ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
1. ಕವಿ ಕವಿತಾ ಆನಿ ಸೊಭಾಣ್
ನಿರ್ಗತಿಕಾಂಚ್ಯಾ ಜೆಪ್ಪುಚ್ಯಾ ಸಾಂತ್ ಆಂತೊನಿಚ್ಯಾ ಆಸ್ರ್ಯಾಂತ್ ಮಾಂಡ್ ಸೊಭಾಣ್ (ನೊ) ಸಂಸ್ಥ್ಯಾನ್ ಅಪ್ಲಿ ಇಕ್ರಾವಿ ಕವಿತಾ ಜಮಾತ್ (ಹಾಂವೆ ತಶೆಂ ಮ್ಹಣ್ ಆಪವ್ಯೆತ್ ತರ್), ಗೆಲೆತ್ಯಾ ಅಯ್ತಾರಾ (ಜೂನ್ 25) ಸಾದರ್ ಕೆಲಿ. ಜಮಾತೆಚ್ಯಾ ಪಯ್ಲೆಂ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೆಂ ಮ್ಹಾನ್ ವ್ಯಕ್ತಿ ಮೊ. ಅಲೆಕ್ಸಾಂಡರ್ ಸೋಜ್ ಆನಿ ಗುಲ್ವಾಡಿ ದತ್ತಾತ್ರೇಯ್ ಭಟ್ ಹಾಂಕಾಂ ಸನ್ಮಾನ್ ತಶೆಂ ಸಂವಾದ್ ಕಾರ್ಯೆಂ ಚಲಯ್ಲೆಂ.
ಪಯ್ಲೊ ಮ್ಹಾನ್ ಮನಿಸ್ ಸಾಹಿತ್ಯ್, ಸಮಾಜ್ ಸೆವಾ ಆನಿ ಪತ್ರಿಕೋದ್ಯಮಾಂತ್ಲೊ ತರ್ ದುಸ್ರೊ ಕೊಂಕ್ಣಿ ಹರಿಕತೆಚೊ ಹರಿಕಾರ್. ಮೊ. ಆಲೆಕ್ಸಾಂಡರ್ ಅದ್ಲೊ ರಾಕ್ಣೊ ಸಂಪಾದಕ್ ಮ್ಹಣ್ತಾನಾಂ, ಸಂವಾದಾಂತ್ಲಿ ಸವಲಾಂ ಸಗ್ಳಿಂ ಸ್ವಭಾವಿಕ್ಪಣಿಂ ರಾಕ್ಣೊ ಭಂವ್ತಿಚ್ ಪಾಸಾಯೊ ಮಾರುಂಕ್ ಲಾಗ್ಲಿಂ. ರಿಚ್ಚಿ ಪಿರೇರಿನ್ ಅದ್ಲ್ಯಾ ಅನಿ ಆತಾಂಚ್ಯಾ ರಾಕ್ಣೊ ಮಧೆಂ ಫರಕ್ ಕಿತೆಂ ಮ್ಹಣ್ ವಿಚಾರ್ಲ್ಲ್ಯಾಕ್ ಮೊ. ಆಲೆಕ್ಸಾಂಡರ್ ಮ್ಹಣಾಲೊ, ’ಹೆಂ ಸವಾಲ್ comparison-ಚೆಂ ನೈಂ development-ಚೆಂ ಮ್ಹಣಾಲೊ. ಮ್ಹಣ್ಜೆ ತುಲನಾಚೆಂ ನೈಂ ವಾಡಾವಳಿಚೆಂ. ಕೋಣ್ ರಿಪೋರ್ಟರಾನ್ ಗುಮಾನಾಂತ್ ಘೆನಾತ್ಲಿ ಮಾರ್ಮಿಕ್ ಜಾಪ್.
ತಾಣೆಂ ಸಾಂಗ್ಚೆ ಸತ್ಚ್ ಆಸೊಂಕ್ ಪುರೊ. ಪುಣ್ ವಾಡಾವಳ್ ವ development ಹಾಚಿ ಪರಿಭಾಶಾ ಕಿತೆಂ..? ಆನಿ ವ್ಯಾಪ್ತ್ ಕಿತ್ಲಿ? ಹೆಂ ಕೋಣ್ ಸಾಂಗ್ತಾಲೊ? ವಾಡಾವಳ್ ಧಾರ್ಮಿಕ್, ಸಮಾಜಿಕ್, ನೈತಿಕ್, ತಾತ್ವಿಕ್ ವ ಕೇವಲ್ ತಾಂತ್ರಿಕ್ ಆಸ್ಯೆತಾ. ರಾಕ್ಣೊ ತಸಲ್ಯಾ ದಿಯೆಸೆಜಿಚ್ಯಾ ಪತ್ರಾನ್ ವಯ್ರ್ ಉಲ್ಲೇಕ್ ಕೆಲ್ಲ್ಯಾ ಹರ್ಯೇಕ್ ಪ್ರಕಾರಾಂತ್ ವಾಡಾವಳ್ ಕೆಲ್ಯಾ ಮ್ಹಣ್ ಸಾಂಗ್ಚೆ ಸುಲಭ್ ನೈಂ. ಸುಂದರ್ ಡಿ.ಟಿ.ಪಿ. ಆನಿ ವಿನ್ಯಾಸಾಕ್ ವಾಡಾವಳ್ ಮ್ಹಣೊಂಕ್ ಜಾಯ್ನಾಂ. ಬ್ಲೇಸಿ ತಸಲ್ಯಾ ಪರ್ನ್ಯಾ ರಾಜಕಾರಣಿಕ್ ಹಿ ಜಾಪ್ ಭಾರಿಚ್ ಹುಶಾರ್ ಮ್ಹಣ್ ದಿಸ್ಲೆಲ್ಯಾಂತ್ ನವೆಂಸಾಂವ್ ಕಾಂಯ್ ನಾಂ, ಅಸೊಂ.
ತೆಚ್ ರಿಚ್ಚಿ ಪಿರೇರಿಚ್ಯಾ ಸವಲಾಕ್ ಗುಲ್ವಾಡಿ ದತ್ತಾತ್ರೇಯ್ ಭಟ್ ಮಾಮ್ ಮ್ಹಣಾಲೊ ’ಹರಿಕತಾ’ ಮ್ಹಳ್ಯಾರ್ ದೆವಾಚಿ ಕತಾ ವಾ ತಾಚಿ ಬರಿ ಖಬಾರ್. ಜಸೆಂ ಚರ್ಚಾಂನಿ ತುಮ್ಚೆ ಪಾದ್ರಿ ವೊರೆಸಾಂವ್ ದಿತಾತ್ ತಶೆಂ. ಆತಾಂ ಮಾತ್ ತಾಂತು ಮನೋರಂಜನ್ ಯೇವ್ನ್ ತಿ ಪಿಡ್ಡ್ಯಾರ್ ಜಾಲ್ಯಾ ತೀ ಗಜಾಲ್ ವೆಗ್ಳಿ. ಕಿರಿಸ್ತಾಂವ್ ಪೋರಾಂಕ್ ಹರಿಕತಾ ಕಿತೆಂ, ಭದ್ರಗಿರಿ ಅಚುತದಾಸ ಕೋಣ್ ವಾ ಹೊಚ್ ಗುಲ್ವಾಡಿ ದತ್ತಾತ್ರೇಯ್ ಭಟ್ ಮಾಮ್ ಕೋಣ್ ಕಿತೆಂ ಕಳಿತ್..? ರೋಬರ್ಟ್ ದೆ ಸೊಬಿಲಿ, ಫ್ರಾನ್ಸಿಸ್ ಬಾರ್ಬೋಜಾ, ಚಾರ್ಲ್ಸ್ ವಾಜ್ ತಸಲ್ಯಾ ಪಾದಿಗಾರಾಂನಿ ಭಾರತೀ ಸಂಸ್ಕ್ರತೆ ಮಾರ್ಗಾನ್ ಜೆಜು ಕ್ರೀಸ್ತಾಚಿ ಬರಿ ಖಬಾರ್ ಪರ್ಗಟ್ ಕರ್ಚೆಂ ಕಾಮ್ ಕೆಲಾಂ. ಕೋಣ್ ಯಾಜಕ್ ಖೆಳ್ (ಯಕ್ಷಗಾನ), ಕೋಣ್ ಜಾದೂ (ಮ್ಯಾಜಿಕ್) ಶಿಕೊನೀ ಹೆಂ ಕಾಮ್ ಕರ್ತಾತ್. ಆನಿ ಕೋಣ್ ಮಿಶಿಯೊನರಿ ಯೋಗಾ ಶಿಕೊನ್ ತ್ಯಾ ಮಾರಿಫಾತ್ ಸುವಾರ್ತಾ ಪರ್ಗಟ್ಚೆಂ ಕಾಮ್ ಕರ್ತಾನಾಂ, ಮುಕಾರಿಂಕ್ ಕೋಣ್ ಪಾದಿಗಾರ್ ಕ್ರಿಸ್ತಕತಾ ಕರಿತ್ ತರ್? - ಬರೆಂಚ್, ಅಸೊಂ.
ನೋದಾಯಿತ್ ಮಾಂಡ್ ಸೊಭಾಣ್ ಸಂಸ್ತೊ ಸಾದರ್ ಕಲಾ ಮಾತ್ರ್ ನೈಂ ಕೊಂಕ್ಣಿ ಸಾಹಿತ್ ತೆಂಯೀ ಕವಿತಾ ವಿಶಾಂತ್ ಕಾಳ್ಜಿ ಕರ್ತಾ ಹಿ ಗಜಾಲ್ ಮ್ಹಾಕಾ ತರೀ ವರ್ತ್ಯಾ ಸಂತೊಸಾಚಿ. ಅಮರ್ ಕವಿ ಚಾ. ಫ್ರಾ. ಚ್ಯಾ ತೇಂಪಾರ್ ‘ಜಾಗೆ ಕವಿ’ ಮ್ಹಣ್ಚೊ ಏಕ್ ಪಂಗಡ್ ದಿಯೆಸೆಜಿಚ್ಯಾ ಕೊನ್ಶಾಂ-ಕೊನ್ಶಾಂನಿ ಅಸಲೆಚ್ ಕವಿತಾ ಬಸ್ಕಾ ಕರ್ತಾಲೊ. ಮಾಂಡ್ ಸೊಭಾಣ್ ಸಂಸ್ತ್ಯಾನ್ ವಯ್ರ್ ಉಲ್ಲೇಖ್ ಕೆಲ್ಲ್ಯಾ ಜಾಗೆ ಕವಿ ಮ್ಹಳ್ಳ್ಯಾ ಅಸಾಂಸ್ತಿಕ್ ಪಂಗ್ಡಾಥಾವ್ನ್ ಪ್ರೇರಣ್ ಜೊಡ್ಲಾಂ ಜಾಂವ್ಕ್ಯೀ ಪುರೊ. ಪೂಣ್ ಜಾಗೆ ಕವಿಂಚೊ ಆನಿ ಕವಿತಾ ಸೊಭಾಣಾಚೊ ಉದ್ದೇಶ್ ಏಕ್ಚ್ ಮ್ಹಣೊಂಕ್ ಕಷ್ಟ್. ‘ಕವಿಕ್ ಲೊಕಾ ಮುಕಾರ್ ಉಭೊ ಕರ್ಚೊ, ಜಾಗೆ ಕವಿಂಚೊ ಮುಖೇಲ್ ಉದ್ದೇಶ್’ (ಅಮರ್ ಕವಿ ಚಾ. ಫ್ರಾ. ಚೆಂ ಖಾಸ್ಗಿ ಪತ್ರ್, ತಾರೀಖ್ 08-05-1991) ತರ್, ಸಾಂತ್ ಅಂತೊನಿಚ್ಯಾ ಅಸ್ರ್ಯಾಚ್ಯಾ ಸಾಲಾಂತ್ ಸಾದರ್ ಜಾಲ್ಲ್ಯಾ ಸೊಭಾಣಾಚ್ಯಾ ಇಕ್ರಾವೇ ಜಮಾತೆಕ್ ವರ್ತ್ಯಾ ಉಮೆದಿನ್ ರಸ್ಗ್ರಾಯ್ಕ್ ಜಾವ್ನ್ ಪಾವ್ಲ್ಲ್ಯಾ ಮ್ಹಾಕಾ ಮನೋರಂಜನ್ ಆನಿ ಪ್ರಚಾರ್ ಮಾತ್ರ್ ಕವಿತಾ ಸೊಭಾಣಾಚೊ ಉದ್ದೇಶ್ಗೀ? ಅಸಲೊ ದುಬಾವ್ ಧೊಸುಂಕ್ ಲಾಗ್ಲಾ.
ಆಜ್ ಕಾಲ್ ಟಿ. ವಿ. ಚಾನೆಲಾಂನಿ ಸಯ್ತ್ ವಿನೋದಿಕ್ ಕವಿಗೋಷ್ಟಿ ಸಾದರ್ ಜಾತಾತ್. ವೊರಾಂಗಟ್ಲ್ಯಾನ್ ಪ್ರೈಮ್ ಟೈಮ್ರ್ ಚಲ್ಚ್ಯಾ ಹ್ಯಾ ಕಾರ್ಯಕ್ರಮಾಂಕ್ ಜಾಯ್ರಾತಾಂಯೀ ಬರಿಂ ಮೆಳ್ತಾನಾಂ, ಫಕತ್ ಅಪ್ಲ್ಯಾ ಬಾಯ್ಲೆಚೆರ್ ಮಾತ್ರ್ ಕವಿತಾ ಕರ್ಚೆ ಸುರೇಂದ್ರ ಶರ್ಮಾಕ್ಚ್ ಆಯ್ಕೊಂಚೆ ಮನಿಸ್ಯೀ ಆಸಾತ್. ಪೂಣ್ ಕವಿತಾ ಮ್ಹಳ್ಯಾರ್ ಕೇವಲ್ ಹಾಸೊಂಕ್ ವಕಾತ್ ಮಾತ್ರ್ಗೀ..? ವಾ ತಾಂತುನ್ ಹೆರ್ ಜೀವನಾನ್ಭೊಗ್ಯೀ ಜಾಯ್? ಕವಿಕ್ ಲೊಕಾ ಮುಕಾರ್ ಉಭೊ ಕರ್ಚೊ ಮ್ಹಣ್ಜೆ ಖಂಯ್ಚ್ಯಾ ಕಾಲೆತಿಚ್ಯಾ ಲೊಕಾ ಮುಕಾರ್..? ಸಾಲ್ಭರ್ ಲೊಕಾಚ್ಯಾ ಖೆಟಿಂತ್ ಆನಿ ಗವ್ಜೆಂತ್ ಎಕಾ ರಸ್ ಗ್ರಾಯ್ಕಾನ್ ಕವಿತಾ ಕಿತ್ಲಿ ಭೊಗ್ಯೆತ್..? ಕವಿತೆಚ್ಯಾ ಬಸ್ಕೆಕ್ ತಾಳಿಯೊ ಪೆಟ್ಚೊ ಲೋಕ್ ಕಿತ್ಲೊ ಗರ್ಜ್..? ಕವಿತಾ ಪೆಲ್ಯಾನ್ ಲೊಟುನ್ ಕವಿವಿಶಿಂ ವಿನೋದಿಕ್ ಉತ್ರಾಂನಿ ನಿರೂಪಣ್ ದಿಂವ್ಚೆಂ ಕಿತ್ಲೆಂ ಗರ್ಜ್..? ಹಿಂ ಮುಳಾಂವಿ ಸವಲಾಂ ಮ್ಹಜ್ಯಾ ಮತಿಂತ್ ಆತಾಂ ಬಿಡಾರ್ ಕರುಂಕ್ ಲಾಗ್ಲ್ಯಾಂತ್.
ಸಾಂತ್ ಅಂತೊನಿಚ್ಯಾ ಅಸ್ರ್ಯಾಂತ್ ನಿರ್ಗತಿಕ್ ಭುರ್ಗಿಂ, ಅಪ್ಲ್ಯಾಂನಿ ಸಾಂಡುನ್ ಘಾಲ್ಲಿಂ, ಪಿರಾಯೆಚಿಂ, ಪಿಡೆಚಿಂ, ಫುಡಾರಾಚ್ಯಾ ಖಂತಿನ್ ಖರ್ಗೊಂಚಿ ತರ್ನಾಟಿಂ ಸಯ್ತ್ ಆಸಾತ್. ತಾಂಕಾಂ ತಾಂಚೆಚ್ ಮ್ಹಳ್ಳೆಂ ಎಕ್ಸುರ್ಪಣ್, ಖಂತ್, ಬೆಜಾರಾಯ್, ಪಿಡಾ ಆನಿ ಹೆರ್ ವೈಯುಕ್ತಿಕ್ ಸಮಸ್ಸೆ ಆಸಾತ್. ತಾಂಕಾಂ ಪದಾಂ ನಾಚ್ ಫೊಕಾಣಾಂಚೆ ಮನೋರಂಜನ್ ಗರ್ಜೆಚೆಂ - ಹೆಂ ನಿಷ್ಟುರ್ ಸತ್ ಎರಿಕ್ ಒಝೇರಾಚ್ಯಾ ಸೂಕ್ಷ್ಮ್ ಮತಿನ್ ತಡವ್ ಕರುನ್ ತರೀ ಪಾರ್ಕಿಲ್ಯಾರೀ (ದೆಕುನ್ ತಾಣೆಂ ಮಹಿನ್ಯಾ ಭಿತರ್ ಅಸ್ರ್ಯಾಂತ್ ಜಿಯೆತೆಲ್ಯಾಂ ಖಾತಿರ್ ಏಕ್ ಪದಾಂ ಫೊಕಣಾಂ ಆನಿ ನಾಚಾಚಿ ಸಾಂಜ್ ಭಾಸಾಯ್ಲಿ) ಅಪ್ಲೆಸ್ತಕೀಂ ನಿಸ್ಸಹಾಯಕ್ ಹೆ ಲೊಕಾಮುಕಾರ್ ಕವಿತೇಕ್ ಉಭೊ ಕರ್ನ್ ಕವಿನ್ ನಾಗ್ಡೆಂ ಜಾಂವ್ಚೆ ಪಿಂತುರ್ ಪಾಶಾರ್ ಜಾಯ್ನಾತ್ಲೆಂ ಮನ್ಶಾಜಾಣ್ವಾಯೆಚೆಂ ದುಬ್ಳೆಪಣ್ಂಚ್ ಸೈ. ವಿಡಂಬನ್ ಮ್ಹಳ್ಯಾರ್ - ಮಾಂಡ್ ಸೊಭ್ಹಾಣ್ ಹರ್ ಕವಿತಾ ಬಸ್ಕೆಂತ್ ಎಕಾ ಬರ್ಯಾ ಕವಿತೇಕ್ ರುಪಯ್ ಪಾಂಯ್ಶಿ ನಗ್ದೆನ್ ಇನಾಮ್ ದೀವ್ನ್ ಮಾನ್ ಕರ್ತಾ.
ಏಕ್ ಪಾವ್ಟಿಂ ಇನಾಮ್ ಮೆಳ್ಲ್ಲ್ಯಾ ಕವಿಂಕ್ ಪರ್ತ್ಯಾನ್ ಇನಾಮ್ ನಾ- ಹ್ಯಾ ನಿಯಮಾ ಪಾಟ್ಲೆಂ ತರ್ಕ್ ಕಿತೆಂ ಆನಿ ಬರಿ ಕವಿತಾ ವಿಂಚುನ್ ಕಾಡುಂಕ್ ಮಾಪಾಂ ಕಸ್ಲಿಂ..? ಮ್ಹಜ್ಯಾ ಸಮ್ಜಣೆಕ್ ಮೆಳಾನಾಂ. ಅಸೊಂ, ಜಸೆಂ ಲತಾ ಮಂಗೇಶ್ಕರಾನ್ ಅಪ್ಣಾಕ್ ಫಿಲ್ಮ್ಫೇರ್ ಎವಾರ್ಡ್ ನಾಕಾತ್ ಮ್ಹಣ್ ಹೆರ್ ಗಾವ್ಪ್ಯಾಂಕ್ ಚಾನ್ಸ್’ ದಿಲ್ಲ್ಯಾಪರಿಂ, ತಸಲೆಂಚ್ ಲೊಜಿಕ್’ ಹಾಂಗಾಂ ಕಾಮ್ ಕರ್ತಾ ಜಾಂವ್ಕ್ ಪುರೊ. ಪೂಣ್ ಜೆದ್ನಾಂ ಹ್ಯಾ ಆದಿಂ ಇನಾಮಾಂ ಮೆಳ್ಲ್ಲೆ ಸಗ್ಳೆ ವೆದಿ ಥಾವ್ನ್ ಸಕಯ್ಲ್ ದೆಂವ್ಲೆ, ತೆನ್ನಾಂ ಲೊಕಾಕಡೆ ವಿಚಾರ್ತಾನಾಂ, ಕೋಣ್ ತಿ ಬಾಯ್ಲ್ ಮನಿಸ್, ಕೋಣ್ ತಿ ತುಮಿಂ, ಕೋಣ್ ತೊ ಲಾಂಬ್ ಮನಿಸ್ - ಅಶೆಂ ಬೊಬಾಟ್ತಾನಾಂ ಕವಿಯ್, ಕವಿತಾಯೀ ಮಾಂಚಿಯೆರ್ ಸಾಂತ್ ಅಂತೊನಿಚ್ಯಾ ಅಸ್ರ್ಯಾಂತ್ಲ್ಯಾಪರಿಂ ನಿರ್ಗತಿಕ್ ಉಭಿ ದಿಸ್ಲಿಂ. ‘
’ಜಳಾರ್’ ಮ್ಹಳ್ಳೊ ಸಬ್ದ್ ಅಯ್ಕೊನ್ಂಚ್ ಹಾಸ್ಚ್ಯಾ ಲೊಕಾ ಮುಕಾರ್ ಕವೀಕ್ ಉಭೊ ಕೆಲ್ಯಾರ್ ಹಾಚೇ ವರ್ತೆಂ ಕಿತೆಂಯ್ ಅಯ್ಕೊಂಚೆ ಪರಿಂ ನಾಂ. ಇಂಡಿಯನ್ ಆಯಡಲ್ ಆನಿ ತೇ ಉಪ್ರಾಂತ್ ಸುರು ಜಾವ್ನ್ ಹ್ಯಾ ದೇಸಾಂತ್ ಆಜ್ ಹರ್ ತಾಲೆಂತ್ ಎಸ್ಎಮ್ಎಸ್ ಅನಿ ಲೊಕಾಭಿಪ್ರಾಯೆನ್ ಠರಾಂವ್ಚ್ಯಾ ಹ್ಯಾ ಕಾಳಾರ್ ಕವಿತೆಕ್ ಸಯ್ತ್ ಹೆ ದೀಸ್ ಆಯಿಲ್ಲೆ ಪಳೆಂವ್ಕ್ ಖರೆಚ್ ಜಿವಾಕ್ ಆಕ್ಲಾಸ್ ಭೊಗ್ತಾತ್. ಕೊಂಕ್ಣೆಂತ್ ಲೊಕಾ ರುಚಿಚೆರ್ ಆನಿ ಅಭಿಪ್ರಾಯಾಂಚೆರ್ ತಾಲೆಂತಾ ಮಾಪ್ಲ್ಲಿಂ ಕಾರ್ಯಿಂ ಹೇ ಆದಿಂಯ್ ಜಾಲ್ಯಾಂತ್ ಜಾಂವ್ಕ್ ಪುರೊ. ಪೂಣ್ ಅಭಿಪ್ರಾಯ್ ದಿಂವ್ಚೊ ಲೋಕ್’ ಖೈಂಚ್ಯಾ ಕಾಲೆತಿಚೊ ಹೆಂ ವರವ್ನ್ ಪಳಂವ್ಚೆಂಯ್ ತಿತ್ಲೆಂಚ್ ಗರ್ಜ್. ಜರ್ ಅದ್ಲೆ ಹಜಾರ್ ಬೆಜಾರಾಯೊ ಕುಶಿಕ್ ಲೊಟುನ್ ಹಾಸೊಂಕ್ ಮಾತ್ರ್ ಕಳ್ಚ್ಯಾ ನಿಶ್ಕಲ್ಮಶ್ ಭೊಗ್ಣಾಂಚ್ಯಾ ಭುರ್ಗ್ಯಾಂ ಮುಕಾರ್ ಕವಿತಾ ವಾಚುನ್, ಬರಿ ಖೈಂಚಿ ಮ್ಹಣ್ ಠರಾಂವ್ಕ್ ಗೆಲ್ಯಾರ್, ಕವಿಕ್ ಲೊಕಾ ಮುಕಾರ್ ಉಭೆಂ ಕರ್ನ್ ಕವಿತೆಕ್ ನಾಗ್ಡೆಂ ಕೆಲ್ಲೆ ಪರಿಂ ಜಾಯ್ತ್ ಮ್ಹಣ್ ಮ್ಹಜಿ ಖಾಲ್ತಿ ಅಭಿಪ್ರಾಯ್.
ನಿಮಾಣೆ ಶರೆ:
ಏಕ್: ಬಸ್ಕೆಚ್ಯಾ ಅಧ್ಯಕ್ಷಾನ್ ಸಂಪ್ಣೇರ್ ಅಪ್ಲಿ ಕವಿತಾ ವಾಚ್ಲಿ. ಹರ್ ಕವಿತೆ ಪಯ್ಲೆಂ ಕವಿಂಚಿ ಪಾರ್ಪೊಳ್ (ವಿನೋದಿಕ್) ಥರಾನ್ ವಳಕ್ ದಿಲಿ. ಪುಣ್ ಬಸ್ಕೆಂತ್ ವಾಚ್ಲೆಲ್ಯಾ ಕವಿತೆವಿಶಿಂ ದೋನ್ ಸಬ್ದ್ ಉಲಂವ್ಚೆಂ ಅಧ್ಯಕ್ಷಾಚೆಂ ಧರ್ಮ್ ವಿಸರ್ಲೊ.
ದೋನ್: ಹ್ಯಾ ಷರಾಕ್ ಆನಿ ಸಾಹಿತಾಕ್ ಕಸಲೊಚ್ ಸಂಬಂಧ್ ನಾ ತರೀ, ಖೈಂಗೀ ಕೊನ್ಶಾಂತ್ ಮ್ಹನ್ಶಾಜೀವ್ ಪಿಗಳ್ಟಾಂ ದೆಕುನ್ ಬರಯ್ತಾಂ. ಅಪುರ್ಬಾಯೆನ್ ಬಸೊನ್ ಕಾರ್ಯಕ್ರಮ್ ಆಯ್ಕಾಲ್ಯಾ ಆಸ್ರ್ಯಾಂತ್ಲ್ಯಾ ಭುರ್ಗ್ಯಾಂಕ್ ತಸೆಂ ವ್ಹಡಾಂಕ್ ಲ್ಹಾನ್ ಏಕ್ ಕುಡ್ಕೊ ಗೊಡ್ಶೆಂ ವಾಂಟ್ಯೆತೆಂ. ಮ್ಹನ್ಶಾ ಕಾಳ್ಜಾಂನಿ ಸಂತೊಸ್ ನಾಚ್ತೊ ಆನಿ ಕವಿತೆಕ್, ಖರೆಂ ಸಾಂಗೊಂ..? ಸರ್ಗ್ ಮೆಳ್ಟೊ...!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
