತ್ ಮ್ಹಾಕಾ ಬೋರ್ ಜಾಯ್ತ್!
ಪುಣ್ ಹಾಂವ್ ಏಕ್ ಪ್ರೇಮಿ ಜಾಂವ್ಕ್ ಆಶೆತಾಂ!
ಪ್ರೇಮಿ ದೆವಾಚೊ..
ಪ್ರೇಮಿ ತಾಚ್ಯಾ ಸೃಷ್ಟಿ ರಚ್ನಾಚೊ..
ಪ್ರೇಮಿ ತಾಚ್ಯಾ ಪ್ರತಿ ರುಪಾಚೊ -
ಮನ್ಶ್ಯಾ - ಭಾವ್ ಭಯ್ಣಿಚೊ..
ಹಾಂವ್ ಕವಿ ನ್ಹಯ್! [- ಆಸ್ಟಿನ್ ಪ್ರಭು]
ಸಬ್ಧ್ ಹಾಂವ್ ಗುಂತುನ್ಂಚ್ ಆಸಾಂ
ಆಬೊಲಿಂ ದೊರಾಕ್ ಗುಂತ್ಲ್ಲ್ಯಾಪರಿಂ
ವಿಂಚುನ್ ಕಾಡುನ್, ದೇಂಟ್ ವೊಳಾವ್ನ್
ಪಾಂಗ್ಳಾಂತ್ ಬಾಂಧ್ಲ್ಲ್ಯಾ ಕಳ್ಯಾಂಕ್ ಸರಿ
ಹೊಕ್ಲೆಕ್ ಸಾಡೊ ನ್ಹೆಸವ್ನ್ ಜಾತಚ್ಚ್
ಬಾಯ್ಲಾಂ ತಿಕಾ ಸುಂರ್ಗಾರಾಯ್ತಾತ್
ಹಾಂವೆಂ ವೊಳ್ಲ್ಲೆ ತೆ ಫುಲಾಂ ಮಾಳಾ
ತಿಚ್ಯಾ ಕೆಂಸಾಂ ಭಂವಾರಿಂ ರೆವ್ಡಾಯ್ತಾತ್
ಉತ್ರಾಂ ತಸಿಂ ಮ್ಹಜ್ಯಾ ಕವಿತೆಂತ್ಲಿಂ
ತಿಂ ವೊವ್ಯಾಂ ರೂಪಿಂ ಪ್ರಸಾರಿತಾತ್
ಥೊಡೆ ತುರೆ ಇಗರ್ಜಾಂಕ್ ವ್ಹರುನ್
ಇಮಾಜಿ ಭಂವಾರಿಂ ಶೃಂಗಾರ್ ಕರ್ತಾತ್
ತಸೆಂಚ್ ಮ್ಹಜಿಂ ಕವನಾಂ ಸಭಾರ್
ಗಿತಾಂ ರುಪಾರ್ ಗಾವುಂಕ್ ಲಾಗ್ತಾತ್
ಹೆರ್ ಥೊಡೆ ತಾಕಾ ತಾಳೊ ಮೆಳವ್ನ್
ಮಾಂಚಿಯೆ ಥಾವ್ನ್ ಪದಾಂ ಗಾಯ್ತಾತ್
ಆಮ್ಶಿ-ತಿಕ್ಶಿ ಮಾಸ್ಳೆಚಿ ಕಡಿ ಕಸೆಂ
ಉತ್ರಾಂ ಥೊಡ್ಯಾಂಕ್ ಆಡೂಕ್ ಲಾಗ್ತಾತ್
ದೆಖುನ್ ಮಿಸ್ತಾ ಥೊಡೆ ಕವನಾಂ ಮ್ಹಜಿಂ
ವಾಚ್ಚ್ಯಾ ಪಯ್ಲೆಂಚ್ ಧಾಂವೊನ್ ಪೊಳ್ತಾತ್
ಕಿಣಿ ಕಿಣಿ ಕಿಣ್ಕಿಣಿ, ಪಾಂಯ್ಜಣಾಂಚೊ ಆವಾಜ್
ಜೆಮೆತೆಲ್ಯಾಂಕ್ ಸುಡ್ಸುಡಾಯ್ ಹಾಡ್ತಾ
ತ್ಯಾ ಆವಾಜಾಕ್ ಸಾರ್ಕೊ ತಾಳ್ ಪಡೊಂಕ್
ತಿಂ ಕೊಲ್ವೊಂತಾಂ ಮಧುರ್ ನಾಚ್ ನಾಚ್ತಾತ್
ಕೋಣ್ ಮ್ಹಣ್ತಾ ಹಾಂವ್ ಕವಿ ನ್ಹಯ್
ತರ್ ಮ್ಹಾಲ್ಘಡಿಂ ಮ್ಹಜಿಂ ಕಪಿ ವ್ಹಯ್?
ಮ್ಹಣ್ತೆಲಿಂ ತಿಂ ಕಸೇಂಯ್ ಮ್ಹಣೊಂ
ಮ್ಹಜೆಂ ಕಿತೆಂಯ್ ಝಡ್ತಾ ಕಾಂಯ್?
ಹಾಂವ್ ಕವಿ ನ್ಹಯ್! [- ರೋಶನ್ ರೊಡ್ರಿಗಸ್]
ಕುಡ್ಡ್ಯಾನ್ ಕುಡ್ಡ್ಯಾಂಕ್ ವಾಟ್ ಧಾಖವ್ಯೆತ್
ಅಮಾಲ್ ಪಿಯೊವ್ನ್ ತಿಂತೆರ್ ಝರವ್ಯೆತ್
ಬಾಯ್ಲ್ ಭುರ್ಗ್ಯಾಂನಿ ಉಪಾಶಿಂ ನಿದ್ಯೆತ್
ವರ್ಸಾಕ್ ಏಕ್ ಶಾಲ್ ಫಳಾಂ ಮಾಂಚಿಯೆರ್ ಘೆವ್ಯೆತ್
ಮೊಗಾಚೊ ಕಾಣಿಯೊ ಹಾವೆಂ ಬರವ್ಯೆತ್
ಮೋಗ್ ನಾಸ್ತಾಂ ಸದಾಂ ಹಾವೆಂ ರಡ್ಯೆತ್
ರೀಣ್ ಕಾಡ್ನ್ ಬೂಕ್ ಛಾಪ್ಯೆತ್
ದುಸ್ರ್ಯಾಂಚಿ ಪ್ರಶಸ್ಥಿ ಚೋರ್ನ್ ಹಾವೆಂ ಜೊಡ್ಯೆತ್
ಧಾಂವ್ಚ್ಯಾ ಗೊಡ್ಯಾಕ್ ಕೊಣ್ ಧರುಂಕ್ ಸಕಾತ್
ವ್ಹಾಳ್ಚ್ಯಾ ಉದ್ಕಾ ಲೊಟಾಕ್ ಕೊಣ್ ಬಾಂಧುಂಕ್ ಸಕಾತ್
ದುದಾಕ್ ರಡ್ಚ್ಯಾ ಬಾಳಾಕ್ ಕೊಣ್ ಥಾಂಬಂವ್ಕ್ ಸಕಾತ್
ಲಿಖ್ಚಾ ತಿಂತೆರಾಕ್ ಕೊಣ್ ಮೊಡುಂಕ್ ಸಕಾತ್
ಖುರ್ಸಾಕ್ ಕೊಣ್ ಸಮ್ಜೊಂಕ್ ಸಕ್ಲಾ
ಚಿಂತ್ಪಾ ಸಕ್ತೆಕ್ ಕೊಣ್ ಮೊಲಾಕ್ ಘೆಂವ್ಕ್ ಸಕ್ಲಾ
ತಿಂತೆರಾಕ್ ಕೊಣ್ ಅಬ್ಲೆಶಾನ್ ವಿಖುನ್ ಚುಕ್ಲಾಂ
ಸತಾಕ್ ದೋನ್ ಧಾರಿಚಿ ತಲ್ವಾರ್ ಕಿತ್ಯಾಕ್ ತುಜಿ ಥಕ್ಲ್ಯಾ
ಖಾಡಾಕ್ ಮ್ಹಜ್ಯಾ ನಾ ವಾಕೊರ್
ಹಾತಿಂ ಚುಕಾನಾ ಮ್ಹಜ್ಯಾ ಮ್ಹಾತಾರೆಂ ತಿಂತೆರ್
ಖಾದಿ ಸೊಭ್ತಾ ಮ್ಹಜ್ಯಾ ಲಾಚಾರ್ ಆಂಗಾರ್
ತರ್ಯೀ ಹಾಂವ್ ಕವಿ ನ್ಹಯ್ ಮ್ಹಜ್ಯಾ ಗಾಂವಾರ್
ಹಾಂವ್ ಕವಿ ನ್ಹಯ್! [- ವಾಯ್ಲೆಟ್ ಜೆ. ಪಿರೇರಾ]
ಹಾಂವ್ ಕವಿ ನ್ಹಯ್, ಬಗಾರ್ ಪರ್ಜಳ್ಚೊ ರವಿ
ಮ್ಹಜಾ ಪ್ರಕಾಸಾನ್ ಜಿಯೆತಾ ಹರ್ಯೇಕ್ ಜಿವಿ
ನಾ ಭರ್ತಿ ನಾ, ಸುಕ್ತಿ ಹಿಚ್ಚ್ ಮ್ಹಜಾ ಜಿಣ್ಯೆಚಿ ಕಾಣಿ
ಕೊಣ್ ಮೊರೊಂಯಾ ಜಲ್ಮೊಂವ್, ಮ್ಹಜಿ ರಾಂವ್ಚಿ ನಾ ದಾಂವ್ಣಿ
ಮ್ಹಜೆ ಥಾವ್ನ್ ಹ್ಯಾ ಸಂಸ್ರಾರ್ ತೊ ಕಿತ್ಲೊ ಪರ್ಜಳ್
ಹಾಂವ್ ಝಳೊನ್ ಉಜ್ವಾಡಾಯ್ತಾಂ ಹೊ ಭುಂಯ್ಥಳ್
ಸಂಸಾರಿ ಮನಿಸ್ ಕಿತ್ಲೊಯ್ ಜಾಂವ್ ಗುಲಾಮ್ ತ್ಯಾ ನಿದೆಕ್
ಪುಣ್ ಜಾಂವ್ಚಿಂನಾ ಮ್ಹಜೆ ಥಾವ್ನ್ ಗಳಾಯ್ ಕೆದಿಂಕ್
ಮ್ಹಜಾ ಪ್ರಕಾಸಾನ್ ಝಳ್ತಾತ್ ತೆ ಕಿತ್ಲೆ ವೀಜ್ ದಿವೆ
ಮ್ಹಜೆ ಥಾವ್ನ್ ಹುನ್ ಉದ್ಕಾಕ್ ಆಯ್ಲಾ ಯಂತ್ರ್ ನವೆಂ
ನಾ ವಿಶೆವ್ ಘೆಂವ್ಕ್ ಆವ್ಕಾಸ್ ವರ್ಸಾಚ್ಯಾ ಬಾರಾಯೀ ಮಹಿನೆಂ
ತರೀ ಶಾಂತ್ ಹಾಂವ್, ನಾ ಬೇಧ್ ಭಾವಾಚೆ ಹುನ್ ವ್ಹಾರೆಂ
ಹಾಂವ್ ಖಂಚಾಯ್ ರಿತಿನ್ ನ್ಹಯ್ ಕವಿ
ಪುಣ್ ದಾಟಾಯ್ಲ್ಯಾ ಮೊಡಾಂಕ್ ನಿತ್ಳಾಂವ್ಚಿ ಚಾವಿ
ತ್ಯಾ ಧರ್ಯಾಚಿ ಘೊರೊಜ್, ಚಿಂತಾಂ ತಾಂತುಂ ಲಿಪೊಂಕ್
ತ್ಯಾ ವ್ಹಾರ್ಯಾಚೊ ಹೊರ್ಬೊಸ್, ರಾಕ್ತಾ ಮನ್ಶ್ಯಾಕ್ ಗ್ರಾಸುಂಕ್
ಹಾಂವ್ ಕವಿ ನ್ಹಯ್, ಹಾಂವ್ ರವಿಚ್ಚ್ ಸಯ್
ಮ್ಹಜ್ಯಾ ದಾವೆಕ್ ಆಟ್ತಾತ್ ತ್ಯೊ ಕಿತ್ಲ್ಯೊ ಬಾಂಯೊ ನಂಯ್
ಖಂತಿಂತ್ ಬುಡ್ಲಾ ಮ್ಹಜಾ ಧಾವೆಕ್ ಕರ್ಪಾತ್ ಕೊಣ್ಣಾ ಹಿ ಭುಂಯ್
ಮಾಗ್ತಾಂ ದೆವಾ ಮ್ಹಜ್ಯಾ ದಾವೆ ಥಾವ್ನ್ ತುಜ್ಯಾ ಪರ್ಜೆಕ್ ಉರಯ್
ಹಾಂವ್ ಕವಿ ನ್ಹಯ್..? [- ಪ್ರಸನ್ನ್ ನಿಡ್ಡೋಡಿ]
ದರ್ಯಾ ರೇಂವ್ ಮೆಜುಂಕ್ ಕೊಣಾಕ್ ಸಾಧ್ಯ್?
ದರ್ಯಾ ಉದಾಕ್ ಸುಕಂವ್ಕ್ ಕೆದ್ನಾಂ ಜಾಯ್ತ್?
ಜಸೆಂ ತುಜಿಂ ಮ್ಹಜಿಂ ಭಗ್ಣಾಂ ಥಾಂಬಂವ್ಕ್ ಅಸಾಧ್ಯ್
ಕವಿಚಿಂ ಚಿಂತ್ನಾಂ ಆಡಾಂವ್ಕ್ ಕೊಣ್ ಧಯ್ರ್ ಘೆತ್..?
ಜಶೆಂ ದೋನ್ ಥೆಂಬೆ ಮೊಂವ್ ಆರಾಂವ್ಕ್ ಭಂವರ್
ಏಕ್ ಫುಲ್ ನ್ಹಯ್ ಶೆಂಭೊರಾನಿ ಮಸ್ತಿತ್ ಸದಾಂ
ಆಮಾಲ್ ಸೆವುನ್ ಪಿಸಾಂತುರ್ ಆಮಾಲಿ ಪಳೆ
ಸದಾಂ ನೀತ್ ಉಚಾರಿತ್ ಅಮಾಲ್ ಸೊಡ್ತಾಂ ’ಫಾಲ್ಯಾಂ’.
ಸಂಸಾರ್, ಆಕಾಸ್, ಸರ್ಗ್, ಯೆಮ್ಕೊಂಡ್ ತರ್
ಸಗ್ಳೆಂ ಕೊಣೆಂ ಪಳೆಲಾಂ ಸಾಂಗಾಟ್..?
ತಾಚೆಂ ವರ್ಣನ್ ಜಿವೆಂ ಜಿವೆಂ ನ್ಹಯ್ಗಿ ಸೂಕ್ಷ್ಮಾಯೆನ್
ಕರಿತ್ ತೊಚ್ಚ್ ’ಕವಿ ಸಿರಿವಂತ್..’
ಉತ್ರಾಂ ಸುಡ್ಸುಡಿತ್ ವರ್ಣನ್ ಪುಡ್ಪುಡಿತ್ ಗಿನ್ಯಾನ್ ಅಗಣಿತ್
ವ್ಹಳಕ್ ಪಾರ್ಕಿತ್ ಸರ್ವಾಂಕ್ ವೊಡಿತ್ ಕೀರ್ತ್ ಜೊಡಿತ್
ಆತಾಂ ವಾಚ್ಪಿ ದೊತೊರಾ.. ತುಂ ಕಿತೆಂ ಮ್ಹಣ್ತಾಯ್?
ಹಾಂವ್ ಕವಿ ನ್ಹಯ್...?!
ಹಾಂವ್ ಕವಿ ನ್ಹಯ್ [- ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ]
ಎಕ್ಸುರ್ಪಣಿ ಬಸೊನ್ ಆಸ್ತಾಂ
ಹಜಾರ್ ಚಿಂತ್ನಾಂ ಮತಿಂತ್ ಘುಂವ್ತಾತ್
ಚಿಂತ್ನಾ ಮ್ಹಜಿಂ ಉಗ್ಡಾಸ್ ಉರ್ಚ್ಯಾಕ್
ಬರವ್ನ್ ಧರ್ತಾಂ ಕಾಗ್ದಾ ಕುಡ್ಕ್ಯಾರ್
ಪುಣ್! ಹಾಂವ್ ಕವಿ ನ್ಹಯ್
ಗಾದ್ಯಾ ಮೆರೆಂತ್ ಚಲೊನ್ ಆಸ್ತಾಂ
ಗುಡ್ಯಾ, ಭಾಗಿಂತ್ ವಚೊನ್ ಬಸ್ತಾಂ
ದೀಷ್ಟ್ ಘುಂವ್ಡಾವ್ನ್ ಭಂವ್ತಣಿ ದೆಖ್ತಾಂ
ಸಂಸಾರ್ ಕಿತ್ಲೊ ಸೊಭಿತ್ ದಿಸ್ತಾ
ಪುಣ್! ಹಾಂವ್ ಕವಿ ನ್ಹಯ್
ದೆವಾ ತುಜಿಂ ಉಚ್ಲಿಂ ರಚ್ನಾಂ
ಪಳೆವ್ನ್ ಹಾಂವ್ ವಿಜ್ಮಿತ್ ಪಾವ್ತಾಂ
ಮ್ಹಜಾಚ್ ಉತ್ರಾಂನಿಂ ಹಾಂವ್ ತಿಂ ವರ್ಣಿತಾಂ
ಸೊಭಾಯ್ ತಾಂಚಿ ಪಳೆವ್ನ್ ಸಂತುಷ್ಟ್ ಜಾತಾಂ
ಪುಣ್! ಹಾಂವ್ ಕವಿ ನ್ಹಯ್
ಹರ್ಯೆಕಾ ರಚ್ನೆಚೆರ್, ಹರ್ಯೇಕ್ ಜೀವಿಚೆರ್
ಧಾಂವ್ಡಾಯ್ತಾಂ ದೀಷ್ಟ್ ಮ್ಹಜಿ
ಹರ್ಯೇಕ್ ಗೂಣ್, ಅವ್ಗುಣ್ ತಾಂಚೆ
ಪಿಂತ್ರಾಯ್ತಾಂ ಹಾಂವ್ ಮ್ಹಜ್ಯಾ ಉತ್ರಾಂಚೆರ್
ಪುಣ್! ಹಾಂವ್ ಕವಿ ನ್ಹಯ್
ಬರಯ್ತೆಚ್ಚ್ ವೆತಾಂ ಚಿಂತ್ನಾಂ ಭಗ್ಣಾಂ ಭಾವನಾ ಮ್ಹಜಿಂ
ವೊಳಿ ವೊಳಿಂನಿ ಸಾಲಾಂ ಸಾಲಾಂನಿಂ
ಉತ್ತೇಜನ್ ಮ್ಹಾಕಾ ಫಕತ್ತ್ ತುಜಿ ಸೃಷ್ಟಿ
ಗಳ್ಸುಂಕ್ ಮ್ಹಜಿ ಅಂತರ್ದೃಷ್ಟಿ
ಪುಣ್! ಹಾಂವ್ ಕವಿ ನ್ಹಯ್
ಕವಿ ಕೊಣ್ಗಾ! [- ಆರ್ಯನ್ ತಾಕೊಡೆ]
ಕವಿ ಕೊಣ್ಗಾ..?
ದಿಸಾ ರಾತಿ ಮಧ್ಲೊ ಫರಕ್ ಸೊಧ್ಚೊ
ವಾರೆಂ ವಾದಾಳ್ ಝಾಡ್ ಪಾವ್ಸಾ ಮಧ್ಲೊ ವೇಳ್ ಭಗ್ಚೊ
ಮತಿಚಿ ಚಾಲಾಕಿ ಮಿರ್ವೊನ್..
ವಾರ್ಯಾಂತ್ ವಾರ್ಯಾಕ್ ಧರ್ಚೊ..
ಉಜ್ಯಾಚೆರ್ ಲಾಂಕುಡ್ ದಾಳ್ಚೊ..
ಮ್ಹೊಂವಾಳ್ ಉತ್ರಾಂನಿ ಖರೆಂ ರೂಪ್ ಧಾಖಂವ್ಚೊ
ಮೆಂದ್ವಾಚೆಂ ಬಳ್ ಎಕಾ ಪಾಡ್ಯಾಬರಿ ಪಿಡ್ಡ್ಯಾರ್ ಕರ್ಚೊ
ಮರ್ಯಾದೆಚ್ಯಾ ಬಸ್ಕೆರ್ ಖೆಬ್ಡಾಯಾಂಚಿ ಉಂಡಿ ಜಾಂವ್ಚೊ
ಮಾನ್ ಆನಿ ಅಕ್ಮಾನ್ ಎಕಾ ವೆದಿರ್ ಭಗ್ಚೊ
ವಯ್ಲ್ಯಾ ಹುದ್ದ್ಯಾರ್ ಆಸ್ಲೆಲ್ಯಾಂಕ್ ವ್ಹಡ್ ಧೊಸ್ ಜಾಂವ್ಚೊ
ಶಿಂತ್ರ್ಯಾಂನಿ ರೆವ್ಡೊನ್ ಆಕ್ರಮಿ ತರ್ಕಾಂಕ್ ಸವಾಲ್ ಜಾಲ್ಲೊ
ನಶಿಬ್ ಫುಟೊನ್ ಸುಕೊನ್ ಗೆಲ್ಲ್ಯಾ ರುಕಾ ತಸ್ಲೊ
ಭೋವ್ಶಾ ಆವಯ್ಚೊ ಯೆಣೊ ಸಯ್ತ್ ವಿಸ್ರೊನ್ ಸೊಡ್ಚೊ
ಕರ್ಮಾಂ..! ಮ್ಹಾಕಾ ಕಿತೆಂ ವಿಸರ್ ಪಡ್ಲ್ಯಾ
ಫಾಲ್ಯಾಂ ಮೆಲೊಂ ತರ್ ಮ್ಹಜೆಂ ಕಿತೆಂ ಉರ್ತಾ?
ದುಸ್ಮಾನ್ ರಡಾತ್ ರಂಗ್ ಬದ್ಲಿತ್!
ಇತ್ಲ್ಯಾಕೀ ಹಾಂವ್ ಕೋಣ್ಗಾ..?
ಹಾಂವ್ ಕವಿ ಭಿಲ್ಕುಲ್ ನ್ಹಯ್ಗಾ!
ಹಾಂವ್ ಕವಿ ನ್ಹಯ್! [- ಪ್ರಿಯಾ ಸಿಕ್ವೇರಾ, ಫೆರಾರ್]
ಪಾಚ್ವ್ಯಾ ರಂಗಾನ್ ಭರೊನ್
ಅಪರಿಚಿತ್ ಜಾಗ್ಯಾಂತ್ಲ್ಯಾ
ವಿಕಾಳ್ ರುಕಾಂ ಮಧೆಂ
ರುಚಿಕ್ ಫಳಾಕ್ ಜಲ್ಮ್ ದೀವ್ನ್
ಭರ್ಮಾನ್ ಫಾಂಟೆ ವಿಸ್ತಾರಾವ್ನ್
ಉಭೊಂ ಆಸಾಂ!
ಜರ್ ತುಕಾ ಮ್ಹಜೆಂ ಫಳ್
ರುಚೊಂಕ್ ನಾಂತರ್
ಸಾಂಗಾನಾಕಾ ’ಹಾಂವ್ ಬರ್ಯಾ ಫಳಾಚೊ ರೂಕ್ ನ್ಹಯ್’
ಚೂಕ್ ಮ್ಹಜಿ ನ್ಹಯ್
ನ್ಹಯ್ ಮ್ಹಜ್ಯಾ ಫಳಾಚಿ
ರೂಚ್ ನಾತ್ಲೆಲ್ಯಾ ತುಜ್ಯಾ ಜಿಬೆಚಿ
ಪಿರ್ವಾಲ್ಲ್ಯಾ ತುಜ್ಯಾ ಮತಿಚಿ
ವಿಶಿಷ್ಟ್ ವ್ಯಕ್ತಿತ್ವಾನ್ ವಾಡೊನ್
ಕಳಿತ್ ನಾತ್ಲೆಲ್ಯಾ ಜಾಗ್ಯಾರ್
ತಾಲೆಂತಾ ಮಧೆಂ
ವಿವಿಧ್ ಕವಿತಾಂ ಬರವ್ನ್
ಖಾಲ್ತೆಂಪಣಿಂ ಜಿಯೆವ್ನ್
ಚಲೊನ್ ಆಸಾಂ
ಜರ್ ತುಕಾ ಮ್ಹಜಿಂ ಕವಿತಾ
ಸಮ್ಜೊಂಕ್ ನಾಂ ತರ್
ಸಾಂಗಾನಾಕಾ ತುಂ ಹಾಂವ್ ಕವಿ ನ್ಹಯ್
ಚೂಕ್ ಮ್ಹಜಿ ನ್ಹಯ್
ನ್ಹಯ್ ಮ್ಹಜ್ಯಾ ಕವಿತಾಚಿ
ಫಾತ್ರೆಲ್ಲ್ಯಾ ತುಜ್ಯಾ ಕಾಳ್ಜಾಚಿ
ಬಡ್ಡ್ ಜಾಲ್ಲ್ಯಾ ಮತಿಚಿ
ಆಗ್ರುಂ ತುಜೆಂ ಕಾಡ್ನ್
ಸಮಾ ಮತಿರ್ ಯೇವ್ನ್
ಮತ್ ತುಜಿ ಪಾಜುನ್
ಕಾಳಿಜ್ ಕಾಪುಸ್ ಕರ್ನ್
ಫಳ್ ಮ್ಹಜೆಂ ಖಾವ್ನ್ ಪಳೆ
ಕವಿತಾ ಮ್ಹಜಿಂ ವಾಚುನ್ ಪಳೆ!!
ಹಾಂವ್ ಕವಿ ನ್ಹಯ್! [- ಕಾವ್ಯಾದಾಸ್]
ಕಿತ್ಯಾಕ್ ಕವಿ ಮ್ಹಣ್ತಾತ್ ಮ್ಹಾಕಾ?
ಕಿತ್ಯಾಕ್ ಪೊಕ್ಳೆಂ ಹೊಗ್ಳಾಪ್?
ಮ್ಹಾಕಾ ಕವಿ ವೊಲಾಯ್ತೆಲೆ
ದಿನಾಂತ್ ಮ್ಹಾಕಾ ಕಾಂಯ್ ಜಾಪ್
ದೋನ್ ತೀನ್ ಪಂಗ್ತಿ ಪಾತ್ಳಾವ್ನ್ ಲಿಖ್ಲ್ಯಾರ್
ಕೊಣ್ ಕಾಂಯ್ ಕವಿ ಜಾತಾ?
ವ್ಹಡ್ಲೆ ವ್ಹಡ್ಲೆ ಸಬ್ಧ್ ವ್ಹಾಪಾರ್ಲ್ಯಾರ್
ಕವನ್ ಮ್ಹಣುಂ ಯೆತಾ?
ದೆವಾನ್ ದಿಲ್ಲೆಂ ಇಲ್ಲೆಂ ದೆಣೆಂ
ಆನಂದ್ ದಿಂವ್ಚ್ಯಾಕ್ ತಾಕಾ
ತಾಚೆಚ್ ಖುಶೆ ಪ್ರಕಾರ್ ಗಳ್ಸುಂಕ್
ವರ್ತೊ ಸಂತೊಸ್ ಮ್ಹಾಕಾ
ಆಧ್ಲ್ಯಾ ಕವಿಂಕ್ ನಿಯಾಳ್ತಾನಾ
ಸಗ್ಳೊಚ್ ಶೆರ್ಮೆತಾಂ ಹಾಂವ್
ಹರ್ಯೆಕ್ ತಾಂಚ್ಯಾ ಉತ್ರಾಂತ್ ಆಸ್ಚೆಂ
ಚಿಂತ್ನಾಂ, ಭಗ್ಣಾಂಚೆಂ ಮೊಂವ್
ಆಪ್ಲ್ಯಾ ಎಕೇಕ್ ಸಬ್ಧಾ ಪಾಟ್ಲ್ಯಾನ್
ಜಾಣ್ವಾಯೆಚೆಂ ಖಜಾನ್
ಮನ್ಶ್ಯಾ ಜಿಣ್ಯೆಕ್ ದಿತಾಲೆ ತೆ
ಲಿಸಾಂವ್, ರುಜ್ವಾತ್ ಮಹಾನ್
ಅಪುಣ್ ಕವಿ ಮ್ಹಣೊನ್ ತಾಣಿಂ
ದಾಂಗ್ರೊ ಫೆರಾಯ್ಲೊ ನಾ
ನಾಂವಾ ಖಾತಿರ್ ಮಾನಾ ಖಾತಿರ್
ವೇಳ್, ಘಾಮ್ ವ್ಹಾರಯ್ಲೊ ನಾ
ತಾಂಚ್ಯಾ ತ್ಯಾ ಮ್ಹಾನ್ ಪಾವ್ಲಾನ್ ಚಲೊಂಕ್
ಮೆಟಾಂ ಹಾಂವ್ ಕಾಡ್ತಾನಾ
ದಿಯಾ ಕುಮ್ಕೆಚೊ ಹಾತ್ - ನಾಕಾ
’ಕವಿ’ ವೊಲಾವ್ನ್ ಗಾಣಾಂ!
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.