ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 2
ವಿಸ್ತಾರ್ ಕ್ಲಾಸಿಂತ್ ಲಾಗಿಂ ಪನ್ನಾಸ್ ವಿದ್ಯಾರ್ಥಿ ಬಸೊನ್ ಆಸ್ಲ್ಲೆ. ಮೆಲ್ವಿನ್ಯಿ ಪಾರ್ಕೊ ಜಾವ್ನ್ ಕ್ಲಾಸಿ ಬಿತರ್ ಸರ್ಲೊ. ಭೊಂವಾರಿಂ ದೀಷ್ಟ್ ಘುಂವ್ಡಾಯ್ತಾನಾ, ತಾಚ್ಯಾ ವಳ್ಕಿಚೆ ಕೊಣೀ ದಿಸ್ಲೆನಾಂತ್. ಕೊಣೀ ಜಾವ್ನ್ ತಾಚೆಲಾಗಿಂ ಉಲೊಂವ್ಕ್ ಮುಖಾರ್ಯಿ ಆಯ್ಲೆನಾಂತ್. ತೆಂ ಮೌನ್ ಆನಿಂ ವಿಶಾಲ್ ಸುವಾತ್ ಎಕಾ ಬಾಂಕಾರ್ ಮೆಲ್ವಿನಾನ್ ಬಸ್ಕಾ ಘೆತ್ಲಿ. ಲೆಕ್ಚರರ್ ಆಯ್ಲೊ, ಆನಿಂ ತಾಂಚಿ ಹಾಜರಿ ಘೆವ್ನ್ ತ್ಯಾ ದಿಸಾಕ್ ರಜಾ ದಿಲಿ.
ತಿಂ ವಾರ್ಯಾ ವಯ್ಲಿಂ ಬಾಂದ್ಪಾಂ ಮೆಲ್ವಿನಾನ್ ಬಾಂದ್ಲ್ಲಿಂ ನಪೈಂಚ್ ಜಾಲ್ಲಿಂ. ತಾಣೆಂ ಚಿಂತ್ಲ್ಲೆಂ ಕಿ, ಹಾಂಗಾ ವಿದ್ಯಾರ್ಥಿ ಎಕಾಮೆಕಾ ಮೆಳ್ತೆಲೆ, ಸುಖ್-ದುಃಖ್ ಸಾಂಗ್ತೆಲೆ, ಆನಿಂ ಆಬಿಪ್ರಾಯೊ ಬದ್ಲಿತೆಲೆ ಮ್ಹಣ್. ಪುಣ್ ಥೊಡ್ಯಾಚ್ ದಿಸಾಂನಿ ತಾಕಾ ಕಳ್ಳೆಂಕ್ ಕಿ, ತಾಣೆಂ ಚಿಂತ್ಲ್ಲೆಂ ಸರ್ವ್ ಫಟ್ ಮ್ಹಣ್. ಸುರ್ವಿಲ್ಯಾ ದಿಸಾಂನಿ ಎಕಾಮೆಕಾಚಿ ವಳೊಕ್ ಜಾಲ್ಯಾರಿ ಚಂಗಾಯ್ ಜಾಲಿನಾ. ಆನಿಂ ತ್ಯಾ ಉದಾಸೀನಾಕ್, ತ್ಯಾ ಕ್ರತಕ್ ವಾತಾವರಣಾಕ್ ಕಾರಣ್ ಸೊಧುನ್ ಚಡ್ ಪೈಸ್ ವೆಚೆಂ ನಾಕಾ ಆಸ್ಲ್ಲೆಂ. ತೆ ಲಾಂಬ್ ಕಲ್ಸಾಂವಾಂ ಘಾಲ್ತಾಲೆ, ಆಪ್ - ಟು - ಡೇಟ್ ಸೊಭ್ತಾಲೆ. ಥೊಡ್ಯಾಂಕ್ ಕಾರಾಂ ಯೇವ್ನ್ ಕೊಲೆಜಿಚ್ಯಾ ದಾರಾರ್ ದೆಂವೈತಾಲಿಂ. ಪುಣ್ ಮೆಲ್ವಿನ್.....ಹೈಸ್ಕೂಲಾಂತ್ಲೆಂ ತೆಂಚ್ ಮಟ್ವೆಂ ಇಜಾರ್ ಆನಿಂ ಖೊಮಿಸ್ ತಾಚೆಂ ನ್ಹೆಸಾಣ್. ಹೆರ್ ವಿದ್ಯಾರ್ಥಿ ಹೊಟೆಲಾಂಕ್ ರಿಗೊನ್ ಖಾಣಾಂ ಖಾತಾನಾ, ತಾಣೆಂ ಕೊಲೆಜಿಥಾವ್ನ್ ಘರಾ ಚಲೊನ್ಂಚ್ ವೊಚಾಜಾಯ್ ಆಸ್ಲ್ಲೆಂ.
’ತುಕಾ ಕಲ್ಸಾವಾಂ, ಸುಟಾಂ ಆನಿಂ ಖರ್ಚಾಕ್ ಮೆಳಾಶೆನಾಂತ್ ಪುತಾ......’ ವಿತೊರಾಬಾನ್ ತಾಕಾ ಪೈಲೆಂಚ್ ಸಾಂಗ್ಲ್ಲೆಂ.
’ಪುಣ್ ತುವೆಂ, ಮ್ಹಾಕಾ ಜಾಯ್ತೊ ತ್ಯಾಗ್ ಕರ್ನ್ ಕೊಲೆಜಿಕ್ ಧಾಡ್ಲಾಯ್ ಬಾಬಾ.....’ ಮೆಲ್ವಿನಾಚೆಂ ಕಾಳಿಜ್ ಉಮಾಳೊನ್ ಯೆತಾಲೆ.
ತರೀ ತೆ ಕ್ಲಾಸಿಂತ್ಲೆಂ ಉಬ್ದೇಸ್ ಸೊಸುಂಕ್ ಕಷ್ಟ್ ಜಾತಾಲೆ. ದುಬ್ಳೊ ಆನಿಂ ಗ್ರೇಸ್ತ್ ಮ್ಹಳ್ಳೊ ವ್ಯತ್ಯಾಸ್ ಸಗ್ಳ್ಯಾನ್ಯಿ ರಾಜ್ ಕಾರ್ತಾಲೊ. ತೆಂ ಖಂದಕ್ ಉತ್ರೊನ್ ತೊ ವ್ಯತ್ತ್ಯಾಸ್ ನಾಸ್ ಕರುಂಕ್ ಕೊಣಾಚ್ಯಾನ್ಂಚ್ ನಜೊ ಆಸ್ಲ್ಲೆಂ,.
ಕ್ಲಾಸಿಂತ್ ತಾಕಾ ಮೊಗಾಚೆ ಈಷ್ಟ್ ಕೊಣಿ ಜಮ್ಲೆನಾಂತ್. ವ್ಹೊಡಾಂಕ್ ದುಬ್ಳೆ ರುಚಾನಾಂತ್. ದುಬ್ಳ್ಯಾಂಕ್ ವ್ಹೊಡಾಂ ಸರ್ಶಿಂ ವಚೊಂಕ್ ದಾಕ್ಷೆಣ್. ತರೀ ಮೆಲ್ವಿನಾಕ್ ಕ್ಲಾಸಿ ಭಾಯ್ಲೊ ಎಕ್ಲೊಚ್ ಮೊಗಾಚೊ ಈಷ್ಟ್ ಆಸ್ಲ್ಲೊ ರಂಗಣ್ಣಾಚೊ ಪೂತ್ ಶೀನ. ಜಶೆಂ ರಂಗಣ್ಣಾ ಆನಿಂ ವಿತೊರಾಬ್ ಮೊಗಾಚೆ ಈಷ್ಟ್ ಜಾವ್ನಾಸ್ಲ್ಲೆ, ತಶೆಂ ತಾಂಚೆಂ ದೋಗ್ ಪೂತ್ಯಿ, ವಿವಿಧ್ ಧರ್ಮಾಚೆಂ ತರೀ, ಭಾವಾ ಸಾರ್ಕ್ಯಾ ಮಯ್ಪಾಸಾನ್ ಆಸ್ಲ್ಲೆ.
ಶೀನ, ಮೆಲ್ವಿನಾಚ್ಯಾಕಿ ಚಾರ್ ವರ್ಸಾಂಕ್ ವ್ಹೊಡ್ ಜಾಯ್ತ್. ತ್ತೊ ವ್ಹೊಡ್ಲೊ ಪೋಲಿ ಜಾವ್ನಾಸ್ಲ್ಲೊ. ಜಿವಾನ್ ದಡಂಗ್ ಆಸೊನಿಂಯ್ ಕಾಮ್ ಕರುಂಕ್ ತಯಾರ್. ಹ್ಯಾ ಆದಿಂಚ್ ತೊ ಜೈಲಾಚ್ಯಾ ದಾರಾರ್ ವೊಚೊನ್ಯಿ ಆಯಿಲ್ಲೊ. ಮಾರಾಫಾರ್,ಚೊರಿ ಆನಿಂ ಡೋಂಗಿ ಮ್ಹಳ್ಯಾರ್ ತಾಕಾ ಉದಾಕ್ ಪಿಯೆಲ್ಲ್ಯಾ ಇತ್ಲೆಂ ಸಸಾರ್. ಶೀನಾಕ್ ಪಳೆವ್ನ್ ವಾಡೊ ಸಗ್ಳೊ ಕಾಂಪ್ತಾಲೊ. ಸಾಧಾರ್ಣಾಚೆಂ ತಾಚೆಲಾಗಿಂ ಉಲೊಂವ್ಕ್ಚ್ ಬಿಯೆತಾಲೆ. ಮರ್ಯಾದಿಚೆ ಮನಿಸ್ ಶೀನಾಕ್ ತಕ್ಲಿ ಉಕೊಲ್ನ್ ಪಳೆನಾತ್ಲ್ಲೆ. ಪುಣ್ ಕಸಲ್ಯಾಗಿ ಬಾಂದಾನ್ ಮೆಲ್ವಿನ್ ಶೀನಾಚೊ ಜಿವಾವರ್ತೊ ಮಿತ್ರ್ ಜಾಲ್ಲೊ. ಶೀನಾಕ್ ಖರ್ಯಾ ವಾಟೆಕ್ ಹಾಡಿಜಾಯ್ ಮ್ಹಣ್ ತಾಣೆಂ ಪೆಂಕಾಡ್ ಬಾಂದ್ಲ್ಲೆಂ. ತಶೆಂ ಶೀನಾಯಿ ಮೆಲ್ವಿನಾ ಖಾತಿರ್ ಜೀವ್ ದೀಂವ್ಕ್ ತಯಾರ್ ಆಸ್ಲ್ಲೊ.
ಹೆಣೆಂ ಕ್ಲಾಸ್ ಆರಂಭ್ ಜಾವ್ನ್ ಮಹಿನೊ ಏಕ್ ಉತರ್ಲ್ಲೊ. ಕೊಲೆಜಿಂತ್ ಮಝಾ ಮೆಳ್ತೆಲಿ ಮ್ಹಣ್ ಚಿಂತ್ಲ್ಲ್ಯಾ ಮೆಲ್ವಿನಾಕ್ ಚ್ಯಾರ್ಯಿ ಕುಶಿಂನಿ ನಿರಾಶಾಚ್ ದಿಸ್ತಾಲಿ. ಸಿನೆಮಾ ಆನಿಂ ಭೊಂವ್ಡಿ ಮ್ಹಣ್ ಜಾಯ್ತೆ ಸಹ - ವಿದ್ಯಾರ್ಥಿ ಗಮ್ಮತಾಂ ಮಾರ್ತಾನಾ, ತೊ ನಿರಾಶೆಚೆ ಆಕ್ಲಾಸ್ ಸೊಡ್ತಾಲೊ. ಕ್ಲಾಸಿಂತ್ ತೆ ಫೊಕಣಾಂ ಕರ್ತಾನಾ, ಮೆಲ್ವಿನ್ ಕುರ್ವೊನ್ ಬಸ್ತಾಲೊ.....ಹಾಯ್, ದುಬ್ಳೊ ಆನಿಂ ಗ್ರೇಸ್ತ್ ಮ್ಹಳ್ಳೊ ಭೇದ್ ದೆವಾನ್ ಕಿತ್ಯಾಕ್ ರಚ್ಲ್ಲೊಗಾಯ್...ಥೊಡ್ಯಾ ವೆಳಾ ತೊ ಚಿಂತಾಲೊ ಕಿ, ಆಪ್ಣೆಂ ಕೊಲೆಜಿಕ್ ಭರ್ತಿ ಜಾಂವ್ಕ್ ನಜೊ ಆಸ್ಲ್ಲೆಂ ಮ್ಹಣ್. ಪಯ್ಶೆ......ಪಯ್ಶ್ಯಾಂಕ್ ಮಾತ್ರ್ ಮನ್ಶಾಕ್ ಧಾದೊಸ್ಕಾಯ್ ದಿಂವ್ಚಿ ಸಕತ್ ಆಸ್ಲ್ಲಿ. ಪುಣ್ ತೆ ಪಯ್ಶೆ ಮೆಲ್ವಿನಾಲಾಗಿಂ ನಾತ್ಲ್ಲೆ. ಥೊಡ್ಯಾ ಪಾವ್ಟಿಂ ತೊ ಚಿಂತ್ತಾಲೊ ಕಿ, ತಾಚೆ ತಿತ್ಲೊ ಗರೀಬ್ ಕೊಣ್ಂಚ್ ನಾ ಮ್ಹಣ್. ಪುಣ್ ತ್ಯಾ ಎಕಾ ದಿಸಾ ತಾಚೆ ತಸಲ್ಯಾಚಿಚ್ ಎಕ್ಲ್ಯಾಚಿ ವಳೊಕ್ ತಾಕಾ ಜಾಲಿ.
ಆಗೋಸ್ಟ್ ಮಹಿನೊ. ಸಾಂಜೆರ್ ಸಾಡೆ ಚ್ಯಾರಾಂಕ್ ಕ್ಲಾಸ್ ಆಖೇರ್ ಜಾಲಿ. ವಿದ್ಯಾರ್ಥಿ ಕ್ಲಾಸಿಂತ್ಲೆಂ ಭಾಯ್ರ್ ಆಯ್ಲೆ. ಆನಿಂ ತೆ ಭಾಯ್ರ್ ಯೆಂವ್ಕ್ಚ್ ರಾಕ್ತಾಲಿಂ ಮ್ಹಳ್ಳ್ಯಾಬರಿ ಅಂತ್ರಳಾರ್ ಎಕಾಚ್ಛಾಣೆಂ ಕಾಳಿಂ ಮೊಡಾಂ ಮಾಂಡ್ಲಿಂ. ಘಡ್ಘಡ್ಯಾಚ್ಯಾ ಅವಾಜಾಸಂಗಿಂ ಸುರು ಜಾಲೊ ಶಿರಾಧಾರಿಂಚೊ ಪಾವ್ಸ್. ದೀಸ್ಭರ್ ಆಸೊರ್ ಆಸ್ಲ್ಲ್ಯಾನ್ ಸಬಾರ್ ಜಣಾಂನಿಂ ಸತ್ರ್ಯೊ ಹಾಡುಂಕ್ನಾತ್ಲ್ಲ್ಯೊ. ನಶಿಬಾನ್, ಜಿಲ್ಲಿಬಾಯೆಚ್ಯಾ ಗೊವ್ಜೆಕ್ ಲಾಗೊನ್ ಮೆಲ್ವಿನ್ ಮನ್ ನಾತ್ಲ್ಯಾರೀ ಸತ್ರಿ ಹಾಡ್ನ್ ಆಯಿಲ್ಲೊ. ಹಾಡ್ಲ್ಲಿ ತಿ ಬರ್ಯಾಕ್ಚ್ ಪಡ್ಲಿ ಮ್ಹಣ್ ಲೆಕ್ಲೆಂ ತಾಣೆಂ. ಆನಿಂ ವೊತ್ಚ್ಯಾ ಪಾವ್ಸಾಕ್, ಸತ್ರಿ ಉಸವ್ನ್ ತೊ ಘರ್ಚ್ಯಾ ವಾಟೆಕ್ ಲಾಗ್ಲೊ.
"ಶೂ....." ಪಾಟ್ಲ್ಯಾನ್ ಕೊಣೆಗಿ ತಾಕಾ ಆಪೈಲೆಂ. ಪಳೆತಾನಾ ತಾಚ್ಯಾಚ್ ಕ್ಲಾಸಿಂತ್ಲೊ ಎಕ್ಲೊ ತಾಕಾ ಪಳೆವ್ನ್ ಹಾಸ್ಲೊ. ಮೆಲ್ವಿನ್ ಪ್ರತಿ ಹಾಸ್ಲೊ.
"ತುಂ ಬೆಜಾರ್ ಪಾವಾನಾಂಯ್ ತರ್, ತುಜ್ಯಾ ಸತ್ರೆಂತ್ ಚಿಕ್ಕೆ ಯೇಂವ್ಗಿ ಹಾಂವ್?" ಕೊಂಕ್ಣೆಂತ್ ತಾಣೆಂ ವಿಚಾರ್ಲೆಂ.
"ಮ್ಹಜಿ ಆಡ್ಕಳ್ ನಾ...ಯೆ," ಮೆಲ್ವಿನಾನ್ ಆಶೆಂ ಸಾಂಗ್ತಾನಾ ತೊ ತಾಚ್ಯಾ ಬರಾಬರ್ ಆಯ್ಲೊ. "ಮ್ಹಾಕಾ ಶೇಡಿ ಗುಡ್ಯಾಚ್ಯಾ ವಾಟೆನ್ ವೊಚೊಂಕ್, ತುಕಾ?"
"ಹಾಂವೀ ಥಂಯ್ ಮ್ಹಣಾಸರ್ ಯೆತಾಂ. ಉಪ್ರಾಂತ್ ಬಸ್ಸಾರ್ ವೆತಾಂ." ಮ್ಹಣಾಲೊ ತೊ. ದೊಗೀ ಸವ್ಕಾಸ್ ಮೆಟಾಂ ಕಾಡುಂಕ್ ಲಾಗ್ಲೆ.
"ಹಿ ಸತ್ರಿ ಪೊರ್ನಿ. ಲುಗಾಟ್ ಚಿಕ್ಕೆ ಪಿಂಜ್ಲಾಂ ಪಳೆ. ತುಂ ಯೇವ್ನ್ಯಿ ಫಾಯ್ದೊ ಜಾಲೊನಾ" ಮೆಲ್ವಿನ್ ಮ್ಹಣಾಲೊ ಲಜೆನ್.
"ಓ ಕಾಂಯ್ ವ್ಹೊಡ್ ನ್ಹಂಯ್. ’ಓಲ್ಡ್ ಈಸ್ ಗೋಲ್ಡ್’ ಮ್ಹಣ್ತತ್. ಹೆಂ ತುಂ ಆಮ್ಚ್ಯಾಚ್ ಕ್ಲಾಸಿಂತ್ಲೊ ತರೀ, ತುಜೆಂ ಸಾರ್ಕೆಂ ನಾಂವ್ ಹಾಂವ್ ನೆಣಾ. ಉಲೊಂವ್ಕ್ ಆಮ್ಕಾಂ ಸಂದರ್ಭ್ಚ್ ಮೆಳೊಂಕ್ನಾಮೂ....."
"ಹಾಂವ್ ಮೆಲ್ವಿನ್. ಉರ್ವಾ ಮ್ಹಜೆಂ ಘರ್. ಆನಿಂ ತುಜೆಂ ನಾಂವ್.....? ಮೆಲ್ವಿನ್ಯಿ ತಾಚೆ ನಾಂವ್ ನೆಣಾಸ್ಲ್ಲೊ.
"ಮ್ಹಜೆಂ ನಾಂವ್ ಗಿಲ್ಬರ್ಟ್, ಆಪೊಂವ್ಚೆಂ ಗಿಬ್ಬಾ ಮ್ಹಣೊನ್. ಹಾಂವ್ ಬೊಂದೆಲ್ಗಾರ್. ತುಜೆಬರಿ ಶಹರಾಂತ್ಲೊ ನ್ಹಂಯ್" ತೊ ಸಾಂಗ್ತಾನಾ ಮೆಲ್ವಿನ್ ಹಾಸ್ಲೊ. ಆಶೆಂ ತೆ ಉಲೊವ್ನ್ ವೆತಾನಾ ಶೇಡಿಗುಡ್ಡಾ ಪಾವ್ಲೆ.
"ಮೆಲ್ವಿನ್" ಗಿಬ್ಬಾ ಹಾಸೊನ್ ಮ್ಹಣಾಲೊ. "ತುಕಾ ಮಸ್ತ್ ದೇವ್ ಬರೆಂ ಕರುಂ, ಇತ್ತುನ್ ಮ್ಹಣಾಸರ್ ಪಾವಯಿಲ್ಲ್ಯಾಕ್. ಹೆಂ.......ಆತಾಂ ಮ್ಹಜ್ಯಾ ಸಾಂಗಾಂತಾ ಹ್ಯಾ ಹೊಟೆಲಾಕ್ ಯೆಂವ್ಚಿ ದಯಾ ದಾಕಯ್ಶಿಗಿ...?"
ಮೆಲ್ವಿನಾಕ್ ಅಜಾಪ್ ಭೊಗ್ಲೆಂ.ಹೊಟೆಲಾಕ್......ತಾಚೆಲಾಗಿಂ ಬೊಲ್ಸಾಂತ್ ರುವಿಯಿ ನಾತ್ಲ್ಲಿ. ಮುಖಾರ್ ಆಸ್ಚ್ಯಾ ತ್ಯಾ ಹೊಟೆಲಾಕ್ ಪಳೆವ್ನ್ ತೊ ಕಾವ್ಜೆಣೆನ್ ಸಾಂಗಾಲಾಗ್ಲೊ - "ಮ್ಹಾಕಾ ಮಾಫ್ ಕರ್ ಗಿಲ್ಬರ್ಟ್....ಹಾವೆಂ ಆಜ್ ಪಯ್ಶೆ ಹಾಡುಂಕ್ ನಾಂತ್. " ಪಯ್ಶೆ ಆಜ್ಚ್ ನಹಿಂ, ತಾಚೆಲಾಗಿಂ ಕೆದಾಳಾಚ್ ನಾತ್ಲ್ಲೆ.
"ಪಯ್ಶೆ....ಕಿತ್ಯಾಕ್" ಮ್ಹಜೆಲಾಗಿಂ ಪಯ್ಶೆ ಆಸ್ತಾನಾ ತುಜ್ಯಾ ಪಯ್ಶ್ಯಾಂಚಿ ಗರ್ಜ್ ಕಿತೆಂ? ಯೆ, ಯೆ, ದಾಕ್ಶೆನಾಕಾ" ಮೆಲ್ವಿನಾಚ್ಯಾ ಹಾತಾಕ್ ಧರ್ನ್ ತಾಕಾ ವೋಡ್ನ್ ವ್ಹೊರ್ನ್ ಗೆಲೊ.
ಕೊಲೆಜಿಕ್ ಆಯಿಲ್ಲ್ಯಾಕ್ ಮೆಲ್ವಿನಾನ್ ಹೊಟೆಲಾಂತ್ ಪಿಯೆಂವ್ಚಿ ಹಿ ಪಯ್ಲಿ ಕಾಫಿ. ಕಾಫಿಯೆಚೊ ಗ್ಲಾಸ್ ಹಾತಿಂ ದರ್ತಾನಾ ಸವ್ಕಾಸ್ ತಾಣೆಂ ಮ್ಹಳೆಂ ’ಗಿಲ್ಬರ್ಟ್, ಆಮ್ಚ್ಯಾ ಕ್ಲಾಸಿಂತ್ಲೆಂ ಸಕ್ಕಡ್ಯಿ ಏಕ್ಚ್ ಥರಾಚೆ ಮ್ಹಣ್ ಹಾಂವೆಂ ಚಿಂತ್ಲ್ಲೆಂ. ಪುಣ್ ಆಜ್ ತುಕಾ ಪಳೆತಾನಾ.."
"ತಶೆಂ ಮ್ಹಳ್ಯಾರ್?" ಆಜಾಪೊನ್ ಮ್ಹಣಾಲೊ ಗಿಬ್ಬಾ.
"ನಹಿಂ ಗಿಲ್ಬರ್ಟ್....ಇತ್ಲೊ ತೇಂಪ್ ಜಾಲೊ ಹಾಂವ್ ಕೊಲೆಜಿಕ್ ಯೇವ್ನ್. ಪುಣ್ ಕೊಣೀ ಮ್ಹಜೆಲಾಗಿಂ ಬರ್ಯಾನ್ ಏಕ್ ಸಬ್ದ್ ಉಲೈಲ್ಲೆ ನಾಂತ್. ಖಂಯ್ಚ್ಯಾ ಕಾರಣಾಕ್ ಲಾಗೊನ್ ಮ್ಹಳ್ಳೆಂ ಮ್ಹಾಕಾ ಸಮ್ಜಾನಾ"
ಗಿಬ್ಬಾ ಹಾಸ್ಲೊ......ಜೋರಾನ್ ಹಾಸ್ಲೊ."ಹುಂ .....ಸಮಾ ಸಾಂಗ್ಲೆಂಯ್. ಹಹ್ಹಾಹ್ಹಾ...... ದುಸ್ರೆಕಡೆ ಮುಯೊ ಕಿತ್ಯಾಕ್ ವೆತಾತ್? ತುಂಯ್ ಲಾಂಬ್ ಕಲ್ಸಾಂವ್ ಘಾಲ್, ಫೆಶನಾಂ ಕರ್, ಬೊಲ್ಸಾಂತ್ ಥೊಡೆ ಪಯ್ಶೆ ಘೆವ್ನ್ ಯೆ. ತುಕಾ ಕಿತ್ಲೆ ಈಷ್ಟ್ ಜಾಯ್ ಸಾಂಗ್"
ಮೆಲ್ವಿನ್ ತೆಂ ಜಾಣಾಸ್ಲೊ. ತೊ ಉಲೊಂವ್ಕ್ ತೊಂಡ್ ಕಾಡ್ಚ್ಯಾ ಆದಿಂಚ್ ಗಿಬ್ಬಾ ಮ್ಹಣಾಲೊ - "ಮೆಲ್ವಿನ್, ಮನ್ಶಾಚೆಂ ತೊಂಡ್ ಪಳೆತಾನಾ ತಾಚಿ ಸ್ಥಿತಿ ಪಾರ್ಕುಂಕ್ ಜಾತಾ ಖಂಯ್. ಹಾಂವ್ ಚಿಂತ್ತಾಂ, ತುಜ್ಯಾ ಘರ್ಚಿಂ ತಿತ್ಲಿಂ ಅನ್ಕೂಲ್ವಂತಾಂ ನಹಿಂ ಮ್ಹಣ್. ಆಶೆಂ ಮ್ಹಳ್ಳ್ಯಾಕ್ ಶಿಣಾನಾಕಾ ಹಾಂ. ಖರೆಂ ಸಾಂಗ್ಚೆಂ ಜಾಲ್ಯಾರ್ ಹಾಂವ್ಯಿ ಎಕ್ಲೊ ಗರೀಬ್. ವರ್ತ್ಯಾ ಕಷ್ಟಾಂನಿ ಹೆಂ ಕೊಲೆಜಿಚೆಂ ಶಿಕಾಪ್ ಶಿಕೊಂಕ್ ಹಾಂವ್ ಆಯ್ಲಾಂ. ಆನಿಂ ಜಾಯ್ತ್ಯಾ ಪಾವ್ಟಿಂ ಹಾಂವ್ ಚಿಂತ್ತಾಂಕಿ, ಹೆಂ ಕೊಲೆಜಿಚೆಂ ಶಿಕಾಪ್ ಗ್ರೇಸ್ತಾಂಕ್ ಮಾತ್ರ್ ಸಹಜ್ಲ್ಲೆಂ ಮ್ಹಣ್. ಪಯ್ಶ್ಯಾಂಚ್ಯಾ ಆಧಾರಾವಿಣೆಂ ಮನ್ಶಾನ್ ಕಶೆಂ ಜಿಯೆಂವ್ಚೆಂ....? ಮತಿಕ್ ಸಮಾಧಾನ್ ಪುಣಿ ಆಸಾಜಾಯ್ಮೂ...?"
"ತುಂ ಮ್ಹಣ್ತಾಯ್ ತುಜಿ ಸ್ಥಿತಿಯಿ ದುಬ್ಳಿ ಮ್ಹಣ್. ಪುಣ್ ತುಂ ಖರ್ಚಾಕ್ ಕಿತೆಂ ಕತಾಯ್? ತುಜೆಬರಿ ಮ್ಹಾಕಾ ಏಕ್ ರುವಿಯೀ ಮೆಳಾನಾಂಮೂ?" ಮೆಲ್ವಿನ್ ಆಜಾಪೊನ್ ಮ್ಹಣಾಲೊ.
"ತೆಂ ಆಯ್ಕಾಶಿ ಜಾಲ್ಯಾರ್ ತುಂ ಹಾಸೊಂಕ್ ಆಸಾಯ್. ದುಸ್ರ್ಯಾ ಖಂಯ್ಚಾಯಿ ಸಂದರ್ಭಾರ್ ತುಕಾ ಸಾಂಗ್ತಾಂ" ಗಿಬ್ಬಾ ವಿಸ್ರೊಂವ್ಕ್ ಪಳೆತಾಲೊ.
"ನಾ ಗಿಬ್ಬಾ, ತುವೆಂ ಸಾಂಗಾಜಾಯಿಚ್ಚ್" ಸಳಾವಳಿನ್ ಮೆಲ್ವಿನಾನ್ ವಿಚಾರ್ಲೆಂ.
"ಹುಂ......ಆಯ್ಕಾತಾಯ್ ಜಾಲ್ಯಾರ್ ಆಯ್ಕ್," ನಾರ್ಗೊನ್ ಗಿಬ್ಬಾ ಉಲೈಲೊ, "ಮ್ಹಜ್ಯಾ ಪುರ್ಸುತೆಚ್ಯಾ ವೆಳಾರ್ ಬಿಡಿಯೊ ಬಾಂದ್ತಾ..."
"ಕಿತೆಂ ಬಿಡಿಯೊ ಬಾಂದ್ತಾಯ್?!" ಹಾಕ್ರೆಲೊ ಮೆಲ್ವಿನ್.
"ವ್ಹೊಯ್", ಗಂಭೀರ್ ತಾಳ್ಯಾನ್ ಮ್ಹಣಾಲೊ ಗಿಬ್ಬಾ, "ಪಳೆ, ಮ್ಹಜ್ಯಾ ಬಾಪಾಯ್ಕ್ ಆಟ್ ಜಣಾ ಭುರ್ಗಿಂ ಆಮಿಂ. ಹಾಂವ್ಚ್ ಮಾಲ್ಘಡೊ. ತಾಚೆ ಶಿವಾಯ್, ಮ್ಹಜಿ ಮಾಂಯ್ ಆನಿಂ ವ್ಹಡ್ಲಿಮಾಂಯ್ ಮ್ಹಣೊನ್, ಘರಾಂತ್ ಇಕ್ರಾಂ ಜಣಾಂ. ಮ್ಹಜೊ ಬಾಪುಯ್ ದುಬ್ಳೊ ರೈತ್. ತಾಚ್ಯಾ ಜೊಡಿನ್ ಇತ್ಲ್ಯಾ ಜಣಾಂಚೆಂ ಜೀವನ್ ಚಲೊಂಕ್ ಸಾಧ್ಯ್ಗಿ? ದೆಕುನ್ಂಚ್ ಪರಿಸ್ಥಿತಿ ಆಶಿ ಆಯ್ಲ್ಯಾಕಿ, ಮೆಲ್ವಿನ್, ಘರ್ಚೆ ಕಷ್ಟ್ ಹಳು ಕರುಂಕ್ ಹಾವೆಂ ಕಿತೆಂ ತರಿ ಕರಿಜಾಯ್. ಹುಂ......ತುಕಾ ಬೆಜಾರ್ ಜಾಲೆಂ ಮ್ಹಣ್ ದಿಸ್ತಾ....ಯಾ ಆಮಿಂ.......ಪಾವ್ಸ್ ರಾವ್ಲೊಸೊ ದಿಸ್ತಾ...."
ಹೋಟೆಲಾಚೆಂ ಬಿಲ್ಲ್ ಗಿಬ್ಬಾನ್ ಫಾರಿಕ್ ಕರ್ತೆಚ್ಚ್ ದೊಗೀ ಭಾಯ್ರ್ ಆಯ್ಲೆ.
"ಮೆಲ್ವಿನ್ .....ಪಳೆ, ಮ್ಹಜೆಂ ಆನಿಂ ತುಜೆಂ ರೆಂಕ್ ಎಕ್ಚ್. ಆಮಿಂ ದೊಗಾಯ್ನಿಂ ಮಿತ್ರ್ ಜಾಯ್ಜಾಯ್"
ತಾಚ್ಯಾ ಹಾತಾಕ್ ಮೆಲ್ವಿನಾನ್ ಆಪ್ಲೊ ಮೆಳೈತಾನಾ, ತಾಚೆಂ ಕಾಳಿಜ್ ಉಮಾಳೊನ್ ಯೆತಾಲೆಂ. ತಿ ಘಡಿ ಕರ್ಕರ್ಯ್ಯಾಂಚಿ ತರೀ, ವರ್ತ್ಯಾ ಸಂತೊಸಾಚಿ ಜಾವ್ನಾಸ್ಲ್ಲಿ ದೊಗಾಂಯ್ಕಿ.
ಗಿಬ್ಬಾಕ್ ಆದೇವ್ಸ್ ಮಾಗೊನ್ ಮೆಲ್ವಿನ್ ಘರಾ ಯೆತಾನಾ, ತಾಚ್ಯಾ ಮತಿಂತ್, ಹಜಾರ್ ಚಿಂತ್ನಾಂ ಘುಂವ್ತಾಲಿಂ. ಸಂಸಾರಾಂತ್ ಕಸಲ್ಯಾ ಥರಾಚೆ ಮನಿಸ್ ಆಸಾತ್ ಆನಿಂ ಕಿತ್ಲ್ಯಾ ಥರಾಂಚೆಂ ಜೀವನ್ ತಾಂಚೆಂ......’ಧಾ ಬೊಟಾಂ ಝರಯ್ ಆನಿಂ ಪಾಂಚ್ ಬೊಟಾಂನಿ ಖಾ....’ ಮ್ಹಳ್ಳೆಲೆಂ ದೆವಾನ್ ಭುಮಿವೈಂಕುಟಾಂತ್. ಪುಣ್ ತಾಂಕ್ ಆಸ್ಲ್ಲೆ ದುಸ್ರ್ಯಾಂಚಿ ಬೊಟಾಂ ಝರೈತಾಲೆ ಆನಿಂ ಆಪ್ಲಿಂ ಪೊಟಾಂ ಭರ್ತಾಲೆ. ಆನಿಂ ಧಾ ಬೊಟಾಂ ಝರೈಲ್ಲೆ ದುಬ್ಳೆ, ಪಾಂಚ್ ಬೊಟಾಂನಿ ಖಾಂವ್ಕ್ ಮೆಳ್ಳೆಂನಾಮೂ ಮ್ಹಣ್ ಆಕ್ಲಾಸ್ ಸೊಡ್ತಾಲೆ. ಕಿತ್ಯಾಕ್, ಪಯ್ಶೆಯಿ ಪಿಲಾಂ ಕಾಡೂಂಕ್ ಸಕ್ತಾಲೆ.
ಇಂಟರ್ ಕ್ಲಾಸಿಂತ್ ಶಿಕ್ಚ್ಯಾ ವಿದ್ಯಾರ್ಥಿಂ ಪಯ್ಕಿ ಕೊಣೆಂಯ್ ಎದೊಳ್ ಬಿಡಿಯೊ ಬಾಂದುನ್ ದೀಸ್ ಸಾರ್ಲ್ಯಾತ್ಗಿ ಕೊಣ್ ಜಾಣಾಂ. ತರೀ ಮೆಲ್ವಿನಾನ್ ಗಿಬ್ಬಾ ಥಾವ್ನ್ ಪಯ್ಲೆಂಚ್ ಪಾವ್ಟಿಂ ಹಿ ಖಬಾರ್ ಆಯ್ಕಾಲ್ಲಿ. ಪೊಟಾಖಾತಿರ್ ಧಂದೊ ಕೆಲ್ಲ್ಯಾಂತ್ ಲಜ್ನಾ. ತರಿಕಿ ಗಿಬ್ಬಾ ತಸಲೆ ಭೋವ್ ಥೊಡೆ ಮೆಳ್ತಿತ್ ಕೊಣ್ಣಾ. ಮೆಲ್ವಿನ್ ಚಿಂತ್ತಾಲೊ ಆಪುಣ್ ಜಾಲ್ಯಾರ್ ಕೆದಿಂಚ್ ಆಶೆಂ ಕರ್ತೊಂನಾ ಮ್ಹಣ್.
ತ್ಯಾ ದಿಸಾ ಎಕಾಚ್ ಥರಾಂಚಿ ಸುಕ್ಣಿಂ ಸಾಂಗಾಂತಾಂ ಮೆಳ್ಲ್ಲಿಂ. ತ್ಯಾ ಉಪ್ರಾಂತ್ ಮೆಲ್ವಿನಾಕ್ ಆದ್ಲೆಬರಿ ಉಬ್ದೇಸ್ ಭೊಗಾನಾತ್ಲ್ಲೆ. ಖಂಯ್ ವೆತಾನಾಂಯ್ ತೆ ಸಾಂಗಾಂತಾ ವೆತಾಲೆ ಆನಿಂ ತಾಂಚಿ ಇಷ್ಟಾಗತ್ ದಿಸಾಂದೀಸ್ ವಾಡೊನ್ ಆಯ್ಲಿ. ಗಿಬ್ಬಾ ಕೆದಾಳಾಯ್ ಮೆಲ್ವಿನಾಕ್ ಸಾಂಗ್ತಾಲೊ.
"ಆಮಿಂ ಬರೆಂ ನಾಂವ್ ಜೊಡಿಜಾಯ್ ಮೆಲ್ವಿನ್. ಖೆಳಾಂತ್, ಶಿಕ್ಪಾಂತ್ ಆನಿಂ ಹರ್ಯೇಕಾ ವಾಟಾಂನಿ ಸಕ್ಡಾಂಕ್ ಸಲ್ವೊವ್ನ್ ಮುಖಾರ್ ಯೇಜಾಯ್. ಆಮ್ಕಾಂ ಗರೀಬ್ ಮ್ಹಣ್ ಕೊಣೀ ಲೆಕಿನಾ ಪಳೆ. ಸಕ್ಡಾಂಕ್ ಮೊಸೊರ್ ಜಾಂವ್ಚ್ಯಾ ವರೇಗ್ ಆಮಿಂ ಮುಖಾರ್ ಯೇಜಾಯ್".
ಪುಣ್ ಮೆಲ್ವಿನ್ ನೆಣಾಸ್ಲೊ ಖಂಯ್ಚ್ಯಾ ಸಂಗ್ತಿಂತ್ ಮುಖಾರ್ ಯೆಂವ್ಚೆಂ ಮ್ಹಣ್. ಶಿಕ್ಪಾಂತ್ ದೊಗೀ ತಕ್ಕಮಟ್ಟಾಕ್ ಹುಶಾರ್ ಆಸ್ಲ್ಲೆ. ತರೀ ಸಕ್ಡಾಂಕ್ ಲಜೆಕ್ ಘಾಲುಂಕ್ ದೊಗಾಂಯ್ಕಿ ಸಾಧ್ಯ್ ಜಾಲೆಂನಾ. ಪುಣ್ ಮೆಲ್ವಿನಾಚ್ಯಾ ಜೀವನಾಂತ್ ಚಿಂತಿನಾಸ್ತಾಂ ಆಶೆಲ್ಲೊ ಏಕ್ ಸಂದರ್ಭ್ ಲಾಬ್ಲೊ.
ಸಪ್ಟೆಂಬರ್ ಮಹಿನೊ. ತಾಂಚಿ ಪರೀಕ್ಶಾ ಕಾಬಾರ್ ಜಾವ್ನ್ ಎಕಾ ಹಪ್ತ್ಯಾಚಿ ರಜಾ ಮೆಳ್ಲ್ಲಿ. ತ್ಯಾ ಸಾತ್ ದಿಸಾಂನಿ ವಿಶೇಷ್ ಸಾಂಗ್ಚ್ಯಾ ತಿತ್ಲೆಂ ಕಾಂಯ್ ಘಡ್ಲೆಂನಾ. ಒಕ್ಟೋಬಾರಾಚ್ಯಾ ಪಯ್ಲ್ಯಾ ಹಪ್ತ್ಯಾಂತ್ ತಾಂಕಾಂ ಪರ್ತ್ಯಾನ್ ಕ್ಲಾಸ್ ಪ್ರಾರಂಭ್ ಜಾಲಿ ಆನಿಂ ಕೊಲೆಜಿಕ್ ಆಯಿಲ್ಲ್ಯಾ ವಿದ್ಯಾರ್ಥಿಂಕ್ ನೋಟಿಸ್ ಬೊರ್ಡಾಚೆರ್ ಏಕ್ ಜಾಹೀರಾತ್ ಪಳೆಂವ್ಕ್ ಮೆಳ್ಳೆಂ.
ಓಲ್ ಇಂಡಿಯಾ - ರೇಡಿಯೊ, ಬೆಂಗ್ಳುರ್ - ಹಾಣಿಂ ಏಕ್ ಗಾಯನಾಂಚೊ ಪಂದ್ಯಾಟ್ ಚಾಲು ಕೆಲ್ಲೊ. ಕೊಲೆಜಿಂತ್ ಶಿಕ್ಚ್ಯಾ ವಿದ್ಯಾರ್ಥಿ ಪಯ್ಕಿ ಕೊಣಾಯ್ಕಿ ಹ್ಯಾ ಪಂದ್ಯಾಟಾಂತ್ ಪಾತ್ರ್ ಘೆಂವ್ಕ್ ಹಕ್ಕ್ ಆಸಾ. ತಶೆಂಚ್ ಧಾ ದಿಸಾಂ ಉಪ್ರಾಂತ್ ಸಾಂ. ಲುವಿಸ್ ಕೊಲೆಜಿಂತ್ ಚಲ್ಚ್ಯಾ ಹ್ಯಾ ಪಂದ್ಯಾಟಾಂತ್, ಗಾಯನಾಂತ್ ಪ್ರಥಮ್ ಆನಿಂ ದುಸ್ರೆಂ ಸ್ಥಾನ್ ಮೆಳ್ಚ್ಯಾ ದೊಗಾಂಕ್ ಬೆಂಗ್ಳೂರ್ ರೇಡಿಯೋಚೆರ್ ಗಾಯನಾಂ ಕರುಂಕ್ ಸಂದರ್ಭ್ ದಿತೆಲೆ.
ತೆಂ ಜಾಹೀರಾತ್ ಮೆಲ್ವಿನಾನ್ ತಶೆಂ ಗಿಬ್ಬಾನ್ಯಿ ವಾಚ್ಲೆಂ. ವ್ಹೊಡ್ಲ್ಯಾನ್ ಹಾಸೊನ್ ಗಿಬ್ಬಾ ಮ್ಹಣಾಲೊ - "ಮೆಲ್ವಿನ್, ಮ್ಹಾಕಾ ಹ್ಯಾ ಪಂದ್ಯಾಟಾಂತ್ ಪಾತ್ರ್ ಘೆಂವ್ಯಾಶೆಂ ದಿಸ್ತಾ. ಕಿತ್ಯಾಕ್ ಬಾಬಾ ಸಾಂಗಾಂತಾ ರೆಡ್ಯಾಂಕ್ ನಾಂಗೊರ್ ಬಾಂದುನ್ ಗಾದೆ ಕೊಸ್ತಾನಾ ’ಓ’ ಮ್ಹಣ್ ಬೊಬ್ ಮಾರ್ಲ್ಲೊ ಉಡಾಸ್ ಯೆತಾ"
"ತರ್ ಕಿತ್ಯಾಕ್ ಘಳಾಯ್? ಏಕ್ ಹಾತ್ ಪಳೆ...." ಹಾಸ್ಲೊ ಮೆಲ್ವಿನ್.
"ಮ್ಹಜಿ ಸಂಗತ್ ಕುಶಿನ್ ದವರ್ಯಾಂ. ತುಜಿ ಆಲೋಚನ್ ಕಿತೆಂ?" ಗಿಬ್ಬಾಬ್ ಸವಾಲ್ ಕೆಲೆಂ "ದೆವಾನ್ ತುಕಾ ಕಂತಾರಾಚೆಂ ದೆಣೆಂ ದಿಲಾಂಗಿ?"
"ಕೊಣ್ಣಾ ಎಲಿಮೆಂಟರಿ ಇಸ್ಕೊಲಾಂತ್ ಲಿಲ್ಲಿ ಟೀಚರ್ ಸಂಗೀತಾಂತ್ ೯೫% ಮಾರ್ಕ್ಸ್ ದಿತಾಲಿ ಗಿಬ್ಬಾ. ತ್ಯಾ ಧೈರಾರ್ ಹಾಂವ್ ಸಾಂಗಾನಾ ಕಿ, ಮ್ಹಾಕಾ ಬರೊ ತಾಳೊ ಆಸಾ ಮ್ಹಣ್. ತರೀ ಮ್ಹಾಕಾ ಭೊಗ್ತಾಕಿ, ಮ್ಹಜೊ ತಾಳೊ ಪಾಡ್ಯಿ ನಾ, ಕಿತ್ಯಾಕ್ ಸಬಾರ್ ನಾಟಕಾಂನಿ ಹಾಂವೆಂ ಕಂತಾರಾಂ ಕೆಲ್ಯಾಂತ್"
"ತರ್ ಕಿತ್ಯಾಕ್ ಪಾಟಿಂ ಕರ್ತಾಯ್? ತುಜೆಂ ನಶೀಬ್ ಕಶೆಂ ಆಸಾ ಪಳೆ" ಉತ್ತೇಜನ್ ದಿಲೆಂ ಗಿಬ್ಬಾನ್.
"ಪುಣ್" ಮೆಲ್ವಿನ್ ನಾರ್ಗಾಲೊ.
"ಪುಣ್ - ಗೀಣ್ ಕಾಂಯ್ ನಾ. ಭಿಂಯಾನ್ ಪಾಟಿಂ ರಾಂವ್ಚೆಂ ಭಾರಿ ವಾಯ್ಟ್ ಮೆಲ್ವಿನ್. ಆಮಿಂ ಮುಖಾರ್ ಯೇಜಾಯ್ ಜಾಲ್ಯಾರ್ ಲಜ್ ಸಾಂಡಿಜಾಯ್, ಧೈರ್ ಘೆಜಾಯ್. ಚಲ್, ಆತಾಂಚ್ ವೊಚೊನ್ ಯೂನಿಯನ್ ಸೆಕ್ರೆಟರಿಲಾಗಿಂ ತುಜೆಂ ನಾಂವ್ ದೀ" ಖಡಾಖಡ್ ಸಾಂಗ್ಲೆಂ ಗಿಬ್ಬಾನ್.
ಮೆಲ್ವಿನಾನ್ಯೀ ಆಪ್ಲೆಂ ಮನ್ ಘಟ್ ಕೆಲೆಂ. ’ಗೆಲ್ಯಾರ್ ಏಕ್ ಫಾತೊರ್, ಮೆಳ್ಳ್ಯಾರ್ ಏಕ್ ಆಂಬೊ’ - ಚಿಂತ್ಲೆಂ ತಾಣೆಂ. ತೆದಾಳಾಚ್ಚ್ ಕ್ಲಾಸ್ ಸುರು ಜಾಂವ್ಚಿ ಕಾಂಪಿಣ್ ವ್ಹಾಜ್ಲ್ಲ್ಯಾನ್ ಸೆಕ್ರೆಟರಿಕ್ ಮೆಳೊಂಕ್ ತಾಕಾ ಜಾಲೆಂನಾ. ತೊ ಕ್ಲಾಸ್ ಆಖೇರ್ ಜಾಂವ್ಕ್ ರಾಕ್ತಾಲೊ.
ಕೊಲೆಜ್ ಯೂನೊಯನ್ ಸೆಕ್ರೆಟರಿ ವಿಲ್ಲಿ ಬಿ.ಎ. ಚ್ಯಾ ನಿಮಾಣ್ಯಾ ಕ್ಲಾಸಿಂತ್ ಶಿಕ್ತಾಲೊ. ಜೀವಾನ್ ಬಾರಿಕ್ ಆನಿಂ ಸ ಫುಟಿ ವಯ್ರ್ ಲಾಂಬ್ ಆಸೊನ್ ಘಾಂಟಿಚ್ಯಾ ತೊರಿಬರಿ ದಿಸ್ತಾಲೊ ವಿಲ್ಲಿ. ತೊ ಗ್ರೇಸ್ತ್ ಕುಟ್ಮಾಂತ್ಲೊ ಭುರ್ಗೊ. ಸ್ವಾಭಾವಿಕ್ ಜಾವ್ನ್ ತಾಚ್ಯಾ ಹಾತಾಂತ್ ಪಯ್ಶೆ ಖೆಳ್ತಾಲೆ ಆನಿಂ ಪಯ್ಶ್ಯಾಂಚ್ಯಾ ಬಳಾನ್ ತಾಕಾ ಹಂಕಾರ್ಯಿ ಚಡ್ಲ್ಲೊ. ಸಾಧಾರ್ಣಾಚ್ಯಾ ಮನ್ಶಾಂಕ್ ಪಳೆತಾನಾ ತಾಕಾ ಕಾಂಟಾಳೊಚ್ ಯೆತಾಲೊ. ತ್ಯಾಚ್ಚ್ ಪರಿ ಆಪ್ಣಾಕ್ ಸೊದುನ್ ಆಯಿಲ್ಲ್ಯಾ ಮೆಲ್ವಿನಾಕ್ ಪಳೆವ್ನ್ ತಾಕಾ ಕಾಂಟಾಳೊಚ್ ಭೊಗ್ಲೊ ಜಾಯ್ಜಾಯ್.
"ಕಿತೆಂ ಆಯ್ಲೊಯ್?" ತಿರ್ಕಾಸ್ ಪಳೆವ್ನ್ ತಾಣೆಂ ವಿಚಾರ್ಲೆಂ. ಮಟ್ವೆಂ ಇಜಾರ್ ಘಾಲ್ಲ್ಯಾ ಭುರ್ಗ್ಯಾಲಾಗಿಂ ಉಲೊಂವ್ಕ್ ತಾಚ್ಯಾ ಮರ್ಯಾದಿಕ್ ಉಣೆಂ ಮ್ಹಣ್ ತಾಣೆಂ ಚಿಂತ್ಲ್ಲೆಂ.
"ಸಕಾಳಿಚೆಂ ನೊಟಿಸ್......" ಲೆನ್ತುವಾಯೆನ್ ಮೆಲ್ವಿನ್ ಉಲೈಲೊ.
ಘಡ್ಘಡೊ ಫುಟ್ಲ್ಲ್ಯಾ ಜಿನ್ಸಾರ್ ಹಾಸ್ಲೊ ತೊ. ತಾಚೊ ತೊ ಹಾಸೊ ಆನಿಂ ತೊ ಬಾರೀಕ್ ಜೀವ್ ಪಳೆತಾನಾ ತೊ ಆತಾಂಚ್ ಘುಡ್ ಘಾಲ್ತಾ ಕೊಣ್ಣಾ ಮ್ಹಣ್ ಮೆಲ್ವಿನ್ ಬಿಯೆಲೊ. ತಾಚೆಂ ಪೆಂಕಾಡ್ ಮೊಡ್ಲಾಬರಿ ಹೆಣೆ ತೆಣೆ ಧಲ್ತಾಲೆ.
"ಹಾಂತುಂ ಹಾಸೊಂಕ್ ಕಿತೆಂ ಆಸಾ?" ವೋಂಟ್ ಚಾಬೊನ್ ಮೆಲ್ವಿನ್ ಮ್ಹಣಾಲೊ.
ಲ್ಹಾನಾಂಕ್ ಭುಜೊಂವ್ಚ್ಯಾ ಜಿನ್ಸಾರ್ ವಿಲ್ಲಿನ್ ಸಾಂಗ್ಲೆಂ - "ಆಳೆರೆ ಆಪಾ, ತುಜಿ ವಳೊಕ್ ಮ್ಹಾಕಾ ನಾ. ತುಂ ಹ್ಯಾಚ್ ಕೊಲೆಜಿಂತ್ ಶಿಕ್ತಾಯ್ ವ ನಾ ಮ್ಹಳ್ಳೆಂಯ್ ಹಾಂವ್ ನೆಣಾ. ಎಕಾದಾವೆಳಾ ತುಂ ಆಮ್ಚ್ಯಾಚ್ ಕೊಲೆಜಿಚೊ ವಿದ್ಯಾರ್ಥಿ ಜಾಲ್ಯಾರಿ ಮ್ಹಜೆಂ ತುಕಾ ಸೂಚನ್ - ಶಿಕ್ಪಾಂತ್ಚ್ ತುಜಿ ಮತ್ ದಾಡ್ಡಿ ಕರ್. ಹೆಂ ಕಾಮ್ ತುಕಾ ನಾಕಾ"
"ತಶೆಂ ಮ್ಹಳ್ಯಾರ್....?" ಘುಸ್ಪುಡ್ಲೊ ಮೆಲ್ವಿನ್, "ಪಂದ್ಯಾಟಾಂತ್ ಭಾಗ್ ಘೆಂವ್ಚಿ ಹರ್ಯೇಕ್ಲ್ಯಾಚಿ ಖುಶಿ. ಕೊಣೆಂಯ್ ಹಾಂತುಂ ಪಾತ್ರ್ ಘೆವ್ಯೆತಾ. ತುವೆಂ ಉಲೈಲ್ಲೆಂ ಮ್ಹಾಕಾ ಸಮ್ಜೊಂಕ್ ನಾ"
"ತುಕಾ ಸಮ್ಜೊಂಚೆಂನಾ, ಕಿತ್ಯಾಕ್ ತುಂ ಆಜೂನ್ಯಿ ತರ್ನೊ" ಆಪುಣ್ ವೊಳ್ಸಾಲ್ಲೊ ಜಾಣ್ತೊ ಮ್ಹಳ್ಳ್ಯಾ ಅರ್ಥಾರ್ ವಿಲ್ಲಿನ್ ಸಾಂಗ್ಲೆಂ, "ತುಜಿಂ ಉತ್ರಾಂ ಹಾಂವ್ ಒಪ್ತಾಂ ಕಿ, ಸಕ್ಡಾಂಕ್ಯಿ ಹ್ಯಾ ಪಂದ್ಯಾಟಾಂತ್ ಪಾತ್ರ್ ಘೆಂವ್ಕ್ ಹಕ್ಕ್ ಆಸಾ. ಪುಣ್ ಚೀಂತ್ ಭುರ್ಗ್ಯಾ, ಫಾಲ್ಯಾಂ ಸಕಾಳಿಂ ಸಾಂತ್ ಅಗ್ನೆಸ್ ಕೊಲೆಜ್, ಗವರ್ನ್ಮೆಂಟ್ ಕೊಲೆಜ್ ಆನಿಂ ಆಮ್ಚಿಂ ಕೊಲೆಜ್ - ಆಶೆಂ ತೀನ್ ಕೊಲೆಜಿಂತ್ಲೆಂ ಚಲೆ ಆನಿಂ ಚಲಿಯೊ ಹಾಂಗಾ ಎಕ್ಟಾಂಯ್ ಜಾತಾತ್. ಆನಿಂ ತ್ಯಾ ವೆಳಾರ್ ಸಕ್ಡಾಂ ಮುಖಾರ್ ತುಂ ಕಾವ್ಳೊ ಕೆಂಕಾರ್ಚ್ಯಾ ಭಾಷೆನ್ ಕಂತಾರಾಂ ಮ್ಹಣ್ಶಿ ಜಾಲ್ಯಾರ್ ಮರ್ಯಾದ್ ಕೊಣಾಚಿ ವೆತಾ ಸಾಂಗ್. ತುಜಿ ವೆಚಿನಾ, ಗೆಲ್ಯಾರ್ಯಿ ತುಕಾ ಜಾಯ್ತೆ ವಳ್ಕಾನಾಂತ್,. ಪುಣ್ ತುಂ ಅವ್ಮರ್ಯಾದ್ ಹಾಡ್ತೊಲೊಯ್ ಎದ್ಯಾ ವೊಡ್ಲ್ಯಾ ಸಾಂ. ಲುವಿಸ್ ಕೊಲೆಜಿಕ್."
ಮೆಲ್ವಿನಾಚ್ಯಾ ತಳ್ಮಾಟ್ಯಾಕ್ ಮಾರ್ಲ್ಲ್ಯಾಬರಿ ಜಾಲೆಂ. ತಾಚಿ ಕೂಡ್ ರಾಗಾನ್ ಸಗ್ಳಿಚ್ ಕಾಂಪ್ಲಿ ಆನಿಂ ಹಾತಾಚ್ಯೊ ಮುಟಿ ಆಂರ್ದಾಲ್ಯೊ. ತ್ಯಾಚ್ ಕ್ಷಣಾ ತ್ಯಾ ಅಸ್ಕತ್ ಸೆಕ್ರೆಟರಿಚ್ಯಾ ತೊಂಡಾರ್ ಚಾರ್ ವ್ಹಾಜಯಾಂ ಮ್ಹಣ್ ತಾಕಾ ತಾಳ್ನಿ ಆಯ್ಲಿ.ಪುಣ್ ತ್ಯಾ ನಾಡಿಚೆರ್ ಬಲತ್ಕಾರಾನ್ ತಾಣೆಂ ಜೈತ್ ವ್ಹೆಲೆಂ. ಆನಿಂ ಸೊಸ್ಣಿಕಾಯೆಚ್ಯಾ ತರೀ ಘಟ್ಟ್ ತಾಳ್ಯಾನ್ ತೊ ಮ್ಹಣಾಲೊ.
"ಹಿ ಮ್ಹಜಿ ಖುಶಿ.......ತುಂ ಮ್ಹಜೆಂ ನಾಂವ್ ಘೆ" ಆನಿಂ ತಾಚ್ಯಾ ಜಾಪಿಕ್ ರಾಕಾನಾಸ್ತಾಂ ಮೆಲ್ವಿನ್ ತಾಕಾ ನಾಂವ್ ದೀವ್ನ್ ಧಡಧಡ ಚಲ್ಲೊ. ವಿಲ್ಲಿ ಬೊಂಬ್ಯಾಪರಿ ತಾಕಾಚ್ ಪಳೆತಾಲೊ.
ಮೆಲ್ವಿನಾಚೆಂ ಮನ್ ಕೊಡು ಜಾಲ್ಲೆಂ. ಹಾಯ್, ಕಿತ್ತುನ್ ಪರ್ಯಾಂತ್ ಹೊ ವ್ಯತ್ತ್ಯಾಸ್? ಕ್ಲಾಸಿಂತ್, ಖೆಳಾಂತ್, ತಶೆಂ ಮನೋರಂಜಿಕ್ ಕಾರ್ಯಕ್ರಮಾಂತ್ಯಿ. ಹಾಕಾ ಅಂತ್ಯ್ ನಾಂಗಿ? ವ ಕಸಲೊಯ್ ಉಪಾಯ್ ನಾಂಗಿ? ತರ್ನೆಂ ರಗಾತ್ ತಾಚೆಂ ಉಚಾಂಬಳ್ ಜಾತಾಲೆಂ. ಪುಣ್ ದುಬ್ಳ್ಯಾಂಚೊ ರಾಗ್, ರಟ್ಟ್ಯಾಂತ್ ಬಳ್ ಆಸ್ಲ್ಯಾರೀ, ಕಾರ್ಯಾಂತ್ ದಾಕೊಂವ್ಕ್ ಸಾಧ್ಯ್ನಾತ್ಲ್ಲೊ. ನಹಿಂ ತರ್, ಆಜ್ ಸಮಾಜೆಂತ್ ಕೊಣಾಕೊಣಾಚೆಂ ರಗಾತ್ ಚಿಂವೊನ್, ಪೊಟಾಂ ವಾಡೈಲ್ಲ್ಯಾಂಚೊ ಸಂಖೊ ಬಿಲ್ಕುಲ್ ಆಸ್ತೊನಾ.
ಹೆಂ ಘಡೊನ್ ಎಕಾ ಹಪ್ತ್ಯಾ ಉಪ್ರಾಂತ್ ಕೊಲೆಜಿಂತ್ ಹೆಂ ಕಾರ್ಯಕ್ರಮ್ ಚಲ್ಲೆಂ. ದೀಸ್ ಸನ್ವಾರ್, ದನ್ಪಾರಾಂ ಕೊಲೆಜಿಕ್ ರಜಾ ಆಸ್ಲ್ಲಿ. ಸಾಂಜೆರ್ ಚ್ಯಾರ್ ವ್ಹಾಜ್ತಾನಾ ವಿದ್ಯಾರ್ಥಿ ಆನಿಂ ವಿದ್ಯಾರ್ಥಿನಿಂಚೊ ಜಮೊ ಸಾಂ. ಲುವಿಸ್ ಕೊಲೆಜಿಚ್ಯಾ ಎಕಾಡೆಮಿ ಹೊಲಾಂತ್ ಜಮ್ಲೊ. ಹಾ, ತೊ ಮೇಳ್ ವರ್ಣುಂಕ್ ಉತ್ರಾಂ ಪಾವಾನಾತ್ಲ್ಲಿಂ. ಚಲಿಯೊ ಕ್ರತಾಕ್ ರಂಗಾನ್ ಸಂಸಾರಾ ವಯ್ಲೆಂ ಆಂಜ್ ಜಾವ್ನ್ ಸೊಭ್ತಾಲ್ಯೊ. ಆನಿಂ ತಾಂಕಾಂ ’ಮಕ್ಕಾರ್’ ಕರ್ಚ್ಯಾ ಚಲ್ಯಾಂಚೊ ’ವಿಂಚ್ಣಾರ್’ ಪಂಗಡ್. ದುಸ್ರ್ಯಾಂಕ್ ತ್ಯಾ ಪಂಗ್ಡಾಂತ್ ಪ್ರವೇಶ್ಚ್ ನಾತ್ಲ್ಲೊ. ಹಾಸೊ, ಖುಶಾಲಾಯ್ ಆನಿಂ ಬೊಬೊ ಧಾರಾಳ್ ಥರಾನ್ ಚಲ್ತಾಲ್ಯೊ. ಸಕ್ಡಾಂನಿ ಬಸ್ಕಾ ಘೆತ್ಲ್ಯೊ. ಮುಖ್ಲ್ಯಾ ಸಿಟಿಂಚೆರ್ ಕೊಲೆಜಿಚೆಂ ಪ್ರಿನ್ಸಿಪಾಲ್, ಲೆಕ್ಚರರ್ ಆನಿಂ ರೇಡಿಯೋ ನಿಲಯಾಚೆ ಅಧಿಕಾರಿ ಬಸೊನ್ ಆಸ್ಲ್ಲೆ.
ಕೊಲೆಜಿಚ್ಯಾ ಲೆಕ್ಚರಾನ್ ಸಮಾರಂಭ್ ಉದ್ಘಾಟನ್ ಕೆಲೆಂ. ದೋನ್ - ತೀನ್ ಭಾಷಣಾಂ ಚಲ್ಲಿಂ. ಆಖ್ರೇಕ್ ರೇಡಿಯೊ ನಿಲಯಾಚ್ಯಾ ಎಕ್ಲ್ಯಾ ಅಧಿಕಾರಿನ್ ಚ್ಯಾರ್ ಉತ್ರಾಂ ಸಾಂಗ್ಲಿಂ. ತಾಂತುಂ ತಾಣೆಂ ಆಸಲ್ಯಾ ಎಕಾ ಕಾರ್ಯಕ್ರಮಾಚಿ ಗರ್ಜ್, ತಾಂತುಂ ಲಾಬ್ಚೊ ಫಾಯ್ದೊ ಆನಿಂ ನಿಜಾಕೀ ಬರೆಂ ದೆಣೆಂ ಆಸ್ಲ್ಲ್ಯಾಂಕ್ ವಯ್ರ್ ಯೇಂವ್ಕ್ ಕಸೊ ಸಂದರ್ಭ್ ಮೆಳ್ತಾ ಇತ್ಯಾದಿ ವಿವರ್ಸಿಲೆಂ. ವ್ಹೊಡ್ಲ್ಯಾನ್ ತಾಳಿಯೊ ಪೆಟ್ಲ್ಯೊ ಸಕ್ಡಾಂನಿ. ಕೊನ್ಶಾಕ್ ಬಸ್ಲ್ಲ್ಯಾ ’ವಿಂಚ್ಣಾರ್’ ಪಂಗ್ದಾಚ್ಯಾ ಜಂಟಲ್ಮೆನಾಂನಿ ಜ್ಯೋರಾನ್ ಶಿಲೊಣ್ಯೊ ಘಾಲ್ನ್ ಆಪ್ಲಿ ಆಭಿರೂಚ್ಯಿ ಪರ್ಗಟ್ಲಿ. ಹೆಂ ಜಾತಚ್ಚ್ ಪಂದ್ಯಾಟ್ ಪ್ರಾರಂಭ್ ಜಾಲೊ.
ಮೆಲ್ವಿನಾಚೆಂ ಕಾಳಿಜ್ ಧಡ್ದಾಡ್ತಾಲೆಂ. ತೊ ಆನಿಂ ಗಿಬ್ಬಾ ನಿಮಾಣ್ಯಾ ಸಿಟಿಂಚೆರ್ ಬಸ್ಲ್ಲೆಂ. ಮೆಲ್ವಿನಾಚೆಂ ಮುಖ್ ಪಳೆಲ್ಲ್ಯಾ ಗಿಬ್ಬಾಕ್ ಸುಸ್ತಾಲ್ಲೆ ಕಿ, ಮೆಲ್ವಿನ್ ಬಿಯೆಲಾ ಮ್ಹಣೊನ್. ತೊ ತಾಕಾ ಧೈರ್ ದಿತಾಲೊ. ಪಯ್ಲ್ಯಾಚ್ಚ್ ಪಾವ್ಟಿಂ ಮೆಲ್ವಿನ್ ಮುಂಡು ನ್ಹೆಸೊನ್ ಅಯಿಲ್ಲೊ. ಆತಾಂ ತಾಚ್ಯಾ ಮತಿಂತ್ ಏಕ್ಚ್ ಚಿಂತ್ನಾಂ ಘುಂವ್ತಾಲಿಂ. - ಇತ್ಲ್ಯಾ ಜಣಾಂ ಮುಖಾರ್ ಕಶೆಂ ಗಾಯನ್ ಕರ್ಚೆಂಗಿ ಮ್ಹಣ್.
ಎಕೆಕ್ಲ್ಯಾಚಿಂಚ್ ನಾಂವಾಂ ಸರ್ತೆ ಪ್ರಕಾರ್ ಆಪಯ್ಲಿಂ. ಗಾಯನಾಂಚೊ ಶಿಂವೊರ್ಚ್ ಥಂಯ್ ವ್ಹಾಳ್ತಾನಾ, ತೆಂ ವಾತಾವರಣ್ ಸ್ವರ್ಗಾಬರಿ ದಿಸ್ಲೆಂ. ಎಕೆಕ್ಲ್ಯಾಚಿ ಆಭಿರೂಚ್ ಎಕೇಕಾ ಥರಾಚಿ. ಥೊಡ್ಯಾಂನಿ ಶಾಸ್ತ್ರೀಯ್, ಥೊಡ್ಯಾಂನಿ ಪಾಶ್ಚಾತ್ಯ್ ಆನಿಂ ದುಸ್ರ್ಯಾಂನಿ ದೊನೀ ವರ್ಗಾಂಚೆಂ ಮಿಶ್ರಣ್ - ಆಶೆಂ ಗಾಯನಾಂ ಮ್ಹಳಿಂ. ವೇಳ್ ಗೆಲೊ ಆನಿಂ ಉಪ್ರಾಂತ್ ಏಕ್ ನಾಂವ್ ಸೆಕ್ರೆಟರಿ ವಿಲ್ಲಿನ್ ಉಲೊ ಕರ್ತಾನಾ ಮೆಲ್ವಿನ್ ಉಡೊನ್ ಪಡ್ಲೊ. ’ಸಿಂತಿ.........ಸಿಂತಿ ತಾಚ್ಯಾ ಧನಿಯಾಚಿ ಧುವ್. ತೆಂಚ್ ಸಿಂತಿ, ಮೆಲ್ವಿನಾಚ್ಯಾ ಕಾಳ್ಜಾಂತ್ ತುಫಾನಾ ಉಟೈಲ್ಲೆಂ ಸಿಂತಿ.
ಚಿಂತ್ನಾಂನಿ ತೊ ಘುಸ್ಪಡೊನ್ ಆಸ್ಲ್ಲ್ಯಾ ಬರಿಚ್ ಜ್ಯೋರಾನ್ ತಾಳಿಯೊ ಪೆಟ್ಚೊ ಆವಾಜ್ ಆಯ್ಕಾಲೊ. ಮೆಲ್ವಿನಾನ್ ತಕ್ಲಿ ಉಕೊಲ್ಲಿ ಆನಿಂ ಸ್ಟೇಜಿರ್ ತಾಣೆಂ ಪಳೆಲೆಂ ಆಮ್ರುಕೆ ಹಾಸೊನ್ ಉಬೆಂ ರಾವ್ಲ್ಲ್ಯಾ ಸಿಂತಿಕ್.
ಸಿಂತಿ ದೊವ್ಯಾ ನಾಯ್ಲೊನಾಚ್ಯಾ ಕಾಪ್ಡಾರ್ ಆಯಿಲ್ಲೆಂ. ತಾಚ್ಯಾ ತ್ಯಾ ಸೊಭಾಯೆಕ್, ತೆಂ ನ್ಹೆಸಾಣ್ ವಿಶೇಷಾಲಂಕಾರ್ ದಿತಾಲೆಂ. ಸಂಸಾರಾಂತ್ಲ್ಯಾ ಆಂಜ್ಯಾಬರಿ ತೆಂ ದಿಸ್ತಾನಾ, ಚಲೆ ತಾಕಾ ಪಳೆವ್ನ್ ದೊಳೆ ವಾಟಾರ್ನ್ ರಾವ್ಲ್ಲೆ. ಮೆಲ್ವಿನಾಚಿ ಕೂಡ್ ಬಾರೀಕ್ ಕಾಂಪ್ಲಿ. ತಾಣೆಂ ಆಪ್ಣಾಂಚ್ಯಾ ನ್ಹೆಸ್ಣಾರ್ ದೀಷ್ಟ್ ವ್ಹೆಲಿ. ತಾಕಾ ಲಜ್ ದಿಸ್ಲಿ.
ಸಿಂತಿನ್ ಗಾಯನ್ ಪ್ರಾರಂಭ್ ಕೆಲ್ಲೆಂ. ಶೀತಳ್ ಮಧುರ್ ವಾರ್ಯಾಬರಿ ವ್ಹಾಳೊನ್ ಯೆತಾಲೊ ತಾಚೊ ರಂಗೀತ್ ತಾಳೊ. ತೆಂ ರಂಗೀತ್ ಗಾಯನ್ ಕ್ಷಣಾನ್ ಸಗ್ಳ್ಯಾನ್ ವ್ಹಾಳ್ಳೆಂ ಆನಿಂ ಮೆಲ್ವಿನ್ ತ್ಯಾ ತಾಳ್ಯಾಕ್ ಆಪ್ಣಾಕ್ಚ್ ವಿಸರ್ಲೊ. ತಾಚೆ ದೊಳೆ ಆಸ್ಡ್ಯೊ ಲೆಗುನ್ ಧಾಂಪಿನಾಸ್ತಾಂ ಸಿಂತಿಕ್ ದೆಖ್ತಾಲೆ......ಗಿಬ್ಬಾಯಿ ತಲ್ಲೀನ್ ಜಾವ್ನ್ ಸಿಂತಿಕ್ ಪಳೆತಾಲೊ. ಹೊಲ್ ಸಗ್ಳೆಂ ನಿಶ್ಶಬ್ದ್ ಆಸ್ಲ್ಲೆಂ. ತೊ ರಂಗೀತ್ ಆವಾಜ್ ಬಂಧ್ ಜಾಲ್ಲೊಯಿ ಮೆಲ್ವಿನಾಕ್ ಖಬಾರ್ ನಾ. ಉಪ್ರಾಂತ್ಲ್ಯಾ ಪ್ರಚಂಡ್ ಬೋಬೆಕ್ ಮಾತ್ರ್ ತಾಚೆಂ ಸಿಂತಿದ್ ಜಾಗೆಂ ಜಾಲೆಂ.
ಪರ್ತ್ಯಾನ್ ಆನಿಂ ಥೊಡ್ಯಾಂಚಿಂ ಗಾಯನಾಂ. ಮೆಲ್ವಿನಾಚೆಂ ನಾಂವ್ ವಿಲ್ಲಿನ್ ಆಖ್ರೇಕ್ ಘಾಲ್ಲೆಂ. ನಿಮಾಣೆಂ ತಾಚಿ ಸರ್ತಿ ಯೆತಾನಾ, ಜೀವಾಂತ್ ತಾಚ್ಯಾ ಕಿತೆಂಗೀ ಭೊಗ್ತಾಲೆಂ, ಗಿಬ್ಬಾನ್ ತಾಕಾ ಧೈರ್ ದಿಲೆಂ. ...ಸಕ್ಕಡ್ಯಿ ತಾಳಿಯೊ ಪೆಟ್ತಾಲೆ. ಆನಿಂ ಮೆಲ್ವಿನ್ ಕಾಂಪೆರಿಂ ಮೆಟಾಂ ಕಾಡ್ನ್ ಸ್ಟೇಜಿರ್ ಚಡ್ಲೊ. ಹೊಲಾಂತ್ಲ್ಯಾ ಸಕ್ಡಾಂಚೆ ದೊಳೆ ತಾಚೆರ್ಚ್ ಆಶ್ಲ್ಲೆ. ತಾಕಾ ತಕ್ಲಿ ಘುಂವೊಳ್ ಆಯಿಲ್ಲ್ಯಾಬರಿ ಜಾಲಿ ಆನಿಂ ತಾಣೆಂ ದೊಳೆ ಧಾಂಪ್ಲೆಂ. ಎಕಾ ಮಿನುಟಾಚೆಂ ಮೌನ್. ದುಸ್ರ್ಯಾ ಕ್ಷಣಾ ತಾಣೆಂ ಧೈರ್ ಘೆವ್ನ್ ಗಾಯನ್ ಪ್ರಾರಂಭ್ ಕೆಲೆಂ. ಏಕ್ ಘಡಿ ತಾಳೊ ಚುಕ್ಲೊಶೆ ಭೊಗ್ಲೆಂ ತಾಕಾ. ಉಪ್ರಾಂತ್, ತಾಣೆಂಚ್ ಘಡ್ಲೆಲ್ಯಾ ಗಾಯನಾಂತ್ ತಾಕಾಚ್ ವಿಸರ್ಲೊ. ಆನಿಂ ತಾಚ್ಯಾ ರಂಗೀತ್ ತಾಳ್ಯಾಂತ್ ಥಾವ್ನ್ ಭಾಯ್ರ್ ಪಡ್ಲೆಂ ನಾಜೂಕ್ ಉತ್ರಾಂ.....ಕಾಳಿಜ್ ಕಡೊಂವ್ಚೊ ತೊ ತಾಳೊ......ದೋನ್ ಮಿನುಟಾಂ.........ಗಾಯನ್ ಅಂತ್ಯ್ ಜಾಲೆಂ. ಮೆಲ್ವಿನ್ ದೊಳೆ ಉಗಡ್ತಾನಾ ಹೊಲಾಂತ್ ಶ್ವಾಸ್ ನಾತ್ಲ್ಲೊ. ಸಕ್ಕಡ್ಯಿ ದೊಳೆ ವಾಟಾರ್ನ್ ತಾಕಾಚ್ ಪಳೆತಾಲೆ.
ಆತಾಂ ಎಕಾಚ್ಛಾಣೆಂ ಹೊಲಾಂತ್ ಬೋಬೊ ಜಾಲ್ಯೊ - "ವನ್ಸ್ ಮೋರ್! ವಂಡರ್ಫುಲ್!" ಮೆಲ್ವಿನಾಚೆ ಕಾನ್ - ಕೆಪ್ಪೆ ಜಾಲೆ ತ್ಯಾ ಆವಾಜಾಕ್. ತೊ ಕಸೊ ಆಪ್ಲ್ಯಾ ಜಾಗ್ಯಾಕ್ ಯೇವ್ನ್ ಪಾವ್ಲೊ ತೊಚ್ ನೆಣಾಂ. ತಾಚೆಂ ಖೊಮಿಸ್ ಘಾಮಾನ್ ಬಿಜ್ಲ್ಲೆಂ.
ಪರ್ಜಳಿಕ್ ಹಾಸ್ಯಾನ್ ಗಿಬ್ಬಾ ಮ್ಹಣ್ತಾಲೊ "ಮೆಲ್ವಿನ್ ವಂಡರ್ಫುಲ್. ತುಜೆಂ ಗಾಯನ್ ವಂಡರ್ಫುಲ್...."ತಾಚ್ಯಾ ದೊಳ್ಯಾಂನಿ ಆನಂದಾಚಿ ದುಃಖಾಂ ಆಸ್ಲ್ಲಿಂ. "ಮೆಲ್ವಿನ್, ಬೊಂಬ್ಯಾಬರಿ ಬಸ್ಲಾಯ್ ಕಿತ್ಯಾಕ್? ತುಂ ಹ್ಯಾ ಸಂಸಾರಾಂತ್ ಆಸಾಯ್ ವ ನಾ?"
ಮೆಲ್ವಿನಾಕ್ ಹ್ಯಾ ಸಂಸಾರಾಂತ್ ಆಪುಣ್ ನಾತ್ಲ್ಲೊಂ ತಶೆಂ ಭೊಗ್ತಾಲೆ ಕೊಣ್ಣಾ. ಆನಿಂ ಕಾರ್ಯಕ್ರಮಾಕ್ ಅಧ್ಯಕ್ಷ್ ಬಸ್ಲ್ಲೊ ರೆಕ್ಟರ್ ಸ್ಟೇಜಿರ್ ಚಡ್ತಾನಾ ಪರ್ಯಾಂತ್ ತಾಕಾ ಖಬಾರ್ ನಾ. ದೋನ್ಂಚ್ ಉತ್ರಾಂ ತಾಕಾ ಆಯ್ಕಾಲಿಂ, ಉಪ್ರಾಂತ್ ಆಪ್ಣಾಕ್ಚ್ ತೊ ವಿಸರ್ಲೊ. "ಮೆಲ್ವಿನ್ ಫಸ್ಟ್.." ತಾಳಿಯೊ ಪೆಟ್ಚ್ಯಾ ಆವಾಜಾಕ್ ಕಾನ್ ಕೆಪ್ಪೆ ಜಾತಾತ್ ತಶೆಂ ದಿಸ್ಲೆಂ ತಾಕಾ. ದುಸ್ರ್ಯಾ ಕ್ಷಣಾ ತೊ ಸಿಟಿ ವಯ್ಲೊ ಉಟ್ಲೊ ಆನಿಂ ಧಡಧಡ ಶಿಡಿಯೆಚಿಂ ಮೆಟಾಂ ದೆಂವೊನ್ ಹೊಲಾಚ್ಯಾ ಭಾಯ್ರ್ ಪಡ್ಲೊ. ಆಪುಣ್ ಕಿತೆಂ ಕರ್ತಾಂ ತೆಂ ತೊ ನೆಣಾಸ್ಲ್ಲೊ.
"ಮೆಲ್ವಿನ್..." ದೊಗಾಂಚೆ ತಾಳೆ ತಾಕಾ ಏಕ್ಚ್ ಪಾವ್ಟ್ಯಿಂ ಆಯ್ಕಾಲೆಂ. ಗಿಬ್ಬಾ ಆನಿಂ ವಿಲ್ಲಿ ಸಾಂಗಾತಾಚ್ ತಾಚ್ಯಾ ಪಾಟ್ಲ್ಯಾನ್ ಧಾಂವೊನ್ ಆಯಿಲ್ಲೆ.
"ಮೆಲ್ವಿನ್ ಕೊಂಗ್ರಾಜ್ಯುಲೇಶನ್ಸ್...." ವಿಲ್ಲಿನ್ ತಾಚೊ ಹಾತ್ ಧರ್ಲೊ.
ಬಾರೀಕ್ ಹಾಸ್ಲೊ ಮೆಲ್ವಿನ್. ವಿಲ್ಲಿಕ್ ’ಥ್ಯಾಂಕ್ಸ್’ ದೀನಾಸ್ತಾಂ ಚಲ್ಲೊ ತೊ ಮುಖಾರ್. ಪಾಟಾಪಾಟ್ ಗಿಬ್ಬಾಯಿ ಗೆಲೊ.
"ಮೆಲ್ವಿನ್, ಪಿಸೊ ಜಾಂವ್ಕ್ ನಾಂಯ್ಮೂ ತುಂ? ತುಕಾ ಜಾಲಾ ಕಿತೆಂ?"
"ವ್ಹಯ್, ಹಾಂವ್ ಪಿಸೊ ಜಾಲಾಂ ಗಿಬ್ಬಾ" ಕಾಂಪ್ಚ್ಯಾ ತಾಳ್ಯಾನ್ ಉಲಯ್ಲೊ ಮೆಲ್ವಿನ್, "ಗಿಬ್ಬಾ, ಏಕ್ ದೀಸ್ ತುವೆಂ ಮ್ಹಳ್ಳೆಂಯ್ ಆಮಿಂ ನಾಂವ್ ಜೊಡಿಜಾಯ್ ಮ್ಹಣ್ ಅನಿಂ ಆಜ್ .....
"ವ್ಹಯ್, ಖರೆಂಚ್ ತುಂ ನಾಂವಾಡ್ಲೊಯ್. ಪುಣ್ ತುಕಾ ಇತ್ಲೊ ಉದ್ವೇಗ್ ಕಿತೆಂ? ನಿಮಾಣೆಂ ರೆಕ್ಟರಾನ್ ಸಾಂಗ್ಲ್ಲೆಂ ಆಯ್ಕಾಲೆಂಯ್ವೇ ತುವೆಂ?"
"ನಾಂ.....ಕಿತೆಂ ಮ್ಹಳೆಂ ತಾಣೆ?"
"ಸಾಂಗ್ಲಾಂ ಕಿತೆಂ ಆಯ್ಕ್,..........ತುಕಾ ಆನಿಂ ಸಿಂತಿಕ್ ಜನವರಿಚ್ಯಾ ಪಯ್ಲ್ಯಾ ಹಪ್ತ್ಯಾಂತ್ ಬೆಂಗ್ಳೂರ್ ವಚೊಂಕ್ ಆಸ್ತೆಲೆಂ."
"ಕೋಣ್ ? ಸಿಂತಿ!" ಹಾಳ್ವಾಯೆನ್ ಬೊಬ್ ಮಾರ್ಲಿ ಮೆಲ್ವಿನಾನ್. ಸಿಂತಿಕ್ ದುಸ್ರೆಂ ಸ್ಥಾನ್! ತಾಚೆಂ ಕಾಳಿಜ್ ಬಂಧ್ ರಾವ್ತಾಶೆಂ ಭೊಗ್ಲೆಂ ತಾಕಾ. ಜೆಂ ಸಿಂತಿ, ಜಾಕಾ ದೀಸ್ ಆನಿಂ ರಾತ್ ನಿಯಾಳ್ತಾಲೊ ಮೆಲ್ವಿನ್; ಜೆ ಸಿಂತಿ, ತೆಂ ತಾಕಾ ಗುಮಾನ್ಂಚ್ ಕರಿನಾತ್ಲ್ಲೆಂ; ಆನಿಂ ಆತಾಂ ತೆಂಚ್ ಸಿಂತಿ ತಾಚ್ಯಾ ಸಾಂಗಾಂತಾ ಬೆಂಗ್ಳೂರಾಕ್......! ಮೆಲ್ವಿನಾಕ್ ಕಿತೆಂ ಭೊಗ್ಲೆಂ ಕೊಣ್ಣಾ. ತಾಚ್ಯಾ ಮತಿಂತ್ ಆನಂದಾಚಿಂ, ಭಿಯಾಂಚಿಂ, ತಶಿಂ ಆಜಾಪಾಚಿ ಚಿಂತ್ನಾಂ ಉಬ್ಜಾಲಿಂ.
"ಮೆಲ್ವಿನ್, ಚಲ್, ಆಮಿಂ ಪಯ್ಲೆಂ ತಾನೆಕ್ ಕಾಂಯ್ ಘೆಯಾಂ". ಗಿಬ್ಬಾನ್ ತಾಕಾ ಶೆಡಿ ಗುಡ್ಯಾಚ್ಯಾ ಎಕಾ ಹೋಟೆಲಾಕ್ ಆಪವ್ನ್ ವೆಲೆಂ.
"ನೀಜ್ ಜಾವ್ನ್ ಮೆಲ್ವಿನ್..." ಗಿಬ್ಬಾ ಮ್ಹಣಾಲೊ ಕಾಫಿಯೆಚೊ ಘೊಟ್ ಗೀಳ್ನ್, "ತುವೆಂ ಆಜ್ ವ್ಹೊಡ್ಲೆಂ ನಾಂವ್ ವ್ಹೆಲೆಂಯ್. ಹಾಂವ್ ನಿಜಾಕಿ ನೆಣಾಸ್ಲ್ಲೊಂ ತುಂ ಇತ್ಲೊ ಬರೊ ಗಾಯ್ಪಿ ಮ್ಹಣೊನ್. ಅತಾಂ ತುಜೆಂ ನಾಂವ್ ಕೊಲೆಜಿಚ್ಯಾ ಸಕ್ಡಾಂಚ್ಯಾ ತೊಂಡಾರ್ ಖೆಳ್ತಾ. ಸಕ್ಡಾಂಕ್ ತುಂ ವಳ್ಕಿಚೊ ಜಾಲೊಯ್"
ಮೆಲ್ವಿನ್ ಹಾಳ್ವಾಯೆನ್ ಹಾಸ್ಲೊ. ಸಾಂಗಾತಾಚ್ ತಾಚ್ಯಾ ಭಾವಾಸಾರ್ಕೊ ತೊ ನಿಸ್ವಾರ್ಥಿ ಗಿಬ್ಬಾಯಿ ಹಾಸ್ಲೊ.
ಪುಣ್ ತ್ಯಾಚ್ ವೆಳಾರ್, ದುಸ್ರ್ಯಾ ಎಕಾ ಘರಾಂತ್ ಹಾಳ್ವಾಯೆಚೆಂ ರಡ್ಣೆಂಚ್ ಜಾತಾಲೆಂ. ಹುಸ್ಕಾರೊನ್ ರಡ್ತಾಲೆಂ ಸಿಂತಿ ಆನಿಂ ಕಳ್ವಳೊನ್ ಭುಜೈತಾಲೊ ಮಾನ್ವೆಲಾಬ್.
"ಸಿಂತಿ, ರಡ್ತಾಯ್ ಕಿತ್ಯಾಕ್ ಬಾಳಾ. ಕೊಣೆಂ ಕಿತೆಂ ಕೆಲೆಂ ತುಕಾ?"
"ಪಪ್ಪಾ......." ಇತ್ಲೆಂಚ್ ಮ್ಹಣ್ತಾಲೆಂ ಸಿಂತಿ. ತಾಚೆಂ ಕಾಳಿಜ್ ಆವ್ಮಾನಾನ್ ಆನಿಂ ರಾಗಾನ್ ಸಗ್ಳೆಂಚ್ ಶಿಜ್ತಾಲೆಂ.
"ಜಾಲೆಂ ಕಿತೆಂಗೊ ಬಾಯೆ? ರಡ್ತಾಯ್ ಕಿತ್ಯಾಕ್ ಆನಿಂ ಮಿಸ್ತೆರಾಂನಿ ಸುಸ್ಕಾರ್ತಾಯ್ ಕಿತ್ಯಾಕ್?" ಸೈರಾಣ್ ಚುಕ್ಲ್ಲೊ ಬಾಪುಯ್ ಮ್ಹಣಾಲೊ.
ಏಕ್ ಘಡಿ ಸಿಂತಿ ವೊಗೆಂ ರಾವ್ಲೆಂ. ಉಪ್ರಾಂತ್ ಸುಸ್ಕಾರೊನ್ ಮ್ಹಣಾಲೆಂ. "ಪಪ್ಪಾ, ಆಜ್ ಪಂದ್ಯಾಟಾಂತ್ ಹಾಂವ್ ಸೆಕೆಂಡ್ ಆಯ್ಲಿಂ"
"ತಿತ್ಲಿಂ ಪುಣಿ ಆಯ್ಲೆಂಯ್ಮ್ಯ್? ಸಂತೊಸಾಚಿ ಖಬಾರ್ಚ್. ಬೆಜಾರ್ ಪಾವೊಂಕ್ ಕಾರಣ್ ಕಿತೆಂ? ಮಾನ್ವೆಲಾಬಾಕ್ ನಿಜಾಕೀ ಸಂತೊಸ್ ಜಾಲ್ಲೊ.
"ಮೆಲ್ವಿನ್ ಫಸ್ಟ್ ಆಯ್ಲಾ ಪಪ್ಪಾ.." ಸಿಂತಿಚೊ ತಾಳೊ ಪಿಂರ್ಗಾಲೊ.
"ಮೆಲ್ವಿನ್...?!" ಪ್ರಭುಚೆ ದೊಳೆ ರುಂದಾಲೆ. ತಾಚೆಂ ಕಾಳಿಜ್ ಆತಾಂ ಸಿಂತಿಚ್ಯಾ ಪ್ರಾಸ್ ಚಡ್ ಜಳ್ತಾಲೆಂ. "ಕಿತೆಂ ಮ್ಹಳೆಂಯ್, ಮೆಲ್ವಿನ್ ಫಸ್ಟ್ ಆಯ್ಲಾ..? ತುಕಾ ತಾಣೆಂ ಆಕ್ಮಾನ್ ಕೆಲೊ?" ಮಾನ್ವೆಲಾಬಾನ್ ದಾಂತ್ ಚಾಬ್ಲೆ.
"ತಾಚ್ಯಾ ಸಾಂಗಾಂತಾ ಹಾಂವ್ ಬೆಂಗ್ಳೂರ್ ವಚಾನಾ ಪಪ್ಪಾ" ರಡ್ಲೆಂ ಸಿಂತಿ.
"ಬಿಲ್ಕುಲ್ ವೆಚೆಂ ನಾಕಾ" ಉಲಯ್ಲೊ ಮಾನ್ವೆಲಾಬ್. "ಹಾಬಾ ಚೆಡ್ಯಾಚೊ ಹಂಕರ್ಗಿ! ತುಂ ರಡಾನಾಕ್ ಬಾಯೆ, ಹಾಂವ್ ಸಗ್ಳೆಂ ಸಾರ್ಕೆ ಕರ್ತಾಂ." ಆನಿಂ ರಡ್ಚ್ಯಾ ದುವೆಕ್ ಥಂಯ್ಚ್ ಸೊಡ್ನ್ ತೊ ಭಾಯ್ರ್ ಸೊಪ್ಯಾರ್ ಆಯ್ಲೊ ಆನಿಂ ಪಾಸಾಯೊ ಮಾರುಂಕ್ಲಾಗ್ಲೊ. ಧುವೆಕ್ ಜಾಲ್ಲೊ ಆಕ್ಮಾನ್ ತಾಕಾಯ್ ಜಾಲ್ಲೊ. ಆಪ್ಣಾಚ್ಯಾ ವಕ್ಲಾಂತ್ಲ್ಯಾಂನಿ ಆಪ್ಣಾಚ್ಯಾಕಿ ಊಂಚ್ ಯೆಂವ್ಚೆಂ ಮ್ಹಳ್ಯಾರ್...?
ತೊ ತಸೊಚ್ ಪಾಸಾಯೊ ಮಾರ್ತಾಲೊ. ಮಧೆಂ ಮಧೆಂ ಲಾಂಬ್ ಶ್ವಾಸ್ ಸೊಡ್ನ್ - ಬಿತರ್ ಸಿಂತಿಚೆಂ ರಡ್ಣೆಂ ಬಂಧ್ ಜಾಲ್ಲೆಂ. ಪ್ರಭುನ್ ಆತಾಂ ಪಯ್ಸ್ ಥಾವ್ನ್ ಯೆಂವ್ಚ್ಯಾ ಮೆಲ್ವಿನಾಕ್ ಪಳೆಲೆಂ. ತಾಕಾ ಕಿತೆಂ ಕರ್ಚೆಂ ಮ್ಹಣ್ ಕಳ್ಳೆಂ ನಾ ತರೀ ಪಿಂತೇಗ್ ಮಾತ್ರ್ ತಕ್ಲೆಕ್ ಚಡ್ಲ್ಲೊ.
"ಮೆಲ್ವಿನ್.." ಜ್ಯೋರಾನ್ಂಚ್ ಆಪಯ್ಲೆಂ ಮನ್ವೆಲಾಬಾನ್. ವಿಜ್ಮಿತ್ ಜಾಲ್ಲೊ ಮೆಲ್ವಿನ್ ಹಜಾರ್ ಚಿಂತ್ನಾಂ ಚಿಂತುನ್ ಪ್ರಭುಚ್ಯಾ ಘರಾಚಿ ಮೆಟಾಂ ಚಡ್ಲೊ.
’ಕಿತೆಂ ಭರಿ ವ್ಹಡ್ಲಿ ಖಬಾರ್ ಆಯ್ಕಾತಾಂ? ವ್ಹಡ್ ಮನಿಸ್ ಜಾಲೊಯ್ ತುಂ!"
"ವ್ಹಡ್ಲೊ ಕಸಲೆಂ ಅಂಕಲ್? ಗಾಯನಾಂತ್ ಫಸ್ಟ್ ಆಯ್ಲೊಂ ಮ್ಹಣ್ತಾನಾ ವ್ಹಡ್ ಮನಿಸ್ ಜಾಂವ್ಕ್ ನಾಂ."
"ಪುಣ್ ಭಾರಿ ನಾಂವಾಡ್ಲೊಯ್ ತುಂ. ಆಮ್ಚ್ಯಾ ಸಿಂತಿಕ್ ಸಲ್ವೊನ್ ಸೊಡ್ಲೆಂಯ್" ಮಾನ್ವೆಲಾಬಾಚ್ಯಾ ತಾಳ್ಯಾಂತ್ ಹಿಣ್ಸೊಣೆ ಆಸ್ಲ್ಲೆಂ.
ಕಾವ್ಜೆಣೆಚ್ಯಾ ಸ್ವರಾನ್ ಸಾಂಗ್ಲೆಂ ಮೆಲ್ವಿನಾನ್ - "ಹಾಂವೆಂ ಸಲ್ವುಂಚ್ಯಾ ಇರಾದ್ಯಾನ್ ಪುಣಿ ಪಂದ್ಯಾಂಟಾಂತ್ ಪಾತ್ರ್ ಗೆಂವ್ಕ್ ನಾ. ಒಟ್ಟಾರೆ, ಆಜ್ ಸಾಂಜೆರ್ಚ್ ಹಾಂವ್ ಜಾಣಾಂ ಜಾಲೊಂ ತಾಣೆಂ ತಾಂತುಂ ಪಾತ್ರ್ ಘೆತ್ಲಾ ಮ್ಹಣ್"
"ವೆಗಿಂಚ್ಯಾಕ್ ತುಕಾ ಬೆಂಗ್ಳೂರ್ ವಚೊಂಕ್ ಆಸಾ! ಆದ್ರುಷ್ಟ್ ತುಜೆಂ" ನಂಜ್ಯಾಳಿ ಹಾಸೊನ್ ಪ್ರಭು ಮ್ಹಣಾಲೊ.
"ಆದ್ರುಷ್ಟ್ ಮ್ಹಜೆಂ ಕಿತ್ಯಾಕ್? ಭಾಯ್ರ್ ವಿಸ್ತಾರ್ಲೆಲ್ಯಾ ದಾಟ್ ಕಾಳೊಕಾಕ್ ಪಳೆವ್ನ್ ಉಲೈಲೊ ಮೆಲ್ವಿನ್, "ತುಮ್ಚ್ಯಾ ಸಿಂತಿಕ್ಯಿ ವಚೊಂಕ್ ಆಸಾ"
"ಖರೆಂ. ಪುಣ್ ತೆಂ ವಚಾನಾ...." ಗಂಭೀರಾಯೆನ್ ಮ್ಹಣಾಲೊ ಮನ್ವೆಲಾಬ್.
"ಕಿತ್ಯಾಕ್ ವಚಾನಾ?" ವಿಜ್ಮಿತ್ಕಾಯೆಚೆಂ ಸವಾಲ್ ಮೆಲ್ವಿನಾಚೆಂ.
"ಹ್ಯಾ ಸವಲಾಕ್ ಜಾಪ್ ತುಂಚ್ ಜಾಣಾಂಯ್", ಉತ್ರಾಂ ತುಕುನ್ ಉಲೈತಾಲೊ ಪ್ರಭು, "ತುವೆಂ ಮ್ಹಜ್ಯಾ ಧುವೆಕ್ ಗಾಯನಾಂತ್ ಸಲ್ವಲಾಂಯ್ ಆನಿಂ ಆಕ್ಮಾನ್ ಕೆಲಾಯ್. ತೆಂ ರಡೊನ್ ಕಂಗಾಲ್ ಜಾವ್ನ್ ಬಿತರ್ ಹಾಂತುಳ್ಣಾರ್ ಪಡ್ಲಾಂ. ನಹಿಂ ತುಕಾ ಹ್ಯಾ ಪಂದ್ಯಾಟಾಂತ್ ಪಾತ್ರ್ ಕಿತ್ಯಾಕ್ ಘೆಂವ್ಕ್ ಜಾಯ್ ಆಸ್ಲ್ಲೊ? ಘೆತ್ಲ್ಯಾರಿ ಸಿಂತಿಕ್ ಕಿತ್ಯಾಕ್ ಆಕ್ಮಾನ್ ಕೆಲೊಯ್? ಆಮ್ಚ್ಯಾ ಬಿಡಾರಾಂತ್ ಆಸ್ಚೊ ತುಂ. ಮ್ಹಜ್ಯಾ ಧುವೆಕ್ ತುವೆಂ ಸಲ್ವುಂಚೆಂ ಸಮಾಂಗಿ?"
ಹೆಂ ಸಂಸಾರಾಂತ್ ನಾತ್ಲ್ಲೆಂ ರಾಜಾಂವ್ ಆಯ್ಕಾತಾನಾ ಹಾಸ್ಚೆಂ ವ ರಡ್ಚೆಂ ಮ್ಹಳ್ಳೆಂ ಮೆಲ್ವಿನಾಕ್ ಕಳ್ಳೆಂನಾ. ತೊ ಧನಿ ಜಾಲ್ಯಾರ್ ಘರ್ಚೊ. ಪುಣ್ ಆಫ್ಣಾಚ್ಯಾ ಖಾಸ್ಗಿ ಕಾರ್ಯಕ್ರಮಾಚಿ ಜವಬ್ದಾರಿ ಮಾನ್ವೆಲಾಬಾಕ್ ಕಿತ್ಯಾಕ್? ತಾಕಾ ಸಂತ್ತಾಪ್ ಆಯ್ಲೊ, ತರೀ ಸಮಾಧಾನೆನ್ ತಾಣೆಂ ಮ್ಹಳೆಂ - "ಸಿಂತಿಕ್ ಆಕ್ಮಾನ್ ಕರುಂಕ್ ಹಾಂವೆಂ ಸ್ವಪ್ಣಾಂತ್ಯಿ ಚಿಂತ್ಲ್ಲೆಂ ನಾಂ. ಪುಣ್ ಸಾಂಜೆರ್ ಘಡ್ಲ್ಲ್ಯಾ ಸಂಗ್ತಿಂತ್ ಸಿಂತಿಕ್ ಜರ್ ಆಕ್ಮಾನ್ ಜಾಲಾ, ಹಾಂವ್ ಮಾಫ್ ಮಾಗ್ತಾಂ. ತೆಂ ವಚಾನಾ ಜಾಲ್ಯಾರ್ ಹಾಂವ್ಯಿ ಬೆಂಗ್ಳುರಾಕ್ ವಚಾನಾ".
"ಕಿತೆಂ, ತುಂ ಬೆಂಗ್ಳುರಾಕ್ ವಚಾನಾಂಯ್? ವ್ಹಾವಾ......ತುಕಾ ಗಾಯನ್ ನ್ಹಂಯ್, ಬಗಾರ್ ಸಿಂತಿಚೊ ಸಾಂಗಾತ್ ಜಾಯಾಸ್ಲ್ಲೊ ನ್ಹಂಯ್?" ಗರ್ಜಾಲೊ ಪ್ರಭು, "ತುವೆಂ ಮತಿಂತ್ ಮಾಂಡ್ಣಿ ಕೆಲ್ಲಿಯ್ ಎಕ್ಸುರ್ಯಾ ಸಿಂತಿಕ್ ಸಾಂಗಾಂತಾ ಬೆಂಗ್ಳೂರಾಕ್ ಧಾಡ್ತಾಂ ಮ್ಹಣ್ಗಿ? ಜಾಣಾಂರೆ ಹಾಂವ್, ತುಮ್ಚ್ಯಾ ತಸಲ್ಯಾ ತರ್ನಾಟ್ಯಾಂಚಿಂ ಪೂರಾ ಚಿಂತ್ನಾಂ. ಮ್ಹಜ್ಯಾ ಧುವೆಕ್ ಕಿತ್ಲೆಂ ಸಕ್ಕಡ್ ತುಮೆಂ ಗುಂಪು ಕರ್ನ್ ಚಲ್ತಾತ್ - ಹೆಂ ಪೂರಾ ಹಾಂವ್ ಜಾಣಾಂ. ಆತಾಂ ತೆಂ ಬೆಂಗ್ಳೂರಾಕ್ ವಚಾನಾ ಮ್ಹಣ್ ತುಂಯಿ ವಚನಾ ಮ್ಹಣ್ತಾಯ್!"
ಪ್ರಭುಚಿಂ ಕಠೋರ್ ಉತ್ರಾಂ ಯಾಕೊನ್ ಮೆಲ್ವಿನಾಚೆಂ ಕಾಳಿಜ್ ದುಕ್ಲೆಂ. ತಿಂ ಉತ್ರಾಂ ಸೊಸುಂಕ್ ಜಾಯ್ನಾಸ್ತಾಂ ತೊ ಉಟ್ಲೊ ಆನಿಂ ಪ್ರಭುಚ್ಯಾ ಘರಾ ಭಾಯ್ರ್ ಪಡ್ಲೊ. ತಾಕಾ ಕಠೀಣ್ ರಾಗ್ಯಿ ಆಯಿಲ್ಲೊ. ತಿಂ ನಹಿಂ ಆಸ್ಲ್ಲಿಂ ಉತ್ರಾಂ ನಿಯಾಳ್ತಾನಾ. ಎದೊಳ್ ವರೇಗ್ ಸಿಂತಿಕ್ ವಾಂಕ್ಡೆ ದಿಷ್ಟಿನ್ ತಾಣೆಂ ದೆಖ್ಲ್ಲೆಂ ನಾಂ. ತಮಾಶೆ ಹ್ಯಾ ಫುಡೆಂ ಕೆಲ್ಲೆಂನಾಂತ್. ಸೈಂಭಿಕ್ ವೊಡ್ನಿನ್ ಸಿಂತಿಚೊ ಸಾಂಗಾಂತ್ ಆಶೆಲ್ಲೊ ಖರೆಂ. ತರೀ, ತೊ ಜಾಣಾಸ್ಲ್ಲೊ ಕಿ ಸಿಂತಿ ಆನಿಂ ತಾಚೆ ಮಧೆಂ ರಾತಿ ದಿಸಾಚೊ ವ್ಯತ್ತ್ಯಾಸ್ ಆಸಾ ಮ್ಹಣ್. ಪುಣ್ ಆತಾಂ ತಾಚೆಂ ಕಾಳಿಜ್ಯಿ ದುಕ್ಲ್ಲೆಂ, ಘಾಯೆಲ್ಲ್ಯಾ ವಾಗಾಬರಿ. ಆಸಲಿಂ ಕಲ್ಪನಾಂ ಜರ್ ಮಾನ್ವೆಲಾಬ್ ಘಡ್ತಾ, ತರ್ ಕಾರ್ಯಾನ್ ತಶೆಂಚ್ ಕೆಲ್ಯಾರ್ ಕಿತೆಂ? ತೊ ಧನಿ.......ತರೀ ಕಿತೆಂ ಜಾಲೆಂ? ಚಿಂತ್ತಾಂ ಚಿಂತಾಂ ಮೆಲ್ವಿನಾಚ್ಯಾ ಕಾಳ್ಜಾಂತ್ ಆಪ್ಶೆಂಚ್ ಗರ್ವ್ ಚಡ್ಲೆಂ ಆನಿಂ ತೊ ಉಚಾಂಬಳ್ ಜಾಲೊ.
"ಮೆಲ್ವಿನ್ ರಾವ್ರೆ ಥಂಯ್. ಖಂಯ್ ವೆತಾಯ್ ಘರಾಗಿ?" ಶೀನಾಚೊ ತಾಳೊ. ಆಯ್ಕೊನ್ ಘರಾ ಘುಂವ್ಚೊ ಮೆಲ್ವಿನ್ ರಾವ್ಲೊ.
"ಹೇಯ್, ಕಿತೆಂರೆ ವ್ಹಡ್ ಮನ್ಶಾಬರಿ ಖಬಾರ್ ಆಯ್ಕಾಲಿ ಹಾಂವೆಂ ಗಾಂವಾರ್ ಸಗ್ಳ್ಯಾ ಹೆಂಚ್ ಉಲವ್ಣೆಂ" ಶೀನಾಂಚ್ ಉಲೈಲೊ, "ಕಿತೆಂ ಆಮ್ಕಾಂ ಗಮ್ಮತ್ ನಾಂಗಿ?"
"ಗಮ್ಮತ್ ಆಸಾರೆ ಶೀನಾ...." ನಿರುತ್ಸಾಹಿ ತಾಳ್ಯಾನ್ ಮೆಲ್ವಿನಾನ್ ಜಾಪ್ ದಿಲಿ.
"ಬೆಂಗ್ಳೂರ್ ಕೆದಾಳಾ ವಚೊಂಕ್?"
"ಬೆಂಗ್ಳುರ್ ವೆತಾಂ ವ ನಾ ತೆಂ ಅಜೂನ್ ನೆಣಾ"
"ತುಕಾ ಜಾಲಾಂ ಕಿತೆಂ? ವ್ಹಡ್ಪಣ್ ಆಯ್ಲಾಂಗಿ ಕಿತೆಂ?" ಶೀನಾನ್ ಬೆಜಾರಾಯೆನ್ ವಿಚಾರ್ಲೆಂ, "ಉಲೈಲ್ಲ್ಯಾ ಉತ್ರಾಂಕ್ ವೊಪಾರಿಂಚಿ ಜಾಪ್ ಕಿತ್ಯಾಕ್?"
ಮೆಲ್ವಿನಾಕ್ ಪುರೊ ಜಾಲ್ಲೆಂ ಆನಿಂ ಸಂಭಾಷಣ್ ಲಾಂಬ್ ಕರುಂಕ್ ಮನ್ ನಾಸ್ತಾಂ ತಾಣೆಂ ಮ್ಹಳೆಂ - "ಆಜ್ ಮ್ಹಜಿ ಮತ್ ಥಾರ್ಯಾರ್ ನಾ ಶೀನಾ.ಜೀವಾಕ್ಯಿ ಕಾಂಯ್ ಹುಶಾರ್ ನಾ. ಫಾಲ್ಯಾಂ ತುಕಾ ಮೆಳ್ತಾಂ."
ಆಶೆಂ ಸಾಂಗೊನ್ ತೊ ಘರ್ಚ್ಯಾ ವಾಟೆಕ್ ಘುಂವ್ಲೊ. ಶೀನಾ ಆಪ್ಲ್ಯಾ ಘರಾ ಚಲ್ಲೊ. ಮೆಲ್ವಿನಾಚ್ಯಾ ಮಟ್ಟಾಕ್ ಬೆಂಗ್ಳೂರ್ ವೆಚೆಂ ಸ್ವಪಾಣ್ ಆಖೆರ್ ಜಾಲ್ಲೆಂ. ವ್ಹಡ್ ಮನ್ಶಾಚ್ಯಾ ವ್ಹಡ್ಲ್ಯಾ ಧುವೆಕ್ ತಾಣೆಂ ಆಕ್ಮಾನ್ ಕೆಲ್ಲೊ ಆನಿಂ ಮಹಾಪಾತಾಕ್ ಆಧಾರ್ಲ್ಲೆಂ! ತ್ಯಾ ಪಾತ್ಕಾಕ್ ಪ್ರಾಚಿತ್ ಜಾವ್ನ್ ಬೆಂಗ್ಳೂರ್ ವಚಾನಾ ಮ್ಹಣ್ ನಿಚೆವ್ ಕೆಲ್ಲೊ ಆನಿಂ ತ್ಯಾ ಪರಿಂ ಉತಾರ್ ದಿಲ್ಲೆಂ.
ವಿತೊರಾಬ್ ಪುತಾಕ್ ಪಳೆವ್ನ್ ಸಂತೊಸಾನ್ ಭರ್ಲೊ. ಪೂತ್ ಸಂಗೀತಾಂತ್ ಜಿಕ್ಲ್ಲಿ ಖಬಾರ್ ಹ್ಯಾ ಆದಿಂಚ್ ತಾಚ್ಯಾ ಕಾನಾರ್ ಪಡ್ಲ್ಲಿ.
"ತುಂ ಕೊಲೆಜಿಕ್ ಗೆಲ್ಲೊ ಆಜ್ ಸಾರ್ಥಕ್ ಜಾಲೆಂ" ಮ್ಹಣಾಲೊ ವಿತೊರಾಬ್. ಕಿತ್ಲ್ಯಾ ಮಟ್ಟಾಕ್ ಸಾರ್ಥಕ್ ಜಾಲ್ಲೆಂ ತೊ ನೆಣಾಸ್ಲ್ಲೊ "ಬೆಂಗ್ಳೂರ್ ಕೆದಾಳಾ ವೊಚೊಂಕ್ರೆ?"
"ಜನವರಿಂತ್...." ಥಿಂಪಿ ಗೀಳ್ನ್ ತಾಣೆಂ ಜಾಪ್ ದಿಲಿ.
"ದೆವಾಚಿ ಮಾಂಡಾವಳ್ ವಿಚಿತ್ರ್.." ವಿತೊರಾಬ್ ಪತಿಣೆಲಾಗಿಂ ಪುಸ್ಪುಸ್ತಾಲೊ. ತ್ಯಾಚ್ ದೆವಾನ್ ಉಪ್ರಾಂತ್ ಕೆಲ್ಲಿ ಮಾಂಡಾವಳ್ ದೊಗಾಂಯ್ ನೆಣಾಸ್ಲ್ಲಿಂ.
ಮನ್ಶಾಚ್ಯಾ ಜೀವನಾಂತ್ ಏಕ್ ಪಾವ್ಟಿಂ ಹಟ್ ಪಡಾತ್ ಜಾಲ್ಯಾರ್, ಸಾಧೆಯಿ ಬೊಲ್ಪೆ ಜಾತಾತ್. ಲಜಿಷ್ಟ್ ಆಸ್ಲ್ಲೆ ರಾಗಿಷ್ಟ್ ಜಾತಾತ್. ಮನ್ಶಾಕ್ ತ್ಯಾ ವೆಳಾರ್ ಕಷ್ಟಾಂ - ನಷ್ಟಾಂಚಿ ಪರ್ವಾ ಆಸಾನಾ. ಫಾರಿಕ್ಪಣಾಚಿ ತಾನ್ ಏಕ್ಚ್ ಉರ್ತಾ.
ಮೆಲ್ವಿನಾಕ್ಯಿ ಹಟ್ ಪಡ್ಲ್ಲೆಂ. "ಮ್ಹಜ್ಯಾ ಧುವೆಕ್ ತಮಾಷೆ ಕರ್ತಾತ್. "ಗುಂಪು ಕರ್ನ್ ಪಾಟ್ಲ್ಯಾನ್ ಯೆತಾತ್....." ಮಾನ್ವೆಲಾಬಾನ್ ಅಪವಾದ್ ಮಾಂಡ್ಲ್ಲೊ. ನಿರಾಪ್ರಾದಿ ಆಪ್ಣಾಚೆರ್ ತಸಲೊ ಗುನ್ಯಾಂವ್ ಯೆತಾನಾ, ತಶೆಂಚ್ ಚಲ್ಲ್ಲ್ಯಾನ್ ಜಾತಾ ಕಿತೆಂ? ಆಪ್ಣಾಕ್ ನಾಕ್ಶೆ ತಿತ್ಲಿ ಮರ್ಯಾದ್ ದೀನಾತ್ಲ್ಲ್ಯಾ ಸಿಂತಿಕ್ ಬಲತ್ಕಾರಾನ್ ಆಪ್ಣಾಕ್ ಪಳೈಶೆ ಕಿತ್ಯಾಕ್ ಕರುಂಕ್ ನಜೊ? ಹ್ಯಾ ಕಾಮಾಂತ್ ಸಲ್ಚೊಣಿ ವ ಜೀಕ್, ಲಜ್ ವ ಮರ್ಯಾದ್ .......ಕಿತೆಂ ಜಾಲ್ಯಾರೀ ವ್ಹಡ್ ನಾ. ಫಾಲ್ಯಾಂ ಥಾವ್ನ್ಂಚ್ ಆಪ್ಣಾಚೆಂ ಕಾಮ್ ಸುರು ಕರ್ತೊಲೊಂ....ತ್ಯಾ ರಾತಿಂ ಹಾಂತುಳ್ನಾರ್ ಹುಳ್ವುಳ್ತಾಲೊ ಮೆಲ್ವಿನ್.
ಸಕಾಳಿಂ ತೊ ಉಟ್ತಾನಾ ತಾಚಿ ತಕ್ಲಿ ಜಡ್ ಜಾಲ್ಲಿ. ರಾತ್ಭರ್ ನೀದ್ ನಾಸ್ತಾನಾ ದೊಳೆ ಹುಲ್ಪಾತಾಲೆ. ತರೀ ದುಸ್ರ್ಯಾಚ್ ಥರಾಚೆಂ ಕಾಮ್ ಪ್ರಾರಂಭ್ ಕರ್ಚ್ಯಾ ದಿಸಾಕ್ ತೊ ಉಟ್ಲ್ಲೊ. ರಾಗ್ ಆನಿಂ ಆಕ್ಮಾನ್ ತಾಚ್ಯಾ ಶಿರಾಂ - ಶಿರಾಂನಿ ವ್ಹಾಳ್ತಾಲೊ. ’ಆಪ್ಣಾಕ್ ಬೆಂಗ್ಳೂರ್ ವೊಚಾನಾಶೆಂ ಕೆಲ್ಲ್ಯಾ ತ್ಯಾ ಸಿಂತಿಕ್ ಶಿಕೈತಾಂ ಬೂದ್...’ ದಾಂತ್ ಚಾಬೊನ್ ತೊ ಚಿಂತ್ತಾಲೊ.
ಪುಣ್ ಖಂಯ್ಚ್ಯಾ ಥರಾನ್ ಬೂದ್ ಶಿಕೊಂವ್ಚಿ? ತೆಂಚ್ ಏಕ್ ಸಮಸ್ಯೆಂ ಜಾವ್ನಾಸ್ಲ್ಲೆಂ. ಮೆಲ್ವಿನಾನ್ ನಿಚೆವ್ ಕೆಲ್ಲೊ, ಪುಣ್ ತ್ಯಾಪರಿಂ ಚಲ್ಚೆಂ ಕಶೆಂ ತೊ ನೆಣಾಸ್ಲ್ಲೊ.
ತ್ಯಾ ಸಕಾಳಿಂ ಕೊಲೆಜಿಕ್ ವೆಗಿಂಚ್ ತೊ ಭಾಯ್ರ್ ಸರ್ಲೊ. ಆನಿಂ ಮನ್ ಘಟ್ ಕರ್ನ್ ಲೇಡಿಹಿಲ್ಲ್ ಬಸ್ಸ್ಟೆಂಡಾಂತ್ ಉಬೊ ರಾವ್ಲೊ. ಭರ್ತಿ ನೋವ್ ಜಾತಾನಾ ಸಿಂತಿ ಬಸ್ಸ್ ಸ್ಟೆಂಡಾಕ್ ಯೆತೆಲೆಂ ತೆಂ ತೊ ಜಾಣಾಸ್ಲ್ಲೊ. ಪಾಂಚ್ ಮಿನುಟಾಂ......ಧಾ ಮಿನುಟಾಂ ಪಾಶಾರ್ ಜಾಲಿಂ. ಮೆಲ್ವಿನ್ ಚಡ್ಪಡ್ತಾಲೊ. ಅಖ್ರೇಕ್ ಸಿಂತಿ ಘರಾ ಭಾಯ್ರ್ ಯೆಂವ್ಚೆಂ ತಾಣೆಂ ದೆಖ್ಲೆಂ ,....ತೆ ಲಾಗಿಂ ಲಾಗಿಂ ಪಾವ್ಲೆಂ. ಮೆಲ್ವಿನಾಚೆಂ ಕಾಳಿಜ್ ಜ್ಯೋರಾನ್ ಉಡ್ತಾಲೆ. ಹಾತಾ ಪಾಯಾಂಕ್ ಘಾಮ್ ಸುಟ್ಲ್ಲೊ.
ಆತಾಂ ಸಿಂತಿ ಬಸ್ಸ್ಟೆಂಡಾಕ್ ಪಾವ್ಲೆಂ. ತಾಣೆಂ ಮೆಲ್ವಿನಾಚೆರ್ ದೀಷ್ಟ್ಚ್ ವ್ಹೆಲಿನಾ. ತಾಕಾ ವಳ್ಕಾನಾತ್ಲ್ಲ್ಯಾ ಬರಿಚ್ ತೆಂ ಬಸ್ಸ್ಟೆಂಡಾಚ್ಯಾ ಎಕಾ ಕೊನ್ಶಾಕ್ ಉಬೆಂ ರಾವ್ಲೆಂ. ಮೆಲ್ವಿನಾಕ್ ಕಿತೆಂ ಕರ್ಚೆಂ ಮ್ಹಣ್ ಕಳ್ಳೆಂ ನಾ. ತಾಚೆಂ ಧೈರ್ ತಾಕಾ ವಿಕ್ರೀತ್ ಕರ್ತಾಲೆಂ. ತಾಣೆಂ ಮಾತೆಂ ಖೊರ್ಪಿಲೆಂ. .....ದೋನ್ ತೀನ್ ಪಾವ್ಟಿಂ ಸುಖಿ ಖೊಂಕ್ಲಿ ಕಾಡ್ಲಿ. ತಾಚೆಂ ತೊಂಡ್ ವರ್ಣಾಂತರ್ ಜಾಲ್ಲೆಂ.
ಉಪ್ರಾಂತ್ ಕೊಸಾಳ್ಚೆಂ ಧೈರ್ ಎಕ್ಟಾಂಯ್ ಕರ್ನ್ ಇತ್ಲೆಂಚ್ ತೊ ಉಲೈಲೊ - "ಸಿಂತಿ.......ಕೊಂಗ್ರಾಜ್ಯುಲೇಶನ್ಸ್....." ಉಪ್ರಾಂತ್ ತಾಚಿ ಜೀಬ್ ಪರ್ತಾಲಿನಾ.
(ಪರಿಣಾಮ್ ಕಿತೆಂ ರಾವ್ಲೊ? ಯೆಂವ್ಚ್ಯಾ ಹಪ್ತ್ಯಾಂತ್ ಪಳೆಯಾಂ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
