ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 16
ಬೊಂಬೈತ್ ಮೆಲ್ವಿನ್ ಆನಿಂ ಶೀನಾ ಯೇವ್ನ್ ದೀಸ್ ಸಬಾರ್ ಸರ್ಲೆ. ವಿಶೇಷ್ ಕಸಲಿಂಯ್ ಘಡಿತಾಂ ಹ್ಯಾ ಮಧೆಂ ಘಡ್ಲಿನಾಂತ್. ಆವಯ್ ಬಾಪಾಯ್ಕ್ ಸಾಂಡುನ್ ಆಯಿಲ್ಲೆಂ, ಆಪ್ರಾಧಿ ಕೊಶೆಡ್ದ್ ಮೆಲ್ವಿನಾಕ್ ಕಾಂತೈತಾಲೆಂ. ಜೆಸ್ಸಿ ವಿಷ್ಯಾಂತ್ ನಿಯಾಳ್ನ್ ಕಾಳ್ಜ್ ರಡ್ತಾಲೆಂ. ತರೀ, ದುಃಖ್ ವಿಸ್ರೊಂಕ್ ಬೊಂಬಯ್ ಆಯಿಲ್ಲ್ಯಾ ತಾಣೆ, ದುಃಖ್ ವಿಸ್ರಾಜಾಯಿಚ್ ಆಸ್ಲ್ಲೆಂ.
ರಾಜುಕ್ ಥೊಡ್ಯಾ ದಿಸಾಂಬಿತರ್ ಜಾಪ್ ದಿತಾಂ ಮ್ಹಣ್ ತಾಣೆಂ ಸಾಂಗ್ಲ್ಲೆಂ. ಶಿಕಾಪ್ ಆಸ್ಲ್ಲ್ಯಾ ತಾಕಾ ಖಂಯ್ಸರ್ ಪುಣಿ ಕಾಮ್ ಮೆಳಾತ್. ರಾಜುಚ್ಯಾ ಖುಸ್ತಾರ್ ದೀಸ್ ಸಾರ್ಚೆ ಕೆದಿಂಚ್ ಬರೆಂ ನ್ಹಂಯ್. ಆಳ್ಶ್ಯಾಬರಿ ಘರಾ ಬಸೊನ್ ಸರ್ಲ್ಲ್ಯಾ ಘಡಿತಾಂಚೊ ವಿಚಾರ್ ಕೆಲ್ಯಾರ್ ದುಃಖ್ ಥಾಂಬ್ಚೆಂನಾ. ಬಗಾರ್ ಖಂಯ್ಪುಣಿ ಕಾಮ್ ಪಳೆಲ್ಯಾರ್ ತಶೆಂ ಪುಣಿ ಖಂತ್ ಬೆಜಾರಾಯ್ ಪಯ್ಸ್ ಸರಾತ್. ದೆಕುನ್ ಆಜ್ ರಾಜುಕ್ ಹ್ಯಾ ವಿಷ್ಯಾಂತ್ ತಿಳ್ಶಿತಾಂ ಮ್ಹಣ್ ತಾಣೆಂ ನಿರ್ಣಯ್ಸಿಲೆಂ. ಪುಣ್, ತ್ಯಾಚ್ ದಿಸಾ ಏಕ್ ಆನಾಹುತ್ ಘಡ್ಲೆಂ.
ಬ್ರೆಸ್ತಾರಾಚೊ ದೀಸ್ ತೊ. ಸಕಾಳಿಂಚಿಂ ಇಕ್ರಾ ವೊರಾಂ. ರಾಜು ಸದಾಂಚೆಬರಿ ಕಾಮಾಕ್ ಗೆಲ್ಲೊ. ಮೆಲ್ವಿನ್ ಬಿಡಾರಾಂತ್ ಬಸೊನ್ ಜನೆಂತ್ಲ್ಯಾನ್ ಭಾಯ್ರ್ ರಸ್ತ್ಯಾಕ್ ದೀಷ್ಟ್ ಲಾವ್ನ್ ಆಸ್ಲ್ಲೊ. ಲೊಕಾಚಿ ಖೆಟ್ ನಾತ್ಲ್ಲಿ ತರೀ, ವಾಹನಾಂ ಪಾತಳ್ ಹೆಣೆಂತೆಣೆಂ ಧಾಂವ್ತಾಲಿಂ. ಗೀಮ್ಚೆಂ ದೀಸ್ ಜಾಲ್ಲ್ಯಾನ್ ಸುರ್ಯಾಚ್ಯಾ ಪ್ರಖರ್ ಕೀರ್ಣಾಂಚೊ ದಾವ್ ಸೊಸುಂಕ್ ಆಸಾಧ್ಯ್ ಆಸ್ಲ್ಲೊ. ಶೀನ ಖಟ್ಲ್ಯಾರ್ ಆಡ್ ಪಡೊನ್ ಕಿತೆಂಗಿ ಚಿಂತ್ತಾಲೊ.
ಟಕ್..ಟಕ್.....ಭಾಯ್ರ್ ದಾರ್ ಥಾಪುಡ್ಲೊಲೊ ಆವಾಜ್ ಜಾಲೊ. ಮೆಲ್ವಿನಾಕ್ ಅಜ್ಯಾಪ್ಚ್ ಜಾಲೆಂ. ಹ್ಯಾ ವೆಳಾರ್ ದಾರ್ ಕೊಣ್ ಬೊಡೈತಾ? ರಾಜು ಪಾಟಿಂ ಪುಣಿ ಆಯ್ಲೊಗಾಯ್...? ವ, ರಾಜುಚೆ ಮಿತ್ರ್ ಕೊಣೀ ತಾಕಾ ಸೊಧುನ್ ಘರಾ ಆಯ್ಲೆ ಕೊಣ್ಣಾ......ಛೆ, ಹ್ಯಾ ವೆಳಾರ್ ತೊ ಆಫೀಸಾಕ್ ಗೆಲಾ ಮ್ಹಣ್ ತೆ ನೆಣಾಂತ್ಗಿ? ಮೆಲ್ವಿನ್ ಚಿಂತುನ್ಂಚ್ ಆಸ್ತಾನಾ, ಪತ್ಯಾನ್ ದಾರ್ ಠೊಕೊಲ್ಲೊ ಆವಾಜ್ ಆಯ್ಕಾಲೊ. ಸಟ್ಟ್ ಕರ್ನ್, ಮೆಲ್ವಿನ್ ಉಟ್ಲೊ ಆನಿಂ ದಾರಾಲಾಗಿಂ ವಚೊನ್ ತಾಣೆಂ ದಾರ್ ಉಘಡ್ಲೆಂ. ತ್ಯಾ ಕ್ಷಣಾ, ಭಾಯ್ರ್ ಉಬೊ ಆಸ್ಲ್ಲ್ಯಾ ವ್ಯಕ್ತಿಚೆರ್ ನ್ಹಂಯ್, ವ್ಯಕ್ತಿಂಚೆರ್ ದೀಷ್ಟ್ ಪಡ್ತಾನಾ ತಾಚಿಂ ಅಂತರ್ಮಳಾಂ ಉಡ್ಲಿಂ. ಕಾಳಿಜ್ ಜ್ಯೋರಾನ್ ಉಡೊಂಕ್ ಲಾಗ್ಲೆಂ. ತಾಳ್ಯಾಚಿ ಶೆಳ್ ಸುಕೊನ್, ಆಪುಣ್ ಮೊನೊ ಜಾಲ್ಲ್ಯಾಬರಿ ಬೊಗ್ಲೆಂ ತಾಕಾ.
ದಾರಾರ್, ಗಂಭೀರ್ ಮುಖ್ ಘೆವ್ನ್ ಎಕ್ಲೊ ಪೊಲಿಸ್ ಸಬ್-ಇನ್ಸ್ಪೆಕ್ಟರ್ ಆನಿಂ ದೋಗ್ ಪೊಲಿಸ್ ಉಬೆ ರಾವ್ಲ್ಲೆ. ಗಂಭೀರ್ ತಾಳ್ಯಾನ್, ಇಂಗ್ಲಿಷಾನ್ ತೊ ಉಲೈಲೊ - "ತುಂ ಕೋಣ್.....?"
"ಹಾಂವ್...ಹಾಂವ್......ರಾವ್, ತುಮಿಂ ಕೊಣಾಕ್ ಸೊಧುನ್ ಆಯ್ಲ್ಯಾತ್?" ಥೊಡೆಂ ಧೈರ್ ಘೆವ್ನ್ ತಾಣೆಂ ವಿಚಾರ್ಲೆಂ.
ಕ್ರೂರ್ ದಿಷ್ಟಿನ್ ಇನ್ಸ್ಪೆಕ್ಟರಾನ್ ತಾಕಾ ದೆಖ್ಲೆಂ. ಆನಿಂ ಬೊಲ್ಸಾಂತ್ಲೆಂ ಏಕ್ ಕಾಗದ್ ಭಾಯ್ರ್ ಕಾಡ್ನ್ ಮೆಲ್ವಿನಾಕ್ ತಾಣೆಂ ದಾಕೊವ್ನ್ ಮ್ಹಳೆಂ - "ಪಳೆ, ಹೆಂ ವಾರಂಟ್ - ಶೀನ ಮ್ಹಳ್ಳ್ಯಾ ಮಂಗ್ಳೂರ್ಚಾ ಚೊರಾಕ್ ಖೈದ್ ಕರುಂಕ್. ತೊ ಹಾಂಗಾಸರ್ ಆಸಾ ಮ್ಹಣ್ ಆಮ್ಕಾಂ ಖಚಿತ್ ಜಾಲಾಂ. ಹಾಂವ್ ಹೆಂ ಘರ್ ಸೊಧುಂಕ್ ಆಯ್ಲಾಂ"
ಮೆಲ್ವಿನಾಚೆ ಹಾತ್-ಪಾಯ್ ಕಾಂಪ್ಲೆ. ನಿಮಾಣೆ......ನಿಮಾಣೆಂ ಶೀನ ಪೊಲಿಸಾಂಚ್ಯಾ ಹಾತಾಂತ್ ಸಾಂಪಡ್ಲೊಗಿ ತರ್...... ದೆವಾ ಆಪ್ಣಾಚಿ ಗತ್ ಕಿತೆಂ?
ಎಕ್ಲೊ ಪೊಲಿಸ್ ದಾರಾರ್ಚ್ ಉಬೊ ರಾವ್ಲೊ. ಇನ್ಸ್ಪೆಕ್ಟರ್ ಆನಿಂ ದುಸ್ರೊ ಪ್ಲಿಸ್ ಕುಡಾ ಬಿತರ್ ಸರ್ಲೆ. ಶೀನ.....ಸಗ್ಳೊಚ್ ಘಾಬರ್ನ್ ಗೆಲ್ಲೊ. ಪೊಲಿಸಾಂಕ್ ಪಳೆವ್ನ್ ಧಾಂವೊಂಕ್ ತಾಣೆಂ ಪಳೆಲೆಂ. ಪುಣ್, ದೊಗಾಂನಿಯೀ ತಾಕಾ ಧರ್ಲೆಂ. ಪುಣ್, ದೊಗಾಂನಿಯಿ ತಾಕಾ ಧರ್ಲೆಂ. ರಾಗಾನ್ ಇನ್ಸ್ಪೆಕ್ಟರಾನ್ ತಾಚ್ಯಾ ಕಾನ್ಸುಲಾಕ್ ಬಳಾನ್ ಮಾರ್ಲೆ. "ಆಮ್ಮಾ....!"ದುಃಖಾಚಿ ಬೊಬಾಟ್ ಮಾರ್ಲಿ ಶೀನಾನ್. ಮೆಲ್ವಿನಾಚ್ಯಾ ದೊಳ್ಯಾನಿಂಯಿ ದುಃಖಾಂ ಭರ್ಲಿಂ.
"ಇನ್ಸ್ಪೆಕ್ಟರ್...." ತಡ್ವುಂಕ್ ತಾಂಕಾನಾಸ್ತಾಂ ಬೋಬ್ ಮಾರ್ಲಿ ಮೆಲ್ವಿನಾನ್. ಶೀನಾಚ್ಯಾ ಬಿರ್ಮೊತೆ ಸಾಂಗಾತಾ, ಇನ್ಸ್ಪೆಕ್ಟರಾಚೊ ಕಠಿಣ್ ಕ್ರೋಧ್ ಆಯ್ಲೊ ತಾಕಾ. "ತುವೆಂ ಆತ್ತಾಂ ಕೆಲ್ಲೆಂ ಕಾಮ್, ತುಜ್ಯಾ ಹುದ್ದ್ಯಾಕ್ ಸಹಜ್ಲ್ಲೆಂ ನ್ಹಂಯ್. ಎಕಾ ಮನ್ಶಾಕ್ ಮಾರುಂಕ್ ತುಕಾ ಅಧಿಕಾರ್ ಕೊಣೆಂ ದಿಲಾ?"
ಅಧಿಕಾರಿಕ್ ವಿಜ್ಮಿತ್ ಜಾಲ್ಲೆಂ. ನಂಜ್ಯಾಳಿ ಹಸೊ ತಾಚ್ಯಾ ವೊಂಟಾಂಚೆರ್ ಉದೆಲೊ. "ಭುರ್ಗ್ಯಾ, ಮ್ಹಾಕಾ ಕಾನುನಾಂ ತುಂ ಶಿಕೈನಾಕಾ. ಜೆಂ ಕಿತೆಂ ಹಾಂವೆಂ ಕೆಲಾಂ. ಆನಿಂ ತ್ಯಾಚ್ ಪ್ರಮಾಣೆಂ, ತುಕಾಯ್ ಖೈದ್ ಕರ್ತಾಂ.
ಮೆಲ್ವಿನಾಕ್ ಶೆಳೊ ಘಾಮ್ ಸುಟ್ಲೊ. ಶೀನ ಸಾಂಗಾತಾ, ಆಪುಣ್ಯಿ ಜೈಲಾಕ್....! ಸತ್ತ್ಯಾನಾಸ್ ಜಾಲೆಂ. ತೊ ಸಗ್ಳೊಚ್ ಕಳ್ವಳ್ಳೊ ಆನಿಂ ರಡೊನ್ ಮ್ಹಣಾಲೊ - "ಇನ್ಸ್ಪೆಕ್ಟರ್.......ಮ್ಹಾಕಾ ಆನಿಂ ಹ್ಯಾ ಚೊರ್ಯೆಕ್ ಕಸಲೊಯ್ ಸಂಬಂಧ್ ನಾ..."
"ತೆಂ ಪೂರಾ ಉಪ್ರಾಂತ್ ಆಮಿಂ ಪಳೆಯಾಂ. ತುಂ ಹ್ಯಾ ಚೊರ್ಯೆಂತ್ ನಾಂಯ್ ತರ್, ತುಜಿ ಸುಟ್ಕಾ ಜಾತೆಲಿ. ಆತಾಂ ಅಮ್ಚೆಂ ಸಾಂಗಾತಾ ಯೇಂವ್ಕ್ ಭಾಯ್ರ್ ಸರ್
"ಪುಣ್....ಪುಣ್.... ಹ್ಯಾ ಘರಾ ಧನಿಯಾಂಕ್ ಖಬಾರ್ ಕೊಣ್ ದಿತಾ? ಇನ್ಸ್ಪೆಕ್ಟರ್, ಹಾಂವ್ ತಾಚ್ಯಾ ಘರಾಂತ್ "ಪೇಯಿಂಗ್ ಗೆಸ್ಟ್’ ಜಾವ್ನ್ ಆಸಾ. ಬೊಂಬಯ್ ಕಾಮ್ ಸೊಧುನ್ ಹಾಂವ್ ಆಯಿಲ್ಲೊ" ಮೆಲ್ವಿನ್ ಘಳ್ಘಳಿತ್ತ್ ರದ್ಲೊ
ಇನ್ಸ್ಪೆಕ್ಟರಾಕ್ ಹ್ಯಾ ತರ್ನಾಟ್ಯಾ ಭುರ್ಗ್ಯಾಚಿ ಬಿರ್ಮೊತ್ ದಿಸ್ಲಿ ಖರಿ. ಪುಣ್ ತಾಣೆಂ ಕರ್ತವ್ಯಾ ಪರ್ಮಾಣೆಂ ಮೆಲ್ವಿನಾಕ್ಯಿ ಪೊಲಿಸ್ ಸ್ಟೇಶನಾಕ್ ವೊರೊಂಕ್ ಆಸ್ಲ್ಲೆಂ. ಸತ್ ನೀತ್......ತಿ ತನ್ಖಿ ಜಾಲ್ಯಾ ಉಪ್ರಾಂತ್ ಕಳ್ತೆಲಿ.
ತಗ್ಸಾಲ್ಯಾ ಸ್ವರಾನ್ ತೊ ಮ್ಹಣಾಲೊ - ’ತುಜ್ಯಾ ಘರ್ಚ್ಯಾ ಧನಿಯಾಚೊ ಆಫಿಸಾಚೊ ಎಡ್ರೆಸ್ ಮ್ಹಕಾ ದಿ. ತಾಕಾ ಆಮಿಂ ಖಬಾರ್ ದಿತಾಂವ್. ಪಯ್ಲೆಂ, ಆಮಿಂ ಪೊಲಿಸ್ ಸ್ಟೇಶನಾಕ್ ಚಲ್ಯಾಂ. ಉಪ್ರಾಂತ್, ಮುಖ್ಲೆಂ ಥಂಯ್ಚ್ ನಿರ್ಣಯ್ಸಿಯಾಂ."
"ಮೆಲ್ವಿನಾಕ್ಯಿ ನ್ಹೆಸೊನ್ ಭಾಯ್ರ್ ಸರ್ಚೆಂ ಪಡ್ಲೆಂ. ಇನ್ಸ್ಪೆಕ್ಟರಾನ್ ದಾರಾಕ್ ಬೀಗ್ ಮಾರ್ಲೆಂ. ಉಪ್ರಾಂತ್ ಸಕ್ಲಾ ಯೇವ್ನ್ ತೆ ಜೀಪಾರ್ ಬಸ್ಲೆ. ಜೀಪ್ ಮಾಹಿಮ್ ಪೊಲಿಸ್ ಸ್ಟೇಶನಾಚ್ಯಾ ವಾಟೆನ್ ಧಾಂವೊಂಕ್ ಲಾಗ್ಲೆಂ.
ಶೀನ ಮೆಲ್ವಿನಾಚ್ಯಾ ತೊಂಡಾಕ್ ದೆಖ್ತಾಲೊ. ತಾಚೆಂ ಮುಖ್ ಸಗ್ಳೆಂ ಕಂಗಾಲ್ ಜಾಲ್ಲೆಂ. ಆತಾಂ ಆಪುಣ್ ಪೊಲಿಸಾಂಚ್ಯಾ ಹಾತಾಂತ್ ಸಾಂಪಡ್ಲೊಂ ಉಪ್ರಾಂತ್. ಬಚಾವಿ ನಾ. ತೆ ಆತಾಂ ಆಪ್ಣಾಕ್ ಮಂಗ್ಳೂರ್ ಧಾಡ್ತೆಲೆ. ಥಂಯ್ ನ್ಯಾಯಸ್ಥಾನಾಕ್ ಆಪ್ಣಾಕ್ ವ್ಹೊರ್ತೆಲೆ. ಜೈಲಾಚೆಂ ಮೀಟ್ ಚಾಕೊಂಕ್ ಮೆಳ್ಚೆಂ ತೆಂ ಖಂಡಿತ್. ಆತಾಂ ಆಪ್ಣಾ ಒಟ್ಟುಕ್ ಮೆಲ್ವಿನ್ಯಿ ಸಾಂಪಡ್ಲಾಂ. ಪೊಲಿಸ್ ತಾಕಾ ಕಿತೆಂ ಕರ್ತಿತ್?
ತಗ್ಸಾಲ್ಲ್ಯಾ ಸ್ವರಾನ್ ಶೀನ, ತುಳುಭಾಷೆನ್ ಮೆಲ್ವಿನಾಲಾಗಿಂ ಮ್ಹಣಾಲೊ. ಕಿತೆಂ ಚಿಂತ್ತಾಯ್ ಮೆಲ್ವಿನ್? ಮ್ಹಜ್ಯಾ ವರ್ವಿಂ ತುಕಾಯಿ ಹೆ ಕಷ್ಟ್ ಆಯಿಲ್ಲ್ಯಾಕ್ ಮ್ಹಾಕಾ ಶಿರಾಪ್ ಘಾಲ್ತಾಯ್ಗಿ?"
ಮೆಲ್ವಿನಾಚೆಂ ಕಾಳಿಜ್ ಮುಡ್ಡಾಲ್ಲ್ಯಬರಿ ಜಾಲೆಂ. ...ನಾ ಶೀನ. ತಶೆಂ ಮ್ಹಣಾನಾಕ್. ಹಾಂವ್ ಇತ್ಲೆಂಚ್ ಚಿಂತ್ತಾ - ತುಕಾ ಆನಿಂ ಮ್ಹಾಕಾ ಆತಾಂ ಮಂಗ್ಳೂರ್ ವರ್ತೆಲೆ. ಮಂಗ್ಳೂರ್ ಮ್ಹಾಕಾ ವಚೊಂಕ್ ಮನ್ ನಾತ್ಲ್ಲ್ಯಾ ವೆಳಾರ್......"
"ತುಂ ಕಾಂಯ್ ಬಿಂಯೆನಾಕಾ ಮೆಲ್ವಿನ್....." ಮಧೆಂಚ್ ಶೀನಾ ಮ್ಹಣಾಲೊ, "ತುಂ ಪೊಲಿಸ್ ಸ್ಟೇಶಾನಾಂತ್ ತುಜೆಂ ನಾಂವ್ ಬದ್ಲುನ್ ಸಂಗ್. ಪೊಲಿಸ್ ತುಕಾ ಕಾಂಯ್ ಕರ್ಚೆನಾಂತ್. ರಾಜು ಯೇವ್ನ್ ತುಕಾ ಸುಟೈತಾಲೊ"
"ಶೀನ..."
"ಹಾಂವೆಂ ಸಾಂಗ್ಲ್ಲ್ಯಾಬರಿ ಕರ್ ತುಂ, ಮ್ಹಜೆಖಾತಿರ್ ತುವೆಂ ಮರ್ಯಾದ್ ಹೊಗ್ಡಾಂವ್ಚಿನಾಕಾ"
ಪೊಲಿಸ್ ಸ್ಟೇಶನ್ ಆಯ್ಲೆಂ. ಜೀಪಾವಯ್ಲೆಂ ಸಕ್ಕಡ್ ದೆಂವ್ಲೆ ಸ್ಟೇಶನ್ ರಾಯ್ಟರಾನ್, ಶೀನ ಆನಿಂ ಮೆಲ್ವಿನಾಚೆಂ ಆನಿಂ ಇನ್ಸ್ಪೆಕ್ಟರಾಚೆಂ ಸಾಂಗ್ಣೆಂ ಬರವ್ನ್ ಘೆತ್ಲೆಂ. ಉಪ್ರಾಂತ್ ಶೀನಾಕ್ ಲೊಕಪ್ಪಾಂತ್ ಘಾಲೆಂ.
"ತುಂ ಮ್ಹಜ್ಯಾ ಸಾಂಗಾತಾ ಯೆ" ಇನ್ಸ್ಪೆಕ್ಟರ್ ಮೆಲ್ವಿನಾಕ್ ಆಫ್ಲ್ಯಾ ಕುಡಾಂತ್ ವ್ಹರ್ನ್ ಗೆಲೊ. "ಬಸ್ ಥಂಯ್ ಕದೆಲಾರ್..." ತಾಣೆಂ ಫರ್ಮಾಯ್ಲೆಂ.
"ಆತಂ ಸಾಂಗ್, ತುಜ್ಯಾ ರಾಜುಚೆಂ ಆಫಿಸ್ ಖಂಯ್ಚೆ?"
ಮೆಲ್ವಿನಾನ್ ರಾಜುಚ್ಯಾ ಆಫಿಸಾಚೆಂ ನಾಂವ್ ಸಾಂಗ್ಲೆಂ. ಟೆಲಿಪೊನ್ ಡ್ರಾಯ್ರೆಕ್ಟರಿರ್ ಪಳೆವ್ನ್, ತಾಚ್ಯಾ ಆಫಿಸಾಕ್ ಇನ್ಸ್ಪೆಕ್ಟರಾನ್ ಫೋನ್ ಕೆಲೆಂ. ರಾಜು ಫೋನಾಚೆರ್ ಮೆಳ್ಳೊ. ಇನ್ಸ್ಪೆಕ್ಟರಾನ್ ಕೂಡ್ಲೆ ತಾಕಾ ಪೊಲಿಸ್ ಸ್ಟೇಶನಾಕ್ ಯೇಂವ್ಕ್ ಸಾಂಗ್ಲೆಂ.
ಮೆಲ್ವಿನ್ ಕಂಗಾಲ್ ಜಾವ್ನ್ಂಚ್ ಇನ್ಸ್ಪೆಕ್ಟರಾನ್ ಕರ್ಚಿ ಸರ್ವ್ ಕಾಮಾಂ ದೆಖ್ತಾಲೊ. ರಾಜುಕ್ ಫೋನ್ ಕರ್ತಚ್, ಇನ್ಸ್ಪೆಕ್ಟರ್ ಏಕ್ ಕಾಗದ್ ಘೆವ್ನ್ ಕಿತೆಂಗಿ ಬರಂವ್ಕ್ ಬಸ್ಲೊ. ದೋನ್ ಮಿನುಟಾಂ ಪಾಶಾರ್ ಜಾಲಿಂ. ಕೊಣೀ ಉಲೈಲೆನಾಂತ್.
ಎಕಾಚ್ಚಾಣೆ ಇನ್ಸ್ಪೆಕ್ಟರಾನ್ ತಕ್ಲಿ ಉಕಲ್ಲಿ. ಮೆಲ್ವಿನಾಚ್ಯಾ ದೊಳ್ಯಾಂಕ್ಚ್ ಪಳೆವ್ನ್ ತೊ ಮ್ಹಣಾಲೊ "ತುವೆಂ ...ತುಜೆಂ ನಾಂವ್ ಬದ್ಲುನ್ ಕಿತ್ಯಾಕ್ ಸಾಂಗ್ಲೆಂಯ್ ಮ್ಹಾಕಾ?"
ಮೆಲ್ವಿನ್ ಶಿರಿಂ ಸುಕ್ಲೊ ಆಪ್ಣೆ ನಾಂವ್ ಬದ್ಲಿಲಿ ಖಬಾರ್ ಇನ್ಸ್ಪೆಕ್ಟರಾಕ್ ಕಶಿ ಕಳ್ಳಿ ’ಮೆಲ್ವಿನ್’ ಆಸ್ಲ್ಲೆಂ ’ಒಲ್ವಿನ್’ ಮ್ಹಣ್ ಸಾಂಗ್ಲಾಂ - ತೆಂಯಿ ಶೀನಾಚ್ಯಾ ವತ್ತಾಯೆಕ್. ಪುಣ್ ಹಿ ಖಬಾರ್ ಇನ್ಸ್ಪೆಕ್ಟಾರಾಕ್ ಕಳೊಂಕ್ ಕಾರಣ್ ಕಿತೆಂ?
"ತುಜೆಂ ಖರೆಂ ನಾಂವ್ ಕಿತೆಂ ಸಾಂಗ್ ಮ್ಹಾಕಾ". ಬಾರಾಧಿಕ್ ತಾಳ್ಯಾನ್ ಇನ್ಸ್ಪೆಕ್ಟರಾನ್ ವಿಚಾರ್ಲೆಂ; "ಪೊಲಿಸ್ ಅಧಿಕಾರಿಲಾಗಿಂ ಫಟಿ ಆನಿಂ ದಗಲ್ಬಾಜ್ ಚಲಾನಾ ಫಟಿ ಕರಿತರಿ ಸಾಂಗ್ಶಿ, ತುಜೊ ಫೊಂಡ್ ತುಂಚ್ ಖೊಂಡ್ತೊಲೊಯ್..."
ಮೆಲ್ವಿನ್ ಜಾಪ್ ದೀಂವ್ಕ್ ವದ್ದಾಡ್ಲೊ. ಪುಣ್ ಮತಿಂತ್, ಕಿತೆಂ ಸಾಂಗ್ಚೆಂ ಮ್ಹಣ್ ಸ್ಥಿರ್ ಕರುಂಕ್ ತಾಚ್ಯಾನ್ ಜಾಲೆಂನಾ. ಖರೆಂ ನಾಂವ್ ದಿಂವ್ಚೆಂ, ವ, ತೆಂಚ್ ಫಟ್ಕಿರೆಂ ನಾಂವ್ ಕರೆಂ ಮ್ಹಣ್ ಭಾಸ್ಚೆಂ?
"ಬರೆಂ.....ತುಕಾ ಉಲಂವ್ಕ್ ಜೀಬ್ ಪರ್ತಾನಾ. ಹಾಕಾ ತುಂಚ್ ಮುಖಾರ್ ಪಶ್ಚಾತ್ತಾಪ್ ಪಾತೊಲೊಯ್. ಆತಾಂ ಸಾಂಗ್, ತುಂ ಹ್ಯಾ ಚೊರಿಯೆಚ್ಯಾ ಅಪ್ರಾಧಾಂತ್ ಭರ್ಸೊಂಕ್ ನಾ ಮ್ಹಣ್ತಾಯ್, ತುಕಾ ಸತ್ ಉಲಂವ್ಕ್ ಕಿತೆಂ ತರ್?"
"ಹಾಂವ್ ಸತ್ಚ್ ಉಲೈತಾಂ ಇನ್ಸ್ಪೆಕ್ಟರ್, ಮ್ಹಜೆಂ ನಾಂವ್ ಒಲ್ವಿನ್"
"ತೊಂಡ್ ಧಾಂಪ್...ಗರ್ಜಾಲೊ ಇನ್ಸ್ಪೆಕ್ಟರ್, "ತುವೆಂ ಆನಿಂ ಶೀನಾನ್ ಜೀಪಾರ್ ಉಲೈಲ್ಲಿ ಉತ್ರಾಂ ಮ್ಹಾಕಾಸಮ್ಜೊಂಕ್ ಕಾರಣ್ ನಾ ಮ್ಹಣ್ ಚಿಂತ್ಲೆಯ್ಗಿ? ಹಾಂವೀ ತುಜೊ ಗಾಂವ್-ಭಾವ್, ಮಂಗ್ಳೂರ್ಚ್ಯಾ ಇಜಯ್ ವಾಡ್ಯಾಂತ್ಲೊ. ಮ್ಹಜೆಂ ನಾಂವ್ ಚಾರ್ಲ್ಸ್ ಪಿರೇರಾ, ಕಳ್ಳೆಂಗಿ? ತುಳು ಭಾಶೆನ್ ಎಕಾಮೆಕಾಲಾಗಿಂ ಉಲವ್ನ್, ನಾಂವ್ ಲಿಪಂವ್ಚಿ ಮಾಂಡಾವಳ್ ಕೆಲ್ಯಾರ್ ಮ್ಹಾಕಾ ಕಿತೆಂ ಕಳ್ಚೆಂನಾ ಮ್ಹಣ್ ಚಿಂತ್ಲೆಯ್ ದಿಸ್ತಾ. ನಾ ಭುರ್ಗ್ಯಾ, ಹಾಂವ್ ಗಾಂವ್ಯಿ ವಿಸ್ರೊಂಕ್ ನಾ. ತುಳು ಆನಿಂ ಕೊಂಕ್ಣೆಕ್ಯಿ ವಿಸ್ರೊಂಕ್ ನಾ"
ಮೆಲ್ವಿನಾಕ್ ವೊಡ್ಲ್ಯಾರ್ ಜೀಬ್ ನಾ ಜಾಲಿ. ತೊ ದೊಳೆ ವಾಟಾರ್ನ್, ಬೊಂಬ್ಯಾಬರಿ ಇನ್ಸ್ಪೆಕ್ಟರ್ ಪಿರೇರಿಕ್ಚ್ ಪಳೆಂವ್ಕ್ ಪಡ್ಲೊ. ತಾಚೆ ಹಾಲ್-ಹವಾಲ್ ಪಳೆವ್ನ್, ಇನ್ಸ್ಪೆಕ್ಟರಾಕ್ ಬಿರ್ಮೊತ್ಚ್ ಭೊಗ್ಲಿ ಜಾಯ್ಜಾಯ್. ಗಂಭೀರ್ ಮುಖಾಚೆರ್ ಹಾಸೊ ಹಾಡೊವ್ನ್ ತೊ ಉಲೈಲೊ - "ಆತಾಂ, ತಶೆಂ ಮ್ಹಾಕಾ ಪಳೆನಾಕಾ. ತುಜೆಂ ನಾಂವ್ ಕಿತೆಂ ಸಾಂಗ್."
"ಮೆಲ್ವಿನ್..." ಪಿಂರ್ಗಾಲೊ ತೊ.
"ಮ್ಹಜೆಲಾಗಿಂ ಪಯ್ಲೆಂ ಫಟ್ ಕಿತ್ಯಾಕ್ ಮಾರ್ಲಿಯ್?"
ಮೆಲ್ವಿನಾನ್ ಜಾಪ್ ಕಾಡ್ಲಿನಾ.
"ಭಿಂಯೆನಾಕಾ. ಹಾಂವ್ ತುಕಾ ಕಾಂಯ್ ಕರಿನಾ. ಮನ್ಶಾನ್ ಕೆದಾಳಾಚ್ ಜಾಲ್ಯಾರಿ ಸತ್ ಉಲಂವ್ಕ್ ಲಜೆನಾಯೆ"
ತೆಂ ಏಕ್ ಖಾಸ್ಗಿ ಕಾರಣ್ ಇನ್ಸ್ಪೆಕ್ಟರ್ .....ಮ್ಹಜ್ಯಾ ಖಾಸ್ಗಿ ಜೀವನಾಂತ್ಲೆಂ. ತೆಂ ತುಕಾ ಸಾಂಗ್ಚ್ಯಾ ಸ್ಥಿತೆರ್ ಹಾಂವ್ ನಾ"
"ಕಿತ್ಯಾಕ್ ಸಾಂಗೊಂಕ್ ನಜೊ? ಮ್ಹಜೆಲಾಗಿಂ ಕಿತೆಂಯ್ ಸಾಂಗ್ಲ್ಯಾರಿ, ತುಕಾ ಕಾಂಯ್ ಬಾಧಕ್ ಯೆಂವ್ಚೆ ನಾ"
"ನಾ ಇನ್ಸ್ಪೆಕ್ಟರ್....ಹಾಂವ್ ಬೊಂಬಯ್ ಅಸಾಂ ಮ್ಹಳ್ಳಿ ಖಬಾರ್ ಕೊಣಾಕ್ಚ್ ಕಳೊಂಕ್ ನಜೊ. ಆನಿಂ ತೆಂ ಕಳೊಂಕ್ ನಜೊ. ದೆಕುನ್ ಹಾಂವೆಂ ಮ್ಹಜಿ ಖಾಸ್ಗಿ ಸಂಗತ್ ತುಕಾ ಸಾಂಗೊಂಕ್ ಸಾಧ್ಯ್ ನಾ"
"ತರ್ ಹಾಚೊ ಪರಿಣಾಮ್ ಕಠಿಣ್ ರಾವ್ತೊಲೊ. ತುಂ ಬೊಂಬಯ್ ಅಸಾ ಮ್ಹಳ್ಳಿ ಖಬಾರ್ ನ್ಹಂಯ್ಚ್ ಸಗ್ಳ್ಯಾನ್ ವಿಸ್ತಾರ್ತೆಲಿ. ಬಗಾರ್, ಶೀನ ಸಾಂಗಾತಾ ತುಕಾ ಮಂಗ್ಳುರಾಕ್ ಧಾಡ್ಚೆಂ ಪಡ್ತೆಲೆಂ. ಕಿತ್ಯಾಕ್ ಕಾನೂನಾಚ್ಯಾ ದ್ರಷ್ಟೆನ್ ತುಜೊಯಿ ವಿಚಾರ್ ಕರುಂಕ್ ಆಸ್ತೊಲೊ. ಚೊರಾ ಸಾಂಗಾತಾ ತುಂ ಶಿರ್ಕಾಲಾಯ್. ತುಂಯಿ ತ್ಯಾ ಚೊರ್ಯೆಂತ್ ನಾತ್ಲ್ಲೊಯ್ ಮ್ಹಣ್ ಕಶೆಂ ರುಜು ಕರ್ತಾಯ್?" ಖಡಾಖಡ್ ಉಲೈಲೊ ಇನ್ಸ್ಪೆಕ್ಟರ್.
ಮೆಲ್ವಿನಾಚೆಂ ತೊಂಡ್ ಬಾವ್ಲೆಂ. ಆಪ್ಲಿ ಖರಿ ಗಜಾಲ್ ಸಾಂಗ್ಚಿ ವ ನಾಕಾ..... ಸಾಂಗ್ಚಿಂ ವ ನಾಕಾ....ಹ್ಯಾಚ್ ಚಿಂತ್ನಾಂನಿ ಮಗ್ನ್ ಜಾಲೊ ತೊ. ಸತ್ ಸಾಂಗ್ಲ್ಯಾರ್ ...ನಾ....ತಿ ದುಃಖಾಚಿ ಖಬಾರ್ ಕಿತ್ಯಾಕ್ ಪರತ್ ಉಸ್ತಿತಾಯ್? ಪುಣ್ ಸಾಂಗಾನಾ ಜಾಲ್ಯಾರ್.....ಆಪುಣ್ ಬೊಂಬಯ್ ಧಾಂವೊನ್ ಅಯಿಲ್ಲೆಂ ಕಾಮ್ ನಿರ್ಫಳ್ ಜತೆಲೆಂ. ದೆವಾ.....ಕರುಂ ಕಿತೆಂ?
ಆಖ್ರೇಕ್ ತಾಣೆಂ ನಿಶ್ಚಯ್ ಕೆಲೆಂ. ಕಶೆಂಯ್ ಬೊಂಬಯ್ ಆಯ್ಲಾಂ ತೊ ಪಾಟಿಂ ಮಂಗ್ಳೂರಾಕ್ ವಚೊಸೊನಾ. ಇನ್ಸ್ಪೆಕ್ಟರಾಕ್ ಗಜಾಲ್ ಆಸಾ ತಶಿ ಸಾಂಗ್ಚಿ.....ಆನಿಂ ತಾಣೆಂ ದುಃಖೇಸ್ತ್ ತಾಳ್ಯಾನ್ ಆಪ್ಲಿ ನಿರ್ಭಾಗಿ ಕಾಣಿ ಸಾಂಗ್ಲಿಂ.
ತಾಚಿ ಕಾಣಿ ಪೂರ್ಣ್ ಜಾತಾ ವರೇಗ್ ಆಯ್ಕೊನ್ ಬಸ್ಲ್ಲೊ ಇನ್ಸ್ಪೆಕ್ಟರ್ ಕಪಾಲಾರ್ ಮಿರಿಯೊ ಘಾಲ್ನ್ ಮ್ಹಣಾಲೊ -"ಹುಂ, ನಿಜಾಯ್ಕಿ ಬಿರ್ಮೊತೆಚಿ ಗಜಾಲ್ ತುಜಿ. ಆತಾಂಚೊ ಸಂಸಾರ್ಚ್ ತಸೊ. ಕೊಲೆಜಿಕ್ ಗೆಲ್ಲ್ಯಾ ಫರಾ ಗರ್ಲ್ ಫ್ರೆಂಡಾಂಕ್ ಸೊಧ್ತಾತ್, ಆನಿಂ ಕಾಂಯ್ ಚಡುಣೆ ಜಾಲ್ಲ್ಯಾ ತಕ್ಷಣ್ ಪೊಳಾಫಳ್ ಘೆಯಾತ್. ಆತಾಂ ಬೊಂಬಯ್ ಯೇವ್ನ್ ಕಿತೆಂ ಕರುಂಕ್ ಚಿಂತ್ಲಾಂಯ್ ತುವೆಂ?"
"ಹಾಂವ್ಚ್ ನೆಣಾ...ಪುಣ್ ಆನಿಂ ಥೊಡೊ ಕಾಳ್ ಸರ್ತಾ ಪರ್ಯಾಂತ್ ಮಂಗ್ಳೂರ್ ವಚೊಂಕ್ ನಜೊ ಮ್ಹಣ್ ಚಿಂತ್ಲಾಂ ಹಾಂವೆಂ
ಪೊಲಿಸ್ ಎಕ್ಲೊ ಬಿತರ್ ಆಯ್ಲೊ ಆನಿಂ ರಾಜು ಸ್ಟೇಶನಾಕ್ ಆಯಿಲ್ಲಿ ಖಬಾರ್ ಸಾಂಗಾಲಾಗ್ಲೊ. ತಾಕಾ ಬಿತರ್ ಆಪವ್ನ್ ಹಾಡುಂಕ್ ಸಾಂಗ್ಲೆಂ ಇನ್ಸ್ಪೆಕ್ಟರಾನ್.
ರಾಜು ಸಗ್ಳೊಚ್ ಘಡ್ಬಡೊನ್ ಧಾಂವೊನ್ ಆಯಿಲ್ಲೊ. ತಾಕಾ ಮಿಸ್ತೆರ್ಚ್ ಜಾಲ್ಲೊ - ಖಂಯ್ಚಾಯಿ ಲಫ್ಡ್ಯಾಂಕ್ ಭರ್ಸೊಂಕ್ ನಾತ್ಲ್ಲ್ಯಾ ಆಪ್ಣಾಕ್ ಎಕಾನೆಕಿ ಇನ್ಸ್ಪೆಕ್ಟರಾನ್ ಕಿತ್ಯಾಕ್ ಆಪಯ್ಲೆಂಗಿ ಮ್ಹಣ್. ಕಾವ್ಜೆಣಿನ್ಂಚ್ ತೊ ಇನ್ಸ್ಪೆಕ್ಟರಾಚ್ಯಾ ಕುಡಾಬಿತರ್ ಸರ್ಲೊ.
"ಬಸ್ ರಾಜು...." ಇನ್ಸ್ಪೆಕ್ಟರ್ ಮ್ಹಣಾಲೊ. "ತುಕಾ ಎಕಾ ಕಾಮಾನ್ ಹಾಂವೆಂ ಅಪಯ್ಲೆಂ. ಸಾಂಗ್, ಶೀನಾಕ್ ಆನಿಂ ಮೆಲ್ವಿನಾಕ್ ಕೆದಾಳಾ ಥಾವ್ನ್ ತುಂ ವಳ್ಕಾತಾಯ್?"
"ಶೀನಾಚಿ ಮ್ಹಾಕಾ ಸಬಾರ್ ವಸ್ರಾಂ ಥಾವ್ನ್ ವಳೊಕ್ ಆಸಾ. ಮೆಲ್ವಿನಾಚಿ ಆತಾಂಚ್ ವಳೊಕ್ ಜಾಲೊ. ಪುಣ್ ಮ್ಹಾಕಾ ಕಿತ್ಯಾಕ್ ಆಪವ್ನ್ ದಾಡ್ಲೆಂಯ್?"
"ರಾವ್, ಸಾಂಗ್ತಾಂ. ಆತಾಂ ಮೆಲ್ವಿನ್ ಆನಿಂ ಶೀನ ಬೊಂಬಯ್ ಯೇವ್ನ್ ತುಜ್ಯಾ ಘರಾ ಆಸ್ರೊ ಘೆತಾತ್. ಪುಣ್ ತೆ ಖಂಯ್ಚಾ ಕಾರಣಾಕ್ ಬೊಂಬಯ್ ಆಯ್ಲ್ಯಾತ್ ಮ್ಹಣ್ ಜಾಣಾಂಯ್ಗಿ?"
"ನಾ...ಹಾಂವೆಂ ತಾಂಚೆಲಾಗಿಂ ವಿಚಾರ್ಲ್ಲ್ಯಾಕ್, ಮೆಲ್ವಿನಾಚಿ ಜಾಪ್ ಮೆಳ್ಳ್ಯಾ - ತೊ ಖಾಸ್ಗಿ ಕಾರಣಾಕ್ ಆಯ್ಲಾ ಮ್ಹಣ್. ಶೀನ ವಿಷ್ಯಾಂತ್ ಹಾಂವ್ ನೆಣಾ"
"ಬರೆಂ, ತಾಂಕಾಂ ಕಿತ್ತುನ್ ಪರ್ಯಾಂತ್ ಆಸ್ರೊ ದೀಂವ್ಕ್ ವಿಚಾರ್ ತುಜೊ?"
"ಹಾಂವ್ ನೆಣಾ...ಕೆದಾಳಾ ಪರ್ಯಾಂತ್ ತೆ ಮ್ಹಜ್ಯಾ ಘರಾ ರಾವ್ತಾತ್, ತೆದಾಳಾ ವರೆಗ್, ಮ್ಹಜಿ ಕಾಂಯ್ ಹರ್ಕತ್ ನಾ. ತೆ ದೊಗಿ ಮ್ಹಜೆ ಮಿತ್ರ್. ತಾಂಕಾಂ ಸುಧಾರ್ಸುಂಚೊ ಕಾಯ್ದೊ ಮ್ಹಜೊ"
ಇನ್ಸ್ಪೆಕ್ಟರ್ ಏಕ್ ಘಡಿ ವೊಗೊಚ್ ರಾವ್ಲೊ. ಉಪ್ರಾಂತ್ ಸಟ್ಟ್ ಕರ್ನ್ ತಾಣೆಂ ಸವಾಲ್ ಕೆಲೆಂ - "ರಾಜು ತುಂ ಜಾಣಾಂಯ್ಗಿ, ಆಜ್ ತುಜ್ಯಾ ಘರಾಂ ತುಂ ಎಕಾ ಚೊರಾಕ್ ಅಸ್ರೊ ದಿತಾಯ್ ಮ್ಹಣ್..?"
"ಕಿತೆಂ, ಚೋರ್...?" ಶೆರ್ಮೆವ್ನ್ ತೊ ಮೆಲ್ವಿನಾಚ್ಯಾ ತೊಂಡಾಕ್ ಪಳೆಂವ್ಕ್ ಪಡ್ಲೊ.
"ವ್ಹಯ್, ಎಕ್ಲ್ಯಾ ಚೊರಾಕ್ ತುಂ ಆತಾಂ ತುಜ್ಯಾ ಘರಾ ಪೊಸ್ತಾಯ್. ಆನಿಂ ತ್ಯಾ ಚೊರಾಕ್ ಹಾಂವೆ ಖೈದ್ ಕೆಲಾ"
"ಹೆಂ ಕಿತೆಂ ಹಾಂವ್ ಆಯ್ಕಾತಾ..... ಮೆಲ್ವಿನ್..? ರಾಜು ಕ್ರೂರ್ ದಿಷ್ಟಿನ್ ಮೆಲ್ವಿನಾಕ್ ಪಳೆಲಾಗ್ಲೊ. ಮೆಲ್ವಿನಾಕ್ ಕಿತೆಂ ಉಲಂವ್ಚೆಂ ಮ್ಹಣ್ ಕಳಾನಾಸ್ತಾಂ, ತಾಣೆಂ ಧರ್ಣಿಕ್ ದೀಷ್ಟ್ ಜೊಕ್ಲಿ.
"ತೊ ಚೋರ್ ಬಂಧಿತ್ ಅಸಾ ರಾಜು. ಅನಿಂ ತಾಕಾ ಆಮಿಂ ಮಂಗ್ಳೂರಾಕ್ ಪಾಟಿಂ ದಾಡ್ತಾಂವ್"
"ಆರೆ ದೆವಾ...ಚೋರ್ ಕೋಣ್ ಇನ್ಸ್ಪೆಕ್ಟರ್? ಮ್ಹಾಕಾ ಎಕೀ ಸಮ್ಜಾನಾ. ಕೊಣ್ ಶೀನಾಗಿ?" ಅಂವ್ಸರಾನ್ ವಿಚಾರ್ಲೆಂ ರಾಜುನ್.
"ವ್ಹಯ್.....ಶೀನ" ಇನ್ಸ್ಪೆಕ್ಟರಾನ್ ಜಾಪ್ ದಿಲಿ.
ರಾಜು ತಕ್ಲೆಕ್ ಹಾತ್ ದೀವ್ನ್ ಚಿಂತುಂಕ್ ಪಡ್ಲೊ. ತಾಣೆಂ ಸ್ವಪ್ಣಾಂತ್ ಚಿಂತುಂಕ್ ನತ್ಲ್ಲೆಂ ಆಜ್ ತಾಣೆಂ ಆಯ್ಕಾಲ್ಲೆಂ. ತಾಚೆಂ ಸಿಂತಿದ್ ಪಿಶೆಂ ಜಾಲ್ಲ್ಯಾಬರಿ ಭೊಗ್ಲೆಂ ತಾಕಾ. ಶೀನಾನ್ ಚೊರಿ ಕೆಲ್ಯಾ..ಕಸಲಿ ಚೊರಿ?
"ಇನ್ಸ್ಪೆಕ್ಟರ್...ಹ್ಯಾ ಚೊರಿಯೆ ವಿಷ್ಯಾಂತ್ ಹಾಂವ್ ಕಾಂಯ್ಚ್ ನೆಣಾಂ....ಪಯ್ಲೆಂ ಜಾಣಾಂ ಆಸ್ಲ್ಲೊ ತರ್, ಕರ್ತವ್ಯಾಚ್ಯಾ ದ್ರಷ್ಟೆನ್ ಹಾಂವ್ ಶೀನಾಕ್ ಅಸ್ರೊಯಿ ದಿತೊನಾ, ಆನಿಂ ಪೊಲಿಸಾಂಕ್ ಹಿ ಸಂಗತ್ ತಿಳ್ಸಿತೊಂ. ಒಟ್ಟಾರೆ, ವ್ಹೊ ಮಿಸ್ತೆರ್ ಕಿತೆಂ ಮ್ಹಾಕಾ ಸಮ್ಜಾನಾ.." ತಗ್ಸಾಲ್ಲ್ಯಾ ಸ್ವರಾನ್ ರಾಜು ಉಲೈಲೊ.
ಥೊಡಿಂ ಮಿನುಟಾಂ ಸಕ್ಕಡ್ ಮೌನ್ ರಾವ್ಲೆ. ಉಪ್ರಾಂತ್ ಇನ್ಸ್ಪೆಕ್ಟರಾನ್ಂಚ್ ತಿ ಶಾಂತಿ ಮೊಡ್ನ್ ಮ್ಹಳೆಂ. "ಬರೆಂ, ಆತಾಂ ತುಮಿಂ ವಚ್ಯೆತ್. ಹಾಂವೆಂ ಸಾಂಗೊನ್ ಧಾಡ್ಲ್ಲ್ಯಾ ವೆಳಾರ್ ತುಮಿಂ ಪೊಲಿಸ್ ಸ್ಟೇಶನಾಂತ್ ಹಾಜರ್ ಜಾಯ್ಜಾಯ್..."
"ಮ್ಹಕಾ ಶೀನಾಕ್ ಪಳೆಜಾಯ್ ಇನ್ಸ್ಪೆಕ್ಟರ್..." ಉಸ್ಮಡ್ಲೊ ಮೆಲ್ವಿನ್.
"ಏಕ್ ಘಡಿ ಚಿಂತುಂನ್ ಇನ್ಸ್ಪೆಕ್ಟರ್ ಮ್ಹಣಾಲೊ. "ಬರೆಂ, ಯೆಯಾ...."
ತೆಗೀ ಶೀನಾಕ್ ಬಂಧ್ ಕರ್ನ್ ದವರ್ಲ್ಲ್ಯಾ ಕುಡಾಕ್ ಗೆಲೆ. ಎಕಾ ಪೊಲಿಸಾನ್ ಕುಡಾಚೆಂ ಬಾಗಿಲ್ ಉಗಡ್ಲೆಂ. ರಾಜು ಆನಿಂ ಮೆಲ್ವಿನ್ ಬಿತರ್ ಸರ್ಲೆಂ. ಇನ್ಸ್ಪೆಕ್ಟರ್ ಭಾಯ್ರ್ ರಾವ್ಲೊ.
ಶೀನ ಎಕಾ ಕೊನ್ಶಾಂತ್ ಬಾಂಕಾರ್ ಬಸೊನ್ ಆಸ್ಲ್ಲೊ. ತಾಣೆಂ ಹಾತ್ ಕಪಾಲಾಕ್ ದಿಲ್ಲೊ. ದೊಳ್ಯಾಂನಿ ದುಃಖಾಂ ವ್ಹಾಳ್ತಾಲಿಂ. ಹಾಂಚೆರ್ ದೀಶ್ಟ್ ಪಡ್ತಚ್, ತೊ ಉಟ್ಲೊ ಆನಿಂ ಹಾಸೊಂಕ್ ಪ್ರಯತ್ನ್ ಕೆಲೆಂ ತಾಣೆ.
"ಶೀನ..." ದೊಗಾಂನಿ ಸಾಂಗಾತಾಚ್ ಆಪೈಲೆಂ.
"ಯೆಯಾ.....ಆನಿಂ ಚಡ್ ಕಾಳ್ ಮ್ಹಾಕಾ ಪಳೆಂವ್ಕ್ ತುಮ್ಕಾಂ ಮೆಳ್ಚೆಂನಾ. ರಾಜು, ಮ್ಹಾಕಾ ಮಾಫ್ ಕರ್..."
"ಶೀನ....ಅಶೆಂ ಕಿತ್ಯಾಕ್ ಕೆಲೆಂಯ್?" ಕಾಂಪ್ಲೊ ರಾಜುಚೊ ತಾಳೊ.
"ಮ್ಹಜ್ಯಾ ನಶಿಬಾಂತ್ ಅಸ್ಲ್ಲೆಂ ಜಾಲೆಂ ರಾಜು. ಹಾಂವ್ ಬೊಂಬಯ್ ಯೇವ್ನ್ ತುಜ್ಯಾ ಘರಾಂತ್ ಅಸ್ರೊ ಘೆತಾನಾ, ತುಕಾ ಹಾಂವೆಂ ಮ್ಹಜಿ ಖಬಾರ್ ತಿಳ್ಶಿನಾತ್ಲ್ಲ್ಯಾಕ್ ಮ್ಹಾಕಾ ಮಾಫ್ ಕರ್. ಮೆಲ್ವಿನಾಕ್ಯಿ ಹಾಂವೆಂ ತೊಂದ್ರೆ ದಿಲೆ"
"ಆತಾಂ ಪೊಲಿಸ್ ತುಕಾ ಕಿತೆಂ ಕರ್ತಾತ್ ಶೀನಾ?" ಮೆಲ್ವಿನಾನ್ ವಿಚಾರ್ಲೆಂ.
"ಆನಿಂ ಕಿತೆಂ ಉರ್ಲಾಂ ಮೆಲ್ವಿನ್? ಎಕ ಹಪ್ತ್ಯಾ ಬಿತರ್ ಮ್ಹಾಕಾ ಮಂಗ್ಳೋರ್ ಧಾಡ್ತೆಲೆ. ಉಪ್ರಾಂತ್......"
"ಉಪ್ರಾಂತ್ ಕಿತೆಂ ಶೀನ..?" ರಾಜುನ್ ಮ್ಹಳೆಂ.
’ಮ್ಹಜಿ ನ್ಯಾಯಸ್ಥನಾಂತ್ ತನ್ಖಿ ಜಾತಚ್, ಜೈಲಾಚಿ ಶಿಕ್ಷಾ ಮ್ಹಾಕಾ ಜಾತೆಲಿ..."
"ಮ್ಹಾಕಾ ತುಜಿ ಬಿರ್ಮೊತ್ ದಿಸ್ತಾ ಶೀನ. ಆಶೆಂ ಘಡೊಂಕ್ ನಜೊ ಆಸ್ಲ್ಲೆಂ. ಹಾಂವೆಂ ಕಿತೆಂ ಕರ್ಚೆಂ ಮ್ಹಣ್ತಾಯ್ ತುಂ?" ಅಸಹಾಯಕ್ ತಾಳ್ಯಾನ್ ಉಲೈಲೊ ರಾಜು.
"ಮ್ಹಜೆಂ ವಿಷ್ಯಾಂತ್ ಕಾಂಯ್ ಕರುಂಕ್ ಸಾಧ್ಯ್ ನಾ ತುಕಾ ರಾಜು. ಬರೇ ಹಾಂವ್ ತುಜೆಲಾಗಿಂ ಏಕ್ ಉಪ್ಕಾರ್ ಮಾಗ್ತಾ. ಮೆಲ್ವಿನಾಚೆಂ ದುಃಖ್ ಥಾಂಬ್ತಾ ಮ್ಹಣಾಸರ್, ತುಜ್ಯಾ ಬಿಡಾರಾಂತ್ ತಾಕಾ ಆಸ್ರೊ ದೀ. ತೊ ಸಂಪೋರ್ಣ್ ನಿರಾಪ್ರಾಧಿ...."
’ಶೀನಾ..." ರಡ್ಲೊ ಮೆಲ್ವಿನ್.
"ರಡಾನಾಕಾ ಇಷ್ಟಾ..." ಅಪ್ಲಿಂ ದುಃಖಾಂ ಪುಸೊನ್ ಶೀನಾ ಮ್ಹಣಾಲೊ, "ಹಾಂವ್ ಮಂಗ್ಳೂರ್ ವೆತಚ್, ಕೊಣಾಯ್ಕಿ ತುಜಿ ಖಬಾರ್ ಸಾಂಗ್ಚೊನಾ....ತುಜ್ಯಾ, ವ ಮ್ಹಜ್ಯಾ ಘರ್ಚ್ಯಾಂಕ್ ಜಾಂವ್, ವ ಪೊಲಿಸಾಂಕ್ ಜಾಂವ್, ತುಂ ಮ್ಹಜ್ಯಾ ಸಾಂಗಾತಾ ಬೊಂಬಯ್ ಆಯಿಲ್ಲಿ ಖಬಾರ್ ಹಾಂವ್ ಸಾಂಗನಾ....."
ಚಡಿತ್ ಉಲಂವ್ಕ್ ತಾಂಕಾಂ ಸಂದ್ರಾಪ್ ಮೆಳ್ಳೊನಾ. ಇನ್ಸ್ಪೆಕ್ಟಾರಾನ್ ತಾಂಕಾಂ ಭಾಯ್ರ್ ಯೇಂವ್ಕ್ ಸೂಚನ್ ದಿತಾನಾ.... ರಡ್ಕುರ್ಯಾ ತಾಳ್ಯಾನ್ ಇತ್ಲೆಂಚ್ ಉಲೈಲೆ ದೊಗಿ, "ಆದೇವ್ಸ್ ಶೀನ...."
"ಆದೇವ್ಸ್.......ವೊಚಾ....."
ದೊಗೀ ಕುಡಾಚ್ಯಾ ಭಾಯ್ರ್ ಪಡ್ಲೆ. ಭಾರಾಧಿಕ್ ಕಾಳಿಜ್ ಗೆವ್ನ್ ಘರಾ ಗೆಲೆ. ವಾಟೆರ್ ಉಲಂವ್ಕ್ ದೊಗಾಂಯ್ಕಿಂ ಮನ್ ಆಯ್ಲೆಂನಾ.
ಏಕ್ ಕಾಣಿ ಸಂಪ್ಲ್ಲಿ. ಚೊರಿ ಕರ್ನ್, ಬೊಂಬಯ್ ಧಾಂವೊನ್ ಯೇವ್ನ್ ಪೊಲಿಸಾಂಚ್ಯಾ ಹಾತಾಂತ್ಲೆಂ ಚುಕೊಂಕ್ ಚಿಂತ್ಲ್ಲೆಂ ಶೀನಾನ್. ಪುಣ್, ದೆವಾಚ್ಯಾ ನಿತಿ ಥಾವ್ನ್, ತಾಕಾ ಚುಕೊಂಕ್ ಬಿಲ್ಕುಲ್ ಸಾಧ್ಯ್ ನಾತ್ಲ್ಲೆಂ. ತ್ಯಾ ಪರಿಂ ಆನ್ನ್ಯಾಯ್ ಕೆಲ್ಲೊ, ಕೆದಾಳಾ ನ್ಹಂಯ್ ಕೆದಾಳಾ ಪುಣಿ ಸಾಂಪಡ್ತಾ ಆನಿಂ ತ್ಯಾ ಪರಿ ಶೀನಾಯಿ ಸಾಂಪಡ್ಲೊ.
ಹಿ ಕಾಣಿ ಅಶಿ ಹಾಂಗಾ ಸೊಡ್ಲ್ಯಾರ್, ಥಂಯ್ ಗಾವಾಂತ್ ದುಸ್ರಿಂ ದೋನ್ ಘಡಿತಾಂ ಘಡ್ಲ್ಲಿಂ. ಜೆಸ್ಸಿ, ಮಾದ್ರಿಂತ್ ಭರ್ತಿ ಜಾಲ್ಲೆಂ. ತೆಂ ವೆಚ್ಯಾ ದಿಸಾ ರೊಫಿನ್ಬಾಯೆನ್, ಹೆರಿ ಆನಿಂ ರಿಜಾ ತಾಂಗೆರ್ಚ್ ಆಸ್ಲ್ಲಿಂ. ಮಾಗ್ಗಿಬಾಯೆಚೆಂ ದುಃಖ್ ವರ್ಣುನ್ ತುದಿ ಕರ್ಚೆಂ ನ್ಹಂಯ್. ತಿಣೆಂ ಆನಿಂ ರೊಫಿನ್ಬಾಯೆನ್ ಜೆಸ್ಸಿಕ್ ಕಿತ್ಲೆಂ ಪರಾತಿಲ್ಲ್ಯಾರಿ, ಪುಸ್ಲಾಯ್ಲ್ಯಾರೀ ತೆಂ ಆಯ್ಕಾಲೆಂನಾ. ಆಪ್ಣೆಂ ಕೆಲ್ಲೊ ನಿಚೆವ್ ಬದ್ಲುಂಕ್ ತೆಂ ಕಬೂಲ್ ಜಾಲೆಂನಾ. ತಾಕಾ ಕೊವೆಂತಾ ವರೆಗ್ ಪಾವ್ನ್ ಆಯ್ಲಿಂ ಸಕ್ಡಾಂ. ತ್ಯಾ ವೆಳಾರ್ ಸಕ್ಡಾಂಚೆಂ ದೊಳೆ ರಡ್ತಾಲೆ.
ಉಪ್ರಾಂತ್ ಮಾಗ್ಗಿಬಾಯ್ ಎಕ್ಸುರಿಂ ಜಾಲಿ. ಎಕ್ಸುರ್ಯಾ ತಿಣೆಂ ಮಂಗ್ಳೂರಾಂತ್ ಜೀವನ್ ಸಾರುಂಕ್ ಸಾಧ್ಯ್ ನಾತ್ಲ್ಲೆಂ. ರೊಫಿನ್ಬಾಯೆನ್ ತಿಕಾ ಭುಜವ್ನ್ ಮ್ಹಳೆಂ. "ಮಾಗ್ಗಿಬಾಯೆ, ಆತಾಂ ತುವೆಂ ಎಕ್ಸುರೆನ್ ಮಂಗ್ಳೂರಾರ್ ಜಿಯೆಂವ್ಕ್ ಜಾಂವ್ಚೆನಾ. ತುಂ ಕಾರ್ಕಳ್ ಯೆ. ಆಮ್ಚ್ಯಾ ಸಾಂಗಾತಾಚ್ ತುಂ ರಾವ್, ಕಿತೆಂ ಮ್ಹಣ್ತಾಯ್?"
ಮಾಗ್ಗಿಬಾಯೆಕ್ ದುಸ್ರಿ ವಾಟ್ಚ್ ನಾತ್ಲ್ಲಿ. ಮ್ಹಾತಾರ್ಯಾ ಪ್ರಾಯೆರ್ ಎಕ್ಸುರೆನ್, ಜೀವನ್ ಸಾರ್ಚೆಂ ತರೀ ಕಶೆಂ? ದುಡ್ವಾಚಿ ಸಹಾಯ್ ನಾ, ಕುಟ್ಮಾದಾರಾಂ ಕೊಣೀನಾಂತ್. ರೊಫಿನ್ಬಾಯೆಚ್ಯಾ ಸಾಂಗ್ಣೆಂ ಪ್ರಕಾರ್ ತಿ ಕಾರ್ಕಳಾಕ್ ವಚೊಂಕ್ ಕಬೂಲ್ ಜಾಲಿ. ಥಂಯ್ ಜಾಲ್ಯಾರ್, ತಾಂಚೆಂ ಘರ್ಚೆಂ ಕಾಮ್ ತರೀ ಕರ್ನ್, ಆಪ್ಲ್ಯಾ ಗ್ರಾಸಾಚಿ ವಾಟ್ ಪಳೆಯೆತ್. ತಾಂಚೆಂ ಧರ್ಮಾಚೆಂ ಶಿತ್ ಖಾಂವ್ಚೆಂ ನಾಕಾ.
ಮಾಗ್ಗಿಬಾಯೆನ್ ಘರ್ ಖಾಲಿ ಕೆಲೆಂ. ಆಸ್ಲ್ಲೊ ಥೊಡೊ ಸಾಮಾನ್, ಲೊರಿಯೆಚೆರ್ ಘಾಲ್ನ್ ಆದೇವ್ಸ್ ಮಾಗೊನ್, ತಿ ರೊಫಿನ್ಬಾಯೆ ಸಾಂಗಾಂತಾ ಕಾರ್ಕಳ್ ಗೆಲಿ.
ಹೆಂ ಜಾವ್ನ್ ಏಕ್ ಹಪ್ತೊ ಜಾಲೊ. ತೊ ಏಕ್ ದೀಸ್ ಆಯ್ತಾರ್. ಘರ್ಚಿಂ ಸಕ್ಡಾಂ ಮೀಸಾಕ್ ಗೆಲ್ಲಿಂ. ಹೆರಿ, ಕಾಮಿಲಾಬ್ ಇನರ್ಜೆಂತ್ಲೆಂ ಸಾಂಗಾತಾ ಭಾಯ್ರ್ ಪಡ್ಲೆ. ರೊಫಿನ್ಬಾಯ್, ರಿಜ ಆನಿಂ ಮಾಗ್ಗಿಬಾಯ್ ಪಾಟ್ಲ್ಯಾನ್ ಚಲೊನ್ ಯೆತಾಲಿಂ.
ಸಟ್ಟ್ ಕರ್ನ್ ಮುಖಾರ್ ವೆತೆಲ್ಯಾ ಕಾಮಿಲಾಬಾಕ್ ತಾಳೊ ಆಯ್ಕಾಲೊ. "ಕಾಮಿಲಾಬಾ, ಚಿಕ್ಕೆ ರಾವ್, ಹಾಂವ್ಯಿ ಯೆತಾಂ"
ಕಾಮಿಲಾಬಾನ್ ಅನಿಂ ಹೆರಿನ್ ಪಾಟಿಂ ಪಳೆಲೆಂ. ತಾಂಚ್ಯಾಚ್ ವಾಡ್ಯಾಂತ್ಲೊ, ಶಾಬಿಯಾಮ್ ಧಾಂವೊನ್ ಯೆತಾಲೊ. ಶಾಬಿಯಾಮ್ ಎಕ್ಲೊ ಕಷ್ಟಿ ರೈತ್. ಮನ್ವೆಲಾಬಾಕ್, ಕಾರ್ಕಳಾಂತ್ ಆಸ್ಚ್ಯಾ ಭುಂಯ್ಚೆರ್ ತೊ ಘೊಳ್ತಾಲೊ. ತೊ ಎಕೀನ್, ಕಷ್ಟಿ ಆನಿಂ ಪಾತ್ಯೆಣೆಚೊ ಮನಿಸ್ ಜಾಲ್ಲ್ಯಾನ್ ಮಾನ್ವೆಲಾಬಾಕ್ ತಾಚೆರ್ ಬರೊಚ್ ವಿಶ್ವಾಸ್ ಆಸ್ಲ್ಲೊ. ಕಾರ್ಕಳಾಂತ್ಲ್ಯಾ ಭುಂಯ್ಚಿ ಮೇಲ್ - ಜವಬ್ದಾರಿ, ತಾಣೆಂ ಶಾಬಿಯಾಮಾಕ್ಚ್ ದಿಲ್ಲಿ. ಆನಿಂ ಉರ್ಲೆಲ್ಯಾ ವಕ್ಲಾಂಚಿ ಗೇಣ್ ಇತ್ಯಾದಿ ತಾಕಾಚ್ ಜಮಯ್ಸುಂಕ್ ಆನಿಂ ಆಪ್ಣಾಕ್ ವರ್ಸಾವಾರ್ ಪಾವಿತ್ ಕರುಂಕ್ ಅಧಿಕಾರ್ಯಿ ದಿಲ್ಲೊ.
ಶಾಬಿಯಾಮ್, ಆಜ್ಚ್ ಮಂಗ್ಳೂರ್ ವಚೊನ್ ಧನಿಯಾಕ್ ಮೆಳ್ಚೊ ಆಸ್ಲ್ಲೊ. ಮೀಸ್ ಜಾತಚ್, ಪೆಂಟೆಕ್ ಯೇವ್ನ್ ಕೊಡಿಯಾಳ್ಚೆಂ ಬಸ್ಸ್ ಧರ್ಚೆಂ ಮ್ಹಣ್, ಸಕಾಳಿಂಚ್ ಆಲೋಚನ್ ಕರ್ನ್ ತೊ ಆಯಿಲ್ಲೊ.
"ಕಿತೆಂ ಕಾಮಿಲಾಬಾ... ಕಿತೆಂ ಹೆರಿ? ಭಾರಿ ಆಪ್ರೂಪ್ ತುಂ. ಕೆದಳಾ ಆಯಿಲ್ಲೊಯ್? ತುಕಾ ಆಜ್ಚ್ ಪಳೆಲೆಂ ಹಾಂವೆ" ಉಲೈಲೊ ಶಾಬಿಯಾಮ್.
ಹಾಂವ್ ಯೆವ್ನ್ ಲಾಗಿಂ ಲಾಗಿಂ ಪಂದ್ರಾ ದೀಸ್ ಜಾಲೆಂ. ಕಸೊ ಆಸಾಯ್ ತುಂ?" ವಿಚಾರ್ಲೆಂ ಹೆರಿನ್ ಹಾಸೊನ್.
"ಹಾಂವ್ ಬರೊಂ ಆಸಾ ಹೆರಿ. ತುಜಿ ಖಬಾರ್ ಕಿತೆಂ? ದಾಕ್ತೆರ್ಗಿಚೆಂ ಶಿಕಾಪ್ ಕಾಬಾರ್ ಜಾಲೆಂವೆ?"
ಜಾಲೆಂ, ಶಾಬಿಯಾಮಾ. ದೆವಾಚ್ಯಾ ದಯೆನ್ ಬರ್ಯಾ ಥರಾನ್ ಪಾಸ್ ಜಾಲ್ಯಾರ್ ಪುರೊ ಮ್ಹಣ್ ಮಾಗ್ತಾಂ ಅನಿಂ ರಿಜಲ್ಟಾಕ್ ರಾಕ್ತಾಂ"
"ಪಾಸ್ ಜಾತೊಲೊಯ್....ಖಂಡಿತ್ ಪಾಸ್ ಜಾತೊಲೊಯ್" ಶಾಬಿಯಾಮಾನ್ ಮ್ಹಳೆಂ.
ಆಶೆಂ ತೆ ಗಜಾಲಿ ಕರ್ನ್ಂಚ್ ಕಾರ್ಕಳ್ ಪೆಂಟೆಂಕ್ ಪಾವ್ಲೆ. ಶಾಬಿಯಾಮಾನ್, ಬಸ್ಸ್ ಸ್ಟೇಂಡಾಕ್ ವೆಚ್ಯಾ ವಾಟೆಕ್ ಘುಂವ್ತಾನಾ, ಕಾಮಿಲಾಬಾಲಾಗಿಂ ಮ್ಹಳೆಂ - "ಮ್ಹಾಕಾ ತುಜೆಲಾಗಿಂ ಥೊಡೆಂ ಉಲೊಂವ್ಕ್ ಆಸಾ ಕಾಮಿಲಾಬಾ. ತುಂ ವಚ್ ಹೆರಿ, ಕೆದಾಳಾಯ್ ತುಕಾ ಮೆಳ್ತಾಂ"
ಹೆರಿ ಘರಾ ಗೆಲೊ. ಕಾಮಿಲಾಬ್ ಆನಿಂ ಶಾಬಿಯಾಮ್ ಬಸ್ಸ್ ಸ್ಟೇಂಡಾಕ್ ಆಯ್ಲೆ.
"ಕಿತೆಂ ಉಲೊಂವ್ಕ್ ಅಸಾ ಮ್ಹಣ್ತಾಲೊಯ್ ತುಂ ಶಾಬಿಯಾಮಾ?" ವಿಚಾರ್ಲೆಂ ಕಾಮಿಲಾಬಾನ್.
"ಹಾಂ.....ದುಸ್ರಿ ಕಾಂಯ್ ವಿಶೇಷ್ ಗಜಾಲ್ ನ್ಹಂಯ್. ಹೆಂ....ಎಕಾಚ್ಚಾಣೆಂ ಹೊ ಪ್ರಸ್ತಾಪ್ ಕಾಡ್ತಾಂ ಮ್ಹಣ್ ಶಿಣಾನಾಕಾ..." ನಾರ್ಗಾಲೊ ಶಾಬಿಯಾಮ್.
"ಕಸಲೊ ಪ್ರಸ್ತಾಪ್ ಮ್ಹಣ್ತಾಯ್ ತುಂ? ಕಿತೆಂ ಗಜಾಲ್ ತಿ ಸಾಂಗೊನ್ ಸೊಡ್....ಆಯ್ಕಾಯಾಂ..." ಧೈರ್ ದಿಲೆಂ ಕಾಮಿಲಾಬಾನ್.
"ನ್ಹಂಯ್....ಹಾಂವ್ ಹೆರಿ ವಿಷ್ಯಾಂತ್ ಉಲಂವ್ಕ್ ಚಿಂತ್ತಾಲೊ... ತಾಚೆಂ ಶಿಕಾಪ್ ಕಾಬಾರ್ ಜಾಲೆಂ ಮ್ಹಣ್ತಾ ತೊ. ಆತಾಂ ಕಿತೆಂ ಆಲೋಚನ್ ತಾಚಿ, ಕಾರ್ಕಳಂತ್ ’ಡಿಸ್ಪೆನ್ಸರಿ’ ಪುಣಿ ಚಾಲು ಕರ್ಚಿಗಿ?"
"ತೆಂ ಹಾಂವ್ ನೆಣಾ ಶಾಬಿಯಾಮಾ. ಹ್ಯಾ ವಿಷಯಿಂ ಹಾಂವ್ ತಾಚೆಲಾಗಿಂ ಉಲೈಲ್ಲ್ಯಾ ವೆಳಾರ್ ಕಸಲೆಂಚ್ ತಾಣೆಂ ಮ್ಹಾಕಾ ಸಾಂಗ್ಲ್ಲೆಂ ನಾ. ತಾಚ್ಯಾ ಮತಿಂತ್ ಕಿತೆಂ ಮಾಂಡಾವಳ್ ಆಸಾ ತಿ ಹಾಂವ್ ನೆಣಾ ಪುಣ್ ಹೆಂ ಸವಾಲ್ ಕರುಂಕ್ ಕಾರಣ್ ಕಿತೆಂ?"
"ಮ್ಹಜ್ಯಾ ಮತಿಂತ್ ಏಕ್ ವಿಚಾರ್ ಯೆತಾ ಕಾಮಿಲಾಬಾ. ದುಸ್ರೆಂ ಕಾಂಯ್ ನ್ಹಂಯ್.....ಹೆರಿ ಆತಾಂ ಪ್ರಾಯೆಚೊ ಜಾಲೊ. ತಾಕಾ ಕಾಂಯ್ ಕಾಜಾರ್ ಕರ್ಚಿ ಆಲೋಚನ್ ನಾಂವೆ ತುಕಾ?"
ಕಾಮಿಲಾಬ್ ಆಮ್ರುಕೊ ಹಾಸ್ಲೊ. ಹೆರಿಚ್ಯಾ ಕಾಜಾರಾ ವಿಷ್ಯಾಂತ್ ತಾಣೆಂ ಆಲೋಚನ್ ಕೆಲ್ಲಿ ಖರಿ - ಪುಣ್ ತಿ ಜೆಸ್ಸಿಲಾಗಿಂ. ಆತಂ ಜೆಸ್ಸಿ ಮಾದ್ರಿಂತ್ ವೆತಾಚ್, ತಾಣಿಂ ದುಸ್ರೆಂ ಕಸಲೆಂಯ್ ನಿರ್ಣಯ್ಸುಂಕ್ ನಾತ್ಲ್ಲೆಂ.
"ಹಾಂ.....ಸವಾಲ್ ತುಜೆಂ ಬರಾಬರ್ ಸಾಯ್ಬಾ. ಪುಣ್ ಹ್ಯಾ ವಿಷ್ಯಾಂತ್ ಹಾಂವೆಂ ಕಿತೆಂ ಆಲೋಚನ್ ಕರ್ಚಿ ಮ್ಹಣ್ತಾಯ್ ತುಂ? ಕಾಜಾರ್ ಜಾತೊಲೊ ತೊ. ತಾಕಾ ಮನ್ ಆಸ್ಲ್ಯಾರ್ ಜಾತೊಲೊ."
"ತಶೆಂ ಮ್ಹಳ್ಯಾರ್ ಜಾತಾವೆಂ ಕಾಮಿಲಾಬಾ? ಭುರ್ಗಿಂ ಕೆದಾಳಾಚ್ ವ್ಹಡಿಲಾಂಲಾಗಿಂ ಸಾಂಗಾನಾಂತ್ ಆಪುಣ್ ಕಾಜಾರ್ ಜಾತಾಂಚ್ ಮ್ಹಣ್. ಹೊ ಪ್ರಸ್ತಾಪ್ ಕಾಡಿಜಾಯ್ ಅವಯ್ ಬಾಪಾಯ್ನ್ಂಚ್. ಆತಾಂ ಪಳೆ. ಆಮಿಂ ಮ್ಹಾತಾರೆ ಜಾವ್ನ್ ಆಯ್ಲ್ಯಾಂವ್. ಆಮ್ಚೆ ಚಡ್ ದೀಸ್ ಗೆಲೆ ಆನಿಂ ಉರ್ಲೆ ಥೊಡೆ. ಹ್ಯಾ ಮ್ಹಾತಾರ್ಯಾ ಪ್ರಾಯೆರ್, ಸುನೆಕ್ ಹಾಡ್ಚೆಂ ಆನಿಂ ಭುರ್ಗ್ಯಾಂಕ್ ಖೆಳಂವ್ಚೆಂ ಸೊಡ್ಲ್ಯಾರ್ ದುಸ್ರಿ ಕಿತೆಂ ಆಶಾ ಉರ್ಲ್ಯಾ ಆಮ್ಕಾಂ ?"
"ತುವೆಂ ಸಾಂಗೆಂ ಸಮಾ ಸಾಯ್ಬಾ. ತುಜ್ಯಾ ಉತ್ರಾಂತ್ ಹಾಂವ್ ನ್ಹಂಯ್ ಮ್ಹಣಾನಾ" ಹಾಸೊನ್ಂಚ್ ಉಲೈಲೊ ಕಾಮಿಲಾಬ್, "ಆತಾಂ ಸಾಂಗ್, ತುಜ್ಯಾ ಖುಸ್ತಾರ್ ಖಂಯ್ ಚೆಡುಂ ಆಸಾ ಮ್ಹಣ್ತಾಯ್ವೆ?"
"ನ್ಹಂಯ್ ತರ್, ಹೊ ಪ್ರಸ್ತಾಪ್ಚ್ ಹಾಂವ್ ಕಾಡ್ತೊಂನಾ" ಮಿಶಿಯೊ ಪುಲೊವ್ನ್ ಸಾಂಗಾಲಾಗ್ಲೊ ಶಾಬಿಯಾಮ್, "ಆನಿಂ ಹ್ಯಾ ಆಯಿನ್ನ್ ವೆಳಾರ್ಚ್ ಹಾಂವ್ ಮಂಗ್ಳೂರಾಕ್ ಬಾಯ್ರ್ ಸರ್ಲಾಂ ಪಳೆ"
"ಚೆಡುಂ ಖಂಯ್ಚೆಂ ಕೊಡಿಯಾಳ್ಚೆಂ ದಿಸ್ತಾ, ಕೊಣ್ ತೆಂ?" ವಿಚಾರ್ಲೆಂ ಕಾಮಿಲಾಬಾನ್.
"ಆಮ್ಚ್ಯಾ ಮನ್ವೆಲಾಬಾಕ್ ವಳ್ಕಾನಾಂಯ್ವೆ ತು?" ಹಾಂವ್ ಘೊಳ್ಚ್ಯಾ ಭುಂಯ್ಚೊ ಧನಿ..." ಸಿಂತಿ ವಿಷ್ಯಾಂತ್ ನಿಯಾಳ್ನ್ ಉಲೈಲೊ ಶಾಬಿಯಾಮ್.
"ಖುದ್ಧ್ ವಳೊಕ್ನ್ ನೆಣಾ. ತರೀ, ತಾಚ್ಯಾ ವಿಷ್ಯಾಂತ್ ಮ್ಹಸ್ತ್ ಆಯ್ಕಾಲಾಂ ಆನಿಂ ಎಕ್ ದೋನ್ ಪಾವ್ಟಿಂ ತಾಕಾ, ಕಾರ್ಕಳ್ ಆಯಿಲ್ಲ್ಯಾ ತವಳ್ ಪಳೆಲಾಂ."
"ತಾಚಿಚ್ ಧುವ್ ಸಿಂತಿ....ಇಂಟರಾಂತ್ ಶಿಕ್ತಾ. ರುಪಾನ್ ಸುಂದರ್, ಗುಣಾನ್ ಖಾಲ್ತೆಂ, ಮತಿನ್ ಚುರುಕ್, ತುಜ್ಯಾ ಹೆರಿಕ್ ಸಾಂಗ್ಲ್ಲೆಂ ಚೆಡುಂ ತೆಂ ಕಾಮಿಲಾಬಾ..." ದರ್ವಡ್ಯಾನ್ ಉಲೈಲೊ ಶಾಬಿಯಾಮ್.
"ಸಿಂತಿ ಇಂಟರಾಂತ್ ಶಿಕ್ತಾ... ತಾಚೆ ಇತ್ಲ್ಯಾಕ್ಚ್ ಮ್ಹಣಾಲೊ ಕಾಮಿಲಾಬ್..... "ಸಿಂತಿಕ್ ತುಂ ಜರ್ ಪಳೈಶಿ ಕಾಮಿಲಾಬಾ, ತುಂಚ್ ಜಾಣಾ ಜಾತಾಲೊಯ್ ಕಿತ್ಲೆಂ ಆಪುರ್ಬಾಯೆಚೆಂ ಚೆಡುಂಗಿ ಮ್ಹಣ್ ತೆಂ. ಹಾಂವ್ ಅತಾಂ ಖಂಯ್ಚಾಕಿ ಧನಿಯಾಗೆರ್ ವೆತಾಂ. ತವಳ್, ಹ್ಯಾ ವಿಷ್ಯಾಂತ್ ಹಾಂವ್ ಪ್ರಸ್ತಾಪ್ ಕಾಡ್ತಾಂ. ಮನ್ವೆಲಾಬ್ ತುಂ ಜಾಣಾ ಆಸ್ಲ್ಲ್ಯಾ ಬರಿ ಗ್ರೇಸ್ತ್, ದುಡ್ವಾಧಿಕ್ ಆನಿಂ ಸಮಾಜೆಂತ್ ನಾಂವಾಡ್ಲೊಲೊ. ತುಜ್ಯಾ ಘನಾಕ್ ಆನಿಂ ಮಾನಾಕ್, ಆನಿಂ ಮಾನ್ವೆಲಾಬಾಕ್ ಸರೀ ತಾಳ್ ಪಡ್ತಾ. ತುಂ ಕಿತೆಂ ಮ್ಹಣ್ತಾಯ್ - ಹ್ಯಾ ಕಾಮಾಂತ್ ಮುಖಾರ್ ಸರೊಂಗಿ?"
ಕಾಮಿಲಾಬ್ ದೋನ್ ಮಿನುಟಾಂ ಚಿಂತುಂಕ್ ಪಡ್ಲೊ. ಉಪ್ರಾಂತ್ ತೊ ಮ್ಹಣಾಲೊ. "ಹುಂ.....ತುಂ ಹ್ಯಾ ವಿಷ್ಯಾಂತ್ ಮುಖಾರ್ ಸರ್ಚ್ಯಾಕ್ ಮ್ಹಜಿ ಕಾಂಯ್ ಅಡ್ಕಳ್ ನಾ. ಅಖ್ರೇಕ್ ತರೀ, ಸೈರಿಕ್ ಜಮಾಜಾಯ್ ಜಾಲ್ಯಾರ್ ಚೆಡ್ಯಾನ್ ಆನಿಂ ಚೆಡ್ವಾನ್ ಎಕಾಮೆಕಾಕ್ ಪಳೆವ್ನ್ ಒಪ್ವಾಜಾಯ್"
"ಜರೂರ್....ಮ್ಹಾಕಾ ಬಿಲ್ಕುಲ್ ಪಾತ್ಯೆಣಿ ಅಸಾ, ಚೆಡುಂ ಆನಿಂ ಚೆಡೊ ಎಕಾಮೆಕಾಕ್ ಒಪ್ಪಾತೆಲಿಂಚ್. ಹೆಂ ಜಾಲ್ಯಾರ್ ಕಿರಾ-ಸಾಳೆರಿಚೆಂ ಜೊಡೆಂ ಜಾತೆಲೆಂ" ಮ್ಹಣಾಲೊ ಶಾಬಿಯಾಮ್.
"ಬರೆಂ ತರ್, ಕೊಡಿಯಾಳಾಕ್ ವಚೊನ್ ಬರಿ ಖಬಾರ್ ಹಾಡ್ನ್ ಯೆ" ಅಶೆಂ ಸಾಂಗೊನ್ ಕಾಮಿಲಾಬಾನ್ ತಾಕಾ ಆದೇವ್ಸ್ ಮಾಗ್ಲೊ. ಬಸ್ಸಾರ್ ಚಡೊನ್ ಬಸ್ತಾನಾ, ಶಾಬಿಯಾಮ್ ಚಿಂತ್ತಾಲೊ - ಅಪುಣ್ ವೆಚ್ಯಾ ಕಾಮಾ ಸಾಂಗಾಂತಾ ಹೆಂಯಿ ಶಾಬಿತ್ ಜಾಲ್ಯಾರ್ ಬರೆಂ ಅಸಾ. ಧನಿಯಾಚ್ಯಾ ಧುವೆಕ್, ಗ್ರೇಸ್ತ್ ಆನಿಂ ಶಿಕ್ಪಿ ನವ್ರ್ರೊ ಸೊಧುನ್ ದಿಲ್ಲಿ ಶಾಭಾಸ್ಗಿ ಆಪ್ಣಾಕ್ ಮೆಳ್ತೆಲಿ. ಹ್ಯಾ ವರ್ವಿಂ ಧನಿಯಾಚ್ಯಾ ನದ್ರೆನ್ ಹಾಂವ್ ಆನಿಕೀ ವಿಶ್ವಾಸಿ ಜಾತೊಲೊಂ - ಮ್ಹಣ್.
ಥಂಯ್, ಮನ್ವೆಲಾಬಾಚಿ ತಕ್ಲಿ ಗರಾಮ್ಚ್ ಜಾಲ್ಲಿ. ಖಂಯ್ಚ್ಯಾ ವೆಳಾರ್ ಸಿಂತಿಕ್ ಪರ್ಕಿ ಜಾತಿಚ್ಯಾ ತರ್ನಾಟ್ಯಾ ಸಂಗಿಂ ತಾಣೆಂ ಪಳೆಲ್ಲೆಂಗಿ, ತ್ಯಾಚ್ ಕ್ಷಣಾ ತಾಚ್ಯಾ ಮತಿಚೆಂ ಸಮಾಧಾನ್ ನಪಂಯ್ಚ್ ಜಾಲ್ಲೆಂ. ತಾಕಾ ಅಕ್ಮಾನ್ ಜಾಲ್ಲೊ ಆನಿಂ ವಾಗಾಬರಿ ತೊ ಘಾಯೆಲ್ಲೊ, ’ನಾ.....ಸಿಂತಿಕ್ ವೆಗಿಂಚ್ ಕಾಜಾರ್ ಕರ್ನಾ ಜಾಲ್ಯಾರ್ ಆಪ್ಲಿ ಮರ್ಯಾದ್ ಸಂಪೂರ್ಣ್ ವಿಕ್ತೆಲೆಂ ತೆಂ..’ ಆಶೆಂ ನಿಚೆವಾಕ್ ಅಯಿಲ್ಲೊ ತೊ. ಘರಾ, ದರ್ವಾಡ್ಯಾನ್ಂಚ್ ಯೇವ್ನ್ ಸಿಂತಿಚ್ಯಾ ಯೆಣ್ಯಾಕ್ ರಾಗಾನ್ಂಚ್ ತೊ ರಾಕೊನ್ ಬಸ್ಲೊ.
ಸದಾಂಚೆಬರಿ ವೇಳ್ ಕರ್ನ್ಂಚ್ ಘರಾ ಪಾವ್ಲೆಂ ಸಿಂತಿ. ಪಪ್ಪಾಕ್, ಆಪ್ಣಾಚಿಂ ಗುಪಿತ್ ಕರ್ತುಬಾಂ ಕಳ್ಲ್ಲಿಂ ಗಜಾಲ್ ತೆಂ ನೆಣಾಸ್ಲ್ಲೆಂ. ಶೇಲ್ಯಾ ಭರಿತ್ ಸ್ವರಾನ್ ತಾಣೆಂ, ಘರಾ ರಿಗ್ತಾನಾ ಬಾಪಾಯ್ಕ್ ಸನ್ಮಾನ್ ಕೆಲೊ. "ಗುಡ್ ಈವ್ನಿಂಗ್ ಪಪ್ಪಾ....."
ಮನ್ವೆಲಾಬಾನ್ ಜಾಪ್ ಕಾಡ್ಲಿನಾ. ತೊ ಜ್ಯಾಲಾಂತ್ ಪಾಸಾಯೊ ಮಾರ್ತಾಲೊ. ’ಕಿತೆಂಗಿ, ಪಪ್ಪಾಚ್ಯಾ ಮತಿಕ್ ಆಜ್ ಸಮಾಧಾನ್ ನಾ.... - ಆಶೆಂ ಚಿಂತುನ್ ಸಿಂತಿ ಅಪ್ಲ್ಯಾ ಕುಡಾಕ್ ಗೆಲೆಂ ಆನಿಂ ಮುಸ್ತಾಯ್ಕಿ ಬದ್ಲುಂಕ್ ಲಾಗ್ಲೆಂ.
ಚಡ್ ವೇಳ್ ಗೆಲೊನಾ. "ಸಿಂತಿ ...!" ಗರ್ಜಾಲೊ ತಾಳೊ ಮನ್ವೆಲಾಬಾಚೊ. ತಾಚ್ಯಾ ತಾಳ್ಯಾಚ್ಯಾ ಜ್ಯೋರಾಕ್ ಘಾಬರ್ಲೆಂ. ’ಓ’ ಮ್ಹಣೊಂಕ್ ಜೀಬ್ ಸುಟ್ಲಿನಾ ತಾಕಾ.
"ಸಿಂತಿ.....!" ಪರ್ತ್ಯಾನ್ ವ್ಹಡ್ಲ್ಯಾನ್ ಆಪೈಲೆಂ ಮನ್ವೆಲಾಬಾನ್. "ಕಿತೆಂ, ಹಾಂವೆಂ ಉಲೊ ಕೆಲ್ಲೆಂ ಆಯ್ಕೊಂಕ್ ನಾಂವೆ ತುಕಾ? ಭಾಯ್ರ್ ಯೆ!"
’ಅರೆ, ಆಜ್ ಪಾಪ್ಪಾಕ್ ಕಿತೆಂ ಜಾಲಾಂ...?’ ಮಿಸ್ತೆರ್ಚ್ ಜಾಲ್ಲೊ ಸಿಂತಿಕ್. ಭಿಂಯಾನ್ಂಚ್ ತೆಂ ಮ್ಹಣಾಲೆಂ -"ಆಯ್ಲಿಂ ಪಪ್ಪಾ"
ಮನ್ವೆಲಾಬಾಕ್ ಪಿಂತೆಗ್ ತಕ್ಲೆಕ್ ಚಡ್ಲ್ಲೊ. ಸಿಂತಿ ಆಪ್ಲ್ಯಾ ಕುಡಾಂತ್ಲೆಂ ಭಾಯ್ರ್ ಆಯಿಲ್ಲೆಂಚ್ ತಾಣೆಂ ವಿಚಾರ್ ಕೆಲೊ - "ಇತ್ಲೊ ವೇಳ್ ಖಂಯ್ ಗೆಲ್ಲೆಂಯ್ ತುಂ?"
"ಖಂಯ್ ನಾ........ ಸಿನೆಮಾಕ್ ವಚೊನ್ ಆಯ್ಲಿಂ" ಘಡ್ಬಡೊನ್ ಸಿಂತಿನ್ ಸಾಂಗ್ಲೆಂ. "ಸಿನೆಮಾ ಕೆದಾಳಾ ಆಖೇರ್ ಜಾಲೊ?"
"ಸ ವೊರಾಂಚೆರ್.." ಕ್ಷೀಣ್ ತಾಳ್ಯಾನ್ ಉಲೈಲೆಂ ತೆಂ.
"ತಾಚ್ಯಾ ಉಪ್ರಾಂತ್ ಘರಾ ಪಾವೊಂಕ್ ದೋನ್ ವೊರಾಂಚೊ ವೇಳ್ ಲಾಗ್ಲೊಗಿ ತುಕಾ?"
"ಬಸ್ಸ್ ಮೆಳೊಂಕ್ ವೇಳ್ ಜಾಲೊ ಪಪ್ಪಾ...." ಸಿಂತಿ ಆತಾಂ ನಿಜಾಯ್ಕಿ ಕಾಂಪ್ಲೆಂ - ಪಪ್ಪಾ ಆಸೊ ಕಿತ್ಯಾಕ್ ಆಜ್ ಉಲೊಂವ್ಕ್ ಲಾಗ್ಲಾಗಿ ಮ್ಹಣ್.
"ಬಸ್ಸ್ ಮೆಳೊಂಕ್ ವೇಳ್ ಜಾಲೊ....ವ, ಹೊಟೆಲಾಂತ್ ಖಾಣಾಂ ಖಾತಾನಾ ವೆಳ್ ಗೆಲ್ಲೊ ಕಳೊಂಕ್ ನಾ...?" ಧೆಂಕ್ಣೊ ಮಾರ್ಲೊ ಮನ್ವೆಲಾಬಾನ್.
"ಪಪ್ಪಾ..." ಸಿಂತಿಚಿ ಜೀಬ್ ಥಂಯ್ಚ್ ಬಂಧ್ ಪಡ್ಲಿ. ಬಾಪಯ್ಚೊ ರಾಗಿಷ್ಟ್ ಜಿನೊಸ್ ಪಳೆತಾನಾ ತಾಕಾ ಸುಸ್ತಾಲೆಂ, ತಾಣೆಂ ಆಜ್ ಆಪ್ಣಾಕ್ ಹಂಪನ್ಕಟ್ಟ್ಯಾರ್ ದೆಖ್ಲಾಂ ಮ್ಹಣ್.
"ಪಪ್ಪಾ!" ಕೆಂವ್ಚಾಲೊ ತೊ, "ಮ್ಹಾಕಾ ಪಪ್ಪಾ ಮ್ಹಣ್ ಆಪೈನಾಕಾ. ಸಾಂಗ್, ಹೊಟೆಲಾಂತ್ ತುಜ್ಯಾ ಒಟ್ಟುಕ್ ಆಸ್ಲ್ಲೊ ತರ್ನಾಟೊ ಕೋಣ್ ತೊ? ತುಕಾ ಸಿನೆಮಾಕ್ ಆಪೊವ್ನ್ ವ್ಹರ್ನ್ ಗೆಲ್ಲೊ ಮಾನಾಯ್ ಕೋಣ್ ತೊ?"
ಸಿಂತಿಕ್ ಜಾಪ್ ದೀಂವ್ಕ್ ಜಾಲಿನಾ. ತೆಂ ರಡೊಂಕ್ ಲಾಗ್ಲೆಂ. ಬಾಪಾಯ್ಕ್ ಆಪ್ಲಿ ಸರ್ವ್ ಖಬಾರ್ ಮೆಳ್ಳ್ಯಾ ಮ್ಹಣ್ ತಾಕಾ ಖಚಿತ್ ಜಾಲೆಂ. ಆನಿಂ ಆಪ್ಣಾಕ್ ಬಚಾವಿ ನಾ.....ಸಾಂಪಡ್ಲಿಂಮೂ ದೆವಾ....
"ರಡ್ತಾಯ್ಗಿ ಘೊಡ್ಯಾ? ತುಕಾ ಹಾಂವೆಂ ದಿಲ್ಲಿ ಸಳ್ಗಿ ಚಡ್ ಜಾಲಿ. ತುಜಿ ಕೆಲ್ಲ್ಯಾ ಅಪುರ್ಬಾಯೆಕ್ ಆಜ್ ತುಂ ಮ್ಹಜ್ಯಾ ಮಾತ್ಯಾರ್ ಚಡೊನ್ ಬಸ್ಲೆಂಯ್ ಆನಿಂ ತೊಂಡಾರ್ ಥುಕೊಂಕ್ಲಾಗ್ಲೆಂಯ್? ಮ್ಹಜಿ ಮರ್ಯಾದ್ ಬಾಜಾರಾಂತ್ ತೀನ್ ಕಾಸಾಂಕ್ ವಿಕುಂಕ್ ತುಂ ಪಾವ್ಲೆಂಯ್. ಉಲಯ್, ಆತಾಂ ತುಜಿ ಜೀಬ್ ಕಿತ್ಯಾಕ್ ಬಂಧ್ ಪಡ್ಲಿ?"
"ಮ್ಹಜಿ ಚೂಕ್ ಜಾಲಿ ಪಪ್ಪಾ.." ನಿರ್ವೊಗ್ ನಾಸ್ತಾಂ - ರಡೊನ್ ಮ್ಹಣಾಲೆಂ ತೆಂ.
"ಚೂಕ್ ತುಜ್ ನ್ಹಂಯ್. ಬಗಾರ್, ತುಕಾ ಕೊಲೆಜಿಕ್ ಧಾಡ್ಲ್ಲ್ಯಾ ಮ್ಹಜಿ ಚೂಕ್.... ಆಯ್ಕ್, ಅಯ್ಚ್ಯಾನ್ ತುಕಾ ಕೊಲೆಜ್ ಬಂಧ್, ಸಿನೆಮಾಯೀ ಅಖೇರ್ ಅನಿಂ ಭಾಯ್ಲಿ ಭಂವ್ಡಿ ಖೈದ್. ತುಕಾ ನವ್ರೊ ಹಾಂವ್ಚ್ ಸೊಧ್ತಾಂಗೊ. ರಸ್ತ್ಯಾರ್ ಭಂವೊನ್ ಮ್ಹಾಕಾ ತುಂ ಜಾಂವಯ್ ಹಾಡಿನಾಕಾ...."
"ಹಾಂವ್ ಕಾಜಾರ್ ಜಾಯ್ನಾ....." ರಡ್ಣ್ಯಾ ಮಧೆಂಯಿ ಬೋಬ್ ಮಾರ್ಲಿ ಸಿಂತಿನ್.
"ತುಂ ಕಾಜಾರ್ ಜಾಯ್ನಾಕಾ. ಪುಣ್, ಹಾಂವ್ ತುಕಾ ಕಜಾರ್ ಕರ್ತಾಂ" ಗೊರೊಜ್ ಮಾರ್ಲಿ ಮಾನ್ವೆಲಾಬಾನ್, "ಚಲ್ ನಿಕಳ್ ಮ್ಹಜ್ಯಾ ದೊಳ್ಯಾಂ ಮುಖ್ಲೆಂ. ವಚ್, ತುಜ್ಯಾ ಕುಡಾಂತ್ ಲಿಪ್ ತುಜೆಂ ಮುಸ್ಕಾರ್ ಘೆವ್ನ್"
ಅನಿಂ ತ್ಯಾ ದಿಸಾ ಥಾವ್ನ್ಂಚ್ ಮನ್ವೆಲಾಬ್ ಧುವೆಕ್ ನವ್ರೊ ಸೊಧ್ಚ್ಯಾ ಕಾಮಾರ್ ಪಡ್ಲೊ. ಕಿತ್ಲೆಶ್ಯೊ ಸಯ್ರಿಕೊ ಪಳೆಲ್ಯಾರೀ, ಏಕೀ ಸಮಾ ಕಟ್ಟ್ ಲಾಗ್ಲಿನಾ. ಆನಿಂ ಸಿಂತಿಚೆಂ ನಡ್ತೆಂ ಜಾಣಾಸ್ಲ್ಲ್ಯಾ ಜಾಯ್ತ್ಯಾಂನಿ, ತಾಕಾ ಸುಣ್ ಕರುಂಕ್ ಧೈರ್ ಘೆತ್ಲೆಂನಾ. ಮನ್ವೆಲಾಬಾಕ್ ತಕ್ಲಿ ಪೊಡಾಫಡ್ ಪರ್ತ್ಯಾನ್ ಪ್ರಾರಂಭ್ ಜಾಲ್ಲಿ. ಹ್ಯಾಚ್ ವೆಳರ್, ಬರ್ಯಾಕ್ಗಿ ವಾಯ್ಟಾಕ್ಗಿ ಮ್ಹಳ್ಳ್ಯಾಬರಿ ಶಾಬಿಯಾಮ್ ಯೇವ್ನ್ ತಾಂಗೆರ್ ಪಾವ್ಲೊ.
(ಸಿಂತಿಚೆಂ ಕಾಜಾರ್ ಹೆರಿಲಾಗಿಂ ಜಮ್ತಾಗಿ? ಶೀನಾಕ್ ಮಂಗ್ಳೂರ್ಚ್ಯಾ , ನ್ಯಾಯಲಯಾಂತ್ ಕಿತೆಂ ತೀರ್ಪ್ ಜಾಲೆಂ? ಮೆಲ್ವಿನಾಚ್ಯಾ ಜಿಣಿಯೆಂತ್ ಕಸಲಿಂ ಘಡಿತಾಂ ಸಂಭವ್ಲಿಂ? ತಾಕಾ ಸೊಧುಂಕ್ ಪ್ರಯತ್ನ್ ಕರ್ಚ್ಯಾ ಗಿಬ್ಬಾಕ್ ಕಿತೆಂ ಪರಿಣಾಮ್ ಮೆಳ್ಳೋ? ಹ್ಯಾ ಸರ್ವ್ ಕುತೂಹಲಾಚ್ಯಾ ಸವಾಲಾಂಕ್ ಜಾಪಿ ಮೆಳ್ತಾನಾ, ಮುಖ್ಲ್ಯಾ ಅಂಕ್ಯಾಂತ್ ಅಧಿಕ್ ಮಝಾ ಯೆತಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14, 15
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
